„ვერსია“: ნინო ბურჯანაძეს პარტია წაართვეს // ვინ გახდება ქრისტიან-დემოკრატიული მოძრაობის ხელმძღვანელი და მიიღებს თუ არა პარტია მონაწილეობას ადგილობრივი თვითმმართველობის არჩევნებში
„ვერსია“: ინტერვიუ გია ვოლსკისთან: „სასამართლოს გადაწყვეტილება ბერ ივანიშვილის განცხადებას ვერ დაეფუძნება» // რატომ არ გამორიცხავს გიორგი ვოლსკი რეპერებისთვის ნარკოტიკის „ჩადებას“ და დაუჭერს თუ არა მხარს „ნარკოპატიმრების“ ამნისტიას
—–
„ახალი თაობა“: ინტერვიუ ზაზა ხატიაშვილთან: „ნარკოტიკების ლიბერალიზაცია საქართველოს დაღუპავს“ // „ბიძინა ივანიშვილი საკუთარ თავს უწყობს საბოტაჟს“
„ახალი თაობა“: ინტერვიუ ადა მარშანიასთან: „რუსეთთან ლაპარაკისთვის დღესვე მზად ვარ“
„ახალი თაობა“: ინტერვიუ ია ანთაძესთან: „გოგი გვახარიას და სალომე ასათიანის გადაცემები 17 ივლისს დაიხურება“ // „საზმაუში იანვრამდე მხოლოდ „მოამბე“ გავა“
—–
„ვერსია“, 14-15 ივნისი, 2017 წელი
ნინო ბურჯანაძეს პარტია წაართვეს
ვინ გახდება ქრისტიან-დემოკრატიული მოძრაობის ხელმძღვანელი და მიიღებს თუ არა პარტია მონაწილეობას ადგილობრივი თვითმმართველობის არჩევნებში
თათია გოჩაძე
ქრისტიან-დემოკრატიული მოძრაობის შესახებ უზენაესმა სასამართლომ საბოლოო გადაწყვეტილება 8 ივნისს მიიღო. სამწლიანი დავა დასრულდა და სასამართლომ გოჩა ჯოჯუას მოთხოვნა ნაწილობრივ დააკმაყოფილა -ჯდომარედ ნინო ბურჯანაძის არჩევის გადაწყვეტილება ბათილად სცნო, თუმცა თავმჯდომარედ გოჩა ჯოჯუა არ აღიარა. მას შემდეგ, რაც 2013 წელს ქდმ-ს თავმჯდომარე გიორგი თარგამაძე თანამდებობიდან გადადგა, პარტიის პოლიტსაბჭომ ნინო ბურჯანაძის პარტიასთან გაერთიანება გადაწყვიტა. გოჩა ჯოჯუა კი ქდმ-ს თბილისის ორგანიზაციის თავმჯდომარე გახლდათ და ორგანიზაციის წევრებთან ერთად ამ გადაწყვეტილებას გაემიჯნა, რის გამოც 2014 წლის აგვისტოდან დავა სასამართლოში დაიწყო. გოჩა ჯოჯუა აცხადებს, რომ ქდმ-ს ყრილობა უკვე გამართულია და თავმჯდომარედ სწორედ ისაა დასახელებული, ამიტომ აპირებს, საჯარო რეესტრის სააგენტოს პარტიის რეგისტრაციისთვის უახლოეს მომავალში მიმართოს.
იმის გასარკვევად, ვინ გახდება თავმჯდომარის გარეშე დარჩენილი პარტიის ხელმძღვანელი, ,,ვერსია” გოჩა ჯოჯუას ესაუბრა. მისი განმარტებით, მნიშვნელოვანია, რომ ამ გადაწყვეტილების მიხედვით, ის სამართლებრივი აქტებიც ბათილია, რასაც ნინო ბურჯანაძე ხელმძღვანელობდა. იგი ასევე აცხადებს, რომ ,,გაერთიანებული დემოკრატიული მოძრაობის” ყრილობა ჩაატარა, (რადგან ქდმ უკვე ბურჯანაძის ხელში იყო), სადაც თავმჯდომარედ თავად ჯოჯუა აირჩიეს: ,,საჯარო რეესტრმა ეს გადაწყვეტილება სამართლიანად უნდა ჩათვალოს. მხოლოდ ამის შემდეგ შეგვეძლება პარტიის დაბრუნება, თუმცა იმას მივაღწიეთ, რომ ბურჯანაძე ვერანაირ დოკუმენტს ვეღარ შექმნის”.
თუ საჯარო რეესტრმა გოჩა ჯოჯუას მოთხოვნა არ დააკმაყოფილა, სასამართლო დავის გაგრძელებას, ყრილობის ჩატარება ურჩევნია და აცხადებს, რომ ამაზეც იფიქრებს. მისი თქმით, ყრილობის ამსახველი დოკუმენტაცია სასამართლოშიც წარადგინეს და მარეგისტრირებელ სააგენტოშიც.
სხვათა შორის, გოჩა ჯოჯუას თქმით, საერთო სახელმწიფოებრივი ინტერესიდან გამომდინარე, ნინო ბურჯანაძის პარტიის წარმომადგენელს გიორგი ახვლედიანს ყოველდღე ხვდება, მაგრამ ამ საკითხზე არ საუბრობენ: ,,არც სცადეს სამართლებრივ დავამდე არ მისულიყო ეს ყველაფერი. არ მჯერა ნინო ბურჯანაძის, ადამიანს ორმა სასამართლო ინსტანციამ რომ უთხრა, მართალი არ ხარო, ხომ უნდა დაფიქრდეს?! ვისაც შეუძლია მსგავსი უზნეო ფორმებით რაღაცების კეთება, თუნდაც პარტიაში ადამიანების უგულებელყოფა, არ დავუშვებ, ხელისუფლება ჩაიბაროს”.
გოჩა ჯოჯუა კიდევ ერთ გარემოებაზე ამახვილებს ყურადღებას. მისი განმარტებით, სასამართლოს გადაწყვეტილების მიხედვით, ნინო ბურჯანაძე როგორც არაუფლებამოსილი პირი სახელმწიფო თანხებს გახარჯავდა: ,,ქდმ კვალიფიციური სუბიექტია და მას ყველა გადამხდელი აფინანსებს. სწორედ ამ სიკეთეების გამო მოხდა ის, რაც მოხდა. რომ არა ეს დავა, ვინმემ იცოდა, რომ ნინო ბურჯანაძე ,,ქრისტიან-დემოკრატიული მოძრაობის” თავმჯდომარე იყო?! მას სჭირდებოდა ის რესურსები, რომლებიც ამ პარტიიდან მიითვისა”.
გოჩა ჯოჯუა აქვე დასძენს, რომ ნინო ბურჯანაძის არჩევას 11 კაცი ესწრებოდა და მიიჩნევს, რომ პარტია მხოლოდ რამდენიმე კაცი კი არა, სტრუქტურები და მხარდამჭერი ხალხია: ,,ვხვდები იმ ადამიანებს, ვინც ჩართული იყო ამ ბრძოლაში და ნახეს, რომ დავა სამართლიანად მოვიგეთ. საქართველოს მასშტაბით ყველა ორგნაზიცია, ვინც ჩვენ გვერდით იყო, არსად გადასულა და ამ მომენტს ელოდა”.
გოჩა ჯოჯუა აცხადებს, რომ ქდმ-ს სახით პოლიტიკურ ასპარეზზე მალე კიდევ ერთი აქტიური ოპოზიციური პარტია გამოჩნდება: ,,ახალგაზრდულმა ფრთამ შექმნა ,,ახალი ქრისტიან-დემოკრატიული მოძრაობა”, თავმჯდომარე ნიკოლოზ ჯოგლიძეა. ისინი ჩართულნი იყვნენ პროცესში და ჩავთვალოთ, რომ ქდმ ორი ფრთით იქნება წარმოდგენილი. წესით, ადგილობრივი თვითმმართველობის არჩევნებში მონაწილეობასაც მოვასწრებთ, თუმცა რთული იქნება მარტო მონაწილეობა. დავბლოკდებით თუ არა ვინმესთან, ჯერ გადაწყვეტილი არ გვაქვს”.
„ვერსია“, 14-15 ივნისი, 2017 წელი
ინტერვიუ გია ვოლსკისთან: „სასამართლოს გადაწყვეტილება ბერ ივანიშვილის განცხადებას ვერ დაეფუძნება» // რატომ არ გამორიცხავს გიორგი ვოლსკი რეპერებისთვის ნარკოტიკის „ჩადებას“ და დაუჭერს თუ არა მხარს „ნარკოპატიმრების“ ამნისტიას
თათია გოჩაძე
12 ივნისს, ,,ბირჟა მაფიას” წევრები- მიხეილ მგალობლიშვილი 50 000 ლარის, ხოლო გიორგი ქებურია 20 000 ლარის სანაცვლოდ წინასწარი პატიმრობიდან გაათავისუფლეს. რეპერები 6 ივნისს დიდი ოდენობით ნარკოტიკული ნივთიერების შენახვის ბრალდებით დააკავეს, რაც 8-დან 20 წლამდე თავისუფლების აღკვეთას ან უვადო პატიმრობას ითვალისწინებს. რეპერების დაკავება საზოგადოების ნაწილმა მათ მიერ გადაღებულ კლიპს დაუკავშირა, სადაც პოლიცია გაშარჟებული და დისკრიმინირებულია. შესაბამისად, გაჩნდა ვერსია, რომ მათზე პოლიციამ შური იძია და ნარკოტიკი ,,ჩაუდო”.
მნიშვნელოვანი ვნებათაღელვა მოჰყვა ბიძინა ივანიშვილის შვილის, ბერას მიერ სოციალურ ქსელში გავრცელებულ განცხადებასაც – ,,ბიჭებო, თქვენთან ვარ!”. მოქალაქეების უდიდესმა ნაწილმა ჩათვალა, რომ სწორედ ამ პოზიციის გამო მოითხოვა პროკურატურამ წინასწარი პატიმრობიდან რეპერთა გათავისუფლება და ხელისუფლებაც, ნარკოპოლიტიკის დაჩქარებული წესით ,,შერბილების” თაობაზე, სწორედ ყოფილი პრემიერის ფაქტორის გამო ალაპარაკდა.
რეპერების დაკავებასვე უკავშირებენ 12 ივნისს რესპუბლიკელების მიერ პარლამენტში კანონპროექტის შეტანას, რომლის თანახმადაც, პარტია გასამართლებული ნარკომომხმარებლების სრულ ამნისტიას, ხოლო გამსაღებლების მიმართ სასჯელის 1/3-ით შემცირებას ითხოვს. საინტერესოა, რატომ არ გამოვიდნენ მსგავსი ინიციატივით რესპუბლიკელები მაშინ, როცა პარლამენტის თავმჯდომარე, მათი პარტიის წევრი დავით უსუფაშვილი იყო? საინტერესოა ისიც, რამდენად შესაძლებელია, რეპერები მართლაც შურისძიების გამო დაეპატიმრებინათ და მართლაც შეასრულა თუ არა მათ გათავისუფლებასა და ნარკოპოლიტიკის ცვლილებებში მთავარი როლი ბერა ივანიშვილის განცხადებამ? ამ კითხვებზე პასუხების მისაღებად, ,,ვერსია” ხელისუფლებისა და რესპუბლიკური პარტიის წარმომადგენლებს დაუკავშირდა.
,,ვერსიასთან” საუბრისას, საპარლამენტო უმრავლესობის წევრი და პარლამენტის სპიკერის მოადგილე გიორგი ვოლსკი აცხადებს, რომ შესაბამისი უწყებების გადაწყვეტილებასთან ბერა ივანიშვილის განცხადებას კავშირი არ აქვს. გია ვოლსკი ,,ბირჟა მაფიის” წევრების დაკავებასაც აფასებს: „გირაოთი გამოშვება არ ნიშნავს, რომ საქმე დახურულია. თუ სასამართლომ გამოუშვა და მითუმეტეს, პროკურატურა არ იყო წინააღმდეგი, არ აქვთ ეჭვი, რომ ისინი გამოძიებასთან არ ითანამშრომლებენ. ნებისმიერი პოლიტიკოსი ვალდებულია, თავი შეიკავოს შეფასებისგან, სანამ რეალური სურათი არ შეიქმნება. სასამართლო იმიტომ არსებობს, წერტილი დაუსვას საკითხს. მჯერა, სასამართლო პოლიტიკურად ანგაჟირებულ განაჩენს არ გამოიტანს’, – ამბობს დეპუტატი.
- გასაგებია, მაგრამ თუ რეპერები ნარკოტიკის შენახვისთვის დააკავეს, რატომ გაათავისუფლეს, ვაღიარებთ, რომ ,,წამალი ჩაუდეს”? და თუ ნარკოტიკი არ ჰქონიათ, გამოდის, კლიპის გამო იძიეს შური?
- რა პასუხი გინდათ მოისმინოთ? პირველად სწორედ ეგ გითხარით და გამეორება არაფერს მოგცემთ.
- მაშინ, როგორც ხელისუფლების წარმომადგენელმა, ის მითხარით, თქვენ რა ინფორმაცია გაქვთ, რეალურად რის გამო დააკავეს რეპერები?
- წარმომადგენლობა რა შუაშია იმ რეალობასთან, რომელიც სასამართლომ უნდა დაადგინოს?! არაადეკვატური კითხვაა. ამ ფაქტმა გამოიწვია პრობლემები, რადგან საზოგადოების ნაწილს მიაჩნია, რომ ეს არის სამაგიეროს გადახდა. დიდი ხანია, დავამთავრეთ დრო, როცა არასასურველი გამოვლინების გამო ძალოვან სტრუქტურას შეეძლო, შური ეძია ადამიანზე, მაგრამ თუ ამ რეალობას სასამართლო დაადგენს, ეს იქნება ჩემთვის მთავარი სახელმძღვანელო. სასამართლომ ჩათვალა, რომ ბრალდებულების მხრიდან თანამშრომლობის ხარისხი და მათი რესურსი – გავლენა მოახდინოს გამოძიებასა და სასამართლო ვერდიქტზე – არის ნულოვანი.
- თუ საუბარი ნარკოტიკის დიდი რაოდენობით შენახვაზეა, თანამშრომლობა საღ აზრს მოკლებული არაა?
- ჩემი სუბიექტური აზრია – პოლიტიკოსმა სასამართლო გადაწყვეტილება ნაკლებად უნდა შეაფასოს, რომ გარკვეულწილად, ზეწოლის ფორმა არ ჰქონდეს. მომწონს თუ არა, სასამართლომ ასე მიიჩნია სწორად.
- თუმცა, საზოგადოების ნაწილში გაჩნდა განცდა, რომ ამ ფაქტმა შესაძლოა ნარკოდანაშაულის დაუსჯელობის სინდრომი გააჩინოს…
- თქვენ, რა, ადასტურებთ, რომ ისინი დამნაშავეები არიან?
- არა, ვამბობ, რომ ბრალი აქვთ წაყენებული ამ მუხლით…
- ამ კონკრეტულ მაგალითზე დაუსჯელობის სინდრომის შემოტანა არ იქნება ობიექტური დასკვნა. სასამართლოს გადაწყვეტილების შემდეგ გამოჩნდება, რამდენად ლოიალურია ის ნარკოტიკების გამყიდველების მიმართ, თუ ეს მართლაც დამტკიცდა; ხოლო, თუ არ დადასტურდა, ჩავთვლი, რომ გადაცდომა მოახდინა შსს-ს ქვედანაყოფმა, რომელმაც შესაბამისი პასუხი უნდა აგოს.
- რას გულისხმობთ?
- არასწორად იმოქმედა, ანუ რასაც დაცვის მხარე ამტკიცებს – ჩაუდო…
- ანუ, არ გამორიცხავთ, რომ პოლიციელებმა ამ ადამიანებს წამალი ჩაუდეს?
- არ ვიცი, ჩემგან რისი გაგება გსურთ, ალბათ, სკანდალური სათაური გინდათ! მე რომ ეს არ გამოვრიცხო – არაფერს ნიშნავს, მთავარია, სასამართლო რა გადაწყვეტილებას მიიღებს. არაფერს გამოვრიცხავ, რადგან საქართველოში პოლიციის მხრიდან ეს გადაცდენა არ იქნება მსოფლიო დონის სკანდალი – სამწუხაროდ, ასეთი რამ ხდება და არამარტო საქართველოში… მაგრამ ვინც წინასწარ იტყვის, რომ ეს იყო ძალოვნების დანაშაული, ან პირადი დამოკიდებულება იქნება, ან პოლიტიკური სპეკულაცია.
- იქონია თუ არა გავლენა ბერა ივანიშვილის განცხადებამ რეპერების წინასწარი პატიმრობიდან გათავისუფლებაზე? თინა ხიდაშელმა აღნიშნა, ამ განცხადებამ სამი სახელმწიფო სტრუქტურა ჩამოშალაო…
- ბერა ივანიშვილის განცხადება არაფერ შუაშია. ეს პოლიტიკური შეტევები უზნეო ექსპლოატაციაა ბიძინა ივანიშვილის მიმართ. ზოგიერთები, მაგალითად, თინა ხიდაშელი, ბერა ივანიშვილის გამონათქვამების რაკურსიდან ბიძინა ივანიშვილის ფაქტორს უბრუნდებიან. არ არსებობს ადამიანი, რომლის განცხადების საფუძველზეც იმოქმედებს სასამართლო ან საგამოძიებო სტრუქტურები. ბერა სრულწლოვანი ადამიანია, სიმღერებს წერს, რეპერია, მაგრამ ვერ ვიტყოდი, რომ სასამართლოს გადაწყვეტილება მის რომელიმე განცხადებაზე იქნება დაფუძნებული.
- თუმცა, ხელისუფლების დამოკიდებულების შეცვლა ნარკოპოლიტიკის მიმართ ბერა ივანიშვილის ამ განცხადებას დაემთხვა…
- არაფერი დამთხვევია. პირიქით, შეიძლება, ბერას განცხადება დაემთხვა იმ სტრატეგიულ მიმართულებას, რომელსაც პარლამენტი ამუშავებს. ამ კანონპროექტზე მუშაობა დაახლოებით ერთ თვეზე მეტია დაიწყო. ამავე დროს, მთავრობისა და თავად პრემიერისგან მოდის ინიციატივა, მაქსიმალურად ლოიალურები ვიყოთ იმ ადამიანების მიმართ, ვინც ჯანმრთელობის რაკურსით არის დაკავშირებული ნარკოდანაშაულთან და მაქსიმალურად მკაცრები მათ მიმართ, ვინც ამ უბედურებას უკანონოდ ავრცელებს. სხვათა შორის, ბოლო პერიოდში მთელი რიგი საკითხებია გადაწყვეტილი, რომელიც ამ პოლიტიკის აშკარა პრიორიტეტულობაზე მიუთითებს: თუ ადრე სამედიცინო დახმარების ჯგუფი ვალდებული იყო, სამართალდამცველებისთვის შეეტყობინებინა ადამიანზე, ვინც ნარკოზემოქმედების ქვეშ იყო და მის მიმართ სისხლის სამართლის პასუხისმგებლობა გარდაუვალი იყო, ახლა ეს ვალდებულება აღარ არსებობს. ადმინისტრაციული სასჯელისა და სისხლის სამართლის პასუხისმგებლობის საკითხებზე კიდევ სამსჯელოა, მაგრამ რეალური სურათი გვიჩვენებს, რომ ვისაც პირადი გამოყენებისთვის აქვს ნარკოტიკი და არაა დაკავშირებული კრიმინალურ საქმიანობასთან, არ დაექვემდებაროს ისეთ სასჯელს, რომელიც მის ცხოვრებას დაანგრევს.
- რესპუბლიკელების ინიციატივაზეც გკითხავთ. მიზანშეწონილად მიგაჩნიათ ნარკოდანაშაულზე დაკავებული პირების ამნისტია?
- ეს პოპულისტური გამოხტომაა. ჩემი ინფორმაციით, ადამიანები, მცირე დოზის გამოყენების გამო საპატიმროებში პრაქტიკულად, აღარ არიან. რაც შეეხება გამსაღებლებს, არ მგონია, მათ მიმართ, ლოიალურები უნდა ვიყოთ. თუმცა, აქაც დასათვლელია სტატისტიკა, ასე ხელაღებით არ შეიძლება საუბარი. საერთოდ, სანამ ამნისტიის შესახებ განაცხადებ, ზუსტად უნდა წარადგინო ციფრები, რამდენი ადამიანი რა მუხლითაა გასამართლებული. ასე თემის შემოგდება და ის, რომ პოლიტიკური წარმატება ეძებო გარკვეული სოციალური ჯგუფის მხარდაჭერაში არჩევნების დროს, ვფიქრობ, არასწორი საქციელია.
———–
იმის გასარკვევად, აქვთ თუ არა სტატისტიკური მონაცემები და რატომ გამოვიდნენ ამ ინიციატივით ახლა, როცა საკითხი ხელისუფლების მიერ ისედაც გააქტიურებულია, ,,ვერსია” რესპუბლიკური პარტიის თავმჯდომარე თამარ კორძაიას დაუკავშირდა. მისი განმარტებით, მსოფლიო პრაქტიკამ დაადასტურა, რომ ნარკოტიკების წინააღმდეგ ბრძოლა წარუმატებელია და პირიქით, დევნის გამო, მოთხოვნა იზრდება: ,,იმ ქვეყნებში, სადაც ალტერნატივა ადამიანის თანადგომაში დაინახეს, გაცილებით უკეთესი ვითარებაა. ყველგან, სადაც დეკრიმინალიზაცია მოხდა, სახელმწიფომ შექმნა სოციალური პროგრამები იმ ადამიანების მხარდასაჭერად, ვისაც ნარკოტიკების მოხმარების შემცირება ან თავის დანებება სურთ. კი არ სჯიან, ეხმარებიან. რესპუბლიკელებს მიგვაჩნია, უნდა გადავიდეთ ლიბერალურ ნარკოპოლიტიკაზე და ყველა, ვისაც თავის დროზე ნარკოდანაშაულის გამო სასჯელი მიუსაჯეს, არაჰუმანური მოპყრობის მსხვერპლია”.
თამარ კორძაიას თქმით, დღეს პატიმრების 1/3 ნარკოდანაშაულისთვის იხდის სასჯელს, ამიტომ უნდა დაიწყოს შეცდომების აღიარება და თუ არსებული ნარკოპოლიტიკა შეცდომა იყო, მათ მიმართაც გამოსწორდეს, ვისაც არასწორად მოექცნენ: ,,მაინტერესებს, ხელისუფლებამ აქამდე რატომ არ გადადგა ამ მხრივ ნაბიჯები? ახლა შეეშინდათ ამომრჩევლის დაკარგვის, თორემ ამ საკითხზე საკონსტიტუციო სასამართლომ გადაწყვეტილება წელიწადზე მეტია გამოიტანა”.
რატომ არ დააყენეს ეს ინიციატივა რესპუბლიკელებმა ხელისუფლებაში ყოფნის დროს, ,,უსუფაშვილის პარლამენტში”? ამ კითხვაზე თამარ კორძაიას ასეთი პასუხი აქვს: ,,როცა ხელისუფლებაში ვიყავით, ფსიქოსოციალური საჭიროების მქონე ადამიანები ქმედუნარიანებად ვაღიარეთ, 18 წლამდე ქორწინება ავკრძალეთ. 5 საუკეთესო კანონპროექტის ავტორი ვიყავი და თუ ფიქრობენ, რომ მარტო ერთმა პარტიამ უნდა ააშენოს ქვეყანა, მოეცათ ხმა და ავაშენებდით! ბევრ რამეს აკეთებდნენ რესპუბლიკელები პარლამენტში, მაგრამ ხანდახან უსამართლოები არიან ადამიანები _ იმაზე მეტს გთხოვენ, ვიდრე შესაძლებელია. ყოველთვის ვემხრობოდით დეკრიმინალიზაციას, რასაც დღეს ის პარლამენტი გვპირდება, რომელიც ამ იდეის განხორციელებისას მაშინ გვებრძოდა”.
თამარ კორძაია ,,ბირჟა მაფიას” წევრების გათავისუფლებასაც ეხმაურება და მიიჩნევს, რომ ამ ამბავში ერთადერთი პოზიტივი ბრალდებულების გათავისუფლებაა: ,,უნდა გაეთავისუფლებინათ მაშინ, როცა დააკავეს. მივაღწიეთ, რომ წინასწარი პატიმრობა უკიდურეს შემთხვევაში გამოიყენება, მაგრამ პროკურატურამ თქვა, საზღვრები არ გვაქვს დაცული და გაიქცევიანო. ფაქტობრივად, აღიარა, რომ სახელმწიფო დაცული არაა. ბერა ივანიშვილის განცხადების შემდეგ კი გამოუშვეს. რატომღაც, სწორედ ამის შემდეგ შეიცვალა მთავრობისა და სასამართლოს პოზიცია. გამოდის, სახელმწიფო სტრუქტურები ერთი ადამიანის სუბიექტურ აზრზეა დამოკიდებული. ასეთი ქვეყანა ინსტიტუციურად არ არსებობს. ალბათ, ინერციით მივდივართ!”.
თამარ კორძაია აცხადებს, რომ იმის მიუხედავად, დაუმტკიცდება თუ არა ბრალი რეპერებს, უმძიმესი ვითარებაა: ,,წარმოიდგინეთ, ამ ადამიანებს ნარკოტიკული დანაშაული რომ არ დაუმტკიცდეს. გამოდის, სახელმწიფომ უნდა აღიაროს – მათ ნარკოტიკული საშუალება პოლიციამ იმიტომ ჩაუდო, რომ მათი კლიპი არ მოეწონა, ეს კი ნიშნავს, რომ სახელმწიფო გამოხატვის თავისუფლებას ებრძვის. ორივე შემთხვევაში ძალიან ცუდ მდგომარეობაში ვართ. ამ პირობებში, როცა პრემიერი შესაბამისი მაღალჩინოსნების პასუხისმგებლობის საკითხს არ აყენებს, ნიშნავს, რომ ხელისუფლება უბრალოდ არ გვყავს და არავინ იცის, რა არის გასაკეთებელი!”
———————–
„ახალი თაობა“, 15 ივნისი, 2017 წელი
ინტერვიუ ზაზა ხატიაშვილთან: „ნარკოტიკების ლიბერალიზაცია საქართველოს დაღუპავს“ // „ბიძინა ივანიშვილი საკუთარ თავს უწყობს საბოტაჟს“
„ახალი თაობის“ კითხვებს ადვოკატთა ასოციაციის ხელმძღვანელი ზაზა ხატიაშვილი პასუხობს.
- ბატონო ზაზა, ადამიანის უფლებების დამცველი საერთაშორისო ორგანიზაციები პრემიერ კვირიკაშვილს განცხადებას უგზავნიან, სადაც აფგან მუხთარლის და სხვა გახმაურებულ საქმეებზეა ყურადღება გამახვილებული. მოვისმინეთ განცხადებები, რომ საბოტაჟს აქვს ადგილი ხელისუფლების წინააღმდეგ. რას იტყვით თქვენ?
- საბოტაჟს ვინ უწყობს ამ ხელისუფლებას?! მე და თქვენ ვერ მოვუწყობთ! საბოტაჟს უწყობენ ის ბინძური პოლიციელები და პროკურორები, რომლებიც ატერორებდნენ საქართველოს მოქალაქეებს სააკაშვილის რეჟიმის დროს და აგრძელებენ საქართველოს მოქალაქეების ტერორს ივანიშვილის ფეოდალური ხელისუფლების დროს!
- ანუ შიგნით, სისტემაშია პრობლემა?
- ასეა. როცა შენ გყავს ერთი და იგივე პროკურორი და ერთი და იგივე პოლიციელი, რომლებსაც აქვთ დანაშაულებრივი ფსიქიკა, შეუძლიათ ადამიანი ტყუილად დაიჭირონ, ვინ უნდა მოგიწყოს საბოტაჟი?! პატრულს, პოლიციას, პროკურატურას სააკაშვილის რეჟიმის დროს ფინანსურ დახმარებას უწევდა ივანიშვილი, ეს ფაქტი ყველას კარგად გახსოვთ. აქედან გამომდინარე, ამ კაცმა გადაწყვიტა მის მიერვე დაფინანსებული სამართალდამცავი სტრუქტურის შენარჩუნება. პლუს ბიძინა ივანიშვილის ხელისუფლებამ ჩაიდინა ისეთი რაღაცები, რაც არ გაუკეთებია მიხეილ სააკაშვილის რეჟიმს.
- კონკრეტულად რას გულისხმობთ?
- მე დაახლოებით ოთხი წლის წინ დავიწყე საუბარი, რომ საქართველოში უმართავი პროცესები მოხდებოდა, დაიწყებოდა აქტიური ჩადებები, იმიტომ, რომ პოლიციელებში იყო დაუსჯელობის სინდრომი. ყველაზე მეტად მიხეილ სააკაშვილს არ უნდოდა სანდრო გირგვლიანი რომ მომკვდარიყო მისი მმართველობის დროს, მაგრამ მოხდა და მოხდა იმიტომ, რომ მიხეილ სააკაშვილმა სამართალდამცავი უწყება მთლიანად მიუშვა, რაც გინდათ, ის ქენითო. იმ პერიოდში ყველაზე ცნობილ დამნაშავეებს კი ხელი ბიძინა ივანიშვილმა გადააფარა. იმ რეჟიმის ერთ-ერთი ყველაზე მძიმე დამნაშავეები იყვნენ მოსამართლენი ჩინჩალაძეები და მურუსიძეები, რომლებიც ბიძინა ივანიშვილმა შეინარჩუნა სასამართლო სისტემაში და დააწინაურა!
დღეს სააპელაციო სასამართლოს თავმჯდომარეა ჩინჩალაძე, ვისთანაც იყო ყველაზე მეტი კითხვის ნიშანი. ჩინჩალაძე არის ბოლო ინსტანცია. უზენაეს სასამართლოში საქმეების 95% არ განიხილება. საზოგადოებას ჩინჩალაძის მიმართ მეტი კითხვა ჰქონდა, ვიდრე ვანო მერაბიშვილის მიმართ. მაგრამ ივანიშვილის ფორმულაა – რაც არ უნდა დანაშაული ჩაიდინო, თუ დამემონები, შენ იქნები ხელშეუხებელი! აი, ამან მოიტანა ყველაფერი!
- რა მოიტანა?
- ბევრი დამნაშავე პოლიციელი დააწინაურა ივანიშვილის ხელისუფლებამ, რომლებსაც ადამიანის წამებაში ედებოდათ ბრალი. საბოტაჟი თავის თავს მოუწყო ივანიშვილმა. დამნაშავე ხალხი დატოვა ხელისუფლებაში. შეუძლებელია ამის გაკონტროლება, ეს უკვე მიშვებული პროცესია. სწორედ ამას გადაყვება ივანიშვილის ფეოდალური რეჟიმი. დღეს ღმერთმა დაგვიფაროს ახალი გირგვლიანების და ახალი ვაზაგაშვილებისგან, მაგრამ ყველაფერი აქეთ მიდის.
- საით მიდის?
- რომ პოლიციელები ჩადიან ათასგვარ სიბინძურეს, ხოლო სავარაუდო დამნაშავე პროკურორები არ იძიებენ მათ საქმეს. ჩვენ ვამბობდით 4 წლის წინ, რომ თუ არ შეიქმნებოდა დამოუკიდებელი საგამოძიებო მექანიზმი, ეს ივანიშვილისთვის იქნებოდა ცუდი. როცა თამაზაშვილმა დაიწყო ხელის ფათური ძალოვან უწყებაში, ეს იმთავითვე ნათელი იყო, რომ ცუდ შედეგს მოიტანდა! ივანიშვილის ხელისუფლებას ცოდვად მარტო ის ეყოფა, რომ ბავშვთა სამყარო გადაწვეს ძალიან საეჭვო ვითარებაში და ხელისუფლებამ ამაზე წაუყრუა.
- პარლამენტი ნარკოპოლიტიკის ლიბერალიზაციაზე მსჯელობს. რამდენად უშველის ეს ჩადებების თემას და რას მივიღებთ საბოლოოდ?
- დღეს ეს არის სახელმწიფო პოლიტიკა, რომ ნარკოტიკებს გაუკეთონ ლიბერალიზაცია და მთელი საქართველო გაანარკომანონ. რა გამარტივება, ხალხო, პირიქით, გამკაცრებაა საჭირო. როგორ შეიძლება ნარკოტიკების გაყიდვა?! წარმოგიდგენიათ, რა დონის ბინძური ხელისუფლება გვყავს, რომ განა იმ პოლიციელებს სჯის, ვინც ნარკოტიკებს უდებს, განა დამოუკიდებელ საგამოძიებო მექანიზმს ქმნის, არა, პოლიციელებს ხელშეუხებელს ტოვებს, რომლებმაც სავარაუდოდ დანაშაული ჩაიდინეს და ადამიანს ჩაუდეს, ხოლო მოსახლეობისთვის ნარკოტიკის თავისუფალ გაყიდვას უშვებს!
ამაზე დიდი უბედურება რა გინდათ, ხალხო?! ეს არის ქვეყნის დაღუპვა, დაქცევა, გაუბედურება! ჩვენთან სკოლაში არ ისწავლება, თუ რა მავნეა ნარკოტიკი. ვიხვეწები და ვერც ერთ განათლების მინისტრს ვერ მივაღებინე, რომ სავალდებულო სწავლება ყოფილიყო ამის! გამოფხიზლდეს მოსახლეობა და მიხვდეს, რომ ივანიშვილი მოვიდა ამ ქვეყნის გასანადგურებლად!
- ანუ თქვენ ეწინააღმდეგებით ნარკოპოლიტიკის ლიბერალიზაციას?
- დიახ, ეს გაანადგურებს ქვეყანას! რა ფორმულა აქვთ, მეტი ნარკოტიკი გაყიდონ და მეტი ბინძური ფული ჰქონდეთ?! კანონის ლიბერალიზაცია არის ამ სენის წახალისება. მიჩნდება ეჭვი, რომ ხელისუფლებას კავშირი აქვს ნარკოტიკების შემომტანებთან. თუ პოლიცია არ აფარებს ხელს შემომტანებს, ისეთ პატარა სახელმწიფოში, როგორიც საქართველოა, რანაირად უნდა შემოვიდეს და გაიყიდოს ნარკოტიკი? ეს ხომ წარმოუდგენელია?! სასაცილოა დღეს პროკურატურის ქმედებები. ეს უკვე კომიკური დაწესებულებაა, რომელიც იმის მიხედვით მოქმედებს, თუ რა თქვა ბერა ივანიშვილმა ან მამამისმა. ბერა ივანიშვილმა დაგვანახა, მე და მამაჩემი ვმართავთ ამ ქვეყანასო! რა გამოდის, თუ არა ხარ ბერა ივანიშვილის მეგობარი და ჩაგიდეს ნარკოტიკი, უნდა წახვიდე ციხეში?!
რასაც ბიძინა ივანიშვილი აკეთებს, ეს რომ მიხეილ სააკაშვილს გაეკეთებინა, 200 ათასი კაცი იქნებოდა ქუჩაში. ბიძინა ივანიშვილს კი ტაშს უკრავენ. ასე როგორ დააჰიპნოზა ეს ხალხი ბიძინა ივანიშვილმა, ვერ გამიგია.
„ახალი თაობა“, 15 ივნისი, 2017 წელი
ინტერვიუ ადა მარშანიასთან: „რუსეთთან ლაპარაკისთვის დღესვე მზად ვარ“
„პატრიოტთა ალიანსის“ წევრი, დეპუტატი ადა მარშანია „ახალ თაობასთან“ ინტერვიუში აფხაზეთის საკითხზე და რუსეთთან პირდაპირი დიალოგის აუცილებლობაზე საუბრობს.
- ქალბატონო ადა, რას იტყვით აფხაზეთის მიმართ ხელისუფლების პოლიტიკასთან დაკავშირებით?
- დღიდან პარლამენტში შესვლისა, ჩვენ ამ საკითხს ვაყენებთ. უპირველესი საკითხი არის ჩვენი ქვეყნის გამთლიანება.
- რუსეთთან პირდაპირ დიალოგზე მოუწოდებს ხელისუფლებას ნინო ბურჯანაძე. თქვენც ფიქრობთ, რომ რუსეთთან პირდაპირ დიალოგს ალტერნატივა არ აქვს თუ ჯერ კიდევ საერთაშორისო ფორმატებს არ ამოუწურავს თავი?
- ყველაფერი უნდა გავაკეთოთ ერთდროულად, როგორც საერთაშორისო თანამეგობრობასთან უნდა ვიმუშაოთ, ისე რუსეთთან უნდა ვიმუშაოთ. პირდაპირი დიალოგის მომზადება მაინც უნდა დავიწყოთ. სხვა ალტერნატივა ამას არ აქვს და ამაში ღრმად ვარ დარწმუნებული. როგორი მძიმეც არ უნდა იყოს საუბარი, საუბარი უნდა დავიწყოთ. ერთადერთი არგუმენტი არის, რომელიც უზენაესია _ ეს არის ჩვენი მიწა-წყალი. ჩემი მთავარი ინტერესი არის, რომ ამ მიწა-წყალს მივხედო და ვუპატრონო. ეს პოლიტიკა უნდა იქნას გატარებული.
- რუსეთის ფაქტორი?
- არ მაინტერესებს. ჩვენ უნდა ვაჩვენოთ რუსეთის ფედერაციას, აფხაზ საზოგადოებას, მსოფლიო თანამეგობრობას, რომ არ დავთმობთ არაფრის ფასად, არ მოვეშვებით, ეს განწყობა თუ გვექნება მთელ ერს, ყველაფერი გამოგვივა. წინააღმდეგ შემთხვევაში არაფერი არ გამოვა. სხვადასხვა ფორმით ყოველდღე უნდა ვაჩვენებდეთ ყველას, რომ ვერ ვეგუებით არსებულ სტატუსკვოს.
კონკრეტულად ჟენევის ფორმატს მივესალმები, არ ვამბობ, რომ არ უნდა იყოს, პირიქით, უნდა იყოს და რაც შეიძლება მეტი უნდა იყოს ასეთი საერთაშორისო ფორმატი, მაგრამ შედეგი არ დადგება, სანამ ფართომასშტაბიან მოლაპარაკებებს არ დავიწყებთ რუსეთთან. ჟენევის ფორმატი არის გამომდინარე ფორმატი, იქ არ წყდება არაფერი, კრემლში წყდება და, რაც მთავარია, ჩვენს გულებში წყდება. შეიძლება ეს ძალიან ემოციურად ჟღერს, მაგრამ თუ თავს დავანებებთ ჩვენივე მიწას და ჩვენვე ხელს ჩავიქნევთ, არც არაფერი არ გამოვა. რუსეთთან ძალიან მძიმე იქნება საუბარი და მე არ მაქვს ილუზია, რომ თუნდაც ამ მძიმე საუბრის შემდეგ უცებ გაგვიხსნის კარს და დაგვპატიჟებს, მაგრამ ჩვენ უნდა ვცადოთ და დავიწყოთ.
- ხელისუფლებიდან ვის გაუშვებდით კრემლში ვლადიმირ პუტინთან მოსალაპარაკებლად?
- არავის არ გავუშვებდი, რადგან არავის იმედი არ მაქვს. არ არიან ის ადამიანები, რომელთაც უპირობოდ ვენდობი. რუსეთმა უნდა დაინახოს, სანამ ხმას ამოიღებ, რომ დამთმობი არ ხარ. ძალიან კარგად ვიცნობ რუსებს და ეს ვიცი. თუმცა, ვლადიმერ პუტინამდე ჯერ გზები უნდა გავჭრათ, მასთან მოლაპარაკებები შემდეგი ეტაპია.
- თქვენ წახვიდოდით?
- მე მზად ვარ, ყოველ წუთს წავიდე.
- აპირებთ?
- რადგან საუბარია ასეთი დონის საკითხზე, ჩვენი ქვეყნის უპირველეს ინტერესზე, მე მინდა, რომ მორალური მხარდაჭერა მაინც მქონდეს. ასევე ხელისუფლება უნდა გიმაგრებდეს ზურგს, ისე არ არის, რომ ჩახვიდე და დამთავრდა.
- რა შედეგს წამოიღებთ, ეს არის მნიშვნელოვანი.
- მე მეუბნებიან, გრიგორი კარასინს ხომ ველაპარაკებითო, მაგრამ გრიგორი კარასინთან საუბარი და კრემლში საუბარი სხვადასხვა რამეა. საზოგადოების მხარდაჭერა არის, რომ ჩვენ პირდაპირი დიალოგი დავიწყოთ რუსეთთან.
- ვიზების ლიბერალიზაცია, სხვა ფაქტორები არ იმოქმედებს აფხაზებზე?
- არა, ჯერჯერობით არ იმუშავებს. საქართველო ევროპისკენ რომ მიდის და ნელ-ნელა რომ ინტეგრირდება, ეს დიდი პლუსია, მაგრამ ეს არ არის ის მომენტი, რის გამოც აფხაზები დაბრუნდებიან. გულწრფელი და მცოდნე საუბარი უნდა დავიწყოთ აფხაზებთან, მე მეგულება 20-მდე ადამიანი, ვისაც შეუძლია ეს და ვისაც აფხაზებში ნამდვილად აქვთ ავტორიტეტი.
„ახალი თაობა“, 15 ივნისი, 2017 წელი
ინტერვიუ ია ანთაძესთან: „გოგი გვახარიას და სალომე ასათიანის გადაცემები 17 ივლისს დაიხურება“ // „საზმაუში იანვრამდე მხოლოდ „მოამბე“ გავა“
საზოგადოებრივი მაუწყებლის ირგვლივ განვითარებული პროცესები საზოგადოებაში დიდ ინტერესს იწვევს. გუშინ დილიდან ვრცელდებოდა ინფორმაცია, რომ საზოგადოებრივზე ახალმა ხელმძღვანელობამ რამდენიმე გადაცემა უკვე დახურა. რა ხდება რეალურად, რა გადაცემები იხურება, რომელი გადაცემები მოხვდება ახალ სამაუწყებლო ბადეში და როდიდან გავა ეთერში განახლებული გადაცემები? „ახალი თაობის“ ამ და სხვა კითხვებს ია ანთაძე პასუხობს.
- ია, ვრცელდება ინფორმაცია, რომ საზოგადოებრივი მაუწყებელი გადაცემებს ხურავს. რა პროცესები მიმდინარეობს საზოგადოებრივ არხზე და რას გვეტყვით გადაცემების დახურვის თაობაზე?
- საქმე ის არის, რომ პროცესი გრძელდება, არაფერი ახალი არ არის. 17 ივლისს, როგორც ეს იყო გამოცხადებული, იხურება ყველა გადაცემა, გარდა მოამბისა. უბრალოდ, ხმაური ატყდა იმის გამო, რომ კანონმდებლობა ითხოვს, ერთი თვით ადრე შევატყობინოთ რადიო თავისუფლებას, რომ ის გადაცემები, რომლებიც აქ მზადდებოდა რადიო თავისუფლებასთან ერთად, ეთერში აღარ გავა 17 ივლისიდან. ანუ ახლა არაფერი არ დახურულა, საუბარია ისევ და ისევ იმაზე, რომ 17 ივლისის შემდეგ, საზოგადოებრივი მაუწყებლის ეთერში იქნება მხოლოდ მოამბე.
- რამდენი ხნით დაიხურება ეს გადაცემები და აქედან რომელი დაბრუნდება განახლებულ ეთერში?
- ჩვენ გვაქვს ორი ბლოკი, სადაც გადაცემები მზადდება. ერთი გახლავთ მედიაწარმოების ბლოკი და მეორე გახლავთ ახალი და მიმდინარე ამბების ბლოკი. მედიაწარმოების ბლოკში გადაცემები დაბრუნდება მხოლოდ კონკურსის წესით. ჩვენთან კონკურსი იყო გამოცხადებული და ეს კონკურსი ჯერ არ დასრულებულა.
- როდის სრულდება კონკურსი?
- დაახლოებით ათ დღეში დასრულდება და გაირკვევა ის გადაცემები, რომლებიც შემოვა კონკურსის წესით ჩვენს ბადეში. რაც შეეხება ახალი და მიმდინარე ამბების ბლოკს, აქ მომზადდება პოლიტიკური გადაცემები და ეს გადაცემები იქნება შიდა რესურსით. ანუ საზოგადოებრივი მაუწყებელი შიდა რესურსით მოამზადებს პოლიტიკურ გადაცემებს, ხოლო ყველა დანარჩენს შემოიტანს კონკურსის წესი. ეს იქნება ორი გზა, რითაც გადაცემები მოხვდება ჩვენი ტელევიზიის ეთერში.
- რა სახით გაივლის კონკურსს გადაცემა, რამდენად კომპეტენტურია ჟიური და ვინ უნდა გადაწყვიტოს, გადაცემა დარჩეს თუ არა?
- კონკურსი იყო გამოცხადებული კარგა ხნის წინ. კომისიაც და სხვა დანარჩენიც შეგიძლიათ ჩვენს ვებგვერდზე ნახოთ. კონკურსი ჩატარდა სამ ეტაპად. პირველი ეტაპის შემდეგ სულ 153 ჯგუფმა შემოიტანა კონკურსში განაცხადი და გადაცემა უნდა იყოს 9. ის ორგანიზაციები, რომლებიც არიან კონკურსის მესამე ეტაპზე გადასული, წერენ პილოტებს, ეს ხანგრძლივი პროცესი იყო, კარგა ხანია დაწყებულია და 21 რიცხვში იქნება კომისიის ბოლო სხდომა, სადაც კომისია პილოტების საფუძველზე შეარჩევს იმ 9 გადაცემას, რომელიც მოხვდება პირველი არხის ეთერში.
- ანუ თვის ბოლომდე მაყურებელს უკვე ეცოდინება, რომელი გადაცემები რჩება?
- დიახ, ასეა. ოღონდ ეს იქნება მედიაწარმოების ბლოკში, ხოლო რაც შეეხება ახალი და მიმდინარე ამბების ბლოკს, აქ პოლიტიკური გადაცემების შესახებ საბოლოო გადაწყვეტილებები ჯერ არ არის მიღებული.
- გოგი გვახარიას და სალომე ასათიანის გადაცემები მართლა დაიხურა?
- არა, ეს არასწორი ინფორმაციაა! ეს გადაცემები გაგრძელდება მანამ, სანამ არის მათი სახელშეკრულებო ვადა, ეს არის 17 ივლისი. უბრალოდ 17 ივლისამდე, ერთი თვით ადრე მათ შეატყობინეს, რომ ეს გადაცემები ეთერში აღარ იქნება. ეს არ არის საზოგადოებრივის შიგნით მომზადებული გადაცემები, ეს გარე ორგანიზაციაა და ჩვენ გვქონდა ვალდებულება, რომ ერთი თვით ადრე გაგვეგზავნა მათთვის შეტყობინება და გავუგზავნეთ. ამის გამო არის ხმაური, თორემ ეს გადაცემები 17 ივლისამდე დარჩება ეთერში.
- საინფორმაციო სამსახურს და „მოამბის“ ჯგუფს მართლა თქვენ უხელმძღვანელებთ?
- არა, არავითარ შემთხვევაში! ეს ჭორი ვრცელდება ალბათ იმის გამო, რომ მე ამ ეტაპზე ვასრულებ ჩვენი დირექტორის დავალებას და ვმუშაობ „მოამბის“ ჯგუფთან ერთად ახალი და მიმდინარე ამბების ბლოკში. მე ვარ სტრატეგიული განვითარების სამსახურის უფროსი. დღეს, რადგან მოამბე არის უაღრესად მნიშვნელოვანი, ეს არის ერთადერთი გადაცემა, რომელშიც ახალი მენეჯმენტი ვმონაწილეობთ. სხვა არც ერთ გადაცემაში ჩვენ არ ვმონაწილეობთ. „მოამბე“ არის ჩვენთვის სტრატეგიული, „მოამბე“ არ ჩერდება, აგრძელებს თავის საქმიანობას 17 ივლისის შემდეგაც ჩვეულ რეჟიმში. ამიტომ მე ვარ ახლა აქ უბრალოდ იმიტომ, რომ რაც შეიძლება სწრაფად შევცვალოთ მოამბე და გადავიდეთ იმ ახალ კონცეფციაზე, რომელიც დაგვხვდა, როცა აქ მოვედით. მე ჩემი გამოცდილებით ვეხმარები იმ ადამიანებს, ვინც ამ ახალ კონცეფციაზე მუშაობს.
- ანუ საინფორმაციოს ხელმძღვანელად არც მომავალში მოიაზრებით?
- არავითარ შემთხვევაში! მე ჩემი საქმე მაქვს. აქ ყველაფერს ჰყავს თავისი უფროსი. ჩვენი ერთ-ერთი ძლიერი მხარე სწორედ ის არის, რომ ყველა შეთანხმებულად ვმუშაობთ და მართვის რგოლში გაუგებრობები საერთოდ არ ხდება.
- როდის დაბრუნდება განახლებული სატელევიზიო ბადე ეთერში?
- ჩვენ ტექნიკური გადაიარაღებაც გვაქვს განზრახული და ძალიან გახანგრძლივდა რეფორმის პროცესი. ჩვენ გვინდოდა ოქტომბრის შუა რიცხვებში ახალი სეზონის დაწყება, მაგრამ შესაძლებელია, ამან გადაინაცვლოს იანვრისკენ. ზუსტი ინფორმაცია არ გვაქვს, ჩვენ ჯერ ველოდებით ტენდერების შედეგებს ტექნიკურ გადაიარაღებასთან დაკავშირებით. ახალი ბადით შევალთ ეთერში, როცა ყველა სტუდია გადაიარაღებული იქნება. შესაძლებელია, ეს ვერ მოხერხდეს იანვრამდე.
- ანუ იანვრამდე, მოამბის გარდა, არანაირი გადაცემა ეთერში არ გავა?
- ჩვენ გვექნება საარჩევნო გადაცემები, ეს ჩვენი ვალდებულებაც არის და ჩვენი სურვილიც. დანარჩენი ყველა გადაცემა იქნება ახალ ბადეში და ეს იქნება ის გადაცემები, რომლებიც იქნება კონკურსში გამარჯვებული. ასევე ცალკე გვქონდა გამოცხადებული ქართულ სერიალებზე კონკურსი და ეს კონკურსიც მიმდინარეობს. ერთი იქნება ქართული დეტექტივი და მეორე იქნება ქართული მელოდრამა.
