„ახალი თაობა“: ინტერვიუ ხათუნა ლაგაზიძესთან: „პაატა ბურჭულაძის ფონდი პოლიტიკური არ იქნება“
„ახალი თაობა“: ინტერვიუ ანზორ აბრალავასთან: „რატომ არის მისაღები, როცა ქმარი პარლამენტის თავმჯდომარეა, ცოლი კი – თავდაცვის მინისტრი?“
„ახალი თაობა“: ინტერვიუ ემზარ კვიციანთან: „ჩვენ ნაცვლად სექსუალურ უმცირესობას რომ ეშიმშილა, ელჩი ელჩზე მოვარდებოდა“
„ახალი თაობა“: ინტერვიუ გიორგი ვაშაძესთან: „ბიძინა ივანიშვილი თინა ხიდაშელს არ მოხსნის… თუ მოქალაქეობა შეუწყდა, სააკაშვილი ნაციონალების თავმჯდომარედ ვეღარ დარჩება“
„რეზონანსი“: ინტერვიუ ლევან ბერძენიშვილთან: „პრემიებზე ზაქარია ქუცნაშვილის მიერ მომზადებულ კანონპროექტს პოპულისტური ხასიათი ჰქონდა“
—————————-
„ახალი თაობა“, 14 ნოემბერი, 2015 წელი
ინტერვიუ ხათუნა ლაგაზიძესთან: „პაატა ბურჭულაძის ფონდი პოლიტიკური არ იქნება“
მსოფლიო ბანი პაატა ბურჭულაძე საზოგადოებრივ-პოლიტიკურ „საქართველოს განვითარების ფონდს“ ქმნის, რომლის პრეზენტაციაც დეკემბერში გაიმართება. უკვე დასახელდა საზოგადოებისთვის კარგად ცნობილი რამდენიმე სახე, რომლებიც აღნიშნულ ფონდში იქნებიან წარმოდგენილნი. ერთ-ერთი პოლიტოლოგი ხათუნა ლაგაზიძეა. არის თუ არა საზოგადოებრივ-პოლიტიკური ფონდი პოლიტიკური პარტიის დაარსების წინა პირობა? რა ამბიციით მიდის ქართულ პოლიტიკაში მსოფლიოში ცნობილი საოპერო მომღერალი? 2016 წლის საპარლამენტო არჩევნებში იქნებიან თუ არა „ქართული ოცნება“ და პაატა ბურჭულაძე მთავარი კონკურენტები?
ამ და სხვა საკითხებზე „ახალი თაობა“ ხათუნა ლაგაზიძეს ესაუბრა.
- ქალბატონო ხათუნა, პაატა ბურჭულაძე საზოგადოებრივ-პოლიტიკურ ფონდს ქმნის. რამდენიმე პიროვნება უკვე დასახელდა, მათ შორის თქვენც. რა შეგიძლიათ საზოგადოებას უთხრათ დღეს იმაზე მეტი, ვიდრე არის ცნობილი?
- მეც არ მაქვს სრულყოფილი ინფორმაცია, მაგრამ ვეცდები, რაც ვიცი, ის გაგიზიაროთ. უპირველეს ყოვლისა, ვადასტურებ, რომ ბატონ პაატასთან შეხვედრები მქონდა. პაატა ბურჭულაძეს აინტერესებდა ჩემი ხედვები საქართველოს განვითარების პერსპექტივებზე, უფრო ზუსტად – საქართველოს უსაფრთხოების ასპექტებზე. ჩემთვის საინტერესო იყო ბატონ პაატასთან კომუნიკაცია თავისთავად, როგორც საზოგადო მოღვაწესთან და მსოფლიო ბანთან, მაგრამ უფრო მნიშვნელოვანი და საინტერესო იყო მასთან ურთიერთობა ახალ ამპლუაში. თავად ეს იდეა აღმოჩნდა ჩემთვის მომხიბლავი.
- რა იდეა?
- ის, რომ ბატონ პაატას აქვს საქართველოში არსებული ინტელექტუალური და პროფესიული პოტენციალის მობილიზებისა და ერთ მინდორზე თავშეყრის სურვილი. შესაბამისად, საუბარია ერთგვარი საზოგადოებრივი საფიხვნოს შექმნაზე. დღეს, როდესაც ქვეყანაში იდეების სივრცე გადაფარა მხოლოდ ნეგატივმა, პოლარიზებამ და შოკისმომგვრელმა მოსმენების თუ წამების სერიალებმა, აუცილებელია, იყოს სივრცე, სადაც მოხდება ინოვაციების, ახალი ინიციატივების, ხედვების ურთიერთგასაზიარებლად შეკრება და შემდეგ ამის ხედვად ჩამოყალიბება. იმ დროს, როდესაც ქვეყანაში მსგავსი არაფერი ხდება, ეს ინიციატივა ჩემთვის საინტერესო და პერსპექტიულია.
- რა სიახლის შეთავაზება შეუძლია ამ ახალ ძალას საზოგადოებისთვის? რა დანიშნულება შეიძლება ჰქონდეს?
- ძალას – ამ ფორმულირებას ვერ დავეთანხმები. ეს არის ფონდი, სადაც მოხდება ამ იდეების გააზრება და შემდეგ თავმოყრა. ეს იქნება ადგილი, სადაც საერთო ხედვების ჩამოყალიბება მოხდება დიალოგისა და კონსენსუსის რეჟიმში.
- რითი იქნება განსხვავებული ეს ფონდი?
- ფონდის მიზნებსა და ამოცანებზე პრეზენტაციაზე იქნება ვრცლად საუბარი. ასევე უფრო დაწვრილებით ამ საკითხზე თავად ბატონი პაატა ისაუბრებს, როდესაც სამშობლოში დაბრუნდება. ფონდი იქნება პროგრესზე ორიენტირებული, ის არ იქნება მიმართული საზოგადოების პოლარიზებისკენ, გამაერთიანებელი მინდვრის ფუნქცია ექნება. ფონდი შემოიყვანს ასპარეზზე ახალ თაობას ახალი ხედვებით.
- თქვენ იდეებზე საუბრობდით. ვისთვის იქნება ეს იდეები შეთავაზებული ხელისუფლებისთვის?
- ეს იქნება საზოგადოების ხედვა, წარმოდგენილი ქვეყნის განვითარების სხვადასხვა მიმართულებით. იდეები იქნება შეთავაზებული ყველასთვის. ნებისმიერს შეუძლია, ეს ხედვა გამოიყენოს, ვისაც აქვს მისი განხორციელებისა და რეალიზაციის ძალაუფლება.
- ქალბატონო ხათუნა, რამდენიმე პიროვნება უკვე დასახელდა. იქნებიან თუ არა სხვა ცნობადი სახეები წარმოდგენილნი?
- ეს კითხვა ბატონ პაატას უნდა დაუსვათ.
- ექსპერტები აცხადებენ, რომ მსგავსი ფონდის დაარსება არის წინა პირობა, რომ ეს ფონდი პოლიტიკურ პარტიად გარდაიქმნას. ამაზე თუ გქონდათ ბატონ პაატასთან საუბარი?
- საუბარი გვქონდა ფონდზე. ეს არის ფონდი, რომელსაც ფონდისთვის საჭირო ნიშნები აქვს. ასევე ვფიქრობთ, რომ აქვს საზოგადოების მობილიზების ის მიზნები, რომელსაც ფონდი ისახავს და ეს აბსოლუტურად მისაღწევია. დანარჩენს მომავალი გვიჩვენებს. პოლიტიკური მიზნებით ეს ფონდი არ იქმნება.
„ახალი თაობა“, 14 ნოემბერი, 2015 წელი
ინტერვიუ ანზორ აბრალავასთან: „რატომ არის მისაღები, როცა ქმარი პარლამენტის თავმჯდომარეა, ცოლი კი - თავდაცვის მინისტრი?“
პარლამენტის ყოფილი წევრი, ორგანიზაცია „სოლიდარობის“ თავმჯდომარე ანზორ აბრალავა მიიჩნევს, რომ ტელეკომპანია „რუსთავი 2“-ის გარშემო მოვლენები ხელოვნურად დაიძაბა, შეინიშნება ძლიერი იერიში ხელისუფლებაზე, „ქართული ოცნების“ მმართველი კოალიცია კი კვალიფიციურ პასუხებს ვერ იძლევა და ვერ აკეთებს მკაფიო განმარტებებს ერთიანი ნაციონალური მოძრაობის ანტისახელმწიფოებრივი გეგმების თაობაზე.
- ხელისუფლება ამ მოვლენებში უსუსურად და არაკვალიფიციურად გამოიყურება. ასეთი ტაქტიკა აქვს არჩეული თუ შეცდომებს უშვებს, არ ვიცი. საერთოდ, არც ერთ მედიასაშუალებას პრობლემები არ უნდა შეექმნას. სიტყვის თავისუფლება უზრუნველყოფილი უნდა იყოს, ამასთან, საჭიროა გარკვეული მოვლენების ახსნა, -განუცხადა „ახალ თაობას“ ანზორ აბრალავამ. მისი სიტყვებით, ნაცმოძრაობა მიხეილ სააკაშვილის ხელმძღვანელობით იყენებს ნებისმიერ თემას, რათა განახორციელოს თავისი გეგმები. ნაციონალების საბოლოო მიზანი რევოლუციაა. „ამას მეც ვაცხადებდი ჯერ კიდევ ერთი წლის წინ. ნაციონალებს რუსთავი 2-ის, ლარის კურსის დაცემის, საარჩევნო გარემოს თემებიც ამისთვის სჭირდებათ“, – ამბობს ანზორ აბრალავა.
- გასაჯაროებული კადრები, რომლებშიც შესაბამისმა ორგანოებმა ნაციონალების მხრიდან სახელმწიფო გადატრიალების ნიშნები დაინახეს და ამაზე საქმე აღძრეს, ქილიკის საგნად იქცა. ..
_ ესეც ხელისუფლების ბრალია. ამ კადრების გარეშეც ცნობილი იყო, რომ ნაცმოძრაობას არეულობა და ხელისუფლებაში ძალით მოსვლა უნდა. ხელისუფლებამ მკაფიო განმარტებები უნდა მისცეს როგორც საკუთარ მოსახლეობას, ისე ჩვენს უცხოელ პარტნიორებს. ხელისუფლებამ ნაცმოძრაობის ხელისუფლების მიერ ჩადენილი დანაშაულების ამსახველი კადრები უნდა აჩვენოს საზღვარგარეთელ მეგობრებს. ეს ძალიან მძიმე კადრებია, მაგრამ ხომ არსებობს ფაშისტების მიერ ჩადენილი, ასევე აბუგრეიბში, გუანტანამოში მომხდარი ან ჩინელი ხუნვეიბინების მიერ ჩადენილი არაადამიანური მოპყრობის კადრები? ესეც მძიმე საყურებელია, მაგრამ მსოფლიომ ხომ ნახა. ახლა ნაციონალი დამნაშავეები ისევ აპირებენ ხელისუფლებაში მოსვლას. ამისათვის ყველა ხერხს იყენებენ. ისინი გვერდით უდგებიან ყველას, ვინც, მათი აზრით, კრიზისს ქმნის. საარჩევნო გარემო ქვეყანაში გასაუმჯობესებელია. ნაციონალებს აღელვებთ არა საარჩევნო გარემოს სრულყოფა, არამედ ამ თემის ოსტატურად გამოყენება. ამის გამოცდილება მათ აქვთ.
- რაზე მიანიშნებთ?
- 2003 წლის მოვლენებზე. მაშინ ე.წ. ვარდების რევოლუციის მოსაწყობად გამოიყენეს საარჩევნო თემა. ახლა ნაციონალურ მოძრაობას უნდა 2003 წლის მოვლენების გამეორება. შესაბამისი მოძრაობა დაწყებულია. დიდი ხმაურია ატეხილი იმაზე, რომ 2016 წლის არჩევნები გაყალბდება. ხელისუფლება იმისთვის არსებობს, რომ საზოგადოებას გარკვეული პრობლემები აარიდოს.
- 31 ოქტომბერს ჩატარებული შუალედური არჩევნების მიმდინარეობას თუ გავიხსენებთ, ხელისუფლებამ საზოგადოებას პრობლემები ვერ აარიდა...
- მარტვილში შუალედური არჩევნები ნორმალურად ჩატარდა. იქ გაიმარჯვა სოსო დანელიამ, რომელსაც მე მხარს ვუჭერდი, საგარეჯოში კი ისეთი ფაქტები მოხდა, რომ ეს გარეშე თვალისთვისაც შესამჩნევია. მთავრობის წევრები ამ არჩევნების დროს ძალიან გამომწვევად იქცეოდნენ. გარდა ამისა, იქ შეიმჩნეოდა ნეპოტიზმი. თავდაცვის მინისტრი ხიდაშელი ზედმეტად აქტიურობდა კანდიდატ ხიდაშელის სასარგებლოდ. გაუგებარია, თუ სხვებს მწვავედ აკრიტიკებენ ნეპოტიზმის გამო და ამას ანტიდემოკრატიულად თვლიან, მაშინ რატომ არის დასაშვები ნეპოტიზმი რესპუბლიკელებში? რატომ არის მისაღები, როცა ქმარი პარლამენტის თავმჯდომარეა, ცოლი კი – თავდაცვის მინისტრი? საგარეჯოში საარჩევნო დარღვევებზე არსებობს მასალები. არ შეიძლებოდა სასამართლოში მათი განხილვა? თუ სასამართლო მარტო „რუსთავი 2“-ით უნდა იყოს დაკავებული? ამ დარღვევების გამო მიმდინარეობს შიმშილობის აქციები. აქამდე საქმე არ უნდა მისულიყო. საკუთარი ქვეყნის მოქალაქეები შიმშილობის აქციამდე არ უნდა მიიყვანო, არც ამდენი პატიმარი უნდა გყავდეს ციხეში პატარა დანაშაულზე.
- პატიმართა რაოდენობა შესამცირებელია?
- იმ დროს, როცა უმძიმესი არაადამიანური დანაშაულების ჩამდენები, მწამებლები გარეთ არიან, სხვებიც უნდა გაათავისუფლო. ეს დამნაშავეები დღეს დემოკრატიაზე ლექციებს გვიკითხავენ. პატიმრებს მათზე ბევრად ნაკლები დანაშაული აქვთ ჩადენილი.
- ირაკლი ალასანიას განცხადებით, ამ ხელისუფლებას დასავლეთში სერიოზულად არავინ უყურებს და ყველა 2016 წლის არჩევნებს ელოდება.
- ამის საპასუხოდ შემიძლია ვთქვა, რომ საქართველოს საზოგადოებაში ირაკლი ალასანიას არ აღიქვამენ ისეთ ფიგურად, რომელსაც შეუძლია არჩევნებში გამარჯვება. ძალიან ბევრ ადამიანს ვხვდები და ვიცი, რომ ალასანიას მხარდაჭერა არ გააჩნია. მას არ წარმოუდგენია ქვეყნის გადარჩენის, კრიზისიდან გამოსვლის არანაირი დოქტრინა და გეგმა.
საერთოდ, პოლიტიკური ველი ცარიელია. ჯანსაღი პოლიტიკური ძალები ვერ აქტიურდებოდნენ იმის გამო, რომ მოხდა პოლიტიკის კაპიტალიზაცია, თუმცა ნელ-ნელა სიტუაცია იცვლება. საზოგადოებაც მიხვდა, რომ მხოლოდ ფული არ არის ყველაფერი. ხალხსაც უნდა, რომ ხელისუფლებაში მოვიდნენ ისეთი ძალები, რომლებიც იცავენ საქართველოს ინტერესებს, ზრუნავენ ადამიანებზე, ფიქრობენ ეკონომიკის რეალურად გაჯანსაღებასა და ტერიტორიულ მთლიანობაზე. ამიტომ ასეთი ძალები გამოჩნდებიან.
„ახალი თაობა“, 14 ნოემბერი, 2015 წელი
ინტერვიუ ემზარ კვიციანთან: „ჩვენ ნაცვლად სექსუალურ უმცირესობას რომ ეშიმშილა, ელჩი ელჩზე მოვარდებოდა“
სახელმწიფო კანცელარიის წინ შიმშილობის აქცია გრძელდება. სახალხო დამცველი და დიპლომატიური კორპუსი კვლავ დუმილის უფლებას ინარჩუნებენ. არადა, მოშიმშილეებს კარვის გაშლის საშუალებასაც კი არ აძლევენ. ისინი ან მოშიმშილეების გამძლეობით არიან აღფრთოვანებული, ან ხელისუფლების გულქვაობით გაოგნებული.
მოშიმშილეებს აქციის შეწყვეტისკენ ყოფილი პრემიერის შემდეგ მოქმედმა პრემიერმაც მოუწოდა. ალიანსელები ირაკლი ღარიბაშვილის მოწოდების გათვალისწინებას არ აპირებენ და შიმშილობას აგრძელებენ. თავის მიმართვაში პრემიერმა ყურადღება გაამახვილა იმ ფაქტზე, რომ არჩევნები არ გაყალბებულა. ალიანსის მოშიმშილე ლიდერი ირმა ინაშვილი ამბობს, რომ ისინი არც ელოდნენ, რომ მთავრობა გაყალბებას აღიარებდა.
ირმა ინაშვილის განცხადებით, ხელისუფლებამ მათ არჩევნები არა მარტო საგარეჯოში, არამედ მარტვილშიც გააყალბა. „ვიმეორებ, რომ ხელისუფლებამ არჩევნები გააყალბა არა მარტო საგარეჯოში, არამედ მარტვილშიც. მეტს გეტყვით, არ ვიცი, მოვიგეთ თუ არა არჩევნები მარტვილში, მაგრამ მინიმუმ 10%-ით მეტი ხმა მივიღეთ, ვიდრე დაგვიწერეს. მე ვერ ვიხსენებ, რომ საქართველოში რომელიმე ხელისუფლებას ოდესმე ეღიარებინოს არჩევნების გაყალბება. არადა, საქართველოში რომ არჩევნები ყოველთვის ყალბდებოდა, ეს ყველამ კარგად იცის. საინტერესოა ისიც, რომ ყოველი ახალი ხელისუფლება, ვიდრე ქვეყნის სათავეში მოვა, წინა ხელისუფლებას ადანაშაულებს არჩევნების გაყალბებაში, ხოლო როცა თავად აღმოჩნდება ხელისუფლებაში, მაინც გაყალბების გზას ირჩევს“, – აღნიშნავს ირმა ინაშვილი.
არჩევნებთან დაკავშირებით პროკურატურამ უკვე დაიწყო გამოძიება. ღარიბაშვილი მათგან ელოდება საბოლოო პასუხს. ირმა ინაშვილი ახლავე ამტკიცებს, რომ გაყალბებას ჰქონდა ადგილი და მოწმეებიც მოჰყავს. „საგარეჯოში რომ არჩევნები გაყალბდა, ეს, პირველ რიგში, იცის ყველა საგარეჯოელმა და მერე იცის მთელმა საქართველომ. რაც მთავარია, ეს ხელისუფლებამაც მშვენივრად იცის“, – ამბობს მოშიმშილე ალიანსელი.
პრემიერისადმი მიმართვაში ის იმაზეც საუბრობს, რომ მათი შიმშილობის აქცია ერთგვარი პრევენციაა, მომავალი წლის არჩევნები რომ არ გაყალბდეს. „დღეს ჩვენ სწორედ იმისთვის ვიბრძვით, რომ 2016 წლის არჩევნები არ გაყალბდეს. ჩვენ ვითხოვთ, რომ სახელმწიფო მოხელეების, მერებისა და გამგებლების, პოლიციის უფროსებისა თუ სხვათა ჩარევა საარჩევნო პროცესში, ამომრჩეველთა მოსყიდვა და დაშინება განიხილებოდეს, როგორც სისხლის სამართლის დანაშაული. ვიბრძვით იმისათვის, რომ საარჩევნო კომისიებში 13 წევრიდან 10 არ ჰყავდეს მხოლოდ „ქართულ ოცნებას“ ანუ ვიბრძვით, რომ არჩევნებში მონაწილეობა იყოს თავისუფალი და კონკურენტებს ჰქონდეთ თანაბარი პირობები“, – განმარტავს „პატრიოტთა ალიანსის“ თავქალი. მისი თქმით, ალიანსმა მოთხოვნები არაერთგზის გააჟღერა როგორც პრესით, ასევე ტელევიზიით.
- ხელისუფლება ისე იქცევა, თითქოს ვერ ხვდება და არ ესმის, რაზე ვსაუბრობთ. არადა, ეს ის ხელისუფლებაა, რომელიც 2012 წელს სწორედ ამ ყველაფერს (ანუ რასაც დღეს ჩვენ ვითხოვთ) გვპირდებოდა, მაგრამ ახლა არაფერს გვპირდება. თითქოსდა ეს მოთხოვნები არც ესმის. თითქოსდა ვერ იგებს, რას ვითხოვთ და მხოლოდ ზოგადი ფრაზებით გვესაუბრება. რატომ? იმიტომ, რომ ხელისუფლებას არაფრის შეცვლა არ სურს! ხელისუფლებამ ხალხის ნდობა დაკარგა! ხელისუფლება უკვე დღეს ემზადება 2016 წლის არჩევნების გაყალბებისთვის, – აცხადებს ირმა ინაშვილი. იგი თავისი თანამებრძოლების სახელით პირობას დებს, რომ მოთხოვნების შესრულებამდე აქცია არ შეწყდება, სამართალდამცავებს კი ურჩევს, მოშიმშილეებს ხელი არ შეუშალონ.
- ჩვენ არაფერს დავთმობთ! ვიქნებით პრინციპულნი და ვიბრძოლებთ ბოლომდე, ვიდრე ჩვენი მოთხოვნები არ შესრულდება! შიმშილობის აქცია არა მარტო გაგრძელდება, არამედ გაფართოვდება!
პოლიცია ძალიან ცუდად იქცევა გორში, ზუგდიდსა და ქობულეთში. მთელი დღეა, ცდილობს მოშიმშილეების დაშინებასა და აყრას. ამაშიც ჩანს, დღეს რაოდენ სავალალო ვითარებაში ვიმყოფებით. ჯერ ხელისუფლებასა და, შესაბამისად, პოლიციას შევახსენებ: შიმშილობა თუ მშვიდობიანი პროტესტის ნებისმიერი სხვა სახეობა კონსტიტუციით მონიჭებული ფუნდამენტია და ამ ფუნდამენტს არავინ უნდა შეეხოს, – ამბობს ინაშვილი.
**********
13 ნოემბერს მოშიმშილეთა რაოდენობა 50 კაცამდე გაიზარდა. ამ დღეებში მათი რიცხვი კიდევ უფრო მოიმატებს. როგორც ალიანსის კიდევ ერთმა მოშიმშილე ლიდერმა ემზარ კვიციანმა „ახალ თაობასთან“ საუბარში განაცხადა, მალე თბილისში გორელი მოშიმშილეებიც ჩამოვლენ. „ჩვენი თანამებრძოლები საქართველოს სხვადასხვა რეგიონში შიმშილობენ. ჩვენი არ იყოს, ისინიც საშინელ დღეში არიან. გორში მოშიმშილეებს პოლიციამ კარავი აუშალა. ისინი შიმშილობას ჯერ ალიანსის ოფისში გააგრძელებენ, შემდეგ კი აქ ჩამოვლენ. ვერაფრით ამიხსნია, რატომ იჩენს ჩვენ მიმართ ასეთ გულქვა დამოკიდებულებას ხელისუფლება. 11 ნოემბერს საშინელი წვიმა მოვიდა და ქოლგის გაშლის უფლება არ მოგვცეს. ეგონათ, რომ გავტყდებოდით. ჩვენ, იცით, რა ვქენით? თავსხმა წვიმაში დავდექით. ტყუილად ჰგონიათ, რომ დაგვასუსტებენ. ეს წინააღმდეგობა კიდევ უფრო გვაძლიერებს. გული მხოლოდ იმაზე მწყდება, რომ ნაციონალებს გადასარევ პირობებში ამყოფებენ, ჩვენ კი ისე გვექცევიან, თითქოს მტრები ვიყოთ“, – ამბობს ემზარ კვიციანი..
- რას გულისხმობთ, როცა ამბობთ, ნაციონალებს უკეთეს პირობებში ამყოფებენო?
- „რუსთავი 2“-ის ეზოში მყოფ ნაციონალებს კარვები დაუდგეს და უფრთხილდებიან. ამაზე კარგად დაწერა ჩვენმა თანამებრძოლმა მიხეილ ცილიკაშვილმა „ნაცები – კარვებში, პატრიოტები – ღია ცის ქვეშ“. ელჩებისა და სახალხო დამცველის ყურადღებაც არ აკლიათ ნაცებს, ჩვენ კი თითქოს არ ვარსებობთ.
- რით ახსნით მათ უყურადღებობას?
- ეს დიპლომატებს ჰკითხეთ. მე ერთი რამე ვიცი, ჩვენ ნაცვლად ნაციონალებს ან სექსუალური უმცირესობების წარმომადგენლებს რომ ეშიმშილათ, ელჩი ელჩზე მოვარდებოდა კანცელარიასთან.
- სახალხო დამცველის უყურადღებობას რით ხსნით?
- საიდან უნდა ვიცოდე, რა ტრიალებს მის თავში. მისი ვალია, ყველას უფლება დაიცვას. წესით, აქ უნდა იყოს, მაგრამ არ გამოჩენილა. მართალი რომ გითხრათ, მისი უყურადღებობა დიდად არ გვანაღვლებს, რადგანაც ვხედავთ, რომ ხალხია ჩვენ გვერდით.
- პოლიტიკური პარტიების წარმომადგენლები თუ გაკითხავენ?
- თითქმის ყველა პარტიის წარმომადგენელი მოვიდა და მხარდაჭერა გამოგვიცხადა.
- ნაციონალებიც?
- ნაციონალებს ჩვენთან რა უნდა? ეგენი კარვებში სხედან.
- ვთქვათ და მოვიდნენ მხარდაჭერის გამოსახატავად, რას იზამთ?
- ჯერ მოვიდნენ და მერე ვნახოთ.
- მათმა ერთ-ერთმა ლიდერმა ნუგზარ წიკლაურმა განაცხადა, ირმა ინაშვილს არჩევნები გაუყალბესო. ამაზე რას იტყვით?
- არჩევნები რომ გაყალბდა, ამაში 100%-ით ვართ დარწმუნებული, მაგრამ, რადგან ამას ნაციონალებიც აღიარებენ, უკვე 1000%-იანი სიმართლეა ჩვენს მხარეს.
- ნაციონალების სიტყვა როდის აქეთ გახდა თქვენთვის ჭეშმარიტება?
- ნაციონალები გაყალბების დიდოსტატები არიან. ეგენი თუ ამბობენ, რომ არჩევნები გაყალბდა, ეს ასეა. რესპუბლიკელები მაგათი სულიერი ძმები არიან და გაყალბება, ბუნებრივია, ეცოდინებოდათ.
- როდემდე აპირებთ შიმშილობის გაგრძელებას?
- სანამ ჩვენი მოთხოვნები არ დაკმაყოფილდება.
***********
კანცელარიის წინ მოშიმშილეები უფლებადამცველთა ორგანიზაციის თავმჯდომარე ნიკოლოზ მჟავანაძემაც მოინახულა. მან კიდევ ერთხელ გამოხატა აღშფოთება სახალხო დამცველის მიმართ. „მართლა მაინტერესებს, რანაირი სახალხო დამცველია უჩა ნანუაშვილი? ხალხი ამდენი დღეა, შიმშილობს და ერთხელ არ მოსულა მათ სანახავად. მოსვლას ვინ ჩივის, განცხადებაც არ გაუვრცელებია მის აპარატს. წარმომიდგენია, რას იზამდა, პატრიოტთა ალიანსის წევრების ნაცვლად ნაციონალები რომ შიმშილობდნენ“, – აცხადებს უფლებადამცველი. მისი თქმით, უჩა ნანუაშვილი ისე იქცევა, რომ უკვე უხერხულია, მას სახალხო დამცველი ერქვას.
- საკმარისია, მეჩეთთან გოჭმა ჩაირბინოს, რომ ერთ ამბავს ტეხს, შეურაცხყოფას აყენებენ ისლამის მიმდევრებსო. წინა კვირას ილიაუნში გამოფინეს მკრეხელური ნახატი, სადაც ღვთისმშობელი თავს იკლავს. ამით მრევლიც და ეკლესიაც შეურაცხყოფილი დარჩა, ნანუაშვილს ხმაც კი არ ამოუღია. ეს რა უბედურებაა? სად გაგონილა, სახალხო დამცველი შერჩევით იცავდეს ხალხის უფლებებს. გამოვიდეს და თქვას, რომ მხოლოდ უმცირესობებისა და ნაციონალების დამცველია. უხერხულია, ამ კაცს სახალხო დამცველი ერქვას, _ აღნიშნავს მჟავანაძე.
***********
13 ნოემბერს, დღის ბოლოს, მოშიმშილეები პარლამენტის ჯანდაცვისა და სოციალურ საკითხთა კომიტეტის თავმჯდომარე დიმიტრი ხუნდაძემ მოინახულა. როგორც „ინტერპრესნიუსს“ პარლამენტიდან აცნობეს, დეპუტატმა თითოეული მათგანის ჯანმრთელობის შესახებ ინფორმაცია მოისმინა.
- მე აქ მოვედი ჩემი თანამდებობრივი და პროფესიული ვალის მოსახდელად, რადგან გახლავართ საქართველოს ყველა მოქალაქის ჯანდაცვის კომიტეტის თავმჯდომარე, მიუხედავად მათი პოლიტიკური შეხედულებისა. უკვე მეექვსე დღეა, მოქალაქეები შიმშილობენ და შეიძლება, მათ ჯანმრთელობას გართულება მოჰყვეს, მით უმეტეს მაშინ, როდესაც ჩვენთვის ყველასთვის პატივსაცემ პიროვნებას, ლევან თედიაშვილს, შაქრიანი დიაბეტი აქვს, ერთ მოქალაქეს კი – მაღალი ტემპერატურა. მოშიმშილეების ჯანმრთელობა გარემო კლიმატის გათვალისწინებით საყურადღებოა. აქ სწორედ იმიტომ მოვედი, რომ თავად მომენახულებინა ისინი და პირადად მიმეღო ინფორმაცია მათი ჯანმრთელობის შესახებ, – განაცხადა დიმიტრი ხუნდაძემ. მისივე თქმით, არსებული ვითარებიდან გამომდინარე, ქალაქის მერ დავით ნარმანიასთან შეთანხმებით მიიღო გადაწყვეტილება, რომ სასწრაფო სამედიცინო დახმარების ბრიგადები მუდმივად იქნებიან მათთან და მოშიმშილეებს ექიმები არ დატოვებენ.
- კიდევ ერთხელ ვაცხადებ, ჩვენი მთავარი საზრუნავია ჩვენი მოქალაქეების ჯანმრთელობა და ყველაფერს გავაკეთებთ მათი ჯანმრთელობის დასაცავად, _ განმარტა დიმიტრი ხუნდაძემ.
„ახალი თაობა“, 14 ნოემბერი, 2015 წელი
ინტერვიუ გიორგი ვაშაძესთან: „ბიძინა ივანიშვილი თინა ხიდაშელს არ მოხსნის… თუ მოქალაქეობა შეუწყდა, სააკაშვილი ნაციონალების თავმჯდომარედ ვეღარ დარჩება“
უახლოეს მომავალში მიხეილ სააკაშვილს შესაძლოა საქართველოს მოქალაქეობა ჩამოერთვას. ნაციონალური მოძრაობის ერთ-ერთი ლიდერი გიორგი ვაშაძე ფიქრობს, რომ ეს ყოველივე მიმდინარე პროცესებს უკავშირდება და მთავრობამაც ეს ინიციატივა ამიტომ გაააქტიურა. „უნდათ, რომ სწრაფად შეუწყვიტონ სააკაშვილს მოქალაქეობა. რაც შეეხება ნაციონალურ მოძრაობას, ის ჩვეულებრივად გააგრძელებს მუშაობას“, – აცხადებს ვაშაძე.
- ახალი თავმჯდომარის არჩევა იგეგმება?
- ჯერჯერობით ამაზე არ გვიმსჯელია. თუ მოქალაქეობა შეუწყდა, სააკაშვილი ვეღარ დარჩება თავმჯდომარედ, თუმცა ჩვენ რა პროცესებით წავალთ და რა გადაწყვეტილებას მივიღებთ, ეს უკვე დროის საკითხია.
- ამბობთ, რომ სააკაშვილისთვის მოქალაქეობის ჩამორთმევა მიმდინარე პროცესებს უკავშირდება. რას გულისხმობთ?
- „ქართული ოცნება“ დიდი პრობლემისა და რთული ამოცანის წინაშე დგას. მისი რეიტინგი დღითიდღე ეცემა. მას უნდა, რომ პოლიტიკური კონკურენტები მალე გაანეიტრალოს და არ მისცეს შესაძლებლობა, აქტიურად ჩაერთონ საქართველოში მიმდინარე პროცესებსა და პოლიტიკაში.
- ამბობენ, რომ არც თავად ნაციონალურ მოძრაობაშია ყველაფერი რიგზე, პარტია დატოვა ბარნოვმა და ამას სხვებიც გეგმავენ. ასეა?
- სხვების მიერ პარტიის დატოვებაზე ჯერჯერობით არაფერი მსმენია. რაც შეეხება ბარნოვს, ბარნოვი პარტიის წევრი იყო, თუმცა ის აქტიურად არ მონაწილეობდა პარტიის საქმიანობაში. მისი გადაწყვეტილება იყო სამოქალაქო სექტორში გადასვლა, სადაც უფრო აქტიური იქნება. აქ განსაკუთრებული არაფერი მომხდარა.
- სამოქალაქო სექტორი თქვენი ახალი სტრატეგიაა? ვინც პარტიიდან წავიდა, ყველა სამოქალაქო სექტორში მიდის. ოპონენტები აცხადებენ, რომ არასამთავრობოს სახელს ეფარებით, რათა პროცესები იქიდან უკეთესად მართოთ. ასეა?
- ეს ბიძინა ივანიშვილის მოსაზრებაა, რაც ძალიან ცუდია. არა მგონია, ის არასამთავრობო სექტორი, რომელიც დღეს საქართველოშია წარმოდგენილი, ყველა ნაციონალურ მოძრაობასთან თანამშრომლობდეს. პირიქით, ძალიან ინტენსიურად გვაკრიტიკებენ. საერთოდ, ბიძინა ივანიშვილისთვის მიუღებელია კრიტიკული და განსხვავებული აზრი. ამ შემთხვევაში ეს არის მთავარი პრობლემა.
გიორგი ვაშაძე ფიქრობს, რომ სამოქალაქო სექტორი საქართველოში ძლიერია, თუმცა კიდევ უფრო გაძლიერება სჭირდება. „აქ „რუსთავი-2“-ის მხარდაჭერაზე კი არ არის საქმე, აქ საუბარია სიტყვისა და გამოხატვის თავისუფლებაზე. ეს პრობლემა შესაძლებელია მალე შეექმნას მთლიანად ქვეყანას და არა მარტო „რუსთავი-2“-ს. კარგი იქნებოდა, ყველა ეს ორგანიზაცია ჩვენი მხარდამჭერი იყოს, მაგრამ, ყველამ კარგად ვიცით, რომ ასე არ არის. ვისაც კი განსხვავებული აზრი აქვს, ივანიშვილისთვის ყველა ნაციონალური მოძრაობის მხარდამჭერია“, – აცხადებს პოლიტიკოსი.
ოპოზიციონერის თქმით, ქვეყანა საარჩევნო წელში გადადის და ხელისუფლებისგან კიდევ ბევრ სიურპრიზს უნდა ველოდოთ, რადგან ისინი კრიტიკას ვერ ეგუებიან.
- საგარეჯოს შუალედურ არჩევნებზეც გკითხავთ. ირმა ინაშვილი უკვე რამდენიმე დღეა შიმშილობს, ხელისუფლება კი არ აპირებს, მისი მოთხოვნები გაიზიაროს...
- ხელისუფლება მომავალ არჩევნებშიც შეეცდება, გაყალბების გზით შეინარჩუნოს ხელისუფლება. სწორედ ამის პრევენცია უნდა მოხდეს და ამ პრევენციის ერთ-ერთი მნიშვნელოვანი კომპონენტი არის სიტყვისა და გამოხატვის თავისუფლების დაცვა. რაც შეეხება ინაშვილის პროტესტს, ყველამ დაინახა, რომ დემოკრატიული პროცესების შექმნას ბიძინა ივანიშვილი არ აპირებს. მისი სურვილია, ჰქონდეს ოლიგარქიული სისტემა, სადაც რასაც თვითონ ამბობს, იმას ასრულებს ყველა.
ოპოზიციონერი ფიქრობს, რომ დღეს „ქართულ ოცნებასა“ და ინაშვილს შორის შინაგანი თანხვედრისა და თანამშრომლობის პროცესია. მისი აზრით, პრემიერ-მინისტრისა და ბიძინა ივანიშვილის განცხადებებიც სწორედ ამაზე მიუთითებს.
- რას გულისხმობთ ამ აზრთა თანხვედრაში?
- 2012 წლამდე ეს ორი ჯგუფი ერთმანეთის სერიოზული პარტნიორი იყო. ამაში ახალი არაფერია. თუნდაც ირმა ინაშვილის განცხადებები, რომ რესპუბლიკელებს ებრძვის და არა „ქართულ ოცნებას“, აღრმავებს ეჭვს, რომ აქ სხვა პროცესები მიმდინარეობს.
- იმის თქმა გსურთ, რომ „ოცნებაში“ დაპირისპირებაა და ივანიშვილი ირმა ინაშვილს ხიდაშელის წინააღმდეგ იყენებს?
- შეიძლება, ასეც შევაფასოთ ეს ყველაფერი, თუმცა არც ის მგონია, რომ მთელი „ქართული ოცნება“ რესპუბლიკურ პარტიას აუჯანყდა, მაგრამ ამ მექანიზმებით ეუბნება რესპუბლიკელებს, თქვენი ადგილი იცოდეთო.
- რატომ, რესპუბლიკელები თავს გავიდნენ?
- რესპუბლიკელებს ძალიან ბევრი დაუთმო და ბევრი პოზიცია მისცა ივანიშვილმა და ახლა ფიქრობს, რომ შესაძლოა, ეს მისთვის საფრთხის შემცველი გახდეს. ბიძინა ივანიშვილს არ აწყობს არავის მოძლიერება, არც შიგნით გუნდში და არც გარეთ. ამიტომ ის ყველას სამართავ მექანიზმს იტოვებს და ამ შემთხვევაში ეს კომპონენტი ჩანს ამ პროცესებში.
- ხომ არ შეიწირავს საგარეჯოს არჩევნები ხიდაშელის სავარძელს?
- ახლა ძალიან რთული იქნება, რომ ბიძინა ივანიშვილმა ეს გადაწყვეტილება მიიღოს, რადგან ამ ეტაპზე ძალიან დასუსტებულია. ახლა კიდევ შიდა დაპირისპირების ასე გამწვავება მისთვის ძალიან რთული იქნება, თუმცა, მეორე მხრივ, რესპუბლიკელებმა ყველას იმედები გაუწბილეს.
- რას გულისხმობთ?
- იმას, რომ ისინი ხელს აწერენ ყველა არადემოკრატიულ ნაბიჯსა და პროცესს, რაც კი ქვეყანაში მიდის! იყო კატეგორია ხალხის, რომლებც ფიქრობდნენ, რომ რესპუბლიკელები ობიექტურები არიან, თუმცა ჩვენ კარგად ვხედავთ, რომ ისინი ობიექტურობისგან ძალიან შორს დგანან და უსუფაშვილიც ღიად „აპრავებს“ ყველა იმ გადაწყვეტილებას, რომლებსაც ბიძინა ივანიშვილი იღებს.
- მაინც?
- თუნდაც სასამართლოში მიმდინარე იმ არაადეკვატურ პროცესს, რომელიც დღეს იქ ხდება. ამის ნათელი მაგალითი იყო პარლამენტის იურისტის მოქმედება საკონსტიტუციო სასამართლოში.
- ეს არ იყო კანონის ჩარჩოებში?
- არა. როგორც ჩანს, უსუფაშვილს ბიძინა ივანიშვილმა წაუყენა გარკვეული პირობა, რომ ასეთი კაი ბიჭის როლის თამაში არ გამოადგება, მანაც უნდა დააფიქსიროს პოზიცია და სწორედ აქედან გამომდინარე მოიფიქრეს ეს აბსურდული და არასამართლებრივი ქმედება, რომელიც მათ პარლამენტის მეშვეობით განახორციელეს.
- დაკარგავენ ამჟამინდელი მფლობელები რუსთავი 2-ს?
- ყველას კარგად გვესმის, რომ მთელი ის პროცესი, რომელიც ამჟამად მიდის „რუსთავი-2“-თან დაკავშირებით, სრულიად ამოვარდნილია საკანონმდებლო ჩარჩოდან. თუ შიდა სასამართლო არა, სტრასბურის სასამართლოა და სხვა ბევრი მექანიზმი არსებობს, რომლებიც ამ პროცესს კანონით შეაფასებს და იტყვის, რომ ეს არადემოკრატიული ქმედებები იყო.
„რეზონანსი“, 14 ნოემბერი, 2015 წელი
ინტერვიუ ლევან ბერძენიშვილთან: „პრემიებზე ზაქარია ქუცნაშვილის მიერ მომზადებულ კანონპროექტს პოპულისტური ხასიათი ჰქონდა“
გვანცა ღვედაშვილი
დეპუტატ ზაქარია ქუცნაშვილის კანონპროექტი პრემიების აკრძალვის შესახებ საკანონმდებლო ორგანოში მეორე მოსმენით ჩავარდა. სახელმწიფო უწყებებში მაღალჩინოსნებისთვის პრემიების შეზღუდვას მხოლოდ 44-მა დეპუტატმა დაუჭირა მხარი. კენჭისყრის მონაცემების მიხედვით, ამ ინიციატივის წინააღმდეგ ლევან ბერძენიშვილმა, მალხაზ წერეთელმა და ზვიად ძიძიგურმა მისცეს ხმა. ამასთან, პარლამენტის სხდომათა დარბაზში იყვნენ, მაგრამ კენჭისყრაში მონაწილეობა არ მიუღია თხუთმეტამდე პარლამენტარს. ინიციატივა 2017 წლის პირველ იანვრამდე პრემიების აღებას უკრძალავდა საქართველოს პარლამენტის წევრებს, მინისტრთა კაბინეტის წევრებს, საკრებულოს თავმჯდომარეებს, მერებსა და გამგებლებს. მთლიანობაში ეს აკრძალვა 700-ზე მეტ თანამდებობის პირს ეხებოდა.
აღნიშნულ საკითხთან დაკავშირებით და იმის გასაგებად, თუ რატომ არ დაუჭირეს მხარი პრემიების აკრძალვის კანონპროექტს, “რეზონანსი” პარლამენტარ ლევან ბერძენიშვილს ესაუბრა. მისი თქმით, ეს კანონპროექტი ვერ მოიტანდა რეალურ შედეგს და ის არათანასწორ მდგომარეობაში აყენებდა საჯარო მოხელეებს. გარდა ამისა, ლევან ბერძენიშვილის თქმით, ზაქარია ქუცნაშვილის კანონპროექტი პოპულისტური ხასიათს იყო და ბევრ ხარვეზს შეიცავდა.
“რეზონანსი”: პრემიების საკითხი აქტუალური და მწვავე თემაა საქართველოში. რატომ არ დაუჭირეთ მხარი მის ამკრძალავ კანონპროექტს?
ლევან ბეძენიშვილი: უპირველეს ყოვლისა მინდა გითხრათ, რომ საქართველოს პარლამენტმა მიიღო ძალიან დიდი კანონი, რომელსაც ჰქვია “კანონი საჯარო მოხელეთა შესახებ”. ეს არის უზარმაზარი კანონი სხვა კანონების შლეიფით, რომლის მიხედვით საქართველოში მისი ამოქმედების შემდეგ არცერთ საჯარო მოხელეს არაფერი პრემიის მაგვარი აღარ დარჩება. ანუ, სიტყვა “პრემია” გაქრება ჩვენი საჯარო სივრციდან.
ჩვენ პრემიის მომხრეები კი არ ვართ, როგორც ეს პრესაში ვიღაცამ დაწერა, რაც საწყენია, ჩვენ პირიქით, პრემიის წინააღმდეგი ვართ. თუმცა, ჩვენ გვინდა, ყველას შეეხოს ეს ამბავი და არა შერჩევით, ზოგს შეეხოს ორი თვით და ზოგს – არა. კანონპროექტი, რომელზეც ლაპარაკობს ბატონი ზაქარია ქუცნაშვილი, არის დროებითი, იქამდე, სანამ ამოქმედდება ეს კანონი. რეალურად ჩვენ უკვე დავუჭირეთ მხარი პრემიების გაქრობას ქართული სინამდვილიდან, ყოველ შემთხვევაში, საჯარო სივრციდან მაინც. იქ, სადაც სახელმწიფო ხელფასი არის, იქნება სახელფასო სარგო და დანამატი, პრემიები აღარ იქნება. ის დიდი კანონი საჯარო მოხელეთა შესახებ არის ჩვენი შიდა მოთხოვნა, ამავე დროს იყო ევროკავშირთან ჩვენი ასოცირებისა და განსაკუთრებით ვიზალიბერალიზაციის მოთხოვნა.
სწორედ იმის გამო, რომ ეს პატარა კანონი, რომელიც ორი თვით ადგენდა რაღაც რეგულაციებს და ვერ უზრუნველყოფდა თანასწორობას, რადგან ძალიან ბევრი ისედაც მიიღებდა პრემიას არსებული სპეციალური კანონების საშუალებით, ჩვენ, პარლამენტის წევრებს, შესაბამისმა კომიტეტმა, ეს იყო საპროცედურო კომიტეტი, გაგვიკეთა განმარტება.
ბატონმა გაგამ, კომიტეტის თავჯდომარემ ილაპარაკა საკმაოდ გასაგებად და დამაჯერებლად, რომ ზაქარია ქუცნაშვილის მიერ შემოტანილი კანონპროექტი ეფექტიანი ვერ იქნება ამ და ამ მიზეზების გამო. საპასუხოდ ქუცნაშვილმა ვერ დაარწმუნა შესაბამისი კომიტეტი კანონის ეფექტურობაში და ვერც პარლამენტის სხვა წევრები. არ დავუჭირეთ მხარი, რადგან არაეფექტიანი იყო და ჰქონდა პოპულისტური ხასიათი. ეფექტი ჰქონდა ის, რომ ხალხი იტყოდა – აი, პრემიებს ებრძვიანო, მაგრამ რეალურად ვერ იმოქმედებდა.
“რეზონანსი”: კონკრეტულად რა მიზეზები განაპირობებს ამ კანონის არაეფექტურობას?
ლევან ბეძენიშვილი: საქმე ის არის, რომ როგორც კი ამოქმედდება საქართველოს კანონი საჯარო სამსახურის შესახებ, პრემიების თემა მთავრდება. შესაბამისად, გაირკვა, რომ ზაქარია ქუცნაშვილის მიერ მოწოდებული კანონპროექტი რეალურ ეკონომიკურ შედეგს არ დებს. ის საჯარო მოხელეებს აყენებს სხვადასხვა მდგომარეობაში, ზოგი იღებს ამ პრემიებს და ზოგი – ვერ, მაშინ, როდესაც კანონს საჯარო სამსახურის შესახებ უკვე კენჭი ეყარა და მას მხარი დაუჭირა პარლამენტმაც და თავად ზაქარია ქუცნაშვილმაც, თან არის ევროპულ კანონმდებლობასთან ძალიან ახლოს, სადაც პრემიების საკითხი საერთოდ ამოღებულია.
პირადად ჩემზე გადამწყვეტი გავლენა იქონია შესაბამისი კომიტეტის დასკვნამ, სადაც ხალხი მუშაობს და არკვევს ასეა თუ ისე. ის კომიტეტი რომ იტყვის “არა”-ს, მე, ვინც იმ კომიტეტის წევრი არ ვარ და არ დავსწრებივარ სხდომას, როგორ უნდა ვთქვა “კი”?! მე ძალიან გულწრფელად დავუჯერე იმას, რასაც მოვუსმინე და ისევ ასე მოხდება, რადგან მაგ თემას არაფერი არ მოჰქონდა და ჩრდილავდა უზარმაზარ კანონს საჯარო სამსახურის შესახებ და ჩრდილავდა თავისი პოპულისტური ხასიათით.
ეს კანონი არაფერს არ წყვეტს და იმან უკვე გადაწყვიტა და როგორც კი ამოქმედდება, ამ კანონით მაინც საქართველო ევროპას გაუთანაბრდება. ზაქარია ქუცნაშვილის კანონპროექტს შესაძლოა მცირე შედეგი ჰქონოდა, თუმცა, საერთო სურათს ვერ შეცვლიდა, რადგან ძალიან ბევრი მაინც მიიღებდა პრემიას ცალკე სპეციალური კანონების გამო, ხოლო ის კანონი აუქმებს ყველა სპეციალურ კანონს და პრემია საერთოდ აღარ იქნება. ქუცნაშვილის ინიციატივით ზოგს ექნებოდა პრემია, ზოგს არა და დაიჩაგრებოდა, რაც არ იქნებოდა სწორი. ამაზე კომიტეტმა ილაპარა, იმსჯელა და თავად კანონპროექტის ავტორმა წააგო ამ კომიტეტთან.
“რეზონანსი”: როდიდან ამოქმედდება კანონი საჯარო სამსახურის შესახებ და შეეხება თუ არა ის სახელფასო სარგოსა და დანამატებს?
ლევან ბეძენიშვილი: ეს კანონი იქნება მხოლოდ საჯარო სამსახურებისთვის. კანონს აქვს თავისი ამოქმედების ვადა და საბოლოოდ 2017 წლის დასაწყისიდან ამოქმედდება.
სახელფასო სარგო და დანამატი არის ხელფასის შემადგენელი ნაწილი. ეს დანამატი იქნება განსხვავებული იმის მიხედვით, თუ ვის როგორი დამსახურება აქვს, ვინ რომელი კლასისაა და ა.შ. ამ კანონში ზუსტად განსაზღვულია ვის, რა, რამდენი და რატომ უნდა დაემატოს.
უნდა ამოქმედდეს კანონი, რომლის მიხედვითაც საქართველოში ერთხელ და სამუდაომოდ დამთავრდება პრემიებთან დაკავშირებით ეს ხანგრძლივი საუბრები და სწორედ ასეთია კანონი საჯარო სამსახურის მოხელეების შესახებ.
