„ალია//კვირის ქრონიკა“: ინტერვიუ ლევან ბერძენიშვილთან: “გოგი თოფაძემ უნდა დატოვოს კოალიცია! სასწრაფოდ გასარკვევია, რა ძალები დგას ამ კაცის უკან!“

„ალია//კვირის ქრონიკა“: ინტერვიუ ლევან ლორთქიფანიძესთან: „ვინ დაასმინა ელისო ჩაფიძემ ბიძინა ივანიშვილთან?“

„ალია//კვირის ქრონიკა“: როგორ იძიებს შურს ბიძინა ივანიშვილი გუბაზ სანიკიძეზე?!

„ალია//კვირის ქრონიკა“: ინტერვიუ ვალერი გელბახიანთან: „კარგად დაიმახსოვრეთ, მოხდება ის, რაც აქამდე მომხდარა, ფერადი რევოლუციების სახით» // რომელ პარტიას დაიტოვებს ივანიშვილი კოალიციაში?

„ალია//კვირის ქრონიკა“: ინტერვიუ სანდრო ბრეგაძესთან: «გადადექიო, გელა დუმბაძემ ულტიმატუმი წამიყენა… სადაც ეშინიათ თინა ხიდაშელის, იქ ჩემი ადგილი არ არის»

„ახალი თაობა“: ინტერვიუ გია ხუხაშვილთან: „კოალიცია „ქართული ოცნება“ უნდა დაიშალოს“

„რეზონანსი//მთელი კვირა”: დაპირისპირება “ოცნებაში”: დეპუტატი თანაგუნდელებს მისი დისკრედიტაციის მცდელობაში ადანაშაულებს

„რეზონანსი//მთელი კვირა”: ინტერვიუ ომარ ნიშნიანიძესთან: „მინისტრი უფრო არაკორექტული იყო, ვიდრე ბატონი გოგი“

„რეზონანსი//მთელი კვირა”: ინტერვიუ დავით ზურაბიშვილთან: „ეს არის პირადი დაპირისპირება თავდაცვის მინისტრსა და გოგი თოფაძეს შორის“

„რეზონანსი//მთელი კვირა”: ინტერვიუ  კახა კუკავასთან: „პარტიები, რომელთა რეიტინგიც 0-სა და 15-ს შორის თამაშობს, კოალიციას არ დატოვებენ”

„ახალი თაობა“: ინტერვიუ ირაკლი ბათიაშვილთან: „რაზე გაურიგდა მიხეილ სააკაშვილი პაატა ბურჭულაძეს და ლეონიდ ჩერნოვეცკის?“

„კვირის პალიტრა“: “ოცნების” კრიზისი?!

„კვირის პალიტრა“: ინტერვიუ მამუკა არეშიძესთან: “არავის ვაშინებ, მაგრამ ხელისუფლება ფხიზლად უნდა იყოს!”

„რეზონანსი//მთელი კვირა”: ვინ გახდება მოსკოვის მთავარი დასაყრდენი საქართველოში // ნინო ბურჯანაძე რუსეთის საგარეო საქმეთა მინისტრის მოადგილეს შეხვდა

„ახალი თაობა“: ინტერვიუ ჯაბა ჯიშკარიანთან: „ნაციონალებს უგულავას ცოლის ოპერაციების დაფინანსებას გავახსენებ“

„ახალი თაობა“: ინტერვიუ გიორგი ჩიტაურთან: „ზაქარია ქუცნაშვილი კანონს არღვევს“

„რეზონანსი//მთელი კვირა”: ლეონიდ თიბილოვის “რეფერენდუმის” ორი მთავარი კითხვა // სეპარატისტები “რესპუბლიკას” სახელს უცვლიან და “პრეზიდენტს” რუსეთთან შეერთების უფლებას აძლევენ

————————-

„ალია//კვირის ქრონიკა“, 22-28 თებერვალი, 2016 წელი

ინტერვიუ ლევან ბერძენიშვილთან: “გოგი თოფაძემ უნდა დატოვოს კოალიცია! სასწრაფოდ

გასარკვევია, რა ძალები დგას ამ კაცის უკან!“

მაკა დეკანოსიძე

მმართველ კოალიციაში დაპირისპირება გადამწყვეტ ფაზაში შედის… კვირის „ნიუსფიდის“ ლიდერი გოგი თოფაძე გახლავთ. გარდა იმისა, რომ ბოლო დროს ანტიევროატლანტიკურ გამოსვლებს მოუხშირა, პარლამენტარმა უკვე ღია ეთერით „რესპუბლიკური პარტიის“ ერთ-ერთი ლიდერი, საქართველოს თავდაცვის მინისტრი თინათინ ხიდაშელი საგარეჯოს არჩევნების გაყალბებაში დაადანაშაულა და მისი დაკითხვის აუცილებლობაზე ისაუბრა. სიტუაცია მას შემდეგ გამწვავდა, რაც „რესპუბლიკელმა“ დავით ბერძენიშვილმა პარლამენტის ტრიბუნიდან თოფაძე ანტიეროვნულ და ანტიკოალიციურ ქმედებებში დაადანაშაულა. მოხუც „მრეწველს“, ორიოდე თანაკოალიციელის გარდა, არავინ გამოესარჩლა. მეტიც, იგი ღიად დატუქსეს. ყველაზე და ყველაფერზე გაბრაზებულმა პარლამენტარმა ჯერ ჟურნალისტებზე მიიტანა იერიში, პოლიციის გამოძახებითაც კი დაემუქრა, შემდეგ კი ერთ-ერთ ტელევიზიაში მისულმა ძმები ბერძენიშვილები მურვან (როგორც თოფაძემ თქვა, მურმან) ყრუსთან გააიგივა და მათ ქართველი ხალხისთვის საძულველი პიროვნებები უწოდა.

„ალიასთან“ საუბრისას, „რესპუბლიკელთა“ ერთ-ერთი ლიდერი და ევროინტეგრაციის კომიტეტის თავმჯდომარე ლევან ბერძენიშვილი აცხადებს, რომ ბრძოლა პიროვნული ხასიათის არაა და საქართველოს საგარეო კურსში განსხვავებული ხედვითაა გამოწვეული, ამიტომ „ქართულ ოცნებას“ მოუწოდებს, პრორუს თოფაძეს სასწრაფოდ დაატოვებინოს „ოცნების“ გუნდი. მიზეზებზე კი, რის გამოც, თოფაძის ყოფნა კოალიციაში დაუშვებელია, ლევან ბერძენიშვილი თავად საუბრობს.

- ბატონო ლევან, ბოლო პერიოდში თქვენი პარტიის მისამართით კოალიციის შიგნით თუ გარეთ დიდი ბრძოლაა გაჩაღებული, თოფაძემ ისიც თქვა, მურვან ყრუ არ ეჯავრებოდათ ქართველებს ისე, როგორც ძმები ბერძენიშვილებიო. როგორ ფიქრობთ, რატომ არ უყვართ „რესპუბლიკელები“?

- მე რასაც ვხედავ, ეს არაა პარტიის წინააღმდეგ ბრძოლა, „რესპუბლიკელებს“ ბევრი ლანძღვა-გინება გვინახავს და ამაზე აღარ გავაკეთებ კომენტარს, მაგრამ ახლა ფოკუსირება მოახდინეს თინათინ ხიდაშელის წინააღმდეგ, არა იმდენად იმის გამო, რომ „რესპუბლიკელია“, არამედ თავდაცვის მინისტრია და ატარებს ევროატლანტიკური ინტეგრაციის მკვეთრ ხაზს. უპირველეს ყოვლისა, ეს თავდასხმა განახორციელა ბატონმა გოგი თოფაძემ. ეს თავდასხმა, ასევე, ხორციელდება ქალბატონ ნინო ბურჯანაძის, ბატონ ლევან ვასაძის, ახლა ვიღაც სადღობელაშვილისა და სხვების მხრიდან, რაც არის კარგად ორკესტრირებული, ვიღაცის მიერ მოფიქრებულ-გააზრებული და წყალს ასხამს სულ სხვა ქვეყნის ინტერესების წისქვილზე. ბატონი თოფაძე არ დაკმაყოფილდა იმით, რომ თინათინ ხიდაშელის დაკითხვა მოისურვა და ბრძანა, რომ თურმე ნატო – ეს არის აგრესიული ბლოკი, რომ საქართველო არ უნდა მიისწრაფოდეს ნატო-სკენ, რომ საქართველო უნდა იყოს ნეიტრალური. ეს ყველაფერი მიუთითებსძალიან ნათელ პრორუსულ, ანტიდასავლურ კურსზე. ეს არ არის „რესპუბლიკელების“ მიმართ დარტყმა, ეს არის ბრძოლა საქართველოს სახელმწიფო ინტერესების წინააღმდეგ, მმართველი კოალიციის წინააღმდეგ, რომელსაც აღებული აქვს ეს კურსი.

მინდა ბატონმა თოფაძემ იცოდეს, დაახლოებით 30საუკუნეა, მედეას შემდეგ, ჩვენ ვართ დასავლური ცივილიზაციის ნაწილი და თოფაძე ვერ შეცვლის ამას, ვერც ისტორიას, ვერც რუსთაველს, ვერც ბარათაშვილს, ვერც ილია ჭავჭავაძეს… ის არ არის ამ დონის მოღვაწე, რომ საქართველოს ისტორია შეცვალოს. ჩვენ მივისწრაფვით ევროპისკენ, ჩვენ მივისწრაფვით ნატო-სკენ. ნატო-ს აგრესიულ ბლოკად გამოცხადება და კადაფის ბედზე ცრემლების ღვრა – ეს არ არის საქართველოს სახელმწიფო ინტერესებში. ნატოს შეურაცხყოფა იმ კოალიციის წევრისგან, რომელსაც ხელი აქვს მოწერილი იმაზე, რომ საქართველო დასავლეთისკენ მიდის, ჩემგან, როგორც ევროინტეგრაციის კომიტეტის თავმჯდომარისგან, როგორ იქნებოდა მოწონებული? რა უნდა მეთქვა, რას ელოდა, ყოჩაღ, რა კარგად მოიქეცითქო?!

- ჟურნალისტებსაც კი პოლიციის გამოძახებით დაემუქრა ბატონი თოფაძე, კოალიციის ზოგიერთი წევრი კი მის მუდმივ არაორდინარულ საჯარო განცხადებებს ასაკს აბრალებს…

- რატომ ჰგონია, რომ პოლიცია, რომელიც სახელმწიფო სტრუქტურაა, ნატო-ს მაგინებელის ინტერესებს დაიცავს და ჟურნალისტებს გაურეკავს იქიდან, მე არ ვიცი… რაც უნდა, ის თქვას, ბატონი გოგი არის ადამიანი, აქვს უფლება, იფიქროს და ისაუბროს, როგორც უნდა. უბრალოდ, მისი ადგილი იმ კოალიციაში არაა, სადაც სხვა რამეა გამოცხადებული, თორემ მასაც აქვს უფლება, რუსეთი უყვარდეს, ნინო ბურჯანაძესაც, სადღობელაშვილსაც (რომელიც ვერ გავიგე, ვინაა)…

- გოგი თოფაძის კოალიციიდან გაშვების საკითხი მხოლოდ ამ ეტაპზე გახდა აქტუალური? მანამდე არ იცოდით, რომ ეს ადამიანი კოალიციის კურსს არ იზიარებდა? მან თავის დროზე, როცა კოალიციაში გაერთიანდა, ღიად განაცხადა, რომ ანტიდასავლური კურსის მომხრე არ იყო?

- მან ხელი მოაწერა დოკუმენტს, რომელშიც წერია, რომ საქართველო მიისწრაფვის ნატო-სკენ და ევროკავშირისკენ, გარდა ამისა, საქართველოს პარლამენტმა 2013 წელს კენჭი უყარა და მრავალპარტიულად, მათ შორის ოპოზიციის მონაწილეობით, მიიღო საგრეო დოკუმენტი, რომელშიც ითქვა, რომ გვინდა ნატო, ევროკავშირი, ვიზალიბერალიზაცია და სხვა… მაშინაც ბატონი გოგი ამას თითქოს ეთანხმებოდა, მაგრამ ყოველთვის გამოთქვამდა ხოლმე თავის მოსაზრებებს ნატო-ს შესახებ, რომელიც არ ემთხვეოდა კოალიციის ხედვას, თუმცა კოალიციაში ამბობდნენ ხოლმე, რა მოხდა მერე, მოხუცი კაცია და ა.შ. მინდა გითხრათ, რომ მოხუცობა აქ არაფერ შუაშია, ძალიან კარგადაც აზროვნებს და შესანიშნავად აანალიზებს ყველაფერს. მაგალითად, იცის,რომ, ჟურნალისტები როცა არ უნდა, გამოუძახოს პოლიციას.ასე რომ, აქ პრობლემა არ არის მის ასაკში. უბრალოდ, პრობლემაა ის, რომ მისი აზროვნება ასცდა სახელმწიფოს კურსს, მმართველი კოალიციის კურსს.

- ბევრია ასეთი აცდენილი პარლამენტში? იქნებ ღიად არ საუბრობენ ამაზე? სხვათა შორის, ზურაბ ტყემალაძე თავგამოდებით იცავს მეგობარს და ანტისახელმწიფოებრივს მის გამონათქვამებში ვერაფერს ხედავს. მისი გარიცხვის საკითხიც ხომ არ დადგება დღის წესრიგში?

- თოფაძისგან განსხვავებით, ტყემალაძეს არასოდეს გაუკეთებია ანტიევროპული განცხადებები, უბრალოდ, მხარს უჭერს, ამბობს, მეგობარიაო და იცავს. ბატონ ზურაბს შესაძლოა, მართლა არ მოუსმენია, მაგრამ მე ჩემი ყურით მოვისმინე, როცა ბატონმა გოგიმ განაცხადა, რომ საქართველო არ უნდა შევიდეს არც ერთ აგრესიულ ბლოკში, ნატო არის ასეთი ბლოკი, იმიტომ რომ ცუდად მოიქცა ირანში, ცუდად მოიქცა ლიბიაში და ა.შ. ეს არ არის ზურაბ ტყემალაძის ტექსტი, ეს არის ბატონი თოფაძის აზრი, ერთი კაცია ასეთი მის ფრაქციაში და მის პარტიაში, დანარჩენებს ასეთი რამ არასოდეს უთქვამთ. რაც შეეხება იმას, რომ ბატონი ზურაბი ამბობს, მეგობარიაო, ეს არ მიკვირს, გადაეფარა თავის მეგობარს. მეგობრობა კარგია მეგობართან, მაგრამ უფრო დიდი სამეგობრო ჰყავს ბატონ ზურას – საქართველო და მისი ინტერესები. აბსოლუტურად პირდაპირ შემიძლია გითხრათ, რომ ის პროევროპულადაა განწყობილი, თანამშრომლობს ჩვენს კომიტეტთან, ის სერიოზულად თანამშრომლობს საქართველო-ევროპარლამენტის ერთობლივი ასოციაციის კომიტეტში, სადაც ქვეკომიტეტის თავმჯდომარეა.

ასე რომ, ტყემალაძეზე არაა საუბარი, საუბარი არის თოფაძის პერსონალურ განცხადებებზე, ჯერჯერობით სხვა ვინმეს ასეთი რამ, თუ არ გავიხსენებთ კიდევ ერთ გამოთქმას ერთი პარლამენტარისა, ასეთ დონეზე, არიქა მინისტრები დავიჭიროთ და ნატო არ გვინდაო, ასეთი საუბარი უმრავლესობაში არავისგან არ მსმენია. ამიტომ იყო, რომ გაკიცხა იგი, როგორც უმრავლესობის ლიდერმა, ბატონმა ზვიად კვაჭანტირაძემ, ასევე, უმრავლესობაში ყველაზე დიდი ფრაქციის „ქართული ოცნების“ თავმჯდომარემ, ბატონმა ვოლსკიმ. იმის დახატვა, რომ ეს არის ბერძენიშვილისა და თოფაძის ომი, სისულელეა.

- თუმცა ბატონმა ვოლსკიმ თოფაძის მიმართ კრიტიკული განცხადება მხოლოდ დავით ბერძენიშვილის იმ განცხადების მერე გააკეთა, რასაც პარლამენტის დარბაზში სიტყვიერი დაპირისპირება მოჰყვა…

- ამას მნიშვნელობა არ აქვს, მაგრამ იმის დახატვა, რასაც ზოგიერთი ცდილობს, თითქოს ეს ორი ადამიანის ჩხუბია, ასე არაა, საუბარია სახელმწიფო ინტერესებზე და გოგი თოფაძის ინტერესებზე, რომელიც საეჭვოდ ემთხვევა სხვა ქვეყნის ინტერესებს. ის, რომ ევროპაში მაინც არ გვიღებენ და რა გვინდა ნატოში და ა.შ… ძალიან ნაცნობი მელოდიაა. გადართეთ რუსეთის არხებზე და რასაც თოფაძე ლაპარაკობს, ამას გაიგონებთ დღეში ასჯერ. სულ ეს საკითხებია, თითქოს ევროპა არის ერთსქესიანთა ცხოვრება, ნატო კი გაერთიანება, რომელიც სტანჯავდა საწყალ კადაფის, რომ ის იყო წმინდანი. იქნებ რომელიმე სხვა ტირანზეც აგვატირონ. სტალინი მიყვარსო, გავიგეთ, ნატო არ მიყვარსო, გავიგეთ, ახლა კიდევ თინა ხიდაშელი მოხსენით, იმიტომ რომ არჩევნები გააყალბაო. ეს არ არის სერიოზული ლაპარაკი, მაგრამ, როგორც ჩანს, სერიოზული ძალები დგას ამის უკან.

დროულად უნდა გაირკვეს ეს, საქართველოს მთავრობა უნდა გაერკვეს, რადგან პერსონალურ სამიზნედ რომ გიქცევენ ქვეყანაში ყველაზე პოპულარულ და აქტიურ მინისტრს, რა თქმა უნდა, ამას პასუხი სჭირდება.

- ვისგან ელოდებით ამ პასუხს?

- მე პირადად საქართველოს მთავრობიდან, იმიტომ რომ საქართველოს მთავრობას უთხრეს, რომ ერთ-ერთ მთავარ მინისტრად ჰყავს დასაჭერი ადამიანი, რომელიც ქვეყანას ექაჩება ქვეყნისთვის არაკარგ ადგილში, კერძოდ ნატო-ში. ამაზე პასუხი უნდა წამოვიდეს მთავრობიდან, ჩვენ გავეცით პასუხი, როგორც „რესპუბლიკელებმა“, სახელმწიფო ინტერესებიდან გამომდინარე და არა იქიდან გამომდინარე, თანაპარტიელი რომაა ქალბატონი ხიდაშელი. ნებისმიერ შემთხვევაში აქ გაცილებით მნიშვნელოვანია ის, რომ ჩვენი კურსი დააყენა კითხვის ნიშნის ქვეშ.

- ისე, „თავისუფალ დემოკრატებსაც“ მიაჩნიათ, რომ პროდასავლურობის გამო მოხდა მათ წინააღმდეგ შეთქმულება და მაღალჩინოსნების დაჭერა, რომელთაც ბრალი დღემდე ვერ დაუმტკიცეს, თქვენი პარტიაც ხომ არ გაიზიარებს იგივე ბედს?

- ეს სხვა შემთხვევა იყო, სასამართლო მიმდინარეობს და ამაზე მე ვერაფერს ვიტყვი. იყო თუ არა ეს პროდასავლური კურსის წინააღმდეგ ბრძოლა, ძნელი სათქმელია, მაგრამ ფაქტი ერთია, მას შემდეგ ქვეყნის კურსი არ შეცვლილა, ვერც თოფაძის განცხადების შემდეგ შეიცვლება კურსი, ამიტომ ამ მოვლენებს ნუ შევადარებთ.

- სხვათა შორის, კოალიციაში თქვენი მისამართით პრეტენზია ბოლო დროს სიებთან დაკავშირებითაც მიდის. გარდა თოფაძისა, „რესპუბლიკელების“ გაძლიერება მომავალ პარლამენტში აშკარად არ ახარებს ბევრს და დაუსრულებელი მითქმა-მოთქმაა ამის გარშემო…

- რაც შეეხება სიის საკითხს, ბატონ თოფაძეს რომ ნამდვილად არ ადარდებს, სიაში 5 იქნება „რესპუბლიკელი“ თუ 10, ეს ვიცი. ის, უბრალოდ, ნატო-ს წინააღმდეგია. ამიტომ ამ კონკრეტულ შემთხვევაში ჩვენ არც სია გვაღელვებს, არც პარტიული ინტერესი, განსხვავებით ძველი შემთხვევისგან, ვინც „თავისუფალ დემოკრატებშია“. აქ სხვა რამეზეა საუბარი, ერთი კაცი ბედავს და თავისი ქვეყნის საწინააღმდეგოდ ლაპარაკობს და ჩვენ ახლა პასუხი გავცეთ, რომ ეს იმიტომ ხდება, 5 ადგილით მეტი გვინდა? ეს არ იქნება სწორი. საერთოდ არ მინდა პარლამენტში არც ერთი ადგილი, ოღონდ საქართველო წავიდეს იმ მიმართულებით, რაც აქვს გამოცხადებული. იმიტომ რომ ამ ქვეყანაში რეფერენდუმია ჩატარებული და უმრავლესობამ, დიდმა უმრავლესობამ, 80%-მა თქვა, რომ ნატო უნდა და ვინ ჰკითხავს ვინმე პარლამენტარს ქვეყნის კურსის წინააღმდეგ სიარულს, როგორ შეცვლის იმას, რასაც ქართველმა ხალხმა უპასუხა?!

- მოახლოებულია არჩევნები, კოალიცია როგორ აპირებს თავის დაზღვევას, რომ მომავალში კიდევ არ ვიხილავთ განსხვავებული კურსის მქონე პიროვნებას სიაში, თოფაძეს ან სხვა ვინმე მსგავსს?

- არაფერი, თოფაძემ უნდა დატოვოს კოალიცია, ეს იქნება სხვისთვის მაგალითი. ხომ ბრძანა, წავალ პარლამენტიდანო. ერთხელ ცხოვრებაში ერთი სიტყვა ხომ უნდა შეასრულოს, წავიდეს პარლამენტიდან და პრობლემა არ ექნება არც მის პარტიას და არც ფრაქციას. პრობლემა მხოლოდ მასშია. არ ვიცი, რა ძალა აკეთებინებს მსგავს განცხადებებს.

- და ეს განცხადებები ხშირად ემთხვევა მნიშვნელოვან მოვლენებს. როცა ნატო-ს გემები დგანან ბათუმში, შემთხვევითობაა, რომ პარლამენტარი თავდაცვის მინისტრის და ამ ალიანსის წინააღმდეგ ილაშქრებს?

- ვფიქრობ, რომ ეს არ არის შემთხვევითი. ბატონი თოფაძე, ლევან ვასაძე, ნინო ბურჯანაძე, ლადო სადღობელაშვილი ერთ სიმღერას მღერიან, სადმე იკრიბებიან და ვინმე ასწავლით რამეს თუ არა, ჩემი გასარკვევი არაა, სახელმწიფო კურსის წინააღმდეგ საუბარი სახელმწიფოს გასარკვევია. ამიტომ აუცილებლად მოსაწვევია უსაფრთხოების სამსახურის მესვეურები და დასასმელია ეს კითხვები. ბოლოს და ბოლოს, რა შეუთვალა ილია მეორემ ბიძინა ივანიშვილს? კაცი თავისი განცხადებებით ქვეყანას ანგრევს და ეს ვიღაცას გადაჰყავს კინკლაობის საკითხში, თითქოს ერთმანეთი არ მოსწონთ ბერძენიშვილებსა და თოფაძეს. ამიტომ ამასსჭირდება გარკვევა, საიდან და როგორ, რანაირად ხდება. თინა ხიდაშელზე რომ თქვა, დასაკითხიაო, ჩვენ რომ სხვანაირი ხალხი ვიყოთ, ხომ ვიტყოდით, ვინაა დასაკითხი, მაგრამ მისგან მხოლოდ იმას ვითხოვთ, რომ დატოვოს ჩვენი რიგები, რადგან კოალიციასთან და დასავლურ კურსთან არაფერი ესაქმება. დაანებოს თავი იმ ადგილს, სადაც არ არიან მისი მომხრეები. ყველამ გაკიცხა, ვნახე ერთი-ორი, რომელმაც თქვა, რომ ბერძენიშვილიც არ ვარგა და არც თოფაძე, თუმცა ეს ის შემთხვევა არაა, როცა ასეთი პრიმიტივის საუბარს ვინმე სერიოზულად მოუსმენს. საუბარია იმაზე, რომ საქართველოს პარლამენტის წევრი, ფრაქციის თავმჯდომარე, ფრაქციის, რომელიც ხელოვნურად შეუქმნეს, არ ჰყოფნიდა ხალხი და მიაშველეს, მოულოდნელად აღმოჩნდა, რომ არ ეთანხმება საქართველოს გაცხადებულ საგარეო კურსს, რომელიც ვერ შეცვალა ვერც ერთმა მთავრობამ, შევარდნაძიდან დაწყებული, ნატო-ს ვუკაკუნებთ და ახლა უნდა შეცვალოს ამ კომუნისტურმა გადმონაშთმა? რომელიც მისტირის ეპოქას, როცა კადაფის ძეგლები იდგა ლიბიაში? მე არ ვიცი, რა ატირებს კადაფიზე, რატომ მიაჩნია აგრესიულ ორგანიზაციად ნატო, მაგრამ ფაქტი ესაა. არსებობს ვიდეომასალა, არსაიდან წაშლილი არაა და თუკი ვინმემ ვერ გაიგო, რა თქვა, შეუძლია, ნახოს. რასაც ამბობს, ყველა სიტყვა არის ანტისახელმწიფოებრივი. როცა ნატო-ზე ასე საუბრობდა, მე სხვებთან ერთად ბრიუსელში ვიყავი ნატო-ში და მომიწია თავის მართლება, რომ ეს ერთი კაცია მხოლოდ, რომელიც თავისებურად ფიქრობს. ეს აზიანებს ჩვენს ინტერესებს…

- თუმცა თოფაძე თავად არ მიდის კოალიციიდან, რას იზამთ?

- მოუწევს, ასე ვერ დარჩება, ჩვენ აღარ გავჩერდებით და ადვილი იქნება მისთვის ამის გადატანა? ამაზე ხომ უნდა იფიქროს? მან ისეთი რამ თქვა, რომ უკან დახევა აღარ არსებობს. იმაზე ხომ არ არის მართლა, საგარეჯოში რა მოხდა, კაცი სახლიდან და კოალიციიდან გველაპარაკება სწორედ ისე, როგორც გველაპარაკება პუტინი.

„ალია//კვირის ქრონიკა“, 22-28 თებერვალი, 2016 წელი

ინტერვიუ ლევან ლორთქიფანიძესთან: „ვინ დაასმინა ელისო ჩაფიძემ ბიძინა ივანიშვილთან?“

ნინო სამხარაძე

ფაქტობრივად, მეორე კვირაა, რაც გოგი თოფაძე უკან არ იხევს და პრინციპულად უპირისპირდება „რესპუბლიკურ პარტიაში“ შემავალ კონკრეტულ სუბიექტებს. მისი სამიზნე ძირითადად არის თავდაცვის მინისტრი თინა ხიდაშელი, რომელსაც ბრალს სდებს არჩევნების კანონდარღვევით ჩატარებაში, ხიდაშელის თანაპარტიელმა დავით ბერძენიშვილმა გოგი თოფაძე ანტიეროვნულ და ანტიკოალიციურ განცხადებებში დაადანაშაულა. საქმე კი იქამდე მივიდა, რომ პარლამენტის სხდომათა დარბაზში მანდატურების ჩარევა გახდა საჭირო დაპირისპირებული მხარეების გასაშველებლად.

დაპირისპირებას მდუმარედ ადევნებდა თვალ-ყურს გოგი თოფაძე, თუმცა მოგვიანებით, ამ ყველაფრის შემყურე ის გაცილებით აგრესიული და შემტევი გახდა, ამ პროცესის შეჩერება კი მხოლოდ ერთ კაცს შეუძლია, ეს არის ბიძინა ივანიშვილი. პრემიერ-მინისტრი გიორგი კვირიკაშვილის განცხადება არ აღმოჩნდა სასიამოვნო მრეწველებისთვის, როცა კვირიკაშვილი თინა ხიდაშელის დამცველად მოგვევლინა და განაცხადა, რომ თავდაცვის მინისტრზე ასეთი ბრალდებები კოალიციას ჩირქს სცხებს. ჩვენ ვიმყოფებით „გოგის კვირეულში“, საზოგადოების დიდი ნაწილისთვის „მართალი გოგი გახდა“ იმედი, რომ ის აიძულებს „რესპუბლიკელებს“, კოალიცია დატოვონ, რადგანაც გოგი თოფაძის პრეტენზიები „რესპუბლიკელების“ მიმართ საზოგადოების გარკვეული ნაწილის პრეტენზიის იდენტურია, მაგრამ არსებობს გარე ფაქტორები, რის გამოც შესაძლოა, თავად გოგი თოფაძე აღმოჩნდეს კოალიციიდან თამაშგარე მდგომარეობაში.

გასული კვირა დინამიკური იყო, თოფაძის განცხადებების ფონზე ჩაიკარგა ტყიბულის მაჟორიტარი დეპუტატის ელისო ჩაფიძის სკანდალური განცხადება, რომელიც მან ბიძინა ივანიშვილის მისამართით გააკეთა სათაურით „რა დააშავეს ტყიბულელებმა?!»

ელისო ჩაფიძე დეპუტატობიდან ოთხი წლის თავზე, მხოლოდ ახლა მიხვდა, რომ ტყიბულში მეშახტეები გაფიცულები არიან, რომ მათთვის საჭიროა საშეღავათო პირობების დაწესება და ამ უპატრონოდ მიგდებულ რეგიონს პატრონი არ ჰყავს. რაც არ უნდა გასაოცარი იყოს, ეს მაჟორიტარი დეპუტატისგან მოვისმინეთ. არადა, წესით, საკანონმდებლო ორგანოში მაჟორიტარი უნდა იყოს ხალხის ხმა და მაჟორიტარს მინიმუმ იმხელა გავლენა უნდა ჰქონდეს თავისი საქმიანობიდან გამომდინარე, რომ მას არ დასჭირდეს განწირული ხმით კივილი – „რა დავაშავეთ, ბატონო ბიძინა!“. ელისო ჩაფიძის ამ ნაბიჯიდან ირკვევა, რომ მისი გავლენა სახელისუფლებო გუნდში არის ნული და იმ მოტივით, რომ თავი გადაირჩინოს და კვლავ პოლიტიკურ ორბიტაზე დარჩეს, პოლიტიკურიბრძოლის ხერხებს ცვლის და საარჩევნო ციკლის დასაწყისში იწყებს ტყიბულელების პრობლემებზე საუბარს. როგორც ჩანს, აქამდე არ ეცალა პოლიტიკური განცხადებებისთვის, ხაჭაპურებს აცხობდა ახლად შექმნილ ოჯახში. სამართლიანობისთვის უნდა ითქვას, რომ ბიძინა ივანიშვილმა თუკი ვინმეს აუხდინა ოცნება, ეს თავად ქალბატონი ელისო ჩაფიძეა, რომელიც თავის დროზე გვერდით ამოიყენა, საპატარძლოს რეგიონრეგიონ დაატარებდა და, საბოლოოდ, გაათხოვა კიდეც. მის ქორწილში საპატიო ადგილი ეჭირა ბიძინა ივანიშვილს.

ელისო ჩაფიძე დღეს ივანიშვილს ახსენებს ტყიბულელებისთვის მიცემულ პირობას, რომელიც მან არ შეასრულა, მაგრამ ამ ოთხი წლის მანძილზე თავად ელისოს არც ერთხელ ასე საჯაროდ არ დაუყენებია ის პრობლემები, რაზეც დღეს საუბრობს, არადა, მეშახტეები 2013 წელსაც ისევე აქტიურად შიმშილობდნენ, როგორც დღეს. ამ ქალბატონმა დააანონსა, რომ, თუკი ხელისუფლება მის მოთხოვნებს არ გაითვალისწინებდა, მაშინ ის წავიდოდა პოლიტიკიდან და ჟურნალისტიკას დაუბრუნდებოდა, მაგრამ, როგორც ჩანს, გადაიფიქრა, რადგან ტკბილია საპარლამენტო მანდატი და ის გავლენები, რაც პარლამენტარს აქვს.

დღეს უკვე აცხადებს, – არც პარლამენტიდან წავალ, არც პოლიტიკიდან და არც პარტიიდან. ასე რომ, „ფსბ“-ს და ცეკას ინტრიგანებს უფრო ადრე არ მოუწიოთ პოლიტიკიდან წასვლა, ვიდრე მეო. დაუზუსტებელია ფრაქცია „ქართული ოცნების“ ლიდერი გია ვოლსკი ჩაფიძისთვის „ფსბ“-ს ინტრიგანია თუ ცეკასი, მაგრამ ცხადია, რომ ჩაფიძე უპირისპირდება ირაკლი ტრიპოლსკის და გია ვოლსკის და ამბობს, რომ ვოლსკისთან რამდენჯერმე ჰქონდა ამ პრობლემაზე საუბარი: მან კი მითხრა, დაწერე წერილი და განვიხილოთო. მოკლედ, ელისომ ვოლსკისგან „აგდებულად“ ჩათვალა თავი და პირდაპირ ბიძინა ივანიშვილთან დაასმინა. ახლა კი ეთერიდან ამბობს, რომ, სავარაუდოდ, შესაძლოა, აღარ იყოს მომავალ არჩევნებში. მოკლედ, ელისოც ვაჭრობს, როგორც შეუძლია.

ვიდრე ელისო ჩაფიძე ახმაურდებოდა, პოლიტიკურ მეცნიერებათა მაგისტრი ლევან ლორთქიფანიძე სოციალურ ქსელში პერმანენტულად ეხმაურებოდა გაფიცული მეშახტეების პრობლემებს და ის აქტიურად იყო ჩართული ამ საკითხში. მიმდინარე კვირის მნიშვნელოვან თემებზე გთავაზობთ ინტერვიუს ლევან ლორთქიფანიძესთან და რა თქმა უნდა, საუბარს გოგი თოფაძის სკანდალური განცხადებებით და „რესპუბლიკელების» ჰიპერაქტიურობით დავიწყებთ.

- ლევან, რით ხსნით „მრეწველებისა“ და „რესპუბლიკელების“ დაპირისპირებას, რა შედეგს მოიტანს ეს?

- ამ ყველაფრის მთავარი მიზეზი თქვენთან ინტერვიუში ვიწინასწარმეტყველე და ვთქვი, რომ მიმდინარეობს ურთიერთშანტაჟის პროცესი, „რესპუბლიკელები“აშანტაჟებენ მთელ კოალიციას, – გავალთ, და თქვენ აღარ იქნებით პროდასავლური ძალა და თქვენი რეპუტაცია მიწასთან გასწორდებაო. დანარჩენები კი «რესპუბლიკელებს“ აშანტაჟებენ, ჩვენს გარეშე სამპროცენტიანი პარტია ხართ, საარჩევნო ბარიერსაც ვერ გადალახავთ და ხელისუფლებას სიზმარშიც ვერ ნახავთო, არც პარლამენტის თავმჯდომარე გეყოლებათ და არც სამი მინისტრი ხელისუფლებაშიო. პრინციპში, ორივე მხარე მართალია, „ქართული ოცნება“ „რესპუბლიკელების“ გარეშე მძიმე დღეში ჩავარდება და, თავის მხრივ, „რესპუბლიკელები“ ვერასოდეს მიაღწევენ იმხელა გავლენას, რასაც მათ ბიძინა ივანიშვილის დახმარებით მიაღწიეს. არჩევნების მოახლოებამ ურთიერთშანტაჟი დაამძიმა, მაგრამ ეს ახლა არ დაწყებულა, შანტაჟი დაიწყო მას შემდეგ, რაც „თავისუფალმა დემოკრატებმა“ კოალიცია დატოვეს. ახლა კი, არჩევნების მოახლოებასთან ერთად, თავგადაკლული ბრძოლა მიდის საარჩევნო სიაში ადგილების მოსაპოვებლად, „რესპუბლიკელებს“ კი განსაკუთრებული მოთხოვნები აქვთ სიებთან დაკავშირებით. მათ სურთ, უფრო მძლავრად და სერიოზულად იყვნენ წარმოდგენილები.

- კულუარული ინფორმაციით, შეიძლება ივანიშვილმა «რესპუბლიკური პარტია“ კოალიციის მიღმა დატოვოს, თქვენ გჯერათ შეთქმულების ამ თეორიის?

- არა მგონია, ივანიშვილმა გადაიფიქროს „რესპუბლიკელების“ კოალიციაში ყოფნა… უბრალოდ, ვფიქრობ, რომ ბატონი გოგი თოფაძე განცხადებებს დამოუკიდებლად ვერ გააკეთებდა და ასეთი თამამი ვერ იქნებოდა. ეს სცენარი, ალბათ, ბატონმა ივანიშვილმა გაათამაშა, რომ „რესპუბლიკელების“ მადა შეძლებისდაგვარად დაბალანსებულიყო. ასეთი მოქმედებები ივანიშვილის მხრიდან კიდევ იქნება, თუმცა ის „რესპუბლიკელებს“ არ გაწირავს, მაგრამ შეეცდება, მათ ადგილი მიუჩინოს და წარმომადგენლობა შეამცირებინოს, ასეთი დიდი მადა რომ აღარ ჰქონდეთ… მაგრამ მე ვფიქრობ, ამ პროცესებმა ძალიან ცუდი ხასიათი მიიღო და იცით, რატომ? „რესპუბლიკელებს“ უპირისპირდება აბსოლუტურად ოდიოზური ფიგურა, არადა, „ქართულ ოცნებას“ აქვს რესურსი, რომ პრემიერ-მინისტრის გუნდი და მის გარშემო შემოკრებილი ადამიანები გახდნენ „რესპუბლიკელების“ დამბალანსებელი კოალიციაში, მაგრამ პრემიერის ირგვლივ შემოკრებილიხალხი ხმას არ იღებს. სამაგიეროდ, ალაპარაკებენ გოგი თოფაძეს, რომელიც არაადეკვატური და ღიმილისმომგვრელია ძალიან ბევრ განცხადებაში. გოგი თოფაძემ ერთ-ერთი ტელეკომპანიის ეთერში თქვა, – მე ვიცოდი არჩევნები დარღვევით რომ ჩატარდა, ამაზე ხმის ამოღებას არ ვაპირებდი, მაგრამ თინა ხიდაშელმა რომ მახსენა ირონიულად, დამამცირა, ამიტომ ამოვიღე ხმაო. ანუ გოგი თოფაძემ თავად თქვა, რომ ვინმეს ცუდ კონტექსტში რომ არ ვეხსენებინე, ფეხებზე დავიკიდებდი არჩევნების გაყალბებას, არც კი დავინტერესდებოდი, იქ რა მოხდა და ჩუმად ვიქნებოდიო. ბუნებრივია, ასეთი ადამიანის მხრიდან ასეთი არგუმენტების წამოსროლას პირადი წყენის საფუძველზე, შედარებით ნაკლები ფასი აქვს. ვისურვებდი კოალიციის შიგნით იყოს ჯანსაღი კონკურენცია, პრემიერმინისტრის ირგვლივ შემოკრებილ ხალხსა და „რესპუბლიკელებს“ შორის ეს კოალიციისთვისაც კარგი იქნებოდა და „რესპუბლიკელებსაც» მადა შეუმცირდებოდათ.

- როგორ ფიქრობთ, თუკი ამ დაპირისპირების ფონზე „რესპუბლიკელები» გამარჯვებულები გამოვლენ, შემცირების ნაცვლად მადა ხომ არ გაეზრდებათ?

- თუ „რესპუბლიკელებს» კოალიციის შიგნით კონკურენციას გაუწევენ გოგი თოფაძისნაირი არასერიოზული პოლიტიკოსები, რა თქმა უნდა, მათი მადა გაორმაგდება და მართლებიც იქნებიან, სხვა ძალები უნდა გააქტიურდნენ, რომ „რესპუბლიკელების» მადა მოითოკოს, თუ არადა, ხაზგასმით ვამბობ, ლოგიკური იქნება „რესპუბლიკელების“ მხრიდან პრეტენზიები და მოთხოვნები.

- „რესპუბლიკელების“ „მცოცავი ანექსია“ გაძლიერდა, ნელნელა იპყრობენ ხელისუფლებას, არასასურველ კადრებს კი აძევებენ. დიასპორის საკითხებში სახელმწიფო მინისტრის მოადგილე სანდრო ბრეგაძე აცხადებს, თინა ხიდაშელმა პრემიერ-მინისტრს ულტიმატუმი წაუყენა და ჩემი განთავისუფლება მოსთხოვაო. სანდრო ბრეგაძე საკუთარი ნებით გადადგა, მაგრამ, როგორც ჩანს, ეს პროცესი არ დასრულდება, პოლიტიკური თავების მოჭრის სეზონი გახსნილია…

- მთავრობაში რომ ვყოფილიყავი, ამ ულტიმატუმს მეც დავაყენებდი, იმიტომ, რომ ბატონი სანდრო ბრეგაძის ლექსიკონი, მისი საუბრის ტონი მთავრობისთვის შესაფერისი არ არის. საჯარო გამოსვლების დროს ქვეყნის მოქალაქეებს ისეთი სიტყვებით მოიხსენიებს (ვინც არ უნდა იყვნენ ისინი – სექსუალური უმცირესობის წარმომადგენლები და ა.შ.), ასე საკუთარი ქვეყნის მოქალაქეებს არ ელაპარაკებიან. სანდრო ბრეგაძის განცხადებები მთავრობის იმიჯს აზარალებდა, რადგან მთავრობა არის გამაერთიანებელი – „ასეთების“, „ისეთების“, რელიგიური უმცირესობების, ოპოზიციის და ა.შ. ბატონი სანდროს პოზიციები დამაზარალებელი იყო ხელისუფლების იმიჯისთვის, მაგრამ მის განცხადებებში ვხედავ სხვა რაღაცას, რომ ის თავისი იდეების საფუძველზე განსაკუთრებული პოლიტიკური ძალის ჩამოყალიბებას შეეცდება. მე ვფიქრობ, რომ ის შეიძლება შევიდეს ალიანსში ნინო ბურჯანაძის ბლოკთან, „პატრიოტთა ალიანსთან“, ან სხვა კონსერვატორულ ძალებთან და ეს კარგია. კარგია, რომ იდეების საფუძველზე გადაჯგუფება დაიწყო. არ გამოვრიცხავ, შეიქმნას რადიკალური კონსერვატორული ფრთა ბატონი სანდროსა და მისი მსგავსი ადამიანების მონაწილეობით… და კიდევ, იცით, რა არ მომწონს? როცა მხარეები თინა ხიდაშელისგან ქმნიან სასწაულ ფიგურას, თუ სანდრო ბრეგაძეს მოუსმენთ, მთავარი უბედურება და ჩვენი ქვეყნის მტერი არის თინა ხიდაშელი, თუ დავით ბერძენიშვილს მოვუსმენთ, თინა ხიდაშელი თურმე არის სიქსტის მადონა, ჩამოსული საქართველოს მთავრობაში. ეს ასე არ არის, ერთ ადამიანზე ყველაფერ ცუდის და ყველაფერ კარგის მიწერა არ შეიძლება.

თინა ხიდაშელი არის ჩვეულებრივი მინისტრი, „რესპუბლიკელები“ კი ცდილობენ გავლენიან ფიგურად წარმოაჩინონ, მაგრამ რატომ ხედავენ ხიდაშელში საფრთხეს სხვა ძალები, ეს არ მესმის. ხიდაშელი არ არის ისეთი გავლენიანი ფიგურა, რომ მას პრემიერი ემორჩილებოდეს, რაშიც ღრმად ვარ დარწმუნებული. წარმოუდგენელია, რომ თინა ხიდაშელმა მძევლად აიყვანოს კვირიკაშვილი და ულტიმატუმი წაუყენოს ამა თუ იმ საკითხზე.

- აშკარაა, რომ კოალიციაში ვითარება დრამატული ხდება, ბიძინა ივანიშვილი კი დუმს, საინტერესოა, როდის გამოჩნდება ის კონკრეტული განცხადებით?

- არა მგონია, კოალიციიდან „რესპუბლიკელები» თავისი ნებით გავიდნენ, თანაც გაითვალისწინეთ, რომ ამ პარტიაში ბიძინა ივანიშვილის ფავორიტი პოლიტიკოსები არიან, მაგრამ იმას ვუშვებ, რომ შესაძლოა, „მრეწველებმა“ დატოვონ კოალიცია და სხვაგან მონახონ თავისი ადგილი, მაგალითად – „პატრიოტთა ალიანსთან~, ნინო ბურჯანაძესთან. ყველაფერი მაინც ამ დღეებში გადაწყდება, როცა ყოფილი პრემიერი თავის პოზიციას დააფიქსირებს… ივანიშვილი, უპირობოდ, მთავარი ფაქტორია ამ კოალიციაში და როგორც წარსულში კანონიერი ქურდები ალაგებდნენ ქუჩაში ურთიერთობებს, აი, ზუსტად ასე, კანონიერი ქურდივით, დაალაგებს ივანიშვილი თავის კოალიციაში სიტუაციას.

- რაც შეეხება „ქართული ოცნების“ მაჟორიტარი დეპუტატის, ელისო ჩაფიძის „გამოღვიძებას“ და მეშახტეთა ბედით დაინტერესებას, ხომ არ უკავშირებთ ამას არჩევნების მოახლოებას? ის, რომ ჩაფიძე ვეღარ იქნება დეპუტატი, თავადაც კარგად იცის. რის მიღწევა სურს?

- რა თქმა უნდა, მისი გააქტიურება უკავშირდება წინასაარჩევნო კამპანიას. თქვენ იცით, მემარცხენე ჯგუფები დავდივართ რეგიონში აქტიურად, სადაც მაღარო, შახტაა, მათ შორის ვიყავით ტყიბულში, საზოგადოების საქმეში ჩახედულ ადამიანს ტყიბულში რომ ჰკითხოთ, ყველამ იცის, რომ არის ძალიან მძიმე კონკურენცია მაჟორიტარის პოსტის დასაკავებლად ტყიბულის რაიონში. ერთი მხრივ, მაჟორიტარად კენჭისყრას აპირებს განათლების მინისტრის მრჩეველი ოთო აბესაძე და მეორე მხრივ, მაჟორიტარობის კანდიდატი არის ელისო ჩაფიძე და მათ შორის გაჩაღებულია უმძიმესი დაპირისპირება. ამას ჩვენ გვიყვებიან ტყიბულელები, არჩევნები მოახლოვდა და ბატონი ოთო აბესაძე აპირებდა ტყიბულელების შესახებ ეთქვა ერთი-ორი სიტყვა და ელისო ჩაფიძემ დაასწრო. ამასთანავე, ძალიან გასაოცარია, რასაც ელისო ჩაფიძე ამბობს და სრული პასუხისმგებლობით ვაცხადებ, რომ ქალბატონმა ჩაფიძემ არ იცის, როგორ დაიცვას მუშათა უფლებები საკანონმდებლო დონეზე. ის მხოლოდ მთიანი რეგიონის კანონის მიღებას ითხოვს. ცხადია, ეს მნიშვნელოვანია, ეს მუშას 10%-იან შეღავათს აძლევს ხელფასის აღების დროს, მაგრამ ელისო ჩაფიძე არაფერს ამბობს შრომით კოდექსში შესატან ცვლილებებზე და სამმხრივი კომისიის შეკრებაზე, სადაც უნდა შედიოდნენ ბიზნესმენები, პროფკავშირი და ხელისუფლების წარმომადგენლები.

ელისო ჩაფიძეს თოფიანი კაცივით ეშინია დავით ბეჟუაშვილის და არაფერს ამბობს მის წინააღმდეგ, რომელიც არის რეალურად ამ შახტის მეპატრონე და ბოროტების მთავარი მქმნელი. შესაბამისად, ადამიანებს ელისო ჩაფიძის გულწრფელობის არ სჯერათ. მან არ იცის, როგორ დაიცვას მუშების ინტერესები და ვერ ბედავს რიგი მოქალაქეების წინააღმდეგ წასვლას, გია ვოლსკისა და გია ჟორჟოლიანის გალანძღვა, მათ წინააღმდეგ სიტყვის თქმა პრობლემას არ წარმოადგენს. ეს მუშები 2013 წელსაც რამდენჯერმე გაიფიცნენ. ამ დროს ელისო ჩაფიძე იყო დეპუტატი და ბეჟუაშვილისა და სხვა მხარეების მომრიგებელი შეხვედრების ორგანიზატორი. რეალური ნაბიჯები ამ მხრივ არ გადადგმულა. ცხადია, ის იბრძვის არჩევნებისთვის და არავის სჯერა მისი განცხადების, რომ ის პოლიტიკიდან წავა, ოღონდ მაღაროელები გადარჩნენ. ზოგადად, კარგია, რომ ხმა ამოიღო და ეს საკითხი დააყენა დღის წესრიგში. ქალბატონი ელისო სარგებლობს იმ არეულობით, რაც შექმნილია კოალიციაში და სურს, ეს სათავისოდ გამოიყენოს და თვითონაც გამოჩნდეს, როგორც ფაქტორი და მოთამაშე. მე ის გამიკვირდა, რაც მან თქვა, ხელისუფლებაში ყოფნის დროს დეპუტატს უჭირს თავისი ამომრჩევლის დაცვაო. ეს არის ალოგიკური განცხადება. სახელისუფლებო ფრაქციის წევრი თუ ხარ და შენ არავინ გისმენს, ე.ი. არაფერს წარმოადგენ, წონა არ გაქვს, აქამდე არაფერი გიკეთებია, პატივს არ გცემენ. სჯობს, ჯერ საკუთარ თავს მიუთითოს ქალბატონმა ჩაფიძემ და მერე სხვებს.

- პარტია „ქართული ოცნების» პოლიტსაბჭოს წევრი არმაზ ახვლედიანი პერმანენტულ შოკურ თერაპიას უწყობს კოალიცია „ქართულ ოცნებას“. აი, რას აცხადებს იგი: „გიორგი კვირიკაშვილმა რაც შეიძლება სწრაფად უნდა გაათავისუფლოს „ქართული ოცნება“ ბებერი პოლიტიკური ნიანგებისგან…“ ასევე, ის ღიად საუბრობს, რომ ოცნებაში» კომუნიზმი მძვინვარებს და დემოკრატიისგან ისინი შორს დგანან. თქვენი აზრით, რასთან გვაქვს საქმე და რატომ ინარჩუნებს იგი კვლავ პოზიციებს „ქართულ ოცნებაში“, თუკი თვლის, რომ ვადაგასულ პოლიტიკურ ნიანგებთან და ვადაგასულ პოლიტიკოსებთან გვაქვს საქმე. არმაზმაც ახლა გამოიღვიძა?

- ბატონ არმაზს ძალიან კარგად ვიცნობ, ის არის ძალიან კარგი მოსაუბრე და პოლიტიკაზე მეტად, მის ადგილს რომელიმე რიტორიკის შემსწავლელ სკოლაში ვხედავ, როცა საუბრობს ბებერ ნიანგებზე და მფრინავ სპილოებზე, არ მესმის მანამდე ისინი იქ არ იყვნენ? კოალიციაში მათთან ხომ თანამშრომლობდა? ასე რომ, ნიანგები რომ იყვნენ კოალიციაში, მან გადასარევად იცოდა. როგორც ჩანს, თავად ვერაფერი გააწყო მათ წინააღმდეგ და გაბრაზებულია. ეს გაბრაზებაც ლოგიკურია, რადგან არმაზმა კოალიციაზე გავლენა დაკარგა. აშკარაა, პოლიტიკოსების კრიზისია, რაც შეიძლება გამოიხატოს ვადამდელ არჩევნებში 2016 წლის საპარლამენტო არჩევნების შემდეგ. მე ვფიქრობ, გამოჩნდებიან ახალი პოლიტიკური ძალები. არ ვვარაუდობ, რომ ჩვენს ქვეყანაში მოხდეს სამოქალაქო ომი, ან დაპირისპირება, რადგან ჩვენ სამოქალაქო ომის კომპლექსი გვაქვს, ასეთ სასწაულს არ ველი, მაგრამ იმას, რომ 2016 წლის შემდეგ შესაძლოა, ვადამდელი არჩევნების ჩატარების აუცილებლობა დადგეს, არ გამოვრიცხავ.

„ალია//კვირის ქრონიკა“, 22-28 თებერვალი, 2016 წელი

როგორ იძიებს შურს ბიძინა ივანიშვილი გუბაზ სანიკიძეზე?!

ნინო სამხარაძე

კოალიციაში შემავალი სუბიექტები ფრონტის ხაზს ხსნიან, ერთმანეთის მიმართ ზიზღის ფრქვევას იწყებენ და არ არის გამორიცხული, რომ ერთ მშვენიერ დღეს კოალიცია აფეთქდეს და მარტივ მამრავლებად დაიშალოს. ამის ყველანაირი წინაპირობა არსებობს. წინა ხაზზე წამოწეულია „მრეწველთა პარტია“ და მისი ლიდერი გოგი თოფაძე, არჩევნების მოახლოებასთან ერთად პარტიებს შორის ეგოიზმი თვალშისაცემი ხდება, კოალიციაში შემავალი სუბიექტები იმასაც კი ვეღარიტანენ, როცა პოლიტიკურ ამინდს, ავად თუ კარგად, სხვა პარტია ქმნის. მაგალითად, „ეროვნული ფორუმი“ ემიჯნება „მრეწველებისა» და „რესპუბლიკელების“ დავას და ისინი საჭიროდ არ თვლიან ამ საკითხზე კომენტარის გაკეთებას, ქვეყანაში უფრო მნიშვნელოვანი პრობლემები არსებობს, სხვათა დავაში არ ჩავერევითო. ძალიან მალე „ეროვნული ფორუმი“ ყრილობას ჩაატარებს და თუკი ყრილობამდე „ქართული ოცნების» ლიდერებთან შეთანხმებას ვერ მიაღწევენ კვოტების გაზრდაზე და მინისტრების პოსტებზე, შესაძლოა, მათ დატოვონ „ქართული ოცნება და ნინო ბურჯანაძეს გაურიგდნენ. მათთვის ნინო ბურჯანაძე შორსმდგარი პოლიტიკური ფიგურა არ არის. ჯერ კიდევ 2010 წელს „ეროვნულმა ფორუმმა“ ნინო ბურჯანაძეს სოლიდარობა გამოუცხადა, ისინი „სახალხო კრებას» შეუერთდნენ, რასაც მაშინ ირაკლი მელაშვილის პროტესტი მოჰყვა. ეს გახდა მიზეზი, მელაშვილს „ეროვნული ფორუმი“ დაეტოვებინა, რადგან მელაშვილი მაშინაც მიიჩნევდა, რომ ნინო ბურჯანაძე პრორუსული ძალა იყო და მის ორბიტაზე „ეროვნული ფორუმის“ ადგილი, წესით, არ უნდა ყოფილიყო. მაშინ პოლიტიკური დაახლოების მომხრე იყო გუბაზ სანიკიძე.

სხვათა შორის, დღეს არ გამორიცხავენ, რომ კვლავ გუბაზ სანიკიძე გახდეს ნინო ბურჯანაძესთან ალიანსის ინიციატორი. მართალია, ის აცხადებს, რომ ნინო ბურჯანაძე მისი შვილის ნათლიაა, საკუთარ სიცოცხლესა და მის ოჯახს ანდობს, თუმცა პოლიტიკა არის პოლიტიკა და არ ვფიქრობთ ამ ეტაპზე მასთან შეერთებასო, მაგრამ, როგორც წესი, პოლიტიკოსები ტყუიან და ყოველთვის ცდილობენ, სიცრუე სიმართლეც შემოგასაღონ, კოალიციაში შემავალმა სუბიექტებმა არ იციან, რა გადაწყვეტილებას მიიღებს ბიძინა ივანიშვილი, თუმცა ამ ეკლექტურ კოალიციაში ხვდებიან, რომ იქ ნამდვილად არ მოხვდნენ, სადაც მათი ადგილია, ეს იყო ფორსმაჟორულ ვითარებაში გაკეთებული კოალიცია, რომელიც აუცილებლად რევიზიას გაივლის. ერთადერთი პოლიტიკური სუბიექტი, რომელმაც თავის დამკვიდრება შეძლო და დღეს დომინანტია, ეს არის „რესპუბლიკური პარტია“, დანარჩენები კი, უბრალოდ, ცარიელ ადგილებს ავსებენ, მათ შორის, „ეროვნული ფორუმი“, რომელმაც ამ 4 წლის მანძილზე ღირებული ვერაფერი შექმნა. მეტიც, ანტიდისკრიმინაციული კანონის მიღების დროს, ეს ე.წ. „ეროვნული პრინციპების მატარებელი“ პოლიტიკოსები, ისე გაირინდნენ, რომ მათი არსებობა თითქმის ყველას დაავიწყდა. პირადად მე, გუბაზ სანიკიძე ლომი მეგონა, ლომი კი არა, კატა ყოფილა… და თუკი ის ფიქრობს, რომ, როცა საჭიროდ ჩათვლის, მაშინ გააჩაღებს ცეცხლს და „ეროვნულ ფორუმს“ რეიტინგს აუწევს, ბატონ გუბაზს ვეტყვი, რომ ამდენი წელი პოლიტიკაში უქმად ყოფილა და პოლიტიკის არაფერი გაეგება რა. მან კარგად უნდა იცოდეს, რომ წილი პასუხისმგებლობა ამ ხელისუფლების უნიათობის, შეუსრულებელი დაპირებების, გარდაცვლილი სამართლიანობის მოდის როგორც „ქართულ ოცნებაზე“, ასევე ამ კოალიციაში შემავალ ყველა პარტიაზე და მას აუცილებლად მოსთხოვენ პასუხს, აუცილებლად ჰკითხავენ, – სად იყავი, გუბაზ, მაშინ, როცა ანტიდისკრიმინაციულ კანონს იღებდნენ და შეახსენებენ მის მიერ ხმამაღლა დაანონსებულ ოცნებას: „არაფერი არ მინდა, არც პრეზიდენტობა, არც არაფერი, მაგის დედაც მოვ…ან, ფული უნდა ვიშოვო, რა… მილიონერი უნდა გავხდე…“.

ამომრჩეველი გუბაზ სანიკიძესა და „ეროვნულ ფორუმს“ რას აპატიებს და რას გაუხსენებს, ეს მათი გადასაწყვეტია, მაგრამ ივანიშვილი რომ არასოდეს დაივიწყებს გუბაზ სანიკიძის მხრიდან მისი შვილის დამცირებას, ეს სანიკიძემ ყველაზე კარგად იცის. სანიკიძემ ბერა ივანიშვილი უწმაწური სიტყვებით მოიხსენია, ბიძინა ივანიშვილს ჩანაწერში აგინებს და ამბობს, რომ თავიდანვე იცოდა, რაც იყო იგი… ეს ის ფარული ჩანაწერია, რომელიც „ნაციონალებმა» არჩევნების წინ კომპრომატად გამოაქვეყნეს. ე.ი. რა გამოდის, გუბაზ სანიკიძემ, ისევე როგორც ლევან ბერძენიშვილმა, რომლისთვისაც ივანიშვილი სოფლიდან ჩამოთრეულ ფულის ტომარასთან ასოცირდებოდა, თავიდანვე იცოდნენ, ვისთან ჰქონდათ საქმე და ვინ იყო იგი, მაგრამ ამ „ფულის ბოზებმა“, რომლებმაც ოღონდ ხელისუფლებაში მოსულიყვნენ და კარგად გამომძღარიყვნენ,ხალხიც ფეხებზე დაიკიდეს და საკუთარი პრინციპები. თუ შენ იცოდი, ვინ იყო ბიძინა ივანიშვილი, რას მირბოდი მის ერთ დაძახილზე, კიკუ ხარ, რომ გაიხადე და ფული აიღე?..

გუბაზ სანიკიძემ კარგად უნდა იცოდეს, რომ სროლა დასწრებაზეა. სანამ ივანიშვილი გესვრის, ჯობია გაასწრო კოალიციიდან, თორემ ყოველთვის წინ დაგხვდებათ თქვენი იდიოტური დასკვნები ბიძინა ივანიშვილის ალბინოს შვილებზე: „შარტავა იძახის, ეგ არის სისხლის აღრევის შედეგიო. ზოოპარკში გინახავს, თეთრი ვეფხვები და ლომები რომ დარბიან?!. სულ ალბინოსები იბადებიან იმიტომ, რომ და-ძმას შორის კონტაქტი არის…“.

ჩემო გუბაზ, მაგ გასიებულ თავში რომ ასეთი ბინძური აზრები მოგივა და კიდევ ოცნებას დაიწყებ, როგორმე დარჩე ხელისუფლებაში, აი, ეს არის ნაძირალობა!.. თუ დღეს ივანიშვილი ხმას არ იღებს, ეს არ ნიშნავს იმას, რომ გაპატია.

ალბათ, ყველაფერს გააკეთებს, რომ საჭირო მომენტში შური იძიოს. მიუხედავად პრეზიდენტთან დაპირისპირებისა, ივანიშვილმა გოგი თოფაძეს არ აპატია პრეზიდენტის მიმართ წარმოთქმული ფრაზები: „თქვენ ქართველი ერი დაუნს შეადარეთ და არ უნდა გეკადრათ ამ ხალხის პრეზიდენტობაო…“. რითაც ხელისუფლების წარმომადგენელმა დაუნის სინდრომის მქონე ადამიანების დისკრიმინაცია მოახდინა და მათ იდეაში წაართვა უფლება, აირჩიონ და ჰყავდეთ პრეზიდენტი. ივანიშვილმა გოგი თოფაძე დატუქსა, ასეთი მკვახე განცხადებების გაკეთება საჭირო არ იყოო… მით უმეტეს, როცა მის შვილებს ეხება საკითხი, აქ ბიძინა ივანიშვილი დაუნდობელი, შეუვალი და შურისმაძიებელი ხდება, ისევე როგორც ნებისმიერი მშობელი, ოღონდ იმ განსხვავებით, რომ გაცილებით მეტი ძალაუფლება აქვს ივანიშვილს, უფრო მწვავედ იძიოს შური მასზე, ვინც მის შვილებს შეეხება. გუბაზ სანიკიძე კი ძალიან ცუდად და ძალიან უხეშად შეეხო ივანიშვილის ოჯახს.

თუკი „ეროვნული ფორუმი“ ყრილობაზე გადაწყვეტს, გაემიჯნოს კოალიცია „ქართულ ოცნებას“, ვინ დაიჯერებს, რომ ეს გადაწყვეტილება ფორუმელებმა თავად მიიღეს. არც არავინ. ამის დაჯერება სასაცილოც იქნება, წარმოიდგინო, როგორ ბედავს, პირველმა გადადგას ეს ნაბიჯი და უარი თქვას ქერის ორმოზე. ეს მაინც ივანიშვილის გასაკეთებელია.

„ალია//კვირის ქრონიკა“, 22-28 თებერვალი, 2016 წელი

ინტერვიუ ვალერი გელბახიანთან: „კარგად დაიმახსოვრეთ, მოხდება ის, რაც აქამდე მომხდარა, ფერადი რევოლუციების სახით»

რომელ პარტიას დაიტოვებს ივანიშვილი კოალიციაში?

ნინო სამხარაძე

იურისტი ვალერი გელბახიანი ჩვენთან ინტერვიუში საინტერესო პოლიტიკურ კომბინაციაზე საუბრობს. მიმდინარე მოვლენებს კი ასე აფასებს, რომ „რაც ხდება, ეს არის ბუნებრივი პროცესი, რადგან საარჩევნო წელია, კოალიცია ადგილების მოპოვების მიზნით იბრძვის და იდეოლოგიური შეუთავსებლობის გამოაშკარავების დროც დადგა. ვინაიდან „რესპუბლიკურ პარტიას“, „ქართულ ოცნებაში“ დომინანტის ფუნქცია აქვს, აქედან გამომდინარე, დანარჩენ პარტიებს ფორმალურობის ელფერი დაჰკრავს, არიან კოალიციის წევრები, მაგრამ არა აქვთ პორტფელები, როგორც აღმასრულებელ ხელისუფლებაში, ასევე მათ არ გააჩნიათ საპარლამენტო თანამდებობები. ისინი ვერ ახდენენ პოლიტიკურ ცხოვრებაზე გავლენას და თავს დაჩაგრულად გრძნობენ. ხშირ შემთხვევაში თავსაც იწონებენ, პრეტენზია არ გამოგვითქვამს, რომ მინისტრის პორტფელები აგვეღო ხელშიო. ბევრი ხვდება, რომ კოალიციაში მისი ადგილი აღარ არის და დაიწყეს ძებნა სხვა პარტიებთან მისასვლელი გზების».

ჩვენს კითხვაზე, რომელმა პარტიებმა დაიწყეს ძებნა ალტერნატიული გზების, რომელიც, სავარაუდოდ, სიაში ვერ მოხვდება, ვალერი გელბახიანი აცხადებს: „კოალიციაში შემავალი სუბიექტების სია ასე გამოიყურება: «რესპუბლიკელები“, „სოციალ-დემოკრატები“, „მრეწველები“, „ეროვნული ფორუმი“, „კონსერვატორები“… ამ უკანასკნელს ფეხქვეშ  ცეცხლი რომ დაუნთო, „ქართული ოცნების“ კოალიციიდან არსად წამსვლელი არ არის. ზვიად ძიძიგური ყველაფერს გააკეთებს, როგორმე ადგილი შეინარჩუნოს. კონსერვატორებს ფრაქციის შესაძლებლობა აღარ ექნებათ, რადგან საარჩევნო სია ფართო სპექტრს ვერ იტევს. გარდა ამისა, კვლევები აჩვენებს, რომ „ქართული ოცნების“ რეიტინგი მაქსიმუმ 30%-ია, რაც ნიშნავს 75-კაციან სიაში 15 ადამიანს. ამ 15 ადგილში ვინმე რომ მოხვდეს პარტიული კვოტით, ეს გამორიცხულია. თუ ზვიად ძიძიგური და „კონსერვატორები“ დარჩებიან, ეს იქნება მისი გამარჯვება, რომ საპარლამენტო პარტიად იქცეს. დანარჩენების – „მრეწველებისა“ და „ეროვნული ფორუმის“ ადგილი, კოალიციაში არ არის. მიუხედავად იმისა, რომ „რესპუბლიკელები“ ძალიან ცდილობენ „ქართულ ოცნებასთან“ ერთად კოალიციაში იყვნენ, ვფიქრობ, არც მათ ექნებათ გარანტირებული ადგილები, რადგან „ოცნება“ დღეს უკვე ბიძინა ივანიშვილი აღარ არის, მას თავის გამწევი ლიდერები ჰყავს და ისინი ფიქრობენ, რომ დიდი პატივი იყო „რესპუბლიკელებისთვის“ მათთან ერთად ყოფნა და საპარლამენტო პარტიიდან, სახელისუფლებო პარტიად გადაკეთდება.

„ოცნებაში“ თვლიან, რომ „რესპუბლიკელებს» განსაკუთრებული წვლილი არ შეუტანიათ სახელმწიფოებრივ პროცესებში და პირიქით, მათ დაბალ რეიტინგს სწორედ „რესპუბლიკელების» ურეიტინგობას უკავშირებენ…

„ქრონიკის“ კითხვაზე, საპარლამენტო არჩევნებამდე დაიშლება თუ არა კოალიცია, ვალერი გელბახიანი პასუხობს, რომ კოალიცია უკვე დაშლილია. „ეროვნულ ფორუმის“ მომავალს ვალერი გელბახიანი ნინო ბურჯანაძესთან ხედავს:

„ეროვნულმა ფორუმმა» ძალიან კარგად იცის, რომ მათი ადგილი იმ კოალიციაში აღარ არის და თამაშგარე მდგომარეობაში აღმოჩნდნენ. სავარაუდოდ, «ფორუმი“ და ბურჯანაძე მოლაპარაკებას დაიწყებენ. რაც შეეხება მრეწველებს, მათი გააქტიურება და გოგი თოფაძის მწვავე განცხადებები დაკავშირებული იყო ორიენტაციულ იდეოლოგიასთან, რაც არსებობენ „მრეწველები“, უფრო ჩრდილოეთისკენ იყურებიან. გასული 4 წელი იყო «თმენის წელი“, ახლა კი «მრეწველები“ საჭიროდ თვლიან გააქტიურებას. ერთია, რომ ისინი თავის თავს ამ კოალიციაში ვერ ხედავენ, თუკი „რესპუბლიკელები“ დარჩებიან და მეორეა, ეს განცხადება ზუსტად იმიტომ გაკეთდა „მრეწველების“ მხრიდან, რომ თავიანთი ორიენტაციის იდეოლოგიური მიმართულება კიდევ ერთხელ გამოეკვეთა. ამ ორიენტაციის ორბიტაზე მოძებნიან თავიანთ დასაყრდენს, ესეც იმ შემთხვევაში, თუკი ვინმემ მოისურვა მათთან ერთად ყოფნა, თუ არადა, თამაშგარე მდგომარეობაში დარჩებიან…“.

კითხვაზე, რა როლს ითამაშებს ამ შემთხვევაში ბიძინა ივანიშვილი, გაუწევს თუ არა ანგარიშს თავის მრეწველ მეგობარს გოგი თოფაძეს, რომელიც, ასევე, მისი ბიზნესპარტნიორია, თუ ის დაიკავებს „რესპუბლიკელების“ მხარეს, რომელიც დასავლეთთან საურთიერთობოდ ბოლო ძაფია ამ ხელისუფლებისთვის, ვალერი გელბახიანი საინტერესო განმარტებას აკეთებს:

„ბიძინა ივანიშვილი აღარ არის ის ბიძინა, როგორიც იყო 2012 წლის საარჩევნო ეტაპისთვის, ბუნებრივია, მისი რეიტინგული მდგომარეობა აღარ არის სახარბიელო, მოსახლეობასთან მას აქვს პრობლემები იმ შეუსრულებელი დაპირებების გამო, რაც წინასაარჩევნოდ გასცა. დღეს სხვების გადასარჩენად კი არ არის ბრძოლა, არამედ ივანიშვილმა საკუთარი თავი და პარტია უნდა გადაარჩინოს, რომ „ქართულმა ოცნებამ“ ხელიდან არ გაუშვას მმართველობის ბერკეტი. ამიტომ, დღეს აღარ დგას ურეიტინგო პარტიების გაცოცხლების საკითხი და ივანიშვილი აღარ აპირებს, საჩუქრად დაარიგოს საპარლამენტო მანდატები, ეს უკვე განვლილი ეტაპია. იგი შეეცდება, საკუთარი ინტერესების სახელით იმოქმედოს პოლიტიკურ კონკურენტულ გარემოში…

გოგი თოფაძე და „მრეწველთა პარტია» ივანიშვილმა შეიძლება გაწიროს და არ გაწირავს „რესპუბლიკურ პარტიას“. მრეწველებს შეუძლიათ, კოალიცია შეკრან „პატრიოტთა ალიანსთან“, ნინო ბურჯანაძესთან, რომელსაც ბარიერის გადალახვის პრობლემა არ აქვს, თუმცა გააჩნია, „მრეწველები“ რა წინადადებებს შესთავაზებენ მათ და რა ფინანსურ დახმარებაზე იქნება საუბარი. პოლიტიკაში ცარიელი არავის არავინ სჭირდება. რაც შეეხება „რესპუბლიკურ პარტიას“, ერთადერთი პოლიტიკური ძალაა „ქართულ ოცნებაში“, რომელიც დასავლეთთან ნდობაშია. ვინაიდან ეს პარტია არსებობს „კოალიციაში“, დასავლეთს ამ კოალიციასთან კითხვის ნიშნები არ აქვს, მიუხედავად იმისა, რომ იქ პრორუსული ძალებიც არიან წარმოდგენილნი. „რესპუბლიკელებთან“ „განქორწინების“ შემთხვევაში კი ივანიშვილისთვის დასავლეთთან ურთიერთობა მარტივი აღარ იქნება და „ქართული ოცნების“ მიმართ დასავლეთის ნდობა დაიკარგება. „რესპუბლიკური პარტია“ ივანიშვილისთვის ფარის ფუნქციას ასრულებს, თუმცა პოლიტიკაში ყველაფერი ხდება და თუკი მოხდება „განქორწინება“, ჩვენ საქმე გვექნება ღია თამაშთან, და „ქართული ოცნება“ იძულებული ხდება, პირდაპირ გადავიდეს ჩრდილოეთის პოლიტიკური ორიენტაციისკენ, რაც ივანიშვილისთვის პიროვნულად ძალიან ცუდი იქნება.

ივანიშვილი რომ მხოლოდ პოლიტიკოსი იყოს და უცხოეთში მილიარდები არ ჰქონდეს დაბანდებული, ცხადია, მისთვის პოლიტიკური გადაწყვეტილება ტრაგედია არ იქნებოდა, მაგრამ ადამიანი, რომელმაც ამხელა ფინანსური რესურსი უცხოეთში დააბანდა, ასეთი გადაწყვეტილება მისი ბიზნესის დაღუპვის ტოლფასი იქნება და მასზე ეკონომიკური სანქციები განხორციელდება.

უღირს კი ასეთი ნაბიჯის გადადგმა? ამიტომ, ძალიან გამიკვირდება, ივანიშვილმა „რესპუბლიკელები“ ჩამოიშოროს და დამოუკიდებელი პოლიტიკური ნაბიჯი გადადგას. ასე რომ, ივანიშვილი იძულებული გახდება, დაიტოვოს „რესპუბლიკელები“. მათ საკუთარი თავის ფასი იციან და მათი როლი იმდენად დიდია საგარეო ურთიერთობებში, არ შეიძლება მათთან ივანიშვილი კომპრომისზე არ წავიდეს. სხვა შემთხვევაში, თუკი „რესპუბლიკელებთან“ განქორწინება მოხდება, ისინი არ დაიკარგებიან. პროდასავლური ორიენტაციის პარტია, ირაკლი ალასანიას გუნდის სახით, არის გარეთ, რომლებთანაც „რესპუბლიკელები“ მეგობრობენ და შესაძლებელია, ამ ორი პარტიიდან დასავლეთისგან მხარდაჭერილი კოალიცია ვიხილოთ. სიტუაცია არ არის მარტივი, რუსეთ-თურქეთს შორის ურთიერთობა სერიოზულად დაიძაბა, ორივე ქვეყანა ომისთვის ემზადება, ასეთ დროს საქართველო რომ რუსეთის ხელში დატოვოს ამერიკამ, გამორიცხულია. ამიტომ დაიწყებს ისეთ ძალებზე აპელირებას დასავლეთი, რომელიც მისთვის მყარი გარანტიების მატარებელია, მყარ გარანტიებს კი ის სამ პოლიტიკურ ძალაში ხედავს „ქართული ოცნების“ მიღმა – „ნაციონალურ მოძრაობაში“, „რესპუბლიკელებსა“ და „თავისუფალ დემოკრატებში“… და თუკი ივანიშვილი „რესპუბლიკური პარტიის“ ძალასა და გავლენას დასავლეთში არ გაითვალისწინებს, გეტყვით, რომ ჩვენ გავხდებით ძალიან საინტერესო მოვლენების მომსწრენი და კარგად დაიმახსოვრეთ, რომ დასავლეთი არაფრით არ დატოვებს ქართველი ხალხის ნებაზე მიმდინარე პოლიტიკურ მოვლენებს და მოხდება ის, რაც აქამდე მომხდარა, ფერადი რევოლუციების სახით“.

„ალია//კვირის ქრონიკა“, 22-28 თებერვალი, 2016 წელი

ინტერვიუ სანდრო ბრეგაძესთან: «გადადექიო, გელა დუმბაძემ ულტიმატუმი წამიყენა… სადაც ეშინიათ თინა ხიდაშელის, იქ ჩემი ადგილი არ არის»

ნინო სამხარაძე

დიასპორის საკითხებში სახელმწიფო მინისტრის მოადგილე სანდრო ბრეგაძე თანამდებობიდან გადადგა, ვინ იქნება შემდეგი, ვის გაიყოლებს იგი. რატომ ვერ გაუძლო თავდაცვის მინისტრის თინა ხიდაშელისა და „რესპუბლიკელების“ ულტიმატუმს პრემიერ-მინისტრმა? რა არის ამ ყველაფრის მიზეზი? სანდრო ბრეგაძე განსაკუთრებით გააქტიურდა ბოლო პერიოდში და ის კატეგორიულად ითხოვდა საკონსტიტუციო ცვლილებებს, სადაც შავით თეთრზე ჩაიწერებოდა, რომ ქორწინება არის ქალისა და მამაკაცის ერთობა, სანდრო ბრეგაძე „ლგბტ“ პირების დაუძინებელ მტრად იქცა. მანამდე კი ის პატრიარქზე განხორციელებულ შეტევებს აპროტესტებდა, რაც გახდა არასამთავრობოების მიზეზი, რომ მათ ბრეგაძის გადადგომა მოითხოვეს. საბოლოოდ თემა მომწიფდა და „რესპუბლიკელებმა“ პრემიერმინისტრს ულტიმატუმი წაუყენეს, თუ ბრეგაძე უარს არ იტყვის ერთსქესიანთა ქორწინების აკრძალვაზე და თანამდებობაზე დარჩება, კოალიციას დავშლითო. არჩევანი „რესპუბლიკელების“ სასარგებლოდ გაკეთდა. შემდეგი ულტიმატუმის სამიზნე გოგი თოფაძეა და ასევე კატეგორიულად სვამენ „რესპუბლიკელები» საკითხს, თუკი თოფაძე დარჩება კოალიციაში, „რესპუბლიკელები“ დავშლით კოალიციას და პრობლემებს შეგიქმნითო. საინტერესოა, ამ შემთხვევაში რას მოიმოქმედებს კოალიციის პოლიტსაბჭო. მართალია, ბრეგაძისა და თოფაძის თანამდებობებს შორის დიდი სხვაობაა და ამ შემთხვევაში თოფაძე არჩეული დეპუტატია, მაგრამ ამ ჯადოსნურ ხელისუფლებაში რომ ყველაფერი მოსულა და ისინი რომ კანონებს არ ცნობენ, ეს კვირის სკანდალი პრემიერ ღარიბაშვილის გადადგომამაც დაადასტურა.

ერთი რამ ცხადია, ლიბერალური ფრთა სამკვდრო-სასიცოცხლო ბრძოლაში შედის ეროვნული ღირებულებებისა და ფასეულობების მატარებელ ძალებთან და არ არის გამორიცხული, კონსერვატორული ძალების კოალიციური გაერთიანება ვიხილოთ. ჩაუდგება თუ არა ამ გაერთიანებას სათავეში ირაკლი ღარიბაშვილი, ამ კითხვაზე არსებობს სხვადასხვა პასუხი და დიდი ნაწილი არ გამორიცხავს, რომ ღარიბაშვილი პოლიტიკაში დაბრუნდეს და კონსერვატორული ძალების ფლანგზე მოსინჯოს პოლიტიკური ბედი.

სანდრო ბრეგაძის გადადგომას მაშინვე გამოეხმაურა «რესპუბლიკელი“ დავით ბერძენიშვილი: „რატომ დაწერა განცხადება, თუ მაგარი ბიჭია?.. მესმის, რომ «აღორძინების“ აქტივისტი ბრეგაძე „რესპუბლიკელებით“ მოხიბლული არც მაშინ ყოფილა და არც ახლა იქნება. მან განცხადება პრემიერ-მინისტრს დაუწერა, რა შუაში ვართ „რესპუბლიკელები“? სანდრო ბრეგაძე ჩვენ არ დაგვინიშნავს და ვერც გავათავისუფლებდით…»

„რესპუბლიკელებზეა“ ნათქვამი, ფიცი მწამს, ბოლო მაკვირვებსო… თინა ხიდაშელის მიმართ პრეტენზიები გროვდება და გოგი თოფაძის შემდეგ, ახლა უკვე სანდრო ბრეგაძე მოითხოვს მის გადადგომას და მოიხსენიებს როგორც არჩევნების გამყალბებელს. ბრეგაძე აცხადებს, რომ მას კანცელარიიდან შეატყობინეს, ქალბატონი ხიდაშელი ასევე ითხოვს მის გაჩერებას ნებისმიერ ფასად და არ კმაყოფილდება მხოლოდ მისი გადაყენებით, რაზეც სანდრო ბრეგაძე საჯაროდ სვამს კითხვას: „რა უნდა მიქნა, თინა, ჯარს გამოუშვებ, მომკლავ თუ დამაპატიმრებ?! მგონი, სულ გარეკე, ქალბატონო!..»

სანდრო ბრეგაძე „ალიასთან“ ინტერვიუში ღიად აცხადებდა, რომ მის ინიციატივას, არ დაკანონებულიყო ერთსქესიანთა ქორწინება, ძალიან ბევრი მოწინააღმდეგე ჰყავდა ხელისუფლებაში და აპირებდა პარლამენტის ლუსტრირებას, რომელი ძალა არ დაუჭერდა მხარს საკონსტიტუციო ცვლილებებს. მოწინააღმდეგე ბანაკად ის „რესპუბლიკურ პარტიას“ ასახელებდა. იგი პირობას დებდა, რომ თანამდებობიდან გადადგებოდა, თუკი დასახულ მიზანს ვერ მიაღწევდა. თუმცა სანდრო ბრეგაძის გადადგომა თავდაცვის მინისტრმა თინა ხიდაშელმა დააჩქარა, დღეიდან კი, თინა ხიდაშელს ერთი დაუძინებელი მტერი შეემატა სანდრო ბრეგაძის სახით. რაც უფრო მეტად მოახლოვდება არჩევნები, მით მეტი კომპრომატი დაიდება „რესპუბლიკური პარტიის» მისამართით, თუმცა მოსაძებნიც არაფერია, რადგან ამ პარტიის შესახებ ყველამ ყველაფერი იცის. ლაშა ამირეჯიბი კი სოციალურ ქსელში აქვეყნებს ლევან ბერძენიშვილის იმ სკანდალური ჩვენებიდან ამონარიდს:

„ჩვენ დავუბრუნდით ჩვენს საზოგადოებას, გვახარებს ჩვენი დიადი ქვეყნის წარმატებები და განსაკუთრებით ყველაფერი კარგი, რაც ჩვენს რესპუბლიკაში კეთდება ბოლო წლებში. მინდა დიდი მადლობა ვუთხრა სუკის თანამშრომლებს, განსაკუთრებით კი სამძებრო განყოფილების გამგეს, პოლკოვნიკ ა. მირიანაშვილსა და გამომძიებელ კაპიტან გ. ცინცაძეს, რომლებმაც მამაშვილური და ჰუმანური დამოკიდებულებით საშუალება მომცეს, ამეხსნა ჩემი სულისთვის ეს მძიმე ტვირთი და მეღიარებინა ჩემი დანაშაული. ველოდები დამსახურებულ სასჯელს და იმედი მაქვს, რომ სასჯელის მოხდის შემდეგ რაიმეთი მაინც გამოვადგები ჩემს ერს, ჩემს ქვეყანას, ჩვენს საბჭოთა ხალხს და მის იდეალებს. როგორც იქნა, ჩემი სინდისი სუფთაა…“.

მოვა დრო და თინა ხიდაშელსაც აუცილებლად გაუხსენებენ იმ ტრაგიკულ შემთხვევას, როცა, გავრცელებული ინფორმაციით, ის იჯდა საჭესთან, როცა დასავლეთ საქართველოში ავარია მოახდინა და დანაშაული მძღოლს საკუთარ თავზე ააღებინა. ამ ავარიას ადამიანის სიცოცხლე შეეწირა… თუმცა მაშინვე ამბობდნენ, რომ უსუფაშვილმა და ხიდაშელმა ყველაფერი გააკეთეს, რომ საქმე ჩაეფარცხათ და დაზარალებული გაეჩუმებინათ.

სანდრო ბრეგაძეჩვენთან ინტერვიუში დავით ბერძენიშვილს პასუხობს რეპლიკაზე:

- ესე იგი, თუ მაგარი ბიჭი ხარ, რატომ გადადექიო?.. მან არ იცის, რა არის „მაგარი“ და „კაიბიჭობა“, ეს გასაკვირი არ არის, 50 წლის ასაკში ადამიანი ძველბიჭობას რომ იწყებს, სასაცილოა, სატირალი რომ არ იყოს… მინდა მას ვუთხრა, რომ ადამიანები თავიანთი პრინციპების ერთგულები უნდა იყვნენ, მაგრამ მათ ხომ არაერთგზის დაამტკიცეს საკუთარი პრინციპების ღალატი… იყო დრო, როცა თავიანთი დისიდენტური საქციელის გამო «კაგებეს“ გენერალს ბოდიშს უხდიდნენ. ასევე, გავიხსენებდი 2004 წელს, როცა ცხონებულმა ზურაბ ჟვანიამ მათი კრიტიკის გამო საქვეყნოდ განაცხადა, – სანამ „რესპუბლიკური პარტია“ საჯაროდ ბოდიშს არ მოიხდის, საპარლამენტო სიაში არ ჩავსვამთო. კარგად მახსოვს, ტელეკამერების წინ მუხლისჩოქით როგორ მივიდნენ ზურაბ ჟვანიასთან და როგორ უხდიდნენ ბოდიშს მხოლოდ და მხოლოდ იმის გამო, რომ საპარლამენტო მანდატი ჩაედოთ ჯიბეში. აი, ასეთ პოლიტიკოსებთან გვაქვს საქმე…

თუ ვაჟკაცობაზე მელაპარაკება ბერძენიშვილი, ჩემი მაგალითი აიღოს, გადადგას ვაჟკაცური ნაბიჯი, კოალიციას გამოეყონ და დამოუკიდებლად მიიღონ არჩევნებში მონაწილეობა. მე გამკვირვებია ამ პარტიის წევრების, ჩვენ პოლიტიკურ მუტანტებთან გვაქვს საქმე… ძალიან სამწუხაროა, რომ ხელისუფლების ზოგიერთი წარმომადგენელი „რესპუბლიკურ პარტიას“ შიშით უყურებს და წამოგებული არიან მათ შანტაჟს, თუნდაც ჩემი გადაყენების პროცედურა განვითარდა აბსოლუტურად სამარცხვინოდ, მაშინ, როცა საქართველოს თავდაცვის სამარცხვინო მინისტრმა თინა ხიდაშელმა კედელთან მიაყენა პრემიერ-მინისტრი და აიძულა, გადავეყენებინე. თქვენ რა გგონიათ, მოწმენდილ ცაზე მივიღე ეს გადაწყვეტილება?!.

- კონკრეტულად ვინ დაგირეკათ და ვინ ჩაგაყენათ საქმის კურსში, რომ გადამდგარიყავით?

- საბოლოოდ ეს ყველაფერი მითხრა მინისტრმა გელა დუმბაძემ, მიღებული იყო გადაწყვეტილება და თუკი თავად არ დაწერ გადადგომის შესახებ განცხადებას, იძულებული ვიქნებით, მოგხსნათ თანამდებობიდანო. იყო ულტიმატუმი ორი კვირის წინაც, რომ შემეწყვიტა ხელმოწერების შეგროვება საკონსტიტუციო ცვლილებებთან დაკავშირებით, რომელიც ერთსქესიანი ადამიანების ქორწინების აკრძალვას გულისხმობდა. პრინციპულად მომთხოვეს, გამეყინა ეს საკითხი, რადგან ამ თემის წამოწევის გამო შესაძლებელი იყო, კოალიცია დაშლილიყო. მე უფრო შორს წავალ და გეტყვით, რომ მხოლოდ და მხოლოდ „ნაციონალებმა“ და „რესპუბლიკელებმა“ განაცხადეს უარი ამ ინიციატივის მხარდაჭერაზე.

„ეროვნულების“ გენერალური მდივანი, იურიდიული კომიტეტის თავმჯდომარეს ვახტანგ ხმალაძეს შეხვდა და მან პირადად უთხრა, რომ, თუ „ქართული ოცნება“ ამ ინიციატივას შეიტანდა საქართველოს პარლამენტში, „რესპუბლიკელები» წინააღმდეგ წავიდოდნენ და მხარს არ დაუჭერდნენ. პირადად განვაცხადე, რომ არ ვაპირებ ჩემს მორალურ-ზნეობრივ პრინციპებზე უარის თქმას და არ დავყვები „რესპუბლიკელების“ შანტაჟს, სადაც ეშინიათ თინა ხიდაშელის, იქ ჩემი ადგილი არ არის.

- თქვენ განაცხადეთ, რომ პრემიერ-მინისტრ გიორგი კვირიკაშვილთან მეგობრობთ. პირადად თუ გქონდათ ამ თემაზე საუბარი?

- არ მისაუბრია ამ საკითხზე, არსებობს პირადი ურთიერთობები, შეიძლება პრემიერმა რაღაც პრინციპების გამო პირად ურთიერთობებს გადააბიჯოს, მაგრამ მე პირად ურთიერთობებს არ ვაბიჯებ.

- დიასპორის მინისტრმა გელა დუმბაძემ რატომ ვერ შეძლო თქვენი დაცვა, ეტყობა, მან არ იცის, რომ თქვენ შემდეგ მისი ჯერია. დიდი ხანია კახი კალაძეს მასზე თვალი აქვს დადგმული და აუცილებლად მოხსნიან მას თანამდებობიდან. მკითხველს შევახსენებ, რომ გელა დუმბაძემ „გაზპრომთან“ მოლაპარაკება უარყოფითად შეაფასა, კალაძემ კი მას „გაკოტრებული პოლიტიკოსი“ უწოდა…

- ვერ გაგცემთ ამ კითხვაზე პასუხს. როცა გელა დუმბაძეს დაპირისპირება ჰქონდა კახი კალაძესთან და უჭირდა, მე საკმაოდ ბევრი რამ გავაკეთე, ყველას ვაჟკაცობას ვერ მოსთხოვ. ყველა ადამიანს ბუმერანგივით მოუბრუნდება, რასაც სხვას გაუკეთებს…

„ახალი თაობა“, 22 თებერვალი, 2016 წელი

ინტერვიუ გია ხუხაშვილთან: „კოალიცია „ქართული ოცნება“ უნდა დაიშალოს“

ვის პოზიციას ახმოვანებს გოგი თოფაძე, რას მოიმოქმედებს ივანიშვილი, რატომ გადაიქცნენ ხელისუფლების წევრები პარაზიტებად, ვის ვიხილავთ მმართველი კოალიციიდან მომავალ პარლამენტში? – ამის შესახებ „ახალ თაობას“ ექსპერტი გია ხუხაშვილი ესაუბრება.

- ექსპერტებისა და პოლიტიკოსების ნაწილი მიიჩნევს, რომ მრეწველებისა და რესპუბლიკელების დაპირისპირების უკან ბიძინა ივანიშვილი დგას და გოგი თოფაძე მის პოზიციებს ახმოვანებს. თქვენ რას ფიქრობთ ამაზე?

- ეს მოსაზრება, ჩემი აზრით, შეთქმულების თეორიის ჟანრიდან არის. მიუხედავად იმისა, რომ ამ საკითხის დარეგულირება ბიძინა ივანიშვილს მოუწევს, ის ამ პროცესებში არ მონაწილეობს.

- თავად დაპირისპირებაზე რას იტყვით, საქმე გვაქვს პარტიების დაპირისპირებასთან თუ პიროვნულ უთანხმოებასთან? ზოგიერთი ლიდერი ამტკიცებს, რომ მრეწველები და რესპუბლიკელები შესანიშნავად თანამშრომლობენ ერთმანეთთან...

- აქ უფრო სისტემურ უთანხმოებასთან გვაქვს საქმე. ამ პარტიებს შორის კონფლიქტი კოალიციის შექმნის დღიდან არსებობს. არავისთვის უცხო არაა, რომ მმართველ გუნდში ერთიანი მსოფლმხედველობა არ არის. ისინი მხოლოდ ერთი ნეგატიური ამოცანის წინააღმდეგ იბრძოდნენ. ეს ნეგატიური ამოცანა ასეთი იყო – ყველა ერთის წინააღმდეგ. მათ ნაციონალების რეჟიმი უნდა დაემარცხებინათ. როდესაც ასეთ მძიმე ბრძოლაში შედიხარ, მაშინ მსოფლმხედველობას ყურადღება არ ექცევა, ხოლო როცა საქმე ქვეყნის მართვაზე მიდგება, მაშინ ასეთი მყიფე გაერთიანებები, საერთო ჯამში, მძიმე სურათს ქმნის. ხელისუფლებას, რომლის წევრებიც ვერცერთ პრინციპულ საკითხზე ვერ თანხმდებიან, გადაწყვეტილებების მიღება უჭირს. ამიტომაც ვერაა ეს ხელისუფლება ეფექტური.

ეს დაპირისპირება, როგორც უკვე აღვნიშნე, თავიდანვე არსებობდა. ის საჯარო არჩევნების მოახლოებამ გახადა. პარტიები მზის ქვეშ თავიანთ ადგილს ეძებენ. აქ ერთი სერიოზული ხარვეზი რომ არ ყოფილიყო, ეს უთანხმოება ჩვეულებრივი ამბავი იქნებოდა.

- რა ხარვეზზე საუბრობთ?

- ეს ხარვეზი ამ უთანხმოებას ძალიან არაჯანსაღ ელფერს სძენს. არცერთ მოდავე მხარეს არ გააჩნია საკუთარი პოლიტიკური კაპიტალი. როგორც რესპუბლიკელების, ასევე მრეწველების ამბიციები არასათანადოა იმ მხარდაჭერასთან, რომელიც მათ ამომრჩევლისგან აქვთ. აქამდე თუ 3-4% ჰქონდათ, ისიც მიფანტ-მოფანტეს და გაანულეს. ფაქტობრივად, ისინი ბიძინა ივანიშვილის ზურგზე პარაზიტირებენ. იგივე შემიძლია ვთქვა კოალიციაში შემავალ სხვა პარტიებზეც. ეს სუბიექტები იმისთვის კი არ იღვწიან, რომ ხალხის თვალში ავტორიტეტი მოიპოვონ, არამედ ისინი ეზომებიან ერთადერთ ადამიანს და ცდილობენ, მის მხრებზე რაც შეიძლება მეტი ადგილი გაიფართოონ. ასეთი დამოკიდებულება ბიძინა ივანიშვილის მიმართ ძალიან უსამართლოა. რა გამოდის, რომ ეს ადამიანები მიეჩვივნენ ხელისუფლებაში ყოფნას, მათი ამბიციები უკიდეგანოდ გაიზარდა და ლამის საკუთარ თავთან აიგივებენ ქვეყნის განვითარებას. არაკორექტულად იქცევა თოფაძის მხარეც, მაგრამ განსხვავება ის არის, რომ ის საპარლამენტო უმრავლესობის პოზიციას გამოხატავს. ისევე, როგორც მრეწველებისთვის, მათთვისაც მიუღებელია რესპუბლიკელები.

- მათთვისაც თუ მიუღებელია რესპუბლიკური პარტია, ხმას რატომ არ იღებენ?

- ეს მათ უნდა ვკითხოთ. მრეწველებისგან განსხვავებით, ამაზე ხმამაღლა არავის უსაუბრია, თუმცა შიდა საუბრები სულ არის. კოალიციის 80%-თვის რესპუბლიკური პარტია არის უცხო სხეული. რესპუბლიკელებსაც ეზიზღებათ დანარჩენი კოალიცია. ეს ცხადზე ცხადია და ყველამ იცის. ამ ხალხს ორი რამ აერთიანებს და არცერთი მათგანი არ არის სახელმწიფოებრივად გამართული და სწორი.

- რა არის ეს ორი რამ, რაც მათ ერთად ყოფნას აიძულებს?

- ეს არის საკუთარი უსუსურობის განცდა და მეორე, პარაზიტირება ივანიშვილის მხრებზე. ასეთი მიდგომა ქვეყანას სერიოზულად დააზიანებს. ყველამ დავინახეთ, რომ კოალიციაში შემავალი პარტიები, რბილად რომ ვთქვათ, ერთმანეთს ვერ იტანენ. დავუშვათ, შენარჩუნდა ეს კოალიცია ამ სახით და მათ მოიგეს არჩევნები. მერე წარმოგიდგენიათ, წინ რა გველოდება? მომავალი 4 წელი ქვეყანა უნდა მართონ ადამიანებმა, რომლებსაც ერთმანეთი ეზიზღებათ.

- შექმნილი ვითარებიდან რა გამოსავალს ხედავთ, კოალიცია ერთ-ერთმა დაპირისპირებულმა პარტიამ უნდა დატოვოს თუ ორივეს წასვლა ჯობია?

- ეს კონფლიქტი არ არის ასეთი ვიწრო და მისი გადაწყვეტა ასე მარტივი არ იქნება. როგორც უკვე გითხარით, თოფაძემ რესპუბლიკელების მიმართ კოალიციის უმრავლესობის აზრი გაახმოვანა. შესაბამისად, ეს უთანხმოება უფრო მრავალწახნაგიანია. „ქართული ოცნებისთვის“ თუ რაიმე მნიშვნელობა აქვს ქვეყნის მომავალს, მაშინ ეს კოალიცია მთლიანად უნდა დაიშალოს. შექმნის ვითარებაში ეს იქნებოდა ყველაზე მარტივი და სწორი გამოსავალი. მასში შემავალ ყველა პარტიას აქვს იმის ამბიციები, რომ ყველაზე მაგრები არიან და მხოლოდ მათ შეუძლიათ ქვეყნის გადარჩენა. ჰოდა, ცალ-ცალკე მიიღონ არჩევნებში მონაწილეობა. არჩევნების შემდეგ უკვე მსოფლმხედველობის ირგვლივ შექმნან კოალიციები. მომავალ პარლამენტში 7-8 ძალა გავა.

- გამოდის, რომ თქვენ მეჭიაურის მოდელს უჭერთ მხარს. პირველად მან მოუწოდა ამბიციურ პარტიებს კოალიციიდან გასვლა...

- თამაზ მეჭიაურს ხშირად არ ვეთანხმები ხოლმე, მაგრამ მის ამ პოზიციას სრულად ვიზიარებ. სწორედ ესაა ევროპული დემოკრატია. კოალიციები წინასაარჩევნოდ კი არ უნდა იქმნებოდეს, არამედ მას პარლამენტში მოხვედრილი ძალები უნდა ქმნიდნენ. ეს არის ჯანსაღი მოდელი, ყველა სხვა იქნება არაჯანსაღი მიდგომა, რაც შედეგს არ მოგვიტანს და ისევ პარაზიტ ხელისუფლებას მივიღებთ, რომელიც ბიძინა ივანიშვილის მხრებზე იქნება. ახლა ესენი თამაშობენ სახლობანას და ყველაფერი ბიძინა ივანიშვილს დაბრალდება.

- რას ფიქრობთ პრემიერის მიერ დაპირისპირებაზე გაკეთებულ განცხადებაზე? რესპუბლიკელები ამაყად აცხადებენ, გიორგი კვირიკაშვილმა ცალსახად ჩვენი პოზიცია დაიკავაო. თქვენ რას იტყვით ამ განცხადებაზე?

- აცხადებენ, ჩვენი პოზიცია დაიკავაო. ეს არის კიდევ ერთი უბედურება. რას ნიშნავს ჩვენი ან თქვენი. ეს არის ძალიან უსაქციელო ლაპარაკი და ამას სჯობია, რესპუბლიკელებმა თავიანთი ავტორიტეტი გაზომონ. კეთილი ინებოს ყველა პარტიამ და იმდენი ამბიცია იქონიონ, რამდენი ნდობაც აქვს საზოგადოებაში. რესპუბლიკელები ყველა თავიანთ განცხადებაში იმას ამტკიცებენ, რომ იმაზე მეტი ამბიციები აქვთ, ვიდრე სახალხო ლეგიტიმაცია გააჩნიათ. ვიღაცის კარზე კი არ უნდა მოითხოვონ ტორტის ნაჭრები, ხალხისგან მიიღონ ლეგიტიმაცია და მერე გველაპარაკონ გონორით. რაც შეეხება პრემიერის განცხადებას, ის ადეკვატურად მოიქცა. თოფაძის პრეტენზიები ეხებოდა მისი კაბინეტის წევრს, თავდაცვის მინისტრ თინა ხიდაშელს. კვირიკაშვილი, დიახაც, ვალდებული იყო, თავისი კაბინეტის წევრი დაეცვა. ვინც არ იცის, შევახსენებ, რომ მინისტრთა კაბინეტი გახლავთ სოლიდარული პასუხისმგებლობის ორგანო. როდესაც ერთ-ერთი მინისტრის მისამართით ასეთი მძიმე ბრალდებები ისმის, მთელი აღმასრულებელი ხელისუფლება ზარალდება. პრემიერს ან უნდა გადაეყენებინა მინისტრი, ან უნდა დაეცვა. მას მესამე არჩევანი არ ჰქონია. ეს იყო და ეს. რესპუბლიკელები მის განცხადებას ტყუილად ასაღებენ მათდამი მხარდაჭერის გამოხატვად.

- რადგან მთავრობაზე ვსაუბრობთ, რას ფიქრობთ დიასპორების საკითხების მინისტრის მოადგილის სანდრო ბრეგაძის წასვლაზე?

- არ მესმის, რატომ არის ეს საკითხი საინტერესო. ისიც არ ვიცი, საერთოდ რატომ იყო ეგ მინისტრის მოადგილე. ამაზე კომენტარს ვერ გავაკეთებ.

- მისი წასვლა საინტერესო იმით არის, რომ ამბობს, ხიდაშელმა პრემიერზე განახორციელა ზეწოლა და ჩემი გადაყენება მოსთხოვაო...

- ვერც ამაზე გავაკეთებ კომენტარს. ეს თემა საერთოდ არ ვიცი და არც მაინტერესებს.

- ზემოთ თქვენ აღნიშნეთ, რომ კოალიციაში არსებული დაპირისპირება ბიძიან ივანიშვილის დასარეგულირებელია. რა უნდა გააკეთოს მან ამისათვის?

- ის ამ პროცესებში უფრო აქტიურად უნდა ჩაერთოს. მან განაცხადა კიდევაც, რომ არჩევნებისთვის გააქტიურდებოდა. რაოდენ უცნაურადაც არ უნდა მოგეჩვენოთ და რაოდენ კრიტიკულადაც არ უნდა იყოთ მის მიმართ განწყობილი, დღეს სტაბილურობის ერთადერთი გარანტი ბიძინა ივანიშვილია. მისი ფაქტორი რომ არ იყოს, კოალიციაში შემავალ პარტიებს ისე ეზიზღებათ ერთმანეთი, შესაძლოა ქვეყანაში უმართავი პროცესები დაწყებულიყო.

- ბიძინა ივანიშვილის ფაქტორიო, ამბობთ და ამ ფაქტორის პირობებშიც რომ ჭამენ ერთმანეთს?

- ერთმანეთს მართლა ჭამენ, მაგრამ ბიძინა ივანიშვილი იმას ახერხებს, რომ ისინი მოუკრეფავში არ გადავიდნენ. ის რომ არა, ბევრად მძიმედ იქნებოდა საქმე. დღეს ხელისუფლების სტაბილურობის ერთადერთი გარანტი ბიძინა ივანიშვილია.

- გიორგი კვირიკაშვილს არ შეუძლია, სტაბილურობის გარანტი იყოს?

- გიორგი კვირიკაშვილი კარგი ბიჭია, მაგრამ ის ძალაუფლების ბერკეტებს არ ფლობს.

- ზემოთ მეჭიაურის მოდელი მოიწონეთ, მაგრამ რამდენად რეალურია ამის განხორციელება? თქვენი აზრით, პარტიები მარტივად დატოვებენ კოალიციას?

- ეს საკმაოდ რთული პროცესი იქნება. უნდა მოხდეს შეთანხმება, რომ ამ პარლამენტის უფლებამოსილების ამოწურვამდე უმრავლესობა შენარჩუნდეს. ეს იმისთვის არის საჭირო, რომ სახელმწიფომ სტაბილურობა არ დაკარგოს, მერე წავიდნენ კოალიციიდან და ცალ-ცალკე იყარონ კენჭი. ეს არის ძალიან რთული ამოცანა და მისი შესრულება მხოლოდ ბიძინა ივანიშვილს შეუძლია.

- პარტიები თუ წავლენ კოალიციიდან, თქვენი აზრით, რამდენი მათგანი შეძლებს საარჩევნო ბარიერის გადალახვას?

- პარტია „ქართული ოცნება“ არათუ ბარიერს გადალახავს, არამედ პირველ ადგილზეც გავა. ის ასოცირდება ბიძინა ივანიშვილთან. მართალია, ამ ადამიანმა დაკარგა ავტორიტეტის რაღაც ნაწილი, მაგრამ ქართულ სინამდვილეში ის ყველაზე წონად ფიგურად რჩება. კოალიციის სხვა სუბიექტებზე რამის თქმა გამიჭირდება. ხომ აქვთ ამბიციები, რომ მაგრები არიან, ჰოდა, ცადონ ბედი. მოხვდებიან, მოხვდებიან, არადა, არც ამით დაშავდება რამე. მომავალ პარლამენტში 7 პარტია მაინც მოხვდება და იქ სხვანაირი დაჯგუფებები ჩამოყალიბდება. დღეს არსებული გადმოსახედიდან, პარლამენტში მოხვედრის შანსები აქვთ ნაციონალებს, თავისუფალ დემოკრატებს, პატრიოტთა ალიანსს, ნინო ბურჯანაძეს, „გირჩასა“ და პაატა ბურჭულაძეს. რესპუბლიკელები ხომ სულ იმას გვიმტკიცებენ, რომ მაგრები არიან, გავიდნენ ცალკე, შევიდნენ პარლამენტში და, ვინც მოსწონთ, იმათთან შექმნან კოალიცია.

„რეზონანსი//მთელი კვირა”, 22 თებერვალი, 2016 წელი

დაპირისპირება “ოცნებაში”:

დეპუტატი თანაგუნდელებს მისი დისკრედიტაციის მცდელობაში ადანაშაულებს

ეკატერინე ბასილაია

“პარტია “ქართულ ოცნებაში” არის ძალიან ბნელი საბჭოთა წარსულის მქონე, ნაცრისფერი ადამიანების გარკვეული წრე, რომლებიც ცდილობენ, ბიძინა ივანიშვილმა სიმართლე არ იცოდეს. ისინი ხალხთან ვერ გავლენ და ვერ დაელაპარაკებიან, მათთვის ხმა არავის მიუცია, მაგრამ ძალიან მნიშვნელოვან საკითხებს ლობირებენ, მნიშვნელოვან გადაწყვეტილებებს იღებენ და ყველა თანამდებობაზე ადამიანებს ისინი ნიშნავენ. მათ შეძლეს, ივანიშვილისაგან ძალიან ბევრი ჯანსაღად მოაზროვნე ადამიანი ჩამოეშორებინათ,” – ამ ბრალდებებს უყენებს თანაგუნდელების ერთ ნაწილს “ქართული ოცნების” ერთ-ერთი დამფუძნებელი და ტყიბულის მაჟორიტარი დეპუტატი ელისო ჩაფიძე და მის წინააღმდეგ ერთწლიან მიზანმიმართულ დისკრედიტაციაშიც სწორედ ამ ადამიანებს ადანაშაულებს.

მმართველ კოალიციაში არსებული თოფაძე-რესპუბლიკელების ლანძღვა-შეურაცხყოფის გარდა, ახლა უკვე პარტია “ქართულ ოცნებაშიც” დაპირისპირების კიდევ ერთმა და შესაძლოა, უფრო მწვავე ტალღამაც იფეთქა.

როგორც ელისო ჩაფიძე აცხადებს, მას შავ პიარს უგორებენ, აშანტაჟებენ მის ოჯახსაც, რის გამოც აშშ-ის საელჩოსაც კი მიმართა და ოღონდ მას ავნონ და ცდილობენ, ტყიბულელებიც კი დასაჯონ. ჩაფიძის თქმით, ესენი არიან განათლების მინისტრის მრჩეველი ოთარ აბესაძე და “ბნელი წარსულის მქონე ნაცრისფერი ადამიანები პარლამენტში”, რომლებმაც მისი დისკრედიტაცია ერთი წლის წინ დაიწყეს.

აღსანიშნავია, რომ გასულ წელს დეპუტატი პირდაპირ ამბობდა იმას, რომ აბესაძეს პარლამენტარი ირაკლი ტრიპოლსკი მფარველობდა, მან წარუდგინა კიდეც ტყიბულელებს აბესაძე მომავალ მაჟორიტარად და მისივე თქმით, აბესაძესთან ერთად მოქმედებდა მცხეთა-მთიანეთის გუბერნატორი ნუგზარ ყიფიანიც, რომელსაც გარკვეული ბიზნესინტერესები ჰქონდა. მაშინ უმრავლესობის ლიდერები შეეცადნენ ეს დაპირისპირება მიეჩქმალათ და ჟურნალისტები საკითხის ზედმეტად გამუქებაშიც კი დაადანაშაულეს. თუმცა, აღმოჩნდა, რომ ეს ჩუმი დაპირისპირება მთელი წელი არსებობდა და ახლა კულუარებიდან საჯაროდ გადმოხეთქა.

ელისო ჩაფიძემ რამდენიმე დღის წინ ჯერ საპარლამენტო ტრიბუნიდან მიმართა ექსპრემიერ ბიძინა ივანიშვილს და მთავრობას შეკითხვით, თუ “რატომ ისჯებიან ტყიბულელები”, შემდეგ კი ღია წერილიც გამოაქვეყნა, სადაც საუბარი იყო იმაზე, რომ კიდევ ერთხელ გადაიხედოს მთის კანონი, რადგან ტყიბულის მუნიციპალიტეტს 2016 წლის 1 იანვრიდან მაღალმთიანი ზონის სტატუსი შეუჩერდა და შესაბამისად, ადგილობრივების მდგომარეობა გაუარესდა. ცვლილებები შევიდა საგადასახადო კოდექსის 83-ე მუხლში, რომლის თანახმად მეშახტეების შემოსავალი 10%-ის ნაცვლად 20%-ით იბეგრება.

წერილში ნათქვამი იყო, რომ ის დიდი ხანია ამ საკითხის გადაწყვეტას წერილობით სთხოვდა კანონის ავტორებს (ირაკლი ტრიპოლსკისა და გია ჟორჟოლიანს), ასევე ფრაქციას, უმრავლესობას და ექსპრემიერს, დაპირებაც მიიღო, რომ გამონაკლისი წესით ტყიბულს სტატუსი მიენიჭებოდა, მაგრამ დაპირება არ შესრულდა. უფრო მეტიც, ითქვა, რომ პრობლემა სწორედ წერილებშია, რაც მისი აზრით, საკითხის მოგვარების გასაჭიანურებლად იაფფასიან პოლიტიკური ხრიკს წარმოადგენს.

ელისო ჩაფიძის წერილის საპასუხოდ ფრაქცია “ქართული ოცნების” თავმჯდომარე გია ვოლსკი “მთელ კვირასთან” საუბრისას აღნიშნავს, რომ “მარტო წერილების წერა საკმარისი არ არის”, ამიტომაც მან ელისო ჩაფიძეს თანამშრომლობა შესთავაზა და ამ შეთავაზებას მოჰყვა მის მიმართ აგრესიული და არაკორექტული გამოხმაურება.

“ელისოს აბუჩად აგდება საერთოდ არ მიფიქრია. ჩემთვის საპატივცემულოა და ყოველ შემთხვევაში მეგობარი მგონია. თუკი მას თვეებია საკითხთან დაკავშირებით მთავრობის სტრუქტურებთან აქვს მიმოწერა, ჩემთვის დეკემბერში არ მოუმართავს, მე ამის თაობაზე ცოტა მოგვიანებით გავიგე და ვთხოვე, მოდი, ერთად ჩამოვაყალიბოთ საქმიანი, ფინანსურად გამართული წინადადება, პრემიერ-მინისტრთან დეტალურად განვიხილოთ და მაგ საქმეს ერთად მივყვეთ-მეთქი. ეს შევთავაზე და შემდეგ უცებ ასეთი აგრესიული და არაკორექტული განცხადებები მოჰყვა, რომელსაც ნამდვილად არ მოველოდი და ცოტა გულდაწყვეტილიც ვარ. სხვამ თავისი თქვას, ჩემგან კი არცერთი თემა უყურადღებოდ არ დარჩენილა. თავადაც აქვს საკმაო რესურსი. ავტორიტეტული დეპუტატია და ვფიქრობ, უფრო საქმიან ვითარებაში უნდა გადავიყვანოთ საქმე, ვიდრე ღია წერილებით ერთმანეთის კბენაში. ასეთი ტექსტი ცოტა უხერხულია. ან პოლიტიკურ ხრიკად რას თვლის?! ფიქრობს, რომ თუნდაც მის მიმართ ხდება რამე? როგორ გეკადრებათ! ელისოსთან პრობლემა არასდროს ყოფილა და მეორეც, არავის არ უღირს არცერთი დეპუტატი, არც ელისო იმად, რომ მუშათა ინტერესებზე გადაიაროს ამ ვითარებამ. აჩქარდა და ცოტა ემოციური განცხადებაა. მზად ვარ ეს ემოციური განცხადება გარკვეულწილად მის სისუსტედ მივიღო და არა ბრალდებად,” – აცხადებს გია ვოლსკი.

მისივე თქმით, თუკი ელისო ჩაფიძე კოაბიტაციის გამო რაღაც ბიზნესლობირებაზე საუბრობს, ეს უკვე სერიოზული ბრალდებაა, არც ერთ ნორმაში არ ჯდება და ამაზე კომენტარი არ სურს.

“საქმიანი ურთიერთობაა საჭირო და საკითხის საქმიანად გადაწყვეტა. ვინმეს ჯინაზე კანონპროექტის შემოტანა საქმეს არ წაადგება. ძალიან გული მწყდება, თუკი მის განცხადებებში კოაბიტაციაზე და ლობირებაზე ნიუანსებია. თუ მას ეს საკითხი მის მიმართ განხორციელებულ პოლიტიკურ დემარშად მიაჩნია, ეჭვი მეპარება, რომ საქმიანი განხილვის რესურსი დარჩა ქალბატონ ჩემ მეგობარ ელისოს. იმიტომ, რომ ელისო დაზარალდეს, ამის გამო მშრომელი ადამიანის დაზარალებაზე მიდიოდეს ვინმე, ეს უკვე ბრალდებაა… ისე, წერილში ვოლსკი-ტრიპოლსკის ასე აგდებულად მოხსენიებაზე ცოტა გამეცინა. მისგან არ მოველოდი,” – აღნიშნავს გია ვოლსკი.

ელისო ჩაფიძის თქმით, ტყიბულისთვის მაღალმთიანი სტატუსის მინიჭება ე.წ. საბიუჯეტო ხარჯების რაციონალური ხარჯვის მოტივით იწელება, მაგრამ ძირითადად მაინც ტყიბულელების “დასჯა” მის დისკრედიტაციას უკავშირდება, რომელიც ერთი წლის წინ დაიწყო “ქართული ოცნების” ერთი ჯგუფის მიერ, მაშინ, როდესაც ვადამდელ არჩევნებზე იყი საუბარი. აი, რა განაცხადა ელისო ჩაფიძემ „მთელ კვირასთან“ საუბრის დროს:

„ვერ გეტყვით, ეს არის კორუფციული თუ დანაშაულებრივი, მაგრამ კანონში ბევრი შეუსაბამობაა. მაგალითად, მაღალმთიან ზონაში მოხვედრილია სოფლები, რომელიც ზღვის დონიდან 220 მეტრზე მდებარეობს და არიან საკურორტო ზონაში. ამავდროულად ამ ზონაში ვერ მოხვდა ზოგიერთი ისეთი სოფელი, რომელიც 680-700 მეტრზეა. ამიტომაც ტყიბულის საკითხის განხილვას კატეგორიულად ვითხოვ. საუბარია ისტორიულ-ეთნოგრაფიულად რა როგორ იყო. დიახ, ისტორიულად ტყიბული ისევე შედიოდა მაღალმთიან ზონაში და ეს კანონმა 1999 წელს აღიარა, როგორც სხვა დანარჩენი – ქვემო სვანეთი, ლეჩხუმი და რაჭა. დასაყვედრებელი მართლა არაფერი არ გვაქვს და ახლა უფრო კატეგორიულად მოვითხოვ ამ საკითხის განხილვას. ამ საკითხის განხილვის დამაბრკოლებელი ფაქტორია ის, რომ ამას საბიუჯეტო სახსრები სჭირდება, ეს ჩემთვის არგუმენტი არ არის.

მეორე მომენტია ის, რომ ჩემი დისკრედიტაციის კამპანია იანვარში დაიწყო, როდესაც თითქოს ვადამდელი არჩევნებისათვის ემზადებოდნენ. საკმაოდ გახმაურებული ისტორიაა, როდესაც ერთი მელიასაგან დაბრწკენილი მრჩეველი ბიჭუნა, რომელიც მინისტრის მოადგილედ ასაღებდა თავს, “ქართულ ოცნებაში” არსებულმა გარკვეულმა ჯგუფმა ტყიბულის საზოგადოებას წარუდგინა. აღმოჩნდა, რომ ტყიბულელებმა ეს ბიჭუნა არ მიიღეს. შემდეგ დაიწყო იმაზე ფიქრი, თუ როგორ გაეფუჭებინათ ელისო ჩაფიძისთვის ავტორიტეტი. ვერ წარმოიდგენთ ცილისწამების რა ნიაღვარი გადავიტანე, თითქოს მე ვარ ერთსქესიანთა ქორწინების მომხრე, თითქოს ტყიბულელ მეშახტეებთან დაკავშირებით შეურაცხმყოფელი რაღაცები ვთქვი… ეთიკის ქარტიასაც კი მივმართე.

ერთმა გავლენიანმა პირმა მითხრა – კი, ბატონო, თუ გინდა ისევ იყარე კენჭი ტყიბულში, მაგრამ ისეთ რაღაცებს გავაკეთებ, შეიძლება სურვილიც აღარ გაგიჩნდესო. ძალიან ბევრი პროვოკაცია მომიწყვეს, ჩემი ოჯახის წევრებზე წნეხის გამო კი იძულებულიც გავხდი, აშშ-ის საელჩოსთვის მიმემართა.

როდესაც ტყიბულის თემის ლობირება დავიწყე და ყველგან ყრუ კედელს ვაწყდებოდი, გამიჩნდა გარკვეული ეჭვი, რომ ეს ყველაფერი ჩემი დისკრედიტაციისთვის კეთდებოდა და ამ ხალხს ანგარიშს იმიტომ ხომ არ უსწორებენ, რომ ჩემ წინააღმდეგ განაწყონ?! ასეთ ადამიანებთან პოლიტიკაში როგორ უნდა ვიყო? მაშინ ვთქვი – მიანიჭონ ტყიბულს მაღალმთიანი რეგიონის სტატუსი და მე პოლიტიკიდან საერთოდ ჩემი ნებით წავალ-მეთქი. თუ პირველ აპრილამდე მისცემენ სტატუსს, პოლიტიკიდან წავალ.

- ვინ არიან თქვენ წინააღმდეგ განწყობილი ადამიანები? არის მათ შორის ტრიპოლსკი, რომელთანაც გასულ წელს გქონდათ დაპირისპირება?

- კონკრეტულად არავის დავასახელებ, თუმცა, ჩვენს პარტიაში ბევრი ლაპარაკობს იმაზე, რომ არის ნაცრისფერი ადამიანების გარკვეული წრე, რომლებიც ცდილობენ ბიძინა ივანიშვილმა სიმართლე არ იცოდეს. ისინი ძალიან ბნელი წარსულის მქონე ხალხია და მათთვის ქართულ საზოგადოებას ხმა არ მიუცია. თუ საჭირო გახდება, მომავალში დავასახელებ. “ქართული ოცნების” ერთ-ერთი დამფუძნებელი და პოლიტსაბჭოს პირველი მდივანი მე ვარ. ისინი კი ხალხთან ვერ გავლენ და ვერ დაელაპარაკებიან, მაგრამ ძალიან მნიშვნელოვან საკითხებს ლობირებენ და მნიშვნელოვან გადაწყვეტილებებს იღებენ.

ისინი ინკოგნიტო გავლენიან პიროვნებებად რჩებიან და ნუ მაიძულებენ მაინცდამაინც მე გამოვიყვანო საზოგადოების წინაშე. მათ შეძლეს ივანიშვილისაგან ძალიან ბევრი ჯანსაღად მოაზროვნე ადამიანი ჩამოეშორებინათ. მე ისევ ბიძინა ივანიშვილის იმედი მაქვს, ის უნდა ჩაერიოს პროცესში.

კი, ბატონო, მე განზე გავდგები, ტყიბულელებს ჩემს პოლიტიკურ ინტერესებს არ შევწირავ. არ მჭირდება ისეთ ადგილზე ყოფნა, სადაც თანამოაზრეები კი არა, მტრები მყავს და საერთოდ “კა-გე-ბეს” ინსტრუქტორები და საბჭოეთის ცუდ წარსულთან დაკავშირებული ადამიანები მიწყვეტენ მე რა უნდა გავაკეთო. ეს არ არის ჩემი “ქართული ოცნება”.

ძალიან მაინტერესებს ან პარტიაში რა ხდება, ან ფრაქციაში რა ხდება, რა გადაწყვეტილებებს იღებენ. დეპუტატებს ლამის სესიასთან დაკავშირებით დღის წესრიგის შესახებ და ბიუროს სხდომებზე რა საკითხი გადის, ამის შესახებ არ აქვთ ინფორმაცია. საოცარი მართვის მეთოდებია დამკვიდრებული. ასეთი დამოკიდებულებაა, რომ რამდენიმე ადამიანის გარდა სხვა დეპუტატები რაც შეიძლება ნაკლებ ინფორმაციას ფლობდნენ, რომ ისინი მუდმივ გაუგებრობაში და სკანდალებში იყვნენ. ამით კი ეს ხალხი ხარობს და სავარაუდო კონკურენტებს სიიდან იცილებენ. ბოლოს განწირული ნაბიჯი გადავდგი. ვუთხარი – ხალხო, ოღონდაც ამას ნუ აკეთებთ და მე განზე გავდგები-მეთქი. ეს წინადადებაც არ მიიღეს. ახლა კი ვიბრძოლებ, რომ ეს ადამიანები ჩამოშორდნენ პარტიას და არა – მე.

მმართველობის დემოკრატიულ სტილს ვითხოვ, რომ ფრაქციის თავმჯდომარის არჩევის უფლებაც გვქონდეს, პარტიის თავმჯდომარისაც და პარლამენტის წევრსაც შეეძლოს თავისი უფლებების ღირსეულად დაცვა. 21-ე საუკუნეა და მგონია მონობა მისაღები არ არის და დეპუტატს ამა თუ იმ თემაზე საკუთარი აზრს გამოთქმის საშუალება უნდა ჰქონდეს.

- გაქვთ იმედი, რომ რამე შეიცვლება?

- დიდი იმედით ველოდები მაისს, როდესაც პარტიის ყრილობა უნდა ჩატარდეს. ზაქარია ქუცნაშვილის ფრაქციის თავმჯდომარეობის დროს ყოველ წელს გვაბარებდნენ ხოლმე ანგარიშს ფინანსებზე თუ სხვა საკითხებზე. ყრილობაზე შევხედავ საით მიდის პარტია და შესაბამისად მივიღებ გადაწყვეტილებას.

მე ჩვენი პრინციპებისა და ღირებულებებისთვის არ მიღალატია. იმ ნაცრისფერი, საბჭოთა ჯურღმულებში გამოზრდილი ადამიანებისათვის ორი თხოვნა მექნება: პირველი – შეწყვიტონ ცილისწამებები ჩემზე და დაანებონ თავი ბინძური, ანონიმური სტატიების გამოქვეყნებას. მე რეაგირებისგან არ დავიღლები. ერთ-ერთმა, საკმაოდ ცნობილმა და 9 აპრილთან საკმაოდ ბინძურად დაკავშირებულმა საბჭოთა რუხმა კარდინალმა დამირეკა და მარწმუნებდა, რატომ არ უნდა მეჩივლა ერთ-ერთ საკითხთან დაკავშირებით. მისი გარემოცვა ჩემთვის უკვე გაშიფრულია; მეორე კი – ხელები შორს ჩემი ოჯახისგან. წინააღმდეგ შემთხვევაში საერთაშორისო ორგანიზაციებს მივმართავ. არჩეულ დეპუტატზე ზეწოლა არ შეიძლება და არავის მივცემ უფლებას წამართვან ნება, თავისუფლად მივიღო გადაწყვეტილება.

- რა წნეხია ოჯახის წევრებზე?

- არსებობს ჩანაწერები და არიან იმის მოწმეები, თანამდებობების და გვერდში დგომის სანაცვლოდ როგორ აიძულებდნენ ადამიანებს, რომ ჩემთვის და ჩემი ოჯახის წევრებისთვის ცილი დაეწამებინათ.

- ოთარ აბესაძე რომ არ მიიღეს ტყიბულელებმა, ამიტომ გაგრძელდა თქვენ წინააღმდეგ ბრძოლა?

- ვინც აბესაძე ჩაიყვანა ტყიბულში, რა გეგმაც არსებობდა თავის დროზე, ეს გეგმა ახლაც გრძელდება. აბესაძის უკან ძალიან რეალური ინტერესები და გარიგებები დგას. არ გამოვრიცხავ, რომ ერთ დღეს იმავე ტყიბულში ერთი დიდი ოლიგარქი მოგვევლინოს როგორც მხსნელი და მესია და ეს პატივცემული აბესაძე მის დაკრულზე თამაშობს.

- რაიმე ბიზნესინტერესების ლობირება ხდება?

- ეს თქვენ უნდა დაადგინოთ, რატომ ხდება ისე, რომ კოაბიტირებულები და ე.წ. ბიზნესმენები, რომლებიც “ქართული ოცნების” მხარეს დადგნენ, ხვალ კი შეიძლება ისევ იცვალონ გუნდი, რატომ არიან ათასჯერ უფრო პრივილეგირებულ მდგომარეობაში. მთავრობის სხდომაზე განიხილება საკითხი, მათ ხომ დაუწესდებათ საგადასახადო შეღავათები და ამ დროს არ განიხილება საკითხი ტყიბულელ მეშახტეებს დაუბრუნებენ თუ არა შეღავათებს. მე ვერაფერს ვერც უარვყოფ და ვერც დავადასტურებ. რატომ შეუყვარდა ჩვენს ხელისუფლებას ეს ბიზნესმენები, არ ვიცი.

- თანაგუნდელებიდან ვინმე დაგიდგათ გვერდით?

- თუ გადაწყვეტილების მიმღებ პირებზე საუბრობთ, მათ დამოკიდებულება არ გამოუხატავთ. ფორმებზე საუბრობენ და ფორმებთან დაკავშირებით როგორმე მე თავად გადავწყვეტ როდის რა ფორმით ვიმოქმედო. ბევრს არ აქვს ისეთი დამსახურება, რომ ვინმეს ჭკუის დარიგებას მოვუსმინო. სიტყვა მაინც უნდა ჰქონდეს ადამიანს შენთვის შეწეული, მორალურ ავტორიტეტად რომ აღიარო. შევიკრიბებით და გამოჩნდება ვინ რა პოზიციას დააფიქსირებს.

- გია ვოლსკიმ თქვა – მე ტყიბულის საკითხზე არაფერი ვიცოდი და როგორც კი გავიგე, ერთობლივი მუშაობაც შევთავაზე და ამის შემდეგ მიკვირს ეს აგრესიული განცხადებებიო.

- სასაცილოა, იმიტომ, რომ სანამ ტყიბულში გაფიცვა დაიწყებოდა, ორი თვით ადრე ვაფრთხილებდი “ქართული ოცნების” წარმომადგენლებს, შემდეგ 14 იანვარს ბიძინა ივანიშვილსაც კი გადავეცი წერილი და ეს არ იცოდა ბატონმა გიამ?! ყველაფერი გავაკეთე იმისათვის, რომ ეს გუნდის შიგნით მოგვარებულიყო. უკვე ყველანაირი ვადები იწურება, ამიტომ შევიტან კანონპროექტს და კენჭისყრის შედეგებს დავაკვირდები და შედეგს ქართულ საზოგადოებას მივაწვდი. ხალხი თავის გმირებს დაინახავს.

„რეზონანსი//მთელი კვირა”, 22 თებერვალი, 2016 წელი

ინტერვიუ ომარ ნიშნიანიძესთან: „მინისტრი უფრო არაკორექტული იყო, ვიდრე ბატონი გოგი“

ლიკა ამირაშვილი

რამდენიმე დღეა კოალიციაში რესპუბლიკელებსა და მრეწველებს შორის ღია დაპირისპირება მიმდინარეობს. ერთმანეთში ბერძენიშვილები და გოგი თოფაძე წაკამათდნენ. დაპირისპირების მიზეზი ამ უკანასკნელის განცხადება გახდა თავდაცვის მინისტრის თინა ხიდაშელი მისამართით. თოფაძის თქმით, ხიდაშელმა შუალედური არჩევნები გააყალბა. მეტიც, ორიოდე დღის წინ თოფაძემ შუალედური არჩევნების გაყალბებაში ხიდაშელთან ერთად იუსტიციის მინისტრი თეა წულუკიანიც დაადანაშაულა.

უმრავლესობიდან უკე დაიწყეს საუბარი, რომ ეს შესაძლოა კოალიციის დაშლას მოასწავებდეს. უმრავლესობის წევრი ომარ ნიშნიანიძე “მთელ კვირასთან” საუბრისას თოფაძისა და ბერძენიშვილების დაპირისპირებას პირად დაპირისპირებას უწოდებს და ფიქრობს, რომ ამით კოალიციის ერთიანობას საფრთხე არ ემუქრება.

„კოალიციაში დაპირისპირება, რა თქმა უნდა, სასურველი არ არის და დროულად უნდა დამთავრდეს. ვფიქრობ, ამ შემთხვევაში პიროვნულ დაპირისპირებასთან გვქონდა საქმე. ზოგადად, კოალიციაში რაღაც წინააღმდეგობები არსებობს, მაგრამ არ მგონია, ისეთი სერიოზული იყოს, რომ კოალიციას რაიმე საფრთხეს უქმნიდეს. თუმცა, ბუნებრივია, არასასიამოვნოა და სასწრაფოდ უნდა მოეღოს ბოლო», – ამბობს ომარ ნიშნიანიძე.

- თქვენ რომელი მხარის არგუმენტები მიგაჩნიათ უფრო დამაჯერებლად?

- უფრო კორექტულები უნდა ვიყოთ. თუმცა, მინდა ვთქვა, რომ როდესაც ერთი მხარისგან კორექტულობას ვითხოვთ, ჩვენც კორექტულები უნდა ვიყოთ. მგონია, რომ მინისტრი უფრო არაკორექტული იყო, ვიდრე ბატონი გოგი, მისი გაცხარება უფრო შემდეგ დაიწყო. ამიტომაც ჯობია ერთმანეთის მიმართ უფრო ლოიალურები ვიყოთ.

- როგორ ფიქრობთ, კოალიციაში ეს წინააღმდეგობები კოალიციის დაშლას ხომ არ მოასწავებს?

- სერიოზული დაპირისპირება ნამდვილად არ არის. რომელიმე ცალკე რომ გავიდეს, არცერთს შანსი არ აქვს. ჩვენც არავის არ ვუშვებთ, იმიტომ, რომ ერთიანობა ძალიან მნიშვნელოვანია. კოალიციის დაშლის საფრთხე და ამის საფუძველი ნამდვილად არ არსებობს.

- საპარლამენტო არჩევნებისთვის სია როგორ დაკომპლექტდება? კოალიციაში რა ცვლილებები იქნება?

- ბუნებრივია, რაღაც პროცესები მიდის და ამაზე მსჯელობა დავიწყეთ, თუმცა, აქტიურად არა. ამ საკითხზე მსჯელობას უფრო მეტად პარტიის ყრილობისთვის დავიწყებთ. რა თქმა უნდა, პარლამენტარებს შორის საუბარი ამ თემაზე მიმდინარეობს, მაგრამ აქტიურად საუბარი ჯერ არ დაწყებულა. პარტიაში, რა თქმა უნდა, ახალი სახეებიც გვეყოლება. მხოლოდ ძველი წევრები არ ვიქნებით, თუმცა, განსაკუთრებული ცვლილებები არ გვექნება. ჩვენ ამას ველით, მაგრამ მგონია, რომ ეს დიდი დოზით არ იქნება. ვნახოთ, როგორ იქნება.

- საარჩევნო კამპანიას როდის დაიწყებთ?

-მგონია, რომ საარჩევნო კამპანია აქამდეც უნდა დაგვეწყო. არჩევნებამდე დიდი დრო დარჩენილი არ არის. სავარაუდოდ, გაზაფხულისთვის საარჩევნო კამპანია დაწყებული უნდა იყოს.

- რის გაკეთებას აპირებთ საარჩევნო კამპანიისთვის? რა გეგმები გაქვთ?

- რა თქმა უნდა, პარტიაში რაღაც საუბრები არის, მაგრამ უფრო აქტუალური მაშინ გახდება, როდესაც პრემიერს შევხვდებით. იმედი მაქვს, რომ ეს შეხვედრა ძალიან შორს არ გადაიწევს. პრემიერთან შეხვედრის შემდეგ ეს საკითხი უფრო აქტუალური გახდება და ჩვენც გარკვეულ ამოცანებს დავსახავთ. ჩემი აზრით, ჩვენი ერთ-ერთი მთავარი ამოცანა კოალიციის პიარი უნდა იყოს. ბატონ ბიძინას ჯერ კიდევ პირველივე შეხვედრისას ვუთხარი, რომ პიარი აუცილებელია. ეს საკითხი ჩვენთან აბსოლუტურად მიტოვებულია. ისტორიკოსი ვარ და რაღაცები მესმის, თანამედროვე პოლიტიკა ამის გარეშე წარმოუდგენელია.

- ბიძინა ივანიშვილი არჩევნებში როგორ იქნება ჩართული, რა ფორმით?

- როგორც თავად თქვა, ის ამ არჩევნებში ძალიან აქტიურად იქნება ჩართული. იმედი მაქვს, რომ მართლაც ასე იქნება, ძალიან დაგვჭირდება.

- მასთან შეხვედრა თუ გქონდათ?

- შეხვედრა ნამდვილად არ გვქონია. მე უბრალოდ პირველი შეხვედრა ვახსენე. იმედია, შეხვედრაც შედგება და, რა თქმა უნდა, კონკრეტული ამოცანებიც დაისახება.

„რეზონანსი//მთელი კვირა”, 22 თებერვალი, 2016 წელი

ინტერვიუ დავით ზურაბიშვილთან: „ეს არის პირადი დაპირისპირება თავდაცვის მინისტრსა და გოგი თოფაძეს შორის“

ელზა პაპოშვილი

“რესპუბლიკური პარტიის” წევრი დავით ზურაბიშვილი აცხადებს, რომ კოალიციაში არანაირი დაპირისპირება არ არსებობს. გოგი თოფაძის განცხადებები მხოლოდ პირადი უთანხმოებაა. მის თქმით, გოგი თოფაძე თავდაცვის მინისტრზე თავდასხმით ანტისახელმწიფოებრივ საქციელს სჩადის. ამის შესახებ პოლიტსაბჭოზე იმსჯელებენ და საბოლოო გადაწყვეტილებას უმრავლესობა მიიღებს. დავით ზურაბიშვილის აზრით, ეს დაპირისპირება მხოლოდ “ქართული ოცნების” შიდა საკითხია და ამაზე თოფაძეს სახალხოდ არ უნდა ესაუბრა.

“რესპუბლიკელები” ამ დაპირისპირებას არ ვუყურებთ ისე, რომ ორ პარტიას შორის რაღაც ხდება. ეს არის პირადი დაპირისპირება, რომელიც გოგი თოფაძემ თავდაცვის მინისტრის მიმართ წამოიწყო. მისი განცხადებები, ბრალდებები, გამონათქვამები და თავდასხმა მინისტრზე ანტისახელმწიფოებრივი, ანტიკოალიციური და ანტიქართულია. ზუსტად მსგავსი შეფასება გააკეთა პრემიერ-მინისტრმა გიორგი კვირიკაშვილმა. ის დაეთანხმა ჩვენს მოსაზრებას და თქვა, რომ თავდაცვის მინისტრზე თავდასხმა არასახელმწიფოებრივია. ეს საკითხი დეტალურად პოლიტსაბჭოზე უნდა გაირჩეს. ჯერჯერობით რისი თქმაც შემიძლია, მხოლოდ ეს არის», – ამბობს თავიტ ზურაბიშვილი „მთელ კვირასთან“ საუბრის დროს.

- გოგი თოფაძე აცხადებს, რომ “რესპუბლიკელებს” კოალიციაში თავის თავზე ზედმეტად დიდი წარმოდგენა აქვთ და გაღიზიანების ერთ-ერთი მიზეზიც ეს არის. რას იტყვით მის ამ შეფასებაზე?

- ჩვენ ველოდებით პოლიტსაბჭოს სხდომას, სადაც ნატოს კურსის შესახებ ბატონი თოფაძის განცხადებებს განვიხილავთ. ვნახოთ, რა გადაწყვეტილება იქნება მიღებული. მანამდე ამ ხალხთან კინკლაობასა და ჭორაობას არ ვაპირებ. ამ სხდომის შემდეგ ყველაფერი დალაგდება და გაირკვევა. “რესპუბლიკელებმა” რა შეფასებაც მივეცით მანამდე, ახლაც ამ პოზიციაზე ვდგავართ. ეს არ არის შიდა კოალიციური დაპირისპირება, ესაა კერძო პირის შეხედულებები, რომელზეც ვფიქრობ, რომ ასე ხმამაღლა და საჯაროდ არ უნდა ესაუბრა. დანარჩენი ახლა კოალიციის გადასაწყვეტია, რას და როგორ მოიმოქმედებს.

- პოლიტსაბჭოზე შესაძლებელია, რომ კოალიციიდან ვინმეს გარიცხვის საკითხი დადგეს?

- სხვა ვერაფერს გეტყვით. როგორც ვთქვით, მხოლოდ პოლიტსაბჭოს გადაწყვეტილებას ველით, წინასწარი დასკვნების და ვარაუდების გაკეთება არც მე და არც ჩემს პარტიას არ გვსურს. მანამდე ვფიქრობთ, რომ ჩვენი პოზიცია სწორია და პოლიტსაბჭოზეც იგივეს ვიტყვით.

„რეზონანსი//მთელი კვირა”, 22 თებერვალი, 2016 წელი

ინტერვიუ  კახა კუკავასთან: „პარტიები, რომელთა რეიტინგიც 0-სა და 15-ს შორის თამაშობს, კოალიციას არ დატოვებენ”

გვანცა ღვედაშვილი

“რესპუბლიკელებსა” და “მრეწველებს” შორის გასულ კვირას დაწყებული დაპირისპირება ისვე გრძელდება. აღნიშნულ დავაზე პოლიტსაბჭოს სხდომის ჩატარებამდე კომენტარის გაკეთებისგან “ქართულ ოცნებაში” თავს იკავებენ. ოპოზიციური პარტია “თავისუფალი საქართველოს” ლიდერი კახა კუკავა კი “მთელი კვირისთვის” მიცემულ ინტერვიუში აცხადებს, რომ ეს დაპირისპირება არავითარი შედეგის მომტანი არ შეიძლება იყოს, რადგან საბოლოოდ არც ერთი დაპირისპირებული მხარე კოალიციიდან თავისი ნებით არ გავა, რადგან ამით მომავალი პარლამენტის შემადგენლობაში მათი ყოფნა კითხვის ნიშნის ქვეშ დადგება. “რესპუბლიკელების” მიმართ გამოხატულ აგრესიას კი იმით ხსნის, რომ მათ აქვთ შესაძლებლობა, სხვა პარტიებთან შედარებით რიცხობრივად უფრო მეტი დეპუტატით წარდგნენ პარლამენტში, რაც კოალიციაში არსებული სხვა პარტიების გაღიზიანების მიზეზი ხდება.

- როგორ ფიქრობთ, კოალიციაში არსებული დაპირისპირება როგორ დასრულდება?

- მეეჭვება, ამ დაპირისპირებამ კონკრეტული შედეგები გამოიღოს, რადგან თქვენ იცით, რომ კოალიცია არ არის შექმნილი პოლიტიკური პრინციპების ირგვლივ, ის შექმნილია იმ მიზნით, რომ მისმა წევრებმა მიიღონ მატერიალური გამორჩენა. აქედან გამომდინარე, საბოლოო ჯამში, როგორც უნდა გაბრაზდნენ კოალიციის წევრები ერთმანეთზე, ორივე მხარეს ძალიან კარგად ახსოვს, რომ არჩევნებში ერთმანეთს სჭირდებიან.

- მოსალოდნელია, რომ “რესპუბლიკელებმა” ან “მრეწველებმა” კოალიციიდან გამოსვლის გადაწყვეტილება მიიღონ?

- გამორიცხულია, თქვენც ხომ კარგად გესმით, რომ პარტიები, რომელთა რეიტინგიც ნულსა და ერთ პროცენტს შორის თამაშობს, რა თქმა უნდა, კოალიციას არ დატოვებენ. მათი ერთადერთი შანსი, მოხვდნენ პარლამენტის მომავალ შემადგენლობაში, არის ბიძინა ივანიშვილის მილიარდები და კოალიციაში დარჩენა.

- თვლით, რომ ამ დაპირისპირების და ერთმანეთის მიმართ მწვავე განცხადებების მიუხედავად, კოალიციას არც ერთი პარტია არ დატოვებს?

- თავისი ნებით რომ არც “რესპუბლიკელები” და არც “მრეწველები” არ დატოვებენ კოალიციას – ამას წყალი არ გაუავა და არც ის მგონია, რომ რომელიმე მათგანი გარიყონ.

- როგორ ფიქრობთ, რა არის ამ დაპირისპირების რეალური მიზეზი და რატომ არის “რესპუბლიკელების” მიმართ გამორჩეული აგრესია?

- დაიწყო წინასაარჩევნო ბრძოლა და შესაბამისად, ყველა პოზიციების გადასინჯვაზეა გადართული. კოალიციაში პირველი პარტია “ქართული ოცნებაა”, მაგრამ “რესპუბლიკურ პარტიას” აქვს იმის შესაძლებლობა, რომ მიიღოს რიცხობრივად მეტი დეპუტატი სხვა პარტიებთან შედარებით, რაც ბუნებრივია, ზოგიერთი პარტიის უკმაყოფილებას იწვევს. რეალურად რომ ვთქვათ, ახლა პარტიებს შორის კვოტებზე ვაჭრობა მიმდინარეობს. როგორც ხდება ხოლმე ნებისმიერი ვაჭრობის დასაწყისში, ახლაც მოვა მათი ხელმძღვანელი, დაჯდება და ეტყვის: შენ ამდენი ადგილი, შენ – ამდენი და ერთმანეთში მოარიგებს. ასე რომ, შეგიძლიათ მშვიდად იყოთ – კოალიციას დაშლის საფრთხე არ ემუქრება.

„ახალი თაობა“, 22 თებერვალი, 2016 წელი

ინტერვიუ ირაკლი ბათიაშვილთან: „რაზე გაურიგდა მიხეილ სააკაშვილი პაატა ბურჭულაძეს და ლეონიდ ჩერნოვეცკის?“

ქვეყანაში განვითარებულ ბოლო პერიოდის პოლიტიკურ პროცესებს `ახალ თაობასთან~ ინტერვიუში სახალხო კრების ერთ-ერთი ლიდერი ირაკლი ბათიაშვილი აფასებს.

- ბატონო ირაკლი, კოალიცია „ქართულ ოცნებაში“ სიტუაცია დღითიდღე იძაბება, დაპირისპირება პიკს აღწევს. ამბობენ, რომ კოალიცია ვერ მიაღწევს ერთიანი სახით არჩევნებამდე. ეს არ აზარალებს ოცნებასა და ზოგადად სახელმწიფოს?

- რასაკვირველია, ეს ქვეყნის იმიჯს საგრძნობლად აზარალებს. როდესაც მმართველ ძალაში ასეთი არასტაბილური ვითარებაა, ეს მთლიანად სახელმწიფოს პოლიტიკურ სტაბილურობაზეც აისახება და უარყოფით ზეგავლენას ახდენს მასზე. დღეს ჩვენ არ უნდა გაგვიკვირდეს ის პროცესი, რომელიც ამჟამად მიმდინარეობს მმართველ კოალიციაში.

- რატომ?

- ეს არის სავსებით ლოგიკური. ეს არის შედეგი იმის, რაც თავის დროზე მოხდა.

- რას გულისხმობთ?

- კერძოდ, ვგულისხმობ იმას, რომ იმთავითვე ეს პოლიტიკური ძალები გაერთიანდნენ არა რაღაც იდეურ ნიადაგზე, არა რაღაც მრწამსისა და მსოფლმხედველობის ნიადაგზე, უბრალოდ, ისინი გაერთიანდნენ ერთი პიროვნების ირგვლივ, რომელმაც ისინი მოიყვანა ძალაუფლებაში. დღეს ისევ წინასაარჩევნო პერიოდია, ქვეყანაში გართულებული პოლიტიკური და ეკონომიკური მდგომარეობაა. აქედან გამომდინარე, სავსებით რეალურია, რომ დაიწყო რღვევა. თუმცა რღვევა უფრო ადრე დაიწყო.

- როდესაც ალასანიას გუნდმა დატოვა ოცნების რიგები?

- რასაკვირველია. ფაქტობრივად, მაშინ დაიწყო კოალიციის რღვევა. მათ საერთო არაფერი ჰქონდათ ერთმანეთთან. ისინი, როგორც ვაგონები, ისე იყვნენ ჩაბმული ბიძინა ივანიშვილის პერსონას.

- ამბობენ, რომ ოცნება კვლავ აპირებს უმრავლესობით მოსვლას და, თუკი აღარ იარსებებს კოალიცია ამ სახით, მაშინ რა იქნება?

- მოვლენ თუ არა უმრავლესობით, ეს კითხვის ნიშნის ქვეშ დგას. საერთოდ, როგორი იქნება მომავალი პარლამენტი, ამას დრო გვაჩვენებს, რამდენად გააქტიურდებიან ოპოზიციური ძალები, ვინ როგორ დაიწყებს საარჩევნო კამპანიის წარმართვას და ასე შემდეგ. დღეს მმართველი კოალიცია შინაგანად არამდგრადია, თუმცა, შევარდნაძის დროიდან მოყოლებული, ასეა, რომ მმართველ ძალას არჩევნებზე აქვს დიდი უპირატესობა. ეს არის მისი სახელისუფლებო ბერკეტები, მისი ადმინისტრაციული რესურსი, რის იმედზეც ყოველთვის იყო მმართველი ძალა და, რასაკვირველია, ახლაც არიან.

- რატომ იქცა რესპუბლიკური პარტია მიუღებელ ძალად საზოგადოების გარკვეული ნაწილისთვის? გვესმის შეფასებები, რომ ის ნულპროცენტიანი პარტიაა და ასე შემდეგ...

- მაგ კოალიციაში არცერთი არ არის დიდი პროცენტის მქონე პარტია. არც რესპუბლიკელები არიან და არც სხვები. რომელი მათგანი იყო დიდი რეიტინგის მქონე პარტია?! რესპუბლიკურ პარტიას გამოცდილება დიდი აქვს პოლიტიკური, გამოკვეთილი ლიდერიც ბევრი ჰყავს, რომლებმაც პოლიტიკაც იციან და ლაპარაკიც, პლუს გარედან აქვთ მხარდაჭერა საკმაოდ სერიოზული, დიდი კავშირები აქვთ დასავლეთთან, ამიტომ ცალსახად გასაგებია, რომ ეს პარტია საჭირო იყო კოალიციისთვის. როგორც ჩანს, ეს პარტია ახლაც საჭიროა ბიძინა ივანიშვილისთვის. ეს არის ფაქტი.

- საუბრობთ, რომ შესაძლოა ოცნება ვერ მოვიდეს უმრავლესობით. ოპოზიციურ ფლანგზე გეგულებათ ისეთი ძალები, რომლებმაც შეიძლება ეს ძალა ჩაანაცვლონ?

- რა თქმა უნდა, ოპოზიციაში არსებობს სერიოზული რესურსი და, უპირველეს ყოვლისა, გამოვყოფდი ნინო ბურჯანაძის პოლიტიკურ ძალას. მართალია, დღეს ის აქტიურად არ ჩანს ჩვენი ამომრჩევლის თვალთახედვაში, თუმცა, ვინმეს თუ აქვს რეიტინგის ზრდის პოტენციალი, ეს აქვს სწორედ ბურჯანაძის პოლიტიკურ ძალას. თუ ამ პოტენციალის რეალიზაცია და სრული გამოყენება მოხდა, ამ ძალას შეუძლია, დადოს სერიოზული შედეგი.

- ფიქრობთ, რომ კოალიცია აღარ იქნება იმ სახით წარმოდგენილი, როგორითაც დღეს არის? თუ ის სერიოზულ ცვლილებებს განიცდის?

- მე ვერ გეტყვით, კოალიცია ასეთი სახით იქნება, სხვა სახით იქნება, ეს თვითონ კოალიციის გადასაწყვეტია. გამოდის ხმები, რომ თავად ლიდერებში არის უკმარისობის გრძნობა და მათი სურვილია, მოხდეს კოალიციის გარდაქმნა, ტრანსფორმაცია, თუმცა დღეს ძალიან ძნელია რაღაც ახალი რესურსების მოძიება. ესეც დიდი პრობლემაა. მათ რომ რაციონალურად ეაზროვნათ, ვისთანაც უნდა ჰქონოდათ კონტაქტების დალაგების პირველი მცდელობა, ეს ისევ და ისევ ნინო ბურჯანაძის პარტია უნდა ყოფილიყო.

- დღეს არის შანსი მათი ერთად ყოფნის?

- შანსი უამრავი რამისაა. პოლიტიკაში ვერაფერს გამორიცხავ.

- რაიმე სიურპრიზებს ხომ არ უნდა ველოდეთ წინასაარჩევნოდ?

- არც სიურპრიზებია გამორიცხული. შესაძლოა, ასეთი მდორე სიტუაცია დიდხანს აღარც გაგრძელდეს.

- კერძოდ?

- არ გამოვრიცხავ, რომ ისეთი მოვლენები შემოვარდეს, რომელსაც არ ველოდებით და რომელმაც სიტუაციის სრული აჭრა გამოიწვიოს.

- არის ამის საფრთხე?

- ხომ ნახეთ, არავინ ველოდებოდით, ისე უცებ დაიწყო რუსთავი 2-თან დაკავშირებული პროცესები, რომელმაც ლამის მთლიანად ამოაყირავა სიტუაცია, ლამის სერიოზული დესტაბილიზაციის საფრთხეების წინაშე დაგვაყენა. ასე რომ, მე მოვლენების მსგავს განვითარებას არ გამოვრიცხავ.

- „რუსთავი 2“-ს მაესტრო ხომ არ ჩაანაცვლებს ამ საქმეში?

- არა. მაესტროში მიმდინარე პროცესები შიდა პრობლემებთან არის დაკავშირებული. მიდის შიდა კონფლიქტი მაესტროს მფლობელობასთან დაკავშირებით. შესაძლოა, გარეშე ფაქტორებიც ჩართული იყოს, მაგრამ ეს დამფუძნებლებს შორის არსებული უთანხმოებაა, რუსთავი 2-ის თემა კი სულ სხვა იყო. ნაციონალებს უნდოდათ, ქვეყანაში განევითარებინათ ისეთი პროცესები, რომლებიც ხელს შეუწყობდა მათ კვლავ ხელისუფლებაში დაბრუნებას.

- როდესაც მოსალოდნელ საფრთხეებზე საუბრობთ, ეს ნაციონალებს უკავშირდება? მით უმეტეს, ისინი აცხადებენ, რომ შემოდგომაზე ხელისუფლებას გადაიბარებენ...

- მიხეილ სააკაშვილისა და მისი უახლოესი გარემოცვის მთავარი მიზანია, აქ ორგანიზება გაუწიონ სიტუაციის სრულ დესტაბილიზაციას წინასაარჩევნოდ. მათ კარგად იციან, რომ არჩევნების გზით ძალაუფლების ხელში ჩაგდების შანსი არა აქვთ, კარგად იციან, რომ არჩევნების შემდეგ მათი წარმომადგენლობა პარლამენტში კიდევ უფრო შემცირდება.

- ამიტომ დესტაბილიზაცია აწყობთ?

- ამიტომ ერთადერთი გამოსავალი ამ მძიმე სოციალურ-პოლიტიკურ ფონზე არის ის, რომ ხელი შეუწყონ სწორედ დესტაბილიზაციის განვითარებას. ამისთვის რაღაცა მიზეზი აუცილებლად დასჭირდებათ. ნაციონალები ჭკვიანები არიან, `ქართული ოცნების~ ლიდერებისგან განსხვავებით, პოლიტიკაში კარგად ერკვევიან. მათ ისიც კარგად იციან, რომ თვითონ მომავალი რევოლუციური ტალღის ლოკომოტივად არ გამოდგებიან, რომელიც მათ სურთ მოიტანონ. ამიტომ ცდილობენ, წინა პლანზე წამოსწიონ ახალი სახეები. ხომ ხედავთ, მათი ხელშეწყობით უამრავი ახალი არასამთავრობო ორგანიზაცია გამოიჩეკა, ახალი პოლიტიკური ორგანიზაციები ჩამოყალიბდა.

- კონკრეტულად რომელს გულისხმობთ?

- მიხეილ სააკაშვილი არ მალავს, რომ მას ჰყავს პოლიტიკურ სპექტრში თავისი ფარული მოკავშირეები და ასეთად თვლის, მაგალითად, ჩერნოვეცკის, პაატა ბურჭულაძეს და ასე შემდგომ. სააკაშვილი ამბობს, ჩვენიანები არიანო, ეს კი კითხვის ნიშნებს აჩენს. რატომ ბურჯანაძეზე არ ამბობს, ჩემი მოკავშირეაო?! მე არ ვამტკიცებ, რომ ასეა, მაგრამ რატომ თვლის სააკაშვილი მათ მოკავშირეებად, ეს კითხვის ნიშნებს აჩენს.

„კვირის პალიტრა“, 22 თებერვალი, 2016 წელი

“ოცნების” კრიზისი?!

რუსუდან შელია

დატოვებს თუ არა პარტიას და რატომ გაახსენდა საგარეჯოს არჩევნების­ შედეგები­ რამდენიმე თვის შემდეგ? ამის გარკვევა “მრეწველების” ლიდერ გოგი თოფაძესთან­ ვცადეთ:

- თინა ხიდაშელზე საუბარი მას შემდეგ­ დავიწყე, რაც საჯაროდ შეურაცხყოფა მომ­აყენა. დაინტერესებულ ადამიანებს შეუძ­ლ­იათ მოისმინონ განცხადებები, რომლებიც თავდაცვის მინისტრმა ჩემი მისამართით გააკეთა. სწორედ ამის შემდეგ ვთქვი, ხიდ­აშელის გამო უხერხულ მდგომარეობაში აღმოვჩნდით და ამას ჩვენი პარტნი­ორებიც მალე გაგვიხსენებენ-მეთქი. მხოლოდ ის ვთქვი,­ რომ ჯარისკაცები სხვადასხვა რაიონიდან საგარეჯოში ჩაიყვანეს…

- პრემიერმა ეს მთელი­ მთავრობის­ შეურაცხყოფად აღიქვა.­ არ ფიქრობთ, რომ ხიდაშელის საწინააღმდეგო განცხადებით კოალიციას დაუპირისპირდით?

- მალე პოლიტსაბჭო შეიკრიბება და ამ საკითხზე პრემიერთან პირისპირ ვის­ა­უ­ბრებთ. მართალია, განსახილველ თემებს პრემიერი ადგენს, მაგრამ რესპუბლიკელებზე საუბარი მაინც მოგვიწევს.

- დღეს კოალიცია არჩევანის წინაშე­ დგას: ან თქვენ უნდა დატოვოთ პარტია,­ ან – რესპუბლიკელებმა. პოლიტსაბჭოზე რა მოთხოვნის წამოყენებას გეგმავთ?

- რესპუბლიკელებს ისეთი პოზიცია აქვთ, თითქოს არჩევნები მათ მოგვაგებინეს,­ არადა, ყველამ იცის, რომ საკუთარი ძალ­ებით ხელისუფლებაში ვერასდროს მოვიდ­ოდნენ… რაც შეეხება გუნდის დატოვებას, რესპუბლიკელებმა ბოდიში მომიხადონ შეურაცხყოფისთვის და მერე ვნახოთ,­ რა იქნება.

———-

ვინ დარჩება კოალიციაში და ვის მოუწევს გაერთიანებიდან წასვლა? “კვირის პალიტრას” ლევან ბერძენიშვილი­ ესაუბრება:

- რესპუბლიკელებს არც “მრეწველების” პარტიასთან და არც მათ ფრაქციასთან კონფლიქტი არ გვაქვს. პრობლემას მხოლოდ­ გოგი თოფაძე წარმოადგენს, რომელიც არა მხოლოდ ჩვენს პარტიას, არამედ, როგორც პრემიერმა განაცხადა, მთლიანად სახელმწიფოს დაუპირისპირდა. რეალურად, თოფაძეს ქვეყნის საგარეო კურსი არ მოსწონს და ცდილობს, საკუთარი პოზიცია რესპუბლიკელებთან დავის კონტექსტში წარმოაჩინოს. ან მე რას მერჩის, სასამართლომ ჩემი ერთი დანაშაული მაინც გამოააშკარავა?

- თოფაძე თქვენ ადრინდელ საქმიანობას­ გახსენებთ და იმ ჩვენებებზე მიგანიშნებთ, რომლებიც თითქოს საბჭოთა ხელისუფლების დროს ოჯახის წევრების წინააღმდეგ მიეცით.

- გოგი თოფაძეს რაღაცები აერია. ლევან ბერძენიშვილმა ცოლი ჩაუშვა, ძმა თუ ბიძაშვილი, ეს საკითხი ვერ გადაფარავს თოფაძის განცხადებას – ნატო არის აგრესიული ძალა და საქართველო ნეიტრალური სახელმწიფო უნდა გახდესო. ეს პოზიცია სახელმწიფოს დეკლარირებულ პოლიტიკას ეწინააღმდეგება, თუმცა, თოფაძე ამ ბრძოლაში მარტოა,
რადგან მას პარტიის წევრებიც არ ეთანხმებიან – ნატოს საწინააღმდეგო სიტყვა არც ერთ მათგანს არ წამოსცდენია.

- თუ თოფაძემ კოალიციის

დატოვებაზე უარი განაცხადა, ამ დაპირის­პირების ფონზე როგორ წარმოგიდგენიათ “მრეწველებთან” ერთ კოა­ლი­ციაში ყოფნა?

- მაქსიმუმი, რაც შეიძლება მოხდეს, თოფაძემ პარტია დატოვოს, მისი პარტიის საწინააღმდეგო კი არაფერი გვაქვს. ჩემთვის ამოწურულია ეს ადამიანი და ის არც პოლიტიკაში და არც ბიზნესში არ მაინტერესებს. ისტორიაში ბერძენიშვილი დარჩება, როგორც პატრიოტი, რომელიც ამისთვის კომუნისტებმა ციხეში ჩასვეს, თოფაძე კი – კომუნისტი საქმოსანი, რომელიც იპარავდა.

- სანდრო ბრეგაძეც აცხადებს, რომ თანამდებობიდან რესპუბლიკელების ზეწოლის გამო გადადგა. ამბობს, რომ გუნდის 80% თქვენ მიმართ ნეგატიურად არის განწყობილი…

- თუ ბრეგაძემ თანამდებობაზე არ გაამართლა, რესპუბლიკელები რა შუაში არიან? კანონში ხაზგასმით წერია, რომ ოჯახი კაცისა და ქალის ერთობაა. ამის წინააღმდეგი რომ ვიყოთ, კან­ონიდან მის ამოღებას ხომ მოვითხოვდით?! ცრუობს ბატონი ბრეგაძე, ის, უბრალოდ, უსაქმური ადამიანია და საერთოდ, მიკვირს, რატომ დაინიშნა თავიდანვე ამ თანამდებობაზე. რაც შეეხება კოალიციის განწყობას, გაერთიანებაში ჩვეულებრივი კონკურენციაა. თუ ვინმეს ჰგონია, რომ კოალიციაში გულში ჩახუტება უნდა იყოს, პოლიტიკის არაფერი გაეგება.

———–

მმართველ გუნდში გოგი თოფაძე­ არ აღმოჩნდა ერთადერთი, ვინც რესპუბ­ლ­იკელ­ებს დაუპირისპირდა. 19 თებერვა­ლს თანამდებობიდან მოულოდნელად სანდ­რო ბრეგაძე გადადგა, მიზეზად კი თინა ხიდაშელის ზეწოლა დაასახელა. “კვირის პალიტრა” დიასპორის საკითხებში სახელმწიფო­ მინისტრის უკვე ყოფილ მოადგილეს, სანდრო­ ბრეგაძეს დაუკავშირდა:

- ხაზგასმით ვაცხადებ, თანამდებობიდან გადადგომა მაიძულეს. კატეგორიულად მთხოვდნენ, იმ პრინციპებზე მეთქვა უარი, რომელთა ერთგული ჯერ კიდევ ეროვნული მოძრაობიდან ვარ… როგორც მინისტრმა გელა დუმბაძემ­ მითხრა, ჩემს გადადგომას მთავრობის წევრები­ ითხოვდნენ. კანცელარი­იდან კი ინფორმაცია მომივიდა, თურმე პრემიერთან შეხვედრაზე არჩევნების გამყალბებელი თინა ხიდაშელი იმყოფებოდა და კვირიკაშვილისგან ჩემი გათავისუფლება კატეგორიულად მოუთხოვია. დიდი ხანია, რესპუბლიკელებს­ ჩემი მთავრობაში ყოფნა აღიზიანებთ. ერთსქესიანთა ქორწინების წინააღმდეგ პარლამენტში ხელმოწერების შეგროვება რესპუბლიკელებისთვის ბოლო წვეთი აღმოჩნდა.

- ზეწოლაში რას გულისხმობთ, თუ თანამდებობას არ დატოვებდით, რესპუბლიკელები­ კოალიციის დატოვებით იმუქრებოდნენ?

- დიახ, თუ ბრეგაძე იქნება მინისტრის მოადგილე, ჩვენ წავალთ კოალიციიდანო. პრემიერმა ხიდაშელი აირჩია და ღმერთმა მშვიდობაში მოახმაროს. არადა, ხიდაშელი კოალიციას არცხვენს – რამდენიმე დღის წინ მომაწოდეს დოკუმენტები, როგორ გააყალბა მან საგარეჯოში არჩევნები და ირმა ინაშვილს გამარჯვება წაართვა.

- ინაშვილი შემთხვევით ახსენეთ, თუ მასთან პოლიტიკურ გაერთიანებას­ გეგმავთ?

- როდესაც მთავრობაში ვიყავი, სერ­იოზული პოლიტიკური ორგანიზაციები მათთან გაერთიანებას მთხოვდნენ, მაგრამ არ ვარ მოღალატე და არ შემიძლია, გუნდის ზურგს უკან მოლაპარაკებები ვაწა­რმოო, ამიტომ ყველა შემოთავაზებაზე უარი განვაცხადე… რაც შეეხება ინაშვილთან გაერთიანებას, ყველაფერს მომავალი გვიჩვენებს. მანამდე კი ვაცხადებ: პოლიტიკაში უფრო აქტიური ვიქნები, ვიდრე აქამდე ვიყავი! საქართველოში ერთსქესიანთა ქორწინებას არასოდეს დავუშვებ, სისხლის უკანასკნელ წვეთამდე დავი­ცავ ჩემს სარწმუნოებასა და პატრიარქს. ბევრი რამ ბიძინა ივანიშვილის ხათრით ვითმინე, მაგრამ ახლა თავისუფლად ვიმოქმედებ. რესპუბლიკელების ადგილი პოლიტიკაში აღარ არის და ნუ მოექცევიან ხელისუფლების პირველი პირ­ები მათი შანტაჟის ტყვეობაში. სხვათა­ შორის, რესპუბლიკელების მიმართ 80% ნეგატიურად არის განწყობილი, იმაზე უარესს ამბობენ, ვიდრე გოგი თოფაძემ თქვა. უბრალოდ, ბევრს არ ჰყოფნის ვაჟკაცობა, ეს ხმამაღლა განაცხადოს.

- იქნებ გვითხრათ, თოფაძის გარდა, ვინ ლაპარაკობს რესპუბლიკელებზე­ ნეგატიურ კონტექსტში…

- ამ ადამიანებს შანსს მივცემ, თვითონ აღიარონ, რას ფიქრობენ რესპუბლიკელებზე, თუ არადა, მათ საჯაროდ­ დავასახელებ. ამაზრზენია, როცა “მრეწველებს” თავს აშკარად ესხმიან, თავად კი ზურგს უკან უარესს ამბობენ. მათ კა-გე-ბეს­ აგენტებს ეძახიან… ეს უნდა დამთავრდეს, ეს ანტიქართული­ ძალა კოალიციიდან უნდა გაირიყოს.

———-

კოალიციის გარდა, კონფლიქტი დაიწყო პარტია­ “ქართულ ოცნებაშიც”, სადაც ერთმანეთს პარტიის ლიდერები­ – არმაზ ახვლედიანი და გიორგი ვოლსკი დაუპირისპირდნენ. არმაზ ახვლედ­იანის აზრით, თუ “ქართულ ოცნებაში”­ პოლ­იტიკოსების წმენდა არ დაიწყო, პარტია ამომრჩევლის ნდობას დაკარგავს და არსებობასაც დაასრულებს:

- დაკვირვებული ადამიანი მიხვდ­ებოდა, რას ვგულისხმობდი “ბებერ პოლ­იტიკურ ნიანგებში”. პიროვნულად არავინ მიხსენებია, თავს არ მივცემ უფლებას, ვინმეს შეურაცხყოფა მივაყენო.

- მაგრამ ბევრმა ეს პიროვნულ შეურაცხყ­ო­ფად მიიღო და გიორგი ვოლსკის პასუხმაც არ დააყოვნა – პროცესებს არაადეკვატურად აფასებს და ვერც მართვაში ერკვევაო.

- სასაცილოდაც არ მყოფნის მისი შეფასება. პირიქით, მან ჩემზე კარგი რომ თქვას, მეწყინება კიდეც. რაც უფრო სწრაფად გათავისუფლდება პარტია “ქართული ოცნება” ვაიპოლიტიკოსებისგან, ქვეყანასაც მალე ეშველება. თითო-ოროლა­ კონფორმისტი პოლიტიკოსის აზრი, ყველა ხელისუფლებასთან რომ პოულობს საერთო ენას, არ მანაღვლებს. პარტიაში შექმნილ პრობლემებზე საუბარი ჯერ კიდევ 2013 წელს დავიწყე. “ქართულ ოცნებაში” გაერთიანება ჩემთვის იყო შეს­აძლებლობა, სწორად მოაზროვნე­ თანაგუნდელებთან ერთად პარტია თანამედროვე, საქვეყნო ინტერესებზე ორიენტირებულ ინსტიტუტად გვექცია. დღეს ვხვდები, რომ მაშინ ბებერ პოლიტიკურ ნიანგებთან ბრძოლაში დავმარცხდით.

- რატომ არ აკონკრეტებთ, ვის გულ­ისხმობთ?

- არაერთმა ამოიცნო თავი! მათ სერიოზული დაჯგუფება შექმნეს პარტიაში. მსგავსი სხვა პოლიტ­იკურ ძალებშიც გვინახავს, მაგრამ მმართველი პარტიისთვის ეს ყოველთვის სახიფათოა! დემოკრატიული რეფორმების დაწყება და პარტიული დისციპლინის ჩამოყალიბება “ქართულ ოცნებაში” ამ დრომდე­ ვერ მოხერხდა.

- რა არ მოგწონთ და რა მიმართულებით ხედავთ დისციპლინის დეფიციტს?

- პოლიტიკური ძალის სტრატეგია მისი წევრების აზრის გათვალისწინებით უნდა განისაზღვროს და გადაწყვეტილებები­ გამჭვირვალე უნდა იყოს. პარტია უნდა აცნობიერებდეს, რომ მის უკან უმთავრესი ძალა – ამომრჩეველი დგას. სანამ ბიძინა ივანიშვილი პარტიის საპატიო თავმჯდომარე გახლდათ, პროგრესის შემაფერხებელ ძალასთან გამკლავება მეტ-ნაკლებად შესაძლებელი იყო, მისი წასვლის შემდეგ კი ქაოსური ვითარება შეიქმნა.

- ვინ აიღო პარტიის მართვის სადავეები?

- დაიწყო გაუმართლებელი ექსპერიმენტები. მათ შორის, ხელმძღვანელ თანამდებობაზე ჯანყარაშვილის დანიშვნასაც ვგულისხმობ. სანამ ირაკლი ღარიბაშვილი პარტიის თავმჯდომარე იყო, ამ საკითხებზე მასთანაც პრინციპულად ვსაუბრობდი…

- დღემდე პოლიტსაბჭოს წევრი ხართ. პარტიიდან თქვენი გარიცხვის საკითხი­ დადგება?

- პარტიის ყრილობაზე გადაწყდება,­ ვინ რჩება და ვინ მიდის. იმედი მაქვს, პარტია განახლდება. ვფიქრობ, კვირიკაშვილი ამას შეძლებს, მაგრამ დრო იწურება და თუ ცვლილებები დაგვიანდა, მათ დაწყებას აზრიც აღარ ექნება.

- რატომ იქნება დაგვიანებული?

- ვერ წარმომიდგენია, საარჩევნოდ “ქართული ოცნება” ამ შემადგენლობით დარჩეს. ის ვეღარც პარტიად ივარგებს და ამომრჩევლის ნდობასაც დაკარგავს. ვაიპოლიტიკოსებისგან გათავისუფლება სასიცოცხლოდაა აუცილებელი. რაც მთავარია, ჯგუფმა, რომელზეც ვლაპარაკობ, საარჩევნო სიის შედგენაში­ მონაწილეობა არ უნდა მიიღოს!

- შეიძლება, საზოგადოების ნაწილმა ჩათვალოს, რომ განაწყენებული ხართ, რადგან არ არის გამორიცხული, ახალ სიაში ვერ მოხვდეთ...

- არ ვფიქრობ, რომ სიაში აუცილ­ებ­ლად უნდა მოვხვდე. არ შეიძლება ეს თვითმიზანი გახდეს, ამაზე ოცნება არანორმალურია! მე იმ ადამიანებს ვგულშემატკივრობ, ვინც ჩვენზე უკეთესია საქმითა­ და ერთგულებით. მადლობა ღმერთს, ასეთი ბევრია.

———-

არმაზ ახვლედიანის ბრალდებებსა და კოალიციაში განვითარებულ მოვ­ლენებს ფრაქცია “ქართული ოცნების”­ თავმჯდომარე გიორგი ვოლსკი აფასებს:

- ახვლედიანი მართვის საკითხებში ვერ ერკვევა და არც იმ ვითარების ადეკვატურია, რაც დღეს არის შექმნილი. სწორედ საბჭოთა მართვის მეთოდებისა და ზედმეტი შენიშვნების გამო ვთხოვეთ, პოლიტსაბჭოს წევრობა შეეჩერებინა და ვხვდები, რომ სწორი გადაწყვეტილებაც მივიღეთ. ის შეურაცხყოფს ჩემს კოლეგებს, როცა საბჭოთა მენტალიტეტზე საუბრობს.

- რესპუბლიკელებსა და თოფაძეს შორის დაპირისპირებაც პიკს აღწევს.­ პოლიტსაბჭოს სხდომაზე გუნდი ვის აირჩევს?

- რესპუბლიკელებისა და გოგი თოფაძის საკითხს პოლიტსაბჭოზე განვიხილავთ, რადგან ეს დაპირისპირება ორი პიროვნებისა თუ ფრაქციის ურთიერთობას გასცდა.
არის საკითხები, რომლებიც გოგი თოფაძემ უნდა განმარტოს, მათ შორის – თავისი პოლიტიკური კურსიც. მას ყველაფრის ახსნის შესაძლებლობა უნდა მივცეთ, რადგან თავისი საქმიანობით მან ეს დაიმსახურა. რესპუბლიკელების წინააღმდეგ განცხადება უადგილო იყო, მაგრამ რესპუბლიკელებსაც თავშეკავება უნდა გამოეჩინათ. პიროვნული შეხლა-შემოხლა ადვილი გადასალახია. ბევრი დაპირისპირება გვინახავს, მაგრამ სხვა საკითხია ქვეყნის კურსსა და პრინციპების შეცვლაზე საუბარი. დანარჩენს პოლიტსაბჭოზე გავარკვევთ.

- არჩევნების მოახლოებასთან ერთად კოალიციაში დაპირისპირების გამწვავებას ელოდებით?

- წინასაარჩევნოდ პოლიტიკური ურთიერთობები ყოველთვის დაძაბულია, ვნებათაღელვა იმატებს, მაგრამ ვეცდებით, კონფლიქტები ავირიდოთ.

„კვირის პალიტრა“, 22 თებერვალი, 2016 წელი

ინტერვიუ მამუკა არეშიძესთან: “არავის ვაშინებ, მაგრამ ხელისუფლება ფხიზლად უნდა იყოს!”

ნათია დოლიძე

მმართველ კოალიციაში დაპირისპირებისთვის ახალ-ახალი მიზეზები არ ილევა. ამჯერად ასპარეზზე “მრეწველების” ლიდერი გოგი თოფაძე და რესპუბლიკური პარტიაა, რომლებიც ურთიერთბრალდებებისას უკვე ეთიკის საზღვრებსაც გადადიან. ჯერ იყო და, თოფაძემ თავდაცვის რესპუბლიკელი მინისტრი თინა ხიდაშელი საგარეჯოში არჩევნების გაყალბებაში დაადანაშაულა, რასაც დავით ბერძენიშვილმა უპასუხა და თოფაძის განცხადებებს ანტისახელმწიფოებრივი და ანტიკოალიციური უწოდა. მისი შეფასებით, თავდაცვის მინისტრის მიმართ ორკესტრირებული კამპანია მიმდინარეობს, თუმცა ამ კამპანიის დირიჟორი ვინ არის, არ დაუსახელებია.

არსებობს ვარაუდი, რომ მიმდინარე პროცესები წინასაარჩევნო კოალიციური “დუღილით” არის განპირობებული და ყველა თავისებურად ცდილობს მომავალ საარჩევნო სიაში ადგილისა და გავლენის მოპოვებას. ექსპერტთა ნაწილის აზრით, შექმნილი არეულობის დალაგება მხოლოდ ექსპრემიერ ბიძინა ივანიშვილს ხელეწიფება, თუმცა ამას ჯერ არ ჩქარობს. სწორედ ამ დაპირისპირებების თაობაზე საუბრით დავიწყეთ ექსპერტ მამუკა არეშიძესთან ინტერვიუ:

- ჩემი აზრით, გოგი თოფაძის განცხადებები გარკვეულწილად დემონსტრირება იყო იმ აგრესიული განწყობებისა, რაც რესპუბლიკელების მიმართ ჩვენი საზოგადოების ერთ ნაწილშია. მართალია, მისი ამგვარი პოზიცია ნაწილობრივ განპირობებული იყო თავდაცვის მინისტრ თინა ხიდაშელის განცხადებით, მეგონა, თოფაძე პარლამენტიდან უკვე წასული იყოო, რამაც, როგორც ჩანს, გვარიანად გააღიზიანა ბატონი გოგი…

კოალიციაში თუ მის გარეთ ვინმეს თუ არ მოსწონს მისი დღევანდელი შემადგენლობა, მოუწევს ამასთან შეგუება, რადგან კოალიცია აუცილებლად შენარჩუნდება არჩევნებამდეც და მის მერეც. შეიძლება ზოგიერთი პერსონა წავიდეს ან რომელიმე სუბიექტი გავიდეს ამ ერთობიდან, მაგრამ მისი კონფიგურაცია მნიშვნელოვნად არ შეიცვლება და იქ აუცილებლად იქნებიან რესპუბლიკელები, ვინც ეს კოალიცია შექმნა, მისი პოზიცია ამ საკითხზე ცხადია – კოალიცია უნდა იყოს სწორედ ამგვარი შემადგენლობის. შემთხვევით თუ მიზანმიმართულად, ის თავის დროზე ისე დალაგდა, რომ აბალანსებს საქართველოს საგარეო პოლიტიკის ვექტორებს. ამ ბალანსში რესპუბლიკელებს ძალიან მნიშვნელოვანი ადგილი აქვთ, რაც კარგად იციან რესპუბლიკურ პარტიაში და ასევე კარგად იციან კოალიციის ხელმძღვანელებმაც. აქედან გამომდინარე, რყევებს ამ მიმართულებით არ ველოდები, რაც უნდა ილაპარაკოს თოფაძემ.

- საგარეო პოლიტიკის ვექტორები ახსენეთ და ზოგიერთი ექსპერტის აზრით, სულაც არ არის გამორიცხული, კოალიციაში გავლენის მოპოვებას თითოეული სუბიექტი სწორედ ქვეყნის საერთაშორისო ორიენტაციის გაძლიერების ან შეცვლის გამო ცდილობდეს…

- რა თქმა უნდა, ამას ვერ გამოვრიცხავთ, მაგრამ კოალიციის შემადგენლობა ჯერჯერობით არსებული ბალანსის დარღვევის საშუალებას არ იძლევა. რესპუბლიკური პარტია ერთ-ერთი ყველაზე გამოცდილი პარტიაა ქვეყანაში, სტრუქტურული თვალსაზრისითაც ერთ-ერთია პოლიტიკურ ძალთა შორის, რომელსაც შეიძლება პარტია ეწოდოს. ეს გამოცდილება მას ძალიან ბევრ რამეში ადგება. მისმა წევრებმა მშვენივრად იციან, როგორ უნდა ივაჭრონ, რათა ჰქონდეთ უკეთესი პოზიცია პოლიტიკურ სივრცეში და გაზარდონ თავიანთი გავლენა. 2011 წელს, მიუხედავად გამოცდილებისა, ეს პარტია არ იყო რიცხობრივად დიდი, მაგრამ 2012 წლის არჩევნების შემდეგ მათი რიგები მნიშვნელოვნად გაიზარდა. ბოლო წლებში რესპუბლიკელებმა ძალიან კარგად იმუშავეს პარტიის სტრუქტურის გასაძლიერებლად. შექმნილი ვითარება პარტიამ სათავისოდ პოლიტიკურად სწორად გამოიყენა, რაც ასევე არ მოსწონს ზოგიერთს კოალიციაში.

- ყველა ელის, რომ ვითარების დასალაგებლად ბიძინა ივანიშვილი მიიღებს გადაწყვეტილებას, თუმცა ის აშკარად არ ჩქარობს…

- ჩინოვნიკების, მათ შორის მაღალი თანამდებობის პირების ერთმა ნაწილმა და პარტიულმა ფუნქციონერებმაც სამუშაო წესად დანერგეს, რომ ყველაფერზე ბიძინა ივანიშვილს ჰკითხონ აზრი ან მის გადაწყვეტილებას დაელოდონ. არადა, ივანიშვილი მათგან მოითხოვს დამოუკიდებლად მიღებულ გადაწყვეტილებებს…

საბოლოოდ, ეს ყველაფერი განაპირობებს იმ არაორგანიზებულობას, რაც პარტია “ქართულ ოცნებაში” თუ კოალიციაში არეულობას ქმნის. იმედია, პარტიასა თუ კოალიციაში ახალი პრემიერის მოსვლით ვითარება უკეთესობისკენ არსებითად შეიცვლება, მაგრამ ერთიცაა – ისევე როგორც კალაძეს, კვირიკაშვილსაც პირდაპირი მოვალეობები თავზე საყრელად აქვს, მოიცლიან კი ისინი პარტიული სამუშაოსთვის?! მეორე საკითხია ის, რომ, სამწუხაროდ, 2012 წლის შემდეგ დაშვებულ იქნა დიდი შეცდომები, პარტიაში და კოალიციაშიც რიგ შემთხვევაში დაწინაურდნენ პირები, რომლებიც “ქართულ ოცნებაში” 2012 წლის 2 ოქტომბერს მივიდნენ, მათგან ბევრია პორტირებული, მათ შორის “ნაციონალური მოძრაობიდან”…

ამ ხალხის დიდი ნაწილი მედროვეა, მათთვის სულერთია, როდის რომელ ორთქლმავალს აეკიდებიან. არიან ისეთებიც, რომლებიც სპეციალურად არიან “ქართულ ოცნებაში” შეგზავნილი, განსაკუთრებით, რეგიონებში. ამ სიტუაციის დალაგებასა და ავგიას თავლების გაწმენდას მუხლჩაუხრელი შრომა სჭირდება.

თქვით, რომ ბიძინა ივანიშვილი გააქტიურებას არ ჩქარობს, ასეა, თუმცა დარწმუნებული ვარ, პროცესებს დიდი ყურადღებით აკვირდება. ჯერ აძლევს საშუალებას ადამიანებს, დამოუკიდებლად მიიღონ გადაწყვეტილებები, საჭირო მომენტში კი აუცილებლად ჩაერთვება…

- პრემიერ-მინისტრ გიორგი კვირიკაშვილის განცხადებამ, როდესაც აშკარად თინა ხიდაშელის მხარე დაიჭირა და თანაგუნდელებს მოუწოდა, ამგვარი საკითხები კოალიციაში გაარჩიონ, ვითარება ვერ განმუხტა, “მრეწველების” კიდევ არაერთი მწვავე განცხადება მოვისმინეთ…

- კვირიკაშვილის განცხადება აბსოლუტურად სწორი იყო – არ ღირს იმ დაპირისპირებების გამოტანა გარეთ, რაც კოალიციასა თუ მთავრობაში შეიძლება წარმოიშვას. მით უფრო ამ წინასაარჩევნო პერიოდში, როდესაც ეს მხოლოდ აზარალებს მმართველ ძალას. კარგი იქნება, თუ კვირიკაშვილის ნათქვამს გაიგებენ ისინი, ვის გასაგონადაც ითქვა!

- “მრეწველებისა” და რესპუბლიკელების დაპირისპირების პარალელურად დიასპორის საკითხებში სახელმწიფო მინისტრის მოადგილის პოსტი დატოვა სანდრო ბრეგაძემ, რომელმაც განაცხადა, მაიძულეს, განცხადება დამეწერაო და ამაში თინა ხიდაშელი და რესპუბლიკური პარტია დაადანაშაულა...

- სანდრო ბრეგაძე კოალიციაში წარმოადგენს საქართველოს პირველი პრეზიდენტის მხარდამჭერებს. მან სერიოზული მუშაობა გასწია 2012 წლის არჩევნებისას. მას აქვს გარკვეული პოზიცია, რაც ვიღაცისთვის შეიძლება მიუღებელი იყო, თუმცა არა მგონია, არ შეიძლებოდა მასთან დალაპარაკება და ვითარების კოალიციაშივე გარკვევა. სანდრო ამბობს, რომ თავდაცვის მინისტრის მოთხოვნით გადააყენეს. ამის თაობაზე არაფერი ვიცი და შესაბამისად, კომენტირებაც გამიჭირდება.

- პრობლემა მხოლოდ კოალიციას არა აქვს. პარტია “ქართული ოცნების” პოლიტსაბჭოს წევრის, არმაზ ახვლედიანის განცხადებებმა პარტიაში არსებული დაძაბულობაც გაამჟღავნა… მან გიორგი კვირიკაშვილს პარტიის “ბებერი ნიანგებისგან” დროულად გათავისუფლება ურჩია.

- არ ვიცი, ვინ იგულისხმა ახვლედიანმა “ბებერ ნიანგებში”, მაგრამ მე ყური მისმა სხვა ფრაზამ მომჭრა. მისგან საბჭოთა მენტალიტეტის ხსენება, ცოტა არ იყოს, გამიკვირდა. საბჭოურ მენტალიტეტზე ლაპარაკობს ადამიანი, რომელიც “მოქალაქეთა კავშირში” იყო, სადაც ეს მენტალიტეტი პირდაპირ მეფობდა და მაშინ ხმა არ ამოუღია. ვიმეორებ, სჯობს ამგვარი საკითხები პარტიაშივე გაირჩეს და მოგვარდეს. ეტყობა, რაღაც სხვა მოხდა, რამაც განაპირობა მისი ეს პოზიცია. სხვათა შორის, სრულიად განსხვავდება ელისო ჩაფიძის შემთხვევა, როდესაც მან განაცხადა, რომ ვერ მოაგვარა ტყიბულელ მეშახტეთა პრობლემები კოალიციაში და იძულებული შეიქნა ღია წერილით მიემართა პრემიერისთვის. ეს სულ სხვა შემთხვევაა, მან სცადა კოალიციაში საკითხის გარკვევა, არ გამოუვიდა და სააშკარაოზე გამოიტანა. აქ მე პოლიტიკურ ინტერესებს ვერ ვხედავ.

წეღან ვახსენე პორტირებულები და ორიოდე სიტყვა ამაზე კიდევ უნდა ვთქვა.ამ ხალხმა უდიდესი პრობლემები შექმნა რეგიონებში. რაც მეტად უსუსურია ამა თუ იმ რეგიონის ხელმძღვანელობა, მით მეტად მძიმე ვითარებაა სოციალური თუ კრიმინალური თვალსაზრისით. ამის კლასიკური მაგალითია გორი – შიდა ქართლის გული, სადაც ადგილობრივი ხელისუფლება, ფაქტობრივად, მოშლილია. ეს არის მაგალითი იმისა, თუ როგორ მოახდინეს კოალიციაში პორტირებულმა პირებმა მინირეგიონული გადატრიალება. ასეა კიდევ ბევრ რაიონში. ავიღოთ ნინოწმინდის რაიონი, იქ ერთი კონკრეტული დეპუტატია, რომელიც რაიონის მამაც არის, დედაც და ღმერთიც… არანაკლებ მძიმე ვითარებაა გარდაბანში, სადაც ახალი გამგებელი აირჩიეს და იმედია, შეძლებს ვითარების გამოსწორებას. “ნაციონალური მოძრაობა” უკვე აანონსებს, არჩევნები გაყალბდებაო. არ გამოვრიცხავ, რეგიონებში ამას საფუძველი უკვე ეყრებოდეს, რადგან საოლქო კომისიების წევრები, რიგ შემთხვევაში, ხელმძღვანელებიც, იგივე ხალხია, ვინც “ნაციონალური მოძრაობის” ყურმოჭრილი მონები იყვნენ და მათ ყველა დავალებას ასრულებდნენ. არჩევნებამდე რამდენიმე თვე დარჩა და ეს საკითხები სასწრაფოდ მისახედია.

- ენგურჰესის წყალსაცავში წყლის ნაკლებობის გამო აფხაზეთის უშუქოდ დარჩენის საფრთხე გაჩნდა. არსებული ინფორმაციით, მას ელექტროენერგია რუსეთიდან მიეწოდება.

- ქვეყნის ენერგეტიკაც საგარეო ვექტორების თემაა. საქართველოს ხელისუფლება ცდილობს ენერგეტიკული სურათი ისე დაალაგოს, რომ არ დააზიანოს ძალიან ბევრი სუბიექტის ინტერესი, რაც ძალიან ძნელია. მოგეხსენებათ, ენერგეტიკული სიმძლავრეების 72% წინა ხელისუფლების დროს სწორედ რუსეთზე გაიყიდა, რამაც მნიშვნელოვანი პრობლემები შექმნა, თუმცა ამ პრობლემებს ბევრი სხვა ფაქტორიც განაპირობებს. თუნდაც ის, რომ გაზის მომხმარებელი აბონენტების რიცხვი 150 000-ით გაიზარდა, გაჩნდა ახალი საწარმოები, რომლებიც დამატებითი ოდენობის ბუნებრივ აირსა და ელექტროენერგიას ითხოვენ. დაგეგმილია დიდი მშენებლობები, რაც ასევე ენერგეტიკულ სიმძლავრეებს ითხოვს. საქართველოს რესურსები კი ამოუწურავი არ არის, რადგან აქამდე არავის უზრუნია სისტემის განახლებასა და განვითარებაზე. სამწუხაროდ, ისე მოხდა, რომ უამრავი ჰესი, რომლებიც კერძო პირებს მიჰყიდეს, ან მოძველებულია და ვერ მუშაობს იმ სიმძლავრეზე, რაზეც არის გათვლილი, ან გაჩერებულია. მოკლედ, ეს თავიდან დასალაგებელი სისტემაა, რაც დიდ თანხებს მოითხოვს… გარდა ამისა, ამ პროცესის წარმართვა საგარეო ვექტორების გათვალისწინების გარეშე არ გამოდის. ამიტომაც არის, რომ კახა კალაძე ხან რუსებს ხვდება, ხან ირანში მიდის, ხან კიდევ აზერბაიჯანში…

საქართველოს ხელისუფლებამ ვერაფრით მოახერხა აეხსნა საზოგადოებისთვის, რა მდგომარეობაშია ჩვენი ენერგოსივრცე, რაც ოპოზიციამ კარგად გამოიყენა და პოლიტიკანობის თემად აქცია. მთავარი პრობლემა ისევ ხელისუფლების არასწორად დაგეგმილი პიარი და საზოგადოებასთან ურთიერთობაა. თუნდაც აფხაზეთთან დაკავშირებული საკითხები ავიღოთ – რა უნდოდა ნორმალურად იმის ახსნას, თუ რამ წარმოშვა პრობლემა და როგორ აპირებს სახელმწიფო მის გადაჭრას. აფხაზები აქამდეც უფასოდ იღებდნენ ჩვენგან ელექტროენერგიას. გარდა ამისა, სერიოზული პრობლემებია როგორც გადასახადების ამოღებაში, ასევე მოძველებული ინფრასტრუქტურის გამო, საიდანაც უამრავი სიმძლავრე იკარგება. მართლაც პარადოქსულ მდგომარეობაში ვართ, ხელისუფლება ვერ შედის აფხაზეთის ტერიტორიაზე, მაგრამ იძულებულია მის ელექტრომომარაგებაზე იზრუნოს, მიუხედავად იმისა, რომ ამით ოკუპანტის სამხედრო ბაზებიც სარგებლობენ. რას ვიზამთ, პოლიტიკას ახლავს ასეთი პარადოქსები.

- სკანდალად იქცა მერიის მიერ პროკურორ გერგედავას ქალიშვილის, როგორც სოციალურად დაუცველის, პარიზული ცხოვრების დაფინანსება…

- გავიგე, უკან დაუბრუნებია იმ პროკურორს ფული. არადა, რომ არ გახმაურებულიყო, ხომ შერჩებოდათ ხახვივით?! ითქვა, რომ ერთი წვრილი ჩინოსანი გაუშვეს თანამდებობიდან ნარმანიას შეცდომაში შეყვანის გამო, მაგრამ, ვფიქრობ, ეს არ არის საკმარისი. კარგად უნდა გამოიკვლიონ, რა მოხდა, ვინ იცრუა… მიმაჩნია, რომ ამგვარ სკანდალში გახვეულმა პროკურორმაც უნდა აიღოს თავისი წილი პასუხისმგებლობა. წინა ხელისუფლების ამბებს იხსენებენ და ამბობენ, მაშინ უარესი ხდებოდაო. უნდა ჩაბარდეს წარსულზე ლაპარაკი ისტორიას. რომ ხდებოდა, ეს ახლანდელ ამბავს ვერ გაამართლებს. სახელმწიფოს სიძლიერე იმაში ჩანს, როდესაც ამგვარ ფაქტებზე ადეკვატური რეაგირება ხდება.

- ჩვენ გარშემო გეოპოლიტიკური ვითარება კვლავაც უკიდურესად დაძაბულია…

- დიახ. დღეს ყველაზე მეტად მაშფოთებს ჩვენს მეზობლად არსებული გეოპოლიტიკური დაპირისპირებების ასპარეზი, რომელიც ლოკალური ვერ იქნება ამ სივრცეში. მისი იმპორტირების სერიოზული საფრთხე არსებობს. ბოლო ერთი თვის განმავლობაში დაღესტანში ორი ტერაქტი მოხდა, ორივე კავკასიის ვილაიეთის მებრძოლებმა მოაწყვეს. ეს ხალხი კარგა ხანს არ აქტიურობდა, თუმცა ახლა გამოჩნდნენ. ეს არის ნიშანი იმისა, რომ გაზაფხულის მოახლოებასთან ერთად კავკასიაში ვითარება შეიცვლება. საფრთხის წინაშე დგანან მრავალმხრივი კონფლიქტის მიმდებარე რეგიონები: ჩრდილოეთი აფრიკა, კავკასია, ევროპის ნაწილი. ამას მხოლოდ მოვლენების განვითარების ლოგიკა არ გვეუბნება, არსებობს გარკვეული ინფორმაციაც. არავის ვაშინებ, მაგრამ საზოგადოებაც და ხელისუფლებაც ფხიზლად უნდა იყვნენ.

„რეზონანსი//მთელი კვირა”, 22 თებერვალი, 2016 წელი

ვინ გახდება მოსკოვის მთავარი დასაყრდენი საქართველოში

ნინო ბურჯანაძე რუსეთის საგარეო საქმეთა მინისტრის მოადგილეს შეხვდა

სალომე სარიშვილი

“გაერთიანებული დემოკრატიული მოძრაობის” ლიდერი ნინო ბურჯანაძე რუსეთის საგარეო საქმეთა მინისტრის მოადგილე გრიგორი კარასინს შეხვდა. ამის შესახებ ინფორმაციას რუსეთის საგარეო საქმეთა სამინისტროს ოფიციალური ვებ-გვერდი ავრცელებს, სადაც ნათქვამია, რომ შეხვედრა მხარეებს შორის 19 თებერვალს შედგა.

ინფორმაციას ადასტურებს ბურჯანაძის პარტიის პრესცენტრიც, თუმცა შეხვედრის დეტალებზე არ საუბრობენ როგორც საზოგადოებასთან ურთიერთობის სამსახურში, ისე პარტიაში.

არის თუ არა ეს შეხვედრა კავშირში წელს, შემოდგომაზე საქართველოში დაგეგმილ საპარლამენტო არჩევნებთან? პოლიტოლოგების აზრით, შესაძლოა, ბურჯანაძე-კარასინის შეხვედრაზე წინასაარჩევნო პერიოდზეც იყო საუბარი, თუმცა, ამ ეტაპზე რუსეთის მხრიდან ამ პროცესში შესაძლო ჩართულობას ნაკლებად სარწმუნო ვარაუდად მიიჩნევენ.

ცნობისთვის: რუსეთის საგარეო საქმეთა სამინისტროს პრესსამსახურის ცნობით, კარასინი-ბურჯანაძის შეხვედრა ორ ქვეყანას შორის ურთიერთობის სხვადასხვა ასპექტებსა და რუსეთ-საქართველოს შორის ურთიერთობის ნორმალიზების საკითხს ეხებოდა.

შეხვედრის დეტალების ირგვლივ ინფორმაციის მოპოვებას “მთელი კვირა” პარტიის სხვა წევრებთან შეეცადა, თუმცა, აღმოჩდა, რომ მათ ამ შეხვედრის შესახებ პრაქტიკულად არაფერი იცოდნენ. “შეხვედრის დროს მხარეებმა განიხილეს რუსეთ-საქართველოს ურთიერთობის ნორმალიზების საკითხი, ის ასპექტები, რომლითაც ამის მიღწევა შესაძლებელია,” – ნათქვამია რუსეთის საგარეო საქმეთა სამინისტროს მიერ გავრცელებულ განცხადებაში.

პოლიტოლოგ რამაზ საყვარელიძის შეფასებით, რუსეთი არჩევნებში აქტიურად ვერ ჩაერევა, რადგან ასეთ შემთხვევაში დასახულის საპირისპირო შედეგს მიიღებს და ეს მოსკოვშიც კარგად იციან.

“რუსეთის მიერ წინასაარჩევნო პროცესში ჩართვა უწინაც ხდებოდა და ახლაც ასეა. ამგვარი გავლენისგან არცერთი ქვეყანა დაცული არაა და მითუმეტეს, საქართველო. რუსეთის მხრიდან ეს გავლენა ჯერ კიდევ 2012 წელს იყო, როდესაც გამოითქვა ვარაუდი იმის შესახებ, თითქოს ივანიშვილის ხელისუფლება პუტინის პროექტია. თუმცა, გავიდა დრო და ამ იდეამ ის შედეგი ვერ მოიმკო, რაც მის გავრცელებას უნდა მოჰყოლოდა.

ბიძინა ივანიშვილი არ აღმოჩნდა ვლადიმირ პუტინის პროექტი, რადგან დასავლეთისკენ სწრაფვის კუთხით მნიშვნელოვანი ნაბიჯები სწორედ მისი მოსვლის შემდეგ გადაიდგა. ამდენად, ვერსია იმის შესახებ, რომ შესაძლოა რუსეთი საარჩევნო პროცესებში უკვე ერევა, ნაადრევი მეჩვენება. არ მგონია, რომ ასე იყოს, რადგან მან უკვე რაღაცები ისწავალა. გავიხსენოთ აფხაზეთში ამგვარ პროცესებში მათი ჩართულობა, სადაც რუსეთმა სრულიად საპირისპირო შედეგი მიიღო. ვფიქრობ, ძველებური, ღია ჩარევის ხერხს რუსეთი ამ ეტაპზე არ გამოიყენებს. თუმცა, რა თქმა უნდა, გამორიცხული არაა წინასაარჩევნო პროცესში სხვა მეთოდებით ჩაერიოს,” – ამბობს “მთელ კვირასთან” საუბრისას რამაზ საყვარელიძე. მისივე თქმით, ახლა, როცა წინასაარჩევნო პერიოდი მოახლოვდა, “გაერთიანებული დემოკრატების” ლიდერი ამ პროცესში თავისი როლის უკეთ წარმოჩენას ცდილობს. საყვარელიძე ფიქრობს, რომ მისი მხრიდან ეს ბუნებრივიცაა, ამიტომ ბურჯანაძესა და რუსეთის საგარეო საქმეთა მინისტრის მოადგილე კარასინს შორის შეხვედრას არჩევნების თემას ნაკლებად უკავშირებს. საყვარელიძის თქმით, ასეთ შემთხვევაში ინფორმაცია საჯარო ვერ იქნებოდა.

“ოპოზიციური პარტიის ლიდერები მხოლოდ რუსეთში ვიზიტით არ გამოირჩევიან. ამ ლოგიკით, შალვა ნათელაშვილი აშშ-ში ხშირად გვინახავს, სადაც იგი ამერიკელ პარტნიორებთან საქართველოს პოლიტიკურ საკითხებს განიხილავს, რასაც დიდი ვნებათაღელვა არ გამოუწვევია. ასე რომ, ეს სტილი დასავლეთის პოლიტიკოსებშიც თანაბრადაა და ბუნებრივია, რუსეთის პოლიტიკოსებშიც. ნებისმიერი სპექტრის წარმომადგენელი შესაძლოა ამგვარ საუბარში ჩაებას, ამაში მოულოდნელი არაფერია. ამიტომ არც ამ შემთხვევაში მგონია, რომ რაიმე განსაკუთრებული ხდება. რა თქმა უნდა, ნინო ბურჯანაძეს აწყობს, რომ პოლიტიკურ პროცესში მნიშვნელოვანი როლი ითამაშოს, ამიტომ ამ როლის წინ წამოწევას სწორედ წინასაარჩევნოდ ცდილობს. მაგრამ ვფიქრობ, ეს ბუნებრივი პროცესია. ის, რომ შესაძლოა რუსეთმა ამ ეტაპზე წინასაარჩევნო პროცესში რაიმე როლი შეასრულოს, გამართლებულ ვარაუდად არ მიმაჩნია. არ მგონია, რომ რაიმე მზაკვრული გეგმის შემთხვევაში ეს ფაქტი გახმაურებულიყო, რადგან რუსულ ელიტასთან შეხვედრა რთული ნამდვილად არაა. სწორედ ის, რომ ეს გაცხადებული ფაქტია, ზედმეტი ეჭვების საფუძველს არ იძლევა, ყოველ შემთხვევაში, ამ ეტაპზე მაინც,” – დასძენს რამაზ საყვარელიძე.

პოლიტოლოგ სოსო ცისკარიშვილის აზრით კი, ბურჯანაძისა და კარასინის შეხვედრის რაიმე ოფიციალურ ნაწილზე საუბარი ამ ეტაპზე ნაადრევია. მისივე თქმით, ნინო ბურჯანაძის პოლიტიკური წარსულიდან გამომდინარე, რუს დიპლომატთან მისი შეხვედრა მოსალოდნელიც კი იყო.

“ნინო ბურჯანაძე ახალბედა პოლიტიკოსი რომ ყოფილიყო, ამ შეხვედრის ირგვლივ ეჭვები გაჩნდებოდა. თუმცა, გამომდინარე მისი პოლიტიკური ბიოგრაფიიდან, რომელიც არც კარასინისთვის და არც მსოფლიოს სხვა დიპლომატებისთვის უცხო არაა, ეს მოულოდნელი არ ყოფილა. ვფიქრობ, ეს შეხვედრა უფრო შიდა პოლიტიკური კონკურენციის საკითხს უკავშირდებოდა. გასაკვირი იქნება, თუ რომელიმე სხვა ოპოზიციური პარტიის ლიდერები ამგვარი შეხვედრის ორგანიზებას ვერ მოახერხებენ. ცხადია, შიდა პოლიტიკურ კონკურენციაში იმ პარტიებს ვგულისხმობ, რომლებიც საპარლამენტო არჩევნებში სავარძლებისთვის იბრძოლებენ. რაც შეეხება რუსეთის წინასაარჩევნო პერიოდში შესაძლო ჩართულობას, ეს ქვეყანა ფულს უმიზნოდ არასდროს ისვრის. ახლახან ძალიან სანდო კვლევის შედეგები გამოქვეყნდა, რომელიც ლიბერალურმა აკადემიამ მოამზადა. კვლევაში მკაფიოდაა აღწერილი, თუ რა ტიპის ხისტი და რბილი ზეწოლაა გამოყენებული რუსეთის მხრიდან. ორივე ამ ხასიათის ძალა საქართველოში დღესაც მოქმედებს, ეს ახალი არაა. თუმცა, დუმილი და ამგვარი ინფორმაციის დაიგნორება არც ხელისუფლებას აკლია და არც ოპოზიციურ ძალას,” – ამბობს სოსო ცისკარიშვილი. მისივე თქმით, რუსეთისთვის სასურველია საქართველოში არსებობდეს ძალა, რომლის იდეოლოგიაც მათგან დიდად განსხვავებული არ იქნება და შესაბამისად, ამ ძალის შესაქმნელად სხვადასხვა მეთოდებს მიმართავს, რაზეც საზოგადოება ნაკლებად ინფორმირებულია.

“ნუ დაგვავიწყდება, რომ არჩევნების შედეგები საბოლოოდ მხოლოდ ამომრჩეველზეა დამოკიდებული. ამიტომ გადამწყვეტი არა რომელიმე ძალა, არამედ თავად ამომრჩეველია. თუ რუსეთის მხრიდან ბურჯანაძის პარტიისთვის რაიმე დახმარების პერსპექტივა მოდის, ამგვარი შეხვედრების შესახებ საზოგადოება ინფორმირებული არ იქნებოდა. შესაძლოა, ბურჯანაძესა და კარასინს შეხვედრაზე წინასაარჩევნო პერიოდზეც ესაუბრათ, გამორიცხული არაფერია, თუმცა, ამ ეტაპზე რაიმე გრანდიოზულ წინადადებაზე საუბარი, არ მგონია, ყოფილიყო,” – აცხადებს პოლიტოლოგი.

„ახალი თაობა“, 22 თებერვალი, 2016 წელი

ინტერვიუ ჯაბა ჯიშკარიანთან: „ნაციონალებს უგულავას ცოლის ოპერაციების დაფინანსებას გავახსენებ“

თბილისის საკრებულოს დეპუტატი, „ქართული ოცნების“ წევრი ჯაბა ჯიშკარიანი „ახალ თაობასთან“ ინტერვიუში აცხადებს, რომ ნაციონალური მოძრაობა ხელისუფლებაში ყოფნისას ოპონენტს არათუ პასუხს სცემდა, დევნიდა და ციხეში სვამდა კრიტიკისთვის.

ჯაბა ჯიშკარიანი ნაციონალური მოძრაობის წევრებს ახსენებს, რომ თბილისის ბიუჯეტიდან ფინანსდებოდა უგულავას ცოლის ახლობლების მკურნალობა და ამის დასამტკიცებლად ხარჯთაღრიცხვის რამდენიმე საბუთიც აქვს: „ჩვენს ოპონენტებს შევახსენებ, თავის დროზე თუ როგორ იყენებდნენ ხალხის ფულსა და მუნიციპალიტეტის ბიუჯეტს, როგორ აღვირახსნილად ექცეოდნენ, როგორ პარპაშობდნენ ხალხის ფულით. მათ თუ დაავიწყდათ, ახლავე შევახსენებ, უგულავას მეუღლის ესთეტიკური ოპერაციები როგორ ფინანსდებოდა მერის პირადი ფონდიდან. ეს დაავიწყდათ?! საზოგადოებამ ძალიან კარგად იცის, თუ რას წარმოადგენდა ნაციონალური მოძრაობა 9 წლის განმავლობაში და მინდა, კონკრეტული ციფრები მოვიყვანო. ბუდა-ბარში ერთ-ერთ საღამოზე ნაციონალებმა 58 ათასი ლარი დახარჯეს, ასევე ტივზე ერთი ქეიფი ნაციონალურ მოძრაობას უჯდებოდა 32 ათასი ლარი.

ფინანსდებოდა მათი ახლობლების ოპერაციები სილამაზისთვის. ქალბატონი ლელა კილაძე და მისი დაქალები თანხებს იღებდნენ მერიის პირადი სარეზერვო ფონდიდან, მერიის ბიუჯეტიდან და ხალხის ფულის მოხმარება ხდებოდა მათ საკეთილდღეოდ და მათი ვნებების დასაკმაყოფილებლად. ჩვენს ოპონენტებს შევახსენებ, თავის დროზე თუ როგორ იყენებდნენ ხალხის ფულსა და მუნიციპალიტეტის ბიუჯეტს, როგორ აღვირახსნილად ექცეოდნენ, როგორ პარპაშობდნენ ხალხის ფულით.  მე ვთვლი, რომ ეს ადამიანები საერთოდ ღირსი არ არიან, პასუხი გავცეთ. ამ შემთხვევაში მე საზოგადოებისთვის ვსაუბრობ, რომ ადამიანები არ იყვნენ შეცდომაში შეყვანილნი“, – ამბობს ჯაბა ჯიშკარიანი.

- თბილისის ბიუჯეტიდან პროკურორის შვილის დაფინანსებაზე რას იტყვით?

- ამ საკითხთან დაკავშირებით ჩვენ უკვე მივიღეთ პასუხი. პირველი პასუხი არის ის, რომ მერიის პასუხისმგებელი პირი თანამდებობიდან არის გადაყენებული. ამდენად. პოლიტიკური პასუხისმგებლობის საკითხი უკვე დადგა. მეორე, ამ ოჯახმა კრედიტი აიღო და სახელმწიფოს დაუბრუნა აღნიშნული თანხა. ეს მორალური ნაბიჯია და მივესალმები ამ ნაბიჯს.

- ნაციონალური მოძრაობა უფრო მეტს ითხოვს...

- ადამიანები როდესაც გველაპარაკებიან და თითქოს გვამხელენ, ავიწყდებათ, მათ რა აქვთ წარსულში, ხელისუფლებაში ყოფნის დროს გაკეთებული. ამ შემთხვევაში ჩვენ მხოლოდ მორალურ მხარეზე შეგვიძლია საუბარი. ჩვენი ხელისუფლების მხრიდან აბსოლუტურად ყველა ზომა იქნა მიღებული. თვითონ მერმაც განაცხადა, რომ ის არ იყო საქმის კურსში, რადგან დღეში 100 დოკუმენტს აწერს ხელს.

- დავით ნარმანიამ არ იცოდა, რას მოაწერა ხელი? უნდა იცოდეს თუ არა მერმა, რა დოკუმენტს აწერს ხელს?

- ნამდვილად ვერ ეცოდინება, რადგან, როგორც თავად საზოგადოებას მოახსენა, დავით ნარმანია დღეში 100-ზე მეტ დოკუმენტზე აწერს ხელს და ყველა დოკუმენტს ანალიზს ვერ გაუკეთებს, მაშინ გამოდის, რომ ამ დოკუმენტების ანალიზით უნდა დაკავდეს. არსად არ წერია, რომ პროკურორის შვილი თუ ვისი შვილიც არ უნდა იყოს, ნებისმიერი თანამდებობის პირის შვილი თუ ოჯახის წევრი არ დააფინანსოს სახელმწიფომ. ქალაქის მერი გამოვიდა და განმარტება გააკეთა, საზოგადოებას აუხსნა, თუ რა მოხდა. ეს არის, ჩემი აზრით, უფრო მნიშვნელოვანი, რომ მერი თავს მოვალედ მიიჩნევს, ამომრჩეველს აუხსნას, რა მოხდა. კორუფცია იქნებოდა, პირადი მოტივებით ჩადენილი კანონდარღვევა თუ სხვა რამ _ ყველაფერს ადეკვატური პასუხი გაეცა. ეს არის მნიშვნელოვანი. ნაციონალური მოძრაობა როდესაც ხელისუფლებაში იყო, მაშინ არათუ დანაშაულის აღიარება, მიჩქმალვაც კი არ ხდებოდა. ვინც კი დააპირებდა მათ მხილებას, მისი დევნა, თვალთვალი, ციხეში ჩასმა და ცხოვრების დანგრევა ხდებოდა. ეს ყველაფერი საკუთარ თავზე გამოვცადე და ვერავინ მეტყვის, რომ ასე არ ყოფილა. ეს თუ უნდა ნაციონალურ მოძრაობას რომ გავახსენო, კი ბატონო, მეტიც შემიძლია გავახსენო.

ჩვენ ვართ ღია და გამჭვირვალე ხელისუფლება. ჩვენი ხელისუფლება მხოლოდ დემოკრატიული პრინციპებიდან გამომდინარე მოქმედებს. მოხდა ფაქტი, გამოააშკარავეს, პასუხმაც არ დააყოვნა და ადეკვატური რეაგირებაც მოხდა. ეს არის მთავარი. თუ ასეთი მაგრები არიან, მაშინ რატომ არ ამხელდნენ, როდესაც ხელისუფლებაში იყვნენ, თუ მხოლოდ დღეს არიან მაგრები?! არ მჯერა მათი კრიტიკისა და პროტესტის. მე იმ ხელისუფლებაში ვერ ვიტანდი უკანონობასა და უსამართლობას და ვერც ახლა დავხუჭავ თვალს უსამართლობასა და უკანონობაზე.

- ნაციონალური მოძრაობა ნარმანიას უნიათოს უწოდებს. ამ მიმართულებითაც არ არის მათი კრიტიკა მისაღები?

- ნაციონალური მოძრაობის კრიტიკა არათუ მისაღები, სამართლიანიც არ არის. ეს მათი აკვიატებაა, რომ ნარმანია უნიათოა, რომ ეს ხელისუფლება უნიათოა. მათ უნდათ, რომ ამ ლოზუნგს მიაჩვიონ საზოგადოების ყური. ეს არის ერთ-ერთი პოლიტიკური მეთოდი. სასაცილოა, როდესაც დავით ნარმანიაზე ამბობენ, უუნაროა. უნარიანს, ალბათ, იმას ეძახიან, რომ 7 ნოემბერს უგულავა მიტინგის დაშლით იყო დაკავებული. რა არის მათი არგუმენტი, როდესაც ამას ამბობენ, რომ ორმოული სამუშაოებია გასაკეთებელი. დაიწყო ეს სამუშაოები.

- მნიშვნელოვანი პრობლემა საცობებია. არსებობს გეგმა, როგორ შეიძლება ქალაქის განტვირთვა?

- საცობებისგან ქალაქის განტვირთვისთვის რამდენიმე პროექტი უნდა ჩაეშვას. კუს ტბის დამაკავშირებელ საბაგირო გზის თაობაზე ტენდერი გამოცხადებულია, ასევე რამდენიმე ახალი გზისა და ესტაკადის მშენებლობასთან დაკავშირებით პროექტი მზად არის. თბილისი მთაგორიანი ქალაქია და, შესაბამისად, საბაგირო ტრანსპორტის დანერგვის რეალური წინაპირობები არსებობს.

- ავტოპარკის განახლება როდის იგეგმება?

- მიმდინარე წელს 150 ახალი ევროპული სტანდარტის, სრულად ადაპტირებული ავტობუსი შემოვა. ეს ავტობუსები, ცხადია, ასევე აღჭურვილია განსაკუთრებული საჭიროების მქონე ადამიანებისთვისაც. ეს იქნება ენერგოდამზოგავი, თანამედროვე, ახალი ტექნოლოგიებით აღჭურვილი უსაფრთხო ავტობუსი. ახლი ავტობაზის მშენებლობაც არის დაგეგმილი. ამ ტიპის ავტობუსები ჯერ ჩვენს ქალაქში არ ყოფილა შემოყვანილი. ეს იქნება პირველად საქართველოში. ტენდერი უკვე გამოცხადებულია „იბიარდის“ საიტზე. პროექტი სწორედ „იბიარდის“ თანადაფინანსებით ხორციელდება.

დედაქალაქში ეტაპობრივად მოხდება ავტოტრანსპორტის გამოცვლა. სრულად მოხდება ავტოპარკის განახლება, შესაბამისად, იგეგმება 650 ეკოლოგიური ავტობუსის შეძენა თბილისისთვის, რომელიც ევრო-6 ძრავით იქნება აღჭურვილი. ეს ძალიან მაღალი დონის, ევროსტანდარტის ავტიბუსებია, რომლებიც ევროპის დედაქალაქებში დადიან. წლის ბოლომდე დედაქალაქში ძირითადი პრობლემები, რომლებიც აწუხებს თბილისელებს, მოხსნილი იქნება. ეს ახალი ავტოპარკი ასევე ხელს შეუწყობს ქალაქის საცობისგან განტვირთვას. ასევე გადაწყვეტილება იქნა მიღებული, რომ დასუფთავების მანქანები აღარ ივლიან ქუჩებში დღის საათებში და ღამე მოხდება ნაგვის გატანა. ესეც, ვფიქრობ, მნიშვნელოვნად შეუწყობს ხელს საცობის პრობლემის მოგვარების საკითხებს. კვლევის თანახმად, თბილისში ყოველდღიურად ნახევარი მილიონი ავტომობილი მოძრაობს. ვფიქრობ, რამდენიმე დაგეგმილი ღონისძიება ამ მიმართულებით პრობლემას მოაგვარებს.

„ახალი თაობა“, 22 თებერვალი, 2016 წელი

ინტერვიუ გიორგი ჩიტაურთან: „ზაქარია ქუცნაშვილი კანონს არღვევს“

რატომ არის „ქართული ოცნების“ მიერ მიღებული მთის კანონი არაეფექტური, რა გადასახადების დაწესებეას აპირებს ხელისუფლება, როგორ მდიდრდებიან მაჟორიტარები? – ამის შესახებ „ახალ თაობას“ ლეიბორისტული პარტიის წევრი გიორგი ჩიტაური ესაუბრება.

„ისევე, როგორც სხვა ჩემი თანაპარტიელები, მეც ამაოდ ვამტკიცებდი, რომ ეს ხელისუფლება ქვეყანას და განსაკუთრებით კი მთიან რეგიონებს დააქცევდა. სამწუხაროდ, არავინ დაგვიჯერა. იქეთ გვიყენებდნენ პრეტენზიას და „ქართული ოცნების“ მიერ მიღებული მთის კანონით აპელირებდნენ. არადა გამოჩნდა, რომ ეს მთის კანონი კიდევ უფრო გაართულებს მდგომარეობას“, – ამბობს გიორგი ჩიტაური.

- რანაირად უნდა გაართულოს?

- ყველანაირად. ჩემი თუ არ გჯერათ, პარლამენტის დეპუტატების დაიჯერეთ. მათი ერთი სიტყვაც არაა დასაჯერებელი, მაგრამ ამ შემთხვევაში სიმართლეს ამბობენ. რამდენიმე დღის წინ გამოვიდა ტყიბულის მაჟორიტარი დეპუტატი და განაცხადა, რომ კანონში შეტანილი ცვლილებების შემდეგ, ტყიბულელი მეშახტეების მდგომარეობა უფრო გართულდა. წინა კვირას გავიგეთ ისიც, რომ მესტიის მოსახლეობას, რომელსაც არანაირი შემოსავალი არ აქვს, წყალზე გადასახადი დაუწესეს. იმის მაგივრად, რომ გადასახადები გაენახევრებინათ, ახალი გადასახადი დაუწესეს. არ გამიკვირდება, ცოტა ხანში მაღალმთიან მოსახლეობას ჰაერზე დაუწესონ გადასახადი. ყაზბეგის მოსახლეობას აქამდე ოქტომბრიდან 15 მაისამდე დაწესენული აქვს გაზის ლიმიტი. გარკვეული ოდენობის გაზი მოსახლეობისთვის უფასოა. ამათ მიერ შეტანილი ცვლილებებით კი უფასო გაზით იქაურები მხოლოდ 15 აპრილამდე ისარგებლებენ. გამოდის, რომ მოსახლოებას ერთი თვე მოპარეს. ამით ალბათ პრემიებს გამოიწერენ.

- თქვენ რაღაც კატასტროფული ვითარება დახატეთ ამ კანონის გარშემო და იქ მაცხოვრებლებს პენსია რომ ეზრდებათ, ეს არაფერია?

- თქვენ წარმოიდგინეთ, რომ არაფერია. ეს პენსია გაიზრდება თუ არა, ჯერ არავინ იცის. მერე ლარის კურსი ისე გააქციეს და დააქციეს, რომ მეეჭვება, ამ გაზრდილმა პენსიამ რაიმე ქნას. წამლებს ისეთი ფასი ადევს, პენსიონერი კი არა, პატიოსანი ბიზნესმენი ვერ შეძლებს მათ შეძენას. დეპუტატები ამ თემებზე საუბარს რატომღაც გაურბიან. ყველა იმაზე ფიქრობს, როგორ მოაწონოს თავიანთ ლიდერებს თავი, რომ სიაში ხელახლა მოხვდნენ. მაჟორიტარები კი საერთოდ ხელიდან წავიდნენ.

- რაში გამოიხატება მათი ხელიდან წასვლა?

- ქვეყანა თავზე დაგვემხო, დასახლებული პუნქტები ხალხისგან იცლება, ესენი კი ხმას არ იღებენ. თითქოს შვეიცარიასავით ქვეყანა გვქონდეს. ხალხის გასაჭირზე ხომ მდუმარებაში არიან, სამაგიეროდ, თავისი ბიზნესის აწყობაზე ბევრს ლაპარაკობენ. მაგალითისთვის ჩემი რაიონის დეპუტატის ქმედება შემიძლია მოვიყვანო. ზაქარია ქუცნაშვილი სერიოზულად არის ჩართული ბიზნესსაქმიანობაში, რაც კანონის დარღვევაა. დეპუტატს ბიზნესის წარმოება ეკრძალება.

- თქვენ შეგიძლიათ დაამტკიცოთ, რომ ქუცნაშვილი უკანონობას სჩადის?

- ამას მე კი არა, ფაქტები დაამტკიცებენ. თუ პროკურატურა საქმის შესწავლას დაიწყებს, მე მზად ვარ, წარვუდგინი დოკუმენტები. რამდენადაც ჩემთვის არის ცნობილია, ასე იქცევიან სხვა მაჟორიტარებიც. ზურაბ ზვიადაური ჩემი მეგობარი იყო, მაგრამ მაგაზეც უნდა ვთქვა სიმართლე. ახმეტაში არსებულ პრობლემებზე ხმას არ იღებს, სამაგიეროდ ისე გასუქდა, ვეღარც კისერს ატრიალებს და ვეღარც კაბინეტში ეტევა.

- რატომ გგონიათ, რომ გასუქებული მაჟორიტარი რაიონს ვერ მიხედავს?

- იმიტომ რომ ვიცი, რის ხარჯზე სუქდებიან მაჟორიტარები. ახმეტის საავადმყოფოში რომ მიხვიდეთ, გული გაგისკდებათ. სტომატოლოგი იმათ არ ჰყავთ, ტრავმატოლოგი და გინეკოლოგი. პაციენტებს ან თელავში აგზავნიან, ან თბილისში. გამაგებინეთ, ექიმი თუ არ ჰყავს ამ ახმეტას, მაჟორიტარი რაში სჭირდება? და საერთოდ. როდის უნდა დამთავრდნენ ეს მაჟორიტარები. ზოგიერთი მათგანი კომუნისტების დროიდან ზის იქ. ის მაინც აღარ რცხვენიათ, ამდენი ხნის მანძილზე რომ არიან მაჟორიტარები? „ქართული ოცნება“ გვპირდებოდა, რომ ამ სისტემას გააუქმებდა, მაგრამ ხელისუფლებაში მოვიდნენ თუ არა, მისი დაცვა დაიწყეს. ჩვენ, ლეიბორისტები არ შევეგუებით ამ ფეოდალების მმართველობას და მარტო იმიტომ მოვალთ ხელისუფლებაში, რომ ქვეყანა მათი ტყვეობისგან გავათავისუფლოთ.

„რეზონანსი//მთელი კვირა”, 22 თებერვალი, 2016 წელი

ლეონიდ თიბილოვის “რეფერენდუმის” ორი მთავარი კითხვა

სეპარატისტები “რესპუბლიკას” სახელს უცვლიან და “პრეზიდენტს” რუსეთთან შეერთების უფლებას აძლევენ

თიკო ოსმანოვა

ოკუპირებული სამხრეთ ოსეთის ე.წ. პრეზიდენტი, ლეონიდ თიბილოვი “რესპუბლიკისათვის” სახელის გადარქმევასა და რუსეთის შემადგენლობაში მისი შესვლისათვის “საკონსტიტუციო საფუძვლის” შექმნას გეგმავს. ამ მიზნით ცხინვალში “რეფერენდუმი” ჩატარდება, სადაც სავარაუდოდ, 2 კითხვა იქნება დასმული:

1. “გსურთ თუ არა, რომ “სამხრეთ ოსეთის რესპუბლიკას” სახელი შეეცვალოს და ეწოდოს “სამხრეთ ოსეთის რესპუბლიკა – ალანია”?

2. “თანახმა ხართ თუ არა, რომ კონსტიტუციაში გაკეთდეს ახალი ჩანაწერი, რომლის მიხედვითაც პრეზიდენტს უფლება ექნება ოფიციალურად მიმართოს რუსეთის ფედერაციას თავის შემადგენლობაში ახალი სუბიექტის სახით სამხრეთ ოსეთის მიღების შესახებ”?

ქართველი ექსპერტები თიბილოვის ამ განცხადებას ნატოსა და საქართველოს ხელისუფლებისადმი გაკეთებულ გზავნილად მიიჩნევენ. მათი განცხადებით, რეალურად, სამხრეთ ოსეთის და რუსეთის გაერთიანება ოფიციალური მოსკოვის გეგმებში არ შედის.

“მიმდინარე წელს ჩვენ ვაპირებთ გავაგრძელოთ რუსულ მხარესთან კონსულტაციები რეფერენდუმის ჩატარების თაობაზე. გვესმის რა საკითხის სირთულე და დელიკატურობა, რადგან არ გვინდა ჩვენს სტრატეგიულ მოკავშირეს შევუქმნათ პრობლემები საერთაშორისო არენაზე, ვთვლით, რომ რეფერენდუმი განსაკუთრებული ფორმით უნდა ჩატარდეს. განიხილება ხმის მიცემა კონსტიტუციაში ახალი ნორმის ჩამატებისთვის, რომლის მიხედვით სამხრეთ ოსეთის პრეზიდენტს უფლება ექნება რუსეთის ფედერაციას მიმართოს სამხრეთ ოსეთის მის შემადგენლობაში მიღების შესახებ”, – განაცხადა ლეონიდ თიბილოვმა დე-ფაქტო პარლამენტისადმი მიმართვაში. მისი თქმით, ასე “სამხრეთ ოსეთის რესპუბლიკა” მიიღებს “მყარ კონსტიტუციურ საფუძველს” რუსეთის ფედერაციის შემადგენლობაში მისი მომავალი შესვლისათვის და ამასთან, საკითხის ასე დასმა არ დაავალდებულებს რუსულ მხარეს სწრაფად მოახდინოს რეაგირება რეფერენდუმის შედეგებზე. ხოლო “პრეზიდენტის” მიერ ამ თხოვნით რუსეთისადმი მიმართვა მოსკოვთან კონსულტაციების საფუძველზე მოხდება.

“არ შეიძლება ჩვენ არ გვაშფოთებდეს დასავლეთის ქვეყნების ლიდერების გახშირებული მოთხოვნები რუსეთის ფედერაციისგან ჩვენი რესპუბლიკის დამოუკიდებლობის აღიარების უკან წაღების შესახებ. ჩვენ გვაშფოთებს მთლიანად საერთაშორისო ვითარების მკვეთრი გართულება, უკრაინაში მიმდინარე მოვლენები, სირიაში და მთელ ახლო აღმოსავლეთში. ასევე, ნატო-ს მოახლოება რუსეთის საზღვრებთან, ჩვენი სამხრეთ მეზობლების მხრიდან ანტირუსული და ანტიოსური რიტორიკა. ასეთ პირობებში ჩვენ კიდევ უფრო მწვავედ ვგრძნობთ ჩვენი დიდი ხნის ოცნების ასრულების აუცილებლობას – დიდ რუსეთთან შეერთებას და დაყოფილი ოსი ხალხის პრობლემის გადაწყვეტას. ცხადია, რომ მხოლოდ ამ გზით უზრუნველვყოფთ საკუთარი უსაფრთხოებისა და მშვიდობიანი განვითარების გრძელვადიან გარანტიებს”, – განაცხადა ლეონიდ თიბილოვმა.

ამასთან, დე ფაქტო ლიდერმა ე.წ. პარლამენტს დაავალა, საქართველოს მიერ ოსი ხალხის გენოციდი აღიაროს. მისი თქმით, ე.წ. სამხრეთ ოსეთის წინააღმდეგ ახალი აგრესიის საფრთხე ბოლომდე არ მოხსნილა.

“გარკვეული პოლიტიკური ძალები კვლავინდებურად განაგრძობენ საქართველოს მხარდაჭერას თავის რევანშისტულ სწრაფვაში. მათი მხრიდან არ მთავრდება უახლესი ისტორიის აშკარა ფაქტების ფალსიფიცირება”, – განაცხადა ლეონიდ თიბილოვმა და ამის მაგალითად ჰააგის სისხლის სამართლის სასამართლოს მიერ დაწყებული გამოძიება დაასახელა. მისი თქმით, ჰააგაში ცდილობენ, რომ აგრესორად წარმოაჩინონ რუსეთი და არა საქართველო. ოკუპირებული ცხინვალი ახალ შეთანხმებასაც ამზადებს, რომლის თანახმადაც, სამხედრო ქვედანაყოფების ნაწილი რუსეთის შეიარაღებულ ძალებს უნდა შეუერთდეს. რაც შეეხება სამხრეთ ოსეთისთვის სახელის შეცვლას, დე ფაქტო პრეზიდენტის თქმით, ამაზე მუშაობა მალე დასრულდება.

“არსებობს ჩრდილოეთ ოსეთი – ალანია და შევთავაზეთ ჩვენს რესპუბლიკასაც ეწოდოს სამხრეთ ოსეთი – ალანია. მთელმა მსოფლიომ უნდა იცოდეს, რომ არსებობს დაყოფილი ხალხის პრობლემა”, – აცხადებს ლეონიდ თიბილოვი. იგი დარწმუნებულია, რომ მომავალში “ორივე ოსეთის” რუსეთის შემადგენლობაში გაერთიანება მოხდება.

რეფერენდუმის ჩატარების შემთხვევაში სამხრეთ ოსეთის მოსახლეობა რუსეთთან გაერთიანების სურვილს გამოთქვამს, ამას პოლიტოლოგ-ექსპერტებიც ადასტურებენ. თუმცა ფიქრობენ, რომ ამ ეტაპზე განცხადება განცხადებად დარჩება.

“ექსპერტთა კლუბის” წევრის ვასილ კვირიკაშვილის თქმით, “დამოუკიდებელი სახელმწიფოს” მიერთება სრული აბსურდია, თუმცა იგი რუსეთის მხრიდან არც ამას გამორიცხავს. „ლეონიდ თიბილოვი მარიონეტია, რასაც უნდა იმას ათქმევინებენ. უკვე იმდენად არაადეკვატურად მოქმედებს რუსეთი, რომ რაიმეს პროგნოზი ძალიან ძნელია. ჯერ სამხრეთ ოსეთი აღიარეს, როგორც დამოუკიდებელი სახელმწიფო, ახლა ამის მიერთება აბსურდულია, თუმცა, არ არის გამორიცხული, რომ ესეც გააკეთონ. ვფიქრობ, ეს განცხადება თიბილოვმა საქართველოს ნატოსთან დაახლოების გამო გააკეთა, თორემ რუსეთს არანაირად არ აწყობს სამხრეთ ოსეთის მიერთება, ეს მისთვის წამგებიანი იქნება. შესაძლოა ახლა ყურადღების გადატანას ცდილობდნენ და იმიტომ გააკეთა ეს განცხადება, თორემ თვითონ რუსეთია ცუდ მდგომარეობაში. დიდი დიდი ერთი წელი გაძლოს და მერე თვითონვე დაიშალოს”, – უთხრა “მთელ კვირას” ვასილ კვირიკაშვილმა და დასძინა იმ შემთხვევაში, თუ მართლაც ჩატარდა რეფერენდუმი, დადებითი პასუხის ლომის წილი ახალგაზრდებზე იქნება.

რუსეთთან სამხრეთ ოსეთის მიერთებას სკეპტიკურად უყურებს “კავკასიური სახლის” აღმასრულებელი დირექტორი გიორგი კანაშვილი. მისი თქმით, რუსეთი საქართველოს ოკუპირებულ რეგიონებს ვაჭრობისთვის იყენებს და ახლა ამის დაკარგვა მის ინტერესებში არ შედის.

“ეს განცხადება პირველი არ არის. ზოგადად, სამხრეთ ოსეთის პოლიტიკური ელიტის უმეტესი ნაწილი საუბრობს ამაზე, რომ კარგი იქნებოდა რუსეთში შესვლა ჩრდილოეთ ოსეთთან გაერთიანების გზით. თუმცა, აღსანიშნავია, რომ ამგვარი გაერთიანების სურვილს თავად ჩრდილოეთ ოსეთის მოსახლეობა არ გამოთქვამს. ამასთან, თვითონ რუსეთი არ განიხილავს ამ საკითხს სერიოზულად იქიდან გამომდინარე, რომ სამხრეთ ოსეთი და აფხაზეთი მისთვის არის ქმედითი ინსტრუმენტი საქართველოსთან ვაჭრობის კუთხით. ვაჭრობის თვალსაზრისით თუ რუსეთი საკუთარ ძალას დაკარგავს, მაშინ რა თქმა უნდა, ვიხილავთ ამ ტერიტორიის ანექსიას, მაგრამ მე მგონი, უახლოეს მომავალში რაიმე ამგვარს არ ვიხილავთ”, – გვითხრა გიორგი კანაშვილმა. მისივე თქმით, რეფერენდუმის მართლა ჩატარების შემთხვევაში კი მისი ლეგიტიმურობა კითხვის ნიშნის ქვეშ დადგება.

“მიუხედავად ამისა, თუ მართლაც ჩატარდა რეფერენდუმი მის ლეგიტიმურობასთან დაკავშირებით იქნება ბევრი კითხვის ნიშანი იქიდან გამომდინარე, რომ იქ არც საერთაშორისო დამკვირვებლები იქნებიან და არც ადგილზეა დემოკრატია, რომ შედეგებს ვენდოთ. თუმცა, ალბათ საზოგადოების უმეტესობა რუსეთთან მიერთების მომხრე იქნება”, – უთხრა “მთელ კვირას” გიორგი კანაშვილმა.

“განცხადება განცხადებად არ დარჩება, თუ საქართველოს ნატოში მიიღებენ”, – ასეთ მოსაზრებას კი ექსპერტი კავკასიის საკითხებში მამუკა არეშიძე გამოთქვამს.

“ჯერ ლავროვმა გააკეთა განცხადება ნატო-საქართველოს დაახლოებასთან დაკავშირებით და აღნიშნა, რომ რუსეთი ამასთან დაკავშირებით შესაბამის ზომებს მიიღებს. ახლა გამოდის თიბილოვი და აკეთებს ამ განცხადებას და თანაც მერამდენედ. ასე რომ, როგორც კი საქართველო გაააქტიურებს დასავლეთთან ურთიერთობას, იმ წუთშივე ხდება ასეთი ტიპის განცხადებების გავრცელება რუსეთის სატელიტების მხრიდან. განცხადება განცხადებად არ დარჩება იმ შემთხვევაში, თუ ნათელი გახდება, რომ საქართველოს ნატოში მიიღებენ. რუსეთმა იმდენჯერ დარღვია თამაშის წესები, რომ მისთვის სულერთია შეასრულებს თუ არა ნაკისრ ვალდებულებას. ასე რომ, კითხვა – აწყობს თუ არა დღეს ეს რუსეთს – უკვე ზედმეტია დღევანდელ პოლიტიკურ სიტუაციაში. ამდაგვარი რეფერენდუმი იქ არაერთხელ ჩატარდა სხვადასხვა ფორმით და შედეგები ყოველთვის ერთი და იგივე იყო – სურთ რუსეთთან გაერთიანება. ხოლო რა ფორმით შევა სამხრეთ ოსეთი რუსეთის შემადგენლობაში, ეს ჩვენთვის სულერთია, თუმცა ჩრდილო ოსეთი დიდად არ მოინდომებს ამის თაობაზე აგრესიული განცხადებების გაკეთებას, იმიტომ, რომ ჩრდილო ოსეთის ეკონომიკა დამოკიდებულია სატრანზიტო დერეფანზე, რომელიც არსებობს როკის გავლით. ასე რომ, ამის თაობაზე მაინცდამაინც თავს არ მოიკლავენ, მაგრამ თუ დავალება იქნება რუსეთიდან, მაშინ ნებისმიერი კონფიგურაცია შესაძლებელია”, – ამბობს “მთელ კვირასთან” საუბრისას მამუკა არეშიძე.