„რეზონანსი“: პრეზიდენტი „ოცნების“ პირისპირ // მმართველი პარტია გიორგი მარგველაშვილისაგან დღეს მორიგ კრიტიკას ელის და საპასუხო განცხადებებს ამზადებს
„რეზონანსი“: ინტერვიუ ლევან გოგიჩაიშვილთან: „პრეზიდენტის დღევანდელი გამოსვლის შემდეგ შესაძლოა ახალი რეალობა შეიქმნას“
„რეზონანსი“: ვახტანგ ხმალაძე: „ჭორია, თითქოს დავით უსუფაშვილის მიერ ახალი პარტიის შექმნა ჩაიშალა“ // გია ხუხაშვილი: „დავით უსუფაშვილის ოპტიმიზმი, რბილად რომ ვთქვათ, გადაჭარბებული იყო“
„ახალი თაობა“: ინტერვიუ სოსო ცისკარიშვილთან: „არ მესმის, ახლა რატომ უნდა გადადგეს გიორგი კვირიკაშვილი“
„ახალი თაობა“: ინტერვიუ მამუკა გამყრელიძესთან: „გიორგი მარგველაშვილს დღესაც ბიძინა ივანიშვილი მართავს“ // „რაც ხდება, ყველაფერი თამაშია“
„ახალი თაობა“: ინტერვიუ ბეჟან ნათელაშვილთან: „ოცნება“ ნაძარცვი ბიუჯეტის შევსებას მწეველების ხარჯზე აპირებს“ // „ბიძინა ივანიშვილი მოწველას არის მიჩვეული“
„რეზონანსი“: „ოცნება“ პარლამენტში თამბაქოს კონტროლის შესახებ კანონის დაბლოკვის მცდელობებს პროგნოზირებს // ინტერვიუ აკაკი ზოიძესთან: „მიუხედავად თამბაქოს ინდუსტრიის წინააღმდეგობისა, ამ კანონს ბოლომდე აუცილებლად გავიტანთ“
„ახალი თაობა“: ინტერვიუ პეტრე მამრაძესთან: „რუსეთს შეუძლია პატარა ქვეყანაში შემოვიდეს, გაანადგუროს და ბაზები დააყენოს“
„რეზონანსი“: ინტერვიუ თორნიკე შარაშენიძესთან: როგორ შევუქმნათ ოკუპანტებს დისკომფორტი // „მათ უნდა იცოდნენ, რომ თუ გადმოვლენ, შესაბამის პასუხს მიიღებენ და მერე უკან ისე გავაბრძანებთ“
„რეზონანსი“: ინტერვიუ სოსო ცინცაძესთან: „სანკტ-პეტერბურგში მომხდარი ტერაქტი სირიის მოვლენებში რუსეთის ჩართვის შედეგია“
——————–
„რეზონანსი“, 07 აპრილი, 2017 წელი
პრეზიდენტი „ოცნების“ პირისპირ
მმართველი პარტია გიორგი მარგველაშვილისაგან დღეს მორიგ კრიტიკას ელის და საპასუხო განცხადებებს ამზადებს
ეკატერინე ბასილაია
პრეზიდენტი მარგველაშვილი ყოველწლიური მოხსენებით პარლამენტის წინაშე დღეს მეოთხედ გამოვა და მოლოდინია, რომ მისი სიტყვა მმართველიმ გუნდის საკმაოდ კრიტიკული იქნება და დებატებიც მწვავედ ჩაივლის. “ოცნების” დეპუტატები კრიტიკული შეპასუხებისთვის უკვე ემზადებიან კიდეც.
რამდენად კრიტიკული და პრეტენზიული იქნება უმრავლესობა, ეს იმაზე იქნება დამოკიდებული, თუ რას იტყვის პრეზიდენტი პარლამენტში.
„დამოუკიდებელ ექსპერტთა კლუბის“ პრეზიდენტი სოსო ცისკარიშვილი აცხადებს, რომ დიდი შეჯიბრი იქნება იმაზე, პრეზიდენტის ლანძღვაში ვინ უფრო კარგად მოაწონებს თავს “შპს ქართული ოცნების” დირექტორ ბიძინა ივანიშვილს”. “აირაის” კვლევით ყველაზე მაღალი რეიტინგის მქონე პოლიტიკოსად მარგველაშვილის დასახელების გამო კი მოლოდინი აქვს, რომ კიდევ უფრო განრისხებულმა “მეოცნებეებმა” დესტრუქციული განცხადებებიც გააკეთონ, ხოლო პრეზიდენტისგან ელოდება, რომ ის აკადემიური ტერმინოლოგიით დამარცხებს ოპონენტებს.
ქვეყნის პირველი პირი პარლამენტში 12 საათზე მივა. მის ყოველწლიურ მოხსენებას დაესწრებიან პრემიერი, ვიცე-პრემიერები და მინისტრების დიდი უმეტესობაც და ამით ექსპრემიერ ირაკლი ღარიბაშვილის მიერ დაწესებულ ერთგვარ ბოიკოტს უკვე მეორედ დაარღვევს მინისტრთა კაბინეტი.წინასწარი ცნობით, დღეს ქუთაისში სახელმწიფო მინისტრები – ქეთევან ციხელაშვილი და ვიქტორ დოლიძე არ იქნებიან. ციხელაშვილის თქმით, ის ვიზიტით საზღვარგარეთ მიემგზავრება, ხოლო დოლიძე ამბობს, რომ ღინისძიებები აქვს დაგეგმილი. დანარჩენები კი, პრემიერთან კონსულტაციების შემდეგ, ჩასვლაზე თანხმობას აცხადებენ.
მინისტრების გარდა მოხსენებას დაესწრებიან დიპლომატთა კორპუსი, პატრიარქი და წმიდა სინოდის წევრები. წელს პირველად დაირღვევა პრეზიდენტის გამოსვლის ფორმატი და გაიმართება დებატები. მიუხედავად იმისა, რომ ორი კვირის წინ, როდესაც გამოცხადდა გიორგი მარგველაშვილის მოხსენების ზუსტი თარიღი, „ოცნების“ დეპუტატების დიდი ნაწილი საჭიროდ არ თვლიდა დებატების გამართავს, საბოლოოდ ამაზე შეთანხმება მაინც შედგა. პრეზიდენტის 45-წუთიან გამოსვლას მოჰყვება 2-საათიანი დებატები და ამას ერთგვარ წინ გადადგმულ ნაბიჯად აფასებენ პოლიტოლოგები.
გიორგი მარგველაშვილი ქუთაისში გუშინ, მოხსენებამდე ერთი დღით ადრე ჩავიდა და შეხვედრები გამართა ჯერ ქუთაისის უნივერსიტეტში კამპანიის „კონსტიტუცია ყველასია“ ფარგლებში, სადაც სტუდენტებს შეხვდება და საკონსტიტუციო რეფორმასთან დაკავშირებით სტუდენტების მოსაზრებებს მოისმინა; შემდეგ კი შეხვდა არასამთავრობი სექტორსა და პოლიტიკოსებს.
სტუდენტებთან შეხვედრაზე პრეზიდენტმა განაცხადა, რომ პარლამენტში ის მეოთხედ გამოდის და მოხარულია, რომ პირველად მიეცემა საშუალება დეპუტატებს კითხვებზე პასუხი გასცეს. „პირველი სამი გამოსვლა იყო ისე, რომ დებატები არ ჩატარებულა, მიუხედავად იმისა, რომ მეც და სხვადასხვა პოლიტიკური ჯგუფებიც სულ ვითხოვდით დებატები ჩატარებულიყო. მე პარლამენტის გადაწყვეტილებას დებატების ჩატარებაზე მივესალმები“, – აღნიშნა გიორგი მარგველაშვილმა და იქვე სტუდენტებს პირობა მისცა, რომ მათ მიერ დასმულ საკითხებზე გამოსვლაში აუცილებლად ისაუბრებდა. „ამ კითხვებს, რაც თქვენ დასვით, მე პარლამენტში დავსვამ და იმედია, არგუმენტირებულ პასუხსაც მივიღებ ჩვენი პატივცემული დეპუტატებისგან“, – განაცხადა პრეზიდენტმა.
სტუდენტების კითხვები კი ე.წ. ფარული მოსმენების კანონს და დაგეგმილ საკონსტიტუციო ცვლილებებს ეხებოდა.
ყველა – ოპოზიციაც, ხელისუფლებაცა და ექსპერტებიც დარწმუნებული არიან, რომ გიორგი მარგველაშვილის გამოსვლა იქნება მმართველო ძალის მიმართ კრიტიკული. გასაკრიტიკებელი თემების ჩამონათვალი კი ბევრია. მათ შორის უპირველესად დიდი კრიტიკა იქნება ე.წ. „ფარული მოსმენების“ კანონთან დაკავშირებით, რის გამოც საკონსტიტუციო სასამართლოში რამდენიმე სარჩელი გუშინ უკვე შევიდა კიდეც. ასევე მთავარი თემა იქნება საკონსტიტუციო ცვლილებები და პრეზიდენტის პირდაპირი წესით არჩევის არაპირდაპირი არჩევით შეცვლის “ოცნებისეული” გეგმა. გიორგი მარგველაშვილმა უკვე რამდენჯერმე განაცხადა, რომ ხალხიც და თავადაც პრეზიდენტის არჩევის წესის ცვლილების წინააღმდეგ არიან. ითქვა ისიც, რომ მოხსენებაში ასევე მთავარი დეტალი იქნება ქვეყნის ეკონომიკური მდგომარეობა და ამ კუთხით მარგველაშვილის კრიტიკის ობიექტი იქნება მთავარობის ეკონომიკური გუნდი.
ოპოზიცია ასევე იმედოვნებს, რომ გიორგი მარგველაშვილი შეეხება სასამართლო სისტემას, “გაზპრომის” გასაიდუმლოებული ხელშეკრულებას მიუღებლობას და მედიის თავისუფლების შეზღუდვას.
საპარლამენტო უმრავლესობა კი დარწმუნებულია, რომ პრეზიდენტი საპარლამენტო ტრიბუნას მმართველი გუნდის კრიტიკისთვის გამოიყენებს და პასუხის გასაცემადაც ემზადებიან.
ფრაქცია „ქართული ოცნების“ თავმჯდომარე მამუკა მდინარაძე ამბობს, რომ პრეზიდენტის მოსალოდნელი კრიტიკის ფონზე ისინი შეეცდებიან საზოგადოებას ქვეყანაში მიმდინარე რეფორმებზე სრული ინფორმაცია მიაწოდონ.
„განსაკუთრებულ სიურპრიზებს არ ველოდებით, გამომდინარე იქიდან, რომ პრეზიდენტის წინა გამოსვლებიდან უკვე ნათელია მისი პათოსი, მისი გამოსვლის სტილი. მას ექნება ბევრი კრიტიკული შენიშვნა, რიგ შემთხვევებში არ გამოვრიცხავ, რომ გასაზიარებელიც კი. ჩვენ შევეცდებით მაქსიმალურად კონსტრუქციულად წარვმართოთ ეს ე.წ. დებატები“, – აცხადებს მამუკა მდინარაძე.
„ქართული ოცნების“ წევრი აკაკი ზოიძე ამბობს, ხშირად ხდება პრეზიდენტის ადმინისტრაციის მხრიდან დაპირისპირებები, თუნდაც კონსტიტუციის ცვლილებასთან დაკავშირებით და ამ თემაზე მისი გუნდის წევრები ისაუბრებენ.
ალექსანდრე ქანთარიას თქმით, ჯერ ნახავენ რას იტყვის მარგველაშვილი და შემდეგ იქნება შესაბამისი პასუხებიც, ხოლო წინასწარ “რაიმე კონკრეტული შეტევა” არ იგეგმება.
„შეიძლება გარკვეული კომენტარები შემდეგ გავაკეთოთ, იმის მიხედვით, თუ სათქმელს როგორ ჩამოაყალიბებს, რა ასპექტებს შეეხება, რამდენად საფუძვლიანი და ნორმალური იქნება მისი გამოსვლა. არ მგონია, რომ რაიმე კონკრეტული შეტევა უნდა განვახორციელოთ. ერთადერთი შეიძლება ვიკითხოთ, საკონსტიტუციო კომისიაზე რატომ არ ესწრებიან მისი წარმომადგენლები,” – აღნიშნავს ალექსანდრე ქანთარია.
პარლამენტის ადამიანის უფლებათა დაცვის კომიტეტის თავმჯდომარე სოფო კილაძე ამბობს, რომ “ოცნება” მზადაა ყველა კითხვას და პოზიციას გასცეს პასუხი.
„ჩვენ მზად ვართ ყველა კითხვას და ყველა პოზიციას გავცეთ პასუხი, იმიტომ, რომ ვთვლით, რომ ჩვენს ქვეყანაში ძალიან ბევრი დადებითი და კარგი რამ გაკეთდა სწორედ ჩვენი გუნდის მმართველობის დროს. შეიძლება ძალიან ადეკვატურად შეაფასოს ის სიტუაცია, რომელიც არის ქვეყენაში. დაველოდოთ, ვნახოთ ის რას იტყვის. ძალიან დიდი იმედი მაქვს, რომ ობიექტურობას შეინარჩუნებს,” – ამბობს სოფო კილაძე.
“დამოუკიდებელ ექსპერტთა კლუბის” პრეზიდენტი სოსო ცისკარიშვილი აცხადებს, რომ “პარლამენტართა ასეული” უკვე თვეებია პრეზიდენეტზე თავდასასხმელადაა დაგეშილი და ელოდება, რომ პრეზიდენტი აკადემიური ტერმინოლოგიით დაამარცხებს “მეოცნებე ზონდერების” მხრიდან “პრეზიდენტის მიჭირხვნის მცდელობას”.
„ფაქტია, რომ “ქართული ოცნება” არ განმარტავს არც იმას, აქამდე რატომ არ იყო დებატები პრეზიდენტის გამოსვლის შემდეგ, ან დღეს რატომაა მისაღები ის, რაც აქამდე მიუღებელი იყო. ჩემი აზრით, საკონსტიტუციო უმრავლესობით გულმოცემულმა “ოცნებამ” გზავნილი მიიღო შპს “ქართული ოცნების” მეპატრონისგან – “დაჰკარით მაგას”. კრიტიკულად გამომსვლელების რაოდენობა ბევრი იქნება და კარგი იქნება, თუ ამ კრიტიკისას არ გასცდებიან აკადემიურ ჩარჩოებს. ნებისმიერ შემთხვევაში დიდი ინტერესია საზოგადოებამ მოისმინოს პრეზიდენტის განწყობები. საინტერესო იქნება, თუ ის რაიმე პერსპექტივაზეც ისაუბრებს. ფაქტია, რომ “აირაის” კვლევაში მარგველაშვილს ყველაზე მაღალი რეიტინგი აქვს, ეს კი კიდევ უფრო გაავეშებს “ქართული ოცნების” დიდ ნაწილს, რადგან პარლამენტართა ასეული თვეების მანძილზე დაგეშილია პრეზიდენტზე თავდასახმელად. მეოცნებე” ზონდერების გარკვეული ჯგუფი კი შეეცდება პრეზიდენტი მიჭირხვნოს. ყველა გამომსვლელი შეეცდება თავი მოაწონონ შპს-ს დირექტორს. ბევრად დიდი ალბათობაა ბატონი პრეზიდენტი არ აჰყვება ქუჩურ ტერმინოლოგიას და აკადემიზმით დაამარცხებს ორღობეებში შეთხზულ ვერსიებს,” – ამბობს სოსო ცისკარიშვილი.
“რეზონანსი“, 07 აპრილი, 2017 წელი
ინტერვიუ ლევან გოგიჩაიშვილთან: „პრეზიდენტის დღევანდელი გამოსვლის შემდეგ შესაძლოა ახალი რეალობა შეიქმნას“
ეკატერინე ბასილაია
“ჩვენ თუ გავზომავთ მთელი მოსახლეობიდან რა რაოდენობის ადამიანს არ მოსწონს კანონი (ფარული მოსმენების შესახებ), საერთო ჯამში შეიძლება მივიღოთ, რომ ასეთი 0,001%-ია. იმის გამო, რომ რაღაცას “ორგანიზაცია” ჰქვია, ეს იმას ხომ არ ნიშნავს, რომ ის ბიბლიური ჭეშმარიტების მატარებელია?! ამ ქვეყანაში ჩვენ ვიღებთ გადაწყვეტილებას. ქართველი ხალხის ნებიდან გამომდინარე, ჩვენ გვაქვს პოლიტიკური პასუხისმგებლობა და რა თქმა უნდა, ჩვენ ყველა გადაწყვეტილებას, იმის გამო, რომ რაღაც 2 ორგანიზაციას, ან თუნდაც 5 პარტიას არ მოწონს, კითხვის ნიშნის ქვეშ არ დავაყენებთ,” – აცხადებს “რეზონანსთან” საუბრისას “ქართული ოცნების” დეპუტატი ლევან გოგიჩაიშვილი და არაადეკვატურს უწოდებს არასამთავრობოებსა და ოპოზიციას, საკონსტიტუციო სასამართლოში “ფარული მოსმენების კანონის” გასაჩივრების გამო.
- რა მოლოდინი გაქვთ, რა თემებზე ილაპარაკებს პრეზიდენტი? ელოდებით თუ არა კრიტიკულ მოხსენებას და პირადად თქვენ რა შეკითხვა თუ შენიშვნა გექნებათ მარგველაშვილის მისამართით?
- შეკითხვების რეჟიმი არ არის გათვალისწინებული. იქნება უბრალოდ გამოსვლები. რა თქმა უნდა, პრეზიდენტი ისაუბრებს იმაზე, რაც მისთვის იქნება აქტუალური. თუ მისი წინა გამოსვლებიდან ანალიზს გავაკეთებთ, რაღაც საკითხებს შეეხება. რაიმე განსაკუთრებული მოლოდინი არ გვაქვს. რა უნდა ილაპარაკოს, არ ვიცი.
- თქვენი ფრაქციის თავმჯდომარემ, მამუკა მდინარაძე განაცხადა, რომ ელოდება ბევრ კრიტიკულ შენიშვნას…
- არ ვიცი რა განწყობით მოდის პრეზიდენტი და წინასწარ ვერ შევაფასებ. ჩვენ ნებისმიერი სცენარისთვის მზად ვართ. ვფიქრობ, რომ ის დაიცავს იმ ეტიკეტს, რაც ზოგადად არის გამოსვლებში. ჩვენი მხრიდანაც იქნება პასუხები. ჩვენ საზოგადოებას ავუხსნით ჩვენს პოზიციას, პრეზიდენტი დააფიქსირებს თავის პოზიციას, ასევე ოპოზიციაც.
- მოლოდინია, რომ პრეზიდენტის კრიტიკული გამოსვლის პათოსს გაიზიარებს ოპოზიციაც...
- თუ პრეზიდენტისა და “ნაციონალური მოძრაობის” რიტორიკა ერთმანეთს დაემთხვევა, არ ვფიქრობ, რომ ეს პრეზიდენტისთვის მომგებიანი შეიძლება იყოს. რა თქმა უნდა, პრეზიდენტი პოლიტიკურ მომენტს ხაზს გაუსვამს, შეეცდება პოლიტიკური დივიდენდების მიღებას, მაგრამ ის, რომ “ნაციონალების” და მისი რიტორიკა ერთნაირი იქნება, ეს ზოგადი იმიჯისთვის დამაზიანებელია. ის ხალხი, ვინც “ნაციონალების” ამომრჩეველია, არ მგონია ოდესმე პრეზიდენტ მარგველაშვილის ამომრჩეველი გახდეს. ფაქტია, რომ მას (გიორგი მარგველაშვილს) სხვა მოტივაციები ამოძრავებს. ხვალინდელი დღე ძალიან ბევრ რამეს მოჰფენს ნათელს.
- თვლით, რომ გიორგი მარგველაშვილი პრეზიდენტობაზე კენჭისყრას აპირებს და წინასაარჩევნო კამპანია დაიწყო?
- ხვალინდელი დღე შესაძლებელია გახდეს ახალი რეალობის შემქმნელი. იმიტომ, რომ მისი ბოლოდროინდელი აქტივობები ემსახურება არა იმას, რომ რაღაც პრობლემები აწუხებს, არამედ მისი ფუნქციის გაზრდას. იმაზე მეტი ფუნქცია, რასაც საქართველოს პრეზიდენტი ჰქვია, მას ვერ ექნება.
- პრეზიდენტის პირდაპირი თუ არაპირდაპირი წესით არჩევის თემა იქნება ხვალ ერთ-ერთი საკითხი პრეზიდენტის გამოსვლისას, მით უფრო, რომ “აირაის” კვლევაში 92% ამბობს, რომ პრეზიდენტი ხალხმა უნდა აირჩიოს. რატომ არის “ოცნებისთვის” ასე პრინციპული, რომ ხალხს არ დარჩეს პრეზიდენტის არჩევის შესაძლებლობა?
- ჩვენ ამ საკითხზე ძალიან მყარი არგუმენტი გვაქვს. საქართველო საპარლამენტო რესპუბლიკის გზით მიდის. საპარლამენტო რესპუბლიკა ტრადიციულად ისეთი კულტურის მატარებელია, როდესაც პრეზიდენტს არბიტრის ფუნქცია აქვს და ის ერთგვარი დამაბალანსებელია სახელისუფლებო შტოებს შორის. პრეზიდენტს მეტი ფუნქცია არ აქვს. საპარლამენტო რესპუბლიკაში პრეზიდენტი პოლიტიკური თანამდებობა არ არის. იგივეა ჩადებული ჩვენს ახლანდელ კონსტიტუციაშიც. მაგალითს მოგიყვანთ – ამომრჩეველი მიდის არჩევნებზე და ხმას აძლევს პრეზიდენტს, გადასცემს ენერგიას, მუხტს, თავის განწყობას. შემდეგ ამ ჩვენი კონსტიტუციით პრეზიდენტი შედის კაბინეტში და აღმოაჩენს, რომ მას არანაირი პოლიტიკური ბერკეტი არ გააჩნია. ის ვერ მართავს ხელისუფლებას, ის ვერ იღებს ვერც საკადრო გადაწყვეტილებას, ვერანაირ პოლიტიკურ გადაწყვეტილებას ვერ იღებს. ის ყოველდღიურ ცხოვრებაში არ მონაწილეობს იმ ფორმით, რა ფორმით ლეგიტიმაციაც აქვს. უბრალოდ, აქვს არბიტრის ფუნქცია. შიდა მოხმარების ბაზარზე მას ფუნქცია არ გააჩნია.
ამდენად, ეს შეუსაბამოა პირდაპირი წესით არჩევნებთან. უბრალოდ ლოგიკა არ არსებობს, რატომ უნდა იყოს პირდაპირი წესით არჩევა.
- თუმცა, ირაკლი კობახიძეს თავად აქვს ნათქვამი, რომ საპარლამენტო რესპუბლიკების 2/3-ში პრეზიდენტი პირდაპირი წესით აირჩევა და გამოდის, რომ რაიმე ვალდებულება ამ მხრივ არ არსებობს...
- მესმის და ეს არის დისკუსიის საგანი. ამისთვის შეიქმნა საკონსტიტუციო კომისია და იქ განიხილება ასეთი საკითხები. პრეზიდენტმა ამ კომისიაში მონაწილეობაზე უარი განაცხადა. მან თავისი დღის წესრიგი დააყენა, თავისი პროგრამა განსაზღვრა, მაგრამ ჩვენ არც ამ დღის წესრიგს ვეთანხმებით და არც მის პროგრამას.
- მეორე საკითხი, რაზეც პრეზიდენტი აუცილებლად ისაუბრებს, დიდი ალბათობით იქნება ე.წ. ფარული მოსმენების კანონი, რომელსაც მარგველაშვილმა ვეტო დაადო და რომელთაგ დაკავშირებითაც დღეს საკონსტიტუციო სასამართლოში რამდენიმე საჩივარი უკვე შევიდა. ელოდებით ამ თემაზე დებატებს?
-მოთხოვნები. ჩვენ გავიარეთ ზუსტად ის ხაზი, რასაც ჰქვია ადამიანის პირადი სივრცე და ქვეყნის უსაფრთხოება. ყველა ადამიანს აქვს უფლება გამოიყენოს ის კონსტიტუციური უფლებები, რაც მას გააჩნია, მაგრამ ვფიქრობ, რომ ამ შემთხვევაში მათი პოზიცია ადეკვატური არ არის და არ არის სწორი არსებულ პოლიტიკურ რეალობასთანაც კი.
ჩვენ გავითვალისწინეთ და დავიცავით ყველა ის მოთხოვნა, რომელიც საკონსტიტუციო სასამართლომ თავის გადაწყვეტილებაში თქვა. ამიტომ ვერ ვხვდები ეს ადამიანები ასე ერთხმად რატომ არიან მოტივირებულები იმისთვის, რომ კანონი გაასაჩივრონ. ჩვენ დღეს ვნახეთ, რომ ერთმანეთს ასწრებდნენ, ვინ შეიტანდა პირველი სარჩელს, მაგრამ რომ ჰკითხო – რატომ? – შეიძლება არგუმენტები არც ჰქონდეთ. იმიტომ, რომ, როდესაც ამ თემების განხილვები მიდიოდა, მათ მონაწილეობა ისე აქტიურად არ მიუღიათ, როგორც საჭირო იყო, არც საკომიტეტო მოსმენებზე და არც საჯარო სივრცეში. უბრალოდ, მათ ასე უნდათ და ასე აკეთებენ. ჩვენ ჩვენი გადაწყვეტილების სისწორეში ეშვი არ გვეპარება.
- ეს კანონი „ოცნების“ გარდა არავის მოსწონს – არც პრეზიდენტს, არც არასამთავრობოებს, არც ოპოზიციას და რატომ ხართ დარწმუნებული, რომ ყველა ცდება?
- “ოცნების” გარდა არ მოსწონს კანონი არავის – ასე არ დგას საკითხი. ჩვენ თუ გავზომავთ მთელი მოსახლეობიდან რა რაოდენობის ადამიანს არ მოსწონს კანონი (ფარული მოსმენების შესახებ), საერთო ჯამში შეიძლება მივიღოთ, რომ ასეთი 0,001%-ია. იმის გამო, რომ რაღაცას “ორგანიზაცია” ჰქვია, ეს იმას ხომ არ ნიშნავს, რომ ის ბიბლიური ჭეშმარიტების მატარებელია?! როდესაც ადამიანს არ მოსწონს რაღაც, შეუძლია სამართლებრივ ფორმებს მიმართოს და ვთქვათ, სასამართლოში გაასაჩივროს. მაგრამ ამ ქვეყანაში ჩვენ ვიღებთ გადაწყვეტილებას. ქართველი ხალხის ნებიდან გამომდინარე, ჩვენ გვაქვს პოლიტიკური პასუხისმგებლობა და რა თქმა უნდა, ჩვენ ყველა გადაწყვეტილებას, იმის გამო რომ რაღაც 2 ორგანიზაციას, ან თუნდაც 5 პარტიას არ მოწონს, კითხვის ნიშნის ქვეშ არ დავაყენებთ. ჩვენ ჩვენს გადაწყვეტილებებს ვერ შევცვლით იმის გამო, რომ რაღაც 2 არასამთავრობო ორგანიზაციას არ მოსწონს, რა მდიდარი ორგანიზაციაც არ უნდა იყოს ის და მათი არმოწონება არ ნიშნავს, რომ გადაწყვეტილება არ არის სწორი.
- თქვენი აზრით, საკონსტიტუციო კომისია ისევ არაკონსტიტუციურად არ სცნობს „ოცნების“ მიერ მიღებულ ე.წ. ფარული მოსმენების კანონს?
- საკონსტიტუციო სასამართლომ უნდა თქვას შევასრულეთ თუ არა მოთხოვნები. რას იზამს, არ ვიცი. ჩვენ ვფიქრობთ, რომ შევასრულეთ. მოლოდინი მაქვს, რომ ამავეს იტყვის სასამართლოც.
„რეზონანსი“, 07 აპრილი, 2017 წელი
ვახტანგ ხმალაძე: „ჭორია, თითქოს დავით უსუფაშვილის მიერ ახალი პარტიის შექმნა ჩაიშალა“ // გია ხუხაშვილი: „დავით უსუფაშვილის ოპტიმიზმი, რბილად რომ ვთქვათ, გადაჭარბებული იყო“
გვანცა ღვედაშვილი
პარლამენტის ყოფილმა თავჯდომარემ დავით უსუფაშვილმა ჯერ კიდევ 2016 წლის ბოლოს დაანონსა, რომ ახალი პარტიის შექმნას აპირებდა, თუმცა ჯერჯერობით ისევ უცნობია, ვინ შევა პარტიაში შემავალი და როდის გაიმართება მისი პრეზენტაცია. ამის საფუძველზე გაჩნდა მოსაზრება, რომ პარლამენტის ყოფილი სპიკერის თაოსნობით ახალი პარტიის შექმნა შესაძლოა საერთოდაც ჩაიშალა.
როგორც პოლიტოლოგი გია ხუხაშვილი “რეზონანსთან” აცხადებს, პარლამენტის ყოფილი თავჯდომარის ოპტიმიზმი გადაჭარბებული იყო. მისივე შეფასებით, მიუხდავად იმისა, რომ უსუფაშვილი ავტორიტეტული პოლიტიკოსია, მას არ აქვს ლიდერისთვის დამახასიათებელი თვისებები, რომლის საშუალებითაც შეძლებს თავის გარშემო გარკვეული რაოდენობის პოლიტიკური პარტნიორები შემოიკრიბოს.
ამასთან ცნობილია, რომ დავიტ უსუფაშვილთან ერთად ახალ პარტიაში მისი ყოფილი თანაგუნდელი ვახტან ხმალაძეც მოიაზრება. “რეზონანსი” შეეცადა სწორედ მისგან გაეგო, რა ეტაპზეა პარტიის ჩამოყალიბების პროცესი და რამდენად შეესაბამება სიმართლეს ვარაუდი, რომ პარტია შესაძლოა აღარ შეიქმნას. „ჯერჯერობით ვერაფერს გეტყვით. როცა რაიმე იქნება, გაიგებთ. რაც შეეხება პარტიის შექმნის ჩაშლას, მოდით, რა, ჭორებს ნუ უსმენთ. გახსოვდეთ მარკ ტვენის გამონათქვამი: „ინფორმაცია ჩემი გარდაცვალების შესახებ გადაჭარბებულია”, – განაცხადა ვახტანგ ხმალაძემ.
როგორც გია ხუხაშვილი აღნიშავს, დავით უსუფაშვილი ძალიან კარგი სახელმწიფო მოღვაწეა, მაგრამ არა პოლიტიკური ლიდერი, რომელსაც ხალხის აყოლიება და წინ გაძროლა შეუძლია.
„დავით უსუფაშვილის ოპტიმიზმი, რბილად რომ ვთქვათ, გადაჭარბებული იყო. რეალურად ქმედითუნარიანი პარტიის ჩამოყალიბება საკმაოდ რთულია. მუხედავად იმისა, რომ უსუფასვილი არის საკმაოდ მძიმეწონიანი, ავტორიტეტული პოლიტიკოსი, პარტიის შექმნასა და შესაბამისად, გარკვეული რაოდენობის ადამიანების მოზიდვას, მათ კონსოლიდაციას სჭირდება ლიდერის განსაკუთრებული თვისებები, რაც უსუფაშვილს არ აქვს. ის არის ძალიან კარგი სახელმწიფო მოღვაწე, მაგრამ არა პოლიტიკური ლიდერი, რომელსაც ხალხის აყოლიება და წინ გაძროლა შეუძლია. ეს ხარვეზი ახალი არ არის და იმისთვის რომ, მან რეალური პარტიული პოლიტიკური პროცესი დაიწყოს, სჭირდება პარტნიორი, რომელიც გახდება მიზიდულობის ცენტრი პოლიტიკით დაინტერესებული ადამიანებისთვის”, – განაცხადა გია ხუხაშვილმა. მისივე შეფასებით, დავით უსუფაშვილის გვერდით უნდა იყოს ზომიერად პოპულისტი, ადამიანი, რომელსაც რიგით მოქალაქეებთან ხიდის გადების უნარები აქვს. მისი შეფასებით, უსუფაშვილისთვის ეს რთულია.
“მას საზოგადოება ჭკვიან ადამაიანად თვლის, თუმცა ლიდერად არ აღიარებენ. როგორც სახელმწიფო მოღვაწეს, ყველა თვლიდა და მათ შორის მეც, რომ ის იყო საუკეთესო პარლამენტის თავჯდომარე, მაგრამ არა პოლიტიკური ლიდერი”, – აღნიშნავს გია ხუხაშვილი.
რამდენად შეძლებს დავით უსუფაშვილი ქმედითუნარიანი და ცოცხალი პარტიის ჩამოყალიბებას დამოუკიდებლად? – ამ კითხვაზე პოლიტოლოგი გვპასუხობს, რომ მსგავის რამ პრაქტიკულად გამორიცხულია: „ვერ შეძლებს, თუ მას არ ეყოლა სერიოზული პარტნიორი ან პარტნიორები, რომლებიც არიან ლიდერის თვისებების მატარებლები. უსუფაშვილი, თუ ჩვენი უახლეს ისტორიას გადავავლებთ თვალს, არის ზურაბ ჟვანიას ტიპის პოლიტიკოსი, რომელსაც ჰქონდა ავტორიტეტი, მაგრამ არ გააჩნდა ელექტორატური ბმა მოსახლეობასთან. იმისთვის, რომ ჟვანიას წარმატებისთვის მიეღწია, სჭირდებოდა ქარიზმატული, პოპულისტი ლიდერი და ასეთი იყო მიხეილ სააკაშვილი.
„აი, ამ კომბინაციამ კარგად იმუშავა – ერთის მხრივ ჟვანიას ავტორიტეტი და მეორეს მხრივ სააკაშვილის ქარიზმა პოლიტიკური შედეგის მისაღწევად ძალიან ეფექტური აღმოჩნდა. იმის თქმა მინდა, რომ უსუფაშვილს სჭირდება მიშა სააკაშვილის ტიპის პოლიტიკოსი. ზუსტად მისნაირისგან ღმერთმა დაგვიფაროს, თუმცა მისი მსგავსი ნამდვილად სჭირდება”, – ამბობს გია ხუხაშვილი.
რაც შეეეხება საზოგადოებაში მოარულ ხმებს, რომ შესაძლებელია დავით უსუფაშვილი და პრეზიდენტი ერთად ვიხილოთ, პოლიტოლოგი გია ხუხაშვილი ამ ეტაპზე მსგავს ალიანსს გამორიცხავს. „მე ამ ეტაპზე ასეთ ალიანს გამოვრიცხავ. მიუხედავად იმისა, რომ პრეზიდენტი საკმაოდ აქტიურია და ჩვენ ვხედავთ მის დინამიურ მოქმედებებს, არ მგონია ამ ეტაპზე მან გადაწყვიტოს აქტიური პოლიტიკური მოღვაწეობა და უსუფაშვილთან მის ალიანს დღეს მე ვერ ვხედავ. თუმცა, მომავალში ყველაფერი შესაძლებელია მოხდეს,” – განაცხადა გია ხუხაშვილმა.
„ახალი თაობა“, 07 აპრილი, 2017 წელი
ინტერვიუ სოსო ცისკარიშვილთან: „არ მესმის, ახლა რატომ უნდა გადადგეს გიორგი კვირიკაშვილი“
პოლიტოლოგი სოსო ცისკარიშვილი „ახალ თაობასთან“ ინტერვიუში ქვეყანაში არსებულ პოლიტიკურ პროცესებზე საუბრობს.
- ბატონო სოსო, აირაის მიერ გამოქვეყნებული სოციოლოგიური კვლევები რა სურათს იძლევა თუნდაც ადგილობრივი არჩევნების წინ, როგორ შეიძლება, მოვლენები განვითარდეს?
- ის ფაქტი, რომ პოლიტიკოსთა რეიტინგში პრეზიდენტ მარგველაშვილს ყველაზე მაღალი რეიტინგი აქვს, არის ჩვენი საზოგადოების ტრადიციული მიდგომა უსამართლოდ ჩაგრულის მიმართ. ხალხი ყოველთვის ჩაგრულის მხარეს არის. „ქართული ოცნება“, მართალია, ვერასდროს დაიჯერებს, რომ პრეზიდენტის რეიტინგი სწორედ მათმა თავგზააბნეულმა თავდასხმებმა გაზარდა, მაგრამ ნამდვილად ასეა. მე სულაც არ გამოვრიცხავ, რომ უმრავლესობის შიდა სამზარეულოში ამ თემებზე ყოფილიყო საუბრები.
- გამოდის, „ქართული ოცნება“ პრეზიდენტისადმი პოლიტიკას შეცვლის?
- არაფერია გამორიცხული, მეტიც, მგონია, რომ პარლამენტში ყოველწლიური გამოსვლის შემდეგ პოლიტიკურ დებატებზე თანხმობა ამის ერთ-ერთი ნიშანიც არის.
- სოზარ სუბარმა განაცხადა, რომ ადგილობრივი არჩევნები „ქართული ოცნების“ დამაჯერებელი გამარჯვებით დასრულდება. რამდენად აქვს ხელისუფლებას ოპტიმიზმის საფუძველი?
- რა კარგი იყო, როდესაც სოზარ სუბარი ომბუდსმენის თანამდებობაზე გახლდათ და ადამიანის უფლებებისთვის იბრძოდა. მაშინ, არა მგონია, მას ასეთი მკვეთრი განცხადება გაეკეთებინა, შეიძლება ითქვას, სრულიად შეუფერებელი განცხადება დემოკრატიული სამყაროსა და დემოკრატიული არჩევნებისთვის. ყოფილ პრემიერ ღარიბაშვილის განცხადებები მახსენდება, როდესაც ის არჩევნების წინ აცხადებდა, ჩვენ არ დავუშვებთ, რომელიმე რაიონში ოპოზიციამ მოიგოს არჩევნებიო. ეს განცხადება და სიტყვა „დემოკრატია“ ვერასდროს შეხვდებიან ერთმანეთს საერთო სივრცეში, იმდენად არის აცდენა მათ შორის. დემოკრატიულ საზოგადოებაში არჩევნების წაგებაც და მოგებაც არჩევნების დღეს წყდება და ორივე შედეგი სრულიად მოსალოდნელია.
- გავრცელდა ხმები, რომ პრემიერი, შესაძლოა, გადადგეს. იზიარებთ ამ მოსაზრებას?
- სრულიად უადგილო მგონია ახლა, ამ ეტაპზე პრემიერ კვირიკაშვილის ირგვლივ გავრცელებული ხმები. არ არის გამორიცხული, ამ ხმებით თუნდაც ამ სოციოლოგიური კვლევების გადაფარვა ხდებოდეს. ჩემთვის სრულიად გაუგებარი იქნებოდა ახლა, ამ ეტაპისთვის პრემიერის გადადგომა. მსგავსი ნაბიჯები იდგმება განსაკუთრებული მნიშვნელობის მქონე პოლიტიკური მოვლენის, თუნდაც არჩევნების წინ, მაგრამ ახლა რატომ უნდა გადადგეს კვირიკაშვილი, არ მესმის.
- ირაკლი ღარიბაშვილი ახსენეთ. შეიძლება, ის დიდ პოლიტიკაში დაბრუნდეს?
- რა თქმა უნდა, ირაკლი ღარიბაშვილი მომავალ წელს აუცილებლად გახდება პოლიტიკურად აქტუალური.
- საპრეზიდენტო არჩევნებზე იყრის კენჭს?
- დიახ. ბიძინა ივანიშვილს ირაკლი ღარიბაშვილი სათადარიგოთა სკამზე, სხვათა შორის, არცთუ ისე გრძელ სკამზე ჰყავს. მას შემდეგ, რაც სრულიად მოულოდნელად წავიდა ირაკლი ღარიბაშვილი თანამდებობიდან, იგრძნობა, ბიძინა ივანიშვილი თითქოს ებოდიშება მას. ამიტომ, არ არის გამორიცხული, „ქართული ოცნების“ კანდიდატი მომავალ საპრეზიდენტო არჩევნებზე სწორედ ირაკლი ღარიბაშვილი იყოს.
„ახალი თაობა“, 07 აპრილი, 2017 წელი
ინტერვიუ მამუკა გამყრელიძესთან: „გიორგი მარგველაშვილს დღესაც ბიძინა ივანიშვილი მართავს“ // „რაც ხდება, ყველაფერი თამაშია“
დღეს პრეზიდენტს ყოველწლიური მოხსენებით პარლამენტში ელიან. არის მოლოდინი, რომ მარგველაშვილის გამოსვლა დაძაბულობისა და დაპირისპირების ფონზე ჩაივლის. ამ აჟიოტაჟსა და დაძაბულობას სპექტაკლს უწოდებს მამუკა გამყრელიძე, რომელიც „ახალი თაობის“ კითხვებს პასუხობს.
- ბატონო მამუკა, პარლამენტში დიდ ხმაურს ელოდებიან. რას ელით თქვენ?
- ეს ყველაფერი ხელოვნურად შექმნილ აჟიოტაჟს წააგავს. ერთს კი გეტყვით, არაფერს საინტერესოს მისგან არ ველოდები, ვფიქრობ, რომ ჩვეულებრივი მართული ფიგურაა.
- ვისგან მართული?
- ბიძინა ივანიშვილის მხრიდან, ამიტომ ეს პიროვნება ჩემში დიდ ინტერესს არ იწვევს.
- მაშინ, რა გამოდის, ეს დაპირისპირება, დაძაბულობა პრეზიდენტსა და მმართველ გუნდს შორის ხელოვნური და დადგმულია?
- მე ასე მიმაჩნია. პრეზიდენტმა გიორგი მარგველაშვილმა აქტიურად დაიწყო წინასაარჩევნო კამპანია. ეს აშკარა და ყველასთვის ნათელია. ამის გაგრძელებას ველი პარლამენტშიც, თუმცა, რა თემით გამოვა და რას იტყვის, ჩემში ეს ინტერესს არ იწვევს. ჩემს თვალში ის ივანიშვილის მარიონეტია!
- კვლევების თანახმად, პოლიტიკოსების რეიტინგში გიორგი მარგველაშვილი ლიდერობს. ამას რით ახსნით?
- მე ესეც ხელოვნური მგონია, თუნდაც იმიტომ, რომ „ნაციონალური მოძრაობიდან“ გამოყოფილ „ევროპულ საქართველოს“ 7% აქვს. ჩემთვის გაუგებარია, რის საფუძველზე შეიძლება ჰქონდეს ამ ორგანიზაციას 7%? ამით ყველაფერი ნათქვამია ამ კვლევების სანდოობაზე.
- რის თქმა გინდათ, რომ ბევრია „ევროპული საქართველოსთვის“ 7%?
- „ნაციონალური მოძრაობის“ მხარდამჭერთა რიგებში დიდი აგრესია გამოიწვია მათმა დემარშმა. სხვა ამომრჩეველი მაგათ არ ჰყოლიათ. ყველამ ვიცით, რომ ნაციონალური მოძრაობის ამომრჩევლის უდიდესი ნაწილი აქეთა მხარეს არის გადმოხრილი და რის ხარჯზე ხდება, 7%-ს რომ უწერენ?! ასე მარტივად ნურავინ შეხედავს. 7% არ არის დაბალი, ძალიან ბევრია! ამიტომ აბსოლუტურად არანაირი ნდობა არ მაქვს ამ რეიტინგების მიმართ!
- არც ხელისუფლებას აქვს ნდობა ამ კვლევების მიმართ და ერთ პოზიციაზე ხართ?
- სხვა რა უნდა თქვას, აბა, „ოცნებამ“?! დღეს მიმდინარეობს შემდეგი პროცესი: ალბათ, მოხდება ამ დაუვარცხნელი და შეუხედავი `ოცნების~ ჩანაცვლება ბევრად უფრო დავარცხნილი და დალაგებული ლიბერალური გაერთიანებით. ასევე აქტიურად მიმდინარეობს მართული ოპოზიციის შექმნის პროცესი.
- „ნაციონალური მოძრაობა“ ჯერ კიდევ არ თმობს მთავარი ოპოზიციური პარტიის პოზიციას...
- „ნაციონალური მოძრაობა“ ინერციით ცოტა ხანს კიდევ იქნება. შემდეგ ნელ-ნელა შეამცირებენ და მერე საბოლოოდ ჩაანაცვლებენ მართული ოპოზიციით.
- მართული ოპოზიციის შექმნის პროცესი მიმდინარეობსო და ვინ გაერთიანდება ამ ახალ ოპოზიციურ სპექტრში?
- იქმნება მართული ოპოზიცია, სადაც, არ არის გამორიცხული, რესპუბლიკელების, ალასანიას ყოფილი პარტიის, ახალი დემოკრატებისა და ამ ევროქოცების, ევროპული საქართველო რომ ჰქვიათ, გაერთიანება მოხდეს. მათ სათავეში თუ ჩაუდგება ყოფილი პრეზიდენტი მარგველაშვილის სახით ან ყოფილი პარლამენტის თავმჯდომარე უსუფაშვილის სახით, ევროპელი ჩინოვნიკების თვალში ეს იქნება ძალიან ფასეული „მონაპოვარი“. ეს ძალიან მომხიბვლელი ვარიანტია, რომელიც ხელისუფლებისთვისაც მისაღები იქნება და შეიქმნება ისეთი „დემოკრატია“, რომელიც მთელ ევროპას გააოცებს.
- რა გამოდის, გიორგი მარგველაშვილი ბიძინა ივანიშვილის დაკვეთით უპირისპირდება „ქართულ ოცნებას“?
- მე გიორგი მარგველაშვილზე არასოდეს მქონია წარმოდგენა, როგორც ცალკე პოლიტიკურ ერთეულზე. ის ყოველთვის იყო და არის მართული ბიძინა ივანიშვილის მიერ. შენ რეზიდენცია არ შეიცვალე და ახლა გაგებუტები… კარგით, რა, მაგას ვინ ჭამს.
- ანუ ეს თამაშია?
- ამაში დარწმუნებული ვარ. მან თავისი მამა-მარჩენალისგან ძალიან ბევრი მიიღო, არაფრისგან პრეზიდენტად დასვა. ასე მარტივად ვერ განუდგებოდა. რაც დღეს ხდება, ყველაფერი თამაშია. თვითონაც ირთობენ თავს და ხალხსაც ართობენ. ეს სიტუაცია იმ მწყემსის ამბავს მახსენებს, ძალიან რომ ცივა და ცხვრები ვერ გაჰყავს საძოვარზე, კატას რომ ჩაუგდებს ტომარაში, ჩამოკიდებს და ცხვრებიც მთელი სამი დღე შესჩერებიან ტომარაში აჩხავლებულ კატას, სანამ არ გამოიდარებს.
- მოსახლეობის ყურადღების გადატანას ცდილობენ?
- ზუსტად იგივე ამბავია, ცდილობენ, ხალხის ყურადღება პრობლემებიდან ასეთ უმნიშვნელო საკითხებზე გადაიტანონ. ჩვენ ამ სიტუაციას ვხედავთ მუდმივად. რუსები მეტროებს აფეთქებენ იმისთვის, რომ ყურადღება გადაიტანონ და, მადლობა ღმერთს, ჩვენთან ბევრად უფრო მშვიდობიანი მეთოდია შერჩეული.
- „ოცნების“ რეიტინგი ძალიან დაბალია. თქვენ რას ფიქრობთ?
- დღეს დაბალია? რა პრობლემაა, როგორც კი დასჭირდებათ, მაშინვე გაზრდიან ამ 26%-ს 52%-მდე. განა ეს მათთვის პრობლემაა? ეს გასულმა არჩევნებმაც ხომ დაგვანახა.
- გიორგი კვირიკაშვილის შეცვლაზეც აქტიურად საუბრობენ. გაუშვებენ პრემიერს სახლში?
- უკვე ექვსი თვეა ამბობენ, რომ კვირიკაშვილს აპრილში გახარიათი ჩაანაცვლებენ. აჰა, მოვიდა ეს აპრილიც და, ალბათ, შეცვლიან, მაგრამ რა მერე?! შესაკრებთა გადანაცვლებით ჯამი არ იცვლება. კვირიკაშვილი იქნება პრემიერად, გახარია თუ სიკინჭილაშვილი, რა მნიშვნელობა აქვს ამას? არანაირი. ამ ქვეყანას მართავს არაფორმალური ლიდერი, პატივცემული ბიძინა ივანიშვილი, მორჩა და დამთავრდა! ჩვენ შევედით ძალიან ხანგრძლივ პროცესში. ამ ადამიანმა მოახერხა პოლიტიკური პროცესების მთლიანი ნიველირება, მიწასთან გაასწორა ყველა და ყველაფერი. ერთადერთი რეალური ოპოზიცია არსებობს „ნაციონალური მოძრაობის“ სახით და, პრაქტიკულად, ისიც დაშლილ და გაუბედურებულ მდგომარეობაშია. არც ფინანსური რესურსები აქვს შესაბამისი და არც ადამიანური. დღეს საზოგადოებაში მუხტი არ არის და არც არაფერს ველოდები.
- საზოგადოებაში პესიმისტური განწყობაა?
- ძალიან პესიმისტური. სანამ სერიოზული შეჯანჯღარება არ მოხდება ან საგარეო ფაქტორები არ იმოქმედებს, შესაძლოა, საგარეო ფაქტორი ისე ამოტრიალდეს, რომ ჩვენთან ყველაფერი სხვანაირად გადალაგდეს. ამ შემთხვევაში შეიძლება ველოდოთ რაიმე ახალს. ამ ეტაპზე შიგნით არც დაძაბულობაა შესაბამისი, არც სოციალური პრობლემატიკა დგას მწვავედ. მიხეილ სააკაშვილის ნაციონალური მოძრაობის მიმართ საზოგადოების ძალიან დიდ ნაწილს აქვს შიში და სიძულვილი. ამ წლების განმავლობაში ვერც შიში მოიხსნა და ვერც სიძულვილი გაქარწყლდა.
- ამ ხელისუფლების მიმართ მსგავსი გრძნობა არ აქვს საზოგადოებას?
- „ოცნების“ ხელისუფლების მიმართ გაჩნდა უნდობლობა, გაღიზიანება, მაგრამ არც შიში აქვთ მისი და არც ზიზღი. აი, ეს შეძლო ბიძინა ივანიშვილმა. კი დასცინიან, ხეებს დაათრევს აქეთ-იქით, გიჟიაო, მაგრამ არ არის თვითონ ხელისუფლებაში და, რასაც უნდა, იმას იზამს. საზოგადოების ნაწილს იმის განცდაც არ აქვს, რომ ის მართავს ქვეყანას. ვინ რა იცის, კულუარებში რა ხდება. იმდენად ჭკვიანია, ამასაც ახერხებს. ხალხს არ აინტერესებს, რა ხდება. არც კრიმინალი მძვინვარებს იმ დოზით, რომ ხალხი ამის გამო დაისტრესოს. ცოტა კრიმინალმაც მოიმატა, ცოტა კორუფციამაც, მაგრამ ხალხი ამასაც შეეჩვია.
- როდის შეიცვლება ეს განწყობები საზოგადოებაში?
- არა მგონია, ოდესმე რამე შეიცვალოს. მიხეილ სააკაშვილი და მისი გუნდი იყო დევიაცია (ქცევა, რომელიც ეწინააღმდეგება მიღებულ ნორმებს – რედ. შენ.) ქართულ სინამდვილეში. ახლა ისევ ჩვეულ მდგომარეობას დავუბრუნდით.
- არც საარჩევნოდ შეიცვლება ვითარება?
- ამ არჩევნებზე აბსოლუტურად არაფერი შეიცვლება. „ოცნება“ ისევ დარჩება. ჩვენ „ოცნება“ მივიღეთ დიდი ხნით.
- მაინც რამდენი წლით?
- საგარეო ფაქტორში თუ არაფერი შეიცვალა, ჩვენ მივიღეთ „ოცნება“ 2030 წლამდე. ადგილობრივ არჩევნებზე ძალიან ბევრ რაღაცას დავინახავთ. ჩვენ დავინახავთ იმას, რომ რეალურად არჩევნები არ გვექნება. არჩევნები, როგორც მოვლენა, მოკვდა, აღარ არის და უახლოესი პერიოდის განმავლობაში ასე იქნება.
„ახალი თაობა“, 07 აპრილი, 2017 წელი
ინტერვიუ ბეჟან ნათელაშვილთან: „ოცნება“ ნაძარცვი ბიუჯეტის შევსებას მწეველების ხარჯზე აპირებს“ // „ბიძინა ივანიშვილი მოწველას არის მიჩვეული“
რა მიზანი აქვს მოწევის წინააღმდეგ ბრძოლას, რა პრობლემებს შექმნის ეს ქვეყანაში, რატომ დუმს ხელისუფლება რეალურ პრობლემებზე? ამის შესახებ „ახალ თაობას“ ლეიბორისტული პარტიის გენერალური საბჭოს წევრი ბეჟან ნათელაშვილი ესაუბრება.
- თქვენი აზრით, ქვეყანაში, სადაც უამრავი პრობლემაა, რატომ გახდა ასეთი აქტუალური მოწევის წინააღმდეგ ბრძოლა? მოწევა, მართალია, მავნებელია, მაგრამ არანაკლებ მავნებელი რამეები ხდება ჩვენ გარშემო...
- ქვეყანაში რომ უამრავი გადაუჭრელი პრობლემაა, სწორედ ამიტომ დაიწყეს ასეთ თემებზე ყურადღების გამახვილება. კანონქვემდებარე აქტებითა და ადმინისტრაციულ სამართალდარღვევათა კოდექსში იდიოტობების ჩაწერით ცდილობენ მთავარი პრობლემებიდან ხალხის ყურადღების გადატანას. მოწევის წინააღმდეგ დაწყებულ კამპანიას მეორე მიზანიც აქვს: ხელისუფლება ამ გზით შეეცდება იმ გაძვალტყავებული ბიუჯეტის შევსებას, რომელსაც 2012 წლიდან მოყოლებული, დღემდე ძარცვავენ. ბიძინა ივანიშვილი მოწველას არის მიჩვეული და ახლა გადაწყვიტა, ფული ხალხის მოწევის ხარჯზე იშოვოს.
- ხელისუფლება ვარაუდობს, რომ სანქციები ხალხს აიძულებს, სიგარეტის მოწევას თავი დაანებოს...
- სიგარეტისთვის თავის დანებება ასე მარტივი რომ იყოს, ხალხი სანქციების გარეშეც დაანებებდა. ყველამ იცის, რომ მოწევა მავნებელია, მაგრამ უჭირთ თავის დანებება. ამათ გადაწყვიტეს, ამის ხარჯზე ბიუჯეტი შეავსონ და მერე ეს ფული ისევ თავად მოიპარონ. ამ გადაწყვეტილების უკან ბიძინა ივანიშვილი დგას, მაგრამ ეს იდეა მიხეილ სააკაშვილს ეკუთვნის. მას ამის გაკეთება აღარ დასცალდა. მისი დაწყებული საქმე „ქართულმა ოცნებამ“ გააგრძელა და ამით კიდევ ერთხელ დაემსგავსნენ წინა ხელისუფლებას.
- მოწევის აკრძალვაზე ლეიბორისტული პარტიის პოზიცია როგორია?
- ამ საკითხზე პარტიაში არც ოფიციალურად და არც არაოფიციალურად არ გვიმსჯელია.
- ბევრი მწეველია თქვენს პარტიაში?
- თითქმის ყველა ვეწევით. ერთადერთი, ვინც არ ეწევა, შალვა ნათელაშვილია. ადრე ისიც ეწეოდა, მაგრამ თავი დაანება.
- რა მიზეზით დაანება სიგარეტის მოწევას თავი?
- ამათი შიშით ნამდვილად არ დაუნებებია. 2009 წელს მას გულთან დაკავშირებით სერიოზული პრობლემები შეექმნა და მოწევას ექიმების მოთხოვნით დაანება თავი.
- რადგან პარტიაში ბევრი ეწევით, ბევრი ფული შევა თქვენგანაც ბიუჯეტში ჯარიმების სახით...
- ბიძინა ივანიშვილი გახლავთ საოცრად მომხვეჭელი კაცი. ის საზოგადოების ყველა ფენიდან შეეცდება სარგებლობის მიღებას. სტატისტიკა მეტყველებს, რომ საქართველოში ბევრია მწეველი და ეს პრობლემა ასე მარტივად არ გადაიჭრება. ხალხის ძარცვას სხვა უკუშედეგებიც მოჰყვება. სერიოზული პრობლემები შეექმნებათ რესტორნებს. ისინი ძალიან ბევრ კლიენტს დაკარგავენ.
- რესტორნები რატომ დაკარგავენ კლიენტებს?
- მოწევა იქაც იკრძალება. რესტორნებში ხალხი საქეიფოდ შედის. ნასვამი ადამიანი, როგორც წესი, უფრო მეტს ეწევა. ყოველ 15 წუთში ადგომა და მოსაწევად გარეთ გასვლა ქართული სუფრის ტრადიციებში არ ზის. ამის გამო რესტორნები კლიენტებს დაკარგავენ. ეს აკრძალვები ერთგვარი ფსიქოლოგიური ტერორიც იქნება და საზოგადოება ძალიან მძიმე დღეში ჩავარდება.
- საზოგადოება ამ გადაწყვეტილებას ჯერჯერობით გაგებით ეკიდება...
- ეგ იმიტომ, რომ სანქციები ძალაში არ შესულა. როცა ამას საკუთარ ტყავზე იგრძნობენ, ალბათ, გამოფხიზლდებიან და პროტესტს გამოხატავენ. არც იმას გამოვრიცხავ, რომ ბოლომდე გაგებით მოეკიდონ ამ ყველაფერს.
ხალხის ინერტულობა ძალიან სახიფათო ზღვარს მიუახლოვდა. ჩვენმა მოსახლეობამ მოქმედი და წინა ხელისუფლების ბევრი ტყუილი გადაყლაპა. უამრავი რამე მოითმინეს, დოლარის კურსის ხელოვნური გაძვირება, ფასების მატება და ათასი უბედურება კიდევ. მოკლედ რომ გითხრათ, ეს ხელისუფლება საქართველოში თითქმის ყველა ოჯახს მეხივით დაეცა. ამათი მომხვეჭელობის გამო ძალიან ბევრ ადამიანს, განსაკუთრებით კი მძღოლებს სერიოზული პრობლემები შეექმნებათ. ისინი მთელი დღის განმავლობაში საჭესთან სხედან და სადმე ხომ უნდა მოსწიონ სიგარეტი. მე არ ვამბობ, რომ მოწევა კარგია, მაგრამ ამ პრობლემას ნელი ტემპებით უნდა ებრძოლო და არა – ასეთი მეთოდებით. ამათ არც მწევლებისა და არაც არამწევლების ჯანმრთელობა არ ადარდებთ. როგორც გითხარით, მათი მიზანი გაძარცვული ბიუჯეტის შევსება და სხვა უფრო სერიოზული პრობლემების მიჩქმალვაა.
- თქვენი აზრით, კონკრეტულად რა პრობლემის გადაფარვა ხდება?
- უმუშევრობა, სიღატაკე, მომატებული კრიმინალი. დღე ისე არ გავა, კონფლიქტისპირა რეგიონებიდან ადამიანები არ გაიტაცონ. ეს ხომ თავისთავად საშინელებაა, მაგრამ, უარესი ის არის, რომ ხელისუფლებას ასეთ ფაქტებზე რეაქცია საერთოდ არ აქვს. ახლა წამოსწიეს სიგარეტის აკრძალვა და ყველა ამ თემაზე ლაპარაკობს. კიდევ ბევრ თემას მოიგონებენ. რამდენიმე წლის წინ ერთი ამბავი ატეხეს, კონსტიტუციაში უნდა ჩაიწეროს, ოჯახი ქალისა და მამაკაცის ერთობააო. თითქოს აქამდე სხვა რამე იყო ოჯახი. ჩაწერით არაფერი ჩაუწერიათ, მაგრამ ხალხს ხომ გადაატანინეს ყურადღება. ნარიყალას მთაზე წამომჯდარი მაფიოზი შუშის სასახლიდან კიდევ ბევრ რამეს მოიფიქრებს, ხალხის ყურადღება რომ გადაიტანოს და მისგან სარგებლობა მიიღოს.
„რეზონანსი“, 07 აპრილი, 2017 წელი
„ოცნება“ პარლამენტში თამბაქოს კონტროლის შესახებ კანონის დაბლოკვის მცდელობებს პროგნოზირებს // ინტერვიუ აკაკი ზოიძესთან: „მიუხედავად თამბაქოს ინდუსტრიის წინააღმდეგობისა, ამ კანონს ბოლომდე აუცილებლად გავიტანთ“
გვანცა ღვედაშვილი
“მეორე მოსმენის დროს გარკვეულ წინააღმდეგობებს ველოდებით. ეს რა თქმა უნდა ბიზნეს ასოციაციების მხრიდან შენიღბული სახით კეთდება, იმ მიზეზებით, რომ მცირე ბიზნესსა და რეკამას დააკლდება თამბაქოს რეკლამიდან მიღებული თანხა და ა.შ.”, – აცხადებს “რეზონანსთან” პარლამენტის ჯანდაცვის კომიტეტის თავმჯდომარე აკაკი ზოიძე თამბაქოს კონტროლის კანონის გამკაცრებასთან დაკავშირებით.
შეგახსენებთ, რომ ეს კანონი პარლამენტმა პირველი მოსმენით უკვე მიიღო, რასაც საზოგადოებაში არაერთგვაროვანი რეაქცია მოყვა.
აკაკი ზოიძე: წინააღმდეგობები ყოველთვის იქნება. მთელს მსოფლიოში, სადაც კი თამბაქოს კონტროლი მკაცრდება, აქტიურდება თამბაქოს ინდუსტრია, რომელიც ყველანაირად ცდილობს შეასუსტოს ის კანონმდებლობა, რომელიც თამბაქოს ბიზნესს არეგულირებს.
საქართველოშიც საკმაოდ სერიოზული წინააღმდეგობები იყო ამ მხრივ, რაზეც ის ფაქტიც მიუთითებს, რომ აღნიშნული კანონპროექტი წინა მოწვევის პარლამენტის დროს არის შეტანილი თუმცა, მისი დაბლოკვა დიდი წარმატებით ხერხდებოდა.
დღეს, საზოგადოებისა და არასამთავრობოს მხრიდან საკმაოდ დიდი მხარდაჭერაა და იმედი გვაქვს, რომ მედიის მხიდანაც გვექნება. მიუხედავად თამბაქოს ინდუსტრიის წინააღმდეგობისა, ამ კანონს ბოლომდე აუცილებლად გავიტანთ. კანონი პირველი მოსმენით უკვე მივიღეთ, თუმცა მეორე მოსმენის დროს გარკვეულ წინააღმდეგობებს ველოდებით. ეს რა თქმა უნდა, ბიზნეს ასოციაციების მხრიდან შენიღბული სახით იქნება გაკეთებული იმ საბაბით, რომ მცირე ბიზნესსა და რეკლამას დააკლდება გარკვეული თანხები და ა.შ., რაც შესაძლებელია. თუმცა, ეს იქნება მცირე თანხა. გარდა ამისა, ჩვენ გარკვეულ პერიოდს გამოვყოფთ, რათა ალტერნატიური სახსრები მოიძებნოს.
საქართველოში ანალოგიური პროგნოზები იყო 2003 წელს, როცა ტელევიზიით და რადიოთი თამბაქოს რეკლამა აიკრძალა, თუმცა ერთი სახის რეკლამა მეორემ ჩაანაცლა და შემოსავლები ამ მხრივ არ შემცირებულა. ანალოგიურად მოხდება ახლაც. თუ დღეს მაღაზიებს თამბაქოს ინდუსტრია უხდის თანხას, იმისთვის, რომ მათი ნაწარმი თვალსაჩინო ადგილას განათავსონ. ჩვენ ამ მაღაზიებს ვაძლევთ საკმარის დროს იმისთვის, რომ სხვა სპონსორები მოიძიონ და თამბქოს ნაცვლად სხვა პროდუქცია განათავსონ, იქნება ეს საღეჭი რეზინები, ტკბილეული თუ სხვა რამ.
- კანონპროექტში ასევე საუბარია, რომ კინოფილმების ჩვენებისას შესაძლოა დაიფაროს თამბაქოს მოწევის პროცესიე
- ეს სამსჯელო თემაა. ტექნიკურად რამდენად შესაძლებელია, ამას ვნახავთ. მოსმენისას რატომღაც ითქვა, რომ ეს მხოლოდ რუსთეშია, თუმცა ამას ვერ დავეთანხმებით, რადგან ბევრ ქვეყანაში ეს მიღებული პრაქტიკაა – ფილმში ხდება სიგარეტის მოწევის დაფარვა ან მისი გადღაბნა. ეს არის მეორე მოსმენის თემა და ამაზე ვიმსჯელებთ. შესაძლებელია მოვძებნოთ ტექნიკურად ყველაზე სწორი გადაწყვეტილება. ამასთან, მეორე მოსმენის დროს ჩვენ გვეყოლება ჯანდაცვის მსოფლიო ორგანიზაციის ექპერტები, რომლებიც დაგვეხმარებიან საერთაშორისო პრაქტიკის მიხედვით ცალკეულ მუხლების სრულყოფაში ისე რომ, მაქსიმალურად გავითვალისწინოთ ყველა დაინტერესებული მხარის პოზიცია. პირველ რიგში კი საქართველოს მოქალაქეების, მათი ჯანმრთელობისა და ჩვენი მომავალი თაობის და ეს არ არის ლიტონი სიტყვები.
- როდიდან შევა აღნიშნული კანონი ძალაში?
- არის გარკვეული მუხლები, რომელებიც გარდამავალ პერიოდს ითვალისწინებს 2018-დან 2020 წლამდე. მაგალითად, თამბაქოს მოწევა სასტუმროს ნომრების არაუმეტეს 20%-ში დასაშვებია 2020 წლის 1 იანვრამდე, ასევე ღია სტადიონებზეც. ამასთან, საზოგადოებრივი თავშეყრის ადგილებში, როგორიც არის რესტორნები, ბარები და ა.შ., მათ ერთი წელი ეძლევათ, რომ მოახდინონ ფართის შესაბამისი კორექტირება, გამოყონ ღია სივრცეები, ტერასები, დერეფნები თუ სხვა ფართი მწეველებისთვის. რაც შეეხება შენობებში მოსაწევად ცალკე გამოყოფილ ოთახებს, ესეც აიკრძალება, რადგან ოთახს ცალკე ვინტილაციაც რომ ჰქონდეს, ეს არ იცავს იმავე შენობაში მყოფ სხვა ადამიანებს თამბაქოს კვამლის მავნე ზემოქმედებისგან. შესაბამისად, არავითარი ოთახების გამოყოფა არ მოხდება. ერთ წელიწადში როცა აიკრძალება, ეს იქნება სრულად აკრძალვა.
კიდევ ერთხელ ხაზს ვუსვამ, რომ ეს არ არის მწეველთა წინააღმდეგ მიმართული კანონი, არამედ ეს არამწეველთა დასაცავად კეთდება
- როგორ მოხდება ამ ყველაფრის კონტროლი? მაგალითად, კერძო შენობებში თამბაქოს მოწევის შემთხვევისას ვის უნდა შევატყობინოთ?
- ეს მიღებული პრაქტიკაა. აღარ ვლაპარაკობ ევროპასსა და ამერიკის მაგალითებზე, სადაც ეს უკვე დამკვიდრებულია. საუბარია ჩვენს მეზობელ ქვეყნებზე – მოლოდვაზე, უკრაინასა და აზერბაიჯანზე სადაც იგივე სიტუაციაა. ამას აკონტროლებენ ცალკეული ორგანოები, სანიტარული ინსპექციიდან დაწყებული, გარემოს დაცვითი ინსპექციებით დამთავრებული. მთავრობასთან კონსულტაციებით ჩვენ შევარჩევთ ოპტიმალურ ადმინისტრაციულ ვარიანტს. მთავარია ჯარიმები იყოს იმ დონის, რომ პრევენციისთვის საკმარისი აღმოჩნდეს და მოხდეს კანონის აღსრულება, რომელის მონიტორინგშიც არასამათავრობო სექტორიც ძალიან აქტიურად იქნება ჩართული.
„ახალი თაობა“, 07 აპრილი, 2017 წელი
ინტერვიუ პეტრე მამრაძესთან: „რუსეთს შეუძლია პატარა ქვეყანაში შემოვიდეს, გაანადგუროს და ბაზები დააყენოს“
პარლამენტის ყოფილი წევრი პეტრე მამრაძე „ახალ თაობასთან“ აცხადებს, რომ რუსეთის რეაქცია საქართველოს ევროპასთან ვიზალიბერალიზაციის საპასუხოდ არაადეკვატური იყო.
- ბატონო პეტრე, რუსეთის რეაქცია საქართველოს ევროპასთან ვიზალიბერალიზაციის საპასუხოდ ადეკვატური იყო? მოგეხსენებათ, საქართველოს ევროპასთან ვიზალიბერალიზაციის პროცესს დაემთხვა აფხაზეთსა და ცხინვალის რეგიონში რუსეთის სამხედრო ნაწილების გაძლიერება, ახალი სამხედრო შეიარაღების შემოტანა, აფხაზური და ოსური შენაერთების რუსულ შენაერთებთან გაერთიანება...
- რუსეთის რეაქცია სრულიად არაადეკვატური იყო. რუსეთის ხელისუფლებას ჰქონდა ისეთი რეაქციები, რომელიც აკნინებს რუსეთს, როგორც დიდ სახელმწიფოს, „დერჟავას“, როგორც თვითონ რუსები უწოდებენ. როგორ შეიძლება, დიდ სახელმწიფოს ასეთი არასრულფასოვნების კომპლექსი ჰქონდეს.
- რუსეთის არაადეკვატური რეაქციები არასრულფასოვნების კომპლექსიდან გამომდინარეობს?
- ნამდვილად, ვინაიდან რუსეთის ინტერესების საწინააღმდეგო არანაირად არ არის საქართველოს ურთიერთობა ევროკავშირთან, რომ არაფერი ვთქვათ ამ ურთიერთობის მოცულობაზე, რომელიც რუსეთისთვის არის სტატისტიკური ნული რუსეთის ბაზრის მასშტაბის გათვალისწინებით.
- რატომ ფიქრობთ ასე, ევროკავშირი რუსეთის ინტერესებს ითვალისწინებს?
- ერთი მაგალითი – მაიდანის შემდეგ, უკრაინაში მოსული ახალი ხელისუფლების პირობებში, ევროგაერთიანებამ, ვიდრე პოროშენკოს ხელისუფლებასთან ასოცირების ხელშეკრულებაზე მოაწერდა ხელს, რუსეთის მთავრობას გაუგზავნა ხელშეკრულების სრული პაკეტი და სთხოვა, თუ რაიმე შენიშვნა გაქვთ, თუ ამ ხელშეკრულების რომელიმე მუხლი რაღაცნაირად ეწინააღმდეგება თქვენს ეროვნულ ინტერესებს, გვითხარით, გავასწორებთ, ვიმსჯელებთო. წესდებით, საერთოდ არ ევალებოდა ევროგაერთიანებას, შეეთანხმებინა რუსეთისთვის, რაზე მოაწერდა ხელს უკრაინასთან, მაგრამ, უკრაინა-რუსეთის კონფლიქტის გათვალისწინებით, ეს გააკეთა. რუსეთის მთავრობამ დღემდე ვერაფერი უპასუხა. თუ რაღაც არ გაწყობს, ის მაინც ხომ უნდა შეგეძლოს, თქვა, ამა და ამ თავში ესა და ეს საზიანოა ჩემთვისო, თან უნდა თქვა, რატომ არის საზიანო.
- მენიშნა საქართველოში ჩამოსული რუსი ჟურნალისტის პოზნერის განცხადება „იმედის“ ჟურნალისტთან, თუ ამერიკას სხვადასხვა ქვეყანაში სამხედრო ბაზები აქვს, რატომ ჩვენ არ უნდა გვქონდეს საქართველოშიო. მის განცხადებაში რუსული ხასიათი კარგად ჩანს...
- პოზნერი ვისაც ემსახურება, ცნობილია. მან რუსული ტელევიზიით განაცხადა, მე ხელშეკრულება დავდე სატანასთან, ამიტომ ხელშეუხებელი ადამიანი ვარო. პოზნერი ცინიკოსია. როგორ შეიძლება რუსეთის შედარება შეერთებულ შტატებთან, რომელიც მსოფლიოში თავისუფლებისა და დემოკრატიის მართლა ფლაგმანია. არაერთი ქვეყანა არსებობს დედამიწის ზურგზე იმის გამო, რომ აშშ არსებობს, თორემ მსოფლიო რუკიდან წაიშლებოდნენ. ასეთია, მაგალითად, დამოუკიდებელი ტაივანი, სამხრეთ კორეა. რომ არა ამერიკა და მისი ფაქტორი, სამხრეთ კორეა რამდენიმე კვირაში გაქრებოდა. ტაივანის ბედიც უცებ გადაწყდებოდა.
- საქართველო?
- ამის მაგალითია საქართველოც. მე არ ვაკლებ კრიტიკას ჩვენს მთავრობას, მაგრამ მთელ რეგიონში სტაბილურობის, დემოკრატიის, თავისუფლების (მათ შორის, სიტყვის თავისუფლების) კუნძული რომ ვართ, ესეც ხომ ფაქტია. აქაც აშშ-ის მოსახლეობისა და, შესაბამისად, მათი მთავრობის წვლილი ძალიან დიდია. თუ შეერთებული შტატების ბაზა სადმე დგას, ეს არის არა ოკუპაციის, არამედ ორმხრივი მოლაპარაკების შედეგი, როცა, როგორც წესი, მას სთხოვენ, რომ დარჩეს და ადგილობრივი მოსახლეობაც კმაყოფილია.
- რუსეთის ხელისუფლებას აშშ-ის მსგავსად მოქმედება არ შეუძლია?
- არა. რუსეთის ხელისუფლებას შეუძლია, პატარა ქვეყანაში შემოვიდეს, დაბომბოს, გაანადგუროს და დააყენოს ბაზები. შემდეგ პოზნერისნაირი დაქირავებული ჟურნალისტები იტყვიან, ჩვენც ხომ შეგვიძლიაო.
- რუსეთს კომპლექსი აქვს თუ მისი ხელისუფლება დიადი რუსეთის იმპერიალისტურ ზრახვებსა და სურვილებზე უარის თქმას ვერ ახერხებს?
- ამის ელემენტიც არის, მაგრამ სად არის საღი აზრი? არაერთ რუსს, ცნობილ მეცნიერსა და პოლიტოლოგს, ანალიტიკოსს დაუწერია, რომ პუტინი რუსეთის ეროვნულ, ანუ სახელმწიფო ინტერესებს ღალატობს.
- იქნებ ამას რუსული ინტელიგენციის წარმომადგენლები ხელისუფლების იმპერიალისტური ქმედებების გასაწონასწორებლად და თვალის ასახვევად წერენ?
- არა. ისინი ამას წერენ იმიტომ, რომ ვეებერთელა ტერიტორია რუსეთში, ურალის ქედის იქით, სრულიად აუთვისებელია. მოსახლეობა იმდენად ცოტაა, საჰარის უდაბნოზე ნაკლებადაა დასახლებული. შედიან ჩინელები და სახლდებიან. ისეთ ხელშეკრულებებს მოაწერა ხელი, რომ ჩინელებს გზა ხსნილი აქვთ. ასევე დაუცველია იქითა საზღვრები.
- სამაგიეროდ, საქართველოსა და უკრაინას არ ეშვება, ახლო აღმოსავლეთშიც იბრძვის...
- ეს არის სწორედ ის, რასაც წერენ. პიატიგორსკი წერდა, ვლადიმირ პუტინი რუსეთის ინტერესებს გარდაცვლილი საბჭოთა კავშირის მკვდარ სხეულთან ღალატობსო.
- ვლადიმირ პუტინი განსაკუთრებით ვერ იტანს ნატოს...
- ძალიან კარგად იციან, რომ ნატო რუსეთისთვის არანაირ საფრთხეს არ წარმოადგენს, მაგრამ საკუთარი ძალაუფლების შენარჩუნებისთვის პუტინსა და მის ჩეკისტურ ხროვას მტრის ხატი სჭირდება.
- პოზნერმა ნატოს საშინელი აგრესიული ბლოკი უწოდა.
- როდესაც ყირიმის ანექსია მოხდა, პოლონეთი და ბალტიის ქვეყნები ეხვეწებოდნენ ნატოს ხელმძღვანელობას, სასწრაფოდ განათავსეთ ჩვენთან ალიანსის შენაერთიო, რადგან რუსეთი იმუქრებოდა, რომ ძალიან მცირე დროში დაიკავებდა ბალტიისპირეთისა და უკრაინის დედაქალაქებს.
- დიახ, პუტინმა განაცხადა, თუ მოვინდომებ, კიევს 2 საათში ავიღებო...
- პუტინი მუქარას არ დასჯერდა და ბალტიის ქვეყნების საზღვრებზე რუსეთის მხრიდან განათავსა საჯარისო ნაწილები _ 350 ათასზე მეტი ჯარისკაცი. ამ დროს ბალტიისპირეთში არმიები სიმბოლურია, ნატოს მხრიდან კი საერთოდ არავინ დგას. ამ ფონზე ბალტიისპირელები ნატოს ეხვეწებოდნენ, დააყენეთ ჩვენთან ჯარი, ხომ ხედავთ, კაცი ღიად იმუქრებაო.
- რუსეთის მუქარა რეალურია?
- ესტონეთში ქალაქი ნარვა რუსულენოვანი მოსახლეობით არის დასახლებული. იქ რომ გააკეთოს რუსეთმა ის, რაც მოხდა ყირიმში, კი, ესტონეთი ნატოს წევრია, მაგრამ ჩრდილოატლანტიკური ალიანსი ესტონეთის გამო იბრძოლებს? ამ ფონზე ნატოს შტაბბინიდან ესტონეთს უპასუხეს, ჩვენ იმ პირობით მიგიღეთ ნატოში, რომ ჩვენი ჯარი თქვენს ტერიტორიაზე არ დადგებოდა და ამ პირობას ვასრულებთო. პუტინმა ხომ პირობა დაარღვია უკრაინასთან დაკავშირებით.
- დიახ, უკრაინასთან დაკავშირებით შეთანხმება იყო, დიდ სახელმწიფოებს უნდა დაეცვათ მისი ტერიტორიული მთლიანობა...
- რუსეთმა კატეგორიულად მოსთხოვა უკრაინას, ბირთვული იარაღი გადაეცა. სამაგიეროდ, რამდენიმე ქვეყანა გარანტად გამოვიდა, თუ უკრაინა ბირთვულ იარაღს რუსეთს გადასცემდა, დაიცავდნენ მის ტერიტორიულ მთლიანობას. ამერიკა შეჰპირდა უკრაინას დახმარებას. ბირთვული იარაღის შენახვას დიდი ფული სჭირდება. ამერიკელი პოლიტოლოგი მაიერი აფრთხილებდა უკრაინასა და აშშ-ს, თუ უკრაინა დაუბრუნებდა რუსეთს ბირთვულ იარაღს, ადრე თუ გვიან რუსეთი შეიჭრებოდა უკრაინის ტერიტორიაზე. პოზნერისგან განსხვავებით, რუსი პოლიტოლოგები წერდნენ, რომ ნატო იყო მიძინებული ორგანიზაცია, რომელიც პუტინმა თავისი აგრესიითა და პირდაპირი საჯარო მუქარით გააღვიძა.
„რეზონანსი“, 07 აპრილი, 2017 წელი
ინტერვიუ თორნიკე შარაშენიძესთან: როგორ შევუქმნათ ოკუპანტებს დისკომფორტი // „მათ უნდა იცოდნენ, რომ თუ გადმოვლენ, შესაბამის პასუხს მიიღებენ და მერე უკან ისე გავაბრძანებთ“
ნინო ქეთელაური
„ოკუპანტებს ვერანაირ დისკომფორტს ვერ უქმნის გაეროს რეზოლუციები. მათთვის დისკომფორტი იქნება რაღარც ხელშესახები, ისეთი, რომ ცხვირში მოხვდეთ”, – ამის შესახებ სოციალურ მეცნიერებათა დოქტორი, საერთაშორისო ურთიერთობების სპეციალისტი, თორნიკე შარაშენიძე “რეზონანსთან” საუბრისას აცხადებს. მისი თქმით, ოკუპანტები ჩვენი ქვეყნის ანექსიას აგრძელებენ, მოქალაქეებს იტაცებენ, პასუხად კი არაფერს იღებენ. ამიტომ, საოკუპაციო ხაზთან საქართველოს სამართალდამცავი ორგანოების გააქტიურებაა საჭირო.
თორნიკე შარაშენიძე: უნდა შევძლოთ, რომ ოკუპანტებს ის კომფორტი, რაც საოკუპაციო ხაზთან აქვთ შექმნილი, მოვუხსნათ. ამაში ვგულისხმობ იმას, რომ ასე მარტივად ვერ გადმოდოდნენ და ჩვენს მოქალაქეებს ვერ იტაცებდნენ. მათ თავადვე გაავლეს ეს მავთულხლართი და ამის აქეთ მაინც არ უნდა გადმოდიოდნენ და ჩვენს მოქალაქეებს იტაცებდნენ. რაღაც ზომებია მისაღები. მათ უნდა იცოდნენ, რომ თუ გადმოვლენ, შესაბამის პასუხს მიიღებენ და მერე უკან ისე გავაბრძანებთ. ისინი აგრძელებენ ანექსიის პროცესს და პასუხად არაფერს იღებენ, ოდნავ დისკომფორტსაც კი. მოდით რეალურად ვთქვათ – ოკუპანტებს ვერანაირ დისკომფორტს ვერ უქმნის გაეროს რეზოლუციები, მათთვის დისკომფორტი იქნება რაღაც ხელშესახები, ისეთი, რომ ცხვირში მოხვდეთ.
- ხელშესახებ დისკომფორტში რას გულისხმობთ, საოკუპაციო ხაზთან სამართალდამცავი ორგანების გააქტიურებას?
- რა თქმა უნდა, ამას ვგულისხმობ. ოკუპანტებმა თვითონვე გაავლეს ეს ხაზი და ამის აქეთ მაინც ხომ უნდა იყოს რამე დალაგებული, რომ აღარ გვაწუხებდნენ?! მე აღარაფერს ვამბობ გალელ ქართველებზე, საერთოდ მიტოვებულები რომ არიან. გორის რაიონში მცხოვრები ქართველები მაინც დავიცვათ.
- როგორ ფიქრობთ, საქარველომ რუსეთთან ურთიერთობის ფორმატს უნდა გადახედოს?
- არა. მე ვფიქრობ, დიალოგის ფორმატის უნდა დარჩეს. თუმცა, მოდით, ასე განვიხილოთ – ჟენევაში აბაშიძემ კარასინს რომ უთხრას, საოკუპაციო ხაზთან რაც ხდება, ეს ცუდიაო, პასუხად მიიღებს, რომ ჩვენ არაფერი ვიცით, იქ ალბათ ადგილზე ვიღაც რაღაცას აფუჭებსო. სწორედ ამიტომ, ჩვენც შეგვიძლია ვუპასუხოთ, რომ თქვენ თუ არ იცით, კი, ბატონო, ჩვენც მივიღებთ ზომებს და თუ შენი ჯარისკაცი ან ოფიცერი თავხედურად იქცევა, შესაბამის რეაგირებას მოვახდენთ. მათი ამგვარი პარპაში უნდა დამთავრდეს, რათა ჩვენ მიერ კონტროლირებად ტერიტორიაზე მცხოვრებ მოქალაქეებს მაინც ჰქონდეთ განცდა, რომ მათ სახელმწიფო იცავს.
- თქვენ დღეს საგარეო საქმეთა მინისტრთან გამართულ შეხვედრას ესწრებოდით. რა პოზიცია აქვს საგარეო საქმეთა მინისტრს ამ საკითხზე?
- შეხვედრაზე ამათან დაკავშირებით მასთან არ გვქონია საუბარი. საგარეო საქმეთა მინისტრს ეს საკითხი ნაკლებად ეხება.
- მინისტრთან კონკრეტულად რაზე იყო საუბარი?
- მან ისაუბრა ჩვენი ქვეყნის აქტიურ მუშაობაზე ევროკავშირთან, ასევე ჩინეთთან, ინდოეთთან და ამერიკის შეერთებულ შტატებთან მიმართებით. მოგეხსენებათ, რომ ჩვენი ელჩი აშშ-ში ტრამპს შეხვდა და შესაბამისად, მინისტრის საუბარიც ამას მოიცავდა. მან უბრალოდ ჩვენი დიპლომატიის აქტიურ მუშაობას გაუსვა ხაზი.
„რეზონანსი“, 07 აპრილი, 2017 წელი
ინტერვიუ სოსო ცინცაძესთან: „სანკტ-პეტერბურგში მომხდარი ტერაქტი სირიის მოვლენებში რუსეთის ჩართვის შედეგია“
ია აბულაშვილი
ევროპარლამენტმა მხარი დაუჭირა, ევროპის კომისიის წინადადებას უკრაინისთვის უვიზო რეჟიმის მინიჭების შესახებ. როგორც უკრაინული მედია იტყობინება, უკრაინისთვის უვიზო რეჟიმის მინიჭებას მხარი დაუჭირა 521 დეპუტატმა, წინააღმდეგ ხმა მისცა 75-მა და თავი შეიკავა 36 დეპუტატმა.
ევროპარლამენტის ამ გადაწყვტილებასთან დაკავშირებით პირველი შეფასებები უკვე გაკეთდა. ექსპერტთა გარკვეული ნაწილი არ გამორიცხავს, რომ უკრაინისთვის ამ დადებით მოვლენას შეიძლება რუსეთისშაგ შარკეული უარყოფითი რეაქცია მოჰყვეს. ამ საკითხთან დაკავშირებით “რეზონანსი” პოლიტოლოგ სოსო ცინცაძეს ესაუბრა.
იგი სანტკ-პეტერბურგში მომხდარ ტერაქტსაც შეეხო. ცინცაძის ვარაუდით, რუსეთის საპრეზიდენტო არჩევნების მოახლოებასთან ერთად, რუსეთის ტერიტორიაზე მსგავსი ტერაქტები გახშირდება. ცნობისათვის: რუსეთში საპრეზიდენტო არჩევნები 2018 წელსაა დაგეგმილი.
- თქვენი აზრით, რა რექცია ექნება რუსეთს ევროპარლამენტის ამ გადაწყვეტილებასთან დაკავშირებით და რამდენად შეეგუება იგი ახლა უკვე ევროპის გზისკენ მიმავალი უკრიანის პერსპექტივას?
- საბოლოო გადაწყვეტილებამდე საჭიროა რამდენიმე პროცეუდრის გავლა, ანუ კენჭისყრის შემდეგ ევროპარლამენტის გადაწყვეტილება უნდა დაამტკიცოს ევროკავშირის წევრი ქვეყნების მუდმივ წარმომადგენელთა კომიტეტმა, შემდეგ კი ევროკავშირის საბჭომ. ამის შემდეგ საკანონმდებლო აქტს ხელი უნდა მოაწეროს ევროპარლამენტის პრეზიდენტმა.
რაც შეეხება რუსეთის რეაქციას ამ საკითხთან მიმართებაში, როგორც ჩანს ეს მათთვის, როგორც სხვა ქვეყნებისთვის, სენსაცია არ იყო. ანალოგიური მიდგომა მოხდა საქართველოს შემდეგ უკრაინასთან მიმართებაშიც; იგივე პირობებით რაც საქართველოს მიმართ იქნა წაყენებული. ჯერ-ჯერობით ოფიციალური კომენტარები რუსეთის ხელისუფლებას ამ საკითხთან დაკავშირებით არ გაუკეთებია და ისეთი პოზიცია უკავიათ, თითქოს საერთოდ არ აინტერესებთ ეს საკითხი, ვნახოთ რა რეაქცია ექნებათ შემდგომში. რუსეთს დღეს თავისი შიდა პრობლემებიც საკმარისი აქვს…
- შიდა პრობლემებში ალბათ ერთ-ერთი სანკტ-პეტერბურგში მომხდარი ტერაქტია, თავად რუსი ექსპერტები არ გამორიცხავენ, მომხდარი ტერაქტი შეიძლება პუტინმა სწორედ ოპოზიციის წინააღმდეგ რეპრესიების გაძლიერებისთვის გამოიყენოს. ეთანხმებით ამ მოსაზრებას?
- სანკტ-პერეტბურგში მომხდარი ტერაქტი სირიის მოვლენებში რუსეთის ჩართვის შედეგია და თუ აქამდე მთავარი სამიზნე როგორც “ალ ქაიდას”, ისე “ისლამური სახელმწიფოსი” იყო ევროპა და ამერიკა, ახლა მთავარ სამიზნედ იქცა რუსეთი და ასეთი რამდენიმე შემთხვევა დაფიქსირდა. ერთი უნდა აღინიშნოს – მოგვწონს თუ არ მოგვწონს, რუსეთის სპეცსამსახურები ოპერატიულად მუშაობენ. ბოლო თვეებში მათ 60-მდე შემთხვევა აღკვეთეს. პეტერბურგის მოვლენების შემდეგ აღმოჩენილია სხვადასხვა ადგილებში დამონტაჟებული ასაფეთქებელი მოწყობილობები, უკვე რამდენიმე ეჭვმიტანილი დაპატიმრებულია. იყო საფრთხე იმისა, რომ პუტინი ამას გამოიყენებდა შიდა რეჟიმის გამკაცრებისათვის და ქანჩების მოჭერისათვის, მაგრამ თუ ვენდობით დუმის სპიკერის განცხადებას, მან უკვე საჯაროდ განაცხადა, რომ ეს ტერორისტული აქტი არავითარ შემთხვევაში არ უნდა იქნეს გამოყენებული ოპოზიციის წინააღმდეგ რესპრესიების გაძლიერებისთვის. როგორც ჩანს, ხელისუფლება მაინც ერიდება შიდა პოლიტიკის განმკაცრებას.
სიმბოლური ის იყო, რომ ადრე პეტერბურგში არცერთი ტერორისტული აქტი არ ხდებოდა, ძირითადი სამიზნე იყო მოსკოვი და სამხრეთ რუსეთის ქალაქები. ეს არის პირველი შემთხვევა, თანაც ეს დაემთხვა თუ დაამთხვიეს პუტინის ვიზიტს პეტერბურგში. უკვე იმასაც ვაქცევთ ყურადღებას – ეს იყო გათვლილი დარტყმა პუტინის მისამართით, მის მშობლიურ ქალაქში, მისი იქ ყოფნის დროს მოხდა ეს ფაქტი.
ყურადსაღებია ისიც, რომ თუ ევროპაში ძირითადად ტერორისტული აქტების ორგანიზატორები და შემსრულებელები იყვნენ და არიან ახლო აღმოსავლეთიდან გადმოსულები, რუსეთში ძირითადად ცენტრალური აზიის მცხოვრებლები არიან. მათგან უკვე ბევრი რუსეთის მოქალაქეა. ეს ართულებს პუტინის ხელისუთფლების ბრძოლას ტერორიზმთან. ასე რომ, ექსპერტები ვარაუდობენ ასეთი ტერორისტული აქტების გახშირებას, განსაკუთრებით რაც უფრო მოახლოვდება საპრეზიდენტო არჩევნები.
