„რეზონანსი“: „რეზონანსის” სარედაქციო განცხადება

„რეზონანსი“: „ქართული ოცნება“: ჩვენ ვემიჯნებით “რესპუბლიკელების” პოზიციას // “რუსთავი 2″-ის საქმე, როგორც მმართველი კოალიციის ერთიანობის გამოცდა

„ახალი თაობა“: ინტერვიუ ლევან ბერძენიშვილთან: „პრობლემა ის არის, რომ სასამართლოები მხარეებად იკვეთებიან… „რუსთავი 2“-ის მეპატრონის საკითხი კი ჩემთვის უმნიშვნელოა“

„ახალი თაობა“: ინტერვიუ ნიკოლოზ მჟავანაძესთან: „რესპუბლიკური პარტია“ „ქართულ ოცნებას“ ზურგზე მორიელივით აზის… აშშ-ის ელჩი აქ გადატრიალების მოსაწყობად ჩამოვიდა?“

„ახალი თაობა“: ინტერვიუ გუგული მაღრაძესთან: „ნაციონალი ლიდერის გვერდით სუფრასთან არ უნდა დავსხდეთ“

„ვერსია“: ინტერვიუ ლიტვის ელჩ გიედრიუს პუოჯუნასთან: „საქართველოს საგარეო კურსი ჩვენში ეჭვებს არ აჩენს“

—————————-

„რეზონანსი“, 07 ნოემბერი, 2015 წელი

„რეზონანსის” სარედაქციო განცხადება

„რუსთავი-2“-ში შექმნილი არაორდინარული სიტუაციიდან გამომდინარე, “რეზონანსი” სოლიდარობას უცხადებს ტელეკომპანიაში მომუშავე კოლეგებს.

მნიშვნელოვნად მიგვაჩნია, რომ მიუხედავად მფლობელობასა და მენეჯმენტთან დაკავშირებით მიმდინარე დავისა, არ მოხდეს მათი პროფესიული საქმიანობისათვის რაიმე სახით ხელის შეშლა და გამოინახოს გზები „რუსთავი-2“-ის მუშაობის ნორმალურ რეჟიმში დასაბრუნებლად.

ყველაფერი უნდა გაკეთდეს, რათა ქვეყანაში მინიმუმამდე იყოს დაყვანილი მედია გარემოს გაუარესებისა და სიტყვის თავისუფლების შეზღუდვის შესაძლებლობა.

ხელისუფლებამ ყველაფერი უნდა გააკეთოს, რათა გააქარწყლოს ეჭვები დასავლური ღირებულებებისადმი მისი ერთგულების გულწრფელობასთან დაკავშირებით, რამაც შეიძლება საფრთხე შეუქმნას საქართველოს ევროატლანტიკურ მისწრაფებებს.

„რეზონანსი“, 07 ნოემბერი, 2015 წელი

„ქართული ოცნება“: ჩვენ ვემიჯნებით “რესპუბლიკელების” პოზიციას

“რუსთავი 2″-ის საქმე, როგორც მმართველი კოალიციის ერთიანობის გამოცდა

სალომე სარიშვილი

“რესპუბლიკური პარტია” მოსამართლე თამაზ ურთმელიძის მიერ მიღებულ გადაწყვეტილებას “რუსთავი 2″-ის დროებითი მმართველების დანიშვნასთან დაკავშირებით კატეგორიულად ემიჯნება და აცხადებს, რომ ამგვარი გადაწყვეტილებით მან ხელისუფლებას “დათვური სამსახური” გაუწია. საპარლამენტო უმრავლესობის ერთი ნაწილი კი მიიჩნევს, რომ ურთმელიძის ეს გადაწყვეტილება აბსოლუტურად გამართლებული იყო და ისინი “რესპუბლიკელების” პოზიციას ემიჯნებიან. თუმცა აღნიშნავენ, რომ მიუხედავად მათი განსხვავებული მოსაზრებისა, ეს კოალიციაში უთანხმოებას არ გამოიწვევს. ასე ფიქრობენ, თავად “რესპუბლიკელებიც” და ამბობენ, რომ განსხვავებული მოსაზრება კოალიციაში პრობლემებს არ შექმნის.

შეგახსენებთ, რომ მმართველ გუნდში აზრთა სხვაობა მოსამართლე თამაზ ურთმელიძის მიერ 5 ნოემბერს, საღამოს 17 საათზე მიღებულმა განჩინებამ გამოიწვია, რომლის თანახმადაც სამაუწყებლო კომპანია “რუთავი 2″-ის დროებით მმართველებად დავით დვალი და რევაზ საყევარიშვილი დაინიშნენ. ამავე გადაწყვეტილების თანახმად, არხის გენერალურ დირექტორს, ნიკა გვარამიას და ასევე ფინანსურ დირექტორს, კახა დამენიას უფლებამოსილება შეუჩერდათ.”რესპუბლიკური პარტიის” ერთ-ერთი წევრის, დავით ბერძენიშვილის თქმით, პარტია აღნიშნულ გადაწყვეტილებებს კატეგორიულად ემიჯნება. მისი განცხადებით, ღამით მიღებული გადაწყვეტილებები ცუდ ასოციაციას იწვევს. ბერძენიშვილი ამბობს, რომ ამგვარი გადაწყვეტილებით, მან ხელისუფლებას “დათვური სამსახური” გაუწია.

“რესპუბლიკური პარტია” ამ პროცესებს კატეგორიულად ემიჯნება. ღამით მიღებული გადაწყვეტილებები ძალიან ცუდ ასოციაციებს იწვევს. მოვუწოდებ როგორც საკონსტიტუციო, ისე საქალაქო სასამართლოს, რომ პოლიტიზებაში არ ჩაერთონ. ეს უნდა იყოს სამართლის საკითხი და არ უნდა იყოს ყოფილ და დღევანდელ ხელისუფლებას შორის ინსტრუმენტად გადანაწილების საკითხი.

“დღესაც კი, როცა ხელისუფლების რეიტინგი არ არის ისეთი, როგორიც 2012 წელს იყო, ხელისუფლებას ასეთი ურთმელიძისეული დათვური სამსახური არ სჭირდება. როგორც ჩანს, ურთმელიძე, რომელიც თავის დროზე გვარამიამ დანიშნა, მაშინ გვარამიას კონტროლის ქვეშ იყო, ახლა ცდილობს დღევანდელი უფროსობის, კონტროლის ქვეშ იყოს. ჩვენ კონტროლირებადი მოსამართლეები არ გვჭირდება არც საკონსტიტუციო სასამართლოში და არც საერთო სასამართლოებში”, – განაცხადა ბერძენიშვილმა.

აღნიშნულ თემაზე აზრი პარტიის კიდევ ერთმა წარმომადგენელმა, დავით ზურაბიშვილმაც გამოხატა და აღნიშნა, რომ “რუსთავი 2″-ის გარშემო მიმდინარე პროცესებში მთავარი პრობლემა არა სიტყვის თავისუფლების ან სამართლიანობის აღდგენაა, არამედ ხელისუფლების სასამართლოსადმი დამოკიდებულებაა.

“ერთ-ერთი არსებითი ხასიათის მიღწევა, რაც “ნაცმოძრაობის” ხელისუფლებიდან წასვლას მოჰყვა, სასამართლოს ხელისუფლების წნეხისგან გათავისუფლება იყო. ჩვენ გაგვიჩნდა რეალური შანსი, რომ სასამართლო სისტემას ერთხელ და სამუდამოდ მოეშორებინა მთავრობის ნოტარიუსის სამარცხვინო ფუნქცია და ჩამოყალიბებულიყო ხელისუფლების ძლიერ, დამოუკიდებელ შტოდ, რაც აუცილებელია, თუ საერთოდ გვინდა ნორმალური, სამართლიანი და დემოკრატიული სახელმწიფო.

“ურთმელიძის ეს განჩინება კი არის ძალიან სერიოზული დარტყმა სასამართლოს დამოუკიდებლობაზე. პოლიტიკური მოტივები აქ იმდენად აშკარაა, რომ ამას თეთრი ძაფით ნაკერიც აღარ ჰქვია. შეიძლება ითქვას, რომ თუკი აქამდე მოსამართლეს არ ჰყავდა დედა, ახლა სასამართლოს აღარა ჰყავს.

“ღლიცინი და სიხარული “აბა, “ნაცები” რომ იმას აკეთებდით, კაი იყო?” სტილში ხომ საერთოდ გულისამრევია. არამც და არამც არ შეიძლება ასეთი პრეცედენტის დაშვება. “ქურდის ქურდი ცხონდა”-ს პრინციპით ცივილიზებული სახელმწიფო არ შენდება,” – ნათქვამია დავით ზურაბიშვილის მიერ გამოქვეყნებულ განცხადებაში, რომელიც მან საკუთარ “ფეისბუკ” გვერდზე გაავრცელა.

“რესპუბლიკელებისგან” განსხვავებით, სხვანაირად ფიქრობენ საპარლამენტო უმრავლესობის დანარჩენი წევრები. პარლამენტის დარგობრივი ეკონომიკისა და ეკონომიკური პოლიტიკის კომიტეტის თავმჯდომარის, ზურაბ ტყემალაძის განცხადებით, უმრავლესობის დანარჩენი ნაწილი “რესპუბლიკური პარტიის” წევრების პოზიციას ემიჯნება და სასამართლოს გადაწყვეტილებას გამართლებულად მიიჩნევს. მისივე თქმით, მოსამართლე ურთმელიძის გადაწყვეტილებაში ხელისუფლება არ ჩარეულა.

როგორც ზურაბ ტყემალაძემ “რეზონანსს” განუცხადა, მიუხედავად “რესპუბლიკელებისგან” განსხვავებული პოზიციისა, ეს კოალიციაში უთანხმოებას არ გამოიწვევს. “რა თქმა უნდა, ჩვენ ამ მოსაზრებას ვემიჯნებით, ვინაიდან ვფიქრობთ, რომ სასამართლომ იმოქმედა კანონის ფარგლებში. ცხადია, ამ შემთხვევაში გადაწყვეტილებას ჩვენ ვერ მივიღებთ, თუმცა, უნდა აღინიშნოს, რომ ხელისუფლების მხრიდან სასამართლოზე და უშუალოდ მოსამართლე ურთმელიძეზე არც ზეწოლა და არც რაიმე ტიპის ჩარევა არ მომხდარა. ახლა იურიდიული ნიუანსებია გასარკვევი, რასაც ბუნებრივია, ისევ სასამართლო განიხილავს. ჩვენ ვემორჩილებით სასამართლო გადაწყვეტილებას, დანარჩენს კი მოვლენათა განვითარება გვიჩვენებს. რაც შეეხება “რესპუბლიკელების” განსხვავებულ მოსაზრებას, კოალიცია და გუნდი არ ნიშნავს იმას, რომ ყველა ერთსა და იმავეს უნდა იმეორებდეს. ყველას აქვს აზრის გამოხატვის უფლება. ამიტომ ჩვენ პატივს ვცემთ ბატონი დავით ბერძენიშვილის პოზიციას, თუმცა გვაქვს განსხვავებული დამოკიდებულება“, – გვითხრა ზურაბ ტყემალაძემ.

საპარლამენტო უმრავლესობის წევრის, გია ვოლსკის აზრით, დავით ბერძენიშვილის განცხადება აღნიშნული თემის ირგვლივ ნაკლები ინფორმაციის ფლობით იყო გამოწვეული. ამბობს, რომ, მიუხედავად ამისა, უმრავლესობის სხვა წევრები მის პოზიციას პატივს სცემენ, თუმცა, აქვთ განსხვავებული მოსაზრება.

გია ვოლსკი მიიჩნევს, რომ მოსამართლე ურთმელიძის განჩინება აბსოლუტურად გასაგები და გამართლებული იყო. „ეს განცხადება დავით ბერძენიშვილმა დილის საათებში გააკეთა და ვფიქრობ, რომ მას საკმარისი და სრული ინფორმაცია აღნიშნული თემის ირგვლივ არ ჰქონდა. თუ ჰქონდა და მაინც ამ აზრზეა, კი, ბატონო, ეს მისი უფლება და პოზიციაა. კოალიციაში კი არა, განსხვავებული მოსაზრება ოჯახში აქვთ ხოლმე. ამიტომ არ მგონია, რომ ეს ის თემაა, რომელმაც შესაძლოა, კოალიციაში განხეთქილება გამოიწვიოს. ყოველ შემთხვევაში, ჩემი აზრი ამ საკითხთან დაკავშირებით ამგვარია. ვფიქრობ, საზოგადოებას სრული ინფორმაცია არ აქვს მომხდართან დაკავშირებით. საკონსტიტუციო სასამართლომ მიიღო აბსოლუტურად გასაგები გადაწყვეტილება იმის თაობაზე, რომ მომენტალურად გასხვისება არ უნდა მოხდეს. მიმაჩნია, რომ გადაწყვეტილება მართებული იყო, ვინაიდან ორივე მხარეს სასამართლო დავის გაგრძელების საშუალება აქვს. აქ ერთი მნიშვნელოვანი საკითხია, რომელიც ადმინისტრირებას ეხება – მოსამართლემ ჩათვალა, რომ ის ადმინისტრაცია, რომელიც ამჟამად “რუსთავი 2″-ში არსებობს, რეალურად სიტუაციას არ მართავს, იქ სიტუაციას მართავს ადამიანთა ჯგუფი, რომელიც სისხლისღვრის ორგანიზებაზეა ორიენტირებული. ამდენად, ეს გადაწყვეტილება მართებული იყო, დანარჩენი კი მხარეთა დავამ უნდა აჩვენოს,” – უთხრა “რეზონანსს” ვოლსკიმ.

“რესპუბლიკური პარტიის” ერთ-ერთი ლიდერის, ლევან ბერძენიშვილის შეფასებით, მიუხედავად მათი პარტიის ზოგიერთი წევრის განსხვავებული აზრისა, ეს კოალიციის შიგნით პრობლემების გამომწვევი არ იქნება. „სასამართლოს გადაწყვეტილებასთან დაკავშირებით იყო შეფასებები, რომელიც არსებულ ვითარებას ეხებოდა. არ მგონია, რომ ეს შეფასებები ერთგვაროვანი იყო, სხვა მოსაზრებებიც მოვისმინეთ. ყველას გვაქვს ჩვენი აზრი და ეს ყოველთვის ერთმანეთისას არ დაემთხვევა. არ მგონია, რომ ეს პრობლემაა. ასე, ამას წინათ ბატონმა გოგი თოფაძემაც გამოთქვა განსხვავებული მოსაზრება, ეს ჩვენს მოსაზრებას არ დაემთხვა. ასევე პარლამენტის თავმჯდომარემ გამოთქვა განსხვავებული მოსაზრება, მაგრამ ეს პრობლემას არ ნიშნავს. ავტომატი არავინ არ არის, განსხვავებული აზრი ყოველთვის იქნება,” – გვითხრა ლევან ბერძენიშვილმა.

„ახალი თაობა“, 07 ნოემბერი, 2015 წელი

ინტერვიუ ლევან ბერძენიშვილთან: „პრობლემა ის არის, რომ სასამართლოები მხარეებად იკვეთებიან… „რუსთავი 2“-ის მეპატრონის საკითხი კი ჩემთვის უმნიშვნელოა“

პარლამენტის ევროპასთან ინტეგრაციის კომიტეტის თავმჯდომარე, რესპუბლიკელი ლევან ბერძენიშვილი „ახალ თაობასთან“ ინტერვიუში აცხადებს, რომ საკონსტიტუციოც და საქალაქო სასამართლოც პოლიტიკურ სიმპათიებს ამჟღავნებენ, რაც მიუღებელია.

- მე არ ვარ იურისტი და ვერ ჩავიხედავ მათ გადაწყვეტილებებში, მაგრამ თვითონ მუშაობის სტილი, ნაჩქარევი, სწრაფი გადაწყვეტილებები საკონსტიტუციო სასამართლოში თუ საქალაქო სასამართლოში მიუთითებს, რომ აქ არის ინტერესები, რომლებიც გასცდა იმ საქმეს, რომელიც ჩვენს ქვეყანას სჭირდება. მიღებული გადაწყვეტილებები არცერთი არ არის საქართველოსთვის სასარგებლო.

- კონკრეტულად რას გულისხმობთ?

- იმას, რომ ჩვენი ევროპული ინტეგრაციისთვის არც მოსამართლის გადაწყვეტილება და არც მისი აღსრულება და არც მისი არაღსრულება ევროპაში არ მიგვიყვანს. ამიტომ ყველა მხარეს მოვუწოდებ, დარჩნენ კანონიერების სივრცეში. ძალიან ვწუხვარ, მაგრამ ასევე უნდა მივმართოთ მოსამართლეებსაც და შევახსენოთ, რომ ყველანი ჩვენ, მოსამართლეები, პარლამენტის წევრები თუ სხვები უნდა ვიყოთ კონსტიტუციის ქვეშ და ვმოქმედებდეთ კანონის ფარგლებში.

- ყველაზე დიდი კითხვის ნიშანი მოსამართლის მიერ ღამე მიღებულ გადაწყვეტილებას უკავშირდება. შეიძლება, პარალელი გაჩნდეს სააკაშვილის მმართველობის დროს ღამეულ გადაფორმებებთან?

- მოსამართლეს გადაწყვეტილება 24 საათის განმავლობაში უნდა მიეღო. ეს, შეიძლება, ღამეც მომხდარიყო და დილითაც. აქ არ არის პრობლემა ღამეში, დილითაც რომ მიეღო, იგივე პრობლემა გვექნებოდა. პრობლემა ის არის, რომ ეს გადაწყვეტილება, ჩემი აზრით, ობიექტურად არ არის მიღებული, ისევე, როგორც საკონსტიტუციო სასამართლოს გადაწყვეტილება, როგორც ჩანს, არ იყო ობიექტურად მიღებული. ეს სასამართლოები მხარეებად იკვეთებიან, რაც წარმოუდგენლად ცუდია ჩვენი ქვეყნისთვის.

- საკონსტიტუციო სასამართლოს თავმჯდომარის ნაციონალურ მოძრაობასთან კავშირზე ხშირად არის საუბარი.

- ჩვენ ვერც ერთი სასამართლოს გადაწყვეტილებას ვერაფერს ვუზამთ. ეს სავსებით გასაგებია, მაგრამ მოწოდება შეგვიძლია, რომ საკანონმდებლო სივრცეში დავრჩეთ, განსაკუთრებით იმ მოქალაქეებს მივმართავ, რომლებიც აცხადებენ, რომ კანონს არ აღასრულებენ და წინააღმდეგობას გაუწევენ.

- ირაკლი ალასანიამ პრემიერს, პრეზიდენტსა და პარლამენტის თავმჯდომარეს მოუწოდა, რომ ერთობლივი შეხვედრები დაიგეგმოს, რათა პროცესები წარიმართოს გონივრულ გარემოში და დემოკრატიული პროცესი ქვეყანაში არ შეფერხდეს. რას იტყვით?

- მე ყოველთვის მზად ვარ, ველაპარაკო ბატონ ალასანიას, მაგრამ მან განცხადება გააკეთა ხელმძღვანელი პირების მიმართ. პოლიტიკური ლიდერები ყოველთვის მზად უნდა იყვნენ სასაუბროდ. მე ვეთანხმები პათოსს, მაგრამ დანარჩენი ჩემზე არ არის დამოკიდებული.

- საგანგებო პრესკონფერენციიდან, რომელიც ქიბარ ხალვაშმა გამართა, გაირკვა, რომ „რუსთავი 2“-ის წილის 50%-ს ხალვაში დავით დვალსა და ჯარჯი აქიმიძეს უბრუნებს. ამაზე რა შეგიძლია თქვათ?

- ამ ხალხთან პრეტენზია არ მაქვს. ხალვაშთან, დვალთან და აქიმიძესთან კითხვები ნამდვილად არ მაქვს. ჩვენ კითხვები მოსამართლეებთან გვაქვს. მეპატრონის საკითხი ამ შემთხვევაში ჩემთვის უმნიშვნელოა. მე აბსოლუტურად ვარ დარწმუნებული, რომ მათ მიმართ კანონი ნამდვილად იყო დარღვეული და ეს ადამიანები თავიანთი უფლებებისთვის იბრძოლებენ. ეს დემოკრატიის ერთ-ერთი ნაწილია. ამიტომ, მათ რა განცხადება გააკეთეს და რას აპირებენ, ეს ჩემი პრობლემა ნამდვილად არ არის. საქმე სხვაგან არის.

- პრობლემას სად ხედავთ?

- ჩვენ კითხვები გაგვიჩნდა მას შემდეგ, რაც ღამე თუ დღისით, რა მნიშვნელობა აქვს, მოსმენის გარეშე, მალული გადაწყვეტილება იქნა მიღებული. კითხვები გვიჩნდება _ საკონსტიტუციო სასამართლო თუ საქალაქო სასამართლო რევოლუციური გზებით ხომ არ მოქმედებენ. ჩვენ სასამართლოსგან სხვანაირ მოქმედებას ვართ მიჩვეული, აქ პინგ-პონგი წავიდა. ეს, შეიძლება, არ დამთავრდეს, კიდევ გაგრძელდეს.

„ახალი თაობა“, 07 ნოემბერი, 2015 წელი

ინტერვიუ ნიკოლოზ მჟავანაძესთან: „რესპუბლიკური პარტია“ „ქართულ ოცნებას“ ზურგზე მორიელივით აზის… აშშ-ის ელჩი აქ გადატრიალების მოსაწყობად ჩამოვიდა?“

შორენა მარსაგიშვილი

რა თამაშს თამაშობენ რესპუბლიკელები, რა კარგი საქმე გაკეთდა რუსთავი 2-ის გარშემო ატეხილი აჟიოტაჟით, სად მიექანება ირაკლი ალასანია, ვინ ახორციელებს მოსამართლეებზე ზეწოლას? – ამის შესახებ „ახალ თაობას“ უფლებადამცველთა გაერთიანების თავმჯდომარე ნიკოლოზ მჟავანაძე ესაუბრება.

ნიკოლოზ მჟავანაძე:

- როგორც მოსალოდნელი იყო, რუსთავი 2-თან დაკავშირებით ორაზროვანი განცხადებები გააკეთეს დავით უსუფაშვილმა და ძმებმა ბერძენიშვილებმა, თინა ხიდაშელმა კი თქვა, კომენტარს არ გავაკეთებო. რესპუბლიკური პარტიის პოზიცია ჩემთვის სრულიად გასაგებია. მათ იმედი აქვთ, რომ ამერიკის სახელმწიფო დეპარტამენტი ხელისუფლების მისამართით მკაცრ განცხადებებს გააკეთებს, რის შემდეგაც ესენი გამოვლენ და იტყვიან, რომ ემიჯნებიან კოალიცია „ქართულ ოცნებას“.

კანონი რომ დარღვეულიყო, კიდევ გავიგებდი მათი განცხადებების პათოსს, მაგრამ ამ შემთხვევაში მოსამართლე ურთმელიძეს კანონი არ დაურღვევია. მოსამართლეს რომელ საათზეც უნდა, მაშინ მიიღებს გადაწყვეტილებას და ეს რესპუბლიკელების საქმე არ არის. თუ რაიმე უკანონობა მოხდა, გაასაჩივრონ, რად უნდა ამას წივილ-კივილი, თანაც განაჩენი შუაღამეზე სულაც არ ყოფილა გამოტანილი და ურთმელიძემ გადაწყვეტილება 5 ნოემბერს, 17 საათზე მიიღო. ამასთან დაკავშირებით განმარტებები თეა წულუკიანმაც გააკეთა. რესპუბლიკელები თუ ასეთი კანონმორჩილები არიან, გვარამიას განცხადებები შეაფასონ.

- რომელი განცხადებები? ნიკა გვარამიამ ბევრი განცხადება გააკეთა.

- ნიკა გვარამია ამბობს, მე „რუსთავი 2“-დან გარეთ არ გავალ და, ხელისუფლებას თუ უნდა, ძალა გამოიყენოსო. აი, ეს უნდა შეაფასონ რესპუბლიკელებმა. ამის მაგივრად ისინი ორაზროვან განცხადებებს აკეთებენ და ალასანია-ნაციონალებთან მისასვლელ გზას იტოვებენ. რესპუბლიკელების განცხადებები უკვე აღარავის უკვირს, მაგრამ დავით ზურაბიშვილი ყოველგვარ ზღვარს გადავიდა. მის ფსიქიკაში უკვე ეჭვი მეპარება. გამოდის და ყოველდღე ერთ ადგილს აგინებს ივანიშვილსა და ღარიბაშვილს. თუ ასე არ მოგწონს ეს გუნდი, ადექი და დატოვე სახელისუფლებო ძალა. იგივე მინდა ვუთხრა ძმებ ბერძენიშვილებს, რომ გამოხტებიან და საშინელებებს ლაპარაკობენ. რატომ არიან ასეთი ბოღმიანები და ღვარძლიანები, ვერ გავიგე. თუ არ მოსწონთ ეს მთავრობა, გაემიჯნონ. იმდენს იზამენ, ერთ დღესაც გამოვა ირაკლი ღარიბაშვილი და ეტყვის, წადით კოალიციიდანო, თუ მანამდე თავად არ წავიდნენ.

- ახლა რატომ არ მიდიან?

- იმიტომ, რომ 3%-იანები არიან. მართლა ხომ არ გგონიათ, რომ საგარეჯო რესპუბლიკელებმა მოიგეს? მაგათ აქვთ ჩანაფიქრი, რომ სახელმწიფო რესურსით როგორმე გაძლიერდნენ და სამომავლო გეგმებს აწყობენ. რესპუბლიკური პარტია `ქართული ოცნების~ ზურგზე არის მორიელი და, რაც მალე გათავისუფლდებიან ამ მორიელისგან, უკეთესი იქნება როგორც მათთვის, ასევე ქვეყნისთვის. თუ გინდათ, წინასწარ გაიგოთ, რას ფიქრობენ ამა თუ იმ საკითხზე რესპები, მოუსმინეთ ნაციონალების განცხადებებს. რესპუბლიკელები იმავეს გაიმეორებენ, ოღონდ _ განსხვავებული სიტყვებით.

- გასაგებია, რომ რესპუბლიკელები კოალიციაში არიან, მაგრამ მათ ხომ აქვთ უფლება, განსხვავებული პოზიცია დააფიქსირონ?

- უფლება როგორ არა აქვთ, მაგრამ, როგორ შეიძლება, დღედაღამ ხელისუფლებას აგინებდე და თან სახელისუფლებო გუნდში რჩებოდე. ასე იქცეოდა ირაკლი ალასანიაც, ხელისუფლებაში როცა იყო. სულ ვამხელდი მის მოღალატეობას და ბევრს არ სჯეროდა. ახლა ხომ ყველამ დაიჯერა, ვინც არის ეს ალასანია! ეგეთები არიან ეს რესპუბლიკელებიც. ორივენი პოლიტიკურ საფლავში ჩაჰყვებიან ნაციონალებს. რესპუბლიკელივით უსირცხვილო უნდა იყო, 5 ნოემბერს გამოტანილი განაჩენი 2007 წლის ტელეიმედის დარბევას რომ შეადარო. თუ ასეთი სამართლიანები არიან, იმაზე რატომ არ ამოიღეს ხმა, იუსტიციის უმაღლესი საბჭოს მდივანმა ლევან მურუსიძემ მოსამართლეებზე ზეწოლა რომ განახორციელა!

- როდის და სად განახორციელა ზეწოლა?

- მიმდინარე წლის 4 ნოემბერს ლევან მურუსიძემ განაცხადა, რომ დაუშვებელ მტკიცებულებად უნდა იქნეს ცნობილი ის ჩანაწერები, რომლებიც უკრაინულმა მედიამ გამოაქვეყნა. საუბარია იმ ჩანაწერებზე, რომლებზეც 315-ე მუხლით აღიძრა საქმე. მურუსიძის თქმით, აღნიშნულ საქმეზე ამ ფირების მტკიცებულებად ცნობა არ შეიძლება, რადგან ისინი უკანონოდ არის მოპოვებული. ლევან მურუსიძის ეს განცხადება გახლავთ სამსახურებრივი უფლებამოსილების ბოროტად გამოყენება, რაც სისხლის სამართლის კოდექსის 332-ე მუხლია. იუსტიციის უმაღლესი საბჭოს მდივანი მოსამართლეებზე ზეწოლას ახორციელებს და მათ აქცევს ჩარჩოებში. ვინ ეკითხება მურუსიძეს, რა გადაწყვეტილებას მიიღებს სასამართლო! ან მან რა იცის, ეს ფირები უკანონოდ არის თუ არა მოპოვებული! მან, როგორც იურისტმა, წესით, უნდა იცოდეს, რომ გამოძიებით უნდა დადგინდეს, რა ფორმით მოხდა ამ ჩანაწერების გაკეთება. ამაზე უნდა ჩატარდეს ექსპერტიზა, ხომ არ არის დამახინჯებული მონტაჟი, რის შემდეგაც ფირის ავთენტურობა დადგინდება.

ჩვენ უკვე გვაქვს ერთი მაგალითი, როცა ჰაკიმ ფაშას სახელით ატვირთული ვიდეოები მტკიცებულებად დაედო საქმეს და მოსამართლემ მოულოდნელად ნივთიერ მტკიცებულად არ ცნო. ეს გადაწყვეტილება ნაციონალებთან დაახლოებულმა მოსამართლე მგელიაშვილმა მიიღო. ყოფილი ხელისუფლება ახლა გაჰყვირის, ურთმელიძე არის ხელისუფლების გავლენის ქვეშო. გავლენის ქვეშ არის მთელი სასამართლო ხელისუფლება, ოღონდ ნაციონალების გავლენის ქვეშ და ერთ-ერთი მათგანი არის ურთმელიძე. რესპუბლიკელებს არც ეს გაუპროტესტებიათ.

- ურთმელიძე რანაირად არის ნაციონალების გავლენის ქვეშ?

- მურუსიძე, აბა, ვინ არის? გამოდის და მოსამართლეებს მოუწოდებს, ესა თუ ის გადაწყვეტილება მიიღონ. სააკაშვილის გუნდი იმდენად შეშინებულია, რომ ყოველგვარ ზღვარს გადასცილდა და ამ საქმეში სასამართლო ხელისუფლების ისეთი მნიშვნელოვანი ფიგურაც კი ჩართო, როგორიც მურუსიძეა. მაინტერესებს, რესპუბლიკელები რატომ არ გამოვიდნენ და არ იკითხეს, საიდან ასკვნის მურუსიძე, რომ ეს ჩანაწერები უკანონოდ არის მოპოვებული. რატომ არავინ ითვალისწინებს იმას, რომ მიხეილ სააკაშვილზე აღძრულია სისხლის სამართლის საქმე და მასზე ძებნაა გამოცხადებული. აქედან გამომდინარე, სრულიად ნორმალურია, მისი სატელეფონო საუბრების მოსმენა ხორციელდებოდეს.

- თქვენ უშვებთ იმას, რომ ყოფილ პრეზიდენტს საქართველოს ხელისუფლება უსმენს?

- თუ გავითვალისწინებთ იმას, რომ მასზე ძებნაა გამოცხადებული, წესით, უნდა უსმენდნენ. ეს ფირები ისეთი მაღალი ხარისხით არის ჩაწერილი, რომ მგონია, ისინი უკრაინის სპეცსამსახურების მიერ არის გაკეთებული. ამ ადამიანმა ლამის ნახევარ უკრაინას გამოუცხადა ომი. რატომ გგონიათ, რომ კიევში მის წინააღმდეგ საქმე არ არის აღძრული და არ უსმენენ? მასთან დაკავშირებით უკრაინის პრემიერმა არსენ იაცენიუკმა პირდაპირ თქვა, თუ ასეთი აღმშენებელი იყო სააკაშვილი, სამშობლოში რატომ ვერ ბრუნდებაო. ეს ყველაფერი არის ვარაუდები და გამოძიებით უნდა დადგინდეს, რანაირად მოხდა ამ ჩანაწერების მოპოვება. ამაზე იდავონ რესპუბლიკელებმა და უაზრო წივილ-კივილს თავი დაანებონ.

ნიკოლოზ მჟავანაძემ არ იცის, როგორ განვითარდება მოვლენები რუსთავი 2-თან დაკავშირებით, მაგრამ ერთი კარგი რამ გაკეთდა – მოხდა ყველას ლუსტრირება და ხალხმა დაინახა, ვინ ვინ არის. „ხელისუფლებას ვურჩევ, რაც შეიძლება მალე გათავისუფლდნენ მოღალატე რესპუბლიკელებისგან, რომლებიც მათ, როგორც უკვე აღვნიშნე, მორიელებივით ასხედან. ამის გარდა, ხელისუფლებამ დიპლომატებთანაც უნდა გამართოს შეხვედრა და მათგან განმარტებები მოისმინოს. განსაკუთრებულად ამერიკის ელჩს უნდა დაელაპარაკონ.  მისი განცხადებები ერთი ერთში ემთხვევა ნაციონალების განცხადებებს. მაინტერესებს, ეგ იან კელი აქ იმიტომ ჩამოვიდა, რომ გადატრიალება მოაწყოს?!“ – აცხადებს ნიკოლოზ მჟავანაძე.

„ახალი თაობა“, 07 ნოემბერი, 2015 წელი

ინტერვიუ გუგული მაღრაძესთან: „ნაციონალი ლიდერის გვერდით სუფრასთან არ უნდა დავსხდეთ“

ტელეკომპანია „რუსთავი-2“-ში დროებითი მმართველების დანიშვნამ გააჩინა ახალი საფუძველი ხელისუფლების საკრიტიკებლად. გაკეთდა განცხადებები იმაზე, რომ ხელისუფლება ამყარებს დიქტატურასა და კონტროლს მედიაზე. პარლამენტის უმრავლესობის წევრი გუგული მაღრაძე ასეთ აჟიოტაჟს უსამართლოს უწოდებს.

- პროცესი არ გასცილებია სამართლებრივ ჩარჩოებს. მოსამართლის გადაწყვეტილებით, ტელევიზიაში შეიცვალა ანუ დროებით დაინიშნა ორი ადამიანი _ გენერალური და ფინანსური დირექტორები. მოსამართლეს ამის სრული უფლება ჰქონდა, ვინაიდან სასამართლომ ქიბარ ხალვაშს ტელეკომპანიაში თავისი წილი დაუბრუნა. განცხადებები იმის თაობაზე, თითქოს ხელისუფლება ტელევიზიაზე კონტროლს ამყარებს, ჰიპოთეზაა და რეალობას არ შეესაბამება, – განუცხადა „ახალ თაობას“ გუგული მაღრაძემ.

- „ქართულ ოცნებას“ ბოლო დროს ხშირად ადანაშაულებენ თავისუფალი სიტყვის შეზღუდვაში...

- „ქართული ოცნება“ რომ თავისუფალ სიტყვას ახშობდეს, არ იქნებოდა ამდენი ტელევიზია, ჟურნალ-გაზეთი და სხვა მედიასაშუალება. ისინი თავისუფლად მუშაობენ, ძალიან ხშირად აკრიტიკებენ ხელისუფლებას. მედიაში არც ისე იშვიათია პიროვნებების შეურაცხყოფა, ცილისწამება, მუქარა. ჩვენ ამას მშვიდად, საყვედურების გარეშე ვხვდებით. ბიძინა ივანიშვილი იყო მეცხრე არხის დამფუძნებელი. მან ეს არხი დახურა.

- ხელისუფლების მიმართ მუქარაში რა იგულისხმეთ?

- ჩვენ გვემუქრებიან, თუ ვინმე ქონებას დაიბრუნებს, ხელისუფლება ცუდ დღეში ჩავარდებაო. ამ დროს ინდივიდს შეაქვს სარჩელი ქონებისა თუ წილების დაბრუნების მიზნით. საქმეს განიხილავს სასამართლო. ხელისუფლება პროცესში არ ერევა. ამის მიუხედავად, გაისმის მუქარა, საპასუხოდ იგეგმება არეულობა.

- შესაძლო არეულობაზე ფარულ ჩანაწერებში საუბრობდნენ.

- საქმე გამოძიებაშია. გარკვეული დასკვნების გამოტანა მოსმენილიდან ჩვენც შეგვიძლია. უნდა მივიღოთ მხედველობაში, რომ ლაპარაკობენ არა შეურაცხადი პირები, არამედ ნორმალური ადამიანები. მათგან ზოგი დეპუტატი ან თანამდებობის პირია, ზოგი _ უცხოეთში მცხოვრები ყოფილი მაღალჩინოსანი. ამ მაღალჩინოსნებმა საქართველოდან იმდენი ფული წაიღეს, რომ საზღვარგარეთ ოჯახებით ცხოვრობენ. ისინი სერიოზულ განცხადებებს აკეთებენ. საუბარია მობილიზაციაზე, იარაღსა და ბარიკადებზე. მათი გათვლებით, უცხოეთში გატანილი ფული უნდა მოხმარდეს არეულობას. ეს ხალხი ისევ ფლობს ფინანსურ რესურსს საქართველოში. ეს იმიტომ მოხდა, რომ „ქართული ოცნება“ არ მოიქცა ნაციონალური მოძრაობის მსგავსად. ნაციონალებმა ბიზნესმენები ან ციხეში გაუშვეს, ან ქონება დაათმობინეს. ჩვენ ეს არ გაგვიკეთებია. ახლა ეს პირები გეგმავდნენ არეულობას. საშინელი მოსასმენი იყო, როცა ახსენეს მოსალოდნელი მსხვერპლი – დედა და ბავშვები. ამ საუბრის გამოქვეყნებამდე იყო მოწოდება, რომ „რუსთავი 2“-ის დასაცავად შვილებთან ერთად მისულიყვნენ.

- სამართლიანობის აღდგენა მაინც ხომ აუცილებელია?

- სამართალი უნდა აღდგეს სასამართლოს გზით. ხელისუფლება ამაში არ უნდა ჩაერიოს. ინდივიდებმა უნდა მიმართონ სასამართლოს. მასობრივი დანაშაულიც ხდებოდა. შემსრულებლები არ დასჯილან, მაგრამ ორგანიზატორები და ბრძანების გამცემები პასუხისგებაში მიეცნენ. ყველაფერი უნდა მოექცეს სასამართლოს ჩარჩოებში. მთავარია, სასამართლო იყოს დამოუკიდებელი. ჩვენს მოსამართლეებს კვალიფიკაცია არ აკლიათ. დაზარალებულმა მოქალაქეებმა მაგალითი ხალვაშისგან უნდა აიღონ.

- ზოგიერთი თქვენი კოლეგა უმრავლესობიდან ნაცმოძრაობის გასამართლებასა და საქმიანობის შეფასებას მოითხოვს.

- ასეთი მოთხოვნა კოლეგებშიც არსებობს და საზოგადოების დიდ ნაწილშიც. ეს გასაკვირი არ არის. დავიწყოთ სამართლებრივი შეფასებით. ეს რომ მოხდეს, უამრავი ფაქტია აუცილებელი, რომელიც დაამტკიცებს, რომ წინა ხელისუფლება ახორციელებდა ანტიჰუმანურ სისტემურ დანაშაულს. ასეთი ფაქტების გარკვეული რაოდენობა არსებობს. ამ რეჟიმის პოლიტიკური შეფასება ასეთი მარტივი არ არის იმ დროს, როცა ნაცმოძრაობას ჰყავს მხარდამჭერები და ლობისტები ბევრ სტრუქტურაში. ჩემი აზრით, ნაცმოძრაობას განაჩენი თავად საზოგადოებამ უნდა გამოუტანოს.

- საზოგადოებამ რა უნდა გააკეთოს?

- არავითარ შემთხვევაში არ ვგულისხმობ ძალადობას, ცემა-ტყეპასა და მივარდნებს. საზოგადოებას შეურიგებელი დამოკიდებულება უნდა ჰქონდეს ნაციონალური მოძრაობის მიმართ. მაგალითად, ეს შეიძლება იყოს წვეულების დატოვება, როცა იქ ნაცმოძრაობის რომელიმე ლიდერია. ასევე ხალხმა უნდა გაიგოს, რომ როცა რუსთავი 2-ის შენობასთან ეძახიან, ეს არ არის თავისუფალი მედიის მხარდაჭერა. ეს არის ნაციონალების მიერ აგორებულ ტალღაში მონაწილეობა. ნაციონალური მოძრაობის გასამართლებაზე, ალბათ, კიდევ მოვისმენთ განცხადებებს. დარწმუნებული ვარ, ჩვენ მთავარი აქცენტი უნდა გავაკეთოთ არა ამ დისკრედიტირებულ პარტიაზე, არამედ იმაზე, თუ რას ვაკეთებთ და კიდევ რის გაკეთებას ვაპირებთ ქვეყნისათვის. ნაცმოძრაობა კი ვერც არეულობას მოაწყობს და დაიშლება კიდეც. იქ სერიოზული დინებებია დაწყებული.

„ვერსია“, 6 ნოემბერი, 2015 წელი

ინტერვიუ ლიტვის ელჩ გიედრიუს პუოჯუნასთან: „საქართველოს საგარეო კურსი ჩვენში ეჭვებს არ აჩენს“

მაკა ლომაძე

საქართველოს პრემიერ-მინისტრი ირაკლი ღარიბაშვილი, ოფიციალური ვიზიტით ლიტვას ესტუმრა და ლიტველ კოლეგას, ასევე ქვეყნის პრეზიდენტს შეხვდა. „ვიმედოვნებ, საქართველოს მოქალაქეებს მალე ექნებათ ევროპაში თავისუფალი გადაადგილების საშუალება“, - ამ განცხადების ავტორი, ლიტვის პრემიერ-მინისტრი ალგირდას ბუტკევი-ჩიუსია, რომელმაც საქართველოს ევროპული და ევროატლანტიკური მისწრაფებების, ასევე ტერიტორიული მთლიანობისა და სუვერენიტეტის მხარდაჭერა კიდევ ერთხელ დაადასტურა. ამ პათოსს უერთდება ლიტვის რესპუბლიკის საგანგებო და სრულუფლებიანი ელჩი საქართველოში, გიედრიუს პუოჯუნასი, რომელიც ამ თანამდებობაზე, არც ისე დიდი ხანია დაინიშნა.

- ბატონო გიედრიუს, საქართველოში ლიტვის ელჩის მოვალეობას არც ისე დიდი ხანია ასრულებთ. ჩვენმა ქვეყანამ და ხალხმა როგორი შთაბეჭდილება მოახდინა?

- საქართველოში პირველად არ ვარ, 10-12 წლის წინაც ვიყავი ჩამოსული. დღეს სრულიად სხვა ვითარებაა: დინამიური, ამბიციური, ევროპული ქვეყანა დამხვდა, რომელმაც პროგრესს მოკლე დროში მიაღწია. საქართველო, უძველესი ისტორიის, მდიდარი, საინტერესო კულტურისა და თანამედროვე პოლიტიკური, ეკონომიკური და კულტურული დინამიური ცხოვრების შესანიშნავ კომბინაციას წარმოადგენს. გულწრფელად მიხარია, რომ ელჩი ვარ თქვენს ქვეყანაში. მოუთმენლად ველი, ვითანამშრომლო კოლეგებთან, მეგობრებთან – შეიძლება ასეც ითქვას, რადგან ჩვენ ქვეყნებს შორის საუკეთესო ურთიერთობებია.

- როგორი მემკვიდრეობა გერგოთ წინამორბედისგან და რა გეგმები გაქვთ ორმხრივი ურთიერთობის გასაღრმავებლად?

- ჩემი წინამორბედი, იონას პასლაუსკასი, საქართველოში 5 წელი მუშაობდა და ისეთი შეგრძნება მაქვს, თითქოს მისი გულის ნაწილი აქ დარჩა. ინტენსიური კავშირები ჩამოყალიბდა მისი ელჩობის პერიოდში. უკეთეს დიპლომატიურ მემკვიდრეობაზე ვერც ვიოცნებებდი. ვაპირებ, იგივე სულისკვეთებით განვაგრძო მუშაობა. როცა ვინმე ლიტვაში იტყვის რომ ქართველია, ან პირიქით, აქ იტყვი, რომ ლიტველი ხარ, საოცარი კეთილგანწყობით ხვდებიან.… ეს ჩვენს შორის, ყველა დონეზე საოცრად ღია ურთიერთობებზე მიუთითებს. მხოლოდ 2015 წელზე რომ ვისაუბროთ, ლიტვის პრემიერმინისტრი იყო ჩამობრძანებული. ორი დღის წინ კი, ირაკლი ღარიბაშვილი იმყოფებოდა ლიტვაში. ოფიციალური ვიზიტით საქართველოს სტუმრობდნენ ლიტვის საგარეო საქმეთა და ჯანდაცვის მინისტრები, პარლამენტის თავმჯდომარის პირველი მოადგილე… საქართველოს იუსტიციის და თავდაცვის მინისტრებიც იყვნენ ვილნიუსში. ჩემი სამთვიანი მუშაობის ფონზე, საკმაოდ ინტენსიური მაჩვენებელია ორმხრივ ურთიერთობებში. მგონია, ქვეყნებს შორის მანძილი, მჭიდრო ურთიერთობების გამო, „შემცირდა“.

- ევროკავშირის წევრი ქვეყნისგან, მნიშვნელოვანია გამოცდილების გაზიარება. ამ მხრივ რა ვითარებაა?

- შარშან, ევროკავშირის წევრობის 10 წელი აღვნიშნეთ. გამოცდილი, ჭკვიანი ადამიანები გვყავს, რომლებსაც შეუძლიათ ბევრი რამ ასწავლონ საქართველოს. მზად ვართ, დახმარების ხელი გავუწოდოთ ქართველებს. ჯადოქარი არ ვარ, გამოვიცნო, როდის იქნება შემდგომი გაფართოება, ამიტომ პრაგმატულ მიდგომას მივყვები. ჩემი რეცეპტია, თავდაუზოგავად იმუშაოთ, მაქსიმალურ მზადყოფნაში იყოთ და შესაბამის მომენტს დაელოდოთ, რომელიც აუცილებლად დადგება. ასე მოხდა ჩვენს შემთხვევაშიც. ეს არ არის არც იოლი და არც მოკლე გზა, მაგრამ მწამს, თუ მართლა გსურთ ამ დიდი ოჯახის წევრი გახდეთ, ეს აუცილებლად მოხდება. ნატოცა და ევროკავშირიც, ბრწყინვალე ინსტრუმენტს აძლევს წევრ სახელმწიფოებს თანამშრომლობისთვის, რომელიც რეალობის შეცვლის შანსია, მაგრამ… ნატო- სა და ევროკავშირისთვის კი არ უნდა გაატაროთ რეფორმები და განვითარდეთ, არამედ, საქართველოსთვის, თქვენთვის, თქვენი მომავლისთვის.

- ეს ნიშნავს, რომ ევროკავშირი და ნატო ,,ბოლო გაჩერება” კი არა, უბრალოდ, გზაა?

- რა თქმა უნდა. ელჩებისა და კომპეტენტური პირების დახმარებით, საქართველოს მთავრობას შეუძლია, ეს მექანიზმები და „ნოუ-ჰაუ“ უფასოდ მიიღოს. არავინ იცის, როდის მოვა ეს დღე. არც ჩვენ ვიცოდით. სწორი არ იქნება, სხვა ქვეყნებს შეგადაროთ, რადგან ინდივიდუალურია ყველა შემთხვევა.

- დღეს, საქართველოს საგარეო კურსთან დაკავშირებით, მოსახლეობის გარკვეულ ნაწილს, კითხვები უჩნდება. ამან შეიძლება გავლენა მოახდინოს ევროკავშირისა და ნატოსკენ მიმავალ გზაზე, მით უფრო, რომ ქართველმა ხალხმა, ამ გაერთიანებებში შესვლის სურვილი, რეფერენდუმით დააფიქსირა?

- საქართველო ერთ-ერთი უდიდესი კონტრიბუტორია ნატო-ს სამშვიდობო ოპერაციებში ავღანეთსა და ცენტრალურ აფრიკაში. თქვენი ქვეყანა მნიშვნელოვან როლს ასრულებს და ამბიციურ რეფორმებს ატარებს სამხედრო სფეროში. ხელისუფლებამ არაერთხელ განაცხადა, რომ მათი მისწრაფება უცვლელია ევროატლანტიკური სტრუქტურებისკენ. ასე რომ, ხელჩაკიდებულები მივდივართ ამ მიზნებისკენ. საქართველო ჩვენი მნიშვნელოვანი პარტნიორია და ჩვენში ეჭვებს არ აჩენს მისი საგარეო კურსი. ვიმედოვნებთ, დეკემბრის ევროკომისიის მოხსენება ვიზა-ლიბერალიზაციასთან დაკავშირებით, პოზიტიური იქნება. ნატო და ევროკავშირი სტაბილური, აყვავებული, დემოკრატიული და ეფექტურად მართული სტრუქტურებია.

- საქართველოში გაქვთ მსგავსი განცდა და აქ ცხოვრება თუ მოგწონთ?

- ერთი კოლეგა, არც ისე დიდი ხნის წინ, მეგობრებს, საქართველოში ვიზიტის შესახებ გვიამბობდა და აღფრთოვანებას ვერ მალავდა. ამ საუბრიდან მალევე, სწორედ აქ დავინიშნე ელჩად… პირველ დღეს ვიფიქრე, შეუძლებელია აქ ცოცხალი გადარჩე, მძღოლებს მანქანის მართვის ისეთი მანერა აქვთ-მეთქი. შოკი იყო, მაგრამ ამასაც ეჩვევი. ვფიქრობ, ეს სისტემა უნდა გადაიხედოს… ჯერჯერობით, თქვენი ლეგენდარული სტუმართმოყვარეობით ვტკბები. ზოგჯერ, ვხუმრობ, რომ ისიც იუნესკოს სიაშია შესატანი. ხანდახან, ეს გამოწვევაც კია – კერძებისა და სასმლის სიუხვე მაქვს მხედველობაში. ძალიან გულღია და კეთილგანწყობილი ხალხი ხართ. ეს გეხმარებათ, ადვილად შეხვიდეთ კონტაქტში, გაცვალოთ ინფორმაცია. ლიტვა- საქართველოს შორის, სამთავრობო დონის გარდა, საოცარი კავშირები გვაქვს მუნიციპალიტეტებს შორისაც. ცოტა ხნის წინ, ჩვენი ქვეყნების ყოფილ დედაქალაქებს, ტრაკაისა და მცხეთას შორის გაფორმდა დაძმობილების დოკუმენტი. მჭიდრო კონტაქტებია ხალხებს შორისაც: გაცვლითი პროგრამებით, უამრავი სტუდენტი სწავლობს. ტექნიკურ უნივერსიტეტში ლიტვურ ენას ასწავლიან. მეც ვცდილობ ვისწავლო ქართული, რომელიც ძალიან ლამაზია, მაგრამ რთულიც. მომწონს საქართველო, ქართველები, თქვენი ისტორია… რამდენიმე შაბათ-კვირა მოგზაურობაში გავატარე. მოვინახულე მცხეთა, ზედაზენი, შიომღვიმე, ასევე, ვიყავი იყალთოს აკადემიაშიც, სადაც ლეგენდის თანახმად, შოთა რუსთაველი სწავლობდა. ძალიან შთამბეჭდავი ქვეყანაა, რომელსაც ყველაფერი აქვს, რაც წარმატებულ, ტურისტული დანიშნულების ადგილს სჭირდება – ზღვა, მთები, უძველესი ქალაქები, კულტურა და რა თქმა უნდა, ძალიან გემრიელი სამზარეულო. უამრავი ლიტველი ჩამოდის. არის პირდაპირი ფრენებიც ვილნიუსიდან ქუთაისამდე. იმედი მაქვს, ქართველი ტურისტების რიცხვიც გაიზრდება ლიტვაში. ჩვენც ბევრი კურორტით ვამაყობთ.

- რა არის თქვენი, როგორც ელჩის პრიორიტეტები?

- განვითარების თანამშრომლობის პროექტების ფარგლებში, სოციალური სექტორი, განათლება, ადმინისტრაციული შესაძლებლობები… ფონდები შეზღუდულია, მაგრამ შეძლებისდაგვარად, გეხმარებით.

- ქართულ კულტურას კარგად იცნობთ?

- გასაოცარი პოლიფონია გაქვთ. ასევე, ულამაზესი ტაძრები, რომლებიც მიანიშნებს, რომ თქვენ ერთ-ერთი პირველი ქრისტიანები ხართ. ლიტველებმა კი, ქრისტიანობა თქვენთან შედარებით, 10 საუკუნის დაშორებით მივიღეთ. სუხიშვილებს დაუჯერებელი ენერგია აქვთ, თითქოს, ძვლები არ აქვთო, ისეთ მოძრაობებს აკეთებენ. უდიდესი შთაბეჭდილება მოახდინა ნინო ქათამაძემ. რთველშიც დამპატიჟეს, შოთი გამომაცხობინეს, ჩურჩხელა ამომავლებინეს, ქვევრის ტრადიციაც გამაცნეს… ბევრი რამ სანახავი მაქვს. გულწრფელად მიხარია, რომ საქართველოში ვარ!