„ალია“: ინტერვიუ სოსო ცინცაძესთან: „უსუფაშვილი ნორწამხდარია…“

ვინ დაიბარა და სინამდვილეში რისთვის ჩავიდა უსუფაშვილი აშშ-ში?

„ალია“: რა ცვლილებები უნდა განხორციელდეს საქართველოს უსაფრთხოების კანონმდებლობაში

„რეზონანსი“: 15 დეკემბრის მოლოდინში // საქართველო ვიზების ლიბერალიზაციისათვის აუცილებელ ბევრ სტანდარტს აკმაყოფილებს

„ახალი თაობა“: ინტერვიუ ლევან თედიაშვილთან: „ეს მთავრობა შიმშილობის აქციაზე არ მოდის, თორემ მწვადებზე მოვიდოდა“

„ახალი თაობა“: ინტერვიუ სოფიო ხორგუანთან: „ვერ ვხვდები, რა ყურადღება უნდა მიაქციოს მოშიმშილეებს ხელისუფლებამ?“

„ახალი თაობა“: ინტერვიუ ზურაბ აბაშიძესთან: „ირაკლი ღარიბაშვილს ერთ რჩევას მივცემდი“

„ახალი თაობა“: ინტერვიუ ზაზა ვეკუასთან: დააყენებს თუ არა საკრებულო დავით ნარმანიას იმპიჩმენტის საკითხს? „დედაქალაქის მერს მერიაში არაფერს ეკითხებიან“

„ვერსია“: ინტერვიუ ელდარ შენგელაიასთან: „ვარდების რევოლუცია“ შეცდომა იყო!“ // რაზე ეჩხუბა ზურაბ ჟვანია, იცნობს თუ არა ბიძინა ივანიშვილს და რას ნანობს ელდარ შენგელაია

—————————-

„ალია“, 18 ნოემბერი, 2015 წელი

ინტერვიუ სოსო ცინცაძესთან: „უსუფაშვილი ნორწამხდარია…“

ვინ დაიბარა და სინამდვილეში რისთვის ჩავიდა უსუფაშვილი აშშ-ში?

გემა ზედელაშვილი

14 ნოემბერს საქართველოს პარლამენტის თავმჯდომარე, დავით უსუფაშვილი ამერიკაში გაიპარა. სიტყვა „გაიპარა“ შემთხვევით არ მიხსენებია, რადგან მისი საიდუმლო ვიზიტის შესახებ, პარლამენტის პრესსამსახურს ინფორმაცია საერთოდ არ გაუვრცელებია (ასეთი რამ არ ხდება ხოლმე), ჟურნალისტებმა შემთხვევით გავიგეთ – უბრალოდ, კაცი თვალში დაგვაკლდა და მოვიკითხეთ. უსუფაშვილი ამერიკიდან ავსტრიაში ჩაფრინდა, სადაც ჩვენმა კოლეგებმა „გამოიჭირეს“:

„მსიამოვნებს თქვენი ასეთი ინტერესი იმასთან დაკავშირებით, რომ წინასწარ გსურთ, იცოდეთ, სად მივდივარ, როგორ მივდივარ. მე, სამწუხაროდ, ისეთი სამუშაო მაქვს, რომ ასე ჩუმად ვერაფერს ვერ ვაკეთებ და არ გავაკეთებ. უბრალოდ, არის შემთხვევები, როდესაც სამუშაო მოითხოვს ზოგჯერ სწრაფ გადაწყვეტილებებს, არსად არ დავმალულვარ… ვაშინგტონში ვიყავი საჯარო ღონისძიებებზე, დასამალი აქ არაფერი ყოფილა, მაგრამ მომიწია მარტო გამგზავრება, დელეგაციის გარეშე, იმიტომ, რომ ეს არ ყოფილა ოფიციალური ვიზიტი, ეს იყო სამუშაო ვიზიტი. მე მქონდა შეხვედრები ამერიკის სახელმწიფო დეპარტამენტის წარმომადგენლებთან, იყო საუბარი რეგიონული უსაფრთხოების სისტემის უზრუნველყოფაზე. ჩვენ ზოგჯერ არასაკმარის ყურადღებას ვუთმობთ იმას, რა ხდება ჩვენგან სამხრეთით ან ჩვენგან აღმოსავლეთით, ჩვენი ყურადღება ხშირად კონცენტრირებულია უფრო იმაზე, რა ხდება უშუალოდ საქართველოში, რა ხდება უკრაინაში, მაგრამ ბოლო ხანებში საქართველოსთვის მნიშვნელოვანი მოვლენები ვითარდება სამხრეთით, სირიაში და ჩვენ უნდა ვიყოთ მჭიდრო კონტაქტში ჩვენს პარტნიორებთან“.

აქ ცოტა საეჭვოდაა საქმე. ჯერ ერთი, ახლა საქართველოსთვის არავის სცხელა და მეორეც – რეგიონული უსაფრთხოების საკითხებს სახელმწიფო დეპარტამენტის თავმჯდომარის მდივნებთან არ არჩევენ. მაინც, რისთვის ჩავიდა უსუფაშვილი აშშ-ში?

„ალიას“ პოლიტოლოგი სოსო ცინცაძეესაუბრა:

- მე უკვე შემთხვევითი დამთხვევების აღარ მჯერა. დაუკვირდი, უსუფაშვილი რა დროს წავიდა ამერიკაში: როდესაც საკონსტიტუციო სასამართლოს „რუსთავი 2“-თან დაკავშირებით მიღებული ჰქონდა გადაწყვეტილება. ამის შემდეგ ურთმელიძემ თვითონ გააუქმა საკუთარი განჩინება, თავზე ნაცარი წაიყარა. გარდა ამისა, ამერიკის ელჩი იძახის, უსუფაშვილმა თვითონ მთხოვა, ვაშინგტონში შეხვედრები ჩამიწყვეო, მოხარული ვარ, რომ ეს მოვახერხეო. ასე იყო თუ ისე, „რუსთავი 2“-თან დაკავშირებით აქედან ვიღაცა უნდა ჩასულიყო და განმარტებები გაეკეთებინა, ეს იყო გამოძახება ძალიან დაბალ დონეზე. ყველაზე ოპტიმალური ფიგურა ამ შემთხვევაში იყო პარლამენტის თავმჯდომარე, იქ ვერც უმრავლესობის ლიდერს გაგზავნიდნენ და ვერც საგარეო საქმეთა მინისტრს, რადგან ამერიკელები ამათ სერიოზულად არ მოუსმენდნენ, უსუფაშვილი და „რესპუბლიკელები“ მაინც მაგათი შვილობილები არიან. აქ უკვე გაურკვეველია, ეს ყველაფერი „ოცნების“ სისუსტით არის განპირობებული თუ „ნაციონალების“ მუშაობით, მაგრამ ამერიკელები აწვებიან მედიის თავისუფლებას.

- ბატონო სოსო, თქვენ თქვით, ეს იყო შეხვედრა დაბალ დონეზეო, რატომ?

- კაცი პარლამენტის თავმჯდომარეა, კონსტიტუციით ქვეყნის ერთ-ერთი პირველი პირი. მე სპეციალურად გადავსინჯე სახელმწიფო დეპარტამენტის ბოლო ერთი წლის მიღებები და დადასტურდა, რომ უსუფაშვილი მიიღეს ძალიან დაბალ დონეზე. მას შეხვდნენ სახელმწიფო დეპარტამენტის ხელმძღვანელის მდივნის მოადგილეები, ორი ქალი. მათი საუბრის ერთადერთი და მთავარი თემა იყო „რუსთავი 2“. თუმცა უსუფაშვილმა ჩამოთვალა, ამაზე და ამაზე ვისაუბრეთო და მთავარი თემა ბოლოს დაასახელა. ახლა ჩვენს რეგიონში გეოსტრატეგიული მდგომარეობა როგორია, ამერიკელებმა უსუფაშვილზე კარგადაც იციან და ჩვენს საგარეო საქმეთა მინისტრზეც კარგად იციან. ამას იქ უნდა გაექარწყლებინა ის გაუგებრობა, რაც ამ ტელევიზიასთან დაკავშირებულმა მოვლენებმა გამოიწვია. ამერიკელებმა უთხრეს, ეს საკითხი ისე უნდა გადაწყდეს, რომ არც ერთი მხარე უკმაყოფილო არ დარჩესო.

- ყველა მხარე კმაყოფილი რანაირად უნდა დარჩეს?

- ერთხელ სოლომონ ბრძენმა ორ მომჩივანს უთხრა, შენც მართალი ხარ და შენც მართალი ხარო. იქვე მესამე იდგა, ეგ როგორ, ორივე მართალი როგორ არისო? სოლომონმა უპასუხა, შენც მართალი ხარო. ეს არ არის ის მომენტი, როცა არც მწვადს დაწვავ და არც შამფურს, ერთ-ერთი უნდა დაიწვას. დაბალ დონეზე შეხვედრა იმაზე მიგვანიშნებს, რომ დღეს ამერიკისთვის ჩვენ არ ვართ პრიორიტეტი, ამას აქვს ობიექტური მიზეზები, ჯერ ერთი ის, რომ ამერიკაშიც იწყება საპრეზიდენტო არჩევნები, მეორე – ბარაკ ობამამ ორივე ფეხი ჩაყო თავისავე დაგებულ მახეში, რომელსაც ჰქვია ახლო აღმოსავლეთი. როდესაც უსუფაშვილი ჩავიდა ვაშინგტონში, უკვე კარზე იყო მომდგარი დიდი ოცეულის შეხვედრა. აგერ, პუტინს შეხვდა ობამა, რა უთხრა, საქართველოზე ელაპარაკა? მე მაინც მეგონა, რომ უსუფაშვილს უმრავლესობის ლიდერი თუ არა, უმცირესობის ლიდერი მაინც შეხვდებოდა. როგორც გაირკვა, თვითონ ამბობს, ვიღაც სენატორებსაც შევხვდიო, მაგრამ ისინი რიგითები არიან. უსუფაშვილი ნირწამხდარია… იქ დაუწყეს, სიტყვის თავისუფლება უნდა იყოს და თან არც ერთი მხარე არ უნდა დაზარალდესო. ჩემი გონებრივი ჰორიზონტი ამას ვერ სწვდება, ეს როგორ უნდა მოხდეს, შენ იცი?

- ალბათ, ქიბარ ხალვაშს გადაუხდიან კომპენსაციას და „რუსთავი 2“-ს შეეშვებიან, ორივე მხარე დარჩება კმაყოფილი.

- კომპენსაცია რატომ უნდა გადაიხადონ ბიუჯეტიდან? თუ ძალიან უნდათ, გადაუხადოს ივანიშვილმა თავისი ჯიბიდან. მე თუ მკითხავ, ეს სკანდალი ბიძინა ივანიშვილს აუგორეს სპეციალურად არჩევნების წინ. ერთ-ერთ წინა ინტერვიუში გითხარი, ურთმელიძე „ნაციონალების“ დაკვეთას ასრულებს-მეთქი, ისეთი შთაბეჭდილება მრჩება, მაგ მოსამართლეს დიდი ფული გადაუხადეს (გამოდის, რომ ოცნებაახდენილთა „სასტავიც“ მანანა კობახიძის თამადობით, ბიძინას დაუპირისპირდებიან? – რედ.). თუ ივანიშვილს ამ ეტაპზე რამე არ აწყობდა, ამ თემის წამოწევა-გააქტიურება იყო. დღეს ბიძინას ჰყავს ორი დაუძინებელი მტერი – „რუსთავი 2“ თავის „ნაციონალებით“ და დავით ნარმანია. ნახე, ქალაქში რა ხდება, ცენტრალური ქუჩები გადათხარეს და ასფალტს ვეღარ აგებენ, ან ამ გაგანია უამინდობაში რა უნდა გააკეთონ? მოვყვეთ გლდანიდან და გავიდეთ დიღომში, ყველგან ერთი და იგივე ხდება. ბოლო ორი დღე თბილისში იყო მზე, ჭავჭავაძის გამზირი გადათხარეს და თითი არ გაუნძრევიათ, დაყარეს „კატოკები“, ტრაქტორები და სადღაც გაქრნენ. როგორც კი წვიმა წამოვა, ეგრევე გამოჩნდებიან, აქ ვცხოვრობ, ყველაფერს საკუთარი თვალით ვხედავ. ამის გამო 1937-ში ხალხს ხვრეტდნენ, დღეს კიდევ საყვედურსაც ვერავის ეტყვი, მით უმეტეს, კოკელ ნარმანიას. იცი, ასე რატომ ხდება? თუ სიტუაციას გადაფხეკავ, უცებ აღმოჩნდება, რომ ვიღაცა ვიღაცის ცოლის ნათესავია, ვიღაცა პარლამენტარის ბიძაშვილია.

- მე ვიცი, რომ თქვენც უკვე ამოგივიდათ ყელში ეს „სითი პარკი“, ბოლობოლო, კომპანიაა თუ „მამაო ჩვენო“? რა გახდა, რით ვერ მოვიშორეთ?!

- ოოო… ეს ჩვენი ჯადოა, რომელიც უგულავამ გაგვიკეთა და ნარმანია ვერ ხსნის, არ აქვს სამაგისო უნარ-ჩვევები. ბიჭო, დღემდე იტაცებენ მანქანებს, ხალხს ინფარქტები ემართება, თან 60 ლარი უნდა გაისროლო ჰაერში. ერთხელ ნარმანიამ თქვა, მაგათ 14 კითხვა გავუგზავნე და პასუხს ველოდებიო, 8 თვე გავიდა იმის შემდეგ. ზის აქ „სითი პარკის“ ებრაელი დირექტორი და ვკიდივართ, აბა, ერთი თავის ქვეყანაში გაბედოს ასეთი რამე, თუ ეგრევე ციხეში არ მიაბრძანებენ. საბოლოო ჯამში, გამოდის, რომ „რუსთავი 2“-ს, რომლის გარშემო სკანდალი ბიძინას ნამდვილად არ აწყობდა, ემატება თბილისის მერი, რომელმაც მთელი ზაფხული გაატარა და ახლა დაიწყო ასფალტის დაგება ნახევარ ქალაქში. დღეს ქვებს ნარმანიას ესვრიან და ხვდება ივანიშვილს. ადრე თბილისის „დინამოში“ ერთი ფეხბურთელი ჩამოიყვანეს ბათუმიდან. ცოტა ხნის შემდეგ ჰკითხეს, სად უფრო კარგად გრძნობთ თავს, ბათუმში თუ თბილისშიო? ამან უპასუხა, რა თქმა უნდა, თბილისში, იქ რომ ვიყავი, დედას მე მაგინებდნენ, აქ კიდევ ყველა იძახის, შენი ჩამომყვანის დედაო. ზუსტად ასეა ნარმანიას საკითხით. ადგეს და შეცვალოს, რა პრობლემაა, ხომ ხედავს, რომ კაცი ასფალტსაც ვერ აგებს?

- აზრი აღარ აქვს, არჩევნები კარს მოგვადგა. იმპიჩმენტი შეიძლება ვეღარ მოესწროს.

- კარგი, რა, თუკი უნდა, დაუძახებს და ეტყვის, დაწერე განცხადება, რომ ნერვები აღარ გივარგაო. აგერ, წყალდიდობა იყო, ასფალტის დამგებებმაც მოგატყუეს, ნერვული სისტემა მოგეშალა, გჭირდება დასვენება. წავა ნარმანია კოკში და თავის ოჯახში დაისვენებს, ნერვულ სისტემას აღიდგენს! დანიშნოს ერთი მეურნე კაცი, არ გვჭირდება დიდი პროფესორი და აკადემიკოსი. მოკლედ, ივანიშვილს არც გარე მტრები აკლია და არც შიდა, ისევ თავისიანები უღებენ ბოლოს. თუ თვითონ არ გამოფხიზლდა, არჩევნებში მაგასაც გაუჭირდება და „ოცნებასაც“.

„ალია“, 18 ნოემბერი, 2015 წელი

რა ცვლილებები უნდა განხორციელდეს საქართველოს უსაფრთხოების კანონმდებლობაში

ნინო სამხარაძე

პარიზის მასშტაბურმა ტერაქტმა თავდაყირა დააყენა მსოფლიოს უსაფრთხოება. ფაქტია, რომ მე-20 საუკუნის კანონმდებლობა ეფექტურად ვეღარ უმკლავდება 21-ე საუკუნის საფრთხეებსა და გამოწვევებს, – აცხადებს ამერიკის შეერთებული შტატების ცენტრალური სადაზვერვო სამსახურის უფროსი. საფრანგეთის პრეზიდენტი კონსტიტუციაში ცვლილების შეტანის მოთხოვნით გამოდის. დიდი ბრიტანეთი უსაფრთხოების ზომებს ამკაცრებს… რა ხდება ამ კუთხით ჩვენს ქვეყანაში, რომელიც ჯიჰადისტებისთვის ერთგვარი ჰაბია?

არის საფრთხე, რადიკალმა ისლამისტურმა დაჯგუფებებმა საქართველოს დერეფანი გამოიყენონ სირიასთან, თურქეთთან, რუსეთთან და ევროპასთან დასაკავშირებლად. „ისლამურმა ხალიფატმა“ თავდაყირა დააყენა მსოფლიო და თუკი საქართველო ცივილიზებულ სამყაროს ფეხს არ აუწყობს, არ დახვეწს უსაფრთხოების კანონმდებლობას, მარტო იმის მოთხოვნა, რომ ამ სამსახურს სჭირდება დაფინანსების გაზრდა, არაფერს ნიშნავს, თუკი ფინანსები და კანონმდებლობა შესაბამისობაში არ მოვა. შეიძლება ითქვას, რომ ისლამური სახელმწიფო ყურისძირშია და ჩვენ ცეცხლის რკალში ვიმყოფებით. ისლამურ ხალიფატში 40 ათასი აქტიური მებრძოლი იბრძვის და მათ ჰყავთ 100 ათასი რეზერვისტი. ისლამურ ხალიფატში საბრძოლველად წასულია საფრანგეთიდან – 1200, დიდი ბრიტანეთიდან – 600, გერმანიიდან – 600, ბელგიიდან – 440, დანიიდან – 150, შვედეთიდან – 180, აზერბაიჯანიდან – 400, რუსეთის ფედერაციიდან – 4000, საქართველოდან – 50-100 მებრძოლი…

ტერორიზმის საფრთხისგან საქართველო კი არა, სუპერსახელმწიფოებიც კი არ არიან დაცულნი, რომლებიც დღემდე თავს იწონებდნენ ყველაზე გამართული უსაფრთხოების სისტემით და ყველაზე ძლიერი სპეცსამსახურებით. ვნახეთ, რომ საფრანგეთის ნაქები სპეცსამსახურები ჩაფლავდნენ, მიუხედავად იმისა, რომ მათ ერაყის სპეცსამსახურებმა რამდენიმე დღით ადრე მიაწოდეს ინფორმაცია მოსალოდნელი საფრთხის შესახებ, დიდი ბრიტანეთის სადაზვერვო სამსახურებმა რამდენიმე საათით ადრე გააფრთხილეს ოფიციალური პარიზი, მოსალოდნელის შესახებ ისრაელმაც მიაწოდა ინფორმაცია, მაგრამ ფრანგული სპეცსამსახურები მაინც უძლური აღმოჩნდა ამ სისხლიანი გამოწვევის წინაშე. ამიტომაც, დიდმა ბრიტანეთმა კანონპროექტი შეიმუშავა საგამოძიებო უფლებამოსილების გაზრდის შესახებ. პროექტის მიხედვით, პროვაიდერები ვალდებულები ხდებიან, ინტერნეტმომხმარებელთა ვებისტორიები ერთი წლის მანძილზე შეინახონ. ასევე, რეგულაციები შეეხება „Whats app“ „i Messenge“ (დაშიფრული მესიჯების სერვისებს), კანონი ასევე ითვალისწინებს, როდის შეუძლიათ სპეცსამსახურებს კომუნიკაციების მიყურადება და ჩაწერა. ამავე პროექტის მიხედვით, როდესაც საფრთხეშია ადამიანის სიცოცხლე, არსებობს გადაუდებელი აუცილებლობა, შესაძლებელია, მიყურადება განხორციელდეს მოსამართლის ნებართვის გარეშე 5 დღის განმავლობაში. ბრიტანეთის უსაფრთხოების სამსახურების ხელმძღვანელები აღნიშნავენ, რომ ტექნოლოგიური პროგრესის ფონზე მათი უფლებამოსილებები მოდერნიზებას საჭიროებს ქვეყნის უსაფრთხოების უკეთესად დაცვის მიზნით.

ცნობილია, რომ მსოფლიოში დიდი ბრიტანეთი, უსაფრთხოების ზომებიდან გამომდინარე, ყველაზე უსაფრთხო ქვეყნად ითვლება. დიდმა ბრიტანეთმა ბოლო რამდენიმე თვის განმავლობაში ხუთჯერ აირიდა თავიდან მოსალოდნელი მასშტაბური ტერორისტული აქტი…

ახლა ვნახოთ, რა ხდება საქართველოში ამ კუთხით…

13 ნოემბრის მასშტაბურ ტერაქტამდე ორი დღით ადრე, 11 ნოემბერს, არასამთავრობო ორგანიზაცია „ადამიანის უფლებების სწავლებისა და მონიტორინგის ცენტრი“ სარჩელით მიმართავს საკონსტიტუციო სასამართლოს და ითხოვს იმ ნორმების არაკონსტიტუციურად ცნობას, რომელთა საფუძველზეც შესაძლებელია, რომ კონტრდაზვერვის საქმიანობის ფარგლებში მოსამართლის ნებართვის გარეშე განხორციელდეს ფარული ვიდეო და აუდიოჩაწერა, ფარული კინო და ფოტოგადაღება. სატელევიზიო კამერებისა და სხვა ელექტრონული მოწყობილობების გამოყენება, აგრეთვე, ელექტრონული თვალთვალი ერთი მონაწილის წერილობითი თანხმობით.

საკონსტიტუციო სასამართლოც და ეს არასამთავრობოც, ალბათ, თავის საქმეს მიხედავენ, მაგრამ უკვე დიდი ხანია დროა, შესაბამისმა სამსახურებმა შეისწავლონ ისეთი არასამთავრობო ორგანიზაციები, რომელიც არ არის გამჭვირვალე და არ ვიცით, რა ინტერესებს ატარებს ქვეყანაში. შეიძლება ბევრი მათგანი ემსახურება არა ქვეყნის ინტერესებს, არამედ ხშირ შემთხვევაში ატარებენ უცხო ქვეყნის სპეცსამსახურების ინტერესს. საქართველოში, 2013 წლის მონაცემებით, რეგისტრირებულია 18044 არასამთავრობო ორგანიზაცია, აქედან 506 გაუქმებულია და აქტიურად მხოლოდ 17538 არასამთავრობო ორგანიზაცია მუშაობს. 3 მილიონ 600- ათასიან ქვეყანაში ასეთი რაოდენობის არასამთავრობო ორგანიზაციები, წესით, კრიტიკის ობიექტი უნდა გამხდარიყო.

სამი წლის განმავლობაში ხელისუფლების მხრიდან დრო და დრო ვისმენთ შეძახილებს და საყვედურებს მათ მიმართ, რამდენჯერმე ბიძინა ივანიშვილმა დააყენა საკითხი, რომ შეისწავლიდა არასამთავრობოების საქმიანობას და მან მხოლოდ რამდენიმე ტრაფარეტული არასამთავრობო ორგანიზაცია ჩამოთვალა. ალბათ, ბიძინა ივანიშვილმა არ იცის, რომ იმ ხუთი არასამთავრობოს გარდა, ქვეყანაში არსებობს კიდევ 17 ათასზე მეტი ასეთი ორგანიზაცია, რომელიც მინიმუმ მტრის წისქვილზე ასხამს წყალს. მრავალმილიონიან საფრანგეთში მოქმედებს 500- ზე მეტი არასამთავრობო ორგანიზაცია და საქართველოსგან განსხვავებით, ისინი მხოლოდ იმ მიმართულებებს იკვლევენ, რაშიც დასაქმებულნი არიან და წლის ბოლოს სპეციალურ მოხსენებას აქვეყნებენ, მათ შორის, ხარჯების შესახებაც.

ამერიკის შეერთებულმა შტატებმა კატეგორიულად აკრძალა არაბული და ისლამური სახელმწიფოების მიერ დაფინანსებული არასამთავრობო ორგანიზაციები და სავალდებულოა, იქ მოქმედმა არასამთავრობოებმა დაასაბუთონ ფულის წარმომავლობა, ისინი ჩვეულებრივ საგადასახადო რეჟიმის პირობებში იმყოფებიან და გასაჯაროებულია ინფორმაცია, ვინ დგას მათ უკან და რა ფულით საზრდოობენ. საქართველოში, განსხვავებით პოლიტიკური პარტიებისგან, არასამთავრობო ორგანიზაციებისთვის სავალდებულო არ არის, გაასაჯაროონ, საიდან, რომელი ქვეყნიდან იღებენ დახმარებას. ალბათ, დროა, საქართველოს სპეცსამსახურები დაინტერესდნენ, ვინ დგას კონკრეტული არასამთავრობო თუ საგანმანათლებლო ორგანიზაციის უკან, ვინაიდან ისლამური სახელმწიფო, არ არის მხოლოდ ტერორისტული ქსელი, მათ აქვთ ჩამოყალიბებული იდეოლოგია, დიდი ფული და ყველა ის სახელმწიფო ატრიბუტიკა, რომლითაც სხვა ქვეყნების მოსახლეობაზე ახდენენ ზეგავლენას.

მსოფლიოს წამყვანი ქვეყნები თანხმდებიან, რომ ზედმეტმა ტოლერანტულობამ და გახსნილობამ დააყენა ის შედეგი, რაც დააყენა და ვეკითხები არასამთავრობო ორგანიზაციების წარმომადგენლებს, ვინ მოგცათ იმის უფლება, სახელმწიფო უსაფრთხოებას გადააბიჯოთ და თქვენი მერკანტილური ინტერესები დაიკმაყოფილოთ? ზუსტადაც, სახელმწიფო უსაფრთხოების სამსახურმა უნდა იმოქმედოს თავისი ქვეყნის უსაფრთხოების ინტერესებიდან გამომდინარე.

მსოფლიო ტერორიზმთან ბრძოლა მიმართულებას იცვლის და ევროპული ქვეყნები საკუთარი კონსტიტუციის გადახედვაზეც ფიქრობენ და საქართველოში არასამთავრობო ორგანიზაციები პირდაპირ წინააღმდეგობაში მოდიან ეროვნულ უსაფრთხოებასთან. ამერიკის ცენტრალური სადაზვერვო სამსახურის ხელმძღვანელი ჯონ ბერნარი ვაშინგტონში საგანგებო მოხსენებით გამოვიდა, რომელიც აცხადებს, რომ პარიზის თავდასხმა მხოლოდ ერთჯერადი აქტი არ არის. ისლამური ხალიფატის მებრძოლებმა სისხლისღვრის ადგილები მონიშნეს, ეს არის ლონდონი, ვაშინგტონი, რომი, მოსკოვი… ამიტომაც შტატები ქვეყნის უსაფრთხოებასთან დაკავშირებით სტრატეგიის შეცვლის აუცილებლობაზე საუბრობს, ცენტრალური სადაზვერვო სამსახურის ხელმძღვანელი აცხადებს, რომ უნდა მოხდეს საკანონმდებლო შეზღუდვების გადახედვა უსაფრთხოების მუშაობასთან დაკავშირებით:

„არსებობს უამრავი საშუალება, რომელიც როგორც ტექნიკურად, ასევე კანონის თვალსაზრისით ართულებს დაზვერვისა და უსაფრთხოების სამსახურების შესაძლებლობას. დროა, გავარკვიოთ, განსაკუთრებით ევროპისთვის, ასევე ამერიკისთვის, ნებით თუ უნებლიეთ, ხომ არ შეიქმნა ერთგვარი ნაპრალი დაზვერვისა და უსაფრთხოების სამსახურების შესაძლებლობებში, დაიცვან ხალხი. ბოლო რამდენიმე წლის განმავლობაში იყო გარკვეული ინფორმაციის უკანონო გამჟღავნების ფაქტები, იყო გარკვეული პოლიტიკა, კანონით დაწესებული თუ სხვა ქმედებები, რომლებმაც უფრო დიდი გამოწვევის წინაშე დააყენა ჩვენი შესაძლებლობა, გამოეაშკარავებინა ტერორისტები. იმედი მაქვს, რომ ეს იქნება განგაშის ზარი, განსაკუთრებით ევროპაში, სადაც, ჩემი აზრით, არასწორი წარმოდგენა იყო იმ საქმიანობაზე, რომელსაც დაზვერვის სამსახურები ეწევიან. ჩვენ უნდა ვახდენდეთ ინფორმაციის უფრო მეტ გაცვლას, თუმცა პროგრამული, ტექნიკური და იურიდიული საკითხები ამ პროცესს აფერხებს. ასევე, უნდა აღინიშნოს კონფიდენციალობის თემა და მთავრობის როლი ამ პროცესში, კონგრესი უკანასკნელი წლების განმავლობაში უშედეგოდ ეცადა კანონების მიღებას, რომლებიც შემხებლობაში მოვიდოდა კიბერკანონმდებლობასთან ინფორმაციის გავრცელების კონტექსტში. ფაქტია, რომ მე-20 საუკუნის კანონმდებლობა ეფექტურად ვერ უმკლავდება 21-ე საუკუნის კანონებს… იმედი მაქვს, რომ ამერიკა მოკავშირეებთან ერთად შეჯერდება ყოვლისმომცველ იურიდიულ და საექსპლოატაციო მიდგომაზე არსებულ საფრთხეებთან მიმართებაში, რომელიც, თავის მხრივ, ინტეგრირებული იქნება ტერორიზმის წინააღმდეგ ბრძოლის ხერხებში და დაიცავს ეროვნულ უსაფრთხოებას….“

სუპერსახელმწიფოები მიდგომებს, კანონებსა და კონსტიტუციასაც კი ცვლიან ხალხის ტერორიზმისგან დასაცავად და თუკი ამ ჯაჭვიდან საქართველო ამოვარდება, ჩვენ ვიქნებით ყველაზე დაუცველები. ამიტომ დროა, უსაფრთხოების სამსახურმა კანონმდებლობას გადახედოს და სინთეზში მოიყვანოს ბრიტანეთის, ამერიკის, ისრაელის, გერმანიის კანონმდებლობასთან. ქართველ სპეცსამსახურებს ძალიან ბევრი მუშაობა დასჭირდებათ იმისთვის, რომ გამოავლინონ ტერორიზმის ბუდეები… არადა, მიხეილ სააკაშვილმა „ოცნების“ ხელისუფლებას ბევრი ნაღმი დაუტოვა.

„ალია“ წერდა, რომ საქართველოში რელიგიური კონფლიქტური კერების გასაღვივებლად, სხვადასხვა ისლამისტური ჯგუფები და კონკრეტული ადამიანები იღვწიან. მათ შორის მიხეილ სააკაშვილის დედის გიული ალასანიას უახლოესი მეგობარი, თურქი ბიზნესმენი ჰეთჰულაჰ გიულენიც გახლავთ, რომელიც ერთ-ერთი ისლამისტური დაჯგუფების „ნურჯულარის“ დამფინანსებლად სახელდება. გიულენის თხოვნით სააკაშვილმა „ნურჯულარის“ წევრებს, თურქეთისა და არაბული ქვეყნების მოქალაქეებს, საქართველოს მოქალაქეობა მიანიჭა დიდი ფულის სანაცვლოდ, იმისთვის, რომ მათ საკუთარი შავბნელი საქმეები ეკეთებინათ და საქართველოში თავისუფლად გადაადგილებულიყვნენ. მიხეილ სააკაშვილმა პრეზიდენტობის ბოლო ვადაში 3200 ექსტრემისტს, და გაურკვეველი წარმომავლობის უცხოელს საქართველოს მოქალაქეობა მიანიჭა. ამიტომაც კაცმა არ იცის, მისი დადებული ნაღმი როდის აფეთქდება და მათი ხელით რა ტერორისტული აქტები განხორციელდება.

ექსპერტი კავკასიის საკითხებში მამუკა არეშიძე „ალიასთან“ ინტერვიუში აცხადებს:

– გასათვალისწინებელია დიდი ბრიტანეთის, ამერიკის შეერთებული შტატების, საფრანგეთის პოზიციები, რომლებიც ცვლიან კანონმდებლობას საკუთარი მოქალაქეების უსაფრთხოების დაცვის მიზნით. მე კარგად არ ვიცნობ საქართველოს კანონმდებლობას ამ თვალსაზრისით, მაგრამ, თუკი საქართველოს სპეცსამსახურებს ამ კუთხით რაიმე პრობლემა აქვთ, ისინი ამ ფერხულში უნდა ჩაებან და კანონმდებლობაში 21-ე საუკუნის გამოწვევების შესაბამისი ცვლილებები უნდა განახორციელონ. დასავლეთის სპეცსამსახურებს, ჩანს, რომ გარღვევა ჰქონდეთ და მე შემიძლია საფრანგეთის სპეცსამსახურების მაგალითით ვიმსჯელო, გერმანიაში შეხვედრა მქონდა საფრანგეთის სპეცსამსახურის წარმომადგენლებთან და მათ მითხრეს, ჩვენ ვართ შეზღუდულები და ხელფეხშეკრულებიც პოლიტიკური ხელმძღვანელობის მხრიდან, რადგან ისინი წინ აყენებენ ადამიანის უფლებებს და ისეთ საკითხს, როგორიც არის ტოლერანტობა, მულტიკულტურული თემები და ა.შ. მე ვთვლი, ეს არის ფსევდოფასეულობები, თან იმ ფორმით, როგორც დღეს დასავლეთშია მიღებული, ხშირ შემთხვევაში, ასეთი ფასეულობების მხარდაჭერა ქვეყნის ლიდერების მხრიდან ხდება მათივე ქვეყნის საზიანოდ. ეს მითხრა საფრანგეთის სპეცსამსახურების წარმომადგენელმა. მათ ხშირ შემთხვევაში იციან, ვინ არის ისლამური ხალიფატის წევრი, მაგრამ კანონმდებლობით შეზღუდულები არიან და ვერ მოქმედებენ, მე ვფიქრობ, დაგვიანებულიცაა უსაფრთხოების კუთხით კანონმდებლობაში ცვლილებების განხორციელებაზე ფიქრის დაწყება.

– ბატონო მამუკა, ჩვენთან ინტერვიუში მუდმივად აცხადებდით, განგაშის ზარებს რეკდით, რომ პანკისზე ცუდი მდგომარეობაა ქვემო ქართლში, გახსნილია ძალიან ბევრი საეჭვო დაწესებულება, რომელიც მოქმედებს, არასამთავრობო, საგანმანათლებლო და საქველმოქმედო ორგანიზაციების საფარქვეშ. ე.წ. ისლამურ სახელმწიფოს ჰყავს ძალიან ძლიერი სპეცსამსახურები, რომლებიც გეგმავენ და ახორციელებენ ტერორისტულ აქტებს და უდიდეს იდეოლოგიურ სამუშაოებს აწარმოებენ. ისინი კარგად ფლობენ ინტერნეტს. თქვენი აზრით, რა ცვლილებები უნდა განხორციელდეს საქართველოს უსაფრთხოების კანონმდებლობაში და როგორი იქნება არასამთავრობოების რეაქცია, თუკი ბრიტანეთის მსგავსად სუს-ი განაცხადებს, რომ ჩვენ ვიტოვებთ უფლებას, 5 დღის მანძილზე საეჭვო პირს მოვუსმინოთ, ვუთვალთვალოთ სასამართლოს სანქციის გარეშეო.

– სანქციის გარეშე მოსმენამ მიჩვევა იცის, თუმცა ექსტრემალურ ვითარებაში კონკრეტულ პირებზე უზენაესი ხელისუფლება მიიღებს არგუმენტად, მათზე შესაძლებელია უფრო მოქნილი იყოს კანონმდებლობა. მკითხველი, ალბათ, ხვდება, რა ტიპის პიროვნებებსა და ორგანიზაციებს ვგულისხმობ. სულ მცირე ორგანიზაციებიც და პიროვნებებიც, ვისაც უსაფრთხოების სამსახური საეჭვოდ მიიჩნევს, ეს საკითხი შეთანხმებული უნდა იყოს საქართველოს პრემიერ-მინისტრთან, პარლამენტის ხელმძღვანელობასთან. ვფიქრობ, საქართველოს ხელისუფლებამ დღეს უნდა შექმნას განსაკუთრებული საბჭო კრიზისების მართვის, ის კი არა, რომელიც დღეს გვაქვს, არამედ უფრო წარმომადგენლობითი, რომელიც ამ ექსტრემალურ სიტუაციაში ფეხს აუბამს იმ გამოწვევებს, რაც ჩვენს პარტნიორებთან ხდება და ასევე ჩვენს მოწინააღმდეგეებთან, მაგალითად, ვგულისხმობ რუსეთს, სადაც უფრო ღრმად წავიდა სპეცსამსახურები ისლამისტური საფრთხის წინააღმდეგ ბრძოლაში. ტერორიზმის წინააღმდეგ ბრძოლის ერთიანი გეგმა, რომლის მიხედვითაც სუპერსახელმწიფოები და მათი მოკავშირეები მოქმედებენ, არ არსებობს, ამას არეგულირებს თითოეული ქვეყნის კანონმდებლობა, რომელიც ხედავთ, რომ 21-ე საუკუნის გამოწვევებს არ პასუხობს. აქ მხოლოდ ტერორიზმის წინააღმდეგ ბრძოლაში არ არის საქმე, საქმე გახლავთ ტერორიზმის პრევენციაშიც.

მაგალითად, დღეს ახალგაზრდები საეჭვო სასწავლებლებში მიდიან ისლამურ ქვეყნებში, იმისთვის, რომ ქვეყნიდან მათი გადინება არ მოხდეს, აქ უნდა იყოს გახსნილი შესაბამისი სასწავლებლები. სხვათა შორის, ძალიან კარგი გამოცდილება აქვს ავსტრალიას მუდმივმოქმედი ანტიტერორისტული საბჭოს კუთხით, სადაც გაერთიანებული არიან არა მარტო სპეცსამსახურები, არამედ ხელისუფლებისა და საზოგადოების წევრები, რომლებიც განსაკუთრებული ნდობით სარგებლობენ. მათ აქვთ ტერორიზმის წინააღმდეგ ბრძოლის გეგმა შექმნილი და ამ გეგმას ახორციელებენ. ასევე, საინტერესოა ისრაელის ანტიტერორისტული გეგმა. მოგეხსენებათ, ისრაელი მუდმივი ტერორიზმის საფრთხის ქვეშ ცხოვრობს, მათ აქვთ ბევრი მკაცრი, უხეში წესი და ვფიქრობ, ჩვენ უნდა ავიღოთ ისრაელის, ავსტრალიისა და ზოგ შემთხვევაში სხვა დიდი ქვეყნების გამოცდილება და დავნერგოთ ჩვენს ქვეყანაში.

დღეს ლაპარაკია იმაზე, რომ საქართველოს სპეცსამსახურებს დაფინანსება უნდა გაუორმაგდეთ და ეს წინადადება „თავისუფალმა დემოკრატებმა“ დააყენეს. ეს არის დემაგოგია, რადგან, თუკი შეზღუდული კანონით იმოქმედებენ, მათ არაფერში სჭირდებათ გაორმაგებული ფინანსები. დღეს ისეთი მდგომარეობაა შექმნილი, თუ საჭირო გახდა, უსაფრთხოების კანონმდებლობა კი არა, შეიძლება კონსტიტუციაც შეცვალო, მაგრამ ამისთვის სერიოზული არგუმენტებია საჭირო, რომლებიც საზოგადოებისთვისაც მისაღები და გასაგები გახდება. ძალიან ბევრი გაურკვეველი წარმომავლობის ორგანიზაცია მოქმედებს საქართველოს ტერიტორიაზე, სპეცსამსახურებმა ამ კუთხით ბევრი უნდა იმუშაონ. სხვათა შორის, ჩემს ცხოვრებაში პირველად დარწმუნებით შემიძლია გითხრათ, რომ ლევან იზორიას განცხადება ინტერნეტსაიტებთან დაკავშირებით იყო აბსოლუტურად სწორი. საიტების ლიკვიდაცია ყველაზე დაბალი კვალიფიკაციის ჰაკერისთვის პრობლემა არ არის, მიუხედავად იმისა, რომ ძალიან სერიოზული ხალხი მუშაობს ინტერნეტრესურსებზე ისლამური ხალიფატის მხრიდან, ზოგ შემთხვევაში ეს საიტები საჭიროა იმისთვის, რომ თვალყური მიადევნო, ვინ არის დაკავშირებული ამ საიტებთან, ვეთანხმები იზორიას, რომ არ არის ამ საიტების დაბლოკვა საჭირო, მეტიც, დაუბრკოლებლად უნდა იმუშაონ, რათა რაც შეიძლება მეტი ინფორმაცია დააგროვო და სათავეზე გახვიდე. მე უბრალოდ ერთი რამ მაშინებს, ასეთი მასშტაბის ტერორისტებთან ბრძოლის გამოცდილება საქართველოს სპეცსამსახურებს არ აქვთ, ამას სჭირდება ბევრი მუშაობა, საკანონმდებლო ბაზის გასწორება, ტექნიკური აღჭურვა, რესურსის მოზიდვა და ეს ყველაფერი არის სწრაფად გასაკეთებელი საქმე.

„რეზონანსი“, 18 ნოემბერი, 2015 წელი

15 დეკემბრის მოლოდინში

საქართველო ვიზების ლიბერალიზაციისათვის აუცილებელ ბევრ სტანდარტს აკმაყოფილებს

ზვიად მახარაძე (ბრიუსელი)

ასოცირების საბჭოს შემდეგ მედიასთან გაკეთებულ განცხადებაში პრემიერ-მინისტმა ირაკლი ღარიბაშვილმა კიდევ ერთხელ დაადასტურა, რომ საქართველოსა და ევროკავშირის ურთიერთობაში ასოცირების ხელშეკრულება ხელისუფლების პრიორიტეტს წარმოადგენს და მისი შესრულების პროცესმა მნიშვნელოვნად დააჩქარა საქართველოს მოდერნიზაცია.

“საქართველომ მნიშვნელოვან წარმატებებს მიაღწია დემოკრატიის კონსოლიდაციის, მართლმსაჯულების სისტემის დამოუკიდებლობისა და კანონის უზენაესობის განმტკიცების, კორუფციის წინააღმდეგ ბრძოლის, ადამიანის უფლებათა და ფუნდამენტურ თავისუფლებათა დაცვის, ეკონომიკური სტაბილურობისა და ზრდის საკითხებში,” – განაცხადა ღარიბაშვილმა.

ევროკავშირის უმაღლესმა წარმომადგენელმა საგარეო და უსაფრთხოების პოლიტიკის საკითხებში, ფედერიკა მოგერინიმ ხაზი გაუსვა ევროკავშირსა და საქართველოს შორის 2014 წლის ივნისში ხელმოწერილი ასოცირების ხელშეკრულების განხორციელებაში მიღწეულ პროგრესს, თუმცა, მისი აზრით, ჯერ კიდევ არსებობს გამოწვევები.

უმაღლესი წარმომადგენლის თქმით, საარჩევნო წელს გარანტირებული უნდა იქნეს მშვიდი, ურთიერთპატივისცემით განმსჭვალული პოლიტიკური გარემო, აუცილებელია თავის შეკავება ნეგატიური მოქმედებისა და განცხადებებისგან. პოლიტიკური გარემო უნდა დაეფუძნოს მედიის თავისუფლებას, პლურალიზმს, კანონის უზენაესობასა და სასამართლოს დამოუკიდებლობას, რათა უზრუნველყოფილი იყოს დემოკრატიული, ინკლუზიური და სამართლებრივი არჩევნები.

სამეზობლო პოლიტიკისა და გაფართოების საკითხებში ევროკომისრის იოჰანეს ჰანის აზრით, ევროკავშირი მნიშვნელოვან მხარდაჭერას უწევს საქართველოს “ამბიციური პოლიტიკური, მართლმსაჯულების სისტემისა და ეკონომიკური რეფორმების” განხორციელების საქმეში. “ამ ეტაპზე ყოველწლიურად გამოიყოფა დაახლოებით 100 მილიონი ევრო, რაც, ჩემი აზრით, მნიშვნელოვანი თანხაა,” – განაცხადა კომისარმა.

შეხვედრის შემდეგ გავრცელებულ ერთობლივ პრესრელიზში აღნიშნულია, რომ ასოცირების საბჭო დადებითად აფასებს 2014 წლის ნოემბრის (საბჭოს) პირველი სხდომის შემდეგ ევროკავშირსა და საქართველოს თანამშრომლობაში მიღწეულ მნიშვნელოვან წინსვლას და მიესალმება საქართველოს მზადყოფნას, შეინარჩუნოს რეფორმების პროცესში მიღწეული დადებითი შედეგები. ამ კონტექსტში ასოცირების საბჭომ შეაფასა საქართველო, როგორც აღმოსავლეთ პარტნიორობის ერთ-ერთი მოწინავე ქვეყანა.

როგორც პრესრელიზშია აღნიშნული, მხარეები შეთანხმდნენ, რომ 2016 წლის ოქტომბრის არჩევნების მოახლოებასთან ერთად საჭიროა არსებული დემოკრატიული გარემოს შენარჩუნება. ევროკავშირმა მოუწოდა საქართველოში მოქმედ ყველა პოლიტიკურ ძალას, უზრუნველყონ თავისუფალი მედია გარემო და პოლიტიკური პლურალიზმი, როგორც დემოკრატიული არჩევნების წინაპირობა და თავი შეიკავონ ისეთი ნაბიჯებისა თუ განცხადებებისგან, რომლებმაც შეიძლება დაძაბულობის ზრდა და პოლარიზების გაღრმავება გამოიწვიოს.

ევროკავშირმა განსაკუთრებით გაუსვა ხაზი იმას, რომ უზრუნველყოფილი უნდა იყოს დამოუკიდებელი სისხლისსამართლებრივი გამოძიება და დევნა; ის უნდა იყოს მტკიცებულებებზე დაფუძნებელი, გამჭვირვალე, მიუკერძოებული, წარიმართოს პროცედურების მკაცრი დაცვით და ასოცირების შეთანხმებით გათვალისწინებული ვალდებულებების შესაბამისად.

ასოცირების საბჭო მიესალმა საქართველოს მიერ ვიზების ლიბერალიზების პროცესში მიღწეულ წარმატებას და ვალდებულებების უდიდესი ნაწილის შესრულებას, როგორც ევროკომისიის 2015 წლის მაისის პერიოდულ ანგარიშშია აღნიშნული. ევროკავშირმა კმაყოფილებით აღნიშნა ის წინსვლა, რომელიც დარჩენილი ვალდებულებების შესრულებაში იქნა მიღწეული.

ევროკავშირის უმაღლესი წარმომადგენელი ფედერიკა მოგერინი ასევე შეეხო ვიზების ლიბერალიზაციის საკითხს და მიესალმა იმ ფაქტს, რომ საქართველო უკვე აკმაყოფილებს ამისთვის აუცილებელ ბევრ სტანდარტს, მაგრამ აღნიშნა, რომ აუცილებელია მუშაობის გაგრძელება დარჩენილი ვალდებულებების შესასრულებლად.

ევროპული და ევროატლანტიკური ინტეგრაციის საკითხებში სახელმწიფო მინისტრმა, დავით ბაქრაძემ განაცხადა, რომ ვიზალიბერალიზაციის საკითხზე ევროკომისია საბოლოო დასკვნას 15 დეკემბერს გამოაქვეყნებს, თუმცა უკვე შეიძლება ითქვას, რომ “ძალიან დიდი და პოზიტიური მოლოდინის” საფუძველი არსებობს.

“რეზონანსის” შეკითხვაზე, საბჭოს სხდომაზე იყო თუ არა უფრო დეტალური საუბარი საარჩევნო წელს წყნარი და თავშეკავებული საარჩევნო გარემოს აუცილებლობაზე, მინისტრმა აღნიშნა, რომ ევროკავშირის წარმომადგენლები შეხვედრის შემდეგ მიღებულ ერთობლივ განცხადებაში მოყვანილი ფრაზებით შემოიფარგლნენ და ამ თემის დეტალური განხილვა არ ყოფილა. “დღევანდელი სხდომით ჩვენ კიდევ ერთი სერიოზული ნაბიჯი გადავდგით ევროპასთან ინტეგრაციის გზაზე და, ჩემი აზრით, ეს არის ძალიან დიდი ნაბიჯი ვიზალიბერალიზაციის პოლიტიკური გადაწყვეტილების მიღებისკენ,” – განაცხადა საგარეო ურთიერთობათა კომიტეტის თავმჯდომარის პირველმა მოადგილემ, ზვიად კვაჭანტირაძემ.

“ჩვენი ევროპელი კოლეგების მხრიდან გაჟღერდა ძალიან ბევრი ოპტიმისტური გზავნილი და არც ზედმეტი შეკითხვები გაჩენილა. იყო აღნიშნული სერიოზული პროგრესი ყველა მიმართულებით, ამიტომ გვაქვს დიდი მოლოდინი, რომ ჩვენ ამ გზაზე მალე დიდ წარმატებას მივაღწევთ,” – აღნიშნა კვაჭანტირაძემ.

„ახალი თაობა“, 18 ნოემბერი, 2015 წელი

ინტერვიუ ლევან თედიაშვილთან: „ეს მთავრობა შიმშილობის აქციაზე არ მოდის, თორემ მწვადებზე მოვიდოდა“

მარიამ მჭედლიშვილი

მთავრობის ადმინისტრაციასთან 8 ნოემბერს დაწყებული შიმშილობის აქცია გრძელდება. „ახალი თაობა“ მოშიმშილეებს გუშინ, 17 ნოემბერსაც ეწვია. ამ დროისთვის მოშიმშილეების რაოდენობა 44 იყო. მოსალოდნელია აქციის მონაწილეების რაოდენობის გაზრდა.

აქციაში მონაწილეობენ როგორც საქართველოს პატრიოტთა ალიანსის ლიდერები და წევრები, ისე მათი მხარდამჭერები. გარდა ამისა, ორგანიზებული ხასიათი მიეცა მოქალაქეების მორიგეობას. ამ მიზნით შექმნილია მობილური ჯგუფები. შიმშილობის აქციები მიმდინარეობს რეგიონებშიც. ყველგან გამოითქმება პროტესტი შუალედური არჩევნების შედეგების გამო, გაისმის არჩევნების გაყალბებაში მონაწილე მინისტრებისა და სხვა ჩინოსნების გადაყენების, გაყალბების საქმის გამოძიების, ასევე საარჩევნო გარემოს გაუმჯობესების მოთხოვნები. აჭარაში ამას დაემატა ქობულეთის პოლიციელების მხრიდან ძალაუფლების გადამეტების გაპროტესტება.

როგორც „ახალმა თაობამ“ შეიტყო, აქციის თბილისის მონაწილეებთან მივიდნენ ეროვნული ფორუმის წევრები. მათ უკმაყოფილება გამოთქვეს მიმდინარე პროცესებში საკუთარი პარტიის პოზიციით, ეროვნული ფორუმის დატოვებისა და აქციის მონაწილეებთან შეერთების სურვილი გამოთქვეს. პარტიელების თხოვნის მიუხედავად, პროტესტს აგრძელებს ლეგენდარული სპორტსმენი, პატრიოტთა ალიანსის ერთ-ერთი ლიდერი, პარლამენტის ყოფილი წევრი ლევან თედიაშვილი.

- კარგად ვიცი, როგორ ჩატარდა 31 ოქტომბერს შუალედური არჩევნები საგარეჯოში. იქ გაიმარჯვა ირმა ინაშვილმა. არჩევნები გაყალბდა. ამის გამო დავიწყეთ შიმშილობა. შეიძლება მერე დაუმორჩილებლობაც გამოვაცხადოთ. მინისტრებმა, რომლებიც გაყალბებაში მონაწილეობდნენ, უნდა დატოვონ თანამდებობები, – გვითხრა ლევან თედიაშვილმა. მისი თქმით, აქ საქმე გვაქვს არა უნებლიე შეცდომებთან, არამედ, შეგნებულ გაყალბებასთან, ანუ დანაშაულთან, რომელშიც შეგნებულად მონაწილეობდნენ თანამდებობის პირები.

- თინა ხიდაშელი და დავით უსუფაშვილი იურისტები არიან. მათ ყველაფერი კარგად იციან, – ამბობს ლევან თედიაშვილი, რომელიც სერიოზულ პრობლემებზე ნახევრად ხუმრობით საუბრობს.

- როგორ ფიქრობთ, მიაღწევთ ხიდაშელისა და აგულაშვილის გადაყენებას?

- ჩვენ ბრძოლას გავაგრძელებთ. ეტყობა, სკამები არ ეთმობათ. როცა დეპუტატი ვიყავი, სახელმწიფო ატრიბუტიკის საკითხებს განვიხილავდით. უნდა დაგვემტკიცებინა ჰიმნი, გერბი და დროშა. მაშინ წამოვაყენე წინადადება, რომ დროშაზე სკამი გამოგვესახა. სკამი არის სიმბოლო, რომლისთვისაც ბევრი ყველაფერს კადრულობს. ახლაც მინისტრებს სკამები არ ეთმობათ. მაშინდელივით ახლაც ავწიე ხელი უკანა მერხზე მჯდომი მოსწავლესავით, მამლის სარგებლობაზე რომ ლაპარაკობს. ასეთი წინადადება გავაცანი ირმა ინაშვილს – ვინაიდან მთავრობა შიმშილობის აქციაზე არ მოდის, მოდით, რამდენიმე ღორი დავკლათ, მწვადები შევწვათ და მწვადებზე აუცილებლად მოვლენ-მეთქი. სამწუხაროდ, არ დამიჯერეს. აქციაზე ისევ არ მოდის მთავრობა. სამაგიეროდ, ხალხი მოდის და მხარს გვიჭერს.

აქციაში მონაწილეობს საგარეჯოელი ვაჟა კევლიშვილი, რომელიც პატრიოტთა ალიანსის მხარდამჭერია.

- საგარეჯოში 12 კაცი შიმშილობს. პირადად მე აქ გამოვთქვამ პროტესტს. არჩევნებმა ჩვენ თვალწინ ჩაიარა. ჩვენი რჩეული ირმა ინაშვილია. ამაზე ტელეკომპანია იმედმაც მოაწყო გამოკითხვა. ისე, შიმშილობით 10 წელიწადზე მეტია, ვშიმშილობ. სხვებიც ასე არიან.

- აქციაზე წამოყენებულ სხვა მოთხოვნებს, მაგალითად, მაჟორიტარული სისტემის გაუქმებასაც ეთანხმებით?

- ალიანსის მხარდამჭერი ვარ და ყველაფერს ვეთანხმები.

შიმშილობის აქციაში მონაწილეობს დამოუკიდებელი ჟურნალისტი ლალი ხუციშვილი, რომელიც თავად აკვირდებოდა არჩევნებს იორმუღანლოში.

- პროტესტს გამოვთქვამ არა მარტო იმის გამო, თუ როგორ უსამართლოდ ჩატარდა არჩევნები იორმუღანლოში, არამედ, იმიტომაც, რომ ხელისუფლება იგნორირებას უკეთებს შიმშილობის აქციას და ცუდად გვექცევა მოშიმშილეებს, _ განუცხადა `ახალ თაობას~ ლალი ხუციშვილმა.

საქართველოს პატრიოტთა ალიანსი კვალიფიციურ სუბიექტად ითვლება, მაგრამ საარჩევნო კომისიებში წევრები არ ჰყავს. ლალი ხუციშვილი იორმუღანლოში ირმა ინაშვილის წარმომადგენელი იყო.

- ნაციონალური მოძრაობა 2003 წელს არჩევნების გაყალბების თემის წამოწევით მოვიდა ხელისუფლებაში. საუბედუროდ, ახლაც არაფერი შეცვლილა. შუალედური არჩევნების დროს გამოიყენეს ხათუნა გოგორიშვილის კარუსელები ახალი დეტალებით. იქ იყო 5 ქორწილისა და 3 გასვენების იმიტაცია. კომისიის წევრები მმართველი კოალიციისა და ნაციონალური მოძრაობიდან იყვნენ. საერთოდ, ისინი ერთად მუშაობდნენ გაყალბებაზე. ამისთვის გამოიყენებოდა როგორც ადმინისტრაციული რესურსი, ესე ნაციონალური მოძრაობის შესაძლებლობები, – ამბობს ლალი ხუციშვილი. მისი სიტყვებით, იორმუღანლოში, სადაც ქართული ენის არმცოდნე აზერბაიჯანული მოსახლეობა ცხოვრობს, კარუსელების გარდა, აქტიურად გამოიყენებოდა ზეწოლისა და დაშინების მეთოდებიც. ზოგს პენსიის მოხსნით ემუქრებოდნენ, ზოგს დაპირებას აძლევდნენ. ნაწილს საარჩევნო უბნებზე მისვლა აუკრძალეს. ყველა ამომრჩეველს მოუწოდებდნენ, შემოეხაზათ 41, აზერბაიჯანულად „გირხ ბირ“.

- როგორც ჟურნალისტი და მოქალაქე, ვაპროტესტებ იმას, რომ არ გვაძლევენ კარვის დადგმის უფლებას. როცა წვიმაში კუსტარულ თავშესაფარს ვაწყობთ, გამოდარების შემდეგ იმასაც საჩქაროდ გვაღებინებენ. საბნებსაც მარტო ღამით ვიყენებთ. დღისით ესეც აგვიკრძალეს. გუშინ თინა ხიდაშელმა სასოწარკვეთილები გვიწოდა. მინდა მას ვუპასუხო, რომ სასოწარკვეთილები არა ვართ. კანონს არ ვარღვევთ. გვაქვს კონკრეტული მოთხოვნები. ხიდაშელი ჩვენ ცილს გვწამებს და რუსეთის აგენტებს გვიწოდებს. 8 წელიწადი ევროპაში ვიცხოვრე. დამიმტკიცოს თავდაცვის მინისტრმა, რომ რუსეთთან რაიმე კავშირი მაქვს!

„ახალი თაობა“, 18 ნოემბერი, 2015 წელი

ინტერვიუ სოფიო ხორგუანთან: „ვერ ვხვდები, რა ყურადღება უნდა მიაქციოს მოშიმშილეებს ხელისუფლებამ?“

ნონა ცაბაძე

„პატრიოტთა ალიანსი“ კანცელარიასთან შიმშილობას კვლავაც განაგრძობს. მოშიმშილეთა მხრიდან კეთდება შეფასებები, რომ ხელისუფლება მათ სრულ იგნორირებას უკეთებს. ასევე ყურადღებას არ აქცევენ არასამთავრობო ორგანიზაციები.

კრიზისების მენეჯერი სოფიო ხორგუანი ასე არ ფიქრობს: „მე ვერ ვხვდები, რა ტიპის ყურადღება უნდა იყოს ხელისუფლების მხრიდან. ეს არის პოლიტიკური ბრძოლის ხერხი, რადიკალური აქცია. კონკრეტულმა პოლიტიკურმა პარტიამ მიმართა ამ გზას“, – ამბობს სოფიო ხორგუანი.

- ამაზე რატომ არ რეაგირებს ხელისუფლება?

- ხელისუფლება რეაგირებს ისე, როგორც რეაგირებს. ხელისუფლება უარყოფს იმას, რომ იქ გაყალბება მოხდა. არასამთავრობო ორგანიზაციების შეფასებებიც მოვისმინე ამ არჩევნებთან დაკავშირებით, სადაც განსაკუთრებულ დარღვევებზე საუბარი არ არის. სულ რამდენიმე დარღვევა ახსენეს მათ. რაიმე განსაკუთრებული შემთხვევა არ ყოფილა.

- მაშინ რა გამოდის, რომ ირმა ინაშვილი ტყუილად შიმშილობს?

- არსებობს სამართლებრივი გზა, როდესაც სასამართლოთი დაამტკიცებ შენს სიმართლეს. თუმცა ესეც ერთ-ერთი გზაა, როდესაც აქციას ატარებ, თანაც ასეთ უკიდურეს ფორმას მიმართავ. რაც შეეხება ხელისუფლებას, სახელმწიფოს მხრიდან უნდა იყოს უზრუნველყოფილი, რომ მათ პრობლემას არავინ უქმნიდეს, თუ ჯანმრთელობასთან დაკავშირებით შეექმნებათ პრობლემა, მობილიზებული უნდა იყოს სამედიცინო სამსახური და დაცული უნდა იყოს მათი უსაფრთხოება.

- ანუ მათი უფლებები არ ირღვევა?

- ეს არის აქცია და მოდით მივეჩვიოთ ამას, რომ პოლიტიკოსებს აქვთ უფლება, გამოიყენონ პოლიტიკური ბრძოლის ის ხერხები, რომლებიც მათთვის არის მისაღები, რომელთაც თავად აირჩევენ. მთავარია, სახელმწიფომ უზრუნველყოს ამ ნების გამოხატვის შესაძლებლობა.

- როდესაც პრეზიდენტის მრჩეველმა, ფიქრია ჩიხრაძემ მოინახულა მოშიმშილეები, ამ ფაქტმა თინა ხიდაშელი გაანაწყენა. სწორედ ამ ფაქტორის გამო ხომ არ ერიდებიან ხელისუფლების წარმომადგენლები მათთან მისვლას და საკუთარი პოზიციის დაფიქსირებას?

- მოდით, ინტერპრეტაციას ნუ მოვახდენთ. მე მოვისმინე ფიქრია ჩიხრაძისა და თინა ხიდაშელის პოზიციაც. ფიქრია ჩიხრაძე ამბობს თავის პოზიციას, რომ ჩვენი საარჩევნო სისტემა დასახვეწია და ამას არ უარყოფს არავინ ამ ქვეყანაზე, ნამდვილად არ გვაქვს იდეალური და აწყობილი საარჩევნო სისტემა. თინა ხიდაშელიც კონკრეტულ კითხვებზე სცემს პასუხს. მე ფიქრია ჩიხრაძისგან არ მომისმენია განცხადება, რომ არჩევნები გაყალბდა!

- თავად თქვენი პოზიცია როგორია, გაუყალბეს ირმა ინაშვილს შედეგები?

- მე ნამდვილად არ შემიძლია იმის თქმა, რომ ეს არჩევნები გაყალბდა და შედეგები უნდა გაბათილდეს. არსებობს სასამართლო და ეს ყველაფერი სასამართლომ უნდა გაარკვიოს. არჩევნები ხომ არ არის მარტო არჩევნების დღე? იყო უამრავი დამკვირვებელი, არიან არასამთავრობოები. დაიდება ყველას შეფასება. მე ვენდობი ამ რამდენიმე კომპეტენტურ არასამთავრობო ორგანიზაციას, რომელიც პროცესს აკვირდებოდა და აცხადებს, რომ სერიოზულ დარღვევებს ადგილი არ ჰქონია.

- ანუ ირმა ინაშვილი აქციებს არ უნდა მართავდეს?

- მე არ მითქვამს, რომ ირმა ინაშვილმა აქცია არ უნდა გამართოს. მას სჯერა, რომ არჩევნები გაუყალბეს. ამიტომ აქცია არის პოლიტიკური ბრძოლის ხერხი და მათ აქვთ უფლება, რომ გამოიყენონ ეს. საარჩევნო წელი დგება, სიტუაცია კიდევ უფრო საინტერესო გახდება. პოლიტიკური ბრძოლის სხვადასხვანაირი ხერხები არსებობს და ვისაც რომელს უნდა, იმას მიმართავს. ყველას სხვადასხვა გემოვნება აქვს.

- იძლევა დღეს ხელისუფლება ამ ბრძოლის ხერხების გამოყენების საშუალებას?

- ერთ-ერთი, რასაც მე დღეს ვუფასებ ამ ხელისუფლებას, ეს არის ძალიან მნიშვნელოვანი რამ და ეს არის პოლიტიკური პლურალიზმი. ანუ არ ხდება ის, რაც წინა ხელისუფლების დროს ხდებოდა. სულ ერთი და იგივე სახეები, ერთი და იგივე პოლიტიკოსები. ეს ხდებოდა იმიტომ, რომ სივრცე იყო ჩაკეტილი და იქ არავინ შეგვიშვებდა.

- დღესაც იგივე არ ხდება? ერთ პოლუსზე `ოცნების~ ხელისუფლებაა, მეორეზე _ ნაციონალები. რა შეიცვალა?

- ვერ დაგეთანხმებით. ასე არ არის. წამოვიდნენ წინა პლანზე ახალი პოლიტიკური სახეები. მე ვერც იმაში დავეთანხმები ვინმეს, რომ მთელი სახელისუფლო რესურსი იყო ჩართული საგარეჯოს არჩევნებში. ასე ნამდვილად არ ჩანდა. ირმა ინაშვილი ნამდვილად არის ქარიზმატული ლიდერი, რასაც ვერ წაართმევ. პარტიის ლიდერია და მართლაც სერიოზული ბრძოლა იყო და გარეშე თვალისთვის ეს ძალიან საინტერესო პროცესი იყო.

- თანასწორი იყო ეს ბრძოლა?

- ბრძოლა თანასწორი იყო და ეს ძალიან საინტერესო პოლიტიკური სანახაობა იყო. მე, მოქალაქე, ამით მხოლოდ ვიგებ, რადგან ვხედავ პოლიტიკურ ბრძოლას. მთავარია, ეს ბრძოლა კანონის ჩარჩოებში ჩაჯდეს.

- არჩევნებიც მალე მოვა, თქვენ რომელი პოლიტიკური ძალის მხარდამჭერი იქნებით?

- დღეს ნამდვილად არ ვიცი, ვის დავუჭერ მხარს 2016 წლის არჩევნებზე. ამ სიტუაციაში მოსახლეობის საკმაოდ დიდი პროცენტია. განა მათ არ იციან, რა უნდათ, უბრალოდ, ყურადღებით აკვირდებიან პროცესს. ამ პროცესს მეც დიდი ყურადღებით დავაკვირდები. დღეს პოლიტიკური ველი გახსნილია. არ არის გამორიცხული, რომ ჩვენ ძალიან საინტერესო პოლიტიკური გადაჯგუფებები ვნახოთ. ამ პროცესში კი აუცილებლად გამოჩნდებიან ახალი სახეები. დღეს რომ არის იმის შესაძლებლობა, რომ ახალი სახეები გამოჩნდნენ პოლიტიკაში, ბოლო წლების განმავლობაში ასეთი შესაძლებლობა არასოდეს ყოფილა.

- ანუ პოლიტიკაში ახალ სახეებს ელოდებით?

- „ქართული ოცნება“ შეეცდება, მოძებნოს ახალი სახეები. ცხადია, ეს არ არის ადვილი პროცესი. ჩვენთან პოლიტიკა არის დისკრედიტირებული. პოლიტიკოსი ასოცირდება რაღაც ცუდთან, ადამიანთან, რომელიც პოლიტიკაში მიდის იმიტომ, რომ იქ იშოვოს ფული. მიუხედავად ამ უნდობლობისა, დღეს არის იმის სიტუაცია, რომ რაღაც ახალი ჯგუფები, ახალი ადამიანები გამოჩნდნენ და იმ ადამიანთა დიდი პროცენტი, ვინც არ იცის, ვის მისცეს ხმა, სწორედ მათ ელის.

- გუნდის გადახალისება „ოცნებასაც“ მოუწევს?

- ეს პროცესი გარდაუვალია და გეტყვით იმასაც, რომ ეს საკმაოდ რთული იქნება. რადგან იქაც არიან ადამიანები, ვისაც არ უნდა თავისი გავლენის დათმობა.

- ნაციონალებზე რას იტყვით? რამდენად ახერხებენ დღეს ისინი საზოგადოებრივ აზრზე ზემოქმედებას? საუბარია, რომ ეს ძალიან კარგად გამოსდით.

- კი, გამოსდით. მთელი 9 წლის განმავლობაში ისინი ხელისუფლებაში იყვნენ და კარგი ტრეინინგი გაიარეს. დიდი გამოცდილება დაუგროვდათ. ამ გამოცდილების ხარჯზე დღეს ისინი ახერხებენ საზოგადოებრივ აზრზე ზემოქმედებას. მართალია ისინი გაირყვნენ და დაკარგეს რეალობის შეგრძნება, მაგრამ მათ მიიღეს გამოცდილებაც. გეტყვით იმასაც, რომ „ოცნება“ როცა რეალურად მოვიდა ხელისუფლებაში, არ იყო მზად, რომ ხელისუფლება აეღოთ. დიდხანს ისე საუბრობდნენ, თითქოს ოპოზიციაში იყვნენ, ვერ გაითავისეს, რომ პასუხისმგებლობა მათზე იყო. თუმცა დღეს ყველაფერი შეიცვალა და ყველაფერი გაიაზრეს.

„ახალი თაობა“, 18 ნოემბერი, 2015 წელი

ინტერვიუ ზურაბ აბაშიძესთან: „ირაკლი ღარიბაშვილს ერთ რჩევას მივცემდი“

ნათია ხურცილავა

„თავისუფალი დემოკრატების“ ერთ-ერთი ლიდერი, დეპუტატი ზურაბ აბაშიძე „ახალ თაობასთან“ ინტერვიუში აცხადებს, რომ ირაკლი ალასანიას გამოცდილება ანტიტერორისტული მიმართულებით, ხელისუფლებამ აუცილებლად უნდა გამოიყენოს. „აუცილებელია, ანტიტერორისტული და საზღვრის დაცვის მიმართულებით ხელისუფლებამ ქმედითი ნაბიჯები გადადგას. უნდა გაიზარდოს ამ მიმართულებით დაფინანსებაც და სტრუქტურების მხარდაჭერაც იმისთვის, რომ საქართველო უფრო ეფექტურად იყოს ჩართული ანტიტერორისტულ საერთაშორისო მისიებსა თუ ქვეყნის შიგნით. ქვეყნის უსაფრთხოების საკითხი როდესაც დღის წესრიგში დგება, მაშინ ხელისუფლებასა და ოპოზიციას შორის ზღვარი არ უნდა ივლებოდეს. ჩვენ მზად ვართ, ამ პროცესში აქტიურად მივიღოთ მონაწილეობა“, – ამბობს ზურაბ აბაშიძე.

- რა ფორმით?

- მოგეხსენებათ, ირაკლი ალასანიას რა გამოცდილება აქვს ამ მიმართულებით. ხელისუფლებამ ამ კუთხით უნდა ითანამშრომლოს ალასანიასთან, მე რომ ვიყო დღეს ხელისუფლებაში, სწორედ ასე მოვიქცეოდი. ჩვენ პარლამენტში ვაპირებთ გარკვეული ინიციატივის წარდგენას.

- დაფინანსების გაზრდის მოთხოვნით გამოდიხართ, მაგრამ ხელისუფლება, საპარლამენტო უმრავლესობა აცხადებს, რომ ვერ ხედავს არგუმენტებს. რას უპასუხებთ?

- ამიტომ არის საჭირო დისკუსიის დაწყება ამ საკითხზე. ურემი რომ გადაბრუნდება, ღმერთმა დაგვიფაროს, მერე აპირებენ ქმედითი ნაბიჯების გადადგმას, თუნდაც დაფინანსების გაზრდას?! დღეს ეს უნდა იყოს პრიორიტეტი. თუ ხელისუფლება ფიქრობს, რომ ის წარმატებულია და ყველაფერს თავს გაართმევს, ასე არ არის. ამ შემთხვევაში ჩვენ ვიწრო პარტიული ინტერესებიდან კი არა, სახელმწიფო ინტერესებიდან გამომდინარე გამოვდივართ. ტერორიზმმა არ იცის შენი და ჩემი.

- უკვე მოიწვია პრემიერ-მინისტრმა უსაფრთხოების საბჭოს სხდომა...

- მხოლოდ ამით ვერ შემოიფარგლებიან.

- ასევე უშიშროების საბჭოს სხდომა მოიწვია პრეზიდენტმა, თუმცა ჯერ უცნობია, დაესწრება თუ არა მას პრემიერ-მინისტრი...

- აუცილებლად უნდა დაესწროს, მაგრამ ეს კინკლაობა, რაღაც გაწევ-გამოწევა, რომელი უფრო მალე ჩატარდება, მივა თუ არა უშიშროების საბჭოს სხდომაზე პრემიერ-მინისტრი თუ არ მივა, ეს რომ არის მთავარი თემა, უბრალოდ, სამარცხვინო ამბავია. უშიშროების საბჭოს ქვეყნის პრეზიდენტი ხელმძღვანელობს და მას აუცილებლად უნდა დაესწროს პრემიერი ღარიბაშვილი. დღეს ამის თქმა რომ გვიწევს, ეს უფრო სამარცხვინო მგონია. მერწმუნეთ, უშიშროების საბჭოზე მისვლით ღარიბაშვილს ჩინ-მენდლები ნამდვილად არ დასცვივდება. მე ახლოს რომ ვიყო ხელისუფლებასთან, აუცილებლად ერთ რჩევას მივცემდი.

- და რა რჩევა იქნებოდა ეს?

- უშიშროების საბჭოს სხდომას დაესწროს ქვეყნის ინტერესებიდან გამომდინარე. ეს სახელმწიფოებრივად იქნებოდა სწორი გადაწყვეტილება, ეს უნდა გააცნობიეროს ირაკლი ღარიბაშვილმა. ეს უფრო მეტ ნდობას გააჩენდა საზოგადოებაში მისდამი.

- ირაკლი ალასანიას გამოცდილება რა კუთხით შეიძლება ამ შემთხვევაში გამოიყენოს ხელისუფლებამ?

- ამაზე თავად ირაკლი ალასანია ისაუბრებს, მაგრამ ცნობილია, რომ ჩვენი პარტიის ლიდერს აქვს საკმაოდ სერიოზული გამოცდილება ანტიტერორისტულ ოპერაციებში მონაწილეობის, თავდაცვის სფეროში მუშაობის. პრევენციული ღონისძიებების გატარების კუთხით მნიშვნელოვანია ალასანიას ჩართულობა.

- დღეს ხელისუფლებისთვის მთავარი გამოწვევა რა არის?

- 25 წელია, იგივე წრეზე ვტრიალებთ, თითქოს ეს არის მოჯადოებული წრე, რომელიც ვერ გავარღვიეთ. კვლავ საარჩევნო გარემოზე თუ მომიწევდა საუბარი, არ მეგონა. ისევ ამაზე გვიწევს არათუ საუბარი, ბრძოლა. 2012 წლის არჩევნები სიკვდილ-სიცოცხლეს შორის ბრძოლა იყო, მაგრამ ეს გადავლახეთ.

- 2016 წლის არჩევნებსაც ასე მოიაზრებთ?

- არა, რა თქმა უნდა, 2016 წლის არჩევნები არ იქნება სიკვდილ-სიცოცხლის ბრძოლა, მაგრამ ეს არჩევნები იქნება გარდამტეხი. ნიშანი იმისა, ჩვენ დემოკრატიისკენ წავალთ თუ უკან გადავდგამთ დიდ ნაბიჯს. ამ არჩევნებით საქართველო ან გადალახავს დემოკრატიის ზღვარს, ან დავრჩებით სიბნელეში, წყვდიადში, იმ სტაგნაციაში, რომლის მომავალიც არსაითკენ იქნება. ჩვენ გვახსოვს, ნაციონალური მოძრაობა როგორ იყო ძალაუფლებას ჩაბღაუჭებული და ყველა გზით ცდილობდა მის შენარჩუნებას, ოღონდ როგორმე არ დაეთმო ძალაუფლება, ყველაფერზე წავიდა, მაგრამ ბიძინა ივანიშვილის ხელმძღვანელობით შევძელით ქვეყნის ამ სენისგან განთავისუფლება. დღეს ისევ ძალაუფლებაზე ჩაბღაუჭებულ ხელისუფლებას საზოგადოება ვერ აიტანს.

- თუმცა, საზოგადოებაში ნიჰილისტური განწყობები მძლავრობს. უმრავლესობა არჩევნებზე წასვლას არ აპირებს, რადგან არ იცის, ვის მისცეს ხმა. ეს არ არის პრობლემა?

- ეს დიდი პრობლემაა. გეთანხმებით, დღეს ადამიანებს პოლიტიკის გაგონება აღარ უნდათ, ჩვენ დავკარგეთ ნდობა ადამიანებში, როგორც პოლიტიკოსებმა და ეს ყველაზე ცუდია, რაც ხელისუფლების უუნარობამ გამოიწვია. საზოგადოების მიერ პოლიტიკური პროცესი არის იგნორირებული.

- რა არის ამის მიზეზი?

- ამის მთავარი მიზეზი ხელისუფლების მიერ გაცემული დაპირებების არშესრულებაა. მეორე მიზეზი კი ის არის, რომ ნაციონალური მოძრაობა ისევ ხელისუფლებაში დაბრუნებას ფიქრობს. თუმცა, მის მიმართ პოლიტიკური განაჩენი ქართველმა საზოგადოებამ დიდი ხნის წინ გამოიტანა და მათ არა უთხრა.

„ახალი თაობა“, 18 ნოემბერი, 2015 წელი

ინტერვიუ ზაზა ვეკუასთან: დააყენებს თუ არა საკრებულო დავით ნარმანიას იმპიჩმენტის საკითხს? „დედაქალაქის მერს მერიაში არაფერს ეკითხებიან“

შორენა მარსაგიშვილი

რატომ არ ითვალისწინებს ოპოზიციის რჩევებს თბილისის მერი, რას ურჩევს მას ოპოზიცია, დაწერს თუ არა ქალაქის თავი „საკუთარი სურვილით“ წასვლის შესახებ განცხადებას, რას მოხმარდება მერიის გაზრდილი ბიუჯეტი? – ამის შესახებ „ახალ თაობას“ თბილისის საკრებულოს ფრაქცია დემოკრატიული მოძრაობის ლიდერი ზაზა ვეკუა ესაუბრება. „მერიისთვის გამოყოფილი ბიუჯეტი თბილისელების კეთილდღეობას არ ითვალისწინებს. მერიის ადმინისტრაციის ხარჯები 15 მილიონიდან 16.5 მილიონამდე გაიზარდა და ეს იმ პირობებში, როცა მერიის ადმინისტრირება ნულის ტოლფასია. ბიუჯეტთან დაკავშირებით ის არც ოპოზიციის რეკომენდაციების გათვალისწინებას აპირებს“, – ამბობს ზაზა ვეკუა..

- მერი ამბობს, რომ მისთვის საინტერესო არ არის, რას ამბობს ოპოზიცია, რადგან ოპოზიციამ ბიუჯეტი რა არის, არ იცისო. ასევე არ გცოდნიათ, ბიუჯეტის მუხლებს შორის სად, რა, როგორ უნდა გადაიტანო და გადმოიტანო...

- დავით ნარმანიას უყვარს ხოლმე ოპოზიციისთვის იმის შეხსენება, რომ ის არჩეული მერია. ეს მან მაშინ გაიხსენოს, როცა კანცელარიაში ან „ქართული ოცნების“ სათავო ოფისში მიბრძანდება, სადაც მას მითითებებსა და დავალებებს აძლევენ. დავით ნარმანიას ყველა განცხადება არასერიოზულია. სხვანაირად ვერაფრით ვხსნი მის განცხადებებს, ის ყველაფრით კმაყოფილია, არადა, დედაქალაქში კატასტროფული ვითარებაა. თავისი მერობის პერიოდში თანამდებობიდან არავინ გაუთავისუფლებია. საქალაქო სამსახურების უფროსების ნაწილმა თანამდებობები დატოვა. მათზე გვეუბნებიან, რომ ისინი საკუთარი სურვილით წავიდნენ.

- უკეთესი იქნებოდა, თუ მათ ნარმანია გაუშვებდა?

- წესით, უნდა გაეშვა. საშინელი სიტუაციაა დღეს თბილისში, ყველა პროექტი ჩავარდნილია. დედაქალაქის ინფრასტრუქტურა მოშლილია და ქუჩაში გადაადგილება, ფაქტობრივად, ვერ ხერხდება. ამ ფონზე ნარმანიას განცხადება, რომ ოპოზიციამ არაფერი იცის და მხოლოდ მე ვიცი, რა სჭირდება თბილისსო, არის არასერიოზული. რაც იცის ნარმანიამ, კი დაატყო დედაქალაქს თავისი ცოდნა.

- თქვენ აღნიშნეთ, რომ ნარმანიას კანცელარიასა და `ქართული ოცნების~ ოფისში აძლევენ მითითებებს. თუ ცოდნა არ აქვს, ისინი რატომ არ ეუბნებიან, რომ რაღაც გააკეთოს. მერიის უმოქმედობა ხომ მმართველი გუნდის რეიტინგზე ცუდად მოქმედებს?

- ცუდად როგორ არ იმოქმედებს. დარწმუნებული ვარ, ეუბნებიან კიდეც, რამე გააკეთოს, ამიტომაც იბარებენ ხშირად. ეტყობა, ამ ადამიანს მეტის გაკეთება არ შეუძლია, ვერც ვერავის სთხოვს პასუხს და ხელს ოპოზიციისკენ იშვერს. ეს ერთ რამეზე მეტყველებს _ დედაქალაქის მერი ძალიან სუსტია.

- ვისი სურვილით წავიდნენ საქალაქო სამსახურის უფროსები, არ ვიცით, მაგრამ მათი წასვლა და ახალი ხალხის მოსვლა არ შეცვლის მერიაში არსებულ ვითარებას?

- მერიაში არაფერი შეიცვლება. მერიის წარმომადგენლებს თვითკრიტიკის უნარი არ გააჩნიათ და ქალაქში არსებულ პრობლემებს ვერ ამჩნევენ. ცოტა ხნის წინ გადათხრილი ქუჩების გამო ნარმანიამ ორ კომპანიას მოსთხოვა პასუხი და, როგორც თავად ამბობს, ამის გამო დააჯარიმა კიდევაც. ყველა კომპანია მიმართულია იქითკენ, რომ მოგება ნახოს. ზოგი მეტად კეთილსინდისიერია, ზოგი – ნაკლებად. კომპანიებზე საუბარს აზრი არ აქვს და მოსახლეობასაც არ აინტერესებს ეს ამბავი. მოსახლეობასთან პასუხისმგებელია მერია, რომელსაც ხალხი მაღალ ხელფასს უხდის. ნარმანიამ ის გამოიკვლიოს, ვინ განახორციელა ეს ტენდერები, რა პირობები იყო ჩადებული, ვის ეხებოდა ზედამხედველობა, კეთდებოდა თუ არა ღამის საათებში. მართლა მაინტერესებს, რატომ მივიყვანეთ საქმე ზამთრამდე, როცა პროექტი ივლის-აგვისტოში უნდა დასრულებულიყო. სანამ კომპანიებს მიადგება, ჯერ საკუთარ თანამშრომლებს მოსთხოვოს პასუხი.

- რატომ არ სთხოვს თანამშრომლებს პასუხს?

- ეს მას უნდა ვკითხოთ. მას ჯერ საყვედური არავისთვის უთქვამს და არც არავინ გაუთავისუფლებია სამსახურიდან. გაჩერებული პროექტებისა და ერთ დიდ საცობად ქცეული თბილისის ფონზე მერიის თანამშრომლები პრემიას პრემიაზე იწერენ.

- შემთხვევით ისე ხომ არ მოხდება, რომ ერთ დღეს დავით ნარმანია „საკუთარი სურვილით“ დაწერს თანამდებობიდან წასვლის შესახებ განცხადებას, როგორც ეს საქალაქო სამსახური უფროსებმა გააკეთეს?

- არა მგონია. ეს საკმაოდ რთული პროცედურა იქნება, თანაც მხოლოდ მისი წასვლით არ გამოსწორდება საქმე. დაპირებები მოსახლეობას მთლიანად „ქართულმა ოცნებამ“ მისცა. ყველამ უნდა იზრუნოს მათ შესრულებაზე. მერთან ბევრი პრეტენზია მაქვს, მაგრამ შორს ვარ იმ აზრისგან, რომ მხოლოდ ნარმანიაა დამნაშავე. მას უჭირს ადმინისტრირება, მაგრამ არიან მერიის სხვა მაღალჩინოსნები, რომლებიც კეთილსინდისიერად არ მუშაობენ.

- საკრებულოს უმრავლესობა ნარმანიას მოღვაწეობას როგორ აფასებს, ისევ კმაყოფილი არიან მისი მუშაობით?

- შეუძლებელია, რომ მისი მუშაობით ვინმე კმაყოფილი იყოს. მისი მისამართით მათაც აქვთ კითხვები. განსაკუთრებით ბევრი კითხვა აქვთ მაჟორიტარებს. თბილისელები შეჩერებული პროექტებისა და შეუსრულებელი დაპირებების გამო მათ სთხოვენ პასუხს.

- შესაძლებელია, ეს უკმაყოფილება ისე გაიზარდოს, რომ უმრავლესობამ არჩეული მერის იმპიჩმენტის საკითხი დააყენოს?

- რას იზამს უმრავლესობა, არ ვიცი, მარჩიელობა კი არ მინდა, თანაც ასეთი გადაწყვეტილება საკრებულოში არ მიიღება.

- აბა, სად მიიღება?

- ზევით და ზევით.

„ვერსია“, 17 ნოემბერი, 2015 წელი

ინტერვიუ ელდარ შენგელაიასთან: „ვარდების რევოლუცია“ შეცდომა იყო!“

რაზე ეჩხუბა ზურაბ ჟვანია, იცნობს თუ არა ბიძინა ივანიშვილს და რას ნანობს ელდარ შენგელაია

ვანო პავლიაშვილი

(შემოკლებით)

„ვერსია“ წარმოგიდგენთ არაჩვეულებრივ ინტერვიუს გენიალური ფილმების გენიალურ რეჟისორ ელდარ შენგელაიასთან.

- ბატონო ელდარ, ვინაიდან მთავრობას შევეხეთ, თან ნოემბერია და ,,ვარდების რევოლუციის” 12 წლისთავი ახლოვდება, მოდით, ძველი ამბები გავიხსენოთ… დღევანდელი გადასახედიდან, ყველაფერ იმას როგორ აფასებთ?

- რა იმას?

- რას და, მახსოვს, ერთ-ერთი მათგანი ხართ, ვინც მაშინ პარლამენტში ვარდით შევიდა…

- გეტყვით: მაინც მგონია, რომ დიდი შეცდომა მოხდა, რადგან სულ რამდენიმე თვის შემდეგ არჩევნები უნდა ჩატარებულიყო და გაცილებით უკეთესი იქნებოდა, ყველაფერი არჩევნების გზით მომხდარიყო და არა – რევოლუციის.

- არადა, რევოლუციაში მონაწილეობდით…

- დიახ, მაგრამ ამ გადასახედიდან, ვფიქრობ, ეს ჩვენი შეცდომა იყო.

- ეს მიზანმიმართული შეცდომა იყო თუ გაუცნობიერებელი?

- ალბათ, გაუცნობიერებელი…

- როდის მიხვდით, რომ „ვარდების რევოლუცია“ შეცდომა იყო?

- დრო რომ გავიდა… ,,ოცნება” სათავეში არჩევნებით მოვიდა და ეს დემოკრატიულია. მაშინ კი რევოლუცია მოხდა, ესე იგი, რაღაცნაირად დემოკრატიის წესი დაირღვა. საერთოდ, ხელისუფლებაში ესა თუ ის ძალა ყოველთვის არჩევნებით უნდა მოვიდეს…

- 2003 წელს შეცდომა მხოლოდ ლიდერებმა დაუშვეს თუ ხალხმაც? როცა რევოლუციონერმა პრეზიდენტმა ინტელიგენციას „ჩარეცხილები“ გიწოდათ, რა განცდა დაგეუფლათ?

- არასასიამ0ოვნო… ინტელიგენცია საქართველოში ყოველთვის გარკვეულ როლს ასრულებდა. არ ვადარებ, მაგრამ გაიხსენეთ, ილიამ საქართველოს ისტორიაში რა როლი შეასრულა…

- ზურაბ ჟვანია რომ ცოცხალი ყოფილიყო, თუნდაც ტერმინი „ჩარეცხილები“ გაჩნდებოდა?

- არა, არა… ზურაბი სულ სხვა ადამიანი იყო და მისი გარდაცვალებით, როგორც ამბობენ, მკვლელობით, დიდი შეცდომა მოხდა. სათავეში ზურაბი რომ ყოფილიყო, საქართველოს, მგონი, სულ სხვა ბედი ექნებოდა…

- ე.წ. ჟვანიას გუნდის წევრად ითვლებოდით…

- რა თქმა უნდა…

(…)

- ჟვანიას როგორც მეგობრისთვის, თუ უთქვამს, რომ სააკაშვილსა და საერთოდ, ნაციონალებთან გარკვეული უთანხმოება ჰქონდა?

- კონფლიქტი სულ ერთხელ მოგვივიდა: ჩვენი პარტიის, გაერთიანებული დემოკრატების შტაბში ვიყავით და ზურაბს ველოდებოდით, რომელიც სააკაშვილთან წავიდა.

- ამ დროს რევოლუცია უკვე მომხდარი იყო?

- დიახ… ზურაბი დაბრუნდა და თქვა, ჩვენ უნდა გავერთიანდეთ _ ჩვენი პარტია უნდა დაიშალოს და სააკაშვილის პარტიას შეუერთდესო. ვუთხარი, ძალიან დიდ შეცდომას უშვებ, ჩვენი სახე უნდა შევინარჩუნოთ, კოალიცია შევქმნათ და თუ საქმე კარგად წავა, ერთად ვიქნებით, რაღაც ისეთი თუ მოხდა, ოპოზიციაში გადავალთ- მეთქი. ზურაბმა ძალიან შემიტია… უსიამოვნება მოხდა და რამდენიმე დღე აღარ მელაპარაკებოდა. მერე შევრიგდით.

- ზურამ დაგისაბუთათ, გაერთიანებული დემოკრატები ნაციონალების პარტიას რატომ უნდა შეერთებოდა?

- ჩვენი გაერთიანება საქართველოს სჭირდებაო, მაგრამ მგონია, ეს შეცდომა იყო…

(…)

- არსებობს ვერსია, რომ პრემიერი ჟვანია ოპოზიციაში გადასვლას გეგმავდა. ზურაბს ამის შესახებ არაფერი უთქვამს?

- არა…

- რამდენჯერმე შეცდომა ახსენეთ, ბატონო ელდარ, ისიც შეცდომა ხომ არ იყო, ჟვანიამ ნინო ბურჯანაძისგან პოლიტიკური სახე რომ შექმნა?

- არა, არ იყო… როცა ზურაბი გადადგა, არჩევანი იყო, ვინ უნდა გამხდარიყო პარლამენტის თავმჯდომარე და ზურაბმა ნინო აირჩია. ნინო ძალიან კარგი იურისტია და იმ პერიოდში აბსოლუტურად ნორმალური იყო, მაგრამ მერე საქმეები რაღაც სხვანაირად წავიდა.

- თქვენი შეფასებით, ,,ვარდების რევოლუციის” მერე ბურჯანაძემ ჟვანიას უღალატა?

- ვერ გეტყვით… მან, უბრალოდ, თავისი გზა აირჩია…

- პრემიერის დღემდე ბურუსითმოცული გარდაცვალების შემდეგ, ე.წ. ჟვანიას გუნდიდან მისი ერთგული რამდენიმე ადამიანიღა დარჩით. ამას რით ხსნით? ისე, ბარამიძესთან, მაჭავარიანსა და გოგორიშვილთან ანუ მათთან, ვინც ნაციონალებად ტრანსფორმირდნენ, გარკვეული კითხვები ხომ არ გაქვთ?

- მათთან საერთოდ არ ვურთიერთობ. ერთადერთი, მიშა მაჭავარიანთან მაქვს კარგი მეგობრობა, მაგრამ პოლიტიკაზე არ ვსაუბრობთ…

- ვერსიის, რომ პრემიერი უბედურ შემთხვევას ემსხვერპლა, გჯერათ?

- ეს ვერსია იმ მომენტში არ იყო, მერე დაიბადა… მჯერა, ის, რა თქმა უნდა, მოკლეს! სხვაგან მოკლეს და მერე, იქ მიიყვანეს, სადაც, თქვეს, გაზი იყოო, მაგრამ იქ გაზი საერთოდ არ ყოფილა, არ გაიგუდა, ესე იგი, მოკლეს!

- თუკი მკვლელობის ვერსიას გავყვებით, თქვენი აზრით, ბატონო ელდარ, ჟვანიას მკვლელობის მიზანი რა უნდა ყოფილიყო?

- ვერ გეტყვით… დიდი პოლიტიკა ისეთი არეალია, სადაც ძნელია გაგება, ეს ამბავი რატომ მოხდა. ჟვანია რუსეთთან ურთიერთობას აგვარებდა. შეიძლება, ეს რაღაც მხარეს არ მოეწონა და მოიცილეს.

- ჟვანია ურთიერთობას მხოლოდ რუსეთთან აგვარებდა თუ დასავლეთთანაც?

- ორივესთან… შეიძლება, ვიღაცას არ მოეწონა, მაგრამ არ ვიცი, ვის… ეს ჩემთვის და მისი ოჯახისთვის ძალიან დიდი განცდაა.

(…)

- ბატონო ელდარ, მართალია, პოლიტიკას თვალს არ ადევნებთ, მაგრამ ოპოზიცია, განსაკუთრებით, ნაცმოძრაობა გაიძახის, საქართველო რუსეთისკენ მიდის და დიქტატურა მკვიდრდებაო…

- არ ვეთანხმები…

- ბოლოს და ბოლოს, „მთავლიტის“ პერიოდი გაქვთ გამოვლილი. თუნდაც ის გადაწყვეტილება, რომელიც მოსამართლე ურთმელიძემ „რუსთავი 2“-თან დაკავშირებით მიიღო, ცენზურის ნიშნებს ატარებდა?

- ერთ რამეს გეტყვით: საბჭოთა კავშირის 70-80-იანი წლები, წინა წლებთან შედარებით, გაცილებით დემოკრატიული იყო და ასე რომ არ ყოფილიყო, ქართული კინოს ფენომენი არ იარსებებდა და მხოლოდ ჩემი კი არა, იგივე თენგიზ აბულაძის, რეზო ჩხეიძის, რეზო ესაძის, საშა რეხვიაშვილის, მერაბ კოკოჩაშვილის, ოთარ იოსელიანის, გიორგი შენგელაიას ფილმები არ შეიქმნებოდა.

(…)

- …ბიძინა ივანიშვილს იცნობთ?

- ადრე ვიცნობდი – ერთი პერიოდი, რაღაც სტუდია ჰქონდა და მის ხელმძღვანელად დამპატიჟა.

- „მე-9 არხს“ გულისხმობთ?

- არა… სააკაშვილის პერიოდში პატარა კინოსტუდია შექმნა, სტუდენტებმა ოთხი პატარა ფილმი გადაიღეს, მაგრამ მერე, რატომღაც, სტუდია დაშალა და კონტაქტი აღარ მქონია…

- მართალია, „ვარდების რევოლუციას“ შეცდომად მიიჩნევთ, მაგრამ თქვენი ძმის, გიორგი შენგელაიასგან განსხვავებით, არც 9 წლის განმავლობაში აქტიურობდით. რატომ?

- ჩემს ოჯახში ტრაგედია მოხდა – ჩემი შვილი დაიღუპა. მას მერე პოლიტიკას მოვშორდი და პოლიტიკაში აღარასოდეს შევალ!

- …ბატონო ელდარ, მარტივ კითხვას დაგისვამთ და მარტივად მიპასუხეთ: ნატო თუ რუსეთი?

- სულ სხვა აზრის ვარ.

- მაინც, როგორი სხვა აზრის?

- თუ გახსოვთ, პირველი რესპუბლიკის დროს, უნდოდათ, რომ საქართველო, როგორც შვეიცარია, ნეიტრალური ქვეყანა ყოფილიყო. შეიძლება, ოცნებას ვამბობ, მაგრამ ასე მგონია, საქართველო ფედერაციული რესპუბლიკა უნდა იყოს – აფხაზეთი და ოსეთი, თავიანთი პრემიერით და მთავრობით, საქართველოს შემადგენლობაში შედიოდნენ. საქართველო ნეიტრალური რომ იყოს, ეს ალბათ, რუსეთსაც აწყობს და დასავლეთსაც.

- რუსეთი ოკუპანტია?

- ახლა, რა თქმა უნდა, არის იმიტომ, რომ ოსეთი და აფხაზეთი წართმეულია.

- სხვათა შორის, კონფედერაციაზე ლაპარაკი ისევ გააქტიურდა. ვთქვათ, საქართველო კონფედერაციული რესპუბლიკა გახდა. როგორ ფიქრობთ, რუსეთი წართმეულ ტერიტორიებს დაგვიბრუნებს?

- მე ტერმინი „ოცნება“ ვიხმარე და რეალობაში, შეიძლება, ასე არც მოხდეს, თუმცა რატომღაც მგონია, ეს რუსეთს აწყობს. საერთოდ, რუსეთს ეშინია, რომ აქ ნატო შემოვა. სხვათა შორის, ახლა ჩვენი ეკონომიკური ურთიერთობა გააქტიურდა – მოვისმინე, რომ ჩვენი მწვანილი და რაღაც- რაღაცები რუსეთში იყიდება.

- ევროკავშირთან გაფორმებული ასოცირების ხელშეკრულებით, მწვანილის გაყიდვა ევროპაშიც შეგვიძლია!

- გასაგებია, მაგრამ რუსული ბაზარი აუცილებლად გვჭირდება!

- მაშინაც მასე ფიქრობდით, როცა ჟვანია ცოცხალი იყო?

- დიახ, რადგან საქართველოს სხვა ბაზარი არ აქვს.

- გახსოვთ, ჯანსუღ ჩარკვიანმა ექსპრომტი რომ დაგიწერათ, ნატოდან გამოხვედი და ისევ ნატოში გინდაო?

- მახსოვს…

- ანუ, თავის დროზე ნატო-ში გინდოდათ!

- პოლიტიკოსი არ ვარ და, კიდევ ვამბობ, გარკვეული შეცდომები იყო, მაგრამ კარგი იქნება, საქართველო ისეთი კონფედერაციული რესპუბლიკა იყოს, როგორიც შვეიცარიაა.

- … ოცნებები ხდება, ბატონო ელდარ?

- ჯერ ერთი, „ოცნება“ შედარებით დემოკრატიული გზით მოვიდა. მეორეც, იდეალური მდგომარეობა არაა, მაგრამ წინსვლა იგრძნობა. სხვათა შორის, შევარდნაძე საქართველოში რომ დაბრუნდა, პირველი ვიზიტით ჩინეთში წავიდა. ეს აბრეშუმის გზა იყო. მის დროს ბაქო- ჯეიჰანიც გაკეთდა, რაც საქართველოს ერთგვარი დაცვაა. დღეს კი ანაკლიის პორტი შენდება.

- ანაკლიის პორტი, ჩვენში დარჩეს და მიშას იდეაა…

- კი ბატონო, მაგრამ სააკაშვილმა დაიწყო და არაფერი ააშენა, დღეს კი პორტი შენდება, რომლითაც ჩინელები არიან დაინტერესებულნი, რადგან მათი წარმოებული პროდუქცია ამ გზით ევროპაში გავა, რაც საქართველოსთვის ძალიან მნიშვნელოვანია -აქედან ფული შემოვა, რომელიც კეთილდღეობას მოხმარდება.

- არსებობს მოსაზრება, რომ ნაციონალების დროს კულტურა ერთი ჯგუფის მიერ იყო მონოპოლიზებული. ამბობენ, რომ ამ კუთხით არაფერი შეცვლილა და ის ჯგუფი მეორემ ჩაანაცვლა…

- დღეს კულტურაში აბსოლუტური თავისუფლებაა – ვისაც რა უნდა, იმას აკეთებს და ცენზურა არ არსებობს, თუმცა კინოში ერთი დიდი ნაკლია: კინოცენტრი, რომელიც, პრაქტიკულად, ერთადერთი დამფინანსებელია, ძალიან ცოტას იხდის.

(…)

- ბატონო ელდარ, ამბობენ, რომ დასავლეთი გვრყვნის და ეროვნულობას გვართმევს…

- იცით, რა არის? – ისეთი რაღაცები მართლა მოდის, რაც არ მსიამოვნებს, მაგრამ ერი მაინც თავისი წესით ცხოვრობს და არ მგონია, რომ ჩვენთან ტრაგიკული მომენტებია.

- რაც კარგები ვართ, მართლა ქართველები ვართ თუ ეს შეფასება მითია?

- მითია!

- ჩვენი ყველაზე დიდი ნაკლი რა არის?

- ქართველებს გვიყვარს, ვიღაც მოვიდეს და დაგვაპუროს. უნდა შევიგნოთ, რომ ყველამ ვიმუშაოთ და არავის ველოდოთ, მოვიდეს და ლუკმა ჩაგვიდოს.

- ძალიან ადრე, როცა ვიცე- სპიკერი იყავით, მახსოვს, მითხარით, ყველა თავისუფალი ადამიანი შერეკილიაო.

- ალბათ, ასეა!

- დღესაც შერეკილი ხართ, ბატონო ელდარ?

- რა თქმა უნდა!

- ისე, მგონია, რომ მეც შერეკილი ვარ!.. ბატონო ელდარ, ოდესმე გავფრინდებით?

- საქართველომ იმდენი უბედურება გადაიტანა, რომ წესით, ქართველი ერი აღარ უნდა არსებობდეს, მაგრამ მჯერა, რომ საქართველო მსოფლიო რუკაზე, როგორც თავისუფალი და დემოკრატიული ქვეყანა, თავის ადგილს მოიპოვებს! როცა ეს მოხდება, შეიძლება, ჩვენ აღარ ვიყოთ, მაგრამ პროცესი აქეთკენ მიდის!