„რეზონანსი“: “ოცნება” თავდაცვის მინისტრის წინააღმდეგ
„ახალი თაობა“: ინტერვიუ სერგო რატიანთან: „ბიძინა ივანიშვილს ნაციონალების საუბრების გამოქვეყნება ვერ გადაარჩენს“
„ახალი თაობა“: ინტერვიუ სოსო ცინცაძესთან: „ალეკო ელისაშვილის ბრალდებაზე არავინ დაისჯება“
„ახალი თაობა“: ინტერვიუ ვახტანგ მაისაიასთან: „ალეკო ელისაშვილმა ბოდიში მოგვიხადოს“
„ახალი თაობა“: ინტერვიუ მეგი გოცირიძესთან: „შერიგების მინისტრს ცხვირზე დაღი უნდა დავასვა“ // პაატა ზაქარეიშვილს ოფისი დაულუქეს და დუსტი დაუყარეს
—————————-
„რეზონანსი“, 12 დეკემბერი, 2015 წელი
“ოცნება” თავდაცვის მინისტრის წინააღმდეგ
ეკატერინე ბასილაია
თინა ხიდაშელის განცხადებას რუსები ძაღლებისა და კატების ჭამას მიჩვეული არიანო, რუსების შემდეგ თავად მმართველი კოალიციის ზოგიერთი წევრი და პოლიტოლოგიც აკრიტიკებენ და აცხადებენ, რომ ეს არის “ზედმეტი ბაქი-ბუქი”, “ცეცხლზე ნავთის დასხმა”, “არაკორექტული”, “მოუღებელი” და “ზღვარს გადაცილებული” განცხადება. ზოგმა პარალელი ექს-თავდაცვის მინისტრის, ირაკლი ოქრუაშვილის მიერ 2006 წელს გაკეთებულ განცხადებასთანაც გაავლო, როდესაც ოქრუაშვილმა თქვა, რომ რუსეთში ფეკალიებიც კი გაიყიდებაო.
აგვისტოში თავდაცვის მინისტრის მიერ აშშ-ის მშვიდობის ინსტიტუტში საჯარო დისკუსიებისას გაკეთებულ განცხადებას, რომ რუსეთისთვის სანქცები სულ ერთია, რადგან ეს ხალხი ლენინგარდის ბლოკადის დროს 900 დღე ძაღლებისა და კატების ჭამას მიჩვეულები არიან, კრიტიკა 4 თვის შემდეგ მოჰყვა.სამი დღის წინ ჟენევის ქართულ-რუსული მოლაპარაკებების მორიგი რაუნდისას ზოგიერთი ქართველი მაღალჩინოსნის “მკაფო ანტირუსული რიტორიკის” გამო უკმაყოფილება გამოთქვა რუსეთის საგარეო საქმეთა მინისტრის მოადგილე გრიგორი კარასინმა. მისი განცხადებით, ლენინგრადის ბლოკადაზე საქართველოს თავდაცვის მინისტრის განცხადება “უკვე აღემატება ყველა ზღვარს”.
გრიგორი კარასინის შემდეგ მინისტრმა კრიტიკა, ცოტა უფრო ფრთხილი, საკუთარი კოალიციის რიგებიდანაც მიიღო. კოალიცის წევრების პირდაპირი კრიტიკისაგან თავს იმის გამო იკავებენ, რომ მათივე განცხადებით, მათი პირადი სურვილის მიუხედავად, გადაწყვეტილია, არჩევნებამდე ერთ გუნდად მივიდნენ და თავს ამიტომ იკავებენ; მეორე ნაწილის თავშეკავების მიზეზი კი ისაა, რომ არ სურთ საზოგადოებამ კარასინის თანამოაზრედ გამოაცხადოს.
მოგვიანებით, თინა ხიდაშელი შეეცადა, უკეთ გამოეხატა სათქმელი და განმარტა, რომ “ტანჯვის გაგება სრულიად განსხვავებულია რუსეთსა და დანარჩენ მსოფლიოში და ამის მაგალითია ლენინგრადის ბლოკადა”.
თინა ხიდაშელის განცხადებას პირველი საგარეო საქმეთა მინისტრი გიორგი კვირიკაშვილი გამოეხმაურა და აღნიშნა, რომ ქვეყანა, რომელსაც ოკუპირებული აქვს საქართველოს ტერიტორიები, საქართველოს ხელისუფლების უმაღლესი წარმომადგენლებისგან რბილ განცხადებებს არ უნდა ელოდოს. თუმცა, მას არ სჯერა, რომ თინა ხიდაშელს ასეთი რამ ეთქვას ლენინგრადის ბლოკადის თაობაზე. “ეს მოვლენა იყო გმირობის მაგალითი მაშინ, საბჭოთა კავშირის ერების არაერთი წარმომადგენლისა და ის ისეთივე ხელშეუხებელი და ისეთივე საამაყოა, როგორც ძალიან ბევრი ასეთი გმირობა მრავალი ერის ბრძოლისა ფაშიზმის წინააღმდეგ. ამიტომ მე არა მგონია, რომ თინას ასეთი რამ ეთქვას,” – აცხადებს გიორგი კვირიკაშვილი.
გიორგი კვირიკაშვილის მსგავსად არც საპარლამენტო უმრავლესობის წევრ თამაზ მეჭიაურის სურს დაიჯეროს, რომ ტინა ხიდაშელმა მსგავსი განცხადება გააკეთა და აცხადებს, რომ ეს ზედმეტი ბაქი-ბუქია, რაც შედეგს არ მოიტანს: „არ მინდა ამ შემთხვევაში კარასინის თანამოაზრე ვიყო, მაგრამ ასეთი ფორმით შეურაცხყოფა არ შეიძლება მიაყენო იმ ხალხ, ვინც გმირობის მაგალითი აჩვენა. უფრო უარესიც გაგვგია, ზოგჯერ ადამიანი ადამიანსაც ჭამდა და ეს ერის შეურაცხყოფისთვის არავის გამოუყენებია. მე მივესალმები ხელისუფლების პოლიტიკას, რომ რუსეთთან რეალისტური პოლიტიკის წარმართვა სურთ, რადგან დამატებითი პრობლემები არ შეიქმნას. ცეცხლზე ნავის დასხმა საჭირო არ არის. განცხადებებით დამარცხებული ქვეყანა არ მინახავს, ამას პრაგმატული პოლიტიკა სჭირდება. ეს არ ნიშნავს ყველაფერი დავთმოთ, მაგრამ ეს ზედმეტრი ბაქი-ბუქია, რაც შედეგს არ მოგვიტანს. მით უმეტეს, ვისი ზურგითაც ემუქრება რუსეთს, ისინი თავად ერიდებიან ასეთი რადიკალური განცხადებების გაკეთებას და ჩვენ რისი იმედი გვაქვს?!
თინა ხიდაშელის შეფასებას არ დავიწყებ, ეს კოლიციის შიდა საქმეა. არავის არ მეშინია, მაგრამ არ არის ლამაზი, როდესაც კოალიციის შიდა საქმეებს გარეთ ამზეურებ. ადრეც, როდესაც რესპუბლიკელებზე რაღაც ვთქვი, მაშინაც შეურაცხყოფა თავიდან თავად მომაყენეს და ინიციატორი არ ვყოფილვარ”, – აცხადებს თამაზ მეჭიაური.
კოალიცია “ქართული ოცნების” წევრი, პარლამენტარი ომარ ნიშნიანიძე მიიჩნევს, რომ ასეთი რადიკალური განცხადებებით “ნაციონალურ მოძრაობას” ემსგავსებიან და იმედს იტოვებს, რომ მინისტრი მომავალში უფრო კორექტულ შეფასებებს გააკეთებს. „ჩვენი მყიფე სახელმწიფო ჩვენ ახლა ბეწვის ხიდზე გადის და ამიტომაც მოზომილი საუბარი უფრო მოიგებდა. მოსახლეობს დიდი ნაწილის აზრიც ესაა. რუსეთის მიმართ შეუვალი და პრინციპულები უნდა ვიყოთ, მაგრამ რაც ნაკლებად გავაღიზიანებთ, ეს ჩვენთვის მომგებიანი იქნება. მაშინ, როდესაც მსოფლიო ომის ზღვარზე ვართ და ჩვენს რეგიონშიც დიდი დაძაბულობაა, მეტი თავშეკავება გვმართებს. ჩვენ კოალიციურ რეჟიმში ვართ და გამიჭირდება გავაკრიტიკო თავდაცვის მინისტრი, მაგრამ მას ასეთი ხისტი გამონათქვამები ჩვევია და მინდა იმედი ვიქონიო, რომ მომავალში რადიკალური განცხადებები ნაკლები იქნება და ამით “ნაციონალურ მოძრაობას” არ დავემსგავებით. ჩვენი ბედისწრაა, არჩევნებამდე ერთ კოალიციად მივიდეთ და გვინდა – არ გვინდა ამის გამო ბევრ რამეს ანგარიში უნდა გავუწიოთ. პოლიტიკოსები იმიტომ ვართ, რომ რაღაცეები დავითრგუნოთ, თორემ ჩემი ნება რომ იყოს, უფრო რადიკალურიც ვიქნებოდი. თუ ჩვენ შედარებით მოზომილები და პოლიტკორექტული ვიქნებით, კარგი იქნება. სამწუხაროდ, გვახსოვს ოქრუაშვილის მსგავსი განცხადებაც ფეკალიებზე და წინა ხელისუფლების მსგავსმა რიტორიკამ მიგვიყვანა სწორედ 2008 წლის ომთან. მაშინ, როდესაც ჩვენ რუსეთისათვის დიდი წინააღმდეგობის გაწევის თავი არ გვაქვს, ცოტა ზომიერი ნაბიჯები უნდა გადავდგათ”, – ამბობს ომარ ნიშნიანიძე.
“ქართული ოცნების” წევრი სოსო ჯაჭვლიანის განცხადებით, მამამისი ლენინგრადის ბლოკადის მონაწილეა და ხიდაშელის განცხადების გამო თავს შეურაცხყოფილად გრძნობს და მიიჩნევს, რომ წესით ხიდაშელმა ბოდიშიც უნდა მოიხადოს: “პოლიტიკოსები მიდიან და მოდიან, ქვეყნები და ხალხი რჩებიან. პოლიტიკოსებმა ისე არ უნდა გააკეთონ, რომ ხალხი ერთმანეთს გადაკიდონ. თუკი მართლა თქვა, რომ რუსები ვრთხებსა და ძაღლებს ჭამდნენო, უნდა იცოდეს, რომ მაშინ ფაშიზმს მთელი მსოფლიო ებრძოდა და აშშ-სთან ერთ ბლოკში იყო რუსეთი. მეორეც, მამაჩემი ბლოკადის მონაწილე იყო და მე შეურაცხყოფილი ვარ მისი განცხადებით. უკრაინაში „გოლოდომორის“ დროს ხალხი ერთმანეთის ხორცს, დედ-მამა შვილებს ჭამდნენ, ისეთი გამწრებული იყო ხალხი და უკრაინელებს ეს უნდა წამოვაძახოთ?!
ეს ყოვლად დაუშვებელია. პოლიტიკოსებს სხვა ერის ასეთი შეურაცხყოფა არ ეკადრებათ. ეს არ არის ზნეოიბრივი განცხადება და ვინც უნდა იყოს, თუდაც ჩემი გუნდის წევრი, თუკი არასწორად გააკეთებს რამეს, მე ამას არ დავმალავ. ამის გამო ბოდიშიც კი უნდა მოიხადო”, – ამბობს სოსო ჯაჭვლიანი. მისი თქმით, რამდენიმე ხნის წინ თავად რუსეთთან დიპლომატიური ურთიერთობის აღდგენის სურვილით გამოვიდა და ამის გამო “რესპუბლიკელებმა” გააკრიტიკეს.
“ვინც ამ მწერილს წაიკითხავს, იტყვის – რუსეთი ოკუპანტია და ა.შ. კი, რუსებს ოკუპირებული აქვთ ჩვენი მიწების 20%, მაგრამ აგერ სახალინსა და კურილიაზე იაპონიისთვის აქვს მიწები წართმეული, უკრაინაში სისხლისმღვრელ ბრძოლები მიმდინარეობს და დიპლომატიური ურთიერთობები მაინც არსებობს. პოლიტიკოსები იმიტომ არიან, რომ ცეცხლს ნავთი კი არ უნდ დავასხათ, არამედ დიპლომატიურ ფორმატში მოვრიგდეთ. ორი თვის წინ ვთქვი, ევროპელები გვეუბნებიან რუსეთთან საერთო ენა გამონახეთო და სასწრაფოდ აღვადგინოთ დიპლომატიური ურთიერთობა რუსეთთან და ერთი ერთზე ველაპარაკოთ-მეთქი. გამოვიდა ლევან ბერძენიშვილი და ლაპარაკობს – ჯაჭვლიანმა რუსეთთან შეერთების განცხადება გააკეთაო. ასე განსხვავებულად აფასებენ რაღაცეებს. მაკრიტიკებენ? მაკრიტიკონ რამდენიც უნდათ. კრიტიკას და დაცინვას კაცი არ მოუკლავს. მეც გავაკრიტიკებ, იმიტომ, რომ ასე ერის შეურაცხყოფა არ შეიძლება. ასევე ჩემი აზრია ის, რომ, მაგალითად, საგარეჯოში ხმებს არ დავთვლიდი. კანონი რომ გაძლევს უფლებას, დაუწერელი რაღაცეები, ზნეობაც არსებობს”, – დასძენს სოსო ჯაჭვლიანი.
დიპლომატიის აკადემიის რექტორის სოსო ცინცაძის თქმით, ეს იყო პროვოკაციული და უტაქტო განცხადება, რომლის გამოც წესით ხიდაშელმა ბოდიში უნდა მოიხადოს, თუმცა, მისივე თქმით, მთავრობა იმდენად შიშის ქვეშაა რუსეთის აგენტობა არ დაბრალდეთ, რომ ამ განცხადების გამო ხიდაშელის გაკრიტიკებას ვერ ბედავს. მისივე თქმით, “რესპუბლიკელებისა” და ივანიშვილ-ღარიბაშვილის კურსი არ ემთხვევა ერთმანეთს ბევრ საკითხებში და მათ შორის საგარეო პოლიტიკურ ვექტორში. იგი ამბობს, რომ წინასაარჩევნო კამპანიის დროს რუსეთთან ურთიერთობის დარეგულირება ერთ-ერთ ბრენდად იყო ქცეული და ამის წინააღმდეგ მაშინ არც ხიდაშელი და არც რომელიმე სხვა “რესპუბლიკელი” არ გამოდიოდა, რადგან კოალიციაში ვერ მოხვდებოდნენ და ისევ ოპოზიციაში ყოფნა მოუწევდათ. დღეს, კი როდესაც უსაზღვროდ მტკიცეა “რესპუბლიკელების” პოზიციები, ივანიშვილ-ღარიბაშვილს სხვა გზა არ აქვს და ამიტომ უწევთ ეს მწარე აბები დროდადრო ყლაპონ. ხიდაშელი კი ყველანაირად ცდილობს რუსეთთან ურთიერთობის დარეგულირებას ხელი შეუშალოს.
“თინა ხიდაშელი სულელი არ არის და იცის, როგორ მტკივნეულად ღებულობენ მის შეურაცხმყოფელ განცხადებებს მოსკოვში, პოლიტიკოსებიც და რიგითი ადამიანებიც. ჩვენ კარგად გვახსოვს, თუ რა მწვავე რეაქცია მოჰყვა ოქრუაშვილის გაცხადებას – რუსეთში ყველაფერი იყიდება და ფეკალიებიც გაიყიდებაო. ამიტომაც თინა ხიდაშელმა ეს კურსი გააგრძელა და მის გაკრიტიკებას მთავრობაში ვერავინ გაბედავს. გიორგი კვირიკაშვილის განცხადება – არ მჯერაო – ძალიან უკბილო და ღიმილის მომგვრელი იყო. ჯობდა გაჩუმებულიყო. ეს იმას ნიშნავს, რომ ხელისუფლება აგრესიული დემაგოგიისადმი შიშის ტყვეობაშია. საკმარისია ვინმე მინისტრი გამოვიდეს და თქვას, რომ ეს უტაქტობა და უზრდელობაა, რომ ის ვერ ჩამოირეცხავს რუსეთის აგენტობის დამღას. ვერც ივანიშვილმა და ვერც ღარიბაშვილმა ვერ გაუძლეს ამ წნეხს და იმის შიშს, რომ რუსეთის აგენტობას დააბრალებენ. რადგან ეს წნეხია როგორც ქვეყნის შიგნიდან, ისე ქვეყნის გარედანაც. ამით სარგებლობს ხიდაშელი. ის ცდილობს რუსეთთან ურთიერთობა გაამწვავოს და ვერ ვხვდები რის იმედად ცდილობს ამას. იმის იმედად, რომ ამერიკელები ფაქტის წინაშე დაყენოს?!
თინა ხიდაშელის სურვილია, რომ მთელი ეს თაიგული გამოიყენოს იმისათვის, რომ ნატო-ში მოგვიღონ, მაგრამ სულ რომ ომის წინაშე დავდგეთ, ჩვენ დღეს ნატო-ში არ მიგვიღებენ. ფაქტია – თინა ხიდაშელს რუსეთთან კონფრონტაცია უნდა. იმიტომ, რომ ქვეყნის შიგნით რუსეთთან ურთიერთობის დარეგულირებაზე მოთხოვნა იზრდება. დარეგულირება ევრაზიულ კავშირში შესვლას არ გულისხმობს, დიპლომატიური ურთიერთობის აღდგენასაც კი არ გულისხმობს. თუკი რუსეთთან ნორმალური ურთიერთობის რეჟიმში გადავედით, “რესპუბლიკელების” ადგილი მთავრობაში აღარ იქნება და ამიტომ ისინი საკუთარი სკამებისთვის იბრძვიან. ბოდიშიც რომ მოიხადოს, ეს არაფერს შეცვლის, იმიტომ, რომ მან ყველაფერი გააფუჭა”, – აცხადებს სოსო ცინცაძე. მისი თქმით, “რუსეთი ასეთ შეურაცხყოფას არ დაივიწყებს და ჩვენ აზრად არ მოგვდის, შეიძლება ისეთ სფეროში მოვიმკოთ ასეთი დაუფიქრებელი და უზრდელური განცხადების “მთელი სკეთე”.
შესაძლოა თუ არა კარასინი-აბაშიძის შეხვედრისას გაჟღერდეს ხიდაშელის განცხადების გამო რუსეთის რაიმე საპასუხო რეაქცია, მაგალითად, რუსულ ბაზარზე ციტრუსის გატანის შეფერეხება ან რუსეთის მხრიდან დაპირებული სავიზო რეჟიმის გაუქმების უკან წაღება – ამ თემაზე პრემიერის სპეცილური წარმომადგენელი რუსეთთან ურთიერთობის საკითხებში ზურაბ აბაშიძე ამბობს, რომ ამგვარ რეაქცია არ ელოდება.
“არ მგონია ამ განცხადებამ რამე უარყოფითი შედეგი მოგვიტანოს. საგარეო საქმეთა მინისტრმა ძალიან კარგად ახსნა ყველაფერი და ძალიან კარგი აქცენტები გააკეთა და მგონია, რომ ამით ეს თემა დასრულდა,” – აცხადებს ზურაბ აბაშიძე.
„ახალი თაობა“, 12 დეკემბერი, 2015 წელი
ინტერვიუ სერგო რატიანთან: „ბიძინა ივანიშვილს ნაციონალების საუბრების გამოქვეყნება ვერ გადაარჩენს“
ნონა ცაბაძე
ნაციონალური მოძრაობის ირგვლივ განვითარებული ბოლო პერიოდის პროცესებს „ახალ თაობასთან“ ინტერვიუში ნაციონალური მოძრაობის ერთ-ერთი ლიდერი სერგო რატიანი აფასებს. დეპუტატი დედოფლისწყაროს რაიონში მათი ოფისის დაცხრილვის ფაქტს ეხმიანება და აცხადებს, რომ საქმე უკვე ტენდენციასთან აქვთ.
- რა ტენდენციაზე საუბრობთ?
- რამდენიმე ხნის წინ ჩვენს 63 ოფისზე, მთელი ქვეყნის მასშტაბით, ერთდროულად მოხდა თავდასხმა. ორგანიზებული თავდასხმა ერთდროულად თუ ხდება და თუ ამას აკეთებს ვიღაც სხვა, მაშინ ჩვენ ხელისუფლება აღარ გვყავს. თუმცა უფრო ახლოს არის ვერსია, რომ ეს არის ხელისუფლების მიერ დაგეგმილი.
- რატომ თვლით, რომ ამის უკან ხელისუფლება დგას?
- ყველამ კარგად იცის, რომ პრემიერმა გაამართლა ეს პროცესი და განაცხადა, რომ ის გამოხატვის თავისუფლებას დაიცავს. ამის შემდეგ რას ვხედავთ ჩვენ – დედოფლისწყაროში, სადაც პრემიერის უახლოესი ნათესაობა, თამაზაშვილები არიან, იქ ყველაზე მეტად უნდა ყოფილიყო სიტუაცია დაცული. ეს არის ან საერთოდ ხელისუფლების მოშლა, ან ეს არის კარგად დაგეგმილი, ან არის გარემო, სადაც ავტომატებით დადიან და სადაც შესაძლებელია, სხვას ესროლო. ეს გარემო შექმნა ხელისუფლებამ! ყველას კარგად ახსოვს, საიდან იწყება ეს თავდასხმები.
- საიდან?
- იწყება მაშინ, როდესაც ენდიაიმ გამოაქვეყნა კვლევა, სადაც ნაციონალური მოძრაობა, სამი წლის თავზე, არის პირველ ადგილზე და იგებს არჩევნებს.
- მართლა გჯერათ, რომ არჩევნებს მოიგებთ?
- ბუნებრივია, ეს არ არის საკმარისი. სამუშაო გაცილებით ბევრია, უფრო მეტი უნდა ავუხსნათ ხალხს. მეტი გზავნილები უნდა მივიტანოთ ამომრჩევლამდე. ნაცვლად იმისა, რომ გადავიდეთ წყნარ რეჟიმში, რას აკეთებს ხელისუფლება?!
- ასეთს რას აკეთებს?
- ერთი მხრივ, ესხმის ოპონენტებს და მეორე მხრივ, იწყებს ზეწოლას რუსთავი 2-ზე და თავისუფალ მედიაზე. რადგან მათ დაინახეს, რომ თავისუფალ და სამართლებრივ გარემოში მოგება მათთვის არის შეუძლებელი. ამიტომ მათ აირჩიეს ეს გზა, მაგრამ ეს გზა არის გზა სამოქალაქო დაპირისპირებისკენ. თუმცა ჩვენ მივდივართ დაგეგმილად და გვაქვს პირდაპირი მითითება, რომ არანაირ პროვოკაციას არ აყვნენ.
- თუმცა ხელისუფლება ამბობს, რომ თქვენი ოფისების დარბევა წამების ამსახველ კადრებს მოჰყვა და არა - ენდიაის რეიტინგებს.
- რას მოჰყვა და რას არ მოჰყვა, მაგაში კი არ არის საქმე.
- აბა რაშია?
- ჯერ ერთი, ის კადრებიც არის დაკავშირებული მათთან. სწორედ ისინი ცდილობენ სიძულვილის ენის გავრცელებას, სადაც ასოციაციობანაზე თამაშობენ. ყველამ კარგად იცის, რომ როდესაც ის კადრები გამოქვეყნდა, საერთოდ არავინ დაუჭერიათ, პირიქით, თანამშრომლობენ ადამიანებთან, ვინც წინა წლებში ადამიანებს აწამებდნენ და შემდეგ ეს ყველაფერი უნდათ ასოციაციურად მიაბან ნაციონალურ მოძრაობას.
- არ გეკისრებათ ამაზე პასუხისმგებლობა? ეს ხომ თქვენი მმართველობის პერიოდში ხდებოდა?
- გადახედეთ, ვინ წარმოადგენს ნაციონალურ მოძრაობას, მათ ჩვენთან სამართლებრივი ბრძოლა წაგებული აქვთ. არც ერთი ასეთი ბრალდება პირდაპირ არ მიდის კონკრეტულ პირებამდე, ეს არავის ეხება. ხვდებიან, რომ ეს ბრძოლა წაგებული აქვთ, ახლა თამაშობენ ასოციაციობანას, აღვივებენ შუღლს, სიძულვილს და შემდეგ ამ თავდასხმებსაც თვითონ გეგმავენ. ერთდროულად 63 თავდასხმა ორგანიზებული რომ არის და ვიღაცა რომ დგას ამის უკან, აქ კითხვის ნიშანი არ არის.
- ცოტაა ნაციონალებზე გაბრაზებული, იქნებ ხელისუფლება არაფერ შუაშია?
- ჩვენ სხვა მტერი არ გვყავს. ხელისუფლების გარდა, ჩვენი მტერი არის რუსეთი. მაშინ ასე ვთქვათ, რომ ამას რუსეთი აკეთებს და დღევანდელი მთავრობა ბუზებს ითვლის. სხვა ლოგიკა არ არსებობს. კარგი, ვიღაცა გაბრაზებულია და პირი შეკრეს და მთელი ქვეყნის მასშტაბით ერთდროულად დაარბიეს ჩვენი ოფისები?!
- მიგაჩნიათ, რომ ეს მიზანმიმართული პროცესია?
- რასაკვირველია, მიზანმიმართული პროცესია, მაგრამ ეს მათ ვერ უშველის! დედამიწის მიზიდულობის ძალა უნივერსალური პროცესია. როგორც აგდებულ ქვას ვერაფერი შეაჩერებს და ის მიწაზე დაეცემა, ასევე ხელისუფლებას ნებისმიერ დემოკრატიულ სამყაროში აქვს დასაწყისი და დასასრული. ხელისუფლება, რომელიც უბრალოდ არაფერს აკეთებს და ყოველი წელი არის უფრო მძიმე, ვიდრე წინა წელი, 4 წლის შემდეგ აგებს არჩევნებს. ეს არის უუნარო ხელისუფლება.
- რატომ არის უუნარო?
- იცით, რასთან შედარებით არის უუნარო? წინა წლების აღმშენებლობასთან შედარებით! ასევე დღეს ჩვენთან დებატებში არის უუნარო! აი, ეს არის უუნარობა! ამიტომ არის, რომ დღეს, ყველა მონაცემით, ნაციონალური მოძრაობა არის პირველ ადგილზე და ჩვენ ამ წარმატებას ვერ მოგვპარავენ.
- ნურც ის შეფასება დაგავიწყდებათ საზოგადოების მხრიდან, რომ ეს ხელისუფლება დემოკრატიულია, თქვენ კი სისხლიანი რეჟიმი იყავით...
- ფაქტი რომ სულ სხვას გვეუბნება?! რაში გამოიხატება მათი დემოკრატობა?! დღეს არიან პოლიტპატიმრები. დღეს არიან სინდისის პატიმრები და ყველა თანხმდება, რომ ეს ბიჭები, რომლებიც ქუთაისში დაიჭირეს, დაჭერილები არიან შერჩევითი სამართლით. ეს ბიჭები ფიზიკური შეურაცხყოფის მცდელობისთვის არიან დაჭერილები. პროკურატურაც კი ვერ ამბობს, რომ აქ ფიზიკური შეურაცხყოფაა. რა დემოკრატობაზე მელაპარაკებით! ნაციონალური მოძრაობის 22 წევრია პროკურატურაში ნამყოფი და ზოგი 30-40-ჯერ არის მისული. არიან პოლიტპატიმრები, გვყავს სინდისის პატიმრები, დაწყვილებულები არიან ევროსაბჭოს საპარლამენტო ასამბლეაზე რუსეთთან, საყოველთაო მოსმენები ხდება და ეს არის მეტი დემოკრატია?! ერთი კომპონენტი მაინც მითხარით, რითი არიან ჩვენზე უფრო დემოკრატები?!
- ბატონო სერგო, 22 პოლიტპატიმარზე საუბრობთ და რატომ გავიწყდებათ, რომ ამ ხელისუფლებამ 200 პოლიტპატიმარი შეიწყალა, როდესაც ხელისუფლებაში მოვიდა. 22 მეტია თუ 200?
- ამ 200 პატიმარზე ჯერ მაშინ ლაპარაკობდნენ საერთაშორისო ორგანიზაციები, რომ ეს არიან არანორმალურად და არაობიექტურად შერჩეული პატიმრები და დღეს ლაპარაკია იმ პროცესში ფულის აღებაზე! ვინ იყო პოლიტპატიმარი – სტრილიკოვი? ის საერთოდ საქართველოს მოქალაქე არ ყოფილა, როგორ შეიძლება ყოფილიყო პოლიტპატიმარი! ან ექსტრემისტები იყვნენ პოლიტპატიმრები?! დღეს კი ირკვევა, რომ ფულია აღებული!
- ამაზეც გედავებიან, რომ ეს ცილისწამება თქვენგან, ნაციონალებისგან მოდის, რათა პროცესის დისკრედიტაცია მოახდინოთ და არ აღიაროთ, რომ პოლიტპატიმრები გყავდათ...
- ჩვენგან როგორ მოდის? თავიდან ამაზე ჩვენც ვლაპარაკობდით, მაგრამ დღეს ამაზე ალეკო ელისაშვილი საუბრობს. რა, ალეკო ელისაშვილი ჩვენიანია?! ჩვენ მთავარი ოპოზიციური ძალა ვართ, მაგრამ ამაზე სხვებიც საუბრობენ.
- ბევრი მიიჩნევს, რომ ელისაშვილი თქვენს ინტერესებს ატარებს...
- კარგით, რა! თავისუფალი დემოკრატების წევრები რომ დააკავეს, ისინიც ნაციონალური მოძრაობის წევრები იყვნენ?! კაბელების საქმეზე რომ დააკავეს.
- გასულ კვირას დიდი აჟიოტაჟი მოჰყვა ჩანაწერებს, სადაც ნაციონალური მოძრაობის შიდა სამზარეულო იქნა გამომზეურებული. რა ხდება ნაციონალებში? რამდენად მძიმე წელი იქნება თქვენთვის 2016? მიაღწევთ არჩევნებამდე?
- ბიძინა ივანიშვილს ასეთი პირადი ჩანაწერების გამომზეურება ვერ გადაარჩენს! მეტსაც გეტყვით, როდესაც ასეთ რამეზე მიდის ხელისუფლება, ის ძალიან სწრაფად ამთავრებს! დღეს ხელისუფლება ღიად შემოდის ჩვენს პირად საუბრებში, ჩვენს ოჯახებში, ჩვენს საპირფარეშოებში და გვითვალთვალებს. ეს არის სრული ეროზია და ჩამოშლა! ამის შემდეგ ხელისუფლებები დიდხანს ვერ ძლებენ ხოლმე. ეს აჩვენებს სერიოზულ კრიზისს, რომელიც აქვს ხელისუფლებას.
- თქვენ შიგნით არსებულ კრიზისზე რატომ არაფერს ამბობთ? არ არის კრიზისი ნაციონალებში?
- საპირფარეშოებში თვალთვალი მაგ საქმეს ვერ გადაარჩენს. რაც შეეხება ნაციონალურ მოძრაობას, ჩვენ ვიცით, რა გვაერთიანებს, რისთვის ვიბრძვით და რას ვაშენებთ. ამიტომ, ეს ჩვენთვის პრობლემა არ არის. საერთოდ, პირად საუბარს არანაირი მნიშვნელობა არ აქვს.
- ანუ გუნდში განხეთქილება არ არის?
- გმადლობთ, აქ დავასრულოთ!
„ახალი თაობა“, 12 დეკემბერი, 2015 წელი
ინტერვიუ სოსო ცინცაძესთან: „ალეკო ელისაშვილის ბრალდებაზე არავინ დაისჯება“
პოლიტოლოგი სოსო ცინცაძე „ახალ თაობასთან“ ინტერვიუში აცხადებს, რომ 2016 წლის არჩევნების შედეგებზე ალეკო ელისაშვილის განცხადება, რომელიც ხელისუფლების მაღალჩინოსნების კორუფციული გარიგების ბრალდებას უკავშირდებოდა, პირდაპირ გავლენას არ იქონიებს. „მსგავსი სკანდალები არჩევნებზე ისეთ ქვეყნებში, როგორიც საქართველოა, პირდაპირ გავლენას არ ახდენენ. ამერიკის შეერთებულ შტატებში, ევროპაში აუცილებლად მოახდენდა, მაგრამ საქართველოში – არა. სწორედ ამიტომ არის, რომ ხელისუფლებას მსგავსი სკანდალი ნაკლებად აწუხებს“, – ამბობს სოსო ცინცაძე.
- თქვენ გჯერათ ალეკო ელისაშვილის?
- ალეკო ელისაშვილი პატიოსანი, პრინციპული ადამიანია, მე მას 10 წელია ვიცნობ. მისი გაჩუმება შეუძლებელია. ის მართლაც არის დამოუკიდებელი, მიუკერძოებელი პოლიტიკოსი, მაგრამ მე არ ვიცი, მის ხელთ რა მტკიცებულებებია, რამდენად მყარია ისინი.
- ოპოზიცია ამბობს, რომ ქვეყანაში 180 პოლიტპატიმარი არ ყოფილა, ამნისტიის კომისიის წევრები აცხადებენ, დასახელდეს თუნდაც ერთი ადამიანი, ვისაც არ ეკუთვნოდა განთავისუფლებაო…
- როდესაც საბჭოთა კავშირში, 70-იანი წლების მეორე ნახევარში, ნიქსონს პოლიტპატიმრების სია გადასცეს, იმ სიაში მხოლოდ 42 ადამიანი იყო, მათ შორის, ბუკოვსკი და სხვები. საქართველოში უცებ 200 პოლიტპატიმარი აღმოჩნდა. პროცესი ძალიან პოლიტიზირებული იყო. ახალმა ხელისუფლებამ კარგად გათვალა. მან იცოდა, რომ გაცემულ სოციალურ დაპირებებს ვერ შეასრულებდა. ამიტომ, რაც არ იყო ხარჯებთან დაკავშირებული და რასაც მხოლოდ პოლიტიკური ნება სჭირდებოდა, იქ მაქსიმალურად მოახდინა ხელისუფლებამ მობილიზება. ამით პოლიტიკური დივიდენდებიც მოიპოვა მოსახლეობაში. ეს ჩვეულებრივი პოლიტიკური პიარსვლაა. ასე იყო შუა საუკუნეებშიც, როდესაც მონარქი ეკურთხებოდა მეფედ, მისი პირველი აქტი შეწყალება იყო.
- თუმცა, შეწყალების აქტი ყველაზე ჰუმანური აქტია.
- ცხადია, მაგრამ პოლიტიკოსისთვის ეს ყველაზე ადვილად შესასრულებელია, ამისთვის არც ბიუჯეტის შესრულებაა საჭირო და არც 100 საწარმოს გახსნა.
- რა მოლოდინი გაქვთ, პროკურატურა გამოიძიებს ამ საქმეს, მიიყვანს ბოლომდე ახალი მთავარი პროკურორი?
- ეს შოთაძისთვის ერთგვარი ლუსტრაციაც იქნება. უკვე გაისმა, რომ თუ ვერ დაამტკიცებს ამ ბრალდებას ალეკო ელისაშვილი, მაშინ მან უნდა აგოს პასუხიო. ამ ბრალდების საფუძვლიანობის მტკიცება იქნება, თუ არავინ დაისჯება. ეს იქნება კლასიკური სიტუაცია, როდესაც სოლომონ ბრძენთან ორი მომჩივანი მივიდა და სოლომონ ბრძენმა ორივეს უთხრა: შენც მართალი ხარ და შენც. მესამემ თქვა, როგორ შეიძლება ორივე მართალი იყოსო, სოლომონმა მესამესაც უთხრა, შენც მართალი ხარო.
- მოვლენები ასე განვითარდება?
- დიახ. მე ვფიქრობ, რომ ამ საქმის ფინალი სწორედ ეს არის. არც ელისაშვილს არავინ აგებინებს პასუხს და არც პროკურატურა იტყვის, რომ ვიღაცამ მართლა აიღო ქრთამი, მაგრამ ხელისუფლებამ უნდა იცოდეს, რომ ამ შემთხვევაში შეიძლება ცოცხებზე უარესი სკანდალი მიიღოს, რადგან პოლიტიკურ ელიტას, პრეზიდენტს, პრემიერს შეეძლო ეთქვა, რომ მათ არ იცოდნენ, რა ხდებოდა ციხეში, რომ მათი ბრძანება არ იყო ცოცხების არადანიშნულებისამებრ გამოყენება, მაგრამ ამ შემთხვევაში ადრესატები, როგორც ელისაშვილი ამბობს, არიან ისეთი პიროვნებები, რომლებიც ხელისუფლებას უშუალოდ
„ახალი თაობა“, 12 დეკემბერი, 2015 წელი
ინტერვიუ ვახტანგ მაისაიასთან: „ალეკო ელისაშვილმა ბოდიში მოგვიხადოს“
ყოფილი პოლიტპატიმარი ვახტანგ მაისაია და შეწყალების კომისიის წევრი მეტრეველი ბოდიშის მოხდას მოითხოვენ ალეკო ელისაშვილისაგან, რომელმაც გამოთქვა ვარაუდი, რომ პოლიტპატიმრების სიის შედგენისას ხელისუფლების მაღალი რანგის პოლიტიკური თანამდებობის პირები ფულს იღებდნენ. „ალეკო ელისაშვილი საუბრობს პოლიტპატიმრების ამნისტიასთან დაკავშირებით კორუფციაზე, ყბადაღებული გონივრული ეჭვის საფუძველზე და არავითარი მტკიცებულებები არ მოჰყავს მისი ნათქვამის გასამყარებლად. ამიტომ მისი ეს განცხადება პოპულისტურია და უპასუხისმგებლო დეკლარაციას წარმოადგენს, – აცხადებენ ვახტანგ მაისაია და ია მეტრეველი.
- ბატონო ვახტანგ, რაში უნდა დასჭირვებოდა ალეკო ელისაშვილს პოპულისტური და უპასუხისმგებლო განცხადებების გაკეთება?
- არ ვიცი. ალეკო ელისაშვილი არის ჩვენი მეგობარი, რომელთან ერთადაც ჩვენ 9 წლის განმავლობაში ხმალამოღებული ვებრძოდით ავტორიტარულ რეჟიმს და მშვიდობიანი გზით დავამარცხეთ. როდესაც ასეთი ადამიანის მხრიდან კეთდება ასეთი უაპელაციო განცხადებები, არასერიოზული ქმედება და ჩირქის მოცხებაა იმ 200 ადამიანისა და მათი ოჯახის წევრების მიმართ, ვინც ეს ყველაფერი საკუთარ ზურგზე იწვნია.
- შეიძლება კონკრეტული ფაქტები აქვს...
- მაშინ უნდა თქვას, რა ფაქტები აქვს. განცხადებას გონივრული ეჭვის საფუძველზე აკეთებს. თუ მას კონკრეტული ფაქტები და არგუმენტები არ აქვს, მაშინ ბოდიში უნდა მოუხადოს იმ ადამიანებს, რომელთა მიმართ უსაფუძვლო განცხადებები გააკეთა გონივრული ეჭვის საფუძველზე.
- ალეკო ელისაშვილი პოლიტიკური სპეკულაციის პროცესშია ჩაბმული?
- არ ვიცი. არც მინდა ვიფიქრო, რომ ალეკო სპეკულაციურ პროცესშია ჩართული. იმედი აქვს, უნებლიეთ მოხდა ეს. არ ვამბობ, რომ პოლიტიკური სპეკულაცია მისგან მოდის. ამ თემას ზოგიერთი პოლიტიკურად ანგაჟირებული ძალა საკუთარი დანაშაულობების გადასაფარად იყენებს. საუბარია ნაცმოძრაობაზე, რომელიც დამნაშავე ძალაა და ბრალი მიუძღვის ადამიანების დახვრეტასა და გაუპატიურებაში.
- ალეკო ელისაშვილის განცხადებებს რაიმე საფუძველი არ შეიძლება ჰქონდეს?
- მან თქვა, რომ გონივრული ეჭვის საფუძველზე აკეთებს განცხადებას. ეს იმას ნიშნავს, რომ მას არ გააჩნია ფაქტები.
- თქვენც იყავით ხომ იმ სიაში?
- დიახ, მაგრამ მხოლოდ ჩემზე არ არის საუბარი. თუ მას გააჩნია კონკრეტული ფაქტები, უნდა წარმოადგინოს.
- ციხეში ყოფნისას თქვენ მიმართ ზეწოლის რა მეთოდები გამოიყენეს?
- ჩემ მიმართ გამოიყენეს დახვრეტის იმიტაცია, ფიზიკური და ფსიქოლოგიური ზეწოლა, გამოიყენეს ფსიქოტროპული ტიპის ნივთიერებები, რომლებიც აკრძალულია საერთაშორისო სამართლის ნორმებისა და პრაქტიკის მიხედვით.
- ფსიქოტროპულ ნივთიერებებს გალევინებდნენ?
- დიახ, ეს უკვე დადასტურებული ფაქტია. ამის თაობაზე თბილისის პროკურატურამ გამოძიება დაიწყო, დაიკითხა 30-ზე მეტი ადამიანი. სამწუხაროდ, პოლიტიკური ნებისა თუ უნებობის გამო, საქმე ბოლომდე არ მივიდა, როგორც სხვა მსგავსი საქმეები, რაც პროკურატურის ყველაზე დიდი დანაშაულია.
- საქმე დაიხურა თუ გამოძიება დაუსრულებლად გრძელდება?
- საქმის გამოძიება გაჩერებულია ზემდგომი პირების მითითების საფუძველზე. ვიცი, ვინც დგანან ამის უკან.
- ვინ დგანან, ისინი არიან მთავარი მოქმედი პირები ამ ხელისუფლებაში?
- კონტრდაზვერვის დეპარტამენტის ის თანამშრომლები არიან, რომლებიც აწარმოებდნენ უკანონო ქმედებებს არა მარტო ჩემ მიმართ, არამედ სხვა პატიმრების წინააღმდეგაც.
- დღეს სად არიან ეს პირები?
- დღესაც კონტრდაზვერვის დეპარტამენტის თანამშრომლები არიან.
- როგორ, ეს პირები კიდევ მუშაობენ?
- დიახ, ზოგიერთი დააწინაურეს ძალოვან სტრუქტურებში. მათ ხელისუფლების მაღალი დონის პოლიტიკური თანამდებობის პირები მფარველობენ.
- ვინ არიან ისინი? ისე უჭირთ კადრები, რომ ეს ადამიანები ვერ გაუშვეს?
- ეს უნდა ჰკითხოთ ბატონ მინდია ჯანელიძეს და სხვა პირებს.
- კრიზისების მართვის საბჭოს მდივანი?
- სწორედ მინდია ჯანელიძე არის ერთ-ერთი, რომელიც დასახელებულ პირებს მფარველობს.
- მინდია ჯანელიძეს ვინ მფარველობს?
- არ ვიცი. ეს კითხვა რიტორიკის დონეზე დავტოვოთ. საზოგადოებამ თვითონ გამოიტანოს დასკვნა.
- რა შედეგი შეიძლება მოჰყვეს ამას?
- შედეგი უკვე მოჰყვა. უკვე არაერთი პირის მიმართ წარმოებს ცილისმწამებლური კამპანია. თუნდაც ახლანდელი აჟიოტაჟი ამის გამოხატულებაა.
„ახალი თაობა“, 12 დეკემბერი, 2015 წელი
ინტერვიუ მეგი გოცირიძესთან: „შერიგების მინისტრს ცხვირზე დაღი უნდა დავასვა“
პაატა ზაქარეიშვილს ოფისი დაულუქეს და დუსტი დაუყარეს
სახელმწიფო მინისტრ პაატა ზაქარეიშვილს საკუთარი ენა ოპოზიციაში ჩაუდგა, წინააღმდეგ შემთხვევაში მისი განცხადებების ახსნა შეუძლებელია. მისგან უცნაურ განცხადებებს ერი ასე თუ ისე შეგუებულია, მაგრამ ბოლოს ისეთი რაღაცა თქვა, რომ ყველაზე მშვიდი ნერვების პატრონებიც კი გამოიყვანა წყობილებიდან.
მიმდინარე წლის 29 ნოემბერს ზაქარეიშვილმა განაცხადა, აფხაზეთი დამოუკიდებელი საქართველოს შემადგენლობაში არასდროს ყოფილაო. ერის ოპტიმისტურად განწყობილი ნაწილი იმედოვნებდა, რომ სახ.მინისტრი განმარტებებს გააკეთებდა და დაფრქვეული სიბრძნისთვის ბოდიშს მოიხდიდა. აღმოჩნდა, რომ ზაქარეიშვილი განმარტებების გაკეთებას და, მით უმეტეს, ბოდიშის მოხდას არ აპირებდა.
„აფხაზთა კრებამ“ და დევნილებმა ორკვირიანი ლოდინის შემდეგ გადაწყვიტეს, პირადად მოესმინათ მინისტრისგან ახსნა-განმარტებები. 11 დეკემბერს რამდენიმე ათეული ადამიანი ხოჭოს გამოსახულებიანი ტრანსპარანტებით სახელმწიფო მინისტრის სამუშაო ადგილს მიადგა და იქაურობა უბედურების ზონად გამოაცხადა.
აქცია წინა დღეს იყო დაანონსებული და ამის შესახებ სკანდალურ მინისტრსაც ჰქონდა ინფორმაცია. პაატა ზაქარეიშვილმა იქაურობა აქციის დაწყებამდე ცოტა ხნით ადრე დატოვა. აქციის მონაწილეთა შორის იყო ყოფილი დეპუტატი მეგი გოცირიძეც. ის კარგა ხანია, პაატა ზაქარეიშვილის ფენომენის შესწავლითაა დაკავებული და მას პუტინის ტყუპისცალად მიიჩნევს. „პაატა ზაქარეიშვილის წინააღმდეგ აქციის მოსაწყობად აფხაზეთიდან დევნილები შეიკრიბნენ. აფხაზეთი არის ჩემი მიწა და თავი ვალდებულად ჩავთვალე, უსირცხვილო მინისტრის უსირცხვილო განცხადება გამეპროტესტებინა“, – განაცხადა „ხალ თაობასთან“ საუბარში მეგი გოცირიძემ.
აქციის მონაწილეებმა პაატა ზაქარეიშვილის სამფლობელოსთან, ტრანსპარანტების გარდა, დუსტიც მიიტანეს. „ხოჭო არის მავნებელი და გეორგიევსკის ბაფთის ფერებში შეღებილი ხოჭო ყველაზე კარგად გამოხატავს ზაქარეიშვილის ბუნებას, რომელიც თავადაც მავნებელია. მავნებლებს დუსტით ებრძვიან. ჩვენც დუსტი დავყარეთ სამინისტროს შენობასთან“, – აღნიშნავს ყოფილი დეპუტატი.
იმოქმედებს თუ არა ზაქარეიშვილზე მავნებლების წინააღმდეგ საბრძოლო საშუალება, მან არ იცის. „აქციის დაწყებამდე 15 წუთით ადრე ეს ადამიანი სამინისტროდან გაიქცა. არადა, ის ვალდებული იყო, ამ ადამიანებისთვის მოესმინა. სხვა თუ არაფერი, ის და მისნაირები ამ ადამიანების ჯიბიდან ამოღებული ფულით ღებულობენ პრემიებს და მივლინებებში დადიან. სანამ სამინისტროში მივა, ალბათ იმ დუსტს გადარეცხავენ და ზაქარეიშვილზე ვერ იმოქმედებს. ამის გამო იქ, შესაძლოა, კიდევ დაგვჭირდეს მისვლა“, – ამბობს გოცირიძე.
ყოფილი დეპუტატი აქციის მიმდინარეობისას მინისტრის საფირმო ფრაზებს იხსენებდა და აღშფოთებას ვერ მალავდა. „ჩემთვის ის გახლავთ კლასიკური ნიმუში იმისა, თუ როგორ შეიძლება გამოიყურებოდეს მოღალატე. ჩვენდა საუბედუროდ, ეს კაცი საქართველოს მთავრობას წარმოადგენს. ეს არის მინისტრი, რომელსაც კონფლიქტების მოგვარება და ერების შერიგება ევალება. ეს ადამიანი ამტკიცებს, რომ რუსებს საქართველოს საზღვარი არ დარღვევიათ, არადა, რუსებს ავტობანამდე 500 მეტრი აშორებთ, მეტი არა. ბევრი რომ არ გავაგრძელო, ეს არის ფილიპე მახარაძე. პუტინს მტრად არ მიიჩნევს და ამბობს, მტერი როგორ არის, თავად ხომ არ ამოქოქა ტანკიო“, – აცხადებს ექს-დეპუტატი.
მეგი გოცირიძე მინისტრს საქართველოს ისტორიის არცოდნაშიც ადანაშაულებს და სურვილი აქვს, მას დავით აღმაშენებლის დროინდელი მეთოდებით მოსთხოვოს პასუხი:
- ეს კაცი სუფთა კოლაბორაციონისტია, ამბობს, აფხაზეთი დამოუკიდებელი საქართველოს შემადგენლობაში არასდროს ყოფილაო. თავს იწონებს, დავით აღმაშენებლის დროს რა ხდებოდა, არ ვიციო. საიდან ეცოდინება, როცა საქართველოს ისტორია გადაშლილი არა აქვს. სამაგიეროდ, მე ვიცი კარგად, რასაც უშვრებოდა დავით აღმაშენებელი ამნაირებს. ის მოღალატეებს ენას აძრობდა და მთელ სხეულს უშანთავდა. ზაქარეიშვილსაც ერთი ადგილი არ უნდა დაუტოვო ამოუშანთავი. გამოსაჩენ ადგილზე, კონკრეტულად ცხვირზე კი, მოღალატე უნდა დააწერო.
მეგი გოცირიძე დასაშანთად გამეტებულ მინისტრს აფერისტობაშიც სდებს ბრალს.
- 2013 წლის 29 ნოემბერს, როდესაც ასოცირების ხელშეკრულება იყო პარაფირებული, საშინელი რესპუბლიკელების საშინელმა წარმომადგენელმა ზაქარეიშვილმა მაშინ თქვა: აფხაზებმა და ოსებმა ახლა კეთილი ინებონ და გადაწყვიტონ, რუსეთში რჩებიან თუ ჩვენთან ერთად მოდიან ევროპაშიო. ზუსტად 2 წლის თავზე განაცხადა, აფხაზეთი საქართველოს შემადგენლობაში არ ყოფილაო, – ამბობს მეგი გოცირიძე. მას ყველაზე მეტად ის განცხადება ამწარებს, რომელიც სახმინისტრმა აფხაზეთიდან ჩამოსვენებულ თავმოკვეთილ ცხედრებთან დაკავშირებით გააკეთა:
„ამ კაცს რომ ვუსმენ, სულ ნერვები მეშლება, მაგრამ ის განცხადება რომ მახსენდება, რომელიც თავმოკვეთილ ქართველებზე გააკეთა, ლამისაა გული გამისკდეს. აფხაზეთში მიმდინარე საომარი მოქმედებების დროს და მოგვიანებითაც, ის ტყვეთა გაცვლის კომისიაში იყო. ამ კომისიას ევალებოდა მიცვალებულების გადმოსვენებაც. აფხაზეთიდან გადმოსვენებული ქართველების ნაწილს თავები არ ჰქონდა. ამას ზაქარეიშვილიც ადასტურებს და აცხადებს, რომ თავად ღებულობდა მათ დაკრძალვაში მონაწილეობას. ჟურნალისტმა ჰკითხა, რატომ ექცეოდნენ ასე სასტიკად ქართველებს და თავებს რატომ აჭრიდნენო. იცით, რა უპასუხა ამ ფარისეველმა რესპუბლიკელმა? მათთვის თავები არ მოუჭრიათ, უბრალოდ, აფხაზეთში ნესტიანი ჰავაა, ეს ცხედრები გარეთ იყო დატოვებული და თავები მოსძვრათო.
დამოუკიდებელი სასამართლო ექსპერტიზის ცენტრისგან ამაზე საინტერესო პასუხი მივიღეთ. დასკვნაში პირდაპირ იკითხება, რომ სახელმწიფო მინისტრი არის არა მარტო ბრიყვი, არამედ მოღალატეც. დასკვნაში გადმოცემულ გვამური ცვლილებების დეტალებზე ვერ ვისაუბრებ. მკითხველიც მეცოდება და ჩემი თავიც. გვამური ცვლილებები საკმაოდ ხანგრძლივი პროცესია. 100 წელი მიწაშიც რომ იყოს, ცხედარს ფიზიკურად თუ არ შეეხე, თავის ქალის მოცილება წარმოუდგენელია“.
ყოფილი დეპუტატი საქართველოს მოსახლეობას და საკუთარ თავს სიბეჩავეში სდებს ბრალს და ამბობს, რომ ზაქარეიშვილის თავგასულობა ყველას ბრალია.
- მაინტერესებს, როდემდე უნდა ვითმინოთ მისი განცხადებები. დღემდე მიკვირს, რამ დაგვაბეჩავა ასე, რომ პასუხს არ ვითხოვთ. სად არის ის საქართველო, რომელსაც იუნკერები ჰყავდა? სად არის ის საქართველო, რომელსაც 100.000 წმინდანი ჰყავს. ვუყურებ ზაქარეიშვილს და მგონია, რომ ეს გმირობის ისტორიები ჩვენ მოვიგონეთ. უკვე იმაშიც მეპარება ეჭვი, იყო თუ არა 9 აპრილი საერთოდ, არადა იმ დღეს მეც დავზარალდი“, – აღნიშნავს გოცირიძე. იგი თავისი მეგობრების სახელით პაატა ზაქარეიშვილის გადადგომას ითხოვს, წინააღმდეგ შემთხვევაში, უფრო მკაცრი ზომების გატარებით იმუქრება.
- 11 დეკემბრის აქციაზე სამინისტრო დავულუქეთ. მომავალში შევეცდებით, იქ გამოვამწყვდიოთ, – ამბობს ყოფილი დეპუტატი.
