„რეზონანსი”: ინტერვიუ ნინო ბურჯანაძესთან: „ბიძინა ივანიშვილი “რესპუბლიკელების” მიმართ განსაკუთრებული გრძნობებით არის გამსჭვალული“
„რეზონანსი”: ინტერვიუ გუგული მაღრაძესთან: “კოალიციის დაშლა ნაკლებად მოსალოდნელია… კახა კალაძე კი ყველაზე წარმატებული მინისტრია”
„ახალი თაობა“: ინტერვიუ კახა კუკავასთან: „ხელისუფლება მიხეილ სააკაშვილის ზონდერებს აწინაურებს“
„ახალი თაობა“: ინტერვიუ ომარ ნიშნიანიძესთან: „უი, რესპუბლიკელები ისევ კოალიციაში არიან?“
„ახალი თაობა“: ინტერვიუ ვახტანგ მაისაიასთან: “რუსეთმა აფხაზეთი დიდ სამხედრო პოლიგონად აქცია“
„რეზონანსი”: ინტერვიუ პაატა ზაქარეიშვილთან: “თუ კვიპროსს 40 წელი დასჭირდა, ჩვენ გაცილებით ნაკლები დაგვჭირდება”
„რეზონანსი”: ხალხში სულ უფრო ნაკლები ფული ტრიალებს // “შეიძლება ითქვას, ამ მხრივ წლევანდელი წელიც მძიმე იქნება”
„რეზონანსი”: ალექსი პეტრიაშვილი ლევან მექვაბიშვილს არ იცნობს და დამკვეთის ვინაობის დადგენას ელოდება
————————-
„რეზონანსი”, 09 მარტი, 2016 წელი
ინტერვიუ ნინო ბურჯანაძესთან: „ბიძინა ივანიშვილი “რესპუბლიკელების” მიმართ განსაკუთრებული გრძნობებით არის გამსჭვალული“
ლიკა ამირაშვილი
“ბიძინა ივანიშვილი ის ადამიანია, ვინც “რესპუბლიკელების” მიმართ განსაკუთრებული გრძნობებით არის გამსჭვალული და ფაქტია, რომ მათსავით აზროვნებს. ყველაფერი გააკეთა იმისთვის, რომ ქვეყანაში “რესპუბლიკური პარტია” წარმატებული და დომინანტური ძალა ყოფილიყო,” – აცხადებს “დემოკრატიული მოძრაობის” თავმჯდომარე ნინო ბურჯანაძე, რომელსაც “რეზონანსი” მიმდინარე პოლიტიკურ საკითხებზე გაესაუბრა. იგი ამბობს, რომ ოპოზიციასთან “საუბრები მიმდინარეობს”, თუმცა საპარლამენტო არჩევნებზე გამოსვლას დამოუკიდებლად აპირებს.
ნინო ბურჯანაძე: მთავრობა, იმის ნაცვლად, რომ რეალური პრობლემებით იყოს დაკავებული, რომელიც ქვეყანაში ნამდვილად ძალიან ბევრია, როგორც წესი, დაკავებულია ხოლმე რაღაც დაპირისპირებების შექმნით ან შემდეგ ამ დაპირისპირებების განმუხტვით.
ჩვენ კარგად გვახსოვს, რეალურად რა ხდებოდა მთავრობაში, როდესაც მთავარი თემა იყო, ვთქვათ, ვინ არის ქვეყნის პირველი პირი, დაესწრება თუ არ მთავრობა უშიშროების საბჭოს სხდომას ან პრეზიდენტის გამოსვლას და ა.შ.
ახლა ეს პრობლემა მოიხსნა და, შეიძლება ითქვას, მთავრობამ სამი წლისთავზე გარღვევა მოახდინა, რადგან ეს თემები დღის წესრიგიდან მოიხსნა. თუმცა რეალური საქმიანობით მთავრობა დაკავებული ნამდვილად ვერ არის და ვერც იქნება. მთავრობაში არიან ადამიანები, რომლებიც დიდი კომპეტენტურობით ნამდვილად ვერ დაიკვეხნიან, რაც ქვეყნის ეკონომიკას, სოციალურ მდგომარეობას, საგარეო და საშიანო პოლიტიკასაც ეტყობა.
რაც შეეხება იმ დაპირისპირებას, რომელიც კოალიციაში არსებობს, როგორც გვეუბნებიან დღეს ეს დაპირისპირება ამოიწურება, თუმცა მთავარი ეს არ არის. მთავარია ამ დაპირისპირების საფუძველი და მიზეზი. საფუძველია ის, რომ ამ კოალიციაში თავიდანვე ბიძინა ივანიშვილმა ისეთი ადამიანები შეკრიბა, რომლებსაც აბსოლუტურად განსხვავებული ხედვები ჰქონდათ, როგორც ფასეულობებთან, ასევე ქვეყნის განვითარების გზებთან დაკავშირებით, რაც კოალიციაში გარკვეულ პრობლემებს ქმნის. ეს პრობლემები განსაკუთრებით ღრმავდება და მწვავდება, როდესაც არჩევნები მოდის.
კოალიციაში მოვლენები როგორ განვითარდება, ჩვენთვის დიდი თავსატკივარი ნამდვილად არ არის. არავითარი მნიშვნელობა არ აქვს, ვინ იქნება და ვინ არ იქნება კოალიციაში და როგორ დალაგდება. ჩვენ ვთვლით, რომ კოალიციას ბიძინა ივანიშვილის ხელმძღვანელობით, აბსოლუტური უმრავლესობით ხელისუფლებაში ყოფნის პირობებშიც კი, ქვეყნის ნორმალურად მართვის შესაძლებლობა არ აქვს.
ვფიქრობ, საქართველოს მოსახლეობამ ძალიან ადეკვატური დასკვნა უნდა გააკეთოს და არჩევნებში ხმა კოალიციას ნამდვილად არ უნდა მისცეს. როდესაც ვამბობ, რომ ხმა არ უნდა მისცე, მე ნამდვილად არანაირ ილუზიებში არ ვარ და ზუსტად ვიცი, რომ კოალიციას გარკვეული რაოდენობის ამომრჩეველი, რა თქმა უნდა, ჰყავს და ეს ბუნებრივია, მაგრამ თუ არჩევნები დემოკრატიული სტანდარტებით ჩატარდა, გამორიცხულია კოალიციამ უმრავლესობა მიიღოს.
- პრემიერ-მინისტრისა და “რესპუბლიკელების” შეხვედრის შემდეგ საუბარია მათ შორის ორმხრივი შეთანხმების გაფორმებაზე. თუმცა ჯერჯერობით არ კონკრეტდება, რა შეთანხმებაზეა საუბარი. როგორ ფიქრობთ, 5-პარტიულ კოალიციაში რას უნდა ნიშნავდეს ორი პარტიის შეთანხმება?
- არანაირ ტრაგედიას ვერ ვხედავ, რომ არ აკონკრეტებენ, რა სახის შეთანხმებაზეა საუბარი. აუცილებელი არ არის, რომ პირველივე ეტაპზე ყველაფერი გასაჯაროვდეს. სიმართლე გითხრათ, არ მაინტერესებს, რა შეთანხმებაზეა საუბარი. ვფიქრობ, ეს იმ პარტიებს უნდა აინტერესებდეთ, რომლებიც კოალიციაში შედიან და პრაქტიკულად მეორეხარისხოვანი პარტიების კატეგორიაში არიან გადასული. თუმცა რეალობა უნდა აღინიშნოს: ამ რესპუბლიკურმა პარტი ნამდვილად შეძლო ის, რომ კოალიციაში დომინანტური ადგილი დაიკავა, რაც იმის დამსახურებაა, რომ სხვაზე მეტი პოლიტიკური გამოცდილება ნამდვილად აქვთ.
საქართველოს მოსახლეობას, რაც არ უნდა უნდოდეს იმის დაჯერება, რომ ბიძინა ივანიშვილი თავის მენტალიტეტით “რესპუბლიკელებისგან” განსვავდება, ეს ტყუილია. ბიძინა ივანიშვილი ის ადამიანია, ვინც “რესპუბლიკელების” მიმართ განსაკუთრებული გრძნობებით არის გამსჭვალული და ფაქტია, რომ მათსავით აზროვნებს. ყველაფერი გააკეთა იმისთვის, რომ ქვეყანაში რესპუბლიკური პარტია წარმატებული და დომინანტური ძალა ყოფილიყო.
- ცოტა ხნის წინ შეხვედრა გქონდათ გრიგორი კარასინთან. რა საკითხზე ისაუბრეთ და შეხვედრის ინიციატორი ვინ იყო?
- ბუნებრივია, ჩვენ ვისაუბრეთ იმ თემებზე, რა თემებზეც საგარეო საქმეთა მინისტროს მოადგილესთან უნდა მელაპარაკა. მნიშვნელოვანია, რომ რუსულ-ქართულ ურთიერთობებში პრობლემების მოგვარების მაქსიმალურად მეტი შესაძლებლობა დარჩეს.
ვხედავ, რომ დღევანდელი ხელისუფლება ამ პრობლემებს აბსოლუტურად ვერ აგვარებს. დღეს ის ურთიერთლანძღვა, რაც სააკაშვილის ხელისუფლების პირობებში იყო, ნამდვილად არ არის, მაგრამ თქვენ თუ შეხედავთ რეალურ სიტუაციას, არათუ გაუმჯობესდა აფხაზეთსა და სამაჩაბლოსთან ურთიერთობა, არამედ გაუარესდა კიდეც. ამას, რა თქმა უნდა, გარკვეულწილად ხელს უწყობდა თავდაცვის ყოფილი და დღევანდელი მინისტრების განცხადებები. ერთი მხრივ, ვითომ რუსეთთან ურთიერთობები უნდათ, მაგრამ, მეორე მხრივ, განსხვავებული განცხადებები კეთდება.
ჩემი ამოცანაა, ხელი შევუწყო იმას, რომ აფხაზეთისა და სამაჩაბლოს დაბრუნების შესაძლებლობა მომავალში მაინც დარჩეს. ვფიქრობ, რუსულ-ქართული ურთიერთობები რადიკაულრად სხვაგვარად უნდა წარიმართოს. ვინ იყო ინიციატორი, ამას არავითარი მნიშვნელობა არ აქვს, იმიტომ, რომ არაფორმალური შეხვედრა იყო. ასეთი შეხვედრები წარსულშიც ყოფილა და მომავალშიც აუცილებად იქნება.
- საპარლამენტო არჩევნებში მონაწილეობას როგორ აპირებთ და არის თუ არა შესაძლებლობა, რომ არასაპარლამენტო ოპოზიცია ნაწილობრივ მაინც გაერთიანდეს?
- რა თქმა უნდა, ვემზადებით, საკმაოდ სერიოზული გეგმები გვაქვს. იმედია, საქართველოს მოსახლეობა არ მოტყუვდება და ცრუ დაპირებებს არ დაუჯერებს.
პირდაპირ ვიტყვი, როცა ადამიანები ამბობენ, გვეშველება თუ არ გვეშველება, რა დავაშავეთ, რომ ამ მდგომარეობაში ვართო… დიახ, დავაშავეთ, როდესაც არჩევნებზე მიდის მოსახლეობა და პრეზიდენტს ისე ხაზავს, მის ადგილას ჯოხი რომ ყოფილიყო, მაინც მოხაზავდა, რადგან ასე ერთმა მდიდარმა კაცმა თქვა. ახლა საპარლამენტო არჩევნებზე არჩევანს იმის გამო თუ გავაკეთებთ, რომ ვინმემ იქნებ რაიმე ელემენტარული საარსებო წყარო გადმომიგდოს ან კარგად ილანძღება, ისევ ამ მდგომარეობაში ვიქნებით.
მოსახლეობა თავის მძიმე მდგომარეობას ნურავის ნუ დააბრალებს. რა თქმა უნდა, ხალხში ძალიან სერიოზული ნიჰილიზმია. ადამიანები ამბობენ, რომ არაფერი არ შეიცვლება. მათ მინდა დავუდასტურო, რომ ნამდვილად არაფერი არ შეიცვლება არჩევნებზე თუ არ მივლენ, ან თუ მივლენ და არასწორ არჩევანს გააკეთებენ.
ყველას ერთი კითხვა მინდა დავუსვა: როცა ამბობენ, რომ არაფერი არ შეიცვლება და საპრეზიდენტო არჩევნებზე კი მარგველაშვილი შემოხაზეს, რომლის სახელი და გვარი უმრავლესობამ არც იცოდა, რისი ცვლილების იმედი ჰქონდათ? რატომ ჰქონდათ იმედი, რომ ამის შემდეგ ისინი უკეთ იცხოვრებდნენ? ანალიზის უნარი ქართველს არ აკლია და პატარა ანალიზი გააკეთონ, რისი იმედი ჰქონდათ, ძალიან მაინტერესებს.
რაც შეეხება კოალიციების შესაძლო შექმნას, ახლა ეს ტრადიციული თემაა, მაგრამ ქვეყნებში, სადაც პოლიტიკური სისტემები ძლიერადაა ჩამოყალიბებული და პარტიები ძალიან ძლიერები არიან, როგორც წესი, ნაკლებად დგება ხოლმე არჩევნებამდე კოალიციების შექმნის საკითხი. ეს საკითხი ძირითადად არჩევნების შემდეგ დგება.
საქართველოში, სადაც მთელი რიგი ობიექტური და სუბიექტური მიზეზების გამო პოლიტიკური პარტიები, როგორც წესი, ბევრია და თან ძალიან მყარად ვერ არიან წარმოდგენილი, ყოველთვის დგება ოპოზიციის გაერთიანების საკითხი.
ჩვენ ჯერჯერობით არჩევნებში დამოუკიდებლად გამოსვლას ვგეგმავთ, თუმცა, რა თქმა უნდა, გარკვეული აზრთა გაცვლა-გამოცვლა სხვადასხვა ოპოზიციურ პარტიას შორის მიმდინარეობს და ამაში ჩვენ ვერაფერს საგანგაშოს ვერ ვხედავთ და კოსულტაციებზე უარს არასოდეს არ ვიტყვით. თუმცა ამაზე წინასწარ განცხადებებს არ ვეთანხმები. ზუსტად ვიცი, ესა თუ ის განცხადება რატომ კეთდებახოლმე, როდესაც ცალკეულ პოლიტიკური პარტიები ძალიან ხმამაღალ განცხადებებს აკეთებენ იმასთან დაკავშირებით, რომ ოპოზიციური პარტიები გაერთიანდეს.
არასოდეს არ ვაძლევ თავს ამ ტიპის განცხადებების გაკეთების უფლებას. ყოველ შემთხვევაში, მოლაპარაკებების ან საუბრის დაწყების პირველ სტადიებზე, მით უფრო, საუბრის დაწყებამდე. ასეთი წინასწარი განცხადებები, როგორც წესი, მხოლოდ და მხოლოდ ხელს უშლის შემდგომ მოლაპარაკებებს. ამიტომ მე ვურჩევდი ყველა იმ პოლიტიკურ პარტიას, რომელთაც გაერთიანება სურს, წინასწარი განცხადებებისგან თავი შეიკავონ.
ჩვენ ამ წუთში საუბარს არ ვეწინააღმდეგებით, მაგრამ ჯერჯერობით არჩევნებზე დამოუკიდებლად გამოსვლას ვგეგმავთ. ეს კონსულტაციები არ არის. ამ ეტაპზე ძალიან არაფორმალური საუბრებია, ვინაიდან ეს არ არის ოფიციალური კონსულტაციები, თუნდაც ოპოზიციის შიგნით, ამიტომ დეტალებზე საუბარს აზრი არ აქვს. ჯერჯერობით სერიოზული სახე ნამდვილად არ აქვს.
- პარტიის საარჩევნო სია როგორი იქნება? მაჟორიტარების სიის შედგენაზე თუ დაიწყეთ მუშაობა?
- ხელისუფლებამ ისე კარგად იმუშავა, რომ მაჟორიტარების სია უბრალოდ ვერ გვექნება, რადგან თბილისში ოლქები როგორ დალაგდება, საბოლოო გადაწყვეტილება ამაზე მიღებული არ არის. საერთოდ, წარმოუდგენელია, რომ არჩევნებამდე რამდენიმე თვით ადრე პოლიტიკურმა სპექტრმა არ იცოდეს, საბოლოოდ მაჟორიტარული ოლქები როგორ დალაგდება. რა თქმა უნდა, თუნდაც პარტიული სია მნიშვნელოვნად დამოკიდებული იქნება დამატებით იმაზე, ამ პერიოდის განმავლობაში ვინ როგორ იაქტიურებს, რამდენად ღირსეული ადამიანები გამოჩნდებიან ამა თუ იმ რაიონში. ალბათ ახალი ადამიანებიც იქნებიან, იმიტომ, რომ არ მგონია, რომელიმე პარტიას მხოლოდ პარტიული რესურსით შეეძლოს სრულიად მაჟორიტარული ოქლების დაკომპლექტება და იმის საჭიროება არ ჰქონდეს, რომ დამატებითი ნორმალური ადამიანები მიიზიდოს. ამიტომაც, ბუნებრივია, ამ მიმართულებითაც ვიმუშავებთ.
„რეზონანსი”, 09 მარტი, 2016 წელი
ინტერვიუ გუგული მაღრაძესთან: “კოალიციის დაშლა ნაკლებად მოსალოდნელია… კახა კალაძე კი ყველაზე წარმატებული მინისტრია”
ელზა პაპოშვილი
უმრავლესობის წევრი გუგული მაღრაძე აცხადებს, რომ კონსტიტუციაში ქორწინების ცნების განსაზღვრა აუცილებელი არ არის. თუმცა პოლიტსაბჭოზე “ქართული ოცნების” მიერ მიღებულ გადაწყვეტილებას მხარს დაუჭერს.
გუგული მაღრაძე: უმრავლესობამ იმსჯელა ამის შესახებ, ამიტომაც შესაძლოა მისი ინიცირება დავიწყოთ და კონსიტიტუციაში ჩანაწერი შევიდეს. თუმცა მე ვთვლი, რომ ჩვენს საზოგადოებაში ოჯახის სხვანაირად გაგების საშიშროება არ არსებობს. მით უმეტეს, თუკი ამ თემაზე რეფერენდუმი იქნება, საქართველოს მოსახლეობის უმრავლესობა, დარწმუნებული ვარ, ჩვენ მიერ მიღებულ გადაწყვეტილებას დაეთანხმება. მაგრამ, კონსტიტუციაში ამის ჩაწერის აუცილებლობას ვერ ვხედავ. ჩვენი მოქალაქეებისათვის ქორწინება მხოლოდ ქალისა და მამაკაცის ერთობაა. რადგანაც საზოგადოებაში გაჩნდა აზრი, რომ ამის განსაზღვრა კონსტიტუციით აუცილებლად უნდა მოხდეს, შესაბამისად, პარლამენტიც გამოეხმაურა.
- თუმცა აღმოჩნდა, რომ კოალიციაში ამ საკითხზე ერთიანობა არ არსებობს, რადგანაც “რესპუბლიკელებს” განსხვავებული მოსაზრება აქვთ?
- ყველას აქვს თავისი აზრი. “რესპუბლიკელები” თუ ასე ფიქრობენ, რა პრობლემაა? მათ მსგავსად შესაძლოა, საზოგადოების ნაწილიც ფიქრობდეს, რომ რაღა საჭიროა კონსტიტუციით ამის განსაზღვრა, ეს ორგანულ კანონში ისედაც ხომ წერია?! ეს უფრო სოცილაური საკითხია, ვიდრე პოლიტიკური, ამიტომაც კონსტიტუციაში მისი ჩაწერა-არჩაწერა პოლიტიკურ კონტექსტში არ უნდა განვიხილოთ.
- ფაქტია, რომ კოალიციაში რიგ საკითხებზე განსხვავებული მოსაზრებები არსებობს, “რესპუბლიკელებისა” და “მრეწველების” დაპირისპირება კი უკვე ყოველგვარ “კოალიციურობას” გასცდა. როგორ ფიქრობთ, წინასაარჩევნოდ შეიძლება, რომ კოალიცია დაიშალოს?
- ეს ნაკლებად მოსალოდნელია. მგონია, რომ საზოგადოებაც ნაკლებად მოელის. საქართველოს სამომავლო განვითარებისთვის, ვფიქრობ, კოალიციის ერთიანობა უკეთესი იქნება. ჩვენ არ ვართ ისეთი დემოკრატიული სახელმწიფო, რომ ყველა პარტიამ წინასაარჩევნოდ დამოუკიდებლად იბრძოლოს. ქვეყნის განვითარების მთავარ ეტაპზე კოალიციის ერთიანობა უკეთესია. მაგრამ თუკი დაშლა აუცილებელი აღმოჩნდება, დიდ ტრაგედიას ვერ ვხედავ.
- “რესპუბლიკელებისა” და “მრეწველების” ერთ კოალიციაში ყოფნა როგორ წარმოგიდგენიათ?
- მშვენივრად წარმომიდგენია, რადგანაც პოლიტიკა ურთიერთობის ხელოვნებაა, ამიტომაც, რაც ქვეყანას სჭირდება, ისე უნდა იმოქმედო. პოლიტიკაში ემოციების დრო არ არის. ორივე პარტიის წარმომადგენლები ამ აუცილებლობას კარგად მიხვდნენ. ვფიქრობ, რომ პრემიერი “რესპუბლიკელების” გარდა კოალიციაში შემავალ ყველა პარტიას შეხვდება. კვირიკაშვილთან შეხვედრის ექსკლუზიური უფლება მხოლოდ ამ პარტიის წევრებს არ აქვთ. რიგი საკითხების გარკვევა თავად კოალიციის შიგნით მოხდება.
- ბოლო დროს გავრცელდა ინფორმაცია, რომ შესაძლოა სამთავრობო ცვლილებები მოხდეს. კონკრეტულად კახი კალაძის სახელს ასახელებენ, რომელმაც თითქოს “გაზპრომთან” დაწყებული მოლაპარაკება ბოლომდე ვერ მიიყვანა….
- კახი კალაძე, ვფიქრობ, მთავრობაში ყველაზე წარმატებული მინისტრია. მან “სოკართან” ხელი ძალიან კარგ ხელშეკრულებას მოაწერა. “გაზპრომთან” მიმდინარე მოლაპარაკებას ამხელა აჟიოტაჟი არ უნდა გამოეწვია, რადგანაც ეს იყო სუფთა ეკონომიკური ტიპის მოლაპარაკება. ეს იყო “ნაციონალების” მიერ აგორებული ხმაური, რომელსაც არანაირი საფუძველი არ ჰქონდა.
„ახალი თაობა“, 09 მარტი, 2016 წელი
ინტერვიუ კახა კუკავასთან: „ხელისუფლება მიხეილ სააკაშვილის ზონდერებს აწინაურებს“
ნონა ცაბაძე
„თავისუფალი საქართველოს“ ლიდერი კახა კუკავა ხელისუფლებას ზონდერების დაწინაურებაში ადანაშაულებს და აცხადებს, რომ ისინი საკმაოდ მაღალ თანამდებობებზე ინიშნებიან.
- ბატონო კახა, რის საფუძველზე აკეთებთ ამ განცხადებებს? კონკრეტულად რას გულისხმობდით?
- მე გავაკეთე განცხადება ხარაზიშვილთან დაკავშირებით, რომელიც იყო კრიალაშვილის ჩაცხრილვის ოპერაციის ხელმძღვანელი 2009 წელს. ის დაინიშნა შსს-ს სპეცდანიშნულების რაზმის ხელმძღვანელად. ეს არის დადასტურებული ფაქტი და ამაზე დღემდე შს სამინისტროს განმარტება არ გაუკეთებია.
- რატომ ხდება ასეთი კადრების დაწინაურება?
- დღევანდელი ხელისუფლება არის იგივე, რაც იყო სააკაშვილის რეჟიმი და რაც იყო შევარდნაძის რეჟიმი. უბრალოდ, მათ ჰყავთ იმიჯმეიკერები და ცდილობენ განსხვავებულად წარმოაჩინონ თავი. სამივე იყო ანტიეროვნული კორუმპირებული რეჟიმები. ქართველ ხალხს მოუწია სააკაშვილის გვერდზე დგომა, შევარდნაძე რომ მოგვეცილებინა და ზუსტად ასევე მოგვიწია სააკაშვილზე არანაკლები ბოროტების, ივანიშვილის გვერდზე დგომა, სააკაშვილი რომ მოგვეცილებინა. როცა გავა დრო, 30-40 წელიწადი და ახალი თაობა შეხედავს ამ პროცესებს, მათთვის ამ რეჟიმებს შორის სხვაობა არ იქნება. ეს არის ერთი დიდი ნაგავი, რომელმაც სახელმწიფო მოაქცია ისეთ ღრმა კრიზისში და ისეთ ჭაობში, რომ ძალიან დიდი კითხვის ნიშანი დგას, შეძლებს თუ არა ქართული სახელმწიფო ამ კრიზისიდან ამოსვლას.
- როდესაც ზონდერებზე საუბრობთ, ამ კონკრეტული შემთხვევის გარდა, იცით სხვა ფაქტებიც?
- ჩვენ კარგად ვიცით, ქალაქის სამმართველოში როგორ ინიშნებოდნენ ვაზაგაშვილის მკვლელობაში მონაწილეები. თუმცა ეს ერთი ფაქტიც სავსებით საკმარისია. კიდევ ბევრ ფაქტს მოვიძიებდი, რომ ვხედავდე ამაზე რეაგირებას.
- ლევან მურუსიძის შემთხვევა ისეთი გახმაურებულია, რომ ამაზე ყველა საუბრობს.
- ლევან მურუსიძე ზონდერი არ არის, თუ გადავალთ ზოგადად წინა რეჟიმის დამნაშავეების დაწინაურებაზე, აქ ძალიან მდიდარი ფაქტოლოგიური მასალა გვაქვს. ამაზე სწორედ გუშინ ვსაუბრობდი იურიდიული კომიტეტის სხდომაზე, სადაც ანა დოლიძის საკითხი განიხილებოდა, რომ ანა დოლიძე არის პრაქტიკულად ერთადერთი, თეთრი ყვავი ამ სისტემაში, რომელიც იყო წინა რეჟიმის ოპონენტი.
- დანარჩენები?
- სხვა ყველა, პროკურატურაშიც, სასამართლოშიც, პოლიციაში ხელმძღვანელ თანამდებობებზე ინიშნებიან ან წინა რეჟიმის აქტიური მხარდამჭერები, როგორიც იყო მურუსიძე, როგორიც იყო მიქაუტაძე, შოთაძე და ა.შ. ან უკეთეს შემთხვევაში, ე.წ. ნეიტრალური ხალხი, რომელიც ასევე წინა რეჟიმის მხარდამჭერები იყვნენ, მაგრამ წინა პლანზე არ ჩანდნენ. ყველა უწყების ხელმძღვანელი პირი წინა რეჟიმის მხარდამჭერი იყო.
„ახალი თაობა“, 09 მარტი, 2016 წელი
ინტერვიუ ომარ ნიშნიანიძესთან: „უი, რესპუბლიკელები ისევ კოალიციაში არიან?“
შორენა მარსაგიშვილი
როდის შეხვდება ბიძინა ივანიშვილი „ქართულ ოცნებას“, ვინ აპირებს ერთნაირსქესიანთა ქორწინების დაკანონებას, იშლება თუ არა კოალიცია? – ამის შესახებ „ახალ თაობას“ საპარლამენტო უმრავლესობის ერთ-ერთი ლიდერი ომარ ნიშნიანიძე ესაუბრება.
- დავით უსუფაშვილმა ჟურნალისტებთან საუბარში განაცხადა, რომ კოალიცია „ქართული ოცნება“ შესაძლოა დაიშალოს და ამისთვის ყველა მზად უნდა იყოს. ამასთან დაკავშირებით რა ინფორმაციას ფლობთ?
- დათო უსუფაშვილს შესაძლოა რაიმე ინფორმაცია აქვს და ამიტომ აკეთებს ამ განცხადებას. მე პირადად ამ ეტაპზე დაშლის საშიშროებას ვერ ვხედავ. საინტერესოა, თავად რესპუბლიკელები ხომ არ აპირებენ მის დაშლას. და საერთოდ, ეგ პარტია ისევ კოალიციაშია? ჩემს ამ კითხვას, ალბათ, მოჰყვება გაგრძელებები, მაგრამ ისეთი არაფერი მითქვამს. ისევე უბრალოდ დავსვი ეს კითხვა, როგორც თავის დროზე იკითხა ხიდაშელმა თოფაძეზე, მაგი ისევ პარლამენტშიაო? იმის მტკიცებას არ დავიწყებ, რომ ჩვენს რიგებში ყველაფერი ძალიან კარგად არის. რაღაც მღელვარებებიც იყო. მაგრამ პრემიერის განცხადებამ ბევრს მოჰფხანა გული.
- რომელი განცხადება იყო ბევრისთვის გულის მომფხანი?
- ის განცხადება, რომელიც რესპუბლიკელებთან შეხვედრის წინ გააკეთა. შეხვედრის შემდეგ რამდენიმე საკითხიც მოგვარდა და მისი დაშლის არანაირი საფრთხე აღარ არის. საკუთარი სურვილით, მეეჭვება, ვინმემ კოალიცია დატოვოს.
- თუმცა ცოტა ხნის წინ თქვენ ერთ-ერთ ინტერვიუში თქვით, რომ რამდენიმე დეპუტატი წავა პარლამენტიდან. ამაზე რას გვეტყვით?
- პრემიერთან გამართული შეხვედრის დროს იყო ამაზე საუბარი. ჩვენ გვერდით არის რამდენიმე დეპუტატი, რომლებსაც მომავალში აღარ სურთ პარლამენტში დარჩენა, სადღაც სხვაგან უნდათ თავის გამოჩენა. ზოგს უნდა პოლიტიკური კარიერის გაგრძელება და არც მათ უნდა შევუშალოთ ხელი. ამაზე მომავალში გვექნება საუბარი და რაღაცები გაირკვევა კიდევ. სამწუხაროდ, პარაზიტული მიდრეკილებები ჩვენს კოალიციაში ჯერ კიდევ არის. ვიღაცები ცდილობენ, ივანიშვილის რესურსების ხარჯზე ისევ გაძვრნენ პარლამენტში. ამასთან დაკავშირებითაც უნდა იყოს საუბარი.
- გავრცელებული ვერსიით, შესაძლოა, კოალიცია ორსუბიექტიანი გახდეს და იქ მხოლოდ რესპუბლიკელები და „ქართული ოცნება“ დარჩეს. ამაზე რას ფიქრობენ პარტიაში?
- არა მგონია, ეს ასე მოხდეს. ამის შესახებ განცხადება დავით უსუფაშვილმა გააკეთა, რაც მოგვიანებით პრემიერმა არ დაადასტურა. აღმოჩნდა, რომ ამის შესახებ არც სხვა ლიდერებმა იცოდნენ რამე. ვიღაცებს, ალბათ, აქვთ ამის სურვილი, მაგრამ ასე არ იქნება. ორპარტიულ თანამშრომლობაზე რომ საუბრობენ, ეს სხვა პარტიების მიმართ არაკორექტულია და არც ჩვენ მიმართ არის გამოხატული პატივისცემა. ჩვენც ხომ უნდა გვკითხონ, რას ვფიქრობთ ამის შესახებ და გვინდა თუ არა მარტო რესპუბლიკელთან თანამშრომლობა.
- ვრცელდება ინფორმაცია იმის შესახებაც, რომ შესაძლოა ზვიად ძიძიგური და კონსერვატორები რესპუბლიკელებში შევიდნენ. ეს სიმართლეა?
- არაა ეს ინფორმაცია მართალი. ზვიად ძიძიგური კონსერვატიული და ტრადიციული ღირებულებების მატარებელია, ამიტომაც, არა მგონია, ის ლიბერალური იდეების მქონე პარტიას შეეკედლოს.
- მრეწველების მოკვეთას მართლა აპირებენ კოალიციიდან?
- არა მგონია, აქამდე მივიდეს საქმე მაგრამ რაღაცები შეიცვლება. ჩვენს კოლეგებს მეტი კორექტულობა მართებთ. მესმის, რომ გოგი თოფაძე ხიდაშელის არაკორექტული განცხადების გამო აიჭრა, მაგრამ ჯობდა, თავი შეეკავებინა. ახლო მომავალში მას პრემიერიც შეხვდება და ყველაფერს მოაგვარებენ.
- დავით უსუფაშვილმა განაცხადა, რომ ის კოალიციაში არსებულ ვითარებაზე ტელეფონით ესაუბრა ივანიშვილს. მან საუბრის დეტალები არ გაამხილა. თქვენთვის თუ არის ცნობილი, რას ფიქრობს ყოფილი პრემიერი მის გუნდში არსებულ დაპირისპირებაზე?
- ეს ყველაზე უკეთ დათო უსუფაშვილმა იცის. მას ცოტა მეტად უნდა ჩასძიებოდნენ ჟურნალისტები, რომ ეთქვა, რა უთხრა ივანიშვილმა. ჩვენ, დეპუტატებმა, არ ვიცით, რას ფიქრობს ამ ყველაფერზე ივანიშვილი. მას ამ თემაზე საჯარო განცხადება არ გაუკეთებია.
- მის დუმილს რით ხსნით, არ აინტერესებს, რა ხდება მის გუნდში?
- როგორ არ აინტერესებს. ის ყველაფერს აკვირდება და ისეთ უმნიშვნელო დეტალებსაც კი ამჩნევს, რომელთა შემჩნევა, ერთი შეხედვით, შეუძლებელია. ადრე მას უფრო ხშირად ვხვდებოდით ხოლმე და შეხვედრებზე ისეთი რამეები უთქვამს, რომ გაგვკვირვებია, ეს ინფორმაცია საიდან აქვსო. მან კულუარული ინფორმაციებიც კარგად იცის. ასე მგონია, ცოტა ხანს კიდევ დააკვირდება ამ პროცესს, ცოტას კიდევ გვაცლის და მერე იტყვის თავის სათქმელს.
- ცოტას კიდევ გვაცლისო ამბობთ და რა მიზნით აკეთებს ამას?
- ის ელოდება, რომ ყველას ლუსტრირება მოხდება. მხოლოდ ამის მერე დასვამს საბოლოოდ ნომრებს. ის დაასახელებს, ვინ პირველია, ვინ მეცამეტე ან მეათე.
- რა ნომრებს გულისხმობთ?
- რა ნომრებს და ბატონმა დავით ბერძენიშვილმა რომ ბრძანა, კოალიციაში რესპუბლიკელები მეორენი ვართო.
- მისმა ძმამ ლევანმა ადრე თქვა, პირველები ვართ, რადგანაც ჩვენ მადრიდის რეალი ვართ, „ქართული ოცნება“ ქუთაისის „ტორპედოაო“. ახლა რა შეიცვალა, რით აჯობა „ტორპედომ“ „რეალს“?
- ეს არაკორექტული შედარება იყო. რეალი შეიძლება მაგარი გუნდია, მაგრამ ტორპედო მირჩევნია და თავის დროზე ისიც ძალიან მაგარი გუნდი იყო. ამის მიუხედავად, არ უნდა თქვა ჩვენზე, ტორპედოაო, თორემ კიდევ ერთხელ ვიკითხავ რესპუბლიკელებზე, უი, ეგენი კიდევ კოალიციაში არიან?! ჩვენთან ყოფნა თუ უნდათ, ასეთი რაღაცებისგან უნდა შეიკავონ თავი. თორემ მათ ევროპისკენ სვლაზე ექსკლუზივი კი არა აქვთ. რა რუკა აქვთ ერთი ამისთანა, გვაჩვენონ, რომლითაც მარტო მათ შეუძლიათ, ქვეყანა დასავლეთისკენ წაიყვანონ. ეგ არის ზღაპარი. არა მგონია, ეგენი ჩემზე მეტი მედასავლეთეები იყვნენ. მაგარ მედასავლეთედ მივიჩნევ საკუთარ თავს, მაგრამ, რადგან პოლიტიკოსი ვარ, იმ დასავლურშიც მხოლოდ კარგს ვეძებ. პირველ რიგში, პროქართველი ვარ და ამის მერე ვარ პროევროპელი. პოლიტიკაში ვინცაა, ყველა ასე უნდა ფიქრობდეს. ბოდიში მომითხოვია და სტრატეგიული პარტნიორების ერთ ადგილში საპონწასმული რომ არის ზოგიერთი გადავარდნილი, ასეთები ვერ ვიქნებით ვერასოდეს. ჩვენთვის მთავარია ტრადიციები.
- იყო საუბრები, რომ საპარლამენტო უმრავლესობა ბიძინა ივანიშვილს უნდა შეხვედროდა. ამაზე თუ ისმის რამე?
- ყველა ამბობს, რომ ასეთი შეხვედრა იქნება, მაგრამ ჯერ არ ვიცით, როდის მოხერხდება. რაც მალე შევხვდებით ჩვენს ლიდერს, მით უკეთესი იქნება. სათქმელი ძალიან ბევრი დაგროვდა. მე გითხარით, რომ მან დეტალებში იცის, თუ რა ხდება კოალიციაში. სამაგიეროდ, არ ვიცი, რამდენად სწორ ინფორმაციას აწვდიან მას იმ განწყობაზე, რომელიც მოსახლეობას აქვს.
- თქვენ მასთან ამ თემაზე გსურთ საუბარი?
- არა მარტო ამ თემაზე, მაგრამ მიმაჩნია, რომ ივანიშვილმა ზუსტად უნდა იცოდეს, როგორი განწყობა აქვს ხალხს.
- ნაციონალებს თუ დაეჯერებათ, „ქართული ოცნების“ მიმართ ხალხს ძალიან ცუდი განწყობა აქვს...
- ჩვენ მიმართ აქვს ცუდი განწყობა და მათ მიმართ კარგი? ახლო მომავალში პარლამენტში დაიწყება იმ დანაშაულების განხილვა, რომლებსაც ეგენი ჩადიოდნენ და მერე ვნახავთ განწყობებს.
- 7 მარტს გამართულ პოლიტსაბჭოს სხდომაზე მთავარ საკითხად საკონსტიტუციო ჩანაწერის გაკეთება განიხილეს, სადაც ეწერება, რომ ქორწინება კაცისა და ქალის ერთობაა. რატომ დადგა დღის წესრიგში ეს საკითხი მაინცდამაინც ახლა?
- ამ პოლიტსაბჭომდე პარტია „ქართული ოცნების“ წევრები შევხვდით გიორგი კვირიკაშვილს. მან შეხვედრა ამ თემაზე საუბრით დაიწყო და გამოკვეთილად თქვა, არავინ არ უნდა დაგვწამოს ცილი, რომ ერთნაირსქესიანთა ქორწინებას ვუჭერთ მხარსო.
- და ვინ დააბრალა “ქართულ ოცნებას“ ასეთი რამე?
- ჯერ არ დაუბრალებიათ, მაგრამ აუცილებლად დაგვაბრალებენ. რადგანაც პრემიერმა ამ თემაზე წამოიწყო საუბარი, მან რაღაც იცის. მისი თქმით, ის დააჩქარებს პროცესს, რომ კონსტიტუციაში ეს ჩანაწერი გაკეთდეს. კვირიკაშვილმა იქვე გაიხსენა ანტიდისკრიმანაციული კანონიც და აღნიშნა, რომ საქართველოში არავითარ შემთხვევაში არ მოხდება უმცირესობების უფლებების დარღვევა. რამდენიმე დღის წინ გამართულ პოლიტსაბჭოს სხდომაზე მან ეს გაიმეორა. ჩვენ კარგად ვიცით, რომ ლიბერალური ღირებულებების მატარებელი რესპუბლიკელები, თავისუფალი დემოკრატები და ნაციონალები ამ საკითხს სხვანაირად უყურებენ.
ჩვენ ყველას მოსაზრებას პატივს ვცემთ და მიმაჩნია, რომ ყველაფერში ზომიერები უნდა ვიყოთ, თუმცა ერთნაირსქესიანთა ქორწინების დაკანონება ისეთი საკითხია, რომელზეც დათმობაზე არ წავალთ. არ არის ჩვენი საზოგადოება იმისთვის მზად, რომ ასეთი რამე დაკანონდეს. სხვების არ ვიცი და პირადად მე ამ ამბავს შევეწირები. მოვისმინე ამ საკითხზე რესპუბლიკელების პოზიციები, მაგრამ, კარგი იქნება, თუ უფრო დეტალურად გვეტყვიან, რატომ ეწინააღმდეგებიან კონსტიტუციაში ამ ჩანაწერის გაკეთებას. ხალხიც დაისვენებს და მათთვის საბოლოო განაჩენის გამოტანა გაუიოლდებათ.
- მათი მხარდაჭერის გარეშე შეძლებთ კონსტიტუციაში ცვლილების შეტანას?
- ვერ შევძლებთ.
- აბა, რა აზრი ჰქონდა ამ ინიციატივის დაყენებას?
- აზრი როგორ არა აქვს. დავიწყოთ იმით, რომ ცილს ვერავინ დაგვწამებს და მეორე, მიზნის მისაღწევად სხვა გზებიც არსებობს. რეფერენდუმის ჩატარებას არაფერი უდგას წინ. სხვა თუ არაფერი, ხალხი დაინახავს, ვის რა უნდა. თუ ვინმეს ჰგონია, რომ ასეთი ქორწინების დაკანონებით ჩვენს პროდასავლურობას გაუსვამს ხაზს, ძალიან შემცდარა. ევროპაში უამრავი კარგი ტრადიციაა და, თუ რაღაცის გადმოღებაა აუცილებელი, ისინი გადმოვიღოთ.
- რატომ დადგა ეს საკითხი დღის წესრიგში, მხოლოდ იმიტომ, რომ ვიღაცამ თქვენზე რაღაც არ იფიქროს თუ მართლა აპირებს რამდენიმე დეპუტატი ერთნაირსქესიანთა ქორწინების დაკანონების ინიცირებას პარლამენტში?
- ვის რა უდევს გულში, ვერ გეტყვით. არც ეს არის გამორიცხული. ამ თემაზე იმიტომ დავიწყეთ საუბარი, რომ საკონსტიტუციოში შევიდა სარჩელი. ერთი ახალგაზრდა ითხოვს ამის დაკანონებას. ზოგიერთი დეპუტატის ქმედებებს რომ ვუყურებ, ეჭვები მიჩნდება, რომ ისინიც დაუჭერენ მხარს ასეთ ქორწინებას.
- რესპუბლიკელები ამ ინიცირებას ემიჯნებიან. ეს კიდევ უფრო ხომ არ გაამწვავებს მათთან ურთიერთობას?
- ამაზე მეტი რაღა უნდა გამწვავდეს. ამ თემაზე აუცილებლად დაველაპარაკებით რესპუბლიკელებს და გავიგებთ მათ პოზიციას.
- როდის აპირებთ ამ შეხვედრას?
- იმედი მაქვს, მალე მოხდება, რაღაცაზე მოვილაპარაკებთ. თუმცა, ალბათ, მხოლოდ ნაწილობრივ დაგვთანხმდებიან.
- ნაწილობრივ დათანხმება რას ნიშნავს?
- ინიციატივის წინააღმდეგ ხმას არ მისცემენ, მხოლოდ თავს შეიკავებენ. ხალხს დასკვნების გამოსატანად ესეც ეყოფა. ჩვენ ძალიან კარგად ვაცნობიერებთ, რომ საქართველოს მომავალში ისეთი პარლამენტი ეყოლება, რომელიც აუცილებლად დაიწყებს ერთნაირსქესიანთა დაქორწინებაზე საუბარს. საკონსტიტუციო ჩანაწერით მათ ცოტათი მაინც შევაფერხებთ.
- ასეთ პარლამენტს საქართველო ამ შემოდგომაზე ხომ არ აირჩევს?
- ამ შემოდგომაზე ასეთ პარლამენტს არ მივიღებთ, მაგრამ შესაძლოა 2020 წელს მოვიდნენ ასეთი აზროვნების დეპუტატები.
„ახალი თაობა“, 09 მარტი, 2016 წელი
ინტერვიუ ვახტანგ მაისაიასთან: “რუსეთმა აფხაზეთი დიდ სამხედრო პოლიგონად აქცია“
გულიკო ბალაძე
რუსეთი დროდადრო საქართველოს ტერიტორიის ოკუპირებულ ნაწილში წვრთნებს ატარებს. აფხაზეთში, ნაგვალიეს პოლიგონზე, 100-კაციანი ჯგუფი მონაწილეობდა სამხედრო წვრთნაში. რუსულმა ანტიტერორისტულმა ქვედანაყოფებმა „უკანონო შეიარაღებული ფორმირებების საქმიანობა აღკვეთეს“.
რისთვის ამზადებს და წვრთნის პუტინი ოკუპირებულ ტერიტორიაზე სამხედრო ქვედანაყოფებს? ექსპერტი სამხედრო-პოლიტიკურ და უსაფრთხოების საკითხებში ვახტანგ მაისაია აცხადებს, რომ რუსეთმა აფხაზეთი ერთ დიდი პოლიგონად აქცია.
- ბატონო ვახტანგ, სულ ახლახან აფხაზეთში რუსული სამხედრო ნაწილების წვრთნა ჩატარდა. საქართველოს ტერიტორიის ოკუპირებულ ნაწილში რუსული ანტიტერორისტული ქვედანაყოფები მზადდება. რუსეთი ე.წ. ანტიტერორისტული საქმიანობისთვის ვინმეს გაუვნებელყოფას აპირებს? რაში სჭირდება აფხაზეთში ასეთი ჯგუფების მომზადება?
- ჯერ ერთი, სირიის ტერიტორია აფხაზეთიდან საკმაოდ ახლოს არის გეოგრაფიულად. მეორეც – სირიის საბრძოლო ოპერაციებში რუსეთის სპეცდანიშნულების ქვედანაყოფების მონაწილეობა დადასტურებული ფაქტია. დღეს სირიაში იბრძვის 1.000-მდე სპეცდანიშნულების მებრძოლი. ამას ემატება დაქირავებული მებრძოლები. ადამიანები ჩადიან სირიაში, მონაწილეობენ, როგორც დაქირავებული მებრძოლები ასადის მომხრე შეიარაღებულ ძალებთან ერთად. ეს ყველაფერი ხდება რუსეთის სპეცსამსახურების ეგიდით.
აფხაზეთისა და სირიის ტერიტორიები, სადაც ახლა სპეცოპერაციები ტარდება, იმდენად ახლოსაა ერთმანეთთან, რომ საკმაოდ ადვილია აქედან სირიაში ქვედანაყოფების გადასროლა.
- აფხაზეთიდან შესაძლებელია რაიმე საბრძოლო მოქმედების განხორციელება, ვთქვათ, რაკეტის გაშვება?
- არა, აფხაზეთიდან შეიძლება მოახდინო რუსული სამხედრო გემების გადაადგილება და სამხედრო ტექნიკის გადასროლა.
- ანუ ზღვის გამოყენებით…
- დიახ, ზღვის გამოყენებით. რუსეთმა შეიძლება აფხაზეთში განალაგოს დამრტყმელი შეიარაღება, რომელიც მიმართული იქნება თურქეთის წინააღმდეგ. თუკი დაიწყება რუსეთ-თურქეთის კონფრონტაცია, აფხაზეთი გახდება რუსეთის პლაცდარმი თურქეთის წინააღმდეგ სამხედრო ზეწოლის განხორციელებისთვის.
- ანუ ამ წერტილში - აფხაზეთის ტერიტორიაზე რუსული სამხედრო ძალების ყოფნა და მომზადება რუსეთისთვის სტრატეგიული დანიშნულებისაა?
- რა თქმა უნდა, აბსოლუტურად, სამი მიზნით _ აქედან შეიძლება განხორციელდეს სამხედრო, სატრანზიტო, სატრანსპორტო ოპერაცია, როგორც საჰაერო, ისე საზღვაო. მეორეც – შესაძლებელია, იგივე ლანდშაფტის პირობებში მოამზადო და გაუშვა სპეცდანიშნულების რაზმები. ამოქმედო ერთი და იმავე ლანდშაფტის ტერიტორიის ფორმატში.
- რუსეთს ყირიმშიც აქვს სამხედრო ბაზა…
- აფხაზეთის ტერიტორია უფრო მიესადაგება სირიის ტერიტორიას.
- სოჭშიც ხომ აქვს რუსეთს საზღვაო ტერიტორია?
- სოჭი უფრო საკურორტო და სხვა ტიპის კომპლექსების დანიშნულებისაა. აფხაზეთი კი აუთვისებელი ტერიტორიაა. აფხაზეთის ტერიტორიის გამოყენება სამხედრო დანიშნულებით რუსეთისთვის უფრო ხელსაყრელია.
- ანუ აფხაზეთი რუსეთმა ერთ დიდ პოლიგონად აქცია…
- რა თქმა უნდა. რუსეთს სურს, აფხაზეთის ტერიტორია თავის შეიარაღებული ძალების, თავდაცვის პოლიტიკისა და სტრატეგიის ერთ-ერთ მთავარ იარაღად გამოიყენოს.
- წვრთნები ნაგვალიეს პოლიგონზე ჩატარდა. რას წარმოადგენს ნაგვალიეს პოლიგონი?
- მგონი, ჩვეულებრივი ტერიტორიაა, სადაც წვრთნები ტარდება. სავარაუდოდ, ვიცი, რომ ერთი რუსული პოლიგინი არის ოჩამჩირესთან ახლოს, მეორე _ სოხუმთან, მესამე _ რიწის მთების მიდამოებში. რომელზეა საუბარი, ვერ გეტყვით.
- 100-კაციანი ჯგუფი დიდია თუ პატარა?
- სპეციალიზებული ასეული, სპეცდანიშნულების რაზმების ეგიდით, გაძლიერებულია, რომელიც წარმოადგენს სრულყოფილ საბრძოლო ერთეულს, ანუ აფხაზეთში ხდება სრულყოფილი რუსული სამხედრო ერთეულების მომზადება ასეულების სახით, რომლებსაც შემდეგ შეუძლიათ თავისუფლად ჩაერთონ სირიის საბრძოლო ოპერაციებში. სირიისა და აფხაზეთის ტერიტორიები ერთმანეთს წააგავს. განსაკუთრებით სირიის იმ ტერიტორიებს, რომელშიც დღეს რუსეთი და ასადის კოალიცია საბრძოლო ოპერაციებს ატარებენ.
- პრორუსულ სამხედრო კოალიციას სირიაში რა შედეგები აქვს დღეისთვის?
- საკმაოდ წარმატებული. მათ შეძლეს გარკვეული სტრატეგიული ტერიტორიის დაკავება, შეძლეს რამდენიმე სტრატეგიული ქალაქის ბლოკირება, სადაც ჯიჰადისტური ძალები არიან გარშემორტყმული. რუსეთი ასევე მივიდა სირია-თურქეთის საზღვართან.
- ე.ი. თურქეთს საკმაოდ რთული ვითარება ექმნება...
- გეთანხმებით.
- რუსეთს სურს თურქეთთან საზღვარი ჰქონდეს?
- ბუნებრივია. რუსეთი ცდილობს მესამე სამხედრო ბაზაც შექმნას ამ საზღვრების მომიჯნავე ტერიტორიებზე და გააძლიეროს თავისი კონტინგენტი.
- დღემდე, რაც საბჭოთა კავშირი დაიშალა, რუსეთს თურქეთთან საზღვარი არ ჰქონდა...
- თუ არ ჩავთვლით სომხეთ-თურქეთის საზღვარს, რომელიც, ფაქტობრივად, რუსეთის შეიარაღებული ძალების სასაზღვრო ძალების კონტინგენტის მიერ კონტროლდება.
- ანუ რუსეთს თუ დასჭირდა, თურქეთს შეიძლება ორი მხრიდან დაეჯახოს? სირიისა და სომხეთის მხრიდან?
- ჩათვალეთ, რომ თურქეთის ტერიტორიის შიგნით არიან ქურთი სეპარატისტები, რომლებიც ასადისა და რუსეთის მხარდამჭერები იქნებიან.
- ანუ თურქეთს შეიძლება სამი მხრიდან დაემუქროს საშიშროება?
- იმედია, რეალურ შეჯახებამდე საქმე არ მივა, მაგრამ თეორიული გათვლებით, თუ რუსეთს დასჭირდა, სავსებით მოსალოდნელი სცენარია.
„რეზონანსი”, 09 მარტი, 2016 წელი
ინტერვიუ პაატა ზაქარეიშვილთან: “თუ კვიპროსს 40 წელი დასჭირდა, ჩვენ გაცილებით ნაკლები დაგვჭირდება”
თაკო მათეშვილი
“ცხინვალში, სასადილოში ორმა კაცმა რაღაც რომ ილაპარაკა, ამაზე სერიოზულ განცხადებებს რომ ვაკეთებდეთ, მათი წესებით თამაში იქნებოდა” – ამბობს სახელმწიფო მინისტრი შერიგებისა და თანასწორობის საკითხებში პაატა ზაქარეიშვილი ცხინვალში ჩასატარებელ “რეფერენდუმზე” და დარწმუნებულია, რომ იგი ისეთივე უშედეგო აღმოჩნდება, როგორიც გასული ორი შემთხვევის დროს იყო.
რუსეთის სიჩუმე მას ამ საკითხის არასერიოზულობაში არწმუნებს და მიიჩნევს, რომ სანამ მოსკოვი არ აქტიურობს, ჩვენი მხრიდან თემისთვის აქტუალობის შეძენა მხოლოდ სეპარატისტების წისქვილზე დაასხამს წყალს.
- რამდენად კმაყოფილი ხართ იმ შედეგით, რაც ენგურჰესთან დაკავშირებით დადგა?
- ნამდვილად კმაყოფილი ვარ. აფხაზეთი ჩვენი ტერიტორიაა და მაშინაც კი ვაწვდიდით ელექტროენერგიას, როცა ჩვენთან არ იყო დენი. ტერიტორიული მთლიანობა მხოლოდ ლამაზი ფრაზა არაა.
- თუმცა, ხელისუფლების წარმომადგენლების მხრიდან გაკეთდა განცხადებები, რომლებიც სადავო გახდა. მაგალითად ის, რომ ამ ელექტროენერგიის დიდ ნაწილს რუსული ბაზები მოიხმარენ…
- პოლიტიკა მოქმედებაა და არა ლაპარაკი. ყოველთვის საბოლოო შედეგებით უნდა ვიმსჯელოთ. შედეგი კი ისაა, რომ გრძელდება პოლიტიკა, რომელიც გვქონდა.
- ამ განცხადებებმა ურთიერთობა კიდევ უფრო ხომ არ დააზარალა?
- არანაირად. ისინი ხედავენ, რომ ქართული საზოგადოება დემოკრატიულია და აქ სხვამოსაზრებები არსებობს. კამათიც არის, მაგრამ მათთვის მნიშვნელოვანი საბოლოო შედეგია.
- ამასწინათ გავრცელდა თქვენი განცხადება, სადაც ამბობდით, რომ ოკუპირებული ცხინვალის რუსეთის შემადგენლობაში შესვლის საფრთხეს ვერ ხედავთ…
- მე ასეთი ფრაზა საერთოდ არ მითქვამს. ერთ-ერთმა ტელეკომპანიამ ცრუ ინფორმაცია გაავრცელა, რაც პირველად არ ხდება. მსგავს თემაზე საუბარი საერთოდ არ მქონია.
- ზოგადად რას ფიქრობთ ცხინვალის “რეფერენდუმზე”?
- 25 წელია ამ სფეროში ვარ და ამ ე.წ. რეფერენდუმზე საუბარი სულ მიდის. ორჯერ ჩაატარეს, 1999 წელს, შევარდნაძის დროს და 2006 წელს, სააკაშვილის დროს. ყველამ ვიცით, რომ ამას არავითარი შედეგი არ ჰქონია. შესაბამისად, იმაზე, რასაც ცხინვალში ლაპარაკობენ, ჩემი აზრით, სახელმწიფო მინისტრი ყოველ წამს არ უნდა რეაგირებდეს. ე.წ. რეფერენდუმი ეხება ვითომდა ამ ტერიტორიის რუსეთთან მიერთებას. ამ დროს კი რუსეთი ჩუმადაა, ხმას არ იღებს და ჩვენ, ცხინვალში სასადილოში ორმა კაცმა რაღაც რომ ილაპარაკა, ამაზე სერიოზულ განცხადებებს რომ ვაკეთებდეთ, მათი წესებით თამაში იქნებოდა. ჩვენთვის მნიშვნელოვანი ისაა, თუ რა პოზიცია აქვს ამ საკითხზე რუსეთს. ჯერჯერობით არანაირი პოზიცია არ ფიქსირდება. ამას რომ მოვისმენთ, მაშინ ჩაერთვება მინისტრიც, მთელი სახელმწიფოც და საერთაშორისო თანამეგობრობაც. როცა ვხედავთ, რომ ცხინვალში საუბრებს არანაირი გაგრძელება არ მოჰყვება, არ მგონია, რომ თავი უნდა გამოვიჩინოთ და ჩვენი წინდაუხედავი საქციელით ტემპერატურა ავწიოთ იქ, სადაც ასაწევი არ არის.
- რა შეგიძლიათ გვითხრათ ცხინვალის მოსახლეობაში არსებულ განწყობებზე?
- იქ ძალიან მძიმე სოციალური მდგომარეობაა. აშკარად გრძნობენ, რომ მიტოვებული არიან. ის დახმარება, რასაც რუსეთისგან ელოდებიან, ადამიანებამდე არ აღწევს. აქვთ განცდა, რომ მძიმე კორუფციაა და ფულის მნიშვნელოვანი ნაწილი ვიღაცის ჯიბეებში იკარგება. ასე რომ, მოსახლეობის დიდი ნაწილი უკმაყოფილოა იმ რეალობით, რაშიც ცხოვრობენ.
- ამის გამო არის პროტესტი?
- რა თქმა უნდა. შეგახსენებთ, რომ იქ ჩატარებულ ყველა ე.წ. არჩევნებზე დაძაბულობაა. შედეგები უქმდება, ხელახლა ინიშნება და ა.შ. აქედანაც ჩანს, რომ პროცესს ისე ვერ მართავენ, როგორც ეს ვიღაცას აწყობს. რუსეთს ე.წ. არჩევნები მხოლოდ ფორმალურად სჭირდება, რათა გაიმყაროს ესა თუ ის პოზიცია. საზოგადოება კი აშკარად უკმაყოფილოა. გარდა ამისა, საზოგადოების მნიშვნელოვანი ნაწილი რეგულარულ კავშირშია დანარჩენ საქართველოსთან. ძალიან ბევრი ჩამოდის სამკურნალოდ, მოგზაურობენ. ოსების გარკვეული ნაწილი ზაფხულობით საქართველოში – შავიზღვისპირეთში ისვენებს და ხედავენ იმ ცვლილებებს, რაც დანარჩენ ქვეყანაში ხდება.
ამიტომ, ჩვენი მშვიდობიანი პოლიტიკის გაგრძელება ძალიან მნიშვნელოვანია, რათა მათ ნახონ, რომ ეს მდგრადი პოლიტიკაა და არა შემთხვევითი. ნახონ, რომ მათ კი არ ვატყუებთ, არამედ ოსებსა და აფხაზებთან ჩვენ, ქართველებს, მშვიდობა მართლაც გვჭირდება. ამას ვიღაცის მოსაწონად კი არ ვაკეთებთ, არამედ იმიტომ, რომ მართლა გვჭირდება მშვიდობა როგორც ღირებულება.
მშვიდობის სამწლიანი პერიოდი თვალში საცემია, თუნდაც იმით, რომ გამყოფი ხაზის გასწვრივ ადამიანი არ დაღუპულა. ეს აქამდე, 25 წლის განმავლობაში არ მომხდარა. ამ სამ წელში არ ყოფილა დაძაბულობა და იმის განცდა, რომ ხვალ შეიძლება, ომი დაიწყოს. ადრე კი ეს ჩვეულებრივი ამბავი იყო – სადღაც ავტობუსი დაიწვებოდა, სადღაც ბავშვებს გაიტაცებდნენ და ა.შ. ასევე, ამ სამი წლის განმავლობაში არც ერთი დამატებითი დევნილი არ გვყავს, დამატებით სოფელი და ქალაქი არ დაგვიკარგავს, რაც, ვერც ერთმა ხელისუფლებამ ვერ აიცილა თავისი მმართველობის პირველივე წლებში. ანუ, ჩვენ არც ერთი ახალი გამოწვევა არ შეგვიქმნია. ვებრძვით იმ გამოწვევებს, რომლებიც დარჩა.
ძალიან ბევრი გამოწვევა მოვსპეთ, ზოგი ვერ მოვსპეთ. ჯერ კიდევ გადასაჭრელი გვაქვს ადამიანების გატაცების პრობლემა. მართალია, ჩვენს დროს სიტუაცია შედარებით შეიცვალა და ძალიან არ მომწონს, რასაც ახლა ვიტყვი, მაგრამ ადრე თუ თვეებით აკავებდნენ, ახლა რამდენიმე დღით აკავებენ. რა თქმა უნდა, ესეც ცუდია, მაგრამ უკეთესია – ადამიანი უკანონო პატიმრობიდან 2-3 დღეში თავისუფლდება.
კიდევ ერთი ჯერჯერობით მოუგვარებელი პრობლემაა მავთულხლართები. ეს თემაც კარგა ხანია, არ გააქტიურებულა, მაგრამ არ გამოვრიცხავ, არჩევნების წინ სიტუაცია დაიძაბოს. ანუ, გვაქვს გამოწვევები, რომლებიც ჩვენთვის შემაშფოთებელია, მაგრამ რაც მთავარია, სისხლი არ იღვრება და ადამიანები არ იღუპებიან. ეს იმას არ ნიშნავს, რომ ჩვენ კმაყოფილები ვართ და ვფიქრობთ, რომ ყველაფერი კარგადაა. თუმცა, მოსახლეობა უნდა ხედავდეს, რომ სერიოზული სასიკეთო ცვლილებები გვაქვს.
მოგეხსენებათ, გამყოფი ხაზის გასწვრივ სახელმწიფო კომისია შეიქმნა და სერიოზულ რესურსებს ვხარჯავთ. ყველა ე.წ. საზღვრისპირა სოფელი უკვე გაზიფიცირებულია. გაზიფიცირების შემდეგ სასმელი წყლით მომარაგებაზე გადავედით. 10 სოფელში ეს პრობლემა უკვე მოგვარდა, ბოლო მთავრობის სხდომაზე კი კიდევ ათი სოფლის დაფინანსება მივიღეთ. წლის ბოლომდე ამ სოფლებში სასმელი წყლის მიწოდების პრობლემა უნდა მოგვარდეს. სარწყავ წყალთან დაკავშირებითაც ყოველი ზაფხული წინასთან შედარებით უკეთესია. ამას ნებისმიერი გლეხი დაგიდასტურებთ. ადრე თუ მათი პრობლემა მოსავლის მორწყვა და მოყვანა იყო, ახლა რეალიზაციაა, რაც ასევე ჩვენი გამოწვევაა და უნდა დავეხმაროთ. უნდა მოვუნახოთ ბაზარი, სადაც მოსავალს გაიტანენ. საქმე ბევრია და კმაყოფილი ვარ, რომ ყველაფერი უკეთესობისაკენ მიდის. თუმცა საბოლოო შედეგამდე ჯერ კიდევ შორია.
- ახსენეთ, რომ სამხრეთი ოსეთიდან და აფხაზეთიდან აქ ხშირად ჩამოდიან სამკურნალოდ, დასასვენებლად, სამოგზაუროდ და ა.შ. ანუ, იმის თქმა გინდათ, რომ ჩვენ მიმართ დამოკიდებულება ეცვლებათ?
- იცვლება და ეს ნამდვილად ასეა. ამის შემოწმება ნებისმიერს შეუძლია. ძალიან ბევრი ოსი ისვენებდა შარშან ქობულეთში. შეგიძლიათ შეამოწმოთ საავადმყოფოები, სადაც ისინი მკურნალობენ – ყველგან მათდამი კეთილგანწყობა იგრძნობა. შესაბამისად, კეთილგანწყობა მოდის მათი მხრიდანაც. მე ხშირად ვხვდები მათ და მადლობას არ მალავენ. კმაყოფილები არიან, რომ საქართველოს ხელისუფლება მათზე ზრუნავს.
- თქვენი აზრით, იმავეს იტყვიან უკან დაბრუნების შემდეგაც?
- რა თქმა უნდა! წინააღმდეგ შემთხვევაში სხვები არ ჩამოვიდოდნენ. ეს ე.წ. აფხაზური და ოსური “ფოსტა” კარგად მუშაობს. ფაქტია, როცა ჩადიან, კარგს ჰყვებიან. დანარჩენების ჩამოსვლით ჩანს ნდობა საქართველოს მიმართ. იმდენად ბევრი ჩამოდის, რომ უკვე იმას ვფიქრობთ, როგორ გადავანაწილოთ ბიუჯეტი. ესეც გამოწვევაა, თუმცა კარგი გამოწვევა.
- ფიქრობთ, რომ ამით ტერიტორიების დაბრუნების პროცესი წინ მიიწევს? ახლა ოპონენტი ალბათ გეტყოდათ, რომ მთავარი “ზემოთ” მიღებული პოლიტიკური გადაწყვეტილებაა…
- რა თქმა უნდა, ოპონენტს ამაში დავეთანხმებოდი. საბოლოო გადაწყვეტილება მართლაც პოლიტიკური გადაწყვეტილებაა, მაგრამ იქამდე მისვლაა საჭირო. სახლი ხომ სახურავიდან არ შენდება. როგორც წესი, კონფლიქტების მოგვარების დროს მხარეები ხალხით სპეკულირებენ. ამბობენ, რომ ხალხი არაა მზად და ა.შ. ჩვენ ამ ფრაზის წარმოშობის საფუძველი უნდა მოვსპოთ. ვერავინ ვერ უნდა თქვას, რომ ხალხი მზად არ არის.
თუ ხალხი შერიგების წინააღმდეგია, ამას ვერანაირი პოლიტიკა ვერ უშველის და პირიქით – თუ ხალხი მზადაა, პოლიტიკოსი მას ვერ შეაფერხებს. ხალხს ჯერ კიდევ ბევრი კითხვა გაჩნია. ჯერ ჩვენ უნდა დავდგეთ ეკონომიკურად ფეხზე და მერე უნდა ვაჩვენოთ ეს სიკეთეები ოკუპირებულ ტერიტორიებზე მცხოვრებ მოსახლეობას. მათ ახლაც მოსწონთ, რაც საქართველოში ხდება, მაგრამ ჯერ კიდევ ვერ გაუთავისებიათ, რომ ეს მათი სახელმწიფოა.
გავიხსენოთ კვიპროსი, რომელიც ევროკავშირის წევრია. მათთან კონფლიქტი 40 წელია მოუგვარებელია. ჩვენსა და აფხაზებს, ან ჩვენსა და ოსებს შორის კი ბევრად მეტი სიმჭიდროვეა, ვიდრე კვიპროსზე თურქებსა და ბერძნებს შორისაა. ჩვენ ისტორიული, ენობრივი, კულტურული, რელიგიური გაუცხოება ნაკლებად გვაქვს, ვიდრე მათ. 40 წლის შემდეგ, მათთან ჯერ ახლა დაიწყო ურთიერთობა მაღალ დონეზე პოლიტიკოსებს შორის. ეს 40 წელი კი ხალხში ნდობის მოპოვებას მოანდომეს. დღეს კი თურქები კვიპროსზე გადადიან და მოგზაურობენ, ეს დაახლოებით იგივეა აფხაზები ქუთაისის ან თბილისის აეროპორტებიდან მსოფლიოში რომ დაფრინავდნენ.
სხვათაშორის, ეს პროცესი უკვე დაიწყო. მას შემდეგ, რაც რუსეთსა და თურქეთს შორის ურთიერთობა დაიძაბა, ბევრი აფხაზი ცდილობს, რომ თურქეთში საქართველოს გავლით მოხვდეს. ამას კი ქართული პასპორტის გარეშე ვერ შეძლებს. ამით ის უკვე არჩევანის წინაშე დგება – თავისი საქმე გააფუჭოს, ან სოჭში დაკითხვები მოუწყონ თუ სად მიდის და რატომ, თუ საქართველოში გადმოვიდეს და ყოველგვარი კითხვების გარეშე წავიდეს სადაც უნდა.
- თუმცა, ალბათ იქაური მოსახლეობის არცთუ დიდ ნაწილს აქვს ბიზნესი ან იმის შესაძლებლობა, რომ სამოგზაუროდ იაროს. ხალხის დანარჩენი ნაწილი როგორ უნდა დააინტერესოთ ქართული პასპორტის აღებით?
- აფხაზური საზოგადოება პატარაა. იქ ინფორმაცია ადვილად ვრცელდება. შეიძლება ვიღაცამ თვითონ არ აიღოს, მაგრამ იცის, რომ სხვები იღებენ. არავინ აძალებს, მაგრამ იცის, რომ ამის გაკეთება შეიძლება. როცა დასჭირდება – აიღებს. საქართველოში ჩამოსვლაც ვერ წარმოედგინა ბევრს, მაგრამ როცა მკურნალობა დასჭირდათ, ჩამოვიდნენ. ბევრჯერ წამიკითხავს ფეისბუქზე მსგავსი რამ. ანუ, უკვე საჯაროდ წერასაც აღარ ერიდებიან. თამამად წერენ იმ შთაბეჭდილებებს, რომლებიც თბილისში ჩამოსვლით მიიღეს. ამიტომ, ეს პროცესი აუცილებლად უნდა გავაგრძელოთ, გაჩერება არაფრით არ შეიძლება. თუ კვიპროსს 40 წელი დასჭირდა, ჩვენ გაცილებით ნაკლები დაგვჭირდება. ჩვენთან უფსკრული არ არის ისეთი ღრმა, როგორიც სხვაგან.
- არსებობს თუ არა სტატისტიკა, აფხაზეთის რამდენი მცხოვრები იღებს ყოველწლიურად ქართულ პასპორტს?
- მაგის სტატისტიკაც არსებობს და იმისიც, თუ რამდენი სარგებლობს ჯანდაცვის პროგრამით, მაგრამ ამაზე ხმამაღლა არ ვსაუბრობთ. ამით არ ვტრაბახობთ და არ ვაპიარებთ. პირდაპირ გეტყვით, რომ სამკურნალოდ ბევრი ჩამოდის, პასპორტს კი ცოტა იღებს, მაგრამ დინამიკა ორივე შემთხვევაში მზარდია.
- ფიქრობთ თუ არა, რომ პასპორტიზაციის პროცესი კიდევ უფრო გააქტიურდება მას შემდეგ, რაც საქართველო ვიზალიბერალიზაციას საბოლოოდ მიიღებს?
- ეს რიცხვი ერთი-ასად გაიზრდება! ჯანდაცვის პროგრამამ იქაურ მოსახლეობასთან ძალიან ბევრი არხი გახსნა. ნახეს, რომ თუკი აქ სამკურნალოდ ჩამოვლენ, ცუდი არაფერი დაემართებათ და იგივეს იფიქრებენ პასპორტის აღებაზეც. ვიზალიბერალიზაციით მათ არნახული შანსი ეძლევათ – მარტივად, ერთი პასპორტით შეეძლებათ მთელს ევროპაში წასვლა. ეს მათთვის ბევრს ნიშნავს. ამან კვიპროსზეც გაამართლა. როცა კვიპროსის პასპორტით ევროპაში მოგზაურობა შეიძლებოდა, იგი ძალიან ბევრმა თურქმა აიღო. ამან კი შემდგომ ურთიერთობებსაც შეუწყო ხელი. ასევე გაამართლა ვიზალიბერალიზაციამ მოლდოვაშიც – დნესტრისპირეთის მოსახლეობის დიდმა ნაწილმა აიღო მოლდოვური პასპორტი, რათა ევროპაში მოგზაურობა შესძლებოდა. ასე რომ, დარწმუნებული ვარ, ეს ყველაფერი ჩვენთანაც სასიკეთო შედეგებს გამოიღებს. ჯანდაცვის პროგრამაზეც ვერ წარმოგვედგინა ასეთი ბუმი და ვიცი აქაც ისეთი შედეგი იქნება, როგორსაც ჯერ ვერც კი წარმოვიდგენთ.
- რუსულენოვანი არხის გახსნის ინიციატივით გამოხვედით, როგორი უნდა იყოს იგი?
- ჩვენი მოსახლეოობის მნიშვნელოვანი ნაწილი, როგორც ოკუპირებულ ისე არაოკუპირებულ ტერიტორიებზე, რუსულ არხებს უყურებს. შესაბამისად მუდმივად რუსულ პროპაგანდას უსმენენ. ამიტომ ვფიქრობ, რომ საჭიროა ამ ენაზე განსხვავებული ინფორმაციაც მიიღონ.
ეს უნდა იყოს ქართული რუსულენოვანი არხი, სადაც აფხაზებსა და ოსებს შეეძლებათ ინფორმაცია საკუთარ ენაზე მოისმინონ. თანაც, ეს ინფორმაცია მათზე იქნება – რა მოხდა აფხაზეთში, რა თქვეს აფხაზეთზე თბილისში, რუსეთში, ევროპაში და ა.შ. ყველანაირი ინფორმაცია მიეწოდებათ, ყოველგვარი ცენზურისა და პროპაგანდის გარეშე. რუსულ არხებზე აფხაზეთსა და ცხინვალზე არაფერს ლაპარაკობენ, ჩვენ კი ვილაპარაკებთ. როცა ეცოდინებათ, რომ დღეში ერთი საათი მათზე ილაპარაკებენ, მათ პრობლემებს გააშუქებენ, სხვას აღარაფერს შეხედავენ. იმასაც ნახავენ, რა განსხვავებაა ევროპასა და რუსეთს შორის. ეს არ იქნება ის ევროპა, რასაც რუსეთი აჩვენებს.
ეს არხი მხოლოდ საინფორმაციო არ იქნება. ის იქნება გასართობიც, შემეცნებითიც და ყველა ასაკის მოთხოვნას დააკმაყოფილებს. სერიალებიც გავა და მულტფილმებიც. თანაც, ყველაფერი ქართული ტიტრებით, რათა ქართულ ენასაც მივაჩვიოთ. შეიძლება ქართულ არხებზე გასული კარგი გადაცემებიც გავიდეს რუსული ტიტრებით.
ასეთი არხი ჩვენს მოსახლეობას ქვემო ქართლში, ჯავახეთში და საქართველოს სხვა ტერიტორიებზეც სჭირდებათ. მათაც მიეცემათ საშუალება, ნახონ რა ხდება თავიანთ სამშობლოში. თუმცა, იგი არ უნდა იყოს ისეთი პროპაგანდისტული, როგორიც “პიკი” იყო.
- ანუ იგი რუსულ “რბილ ძალასაც” დაუპირისპირდება?
- ჩემთვის მნიშვნელოვანია მათ საქართველოზე მივაწოდოთ ინფორმაცია. ვფიქრობ, რომ როგორც კი ვიღაცას უპირისპირდები მაშინვე იმის მძევალი ხდები. ჩვენ კი გვინდა, რომ ჩვენი პოტენციალის ჩვენების საშუალება გვქონდეს და არა ვიღაცასთან დაპირისპირების.
„რეზონანსი”, 09 მარტი, 2016 წელი
ხალხში სულ უფრო ნაკლები ფული ტრიალებს
“შეიძლება ითქვას, ამ მხრივ წლევანდელი წელიც მძიმე იქნება“
ელზა წიკლაური
ლარის დევალვაციისა და გაძვირებული ცხოვრების გამო, ხალხის მსყიდველუნარიანობა ყოველდღიურად მცირდება. 1,5 წელში 45%-ით გაუფასურებულმა ლარმა მოსახლეობის სხვადასხვა ჯგუფში მსყიდველობითი უნარი 30%-ით შეამცირა. ანალიტიკოსების პროგნოზით, წლეულს საქართველოში სოციალური მდგომარეობა კიდევ უფრო დამძიმდება, რისი ერთ-ერთი მათავრი მიზეზი გარე ფაქტორები, კერძოდ კი, მსოფლიო ეკონომიკის ზრდის კიდევ უფრო შენელება გახდება.
ქართული ლარი ბოლო 1,5 წლის განმავლობაში 45%-ით გაუფასურდა. ლარის დევალვაციის პარალელურად, საქართველოს მოსახლეობის სოციალური მდგომარეობაც მძიმდება. მცირდება ლარის და შესაბამსიად, მოსახლეობის მსყიდველუნარიანობა. ეკონომისტების ერთი ნაწილის აზრით, ბოლო წელიწად-ნახევარში ლარის მსყიდველობითი უნარი 3-4%-ით შემცირდა, მეორე ნაწილის გათვლებით ამ მაჩვენებელმა 30%-საც კი მიაღწია.
“მოსახლეობაზე განსაკუთრებით სავალუტო კრიზისმა იმოქმედა, იმის გამო, რომ კალათაში 80% იმპორტირებული პროდუქტია. შეიძლება ვთქვათ, რომ ამ პერიოდში მოსახლეობის მსყიდველუნარიანობა 30%-ით არის შემცირებული”, – აცხადებს “რეზონანსთან” საუბრისას ეკონომისტი ემზარ ჯგერენაია.
მისი შეფასებით, ეს ყველაფერი მძიმედ აისახება ეკონომიკაზე. მართალია, შემცირებულმა იმპორტმა ლარის ვარდნა შეაჩერა, თუმცა ამან ბაზარზე მოთხოვნაც შეამცირა. შემცირებულმა ბაზარმა კი გაზარდა უმუშევრობის მაჩვენებელი და ცხოვრების დონე უფრო დაეცა.
“სავალუტო ფონდმა მსოფლიო ეკონომიკის ზრდის პროგნოზი გამოაქვეყნა. სსფ-მა 2016 წელს ეს მაჩვენებელი 2,5%-მდე დაიყვანა. ეს ნიშნავს იმას, რომ გარეფაქტორი კიდევ უფრო მძიმე იქნება და ამისათვის მზად უნდა ვიყოთ. მაგალითს გეტყვით – ჩვენი ექსპორტის ძირითადი მიმართულება იყო აზოტი. ახლა რუსთავის ქარხანა გაჩერებულია, მანგანუმის და ქვანახშირის წარმოება შემცირებულია, ანუ 2016 წლის პირველ კვარტალში ჩვენი ექსპორტის ხუთეულში რაც კი შედის, ავტომანქანების გარდა, ყველაფერი გაჩერდა. ბუნებრივია, ეს ექსპორტს მნიშვნელოვნად შეამცირებს. აქედან გამომდინარე, შეიძლება ითქვას, რომ წლევანდელი წელიც მძიმე იქნება”, – დასძინა ემზარ ჯგერენაიამ.
სტატისტიკოს სოსო არჩვაძის თქმით, მსყიდველუნარიანობა წესით უნდა იანგარიშებოდეს ინფლაციის უკუპროპორციულ დამოკიდებულებაში, მაგრამ თავად ინფლაციის გაანგარიშების მეთოდიკა კაპიტალურ ცვლილებას საჭიროებს. , როდესაც ეს მეთოდიკა შედგა, მაშინ საქართველოში ფულად-საკრედიტო, საბანკო სისტემა ჩამოყალიბების სტადიაში იყო.
“იმ პერიოდში გაცემული კრედიტების თანაფარდობა მშპ-სთან 2-3%-ის ფარგლებში იყო. დღეს ეს მაჩვენებელი 50%-ს გადასცდა. ამიტომ, მისი გაუთვალისწინებლობა არ შეიძლება, მით უმეტეს, რომ კრედიტების დიდი ნაწილი, თითქმის 70% დოლარიზებულია. დოლარი კი 1,5 წელში მნიშვნელოვნად გამყარდა. ამ ყველაფრის გამო მოსახლეობას მოუწია არანაკლებ 120 მლნ ლარით მეტის გადახდა მარტო მომსახურებაზე, ვიდრე გადაიხდიდა 1,65-1,67-ის კურსის შემთხვევაში. ფაქტობრივად, მოსახლეობამ საკუთარი ჯიბიდან ამოიღო და ბანკებშმი გადაიხადა დამატებით ეს ფული. ძნელი დასადგენია ის თანხა, რასაც მოსახლეობა მიკროსაფინანსოებს უხდის, იქ საპროცენტო განაკვეთი კიდევ უფრო მაღალია.
ამ ყველაფრიდან გამომდინარე, შეიძლება ითქვას, რომ ხალხში ნაკლები ფული რჩება და მისი მოთხოვნა მცირდება, შედეგად კი ინფლაციაც არ იზრდება საგრძნობლად. ინფლაციის დაბალი დონის შენარჩუნებაზე გარე ფაქტორებიც მუშაობდნენ, მაგრამ მთავარი მაინც ისაა, რომ მოსახლეობაში ნაკლები რესურსი დარჩა.
საბოლოოდ, მივიღეთ დამახინჯებული სურათი – ვითომ ყველაფერი კარგადაა, ინფლაცია დაბალ დონეზეა, მაგრამ სინამდვილეში მოსახლეობის მსყიდველუნარიანობა მნიშვნელოვნად შემცირდა. ეს იმიტომ, რომ მათი ფულადი სახსრების სულ უფრო და უფრო მზარდი ნაწილი გადამისამართდა საკრედიტო მომსახურების დასაფარად. ამიტომ, შეიძლება ქვეყანაში ინფლაცია არ იყოს მაღალი, მაგრამ რეალურად მდგომარეობა მძიმე იყოს. ამის შედეგია ისიც, რომ დედაქალაქის ცენტრში ძალიან ბევრი მაღაზია იხურება. ამაში “დამსახურება”, გარკველწილად, საბანკო სექტორსაც მიუძღვის”, – აცხადებს არჩვაძე.
ვიდრე სტატისტიკის სამსახური მოსახლეობის შემოსავლებს და ხარჯებს არ გამოაქვეყნებს, მანამდე იმაზე საუბარი, თუ რამდენად შემცირდა ლარის მსყიდველობით უნარი, ძალიან რთულია.
“საბანკო სექტორის გამოისობით მოსახლეობის მსყიდველობითი უნარი 3-4%-ზე მეტით არ არის შემცირებული. მთლიან მაჩვენებელზე საუბარი, ვიდრე სტატისტიკის სამსახური არ გამოაქვეყნებს მონაცემებს, რთულია. ერთი რამ შეიძლება ვთქვათ, თუ ნომინალურად შემოსავლები 7-8%-ზე ნაკლებად გაიზარდა, მაშინ რეალურად მივიღებთ მოსახლეობის მსყიდველუნარიანობის მკვეთრ შემცირებას. თუ ნომინალური შემოსავლები 8%-ით გაიზარდა, ეს იქნება ნულოვანი ზრდა, თუ უფრო ნაკლებით გაიზარდა მოსახლეობის შემოსავლები, ჩათვალეთ, რომ ძალიან მძიმე მდგომარეობაა. 8%-ის ზემოთ კი, შეიძლება ვთქვათ, რომ სიტუაცია არ გაუარესებულა.
ეს შემცირება როგორ არის განაწილებული სხვადასხვა სოციალურ ჯგუფში, ამაზე ზუსტი პასუხი “საქსტატს” უნდა მოვთხოვოთ. სტატისტიკის გარეშე ჩვენი ნებისმიერი მსჯელობა იქნება ზედაპირული”, – დასძინა არჩვაძემ.
„რეზონანსი”, 09 მარტი, 2016 წელი
ალექსი პეტრიაშვილი ლევან მექვაბიშვილს არ იცნობს და დამკვეთის ვინაობის დადგენას ელოდება
ელზა პაპოშვილი
საავადმყოფოდან გამოწერის შემდეგ “თავისუფალი დემოკრატების” გენერალური მდივანი ალექსი პეტრიაშვილი აცხადებს, რომ მის საქმეზე დაკავებულ ლევან მექვაბიშვილს არ იცნობს და მასთან არანაირი შეხება არ ჰქონია, მისი სახელი და გვარიც მხოლოდ დაკავების შემდეგ გახდა ცნობილი.
პოლიტიკოსი ამბობს, რომ მექვაბიშვილთან ურთიერთობა ერთი მარტივი მიზეზის გამო ვერ ექნებოდა, რადგანაც მას ასოცირების ხელშეკურულება გაჰქონდა, ხოლო ამ პირს – ლომბარდები. შესაბამისად, ეჭვმიტანილის მიერ დასახელებული მოტივი – პიროვნული დაპირისპირება – ლოგიკას და რეალობას მოკლებულია.
“თავდასხმისას, ღმერთის წყალობით, გონება არ დამიკარგავს. ალბათ ეს ლევან მექვაბიშვილისა და მისი თანამზრახველისთვის სამწუხარო ფაქტია, რადგანაც მათი მოქმედების ყველა დეტალი და წვრილმანი მახსოვს. კარგად დავიმახსოვრე, ვინ რა ინსტრუმენტით “მუშაობდა”. მექვაბიშვილს სახეზე ნიღაბი არ ეკეთა და მისი ამოცნობა ადვილად შევძელი. “მას მოვუწოდებ, რომ გამოძიებასთან ითანამშრომლოს. ალბათ მისთვის ეს საუკეთესო გამოსავლი იქნება, ბრალი მაინც შეუმსუბუქდება… ცრუობს, როდესაც იძახის, რომ ჩვენ შორის რაღაც შელაპარაკება და დაპირისპირება იყო.
“რაც შეეხება მეორე პირს, ვფიქრობ, რომ აქ სიტუაცია უფრო გართულდება. ის ნიღბით მოქმედებდა და ამოცნობა რთული იქნება. ამიტომ გამოძიებას სხვა, დამატებით სამძებრო სამუშაოს ჩატარება მოუწევს. ვფიქრობ, რომ მათ ამაში ხელი არ უნდა შევუშალოთ და საქმის გაკეთება ვაცალოთ,” – აცხადებს ალექსი პეტრიაშვილი.
ის თავდასხმის მოტივზე სპეკულაციას არ აპირებს და ფიქრობს, რომ ეს გამოძიებამ უნდა დაადგინოს; ზოგიერთი პოლიტიკოსის დასკვნები დანაშაულის მოტივზე უკვე წაიკითხა და მათ “მჭევრმეტყველებაში” ვერ მიბაძავს; საქმეს კი გახსნილად არ ჩათვლის, სანამ მეორე დამნაშავე დაკავებული და დამკვეთის ვიანობა ცნობილი არ გახდება.
ის დამნაშავეების სამაგალითო დასჯას მოითხოვს, რათა ფულის სანაცვლოდ ადამიანები ასე სასტიკად აღარავინ გაიმეტოს.
ალექსი პეტრიაშვილის მეუღლე, ეკა მიშველაძე იმედოვნებს, რომ სს-ის საქმე გადაკვალიფიცირდება და გამოძიება მკვლელობის მცდელობის მუხლით წარიმართება.
“ვფიქრობ, საქმე ჯერ გახსნილი არ არის, რადგანაც მთავარი – შემკვეთის ვინაობა – ჯერჯერობით არ დადგენილა. შესაბამისად, ველოდები, დაისაჯოს ყველა ის პირი, ვინც დანაშაულის დაგეგმვასა და შესრულებაში მონაწილეობა მიიღო. რაც შეეხება დანაშაულის გადაკვალიფიცირებას, მგონია და დარწმუნებული ვარ, რომ გამოძიება მკვლელობის მცდელობის მუხლით უნდა წარიმართოს. როდესაც ადამიანს საფერთქელში ურტყამ და შემდეგ იარაღს ესვრი, ეს იმას ნიშანვს, რომ მას სასიკვდილოდ იმეტებ,” – განაცხადა ეკა მიშველაძემ. ბრალდებული ლევან მექვაბიშვილი დუმილის უფლებას იტოვებს. პროკურატურის განცახდებით, მან დაკითხვაზე თქვა, რომ დანაშაულის ჩადენის დროს მარტო მოქმედებდა, თუმცა გამოძიების ხელთ არსებული მტკიცებულებები სულ სხვა ფაქტებზე მიუთითებს.
თბილისის საქალაქო სასამართლოში გუშინ მიმდინარე პროცესზე პროკურატურამ მექვაბიშვილისთვის პატიმრობის შეფარდება მოითხოვა, რაზეც მოსამართლე დათანხმდა. დაცვის მხარე 15-ათასლარიანი გირაოს შეფარდების შუამდგომლობას აყენებდა.
როგორც ჟურნალისტებს სხდომის დასრულების შემდეგ ადვოკატმა მარინა ფილაურმა განუცხადა, საქმე პოლიტიკას არ უკავშირდება და ეს პირადი ხასიათის დაპირისპირებაა.
“ინტერპრესნიუსთან” კომენტარი ეჭვმიტანილის ყოფილმა ცოლმა, მსახიობმა იუნა შაფათავამ გააკეთა, რომელიც ფიქრობს, რომ ლევან მექვაბიშვილსა და ალექსი პეტრიაშვილს შორის სავარაუდოდ ჩვეულებრივ თბილისიურ გარჩევას ჰქონდა ადგილი.
“ლევან მექვაბიშვილს ვახასიათებ ყველანაირად დადებითად. ის არის ჩემი ცხოვრების პირველი და დაუვიწყარი მამაკაცი. ძალიან კარგი სპორტსმენია, მოკრივე, საქართველოს ეროვნული ნაკრების წევრი, საქართველოს არაერთგზის ჩემპიონი, ეროვნული ნაკრების სახელით კრივში მსოფლიო ჩემპიონატის არაერთგზის მონაწილე და რამდენიმე საერთაშორისო ტურნირის გამარჯვებული, სპორტის ოსტატი.
“რაც ვიცი, მხოლოდ ერთადერთხელ, 2011 წელს იყო დაკავებული. მას შემდეგ, რაც დავშორდით, მე ლევანთან არანაირი კონტაქტი არ მაქვს. მთავარია, რომ პეტრიაშვილი ცოცხალია. საკითხს შორიდან რომ შევხედოთ, მიუკერძოებლად, ჩვეულებრივი თბილისური გარჩევა იყო, სხვას ვერაფერს გეტყვით. გასაკვირი ამაში არაფერია. კაცები ერთმანეთში ჩხუბობენ კიდეც, ჩვეულებრივი კაცური გარჩევა იყო,” – განაცხადა იუნა შაფათავამ.
ალექსი პეტრიაშვილის საქმესთან დაკავშირებით გამოძიება სისხლის სამართლის კოდექსის 117-ე მუხლით მიმდინარეობს, რაც სხეულის განზრახ მძიმე დაზიანებას გულისხმობს.
