„რეზონანსი”: ბრალდება რუსეთიდან მართულობაზე: თინა ხიდაშელი-გოგი თოფაძის დაპირისპირება მწვავდება
„რეზონანსი”: ინტერვიუ თამაზ მეჭიაურთან: „გოგი თოფაძის მიმართ თინა ხიდაშელის ბრალდება არის “აბსურდი და უსუსური”
„რეზონანსი”: ინტერვიუ ზაალ ანჯაფარიძესთან: “რესპუბლიკელების” კოალიციაში ყოფნა პოლიტიკურადაც და მორალურადაც აზრს კარგავს“
„რეზონანსი”: ინტერვიუ ვახტანგ ძაბირაძესთან: “ქართული ოცნება” კი არ უნდა დაიშალოს, პირიქით, ირაკლი ალასანიაც უნდა შემოირიგოს
„რეზონანსი”: მიაღწევს თუ არა არჩევნებამდე კოალიცია “ქართული ოცნება” არსებული შემადგენლობით?
„საქართველო და მსოფლიო“: უნდა გადადგეს თუ არა თავდაცვის მინისტრი გამოძიების დასრულებამდე
„ახალი თაობა“: ინტერვიუ თამარ ჩხეიძესთან: „ბიძინა ივანიშვილს რესპუბლიკელების კოალიციიდან გასვლა არ აწყობს”
„ახალი თაობა: ინტერვიუ ნანა კაკაბაძესთან: „ალეკო ელისაშვილის უკან დათო უსუფაშვილი და თინა ხიდაშელი დგანან”
„ახალი თაობა“: ინტერვიუ ლევან ალაფიშვილთან: „თეა წულუკიანს ევროსასამართლოს მოსამართლეობა უნდოდა“
„რეზონანსი”: უვიზო მიმოსვლაზე საბოლოო გადაწყვეტილების დღეების ათვლა დაიწყო
„რეზონანსი”: გაზის ზემაღალი ფასის გამო საწარმოები იხურება
————————-
„რეზონანსი”, 03 მარტი, 2016 წელი
ბრალდება რუსეთიდან მართულობაზე – ხიდაშელი-თოფაძის დაპირისპირება მწვავდება
თიკო ოსმანოვა
“თინა ხიდაშელი თავისი რიტორიკით საქართველოს პროდასავლურ არჩევანს ბევრად უფრო დიდ ზიანს აყენებს, ვიდრე გოგი თოფაძე, რომელზეც ის აპელირებს”, – ამბობს “რეზონანსთან” საუბრისას ექსპრემიერის ყოფილი მრჩეველი გია ხუხაშვილი “რესპუბლიკურ პარტიასა” და “მრეწველებს” შორის არსებულ დაპირისპირებაზე. მისივე თქმით, კოალიაციას არც ერთი მათგანი არ დატოვებს, რადგან იციან, რომ ივანიშვილის გარეშე არჩევნებზე წარმატების მიღწევა გაუჭირდებათ.
შეგახსენებთ, რომ უმრავლესობაში დაპირისპირება ფრაქცია “მრეწველების” თავმჯდომარის, გოგი თოფაძის განცხადებას მოჰყვა, რომელმაც 16 თებერვალს თინა ხიდაშელი საგარეჯოს არჩევნების გაყალბებაში ღიად დაადანაშაულა და ივარაუდა, რომ იგი მინისტრად დიდხანს აღარ დარჩებოდა.
მისივე თქმით, საგარეჯოს არჩევნებში მისმა უხეშმა ჩარევამ “ქართულ ოცნებას” საზოგადოების თვალში იმიჯი შეულახა და ამომრჩეველს არჩევნების ობიექტურად ჩატარების იმედი დაუკარგა. დეპუტატის განცხადებით, მას აქვს შესაბამისი მტკიცებულებები, სადაც თინა ხიდაშელის ბრალეულობა იკვეთება.
ამ ბრალდებებს თავის დროზე რესპუბლიკური პარტიის წევრებმაც უპასუხეს, პარლამენტში იყო სიტყვიერი დაპირსპირებაც და პროკურატურის პასუხიც, რომ საგარეჯოს არჩევნებს გამოიძიებს.
ამასთან დაკავშირებით განცხადება პრემიერ-მინისტრმა გიორგი კვირაკაშვილმაც გააკეთა და მხარეებს კორექტულობისკენ მოუწოდა. შემდეგ დაპირისპირებულმა პარტიებმა რამდენიმედღიანი ტაიმ-აუტიც აიღეს. თუმცა გუშინწინ თავდაცვის მინისტრმა ორკვირიანი დუმილი დარღვია და თოფაძეს “გარე ძალების”, გინდათ – რუსეთის, მიერ მართული უწოდა.
“ეს არის კოალიციის საწინააღმდეგო ქმედება. ეს გიორგი კვირიკაშვილის მთავრობის, ბიძინა ივანიშვილის მიერ შექმნილი კოალიციის წინააღმდეგ მიმართულია და როგორ შეიძლება, ამის უკან იდგეს ბიძინა ივანიშვილი. დიახ, ეს არის კამპანიური მოქმედება. დიახ, ამის უკან დგანან ძალები. ოღონდ, ეს ძალები კოალიციაში არ უნდა ვეძებოთ. ეს ძალები ჩვენს მეზობელ ქვეყანაში უნდა ვეძებოთ,” – განაცხადა თინა ხიდაშელმა.
მისივე თქმით, მას აქვს კითხვები იმ ადამიანებთან, ვინც აცხადებს, რომ ხიდაშელის და თოფაძის დაპირისპირება არის პიროვნული.
“მე ვიცი ჩემი მთვარობის პოზიცია. შესაბამისად მოთხოვნები, რომ ტელევიზიით გამოვიდეთ და სათითაოდ ერთმანეთის მხარდამჭერი განცხადებები ვაკეთოთ, მგონი, არასწორია და ამის მოთხოვნილება იმ შემთხვევაში გიჩნდება, თუ ვიღაცასთან ეჭვები გაქვს. მე ვთქვი ერთ-ერთ ეთერში, რომ ერთ-ერთ დეპუტატთან დაკავშირებით კონკრეტული კითხვები მქონდა, როდესაც ითქვა, რომ არაფერ შუაში არ არის კურსი და ეს არის პიროვნული დაპირისპირება. მე ძალიან მარტივი კითხვები მაქვს იმ ადამიანებთან, ვინც ამ განცხადებებს აკეთებენ, რომ ეს არის პიროვნული დაპირისპირება. ჩემს მეგობარ ირაკლი სესიაშვილს, ჩემს პირად მეგობარს მივმართავ, პოლიტიკას თავი რომ დავანებოთ, როდესაც ის ამბობს, რომ ეს არის პიროვნული დაპირისპირება, სულ მაინტერესებს, რას ფიქრობს სტალინზე, როცა ამბობს, რომ მე გოგი თოფაძესთან მაქვს პიროვნული დაპირისპირება,” – განაცხადა თინა ხიდაშელმა.
იგი პროკურატურის მიერ საგარეჯოს არჩევნებზე გამოძიების დაწყებასაც გამოეხმაურა და აღნიშნა, რომ გამოძიება საარჩევნო სისტემას უქმნის საფრთხეს.
“პროკურატურამ მთელი სისტემა, რომელიც მუშაობს არჩევნების დროს და რომელიც არჩევნებს ლეგიტიმაციას სძენს, ეჭვქვეშ დააყენა. მე მაინც მგონია, რომ ეს გადაწყვეტილება ირაკლი შოთაძემ მიიღო. ეს მცდარი გადაწყვეტილებაა. იმდენად მარტივი საქმეა, რომ მას ვერსაიდან კუდს ვერ მოაბამ,” – აცხადებს ხიდაშელი.
რაც შეეხება კოალიაციის მომავალს, თავდაცვის მინისტრმა თქვა, რომ “რესპუბლიკელები” ულტიმატუმობანას არ აპირებენ.
“ჩვენ არ ვაპირებთ, ვითამაშოთ ულტიმატუმობანა. ყველა თვითონ იღებს გადაწყვეტილებას, საკუთარი კომფორტიდან და დისკომფორტიდან გამომდინარე,” – განაცხადა თინა ხიდაშელმა.
თავდაცვის მინისტრის განცხადება უპასუხოდ დატოვა თავად გოგი თოფაძემ. მისმა თანაგუნდელმა ზურაბ ტყემელაძემ კი აღიშნა, რომ თოფაძე კოალიაციის დატოვებას არ აპირებს.
“თავდაცვის მინისტრის განცხადებებზე არ ვაკეთებ კომენტარს. რაც შეეხება გოგი თოფაძეს, ის არაფერს არ დატოვებს. თუ პარტია დატოვებს კოალიციას, მაშინ გოგი თოფაძეც დატოვებს მას,” – განაცხადა ტყემალაძემ.
“რესპუბლიკელებსა” და “მრეწველებს” შორის არსებულ დაპირსპირებაში გარე ძალების შესაძლო ჩარევას გამორიცხავს პარტია “ქართული ოცნების” პოლიტსაბჭოს წევრი არმაზ ახვლედიანი.
“ჩვენ ხშირად ვეძებთ გარეთ საფრთხეებს, მტრებს, არადა უნდა ვაღიაროთ, რომ ამ უთავბოლობის თავი და თავი შიგნითაა. სხვა დროს შეიძლება იყო გარკვეული გარე ფაქტორები, რაც იწვევს-ხოლმე პოლიტიკურ პროცესში და მათ შორის კოალიცია “ქართულ ოცნებაში” სირთულეებს, მაგრამ ამ კონკრეტულ შემთხვევაში, მგონია, რომ მთავარი პრობლემა თავად კოალიციაშია. ეს არის არაორგანიზებული პოლიტიკური გაერთიანება და ამ არაორგანიზებულობის მთავარი წყარო გახლავთ კოალიციის საყრდენი ძალა პარტია “ქართული ოცნება”, – ამბობს “რეზონანსთან” საუბრისას ახვლედიანი.
კითხვაზე, არსებობს თუ არა ალბათობა, რომ დაპირისპირებული პარტიებიდან რომელიმემ კოალიაცია დატოვოს, ახვლედიანი პასუხობს, რომ ამას არ გამორიცხავს, თუმცა აქვე დაძენს, რომ ამით არსებითად არაფერი შეიცვლება.
“არ გამოვრიცხავ, რომ ასე მოხდეს, რომელიმემ დატოვოს კოალიაცია ან პირიქით, ორივე დარჩეს კოალიაციაში, მაგრამ არც ერთ შემთხვევაში, ჩემი დაკვირვებით, არსებითად არაფერი შეიცვლება. მომხრე ვარ, რომ პირველ რიგში პარტია “ქართულ ოცნებაში” იყოს არა ფასადური, არამედ ძირეული რეფორმები გატარებული დემოკრატიული მმართველობის დამკვიდრების მიზნით.
“თუ ასე მოხდება, გარწმუნებთ ყველა პრობლემური კითხვა თავისთავად იქნება პასუხგაცემული და ჩვენ მომავალში ჩიხიდან გამოსავალის ძებნას კი არ დავიწყებთ, არამედ ამ ჩიხში უბრალოდ არ აღმოვჩნდებით,” – გვითხრა ახვლედიანმა.
მისივე თქმით, თავის დროზე “ქართული ოცნების” არჩევნებში გამარჯვება თითოეული სუბიექტის დამსახურებაა.
“ერთია, როცა წინასაარჩევნოდ აღწევ წარმატებას და გაცილებით მნიშვნელოვანია ამ მონაპოვარის შენარჩუნება და სასიკეთოდ გამრავლება. თინა ხიდაშელი თავისი რიტორიკით საქართველოს პროდასავლურ არჩევანს ბევრად უფრო დიდ ზიანს აყენებს ვიდრე გოგი თოფაძე”, – აცხადებს პოლიტოლოგი გია ხუხაშვილი.
“როდესაც ადამიანი თავისთავს უკავშირებს ქვეყნის არჩევანს, ამით შეურაცხყოფას აყენებს მთლიანად სახელმწიფოს. იმიტომ, რომ შეუძლებელია ერთ პარტიაზე იდგეს ქვეყნის გეოპოლიტიკური არჩევანი. ჩემი აზრით, ხიდაშელი თავისი რიტორიკით საქართველოს პროდასავლურ არჩევანს ბევრად უფრო დიდ ზიანს აყენებს, ვიდრე გოგი თოფაძე, რომელზეც ის აპელირებს.
“არა მგონია, “რესპუბლიკურმა პარტიამ” კოალიაცია დატოვოს. მშვენივრად იციან, რომ ივანიშვილის მხრებიდან ჩამოსულები წარმატებას ვერ მიაღწევენ, ბარიერსაც ვერ გადალახავენ. ამიტომ ისევ უკანა კარიდან შესვლაზე ფიქრობენ. ბიძინა ივანიშვილის მხრებიდან არაფრის ფასად არც ერთი პარტია არ ჩამოვა მათ შორის “მრეწველებიც”, – უთხრა “რეზონანსს” ხუხაშვილმა.
„რეზონანსი”, 03 მარტი, 2016 წელი
ინტერვიუ თამაზ მეჭიაურთან: „გოგი თოფაძის მიმართ თინა ხიდაშელის ბრალდება არის “აბსურდი და უსუსური”
ელზა პაპოშვილი
უმრავლესობის წევრი თამაზ მეჭიაური თავდაცვის მინისტრ თინა ხიდაშელს გოგი თოფაძის მიმართ “იმპერატიულ” ტონს უწუნებს. მისი თქმით, არავის აქვს უფლება, რომ პარლამენტის წევრს მანდატის დატოვება მოსთხოვოს, გარდა თავად პარლამენტისა იურიდიულად და მორალურად “ერთი ადამიანისა”, რომელმაც გოგი თოფაძის პარლამენტში ყოფნა გადაწყვიტა. თამაზ მეჭიაური აცხადებს, რომ თუკი ადამიანი რუსეთს “რესპუბლიკელების” მსგავსად დედას არ აგინებს, ამ პარტიის წევრებისთვის ის კრემლის მიერ არის მართული. დეპუტატი ფიქრობს, რომ მათი აგრესიული რიტორიკა რუსეთის მიმართ ქვეყანას აზარალებს. ამიტომაც მიაჩნია, რომ ეს ტონი უნდა შეარბილონ.
- თქვენ განაცხადეთ, რომ დეპუტატისთვის პარლამენტის დატოვების მოთხოვნის მორალური უფლება მხოლოდ ერთ ადამიანს აქვს, ვის გულისხმობდით?
- პარლამენტი არავის საკუთრება არ არის. შესაბამისად, გოგი თოფაძეს მის დატოვებას იმპერატიული და ბრძანებლური ტონით ვერავინ ვერ მოსთხოვს, გარდა მთლიანად პარლამენტისა და ერთი ადამიანისა, რომელსაც ამის სრული მორალური უფლება აქვს. ამაში იმ ადამიანს ვგულისხმობ, ვინც ისინი საკანონმდებლო ორგანოში გაიყვანა და მათი იქ ყოფნა საჭიროდ ჩათვალა. არ მგონია ლამაზი საქციელი, როდესაც ასეთი აგრესიული ტონით საკუთარ კოლეგას მანდატის დატოვებას სთხოვ, არა აქვს მნიშვნელობა, ვინ არის და რა თანამდებობა უკავია.
- თქვენ ფიქრობთ, რომ თავდაცვის მინისტრმა თინა ხიდაშელმა გოგი თოფაძეს პარლამენტის დატოვება მოსთხოვა?
-არ ვიცი, მოთხოვნა იყო თუ არა, მაგრამ ფაქტია, რომ ასეთ განცხადებას ადგილი ჰქონდა. კიდევ ერთხელ გავიმეორებ, რომ ძალიან არასწორი საქციელია. საზოგადოებამ მოისმინა, რაც განაცხადა ხიდაშელმა და მათ გადაწყვიტონ, ეს მოთხოვნა იყო თუ სხვა რამ. საკუთარი კოლეგა ასეთი ტონით არ უნდა მოიხსენიო. ეს ლამაზი საქციელი არ არის. ერთმანეთის მიმართ, პირველ რიგში, პატივისცემა ჩვენ უნდა გვქონდეს და მერე სხვებს მოვთხოვოთ.
- მინისტრმა განაცხადა, რომ გოგი თოფაძეს პოლიტიკური წონა არ აქვს, რას იტყვით თქვენ?
- პოლიტიკური წონის ქონა-არქონაზე, ვფიქრობ, რომ მხოლოდ ხალხმა უნდა ილაპარაკოს. ამაზე საუბრის ლეგიტიმური უფლება მათ გარდა არავის აქვს. ეს ადამიანი რადგანაც პარლამენტშია, ეს იმას ნიშნავს, რომ მას ამის უფლება ვინმემ კი არა, ქართველმა ამომრჩეველმა მისცა. პოლიტიკური წონადობის განმსაზღვრელი ხალხის ხმაა. თუკი თოფაძეს წონა არ აქვს, აბა, საზოგადოებამ როგორ აირჩია?
- რას იტყვით თინა ხიდაშელის განცხადებაზე, რომ გოგი თოფაძე, შესაძლოა, გარე ძალის მიერ იყოს მართული?
- ეს არის სრული აბსურდი და უსუსური ბრალდება. რადგანაც ადამიანს თავისი შეხედულება აქვს, ესე იგი ვიღაცისგან მართულია? მაინც და მაინც მაგათსავით რუსეთს დედას რომ არ აგინებს ე.ი. რუსეთის კაცია? უბრალოდ, სხვადასხვა შეხედულების ადამიანები არსებობენ. ერთისთვის ღირებულია, რომ ჩვენს ქვეყანას ევროპული ღირებულებები ჰქონდეს, თუმცა ეს უნდა მოხდეს ისე, რომ თავიდან ავიცილოთ ის საფრთხეები, რომელიც შესაძლოა ამ ინტეგრაციამ გამოიწვიოს.
“რესპუბლიკელები” კი რუსეთის მიმართ ძალიან აგრესიული რიტორიკით გამოირჩევიან, რაც მგონია, რომ ქვეყნის ინტერესს აზიანებს. არ არის სწორი, როდესაც ეს ხალხი პროდასავლურ ძალად მხოლოდ თავის თავს მოიზრებს. მაგათი აზრით, თუ დღედაღამ რუსეთს არ ლანძღავ, აუცილებლად კრემლიდან ხარ მართული. ეს დამოკიდებულება ჩემთვის მიუღებელი და არასწორია.
ქვეყნის მიმართ ყველას ჩვენი პასუხისმგებლობა გვაქვს. აქედან გამომდინარე, ჩემი მიზანია არა მხოლოდ ევროპისკენ ინტეგრაცია, რომელიც ჩვენი ქვეყნის ტერიტორიების დაკარგვის ხარჯზე შეიძლება მოხდეს, არამედ შევიდეთ ღირსეულად, დანაკარგების გარეშე. შესაბამისად, აუცილებელია დიალოგი შენს მეზობელთან, რომელიც ჩვენი ტერიტორიების დაბრუნების მთავარი გარანტორია.
- თქვენ ფიქრობთ, რომ “რესპუბლიკელები” თავისი რადიკალური პროდასავლურობით ქვეყნის ინტერესებს აზიანებენ?
- მე კონკრეტულად “რესპუბლიკელებს” არ ვგულისმობ, ეს ეხება ყველა იმ ადამიანს, რომელსაც ქვეყნის ბედის გადაწყვეტა შეუძლია. ხოლო რუსეთის მიმართ ზედმეტი აგრესია, მიმაჩნია, რომ ქვეყნის ინტერესებს აზიანებს. თითოეული გაუთვალისწინებელი ნაბიჯი ქვეყნისთვის, შესაძლოა, დამღუპველიც აღმოჩნდეს.
- როგორ ფიქრობთ, “მრეწველებისა” და “რესპუბლიკელების” დაპირისპირების ფონზე მათი ერთ კოალიციაში ყოფნა შესაძლებელია, ერთად მუშაობას შესძლებენ?
- არ ვიცი, ვნახოთ. ამას დრო აჩვენებს. ჯერ რადგანაც ისევ ერთად მუშაობენ, ესე იგი შესაძლებელია. მაგრამ ვფიქრობ, რომ ასეთი ღვარძლი თანამებრძოლებსა და თანამოაზრეებს ერთმანეთის მიმართ არ უნდა ჰქონდეთ. ასეთი ფორმით ურთიერთობა არ შეიძლება. კოალიციაში ყველამ იმდენი უნდა მიიღოს, რასაც იმსახურებს. ზედმეტი ამბიციურობით თავი არავის არ უნდა მოაბეზრო. მეტის მიღება როდესაც გინდა, ეს კოალიციაში შემავალი სხვა ძალის ხარჯზე არ უნდა მოხდეს, რაც თავისთავად კონფლიქტს იწვევს. ეს არის ჩემი პირადი შეხედულება.
„რეზონანსი”, 03 მარტი, 2016 წელი
ინტერვიუ ზაალ ანჯაფარიძესთან: “რესპუბლიკელების” კოალიციაში ყოფნა პოლიტიკურადაც და მორალურადაც აზრს კარგავს“
თაკო მათეშვილი
ანალიტიკოსი ზაალ ანჯაფარიძე კოალიცია “ქართულ ოცნებაში” მიმდინარე, საკმაოდ ხმურიან პროცესებს აფასებს და ამბობს, რომ კოჰაბიტაცია, რაც ადრე “ქართულ ოცნებასა” და “ნაცმოძრაობას” შორის იყო, ახლა თავად კოალიციის სუბიექტებს შორის დაიწყო. იგი “ქართული ოცნების” ერთიანობის შენარჩუნების საჭიროებას ვერ ხედავს. მიაჩნია, რომ მასში შემავალმა პარტიებმა არჩევნებში საკუთარი ძალით უნდა სცადონ ბედი და რომ მათი ხელოვნური ერთობა, სადაც დაპირისპირება არჩევნების მოახლოების პროპორციულად მწვავდება, ხალხის თვალში სულ უფრო კარგავს ნდობას.
- ხელისუფლებაში სიტუაცია დღითი დღე იძაბება. რისი ბრალია ეს – არჩევნების მოახლოების თუ უფრო დიდ პრობლემებთან გვაქვს საქმე?
- ალბათ ერთიც და მეორეც. ისიც, რომ კოალიციაში სერიოზული დაპირისპირებაა და ისიც, რომ არჩევნები ახლოვდება. კოალიციაში კონსენსუსის მიღება საკმაოდ რთულია, ამაზე ბევრი რამ მეტყველებს. საჯარო ინფორმაციითაც კი ცხადია, რომ იქ საკმაოდ დაძაბული ვითარებაა და სიამტკბილობა არასოდეს ყოფილა. თუ ადრე ე.წ. კოჰაბიტაცია “ქართულ ოცნებასა” და “ნაცმოძრაობას” შორის იყო, ცნობილი მოვლენების შემდეგ, კოჰაბიტაციის პროცესი უკვე თავად კოალიციის სუბიექტებს შორის დაიწყო. არჩევნების მოახლოებასთან ერთად კი ბრძოლა მზისქვეშეთში ადგილის მოპოვებისათვის აქტიურდება. ყველა პარტია თავისას ითხოვს და ამით კონფლიქტი მწვავდება. თუმცა კოალიციის ცალკეულმა სუბიექტებმა, მაგალითად “რესპულიკელებმა”, პოზიციები ერთგვარად გაიმყარეს და როგორც ჩანს, იმაზე მეტი მოიპოვეს, ვიდრე, კოალიციის დანარჩენი სუბიექტების აზრით, მათ ეკუთვნით. სწორედ ესეც შეიძლება იყოს იმ კამპანიის ერთ-ერთი მიზეზი, რომელიც რესპუბლიკური პარტიის წინააღმდეგ დაიწყო. ამ კამპანიის მოთავე გოგი თოფაძეა, თუმცა თუ კოალიციის სხვა წევრების პოზიციასა და მათ პასიურობას გავითვალისწინებთ, უნდა ვივარაუდოთ, რომ თოფაძის აზრისადმი ისინიც სოლიდარულად არიან განწყობილნი.
ასე რომ, კოალიციაში საკმაოდ დაძაბული სიტუაციაა და ამის ფონზე მე პირადად მიჩნდება კითხვა – რამდენად საჭიროა კოალიციის ასეთი სახით შენარჩუნება და არჩევნებზე წარდგომა, რამდენად წაადგება ეს თავად კოალიციას, ხომ არ გამოიწვევს ეს ელექტორატის გარკვეული ნაწილის დაკარგვას?!
- ანუ, თქვენი აზრით, კოალიციის შენარჩუნების აუცილებლობა აღარ დგას?
- მიზანი, რის გამოც თავის დროზე კოალიცია შეიქმნა – სააკაშვილის ხელისუფლების შეცვლა – წარმატებით შესრულდა. მას შემდეგ კი, ჩემი აზრით, კოალიციის არსებული სახით შენარჩუნება არც პოლიტიკურადაა გამართლებული და არც სამართლიანია. მისმა ყველა წევრმა საკუთარი ძალით უნდა სცადოს ბედი, საკუთარი რესურსით, იდეოლოგიითა და პროგრამით უნდა წარდგეს ამომრჩევლის წინაშე. ეს სამართლიანი იქნებოდა.
თუმცა არსებობს ერთი ფაქტორი – პოლიტიკური კონიუნქტურა, წმინდა მიწიერი და პრაგმატული ინტერესები, რომელიც კოალიციის ყველა წევრ პარტიას ბიძინა ივანიშვილის კისერზე ჯდომას აიძულებს. ამით გამოწვეული კომფორტი იმდენად მიმზიდველია, რომ მან მსოფლმხედველობრივი შეუთავსებლობით გამოწვეული დისკომფორტი გადაწონა.
წესით, არ უნდა გაჩერდე კოლიციაში, სადაც შენ გვერდით დიამეტრალურად განსხვავებული ღირებულებების მქონე სუბიექტია. მიუხედავად ამისა, “რესპუბლიკელები” მუდმივად იმეორებენ, რომ კოალიციის დატოვებას არ აპირებენ. არადა, თუ ევროპული პოლიტიკური კულტურის წესებს გავითვალისწინებთ, რომლის მიმდევრებადაც ისინი მიიჩნევიან, არ უნდა ჩერდებოდნენ იქ, სადაც მათ მსოფლმხედველობას ეწინააღმდეგებიან.
- “რესპუბლიკელებსა” და “მრეწველებს” შორის არსებული დაპირისპირების საკითხი კოალიციის პოლიტსაბჭოს სხდომაზე უნდა გადაწყდეს, რომელიც აქამდე ყოველკვირეულად ტარდებოდა ხოლმე, ახლა კი, უკვე სამი კვირაა, არ ჩატარებულა. მისმა წევრებმა ისიც კი არ იციან, თუ როდის დაინიშნება სხდომა. თქვენი აზრით, კოალიციაში ფეხს ითრევენ და სხდომის განგებ გადადებას ცდილობენ, რათა ვნებები ჩაცხრეს და გადაწყვეტილება უფრო ცივი გონებით მიიღონ, თუ უბრალოდ, ჯერ გადაწყვეტილება არ მიუღიათ და გადადება ამის შედეგია?
- თქვენ მიერ დასახელებულ მიზეზებს არსებობის უფლება აქვს. თუმცა, არ მგონია, კოალიციაში ვნებები ჩაცხრეს, რადგან ის წინააღმდეგობები არსად გაქრება. ასე რომ, პოლიტსაბჭოს სხდომის უსასრულოდ გადადებას ვერ მოახერხებენ.
როგორც ჩანს, კოალიციაში დუღილის პროცესია, გადაწყვეტილების მიღების ეტაპზე არიან. ალბათ “რესპუბლიკელებთანაც”, “მრეწველებთანაც” და სხვა სუბიექტებთანაც კულუარული მოლაპარაკებები მიდის, რათა გადაწყვეტილებაზე შეჯერდნენ. რა გადაწყვეტილებითაც უნდა დასრულდეს პოლიტსაბჭო – რესპუბლიკური პარტია წავა თუ მრეწველები, კოალიციისათვის ორივე ვარიანტი დამაზიანებელი იქნება.
- რომელი უფრო მეტად?
- საინტერესო კითხვაა. თუ კოალიცია თავისი რიგებიდან თოფაძესა და “მრეწველებს” გაუშვებს, ვფიქრობ, ტრადიციულად მოაზროვნე ელექტორატის არცთუ მცირე ნაწილი “ქართულ ოცნებას” ჩამოშორდება. რთული მისახვედრი არ უნდა იყოს, თუ საით წავა ეს ხალხი. თუ “ოცნება” რესპუბლიკურ პარტიას შეელია, რა თქმა უნდა, ეს დასავლეთთან ურთიერთობის დაძაბვას გამოიწვევს. კითხვები აუცილებლად გაჩნდება. რაც მთავარია, ამან შეიძლება სახელისუფლებო ქვეყანაში კრიზისი გამოიწვიოს – პარლამენტის თავმჯდომარის თანამდებობიდან დავით უსუფაშვილი წავა, მთავრობას სამი მინისტრი, რამდენიმე მინისტრის მოადგილე საპარლამენტო კომიტეტების თავმჯდომარეები დატოვებენ, რომლებიც რესპუბლიკური პარტიის წარმომადგენლები არიან. ასე რომ, ეს ყველაფერი ასე უკვალოდ არ ჩაივლის.
ამიტომაც, ჩემი აზრით, ახლა “ქართულ ოცნებაში” ოქროს შუალედის მოძებნას ცდილობენ. თუმცა ასეთი შუალედის მონახვა ნამდვილად გაუჭირდებათ და რომელიმე სუბიექტთან შელევა მოუწევთ. განვმეორდები და ვიტყვი, რომ იმ შემთხვევაშიც კი, თუ კოალიციაში ორივე პარტია დარჩება, არც ეს წაადგება საარჩევნოდ კოალიციის იმიჯს, რადგან ყველას ეცოდინება, რომ “ქართული ოცნება” აბსოლუტურად ხელოვნური ერთობაა, რომელიც ბიძინა ივანიშვილის მხრებზე ზის.
- რაც შეეხება თინა ხიდაშელისადმი წაყენებულ ბრალდებებს, რა განვითარება უნდა მოჰყვეს ამას, ზოგადად, როგორ მოქმედებს ქვეყნის იმიჯზე ის, რომ ხელისუფლების წარმომადგენელი თანაგუნდელს, თავდაცვის მინისტრს, საკმაოდ მძიმე – არჩევნების გაყალბების – ბრალდებას უყენებს?
- ბრალდება მართლაც საკმაოდ მძიმეა. ამ ბრალდების გამოც და იმის გამოც, რომ პროკურატურამ გამოძიება დაიწყო, პოლიტიკური და მორალური კუთხით “რესპუბლიკელების” კოალიციაში ყოფნა აზრს კარგავს. არ ვიცი, რა დასკვნას დადებს პროკურატურა, მაგრამ თუ მან დაადგინა, რომ თავდაცვის მინისტრი არჩევნების შედეგების გაყალბებაში მართლაც მონაწილეობდა, ან მონაცემებში რაიმე ფორმით ერეოდა, ეს პოლიტიკური სკანდალი იქნება.
თუმცა, მეორე მხრივ, დადგინდება, რომ საქართველოში ხელშეუხებელი არავინაა და კანონის წინაშე ყველა თანასწორია. ნებისმიერი თანამდებობის პირის მიმართ შეიძლება დაიწყოს გამოძიება, თუკი გაჩნდება ეჭვი, რომ მან მართლსაწინააღმდეგო ქმედება ჩაიდინა. ევროპასა და ამერიკაში ეს მიღებული პრაქტიკაა. იქაური საგამოძიებო ორგანოების ყურადღების ცენტრში ძალიან მაღალი თანამდებობის პირები მოხვედრილან.
- თქვენ ისაუბრეთ იმაზე, თუ როგორ დაიწია კოალიციის რეიტინგმა ამ დაპირისპირებების გამო. ამ ფონზე, გაიზარდა თუ არა, თქვენი აზრით, საარჩევნოდ ოპოზიციის შანსი?
- არ მგონია, ამით საპარლამენტო და მით უმეტეტეს, არასაპარლამენტო ოპოზიციის შანსი გაზრდილიყო. საზოგადოების აბსოლუტური უმრავლესობის დამოკიდებულება მთავარი ოპოზიციური ძალისადმი, როგორადაც “ნაცმოძრაობაა” მიჩნეული, ისეთივე რჩება, როგორიც ადრე იყო. ამას სოციოლოგიური გამოკითხვებიც ადასტურებს. “ნაცმოძრაობას” ის რეიტინგი, რაც ხელისუფლებიდან წასვლის შემდეგ ჰქონდა, არც მომატებია და არც დაჰკლებია. ეს იმას მოწმობს, რომ მისი ელექტორატი არ იზრდება. რამდენიმე პარტიას აქვს იმის პოტენციალი, რომ თუ კოალიციაში განხეთქილება გაღრმავდა, “ქართული ოცნების” ელექტორატის გარკვეული ნაწილი თავისკენ წაიყვანოს.
- მაგალითად რომელ პარტიებს?
- ესენია ის პარტიები, რომლებიც ნაციონალურ-პატრიოტულ პლატფორმაზე დგანან. რომლებიც ამბობენ, რომ არც დასავლეთი უნდათ, არც რუსეთი და ქართული ინტერესების დაცვას აპირებენ. სოციოლოგიურ კვლევებს თუ დავეყრდნობით, ასეთ პარტიებს უფრო აქვთ მხარდაჭერა. შესაბამისად, თუკი ელექტორატის ის ნაწილი, რომელზეც ზემოთ ვსაუბრობით, “ქართული ოცნებით” განიხიბლა, რაც უკვე დაწყებულია, დიდი ალბათობით ასეთი ტიპის პოლიტიკური პარტიებისკენ წავა. თუ ასპარეზზე ახალი პოლიტიკური მოთამაშეები გამოჩნდნენ, რასაც არ გამოვრიცხავ, შესაძლოა მხარდამჭერთა ნაწილი მათაც წაიყვანონ.
„რეზონანსი”, 03 მარტი, 2016 წელი
ინტერვიუ ვახტანგ ძაბირაძესთან: “ქართული ოცნება” კი არ უნდა დაიშალოს, პირიქით, ირაკლი ალასანიაც უნდა შემოირიგოს
ელზა პაპოშვილი
პოლიტოლოგი ვახტანგ ძაბირაძე აცხადებს, რომ “ქართული ოცნების” დაშლა ქვეყანაში პოლიტიკურად არასტაბილურ გარემოს შექმნის. მისი აზრით, “მრეწველებმა” და “რესპუბლიკელებმა” პირადი დაპირისპირება გვერდზე უნდა გადადონ და, ქვეყნის ინტერესებიდან გამომდინარე, როგორმე ერთად მუშაობა გააგრძელონ. იგი მიიჩნევს, რომ კოალიციის დაშლით ყველაზე მეტად ოპოზიციური პარტიები იხეირებენ, ხოლო სახელმწიფოებრივი თვალსაზრისით ეს შესაძლოა გამოუსწორებელი შეცდომა აღმოჩნდეს. ის “ოცნებას” ურჩევს, რომ 2016 წლის არჩევნებისთვის “თავისუფალი დემოკრატებიც” შემოირიგოს.
- ამ ეტაპზე შესაძლებელია ვივარაუდოთ, რომ საარჩევნოდ კოალიცია “ქართული ოცნება” დაიშლება?
- შესაძლებელია, გამორიცხული არაფერი არ არის, მაგრამ საკითხავი ისაა, თავად მათთვის და საზოგადოებისთვის რამდენად მომგებიანი იქნება. კოალიციის დაშლა ყველაზე ხელსაყრელი ოპოზიციისთვისაა. დაშლის შემთხვევაში, შესაძლოა არჩევნებში ვერ გაიმარჯვოს. ხოლო თუ მაინც უმრავლესობით მოვლენ, მომდევნო 4 წელი ქვეყნისთვის არასტაბილური და არამყარი იქნება, რადგანაც “ოცნება” ამომრჩევლის თვალში სტაბილურობის განცდას დაკარგავს.
- “რესპუბლიკელებისა” და “მრეწველების” დაპირისპირების ფონზე შეიძლება, რომ რომელიმე მათგანმა კოალიცია დატოვოს?
- თუკი ამ ხალხს სახელმწიფოსა და ხალხის წინაშე პასუხისმგებლობა ექნება, დაპირისპირების ფონზეც არჩევნემაბდე კოალიციაში ერთად ყოფნა და მუშაობა უნდა შეძლონ. აქ საუბარია არა ვიღაცების, არამედ ქვეყნის წინაშე პასუხისმგებლობაზე.
რაც ყველაზე და ყველაფერზე მაღლა დგას, “ოცნების” დაშლამ შეიძლება ქვეყანაში ბიძგი მისცეს ძალიან ცუდი პროცესების განვითარებას. ის, რომ არჩევნების დროსაც და მას შემდეგაც ქვეყანაში ბერი ძალა დაინტერესებული იქნება, რომ პოლიტიკური პროცესები დაიძაბოს, ეს კოალიციის წევრებისთვისაც ცნობილია. ამიტომაც მგონია, რომ ორივე პარტიის წევრებს გონიერება ეყოფათ და წინასაარჩევნოდ პირად დაპირისპირებას დაივიწყებენ. ორივე მხარემ კეთილი უნდა ინებოს და თავისი პრეტენზიები გვერდზე გადადოს.
ვთვლი, რომ კოალიციამ კარგად იმუშავა. შესაძლოა, ამომრჩეველი მთლად კმაყოფილი არ არის, მაგრამ საკმაოდ ბევრი რამაც გააკეთეს. თუკი წინასაარჩევნოდ “ქართული ოცნება” დაიშლება, პოლიტიკურ ასპარეზს დატოვებს, რითაც შესაძლოა ხელი შეუწყონ ქვეყანაში ძალიან ცუდი პროცესების განვითარებას. არ არის გამორიცხული, რომ ისედაც გულგატეხილი ამომრჩეველი არჩევნებზე საერთოდ არ მივიდეს. პირიქით, მგონია, რომ “ქართულმა ოცნებამ” ირაკლი ალასანიას პარტიასთან მოლაპარაკება უნდა დაიწყოს და კოალიციაში დააბრუნოს. ყველამ ქვეყნის ინეტერესებიდან გამომდინარე, ძველი წყენა უნდა დაივიწყოს და მოლაპარაკების მაგიდასთან დასხდნენ.
- იმ ფონზე, რაც “თავისუფალ დემოკრატებსა” და “ოცნებას” შორის მოხდა, ფიქრობთ, რომ ეს რეალურია?
- საკითხზე მსჯელობის დროს გამოვდივარ იქიდან, თუ ქვეყნის ინტერესში რა შედის. ამიტომაც ვთვლი, რომ კარგი იქნება, ალასანია მომავალი არჩევნებისთვის “ქართულ ოცნებასთან” გაერთიანდეს. ქვეყანას წინ საკმაოდ რთული პერიოდი ელოდება, ყველა მოზროვნე თუ სახელმწიფოსთვის მნიშვნელოვანი ადამიანების გაერთიანება უნდა მოხდეს, რათა ჩამოყალიბდნენ, 4 წლის განმავლობაში ქვეყნისთვის სასურველი და სასარგებლო რა გააკეთონ. ასე თუ გაგრძელდა, 2020 წლისთვის მივიღებთ ისეთივე დაპირისპირებას, რაც 2012, 2003-სა და 1995 წლებში გვქონდა.
- თავდაცვის მინისტრმა განაცხადა, რომ გოგი თოფაძის ქმედება, შესაძლოა გარე ძალისგან მართული იყოს. მან მინიშნება რუსეთზე გააკეთა. თქვენ როგორ ფიქრობთ?
- არ ვთვლი, რომ ეს ასეა. გოგი თოფაძეს თავისი შეხედულება და მოსაზრება აქვს. ვერ დავიჯერებ, რომ ის რუსეთის მხრიდან მართული დეპუტატია. სულაც არ ვთვლი, რომ ვინმეს დავალებით მოქმედებდეს. რა თქმა უნდა, მესამე ძალის დაინტერესება ასეთ პროცესებში ყოველთვის არსებობს, მაგრამ იმ მოსაზრებას მაინც ვერ გავიზიარებ.
კოალიციის დაშლა ყველაზე მეტად ოპოზიციურ პარტიებს აწყობს. ამ პროცესში, ბუნებრივია, ყველა ერთვება და თოფაძის განცხადებებს სათავისოდ იყენებენ. ამიტომაც ვფიქრობ, რომ ეს კინკლაობა დროზე უნდა დასრულდეს და ეს ყველაზე მეტად “ქართული ოცნების” ინტერესში უნდა შედიოდეს. როდესაც განცხადებას აკეთებ, რომ თოფაძე სხვა ქვეყნის მხრიდან იმართება, მაშინ ამის დასამტკიცებლად რაიმე დოკუმენტაცია უნდა გქონდეს.
„რეზონანსი”, 03 მარტი, 2016 წელი
მიაღწევს თუ არა არჩევნებამდე კოალიცია “ქართული ოცნება” არსებული შემადგენლობით?
ლიკა ამირაშვილი
კოალიცია “ქართული ოცნებაში” დაპირისპირება გრძელდება. ცოტა ხნის წინათ ერთმანეთს პარტია “მრეწველები” და “რესპუბლიკელები” ღიად დაუპირისპირდნენ. ამას ბიძგი მისცა გოგი თოფაძის ბრალდებამ, რომ თავდაცვის მინისტრმა თინა ხიდაშელმა საგარეჯოში არჩევნები გააყალბა. ამის შემდეგ რამდენიმე კვირა მხარეები ერთმანეთს პერმანენტულად აკრიტიკებდნენ, შიგადაშიგ კრიტიკაზე მორატორიუმს აცხადებდნენ და ისევ აკრიტიკებდნენ. კოალიციურმა მედიაციამ პრობლემა ვერ გადაჭრა. თუმცა სამშაბათს “რუსთავი 2″-ის ეთერში თინა ხიდაშელმა თოფაძე, მართალია ირიბად, მაგრამ ერთმნიშვნელოვნად დაადანაშაულა რუსეთის კარნახით მოქმედებაში.
როგორ ფიქრობთ, უკანასკნელი მოვლენების გათვალისწინებით, მიაღწევს თუ არა არჩევნებამდე კოალიცია “ქართული ოცნება” არსებული შემადგენლობით? – ამ კითხვით “რეზონანსმა” საზოგადოებისთვის ცნობილ ადამიანებს მიმართა.
გიგა ნასარიძე (ა/ო “საქართველო არ იყიდება”): საქმე ის გახლავთ, რომ კოალიცია “ქართული ოცნების” ზოგიერთ ბლოკს კოალიციის დატვება რაც უნდა ძლიერ უნდოდეს, არ დატოვებს, რადგან ბატონი ბიძინა ივანიშვილის ფულის ფაქტორი მოქმედებს. ყველაფერს გააკეთებენ იმისათვის, რომ ბიძინა ივანიშვილის კეთილგანწყობა შეინარჩუნონ და წამყვანს პოზიციებზე დარჩნენ. ამიტომ არ მგონია, რომ დაიშალოს.
ნანა კაკაბაძე (უფლებამდაცველი): “ქართული ოცნება” არჩევნებამდე რა შემადგენლობით მიაღწევს, რთული სათქმელია. წინასწარ პროგნოზს ვერ ვაკეთებ.
ლადო ვარდოსანიძე (არქიტექტორ-ურბანისტი): არ მგონია, რომ “ქართულმა ოცნებამ” სრული შემადგენლობით მიაღწიოს. ვფიქრობ, გადანაცვლებები იქნება, მაგრამ ძირითადი ბირთვი დარჩება. შესაძლებელია, რომელიმე პოლიტიკური ძალა შეიამხანაგოს. ცხადია, საზოგადოების მხრიდან ადრინდელი მხარდაჭერა არ ექნება, ამიტომ რესურსს ეძებს. დარწმუნებული ვარ, პარტიების გარდა ინდივიდებსაც ეძებს, ვინაიდან ეს შემადგენლობა ინდივიდთა დონით, რამდენიმე ინტელექტუალის გარდა, ვერ გამოირჩევა.
გია ბუღაძე (ფერმწერი): წესით და კანონით, ამ შემადგენლობით ვერ უნდა მივიდნენ. “ქართული ოცნება” უცნაური წარმონაქმნია. როგორც წესი, კოალიციები არჩევნებისთვის იქნება-ხოლმე. ამათ საერთო რა აქვთ, ვერ გავიგე, იმიტომ რომ ერთი სტალინს გაიძახის, მეორე ნატოს. ახლა რისთვის ერთიანდებიან, სიმართლე გითხრათ, არ მესმის. ვფიქრობ, არსებული შემადგენლობით მიღწევა გაუჭირდებათ. თუმცა არ გამოვრიცხავ, რომ რაღაცის სიძულვილის გამო ისევ გაერთიანდნენ. სიძულივლით გაერთიანების კი არ მჯერა.
ნუცა ჯანელიძე (მუსიკათმცოდნე): არ მგონია, იგივე რაოდენობით მიაღწიონ, კი ამბობენ, რომ უნდა ვიყოთ ერთად და ეს ჩვენი შიდა საქმეა, მაგრამ ბზარი ერთხელ რომ გაჩნდება, გამთელება ძნელია. მეორე მხრივ, ყველაფერი შიგნიდან ტყდება, ამ ადამიანებს ერთმანეთთან რა უნდათ, ვერ გავიგე.
„საქართველო და მსოფლიო“, 2-8 მარტი, 2016 წელი
უნდა გადადგეს თუ არა თავდაცვის მინისტრი გამოძიების დასრულებამდე
შორენა ცივქარიშვილი
საქართველოს მთავარმა პროკურატურამ საგარეჯოში ჩატარებული შუალედური არჩევნების საქმეზე გამოძიება დაიწყო. ამის საფუძვლად იქცა პარლამენტარ გოგი თოფაძის განცხადება, რომლითაც მან თავდაცვის მინისტრი, ფაქტობრივად, არჩევნების გაყალბებაში დაადანაშაულა. გოგი თოფაძემ განაცხადა, რომ თინა ხიდაშელმა არჩევნების შედეგებზე ზემოქმედების მიზნით მუხროვანის სპეცუბანზე რეგისტრირებული ამომრჩევლების _ სამხედრო მოსამსახურეების – რაოდენობა სპეციალურად გაზარდა. გამოძიება სისხლის სამართლის კოდექსის 332-ე მუხლის პირველი ნაწილით მიმდინარეობს, რაც სამსახურეობრივი უფლებამოსილების გადამეტებას გულისხმობს.
პარლამენტარმა გოგი თოფაძემ პირველად სწორედ გაზეთ “საქართველო და მსოფლიოსთან” ინტერვიუში ისაუბრა საგარეჯოს არჩევნებში თავდაცვის მინისტრის მიერ შეტანილ “წვლილზე”: “წესით და რიგით, ხიდაშელმა, მინისტრის კაბინეტში კი არა, დაკითხვებზე უნდა იაროს”, – განაცხადა თოფაძემ. მალე პროკურატურას აღნიშნული საკითხით დაინტერესება მოსთხოვა არასამთავრობო ორგანიზაციამ “საერთაშორისო გამჭვირვალობა საქართველო”. ორგანიზაციის ხელმძღვანელ ეკა გიგაურის განცხადებით, საზოგადოებამ უნდა იცოდეს, საქმე ცილისწამებასთან გვაქვს თუ არჩევნების გაყალბებასთან.
“სამწუხაროდ, საქართველოს პარლამენტის წევრისა და ფრაქციის თავმჯდომარის მიერ საჯაროდ გაკეთებული განცხადებების მიუხედავად, გამოძიება არ დაინტერესებულა საგარეჯოს ოლქში არჩევნების შესაძლო გაყალბების ფაქტით, მიუხედავად იმისა, რომ გარკვეული მტკიცებულებებისა და დოკუმენტების არსებობაზეც იყო საჯაროდ საუბარი. არჩევნების გაყალბება სისხლის სამართლის დანაშაულს წარმოადგენს. სისხლის სამართლის კოდექსის არაერთი მუხლით არჩევნების გაყალბება და საარჩევნო უფლების განხორციელებაში ხელის შეშლა დასჯადია…
ფრაქციის თავმჯდომარისა და საქართველოს პარლამენტის წევრის განცხადებების იგნორირება ყოვლად დაუშვებელია”, – ნათქვამია “საერთაშორისო გამჭვირვალობა საქართველოს” მიერ გავრცელებულ განცხადებაში (სტილი დაცულია – რედ.)
ჩვენ დავუკავშირდით “საერთაშორისო გამჭვირვალობა საქართველოს” ხელმძღვანელობას, მაგრამ ამ საკითხზე დამატებითი კომენტარისგან რატომღაც თავი შეიიკავეს.
რესპუბლიკელები კი ამ ყველაფერს ხელისუფლებაში მყოფი პროდასავლური ძალების დასასუსტებლად მიმართულ კამპანიად მიიჩნევენ. “თოფაძე, რომელიც ხელისუფლების წარმომადგენელია, ცრუ ბრალდებებით გამოდის თავდაცვის მინისტრის წინააღმდეგ. ხელისუფლებიდან გაგდებული ბრეგაძე უხამსი ბრალდებებით გამოდის თავდაცვის მინისტრის წინააღმდეგ. არჩევნებში დამარცხებული ირმა ინაშვილი ასევე დაუსაბუთებელი ბრალდებებით გამოდის და ითხოვს თავდაცვის მინისტრის უფლებამოსლების შეჩერებას. ეს ყველაფერი, ნებსით თუ უნებლიეთ, საქართველოს პროდასავლური კურსის ინტერესებს არ ემსახურება”, _ აცხადებს რესპუბლიკური პარტიის ერთ-ერთი ლიდერი დავით ბერძენიშვილი.
2016 წლის 31 ოქტომბერს საგარეჯოში გამართულ შუალედურ არჩევნებში რესპუბლიკელების კანდიდატმა თამარ ხიდაშელმა 559 ხმით მოუგო “საქართველოს პატრიოტთა ალიანსის” კანდიდატს – ირმა ინაშვილს, რომელმაც არჩევნების შედეგების გამოცხადებისთანავე დაიწყო გაყალბებაზე საუბარი. საარჩევნო გარემოს გაუმჯობესების, თავდაცვისა და გარემოს დაცვის მინისტრების გადადგომის მოთხოვნით ინაშვილმა თანამოაზრეებთან ერთად შიმშილობაც გამოაცხადა. გოგი თოფაძის განცხადების შემდეგ კი ირმა ინაშვილი საქართველოს პრემიერმინისტრ გიორგი კვირიკაშვილს მოუწოდებს, გამოძიების დასრულებამდე თავდაცვის მინისტრი თანამდებობიდან გადააყენოს, რაც მოწმეებზე ზეგავლენის შესაძლებლობას გამორიცხავს.
„ეს, ერთი მხრივ, სამართლებრივი, მეორე მხრივ კი, ღირსების საკითხია. როდესაც თავდაცვის მინისტრი არჩევნების გაყალბებაშია ეჭვმიტანილი თუ მხილებული, ის თანამდებობიდან უნდა გადადგეს. მოგეხსენებათ, დღეს არ დამიწყია ამ არჩევნების გაყალბებაზე საუბარი. ჩვენ არჩევნების ღამესვე საჯაროდ განვაცხადეთ, რომ მუხროვანში, კონკრეტულად უჯარმის მე-13 უბანზე, ჯარისკაცების ასმა პროცენტმა ხმა სახელისუფლო კანდიდატს მისცა, რაც თავისთავად ეჭვს და ძალიან ბევრ კითხვას ბადებს. ამას გარდა, კონკრეტული ინფორმაცია გვაქვს იმის თაობაზე, როგორ მიიღო ჯარმა ამ არჩევნებში მონაწილეობა. ჩვენ ვიცით, რომ გამოიყენეს “კარუსელი” და ჯარისკაცების ნაწილმა ხმა მისცა როგორც სამხედრო უბანზე, ასევე საერთო სიით. უამრავი კანონდარღვევა მოხდა, არჩევნები გაყალბდა და თავდაცვის მინისტრი, თუ მას ღირსება აქვს, თანამდებობიდან უნდა გადადგეს“, – ამბობს ირმა ინაშვილი, „საქართველოს პატრიოტთა ალიანსის” გენერალური მდივანი.
- პრემიერი გაითვალისწინებს თქვენს მოთხოვნას და გადააყენებს თანამდებობიდან თავდაცვის მინისტრს?
- ვფიქრობ, რომ არ გაითვალისწინებს, მაგრამ რა მნიშვნელობა აქვს?! მე ვაყენებ ამ საკითხს და ეს უკვე პრემიერის გადასაწყვეტია, რას იზამს. ჩვენ საგარეჯოს არჩევნების დასრულებისთანავე მოვითხოვეთ თავდაცვისა და გარემოს დაცვის მინისტრების თანამდებობიდან გადაყენება და ეს საკითხი დღის წესრიგიდან დღემდე არ მოგვიხსნია.
- რა პასუხს გასცემთ დავით ბერძენიშვილს, რომელმაც განაცხადა, რომ თქვენი ცრუ ბრალდებები პროდასავლური კურსის წინააღმდეგაა მიმართული?
- დავით ბერძენიშვილი თავის ძმასთან ერთად არის “სტუკაჩოვი” და ცნობილი “სტუკაჩოვების” გამონათქვამებზე რა უნდა ვთქვა. ჩვენ ვლაპარაკობთ დანაშაულზე და საგარეო ვექტორები არაფერ შუაშია. ჯერ გაირკვეს, არის თუ არა დანაშაული ჩადენილი, მიბრძანდნენ პროკურატურაში, მისცენ ჩვენება და მერე ვილაპარაკოთ, არის თუ არა არჩევნების გაყალბება პროდასავლური კურსი. ეს არის სისულელე და პროვინციული აზროვნება, როდესაც ჩვენ სისხლის სამართლის დანაშაულზე ვლაპარაკობთ და ისინი კი _ საგარეო ვექტორზე.
——-
თავდაცვის მინისტრის გადადგომას დიასპორის მინისტრის ყოფილი მოადგილე სანდრო ბრეგაძეც მოითხოვს:
- პროკურატურას სიმართლის დასადგენად სჭირდება მოწმეები, რომლებიც ან დაადასტურებენ, ან უარყოფნ თინა ხიდაშელის მონაწილეობას არჩევნების ფალსიფიკაციაში. მოწმეების უმრავლესობა კი თავდაცვის სამინისტროს თანამშრომელია და უშუალოდ ექვემდებარება ხიდაშელს. აქედან გამომდინარე, ლოგიკურად, მის დაქვემდებარებაში მყოფ პირებზე მას სერიოზული გავლენის მოხდენა შეუძლია.როდესაც სოფლის მეურნეობის სამინისტროში დაიწყო გამოძიება, მინისტრმა დავით კირვალიძემ ვაჟკაცური ნაბიჯი გადადგა და დაკავებული თანამდებობიდან წავიდა. ანალოგიურად მოიქცა თავდაცვის ყოფილი მინისტრი ირაკლი ალასანიაც. ქალბატონი თინა ხიდაშელი ძალიან უთავმოყვარეოდ იქცევა, მისთვის მხოლოდ თანამდებობაა პრიორიტეტული და საზოგადოების სამართლიან მოთხოვნას არაფრად აგდებს. თუ თავდაცვის მინისტრი თანამდებობიდან არ გადადგება, გამოძიების დასრულებამდე უფლებამოსილება მაინც უნდა შეიჩეროს, მაგრამ, როგორც ვხედავ, ის მსგავსს არაფერს აპირებს, პირიქით – რესპუბლიკელები საუბრობენ, თითქოს ეს ყველაფერი ქვეყნის პროდასავლური კურსის წინააღმდეგაა მიმართული. ნუ ეფარებიან პროდასავლურ კურსს, არანაირი კავშირი მათ ნატოსთან, ევროკავშირთან და არც რომელიმე საერთაშორისო სტრუქტურასთან არ აქვთ და ნუ აქვთ დიდი წარმოდგენა საკუთარ თავზე, რომ საქართველოს ნატოსა თუ ევროკავშირში შესვლა რესპუბლიკელებზეა დამოკიდებული. რესპუბლიკელები დღესაც ახლოს არიან მიხეილ სააკაშვილთან, რომელიც გვაშანტაჟებდა, რომ, თუ ის არ იქნებოდა პრეზიდენტი, საქართველო იზოლაციაში მოექცეოდა.
- მიხეილ სააკაშვილთან რესპუბლიკელების ახლოს ყოფნაში რას გულისხმობთ? ამბობთ, რომ მათ დღესაც აქვთ ურთიერთობა?
- შემიძლია, დადასტურებული ინფორმაცია მოგაწოდოთ, რომ გიგა ბოკერიას, “თავისუფლების ინსტიტუტის” ჯგუფსა და რესპუბლიკური პარტიის წევრებს დღემდე მეგობრული ურთიერთობა აქვთ და დღესაც უნისონში მოქმედებენ. მათ გადაწყვეტილი აქვთ მომავალ პარლამენტში მოხვდნენ და შემდეგ ნაციონალებთან ერთად იმოქმედონ საქართველოს ინტერესების საზიანოდ. ეს პროცესი, უკვე კარგა ხანია, დაწყებულია…
მნიშვნელოვანი და გასათვალისწინებელია კიდევ ერთი საკითხი: რესპუბლიკელებიც და ნაციონალებიც მხარს უჭერენ საქართველოში ერთი და იმავე სქესის ადამიანებს შორის ქორწინების დაკანონებას. რა თქმა უნდა, ამ საკითხის წამოჭრა ჩემი მხრიდან, მით უმეტეს, წინასაარჩევნოდ, მათთვის ძალიან არასასურველი იყო. არჩევნების წინ ხდება ყველა პოლიტიკური ძალის ლუსტრაცია და დავინახეთ, რომ რესპუბლიკელები, რომელთაც მოსახლეობის არანაირი მხარდაჭერა არ აქვთ, აპირებენ, სხვისი ავტორიტეტით მოხდვნენ პარლამენტში, რათა შემდეგ არამხოლოდ ერთნაირსქესიანთა ქორწინება, არამედ სხვა ბევრი ანტიეროვნული და ანტისახელმწიფოებრივი საკითხი დააკანონონ.
„ახალი თაობა“, 03 მარტი, 2016 წელი
ინტერვიუ თამარ ჩხეიძესთან: „ბიძინა ივანიშვილს რესპუბლიკელების კოალიციიდან გასვლა არ აწყობს”
ადიგენში რელიგიურ დაპირისპირებას ბევრმა უწოდა სპეციალურად გაღვივებული კონფლიქტი. ილია ჭავჭავაძის საზოგადოების თავმჯდომარე თამარ ჩხეიძე „ახალ თაობასთან“ ინტერვიუში არ გამორიცხავს, რომ გარკვეული ძალები რელიგიურ განსხვავებებს იყენებდნენ საქართველოს წინააღმდეგ.
„საქართველოს მოწინააღმდეგეებისთვის ადვილია განსხვავებების გამოყენება. ვფიქრობ, ამ შემთხვევაში მართლმადიდებლებსა და მუსლიმანებს შორის განსხვავებების გამოყენება ხდება. რელიგია საერთოდ ფაქიზი თემაა და საზოგადოება უნდა მოერიდოს კონფლიქტებს ამ ნიადაგზე“, – ამბობს თამარ ჩხეიძე.
- რა მიზნით შეიძლება ხდებოდეს ამ დაპირისპირების პროვოცირება?
- საქართველოსთვის სახელის გასატეხად. თუ საქართველოს ექნება არატოლერანტული, აგრესიული, არაცივილიზებული ქვეყნის იმიჯი, ეს ხელს შეუშლის ევროინტეგრაციას. ეს კი რუსეთის ინტერესებშია. არატოლერანტული ქვეყნის სახელი საზიანოა არა მარტო ჩვენი სახელმწიფოსთვის, არამედ, მართლმადიდებელი ეკლესიისთვის.
- ბოლო დროს გახშირდა განცხადებები იმაზე, რომ გაძლიერდა რუსული პროპაგანდა და არსებობს საქართველოს საზოგადოების რუსეთისაკენ გადახრის საფრთხე.
- რუსული ძალა და ფული ამოქმედებულია. რუსეთისკენ გადახრის ნიშნები უკვე არსებობს. რუსული პროპაგანდა ავრცელებს პრიმიტიული შეფერილობის განცხადებებს იმაზე, თითქოს აშშ და დასავლეთი გვართმევენ ქართველობას. ეს ძალიან პრიმიტიული ლოზუნგი გათვლილია პრიმიტიულ ადამიანებზე. მისი ავტორები ნერგავენ მოსაზრებას, თითქოს საქართველოს ხსნა შეუძლია მართლმადიდებელ რუსეთს. ეს ხომ სიყალბეა! საქართველოში რუსეთის შემოსვლის შემდეგ რუსეთის თავდასხმის მთავარი ობიექტი გახდა საქართველოს მართლმადიდებელი ეკლესია. რუსებმა მას ავტოკეფალიაც წაართვეს, ტაძრები კი გაძარცვეს და კედლები გადაღებეს. იმასაც ვხედავთ, რას უშვრება რუსეთი ქართულ ეკლესიებს ანექსირებული აფხაზეთის ტერიტორიაზე.
- არის თემები, რომელთაც რუსული პროპაგანდა იყენებს?
- რუსული პროპაგანდა ბევრ თემას იყენებს. ერთ-ერთი მათგანია ანტიჰომოფობიური მოძრაობისთვის გადაჭარბებული მნიშვნელობის მინიჭება. დასავლეთშიც არის ორგანიზაციები, რომლებიც ამას მეტისმეტ ყურადღებას უთმობენ. სექსუალური უმცირესობები არ უნდა იდევნებოდნენ. ამაზე არავინ დავობს, მაგრამ ანტიჰომოფობიურ გამოსვლებზე გადამეტებული აქცენტებია. ამას კარგად იყენებს რუსული პროპაგანდა. რუსეთმა მშვენივრად გამოიყენა აშშ-ის უმაღლესი სასამართლოს გადაწყვეტილება ერთსქესიანთა ქორწინებების დაკანონების შესახებ. ჰომოსექსუალიზმი მგრძნობიარე თემაა საქართველოში. რუსული პროპაგანდა ამას ხედავს და უნდა დაგვიმტკიცოს, რომ რუსეთია ქართული ტრადიციებისა და რწმენის შენარჩუნების გარანტი. ეს, ცოტა არ იყოს, ირონიას ბადებს.
- რატომ?
- იმიტომ, რომ საქართველოს რუსეთთან ერთ-ერთი პირველი შეხება თამარ მეფის პირველი ქმრის მეშვეობით მოხდა. გიორგი რუსს ცხოვრების ისეთი წესი ჰქონდა, რომ რუსეთი დასავლეთიდან წამოსულ გარყვნილებაზე არ უნდა ლაპარაკობდეს.
- ამ თემებზე აზრს გამოთქვამენ კოალიცია „ქართულ ოცნებაშიც“. ბოლოდროინდელი დაპირისპირება „ქართულ ოცნებაში“ იდეოლოგიურ ხასიათს ატარებს თუ ესაა ბრძოლა სკამებისათვის?
- მიუხედავად იმისა, რომ „ქართულ ოცნებაში“ აზრთა სხვადასხვაობა და იდეოლოგიური განსხვავებებია, დაპირისპირების მიზეზია გავლენები და ძალაუფლება. თავის დროზე ეს ხალხი არა პრინციპების გარშემო, არამედ, ხელისუფლებაში მოსასვლელად ბიძინა ივანიშვილის ფულის გარშემო გაერთიანდა. ახლაც უნდათ ხელისუფლებაში დარჩენა. რესპუბლიკურ პარტიას კოალიციაში განსაკუთრებული ფუნქცია აქვს. ივანიშვილი ხელისუფლებაში რუსეთის ხელშეწყობით მოვიდა. რუსეთის მითითებითვე, რესპუბლიკურ პარტიას ახალი გაერთიანებისთვის დასავლური იმიჯი უნდა შეექმნა. რესპუბლიკელებს ეს ფუნქცია ახლაც აქვთ. მათთან დაპირისპირებულ გოგი თოფაძეს დიდი მისია და მნიშვნელობა არ გააჩნია. რესპუბლიკელების პროდასავლურობა პროპაგანდის იქით არ მიდის.
- რას გულისხმობთ?
- რესპუბლიკელების პოზიციები საქართველოს ტერიტორიული მთლიანობის საკითხში არ არის პროდასავლური.
- ბოლო დროს რესპუბლიკელების კრიტიკა პარტია „ქართულმა ოცნებამაც” დაიწყო...
- ამას კონკურენციით ვხსნი. ესაა მეტოქეობა ადგილებისთვის საარჩევნო სიაში. თუ ირაკლი ალასანიას თავის დროზე პირადად ივანიშვილი და მაშინდელი პრემიერი ღარიბაშვილი უპირისპირდებოდნენ, რესპუბლიკელების შემთხვევაში ასე არაა. ივანიშვილი და კვირიკაშვილი რესპუბლიკურ პარტიას მხარს უჭერენ. შესაძლოა, ბიძინა ივანიშვილს აღიზიანებდეს რესპუბლიკელების გაზრდილი ამბიციები და პროკურატურაში საგარეჯოს არჩევნების საქმის გამოძიება მათთვის გაფრთხილება იყოს. ამ ეტაპზე ბიძინა ივანიშვილს რესპუბლიკელების ჩამოშორება არ აწყობს.
„ახალი თაობა“, 03 მარტი, 2016 წელი
ინტერვიუ ნანა კაკაბაძესთან: „ალეკო ელისაშვილის უკან დათო უსუფაშვილი და თინა ხიდაშელი დგანან”
დაპირისპირებამ პოლიტპატიმრების საქმეზე კიდევ უფრო მწვავე ფორმები მიიღო. დღეს უკვე აქეთ სდებენ ალეკო ელისაშვილს ბრალს, რომ თავად იყო კორუფციაში გარეული და გარკვეული თანხის სანაცვლოდ იწყალებდა პატიმრებს.
უფლებადამცველი ნანა კაკაბაძე „ახალ თაობასთან“ ინტერვიუში კიდევ უფრო სკანდალურ განცხადებას აკეთებს და იმ პირებს ასახელებს, ვინც ალეკო ელისაშვილის უკან დგას.
- ქალბატონო ნანა, პირველი თქვენ იყავით, ვინც სწორედ ჩვენი გაზეთის ფურცლებიდან დააანონსეთ, რომ ალეკო ელისაშვილის წინააღმდეგ კომპრომატებს დადებდით და ეს ეკა ბესელიამ გააჟღერა კიდეც. ალეკო ელისაშვილი ახლა თქვენ დაგიპირისპირდათ. იქნებ ამ დეტალებზე საუბრით დავიწყოთ?
- მე მქონდა პირდაპირი ეთერი და, მიუხედავად ყველაფრისა, იქაც მოვერიდე საზოგადოებას, რომ ამ ადამიანის სრული სახე მეჩვენებინა. თუმცა იმდენად ზღვარს გადასულია ეს ყველაფერი, რასაც ელისაშვილი აკეთებს, რომ ალბათ სათქმელი უნდა ითქვას და ამას ვიტყვი თქვენი გაზეთის ფურცლებიდან!
- რას გულისხმობთ? რის თქმას აპირებთ, რაც ჯერ არ გითქვამთ?
- იმ დღიდან, როდესაც ეგ გახდა შეწყალების კომისიის თავმჯდომარე, იყო გაუთავებელი წუხილი პატიმრებისა, რომ შეწყალებები, რომლებიც ხდებოდა ალეკო ელისაშვილის დროს, ვერ უძლებდა ვერანაირ კრიტიკას. მე ამას ვამბობ კულტურული ფორმით, თორემ პატიმრები სულ სხვა ფორმით საუბრობდნენ.
- რაზე საუბრობდნენ?
- რომ ამის უკან იდგა კორუფცია. სხვა მხრივ აუხსნელი იყო ის შეწყალებები, რომლებიც ელისაშვილის დროს ხდებოდა. მე ჯერჯერობით თავს შევიკავებ გვარების დასახელებისგან, თუ პროკურატურა დაინტერესდება, რა თქმა უნდა, მათ სრულად მივაწვდი ამ სიას, მაგრამ მე თქვენ გეტყვით მუხლებს, რომლებიც არის შეწყალებული ალეკო ელისაშვილის მიერ. ეს არის უმძიმესი დანაშაულებები.
- კონკრეტულად?
- ეს არის მკვლელობები, მკვლელობის მცდელობები, ძალიან დიდი მასშტაბის ნარკორეალიზაციები, ადამიანების გატაცება, ყაჩაღობა-გატაცებით, აი, ასეთი მუხლებია შეწყალებული და არ არიან შეწყალებული მსუბუქი დანაშაულის მქონე პატიმრები. ამ ადამიანებს შეწყალებისას გაატანეს ზოგს 15 წელი, ზოგს 20 და 24. აპატიეს ასეთ ადამიანებს და არ აპატიეს ისეთ ადამიანებს, რომლებსაც თვეები ჰქონდათ დარჩენილი. ბუნებრივია, ასეთი შეწყალებები იწვევდა კითხვებს. ხოლო პატიმრებისთვის ეს არ აჩენდა კითხვებს, ისინი პირდაპირ ამბობდნენ, რომ ეს არის კორუფციის შედეგი.
- იგულისხმება ფულის აღება?
- კორუფცია ჩემთვის მაინცდამაინც ფულს არ ნიშნავს, სხვა ინტერესებსაც ნიშნავს, მაგრამ ეს ადამიანები პირდაპირ აცხადებდნენ, რომ ამის უკან იდგა კორუფცია და მოითხოვდნენ, რომ ამითი დავინტერესებულიყავი.
- მერე არ დაინტერესდით?
- მიუხედავად იმისა, რომ მე თვალნათლივ ვხედავდი, რომ იქ რაღაცა ძალიან სერიოზული პრობლემა იყო შეწყალებასთან დაკავშირებით, მაინც არ მჯეროდა, რომ ეს იყო კორუფციის შედეგი და მეგონა, რომ ეს იყო მისი არაპროფესიონალიზმის, გამოუცდელობის შედეგი, რომ მას არასოდეს შეხება არ ჰქონია პატიმრებთან და წარმოდგენა არ ჰქონდა, სად მოხვდა. პატიმრებმა უკვე დაწერეს საჩივარი და გააგზავნეს პროკურატურაში. სამი საჩივარია მის წინააღმდეგ გაგზავნილი.
- ის ამას ცილისწამებას უწოდებს...
- მე ეს პირდაპირაც ვუთხარი ელისაშვილს, ერთი თვეა, რაც ამაზე ლაპარაკი დაიწყო და უკვე სამი წერილია მის წინააღმდეგ შესული პროკურატურაში. სამწელიწადნახევარია, ნაციონალები ამ პოლიტპატიმრების სიებს ატრიალებენ და ერთი ადამიანი როგორ ვერ იპოვეს, რომელსაც ათქმევინებდნენ, რომ ფულია გადახდილი. ერთი თვე არაა, რაც გამოვიდა პოლიტიკურ არენაზე და სამმა ადამიანმა უჩივლა. მიუხედავად იმისა, რომ ამდენი მტკიცებულება მქონდა, რომ გაშვებული ჰყავს ამდენი ადამიანი, რომელთა გაშვებაც არანაირ ლოგიკას და სამართლიანობას არ ეფუძნება, მე არ გამიბედავს, არ გამოვსულვარ და არ მითქვამს, რომ ეს არის კორუმპირებული ადამიანი. მე რომ ვკითხე, შენ რა არგუმენტი გქონდა, ჩირქი რომ მოსცხე ამ პროცესს-მეთქი, იცით, რა მიპასუხა?!
- რა?
- ბიძინა ივანიშვილისა და ირაკლი ღარიბაშვილის გამონათქვამებიო. შეიძლება ნორმალური იყოს ადამიანი, რომელსაც ამხელა ბრალდებებზე ეს არგუმენტები მოჰყავს?! ან რა თქვა ბიძინა ივანიშვილმა ისეთი? როდესაც პროცესი მიმდინარეობდა, მაშინ თქვა, იმდენი ამბები ისმის ამ პოლიტპატიმრებზე, ამით დავინტერესდებიო. დაინტერესდა და ნახა, რომ პროცესი კანონის ფარგლებში მიმდინარეობდა. ადამიანი ამის გარდა სხვა არგუმენტს ვერ ასახელებს. ალეკო ელისაშვილის უკან ძალიან სერიოზული ინტერესები იყო, როდესაც მან ეს კამპანია წამოიწყო.
- რა ინტერესები?
- სულ მცირე, პოლიტიკური ინტერესები. იგი ფიქრობს, რომ ამ ბინძური მეთოდებით შემოვა პოლიტიკაში და ადგილს დაიმკვიდრებს. მაგრამ პირველივე კვირაში გასკდა, რომ ის აფერისტია. ამდენი ხანია, კაცი მესიჯებზე ლაპარაკობს და მესიჯი ვერ წააკითხა სათანადო უწყებებს. სად არის ეს მესიჯები?! პროკურატურას მიუტანა ტელეფონი და ისიც არ შეუმოწმებია, ტელეფონში იყო თუ არა ის მესიჯები. თუკი მესიჯები არ ჰქონდა, რისთვის მიჰქონდა ტელეფონი?! მაგის ტელეფონის გამომშვები ქარხანა რაში აინტერესებდა პროკურატურას?!
- ეს იყო ცილისწამება ელისაშვილის მხრიდან?
- არა მხოლოდ ცილისწამება. სამწუხაროდ ცუდია, რომ დღეს აღარ არსებობს ცილისწამებისთვის სისხლის სამართლის პასუხისმგებლობა. სწორედ ასეთი ადამიანები აბინძურებენ პოლიტიკას, როგორიც ელისაშვილია. მე ვიცი, რასაც ისახავდა მიზნად ეს კამპანია.
- რას ისახავდა?
- მე არც ეკა ბესელიას და არც მანანა კობახიძის ადვოკატი არ ვარ, მაგრამ ხომ ძალიან კარგად, ხელის დადებით ჩანს, რომ ამის უკან დგანან ის ადამიანები, ვისაც სიაში ბესელიასა და კობახიძეზე წინ უნდათ დგომა! სწორედ ეს ადამიანები არიან ჩართულები ამ ბრძოლაში! ეს ხომ ორჯერ ორი ოთხია! სწორედ ეს არის ბინძური პოლიტიკის ნაწილი.
- ელისაშვილს ვიღაც მართავს? მის უკან კონკრეტული ადამიანები დგანან?
- რა თქმა უნდა! აბა, რომელი დავით აღმაშენებელი ელისაშვილი გვყავს, რომ გამოვიდეს და საქართველოს დამოუკიდებლობისთვის და კორუფციის წინააღმდეგ გაილაშქროს! ეს არის მართული ადამიანი, რომელსაც არგუმენტიც არ მისცეს, რაზე უნდა ელაპარაკა! ელისაშვილი არის ცრუპენტელა ადამიანი, რომელმაც ვერ განსაზღვრა, რომ ერთ მშვენიერ დღეს ეს ყველაფერი გასკდებოდა. ჭავჭავაძეობა რომ უნდა და პრეტენზიები რომ აქვს, საქართველოს უახლესი ისტორია მაინც წაიკითხოს.
- ელისაშვილი ბრალს აქეთ გდებთ და აცხადებს, იმიტომ დაუპირისპირდით, რომ თავად გინდოდათ შეწყალების კომისიის თავმჯდომარეობა. ამაზე რას უპასუხებთ?
- მე ვიყავი რეკომენდატორი, უდოს კომისიაში ხალხი რომ ინიშნებოდა. ჩემი პრინციპული პოზიციაა, რომ არ ვყოფილიყავი არც უდოს კომისიაში და არც _ შეწყალების კომისიაში, რადგან ყოველთვის ვამბობ, რომ მე ვარ სუბიექტური პატიმრების მიმართ. მე მეძნელება ვიაზროვნო ისე, რომ ადამიანებს უარი ვუთხრა ციხიდან გამოსვლაზე. მე თვითონ გავიარე ეს ჯოჯოხეთი და არ შემიძლია ასე მარტივად ვთქვა შეწყალებაზე უარი. მირჩევნია, ვიყო უფლებადამცველი და მათი უფლებები დავიცვა.
- ქალბატონო ნანა, დავუბრუნდეთ ჩვენი ინტერვიუს მთავარ თემას. ვინ დგას ალეკო ელისაშვილის უკან და ვინ მართავს მას? თქვენ სია და კოალიცია ახსენეთ, გამოდის, რომ ნაციონალებს აღარ გულისხმობთ...
- სწორედ რომ პოლიტიკურად მართული პროცესია. დიახ, მე მაქვს ერთ პოლიტიკურ ჯგუფზე სერიოზული ეჭვი, რომ ის დგას ამ ყველაფრის უკან. რასაკვირველია, ეს პროცესი ნაციონალების ინტერესშიც შედის, ისინი ამ ყველაფერს სათავისოდ იყენებენ.
- მაშინ რომელ ჯგუფს გულისხმობთ, იქნებ დაასახელოთ?
- კარგი, დავასახელებ და ეს არის `ქართულ ოცნებაში~ მყოფი პოლიტიკური ჯგუფი, რომელიც ამ ყველაფრის უკან დგას!
- ეს საკმაოდ სერიოზული განცხადებაა. უფრო მეტად არ დაკონკრეტდებით?
- სერიოზულია. ეს ეჭვი სწორედ რომ ალეკო ელისაშვილის სულელური ინტერვიუების მერე დამებადა, რომ გამოდიოდა და ყვიროდა, ამას ველაპარაკე, იმას ველაპარაკე. ამ ყველაფერმა გამიჩინა კითხვები კონკრეტული ადამიანების მიმართ. დიახ, ესენი არიან დათო უსუფაშვილი და თინა ხიდაშელი!
- ეს ადამიანები რა შუაში არიან?
- აბა გაიხსენეთ ალეკო ელისაშვილის განცხადებები, როდესაც ის ბრალს დებდა ბესელიას და კობახიძეს, იქვე ისიც დაურთო, ამის შესახებ დავით უსუფაშვილს და თინა ხიდაშელს ვუთხარიო. შე დალოცვილო, პარლამენტის თავმჯდომარე რომ ხარ და რომ გეუბნებიან, რომ კორუფციაში არიან მხილებული პარლამენტის უმაღლესი თანამდებობის პირები, შეიძლება მერე ამაზე ასეთი პასუხი გასცე ჟურნალისტს, რომ არ მახსოვს, ეს მითხრა თუ არა ელისაშვილმაო?!
- ანუ თქვენ ამბობთ, რომ რესპუბლიკელები ელისაშვილის ხელით უპირისპირდებიან კობახიძეს და ბესელიას?
- დიახ, მე ასე ვფიქრობ. შეიძლება პარლამენტის თავმჯდომარეს ეუბნებოდნენ, რომ პარლამენტის ძალიან მაღალი თანამდებობის პირები ქრთამს იღებენ და ის პასუხობდეს, არ მახსოვს, ეს მითხრა თუ არა ელისაშვილმაო?! აქ უნდა გარკვეული პასუხი _ ან მითხრა, ან არ მითხრა. არ მახსოვსო, თქვა. ეს იმას ნიშნავს, რომ ელისაშვილი არ გაწირეს და ამ დროს დარტყმა მიაყენეს თავის თანაგუნდელს! თინა ხიდაშელმა კი ასე უპასუხა: ჩემთან შეწყალების კომისიაზე არაფერი უთქვამს ელისაშვილს, პოლიტპატიმრებზე მითხრაო. მით უარესი, თუ პოლიტპატიმრებზე უთხრა! თავად არ მისცა ხმა პოლიტპატიმრების სიას?! როგორ გააბედინა ამის თქმა ელისაშვილს?! რა პასუხი გასცა თინა ხიდაშელმა, ეს არ არის საინტერესო?! პოლიტპატიმრებზე პასუხისმგებლობა ნანა კაკაბაძეს კი არ აქვს აღებული, პარლამენტს აქვს, სწორედ თინა ხიდაშელს აქვს, ხმა რომ მისცა!
- ანუ პოლიტპატიმრების სახელით მოხდა მანიპულირება და მთავარი მიზეზი შიდა დაპირისპირება იყო?
- სწორედ ასე იყო. საკუთარი ინტერესებისთვის, პირადი ანგარიშსწორებისთვის პოლიტპატიმრებს ესროლეს ტალახი. ამდენი ხანი რომ ამ პოლიტპატიმრების საქმეები არ გადაიხედა, დიახ, დღეს უკვე ღიად ვიტყვი, რომ ამის უკანაც იდგა გარკვეული ინტერესი. ამ ყველაფერს ვიღაც მიზანმიმართულად ბლოკავდა!
- ალეკო ელისაშვილის წინააღმდეგ გაკეთებულ განცხადებებსაც შევეხოთ. გაქვთ მყარი არგუმენტები, რომ მას ბრალი დასდოთ?
- მის წინააღმდეგ სამი საჩივარია უკვე შესული. ახლა დანარჩენს უკვე გამოძიება დაადგეს. მე ნამდვილად ვითანამშრომლებ გამოძიებასთან. მე ის კი არ მაინტერესებს, რომ ალეკო ელისაშვილი ციხეში წავიდეს. უბრალოდ, ეს მისთვის მაგალითი უნდა იყოს, რომ მეორედ ვეღარ გაბედოს ასეთი უზნეობის და პოლიტიკაში ასეთი ბინძური მეთოდების დამკვიდრება! აუცილებლად ვითანამშრომლებ პროკურატურასთან
„ახალი თაობა“, 03 მარტი, 2016 წელი
ინტერვიუ ლევან ალაფიშვილთან: „თეა წულუკიანს ევროსასამართლოს მოსამართლეობა უნდოდა“
ვინ გახდება სტრასბურგში ადამიანის უფლებათა ევროპის სასამართლოს ქართველი მოსამართლე? საქართველოს მთავრობის მიერ დამტკიცებული სამი კანდიდატიდან ერთ-ერთს, ევროსაბჭო 2016 წლის შემოდგომაზე აირჩევს. კონსტიტუციონალისტი ლევან ალაფიშვილი „ახალ თაობასთან“ ინტერვიუში აცხადებს, რომ მოსამართლეობის კანდიდატთა შერჩევისას სამთავრობო კომისია პოლიტიკურად იყო მოტივირებული.
- ბატონო ლევან, სამთავრობო კომისიამ ევროსასამართლოში წარსადგენად რამდენად ღირსეული კანდიდატები შეარჩია? არასამთავრობო სექტორი ასახელებს სხვადასხვა ადამიანებს და კითხულობს, რატომ ვერ მოხვდნენ ისინი, მაგალითად, ეკა გიგაური კითხულობს, რატომ ვერ მოხვდა ამ სიაში კონსტანტინე კორკელია.
- მნიშვნელოვანია კანდიდატების შერჩევის პროცესი, რადგან ის უნდა იყოს დემოკრატიული და გამჭვირვალე. ყოველგვარი კითხვის ნიშნების გარეშე უნდა იყოს შერჩეული და წარდგენილი ის სამი კანდიდატი. კითხვები, რომლებიც ქვეყნის შიგნით თუ გარეთ გაჩნდება, პროცესს დააზიანებს. თუნდაც მცირედი ეჭვი თავად პროცესის თუ კანდიდატების მიმართ შეიძლება გახდეს იმის საფუძველი, რომ ეს საკითხი ევროასამბლეაში არათუ პლენარულ სხდომაზე გავიდეს, არამედ ევროსაბჭოს კომიტეტმა დაუბრუნოს ეს კანდიდატები უკან სახელმწიფოს კონკრეტული მითითებით.
- რა პროცედურებით შეირჩნენ კანდიდატები? იყო გამჭვირვალობა დაცული?
- პროცედურებზე ვერაფერს გეტყვით, რაც შეეხება გამჭვირვალობას, იყო დაცული, მაგრამ რამდენად იყო ზოგადად კრიტერიუმები შეფასების ნათელი და ობიექტური?! ევა გოცირიძისა და გიორგი პაპუაშვილის განცხადებებს შეიძლება გარკვეული ეჭვი მოჰყვეს. მაგალითად, საინტერესოა, 47 მსურველი როგორ გაიფილტრა? თუნდაც კოტე კორკელია რატომ ვერ მოხვდა ნომინანტთა შორის, რა კრიტერიუმები ვერ დააკმაყოფილა მან? არამკაფიო პროცედურებმა შეიძლება ისეთი კითხვები დაბადოს, რომლებმაც შეიძლება სახელმწიფო დააზიანოს. ამიტომ ვამბობ, რომ ყველა კითხვას ადეკვატური პასუხი უნდა გაეცეს.
- როგორია ევროსაბჭოში პროცედურები?
- მას შემდეგ, რაც ამ ხუთეულიდან მთავრობა სამ კანდიდატს შეარჩევს და ევროსაბჭოში წარადგენს, სადაც სპეციალური კომიტეტია, იქ ამ სამმა კანდიდატმა უნდა გაიაროს ფილტრი. ამ კომიტეტში კი უმრავლესობას აკონტროლებს ევროპის სახალხო პარტია, რომელსაც კრიტიკული დამოკიდებულება აქვს საქართველოში მიმდინარე პოლიტიკური პროცესების მიმართ. ამიტომ თუ კითხვები იარსებებს და ეჭვი გაჩნდება ამ სიის მიმართ, შეიძლება მათ ეს სია უკან დაგვიბრუნონ.
- ეს რას გამოიწვევს, ეს იქნება ქვეყნის პრესტიჟისთვის დამაზიანებელი?
- რა თქმა უნდა, ეს ძალიან ცუდი იქნება. კანდიდატს ევროპის საპარლამენტო ასამბლეა ამტკიცებს, მაგრამ ჯერ ევროსაბჭოს კომიტეტია წინ. კომიტეტს რომელი პარტია აკონტროლებს, უკვე მოგახსენეთ. მე ვშიშობ, ეს პროცესი ფართო პოლიტიკური დისკუსიის საგანი არ გახდეს ევროსაბჭოში.
- კომისიის დონეზე ამ პროცესს პოლიტიკური შემადგენელი ახლდა?
- როგორც ჩანს.
- საიდან გიჩნდებათ ეს ეჭვი?
- იმ განცხადებებიდან, რომლებიც უკვე გაკეთდა პოლიტიკოსების მხრიდან. საკონსტიტუციო სასამართლოს თავმჯდომარის განცხადებას ვგულისხმობ.
- რომელიც იუსტიციის მინისტრმა გააკრიტიკა?
- დიახ. საკონსტიტუციო სასამართლოს მოქმედი თავმჯდომარის მიმართ იმ ლექსიკით საუბარი, რომელიც წულუკიანმა გამოიყენა, მიუღებელია. ასევე დამაფიქრებელია კოალიციაში არსებული მდგომარეობა, რადგან რესპუბლიკელმა ვახტანგ ხმალაძემ, ძალიან კომპეტენტურმა კონსტიტუციონალისტმა, რომელიც ამ კომისიის წევრი იყო, მიუხედავად ამ ყველაფრისა, მაღალი შეფასება დაუწერა გიორგი პაპუაშვილს.
- რატომ, როგორ ფიქრობთ?
- ეს ჩემთვის მიანიშნებს იმას, რომ პროცესი იყო პოლიტიკურად მოტივირებული. როგორ, ყველა ერთად გაგიჟდა თუ მხოლოდ ვახტანგ ხმალაძე გაგიჟდა. მან პაპუაშვილს 4,5 ქულა დაუწერა, მაქსიმუმი არის 5 ქულა. ვიღაცამ თავს უფლება მისცა და მხოლოდ 1 ქულა დაუწერა. ხმალაძეზე უფრო დიდი პროფესიონალი იყო ვინმე კომისიაში?! ჩემთვის ამ პროცესში ყველაზე ობიექტური შეფასება ხმალაძის შეფასება იყო.
- ხომ არ იყო ხმალაძის შეფასება კოალიციაში შიდა დაპირისპირებით განპირობებული?
- არამც და არამც. ხმალაძის შეფასება პაპუაშვილისადმი მხოლოდ ობიექტურობის მანიშნებელი იყო.
- გიორგი პაპუაშვილმა ამის შემდეგ იუსტიციის მინისტრის მისამართით ზეწოლაზე გააკეთა განცხადება. აქამდე რატომ არ გააკეთა ეს განცხადება, განაწყენებულის პოზიციიდან ხომ არ საუბრობს პაპუაშვილი?
- შეიძლება კამათის საგანი იყოს, როდის უნდა ეთქვა მას ამის შესახებ, მაგრამ იმ პერიოდში საკონსტიტუციო სასამართლოს მოსამართლეები პოლიტიკური თავდასხმის ობიექტები იყვნენ, პროცესი დაძაბული იყო. შეიძლება ამ ყველაფრის გათვალისწინებით გადაწყვიტა, მაშინ არ ეთქვა, რომ პოლიტიკურ პროცესებში არ ყოფილიყო ჩართული. დღეს რატომ თქვა, ეს შეიძლება კამათის საგანი იყოს, მაგრამ მსგავსი რომ არ განმეორდეს, ამის შესახებ აუცილებლად საჯაროდ უნდა თქმულიყო.
- სხვა კანდიდატებზე რა შეგიძლიათ გვითხრათ, ადეკვატური კანდიდატები შეირჩნენ?
- ცნობილია, რომ ორი დიდი მსურველი იყო ამ პოსტზე. ერთი _ თვითონ იუსტიციის მინისტრი.
- თეა წულუკიანს უნდოდა ევროსასამართლოს მოსამართლეობა?
- დიახ, ეს ცნობილი ფაქტია, ის დაელოდებოდა მოქმედი მოსამართლის ვადის გასვლას და შემდეგ მინისტრის პოსტს დატოვებდა და სტრასბურგში გადავიდოდა, მაგრამ მას ისეთი კონკურენტი გამოუჩნდა, როგორიც ქალბატონი ევა გოცირიძეა.
- თუ წულუკიანს რეალურად უნდოდა ევროსასამართლოს მოსამართლეობა, კომისიაში ვერ „ჩააწყო“, რატომ ვერ გახდა ის კანდიდატი?
- პროცესი ხომ აქ არ მთავრდება, ეს იყო უმთავრესი წინაღობა. ასევე, თუკი გარედან არის მოთხოვნა, რომ გამჭვირვალე იყოს პროცესი, ხომ ფაქტია, რომ ამ შემთხვევაში თეა წულუკიანი თუნდაც კოტე კორკელიას კონკურენციას ვერ გაუწევს პროფესიული ნიშნით, ეს ხომ მისთვისაც უდავო იყო.
„რეზონანსი”, 03 მარტი, 2016 წელი
უვიზო მიმოსვლაზე საბოლოო გადაწყვეტილების დღეების ათვლა დაიწყო
გადაწყვეტილება 10 მარტამდე გამოცხადდება, 3-4 თვეში უვიზო რეჟიმი უნდა ამოქმედდეს
ეკატერინე ბასილაია
თბილისმა ევროპაში უვიზოდ მიმოსვლაზე საბოლოო გადაწყვეტილების მიღების დღეების ათვლა დაიწყო. ევროკომისიამ ამ საკითხზე კავშირის საკანონმდებლო ორგანოებს – ევროპულ საბჭოსა და ევროპარლამენტს – კანონმდებლობაში ცვლილებების შეტანისთვის უახლოეს დღეებში უნდა მიმართოს. საქართველოს ხელისუფლების წარმომადგენლები აცხადებენ, რომ ეს იქნება დღეს ან ხვალ, მაგრამ 10 მარტს არ გადასცილდება და ეს დაპირება მათ უშუალოდ ბრიუსელიდან მიიღეს.
მას შემდეგ, რაც ევროკომისია საკანონმდებლო ცვლილებების ინიცირებას მოახდენს, დაახლოებით 4-5 თვეში კანონმდებლობაში ცვლილებები შევა და ის საკანონმდებლო ჟურნალში გამოქვეყნდება. ამიტომაც ეს მიმართვა მნიშვნელოვანი ეტაპია. ცვლილებების გამოქვეყნებიდან 20 დღეში კი საქართველოს მოქალაქეები ბიომეტრიული პასპორტით 90 დღის განმავლობაში შენგენის ქვეყნებში ვიზის გარეშე შეძლებენ შესვლას.
აღსანიშნავია, რომ მოლდოვას შემთხვევაში ამ პროცედურას ხუთი თვე დასჭირდა.
მართალია, გადაწყვეტილების ზუსტი თარიღი ჯერ ცნობილი არ არის, მაგრამ უკვე დადასტურებულია, რომ საქართველო და უკრაინა ევროკავშირთან უვიზო მიმოსვლის გზას ცალ-ცალკე გაივლიან, რაც ჩვენთვის ცალსახა პოზიტივია, რადგან უკრაინა ზოგიერთი ვალდებულების შესრულებას აგვიანებს. ევროკომისია კიევს დამატებით ანგარიშს სთხოვდა, მაგალითად, იგივე კორუფციის წინააღმდეგ ბრძოლის თვალსაზრისით. ასე რომ, გადაწყვეტილია, უვიზო რეჟიმის საკითხში საქართველო უკრაინას არ დაელოდება.
ევროკომისიამ საქართველოს შესახებ სამოქმედო გეგმის შესრულებაზე დადებითი დასკვნა გასული წლის 15 დეკემბერში მიიღო და ამის შემდეგ საბოლოო გადაწყვეტილება ახლა სწორედ ევროპულ საბჭოსა და ევროპის პარლამენტზეა დამოკიდებული.
იყო მოლოდინი, რომ ევროკომისიის მიმართვა გუშინ უნდა გაკეთებულიყო და ამის შესახებ თავის “ფეისბუქ”-გვერდზე საპარლამენტო უმრავლესობის ლიდერმა ზვიად კვაჭანტირაძემ დაწერა.
“მეგობრებო, როგორც ევროკავშირთან საპარლამენტო ასოცირების კომიტეტის თავმჯდომარე, ვარ ძალიან ბედნიერი, რომ დღეს საშუალება მეძლევა, წინასწარ გაგიზიაროთ ახლახან ბრიუსელიდან, ჩვენი მეგობარი ევროპარლამენტარებისგან მიღებული ძალიან სასიხარულო ინფორმაცია. ხვალ, ბრიუსელი უვიზო მიმოსვლის ეფექტურად ძალაში შესასვლელად საბოლოოდ, ოფიციალურად გამოაქვეყნებს შეთავაზებულ სამართლებრივ ინსტრუმენტს მხოლოდ საქართველოსთვის! ეს არის საბოლოო გადაწყვეტილება, ბოლო ნაბიჯი ევროკავშირის მხრიდან, საქართველოს მოქალაქეებისთვის შენგენის შეთანხმების ქვეყნებში უვიზოდ მიმოსვლის ეფექტურად ძალაში შესაყვანად,” – დაწერა კვაჭანტირაძემ.
მისი მოლოდინი არ გამართლდა. კონკრეტულ თარიღზე არ საუბრობს საგარეო საქმეთა მინისტრი. მიხეილ ჯანელიძის განცხადებით, ევროკომისიის მიერ საქართველოს უვიზო მიმოსვლასთან დაკავშირებით ევროპული საბჭოსთვის მიმართვას უახლოეს პერიოდში ელოდება.
“ჯერ კიდევ თებევრალში პრემიერ-მინისტრის ვიზიტის ფარგლებში გადაწყდა, რომ კომისიის მხრიდან ევროსაბჭოსთვის ოფიციალური წარდგინება რეგულაციის ცვლილების შესახებ, მოხდებოდა უახლოეს კვირებში. შესაბამისად, ჩვენ ამას ველოდებით, რის შემდეგაც დაიწყება ცვლილების განხილვა. ვფიქრობთ, რომ ეს ცვლილებაც მალე უნდა განხორციელდეს, რათა საქართველომ მიიღოს ის შედეგი, რომელსაც იმსახურებს თავისი გატარებული რეფორმებით”, – განაცხადა მიხეილ ჯანელიძემ.
“მარტის პირველ დეკადაში იქნება ოფიციალური მიმართვა ევროკომისიის მხრიდან,” – “რეზონანსთან” საუბრისას აცხადებს ევროინტეგრაციის საპარლამენტო კომიტეტის თავმჯდომარე ლევან ბერძენიშვილი. ამბობს, რომ ამის შესახებ ევროპელი კოლეგებისგან შეიტყო.
“არის მოლოდინი, რომ შეიძლება იყოს დღეს ან ხვალ, მაგრამ მარტის პირველ დეკადაში აუცილებლად ველოდებით. პოლიტიკური გადაწყვეტილება უკვე მიღებულია და ახლა საკითხი ტექნიკურ ნაწილში გადადის. ველოდებით, რომ ევროპის კომისია, რომელსაც დეკემბერში დადებითი დასკვნა აქვს დადებული, ოფიციალურად კანონპროექტით მიმართავს, რომ ერთ-ერთ რეგულაციაში შევიდეს ცვლილება. ამ რეგულაციაში არის ორი სია. ერთი სიაა, სადაც არის ჩამონათვალი ქვეყნებისა, რომლებსაც შენგენის ქვეყნებში შესასვლელად ვიზის აღება ეკუთვნით და მეორეა უფრო მოკლე სია, იმ ქვეყნების ჩამონათვალით, რომლებიც ხანმოკლე ვიზიტებისას ვიზისგან გათავისუფლებულები არიან. სწორედ ამ მეორე სიაში უნდა გადაგვიტანონ. ამ გადაწყვეტილებას იღებს ევროპის კავშირის საბჭო – 28 ქვეყანა კონსესუსით და ევროპის პარლამენტის 751 დეპუტატი კენჭისყრით. ამის შემდეგ ორივე მხარე მოაწერს ხელს, გამოაქვეყნებს და საქართველოს მოქალაქეები ევროპაში წავლენ უვიზოდ. ახლა ჩვენ ველოდებით, რომ მოხდეს ეს შეთავაზება – აღმასრულებელმა ხელისუფლებამ – ევროკომისიამ, საკანონმდებლო ხელისუფლებას – ევროპის საბჭოსა და ევროპარლამენტს უნდა წარუდგინოს, რომ ცვლილება მათ რეგულაციაში შევიდეს. ინიციატივის წარდგენის შემდეგ საბოლოო გადაწყვეტილებამდე არის 3-4 თვე. აქედან გამომდინარე, ვვარაუდობთ, რომ თუკი ყველაფერი სწორად წავიდა, ჩვენი მოქალაქეები ვიზის გარეშე გაემგზავრებიან ევროპის ყველა ქვეყანაში, დიდი ბრიტანეთისა და ირლანდიის გარდა. ეს ნიშნავს, რომ ევროკავშირი გვიცხადებს ისეთ ნდობას, როგორიც თავის დროზე გამოუცხადა ბალკანეთის ქვეყნებს და ორი წლის წინ – მოლდოვას,” – აღნიშნავს ბერძენიშვილი.
საქართველოსა და ევროკავშირს შორის სავიზო რეჟიმის გამარტივებაზე დიალოგი 2012 წლის ივნისს დაიწყო. 2013 წლის თებერვალში საქართველომ სავიზო რეჟიმის ლიბერალიზაციის სამოქმედო გეგმა მიიღო. იმავე წლის ნოემბერში ევროკომისიამ პირველი ანგარიში მოამზადა, 2014 წლის ოქტომბერში კი რიგით მეორე ანგარიში ქვეყნდება. 2015 წლის მაისში რიგაში გამართულ აღმოსავლეთ პარტნიორობის სამიტზე, სადაც საქართველოს მიერ შესრულებული სამუშაოები მესამედ შეაფასეს, ქვეყანას სავიზო რეჟიმის გამარტივებაზე დროებით უარი ეთქვა. საბოლოოდ, ევროკომისიის მხრიდან დადებითი დაასკვნა ქვეყანამ გასული წლის 15 დეკემბერს მიიღო. ახლა კი ბოლო ეტაპი დარჩა – მარტში ევროკომისიამ საკანონმდებლო ცვლილებები ევროპის საბჭოსა და ევროპარლამენტში უნდა წარადგინოს.
„რეზონანსი”, 03 მარტი, 2016 წელი
გაზის ზემაღალი ფასის გამო საწარმოები იხურება
მარი ჩიტაია
გაზის მაღალი ფასი საქართველოში წარმოების განვითარებას მკვეთრად აფერხებს. პრობლემა აქვს თითქმის ყველა საწარმოს, რომელიც ბუნებრივი აირის მსხვილი მომხმარებელია. მწარმოებლები ფიქრობენ, რომ ქვეყანაში გაზის ბუნებრივი აირი არაადეკვატურად ძვირია და ამ პირობებში საწარმოო საქმიანობა აზრს კარგავს.
კომერციული სექტორის წარმომადგენელთა შეფასებით, გაზის ფასი საერთაშორისო ბაზარზე არსებულ მაჩვენებლებს მნიშვნელოვნად აღემატება. ასეთი უთანაბრობის გამო, შესაძლოა, ზოგიერთმა საწარმომ ფუნქციობა შეწყვიტოს.
პირველ რიგში, ასეთი რეალობის წინაშე აღმოჩნდა შპს “რუსთავის აზოტი”, რომლის გენერალური დირექტორი ბუნებრივ აირის ტარიფის შემცირებას კატეგორიულად ითხოვს. ლევან ბურდილაძის განცხადებით, თუკი საწარმოს გაზის ფასი არ შეუმცირდება, ის მუშაობას შეწყვეტს. როგორც ბურდილაძემ განაცხადა, საწარმო უკვე ერთი თვეა გაჩერებულია და თუ ტარიფი რა შეიცვლება, ის ვეღარ გაეშვება და თანამშრომლების დათხოვნა გახდება საჭირო.
2015 წლის ბუნებრივი გაზის ბალანსის მიხედვით, “რუსთავის აზტოტი” საქართველოში ბუნებრივი აირის ყველაზე დიდი მომხმარებელია. საწარმოს მიერ გაზის მოხმარების მოცულობამ შარშან 292,000 მლნ კბ/მ შეადგინა. დანარჩენი მომხმარებლები, ძირითადად, დისტრიბუტორებია, რომელთა შორის ერთ-ერთი პირველია “ყაზტრანსგაზი”. მის მიერ მოხმარებული გაზის მოცულობამ წინა წელს 181,000 მლნ კბ/მ შეადგენს. “დისტრიბუშენ კომპანისთვის” ეს მაჩვენებელი 167,400 მლნ კბ/მ-ით განისაზღვრა.
ჯამში, 2015 წელს კომერციული სექტორის მიერ გამოყენებული გაზის მოცულობა 43% შეადგენს, ხოლო ამ სეგმენტისთვის დაწესებული საფასური 1000 კბ/მ-ზე დაახლოებით 320 დოლარით განისაზღვრება, რაც ძალიან მაღალია ტარიფია.
“რუსთავის აზოტში” აცხადებენ, რომ 6 თვეა აზერბაიჯანულ კომპანია “სოკართან” მოლაპარაკება მიმდინარეობს. საწარმომ ბუნებრივი აირის ღირებულების ცვლილებასთან დაკავშირებით დაპირებაც მიიღო, თუმცა უშედეგოდ.
“გაზის მოწოდება თუ არ აღგვიდგება განახლებული კონკურენტუნარიანი ფასით, კომბინატი ვეღარ გააგრძელებს მუშაობას. უბრალოდ, საწარმო ვერ შეძლებს ფუნქციობას. 6 თვეზე მეტია, “სოკართან” მოლაპარაკება მიმდინარეობს. ჩვენ ვცდილობდით გაგვეთვალისწინებინა მსოფლიო ტენდენცია, რაც დღეს არსებობს გაზთან მიმართებაში. ნავთობისა და გაზის ფასთა უპრეცენდენტო ვარდნაა და გვინდოდა ეს ტენდენცია ჩვენც შეგვხებოდა, მაგრამ შედეგს ვერ მივაღწიეთ.
პირველ თებერვალს შეგვიწყდა გაზის მიწოდება, ამის შემდეგ მოლაპარაკება განსაკუთრებით აქტიურ ფაზაში შევიდა. შევხვდით ენერგეტიკის სამინისტროს, “სოკარს”, მივიღეთ სიტყვიერი დაპირება, თუმცა უშედეგოდ. თუ ჩვენ არ დაგვიწესებენ რეალურ ფასს, რომელიც დღევანდელ საბაზრო რეალობას შეესაბამება, კომპანია მუშაობის გაგრძელებას ვერ შეძლებს. ერთ დღესაც თანამშრომლების სახლებში გაშვება მოგვიწევს”, – აღნიშნა ბურდილაძემ.
მისი განცხადებით, “სოკარი” საერთაშორისო საფასო ტენდენციას არ ითვალისწინებს და გაზს არაადეკვატურ ფასად ყიდის. “მსოფლიო ბანკისა და სხვა საფინანსო ორგანზიაციების კვლევები აჩვენებს, რომ ევროპაში გაზის ფასი 42%-ით არის შემცირებული და ეს რეალობა უნდა გავითვალისწინოთ. მოვითხოვთ, რომ ტარიფს დააკლონ, რადგან არსებული ფასით მუშაობის გაგრძელებას აზრი არ აქვს, შეუძლებელია”, – აცხადებს ლევან ბურდილაძე.
ანალოგიური პრობლემის წინაშეა “აგარის შაქარი”. პროდუქტის თვითღირებულების 30% გაზის გადასახადს უჭირავს. კომპანიის გენერალური დირექტორი ალხან ალიზადე ფიქრობს, რომ ტარიფის შემცირება გავლენას ფასზეც მოახდენს, რაც წარმოებისთვის დიდი შეღავათი იქნება.
“გაზის გადასახადი ჩვენთვის მძიმე ტვირთია. პრობლემა რეალურად არსებობს, რადგან გაუმართლებლად მაღალ ფასს ვიხდით. მარტო გაზის ფასს თვითღირებულებაში 30% უკავია, რაც პროდუქტის ღირებულებაზე ადეკვატურად აისახება. ვფიქრობ, შეღავათი უნდა დაწესდეს, რომ საბოლოოდ მომხმარებელი დარჩეს მოგებული. მაღალი გადასახადის გამო, შაქარიც ძვირი ღირს და ამით ყველაზე მეტად მოსახლეობა ზარალდება.
ჩვენი თხოვნაა, გადასახადი შეგვიმცირდეს. არსებულ ტარიფთან გამკლავება საწარმოებისთვის უკვე სერიოზულ პრობლემად იქცა, განსაკუთრებით იმ ფონზე, როცა ბუნებრივ აირზე მსოფლიო ფასი დაბლა იწევს. ცვლილება ჩვენც უნდა ვიგრძნოთ”, – აცხადებს ალიზადე.
ეკონომიკის სფეროს სპეციალისტი ემზარ ჯგერენაია ამბობს, რომ კომერციული სექტორისთვის ბუნებრივი აირის გადასახადი არარეალურია, რის გამოც “სოკარს” ტარიფის კორექტირება მოუწევს. იგი არ გამორიცხავს, რომ “სოკარმა” საბოლოოდ დათმოს კომერციული სექტორის სასარგებლოდ.
“რუსთავის აზოტს” დიდი ხანია, რაც პრობლემა აქვს გაზის რაოდენობისა და ფასის გამო. აბსოლუტურად მართებულია საწარმოს პრეტენზია, განსაკუთრებით ტარიფის თვალსაზრისით, რადგან კომერციული სექტორის მომხმარებლებს არაადეკვატურად მაღალი ფასის გადახდა უწევთ. იმ ფონზე, როდესაც საერთაშორისო ბაზარზე გაზი იაფდება, “სოკარსაც” ტარიფის შესამცირებლად შესაბამისი გადაწყვეტილება უნდა მიეღო.
როგორც ვიცი, “სოკარი” თანახმაა, რომ ტარიფი შეამციროს. მოუწევს კიდეც ამ ნაბიჯის გადადგმა, რადგან ქართველი მომხმარებლისთვის დაწესებული გადასახადი კონკურენტუუნაროა. ბუნებრივია, რომ ამით ყველაზე მეტად “რუსთავის აზოტი” ზარალდება, რადგან გაზის უმსხვილესი მომხმარებელია. არსებული პრობლემა სხვა საწარმოებს ნაკლებად ეხება, თუმცა მაღალი ტარიფის გამო ზარალს ყველა მათგანი განიცდის.
ცხადია, დიდი გადასახადი საწარმოო პროცესის განვითარებას აფერხებს. ვიმედოვნებ, რომ კომპანიებს ეს ტვირთი შეუმსუბუქდება. “სოკარს” მოუწევს, რომ კომერციული სექტორის სასარგებლოდ დათმოს”, – აცხადებს “რეზოანანსთან” ემზარ ჯგერენაია.
