„რეზონანსი“: ინტერვიუ სოსო ცინცაძესთან: “ჩვენთვის წამგებიან ფაქტორად იქცა უკრაინასთან ერთ პაკეტში აღმოჩენა”
„ახალი თაობა“: ინტერვიუ მაია ფანჯიკიძესთან: „იმედი მაქვს, რომ ვიზალიბერალიზაციას მივიღებთ“
„რეზონანსი“: ინტერვიუ ანი მიროტაძესთან: „არ მგონია, ივანიშვილი საარჩევნო პერიოდში ვითარებას შორიდან დააკვირდეს”
„ალია“: ინტერვიუ მურმან დუმბაძესთან: საიდან იშოვა მილიარდები და რისთვის დააჯარიმეს «ბედნიერი საქართველოს“ ლიდერი ლეონიდ ჩერნოვეცკი?
„ალია“: „მარგველაშვილი ახალ პოლიტიკურ ჯგუფს ქმნის, რომელიც, რატომღაც, ასეთი ფორმით იწყებს არენაზე გამოსვლას»
„ახალი თაობა“: ინტერვიუ გიორგი ვაშაძესთან: „მანანა კობახიძის და ეკა ბესელიას ბედი ივანიშვილის ხელშია“
„ახალი თაობა“: ინტერვიუ ზაზა დავითაიასთან: „ალეკო ელისაშვილის სკანდალი „ნაციონალებს“ ცუდად შეუბრუნდება“
„რეზონანსი“: შეწყალების სკანდალში “სხვა საქმეები” გამოჩნდა
„რეზონანსი“: ინტერვიუ ნანა კაკაბაძესთან: „ამ აურზაურით ახალი პოლიტიკური ძალის გამომზეურება ხდება“
„ახალი თაობა“: ინტერვიუ გიგა ბუკიასთან: «პენსიის 400 ლარამდე გაზრდა არარეალური დაპირებაა»
„რეზონანსი“: პროგნოზი მართლდება: წლის ბოლოს ფულადი გზავნილები 25%-ით შემცირდება
—————————-
„რეზონანსი“, 16 დეკემბერი, 2015 წელი
ინტერვიუ სოსო ცინცაძესთან: “ჩვენთვის წამგებიან ფაქტორად იქცა უკრაინასთან ერთ პაკეტში აღმოჩენა“
ია აბულაშვილი
“საქართველომ ყველაფერი გააკეთა, რასაც ჩვენგან ევროპა ელოდა. პროცესი წინ მიდის. მოთმინებით დაველოდოთ საბოლოო გადაწყვეტილებას, რომელიც საქართველოს მოლოდინით პოზიტიური იქნება”, – ასე გამოეხმაურა პარლამენტის თავმჯდომარე დავით უსუფაშვილი ევროკომისიის მიერ საქართველოს შესახებ ანგარიშის გამოქვეყნების გადადების საკითხს. ევროკავშირის უმაღლესი წარმომადგენელის საგარეო პოლიტიკისა და უსაფრთხოების საკითხებში ფედერიკა მოგერანის განცხადებით, საერთო შეფასება არის დადებითი და საჭიროა არსებული სულისკვეთების შენარჩუნება. საქართველოს ხელისუფლებაც იმედოვნებს, რომ დასკვნის შინაარსი იქნება პოზიტიური, მაგრამ, როგორც ექსპერტები ამბობენ, შინაარსის შემდეგ მნიშვნელობას იძენს დროულობა, რასაც ჩვენი საზოგადოება დიდ მნიშვნელობას ანიჭებს.
კიდევ რამდენ ხანს გაჭიანურდება ვიზალიბერალიზაციის მინიჭების პროცედურა და რა სირთულეების წინაშე შეიძლება აღმოჩნდეს საქართველო – ამის შესახებ “რეზონანსი” პოლიტოლოგ სოსო ცინცაძეს ესაუბრა.
- თვითონ ის ფაქტი, რომ შეფერხება მოხდა ამ ეტაპზე, რომელიც თითქოს გარანტირებული გვქონდა, არასასიამოვნო სიურპრიზია. ჩვენთვის წამგებიან ფაქტორად იქცა უკრაინასთან ერთ პაკეტში აღმოჩენა. უკრაინას მართლაც ბევრი პრობლემები აქვს, სწორედ ტექნიკური თვალსაზრისით და გულახდილად რომ ვთქვათ, მართლაც არ არის მზად ვიზალიბერალიზაციისთვის პირველსავე ეტაპზე. დიდი ალბათობით შეიძლება ვივიარაუდოთ, რომ ამ ეტაპს საქართველო და უკრაინა გადალახავენ, მაგრამ მთავარი სირთულეები წინ არის, როდესაც 28 ქვეყანამ უნდა მიიღოს პოლიტიკური გადაწყვეტილება. დღეს დამირეკეს მოსკოვის ერთ-ერთი გამოცემიდან და არასასიამოვნო სიახლეზე მთხოვეს კომენტარი. კერძოდ, საკითხი ეხებოდა გერმანიის ერთ-ერთი მხარის, ბავარიის მთავრობის პოზიციას, რომელიც თურმე უარყოფითად ყოფილა განწყობილი საქართველოსთვის ვიზალიბერალიზაციის მინიჭებასთან დაკავშირებით. რასაკვირველია, თავისთავად გერმანიის ერთ-ერთი მხარის პოზიცია ნაკლებად იქონიებს გავლენას გერმანიის ფედერალური მთავრობის პოზიციაზე, მაგრამ თავად ფაქტი არასასიამოვნოა. ასე რომ, ის წარმოდგენა, თითქოს ჩვენ მთელი ევროპა გულისფანცქალით გველოდება, რბილად რომ ვთქვათ, ბოლომდე სიმართლე არ არის.
- ანუ, არის იმის საფრთხე, რომ რაღაც მიზეზით საქართველოს უარი ეთქვას ვიზალიბერალიზაციაზე?
- აქ არის ურთიერთგამომრიცხავი ფაქტორები. ერთი ის, რომ საქართველოსთვის ვიზალიბერალიზაციაზე უარის თქმა მაშინ, როდესაც ევროპის ყველა კარი გაიღო მილიონობით ახლოაღმოსავლელი და აფრიკელი ლტოლვილებისათვის, ცოტა ძნელად ასახსნელი და ჩვენთვის შეურაცმყოფელი იქნება. გარდა ამისა, მოგეხსენებათ იმ 6 ქვეყნის შესახებ, რომლებიც დასაწყის ეტაპზე დაფიქსირდნენ აღმოსავლეთის პარტნიორობის წევრებად და მთლიანად ამ პროგრამამ, რომელსაც დღეს რეალურად მხოლოდ საქართველო და მოლდოვა შემორჩა (უკრაინის საკითხი ჯერ კიდევ გასარკვევია) უკვე შთანთქა ათეულობით მილიონი ევრო. ევროკავშირი კი ბიუჯეტის სკრულპულოზურად თვლას არის მიჩვეული. ამიტომ აუცილებელია, რომ ევროჩინოვნიკებმა თავის ამომრჩევლების წინაშე დადონ რაღაც შედეგი. გარდა ამისა, არ შეიძლება ბრიუსელში ანგარიშს არ უწევდნენ იმ გარემოებას, რომ საქართველოს ერთი მეორეს მიყოლებით ნატოს ყველა სამიტზე უცრუებენ იმედს, ხოლო ლიბერალიზაცია შეიძლება გამოდგეს კარგ პროპაგანდისტულ კომპენსაციად, მითუმეტეს, რომ ბრიუსელს კარგად ახსოვს ბელორუსის მაგალითები. ასე რომ, პრო და კონტრა ჩვენთან მიმართებაში ერთმანეთს აწონასწორებს და შეიძლება ერთი შეხედვით სულ უმნიშვნელო ფაქტორმა გადაწონოს სასწორი.
- ამ პროცესში ჩვენთვის ყველაზე ცუდი ვარიანტი რა შეიძლება იყოს?
- ჩვენ უკვე წარვადგინეთ ჩვენი ანგარიში, რომელიც, წინასწარი მონაცემებით, გადაჭარბებით აკმაყოფილებს ტექნიკურ კრიტერიუმებს. უნდა დაველოდოთ უკრაინის პრობლემების გადაჭრას. ყველაზე ცუდი ვარიანტი შეიძლება იყოს, უკრაინა რომ არ გაანაწყენონ, ამ მიზნით ორივეს გადაგვიდონ გარკვეული პერიოდით ვიზალიბერალიზაციის მონიჭების პროცედურა. ჩვენ ისღა დაგვრჩენია, რომ პასიური მაყურებლის როლით დავკმაყოფილდეთ და ვილოცოთ იმისთვის, რომ უკრაინის მთავრობამ რაც შეიძლება მალე აღმოფხვრას ბრიუსელის მიერ მითითებული ხარვეზები. ამ პერიოდში ჩვენ არაფრის კეთება აღარ შეგვიძლია, უკრაინას ვართ მიბმული და შეიძლება ელემენტარულად ყველაზე ცუდ ვარიანტში უკრაინასთან ერთად მოგვიწიოს კიდევ ლოდინი.
„ახალი თაობა“, 16 დეკემბერი, 2015 წელი
ინტერვიუ მაია ფანჯიკიძესთან: „იმედი მაქვს, რომ ვიზალიბერალიზაციას მივიღებთ“
ევროკომისიის მიერ ვიზალიბერალიზაციასთან დაკავშირებული ანგარიშის გამოქვეყნების თარიღმა გადაიწია. საგარეო საქმეთა მინისტრი გიორგი კვირიკაშვილი აცხადებს, რომ გადადება საქართველოსთან არ არის დაკავშირებული. იგივეს ფიქრობს საგარეო საქმეთა ყოფილი მინისტრი, თავისუფალი დემოკრატების ერთ-ერთი ლიდერი მაია ფანჯიკიძე. ის `ახალ თაობასთან~ ინტერვიუში აღნიშნავს, რომ არ აქვს საფუძველი იფიქროს, რომ ევროკომისიის მიერ მოხსენების გადადების მიზეზი შინაარსობრივი მხარეა.
„ევროკომისიის მიერ ვიზალიბერალიზაციასთან დაკავშირებული ანგარიშის გამოქვეყნების გადადება ტექნიკური მიზეზით არის გამოწვეული და საფუძველი არ მაქვს, ეჭვი შევიტანო არც ფედერიკა მოგერინის და არც სხვა პირების განცხადებაში. ისინი აცხადებენ, რომ ეს მოხსენება დეკემბრის ბოლომდე გამოქვეყნდება. აღნიშნული მოხსენება ერთ და ორ დღეში არ იწერება. სექტემბერში დასრულდა იმ მისიის მუშაობა, რომელსაც უნდა შეემოწმებინა, რამდენად შეასრულა საქართველომ ყველა ვალდებულება. ეს მოხსენება რამდენიმე თვის განმავლობაში იწერებოდა“, – ამბობს მაია ფანჯიკიძე.
- თქვენი პარტია ამ მიმართულებით ძალიან აქტიურობდა…
- ჩვენ ყველა შეხვედრაზე, რომელიც ევროკავშირის წარმომადგენლებთან გვქონდა, ვახმოვანებდით პოზიციას, რომ საქართველომ ევროპასთან უვიზოდ მიმოსვლა აუცილებლად უნდა მიიღოს. ეს არის ძალიან მნიშვნელოვანი ჩვენი ქვეყნისთვის. ეს არის საკითხი, სადაც ყველა ერთიანი უნდა ვიყოთ. ყველამ უნდა ვიმუშაოთ, რომ საქართველომ ამ წარმატებას მიაღწიოს. ჩვენი პარტიის, ერთ-ერთმა ლიდერმა, ვიქტორ დოლიძემ, პარლამენტში მიმართვის ინიცირება მოახდინა, რომელიც ევროპელ კოლეგებთან გაიგზავნა სწორედ ვიზალიბერალიზაციის დადებითად გადაწყვეტის თხოვნით. შეხვედრებზე ყველა ევროპელი კოლეგისგან გვესმოდა, რომ ეს მოხსენება დადებითი იქნება და საქართველოს მიერ შესრულებული სამუშაო შეფასებული იქნება მაღალ დონეზე.
- ითქვა, რომ შეიძლება გადადება უკავშირდებოდეს უკრაინას, რომელმაც ბოლომდე ვერ შეასრულა ვალდებულებები და ბრიუსელი პირადად პრეზიდენტ პოროშენკოსგან ითხოვს გარანტიებს…
- იმ მომენტში, როდესაც საქართველო და უკრაინა ერთად მოიხსენიეს, უსიამოვნო განცდა დამეუფლა, რადგან ტაქტიკური გადაწყვეტილება შეიძლება მიღებული იყოს ერთი ან რამდენიმე ქვეყნის მიმართ ერთდროულად, მაგრამ რაც შეეხება ტექნიკურ შეფასებას, ეს საქართველოს დამოუკიდებელი საშინაო დავალება იყო და ის დამოუკიდებლად უნდა შეფასებულიყო და არ ყოფილიყო დაკავშირებული რომელიმე სხვა ქვეყანასთან. მიუხედავად ამისა, მაია ფანჯიკიძე ამბობს, რომ საქართველოს მიერ საშინაო დავალების შესრულება იქნება დამოუკიდებელი მოხსენება და იქ მხოლოდ საქართველოს მიერ ამ გეგმის შესრულებაზე იქნება საუბარი. ამიტომ, მე ძალიან მინდა მჯეროდეს, რომ ეს არის მხოლოდ ტექნიკური შეფერხება ევროკავშირში, თუმცა რა მიზეზით არის ეს გამოწვეული, არ ვიცი“, – აცხადებს საგარეო საქმეთა ყოფილი მინისტრი.
- ტექნიკური შეფასება არის პირველი ეტაპი, შემდეგი ეტაპი რა არის?
- ეს არის პირველი ეტაპი, აუცილებელი და ძალიან მნიშვნელოვანი ეტაპი. ამ ეტაპზე, ამ შეფასებაზე დაყრდნობით ევროკავშირის 28 წევრი ქვეყნის მიერ უნდა იქნას პოლიტიკური გადაწყვეტილება მიღებული. ეს თვეები, იანვრიდან ორი-სამი თვე განსაკუთრებით, ხელისუფლებამ მაქსიმალურად უნდა გამოიყენოს, რომ პოლიტიკური გადაწყვეტილება დადებითი იყოს ჩვენი ქვეყნისთვის.
- რა რჩევა შეგიძლიათ მისცეთ ხელისუფლებას, რა ნაბიჯები უნდა გადადგას ამ მიმართულებით?
- ამ ყველაფრისთვის საჭირო არის ინტენსიური პოლიტიკური და დიპლომატიური მუშაობა. დაწყებული საელჩოების დონიდან, რომელთაც ზეპირად უნდა იცოდნენ, თუ რა არის გაკეთებული, ასევე უნდა იცოდნენ, თუკი არის რამე სახის გამოწვევა დარჩენილი. ასევე ყოველდღიურ რეჟიმში უნდა იცოდნენ წინსვლის შესახებ. საგარეო საქმეთა სამინისტრომ 28-ვე ქვეყანასთან უნდა იმუშაოს და ამ გზაზე მიიტანოს ჩვენი ქვეყნის წარმატების ამბავი. შემდეგი ნაბიჯი არის უფრო მაღალი ეტაპი, ვგულისხმობ ქვეყნის პირველ პირებს, რომელთაც უნდა ჰქონდეთ თავიანთ კოლეგებთან, პრეზიდენტებთან, პრემიერ-მინისტრებთან, პარლამენტის თავმჯდომარეებთან აქტიური კომუნიკაცია, რომ ეს საკითხი ყოველთვის აქტუალური იყოს და უმაღლეს დონეზე მოხდეს მისი ლობირება.
- ქალბატონო მაია, ცალკე პაკეტით რომ ვიყოთ წარმოდგენილი და არა _ აღმოსავლეთ პარტნიორობის ფორმატში, შეიძლება უკეთესი იყოს ჩვენთვის. შესაძლებელია, ამ კუთხითაც იყოს მუშაობა წარმოებული?
- როდესაც აღმოსავლეთ პარტნიორობის ფორმატი პირველად გაცხადდა, სადაც ექვსი ქვეყანა გაერთიანდა, ექვსივე ქვეყანას ერთნაირი სასტარტო პოზიცია ჰქონდა. შემდეგ, იმის მიხედვით, თუ რა ამბიციები აქვთ ამ ქვეყნებს და რა გეგმები, ზოგი დაწინაურდა და ზოგი ჩამორჩა ამ პროცესს.
- ჩვენ სად ვართ?
- საქართველო არის მოწინავეთა შორის, რადგან საქართველოს გაცხადებული მიზანი აქვს, რომ ევროკავშირის წევრი გახდეს.
მაია ფანჯიკიძის თქმით, 2015 წელს ევროკავშირმა შეიმუშავა აღმოსავლეთ პარტნიორობის ახალი დოკუმენტი, რომელიც გულისხმობს უფრო ინდივიდუალურ მიდგომებს. იმის მიხედვით, თუ რა მიზანი აქვს ქვეყანას, რა გეგმა და რა ამბიცია, მან შეიძლება ინდივიდუალურად მოირგოს ეს ფორმატი. „ეს არის ძალიან კარგი ჩვენთვის, რადგან ეს მიდგომა საქართველოს ახალ შანსებს უხსნის, რომ მაქსიმალური მიიღოს ამ არსებული ფორმატიდან. ამდენად, ჩათვალეთ, რომ ეს არის ინდივიდუალური პაკეტი. ახლა მთავარია, ამ გახსნილ შესაძლებლობებს ჩვენი ქვეყანა როგორ გამოიყენებს. ასევე ეს საერთო ფორმატი ერთმანეთში ურთიერთობაშიც გვეხმარება და კიდევ არის სტიმული, რომ დაწინაურებულ ქვეყნებს დაეწიონ, რასაკვირველია თუ ამის ამბიცია ექნებათ“, – აღნიშნავს მაია ფანჯიკიძე.
- დეკემბრის ბოლოსთვის თუ არ მოხდა შეფასების დოკუმენტის გამოქვეყნება და კიდევ გადაიდო, შეიძლება სხვა რეალობის წინაშე აღმოვჩნდეთ? თუ ფედერიკა მოგერინის განცხადება ძალაში დარჩება და ვიზების ლიბერალიზაციას მივიღებთ შენგენის ზონაში?
- მე მინდა ოპტიმისტი ვიყო, რადგან ეს საქართველოსთვის მართლაც უმნიშვნელოვანესი მოვლენაა და არ მინდა მოვლენებს წინ გავუსწრო. თუ 22-23 დეკემბრამდე ვერ მივიღეთ შეფასება ევროკომისიისგან და ეს პროცესი იანვრისთვის გადაიწევს, მაშინ გვექნება საფუძველი, რომ შევშფოთდეთ და დავიწყოთ მიზეზების კვლევა, მაგრამ მანამდე ყველას სიმშვიდისკენ მოვუწოდებ. რაც მთავარია, უნდა ვენდოთ ევროკავშირს. თუკი ის ამბობს, რომ ამ ყველაფერს ტექნიკური მიზეზი აქვს, ჩვენ უფლება არ გვაქვს, ევროკავშირის განცხადებაში ეჭვი შევიტანოთ. იმედი მაქვს, რომ ეს პროცესი წარმატებით დაგვირგვინდება.
„რეზონანსი“, 16 დეკემბერი, 2015 წელი
ინტერვიუ ანი მიროტაძესთან: „არ მგონია, ივანიშვილი საარჩევნო პერიოდში ვითარებას შორიდან დააკვირდეს”
სალომე სარიშვილი
საპარლამენტო უმრავლესობის წევრის, ანი მიროტაძის განცხადებით, “ქართული ოცნების” ცენტრალურ ოფისში გამართულ გუშინდელ უმრავლესობის სხდომაზე, რომელსაც ურავლესობის წევრებთან ერთად, ყოფილი და მოქმედი პრემიერ-მინისტრები ირაკლი ღარიბაშვილი და ბიძინა ივანიშვილი ესწრებოდნენ, მსჯელობა მხოლოდ ერთ კონკრეტულ საკითხზე – საარჩევნო კოდექსში შესატან ცვლილებებთან დაკავშირებით იყო.
დეპუტატის თქმით, უმრავლესობის სხდომაზე არც შეწყალების კომისიის ირგვლივ შექმნილი ვითარება განუხილავთ და არც სხვა პოლიტიკური საკითხები. მიროტაძის განცხადებით, მისთვის უცნობია, ჰქონდა თუ არა ექსპრემიერს ცალკეულ დეპუტატებთან სხვა თემებზე საუბარი.
საპარლამენტო უმრავლესობის წევრი მომავალ საარჩევნო კამპანიაში ყოფილი პრემიერ-მინისტრის ჩართულობას არ გამორიცხავს, თუმცა რა ფორმით შეიძლება ბიძინა ივანიშვილი წინასაარჩევნო პროცესში ჩაერთოს, ეს მისთვის ჯერჯერობით უცნობია. ამბობს, რომ საუბარი უმრავლესობის სხდომის ფორმატში არც ამ თემაზე ყოფილა.
გუშინდელი უმრავლესობის სხდომის შესახებ “რეზონანსი” ანი მიროტაძეს ესაუბრა.
- “ქართული ოცნების” ცენტრალურ ოფისში გამართულ უმრავლესობის სხდომას ყოფილი პრემიერ-მინისტრი ბიძინა ივანიშვილიც ესწრებოდა. მოკლედ რომ გვითრათ რა საკითხებზე იმსჯელეთ სხდომაზე უმრავლესობის წევრებმა.
- სხდომაზე ერთი ძირითადი საკითხი განვიხილეთ, რომელიც საკონსტიტუციო სასამართლოს გადაწყვეტილებას ოლქების გამოთანაბრებასთან დაკავშირებით ეხებოდა. მოგეხსენებათ, რომ საარჩევნო კოდექსში ცვლილებები უკვე ინიცირებულია და პირველი მოსმენით მიღებულია. აქედან გამომდინარე, ამ კვირაში ამ საკითხის დეტალური, მუხლობრივი განხილვა უნდა მოხდეს. იქ არის გარკვეული სოფლები, რომლებთა გარკვეულ ოლქებთან გაერთიანება იგეგმება. მაგალითისთვის გეტყვით, რომ რამდენიმე სოფელი შესაძლოა ყვარლის საარჩევნო ოლქში შევიდეს, რომელიც ლაგოდეხთან გაერთიანდება. უმრავლესობის სხდომაზე საუბარი მხოლოდ ამგვარ დეტალებზე იყო.
- საპარლამენტო უმრავლესობის ლიდერის, ზვიად კვაჭანტირაძის თქმით, ბიძინა ივანიშვილი “ქართული ოცნების” კოალიციურ და პარტიულ ღონისძიებებში აქტიურად ჩაერთვება. ხომ არ ყოფილა მომავალ საარჩევნო კამპანიაში მისი შესაძლო ჩართულობის შესახებ საუბარი?
- ვადასტურებ, რომ ამ შეხვედრას ბიძინა ივანიშვილი ესწრებოდა, თუმცა მას არც იმის შესახებ უთქვამს რაიმე, რომ საარჩევნო კამპანიაში ჩაერთვება და არც იმაზე უსაუბრია, თუ რა ფორმით იქნება ეს ჩართულობა მოსალოდნელი. მინდა გითხრათ, რომ შეხვედრაზე საარჩევნო კამპანიაზე საუბარი საერთოდ არ ყოფილა. ცხადია, ვგულისხმობ უმრავლესობის ფორმატში. თუკი მას ცალკეულ დეპუტატებთან ამ თემაზე რაიმე სახის საუბარი ჰქონდა, ეს ჩემთვის უცნობია. თუ ამ საკითხზე ჩემი აზრი გაინტერესებთ, შემიძლია საკუთარი პოზიცია ვარაუდის დონეზე მოგახსენოთ. ბატონი ბიძინა ჩვენი გუნდის წევრია. ამიტომ მგონია, რომ საარჩევნო პერიოდში არ დაჯდება და ვითარებას შორიდან არ დააკვირდება. თუმცა როგორ გააკეთებს ამას – როგორც რიგითი მოქალაქე, თუ უფრო აქტიურად ჩართული პირი, ამ საკითხზე არათუ არ გვიმჯელია, საერთოდ თემა არ წამოწეულა. ამიტომ ეს დროის საკითხია და მოვლენებს უნდა დაველოდოთ.
- გუშინ ოპოზიციაში გამოითქვა მოსაზრება იმის შესახებ, რომ ვიდრე შეწყალების კომისიის საკითხზე გამოძიება მიმდინარეობს, პარლამენტის ადამიანის უფლებათა დაცვის კომიტეტის თავმჯდომარემ ეკა ბესელიამ და ვიცე-სპიკემა მანანა კობახიძემ თანამდებობა დროებით უნდა დატოვონ. ამ თემაზე ხომ არ იყო საუბარი?
- სრული პასუხისმგებლობით შემიძლია გითხრათ, რომ გარდა საარჩევნო კოდექსში შესატანი ცვლილებებისა, რომელიც ოლქების გამოთანაბრებას უკავშირდება, სხვა თემაზე საუბარი არ ყოფილა. საარჩევნო კოდექსში შესატან ცვლილებებზე გარკვეულ საკითხებში აზრთა სხვადასხვაობა იყო, თუმცა საბოლოოდ ყველანი შევჯერდით.
„ალია“, 16 დეკემბერი, 2015 წელი
ინტერვიუ მურმან დუმბაძესთან: საიდან იშოვა მილიარდები და რისთვის დააჯარიმეს «ბედნიერი საქართველოს“ ლიდერი ლეონიდ ჩერნოვეცკი?
ნინო სამხარაძე
კიევის ყოფილი მერი ლეონიდ ჩერნოვეცკი, რომელმაც პარტია „ბედნიერი საქართველოსთვის“ დააანონსა, დამფუძნებრლი ყრილობის მოსამზადებლად საინიციატივო ჯგუფთან ერთად მუშაობს. როგორც ირკვევა, მურმან დუმბაძის ტელეფონზე შედის უამრავი სმს-გზავნილი, რომ მან ლეონიდ ჩერნოვეცკიზე გაიყვანოს კონკრეტული პოლიტიკოსები, თუმცა დუმბაძე არ ასახელებს მათ ვინაობას, ვისაც აქვს სურვილი, გაერთიანდეს კიევის ყოფილი მერის პოლიტიკურ გუნდში. ვინ გაერთიანდება მასთან, არსებობს სია, მაგრამ პერსონალიების გაჟღერებისგან ჯერ თავს იკავებენ.
მაშ ასე, როგორ მოხდა მურმან დუმბაძესთან დაკავშირება და რატომ არჩია ლეონიდ ჩერნოვეცკიმ დუმბაძე? იცის თუ არა ბატონმა მურმანმა, რა ბრალდებები წაუყენეს საკუთარ ქვეყანაში კიევის ყოფილ მერს, რატომ ედავებიან მას კორუფციაში, ნარკოტიკების მოხმარებაში და საერთოდ, რა იცის ამ პიროვნების შესახებ? ამ და სხვა კითხვებზე „ალიას“ თავად მურმან დუმბაძეპასუხობს…
- რატომ აგირჩიათ ჩერნოვეცკიმ, ვისი საშუალებით დაგიკავშირდათ და რა ენაზე ესაუბრეთ მას?
- მას შემდეგ, რაც ლეონიდ ჩერნოვეცკიმ პარტიის შექმნა დააანონსა, დამიკავშირდა მისი თანაშემწე გიორგი ქვრივიშვილი. ბატონ ლეონიდთან საუბარი არის ძალიან მარტივი იმ თვალსაზრისით, რომ ის არის ჩამოყალიბებული პოლიტიკოსი, ის გახლდათ რადას დეპუტატი, ორჯერ კი – არჩეული წესით კიევის მერი, მან იცის საპარლამენტო ცხოვრება, ორგანიზაციული სტრუქტურა და ყველა დეტალში ჩახედულია. რაც მთავარია, მას გული შესტკივა საქართველოში არსებულ სიღარიბეზე. საუბრისას მითხრა, – მიუხედავად იმისა, რომ კიევში არის სამოქალაქო ომი, დაძაბულობა, რუსეთის მხრიდან აგრესიული ქმედებები, კიევი ეკონომიურად გაცილებით წელგამართულია, ვიდრე საქართველო. მას ძალიან სწყდება გული სიღარიბეზე. თქვენ გაინტერესებთ, რა ენაზე მესაუბრა იგი… მესაუბრებოდა რუსულად, თუმცა ესმის ქართული და სწავლობს ქართულ ენას…
- წლების მანძილზე ის ქართველების სიძე იყო - კაცი, რომელიც ქართულ პოლიტიკაში მოდის, ოკუპანტის ენაზე არ უნდა საუბრობდეს, ეს არის ქართველებისადმი უპატივცემულობა… მაგალითად, დავით ჟვანიამ სანამ უკრაინული არ ისწავლა, არ გასჩენია პოლიტიკაში მოსვლის ამბიცია. მან ერთხელ ჩემთან ინტერვიუში ისიც თქვა, რომ, როცა უკრაინაში პოლიტიკოსი რუსულად საუბრობს, ეს უკრაინელების შეურაცხყოფააო…
- მას საქართველო ძალიან უყვარს, მისი პირველი მეუღლე საქართველოდან იყო, მისი შვილები ქართული წესით არიან გაზრდილები, საქართველოს ყოველი კუთხე-კუნჭული ზეპირად იცის…
- მას ბიზნესინტერესები აქვს გუდაურსა და ბაკურიანში და მოგზაურობა მისი გატაცებაა, საქართველოს სიყვარულთან ამას რა კავშირი აქვს?
- ამით იმის თქმა მინდა, რომ ბატონი ლეონიდი საქართველოს საკმაოდ კარგად იცნობს. თქვენ, როგორც ჟურნალისტი, სწორად იქცევით, რომ ადამიანს, რომელიც პოლიტიკაში მოსვლას აანონსებს, გამადიდებელი შუშით უყურებთ, თუმცა ჩემთვის გადამწყვეტი მნიშვნელობა ჰქონდა მის საგარეო ვექტორს და ორიენტაციას, ეს იქნება ევროპული ორიენტაციის პარტია და ბატონი ლეონიდი ამბობს, რომ ჩვენი პოლიტიკური და ეკონომიკური განვითარება უნდა მოხდეს ევროპული გზით. მასთან საკმაოდ ხანგრძლივი შეხვედრა მქონდა, რა ნიშნით შემარჩია, მისთვის არ მიკითხავს, ჩვენ ვისაუბრეთ ბევრ საკითხზე, საკადრო პოლიტიკიდან დაწყებული, საპარლამენტო მუშაობით დასრულებული… მან თქვა, რომ 10-მილიარდიანი ბიუჯეტის პირობებშიც კი შესაძლებელია დაიძლიოს საქართველოში სიღარიბე, თუკი სწორად დაიხარჯება თანხები. ის ამბობს, რომ გაბერილია სამინისტროების რაოდენობა. ეს კარგად გასააზრებელი საკითხია. ხელისუფლება ფუფუნებაში ცხოვრობს, ხალხი მშეიერია, პრემიების, დანამატების შემცირებით შესაძლებელია სოციალური პროექტების დაფინანსება. მოვიდა დრო, რომ პიროვნებების კვალდაკვალ პოლიტიკოსებმა ერთმანეთში პროგრამებით იდავონ, ამიტომ უახლოეს დღეებში ჩვენი მთავარი ამოცანაა საინიციატივო ჯგუფის შექმნა, რომელიც დამფუძნებელ ყრილობას მოამზადებს.
- ვინ შევა საინიციატივო ჯგუფში?
- გვარების დასახელების ინიციატივა ჩერნოვეცკის დავუტოვოთ, გეტყვით, რომ ეს იქნება საკმაოდ კონკურენტუნარიანი პარტია.
- გამოდის, რომ ჩვენ ვეწევით ძებნილების, სისხლის სამართლის დამნაშავეების ექსპორტსა და იმპორტს, ქვეყნიდან გაგვექცა სააკაშვილი უკრაინაში და სანაცვლოდ ქართულ პოლიტიკაში მივიღეთ ძებნილი, პოლიტიკოსი, რომლის დაპირებებზეც კიევში ანეკდოტები დადის…
- მე ასე არ ვიტყოდი, ლეონიდ ჩერნოვეცკი ბოლო რამდენიმე წლის განმავლობაში საქართველოს მოქალაქეა, მას საქართველოს მოქალაქეობა მიანიჭა პრეზიდენტმა მარგველაშვილმა…
- ბატონო მურმან, მინდა ჩაგიტაროთ ერთგვარი ტესტი და გავიგო, რა ინფორმაციას ფლობთ თქვენი პოლიტიკური ლიდერის შესახებ?
- ვიცი, რომ უკრაინაში მას შოთა რუსთაველის ძეგლი აქვს დადგმული, უფასოდ გადასცა მიწა საქართველოს საელჩოს კიევში. მე ვიცი, რომ უკრაინაში დაღუპულ ქართველ ჟურნალისტ გიორგი ღონღაძეს მემორიალი დაუდგა…
- ბატონო მურმან, საკუთარი ცოდვების მოსანანიებლად ე.წ. კანონიერი ქურდებიც აშენებენ ეკლესიებს, მაგრამ ეს მათ ღირსებას არ მატებს… როგორც ვხვდები, ამ პიროვნების პოლიტიკურ ბიოგრაფიას არ იცნობთ. ეს პიროვნება არის ეპატაჟური, მეტსახელად „ლიონია კოსმოსს» ეძახიან, თავის დროზე „ნიუ-იორკ ტაიმსიც“ წერდა, რომ ჩერნოვეცკის ოცნება იყო თავის კატასთან ერთად კოსმოსში გაფრენა… ფრთხილად იყავით, ემანდ, თქვენთან ერთად არ მოინდომოს კოსმოსში გაფრენა… იგივე გაზეთი ასევე წერდა, რომ უკრაინელები მას „გიჟს“ ეძახდნენ და დაპირებებს სიმღერით გასცემდა… ახლა როგორ არის თქვენი საქმე, პენსიონერებს სიმღერით აუხსნით, როგორ გაუზრდით მათ პენსიას 500 ლარამდე? რატომ გვეკაიფებით ეს პოლიტიკოსები, ბატონო მურმან?
- ქალბატონო ნინო, აქ არის ძალიან მარტივი პასუხი, ე.ი. ამომრჩეველს, ვისაც სჯერა, რომ ამ პიროვნებას რაღაც სარგებლის მოტანა შეუძლია საქართველოსთვის, ასეთი ამომრჩეველი მივა საარჩევნო ყუთთან და ხმას მისცემს პარტიას „საქართველოს ბედნიერებისთვის“. ჩვენ არ ვფიქრობთ, რომ 2 მილიონ-ნახევარი ამომრჩეველი ხელებს დაიკაპიწებს და საარჩევნო ურნასთან 2016 წლის ოქტომბერში უკლებლივ ჩვენ მოგვცემს ხმას… მაგრამ, გარწმუნებთ, რომ „ბედნიერი საქართველო~ იქნება ის ძალა, რომელიც ღია კონკურენციაში შევა არა მარტო კოალიცია „ქართულ ოცნებასთან, არამედ არსებულ პოლიტიკურ სპექტრთან და საკმაო რაოდენობით აღმოვჩნდებით პარლამენტში… მე უფრო მეტად ის მაინტერესებს, რატომ უკრძალავს საქართველოს მთავრობა ლეონიდ ჩერნოვეცკის საქველმოქმედო საქმიანობას…
- ამ საკითხზე ლეონიდ ჩერნოვეცკიმ ჯანდაცვის სამინისტროსგან ამომწურავი პასუხი მიიღო… მან თვითნებურ ქველმოქმედებას მიჰყო ხელი ისე, რომ სამინისტრო საქმის კურსში არ ჩაუყენებია.
- დიახ, მან ბავშვთა თავშესაფარი გააკეთა, მაგრამ ჯანდაცვის სამინისტრო ამბობს, რომ მისი ქმედება კანონთან შეუსაბამოა. საქართველოს კანონის მიხედვით მზრუნველობამოკლებული ბავშვი უნდა იზრდებოდეს ან მშობელთან, ან მიმღებ ოჯახში… საქმე ის არის, რომ ბავშვთა თავშესაფარის გამო ჩერნოვეცკის საქველმოქმედო ფონდი „სოციალური პარტნიორობა“ დააჯარიმეს…
- დააჯარიმეს, სულ რაღაც, 2000 ლარით, ეს კაცი „ფორბსის“ სიაში უკრაინელ მილიარდერთა ასეულში შედიოდა… საიდან დააგროვა სახელმწიფო მოხელემ მილიარდები? თქვენ ჩერნოვეცკისთვის ეს კითხვა არ დაგისვამთ?
- კარგი კითხვაა… როცა ბატონ ბიძინა ივანიშვილთან მივედი, ეს კითხვა არც მისთვის დამისვამს, თუ საიდან იშოვა მილიარდები…
- ბიძინა ივანიშვილი საჯარო მოხელე არასდროს ყოფილა და შესაბამისად, ამ კითხვის დასმა სწორი არ იქნებოდა… პარალელს ნუ ავლებთ ჩერნოვეცკისა და ივანიშვილს შორის, მე კონკრეტულად გეკითხებით, საიდან იშოვა მილიარდები უკრაინის სახელმწიფო მოხელემ?
- თუ პიროვნება კანონის ფარგლებში მოქმედებს და კანონი საშუალებას აძლევს, დააგროვოს ფული, ღმერთმა ხელი მოუმართოს. ჩემი ამოცანაა, საქართველოს ჰყავდეს მეტი მილიარდერი… მე მასთან არ მილაპარაკია კონკრეტულ თემებზე, კერძოდ კი, მისი ცხოვრების უკრაინული ნაწილით არ დავინტერესებულვარ.
- ბატონ ლეონიდს კიევის ახლანდელი მერი ვიტალი კლიჩკო ბრალს სდებს კორუფციულ გარიგებებში, მიწების გასხვისებაში, ჯერ კიდევ 2008 წელს იმუქრებოდა, რომ მას აუცილებლად ჩასვამდა ციხეში. ჩერნოვეცკი ჯერ ისრაელს აფარებდა თავს, ხოლო შემდეგ უკრაინის ხელისუფლების ძებნილი საქართველოში ჩამოვიდა, რადგან ის ახლო ურთიერთობაში იყო მიხეილ სააკაშვილთან...
- მე როგორც ვიცი, ვიტალი კლიჩკომ ბოდიში მოუხადა ლეონიდ ჩერნოვეცკის, ეს მან თავად მითხრა. საქართველოს სახელმწიფოს უკრაინასთან აქვს სტრატეგიული ურთიერთობა, ერთ-ერთი მოკავშირე სახელმწიფოა ჩვენი, ხომ მართალია?
- გააჩნია, რა შემთხვევაში… მიხეილ სააკაშვილი სისხლის სამართლის დამნაშავეა და მისი დაჯგუფება უკრაინის ხელისუფლებას აფარებს თავს, ამის შემდეგ შეიძლება ვთქვათ, რომ უკრაინის დღევანდელი ხელისუფლება ჩვენი მოკავშირეა?
- მაშინ, გამოდის, რომ საქართველოს მთავრობა კანონგარეშე იქცევა და დღევანდელი ხელისუფლება კანონის მიღმა მოქმედებს? ეს შეკითხვები უნდა დავუსვათ საგამოძიებო ორგანოებს, რომელთაც ევალებათ, კანონი აღასრულონ საქმის ამ ნაწილში. ჩემი ინტერესია, რომ გვერდით დავუდგე ადამიანს, რომელმაც სამი წლის განმავლობაში საქართველოსთვის ბევრი სიკეთე გააკეთა. მე ვუფასებ იმ შრომას, რაც მან გასწია, უამრავი ბავშვი გადაარჩინა, მოხუცებს უვლის, პატრონობს. რაც შეეხება კრიმინალურ ნაწილს, დანაშაულს, კანონის მიღმა მოქმედებას, ეს არის სპეციალური ორგანოების გადასაწყვეტი საქმე და არა ჩემი…
- ლეონიდ ჩერნოვეცკი ერთ-ერთ ინტერვიუში თავად ამბობს, რომ «გიჟს“ ეძახიან, როგორ შეატყვეთ პირად საუბარში, გიჟია?
- მიხეილ სააკაშვილი მეც გიჟს მეძახდა. ასე რომ, ეს ეპითეტები პოლიტიკაში დამახასიათებელია, ვინც პოლიტიკაში შედის, ყველაფრისთვის მზად უნდა იყოს.
- ბატონო მურმან, მოდით, მოვითხოვოთ, ამ ადამიანმა ნარკოლოგიური შემოწმება გაიაროს, რადგანაც, უკრაინის შინაგან საქმეთა ყოფილი მინისტრი ნარკომანს ეძახდა, რის გამოც უხერხულ ადგილას წიხლი მიიღო ჩერნოვეცკისგან...
- მინდა გითხრათ, რომ ფიზიკურად ლეონიდ ჩერნოვეცკი არის ძალიან მომზადებული, ათლეტური, ნარკომანობისა მას არაფერი ეტყობა, ეს არის ჭორი. ის ძალიან დიდ დროს უთმობს სპორტს…
- სხვათა შორის, როცა კიეველმა ექიმებმა განაცხადეს, რომ მას აქვს გადახრები და ფსიქიკური პრობლემები და მის ნარკომანობაზე მიდგა საქმე, ლეონიდ ჩერნოვეცკიმ ტელეკამერების წინ გაიხადა და საცვლის ამარა „ბოდი ბილდინგი» ჩაატარა…
- ჩვენ ხომ ღიაობა გვინდა და ესეც ღიაობის ერთ-ერთი მეთოდია.
„ალია“, 16 დეკემბერი, 2015 წელი
„მარგველაშვილი ახალ პოლიტიკურ ჯგუფს ქმნის, რომელიც, რატომღაც, ასეთი ფორმით იწყებს არენაზე გამოსვლას»
არასამთავრობო ორგანიზაცია «ყოფილი პოლიტპატიმრები – ადამიანის უფლებებისთვის» თავმჯდომარე ვარაუდობს, რომ ალეკო ელისაშვილის განცხადებები, კორუფციულ სქემასთან დაკავშირებით, ახალი პოლიტიკური ძალის შექმნის წინაპირობაა.
როგორც ნანა კაკაბაძე აღნიშნავს, სავარაუდოდ, პრეზიდენტი გიორგი მარგველაშვილი, წინასაარჩევნოდ ახალ პოლიტიკურ ჯგუფს ქმნის. ნანა კაკაბაძე მიიჩნევს, რომ კორუფციაზე საუბრის დაწყებამდე ელისაშვილი ჯერ უნდა დაინტერესებულიყო, იყო თუ არა პოლიტიკური საფუძვლები იმ ადამიანების საქმეებში, რომლებსაც მოგვიანებით პარლამენტმა პოლიტპატიმრის სტატუსი მიანიჭა.
„რა ინტერესი აქვთ, ძალიან მალე გამოჩნდება. მგონია, რომ ახალი პოლიტიკური გადაჯგუფებები იწყება და არჩევნების წინ რაღაც ახალი პოლიტიკური გაერთიანება კეთდება მარგველაშვილის ირგვლივ. მე მესმის საზოგადოების, რომ აი, ამხილა კორუფციაში… – ბუნებრივია, საზოგადოების გულის მოგება ამითი დროებით მოხდება, მაგრამ გაივლის დრო და ეს ყველაფერი ზედაპირზე აღმოჩნდება. მე არ მგონია, რომ რომელიმე პოლიტიკური ძალა, თუნდაც ახალი პოლიტიკური ძალა, ასეთნაირად უნდა იმკვიდრებდეს თავს. ყველაფერი უნდა ეფუძნებოდეს სამართლიანობას. ჯერ დაამტკიცე, რომ ეს ასეა და მერე ილაპარაკე და არა წინმსწრებად, პირდაპირ რომ შეფასებებს აკეთებ და მტკიცებულებებს არ დებ. ძალიან ცუდია, რომ ასეთი სახით ფიქრობს ახალი პოლიტიკური ძალა არენაზე გამოსვლას. ეს არის ჩემი ვარაუდი. შეიძლება ეს ასე არ არის და სხვა რამ დევს ამის უკან, მაგრამ ჯერჯერობით, მე მგონია, რომ მარგველაშვილი თავის ირგვლივ ახალ პოლიტიკურ ჯგუფს ქმნის, რომელიც, რატომღაც, ასეთი ფორმით იწყებს არენაზე გამოსვლას.
მე არ ვიცი, რა ხდებოდა შეწყალების კომისიაში და არ გამოვრიცხავ, რომ ნებისმიერ სიტუაციაში, შესაძლებელია, არსებულიყო კორუფცია, მაგრამ ჩემთვის არ არის საკმარისი ის მოტივები, რასაც ელისაშვილი ამბობს, რომ წელიწად-ნახევრის განმავლობაში მალავდა ამ ინფორმაციას, როდესაც მან გადასარევად იცოდა პროცედურები, როგორ უნდა მომხდარიყო ამის მხილება, თუკი მას ამის არგუმენტები გააჩნდა. ალბათ, იქნება გადასვლებიც. იმის წინააღმდეგი არ ვარ, რომ ახალი პოლიტიკური ძალა გაჩნდეს – გაჩნდეს, ბატონო, უბრალოდ, არ არის ლამაზი ასეთი ფორმით გამოსვლა არენაზე. მესმის, რომ უცბად ატყდა დიდი პიარი, მაგრამ მიზნისთვის არ შეიძლება ყველა გზა იყოს გამართლებული“, – განაცხადა კაკაბაძემ.
„ალიას“ კომენტარი:
აბა, რაღა გვიჭირს აწი, თუ მორიგი პარტია შეემატა ქართულ პოლიტიკურ სივრცეს - ხალხისთვის ტვინის ბურღვის კიდევ ერთი საშუალება გაჩნდება. ისე, ქალბატონო ნანა, მოგიბრუნდებათ მარგველაშვილი ან რა ვიცით, ვინც მის პარტიაში შევა (თუ საერთოდ გამოჩნდა მსგავსი რამ) და გეტყვით - „ნაცმოძრაობა“ „ვარდების რევოლუციით“, ხოლო „ქართული ოცნება“ „ციხის კადრების» გასაჯაროებით თუ მოვიდა ქვეყნის სათავეში, ჩვენ რა პეწი გვირევია, უკვე აპრობირებული მეთოდი რომ არ გამოვიყენოთო და პრინციპში, მართლებიც იქნებიან. საერთოდაც, ნამეტანი ბინძური რამეა ეს ოხერი პოლიტიკა და ყველა თავისებურად ცდილობს ხალხის გადარევა-გადაბირებას, რაც ძალიან კი არ მოგვწონს, მაგრამ მაინც ეჭვი გვეპარება, მარგველაშვილი პარტიის შექმნას აპირებდეს – ამდენი ხანია, ხმა არ ამოუღია ამსკანდალზე. უფრო მეტიც, მან კარგა ხნის წინ მიიღო ელისაშვილისგან ინფორმაცია ზოგიერთების მამაძაღლობების შესახებ, თუმცა თქვა რამე? არა, ბატონო, არ აიტკივა თავი და ვითომ, უახლოეს მომავალში იზამს რამეს? რა ვიცი, რა ვიცი..
„ახალი თაობა“, 16 დეკემბერი, 2015 წელი
ინტერვიუ გიორგი ვაშაძესთან: „მანანა კობახიძის და ეკა ბესელიას ბედი ივანიშვილის ხელშია“
„ახალ თაობასთან“ ინტერვიუში შეწყალების კომისიის ირგვლივ ატეხილ აჟიოტაჟს „ნაციონალური მოძრაობის“ ერთ-ერთი ლიდერი, გიორგი ვაშაძეც, ეხმაურება. „ვიდრე ალეკო ელისაშვილი გააკეთებდა განცხადებებს, მანამდეც იყო ამაზე საუბარი, რომ ეს ადამიანები, ბესელია და კობახიძე, ჩართულები იყვნენ ამ შეწყალების კომისიის საქმეში. არა მარტო საუბარი იყო, თავის დროზე, ე.წ. პოლიტპატიმრების სიები რომ გააკეთეს, იქ ძალიან ბევრი საეჭვო ადამიანი მოხვდა. ისიც დიდ ეჭვს იწვევდა, რომ მაინცდამაინც მათი დაცვის ქვეშ მყოფი პირები მოხვდნენ შეწყალებულთა თუ პოლიტპატიმრების სიაში, – აცხადებს ვაშაძე `ახალ თაობასთან~ ინტერვიუში.
- საუბარია, რომ ეს მიზანმიმართული და ცილისმწამებლური პროცესია.
- ეჭვები დიდია. საქართველო პატარა ქვეყანაა და არაფერი იმალება! შემთხვევით ასეთი საკითხები არ წამოიწევს ხოლმე. პირდაპირ გეტყვით, რომ მე ალეკო ელისაშვილის განცხადებას უფრო ვენდობი, ვიდრე ეკა ბესელიას და მანანა კობახიძის განცხადებებს.
- რატომ ენდობით ელისაშვილს უფრო მეტად? რადგან თქვენს მოსაზრებებს ემთხვევა?
- არა იმიტომ, რომ ჩვენს მოსაზრებებს ემთხვევა. ღიად გეტყვით, ელისაშვილი უფრო ისეთი ტიპაჟია, რომელიც შემთხვევითობით და უბრალო დაბრალებებით არ შემოიფარგლება ხოლმე. თითქოს უნდა, რომ რაღაც გულწრფელად თქვას. არაერთი მკაცრი განცხადება გაუკეთებია ნაციონალურ მოძრაობაზეც, რომლებიც ხშირად არ მომწონებია. გადაწყვიტა ადამიანმა ისაუბროს იმ პრობლემაზე, რასაც ხედავს.
- იმაზეც საუბრობენ, რომ ალეკო ელისაშვილი თქვენს ინტერესს ემსახურება.
- ეს საბავშვო ბაღის დონის არგუმენტია. ყველა ოპოზიციურად განწყობილ ადამიანს და ყველას, ვინც აქტიურად არის ჩართული პოლიტიკურ ცხოვრებაში, აქვს საკუთარი აზრი. ვფიქრობ, რომ ზუსტად გარკვეულ ფაქტებზე დაყრდნობით გამოთქვა ეს აზრი ელისაშვილმა, რომელიც იყო ამ კომისიაში. მე უფრო სხვა რამეზე მინდა გავამახვილო ყურადღება.
- რაზე?
- ამ პროკურატურის საერთოდ არ მჯერა.
- თქვენი დროინდელი პროკურატურა ჯობდა?
- მე დღევანდელ პროკურატურაზე ვსაუბრობ, რომელიც მიკერძოებული და პოლიტიზებულია და არის პირდაპირ ბიძინა ივანიშვილის გავლენის და მართვის ქვეშ. ბესელიას და კობახიძის ბედი დამოკიდებულია ერთადერთ ადამიანზე, ეს გახლავთ ბიძინა ივანიშვილი.
- ივანიშვილი რა შუაშია?
- თუ ის გადაწყვეტს, რომ ამ ადამიანებმა პასუხი აგონ მათ მიერ ჩადენილ ქმედებაზე, აგებენ პასუხს, ხოლო თუ გადაწყვეტს და შეიწყალებს, მაშინ ამ ადამიანებს სისხლის სამართლის პასუხისგებაში არ მისცემს. ყველაფერი დამოკიდებულია მის ნებაზე. სწორედ ამიტომ არის ასეთი არანორმალური პროცესი საქართველოში.
- არანორმალურში რას გულისხმობთ?
- რა მნიშვნელობა აქვს, პროკურატურაში მივა ელისაშვილი, მივა ბესელია თუ კობახიძე, ან თუნდაც ღარიბაშვილი მივიდეს. ამას მნიშვნელობა არ აქვს. მხოლოდ ერთი კაცის აზრს აქვს მნიშვნელობა, რომელიც იტყვის ან – ასე, ან – ისე. როგორ გადაწყვეტილებასაც მიიღებს, სწორედ ისე იქნება კობახიძისა და ბესელიას ბედი.
- გჯერათ, რომ მათ სერიოზული თანხა აიღეს?
- მე უდანაშაულობის პრეზუმპციას არ დავარღვევ, მიუხედავად იმისა, რომ თავად ეს ადამიანები ხშირად არღვევენ ხოლმე უდანაშაულობის პრეზუმპციას. თქვენს კითხვაზე კი პირდაპირ გეტყვით, რომ მაქვს სერიოზული ეჭვი. ეს პირველად არ ხდება, როცა ბესელიასა და კობახიძეზე ასეთ რამეს ამბობენ. ეს ეჭვები და ეს საუბრები აქამდეც იყო. წესით, აქამდეც უნდა დაინტერესებულიყო ამ საქმით კომისია. დაველოდოთ, რა მოხდება. თუმცა დღეს ეს ყველაფერი დამოკიდებულია არა სამართლიან სასამართლოზე, არა პროკურატურაზე, არამედ ბიძინა ივანიშვილის განწყობებსა და გადაწყვეტილებებზე.
- როდესაც კოკაინის გახმაურებულ საქმეზე მიდის საუბარი, კეთდება განცხადებები, რომ ეს ნარკოტიკი მათ ნაციონალების დავალებით ჩაუდეს, რომ თქვენი ხელისუფლება ყოველთვის ასე მუშაობდა და რომ უმეტესად უდანაშაულო ადამიანები ისხდნენ ციხეში. ამაზე რას უპასუხებთ?
- რამდენი ჩაუდეს, ხომ ვერ მეტყვით? ორ კილო ნარკოტიკზეა საუბარი! საერთოდ რაზე ლაპარაკობენ? ვინმემ რომ თქვას, რომ სამი გრამი კოკაინი ვიღაცას ჩაუდეს და დააკავეს, ეს კიდევ მესმის, მაგრამ ორი კილო?! ან რა პოლიტიკური ღირებულებების იყო ის, ვინც დააკავეს? ვის რა ინტერესი უნდა ჰქონოდა მის მიმართ? ჰქონდა მას რამე ღირებულება? ორი კილო კოკაინი რომ ვინმემ ჩაუდოს ვინმეს, რაღაც ღირებულება ხომ უნდა ჰქონდეს ამ ადამიანს?! არავისთვის ნაცნობი ადამიანი არ არის და ვლაპარაკობთ ორი კილო კოკაინის ჩადებაზე! ეს, უბრალოდ, სასაცილოა. ამის დაბრალება ალბათ მსოფლიო პრაქტიკაში არ იქნება, როგორ უნდა ჩაუდო ორი კილო კოკაინი?! ეს ძალიან დიდი რაოდენობაა.
- გადაიყოლებს ეს სკანდალი „ოცნებას“?
- ყველა, ვინც არის „ოცნებაში“, პარლამენტში, მთავრობაში, ყველა არის ნულ პროცენტიანი! ერთადერთი, რასაც აქვს პროცენტი, არის ბიძინა ივანიშვილის ფული! ამ ფულს აზის ბიძინა ივანიშვილი, რომელიც გადაწყვეტს – ვის სიკვდილი, ვის ჩამოხრჩობა! მორჩა და დამთავრდა, რეალური სურათი ასეთია!
- რა ხდება ნაციონალურ მოძრაობაში? გვახსოვს გასული კვირა, როგორი სკანდალი აგორდა ფარულ მოსმენებთან დაკავშირებით. გამოქვეყნდა თქვენი ფარული ჩანაწერიც. იშლება ნაცმოძრაობა, რეალურად არსებობს დაპირისპირება თუ რა ხდება თქვენს შორის?
- ნაციონალურ მოძრაობაში რომ სერიოზული აზრთა სხვადასხვაობაა, ეს ახალი არ არის. ამის შესახებ არაერთხელ მითქვამს. თუ ყველაფერი კარგად არის აწყობილი პოლიტიკურ ორგანიზაციაში, ასეთი აზრთა სხვადასხვაობა და კამათი პრობლემას არ ქმნის, პირიქით, ეს ჯანსაღი პროცესია. რაც შეეხება მოსმენებს, პირდაპირ გეტყვით, რომ არც ვაპირებ ამაზე კომენტარის გაკეთებას.
- არ არის ეს საუბარი ავთენტური?
- ჩემი საუბარიც გამოქვეყნდა და გეტყვით, რომ ეს იყო რამდენიმე საუბრისგან, რამდენიმე ეპიზოდისგან შეკრული საუბრები. ადამიანი უშუალოდ საუბარში რას იტყვის და როგორ იტყვის, ამას სხვა ყური რომ უსმენს, ეს ცუდი მოსასმენია. მარტო სხვისთვის კი არა, პირადად შენთვისაც რთული მოსასმენია. ფაქტი ის არის, რომ ხელისუფლება გვისმენს. მას უარი არ უთქვამს მოსმენებზე. ახლა, უბრალოდ, დაამუღამეს რუსეთში რეგისტრირებულ საიტებზე ამ ყველაფრის ატვირთვა, რომელზეც ამბობენ, უკრაინულიაო, რაც ძალიან სასაცილოა. უკრაინას არაფერში სჭირდება და არ აინტერესებს ამ ტიპის საუბრების გამოქვეყნება. საქართველოს ხელისუფლებას ამ საკითხში რუსეთი ეხმარება.
- პარტიის თავმჯდომარეზე უარი თქვით, რატომ, შეუცვლელია სააკაშვილი?
- პოლიტსაბჭოს სხდომის შემდეგ გაკეთდა განცხადება, რომ ჩვენ არ ვაპირებთ თავმჯდომარის არჩევნების ჩატარებას. ეს პოსტი ვაკანტურია. არ ეყოლება პარტიას თავმჯდომარე და მორჩა! გვყავს პოლიტიკური საბჭო, პოლიტიკური საბჭოს თავმჯდომარე, იმდენი თანამდებობა გვაქვს ნაციონალურ მოძრაობაში, რომ უთავმჯდომარეობას როგორმე ავიტანთ.
„ახალი თაობა“, 16 დეკემბერი, 2015 წელი
ინტერვიუ ზაზა დავითაიასთან: „ალეკო ელისაშვილის სკანდალი „ნაციონალებს“ ცუდად შეუბრუნდება“
რას ითხოვენ ყოფილი პოლიტპატიმრები პარლამენტისგან, ვინ ერეოდა უხეშად პოლიტპატიმრების სიის შედგენაში, რისი ეშინიათ ნაციონალებს? -ამის შესახებ „ახალ თაობას“ ყოფილი პოლიტპატიმარი, „ასავალ დასავალის“ ჟურნალისტი ზაზა დავითაია ესაუბრება.
„ისევე, როგორც მედალს, ალეკო ელისაშვილის სკანდალურ განცხადებასაც ორი მხარე აქვს. მე, როგორც ყოფილ პოლიტპატიმარს, მისი განცხადების მიმართ პროტესტი გამიჩნდა. ჩემი თანამოაზრეების მსგავსად, მეც ვფიქრობ, რომ ეს ყველაფერი ემსახურება პოლიტპატიმრების წინააღმდეგ საზოგადოებრივი აზრის შექმნას. ეს პროცესი ნაციონალური მოძრაობის მიერ იმართება. ყოფილი ხელისუფლების წარმომადგენლები მიიჩნევენ, რომ პოლიტპატიმრების თემის დისკრედიტაციით საკუთარი თავის რეაბილიტაციას შეეცდებიან. ასე ნამდვილად არ მოხდება და ალეკო ელისაშვილის აგორებული სკანდალი მათ ცუდად შეუბრუნდება», – ამბობს ზაზა დავითაია.
- რატომ გგონიათ, რომ ეს სკანდალი მათ შეუბრუნდება ცუდად?
- ყოფილმა პოლიტპატიმრებმა უკვე ოფიციალურად მოითხოვეს მათი საქმეების ხელახალი გამოძიება. არ გამოვრიცხავ, რომ, შესაძლოა, რამდენიმე ადამიანს მართლაც არ ეკუთვნოდა პოლიტპატიმრის სტატუსი, მაგრამ ვერავინ დამაჯერებს, რომ მათი სიაში ჩასმით ვინმემ ფული აიღო. ყოფილი პოლიტპატიმრების საქმეების ხელახალი გამოძიება ბევრ რამეს მოჰფენს ნათელს.
- საქმეების ხელახალ გამოძიებას ყველა ეთანხმება თუ გამონაკლისებიც არიან?
- წესით, ყველა უნდა დათანხმდეს. ვინც ამაზე უარს იტყვის, დაადასტურებს, რომ პოლიტპატიმრის სტატუსის ტარების ღირსი არ არის. ხელისუფლებამ რაც შეიძლება მალე უნდა დაიწყოს ამ საქმეების გამოძიება. ეს ძნელი არ უნდა იყოს, რადგან სულ 190 საქმეზეა საუბარი. პარლამენტმა სულ 190 ადამიანს მიანიჭა პოლიტპატიმრის სტატუსი. მოქმედმა ხელისუფლებამ ისედაც დიდი შეცდომა დაუშვა, როცა ეს საქმე შუა გზაში მიატოვა და მხოლოდ სტატუსი მიანიჭა, მათი უკანონოდ დაპატიმრების გამო კი დამნაშავე მოსამართლეებსა და პროკურორებს პასუხი არ აგებინა. გამოიძიონ ეს საქმეები და თუ აღმოჩნდება, რომ ვიღაც მართლა კანონიერად იჯდა ციხეში, მათი ბრალეულობა ნაციონალებს პოლიტიკურ ქულად ჩაეწეროთ. დარწმუნებული ვარ, რომ ამ სტატუსის მატარებელი ადამიანების აბსოლუტური უმრავლესობა გამართლდება ობიექტური სასამართლოს წინაშე. ამით სისტემური დანაშაულის მხილებაც მოხდება. ელისაშვილის განცხადება, კიდევ გეუბნებით, ცუდად შეუტრიალდება ნაციონალებს და მათთან კოაბიტირებულ მეოცნებეებს.
- ზაზა, თქვენ 190 ადამიანის საქმის გადახედვას ითხოვ, მაგრამ არაფერი გითქვამთ იმ ადამიანებზე, რომლებმაც პოლიტპატიმრის სტატუსი ვერ მიიღეს, მათ რიგებში თავადაც ხართ. თქვენი საქმეების გადახედვას თუ მოითხოვთ?
- ამას ჩვენ დიდი ხანია ვითხოვთ. ჩვენ პოლიტპატიმრის სტატუსს რიგი მიზეზების გამო ვერ ვეღირსეთ. პარლამენტმა როცა დაიწყო პოლიტპატიმრების საქმის განხილვა, არსებობდა საერთო სია, სადაც შეყვანილი იყვნენ როგორც ციხეში მყოფი, ასევე უკვე თავისუფლებაზე გამოსული პოლიტპატიმრები. ჩვენი მთავარი „დანაშაული“ ის იყო, რომ მანამდე მოვიხადეთ სასჯელი, სანამ ქვეყანაში ხელისუფლება შეიცვლებოდა. პირადად მე, როგორც იტყვიან, ზარიდან ზარამდე მოვიხადე უკანონოდ მისჯილი სასჯელი. პოლიტპატიმრის სტატუსის გარეშე დარჩნენ ისეთი ადამიანები, როგორებიც არიან ირაკლი ბათიაშვილი, ნორა კვიციანი. სულ 70 ადამიანზეა საუბარი.
- თქვით, რომ თქვენი მთავარი `დანაშაული~ ის იყო, რომ ხელისუფლების შეცვლამდე გამოხვედით ციხიდან. მხოლოდ ეს იყო მიზეზი?
- ეს ამერიკის რეაქციული ძალების დამსახურებაა. მათ ყველაფერი გააკეთეს, რომ პოლიტპატიმრების რიცხვს ნაციონალებისთვის საშიშ ნიშნულამდე არ მიეღწია. ამიტომ პოლიტპატიმრის სტატუსი მხოლოდ 190 ადამიანს ერგო, 70 კი ისე დარჩა. არადა, ჩვენ პირველებმა ვიწვნიეთ ჩვენს თავზე იმ რეჟიმის სისასტიკე.
- თუ პარლამენტმა ხელახლა დაიწყო პოლიტპატიმრების საქმეების განხილვა, თქვენი საქმეებიც გადაიხედება?
- ბედის ირონიით, ჩვენ ამის შესაძლებლობასაც მოკლებული ვართ. ამიტომ მათი სახელით მივმართავ პარლამენტს, რომ დაუყოვნებლივ დაიწყოს ამ საკითხის განხილვა. ამნისტიის კანონში არსებობდა მეოთხე მუხლი, რომელიც უსტატუსოდ დარჩენილი პოლიტპატიმრებისთვის სტატუსის მინიჭებას ითვალისწინებდა. პარლამენტმა გარკვეული ძალების გავლენით ეს გადაწყვეტილება არ მიიღო.
- რა ძალებზეა საუბარი?
- მეოთხე მუხლის ამოქმედებას ხელი რესპუბლიკელებმა შეუშალეს. საქმეში ამერიკელებიც ჩაერივნენ და სრულიად უსაფუძვლოდ დაგვტოვეს ამ სტატუსის გარეშე.
- ასე პირდაპირ გითხრეს, ამის და ამის გამო არ გაძლევთ სტატუსსო?
- გვითხრეს, ჯერ ის ხალხი გამოვიყვანოთ, ვინც ციხეში ზის და მერე ყველას ერთად მოგხედავთო. დაგვპირდნენ, რომ შეიქმნებოდა ხარვეზების დამდგენი კომისია, რომელიც გადახედავდა საქმეებს. ამ საქმეების გადახედვას საშველი არაფრით დაადგა. ვისარგებლებ თქვენი გაზეთის საშუალებით და ხელისუფლებას ამ დანაპირებს შევახსენებ. ისინი ვალდებული არიან, გადახედონ უსტატუსოდ დარჩენილთა საქმეებს და სტატუსი მოგვანიჭონ. თუ აღმოჩნდება, რომ რომელიმე ჩვენგანი სამართლიანად ჩასვეს ციხეში, დაე, თავიდან მოახდევინონ სასჯელი. მე თუ დამიმტკიცდება, რომ სამართლიანად ჩამსვეს, მზად ვარ, ახლავე წავიდე ციხეში და თავიდან მოვიხადო სასჯელი.
- აკო მინაშვილი ითხოვს, რომ მანანა კობახიძეს და ეკა ბესელიას დეპუტატის უფლებამოსილება შეუწყდეთ. ამაზე რას ფიქრობთ?
- მიუხედავად იმისა, რომ ამ ადამიანების მიმართ უამრავი შენიშვნა მაქვს, აკო მინაშვილს და მისთანებს მინდა მივმართო, ხელები შორს ეკა ბესელიასა და მანანა კობახიძისგან.
- რა შენიშვნები გაქვთ მათი მისამართით?
- მათ ბოლომდე ვერ მიიყვანეს პოლიტპატიმრების საქმე. მათ ბოლომდე ვერ მიიღეს ყველა ზომა, რომელიც ჩვენ დასაცავად იყო საჭირო და შუა გზაში მიგვატოვეს. იმ კომისიის წევრი მეც ვიყავი, რომელიც პოლიტპატიმრების საქმეებს განიხილავდა. კომისიაზე ანგარების თვალსაზრისით არავის საქმე არ განხილულა. ყველა საქმეს სკრუპულოზურად განვიხილავდით. დაუმსახურებლად პოლიტპატიმრის სტატუსი არავის მიუღია. მეტსაც გეტყვით, რამდენიმე ადამიანს, რომლებიც იმსახურებდნენ პოლიტპატიმრობას, ეს სტატუსი არ მიანიჭეს. იმ კომისიაზე მე ჰელსინკის ჯგუფს წარმოვადგენდი. ამ ადამიანებისთვის სტატუსის მინიჭებას მე კი დავუჭირე მხარი, მაგრამ ხმათა უმრავლესობით საკითხი სხვანაირად გადაწყდა.
- იმ ადამიანების დასახელება შეგიძლიათ, ვისაც სტატუსი არ მიანიჭეს? და ისიც დავაკონკრეტოთ, ეს პიროვნებები იმ მომენტისთვის პატიმრობაში იმყოფებოდნენ?
- კი, პატიმრობაში იყვნენ. იმ დროისთვის უკვე შეთანხმებული ვიყავით, რომ მხოლოდ ციხეში მყოფების საქმეებს განვიხილავდით. ვისაც სტატუსი არ მიანიჭეს, მათი გვარების დასახელებისგან თავს შევიკავებ და მხოლოდ ერთ მათგანს დავასახელებ. პოლიტპატიმრის სტატუსი არ მიანიჭეს ირაკლი დოკვაძეს. კომისია მისი საქმის განხილვას გაექცა. ეს ადამიანი დღეს სასიკვდილო შიმშილობაზეა.
- რა იყო ამის მიზეზი?
- ირაკლის უმკაცრესი სასჯელი ჰქონდა. კომისიის წევრებს შეეშინდათ, რომ თუ მის საქმეს განიხილავდნენ, ნაციონალები ამას ცუდად გამოიყენებდნენ და მისი საქმე გახდებოდა ის იარაღი, რომელსაც ნაციონალები სხვა პატიმრების წინააღმდეგაც გაისროდნენ. იყო საშიშროება, რომ დანარჩენების საქმეების განხილვაც ჩაილურის წყალს დალევდა. შესაძლოა, ასეც მომხდარიყო, მაგრამ მისი საქმის ასე დატოვება დიდი უსამართლობა იყო. ირაკლი დოკვაძე რეალურად იმსახურებდა ამ სტატუსს. ამაზე მეც ვგრძნობ პასუხისმგებლობას, მიუხედავად იმისა, რომ მის სასარგებლოდ ხელი ავწიე. მანანა კობახიძეს და ეკა ბესელიას მოვუწოდებ, ხელახლა მიუბრუნდნენ პოლიტპატიმრების საქმეებს და ეს სია შეავსონ. და ამ სიის შევსებით უნდა დაიწყოს ნაცმოძრაობის განკითხვა.
- დარწმუნებული ხართ, რომ დადგება მათი განკითხვის ჟამი? ახლა ისინი განიკითხავენ მეოცნებეებს პოლიტპატიმრების გამო...
- პოლიტპატიმრების საქმეების ხელახალი გადახედვა და მათი ბოლომდე მიყვანა ნაციონალებისთვის პოლიტიკურ კუბოზე ბოლო ლურსმნის ჩაჭედება იქნება. ამით მთელი მსოფლიო დაინახავს, რომ მათ საქართველოში მართლაც რეჟიმი ჰქონდათ დამყარებული და ადამიანებს უსამართლოდ ექცეოდნენ.
„რეზონანსი“, 16 დეკემბერი, 2015 წელი
შეწყალების სკანდალში “სხვა საქმეები” გამოჩნდა
თიკო ოსმანოვა
შეწყალების სკანდალური საქმე სულ უფრო დიდ მასშტაბებს იძენს და ახალ-ახალი დეტალებით მდიდრდება. საქმეზე მოწმის სახით რამდენიმე დღეში უკვე 30-მდე ადამიანია დაკითხული, ძირითადად ყოფილი და მოქმედი მაღალჩინოსნები. ასევე ახლო მომავალში პროკურატურამ, შესაძლოა, პრეზიდენტიც დაკითხოს.
ამის პარალელურად შეწყალების კომისიის მოქმედი თავმჯდომარე ზვიად ქორიძე აცხადებს, რომ შეწყალების კომისიაზე ხელისუფლების წარმომადგენელთა მხრიდან ზეწოლა და არაჯანსაღი ინტერესი მხოლოდ მისი წინამორბედის, ალეკო ელისაშვილის თავმჯდომარეობისას არ ყოფილა. ქორიძის თქმით, მან რამდენიმე ასეთი ფაქტის შესახებ ჩვენება მისცა გამოძიებას.
რაც შეეხება კონკრეტულ სიახლეებს გამოძიებაში, პროკურატურამ გუშინ განაცხადა, რომ ელისაშვილის მიერ საჯაროდ გაკეთებული რამდენიმე განცხადება არ დასტურდება. კერძოდ, საქმის პროკურორის, მამუკა კაციტაძის თქმით, ელისაშვილის მიერ პროკურატურაში მოტანილ მობილურ ტელეფონში არ აღმოჩნდა იმ მაღალჩინოსნების მესიჯები, რომლებსაც ის ასახელებს. მისი თქმით, მობილურ ტელეფონს ელისაშვილის სურვილის შესაბამისად ექსპერტიზა უტარდება, რომელიც ტექნოლოგიების საშუალებით დაადგენს, რა შინაარსის ინფორმაცია არსებობდა ტელეფონში.
კაციტაძის განმარტებით, ტელეფონში სმს-ები მართლაც იყო, თუმცა ისინი შემხებლობაში არ არის მოცემულ სისხლის სამართლის საქმესთან.”მოწმის სახით დამატებით დაიკითხა ალექსანდრე ელისაშვილი, რომელმაც გამოძიებას წარრუდგინა მისი კუთვნილი მობილური ტელეფონი. ელისაშვილის განმარტებით, სწორედ ამ მობილურ ტელეფონში ჰქონდა მას შენახული ცალკეული მაღალჩინოსნების მიერ მისთვის გამოგზავნილი მოკლე ტექსტური შეტყობინებები.
“მობილური ტელეფონი დათვალიერებული იქნა ალექსანდრე ელისაშვილის თანდასწრებით, რომელშიც არ აღმოჩნდა მაღალჩინოსნების მიერ გამოგზავნილი მის მიერ დასახელებული მოკლე ტექსტური შეტყობინებები.
“დათვალიერების შემდეგ ალექსანდრე ელისაშვილმა განაცხადა თანხმობა ექსპერტიზის ჩატარებაზე. მისი თანდასწრებითვე დაილუქა წარმოდგენილი მობილური ტელეფონი და მონაცემების აღდგენის მიზნით კომპიუტერულ-ტექნიკური ექსპერტიზის ჩატარებისათვის გადაიგზავნა სამხარაულის სახელობის სასამართლო ექსპერტიზის ეროვნულ ბიუროში”, – განაცხადა კაციტაძემ.
მთავარი პროკურატურის საზოგადოებასთან ურთიერთობის დეპარტამენტის უფროსის, ნათია სუხიაშვილის განცხადებით, ელისაშვილი პროკურორის მოადგილეს შეხვდა პირად საქმეზე და არა შეწყალების კომისიაზე ზეწოლის საკითხზე.
სუხიაშვილის განმარტებით, ალეკო ელისაშვილმა მას გიორგი გოგაძესთან შეხვედრის ორგანიზება “პირად საკითხზე” დახმარების მიზნით სთხოვა, რომელიც მისი ერთ-ერთი ახლობლისთვის წართმეული თანხის დაბრუნებას უკავშირდებოდა.
“როგორც იცით, პროკურატურაში მიმდინარეობს გამოძიება, რომლის ფარგლებშიც დავიკითხე მოწმის სახით. მოვყევი ის, რაც იყო რეალურად – რომ ალეკო ელისაშვილი დამიკავშირდა და მთხოვა შემეხვედრებინა მთავარი პროკურორის მოადგილე გიორგი გოგაძესთან, რომელთანაც ჰქონდა თხოვნა პირად საკითხზე. ის აპირებდა გოგაძისთვის ეთხოვა, რომ პროკურატურა მის ერთ-ერთ ახლობელს, რომელიც იყო დაზარალებული, თანხის დაბრუნებაში დახმარებოდა. მე რა თქმა უნდა, ბატონი გიორგი ჩავაყენე საქმის კურსში და მისი თანხმობის შემდეგ, ორგანიზება გავუკეთე აღნიშნულ შეხვედრას.
“პირადად მე დავუშვი ალეკო ელისაშვილზე ელექტრონული საშვი, დავხვდი პირველ სართულზე, ის იყო მარტო. ავიყვანე გიორგი გოგაძის კაბინეტში, სადაც დაგვხვდნენ ბატონი გიორგი, ვაკე-საბურთალოს რაიონული პროურორი ნიკოლოზ სანიკიძე და სამართლებრივი უზრუნველყოფის დეპარტამენტის უფროსის მოადგილე ირაკლი დონდოლაძე”, – განაცხადა ნათია სუხიაშვილმა.
შეგახსენებთ, რომ ელისაშვილის მტკიცებით, ერთი წლის წინ შესაბამისი ინფორმაცია სწორედ მთავარი პროკურორის მოადგილე გიორგი გოგაძეს მიაწოდა, თუმცა თავად გოგაძე აღნიშნულს არ ადასტურებს.
მედიაში გავრცელებული ინფორმაციით კი საქმე, რომელთან დაკავშირებითაც შეწყალების კომისიის ყოფილი თავმჯდომარე ალეკო ელისაშვილი ხელისუფლების მაღალჩინოსნებს მასზე ზეწოლაში ადანაშაულებს, ე.წ. კოკაინის საქმეზე დაკავებულებს უკავშირდება. საქმის მთავარი ფიგურანტი ნუგზარ ბოჭორიშვილი თავისი მეგობარი ქალის, ანასტასია ზაუტაშვილის გათავისუფლებას ხელისუფლების ცვლილებისთანავე მისი პოლიტპატიმართა სიაში ჩასმით შეეცადა.
თავად ზაუტაშვილი კი ვინმესთვის რაიმე თანხის მიცემას უარყოფს. მისი თქმით, “ზღაპარია ის ინფორმაცია, რომელიც ალეკო ელისაშვილმა და ქორიძემ გამოძიებას მიაწოდეს”.
“არასოდეს არ მითხოვია შეწყალება. ყოველთვის ვითხოვდი გამართლებას. პროკურატურა ჩემს საქმეს გადახედავს და თვითონ გამამართლებს. როდესაც ალეკო ელისაშვილი გახდა შეწყალების კომისიის თავმჯდომარე, იგი შემოსული იყო ციხეში. ამას ესწრებოდნენ სხვა მსჯავრდებულებიც. მან თქვა, რომ ჩემს საქმეს იცნობს და მითხრა, რომ ადვოკატებს მიეტანათ კომისიაში განცხადება, რომ უდანაშაულო ვარ, რის შემდეგაც პრეზიდენტს თვითონ შეუტანდა ჩემს საქმეს. სწორედ ამის შემდეგ გადავწყვიტე შეწყალების შესახებ განცხადება დამეწერა და ამის შემდეგ მოვიკითხე მანანა კობახიძესთან ჩემი საქმე. მანამდე შეწყალება არ მითხოვია. ვითხოვდი გამართლებას”, – განაცხადა ზაუტაშვილმა.
მისი თქმით, იგი უკანონო პატიმარია და მხოლოდ იმიტომ ზის ციხეში, რომ იძულების მიუხედავად, წარდგენილი ბრალდება არ აღიარა.
“ზღაპარია ფულის გადახდასთან დაკავშირებით განცხადებები. კანფეტიც არავისთვის მიმიცია”, – განაცხადა ანასტასია ზაუტაშვილმა, რომელიც ე.წ. კოკაინის საქმეზე 2010 წელს სხვა პირებთან ერთად დააკავეს და უმაღლესი სასჯელი მიუსაჯეს.
რაც შეეხება ეკა ბესელიას, ზაუტაშვილის განცხადებით, მთელი ამ ხნის განმავლობაში მისი მისამართით უკმაყოფილებას გამოთქვამდა, რადგან ბესელია მათ საქმეზე უმოქმედო იყო.
“რეზონანსი” გუშინ მთელი დღის განმავლობაში ცდილობდა ალეკო ელისაშვილთან დაკავშირებას, თუმცა მან ჩვენს სატელეფონო ზარებს არ უპასუხა, მოგვიანებით კი ტელეფონი გამორთო.
შეწყალების კომისიის ამჟამინდელ თავმჯდომარე ზვიად ქორიძეს კი მიუკერძოებული გამოძიების იმედი ჯერ კიდევ აქვს. უფრო მეტიც, მისი თქმით, შოთაძის უწყებას პატიმრების შეწყალების კორუფციულ სქემებთან დაკავშირებით რამდენიმე ფაქტი კიდევ მიაწოდა, რომელზედაც, წესით, მისი თქმით, პროკურატურამ მოკვლევა უნდა დაიწყოს.
“ის ჩვენება, რაც მივეცი პროკურატურას, არის კონფიდენციალური და გამოძიების ინტერესებიდან გამომდინარე, ჯერ საჯაროდ არ ვილაპარაკებ. მითუმეტეს, რომ ინფორმაციის ნაწილი შეეხება ადამიანს, რომელიც ჯერ კიდევ საპატიმროში იმყოფება.
“ახლა სასიცოცხლოდ მნიშვნელოვანია, რომ პროკურატურამ გამოძიება წარმატებით მიიყვანოს ბოლომდე და მიუკერძოებლობის მაღალი ხარისხი აჩვენოს საზოგადოებას. თუ პროკურატურას არ აქვს უნარი გაუძლოს რაიმე ტიპის პოლიტიკურ ზეწოლას, მაშინ ამის შესახებაც უნდა განაცხადოს.
“ამ წუთისთვის კიდევ მაქვს იმედი, რომ პროკურატურა საქმეს ობიექტურად გამოიძიებს”, – უთხრა “რეზონანსს” ქორიძემ და დასძინა, რომ იმ საქმეზე, რომელზეც ელისაშვილი საუბრობს, არაჯანსაღი ინტერესი მის დროსაც გამოავლინეს.
“საკმაოდ არაჯანსაღი ინტერესი ამ საქმის მიმართ თავს იჩენდა შემდეგაც. რაც შეეხება სხვა საქმეებს, მე ამის თაობაზე რამდენიმე ფაქტთან დაკავშირებით ვესაუბრე მთავარი პროკურატურის გამომძიებელს და ეს არის ძალიან მნიშვნელოვანი ინფორმაციები, რაზეც პროკურატურამ უნდა შეინარჩუნოს კონფიდენციალობა და დაიწყოს გამოძიება.
“მე მივაწოდე ფაქტები, რომელზეც მოკვლევა უნდა დაიწყოს. თუმცა, გახდება თუ არა ეს სისხლის სამართლის აღძვრის საფუძველი, ეს შოთაძის უწყებამ უნდა გადაწყვიტოს. მაგრამ პროკურატურას ამით ყველა საფუძველი გამოვაცალე, რომ რამდენიმე თვის შემდეგ, როდესაც შეიძლება ესა თუ ის საქმე აღმოჩნდეს ასეთი ფორმით განვითარებული, იქ უკვე არ მითხრას პროკურატურამ – სად იყავი მაშინო, რაზეც ახლა აქტიურად საუბრობენ. ელისაშვილი ზუსტად იქ იყო, სადაც უნდა ყოფილიყო. ეს კითხვა ჟურნალისტებმა გიორგი ბადაშვილს უნდა დაუსვან”, – გვითხრა ქორიძემ.
შეგახსენებთ, რომ მთავარ პროკრატურაში გამოძიება სისხლის სამართლის კოდექსის 339-ე პრიმა მუხლის მე-2 ნაწილითაა აღძრული, რაც ზეგავლენით ვაჭრობას გულისხმობს. გამოძიების დაწყების საფუძველი კი საკრებულოს დამოუკიდებელი დეპუტატისა და შეწყალების კომისიის ყოფილი თავმჯდომარის, ალეკო ელისაშვილის განცხადება გახდა, რომელმაც თქვა, რომ მისი კომისიაში მუშაობის პერიოდში “ქართული ოცნების” მაღალჩინოსნები ფულის სანაცვლოდ კონკრეტულ პატიმართა შეწყალებას სთხოვდნენ და ამის გამო მასზე ზეწოლას ახორციელებდნენ.
„რეზონანსი“, 16 დეკემბერი, 2015 წელი
ინტერვიუ ნანა კაკაბაძესთან: „ამ აურზაურით ახალი პოლიტიკური ძალის გამომზეურება ხდება“
ელზა პაპოშვილი
უფლებადამცველი და ორგანიზაცია “ყოფილი პოლიტპატიმრები – ადამიანის უფლებებისათვის” თავმჯდომარე ნანა კაკაბაძე აცხადებს, რომ ალეკო ელისაშვილის მიერ გაკეთებული სკანდალური განცხადება სხვა არფერია, თუ არა ახალი პოლიტიკური ძალის გამომზეურება. ხოლო ამ თამაშში, კაკაბაძის აზრით, საქართველოს პრეზიდენტიც მონაწილეობს.
უფლებადამცველი ამბობს, რომ ელისაშვილს წელიწადნახევარი ჰქონდა იმისთვის, რათა დანაშაულებრივ ფაქტებზე ესაუბრა და პროკურატურაში განცხადება დაეწერა, რაც მან არ გააკეთა. ამიტომაც კაკაბაძეს როგორც საქართველოს პრეზიდენტის, ასევე შეწყალების კომისიის ყოფილი თავმჯდომარის მიმართ კითხვები უჩნდება. მისი აზრით, თუკი რომელიმე დეპუტატმა ელისაშვილს მართლა დაურეკა და კონკრეტული პატიმრების საქმე მოიკითხა, ეს დანაშაული არ არის, რადგანაც, მისი თქმით, ასეთი ქმედება პარლამენტის წევრის პირდაპირი მოვალეობაა.
ნანა კაკაბაძე: კომისიის წევრებზე ან მის თავმჯდომარეზე რაიმე ზეწოლის ფაქტებზე არასდროს არაფერი მსმენია. საერთოდ არც მესმის კომისიის წევრზე ზეწოლა ვინ შეიძლება მოახდინოს. წარმოუდგენელია, როგორი ფორმით უნდა განხორციელდეს და ვინ უნდა აიძულეს კომისიის წევრი, რომ რომელიმე პატიმრის საქმე განიხილოს.
ზეწოლა მხოლოდ პრეზიდენტს შეუძლია, რადგანაც კომისიის წვრები მხოლოდ მის დაქვემდებარებაში იმყოფებიან. მაშინ კრიმინალური სახის ზეწოლაზე უნდა იყოს საუბარი, როდესაც ვიღაცა ბანდიტია და კომისიის რომელიმე წევრს ემუქრება. ოფიციალური სტრუქტურა, ვისაც ელისაშვილზე ზეწოლა შეეძლო, მხოლოდ მარგველაშვილია.
“რეზონანსი”: ალეკო ელისაშვილი ამბობს, რომ ერთ-ერთმა მაღალჩინოსანმა უთხრა, რომ კონკრეტული პატიმრის შეწყალებაში “ბე”-ს სახით 200 ათასი დოლარი იყო გადახდილი. თქვენ თუ გაქვთ ინფორმაცია ვინ იყო ეს ადამიანი?
- ყველას სახელი და გვარი დასახელდა. თქვეს, რომ ესენი არიან ეკა ბესელია და მანანა კობახიძე. რატომ მაინცდამაინც იმ ადამიანის სახელს ვერ ასახელებენ, რომელსაც 200 ათასი ჰქონდა აღებული? დაასახელონ ეს ყველაზე მთავრი ფიგურა, რომელიც პატიმრისგან შეწყალების სანაცვლოდ თურმე ამხელა თანხას იღებდა.
- თუ არსებობს ვარაუდი, ვინ შეიძლება ეს მაღალჩინოსანი იყოს?
- წარმოუდგენელია, ვარაუდის დონეზეც ვერ ვფიქრობ ვინ შეიძლება ეს იყოს, რომელსაც შეუძლია შეწყალების კომისიის თავმჯდომარეს დაურეკოს და კონკრეტული პირის შეწყალება მუქარის და ზეწოლის მეშვეობით აიძულოს. კომუნისტური სისტემაა, რომ თანამდებობის პირმა ერთი ზარი გააკეთოს და პატიმრების შეწყალება მოითხოვოს?! ვერ გეტყვით, ჩემს წარმოდგენაში ძალიან შორს არის.
- პატიმრების მხრიდან თუ გსმენიათ პრეტენზიები, რომ იმ ადამიანებს იწყალებენ, რომლებსაც უფრო მეტი აქვთ მისჯილი, ვიდრე მათ, ხომ შეიძლება ელისაშვილი მსგავსი სახის საქმეებს გულისხმობდეს?
- კი, ასეთი პრეტენზიები პატიმრების მხრიდან არაერთხელ ყოფილა. მსგავსი ფაქტების შესახებ ინფორმაცია მეც მაქვს. შეწყალების კომისიის მხრიდან ყოფილა პრეცედენტები, რომ მკვლელები, ყაჩაღები და სხვა მძიმე დანაშაულისთვის ბრალდებული პირების შეწყალება მომხდარა. მაგრამ კონსტიტუციაში წერია, რომ პრეზიდენტს ნებისმიერი პირის შეწყალების უფლება აქვს. ვინ უნდა შეიწყალოს და რატომ – კანონი ამასა არ აკონკრეტებს. პრეზიდენტს უპირობოდ ნებისმიერი ადამიანის შეწყალება შეუძლია. მაგრამ მეორე საკითხია, ის ამ კანონიერ უფლებას რამდენად სამართლიანად იყენებს. მისი გადაწყვეტილებები თუ ზის სამართლის ჩარჩოებში, როდესაც ასეთ მძიმე დანაშაულისთვის ბრალდებულ ადამიანებს ათავისუფლებს. ამ საკითხს კარგი შესწავლა სჭირდება, ასეთ ფაქტებს სისტემატიური ხასიათი ხომ არ ჰქონდა. მე ამ ბოლო დორს, რაც ეს აჟიოტაჟი ატყდა, დავინტერესდი და სასჯელაღსრულებიდან მსგავსი სახის საქმეები გამოვითხოვე. ვაპირებ შევისწავლო მარგველაშვილის პრეზიდენტობის დროს რა სახის დანაშაულისთვის ბრალდებული პირების შეწყალება მოხდა.
ჩემთვის ეს ამბავი იმდენად გაურკვეველია, რომ ლოგიკურადაც ვერ ვხვდები ელისაშვილი რა სახის ზეწოლაზე შეიძლება საუბრობდეს. უფრო მგონია, რომ რაღაცა ახალი პოლიტიკური ძალის გამომზეურება ხდება და ამ პიარით ხელისუფლებაში მოსვლა სურთ. მარგველაშვილი ახალ პოლიტიკურ ძალას თუ ქმნის, ეს უკვე სხვა საქმეა.
სხვაგვარად, მგონია, რომ ის თანხა, რასაც ელისაშვილი ასახელებს, პატიმრის ოჯახს კი არა, საქართველოში სულ რამდენიმე მილიონერს თუ შეუძლია გადაიხადოს. ელისაშვილი როდესაც ამ განცხადებას აკეთებს, ის ხომ უნდა ხვდებოდეს, რომ პირიველი დარტყმა ვისაც მიაყენა ეს საქართველოს პრეზიდენტია?
თავმჯდომარეს ასეთი ზეწოლის არსებობის შემთხვევაში შეეძლო ფურცელზე დაეწერა და პროკურატურაში განცხადება შეეტანა. მისცემოდა მსვლელობა და გამოძიება დაწყებულიყო, მართლა ხდებოდა თუ არა მასზე ზეწოლა. კითხვა მიჩნდება – რატომ ახლა და არა წელიწადნახევრის წინ?
- თქვენ ფიქრობთ, რომ ეს პოლიტიკური თამაშია?
- სხვა შემთხვევაში ეს არის აბსურდი. ვფიქრობ, რომ რაღაც ახალი პოლიტიკური ძალის ჩამოყალიბება ხდება. ელისაშვილი ვერაფრის დამტკიცებას ვერ შეძლებს. ის, რომ რომელიღაც პოლიტიკოსი ტელეფონით ურეკავდა და კონკრეტული პატიმრის შეწყალებას სთხოვდა ან ინტერესდებოდა კომისია იხილავდა თუ არა მის საქმეს, ეს ჩვეულებრივი ამბავია. დეპუტატს ამის უფლება კი არა აქვს, არამედ ეს მისი პირდაპირი მოვალეობაა. რამდენჯერაც მიაკითხავს მას პატიმრის ნათესავი, მან შეწყალების კომისიის წევრებს იმდენჯერ უნდა დაურეკოს და შეაწუხოს. აბა, სხვაგვარად დახმარება როგორ უნდა მოახერხოს? ხოლო თავად კომისიის წევრებმა უნდა განსაზღვრონ, რომელი გადაწყვეტილება იქნება სწორი. მათ ტვინი და აზროვნება ხომ იმიტომ აქვთ, რომ მათი მოსაზრება თუ არასწორია, არ გაითვალისწინონ. ასეთი სახის ფაქტი ვერ იქნება განხილული როგორც დანაშაული.
- ელისაშვილმა გააკეთა განცხადება, რომ მსგავსი ინფორმაცია პრეზიდენტსაც მიაწოდა. როგორ ფიქრობთ, მარგველაშვილმა ამაზე განცახდება რატომ არ გააკეთა, ან რა სახის რეაგირება უნდა მოეხდინა?
- თუ ელისაშვილმა ეს ინფორმაცია პრეზიდენტს ნამდვილად მიაწოდა და ის ამდენი ხანი დუმდა, პირდაპირ ვიძახი – ეს სისხლის სამართლის დანაშაულია იმის და მიუხედავად ეს ინფორმაცია მართალი აღმოჩნდება თუ არა. პრეზიდენტმა ეს ინფორმაცია ხომ მიიღო? ამაზე რეაქცია რატომ არ ჰქონდა? პრეზიდენტის ვალდებულება იყო, რომ პროკურატურა საქმის კურსში ჩაეყენებინა. რაც შეეხება თავდაცვის მინისტრსა და პარლამენტის თავმჯდომარეს, მათ თქვეს, რომ ელისაშვილს ასეთი რამ მათთვის არ უთქვამს. ხოლო მარგველაშვილმა ამაზე განცხადება არ გააკეთა.
„ახალი თაობა“, 16 დეკემბერი, 2015 წელი
ინტერვიუ გიგა ბუკიასთან: «პენსიის 400 ლარამდე გაზრდა არარეალური დაპირებაა»
ერთ-ერთი მთავარი ბრალდება, რასაც მმართველ კოალიციას ბოლო დროს უყენებენ, უმძიმესი სოციალური ფონის არსებობაა. „ქართული ოცნების“ ოპონენტების შეფასებით, ხელისუფლებამ ვერ გაატარა კომპლექსური ღონისძიებები სიღარიბისა და სიღატაკის დასაძლევად. პარლამენტის უმრავლესობის წევრი, ფრაქცია „კონსერვატორების“ თავმჯდომარე გიგა ბუკია „ახალ თაობასთან“ საუბარში აცხადებს, რომ ეს უსაფუძვლო ბრალდებებია. „ხელისუფლება შეძლებისდაგვარად აუმჯობესებს ხალხის მდგომარეობას. ჩვენ უმძიმესი მემკვიდრეობა გვერგო. სამ-ოთხ წელიწადში როგორ უნდა დაძლიო სრულად სიღარიბე და სიღატაკე? ვინც ასეთ მოთხოვნებს გვიყენებს, მას არასწორი მიდგომები, ან არასწორი წარმოდგენა აქვს ქვეყანაში შექმნილ მდგომარეობაზე. დიდი თანხები ხმარდება სოციალური მოთხოვნების დაკმაყოფილებას. ესაა, პირველ რიგში, საყოველთაო ჯანდაცვა. ჩვენამდე საყოველთაო ჯანდაცვა არ არსებობდა“, – ამბობს გია ბუკია.
- მოსახლეობის სოციალური მდგომარეობა მაინც მძიმეა...
- ამ ხელისუფლების ხელშეწყობით კერძო სექტორში შეიქმნა 90 ათასი ახალი სამუშაო ადგილი. განხორციელდა ხვნა-თესვის პროგრამა.
- ითვლება, რომ ასეთი ერთჯერადი აქციებით სოფელს არ ეშველება...
- ეს ხელს უწყობს იმას, რომ სოფლად ადამიანმა თავის რჩენა შეძლოს. საუბარი არ არის მის გამდიდრებაზე. მნიშვნელოვანია მთის კანონის ამუშავება. მეწარმეს, რომელიც მთაში რაიმე ბიზნესს დაიწყებს, დიდი შეღავათები ელის. ნურავის დაავიწყდება, რა დღეში იყო ჩავარდნილი ბიზნესი, როგორ ატერორებდა მას წინა ხელისუფლება. ახლა ბიზნესმენები მშვიდად არიან.
- თუმცა, პრობლემები ბევრია...
- ზოგ ადამიანს საკუთარ თავზე არ უგრძნია სიახლე და სიკეთე. დარწმუნებული ვარ, რომ აბრეშუმის გზის ამოქმედება, ანაკლიის პორტის ამუშავება და სხვა პროექტები უფრო მეტ ადამიანს მოუტანს კეთილდღეობას. ჩვენი გზა სწორია, ვისაც რაიმე წინადადება აქვს, მოგვმართოს.
- საქართველოს მოსახლეობის მძიმე მდგომარეობაზე აკეთებენ აქცენტს ახალი პოლიტიკური მოთამაშეები. მაგალითად, ლეონიდ ჩერნოვეცკის პარტია.
- ჯერჯერობით, დეკლარირების გარდა, ამ ახალი ძალებისგან არაფერი მოგვისმენია. მათი დაპირება, პენსიის 400 ლარამდე გაზრდის შესახებ, არარეალურია. მოსახლეობა ასეთ ბრჭყვიალა დაპირებებს არ დაუჯერებს. ერთია სურვილი და მეორე _ რეალობა. არავის გააჩნია ჯადოსნური ჯოხი, რომ უცებ პენსია 400 ლარი გახადოს. ეს არის ფრთიანი ფრაზები და არა პროგრამა. თუ რეალურ პროგრამას წარმოადგენენ, მაშინ ვნახოთ. თუმცა, ძალიან მეეჭვება, რომ ამ დაპირების შესრულება შეიძლებოდეს.
- ახალი მოთამაშეების გარდა, პოლიტიკურ ველზე არიან ძველი პარტიებიც. ნაციონალური მოძრაობა ისევ მეორე ძალად ითვლება?
- ყველაფერს 2016 წლის არჩევნები წარმოაჩენს. ბოლო არჩევნები თვითმმართველობისა იყო. იქ მეორე ადგილზე გავიდა ნაციონალური მოძრაობა.
- ითქვა, რომ ბიძინა ივანიშვილი საარჩევნოდ იაქტიურებს. მაინც რა იგულისხმება ამაში?
- «ქართული ოცნების“ კოალიცია ბიძინა ივანიშვილის შექმნილია. ჩვენ ვაგრძელებთ იმ გზას, რომელიც მან დასახა. ბიძინა ივანიშვილი იაქტიურებს განცხადებებით, ანალიზით. ის აუხსნის ამომრჩეველს, თუ რატომ უჭერს მხარს ამ ძალას. ბიძინა ივანიშვილი რომ არ მოსულიყო ხელისუფლებაში 2012 წელს, საქართველო უმძიმეს მდგომარეობაში აღმოჩნდებოდა.
„რეზონანსი“, 16 დეკემბერი, 2015 წელი
პროგნოზი მართლდება: წლის ბოლოს ფულადი გზავნილები 25%-ით შემცირდება
მაკა ხარაზიშვილი
ფულადი გზავნილების მაჩვენებელი ყოველთვე უმჯობესდება. თუკი ოქტომბერში გადმორიცხვები 27%-ით შემცირდა, ნოემბერში კლებამ 18% შეადგინა. ეკონომისტების გათვლით, 2016 წელს გზავნილების მოცულობა დაახლოებით ძველ ნიშნულს დაუბრუნდება, თუმცა გაუმჯობესება მოსალოდნელი არ არის.
ნოემბერში ფულადი გაზავნილების ვარდნის პროცენტული მაჩვენებელი შემცირდა. ოქტომბერში, შარშანდელ ანალოგიურ პერიოდთან შედარებით, ფულადი გზავნილები 27,5%-ით იყო შემცირებული, ნოემბერში – 18,3%-ით. მთლიანობაში 11 თვეში ემიგრანტებმა საქართველოში 978 მილიონი დოლარი გადმორიცხეს, რაც 342 მილიონი დოლარით ნაკლებია შარშანდელი წლის ანალოგიურ პერიოდთან შედარებით. გამომდინარე იქიდან, რომ დეკემბერში ფულადი გზავნილების მოცულობა ყოველთვის იზრდება, წლის ბოლოს ამ მიმართულებით გარღვევა 350 მილიონი დოლარი იქნება, ანუ დაახლოებით იმდენი, რამდენაც ეკონომისტები წინასწარვე ვარაუდობდნენ.
ეროვნული ბანკის მონაცემებით, 2015 წლის ნოემბერში ქვეყანაში შემოსული ფულადი გზავნილების მოცულობამ 85.2 მილიონი დოლარი, ანუ 204.6 მილიონი ლარი შეადგინა, რაც 18.3%-ით (19.1 მილიონი დოლარით) ნაკლებია 2014 წლის ნოემბრის ანალოგიურ მაჩვენებელზე.
უცხოეთიდან საქართველოში ფულადი გზავნილების 91.7 პროცენტი იმ 13 უმსხვილეს დონორ ქვეყანაზე მოდის, საიდანაც ასეთი გზავნილების მოცულობამ ნოემბერში 1 მლნ დოლარს გადააჭარბა. იმავე 13 ქვეყანაზე გასული წლის ნოემბერში მთელი ფულადი გზავნილების 92.2 პროცენტი მოდიოდა.
ყველაზე მეტი ფულადი გზავნილი ისევ რუსეთიდან შემოდის. ნოემბერში ამ ქვეყანაში წასულმა ქართველებმა საქართველოში 33,3 მილიონი დოლარი გადმორიცხეს. ეს ნიშნავს, რომ რუსეთიდან ფულადი ნაკადის მოცულობა, 2015 წლის პირველ თვეებთან შედარებით, ისევ იზრდება. იანვარში ამ ქვეყნიდან მხოლოდ – 25,8 მილიონი დოლარი გადმოირიცხა, ხოლო თებერვალში – 28,1 მილიონი დოლარი, იმ პერიოდში თითქმის 50%-იანი კლება დაფიქსირდა.
რუსეთის შემდეგ საბერძნეთია ის ქვეყანა, საიდანაც ყველაზე მეტი თანხა ირიცხება. თუმცა ნოემბერში, წინა წლის ანალოგიურ პერიოდთან შედარებით, ამ მიმართულებითაც მკვეთრი ვარდნაა, რაც საბერძნეთის ეკონომიკურ კრიზისს უკავშირდება. ნოემბერში საბრძნეთიდან 8,7 მილიონი დოლარი გადმოირიცხა, რაც 6 მილიონი დოლარით დაკლებული მაჩვენებელია.
შემდეგია იტალია და ამ ქვეყნიდან გზავნილები თითქმის იგივე დონეზეა – 8,5 მილიონი დოლარი. მეოთხე ადგილზეა ამერიკა 8,2 მილიონი დოლარით. აშშ-დან, პირიქით, გადმორიცხვა 2 მილიონი დოლარით არის გაზრდილიი. მეხუთეა თურქეთი, საიდანაც გზავნილების მოცულობა 800 ათასი დოლარით 4,9 მილიონ დოლარამდეა შემცირდა. ამ შემთხვევაში ხაზგასასმელია ის ფაქტი, რომ თურქეთში სამუშაოდ წასული ქართველების დიდ ნაწილს ფული “ქეშად” გადმოაქვთ, შესაბამისად, იქიდან შემოსული თანხა გაცილებით მეტია.
ეკონომისტების გათვლით, მომავალ წელს კლების ტენდენცია შეჩერდება, თუმცა გზავნილების მოცულობა არ ბევრად მოიმატებს. ამის მიზეზი რუსეთში, უკრაინასა და საბერძნეთში არსებული რთული ეკონომიკური ვითარებაა, სადაც ყველაზე მეტი ქართველია ფულის საშოვნელად ჩასული.
ფულადი გზავნილების ისტორიულ მაქსიმუმად 2013 წელი ითვლება – 1,477 მილიარდი დოლარი. 2014 წლიდან რეგიონში არსებული მდგომარეობის გამო ამ მაჩვენებლის გაუარესება დაიწყო. წელს იგი 2011 წლის პირველი ნახევრის დონეს, დაახლოებით, 1,1 მლრდ დოლარს დაუბრუნდება.
გლობალური ფინანსური კრიზისის შედეგად, განვითარებად ქვეყნებში ფულადი გზავნილების მოცულობა მნიშვნელოვნად შემცირდა 7 წლის წინ, თუმცა ეს დროებითი მოვლენა აღმოჩნდა. მაშინ მსოფლიოში ეკონომიკური მდგომარეობის დასტაბილურება საქართველოში გზავნილების ეტაპობრივ გაზრდასაც დაეტყო და 2014 წლის მორიგ კრიზისამდე რეკორდულ მაჩვენებელსაც მიუახლოვდა.
უფრო მეტიც, ეკონომისტების განცხადებით, ბოლო წლებში გადმორიცხული თანხის ზრდა იმ ფაქტზეც მიუთითებს, რომ წლების წინათ გადახვეწილი ქართველები უცხო ქვეყნებში თანდათანობით მკვიდრდებიან, სამშობლოში დაბრუნებას არ აპირებენ და მათი ანაზღაურება იზრდება. ამასთანავე, ფულადი გზავნილების დადებით მხარე არის ის, რომ იგი ქვეყნის საგარეო დაფინანსების წყაროს ამრავალფეროვნებს. გარდა ამისა, ფულად გზავნილებს მნიშვნელოვანი წვლილი შეაქვს შინამეურნეობათა მოხმარების სტაბილურობაში. ისინი საქართველოში სამუშაოს არმქონე ოჯახების სოციალური უზრუნველყოფის და შემოსავლის წყაროა.
