„ახალი თაობა“: ინტერვიუ ნანა დევდარიანთან: „დასავლეთმა დაინახა, რომ სამოქალაქო პირი, თანაც ქალი დაინიშნა თავდაცვის მინისტრად“
„რეზონანსი“: ინტერვიუ ლევან ბერძენიშვილთან: “იმ ქვეყანამ, ვისიც ყველაზე მეტად გვეშინია, გვითხრა, ნუ გეშინიათო”
„ვერსია“: რას უნდა ველოდეთ რიგის სამიტისგან? // გვექნება თუ არა ევროპაში უვიზო მიმოსვლის უფლება?
———————-
„ახალი თაობა“, 08 მაისი, 2015 წელი
ინტერვიუ ნანა დევდარიანთან: „დასავლეთმა დაინახა, რომ სამოქალაქო პირი, თანაც ქალი დაინიშნა თავდაცვის მინისტრად“
ნონა ცაბაძე
(შემოკლებით)
ქვეყანაში მიმდინარე პოლიტიკურ პროცესებს „ახალ თაობასთან“ ინტერვიუში გლობალური კვლევების ცენტრის ხელმძღვანელი, ექსპერტი ნანა დევდარიანი აფასებს.
(…)
– თინა ხიდაშელის გამინისტრებას დიდი მითქმა-მოთქმა მოჰყვა, დასავლეთმა აიძულაო და ასე შემდეგ. თქვენ რას ფიქრობთ ამის თაობაზე?
– როგორც კი ცნობილი გახდა, რომ მთავრობაში, შესაძლოა, ცვლილებები იყოს, მაშინვე ნორლანდი მივიდა ბიძინა ივანიშვილთან. როგორც ჩანს, უნდოდა, გაერკვია, რა იყო მოსალოდნელი, ილაპარაკა თუ არა ნორლანდმა პერსონალურად თინა ხიდაშელზე, ამას ვერავინ იტყვის. იმ ორმა ადამიანმა იცის მარტო – ნორლანდმა და ივანიშვილმა, მაგრამ ამას არ აქვს მნიშვნელობა. როდესაც ხალხი ასე ფიქრობს, ეს საკმაოდ ცუდი სიგნალია. ასე იყო თუ არ იყო, ყველა ასე მიიჩნევს.
– ახალი დანიშნული იყო თავდაცვის მინისტრი. რა არ მოეწონათ მასში?
– საქმე ის არის, მოეწონათ თუ არ მოეწონათ. დიმახ, სულ ახალი დანიშნული იყო, მაგრამ გადაწყვიტეს გადახალისება და მოხდა ასე. დასავლეთმა დაინახა, რომ სამოქალაქო პირი თანაც ქალი დაინიშნა თავდაცვის მინისტრად. ამაში თავისთავად ცუდი არაფერი არ არის. დასავლეთ ევროპის მთელი რიგი ქვეყნებია, სადაც თავდაცვის მინისტრები არიან ქალები, მაგრამ, საქმე ისაა, რომ იმ ქვეყნებში სრულიად არ აქვს მნიშვნელობა, თავდაცვის მინისტრი ვინ იქნება, იმიტომ, რომ ესენი არიან ნატოს წევრი სახელმწიფოები და მთი შეიარაღებული ძალები ერთიანი სარდლობის ქვეშ არის. ჩვენ ვართ ჩვენი არმიის ჩამოყალიბების ძალიან რთულ პროცესში. ამ დროს ძალიან დიდი მნიშვნელობა აქვს, თავად სამხედროები როგორ მიიღებენ ამას. არა ის, დასავლეთში როგორ შეაფასებენ, არამედ მთავარია, შაიარაღებულ ძალებში იყოს ადეკვატური რეაქცია ამაზე და ამას უახლოესი მომავალი გამოაჩენს.
„რეზონანსი“, 08 მაისი, 2015 წელი
ინტერვიუ ლევან ბერძენიშვილთან: “იმ ქვეყანამ, ვისიც ყველაზე მეტად გვეშინია, გვითხრა, ნუ გეშინიათო”
იაგო ნაცვლიშვილი
(შემოკლებით)
რიგის სამიტისგან დადებით შედეგს ველოდებით, ამის შესახებ “რეზონანსთან” საპარლამენტო უმრავლესობის ერთ-ერთმა ლიდერმა “რესპუბლიკელმა” ლევან ბერძენიშვილმა ისაუბრა. დეპუტატი აცხადებს, რომ ევროკავშირის ყველა ქვეყანა ამბობს, რომ საქართველომ მოთხოვნები კარგად შეასრულა და ეს მალე სპეციალურად მომზადებულ დოკუმენტშიც აისახება, თუმცა მიიღებს თუ არა ჩვენი ქვეყანა ვიზა-ლიბერალიზაციას, ეს მხოლოდ ამ ტექნიკურ დოკუმენტზე არ არის დამოკიდებული და საბოლოოდ პოლიტიკური გადაწყვეტილება უნდა იყოს მიღებული. ლევან ბერძენიშვილის თქმით, პოლიტიკური გადაწყვეტილების მიღება ორ ქვეყანაზე – საფრანგეთსა და გერმანიაზეა დამოკიდებული. დეპუტატი ფიქრობს, რომ ვიზა-ლიბერალიზაციას მივიღებთ, მაგრამ შესაძლოა ეს ვადებში გაიწელოს.
(…)
„რეზონანსი”: რიგის სამიტის მოახლოებასთან ერთად მატულობს სხვადასხვაგვარი ინფორმაციაც. “როიტერმა” გაავრცელა ცნობა, რომ საქართველო სამიტიდან დადებით შედეგს არ უნდა ელოდოს. გერმანიის საგარეო საქმეთა მინისტრი კი ამბობს, რომ საქართველომ ყველა მოთხოვნა ზედმიწევნით კარგად შეასრულა. თქვენ ახლახან იმყოფებოდით ევროპაში. რა განწყობაა ევროკავშირის ქვეყნებში?
ლევან ბერძენიშვილი: ეს ორივე ინფორმაცია, რომელიც თქვენ დაასახელეთ, წინ უსწრებს იმ დოკუმენტს, რომელიც ჯერ არავის არ უნახავს. “როიტერი” დიდი სააგენტოა, შესაძლოა, რაღაც ნაწილი ნახა, მაგრამ ოფიციალურად დოკუმენტი ჯერ არავის არ უნახავს. ჩვენ გვაქვს მყარი მხარდაჭერა. ბოლო პერიოდში სადაც კი ვიყავით, ყველგან გვითხრეს, რომ საქართველომ საშინაო დავალება ზედმიწევნით კარგად შეასრულა. ის, რომ თითქოს ჩვენ სადმე რამე კარგად არ გავაკეთეთ, ასეთი რამე “როიტერსაც” კი არ უთქვამს. ცოტა უცნაური იყო განცხადება, რომ თითქოს მოლდოვას დონემდე არ ვართ მისული. ჩვენ იმაზე გაცილებით წინ ვართ წასული ვიზალიბერალიზაციის გზაზე, ვიდრე ამ ეტაპზე მოლდოვა იყო. ჩვენ მეტი მოთხოვნა წამოგვიყენეს და მეტი შევასრულეთ.
„რეზონანსი”: რატომ წამოგვიყენეს უფრო მეტი მოთხოვნა?
ლევან ბერძენიშვილი: იმიტომ, რომ დრო გავიდა და მოთხოვნებიც გაეზარდა ევროკავშირს. იმათაც წაუყენეს მოთხოვნები და მოლდოვამ ეს დამატებით შეასრულა უკვე მიღებული ვიზა-ლიბერალიზაციის დროს. დამატებითი მოთხოვნები შეიძლება ჩვენთანაც დადგეს. ეს არის ჩვეულებრივი მოვლენა. ევროპაში აშფოთებთ, რომ არ მოხდეს ევროკავშირის ქვეყნებში უკონტროლო შედინება. სწორედ მოლდოვის მაგალითმა აჩვენა, რომ ჩვენი ქვეყნებიდან ევროკავშირს არანაირი საფრთხე არ ელის. მოლდოვიდან ევროპაში ვიზიტით იმაზე გაცილებით ნაკლებმა ადამიანმა ისარგებლა, ვიდრე ეს მოსალოდნელი იყო და არანაირი პრობლემა არ შეუქმნია მოლდოვას ევროკავშირისთვის.
ჩვენ ყველგან გვითხრეს, რომ საქართველომ მოთხოვნები ძალიან კარგად შეასრულა. ახლა საჭიროა, რომ ეს ამავე სიტყვებით დაიწეროს იმ ტექნიკურ დოკუმენტში, რომელიც მალე გამოქვეყნდება. მაგრამ მეორე საკითხია უვიზო მიმოსვლის მოცემა. ეს უკვე მეორე ნაწილია და არ არის დამოკიდებულ ტექნიკურზე, ეს არის პოლიტიკური ნაწილი. პოლიტიკური გადაწყვეტილება ამ მომენტსაც ითვალისწინებს იმიტომ, რომ თუ დავალება არ შეასრულე, ვიზა-ლიბერალიზაციას არც ერთ ვარიანტში არ მოგცემენ, მაგრამ თუ შეასრულე, შესაძლოა ახალი მოთხოვნები დაიდოს. ჩვენ აქ უძლურნი ვართ, მაგრამ იმ ქვეყანამ, ვისიც ყველაზე მეტად გვეშინია, გვითხრა, რომ ნუ გეშინიათო.
„რეზონანსი”: პოლიტიკური გადაწყვეტილება რაზეა დამოკიდებული?
ლევან ბერძენიშვილი: პირდაპირ გეუბნებით, ეს დამოკიდებულია ორი ქვეყნის – გერმანიისა და საფრანგეთის პოზიციაზე. გერმანიამ თქვა, რომ არ იქნება პრობლემა, მაგრამ მას არ უთქვამს ვადები. ჩვენ ლიბერალიზაციას აუცილებლად მივიღებთ, მაგრამ ეს იქნება 2016 წლის იანვრიდან, თუ ვთქვათ, ივნისიდან, ეს არ არის ცნობილი. თუ სამიტზე იტყვიან, რომ ვაძლევთ ვიზალიბერალიზაციას, მაშინ მოგვცემენ იანვრიდან, მაგრამ თუ თქვეს, რომ მივცემთ, მაგრამ დამატებით კიდევ რაღაცები უნდა შესრულდეს, მაშინ ვადა გადაიწევს.
ჩვენ ყველაფერი გავაკეთეთ, განსაკუთრებით ამას პარლამენტზე ვამბობ, მაგრამ რიგის სამიტი არის სამთავრობო ფორმატი და ყველაფერს მთავრობები წყვეტენ. პარლამენტები რომ წყვეტდნენ, ჩვენ დადებითი შედეგი ჯიბეში გვედებოდა. შედეგი ნებისმიერ შემთხვევაში კარგი იქნება, მაგრამ იქნება თუ არა კონკრეტულად ნათქვამი ჩვენს ევროპულ პერსპექტივაზე გაკეთებული განცხადება, არ ვიცი. ხომ გახსოვთ მაპ-ზე უკეთესი რომ მოგვცეს ნატოს ბუქარესტის სამიტზე, ეს იქნება თუ არა ევროკავშირთან მიმართებაში, ეს ჩვენ არ ვიცით. ნატოს შესახებ რაც იყო ნათქვამი, მაშინ ეს სერიოზულად არ აღვიქვი. მიმაჩნია, მაშინ მაპი რომ მოეცათ, უკრაინაში ომი არ იქნებოდა. კარგი იქნება, ევროპა ჩვენს მაგალითს თუ არა, უკრაინის მაგალითს მაინც თუ მიაქცევს მეტ ყურადღებას.
დარწმუნებული ვარ, რომ გადაწყვეტილება ჯერ მიღებული არ არის, ნაჩქარევია რუსეთისა და ზოგიერთი ოპოზიციონერის სიხარული, რომ საქართველო სამიტიდან ვერაფერს ვერ მიიღებს.
„რეზონანსი”: მიხეილ სააკაშვილი აცხადებს, რომ მოლდოვას პრემიერმა მას რეფორმატორთა ჯგუფის (ნაცმოძრაობის წევრების) გაგზავნა და დახმარების აღმოჩენა სთხოვა…
ლევან ბერძენიშვილი: ეს განცხადება სანდოდ არ მიმაჩნია. მოლდოვაში არის უმცირესობის მთავრობა და ისინი ასეთ რისკზე ვერავითარ შემთხვევაში ვერ წავლენ. მოლდოვაში მთავრობას საპარლამენტო უმრავლესობის მხარდაჭერა არ აქვს, ასე რომ, ასეთ ექსპერიმენტებზე ვერ წავლენ. მიხეილ სააკაშვილს რომ სამიტის წინ უნდა რაღაცების არევა, ეს მე არ მიკვირს. მას სურს დაამტკიცოს, რომ მის გარეშე არც საქართველოს და არც მსოფლიოს პერსპექტივა არ აქვს. სააკაშვილი უკვე სასაცილო ფიგურაა. ექსპრეზიდენტი იმასაც ამბობდა, რომ უკრაინაში მთავარი მრჩეველი გახდებოდა, მაგრამ ხომ გაირკვა, რომ ნახევარმრჩეველია.
„რეზონანსი”: თუმცა “ნაცმოძრაობის” წევრებს უკრაინაში საკმაოდ სერიოზული თანამდებობები უკავიათ…
ლევან ბერძენიშვილი: ამაზე არავინ არ დაობს. თუკი კიდევ აქვთ რესურსი და რომელიმე ქვეყანას სჭირდება დახმარება, ღმერთმა ხელი მოუმართოთ.
„რეზონანსი”: იმ შემთხვევაში, თუ “ნაცმოძრაობა” ჩავა მოლდოვაში, ეს ხომ არ იქონიებს გავლენას ჩვენი და მოლდოვას ურთიერთობაზე?
ლევან ბერძენიშვილი: რა თქმა უნდა, არა. უკრაინის შემთხვევაში ხომ არ ჰქონია არავითარი გავლენა. შეიძლება ვიღაცას ეწყინოს და განცხადებაც გააკეთოს, მაგრამ ეს არის თავად მოლდოვას გადასაწყვეტი. უკრაინაში მარტო ქართველები არ არიან დანიშნული მინისტრის მოადგილეებად. ამაში ძალიან ბევრი ქვეყანაა ჩართული.
„რეზონანსი”: საკადრო ცვლილებებზეც ვისაუბროთ. თქვენი თანაფრაქციელი თინა ხიდაშელი თავდაცვის მინისტრი გახდა. ასეთი შეფასებებიც გამოითქვა, რომ საგარეო ორიენტირი არ ჩანდა კარგად და ამიტომ გახდა ხიდაშელი მინისტრი…
ლევან ბერძენიშვილი: “რესპუბლიკური” პარტია რომ პროდასავლურია, ეს ნათელია, მაგრამ ჩვენ იმიტომ ვართ ამ კოალიციაში, რომ კოალიციაც პროდასავლურია. ჩვენ ერთი საერთო დოკუმენტი გვაქვს, სადაც წერია, რომ კოალიციის მიზანი არის ევროკავშირი და ნატო.
„რეზონანსი”: თუმცა სხვა განცხადებებიც გვახსოვს ხელისუფლებიდან…
ლევან ბერძენიშვილი: დიახ. კოალიციის შიგნით არის ერთი კაცი – გოგი თოფაძე, რომელსაც ყოველთვის განსხვავებული მოსაზრება ჰქონდა, მაგრამ ამ პროდასავლურ დოკუმენტზე ხელი მასაც აქვს მოწერილი. ვერავითარ საფრთხეს ვერ ვხედავ იმაში, რომ ერთ კაცს აქვს თავისი მოსაზრება.
(…)
„ვერსია“, 8 მაისი, 2015 წელი
რას უნდა ველოდეთ რიგის სამიტისგან
გვექნება თუ არა ევროპაში უვიზო მიმოსვლის უფლება
ნინი ჯაფარიძე
,,თუ ხიდზე გადასვლა გსურთ, ჯერ მდინარესთან უნდა მიხვიდეთ”, – ასე უპასუხა ევროკავშირის ელჩმა იანოშ ჰერმანმა კითხვას, როდის გახდება საქართველო ევროკავშირის წევრი. მისივე განმარტებით, ჩვენ უკვე გვაქვს ევროკავშირთან ასოცირების შეთანხმება და რაც უფრო წინ წავიწევთ ამ მიმართულებით, მსგავსი კითხვის დასმის მით მეტი უფლება გვექნება. რიგაში, 21-22 მაისს დაგეგმილი აღმოსავლეთ პარტნიორობის სამიტი კარს მოგვადგა. ლატვიის საგარეო საქმეთა მინისტრმა ანდრის ბერჟინმა ნოემბერში განაცხადა, რომ რეფორმების თვალსაზრისით, საქართველოს ძალისხმევა აშკარაა და ამ კუთხით ის ერთ-ერთი ლიდერი ქვეყანაა. მინისტრმა იმედი გამოთქვა, რომ თანამშრომლობა საქართველოსა და ევროკავშირს შორის კიდევ უფრო გაღრმავდებოდა მათ შორის ისეთ საკითხებშიც, როგორიც არის უსაფრთხოება, თავდაცვა და ენერგოპოლიტიკა.
რას ფიქრობს დღეს სამიტის მასპინძელი ქვეყნის უმაღლესი უწყების წარმომადგენელი, სამიტი მიმდინარეობისას შევიტყობთ, მანამდე კი ,,ვერსია” ქართველი პოლიტიკოსებისა და ექსპერტების აზრით დაინტერესდა. შევეცადეთ გაგვერკვია, რა მნიშვენლობა აქვს რიგის სამიტს საქართველოსთვის და რა მოლოდინი უნდა გვქონდეს.
საქართველოს პარლამენტის ევროპასთან ინტეგრაციის კომიტეტის წევრი გია ვოლსკი აცხადებს, რომ რიგის სამიტი საქართველოს მხრიდან ევროინტეგრაციისკენ გადადგმული კიდევ ერთი ნაბიჯია. რაც შეეხება ვიზალიბერალიზაციას, მისი განმარტებით, რიგის სამიტი არ არის ის შემთხვევა, სადაც აღნიშნულ პროცესთან დაკავშირებით საბოლოო გადაწყვეტილება უნდა მიიღონ და მოლოდინი ამასთან დაკავშირებით, მცდარია:
,,რიგის სამიტი ევროინტეგრაციის სტრატეგიის კუთხით კიდევ ერთი წინგადადგმული ნაბიჯია. სხვადასხვა ქვეყნის უმაღლესმა წარმომადგენლებმა უკვე განაცხადეს იმ პოზიტიური დამოკიდებულების შესახებ, რომელსაც დღეს ისინი საქართველოში ხედავენ. ისეთი საერთაშორისო ორგანიზაციები, როგორიცაა ევროპის საბჭო, საპარლამენტო ასამბლეა, საქართველოში მიმდინარე მოვლენებს დადებითად აფასებენ. ხაზგასმულია სამართლის სფერო და აქ მომხდარი რეფორმების პოზიტიურობაც. ასევე სახელმწიფოს დამოკიდებულება მედიასთან. რაც შეეხება ვიზა ლიბერალიზაციას, ისეთი წარმოდგენაა, თითქოს ეს საკითხი ამ სამიტზე საბოლოოდ გადაწყდება. სინამდვილეში, ეს პროცედურა ამას სულაც არ ითვალისწინებს. რიგის სამიტზე საქართველოს შეაფასებენ. იტყვიან, რა ეტაპზეა ქვეყანა. შემდგომი ნაბიჯების სწორედ ამ შეფასებებზეა დამოკიდებული”.
პოლიტოლოგი ვახტანგ ძაბირაძე მიიჩნევს, რომ საქართველოს მოლოდინი რიგის სამიტთან დაკავშირებით მაღალი უნდა იყოს, რადგან შეფასებები პოზიტიური იქნება. აღსანიშნავია, რომ ძაბირაძე რიგის სამიტს საქართველო- რუსეთის ურთიერთობის ჭრილშიც განიხილავს და აცხადებს, რომ სწორედ აქ გამოჩნდება, რამდენად მზადაა დასავლეთი, რუსეთის წინააღმდეგ მკვეთრი ნაბიჯები გადადგას:
,,რიგის სამიტთან დაკავშირებით დიდი მოლოდინი უნდა გვქონდეს, რადგან ეს საქართველოს საგარეო კურსის კიდევ ერთი დადასტურება იქნება. ეს არის მნიშვნელოვანი ნაბიჯი როგორც ორიენტაციის, ასევე სახელმწიფოებრიობის ჩამოყალიბებისთვის და ქვეყანაში დემოკრატიული პროცესების განვითარების კუთხითაც. სამიტზე ასევე ვნახავთ, რამდენადაა მზად დასავლეთი მკვეთრი ნაბიჯები გადადგას რუსეთთან მიმართებაში. 10 მაისს მერკელი მოსკოვში ჩასვლას აპირებს და იქაც მნიშვნელოვანი მოლაპარაკებები შედგება. ამას აქვს როგორც სოციალური, ასევე პოლიტიკური და სახელმწიფოებრივი მნიშვნელობა. მგონია, პოზიტიურ სიახლეს უვიზო მიმოსვლის მიმართულებითაც უნდა ველოდეთ, მაგრამ თუ ასე არ მოხდა, არ უნდა გავნაწყენდეთ. იმედია, ვიზების შემსუბუქების საკითხი მაინც დადგება. მაგალითად, ერთი ან ორი წელი ლიბერალური ვიზები იყოს, შემდგომ კი ეს პროცესი დასრულდება და გადავალთ უვიზო მიმოსვლაზე”.
სტრატეგიული დაგეგმარებისა და უსაფრთხოების ექსპერტი თეიმურაზ თუმანიშვილი ასევე მიიჩნევს, რომ საქართველო რიგის სამიტზე დადებით შეფასებებს მიიღებს. მისი განცხადებით, ჩვენი ქვეყანა უმნიშვნელოვანესი რეგიონის ცენტრშია და ავტომატურად ხდება ამ რეგიონის ,,გასაღები”:
,,ამ რეგიონის მიმართ, სამიტის ორგანიზატორებს აქვთ გამოკვეთილი გეგმები, რომლებიც უკავშირდება სომხეთსა და აზერბაიჯანს, ამ ქვეყნების დაახლოვებას ევროკავშირთან. ამ ფონზე საქართველო მთელი რეგიონის უშუალო სახელმწიფო- გასაღები ხდება. გარდა ამისა, გერმანიის საგარეო მინისტრის, შტაინმაიერის დადებითი შეფასებებიც იმის მანიშნებელია, რომ შეფასებები პოზიტიური იქნება. თუმცა ვფიქრობ, შესაძლოა, ლართან დაკავშირებით გარკვეული შენიშვნები და მითითებები გაკეთდეს. ვიზა ლიბერალიზაციის კუთხით კი, შესაძლოა, პოზიტიური ცვლილებები იგეგმებოდეს. მიუხედავად იმისა რომ რუსეთი ყველა ბერკეტს გამოიყენებს, ამ ქმედებების შესაფერხებლად ან დასაბლოკად”.
პოლიტოლოგ სოსო ცინცაძეს რადიკალურად განსხვავებული შეხედულება აქვს. მისი აზრით, ნაკლებად მოსალოდნელია, რიგის სამიტზე საქართველომ დადებითი შეფასებები მიიღოს. ცინცაძის განმარტებით, უმჯობესია, საქართველო შედეგზე ორიენტირებული შედეგზე იყოს და არა დაპირებებზე:
,,გულახდილად გეტყვით, რიგის სამიტი საქართველოსთვის არაფერსაც არ ნიშნავს. ნატო, ევროკავშირი, ვიზა ლიბერალიზაცია ეს ყველაფერი ეფექტია. შეფასება ასე უნდა გავაკეთოთ: ან გვეძლევა უვიზო მიმოსვლის შანსი, ან არა. პროცესი ფასდება შედეგით. შედეგებზე უნდა ვიყოთ ორიენტირებულები და არა დაპირებებზე. მოლდოვაში უკვე უვიზო რეჟიმია. გეკითხებით საამისოდ რა რეფორმები გატარდა მოლდოვაში? ან რითია მოლდოვა ევროპასთან უფრო ახლო ვიდრე საქართველო? დამერწმუნეთ, იქ ხალხი არ ცხოვრობს ჩვენზე უკეთ. იქ კომუნისტური პარტიაა ძლიერი. ჩვენთან კი ეს პარტია აღარ არსებობს. ეს არის განსხვავება. და ესაა ევროპული ფასეულობა და ღირებულება? თუ ეს არის დემოკრატია და ევროპული სახელმწიფო, მაშინ რა ფასი აქვს ამ ყველაფერს. ვიზა ლიბერალიზაციას არ მოგვცემენ არც დღეს და არც ხვალ. ღატაკ ქვეყნებს ყველა ერიდება. აბა, რით უნდა მოვაწონოთ თავი ევროპას? იმით, რომ გავხსნათ საზღვრები? შესაძლოა, მკრეხელობა იყოს ჩემი მხრიდან, მაგრამ ვიტყვი, რომ, როდესაც საზღვარი გაიხსნება, ქვეყანა დაიცლება”.
,,ევროპელი დემოკრატების” ლიდერს, პაატა დავითაიას რიგის სამიტთან დაკავშირებით სკეპტიკური დამოკიდებულება აქვს. მისი განცხადებით ეს სამიტი საქართველოსთვის განსაკუთრებით მნიშვნელოვანია, მაგრამ საქართველო, სავარაუდოდ, პოზიტიურ შეფასებებს ვერ მიიღებს. ასეთ არასახარბიელო პროგნოზს, პაატა დავითაია იმ მუშადოკუმენტზე დაყრდნობით აკეთებს, რომელიც მას ხელთ აქვს:
,,ვერ გეტყვით, ეს რა დოკუმენტია, თუმცა თუ ისე განვითარდა მოვლენები, როგორც ვფიქრობ, რიგის სამიტზე კარგ შეფასებებს არ მივიღებთ. დამერწმუნეთ, სამიტზე ყველაფერი ისახება. იქ იმ შედეგს ვიღებთ, რასაც ვაკეთებთ აქ. ჩვენ გვაქვს სახელისუფლო კრიზისი. სავიზო რეჟიმზეც იკავებენ უკვე თავს და არ მგონია, ამ სამიტმა რაიმე განსაკუთრებული შედეგები მოიტანოს”.
