11 ნოემბერი, 2015 წელი
შინაარსი
„რეზონანსი“: შეძლებს თუ არა მთავრობა პრეზიდენტის გამოსახლებას
„რეზონანსი“: ინტერვიუ გია ხუხაშვილან: „ვფიქრობ, ივანიშვილი ვიღაცას შეცდომაში ჰყავს შეყვანილი”
„ახალი თაობა“: ინტერვიუ კახა კუკავასთან: „თინა ხიდაშელსა და გიგლა აგულაშვილს სასამართლოში შევხვდებით“
„ახალი თაობა“: ინტერვიუ ნინო გვენეტაძესთან: „მოსამართლე თამაზ ურთმელიძისგან ანგარიშს კი არა, ინფორმაციას ვითხოვდით“
„ალია“: ბევრი კითხვა დაგროვილა თქვენთან, ბატონო ბიძინა, ძალიან ბევრი კითხვა… (სარედაქციო სტატია)
„ალია“: ინტერვიუ ვალერი გელბახიანთან: რატომ გამოჩნდა ღიად ბიძინა ივანიშვილი და ვის დასჯის „რუსთავი-2“-ის სკანდალის გამო?
„ახალი თაობა“: ინტერვიუ ვალერი გელბახიანთან: „ხელისუფლება მოშიმშილეებს უნდა დაელაპარაკოს.. „რუსთავი 2“-ის ამბები შეიწირავს მთავრობას“
„ვერსია“: ინტერვიუ პატრიოტთა კავშირის წევრებთან: „თუ ნაციონალები ფეხებქვეშ გაგვებლანდებიან, იქვე დარჩებიან!“ // არსებობს თუ არა პატრიოტთა ალიანსისა და ნაციონალთა აქციების გადაკვეთისა და სამოქალაქო დაპირისპირების საფრთხე
„ახალი თაობა“: ინტერვიუ ზაალ კასრელიშვილთან: „დაშლის პირას მისული „გაზპრომ“-ის გამო აზერბაიჯანის განაწყენება არ ღირს“
—————————-
„რეზონანსი“, 11 ნოემბერი, 2015 წელი
შეძლებს თუ არა მთავრობა პრეზიდენტის გამოსახლებას
თაკო მათეშვილი
ბიძინა ივანიშვილი იქადნება, რომ მალე სასახლიდან პრეზიდენტს ძალით გამოასახლებენ. გიორგი მარგველაშვილს რეზიდენციის დატოვება აუცილებლად მოუწევს, სურს მას ეს თუ არა, განაცხადა გუშინ ექს-პრემიერმა. მართალია, იურისტების თქმით, სამართლებრივად ამის ბერკეტი მთავრობას გააჩნია, მაგრამ პოლიტოლოგები იმაზე მიანიშნებენ, რომ ეს “ოცნების” ხელისუფლებას საკმაოდ ძვირად დაუჯდება.
რეზიდენცია სახელმწიფოს საკუთრებაა, შესაბამისად, აღმასრულებელ ხელისუფლებას შეუძლია მიიღოს გადაწყვეტილება პრეზიდენტისათვის მისი ჩამორთმევის შესახებ. მანვე უნდა დაადგინოს, თუ სად განაგრძობს იგი მოღვაწეობას. თუკი გიორგი მარგველაშვილი რეზიდენციას საკუთარი სურვილით არ დატოვებს, იძულებით აღსრულების პროცესი დაიწყება.
მიხეილ სააკაშვილის მიერ აგებულ სასახლეში შესვლის გამო ბიძინა ივანიშვილი პრეზიდენტს ყველა საჯარო გამოსვლისას აკრიტიკებს. შემთხვევა ხელიდან არც გუშინ გაუშვია, როდესაც ჟურნალისტებთან საუბრისას პრეზიდენტის უარს ათონელის რეზიდენციაში გადასვლასთან დაკავშირებით “ცინიზმის ძალიან მაღალ დონე” უწოდა.
“მთავარი, რასაც მე ვხედავ, არის ის, რომ ყველამ უნდა დაიცვას კანონი, პატივი სცეს ქართულ სახელმწიფოს. პირველ რიგში, პრეზიდენტმა… რა თქმა უნდა, ეს უნდა დასრულდეს და დასრულდება, მას ეს სურს თუ არ სურს. სახელმწიფო სახელმწიფო უნდა იყოს და სტრუქტურებმა თავისი უფლებამოსილება უნდა განახორციელონ. თავის დროზე მთავრობამ განაცხადა, რომ კანონიერი ქმედებისგან თავს შეიკავებს. ეგ დროც დადგება,” – განაცხადა ბიძინა ივანიშვილმა.იურისტები იმ პროცედურებს განმარტავენ, რომელიც პრეზიდენტის სასახლიდან გამოყვანისთვისაა საჭირო და ამბობენ, რომ თუკი მთავრობა ამას მოინდომებს, მიაღწევს კიდეც.
იურისტი პაატა შავაძე ამბობს, რომ მთავრობის გადასაწყვეტია, თუ სად უნდა ასრულებდეს პრეზიდენტი თავის საქმიანობას და რომელ შენობასაც გამოუყოფს, პრეზიდენტი იმას უნდა დასჯერდეს. “პრეზიდენტს არ აქვს უფლება, გაჯინიანდეს და იქიდან გამოსვლაზე უარი თქვას. მთავრობის გადაწყვეტილების აღსრულებისათვის კი სამართლებრივად ყველა ბერკეტი არსებობს. თუკი მთავრობა მიიღებს გადაწყვეტილებას, რომ პრეზიდენტმა სასახლე უნდა დატოვოს, ეს გადაწყვეტილება ჩვეულებრივად უნდა აღსრულდეს. კანონის აღსრულებას წინ პრეზიდენტიც კი ვერ აღუდგება. შენობა სახელმწიფოს საკუთრებაა და მთავრობას შეუძლია, იგი სამართლებრივი ხერხით გამოათავისუფლოს და მესაკუთრეს – სახელმწიფოს ჩააბაროს,” – ამბობს შავაძე.
ადვოკატ გელა ნიკოლაიშვილის თქმით, „ამისათვის საჭიროა, მინისტრთა კაბინეტმა უბრალოდ დაადგინოს, რომ პრეზიდენტის რეზიდენცია ამა და ამ მისამართზე უნდა იყოს. აღსრულებაც ჩვეულებრივ მოხდება, პრეზიდენტი ვალდებული იქნება, კანონს დაემორჩილოს. წინააღმდეგ შემთხვევაში, არც ისაა გამორიცხული, ძალით გამოსახლების სცენაც კი ვნახოთ. თუმცა, სამარცხვინო იქნება, აღმასრულებელმა ხელისუფლებამ პრეზიდენტი სასახლიდან ძალით გამოასახლოს. ეს მთელი ქვეყნისათვისაა ცუდი.”
პრეზიდენტის სასახლის გარშემო შექმნილ ამ ხანგრძლივ აჟიოტაჟს “სამარცხვინოს” უწოდებს პოლიტოლოგი სოსო ცინცაძე და ამბობს, რომ ეს ყველაფერი ვნებს როგორც მმართველი გუნდის, ისე ქვეყნის იმიჯსა და სახეს. ის ხელისუფლებას უფრო მნიშვნელოვანი პრობლემებით დაკავებას ურჩევს. “არ მგონია, ეს ქვეყნისათვის ყველაზე პრინციპული საკითხი იყოს. ქვეყანაში, სადაც უმუშევრობა ყვავის, სიღატაკეა, ეროვნული ვალუტა ყოველდღე უფასურდება და ფასები იზრდება, დავიჯერო, ყველაზე მნიშვნელოვანი ისაა, თუ რომელ შენობაში იჯდება გიორგი მარგველაშვილი? მმართველი პარტია დანა-სისხლადაა გადაკიდებული “ნაციონალურ მოძრაობას”, ყოფილ პრეზიდენტს, ახალ პრეზიდენტსაც, ეს ყველაფერი კი ქვეყანას სახელს უტეხს… რომ ამბობენ, ავლაბრის რეზიდენცია უმაღლეს სასწავლებლად უნდა გადაკეთდესო, არაგონივრულია, რადგან გადაკეთება იმხელა ფასი დაჯდება, რომ სჯობს, საერთოდ ახალი ააშენონ, დიდი სხვაობა არ იქნება,” – აცხადებს ცინცაძე.
„რეზონანსი“, 11 ნოემბერი, 2015 წელი
ინტერვიუ გია ხუხაშვილან: „ვფიქრობ, ივანიშვილი ვიღაცას შეცდომაში ჰყავს შეყვანილი”
ელზა პაპოშვილი
ბიძინა ივანიშვილის ყოფილი მრჩეველი და ექსპერტი გია ხუხაშვილი აცხადებს, რომ ექსპრემიერის განცხადებები საქართველოში მიმდინარე პროცესებზე მხოლოდ მისი, როგორც მოქალაქის, პოზიციაა.
- როგორ ფიქრობთ, რას გულისხმობდა ბიძინა ივანიშვილი, როდესაც მარგველაშვილზე განაცხადა, რომ მისი უარი პრეზიდენტის სასახლიდან გადასვლაზე ცინიზმის მაღალი დონეა და რეალურად მას გამოსახლებით დაემუქრა?
- ბატონი ივანიშვილი არის საქართველოს მოქალაქე. ის აღარ არის ხელისუფლებაში. მისი ეს რადიკალური განცხადებებიც ადასტურებს, რომ ქვეყნის ფორმალური მმართველი არ არის. რეალურად ის ამ განცხადებას პირველად არ აკეთებს. ვხედავთ, რომ მისი განცხადებების მიუხედავად, ქვეყანაში სიტუაცია ისე არ მიდის, როგორც მას სურს. ივანიშვილს სრული უფლება აქვს, ჰქონდეს თავისი კრიტიკული და რადიკალური დამოკიდებულება.
- კი მაგრამ, ფიქრობთ, რომ ივანიშვილს მთავრობაზე გავლენა არა აქვს? არც თავად ღარიბაშვილი მალავს და აცხადებს, რომ მას შეიძლება აზრი ჰკითხოს.
- კი ბატონო, იზიარებდეს, მერე და რა. ამ განცხადებას ვერანაირი სამართლებრივი ქმედება ვერ მოჰყვება. მე მაგალითად, როგორც საქართველოს მოქალაქეს, კითხვები მიჩნდება პრეზიდენტის პოზიციებთან დაკავშირებით. მაგრამ ეს საინტერესო არ არის. ამ განცხადებას რომ მთავრობის წარმომადგენელი აკეთებდეს, სხვა კითხვებს დავსვამდი. ღარიბაშვილი მის მოსაზრებას რომც ეთანხმებოდეს, მერე რა, პრეზიდენტის გამოსახლების აქტს ხომ ვერ გამოსცემენ? მათ არ შეუძლიათ ისეთი აქტის გამოცემა, რომელიც პრეზიდენტის აქტზე მაღლა დადგება. ეს ჩვეულებრივი ამბავია. მართალია, მის მოსაზრებას პატივს ვცემ, მაგრამ ვერ გავიზიარებ. არ ვიცი, რა ციფრებზე საუბრობს. ვფიქრობ, რომ ივანიშვილი ვიღაცას შეცდომაში ჰყავს შეყვანილი. ან მეორე ვარიანტია, რაღაცა იცის ისეთი, რაც ჩვენ არ ვიცით და ბოლომდე არ ამბობს. მე ვერ ვხვდები, ამ 10 მილიონს რატომ ასახელებს. პრეზიდენტი ათონელზე იქნება თუ რეზიდენციაში, ხარჯები ამით რატომ იცვლება? ჩემთვის ეს ცოტა გაუგებარია.
ერთადერთი მცირე განსხვავება შეიძლება მხოლოდ კომუნალურ გადასახადში იყოს. დანარჩენ რა ხარჯებზეა საუბარი, არ მესმის. თუ ამ 10 მილიონს პუნქტებად ჩამოშლიდა, უფრო მეტი ინფორმაცია მექნებოდა და კვალიფიციურ პასუხსაც გაგცემდით. კომუნალურ ხარჯებში რაღაც მიზერული განსხვავება შეიძლება იყოს, რადიკალური ვერ იქნება.
პოზიცია მთავრობაშიც შეიძლება ჰქონდეთ. კი, ამ თემაზე პრეზიდენტსა და მთავრობას შორის პოლემიკა არაერთხელ ყოფილა. ესეც ჩვეულებრივი ამბავია. მაგრამ რეალურად ეს როგორ უნდა მოხდეს, მარგველაშვილს თუ არ უნდა, მას სასახლიდან როგორ გამოასახლებენ? ამ პოზიციის ფორმალიზება და ლეგალიზაცია ვერ მოხდება.
- ივანიშვილმა ასევე გააკრიტიკა არასამთავრობო ორგანიზაციები. როგორ ფიქრობთ, რატომ აღიზიანებს მას არასამთავრობო ორგანიზაციის ზოგი წარმომადგენელი?
- იგივეს გეტყვით, ესეც კვლავ მისი მოქალაქეობრივი უფლებაა. ვისაც უნდა, იმას შეაფასებს და გააკრიტიკებს. ეს საქართველოს მოქალაქის ჩვეულებრივი პოზიციაა. მთავარია, ეს შეურცხყოფაში არ გადადიოდეს. სხვა მხრივ მას ნებისმიერი რამის თქმა შეუძლია. მე არ მინდა, რომ ერთი მოქალაქის განცხადებებზე სხვა მოქალაქეები კომენტარებს აკეთებდნენ. მესმის, რომ მას საზოგადოებაში გავლენა აქვს, მაგრამ ის მთავრობის წევრი აღარ არის და როგორც სამოქალაქო პირი, რასაც უნდა იმას ილაპარაკებს. ამას ვერავინ ვერ დაუშლის. ესეც არასწორია. მის ამ პოზიციაზე ვერ ვიტყვით, რომ ან ამეტებს ან არ ამეტებს. ჩვეულებრივი მოქალაქის პოზიციას ვერავინ ვერ შეაფასებს. საჯარო მოხელის, კი ბატონო, მაგრამ არ არის ეს კაცი მთავრობაში და მის განცხადებებს ასეთი აჟიოტაჟი არ უნდა მოჰყვებოდეს. მას თმენის ვალდებულება არ აქვს და მის ნათქვამზე ვერც პასუხს ვერ მოვთხოვთ და დაზუსტებით ვერც იმას ვიტყვით, რომ მთავრობის წევრები მის პოზიციას იზიარებენ.
- რას იტყვით მის განცხადებაზე “რუსთავი 2″-თან დაკავშირებით, სადაც მან მოსამართლე ურთმელიძის მიმართ უკმაყოფილება გამოთქვა?
- მისი ეს განცხადება, სიმართლე გითხრათ, მომეწონა. სწორი პოზიცია იყო. ურთმელიძის მიმართ კითხვები ბევრ ადამიანს გაუჩნდა, რადგანაც მისმა ამ ქმედებამ ჩაწყნარებული სიტუაცია მეორედ ააფეთქა. მოსამართლე ურთმელიძე მხოლოდ მოსამართლე არ არის. ის ამ ქვეყნის მოქალაქეცაა. მე მას, როგორც მოსამართლეს, ვერ შევაფასებ. მაგრამ ვიტყვი, რომ ცუდი მოქალაქეა, რადგანაც დაწყნარებული ვითარება ხელახლა გაამწვავა. ასე რომ, მისი მოქალაქეობრივი პასუხისმგებლობა ჩემში კითხვებს იწვევს. პრინციპში, ბიძინა ივანიშვილმაც ეს თქვა.
- როგორ ფიქრობთ, ბოლო დროს მისი გააქტიურება და განცხადებები რასთან არის დაკავშირებული?
- ის ხვდება, რომ ქვეყანაში მთლად ყველაფერი კარგად არ არის და ეს აწუხებს, რადგან მორალურ პასუხისმგებლობას გრძნობს. აქტიურობს იმისათვის, რომ პროცესი გარკვეულ კალაპოტში ჩაჯდეს. რამდენად ახერხებს ამას, ეს უკვე ცალკე თემაა.
- თქვენ ივანიშვილის მრჩეველი იყავით. ახლა თუ გაქვთ ინფორმაცია, კვლავ ჰყავს თუ არა მას მრჩევლები და თქვენ რატომ წამოხვედით?
- როგორც ვიცი, მას მრჩევლები აღარ ჰყავს, თუმცა თავისი ორგანიზაციები აქვს. ალბათ იქ არიან ადამიანები, რომლებთანაც მას კომუნიკაცია აქვს. ხოლო იქიდან ჩემი წამოსვლის მიზეზი ძალიან მარტივი იყო. ახალი ხელშეკრულება არჩევნების შემდეგ უნდა გაფორმებულიყო, მაგრამ მე გამოვედი და გამოვაცხადე, რომ პოლიტიკური ციკლის დასრულების შემდეგ წავიდოდი. სამწუხაროდ, ეს სწრაფად ვერ გავაკეთე, რადგანაც ჩამოყალიბების პროცესი მიდიოდა და გარკვეული პერიოდი დარჩენა მაინც მომიწია. შემდეგ სისტემიდან წამოსვლა მხოლოდ ჩემი პირადი არჩევანი იყო. კი, არის ათასი მითქმა-მოთქმა, მაგრამ სიმართლე ესაა. შეიძლება, რომ ადამიანმა ძალაუფლებაზე უარი ნებით თქვას.
„ახალი თაობა“, 11 ნოემბერი, 2015 წელი
ინტერვიუ კახა კუკავასთან: „თინა ხიდაშელსა და გიგლა აგულაშვილს სასამართლოში შევხვდებით“
ნონა ცაბაძე
„ახალი თაობა“ უკვე წერდა იმის შესახებ, რომ პატრიოტთა ალიანსის ლიდერმა ირმა ინაშვილმა შიმშილობა დაიწყო და ის თავდაცვის მინისტრ თინა ხიდაშელისა და გარემოს დაცვის მინისტრ გიგლა აგულაშვილის გადადგომას ითხოვს. ინაშვილს მხარს უჭერს არასაპარლამენტო ოპოზიციის დიდი ნაწილი. მასთან თანამშრომლობას არც ნაციონალები გამორიცხავენ. „თავისუფალი საქართველოს“ ლიდერი კახა კუკავა აცხადებს, რომ მან და კიდევ რამდენიმე ოპოზიციურმა პარტიამ უკვე გააკეთეს სოლიდარობის შესახებ განცხადებები და ერთობლივ მოქმედებას გეგმავენ.
- ბატონო კახა, ერთობლივ მოქმედებაში რა იგულისხმება?
- ჩვენ გვქონდა პატრიოტთა ალიანსთან კონსულტაციები. მიუხედავად იმისა, რომ ჩვენ გვაქვს განსხვავებული საშინაო და საგარეო პოლიტიკურ ხედვები, ეს არ არის კავშირში იმასთან, რომ დემოკრატიულ საზოგადოებაში არჩევნები უნდა ტარდებოდეს თავისუფლად. ამიტომ ჩვენ მზად ვართ, მათი ხმებიც დავიცვათ, მათი უფლებებიც დავიცვათ.
- როგორ აპირებთ მათი ხმებისა და უფლებების დაცვას?
- კონკრეტულად რა ფორმით მოხდება ეს, ამაზე უახლოეს მომავალში ჩამოვყალიბდებით.
- „ნაციონალური მოძრაობაც“არ გამორიცხავს ირმა ინაშვილთან და პატრიოტთა ალიანსთან თანამშრომლობას. ეს რამდენად მოხერხდება?
- „ნაციონალური მოძრაობის“ მხრიდან საუბრები სოლიდარობასა და თავისუფალ არჩევნებზე ისეთივე სიმართლეა, როგორც „ქართული ოცნების“ მხრიდან, ვინაიდან იმ პოლიტიკური პარტიების მხრიდან სოლიდარობა, რომლებიც არჩევნების გაყალბებაში არიან ეჭვმიტანილნი, ძალიან ჰგავს იუდას ამბავს.
- გასაგებია, რომ ინაშვილს სოლიდარობას უცხადებთ. გარდა ამისა, სხვა რა გეგმები აქვს არასაპარლამენტო ოპოზიციას?
- დღეს მომწიფდა მესამე ცენტრის ჩამოყალიბების საკითხი და ის მალე შეიქმნება, რადგან ის ორი პოლიტიკური ძალა, რომლებიც ერთმანეთთან არიან დაპირისპირებული, „ქართული ოცნება“ და ნაციონალური მოძრაობა, ორი ბერწი პოლიტიკური სხეულია, რომელთა ურთიერთობისგანაც საზოგადოება ვერაფერს სასიკეთოს ვერ მიიღებს.
ოპოზიციონერი მიიჩნევს, რომ ორივე პოლიტიკური ძალა საზოგადოებას წარსულისკენ ექაჩება, ერთი – მიხეილ სააკაშვილის ავტორიტარიზმისკენ, ხოლო მეორე – კიდევ უფრო შორეული წარსულისკენ. „ბიძინა ივანიშვილი გამოხატავს ქურდულ ოლიგარქიულ მენტალობას, რომელიც 70-80-იან წლებში იყო პოსტსაბჭოთა რესპუბლიკებში. „ოცნებამ“ და „ნაციონალებმა“ ერთმანეთთან ბრძოლაში ყველაფერი მოსპეს და გაანადგურეს, რაც კი ამ ქვეყნის მონაპოვარი იყო“, – აცხადებს კუკავა.
- რა იყო ამ ქვეყნის მონაპოვარი?
- თუნდაც სიტყვის თავისუფლების ჩანასახი, თუნდაც სასამართლოს დამოუკიდებლობა.
- იყო სასამართლო დამოუკიდებელი?
- აქამდე სასამართლოს დამოუკიდებლობა დეკლარაციის დონეზე მაინც იყო საქართველოში. ბოლო ორი კვირის განმავლობაში კი პოლიტიკური ხელისუფლების წარმომადგენლები მოსამართლეებზე ზეწოლას ღიად ახდენენ. დღეს ქვეყანას ჰაერივით სჭირდება მესამე ცენტრი, რომლის მთავარი ფასეულობა იქნება ქვეყნის გარდაქმნა დემოკრატიულ ქვეყანად, ხოლო მისი ტაქტიკური ამოცანა იქნება `ქართული ოცნებისა~ და ნაციონალური მოძრაობის პოლიტიკური განადგურება. არ შეიძლება, ქვეყანაში არსებობდნენ კლანები და დროა, მათ პოლიტიკურ პროცესებზე ზეგავლენა შეწყვიტონ.
- რომელ კლანებს გულისხმობთ? ფიქრობთ, რომ დღეს ქვეყანას კლანები მართავენ?
- ამას დიდი ფიქრი და მტკიცება რად უნდა?! სამარცხვინოა, 2015 წელს ილჰამ ალიევი ჩამოდის თბილისში, ხვდება ოფიციალურ პირებს, შემდეგ ხვდება ბიძინა ივანიშვილს და აზერბაიჯანული პრესა წერს, რომ ილჰამ ალიევი შეხვდა საქართველოს ბატონ-პატრონს. 2015 წელს თუ ჩვენ აზერბაიჯანის დასაცინი გავხდებოდით დემოკრატიის კუთხით, ამას, ალბათ, ვერ წარმოიდგენდა და ასეთ პროგნოზს ვერ გააკეთებდა ვერცერთი პოლიტიკური ექსპერტი.
- ანუ დაგვცინიან?
- რა თქმა უნდა, ეს დაცინვაა! ილჰამ ალიევს შეუდგინეს გრაფიკი: დილის 12 საათზე შეხვედრა პრეზიდენტთან, 2-ზე – პრემიერთან, ხოლო 8 საათზე შეხვედრა „ხაზეინთან“! ეს ხომ არის ქვეყნის მასხრად აგდება?!
- რა სტატუსით შეხვდა ივანიშვილი?
- აი, ზუსტად ამ სტატუსით – „ხაზიაინ გრუზიი“. ზუსტად ამ სიტყვებით წერს აზერბაიჯანული გამოცემა. რა, ვინმესთვის უცხოა, რომ დღეს ქვეყანას მართავს ივანიშვილი?! მისი გუნდის წევრებიც აღიარებენ, რომ ივანიშვილია ამ ქვეყანაში მთავარი პოლიტიკური ფიგურა. ლანძღავენ რესპუბლიკელებს და კიდევ სხვებს და ყველა საჩივლელად ივანიშვილთან მიდის.
- რესპუბლიკელები ახსენეთ და ირმა ინაშვილის მთავარი მოთხოვნაა, გადადგნენ თინა ხიდაშელი და გიგლა აგულაშვილი. გაიზიარებს „ხაზიაინი“ ამ მოთხოვნას? ამბობენ, რომ რესპუბლიკელები დიდად არც მას ეხატება გულზე.
- თინა ხიდაშელთან და გიგლა აგულაშვილთან დიალოგი, სამწუხაროდ, ვერ შედგა. მათ უარი განაცხადეს ოპოზიციასთან დიალოგზე, მაგრამ, მე მინდა მათ ვუთხრა, რომ ჩვენ შევხვდებით ძალიან მალე და შევხვდებით სასამართლოში, როცა ისინი ბრალდებულის სკამზე ისხდებიან. მათ წინააღმდეგ იქნება წამოყენებული ბრალდებები და ერთ-ერთი ბრალდება იქნება სწორედ შუალედური არჩევნების გაყალბება.
- როდესაც მესამე ცენტრზე საუბრობთ, რამდენად რეალურია ეს ყველაფერი? სად არიან ის პოლიტიკური ძალები, რომლებიც ამ ცენტრს შექმნიან?
- ამას უახლოესი მომავალი გვაჩვენებს. საზოგადოებაში ეს მოთხოვნა საკმაოდ აქტიურია. პირადად მე ჩართული ვარ კონსულტაციებში ამ საკითხთან დაკავშირებით და გეტყვით იმასაც, რომ მესამე ცენტრი შედგება.
- არის ის განწყობები, რომ ხალხი ქუჩაში გამოვიდეს?
- ამისთვის გარკვეული მზაობა არსებობს. აქამდე თუ არსებობდა განცდა, რომ, აი, მოვიდა „ოცნება“ და „ნაცებს“ მაინც ხომ სჯობიან, ეს იმედიც მოკვდა ქართველ საზოგადოებაში. „ოცნება“ თუ ებრძვის „ნაციონალურ მოძრაობას“, ებრძვის მხოლოდ იმიტომ, რომ იგივე დანაშაულებრივი სისტემა თავად მოირგოს.
- მოესწრება 2016 წლამდე მესამე ცენტრის ჩამოყალიბება?
- უნდა მოესწროს და, თუ ეს მოხდა, მაშინ „ოცნებასაც“ და ნაციონალებსაც საპარლამენტო არჩევნებზე ბარიერის პრობლემა დაუდგებათ.
„ახალი თაობა“, 11 ნოემბერი, 2015 წელი
ინტერვიუ ნინო გვენეტაძესთან: „მოსამართლე თამაზ ურთმელიძისგან ანგარიშს კი არა, ინფორმაციას ვითხოვდით“
ნათია ხურცილავა
უზენაესი სასამართლოს თავმჯდომარე ნინო გვენეტაძე ამბობს, რომ ყველა კითხვას, რომლებიც საზოგადოებას სასამართლოსთან დაკავშირებით გაუჩნდა, პასუხი დაუყოვნებლივ უნდა გაეცეს. „ახალი თაობის“ კითხვას, თუ რატომ ვერ უზრუნველყო საქალაქო სასამართლომ საზოგადოების ინფორმირებულობა „რუსთავი-2“-ის ცნობილ განჩინებაზე, ნინო გვენეტაძე ასე პასუხობს: „ეს კითხვა მეც მაქვს“.
- პარლამენტმა, როგორც მხარემ, საკონსტიტუციო სასამართლოს მიმართა, რომ მოსამართლეების აცილება მოხდეს. რა შეგიძლიათ, ამ საკითხზე თქვათ?
- ეს საკითხები მხოლოდ კონკრეტული სასამართლოს იურისდიქციის ფარგლებშია. საკონსტიტუციო სასამართლოს შეუძლია, ამ საკითხებზე იმსჯელოს და საპროცესო წესდებითა და ფორმით პასუხი მიიღოს საზოგადოებამ. ჩემი მთავარი მიზანი საკონსტიტუციო და საერთო სასამართლოების მიმართ არის ის, რომ კანონის ფარგლებს არ გავცდეთ და ვიყოთ ანგარიშვალდებული საზოგადოების წინაშე. ამ პროცესის განხორციელების შემდეგ საკონსტიტუციო სასამართლოს ექნება სურვილიც და ვალდებულებაც, რომ საზოგადოებისთვის განმარტება გააკეთოს, ისე, როგორც ჩვენ გვაქვს ამის სურვილი, მაგრამ ხშირად ვერ ვასრულებთ იმ ვალდებულებას, რომელიც გვაქვს.
- ბოლო დროს განვითარებულ მოვლენებს გულისხმობთ?
- დიახ. ეს აშკარად გამოჩნდა, როდესაც მაღალი საზოგადოებრივი ინტერესის მქონე გადაწყვეტილებასთან დაკავშირებით ფაქტობრივად ვერც საქალაქო სასამართლომ და ვერც იუსტიციის საბჭომ დროულად ვერ მიაწოდა ინფორმაცია საზოგადოებას. ჩემი აზრით, ამან გამოიწვია ის განსხვავებული შეფასებები, რომლებიც ასევე იყო კრიტიკის საგანი. ჩემი პირველი საზრუნავი არის ის, რომ საქალაქო სასამართლოში დეტალურად გავარკვიო საკითხები მიღებულ გადაწყვეტილებასთან დაკავშირებით.
- კონკრეტულად რა გაინტერესებთ საქალაქო სასამართლოსგან?
- ინფორმაციის უქონლობის თაობაზე მაინტერესებს. ინფორმაცია ტრადიციულად კეთდება საქალაქო სასამართლოში. „რუსთავი-2“-ის საქმესთან დაკავშირებით პირველ გადაწყვეტილებაზე საქალაქო სასამართლომ ორგზის გააკეთა მსგავსი განმარტება, რამაც საზოგადოებას და თქვენც, ჟურნალისტებს, მოგცათ საშუალება, გქონოდათ იმ კითხვებზე პასუხები, რომლებიც შეიძლება ყოფილიყო საზოგადოების მიერ დაყენებული. ამიტომ ეს საკითხები არ დარჩება უგულებელყოფილი. საბჭოს წევრებთან ერთად ან დამოუკიდებლად საქალაქო სასამართლოში შევხვდები საქალაქო სასამართლოს ადმინისტრაციას, სასამართლოს თავმჯდომარეს, სპიკერ-მოსამართლეს, პრესცენტრს, სადაც ჩვენ გვექნება მსჯელობა ამ საკითხზე, რომ დროულად მივცეთ ანგარიშვალდებულების ფორმატში საზოგადოებას ინფორმაცია. საქალაქო სასამართლოს აქვს სპიკერ-მოსამართლის რესურსი. ის ერთ-ერთი უმსხვილესი სასამართლოა, მას ჰყავს სპიკერ-მოსამართლე და აქვს განცხადების გაკეთების ტრადიცია.
- ამ შემთხვევაში რატომ არ მიმართა ამ ტრადიციას?
- ეს კითხვის ნიშანი არსებობდა ჩემთვისაც და ამ კითხვაზე პასუხს ველოდი საერთო სასამართლოებიდან, კონკრეტულად – საქალაქო სასამართლოდან. მე კომუნიკაცია მქონდა როგორც საქალაქო სასამართლოს თავმჯდომარესთან, რომელიც ქვეყანაში არ იმყოფებოდა, ისე თავმჯდომარის მოვალეობის შემსრულებელთან, მენეჯერთან და პრესცენტრთან, მაგრამ ვერცერთი ამ სუბიექტისგან ინფორმაცია ვერ მივიღე იმის შესახებ, თუ რატომ არ გაკეთდა განცხადება.
- თქვენ, როგორც უზენაესი სასამართლოს თავმჯდომარემ, საზოგადოების მეტი ინფორმირებულობისთვის რა უნდა გააკეთოთ? რა ხარვეზებს ხედავთ ამ პროცესში?
- განჩინებასთან დაკავშირებით ხარვეზებს კატეგორიულად ვერ დავაფიქსირებ. სამართალწარმოების პროცესი გრძელდება, ამიტომ ჩემი შეფასებები მიმდინარე პროცესზე გამორიცხულია. ჩვენ უკვე ვისაუბრეთ, რომ ნაკლოვანებები ცალსახად გამოჩნდა. კონკრეტულ საქმესთან დაკავშირებით მოსამართლის ანგარიშს კი არ ითხოვდა ვინმე, არამედ საზოგადოებისთვის ინფორმაციის მიწოდებას განჩინებაში არსებულ პრობლემურ კითხვებთან დაკავშირებით. ეს არ ნიშნავს განჩინების შინაარსში შესვლას, ეს არ ნიშნავს მოსამართლისთვის ანგარიშის მოთხოვნას. ერთადერთი ფორმატი, სადაც შეიძლება მოსამართლის პოზიციის მოსმენა, არის იუსტიციის უმაღლესი საბჭო. ეს არის მხოლოდ მოსმენა და არა – ანგარიში. მე ასეთი შეთავაზება გავუკეთე მოსამართლეს, მაგრამ ამის გამო არაეთიკურადაც კი გამაკრიტიკეს ჩემმა კოლეგებმა, თუმცა გარწმუნებთ, სხვა საკანონმდებლო შესაძლებლობა მოსამართლესთან ურთიერთობის არც მე, როგორც თავმჯდომარეს და არც იუსტიციის საბჭოს წევრებს არ გაგვაჩნია.
- მოსამართლემ ამ შესაძლებლობაზე უარი განაცხადა.
- გასაგებია, რომ თვითონ მოსამართლემ განაცხადა უარი მოსვლაზე, მაგრამ გაუგებარია პოზიციები, როდესაც კანონით დადგენილი ფორმატი უარყოფითად შეფასდა.
- მოსამართლე ხელშეუხებელია საზოგადოების კრიტიკისგან?
- არა, მე ვადასტურებ, რომ მოსამართლე კრიტიკას უძლებს. მოსამართლეს თმენის მაღალი ვალდებულება აქვს. საუბარია იმაზე, რომ არ იყოს შეურაცხმყოფელი კრიტიკა და სასამართლოს პრესტიჟსა და ავტორიტეტს არ მიაყენოს ზიანი, მოსამართლის ინდივიდუალური დამოუკიდებლობა არ დააყენოს ეჭვქვეშ. სხვა ყველა კითხვა თქვენი, ჟურნალისტებისა და საზოგადოების მხრიდან ლეგიტიმურია. მე ამ პროცესში ვალდებული ვარ, ეს ხაზი სწორად გავატარო. მე ავიღე პასუხისმგებლობა, რომ საქალაქო სასამართლოში ყველა მომდევნო გადაწყვეტილებასთან დაკავშირებით გაკეთდეს არა ანგარიში, არამედ განმარტებები.
- სხვა მოსამართლეებისთვის ეს შემთხვევა შეიძლება, ერთგვარი მესიჯი იყოს?
- ეს მთელი სასამართლო კორპუსისთვის პოზიტიური მესიჯი იქნება, რომ გამჭვირვალობისა და ანგარიშვალდებულების კუთხით სასამართლო უნდა იყოს მომზადებული, იუსტიციის საბჭოს კი უნდა ჰქონდეს რეალური ბერკეტი, რითაც ის საზოგადოების მაღალ ინტერესს დააკმაყოფილებს.
- ქალბატონო ნინო, პრეზიდენტმა თქვა, უზენაეს სასამართლოს ყველაზე პრინციპული და გაუტეხელი ხელმძღვანელი ჰყავსო. რას იტყვით?
- ეს გამოცდა ჯერ კიდევ წინ არის, რადგან სასამართლოს მუდმივი განახლება და რეფორმა სჭირდება. მე ამ გზაზე სირთულეები ნამდვილად შემხვდება, თუმცა, მართლმსაჯულების ინტერესებიდან გამომდინარე, დამოუკიდებელი სასამართლოს დასამკვიდრებლად ჩემთვის ასეთი განცხადება სტიმულიც არის.
„ალია“, 11 ნოემბერი, 2015 წელი
ბევრი კითხვა დაგროვილა თქვენთან, ბატონო ბიძინა, ძალიან ბევრი კითხვა…
„ალიას“ რედაქცია
დღის მთავარ თემად იქცა ბიძინა ივანიშვილის კომენტარები საკმაოდ ბევრ საკითხზე და ატყდა ერთი ამბავი – ყოფილმა პრემიერმა ეს თქვა, ყოფილმა პრემიერმა ის თქვა… მოკლედ, ბიძინა ივანიშვილი ჟურნალისტებმა ერთ-ერთ ღონისძიებაზე „გამოიჭირეს“ და „დაბომბეს“ კიდეც კითხვებით. ბუნებრივია, ყოფილ პრემიერს ერთერთი მთავარი კითხვა „რუსთავი-2“-ის გარშემო მიმდინარე მოვლენების შესახებ დაუსვეს, რაზეც მან ასეთი პასუხი გასცა:
- შექმნილი სიტუაცია არ არის მთავრობისთვის ხელსაყრელი, ეს არის ხელსაყრელი სწორედ „ნაციონალური მოძრაობისთვის“. როგორ აწიეს თემა, ნახეთ. ოსტატები არიან. განა არ ვიცოდი, რომ ამას იზამდნენ? ეს რომ ჩემზე ყოფილიყო დამოკიდებული, მე მაგის ჭკუა მეყოფოდა, რომ საერთოდ არ შევხებოდი „რუსთავი-2“-ს და მერე ეს დროებითი მმართველი ასე სწრაფად არ შეგვეყვანა. მე ამის ჭკუა მეყოფოდა. რა მოჰყვებოდა მას, ძალიან იოლი დასანახი იყო – „ნაციონალური მოძრაობის“ ხელწერა ხომ კარგად ვიცით, მაგრამ ამავდროულად რა ვუყოთ დვალს, აქიმიძესა და ხალვაშს? მათ აქვთ კანონიერი უფლება, იდავონ იმაზე, რაც წაართვეს. ნამდვილად მეყოფოდა ჭკუა, რომ ასეთი კოზირი არ გადამეგდო „ნაციონალებისთვის“. კოზირში ვგულისხმობ განსაკუთრებით ზეპირი მოსმენის გარეშე მმართველის დანიშვნას. კიდევ ერთხელ ვიმეორებ, პოლიტიკურად, რა თქმა უნდა, ეს გადაწყვეტილება წამგებიანი იყო, მაგრამ სამართლებრივად ჯერ არავის დაუსაბუთებია, რომ ურთმელიძემ კანონი დაარღვია. თუ ვინმეს არ მოსწონს ურთმელიძის გადაწყვეტილება და პოლიტიკურად ეს ჩვენ ნამდვილად გვაზიანებს, ამისთვის არსებობს ისევ სასამართლო, -განაცხადა ყოფილმა პრემიერმა.
კი, ბატონო ბიძინა, თამაზ ურთმელიძე რომ ვიღაცის დაკრულზე ცეკვავს, ამაზე დიდი ხნის წინ გაგვიჩნდა ეჭვები და ბევრი კითხვაც, თუმცა რა გინდა, რომ ქნა – აგერ, თავადაც გაქვთ ურთმელიძესთან კითხვები და გგონიათ, გიპასუხებთ? უხ, მეტი არაა ჩემი მტერი!
- კითხვები არსებობს ჩემი მხრიდანაც. მაგრამ ამ კითხვებს პასუხი უნდა გასცეს სასამართლომ. კითხვებია – უნდა შეეყვანა თუ არა მმართველი საბოლოო გადაწყვეტილებამდე და ასე შემდეგ… თუმცა, ვერც „ნაციონალური მოძრაობის“ წევრები და ვერც თქვენ ვერ მეტყვით, რომ ურთმელიძემ კონსტიტუცია დაარღვია და კანონის ფარგლებს გასცდა. საზღვარგარეთ ამის პრაქტიკა არის გაცილებით მეტი, ვიდრე საქართველოში. ამიტომაც, თუ არ მოგვწონს და ეჭვი გვაქვს ურთმელიძის გადაწყვეტილებაზე, რომ პირველივე ინსტანციაში, ზეპირი მოსმენის გარეშე მიიღო გადაწყვეტილება, ამაზე პასუხი უნდა გასცეს ისევ და ისევ სასამართლომ, – განაცხადა ბიძინა ივანიშვილმა.
კარგით, ჩვენ, ხალხი, დავიცავთ კანონს, მაგრამ ჩინოვნიკებს რომ ვუყურებთ, ამის სურვილი არ გვაქვს და რა წყალში გადავვარდეთ, კაცო?! თუ ჩვენ უნდა ვემორჩილებოდეთ კანონებსა და სახელმწიფოს მოთხოვნებს, ჩინოვნიკები რატომ უნდა იყვნენ პრივილეგირებულ მდგომარეობაში? თუნდაც პრეზიდენტი ავიღოთ! რა, თავად არ ხართ უკმაყოფილო მარგველაშვილის გაჯიუტებით - არ გამოვალ ავლაბრის რეზიდენციიდანო?!
- მთავარი, რასაც მე ვხედავ, არის ის, რომ ყველამ უნდა დაიცვას კანონი, პატივი სცეს ქართულ სახელმწიფოს და პირველ რიგში, პრეზიდენტმა. კომერციული ნაწილიც უნდა შეფასდეს, 10 მილიონს გადასცდა და ამბობს, რომ მოქალაქეების დასაცავად აკეთებს.
აქაც ცინიზმის ძალიან მაღალი დონეა. რა თქმა უნდა, ეს უნდა დასრულდეს და დასრულდება, მას ეს სურს თუ არ სურს. სახელმწიფო სახელმწიფო უნდა იყოს და სტრუქტურებმა უნდა განახორციელონ თავისი უფლებამოსილება. თავის დროზე მთავრობამ განაცხადა, რომ კანონიერი ქმედებისგან თავს შეიკავებს. დადგება ეგ დროც, – განაცხადა ბიძინა ივანიშვილმა.
ვაა, გამოასახლებთ, კაცო? პრეზიდენტს? მერე ამერიკა და დასავლეთი ღერა-ღერა რომ დაიპუტავს, მაგაზე არ უნდა ვიფიქროთ? თანაც, „რუსთავი-2“-ის გარშემო ისეთი შეშფოთებულები არიან, ნამეტანი ღელავენ და კიდევ უნდა მივცეთ დამატებითი საბაბი?
- ჩვენ, რა თქმა უნდა, ანგარიშს ვუწევთ ამერიკის შეერთებული შტატების შეშფოთებას. ის არის მთავარი სტრატეგიული პარტნიორი და ყველანაირად ვცდილობთ, დავარწმუნოთ ჩვენს გულწრფელობაში. მე ვფიქრობ, შეშფოთება არის გადაჭარბებული. საფუძველი ამის კი გახლავთ ისევ „ნაციონალური მოძრაობა“, რომელიც 9 წლის განმავლობაში ახერხებდა უამრავი მეგობრის შეძენას, თავისი ხელწერის – დიქტატურის ნაცვლად დემოკრატიად გაფორმებას და ა.შ. მე ამას გულწრფელად ვიღებ ყურადღებით. ვალდებულადაც კი ვთვლი თავს და დღევანდელ ხელისუფლებასაც, ვფიქრობ, იგივე ვალდებულება აქვს, რომ ჩვენ ყველა კითხვას ვუპასუხოთ. ვუპასუხებთ კიდეც და ვაჩვენებთ რეალობას, რომ არაფერიც არ ხდება, – განაცხადა ყოფილმა პრემიერმა.
კააარგი, ვთქვათ „აშუშუ“ დავარწმუნეთ, ევროპაც, მაგრამ აქაური არასამთავრობო სექტორიც რომ შფოთავს და ღელავს? აგერ, „რუსთავი-2“-ის შენობასთან 24-საათიანი მორიგეობა დააწესეს – მაჯლაჯუნები უნდა განდევნონ და ჭინკები ღამღამობით…
- არასამთავრობოთა დიდი ნაწილი, ეკა გიგაურის ხელმძღვანელობით, რომელიც არასამთავრობოდ წარმოგვიდგა და როგორც იქნა, ახლა პოლიტიკაში თავის რეალურ სახეს გვაჩვენებს, „ნაციონალური მოძრაობის“ გაგრძელებაა. საუბედუროდ, ისინი ძალიან აბინძურებენ სამოქალაქო საზოგადოებას. კარგი იქნება, დანარჩენი ნაწილიც, სამოქალაქო საზოგადოებას რომ უწოდებს თავის თავს და რეალურად „ნაციონალური მოძრაობის“ სტრუქტურის ნაწილია, თუ თავადაც დაარქმევენ თავის თავს სახელს, როგორც გიგაურმა, როგორც იქნა, გადაწყვიტა, – ამბობს ივანიშვილი.
კარგით, არასამთავრობო ორგანიზაციები იქით იყვნენ, მაგრამ ლარის განადგურებამ რომ საშინელ დღეში ჩაგვაგდო და ვერც ეროვნული ბანკი და ვერც მთავრობა ხეირიანს ვერაფერს ახერხებს, ამ საკითხს რა ჯანდაბა ვუქნათ?
- დღეს განსაკუთრებული არაფერი ხდება და ამ თემასაც თავიდან ნუ ავწევთ. ის, რომ ასეთი დევალვაცია მოხდა და კრედიტორები ძალიან მძიმე დღეში არიან, ამაზე ფიქრობს ხელისუფლება და ვფიქრობ მეც. მე არ გამოვრიცხავ, რომ პირადი დახმარება აღმოვუჩინო, მაგრამ, რომ არ მოხდეს ბიზნესში რამე მკვეთრი გადანაწილება და არ მოხდეს ბანკროტი, ამ თემებზეც ვმსჯელობ. ზოგადად, ძალიან მაწუხებს ეს თემა, ვისაც ჰქონდა კრედიტი აღებული და თავის დროზე ლარის კურსი იყო 2-ზე ქვემოთ და დღეს არის 2,40-თან ახლოს, თითქმის 30 პროცენტით გაუძვირდათ მათ ეს კრედიტების მომსახურება. მე ამ თემებზეც ვმსჯელობ, თუ გნებავთ. ქუმსიშვილს გუშინაც შევხვდი და ამ თემებზეც მქონდა საუბარი, -განაცხადა ბიძინა ივანიშვილმა.
ძალიან უჭირს ხალხს, ბატონო ყოფილო პრემიერო, ძალიან, თან ეს არჩევნების თემა და შიმშილობის აქციები. მოკლედ, ათასი პრობლემაა, კაცო, არ არის ქვეყანაში კარგად საქმე, ჰკითხეთ ეს რიგით მოქალაქეებს და არა ქუმსიშვილს. გნებავთ, ირმა ინაშვილს ჰკითხეთ, რა ხდებოდა და ხდება საგარეჯოში.
- მინდა, მივულოცო ირმა ინაშვილს, რომ კოალიციას ღირსეული წინააღმდეგობა გაუწიეს. ჩემთვის მოულოდნელი იყო, რეალურად თანაბარი ბრძოლა დააფიქსირეს. სამწუხაროა განცხადებები, რომ არჩევნები გაყალბდა. ესეც აზარალებს დღევანდელ ხელისუფლებას. კარგი იქნებოდა, დაკონკრეტებულიყვნენ, ტერმინი „გაყალბებული არჩევნები“ მიუღებელია. მოპარული არჩევნები არ ყოფილა, ჩუმად არავის არაფერი უკადრებია. მათ რიცხვში, მე, რაც შემეძლო თვალს ვადევნებდი. კონკრეტული კითხვები, რაც არსებობს, გასაჩივრებულია. ქართველები მაქსიმალისტები ვართ, ყველაფრის კულმინაციაში აყვანა გვინდა. მინდა, ვთხოვო ინაშვილს, ამ უკიდურეს ფორმაზე, შიმშილობაზე იქნებ უარი თქვას. ყველა დანარჩენმა პარტიამ ამ არჩევნებს ბოიკოტი გამოუცხადა, რადგან მსგავს წინააღმდეგობას ვერ გაუწევდნენ კოალიციას. „პატრიოტთა ალიანსმა“ ბოიკოტი რომ არ გამოაცხადა, ეჭვები ჰქონდათ, რომ ხელისუფლებას ეთამაშებოდნენ. თურმე, ასე არ ყოფილა, მათ რეალური წინააღმდეგობა გაუწიეს ხელისუფლებას და ნახეთ, რა ბდღეში ჰყავს ხელისუფლება დღეს ამ პარტიას, – განაცხადა ბიძინა ივანიშვილმა.
უი, კინაღამ დაგვავიწყდა, ეს გოგი თოფაძე და თამაზ მეჭიაური რომ ბურდავენ ხოლმე და უცნაურ განცხადებებს აკეთებენ, შეიძლება ასე, ეს ოხერი? გადარიეს ხალხი და კიდევ გადარევა გვინდა, ისედაც იმდენი კითხვაა პასუხგაუცემელი – ეს „გაზპრომიო“, ის ალიევია გადარეულიო…
- მე დღესაც დიდ პატივს ვცემ მეჭიაურსაც და გოგი თოფაძესაც, მიუხედავად იმისა, რომ მათი ბევრი განცხადება არ მომწონს და არ იმსახურებს მოწონებას. მე დღეს კიდევ ერთხელ მოვუწოდებდი მათაც და ჩვენი პარლამენტის სხვა წევრებსაც, რომ უფრო თავშეკავებულები იყვნენ. ნაკლები ემოცია და მეტი კორექტულობა მართებთ მათ, რამეთუ ისინი საქართველოს წარმოადგენენ, – განაცხადა ივანიშვილმა.
და „გაზპრომის“ თემა, ბატონო ყოფილო პრემიერო… რაო, ილჰამ ალიევმა, მეწყინა რუსულ გაზზე რომ ჩალიჩობს კალაძეო?
- უფრო საინტერესო საუბარი გვქონდა მე და ბატონ ალიევს, ვიდრე „გაზპრომია“. ეს თემა „ნაციონალური მოძრაობის“ მიერაა აგორებული. ჩვენ გვქონდა ძალიან საინტერესო შეხვედრა და მეგობრული საუბარი, – განაცხადა ბიძინა ივანიშვილმა.
„ალია“, 11 ნოემბერი, 2015 წელი
ინტერვიუ ვალერი გელბახიანთან: რატომ გამოჩნდა ღიად ბიძინა ივანიშვილი და ვის დასჯის „რუსთავი-2“-ის სკანდალის გამო?
ნინო სამხარაძე
ექს-პრემიერი ბიძინა ივანიშვილი აქტიურ მოქმედებაში მოდის. ის არაერთ საჯარო ღონისძებას დასწრებია ბოლო ხანს, მაგრამ ჟურნალისტების შეკითხვებს გაურბოდა. მაშინ, რა მოხდა ახლა? როგორც ჩანს, „რუსთავი 2“-ის სკანდალმა ხელისუფლება დეპოში შეიყვანა. ამ თემის ირგვლივ განვითარებული მოვლენებით ივანიშვილი კმაყოფილი არ არის: „ჩემზე რომ ყოფილიყო დამოკიდებული, მე მეყოფოდა ჭკუა, რომ ჯერ საერთოდ არ შევხებოდი „რუსთავი 2“-ს და მერე დროებითი მმართველი ასე სწრაფად არ შემეყვანა. პოლიტიკურად მოსამართლე თამაზ ურთმელიძის გადაწყვეტილებები მთავრობას აზიანებს, თუმცა სამართლებრივად ჯერ არავის დაუსაბუთებია, რომ მან კანონი დაარღვია….“
აშკარაა, რომ ვიღაცას სიკვდილის ბუზი დააჯდა და მსხვერპლშეწირვას ვიხილავთ, როგორც ჩანს, ვიღაცებმა თვითინიციატივა გამოიჩინეს და ივანიშვილის გულისმოსაგებად გადაამლაშეს პროცესებში.
10 ნოემბერს, ექსპრემიერმა ფაქტობრივად, უახლესი პოლიტიკური გეგმის მონახაზი შესთავაზა საზოგადოებას. ივანიშვილი კიდევ ერთხელ აფრთხილებს პრეზიდენტ მარგველაშვილს, რომ მისი ცინიზმის ძალიან მაღალ დონეს დაასრულებს და ის აუცილებლად დატოვებს ავლაბრის რეზიდენციას, მას ეს სურს თუ არა. საინტერესოა, რა მეთოდით გამოასახლებენ პრეზიდენტს ავლაბრის რეზიდენციიდან, რა სამართლებრივი ბერკეტები არსებობს იმისთვის, რომ მარგველაშვილს იძულებით დაატოვებინებენ რეზიდენციას?
ბატონმა ბიძინამ უნდა იცოდეს, რომ უფრო დიდი სკანდალის თემა გახდება პრეზიდენტ მარგველაშვილის იძულებით გამოსახლება ავლაბრის რეზიდენციიდან, ვიდრე ეს არის „რუსთავი 2“-ის საქმე.
ივანიშვილმა თავის დროზე განმარტა, რომ ნოემბერში რეზიდენტს ნიღაბს ჩამოხსნიდა. სკანდალური აუდიო და ვიდეოჩანაწერების გავრცელების შემდეგ მედიაში გაჩნდა ინფორმაცია, რომ არსებობს აუდიოჩანაწერი მიხეილ სააკაშვილსა და გიორგი მარგველაშვილს შორის. შესაძლოა, ივანიშვილი ამ ჩანაწერსაც გულისხმობს, რაც საზოგადოებას კიდევ ერთხელ ნეგატიურად განაწყობს მარგველაშვილის წინააღმდეგ. თუმცა ეს მხოლოდ ვერსიებია და ასეთი ტიპის ჩანაწერი რომც გამოჩნდეს, საერთაშორისო საზოგადოებისთვის ეს კიდევ ბერთი მიზეზი იქნება, რომ თავს დაესხნენ ხელისუფლებას.
საერთაშორისო საზოგადოების გასაგონად ივანიშვილმა განმარტა: უამრავი უმეცარი განცხადება აქვს გაკეთებული ევროსაბჭოს, ეუთოს, თუმცა ეს არ ნიშნავს, რომ მთავრობამ მათი განცხადებები ყურად არ იღოს. მოკლედ, ასეა თუ ისეა, ყველაფერი რიგზე არ არის და ივანიშვილის გააქტიურებაც ამას მოწმობს.
იურისტი ვალერი გელბახიანი იყო ის ერთადერთი ანალიტიკოსი, რომელიც კულისებში მყოფ ივანიშვილზე დადასტურებულად აცხადებდა, რომ არჩევნების მოახლოებასთან ერთად ის გააქტიურდებოდა და პოლიტიკაში ღიად დაბრუნდებოდა. მეტიც, მან ივარაუდა, რომ არჩევნებამდე დაახლოებით 3 თვით ადრე ის გადააყენებდა მთავრობას და პროცესების მართვას საკუთარ თავზე აიღებდა.
„ალიას“ კითხვებს პასუხობს ვალერი გელბახიანი:
- ბიძინა ივანიშვილის გამოჩენა და კომენტარები რას ნიშნავს. „რუსთავი 2“-ის საქმის დასრულების შემდეგ ჩვენ ახალ პოლიტიკურ რეალობას ვიხილავთ?
- რაც დრო გადის, მეტად ვრწმუნდები, რომ უფრო მეტი სიურპრიზისა და მოულოდნელობის წინაშე დავდგებით, ვიდრე ამას მე ვვარაუდობდი. ბატონი ბიძინა ივანიშვილის 10 ნოემბრის განცხადებები მიანიშნებს იმაზე, რომ ვიღაცას ხელისუფლებაში მისი სახელი ბოროტად აქვს გამოყენებული და ვიღაცამ ძალიან გადააჭარბა თავის უფლებამოსილებას. მიუხედავად იმისა, რომ აქამდე თავის მართლების რეჟიმში იყო ხელისუფლება „რუსთავი 2“-თან მიმართებაში, რომ ის არ ერეოდა ამ პროცესში, ჩვენ ვერ დავინახეთ ხელისუფლების მხრიდან ისეთი ნაბიჯები, რომელიც ამ ეჭვებს გამორიცხავდა. იგივე სასამართლოს მოქმედებებთან დაკავშირებით, ბატონმა ივანიშვილმა წყალგამყოფი ხაზი გაავლო. ეს არის ერთადერთი შემთხვევა, რომელსაც აბსოლუტურად ვეთანხმები. თუ ვიღაცას გათვლილი ჰქონდა, რა მოჰყვებოდა მის ნაბიჯებს, მაშინ მას სწორად უნდა გაეთვალა, ივანიშვილი კი ამბობს, მე რომ მათ ადგილზე ვყოფილიყავი, უკეთ გავთვლიდი და უკეთესი შედეგები დადგებოდაო. ასეთი მაღალი ინტერესის საქმის, ასეთი სწრაფ ტემპში სასამართლოს განხილვა და ასეთი გადაწყვეტილებების გამოტანა აგრესიული ტონალობით, ბუნებრივია, აჩენდა აზრს, რომ ეს იყო ვიღაცისგან ინდულგირებული, – მიდი, შენ გააკეთე და ხმას ვერავინ ამოიღებსო. მაგრამ ხომ ხედავთ, ივანიშვილმა ხმა ამოიღო, ეს იმას ნიშნავს, რომ ამ საქმის რევიზია უნდა გაკეთდეს.
მივესალმები ივანიშვილის ამ ტიპის განცხადებებს, ახლა ვთხოვ პირადად მას, თავად მოახდინოს რეაგირება და მოითხოვოს იმ ადამიანების პასუხისმგებლობა, ვინც უდიერად ეპყრობა სამართალს. როგორც ჩანს, ახლა ის არკვევს, ვინ ჩაერია ამ საქმეში. ვისი ინტერესი იყო „რუსთავი 2“-თან დაწყებული სამართლებრივი დავა. ჩვენ ვხედავთ, რომ ბიძინა ივანიშვილს უნდა საზოგადოებამდე ინფორმაციის მიტანა, რომ მისი ხელი ამ პროცესში არ ურევია, რადგან მან თქვა, – მე რომ ვყოფილიყავი ამ საქმეში, უკეთ გავაკეთებდიო. ამ განცხადებებში ამოკითხულია პროტესტის ნიშანი, შესაძლოა, თავის დროზე ვინმემ უთხრა ივანიშვილს, ამ ნაძირალა სააკაშვილს „რუსთავი 2“-ს წავართმევო, მაგრამ დაინახა დაუკრეფავში გადავიდნენ და მის ხელისუფლებას ამით ზიანი მიადგა.
ბუნებრივია, ამ საკითხს ისე არ დატოვებს, ის ჩაერია პროცესში და მოითხოვს იმ ხალხის დასჯას, ვინც უმტკიცებდა, რომ ნაძირალა სააკაშვილს „რუსთავი 2“-ს ისე წაართმევდა, ამას ხელისუფლების იმიჯი არ შეეწირებოდა. როცა ქონების დაბრუნების ეგიდით გამოდიხარ და ქიბარ ხალვაშს უბრუნებ ქონებას, ჯერ ცხონებული ზვიად ცეცხლაძის ოჯახისთვის დაებრუნებინა იმავე ქიბარ ხალვაშს წართმეული ქონება, რაშიც ფული არ გადაუხდია და მერე მოეთხოვა თავისი სამართლიანობის აღდგენა. ბიძინა ივანიშვილი კარგად იცნობდა ბიზნესმენ ზვიად ცეცხლაძეს, კარგი ურთიერთობებიც ჰქონდა და პატივსაც სცემდა და ახლა როგორ, ქიბარ ხალვაში აღმოჩნდა პატიოსანი ბიზნესმენი და წინა ხელისუფლებისგან დაჩაგრული?!. ახლა გაიგო ეს ამბავი და ქიბარ ხალვაში სააკაშვილის რეჟიმისგან დაჩაგრული კი არ იყო, არამედ ის იყო იმ რეჟიმის ჯიბის ბიზნესმენი, რომელიც თვითონ „ახევდა“ სხვებს ბიზნესებს.
- თქვენ როგორ ფიქრობთ, ვინ დაისჯება ამის გამო, მოსამართლე ურთმელიძე თუ ვინმე ხელისუფლებიდან, თუ მთლიანად ხელისუფლება გადაჰყვება ამას?
- ვინც ხელისუფლება დაარწმუნა, რომ ამ საქმეს მოიგებდა, „ნაციონალებს“ სუფთად აახევდა „რუსთავი-2“-ს, ის დაისჯება. თქვენ ხედავთ, „რუსთავი 2“ არ გადავიდა ახალი მესაკუთრის ხელში, ეს საკითხი სულ მცირე წელიწად-ნახევარი გაიწელება და ამასობაში არჩევნები დასრულდება, „რუსთავი 2“-ს ვერ გამოაცლიან „ნაციონალურ მოძრაობას“. თუ ტექნიკურად და უფრო ჭკვიანად მოიქცეოდნენ, რა თქმა უნდა, კარგი იდეა იყო, მაგრამ დღეს უკვე ვხედავთ, რომ ამ თემამ ბინძური სახე მიიღო. პირდაპირ გეტყვით, რომ ამ საქმის გამო ვიღაცა აუცილებლად დაისჯება, ეს არ მოხდება პირდაპირ ვინმეს დაჭერით, დააკვირდით მოვლენებს, უცბად თითქოს ვიღაც ავად გახდება, ამის გამო თანამდებობიდან გადადგება და აი, სწორედ ის იქნება დასჯილი ამ საქმის გამო.
- ივანიშვილმა, ასევე, შეაფასა უცხოელების კრიტიკა და თქვა, რომ უამრავი უმეცარი განცხადება აქვთ გაკეთებული, თუმცა ეს არ ნიშნავს, რომ საქართველოს მთავრობამ ყურად არ იღოს და ჟურნალისტის კითხვას, რა გავლენა ექნება პირადად ივანიშვილზე უცხოელების კრიტიკას, უპასუხა, ტყუილად ელოდებიან, რომ მას ვინმე დასჯის, რადგან დანაშაული არ ჩაუდენია…
- თქვენ ნახეთ, რომ ივანიშვილი თავდაცვის რეჟიმში გადაიყვანეს, ეს ნიშნავს, რომ ის უკვე წაგებულ თამაშშია. აი, ამას მიაღწია დასავლეთმა და „ნაციონალურმა მოძრაობამ“. ბიძინა ივანიშვილი ყველაზეა გაბრაზებული, განსაკუთრებით მის გუნდზე, გაბრაზების მიზეზი კი მას ნამდვილად აქვს, ეს ამბები მარტივად არ ჩაივლის და ვინც პოლიტიკოსია გუნდში, ის თავის სვლებს გააკეთებს. ფაქტია, „რესპუბლიკელები“ ვაჭრობენ და ეს პროცესები დიდი ხანია მიდის, განსაკუთრებით მას შემდეგ, რაც ირაკლი ალასანიამ და „თავისუფალმა დემოკრატებმა“ დატოვეს კოალიცია. თუმცა ისინი არიან შემდგარი პოლიტიკოსები, ინტელექტუალური ძალა და გასაკვირი სულაც არ არის, რომ ვაჭრობენ. გასაკვირი სულაც არ არის ის ამბავი, რომ „რესპუბლიკელები“ ასე იქცევიან, მე ის მიკვირს, აქამდე როგორ მოიტანა „კოალიციამ“ თავი და რომ არა „ნაციონალური მოძრაობა“, როგორც ძირითადი ოპოზიცია, და მათ ადგილას სხვა ოპოზიციური ძალა გვენახა, დამერწმუნეთ, თავს ვერ შეინახავდა კოალიცია „ქართული ოცნება“, ეს ხელისუფლება აქამდე ჩამოშლილი იქნებოდა. ნებისმიერი ძლიერი ოპოზიცია ამ ხელისუფლებას სახლში გაუშვებდა.
_ როგორ ფიქრობთ, გახდება თუ არა მთავარი ოპოზიციური ძალა „პატრიოტთა ალიანსი“ და ჩაანაცვლებს თუ არა ის „ნაცმოძრაობას“? ბიძინა ივანიშვილმა თქვა, რომ ირმა ინაშვილმა საგარეჯოს არჩევნებზე მოლოდინს გადააჭარბა, არ ეგონა, რომ ასეთ ძლიერ კონკურენციას გაუწევდა „ოცნების“ კანდიდატს და მას შიმშილობის შეწყვეტისკენ მოუწოდა. რას ფიქრობთ ამ განცხადებაზე?
- ივანიშვილმა დაახლოებით ორი კვირის წინ განაცხადა, რომ მას ჭარბი ნდობა აქვს საზოგადოების, ხოლო შუალედურმა არჩევნებმა ბიძინა ივანიშვილი დააფიქრა, რომ საქმე მთლად ასე არ არის, მას სწორად არ ჰქონდა რეალობა შეფასებული, თუ არ იბრძოლე, რეიტინგი არ გაქვს და მან ეს უკვე აღიარა. ივანიშვილმა ლოგიკურ კითხვას უპასუხა, რომ არც ისეა საქმე, როგორც თავად ჰგონია, ამიტომ საჭიროა, ხელისუფლებამ ყურები გამოიფერთხოს და იბრძოლოს, მეტი გააკეთოს. ივანიშვილმა თქვა, რომ ის ეკონომიკურ გუნდთან ძალიან აქტიურად მუშაობს და მისი წინა განცხადებებიდან განსხვავებით, ისიც თქვა, რომ ლარის დევალვაცია აღელვებს და თქვა, რომ არ გამოვრიცხავ პირადად დავეხმარო იმ კრედიტორებს, რომლებიც ლარის კურსის გამო დაზარალდნენო. ეს განცხადებები არის იმის მცდელობა, რომ ივანიშვილი ისევ მხსნელად გამოჩნდეს. თუ მან საკუთარი დიდი ფული არ დახარჯა, სხვანაირად არაფერი გამოვა, მან უნდა აღიდგინოს ის ავტორიტეტი, რაც მოსახლეობაში ჰქონდა.
ბუნებრივია, რა ავტორიტეტიც მას 2012 წელს ჰქონდა, ის აღარ დაუბრუნდება, მაგრამ შუალედურმა არჩევნებმა საფრთხის წინაშე დააყენა. მან მოუწოდა ამომრჩევლებს, მხარი დაეჭირათ კოალიციის კანდიდატისთვის, მაგრამ ხალხმა არ მოუსმინა, ამით მიხვდა, რომ მას ჭარბი ავტორიტეტი არ აქვს, ვიღაცა ატყუებდა, რომ ძალიან დიდი ავტორიტეტი აქვს და მისი სიტყვა გადამწყვეტია, მაგრამ საკუთარი თვალით ნახა, რომ თურმე ასე არ არის. ამიტომ ის იწყებს აქტიურ ქმედებას, მისივე რეიტინგშია პრობლემა, პარტიას რომ რეიტინგი არ აქვს, თვითონაც კარგად იცის, ამიტომ უნდა თუ არა, პირდაპირ მოქმედებაზე უნდა გადავიდეს. რეფორმები, ხალხისთვის იმედის ჩასახვა, შედეგები, ეს ყველაფერი ერთობლიობაშია, მაგრამ, თუ პროცესებს თვითონ ჩაუდგება სათავეში, ბუნებრივია, ამის მიხედვით მოხდება ბევრი რამის გადაწყობა. საარჩევნო ტექნოლოგიას აქვს სულ სამი კომპონენტი – ფული, კარგი პარტიული ორგანიზაცია და ტელევიზია. ეს აქვს ორივე ძალას – „ნაცმოძრაობასაც“ და „ქართულ ოცნებასაც“, მაგრამ ბიძინა ივანიშვილს „ნაციონალებისგან“ განსხვავებით, კარგი ტელევიზია არ აქვს, ამ მხრივ, უპირატესობა „ნაცების“ მხარესაა (რომც ჰქონდეს „ოცნებას“ უკეთესი ტელევიზია, რას უზამს „რუსთავი-2“-ის გავრცელებულ იმ ფაქტებს, რასაც მოსახლეობა „რუსთავი-2“-ის გარეშეც ხედავს? – რედ.) პლუს ამას არის პარტიები, რომლებიც 5%-იან ბარიერს გადალახავენ – „პატრიოტთა ალიანსი“. „ბურჯანაძე“, „ალასანია“, „ნათელაშვილი“. ასე რომ, ექვსი სუბიექტი გამოდის სერიოზულ მოთამაშედ. ივანიშვილს რომ ეგონა, უმრავლესობა ჩემს ხელშიაო, ეს უკვე კითხვის ნიშნის ქვეშ დადგა, ან არის მის ხელში და ან არა… ამიტომ ეს მოცემულობა ივანიშვილს აიძულებს, პირადად შემოვიდეს პოლიტიკაში და საკუთარ თავზე აიღოს პროცესები.
- დაბოლოს, ივანიშვილის პრობლემად პრეზიდენტ მარგველაშვილის ავლაბრის რეზიდენციიდან გამოყვანის თემა ისევ რჩება. სამართლებრივი მექანიზმების ამუშავებისკენ მოუწოდებს ხელისუფლებას. რა სამართლებრივი ბერკეტი არსებობს პრეზიდენტის ავლაბრის რეზიდენციიდან გამოყვანისა და რა რეაქცია ექნება საერთაშორისო საზოგადოებას?
- თუ მთავრობა გამოიტანს დადგენილებას, რომ გამოსახლებული იქნას პრეზიდენტი ავლაბრის რეზიდენციიდან, მერწმუნეთ, ეს იქნება უარესი სკანდალი, ვიდრე „რუსთავი-2“-ის. პრეზიდენტის გამოსახლება სამართლებრივად ასე იქნება: მთავრობა ადგენს, სად უნდა განთავსდეს პრეზიდენტი, თუკი ათონელზე არ გადავიდა გიორგი მარგველაშვილი, მიმართავენ სასამართლოს და სასამართლო გადაწყვეტს პრეზიდენტის გამოსახლების საკითხს. თუ სასამართლოს განჩინებას არ დაემორჩილება პრეზიდენტი, სააღსრულებო ბიურო ჩაერთვება საქმეში და იძულებით გამოასახლებენ.
„ახალი თაობა“, 11 ნოემბერი, 2015 წელი
ინტერვიუ ვალერი გელბახიანთან: „ხელისუფლება მოშიმშილეებს უნდა დაელაპარაკოს.. „რუსთავი 2“-ის ამბები შეიწირავს მთავრობას“
მარიამ მჭედლიშვილი
საქართველოში სამართლიან არჩევნებს და ნორმალურ საარჩევნო გარემოს ოპოზიციური პარტიები წლებია, მოითხოვენ. ეს მოთხოვნა ბოლო დროს გამძაფრდა, პროტესტმა კი შიმშილობის აქციის ფორმა მიიღო. შუალედური არჩევნების შემდეგ, რომელიც 31 ოქტომბერს გაიმართა, საარჩევნო გარემოს გაუმჯობესების და სხვა მოთხოვნებით მთავრობის ადმინისტრაციასთან შიმშილობა დაიწყეს საქართველოს პატრიოტთა ალიანსის ლიდერებმა.
პროტესტის უკიდურესი ფორმის გამოყენებას საგანგაშოს უწოდებს ყოფილი დეპუტატი, იურისტი ვალერი გელბახიანი. „როდესაც პოლიტიკოსები იწყებენ შიმშილობას პროტესტის ნიშნად, ეს ყოველთვის საგანგაშოა. მით უმეტეს, როცა საქმე ეხება სამართლიანი არჩევნების მოთხოვნას. ასეთ დროს პროტესტი ექცევა მსოფლიოს ყურადღების ცენტრში“, – განუცხადა „ახალ თაობას“ ვალერი გელბახიანმა.
- ხელისუფლებამ ამაზე რეაგირება უნდა მოახდინოს?
- რა თქმა უნდა, და რაც შეიძლება მალე. ნორმალური არჩევნები და ხმების დაცვა არ არის განყენებული მოვლენა, რომელიც საზოგადოებას არ აინტერესებს. ესაა ხალხის არჩევანის უფლება. ადამიანებს უფლება აქვთ აირჩიონ ის, ვინც უნდათ. არჩევნები არ უნდა ყალბდებოდეს. ისეთი სიტუაციაა, როცა ხელისუფლების ინტერესი წინააღმდეგობაშია ხალხის მოთხოვნებთან. ამ ვითარებაში ხელისუფლებამ დიალოგი უნდა დაიწყოს აქციის მონაწილეებთან. სამართლიანი არჩევნების თემა აწუხებს ყველა პარტიას, მთელ საზოგადოებას. ადრე თუ გვიან, ხელისუფლებას მოუწევს დათმობაზე წასვლა. ამიტომ, ჯობია, დიალოგი ახლავე დაიწყოს. პროტესტის უკიდურესი ფორმა, შიმშილობა, დიალოგში უნდა გადაიზარდოს.
- საარჩევნო რეფორმა აქამდე უნდა განხორციელებულიყო?
- ეს იყო აუცილებელი. ხელისუფლება რომ ამაზე არ წავიდა, ამით საკუთარ თავს მიაყენა ზიანი. ეტყობა, იმედი ჰქონდათ, რომ საარჩევნო პროცესებს გააკონტროლებდნენ. მიიღეს უკუშედეგი. საარჩევნო რეფორმას ყველა მოითხოვს. პროტესტმა შეიძლება ფართო ხასიათი მიიღოს და მასობრივი გახდეს.
- მსოფლიოს ყურადღების ცენტრში ტელეკომპანია „რუსთავი-2“-ის გარშემო მიმდინარე მოვლენებიც მოექცა.
- ხელისუფლება ძალიან მოუმზადებელი შეხვდა ამ პროცესებს. ვერ გააცნობიერა, რომ „რუსთავი-2“ ინდუსტრიული და გავლენიანი ტელეკომპანიაა. ესაა დომინანტი მედიასივრცეში. ქიბარ ხალვაშის დავამ წილებზე თავიდანვე გააჩინა კითხვები და ეჭვები.
- რას გულისხმობთ?
- თავიდანვე უცნაური იყო მისი საქმის წარმოებაში მიღება სასამართლოში იმ დროს, როცა სხვა მოდავეებს და სამართლიანობის აღდგენის მსურველებს ეს არ შეუძლიათ. რომ მიეღოთ სპეციალური კანონი ხანდაზმულობის ვადებთან დაკავშირებით, სხვა საქმე იქნებოდა. იურისტებში ეჭვები გააჩინა იმანაც, რომ სამოქალაქო დავა ფაქტობრივად გადაიზარდა სამეწარმეო დავაში. ეს ადამიანებს აფიქრებინებს, რომ აქ არის ხელისუფლების დაინტერესება. ხელისუფლებამ თვითონაც გააჩინა კითხვები იმით, რომ გამჭვირვალობის და სიცხადის შეტანის ნაცვლად, დაიწყო თავის მართლება. პრაქტიკულად, ხელისუფლებამ აიკიდა ეს პრობლემა.
- არსებობს მოსაზრება, რომ რუსთავი 2-ის ამბებს მთავრობაში რამდენიმე პირი შეეწირება.
- ალბათ, ამას მთავრობა შეეწირება. ეს საერთაშორისო ზეწოლით მოხდება. ყველას გვახსოვს 2007 წლის მოვლენები და სააკაშვილის რაზმების შევარდნა ტელეკომპანია იმედში. ძლიერი პოზიციების მქონე სააკაშვილი მაშინ აიძულეს, გადამდგარიყო. ახლა დარბევა არ მომხდარა, სხვა მოვლენებია, მაგრამ უცხოეთში საუბარია იმაზე, რომ ხელისუფლება ერევა თავისუფალი მედიის საქმიანობაში. ამიტომ, რეაქცია მკაცრია. ვფიქრობ, ეს არხი 2016 წლის არჩევნებამდე თავს შეინარჩუნებს.
„ვერსია“, 11 ნოემბერი, 2015 წელი
ინტერვიუ „პატრიოტთა კავშირის“ წევრებთან: „თუ ნაციონალები ფეხებქვეშ გაგვებლანდებიან, იქვე დარჩებიან!“ // არსებობს თუ არა პატრიოტთა ალიანსისა და ნაციონალთა აქციების გადაკვეთისა და სამოქალაქო დაპირისპირების საფრთხე
ნინო კომახიძე
„შიმშილობა 2015“-ის სეზონი გახსნილია: მეოთხე დღეა, მთავრობის კანცელარიასთან პატრიოტთა ალიანსის წევრები – ირმა ინაშვილი, ემზარ კვიციანი, ადა მარშანია, ლევან თედიაშვილი და გიორგი ლომია ორნაწილიანი მოთხოვნით შიმშილობენ: 1. საგარეჯოში არჩევნების გაყალბების გამო, გადადგნენ თავდაცვისა და გარემოს დაცვის მინისტრები – თინა ხიდაშელი და გიგლა აგულაშვილი, გაყალბების ფაქტზე კი სისხლის სამართლის საქმე აღიძრას; 2. შეიცვალოს საარჩევნო კოდექსი და კონსტიტუციის შესაბამისი მუხლები. შიმშილობის დაწყებამდე, 8 ნოემბერს, პატრიოტთა ალიანსმა რუსთაველის ძეგლიდან კანცელარიამდე, დიდი ტრანფსარანტით, აქცია-მსვლელობა მოაწყო. ეს ტრანსფარანტი დღესაც კანცელარიის ეზოში ისე უდევთ, რომ პრემიერ-მინისტრმა, მესამე სართულიდან გადმოხედვისას, კარგად დაინახოს.
როგორც მოშიმშილეები ირწმუნებიან, აქცია უვადო იქნება და მოთხოვნების შესრულებამდე არ დასრულდება. მოშიმშილეები კი ერთმანეთს ჩაენაცვლებიან, რადგან საარჩევნო კოდექსისთვის ჯანმრთელობის შეწირვას არავინ აპირებს. ვინ იცის, რამდენი ასეთი აქცია გვინახავს ქუჩასა თუ პარლამენტის დარბაზებში, მაგრამ ოპოზიციისთვის აშკარად ცუდი დრო მოვიდა – თუკი ადრე ახალმა მემარჯვენეებმა პარლამენტის მაშინდელი სპიკერის, ნინო ბურჯანაძის ოთახთან 16 დღე სწორედ საარჩევნო მოთხოვნებით იშიმშილეს და მისგან პლედი და ერთი- ორი თბილი სიტყვაც ვერ მიიღეს, დღეს ღია ცისქვეშ, მჯდომარე აქციის მონაწილეებს, თურმე, კარვის კი არა, დიდი ქოლგის გაშლაც ეკრძალებათ. შიმშილობის აქციები იყო 2009 წელსაც, „კარვების ქალაქში“, 2011-შიც, მაისის ცნობილი აქციების დროს, მაგრამ ყველა მათგანი უშედეგოდ დასრულდა. ისე, დღევანდელ მოშიმშილეებს ბრალდებათა მთავარი ადრესატი, მინისტრი თინა ხიდაშელი სკეპტიკურად გამოეხმაურა, სასამართლოში შეტანილი საარჩევნო დავების დასრულებამდე მაინც დაეცადათ და აქციები მერე დაეწყოთო.
რა მიზანი აქვს ისეთ ბრძოლას, რომელიც წინასწარგანწირულია დამარცხებისთვის? რისი იმედი აქვს პატრიოტთა ალიანსს და რატომ მიმართავს პროტესტის ამ ერთ-ერთ უკიდურეს ფორმას? – ეს კითხვები კანცელარიასთან მჯდომ ადა მარშანიას დავუსვით.
„როდემდე უნდა იყოს ბრძოლის ყველა ხერხი და მეთოდი უშედეგო, როდემდე უნდა ვიაროთ ტრაგიკულ, მოჯადოებულ წრეზე და როდემდე ვითმინოთ, როგორ იყენებს ყველა ახალი ხელისუფლება ყველა ბერკეტს, კანონიერ და უკანონო წესებს მთავრობასა და პარლამენტში მისთვის სასურველი ხალხის დასასმელად? მხოლოდ ჩვენი ბრძოლისა და ჩვენი თავის იმედი გვაქვს. რაკი დავიწყეთ, ამ საქმეს ბოლომდე მივყვებით და მალე ამ ბრძოლაში სხვა მეთოდებიც შევა – შიმშილობის არეალი გაფართოვდება და ,,ქართულ ოცნებას” ვუჩვენებთ, რას ნიშნავს ნამდვილი ბრძოლა. „ოცნების“ ნამუსზე აგდების იმედი არ გვაქვს, უბრალოდ, გვინდა, ხელისუფლების ჩვენი ძალა ვაჩვენოთ.
„დავიღალეთ და დავიშალეთ“ აღარ იქნება! მინისტრები სამაგალითოდ უნდა დაისაჯონ და მათ წინააღმდეგ სისხლის სამართლის საქმეები აღიძრას. ვთქვათ, მოხდა სასწაული, საარჩევნო დავები ირმამ მოიგო და დეპუტატი გახდა, ამის მიუხედავად, 2016 წლის არჩევნების ბედი ხომ უკვე გასაგებია?! „ოცნებას“ 2020 წლამდე ტოტალური კონტროლის დაწესება სურს, რათა მერე, შეცვლილი კოდექსითაც კი გაიმარჯვოს. ეს ხელისუფლება უკვე აღარ ვარგა და ერთი წლის შემდეგ, აღარ უნდა იყოს ქვეყნის სათავეში. ამ შუალედურმა არჩევნებმა ქვეყანაში არსებული ტრაგიკული ვითარება ბოლომდე გააშიშვლა და ძალიან კარგი ვქენით, ბოიკოტი რომ არ გამოვაცხადეთ. უკანონო კანონების შეცვლა თუ არ გვინდა, აბა, რა გვინდა, ისევ რევოლუციები და გადატრიალებები, რომ მერე გვითხრან, უკანონოდ მოიქეცითო? ვიცი, ბევრს სკეპტიკური განწყობა აქვს, მაგრამ ეს იმიტომ, რომ წინა წლებში ოპოზიციის აქციებს ღალატი ღუპავდა, საქმე ბოლომდე არავის მიჰყავდა. პოლიტიკური სპექტრი არ უვარგა საქართველოს… ვიდრე გავუძლებთ, ჩვენ ვიშიმშილებთ, მერე შეგვცვლიან. სხვა ვინ, თუ არა ჩვენ?!“
შიმშილობაში კოდორის ხეობის ყოფილი რწმუნებული ემზარ კვიციანიც ჩაება. ალბათ, მისი პოლიტიკური ბეგრაუნდი ყველასთვის ცნობილია და ამიტომაც გაჩნდა კითხვები, განსაკუთრებით, ოპონენტთა ბანაკიდან: რისთვის ემზადება კვიციანი? არის თუ არა შიმშილობის დაწყება, წინასაარჩევნოდ, პროცესების ქუჩაში გადატანისა და ესკალაციის მცდელობა და როგორია პატრიოტთა ალიანსის გეგმა ,,ბე”, თუკი შიმშილობის პერმანენტულმა აქციებმა არ გაამართლა, ამ კითხვებით ემზარ კვიციანს მივმართეთ:
„შიმშილობა შედეგს აუცილებლად გამოიღებს. ის წინა, წარუმატებელი აქციები ჩვენ არ ჩაგვიტარებია და ამიტომაც დასრულდა უშედეგოდ. პატრიოტთა ალიანსში გაწევრიანებული განსხვავებული ხალხი ვართ და ეროვნულ, პატრიოტულ გზას მივყვებით. დესტაბილიზაცია რომ მინდოდეს, აქ რატომ ვიჯდებოდი და რა ჯანდაბად ვიშიმშილებდი? ეგ გეგმა რომ გვქონოდა, 8 ნოემბერს, როცა ერთ დაძახილზე ქუჩაში 20 000 კაცი გამოვიყვანეთ, დესტაბილიზაციას რატომ ვერ მოვაწყობდით? ნახეთ, აქ როგორ ვშიმშილობთ, სუფთად და კოხტად, თორემ გამოვიდოდით „მოლოტოვის კოქტეილებით“ და არეულობას მოვაწყობდით, მაგრამ ეს არ გვსურს! აი, ასე, სუფთად გვინდა გამარჯვება. რესპუბლიკელებო ხომ სულ დემოკრატიაზე გვმოძღვრავდნენ, დღეს კი ჩვენ ვიცავთ დემოკრატიას რესპუბლიკელებისგან“.
მაშინ, როცა ქალაქში დაძაბულობის კიდევ ერთი კერა არსებობს, რომელსაც მოწინააღმდეგე ბანაკი „რუსთავი 2“-ის ეზოში ამაგრებს, რამდენად მართებულია, მეორე, პერმანენტული აქციის გამართვა და არსებობს თუ არა საფრთხე, რომ ეს ორი ბანაკი – პატრიოტთა ალიანსი და ნაციონალური მოძრაობა ერთმანეთს ფიზიკურადაც დაუპირისპირდეს? მით უმეტეს, არსებობს 90-იანი წლების გამოცდილება, როცა ქალაქში რამდენიმე ძალა ერთდროულად თარეშობდა და დღემდე სადავოა, პირველად ვინ გაისროლა. მოკლედ, მიდის თუ არა პოლიტიკური პროცესი სამოქალაქო არეულობისკენ? – ამ საფრთხეს ემზარ კვიციანი სერიოზულად არ უყურებს, თუმცა აცხადებს, რომ ვინც ფეხქვეშ გაებლანდება, იქვე დარჩება:
„ახლა „რუსთავი 2“-ის „დეყალბიზაციის“ პროცესი მიდის. ეს არხი არ უნდა დაიხუროს, მაგრამ დღეს რა სიყალბესაც ანთხევს, ასეც არ შეიძლება. მართლა გაფუჭებული და გატუტუცებული ტელევიზიაა, თუმცა ეს აქციები არ გადაიკვეთება, რადგან ისინი არავინ არიან და არაფერს წარმოადგენენ. ჩვენ მათ არ ვამჩნევთ და არ ვიმჩნევთ, მაგრამ თუ სადმე ფეხებქვეშ გაგვებლანდებიან, იქვე, ფეხებქვეშ დარჩებიან“.
პროვოკაციებს საფრთხეს ვერც ამ აქციის და პატრიოტთა ალიანსის ლიდერი ირმა ინაშვილი ხედავს, თუმცა გართულებების შემთხვევაში, კანცელარიასთან მობილიზებული პოლიციის იმედი აქვს. აცხადებს, რომ პირველად შიმშილობს და პროტესტის ამ უკიდურესი ფორმისთვის თვით მიხეილ სააკაშვილის ხელისუფლების დროსაც არ მიუმართავს, დღეს კი, ჩვენს ირგვლივ ყრუ კედელია, ჩემს წინააღმდეგ შუალედურ არჩევნებში ლამის ტანკი გამოიყვანეს, ამიტომ ამ მარაზმს ქვეყანაში, ერთხელ და სამუდამოდ, დავასრულებთო. ინაშვილი ხელისუფლებისგან გარანტიებს ითხოვს, რომ საარჩევნო კოდექსი არა 2020, არამედ 2016 წლამდე შეიცვალოს. წინააღმდეგ შემთხვევაში, პოლიტიკოსი ქალბატონი საქართველოს სხვადასხვა ქალაქში ასევე პერმანენტული შიმშილობის დაწყებით იმუქრება:
„ბავშვი არ ვარ და მესმის, ერთჯერადი მოთხოვნით მინისტრებს არ გადააყენებენ, მაგრამ ხელისუფლებას ვარწმუნებ, ეს მოთხოვნები მთელ საქართველოს მოედება. შიმშილობა უკვე დაიწყო საგარეჯოში, მალე ბათუმიდან, ზუგდიდიდან, მარტვილიდანაც შემოგვიერთდებიან. ერთ დღეში ვერა, მაგრამ ცოტა ხანში იმასაც მივაღწევთ, რომ არჩევნების გამყალბებელ მინისტრებს გადააყენებენ. მშვიდობიანი გზებისა და მეთოდების გამოყენების მომხრე ვართ და ერთი მხრივ, სამართლებრივ, მეორე მხრივ, სამოქალაქო აქტივობის ხერხებს მივმართავთ. ვიცი, არავინ ელოდა, რომ 8 ნოემბრის აქციაზე ამდენი ხალხი მოვიდოდა, თუმცა ამ მასშტაბური მანიფესტაციის მონაწილე ხალხმა ერთად უთხრა უარი გამყალბებელ ხელისუფლებას. ახლა უკვე ხელისუფლებაზეა დამოკიდებული, რა რეაგირება ექნება და თუ რეაგირება საერთოდ არ ექნება, თავის თავს დააბრალოს. ხელისუფლება, რომელიც თავისი ხალხისგან იზოლაციაში ექცევა, ძალიან ცუდად ამთავრებს და ეს უკვე გვინახავს. რაც შეეხება პარალელურ აქციას, არ მგონია, მათთან გადავიკვეთოთ, რადგან ეს ორი სრულიად სხვადასხვა პოლიტიკური ორგანიზაციაა, თანაც, ვნახეთ, ნაცების ორგანიზებულ კონცერტზე 300 კაცი ძლივს მივიდა. ნაციონალები იშლებიან და მათ ამ გზაზე წარმატებას ვუსურვებთ, თუმცა აქ რომც მოვიდნენ, აგერ, პოლიცია დგას და დაარეგულიროს ვითარება, რომ შეხლა- შემოხლა არ მოხდეს. ჩვენ აქ ყველა წესისა და კანონის დაცვით ვდგავართ და არალეგიტიმურსაც არაფერს ვითხოვთ, ამიტომ, თუ ვინმე მოვა და რამეს დააშავებს, პატრულმა მიხედოს და დააკავოს“.
მოშიმშილეებთან სოლიდარობის გამოსახატად ჯერჯერობით მათი მხარდამჭერების მცირე ნაწილი მიდის. ორი დღის წინ კი აქციას სოლიდარობა წარსულში ამავე თემაზე მოშიმშილე მამუკა კაციტაძემ გამოუცხადა. სხვათა შორის, კაციტაძემ და ინტერპარტიული ჯგუფის სხვა წევრებმა 200 000 ხელმოწერა უკვე შეაგროვეს და პარლამენტში სწორედ ამ დღეებში შეიტანეს, საარჩევნო კანონმდებლობის გადახედვის მოთხოვნით. ჰოდა, „ოცნებას“ ერთი ვადის მშვიდობიანად ჩასამთავრებლად დაფიქრება მართებს, რადგან ქალაქში პერმანენტული აქციების არაერთი საპროტესტო კერაა, რადიკალური თუ „ზომიერი“ ძალები კი შიმშილობენ და ხელმოწერებს აგროვებენ.
„ახალი თაობა“, 11 ნოემბერი, 2015 წელი
ინტერვიუ ზაალ კასრელიშვილთან: „დაშლის პირას მისული „გაზპრომ“-ის გამო აზერბაიჯანის განაწყენება არ ღირს“
შორენა მარსაგიშვილი
რა შემთხვევაში დატოვებენ რესპუბლიკელები „ქართულ ოცნებას“, რატომ არ ღირს გაზპრომთან დიალოგი, რატომ არ უნდა ვაწყენინოთ აზერბაიჯანს, რა ბრძანებას ელოდებიან პრორუსული და პროდასავლური ძალები? – ამის შესახებ „ახალ თაობას“ კავკასიის ხალხთა კონფედერაციის პრეზიდენტი ზაალ კასრელიშვილი ესაუბრება.
ზაალ კასრელიშვილი:
- ძალიან მალე გიორგი მარგველაშვილი და „თავისუფალი დემოკრატები“ „ნაციონალებთან“ ერთად ოფიციალურად გააფორმებენ ალიანსს. მათ შესაძლო თანამშრომლობაზე საუბარი ჩვენ ჯერ კიდევ ორი წლის წინ დავიწყეთ, ზოგიერთმა ფსევდო პოლიტიკოსმა ეს არ დაიჯერა, სხვებმა მოტივი ვერ დაინახეს, თუ რატომ უნდა მომხდარიყო მათი გაერთიანება. საქართველოში მოქმედი პოლიტიკური ორგანიზაციები ქვეყნის გარედან იკვებებიან როგორც ფინანსურად, ასევე იდეოლოგიურად. ისინი უცხო ქვეყნის სპეცსამსახურების ინტერესებს წარმოადგენენ, გადაწყვეტილების მიღების დროს დამოუკიდებლები არ არიან და იმას გააკეთებენ, რასაც უბრძანებენ.
- ამით იმის თქმა გინდათ, რომ ამათი გაერთიანება სხვების კარნახით მოხდება?
- არჩევნებამდე რამდენიმე თვით ადრე, სავარაუდოდ, აღდგომისთვის, კოალიციების ჩამოყალიბების პროცესი საბოლოოდ გადაწყვეტილია. უნდათ თუ არა მარგველაშვილს, ნაციონალებს და ირაკლი ალასანიას გაერთიანება, ეს მათ პატრონებს არ აინტერესებთ. ისინი ეტყვიან, რომ უნდა გაერთიანდნენ და ესენიც გაერთიანდებიან.
- ადრე თქვენ ამ შესაძლო ალიანსში რესპუბლიკელებსაც მოიაზრებდით, ახლა აღარ გიხსენებიათ. გამოგრჩათ, თუ მათ თავს რაიმე სხვა ხდება?
- რაღაცები შეიცვალა და ამ ეტაპზე არ გვგონია, რომ რესპუბლიკელები კოალიცია „ქართულ ოცნებას“ გაემიჯნონ. ოღონდ ეს მათი საბოლოო გადაწყვეტილება არ არის. „ქართული ოცნება“ თუ ხმამაღლა იტყვის, რომ ევროატლანტიკურ კურსს გადაუხვია, ამ შემთხვევაში მოხდება კოალიციიდან მათი წამოსვლა. ასე რომ, გიორგი მარგველაშვილის გარშემო მხოლოდ ნაციონალებს და თავისუფალ დემოკრატებს ვიხილავთ. ამ ძალებს შესაძლოა დიდად არ მოსწონთ მარგველაშვილი, მაგრამ ის დღეს მხოლოდ ერთი მიზეზით სჭირდებათ – ეს მისი სტატუსია. ამ ადამიანს არც საქართველოში და არც მის ფარგლებს გარეთ არ აქვს კავშირები და გავლენა. სამაგიეროდ, აქვს პრეზიდენტის სტატუსი. როდესაც დასავლეთში რაიმე მოვლენასთან დაკავშირებით საქართველოს პრეზიდენტს მოიხსენიებენ, არავინ კითხულობს, რა ავტორიტეტი აქვს მას თავის ქვეყანაში. მათთვის პრეზიდენტი უკვე სტატუსია და ევროპელებისთვის მისი განცხადება აღქმულია, როგორც მაღალი რანგის გადაწყვეტილება. ჩვენი აზრით, პროდასავლური ძალები რაც შეიძლება მალე უნდა გაერთიანდნენ.
- ამ ძალებს პროდასავლურად მიიჩნევთ, ჩვენთან ინტერვიუში არაერთხელ გითქვამთ, რომ ნაციონალები და ირაკლი ალასანია რუსეთის ინტერესებს ატარებდნენ ხშირად. რანაირად გამოდიან პროდასავლური ძალები?
- ჩვენ დანამდვილებით შეგვიძლია ვთქვათ, რომ პროდასავლურ ძალებში რუსეთის სპეცსამსახურების მიერ ჩანერგილი ადამიანები არიან. ასევე დარწმუნებით გეტყვით, რომ პრორუსულ პარტიებშიც არიან სხვადასხვა ქვეყნების სპეცსამსახურების აგენტები. ჩვენ ყურადღებას მარტო პრორუსულ და პროდასავლურ ძალებზე ვაკეთებთ, არადა საქართველოში და მთელს კავკასიაში გავლენის მოპოვება კიდევ რამდენიმე ქვეყანას სურს.
- რომელ ქვეყნებზე საუბრობთ?
- თურქეთი, ირანი. საქართველოს მიმართ სერიოზული ინტერესი გაუჩნდა ისლამურ სამყაროსაც. ისლამურ სახელმწიფოს არ ვგულისხმობ. ისლამური სამყარო დასავლეთით არის ძალიან დაინტერესებული და ეს ინტერესები კავკასიაზე გადის. ჩემი მოგონილია არაა, რომ ვინც კავკასიაშია ფეხმოკიდებული, ის დგას იმ პლაცდარმზე, საიდანაც ძალიან კარგად ჩანს როგორც აღმოსავლეთ-დასავლეთი, ასევე სამხრეთ-ჩრდილოეთი. საქართველოს მიმართ სერიოზული ინტერესი აქვს ისრაელსაც, ეს სახელმწიფო ისლამური სამყაროს შუაგულში მდებარეობს და 1947 წლიდან ებრძვის რადიკალურ ისლამს. ამ ბრძოლაში მყოფი ისრაელისთვის საქართველო გახლავთ როგორც ზურგი, ასევე პლაცდარმი. სხვა კორპორაციულ ინტერესებზე აღარ ვილაპარაკებთ.
- ზემოთ აღნიშნეთ, რომ რესპუბლიკელები გაემიჯნებიან კოალიციას, თუ ის ღიად შეცვლის საგარეო კურსს. „გაზპრომ“-თან მოლაპარაკებები არის თუ არა კურსის ცვლა? ექსპერტთა ნაწილი მიიჩნევს, რომ რუსულ გაზს თან რუსული ჩექმა მოსდევს.
- „გაზპრომ“-თან მოლაპარაკებების დაწყებას სხვა სიბრტყეში ვუყურებთ. რუსული გაზის შემოსვლა საქართველოში კონკურენციას გაუწევს ჩვენს სტრატეგიულ პარტნიორ აზერბაიჯანს, რისი მომხრეებიც ჩვენ არ ვართ.
- რატომ, კონკურენცია უკეთესი არ იქნება?
- გააჩნია, ვინ არის კონკურენტი. თანაც არ ღირს „გაზპრომ“-ის გამო ჩვენს მეგობრებთან ურთიერთობის გაფუჭება. გასული საუკუნის 90-იან წლებში აზერბაიჯანის იმჟამინდელმა ხელისუფლებამ სწორი პოზიცია დაიკავა და საქართველო სისხლისღვრისგან იხსნა, რისი დავიწყებაც არ შეიძლება.
- იქნებ დეტალურად გვითხრათ, რა სისხლისღვრა აგვაცილა ოფიციალურმა ბაქომ?
- არ ვიცი, იცის თუ არა თქვენმა მკითხველმა, მაგრამ კრემლის გეგმის თანახმად, აფხაზეთის ნაცვლად, დაპირისპირება ქვემო ქართლში უნდა მომხდარიყო. ამ პროცესებში ჩვენ აქტიურად ვიყავით ჩართული და ყველა დეტალი მახსოვს. ისიც კარგად ვიცი, რომ ერთმა ზარმა აგვაცილა სისხლისღვრა. საქართველოს ტერიტორიაზე უკვე მობილიზებული იყო 100-მდე ნიღბიანი მებრძოლი. ამ ადამიანებს ქვემო ქართლის ქართული მოსახლეობისთვის ცეცხლი უნდა გაეხსნათ. ისინი ღამით უნდა შესულიყვნენ ქართულ სოფლებში და მძინარე ხალხი გაეწყვიტათ. გეგმის თანახმად, ამის შემდეგ გავრცელდებოდა ინფორმაცია, რომ აზერბაიჯანი თავს დაესხა საქართველოს.
- ეს შეიარაღებული პირები ვინ იყვნენ?
- როგორც მოგვიანებით დავადგინეთ, მათ გაასაღებდნენ თურქული ორიენტაციის აზერბაიჯანელ მებრძოლებად. სინამდვილეში ისინი რუსი სპეცრაზმელები იყვნენ. გეგმაც რუსეთის მიერ იყო მოფიქრებული. როცა ამის შესახებ შეგვატყობინეს, სიმართლე გითხრათ, თავიდან არ დავიჯერეთ.
- რატომ არ დაიჯერეთ?
- იმ დროისთვის აზერბაიჯანსა და სომხეთს შორის უკვე დაწყებული იყო შეიარაღებული კონფლიქტი. ოფიციალურ ბაქოს საქართველოსთან სიტუაციის გამწვავება არც სამხედრო და არც პოლიტიკური თვალსაზრისით არ აწყობდა. ახალი ფრონტის გახსნა მათთვის ძალიან მძიმე იქნებოდა. სამაგიეროდ, ეს აწყობდა რუსეთს, მათ ქვემო ქართლში მოძებნეს პროვოკატორები და სერიოზული დაპირისპირება მზადდებოდა. იმ დროს ცხონებული მერაბ კოსტავა ჯერ კიდევ ცოცხალი იყო და ჩვენთან ქვემო ქართლში მცხოვრები ბევრი აზერბაიჯანელი მეგობრობდა. მოგვიანებით ამ ხალხს სასტიკად გაუსწორდნენ ის ძალები, რომლებიც ამ რეგიონში პროვოკაციის მოწყობას აპირებდნენ.
- დახოცეს?
- ცოცხალი მხოლოდ ორი მათგანი გადარჩა, დანარჩენები ფიზიკურად გაანადგურეს. ისინი სხვადასხვა დროს, საეჭვო ვითარებაში, ავტოავარიებში დაიღუპნენ.
- ისინი საქართველოში მცხოვრები აზერბაიჯანელები იყვნენ?
- დიახ, საქართველოში მცხოვრები ეთნიკური აზერბაიჯანელები იყვნენ, ინფორმაცია მათ მოგვაწოდეს და ამისთვის დიდი მადლობა მათ. როცა პირველად გვითხრეს ეს ამბავი, როგორც უკვე გითხარით, არ დავიჯერეთ. იმათ არ დაიშალეს და ამტკიცებდნენ, რომ რაღაც საშინელება იგეგმებოდა. იმასაც გვეუბნებოდნენ, რომ ამას აზერბაიჯანი არ ამზადებდა. თავისი რომ არ დაიშალეს, ვუთხარით, რომ რამენაირად დაემტკიცებინათ. ცოცხლად გადარჩენილებიდან ერთ-ერთმა დარეკა აზერბაიჯანის მაშინდელ პრეზიდენტ ელჩიბეისთან და ყველაფერი უთხრა.
- ეს ადამიანი ასე ახლოს იცნობდა პრეზიდენტს, რომ დაურეკა?
- ძალიან კარგად იცნობდა. ეს ადამიანი აზერბაიჯანის გათავისუფლებისთვის იბრძოდა. მისი ორი ბიძა რუსებმა ბაქოს სისხლიანი მოვლენების დროს მოკლეს, ისინი გმირების პანთეონში არიან დაკრძალული. ელჩიბეიმ ჩვენი მეგობრის ზარზე სასწრაფო რეაგირება მოახდინა. მან გადმორეკა იმ რაიონების ხელმძღვანელებთან, რომლებიც საქართველოს ესაზღვრებოდა. პრეზიდენტმა ისინი კატეგორიულად გააფრთხილა და უთხრა, ყველა ის ადამიანი, ვინც საქართველოს და ქართველების წინააღმდეგ წავა, არის რუსეთის აგენტი და სასტიკად დაისჯებაო. ამ სატელეფონო საუბრიდან რამდენიმე დღეში სიტუაცია განიმუხტა და საქართველო მაშინ სისხლისღვრას გადაურჩა. ქვემო ქართლშიც იყვნენ პროვოკატორები, ვინც საქართველოდან გამოყოფას ითხოვდა. რუსეთი მათი გამოყენებით ცდილობდა დაპირისპირების კერის შექმნას. რაც ქვემო ქართლში ვერ განახორციელა, აფხაზეთში კარგად გამოუვიდა.
- აფხაზეთის მიმართულებით რატომ ვერაფრის გაკეთება ვერ მოხერხდა?
- იმ დროს არც მერაბ კოსტავა აღარ იყო ცოცხალი, ზვიად გამსახურდია ქვეყნიდან იყო გაგდებული, ხოლო ჩვენ შევარდნაძის მთავრობა, როგორც ცოფიან ძაღლებს, ისე დაგვდევდა. აფხაზებმა ვერავინ გამონახეს ისეთი, ვისაც დაელაპარაკებოდნენ.
- ისევ „გაზპრომ“-ის თემას დავუბრუნდეთ. ელჩიბეისთან დაკავშირებული ამბის გამო ეწინააღმდეგებით რუსული გაზის შემოსვლას?
- დიახ, სწორედ ამის გამო არ მინდა, რომ რუსულმა გაზმა კონკურენცია გაუწიოს ჩვენს სტრატეგიულ პარტნიორ ქვეყანას. ამის გარდა, აზერბაიჯანს ნავთობიც აქვს და გაზიც. პლუს ამას, შუა აზიის ქვეყნებიდან ევროპისკენ წამოსულმა ენერგომატარებლებმა ჩვენზე უნდა გაიაროს, მაგრამ სანამ საქართველომდე მოაღწევს, აზერბაიჯანის ტერიტორია ხომ უნდა გაიაროს. ახლა მითხარით, რატომ უნდა ვაწყენინო კარგ მეზობელს, რომელიც ბუნებრივ აირს ძალიან იაფად მაწვდის. რატომ უნდა ჩავანაცვლო ის უფრო ძვირი გაზით, რომელიც იმ ქვეყანამ უნდა მომაწოდოს, რომელსაც ჩემი ქვეყნის 20% აქვს ოკუპირებული და მცოცავ ანექსიას ახორციელებს?! მგონი, საკმარისი მიზეზები დაგისახელეთ, თუ რატომ არ უნდა შემოვიყვანოთ „გაზპრომ“-ი, მაგრამ მთავარი ეს არ არის.
- არის კიდევ რაიმე მიზეზი?
- არის და თანაც როგორი. საქართველოში ჯერ არავის განუცხადებია ღიად, რომ „გაზპრომ“-ი იშლება. ის რამდენიმე დამოუკიდებელი კომპანიის გაერთიანებაა. წლების წინ ისინი დამოუკიდებლად აწარმოებდნენ თავიანთ ბიზნესს და დიდი მოგებაც ჰქონდათ. ყველას თავისი პატრონი ჰყავდა. რუსეთის დღევანდელი ხელისუფლების მეცადინეობით ეს კომპანიები „გაზპრომ“-ში გააერთიანეს და იქედან მიღებული შემოსავლები კრემლის სალაროში მიედინება. „გაზპრომ“-მა ბევრი ფული იშოვა, მაგრამ მან თავისი თავი ამოწურა და დასავლეთში ძალიან ცუდი იმიჯი აქვს. ამ და სხვა მიზეზების გამო არანებაყოფლობით გაერთიანებული კორპორაცია დაშლის საფრთხის წინაშე დგას. ჩვენს ხელთ არსებული ინფორმაციით, 2016 წლიდან მისი ტრანსფორმაცია უკვე დაიწყება.
- თუ იშლებიან, საქართველოში შემოსვლით რატომ იკლავენ თავს?
- კორპორაციის ხელმძღვანელობის ნაწილი წინ იხედება და ცდილობს, ახალი ბაზრები აითვისოს. ეს, ჩემი აზრით, უფრო კერძო ინტერესია, ვიდრე სახელმწიფო.
- გამოდის, რომ „გაზპრომ“-ს რუსული ჩექმა არ შემოჰყვება?
- რუსებს თუ შემოსვლა უნდათ, გაზის გარეშეც შემოვლენ, მაგრამ გაზპრომი მაინც მიუღებელია. ჯერ ერთი, მათი აირი აზერბაიჯანულზე უფრო ძვირია. მათ არც ხარისხი არ უვარგათ და ის სოკარს კონკურენციას ვერ გაუწევს. ამიტომაც არის, რომ ამ თემაზე ისტერიკა არ გვჭირს.
- მაგრამ მაინც ეწინააღმდეგებით „გაზპრომ“-ის შემოსვლას.
- ვეწინააღმდეგებით იმიტომ, რომ მიგვაჩნია, რომ დაშლის პირას მისული „გაზპრომ“-ის გამო, ჩვენი კარის მეზობლის და სტრატეგიული პარტნიორის განაწყენება არ ღირს.
