„ახალი თაობა“: ინტერვიუ ბიძინა გუჯაბიძესთან: „რუსეთთან ულტიმატუმებით არაფერი გამოგვივა“
„ახალი თაობა“: ინტერვიუ ზაალ კასრელიშვილთან: „რესპუბლიკელების“ და „თავისუფალი დემოკრატების“ რეიტინგი მკვეთრად გაიზარდა… რა დროს ფარული ჩანაწერებია, ქვეყანა ტერაქტების საფრთხის წინაშე დგას“
„ახალი თაობა“: ინტერვიუ ნანა კაკაბაძესთან: „ვიდეოკადრების განადგურება ხელისუფლების დანაშაული იყო… პასუხისმგებლობა არასამთავრობოებსაც ეკისრებათ”
„ახალი თაობა“: ინტერვიუ სოსო მანჯავიძესთან: „პირადი ცხოვრების ფაილების განადგურება მასკარადი იყო”
„რეზონანსი”: „შემდეგი შეიძლება იყოთ თქვენ!“: დატერორებული პოლიტელიტა და დაუცველობის განცდა საზოგადოებაში
„რეზონანსი”: გაქვთ თუ არა მოლოდინი, რომ ფარული ვიდეოჩანაწერების საქმე გაიხსნება?
„რეზონანსი”: ინტერვიუ ირაკლი სესიაშვილთან: უცხოელი ექსპერტები ფარული ჩანაწერების გამოსაძიებლად
„რეზონანსი”: ინტერვიუ გია მაისაშვილთან: პოზიცია ვიდეოკადრების გავრცელების, უნივერსიტეტში მიმდინარე მოვლენებისა და სამომავლო არჩევნების შესახებ
„რეზონანსი”: “სტუდენტებს სერიოზული საფრთხე გვემუქრება” // თსუ-ში სიტუაცია კონტროლიდან გამოდის
„რეზონანსი”: საქართველოდან უფრო მეტი ფული გადის, ვიდრე შემოდის // ბოლო 5 წელიწადში 6 მლრდ დოლარის ინვესტიცია შემოვიდა, ხოლო გატანილი კაპიტალის ოდენობა 6,5 მლრდ-ს აღემატება
————————-
„ახალი თაობა“, 15 მარტი, 2016 წელი
ინტერვიუ ბიძინა გუჯაბიძესთან: „რუსეთთან ულტიმატუმებით არაფერი გამოგვივა“
პარტია „კონსერვატორების“ ერთ-ერთი ლიდერი ბიძინა გუჯაბიძე „ახალ თაობასთან“ საუბარში აცხადებს, რომ ისინი არსად წასვლას არ აპირებენ, კოალიციაში რჩებიან და იქნებიან იმ ძალასთან, რომელსაც წარმოადგენს ბიძინა ივანიშვილი.
- ბატონო ბიძინა, კოალიცია „ქართულ ოცნებაში“ მრეწველებსა და რესპუბლიკელებს შორის დაპირისპირებამ კოალიციის დანარჩენი პარტიები აუტსაიდერის როლში ჩაგაყენათ. რა გეგმები გაქვთ კონსერვატორებს ამ ეტაპზე? როგორ ფიქრობთ გასვლას არჩევნებზე, კოალიციურ რეჟიმში თუ დამოუკიდებლად?
- მე არ ვთვლი, რომ კონსერვატორები აუტსაიდერის მდგომარეობაში ვართ. ჩვენ გვწამს, რომ კონსერვატორული იდეოლოგია ერთ-ერთი ფუძემდებლურია ქართულ სახელმწიფოებრიობაში. მიუხედავად 21-ე საუკუნისა, ქართველების დაახლოებით 70-80%, თავისი სულიერი მდგომარეობით და მენტალობით, კონსერვატორია. ამ რესურსის რეალიზაციას არჩევნებში როგორ შევძლებთ, ჩვენზეა დამოკიდებული.
- კოალიციაში საუბარი რომ დაიწყო, რესპუბლიკელები წავიდოდნენ თუ მრეწველები, შეიქმნა შთაბეჭდილება, რომ სხვა სუბიექტების კოალიციაში დარჩენის საკითხიც კითხვის ნიშნის ქვეშ დადგა...
- ჩვენ კოალიციაში ვრჩებით. ყველაზე სანდო ძალა ჩვენ ვართ. ჩვენ დაშლაზე არასოდეს არაფერი გვითქვამს. ახლაც ამ მდგომარეობას ვინარჩუნებთ. ვიქნებით იმ ძალასთან, რომელსაც წარმოადგენს ბიძინა ივანიშვილი და არსად წასვლას არ ვაპირებთ.
- შიდა ქართლში კონფლიქტისპირა ერთ-ერთ სოფელში რუსი ჯარისკაცები გააქტიურდნენ, ქართველების ბაღებში გზა გაჰყავთ და ვაშლის ხეებს ჭრიან...
- ფეისბუქზე წავიკითხე ინფორმაცია, მაგრამ სრული არ გახლდათ. შეიძლება გზას აკეთებენ მიმოსვლისთვის. რუსს ეს ტერიტორია ოკუპირებული აქვს, თავისად თვლის და, რაც უნდა, იმას აკეთებს. პრეტენზიები და ულტიმატუმები რომ წავუყენოთ რუსეთის ფედერაციას, ჯერჯერობით, არაფერი გამოგვივა. რუსეთი მართლსაწინააღმდეგოდ მუშაობს და, ჯერჯერობით, გასდის. არავის შერჩება მიტაცებული ჩვენი ერთი გოჯი მიწაც კი. იქ მავთულხლართს გაჭიმავს თუ ჯარს შეიყვანს, იმდენად მნიშვნელოვანი არ არის, ვიდრე ის, რომ ჩვენ უნდა დაველოდოთ მსოფლიოში ვითარების შეცვლას.
- შეიძლება ჩვენ ახლა რუსეთს ვერ გავუმკლავდეთ, მაგრამ…
- ჩვენი საგარეო საქმეთა სამინისტრო მუდმივად აფიქსირებს ჩვენს პოზიციებს. ჩვენ არ გვინდა ულტიმატუმების ენით საუბარი. გვინდა დიპლომატიური გზებით შევატყობინოთ მხარეს, რუსეთი იქნება თუ სხვა მეზობელი სახელმწიფოები, ვინც უნდა იყოს ის, ჩვენ არ მივმართავთ ხმამაღალ განცხადებებს, სანამ ამის საჭიროება არ იქნება. ჩვენ არ ვართ ჯერ ისეთი ძლიერი სახელმწიფო, რომ ნებისმიერ ქმედებაზე ვუპასუხოთ. მოვა დრო, როცა შეცვლილი იქნება ვითარება მთელ მსოფლიოში, რუსეთიც აღარ იქნება ისეთი ძლიერი, როგორიც ახლაა,
- ეგ გასაგებია, მაგრამ როდესაც სუს-ი და საგარეო უწყება აცხადებენ, გზა არ გაჰყავთ ჩვენს კონტროლირებად ტერიტორიაზეო, ეს რას ნიშნავს მაშინ, როდესაც ჩვენი მოქალაქეები დღემდე იმ ტერიტორიებს ამუშავებდნენ, მათი ვაშლის ბაღები იყო. თუნდაც ვერ აკონტროლებდე, ამგვარი განცხადების გაკეთება რამდენად მიზანშეწონილია?
- ეს არის ვითარების დაფიქსირება და არა ის, რომ ჩვენს ტერიტორიად არ მიგვაჩნია. იქით, სადაც ოკუპაციის ზონაა, ჩვენს ტერიტორიებს ვერ ვაკონტროლებთ. მოხდა ფაქტის დაფიქსირება, რაც არის რეალობა.
- არა მგონია, მაინც მისაღები იყოს ამგვარი განცხადებები პასუხისმგებლიანი სახელმწიფო უწყებების წარმომადგენლების მხრიდან. მე ვერ მოვიწონებ სუსისა და საგარეო საქმეთა მინისტრის მოადგილის იმგვარ განცხადებებს, რაც მოვისმინეთ...
- საგარეო საქმეთა სამინისტრო, სუსი და ნებისმიერი სტრუქტურა ფაქტის დაფიქსირებას ახდენს. ხომ იცით, რაც არის კონტროლირებადი ტერიტორია, მეტს რას ითხოვთ? უბრალოდ ფაქტი აღნიშნეს, რომ ჩვენს ტერიტორიაზე არ ხდება გზის გაყვანა. ჩვენი ტერიტორია არ არისო, არ უთქვამთ. მავთულხლართების იქით თუ რაღაც ხდება, ჩვენ რას ვიზამთ.
- მავთულხლართები გავლებული არ არის და ჩვენი მოქალაქეების ბაღებში იჭრებიან და ძირკვავენ ვაშლებს...
- მე რაც ვნახე, ვაშლი ამოძირკვული არ არის. თუმცა, ნაკვეთი ჩანს. მე სხვა სურათი არ მინახავს და არ ვიცნობ სიტუაციას.
- თქვენ ფიქრობთ, მსოფლიოში ვითარება იმგვარად შეიცვლება, რომ რუსეთი საოკუპაციო პოლიტიკას ვეღარ გააგრძელებს?
- რუსეთის ქმედებები ხშირად არაპროგნოზირებადია, მაგრამ მას არ შეუძლია, მუდმივად შეინარჩუნოს ეს სიტუაცია.
„ახალი თაობა“, 15 მარტი, 2016 წელი
ინტერვიუ ზაალ კასრელიშვილთან: „რესპუბლიკელების“ და „თავისუფალი დემოკრატების“ რეიტინგი მკვეთრად გაიზარდა … რა დროს ფარული ჩანაწერებია, ქვეყანა ტერაქტების საფრთხის წინაშე დგას“
რატომ არ ღირს პირადი ცხოვრების ამსახველ კადრებზე ამხელა ყურადღების გამახვილება, რა საფრთხეები ელოდება გარედან საქართველოს, რომელი პარტიების რეიტინგი გაიზარდა? – ამ თემებზე „ახალ თაობას“ კავკასიის ხალხთა კონფედერაციის პრეზიდენტი ზაალ კასრელიშვილი ესაუბრება.
„პირადი ცხოვრების ამსახველი კადრების გავრცელება თავისთავად დასაგმობია, მაგრამ შექმნილ ვითარებაში ამაზე ამხელა ყურადღების გამახვილება არ ღირს. არც მე ვაპირებ ამაზე ბევრ საუბარს, მხოლოდ იმას ვიტყვი, რომ თუ ვინმეს ინტერესში არ შედის ამ ჩანაწერების გავრცელება, ეს არის ხელისუფლება. საქართველოს საზღვრებთან მძიმე ვითარებაა და ყურადღებას თუ მოვადუნებთ, შესაძლოა, მძიმე შედეგები მივიღოთ. პოლიტიკაში შემთხვევით მოხვედრილი ადამიანების გასაგონად მინდა ვთქვა, რომ ტერაქტები უკვე ჩვენს საზღვრებთან ხდება. თურქეთში ლამის დღე არ გავა, ასეთი უბედურება არ დატრიალდეს. იგივე ვითარებაა რუსეთშიც. დაღესტანსა და ინგუშეთში უკვე მოხდა აფეთქებები, ვლადიკავკაზში, საბედნიეროდ, აღკვეთეს ტერაქტი.
პირადი ცხოვრების ამსახველი კადრების გამოქვეყნება ამაზრზენია, მაგრამ იმას რატომ არავინ ფიქრობს, რომ ეს შესაძლოა ყურადღების გადასატანად იყოს გაკეთებული. რატომ გვავიწყდება, რომ ომის ზღვარზე მყოფი რუსეთისთვისაც და თურქეთისთვისაც საქართველოზე გავლენის მოპოვება სასიცოცხლოდ მნიშვნელოვანია”, – ამბობს ზაალ კასრელიშვილი.
- თქვენ ფიქრობთ, რომ ამ ფირების გავრცელების უკან რუსეთის ან თურქეთის სპეცსამსახურები დგანან?
- ამ ქვეყნების სპეცსამსახურები საქართველოში უკვე დიდი ხანია მუშაობენ. მათი ხალხი ხელისუფლებაშიც კარგად არის მოკალათებული. ქვეყანაში არსებული ქაოსით ეს ქვეყნები აუცილებლად ისარგებლებენ. ფირები კი ბევრ ვინმეს შეეძლო გაევრცელებინა. მთავარი აქცენტი ნაციონალებზე კეთდება, მაგრამ ეს ჩანაწერები რამდენიმე პარტიის წარმომადგენლებს აქვთ. ვინ, რას და როგორ გამოაგდებს, ამის პროგნოზირება ძნელია. სამაგიეროდ, ნათლად ჩანს, რომ ქვეყანა არეულობისკენ მიჰყავთ. წერა-კითხვის უცოდინარი და დედიკოს ბიჭი პოლიტიკოსები კი ვერაფერს აკეთებენ. ადრეც გითხარით და ახლაც გავიმეორებ, რომ პოლიტიკური ველი ამ უსაქმურებისგან უნდა გაიწმინდოს. პოლიტიკაში ის ხალხი უნდა მოვიდეს, ვისთვისაც მთავარი ქვეყნის ინტერესები იქნება და არა – პრემიები.
ამ ფირების გავრცელებით და „ქართულ ოცნებაში“ დაწყებული დაპირისპირებით თავისუფალმა დემოკრატებმა და რესპუბლიკელებმა იხეირეს.
- რანაირად იხეირეს?
- მათმა რეიტინგმა მკვეთრად მოიმატა. ორივე პარტიაზე ერთდროულად დაიწყო სხვადასხვა ტიპის შეტევები. ეს შემთხვევითი არაა. ვიღაცას ძალიან უნდა, ეს ორი პარტია ტანჯული რაინდების მანტიით შემოსოს. ეს ვიღაც ქვეყნის გარედან მოქმედებს. კრემლის ინტერესებში კი ისეთი ძალების გააქტიურებაა, რომლებიც ნატოს და დასავლეთს გალანძღავენ. საუბარია თოფაძის მაგვარ პოლიტიკოსებზე.
- ისე გაუჭირდა კრემლს, რომ გოგი თოფაძის იმედად დარჩა?
- რუსეთს ძალიან უჭირს, მაგრამ არა იმდენად, რომ ფსედო პრორუსული პარტიების იმედად იყვნენ. თუ მართლა თოფაძის იმედად არიან, მაშინ მთლად დაქცეულა ეს ქვეყანა და ეგაა. ჩვენ გვგონია, რომ თოფაძე და მისი ტიპის პარტიები უბრალოდ თავს აწონებენ რუსეთს.
ბოლო ხანებში ქართულ მედიაში ერთი სამწუხარო ტენდენცია გაჩნდა – გოგი თოფაძე და სანდრო ბრეგაძე პატრიოტი რაინდების როლში გამოჰყავთ. არადა, სანდრო ბრეგაძემ რამდენიმე წლის წინ „ჩამიშვა“ და უნდოდა, რომ დავეჭირე. ჩემამდე მან ლაშა ამირეჯიბი, ვალერი გელბახიანი და გიორგი თარგამაძე დააბეზღა.
- რას ნიშნავს „ჩაგიშვათ“ ან როდის მოხდა ეს ამბავი?
- არც ისე დიდი ხნის წინ. მივიდა გიორგი ზედელაშვილთან და მინდია ჯანელიძესთან, უთხრა, ზაალ კასრელიშვილი ალ-შიშანის ანუ თარხან ბათირაშვილის მეგობარიაო.
- მართლა თქვენი მეგობარია ალ-შიშანი?
- თარხან ბათირაშვილს არ ვიცნობ, ის ჩემთან შედარებით ბავშვია. მისი ძმა კი ჩემი მეგობარია და ამას არასოდეს უარვყოფ. ალ-შიშანის ძმა სამხედროდ არის დაბადებული. ტვინით გაძეძგილი პიროვნებაა, რომელიც ნებისმიერი ქვეყნის გენშტაბის უფროსი იქნებოდა. ეს ძმები უერთგულესი და უჭკვიანესი მებრძოლები არიან. ისინი გაჭირვებულ ოჯახში გაიზარდნენ. ისე, რომ იცოდეთ, წოვა-თუშები არიან და დედა ჰყავთ ჩეჩნის ქალი. თარხანმა ამერიკაში გაიარა წვრთნები, აქ ჩამოვიდა და ცხინვალის ომში არნახულად იომა, ყველა რომ გაიქცა, ეგ დარჩა. იმის მაგივრად, რომ მედალი მიეცათ, ციხეში შეაგდეს. 3 წლის მანძილზე ცდილობდა რეაბილიტაციას. მთელი ეს პერიოდი სოფელში იჯდა და საჭმლის ფულიც კი არ ჰქონდა. საქართველო ის ქვეყანაა, სადაც ილია ჭავჭავაძეს შუბლში ტყვია ესროლეს და რა გასაკვირია, გმირები არ უყვარდეთ. ისლამური სახელმწიფოს წარმომადგენლები კი მთელი მსოფლიოს მასშტაბით ეძებენ ასეთ ხალხს, თარხანიც იპოვეს. რამდენჯერმე შესთავაზეს დიდი ფული მათთან წასვლის სანაცვლოდ. ბოლოს დათანხმდა, ბიჭს პურის ფული არ ჰქონდა და არც რაიმე პერსპექტივა. წავიდა და როგორი ბიჭიც ყოფილა, ყველამ დავინახეთ. რიგითი ჯარისკაცობით დაიწყო და სარდალია.
სხვათა შორის, ამ ბიჭის დიდი დამსახურებაა, საქართველოში ისლამისტებს არაფერი რომ არ მოუწყვიათ. ეს ჩვენი სპეცსამსახურების დამსახურებაც არის, ისინიც კარგად მუშაობენ ამ მიმართულებით.
- დაჭერას როგორ გადაურჩით?
- როგორ გადავურჩი და ხელისუფლებაში, საბედნიეროდ, არიან საღად მოაზროვნე ადამიანები. სანდრო ბრეგაძე და გოგია თოფაძე კი მედიას გმირებად გამოჰყავს.
- მოდით, ისევ „რესპუბლიკელების“ და „თავისუფალი დემოკრატების“ ამბავს დავუბრუნდეთ. ამბობთ, ვიღაცას სურს, რომ მათ ტანჯული რაინდების იმიჯი შეექმნათ. ვინ არის ამით დაინტერესებული?
- „რესპუბლიკელებზე“ და ირაკლი ალასანიას ხალხზე განხორციელებულმა შეტევებმა დასავლეთის თვალში ამ ორი პარტიის ავტორიტეტი გაზარდა. უნდა ნახოთ, რა ამბავში არიან მათი პატრონები დასავლეთში. ისინი პირდაპირ და ღიად აცხადებენ, რომ საქართველოში პროდასავლურ პოლიტიკურ ძალებზე იდეოლოგიური და ფიზიკური შეტევა დაიწყო. ამან დასავლეთში „ქართული ოცნების“ ავტორიტეტი მნიშვნელოვნად შეარყია. დასავლეთში უკვე ღიად ამბობენ, რომ პრორუსული ძალების გასაძლიერებლად პროდასავლური ძალების განადგურება მიდის. ეს ამბავი ასე მარტივად არ დასრულდება.
- ამბობთ, დასავლეთში „თავდემ“-ების და „რესპუბლიკელების“ ავტორიტეტი გაიზარდაო. ეს იმას ხომ არ ნიშნავს, რომ საარჩევნოდ ისინი გაერთიანდებიან?
- ორივე პარტიის რეიტინგი მკვეთრად არის გაზრდილი, თუმცა არა მგონია, ეს გაერთიანება შედგეს. კოალიცია „ქართული ოცნება“ რესპუბლიკელებს არაფრით არ შეელევა.
- ექსპერტთა ნაწილი ამტკიცებს, რომ „ქართულ ოცნებაში“ ერთი სული აქვთ, რესპუბლიკელები მოიშორონ...
- ვერ გეტყვით, რის საფუძველზე აკეთებენ ისინი ამ განცხადებებს. კოალიციაში რესპუბლიკელებს რომ ვერ იტანენ, ამას მეც ვადასტურებ, მაგრამ არსებულ ვითარებაში „ქართული ოცნება“ მათ ვერ შეელევა.
- რატომ ვერ შეელევიან?
- “ქართულ ოცნებაზე“ ისედაც ამბობენ, რომ საგარეო კურსი შეცვალა. კოალიციის ერთ-ერთი ლიდერის, გოგი თოფაძის განცხადებები პირდაპირ რუსეთის წისქვილზე ასხამს წყალს. რესპუბლიკელებს თუ გაუშვებენ, მთელი დასავლეთი იტყვის, რომ ხელისუფლებამ კურსი შეცვალა, რაც „ქართული ოცნების“ ინტერესებში არ შედის. აქედან გამომდინარე არ გვგონია, რომ რესპუბლიკელები და თავისუფალი დემოკრატები ერთად გამოვლენ არჩევნებზე. თუმცა პოლიტიკაში არაფერია გამორიცხული. ისე, გვგონია, რომ ეს ორი პარტია და მათ დამატებული გასუფთავებული დემოკრატები კარგ კოალიციას შექმნიან. არჩევნებამდე დარჩენილ დროში აქ კიდევ ბევრჯერ აირევა სიტუაცია. იმედია, ხელისუფლება კარგად გააცნობიერებს იმ საფრთხეებს, რაც საქართველოს გარედან ემუქრება. ქვეყანას, სადაც ბოზი და გმირი ერთმანეთისგან ვერ გაურჩევიათ, კარგად ცხოვრებაზე პრეტენზია რატომ აქვს, არ მესმის. ყველაზე ნაკლები ყურადღება საგარეო საფრთხეებზე მახვილდება, ყურადღებით თუ არ ვიქნებით, საქართველო და მასთან ერთად მთელი კავკასია, შესაძლოა რუსეთ-თურქეთის დაპირისპირების პოლიგონად იქცეს. რომელი ქვეყნის სპეცსამსახური რა ტერაქტს მოაწყობს, არ ვიცით და ფარულ ჩანაწერებზე გვაქვს მთელი ყურადღება გადატანილი.
ჩვენს პოლიტიკოსებს უფრო მეტი გამჭრიახობა და პატრიოტიზმი რომ ჰქონოდათ, ამ დაპირისპირებას საქართველოს სასიკეთოდ გამოიყენებდნენ. `ახალ თაობასთან~ საუბარში არაერთხელ მითქვამს, რომ ასეთი შანსი საქართველოს ბოლო 100 წლის მანძილზე არ მისცემია. დღეს რუსეთს ისე, როგორც არასდროს, აწყობს საქართველოსთან კეთილმეზობლური ურთიერთობები. ჩვენ თავისუფლად შეგვიძლია აფხაზეთის და სამაჩაბლოს დაბრუნებაზე დავიწყოთ საუბარი.
- რის სანაცვლოდ?
- ამ შემთხვევაში ჩვენ არაფრის დათმობა არ მოგვიწევს. დათმობებზე ჩვენთან მოუწევთ წამოსვლა.
- თურქეთს რა უნდა დავათმობინოთ?
- თურქეთის ტერიტორიაზე მილიონობით ჩვენი თანამემამულე ცხოვრობს. ჩვენ მათ ბედზე შეგვიძლია დავიწყოთ ზრუნვა. რუსეთის მსგავსად, კავკასიაში არეულობა არც თურქეთს აწყობს. ადრე თუ გვიან ქურთები ავტონომიას მიიღებენ, ასეთივე პრეტენზიები გაუჩნდებათ იქ მცხოვრებ კავკასიელებსაც. იქ, ჩერქეზების გარდა, მუსლიმი ოსები ანუ დიგორებიც მრავლად სახლობენ. ისინი მეფის რუსეთმა თურქეთში მოჰაჯირობის დროს გაასახლა. თურქეთში ძლიერი კავკასიური დიასპორაა, ეს კარტი მოსკოვმა შესაძლოა ნებისმიერ დროს გაათამაშოს. ჩვენთვის ძალიან სახარბიელო დრო დადგა და ეს შანსი აუცილებლად უნდა გამოვიყენოთ. ჩვენ კი რას ვაკეთებთ, ფარულ ჩანაწერებს განვიხილავთ!
„ახალი თაობა“, 15 მარტი, 2016 წელი
ინტერვიუ ნანა კაკაბაძესთან: „ვიდეოკადრების განადგურება ხელისუფლების დანაშაული იყო… პასუხისმგებლობა არასამთავრობოებსაც ეკისრებათ”
უფლებადამცველი ნანა კაკაბაძე „ახალ თაობასთან“ ინტერვიუში ფარული ჩანაწერების თემას ეხმიანება.
- ქალბატონო ნანა, არასამთავრობო ორგანიზაციები და ოპოზიციური პარტიები აღნიშნული კადრების გავრცელებაში ბრალს ხელისუფლებას სდებენ. რამდენად არის ხელისუფლება ამაში დამნაშავე?
- სწორედ ეს არის აქ მთავარი, რომ ოპოზიცია და არასამთავრობო ორგანიზაციები ხელს იშვერენ ხელისუფლებისკენ. სწორედ ეს ოპოზიცია და განსაკუთრებით კი არასამთავრობო ორგანიზაციები იყვნენ უნისონში, როდესაც მოითხოვდნენ არა რეჟიმის გასამართლებას და სისტემური დანაშაულებების გამოვლინებას, არამედ კადრების განადგურებას. ერთადერთი ადამიანი, ვინც ადეკვატური იყო ამ პროცესში და ვინც სწორად მოითხოვდა სამართლებრივი მიმართულების მიცემას ამ პროცესისთვის, იყო კახი კახიშვილი.
- არ უნდა განადგურებულიყო ეს კადრები?
- რასაკვირველია, არა, რადგან ეს იყო მტკიცებულება მათ წინააღმდეგ, ვინც ეს დანაშაული ჩაიდინა. მოსაფიქრებელი იყო ფორმა, როგორ უნდა მომხდარიყო ამ ადამიანების გასამართლება, დახურული სხდომები უნდა ჩატარებულიყო და მხოლოდ მოსამართლეებისთვის უნდა ყოფილიყო ხელმისაწვდომი ეს მასალა. კადრების განადგურება კი უდიდესი დანაშაული იყო. დღეს ამ სულელურ გაერთიანებაში რომ არიან თავმოყრილები ეს არასამთავრობოები, სწორედ მათ ეკისრებათ პასუხისმგებლობა.
- რაზე ეკისრებათ პასუხისმგებლობა?
- იმაზე, რომ ხელი შეუშალეს კადრების განადგურებას.
- რა დაშავდა კადრების განადგურებით?
- ამით მოხდა ის, რომ ამ პირადი ცხოვრების ამსახველი კადრების გამოძიება არც დაწყებულა. პირიქით, ამ ადამიანებს მიეცათ საშუალება, რომ ამ კადრებით ევაჭრათ. მე არ გამოვრიცხავ, რომ ეს კადრები არის გაყიდული.
- რას ნიშნავს გაყიდული?
- იმას, რომ ვიღაცამ შეისყიდა, სწორედ პირადი ანგარიშსწორების მიზნით. მე ძალიან შორს ვარ იმ აზრისგან, რომ ეს კონკრეტულმა პოლიტიკურმა ძალამ გამოიყენოს. ის პოლიტიკოსი, ვისზეც ეს კადრები გავრცელდა, ნამდვილად არ წარმოადგენდა იმგვარ საფრთხეს, რომ მისი ჩამოშორების მიზნით იყოს ეს გამოყენებული.
- მაშინ რა პროცესთან გვაქვს საქმე?
- აქ სხვა პროცესია. მე წინ არ გავუსწრებ მოვლენებს. ამას გამოძიება იტყვის, არ მინდა ამით საქმეს ვავნო.
- ეს იყო ხელისუფლების შეცდომა, კადრები რომ გაანადგურა, თუ ზეწოლას ვერ გაუძლო?
- შეცდომა კი არა, ეს იყო უდიდესი დანაშაული! როგორ შეიძლება მტკიცებულებების განადგურება?! როგორ შეიძლება, ამაზე გადაწყვეტილება მიიღოს რაღაცა ჯგუფმა?! გამოძიება დაწყებული არ არის და მტკიცებულებებს ანადგურებ? ეს არის პირდაპირ კრიმინალი!
- ვრცელდება ინფორმაციები, რომ ამ ყველაფერს კურირებს მეგის ქარდავა, რომ ის ვაჭრობს ამ თემით ახალ ხელისუფლებასთან, რომ ჩანაწერების ასლები მასთან ინახება. ამის თაობაზე რას იტყვით?
- მერე და ვინმე მივიდა მეგის ქარდავამდე?! გამოძიება დაინტერესდა მისით? ახლა როგორ უნდა გამოიძიონ? მტკიცებულება განადგურებულია, ვის რას დაუმტკიცებენ?! ან როგორ უნდა მოხდეს სისხლის სამართლის პასუხისმგებლობის აღძვრა და დამნაშავეების დასჯა, ვინც ამ ჩაწერას, თვალთვალს და მიყურადებას აწარმოებდა. სასამართლოზე მტკიცებულებად რა უნდა იქნეს წარდგენილი?! ეს კიდევ უფრო შორს წასული პროცესია. წლების შემდეგაც შეუძლიათ ეს კადრები გამოიყენონ. ეს პროცესი თვითდინებაზე მიუშვეს. ეს ვითომ მეტრები ადამიანის უფლებების დაცვის დარგში გააქტიურებას რომ გვიანონსებენ, დაანგრიეს ქვეყანა და მეტი რაღა უნდა გააქტიურდნენ?!
- ანუ ეს მიზანმიმართული პროცესია და ხდება ხელისუფლების დისკრედიტაცია?
- ეს თუ ვინმეს არ აწყობდა, არ აწყობდა ხელისუფლებას! ეს ორჯერ ორი ოთხია. დღეს პასუხს აგებენ არა ის არასამთავრობო ორგანიზაციები, რომლებმაც მიიღეს გადაწყვეტილება ამის განადგურებაზე, არამედ პასუხისმგებლობა მოდის ხელისუფლებაზე.
- თქვენ ამტკიცებთ, რომ არასამთავრობოებმა მიზანმიმართულად ხელი შეუწყვეს იმ პროცესს, რომ დამნაშავე არ გამოვლენილიყო?
- ხელი შეუწყო კი არა, იყო ერთ-ერთი აქტიური მონაწილე ამ პროცესებისა. რომელი მათგანი გამოვიდა და რომელმა თქვა, რომ რას შვებით, ეს დანაშაულია. დღეს ხელს ხელისუფლებისკენ გაიშვერენ და ხელისუფლებას ეს უნდა სცოდნოდა. მას შემდეგ, რაც ხელისუფლებამ განაცხადა, რომ კადრები გაანადგურა, პროცესი უმართავი და უკონტროლო გახადა! მე ვფიქრობ, რომ კონკრეტული პირები დღეს ამ ვიდეო მასალებს ყიდულობენ იმ პირებისგან, ვინც ეს გადაიღო თავის დროზე.
- რა მიზნით?
- ეს უკვე სხვა საკითხია. მომგებიან ბიზნესად იქცა ქვეყანაში ფირებით ვაჭრობა. თუ ეს ყველაფერი გამოძიებული იქნება ნორმალურად და სწორად, დაინახავენ, რომ ბიზნესის შედეგად აღმოჩნდა ეს ვიღაცის ხელში. მე არც ის მგონია, რომ ეს ნაციონალურმა მოძრაობამ დადო, რადგან ხომ უნდა იყოს ამის უკან რაღაცა ინტერესი? ვერანაირ ინტერესს ვერ ვხედავ ვერც მათი მხრიდან. აქ რაღაც სხვა ხდება, რასაც სჭირდება გამოძიება. მე ასე ვფიქრობ, რომ ეს ერთმა გაყიდა და მეორე დაინტერესებულ პირს მისცა ხელში. გამოდის, რომ აღებ-მიცემობა და ვაჭრობა მუდმივად იქნება ამასთან დაკავშირებით. ხელისუფლება კი მუდმივად ასეთ სიტუაციაში იქნება. უმკაცრესად დავსჯითო. ვერაფერსაც ვერ დასჯი! იმიტომ, რომ ხელში არაფერი გიჭირავს!
„ახალი თაობა“, 15 მარტი, 2016 წელი
ინტერვიუ სოსო მანჯავიძესთან: „პირადი ცხოვრების ფაილების განადგურება მასკარადი იყო”
საზოგადოება აღშოთებულია პირადი ცხოვრების ამსახველი კადრების ტირაჟირებით. ადამიანებს ნაკლებად სჯერათ, რომ გამოძიება უახლოეს ხანში გამოიკვლევს ამ ვიდეოების შემქმნელებს და გამავრცელებლებს.
საკრებულოს დამოუკიდებელი დეპუტატი სოსო მანჯავიძე `ახალ თაობასთან~ ინტერვიუში აღნიშნავს, რომ ასეთი კადრების გავრცელების შეჩერება, ფაქტობრივად, შეუძლებელია. პირადი ცხოვრების ამსახველი უამრავი მასალა არსებობს, მათ შორის _ საზღვარგარეთ. ისინი არ განადგურებულა. კომპრომატების მოგროვება საბჭოთა უშიშროების სამსახურებისთვისაც იყო დამახასიათებელი, სააკაშვილის რეჟიმის დროს კი ამან მანიაკალური ხასიათი შეიძინა.
„ამ ვიდეოების შექმნაც და გავრცელებაც ამაზრზენი მოვლენაა. არ ვიცი, ახლა ვის დასჭირდა მათი ტირაჟირება. ხელს ვერავის დავადებ. ძირითადად, განიხილავენ სამ ვერსიას. პირველის თანახმად, ამას ერთიანი ნაციონალური მოძრაობა აკეთებს. მეორე ვერსიით, ამის უკან ბიძინა ივანიშვილი და „ქართული ოცნება“ დგანან. მესამე ვერსიით, ამ გზით სხვა პოლიტიკური პარტიები ებრძვიან კონკურენტებს. კომპრომატების გამოყენება საქართველოში ახლა არ დაწყებულა. ამას დიდი ხნის ისტორია აქვს. ახლა უფრო მეტად გამოაშკარავდა ის მანკიერი სქემები, რომლებიც დიდი ხანია მოქმედებს”|, – ამბობს სოსო მანჯავიძე.
- რომელ სქემებზე საუბრობთ?
- ჯერ კიდევ საბჭოთა უშიშროების სამსახურები იყენებდნენ კომპრომატებს. გასვრილი პირები ინიშნებოდნენ თანამდებობებზე. ასეთი ჩინოსნები ადვილად იმართებოდნენ. შევარდნაძის დროს ეს სქემა მაღალ ხარისხში ავიდა, სააკაშვილის მმართველობისას კი მანიაკალური სახე მიიღო. საბჭოთა კავშირის დაშლის შემდეგ საქართველოში უამრავი რუსეთის აგენტი აღმოჩნდა საკვანძო ადგილებზე. მათი მონაწილეობით რუსეთმა საქართველოდან გაიტანა არქივები, რითიც მოისპო აგენტების გამოვლენის საშუალება. მოქალაქეთა კავშირის პერიოდიდან მოყოლებული, კომპრომატების გამოყენება სხვებმაც დაიწყეს _ ქვეყანაში სხვა ტიპის აგენტურა, ნაციონალური უსაფრთხოების ტიპის აგენტურაც გააქტიურდა და ამუშავდა ახალი ინკუბატორი, ანუ კადრების შერჩევის ახალი სისტემა. ამ სისტემით, პოლიტიკურ თანამდებობებზე მართვადი კომპრომეტირებული პირები უნდა დანიშნულიყვნენ. ამ ახალი კადრების დამახასიათებელი თვისებებია დიდი პატივმოყვარეობა და კომპრომატები. მათ ხალხის მოსატყუებლად წინ უნდა წამოეწიათ ეროვნული სენტიმენტები, მიმზიდველი ლოზუნგები. სასურველი იყო, რომ ისინი ყოფილიყვნენ სექსუალური, რელიგიური ან სხვა სახის უმცირესობის წარმომადგენლები. პოლიტიკური და საინფორმაციო ელიტა ასე იქმნებოდა.
- ანუ, სააკაშვილის მმართველობის დროს გადაღებული და დამზადებული კადრების გარდა, კომპრომატები ამ სქემების საფუძველზე გროვდებოდა?
- დიახ. საბჭოთა უშიშროების მეთოდიკას დაემატა ინკუბატორი, რომელთანაც იდეოლოგიურად ახლოსაა „თავისუფლების ინსტიტუტი“, „ნაციონალური მოძრაობა“ რესპუბლიკური პარტია და სხვა.
- ახლა ვის დასჭირდა პოლიტიკოსების კომპრომატების ფრიალი?
- არ ვიცი. მმართველ გუნდს რომ უნდოდეს რომელიმე ადამიანის პოლიტიკიდან ჩამოცილება, მას ასე არ მოექცეოდა. დაიბარებდნენ ასეთ პირს და ეტყოდნენ, წადიო. ვინც ამას აკეთებს, იმას არსებული პოლიტიკური კონსტრუქციის მოშლა, სახელმწიფო ინსტიტუტების დასუსტება და დესტაბილიზაცია უნდა. თბილისში თითქმის ყველამ იცოდა ზოგიერთ პირზე ვიდეოების და კომპრომატების არსებობა. ისინი თანამდებობებზე მაინც ინიშნებოდნენ.
- ამის შეჩერება არ შეიძლება?
- საუბედუროდ, ეს გამოძიებით შეუძლებელია. როცა გამოგვიცხადეს, ფაილებს ვანადგურებთო, ეს მასკარადი იყო. სააკაშვილის რეჟიმმა უამრავი მასალა დააგროვა. ასლი ბევრია. ვინ როდის დადებს და გაავრცელებს ამ ვიდეოებს უცხოეთიდან, კაცმა არ იცის. კომპრომატები მარტო პოლიტიკოსებზე არ აქვთ. ძირითადად, ეს ერთი წრეა _ ზოგმა დაამზადა, ზოგმა გაავრცელა. ვისზედაც ავრცელებენ კადრებს, ეს მისთვის მორალური მკვლელობაა. თუ ის უზნეო სქემები არ მოიშალა, რომლებიც კომპრომატების შეგროვებაზეა აწყობილი, არაფერი გვეშველება. უნდა მოიშალოს ეს სქემები. სახელგატეხილები არ უნდა ინიშნებოდნენ თანამდებობებზე. სხვა შემთხვევაში, კომპრომატების გამოქვეყნება არ შეწყდება, მით უმეტეს, საარჩევნოდ.
- უნივერსიტეტში მიმდინარე მოვლენებსაც შეუძლია დესტაბილიზაციის გამოწვევა?
- უნივერსიტეტში კრიზისული სიტუაციაა, რომელიც აუცილებლად უნდა განიმუხტოს. რექტორი ლადო პაპავა ვერ მართავს სიტუაციას. ამ უმაღლეს სასწავლებელზე კონტროლის დამყარებას ცდილობენ ლიბერალური ჯგუფები, რომლებიც „“თავისუფლების ინსტიტუტის“ იდეოლოგიას მისდევენ.
„რეზონანსი”, 15 მარტი, 2016 წელი
„შემდეგი შეიძლება იყოთ თქვენ!“: დატერორებული პოლიტელიტა და დაუცველობის განცდა საზოგადოებაში
ეკატერინე ბასილაია
თუ ხელისუფლება პირადი ცხოვრების ამსახველი ვიდეოების გავრცელებისთვის კონკრეტულ ადამიანის დასჯის პრეცედენტს არ შექმნის, წინასაარჩევნოდ ამგვარი უკანონო ჩანაწერები წალეკავს ქვეყანას, რაც დესტაბილიზაციის საფრთხეს შექმნის, – აცხადებენ პოლიტოლოგები და ქვეყნის შიგნით თუ გარეთ დესტაბილიზაციის მოსურნე ძალებზე საკუთარ ვარაუდებს გამოთქვამენ.
კონსტიტუციის სპეციალისტის, ანალიტიკოს ვახტანგ ძაბირაძის განცხადებით, ამგვარი კომპრომატები რომ დაიდებოდა და თან, წინასაარჩევნო პერიოდში, ამას დიდი მიხვედრა არ სჭირდებოდა. უკანონო ჩანაწერების გავრცელება და ახლის დაანონსება ქვეყანაში არეულობის მოწყობის მიზნით ხდება და არეულობის მოწყობის ინტერესი შესაძლოა სხვადასხვა იყოს. ერთი ნაწილი – ქვეყნის შიგნით შეიძლება ფიქრობდეს, რომ ამ არეულობით ხელს მოითბობს და ხელისუფლებაში მოვა, თუ დაბრუნდება; მეორე ნაწილი – ქვეყნის გარეთ, შესაძლოა ფიქრობდეს, რომ თუ ქვეყანაში არეულობა იქნება, ეს შეაჩერებს დავუშვათ დასავლეთისკენ ლტოლვას, იგივე ვიზალიბერალიზაციას. ხელისუფლებას კი, მისი მტკიცებით, ეს არ უნდა აწყობდეს, რადგან ყველა ხელს მისკენ იშვერს და ამგვარი ვიდეოების ვერაღკვეთაზე პასუხისმგებლობა უპირველესად მმართველ ძალას ეკისრება, რაც მის რეიტინგს აკნინებს.
ვახტანგ ძაბირაძე: “ბუნებრივია, ამ ფაილების ასლები თავიდანვე იქნებოდა. “ნაციონალური მოძრაობიდან” ის ადამიანები, ვინც ეს ჩაიწერა და შეინახა, დროს ელოდებოდნენ. წინასაარჩევნო პერიოდი კი სწორედ ის დროა, როდესაც ქვეყანაში ისედაც დაძაბული ვითარებაა. როგორი მშვიდობიანი უნდა იყოს ეს პერიოდი, დაპირისპირება მაინც არის. ამ დროს ხელისუფლება სუსტია, ამერიკილების გამოთქმით, ხელისუფლება “კოჭლი იხვის” პირობებშია, ინტერესების შეჯახება ხდება და იქმნება საერთო ფონი, რომ სიტუაცია გამწვავდეს. ამიტომაც, არ არის საკვირველი, რომ ამ პერიოდს დაამთხვევდნენ ამგვარი ვიდეოების გამოყრას. ამ ფაილების გავრცელებით ქვეყანაში არასტაბილური ვითარების შექმნას ცდილობენ, ამიტომ საჭიროა ფრთხილად ვიყოთ და ემოციებს არ უნდა ავყვეთ. ძალიან კარგია, რომ საზოგადოებრივი აზრი მკვეთრად უარყოფითია, მაგრამ საინფორმაციო სააგენტოებზე გალაშქრება სწორი არ მგონია“.
ვინ შეიძლება ყველაზე მეტად დაინტერესებული იყოს ამ კომპრომატების გამოქვეყნებით“ ვახტანგ ძაბირაძე ერთ-ერთ ასეთ დაინტერესებულ მხარედ რუსეთს ასახელებს:
“ადრეც მითქვამს და ახლაც ვიმეორებ, რომ ევროკავშირთან ასოცირების ხელშეკრულებაზე ხელმოწერა ვიღაცებმა გაატარეს და შედარებით მშვიდობიანად წარიმართა, სულაც არ ნიშნავს იმას, რომ ამით ვიღაცები შეეგუენ ჩვენ მიერ ევროპისკენ გადადგმულ ამ ნაბიჯებს. მარტივი ლოგიკაა – მაშინ გაცილებით რთული და მძიმე იყო მათთვის უკრაინის პრობლემა და შესაბამისად, ჩვენთან დესტაბილიზაციის გეგმა გადადეს. ადგილობრივი ინტერესებიც არ უნდა დაგვავიწყდეს. შესაძლოა ვიღაც სულ არ იყოს რუსეთისგან მართული, მაგრამ ხელისუფლებაში მოსვლა, თუ დაბრუნება სურდეს. ეს ინტერესები ერთმანეთს ემთხვევა და ეს ქმნის ზოგად ფონს, როდესაც შესაძლებელია არასტაბილური ვითარების გამოწვევა. ამ ინტერესების შემთხვევაში ყველაზე ძლიერი ვინც არის, ის ბუნებრივია, ყველა დანარჩენს გამოიყენებს, როგორც ფინანსურად, ისე ანალიზის თვალსაზრისით. ამიტომაც დაიწყო ეს შავი პიარი ახლა”, – განმარტავს ვახტანგ ძაბირაძე. მისი განცხადებით, თუკი “იუთუბიზე” გამავრცელებლის დადგენა ვერ მოხდება, ამგვარი ვიდეოები ისევ მოსალოდნელია და იქნება კოშმარი.
“ყველამ ერთად რაღაც უნდა მოვიფიქროთ, თუ გვინდა, რომ ამ საშინელებას თავი დავაღწიოთ. თუკი საარჩევნო პოლემიკის დროს ამ ჩანაწერების თემას ირიბად, თუ მინიშნებების დონეზეც არ გამოიყენებენ პოლიტიკოსები ერთმანეთის წინააღმდეგ, მაშინ ეს კომპრომატები არ იმუშავებს. თუ გამოიყენებენ და, სამწუხაროდ, ალბათ გამოიყენებენ, ეს დიდი პრობლემაა. თუ ლაპარაკი და ურთიერთბრალდებები გაგრძელდება, მაშინ არასტაბილურობის ხიფათი შეიქმნება და ის ყველას შეეხება”, – ამბობს ვახტანგ ძაბირაძე.
თსუ-ს პროფესორის, პოლიტოლოგ კორნელი კაკაჩიას განცხადებით, ვერავინ იტყვის, ვის შეიძლება გაევრცელებინა ეს ვიდეოები, რადგან ერთი პარტიის მიმართ არ არის თავდასხმა, სხვადასხვა პარტიიდან არის მსხვერპლი. ამიტომ უამრავი ვარიანტის განხილვა შეიძლება და როგორც “ნაციონალებისკენ”, ისე ხელისუფლებისკენ შეიძლება ხელის გაშვერა.
“ერთი ვარიანტით, შესაძლოა ყოფილი ხელისუფლების წარმომადგენლებს გაევრცელებინათ, რომლებსაც ასლები ჰქონდათ. ასევე ამ ხელისუფლების წარმომადგენლებზეც შეიძლება ხელის გაშვერა, რადგან ჩვენ გვახსოვს შს მინისტრის მოადგილის მიერ ამგვარი ქმედება, რომელიც თანამდებობიდან გაათავისუფლეს. შესაძლოა შიდა კოალიციური, პარტიათა შორის, ან პიროვნული კონკურენცია იყოს მოტივი. ცუდი ის არის, რომ როგორც ჩანს, ამგვარი ვიდეოფაილები ჯერ კიდევ ბევრია და, სავარაუდოდ, არჩევნების წინ ბევრს ვნახავთ”, – ამბობს კაკაჩია და ყველაზე დიდ პრობლემას იმაში ხედავს, რომ პრეცედენტი არ შექმნილა, ვინმე ამგვარ ქმედებაზე დასჯილიყო. ამ ყველაფერზე პირველ რიგში ხელისუფება არის პასუხისმგებელი, რადგან მათ აქვთ ბერკეტები, რითაც დადგენა შეუძლიათ. თუკი რესურსები არ ჰყოფნით, უცხოელი ექსპერტები უნდა ჩართონ.
ჩვენს პოლიტიკურ კულტურაში ამგვარი რამ ადრე არ ყოფილა და, აქედან გამომდინარე, სამართალდამცველებიც ძალიან დაბნეულები არიან. არ იციან, ასეთი ტიპის დანაშაულს როგორ უნდა ებრძოლონ. ამით სარგებლობენ გამავრცელებლები და ერთი ნაბიჯით წინ არიან, ვიდრე სამართალდამცველები, რაც არ შეიძლება დიდი ხნით გაგრძელდეს. ამაზე სამართლებრივი რეაგირება აუცილებლად უნდა მოხდეს. ცხადია, რომ პოლიტიკოსებზე წნეხის მექანიზმად იყენებენ. იქიდან გამომდინარე, რომ ქართული საზოგადოება კონსერვატიულია, ასეთი ვიდეოფაილებით რეპუტაციის შელახვას ცდილობენ, თუმცა ერთი რამ ვერ გათვალეს. რაც უფრო ვრცელდება ეს ვიდეოები, საზოგადოებრივი აზრი აბსოლუტურად საწინააღმდეგო განწყობას, მსხვერპლების მიმართ მხარდაჭერას გამოხატავს. თუკი ეს გაგრძელდება, შესაძლოა ამ ფაილებმა დაკარგოს ის ეფექტი, რაც ჩაფიქრებული იყო”, – ამბობს კორნელი კაკაჩია.
პოლიტოლოგის თქმით, ზოგადად 2012 წლის არჩევნებში ციხის კადრების ეფექტმა ნაწილობრივ ცუდად იმუშავა იმ გაგებით, რომ საზოგადოების რაღაც ნაწილმა ჩათვალა, ამ ვიდეოებსაც იგივე ეფექტი ექნებოდა, რაც ციხის კადრებს ჰქონდა. ამიტომაც თვლის, რომ იმ პოლიტიკურ ძალებსა თუ ჯგუფებს, რომლებიც ამ ვიდეოებს აზიარებენ, ეს ცდუნება აქვთ და ამას პარტიული თუ პიროვნული მოწინააღმდეგეების წინააღმდეგ იყენებენ.
პოლიტოლოგი რამაზ საყვარელიძე ამბობს, რომ ამ უკანონო ჩანაწერების გავრცელება ხელისუფლების წინააღმდეგაც არის დარტყმა და ის ოპოზიციის რიგ ძალებსაც აზიანებს, ამიტომაც რთულია ლოგიკურად საუბარი იმაზე, ვის შეიძლება ამ ბინძური კომპრომატების გამოფენა ხელს აძლევდეს.
“ვიდეოზე იყო მინიშნება, რადგან ამ ხელისუფლებამ არ გამოიძია უკანონო კადრების გადაღება და არავინ დასჯილა, ამიტომ ვავრცელებთ და ისევ გავავრცელებთო. ამ ნიუანსით ერთდროულად სამმაგი მიმართულებით დარტყმა ხდება. ხელისუფლებაზე არის დარტყმა იმიტომ, რომ ფარული ჩანაწერების საქმე არ გამოიძია და შემკვეთი არავინ დასჯილა, ამიტომ ვიღაცებს ხელ-ფეხი გაეხსნათ და არ ეშინიათ, კადრები გაავრცელონ. თუ ვინმეს აყენებს ზიანს, ასევე ეს “ნაციონალური მოძრაობაცაა”, რადგან უკანონო კადრების გადაღება მათ დროს ხდებოდა და დარტყმაა იმ ოპოზიციურ ძალებზეც, ვინც ყველაზე მეტად გამოხატავდა პროტესტს, წინა ხელისუფლებასთან დაპირისპირება მკვეთრი რატომ არ არისო. არსებობის უფლება აქვს იმ ეჭვსაც, რომ შესაძლოა ეს ყველაფერი ქვეყნის გარედან იყოს მართული, მითუმეტეს, რომ ქვეყნის გარეთ არიან პირები, ვინც ამ მასალას ფლობენ და “ნაციონალებთან” დაპირისპირებულნი არიან”, – ამბობს რამაზ საყვარელიძე და ვარაუდობს, რომ შესაძლოა დაძაბული პოლიტიკური სიტუაცია და არჩევნებზე ხალხის არწასვლა იყოს ამ ბინძური ხერხებით თამაშის საბოლოო მიზანი.
„რეზონანსი”, 15 მარტი, 2016 წელი
გაქვთ თუ არა მოლოდინი, რომ ფარული ვიდეოჩანაწერების საქმე გაიხსნება?
ნინო ქეთელაური
ერთ-ერთი პოლიტიკოსის პირადი ცხოვრების ამსახველი ვიდეო ინტერნეტში ისევ გავრცელდა. კადრებში სახეები დაფარულია და თან ახლავს ტექსტი, რომელშიც მასალის ავტორი მოქმედ პოლიტიკოსებს პოლიტიკიდან წასვლისკენ მოუწოდებს. წინააღმდეგ შემთხვევაში, მათ შესახებ მსგავსი ტიპის ჩანაწერების გავრცელებით ემუქრება. “წადით პოლიტიკიდან და არ დაიდება კადრები, თუ არადა და იხილავთ შემდეგ სერიებს”, – წერია ვიდეოს ტექსტში. შეგახსენებთ, რომ გასულ კვირასაც გავრცელდა პირადი ცხოვრების ამსახველი ვიდეო, სადაც სახეები დაფარული არ იყო და პირების იდენტიფიცირება შეიძლებოდა.
კამპანია “ეს შენ გეხება” პირადი ცხოვრების ამსახველი ფარული ჩანაწერების საკითხის გამოძიების მიზნით სპეციალური საგამოძიებო ფორმატის შექმნას ითხოვს. როგორც ახალგაზრდა იურისტთა ასოციაციის თავმჯდომარე ანა ნაცვლიშვილი აცხადებს, გამოძიება მიმდინარეობს, მაგრამ ის მაღალი ნდობით არ სარგებლობს. “მოვითხოვთ სპეციალური საგამოძიებო ფორმატის შექმნას ამ ფაქტების და ზოგადად, ფარული ჩანაწერების საკითხთან დაკავშირებით. ასევე დავსვამთ საკითხებს, რომელიც ეხება დამოუკიდებელი საგამოძიებო მექანიზმების შექმნას”, – განაცხადა ანა ნაცვლიშვილმა.
გაქვთ თუ არა მოლოდინი, რომ ფარული ჩანაწერების საქმე გაიხსნება? – ამ კითხვით “რეზონანსმა” საზოგადოების წარმომადგენლებს მიმართა.
ირმა სოხაძე (მომღერალი): “სამწუხაროდ, არ ვარ დარწმუნებული, რომ გამოძიებული იქნება და მინდა, რომ რაღაც სხვა ფორმები მოვიძიოთ თვითონ საზოგადოებამ და ხელისუფლებამაც. ვინც მიიღებს, საერთოდ ნუ გახსნის, არავითარი გაზიარება, გავრცელება და ა.შ. რაღაც პროტესტი ჩვენ თუ არ მოვიფიქრეთ, ეს ალბათ აღარ დამთავრდება. ჩვენ ვიცით, რომ არსებობს 10 ათასობით მსგავსი ჩანაწერი და მაშინვე ითქვა, რომ ამის განადგურება სრულად ვერ მოხდებოდა. იმიტომ, რომ ამის გადაწერა შეიძლებოდა და არავინ იცის, კიდევ რამდენ ადამიანს აქვს და, სამწუხაროდ, ცოტა აბსურდულია, ყველა იპოვო და გაანადგურო. ამიტომ, იგნორირება და საშინელი პროტესტი იქნება ამის პასუხი. პროტესტი იმ ადამიანს, ვინც კადრების გავრცელებით არჩევნებში მოგებას, თუ კონკურენტის ჩამოცილებას ცდილობს.
ანალიზი ჩვენვე უნდა გავაკეთოთ, ალბათ, ადვილი მისახვედრი არ იქნება, თუ რომელი ძალები არიან ამ სიბინძურით დაინტერესებულები, მაგრამ მოდი, ვაჩვენოთ, რომ საზოგადოება არ ვართ ამით დაინტერესებული. ყველასთან მაქვს თხოვნა, თუ ვინმეს მსგავსი ჩანაწერი მიუვა, არც კი გახნას, ისე წაშალოს, მხოლოდ იგნორირებაა გამოსავალი.”
ვასილ მაღლაფერიძე (პუბლიცისტი): “მე ჩანაწერები არ მინახავს, ტექნიკურ დეტალებშიც ვერ ვერკვევი, მაგრამ დიდი ინტერესი მაქვს, სპეციალისტმა ამიხსნას, თუ როგორ ხდება კიბერდანაშაულებები და რამდენად ხელმისაწვდომია ამის გახსნა. ძალიან მნიშვნელოვანია ამ საქმის გამოძიება.”
მერაბ კოკოჩაშვილი (რეჟისორი): “არჩევნების წინა პერიოდია და როგორც ჩანს, ვიღაცები არეულობის შემოტანას ცდილობენ. თუ საქმეს არ გამოიძიებენ, დიდი უსიამოვნებები იქნება. დაიწყება უწყვეტი დაპირისპირებები.”
ნანა კაკაბაძე (უფლებადამცველი): “მე ვფიქრობ, ამის ფუნდამენტური გამოძიების პროცესი უკვე დაგვიანებულია. ვგულისხმობ ამ საქმისადმი ხელისუფლების არაპროფესიონალურ მიდგომას, რაც გამოიხატა კადრების განადგურებაში. იმიტომ, რომ ეს კანონდარღვევა იყო და მათ გინდაც პრემიერის, გინდაც შინაგან საქმეთა სამინისტროს ნებისმიერი დადგენილებით არანაირი უფლება არ ჰქონდათ, გაენადგურებინათ ის, რაც კანონით იყო დაცული და კანონივე არეგულირებდა, თუ როგორ უნდა მომხდარიყო მისი განადგურება. აქედან გამომდინარე, ვინც ეს გაანადგურა, აღმოჩნდა კანონგარეშე და რაც მთავარია, გაანადგურა მტკიცებულებები და ფაქტობრივად კვალი წაშალა. ამის გათვალისწინებით, მე ვფიქრობ, ძალიან გაჭირდება რეალური კვალის მიგნება და მხოლოდ ვერსიების დონეზე არ უნდა მოხდეს ვიღაცების დასჯა.”
რეზო მიშველაძე (მწერალი): “ძალიან მიჭირს ამაზე სუბარი. ჩემთვის, მწერალი რევაზ მიშველაძისთვის მსგავს სიბინძურეებზე კომენტარის გაკეთებაც კი მიუღებელია.”
„რეზონანსი”, 15 მარტი, 2016 წელი
ინტერვიუ ირაკლი სესიაშვილთან: უცხოელი ექსპერტები ფარული ჩანაწერების გამოსაძიებლად
თიკო ოსმანოვა
საპარლამენტო უმრავლესობის წევრის ირაკლი სესიაშვილის განცხადებით, ხელისუფლება ყველა ღონეს იხმარს, რომ ფარული ჩანაწერების საქმე რაც შეიძლება სწრაფად გამოიძიოს. მისივე თქმით, თუ საჭირო გახდება, უცხოელ ექსპერტებს ჩამოიყვანენ და საქმეს ბოლომდე მიიყვანენ. „ვცდილობ, რომ ჩემი ანალიზი გავაკეთო შექმნილ ვითარებასთან დაკავშირებით. რა თქმა უნდა, ამაზრზენი ფაქტია და სახელმწიფო, საგამოძიებო ორგანოები ყველაფერს აკეთებენ იმისთვის, რომ დროულად მოხდეს ამ საქმის გამოძიება. სადაც უნდა იყოს და როგორც უნდა იყოს, ყველა რესურსს გამოვიყენებთ, რომ დამნაშავეები აღმოვაჩინოთ და დავსაჯოთ“, – ამბობს ირაკლი სესიაშვილი „რეზონანსთან“ ინტერვიუში.
- თქვენი აზრით, ვის აძლევს ხელს ამ კადრების გავრცელება?
- ამ ყველაფრის უკან შეიძლება იყოს ის, ვისაც უნდა, რომ ქვეყანაში იყოს არასტაბილურობა, ვისაც ასეთი პოლიტიკური მრწამსი აქვს, ვისაც ასე უცხოვრია და მისაღებია ასეთი მიდგომები, ან სურს ზიანი მიაყენოს ხელისუფლების იმიჯს – დაუცველობის გრძნობა დათესოს. ასე რომ, დარწმუნებული ვარ, საზოგადოება ძალიან კარგად გაიხსენებს, ვისი პოლიტიკური მრწამსი იყო და ვის ჰქონდა ასეთი მიდგომები ქვეყნისა და საკუთარი მოქალაქეების მიმართ.
- “ნაციონალურ მოძრაობას” გულისხმობთ?
- დღეს ხელს “ნაციონალური მოძრაობის” ყველა წევრისკენ არ ვიშვერ. ვამბობ, რომ გვაყვს საერთო მტერი – მათ შორის “ნაციონალურ მოძრაობასაც” და პირველ რიგში მთლიანად საზოგადოებასაც. საერთოდ არ ვაბრალებ ჩემს კოლეგა დეპუტატებს. ეს არის ძალა, რომელიც ებრძვის თითოეულ ჩვენგანს. არ ვიცი, ეს შეიძლება იყოს ყველა, ვინც არ ეთანხმება იმ პრინციპებს, რომელიც ჩამოვთვალე.
- შიდა თუ გარე ძალას გულისხმობთ?
- ფიზიკურად ეს ძალა სად არის, ქვეყნის შიგნით თუ გარეთ, არ ვიცი, მაგრამ ფაქტია, როგორც კი გიორგი კვირიკაშვილმა გააკეთა განცხადება, რომ გვინდა წყნარად და მშვიდად მივიდეთ ოქტომბრამდე და ჩავატაროთ ღირსეული არჩევნები, გააქტიურდნენ. ამის ძალიან ბევრს ეშინია. ზოგიერთი ყოფილი პოლიტიკოსი აცხადებდა, რომ ქინძი ვიყოო. ხელს არავის ვადებ, მაგრამ ფაქტია, ვიღაცებს ამ ქვეყანაში არასტაბილურობა სურს და ხელისუფლებისთვის ზიანის მიყენება. ზოგიერთებს არ უნდათ მშვიდობიანი არჩევნები, როგორც კი კვირიკაშვილმა ეს განცხადება გააკეთა, მაშინვე დავინახე შიში გარკვეულ პოლიტიკურ ძალებში.
- თქვენი აზრით, თუ შეძლებს პროკურატურა ამ საქმის გამოძიებას, ეს ხომ არ არის პირველი შემთხვევა, რაც ასეთი ჩანაწერები ვრცელდება?
- ვერ გეტყვით. საზოგადოებაში რატომღაც მუსირებს აზრი, როგორც გინდათ გააკეთეთ რაღაც და საქმე გამოიძიეთ. ასე მარტივად არ არის გამოძიება. ყველა საქმე რომ იხსნებოდეს, მსოფლიოში დანაშაული აღარ მოხდებოდა. ძალიან რთულია, ინტერნეტსივრცეში რაღაც ფაილი აიტვირთოს და მერე უცებ გამოიძიო. მთავარია, ხელისუფლება და საგამოძიებო ორგანოები მობილიზებულნი არიან. ამ საქმის გახსნისთვის ყველა რესურსს გამოვიყენებთ. საერთაშორისო ექსპერტებსაც მოვიწვევთ, თუ საჭირო გახდება.
- თუმცა საზოგადოება ფიქრობს, ამის პოლიტიკური ნება არ არსებობს და საქმის გახსნას სკეპტიკურად უყურებს…
- რას ჰქვია, პოლიტიკური ნება არ არსებობს, ეს არის თავდასხმა ჩვენს ხელისუფლაზე და ტერორი მოსახლეობაზე.
- რაც შეეხება ე.წ ოდეერებს და თსუ-ში განვითარებულ მოვლენებს, რას ფიქრობთ ამასთან დაკავშირებით, იგეგმება თუ არა ამ კანონის ხელახლა გადახედვა?
- “ოდეერები” გაუქმებულია. არის მთავრობის დადგენილება, სადაც განსაზღვრულია, რომ უშიშროების ოფიცერი შეიძლება შევიდეს მხოლოდ ურთიერთშეთანხმების საფუძველზე 25 ობიექტში. სია გამოქვეყნებულია, ღია, საჯაროა ყველა ინფორმაცია.
- მაშინ უნივერსიტეტში რა უნდოდა?
- არ არიან უნივერსიტეტში, გაუქმებეულია ხელშეკრულება და თუ ვინმეს ამის არ სჯერა, ე.ი არ გინდათ, რომ დაიჯეროთ, ეს არის მთელი პრობლემა. ეტყობა, ვიღაცას აქვს ინტერესი, იმიჯი შეულახოს უშიშროების სამსახურს, რომლებიც მართლა ღირსეულად ახორციელებენ თავიანთ მოვალეობას.
- ის, რომ “ოდეერები” არიან არასპეციფიკურ დაწესებულებებშიც, ამას თქვენივე თანაგუნდელიც ადასტურებს…
- აქამდე თუ იყო და არ წამოვიდა, ამასთან დაკავშირებით ვერაფერს გეტყვით. მას შემდეგ, რაც შევიდა დადგენილება, მარტო ამ 25 ობიექტში შევლენ ურთიერთშეთანხმების საფუძველზე. თუ სადღაც მუშაობდა და იქ დარჩა, ამაზე პასუხი მოსთხოვეთ იმ უწყების ხელმძღვანელს, კერძო სტრუქტურა იქნება, თუ საჯარო. შეიძლება უბრალო თანამშრომლად ჰყავთ უშიშროების ყოფილი თანამშრომელი, იმიტომ, რომ ესენი აღარ არიან ხელშეკრულებით და კავშირი არ აქვს უსაფრთხოების სამსახურთან. და თუ ვინმეს არ მოსწონს, შეუძლია გაათავისუფლოს სამსახურიდან და ხელს ნუ იშვერენ უსაფრთხოების სამსახურისკენ, ეს არის აბსოლუტურად მიზანმიმართული დისკრედიტაციის მცდელობა.
„რეზონანსი”, 15 მარტი, 2016 წელი
ინტერვიუ გია მაისაშვილთან: პოზიცია ვიდეოკადრების გავრცელების, უნივერსიტეტში მიმდინარე მოვლენებისა და სამომავლო არჩევნების შესახებ
თაკო მათეშვილი
“ეს არა მხოლოდ სამარცხვინო, არამედ საშიშია. თუ აღმოჩნდა, რომ ინტელექტუალური კაპიტალიც არ გვაქვს, ე.ი აღარაფერი გვქონია”, – ამბობს ეკონომისტი, “ლიდერთა სკოლის” ხელმძღვანელი გია მაისაშვილი მასწავლებელთა სასერტიფიკატო გამოცდების შედეგების შეფასებისას და დასძენს, რომ ეს ყველაფერი ქვეყანაში განათლების სფეროს განვითარების სტრატეგიის არარსებობამ გამოიწვია. “რეზონანსთან” საუბრისას იგი გავრცელებულ სკანდალურ კადრებსაც ეხება და ამბობს, რომ ამ საქმის დროული გამოძიების იმედი არ აქვს. მისი თქმით, ეს ყველაფერი ყველას იმიჯს აზიანებს – ხელისუფლებით დაწყებული, საზოგადოებით დასრულებული.
„სამწუხაროდ, ქვეყანაში არსებობენ ადამიანები, ვინც ასეთ რაღაცებს ფირზე იღებს და ავრცელებს. მედია იძულებულია ამდენ ცუდზე, ნეგატივზე, პრიმიტივიზმზე ფოკუსირდეს. არა მხოლოდ მედია, საზოგადოებაც ყველაზე პრიმიტიულ ნაწილზეა ფოკუსირებული. მთელი საზოგადოების ყურადღება ამ ამაზრზენ ფაქტზეა მიპყრობილი, იმის ნაცვლად, რომ ისეთ ტრაგედიას მიაქციონ ყურადღება, როგორიც გამოცდებში მასწავლებელთა 83 პროცენტის ჩაჭრაა. ეს არამხოლოდ სამარცხვინო, არამედ საშიშია. თუ აღმოჩნდა, რომ ინტელექტუალური კაპიტალიც არ გვაქვს, ე.ი აღარაფერი გვქონია. დღეს ასპარეზზე ყველაზე უღირსი, უვიცი, უთავმოყვარეო ხალხია გამოსული. ყველგან ასეთი ხალხი ტრიალებს. პოლიტიკაშიც და საზოგადოებაშიც. საზოგადოების გამოფხიზლებაა საჭირო, რომელთა რაოდენობაც ბევრად დიდია, ვიდრე იმ ამპარტავანი ვიგინდარებისა, რომლებიც ხელისუფლებაშიც არიან და ოპოზიციაშიც», – ამბობს გია მაისაშვილი.
- თქვენი აზრით, რამდენად ადეკვატური იყო ხელისუფლების რეაქცია და ქმედება გავრცელებულ სკანდალურ კადრებზე? გაქვთ იმის მოლოდინი, რომ ამ საქმის გამოძიებას შეძლებენ?
- სიმართლე გითხრათ, ამ ხელისუფლების პოზიტიური ქმედების იმედი არ მაქვს. ამდენი ხანია რაღაც სიკეთეს ველით და ამ ქვეყნის ყველაზე მნიშვნელოვანი მომენტი ფაქტობრივად გაიფლანგა. როგორ შეიძლება რამეს იმედი გვქონდეს, როცა გადაწყვეტილების მიმღები, გუნდის შემკრები და მთავარი ამოცანების განმახორციელებელი არავინაა? არაფრის მაქნისები არიან და რა ამოცანა უნდა გადაწყვიტონ? სამწუხაროდ, ამ სრულიად უსუსურ ხელისუფლებაზე ძალიან ცუდი წარმოდგენა მაქვს.
- გავრცელებული კადრები, თქვენი აზრით, ვის იმიჯს აზიანებს?
- ყველას რეიტინგს ურტყამს – მთელი საზოგადოების, ჩვენი ქვეყნის. ადამიანები ერთმანეთის მიმართ ნდობას კარგავენ, ჩასაფრებულები არიან. რა თქმა უნდა, ეს კადრები ხელისუფლების იმიჯსაც აზიანებს, რადგან ასეთი რაღაცები ნორმალური ხელისუფლების პირობებში არ უნდა ხდებოდეს.
- მასწავლებელთა ტესტირებამ საკმაოდ არასახარბიელო შედეგები აჩვენა. თქვენი აზრით, რამ გამოიწვია ეს?
- მასწავლების უმრავლესობა ძალიან დაბალ დონეზეა. თავად პროფესია შეურაცხყოფილია. ჩვენს ქვეყანაში განათლების სფეროს სტრატეგია მკაფიოდ არაა ჩამოყალიბებული. თუ ვაღიარებთ, რომ მოსწავლე და სტუდენტი მთავარია, თუ გვინდა, რომ მათზე ვიყოთ ორიენტირებულები, მასწავლებელი უნდა გავაძლიეროთ. მაგრამ პრობლემა ისაა, რომ ამათ არაფრის გაკეთება არ სურთ. მხოლოდ თანამდებობის შენარჩუნება უნდათ. მათ არ აქვთ ხედვა და კომპეტენცია რამეს შესაცვლელად. როცა არ გაქვს ხედვა და გაქვს თანამდებობა, მხოლოდ თანამდებობის შენარჩუნებას ცდილობ. ხოლო როცა ხედვა გაქვს და ამ ხედვისთვის მიდიხარ თანამდებობაზე, მთელი შენი რესურსით ამის განხორციელებას ცდილობ და არა თანამდებობის შენარჩუნებას. მის შესანარჩუნებლად ფიქრისთვის დრო აღარ გაქვს.
ახლა კი, როცა არაფერი იცი და არაფერს აკეთებ, ცდილობ როგორმე ირგვლივ შენიანები შემოიკრიბო, ყველა თანამდებობაზე შენიანი მოიყვანო, რომ როგორმე ციხესიმაგრე შეინარჩუნო, რათა მაღალი ხელფასი და დანამატი დიდხანს გქონდეს. ეს ამაზრზენია. თუ განათლების სფეროს დროზე არ მივხედეთ, ჩვენ მეტი დრო აღარ გვექნება.
- თბილისის სახელმწიფო უნივერსიტეტში მიმდინარე პროცესები საზოგადოების ყურადღების ცენტრშია. როგორ აფასებთ იქ არსებულ სიტუაციას?
- უნივერსიტეტს ჰყავს რექტორი, რომელსაც არანაირი სურვილი არ აქვს სასწავლო პროცესი გამოასწოროს. ხელმძღვანელობა პარალიზებულია, პროფესურა კი – არაადეკვატური. საქართველოში არ არსებობს უნივერსიტეტი, რომელიც ადეკვატურ, 21-ე საუკუნის შესატყვის, კვალიფიციურ კადრებს ამზადებს. არცერთი! ასეთ პირობებში როგორ გინდა თანამედროვე ეკონომიკა შექმნა? ეს გამორიცხულია. შერჩევის პროცესი ფარსია. აკადემიური საბჭო სრულიად არაადეკვატური ადამიანებითაა დაკომპლექტებული.
უნივერსიტეტის სრული გაწმენდაა საჭირო. წელიწადში 90 მილიონი, თქვენი, ჩემი და სხვების რესურსი იხარჯება. წარმოიდგინეთ, ამდენი წლის განმავლობაში მილიარდობით ლარი იხარჯება ამათი კეთილდღეობისათვის და არა სტუდენტების მომზადებისათვის. გადასახადების გადამხდელთა ფულს საკუთარი ჯიბის გასასქელებლად იყენებენ. ამაზე დიდი დანაშაული რაღაა?
თბილისის სახელწმიფო უნივერსიტეტში მიმდინარეობს არა სასწავლო პროცესი, არამედ შიდა პოლიტიკური ინტრიგები. როგორ შეიძლება მთელ კეთილდღეობას რექტორი იღებდეს? ორ კვირაში ერთხელ დაფრინავს სადღაც და რაღაც სწავლებებს ესწრება. ვიღაცამ გამოაქვეყნა, თუ რამდენი თანხა დაიხარჯა რექტორის მოგზაურობაზე და რა იყო ამ მოგზაურობის შედეგი სასწავლო პროცესის გაუმჯობესების თვალსაზრისით. ამ პირობებში საზოგადოებას რამე წინსვლა როგორ უნდა ჰქონდეს? არაპროფესიონალიზმის, ნიჰილიზმის, ნეპოტიზმისა და ბოღმის ზეიმია. ეს ყველაფერი უნდა დასრულდეს, ყველაზე მნიშვნელოვანი საკითხები წამოვწიოთ და ის ადამიანები, რომლთაც ამ საკითხებზე საუბარი შეუძლიათ.
- საარჩევნო წელი საკმაოდ მწვავედ დაიწყო. არჩევნების მოახლოებასთან ერთად ელოდებით თუ არა მდგომარეობის კიდევ უფრო გამწვავებას?
- ჩემზე კარგად იცით, რომ არჩევნების მოახლოებასთან ერთად ყოველგვარი ტალახი და ლექი თავზე ამოვა. რამდენი არჩევნები გავიარეთ და ყოველ ჯერზე ასე ხდება – ათასი ჯურის ავანტიურისტი აქტიურდება, ხელებს ითბობენ და შემდეგ სტაგნაცია ისევ გრძელდება. რას უნდა ველოდოთ ახალს არჩევნებისათვის? ვინმე ახალი მონაწილეობს ახალი სტრატეგიითა და პროფესიონალიზმით? ხელისუფლება, რომელიც უკვე დავრწმუნდით, რომ უსუსურია, არჩევნებში გაიმარჯვებს და ეს უსუსურობა გაგრძელდება. ოპოზიცია კი 9 წლის განმავლობაში უკვე შევისწავლეთ და ვიცით, რისი გამკეთებელია, რაოდენ კრიმინალური წარსული აქვს.
სხვა ვინ მონაწილეობს? იგივე ადამიანები, ვინც ამდენი ხანი მონაწილეობენ. სიახლის მოლოდინი როგორ უნდა გვქოდეს? ჩვენ ხომ ამ ხალხს დიდი ხანია ვიცნობთ და ვიცით, რისი გამკეთებლები არიან. თუ არჩევნებში ახალი ძალა და იმედი არ მონაწილეობს, რა მნიშვნელობა აქვს, როგორ დასრულდება იგი? ვიღაცა მეტ ხმას მიიღებს, ვიღაცა ნაკლებს, მაგრამ შესაკრებთა გადანაცვლებით ჯამი არ იცვლება. ნულს მივუმატოთ ნული, უდრის ნულს.
„რეზონანსი”, 15 მარტი, 2016 წელი
“სტუდენტებს სერიოზული საფრთხე გვემუქრება“
თსუ-ში სიტუაცია კონტროლიდან გამოდის
სალომე სარიშვილი
სიტყვიერი და ფიზიკური დაპირისპირება, დაუსრულებელი აქციები, შეწყვეტილი სასწავლო პროცესი, ქაოსი და ფაქტობრივად, უმართავი ვითარება – თბილისის სახელმწიფო უნივერსიტეტში სიტუაცია ყოველდღიურად უფრო და უფრო მწვავდება.
მიუხედავად იმისა, რომ გუშინ თსუ-ს კანცლერის პოსტზე წარდგენილმა გიორგი გაფრინდაშვილმა საკუთარი კანდიდატურა მოხსნა, მღელვარება უნივერსტიტეტში მაინც არ დამცხრალა. სტუდენტები დანარჩენი მოთხოვნების დაკმაყოფილებას ითხოვენ, სხვა შემთხვევაში კი აქციების გაგრძელებას გეგმავენ. საგულისხმოა ის გარემოებაც, რომ თსუ-ს სტუდენტთა აქციას ახლა უკვე კონტრმომიტინგეთა აქცია დაუპირისპირდა.
გუშინ თსუ-ს სასწავლო პროცესის მართვის დეპარტამენტთთან გიორგი გაფრინდაშვილის მოწინააღმდეგეთა ჯგუფს უნივერსიტეტის თვითმმართველობის მხარდამჭერები სიტყვიერად დაუპირისპირდენენ, თუმცა, ეს დღის განმავლობაში მომხდარი მხოლოდ ერთი დაპირისპირება არ ყოფილა. მოგვიანებით თსუ-ს პირველ კორპუსთან სტუდენტები ერთმანეთს ფიზიკურად კიდევ ერთხელ დაუპირისპირდნენ.
აღსანიშანავია, რომ შეტაკებაში მონაწილე რამდენიმე სტუდენტს სახეზე ნიღაბი ჰქონდა აფარებული და განსაკუთრებული აგრესიით გამოირჩეოდნენ.
კონტრაქტივისტები შენობაში უპრობლემოდ, დაცვის პოლიციასთან შეთანხმებით შევიდნენ და მოგვიანებით თვითმმართველობის წევრებს შეუერთდნენ. თვითმმარ-თველობის აქტივისტთა ჯგუფის წევრები აგრესიულად და არაადეკვატურად ეპყრობოდნენ ჟურნალისტებსაც, იყო ტექნიკური ინვენტარის დაზიანების მცდელობაც, კერძოდ კი “ლიბერალის” ჟუნალისტს კამერა დაუზიანეს.
საღამოს საათებში თვითმმართველობის მხარდამჭერებმა უნივერსიტეტის რექტორთან მისი გადადგომის მოთხოვნით შესვლაც მოინდომეს და საამისოდ სამართალდამცველებთან შელაპარაკებაც მოუვიდათ, თუმცა, საბოლოოდ, ვითარება თსუ-ს უსაფრთხოების სამსახურის თანამშრომლებმა განმუხტეს.
საგულისხმოა, რომ ლადო პაპავას გადადგომისკენ მანამდე თსუ-ს კანცლერობის ყოფილმა კანდიდატმა, გიორგი გაფრინდაშვილმაც მოუწოდა და რექტორი სიტუაციაზე კონტროლის დაკარგვაში დაადანაშაულა. ამის საპასუხოდ კი ლადო პაპავამ განაცხადა, რომ გადადგომას არ აპირებს, რადგან ამგვარი გადაწყვეტილება თსუ-ში მეტ ქაოსს გამოიწვევს.
“ბოლო დროს უნივერსიტეტში განვითარებული მოვლენები, რომლებმაც საფრთხის ქვეშ დააყენა უმაღლესი სასწავლებლის ნორმალური ფუნქციონირება და გამოიწვია სტუდენტების დაპირისპირება, მართული იყო იმ ძალების მიერ, რომლებიც ცდილობდნენ კანონის სრული დაცვით არჩეული კანცლერობის კანდიდატის დისკრედიტირებას და უნივერსიტეტის გახლეჩას. ვთვლი, რომ ყოველივე ზემოაღნიშნულთან დაკავშირებით პასუხისმგებლობა თავის თავზე უნდა აიღოს უნივერსიტეტის რექტორმა, რადგან მან, როგორც უნივერსიტეტის პირველმა პირმა, არცერთი ქმედითი ნაბიჯი არ გადადგა მიმდინარე დღეებში სიტუაციის ნორმალიზების, სამართლებრივ ჩარჩოებში მოქცევისა და დაძაბულობის თავიდან აცილებისათვის. რექტორის მხრიდან პასუხისმგებლობის თავზე აღება არ მინდა ორაზროვნად იქნეს აღქმული. ამიტომ განვმარტავ – იგი უნდა გადადგეს დაკავებული თანამდებობიდან”, – განაცხადა გიორგი გაფრინდაშვილმა.
თუმცა, მიუხედავად გიორგი გაფრინდაშვილის გუშინდელი გადაწყვეტილებისა, სტუდენტური მოძრაობა “აუდიტორია 115″-ის წევრები აქციების შეწყვეტასა და დაშლას არ აპირებენ.
როგორც ერთ-ერთმა სტუდენტმა ანა-მარია ბრეგვაძემ “რეზონანსს” განუცხადა, ისინი აქციებს მანამ არ შეწყვეტენ, სანამ მათი სხვა მოთხოვნებიც არ დაკმაყოფილდება, რისი პირობაც განათლებისა და მეცნიერების მინისტრისგან თამარ სანიკიძისგან მიიღეს. კერძოდ, ეს ეხება უნივერსიტეტში ე.წ “ოდეერის” ინსტიტუტის გაუქმებასა და თვითმმართველობის რეფორმირებას.
“უნივერსიტეტში დღის განმავლობაში რამდენიმე ფიზიკური დაპირისპირება მოხდა, რომელიც მხოლოდ ჩვენსა და თვითმმართველობის წარმომადგენლებს შორის არ მომხდარა. თსუ-ში არსებული თვითმმართველობის წარმომადგენლებთან დაახლოებული ე.წ “ქართული ძალა” ებრძვის ჟურნალისტებსაც. ეს არის ფაშისტური, ნეონაცისტური დაჯგუფება, რომელიც უნივერსიტეტის კედლებზე ფაშისტურ სიმბოლიკებს ხატავს და აცვიათ ამ გამოსახულების მქონე მაისურები. ეს ნიშნავს, რომ თითოეულ აქ მყოფ სტუდენტს სერიოზული საფრთხე გვემუქრება. მიუხედავად იმისა, რომ ადგილზე ბევრი სამართალდამცველია, რეაგირება მათ საქციელზე არ ხდება. რა თქმა უნდა, დანებებას არ ვაპირებთ, აქციები გაგრძელდება და ჩვენი მიზნებისთვის ბოლომდე ვიბრძოლებთ. აუცილებლად უნდა აღვნიშნო, რომ ჩვენი მოთხოვნების გათვალისწინება და სიტუაციის დარეგულირების პირობა თავად განათლებისა და მეცნიერების მინისტრისგან მივიღეთ, როცა მან ჩვენთან შეხვედრისას ე.წ ოდეერების ინსტიტუტსა და თვითმმართველობის რეფორმირებაზე ისაუბრა. თამარ სანიკიძემ მოგვცა პირობა, რომ ჩვენთან ერთად ამ რეფორმაზე მუშაობას ორშაბათიდანვე დაიწყებდა, რადგანაც ყველა ვთანხმდებით, რომ თვითმმართველობის იმ ფორმით არსებობა, რა ფორმითაც დღეს არსებობს, წარმოუდგენელია. რაც შეეხება ე.წ ოდეერის ინსტიტუტს, მინისტრმა ამაზეც თქვა, რომ იგი თსუ-ში ამასაც ეწინააღმდეგება და გამოძიების დაწყებას მიესალმება”, – ამბობს “რეზონანსთან” საუბრისას სტუდენტი.
მნიშვნელოვანია აღინიშნოს ისიც, რომ სტუდენტურ მოძრაობას სოლიდარობას ილიას უნივერსიტეტის, ბათუმის სახელმწიფო უნივერსიტეტის, თეატრალური უნივერსიტეტის, თავისუფალი უნივერსიტეტის, კავკასიის უნივერსიტეტისა და ტექნიკური უნივერსიტეტის სტუდენტების ნაწილი უცხადებს.
„რეზონანსი”, 15 მარტი, 2016 წელი
საქართველოდან უფრო მეტი ფული გადის, ვიდრე შემოდის
ბოლო 5 წელიწადში 6 მლრდ დოლარის ინვესტიცია შემოვიდა, ხოლო გატანილი კაპიტალის ოდენობა 6,5 მლრდ-ს აღემატება
მაკა ხარაზიშვილი
ბოლო 5 წელიწადში საქართველოდან 6,5 მილიარდი დოლარის კაპიტალი გავიდა. ამ პერიოდში შემოსული ინვესტიციების რაოდენობა კი მხოლოდ 6 მილიარდია. ფაქტობრივად, ინვესტორებს რაც შემოაქვთ ისევ უკან გააქვთ. ამიტომაც საქართველოში ვერც ბიზნესი ვითარდება და არც სამუშაო ადგილები იქმნება.
ქვეყნიდან გატანილი კაპიტალის მოცულობა წლიდან წლამდე იზრდება. ძირითადად, ხდება უცხოური ინვესტიციებით შექმნილ საწარმოებში მოგების რეპატრიაცია უკან თავის სამშობლოში ან კიდევ გარკვეული პერიოდის გასვლის შემდეგ ამ ინვესტიციის გადინება. შესაბამისად, შემოტანილ და გატანილ ინვესტიციებს შორის სხვაობა თანდათანობით ძალიან მცირდება.
2015 წელს საქართველოში წმინდა ინვესტიციებმა 1,351 მილიარდი დოლარი შეადგინა, ქვეყნიდან 1,136 მილირადი დოლარი გავიდა. ეკონომიკის მეცნიერებათა დოქტორის სოსო არჩვაძის განცხადებით, თუკი შემოსულ ინვესტიციებს შევადარებთ საინვესტიციო მოგებისა და რეზიდენტების მიერ უცხოეთში გატანილი კაპიტალის საერთო მაჩვენებელს, გაცილებით საგანგაშო მაჩვენებელს მივიღებთ. აღმოვაჩენთ, რომ ქვეყნიდან უფრო მეტი თანხა გაედინება, ვიდრე შემოდის. კერძოდ, ბოლო 5 წელიწადში 6 მილიარდი დოლარის ინვესტიცია შემოვიდა, ხოლო გატანილი კაპიტალის ოდენობა 6,5 მილიარდ დოლარს (საინვესტიციო მოგება და კაპიტალი) აღემატება.
ეკონომიკის მეცნიერებათა დოქტორის სოსო არჩვაძის მიერ მომზადებული სტატისტიკის მიხედვით, რომელიც საგადასახდელო ბალანსს ეყრდნობა, 2010 წელს ქვეყანაში 814 მილიონი დოლარის ინვესტიცია შემოვიდა, ხოლო ქვეყნიდან 872 მილიონი დოლარის კაპიტალი გავიდა. ეს კი შემოსული ინვესტიციების 107%-ია. 2011 წელს კი უცხოურმა პირდაპირმა ინვესტიციებმა 1,117 მილიარდი დოლარი შეადგინა, ქვეყნიდან გასული კაპიტალი – 1,320 მილიარდი დოლარი (118%) იყო. ამ მიმართულებით, საგანგაშო ვითარება იყო 2012 წელს, როდესაც შემოსული ინვესტიცია 912 მლნ დოლარის არ აღემატებოდა, ხოლო ქვეყნიდან 1,535 მილიარდი დოლარი გავიდა (168%). 2013 წელს აღნიშნული თანაფარდობა ცოტა შემცირდა – შემოვიდა 942 მილიონი დოლარი, ხოლო გავიდა 1,315 მილიარდი დოლარის კაპიტალი.
შარშან ვითარება კარდინალურად შეიცვალა. ამაზე მნიშვნელოვანი გავლენა მოახდინა სტატისტიკის ეროვნული სამსახურის მიერ მოგვიანებით გამოქვეყნებულმა დაზუსტებული ინვესტიციების მაჩვენებელმა. 2014 წელს ქვეყანაში 1,758 მილიარდი დოლარის ინვესტიცია აღინუსხა, ხოლო ქვეყნის გარეთ მხოლოდ 1,265 მლრდ დოლარის (71,9%) კაპიტალი გავიდა. 2015 წლის პირველ ნახევარში პროპორცია ისევ დაირღვა – შემოვიდა 530 მილიონი დოლარი, ხოლო ამ პერიოდში ქვეყნიდან 671 მილიონი დოლარის გადინება მოხდა (126%).
ეკონომისტები აღნიშნავენ, რომ ქვეყნის ეკონომიკური მდგომარეობისა და რესურსების სიდიდის განხილვისას უნდა გავითვალისწინოთ არა მარტო უცხოეთიდან შემოტანილი ინვეტიციები, არამედ მათი შემდგომი ბედიც. კერძოდ ის, რომ წარმოების მომდევნო ეტაპზე ამ ინვესტიციებიდან მიღებული მოგება რჩება საქართველოში თუ გაედინება ფარგლებს გარეთ.
ეკონომისტი დავით ასლანიშვილი აღნიშნავს, რომ საქართველოში სხვადასხვა სახის ინვესტიცია შემოდის, მათ შორისაა, ოფშორიდან შემოსული თანხაც. ამ დროს ბიზნესმენებს აქვთ მცდელობა, რომ საქართველოში საკუთარი ბიზნესი “გააპრავონ” და ინვესტიციები აჩვენონ. გარდა ამისა, ასლანიშვილის განცხადებით, 2008 წლის აგვისტოს შემდეგ, როდესაც საქართველოში 4,5 მილიარდი დოლარის დახმარება შემოვიდა, აქედან დიდი ნაწილი იყო სესხი, რომლის გასტუმრებაც ახლა ხდება.
“2015 წელს ბანკებს 1,4 მილიარდი ლარი ჰქონდათ გასასტუმრებელი, წელს შედარებით ნაკლები თანხაა, თუმცა 2017-ში 2 მილიარდ ლარზე მეტი აქვთ გადასახდელი”, – ამბობს დავით ასლანიშვილი და დასძენს, რომ მსხვილ ბიზნეს მთლიანი მოგება გააქვს საქართველოდან. ამიტომაც მნიშვნელოვანია, რომ დროულად ამოქმედდეს მთავრობის ინიციატივა, რომელიც რეინვესტირებისას მოგების გადასახადის გაუქმებას ითვალისწინებს.
“აქ ფულს აკეთებენ ნავთობკომპანიები, ენერგეტიკა, ფარმაცია, ბანკები. ჩვენი ამოცანაა, რომ ინვესტიციები ადგილზე რჩებოდეს. სამწუხაროდ, ამ პროცესს მთავრობაც უშლის ხელს, ვინაიდან თანხის შემოდინება კაპიტალის ბაზარზე უნდა ხდებოდეს, კაპიტალის ბაზარი კი მოსპეს”, – ამბობს დავით ასლანიშვილი.
ეკონომისტების განცხადებით, მთავარია არა ინვესტიციების მოზიდვა, არამედ ამ ინვესტიციების დიდი ხნით საქართველოში დამკვიდრება ისე, რომ მიღებული მოგების მნიშვნელოვანი ნაწილი კვლავწარმოებისთვის გამოიყენებოდეს.
ექსპერტ აკაკი ჩარგეიშვილის განცხადებით, ინვესტიცია მოქმედი კანონმდებლობით – ეს არ არის პირდაპირი ფული, დანადგარები, სხვადასხვა ტექნოლგია, რომელიც ერთიანობაში ქმნის ამ ღირებულებას.
“საქართველოში წარმოება არ არის საკმარისად განვითარებული. აქ ყველაზე მნიშნველოვანია დავადგინოთ გვაქვს დადებითი თუ უარყოფითი სალდო. წარმოების წინსვლა ხდება იმ შემთხვევაში, როდესაც საგადასახადო გარემო ხელს უწყობს ბიზნესის განვითარებას. ჩვენ დიდ რესურსს ვდებთ ტურიზმში და ეს არის ერჯერადი შემოსული თანხა, რომელიც არ არის პირდაპირი ინვესტიცია. რეალურ შედეგს მივაღწევთ წარმოების განვითარებით, რომ ქვეყნის ეკონომიკის განვითარება იყოს შესაბამისი”, – ამბობს აკაკი ჩარგეიშვილი.
აკადემიკოსი ავთო სილაგაძე ასევე აღნიშნავს, რომ ხელისუფლების მიერ მოგების გადასახადით ლავირება კარგი სიგნალი იქნება ინვესტორისთვის, თანაც ამ გადასახადიდან ბიუჯეტი არც ისე ბევრ თანხას იღებს. “ყოველწლიურად საკმაოდ დიდი თანხა გადის უცხოეთში – ასეულობით მილიონი დოლარი. ამ ფულის ბრუნვაზე გარკვეული საგადასახადო შეღავათები უნდა დაწესდეს, რათა ქვეყანამ ეს კაპიტალი შეინარჩუნოს”, – დასძენს ავთო სილაგაძე.
აღსანიშნავია ისიც, რომ ბოლო 10 წლის განმავლობაში საქართველოში 11 მილიარდ დოლარზე მეტი ინვესტიცია შემოვიდა. ერთი შეხედვით, ამ რაოდენობის კაპიტალს ქვეყნის ეკონომიკა ბევრად წინ უნდა წაეწია, ვიდრე ამჟამადაა. რეალურად კი ქვეყანაში არც უმუშევრობის მაჩვენებელი შემცირებულა და არც სოციალური მდგომარეობა გაუმჯობესებულა. სპეციალისტების ნაწილი მიიჩნევს, რომ საქართველოში, ძირითადად, სპეკულაციური ინვესტიციები შემოდიოდა, რომელიც მოსახლეობის ცხოვრების დონეზე არ აისახა.
