„ალია“: ინტერვიუ გიორგი ფოფხაძესთან: „თუ ფრანგები ჰაერსაწი-ნააღმდეგო თავდაცვით იარაღს სხვებისგან ყიდულობენ, მაშინ ჩვენ რად გვინდა მათი ნახმარი და მოძველებული ტექნიკა?“
„ალია“: ინტერვიუ სოსო ცინცაძესთან: სინამდვილეში რისთვის ჩამოვიდნენ თბილისში დანიის, პოლონეთისა და შვედეთის საგარეო მინისტრები?
„რეზონანსი“: რა გზავნილები გააჟღერეს თბილისში ევროპელმა საგარეო მინისტრებმა // კორნელი კაკაჩია: “გამოჩნდა, რომ, სავარაუდოდ, რიგის სამიტზე დადებით პასუხს ვერ მივიღებთ”
„რეზონანსი“: ინტერვიუ კახა გოგოლაშვილთან: ევროპასთან უვიზო რეჟიმისთვის მზად ვართ, თუმცა ევროპის საზოგადოებრივი აზრი ამას დიდი ენთუზიაზმით არ უყურებს“
„რეზონანსი“: ინტერვიუ გია ხუხაშვილთან: „ საქართველოს პრორუსი ძალების გააქტიურებაში საფრთხეს ვერ ვხედავ“
———————-
„ალია“, 15 აპრილი, 2015 წელი
ინტერვიუ გიორგი ფოფხაძესთან: „თუ ფრანგები ჰაერსაწინააღმდეგო თავდაცვით იარაღს სხვებისგან ყიდულობენ, მაშინ ჩვენ რად გვინდა მათი ნახმარი და მოძველებული ტექნიკა?“
ინტერვიუში საფრანგეთში მოღვაწე ქართველი ჟურნალისტი გიორგი ფოფხაძე „ალიას“ კორესპონდენტთან ნინო სამხარაძესთან საქართველოს საშინაო და საგარეო საკითხებზე საუბრობს.
გთავაზობთ ამონარიდს:
- გიორგი, რა იცი ალასანიას პარიზულ სკანდალზე? რას წერს ფრანგული მედია, ბოლოს და ბოლოს, ჰაერსაწინააღმდეგო თავდაცვითი იარაღის შეძენა ჩაიშალა?
- ამ საკითხზე ბევრი რამ ვიცი… მე დავუკავშირდი საფრანგეთის თავდაცვის მინისტრის პრესსამსახურს, რომელმაც დამიდასტურა, რომ ნამდვილად მოეწერა ხელი მემორანდუმს, მაგრამ ეს არ ყოფილა საბოლოო კონტრაქტი, საფრანგეთის მხარე აცხადებს, მემორანდუმი საიდუმლო ინფორმაციის შემცველია და დეტალებს ვერ გეტყვითო, ხელი მოეწერა, ამას ადასტურებენ, რასაც საქართველოს თავდაცვის მინისტრიც ადასტურებს.
უბრალოდ, მე იცით, რა მაინტერესებს, ყოფილი და მოქმედი მინისტრებისგან? საფრანგეთი ჰაერსაწინააღმდეგო თავდაცვით საშუალებებს ისრაელიდან ყიდულობს, ფრანგები არ არიან ისე ძლიერები შეიარაღებაში, რომ ამ ტიპის იარაღი აწარმოონ. მოვიძიე ინფორმაცია და რასაც ირაკლი ალასანია ამბობს, ასე არ არის, ეს იმ სიძლიერის თავდაცვითი საშუალება არაა, რომელიც ჩვენ დაგვიცავდა. ფრანგებს თვითონ ამერიკული და ებრაული სისტემები უყენიათ და ახლაც მიმდინარეობს მოლაპარაკება, რომ ისრაელიდან და ამერიკიდან უახლესი ტექნოლოგია შეისყიდონ. თუ ფრანგები ჰაერსაწინააღმდეგო თავდაცვით იარაღს სხვებისგან ყიდულობენ, მაშინ ჩვენ რად გვინდა მათი ნახმარი და მოძველებული ტექნიკა? თუკი ფრანგები უახლეს ტექნიკას ებრაელებისგან და ამერიკელებისგან ყიდულობენ, ჩვენც დავლაპარაკებოდით მათ. კი ბატონო, შეიძლება მოგვეგო, რომ შეგვეძინა, მაგრამ ეს არაა ის თავდაცვითი ქოლგა, რომელიც დაგვიცავდა. თუ ყიდულობ, თანამედროვე ტექნიკა იყიდე, შე დალოცვილო.
მოკლედ, ალასანია პოლიტიკოსია, მისი მესმის და ამიტომ მისი მხრიდან პოლიტიკურ სპეკულაციებს აქვს ადგილი. ალასანიამ ამ ხელისუფლებას სუსტი წერტილები უპოვა, ახლა წამოკიდებული ჰყავს და პოლიტიკურად ბომბავს! ირაკლის განცხადებები უფრო გაბრაზებული კაცის ნათქვამს ჰგავს, საგანგაშო არაფერი არ ხდება, საჰაერო თავდაცვითი შეიარაღების შესყიდვაზე მოლაპარაკების პროცესი არ ჩაშლილა, მთავარი ესაა.
- რას წერს ფრანგული მედია საქართველოს ხელისუფლებაზე?
- საქართველოს ხელისუფლებაზე დიდი ხანია მწვავე და კრიტიკული წერილები აღარ მინახავს, არის გაწონასწორებული, რიტორიკა აბსოლუტურად შეიცვალა. ამ მთავრობის პიარმა სულ რომ არაფერი არ აკეთოს, ევროკავშირის 28 ქვეყანას საელჩო ჰყავს საქართველოში და ისინიც ხომ აწვდიან თავიანთ მთავრობებს ინფორმაციებს. მოვისმინე შვეიცარიის ელჩის ბეხლერის განცხადება, რომ საქართველოში თუ ქრთამი არ გადაიხადე, ბიზნესს ვერ დაიწყებო, გამეცინა და იცით, რატომ? აბა, შვეიცარიაში ჩავიდეს ქართველი ბიზნესმენი და გადაწყვიტოს ბიზნესის კეთება, ქრთამები შენ იქ უნდა ნახო… ასე რომ, არც ისე წვიმს, როგორც ქუხს.
- რაც შეეხება ვიზა-ლიბერალიზაციის საკითხს, მაისში დაგეგმილია რიგის სამიტი და არის იმედგაცრუებული მოლოდინი, რომ საქართველოს არ მიანიჭებენ ვიზა-ლიბერალიზაციას. ევროსტრუქტურების კულუარებიდან თქვენ რა ინფორმაცია გაქვთ?
- ეს არის საკითხი, რაც ფუნდამენტურად ვიცი, ძალიან კარგად მივდივართ ვიზა-ლიბერალიზაციის მიმართულებით. 2012 წელს დავიწყეთ საუბარი, ახლა მესამე ეტაპზე გადავედით. ფაქტობრივად, ორ წელიწადნახევარში ვიზა-ლიბერალიზაციის მესამე ეტაპზე გადასვლა _ ეს არის დიდი პროგრესი. მოლდოვამ და უკრაინამ 2004 წელში დაიწყო ვიზალიბერალიზაციაზე ლაპარაკი, მოლდოვამ დაასრულა, მაგრამ ამას მოუნდა 10 წელი. ჩვენ ის ეტაპები გავიარეთ ორ წელიწად-ნახევარში, რაც მოლდოვამ 10 წელში განვლო. ხვალ რომ მოგვცეს ევროპამ ვიზა-ლიბერალიზაცია, საქართველო მზად არ აღმოჩნდება, რადგან ვიზა-ლიბერალიზაციას ბევრი ფაქტორი სჭირდება, ყველაზე მთავარი არის ის, რომ ჩვენი საკანონმდებლო სისტემა ევროკავშირის საკანონმდებლო ორგანოსთან სინქრონიზაციაში მოვიდეს, რაც არ გვაქვს, ეს კი ხანგრძლივი პროცესია, ასევე, ჩვენ არ გვაქვს ევროკავშირის დონის საბაჟო, ამას იმხელა ეკიპირება სჭირდება, რომ ეს არ მოხდება 5 თვეში. ვიზა-ლიბერალიზაცია მარტო ის კი არ არის, რომ ჯიბეში ჩაიდო ევროპის ვიზით პასპორტი და წახვიდე, სტანდარტული პასპორტიზაცია უნდა მოხდეს. რიგის სამიტის წინ გამოცხადდება დასკვნა, რომელიც ახლა მზადდება. შიდა სამზარეულოდან ვიცი, რომ ეს დასკვნა იქნება ძალიან პოზიტიური. ამ საკითხში პროგრამა მინიმუმი უნდა იყოს ის, რომ რიგის სამიტზე დეკლარაციის დონეზე მაინც უნდა დაფიქსირდეს, რომ ჩვენ უახლოეს მომავალში ვიზა ლიბერალიზაციას აუცილებლად მივიღებთ.
- ევროსტრუქტურებში, როგორ აფასებენ სააკაშვილისა და მისი თანამზრახველების უკრაინის მთავრობაში ყოფნას?
- დღე არ გავა, რომ ფრანგულ მედიაში არ დაიწეროს უკრაინის მოვლენებზე სტატიები, ჩვენ გადამეტებულად ვაფასებთ მათ შესაძლებლობებს და დიდ დროს ვუთმობთ სააკაშვილის როლს უკრაინაში. ფრანგული მედია ამას არ აკეთებს. ნაციონალები დღემდე დაუღალავად მუშაობენ ევროსტრუქტურებში, ის, რაც ადეიშვილის შემთხვევაში მოხდა, არის სწორედ მათი მუშაობის შედეგი. ალბათ, გამოასწორებს ვითარებას ეს მთავრობა, ალბათ, წავლენ ეს ოდიოზური ფიგურები ხელისუფლებიდან და იმედი მაქვს, ახალი სახეები მოვლენ „ოცნებაში“ და დამნაშავე დაისჯება.
„ალია“, 15 აპრილი, 2015 წელი
ინტერვიუ სოსო ცინცაძესთან: სინამდვილეში რისთვის ჩამოვიდნენ თბილისში დანიის, პოლონეთისა და შვედეთის საგარეო მინისტრები?
გელა ზედელაშვილი
(შემოკლებით)
14 აპრილს საქართველოში დანიის, პოლონეთისა და შვედეთის საგარეო საქმეთა მინისტრები, მარტინ ლიდეგორდი, გჟეგოჟ სხეტინა და მარგოტ ვალსტრომი ჩამოვიდნენ. ვინაიდან ეს ვიზიტი დაგეგმილი არ ყოფილა, სავარაუდოდ, საქმე გვაქვს სასწრაფოდ განსახილველ საკითხებთან. როგორც საგარეო საქმეთა მინისტრმა, თამარ ბერუჩაშვილმა განაცხადა, ევროპელ კოლეგებს დეტალურად გააცნეს ის რეფორმები, რომლებიც ვიზა-ლიბერალიზაციის სამოქმედო გეგმის განხორციელების პროცესში გატარდა. სინამდვილეში რატომ ეწვივნენ თბილისს მინისტრები, რატომ გადაამოწმეს ჩვენი ქვეყანა რიგის სამიტამდე კიდევ ერთხელ?
„ალიას“ პოლიტოლოგი სოსო ცინცაძე ესაუბრა:
- ეს ვიზიტი ნამდვილად იყო დაუგეგმავი… ახლა გამოვა ჩვენი საგარეო საქმეთა მინისტრი და იტყვის, ეს ყველაფერი ჯერ კიდევ მიშას დროს იყო დაგეგმილიო. ბერუჩაშვილი იმასაც იძახის, ვიზიტი ნაყოფიერი იყო, რიგის სამიტზე დიდი იმედებით წავალთო. ეტყობა, იმას აღარ მოუსმინა, რა თქვეს ჩამოსულმა მინისტრებმა: ჩვენ მოლდოვას უვიზო რეჟიმი იმიტომ მივეცით, რომ ამ ქვეყანამ ყველა ვალდებულება შეასრულა, თქვენ ჯერ პირობები არ შეგისრულებიათო. აქ უკვე რაღაც სიტუაცია აიჭრა, თუ წულუკიანს დავუჯერებთ, კანონი, რომელმაც ჩვენი სავიზო რეჟიმი შეზღუდა, ანუ საქართველოში შემომსვლელთა რაოდენობა შეამცირა, კარგი ყოფილა, მას უკეთესი კანონი არასოდეს მიუღია, ევროპამ ამისთვის მადლობა მითხრა, მალე მედალსაც დამკიდებენო. ამ დროს ბიძინა ივანიშვილი ამბობს, არ ვარგა, ისევ უნდა გაუქმდესო. რა გამოდის? ან ცდება ივანიშვილი და მთავრობა, ან ცდება თეა წულუკიანი. ვინაიდან, არ შეიძლება, ბატონი ბიძინა შეცდეს, სიმბოლურად მაინც ცდება წულუკიანი, რომელიც თავის აზრზეა, ჩემი სტუდენტი იყო და ვიცი, რომ ძალიან ჯიუტი გოგოა.
- ბატონო სოსო, თქვენ გაქვთ ჩემთან ნათქვამი, რომ, როდესაც ირანთან სავიზო რეჟიმი გაუქმდა, ეს ამერიკელებს ძალიან არ მოეწონათ და სააკაშვილს უსაყვედურეს კიდეც. გამოდის, წულუკიანია მართალი.
- წულუკიანმა ძალიან კარგად იცის, რომ საკუთარ თავზე ამხელა ტვირთს ვერ აიღებს, სავიზო რეჟიმების გამკაცრების შესახებ უკვე ლაპარაკობენ ევროპაში, აგერ, ორი დღის წინ გამოვიდა დანიის დედოფალი, რომელიც მუდმივად იცავდა ემიგრანტებს და თქვა: როდესაც მუსლიმანები ჩამოდიან ჩვენთან საცხოვრებლად, იმათ უნდა დაივიწყონ თავიანთი ძველი ადათ-წესები და ჩვევები, უნდა გაითავისონ ჩვენი ფასეულობებიო. ეს რევოლუციური განცხადებაა, რომელიც უნდა განვიხილოთ ზოგად კონტექსტში და დავასკვნათ, რომ ჩვენ რიგის სამიტზე, არავითარ სავიზო რეჟიმს არ გაგვიმარტივებენ. ახლა ჩამოვიდნენ, აუხსნიან ჩვენს ხელისუფლებას, რათა ნელ-ნელა ყველა შეეგუოს. ეს იგივე საკითხად იქცევა, როგორც ნატო და ევროკავშირი.
დასავლეთში მშვენივრად იციან, რა ხდება დღეს საქართველოში… სიმართლე გითხრა, მეც არ მსიამოვნებს, როცა უვიზო მიმოსვლაზე ლაპარაკობენ, ჩვენი სოფლები და ქალაქები საერთოდ დაცარიელდება. თვითონ აქვთ ამ მხრივ პრობლემები, აქედან მიაწყდება ხალხი. გარდა ამისა, ევროპის ქვეყნებში ძალაუფლებას უკვე ხელში იგდებენ რადიკალები, რომლებიც განიცდიან რუსულ გავლენას და ითხოვენ სავიზო რეჟიმების გამკაცრებას. ასე ხდება უნგრეთში, ასე ხდება საფრანგეთში და ასე მოხდა საბერძნეთში. გაივსო ემიგრანტებით ევროპა, სიტუაცია ყოველწლიურად იცვლება, მიაწყდნენ ამ ქვეყნებს აფრიკელები, ინდუსები, პაკისტანელები და არაბები.
- მაშინ მოლდოვას რატომ უხსნიან კარს, ამ ქვეყანამ მართლა ყველა ვალდებულება შეასრულა?
- არაფერი არ შეასრულა, მოლდოვა, ფაქტობრივად, არის რუმინეთი, რომელიც ევროკავშირის წევრიც არის და ნატოს წევრიც. ეს ქვეყანა ისტორიულად რუმინეთის შემადგენელი ნაწილი იყო – ენა, კულტურა და წარსული ერთი აქვთ და ნელ-ნელა მიაცურებენ იქით. ჩვენ ევროპად არ გვთვლიან, ძალით ვეტენებით.
- ამ დროს „ნაციონალები“ და არასამთავრობოები ატარებენ „ჩაშვების“ პოლიტიკას, ჩამოსულებს უმტკიცებენ, ჩვენი ქვეყანა რუსეთისკენ მიდის, აქ რაღაც ჯგუფები ძლიერდებიან და ამაზე ხელისუფლებას რეაქცია არ გააჩნიაო.
- რუსეთთან ჩვენ საერთოდ ვერაფერს მივაღწიეთ, მაგრამ ამათ ისიც არ აწყობთ, აბაშიძე-კარასინის ფორმატი რომ არსებობს. მართალია, ბოლო შეხვედრებიდან არაფერი გამოდის, მაგრამ აბაშიძე აკეთებს იმას, რის უფლებაც მისცეს. ალბათ, უკვე თავი მოგაბეზრე იმაზე ლაპარაკით, რომ თამასამ ცოტა ზემოთ უნდა აიწიოს. ნუ აქცევენ ყურადღებას ამ ჩამშვებებს, ეს ჩამშვებები სულ იქნებიან, სანამ „ნაცმოძრაობა“ იქნება. სანამ არასამთავრობოებზე რამეს ვიტყვი, ჯერ მითხარი, ეგენი რით არსებობენ?
- გრანტებით.
- აგაშენა ღმერთმა… რით ცხოვრობდა მიშას დროინდელი ოპოზიცია? მიშას გრანტებითა და ფინანსებით. ადამიანები, რომლებიც ოდესღაც სააკაშვილის ხელის შემყურეები იყვნენ, დღეს პარლამენტში არიან, ზოგი ვიცე-სპიკერია, ზოგი – კომიტეტის თავმჯდომარეა. ეგენი ყოველთვის ჩემზე კარგი მანქანით დადიოდნენ და ჩემზე კარგად იკვებებოდნენ. ამ დროს მეც პროფესორი ვარ, ჩემი ცოლიც პროფესორია, მამაჩემიც პროფესორი იყო. ამიხსენი, ოპოზიციონერი უმუშევრები ჩემზე კარგად როგორ ცხოვრობდნენ? ჩვენში არასამთავრობო სექტორი უკვე იქცა ერთგვარ ბიზნესად, უფასოდ თითსაც არ გაანძრევენ. დღეს საქართველოში, მე მგონი, კატებსაც აღარ აქვთ უფასო სექსი. სხვათა შორის, ჩვენ ძალიან ზედმეტი წარმოდგენა გვაქვს ამ „ჩამშვებებზე“, ყველა ევროპულ სახელმწიფოს თბილისში აქვს საელჩო. ყველა ელჩს აქვს ერთი საქმე, საქართველოში ინფორმაციას აგროვებენ, თავიანთი წყაროები ჰყავთ, დეპარტამენტებს ამუშავებენ და გადასცემენ თავიანთ ქვეყნებში.
დაუკვირდი, ღონისძიება არ ტარდება თბილისში, ელჩები რომ არ ესწრებოდნენ, მაგათ სასამართლოებშიც კი დაიწყეს სიარული და ამიტომ, როცა დელეგაცია ჩამოდის, ყველაფერი უკვე ცნობილია. ერთი რამე აშკარად შეინიშნება, დასავლეთში არცთუ კარგი წარმოდგენა აქვთ ჩვენს დღევანდელ ხელისუფლებაზე და ეს არის მთავრობის ბრალი, რას აკეთებენ ჩვენი ელჩები უცხოეთის ქვეყნებში, მტრებს ამრავლებენ თუ მეგობრებს? რასაც ვხედავ, მტრებს ამრავლებენ. ვერ გავიგე, რა პრინციპით ნიშნავენ ელჩებს? გახსოვს, შარშან რომ დაიწყეს ლაპარაკი ერთ ადამიანზე, ინგლისში უნდა გავაგზავნოთ, კარგი მწერალიაო? ეს გინესის რეკორდების წიგნშია შესატანი, შენ ელჩი გინდა თუ მწერალი? ნახე, რა ხდება აზერბაიჯანში, მიშა სააკაშვილს იწვევენ ოფიციალურად და იცი, რას ამბობენ? სააკაშვილის დროს ჩვენმა მეგობრობამ პიკს მიაღწიაო. მარტო ამ განცხადების გამო ჩვენი ელჩი უნდა გამოეძახებინათ თბილისში და ეკითხათ, რა ხდება. აზერბაიჯანელებს ბოლო დროს ძალიან დიდი პრეტენზიები აქვთ, ეს რატომ არ აინტერესებს არავის? სომხებსაც აქვთ პრეტენზიები, უკვე ოფიციალური წერილი გამოუგზავნეს ჩვენს პრემიერ-მინისტრს, ჩვენი ეკლესიები დაგვიბრუნეთო.
დავუბრუნდეთ ძირითად თემას: ჩვენ რიგის სამიტიდან მივიღებთ იმას, რაც მივიღეთ უელსის სამიტიდან – დაპირებებს, ქებას, რა კარგი ბიჭები და გოგოები ვართ, რა ბევრი რამე გავაკეთეთ, მაგრამ იქვე იქნება რეფრენი, კიდევ უფრო მეტი გვაქვს გასაკეთებელი. აი, ამის სათქმელად ჩამოვიდნენ ეს მინისტრებიც, რომ მერე მოულოდნელი არაფერი იყოს და გული არ წაგვივიდეს.
„რეზონანსი“, 15 აპრილი, 2015 წელი
რა გზავნილები გააჟღერეს თბილისში ევროპელმა საგარეო მინისტრებმა
კორნელი კაკაჩია: “გამოჩნდა, რომ, სავარაუდოდ, რიგის სამიტზე დადებით პასუხს ვერ მივიღებთ“
იაგო ნაცვლიშვილი
(შემოკლებით)
რიგის სამიტამდე რამდენიმე კვირით ადრე საქართველოში ჩამოსულმა დანიის, შვედეთისა და პოლონეთის საგარეო საქმეთა მინისტრებმა მნიშვნელოვანი გზავნილები გააჟღერეს. მინისტრებმა ხაზი გაუსვეს, რომ საქართველოსთვის ევროკავშირის კარი ღიაა, თუმცა აქვე აღნიშნეს, რომ ეს მეტწილად საქართველოზეა დამოკიდებული, თუ რამდენად კარგად შეასრულებს ევროკავშირის მხრიდან დაკისრებულ ვალდებულებებს. მინისტრების განცხადებით, ქვეყანამ უნდა გააგრძელოს რეფორმები, ხაზი გაუსვეს სასამართლო სისტემის რეფორმას და მიგრაციასთან დაკავშირებულ საკითხებს.
გუშინ საქართველოში შვედეთის, დანიისა და პოლონეთის საგარეო საქმეთა მინისტრები მარგოტ ვალსტრომი, მარტინ ლიდეგორდი და გჟეგოჟ სხეტინა იმყოფებოდნენ. მათ ქართველ კოლეგასთან, თამარ ბერუჩაშვილთან ერთად გამართულ პრესკონფერენციაზე მნიშვნელოვანი გზავნილები გააჟღერეს. მთავარი თემა, რასაკვირველია, რიგის სამიტთან დაკავშირებული საკითხები იყო. შვედეთის საგარეო საქმეთა მინისტრმა მარგოტ ვალსტრომმა განაცხადა, რომ საქართველოს გარკვეული მოთხოვნ:ების შესრულება მოუწევს.
„მან უნდა შეასრულოს გარკვეული მოთხოვნები იგივე სასამართლო სისტემის რეფორმირების დარგში, მიგრაციის საკითხების მოგვარებასთან დაკავშირებით. ჩვენი სიგნალი არის ასეთი, რომ რეალისტური უნდა იყოს მოლოდინი“, – განაცხადა შვედეთის საგარეო საქმეთა მინისტრმა.
პოლონეთის საგარეო საქმეთა მინისტრმა გჟეგოჟ სხეტინამ კი აღნიშნა, იმედოვნებენ, რომ საქართველოც იგივე გზას გაივლის ვიზა ლიბერალიზაციასთან დაკავშირებით, რაც მოლდოვამ გაიარა.
დანიის საგარეო საქმეთა მინისტრის მარტინ ლიდეგორდის განცხადებით, გაიხსნება თუ არა საქართველოსთვის ევროპა, ეს თავად საქართველოზეა დამოკიდებული. ლიდეგორდის განცხადებით, დანია მხარს უჭერს საქართველოსთვის ვიზის ლიბერალიზაციას.
„ჩვენ, რასაკვირველია, ძალიან დიდი სურვილი გვაქვს, რომ ვიზალიბერალიზაციის საკითხი საქართველოსთვის წარმატებით გადაწყდეს. ამასთან დაკავშირებით საქართველომ უნდა გამოიჩინოს კონკრეტული ინიციატივები. დღეს ჩვენ ვერაფერს დაგპირდებით, ერთადერთი შეგვიძლია ვთქვათ, რომ არ დავიშურებთ ძალისხმევას, რომ ეს ყველაფერი შესაძლებელი გახდეს“, – განაცხადა დანიის საგარეო საქმეთა მინისტრმა.
სპეციალისტების პოზიციები ორ ნაწილად არის გაყოფილი. ერთმა ნაწილმა მინისტრების განცხადებებში ის გზავნილი დაინახა, რომ საქართველო რიგის სამიტზე ვიზალიბერალიზაციას ვერ მიიღებს, მეორე ნაწილი კი ამბობს, რომ ამ კონკრეტული ქვეყნების წარმომადგენლები საქართველოს მხარს უჭერენ, თუმცა დადებითი შედეგისთვის ეს საკმარისი არაა.
პოლიტოლოგი კორნელი კაკაჩია „რეზონანსთან“ საუბრისას ამბობს, რომ მისი დაკვირვებით, ვიზიტის მიზანი იყო, საქართველოს ხელისუფლებასთან ერთად მეგობრულ ფორმატში განეხილათ ის საკითხები, რაც ვიზალიბერალიზაციის მეორე ფაზის დროს ქართულმა მხარემ სათანადოდ ვერ შეასრულა.
„რამდენიმე მინიშნება გაკეთდა იმაზე, რათა საქართველომ ამ პრობლემურ საკითხებს მეტი ყურადღება დაუთმოს. გამოჩნდა, რომ სავარაუდოდ რიგის სამიტზე ვიზალიბერალიზაციის საკითხზე დადებით პასუხს ვერ მივიღებთ. ალბათ ამაზე იქნებოდა საუბარი, კონკრეტულად რა ნაბიჯები უნდა გადადგას ხელისუფლებამ, რომ მომდევნო სამიტზე დადებითი შედეგი იყოს.
„მინდა ვცდებოდე, მაგრამ ასე ჩანდა, რომ რიგის სამიტზე პასუხი უარყოფითი იქნება. ალბათ ეს ძალიან მოულოდნელიც არ უნდა ყოფილიყო ჩვენთვის, იქიდან გამომდინარე, რომ ძალიან ცოტა დრო იყო მეორე ფაზის განხორციელებისთვის. თუ რაღაც სენსაცია არ მოხდა, ვიზების ლიბერალიზაციას არ მოგვცემენ. თუმცა პოლიტიკურ კონიუნქტურას დიდი მნიშვნელობა აქვს და ყველაფერი შეიძლება მოხდეს. თუ ევროკავშირის ქვეყნების პოლიტიკური ნება იქნება, მაშინ ისინი ნაკლებ ყურადღებას მიაქცევენ ამ პრობლემებს.
„რეფორმების გატარებასაც გაუსვეს ხაზი იგივე სასამართლო სისტემაში. ეს რეფორმები ინერციით მიდიდა და გრძლედება ისევ, მაგრამ ალბათ საჭიროა ახალი ხედვა კონკრეტულ სფეროებში. საქართველოს ორჯერ მეტი მოეთხოვება, ვიდრე მოლდოვას და უკრაინას, იმიტომ, რომ ისინი ტერიტორიულად უფრო ახლოს არიან ევროპასთან“, – გვითხრა კორნელი კაკაჩიამ.
ფონდ „ღია საზოგადოება – საქართველოს“ ევროინტეგრაციის პროგრამის ხელმძღვანელი ვანო ჩხიკვაძე, ამბობს, რომ იმ ქვეყნების საგარეო საქმეთა მინისტრები, რორმლებიც საქართველოში იმყოფებოდნენ, მხარს უჭერენ საქართველოს ევროინტეგრაციას და მათი პოზიციები ვიზალიბერალიზაციის საკითხზე განმსაზღვრელი ვერ იქნება. „ამ ქვეყნების პოზიციას ევროპაში ბევრი არ იზიარებს. არის ქვეყნები, რომლებიც საქართველოცი მიმდინარე პროცესებს ეჭვის თვალით უყურებენ. ამ ვიზიტით ჩვენი ქვეყნის მიმართ გამოხატული მხარდაჭერა კარგი და მნიშვნელოვანია, მაგრამ არასაკმარისი. ეს არ ნიშნავს იმას, რომ ეს არის ევროკავშირის პოზიცია.
„რა თქმა უნდა, ამ წუთას არ არის პასუხი კითხვაზე, მიიღებს თუ არა საქართველო ვიზების ლიბერალიზაციას რიგის სამიტზე. ეს სხვა ფაქტორებზეა დამოკიდებქული. პირველი, ყველაზე მნიშვნელოვანი ფაქტორი, იქნება ლიბერალიზაციის მოკლე ანგარიში, რომელიც წესით, აპრილის ბოლომდე უნდა გამოქვეყნდეს. ამ ანგარიშის მიხედვით გამოჩნდება, რამდენად წარმატებით შეასრულა საქართველომ ვიზალიბერალიზაციის მეორე ფაზა. ამის შემდეგ საქმეში ერთვებიან ევრკავშირის წევრი ქვეყნების შს და იუსტიციის მინისტრები, ისინი იღებენ გადაწყვეტილებას და საბოლოოსიტყვა მათ ეთქმით“, – ამბობს ვანო ჩხიკვაძე, რომელიც აღნიშნავს, რომ მინისტრების მხრიდან რეფორმების განხორციელებაზე ხაზგასმა იმას ნიშნავდა, რომ დადებითი შედეგის მისაღწევად რეფორმების გაგრძელება აუცილებელია.
„რეზონანსი“, 15 აპრილი, 2015 წელი
ინტერვიუ კახა გოგოლაშვილთან: ევროპასთან უვიზო რეჟიმისთვის მზად ვართ, თუმცა ევროპის საზოგადოებრივი აზრი ამას დიდი ენთუზიაზმით არ უყურებს“
თაკო მათეშვილი
(შემოკლებით)
რიგის სამიტზე საქართველოსთვის ევროკავშირის მიერ უვიზო მიმოსვლაზე „მწვანე შუქის ანთების“ შანსზე საუბრისას ევროპული კვლევების ცენტრის ხელმძღვანელი კახა გოგოლაშვილი აცხადებს, რომ საქართველოს მიერ სამოქმედო გეგმა შესრულებულია, თუმცა გარე ფაქტორების გათვალისწინებით, ევროპაში საზღვრების კიდევ უფრო გახსნას არ მიესალმებიან. დასავლურ პრესაში გავრცელებული ცნობებით თუ ვიმსჯელებთ, უვიზო რეჟიმის დაწესების საკითხში მაინცდამაინც დიდი იმედი არ უნდა გვქონდეს. კახა გოგოლაშვილი „რეზონანსს“ იმ ხელშემშლელ ფაქტორებზე ესაუბრება, რომელთა გამოც უვიზო მიმოსვლის შემოღება ეჭვქვეშ დგება.
„საქართველომ სავიზო ლიბერალიზებისთვის აუცილებელი სამოქმედო გეგმის მეორე ფაზა პრაქტიკულად უკვე დაასრულა და ახლა ველოდებით ევროკომისიის შეფასებას. პრინციპში, ჩვენ უვიზო რეჟიმისთვის მზად ვართ, მაგრამ ევროპაში არსებულ განწყობებზე ბევრი რამაა დამოკიდებული. სამწუხაროდ, ახლა ევროპაში ამ კუთხით საუკეთესო განწყობა არ არის. მიგრაციული ნაკადის გაზრდა და ადამიანთა გადაადგილების გამარტივება ახლა იქ დღის წესრიგში არ დგას. ეს თემა ევროკავშირის წევრი ქვეყნბეის მოსახლეობისათვის პოპულარული არ არის.
ეს გამოწვეულია არა საქართველოში არსებული ვითარებით, არამედ „ისლამური სახელმწიფოს“ მიერ განხორციელებული ტერორისატული აქტების გამო. ევროკავშირში ხალხი ფიქრობს, რომ რაც უფრო მარტივდება სავიზო რეჟიმი, მით უფრო იზრდება ტერორიზმის საშიშროებაო. გარდა მისა, უკრაინაში მიმდინარე ომი მთელ აღმოსავლეთ ევროპას არამიმზიდველს ხდის. ევროპაში კარგად იციან, რომ ახლა უკრაინაში უამრავი ლტოლვილია და ქვეყნის საზღვრები ცუდად კონტროლდება. ვინაიდან ჩვენ და უკრაინა ერთად განვიხილებით (მიუხედავად იმისა, რომ სამოქმედო გეგმები ინდივიდუალურად მივიღეთ), ესეც ერთ-ერთ შემაფერხებელ ფაქტორად უნდა ჩავთვალოთ.
(…)
საბოლოო ჯამში შენგენის ზონაში თავისუფალი მიმოსვლის გამოცხადება მათი, ანუ ევროკავშირის ქვეყნების სუვერენული გადაწყვეტილებით უნდა მოხდეს და ამ ქვეყნების ინტერესს უნდა ეხმიანებოდეს. საერთოდ, ევროკავშირი არანაირად არაა ვალდებული სავიზო რეჟიმი გაგვიმარტივოს. ეს, უბრალოდ, მათი კეთილი ნებაა, რომლის დასამსახურებლად აუცილებელია სამოქმედო გეგმა შევასრულოთ – ვაჩვენოთ, რომ ჩვენი კანონმდებლობა მათ კანონმდებლობას შეესაბამება.
გასათვალისწინებელია ევროკავშირის სახელმწიფოთა მოსახლეობის აზრით, იქაური პოლიტიკური პარტიები პოზუციები. მოგეხსენებათ, ზოგიერთი პოლიტიკური პარტია ვიზების რეჟიმის გამარტივებას სასტიკად ეწინააღმდეგება, მაგალითად, ნაციონალისტური ორგანიზაციები და მათი მხარდამჭერები. კიდევ ერთ დამატებით ნეგატიურ ფაქტორად საქართველოდან სირიაში ახალგაზრდების მიგრაცია შეიძლება იყოს. ეს ყველაფერი გავლენას ახდენს რიგის სამიტზე მისაღებ გადაწყვეტილებაზე“, – ამბობს ინტერვიუში კახა გოგოლაშვილი.
„რეზონანსი“, 15 აპრილი, 2015 წელი
ინტერვიუ გია ხუხაშვილთან: „ საქართველოს პრორუსი ძალების გააქტიურებაში საფრთხეს ვერ ვხედავ“
ინტერვიუში საქართველოს განვითარების კვლევითი ინსტიტუტის დამფუძნებებლი, ექსპერტი გია ხუხაშვილი, „რეზონანსის“ კორესპონდენტთან თაკო მათეშვილთან საუბრისას საშინაო და საგარეო პოლიტიკის საკითხებს ეხება.
გთავაზობთ ამონარიდს:
- თქვენ არ ფიქრობთ, რომ პრორუსი ძალები საქართველოში მართლაც გააქტიურდნენ?
გია ხუხაშვილი: ეს მოსალოდნელიც იყო. თუმცა, მე საფრთხეს ვერ ვხედავ. საზოგადოების დიდი ნაწილი შეთანხმებულია, რომ დემოკრატიული ინსტიტუტების განვითარებისა თუ უსაფრთხოების კუთხით, უკეთესია დასავლეთს დაუხალოვდეს. თუმცა, თუ ვიღაც ფიქრობს, რომ ეს შეცდომაა, გასაკვირი არაა.
ამ საკითხზე არასამთავრობოების საუბარი ღრმად არასერიოზულია. ადამიანებს საკუთარი აზრის გამოთქმის უფლებას ნუ წავართმევთ, თუნდაც მათი აზრი ჩვენთვის მიუღებელი იყოს. ძალიან სახიფათო ტენდენცია გვაქვს – ზოგიერთი “ენჯეო” ცდილობს, ქვეყნის განვითარების პერსპექტივებზე აზრის გამოთქმაზე მუდმივად ექსკლუზიური უფლება ჰქონდეს, ნებისმიერ სხვა აზრს კი კატეგორიულად ეწინააღმდეგებოდეს და საფრთხეს უწოდებდეს.
- ამბობთ, რომ პრორუსი ძალების გააქტიურებაში საფრთხეს ვერ ხედავთ, თუმცა ბოლო პერიოდში ხმაური გამოიწვია პარლამენტის წევრის, გოგი თოფაძის განცხადებამ, რომელშიც იგი ევროპისა და ნატო-ს წინააღმდეგ გამოდიოდა. ეს უჩვეულო იყო განსაკუთრებით იმ ფონზე, როცა ხელისუფლება, რომელსაც იგი წარმოადგენს, ქვეყნის კურსს მკვეთრად პროდასავლურს უწოდებს. თქვენი აზრით, რამდენად სწორი და ბუნებრივია ის ფაქტი, რომ თავად ხელისუფლებაში ასეთი ფუნდამენტური საკითხებისადმი განსხვავებული მიდგომაა?
გია ხუხაშვილი: ეს მართლაც წინააღმდეგობრივია. თუმცა, სახელმწიფო პოლიტიკა ევროატლანტიკურ სტრუქტურებში ინტეგრაციისკენაა მიმართული და მათ ქმედებაში სხვა რამ არ ჩანს. მესმის, რომ პოლიტიკური ოპონენტები კითხვების დასმას მუდმივად ცდილობენ, მაგრამ ხელისუფლებას თავისი საქმით ჯერ არ გამოუვლენია, რომ კურსს გადაუხვია. გოგი თოფაძეს ვერ გავამტყუნებ, თავის აზრს ამბობს. ეს განცხადება სახელმწიფო პოლიტიკას ვერ განსაზღვრავს, ვინაიდან ძალაუფლებაში მისი წილი საამისოდ დიდი არ არის. თუმცა, ბუნებრივია, ეს ძალიან უცნაურად გამოიყურება.
რაც შეეხება იმას, რომ ხელისუფლების ზოგიერთი წევრი ამ ყველაფერს სკეპტიკურად უყურებს და ევროპული არჩევანისადმი კრიტიკულადაა განწყობილი, ვფიქრობ, ეს ხელისუფლებს ეკლექტიკიდან გამომდინარეა. ზოგადად, ასეთი ტიპის კოალიციების ხელისუფლებაში ეჭვის თვალით ვუყურებ. მისი არაეფექტურობა და არამობილურობა, ვფიქრობ, სწორედ ამითაა გამოწვეული. ასეთი კოალიციები მხოლოდ ნეგატიური მიზნით – ვინმეს წინააღმდეგ იქმნება. მათ პოზიტივის მოტანა ძალიან უჭირთ.
ვფიქრობ, ხელისუფლებაში ძალიან უცნაური წარმონაქმნი მივიღეთ, რაც სახელმწიფოს განვითარების მხრივ ძალიან საზიანოა. თქვენ წარმოიდგინეთ, რამდენ საკითხზეა წინააღმდეგობა კოალიციაში და ეს გადაწყვეტილების მიღების პროცესს როგორ აფერხებს. ხელისუფლებამ უნდა მოახერხოს და ერთიანი დისციპლინარული ხაზი დაიჭიროს. თუ რაიმე საკამათო აქვთ, იკამათონ, აზრები შეაჯერონ და ხალხის წინაშე ერთიანი პოზიციის წარდგნენ.
(…)
- ცოტა ხანში რიგის სამიტი გველის. ხელისუფლება იმედს გამოთქვამს, რომ მასზე შენგენის ზონაში უვიზოდ გადაადგილების უფლებას მოვიპოვებთ. როგორია თქვენი მოლოდინი?
გია ხუხაშვილი: მე ოპტიმისტურად არ ვარ განწყობილი. საქმე ისაა, რომ დღეს გლობალურ პოლიტიკაში ძალიან მაღალი რისკებია. ევროპას ძალიან დიდი თავის ტკივილი აქვს და დამატებითი პრობლემების თავის თავზე აღებას ვერ გაბედავენ. გარდა ამისა, ბევრი სუბიექტური და ობიექტური პრობლემაა. ამიტომ, ალბათ ისევ ოპტიმისტურ, სიმბოლურ ნაბიჯებს ვიხილავთ, მაგრამ სისტემურ და ნახტომისებურ გარღვევას არ ველი. არც ევროპაა ამისათვის მზად და ვფიქრობ, რომ სამწუხაროდ, არც ჩვენ.
