„ალია“: საქართველო-ნატო: დედას გაფიცებთ, ბატონო მინისტრო, რა თქვით ახლა აქ ან ახალი, ან ისეთი, რომ გულს გაგვიხარებდა? არც არაფერი!
„რეზონანსი“: ინტერვიუ მამუკა არეშიძესთან: „ქართული ჯიჰადი” სირიაში – 120-მდე მებრძოლი, 20 დაღუპული და 4 საველე მეთაური“
„რეზონანსი“: შეიძლება რუსეთსა და თურქეთს შორის დაძაბულობამ საქართველოს პრობლემები შეუქმნას?
„ახალი თაობა“: ინტერვიუ თორნიკე შარაშენიძესთან: „ჩვენმა სპეცსამსახურებმა ამერიკელ და ევროპელ კოლეგებთან უნდა ითანამშრომლონ“
„ახალი თაობა“: ინტერვიუ სოსო მანჯავიძესთან: „რუსეთ-თურქეთის ესკალაცია საქართველოსთვის საზიანოა”
„ახალი თაობა“: პარლამენტის ახალი თავმჯდომარე ქალი იქნება: „ქართული ოცნების“ საარჩევნო სიაში ბიზნესმენები და სპორტსმენები ვეღარ მოხვდებიან
„ვერსია“: ინტერვიუ გია ხუხაშვილთან: 2016 წლის არჩევნების ორი სკანდალური სცენარი
„ალია“: ინტერვიუ მამუკა არეშიძესთან: მინისტრები ნოდარ ხადური, თამარ სანიკიძე, მიხეილ გიორგაძე პოსტებს დაემშვიდობებიან
„ახალი თაობა“: ინტერვიუ ომარ ნიშნიანიძესთან: „ბერაძისა და მაღრაძის განცხადებები “ქართული ოცნების” რეიტინგს ძალიან აზიანებს”
„ახალი თაობა“: ინტერვიუ ჯემალ გამახარიასთან: „1991 წელს არძინბამ კონსტიტუციაში ჩაწერა, რომ აფხაზეთი საქართველოს ნაწილია“
—————————-
„ალია“, 02 დეკემბერი, 2015 წელი
საქართველო-ნატო: დედას გაფიცებთ, ბატონო მინისტრო, რა თქვით ახლა აქ ან ახალი, ან ისეთი, რომ გულს გაგვიხარებდა? არც არაფერი!
რედაქცია
ამ ჩვენს პოლიტიკოსებს, ძვირფასო მკითხველო, გაზუთხული აქვთ უკვე, რა უნდა თქვან ნატოზე, ევროპაზე, რომ საქმედაც ჩაეთვალოთ და თან არც მწვადი დაწვან და არც შამფური. თუ არ გჯერათ, ა, ბატონო, კვირიკაშვილს უგდეთ ყური:
„ჩვენი მიზანია ნატოს წევრობა, ალიანსის გადასაწყვეტია, რა ინსტრუმენტებით უზრუნველყოფს საქართველოს გაწევრიანებას. ჩვენ დღეს გვაქვს ყველა საჭირო ინსტრუმენტი ამისთვის, მათ შორის ნატოს სამხედრო ძალებთან თავსებადობის კუთხით, რაც ძალიან მნიშვნელოვანია“, - ამის შესახებ საქართველოს ვიცე-პრემიერმა, საგარეო საქმეთა მინისტრმა გიორგი კვირიკაშვილმა ბრიუსელში განაცხადა, სადაც ის ნატოს საგარეო საქმეთა მინისტერიალში მონაწილეობს. მისი შეფასებით, მნიშვნელოვანია, რომ საქართველო ნატოში ინტეგრაციის გზაზე იყოს თანმიმდევრული, რადგან საქართველოს საბოლოო მიზანი ალიანსის წევრობაა და ქვეყანა მზად უნდა იყოს იმ პერიოდისთვის, როცა ეს შესაძლებელი გახდება.
„ყველას უნდა გვესმოდეს, რომ ნატოს წევრობა არის საქართველოს საბოლოო მიზანი და ამ მიმართულებით უნდა გავაკეთოთ ყველაფერი, რათა დაველოდოთ იმ დროს, როცა ეს შესაძლებელი გახდება. ნატო უნდა იყოს მზად იმისთვის, რომ საქართველოს გაწევრიანებაზე მიიღოს დადებითი გადაწყვეტილება, საქართველო კი, თავის მხრივ, ყველაფერს აკეთებს, რათა შეიძინოს ის ინსტრუმენტები, რომელიც განსაზღვრავს საქართველოს გაწევრიანებას ალიანსში. ვფიქრობ, უკვე გვაქვს ძალიან დიდი პროგრესი სახეზე, ამას ხაზს უსვამენ ჩვენი პარტნიორები და ამ მიმართულებით გავაგრძელებთ მუშაობას“, – აღნიშნა გიორგი კვირიკაშვილმა. მისი თქმით, საქართველო მონაწილეობს ნატოს სამშვიდობო ოპერაციებში და მნიშვნელოვანი წვლილი შეაქვს გლობალურ უსაფრთხოებაში. „ჩვენ, ასევე, ვმონაწილეობთ ავღანეთის სამშვიდობო ოპერაციაში, რომელიც არა მხოლოდ ავღანეთში, არამედ მთლიანად რეგიონში უზრუნველყოფს უსაფრთხოებასა და სტაბილურობას, ამიტომ ვფიქრობთ, რომ ჩვენ გვაქვს ყველაფერი, რაც საჭიროა ნატოს წევრობისთვის, თუმცა უნდა იყოს მზაობა თავად ნატოს ყველა წევრის მხრიდან, რათა მიღებული იქნას ეს გადაწყვეტილება. დღეს ჩვენ არ ვიცით, რა გადაწყვეტილებას მიიღებენ ვარშავის სამიტზე, მაგრამ როგორიც არ უნდა იყოს ეს გადაწყვეტილება, საქართველო თანმიმდევრულად, მტკიცედ გააგრძელებს ამ ვექტორს - ნატოს წევრობისკენ სვლას, - განაცხადა საქართველოს საგარეო უწყების ხელმძღვანელმა.
დედას გაფიცებთ, ბატონო მინისტრო, რა თქვით ახლა აქ ან ახალი, ან ისეთი, რომ გულს გაგვიხარებდა? არც არაფერი! ნატოს წევრობა რომაა ჩვენი მიზანი, ეგ გადასარევად ვიცით! ისიც ვიცით, რომ ალიანსის გადასაწყვეტია, რა ინსტრუმენტებით მოხდება ჩვენი გაწევრიანება, მაგრამ სად ჯანდაბაშია ეს ინსტრუმენტები, აქ უკვე ბურუსითაა მოცული ყველაფერი.
ჰო, ჯარიც რომ გვყავს ნატოს სტანდარტების, ეგ ამბავიც ზეპირად ვიცით და გვახარებს კიდეც, მაგრამ რა ხეირი მანდედან? ყველაზე ცუდად აი, ეს სიტყვები ხვდება ყურს: „ყველაფერი უნდა გავაკეთოთ და დაველოდოთ იმ დროს, როცა ეს შესაძლებელი გახდება“.
მეტი რაღა ჯანდაბა უნდა გავაკეთოთ, კაცო? გრაალის თასს ჩვენ ვერ შევქმნით, ვეღარც იუდას შევუშლით ხელს, რომ 30 ვერცხლად არ გაყიდოს ქრისტე და დანარჩენში ვიჭრებით რამეში ნატოსთან? არა! ერთ-ერთი ყველაზე დიდი კონტინგენტით ვართ წარმოდგენილები ცხელ წერტილებში?
კი! აბა, როდისღა დადგება დრო, როცა ალიანსში მიგვიღებენ, რომ ამოვწყდებით და გადავშენდებით მამაძაღლი პუტინის გამო? ჰოდა, აიღეთ მერე ეგ თქვენი ნატო და ხევში გადააგდეთ!.. ერთადერთი ხეირი, რაც ნატოს უკავშირდება, ის არის, რომ ჩინოვნიკები დადიხართ აღმა-დაღმა ხალხის ფულებით ათასგვარ სამიტსა და მინისტერიალზე დასასწრებად და იმიტომაცაა ზედგამოჭრილი ამ ყველაფერზე – „გიჟი ქალაქს მიდიოდა, რა მიჰქონდა, რა მოჰქონდა“…
„რეზონანსი“, 02 დეკემბერი, 2015 წელი
ინტერვიუ მამუკა არეშიძესთან: „ქართული ჯიჰადი” სირიაში – 120-მდე მებრძოლი, 20 დაღუპული და 4 საველე მეთაური“
ეკატერინე ბასილაია
ახლო აღმოსავლეთში ჯიჰადისტების მხარეზე ბრძოლისას აჭარიდან 4 ადამიანია გარდაცვლილი, ქვემო ქართლიდანაც 4, პანკისიდან კი 12. საქართველოდან სირიაში საომრად დაახლოებით 120-მდე ადამიანია წასული. მათგან ცნობილია 4 საველე მეთაური და ოთხივე ქისტია. აჭარიდან და ქვემო ქართლიდან საველე მეთაურები არ არიან, აცხადებს “რეზონანსთან” საუბრისას “სტრატეგიული კვლევების კავკასიური ცენტრის” ხელმძღვანელი მამუკა არეშიძე.
მისი თქმით, საქართველოში ისლამისტური ქსელი საკმაოდ წარმომადგენლობითია – არიან ადამიანები, რომლებიც ახალგაზრდების მოზიდვით, საზოგადოებასთან მუშაობით არიან დაკავებულნი და, ამდენად, ექსპერტი მომავალ დაკავებებსაც ელოდება.
“საქართველოში ისლამისტური ქსელი საკმაოდ წარმომადგენლობითია. ვერ გეტყვით, რომ ისეთი ორგანიზებული ძალაა, რომელსაც დღეს მთების შეძვრა შეუძლია, მაგრამ სახელმწიფო რომ არ ჩარეულიყო, ხვალ და ზეგ შესაძლოა, ორგანიზებული ძალა გამხდარიყო. აქედან გამომდინარე, როდესაც კითხვა ჩნდება, თუ აქ არიან, რას აპირებენ, მე ვამბობ: ჯერჯერობით ახალგაზრდების მოზიდვით, საზოგადოებასთან მუშაობით არიან დაკავებულნი და გააჩნია, რა ბრძანებას მიიღებენ მომავალში. როგორც ჩანს, ჯერ ბრძანების რიგი არ დამდგარა. თუმცა მათი საქმიანობა აღკვეთილი იქნა იმ ეტაპზე, როდესაც ახალგაზრდობასთან მუშაობას ეწეოდნენ და რეგიონში ამ მიმართულებით აქტიურობდნენ,” – აცხადებს არეშიძე.
- 23 ნოემბერს გავრცელდა 4 ქართველი ჯიჰადისტის მუქარა, ამის შემდეგ კი 7 დღეში სოფელ ნასაკირალში აკავებენ 4 პირს, რომელთაც სახლში იარაღი და ასაფეთქებელი ნივთიერებები აღმოუჩინეს და თან დაკავებულთაგან 2-ს მუქარის გამავრცელებლებთან ნათესაობაც აკავშირებს. რას ნიშნავს ეს, მუქარის რეალურად შესრულება იგეგმებოდა გურიაში?
- კიდევ იმ აზრზე ვარ, რომ იმ ოთხეულის გამოსვლა და მუქარა განსაკუთრებული საფრთხის შემცველი ნამდვილად არ იყო. ეს იყო საკუთარი თავის შეგულიანება და მომხრეებისთვის შეძახილი, ვიდრე რეალური ძალის დემონსტრირება.
- თუ ძალოვნებს დავუჯერებთ, ამ ადამიანებს სახლში იარაღი ჰქონდათ, ეს ნიშნავს, რომ საქართველოში რაღაც ტერორისტულ აქტიურობას აპირებდნენ? რაში დასჭირდათ იარაღის შენახვა?
- ეს კარგი კითხვაა, რომელზეც ჯერჯერობით პასუხი არ მაქვს. იარაღის ქონა პირდაპირ არ ნიშნავს იმას, რომ რაღაცას აპირებდნენ, მაგრამ რასაკვირველია, ასეთი ტიპის იარაღის შენახვა, პლუს შესაბამისი ლიტერატურისა და ასაფეთქებელი ნივთიერების არსებობა, ბუნებრივია, გვიბიძგებს, ვიფიქროთ, რომ რაღაცისთვის ემზადებოდნენ. ალბათ ასეც იყო, მაგრამ დაბეჯითებით არ შემიძლია გითხრათ, რომ რაიმეს დღეს და ხვალ აპირებდნენ. ხშირად მისვამენ ხოლმე შეკითხვას, სირიაში საბრძოლველად წასულები რომ დაბრუნდებიან, მერე რა გვეშველებაო. ისინი კი არ დაბრუნდებიან, აქ არიან.
- შესაძლოა, ბევრი უკვე გადაიბირეს?
- პანკისის მაგალითი უკვე გვაქვს, სადაც ახალგაზრდების ძალიან დიდი ნაწილი (პროცენტების დასახელება გამიჭირდება, თუმცა ის 50%-ზე მეტია) უკვე დიდი ხანია სალაფიტური, იგივე ვაჰაბიტური, მეჩეთის გარშემო იყრის თავს. გურიასა და აჭარაში შესაძლოა, ასეთი პროცენტი არ იყოს, მაგრამ გადაბირების ინტენსიური მუშაობა იქაც მიმდინარეობს.
- საქართველოში ქრისტიანების გადაბირების შემთხვევებიც არის?
- ამის მაგალითებიც არის.
- გურიაში დაკავებული 4 პირიდან ორი – მირიან ბერიძე და ლაშა გობაძე, ცნობილი ვიდეომუქარის ავტორების – მერაბ ირემაძისა და ხვიჩა გობაძის ახლობლები და ნათესავები აღმოჩნდნენ. ამის გამო გაჩნდა კითხვები, რომ შესაძლოა, მხოლოდ ნათესაური კავშირების გამო მიიტანეს ეჭვი ამ ორ ადამიანზე და ასევე შესაძლოა, იარაღიც კი ჩაუდეს ბრალის გასამყარებლად.
- დაკავებულებიდან ერთი პიროვნების შესახებ დარწმუნებით შემიძლია ვთქვა, რომ მარტო მეგობრობა-ნათესაობის გამო არ დაუკავებიათ. დანარჩენის თაობაზე ჩემთვის ცოტა რამ არის ცნობილი. ერთ-ერთი პიროვნების დაკავება აბსოლუტურად ლოგიკური იყო, თუნდაც სახლი სულ გაკრიალებული ჰქონოდა და არაფერი აღმოეჩინათ. ის ადამიანი საქართველოსთვის საფრთხეს წარმოადგენდა.
- რადგან უკვე დაკავებულია, შეგიძლიათ გვითხრათ, რომელზე საუბრობთ? თან შესაძლოა, მოწმედაც კი მოხდეს თქვენი დაბარება.
- ამას ვერ ვიტყვი, ეს იქნება იმის პირდაპირი მანიშნებელი, რომ საბუთის გარეშე კონკრეტულ პიროვნებას ბრალს ვდებ. სამართალდამცავებმა გამოიძიონ და თავად ნახონ მისი სააგიტაციო და ძირგამომთხრელი მუშაობის თაობაზე.
- გურიაში რამდენად ბევრი ისლამისტია და რამდენად რთული ვითარებაა ამ მხრივ ამ რეგიონში?
- დაკავებულები სოფელ ნასაკირალიდან არიან. გურიაში რადენიმე მუსლიმური სოფელია, სადაც აჭარელი ეკომიგრანტები ცხოვრობენ. ასეთი სოფლებია: ნასაკირალი, ბუკნარი და ზოტი. რომ გითხრათ, ეს სოფლები მთლიანად სალაფიტურია, ასე არ არის. ტრადიციული ისლამის მიმდევრებიც ცხოვრობენ. ზოტიდან არის საქართველოს გმირი მურთაზ ირემაძე, რომელიც 2008 წლის ომში დაიღუპა. ამ სოფლებში მხოლოდ თითო-ოროლა ქრისტიანი ოჯახი თუ იქნება.
- ამბობთ, რომ დაკავებული ერთ-ერთი პირის იდეოლოგიური მუშაობის შესახებ ინფორმაცია გქონდათ, თუმცა საზოგადოებისთვს ძირითადად მაინც პანკისიდან ვრცელდებოდა ინფორმაცია ისის-ის რიგებში საბრძოლველად წასულებზე თუ დაღუპულებზე. ვიცით, რომ 12-ია გარდაცვლილი. სირიაში საომრად წასულებიდან რამდენიმე კონკრეტული გვარიც გავრცელებულა. აჭარა-გურიიდან კი მსგავსი ცნობები არ მოსულა, სანამ თავად არ გადაწყვიტეს მუქარის გავრცელება. როგორ ახერხებდნენ ასე მალულად მოქმედებას?
- ზუსტად იმიტომ ახერხებდნენ, რომ ჟურნალისტებზე ზემოქმედების მთელი პლასტი იყო შექნილი. პანკისი გახდა საერთაშორისო უარყოფითი ბრენდი, ზუსტად იმიტომ, რომ მუდმივად ყოფილიყო საქართველოს უარყოფითი მხარის დემონსტრირება პანკისის მეშვეობით. ბოლო წლების განმავლობაში ისეთი არაფერი ხდებოდა პანკისში, რა უარყოფითი ავტორიტეტიც ჰქონდა საერთაშორისო პრესაში. ჟურნალისტებმა დაღალეს პანკისის მცხოვრებლები.
- პანკისის თემის აქტუალობა პრესის ბრალი სულაც არ არის. ობიექტური წინაპირობებიც არსებობდა, წლების წინ პანკისის კრიზისი, შემდეგ ლაფანყური და შემდეგ ცნობილი ტერორისტი საველე მეთაურის – ბათირაშვილის წარმომავლობა.
- მართალია ეს, მაგრამ ისეთი შთაბეჭდილება მრჩება, რომ ხელისუფლების წარმომადგენლები 2000-2012 წლებში ხელოვნურად ქმნიდნენ ისეთ სიტუაციას, რომ პანკისის მოსახლეობას უარყოფითი იმიჯი ჰქონოდა. მერე რა, რომ ბათირაშვილი პანკისიდანაა?! ნიუ-იორკის “ტყუპების” ამფეთქებლები (11 სექტემბრის ტერაქტი – რედ.) საუდის არაბეთიდან იყვნენ, მაგრამ ეს არ ნიშნავს, რომ ის ტერორისტების სახელმწიფოა.
- და მაინც პანკისის გარდა, მაგალითად, გურია-აჭარაში რა ხდება, რამდენია წასული სირიაში და რამდენია გარდაცვლილი?
- გურიიდან დაღუპულების რიცხვი ჩემთვის უცნობია, მგონი, არავინ დაღუპულა. ჩემი ინფორმაციით, აჭარიდან 4 ადამიანია გარდაცვლილი, ქვემო ქართლიდანაც – 4. ჯამში 20 ადამიანი დაიღუპა სირიაში და ეს საქართველოსთვის პატარა რიცხვი არ არის. საქართველოდან სირიაში საომრად 120-მდე ადამიანია წასული, თუმცა რთული სათქმელია, ზუსტად რამდენი, რადგან ბევრი მათგანი დაფიქსირებულია ამა თუ იმ ქვეყანაში დასაქმებულებად, თუმცა მერე ირკვევა, რომ ისლამისტების რიგებში არიან. ცნობილია 4 საველე მეთაური და 4-ვე ქისტია. აჭარიდან და ქვემო ქართლიდან საველე მეთაურები არ არიან.
აჭარის შესახებ ადრეც ვრცელდებოდა რაღაც ცნობები, მაგალითად, ის, რომ ბათუმში მოსამზადებელი ცენტრები იყო, სადაც ადამიანების ტვინის გამორეცხვა ხდებოდა. ჩვენ ვიცით მეთოდოლოგია, როგორ ხდება ადამიანების დამუშავება და რას აღუთქვამენ მათ. ახალგაზრდები სასწავლებლად მიჰყავთ, ოჯახებს მატერიალურად ეხმარებიან. ჰუმანიტარულ დახმარებასთან ერთად კი იდეოლოგიური დამუშავებაც ხდება, რომ სამომავლოდ გამოიყენონ.
- პანკისელ ისლამისტებსა და გურია-აჭარის ისლამისტებს შორის არის კავშირი?
- რასაკვირველია, არის. მაგალითად, მუქარის ვიდეოს ერთ-ერთი ავტორი ხვიჩა გობაძე პანკისში რამდენჯერმე იყო ჩასული. ასევე ბახუნტარიძე, რომელიც ერთ-ერთი ცნობილი რელიგიური მოღვაწეა აჭარაში, მასაც პანკისელ სალაფიტებთან ჰქონდა კონტაქტები. ასევე რუსი დიპლომატის მკვლელობაში ეჭვმიტანილი ლაკაევი წლების წინ ბათუმში იარაღის შეძენა-ტარებისთვის დააკავეს და ახლაც პატიმარია.
- ამბობთ, პრესამ პანკისი გახადა უარყოფითი ბრენდი, ამას პლუს ის, რომ “აისისის” რიგებში პანკისიდან უფრო მეტი ახალგაზრდაა წასული და მაინც საქართველოს მიმართ ორი მუქარა გავრცელდა და ორივე აჭარლების მხრიდან, პანკისელებისგან კი ამ მიმართულებით აქტიურობა არ ყოფილა. რა არის ამის მიზეზი?
- ეს ქისტების სწორ აზროვნებასა და მათ საკუთარი ქვეყნის მიმართ დამოკიდებულებაზე მეტყეველბს. სირიაში მებრძოლ არც ერთ ჩეჩენს არ გაუკეთებია საკუთარი რესპუბლიკის მიმართ აგრესიული განცხადება, ერთადერთი კადიროვს ემუქრებიან.
„რეზონანსი“, 02 დეკემბერი, 2015 წელი
შეიძლება რუსეთსა და თურქეთს შორის დაძაბულობამ საქართველოს პრობლემები შეუქმნას?
გვანცა ღვედაშვილი
ბრიუსელში ნატო-ს მინისტერიალი იწყება. მსჯელობა გაიმართება ავღანეთსა და უკრაინისთვის დახმარების გაწევაზე, რუსეთთან ურთიერთობასა და სხვა საკითხებზე.
მეორე სესიის მთავარი საკითხი “სამხრეთიდან მომავალი საფრთხე” გახდება. როგორც მოსალოდნელია, ალიანსი თურქეთს მხარდაჭერას გამოუცხადებს და ნატოს პარტნიორებისთვის ჩრდილოეთ აფრიკასა და ახლო აღმოსავლეთში დახმარების გაზრდის საკითხებზე იმსჯელებს. სესიის ერთ-ერთი საკითხი ტერორისტულ ორგანიზაცია “ისლამურ სახელმწიფოსთან” ბრძოლა იქნება.
მინისტერიალის მონაწილეები განიხილავენ რუსეთთან შემდგომ ურთიერთობას, უკრაინაში რუსეთის ქმედებების და ნატო-ს სამეზობლოში რუსული სამხედრო ძალების გააქტიურების კონტექსტში.
ბოლო დროს რუსეთსა და თურქეთს შორის დაძაბული ურთიერთობის შესახებ აქტიურად საუბრობენ საქართველოში. პარიზში გამართულ კონფერენციაზე, რომელიც კლიმატის ცვლილებას შეეხებოდა, რუსეთის პრეზიდენტმა ვლადიმირ პუტინმა დემონსტრაციულად აარიდა თავი თურქ კოლეგასთან შეხვედრას, რომელიც რუსული ბომბდამშენის ჩამოგდების შემდეგ სიტუაციის განმუხტვით იყო დაინტერესებული.
“შეიძლება რუსეთსა და თურქეთს შორის დაძაბულობამ საქართველოს პრობლემები შეუქმნას?” – ამ კითხვით “რეზონანსმა” საზოგადოების ცნობილ წარმომადგენლებს მიმართა.
ანზორ თოთაძე (დემოგრაფი): თუ დაძაბული ურთიერთობა გაგრძელდა და ომამდე მივიდა საქმე, შესაძლოა, განზე აღარ დატოვონ ჩვენი ტერიტორია და დაძაბულებამ საქართველოშიც გადმოინაცვლოს.
ლევან ღვინჯილია (ენათმეცნიერი): გააჩნია, რამდენად უკომპრომისო იქნება ეს დაძაბულობა. თუ ის გაიზრდება, რა თქმა უნდა, საქართველოსთვის კარგი არ იქნება.
გიგა ნასარიძე (ა/ო “საქართველო არ იყიდება”): რა თქმა უნდა, როცა ორი მეზობელი პირდაპირ თუ ირიბად ომობს ერთმანეთთან, ამან შესაძლოა, საქართველოზე უარყოფითად ან დადებითად იმოქმედოს. ყველაფერი დამოკიდებულია საქართველოს ხელისუფლების მოქმედებებზე. დაძაბულ ზონაში ცხოვრება მარტივი არ არის. იმედია, ეს ყველაფერი ჩაცხრება და სიტუაცია ომამდე არ მივა, თუმცა, კიდევ ერთხელ ვიმეორებ, რომ ამ სიტუაციაში საქართველოსთვის სარგებლის ნახვა შესაძლებელია და ეს მთლიანად ხელისუფლებაზეა დამოკიდებული.
გიორგი შენგელაია (რეჟისორი): ძალიან ძნელი დასაბალანსებელია ეს ამბავი. ახლა მსოფლიოში მიმდინარე ნებისმიერმა მოვლენამ შეიძლება გავლენა იქონიოს საქართველოზე და აქვს კიდეც გავლენა. კონკრეტულად რა მოხდება, არ ვიცი. ზუსტ პროგნოზს, თუ რა მოხდება, ნამდვილად ვერ გავაკეთებ.
„ახალი თაობა“, 02 დეკემბერი, 2015 წელი
ინტერვიუ თორნიკე შარაშენიძესთან: „ჩვენმა სპეცსამსახურებმა ამერიკელ და ევროპელ კოლეგებთან უნდა ითანამშრომლონ“
ნათია ხურცილავა
სახელმწიფო უსაფრთხოების სამსახურმა 4 პირი დააკავა. ჩხრეკის შედეგად დაკავებული პირების საცხოვრებელი სახლებიდან ამოღებულია ისლამური სახელმწიფოს დროშები, ცეცხლსასროლი იარაღი, ასაფეთქებელი მოწყობილობები და ე.წ. მეხსიერების ბარათი.
„ახალ თაობასთან“ ინტერვიუში პოლიტოლოგი თორნიკე შარაშენიძე აცხადებს, რომ სპეცსამსახურებს აქვთ რეალური შესაძლებლობა, აწარმოონ შესაბამისი სამუშაოები, რათა საფრთხე დროულად აღიკვეთოს. „ჩვენი უსაფრთხოების სამსახური თუ რამე დანაშაულს გახსნის, ეს მხოლოდ კარგია და ამას მხოლოდ მივესალმები. რადგან ტერორისტული აქტი ვეღარ განხორციელდა, ე.ი. უსაფრთხოების სამსახურმა დროულად იმუშავა. როგორც ჩანს, იზორიამ სწორი დასკვნები გააკეთა და საქმის კეთებაზე გადავიდა. ეს მხოლოდ მისასალმებელია. ჩვენი ქვეყნის სპეცსამსახურებს ადეკვატური მუშაობა მართებთ“, – აცხადებს პოლიტოლოგი.
- ხელისუფლება გაართმევს თავს ამ საფრთხეს?
- სამწუხაროდ, საფრთხე რეალურია, მაგრამ ჩვენს ქვეყანაში თუ უსაფრთხოების ზომები უფრო კარგად იქნება დაცული, ვიდრე, მაგალითად, ჩრდილოეთ კავკასიაში, მაშინ შეიძლება ამ საფრთხის თავიდან აცილება.
- რას გულისხმობთ?
- ჩრდილოეთ კავკასიაში ტერორისტული აქტები ხშირად ხდება. ამით ისლამური სახელმწიფო ვერაფერს აღწევს, ვერც იმ საერთაშორისო რეზონანსს იწვევს, რომლისკენაც მათი ეს აგრესიაა მიმართული, მაგრამ მაინც გეგმავს და ახორციელებს.
- რატომ?
- პირველი, ჩრდილოეთ კავკასიაში სათანადოდ არ არის დაცული უსაფრთხოების ზომები. მეორე იმიტომ, რომ ტერორისტული აქტები უნდა განახორციელონ. ეს მათი მიზანია. ჩემი აზრით, ისლამური სახელმწიფოსთვის უფრო პრიორიტეტული იქნება, ტერორისტული აქტები განახორციელოს არა ჩრდილოეთ კავკასიაში, არამედ საქართველოში, მაგრამ საქართველო უფრო დაცულია, ვიდრე, მაგალითად, ჩრდილოეთი კავკასია. თუ ეს მათ კარგად ეცოდინებათ, მაშინ ჩვენთან ტერაქტებს აღარ მოაწყობენ, რადგან მიხვდებიან, რომ სერიოზული დანაკარგები ექნებათ და, ამავე დროს, ამ ყველაფერს ის რეზონანსი არ მოჰყვება, რაც მოჰყვა, მაგალითად, პარიზის ტერაქტს.
- ირაკლი ალასანია უსაფრთხოების სამსახურისთვის დაფინანსების გაზრდას ითხოვდა. არის ამის საჭიროება?
- ჩვენ ისეთი სპეცსამსახურები არ გვყავს, როგორიც გერმანიას ან აშშ-ს, მაგრამ ჩვენს რეგიონში, ასე თუ ისე, რაღაც გარანტია მაინც არის, რომ ეს ზომები მეტ-ნაკლებად იყოს დაცული.
- მნიშვნელოვანია, ევროპელ, ამერიკელ სადაზვერვო სამსახურებთან იყოს ინტენსიური თანამშრომლობა?
- რასაკვირველია, ეს არის უმნიშვნელოვანესი კომპონენტი ჩვენი ქვეყნის თავდაცვის მიმართულებაში. ამერიკელებს ისედაც ძალიან დიდი წვლილი მიუძღვით ჩვენი სპეცსამსახურების წვრთნასა და ჩამოყალიბებაში. ასევე ძალიან მნიშვნელოვანია, რომ ქართულმა მხარემაც მიაწოდოს ინფორმაცია და ეს იყოს რეალურად ორმხრივი თანამშრომლობა.
- რამდენად გვაქვს შესაბამისი ტექნიკა, იმის შესაძლებლობა, რომ ქართულმა სპეცსამსახურებმა შეძლონ ადეკვატური სამუშაოების ჩატარება?
- რადგან ჩვენი სპეცსამსახურები ვაიბერს უსმენენ, გამოდის, თანამედროვე ტექნიკით არიან აღჭურვილნი და, დიდი იმედი მაქვს, რომ ეს ტექნიკა დანიშნულებისამებრ იქნება გამოყენებული.
- სპეცოპერაცია გურიის ერთ-ერთ სოფელ ნასაკირალში ჩატარდა. წინა შემთხვევაც სწორედ გურიას უკავშირდება…
- კაცმა არ იცის, კიდევ სად შეიძლება, იყოს ეს ბუდე. ამ შემთხვევაში ჩვენმა სპეცსამსახურებმა გურიაში მიაგნეს, ეს არის და ეს.
ექსპერტი თორნიკე შარაშენიძე რუსეთის პრეზიდენტ პუტინსა და თურქეთის პრეზიდენტ ერდოღანს შორის არსებულ დაძაბულობაზეც საუბრობს:
- პუტინის ბრალდება, რომ ერდოღანი ისლამურ სახელმწიფოს მფარველობს, თუ არის სიმართლე და, თუ ეს ინფორმაცია პუტინს აქვს, ამ ორ დღეში მოიპოვა? მაინცდამაინც ახლა რატომ აკეთებს ამ განცხადებას? ადრე რატომ არ გააკეთა და რატომ არ ამხილა ერდოღანი ტერორისტების მფარველობაში? თუ მთავარი მიზეზი რუსული სუ-24-ის ჩამოგდებაა?!
- თუ რეალურად მფარველობს თურქეთი ტერორისტებს?
- რატომ უნდა იყოს თურქეთის ინტერესებში ისლამური სახელმწიფოს მფარველობა, რომელმაც მას ტერაქტი მოუწყო? ეს ხომ ძალიან ცნობილი ფაქტია. თანაც ეს ფაქტი ახლახან მოხდა, გასულ წლებში ხომ არ მომხდარა. როგორც ჩანს, ლოგიკასთან ვიღაც-ვიღაცები მწყრალად არიან. ისლამური სახელმწიფოს გაძლიერება არც ერთი სახელმწიფოს ინტერესებში არ არის, რადგან მისგან საფრთხე ყველას ემუქრება. მეორე საკითხია, რომ რუსეთი ცდილობს ასადის რეჟიმის გადარჩენას და ამაში რაღაც მეთოდებს იყენებს. ასევე თურქეთი ცდილობს, ასადის რეჟიმი მოსპოს და ამაში ასევე გარკვეულ მეთოდებს იყენებს.
- ამერიკის როლი როგორია ამ პროცესებში?
- ობამას პოლიტიკაა, რომ მაქსიმალურად თავი შეიკავოს ე.წ. შარიან რეგიონებში ჩარევისგან, რასაც ასევე ბუშის ადმინისტრაცია აკეთებდა. ობამას პოლიტიკა რეგიონის მიმართ ძალიან ფრთხილი და თავშეკავებულია.
- ტერორიზმის საფრთხე ამერიკასაც ხომ ემუქრება?
- ცხადია, მაგრამ ის სრული მასშტაბით მაინც არ ჩაერევა პროცესებში, არავითარ შემთხვევაში ჯარებს არ შეიყვანს, თავის მოკავშირეებს დაეხმარება სადაზვერვო ინფორმაციის მიწოდებითა და ავიაციით. მე არ მგონია, რომ ამერიკამ სერიოზული სპეცოპერაცია ჩაატაროს სირიაში. ერაყის მძიმე გამოცდილების შემდეგ ეს მას არაფერში სჭირდება.
- ობამა და სხვა ლიდერები პირობას დებენ, რომ საფრთხეს, რომელიც ისლამურ სახელმწიფოს უკავშირდება, დაძლევენ…
- კი, დაძლევენ, მაგრამ ამერიკა ამ პროცესებში სრული მასშტაბით არ ჩაერევა.
„ახალი თაობა“, 02 დეკემბერი, 2015 წელი
ინტერვიუ სოსო მანჯავიძესთან: „რუსეთ-თურქეთის ესკალაცია საქართველოსთვის საზიანოა”
მარიამ მჭედლიშვილი
რუსეთსა და თურქეთს შორის დაპირისპირება გრძელდება და ახალ ფორმებს იძენს. არსებობს მოსაზრება, რომ ამან შეიძლება საქართველოს ეკონომიკას რაღაც სარგებელი მოუტანოს. თუმცა, უმრავლესობა აცნობიერებს, რომ ეს მოვლენები ზიანს მოუტანს საქართველოს უსაფრთხოებას.
- სამწუხაროდ, პარიზში მიმდინარე ეკოლოგიურ სამიტზე არ მოხდა თურქეთისა და რუსეთის პრეზიდენტების შეხვედრა. არ მოხდა ვითარების განმუხტვა, რაც ძალიან ცუდია უსაფრთხოებისთვის, – აღნიშნა „ახალ თაობასთან“ საუბარში თბილისის საკრებულოს წევრმა სოსო მანჯავიძემ. მისი აზრით, საქართველოს ხელისუფლებამ ყველაფერი უნდა იღონოს, რომ რუსეთ-თურქეთის დაპირისპირება არ მოხდეს საქართველოს ტერიტორიაზე და მხარეებმა ერთმანეთის წინააღმდეგ არ გამოიყენონ ტერორისტები. არსებობს იმის საშიშროებაც, რომ რუსეთმა ტრანზიტად გამოიყენოს საქართველოს ტერიტორია. საუბარია სახმელეთო გადაზიდვებზე.
- სამხედრო ტვირთებისთვის?
- სამხედრო ძალისა და ტვირთებისთვის. ჩრდილოეთიდან ცხინვალის, სომხეთის, ირანის გავლით სირიამდე. საუბედუროდ, თუ რუსეთს ტრანზიტი დასჭირდა, საქართველო ერთადერთი ვარიანტი იქნება, ვინაიდან აზერბაიჯანი უარს იტყვის ტვირთებისა გატარებაზე.
- რუსეთსა და თურქეთს შორის დაპირისპირება ეკონომიკური ომის ფარგლებს გასცდება?
- თუ ესკალაცია არ შენელდა, საშიშროება გველის. რუსეთი აძლიერებს თავის სამხედრო ყოფნას რეგიონში. რუსეთს სომხეთთან გაფორმებული აქვს საჰაერო თავდაცვის ხელშეკრულება ძალების ერთობლივად გამოყენების შესახებ. სამხედრო თანამშრომლობა რუსეთს საქართველოს ოკუპირებულ რეგიონებთან, აფხაზეთთან და ცხინვალის რეგიონთანაც აქვს. თურქულ არმიას თავისი ამბიციები აქვს. თურქებს ამოძრავებთ ფატალისტური იდეები დამასკოს დანგრევის თაობაზე. რეგიონში უძლიერესი თურქული არმია თავს იყრის სირიის საზღვართან.
- საქართველოში ბევრს ჰგონია, რომ თურქეთ-რუსეთის დაპირისპირება საქართველოსთვის სახეირო იქნება.
- ალბათ, იგულისხმება ის, რომ ამ სახელმწიფოების სავაჭრო ურთიერთობის ხარჯზე ჩვენი ვაჭრობა განვითარდება და ტურისტები ჩვენთან შემოვლენ. ჯერ ერთი, საქართველოს არ გააჩნია ნამატი პროდუქცია. მეორეც, ექსპორტის განვითარება არ უნდა ხდებოდეს უსაფრთხოების ხარჯზე. ვრცელდება ინფორმაცია იმის შესახებ, რომ თურქეთმა შეიძლება რუსეთის წინააღმდეგ გამოიყენოს დაჯგუფება ისლამური სახელმწიფოს მებრძოლები, რომლებსაც პანკისის ხეობაში გადმოისვრიან. საქართველოში არსებობს ამ კუთხით სახიფათო სხვა კერებიც. ამიტომ, საქართველოს ხელისუფლებას დიდი ძალისხმევა მართებს. რაც მთავარია, საფრთხეებს მთელი სერიოზულობით უნდა მიუდგეს.
„ახალი თაობა“, 02 დეკემბერი, 2015 წელი
პარლამენტის ახალი თავმჯდომარე ქალი იქნება: „ქართული ოცნების“ საარჩევნო სიაში ბიზნესმენები და სპორტსმენები ვეღარ მოხვდებიან
შორენა მარსაგიშვილი
კოალიცია „ქართულ ოცნებაში“ სიტუაცია უკიდურესად დაიძაბა. მმართველი გუნდი საარჩევნო სიის შედგენას შეუდგა, რასაც დიდი უკმაყოფილება მოჰყვება.
თვითმმართველობის არჩევნებისთვის საარჩევნო სია ბიძინა ივანიშვილის გარეშე შედგა. ახლა ამით ხსნიან იმ ფაქტს, რომ თვითმმართველობებში გაურკვეველი პოლიტიკური წარმომავლობის ხალხი მოხვდა. არადა ანგელოზები საარჩევმო სიაში არც ივანიშვილს შეუყვანია 2012 წელს. ახლა თავადაც აღიარებს, რომ მათი 80% პარლამენტში შესაშვები არ იყო.
წარსული შეცდომებიდან გამომდინარე მომავალი არჩევნებისთვის საარჩევნო სიის შედგენას უშუალოდ ბიძინა ივანიშვილი ხელმძღვანელობს. თავიანთი ხალხის გაყვანას შეეცდებიან კოალიციის სხვა ლიდერებიც.
მმართველ გუნდში კარგად აცნობიერებენ, რომ 2012 წლის არჩევნებისგან განსხვავებით, არჩევნების მოგება გაუჭირდებათ და ამიტომაც სიის პირველი ნომრის შერჩევაზე დიდი კასტინგი აქვთ გამოცხადებული. ბევრს უნდა, რომ სიას სათავეში ნაპრემიერალი ჩაუდგეს, მაგრამ ივანიშვილი ამაზე არ თანხმდება.
პარტიული სიის შედგენის გარდა, კოალიციაში მაჟორიტარებზეც აქვთ გამოცხადებული კასტინგი. სანამ რეგიონებში სასურველ კანდიდატებს მონახავენ, რაიონებში კონფერენციებს ატარებენ და რაიონული ორგანიზაციების თავკაცებს ნიშნავენ.
_ „ქართული ოცნება“ ისეთ ხალხს ნიშნავს, რომ მეეჭვება, არჩევნები მოიგონ. ხელვაჩაურში და შუახევში ძალიან სუსტი კადრები დანიშნეს რაიონული ორგანიზაციების ხელმძღვანელებად. არჩევნებზე მათ დამარცხებას უფრო იოლად შევძლებთ, _ განაცხადა „ახალ თაობასთან“ საუბარში „ქართული ოცნების“ ყოფილმა წევრმა, დეპუტატმა მურმან დუმბაძემ.
მისი თქმით, სხვა რაიონებშიც იგივე ვითარებაა. ყოფილი მეოცნებე მიიჩნევს, რომ ივანიშვილი კადრებს არა ერთგულების, არამედ მონური მორჩილების მიხედვით შეარჩევს.
„ქართულ ოცნებაში“ კი აცხადებენ, რომ მათ პროფესიონალების მოძიება დაიწყეს. ამ ეტაპისთვის არ აკონკრეტებენ, კონკრეტულად რა სფეროში ეძებენ პროფესიონალებს. კოალიციის ერთ-ერთი ლიდერი კახა კალაძე ამბობს, რომ საარჩევნო სია სრულიად განახლდება. ვიცე-პრემიერი პირობას დებს, რომ სიის მიღმა დარჩენილები გუნდში დარჩებიან.
ამ დაპირების მიუხედავად, „ქართულ ოცნებაში“ დიდი უკმაყოფილებაა. „პირველი რადიოს“ ინფორმაციით, საპარლამენტო უმრავლესობასთან კოალიციის ოფისში გამართულ შეხვედრაზე ბიძინა ივანიშვილმა სადეპუტატო კორპუსს განუცხადა, რომ მათი უმრავლესობა პარლამენტში ვეღარ მოხვდება. ამ შემთხვევაში საუბარია მსახიობ და სპორტსმენ დეპუტატებზე. ,,დაწუნებულმა“ დეპუტატებმა კოალიციის ლიდერის ეს გადაწყვეტილება ადგილზევე გააპროტესტეს. თუმცა, მათი პროტესტი მიღებულ არ იქნა.
მოსალოდნელი გართულებების თავიდან აცილების მიზნით, მათ მიიღეს გარანტია, რომ ისინი არჩევნების შემდეგ სამინისტროებში, სხვადასხვა უწყებებსა და გუბერნატორების ოფისებში დასაქმდებიან.
ერთ-ერთ მათგანს კი შეიძლება ძალიან გაუმართლოს და სპორტის მინისტრობას გამოჰკრას ხელი. ამ პოსტზე, შესაძლოა, შოთა ხაბარელი დაინიშნოს. მისი კანდიდატურა ამ პოსტზე აქამდეც მოიაზრებოდა.
თუ გავითვალისწინებთ იმას, რომ სპორტსმენი დეპუტატების უმეტესობა მაჟორიტარია, იმ რაიონებშიც მოუწევთ სათანადო კანდიდატების შერჩევა. როგორც ამბობენ, უკვე გადაწყვეტილია, რომ ახმეტაში მაჟორიტარად ზურაბ ზვიადაურს აღარ წარადგენენ. მან პოლიტიკიდან წასვლის სურვილი ადრეც გამოთქვა და ალბათ ამ ამბავს იოლად გადაიტანს, თანაც სადღაც აუცილებლად დაასაქმებენ.
ბიძინა ივანიშვილი კუნთმაგარი დეპუტატების მიმართ დადებითად იყო განწყობილი. იმდენად დადებითად, რომ მათ შეეძლოთ, კოალიციის ლიდერების გვერდის ავლით, შეხვედროდნენ ყოფილ პრემიერს.
ასეთი რამ მიმდინარე წლის აპრილში მოხდა, როცა სპორტის საპარლამენტო კომიტეტის წევრებმა სოლოლაკში მიაკითხეს ნაპრემიერალს. იმ პერიოდში სპორტის კომიტეტი ლევან ყიფიანის გადადგომას ითხოვდა. ზემოდან ისინი რამდენჯერმე გააფრთხილეს, რომ ამ განზრახვაზე ხელი აეღოთ. მათ განზრახვაზე არათუ არ აიღეს ხელი, ივანიშვილთან მიცვივდნენ და კომპრომატებიც აიტანეს.
საბოლოო ჯამში, ყიფიანი მართლაც წავიდა, სპორტის კომიტეტის ხალხი კი ყველაზე ჯიუტ და საშიშ ხალხად იქნა მიჩნეული. როგორც „ახალი თაობისთვის“ ცნობილი გახდა, კოალიციაში რამდენიმე ლიდერმა კუნთმაგრებისა და ივანიშვილის ახლობლობა ვერ აიტანა და ექსპრემიერი დაარწმუნეს, რომ ისინი მომავალ პარლამენტში აღარ უნდა მოხვდნენ.
ახლა საინტერესოა იმის გარკვევა, მხოლოდ ოლიმპიური და მსოფლიოს ჩემპიონები დაისჯებიან, თუ იმათაც „დაბრაკავენ“, ვისაც ბავშვობაში ერთხელ მაინც უთამაშია ფეხბურთი. ამ ლოგიკით პარლამენტიდან ეკა ბესელიაც უნდა გაუშვან. თინეიჯერობაში ისიც აგორებდა თურმე ბურთს.
საარჩევნო სიაში არც ბიზნესში ჩართულ დეპუტატებს შეიყვანენ. მათ ბიძინა ივანიშვილს რამდენიმე თვის წინ უკვე უთხრა, რომ უმჯობესია, ბიზნესით დაკავდნენ და სამუშაო ადგილები შექმნან.
კითხვის ნიშნის ქვეშ იყო რესპუბლიკელების ამბავიც, მაგრამ რაკი მათ შორის მსოფლიოს ჩემპიონები არ არიან, ისინი პარლამენტში შევლენ. როგორც „ახალი თაობისთვის“ ცნობილი გახდა, რესპუბლიკელებმა სამომავლო გარანტიები მიიღეს და კოალიციაში დარჩებიან.
კასტინგია გამოცხადებული პარლამენტის თავმჯდომარის კანდიდატურაზეც. როგორც ამბობენ, ის ქალი უნდა იყოს. არ არის გამორიცხული, რომ ეს პოსტი მანანა კობახიძემ ან თინა ხიდაშელმა დაიკავოს.
ხიდაშელისა და კობახიძისგან განსხვავებით, აშკარად არ გაუმართლა გუგული მაღრაძეს და რიმა ბერიძეს. არადა, ამ უკანასკნელს ჩუღურეთის მაჟორიტარობა უნდოდა. მისმა განცხადებამ 1,18 ლართან დაკავშირებით `ქართული ოცნების~ რეიტინგი ლამის 1.18%-მდე ჩამოიყვანა, რაც მისთვის საბედისწერო გამოდგა.
განცხადებების მხრივ გუგული მაღრაძეც მოიკოჭლებს და, როგორც ამბობვნ, მასაც აუნთეს წითელი.
………….
როგორც უკვე აღვნიშნეთ, მაჟორიტარების შერჩევაც მიდის. გავრცელდა ინფორმაცია, რომ მაჟორიტარობისთვის თამაზ მეჭიაურს წარადგენენ. ბიძინა ივანიშვილის თანაკურსელი მშობლიური თიანეთის ნაცვლად რატოღაც თეთრიწყაროში გაამწესეს.
თამაზ მეჭიაური უარყოფს, რომ გუნდმა თეთრიწყაროს მაჟორიტარი დეპუტატის კანდიდატობა შესთავაზა. „მე საერთოდ ბუნებით მაჟორიტარი ვარ, მაგრამ აბსოლუტურად შეუსაბამობაშია ჩემთან ის რაიონი, რომელიც მე მიწერია. როგორც ვიცი, წერია, რომ თეთრიწყაროს მაჟორიტარი დეპუტატი ვიქნები. ორჯერ ვარ ნამყოფი სულ თეთრიწყაროში. შეიძლება ვიღაცასთან არის მონახაზი ასეთი. მე რაც ვიცი, ბოლო შეხვედრაზე ითქვა, რომ თითოეული მაჟორიტარი დეპუტატის შერჩევა ინდივიდუალურად მოხდება“, – განაცხადა მეჭიაურმა.
„ვერსია“, 02 დეკემბერი, 2015 წელი
2016 წლის არჩევნების ორი სკანდალური სცენარი
ვინ ჩაანაცვლა პაატა ბურჭულაძემ ქართულ პოლიტიკაში და რა შემთხვევაში ითანამშრომლებს მსოფლიო ბანი ბიძინა ივანიშვილთან
ნინო კომახიძე
ახალი ძალის გამოჩენა ყოველთვის ახალ იმედებს და მოლოდინს უკავშირდება. თუ ამ ახალ ძალად, ამჯერად, პაატა ბურჭულაძეს მოვიაზრებთ, იგი გარდამტეხ როლს 2016 წლის არჩევნებში, ნებისმიერ შემთხვევაშიც შეასრულებს - შექმნის თუ არა პარტიას და იქნება თუ არა სიის პირველი ნომერი. ეს სწორედ ის სქემაა, რომლითაც 2012 წელს ბიძინა ივანიშვილი მოვიდა და სააკაშვილის ხელისუფლება შეცვალა. რას და ვის შეცვლის ბურჭულაძის ფაქტორი, როგორ გადალაგდება სახელისუფლო თუ ოპოზიციური სპექტრი და ვინ იქნება „ქართული ოცნების“ მემკვიდრე - ამ თემებზე, „ვერსიასთან“ ექსპერტი გია ხუხაშვილი მსჯელობს.
- იმის მიუხედავად, გარდაიქმნება თუ არა პაატა ბურჭულაძის ფონდი პარტიად, ის უკვე პოლიტიკაშია. ეს სპეციფიკური რეალობაა, მაგრამ ასეა – არც ბიძინა ივანიშვილია პოლიტიკაში პირდაპირ ჩართული, მაგრამ საზოგადოებრივი მოძრაობებით, „20/30“-ისა და თუნდაც „მოქალაქის“ მეშვეობით, გავლენას მთელს პოლიტიკურ პროცესზე ახდენს და ამას არც უარყოფს. ბურჭულაძის ამ ფონდს კი, გარკვეულწილად, ამბიცია აქვს, ,,მოქალაქესთან” კონკურენციაში შევიდეს. საუბარია ივანიშვილისა და ბურჭულაძის პიროვნულ კონკურენციაზე, რადგან ორივე მათგანის გაცხადებული მიზნები, თუნდაც სამოქალაქო სექტორიდან, ძალიან ჰგავს ერთმანეთს. ეს უკვე პოლიტიკაა, იმისგან დამოუკიდებლად, შექმნის თუ არა ბურჭულაძე პარტიას. რაც შეეხება პაატა ბურჭულაძის ფაქტორს: ახლა საქართველოს პოლიტიკური ელიტის კრიზისი გვაქვს. ამომრჩევლები პოლიტიკოსებისგან დისტანცირებულნი არიან, მათ უდიდეს ნაწილს, მოქმედ სპექტრში, არავინ მოსწონს, რასაც ყველა კვლევა აჩვენებს. ეს კი ნოყიერ ნიადაგს ქმნის ახალი ძალების გამოჩენისთვის. ფაქტობრივად, დღეს ძალაუფლება ქუჩაში აგდია და მისი ამღები არავინაა. იმ ადამიანთა შორის, ვისაც სახელმწიფოში მიმდინარე მოვლენებზე ზეგავლენის ამბიცია აქვს, ბურჭულაძეს ყველაზე სერიოზული პერსპექტივა გააჩნია, მისი ინდივიდუალური რეიტინგიდან და ავტორიტეტიდან გამომდინარე.
- მთელი ეს შეფასება იმაზე ავაგეთ, რომ პაატა ბურჭულაძე ბიძინა ივანიშვილის კონკურენტია. თუ გავიხსენებთ, რომ 4 წლის წინ ითქვა, ივანიშვილი ვიღაც ლიდერს ნიადაგს უსუფთავებსო, რატომ არ შეიძლება, ,,ახალი ბიძინა” სწორედ პაატა ბურჭულაძე იყოს და ამ ხელისუფლების კონკურენტი კი არა, მემკვიდრე აღმოჩნდეს?
- არაფერს გამოვრიცხავ. პირიქით, მეტსაც გეტყვით – შესაძლოა, არავითარი გარიგება და შეთანხმებული მოქმედების სქემა არ არსებობდეს, მაგრამ ბურჭულაძისა და ივანიშვილის ძალების რაღაც ფორმით გაერთიანება თავად რეალობამ მოიტანოს. არ არის გამორიცხული, პროცესმა თავად უბიძგოს ,,ოცნებას” ბურჭულაძესთან კოორდინაციისკენ. სულ ორი ვარიანტი არსებობს:
ან „ოცნებასა“ და ბურჭულაძეს შორის უკვე არსებობს შეთანხმება, რაც ჩემი აზრით, ნაკლებად სავარაუდოა. ბურჭულაძის განაცხადში ჯერ მხოლოდ ის იკითხება, რომ მისი და ,,ოცნების” სეგმენტი ერთი და იგივეა და ისინი კონკურენტები არიან; მეორე ვარიანტი კი ისაა, რომ შესაძლოა, შეთანხმება არჩევნების შემდეგ შედგეს და პოსტსაარჩევნო კოალიცია გახდეს საჭირო. მეორე ვარიანტი იმაზეა დამოკიდებული, აიღებს თუ არა ივანიშვილი უმრავლესობას. დღეის მდგომარეობით, ვფიქრობ, ასეთი გარიგება არ იგეგმება.
- არსებობს კიდევ ერთი ვერსია, რომელიც ლევან ვასაძის პაატა ბურჭულაძით ჩანაცვლებას ითვალისწინებს. თუკი აქამდე ვასაძეც იყო გარკვეული ფაქტორი, რომელიც რუსეთს უნდა გაეაქტიურებინა, მისი პერსონა გაცილებით რეიტინგული და მისაღები ბურჭულაძით ხომ არ შეიცვალა?
- საკითხს ამ კონტექსტში თუ განვიხილავთ, ბუნებრივია, ბურჭულაძე ბევრად უკეთ გამოიყურება, ვიდრე ვასაძე. ვასაძეს ბევრ საკითხზე ცალსახა, რადიკალური პოზიცია ჰქონდა და მისი დიაპაზონიც გაცილებით შეზღუდული იყო. გარდა ამისა, ძალიან მყარი იყო მისი ბმა რუსეთთან. ამ მხრივ, ბურჭულაძის დიაპაზონი ბევრად ფართოა, ხოლო მისთვის პრორუსულობის დაბრალება არცთუ მარტივი ამოცანაა. ამ მიმართულებით მის მიმართაც იქნება შემოტევები, მაგრამ ამას ასე მარტივად ვერ დაამტკიცებენ. სხვათა შორის, ბურჭულაძემ ეს საფრთხეც გაითვალისწინა და თავის გარშემო ე.წ. ბუფერული ბეგრაუნდი კონკრეტული ადამიანების შემოკრებით. მისი მხრიდან ეს დაახლოებით იგივე ტექნოლოგიური სვლაა, რაც, თავის დროზე, ივანიშვილმა გააკეთა, როცა კოალიციაში თავისუფალ დემოკრატებსა და რესპუბლიკელებს დაუძახა.
- პოლიტიკური ოპონენტები, როგორც წესი, პროდასავლური იმიჯის გამო წინწამოწეულ ასეთ ძალებს, ,,ლეღვის ფოთლებს” უწოდებენ. როგორ ფიქრობთ, ეს ის შემთხვევაა?
- სულაც არ ვფიქრობ, რომ ეს პარტიები ლეღვის ფოთლები იყვნენ და ყველაფერი „ქართული ოცნების“ შენიღბვის მიზნით გაკეთდა. 2012 წელს ჩვენ ნამდვილად არ ვაყალიბებდით პრორუსულ ძალას, უბრალოდ, ეს იყო კონტრზომები და პრევენცია მოსალოდნელი პროპაგანდის წინააღმდეგ. არც ის მგონია, რომ პაატა ბურჭულაძე პრორუსია, მაგრამ როგორც წესი, ახალ პოლიტიკურ ფიგურებს სწორედ მსგავსი განცხადებებით უტევენ ხოლმე. ძალიანაც ლოგიკურია, ასეთ დროს ადამიანმა ზომებს მიმართოს და თავი ამ პოლიტტექნოლოგიით დაიცვას. თუმცა ეს იმას სულაც არ ნიშნავს, რომ ბურჭულაძის გარშემო თავმოყრილი ადამიანები „ლეღვის ფოთლები“ არიან.
- მეორეა, რამდენად იქნებიან ისინი სიაში. თუ ეს ხალხი მხოლოდ ბუფერს ქმნის პროდასავლური იმიჯისთვის და შემდეგ, საარჩევნო სიაში ვერ ვიხილავთ, ამაში იგულისხმება „ლეღვის ფოთლობაც“
- თუ ბურჭულაძის ფონდი პარტიად ჩამოყალიბდა, მასში პოლიტიკური კომპონენტის გაძლიერების აუცილებლობა იმის მიუხედავადაც გაჩნდება, იქნებიან თუ არა სიაში ეს ადამიანები. წინა პლანზე ახალი ხალხის წამოწევის საჭიროება უკვე ჩანს. რბილად რომ ვთქვათ, დღევანდელი შემადგენლობა არასაკმარისია სერიოზული პოლიტიკური ამოცანების შესასრულებლად. შესაბამისად, მათი ჩანაცვლება უნდა მოხდეს.
- და ვინ იქნებიან ის „ახალი სახეები“, ვინც ბურჭულაძემ უნდა წამოწიოს: ალასანიას, რომელსაც უკვე ესაუბრა, ინაშვილი, ბურჯანაძე, ნათელაშვილი თუ სხვები?
- რა თქმა უნდა, ეს ძალიან დიდი პრობლემაა. პრობლემაა ასევე, კოალიციური განვითარება და სხვა პარტიებთან გაერთიანებაც. დღევანდელი გადმოსახედიდან, ისეთი ძალები არ არიან, რომელიც ბურჭულაძეს აქტივის სახით შეემატებოდა. იგივე ირაკლი ალასანია მას ელექტორატს საკმაოდ შეუზღუდავს და ბურჭულაძე, მასთან გაერთიანებით, უფრო მეტ ამომრჩეველს დაკარგავს, ვიდრე შეიძენს. ერთადერთი, რამაც შეიძლება რომელიმე პარტიასთან დაჯგუფება აიძულოს, წმინდა ტექნიკური და ინფრასტრუქტურული საკითხია. მთელი ქვეყნის მასშტაბით პარტიული ინფრასტრუქტურის აშენება საკმაოდ გრძელი და რთული პროცესია, დრო კი არც ისე ბევრი. ამიტომ შესაძლოა, ბურჭულაძემ კოალიცია კი არ გააკეთოს, რომელიმე ნომინალური პარტია შეისრუტოს და მისი სტრუქტურები გამოიყენოს.
- ასე უკვე მოექცა ნინო ბურჯანაძე ქრისტიან-დემოკრატებს, მაგრამ ვინაა დღეს ისეთი, ვისაც პარტიული სტრუქტურა მოწესრიგებული აქვს, მაგრამ მაინც ნომინალური ძალაა?
- ზუსტად ესაა პრობლემა – საერთოდ არის თუ არა დღევანდელ სპექტრში პარტია, ვისი შესრუტვაც აწყობს ბურჭულაძეს? შესაძლოა, ვიღაცას არ აქვს სტრუქტურები, მაგრამ აქვს მისი შექმნის ორგანიზაციული გამოცდილება და ეს გზა სწრაფად გაიარონ, თუ ბურჭულაძე ამ პარტიების ,,ერთ და ორკაციან” ამბიციებს დააკმაყოფილებს. ამ სქემაში, ბურჯანაძისა და ქდმ-ს მაგალითზე უკეთ ზურაბ ჟვანია ჯდება, როცა არჩევნებში თავისი პარტიით ვერ შევიდოდა, სხვა ძალა შეისრუტა და ამ ტექნოლოგიამ იმუშავა.
- მაშინ იმ სქემასაც აქვს არსებობის უფლება, რომ როგორც ძმები გაჩეჩილაძეების პერიოდში, ახლაც შეიკრიბოს გაერთიანებული ოპოზიცია და მათბურჭულაძე ჩაუდგეს სათავეში. ასეთი რამ რეალურია?
- ასეთი ეკლექტური გაერთიანებები მხოლოდ მაშინ ამართლებს, როცა ყველა, ფასეულობებისა და პლატფორმების მიუხედავად, ერთის წინააღმდეგ ერთიანდება. ამის მაგალითი 2012 წელს ვნახეთ, როცა ,,ოცნება” გაერთიანდა სააკაშვილის რეჟიმის წინააღმდეგ. ,,ოცნებას” კი დღეს ყველაფერი შეიძლება დავაბრალოთ, რეჟიმობის გარდა. მგონია,
წინასაარჩევნოდ, პარტიები უფრო თემატურად დაჯგუფდებიან და ერთი დიდი გაერთიანება არ შედგება. თუმცა ხელისუფლება ყველაფერს აკეთებს, რათა ,,შუა გაიკრიფოს” და დანარჩენ ოპოზიციას ამ სცენარისკენ თავად უბიძგებს. ეს ძალიან სახიფათო თამაშია _ რაც უნდა სუსტი იყოს ოპოზიცია, როცა მთელი პარტიული ელიტა, მემარცხენე-მემარჯვენეებიანად, შენს წინააღმდეგ ერთიანდება, ეს ცეცხლთან თამაშის ტოლფასია. მე უფრო იმ საშიშროებას ვხედავ, რომ ეს პარტიები წინასაარჩევნოდ კი არა, არჩევნების მერე დაჯგუფდებიან.
- პროცესები, ალბათ, ქუჩაში გაგრძელდება და მას ნაციონალური მოძრაობა ჩაუდგება სათავეში?
- ასეა, პროცესები ქუჩაში გადაინაცვლებს და არჩევნების ლეგიტიმურობასთან დაკავშირებით კითხვის ნიშნები გაჩნდება. ამიტომ, უფრო პოსტსაარჩევნო კრიზისს ველი, რომელიც არსებული ხელისუფლებისთვის ფატალური შეიძლება აღმოჩნდეს. ამ მოძრაობას სათავეში ნაციონალები ჩაუდგებიან თუ არა, სხვა საკითხია. მათ იციან, რომ ხელისუფლებაში ვერ დაბრუნდებიან, ამიტომ მიზნად არჩევნების მოგებას კი არა, ,,ოცნების” წაგებას ისახავენ. 2016 წლის არჩევნებზე ნაციონალებს ნეგატიური მიზანი აქვთ _ ,,ოცნების” გაშვება სურთ და მერე, შესაძლოა, პარლამენტსშიგნით რაღაც კოალიციებზეც დაიწყონ საუბარი. ამას არჩევნების შედეგების ეჭვქვეშ დაყენებითა და რევოლუციური პროცესების ინიცირებით შეძლებენ. გამოვრიცხავ, რომ ,,ოცნებას” გაურიგდნენ, რადგან მათი მიზნები პოლიტიკურ ჩარჩოებში აღარ ეტევა _ უკვე პიროვნული ვენდეტა სურთ ივანიშვილზე. თუმცა ნაციონალები, მიზნის მისაღწევად, შესაძლოა, თემატურ თანამშრომლობაზე პატრიოტთა ალიანსთანაც კი წავიდნენ, პოსტსაარჩევნო კრიზისის ფორმატში.
ვფიქრობ, ეს სცენარი ყველაზე რეალურია. არჩევნებზე დაბალი აქტივობის პირობებში, როცა ხელისუფლება არ მიდის საარჩევნო კანონის ცვლილებაზე და მაჟორიტარებისა და ადმინისტრაციული რესურსის მეშვეობით, დიდი ალბათობაა, რომ მთელი პოლიტიკური ელიტა მის წინააღმდეგ გაერთიანდეს. მით უმეტეს, ხელისუფლება არჩევნების შედეგების დაწერას ტექნიკურად, პროფესიონალურად ვერ შეძლებს, ამ პროცესებს, ,,რუსთავი 2”-ის გარდა, სხვა არხებიც გააშუქებენ და ამგვარად, შესაძლოა, არჩევნების გაყალბების ძალიან დრამატული სურათი დაიდოს. ამას ის მოყვება, რომ ყველა კონსოლიდირებულად გააპროტესტებს შედეგებს. ბურჭულაძე კი მთელ ამ აპოკალიპტურ სცენარში, ერთადერთ ნათელ წერტილად დარჩება და ნიჰილისტურად განწყობილი საზოგადოების დიდ ნაწილს მიიზიდავს. მთელ ამ პროცესში, ბურჭულაძე პოლიტიკური ვითარების სტაბილიზაციის ერთ-ერთ ფაქტორად შეიძლება განვიხილოთ. თუმცა არც ისაა გამორიცხული, პროცესი ისე წავიდეს, რომ ხელისუფლებამ გარკვეული რადიკალიზმისკენ მასაც უბიძგოს. ყველა შემთხვევაში, მთავარი მოთამაშე მაინც ხალხია, ძლიერი სამოქალაქო საზოგადოება, რომელსაც კონკრეტული პოლიტიკური ინტერესი არ აქვს და არც ის უნდა დაუშვას, სხვის პოლიტიკურ ინტერესსა და ,,ცხელ თავებს” ქვეყანა გადაყვეს. სხვა ძალა, ვინც ამ ამოცანას შეასრულებს, უბრალოდ არ არსებობს.
- არც ბიძინა ივანიშვილი? სხვათა შორის, მან განაცხადა, 2016 წელს არჩევნებში იმაზე აქტიურად ჩავერთვები, ვიდრე 2012-ში ვიყავიო.
- ეს მხოლოდ ერთ რამეს ნიშნავს. ბიძინა ივანიშვილი ხვდება, რომ საქმე არც ისე კარგადაა და მიაჩნია, პროცესებს შემოაბრუნებს. მისი ჩართვის შემთხვევაში, „ოცნება“ საგრძნობლად გაძლიერდება, მისი ხელისუფლებიდან გასტუმრების საფრთხე კი შემცირდება. თანაც თუ კოალიციის შიგნით რაღაც პროცესები მიდის, ივანიშვილი მათ კონსოლიდაციას შეუწყობს ხელს და შიგნიდან გაამაგრებს.
- დღეს რა ამაგრებს კოალიციას, თუ არა პრაგმატული აზრი, რომ ცალ-ცალკე ისინიც ნომინალურები გახდებიან და შეძლებს თუ არა ივანიშვილი ,,ოცნების” გაცოცხლებას?
- დღეს კოალიციაში პარტიებს საკუთარი უსუსურების გრძნობა აერთიანებთ. პროცესში ივანიშვილის ჩართვა კი მისთვისაც კარგია და ქვეყნისთვისაც. ჯერ ერთი, ამით გაიზომება, მართლა აქვს თუ არა ,,ჭარბი ნდობა” და არის თუ არა მისი ფაქტორი არჩევნების ბედის გადამწყვეტი. და მეორე, დღეს მას ბევრი ისეთი რამ ჩრდილში ყოფნის გამო ბრალდება, რაშიც არც მონაწილეობს. ამიტომ თუ ბიძინას ლეგალიზება მოხდება პოლიტიკაში, ყველასთვის კარგი იქნება. ივანიშვილს გარკვეული რესურსი ნამდვილად აქვს, ,,ოცნებას” მიეხმაროს. თუმცა ვფიქრობ, ის კრიტიკული წერტილი, როცა შეეძლო, გადამწყვეტი როლი ეთამაშა, უკვე გავიარეთ. ჩემი აზრით, დღეს იგი საკუთარ შესაძლებლობებს გადაჭარბებულად აფასებს.
„ალია“, 02 დეკემბერი, 2015 წელი
ინტერვიუ მამუკა არეშიძესთან: მინისტრები ნოდარ ხადური, თამარ სანიკიძე, მიხეილ გიორგაძე პოსტებს დაემშვიდობებიან
ნინო სამხარაძე
„ალიას“ წყაროს ინფორმაციით, 2016 წლის ადრიან გაზაფხულზე მინისტრთა კაბინეტში ცვლილებებს უნდა ველოდოთ, ასევე დიპლომატიურ კორპუსში მოხდება რამდენიმე ცვლილება. „ალია“ ჯერ კიდევ აგვისტოში წერდა, რომ დიდ ბრიტანეთში საქართველოს ელჩი რევაზ გაჩეჩილაძე, რომელიც აღმოსავლეთმცოდნეა, ვადაზე ადრე განთავისუფლდებოდა ელჩის თანამდებობიდან. საგარეო საქმეთა ყოფილმა მინისტრმა თამარ ბერუჩაშვილმა უკვე დაადასტურა, რომ გაჩეჩილაძეს ის ჩაანაცვლებს. თურქულმა ინტერნეტგამოცემამ, რომელიც თურქეთში არსებული სხვადასხვა ქვეყნის საელჩოების საქმიანობას აშუქებდა, 2014 წელს ირაკლი კოპლატაძე ყველაზე ელეგანტურ ელჩად დაასახელა, მაგრამ საქართველოს მთავრობა თვლის, რომ რუსეთთურქეთის დაძაბული ურთიერთობის ფონზე საჭიროა უფრო ძლიერი დიპლომატის მოძებნა, რომელსაც მეტი გავლენები და მეტი წვდომა ექნება თურქეთის ხელისუფლებასთან. ასეთი კი, ვინც მსგავს გამოწვევებს გაუმკლავდება, არის გიორგი ჯანჯღავა. ის გახლავთ საკმაოდ კვალიფიციური დიპლომატი, ირანის ისლამურ რესპუბლიკაში საქართველოს საგანგებო და სრულუფლებიანი ელჩი, 2013 წელს იგი თურქეთის რესპუბლიკაში მუშაობდა კონსულად და რაც მთავარია, აქვს გავლენიან ხალხთან კონტაქტები. დღეს ის საქართველოს საგანგებო და სრულუფლებიანი ელჩია საუდის არაბეთში.
„ალიას“ კითხვებს პასუხობს ექსპერტი კავკასიის საკითხებში მამუკა არეშიძე…
– ჩვენი ინფორმაციით, დიპლომატიურ კორპუსში ხელისუფლებამ საკადრო ცვლილებების გატარება დაიწყო, ჯერ კიდევ ზაფხულში „ალია“ წერდა, რომ დიდი ბრიტანეთის ელჩი გაჩეჩილაძე პოსტს დატოვებდა. რას უკავშირებთ ამ ცვლილებებს?
– მართლაც რომ დიდი მეცნიერია რევაზ გაჩეჩილაძე, მაგრამ ის გახლავთ აღმოსავლეთმცოდნე, მე ვფიქრობ, რომ საქართველოს აღმოსავლეთ ქვეყნებში სჭირდება განსაკუთრებულად კრეატიული ელჩები. ჩემი აზრით, რევაზ გაჩეჩილაძე ამ მიმართულებით იქნება გამოყენებული ევროპის წამყვან ქვეყნებში. აღმოსავლეთი გახდა პრიორიტეტული მიმართულება. აქედან გამომდინარე, არ გამოვრიცხავ, რომ აღმოსავლეთის მიმართულებით მოხდეს საკადრო ცვლილებების გატარება დიპლომატიურ კორპუსში. ასევე, ვვარაუდობ, არ არის გამორიცხული, ელჩი შეიცვალოს თურქეთში, რადგან იქ ძალიან რთული და მძიმე ვითარებაა, იმას კი არ ვამბობ, რომ საქართველოს ელჩმა ირაკლი კოპლატაძემ გამოწვევებს თავი ვერ გაართვა, არამედ დღის წესრიგში დადგა ახალი გამოწვევები და სრულიად ახალი პიროვნებაა საჭირო, რომელიც სიტუაციას უცებ აუღებს ალღოს, გარდა ამისა, საჭიროა პიროვნება, რომელიც პოლიტიკურ თურქულ ისტებლიშმენტს კარგად იცნობს. რამდენადაც ვიცი, საქართველოს ხელისუფლებაში თვლიან, რომ ასეთი პიროვნება აუცილებლად უნდა გამოინახოს და თურქეთში ელჩად დაინიშნოს. ყოველ შემთხვევაში დადასტურებულად გეტყვით, რომ ამაზე ფიქრი მიმდინარეობს…
– ჩვენ გვაქვს ინფორმაცია, რომ საუდის არაბეთში საქართველოს სრულუფლებიანი ელჩი გიორგი ჯანჯღავა დაინიშნება თურქეთში ელჩად.
– დიახ, ამის შესახებ მეც მსმენია, ის წლების მანძილზე მუშაობდა თურქეთში კონსულად, ასეთი მაღალი კვალიფიკაციის ელჩი პრინციპში აღმოსავლეთის მიმართულებით არ გვყავს, მარტო აღმოსავლეთში კი არა, თამამად შემიძლია ვთქვა, რომ ბევრგან არ გვყავს ჯანჯღავასნაირი ელჩი. ასევე, იყო საუბრები, რომ აშშში საქართველოს ელჩი არჩილ გეგეშიძე ვადაზე ადრე დატოვებდა პოსტს და მას სხვა კანდიდატურით ჩაანაცვლებდნენ, მაგრამ, როგორც ჩანს, დღეს ამის საჭიროება არ დგას, რადგან ამ მიმართულებით საუბრები შეწყდა.
– ასევე, მოსალოდნელია აღმასრულებელ ხელისუფლებაში კარუსელის დატრიალება, არჩევნების წინ, როგორც წესი, ახალი სისხლის გადასხმა მიღებულია, როგორც პოლიტიკური ტექნოლოგია, რა ცვლილებებს ელოდებით?
– გარდაუვალია ცვლილებები აღმასრულებელ ხელისუფლებაში. ჩემი ვარაუდით, ეს მოხდება 2016 წლის თებერვლის ბოლოს, როცა საარჩევნო მანქანა სრული მასშტაბით ჩაირთვება. ჩვენ ვნახავთ რამდენიმე საკადრო ცვლილებას, პოსტებს დატოვებენ: ფინანსთა მინისტრი ნოდარ ხადური, განათლების მინისტრი თამარ სანიკიძე, კულტურის მინისტრი მიხეილ გიორგაძე, ეს უკანასკნელი აუდიტის სამსახურის დასკვნას შეეწირება. რაც შეეხება განათლების მინისტრს, ამ სფეროში ჩავარდნაა, ნოდარ ხადურზე აღარაფერს ვლაპარაკობ. არის მოლოდინი, რომ შერიგების მინისტრი პაატა ზაქარეიშვილი დატოვებს პოსტს, რადგან მის მიმართ გაღიზიანების ხარისხი არის მაღალი, მაგრამ ეს თემა არ გააქტიურდება, ვინაიდან ის გახლავთ „რესპუბლიკური პარტიის“ კრეატურა. აქედან გამომდინარე, ხმები იმის შესახებ, რომ პაატა ზაქარეიშვილი პოსტს დატოვებს, არ გამართლდება.
– პაატა ზაქარეიშვილის ყოველი გამოსვლა ბადებს ეჭვებს, ხომ არ თამაშობს ის რუსეთის თამაშს. მინისტრი აცხადებს, აფხაზეთი დამოუკიდებელი საქართველოს შემადგენლობაში არასდროს ყოფილაო, რას ჰგავს ეს?
– ჩვენ იძულებული ვართ, ავხსნათ ზაქარეიშვილის განცხადებები, პირად საუბარში მის მეგობრებს ხშირად მიუნიშნებიათ, რომ, სამწუხაროდ, მისი ნათქვამი მინისტრის პოსტიდან ჰგავს არასამთავრობო ორგანიზაციის ხელმძღვანელის ნათქვამს… მე მგონია, პაატამ იგულისხმა შემდეგი: 1992 წლის შემდეგ, რაც საქართველო დამოუკიდებელი გახდა, ერთად ცხოვრების გამოცდილება არ გვაქვს, მაგრამ ის არის მინისტრი და მისი მხრიდან ასეთი ტიპის განცხადებები არ უნდა კეთდებოდეს. პირადად არც ვმალავ, რომ მისი ნათქვამი არ მომეწონა. მაგალითად ის, რომ ზაქარეიშვილი აცხადებს, – რა იყო დავით აღმაშენებლის დროს, ეს მე არ ვიცი… რას ნიშნავს, „არ იცი“, სწორედაც უნდა იცოდე, მის დროს რა და როგორ იყო… ასე რომ, მის მიერ გამოყენებული ფრაზა, რბილად რომ ვთქვათ, არის მოუფიქრებელი, რაც, ბუნებრივია, მინისტრს არ შეშვენის.
იცით, საქმე რა არის? ჩვენს მინისტრებს ძალიან მაღალი კრიტერიუმებით ვუდგებით, მე მაინტერესებს, რა შედეგებს დებს ესა თუ ის მინისტრი და რა საქმეს აკეთებს. რას ლაპარაკობს, ეს ხშირ შემთხვევაში გადამწყვეტი არ არის. მაგალითად, თურქეთში ძალიან მაღალი თანამდებობის პირი გამოდის და აცხადებს, _ დროა, მსოფლიომ ცნოს ისლამური ხალიფატი… ეს იცით, რისი ტოლფასი იყო?.. მთელი კოალიციისთვის თავზე რომ დაემხოთ ნაგვის ურნა, მაგრამ ეს პიროვნება დღესაც თანამდებობაზეა.
ასე რომ, მინისტრის განცხადების გამო მათი აქეთ-იქით სროლა, სწორი არ იქნება… კონიუნქტურის გამო, მინისტრები არ უნდა ცვალო და საზოგადოებაში ქულები არ უნდა დაიწერო. თუ ის საქმეს არ აკეთებს, მაშინ უნდა შეცვალო. ამას საზოგადოება უფრო სწორად გაიგებს…
„ახალი თაობა“, 02 დეკემბერი, 2015 წელი
ინტერვიუ ომარ ნიშნიანიძესთან: „ბერაძისა და მაღრაძის განცხადებები “ქართული ოცნების” რეიტინგს ძალიან აზიანებს”
შორენა მარსაგიშვილი
რას უნდა გაუწიონ ანგარიში „ქართული ოცნების” წევრებმა, არის თუ არა კოალიციაში „გირჩების“ ადგილი, გეგმავენ თუ არა პაატა ბურჭულაძესთან თანამშრომლობას? – ამის შესახებ “ახალ თაობას“ “ქართული ოცნების“ ერთ-ერთი ლიდერი, დეპუტატი ომარ ნიშნიანიძე ესაუბრება.
- “ქართული ოცნების“ წარმომადგენლებმა რიმა ბერაძემ, გუგული მაღრაძემ და პაატა ზაქარეიშვილმა თავიანთი ბოლო განცხადებებით საზოგადოება შოკში ჩააგდეს. თქვენ რას იტყვით მათ მოსაზრებებზე?
- გულწრფელად გეტყვით, არ მომეწონა. ადამიანმა, როცა პოლიტიკაში ხარ, განცხადებების გაკეთების დროს უნდა იფრთხილო, განსაკუთრებით მაშინ, როცა წინ საარჩევნო წელია. ნებისმიერმა ჩვენმა განცხადებამ შესაძლოა მოწინააღმდეგის წისქვილზე დაასხას წყალი. მოწინააღმდეგე კი ისეთი გვყავს, არაფრისგან ქმნის სკანდალს. სათქმელი მკაფიოდ უნდა ითქვას და განმარტებები მაშინვე გაკეთდეს..
- თქვენი აზრით, შესაძლებელია, რომ ადამიანს დღეში 1,18 ლარი ეყოს კვებაზე?
- ამ თანხით ნორმალური კვება გამორიცხულია. ასეთი განცხადებები არ უნდა გაკეთდეს, ასეთი განცხადებების გამო ხალხის დასაცინები ვხდებით. იგივე შემიძლია ვთქვა ჩემს კოლეგა გუგული მაღრაძეზეც. მასაც ვურჩევ, დიდი დაკვირვება გამოიჩინოს, როდესაც რამეს ამბობს. ასეთი განცხადებები `ქართული ოცნების~ რეიტინგს ძალიან აზიანებს. ხშირ შემთხვევაში `ქართული ოცნების~ წევრების განცხადებები კონტექსტიდან არის ამოვარდნილი, მაგრამ მაინც თავშეკავებაა საჭირო.
- თქვენი ოპონენტები ამ გასაოცარ განცხადებებს იმით ხსნიან, რომ „ქართული ოცნება“ რეალობას არის მოწყვეტილი. მათი მტკიცებით, თქვენთვის ხალხის პრობლემები უცხოა…
- ხალხის პრობლემა რომ ჩვენი პრობლემაა, ეს არაერთხელ დავამტკიცეთ. ჩვენ არჩეული გვაქვს ის მიმართულება, რომელსაც მთელი ჩრდილოეთი ევროპა მიჰყვება. ეს გახლავთ სოციალ-დემოკრატიული საკითხების უპირატესობა. ეს გამოიხატება უფასო ბაგა-ბაღებით, წიგნების უფასოდ დარიგებით, საყოველთაო ჯანდაცვის პროგრამითა და კიდევ მრავალი შეღავათით. ხალხისგან დაშორებულები არასდროს ვყოფილვართ. ჩვენი მთავარი პრობლემა ის გახლავთ, რომ ეკონომიკის სათანადო დონეზე ამოქოქვა ვერ მოვახერხეთ. ამას თავისი ობიექტური მიზეზები აქვს, მაგრამ არის სუბიექტური მიზეზებიც. ყოველ შემთხვევაში, გაცილებით მეტი სამუშაო ადგილის შექმნა შეიძლებოდა.
- უცნაური განცხადებების გარდა, „ქართულ ოცნებას“ პრემიებისადმი მიდრეკილებაც ახასიათებს. ამის გამო ხშირად ხდებით კრიტიკის ობიექტი.
- ნეტა ვინმე მოგვცემდეს ამ პრემიას და უარს ნამდვილად არ ვიტყოდით. დაიჯერეთ, ხალხო, დეპუტატები პრემიებს არ ვიღებთ.
- დეპუტატები მართლაც არ იღებთ პრემიებს, მაგრამ სხვა ჩინოსნები ხომ იღებენ.
- პრემიებს ხელისუფლების პირველი პირებიც არ იღებენ, მაგრამ ეს თემა ძალიან მტკივნეულია. პრემიები გაიცემა და ამ საკითხს ჩვენი ოპონენტები სათავისოდ იყენებენ. ამაზე საუბარი უნდა დასრულდეს და, კარგი იქნება, თუ ამ ეტაპზე პრემიების გაცემა საერთოდ აიკრძალება.
- მარტო ამ ეტაპზე რატომ?
- იმიტომ, რომ ადამიანს წახალისება სჭირდება. ვინც ათმაგად და გამორჩეულად მუშაობს, მას უნდა მიეცეს პრემია. ამას მხოლოდ ხელისუფლების წარმომადგენლებზე არ ვამბობ. პრემიები ყველა სფეროში უნდა გაიცემოდეს. ამ ეტაპზე ხელისუფლების წარმომადგენლებმა დამსახურებული პრემიის აღებისგანაც უნდა შეიკავონ თავი, წინააღმდეგ შემთხვევაში, ამას საარჩევნოდ ნაციონალები ცუდად შემოგვიტრიალებენ..
- კოალიციამ უკვე დაიწყო არჩევნებისთვის მზადება?
- არჩევნებისთვის უკვე სერიოზულად ვემზადებით. უფრო ადრეც უნდა დაგვეწყო სამზადისი.
- ბოროტი ხმები ამბობენ, კვოტების გადანაწილებაზე კოალიციაში რაღაც დაპირისპირებები არისო. მართალია ეს ამბავი?
- კვოტების გადანაწილების დროს ნებისმიერ კოალიციაში აქვს ადგილი აზრთა სხვადასხვაობას. კვოტების გადანაწილებაზე უკვე დაწყებულია საუბარი, მაგრამ ეს ჯერ ლიდერების დონეზე მიდის.
- საპარლამენტო კულუარებში არ განიხილება ეს საკითხი?
- ამ საკითხზე ჯერ მხოლოდ ლიდერები მსჯელობენ. ჩვენ ამის შესახებ მოგვიანებით შევიტყობთ.
- ეს დაახლოებით რამდენ ხანში მოხდება?
- სადღაც ორ თვეში გარკვეული იქნება, რომელი პარტია რა კვოტით იქნება წარმოდგენილი კოალიციაში.
- კვოტების გადანაწილების გამო შეიძლება, რომელიმე პარტიამ კოალიცია დატოვოს?
- ბუნებრივია, ამ საკითხის განხილვა მწვავედ წარიმართება. ყველა პარტია შეეცდება, რაც შეიძლება მეტი კვოტა მოიპოვოს. არა მგონია, ამის გამო კოალიციაში განხეთქილება მოხდეს. ვიღაცას შეიძლება ეწყინოს, მაგრამ ამის გარეშე პოლიტიკა არ არსებობს.
- ამ ვიღაცამ ხომ შეიძლება, კოალიცია დატოვოს?
- ადამიანს წასვლა თუ უნდა, მას ძალით ხომ ვერ დავაკავებთ.
- არის იმის ალბათობა, რომ ვინმეს წასვლა მოუნდება?
- ამ ეტაპზე არა მგონია, ვინმე წასვლაზე ფიქრობდეს.
- რატომ ხართ ასეთი დარწმუნებული?
- იმიტომ, რომ ცალ-ცალკე პარლამენტში მოხვედრის შანსი არავის აქვს. აქედან გამომდინარე, კოალიცია ერთიანობას შეინარჩუნებს.
- ბევრს საუბრობენ „ქართული ოცნების“ შესაძლო პარტნიორებზე. მართალია, პაატა ბურჭულაძე ჯერ ოფიციალურად არ მოსულა პოლიტიკაში, მაგრამ ამბობენ, რომ ის ბიძინა ივანიშვილის პროექტია…
- პაატა ბურჭულაძესთან დაკავშირებით სხვა მოსაზრებებიც ისმის. ზოგიერთი ამტკიცებს, რომ ის ნაციონალების პროექტია. ერთხელ პრესაში ისიც წავიკითხე, რომ ის რუსული პროექტია. ჯერ დასკვნების გაკეთება ადრეა. ამბობენ, რომ ბურჭულაძე ახლო კონტაქტში იყო სააკაშვილთან. თუ ეს სიმართლეა, ძალიან მეწყინება, იმიტომ, რომ ამ ადამიანს ძალიან ვაფასებ. მაგრამ თუ დამტკიცდა, რომ სააკაშვილთან აქვს კავშირი, მაშინ მას ყველა გავემიჯნებით. თუ ეს არ დამტკიცდება, მაშინ თავისუფლად შეიძლება მასთან თანამშრომლობა. რატომღაც მგონია, რომ პაატა ბურჭულაძე ცუდ გზას არ დაადგება.
- ცუდ გზაში რას გულისხმობთ?
- ნაციონალებისკენ მიმავალ გზას.
- შესაძლოა, კოალიციაში შემოვიდნენ „გირჩები“?
- გამორიცხულია, რომ ისინი ჩვენს კოალიციაში შემოვიდნენ, ასეთ რამეს ნამდვილად არ ველოდები.
- რატომ არ ელოდებით, პოლიტიკაში ხომ ყველაფერი შეიძლება მოხდეს?
- პოლიტიკაში შეიძლება ყველაფერი მოხდეს, მაგრამ ჩვენთან როგორ შემოვლენ, როცა ისევ ნაციონალებთან არიან.
- რით გამოიხატება მათი ყოფნა ნაციონალებთან?
- ისინი დღემდე ინარჩუნებენ ძველ კონტაქტებს. „გირჩების“ მიერ გაკეთებული განცხადებები კი მიუთითებს იმაზე, რომ „გირჩები“ ნაციონალური ტოტიდან ჯერ საბოლოოდ არ მოწყვეტილან. მათთან თანამშრომლობა მხოლოდ ერთ შემთხვევაში შეიძლება – ქვეყანას თუ საგარეო საფრთხე დაემუქრა, მაშინ მათთან თემატურად შეიძლება თანამშრომლობა, მაგრამ კოალიციაში „გირჩებთან“ ერთად ყოფნისგან ღმერთმა დაგვიფაროს.
- ბიძინა ივანიშვილი კი მათი ქმედებით აღფრთოვანებულია და ისიც კი თქვა, რომ ნაცმოძიდან წამოსული დეპუტატები მის თვალში ამაღლდნენ…
- ამაღლდნენო, თქვეს და არა ის, რომ კოალიციაში შემოვლენო. ბატონი ბიძინა ნაციონალებს სულ ეუბნება, გაემიჯნეთ მაგ დამნაშავე ძალასო, მაგრამ მას არასდროს უთქვამს, რომ ერთად უნდა ვიაროთ.
- ირაკლი ალასანიას გუნდის დაბრუნება თუ არის მოსალოდნელი?
- ძალიან დამწყდა გული, როდესაც თავისუფალმა დემოკრატებმა კოალიცია დატოვეს. კარგი იქნებოდა, ისევ ერთად ვყოფილიყავით, მაგრამ აღარ გამოვა. ერთმანეთზე ბევრი ცუდი რამ ვთქვით. ამ მხრივ თავი განსაკუთრებით ალასანიამ გამოიჩინა. მან ჩვენთან მოსასვლელი ყველა ხიდი დაწვა.
- ბევრს საუბრობენ, რომ „ქართული ოცნება“ მომავალი არჩევნების გასაყალბებლად ემზადება. ამის დამადასტურებელ მაგალითად 31 ოქტომბერს ჩატარებული შუალედური არჩევნები მოჰყავთ. გარისკავს „ქართული ოცნება“ არჩევნების გაყალბებას?
- გამორიცხულია, რომ ჩვენ არჩევნები გავაყალბოთ. ამის არც სურვილი გვაქვს და არც აუცილებლობაა. ჩვენ ყოველგვარი ხრიკების გარეშე გავიმარჯვებთ. ჩვენ ევროპისკენ გვაქვს გეზი აღებული, სადაც არჩევნებს არ აყალბებენ. აქედან გამომდინარე, არჩევნებს არც ჩვენ გავაყალბებთ.
- ნაციონალები კი ამტკიცებენ, რომ გაყალბების გარეშე არჩევნებს მწარედ წააგებთ…
- ეს მაგათი კეთილი სიზმარია. დღედაღამ ესიზმრებათ, რომ ხელისუფლებაში ბრუნდებიან, მაგრამ არ აუხდებათ ეგ სიზმარი. ჩვენზე შესაძლოა განაწყენებულია ამომრჩეველი, მაგრამ მათი ნაავკაცარიც ახსოვთ. ამის მიუხედავად, არჩევნებში ხმებს მაინც მიიღებენ და პარლამენტშიც მოხვდებიან. იმ 50%-ის იმედი კი ტყუილად აქვთ, რომელიც ჯერჯერობით არჩევანს არ აკეთებს. ეს ხალხი მათთან არ წავა.
- აბა, ვისკენ წავა?
- მათი დიდი ნაწილი, ალბათ, ჩვეკენ წამოვა. პარლამენტს მიღმაც არიან ძალები, რომლებიც მათ მხარდაჭერას დაიმსახურებენ. მომავალი პარლამენტი იქნება მრავალპარტიული.
„ახალი თაობა“, 02 დეკემბერი, 2015 წელი
ინტერვიუ ჯემალ გამახარიასთან: „1991 წელს არძინბამ კონსტიტუციაში ჩაწერა, რომ აფხაზეთი საქართველოს ნაწილია“
გულიკო ბალაძე
აფხაზეთის უმაღლესი საბჭოს თავმჯდომარის მოადგილე ჯემალ გამახარია ფიქრობს, რომ სწორი არ არის პაატა ზაქარეიშვილის განცხადება, რომლის მიხედვით, დამოუკიდებელ საქართველოს აფხაზებთან თანაცხოვრების გამოცდილება არ აქვს. „ჩვენ გვაქვს საქართველოს დემოკრატიულ რესპუბლიკაში თანაცხოვრების გამოცდილება და არც თუ ისე ცუდი. ის გამოცდილება, რომელიც მაშინ დაგროვდა, შეიძლება მომავალშიც გამოგვადგეს“, – აცხადებს ჯემალ გამახარია „ახალ თაობასთან“ საუბარში.
- 1991 წელს, ფაქტობრივად, სრული თანამშრომლობა იყო….
- 1991 წელს, როდესაც საქართველომ დამოუკიდებლობა გამოაცხადა, აფხაზებსა და ქართველებს შორის თანამშრომლობა იყო. აფხაზურმა მხარემ, არძინბას ხელმძღვანელობით, აფხაზეთის ავტონომიური რესპუბლიკის კონსტიტუციაში საკუთარი ხელით ჩაწერა, რომ აფხაზეთი არის საქართველოს რესპუბლიკის, ანუ დამოუკიდებლობაგამოცხადებული საქართველოს ნაწილი, მან შეცვალა ძველი ფორმულირება, რომ აფხაზეთი არის საქართველოს სსრ-ის ნაწილი. ეს მოხდა 1991 წლის ზაფხულში, დამოუკიდებლობის გამოცხადებიდან 3 თვის შემდეგ.
ჯემალ გამახარია ამბობს, რომ აფხაზეთის კონსტიტუციაში ბევრი სხვა ცვლილებაც განხორციელდა, რომლებიც გამორიცხავდა აფხაზეთის კანონიერი გზით გამოყოფას საქართველოსაგან.
- კონსტიტუციაში ჩაიწერა, რომ რეფერენდუმის დანიშვნას ხმების 2/3 სჭირდება. ისე რეფერენდუმს ვერ დანიშნავდნენ, _ ამბობს ჯემალ გამახარია.
- აფხაზეთის სამართლებრივ სტატუსზეც ხომ მოილაპარაკეს?
- დიახ, აფხაზეთის სამართლებრივი სტატუსი კონსტიტუციაში იყო ჩაწერილი (58-ე მუხლი), რომ გადაწყვეტილება სტატუსის შესახებ ძალაში შედიოდა საქართველოს უზენაესი საბჭოს სპეციალური დადგენილებით და აფხაზეთის უმაღლესი საბჭოს გადაწყვეტილების შემდეგ. სანამ საქართველოს ხელისუფლება არ მიიღებდა გადაწყვეტილებას აფხაზეთის სტატუსთან დაკავშირებით, აფხაზეთის უმაღლესი საბჭოს გადაწყვეტილება ამ საკითხზე ძალაში ვერ შედიოდა. ეს გამოცდილება გვაქვს დაგროვილი.
- პაატა ზაქარეიშვილს ცნობილ განცხადებას წინ უძღოდა ფედერალური მოწყობის თაობაზე განცხადება. არსებობს კუბლაშვილ-ზაქარეიშვილ-ბაქრაძის 10 წლის წინანდელი პროექტი, რომელიც გაააქტიურა ახლა მინისტრმა. ფედერალური მოწყობა არის გამოსავალი?
- ამ ეტაპზე კამათი საქართველოს ფედერალიზაციასა და კონფედერაციაზე სერიოზულად არ მიმაჩნია. ჩვენთვის მთავარი და მნიშვნელოვანია, როცა ამის დრო დადგება, აფხაზებთან თანაცხოვრების ისეთი ფორმა გამოვძებნოთ, რომელიც დააკმაყოფილებს აფხაზურ მხარეს და უზრუნველყოფს საქართველოს ტერიტორიულ მთლიანობას. ეს ორი პირობა უნდა იყოს დაცული.
- რა ფორმა შეიძლება იყოს ასეთი?
- ამ შემთხვევაში რას დავარქმევთ ამას, ნაკლებად მნიშვნელოვანია.
- ზაქარეიშვილი ამბობს, რომ უნდა იყოს ასიმეტრიული სახის ფედერაცია, სადაც აფხაზეთს უფრო მეტი უფლებები ექნებათ, ვიდრე სხვა რეგიონებს…
- ეს უფლებები არ უნდა ვრცელდებოდეს გამოყოფის უფლებამდე. დანარჩენ უფლებებზე საუბარი შეიძლება. სხვანაირად კონფლიქტის დარეგულირება და საუბარი ერთიან სივრცეში და ერთიან სახელმწიფოში ცხოვრებაზე ზედმეტია.
- პაატა ზაქარეიშვილი-კუბლაშვილის პროექტში საუბარი იყო ორ თანაბარუფლებიან სუბიექტზე. თუკი ორი თანაბარუფლებიანი სუბიექტი იქნება, სავარაუდოდ, გამოყოფის უფლებაც იარსებებს. თუმცა, გააჩნია, რა მექანიზმებს მოუხმობ ამის განსახორციელებლად.
- სავსებით სწორია. სხვადასხვა ფორმის ფედერალიზმი ვიცით. ჩეხეთისა და სლოვაკეთის ფედერალიზმმა, ვიცით, რა გამოიწვია. სამაგიეროდ, შვეიცარიას დაშლის საფრთხე არ ემუქრება.
- შვეიცარია ნეიტრალურია და ამის გარანტი, მგონი, მთელი მსოფლიოა. პაატა ზაქარეიშვილმა მინიშნება გააკეთა ესპანეთის სეპარატისტულ რეგიონებზე, ბასკეთსა და კატალონიაზე. ეს არ იყო კარგი მინიშნება, რადგან ისინი გამოყოფისთვის იბრძვიან.
- გამოყოფას ითხოვენ, მაგრამ მათ მხარს არ უჭერს ევროპა. ამიტომ უნდა გამოინახოს თანაცხოვრების ისეთი ფორმა, რომლითაც გამოყოფის საკითხი არ დადგება.
