„რეზონანსი“: ექსპერტები გაეროში პრემიერ-მინისტრის გამოსვლას არაერთგვაროვნად აფასებენ: “უმჯობესია, უფრო დიდი პრობლემა წამოსწიო და იმ პრობლემაში შენი ადგილი დაანახო”

„რეზონანსი“: ინტერვიუ დავით ზურაბიშვილთან: “იმედის” დახურვაში თავად ნიკა გვარამია მონაწილეობდა

„ახალი თაობა“: ინტერვიუ დეპუტატ კარლო კოპალიანთან:  „მარგველაშვილმა სახიფათო თამაში წამოიწყო“

——————

„რეზონანსი“, 03 ოქტომბერი, 2015 წელი

ექსპერტები გაეროში პრემიერ-მინისტრის გამოსვლას არაერთგვაროვნად აფასებენ: “უმჯობესია, უფრო დიდი პრობლემა წამოსწიო და იმ პრობლემაში შენი ადგილი დაანახო”

სტატიაში ვრცლადაა გადმოცემული საქართველოს პრემიერ-მინისტრის ირაკლი ღარიბაშვილის გამოსვლა გაეროს გენერალურ ასამბლეაზე, რომელსაც საქართველოში არაერთგვაროვანი შეფასებები მოჰყვა. პოლიტოლოგების ნაწილი ფიქრობს, რომ მან სწორი აქცენტები დასვა და მსოფლიოს სწორი გზავნილები მიაწოდა, მეორე ნაწილის აზრით კი, პრემიერმა ტრიბუნიდან იცრუა (ავტორი – თაკო მათეშვილი).

პოლიტოლოგ რამაზ საყვარელიძის  აზრით, კარგია რომ პრემიერ-მინისტრს გაეროს სამიტზე გამოსვლის საშუალება მიეცა და მან საქართველოს მიღწევები მსოფლიოს წინაშე წარადგინა – „ასეთი წარდგენა კი ნამდვილად გვჭირდება“. პოლიტოლოგი დადებითად აფასებს იმ ფაქტს, რომ პრემიერ-მინისტრი ოკუპაციის თემას შეეხო და ამ პრობლემის შექმნაში რუსეთისადმი პასუხისმგებლობის დაკისრებას თავი არ აარიდა, თუმცა რამაზ საყვარელიძე იქვე იმასაც ამბობს, რომ ირაკლი რარიბაშვილისაგან სირიის პრობლემაზე ყურადღების გამახვილებასაც ელოდა.

„სამწუხაროდ თუ საბედნიეროდ, დღეს მთელი მსოფლიო სირიითა და უკრაინითაა დაინტერესებული, რადგან ჩვენთან ისეთი მწვავე სიტუაციაა არაა, როგორც ამ ქვეყნებში, თუმცა, საქართველოს ორივესთან – უკრაინასთან და სირიასთანაც კავშირი აქვს: უკრაინაში რაც მოხდა, ის ჩვენთან უკვე იყო, ხოლო სირიაში ტერორისტებთან ბრძოლა მიმდინარეობს, რომელიბიც ნარკოტიკებისა და იარაღით უკანონოდ ვაჭრობით არიან დაკავებული, ანუ მათი საქმიანობის ტრანზიტის ხაზი საქართველოზეც გადის. ამიტომაც გამოაცხადეს მათ, რომ კავკასია და საქართველო მათ ინტერესებშია. ასე რომ, იქ მიმდინარე პროცესები საფრთხეს უქმნის საქართველოსაც, შესაბამისად, საქართველოს მიტოვება მსოფლიოსათვის საფრთხის შემცველია. ტერორისტები ტვირთების კონტროლს ხელში აიღებენ, მათი დამარცხება უფრო გართულდება. როგორც ხედავთ, საქართველო ორივე თემაში ფიგურირებს და სასურველი იყო იყო პრემიერს ამაზეც ელაპარაკა. ჩვენი საკუთარ პრობლემების წინ წამოწევა, რა თქმა უნდა კარგია, მაგრამ უმჯობესია უფრო დიდი პრობლემა წამოსწიო და ამ პრობლემაში შენი ადგილი დაინახო“, – აცხადებს რამაზ საყვარელიძე.

პრემიერ-მინისტრის გამოსვლის იმ ნაწილს, რომელშიც იგი მთავრობის მიღწევებზე საუბრობს, პოლიტოლოგი ნიკა ჩიტაძე არ ეთანხმება და მბობს, რომ ჯანდაცვის პროგრამებსა და განათლების სფეროში განხორციელებულ რეფორმებს თუ არ ცავთვლით, ყველა ძირითადი მიმართულებით საქართველო უკან იხევს, განსაკუთრებით კი სოციალურ-ეკონომიკური კუთხით.

ქვეყნის მთლიანი შიდა პროდუქტის  ზრდა, ნიკა ჩიტაძის აზრით, დაახლოებით ორჯერ შემცირდა და დემოკრატიული ინსტიტუტების განვითარების მხრივაც დიდი პრობლემებია, პრემიერმა კი ამ პრობლემების არსებობა არ აღიარა და მხოლოდ მიღწევებზე ილაპარაკა.

ამასთან, ნიკა ჩიტაძე რუსეთის თემის წამოწევას მიესალმება: „ირაკლი ღარიბაშვილმა თქვა, რომ საქართველო ოკუპირებულ ტერიტორიებს ვერ შეეგუება და სანამ ეს პრობლემა იარსებებს, ამ ორ ქვეყანას შორის სრულყოფილი ურთიერთობები არ აღდგება. ეს განცხადება გასაგები იყო და კარგია, რომ გაკეთდა. ამაში ნამდვილად ვეთანხმები: რა თქმა უნდა, საქართველოსა და რუსეთს შორის დიპლომატიური ურთიერთობა ვერ აღდგება, სანმ ჩვენი ორი ისტორიული რეგიონი ოკუპირებულია“, – აცხადებს ნიკა ჩიტაძე.

„რეზონანსი“, 03 ოქტომბერი, 2015 წელი

ინტერვიუ დავით ზურაბიშვილთან: “იმედის” დახურვაში თავად ნიკა გვარამია მონაწილეობდა

„რეზონანსის“ კორესპონდენტ ელზა პაპოშვილთან “რესპუბლიკური” პარტიისა და დედაქალაქის საკრებულოს წევრის დავით ზურაბიშვილის საუბრის მთავარი თემაა საქართველოს ხელისუფლების დამოკიდებულება მასობრივი ინფორმაციის საშუალებებთან, კერძოდ – ტელეკომპანია „რუსთავი-2“-თან.

გთვაზობთ ინტერვიუს ტექსტს:

- როგორ ფიქრობთ, “რუსთავი 2″-ის მიმართ დაწყებული პროცესები ხელისუფლებაზე როგორ გავლენას მოახდენს?

- რა თქმა უნდა, ყველანაირად უარყოფითად იმოქმედებს. როდესაც ასეთი სიტუაციაა, ხელისუფლება და ყველა მისი შტო მობილიზებული უნდა იყოს იმაზე, რომ სასამართლოზე ზეწოლის ეჭვი არავის დარჩეს, რადგანაც ყველა უნდა დარწმუნდეს, რომ ეს მხოლოდ და მხოლოდ კერძო სუბიექტთან მიმდინარე დავაა. ჩვენი ხელისუფლების მთელი ძალისხმევა ამისკენ უნდა იყოს მიმართული. სამწუხაროდ, სრულიად სხვა რაღაცას ვხედავთ. ხელისუფლების წარმომადგენლები ძირითადად მობილიზებული არიან იმისკენ, რომ ყველას დაუმტკიცონ, თუ “რუსთავი 2″, როგორი პარტიული ტელევიზიაა.

- ფიქრობთ, რომ საზოგადოებას შთაბეჭდილება ექმნება, რომ ქიბარ ხალვაში დამოუკიდებლად არ მოქმედებს და მას მხარს ხელისუფლება უჭერს?

- რა თქმა უნდა, საზოგადოებას კითხვები ყოველთვის უჩნდება. მტკიცებულების ტვირთი ხელისუფლებას აწევს. ტყუილად არაფერი ხდება. როდესაც ადმიანს სამი წლის მანძილზე არაფერი არ გაუპროტესტებია და ქონებას ახლა ითხოვს, ეს ცოტა საეჭვოა. თანაც ეს იმ ფონზე ხდება, როდესაც ხელისუფლება მუდმივად იმაზე საუბრობს, რომ ეს ტელევიზია ცუდია. ეს ყველაფერი კი ძალაუნებურად კითხვებს აჩენს. ამიტომაც ნიკა გვარამიას საბაბი აქვს და ამ თემით მანიპულირებას ახდენს. არის საკითხები, რაც პოლიტიკური თამაშის წესებში არ ჯდება. მაგრამ, სამწუხაროდ, ამის შედეგი ის არის, რომ ამ ტელევიზიას ხან აშშ და ხან სხვადასხვა საერთაშორისო ორგანიზაციები უცხადებენ მხარდაჭერას. “ნაციონალური მოძრაობის” დროს, როდესაც მედიაზე კონტროლი და ზეწოლა სრულიად ხორციელდებოდა, მათ პოლიტიკური თამაშის წესები ისე კარგად იცოდნენ, რომ საზღვარგარეთ ამის დამამტკიცებელი საბუთის გატანა ძალიან რთული იყო. ესენი კი ხმამაღლა გაჰყვირიან, რომ ცუდი ტელევიზიაა და მიკერძოებულია. ამის გამო ხელისუფლება საერთაშორისო ორგანიზაციებს ვერ არწმუნებს, რომ მედიაზე ზეწოლა არ ხორციელდება, ეს კი ჩვენი დიდი მინუსია.

- ხელისუფლებამ როგორ უნდა დაამტკიცოს, რომ ის ამ საქმეში გარეული არ არის?

- ძალიან მარტივად. თუკი ხელისუფლება სასამართლოზე ზეწოლას ახდენს, ეს არ დაიმალება და ადვილად გამოაშკარავდება. ამიტომაც ხელისუფლება მაქსიმალურად უნდა ეცადოს, რომ ამ პროცესების მიმდინარეობისას კითხვები არავის დარჩეს. სასამართლო აუცილებლად ძალიან გამჭვირვალედ უნდა წარიმართოს. თავად ხელისუფლების ინტერესში უნდა შედიოდეს, რომ საზოგადოებას ამ საკითხთან დაკავშირებით მაქსიმალურად ბევრი ინფორმაცია მიაწოდოს.

დავუშვათ “ნაციონალური მოძრაობა” ამ თემის პოლიტიზებას ახდენს და ამას ეხმაურებიან ამერიკის საელჩო და ევროსაბჭოს წარმომადგენლები. ხელისუფლება ვალდებულია მათთან მაქსიმალური კონტაქტი იქონიოს და ყველა კითხვაზე ამომწურავი პასუხი გასცეს, რასაც ამ ხელისუფლებისგან მე ვერ ვხედავ. ამიტომაც არის ამხელა სკანდალი ატეხილი. სხვაგვარად ამ თემას რეზონანსი არ მოჰყვებოდა.

- “ნაციონალური მოძრაობა” აცხადებს, რომ წინასაარჩევნოდ დამოუკიდებელ მედიაზე მიზანმიმართული ზეწოლა ხორციელდება. თქვენ ამის ნიშნებს ვერ ხედავთ?

- არჩევნებამდე ერთი წელია დარჩენილი. თუმცა ფაქტია, რომ ამას “ნაციონალური მოძრაობა” და “რუსთავი 2″-ის ჟურნალისტები ამტკიცებენ. ეს არის მათ მიერ გაბერილი თემა და პოლიტიკური ბრალდება, რომელიც შეესაბამება თუ არა სიმართლეს, ამას სასამართლოს გადაწყვეტილება დაადგენს. მანამდე ამაზე საუბარი ძალიან რთულია. თუმცა, საერთაშორისო ორგანიზაციის წამომადგენელს როდესაც უმტკიცებ, რომ ეს ტელევიზია პარტიულია და არა დამოუკიდებელი, აქ უკვე ისინი ეჭვის თვალით გიყურებენ და ვერ ხვდებიან რას ამბობს.

შეფასებები ხელისუფლების საქმე არ არის. რა თქმა უნდა, “რუსთავი 2″ “ნაციონალური მოძრაობის” ზეგავლენის ქვეშ მყოფი ტელევიზიაა, მაგრამ ეს არ ნიშნავს, რომ ის დამოუკიდებელი არ არის. დამოუკიდებელი ტელევიზია ნიშნავს სახელმწიფო გავლენისგან თავისუფალს. არ არსებობს აბსოლუტურად დამოუკიდებელი მედია საშუალება, ეს მსოფლიოს ნებისმიერ ქვეყანაში ასეა. “ნაციონალური მოძრაობის” გავლენა ამ ტელევიზიაზე ისე უნდა მივიღოთ, როგორც ფაქტი. კი, ბატონო, იყოს მაგრამ ამაზე ხელისუფლების მხრიდან ასეთი ნევროზული რეაქციები არ უნდა იყოს, რასაც მერე თავად “რუსთავი 2″ გადასცემს და ხალხსაც სხვა შთაბეჭდილება რჩება. ეს ტელევიზია საზოგადოებისთვის ინფორმაციის მიღების ერთ-ერთი წყარო არ არის და არსებობს სხვა უამრავი მედია, რომლიდანაც რადიკალურად განსხვავებული ინფორმაციის მიღება შეუძლიათ. ამიტომაც ხელისუფლების წარმომადგენლები ძალიან დიდ შეცდომას უშვებენ, როდესაც მის არსებობას ამხელა ყურადღებას უთმობენ.

- თქვენ ფიქრობთ, რომ “რუსთავი 2″-ის საკითხის პოლიტიზებას თავად ხელისუფლება ახდენს?

- რა თქმა უნდა, ჩვენი ხელისუფლებისთვის სამწუხაროდ “ნაციონალურ მოძრაობასთან” ურთიერთობა მთავარ და გადამწყვეტ საკითხად იქცა, ხოლო ეს ბრძოლა პირდაპირ დაკავშირებულია “რუსთავი 2″-თან. მეც და “რესპუბლიკური” პარტიის სხვა დანარჩენი წევრებიც მუდმივად ვამბობთ, რომ არ შეიძლება ამ პარტიასთან დაპირისპირება ჩვენი ხელისუფლების მთავარ თემას წარმოადგენდეს. ეს რიტორიკა და განწყობა თავად საზოგადოებაზეც მოქმედებს და მათ დაპირისპირებისკენ უბიძგებს. ხოლო საერთაშორისო დონეზე ეს საერთოდ კოშმარია. ამიტომაც ყველაფერს პოლიტიკურად მოტივირებულის სარჩული ედება. მე რომ მათ ადგილას ვიყო, მეც ვერაფერს გავიგებდი. ყველაფერზე ხომ არ შეიძლება ამ ხალხის ხსენება?

- თქვენი აზრით, “რუსთავი 2″-ის თემა საზოგადოებაში დაპირისპირებას გამოიწვევს?

- აქ ყველაფერთან ერთად მეორე მთავარი საკითხია თავად ნიკა გვარამია როგორ იქცევა. ხშირად მისი გამოსვლები ისტერიულია. ირონიას იწვევს ის განცხადებები, რომ “რუსთავი 2″ დამოუკიდებელი და მართალი ტელევიზიის ფალგმანია. ალბათ ყველას ძალიან კარგად ახსოვს წინა ხელისუფლების დროს ვინ სად იყო. ან ეს ტელევიზია რა სიუჟეტებს დგამდა. “იმედის” დახურვაში თავად ნიკა გვარამია მონაწილეობდა. ასე რომ, მის მიერ ეს საწყალისა და ჩაგრულის როლის თამაში ცოტა სასაცილოა. ამიტომაც არ მგონია, რომ “ნაციონალური მოძრაობის” მხარდამჭერების გარდა ვინმემ თავი გაიგიჟოს.

თუმცა, თუკი მის დახურვას რეალურად საფრთხე დაემუქრება, მე დარწმუნებული ვარ, საზოგადოების ჯანსაღო ნაწილი ამას გააპროტესტებს. თუმცა, როგორც ვთქვი, ჯერ-ჯერობით ეს ყველაფერი მხოლოდ სასამართლოს გადაწყვეტილების შემდეგ გამოჩნდება.

- წინა ხელისუფლების დროს “იმედში” განვითარებულ მოვლენებსა და დღევანდელ “რუსთავი 2″-თან მიმდინარე პროცესებში საერთოს ხედავთ?

- მე ვფიქრობ, რომ ჯერ-ჯერობით არ არის. იმიტომ, რომ ჯერ ერთი “იმედი” არ იყო კონკრეტული პოლიტიკური პარტიის ზეგავლენის ქვეშ მყოფი მედია საშუალება. “იმედი” ნამდვილად აშუქებდა იმას, რაც ქვეყანაში რეალურად ხდებოდა. მის წინააღმდეგ მთელი სახელმწიფო მანქანა სრულად იყო მომართული. აღარ ვსაუბრობ იმაზე, რომ სასამართლოს მეშვეობით მთელი ტელევიზიის წილები გადაიფორმეს. ამიტომაც პარალელის გავლება ამ ორ მედია საშუალებას შორის ძალიან გამიჭირდება. “რუსთავი 2″-ის მიმართ მთელი სამი წლის განმავლობაში ხალვაშს პრეტენზია არ გამოუთქვამს, ხოლო შემდეგ მოულოდნელად სასამართლოში ჩივის და ყველაფერს აყადაღებენ. ვფიქრობ გარკვეული ეჭვი სწორედ ამ ფაქტმა გამოიწვია.

რაც შეეხება გვარამიას განცახდებას, რომ ყადაღის დადება ტელევიზიის დახურვას ნიშნავს, ეს სრული აბსურდია. ეს უბრალოდ გვარამიას მიერ ატეხილი ისტერიკაა. აქ საუბარია იმაზე, რომ მათ უბრალოდ წილის გაყიდვა ეკრძალებათ. თუკი გამოცხადებულ ანგარიშზე ჩვეულებრივ ადამიანებს ფულის გადარიცხვა შეუძლიათ, ზუსტად ასევე შეუძლიათ მის სპონსორებსაც. ასე რომ, ძალიან ტანჯულის მანტიის მორგებაც ზედმეტი მგონია.

„ახალი თაობა“, 03 ოქტომბერი, 2015 წელი

ინტერვიუ დეპუტატ კარლო კოპალიანთან:  „მარგველაშვილმა სახიფათო თამაში წამოიწყო“

შორენა მარსაგიშვილი

რამდენიმე დღის წინ დეპუტატმა აკაკი ბობოხიძემ საქართველოს მოსახლეობას ლამის ომის დაწყებისკენ მოუწოდა. მისი თქმით, ხელისუფლებისგან იმედგაცრუებულმა ამომრჩეველმა იმ მეზობლებს უნდა მოჰკითხოს, ვინც მათ „ქართული ოცნებისთვის“ ხმის მიცემას სთხოვდა. აკაკი ბობოხიძის მოწოდება ხელისუფლებას გულთან ახლოს დიდად არ მიუტანია. უმრავლესობის ერთ-ერთი ლიდერი კარლო კოპალიანი კი მიიჩნევს, რომ ამის ასე დატოვება არ შეიძლება.

- როგორც პაპაჩემი გაცოცხლდება და ადგება საფლავიდან, ისე „ნაციონალები“ დაბრუნდებიან ხელისუფლებაში, მაგრამ არეულობის მოწყობას ნამდვილად შეეცდებიან. ამის ნათელი მაგალითია აკაკი ბობოხიძის მიერ გაკეთებული განცხადება. მჯერა, რომ ხალხი მის დაკრულზე არ იცეკვებს, მაგრამ ასეთი განცხადებები რეაგირების გარეშე არ უნდა დარჩეს, – აღნიშნა „ახალ თაობასთან“ საუბარში კარლო კოპალიანმა.

დეპუტატის განმარტებით, ყოფილი ხელისუფლება ყველა საბაბს იყენებს არეულობის მოსაწყობად.

- ხალხი ამათ დაძახილზე ქუჩაში არ გამოდის, მაგრამ რამდენიმე ათეული ადამიანის მოგროვებას მაინც ახერხებენ. 2 ოქტომბერს ქუთაისში, პარლამენტის შენობასთან, ასამდე კაცი მოიყვანეს, რომლებიც ვითომ სიტყვის თავისუფლებას იცავდნენ, სინამდვილეში კი პროვოკაციების მოსაწყობად იყვნენ მოსული, – აღნიშნავს უმრავლესობის წევრი.

კოპალიანის განცხადებით, ნაციონალები ყველაფერს აკეთებენ, რომ ისინი წყობილებიდან გამოიყვანონ.

- გამოვიდა იმ დღეს ერთი ჩემი კოლეგა და `ქართულ ოცნებას~ უწოდა ჭირი. ჭირები და ჭირზე უარესები თავად არიან. მესმის, რომ ამის მოსმენა ძნელია, მაგრამ ცოტაც უნდა გავძლოთ და ეს პოლიტიკური ჭირი, რომელსაც ნაციონალური მოძრაობა ჰქვია, საერთოდ გაქრება, – ამბობს დეპუტატი. იგი დარწმუნებულია რომ ეს მომავალი წლის საპარლამენტო არჩევნებზე მოხდება.

- 2016 წელს პოლიტიკურადაც გაქრებიან, მათ მდგომარეობაში ყოფნას არავის ვუსურვებ. ქორწილში ეგენი ვერ წასულან და გასვენებაში, სადაც შევიდნენ რესტორანში, ყველგან სცემენ. ქალებმაც კი დაუწყეს ცემა, ახლა მითხარით, ვინ არის ჭირი, – კითხულობს კარლო კოპალიანი.

პარლაენტის წევრის აზრით, საშინაო ფრონტზე „ნაციონალების“ საქმე ცუდად არის, სამაგიეროდ, ქვეყნის გარეთ გრძნობენ თავს კარგად. დეპუტატის განმარტებით, ნაციონალები 9 წლის მანძილზე შეძენილი მეგობრების დახმარებით ხელისუფლებას პრობლემებს უქმნიან.

- ერთი ამბავი აქვთ ატეხილი ევროსაბჭოს რეზოლუციის გამო. რა უხარიათ, მაინც ვერ გავიგე, მთელმა სამყარომ გაიგო, რომ ევროპის სახალხო პარტია ამათ დაკრულზე ცეკვავს. 9 წლის განმავლობაში, ეტყობა, რაღაც ძალიან სერიოზულით მოხიბლეს და ან რაღაცაში გამოიჭირეს, წინააღმდეგ შემთხვევაში, მათი გულისთვის ასე არ მოიკლავდნენ თავს, – აღნიშნა დეპუტატმა. იგი ევროსაბჭოზე მიღებულ რეზოლუციას არ ეთანხმება და მიიჩნევს, რომ ეს ევროსაბჭოს აზრი არ არის.

- ევროსაბჭო 400 დეპუტატს ითვლის, ამ საკითხის განხილვას კი სულ რაღაც 100 კაცი ესწრებოდა, ისინიც ძლივს მიიყვანეს იქ. ამ ასმა კაცმა უყარა რეზოლუციას კენჭი და 89 მათგანმა ჩათვალა, რომ საქართველოში წინასწარი პატიმრობის ფორმას პოლიტიკური ოპონენტების დევნისთვის იყენებს ხელისუფლება. მართლა მაინტერესებს, სად იყო ეს ხალხი, როცა პოლიტიკურ ოპონენტებს ციხეებში ყრიდნენ და ქონებას ართმევდნენ. მაშინ ევროსაბჭო საქართველოში მხოლოდ დემოკრატიის შუქურის ციალს ამჩნევდა?!, – აცხადებს კარლო კოპალიანი. იგი დარწმუნებულია, რომ იმ დეპუტატებს, რომლებიც სხდომას არ ესწრებოდნენ, საქართველოსთან დაკავშირებით სხვა აზრი აქვთ. ამის მიუხედავად, ის ამ დეპუტატებით უკმაყოფილოა.

- ევროპარლამენტარებს რომ ჰკითხო, საქართველოზე ფიქრში ათენებენ და აღამებენ. იმ სხდომას, სადაც ჩვენი საკითხი განიხილებოდა, 300 დეპუტატი არ დაესწრო. იქ მყოფებმა ისეთი გადაწყვეტილება მიიღეს, რომ ლამისაა, საქართველოს ევროპა შეაძულონ, – აღნიშნა კარლო კოპალიანმა.

უმრავლესობის წევრის განმარტებით, ევროპული სტრუქტურები მკაფიოდ უნდა ჩამოყალიბდნენ, უნდათ თუ არა მათ საქართველო: „ჩვენ ბევრი დარტყმა მივიღეთ რუსეთისგან იმის გამო, რომ დასავლური კურსი ავირჩიეთ. ევროპამ რაღაც უნდა იღონოს, რომ ამ გზაზე დავრჩეთ. მათგან რუსული აგრესიის მოგერიებას არ ვითხოვ. ევროსაბჭო და სხვა სტრუქტურები ცდილობენ, მოფაშისტო ნაციონალური მოძრაობა წამებულებად შერაცხონ. ამას საქართველოს მოსახლეობა ცუდად შეხვდება და, შესაძლოა, ევროპაზე გული ავიცრუოთ და სხვაგან გავიხედოთ“-

კითხვაზე, საით შეიძლება გავიხედოთ, დეპუტატი ასე პასუხობს:

- სადღაც ეშმაკებისკენ გავიხედავთ ალბათ. ხშირად ამბობენ, რომ საქართველოში ევრაზიული კავშირის მომხრეთა რიცხვი გაიზარდა. ეს ევროპული სტრუქტურების დამსახურებაა. ამ ორგანიზაციის წევრთა ნაწილი დამნაშავე „ნაციონალებს“ დღემდე ხელს აფარებს.

კარლო კოპალიანს პრეზიდენტ გიორგი მარგველაშვილის სიტყვები ცუდად მოხვდა გულზე. ამერიკაში ვიზიტად მყოფმა პრეზიდენტმა განაცხადა, საქართველო საერთაშორისო რადარებიდან გაქრაო.

- მისგან სიურპრიზებს მიჩვეულები ვართ, მაგრამ ასეთ განცხადებას მაინც არ ველოდი. მისმა ამბიციურობამაც გამაკვირვა, ამერიკელებს განუცხადა, პოლიტიკაში ვიყავი და მომავალშიც ვიქნებიო. ვის აბოლებს ეს ადამიანი? ბიძინა ივანიშვილმა ის პრეზიდენტის სავარძელში ჩასვა, ამან თავი რაღაცად ჩათვალა და ძალიან სახიფათო თამაში წამოიწყო, – აღნიშნა დეპუტატმა. მან არ იცის, როგორ დასრულდება ეს თამაში, სამაგიეროდ, კარგად ხედავს პრეზიდენტის პოლიტიკურ მომავალს:

- გიორგი მარგველაშვილი ძალიან მაგონებს გია თორთლაძეს, რომელთანაც ერთად წინა მოწვევის პარლამენტში უმცირესობაში ვიყავი. 2 დღის წინ გამოვიდა თორთლაძე და განაცხადა, პოლიტიკაში ვბრუნდებიო. კაციშვილს ამაზე რეაქცია არ ჰქონია, რადგან მთელი ავტორიტეტი გაფლანგა, ასე მოუვა მარგველაშვილსაც. პრეზიდენტი განათლებული კაცია და, იმედია, ყველაფერს გადააფასებს. წესით, უნდა მიხვდეს, რომ ქვეყნის შიგნით და გარეთ ინტრიგების ხლართვა შედეგს არ მოუტანს.

ინტრიგების ხლართვაში კარლო კოპალიანი „ქართული ოცნების“ ზოგიერთ წევრსაც ადანაშაულებს. მისი თქმით, პარტიაში ბევრი ჩანერგილია და ისინი წყალს ამღვრევენ.

- პარტია „ქართული ოცნების“ ბედი ჩემთვის მნიშვნელოვანია. უკვე მეოთხე წელი დაიწყო, რაც ხელისუფლებაში მოვედით, მაგრამ ვერაფრით გავძლიერდით, – ჩივის დეპუტატი. მისი თქმით, ამას რამდენიმე მიზეზი აქვს:

- ეტყობა, ჩვენ თავიდან მეტი აქტიურობა უნდა გამოგვეჩინა, ბოლო რამდენიმე თვეა, სულ ამაზე ვსაუბრობთ, მაგრამ საქმე არ დაიძრა. სიფრთხილით უნდა მოვკიდებოდით იმ ხალხს, ვინც პარტიაში შემოდიოდა, მაგრამ მაშინ ფორსმაჟორულ სიტუაციაში ვიყავით და ამას ნაკლები ყურადღება ექცეოდა.

კარლო კოპალიანის თქმით, ახლა ამ საკითხებზე პარტიის ზედა ეშელონებშიც დაფიქრდნენ, მაგრამ მარტო ფიქრი საკმარისი არ არის: „ტარდება რაიონული კონფერენციები, ხდება ახალი სახეების მოძიება. ეს მისასალმებელია, მაგრამ საკმარისი არ არის. „ქართულ ოცნებაში“ სანამ დიდი წმენდა არ ჩატარდება, შედეგს ვერ მივიღებთ“.

კითხვას, კონკრეტულად ვისგან უნდა გაიწმინდოს პარტია, დეპუტატი ასე პასუხობს:

- კონკრეტული სახელები და გვარები პარტიის ხელმძღვანელობამ უნდა დაასახელოს, ჩვენ იმ ხალხისგან უნდა გავთავისუფლდეთ, ვისაც გულზე დღემდე 5 ნომერი აწერია. ეს ხალხი ჯერ პარტიის შექმნის დროს ჩაგვინერგა ყოფილმა ხელისუფლებამ, შემდეგ კი ღრმა კოაბიტაციის დროს შემოგვეპარნენ. პორტირებულმა ნაციონალებმა თვითმმართველობებში სერიოზული პრობლემები შეგვიქმნეს.

კარლო კოპალიანი არ გამორიცხავს, რომ პორტირებული ნაციონალები კოალიციის სხვა პარტიებშიც იყვნენ, მაგრამ ეს ამბავი ნაკლებად ადარდებს: „არ ვიცი, ისინი რას იზამენ ჩანერგილებთან დაკავშირებით, მათი შიდა სამზარეულო ჩემი საქმე არ არის. მე ყველაზე მეტად ჩემი პარტია მადარდებს, სადაც ბევრი ადამიანი შემთხვევით და საეჭვოდ მოხვდა“.

როდის დაიწყება წმენდა, კარლო კოპალიანმა არ იცის, იმაში კი ღრმად არის დარწმუნებული, რომ ჩანერგილებისგან ბევრი უსიამოვნება ელოდებათ.