„რეზონანსი“: როგორ აიძულებს რუსეთი საქართველოს აფხაზეთის რკინიგზის გახსნას // რუსეთის სარკინიგზო ჯარებმა აფხაზეთის რკინიგზის რემონტი დაგეგმილზე 2 თვით ადრე დაასრულეს
„რეზონანსი“: შეიცავს თუ არა საფრთხეს საქართველოსთვის რუსული გაზის მიღება?
„ახალი თაობა“: ინტერვიუ ემზარ კვიციანთან: „ნაციონალების“ აქციის უკან იგორ გიორგაძე დგას // „ყოფილ ხელისუფლებას აშშ და რუსეთი ერთად მფარველობს“
„ახალი თაობა“: ინტერვიუ ზაალ კასრელიშვილთან: „რუსეთი და თურქეთი საქართველოში რელიგიური დაპირისპირების მოწყობას აპირებენ“ //პანკისელების საბოლოო გაფრთხილება ხელისუფლებას
„ვერსია“: ინტერვიუ თემურ შაშიაშვილთან: „ნინო ბურჯანაძემ დიდი შეცდომები დაუშვა და თავის გადაწყვეტილებებზეც თავად აგოს პასუხი“ // წავიდა თუ არა პოლიტიკიდან და რატომ ემიჯნება ქართველ პოლიტიკოსებს „თეთრების“ ლიდერი
—————————-
„რეზონანსი“, 9 ოქტომბერი, 2015 წელი
როგორ აიძულებს რუსეთი საქართველოს აფხაზეთის რკინიგზის გახსნას
რუსეთის სარკინიგზო ჯარებმა აფხაზეთის რკინიგზის რემონტი დაგეგმილზე 2 თვით ადრე დაასრულეს
სალომე სარიშვილი
დღეიდან საქართველო-რუსეთის რკინიგზის აფხაზეთის მონაკვეთი – მდინარე ფსოუდან მდინარე ენგურამდე – სრულად გაწმენდილი და შეკეთებულია. რუსეთის სარკინიგზო ჯარებმა ეს სამუშაო დაგეგმილზე 2 თვით ადრე დაასრულეს და უახლოეს დღეებში დატოვებენ აფხაზეთს. იმ ფონზე, როდესაც საქართველოს ხელისუფლება კატეგორიულად უარყოფს აფხაზეთის რკინიგზის გახსნაზე ოფიციალურ მოსკოვთან ყოველგვარ მოლაპარაკებას, ჩნდება ლოგიკური კითხვა – რატომ დაახარჯეს რუსებმა ფული და ადამიანური რესურსი ამ სარკინიგზო მონაკვეთის აღდგენას.
ექსპერტთა უმრავლესობა მიიჩნევს, რომ ოფიციალური მოსკოვისათვის რამდენიმე მიზეზის გამო სასიცოცხლოდ მნიშვნელოვანია ამ რკინიგზის ამუშავება და, შესაბამისად, დარწმუნებულია, რომ საქართველოს ხელისუფლების დათანხმება მის ამუშავებაზე არ გაუჭირდება.
იმაზე, რომ რუსეთს საქართველოს გავლით სარკინიგზო მიმოსვლის აღდგენის იმედი აქვს, თუნდაც ის ფაქტი მიუთითებს, რომ სარკინიგზო ხაზის გარემონტება მოხდა არა რომელიმე დასახლებულ პუნქტამდე, ვთქვათ, გალამდე, არამედ ენგურის ხიდამდე.
კონფლიქტოლოგი მამუკა არეშიძე მიიჩნევს, რომ აფხაზეთის რკინიგზის შეკეთება ახლო აღმოსავლეთში მიმდინარე მოვლენებთანაა დაკავშირებული. მისი თქმით, ამ პროცესს გლობალურად უნდა შევხედოთ, ვინაიდან რკინიგზის თემით ბევრი ქვეყანაა დაინტერესებული.
“რაც ახლო აღმოსავლეთში ხდება, ასე მალე არ დამთავრდება. ეს შესაძლოა, ძალიან ხანგრძლივი პროცესი იყოს. საკითხს ობიექტურად რომ მივუდგეთ, ეს ისედაც ხანგრძლივი პროცესია, რომელიც პრაქტიკულად 2001 წელს დაიწყო, ხოლო თუ კარგად ჩავუღრმავდებით, აქ უბრალოდ პაუზა იყო, თორემ პროცესი ჯერ კიდევ ავღანეთში 1979 წელს დაიწყო, მერე “უდაბნოს ქარიშხლის” სახით ერაყში გაგრძელდა და შემდეგ ავღანეთი-ერაყის მონაკვეთში ისევ ხელახლა დაიწყო, ახლა უბრალოდ მასშტაბი და სახე შეიცვალა.”2001 წელს ახალი ეტაპი დაიწყო, შემდეგ გაგრძელდა და მერე ამას სირიაც დაემატა. უნდა აღინიშნოს, ამ პროცესში ძალიან სერიოზული მოთამაშეები არიან ჩართულნი, ამერიკის, ევროკავშირის, ირანის, თურქეთისა და სხვების გარდა, ბოლო მომენტში ჩინეთიც კი ჩაერთო. ეს ყველაფერი ისეთი ტიპის დაპირისპირება გახლავთ, რომელიც მეორე მსოფლიო ომის შემდეგ კაცობრიობამ არ იცის.
“აქედან გამომდინარე, ჩვენ არც კი ვიცით ზუსტად ვის და ვის შორის შეიძლება შედგეს მოლაპარაკება. დღეს ირანი არა მხოლოდ რუსეთის, არამედ აშშ-ის პარტნიორიც ხდება, რაც სპარსეთის ყურის ქვეყნების გაღიზიანებას იწვევს. ჩვენ არ ვიცით ვის სჭირდება ეს რკინიგზა,” – ამბობს არეშიძე და დასძენს, რომ თუკი სირიაში ომი გაგრძელდა და ფართო მასშტაბიანი სახე მიიღო, გამორიცხული არაა რკინიგზა ირანისკენ რუსული ჯარების გადასასროლად იყოს საჭირო.
“არ გამოვრიცხავ, რომ რუსეთი მომავალი კონფლიქტისათვის ემზადება, რომელმაც შესაძლოა მხოლოდ სირია და ერაყი არ მოიცვას.
“ჩვენს მხარეს სამხედრო აგრესიას ასეთი ფორმით არ ვვარაუდობ, ვინაიდან რუსეთს ჩვენ წინააღმდეგ არავითარი რკინიგზა არ სჭირდება. 2008 წელს რკინიგზა რაიმეში გამოიყენეს? ერთადერთი იყო ის, რომ ოჩამჩირის პორტისთვის რკინიგზის პატარა ხაზი დასჭირდათ, თორემ დანარჩენ შემთხვევაში საქართველოს ტერიტორიაზე ყოველგვარი რკინიგზის გარეშე შემოიჭრნენ.
“მათ სამხრეთ ოსეთსა და აფხაზეთში იმდენად ძლიერი სამხედრო ფორმირებები აქვთ, რომ რკინიგზა არაფერში სჭირდებათ. ისეთი გეოპოლიტიკური ძვრები ხდება, შთაბეჭდილება მრჩება, რომ შესაძლოა საქართველო ერთ მშვენიერ დღეს მხოლოდ საქმის კურსში ჩააყენონ და ესეც შეიძლება ფორმალური იყოს.
“ეს მხოლოდ რუსეთის პოზიცია არაა, ეს შეიძლება სხვისი პოზიციაც იყოს. მაგალითად, ჩვენი მეზობელი სხვა ქვეყნის ან შესაძლოა ამერიკის შეერთებული შტატების. ეს ძალიან რთული სათქმელია და ცალსახად ვერაფერს იტყვი.
“ვფიქრობ, რუსეთმა ეს გზა მოიყვანა არა იმიტომ, რომ ხვალ გზა დანარჩენ საქართველოში გააგრძელოს, არამედ იმიტომ, რომ მასშტაბური ომისთვის ემზადება.
“საქმე ისაა, რომ რეალურად იქ დასასრულებელი არაფერი იყო, უბრალოდ გასაწმენდი იყო. რომ გითხათ იქ რაიმე ფუნდამენტური სამუშაოები შესრულდა-მეთქი, ასე არ ყოფილა. გაიწმინდა, გასუფთავდა და ზოგიერთ ადგილას გასწორდა, მაგრამ პრინციპში იქ მხოლოდ 60 კილომეტრამდე გზა იყო გასაკეთებელი. გარდა ამისა, განცხადება ერთია და დასრულება მეორე. არაა გამორიცხული, რომ განცხადება განგებ გაკეთდა, რათა გამგებმა გაიგოს.
“მეჩვენება, რომ ზოგიერთი ადგილი, ენგურიდან უფრო მოშორებით, გალის რაიონის სიღრმეში გასაკეთებელი კიდევ იყო. ამიტომ მთელ ამ პროცესს ამ კუთხით უნდა შევხედოთ და არა იმ ნაწილში, რომ შესაძლოა საქართველო რუსეთთან ფარულ მოლაპარაკებებს მართავს.
“თუ გლობალურმა მოთამაშეებმა გარკვეული ნაბიჯების გადადგმა გადაწყვიტეს, პატარა ქვეყანას ანგარიშს სამწუხაროდ არავინ უწევს, მითუმეტეს თუ ამერიკელები და რუსები ახლო აღმოსავლეთთან დაკავშირებით მოილაპარაკებენ,” – ამბობს არეშიძე.
სახედრო ექსპერტი ვახტანგ მაისაია აფხაზეთის რკინიგზის გახსნის მნიშვნელობას რამდენიმე ფაქტორს უკავშირებს და ამბობს, რომ რუსეთს რკინიგზა პირველ რიგში, სამხედრო ტექნიკის გადასასროლად სჭირდება. მისი აზრით, რუსეთი აფხაზეთში სამხედრო პლაცდარმის შექმნას იწყებს, რაც შავი ზღვისა და რეგიონული მიმართულებით მათი ინტერესების გაძლიერებას უკავშირდება.
“მახსოვს თქვენს გაზეთთან საუბრისას ვთქვი, რომ რუსები სამუშაოებს ვადაზე ადრე დაასრულებდნენ. ჩემი ვერსია რეალური აღმოჩნდა. აქ რამდენიმე ფაქტორია და რამდენადაც პარადოქსულად უნდა ჟღერდეს, ეს შესაძლოა სირიის ფაქტორსაც უკავშირდებოდეს, ვინაიდან რკინიგზის ეს მონაკვეთი სამხედროებმა შეაკეთეს.
“მოგეხსენებათ, რუსეთში სპეციალური სარკინიგზო ჯარებია შექმნილი, რომლებიც ასეთი ტიპის სამუშაოებს ასრულებენ. კერძოდ, მუშაობენ სპეციალური სარკინიგზო ხაზების გაყვანაზე და აგებენ სპეციალური ბირთვული სარაკეტო ტექნოლოგიებისთვის გადასაადგილებელ საშუალებებს. რა თქმა უნდა, ეს ნიშნავს, რომ რუსეთი ამ გზით სამხედრო ტექნიკის გადასროლას აპირებს.
“აქ ორი ფაქტორია. პირველი ის, რომ ისინი აპირებენ გალის რაიონი სამხედრო ტიპის რეინტეგრირებულ რაიონად გადააქციონ, ასევე ოჩამჩირე, სადაც ისინი სამხედრო-საზღვაო ბაზის აშენებას აპირებენ. ცნობილი რუსულ-აფხაზური “ხელშეკრულება” საარმიო დაჯგუფების შექმნას ითვალისწინებდა და სამწუხაროდ, ამ პროექტის რეალიზაცია უკვე იწყება – რუსეთი აფხაზეთში სამხედრო პლაცდარმის შექმნას იწყებს, რაც ცხადია, შავი ზღვისა და რეგიონული მიმართულებით მათი ინტერესების გაძლიერებას უკავშირდება.
“მეორე ფაქტორია სირია, სადაც რუსები უკვე სახმელეთო ოპერაციებზე გადადიან. აი, აქ უკვე მათ საკმაოდ მძლავრი შეიარაღებული ძალების გადასროლა დასჭირდებათ, რისთვისაც შესაძლოა საქართველოს ტერიტორია გამოიყენონ. ბუნებრივია, გამორიცხული არაა, რომ სარკინიგზო ხაზის გაყვანა ამ ფაქტს უკავშირდება.
“მნიშვნელოვანია, რომ სირიაში შეიქმნება დაახლოებით 10 ათას კაციანი დაჯგუფება, სადაც მონაწილეობას ირანის რეგულარული არმიის და სირიის რეჟიმის მეომრები მიიღებენ. ეს კოალიციური ძალა კი სახმელეთო ოპერაციას როგორც რადიკალური ისლამისტური, ისე ზომიერი ისლამისტური დაჯგუფებების წინააღმდეგ განახორციელებს.
“აი, აქ ემზადება რუსეთი სახმელეთო-სატრანზიტო კუთხით საქართველოს ტერიტორიის გამოყენებისათვის. რა ულტიმატუმს წაუყენებენ საქართველოს ხელისუფლებას რუსები, უცნობია. ფაქტია, რომ მათ ინტენსიური სახმელეთო კომუნიკაცია სჭირდებათ, რაც პირდაპირ საქართველოს ტერიტორიას უკავშირდება.
“აქ საქართველოს პოზიცია პრინციპული უნდა იყოს, რათა რუსეთმა ჩვენი ტერიტორია სატრანზიტო კორიდორად არ გამოიყენოს. მესმის, რომ ძალიან რთული მოლაპარაკება მოუწევთ, თუმცა, რეალობა ასეთია. გარდა ამისა, აუცილებელია აქ დასავლეთის ჩართულობა გაიზაროს და მათ მხარი დაგვიჭირონ,” – ამბობს “რეზონანსთან” საუბრისას ვახტანგ მაისაია.
სოსო ცისკარიშვილი ვარაუდობს, რომ რუსეთი საქართველოს ხელისუფლებაზე ზეწოლას მოახდენს, რათა რკინიგზის გახსნაზე დაითანხმოს.
“ის, რასაც ვფიქრობ და ვვარაუდობ, ჯერ ჩვენი საზოგადოებისთვის მომწიფებული არაა. ეს ის შემთხვევაა, როცა ზოგჯერ თქმა სჯობს არათქმასა, ზოგჯერ თქმითაც დაშავდების. ახლა უნდა დავიცადოთ და ვნახოთ მოვლენები როგორ განვითარდება. აქ შეიძლება განვიხილოთ ორი ვერსია, რომელთაგან ერთ-ერთი შესაძლოა ზეწოლაც კი იყოს.
“უნდა აღინიშნოს, რომ ეს საკითხი მხოლოდ ჩვენი გადასაწყვეტი არაა. არსებობს ჩვენი მეზობელი ქვეყანა აზერბაიჯანი, რომელიც რასაკვირველია გახარებული ვერ იქნება იმით, რომ სომხეთში ირაღის უზარმაზარი რაოდენობა სწორედ რკინიგზის სახით შევა”, – განაცხადა სოსო ცისკარიშვილმა.
„რეზონანსი“, 9 ოქტომბერი, 2015 წელი
შეიცავს თუ არა საფრთხეს საქართველოსთვის რუსული გაზის მიღება?
ლიკა ამირაშვილი
ვიცე-პრემიერმა, ენერგეტიკის მინისტრმა კახა კალაძემ რუსულ “გაზპრომთან” მორიგი შეხვედრის გამართვის თაობაზე ინფორმაცია დაადასტურა. როგორც ენერგეტიკის მინისტრმა აღნიშნა, “გაზპრომთან” ურთიერთობა დღეს არ დაწყებულა, წლებია გაზს რუსეთიდან ვიღებთ და ეს ურთიერთობა მომავალშიც გაგრძელდება.
მისივე განცხადებით, “გაზპრომთან” გამართულ პირველ შეხვედრაზე, რომელიც მუშა შეხვედრა იყო, დასმული იქნა საკითხი გაზსადენში გაზის მოცულობის გაზრდასთან დაკავშირებით.
“შეხვედრაზე, რომელიც გავმართეთ, ჩვენ დავსვით საკითხი იმასთან დაკავშირებით, რომ ის მოცულობები, რომელიც დღეს რუსეთიდან სომხეთის მიმართულებით გაზსადენში გადის, გაიზარდოს, რადგან ჩვენთვის მნიშვნელოვანია, რომ ეს მილსადენი მაქსიმალურად იყოს დატვირთული, რადგან ამ შემთხვევაში, უფრო მეტი საშუალება გვექნება, დამატებითი მოცულობები მივიღოთ, ასევე თუ კომერციულ კომპანიებს ექნებათ სურვილი და შესაძლებლობა, მათ მიეცეთ საშუალება, ბუნებრივი აირი შემოიტანონ რუსეთიდან”, – განაცხადა კახა კალაძემ.
ექსპერტთა ნაწილი მიიჩნევს, რომ ქართულ ენერგეტიკაში რუსული გაზის წილის შესაძლო გაზრდა სერიოზული რისკების შემცველია, რაგანც ოფიციალური მოსკოვი, როგორც წესი, თავის გაზს პოლიტიკური ზეწოლისათვის იყენებს.
თქვენი აზრით, რამდენად გამართლებული იქნება რუსეთისაგან ბუნებრივი აირის მიღება და ემუქრება თუ არა საქართველოს ენერგეტიკულად რუსეთზე დამოკიდებულ ქვეყნად ქცევის საფრთხე? – ამ კითხვით “რეზონანსმა” საზოგადოების წარმომადგენლებს მიმართა.
ვახტანგ ძაბირაძე (პოლიტოლოგი):“რუსეთიდან გაზის მოწოდება პრობლემა არ არის, ჩვენ თუ დამზღვევი მექანიზმი გვექნება. ამიტომ გაზის მიღება, რა თქმა უნდა, შეიძლება. თუმცა ეს თუ სხვა წყაროს ჩანაცვლების ხარჯზე უნდა მოხდეს, არ მგონია, რომ სწორი ნაბიჯი იყოს. შემდეგში რუსეთი ამ ბერკეტს ჩვენ წინააღმდეგ აუცილებლად გამოიყენებს.
“მზად უნდა ვიყოთ, რომ ამ ბერკეტის გამოყენებით რუსეთი საქართველოზე ზეწოლას მოახდენს. სხვა მხრივ, მე პრობლემას ვერ ვხედავ და ვერც იმას ვხედავ, რომ ამას შეიძლება საგარეო ორიენტაციასთან კავშირი ჰქონდეს. ძალიან კარგია, თუ გაზის დამატებითი წყარო გვექნება, მაგრამ გაზის გათიშვის შემთხვევაში, მძიმე მდგომარეობაში არ აღმოვჩნდეთ.
ნოდარ ნათაძე (ფილოლოგი): “ეს თუ მართალია, ძალიან ცუდია, რადგან იმაზე მეტყველებს, რომ ხელისუფლება პირდაპირ რუსეთზე დამოკიდებულების გასაზრდელად მუშაობს. რა თქმა უნდა, ეს ინფორმაცია თუ მართალია, ძალიან ცუდი იქნება.”
დიმა ჯაიანი (მსახიობი): “ვერ გეტყვით, გაზის მოწოდებით ვისზე ვიქნებით დამოკიდებულები. მთავარია, გაზი და ელექტროენერგია იყოს, ქვეყანაში ადამიანები არ იყვნენ, რომლებიც ზამთარში გაზის გარეშე დარჩებიან. ახლა რუსეთზე თუ გაზით ვიქნებით დამოკიდებული, ეს ძალიან ცუდია, თუმცა, არ მგონია, ეს ასე იყოს.”
იგორ კვესელავა (პოლიტოლოგი): “საქართველომ ყველა ქვეყანასთან უნდა ითანამშრომლოს, განსაკუთრებით კი რუსეთთან. რუსეთი დიდი ქვეყანაა, რომელსაც გაზის უზარმაზარი მარაგი აქვს. ხელისუფლება რუსეთთან ხელშეკრულებას ისე არ დადებს, რომ აზერბაიჯანთან დადებულ ხელშეკრულებაზე უარესი იყოს.
“იმ შემთხვევაში, თუ საქართველოს ხელისუფლება “გაზპრომთან” მოილაპარაკებს და ეს საქართველოს მოსახლეობისათვის დადებითი იქნება, პრობლემას ვერ ვხედავ. ამიტომ მივესალმები ხელშეკრულების დადებას, რომელიც საქართველოს განვითარებისკენ გადადგმულ ნაბიჯად მიმაჩნია.”
„ახალი თაობა“, 10 ოქტომბერი, 2015 წელი
ინტერვიუ ემზარ კვიციანთან: „ნაციონალების“ აქციის უკან იგორ გიორგაძე დგას.. ყოფილ ხელისუფლებას აშშ და რუსეთი ერთად მფარველობს“
შორენა მარსაგიშვილი
კოდორის ხეობაში პრეზიდენტის ყოფილი რწმუნებული ემზარ კვიციანი ნაციონალებს სამოქალაქო ომის სამზადისში ადანაშაულებს. ვინ აქეზებს ამისკენ ყოფილ ხელისუფლებას და რა კავშირები აქვთ მათ რუსეთთან? _ ამის შესახებ კვიციანი `ახალ თაობას~ ესაუბრება.
ემზარ კვიციანი:
- დამნაშავეების ბუდე, ნაციონალური მოძრაობა, საქართველოში დიდი არეულობის მოწყობას აპირებს. მათ გეგმაში რომ სამოქალაქო დაპირისპირება შედის, ამაზე ნაციონალების განცხადებებიც მეტყველებს. ისინი ყველაფერზე აპირებენ წასვლას და ამაში მათ ბაბუა იგორი ეხმარებათ.
- ბაბუა იგორ ვინღაა?
- ამათი მამა და მარჩენალი იგორ გიორგაძე, თავის დროზე სწორედ მან შექმნა ნაციონალური მოძრაობა.
- ამას სერიოზულად ამბობთ თუ ღადაობთ?
- ვგავარ იმ კაცს, ასეთ თემებზე რომ იღადაოს? მაგას უნდოდა შევარდნაძის მოშორება და ამიტომაც შექმნა ეს პარტია.
- თუ ასე იყო, რატომ არ მისცეს საქართველოში ჩამოსვლის უფლება?
- ვინ გითხრათ, რომ არ მისცეს საქართველოში დაბრუნების უფლება. ეს ყველაფერი იყო დადგმული სპექტაკლი. ის საქართველოში რომ ჩამოსულიყო, ყველაფერი ნათელი გახდებოდა. მათი ალიანსი მე გავშიფრე და ამიტომაც გამიმწარეს ცხოვრება. აქედან გაქცეული რომ ვიყავი, არც კი იცით, რა პირობებში მიწევდა რუსეთში ყოფნა გიორგაძის გამო. მას რუსეთში დიდი გავლენა აქვს და ამიტომ ვერ მოვახერხე იქიდან წასვლა, არსად არ მიშვებდნენ.
ემზარ კვიციანი ამბობს, რომ მოვა დრო და ყველაფერს დეტალებში მოყვება, მაგრამ მთავარი უკვე გააკეთა – მათი ალიანსი ვამხილე.
- ახლა ისინი ერთად აპირებენ საქართველოში კიდევ ერთი გადატრიალების მოწყობას. ხალხის მხარდაჭერის იმედი ტყუილად აქვთ, ერთი გაბედონ რამე და ნახავენ, როგორ გადაატრიალებს მათ ხალხი. დიდი ბრძოლის გადატანა კი მოგვიწევს, იმიტომ, რომ ნაციონალების უკან ამერიკაც დგას, _ აცხადებს ემზარ კვიციანი.
- ბოლო-ბოლო ვინ დგას ამ ნაციონალების უკან? იგორ გიორგაძე რუსეთის პირდაპირი წარმომადგენელია და რუსეთ-ამერიკა ერთად არიან ამ საქმეში?
- რუსეთი და ამერიკა სულ ერთად არ იყვნენ? ეგენი ერთმანეთის მტრები არასდროს ყოფილან. ერებს და რელიგიებს ერთმანეთთან აპირისპირებენ და მერე ამით თავად ნახულობენ დიდ სარგებელს. აფხაზეთიც და სამაჩაბლოც ამ ორმა ქვეყანამ დაგვაკარგვინა. 2001 წელს იგივეს გაკეთებას აპირებდნენ კოდორშიც. ყველაფერი კარგად გათვალეს, მაგრამ ჩვენ ჩავშალეთ ეს საქმე. მაშინ ამერიკის და რუსეთის ერთობლივი შეთანხმებით დაიგეგმა პროვოკაცია. პანკისში მყოფ ჩეჩენ მებრძოლებს ვიღაც დაჰპირდა, რომ აფხაზეთის გავლით ჩრდილოეთ კავკასიაში გადაიყვანდნენ. ჩვენ დაგვპირდნენ, რომ აფხაზეთს დავიბრუნებდით. ჩვენც და ჩეჩნებიც მოტყუებული დავრჩით. თქვენს მკითხველს კარგად უნდა ახსოვდეს ის მოვლენები, როგორ გვბომბავდა რუსული ავიაცია. პოზიციებზე გასულებს საჭმელიც კი არ გვქონდა. ფოთლებით და ცხენის უმი ხორცით ვიკვებებოდით.
- უმი ხორცით რატომ, ვერ შეწვით ან მოხარშეთ?
- მოხარშვას და შეწვას ცეცხლის ანთება სჭირდებოდა, ცეცხლი რომ აგვენთო, რუსები დაგვინახავდნენ. ვერ წარმოიდგენთ, რა საშინელებაა, როცა მშიერი ხარ და თან იცი, რომ გიღალატეს. ცხენის უმი ხორცი კი მთლად საზიზღრობა იყო. ამ საზიზღრობით ვიყავით გაბრუებული, როცა ჩეჩნებმა გაეროს ვერტმფრენი ჩამოაგდეს. ამის გამო ჩემს ახლად შეძენილ მეგობარ რუსლან გელაევთან კინაღამ დიდი ჩხუბი მომივიდა.
- გაეროს ვერტმფრენი რატომ ჩამოაგდეს?
- რუსული ეგონათ. იმ დროს მე კოდორში პრეზიდენტის რწმუნებული ვიყავი და სხვა საქმეებთან ერთად ხეობის საკვები პროდუქტებით მომარაგებაც მევალებოდა. პროდუქტის შესაძენად სახელმწიფო გვიყოფდა ფულს. პროდუქტი ოქტომბერში შეგვქონდა.
ამერიკის და რუსეთის დავალებით, მე ჩეჩნებთან ერთად პოზიციებზე გამიტყუეს. ამ დროს ზურაბ ნოღაიდელმა უარი თქვა კოდორისთვის ფულის გამოყოფაზე. ეს იმას ნიშნავდა, რომ ხეობა საკვების გარეშე დარჩებოდა და დაიცლებოდა. იმედი ჰქონდათ, რომ ან მე მომივიდოდა რამე და ან გზა ჩაიკეტებოდა, მაგრამ, უფლის წყალობით, იმ წელს თოვლი გვიან მოვიდა, მეც გამოვაღწიე ალყიდან. მაშინ ხეობა რომ არ დაიცალა, ეს ლევან მამალაძის წყალობით მოხდა და ამიტომაც ისჯება დღემდე ის ამერიკელებისგან.
- რანაირად გადაარჩინა მაშინ ლევან მამალაძემ ხეობა?
- ის იყო ქვემო ქართლში პრეზიდენტის რწმუნებული. მან გამოყო ფული და შეიტანა ხეობაში პროდუქტი. ჩაიშალა რუსეთ-ამერიკის გეგმა, ამის გამო მათ მამალაძე შეიძულეს. მას კიდევ იმის გამო ვერ იტანდნენ, რომ შევარდნაძის მემკვიდრედ მოიაზრებოდა, რაც რუსეთ-ამერიკის გეგმას ეწინააღმდეგებოდა. 2003 წლის ნოემბერში ქვეყნიდან გააქციეს. ამერიკელების მოთხოვნით, დღემდე არ უშვებენ საქართველოში. დიდი უსამართლობაა, ლევანი ქვეყნიდან იყოს გაქცეული, ხოლო ნაციონალები აქ ისე თავისუფლად დადიოდნენ, რომ მიტინგების მოწყობას ბედავდნენ.
„ახალი თაობა“, 10 ოქტომბერი, 2015 წელი
ინტერვიუ ზაალ კასრელიშვილთან: „რუსეთი და თურქეთი საქართველოში რელიგიური დაპირისპირების მოწყობას აპირებენ“
პანკისელების საბოლოო გაფრთხილება ხელისუფლებას
შორენა მარსაგიშვილი
11 ოქტომბერს პანკისში ლაფანყურის სპეცოპერაციისას დაღუპულების პატივსაცემად დოღი გაიმართება. ამით პანკისელები და არა მარტო ისინი, საქართველოს ხელისუფლებისგან ამ საქმის გამოძიებას კიდევ ერთხელ მოითხოვენ. კავკასიის ხალხთა კონფედერაციის პრეზიდენტ ზაალ კასრელიშვილის თქმით, თუ ხელისუფლება კიდევ ერთხელ წაუყრუებს მათ მოთხოვნებს, სერიოზული პრობლემები შეგვექმნება.
ზაალ კასრელიშვილი:
- ხელისუფლება ვერც კი აცნობიერებს, რომ ცეცხლს ეთამაშება. მართლა ყოველგვარ საზღვარს სცილდება ის, რაც ლაფანყურის სპეცოპერაციიის საქმის გამოძიებასთან ხდება. „ქართული ოცნება“ აქაურებს ორჯედ დაჰპირდა ამ საქმის გამოძიებას. მეოთხე წელი დაიწყო და დღემდე არაფერი თქმულა ამ საქმეზე. პანკისელები სახელმწიფოებრივად აზროვნებენ და 3 წელი მოთმინებით ელოდებიან დეტალების გარკვევას. მათ ხელისუფლებისთვის არც აქციები მოუწყვიათ და არც ულტიმატუმი წაუყენებიათ, ისინი ხელისუფლებას კაცურ სიტყვაზე ენდნენ. 11 ოქტომბერს გამართული დოღით ისინი „ქართულ ოცნებას“ დელიკატურად შეახსენებენ, რომ ამ საქმის დამნაშავეები დასასჯელები არიან. არავის ეგონოს, რომ დრო მათ ამ ამბავს დაავიწყებს. კავკასიელები დაღვრილ სისხლს ასე იოლად არ ივიწყებენ.
- თქვენ და სხვა ექსპერტებსაც არაერთხელ გითქვამთ, რომ ეს საქმე გამოძიებულია და რიგი მიზეზების გამო არ ხმაურდება. იქნება მართლა არის ამ საქმეში რაიმე ისეთი, რომლის გამხელაც არ შეიძლება.
- ამ საქმეში რამდენიმე ქვეყნის სპეცსამსახურია ჩარეული და სწორედ ისინი აფერხებენ დეტალების გამჟღავნებას. რაღაც საიდუმლო დეტალები ალბათ იქნება, მაგრამ დანარჩენი უნდა ითქვას. ამდენი ადამიანი დახოცეს და არ უნდა ვიცოდეთ, რა მოხდა? ამ სისხლს არავინ დაივიწყებს, ამაზე „ქართულ ოცნებას“ აუცილებლად მოსთხოვენ პასუხს.
- „ქართულ ოცნებას“ რატომ მოსთხოვენ, ვინც ჩაატარა სპეცოპერაცია, იმათ მოსთხოვონ. თუ არ იციან მათი ვინაობა?
- ამის შესახებ კავკასიელებმა იმაზე მეტი იციან, ვიდრე საქართველოს სპეცსამსახურებმა. ისინიც კარგად აცნობიერებენ, რომ სხვა ქვეყნების სპეცსამსახურების გამო ფერხდება საქმის გასაჯაროება. ამის თქმა მაინც იკადრონ ხმამაღლა და ხალხს ნუღარ ატყუებენ. ან რა სახელმწიფო ჩვენ ვართ, ქვეყნის ტერიტორიაზე რომ რამდენიმე ქვეყნის სპეცსამსახური ჩაგიტარებს ოპერაციას.
- ანუ ლაფანყურის სპეცოპერაცია რამდენიმე ქვეყნის სპეცსამსახურმა ჩაატარა?
- ამ საქმით რამდენიმე ქვეყნის სპეცსამსახური იყო დაინტერესებული. სისხლიანი ოპერაცია უშუალოდ წინა ხელისუფლებამ ჩაატარა. ნაციონალურ მოძრაობაში შიდა დაპირისპირებას ჰქონდა ადგილი და ამას მოჰყვა ამდენი ადამიანის დაღუპვა. ეს ამბავი „ქართულმა ოცნებამ“ კარგად გამოიყენა არჩევნების წინ. ბევრმა მათ ხმა იმიტომ მისცა, რომ სისხლისღვრას გამოუცხადა პროტესტი. ახლა კეთილი ინებონ და გაასაჯაროონ საქმე. უცხო სპეცსამსახურების გარდა, სხვა მიზეზებიც არის, რის გამოც არაფერს ამბობენ.
- რა მიზეზებია, ვინმე ამათიანი მონაწილეობდა იმ საშინელებაში?
- ამ ოპერაციის მონაწილენი ისევ მუშაობენ ძალოვან სტრუქტურებში, მაგრამ ეს არ არის მიზეზი, მიზეზია სხვა, რომლისაც ჩვენში ბევრს ეშინია. ამ მიზეზს ფარული ჩანაწერები ჰქვია.
- რა ფარულ ჩანაწერებზეა საუბარი, ლაფანყურის საქმეს უკავშირდება?
- არა, ბატონო, არა. საუბარია იმ ფარულ ჩანაწერებზე, რომლებიც ნაციონალებს ამ ხელისუფლების წარმომადგენლებზე აქვთ. როგორ გგონიათ, წინა ხელისუფლებამ ამათ ტყუილად დაუტოვა ფაილები შსს-ში? ამით მიანიშნეს, რომ მათზე ბევრი რამ ჰქონდათ. ხელისუფლების წარმომადგენლებზე არსებობს სხვა ჩანაწერებიც, რომლებიც სამეგრელოს კასრებში აღმოაჩინეს. ყველაზე საინტერესო ჩანაწერები კი ოდესაში ინახება. მათ ვინ და როდის გამოაქვეყნებს, არავინ იცის.
- რა გადაუღეს ამისთანა?
- ეგ მაგათ ეცოდინებათ, ფაქტია, რომ ამ კადრების შიშით ვერც ერთი საქმის, მათ შორის, ლაფანყურის საქმის, გამოძიება ვერ ხერხდება. როგორც კი დამნაშავეს დაასახელებენ, ეგრევე ხელისუფლების წარმომადგენელზე გამოქვეყნდება სკანდალური მასალები.
- ის მაინც არ იცით, რა ტიპის კომპრომატებია?
- საიდან უნდა ვიცოდე, მეგიზ ქარდავას გადამღებ სტუდიაში არასდროს მიმუშავია. ვინაიდან ამ მასალების გამო თითის გატოკებას ვერ ბედავენ, გამოდის, რომ ძალიან სკანდალური ჩანაწერებია მათზე. ჩემი მხრიდან ვურჩევ ხელისუფლებას, ამ კადრების გამოქვეყნება ერჩიოს იმას, რაც ლაფანყურის საქმის გამოუძიებლობას მოჰყვება.
- რა შეიძლება მოჰყვეს?
- შურისძიება. ერთხელ მათ უკვე სცადეს. თბილისში მეტროში უნდა მოეწყოთ აფეთქება. მაშინ ეს ჩვენი ჩარევით აღიკვეთა. რა მოხდება მომავალში, ამაზე პასუხს აღარ ვაგებთ. ჩვენ იმ ხალხს ვეღარ დაველაპარაკებით.
- რატომ ვერ დაელაპარაკებით?
- რამდენჯერმე დაველაპარაკეთ და გავაჩერეთ, რა პირით დაველაპარაკო ჩვენს კავკასიელ მეგობრებს? ხელისუფლებისგან განსხვავებით, კაცის სიტყვას ჩვენ სხვანაირად ვუყურებთ. „ქართულ ოცნებას“ აზრზე მოსვლას ვურჩევ. სირიაში რუსეთის მიერ დაწყებულმა ოპერაციამ ვიღაცას რაღაც უაზრო აზრები გაუჩინა. ჩვენ კი ვამბობთ, რომ რუსეთისთვის კუდის ქიცინი მათთვის ცუდად დასრულდება.
- „ქართული ოცნება“ რუსეთს კუდს უქიცინებს?
- „ოცნების“ ნაწილი ნამდვილად უქიცინებს კუდს, საბედნიეროდ, მათ რიგებშიც არის ნორმალური ხალხი.
- აღნიშნეთ, რუსეთის მიერ სირიაში დაწყებულმა ოპერაციამ ვიღაცას უაზრო აზრები გაუჩინაო. რას გულისხმობთ?
- დაიჯერეს, რომ რუსეთის დაწყებული სპეცოპერაცია ისლამურ სახელმწიფოს გაანადგურებს. იმას კი ვერ ხვდებიან, რომ ეს ჩვენთვის უფრო უარესია.
- უფრო უარესი რატომ არის?
- რუსულმა ავიაციამ სირიაში 91 სამხედრო გაფრენა განახორციელა. მთლიანად გაანადგურა ისლამური სახელმწიფოს ინფრასტრუქტურა, ცოცხალ ძალას კი ვერაფერი დააკლო. მხოლოდ 14 მებრძოლი დაიღუპა, დანარჩენები კი გაიფანტნენ. ახლა ისინი სხვადასხვა ქვეყნებში გადანაწილდებიან. დღეს არც ერთი ქვეყანა, მათ შორის არც საქართველო, დაცული არ არის. ჩვენ საფრთხე გველოდება როგორც ისლამური სახელმწიფოს მებრძოლების, ასევე რუსეთის მხრიდან. ტერაქტებს და პროვოკაციებს შესაძლოა ვერ გადავურჩეთ. რუსეთს 25 წელია, პანკისი მიზანში ჰყავს ამოღებული.
- ფიქრობთ, რომ პანკისში მოაწყობს რამეს?
- დიდ რამეს მოაწყობს. მოსკოვმა ტერორისტებთან ბრძოლის საბაბით სირიაში დაიწყო ოპერაცია და თავის საზღვრებთან რამეს მოერიდება? მით უმეტეს, ყველამ იცის, რომ ბევრი პანკისელი ისლამური სახელმწიფოს მხარეს იბრძვის. ამ ვითარებაში ყველაფერი უნდა გავაკეთოთ, რომ პანკისელები არ გავაღიზიანოთ. ეს ხალხი ყოველთვის ჩვენ გვერდით იდგა, რუსეთმა ვერ მოახერხა, ისინი ჩვენ წინააღმდეგ განეწყო.
რუსეთის გარდა, აქ თურქეთიც შეეცდება პროვოკაციის მოწყობას და ეს პროვოკაცია რელიგიური დაპირისპირება იქნება. ეს საფრთხე აზერბაიჯანსაც ემუქრება. იქ მცხოვრებ დაღესტნელებს უკვე დაეძაბათ ურთიერთობა აზერბაიჯანელებთან.
„ქართულ ოცნებაში“ მყოფი ბრიყვი და მედროვე ხალხი ამ საფრთხეებს არ აცნობიერებს და ქვეყანას უფსკრულისკენ მიაქანებენ. სანამ სადმე არ ჩავჩეხილვართ, ბიძინა ივანიშვილი უნდა დაბრუნდეს პოლიტიკაში. მას საკმარისად მაღალი ავტორიტეტი და ჭკუა აქვს იმისთვის, რომ ქვეყანას ეს საფრთხეები ააცილოს.
„ვერსია, 10 ოქტომბერი, 2015 წელი
ინტერვიუ თემურ შაშიაშვილთან: „ნინო ბურჯანაძემ დიდი შეცდომები დაუშვა და თავის გადაწყვეტილებებზეც თავად აგოს პასუხი“
წავიდა თუ არა პოლიტიკიდან და რატომ ემიჯნება ქართველ პოლიტიკოსებს „თეთრების“ ლიდერი
ნინო კომახიძე
ნაციონალების დროს ყველაზე აქტიური ოპოზიციური გაერთიანება სახალხო კრება იყო, კრების ერთ-ერთი ყველაზე აქტიური სახე კი ,,თეთრების” ლიდერი თემურ შაშიაშვილი. ნინო ბურჯანაძესთან ერთად, შაშიაშვილი კარგა ხანს იბრძოდა, 2012 წლის არჩევნებშიც მისი მეგობრების სიაში ეწერებოდა და არა კონკურენტების, თუმცა მათი გზები მაინც გაიყო. ნინო ბურჯანაძემ ჯერ „ქრისტიან-დემოკრატების“ დიდი ნაწილი შეიერთა, შემდეგ რამდენიმე პარტიასთან, მათ შორის, ნაციონალებთან ერთად, შუალედურ არჩევნებს ბოიკოტი გამოუცხადა. თუმცა შაშიაშვილის ძალა არც ამ 12-პარტიულ სიაშია და არც შუალედურ არჩევნებში მონაწილეობს. ისიც ცხადია, რომ მას არც არჩევნების მაჟორიტარული წესის გაუქმება სურს, რადგან, ალბათ, ფსონს, 2016 წლისთვის ქუთაისის მაჟორიტარობაზე დებს. თუმცა მისი ძველი აქტიურობიდან დღეს მხოლოდ მოგონებები დარჩა.
სად არის და რას აპირებს თემურ შაშიაშვილი - ,,ვერსიას” თეთრების ლიდერი ესაუბრება.
- ბატონო თემურ, შუალედური არჩევნებია კარსმომდგარი, თქვენ კი პოზიციურად, არსად ჩანხართ - არც 12-პარტიულ ოპოზიციურ გაერთიანებაში და არც წინასაარჩევნო ხაზზე, რატომ?
- პირველ რიგში, საქართველოს მოსახლეობას ყველამ ბოდიში უნდა მოვუხადოთ იმის გამო, რა მდგომარეობაშიც ქვეყანა აღმოჩნდა. ყველაფერი პოლიტიკოსების გამო მოხდა. სამწუხაროა, რომ ბევრი განათლებული და კარგი კაცი იმით ტრაბახობს, პოლიტიკასთან არანაირი შეხება არ მაქვს და არც არჩევნებზე მივდივარო. ამდენი სიბინძურე, რაც დღეს ქართულ პოლიტიკაშია, არც ერთ სხვა სფეროში არ არის: ერთნი ,,ესენგე”- ში შესვლას ითხოვდნენ, თუ არ შევალთ, დავიღუპებითო და მერე ამბობდნენ, ,,ესენგე”- მ დაღუპა ქვეყანაო. ამბობდნენ, რკინიგზა უნდა გადავკეტოთო და რუსეთის წინააღმდეგ აქციებს აწყობდნენ, მერე ისევ რუსეთში გარბოდნენ და ბოდიშებს იხდიდნენ. ხოლო ის ხალხი, ვისაც შეცდომა არ მოსვლია, ამ ქვეყანაში პოლიტიკოსებად საერთოდ არ ითვლება. ამ დროს, მოდის ივანიშვილი და ამბობს, პოლიტიკოსი არ ვარო – შეიძლება, ყველაფერს მართავდე და პოლიტიკოსი არ იყო? სასაცილოა ეს ყველაფერი! თან მთელი პოლიტიკა ბიზნესად იქცა და ისიც მაოცებს, რამდენს უძლებს ეს ბიზნესი. ვიღაცას არჩევნებში მონაწილეობა აწყობს და ეს ბიზნესია, ვიღაცას არმონაწილეობა უფრო აწყობს და ესეც ბიზნესია. ახლა მითხარით, აი, ამ ვითარებაზე რა პოზიცია უნდა მქონდეს?! დღევანდელ და ყოფილ ხელისუფლებასაც მხოლოდ მორჩილები სჭირდებოდათ: ფეხქვეშ გაეგები, თანამდებობაზე ხარ, შენი პოზიცია გექნება – ნული ხდები. ვიდრე ქვეყანაში ასეთი ხელისუფლებაა, არც შუალედურ არჩევნებს აქვს აზრი და არც ძირითადს.
- ვინც შუალედურ არჩევნებში მონაწილეობს, მას მხოლოდ ბიზნესინტერესი აქვს, თუ ხელისუფლების საქმეს აკეთებს? დაახლოებით ასეთია თქვენი ერთ-ერთი განცხადების შინაარსი.
- ახლა, ასე გადაჭრით ვერ ვიტყვი, რომ ხელისუფლების საქმეს მიზანმიმართულად აკეთებენ, მაგრამ ეს მათდაუნებურად, ასე გამოდის. ისიც არ ვიცი, ვინ მონაწილეობს არჩევნებში, თუმცა ვისურვებდი, პარლამენტში პოლიტიკოსები შედიოდნენ. ხომ გახსოვთ, რა ამბები ატყდა, როცა პირველმა მე ვთქვი იმის შესახებ, არ შეიძლება ამდენი სპორტსმენი თუ ხელოვანი იყოს საკანონმდებლო ორგანოში- მეთქი. ისიც გემახსოვრებათ, მაშინ რა დღე მაყარეს, დღეს კი ამ განცხადებებს თავად იმეორებენ. სააკაშვილმა და ივანიშვილმა ქართულ პარლამენტარიზმს უდიდესი დარტყმა მიაყენეს.
- მაშინ რატომ არ ხართ იმ 12 პარტიასთან ერთად, ვინც შუალედურ არჩევნებს ბოიკოტს უცხადებს?!
- არჩევნებს ბოიკოტს არ ვუცხადებ, მაგრამ მასში არც ვმონაწილეობ და მაქვს ჩემი პოზიცია: არ მინდა იმ პოლიტიკურ პარტიებთან ყოფნა, რომლებიც ჩემს ხედვას არ იზიარებენ: ქვეყანას პოლიტიკოსთა ცხოვრების წიგნი, პოლიტიკოსად აღიარების წესი სჭირდება.
- ლუსტრაციის კანონზე საუბრობთ?
- რაც გინდათ, ის დაარქვით, მაგრამ გამოვიდნენ და უპასუხონ ხალხის კითხვებს: ვის რა პოზიცია ჰქონდა სამოქალაქო ომის დროს, ,,ესენგე”- ში შესვლის დროს და ა.შ.
- და ამ 12 პარტიაში თქვენი მთავარი მოკავშირე ნინო ბურჯანაძეცაა, თუ აღარც ხართ მოკავშირეები?
- ჩემთვის მნიშვნელობა არ აქვს, ვინ სადაა და სად არა. მეც რომ ვიყო ამ გაერთიანებაში, იგივეს ვიტყოდი. ნინო ბურჯანაძემ სხვადასხვა გაერთიანებით დიდი შეცდომა დაუშვა. ქალბატონ ბურჯანაძეს ღიად ვუთხარი, რომ სირცხვილად მიმაჩნია იმ 12-დან ბევრ პარტიასთან ერთად ბრძოლა, დგომა და საერთოდ აღარ დავჯდები მოლაპარაკების იმ მაგიდასთან, სადაც მხოლოდ სკამზე მაფიქრალი პოლიტიკოსები სხედან. ბურჯანაძემ თავის გადაწყვეტილებებზე თავად აგოს პასუხი!
- დამიზუსტეთ, გაიყარა თუ არა თქვენი და ბურჯანაძის გზები საბოლოოდ?
- არ მგონია, რომ პოლიტიკაში და მით უმეტეს, არჩევნებში სადმე კიდევ ერთად ვიქნებით. ჩვენ სახალხო კრებაში ვიყავით, რომელიც პარტიული გაერთიანება არ ყოფილა და სწორედ ეს შეეშალა ჩვენთან ნინო ბურჯანაძეს. ამიტომ სხვებთანაც აღარ დავჯდები სალაპარაკოდ, ამიერიდან, მხოლოდ პროფესიონალების გვერდით ვიქნები. შეიძლება, თემურ შაშიაშვილის ერთგული არ იყო, მაგრამ ქვეყანას უერთგულო. თუმცა ამის მიხედვით, პარტნიორებს არავინ არჩევს. ივანიშვილმაც პირადად მისი ერთგული ლაქიები მოიყვანა პოლიტიკაში და ჩვენც დაგვღუპა და საკუთარი თავიც. არ ვიცი, ვისი გზები სად გაიყარა, მაგრამ ვიცი, სად ვარ – „თეთრები“ იმ ხალხის გვერდით ვდგავართ, ვისაც მიაჩნია, რომ საქართველოში პოლიტიკოსად აღიარების რაღაც სისტემაა საჭირო.
ერთ მაგიდასთან შეკრებილ იმ 12 პარტიას პოლიტიკოსებად არ მივიჩნევ, რადგან არც მათ მივაჩნივარ პოლიტიკოსად. ისინი ,,თეთრებს” პარტიად არ თვლიან, მაგრამ თავად კლასიკური გაგებით პარტიები არიან?! შეიკრიბება 5-6 პარტია, იშოვიან საყრდენს, ვინც მხარს უჭერს ან აფინანსებს და მერე ვითომ ერთიანდებიან. ეს ხომ ნამდვილი იდეის გარშემო შეკრული გაერთიანება არ არის?! ყველაფერი დანარჩენი პარტიული გუნდების წიოკია და მერე ბიზნესმენების დაწიოკება. ესაა რეალობა. ერთსაც გეტყვით: საქართველოს პოლიტიკოსთა 90% ან რუსეთს ემსახურება, ან ამერიკას. ის, ვინც ყველაზე მეტად ეგება ფეხქვეშ ამერიკას, რეალურად, იმას ებრძვის, რაც მართლაც კარგია ამერიკაში – ეკონომიკური პოლიტიკის ლიბერალიზება არ სურთ, არც მაჟორიტარული არჩევნები უნდათ.
- მაჟორიტარული წესის გაუქმება რომ არ გინდათ, ეს ნათელია.
- ამერიკაში მაჟორიტარებითაა დაკომპლექტებული კონგრესიცა და სენატიც. სააკაშვილიც დიდი ანტიამერიკელი იყო და ივანიშვილიც, დაწყებული მის მიერ ფულების დარიგებით და გაგრძელებული მისი სხვა ნებისმიერი ქმედებით.
- ისე, სახალხო კრების ყოფილმა წევრმა ირაკლი ბათიაშვილმა რომ თქვა, ყოფილი ხელისუფლების გარკვეულ წრეს ბიძინა ივანიშვილის აფეთქება უნდაო, ეს განცხადება რას ნიშნავდა?
- რას ნიშნავს, ვერ გეტყვით, მაგრამ ვისურვებდი, ირაკლი ბათიაშვილი ამ განცხადებით არ გამოსულიყო, რადგან მის მიმართ კეთილგანწყობილი ვართ. არავის აინტერესებს ბიძინა ივანიშვილის აფეთქება. აი, ვისაც მისი აფეთქება უნდა აინტერესებდეს, იმას სწორედ ასეთი ბიძინა ივანიშვილი უფრო სჭირდება. იმ ძალებს, ვინც ბიძინას აფეთქებაზე საუბრობს, გაცილებით მეტად აწყობთ საქართველოში ჩამოყვანილი და აფეთქებული სააკაშვილის ხილვა.
- ეს რას ნიშნავს, ანუ თავად ყოფილ ხელისუფლებას აწყობს სააკაშვილის აფეთქება?
- საუბარია იმ ძალებზე, ვისზეც ბათიაშვილი აკეთებს აქცენტს. დიახ, მათ რეალურად, მიხეილ სააკაშვილის აფეთქება აწყობთ, ამიტომ სწორად იქცევა ეს ხელისუფლება, სააკაშვილს საქართველოში რომ არ უშვებს, რადგან ამ ძალების მიზანია, სააკაშვილი აქ ჩამოვიდეს, აფეთქდეს და გმირად იქცეს.
- შექმნილი ვითარებიდან გამოსავალი რა არის, ვადამდელი არჩევნები, როგორც ამას ნაციონალები ითხოვენ?
- არჩევნებამდე ერთი წელი რჩება, ასე რომ, ვადამდელი არჩევნების მოთხოვნა ახლა სისულელეა. ამ ვითარებიდან გამოსავალი ერთია: ნაციონალური მოძრაობა სახალხო სასამართლომ უნდა გაასამართლოს, ,,ოცნება” კი უნდა წავიდეს, რადგან ამ ძალის შიგნით იმის არავითარი პოტენციალი არ არის, რომ ვითარების შეცვლა შეუძლია.
- გულაცრუებული კი ხართ პოლიტიკაზე, მაგრამ თქვენ რას აპირებთ საპარლამენტო არჩევნებისთვის?
- რა თქმა უნდა, მონაწილეობას მივიღებთ, ოღონდ პროფესიონალებთან ერთად და ძლიერი პარტიით! ჩვენ ძალიან ძლიერი გუნდი გვეყოლება – საქართველო ჩვენგან ძლიერ და სერიოზულ გუნდს უნდა ელოდეს!
