„კვირის პალიტრა“: ინტერვიუ სანდრო თვალჭრელიძესთან: „ბირჟა მაფიის“ ირგვლივ ყველაფერი უნიჭოდ დადგმულ სპექტაკლს ჰგავს“ // „ის, რაც ოთარ ფარცხალაძის გარშემო ხდება, ამ ხელისუფლების მმართველობის ლაქაა, მათ შორის გიორგი ბადაშვილის მოხსნა-დანიშვნა“ // „მახარებს საზოგადოების სწრაფი და სწორი რეაქცია, რაც ცხადყოფს, რომ ამ ქვეყანაში ანგარიშსწორებისა და შურისძიების საშუალება არავის მიეცემა“

„კვირის პალიტრა“: ზაალ უდუმაშვილი: „დრო მჭირდება, რომ ჩამოვყალიბდე, ვარ თუ არა მზად მერის არჩევნებისთვის“ // ჯარჯი აქიმიძე: „ერთი პარტიის ორი განაყოფი ცდილობს, ტელევიზიაში გავლენის სფეროები ერთმანეთს წაართვას… „რუსთავი-2“-ში ისეთი ფინანსური პრობლემებია, შესაძლოა, მალე ტელევიზიამ თავი გაკოტრებულად გამოაცხადოს. ეს ჩვეულებრივი პარტიული ბრძოლაა, რომელსაც ტელევიზია ეწირება“ // გია ხუხაშვილი: „ნაციონალური მოძრაობის“ გაყოფის შემდეგ მოსალოდნელიც იყო, რომ „რუსთავი-2“-ში მოვლენები ამ სცენარით განვითარდებოდა“

„კვირის პალიტრა“: ინტერვიუ ლეილა მუსტაფაევასთან: „აფგანი ბოლოს საქართველოში ალიევების ბიზნესინტერესებზე წერდა“

—–

„ახალი თაობა“: გადაახტება თუ არა შინაგან საქმეთა სამინისტრო ბერა ივანიშვილს? // ინტერვიუ ზვიად კუპრავასთან: „ბირჟა მაფიის“ წევრების კლიპით მე, როგორც ყოფილი პოლიციელი, შეურაცხყოფილი დავრჩი, მაგრამ ის, თუ რა გაგრძელებაც ამ კლიპს მოჰყვა, აბსოლუტურად მიუღებელია“ // „პატრიარქი სრულ იზოლაციაშია» // „სოსო ოხანაშვილის სიცოცხლეს საფრთხე ემუქრება“

„ახალი თაობა“: ინტერვიუ გიორგი კახიანთან: „ჩვენი მაჟორიტარების ნაწილი პროპორციულ სისტემაზე გადასვლას ეწინააღმდეგება“ // „5%-იანი ბარიერი და პოლიტიკური ბლოკების გაუქმება პარტიულ სისტემას მხოლოდ გააძლიერებს“

„ახალი თაობა“: ინტერვიუ ალეკო ელისაშვილთან: „არჩევნების მოსაგებად ხალხის დიდი მხარდაჭერა და ცოტა ფულია საჭირო“

„ახალი თაობა“: ინტერვიუ მამუკა გამყრელიძესთან: „რუსთავი-2“-ის ფინანსური კრიზისი ნიკა გვარამიას ბრალია“ // „ზაალ უდუმაშვილის კანდიდატურას თბილისის მერის პოსტზე სკეპტიკურად ვუყურებ“

—–

„კვირის პალიტრა“: „გაზის ტარიფი ზაფხულში გაიზრდება!“ // „სამი შუამავალი კომპანიის რეალური ფუნქცია მხოლოდ ფასნამატის შექმნაა“

„კვირის პალიტრა“: ჭიჭიკო ბენდელიანის რუსულ პოლკს საქართველო ყირიმიდან დაუბომბავს… // რას წარმოიდგენდა უშიშარი ქართველი მფრინავ-გამანადგურებელი, რომ მისი პოლკის “შთამომავლები” 67 წლის შემდეგ მის სამშობლოს დაბომბავდნენ…

———————

„კვირის პალიტრა“, 12 ივნისი, 2017 წელი

ინტერვიუ სანდრო თვალჭრელიძესთან: „ბირჟა მაფიის“ ირგვლივ ყველაფერი უნიჭოდ დადგმულ სპექტაკლს ჰგავს“ // „ის, რაც ოთარ ფარცხალაძის გარშემო ხდება, ამ ხელისუფლების მმართველობის ლაქაა, მათ შორის გიორგი ბადაშვილის მოხსნა-დანიშვნა“ // „მახარებს საზოგადოების სწრაფი და სწორი რეაქცია, რაც ცხადყოფს, რომ ამ ქვეყანაში ანგარიშსწორებისა და შურისძიების საშუალება არავის მიეცემა“

ნათია დოლიძე

გასულ კვირას საქართველოს კონსტიტუციაში დაგეგმილი ცვლილებების თაობაზე ვენეციის კომისიის წინასწარი დასკვნა გახდა ცნობილი, თუმცა, როგორც მალევე გაირკვა, დოკუმენტი საიდუმლო იყო და არ უნდა გასაჯაროებულიყო. როგორც პარლამენტის თავმჯდომარე ირაკლი კობახიძემ განაცხადა, მომხდარმა ვენეციის კომისია შეაშფოთა და საქართველოს ხელისუფლებას საყვედურის მოსმენაც მოუხდა.

ირაკლი კობახიძე კომიტეტის სხდომაზე შეეცადა, გაერკვია, ვისგან გაჟონა ინფორმაციამ და შეიძლება ითქვას, რომ ხელი პირდაპირ პრეზიდენტის ადმინისტრაციისკენ გაიშვირა, სადაც ამას კატეგორიულად გამორიცხავენ. როგორც გიორგი მარგველაშვილის ადმინისტრაციაში ამბობენ, პრეზიდენტს ეს დოკუმენტი საერთოდ არ მიუღია. მოკლედ, ამ ურთიერთბრალდებებში თავად დოკუმენტის არსი და ვენეციის კომისიის რეკომენდაციების მნიშვნელობა საინფორმაციო ველში, ფაქტობრივად, ჩაიკარგა. ინტერვიუ ექსპერტ სანდრო თვალჭრელიძესთან­ სწორედ­ ამ საკითხზე საუბრით დავიწყეთ:

- ის, რასაც ვენეციის კომისიის წინასწარი დასკვნის გავრცელების შემდეგ ვადევნებდით თვალს, მძიმე საყურებელი იყო. არაერთხელ მითქვამს, რომ ჩვენში სახელმწიფო მოხელეებს სახელმწიფოებრივი აზროვნების სერიოზული პრობლემა აქვთ. არა აქვს მნიშვნელობა, ინფორმაციამ საიდან გაჟონა – საპარლამენტო უმრავლესობიდან, პრეზიდენტის ადმინისტრაციიდან თუ კიდევ საიდანმე, სამწუხაროდ, ეს მხოლოდ ერთ რამეს აჩვენებს – სახელისუფლებო გუნდში არიან პირები, რომლებსაც სახელმწიფოებრივად აზროვნება არ შეუძლიათ, ვერ გრძნობენ პასუხისმგებლობას და არ შეუძლიათ საიდუმლოს შენახვა, რაც სხვა შემთხვევაში შეიძლება სავალალო აღმოჩნდეს ქვეყნისთვის. ამჯერად ჩავთვალოთ, რომ ეს არ არის ისეთი ინფორმაცია, რისი გასაჯაროებაც ქვეყანას დიდ საფრთხეს შეუქმნიდა, მაგრამ სავარაუდოდ, არც საფრთხის შემცველი ინფორმაციაა მათ ხელში დაცული. სხვა რა შეიძლება დაერქვას ამას, თუ არა სახელმწიფო ინტერესების დაზიანება?! ფაქტია, რომ უმაღლესი რანგის ჩინოვნიკები არასახელმწიფოებრივად მოიქცნენ!

- წინასწარი დასკვნა გასაჯაროებულია და ამას აღარაფერი ეშველება. საინტერესოა დოკუმენტში გამოთქმული შენიშვნების შეფასება. გავიხსენოთ ისიც, რომ “ქართული ოცნების” წარმომადგენლები აქამდე ხშირად იმეორებდნენ, რომ ვენეციის კომისიის რეკომენდაციებს აუცილებლად გაითვალისწინებდნენ...

- არ შეიძლება თავმოყვარე ქვეყნის პარლამენტი ასეთ დიდ მნიშვნელობას ანიჭებდეს გარედან ნაკარნახებ დირექტივებს, როდესაც საქმე ქვეყნის კონსტიტუციას შეეხება. ეს მხოლოდ და მხოლოდ იმაზე მიანიშნებს, რომ ასეთ პარლამენტს საკმარისი კომპეტენცია არა აქვს. რაც შეეხება ვენეციის კომისიის შენიშვნებს, წინასწარი დასკვნის მიხედვით შეიძლება ითქვას, რომ ისინი უფრო ტექნიკურია, ვიდრე პოლიტიკური. ხელისუფლებას მოვუწოდებ, გაითვალისწინოს ვენეციის კომისიის რჩევა და რაც შეიძლება მეტი საკითხი გადაწყდეს კონსენსუსის გზით. რასაც კონსტიტუციის განხილვა დაარქვეს, ეს განხილვის კარიკატურა იყო – დადიოდნენ კონკრეტული პირები თავიანთი პარტიზანებით და სხვადასხვა რეგიონში ერთმანეთს ეჯიკავებოდნენ.

დამერწმუნეთ, მთელმა ამ პროცესმა ჩვენი საზოგადოების მნიშვნელოვანი ნაწილის ყურადღების მიღმა ჩაიარა. ხელისუფლებამ ვერ მოახერხა ამ საკითხით საზოგადოების დაინტერესება და მივიღეთ ის, რაც მივიღეთ. პარტიები, პოლიტიკოსები მიდიან და მოდიან, კონსტიტუცია და საზოგადოება, რომელმაც უნდა იხელმძღვანელოს ამ დოკუმენტით, რჩება, ამიტომ უმნიშვნელოვანესია, რომ ის შეიქმნას დიდი საზოგადოებრივი კონსენსუსის შედეგად, მათ შორის პოლიტიკური კონსენსუსიც იგულისხმება, რაც ყველაზე მეტად აკლია ამ საკონსტიტუციო პროცესს. ეს ჩვენი ქვეყნის ძირითადი კანონია, რომლითაც უნდა ისარგებლოს ყველა მოქალაქემ და მას აქვს უფლება, მის შექმნაში მონაწილეობდეს…

- როგორც მოსალოდნელი იყო, ვენეციის კომისიას ყველაზე მნიშვნელოვანი შენიშვნა საპარლამენტო არჩევნებისას ე. წ. გაუნაწილებელი მანდატების განაწილების წესთან აქვს და შემდეგ რეკომენდაციებს იძლევა: პროპორციული განაწილება ყველა პოლიტიკურ პარტიაზე, რომელმაც 5%-იანი ბარიერი გადალახა; მოგებული პარტიისთვის გაუნაწილებელი ხმების განაწილების ზღვრის დადგენა ან ბარიერის შემცირება 2-3%-მდე...

- ჩემი აზრით, მე-4 ვარიანტი გამორჩათ – ყველაზე მარტივად ამ საკითხს მოაგვარებდა იმ სისტემის დატოვება, რაც ახლა მოქმედებს. ვგულისხმობ იმას, რომ მე დიდად არ ვემხრობი მაჟორიტარული სისტემის გაუქმებას, რაც თავის დროზე სწორედ ვენეციის კომისიის რეკომენდაცია გახლდათ და ამ ხელისუფლებამ გადაწყვიტა მისი შესრულება. ვფიქრობ, ეს შეცდომაა. გასაგებია, რომ ჩვენი ისტორიული გამოცდილებით ამ სისტემას აქვს ხარვეზები, ხშირად არ მუშაობდა ისე, როგორც უნდა ემუშავა და მასში გამარჯვებას მაინც იმ პარტიის წარმომადგენლები აღწევდნენ, რომელიც იმარჯვებდა, მაგრამ მიმაჩნია, რომ თანდათან ჩვენში მოქალაქეობრივი პასუხისმგებლობა ისე გაიზრდება, რომ კვლავაც დღის წესრიგში დადგება, ამომრჩეველმა კონკრეტულ პირებს მისცეს ხმა და არა გაუგებარ პარტიულ სიას, სადაც ჩაწერილ პირთა უმრავლესობის ბიოგრაფიასა და საქმიანობაზე თითქმის არაფერი ეცოდინება. მაჟორიტარული სისტემა ასეთი ცუდი თუ არის, წამყვან, ძველი დემოკრატიის ევროპულ ქვეყნებში რატომ არ აუქმებენ?

ჩემი აზრით, 5%-იანი საარჩევნო ბარიერის დაწევა, რასაც ვენეციის კომისია ერთ ვერსიად გვთავაზობს, არასწორი იქნება. რა უნდა პარლამენტში იმ პარტიას, რომელსაც ამომრჩევლის 5%-ზე ნაკლებმა მისცა ხმა?

- კიდევ ერთი თემა, რომელიც ჩვენშიც აზრთა სხვადასხვაობას იწვევს და ვენეციის კომისიის ყურადღების ცენტრშიც მოექცა, ქორწინების შესახებ ჩანაწერია. კომისია მიიჩნევს, რომ ქორწინებასთან დაკავშირებული მუხლი არავითარ შემთხვევაში არ უნდა იძლეოდეს ერთსქესიანი პარტნიორობის აკრძალვის ინტერპრეტირებას...

- სამწუხაროდ, ბოლო ხანს ჩვენს ხელისუფლებას დასჩემდა ძალიან მნიშვნელოვან საკითხებშიც კი პოპულისტური მიდგომები. თითქოს არაპოპულარული გადაწყვეტილებების მიღების ეშინია. დღეს ასეთი ჩანაწერი კონსტიტუციაში ხომ არ არსებობს, აი, მოიწადინეს შოთამ და გივიმ და მოითხოვეს ქორწინების რეგისტრაცია, შეძლებენ ამას? – რა თქმა უნდა, ვერა, რადგან კანონი ამის უფლებას არ იძლევა! არ არის საჭირო საკონსტიტუციო დონეზე მტკივნეული და არაფრისმომცემი საკითხების განხილვა, მით უფრო, რომ ეს ძალიან კარგად რეგულირდება სამოქალაქო კოდექსით. რა საჭიროა ამის კონსტიტუციაში ჩაწერა?! – მხოლოდ იმიტომ, რომ გარკვეული ჯგუფების გული მოიგოს ხელისუფლებამ? – არ არის საჭირო ასეთი მნიშვნელოვანი დოკუმენტების კონკრეტულ ინტერესებზე მორგება, ეს არ შეიძლება! ეს ხომ ღია კარში ბურთის გატანას ჰგავს?!

- კიდევ ერთი საკითხი, რომელიც ოპონენტებმა ასე პოპულისტურად შეაფასეს, უცხოელებისთვის მიწის მიყიდვის აკრძალვის შესახებ კონსტიტუციაში ჩანაწერის გაჩენაა, რის თაობაზეც მიღებული გადაწყვეტილება გასულ კვირას პრემიერმა გიორგი კვირიკაშვილმა გაახმაურა…

- როდესაც დამოუკიდებლობის მოპოვების შემდეგ ეს მიწები განსახელმწიფოებრივდა, სასოფლო-სამეურნეო მიწის ძალიან დიდი ფართობები გაუნაწილებელი დარჩა. სახელმწიფო ახლა მათ გაყიდვას ცდილობს, მე კიდევ მგონია, რომ ეს მიწები ისევ უსასყიდლოდ უნდა გადაეცეს საქართველოს მოქალაქეებს, რათა ამით ხელი შეეწყოს ძლიერი ფერმერული მეურნეობების შექმნას.

- რას ფიქრობთ “რუსთავი 2″-ში განვითარებულ მოვლენებზე. გავრცელებული ინფორმაციით, ნიკა გვარამიამ ტელეკომპანიის გენერალური დირექტორის პოსტი დატოვა. ერთ-ერთი ვერსიით, შესაძლოა, ის აქტიურ პოლიტიკაში დაბრუნდეს…

- ვინაიდან არა გვაქვს კონკრეტული ინფორმაცია, თუ რა დგას ყოველივე ამის უკან, ძნელია შეფასების გაკეთება. ითქვა, რომ გვარამიას წასვლა თითქოს ფინანსურ პრობლემებს უკავშირდება, ეს კი არადამაჯერებელია, რადგან ეს პრობლემები დღეს არ წარმოშობილა. ამის უკან აშკარად პოლიტიკური პროცესია, მაგრამ რა და როგორი, გამიჭირდება თქმა. შესაძლოა, ის, რომ ისე არ მიდის სტრასბურგში საქმე, როგორც გვარამიას სურს, ან გვარამია მიხვდა, რომ ახალგაზრდა კაცია, მომავალი აქვს და ეს მომავალი არ უნდა შესწიროს კონკრეტულ იდეას… იქნებ უნდა ადამიანს რაღაცის შეცვლა, რათა რესტორანში შესვლის აღარ ეშინოდეს.

ბუნებრივია, პროცესი პოლიტიზებულია, რადგან “რუსთავი 2″ პოლიტიკური წარმონაქმნია. ვნახოთ, როგორ განვითარდება მოვლენები, დაახლოებით ორ კვირაში უკეთესად გამოჩნდება, რა პროცესის მომსწრენი ვართ. გვარამიას ბევრი რამ შეიძლება ვუსაყვედუროთ, მაგრამ ის აშკარად არ არის სულელი, მეტიც, ჭკვიანი კაცია!

- სანამ ნიკა გვარამიას გადადგომაზე გავრცელდებოდა ინფორმაცია, ის და ზაალ უდუმაშვილი უკრაინას სტუმრობდნენ. ერთ-ერთი ვარაუდით, გვარამიას გადადგომა სწორედ იქ გადაწყდა. გამოითქვა ეჭვი, რომ მას მერე, რაც ნიკა გვარამიას პოლიტიკური სიმპათიები “ნაციონალური მოძრაობიდან” გამოყოფილი “ევროპელი დემოკრატებისკენ” გადაიხარა, მას სააკაშვილი აღარ ენდობოდა...

- ჩემი აზრით, რაც მეტი დრო გავა, სულ უფრო ნაკლები გავლენა ექნება ბატონ სააკაშვილს “რუსთავი 2″-ზე, ამას ისიც გრძნობს და ცდილობს, ეს გავლენა როგორმე შეინარჩუნოს. არ არის გამორიცხული, ცვლილებები არხზე ამასაც უკავშირდებოდეს. გავრცელებული ინფორმაციით, არხის თანამშრომლებს ბოლო რამდენიმე თვის განმავლობაში ხელფასს, ფაქტობრივად, არ აძლევდნენ. შესაძლოა, საკითხი ასეც დამდგარიყო, დამფუძნებლებს გვარამიასთვის წაეყენებინათ ულტიმატუმი – ან გადადგები, ან არ დავაფინანსებთ ტელეკომპანიასო.

სააკაშვილი აშკარად ებღა­უჭება გავლენებს საქართველოში, მაგრამ ისე ჩანს, რომ მისი სამიზნე მაინც უკრაინაა, თუმცა “რუსთავი 2″-ს ინახავს და არაფრით დათმობს ნებით.

- მოგეხსენებათ, “ნაციონალურმა მოძრაობამ” თბილისის მერის არჩევნებში მონაწილეობა შესთავაზა “რუსთავი 2″-ის ტელესახეს და გენდირექტორის მოადგილე ზაალ უდუმაშვილს. როგორც ამბობს, შეთავაზება პირადად სააკაშვილისგან მიიღო…

- ვფიქრობ, არჩევანი შემთხვევითი არ არის. ფაქტია, უდუმაშვილი გაცილებით გაწონასწორებული ადამიანია, ვიდრე მელია. ის წლებია საზოგადოების თვალწინაა და აშკარად სიმპათიით სარგებლობს. როგორც ჩანს, ჰგონიათ, რომ უდუმაშვილისთანა ფიგურით წარმატებას მიაღწევენ, მაგრამ “ნაციონალურ მოძრაობას” არანაირი შანსი იმისა, რომ მოიგოს თბილისის მერის არჩევნები, არა აქვს, თუმცა, არც იმ მოსაზრებას დავეთანხმები, რომ კახი კალაძე უალტერნატივო ფიგურაა. დარწმუნებული ვარ, თბილისის მერის არჩევნებში მეორე ტური გაიმართება, საკმაოდ სერიოზული კონკურენციით.

- რადგან კახი კალაძე ახსენეთ, საინტერესოა, რამდენად სწორი იქნება “ქართული ოცნების” არჩევანი, თუ თბილისის მერობის კანდიდატად სწორედ კალაძე დაასახელეს?

- დავით ნარმანიას ვიცნობ, ის კარგი ეკონომისტია, მაგრამ ბოლო წლებმა აჩვენა, რომ თბილისის მერობა მის კომპეტენციას აშკარად სცილდება. ჩემი აზრითაც, თბილისის მერი აუცილებლად თბილისელი უნდა იყოს, ამას უარგუმენტოდ არ ვამბობ. საქმე ის არის, რომ აქ ძალიან ბევრი ისეთი პრობლემაა, რომელიც ზედაპირზე არ ჩანს და ამის დანახვა მხოლოდ აქ დაბადებულ ადამიანს შეუძლია. ვშიშობ, ბატონ კახი კალაძეს ამ პრობლემების ნაწილიც კი არა აქვს გააზრებული. კახა კალაძე კარგი მენეჯერია, მაგრამ პოლიტიკაში თამაშობს ისე, როგორც ფეხბურთს თამაშობდა – სწორხაზოვნად, მეტიც, ძალიან სწორხაზოვნად.
მის შესახებ ბევრი კითხვა ისმის და ჭორი ვრცელდება – ის, რომ ენერგეტიკაში ყველაფერი დალაგებული არ არის, რომ იქ კორუფციული გარიგებებია, რომ სამართალდამცავ სტრუქტურებზე ირიბი, მაგრამ ძლიერი გავლენა აქვს და ა.შ. მაგრამ ეს ყველაფერი, ჯერჯერობით, მოარული ხმებია, რომელთა დასაბუთება არ ჩანს, ამიტომ ჭორებზე ლაპარაკი არ ღირს… ერთადერთი, რაც შემიძლია ვთქვა, ის არის, რომ მე განცვიფრებულიც კი ვარ, როგორ გაიზარდა ეს ადამიანი ბოლო წლების განმავლობაში, მაგრამ დამოუკიდებელ პოლიტიკოსამდე და სახელმწიფო მოღვაწემდე მაინც ძალიან ბევრი აკლია. ჩემი აზრით, მას არ შეუძლია დამოუკიდებელი პოლიტიკის წარმოება. პროფესიული კომპეტენციაც აკლია, თუნდაც “გაზპრომთან” მოლაპარაკებები გავიხსენოთ. როგორც აღმოჩნდა, ნორმალური მრჩეველიც არ ჰყავდა – რუსეთი იმუქრებოდა, რომ ირანიდან შეიტანდა სომხეთში გაზს, კალაძემ კი არც ირანის სიტუაცია იცოდა, არც პოლიტიკური ძალების განლაგება და არც ირანისა და სომხეთის დამაკავშირებელ ინფრასტრუქტურაზე ჰქონდა წარმოდგენა. ის, როგორც სპორტიდან მოსული კაცი, საკმაოდ ხისტი და მებრძოლია, მაგრამ, მეეჭვება, თბილისის გაძღოლისთვის საჭირო კომპეტენცია ჰქონდეს!

- გიორგი ბადაშვილის ახალმა პოსტმა ბევრი კითხვა გააჩინა. ის მთავარი პროკურორის მოადგილედ დანიშნეს…

- კარგია, რომ ბადაშვილი ჩამოაშორეს ფინანსთა სამინისტროს საგამოძიებო სამსახურს, მაგრამ მთავარ პროკურატურაში მისმა გადაყვანამ საზოგადოება გააღიზიანა.
ის, რაც ფარცხალაძის გარშემო ხდება, ამ ხელისუფლების მმართველობის ლაქაა, მათ შორის ბადაშვილის მოხსნა-დანიშვნაც. დაგვავიწყდა, რა დამართეს ქვეყანას კოლექტიურმა კეზერაშვილებმა და უდესიანებმა?! თუ მათი “გზის გამგრძელებლები”დროულად არ ალაგმეს, ამ დაჯგუფებების საცეცები საზოგადოების ყველა სფეროში შეაღწევს… მე არც თორდიას ვენდობი, მიმაჩნია, რომ ის და ფარცხალაძე ერთი ცომისგან არიან მოზელილი და ამაში უბედურება არაფერი იქნებოდა, ხელისუფლებაში მათი ფორმალური თუ არაფორმალური ყოფნა რომ არა. ჩემი აზრით, თორდიაც გასაშვებია თანამდებობიდან, კარგია, უკვე მალე რომ ეწურება ვადა. ასეთი სახელმწიფო ჩინოსნები ქვეყნისთვის ყველაზე დიდი პრობლემაა. ამ 25 წლის განმავლობაში ვერ მოვახერხეთ გაგვეზარდა ნორმალური, პატრიოტი, პატიოსანი სახელმწიფო ჩინოსნები.

- თუ გავითვალისწინებთ, ფარცხალაძის უეცრად გამდიდრების თაობაზე გავრცელებულ ინფორმაციას, მას მართლაც ხშირად ადარებენ დავით კეზერაშვილს...

- რას ვიზამთ, კეზერაშვილიც და ფარცხალაძეც ბედკრული საქართველოს შვილები არიან. მათი მსგავსნი საბჭოთა პერიოდშიც მრავლად იყვნენ. ჩემი აზრით, ეს არის ჩვენი ყველაზე დიდი პრობლემა, რომელიც მერაბ მამარდაშვილმა შეაფასა, როგორც გადასხვაფერება ცვლილებების გარეშე. მოკლედ, კოსმეტიკური გადასხვაფერება ხდება, შინაგანად, მენტალურად კი იგივენი არიან…

- დიდი გამოხმაურება მოჰყვა რეპჯგუფ “ბირჟა-მაფიის” 2 წევრის დაკავებას. მათ შსს ნარკოდანაშაულს ედავება, თუმცა ისინი აცხადებენ, რომ მათი დაკავება იმ კლიპის გამო მოხდა, რომელშიც პოლიცია გააშარჟეს. მომხდარს საზოგადოების ნეგატიური რეაქცია მოჰყვა, გაიმართა საპროტესტო აქცია, შექმნილ ვითარებას გამოეხმაურა პრემიერიც… თქვენზე რა შთაბეჭდილებას ტოვებს ეს ყველაფერი?

- ისეთივეს, რაც სახალხო დამცველმა თქვა, ანუ ანგარიშსწორების. ჯერჯერობით ნაადრევია რაიმეს დანამდვილებით თქმა, მაგრამ ეს ყველაფერი უნიჭოდ დადგმულ სპექტაკლს ჰგავს. დაველოდოთ პროკურატურის გამოძიების შედეგებს, რომელიც შსს-ს წარმომადგენელთა ქმედებებს გამოიძიებს. მახარებს საზოგადოების სწრაფი და სწორი რეაქცია, რაც ცხადყოფს, რომ ამ ქვეყანაში ანგარიშსწორებისა და შურისძიების საშუალება არავის მიეცემა. ჩვენი სამოქალაქო საზოგადოება ვითარდება და აღვირახსნილობის უფლებას აღარავის მისცემს. ამ შემთხვევაში არა აქვს მნიშვნელობა კლიპის შინაარსსა და ხარისხს, ყველას აქვს აზრის გამოხატვის უფლება ისე, როგორც სურს, და არავის აქვს უფლება, ვინმეს ეს შეუზღუდოს. თუმცა, ვნახოთ, რას იტყვის გამოძიება.

„კვირის პალიტრა“, 12 ივნისი, 2017 წელი

ზაალ უდუმაშვილი: „დრო მჭირდება, რომ ჩამოვყალიბდე, ვარ თუ არა მზად მერის არჩევნებისთვის“ // ჯარჯი აქიმიძე: „ერთი პარტიის ორი განაყოფი ცდილობს, ტელევიზიაში გავლენის სფეროები ერთმანეთს წაართვას… „რუსთავი-2“-ში ისეთი ფინანსური პრობლემებია, შესაძლოა, მალე ტელევიზიამ თავი გაკოტრებულად გამოაცხადოს. ეს ჩვეულებრივი პარტიული ბრძოლაა, რომელსაც ტელევიზია ეწირება“ // გია ხუხაშვილი: „ნაციონალური მოძრაობის“ გაყოფის შემდეგ მოსალოდნელიც იყო, რომ „რუსთავი-2“-ში მოვლენები ამ სცენარით განვითარდებოდა“

რუსუდან შელია

ნიკა გვარამია “რუსთავი 2″-ის გენერალური დირექტორის თანამდებობიდან გადადგა – მართალია, ამ ინფორმაციას თავად გვარამია არ ადასტურებს, თუმცა ტელეკომპანიის თანამშრომლების განცხადებით, 9 ივნისს გამართულ თათბირზე პოსტი დატოვა. საკადრო ცვლილებებია მენეჯმენტშიც – გავრცელებული ინფორმაციით, არხს ტოვებს საინფორმაციო გამოშვება “კურიერის” წამყვანი ქეთი კვაჭანტირაძე და მის ნაცვლად “კურიერს” ჟურნალისტი თამარ ბაღაშვილი წაიყვანს; გიორგი ლაფერაშვილის ნაცვლად ტელეკომპანიის საინფორმაციო სამსახურს ნოდარ მელაძე უხელმძღვანელებს. ტელევიზიაში მიმდინარე ცვლილებებზე “კვირის პალიტრას” ჟურნალისტი ზაალ უდუმაშვილი ესაუბრა:

- საზოგადოებისთვის ცნობილი იყო, რომ “რუსთავი 2″-ში რეორგანიზაცია გამოცხადდა, რომლის მიზეზიც ფინანსური პრობლემებია. საკადრო ცვლილებებიც სწორედ ამით იყო განპირობებული, თუმცა კონკრეტულ გადაწყვეტილებას ჯერჯერობით ვერ გავასაჯაროებ. ყველაფერი უახლოეს დღეებში გახდება ცნობილი – რაც შეეხება ნიკა გვარამიას, ის ამ ეტაპზეც ოფიციალურად “რუსთავი 2″-ის გენერალური დირექტორია…

- ტელევიზიაში 9 ივნისს გამართული თათბირის შემდეგ ჟურნალისტების ნაწილმა­ დაადასტურა, რომ გვარამია გადადგა. ოფიციალურად მის დირექტორად ყოფნაზე იმიტომ­ მიანიშნებთ, რომ ახლა კონტრაქტის გაწყვეტის მხოლოდ ფორმალური დეტალებია დარჩენილი?

- ვიმეორებ, გვარამია ახლაც “რუსთავი 2″-ის დირექტორია. სხვა ინფ­ორმაციას არ ვადასტურებ. “რუსთავი 2″-ს ფინანსური პრობლემები აქვს და ასეთ პირობებში რეორგანიზაცია ჩვეულებრივი მოვლენაა.

- რა ფინანსური პრობლემები აქვს არხს? თქვენი შეფასებით, ნიკა გვარამიას მენეჯერობით კრიზისს ტელევიზია ვერ დასძლევდა?

- რა თქმა უნდა, დასძლევდა, თუმცა ყველა დეტალი უახლოეს დღეებში გახდება­ ცნობილი. რაც შეეხება ფინანსურ პრობ­ლემებს, ჩვენ ორი წელი ყადაღის პირობებში ვმუშაობდით, ვალდებულებაც მრავლად დაგროვდა. ახლა ხარჯებს ვამცირებთ, რეორგანიზაციაც ამიტომ არის აუცილებელი და ამის შესახებ ბოლო თათბირზე ბევრი ვიმსჯელეთ.

- არსებობს მოსაზრება, რომ “რუსთავი 2″-ში დაწყებული პროცესი “ნაციონალურ მოძრაობასა” და “ევროპულ საქართველოს” შორის გავლენების გაყოფას უკავშირდება…

- ტელევიზიაში მხოლოდ ფინანსური პრობლემებია, ვცდილობთ, გავუმკლავდეთ.

- თათბირების სერიების დაწყებამდე თქვენ და გვარამია უკრაინაში იმყოფებოდით. “ნაცმოძრაობამ” მერობის კანდიდატობა შემოგთავაზათ, გვარამიას საკითხიც იქვე გადაწყდა?

- უკრაინაში “ნაციონალური მოძრაობის” ლიდერებს შევხვდი და შეთავაზებაც მივიღე, თუმცა ამაზე საუბარი ნიკა გვარამიას თანდასწრებით არ ყოფილა. გვარამია უკრაინაში სხვა შეხვედრაზე გახლდათ, არხის დამფუძნებლებს ტელეკომპანიაში არსებულ ფინანსურ ვითარებას აცნობდა.

- და თქვენ იყრით კენჭს “ნაციონალური მოძრაობიდან” მერობის კანდიდატად?

- თუ ვინმე ახლოსაა პოლიტიკასთან, ჟურნალისტები ვართ, ამიტომაც შემოთავაზება ჩემთვის მოულოდნელი არ ყოფილა­ და არა მგონია, საზოგადოებისთვისაც საკვირველი იყოს. უბრალოდ, დრო მჭირდება, რომ ჩამოვყალიბდე, ვარ თუ არა მზად არჩევნებისთვის, რა ფორმით ჩავერთვები და საერთოდ, გადავწყვეტ თუ არა პოლიტიკაში გადასვლას.

- მთავარი შემაფერხებელი ფაქტორი რა არის თქვენთვის – მმართველი გუნდის ან სხვა პარტიების კონკურენტები, თუ “ნაციონალურ მოძრაობასთან” ასოცირება?

- კონკურენტების რომ მეშინოდეს, არც დავიწყებდი ამ საკითხის განხილვას, მით უმეტეს საჯაროდ. თავიდანვე კარგად ვიცოდი, ვის უნდა დავპირისპირებოდი, უბრალოდ, სხვა ფაქტორებია, რამაც, არ გამოვრიცხავ, პოლიტიკაში გადანაცვლება წლობით გადამადებინოს.

———–

ტელევიზიაში არსებულ ფინანსურ პრობლემებზე საუბრობს “რუსთავი 2″-ის დამფუძნებელი ჯარჯი აქიმიძეც: „ერთი პარტიის ორი განაყოფი ცდილობს, ტელევიზიაში გავლენის სფეროები ერთმანეთს წაართვას – ეს ჩვეულებრივი პარტიული ბრძოლაა, რომელსაც ტელევიზია ეწირება.”რუსთავი 2″ ამ ბრძოლის გამო დიდი ხანია დასუსტებულია და ახლა საერთოდ საეჭვო გახდა, მოახერხებს თუ არა ამ ომის შემდეგ გადარჩენას“, – ამბობს იგი.

- რას გულისხმობთ?

- უზენაესმა სასამართლომ მიიღო გადაწყვეტილება, რომელიც სტრასბურგმა უნდა განიხილოს, თუმცა არავინ იცის, სარჩელის განხილვა როდის დაინიშნება.­ პარალელურად, მე და დათო დვალი პროკურატურაში ვცდილობთ სიმართლის დადგენას, სადაც ჩვენებას ვაძლევთ და დოკუმენტებიც წარვადგინეთ, თუმცა მეშინია, ჩვენი მცდელობა ტყუილუბრალო შრომა არ აღმოჩნდეს და დავის საგანი ქაღალდზეც კი არ შეგვრჩეს.
“რუსთავი 2″-ში ისეთი ფინანსური პრობლემებია, შესაძლოა, მალე ტელევიზიამ თავი გაკოტრებულად გამოაცხადოს. უზარმაზარი ვალებია აღებული, მათ შორის, სახელმწიფოსგანაც, უამრავი რეკლამა ბარტერშია, მანქანებიც კი ვალდებულებებითაა აღებული და შესაძლოა, ისეც მოხდეს, რომ კომპანია უსარგებლო კორპორაციად იქცეს. “ნაციონალურმა მოძრაობამ” ნაძარცვი ფულით ტელევიზია აცოცხლა, თუმცა, როდესაც ფული ამოიწურა, ვალების აღებაზე გადავიდნენ, ახლა კი არ იციან, როგორ მოიქცნენ.

- ფიქრობთ, რომ ვალებს მიზანმიმართულად იღებდნენ? ჰქონდა კომპანიას სხვა გამოსავალი ფინანსური უზრუნველყოფისთვის იმ პირობებში, როდესაც რამდენიმე წელია ტელევიზიის ქონება დაყადაღებულია?

- ვერ გეტყვით, რატომ გაკეთდა ეს მავნებლობა, მაგრამ ფაქტია, “რუსთავი 2″-ის უბედურებით ყველამ იხეირა. პრობლემ­ები კი შუა რგოლზე გადა­ტყდა,­ რომლებსაც თვეების განმავლობაში ხელფასები არ აუღიათ. არადა, ტელევიზიის სახეებმა კი არა, სწორედ ამ შუა რგოლმა მოიტანა ტელევიზია დღევანდლამდე. არ მინდა, ეს ადამიანები სამსახურიდან გაუშვან. ცოტა ხნის წინ პრესკონფერენციაზე­ “რუსთავი 2″-ის ძველი თანამშრ­ო­მელი,­ მძღოლი ვნახე, რომელიც მოვიკითხე და ამის გამო სამსახურიდან გააგდეს.

“რუსთავი 2″-ში ვითარება არ გამოსწორდება, სანამ სამართლიანობა არ აღდგება, ამის შემდეგ მე და დავით დვალი არაფერს დავიშურებთ, რომ საზოგადოებას დავუბრუნოთ ისეთი “რუსთავი 2″, როგორსაც იმსახურებს, და არა რომელიმე პარტიის ქვედანაყოფი და ზონდერმანქანა.

- სამართლიანობის აღდგენა ახსენეთ – სამართლიანობა იქნება, ტელეკომპანია ქიბარ ხალვაშს დაუბრუნდეს, თუ თქვენი საქმე მივიდეს ბოლომდე პროკურატურაში?

- მე, დავით დვალი და ქიბარ ხალვაში მოვილაპარაკებთ და შევთანხმდებით. პროკურატურაში ჩვენი საქმის ძიება­ ამ პროცესს ხელს არ უშლის. თუმცა გულდა­საწყვეტი იქნება, თუ ისე დასრულდება, რომ ამდენი ხნის დავის შემდეგ “რუსთავი 2″”ფორმალურად, ქაღალდზეც არ იარსებებს.

———-

პაატა სალია, ქიბარ ხალვაშის ადვოკატი:

- “რუსთავი 2″-ში მიმდინარე პროცესით ჩვენთვის არაფერი იცვლება – სტრასბურგის სასამართლოსა და უზენაესი სასამართლოს გადაწყვეტილების აღსრულებას ველოდებით. სტრასბურგის დავაში მონაწილე მხარე არა ვართ, რადგან დავაში მოპასუხე მხარე სახელმწიფოა, შესაბამისად, ჩვენ განხილვების თაობაზე ინფორმაციასაც ვერ ვიღებთ. ჩვენს ყველა სარჩელში მითითებულია, რომ ქიბარ ხალვაშს წილების დათმობა მიხეილ სააკაშვილმა აიძულა, ხალვაშმა გერმანიაში პოლიტიკური თავშესაფარი სწორედ მსგავსი სარჩელის გამო მიიღო. დღესაც იმავე პოზიციაზე ვართ – ტელევიზიას სააკაშვილი აკონტროლებს, შესაბამისად, არა აქვს მნიშვნელობა, გვარამია იქნება დირექტორი თუ ვინმე სხვა.

———-

ექსპერტი გია ხუხაშვილი“რუსთავი 2″-ში მიმდინარე პროცესებს კანონზომიერად მიიჩნევს:

- “ნაციონალური მოძრაობის” გაყოფის შემდეგ მოსალოდნელიც იყო, რომ “რუსთავი 2″-ში მოვლენები ამ სცენარით განვითარდებოდა. არ ვამბობ, რომ ტელ­ევიზია ხისტი პოლიტიკური პროექტი იყო, უბრალოდ, სარედაქციო პოლიტიკა, მინიმუმ, გემოვნებით ემთხვეოდა “ნაციონალური მოძრაობის” პოლიტიკურ ხაზს. როდესაც პარტია ორ ნაწილად დაიშალა, პოლიტიკური წარმოდგენები რედაქციაში­ გაიყო – განსაკუთრებით, საინფორმაციო ბლოკში მომუშავე გუნდის შეხედულებები იყო კონფლიქტური. ეს პროცესი უფრო დიდი ხნით ადრე უნდა დაწყებულიყო, მაგრამ “რუსთავი 2″-ის მობილიზაცია ხელისუფლების უგუნურმა პოლიტიკამ მოახდინა – სასამართლოს შეტევებმა დროებით შეაჩერა “რუსთავი 2″-ის გაყოფაც.

- ნიკა გვარამიას წასვლა ნიშნავს, რომ ის მიხეილ სააკაშვილის პოლიტიკას არ ეთანხმება?

- პერსონალიებზე არ ვისაუბრებ, თუმცა ნიკა გვარამია სერიოზულ მოთამაშედ იქცა პოლიტიკის საჭადრაკო დაფაზე. არც იმას გამოვრიცხავ, რომ გვარამიას სააკაშვილის მარწუხებისგან გათავისუფლება უნდოდა, რაც სააკაშვილმა არ აპატია – დღეს სააკაშვილის ინტერესებს ძმები ყარამანიშვილები წარმოადგენენ. სწორედ ფინანსების გამოყენებით დაამარცხა სააკაშვილმა გვარამია. მიუხედავად მცდელობისა, სააკაშვილის გაძლიერება მაინც შეუძლებელია, მით უმეტეს, “რუსთავი 2″-ის დახმარებით. უკვე ცალსახად შეგვიძლია ვთქვათ, რომ ტელევიზია ბოლომდე ხდება სააკაშვილის პოლიტიკური პროექტი და ამ სტიგმის მოშორება შეუძლებელი იქნება.

„კვირის პალიტრა“, 12 ივნისი, 2017 წელი

ინტერვიუ ლეილა მუსტაფაევასთან: „აფგანი ბოლოს საქართველოში ალიევების ბიზნესინტერესებზე წერდა“

რუსუდან შელია

აზერბაიჯანის პრეზიდენტის ოჯახს საქართველოში უამრავი ბიზნესი აქვს, თანაც მნიშვნელოვანი შეღავათებით – აქვს სასტუმროები, ნავთობკომპანია და ბანკი, რომლის მეშვეობითაც უკანონო ფინანსური ოპერაციები ხორციელდება, საიდანაც სარგებელს ქართველების კონკრეტული ჯგუფიც იღებს. ალიევებმა და მათთან დაახლოებულმა ოლიგარქებმა საქართველოში ფართო ბიზნესქსელი განათავსეს.

რადიო „აზადლიგ“-მა (“თავისუფლებამ”) გაავრცელა­ აზერბაიჯანელი დეპუტატის, ელმან ნასიროვის განცხადება, სადაც იგი ხაზგასმით აცხადებს, რომ აფგან მუჰთ­არლის დაკავება აზერბაიჯანულ-ქართული სპეცსამსახურების ერთობლივი მუშაობის შედეგია… საქართველოს სახელმწიფო უსაფრთხოების სამსახური კატეგორიულად უარყოფს აზერბაიჯანელი ჟურნალისტის გაუჩინარებაში მონაწილეობას, თუმცა, როგორც “კვირის პალიტრასთან”"საუბრისას აფგან მუჰთარლის მეუღლე, ლეილა მუსტ­აფაევა აღნიშნავს, აზერბაიჯანული მხარე დიდი ხანია ყველა მედიასაშუალებაში საქართველოს სპეცსამსახურების მონაწილეობაზე საუბრობს:

- დეპუტატი ელმან ნასიროვი აზერბაიჯანის ყველა მედიასაშუალებაში ხაზს უსვამს, რომ აფგანის გატაცება ერთ-ერთი ყველაზე­ წარმატებული სპეცოპერაცია იყო. აზერბაიჯანში ყველა ადასტურებს, რომ აფგანი ორი ქვეყნის სპეცსამსახურების ერთობლივი მუშაობის შედეგად გაიტაცეს. ამ ფაქტმა ყველას კარგად დაგვანახა, რომ ქართველი სამართალდამცავები მარტივად ერთვებიან უკანონო მოლაპარაკებებში, და რაც მთავარია, პასუხისმგებლობასაც ვერ გრძნობენ დანაშაულებრივი ნაბიჯების გამო. ჩემს ადვოკატს გამოძიების დეტალებშიც კი არ ახედებენ, არადა, მათი პირდაპირი ვალდებულებაა, ყველა სიახლე გაგვაცნონ. მით უმეტეს, როდესაც ყველა ქვეყნის საელჩო თუ საერთაშორისო ორგანიზაცია გამოძიების დასრულებას ელის. აფგანიც იმავეს ითხოვს – ადვოკატის ბოლო ვიზიტისას მან საქართველოს ხელისუფლებისგან როგორც თბილისში, ისე ლაგოდეხის გამშვებ პუნქტთან დამონტაჟებული სათვალთვალო ჩანაწერების გასაჯაროება მოითხოვა.

ახლა ყველაფერი ქართული მხარის ობიექტურ გამოძიებაზეა დამოკიდებული, რის სურვილსაც ვერ ვგრძნობ. პირიქით, ვფიქრობ, ყველაფერს მიჩქმალავენ. მით უმეტეს, რომ აფგანი ბოლო პერიოდში ალიევის ოჯახის საქართველოში არსებულ ბიზნესინტერესებზე წერდა. აზერბაიჯანის პრეზიდენტის ოჯახს საქართველოში უამრავი ბიზნესი აქვს, თანაც მნიშვნელოვანი შეღავათებით – აქვს სასტუმროები, ნავთობკომპანია და ბანკი, რომლის მეშვეობითაც უკანონო ფინანსური ოპერაციები ხორციელდება, საიდანაც სარგებელს ქართველების კონკრეტული ჯგუფიც იღებს. ალიევებმა და მათთან დაახლოებულმა ოლიგარქებმა საქართველოში ფართო ბიზნესქსელი განათავსეს. მათი დაინტერესების სფერო საბანკო და საფინანსო, სატრანსპორტო, ტურიზმისა­ და სურსათის სექტორებია. ალიევები ისრ­აელელ და მაროკოელ ბიზნესმენებს ამოეფარნენ და მათი სახელით საქართველოში დიდ ფულსაც ათეთრებდნენ. მაგალითად, ერთ-ერთ ბოლო სტატიაში აფგანი წერდა, რომ აზერბაიჯანმა საქართველოს 750 მლნ დოლარის დაბალპროცენტიანი სესხი გამოუყო ბაქო-ახალქალაქი-ყარსის სარკინიგზო მაგისტრალის მშენებლობისთვის. ეს იყო რეგიონული სარკინიგზო მიმოსვლის პროექტი, რომელიც სამხრეთ კავკასიას ევროპასთან დააკავშირებს. პირობაში ხაზგასმით იყო მითითებული, რომ სამუშაოები აზერბაიჯანულ კომპანიებს უნდა შეესრულებინათ. აფგანი მტკიცებულებებზე დაყრდნობით წერდა, რომ ერთი შეხედვით, აზერბაიჯანის კეთილი ჟესტი რეალურად ალიევების ქონებრივ ინტერესებს უკავშირდება. მდიდარი აზერბაიჯანელები ხშირად სარგებლობენ ძველ თბილისში არსებული ძვირად ღირებული სასტუმრო “ტიფლისით”, რომელიც რეალურად აზერბაიჯანის პრეზიდენტის საკუთრებაა. საჯარო რეესტრის ეროვნული­ სააგენტოს მონაცემებით, სასტუმრო ქართველ ბიზნესმენს ეკუთვნოდა, თუმცა, თაღლითური სქემების საშუალებით ის აზერბაიჯანის მმართველი ოჯახის ხელში აღმოჩნდა. მეტიც, აფგანის სტატიაში ასევე ნათქვამია, რომ ალიევების ოჯახის აქტივები მთელ საქართველოზე ვრცელდება. ბათუმში, ხიმშიაშვილის ქუჩაზე 999 კვადრატული მეტრი მიწა ალიევების ოჯახის კომპანიას (“გლორია”) მხოლოდ ერთ ლარად გადაეცა. აჭარის ავტონომიური რესპუბლიკის ფინანსთა და ეკონომიკის სამინისტროსთან გაფორმებული ხელშეკრულების მიხედვით, ამ ტერიტორიაზე სასტუმრო აშენდა, სადაც ქართველები უნდა დასაქმებულიყვნენ, თუმცა ეს პირობა არ შესრულებულა.­

გარდა ამისა, აფგანს აქვს ინფორმაცია ტენდერების შესახებაც, რომელიც საქართველოში აზერბაიჯანული კომპანიების მონაწილეობით ტარდება, როგორ იგებდნენ ისინი ქრთამის საშუალებით აქ ტენდერებს და მილიონობით ლარის მოგებას ნახულობდნენ.

—————–

„ახალი თაობა“, 12 ივნისი, 2017 წელი

გადაახტება თუ არა შინაგან საქმეთა სამინისტრო ბერა ივანიშვილს?

ინტერვიუ ზვიად კუპრავასთან: „ბირჟა მაფიის“ წევრების კლიპით მე, როგორც ყოფილი პოლიციელი, შეურაცხყოფილი დავრჩი, მაგრამ ის, თუ რა გაგრძელებაც ამ კლიპს მოჰყვა, აბსოლუტურად მიუღებელია“ // „პატრიარქი სრულ იზოლაციაშია» // „სოსო ოხანაშვილის სიცოცხლეს საფრთხე ემუქრება“

რატომ იცვლებიან ასეთი სიხშირით პატრიარქის დაცვის წევრები, რაზე მიანიშნა უწმინდესმა თავისი დაცვის ყოფილ უფროსს, რა ხდება ნარკოტიკების ჩადებებთან დაკავშირებით, რატომ შეიცვალა ხელისუფლების პოზიცია ბერა ივანიშვილის განცხადების შემდეგ, ვინ უნდა აგოს შექმნილ ვითარებაზე პასუხი? ამ თემებზე „ახალ თაობას“ სამართალდამცავთა რეფორმირების ცენტრის ხელმძღვანელი ზვიად კუპრავა ესაუბრება.

- შინაგან საქმეთა სამინისტროში დაწყებულია საკადრო ცვლილებები, რასაც დიდი მითქმა-მოთქმა მოჰყვა. ზოგი ამას აზერბაიჯანელი ჟურნალისტის გატაცებას უკავშირებს. თქვენ რას ფიქრობთ ამ ცვლილებებზე?

- ეს ცვლილებები პირდაპირ უკავშირდება ბექა ხახუბიას ამბავს. ამის გამო „ქართულ ოცნებაში“ მინისტრის პასუხისმგებლობის საკითხიც კი დააყენეს. ახლა ის ცდილობს, საკადრო ცვლილებებით შეინარჩუნოს თანამდებობა.  ბოლო დროს ძალიან ბევრი რამე მოხდა ქვეყანაში. გორთან ბექა ხახუბიას დაღუპვის ფაქტი, აზერბაიჯანელი ჟურნალისტის გატაცება, ახლა კიდევ რეპერების დაკავება. გიორგი მღებრიშვილის მინისტრობის დროს ძალიან ბევრი უცნაური ფაქტი მოხდა. ეს იმაზე მიუთითებს, რომ ეს ადამიანი შინაგან საქმეთა სამინისტროს ვერ მართავს.

- გამორიცხავთ, რომ ხელისუფლებაში ვიღაც მისი დისკრედიტაციით არის დაინტერესებული და მინისტრს ამ რაღაცებს „უჩალიჩებენ“?

- რას ჰქვია, „უჩალიჩებენ“? თუ „უჩალიჩებენ“, მაშინ მით უმეტეს უნდა წავიდეს. ალექსანდრე ჭიკაიძე, ჭიკაიძეო, გავიძახოდით და იმასაც კი არ დაუგროვებია ასეთი ცოდვები. ვახტანგ გომელაურმა იმდენად ცოტა დრო გაატარა ამ უწყებაში, რომ, როგორც შინაგან საქმეთა მინისტრს, ვერ შევაფასებ. რამდენადაც მე ვიცი, თავად „ქართულ ოცნებაშიც“ ითხოვენ, რომ გიორგი მღებრიშვილი წავიდეს. არ ვიცი, რას ელოდება გიორგი კვირიკაშვილი. თუმცა კვირიკაშვილი კი არა, ბიძინა რას ელოდება? აქ ხომ ივანიშვილი წყვეტს ყველაფერს.

- ჯგუფ „ბირჟა მაფიის“ წევრების დაკავების შემდეგ ისევ აქტიურად დაიწყო საუბარი ნარკოტიკების ჩადებაზე. დაკავებულ რეპერებს მხარდაჭერა გამოუცხადა ბერა ივანიშვილმა, რის შემდეგაც ხელისუფლების წარმომადგენლებმა საპირისპირო განცხადებები გააკეთეს. ამასთან დაკავშირებით რას ფიქრობთ?

- „ბირჟა მაფიის“ წევრების კლიპით მე, როგორც ყოფილი პოლიციელი, შეურაცხყოფილი დავრჩი, თუმცა დემოკრატია ნიშნავს იმას, რომ ასეთი მიუღებელი კლიპი, თუ ის გამოხატვის თავისუფლებისა და კანონის ჩარჩოებში ჯდება, უნდა აიტანო. ამ ადამიანებმა, მართალია, ძალიან უგემოვნო კლიპი გადაიღეს, მაგრამ ის კანონის ჩარჩოებში ჯდება. რა გაგრძელებაც ამ კლიპს მოჰყვა, აბსოლუტურად მიუღებელია. ჩადებას არანაირი გამართლება არა აქვს, რადგანაც ის თავად არის მძიმე დანაშაული. ადამიანს ნარკოტიკებთან აქამდე არანაირი შეხება არ ჰქონია და კლიპის გამოსვლის მეორე დღიდან როგორ დაიწყო ბარიგობა? ნარკოლოგიური შემოწმებით დაუდგინდათ, რომ სუფთები არიან.

ყველა შემთხვევაში უნდა დაისაჯონ ის პირები, რომლებმაც ამ რეპერებს ნარკოტიკები ჩაუდეს, მაგრამ მარტო მათზე არ უნდა გადატყდეს ჯოხი. პასუხისგებაში ის თანამდებობის პირები უნდა მიეცნენ, რომლებიც ამგვარ დავალებებს გასცემენ. რამდენიმე თვის წინ მინისტრმა თქვა, სამინისტრო ბალასტისგან უნდა გაიწმინდოსო. ბალასტი სწორედ ის ხალხია, ვინც ასეთ უკანონო ბრძანებებს გასცემს. ჩადებები, როგორც წესი, რიგითი ოპერის დონეზე არ წყდება.

რაც შეეხება ბერა ივანიშვილის განცხადებას, მისმა პოზიციამ ნათლად გამოაჩინა, თუ რა მმართველობის სტილია დღეს ქვეყანაში. ბერამ რეპერების მხარდასაჭერი განცხადება მათი დაკავებიდან ორი დღის შემდეგ გააკეთა. ამ განცხადებისკენ მას ახალგაზრდების პროტესტმა უბიძგა.

- 10 ივნისს რუსთაველზე გამართულ აქციას გულისხმობთ?

- ამ აქციაზე ვსაუბრობ. ის პოლიტიკური ძალების მიერ არ ყოფილა მართული. ახალგაზრდებმა თავისი ინიციატივით გააპროტესტეს ის ბაკქანალია, რაც ჩადებებთან დაკავშირებით ხდება. ამ აქციის შემდეგ ბერა ივანიშვილი დაკავებულ რეპერებს მხარდაჭერას უცხადებს. ბერა თავადაც რეპერია და თავის კოლეგებს გამოუცხადა სოლიდარობა. ის რომ ივანიშვილის შვილი არ ყოფილიყო, მისი მხარდაჭერა ჩვეულებრივი ამბავი იქნებოდა. მან ძალიან კარგად იცის, რომ მის მიერ ნათქვამ თითოეულ სიტყვას დიდი მნიშვნელობა აქვს ხელისუფლებისთვის. მისი განცხადების შემდეგ ეს საქმე 180 გრადუსით შემოტრიალდება.

ეს ახალგაზრდა მხოლოდ თავისი კოლეგებით არ უნდა შემოფარგლულიყო. მას მსგავსი განცხადება ყველა იმ საქმეზე უნდა გაეკეთებინა, სადაც დიდი ალბათობაა იმისა, რომ ჩადებას ჰქონდა ადგილი. სამწუხაროდ, ბერა შერჩევით გამოხატავს სოლიდარობას და მხოლოდ რეპერებს «უპადერჟკებს“. ეს, პირველ რიგში, პროკურატურისა და შინაგან საქმეთა სამინისტროსთვის არის შეურაცხმყოფელი. ერთია, რომ მათ დანაშაული ჩაიდინეს და ახლა ბერას განცხადების გამო მოუწევთ ამ ყველაფრის უკან წაღება.

- თქვენი აზრით, ბერას განცხადების შემდეგ ბირჟა მაფიის წევრების წინააღმდეგ საქმე შეწყდება?

- საქმეს ბოლომდე თუ არ შეწყვეტენ, ამ ბიჭებს გაათავისუფლებენ. ამ საქმეში ბერას სახით ისეთი მძიმე არტილერიაა ჩართული, რომ პატიმრობაში დატოვება აღარ გამოვა. ბერას ვერც შსს გადაახტება, ვერც პროკურატურა და ვერც სუსი. დაველოდოთ და ყველა ვნახავთ, რა მოჰყვება მის ნათქვამს. რაღაც შედეგი უკვე მოჰყვა, ხელისუფლების პირველი პირები უკვე სხვანაირად ლაპარაკობენ.

- იქნებ მათი პოზიციის შეცვლა იმ აქციას უკავშირდება, რომელზეც ზემოთ ისაუბრეთ?

- სხვა ჩადებების დროსაც არანაკლები პროტესტი ყოფილა, მაგრამ ხელისუფლებას ხალხის განწყობა არასდროს გაუთვალისწინებია.

- ამ ბიჭების გამართლება თუ მოხდება, ეს ხომ პირდაპირ იმის აღიარება იქნება, რომ ჩადებას აქვს ადგილი. აწყობს ხელისუფლებას ეს?

- არ აწყობს, მაგრამ რადგან ბერა ჩაერია საქმეში, მას ვერ გადაახტებიან. ამ ადამიანს ბევრი რამე შეუძლია. ყველას კარგად გვახსოვს, რომ რამდენიმე თვის წინ შსს-დან მის ერთ სიტყვაზე 15 პოლიციელი გამოუშვეს. თუ ამ პოლიციელებმა ადამიანს სცემეს, მაშინ ისინი კი არ უნდა გამოეშვათ, მათ წინააღმდეგ სისხლის სამართლის გამოძიება უნდა დაწყებულიყო. საინტერესოა, რომ 15-ვე პოლიციელმა ერთ დღეს დაწერა წასვლის შესახებ განცხადება და ყველა მათგანს ერთდროულად შეექმნა ოჯახში პრობლემები.

- ახლაც ბერა ჩაერია საქმეში და დასჯიან ვინმეს?

- ბერამ თუ გადაწყვიტა, რომ დასასჯელია, გიორგი მღებრიშვილსაც დასჯიან და გიორგი კვირიკაშვილსაც. დაველოდოთ და ვნახავთ, თუ წავა ბერას წინააღმდეგ შინაგან საქმეთა სამინისტრო, რომელმაც ეს ადამიანები დაიჭირა, ან პროკურატურა, რომელიც ბრალს ადასტურებს. ძალოვნებმა თუ რეპერების მიმართ პოზიცია შეცვალეს, გამოდის, ყველა ბერას გავლენის ქვეშ არის მოქცეული. ჯიუტად თუ გააგრძელებენ ბრალის მტკიცებას, მაშინ შეგვიძლია ვთქვათ, რომ ბიძინა ივანიშვილის რეპერი შვილის გავლენის ქვეშ არ მოექცნენ. ბერას განცხადების მერე აქ პროცესები ძალიან საინტერესოდ განვითარდება.

კახა კალაძე უკვე გამოვიდა და იმ ადამიანების დასჯა მოითხოვა, რომლებმაც რეპერებს ნარკოტიკი ჩაუდეს. პრემიერმაც რაღაც მაგდაგვარი თქვა. ბერას განცხადებამდე სად იყო ეს ხალხი?!

- საინტერესოა, ჯეჯელავა თუ შეცვლის პოზიციას? ამტკიცებდა, ეს კლიპი სახელმწიფოებრიობის წინააღმდეგ იყო მიმართულიო...

- მან არ იცოდა, რომ ბერა რეპერებს დაუჭერდა მხარს, თორემ ასეთ განცხადებას არავითარ შემთხვევაში არ გააკეთებდა. თავად მის განცხადებაზე რა გითხრათ, კაცი ვიცეპრემიერია და გამოხატვის თავისუფლებაზე წარმოდგენა არა აქვს. მას არც ადამიანის უფლებების დაცვასა და თმენის ვალდებულებაზე ეცოდინება.

- კიდევ ერთი საკითხი, რომელმაც ამ დღეებში საზოგადოებაში მითქმა-მოთქმა გამოიწვია, პატრიარქის დაცვის წევრების შეცვლაა. 10 ივნისს ცნობილი გახდა, რომ უწმინდესის დაცვის სამსახური თითქმის მთლიანად შეიცვალა. ეს ჩვეულებრივი ამბავია?

- ჩვეულებრივი კი არა, ძალიან ცუდი ამბავია. პატრიარქს დაცვას ისე ხშირად უცვლიან, ცუდი მოლოდინები მაქვს. ყველაფერი სოსო ოხანაშვილის გაშვებით დაიწყო, რომელიც დაცვის სამსახურის უფროსობიდან პატრიარქის ნების წინააღმდეგ გაათავისუფლეს. დაახლოებით ორი კვირის წინ უცხოეთში მცხოვრებ თანამემამულეებთან შეხვედრისას პატრიარქმა ძალიან საინტერესო განცხადება გააკეთა. ის მთელი ამ წლების განმავლობაში ემიგრანტებს სამშობლოში დაბრუნებისკენ მოუწოდებდა, ახლა კი უთხრა, არ ჩამოხვიდეთ, დარჩით იქ, სადაც ხართო. ამ განცხადებამ ძალიან დათრგუნა ჩვენი ემიგრაცია. ყველა კითხულობდა, რატომ გვითხრა უწმინდესმა ასეთი რამე, ჩვენ ხომ სამშობლოში დაბრუნებაზე ასე ვოცნებობთო. მე ცოტა სხვანაირი კუთხით შევხედე ამ განცხადებას და მიმაჩნია, რომ ეს განცხადება სოსო ოხანაშვილს ეხებოდა. თანამდებობიდან გადაყენების შემდეგ, ის იძულებული გახდა, ქვეყნიდან გაქცეულიყო. მან ძალიან კარგად იცის, რომ უახლოეს მომავალში საქართველოში არ ჩამოესვლება.

- რატომ არ ჩამოესვლება?

- მას აქ ემუქრება სერიოზული საფრთხე. ეს პატრიარქმაც იცის და ამიტომ გააკეთა მან ის ცნობილი განცხადება ემიგრანტებთან დაკავშირებით.

- საჯაროდ რომ არ გაეკეთებინა ეს განცხადება, ისე ვერ მიაწვდენდა ოხანაშვილს ხმას?

- ამის გაკეთება ახლა შეუძლებელია. ახლა უწმინდესი სრულ იზოლაციაშია და მას ანზორ ჩუბინიძე აკონტროლებს.

- გაკონტროლებაში რას გულისხმობთ?

- პატრიარქის კვებას, გადაადგილებას, სტუმრებს, საუბრებს აკონტროლებს ბიძინა ივანიშვილის დაცვის ყოფილი წევრი ანზორ ჩუბინიძე, რომელიც სახელმწიფო დაცვის სამსახურის უფროსია და რომლის კანდიდატურაც შს მინისტრის პოსტზე განიხილება. ამ ტოტალური კონტროლის პირობებში ილია II-ს სოსო ოხანაშვილთან თავისუფალი კომუნიკაციის საშუალება არ აქვს. ამიტომაც ვფიქრობ, რომ ემიგრანტების მიმართ გაკეთებული განცხადებით თავისი დაცვის უფროსს ძალიან მნიშვნელოვანი მესიჯი გაუგზავნა.

- თქვენ ამბობთ, რომ სოსო ოხანაშვილს აქ საფრთხე ემუქრება. ვისგან ან რატომ ემუქრება ეს საფრთხე?

- სოსო ოხანაშვილმა ძალიან ბევრი რამე იცის. მის ხელთ არსებული ინფორმაციები, შესაძლოა, ვიღაცის ინტერესებს ეწინააღმდეგებოდეს. აქედან გამომდინარე, ადვილი შესაძლებელია, მისი ლიკვიდაციაც კი მოხდეს, თუ საქართველოში დაბრუნდება. მის ხელთ არსებული ინფორმაცია განსაკუთრებულად ღირებული და სახიფათო გახდება იმ შემთხვევაში, თუ პატრიარქის წინააღმდეგ რაღაც შეთქმულება მზადდება. რაც ახლა ხდება, მგონია, რომ ეს შეთქმულების ნაწილია და მეტი არაფერი. საპატრიარქოში ვიღაცები ერთმანეთს პატრიარქის სკამისთვის ებრძვიან და ა.შ.

დაცვის ასეთი ხშირი ცვლილებაც ეჭვებს ბადებს. სოსო ოხანაშვილის წასვლის შემდეგ პატრიარქის დაცვის უფროსად ზურაბ ბუჩუკური დაინიშნა, რომელიც ოხანაშვილის მოადგილე იყო და უწმინდესის ნდობით სარგებლობდა. ცოტა ხნის წინ ისიც შეცვალეს და ახლა დაცვის წევრები შეუცვალეს, რაც პატრიარქისთვის დამთრგუნველია. მას ყოველდღე ახალ-ახალ ადამიანებთან უწევს ურთიერთობა. დაცვას ძალიან დიდი მნიშვნელობა აქვს და მას ბოლომდე უნდა ენდობოდე. პროტოკოლის მიხედვით, როცა დასაცავი ობიექტი „ა“ პუნქტიდან „ბ“ პუნქტისკენ გადაადგილდება, დაცვას სრული უფლება აქვს, მისი მოთხოვნა არ გაითვალისწინოს.

დაცვის ქვეშ მყოფებს, მათ შორის პატრიარქს, პრეზიდენტს, პრემიერს ვალდებულება აქვთ, დაემორჩილონ დაცვის მითითებებს. პატრიარქისთვის იოლი არ იქნება, დღეს ერთი ადამიანის მითითებებს დაემორჩილოს, ხვალ – სხვისას, თან ამ ადამიანებს პატრიარქი საერთოდ არ იცნობს. შესაძლოა, მათში ეჭვი არ ეპარება, მაგრამ ბოლომდეც ვერ ენდობა.

საერთოდ, ბოლო პერიოდში ძალიან მძიმე მდგომარეობაა შექმნილი საპატრიარქოში. ამაში ციანიდის საქმეზე გამართულმა ბოლო სასამართლო სხდომამაც დამარწმუნა. ადვოკატებმა სხდომის გახსნაზე შუამდგომლობა დააყენეს. იმედი მქონდა, რომ მოსამართლე ამ მოთხოვნას დააკმაყოფილებდა და დასასწრებად მივედი. ძალიან დამწყდა გული, როცა იქ ვერცერთი სასულიერო პირი ვერ დავინახე. ეს იმას ნიშნავს, რომ სასულიერო პირები ვიღაცის გავლენის ქვეშ არიან.

- ეს კონკრეტული პირი ვინ შეიძლება იყოს?

- ეს კონკრეტული პირი სახელმწიფო ხელისუფლების წარმომადგენელი არ არის. ეს კონკრეტული პირი უფრო მაღალი იერარქიის სასულიერო პირია. შესაძლოა, ეს ქორეპისკოპოსი იაკობია. არ არის გამორიცხული, ეს იყოს შორენა თეთრუაშვილი, რომელსაც ძალიან დიდი გავლენები აქვს. სასულიერო პირების სასამართლოზე მიუსვლელობამ გამაოცა და ძალიან დამწყვიტა გული. არ მეგონა, თუ ისინი თავიანთ სულიერ ძმას მიატოვებდნენ.

- იქნებ იმიტომ არ მივიდნენ, რომ მამა გიორგი მამალაძე დამნაშავედ მიაჩნიათ?

- საქართველოს კანონმდებლობაში გვიწერია, რომ პირი, რომელსაც წაყენებული აქვს ბრალი (მნიშვნელობა არა აქვს ბრალის სიმძიმეს), სანამ სასამართლოს განაჩენი არ დადგება, ითვლება უდანაშაულოდ. ეს ყველა დემოკრატიულ ქვეყანაში ასეა. დღეის მდგომარეობით, მამა გიორგი მამალაძე არის უდანაშაულო. აქედან გამომდინარე, სასამართლო პროცესზე მის მხარდასაჭერად სასულიერო პირები უნდა მისულიყვნენ, იქნებ მამა გიორგი მათთვის რის თქმას აპირებდა. სასამართლო პროცესი დახურეს, სასულიერო პირებს იქ მისვლის უფლებას არ აძლევენ – აშკარაა, სიმართლის დადგენა ვიღაცას არ უნდა. ახლა მამა გიორგის ოჯახმა და ადვოკატებმა ძალიან უნდა იაქტიურონ. წინააღმდეგ შემთხვევაში, სიმართლე არ დადგინდება და მოსამართლე ბუგიანაშვილი ისეთ განაჩენს გამოიტანს, როგორიც პროკურატურას აწყობს.

„ახალი თაობა“, 12 ივნისი, 2017 წელი

ინტერვიუ გიორგი კახიანთან: „ჩვენი მაჟორიტარების ნაწილი პროპორციულ სისტემაზე გადასვლას ეწინააღმდეგება“ // „5%-იანი ბარიერი და პოლიტიკური ბლოკების გაუქმება პარტიულ სისტემას მხოლოდ გააძლიერებს“

„ქართული ოცნების“ ერთ-ერთი ლიდერი, პარლამენტის საპროცედურო საკითხთა კომიტეტის თავმჯდომარე გიორგი კახიანი „ახალ თაობასთან“ ინტერვიუში ვენეციის კომისიის წინასწარ შეფასებებზე საუბრობს.

- ბატონო გიორგი, ვენეციის კომისიის არაოფიციალურ დასკვნას როგორ შეაფასებთ, ეს ის არის, რასაც ელოდით?

- შემიძლია ვთქვა, რომ შეფასებები პოზიტიურია. კონსტიტუციის პროექტი შეფასებულია საპარლამენტო რესპუბლიკის გაძლიერების თვალსაზრისით წინ გადადგმულ ნაბიჯად, რასაც ველოდით კიდეც. ბერლინის კონფერენციის შემდეგ პირადად მე ასეთი მოლოდინი მქონდა. კრიტიკული ხასიათის შენიშვნები სამართლებრივი კუთხით იმ საკითხზე, რომელიც ერთ-ერთი ყველაზე რეზონანსულია, ნაკლებად არის. არის გარკვეული რეკომენდაციები ე.წ. ბონუსთან დაკავშირებით.

- მოხდება ამ საკითხზე ვენეციის კომისიის შენიშვნის გათვალისწინება?

- რა თქმა უნდა, გარკვეული რეგულაციების შემოღებაზე არის საუბარი, რომელიც არ მისცემს გამარჯვებულ პოლიტიკურ გუნდს, მაგალითად, საკონსტიტუციო უმრავლესობის ჩამოყალიბების შესაძლებლობას სწორედ ბონუსის ხარჯზე. ჩვენ, ისედაც ვაპირებდით ბონუსთან დაკავშირებით რეგულაციების შემოღებას, რომლებიც დისპროპორციის თეორიულ შესაძლებლობასაც კი გამორიცხავს მიღებულ მანდატებსა და აღებულ პროცენტულ მაჩვენებელს შორის. ეს ყველაფერი კონსტიტუციაში იქნება ასახული.

ნებისმიერი საარჩევნო სისტემა ორ ძირითად მიზანს უნდა ემსახურებოდეს: პარტიულ პლურალიზმსა და სტაბილურობას. ყოველი პარტია მიიღებს იმდენ მანდატს, რამდენსაც ის არჩევნებზე პროცენტულად აიღებს. მაგალითად, არჩევნებზე პარტია აიღებს ხმების 20%-ს, მას მანდატების 20% ექნება. ხშირ შემთხვევაში, საზოგადოების არასწორი ინფორმირება ხდება. თითქოს, გადაუნაწილებელი მანდატების მიღებით ერთმა გუნდმა შეიძლება კონსტიტუციური უმრავლესობა მიიღოს, არადა, ასე არ არის. მე გამოვრიცხავ, იმ საარჩევნო სისტემის პირობებში, რომელზეც გადავდივართ, რომელიმე პოლიტიკურ ძალას კონსტიტუციური უმრავლესობა ჰქონდეს ბონუსის დახმარებით. ჩვენ განვიხილავთ დამატებითი რეგულაციების შემოღებას, რაც თეორიულადაც კი გამორიცხავს ამის ალბათობას. რაც შეეხება 5%-იან ბარიერს, პოლიტიკური ბლოკების გაუქმებას, აქ ვენეციის კომისიის პოზიცია ცალსახაა და ისინი თვლიან, რომ ეს იყო სწორი გადაწყვეტილება.

- თუმცა ოპოზიცია არ გამორიცხავს, რომ ასეთ შემთხვევაში ხელისუფლების ცვლილების გზად მხოლოდ რევოლუციური სცენარი დარჩეს. როგორია თქვენი კონტრარგუმენტი?

- პოლიტიკური ბლოკების გაუქმება ერთადერთი სწორი გადაწყვეტილებაა, რომელმაც ხელი უნდა შეუწყოს ძლიერი პარტიის ინსტიტუტის შექმნას. ბლოკების ინსტიტუტის გაუქმება არ არის პოლიტიკური სტაბილურობის ნაწილთან კავშირში. დღეს პარტიული სისტემის განვითარებით ვართ იქ, სადაც 90-იან წლებში ვიყავით. ამის ერთ-ერთი მიზეზი არის ის კანონმდებლობა, რომელიც გვაქვს და რომელიც ხელს უშლის ძლიერი პარტიების შექმნას. 20 პარტია იღებს ბიუჯეტიდან დაფინანსებას, მაგრამ მათი დასახელება მეც კი გამიჭირდება.

- თუმცა თქვენ პოლიტიკური ბლოკით მოხვედით ხელისუფლებაში...

- დიახ, მაგრამ ეს არ ნიშნავს, რომ იგივე სისტემა უნდა დარჩეს და არ განვითარდეს, წინ არ წავიდეთ.

- პრეზიდენტის არჩევის წესზე ვენეციის კომისიის შეფასება ხელისუფლების პოზიციას ემთხვევა?

- პრეზიდენტის არჩევის წესი სრულად შეესაბამება მმართველობის იმ მოდელს, რომელიც საქართველოში ყალიბდება. მეტიც, ამ სისტემაში, საპარლამენტო მოდელში, პრეზიდენტის პირდაპირი წესით არჩევა მიზანშეწონილი არ არის. ის, უფლებამოსილებები, რომლებიც კონსტიტუციური პროექტით არის პრეზიდენტისთვის მინიჭებული, ასევე პოზიტიურად იქნა შეფასებული.

- ოპოზიცია ამბობს, რომ ვენეციის კომისიას ის შენიშვნები აქვს, რომლებიც მათ ჰქონდათ. რას უპასუხებთ?

- ოპოზიციას ძალიან ბევრი შენიშვნა ჰქონდა. მათი შენიშვნები სამართლებრივ არგუმენტაციას არის მოკლებული და ვერც ვენეციის კომისიის დასკვნაში იქნებოდა ასახული და გათვალისწინებული. ამდენად, ისინი ვენეციის კომისიის წინასწარი შეფასებების პათოსსა და სურათს ამახინჯებენ.

- ბატონო გიორგი, თქვენს გუნდში აზრთა სხვადასხვაობაა. მაჟორიტარები არ ეთანხმებიან მაჟორიტარული არჩევნების გაუქმებას. კონსულტაციები რა შედეგით შეიძლება დასრულდეს?

- საკონსტიტუციო კომისიაში წარმოდგენილმა უმრავლესობის წვერებმა პროპორციულ საარჩევნო სისტემაზე გადასვლას მხარი დაუჭირეს. ეს თავისთავად მეტყველებს იმ განწყობაზე, რომელიც გუნდში არსებობს. თუმცა, უმრავლესობაში არიან დეპუტატები, რომლებიც არ ემხრობიან სრულად პროპორციულ საარჩევნო სისტემაზე გადასვლას. ესენი არიან ის დეპუტატები, რომლებიც ძირითადად მაჟორიტარული წესით არიან არჩეული. მაჟორიტარების ერთი ნაწილი მხარს არ უჭერს პროპორციულ საარჩევნო სისტემაზე გადასვლას. კონსულტაციების პროცესი მიმდინარეობს. კონსტიტუციის პროექტის საპარლამენტო განხილვამდე ჯერ კიდევ არის დრო.

- წინასწარი განწყობები როგორია?

- იმედი მაქვს, რომ საერთო პოზიციაზე შევჯერდებით.

- რაზე იქნება ეს დამოკიდებული?

- ეს არის პროცესი, სადაც ჩვენ ვცდილობთ, არგუმენტებით ვისაუბროთ, თუ რატომ ვთვლით, რომ მიზანშეწონილია პროპორციულ საარჩევნო სისტემაზე გადასვლა. იმედი მაქვს, კენჭისყრისას მივიღებთ ხმათა იმ რაოდენობას, რომელიც საკმარისი იქნება კონსტიტუციაში ცვლილებების განსახორციელებლად.

- „ქართული ოცნების“ წინასაარჩევნო დაპირება იყო საარჩევნო სისტემის შეცვლა, რაც ვერცერთმა ხელისუფლებამ ვერ გაბედა. ძალაშია ეს დაპირება თუ შესაძლებელია, არსებული საარჩევნო სისტემა დარჩეს?

- არა, ეს დაპირება ძალაშია. ძალაში რომ არის, ეს ჩანს ჩვენი ყოველდღიური აქტივობით.

- მაგრამ, თუ კენჭისყრაზე ჩავარდა?

- საკონსტიტუციო ცვლილებები რომ განხორციელდეს, მას ძალიან მაღალი მხარდაჭერა სჭირდება. 113 დეპუტატის მხარდაჭერაა საჭირო და ამ ხმების მოპოვებას ვცდილობთ უმრავლესობის რიგებში, სადაც 116 დეპუტატია. თუმცა, კენჭისყრის დროს ყველა დეპუტატი ინდივიდუალურად იღებს გადაწყვეტილებას.

- ოპოზიციასთან გამორიცხავთ ამ საკითხზე კონსულტაციებს?

- ოპოზიციის გადასაწყვეტი იქნება, ისინი მხარს დაუჭერენ თუ არ დაუჭერენ. თუ მხარს დაუჭერენ, მაშინ უფრო იზრდება შანსი, რომ პროპორციულ საარჩევნო სისტემაზე გადავიდეთ. თუმცა, ჩემთვის უფრო მნიშვნელოვანია, უმრავლესობის შიგნით მოვახერხოთ შეთანხმება, რომ საერთო პოზიციით წარვდგეთ კენჭისყრაზე. შეჯერებულ პოზიციას ყველამ ერთხმად უნდა დავუჭიროთ მხარი. ეს უფრო მნიშვნელოვანი მგონია.

- ბატონო გიორგი, კახა კალაძეზეც მინდა გკითხოთ. მართლაც უალტერნატივო კანდიდატია, როგორც თქვენი გუნდი ამბობს, თბილისის მერის პოსტზე?

- დიახ, ის უალტერნატივო კანდიდატი იქნება. არა მგონია, სხვა რომელიმე პოლიტიკური გუნდის კანდიდატმა მას მნიშვნელოვანი კონკურენცია გაუწიოს. ნამდვილად შემიძლია გითხრათ, კახა კალაძის სახით ძალიან კარგი მერი ეყოლება თბილისს. თუმცა, ყველაფერს თავისი წესი აქვს და მისი წარდგენაც მოხდება მას შემდეგ, რაც ამ გადაწყვეტილებას პოლიტსაბჭო მიიღებს და ამის შესახებ გუნდის ლიდერი გიორგი კვირიკაშვილი თავად ამცნობს საზოგადოებას.

- უკეთესი მერი იქნება, ვიდრე ნარმანია?

- ამ კონტექსტში არ მინდა, ამ კითხვას პასუხი გავცე. არ მინდა, ჩვენი გუნდის ერთი წევრი მეორეს შევადარო. ბატონი ნარმანია ჩვენი გუნდის წევრია. პატივს ვცემ მას. ის კომპეტენტური, პასუხისმგებლობის მქონე პიროვნებაა.

„ახალი თაობა“, 12 ივნისი, 2017 წელი

ინტერვიუ ალეკო ელისაშვილთან: „არჩევნების მოსაგებად ხალხის დიდი მხარდაჭერა და ცოტა ფულია საჭირო“

მერობის კანდიდატებთან დაკავშირებით საბოლოო სურათი ჯერ კიდევ არ გამოკვეთილა. გასულ კვირას აქტიურად საუბრობდნენ იმის თაობაზე, რომ ნაციონალური მოძრაობა ზაალ უდუმაშვილის კანდიდატურას წარადგენდა, თუმცა საბოლოო გადაწყვეტილება პარტიას კვლავაც არ მიუღია. ასევე საბოლოოდ ვერ ჩამოყალიბდა ალეკო ელისაშვილი.

- ალეკო, თუ ჩამოყალიბდით საბოლოოდ, აპირებთ მერის თანამდებობაზე საკუთარი კანდიდატურის წარდგენას თუ არა?

- არა, ჯერ არ ჩამოვყალიბებულვარ, ისევ ვფიქრობ.

- ამდენი ფიქრი სჭირდება ამ გადაწყვეტილებას?

- ჯერ არ მაქვს საბოლოო გადაწყვეტილება მიღებული, მაგრამ მალე მექნება.

- ისევ იმ პოზიციაზე რჩებით, რომ დამოუკიდებელ კანდიდატად იყაროთ კენჭი?

- რა თქმა უნდა, მხოლოდ და მხოლოდ დამოუკიდებელი კანდიდატი!

- „რესპუბლიკელები“ და „თავისუფალი დემოკრატები“ აპირებენ, რომ თქვენ დაგიჭირონ მხარი.

- მე არ ვიქნები არცერთი პარტიის კანდიდატი.

- რის თქმა შეგიძლიათ სხვა კანდიდატურებზე? უკვე ცნობილია რამდენიმე მათგანი...

- სხვებზე ლაპარაკი არ მინდა. ღმერთმა ყველას ხელი მოუმართოს, მაგრამ მე მჯერა, რომ თბილისის მოსახლეობა გააკეთებს ადეკვატურ არჩევანს და ვერავინ იმოქმედებს მათ არჩევანზე.

- ექსპერტები ამბობენ, რომ არჩევნებში დიდი ფულია საჭირო და, აქედან გამომდინარე, ალეკო ელისაშვილის შანსები ნაკლებია. რით უპასუხებდით ასეთ შეფასებებს?

- როგორც ჩანს, კარგად ვერ ერკვევიან საარჩევნო საკითხებში ჩვენი ექსპერტები, ისინი, ვინც ასე ლაპარაკობენ. სწორედ ჩვენმა პოლიტიკოსებმა და ექსპერტებმა დაამკვიდრეს ეს სტერეოტიპი, თითქოს ძალიან ბევრი ფულია საჭირო, რადგან თავადაც ბევრი ფული მიაქვთ ხოლმე. სინამდვილეში ძალიან ცოტა ფულია საჭირო. ხალხის დიდი მხარდაჭერა და ცოტა ფული რეალურად საჭიროა არჩევნებში.

- ამბობენ, რომ ირაკლი კობახიძესთან და ბესელიასთან შესულ დაპირისპირებაში თქვენი იმიჯი დაზიანდა და ეს არჩევნებზეც დაგაზარალებთ. ამაზე რას იტყვით?

- თუ გადაწყვეტილებას მივიღებ, ამაზე უკვე ამომრჩეველი არჩევნების დროს იტყვის, დაზიანდა თუ არა ჩემი იმიჯი.

- რაზეა დამოკიდებული თქვენი გადაწყვეტილება, რას ელოდებით?

- არაფერს არ ველოდები, უბრალოდ, კარგად ვაანალიზებ ყველაფერს, ჩემს შესაძლებლობებს, რესურსებსა და მოცემულობას.

- „ოცნების“ კანდიდატი, ალბათ, კახა კალაძე იქნება. რამდენად შეძლებთ, მას დაუპირისპირდეთ და კონკურენცია გაუწიოთ?

- ვნახოთ, ჯერ ჩამოვყალიბდე საბოლოოდ და მერე გეტყვით მაგაზე პასუხს. „ქართულმა ოცნებამ“ ძალიან ფეხებზე დაიკიდა ეს ხალხი. ის ძალიან დაშორდა ხალხს, ხალხის საწინააღმდეგოდ მოქმედებენ და ჩაძირული არიან კორუფციაში. ამ თვითმმართველობის არჩევნებზე ხალხმა ერთი კარგი ალიყური უნდა გავაწნათ `ოცნებას~, განსაკუთრებით თბილისში. მე ამის დიდი მოლოდინი მაქვს.

„ახალი თაობა“, 12 ივნისი, 2017 წელი

ინტერვიუ მამუკა გამყრელიძესთან: „რუსთავი-2“-ის ფინანსური კრიზისი ნიკა გვარამიას ბრალია“ // „ზაალ უდუმაშვილის კანდიდატურას თბილისის მერის პოსტზე სკეპტიკურად ვუყურებ“

„რუსთავი-2“-ში მიმდინარე პროცესები საზოგადოების დიდ ინტერესს იწვევს. „ახალი თაობა“ შეეცადა, იქ მომუშავე ჟურნალისტებისგან მოესმინა შეფასებები, თუმცა ამაოდ. ზაალ უდუმაშვილი ჩვენს სატელეფონო ზარებს არ პასუხობს, ნანუკა ჟორჟოლიანმა კი გვითხრა, რომ კომენტარს მხოლოდ ნიკა გვარამიას განცხადების შემდეგ გააკეთებს.

თუ რა პრობლემებია ტელევიზიაში, მოხდა თუ არა დაპირისპირება გვარამიასა და ყარამანიშვილებს შორის, რა როლი აქვს ამ პროცესებში მიხეილ სააკაშვილს? „ახალი თაობის“ ამ და სხვა კითხვებს ყოფილი დიპლომატი, „რუსთავი-2“-ის ყოფილი თანამშრომელი და გია ყარამანიშვილის ახლო მეგობარი მამუკა გამყრელიძე პასუხობს.

- ბატონო მამუკა, რა ინფორმაციებს ფლობთ, რა ხდება დღეს რუსთავი 2-ში? წლების განმავლობაში ამ ტელევიზიის თანამშრომელი იყავით. ითქვა, რომ მიხეილ სააკაშვილის სერიოზული ჩარევის შედეგად შეიცვალა იქ პროცესები. რა ხდება რეალურად?

- ურთიერთგამომრიცხავი ინფორმაციები მაქვს. მაქსიმალურად ვცდილობ, რომ არ ჩავერიო, მაქვს საკმაოდ კარგი ურთიერთობა მფლობელთან და სხვებთანაც. ძალიან განსხვავებული შეფასებებია საზოგადოებაში, ვაიმე დაიღუპება „რუსთავი-2“, თუ ნიკა გვარამია წავა…

- თქვენ ასე არ ფიქრობთ?

- არაფერიც არ დაიღუპება, კაცო! „რუსთავი-2“ არის ერთი დიდი კოლექტივი.

- ნიკა გვარამია დაემუქრა მიხეილ სააკაშვილს, დაგიშლი ტელევიზიასო. აქვს ნიკა გვარამიას ამის ბერკეტი?

- მოდით, ასე ვთქვათ, მას ჰყავს გარკვეულად შეკრული ჯგუფი, რომლებიც შეიძლება მასთან ერთად წავიდნენ. თუმცა საქართველოში ცხოვრების გამოცდილებამ მაჩვენა ისიც, რომ ეს შეკრული გუნდი ძალიან სწრაფად იშლება ხოლმე, როდესაც შესაბამის პირობებს შესთავაზებ. არავინ არავისთვის თავს არ იკლავს.

- გავრცელებული ინფორმაციით, რამდენიმე ცნობილმა ჟურნალისტმა უკვე დატოვა ტელევიზია...

- ლაფერას წასვლა საკმაოდ მძიმე იქნება ტელევიზიისთვის, იმიტომ, რომ გიორგი ლაფერაშვილი მართლაც ძალიან სერიოზული გამოცდილების მქონე ადამიანია ნიუსებში.

- ის უკვე ნოდარ მელაძემ შეცვალა...

- ნოდარ მელაძე გამოცდილი ადამიანია და, ჩემი აზრით, არანაირი პრობლემა არ უნდა იყოს, თუმცა, კარგი იქნებოდა, ლაფერა ყოფილიყო. იქ არის დემნა ჯაფარიძე, იქ არის ხაბურზანია. ესენი რომ წავიდნენ, ძალიან სერიოზული პრობლემები შეექმნება პროდაქშენის ჯგუფს. მე მეეჭვება, რომ ესენი წავიდნენ, რადგან ორივე მათგანი გვარამიამდე დიდი ხნით ადრე იყვნენ და ისინი „რუსთავი-2“-ის შტაფი არიან უკვე წლებია. შესაძლოა, გიორგი გაბუნია წავიდეს, თუმცა არც ის მოუყვანია გვარამიას, გოგი გეგეშიძის მოყვანილია.

- მიხეილ სააკაშვილის სერიოზული ჩარევის შედეგად დაიძრა ეს პროცესებიო. ზაალ უდუმაშვილიც მან დაითანხმა მერობის კანდიდატობაზე?

- პირადად მე ძალიან სკეპტიკურად ვუყურებ ზალიკოს კანდიდატურას. ზალიკო ძალიან მოკრძალებული, ძალიან კარგი ადამიანია. მისთვის რთული იქნება ასეთ ხისტ პროცესებში ჩარევა. იქ იმდენი სიბინძურე ამოდის ზემოთ. ზალიკოს ვერაფერს ვერ უპოვიან, შეუძლებელია, მას რაიმე კომპრომატი ამოუქექონ. უბრალოდ, მისთვის არასასიამოვნო უნდა იყოს ამ პროცესში მონაწილეობა. ის მშვიდ და გამოზომილ ცხოვრებას შეეჩვია.

- ზაალ უდუმაშვილმა თავადვე დაადასტურა, რომ შეხვდა მიხეილ სააკაშვილს და კონსულტაცია მასთან გაიარა. რა გამოდის, რომ გუნდმა არასწორი არჩევანი გააკეთა კანდიდატზე? ან რატომ ზაალ უდუმაშვილი, სხვა სახე არ ჰყავს „ნაციონალურ მოძრაობას“?

- ყველაფრით კარგია ზალიკო, მაგრამ, როდესაც ზალიკო ამბობს, მე არა ვარ ნაციონალური მოძრაობის კანდიდატი და ვიქნები დამოუკიდებელი და უბრალოდ ნაციონალური მოძრაობა მხარს დამიჭერსო, ეს იმას ნიშნავს, რომ ნაციონალურ მოძრაობაში არის უაღრესად ღრმა კრიზისი და „პირველ ოპოზიციურ“ პარტიას არა აქვს საშუალება, საკუთარი კანდიდატი წარმოადგინოს. ეს არის ძალიან სერიოზული მესიჯი ამომრჩევლისათვის, რომ ჩვენ არა გვყავს არავინ და ამიტომ თავისუფალ კანდიდატს ვუჭერთ მხარს. და ეს ნორმალურია?! ოპოზიციურ პარტიას, რომელსაც უნდა ჰქონდეს გამარჯვებისა და ხელისუფლებაში მოსვლის სურვილი, არ უნდა ჰყავდეს კანდიდატი დედაქალაქის მერის თანამდებობაზე?! ეს ჩემთვის სრულიად გაუგებარია! აქვე ვიტყვი, რომ ზალიკოს საწინააღმდეგო არაფერი მაქვს.

- ანუ პარტიაში სერიოზული და ღრმა კრიზისია? ვერ შეარჩიეს ისეთი სუფთა სახე, რომელიც ამომრჩეველში სიმპათიას გამოიწვევდა?

- როგორ არ შეიძლებოდა, ზაზა ბიბილაშვილი რომ შეერჩიათ, რა პრობლემა იყო?! ეტყობა, ზაზამ არ მოინდომა. არავის უნდა წაგება. ყველამ ვიცით, რომ პატარა შანსებია გამარჯვების. გრიგოლ ვაშაძეზეც იყო საუბარი, მაგრამ აქაც არაფერი. მოკლედ, სიტუაცია ისეთია, რომ ზალიკოზე შეჩერდნენ. ზალიკომ რომ თქვას, რომ მე ნაციონალურ მოძრაობაში შევედი და ამ პარტიის წევრი ვარ, მაშინ გასაგები იქნებოდა, მაგრამ ეს სიტუაცია გაუგებარია.

მე მრჩება შთაბეჭდილება, რომ თუ გვარამია „რუსთავი-2“-დან წავა, ის აუცილებლად წავა პოლიტიკაში.

- ითქვა ისიც, რომ ნიკა გვარამია „ევროპულ საქართველოში“ მიდის...

- ეს, უბრალოდ, ვარაუდებია. მე არ ვიცი, ის წავა თუ არა ევროპულ საქართველოში, მაგრამ მას შეუძლია, ცალკე ჯგუფი შექმნას, საკუთარი პოლიტიკური პარტია ცნობადი სახეებით, იმ სახეებით, რომლებიც რუსთავი 2-ში იყვნენ და მასთან ერთად წავლენ.

- გამოვა აქედან რამე?

- რა გამოვა, ეს სხვა თემაა. ზოგადად არ მინდოდა რუსთავი 2-ის თემასთან გაკარება, თავად ჩუმად არიან და არც მე მინდა ჭორაობა. იქ შიგნით ისეთი პროცესებია, ისეთი დუღილია ხოლმე…

- სერიოზული დაპირისპირებააო, გამოდის ინფორმაციები. თქვენ ადრეც თქვით ჩვენთან ინტერვიუში, რომ ნაციონალური მოძრაობის ინტერესები ამ არხზე ყველაზე ნაკლებად შუქდებოდა ანუ გვარამიას მიჰყავდა იქ „პარადი“?

- ამის დადასტურება დღესაც შემიძლია. პრაქტიკულად გვარამიას სრული კარტბლანში ჰქონდა მფლობელებისაგან. მე გეტყვით ყარამანიშვილს აზრს, რომელიც მას დაახლოებით ორი თვის წინ ჰქონდა. მას არ უნდოდა ტელევიზიიდან ნიკა გვარამიას გაშვება. მფლობელს არ აქვს სურვილი, რომ ჩაერიოს ამ პოლიტიკურ სიტუაციებში. მისი სურვილია, ეს ტელევიზია ფინანსურად იყოს მომგებიანი, მომგებიანი თუ არა, წამგებიანი მაინც არ იყოს.

- „რუსთავი-2“-ის თანამშრომლები ამბობენ, რომ დღეს ტელევიზია სერიოზულ ფინანსურ კრიზისშია.

- და რატომ უნდა იყოს ასეთი ძლიერი კომპანია ფინანსურ კრიზისში?! ასეა თუ ისე, რაც არის, ეგ არის. ე.ი. არ აღმოჩნდა ნიკა გვარამია შესაბამისი დონის მენეჯერი.

- თქვენ თუ დაადასტურებთ ნიკა გვარამიასა და ყარამანიშვილებს შორის მომხდარ დაპირისპირებას?

- ამის თაობაზე ვერაფერს გეტყვით. მე გია ყარამანიშვილს ვესაუბრე, მაგრამ მასთან არ მქონია საუბარი მსგავს თემებზე. კიდევ ერთხელ გიდასტურებთ იმას, რომ გია ყარამანიშვილს ნიკა გვარამიასთან დაპირისპირება არ სურდა არანაირად. მის ინტერესებში ეს ამბავი არ იყო.

- მაშინ რატომ შეიცვალა სურათი?

- ვერ გეტყვით.

- რამდენად უშვებთ იმას, რომ ბიძინა ივანიშვილთან გარიგდა გია ყარამანიშვილი?

- კარგით, რა…

- ეს გამორიცხულია?

- საერთოდ გამორიცხული არაფერი არ არის. არასდროს არაფერი არ უნდა გამოვრიცხოთ, მაგრამ გია ყარამანიშვილი მიხეილ სააკაშვილის ახლო მეგობარია და ეს ცოტა რთული წარმოსადგენია.

- არის იმის საშიშროება, რომ ისეთი ბრენდი, როგორიც „რუსთავი-2“-ია, სერიოზული საფრთხის წინაშე აღმოჩნდეს?

- დირექტორის წასვლით ასეთი ძლიერი ტელევიზიები მარტივად არ იშლება. შემცვლელი ყველას გამოუჩნდება.

- მიხეილ სააკაშვილის ფრთა ცდილობს დღეს „რუსთავი-2“-ში გაძლიერებას?

- შესაძლებელია. თუმცა მიხეილ სააკაშვილი არც ისეთი სულელია. რად უნდა მას ერთი პარტიის ტელევიზია?! დღეს არავის სჭირდება ერთ პარტიაზე მორგებული ტელევიზია. ყველას დაბალანსებული არხი მოსწონს. ერთ პარტიაზე მორგებული იყო მე-9 არხი. ახლა არის იმედი, რომელიც მთლიანად გადართულია სახელისუფლებო პარტიის ქება-დიდებაზე. რაც უნდა აგინონ „რუსთავი-2“-ს, დღეს მას ყველაზე ბევრი ადამიანი უყურებს. იმიტომ უყურებენ, რომ ისინი სიმართლეს ამბობენ. ეს მოცემულობა ასე დარჩება.

- რატომ აჭიანურებს ნიკა გვარამია გადაწყვეტილების მიღებას? შესაძლებელია დარჩეს თანამდებობაზე?

- თქვენ ხომ ძალიან კარგად იცით, რომ საქართველოში ყოველთვის ყველაფერი ვაჭრობასთან არის დაკავშირებული.

- ანუ ის ვაჭრობს?

- იქ გარკვეული პირობების შეთანხმება მიმდინარეობს. მე არ ვლაპარაკობ მაინცდამაინც ფინანსურზე. იგივე თავისუფლება გარკვეულ საკითხებში და უამრავი ნიუანსია. ერთი რამ ფაქტია, რომ ნიკა გვარამიას ჰქონდა მიცემული 100%-იანი კარტბლანში კონტენტის შექმნაზე. არავინ არაფერს უშლიდა. უბრალოდ, რუსთავი 2 რომ შევიდა ფინანსურ კრიზისში, ამან გამოიწვია ეს ყველაფერი. შესაძლოა, იწყინა ნიკა გვარამიამ, ამას მე რატომ მაბრალებთო. აბა, ვის უნდა დააბრალონ?! ის იყო იქ ყველაფერი! ეს ყველაფერი ყოფითი ამბავია და პოლიტიკასთან ნაკლები კავშირი აქვს. ყოველ შემთხვევაში, მე არ დავაკავშირებდი. თუ გვარამია წავა, ის წავა პოლიტიკაში. რამდენად წარმატებული იქნება, ეს სხვა საკითხია. მე არ მინდა ამ ყველაფერში ჩარევა, რადგან მგონია, რომ პოლიტიკური კი არა, ყოფითი ფინანსური საკითხია.

- ბოლოს ყველაფერი ფინანსებსა და ყოფითზე დადის...

- რა თქმა უნდა, ასეა! ყოველთვის ვიღაცას რაღაც პირობები არ აწყობს და მერე ამას მოჰყვება ხოლმე ყველაფერი. შეიქმნა ახლა ვაი-უშველებელი, დავიღუპეთ, გვარამია წავაო. წავა და წავიდეს. ის წავა, სხვა მოვა, მთავარია, ეს ტელევიზია გამოიყვანონ ფინანსური კრიზისიდან. კომერციული ტელევიზიის თავიდათავი ფინანსებია. თუ ფინანსები არ იქნება, გვარამია კი არა, ვინც გინდა, ის მოიყვანე, ვერაფერს გაგიკეთებს!

————————-

„კვირის პალიტრა“, 12 ივნისი, 2017 წელი

„გაზის ტარიფი ზაფხულში გაიზრდება!“ // „სამი შუამავალი კომპანიის რეალური ფუნქცია მხოლოდ ფასნამატის შექმნაა“

ემა ტუხიაშვილი

მომავალი თვიდან გაზის ტარიფის გაზრდა იგეგმება. ენერგეტიკის მარეგულირებელმა კომისიამ უკვე დაასრულა მუშაობა გაზის გამანაწილებელი კომპანიების განაცხადებზე და გადაწყვეტილებას რამდენიმე დღეში გამოაცხადებს. ტარიფის ზრდის მიზეზად ენერგოკომპანიები ლარი-დოლარის კურსის ცვლილებასა და მათ მიერ განხორციელებულ ინვესტიციებს ასახელებენ. აღსანიშნავია ისიც, რომ 2005 წლის შემდეგ გაზის ტარიფის გადახედვა არ მომხდარა.­ მმართველ გუნდშიც არ უარყოფენ, რომ ტარიფის ზრდა მოსალოდნელია, თუმცა სპეციალისტების ნაწილის აზრით, გაძვირების ობიექტური მიზეზი არ არსებობს, მით უფრო იმ ფონზე, როცა საზღვრიდან მომხმარებლამდე გაზის ფასი ხელოვნურად იზრდება.

თემურ ჭიჭინაძე, ენერგეტ­იკოსი:

“გაზის გაძვირებისგან მომხმარებელთა უფლებებს ვეღ­ა­­რავინ დაიცავს, რადგან ეს ის სფეროა, რომელიც 10 წელია­ ენერგეტიკის მარეგულირებელი კომისიის კომპეტენციაში სრულ­ად აღარ შედის. არსებობს ენერგეტიკის­ მინისტრის 2007 წლით დათარიღებული ბრძანება, რომლის თანახმად, მონოპოლიური ბაზრის პირობებში­ გაზის მიწოდების აბსოლუტურად ალოგიკური დერეგულირ­ება მოხდა. შედეგად ის მივიღეთ, რომ ბუნ­ებრივი აირის საც­ალო და საბითუმო ფასი (გარდა­ საყოფაცხოვრებო მომხმარებლის რეგულირებადი ნაწილისა და თბოელექტროსადგურებისა) დერეგულირებულია და ყველა სხვა მომხმარებელს ტარიფის დადგენის გარეშე, მიმწოდებლის მიერ შეთავაზებული ფასით მიეწოდება; ხოლო იმ ნაწილში, სადაც ტარიფი­ სემეკის მიერ რეგული­რდება, დარწმუნებული ვარ, უკვე მიღებულია პოლიტიკური გად­აწყვეტილება ტარიფის ზრდ­ის თაობაზე. ამიტომაც გვაჩვევენ სამთავრობო უწყებები, რომ გაზის გაძვირება გარდაუვალია და არავინ ლაპარაკობს იმ რეალურ ვითარებაზე, რომელიც წლებია ამ სფეროში არსებობს. ეს კორუფციული სქემაა ჩვენი მოქალაქეების, მცირე და საშუალო, დიდი ბიზნესისა და ზოგადად, ეკონომიკის საზიანოდ. კორუფციული სქემა, რომელიც წინა ხელისუფლების დროს შეიქმნა, დღესაც წარმატებით მუშაობს, ხოლო მილიონებს, რომელიც ამ კორუფციული გარიგებით ერთეულების ჯიბეში ილექება, ისევ საქართველოს მოსახლეობა იხდის.

- ენერგოკომპანიები გაზის გაძვირების მიზეზად განხორციელებულ­ ინვესტიციებსა და ლარი-დოლარის კურსს ასახელებენ…

- გაზის გაძვირების რეალ­ური საფუძველი არ არსებობს.­ ერთი, რაც ცნობილია, ის არის, რომ “ყაზტრანსგაზმა” 180 მილიონი­ დოლარის მოთხოვნით­ სარჩელი შეიტანა ლონდონის სასამართლ­ოში საქართველოს ხელისუფლების წინააღმდეგ; ანუ ყაზახები ვერ მართავენ­ კომპანიას, რადგან 2010 წლიდან ენერგეტიკის სამინისტროს კომპანიაში დანიშნული ჰყავს დროებითი მმართველი და შესაბამისად, კომპანიის მიერ ინვესტიციების­ განხორციელებაზე ლაპარაკი ზედმეტია. ახლა დადგა საკითხი, რომ საქართველოს მთავრობამ გადაიხადოს თანხა, რომელსაც ყაზახური მხარე ითხოვს და ისევ გადასცეს მათ მართვაში კომპ­ანია. სახელმწიფოს ბიუჯეტში ზედმეტი ფული არა აქვს, რომ 180 მილიონი დაფაროს, ამიტომ კარგი გამოსავალია ტარიფის ზრდა თბილისის მოსახლეობ­ისთვის და ამ გზით ყაზახური მხარისთვის ზარალის კომპენსირება.

ყველაზე დიდი პრობლემა ის არის, რომ არ ვიცით, რა ღირს საქა­რთველოს საზღვრამდე მოსული გაზი. ნებისმიერ მოქალაქეს აქვს შესაძლებლობა, თუნდაც ინტერნეტით, გაიგოს, თუ რა ღირს ბუნებრივი გაზი მე­ზობელ­ სომხეთში­, თურქეთში, უკრაინაში, ბალტიისპირეთის­ ქვეყნებსა თუ ბელორუს­იაში. მხოლოდ­ საქა­რთველოში იმართება მთელი ენერგეტიკული­ სექტორი ისევ “ნაცმოძრაობის” დროინდელი სქემით და ეს სფერო გასაიდუმლოებულია. ვერავინ გეტყვით, რამდენად ყიდულობს საქართველო აზერბაიჯანისგან ბუნებრივ აირს, ჩვენ მხოლოდ საბოლოო შედეგი ვიცით. ცნობილია, რომ, მაგალითად, გაზგასამართ სადგურებზე 1000 კუბური მეტრი გაზის ფასი 260-270 დოლარია, რაც ძალიან ძვირია.

- რატომ არის გაზი ასე ძვირი­ ჩვენთან, რა არის მიზეზი?

- მხოლოდ საქართველოს ტერიტორიაზე გაზის ტრანსპორტირებაში ჩართულია სამი საშუ­ამავლო კომპანია – “გაზექსპო­რტი”, “სოკარ ჯორჯია გაზი” და “სოკარ გაზ ექსპორტ-იმპორტი”.­ მათ საზღვრის შემდეგ უნდა უზრუნველყონ გაზის მიწოდება გაზგამანაწილებელი კომპანიებისთვის. ამ კომპანიებს შორის ერთი დაფუძნებულია 2008 წელს, მეორე – 2011-ში. წილების ნაწილს აზერბაიჯანული მხარე ფლობს, ნაწილი კი ოფშორში რეგისტრირებულ მფლობელებს ეკუთვნის და მათი ვინაობა უცნობია.

2001-2003 წლებში,­ როდესაც “იტერა” უზრუნველყოფდა გაზის შემოტანას, კომპანიებს, რომლებიც დიდი ოდენობით გაზს მოიხმარდნენ, მათ შორის “რუსთავის­ აზოტს”, “თბილგაზს” და ა.შ., შეეძლოთ პირდაპირ საზღვარზე­ ეყიდათ გაზი. დღეს თბილისის გაზგამანაწილებელმა კომპანიამ გაზი რომ მიიღოს, სამი კომპანია უნდა გაიაროს, პლუს საქართველოს ტრანსპორტირების კომპანია. როგორც გითხარით, ეს სქემა 2007 წელს ამუშავდა, როცა მაშინდელი ენერგეტიკის მინისტრ ალექსანდრე ხეთაგურის ბრძა­ნებით გაზის დერეგულირება მოხდა. ასე რომ არ ყოფილიყო, მარეგულირებელი კომისია არ დაუშვებდა ამ სამი საშუამავლო კომპანიის არსებობას, მიმწოდებლებისთვის დააწესებდა გონივრულ მოგებას და მოსახლეობისთვის ბუნებრივი გაზი გაცილ­ე­ბით იაფი იქნებოდა, ვიდრე დღეს არის. საზღვართან მოსული გაზი, რომ­ელიც, დავუშვათ, 185 დოლარი ღირს, ყველა ფასნამატის გათვალ­ისწინებით ეღირებოდა 215-220 დოლარი და არა 270, როგორც დღეს.

ამ შუამავალი კომპანიების რეალური ფუნქცია მხოლოდ ფასნამატის შექმნაა. გარდა ამისა, არის კიდევ ერთი კორუფციული გარემოება, რასაც სათანადო ყურადღება რატომღაც არ ეთმობა – “გაზპრომთან” ხელშეკრულების პირობების შეცვლამდე ჩვენ ვიღებდით რუსეთიდან სომხეთში ტრანზიტულად გატარებული გაზის სანაცვლოდ 10%-ს ნატურით – ჯამში 200 მილ­იონ კუბურ მეტრს, შაჰ-დენიზის მილსადენიდანაც 5%-ს, 300 მილიონ კუბურ მეტრს. ასევე გვქონდა საშუალება, შეგვეძინა 500 მილიონი კუბური მეტრი ბუნებრივი გაზი სპეციალურ ფასად – 55 დოლარად, 1000 კუბურ მეტრზე ყოველწლიური ფასის 0.5%-იანი ზრდით. ფაქტობრივად, საქართველო იღებდა 1 მილიარდ კუბურ მეტრს, რაც საქართველოს მთლიანი მოხმარების 50%-ია. ეს ძალიან კარგი პირობაა ქვეყნისთვის. ამის ნაცვლად წინა ხელისუფლებამ გრძელვადიანი ხელშეკრულებით (ფაქტობრივად, სამუდამოდ) ეს მოცულობა – 1 მილიარდი კუბური მეტრი, ხელსაყრელ ფასად, 112 დოლარად 1000 კუბურ მეტრზე გადასცა “სოკარს”. მან ამ 112-დოლარიან გაზს დაამატა 31 დოლარი და ზარ-ზეიმით დაგვიბრუნა 143-დოლარიანი ე.წ. სოციალური გაზი; ანუ ეს 31 დოლარი ზემოხსენებულმა საშუამავლო კომპანიებმა დაამატეს, ფაქტობრივად, არაფერში.

ყველა ეს კორუფციული სქემა რომ გაიხსნას, მემორანდუმები, ხელშეკრულების პირობები გასაჯაროვდეს, ძალიან მარტივი იქნება ტარიფებთან დაკავშირებული იმ დაპირების შესრულება, რომელიც მოქმედ ხელისუფლებას 2012 წლის არჩევნებამდე ჰქონდა.

2012 წელს ენერგეტიკოსთა ჯგუფმა დავსვით საკითხი, რომ ხეთაგურის ბრძანება გაუქმებულიყო, თუმცა ენერგეტიკის სამინისტრომ რეაგირების გარეშე დაგვტოვა. ეს ბრძანება რომ გაუქმებულიყო, საშუამავლო კომპანიები მექანიკურად ამოვარდებოდნენ სქემიდან და გაზის ტარიფიც გაცილებით დაბალი იქნებოდა. ახლა კი გაზის ტარიფი ზაფხულში გაიზრდება. ეს ის დროა, როცა მოსახლეობა მცირე რაოდენობით მოიხმარს გაზს და ტარიფის ზრდა ნაკლებად შესამჩნევი იქნება…

თემურ ჭიჭინაძე, ენერგეტ­იკოსი:

„ენერგეტიკაში მოქმედ და ყოფილ ხელისუფალთა სრული კოაბიტაციაა. ამის მაგალითია “ნენსკრა ჰესზე”­ გამოცხადებული ტენდერი. 280-მეგავატიანი ჰესის მშენებლობაზე ტენდერს რომ აცხადებ და მის მშენებლობას 1,2 მილიარდად აფასებ, ეს ნონსენსია. მაგალითად, იგივე ჯდება “ხუდონჰესის” მშენებლობაც, მაშინ როცა მისი სიმძლავრე 700 მეგავატია. ნუთუ ეს ადამიანები უხერხულობას მაინც არ გრძნობენ?!

“ნენსკრაზე” ერთი მეგავატი გამომუშავებული ელექტროენერგია 4,28 მილიონი დოლარი ჯდება, როცა ყველა საერთაშორისო სტანდარტით მისი ღირებულება 1,3-1,5 მილიონია. საყურადღებოა ისიც, რომ “ნენსკრა ჰესზე” გაფორმებული ხელშეკრულების თანახმად, ენერგიის შესყიდვის ვალდებულება 35-წლიანია… ახსნის კი ვინმე,­ რისთვის ხდება ეს?! გაუგებარია იმ 500-კილოვოლტიანი გადამცემი ხაზის მშენებლობაც, რომელიც რუსეთს სომხეთთან აკავშ­ირებს და შენდება ჩვენი, ანუ ბიუჯეტის სახსრებით, თან კრედიტით! სამწუხაროა, რომ ამ ხაზზე ატეხილმა­ ხმაურმა გადაფარა ყველაზე მთავარი კითხვა – რისთვის არის ეს ხაზი საჭირო? ფაქტია, ასეთი მასშტაბის ხაზის მშენებლობა არ სჭირდება ჩვენს ტერიტორიაზე არსებული ახალი ჰესების სიმძლავრეების გამოტანას. ამის გაკეთება 220-კილოვოლტიანი გადამცემი ხაზითაც იქნებოდა შესაძლებელი. გამოდის, ის რეალურად სომხეთის ენერგოსისტემისთვის შენდება 1200 მეგავატი ატომური მდგრადობის უზრუნველსაყოფად.

რა თანხა იხარჯება ამ პროე­ქტისთვის, რამდენი იქნება ტარიფი და რა მოგებას ნახავს ქვეყანა, რატომღაც არავინ თვლის თავს მოვალედ, მოსახლეობას ანგარიში ჩააბაროს. ამ ხარჯების ამოღება საბოლოოდ მაინც ხალხის ჯიბიდან ხდება.

„კვირის პალიტრა“, 12 ივნისი, 2017 წელი

ჭიჭიკო ბენდელიანის რუსულ პოლკს საქართველო ყირიმიდან დაუბომბავს…

რას წარმოიდგენდა უშიშარი ქართველი მფრინავ-გამანადგურებელი, რომ მისი პოლკის „შთამომავლები“ 67 წლის შემდეგ მის სამშობლოს დაბომბავდნენ…

ირაკლი ალადაშვილი

აგვისტოს ომის უცნობი დეტალები ანუ როგორ გამოიყენა რუსეთის ხელისუფლებამ საქართველოზე თავდასხმისთვის უკრაინის ტერიტორია და როგორ იყო თავმოყრილი მისი ჯავშანტექნიკა სომხეთ-საქართველოს საზღვართან…

ნებისმიერი ომი წლობით ინახავს საიდუმლოებებს და ამ მხრივ გამონაკლისი არც 2008 წლის რუსეთ-საქართველოს ომია.

აგვისტოს ომის დროს კრემლმა საქართველოზე თავდასხმისთვის რუსეთის ტერიტორიის გარდა, ყირიმიც რომ გამოიყენა, მაშინ გავიგეთ, როდესაც სევასტოპოლიდან გამოსულმა რუსეთის შავი ზღვის ფლოტის საზღვაო ესკადრამ ოჩამჩირის სანაპიროზე დესანტი გადმოსხა. კრემლმა ეს შეტევითი ხასიათის საბრძოლო ოპერაცია უკრაინის მაშინდელი პრეზიდენტის, იუშჩენკოს დაუკითხავად ჩაატარა და ჯერ კიდევ მაშინ დაანახა როგორც უკრაინას, ისე – მთელ მსოფლიოს, რეალურად ვინ აკონტროლებდა ყირიმის ნახევარკუნძულს.

რუსული სპეციალიზებული საინფორმაციო საშუალებების ანალიზის შემდეგ “კვირის პალიტრამ” აღმოაჩინა, რომ აგვისტოს ომის დროს ყირიმიდან რუსეთმა არა მარტო საზღვაო დესანტი გადმოსხა ჩვენს სანაპიროზე, არამედ საჰაერო დაბომბვებიც განახორციელა.

აგვისტოს ხუთდღიანი ომის დროს ყირიმში, გვარდეისკოეს აეროდრომზე ბაზირებული რუსეთის შავი ზღვის ფლოტის 43-ე ცალკეული საზღვაო მოიერიშე საავიაციო პოლკის ოთხმა ეკიპაჟმა Су-24 ტიპის საფრონტო ბომბდამშენებით საბრძოლო გაფრენები განახორციელა ცხინვალის რეგიონში ქართული დასახლებული პუნქტების დასაბომბად. გარდა ამისა, ამავე პოლკის ორი ეკიპაჟი Су-24МР ტიპის სადაზვერვო თვითმფრინავებით საქართველოს ცაში სადაზვერვო ფრენებს ახორციელებდა.

სხვა ქვეყნების ტერიტორიების გამოყენება საკუთარი სამხედრო-პოლიტიკური მიზნების მისაღწევად რუსეთის ხელისუფლებისთვის არახალია. აგვისტოს ომის დროს საქართველო-სომხეთის საზღვარს მომდგარი იყო რუსეთის 102-ე გიუმრის სამხედრო ბაზის საბატალიონე-ტაქტიკური ჯგუფი, არანაკლებ 50 ერთეული ჯავშანტექნიკით და ისინი მხოლოდ ბრძანებას ელოდნენ საქართველოს ტერიტორიაზე შემოსაჭრელად.
სხვათა შორის, რუსულ საავიაციო პოლკში, რომელმაც ყირიმიდან საქართველო დაბომბა, დღესაც უდიდეს პა­ტივს სცემენ ჩვენს ცნობილ თანამემამულეს, საბჭოთა კავშირის გმირს, ჩოხატაურელ ჭიჭიკო ბენდელიანს, რომლის დიდი სურათი თვალსაჩინო ადგილზე უკიდიათ.

საქმე ის არის, რომ ამ პოლკის საავიაციო რგოლის მეთაური ჭიჭიკო ბენდელიანი ერთ-ერთი პირველი მფრინავი იყო, რომელიც 1941 წლის 22 ივნისს, გამთენიისას, საჰაერო ბრძოლაში ჩაერთო გერმანული თვითმფრინავების წინააღმდეგ. იგი 1944 წელს საჰაერო ბრძოლაში დაიღუპა, თუმცა მანამდე მოასწრო 400-ზე მეტი საბრძოლო გაფრენა, მარტომ ჩამოაგდო მოწინააღმდეგის 12 თვითმფრინავი (მათ შორის ერთი – საჰაერო ტარანით), ხოლო 20 – ჯგუფთან ერთად. საგულისხმოა, რომ ჭიჭიკო ბენდელიანის ცხედარი მისმა ქალიშვილმა უკრაინიდან სამშობლოში 2008 წელსვე გადმოასვენა. რას წარმოიდგენდა უშიშარი ქართველი მფრინავ-გამანადგურებელი, რომ მისი პოლკის “შთამომავლები” 67 წლის შემდეგ მის სამშობლოს დაბომბავდნენ…

———

P.S. ყირიმში, გვარდეისკოეს აეროდრომზე ბაზირებული რუსეთის შავი ზღვის ფლოტის 43-ე ცალკეულმა საზღვაო მოიერიშე საავიაციო პოლკმა საქართველოს დასაბომბად ყველაზე მოძველებული Су-24 (და არა – Су-24М) ტიპის საფრონტო ბომბდამშენები გამოიყენა, რომლებიც 2016 წელს ჩამოწერეს. არ არის გამორიცხული, რომ სწორედ ეს Су-24-ები 1993 წლამდე, ანუ რუსეთში გადაფრენამდე, კახეთში, დიდი შირაქის აეროდრომზე ბაზირებდა.