„რეზონანსი//მთელი კვირა”: ინტერვიუ ირაკლი კობახიძესთან: „ჩვენი ამოცანაა, რომ კოალიცია არსებული სახით შევინარჩუნოთ“

„რეზონანსი//მთელი კვირა”: ინტერვიუ მამუკა არეშიძესთან: „ღიად ვამბობ – მინდა, ისევ ვიყო გარდაბნის მაჟორიტარობის კანდიდატი“

„ახალი თაობა“: ინტერვიუ სოსო ცინცაძესთან: „2016 წლის არჩევნებზე ხალხი ისევ ბიძინა ივანიშვილს გაჰყვება“

„ახალი თაობა“: ინტერვიუ მეგი გიცირიძესთან: „ბიძინა ივანიშვილი თავის ხალხს კომპრომატებით მართავს… „ნაცმოძრაობა „ქართული ოცნების“ კადრების სამჭედლოა“

„ვერსია“: ინტერვიუ პაატა ბურჭულაძესთან: რატომ მოვიდა პოლიტიკაში, რა პერსპექტივები აქვს და როგორ შეხვდა მიხეილ სააკაშვილს

„კვირის პალიტრა“: ინტერვიუ პაატა ბურჭულაძესთან: „ყველა ცდილობს, გადამიბიროს…

„კვირის პალიტრა“: ინტერვიუ ეკა ბესელიასთან: „ალეკო ელისაშვილი კომიკური პიროვნება გახდა, მის საქმეზე ყველა იცინის”

„კვირის პალიტრა“: ინტერვიუ სოსო ცისკარიშვილთან: “ქართული ოცნების” საპარლამენტო დეპუტაციის ნახევარიც ვეღარ მოხვდება მომავალ საარჩევნო სიაში… ქვეყანაში განგსტერები გაჩნდნენ!”

„კვირის პალიტრა“: ინტერვიუ ნინო გოგუაძესთან: შურისძიება 5 თვის შემდეგ?! // ეკა მიშველაძე: „ჩვენ მშვიდი­ და ბედნიერი ცხოვრება გვქონდა და გვექნება კიდეც…“

„რეზონანსი//მთელი კვირა”: ინტერვიუ მაია ფანჯიკიძესთან: „ალექსი პეტრიაშვილმა ვერც ერთი თავდამსხმელი ვერ ამოიცნო.. იგი საღ გონებაზეა, კონტაქტურია და იგი თავის სათქმელს იტყვის“

„ახალი თაობა“: ინტერვიუ შალვა ხაჭაპურიძესთან: „ალექსი პეტრიაშვილზე თავდასხმა პოლიტიკასთან კავშირში არ არის“

„რეზონანსი//მთელი კვირა”:  დიდი სოციალური კრიზისის დასაწყისი // საყოველთაო გაფიცვების ტალღა, შესაძლოა, ტყიბულისა და ქსნის პარალელურად ჭიათურას, ზესტაფონსა და კაზრეთსაც მოედოს

„რეზონანსი//მთელი კვირა”: რამდენად სამართლიანია ტყიბულელ გაფიცულთა მოთხოვნები?

„რეზონანსი//მთელი კვირა”: რუსი ექსპერტი: აფხაზები რუსეთის ან საქართველოს შემადგენლობაში შესვლაზე დაიწყებენ ლაპარაკს

„რეზონანსი//მთელი კვირა”: სომეხი დეპუტატი: “კაცები ნუ კოცნით ერთმანეთს, ეს ქართული ტრადიციაა”

————————-

„რეზონანსი//მთელი კვირა”, 29 თებერვალი, 2016 წელი

ინტერვიუ ირაკლი კობახიძესთან: „ჩვენი ამოცანაა, რომ კოალიცია არსებული სახით შევინარჩუნოთ“

თაკო მათეშვილი

“ამ განცხადებაზე ლაპარაკი ჩვენ ძალიან სერიოზულად მოგვიწევს,” – ამბობს “ქართული ოცნების” აღმასრულებელი მდივანი ირაკლი კობახიძე გოგი თოფაძის თინა ხიდაშელისადმი გაკეთებულ განცხადებაზე და დასძენს, რომ მათი დაპირისპირების საკითხი პოლიტსაბჭოს მომავალ სხდომაზე აუცილებლად განიხილება. “მთელ კვირასთან” ინტერვიუში კობახიძე წინასაარჩევნო გეგმებზეც საუბრობს და ამბობს, რომ კოალიციის საარჩევნო სია განახლებული იქნება.

- კოალიციის პოლიტსაბჭოს სხდომა, რომელიც ყოველ შაბათს ტარდებოდა ხოლმე, კარგა ხანია აღარ გამართულა. რა არის ამის მიზეზი?

- კოალიციის პოლიტსაბჭოს სხდომა ყოველკვირეულად არ იმართებოდა ხოლმე. სხდომებს ვიწვევდით საჭიროებისამებრ, შედარებით დიდი ინტერვალებით. ამ შემთხვევაში პოლიტსაბჭოს სხდომის გადადებას მხოლოდ ტექნიკური მიზეზი აქვს. სამწუხაროდ, ვერ მოხერხდა მის ჩასანიშნად ისეთი დღის შერჩევა, როდესაც ყველა წევრი თბილისში იქნება და შეძლებს დასწრებას.

- როდის ეცლება ყველა წევრს და როდის გაიმართება, ეს ჯერ კიდევ არ იცით?

- როგორც კი პოლიტსაბჭოს ყველა წევრის დასწრების უზრუნველყოფას შევძლებთ, მაშინვე ჩატარდება სხდომა. იმის გათვალისწინებით, რომ განსახილველად საკმაოდ ბევრი საკითხი დაგროვდა, ჩვენს ინტერესებში შედის, რაც შეიძლება მალე გავმართოთ. რამდენჯერმე ვცადეთ პოლიტსასბჭოს შეკრება. წინა კვირასაც გვქონდა ამის სურვილი, მაგრამ მაშინაც ის პრობლემა გვქონდა, რომ ზოგიერთი წევრი საზღვარგარეთ იყო. ამიტომ, გადადება კიდევ ერთხელ მოგვიწია.

- პოლიტსაბჭოს სხდომაზე “რესპუბლიკელებსა” და “მრეწველებს” შორის არსებული დაპირისპირების საკითხი დადგება?

- ბუნებრივია. ეს ერთ-ერთი აქტუალური საკითხია და აუცილებლად განიხილება.

- როგორც “რესპუბლიკელები” ამბობენ, ისინი სხდომაზე “მრეწველებიდან” გოგი თოფაძის გარიცხვის, ან თუ “მრეწველები” ამაზე არ წავლენ, მთელი პარტიის კოალიციიდან გასვლას მოითხოვენ…

- ძალიან ცუდი იქნება, თუ პოლიტსაბჭოს სხდომა ასეთ რეჟიმში დაიწყება. ჩვენ, პირველ რიგში, საკითხი საფუძვლიანად უნდა განვიხილოთ და შემდეგ უნდა ვისაუბროთ იმაზე, თუ რა გაგრძელება შეიძლება მოჰყვეს კოალიციის პარტიებს შორის ურთიერთობას.

ჯერ უნდა განვიხილოთ ის პრობლემა და ვითარება, რაც შექმნილია და ამის შემდეგ ვეძებოთ გამოსავალი. ამა თუ იმ პარტიის მიმართ სანქციებზე თუ სხვა ტიპის პრინციპულ გადაწყვეტილებებზე საუბარი მას შემდეგ უნდა დაიწყოს, რაც საკითხის არსში გავერკვევით და შესაბამის დასკვნებს გამოვიტანთ.

- პოლიტსაბჭოს სხდომამდე იმართება თუ არა კონსულტაციები ამ ორ პარტიას შორის რაიმე ფორმატში?

- რამდენადაც ვიცი, მათ შორის ორმხრივი კომუნიკაცია და კონსულტაციები არ შემდგარა. შესაბამისად, ეს საკითხი პოლიტსაბჭოს ფორმატში განიხილება.

- კოალიციის ხელმძღვანელობას ამ პრობლემის მოგვარების გზად რა ესახება?

- ურთიერთობის დარეგულირებას მაქსიმალურად ვეცდებით. ჩვენი ამოცანა ისაა, რომ კოალიცია არსებული სახით შევინარჩუნოთ და ურთიერთობა მასში შემავალ ყველა პარტიას შორის დავალაგოთ. ჩვენი პარტიის პრინციპი ესაა და ამ პრინციპით ვიმოქმედებთ.

- და თუ ამ ორ პარტიას შორის არჩევანზე მიდგა საქმე?

- როგორც უკვე გითხარით, ჯერ პრობლემის არსში უნდა გავერკვეთ დეტალურად, სიღრმისეულად ვიმსჯელოთ და მხოლოდ ამის შემდეგ შეიძლება განვსაზღვროთ პრობლემის გადაწყვეტის გზები. ამის გარეშე პრინციპულ გადაწყვეტილებას ვერ მივიღებთ.

- პოლიტსაბჭოს სხდომის გადადების მიზეზი ისიც ხომ არაა, რომ ხელმძღვანელობა ჯერ ვერ ჩამოყალიბდა, თუ როგორ მოიქცეს, ან ემოციების ჩაცხრობას ელოდება, რათა შემდეგ გადაწყვეტილების ცივი გონებით მიღება გახდეს შესაძლებელი?

- არა. როგორც უკვე გითხარით, ჩვენს ინტერესებში შედის, სხდომა რაც შეიძლება მალე ჩატარდეს. მისი გადადება უკვე მეორედ ტექნიკური მიზეზების გამო მოგვიწია.

- თქვენი აზრით, როგორ იმოქმედა ამ ყველაფერმა კოალიციის რეიტინგზე? მითუმეტეს თუ გავითვალისწინებთ, რომ რამდენიმე თვეში არჩევნებია…

- არ მგონია ამას ჩვენს საარჩევნო შანსებზე ემოქმედა. ცნობილმა განცხადებებმა, რა თქმა უნდა, კოალიციურ ურთიერთობებს ზიანი მიაყენა. თუმცა, მიუხედავად ამისა, არ მგონია, რომ ამას ჩვენი რეიტინგი დაბლა დაეწია.

- როცა კოალიციის ერთ-ერთი ლიდერი ანტიდასავლურ განცხადებებს აკეთებს, ან თანგუნდელებს – თავდაცვისა და იუსტიციის მინისტრებს არჩევნების გაყალბებაში ადანაშაულებს, ეს, თქვენი აზრით, კოალიციის რეიტინგს ქვემოთ არ სწევს?

- ამ განცხადებაზე ძალიან სერიოზული მსჯელობა მოგვიწევს. რაც შეეხება კოალიციის დასავლურ კურსს, ამაზე ერთი რამ შემიძლია ვთქვა: კოალიციაში ამ კურსის გარანტი ჩვენი პარტია – “ქართული ოცნება – დემოკრატიული საქართველოა”. ცალკეული განცხადებებით კი ამ კურსს არავითარი საფთხე არ დაემუქრება.

- თოფაძე-ხიდაშელის დაპირისპირება თავად თოფაძემ პიროვნულ დაპირისპირებად შეაფასა; “რესპუბლიკელებმა” კი “ერთი კაცის სახელმწიფოსთან დაპირისპირება” უწოდეს. თქვენ როგორ აღიქვამთ ამ ყველაფერს – პიროვნული დავაა, პარტიათაშორისი თუ კიდევ უფრო მასშტაბური რამ?

- ფაქტია, რომ შექმნილი ვითარება კოალიციაში შემავალი პარტიების ურთიერთობების კონსტრუქციულ რეჟიმში გაგრძელებას არ წაადგება. ეს ვითარება აუცილებლად უნდა დარეგულირდეს. ჩვენთვის მთავარი ესაა და ამისათვის ყველაფერს გავაკეთებთ.

- და თუ მაინც ერთ-ერთი პარტიის გასვლის საკითხი დადგა, ამით კოალიცია დაიშლება, თუ დარჩენილი სუბიექტებით გააგრძელებს მოღვაწეობას?

- კიდევ ვიმეორებ, რომ ჩვენ ამ საკითხზე არ გვისაუბრია, კონსულტაცია არ შემდგარა. შესაბამისად, ჯერჯერობით რაიმე გადაწყვეტილებაზე საუბარი ამ ეტაპზე არასწორია. ჯერ საკითხის არსზე უნდა ვიმსჯელოთ და შემდეგ პრობლემის გადაჭრის გზებზე. ამიტომ მიჭირს, კომენტარი გავაკეთო იმაზე, თუ როგორ შეიძლება გაგრძელდეს კოალიციური ურთიერთობები.

- “რესპუბლიკური პარტიის” თავმჯდომარე ხათუნა სამნიძემ ჩვენთან ინტერვიუში განაცხადა, რომ საჭიროა კოალიციაში ჩამოყალიბდნენ ძირეულ საკითხებზე, რათა შემდგომში მისმა წევრებმა კოალიციის საერთო კურსის საწინააღმდეგო განცხადებები აღარ აკეთონ; ან თუ მაინც გააკეთებენ, გაწერილი იყოს, თუ რა შესაბამისი რეაგირება უნდა მოჰყვეს ამას. როგორი შეიძლება იყოს რეაგირება “ურჩი” წევრების განცხადებებზე?

- ის მოსაზრება, რომ კოალიციაში ძირითადი პრინციპები შეთანხმებული უნდა იყოს, რა თქმა უნდა, სწორია. კონკრეტული წესების შემუშავებას რაც შეეხება, ამაზეც შეიძლება საუბარი. შეიძლება მართლაც ჩამოყალიბდეს ერთგვარი ეთიკის კოდექსი, რომლითაც კოალიციის ძირითად კურსს დავიცავთ. ამაზე შეთანხმება შესაძლებელია და სავარაუდოდ, პოლიტსაბჭოს მომავალ სხდომაზე ამ საკითხზე ვიმსჯელებთ კიდეც.

- როდის დაიწყებთ აქტიურ საარჩევნო კამპანიას? ხომ არ ფიქრობთ, რომ გვიანდება?

- საარჩევნო რეჟიმზე ძალიან მალე გადავალთ. გეგმა გაწერილი გვაქვს და აპრილიდან პარტია ძალიან აქტიურ სამუშაო რეჟიმზე გადავა.

- დაიწყეთ თუ არა მუშაობა სიის შედგენაზე და როდის გახდება ცნობილი?

- მუშაობა დაწყებულია. საზოგადოებისათვის კი იგი ცნობილი არჩევნების დანიშვნის შემდეგ გახდება. ბუნებრივია, ჩვენს პარტიაში, “ქართულ ოცნებაში”, ახალი სახეები გამოჩნდებიან. ამომრჩევლის წინაშე განახლებული სიით წარვდგებით, როდესაც არჩევნები დაინიშნება.

- კოალიციური სია რამდენად სახეცვლილი იქნება?

- ჩვენ ჩვენს სიაზე ვართ პასუხისმგებელი. პარტიული სიების შედგენა თავად პარტიების პრეროგატივაა. ისინი თავად გადაწყვეტენ, თუ როგორ გადაანაწილებენ ადგილებს მათთვის განკუთვნილი კვოტის ფარგლებში. საბოლოოდ კი, კოალიციური სია პოლიტსაბჭოს მიერ დამტკიცდება. რაც შეეხება კოალიციური კვოტების გადანაწილებას, ამაზე მსჯელობა ჯერჯერობით არ დაწყებულა, თუმცა უახლოეს მომავალში დაიწყება.

- ანუ, პარტიები ერთმანეთის სიებში არ ჩაერევით?

- რა თქმა უნდა, პრინციპების დონეზე ჩარევა შესაძლებელია. ჩვენთვის მნიშვნელოვანია, რომ არა მხოლოდ პარტია “ქართული ოცნების” სიაში იყვნენ სათანადო რეპუტაციის, კვალიფიკაციისა და გამოცდილების მქონე ადამიანები, არამედ კანდიდატები დანარჩენმა პარტიებმაც ანალოგიური პრინციპით შეარჩიონ.

„რეზონანსი//მთელი კვირა”, 29 თებერვალი, 2016 წელი

ინტერვიუ მამუკა არეშიძესთან: „ღიად ვამბობ – მინდა, ისევ ვიყო გარდაბნის მაჟორიტარობის კანდიდატი“

ლიკა ამირაშვილი

კავკასიის საკითხებში ექსპერტი მამუკა არეშიძე “მთელ კვირასთან” საუბრისას აცხადებს, რომ 2016 წლის საპარლამენტო არჩევნებზე გარდაბნის მაჟორიტარობის კანდიდატობა სურს, თუმცა “ქართული ოცნებისგან” შეთავაზება ჯერ არ მიუღია.

რაც შეეხება “მრეწველებისა” და “რესპუბლიკელების” დაპირისპირებას, არეშიძე ფიქრობს, რომ ამით კოალიციას საფრთხე არ ემუქრება და არცერთი პარტია კოალიციას არ დატოვებს. როგორც არეშიძემ განაცხადა, “ოცნება” არჩევნებისთვის ახალ სახეებს ეძებს და მოლაპარაკება უცხოეთში მყოფ ქართველებთანაც მიმდინარეობს.

„ბიძინა ივანიშვილის განცხადებიდან რასაც ვვარაუდობდით, კარგად ჩანს. მან თავის მომხრეებს სთხოვა, რომ “რესპუბლიკელების” მიმართ მკვეთრი გამონათქვამები შემწყდარიყო. კოალიციის დაშლა ამ არჩევნებისთვის, სავარაუდოდ, მოსალოდნელი არ არის. ასე იმიტომ კი არ მოხდება, რომ ვინმეს კაპრიზია, არამედ კოალიციის სახეს რამდენიმე პოლიტიკური პარტია განსაზღვრავს. ესენია “ქართული ოცნება” და “რესპუბლიკელები”. გარდა იმისა, რომ “რესპუბლიკელები” კოალიციის სახეს განსაზღვრავენ, დასავლური ვექტორის ხაზგასმულად მხარდამჭერებიც არიან. აქედან გამომდინარე, ტაქტიკური მოსაზრებებით, კოალიციისთვის საჭიროა. როგორც ჩანს, ეს განმსაზღვრელია იმისა, რომ კოალიციის რღვევა მოსალოდნელი არ იყოს და პლუს “რესპუბლიკელები” კოალიციიდან არ გავიდნენ. ამ შემთხვევაში კოალიციის სხვა სუბიექტებზე არ ვსაუბრობ, იმიტომ, რომ არ ვიცი, დარჩებიან თუ არა. ზოგიერთის ფუნქცია უფრო სუსტია, ზოგიერთის კი ძლიერი, მაგრამ ჩემთვის რთული წარმოსადგენია, ვინ დარჩება. მგონია, რომ “მრეწველები” დარჩებიან, შესაძლოა, გოგი თოფაძე აღარ იყოს, რომელსაც რამდენადაც ვიცი, თავისი ასაკიდან გამომდინარე, დეპუტატობა აღარ სურს, თუმცა “მრეწველები” ალბათ იქნებიან“, – ამბობს მამუკა არეშიძე “მთელ კვირასთან” საუბრისას.

- კოალიციის საარჩევნო სიაში პარტიებს შორის ადგილები როგორ გადანაწილდება, თქვენ რა ინფორმაცია გაქვთ?

- მარტივი სათქმელი არ არის, თუმცა ვიცი, რომ კოალიციის ზოგიერთ სუბიექტს მადა გაეზარდა. კოალიციაში კვოტების საკითხს “ქართული ოცნების” ხელმძღვანელობა გადაწყვეტს. იმიტომ, რომ “ქართული ოცნება” კოალიციაში დიდი ძალაა. მიუხედავად იმისა, რომ ორგანიზაციული თვალსაზრისით ამ პარტიამ ის ფორმა ვერ მიიღო, რომელიც მოსალოდნელი იყო, მაინც მნიშვნელოვანი ძალაა. მგონია, რომ ადგილების 50% “ქართული ოცნების” იქნება. დანარჩენი სუბიექტების მიხედვით გადანაწილდება.

- და რომელ სუბიექტს გაეზარდა მადა, ვის გულისხმობდით?

- სხვათა შორის, თითქმის ყველა სუბიექტს ვგულისხმობდი. ზუსტად ვერ გეტყვით, ვის რამდენი უნდა, მაგრამ “რესპუბლიკელების” თაობაზე ჩემთვის ცნობილია, რომ უფრო მეტი უნდათ. პრესიდან ვიცი, რომ 25%-ს ითხოვენ, რაც სიაში ყოველი მეოთხე ადგილი გამოდის. 25%-ს რამდენად მიიღებენ, რთული სათქმელია, თუმცა “რესპუბლიკელებს” იმის საშუალება აქვთ, რომ ასეთი ტიპის მოთხოვნები ჰქონდეთ.

რამდენად რეალისტურია მათი მოთხოვნა – ეს ცოტა სხვა საკითხია. იმიტომ, რომ ყველაფერს კადრების ხარისხი გადაწყვეტს. 2012 წლის არჩევნებში კოალიციაში ხშირ შემთხვევაში ადამიანები სპონტანურად ხვდებოდნენ და არა გააზრებით. დღეს სხვანაირი მდგომარეობაა, თითოეულ კანდიდატს განსაკუთრებულად დააკვირდებიან, მე ასეთი ინფორმაცია მაქვს. “რესპუბლიკელი” იქნება თუ სხვა სუბიექტი, კოალიციის ძალიან ღირსეული და სერიოზული კანდიდატების შერჩევა მართებთ, რათა მათი კანდიდატები სხვაზე უკეთესები იყვნენ.

- კოალიციაში ახალ სახეებსაც თუ ვიხილავთ?

- ვიცი, რომ “ქართული ოცნების” მხრიდან რამდენიმე ახალ სახესთან მოლაპარაკება მიდის. ზოგიერთმა უარი თქვა. ასევე ვიცი, რომ რამდენიმე უცხოეთში მყოფ ქართველთან მიმდინარეობს მოლაპარაკება, თუმცა, მათ სახელსა და გვარს ვერ დავასახელებ, იმიტომ, რომ მოლაპარაკება დასრულებული არ არის.

- თქვენ თუ იქნებით გარდაბანში მაჟორიტარი?

- თუ შემომთავაზებენ, აუცილებლად დავთანხმდები. ჯერჯერობით შემოთავაზება არ არის. ეს საკითხი ღიადაა დატოვებული. ერთადერთი ის ვიცი, რომ ეს საკითხი გაზაფხულზე გადაწყდება. ჩემთვის ძალიან დიდი მნიშვნელობა აქვს, რომ გარდაბანში სიტუაცია შეიცვალოს. მინდა გითხრათ, რომ ძალიან დიდი იმედი მაქვს ჩვენი გამგებლის გოჩა ჯამარაულის, რომელმაც მიუხედავად იმისა, რომ არანაირი ადმინისტრაციული მუშაობის გამოცდილება არ ჰქონდა, სიტუაციას ალღო უცბად აუღო და ზუსტად იმას ებრძვის, რასაც მე ვებრძოდი – უკანონობას და კორუფციას. მთავრობამ მხარი თუ დაუჭირა, მაშინ სერიოზული შედეგები ექნება. ჩათვალეთ, რომ ღიად ვამბობ – მე მაქვს რევანშის სურვილი, იმიტომ, რომ ვიცი, არჩევნები როგორც გამიყალბეს. ვინც გამიყალბა, ქვემო ქართლში და მათ შორის გარდაბნის რაიონში დღესაც ბოგინობს. მინდა, ყველა დავარწმუნო, რომ უფრო მეტის გაკეთებაა შესაძლებელი. ამიტომ მინდა, ისევ ვიყო გარდაბნის რაიონში მაჟორიტარობის კანდიდატი.

- პაატა ბურჭულაძის ფონდი პარტიად ჩამოყალიბების შემთხვევაში, თქვენი აზრით, რამდენად ძლიერი კონკურენტი იქნება?

- ბურჭულაძე ცდილობს, რომ რაც შეიძლება მეტი ახალგაზრდა და პერსპექტიული ადამიანი თავის რიგებში გააერთიანოს. პარტიად ჩამოყალიბების შემთხვევაში სერიოზული ძალა ექნება. არ ვიცი, ყველა რაიონში გახსნეს თუ არა ოფისი, მაგრამ რასაც ვუყურებ, საკმაოდ საინტერესო კონფიგურაციით ლაგდება. პარტიად გადაკეთების შემთხვევაში სერიოზული ძალა იქნება. ამავე დროს არ უნდა დაგვავიწყდეს “პატრიორები”, რომლებიც ასევე სერიოზული ძალაა, მათ ეს ადგილობრივ დონეზე დაამტკიცეს. თუმცა, ამ გადასახედიდან ვერ გეტყვით, რომ კოალიციისთვის ვინმე სერიოზული საფრთხის შემცველი იქნება. არჩევნები რაც უფრო მოახლოვდება, სიტუაცია შეიძლება შეიცვალოს. აქეთ “ნაციონალური მოძრაობა”, პაატა ბურჭულაძეც თუ პარტიად გადაკეთდა… და “პატრიოტებიც”. ამასობაში ნინო ბურჯანაძეც არ უნდა დაგვავიწყდეს.

შესაძლოა, ოპოზიციური პარტიების ნაწილი ერთ ბლოკში გაერთიანდეს. მოკლედ, სერიოზული ბრძოლა იქნება. მითუმეტეს იმ ფონზე, რაც პოლიტიკურ სივრცეშია შექმნილი, როდესაც შევიწროება და ძალდატანება ჯერჯერობით არ ჩანს.

„ახალი თაობა“, 29 თებერვალი, 2016 წელი

ინტერვიუ სოსო ცინცაძესთან: „2016 წლის არჩევნებზე ხალხი ისევ ბიძინა ივანიშვილს გაჰყვება“

პოლიტოლოგი სოსო ცინცაძე „ახალ თაობასთან“ ინტერვიუში აცხადებს, რომ კოალიცია „ქართული ოცნება“ არ დაიშლება, მაგრამ პროცესები კიდევ უფრო გამწვავდება და ამისთვის ივანიშვილი მზად უნდა იყოს.

- ბატონო სოსო, რამდენად შეიძლება არჩევნების წინ კოალიცია საერთოდ დაიშალოს?

- არა, კოალიციის დაშლა გამორიცხულია. რომელიმე პარტიას მაინც უნდა ჰქონდეს იმის იმედი, რომ მარტო გავა არჩევნებზე და გაიმარჯვებს. ამის იმედი არცერთ პარტიას არ აქვს. მაგალითად, თავად „ქართული ოცნება“ რომ გავიდეს კოალიციიდან და პარტიამ კი არა, ბიძინა ივანიშვილმა რომ გაიმარჯვოს, ეს იქნება პარტია „ქართული ოცნების“ გამარჯვება, მაგრამ მთავრობას მაინც ვერ დააკომპლექტებს. სხვათა შორის, არც კადრები არ ეყოლება საამისოდ. ამიტომ კოალიცია შენარჩუნდება, არც მისი დაშლის პოლიტიკური ნება არსებობს. ეს გადაწყვეტილება თავად ივანიშვილმა უნდა მიიღოს, როგორც თავის დროზე ასეთი ერთობის შექმნის გადაწყვეტილება მიიღო.

- მაშინ ამ გადაწყვეტილებას ხომ სხვა საფუძველი ედო?

- გასაგებია, მაგრამ ივანიშვილის მხრიდან დღეს ამ გადაწყვეტილების მიღება იქნება რადიკალური ნაბიჯი და ეს იქნება პირდაპირ ბარიკადებზე ასვლა მისი მხრიდან.

- რატომ?

- ეს იმას ნიშნავს, რომ მან უნდა გადაიმტეროს მთელი ქართული პოლიტიკური სპექტრი. ქართული პოლიტიკიდან წასვლა ხომ არ არის ევროპის ან ამერიკის პოლიტიკიდან წასვლა, სადაც ეს დროებითი მოვლენაა, რადგან, დღეს რომ დამარცხდები, ხვალ გაიმარჯვებ და დაბრუნდები კიდეც. დღეს, ქართული პოლიტიკიდან წასვლა, პირველ რიგში, უხელფასოდ, შემოსავლის, კეთილდღეობის გარეშე დარჩენას ნიშნავს. ეს ნიშნავს, რომ აღარ გაქვს გავლენა, აღარ შეგიძლია ბიძაშვილი, ცოლისძმა სამსახურში მოაწყო. წარმოიდგინეთ, ამ ადამიანებს ბიძინა ივანიშვილმა დღეს რომ უთხრას: არა! მორჩა! როგორ შემოუტრიალდებიან მას და რა დღეში ჩააგდებენ?! შეიძლება, იქამდე მიიყვანონ ივანიშვილი, რომ არათუ პოლიტიკაზე ააღებინონ ხელი, საერთოდ ხელი ააღებინონ საქართველოში დარჩენაზეც კი. ამიტომ კბილებით ჩაბღაუჭებიან კოალიციასაც და გაერთიანებული ძალით ისეთ შანტაჟს მოუწყობენ ივანიშვილს, რომ თავბედს დააწყევლინებენ.

- არჩევნების მოახლოებასთან ერთად შიგნით პროცესები კიდევ უფრო დაიძაბება?

- ბუნებრივია და ივანიშვილი ამისთვის მზად უნდა იყოს. ამ ადამიანებისთვის პოლიტიკაში დარჩენა ყოფნა-არყოფნას ნიშნავს, სიკვდილ-სიცოცხლის დილემაა, თუ რატომ აქვთ ასე გამძაფრებულად, ამაზე უკვე მოგახსენეთ. წარმოიდგინეთ, რომ ეს ყველაფერი დაკარგონ. ცხადია, ამას ვერ ეგუებიან და ამიტომაც ვართ ამ ყველაფრის მოწმენი. ჩვენთან სულ სხვა სცენარი და სიუჟეტი ვითარდება, განსხვავებული ფიგურანტებით, ვიდრე ევროპის ნებისმიერ ქვეყანაში და ამერიკის შეერთებულ შტატებში, სადაც ადამიანი სახელმწიფო სამსახურში იმიტომ კი არ მიდის, რომ ფული იშოვოს, არამედ ემსახუროს ქვეყანას. იქ სახელმწიფო სამსახურში არავის უნდა წასვლა, რადგან გაცილებით ნაკლებია ხელფასი, ვიდრე კერძო სექტორში. ჩვენთან კი ყველაფერი პირიქითაა. ამიტომ ვამბობ, რომ რასაც ახლა ვხედავთ, მხოლოდ ყვავილია, ნაყოფი შემდეგ იქნება. იქნება მუჯლუგუნები, კომპრომატები. თოფაძისა და „რესპუბლიკელების“ დაპირისპირება შეიძლება მონაგონი იყოს იმასთან შედარებით, რაც შეიძლება მოხდეს.

- ასე მწვავედ შეიძლება მოვლენები განვითარდეს?

- ჯერ კიდევ მოლოდინის რეჟიმში არიან, მაგრამ, როდესაც ფაქტის წინაშე დადგებიან და აღმოაჩენენ, რომ საპარლამენტო სიის მიღმა რჩებიან, მერე ეს ადამიანები ძალაუნებურად გაერთიანდებიან.

- და რა შეიძლება მათ გააკეთონ?

- ბევრს ვერაფერს გააკეთებენ, მაგრამ წყალს აამღვრევენ, სიტუაციას დაძაბავენ და დესტაბილიზაციის ელემენტებს შეიტანენ არა მხოლოდ პოლიტიკურ პროცესში, არამედ ჩვენს ცხოვრებაშიც, მაგრამ ვერაფერს შეძლებენ, რადგან მათ ხალხის მხარდაჭერა არ ექნებათ.

- თქვენ ამბობდით, რომ პარტია „ქართული ოცნება“ შეიძლება გავიდეს კოალიციიდან. თავის დროზე რატომ არ უნდოდა ივანიშვილს, რომ ძლიერი პარტია შეექმნა და მხოლოდ ის ყოფილიყო დასაყრდენი?

- როგორ არ უნდოდა, მაგრამ ასეთი მარტივი არ არის ძლიერი პოლიტიკური პარტიის შექმნა. აქ მხოლოდ ფინანსური რესურსი არ არის მთავარი, მთავარია ადამიანური რესურსი. ვინ იქნებიან პარტიაში, შენი მომხრეები მხოლოდ თუ იდეური მიმდევრები. პარტია ბევრი ნიუანსისგან შედგება, ძალიან რთული პროცესია და მისი შექმნის დროს მთავარი სელექციაა. მედროვე თანამოაზრისგან უნდა გაარჩიო ისე, რომ არ შეგეშალოს. კოალიციის შექმნის დროს ივანიშვილმა კურსი თანამოაზრეებისკენ კი არა, თანამებრძოლებისკენ აიღო. ურჩხული გაქრა და ახლა აღარ არის ბრძოლა საჭირო, თანამებრძოლებს კი ღირებულებები არ აკავშირებთ, ბრძოლის ობიექტი აღარ არსებობს, ამიტომ ეს ქაოსი ბუნებრივია.

- ამ არჩევნების მიმართ რა მოლოდინი გაქვთ, როგორ განვითარდება მოვლენები, ვინ გაიმარჯვებს?

- დღეს ხალხი ისევ ივანიშვილს გაჰყვება, მაგრამ იმდენი არა, რამდენიც 2012 წლის არჩევნებზე გაჰყვა, მაგრამ ნაწილი მაინც მას მისცემს ხმას, რადგან სხვას ვერავის ხედავს, ვისაც შეიძლება დაეყრდნოს.

- მეორე ნაწილი?

- მეორე ნაწილი სახლში დარჩება, მათგან ერთი, ორი, რომელსაც აქტიურობა არ ასვენებს, წავა და ორ, სამკაციან პარტიას მისცემს ხმას. ეს იქნება და ეს.

„ახალი თაობა“, 29 თებერვალი, 2016 წელი

ინტერვიუ მეგი გიცირიძესთან: „ბიძინა ივანიშვილი თავის ხალხს კომპრომატებით მართავს… „ნაცმოძრაობა „ქართული ოცნების“ კადრების სამჭედლოა“

რა საიდუმლოს ამხელენ ნაციონალები, ჰყავთ თუ არა ხელისუფლებაში ჩანერგილი ხალხი, რა კომპრომატები აქვს ივანიშვილს „ქართული ოცნების“ წევრებზე, რით ჰგავს დღევანდელი ვითარება გასული საუკუნის 90-იანებს? – ამის შესახებ „ახალ თაობას“ ყოფილი დეპუტატი, ნაცმოძრაობის წევრი მეგი გოცირიძე ესაუბრება.

„დღისით, მზისით ბუკა პეტრიაშვილზე განხორციელებული თავდასხმა ამტკიცებს იმას, რაზეც ნაციონალები ხელისუფლების შეცვლის შემდეგ ვყვირივართ – ქვეყანაში კრიმინალი აყვავდა. ახლა ისეთი ვითარებაა, რომ კრიმინალმა ნაყოფიც მოისხა. მისი ყოფილი თანამებრძოლებისგან განსხვავებით, რომლებმაც პეტრიაშვილის ცემაზე რაღაც ორაზროვანი კომენტარები გააკეთეს, მე ვგმობ ამ ფაქტს და დამნაშავეების კანონის სრული სიმკაცრით დასჯას ვითხოვ, მიუხედავად იმისა, რომ კარგად მახსოვს ის კომენტარი, რომელიც ბუკამ ნუგზარ წიკლაურზე თავდასხმასთან დაკავშირებით გააკეთა“, – ამბობს მეგი გოცირიძე.

- რა კომენტარზე საუბრობთ?

- როცა წიკლაურზე პირველი თავდასხმა განხორციელდა, პეტრიაშვილმა თქვა, ალბათ, გამწარებული ხალხი დაესხა თავსო. სხვათა შორის, ის საქმე დღემდე გამოძიებული არ არის. საზოგადოების დაზაფვრა არ მინდა, მაგრამ ქვეყანაში გამეფებულია ქაოსი. ხელისუფლებაში ერთი თვის მოსულები იყვნენ, კრიმინალის მატება რომ დაიწყო. თავიდან ამას ნაციონალებს გვაბრალებდნენ. ახლა კარგა ხანია, ასეთი ბრალდებები არ მსმენია. შავ დღეში ჩავარდნილ ხელისუფლებას მე დავეხმარები და თქვენი გაზეთის საშუალებით გავამხელ იმ დანაშაულებს, რომლებიც ჩვენი ჩადენილია, მაგრამ ამაზე არავინ არაფერი იცის.

წითელი ზღვა რომ არის, ხომ იცით, ის ზღვა სააკაშვილმა შეღება სისხლით. აი, იმ სისხლით, ქოცების მტკიცებით, ჩვენ რომ ვსვამდით. ამ სისხლის ნახევარს ზღვაში ასხამდა და იქაურობა გაწითლდა. წყნარი ოკეანეც ეცოდეინებათ ქოცებს და ეგეც მიშამ დააწყნარა. ყველაზე მთავარი არის მკვდარი ზღვა, ქოცებო, არ იცოდით, ეს ზღვა სააკაშვილმა რომ მოკლა?

- ხუმრობა კარგია, მაგრამ სერიოზულადაც ვისაუბროთ. კრიმინალის მატებას ჩვენ აღარ გვაბრალებენო და რა ხდება?

- სანამ ამაზე გადავალ, შავი ზღვის ამბავიც არ დამავიწყდეს, ეგეც ჩვენი გაშავებულია. რაც შეეხება კრიმინალის მატებას, რას ელოდით, როცა ციხიდან ათასობით კრიმინალი გამოუშვეს. რამდენიც არ უნდა უარყონ, შექმნილი ვითარება ადასტურებს, რომ დღეს ქვეყანაში კრიმინალი წახალისებულია.

- რით გამოიხატება კრიმინალის წახალისება?

- რით? პროკურორებსა და პოლიციელებს ხოცავენ, მოსამართლეების მანქანებს ცეცხლსასროლი იარაღიდან ცხრილავენ. მეტი არგუმენტი რაღა მოვიყვანო. ბანკებისა და ბანკომატების გატან-გამოტანა ჩვეულებრივ ამბად იქცა. მართალია, 21-ე საუკუნეში ვართ, მაგრამ ჩვენი ქვეყანა უკან, 90-იანი წლებისკენ მიექანება. კრიმინალი ბიბინებს, ლარის კუპონიზაცია სახეზეა, პირზე ტალონების შემოღებაღა გვაკლია და „ბედნიერი“ 1990-იანები.

- დენი რომ არ ქრება? სად იყო სინათლე 1990-იანებში?

- ცოტაც აცალეთ და ეგეც ჩაქრება. „გაზპრომს“ შემოიყვანენ და გაზიც სანატრელი იქნება. ქოცების გასაგონად მინდა ვთქვა, რომ იმ სისხლიან ცხრა წელში ჩვენ ენერგეტიკული დამოუკიდებლობა მოვიპოვეთ. ესენი ამასაც კარგავენ. შეკვეთილი მკვლელობები და საქმის გარჩევებიც ჩვეულებრივი რამე გახდა. რამდენიმე დღის წინ მეოთხეკლასელმა ბავშვებმა ისე იჩხუბეს, რამდენიმე მათგანი საავადმყოფოში წაიყვანეს.

- ბავშვების ჩხუბი მაშინაც ხშირად ხდებოდა, როცა თქვენ იყავით ხელისუფლებაში...

- ნამდვილად ხდებოდა და ამიტომაც შემოვიღეთ მანდატურის ინსტიტუტი. ახლა ეს ინსტიტუტი აღარ ფუნქციონირებს და შედეგიც სახეზეა. ისეთი საშინელებები ხდება, მგონი, 90-იანებშიც არ იყო. სიგარეტს ასეთი ფასი მაშინაც კი არ ჰქონდა. 11-12 ლარი ღირს სიგარეტი და ხალხს, მგონი, განვადებით გამოაქვს. იმდენი რამეა გაფუჭებული, რომ მათი ჩამოთვლა ძალიან შორს წაგვიყვანს. ამათი ვერაფერი გავიგეთ და იქნებ თავად აგვიხსნან, რას ემსახურება ეს ყველაფერი.

- ექსპერტებისა და პოლიტიკოსების ნაწილი მეოცნებეთა ასეთ ქმედებებს იმით ხსნის, რომ ისინი ხელისუფლების გადაბარებისთვის ემზადებიან...

- ქერის ორმოში არიან ჩავარდნილი და ესენი ამ თბილ სავარძლებს საკუთარი სურვილით არავის გადააბარებენ. შესაძლოა უნდათ კიდევაც ვიღაცებს საქმის გაკეთება, მაგრამ არაფერი იციან. ზოგიერთმა მათგანმა კომპიუტერის გამოყენებაც კი არ იცის.

- კომპიუტერის გამოყენება როგორ არ ეცოდინებათ...

- როგორ და ჩვეულებრივად. მხედველობაში საქმის წარმოება მაქვს, თორემ ფეისბუქი და უფრო ოდნოკლასნიკები ეცოდინებათ. ხელისუფლება რომ შეიცვალა, ქოცები შეცვივდნენ ყველგან, მაგრამ, რომ ნახეს, საქმეს ვერ აკეთებდნენ, რამდენიმე ნაციონალი დატოვეს სამსახურში, რომ მათგან ელემენტარული რაღაც ესწავლათ.

- გამოდის, ჩვენ რომ ჩანერგილები გვგონია, ისინი კომპიუტერის სპეციალისტები ყოფილან...

- ამათ ჩანერგვა რად უნდათ. ისეთ განცხადებებს აკეთებენ, რომ ყველაფერი ნათელია. ამათ წარმოდგენაც კი არა აქვთ, რა არის სახელმწიფო. დღეს ძალაუფლება ქუჩაში აგდია. ახლა ის ვინმემ უნდა აიღოს.

- როგორ გგონიათ, ვინ აიღებს ამ ძალაუფლებას?

- რა თქმა უნდა, ჩვენ. ჩვენ ვართ ერთადერთი ძალა, რომელმაც იცის ქვეყნის მართვა. ნაციონალური მოძრაობა ის ძალაა, რომელმაც საქართველო ჭაობიდან ამოათრია და ძლიერ სახელმწიფოდ აქცია. ჩვენ შორის შიგნით არაერთ თემაზე ყოფილა კამათი, მაგრამ ეს გარეთ არ გამოსულა. ესენი ერთმანეთს დაერივნენ და მათი გამჩერებელიც არავინაა. დეპუტატი მინისტრს არჩევნების გაყალბებას სდებდა ბრალად, მინისტრი ფრაქციის თავმჯდომარეს ჩეკისტობას აბრალებს.

- ახლა არ თქვათ, რომ მათ შორის არსებული დაპირისპირება გაწუხებთ.

- ქვეყნის იმიჯზე აისახება ეს ცუდად, თორემ, ისე უქნიათ, დაუჭამიათ ერთმანეთი. სხვას რას ელოდით ხალხისგან, რომელიც იდეის კი არა, ფულის გარშემო გაერთიანდა. არჩევნების მოახლოებასთან ერთად, დაპირისპირება ძალიან საინტერესო სახეს მიიღებს. კოალიციის ყველა წევრზე კომპრომატები არსებობს და მათი ფრიალი დაიწყება.

- თქვენ ააფრიალებთ?

- ჩვენ რატომ უნდა ავაფრიალოთ? ერთმანეთს აუფრიალებენ. ივანიშვილმა კოალიციაში შესაყვანი ხალხის სია საგანგებოდ შეარჩია, არჩევანი კომპრომატებით გადაპენტილ ხალხზე გააკეთა.

- იმის თქმა გინდათ, რომ კომპრომეტირებული ხალხი შეარჩია საგანგებოდ?

- რა თქმა უნდა. სპეციალისტების ნაცვლად ასეთ ხალხს ეძებდა სანთლით. აბა, რა გგონიათ, გია ჟორჟოლიანი რატომ მოხვდა პარლამენტში ან სოსო ჯაჭვლიანი? ამ ჯაჭვლიანის ერთადერთი დამსახურება ის იყო, რომ კურტანიძესთან ერთად ჯაჭვები შემოიკრა და ქუთაისიდან ასე ჩამოვიდა თბილისში.

- მსოფლიოს ჩემპიონი რომ არის მკლავჭიდში ჯაჭვლიანი, ეს არაფერს ნიშნავს?

- ვთქვათ, მსოფლიოს ჩემპიონია და მერე რა? ხომ ხედავთ, მთელი მკლავჭიდელები აუმხედრდნენ.

- როგორც ამბობენ, ამაში ნაცმოძრაობის ხელი ურევია...

- ჩვენი ხელი არა, ჩვენი ფეხი. ყველაფერს თუ ჩვენ ვურევთ, გამოდის, რომ ძალიან მაგრები ვყოფილვართ. ამაში ისედაც არ მეპარება ეჭვი, მაგრამ, ის მითხარით, ხელისუფლება სად არის ამ დროს.

- მოდით, ისევ კომპრომატების თემას დავუბრუნდეთ. ეს კომპრომატები ივანიშვილის ხელში საიდან აღმოჩნდა, ნაციონალებმა მიეცით?

- ჩვენ მიერ კომპრომატების მიწოდება რაში სჭირდებოდა, კარგად შეხედეთ, მოსიარულე კომპრომატები არიან. გუბაზ სანიკიძე რატომ უნდა იყოს პარლამენტში, ხალხო? მაგის დამსახურება მითხარით რამე.

- ლევან სანიკიძის შვილია...

- ლევან სანიკიძე კარგი ადამიანი იყო, მაგრამ მისი შვილობა საკმარისი არ არის იმისთვის, რომ პარლამენტში წამოჯდე. ლევან სანიკიძის შვილი რომ არის, კიდევ უფრო არ ეპატიება, რასაც ეგ პარლამენტში აკეთებს.

- რას აკეთებს იმისთანას, რასაც სხვები არ აკეთებენ?

- რას აკეთებს და სძინავს. ამ ადამიანს ძილში ვუხდით 5.000-ლარიან ხელფასს. შვილების თემა კარგად გამახსენეთ, იუსტიციის მინისტრის მამა მოსამართლე წულუკიანი იყო, რომელსაც 20 ადამიანისთვის აქვს სასიკვდილო განაჩენი აქვს გამოტანილი.

- მამების შეცდომებზე შვილები პასუხს არ აგებენ...

- პასუხს არ ვთხოვ, უბრალოდ, მაინტერესებს, გახსნის თუ არა იუსტიციის სახლთან ახალ მემორიალს.

- რა მემორიალი უნდა აღმართოს?

- იქ ხომ აღმართა ერთი მემორიალი, რომელიც ნაციონალური რეჟიმის მსხვერპლთა სახელზეა. კეთილი ინებოს და შევარდნაძისა და კომუნისტების დროს დახვრეტილებსაც დაუდგას ძეგლი. სამართლიანობა სხვანაირად ვერ აღდგება. კომპრომეტირებული ხალხი რატომ შეარჩია ივანიშვილმაო, მკითხეთ ზემოთ. იმიტომ შეარჩია, რომ ასეთი ხალხის მართვა და მათზე ხელის შეწმენდა უფრო იოლია. აბა, გაიხსენეთ, არჩევნების წინ როგორ დაარბენინებდა ამ ხალხს და დაპირებებს არიგებინებდა. ვერაფერი ვერ შესრულდა და ახლა ყველაფერს ამათ დააბრალებს. მეტსაც გეტყვით, ივანიშვილმა რამდენიმე წლის წინ საინტერესო რამე თქვა, შევქმნი ოპოზიციურ გუნდს, რომელიც ჩემივე ხალხს დაუპირისპირდებაო. ასეც იქნება.

- რატომ გგონიათ, რომ ასე იქნება, ამტკიცებთ, რომ არცერთი დანაპირები არ შეასრულა და რაღა ამას შეასრულებს?

- ამას იმიტომ შეასრულებს, რომ მის საქმეს სჭირდება ასე. ოლიგარქმა კარგად იცის, რომ მის ხალხს აღარავინ მისცემს ხმას. დღეს მოქმედი ქოც-მაჟორიტარები არჩევნებს ვეღარ მოიგებენ.

- ამაზე არჩევნების შემდეგ ვისაუბროთ...

- არჩევნები რად უნდა ამას, მათი მარცხი ახლაც ნათლად ჩანს. რომელმა რაიონმა უნდა აირჩიოს ეს ხალხი? გახსოვთ დაპირება, 5 მილიონი თითო სოფელსო, ამ თბილისში რომ დამსხდარხართ ეს ჟურნალისტები, წადით, ნახეთ სოფლები, იქნებ მიაკვლიოთ ამ 5 მილიონს. არცერთ სოფელს არ მიუღია ეს თანხა. კარგად მახსოვს, ზვიად ძიძიგური როგორ ყვიროდა, დენი 5 თეთრზე ძვირი როგორ უნდა იყოსო, ამტკიცებდა, მიშას წილი აქვს ამ ტარიფშიო. რატომ არ გახადეს დენი 5 თეთრი და ახლა ვის ჯიბეში მიდის ეს ფული? ამ ადამიანს ახლა ხმას აღარავინ მისცემს.

- ისე, არ დაგავიწყდეთ და 2004 წელს ნაცმოძრაობამ გაიყვანა ზვიად ძიძიგური პარლამენტში...

- არაფერი არ მავიწყდება. ჩვენს მიერ მოყვანილი ხალხი რომ არა, დღეს ბიძინა ივანიშვილი პარლამენტში უმრავლესობასაც ვერ მოაგროვებდა. ოლიგარქი თავის ხალხზე მეტად პორტირებულ ნაციონალებს ენდობა.

- ვითომ ასეა საქმე?

- ასეა, ასე. მართლა მაგათ იმედზეა, დანარჩენებს შეხედეთ, რა სიტყვებით ამკობენ ერთმანეთს. დაახლოებით 10 დღის წინ ერთმანეთზეც გაიწიეს,. ნაციონალების მიერ მოყვანილი ხალხი რომ არ გადაებირებინა, ყველაფერს დაკარგავდნენ. ნაცმოძრაობა „ქართული ოცნების“ კადრების სამჭედლოა. მაგარი უნამუსო ხალხია ამ „ოცნებაში“ – „ნაციონალებზე“ ამბობენ, ცხრა წელი სისხლს სვამდნენო და მათთან ერთად უმრავლესობა შექმნეს. თუ სისხლს ვსვამდით, ეგენიც დალევდნენ, აბა, მარტო მე და მიშას კი არ დაგვილევია სისხლი.

„ვერსია“, 29 თებერვალი, 2016 წელი

ინტერვიუ პაატა ბურჭულაძესთან: რატომ მოვიდა პოლიტიკაში, რა პერსპექტივები აქვს და როგორ შეხვდა მიხეილ სააკაშვილს

ვანო პავლიაშვილი

(შემოკლებით)

(…)

…თითქმის ორთვიანი მოლაპარაკება ლოგიკურ ფინალამდე მივიდა – ,,საქართველოს განვითარების ფონდის” აღმასრულებელ დირექტორთან აუდიენცია შეთანხმებულია…

- ისე, რატომ გადაწყვიტეთ, პოლიტიკაში ამ არეულ დროს შემოსულიყავით?

- ვანო, პოლიტიკაში არ შემოვსულვარ. ეს მძიმე სიტუაციიდან გამოსვლის შესწავლაა. დღეს საქართველოში ძალიან ცუდი სიტუაცია და ხალხში აბსოლუტური უიმედობაა. საერთოდ, ჩემთვის ამ ნაბიჯის გადადგმა ძალიან ძნელი იყო _ იცით, რომ ხელოვნება, ასევე ორივე ფონდი _ ,,იავნანა” ,,ივერია” დავთმე და აქეთ გადმოვერთე. აუცილებელია, დღეს ,,საქართველოს განვითარების ფოდნი” არსებობდეს იმიტომ, რომ საქართველო ფეხზე უნდა დადგეს! ფონდში ძალიან კარგი პროფესიონალები და საქართველოს მოსიყვარულე ხალხია, ვისაც რაღაცის გაკეთება მართლა უნდა. ახლა ვითარებას ვსწავლობთ და სამ თვეში, შეიძლება ნაკლებშიც, იმ ხედვას დავდებთ, რომელიც მთავრობამ მხოლოდ კი არ უნდა გაიზიაროს, არამედ აუცილებლად უნდა აამოქმედოს კიდეც! თუ ამ პროგრამას არ აამოქმედებს, მაშინ, ალბათ, სხვა ნაბიჯების გადადგმა მოგვიწევს.

- რა ნაბიჯებს გულისხმობთ?

- ჯერ არ ვიცი, მაგრამ ვიმეორებ: ამხელა უიმედობა არასოდეს ყოფილა და თუნდაც საგარეჯოსა და გარდაბნის არჩევნებზეც გამოჩნდა – ამომრჩევლის 70 პროცენტი არჩევნებზე არ მივიდა. ეს იმას ნიშნავს, რომ ხალხი ფიქრობს, არჩევნებზე სიარულს აზრი აღარ აქვსო.
სხვათა შორის, საქართველოს ექვს ქალაქში ჩვენი ოფისები გავხსენით…

- სხვა თუ არაფერი, სწორედ ამ ოფისების გახსნას აქვს პოლიტიკური ანტურაჟი…

- შეიძლება, ბევრი ასე ხედავს, რომ ეს პოლიტიკური ანტურაჟია. კი ბატონო, ვანო, რაც გინდათ, ის დაარქვით, მაგრამ ეს საქართველოს სამსახურში ჩადგომაა და მეტი არაფერი!

- ბატონო პაატა, როგორც ბიძინა ივანიშვილი იტყოდა, ჩაგეკითხებით ხოლმე - ამბობთ, ხალხი უიმედოდააო, თუმცა უიმედობა, განსაკუთრებით, ბოლო წლების განმავლობაში, ჩვენი საზოგადოებისთვის უცხო არაა…

- ვანო, ვერ დაგეთანხმებით იმიტომ, რომ იმედი ყველა არჩევნების დროს არსებობდა. თუნდაც მიშა რომ მოვიდა ან შემდეგ, მიშა რომ წავიდა და ბიძინა მოვიდა, ესეც ძალიან დიდი იმედი იყო… დღეს კი ისეთი სიტუაციაა, რომ იმედი აღარაფრისაა!

- როცა ყურადღებას უიმედობაზე ამახვილებთ, აქცენტს ეკონომიკაზე აკეთებთ?

- პირველ რიგში, დიახ, ეკონომიკაზე ვაკეთებ, მაგრამ ეკონომიკაზე უფრო დიდი უიმედობა სამართალდამცავი კუთხითაა.

- ახლა, მე რომ ,,ოცნებელი” ვიყო, შეგეკამათებოდით და გეტყოდით, ცდებით-მეთქი, რამეთუ ეკონომიკური სიდუხჭირის მიუხედავად, დღეს თავისუფლად ვსუნთქავთ!

- ერთის მხრივ, თავისუფლად ვსუნთქავთ _ ციხეში ის ტანჯვა აღარაა, რაც ნაცმოძრაობის დროს იყო, რაც ძალიან კარგია, მაგრამ სასამართლოში თუნდაც მურუსიძის დანიშვნა პირველი ნიშანია, რომ ყველაფერი შეიძლება, თავიდან დაიწყოს. ამიტომ, ჩვენი ფონდი პირველი იყო, რომელმაც ყველაფერი ეს დაიწყო, რადგან არ შეიძლება, ადამიანი, რომელიც ყველაფერზე ხელს მოაწერს, ჩვენი სიმართლის დამცველი იყოს!

- ლოგიკურად შემდეგ კითხვამდეც მივედით: იმ ავბედითი 9 წლის განმავლობაში, როცა გირგვლიანი მოკლეს და 7 ნოემბერს ხალხი სასტიკად დაარბიეს, პარალელურად, ბიზნესს ართმევდნენ და ატერორებდნენ, მსგავსი განცდა რატომ არ გაგიჩნდათ და რაღა ახლა გადაწყვიტეთ, ხალხი უიმედოდაა და მოდი, ფონდს შევქმნი, რომელიც ქვეყანას გადაარჩენსო?

- ერთ რამეს გეტყვით: როცა უიმედობა ბავშვებზე არსებობდა, ფონდი ,,იავნანა” შევქმენი, რომელმაც, თუ იცით, ძალიან კარგად იმუშავა და დღესაც მოქმედებს. ყოველთვის იმ აზრზე ვარ, რომ სათქმელი ადრესატს ვუთხრა. მიშას დროს უიმედობა კი არა, შიში იყო, რომელიც დღეს სხვა შიშით შეიცვალა ანუ მაშინ ხელისუფლების შიში არსებობდა. დღეს კი – ხვალინდელი დღის…

- იმის თქმა გინდათ, რომ ხელისუფლების მაშინდელი შიში შიმშილით სიკვდილის შიშმა შეცვალა?

- იცით, საქართველოში, წელიწადში რამდენი ბავშვი კვდება? ათასი, აქედან 300 კვების დეფიციტის გამო. ეს კატასტროფული ციფრია. სოფლებში ბავშვების უმეტესობა მხოლოდ პურით იკვებება და ტკბილეულის გემოც არ იცის. ვანო, თქვენს წინა კითხვას დავუბრუნდები: ნაციონალებს ყოველთვის ვაკრიტიკებდი. დღესაც ისე გამოდის, რომ არსებულ მთავრობას ვაკრიტიკებ.

- ეს კრიტიკა კი არა, უფრო პოლიტიკური განცხადებებია!

- სხვანაირად როგორ შეიძლება? _ მხოლოდ კრიტიკა კი არა, ქებაც პოლიტიკურია! იმას ვლაპარაკობ, რაზეც გული მტკივა!

- ბატონო პაატა, თქვენს პერსონასთან პოლიტიკის დაკავშირება ახალი არ არის: 2012 წლის არჩევნების წინ ითქვა, რომ ნაციონალები პარტიულ სიაში ,,ჩასმას” გთავაზობდნენ. ისიც გავიგე, 2013 წელს, ივანიშვილისგან თითქოს შემოთავაზება გქონდათ, რომ ,,ოცნების” საპრეზიდენტო კანდიდატი ყოფილიყავით. ამ კულუარულ ინფორმაციებს დამიდასტურებთ?

- შემოთავაზება ყველა წამყვანი პარტიიდან ყოველთვის იყო, მაგრამ პოლიტიკაში ჩემს თავს ვერ ვხედავდი, თან ყოველთვის იმედი არსებობდა, ამას სხვა გააკეთებს, მე რატომ უნდა ჩავერთო-მეთქი. ჩემს ხალხს ჩემი ხელოვნებითა და საქველმოქმედო ფონდებით უფრო ვემსახურებოდი. დღეს კი ხალხს ხვალინდელი დღის იმედი აღარ აქვს, აღარ იცის, როგორ მოიქცეს და ასეთი მამაცური ნაბიჯი ამიტომაც გადავდგი!

- ეს გავიგე, მაგრამ კონკრეტულად მიპასუხეთ: 2013 წელს, ივანიშვილი მართლა გთავაზობდათ, ,,ოცნების” საპრეზიდენტო კანდიდატი ყოფილიყავით?

- დიახ, ბატონ ბიძინასთან ამაზე საუბარი იყო, მაგრამ ვუთხარი, ამის აუცილებლობა არაა-მეთქი და თვითონაც დამთანხმდა. მაშინ ,,ოცნება” ახალი მოსული იყო, რეიტინგი ჰქონდა და ხალხსაც ძალიან უყვარდა. სხვათა შორის, ვიდეოფირიც არსებობს, სადაც ვამბობ, რომ აპოლიტიკური დავრჩებოდი და თუ საქართველოს რამეში დავჭირდებოდი, ისე მივეხმარებოდი!

- ასეა თუ ისე, ,,საქართველოს განვითარების ფონდის” შექმნას დიდი აჟიოტაჟი მოჰყვა, განსაკუთრებით ,,ოცნებელებისგან”; მეტიც, სოციალურ ქსელში ფოტოც გავრცელდა, რომელზეც სააკაშვილ-ადეიშვილთან ერთად ხართ აღბეჭდილი და რომელიც არცთუ დიდი ხნის წინაა გადაღებული. ბატონო პაატა, მოდით, ამ ფოტოს ისტორია მიამბეთ…

- (იღიმება) სიამოვნებით…

- ისიც თქვეს, ბურჭულაძე საქართველოში მიშამ გამოაგზავნაო…

- ბატონო ვანო, ამ ფოტოს ისტორიას აუცილებლად მოგიყვებით, მაგრამ მანამდე ერთს გეტყვით: ,,ოცნების” ხალხი ცდილობს, ნაციონალებისკენ გადამამისამართოს, ნაციონალები ,,ოცნებისკენ”…

- კიდევ ერთი ვერსია არსებობს: თქვენი მთავარი დასაყრდენი მრევლია - ეს, ვფიქრობ, მნიშვნელოვანი ფაქტორია და ამაზეც ვილაპარაკოთ…

- კი ბატონო… ყველა ცდილობს, აქეთ-იქით გადამამისამართოს, მაგრამ მე ქართველი ხალხის წარმომადგენელი ვარ და ამაში ეჭვი საღად მოაზროვნე ადამიანს, მგონი, არ უნდა შეეპაროს. ჩემი პირველი ლოზუნგიც ასეთი იყო: ,,ჩემიანებად” და ,,სხვისიანებად” გაყოფა მტრის წისქვილზე წყლის დასხმაა!

- სხვათა შორის, ორი დღის წინ, ანალოგიური განცხადება პრემიერმა კვირიკაშვილმაც გააკეთა…

- დიახ, ჩვენს სიტყვებს მთავრობის წევრებიც იმეორებენ და ეს ძალიან მიხარია, მაგრამ ისინი მხოლოდ იმეორებენ და ვერაფერს აკეთებენ. მე კი ამას აუცილებლად რეალობად ვაქცევ.

- ღმერთმა ხელი მოგიმართოთ, მაგრამ როცა სააკაშვილთან ფოტოს იღებდით…

- (სიტყვას ღიმილით მაწყვეტინებს) სააკაშვილთან ფოტოს ბაიდენიც იღებს… სექტემბერში, ძალიან დიდი ფესტივალი გავხსენი, რომელიც ოდესაში პირველად ჩატარდა. საერთოდ, ჩემი გასტროლები 3-5 წლით ადრე იყო ხოლმე დაგეგმილი. ასე რომ, ამ ფესტივალის გახსნაც სამი წლის წინ დაიგეგმა. ფესტივალამდე, სამი კვირით ადრე, სააკაშვილი ოდესის გუბერნატორად დაინიშნა და ველოდი, რომ კონცერტზე აუცილებლად მოვიდოდა. სხვათა შორის, ,,რუსთავი 2”-ის პირდაპირ ეთერში იუმორით ვთქვი, თუ მოვიდა, თქვენგან დიდ სიყვარულს გადავცემ-მეთქი და ამაზე ყველას გაგვეცინა… კონცერტის წინ აჟიოტაჟი ატყდა, აი, მოდის, მოდისო… ბატონო მიხეილი, ვიდრე ჩემთან მოვიდოდა, სცენაზე აბრძანდა და ნახევარსაათიანი სიტყვა თქვა. იცით, რომ ოდესაში დიდ პატივს სცემენ და ხალხმა ტაში დაუკრა.

- კონცერტზეც დარჩა?

- დიახ. კონცერტის შემდეგ, ჩემთან მოვიდა და მითხრა, პაატა, გეპატიჟებითო, მაგრამ მივუგე, უკვე დაპატიჟებული ვარ _ ბანკეტს ადგილობრივი მოსახლეობა აკეთებს და იქ მობრძანდით-მეთქი. ჰოდა, მოვიდა და ეს სურათიც იქ გადავიღეთ.

- განა, არ ელოდით, რომ ამ ფოტოს ამხელა რეზონანსი ექნებოდა?

- იცით, მიშასთან რამდენი ფოტო მაქვს გადაღებული!

- ეგ ადრე, ახლა კი მიშა საქართველოში შიდა ძებნილია…

- რა მნიშვნელობა აქვს, სურათი როდისაა გადაღებული? სურათი ბიძინასთან, შევარდნაძესთან, საფრანგეთის პრეზიდენტ ჟაკ შირაკსა და, საერთოდ, ყველასთან მაქვს გადაღებული. ამას აჟიოტაჟი რატომ უნდა მოჰყვეს, მით უმეტეს, როცა ფოტოზე 8 ადამიანი ვართ?!

- მოკლედ, მაინც ვერ გავიგე, თქვენი გამოჩენა ნაციონალური ქეისით რატომ შეიფუთა?

- უბრალოდ, ,,ოცნების” პიარმა კარგად იმუშავა და მეტი არაფერი… ალბათ, ფიქრობდნენ, რომ ამით დაღს დამასვამდნენ…

- ,,ოცნების” მიმართ ძალიან ანტაგონისტურად ხართ განწყობილი…

- რატომ? თუ ცდილობენ, რომ ნაციონალებისკენ ,,გადამიბირონ”, მაშინ ეს კარგად გამოსდით…

- ,,საქართველოს განვითარების ფონდის” შექმნის პარალელურად, როგორც ვიცი, ბიძინა ივანიშვილს შეხვდით. მითხრეს, რომ ამ შეხვედრის შუამავალი პატრიარქი იყო…

- არა, არა, როგორ გეკადრებათ! ბიძინასთან პატრიარქი არ მჭირდება! ჩვენ ყოველთვის პირდაპირი ურთიერთობა გვქონდა…

- ბოლო შეხვედრაზე რაზე ისაუბრეთ?

- ეს შეხვედრა ძალიან სპონტანურად მოხდა _ ბადრი პატარკაციშვილის 60 წლის იუბილეზე, პატარკაციშვილის სახლში.

- ბატონო პაატა, ყოფილ პრემიერთან ე.წ. შუშის სასახლეში გამართულ შეხვედრაზე გეკითხებით…

- წელიწადნახევარია, ასეთი შეხვედრა არ ყოფილა…

- ესე იგი, ივანიშვილთან კარგი ურთიერთობა აღარ გაქვთ?

- რატომ არ მაქვს? ვანო, მოდით, ასე ვთქვათ: თუკი დღევანდელ მთავრობას ვაკრიტიკებ, იმას არ ნიშნავს, რომ ეს ადამიანები არ მიყვარს. მინისტრებთან ძალიან კარგი ურთიერთობა მაქვს, მაგრამ ეს საქართველოს ცხოვრებას არ ეხება. სხვათა შორის, მეგობარი მეგობარმა უნდა გააკრიტიკოს. იმის იმედი რომ არ მქონოდა, გაამართლებდა, არც ფონდ ,,იავნანას” დავაარსებდი და არც ,,ივერიას”. იმედი რომ არ მქონდეს, საქართველოს სწორი გზით წაყვანას შევძლებ, არც ამ ფონდს შევქმნიდი. მოკლედ, მნიშვნელობა არ აქვს, მინისტრებთან როგორი ურთიერთობა მაქვს, თუნდაც კვირიკაშვილთან, მეგობრული და ძალიან კარგი ურთიერთობა მაქვს!

- ამის გამო კვირკაშვილს ბიძინა ივანიშვილთან ურთიერთობა არ გაუფუჭდეს!

- ურთიერთობის გაფუჭება არავისთან მინდა და თუ ისინი იმიტომ გაიფუჭებენ, რომ საქართველოს წინსვლას ვცდილობ, კი ბატონო, გაიფუჭონ!

- …ბატონო პაატა, ამბობთ, რომ ,,საქართველოს განვითარების ფონდში” ძლიერი პროფესიონალები არიან, თუმცა ისინი სხვადასხვა დროს, სხვადასხვა ხელისუფლებისა თუ პოლიტიკური ჯგუფის გვერდით იდგნენ. ავიღოთ მაგალითად ვანო მაჭავარიანი, რომელიც ,,ოცნებას” გულშემატკივრობდა, ასევე ხათუნა ლაგაზიძე, რომელიც ,,ოცნების” გარკვეული პროგრამების შემუშავებაში მონაწილეობდა… ვანო მაჭავარიანი ფონდის დატოვებას მართლა აპირებს?

- ვანო ფონდიდან უკვე წავიდა, თუმცა საგარეო ურთიერთობებში გვეხმარება – ვთხოვე, ხელშეკრულებით დარჩენილიყო…

- რატომ წავიდა?

- ეს ვანოს ჰკითხეთ… საერთოდ, ჩვენი ფონდი ახალ ფაზაში გადავიდა… წეღან გითხარით, რეგიონებში ოფისები გავხსენით-მეთქი. მეგონა, რომ სიტუაცია ცუდი იყო, მაგრამ აღმოჩნდა, რომ კატასტროფულია! ამიტომ, ბატონ ვანოს ვთხოვე, რომ მთლიანად არ წასულიყო და ვინაიდან საგარეო ურთიერთობებში ძალიან კარგი სპეციალისტია, ჩვენთან ხელშეკრულებით დარჩა!

- ხათუნა ლაგაზიძეს ჩემს პატივისცემას საჯაროდ ვუდასტურებ. ვანო მაჭავარიანს არ ვიცნობ, მაგრამ მისი მთავარი ,,კომპრომატი” მიხეილ მაჭავარიანის ძმობაა. შესაბამისად, ნუთუ, არ იცოდით, რომ თქვენს გვერდით მის გამოჩენას კუდი მოებმებოდა?

- რა თქმა უნდა, ვიცოდი.

- მერე, ეს ნაბიჯი რატომ გადადგით?

- მომისმინეთ: 90-იან წლებში ხუთნახევარი მილიონი ვიყავით, დღეს 3 მილიონი 700 ათასი ვართ. ვანო, ფიქრობთ, რომ ეს იმხელა ფუფუნებაა, თუ ვინმე რომელიმე პარტიაში იყო, გადავისროლ-გადმოვისროლოთ და ახალი სახეები მოვნახოთ? პირიქით, არ სჯობია, გავერთიანდეთ და რაღაც გავაკეთოთ?! რა მნიშვნელობა აქვს, ვინ რომელ პარტიაში იყო. მთავარია, დღეს საქართველოს ვინ როგორ ემსახურება!

- ამ ლოგიკით, ბატონო პაატა, ,,ოცნებაში” რატომ არ მიხვედით?

- რას ნიშნავს, ,,არ მივედი”?

- თქვენი იდეები შეგეთავაზებინათ…

- ახლა სწორედ ამას ვაკეთებ, თუმცა ერთია, როცა იდეებს მე შევთავაზებ და მეორე – როცა მთელი ჩემი გუნდი შესთავაზებს.

- თუ ,,ოცნება” თქვენს იდეებს არ მიიღებს, რას იზამთ? ვიცი, რომ არასაპარლამენტო ოპოზიცია საპროტესტო აქციების დაწყებას არ გამორიცხავს. ქუჩაში თქვენც გახვალთ?

- თუ ,,ოცნება” ჩვენს იდეებს არ მიიღებს, ვანო, პირველ ინტერვიუს თქვენ მოგცემთ და გეტყვით, რას ვაპირებთ და რა ნაბიჯებს გადავდგამთ.

- თუკი პოლიტიკური ამბიციები არ გაქვთ, აბა, რეგიონებში ,,საქართველოს განვითარების ფონდის” ფილიალების გახსნის მიზანი რა არის?

- ეს ფილიალები რეგიონებში პრობლემებს შეისწავლის და ხალხს ტრიბუნას მივცემთ, რომ მისი ხმა მთავრობამ გაიგოს. მალე რაიონებში შექმნილ ვითარებაზე პრესკონფერენციას გავმართავთ. ასე რომ, მთავრობა ხალხის ხმას გაიგებს და ამაზე რეაგირება უნდა მოახდინოს, თუმცა მთავრობას ხალხის ჯერჯერობით არ ესმის.

- მუდმივი ტრიბუნა რომ გქონდეთ, საკუთარი მედიასაშუალებაც აუცილებელია. ამ კუთხითაც ხომ არ ფიქრობთ?

- არა, რადგან მედიასთან პრობლემა არ გვაქვს. მედიაში ბევრია ხალხი, ვისაც საქართველოს წინსვლა და განვითარება აინტერესებს!

- ერთი სიტყვით, ,,საქართველოს განვითარების ფონდი” ,,ოცნებისთვის” თავისტკივილია?

- ,,საქართველოს განვითარების ფონდი” თავისტკივილი იმისთვისაა, ვინც საქართველოს ვერ ავითარებს და ვერც წინსვლას უზრუნველყოფს. ჩვენ მოწინააღმდეგეები არ გვყავს. ჩვენ ერთი გზა გვაქვს და ყველას ვთხოვთ: ბატონებო, გავერთიანდეთ! იმაზე ცუდი არაფერი მომხდარა, რომ გავიყავით. მტერმა გარედან შეძლო, რომ გაგვყო. ამის ერთი შედეგი აფხაზეთია, მეორე სამაჩაბლო და ახლა ყველაზე საშინელება ხდება _ საქართველო დასავლეთით და აღმოსავლეთით იყოფა. ამიტომ უნდა გავერთიანდეთ _ ყველა პარტიაში არიან ადამიანები, ვისაც შეუძლია, საქართველო სწორი გზით წაიყვანოს! ხალხმა უნდა გაიგოს: ,,ოცნება”, ნაცმოძრაობა თუ ალიანსი ჩვენი მტერი არაა!

- ბატონო პაატა, ტრადიციული კითხვა უნდა დაგისვათ: ნატო თუ რუსეთი?

- (იღიმება) საქართველოს უმეტესობას ნატო უნდა.

- პაატა ბურჭულაძეს ნატო უნდა თუ რუსეთი?

- პაატა ბურჭულაძეს ის უნდა, რაც საქართველოს არგებს.

- და საქართველოს, თქვენი აზრით, რა არგებს?

- ჩვენი გზა დასავლეთისკენაა და ამაში დარწმუნებული ვარ. რუსეთთან ჩვენი პრობლემა ყოველთვის ის იყო, რომ მის პოლიტიკას ზედმეტად ვენდობოდით.

- რუსეთი ოკუპანტია?

- დღეს ოკუპანტია და ამაზე არ შეიძლება, სხვა აზრი არსებობდეს!

- არსებობს მოსაზრება, რომ პაატა ბურჭულაძე მხოლოდ დასავლეთის კი არა, რუსული პოლიტიკური წრეებისთვისაც მისაღებია…

- მართლაც, მისაღები ვარ იმიტომ, რომ ორივესთან ძალიან კარგი დამოკიდებულება მაქვს და ეს ურთიერთობა არ გამიფუჭებია! 2008 წელს, როცა საქართველო-რუსეთის ომი დაიწყო, ერთ-ერთ ტელევიზიით განვაცხადე, საშინელება მოხდა _ რუსეთი თავს დაგვესხა, მაგრამ შეურაცხმყოფელი განცხადებები არ უნდა გავაკეთოთ და შემდგომში მოლაპარაკებები უნდა დავიწყოთ-მეთქი… ხომ ხედავთ, პოლიტიკა სხვა რაღაცაა და სახელმწიფოებრივი პოლიტიკა უნდა არსებობდეს!

- პუტინს პირადად იცნობთ?

- არა, ჩემს კონცერტზე ერთხელ იყო მოსული…

- რუსული პოლიტიკური ისტებლიშმენტის წარმომადგენლებთან ურთიერთობა გაქვთ?

- ჩემს კონცერტებსა და წარმოდგენებზე ბევრია ნამყოფი, თუმცა მეგობრული ურთიერთობა არავისთან მაქვს!

- თუ პოლიტიკაში მოსვლას გადაწყვეტთ, რუსეთთან ურთიერთობას როგორ აღადგენთ?

- ვანო, გენაცვალე, თუ პოლიტიკაში მოსვლას გადავწყვეტ, გეტყვით, მაგრამ ამაზე ლაპარაკი ჯერ არ მინდა.

- კეთილი, მაგრამ გინდათ თუ არა, უკვე პოლიტიკაში ხართ, პაატა ბატონო!

- ვერ ვიტყვი, რომ პოლიტიკაში ვარ! მე საქართველოს სამსახურში ვარ!

- სხვათა შორის, მითხრეს, რომ არჩევნების წინ, მხარდაჭერა, შესაძლოა, ირაკლი ალასანიას გუნდს გამოუცხადოთ…

- ამაზე არც გვიფიქრია…

- ზოგი ამბობს, რომ ახლა ბრძოლა მრევლისთვის მიდის ანუ ხელისუფლება ცდილობს, მხარდამჭერები წაგართვათ და კონსტიტუციაში ოჯახის შესახებ ჩანაწერის გაკეთება ამიტომაც გააქტიურდა… ეკლესიას საქართველოში ყველაზე მაღალი ნდობა აქვს. როცა ,,საქართველოს განვითარების ფონდს” ქმნიდით, გათვლას მრევლზეც აკეთებდით?

- ეკლესიას, რა თქმა უნდა, მაღალი ნდობა აქვს – ხალხს პატრიარქი უყვარს…

- ცნობილია, რომ უწმინდესთან კარგი ურთიერთობა გაქვთ…

- რა თქმა უნდა… ცხოვრებაში გათვლით არაფერი გამიკეთებია. ყოველთვის იმას ვაკეთებ, რისიც მჯერა და რაც საჭიროა. თუ მახათას მთაზე ეკლესიის მშენებლობას გულისხმობთ, გეტყვით, რომ მართლაც, სასწაული რამ კეთდება – ამ დიდებულ ტაძარს მთელი საქართველო თითო-თითო ლარით აშენებს. არ მინდა, სპეკულაცია იყოს, აი, პაატა იყენებსო და ამიტომ ,,ივერიის” ფონდიდან წამოვედი. პოლიტიკური გათვლა არ მაქვს და ვერ ვიტყვი, რომ ვინმეს ვიყენებ, ღმერთმა დამიფაროს! თუ ვინმეს უნდა, კი ბატონო, იყოს ჩვენს გვერდით! სხვათა შორის, ეკლესია ჩემს სოფელშიც, საიდანაც ჩემი გვარი მოდის, ავაშენე და ისიც დიდი პატივია, რომ მახათას მთაზე ტაძრის მშენებლობაში თავის დროზე უწმინდესმა ჩამრთო!

- …ფონდი ფულთან ასოცირდება… მე, რიგით ობივატელს, რას მთავაზობთ?

- ვანო, თქვენც იმას შემოგთავაზებთ, რასაც მთავრობას შევთავაზებთ ანუ ლაპარაკია მოსახლეობის პირობების გაუმჯობესებაზე. არ მინდა და ისეთ საქართველოს ვერ შევეგუები, სადაც ბავშვები შიმშილობენ! ნუთუ, არ შეგვიძლია, ბავშვებს საჭმელი მივცეთ?! ვერც ისეთ საქართველოს შევეგუები, სადაც ოჯახის ერთ-ერთი დამფინანსებელი პენსიონერია! – როგორ შეიძლება, ადამიანები, ვისაც შინ პენსიონერი ჰყავს, თავს ბედნიერად თვლიდნენ, რომ ოჯახში პენსიის ფული შესდით? საქართველოში, პრაქტიკულად, არ არსებობს ოჯახი, ვისაც საზღვარგარეთ ოჯახის წევრი არ ჰყავს გაშვებული, უმეტესად, ქალბატონები და იქიდან კვების ფულს აგზავნიან. ვერც ამას შევეგუები. როგორ შეიძლება, ამ ქვეყანაში გაიხარო, როცა ამდენი გაჭირვებულია?! საქართველოს მოსახლეობის 42-მა პროცენტმა სახელმწიფოსგან სოციალური დახმარება მოითხოვა, ესე იგი, ამ ქვეყნის 42 პროცენტი თავს ღატაკად თვლის და ამის შეგუება როგორ შეიძლება?! ასე კიდევ 4 წელი რომ გაგრძელდეს, ისე უკან წავალთ, რომ იქიდან ვეღარ გამოვალთ! ამიტომ, მინდა, ჩვენი მთავრობა ცოტა გამოფხიზლდეს და შიდა კინკლაობიდან მთელი აქცენტი იმაზე გადაიტანოს, ხალხი როგორ ცხოვრობს, თორემ ტელევიზიით ხალხის გართობით საქმე არ გამოდის!

- მსგავსი დაპირება-შეძახილი არაერთხელ მოგვისმენია და ჩვენც მუდმივად მესიას ვეძებთ - გვგონია, თუკი ადამიანი წარმატებულია, ესე იგი, ის ქვეყანასაც ააყვავებს! ბატონო პაატა, მოსახლეობისთვის მორიგი მესია ხომ არ ხართ?

- ვანო, ღმერთმა დამფაროს, რომ მესიობაზე ვიფიქრო, მაგრამ საქართველო ფეხზე რომ დადგეს, ხელისუფლებაში ისეთი ძალა უნდა მოვიდეს, რომელსაც, პირველ რიგში, ხალხი უყვარს. ერთი სიტყვით, საქართველოს ფეხზე დაყენებას დიდი ამბავი არ უნდა! თუ სწორი ხალხი უხელმძღვანელებს და სწორი მიმართულებით წავა, საქართველო ფეხზე შეიძლება რამდენიმე წელში დადგეს. სხვანაირად, გეუბნებით, დავიღუპებით და ოთხი წელი კიდევ ასე რომ გაგრძელდეს, როგორიც დღესაა, მერე მართლა სასწაულის მოხდენა დაგვჭირდება! ეს ფონდიც ამიტომ დაარსდა და თუ მთავრობა ჩვენს რეკომენდაციებს გაითვალისწინებს, კარგი იქნება, თუ არადა, საქმეს სხვანაირად წავიყვანთ!

- ამბობთ, ხალხი იმედგაცრუებულიაო და თქვენ რატომ უნდა დაგიჯეროთ?

- ხალხი იმიტომ დაგვიჯერებს, რომ უნდა, რაღაც კარგი მოხდეს!

(…)

„კვირის პალიტრა“, 29 თებერვალი, 2016 წელი

ინტერვიუ პაატა ბურჭულაძესთან: „ყველა ცდილობს, გადამიბიროს… „ძალიან უნდათ “ნაციონალებს“, რუსულ პროექტად გამომიყვანონ, “ქართულ ოცნებას” სურს, “ნაციონალების” პროექტად მომნათლოს, მაგრამ ვაცხადებ – მე ვარ ქართველი ხალხის პროექტი“

ნათია დოლიძე

ჩვენში დიდი ინტერესი გამოიწვია ცნობილი საოპერო მომღერლის, პაატა ბურჭულაძის მიერ “საქართველოს განვითარების ფონდის” დაარსებამ. ის აქამდე საქველმოქმედო საქმიანობას ეწეოდა, ახლა ბევრს ლაპარაკობენ, რომ ფონდის შექმნიდან პოლიტიკური ორგანიზაციის ჩამოყალიბებამდე ერთი ნაბიჯია.

აპირებს თუ არა პოლიტიკაში მოსვლას, როდის შეხვდა ბიძინა ივანიშვილს და როდის მიხეილ სააკაშვილს, ან რატომ მიიჩნევს, რომ ქვეყანაში კრიზისია? ამ კითხვებზე პასუხს ბატონი პაატასგან ჩვენს ექსკლუზიურ ინტერვიუში წაიკითხავთ.

- ბატონო პაატა, რატომ გადაწყვიტეთ მაინცდამაინც ახლა დაგეფუძნებინათ ფონდი და გაგეკეთებინათ საკმაოდ მწვავე პოლიტიკური განცხადებები?

- დღეს აღმოვჩნდით იმ ვითარებაში, როდესაც დრო სწორედ ჩვენს საწინააღმდეგოდ მუშაობს და თუ ყველაფერი ასე გაგრძელდა, ქვეყანა კიდევ უფრო უარეს კრიზისში აღმოჩნდება. ეს ორგანიზაცია არ არის პოლიტიკური, თუმცა ძალიან სერიოზული გეგმები აქვს. ამ ორი კვირის წინ დავპირდით საზოგადოებას, რომ სამ თვეში წარმოვადგენდით ქვეყნის სხვადასხვა სფეროს განვითარების ჩვენეულ ხედვას, რასაც შევთავაზებთ­ მთავრობას. თუ მიიღებს და მის განხორციელებაზე იფიქრებს, უბედნიერესი ადამიანები ვიქნებით.
თუ მთავრობა ისევ ძველებუ­რი ხედვით გააგრძელებს­ საქმიანობას, ანუ უარეს ჩიხში­ მოაქცევს ქვეყანას, მაშინ უკვე სხვანაირად ვიფიქრებთ.

- განაცხადეთ, რომ ქვეყანა დიდ კრიზისშია, წინა ხელისუფლების დროს ვერ ხედავდით კრიზისის ნიშნებს, რადგან არ გვახსოვს თქვენგან ასეთი მწვავე კრიტიკა…

- აქამდე ყოველთვის მქონდა იმედი, რომ რაღაც უკეთესობისკენ შეიცვლებოდა, ახლა აღარ მაქვს… აქვე უნდა ვთქვა, რომ ვინც კი მოდიოდა ხელისუფლებაში, ყველას გვერდში ვედექი. სიმართლე უნდა ითქვას, სააკაშვილმა მმართველობის პირველი წლების განმავლობაში ძალიან ბევრი რამ გააკეთა, ქვეყანა დააყენა ფეხზე. ყოველთვის ვედექი ქვეყნის განვითარებას გვერდში. დღეს მითხარით, ვინ არის ისეთი, ვისაც გვერდში შეიძლება დავუდგე?! ასე რომ გაგრძელდეს კიდევ ოთხი წელი, ალბათ, ისეთ ჭაობში ჩავეფლობით, რომ იქიდან შეიძლება ვეღარც ამოვიდეთ.

- მაინც რას მიიჩნევთ ამ ხელისუფლების ყველაზე დიდ ხარვეზად?

- სამართალს… ვიდრე საქართველოში არ იქნება სამართლიანი სასამართლო, ვიდრე ამ ქვეყანაში მურუსიძე მოსამართლე იქნება, არაფერი გვეშველება. დღევანდელმა ხელისუფლებამ წინას უსამართლობის მთელი პასუხისმგებლობა გადმოიბარა მას შემდეგ, რაც მურუსიძე შემოისვა მხრებზე და დაატარებს აქეთ-იქით.

- თქვენი ფონდის პრეზენტაციამდე გავრცელდა ინფორმაცია, რომ კონსულტაციებს მართავდით ბიძინა ივანიშვილთან...

- კონსულტაცია არ ყოფილა­, ვთქვი, რომ მასთან კონტაქტი მქონდა და ეს აიტა­ცა მედიამ. კონსულტაცია არავისთან გამიმარ­თავს ან რატომ უნდა გამემართა, როდე­საც ჩვენ არა ვართ პოლიტი­კური პარტია. თუ რამე მოხდა და ჩამოვყალიბდით პოლიტიკურ ძალად, აუცილებლად ყველას შევხვდები. ბიძინა ივანიშვილს 2012 წლის არჩევნების შემდეგ მხოლოდ ერთხელ შევხვდი. ეს მოხდა ბადრი პატარკაციშვილის 60 წლის იუბილეზე, ბადრისთან სახლში. ყველას თვალწინ გადავკოცნეთ ერთმანეთი და მოვიკითხეთ… ეს იყო და ეს. მეგობრული ურთიერთობა მაქვს როგორც ბატონ ბიძინასთან, ასევე ირაკლი ალასანიასა და ბევრ სხვასთან, მათ შორის “ნაციონალებთან”. ყველა ცდილობს, გადამიბიროს… ან რა შეთავაზებაზე უნდა იყოს ლაპარაკი, როდესაც არა ვართ

პოლიტიკური პარტია… არ არის აუცილებელი, პოლიტიკოსი იყო და ისე ემსახურო შენს ქვეყანას, მაგრამ როცა ხედავ, რომ ქვეყანა არ ვითარდება სწორი გზით, მაშინ იძულებული ხარ, შეხვიდე პოლიტიკაში. ჩვენ ვცდილობთ, ეს ამბავი როგორმე ავიცილოთ თავიდან. სხვათა შორის, ამ მთავრობის მინისტრებთანაც კარგი ურთიერთობა მაქვს, ზოგიერთთან ვმეგობრობ კიდეც, მაგრამ ჩემი პირადი ურთიერთობები და მეგობრები არაფერ შუაშია ქვეყნის განვითარებასთან. უმნიშვნელოვანეს საკითხად მიმაჩნია ის, რომ ხელისუფლებამ და ოპოზიციამ მოახერხოს და პირად პოლიტიკურ ინტერესებზე მაღლა ქვეყნის ინტერესები დააყენოს.

- გია ხუხაშვილმა ერთ-ერთ ინტერვიუში განაცხადა, რომ 2012 წელს არსებობდა ასეთი გეგმა: “ქართული ოცნების” გამარჯვების შემდეგ ივანიშვილი პრემიერი იქნებოდა, თქვენ კი პრეზიდენტობის კანდიდატი...

- იყო ამაზე ლაპარაკი, მაგრამ მე და ბატონმა ბიძინამ გადავწყვიტეთ, რომ ჩემი პოლიტიკაში შემოსვლის აუცილებლობა მაშინ არ იყო.

- ხშირად თქვენს ფონდს რუსულ პროექტად მოიხსენიებენ. ასევე იხსენებენ თქვენს ციტატებსაც. ერთ-ერთ ინტერვიუში ბრძანეთ, რომ პატივია თქვენთვის, როდესაც რუსულ ბანად მოგიხსენიებენ, მეორეში კი განაცხადეთ, რომ 2008 წლის რუსეთის მიერ ჩვენი ტერიტორიების ოკუპაციაში საქართველოს ბრალეულობაც არისო… იმასაც ამბობენ, რომ რუსეთში სერიოზული კავშირები გაქვთ…

- მართალია, რუსეთში მართლაც მაქვს კავშირები, ისევე როგორც დასავლეთში­ – ევროპასა და მთელ მსოფლიოში. თქვენ მიერ ნახსენებ ინტერვიუში ვთქვი, – გულითა და სულით ქართველი ვარ, მაგრამ მსიამოვნებს, მსოფლიოში რუსულ ბანად რომ მომიხსენიებენ-მეთქი. ამას დღესაც ვიმეორებ. რაც შეეხება ჩვენს შეცდომას 2008 წელს, არ მიგულისხმია ამაში ის, რომ რუსეთის აგრესიას პასუხი გავეცით. ჩვენი შეცდომა ისაა, რომ ჩვენი მთელი ისტორიის განმავლობაში ზედმეტად ვენდობოდით რუსულ პოლიტიკას, იგივე მოხდა 2008 წელსაც. ვფიქრობ, დღესაც იმავე შეცდომას ვუშვებთ. რუსეთის ზედმეტი ნდობა არ შეიძლება! ჩვენ აღარ ვჩანვართ ევროპისა და აშშ-ის რადარებზე, უკვე აღარავინ ახსენებს საქართველოს. არ ვიცი, იქნებ ვიღაცისთვის ეს სწორი პოლიტიკაა და რუსეთს ამით ვაწყნარებთ, მაგრამ, ჩემი აზრით, ეს შეცდომაა. რუსეთთან, ასეთ დიდ ქვეყანასთან, რა თქმა უნდა, არ უნდა გვქონდეს მტრული ურთიერთობა, მაგრამ არა ზედმეტი ნდობის ხარჯზე. ჩვენი ფონდის კურსი მხოლოდ დასავლურია, საქართველოს გზა ევროპის გზაა. ძალიან უნდათ “ნაციონალებს”, რუსულ პროექტად გამომიყვანონ, “ქართულ ოცნებას” სურს “ნაციონალების” პროექტად მომნათლოს, მაგრამ ვაცხადებ – მე ვარ ქართველი ხალხის პროექტი.

- ამ ორიოდე თვის წინ გავრცელდა ფარული ჩანაწერები, რომელშიც მიხეილ სააკაშვილი ამბობდა, რომ თქვენ და თქვენი ფონდი უნდა ჩამოყალიბდეთ “მესამე ძალად” და რომ თქვენ თავისი ხალხი “ჩაგიბათ“…

- ჩვენ თუ ჩამოვყალიბდებით პოლიტიკურ ძალად, მესამე კი არა, აუცილებლად პირველი ძალა ვიქნებით. მეორე-მესამეზე სხვები განაწილდნენ. ეგ ჩანაწერები სრული სისულელეა, არ ღირს მაგაზე ლაპარაკი…

- რამდენიმე დღის წინ თქვენი ფონდის აღმასრულებელი მდივნის თანამდებობა დატოვა ვანო მაჭავარიანმა, რატომ?

- მას თავისი გეგმები ჰქონდა, მადლიერი ვარ, რომ დამთანხმდა იყოს ჩემი მრჩეველი საგარეო საკითხებში. მასთან კონტრაქტი გავაფორმეთ. რამდენიმე რეგიონში უკვე გავხსენით ჩვენი წარმომადგენლობა, მართალი გითხრათ, კი ვიცოდი რთულ მდგომარეობაში რომ იყო მოსახლეობა, მაგრამ ნანახმა ყველა მოლოდინს გადააჭარბა, ამიტომაც გადავწყვიტე უფრო აქტიურად ჩავერთო ფონდის მუშაობაში და აღმასრულებელი მდივნის თანამდებობაც მე შევითავსე…

- რა თანხებით ფინანსდება თქვენი ფონდი?

- თვითონ ვაფინანსებ, გარდა ამისა, მეხმარებიან ჩემი ქართველი და ევროპელი მეგობრები. თუ ოდესმე ფონდი გადაწყვეტს პარტიად ჩამოყალიბებას, მაშინ ყველა თეთრის წარმომავლობა გასაჯაროვდება.

- თუ დაგჭირდათ პოლიტიკაში მოსვლა, ფიქრობთ, რომ საპარლამენტო არჩევნებში მიიღებთ მონაწილეობას, თუ თქვენი სამიზნე საპრეზიდენტო არჩევნებია?

- ჯერ არსებითად ვერაფერს გეტყვით, სამი თვე მაცალეთ, დავდებთ ამ გეგმას, შევთავაზებთ მთავრობას, ვნახოთ, რას გვიპასუხებს… ღმერთმა ქნას, წაიყვანონ ქვეყანა უკეთესობისკენ, თუ არ წაიყვანენ, პირველი იქნებით, ვისაც პოლიტიკურ ინტერვიუს მოგცემთ.

- ერთ-ერთ ინტერვიუში სალომე ზურაბიშვილმა განაცხადა: “ბურჭულაძის საქმიანობასთან კითხვები მაქვს, რატომ არ აფათურებდა წინა ხელისუფლება მისი ფონდის საქმიანობაში ხელს, როდესაც ქვეყანაში ნებისმიერი ფულადი გადარიცხვები კონტროლდებოდა? მისი ფონდი ლამის ოფიციალური სტატუსითაც სარგებლობდა“...

- მაგაზე პასუხის გაცემა უზნეობა იქნება. მინდა ვკითხო თავად მას, მაინც რას ფიქრობს, რატომ არ აფათურებდა?! თვითონ იქნებ იცის პასუხი ამ სულელურ შეკითხვაზე, ან რა იყო იქ ხელის საფათურებელი?! იყო პერიოდი, როდე­საც “ნაციონალური მოძრაობა” ხელს გვიშლიდა. ამის მიზეზი ის იყო, რომ მოსკოვში საქველმოქმედო კონცერტში მივიღე მონაწილეობა. არ მქონდა უფლება, არ მემღერა ავადმყოფი ბავშვების დასახმარებლად. მთავრობიდან დამირეკეს და ამიკრძალეს, მე მაინც წავედი, ამას მოჰყვა ის, რომ სამშობლოს მტრად გამომაცხადეს. ამ კონცერტიდან ერთ წელიწადში სააკაშვილმა ბრწყინვალების ორდენი გადმომცა. იმ ხელისუფლებას ეყო სინდისი, არ გაეფუჭებინა კარგი საქმე, რომლის ეგიდითაც 110 ოჯახს გადაეცა სახლის გასაღები…

————-

“სააკაშვილმა ისე გამოიყვანა, რომ მან ჩამიყვანა ოდესაში“

პაატა ბურჭულაძე 2015 წლის სექტემბერში ოდესაში მიხეილ სააკაშვილთან შეხვედრას იხსენებს: “ორი წლით ადრე მქონდა დაგეგმილი 2015 წლის სექტემბერში ოდესაში, ახალი ფესტივალის გახსნაში მონაწილეობა. მის გახსნამდე 10 დღით ადრე დაინიშნა სააკაშვილი გუბერნატორად. დარწმუნებული ვიყავი, რომ მოვიდოდა კონცერტზე და ასეც მოხდა. სცენაზე ნახევარსაათიანი სიტყვა დაარტყა და ისე გამოიყვანა, რომ მან ჩამიყვანა ოდესაში… კონცერტის მერე მიმიპატიჟა, მაგრამ ვუთხარი, რომ ორგანიზატორებს გამზადებული ჰქონდათ უკვე სუფრა და აქეთ დავპატიჟე, მოვიდა… სულ ეს იყო”.

„კვირის პალიტრა“, 29 თებერვალი, 2016 წელი

ინტერვიუ ეკა ბესელიასთან: „ალეკო ელისაშვილი კომიკური პიროვნება გახდა, მის საქმეზე ყველა იცინის”

რუსუდან შელია

ფაქტია, რომ ე.წ. კოკაინის საქმე აქტუალობას არ კარგავს – საქმეში ახალი ფიგურები ჩნდებიან, პროკურატურა კი გამ­ოძიების შედეგებს არ ახმაურებს. დეტალებზე “კვირის პალიტრასთან” ადამიანის უფლებათა­ დაცვის კომიტეტის თავმჯდომარე ეკა ბესელია­ გვესაუბრება:

- მოდი, დავსვათ მარტივი კითხვა – რა სახით, რა ფორმით, როგორ ვახდენდი მე ელისაშვილზე ზეწოლას? თვეების განმა­ვლობაში მედიამ ისე ატრიალა ეს თემა, რომ ამ კითხვაზე პასუხი არავის მიუღია.­ ვიმეორებ, ელისაშვილი, რომელიც დღეს მატყუარა პოლიტიკოსად ჩამოყალიბდა, ვერაფერს ასაბუთებს – კარგად იცის, რომ ამ საკითხზე მასთან არასოდეს მისაუბრია. სწორედ ამიტომ გაექცა­ ჩემთან ღია ეთერში­ შეხვედრას, არ უნდოდა საზოგადოებას სიმართლე დაენახა. ეს უნიჭოდ დადგმული სცენაა, რომელიც ჩვენი პოლიტიკური ოპონენტების დახმარებით მომზადდა. დააკვირდით პროცესს, ელისაშვილმა­ რითი დაიწყო? პატრიარქის განცხადებას მხარი რომ დავუჭირეთ, ამას მოჰყვა მისი მრისხანება და ცრუ განცხადებები ჯერ პოლიტპატიმრების თემაზე, შემდეგ კი ე.წ. კოკაინის საქმეზე. რა მოხდა? – პოლიტპატიმ­რ­ებმა პრინციპული პოზიცია დაიკავ­ეს, ელი­საშვილი შეშინდა და უარყო­ ის, რაც საჯაროდ განაცხადა, პოლი­ტ­­­პატიმრების თემაზე არაფერი მითქვამსო.

- არ ფიქრობთ, რომ ინტერესთა კონფლიქტია, როდესაც პროკურატურა­ იძიებს საქმეს, რომელშიც თქვენ ფიგურირებთ,­ პარალელურად კი პროკურორთა საბჭოს წევრი ხართ?

- გამოძიება გააჭიანურა ელისაშვილის ჯადოსნურ ტელეფონზე ექსპერტიზამ, რატომ არ შეინახა ის წერილები, რომლებსაც თურმე მანანა კობახიძე უგზავნიდა? შეიძლება ჟურნალისტმა სამხილი გააქროს? იმედია, პროკურატურა მალე გამოაქვეყნებს ყველა მასალას. მეტიც, პირადად მოვითხოვ, დოკუმენტები საზოგადოებისთვისაც ხელმისაწვდომი გახდეს. დასამალი არაფერი მაქვს, ამ პროცესს ბოლომდე მივიყვან და არ მოვეშვები, ვიდრე არ აღიარებს, რომ ჩემზე­ ტყუილი თქვა.

ელისაშვილი ვითომ წესიერი კაცის­ ნიღაბს ირგებს. აბა, იკითხეთ საკრებულოში და მოგიყვებიან, როგორ ითხოვდა გაზრდილ ხელფასსა და სხვა რამეებსაც. გარდა ამისა, ბევრი წერილი მივიღე მისი საქმიანობის შესახებ პატიმრებისგანაც. ყველა იმ პირს სამართლებრივად მოვთხოვ პასუხს, ვინც ცილისწამებითა და ცრუ დასმენით არის დაკავებული. რაც შეეხება საპროკურორო საბჭოს, ინტერესთა კონფლიქტი რომ ყოფილიყო, არათუ საბჭოში, არსად არ ვიქნებოდი, მაგრამ ელისაშვილი კომიკური პიროვნება გახდა და მის საქმეზე უკვე ყველა იცინის.

- ცნობილი გახდა, რომ ე.წ. კოკაინის საქმის ერთ-ერთი მთავარი ფიგურანტი ანას­ტასია ზაუტაშვილი და სხვა დაკავებულები თვითდაზიანებით იმუქრებიან, შესრულდება თუ არა მათი მოთხოვნები­ გამოძიების დაწყებასთან დაკავშირებით?

- ვიცი, რომ გამოძიება დაწყებულია და მნიშვნელოვანია, რომ ყველა გარემოება სამართლიანად დადგინდეს.

- ელისაშვილისა და ზაუტაშვილის შეხვედრის შემდეგ, გაჩნდა აზრი, რომ ე.წ. კოკა­ი­ნის საქმეზე გასამართლებულები ამჯერად თქვენ წინააღმდეგ ამოქმედდნენ. ელისაშვილი არ გამორიცხავს, რომ ზაუტაშვილმა მტკიცებუ­ლებებიც მიაწოდოს ამ საქმეზე. არ დაინტერესებულხართ, რატომ ხვდება ზაუტაშვილი ელისაშვილს და რატომ სთხოვს ადვოკატის შერჩევას?

- ეს ფაქტი არის ელისაშვილის პირდაპირი აღიარება, რომ ცრუობდა. ადვოკატისგან ცნობილია, რომ ელისაშვილი ანასტასია ზაუტაშვილს ორჯერ შეხვდა და ბოდიშიც მოუხადა, რომ ცრუ განცხადებებით მართლაც დიდი ზიანი მიაყენა. რატომ შესთავაზა თავისი მეგობარი ადვოკატი მალხაზ ჯანგირაშვილი, ნინო ჯანგირაშვილის ძმა?

- ზაუტაშვილის ახალი ადვოკატები თქვენს ნდობას არ იმსახურებენ?

- ელისაშვილს სურს ადვოკატ მირიან­ ნიკოლაძის განეიტრალება. ვინმეს სჯერა, რომ ასეთი მატყუარა კაცი ზაუტაშვილის ბედით დაინტერესდა? ალბათ,­ ჰპირდება, რომ პრეზიდენტთან შეწყალებაში დაეხმარება.

- ბიძინა ივანიშვილს ელისაშვილის ბრალდებებზე სასაუბროდ თუ შეხვდით?

- ამ საკითხზე ბიძინა ივანიშვილმა კომენტარი საჯაროდ გააკეთა და სახელიც დაარქვა, თუ ვისგან იმართება ეს ცრუ პროცესი. ბიძინა­ ივანიშვილს პირადად შევხვდი, ის ზუსტად აფასებს ამ ავანტიურას, ხოლო რა თქვა კონკრეტულად ამ მატყუარა ელისაშვილზე, არ გავიმეორებ. …

- თქვენი სახელი ცოტა ხნის წინ კიდევ ერთ სკანდალს დაუკავშირდა – გავრცელებული ინფორმაციით, ვინმე ღურწკაიამ თქვენი პირადი ცხოვრების ამსახველი ჩანაწერები­ ერთ-ერთ გაზეთში მიიტანა. ..

- გამოძიების ორგანო არა ვარ, რომ ეს საკითხები გავარკვიო. სააკაშვილის დროს ყველა მის ოპონენტსა და საჯარო პირს უკანონოდ უთვალთვალებდნენ, უსმენდნენ და ა.შ. ნაწილს ჩანაწერებს უქვეყნებდნენ, ნაწილს კი შანტაჟისთვის ინახავდნენ. ჩემი ოჯახიც იმ სისტემის მსხვერპლი იყო და დღესაც თუ ვინმე გაბედავს ამ უკანონობის გაგრძელებას, მკაცრად დაისჯება.

- როგორ აფასებთ რესპუბლიკელებსა და “მრეწველებს” შორის დაპირისპირებას? ცნობილია, რომ თქვენც უკმაყოფილო იყავით პარლამენტის­ თავმჯდომარით, რადგან ელისაშვილის საპასუ­ხოდ სოლიდარობა არ გამოგიცხადათ.

- კოლეგებზე საჯაროდ არ ვსაუბრობ… რაც შეეხება პარლამენტის თავმჯდო­მარის ინერტულობას, სოლიდარობა მე კი არა, პარლამენტის მიერ მიღებულ და ხელმოწე­რილ აქტს სჭირდებოდა. ელისაშვილმა ყველას მიაყენა შეურაცხყოფა,­ თუ სიას მხოლოდ ბესელია წერდა?! მოგვიანებით ამ საკითხზე უსუფაშვილმა ისაუბრა და ელისაშვილმა მისგანაც ადეკვატური პასუხი მიიღო!

- კულუარებში ამბობენ, რომ შესაძლოა, ახალ სიაში თქვენ ვეღარ მოხვდეთ...

- როგორც პოლიტსაბჭოს წევრი, სიის შედგენაში ჩართული ვარ, თუმცა ჯერჯერ­ობით ამ მიმართულებით მუშაობა არ დაგ­ვიწყია. რაც შეეხება ჩემს საკითხს, საკუთარ თავზე ლაპარაკი არაკორექტულია…

———–

“კობა კობახიძე “ნაცმოძრაობისა” და ყოფილი პოლიციელების თამაშს თამაშობს“

ე.წ. კოკაინის საქმეზე დაკავებულების ყოფილი ადვოკატი კობა კობახიძე ალაპ­არაკდა. მისი განცხადებით, ანასტასია ზაუტაშვილის ოჯახთან მანანა კობახიძის ძმამ, თედო კობახიძემ დააკავშირა, რომელიც საქმის წარმატებით დასრ­ულების შემთხვევაში, ბონუსად 75 ათას ევროს დაჰპირდა.

- თედო კობახიძემ მითხრა, სანამ ზაუ­ტ­­აშვილისა და სხვა დაკავებულების ინტ­ერესებს დაიცავ, პრეზიდენტთან შეწყალების თემაზე მე ვიმუშავებო. მაშინვე მივხვდი, რომ ამას მანანას დახმარებით აპირებდა, რადგან თედოს მხოლოდ მისი დის გამო სცემენ პატივს. თედომ ისიც მითხრა, თუ დაკავებულების გათავისუფლებას მოვახერხებდით, ხუთივე დაკავებულისგან 75 ათასი ევრო უნდა მოგვეთხოვა – ფულის­ პრობლემა არა აქვთო. თუმცა თანხა მაინც ბევრი მომეჩვენა, ანუ თითოეულისგან­ 15 ათასი…

- თუ კორუფციულ გარიგებაზე ინფო­რმაცია გქონდათ, ამ დრომდე რატომ არ ამხელდით, ან რა მტკიცებულებები წარუდგინეთ პროკურატურას?

- პროკურატურაში მტკიცებულების­ სახით 13 აუდიო და სატელეფონო ჩანაწერი­ წარვადგინე და თუ ჩემ მიმართ ცილისმწამებლური კამპანია გაგრძელდება, სხვა მტკიცებულებებსაც გავასაჯაროებ. ამაზე საუბარი ახლა იმ მიზეზით გადავწყვიტე, რომ კობახიძე ურცხვად იტყუება – ალეკო ელისაშვილი მართალია, მანანა კობახიძე ამ საქმით განსაკუთრებით დაინტერესებული იყო. დიდი ხანია მანანას ვიცნობ. მას არაერთ საქმესთან დაკავშირებით უთქვამს, ადვოკატად ჩაერთეო. ახლა კი თედო დამიკავშირდა, დაეხმარე და არ ინანებო… ჩემი განცხადებების შემდეგ მანანა კობახიძის დის ქმარი, ლევან ონიანი დამემუქრა და პროკურატურას ეს მტკიცებულებებიც წარვუდგინე.

- რამდენიმე დღის წინ მის სამართლებრივ დარღვევებზეც ისაუბრეთ. რა საქმეში ფიგურირებს მანანა კობახიძის სიძე?

- შარშან ლევან ონიანმა მეზობელი დაჭრა, სხეულზე მძიმე დაზიანებები მიაყენა, თუმცა ეს საქმე მანანასა და თედოს გავლენით პროკურატურაში დღემდე თაროზეა შემოდებული. თავად თედო მეუბნებოდა, პროკურატურაში საქმეს ვაგვარებო.

მანანა კობახიძე, ვიცე-სპიკერი: – კობა კობახიძე “ნაციონალური მოძრაობისა” და ყოფილი პოლიციელების თამაშს თამაშობს, რომლის მიზანიც “ქართული ოცნებისა” და პირადად ჩემი დისკრედიტაციაა. ძალოვანი უწყებების ის თანამშრომლები, რომლებიც ჯერაც ამ სისტემაში არიან, ეწინააღმდეგებიან ისეთი საქმეების გამოძიებას, რომლებიც მათთვის შეიძლება პრობლემური იყოს – თუ საქმის განახლება მათ პასუხისმგებ­ლობამდე მივა, ეს, ბუნებრივია, ხელს არ აძლევთ.­ “შეწყალების სკანდალი” არ არის იმ სირთულის საქმე, რომელსაც გამოსაძიებლად რამდენიმე თვე სჭირდება, ამიტომ პროკურატურას მივმართავ, გამოძიება დროულად დასრულდეს!

რაც შეეხება კობა კობახიძეს, ბოლო დღეებში კიდევ უფრო გამიმძაფრდა ეჭვი, რომ 2012 წლის შემდეგ ის აქტიურად იყენებს ჩემს გვარსა და სახელს თავის კლიენტებთან ურთიერთობაში, რათა სარფიანად გაყიდოს თავისი საადვოკატო მომსახურება.

„კვირის პალიტრა“, 29 თებერვალი, 2016 წელი

ინტერვიუ სოსო ცისკარიშვილთან: “ქართული ოცნების” საპარლამენტო დეპუტაციის ნახევარიც ვეღარ მოხვდება მომავალ საარჩევნო სიაში… ქვეყანაში განგსტერები გაჩნდნენ!”

ნათია დოლიძე

ევროინტეგრაციის საკითხებში ყოფილ სახელმწიფო მინისტრ ალექსი პეტრიაშვილზე თავდასხმამ, რომელიც დღისით, ფაქტობრივად, ქალაქის ცენტრალურ ნაწილში მდებარე სასაფლაოზე მოხდა, ჩვენში ბევრს გაახსენა გასული საუკუნის შავბნელი 90-იანი წლები, როდესაც ქვეყანაში სრული განუკითხაობა მეფობდა და კრიმინალური ვითარება უკიდურესად მძიმე იყო. კრიმინალის იმჟამინდელ მასშტაბთან დღევანდელი სიტუაციის შედარება, საბედნიეროდ, არაადეკვატური იქნება, თუმცა მიუხედავად სამართალდამცავთა მიერ წარმოდგენილი საიმედო სტატისტიკისა, ფაქტია, რომ გარდა შემზარავი დანაშაულებისა, გახშირდა ყოფითი ხასიათის დანაშაულიც. ძნელია ედავო სახელმწიფოს, რომელიც არგუმენტად სტატისტიკას იშველიებს, მაგრამ საზოგადოებაში გაჩენილ განცდას, რომ კრიმინოგენული ვითარება სულ უფრო რთულდება, სტატისტიკა ვერაფერს შველის. იმ ვითარებაში, როდესაც დამნაშავე ბედავს დღისით, მზისით, ჩაუსაფრდეს ცნობილ პოლიტიკოსს და სასტიკად გაუსწორდეს, როგორ იგრძნობს დაცულად თავს რიგითი მოქალაქე? – სწორედ ამ კითხვით დავიწყეთ ინტერვიუ ექსპერტ სოსო ცისკარიშვილთან:

- მეტად ცუდი რამ მოხდა, ეს თავდასხმა, სამწუხაროდ, გვაფიქრებინებს, რომ ქვეყანაში განგსტერები გაჩნდნენ, რომლებიც უკვეთენ მკვლელობებს და ამაზე პასუხს არ აგებენ. ჩემი შეფასებით, თავდასხმას ალექსი პეტრიაშვილზე აშკარად შეკვეთილი დანაშაულის ნიშნები აქვს, როდესაც ვიღაცის მითითებით სწორედ ის იყო სამიზნე.
ეს ფაქტი შეურაცხყოფს სახელმწიფოს, განურჩევლად იმისა, ვინ იყო დამკვეთი, ვინ – შემსრულებელი ან რა იყო თავდასხმის მოტივი… არაფრით არ შეიძლება ეს შერჩეს ან ჩამფიქრებელს, ან კიდევ შემსრულებელს. იმედია, საქმეს დროულად გამოიძიებენ, ოღონდ ისე, რომ დაისაჯონ არა მხოლოდ შემსრულებლები, არამედ დამკვეთებიც.

თუ, ბოლოს და ბოლოს, მკაცრად არ დაისაჯა შემკვეთი, ეს იქნება საწინდარი იმისა, რომ ჩვენში განგსტერები კიდევ უფრო მომრავლდნენ. მიხარია, რომ ბატონი ალექსი გადარჩა, მაგრამ ჩვენ გვახსოვს საკუთარი შვილის საფლავზე სისასტიკით აფეთქებული იური ვაზაგაშვილი, შემსრულებელი კი გამოვლინდა და დაისაჯა, მაგრამ სამართალდამცავი სტრუქტურები შემკვეთზე აღარ ლაპარაკობენ.

იგივე მოხდა ბესიკ ხარძიანის შემთხვევაშიც, როდესაც პროკურატურა მხოლოდ იმიტომ შეგვიძლია შევაქოთ, რომ პროფესიონალურად იმუშავა და გამოავლინა მკვლელობის შემსრულებლები, თუმცა დამკვეთზე არაფერი ვიცით და ვერსიები მხოლოდ ჭორად ვრცელდება. ეს როგორმე უნდა დასრულდეს ქვეყანაში, თორემ უარესი მოხდება.
დანაშაულის ზრდა, ნაწილობრივ შეიძლება ავხსნათ სასჯელაღსრულების სისტემის ლიბერალიზაციითაც. როდესაც ვცდილობთ, გადავიდეთ ევროპულ სტანდარტებზე და დემოკრატიული პროცესი შეეხოს ყველა სფეროს, მათ შორის, ამასაც, ეს მხოლოდ მისასალმებელია, მაგრამ ეს არ უნდა ნიშნავდეს სიმკაცრის შესუსტებას იმ დამნაშავეების მიმართ, რომლებიც კანონის ფარგლებში მკაცრი რეჟიმის პირობებში უნდა იხდიდნენ სასჯელს. ისიც უნდა ითქვას, რომ ზედმეტად ზრდილობიანი გახდა ჩვენი პოლიცია, ხშირად ქუჩაში მიმდინარე პროცესებისა თუ წვრილმანი დანაშაულისადმი მათი დამოკიდებულება გულგრილია.

ელემენტარულ რამეს გავიხსენებ: როდესაც ჩვენი თანამოქალაქეები უსაფრთხოების წესის დარღვევით მიწისქვეშა გადასასვლელების თავზეც კი ქუჩას წითელ შუქზე ჭრიან
და მანქანების ზღვას მიარღვევენ, პატრული შესაძლოა იქვე იყოს და ამას მშვიდად ადევნებდეს თვალს ისე, რომ არანაირი ზომა არ მიიღოს… ამ პატარა მაგალითითაც ჩანს, რომ სამართალდამცავთა მოქმედება არ არის

ადეკვატური და ოპერატიული. ამის განზოგადება უფრო სერიოზულ სამართადარღვევებზეც შეგვიძლია. ვერ ვიტყვი, რომ რაიმე უკეთესი ხდებოდა წინა ხელისუფლების პირობებში, როდესაც დამნაშავედ სახელმწიფო სისტემა იყო ქცეული და ნებისმიერი, სამართალდარღვევის შემთხვევაში თვითონ მოქმედებდა სადისტური მეთოდებით. ძალიან მნიშვნელოვანია სამოქალაქო სიფხიზლეც, თუ რაიმე მიუღებელს წავაწყდებით, უმრავლესობა თვალს ვარიდებთ ამას და გვგონია, რომ ეს ჩვენ არ გვეხება. როცა შეგვეხება, უკვე გვიანი იქნება.

- არსებობს მოსაზრება, რომ მოიკოჭლებს­ სამართალდამცავთა პროფესიონალიზმი და ოპერატიული მუშაობა…

- დარწმუნებული ვარ, პოლიციის, პროკურატურის თუ უსაფრთხოების სამსახურის დღევანდელი შემადგენლობა ძალიან ცდილობს უკეთესი შედეგის მიღწევას, მაგრამ საკადრო გადაწყვეტილებები ამას ხშირად ხელს არ უწყობს. თუ სამართალდამცავთა რიგები კვლავაც არაპროფესიონალებით შეივსება, შესაძლოა, ვითარება კიდევ უფრო გაუარესდეს, რადგან გარდა მომხდარ დანაშაულზე რეაგირებისა, უდიდესი მნიშვნელობა აქვს მის პრევენციას, რასაც სწორედ პროფესიონალთა მუშაობა სჭირდება. არ იქნება ურიგო, ჩვენი მეგობარი ქვეყნებიდან შესაბამისი სამსახურების კონსულტირებისთვის მოვიწვიოთ პროფესიონალი კადრები, რომელთა დახმარებითაც მოხერხდება როგორც პრევენციული ზომების მიღება, ისე დანაშაულის აღკვეთა.

- ბატონო სოსო, ზოგიერთი მაღალ­ჩი­ნოსნის არათანამიმდევრულობასა და გაუთვლელ გადაწყვეტილებებს შეიძლება მივაწეროთ ის, რაც თუნდაც მარჯვენასაჭიანი მანქანების შემოყვანის აკრძალვის თემასთან დაკავშირებით მოხდა? გასული წლის ბოლოს შინაგან საქმეთა სამინისტრომ ისე მიაწოდა საზოგადოებას ინფორმაცია, რომ ეს უკვე გადაწყვეტილი ამბავი იყო, ისევე, როგორც საგზაო წესების გამკაცრება. დღეს კი აცხადებენ, რომ ამ თემებს თურმე სამართლებრივი გზის გავლა სჭირდება და მხოლოდ ერთი წლის შემდეგ შეიძლება შეიცვალოს კანონმდებლობა. ამასობაში უამრავმა ადამიანმა იზარალა.

- სამწუხაროა, რომ როგორც არაერთი სხვა პროგრესული ინიციატივა, ესეც მომავალ საპარლამენტო არჩევნებს შეეწირა. რას ვიზამთ, ჩვენი პოლიტიკოსების ერთადერთი “რელიგია” არჩევნებია, ამ შემთხვევაშიც ასე მოხდა. ძალიან პრიმიტიული განცხადებები მოვისმინეთ ამ მანქანების შემოყვანის თაობაზე. მათთვის უსაფრთხოების საკითხებზე უფრო მნიშვნელოვანი აღმოჩნდა ზოგიერთი ჟურნალ-გაზეთის მიერ დათვლილი ის საარჩევნო ხმები, რომელთYაც “ქართული ოცნება”, სავარაუდოდ, ამ ცვლილების მიღების შემთხვევაში დაკარგავდა. კარგი იქნებოდა, თავის დროზე ეფიქრათ ამაზე და რიგითი მოქალაქეებისთვის მაინც არ შეექმნათ პრობლემები.

ხშირად ხდება ხოლმე, რომ ამა თუ იმ კანონპროექტის განხილვისას ოპტიმისტურად განვეწყობით, მაგრამ აღმოჩნდება, რომ უკვე მიღებული კანონი ერთი ან მეტი წლის შემდეგ შედის ძალაში, ეს შეეხება მაჟორიტარული სისტემით არჩევნებსაც, რომლის გაუქმებაც მხოლოდ იმიტომ გააჭიანურეს, რომ ზოგიერთისთვის პარლამენტში კიდევ მოხვედრა იდეფიქსია.

ჩვენში კვლავაც ფესვგადგმულია აზრი, რომ ზეწოლისგან მხოლოდ პარლამენტარების კერძო ბიზნესია დაცული. ამის მაგალითი იყო ის, როდესაც ერთ ღამეში ათმა თუ თორმეტმა “ფეოდალმა” “ნაციონალური მოძრაობიდან” “ქართულ ოცნებაში” ისკუპა.

- როგორ აფასებთ კოალიციაში მიმდინარე პროცესებს, სადაც დაპირისპირებებმა უკვე საჯარო სივრცეში გადაინაცვლა. გოგი თოფაძისა და რესპუბლიკური პარტიის კონფლიქტმა ბევრს აფიქრებინა, რომ მმართველი ძალა შეიძლება დაიშალოს. ვრცე­ლ­დებოდა ინფორმაცია­, რომ 27 თებერვალს კოალიციის პოლიტსაბჭო იმსჯელებდა ამ დაპირისპირებებზე, თუმცა შეკრება მიმდინარე კვირისთვის გადაიდო…

- როდესაც პოლიტიკური გაერთიანება ცდილობს, ხშირად გაართოს საზოგადოება და გაახაროს ოპოზიცია იმ სეირებით, რასაც ბოლო ხანს ვადევნებთ თვალს, ეს ძალიან სამწუხაროა. მაგრამ მაინც მგონია, რომ გონიერება სძლევს ემოციებს და ყველა თავის შეცდომას დაუკვირდება. ამ ეტაპზე კოალიციის დაშლას არ ველი, თუმცა დაპირისპირებები შეიძლება გამძაფრდეს. კარგი იქნება, თუ კოალიციაში დაფიქრდებიან ჯერ კიდევ მე-18 საუკუნეში ოლივერ გოლდსმიტის ნათქვამზე, რომ “კამათში გამარჯვების საუკეთესო გზაა კამათისთვის თავის არიდება”. როდესაც ერთმანეთს სიტყვას არ არჩენენ და გაუთავებლად ესხმიან თავს, ეს უპირველესად მათვე ვნებთ. დაპირისპირებები შეიძლება იყოს, მაგრამ არა სატელევიზიო სივრცეში, არამედ კაბინეტებში, ეს იქნება საუკეთესო არა მხოლოდ ამ კამათის მონაწილეებისთვის, არამედ მთლიანად სახელმწიფოსთვის.

- ისეთი შთაბეჭდილება რჩება, რომ ბიძინა ივანიშვილის გადაწყვეტილებაზე იქნება ბევრი რამ დამოკიდებული, თუმცა მისი დაპირების მიუხედავად, რომ საარჩევნო პროცესებში აქტიურად ჩაერთვებოდა, თითქოს ამას არ ჩქარობს…

- ვერ დაგეთანხმებით. ბატონი ბიძინა სიტყვის კაცია და ჩემი აზრით, უკვე აქტიურად არის ჩართული წინასაარჩევნო პროცესებშიც. ამ დასკვნას მე ვაკეთებ “ქართული ოცნების” ზოგიერთი წარმომადგენლის ქცევის ანალიზიდან. ეს ხალხი აქამდე თუ ფიქრობდა, რომ საპარლამენტო სავარძლის შესანარჩუნებლად საკმარისი იყო უკმეხი განცხადებების პრეზიდენტის საწინააღმდეგოდ კეთება, ეს ახლა, როგორც ჩანს, საკმარისად აღარ მიაჩნიათ და თავდასხმის ობიექტად რესპუბლიკური პარტია შეარჩიეს. ახლა მის “მიჭირხვნას” ცდილობენ. ივანიშვილის ერთმა უერთგულესმა პარლამენტარმა ისიც ბრძანა, გავიდეს კოალიციიდან რესპუბლიკური პარტია, დამოუკიდებლად მიიღოს მონაწილეობა არჩევნებში და ვნახოთ, რა პრეტენზიები ექნება აღმასრულებელ ხელისუფლებაზეო. ეს უმეცარი მიდგომა კიდევ უფრო აკნინებს მისი ავტორის ისედაც დაბალ რეიტინგს. მოწმენი ვართ, რომ თავდაცვის მინისტრის აუგად მოხსენიების განსაკუთრებული ინტერესი გაჩნდა. სიმართლე გითხრათ, არ ვიცი, რატომ ვერ იპოვა თოფაძემ პრეზიდენტსა და თავდაცვის მინისტრზე თავდასხმის გარდა, პარლამენტში დარჩენის სხვა გზა. ეს ჩემთვის მხოლოდ სინანულის მომგვრელია. მას ნამდვილად უნდა ეგულებოდეს სხვა პოლიტიკური პარტიები, რომლებიც პირველ სამეულში სიამოვნებით დაუთმობენ ადგილს.…

- რაზე მიანიშნებთ, რესპუბლიკური პარტიის საწინააღმდეგო გამოსვლების უკან შეიძლება ბიძინა ივანიშვილი იდგეს?

- დამერწმუნეთ, ბიძინა ივანიშვილი არავის უკან არ დგას, ეს მის უკან ცდილობს ადგილის შენარჩუნებას ზოგიერთი, რადგან დანამდვილებით შემიძლია გითხრათ, რომ “ქართული ოცნების” საპარლამენტო დეპუტაციის ნახევარიც ვეღარ მოხვდება მომავალ საარჩევნო სიაში. ისინი, ვინც ივანიშვილის უკან არიან ჯერჯერობით მოკალათებულნი, ძალიან კომფორტულად გრძნობენ თავს, მაგრამ სულ შიში აქვთ, არ დაკარგონ ეს ადგილი და ამისთვის იბრძვიან ახლა გააფთრებით.

- საგარეჯოს შუალედურ არჩევნებს უკვე პროკურატურა იძიებს. არსებობს ვარაუდი, რომ ამ ძიების შედეგი შესაძლოა პოლიტიკური მანიპულირების თემად იქცეს...

- თუ მეტი საქმე პროკურატურას აღარ აქვს, უნდა დაკავდეს ამ საკითხით და გამოიძიოს, თუმცა ძალიან მეეჭვება, ასეთი უსაქმურები იყვნენ. წინასწარ რაიმეს თქმა ძნელია, დაველოდოთ მოვლენების განვითარებას… იმედია, უარს იტყვის პროკურატურა პოლიტიკურ პროცესებში ჩარევაში.

- გასულ კვირას ძალიან გართულდა ვითარება ტყიბულში, სადაც რამდენიმე დღის განმავლობაში მაღაროელთა საპროტესტო აქციები მიმდინარეობდა...

- ამ პროცესს ჰქონდა სამართლიანი და ბუნებრივი დასაწყისი, თუმცა ამგვარი უკმაყოფილებით კმაყოფილი პოლიტიკური ძალები სიამოვნებით მიიღებდნენ მონაწილეობას ამ შფოთის კიდევ უფრო გაზრდაში, თუ ამის საშუალება მიეცემათ. ზუსტად რა მოხდა, ვერ გეტყვით, მაგრამ ნამდვილად მძიმე საყურებელი იყო კერძო საკუთრებაში ადამიანების შეჭრა და იქაურობის დარბევა. კარგი იქნებოდა, ხელისუფლებას მეშახტეებისთვის მანამდე მოესმინა, ვიდრე ვითარება ასე გამწვავდებოდა. როგორც ვიცი, ახლა დაიწყეს ამ პრობლემების გადაჭრაზე მუშაობა. სჯობს გვიან, ვიდრე არასდროს, ესეც პროგრესია…

- როგორ აფასებთ საქალაქო სასამართლოს თავმჯდომარეობიდან მამუკა ახვლედიანის გადაყენებას და თუ ხედავთ ამ პროცესში პოლიტიკურ ინტერესებს?

- გამიჭირდება რაიმეს თქმა, რადგან არც იმ კითხვაზე არსებობს პასუხი, თავად ახვლედიანის განცხადებებში თუ იყო პოლიტიკური ინტერესები, მით უფრო, როდესაც სცადა ერთ ქვაბში მოეხარშა ნინო გვენეტაძე და გირგვლიანის მკვლელების მოსამართლე. რადგან მართლმსაჯულება ვახსენეთ, აუცილებლად უნდა ვთქვა სრულიად აბუჩად აგდებულ სასამართლო სისტემაზე ორიოდე სიტყვა. ხშირად შეიძლება გავლენიანი პირის ერთმა არასწორმა ფრაზამ მნიშვნელოვნად დააზიანოს საქმე. გასული წლის მიწურულს ერთ-ერთი არხის მეშვეობით ბიძინა ივანიშვილის მიერ მურუსიძის დადებითმა შეფასებებმა ლამის სასამართლო სისტემის დამოუკიდებლობის სიმბოლოდ აქცია კაცი, რომელიც აქამდე წინა ხელისუფლების უსამართლო სასამართლოს სიმბოლო იყო.

სამწუხაროდ, მურუსიძის თემა ქვეყანაში გამოყენებულია მუდმივი შფოთისა და არეულობის შესანარჩუნებლად. ის პოლიტიკური ძალები, რომლებიც მოქმედებენ დევიზით “რაც უარესია, ის უკეთესია”, სარგებლობენ რა მუდმივი შფოთის დამნერგავი სატელევიზიო სივრცით, ცდილობენ საზოგადოებამ ვეღარ გაარჩიოს ერთმანეთისგან ტყუილ-მართალი.

- რას ფიქრობთ, მიხეილ სააკაშვილის უკრაინულ კარიერასა და მის შესაძლო პრემიერმინისტრობაზე?

- სხვადასხვა მედიასაშუალებით არაერთხელ ვურჩიე სააკაშვილს, თავი შეეკავებინა ისეთი ნაბიჯებისგან, რაც საზიანო შეიძლება ყოფილიყო მისი სიცოცხლისთვის. ახლაც იმავეს ვიმეორებ. ახლახან გავეცანი უკრაინულ მედიაში გამოქვეყნებულ მასალებს, სადაც ლაპარაკია იმაზე, თუ რა ძალებს უპირისპირდება სააკაშვილი. მათი ინტერესები იმხელაა, რომ შესაძლოა უკრაინაში სააკაშვილის ლიკვიდაციაზე რეალურად იფიქრონ. ძალიან არ მინდა სააკაშვილს საკუთარი კარიერული სურვილები ასე ძვირად დაუჯდეს.

„კვირის პალიტრა“, 29 თებერვალი, 2016 წელი

ინტერვიუ ნინო გოგუაძესთან: შურისძიება 5 თვის შემდეგ?!

ეკა მიშველაძე: „ჩვენ მშვიდი­ და ბედნიერი ცხოვრება გვქონდა და გვექნება კიდეც…“

რუსუდან შელია

(შემოკლებით)

26 თებერვალს საბურთალოს “საძმოს” სასაფლაოზე, ლევან მიქელაძის საფლავთან “თავისუფალი დემოკრატების” გენერალური მდივანი ალექსი (ბუკა) პეტრიაშვილი დაჭრეს. მძიმე ოპერაციის შემდეგ, მისი ჯანმრთელობის მდგომარეობა სტაბილურია, თუმცა როგორც ექიმები აცხადებენ, მას სამი ჭრილობა ცეცხლსასროლი იარაღით აქვს მიყენებული – ორი ტყვია ქვემო კიდურებში მოხვდა, ერთი კი თირკმლის მიდამოებში, რომლის ამოღებისგანაც ექიმებმა თავი შეიკავეს. რა მოხდა საბურთალოს სასაფლაოზე, ამის შესახებ გვიყვება “თავისუფალი დემოკრატების” ერთ-ერთი ლიდერი ნინო გოგუაძე,­ რომელმაც ინფორმაცია ალექსი პეტრიაშვილისგან მიიღო:

- როგორც კი ბუკა გონზე მოვიდა, ოჯახის წევრების შემდეგ მის სანახავად მეც შევედი. ვერ აღგიწერთ, რა მძიმე სანახავი იყო. ჩემი თხოვნით, მან დეტალურად გაიხსენა, რა მოხდა იმ ავბედით დღეს საბურთალოს სასაფლაოზე.­..

(…)

მსგავსი­ ფაქტები მხოლოდ­ რუსეთში ხდება, ჩვენ კი ეს 90-იან წლებში გავიარეთ. ხელი­სუფლებამ­ დროულად უნდა დააკავოს შემს­რულებლები. თუ დანაშაულს ვერ გახსნიან, მძიმე პოლიტიკური პასუხისმგებლობა დაეკისრებათ.

- თქვენ ზემოთ შეკვეთილი მკვლელობა ახსენეთ. ალბათ, გაჩნდება კითხვა, თუ პეტრიაშვილის მოკვლა სურდათ, რატომ ესროლეს ქვედა კიდურებში ან მუცელში?

- როგორც ამბობენ, მუცელში­ სროლით ადამიანს ტანჯვით სიკვდილისთვის იმეტებენ. ჯერჯერობით, ბუკასთან გამომძიებლები არ შესულან, რადგან სუსტადაა და დაკითხვა არ შეიძლება. რაც შეეხება ვერსიებს, ეს მხოლოდ სპეკულაციებია. მით უმეტეს, ჩვენ ვერსიებზე საერთოდ არ გვისაუბრია და საზოგადოებას გამოძიების დასრულებამდე მოთმინებისკენ მოვუწოდეთ. თუმცა ის, რომ დღისით, მზისით, ოპოზიციური პარტიის გენერალურ მდივანს დემონსტრაციულად და ცინიკურად ესხმიან თავს, ქვეყანაში პოლიტიკურ კლიმატსა და კრიმინოგენულ ვითარებაზე ცალსახად მიანიშნებს.

ჩვენი გაღიზიანება უმრავლესობის წევრების მინიშნებებმაც გამოიწვია. თურმე ფეხებში სროლა ტრადიციების მაჩვენებელია. იქნებ ბატონმა ნუკრი ქანთარიამ განგვიმარტოს, რა ტრადიციებზე საუბრობს, რადგან ასეთს ჩვენ არ ვიცნობთ და ამ მენტალიტეტით არც გვიცხოვრია. რა ტრადიციებს­ გვიმკვიდრებენ უმრავლესობის წევრები? რაც უნდა პირადი მოტივი ყოფილიყო, თავდასხმა თუნდაც ყოფით ნიადაგზე დაუშვებელია. ან რატომ აწვდიან ეს ადამიანები საზოგადოებას მზა რეცეპტს და საიდან იციან, რომ პირად ანგარიშსწორებასთან გვაქვს საქმე?

- თქვენ მიიჩნევთ, რომ თავდასხმა პოლიტიკური მოტივით მოხდა?

- იქნებ პირადი მოტივების უკან პოლიტიკური ბერკეტებია? საერთოდ, გახმაურებული მკვლელობა პირადი მოტივებით იფუთ­ება ხოლმე.

- რას გულისხმობთ?

- არ დავაკონკრეტებ… არაფერს ვამტკიცებ, უბრალოდ, ვამბობ, რომ უმრავლესობის წევრებისგან პირად მოტივებზე საუბარი სირცხვილია. ჩვენი პარტიის წევრებს წარმოდგენა არა გვაქვს, რა მოხდა და, ჯერჯერობით, არც ეჭვებზე ვისაუბრებთ… ამაზე მხოლოდ ის ადამიანები საუბრობენ, რომლებიც კვალის არევას ცდილობენ. იმედია, საქმე მალე გაიხსნება და როგორც შემსრულებლები, დამკვეთებიც კანონის წინაშე პასუხს აგებენ.

————

ალექსი პეტრიაშვილზე თავდასხმის ფაქტს ქვეყანაში სრული განუკითხაობის დადასტურებად აფასებს “თავისუფალი დემოკრატების” ლიდერი ირაკლი ალასანიაც:
“ალექსი პეტრიაშვილზე თავდასხმა ქვეყანაში არსებულ სრულ განუკითხაობაზე მიუთითებს, თანაც, ეს ფაქტი ჩვენს პარტიაზე თავ­დასხმაა. ამასთან, მაშინ, როდესაც ერთ-ერთი პოლიტიკური ძალის გენერალურ მდივანს ლაჩრული ჩასაფრებით მეგობრის საფლავზე­ ცეცხლსასროლი იარაღით სამ ჭრილობას აყენებენ, ეს კიდევ ერთხელ მიანიშნებს, რომ ქვეყანაში პრაქტიკულად ყველა მოქალაქე დაუცველია. წინასწარ შეფასებებს­ არ გავაკეთებ, რადგან იმედია, გამოძიებას ესმის, რამდენად სერიოზულად დგას საკითხი და სწრაფად დაა­დგენს ამ ლაჩრული მკვლელობის­ მცდელობის შემსრულებლებსაც და შემკვეთებსაც”.

————

ვის ასახელებენ შემკვეთად პეტრიაშვილის ახლობლები

ალექსი პეტრიაშვილისა და ეკა მიშველაძის ახლობლები, რომლებმაც ამ ეტაპზე ვინაობის გამხელისაგან თავი შეიკავეს, მომხდარის შესახებ მთავარ ვერსიად მაინც პირად შურისძიებას განიხილავენ. მათი თქმით, სანამ ალექსი პეტრიაშვილს გაიცნობდა, ეკა მიშველაძეს რომანი ჰქონდა ერთ-ერთ მსხვილ ბიზნესმენთან (რომელიც ამჟამად უცხოეთში ცხოვრობს), რასაც ჟურნალისტი თავის დროზე არც მალავდა. როდესაც ამ ბიზნესმენმა მიშველაძისა და პეტრიაშვილის სასიყვარულო ურთიერთობის შესახებ შეიტყო, ძალზე მძაფრი რეაქცია ჰქონდა და პოლიტიკოსს ფიზიკური ანგარიშსწორებითაც დაემუქრა. ახლობლების თქმით, პეტრიაშვილს და ამ ბიზნესმენს საერთო სამეგობრო წრე ჰყავთ და სწორედ მათი მონაწილეობით “საქმე გაირჩა”, იყო ძალზე მწვავე საუბრები, რის შესახებაც თბილისში საკმაოდ ბევრმა ადამიანმა იცის. ამ შეხვედრის შემდეგ თითქოს კონფლიქტი ამოიწურა, 2015 წლის ოქტომბერში პეტრიაშვილი და მიშველაძე დაქორწინდნენ, მაგრამ… პეტრიაშვილის ახლობლებს უჭირთ დაკონკრეტება, რა მოხდა წყვილის ქორწინებიდან ხუთი თვის შემდეგ – მიშველაძის ყოფილი მეგობარი მამაკაცი ვინმემ წააქეზა, მისი პროვოცირება მოახდინა თუ მამაკაცური ღირსების შეურაცხყოფა ბოლომდე ვერ “მოინელა” და პეტრიაშვილის დასჯა მაინც გადაწყვიტა… თუმცა, დაველოდოთ და ვნახოთ, რა შედეგით დასრულდება გამოძიება, თუმცა პეტრიაშვილის ახლობლები დარწმუნებული არიან, რომ კვალი სწორედ ზემოხსენებული ბიზნესმენისკენ მიდის.

“იმედი მაქვს, ის ნაძირალა სათანადოდ დაისჯება“

ეკა მიშველაძე: “გამომძიებლებს ყველა დეტალი აინტერესებდათ და როგორც შემეძლო, ყველა კითხვას ვუპასუხე. მათ ისიც მკითხეს, თავად ხომ არა მაქვს ვერსია ან ვინმეზე ხომ არ ვეჭვობ. ამ ეტაპზე არაფრის თქმა არ შემიძლია, რადგან ძნელია ასეთ ვითარებაში ვინმეს ხელი დაადო. ამაზრზენი და სასტიკი რამ მოხდა და იმედი მაქვს, ის ნაძირალა,­ ვინც ბუკა სასიკვდილოდ გაიმეტა, სათანადოდ დაისჯება. ჩვენ მშვიდი­ და ბედნიერი ცხოვრება გვქონდა და გვექნება კიდეც ყველა იმ ადამიანის სამწუხაროდ, ვინც ასეთი სისასტიკე და სისაძაგლე ჩაიდინა”.

„რეზონანსი//მთელი კვირა”, 29 თებერვალი, 2016 წელი

ინტერვიუ მაია ფანჯიკიძესთან: „ალექსი პეტრიაშვილმა ვერც ერთი თავდამსხმელი ვერ ამოიცნო.. იგი საღ გონებაზეა, კონტაქტურია და იგი თავის სათქმელს აუცილებლად იტყვის“

თიკო ოსმანოვა

“ალექსი პეტრიაშვილმა ვერცერთი თავდამსხმელი ვერ ამოიცნო, რაც იმაზე მოწმობს, რომ ეს იყო შეკვეთილი ტერორისტული აქტი. მოტივებზე და მიზეზებზე საუბრისგან ჯერჯერობით თავს ვიკავებთ. ეს არის სპეკულაცია, რომელიც გავლენას მოახდენს გამოძიებაზე”, – ამბობს “მთელ კვირასთან” საუბრისას “თავისუფალი დემოკრატების” ერთ-ერთი ლიდერი მაია ფანჯიკიძე. ალექსი პეტრიაშვილის თავდასხმის დეტალებზე და დანაშაულის შესაძლო მოტივებზე “მთელი კვირა” მაია ფანჯიკიძეს ესაუბრა.

„26 თებერვალს იყო ლევან მიქელაძის დაბადების დღე. ეს ადამიანი ჩვენი პარტიისთვის იყო განსაკუთრებული პიროვნება, ალექსი პეტრიაშვილისთვის კი – ძალიან ახლო მეგობარი, რომლის სიკვდილი მაშინ იყო საკმაოდ საიდუმლოებით მოცული და ამან ძალიან იმოქმედა მის ყველა ახლობელზე. პეტრიაშვილს ჰქონდა ტრადიცია, რომ იგი მიქელაძის დაბადების დღეზე მიდიოდა საფლავზე და ეს იცოდა აბსოლუტურად ყველამ. როგორც ჩანს, როდესაც იქ მივიდა, ელოდებოდნენ ჩასაფრებული ლაჩარი მკვლელები.

ისინი ორნი იყვნენ. აქედან ერთს ეკეთა ნიღაბი, მეორეს – არა, მაგრამ თავად პეტრიაშვილმა ვერცერთი ვერ ამოიცნო, რაც მოწმობს, რომ ეს იყო შეკვეთილი ტერორისტული აქტი. თავში აქვს ჩარტყმული ჩაქუჩი თუ ურო და ნასროლი აქვს 5 ტყვია, რომლიდანაც 3 მოხვდა. იყო საკმაოდ მძიმედ დაჭრილი, მაგრამ ექიმების დახმარებით იგი გადაარჩინეს. ახლა მისი მდგომარეობა სტაბილურია და გამოჯანმრთელების გზაზეა», – ამბობს მაია ფანჯიკიძე.

- ოპერაციის შემდეგ თუ ესაუბრეთ და თავად რას ფიქრობს მომხდარზე?

- როცა ნარკოზიდან გამოვიდა, იყო აბსოლუტურად ადეკვატური და კონტაქტური. გადაიყვანეს ინტენსიური თერაპიის პალატაში. პრინციპში, ექიმმა თქვა, რომ მისი გადაყვანა შეიძლება ჩვეულებრივ პალატაში, მაგრამ რადგან ერთი ტყვია თირკმელთან არის და არ ამოუღიათ, ამის გამო დაკვირვების მიზნით დატოვეს რეანიმაციაში. მას ჯერ ესაუბრა ირაკლი ალასანია, შემდეგ მეც ვნახე. ამბობს, რომ სასაფლაოზე შეხვდა სამი მეგობარი, ისინი ერთად იდგნენ, როდესაც ეს ორი პირი თავს დაესხა.

როგორც ცნობილია, ერთ-ერთი მეგობარი იყო კახა საკანდელიძე. დანარჩენები მე არ ვიცი, თუმცა ალბათ გამოვლენ და იტყვიან. მათ სიტუაციის განმუხტვა სცადეს, მაგრამ მათ დაემუქრნენ და ეს ვერ მოხერხდა. ამას ასდის შეკვეთილი აქტის სუნი, რადგან იყვნენ სრულიად უცნობი ადამიანები. ერთს ნიღაბი ეკეთა და მეორეს სახე დაფარული ჰქონდა და მისი ამოცნობა ვერცერთმა ვერ მოახერხა. ის, რომ უცნობები არიან, ნამდვილად ეჭვს არ იწვევს. ვფიქრობ, როდესაც ოპოზიციური პოლიტიკური პარტიის “თავისუფალი დემოკრატების” გენერალურ მდივანზე ხდება შეიარაღებული თავდასხმა დღისით და მზისით ქალაქის ცენტრში, ეს არის უკვე პოლიტიკური მოვლენა რა მიზეზიც უნდა ჰქონდეს ამ თავდასხმას. რაც შეეხება მიზეზს ან მოტივს, ჩვენ ყოველგვარი სპეკულაციისგან თავს ვიკავებთ, რადგან მიგვაჩნია, რომ გამოძიება უნდა ჩატარდეს სასწრაფოდ და ეფექტურად.

შს მინისტრმა, რომელიც მისული იყო პეტრიაშვილის სანახავად, თქვა, რომ საქმე გაიხსნება. ამიტომ, სანამ გამოძიება რამეს იტყვის, მანამდე ყველამ თავი უნდა შეიკავოს სპეკულაციების და ვარაუდის გამოთქმისგან.

- და მაინც რას უკავშირებთ ამ ფაქტს – პოლიტიკურს თუ პირად მოტივს? უმრავლესობის ერთ-ერთმა ლიდერმა თქვა, რომ ამ ფაქტს წინაისტორია აქვს, რომელიც ყველამ იცის…

- კვაჭანტირაძეს, ქანთარიას, ვახტანგ ხმალაძეს, ყველას, ვინც მიიჩნევს, რომ ეს შეიძლება იყოს პირადი ანგარიშსწორება, ვეტყვი, რომ თავი შეიკავონ ყოველგვარი ვერსიების გამჟღავნებისგან. მათ არ აქვთ არანაირი საფუძველი, რომ რამე განაცხადონ. როდესაც უმრავლესობის წევრები გამზადებული ვერსიებით გვევლინებიან მომხდარიდან სულ რაღაც 1-2 საათის შემდეგ, ეს ძალიან დიდ ეჭვს იწვევს საზოგადოებაში.

ჯერ ერთი, აბსოლუტურად არ აქვს მნიშვნელობა, რა უდევს საფუძვლად ამ თავდასხმას. ფაქტი ერთია – ქვეყანაში კრიმინოგენური მდგომარეობა რთულადაა, მოქალაქეები დაუცველები არიან. ასეთ ფაქტებს უკვე სისტემატური ხასიათი მიეცა. ეს არის პირველ რიგში საგანგაშო და ამ ფონზე გამზადებული ვერსიები უმრავლესობის წევრებისგან ძალიან სახიფათო თამაშია. ასე რომ, ფრთხილად იყვნენ. მათ არაფერი არ იციან, რა მოხდა და როგორ მოხდა. ჩვენც კი არ ვაძლევთ თავს უფლებას, რაიმე ვარაუდი გამოვთქვათ და მითუმეტეს ის ადამიანები, რომლებსაც ალექსი პეტრიაშვილთან ახლობლური ურთიერთობა არ ჰქონიათ, ნუ იძლევიან გამზადებულ რეცეპტებს და ნუ ახდენენ გავლენას გამოძიებაზე.

- რას ამბობს თავად პეტრიაშვილი? ამ ინციდენტამდე ემუქრებოდნენ თუ არა, ან ხომ არ უთვალთვალებდნენ?

- ამის თაობაზე ზუსტად არაფერი ვიცი. ჭორაობას ნამდვილად ვერ ავყვები. ალექსი პეტრიაშვილი საღ გონებაზეა, კონტაქტურია და იგი თავის სათქმელს აუცილებლად იტყვის.

- რა ურთიერთობა ჰქონდა ბიზნესმენ სოსო დოლიძესთან?

- ვიცი მხოლოდ ის, რომ ასეთი გვარების გაჟღერებას გარკვეულწილად ხელი შეუწყო უმრავლესობის მხრიდან გაკეთებულმა კომენტარებმა, რომ ეს ყველაფერი მიდის პირად დაპირისპირებამდე და მას აქვს ყოფითი მიზეზი, რისი საფუძველიც არავის არ გააჩნია.

- “რეზონანსმა” ეს ვერსია მანამდე გაიგო, სანამ უმრავლესობა ამაზე კომენტარს გააკეთებდა…

- ვერ გეტყვით, არავის პირადი ცხოვრებით არ ვინტერესდები იმდენად, რომ რაღაც კონკრეტული ინფორმაციები მქონდეს. არ აქვს არავითარი მნიშვნელობა, რა არის მოტივი. მთავარია, ამ ფაქტს ჰყავს თვითმხილველები და შსს სამინისტროს აქვს ყველა საშუალება, რომ ცხელ კვალზე გახსნას დანაშაული, რადგან ამ სამი ადამიანის გარდა არის კიდევ ერთი ქალბატონი, რომელმაც დაინახა ეს ყველაფერი. იქ ალბათ არსებობს კამერები და სხვა მეთოდები, რომ დადგინდეს, ვინ იყო სასაფლაოზე.

- როგორ ფიქრობთ, მღებრიშვილის უწყება მოახერხებს საქმის ცხელ კვალზე გახსნას?

- ეს სამართალდამცავ ორგანოებზეა დამოკიდებული. არცერთ მოწმეს არ უთქვამს უარი მათთან თანამშრომლობაზე. შესაბამისად, ვფიქრობ, რომ თუკი მართლაც მთელი რესურსი გადასროლილია ამ საქმის გამოძიებისკენ, როგორც პრემიერმა თქვა, შედეგიც მალე უნდა დაიდოს.

„ახალი თაობა“, 29 თებერვალი, 2016 წელი

ინტერვიუ შალვა ხაჭაპურიძესთან: „ალექსი პეტრიაშვილზე თავდასხმა პოლიტიკასთან კავშირში არ არის“

გაუარესდა თუ არა ქვეყანაში კრიმინოგენური სიტუაცია? ეს კითხვა ბოლო პერიოდში აქტუალურად ისმის. აღნიშნულ საკითხთან დაკავშირებით „ახალ თაობას“ იურისტი, უფლებადამცველი შალვა ხაჭაპურიძე ესაუბრა.

- ბატონო შალვა, ხშირად გვესმის შეფასებები, რომ ქვეყანაში კრიმინოგენური ფონი დამძიმდა, რომ ამ ქვეყანაში ცხოვრება სულ უფრო სახიფათო ხდება. რამდენად რეალურია ეს შეფასებები?

- როდესაც ვსაუბრობთ იმაზე, რომ გაიზარდა დანაშაული, ამ დროს ყოველთვის ვეყრდნობით სტატისტიკას. ჩემი ყოველდღიური საქმიანობაა სისხლის სამართალი და მე ჩემს სტატისტიკას ვეყრდნობი.

- და რისი თქმა შეგიძლიათ?

- ვერ გეტყვით, რომ გაზრდილია. გაიზარდა, ალბათ, დანაშაულების გარკვეული წილი. ეს უფრო არის წვრილმანი ქურდობები. მეორე ტიპის კატეგორია დანაშაულისა, რამაც იმატა, ეს შეიძლება იყოს დაკავშირებული ცეცხლსასროლი იარაღის ხმარებასთან. ესეც არ არის საგანგაშოდ გაზრდილი. ეს უფრო გაპიარდა. ამან კი საზოგადოებაში გააჩინა განცდა, რომ დანაშაულმა იმატა.

- სინამდვილეში რა ხდება? არ აღინიშნება მატება?

- მე პრაქტიკაში მიხდება ამ ყველაფერთან შეხება და იგივე სტატისტიკაა, რაც იყო ნაციონალური მოძრაობის დროს, თუმცა არ დაგვავიწყდეს, მათ დროს რა ხდებოდა. ხალხს ქუჩაში ცხრილავდნენ, იყო ძალადობა, თუმცა, ამ ტერორის მიუხედავად, დანაშაული მაინც ხდებოდა. დანაშაული ყველგან ხდება, ყველაზე დემოკრატიულ ქვეყანაშიც კი. აქ დიდი მნიშვნელობა აქვს საზოგადოების თვითშეგნებასაც.

- რას გულისხმობთ?

- ძალიან არაპოპულარულ რაღაცას ვიტყვი, მაგრამ კრიმინალების დიდი ნაწილი ნაციონალების დროს არ ჩანდა, მიყუჩებული იყვნენ, ხმას არ იღებდნენ, მაგრამ, როგორც კი იგრძნეს დემოკრატიის სიო, მაშინვე გააქტიურდნენ. ხშირად გვესმის ტელევიზიით, აქ დაჭრეს, იქ დაჭრეს. ადრე ამის თქმასაც ვერ ბედავდნენ, თუმცა ამ დანაშაულების 99%-ს თუ გადავხედავთ, ეს უფრო საყოფაცხოვრებო ნიადაგზე ჩადენილი დანაშაულია.

- აქვე გკითხავთ ალექსი პეტრიაშვილზე განხორციელებულ თავდასხმაზეც. უამრავი ვერსია მოვისმინეთ, რომ ეს იყო შეკვეთილი მკვლელობის მცდელობა, ზოგმა პოლიტიკური სარჩული დაუდო. რას იტყვით თქვენ?

- მიმდინარეობს გამოძიება. თუ რა იყო და როგორ იყო, ამაზე წინასწარ საუბარი არ არის სწორი, მაგრამ არ მგონია, რომ ეს იყოს დაკავშირებული პოლიტიკასთან. დღეს საქართველოში არ არის ისეთი ცხელი პოლიტიკური ფონი, რომ ამის ეჭვი გაგვიჩნდეს. თვითონ ეს პარტიაც, რომლის გენერალური მდივანიც გახლავთ ბატონი ალექსი პეტრიაშვილი, არ არის ისეთ მწვავე და ხელჩართულ სიტუაციაში მმართველ პარტიასთან ან რომელიმე სხვა პოლიტიკურ ძალებთან, რომ ამას ეს შედეგი მოჰყოლოდა. ასეთი ტიპის დანაშაულს ყოველთვის თან ახლავს გარკვეული წინაპირობა.

- ანუ?

- რაღაც პირობის გამო ხდება ეს დანაშაული. ეს რომ ხულიგნური ქვენაგრძნობით ჩადენილი დანაშაული არ არის, ამაზე მეტყველებს ის, რომ თავდამსხმელები ნიღბებით იყვნენ.

- რა იყო მიზეზი და მიზანი?

- ვიღაცამ განზრახ დაგეგმა და განახორციელა. ეს პოლიტიკასთან კავშირში არ არის, დეტალებს კი გამოძიება გაარკვევს. დამნაშავეები რომ არ ყოფილიყვნენ ნიღბებით, მაშინ სხვა ვერსიაც გაჩნდებოდა.

- კერძოდ?

- ზოგადად სასაფლაოებზე ხშირია დანაშაული. მკვლელობებიც ხშირად ხდება და სხვა ტიპის დანაშაულიც. როგორც წესი, ეს საეკლესიო დღესასწაულებზე ხდება და სიმთვრალის ფონზე. მე ყველას მოვუწოდებ, თავი შეიკავონ პოლიტიკური განცხადებების კეთებისგან. ეს ორი დღეა ვუსმენ დემაგოგიურ განცხადებებს, რომ ამ ქვეყანაში ცხოვრება აღარ შეიძლება, რომ გარეთ გასვლა სახიფათოა და ასე შემდეგ. კარგით რა!

- არ ეთანხმებით?

- არა! ამერიკის პრეზიდენტი მოკლეს და იქ არ გაუკეთებიათ ასეთი განცხადებები. კი, ცუდია, რომ დანაშაული ხდება, არ უნდა ხდებოდეს. მე მოვუწოდებ პოლიციას, დროულად გახსნას ეს დანაშაული და, დარწმუნებული ვარ, ამ დღეებში გაიხსნება.

- თქვენ აღნიშნეთ, რომ იმატა საყოფაცხოვრებო ნიადაგზე ჩადენილმა დანაშაულმა. რა ხდება, რატომ იმატა ასე მკვეთრად?

- ძალიან მძიმე სოციალური ფონია ქვეყანაში. ამ მძიმე სოციალურ ფონს ემატება ის მძიმე ფსიქიკური ფონი, რომელიც ზოგადად ჩვენს ქვეყანაშია. სულ ვამბობდი 90-იან წლებში, მოვა დრო და ჩვენი მოსახლეობის 80-90% ფსიქიატრთან ვიქნებით სამკურნალო-მეთქი. ამას ვამბობ ისეთ ადამიანებზე, რომელთაც სოციალურად ყველაფერი მოგვარებული აქვთ. ამ კატეგორიაშიც კი მძიმე ფსიქიკური ფონია და ახლა ამათ დაუმატე ის კატეგორია, რომელიც სოციალურად უმძიმეს სიტუაციაშია. ამას დაამატეთ ალკოჰოლიზმი, რომელიც მძვინვარებს ქვეყანაში. ეს სერიოზული ჭირია. პირდაპირ ქუჩაში სვამს ახალგაზრდობა.

- როდესაც მარიხუანის დეკრიმინალიზაციაზე საუბრობენ, ეს საკითხი არ არის მისახედი?

- სასაცილოა, მარიხუანაზე გამოვდივართ და ქვეყანას ვანგრევთ, აქვე მოშხამული არაყი იყიდება, რომელიც წამლავს ადამიანის გონებას. მქონია შემთხვევა, დაუკავებიათ კაცი, რომელმაც სიმთვრალეში დანაშაული ჩაიდინა, დილით შევდივარ კაპეზეზე და საერთოდ არ ახსოვს, რა ჩაიდინა. ეს ფსიქიატრიული სამსახურებიც საერთოდ მოიშალა. კიდევ ერთი სერიოზული პრობლემა – შემოიყარა უამრავი იარაღი. საიდან მოვიდა ამდენი მაკაროვი და ტეტე?! კიდევ ერთი სერიოზული პრობლემა…

- რომელი?

- სკოლამ დაკარგა თავისი ფუნქცია. დღეს ხმამაღლა გვიწევს იმის აღიარება, რომ სკოლა არათუ აღზრდას არ აკეთებს ბავშვებისას, სასკოლო საგნებსაც კი ვეღარ ასწავლიან.

- რა არის ამის მიზეზი?

- ის, რომ სისტემა ვერ ჩამოვაყალიბეთ, ვერ შევქმენით. ჩავხედოთ თითოეულ სფეროს. ყველგან ერთი და იგივე სიტუაციაა. არც ის დაგვავიწყდეს, რომ ის მოძალადეები, რომლებიც იყვნენ ნაციონალური მოძრაობის დროს, ბევრი სისტემაში მუშაობდა და ბევრი სისტემის გარეთ იყო. ესენი ყველანი გარეთ არიან. ვინმე დაისაჯა? არავინ!

- ანუ არის იმის საფრთხე, რომ კვლავ დაიძაბოს სიტუაცია? კონკრეტულ ძალას თუ დასჭირდა, ამას სათავისოდ გამოიყენებს?

- რა თქმა უნდა, გამოიყენებს. ეს აქციები, საპროტესტო გამოსვლები, იგივე ის, რაც ტყიბულში ხდება, სცილდება პროტესტის ფორმას. ეს ყველაფერი შესაძლოა სხვა ფორმებში გადაიზარდოს.

- ანუ მართვადია ეს აქცია?

- მე ვერ ვიტყვი, რომ ეს ახალგაზრდები დღეს ვინმესგან იმართებიან, მაგრამ, არ არის გამორიცხული, რომ მათი გამოყენება მოხდეს შავბნელი მიზნებისთვის. ამიტომ ეს ძალიან საფრთხილო თემაა.

„რეზონანსი//მთელი კვირა”, 29 თებერვალი, 2016 წელი

დიდი სოციალური კრიზისის დასაწყისი

საყოველთაო გაფიცვების ტალღა, შესაძლოა, ტყიბულისა და ქსნის პარალელურად ჭიათურას, ზესტაფონსა და კაზრეთსაც მოედოს

ეკატერინე ბასილაია

ტყიბულის მაღაროელთა გაფიცვებმა, სადაც ადამიანები უკვე ორ კვირაზე მეტია მხოლოდ იმას ითხოვენ, რომ ისინი მუშებად ჩათვალონ და არა მონებად და ადამიანური ხელფასი ჰქონდეთ, ის შედეგი მოიტანა, რომ ახლა ტყიბულის მოვლენები საყოველთაო ყურადღების ცენტრშია. ეს პროტესტი ერთი ქალაქის “ორთქლის გამოშვებად” დარჩება, თუ ქვეყანაში დიდი სოციალური საპროტესტო მოძრაობის დასაწყისად გადაიქცევა, ეს ჯერ არავინ იცის, თუმცა ამგვარ ნიშნებზეც უკვე ბევრი მიუთითებს.

ტყიბულში მუშების გაფიცვის მე-16 დღეა, ქსანში – 24-ე, დიდი ალბათობაა, რომ ამ რიგში შემდეგი ზესტაფონი იყოს.

“დაძაბულობა ბევრგანაა. მაგალითად, ზესტაფონის ფეროში ისეთივე მძიმე მდგომარეობაა, როგორც ტყიბულში. სექტემბრიდან მიდის მოლაპარაკებები და უშედეგოდ. ბოლო 21-დღიანი ვადა შემდეგ კვირას იწურება და ძალიან დიდი შანსია, გაფიცვაზე გავიდეთ. ასევე პრობლემებია კაზრეთშიც, “არემჯი გოლდსა” და “არემჯი კუპერში”, სადაც 2014 წელს იყო 39-დღიანი ყველაზე ხანგრძლივი გაფიცვა და არის სოციალური აფეთქების საშიშროება, რადგან იქ დღესაც მონათმფლობელობაა, მუშები უშიშროების სამსახურს ჰყავს დაშინებული და შეიძლება ეს ყელში ამოუვიდეთ. ასევე დროებითი სიმშვიდეა ჭიათურაში. 4 თვით გაჩერდა ჭიათურის მაღარო, ის 20 მაისს უნდა ამუშავდეს და იქაც უამრავი პრობლემაა. ასევე დიდი წნეხია რკინიგზაშიც…”, – ამბობს გაერთიანებული პროფკავშირების თავმჯდომარის მოადგილე გოჩა ალექსანდრია და არჩევნებამდე მუშათა სხვა გაფიცვებსაც არ გამორიცხავს.

დიდი საპროტესტო მოლოდინის მიზეზი არც თუ ცოტაა. “რაც ტყიბულში ხდება, ეს პირველი მერცხალია. სამომავლოდ ასეთი ბევრი კერა შეიძლება გაჩნდეს,” – აცხადებს საქართველოს განვითარების კვლევითი ინსტიტუტის დამფუძნებელი გია ხუხაშვილი: “იმიტომ, რომ სოციალური ფონი ქვეყანაში საკმაოდ დაძაბულია. პლუს ის, რომ ახლა საარჩევნო ციკლში ვართ და ამ პროცესში პოლიტიკოსები შედიან. ბუნებრივია, ბევრი პოლიტიკური ძალა დაინტერესებულია სოციალური პროტესტის რადიკალიცაზიით და ეს საპროტესტო რისკების კიდევ უფრო გამწვავებას ხელს შეუწყობს”.

ქსანი და ტყიბული – რა ელით გაფიცულებს

მუშათა გაფიცვები ორ კვირაზე მეტია ორ სხვადასხვა ადგილზე პარალელურად მიმდინარეობს. ერთი 5 თებერვალს ქსნის მინის ტარის ქარხანაში დაიწყო, სადაც 200-ზე მეტი მუშა გაიფიცა; 13 თებერვალს კი ტყიბულში 1200-მა მაღაროელმა თქვა უარი მუშაობაზე მანამ, სანამ შრომის ადამიანურ პირობებს არ შეუქმნიან. ორივე შემთხვევაში უპირველესი მოთხოვნა ხელფასის ზრდაა. ორივე შემთხვევაში დიდი უარის შემდეგ დამსაქმებლებმა მაქსიმუმ მხოლოდ 5%-იან მატებაზე დაიწყებს საუბარი, რაზე დათანხმებასაც მუშები არ აპირებენ. ქსანში გაფიცული 200-ზე მეტი მუშა საწარმოში დასაქმებული მუშების 90%-ია. მათი სამი მოთხოვნიდან უპირველესი ხელფასის 30%-ით გაზრდაა, რაც ბოლო წლებში ინფლაციისა და საწარმოში ახალი ღუმელების დამონტაჟებით გამოწვეული შრომის ნაყოფიერების ზრდას უკავშირდება. ქარხნის წინ განთავსებულ კარავში მუშები ღამეს მორიგეობით ახლაც ათევენ.

გაფიცვის ხელშემწყობი პროფკავშირებია. თურქმა დამსაქმებელმა მოლაპარაკების ნაცვლად გაფიცული ქართველი მუშების ჩასანაცვლებლად ოთხი თურქი შტრეიკბრეხერიც კი ჩამოიყვანა.

ქართველი მუშების მხარდამჭერი პატარა აქცია თურქეთშიც მოეწყო, ქართულენოვანი პლაკატებითა და ვიდეომიმართვით. მუშების მხარდასაჭერად უახლოეს დღეებში საქართველოში ჩამოსვლას აპირებენ თურქეთის პროფკავშირების საერთაშორისო მდივანი და ვიცე-პრეზიდენტიც.

პარასკევს კომპანიის ხელმძღვანელობამ ხელფასის მხოლოდ 4.9%-იან გაზრდაზე დაიწყო საუბარი. ითქვა, რომ გასული წლის ინფლაციის ოფიციალური მაჩვენებელი 4.9% იყო და ამის მიხედვით მოახდენდნენ ხელფასის ინდექსირებას. გაფიცულები ამ შემოთავაზებას არ დათანხმდნენ. ახლა სამშაბათის დადგომას ელოდებიან, როდესაც თურქეთიდან უნდა ჩამოვიდეს დირექტორი და ახალი წინადადება ჩამოიტანოს.

მიუხედავად იმისა, რომ ქსნის გაფიცვიდან 24 დღე სრულდება და მედიამაც ეს არაერთხელ გააშუქა, საზოგადოების ფართო წრეებში და ხელისუფლებიდან ყურადღება მაინც უფრო ტყიბულისკენაა. შესაძლოა იმიტომ, რომ ტყიბულში 1200 მუშაა გაფიცული, გაფიცვა უკვე მთელ ქალაქს მოედო, საპროტესტო მოძრაობაში არა მარტო მუშები, მათი ოჯახის წევრები და მთელი ქალაქის მოსახლეობაა ჩართული, ადგილობრივი ხელისუფლების და მაჟორიტარი დეპუტატის ჩათვლით და ამდენად, დღეს ტყიბულის რაიონში სოციალური კრიზისია.

ტყიბულის მინდელისა და ძიძიგურის სახელობის ქვანახშირის მომპოვებელი შახტების მუშათა დიდმა ნაწილმა, 1200-მა მაღაროელმა, გაფიცვა ყველანაირი წინასწარი მხარდაჭერის გარეშე 13 თებერვალს თავად წამოიწყო ბოლო წლებში სერიოზულად შემცირებული ხელფასის 40%-ით ზრდისა და აუტანლად მძიმე სამუშაო პირობების გაუმჯობესების მოთხოვნით.

გაფიცვის პირველ კვირას ქსნის მუშების მსგავსად ყურადღებას მათაც არავინ აქცევდა, თუმცა, შემდეგ იმდენად მასობრივი გახდა პროტესტი, რომ მაინც შეძლეს ხელისუფლება აელაპარაკებინათ და სოლიდარობის აქციებიც გამართულიყო ტყიბულს გარეთ – თბილისსა და ბათუმში.

ტყიბულის მაჟორიტარმა დეპუტატმა ელისო ჩაფიძემ პარლამენტიდან მიმართა მთავრობას, რომ მთის კანონის მიღების შემდეგ ტყიბულელები დაისაჯნენ, რადგან საგადასახადო შეღავათი გააუქმდათ და მისი აღდგენა მოითხოვა, რაც საშემოსავლო გადასახდის 20%-დან 10%-მდე შემცირებას გულისხმობს.

პროტესტის გამწვავების შემდეგ ფინანსთა მინისტრმა გასცა დაპირება, რომ ეს შეღავათი აღუდგებოდა ყველას, ვინც ამით 1 იანვრამდე სარგებლობდა, მათ შორის უპირველესად ტყიბულის მაღაროელებს. საქართველოს შრომის, ჯანმრთელობისა და სოციალური დაცვის მინისტრის დავით სერგეენკოს განცხადებით კი, დამსაქმებელ-დასაქმებულებს შორის შრომით დავაში მოსალაპარაკებლად სამინისტროს წარმომადგენელი აქტიურად არის ჩართული და საკითხის მედიაციის გზით დარეგულირების იმედი გამოთქვა.

ტყიბულელების პრობლემის გარკვევაში ჩაერთო პრეზიდენტის მრჩეველიც.

ჯერჯერობით ტყიბულელი მაღაროელებისა და კომპანია “საქნახშირი ჯი-აი-ჯი ჯგუფის” ხელმძღვანელებს შორის შეთანხმება ვერ შედგა. კომპანიის ადმინისტრაციამ, რომელიც წინა დღეებში ირწმუნებოდა, რომ ქვანახშირის ფასი ძალიან დაეცა და ერთი თეთრითაც ვერ გაზრდიდა ხელფასს, პარასკევს განაცხადა, რომ მაღაროელებს ორი თვის შემდეგ ხელფასს 5%-ით მოუმატებს და ეს მაქსიმუმია, რისი შეთავაზებაც შეუძლიათ.

გაფიცულები ამ შეთავაზებას არ თანხმდებიან. არდათანხმების შემთხვევაში ადმინისტრაციამ ერთგვარი მუქარაც კი გააჟღერა – თუკი პროტესტი დიდხანს გაგრძელდება, შესაძლოა, გარკვეული უბნების კონსერვაცია მოგვიწიოსო, რაც იმას ნიშნავს, რომ მუშები საერთოდ უმუშევრები დარჩებიან.

როგორც პროფკავშირების წარმომადგენელი გოჩა ალექსანდრია ამბობს, ტყიბულთან დაკავშირებით ერთი სკანდალიცაა. 2011 წელს ტყიბულში პროფკავშირების მხარდაჭერით გაფიცვები იყო, რომლის დასრულებისას ხელშეკრულება გაფორმდა და მაშინდელმა დირექტორმა ხელი მოაწერა შეთანხმებას, რომ დამსაქმებელს მუშებისთვის ხელფასის ინდექსაცია ყოველ წელს უნდა განეხორციელებინა ოფიციალური ინფლაციის მაჩვენებლის მიხედვით. წლებია მუშები ამ შეთანხმების შესრულებას ითხოვდნენ. ამ დაანგარიშებით ბოლო 5 წლის განმავლობაში ინფლაციის ჯამი 14,7%-ია და გამოდის, ხელშეკრულებით პირდაპირი ვალდებულებაა, ხვეწნის გარეშე, მინიმუმ 14,7%-ით მაინც მოხდეს მაღაროელებისთვის ხელფასის მომატება.

ახლა ადმინისტრაცია თავიდან ირწმუნებოდა, რომ მაშინდელი დირექტორი უფლებამოსილი არ იყო, ხელშეკრულებაზე ხელი მოეწერა და თან, ხელმოწერა გაყალბებულია. შემდეგ კი გაყალბებაზე საუბარი იმით შეცვალეს, რომ მაშინ არა ხელშეკრულება, არამედ ურთიერთგაგების მემორანდუმი გაფორმდა, რასაც სავალდებულო ხასიათი არ აქვს.

გახდება თუ არა ტყიბული მასობრივი აქციების “პირველი მერცხალი”

“რაც დღეს ტყიბულში ხდება, ეს უბრალო გაფიცვა არ არის, ეს საპროტესტო მოძრაობაა და ტყიბულში ამან სოციალური კრიზისი უკვე გამოიწვია. ქსნისა და ტყიბულის გაფიცვები, ის, რომ ჭიათურა გაჩერებულია, ის, რომ რუსთავის ფოლადიდან 900 ადამიანია გაშვებული და ახლა პლუს 300 უხელფასო შვებულებაში გაუშვეს, მიუთითებს იმაზე, რომ მასშტაბურ სოციალურ-ეკონომიკურ კრიზისთან გვაქვს საქმე.

“ეს კრიზისი შესაძლოა გაღვივდეს და გაღვივების ხელშემწყობები ადვილად მოიძებნებიან, თან პოლიტიკურად ცხელი წელია. რაც უფრო მივუახლოვდებით არჩევნებს, ამ გულწრფელი პროტესტისათვის სხვა ფორმის მიცემის მოსურნე ხალხი ბევრი გამოჩნდება. ამიტომ ხელისუფლება ზედაპირულად ნუ უყურებს ამ პრობლემას”, – აცხადებს პროფკავშირების წარმომადგენელი გოჩა ალექსანდრია.

პოლიტოლოგ სოსო ცინცაძის შეფასებით, რაც ტყიბულში ხდება, ეს პირველი მწვავე სოციალური კრიზისია და იგი უშვებს შესაძლებლობას, რომ სხვა საწარმოს მუშებიც გაიფიცონ, მაგრამ იქვე ამბობს, რომ ეს რაიმე შედეგს მაინც არ გამოიღებს.

“ეს საწყალი მუშები ადამიანურთან მიახლოებულ ანაზღაურებას მოითხოვენ და არა გერმანელი და კანადელი მაღაროელის პირობებსა და ხელფასს. რუსეთისა და ჩინეთის დონეს თხოულობენ, მეტს კი არაფერს და მაგასაც არ აძლევენ.

“ორი დღეა ადმინისტრაციის წარმომადგენელს ვუსმენ და შუბლზე ძარღვი არ უკანკალებს, მაღაროელებს როგორც პირად მტრებს ისე უყურებს. შებრალებაც კი არ ეტყობა, რომ აი, კი, გვესმის თქვენი, მაგრამ ჩვენც გვიჭირსო. არა, არავითარი დათმობაო, – გაიძახის.

“შეიძლება სხვა საწარმოს მუშებიც გაიფიცონ, მაგრამ აქ ერთი რამეცაა – გაფიცვის ყოველი დღე მათთვის დამატებითი შიმშილია. სადილის დრო ყოველდღე მოდის, შვილები ჰყავთ და რაც უფრო დიდხანს გაგრძელდება ეს გაფიცვა, იძულებული გახდებიან, დათმონ.

“კომპანიის ხელმძღვანელობის ლოგიკაც ასეთია – სად წამიხვალთ, ხვალ მაინც იძულებული გახდებით, რომ დაბრუნდეთ და ჩემს კაპიკებზე იმუშაოთ, მშივრები ხომ არ მოკვდებითო.ეს არის ამაზრზენი. მე-17 საუკუნის ინგლისში იყო ასეთი სიტუაცია და ასეთი დამოკიდებულება მუშებთან. მაშინ გამწარებული ხალხი სამუშაო დაზგებსაც კი ამტვრევდა.

“ჩვენთან სოლიდარობა არ არის, პროფკავშირებიც კი ვერ ჩამოყალიბდა. კომუნისტების მიერ დატოვებულ ქონებას დაეპატრონნენ, მაგრამ როგორც სოციალური ძალა ვერ შეიქმნა. ევროპა შტრეიკბრეხერების სისტემას 100 წლის წინ გამოემშვიდობა, ჩვენთან კი ახლაც ვხედავთ – ნაწილი გაფიცულია, ნაწილი მუშაობს და ამ დროს რას აკეთებენ პროფკავშირები? გაფიცული მუშების დახმარების ფონდი უნდა არსებობდეს,” – ამბობს ცინცაძე.

მისი თქმით, ხელისუფლება ამ პროცესებისადმი გულგრილია იმიტომ, რომ ამგვარი პროტესტების მიუხედავად არჩევნების წაგების შიში არ აქვთ.

“არ ვიცი, მუშები ასეთი ნეტარ მორწმუნეები თუ არიან და ფიქრობენ, რომ ხელისუფლება არჩევნებში წაგების შიშით მათ რაღაცას დაუთმობს, გულუბრყვილონი ყოფილან. ამ პროტესტს მოკლევადიან პერსპექტივაში არანაირი გავლენის მოხდენა არ შეუძლია პოლიტიკურ პროცესებზე, რადგან ხელისუფლებას ისეთი საარჩევნო სისტემა აქვს თავისი მაჟორიტარებით, რომ არჩევნებს ისედაც იგებს. ამიტომ ამ პროტესტის შიში არ აქვთ და არიან ჩუმად,” – ამბობს ცინცაძე.

პოლიტოლოგი გია ხუხაშვილი მიიჩნევს, რომ პროტესტის ეს ჯაჭვი შეიძლება სხვაგან და სხვაგან გადავიდეს. მით უფრო, რომ არჩევნების წინ პოლიტიკოსები სოციალურ დაძაბულობას ხელს შეუწყობენ, რადგან ეს არის მთავარი ტალღა, რაზეც იბადება და ვითარდება ხელისუფლების მიმართ პოლიტიკური მიუღებლობა და ეს პროცესს კიდევ უფრო გაართულებს.

“სოციალური რისკი ძალიან მაღალია. შახტაში სამუშაო სტანდარტები როგორია, ყველას წარმოგვიდგენია და ამ მძიმე შრომის შედეგად აღებული ხელფასი არსებული ინფლაციის გამო რომ ვერ ფარავს აუცილებელ სასიცოცხლო ხარჯებს, ბუნებრივია, ამ დროს ვითარება განსაკუთრებით იძაბება.

“ამას ემატება პოლიტიკა. ოპოზიცია ამ სოციალური რისკების რადიკალიზაციას აუცილებლად მოახდენს და მასშტაბები გაიზრდება, თუკი ხელისუფლებამ ნორმალური კრიზის მენეჯმენტი ვერ ისწავლა და დღევანდელივით მხოლოდ განცხადებებით და კოსმეტიკური გადაწყვეტილებებით შემოიფარგლება.

“გასაგებია, ნახშირის ფასი მცირდება და არ გამიკვირდება, საწარმოს ხელფასების მომატების საშუალება რომ არ ჰქონდეს, მაგრამ აქ საუბარია, რომ ოქროს კვეთა უნდა მოიძებნოს. ამის მენეჯმენტი კი სახელმწიფოს შესაბამისმა სტრუქტურებმა უნდა მოახდინოს და ორივე მხარე უნდა გრძნობდეს, რომ სახელმწიფო მათი პრობლემების გადაწყვეტაში მონაწილეობს. დღეს რაც ხდება, ეს გარკვეულწილად დისტანცირებაა, რაც პრობლემებს შექმნის და რაც შეიძლება უახლოეს არჩევნებზე სავალალო შედეგით დასრულდეს,” – ამბობს ხუხაშვილი.

მისი თქმით, შეიძლება ეს ფაქტი რაღაც ჯაჭვის დასაწყისი გახდეს. ხუხაშვილის აზრით, თუ ხელისუფლება თვლის, რომ ერთ ადგილზე მუშების სასარგებლოდ საკითხის გადაწყვეტა სხვა საწარმოს მუშების გაფიცვას მისცემს სტიმულს და ამიტომ უდგება ამ საკითხს ზედაპირულად, ასეთი მიდგომა ძალიან დიდი რისკია. შეიძლება მასობრივი, საყოველთაო სახე მიიღოს ამ პროტესტმა და ეს ძვირი დაუჯდეს.

ხუხაშვილის თქმით, ხელისუფლებამ სწორი მენეჯმენტით კრიზისის კერების დროზე ჩაქრობა უნდა მოახერხოს, რადგან ადამიანები ნეგატიურ მაგალითზე უფრო მწარდებიან და უფრო რადიკალურ ფორმებს იღებს ეს ყველაფერი.

“ხელისუფლების მთავარი პრობლემა ის არის, რომ მათ პრობლემებთან პირისპირ დადგომა უჭირთ და მუდმივად პრობლემებს ემალებიან. ეს სირაქლემას პოლიტიკა მათთვის სახიფათოა. ამომრჩეველი გადაწყვეტილებას იქიდან გამომდინარე მიიღებს, თუ რა არის მისთვის პრიორიტეტული პრობლემები და ყველა კვლევა აჩვენებს, რომ მთავარი პრობლემა სოციალური თემებია,” – დასძენს ხუხაშვილი.

„რეზონანსი//მთელი კვირა”, 29 თებერვალი, 2016 წელი

რამდენად სამართლიანია ტყიბულელ გაფიცულთა მოთხოვნები?

ნინო ქეთელაური

(შემოკლებით)

რამდენად სამართლიანია გაფიცულთა მოთხოვნები? – ამ კითხვით “მთელმა კვირამ” საზოგადოების წარმომადგენლებს მიმართა.

მიხეილ ცაგარელი (ასტროლოგი): “რასაკვირველია, სამართლიანია. იმიტომ, რომ ქვეყანაში, სადაც ყველაფერი ძვირდება და ხელფასები არ იცვლება, ლოგიკურია, რომ ადრე თუ გვიან ეს მოთხოვნები დადგება. სამუშაო პირობები უნდა იყოს ნორმალური, მითუმეტეს, მეშახტეებისთვის, ამაზე ბჭობა საერთოდ არ არის საჭირო. სამართლიანი მოთხოვნებია, თუმცა სხვა საქმეა, მთავრობა რამდენად დიპლომატიურად შეძლებს ამ ყველაფრის მოგვარებას. მეორე მხრივ, თან ვფიქრობ, ჩვენ ვიღებთ ვალდებულებას, რომ ქვეყანაში შემოვიყვანოთ 250 ათასი ლტოლვილი, გვცალია ჩვენ ამ ლტოლვილებისთვის?! როდესაც საკუთარი ლტოლვილები არიან დაუკმაყოფილებლები და ჩვენივე ხალხს არ აქვს ნორმალური სამუშაო პირობები. წარმოგიდგენიათ, ეს 250 ათასი ლტოლვილი ქვეყანაში სიტუაციას როგორ არევს?! მე ეს ძალიან მაღელვებს და ვფიქრობ, რომ ხელისუფლების ეს ნაბიჯები ერის ღალატია მაშინ, როდესაც ერი ისედაც სიკვდილის და დემოგრაფიული კატასტროფის წინაშეა მიყვანილი. მერე ვიღას ეცლება ჩვენი ტყიბულელი მეშახტეებისთვის ან საკუთარი ლტოლვილებისთვის, როდესაც ისინი წამოაყენებენ პირობებს და მოაწყობენ აჯანყებებს. მე მიმაჩნია, მთავრობამ პირველ რიგში საკუთარი ხალხის პრობლემები უნდა მოაგვაროს და იფიქროს, კიდევ დამატებით ამდენი ლტოლვილის შემოყვანით რა პრობლემების წინაშე აღმოჩნდება ქვეყანა.”

მერაბ კოკოჩაშვილი (რეჟისორი): “იმ პირობებში, როდესაც ასეთ მძიმე მდგომარეობაშია მთელი მსოფლიო და ეკონომიკური ურთიერთობები დამძიმებულია ყველგან, ვფიქრობ, ყველამ ერთმანეთს უნდა გაუწიოს ანგარიში. სხვანაირად წარმოება და ეკონომიკა საბოლოოდ დაინგრევა. აქედან გამომდინარე, ვთვლი, რომ აუცილებელია ურთიერთგაგება, უნდა დასხდნენ და ბოლომდე გაუგონ ერთმანეთს, თუნდაც გარკვეულ პირობებზე მაინც შეთანხმდნენ. დაპირისპირება და კონფრონტაცია ანგრევს ყველაფერს. ”

ირმა სოხაძე (მომღერალი): “აბსოლუტურად სამართლიანია. მე არ მესმის, რატომ არ არის რაიმე ბერკეტი, თუნდაც კომისია, რომელიც მოაგვარებს არსებულ მდგომარეობას. მონათმფლობელური წყობილება ხომ არ არის?! შუა საუკუნეები ხომ არ არის?! ხელფასებს ისეთ დაბალს ასახელებენ, რომ იქ ჩასვლა და 2-ჯერ მტვრის გადაწმენდაც კი გაცილებით ანაზღაურებადია. “ამ ადამიანებს წასასვლელი არ აქვთ, მაგრამ ეს არ არის იმის საბაბი, რომ ანგარიში არ გაუწიონ. ისეთი პირობები უნდა შეუქმნან, რომ არსებობის საშუალება მაინც დაუბრუნდეთ, ამას ვთხოვდი კერძო კომპანიას.”

მიშა მშვილდაძე  (პროდიუსერი): “რა თქმა უნდა, მათი მოთხოვნები სამართლიანია იმიტომ, რომ განსაკუთრებულ ფუფუნებას არ ითხოვენ. მათ ელემენტარული პირობები სჭირდებათ. ძალიან ბევრი ადამიანი მუშაობს სხვადასხვა მაღაროში, სადაც ისინი პირდაპირ სიკვდილზე მიდიან და ვფიქრობ, ამ მიმართულებით რაღაც არის ქვეყანაში დასარეგულირებელი.”

„რეზონანსი//მთელი კვირა”, 29 თებერვალი, 2016 წელი

რუსი ექსპერტი: აფხაზები რუსეთის ან საქართველოს შემადგენლობაში შესვლაზე დაიწყებენ ლაპარაკს

თიკო ოსმანოვა

ცნობილი რუსი ექსპერტის ანდრეი ეპიფანცევის აზრით, მალე შესაძლოა, აფხაზეთმა “საკუთარი დამოუკიდებლობით ვაჭრობა” დაიწყოს მოსკოვთან ან თბილისთან. თბილისში ასეთ პერსპექტივას არარეალურად მიიჩნევენ და ვარაუდობენ, რომ უახლოესი წლების განმავლობაში აფხაზები თუნდაც ფსევდო დამოუკიდებლობას ავტონომიაზე არ გაცვლიან.

რუსი ექსპერტის თქმით, ახლა აფხაზეთი ტოტალურ ჩიხშია და თუ რუსეთი, რომელიც თავადაც არასახარბიელო ეკონომიკურ მდგომარეობაშია, აუცილებელ დიდძალ თანხებს არ გამოუყოფს, სოხუმის ხელისუფლებას მოუწევს, მოსკოვს ან თბილისს მათ შემადგენლობაში ფორმალურად შესვლა შესთავაზოს.

“აფხაზეთში ყველაფერი ნელ-ნელა იქით მიდის, რის შესახებაც უკვე არაერთი წელია, ვსაუბრობდი: სახელმწიფო, რომლის მიზანს აფხაზების ეთნიკური პროექტის რეალიზება წარმოადგენს თვითორგანიზების არქაული – ყქ|||-ყ|ყ საუკუნეების ფორმების საფუძველზე, ძალზე სუსტი სახელმწიფოებრივი და ძალზე ძლიერი კლანური ხელისუფლებით, თანამედროვე პირობებში ვერ ჩამოყალიბდება.

იგი შეუმდგარია მთელი რიგი მიზეზების გამო და უპირველესად, ეკონომიკურად”, – ამბობს ეპიფანცევი.

მისივე განმარტებით, პრაქტიკული თვალსაზრისით, ეს უკვე გადაიზარდა ტოტალურ ინფრასტრუქტურულ კოლაფსში, რომლის ნაწილს წარმოადგენს ენერგეტიკული ინფრასტრუქტურა.”დამოუკიდებლობის 23 წლის განმავლობაში მის რემონტში არაფერი ჩადებულა, რადგან საკუთარ სახსრებს აფხაზეთი არ გამოიმუშავებს, მოსახლეობა კი თითქმის ტოტალურად არ იხდის მოხმარებული დენის იმ მიზერულ გადასახადსაც კი, რომელიც იქ არის დაწესებული – 40 კაპეიკა კილოვატში.

“შესაბამისად, ინფრასტრუქტურაში მრავალმილიარდიანი ინვესტირების გარეშე ვითარების გამოსწორება შეუძლებელია, ასეთი ფულის შოვნა კი – პრინციპშიც შეუძლებელია, განსაკუთრებით გარე ბაზრებზე კრიზისის მომძლავრების პირობებში. თუმცა, რომც ეშოვათ, ამას მაინც არ ექნებოდა არანაირი აზრი, რადგან შემდეგ თითქმის შეუძლებელი იქნებოდა თანხების მოპოვება ახლა უკვე ამ ინფრასტრუქტურის შენახვისთვის – ისეთი ეკონომიკა ხომ არ არსებობს, რომელიც ამხელა თანხებს მოიტანდა. შესაბამისად, ეს არის ტოტალური ჩიხი”, – განმარტავს რუსი ექსპერტი.

მისივე თქმით, შექმნილ ვითარებაში აფხაზეთში ისმის კითხვა – რა გავაკეთოთ? აფხაზურ საზოგადოებას კი მასზე ერთი პასუხი აქვს – ფული რუსეთმა უნდა მოგვცეს.

ეპიფანცევის აზრით, რუსეთისთვის ეს სულ ცოტა ხანში მორიგ დილემაში გადაიზრდება.

“აუცილებელი გახდება, არა უბრალოდ შეინახო რუსეთის ბიუჯეტის ხარჯზე მცხოვრები პარაზიტი აფხაზური სახელმწიფო, არამედ თავიდან აშენო მისი დანგრეული ინფრასტრუქტურა. ნავთობის მაღალი ფასის პირობებში პასუხი გასაგები იქნებოდა – “რა თქმა უნდა, ავაშენებთ!”, მაგრამ ახლა სიტუაცია სხვაგვარია: ფული არ არის და კიდევ დიდხანს არ იქნება” – განმარტავს ექსპერტი და მოვლენათა განვითარების ორ ძირითად ვარიანტს ხედავს:

“1. იმის გათვალისწინებით, რომ აფხაზეთი მცირეა და ათეული მილიარდი რუბლი ინფრასტრუქტურის ნულიდან შენებისთვის რუსული ბიუჯეტისთვის კრიტიკულად არ გამოიყურება, მოსკოვი სამომავლოდ დაეთანხმება ამ ფულის გამოყოფას, შემოიღებს ახალ “პლატონს”, გაუზრდის გადასახადებს საკუთარ მოქალაქეებს, გაზრდის ფასებს, კიდევ რამდენიმე წლით გაყინავს პენსიების დაგროვებით ნაწილს თავად რუსეთში – მთავარია, აფხაზებს შეუნარჩუნდეთ შესაძლებლობა, არაფერი აკეთონ და არ იხადონ ელექტროენერგიის გადასახადი;

“2. ფულს არ გამოყოფენ და მაშინ აფხაზეთს კიდევ უფრო მეტი დეგრადაცია ელის, პოლიტიკური კრიზისები და სხვა სახალისო მოვლენები, რომლებიც ადრე თუ გვიან მიიყვანს რესპუბლიკას აუცილებლობამდე, დაიწყოს ვაჭრობა საკუთარი დამოუკიდებლობით, ანუ შესთავაზოს მოსკოვსა და თბილისს, ფორმალურად შევიდეს ან ერთის ან მეორის შემადგენლობაში ყველა ამჟამინდელი პრივილეგიის შენარჩუნებითა და აფხაზების საქმეებში ჩაურევლობისა და კმაყოფის არაჩვეულებრივი პირობებით. დაველოდოთ”, – დასძენს ეპიფანცევი.

თბილისში ამ პროგნოზს არა რეალურად უყურებენ და ჯერჯერობით მოვლენათა განვითარების მხოლოდ ერთ სცენარს განიხილავენ.

აფხაზეთის უშიშროების ექს-მინისტრის ლევან კიკნაძის თქმით, აფხაზები დარწმუნებული არიან, რომ იმსახურებენ “დამოუკიდებლობას” და შესაბამისად, მისი თქმით, ისინი ამას ავტონომიაში არ გაცვლიან.

“ჩემი აზრით, რასაც ამ ბოლო დროს ვაკვირდები, შეიძლება მყარად ითქვას, რომ აფხაზეთი ავტონომიაზე არ დათანხმდება. მომავალში კი თუ ავტონომიაზე მიდგა საკითხი, არ მგონია, თავად აფხაზებმა მოინდომონ. დარწმუნებულნი არიან, რომ იმსახურებენ “დამოუკიდებლობას”. ასე რომ, ახლო მომავალში თუნდაც ფსევდო დამოუკიდებლობას ავტონომიაზე არ გაცვლიან.

“თუ რუსეთს ისე გაუჭირდა, რომ აფხაზებს ვეღარ დაეხმარება, და თუ რომელიმეს შემადგენლობაში შესვლის საკითხი მართლაც დადგა, მაშინ ჩვენ უნდა ვიყოთ მომზადებული, რომ ჩვენსკენ გადმოიხარონ. ამ მომზადებაში კი ბევრ რამეს ვგულისხმობ, საქართველო მიმზიდველი უნდა გახდეს ყველანაირად.

“აფხაზები იქიდან ყველაფერს აკვირდებიან. საქართველომ ეს უნდა შეძლოს, მაგრამ თუ ასე წავიდა ვითარება, რაც ახლა ჩვენთან ხდება ეკონომიკური და პოლიტიკური თვალსაზრისით, ვერასდროს ვერ გავხდებით მიმზიდველი”, – ამბობს “მთელ კვირასთან” საუბრისას კიკნაძე.

მის აზრს იზიარებს “საქართველოს ევროპელი დემოკრატების” თავმჯდომარე პაატა დავითაია და ამბობს, რომ უახლოესი 5-10 წელი აფხაზები ამ მხრივ აქტიურობას არ დაიწყებენ.

“სამწუხაროდ, ასე არ არის. აფხაზეთში იმდენი რუსი ჯარია და ისე კონტროლდება ყველაფერი, რომ ვინც კი ამ მიმართულებით ოდნავ მოძრაობას იწყებს, ფიზიკურად ანადგურებენ, კლავენ.

“ახალგაზრდობა ჩვენსკენ არ იყურება. ვისაც ურთიერთობა ჰქონდა ქართველებთან, უკვე ძალიან ცოტანი არიან. მომავალში კი, თუ განვვითარდით სერიოზულად, ვგულისხმობ ევროპასთან უვიზო მიმოსვლას და სხვა პერსპექტივებს, შესაძლოა, შემდეგ ვიღაცები გონს მოვიდენ, მაგალითად, მომავალი თაობა, ოღონდ 5-10 წლის შემდეგ. ამ ეტაპზე კი ასეთ პერსპექტივას ვერ ვხედავ”, – გვითხრა დავითაიამ.

მისივე თქმით, რუსეთი აფხაზეთის შენახვას ყოველთვის შეძლებს.

“ასეა თუ ისე აფხაზეთი საკუთარი თავის შენახვას ახერხებს. რუსეთი ფულს რომ აძლევს, ის კორუფციულია და იყოფენ. ასე რომ, რუსი კოლეგის აზრი შორეულ პერსპექტივას ჰგავს, რადგან “ეფ-ეს-ბეს” თანამშრომელი რაულ ხაჯიმბა ახლა ვაჭრობას ნამდვილად არ დაიწყებს, გამორიცხულია.

“მაგალითად, აფხაზეთის ერთ-ერთი მედიის წარმომადგენელი ენგურზე გადმოვიდა, შემდეგ ზუგდიდშიც იყო და ამ მხარით აღფრთოვანებული დარჩა – შოკში იყო, მაგრამ იქ რომ ჩავიდა, მალობა გადაუხადა მის ნათესავებს, წინაპრებს ქართველების მოკვლისთვის და აფხაზეთის თავისუფლებისთვის.

“ადამიანი ამას რომ ნახავს და შეადარებს აფხაზეთში გადამწვარ ინფრასტრუქტურას, ბალახს რომ მიაქვს ყველაფერი და შემდეგ ამას დაწერს, რაზეა საუბარი?! ეს არის ადამიანი, რომელიც ომის შემდეგ დაიბადა.

“თანაც საქართველოს მთავრობას არანაირი პოლიტიკა არ აქვს აფხაზებთან დაკავშირებით და რას შესთავაზებს, არ ვიცი. თუმცა, ბევრი სქემა არსებობს და თუ ამუშავდება ამ მიმართულებით, შეიძლება მიმზიდველი გავხდეთ კიდეც”, – უთხრა “მთელ კვირას” დავითაიამ.

„რეზონანსი//მთელი კვირა”, 29 თებერვალი, 2016 წელი

სომეხი დეპუტატი: “კაცები ნუ კოცნით ერთმანეთს, ეს ქართული ტრადიციაა”

ლიკა გურაბანიძე

სომხეთის ოპოზიციური პარტიის “ეროვნული კონგრესის” საპარლამენტო ფრაქციის მდივანმა, არამ მანუკიანმა 23 თებერვალს სომხეთის პარლამენტში სიტყვით გამოსვლისას განაცხადა, რომ “ლამაზი არაა, როდესაც სომხეთის ეროვნული კრების (პარლამენტის) დეპუტატები მისალმებისას ყოველდღე ერთმანეთს კოცნიან”.

დეპუტატის განცხადებით, ამ ტრადიციას ბოლო უნდა მოეღოს. მანუკიანის თქმით, ეს წესი სომხეთში საქართველოდან გავრცელდა. დეპუტატმა განაცხადა, რომ იგი უკრძალავს თავისი პარტიის წევრებს ყოველდღე ერთმანეთის გადაკოცნას.

“მაგალითისთვის, ჩვენს პარტიაში ბიჭებს ყოველდღე გადაკოცნა ავუკრძალე. იგივე ხდება უნივერსიტეტებთან. ეს ლამაზი არაა! ასე ამგვარი კულტურის გავრცელება ხდება. ეს ტრადიცია საქართველოდან მოვიდა. იქ კაცები ყოველდღე კოცნიან ერთმანეთს. იგივეს ნუ გააკეთებთ, ეს ლამაზი არაა. ბავშვები გიყურებენ”, – განაცხადა არამ მანუკიანმა.

ამ ფაქტთან დაკავშირებით “მთელი კვირა” ისტორიკოსებს ესაუბრა და იმის დადგენა სცადა, თუ საიდან მოდის მამაკაცების მიერ ერთმანეთის გადაკოცნის წესი.

ისტორიკოსები ერთხმად თანხმდებიან, რომ მისალმების ეს წესი ქართული წარმოშობის არაა და ჩვენთან მისალმებისას მამაკაცები ერთმანეთს მხარზე ეამბორებოდნენ. მათივე აზრით, გადაკოცნით მისალმების ტრადიცია ძირითადად აზიიდან და ძველი საბერძნეთიდან მოდის.

ისტორიკოს თედო დონდუას ჩვენთან საუბარში ერთ-ერთი ფაბულა მოჰყავს, რომელშიც სწორედ მამაკაცების მიერ ერთმანეთის გადაკოცნის წესია აღწერილი. ისტორიკოსის თქმით, გადაკოცნის ტრადიცია სათავეს ანტიკურ საბერძნეთში უძველესი დროიდან, ჯერ კიდევ ალექსანდრე მაკედონელის (ძვ. წ. 336-323) მმართველობის პერიოდში იღებს.

“არსებობს კონკრეტული წყარო, ფაბულა, რომელშიც ნათლადაა ნაჩვენები ეს ფაქტი. ფაბულის შინაარსში კი ჩანს, რომ ერთ-ერთ ნადიმზე, როდესაც ალექსანდრემ ფიალა დაცალა და თავის მეგობარს გაუწოდა, ამან ჩამოართვა სასმისი და დალია. შემდეგ მივიდა, მეფეს თაყვანი სცა და აკოცა. ყველა დანარჩენმა იქ მყოფთაგან რიგრიგობით მიბაძა მას.

“კოცნა ბერძნულია და გეტყვით იმასაც, რომ თაყვანისცემა აზიური. ჩვენ ვასკვნით იმას, რომ კოცნა და თაყვანისცემა სხვადასხვა რამაა. გარდა ბერძნებისა, კოცნის წესი ებრაელებსაც ჰქონდათ – ე.წ. “იუდას ამბორი”. შემიძლია ის დანამდვილებით ვთქვა, რომ კოცნის წესი ქართველების მოგონილი არ არის”, – აღნიშნა ისტორიკოსმა.

ისტორიკოსი გია ანჩაბაძე ისტორიული წყაროების მიხედვით მსჯელობს და განმარტავს, რომ ისტორიაში მამაკაცების მიერ ერთმანეთის გადაკოცნის ტრადიცია ჯერ კიდევ ქრისტეს მოღვაწეობის პერიოდში პალესტინაში გვხვდება. ანჩაბაძეს ჩვენთან საუბარში რამდენიმე ქვეყნის უძველესი კულტურიდან მაგალითებიც მოჰყავს.

“მამაკაცებს შორის გადაკოცნის წესი უძველესი დროიდან მოდის. შესაძლოა, ვიმსჯელოთ და ვთქვათ, რომ გადაკოცნის ტრადიცია ძველ ინდურ კულტურებშიც გვხვდება. ძველ ინდურ სანსკრიტულ ტექსტებში გვხვდება ჩანაწერები, სადაც კოცნა ერთმანეთისთვის სულის გადაცემას ნიშნავდა.

“გადაკოცნის წესი ისტორიულ წყაროებში რიტუალური ნიშნის მატარებელია. ვიცი ის ფაქტი, რომ გადაკოცნის წესი რუსეთში მე-17 საუკუნიდანაა გავრცელებული. აქედან გამომდინარე, გადაკოცნის ტრადიცია არა მარტო საქართველოში, არამედ ბევრ სხვა ქვეყანაში იყო.

“მამაკაცების მიერ ერთმანეთის გადაკოცნის წესი, ტრადიცია ადრეულ ხანებში აზიაში გვხვდება. თუ კიდევ უფრო ძველ რელიგიურ მასალებს გავეცნობით, აღმოჩნდება, რომ გადაკოცნის ტრადიცია ჯერ კიდევ იესო ქრისტეს მოღვაწეობის პერიოდში პალესტინაში იყო, რადგან იუდამ სწორედ გადაკოცნით გაყიდა ქრისტე და ამ ჟესტით მასზე მიუთითა”, – განმარტა ანჩაბაძემ.

ისტორიკოსი ედიშერ გვენეტაძე აღნიშნავს, რომ უძველესი დროიდან ჩვენს ქვეყანაში მხოლოდ მხარზე ამბორი იყო მიღებული. ისტორიკოსი ჩვენთან საუბარში განმარტავს, რომ მამაკაცების მიერ ერთმანეთის გადაკოცნის წესი საქართველოდან არ არის წამოსული.

“საქართველოში მიღებული იყო უძველესი დროიდან მხარზე კოცნა. ჩვენს ქვეყანაში როდის შემოვიდა ეს წესი, ამის შესახებ პირდაპირი ისტორიული წყარო არ არსებობს. ზუსტად გეტყვით იმას, რომ მამაკაცების მიერ ერთმანეთის გადაკოცნის კულტურა საქართველოდან ნამდვილად არ მოდის”, – განმარტა ისტორიკოსმა.