„რეზონანსი“: „ნაცმოძრაობის” და ალასანია-ოქრუაშვილის ალიანსი „ოცნების“ წინააღმდეგ

„ახალი თაობა“: ინტერვიუ ვახტანგ ძაბირაძესთან: „არაფერია უცნაური, რომ პრეზიდენტი მეორე ვადაზე ფიქრობდეს“

„ახალი თაობა“: ინტერვიუ ლადო სადღობელაშვილთან: „რესპუბლი-კელები“ „ქართულ ოცნებას“ მორწმუნეებთან აპირისპირებენ“

„ახალი თაობა“: ინტერვიუ თამარ ჩხეიძესთან: „პოლიტიკაში არსებული რეალობა გარდაბნის არჩევნებზე გამოჩნდა“

„ახალი თაობა“: ინტერვიუ ინგა გრიგოლიასთან: „მაესტროს“ ამბებში გიორგი ვირიკაშვილი ცუდად გახვიეს“

„რეზონანსი“: ინტერვიუ გია ხუხაშვილთან: „სამწუხაროა, რომ გიორგი კვირიკაშვილის გამოუცდელობა ასეთი არასასიამოვნო ფორმით გამოჩნდა“

„რეზონანსი“: ინტერვიუ მამუკა ღლონტთან: „დარწმუნებული ვარ, “მაესტრო” პროსახელისუფლებო გახდება“

—————————-

„რეზონანსი“, 06 თებერვალი, 2016 წელი

“ნაცმოძრაობის” და ალასანია-ოქრუაშვილის ალიანსი „ოცნების“ წინააღმდეგ

ლიკა ამირაშვილი

გორში პრაქტიკულად “ხავერდოვანი გადატრიალება” მოხდა – ქალაქის საკრებულოში “ნაციონალურმა მოძრაობამ“, ირაკლი ალასანიას “თავისუფალმა დემოკრატებმა” და ირაკლი ოქრუაშვილის “ქართულმა პარტიამ” კოალიციური უმრავლესობა შექმნეს და “ქართული ოცნება” ხელისუფლებას ჩამოაცილეს – გუშინ გამართული კენჭისყრის შედეგად საკრებულოს თავმჯდომარე პაპუნა კობერიძე თანამდებობიდან გადააყენეს. კენჭისყრაში მონაწილეობა 15-დან რვა დეპუტატმა მიიღო, შვიდმა კი მონაწილეობაზე უარი განაცხადა.

ცნობისათვის, გორის 15-კაციან საკრებულოში 5 დეპუტატი კოალიცია “ქართული ოცნების” წევრია, 4 წევრი ირაკლი ოქრუაშვილის “ქართულ პარტიას” ჰყავს, 2 – “თავისუფალ დემოკრატებს“, 1 – “ნაციონალურ მოძრაობას“, 1 – “ნინო ბურჯანაძე – ერთიან ოპოზიციას“, 1 – “ლეიბორისტულ პარტიას” და 1 უპარტიო დეპუტატია, რომელმაც დაახლოებით 1 თვის წინ დატოვა “ოცნების” ფრაქცია.

საკრებულოში “ოცნებამ” უმრავლესობა მას შემდეგ დაკარგა, რაც ირაკლი ალასანიას “თავისუფალი დემოკრატები” ოპოზიციაში გადავიდნენ. ხოლო 4 იანვარს კოალიცია “ქართული ოცნება” საკრებულოს კიდევ ერთ-ერთმა წევრმა დატოვა – იოსებ ფალელაშვილი ჯერჯერობით არც ერთ პარტიაში გაერთიანებული არაა, თუმცა საკუთარი ხმა ყოფილი თანაგუნდელების წინააღმდეგ გამოიყენა.

ერთმანეთისგან განსხვავებულმა ოპოზიციურმა პარტიებმა გორის მერისა და საკრებულოს თავმჯდომარის გადაყენების შესახებ განცხადება საკრებულოს აპარატში ჯერ კიდევ შემოდგომით შეიტანეს, თუმცა პროცესი შეჩერდა და მათი იმპიჩმენტის საკითხი არ დამდგარა.ახალი თვითმმართველობის პირობებში, შესაძლოა, პრეცედენტული აღმოჩნდეს და გორში წარმომადგენლობითი ორგანოს ხელმძღვანელობა ოპოზიციამ აიღოს ხელში. დადგება თუ არა მერის იმპიჩმენტის საკითხი, ოპოზიცია ამაზე ჯერ არ საუბრობს, თუმცა, როგორც “რეზონანსთან” საუბრისას აღნიშნავენ, არაფერს არ გამორიცხავენ.

რაც შეეხება საკრებულოს თავმჯდომარეობის კანდიდატს, ოპოზიცია ჯერჯერობით არ ასახელებს. თუმცა “თავისუფალი დემოკრატების” წარმომადგენელი ოთარ კვირიკაშვილი “რეზონანსთან” საუბრისას ამბობს, რომ ახალი კანდიდატი შესაძლოა ირაკლი ოქრუაშვილის “ქართული პარტიიდან” იყოს.

“გორში ხელისუფლებისთვის ვითარება საკმაოდ რთულია. “ქართულმა ოცნებამ” საკრებულოში უმრავლესობა დიდი ხანია დაკარგა. სანამ პარტია კიდევ ერთმა წევრმა არ დატოვა, სტატუს-კვოს საკრებულოს ბურჯანაძის “დემოკრატების” და “ლეიბორისტი” წევრებით ინარჩუნებდნენ. ამ ეტაპზე მაქვს მხოლოდ ის ინფორმაცია, რომ საკრებულოს თავმჯდომრის მოადგილემ თანამდებობა საკუთარი ნებით დატოვა. სავარაუდოდ მის ბედს კომისიის თავმჯდომარეებიც გაიზიარებენ. ახალი თავმჯდომრის ასარჩევად, რა თქმა უნდა, ცალ-ცალკე საჭირო ხმები არავის არ აქვს. ამიტომ ის პარტიები, რომლებმაც თავმჯდომრის გადადგომა მოითხოვეს, სრულიად საკმარია, ანუ ჯამში 8 კაცი. სავარაუდოდ გორის საკრებულოს თავმჯდომრის კანდიდატი “ქართული პარტიიდან” იქნება“, – განაცხადა ოთარ კვირიკაშვილმა.

როგორც “ქართული პარტიის” წარმომადგენელი, საკრებულოს წევრი ილია მეტრეველი “რეზონანსთან” საუბრისას ამბობს, ოპოზიციის გაერთიანება მას შემდეგ მოხდა, რაც “თავისუფლმა დემოკრატებმა” “ქართული ოცნება” დატოვა.

“ოპოზიციის გაერთიანება იმ საქმიანობამ გამოიწვია, რასაც გორის მერია და საკრებულოს ხელმძღვანელობა აკეთებდა. ქალაქს ცოტა სხვანაირი მუშაობა და მიდგომა სჭირდება. ამ ყველაფერმა გაგვაერთიანდა. არჩევნებამდე გორის საკრებულოს თავმჯდომრის კანდიდატის გამჟღავნებას არ ვაპირებ. თუმცა, გორის საკრებულოში ამჟამად ჩვენი ფრაქცია ყველაზე დიდია. რაც შეეხება მერის იმპიჩმენტს, ამ საკითხს ვერც დავადასტურებ და ვერ უარვყოფ. ვნახოთ მოვლენები როგორ განვითარდება, გამორიცხული არაფერი არ არის“, – აღნიშნა ილია მეტრეველმა.

გორის საკრებულოს წევრი “ნაციონალური მოძრაობიდან” მინდია გოდერძიშვილი “რეზონანსთან” საუბრისას თავმჯდომრის კანდიდატზე საუბრისგან თავს იკავებს.

“ჯერჯერობით კანდიდატებზე საუბარისგან თავს შევიკავებ. ოპოზიცია კონკრეტული საკითხის მიმართ გაერთიანდა. ვთვლით, რომ ჩვენ სხვადასხვა საკითხთან გადაწყვეტილებების მიღებაში გაცილებით უფრო თავისუფლები ვართ, ვიდრე ცენტრალურ აპარატს დამოკიდებული პირები. მთელი რიგი საქმეები გადასახედია და სხვანაირი თვალითაა დასანახი“, – განაცხადა მინდია გოდერძიშვილმა.

როგორც “თავისუფალი დემოკრატების” გორის რაიონული ორგანიზაციის ხელმძღვანელი, საკრებულოს წევრი თამარ თედლიაშვილი “რეზონანსთან” საუბრისას ამბობს, ოპოზიცია კანდიდატებზე შეთანხმებული უკვე არის, თუმცა დასახელებისგან თავს იკავებს.

“როდესაც საკითხი იმპიჩმენტამდე მივიდა, საკრებულოს წევრების მიმართ გარკვეულ ზეწოლას ჰქონდა ადგილი. ჩვენ თითქმის ყველა საელჩო და დიპლომატიური კორპუსი საქმის ყურში ჩავაყენეთ, რომ პირველ ეტაპზე ფსიქოლოგიური ზეწოლა ხორციელდებოდა. ამის გამო თავს დავიზღვევთ და კანდიდატს ჯერჯერობით არ დავასახლებ. ერთ-ერთი ბოლო მიზეზი, რამაც ეს გადაწყვეტილება მიგვაღებინა, ისაა, რომ ბიუჯეტის მისაღებად რიგგარეშე სხდომა არ დანიშნა. თავმჯდომარეს შეეძლო და ვალდებულიც იყო, რომ რიგგარეშე სხდომა დაენიშნა“, – განაცხადა თამარ თედლიაშვილმა.

საკრებულოს ყოფილი თავმჯდომარე “ქართული ოცნების” წევრი პაპუნა კობერიძე “რეზონანსთან” საუბრისას ამბობს, რომ მისი თანამდებობიდან გადაყენება იმას მოწმობს, რომ ქვეყანაში ჭეშმარიტი დემოკრატიული პროცესი მიმდინარეობს.

“2012 წელს ხელისუფლებაში იმიტომ მოვედით, რომ ქვეყანაში დემოკრატია ყოფილიყო, რასაც ეს გორში მიმდინარე პროცესიც ადასტურებს. ყველა დამეთანხმება, რომ წინა ხელისუფლების დროს პროცესი აქამდე ვერ მივიდოდა. თუმცა, რა თქმა უნდა, ამ პროცესების მიღმა სხვა საქმეა. პარტიებმა გაერთიანება იმისათვის მოახდინეს, რომ ხელისუფლება შეეცვალათ. ესენი არიან “ქართული პარტია“, “ნაციონალური მოძრაობა“, “თავისუფალი დემოკრატები” და კოალიციის ერთი წევრი, რომელმაც ფრაქცია დატოვა. დანარჩენი უკვე მკითხველმა უნდა შეაფასოს, თუ ეს რა ძალებმა მოახდინეს. მინდა გითხრათ, რომ ეს საზოგადოების დაკვეთა არ ყოფილა. ეს ყველაფერი გორელების დაკვეთა რომ ყოფილიყო, გადადგომის შესახებ განცხადებას თავად გავაკეთებდი. ვიღაცების მიერ მართული წმინდა წყლის პოლიტიკური პროცესია“, – აღნიშნა პაპუნა კობერიძემ.

როგორც “ქართული ოცნების” წევრი, გორის მაჟორიტარი დეპუტატი სოსო ვახტანგაშვილი “რეზონანსთან” საუბრისას აღნიშნავს, გორში მიმდინარე პროცესები ეტაპობრივად შექმნილი და დამძიმებული სიტუაციის შედეგია.

“ესაა ეტაპობრივად ნაბიჯ-ნაბიჯ შექმნილი და დამძიმებული სიტუაცია, რომელმაც დღეს უბრალოდ საზოგადოებას დაანახა, რომ მოხდა პრეცედენტული გადაწყვეტილება და კოალიცია “ქართულმა ოცნებამ” გორში ჯერ უმრავლესობა და შემდეგ მმართველობაში თავისი კადრი დაკარგა. დაახლოებით ერთი კვირის წინ ადგილობრივ ტელევიზიაში ვრცელი საჯარო გამოსვლა მქონდა, სადაც რისკებზე და შექმნილ სიტუაციაზე ვისაუბრე. მაშინ განვაცხადე, რომ ეს პროცესი იმპიჩმენტამდე მივა, შემდეგი კი გორის მერი იქნება.

საჯაროდ ვიძახი, რომ მმართველობაში და მენეჯმენტში ბევრი ცვლილებაა შესატანი როგორც რეგიონალურ დონეზე, ასევე ცენტრალური ხელისუფების დონეზე. შეცდომებიც ბევრი მოგვდის, განსაკუთრებით საკადრო. ამის იქით არ მინდა წავიდე, რადგან ვითარება დამატებითი ანალიზის საჭიროებას განაპირობებს და არ მინდა კიდევ უფრო დავამძიმო შექმნილი სიტუაცია, რომელიც გორის საკრებულოშია შექმნილი“, – აღნიშნა სოსო ვახტანგაშვილმა. მისი თქმით, იმის გამო რომ გორში პოლიტიკური ძალთა ბალანსი შეიცვალა, შესაძლოა მერის იმპიჩმენტის საკითხიც დადგეს.

“მერთან მიმართებაში ხმათა 2/3 სჭირდებათ, მაგრამ ცოტა ხნის წინ “ნაციონალურმა მოძრაობამ“, რაოდენ გასაკვირიც უნდა იყოს, ოქრუაშვილის პარტიასთან და “თავისუფლ დემოკრატებთან” ერთად დააანონსეს, რომ შემდეგი ნაბიჯი მერის იმპიჩმენტი უნდა იყოს. თუ ქმედითი ზომები არ გატარდება, ბუნებერივია იმპიჩმენტი შესაძლოა განხორციელდეს. ვინაიდან ადამიანები, რომლებიც თავიანთი დაშვებულ შეცდომების შედეგად დამდგარ რეალობას ვერ აცნობიერებენ, ისინი შეცდომებს ალბათ მომავალშიც დაუშვებენ“, – აღნიშნა სოსო ვახტანგაშვილმა.

„ახალი თაობა“, 06 თებერვალი, 2016 წელი

ინტერვიუ ვახტანგ ძაბირაძესთან: „არაფერია უცნაური, რომ პრეზიდენტი მეორე ვადაზე ფიქრობდეს“

პოლიტოლოგი ვახტანგ ძაბირაძე „ახალ თაობასთან“ ინტერვიუში აცხადებს, რომ პრეზიდენტ გიორგი მარგველაშვილის ის ნაშრომი წაიკითხა, რომელიც განსჯის საგანი გახდა, თუმცა იქ ვერაფერი ისეთი ამოიკითხა, რომელიც პრეზიდენტის დამოკიდებულებას დააკნინებს სამშობლოსა და ქართველი ხალხის მიმართ.

„მე ვნახე მარგველაშვილის ის ნაშრომი, რომელზეც მიუთითებდა თოფაძე, მაგრამ ვერაფერი ამოვიკითხე ისეთი, რომ ვიფიქრო, რომ მარგველაშვილს სამშობლო არ უყვარს. ჩვენ ვართ ჩვენივე საზოგადოებით უკმაყოფილო. ზოგი ამას უფრო მკვეთრად გამოხატავს, ზოგი ნაკლებად. ირაკლი კაკაბაძემ, რომლის რედაქტორობითაც დაიბეჭდა ეს წერილი, მოიყვანა მაგალითად ილიას “ჩვენისთანა ბედნიერი ერი“. უფრო შორს რომ არ წასულიყო ირაკლი, მე ჭაბუა ამირეჯიბის „საძოვარზე მიშვებული ერი ვართ“, გავიხსენებდი, რომელიც ზუსტად ასახავს დღევანდელ სამწუხარო რეალობას. ყველაზე ცუდი ის არის, რომ ნომერ პირველი პრობლემა ამ ქვეყანაში ქონების შოვნა გახდა, სხვა დანარჩენი კი პოლიტიკის ნაწილია”, – ამბობს ვახტანგ ძაბირაძე.

- პოლიტიკური პიარის ნაწილია ეს ყველაფერი და სხვა არაფერი?

- ცხადია, ეს უფრო მძაფრდება იმ შემთხვევაში, როდესაც არჩევნებია კარს მომდგარი. არანაირი რეალური მსჯელობა და პრობლემაზე საუბარი აქ არ არის. საარჩევნო წელია და შინაურიც და გარეულიც მხოლოდ იმაზე ფიქრობს, ვინ რა ადგილი და როლი დაიკავოს და მოირგოს. ამიტომ ვერ დავეთანხმები პრეზიდენტს, რომ მის წინააღმდეგ მიზანმიმართული კამპანია აგორდა. თუ ასეთი კამპანია დაიწყო მის წინააღმდეგ, მაშინ ვარწმუნებ, ის კრახით დასრულდება.

- საპარლამენტო უმრავლესობის წევრები, კონკრეტულად მეჭიაური ამბობს, რომ პრეზიდენტის გამოსვლა ემსახურებოდა მისი პოლიტიკური მომავლის შექმნას, დიდი პოლიტიკური, ოპოზიციური ცენტრის ლიდერის როლში წარმოუდგენია მას თავიო. ეს რამდენად შეიძლება რეალური იყოს?

- პრეზიდენტის თანამდებობა არის პოლიტიკური თანამდებობა პირველ რიგში. ის, რომ მას პოლიტიკური ამბიციები აქვს, რატომ უნდა იყოს გასაკვირი ან მიუღებელი, უბრალოდ, არ მესმის. თუ პრეზიდენტი არ ფიქრობს მის პოლიტიკურ მომავალზე, მაშინ მისი ზოგიერთი გადაწყვეტილება გაუგებარი იქნებოდა. არაფერია გასაკვირი იმაში, რომ პრეზიდენტი პოლიტიკურ მომავალზე ფიქრობდეს. რა, მეჭიაური თვითონ არ ფიქრობს პოლიტიკურ მომავალზე?! რა, პოლიტიკურ კარიერას არ იკეთებს?!

- უმრავლესობა ამბობს, რომ პრეზიდენტი ოპოზიციის პოზიციიდან ესაუბრება. ამ შემთხვევაში პრობლემა კონსტიტუციის არგაგებაშია თუ სად არის?

- ყველა ერთ ხმაში რომ მღეროდა, ის ოპერა უნდა დასრულდეს თუ უკვე არ დასრულდა. პრეზიდენტმა რაც თქვა, რა იყო შეუსაბამო? პრეზიდენტის გამოსვლაში მკაფიოდ იყო ხაზი გავლებული მთავრობის შეფასებასა და პოლიტიკური ვითარების შეფასებას შორის. პრეზიდენტს თავისი კომპეტენცია კარგად აქვს გააზრებული და მორგებული. პრეზიდენტს მთავრობის საქმიანობა არ შეუფასებია. პრეზიდენტმა პოლიტიკური ვითარება შეაფასა, მაგრამ ძაღლის თავი იცით, სად არის დამარხული? რაც დალაგდა პრეზიდენტსა და პრემიერს, ინსტიტუტებს შორის ურთიერთობა, ვიღაცები თვლიან, რომ მარგველაშვილს თუ ისევ გააკრიტიკებენ, ამით ივანიშვილთან პოლიტიკურ ქულებს დაიწერენ. სამწუხაროდ, ეს მოტივია დღეს წამყვანი, ვიდრე რეალობის ობიექტური შეფასება და ასახვა.

- უნდა გაუქმდეს თუ არა კრიზისების მართვის საბჭო?

- მე ვთვლი, რომ არ უნდა დარჩეს და მხოლოდ პრეზიდენტთან უნდა იყოს უშიშროების საბჭო. რატომ? მე ამის არგუმენტები მაქვს და მოყვანა შემიძლია. პრეზიდენტი დაეთანხმა პრემიერს, რომ არ უნდა გაერთიანდეს უშიშროების საბჭოსთან. თუმცა, ეს მისი პოზიციაა.

- მეორე ვადით არჩევისთვის იბრძოლებს პრეზიდენტი მარგველაშვილი? ამერიკის შეერთებულ შტატებში, როდესაც მას ეს კითხვა დაუსვეს, ღიად თქვა, რომ პოლიტიკური ცხოვრების გაგრძელებას აპირებს…

- რატომაც არა, ის ახალგაზრდა კაცია და ერთი ვადის ამოწურვის შემდეგ, ალბათ არ აპირებს სახლში წასვლას. თუმცა, არა თუ ჩვენს ქვეყანაში, მთელ მსოფლიოში სიტუაცია ისე სწრაფად და კარდინალურად იცვლება, რომ მიჭირს პროგნოზირება, თუ რა იქნება 2017 წელს. ერთი შემიძლია გითხრათ: პრეზიდენტს პოლიტიკური კარიერის გაგრძელება რომ უნდოდეს, ამაში ცუდს ვერაფერს ვხედავ. ეს არის სრულიად ჯანსაღი და ნორმალური დამოკიდებულება.

„ახალი თაობა“, 06 თებერვალი, 2016 წელი

ინტერვიუ ლადო სადღობელაშვილთან: „რესპუბლიკელები“ „ქართულ ოცნებას“ მორწმუნეებთან აპირისპირებენ“

ვისი დავალებით მოქმედებენ „რესპუბლიკელები“, ვინ აპირებს რელიგიური გრძნობების შესახებ კანონპროექტის ჩაგდებას, რას ჰპირდება „თავისუფალი თაობა“ საკრებულოელ დავით ზურაბიშვილს? – ამის შესახებ „ახალ თაობას“ „თავისუფალი თაობის“ ლიდერი ლადო სადღობელაშვილი ესაუბრება.

„დავით ზურაბიშვილს აუცილებლად მოვთხოვთ პასუხს და მას აუცილებლად მოუწევს პასუხის გაცემა იმ გამონათქვამებზე, რომლითაც ის მორწმუნეების, ძირითადად კი მართლმადიდებლების რელიგიურ გრძნობებს შეურაცხყოფს“, – ამბობს ლადო სადღობელაშვილი.

- პასუხის მოთხოვნაში რას გულისხმობთ, სასამართლოში უჩივლებთ?

- ამ ეტაპზე სასამართლოში ჩივილს აზრი არა აქვს. ჩვენ, „თავისუფალი თაობა“, მას სხვანაირად მოვთხოვთ პასუხს. რამდენიმე დღის წინ მან სოციალურ ქსელში შეურაცხმყოფელი სტატუსი გამოაქვეყნა. საერთოდაც, ეს ადამიანი ხელიდან არ უშვებს შესაძლებლობას, რომ რელიგიასა და სასულიერო პირებს შეურაცხყოფა მიაყენოს. მისიც კარგად მესმის და ვიცი, რომ ასეთი დავალება აქვს მიღებული და, თუ ყველაფერს კარგად შეასრულებს, შესაძლოა რესპუბლიკელებმა ის ივანიშვილს „ქართული ოცნების“ საარჩევნო სიაშიც ჩააწერინონ. მისი ყველა განცხადება აღმაშფოთებელია, მაგრამ მღვდლებზე რაც დაწერა, ის მთლად ამაზრზენი იყო. მისი განცხადებით, დაუშვებელია თურმე, რომ მღვდლის გინება ფასიანი იყოს და სხვა პროფესიების უფასო, ან უცოდინარმა მკრეხელმა ისიც კი არ იცის, რომ მღვდელი პროფესია არ არის, ისევე, როგორც რაბინი ან მოლა.

- თუ არ იცის, მიეტევება, არცოდნა არცოდვააო…

- ამ შემთხვევაში ასე არ გამოვა, რადგანაც ზურაბიშვილმა ძალიან კარგად იცის, რომ მღვდელი პროფესია არ არის, მისი შეურაცხმყოფელი გამოხტომები უკვე ყელში ამოვიდა და მას აუცილებლად მოვთხოვთ პასუხს. ამ განცხადებიდან რამდენიმე დღეში მან პრესკონფერენცია გამართა. იმ პრესკლუბის წარმომადგენლებს ვეცით პატივი, სადაც ღონისძიება შედგა, თორემ მივუვარდებოდით და თავზე დავამხობდით იქაურობას. ნაციონალების მიერ კონტროლირებად პრესკლუბში როცა მივა, იქ ნამდვილად მივაკითხავთ.

- იქნებ დააკონკრეტოთ, რას ნიშნავს, მიაკითხავთ. ეს ზურაბიშვილმა შესაძლოა მუქარად მიიღოს…

- უკანონოს არაფერს ჩავიდენთ. ჩვენ ყოველთვის კანონის ფარგლებში ვმოქმედებთ და ზურაბიშვილსაც კანონის შესაბამისად მოვთხოვთ პასუხს ყველა შეურაცხყოფაზე. რელიგიური გრძნობების შეურაცხყოფაზე რეაგირება აუცილებელია. ამისთვის სხვა რესპუბლიკელებსაც უნდა მოეთხოვოთ პასუხი.

- კიდევ ვისთვის აპირებთ პასუხის მოთხოვნას?

- რესპუბლიკელები თავიდან ბოლომდე ანტირელიგიურები არიან, მაგრამ ზურაბიშვილი, თამარ კორძაია და ლევან ბერძენიშვილი აშკარად გამოირჩევიან. მათი განცხადებები „ქართულ ოცნებას“ არჩევნებზე სერიოზულ პრობლემებს შეუქმნის.

- რა პრობლემებს?

- შესაძლოა ძალიან ბევრი ამომრჩეველი დაკარგონ. საქართველოს მოსახლეობის უდიდესი ნაწილი და, შესაბამისად, ამომრჩეველიც მართლმადიდებელია. ესენი კი თავიანთი განცხადებებით მმართველ კოალიციას მორწმუნეებთან აპირისპირებენ. დავით ზურაბიშვილი, რომელიც, სხვა რესპუბლიკელების მსგავსად, სამწუხაროდ, კოალიციაში შედის, გამუდმებით ლანძღავდა და აკრიტიკებდა ივანიშვილსა და ღარიბაშვილს, მთლიანად ხელისუფლებასაც ცუდად მოიხსენიებდა, თითქოს თავად არ იყო ამ გუნდის წევრი. ახლა უცბად გუნდურობის თამაში დაიწყო და კოალიციის სახელით განაცხადა, რომ კოალიცია კანონს რელიგიური გრძნობების შესახებ მხარს არ დაუჭერს.

- ამას პარლამენტის დეპუტატებიც ამბობენ…

- ყველა ასე არ ფიქრობს. ბევრი მათგანი კანონის კიდევ უფრო გამკაცრებას უჭერს მხარს. რესპუბლიკელები და მათნაირი არასამთავრობოები ცდილობენ, ისე დახატონ სურათი, რომ მხოლოდ მართლმადიდებლობის შეურაცხყოფა იქნება დასჯადი. ეს არის სიცრუე. კანონი ყველა რელიგიურ მიმდინარეობას შეეხება და ამას საქართველოში მცხოვრები ყველა რელიგიის წარმომადგენლები დაუჭერენ მხარს.

- პარლამენტი თუ მიიღებს ამ კანონს?

- დიდი სურვილი მაქვს, რომ მიიღონ, მაგრამ წინასწარ რამის თქმა ძნელია. ეს პარლამენტი ზებრასავით ჭრელია და, ვინ რას ფიქრობს, ვერ გაიგებ. მგონი, უკვე დროა. „ქართული ოცნება“ ასეთი ხალხისგან გათავისუფლდეს. პირველ რიგში რესპუბლიკელების გაშვება უნდა მოხდეს.

- დათანხმდება ამას ივანიშვილი? დავით უსუფაშვილმა თქვა, არსად წასვლას არ ვაპირებო…

- ეგენი თავიანთი ნებით სად წავლენ? მათ დღეს იმხელა მანდატი აქვთ, რაც ნამდვილად არ შეესაბამება მათ რეიტინგს. არ შეიძლება, 2%-იან პარტიას აღმასრულებელ და საკანონმდებლო ხელისუფლებაში ამდენი კაცი ჰყავდეს. იმედი მაქვს, რომ საარჩევნო სიის შედგენისას ხელისუფლების პირველი პირები ამაზე დაფიქრდებიან. არა მგონია, რომ რესპუბლიკელებს საერთოდ გაუშვებენ, მაგრამ, იმედია, სიაში იმაზე მეტს არ ჩაწერენ, ვიდრე ახლა არიან. კარგი იქნება, თუ რესპუბლიკელების პოლიტიკურ მადას აღმასრულებელ ხელისუფლებაშიც შეუკვეცენ. თინა ხიდაშელი და გიგლა აგულაშვილი მთავრობას სახელს უტეხენ.

- რანაირად უტეხენ სახელს?

- გარემოს დაცვის მინისტრმა აგულაშვილმა ამ ზამთარს მთელი საქართველო გაყინა. თინა ხიდაშელი კი ჯარს ლაურა ღაჭავას შეკერილი ფორმით უპირებს შემოსვას.

- აგულაშვილმა რანაირად გაყინა ხალხი?

- საქართველოს ნაწილი ზამთარში შეშით თბება. აგულაშვილმა ხალხს ტყიდან შეშის გამოტანის უფლება არ მისცა.

- რა მიზეზით?

- უთხრა, ტყეში მოსაჭრელი ხეები არ არისო. ამ საქმით აუცილებლად უნდა დაინტერესდეს გამოძიება. ჩვენც მოვიძიებთ მასალებს და გამოვაქვეყნებთ. მაგასაც ისე ვამხელთ, როგორც თინა ხიდაშელი ვამხილეთ. როგორც უკვე გითხარით, ის აპირებს, რომ ჯარისთვის ტანსაცმელი ლაურა ღაჭავას შეაკერვინოს.

- დაშავდება რამე, თუ ჯარისთვის ფორმას ღაჭავას ფირმა შეკერავს? მას სამკერვალო ფაბრიკები აქვს…

- როგორ არ დაშავდება? ლაურა ღაჭავა არ არის ჩვეულებრივი მეწარმე, ის დამნაშავე კოდუების დედაა. პირადად ჩემთვის შეურაცხმყოფელია, თუ ჯარი მის მიერ შეკერილ ფორმას ჩაიცვამს. თქვენს მკითხველსა და ხელისუფლებას შევახსენებ, რომ ღაჭავას ერთ-ერთი შვილი ჯარისკაცებს დასახოცად დასდევდა. ყველას კარგად გვახსოვს 2009 წლის ე.წ. მუხროვანის ამბოხება. იმ დღეს არის გადაღებული ცნობილი კადრები, სადაც მერაბიშვილი მაღალჩინოსნებს ეუბნება, ორი გვამი მინდაო. ამ მაღალჩინოსნებს შორის იდგა შეიარაღებული ერეკლე კოდუაც, რომელიც ერთ-ერთი პირველი გაიქცა დავალების შესასრულებლად. როგორ შეიძლება, ამ ადამიანის დედამ ჯარისთვის ფორმა შეკეროს. ეს არის ყველას და, პირველ რიგში, ქართველი ჯარისკაცების შეურაცხყოფა.

მოვუწოდებ ხელისუფლებასა და პირადად პრემიერს, დაინტერესდეს ამ საკითხით. გიორგი კვირიკაშვილს ასევე ვთხოვთ, შეხვდეს ახალგაზრდობას. ასეთი შეხვედრა აუცილებელია.

- ახალგაზრდობასთან შეხვედრა აუცილებელია?

- უფრო საჭიროა. საჭიროა, პრემიერი კვირიკაშვილი დაინტერესდეს ახალგაზრდების თემატიკით. თქვენი გაზეთის საშუალებით მივმართავ პრემიერს, იქნებ რამენაირად მოახერხოთ და უახლოეს პერიოდში, განსაკუთრებით მანამდე, სანამ თქვენ პარტიის ლიდერად ჩამოყალიბდებით, ამას რომ არ ჰქონდეს პოლიტიკური ელფერი, გთხოვთ, შეგხვდეთ. მოვიწვიოთ სტუდენტები, სხვადასხვა არასამთავრობო ორგანიზაციები, ახალგაზრდული მოძრაობები, თუნდაც პოლიტიკურად ანგაჟირებული ახალგაზრდები, რომლებიც ჭარბობს ჩვენს ქვეყანაში, მოვაწყოთ გაფართოებული შეხვედრა და განვიხილოთ ზოგადი პრობლემატიკა, რომელიც ახალგაზრდებში არის.

ბატონ კვირიკაშვილს მინდა ვთხოვო, დაუახლოვდეს და მეგობრული ურთიერთობა დაამყაროს ახალგაზრდებთან, რადგანაც ამ ქვეყანაში უამრავჯერ ვნახეთ, რა არის ახალგაზრდული ერთობა. ახალგაზრდებს ვერავინ დაუდგება წინ. ნებისმიერი ახალგაზრდა შემართულია, დაიცვას თავისი ქვეყანა როგორც ტერიტორიულად, ასევე სულიერად.

„ახალი თაობა“, 06 თებერვალი, 2016 წელი

ინტერვიუ თამარ ჩხეიძესთან: „პოლიტიკაში არსებული რეალობა გარდაბნის არჩევნებზე გამოჩნდა“

პრემიერ-მინისტრისა და პრეზიდენტის განცხადებები პოლიტიკაში კონფრონტაციულობის დამთავრების აუცილებლობის შესახებ წინასაარჩევნო დაძაბულობას ვერ შეანელებს, თუმცა, ილია ჭავჭავაძის საზოგადოების თავმჯდომარე თამარ ჩხეიძე როგორც „ახალ თაობასთან“ ინტერვიუში აცხადებს, დაპირისპირების შემცირების ნიშნები თვალსაჩინოა.

„არჩევნების წინ წარმოუდგენელია პოლიტიკურ ძალებს შორის კონფრონტაციული რეჟიმის დაძლევა. თუმცა, ახალი პრემიერის მოსვლის შემდეგ გამოიკვეთა დაპირისპირების შემცირების ნიშნები და ურთიერთობის ახალი სტილი. კვირიკაშვილი არ არის დაპირისპირებული პრეზიდენტთან, როგორც ღარიბაშვილი იყო. პრემიერი არ ამბობს უარს ეროვნული უშიშროების საბჭოს სხდომებში მონაწილეობაზე. ის ესწრება პრეზიდენტის მოხსენებას პარლამენტში. მთლიანობაში, ძირეული ცვლილებები ვერ მოხდება”, – ამბობს თამარ ჩხეიძე.

- რატომ?

- იმიტომ, რომ მმართველობის სისტემა იგივე დარჩა. ამ სიტუაციაში პირველი პირებიც კი ვერაფერს შეცვლიან. ეს კარგად გამოჩნდა ტელეკომპანია „მაესტროში“ მიმდინარე პროცესებშიც.

- თქვენ როგორ აფასებთ ამ პროცესებს?

- ამ ტელეკომპანიასთან დაკავშირებულ მოვლენებზე დეტალური და სამართლებრივი ინფორმაცია არ გამაჩნია, მაგრამ, ამ სიტუაციაშიც აშკარაა, რომ იქ დადებითი პროცესები არ მიდის. საუბარია წილების გადანაწილებაზე, მაგრამ, სინამდვილეში, ხელისუფლება ცდილობს არხის გაკონტროლებას. ამას წინ უძღოდა „რუსთავი-2“-ში განვითარებული მოვლენები. იქ ხელისუფლების ჩარევა აშკარა იყო. საბოლოოდ, „რუსთავი 2“-ში შედეგს ვერ მიაღწიეს. მაესტრო მასშტაბებით და შინაარსით „რუსთავი-2“-ს ვერ გაუტოლდება, მაგრამ პოპულარული არხია. ხელისუფლებამ გადაწყვიტა მისი დაქვემდებარება.

- არსებობს მოსაზრება, რომ ტელეკომპანიებზე კონტროლის დაწესება ამაოა იმ დროს, როცა არსებობს ინტერნეტმაუწყებლობა, მუშაობენ სხვა პატარა ტელეკომპანიები…

- არ ვეთანხმები, რომ ასეთი კონტროლის დაწესება ამაოა და ამას ხელისუფლებისათვის მნიშვნელობა არა აქვს. პირიქით, იმ ხელისუფლებისათვის, რომელიც თავისუფალ სიტყვას ზღუდავს, ამას უზარმაზარი მნიშვნელობა აქვს. იმ ტელევიზიების მასშტაბები და გავლენა, რომელიც ახსენეთ, ბევრად მცირეა პოპულარულ არხებთან შედარებით.

- საპარლამენტო არჩევნები ახლოვდება. შეიძლება თუ არა გარკვეული დასკვნების გამოტანა გარდაბნის გამგებლის რიგგარეშე არჩევნებიდან, რომელიც ცოტა ხნის წინ გაიმართა?

- ჩემი აზრით, გარდაბნის გამგებლის არჩევნების შედეგებმა აჩვენა ის რეალური სურათი, რომელიც დღეს გვაქვს. ადრეც ვამბობდი, რომ მთავარი სუბიექტები ისევ „ქართული ოცნება“ და ნაციონალური მოძრაობა არიან. ამ არჩევნებზეც ეს გამოჩნდა.

- თუმცა, არჩევნებში სხვა სუბიექტების მონაწილეობის შემთხვევაში პროცენტები სხვანაირად გადანაწილდება?

- შედეგი პროცენტულად განსხვავებული იქნება, მაგრამ სურათი იგივე დარჩება. სიტუაციას მხოლოდ გლობალური მოვლენები გარდატეხს.

- საერთაშორისო სიტუაციას გულისხმობთ?

- საერთაშორისო სიტუაციასაც, შიდა მოვლენებსაც. შესაძლოა, რაღაც მოვლენები მოხდეს საქართველოშიც და ამან შეცვალოს პოლიტიკურ ძალთა განლაგება.

- იმ პარტიებს თუ შეუძლიათ სიტუაციის შეცვლა, რომლებიც საარჩევნო გარემოს გაუმჯობესებას მოითხოვენ?

- ვითარება შეიცვლება მხოლოდ გლობალური ფაქტორებით. ვეთანხმები მოთხოვნას არჩევნების მთლიანად პროპორციული წესით ჩატარების თაობაზე. პარტიები ყველა აუცილებელ მოთხოვნას ამ თემაზე არ აყენებენ. ისინი გარდატეხასაც ვერ შეიტანენ.

- პაატა ბურჭულაძის თქმით, კონცეფციას ქვეყნის განვითარებაზე სამ თვეში წარმოადგენს…

- მოახლოებული არჩევნებისათვის ეს დაგვიანებული იქნება. პაატა ბურჭულაძის გამოჩენა საერთოდ არ არის იმ მასშტაბის მოვლენა, რომელიც შეცვლის ძალთა განლაგებას.

- ექსპერტების აზრით, „ქართულ ოცნებას” ლეგიტიმაციის პრობლემები ექნება არჩევნების შემდეგ და ეს კრიზისში გადაიზრდება..

- ალბათ, იგულისხმება, რომ „ქართული ოცნება“ დაბალ მხარდაჭერას მიიღებს არჩევნებზე. ასეთი რამ გამორიცხული არ არის. უნდა ითქვას, რომ ამ კოალიციას მცირე პროცენტის აღებაც გაუჭირდება. ამისთვისაც დიდი ძალისხმევა დასჭირდება, მიუხედავად იმისა, რომ ნებისმიერ მმართველ ძალას დიდი უპირატესობა აქვს. ჩემი აზრით, პარლამენტში მივიღებთ ან იმავე განლაგებას, რაც გარდაბანში გამოჩნდა. ან მოხდება გლობალური ცვლილებები, რაც შეცვლის ძალთა ბალანსს.

„ახალი თაობა“, 06 თებერვალი, 2016 წელი

ინტერვიუ ინგა გრიგოლიასთან: „მაესტროს“ ამბებში გიორგი კვირიკაშვილი ცუდად გახვიეს“

დავა ტელეკომპანია „მაესტროსთან“ დაკავშირებით კვლავაც გრძელდება. „მაესტროზე“ მიმდინარე პროცესებს ჟურნალისტი ინგა გრიგოლია ეხმიანება და „ახალი თაობის“ შეკითხვებს პასუხობს.

- ინგა, რა ხდება დღეს მაესტროზე, როგორია თქვენი თვალით დანახული ვითარება?

- დღეს „მაესტროზე“ „იმედიზაციის“ პროცესი მიდის.

- რას გულისხმობთ?

- ირაკლი რუხაძე რომ არ ეხსენებინათ ძმებ გაჩეჩილაძეებს, მე თვითონაც ჩავთვლიდი, რომ ეს იყო დამფუძნებლებს შორის არსებული კონფლიქტი წილების თემაზე და ამის მოგვარების მცდელობა, მაგრამ ისეთი ფული დაასახელეს გაჩეჩილაძეებმა, რომელმაც მე კითხვები კი არ გამიჩინა, პირდაპირ დავასკვენი, რაც ხდება.

- და რა ხდება?

- თავიდანვე „იმედმა“ რომ იყიდა 5 მილიონით „მაესტროს“ სარეკლამო დრო, უკვე ცხადი იყო ეს გავლენები, მაგრამ დღეს, როცა ღიად გამოდის გია გაჩეჩილაძე და ამბობს, რომ ირაკლი რუხაძემ ასესხა ფული, ეს არ მესმის. ფულს საქართველოში არავინ გასესხებს, თან მილიონებს! არავინ ჩადებს მილიონებს ისე, უბრალოდ, მედიაში. პატარა ბავშვი ვინც არ არის, ყველა მიხვდება, რომ ეს არის „იმედიზაციის“ პროცესი. ჯერ იყიდეს სარეკლამო დრო რუხაძემ და „იმედმა“ და ახლა უკვე მთავარი მეწილეებისთვის, ვინც ედავება გოგელიასა და ასათიანს, დიდი ფულიც გაიღეს. მე ძალიან მიყვარს და ვმეგობრობ გაჩეჩილაძეებთან, მაგრამ ირაკლი რუხაძე…

- რას ერჩით ირაკლი რუხაძეს?

- ირაკლი რუხაძე არის ერთ-ერთი ის ადამიანი, რომელიც იყო მთავარი გადაწყვეტილების მიმღები, როდესაც დახურეს „რეაქცია“. ირაკლი რუხაძეს მე პირადად ვიცნობ და არ დავიწყებ ბევრი სხვა რამის მოყოლას.

- ვინ დგას მის უკან?

- ის პატარკაციშვილების ქონების განმკარგავია. მე მას კარგად ვიცნობ და არ ვთვლი საჭიროდ, რომ ჩვენი შეხვედრის დეტალებზე პრესით ვილაპარაკო. მასთან ბევრი საქმიანი საუბარიც მქონია და ისიც ზუსტად ვიცი, რომ ამ კაცმა დახურა „რეაქცია“. აქედან გამომდინარე, საერთოდ კითხვის ნიშანი არ მაქვს, ჩაერევიან თუ არა ისინი „მაესტროს“ დამოუკიდებლობაში. რა თქმა უნდა, ჩაერევიან!

- რატომ ფიქრობთ ასე?

- იმიტომ, რომ „რეაქცია“, რომელიც იყო ყველაზე ყურებადი პროდუქტი „იმედზე“ და ამხელა რეიტინგის მქონე პოლიტიკური ტოქ-შოუ ისე დახურეს, რომ საჭიროდაც კი არ ჩათვალეს ჩემთვის რაიმე ტიპის განმარტება. რაღაცა ბოდვა მოვისმინე მერე, რომ თურმე ფორმატი უნდა შეეცვალათ და კი აქვთ ახლა შეცვლილი ფორმატის გადაცემა. აქედან გამომდინარე, მე ზუსტად ვიცი, რომ „მაესტროში“ მოხდება ჩარევა, იმიტომ, რომ ეს არის ირაკლი რუხაძის ფული. ზოგადად არ მჩვევია და არც მიყვარს რესპონდენტების ქება-დიდება, მაგრამ მე მომწონს პრემიერ-მინისტრი გიორგი კვირიკაშვილი…

- სწორედ მასზე უნდა მეკითხა. ამბობენ, რომ ის ცუდად გასვარეს ამ საქმეში. რატომ, რა ხდება?

- მართლა ძალიან დიდ პატივს ვცემ გიორგი კვირიკაშვილს. ის უაღრესად კარგი ტიპია, ჟურნალისტებთან კონტაქტური და ძალიან აზრიანი ადამიანია. დიდ პატივს ვცემ და გუშინ ჩემთვის იყო შოკი, როდესაც მოვისმინე, რომ ამ დღეებში, როდესაც მიდის „მაესტროსთვის“ ომი, ერთ-ერთი მხარე მიდის მასთან, კანცელარიაში აქვს შეხვედრა და ფორმულირება არის ასეთი – „ჩემი ძმაკაცია პრემიერი“. პრემიერი ძალიან უხერხულ სიტუაციაში ჩააგდეს. ახლა გიორგი კვირიკაშვილს მოუწევს განმარტების გაკეთება, რას ეხებოდა ეს შეხვედრა და ილაპარაკეს თუ არა მაესტროზე. ძალიან რთული დასაჯერებელია, რომ იქ „მაესტროზე“ არ ყოფილიყო ლაპარაკი. კიდევ ერთი დეტალია აქ.

- რომელ დეტალს გულისხმობ?

- ბაია გადაბაძეც ითხოვს პრემიერთან შეხვედრას, მაგრამ არავინ შეხვედრია მას. მე არ ვიცი, გოგელია ვინ არის, რამდენად ეკუთვნის გოგელიას, გრეჩიხებს რამდენად ეკუთვნით, ერთი ის ვიცი, რომ მთელი ცხოვრება მამუკა ღლონტთან იყო ეს „მაესტრო“ დაკავშირებული. მეტი შიდა ამბები მართლა არაფერი ვიცი, მაგრამ ირაკლი რუხაძის იქ გამოჩენამ ძალიან ბევრი კითხვის ნიშანი გამიჩინა.

- საუბრობენ იმაზეც, რომ კითხვის ნიშნებს აჩენს ძმები გაჩეჩილაძეების წინა პლანზე წამოწევა არჩევნების წინ. ასეა?

- ეს ყველაფერი უკვე არის ინსინუაციები და ჩვენ შეგვიძლია, ვერსიებზე ვილაპარაკოთ.

- ეს არ არის მხოლოდ მეწილეებს შორის ბრძოლა?

- არა, არ მგონია. შესაძლოა, ერთი მხრივ, ეს იყოს მეწილეებს შორის ბრძოლა და ეს შესანიშნავად გამოიყენეს პოლიტიკური ამბებისთვის. მე ძალიან მწყდება გული, რომ შეეცადნენ, რომ პრემიერი გაეხვიათ ამ ამბებში. ის უხერხულ მდგომარეობაშია და მართლა ველოდები, რომ გიორგი კვირიკაშვილი განმარტებას გააკეთებს.

- დასრულდა „მაესტროს“ თავისუფლება?

- ჯერ არ დასრულებულა. როგორც ვიცი, შენობა მაკასია, აპარატურა მაკასია, საერთოდ როგორ უნდა შევიდნენ და როგორ უნდა იმაუწყებლონ. ამ წუთისთვის რეესტრში არ არის დარეგისტრირებული ლევან გაჩეჩილაძე, აქედან გამომდინარე, არ ვიცი, თუმცა ერთი ვიცი, ირაკლი რუხაძის გამყარებული ფულით, რა წამსაც შეიცვლებიან იქ მაკონტროლებლები, იმ წამს დასრულდება მაესტროს თავისუფლება. ამას ვლაპარაკობ საკუთარი გამოცდილებიდან. მე როდესაც „რეაქცია“ დამიხურეს, მაშინვე ვთქვი, არსებობს თემები, რომელთაც ბოლომდე მივყვები-მეთქი. „მაესტროში“ ირაკლი რუხაძის გამოჩენა არის იგივე მედიის გაკონტროლების ამბავი, რასაც შეეწირა „რეაქცია“ – ვაჭრობისა და გაკონტროლების ამბავი.

- ვისთან ან რაზე ვაჭრობის?

- ვაჭრობის ჩვენი გადაცემებით, ჩვენი რეიტინგით, ჩვენი თავისუფლებით.

- რამდენად არის რუხაძე დაკავშირებული სახელისუფლებო წრეებთან? მაღალ ეშელონებთან?

- ცხადია, რომ ვაჭრობს და ვისთან ვაჭრობს? იმასთან, ვინც ყველაზე გავლენიანია. ვისაც აქვს შენს ბიზნესებზე გადაწყვეტილების მიღების უფლება. გაარკვიონ, საბოლოოდ რა ბიზნესები გადავიდა მათ ხელში და რას შეეწირა „რეაქცია“. რა თქმა უნდა, ვაჭრობა ყოველთვის მიდის ხელისუფლებასთან. აბა, ჩემთან ხომ ვერ ივაჭრებენ?!

„რეზონანსი“, 06 თებერვალი, 2016 წელი

ინტერვიუ გია ხუხაშვილთან: „სამწუხაროა, რომ კვირიკაშვილის გამოუცდელობა ასეთი არასასიამოვნო ფორმით გამოჩნდა“

თაკო მათეშვილი

პოლიტოლოგი გია ხუხაშვილი დარწმუნებულია, რომ ტელეკომპანია “მაესტროს” ირგვლივ განვითარებული მოვლენები კავშირშია როგორც პოლიტიკასთან, ისე კომერციულ ინტერესებთან. ამბობს, რომ თუნდაც “ყველაზე ცუდი სცენარი” განვითარდეს და “მაესტრო” ხელისუფლების გავლენის ქვეშ აღმოჩნდეს, მაყურებელი მაინც შეძლებს წინასაარჩევნოდ განსხვავებული ინფორმაციის მიღებას, რადგან, მისი თქმით, სიტუაციას “რუსთავი 2″ დააბალანსებს. გარდა ამისა, გია ხუხაშვილი მიიჩნევს, რომ “მაესტროსთან” დაკავშირებით აგორებულმა სკანდალმა პრემიერ გიორგი კვირიკაშვილის პოლიტიკური გამოუცდელობა გამოაჩინა. „ჯერჯერობით სრული ინფორმაცია არ გვაქვს. რასაც ეკრანიდან ვისმენ, იმის საფუძველზე ვასკვნი, რომ ორივე მხარეს თავისი კოზირები აქვს და ამ კოზირების გათამაშებას ცდილობენ“, – ამბობს გია ხუხაშვილი“რეზონანსთან“ საუბარში.

- თქვენი აზრით, ეს უბრალოდ მეწილეებს შორის დავაა, თუ პოლიტიკური შინაარსის პროცესი?

- არ ვიზიარებ მოსაზრებას, რომ ეს თემა მთლიანად პოლიტიკურია. ზოგადად, როცა მედიაში და განსაკუთრებით ტელემედიაში ასეთი პროცესები იწყება, პოლიტიკა რაღაც ფორმით ყოველთვის მონაწილეობს, მაგრამ ვფიქრობ, რომ ამ შემთხვევაში კომერციული ფაქტორიც თავის როლს თამაშობს. ასე რომ, “მაესტროს” თემა მთლად პოლიტიკურად ანგაჟირებულს არ ჰგავს.

ვფიქრობ, ამ სიტუაციაში მთავარი ყველაზე მნიშვნელოვანი კაპიტალის შენარჩუნებაა. ამაში კი ადამიანურ რესურსს – ჟურნალისტებს ვგულისხმობ. მთავარია ისინი არ დაზარალდნენ. მოდავე მხარეებმა, მანამ სანამ ყველაფერს გაარკვევენ, ეს უნდა მოახერხრონ. მითუმეტეს, თუ მომავალში ამ საქმიანობის გაგრძელებას აპირებენ, მათსავე ინტერესში შედის, რომ ჟურნალისტები არ დაზარალდნენ. წინააღმდეგ შემთხვევაში, ამ დავის დროს შესაძლოა ის განადგურდეს, რის მისაღებადაც იბრძვიან. ამიტომაც ვფიქრობ, რომ მათ შორის ანტიკრიზისული მემორანდუმი უნდა დაიდოს და მოიფიქრონ, თუ როგორ წაიყვანონ პროცესი ისე, რომ ტელევიზიამ ნორმალურ ვითარებაში განაგრძოს მუშაობა. ეს უახლოს პერიოდშია გასაკეთებელი. სხვანაირად შეიძლება ტელევიზიას ისეთი გამოუსწორებელი ზიანი მიადგეს, რომ გამარჯვებულმა ვეღარაფრით ისარგებლოს და იმ სიკეთიდან, რისთვისაც იბრძვის, აღარაფერი დარჩეს.

- თქვენი აზრით, კავშირშია თუ არა ეს ყველაფერი არჩევნების მოახლოებასთან?

- ბუნებრივია, არჩევნების მოახლოება ამ ყველაფერს განსაკუთრებულ ელფერს სძენს. ამიტომაც არ იქნება სწორი ვთქვათ, რომ პოლიტიკა საერთოდ არაფერ შუაშია. მითუმეტეს, რომ ერთ-ერთი მხარის მხრიდან შეცდომებსაც ჰქონდა ადგილი – პრემიერ-მინისტრთან სასაუბროდ სწორედ მაშინ მივიდა, როცა თემა გამწვავდა. რაღაც განსაკუთრებულ ურთიერთობაზეც კი იყო საუბარი. პრემიერის მხრიდანაც იგივე განცხადება გაკეთდა.

ვფიქრობ, ამით კვირიკაშვილის პოლიტიკური გამოუცდელობა კარგად გამოჩნდა. მიუხედავად იმისა, ჰქონდა თუ არა მას გაჩეჩილაძესთან “მაესტროს” თემაზე საუბარი, ერთ-ერთ მხარესთან ღია შეხვედრა არასწორი ნაბიჯი იყო. მაშინ მეორე მხარესაც უნდა შეხვედროდა, რომ ეჭვები გაქარწყლებულიყო. არადა მეორე მხარესთან შეხვედრაზე მან უარი განაცხადა. ჩემი აზრით, ეს ძალიან მძიმე პოლიტიკური შეცდომაა. კვირიკაშვილს პოლიტიკაში შემოსვლისას ძალიან კარგი სტარტი ჰქონდა და სამწუხაროა, რომ მისი გამოუცდელობა ასეთი არასასიამოვნო ფორმით გამოჩნდა.

- ძმები გაჩეჩილაძეების პარტნიორი ირაკლი რუხაძე ამავდროულად პატარკაციშვილის ოჯახის ქონების განმკარგავია. შესაბამისად, გაჩნდა ეჭვი იმასთან დაკავშირებით, რომ შესაძლოა ამ ყველაფრის უკან პატარკაციშვილის ოჯახიც იდგეს. რამდენად საფუძვლიანად მიგაჩნიათ თქვენ ეს?

- იმისათვის, რომ დაბეჯითებით ვისაუბრო, საკმარისი ინფორმაცია არ მაქვს. გაჩეჩილაძეები ამბობენ, რომ მათ ირაკლი რუხაძისგან მხოლოდ ფული ისესხეს. სიმართლეა ეს თუ არა, ეს ცოტა ხანში გამოჩნდება, რადგან ასეთი რაღაც საქართველოში არ იმალება. თუ მათ უბრალოდ ფული ისესხეს, მაშინ აქ სალაპარაკოც არაფერია. კითხვის ნიშანი, რა თქმა უნდა, ბევრია, მაგრამ მე მათზე პასუხი არ მაქვს. ფაქტია, რომ რთული ვითარებაა.

- ელისო კილაძემ იმაზეც ისაუბრა, რომ მოლაპარაკებაში ბიძინა ივანიშვილის დეიდაშვილი, უჩა მამაცაშვილიც იყო ჩართული, რაც, მისი აზრით, პირდაპირ მიანიშნებს იმაზე, რომ ყველაფერის უკან ივანიშვილი დგას…

- ეს საკითხი ჩემს კომპეტენციას სცილდება. რომც ვიცოდე რამე, ამაზე საუბარი არ მენდომებოდა, რადგან ჩემი საქმე არაა.

- ამ ყველაფრის გათვალისწინებით, თქვენი აზრით, როგორი მედიაგარემო გვექნება წინასაარჩევნოდ?

- არ ვფიქრობ, რომ მას სიმწვავე მოაკლდება. ისეთ სიტუაცია, როგორიც სააკაშვილის დროს გვქონდა, როცა მთელი მედია “ნაცმოძრაობის” ხელში იყო, აღარ გვექნება. ერთი “რუსთავი 2″ გადაწონის ყველაფერს. შესაბამისად, რაც უნდა მოხდეს “მაესტროსთან” დაკავშირებით, ყველაზე ცუდი სცენარიც რომ განვითარდეს, ინფორმაციაზე მონოპოლია მაინც ვერ დაწესდება. შესაბამიად, საზოგადოებრივი ინტერესის სისტემური დაზიანება შეუძლებელია.

„რეზონანსი“, 06 თებერვალი, 2016 წელი

ინტერვიუ მამუკა ღლონტთან: „დარწმუნებული ვარ, “მაესტრო” პროსახელისუფლებო გახდება“

ეკატერინე ბასილაია

“მათ (ძმებ გაჩეჩილაძეებს) არ აინტერესებთ სხვა დამფუძნებლების აზრი და ძალისმიერი მეთოდებით მოქმედებენ. მედიაზე ძალისმიერი მოქმედება, არ მგონია, კარგი იყოს…” – აცხადებს “მაესტროს” დამფუძნებელი და 15%-იანი წილის მფლობელი მამუკა ღლონტი და დარწმუნებულია, რომ ტელეკომპანის გაკონტროლებისათვის “ოცნებამ” გაჩეჩილაძე გამოიყენა და მალე არხი პროსახელისუფლებო გახდება. მისი განცხადებით, გაჩეჩილაძემ სულ ახლახან შეიძინა 30%, რომელიც ლეგიტიმურია, მაგრამ ლეგიტიმური არ არის ის 25%, რომელსაც გაჩეჩილაძე მანამდე ფლობდა, ამიტომაც მას სასამართლოში სარჩელი აქვს შეტანილი და სასამართლოს დასრულებას ელოდება.

- რა ხდება მაესტროში, რა პროცესებს ვადევნებთ თვალს?

- ფაქტის კონსტატაცია გავაკეთო?

- მმართველი ძალის წარმომადგენლებისაგან კეთდება შეფასება, რომ ეს არის მეწილეებს შორის წილების გადანაწილების თემა და სხვა არაფერი. თუმცა ოპოზიციიდან გაისმის ის, რომ “მაესტროში” პოლიტიკური გავლენის მოპოვებისთვის ბრძოლა მიმდინარეობს? ამ ორიდან რომელი ბრძოლაა მაესტროში?

- ნეტარ არიან მორწმუნენი… ვისაც სჯერა, რომ ქართულ რეიტინგულ ტელევიზიებში პოლიტიკური გავლენები არ არის, ან არ არის მცდელობა, რომ იყოს, მართლაც ნეტარ არიან. ეტყობა, ჩემგან განსხვავებით, ისინი ძალიან მშვიდი ცხოვრებით და ძალიან ბედნიერ ქვეყანაში ცხოვრობენ. ყველა დიდ ტელევიზიაში არის პოლიტიკური გავლენა, რაც ხან ზეწოლით გამოიხატება, ხან პრემიებით, ხან – ინვესტიციებით, ხან – დაფინანსებით.

- ის, რომ გია გაჩეჩილაძე დამატებით 15-15%-ს ყიდულობდა, ეს თქვენთვის ცნობილი თუ იყო, ან რატომ გაყიდეს მფლობელებმა ეს წილები, მათი არგუმენტი თუ იცით?

- საკუთრების უფლება ეს ერთ-ერთი მთავარი ღირებულებაა, ამიტომ ვინც წილი გაყიდეს, მათთან პრეტენზია არ შეიძლება იყოს. რაც შეეხება ბატონ გაჩეჩილაძეს, მან შეიძინა 30% და ამ 30%-ს მე ლეგიტიმურად ვაღიარებ. თუმცა ლეგიტიმურად არ ვაღიარებ მის იმ 25%-ს, რაც მანამდე გააჩნდა. არსებობს ნასყიდობის წინარე ხელშეკრულება, რომელიც მას ავალდებულებს, რომ შემდეგ გააფორმოს უკვე მთავარი ხელშეკრულება, რის მიხედვითაც მას თავისი წილები 4 ძველ დამფუძნებელზე უნდა გაესხვისებინა. ეს კი შემდეგ მან გადაიფიქრა. შეგიძლიათ მას ჰკითხოთ, რამ აიძულა ის, რომ ნასყიდობის წინარე ხელშეკრულება დაედო. შესაბამისად მე, როგორც ერთ-ერთი მეწილე, ბატონი გიას ხელში 25%-ს არ ვაღიარებ, ვაღიარებ მხოლოდ ახლად შეძენილ 30%-ს. ერთი თვის წინ სარჩელი უკვე შევიტანე და ვნახოთ, სასამართლო როგორ დამთავრდება.

- რატომ უნდა გადაენაწილებინა საკუთარი 25% მეწილეებისთვის ან მერე რატომ გადაიფიქრა?

- აი, ეს მსურს, რომ ჯერ მისგან მოვისმინო – რატომ გაუჩნდა მას სურვილი, გაეფორმებინა ნასყიდობის წინარე ხელშეკრულება და შემდგომ რატომ აღარ შეასრულა დანაპირები.

- თქვენ არ იცით მიზეზი?

- მე ყველაფერი ვიცი და ძალიან ბევრი ვიცი, მაგრამ მაინტერესებს ჯერ მისგან მოვისმინო.

- “ტვ 11″-ის სიხშირეზე “მაესტრო 24″ იხსნება. რატომ გახდა ახალი არხის გახსნა აუცილებელი და თქვენ თუ იღებთ ამაში მონაწილეობას?

- ამ შემთხვევაში ამ ახალი კომპანიის არც მეწილე ვარ და არც დამფუძნებელი და ამ კომპანიაზე პასუხს ვერ გაგცემთ. საერთოდ, მე ტელევიზიიდან გაქცეული ვარ და ახლაც ძალიან მძიმედ გადამაქვს ეს ამბები იმიტომ, რომ ზუსტად ამ ამბებს გავექეცი და წელიწადზე მეტია საერთოდ ტელევიზიისკენ გახედვაც მეძნელება.

- გაჩეჩილაძის ნაბიჯებს როგორ შეაფასებთ, მისი თქმით, ბაია გადაბაძის გაშვების მიზეზი არის “მაესტროს” რეიტინგის კლება, ტელევიზიის გაკოტრებაზე მის მიერ შეტანილი განცხადება და ფინანსური მდგომარეობა. ეს არგუმენტი თქვენთვის მისაღებია?

- ყველანაირ საკითხს შეიძლება სხვადასხვა მხრიდან შეხედო. თუ დავუშვებთ, რომ ბატონი გია მართალია და ამიტომ გადააყენა ბაია გადაბაძე, უნდა გავითვალისწინოთ ისიც, რომ ერთ თვეში შეიძლება სასამართლომ მას მართვის 25% სხვაზე გადააფორმებინოს, რაც იმას ნიშნავს, რომ ერთ თვეში ისევ მოუწევს ტელევიზიის დირექტორის შეცვლა. შედეგად კი აღმოჩნდება, რომ ტელევიზიამ ძალიან დიდი ზიანი მიიღო.

ტელევიზია უკვე იღებს ძალიან დიდ ზიანს და არ შეიძლება მისი დამფუძნებელი, რომელსაც სურს ტელევიზიის აღორძინება, საკუთარი ნებით აყენებდეს ტელეარხს ზიანს. როგორც ხედავთ, უკვე “მაესტრო 24″ გაჩნდა, ალბათ თანამშრომლების ნაწილი იქით წავა. გაჩეჩილაძეს საერთოდ აქვს თუ არა შენობა, საიდანაც უნდა იმაუწყებლოს, ესეც არ ვიცი, რადგან შენობა მაკა ასათიანს ეკუთვნის. საბოლოოდ თუკი ვინმე დაზიანდება, ეს მაყურებელი იქნება. ამაზე უნდა ეფიქრა ბატონ გიას. თუ ის წინააღმდეგი იყო იმის, რომ “მაესტრო” გაკოტრდა, წინააღმდეგი იყო იმის, რომ ბაია გადაბაძე არაკეთილსინდისიერად ახორციელებს საქმეს, არსებობს სასამართლო, სადაც საკუთარი სიმართლე უნდა დაამტკიცო. მაგრამ საქმე სწორედ ისაა, რომ სანამ არ მოიპოვა 30% და ასევე ის საეჭვო 25%, არ მოისურვა ამის გაკეთება და რადიკალური სვლები გააკეთა. თუმცა, ეს მისი ნებაა და ალბათ სასამართლო ყველაფერს თავის ადგილზე დააყენებს.

- თქვენ არ გქონდათ ბაია გადაბაძესთან პრობლემა იმ საკითხზე, რაზეც გაჩეჩილაძე საუბრობს?

- არხის პირველი დამფუძნებელი მე ვარ, სხვები შემდეგ შემომიერთდნენ და თუკი ბრენდი დღეს ღირებული და პოპულარულია, ეს ჩემი პროექტების დამსახურებაა. ასეთი დაახლოებით 10 პროექტი მაქვს გაკეთებული, სხვა დამფუძნებლებს კი ერთიც არ გაუკეთებიათ. მინიმუმ იმას მაინც ვიმსახურებდი, რომ რაღაც კონსულტაცია გაევლოთ ჩემთან – ახლა გადაეყენებინათ ბაია, ლევანი დაენიშნათ თუ ვინ. პატივისცემის ამბავში კონსულტაციები მაინც ყოფილიყო?! ასეთი რამ არ გაუვლიათ. შესამაბისად მათ არ აინტერესებთ სხვა დამფუძნებლების აზრი და ძალისმიერი მეთოდებით მოქმედებენ. მედიაზე ძალისმიერი მოქმედება არ მგონია კარგი იყოს.

- გადაბაძის განცხადებით, მისთვის პრობლემაა და კითხვის ნიშნებს აჩენს ის, რომ “იმედის” არაოფიციალური მმართველი ირაკლი რუხაძე დებს ფულს კონკურენტ ტელევიზიაში. არის ეს თქვენთვის საეჭვო, ან თქვენთვის რა აჩენს კითხვის ნიშნებს?

- ბატონმა ირაკლიმ მინიმუმ მიაღწია იმას, რომ იმ თანხად, რაც გადაიხადა, ფაქტობრივად დაშლის პირას მიიყვანა კონკურენტი ტელევიზია. რაც შეეხება მის პოლიტიკურ ამბიციებს, ამის შესახებ მე ვერაფერს გეტყვით, თუმცა, შესაძლოა ეჭვი არსებობდეს. ნგრევის პროცესის დაწყებას თვალყურს ყველა ვადევნებთ. ამ თემით აშშ-ის საელჩო დაინტერესდა. ეს ქვეყნის იმიჯისთვის არის ცუდი, პრემიერ-მინისტრი გაეხვია შარში, როდესაც ბატონმა გიამ თქვა – ჩემი ძმაკაციაო და სამუშაო საათებში მასთან მივიდა. ეს ქვეყნისთვისაც ცუდია და მედიისთვისაც.

- თქვენ რა ეჭვები გაქვთ, “ოცნების” ხელისუფლების სურვილია, გააკონტროლოს ტელეარხი?

- არ არსებობს ხელისუფლება, რომელსაც მედიის გაკონტროლების სურვილი არ აქვს. ასეთი ხ-ელისუფლება მსოფლიოში არ არსებობს და თუ “ოცნება” არის ისეთი ხელისუფლება, რომელსაც ასეთი სურვილი არ აქვს, მაშინ ჩვენ 23-ე საუკუნეში ვართ.

- თქვენ მიგაჩნიათ, რომ ეს არა მარტო სურვილია, არამედ “ოცნებამ” გაჩეჩილაძეების ხელით მაესტროს გასაკონტროლებლად მოქმედებაც დაიწყო?

- რაც უკვე ვთქვი, იქიდან საკმაოდ საღი აზრის გამოტანა შეიძლება.

- გჯერათ, რომ გაჩეჩილაძეების სურვილია არხი უფრო რეიტინგული გახდეს და მხოლოდ არარეიტინგულობა იყო მათი დღევანდელი ქცევის მიზეზი?

- ვენაცვალე სულში, ნეტა გააკეთონ კარგი ტელევიზია, მე მათ მხოლოდ წარმატებას ვუსურვებ, ოღონდ ლეგიტიმურად უნდა ჰქონდეთ ის 55%. დავა სასამართლოშია. როდესაც სასამართლოშია დავა, მინიმუმ კითხვის ნიშანი არსებობს მათი წილების რაოდენობაზე, თორემ ღმერთმა ხელი მოუმართოთ და ერთი კი არა, 10 ტელევიზია გააკეთონ.

- ბოლო პერიოდში გაჩეჩილაძეებთან საუბარი თუ გქონიათ “მაესტროს” საკითხზე?

- არც ერთი დამფუძნებელი საქმის კურსში არ ვიყავით. ახლაც არ ვიცი, მომავალში რა პროგრამა აქვს და ა.შ. ეს მინიმუმ ძალიან უხერხულია, რომ “მაესტროს” დამფუძნებლების – მე და ეკა აკობიას მიმართ ელემენტარული პატივისცემა არ ჰქონდეთ. მე და ეკა აკობია ვიყავით ერთად შენობაში, როდესაც ეროსი კიწმარიშვილი გადმოძვრა ღობეზე. ჩვენ რომ არ შევსულიყავით იქ იმ დროს, საინტერესოა დღეს გასაყოფი საერთოდ რა იქნებოდა. ასეთ ადამიანებს, რომლებიც არც ერთ მხარეს არ ვიყავით ჩართული, იმის ღირსად არავინ გვთვლის, მომავლის გეგმები შეგვატყობინონ. შესაბამისად, ჩემთვის მათი დამოკიდებულება გასაგებია.

- რითი დაიწყო მაკა ასათიანსა და გია გაჩეჩილაძეს შორის დაპირისპირება?

- “მაესტროს” დამფუძნებლების ნაწილს მიგვაჩნია, რომ გია გაჩეჩილაძეს 25% არალეგიტიმურად აქვს მითვისებული.

- გაჩეჩილაძის მტკიცებით, დაპირისპირება გაკოტრების საქმის სასამართლოში შეტანის გამო დაიწყო…

- გაჩეჩილაძემ სულ ახლახან შეიძინა 30%. როდესაც სტუდია “მაესტრომ” გაკოტრებაზე შეიტანა განცხადება, გაჩეჩილაძე მხოლოდ იმ 25%-ის მფლობელი იყო, რომლის ლეგიტიმურობაში ჩვენ ყველას ეჭვი გვეპარება.

- სასამართლოსგან რა მოლოდინი გაქვთ?

- არ ვიცით სასამართლო როდის გაიმართება. სიმართლის გარკვევას ველოდებით. თუ სასამართლოს ერთი ინსტანცია გაგვამტყუნებს, ჩვენ ბოლომდე წავალთ. თუკი ბოლო ინსტანციაც გაგვამტყუნებს, საშველი აღარ იქნება და დავას თავს დავანებებთ.

- თქვით, რომ ერთი წელია, პროცესებს ჩამოშორდით. მიზეზი რა იყო, იყო ნიშნები, რომ “მაესტროში” პროცესები ჯანსაღად არ მიდიოდა?

- მთელი ჩემი ცხოვრება გასართობ გადაცემებს ვაკეთებდი. “ნაციონალურმა მოძრაობამ“, რომლებიც მოძალადეები იყვნენ ამ სიტყვის სრული მნიშვნელობით, ჩვენი კომპანია გაკოტრებამდე მიიყვანა. შემდეგ იძულებულები გავხდით ჩავრთულიყავით პოლიტიკურ პროცესებში და ამდაგვარი ტელევიზია გაგვეკეთებინა. როგორც კი ეს მოძალადე “ნაციონალური მოძრაობა” წარსულს ჩაბარდა, ისეთი ტიპის ტელევიზია, როგორიც “მაესტრო” გახდა, საინტერესო არ იყო. საერთოდ, მე გასართობი გადაცემების სპეციალისტი ვარ და მაყურებელიც ასე მიცნობს. შესაბამისად, აღარ მქონდა სურვილი ასეთი სახის ტელევიზიაში მემუშავა. მით უმეტეს იმ წინა წლებმა და სტრესებმა, რაც გადავიტანე, ჯანმრთელობის მხრივ ძალიან დიდი ზიანი მომიტანა. ამიტომ გავერიდე პროცესს, რომ ჩემთვის მშვიდად და წყნარად მეცხოვრა. საუბედუროდ, ეს არ გამომდის.

- 2014 წლის დეკემბერში ტელეკომპანია 20-მდე თანამშრომელმა დატოვა, მათ შორის ნინო ჟიჟილაშვილმა და ვახო სანაიამ. ჟურნალისტები ამბობდნენ, რომ “არხი უნდა გახდეს იდეოლოგიზებული” და ამიტომაც ტელევიზიიდან წასვლა გადაწყვიტეს. რა ხდებოდა მაშინ და არის თუ არა დღევანდელი პროცესი 2014 წლის ამბების გაგრძელება?

- მე არც იმ პროცესებში ვიყავი ჩართული და არც დღევანდელ პროცესებში ვარ. შესაბამისად, პროცესის მონაწილეები უფრო სწორ პასუხს გაგცემთ, ვიდრე მე.

- საუბარი იმაზე, რომ ადრე მაკა ასათიანის ქმრის გეგმა იყო “მაესტრო” პრორუსული არხი გამხდარიყო და ახლა გაჩეჩილაძის სურვილია არხი სახელისუფლებო გახდეს, რადგან ის პრემიერის მეგობარია. თქვენ რა აზრის ხართ ამაზე?

- ვინც ამას ამბობს, ისინი იმასაც ამბობენ, რომ ეს ხელისუფლება პრორუსულია. ამ ლოგიკით განსხვავებას ვერ ვხედავ. თუკი “მაესტროც” პრორუსულია და ხელისუფლებაც, გამოდის პრორუსულობაში არაფერი იცვლება. ამაში ვერანაირ ლოგიკას ვერ ვხედავ და ვერანაირ პასუხს ვერ გაგცემთ იმის გარდა, რაც გითხარით.

- თუმცა, ეჭვი გაქვთ, რომ “მაესტრო” პროსახელისუფლებო გახდება.

- ეჭვი არ მაქვს, დარწმუნებული ვარ.

- არის დღეს “მაესტროში” გუნდი, ვინც გაჩეჩილაძეს მხარს უჭერს?

- “მაესტროში” თანამშრომლების 80%-ს არ ვიცნობ და ვერაფერს გეტყვით.