„რეზონანსი”: „ოცნება“ დაიშალა – რა იქნება შემდგომ
„რეზონანსი”: როგორ იმოქმედებს “რესპუბლიკელების” კოალიციიდან გასვლა არჩევნებში “ოცნების” შედეგზე?
„რეზონანსი”: ინტერვიუ ლევან ბერძენიშვილთან: “გარწმუნებთ, მომავალი პარლამენტი ჩვენ გარეშე არ იქნება…”
„რეზონანსი”: ინტერვიუ თამაზ მეჭიაურთან: «დღევანდელი მოცემულობით, რესპუბლიკური პარტია ბარიერს გადალახავს“
„რეზონანსი”: ინტერვიუ გია ხუხაშვილთან: “ოცნების” გარდა ყველა სხვა პარტიას ბარიერის გადალახვა გაუჭირდება“
„რეზონანსი”: ინტერვიუ ზურაბ ტყემალაძესთან: „რესპუბლიკელების” გასვლა “მრეწველებთან” დაპირისპირების შედეგია“
„რეზონანსი”: ინტერვიუ ანი მიროტაძესთან: კოალიცია დაიშალა – რა გეგმები აქვს “ეროვნულ ფორუმს”
„ახალი თაობა“: ინტერვიუ სოსო ცინცაძესთან: „ქართულ ოცნებას“ მარტო გაუჭირდება“
„ახალი თაობა“: ინტერვიუ სანდრო ბრეგაძესთან: „თინა ხიდაშელი უნდა გადადგეს!»
„ახალი თაობა“: ინტერვიუ სოსო მანჯავიძესთან: „ეს რესპუბლიკელების გადაწყვეტილება არ ყოფილა“
„რეზონანსი”: არჩევნების წელი – გაფიცვების წელი // „არჩევნებამდე ქვეყანაში საპროტესტო აქციების მასშტაბი მნიშვნელოვნად მოიმატებს”
„რეზონანსი”: გაუმჯობესებული ბალანსი გამყარებულ ლარს არ ნიშნავს
————–
“ალია”: ინტერვიუ გია ხუხაშვილთან: წითელი ხაზები გადალახულია, ქვეყანა აყროლდა
“ალია”: ინტერვიუ ვალერი ვალერი ხაბურძანიასთან: „მე ვთქვი, კიდევ ორ-სამ ქალბატონზე გამოაქვეყნებენ ვიდეოს-მეთქი და კაცებიც ნუ არიან მშვიდად, ამის შემდეგ ნადირობა დაიწყება კაცებზე“
“ალია”: რა დაწერა თინა ხიდაშელმა „ფეისბუქში“ და რა დაუწერეს კომენტარებში…
“ალია”: როდიდან და ვისთან ერთად იწყებს აქციებს კახა კუკავა?
————————-
„რეზონანსი”, 01 აპრილი, 2016 წელი
“ოცნება” დაიშალა – რა იქნება შემდგომ
ეკატერინე ბასილაია
კოალიცია “ქართულ ოცნებაში” შემავალი პარტიები არჩევნებზე ცალ-ცალკე იყრიან კენჭს. გუშინდელი პარტნიორიები უკვე კონკურენტები არიან. ახლა მთავარი დილემაა, ამ დაშლილი კოალიციიდან ვინ შეძლებს პარლამენტში მანდატების მოპოვებას და ვინ – არა. პარტია “ქართული ოცნების” წევრები ირწმუნებიან, რომ მათ სანერვიულო არაფერი აქვთ და არჩევნებში ისინი ისევ პირველ ადგილზე გავლენ.
სხვებს კი შანსი მხოლოდ იმ შემთხვევაში ექნებათ, თუკი “ქართული ოცნება” თავის ყოფილ თანამებრძოლებს ადმინისტრაციულ რესურსს შეაშველებს, ასევე მაჟორიტარულ ოლქებში “ყოფილებს” საკუთარ კანდიდატს არ დაუპირისპირებს და ერთ დროს გვერდით მდგომებს მაჟორიტარების გაყვანაში შეეშველება.
გაყრაზე პირველი საჯარო განცხადება გუშინ “რესპუბლიკელებმა” გააკეთეს და რამდენიმე დღის წინ დაანონსებული გადაწყვეტილება დილით გაასაჯაროვეს. შემდეგ განცხადება გააკეთა პრემიერმა კვირიკაშვილმაც და აღნიშნა, რომ პარტია “ქართული ოცნებაც” ცალკე აპირებს არჩევნებში გასვლას და კოალიცია პარლამენტში შეიქმნება.დაშლის ფონზე ითქვა ისიც, რომ არჩევნებამდე “რესპუბლიკელი” თანამდებობის პირები, მათ შორის მინისტრებიც, აპირებენ ადგილების შენარჩუნებას, თუკი რამე გაუთვალისწინებელი არ მოხდა.
პოლიტოლოგების თქმით, მმართველ პარტიას ბოლოდროინდელი რეიტინგის საგრძნობი დაცემის მიუხედავად გააჩნია ადმინისტრაციული და ექსპრემიერი ბიძინა ივანიშვილის პიროვნული რესურსი. ამდენად პარლამენტში შესვლის პრობლემა არ აქვთ, თუმცა შეძლებენ თუ არა საპარლამენტო უმრავლესობის, მინიმუმ 76 დეპუტატის დაუბრკოლებლად გაყვანას, ეს ჯერ გარკვეული არ არის.
კოალიციის სხვა დანარჩენ ოთხ პარტიას – “რესპუბლიკელებს”, “მრეწველებს”, “ეროვნულ ფორუმსა” და “კონსერვატორებს” დღეის გადასახედიდან საკუთარი ძალებით პარლამენტში შესვლის შესაძლებლობა არ აქვთ, თუკი მათაც პარტია “ოცნება” არ წაეხმარება.
საკვლევ-საკონსულტაციო ცენტრ “ფსიქო პროექტის” დამფუძნებელი ფსიქოლოგი ზურაბ ბიგვავა “რეზონანსთან” საუბრისას აცხადებს, რომ პარტიების სოციოლოგიური კვლევა ერთი თვის წინ ჩატარდა, რის მიხედვითაც დამოუკიდებლად კენჭისყრის შემთხვევაში კოალიციის შიგნით ერთადერთი პარტია, რომელიც დიდ მხარდაჭერას მიიღებს, “ქართული ოცნებაა”. კოალიციაში შემავალ სხვა პარტიებს კი დამოუკიდებლად ბარიერის გადალახვის პერსპექტივა არა აქვთ. მისი თქმით, კვლევაში როგორც მთლიანად კოალიციის, ასევე მასში შემავალი თითოეული პარტიის რეიტინგი იყო გაზომილი. ამბობს, რომ ცალსახად რაიმეს მტკიცება რთულია, თუმცა კვლევის მიხედვით პარტია “ქართულ ოცნებას” და კოალიცია “ქართულ ოცნებას” დაახლოებით ერთნაირი რეიტინგი ჰქონდა.
რომელ პარტიებს ჰქონდათ 5%-ზე მეტი რეიტინგი, ამაზე კვლევის ავტორი არ საუბრობს, რადგან კვლევის დამკვეთისგან არ აქვს შედეგების გასაჯაროების ნებართვა მიღებული. თუმცა ზოგად ტენდენციებს მაინც აღნიშნავს.
ზურაბ ბიგვავას თქმით, კოალიციის შიგნით მეორე ადგილზე “რესპუბლიკელები” გავიდნენ, მაგრამ მათაც არ ჰქონდათ ბარიერის გადასალახად აუცილებელი 5%.
“ყველა პარტიის მიმართ არის ძალიან დიდი ნიჰილიზმი. ყველას დააკლდა რეიტინგი. ამისდა მიუხედავად, პირველ ადგილზე მაინც “ქართული ოცნებაა”, მეორეზე “ნაციონალური მოძრაობაა” და ის “ოცნებას” ორჯერ ჩამორჩება,” – ამბობს ზურაბ ბიგვავა. მისი მონაცემებით პარლამენტში მოხვედრის შანსი მხოლოდ 3 პარტიას ჰქონდა. გარდა ამისა, ის აღნიშნავს, რომ “თავისუფალი დემოკრატები”, “პატრიოტთა ალიანსი” და “დემოკრატიული მოძრაობა” 5%-იან ბარიერთან ახლოს იყვნენ.
“შეიძლება ითქვას, რომ ამათგან ერთი ახლოს არის ბარიერთან. შეიძლება ითქვას, რომ ბარიერი გადალახული აქვს, დანარჩენები – ვერ ლახავენ. ეს არის დღევანდელი სურათი, შესაძლოა სიტუაცია ხვალ შეიცვალოს. ეს ხდება-ხოლმე, რადგან ბევრია ისეთი, ვინც ჯერ ჩამოყალიბებული არაა. ეს ხალხი საით წავა, ძნელი სათქმელია,” – აღნიშნავს ზურაბ ბიგვავა.
გასული წლის დეკემბერში ენ-დი-აის მიერ გამოქვეყნებული სოციოლოგიური კვლევით გამოკითხულთა 60%-ს გადაწყვეტილი არ ჰქონდა, რომელ პარტიას მისცემდა არჩევნებში ხმას.
ზურაბ ბიგვავას თქმით, მისი ჯგუფის მიერ ჩატარებულ კვლევაში გაცილებით ნაკლები ადამიანი პასუხობდა, რომ ჩამოყალიბებული არ იყო. თვლის, რომ ამ კვლევის პრეზენტაცია არ უნდა მოხდეს, იმიტომ რომ ბევრი დაიწყებს ძახილს, რომ მონაცემები სპეციალურად არის გაყალბებული. კვლევა კი იმის გამო ჩატარდა, რომ პოლიტიკურმა ძალამ წინასაარჩევნო პროცესი დაგეგმოს.
ზურაბ ბიგვავას განცხადებით, ის, რომ კოალიცია არჩევნებში ერთიანი ბლოკით არ გავა, ეს დადებითი მოვლენაა. შესაძლოა, რესპუბლიკურმა პარტიამ ბარიერი ვერ გადალახოს, მაგრამ მას მაჟორიტარულ ოლქებში შეუწყოს ხელი “ოცნებამ”.
“არ მგონია, რომ “რესპუბლიკელები” “ქართულ ოცნებას” დაუპირისპირდებიან. არის შანსი, რომ მათ ბარიერი ვერ გადალახონ, მაგრამ ინდივიდუალურად “რესპუბლიკელები” საინტერესო და გამოცდილი პოლიტიკოსები არიან და შეიძლება დავუშვათ, მაჟორიტარებად გაიყვანონ საკუთარი წარმომადგენლები.”
დიპლომატიური აკადემიის რექტორის, სოსო ცინცაძის თვალსაზრისით, “ოცნებამ” თავისი რესურსები სატელიტ პარტიებსაც გადაუნაწილოს, რადგან პარლამენტში კოალიციის სხვა ყოფილი წევრებიც გაიყვანოს პარლამენტში და გადაწყვეტილების მიღების დროს “თითის დამჭერი” დეპუტატები ჰყავდეთ შეგულებული.
სოსო ცინცაძის თქმით, “რესპუბლიკელებს” “ოცნება” ადმინისტრაციული რესურსით არ დაეხმარება, რადგან ეს პარტია კოალიციიდან პირველი გავიდა და თანაც, ბევრ საკითხში ჰქონდათ განსხვავებული ხედვები, ამიტომ ივანიშვილი ამ პოლიტიკოსებს უკვე კარგი თვალით არ უყურებს და დახმარებითაც თავს არ მოიკლავენ. თუმცა პარლამენტში მოხვედრის შესაძლებლობა ასევე აქვთ “რესპუბლიკელებსაც” იმ შემთხვევაში, თუ აცალეს მთავრობაში ყოფნა და ადმინისტრაციული რესურსით ჩაატარეს წინასაარჩევნო კამპანია.
“რესპუბლიკელები” ჭკვიანი ბიჭები არიან. 1-2 წელია ცალკე აპირებდნენ კენჭისყრას და ზომებსაც მიიღებდნენ. ჩანს, რომ აქცენტს რეგიონებზე აკეთებდნენ, იქ აძლიერებდნენ თავიანთ წარმომადგენლობებს, ამდენად მათ რეგიონებში უფრო მეტი ხმის მოპოვება შეუძლიათ, ვიდრე თბილისში. რეგიონებში მათდამი ნეგატიური დამოკიდებულება ნაკლებია. იქ საერთოდ ინდიფერენტიზმია, ყველას მიმართ ტოტალური უკმაყოფილებაა. ხოლო კოალიციიდან გასვლის შემდეგ ივანიშვილით უკმაყოფილო ადამიანების ნდობას რეგიონებში უფრო მოიპოვებს, ვიდრე დედაქალაქში და შასი აქვთ. თანაც, დიდი ალბათობით არჩევნებზე მარტო არ წავლენ, “თავისუფალ დემოკრატებთან” გაერთიანდებიან,” – ამბობს სოსო ცინცაძე.
პოლიტოლოგ კორნელი კაკაჩიას თქმით, კოალიცია დე ფაქტოდ დაშლილია. იქიდან გამომდინარე, რომ მალე წინასაარჩევნო პროცესი ძალიან გააქტიურდება, კოალიციის პარტიებს შორის დაპირისპირება ისევ მოსალოდნელია და შესაძლებელია იმდენად დაიძაბოს სიტუაცია, რომ “რესპუბლიკელი” მინისტრების გადადგომაც კი ვიხილოთ.
კორნელი კაკაჩიას პროგნოზით, “ქართული ოცნება” პარლამენტში მოხვდება, თან ადმინისტრაციული რესურსების ხარჯზე საკმაოდ სოლიდურ წარმომადგენლობასაც შეიყვანს. სხვებთან შედარებით ალბათ უკეთესი შანსი აქვთ “რესპუბლიკელებს”, თუმცა მათი პროდასავლური ნიშა სხვა სოლიდურ პარტიებსაც უჭირავთ და კონკურენცია გაუჭირდებათ. მისი თქმით, 5%-იანი ბარიერის გადალახვის შანსი ასევე აქვს “პატრიოტთა ალიანსს”.
კორნელი კაკაჩია თვლის, რომ მართალია “ქართულ ოცნებას” ხელს აძლევს ოპოზიციაში “ნაციონალური მოძრაობის” ნაცვლად მაგალითად იგივე “რესპუბლიკელები” ჰყავდეს, თუმცა ისე როგორც ადრე “ნაციონალური მოძრაობა” აკეთებდა, როდესაც ადმინისტრაციული რესურსით ხმების მოკრებაში ხელს უწყობდა “ქრისტიან-დემოკრატებს”, რამდენად გააკეთებს “ქართული ოცნება” ახლა საკუთარი კოალიციის ყოფილი წევრების მიმართ, ცოტა რთული სათქმელია.
მიზეზი კი ისაა, რომ “ოცნებას” ჯერ თავად აქვს პრობლემა, უმრავლესობის შესანარჩუნებლად რაც შეიძლება ბევრი საკუთარი კანდიდატი გაიყვანოს და სხვა პარტიებზე დამოკიდებულნი ნაკლებად იყონ.
“ქართულ ოცნებას” არანაირი გარანტია არ აქვს, რომ საკონსტიტუციო უმრავლესობა ექნება. ამის ალბათობა ძალიან დაბალია. “ნაციონალურ მოძრაობას” კი სრული კომფორტი ჰქონდა და შეეძლო ასეთი თამაშების წარმოება. დღეს კი “ქართული ოცნების” რეიტინგი არ არის დამაიმედებელი და ამიტომაც კოალიციის ყოფილი წევრების გაყვანისთვის ხელის შეწყობის თავი რამდენად ექნებათ, არ ვიცით. პარლამენტში შესვლის შანსზე საუბარი ჯერ ნაადრევია, თუმცა თუკი არასაპარლამენტო პარტიებმა შეძლეს პარლამენტში შესვლა, ამ შემთხვევაში შესაძლოა “ქართული ოცნება” “პატრიოტთა ალიანსთან” უფრო შევიდეს ალიანსში, ვიდრე “რესპუბლიკელებთან”.
„რეზონანსი”, 01 აპრილი, 2016 წელი
როგორ იმოქმედებს “რესპუბლიკელების” კოალიციიდან გასვლა არჩევნებში “ოცნების” შედეგზე?
გვანცა ღვედაშვილი
(შემოკლებით)
როგორ იმოქმედებს არჩევნებში “ქართული ოცნების” შედეგზე რესპუბლიკური პარტიის კოალიციიდან გასვლა? – ამ კითხვით “რეზონანსმა” საზოგადოების ცნობილ წარმომადგენლებს მიმართა.
სერგო ვარდოსანიძე (ისტორიკოსი): ძალიან ძნელია ახლა ერთმნიშვნელოვანი პასუხის გაცემა, თუ როგორ აისახება ეს ყველაფერი “ქართულ ოცნებაზე”, თუმცა, ვფიქრობ, რესპუბლიკურ პარტიას ეყოლება თავისი ელექტორატი და ალბათ ფიქრობენ, რომ რომელიმე სხვა ძალასთან იქნებიან კოალიციაში. როგორც უნდა იმოქმედონ მათ დღეს, ძალიან ცოტა დრო დარჩა არჩევნებამდე და მათ მიერ ხალხისთვის მიცემული დაპირებები უკვე შესრულებულია და ამომრჩეველი ახლა სწორედ ამის მიხედვით შეაფასებს არჩევნზე პარტიებს და განაჩენსაც ასე გამოიტანენ, რა გაკეთდა და რა უნდა გაკეთებულიყო.
ნატო გელაშვილი (მომღერალი): არ მგონია, “რესპუბლიკელების” გამოსვლამ რაიმე გადაუწყვიტოს “ქართულ ოცნებას”. გადამწყვეტი ხმა მათ ნამდვილად არ მიუღიათ მოსვლის დროს. ასე რომ, არ მგონია, “ოცნების” ძირითად ძალას შეადგენდნენ. მთავარია, ამ ძალის გარდა იყო რეალური ძალა, რომლითაც “ოცნება” გარკვეულ კოზირს შეინარჩუნებს, თორემ “რესპუბლიკელებს” არ აქვთ ის ძალა საზოგადოებაში, რომ რაიმე გადაწყვიტონ. ასე რომ, არ მგონია, ეს რაიმე პრობლემის შემქმნელი იყოს “ქართული ოცნებისთვის”.
ზურაბ ვადაჭკორია (ილუზიონისტი): “ქართულ ოცნებაზე” როგორ აისახება, თუ ხალხზე და საქართველოზე, მე ის უფრო მაინტერესებს, ჩვენს მაცხოვრებლებზე როგორ აისახება ეს ყველაფერი, თორემ “ქართულ ოცნებას” თავისი ამომრჩეველი ჰყავს, “რესპუბლიკელებს” – თავისი. ასახვით ეს არჩევნების მერე უნდა აისახოს, თუ როგორ გამოგვადგებიან ჩვენ. ისინი ხომ ჩვენთვის ზრუნავენ, და ყველაფერს ჩემთვის, შენთვის და საზოგადოებისთვის აკეთებენ და ვნახოთ, არჩევნების შემდეგ როგორ იზრუნებენ. ყველა ქმედება ჩვენზე, საზოგადოებაზე უნდა აისახოს და არა “ქართულ ოცნებაზე”.
დოდო ხუციშვილი (თეატრმცოდნე): ვფიქრობ, არანაირად, რადგან “რესპუბლიკელებს” ყველაზე მეტად აწყობდათ კოალიციაში ყოფნა. “ქართულ ოცნებას” აქვს იმის რესურსი, რომ მოიწვიოს ახალი კადრები. ამათანავე, ქართველები ვართ იმის ღირსი, დაგვაფასონ და პარლამენტის მომავალმა წევრებმა გაიგონ, რომ ჩვენ შეგვიძლია კარგის და ცუდის დანახვა. შეიძლება მთავრობა უშვებდა გარკვეულ შეცდომებს, თუმცა იმასაც ვხედავთ, რომ ეს შეცდომები არ ყოფილა კატასტროფის ტოლფასი. ყველაზე მნიშვნელოვანი არის ის, რომ, მართალია, ძალიან ნელა, მაგრამ ძალიან მტკიცედ წინ მაინც მივიწევთ.
„რეზონანსი”, 01 აპრილი, 2016 წელი
ინტერვიუ ლევან ბერძენიშვილთან: “გარწმუნებთ, მომავალი პარლამენტი ჩვენ გარეშე არ იქნება…”
სალომე სარიშვილი
რესპუბლიკელი ლევან ბერძენიშვილის განცხადებით, არჩევნებში დამოუკიდებლად მონაწილეობის შესახებ გადაწყვეტილება პარტიამ ერთპიროვნულად, ორდღიანი მსჯელობის შემდეგ, თუმცა საკმაოდ რთულად მიიღო. “ყველა პარტიამ თავისი ფასი უნდა იცოდეს. არასოდეს არ უნდა ითქვას, რომ ვიღაცა ვიღაცას დაეხმარა,” – ამბობს ლევან ბერძენიშვილი “რეზონანსთან” საუბრისას და უმატებს, რომ დადგა დრო, საქართველოში კოალიციები შეიქმნას როგორც ევროპაშია – არჩევნების შემდგომ და არა მანამდე.
- თქვენმა პარტიამ არჩევნებში მონაწილეობის მიღება დამოუკიდებლად გადაწყვიტა. რატომ?
- რესპუბლიკურმა პარტიამ ამგვარი გადაწყვეტილება ხანგრძლივი მსჯელობის შემდეგ მიიღო, რადგან ვფიქრობთ, რომ არჩევნების დრო მაქსიმალურად უნდ გამოვიყენოთ. დავინახეთ, რომ არც ჩვენ, არც ჩვენს პარტნიორ “ქართულ ოცნებას” დიდი შესაძლებლობები არჩევნებზე ერთად გავიდეთ, არ გვაქვს.
ვიღაცებმა ეს გადაწყვეტილება გაამართლეს, ვიღაცებმა თქვეს, აი, “რესპუბლიკელებს” დაბალი რეიტინგი აქვთ და ვერაფერს იზამენო, თუმცა ჩვენ მივიღეთ პასუხისმგებლიანი გადაწყვეტილება: გავიდეთ და ვნახოთ, რა გვაქვს, დავიკავოთ ისეთი ადგილი, როგორც ამას ქართველი ხალხი გადაწყვეტს. მგონია, რომ ეს სახელმწიფოებრივად მნიშვნელოვანი გადაწყვეტილებაა. ჩვენ არ გვსურს არც ერთი ხმით არც მეტი და არც ნაკლები. გვინდა მივიღოთ ის, რაც გვეკუთვნის. თუ საჭირო იქნება და ვიქნებით ძლიერები, არჩევნების შემდეგ შევქმნით ან არ შევქმნით კოალიციას. ვფიქრობ, დადგა დრო, საქართველოში კოალიციები შეიქმნას როგორც ევროპაშია – არჩევნების შემდგომ და არა მანამდე.
- რეიტინგი ახსენეთ. საინტერესოა, როგორ აფასებთ საკუთარ შანსს პარტიაში, ფიქრობთ, რომ შეძლებთ ბარიერის გადალახვას?
- ყველა პარტიამ თავისი ფასი უნდა იცოდეს. არასოდეს არ უნდა ითქვას, რომ ვიღაცა ვიღაცას დაეხმარა. “რესპუბლიკელები” ყოფილან კიდეც პარლამენტში, არც ყოფილან, თუმცა ეს პარტიის ცხოვრებაში მთავარი არაა. რა თქმა უნდა, ჩვენ ვიბრძოლებთ იმისთვის, რომ ბარიერი გადავლახოთ და გარწმუნებთ, რომ მომავალი პარლამენტი ჩვენ გარეშე არ იქნება.
- ანუ, შეიძლება თქვენი ეს გადაწყვეტილება ერთგვარ ძალების მოსინჯვადაც მივიჩნიოთ?
- ჩვენ 38 წლის პარტია ვართ და რა თქმა უნდა, მთელი ამ დროის განმავლობაში ძალები გვქონდა. ჩვენ ვიყავით 90-იანების პარლამენტში, მერე არ ვიყავით, მერე ისევ ვიყავით და ა.შ, ამიტომ ძალიან ძველი და გამოცდილი ძალა ვართ. “რესპუბლიკური პარტია” საქართველოს ისტორიაში არის ერთ-ერთი ორგანიზებული პარტია, რომელსაც აქვს სტრუქტურები, ისტორია. ყველაზე ხნიერი და ამავდროულად განახლებული პარტია ვართ ქვეყნის ისტორიაში. დაახლოებით ვიცით, როგორ სეგმენტზე ვმუშაობთ, ვინ არის ჩვენი ამომრჩეველი, ვიცით, როგორ უნდა ვილაპარაკოთ მათთან. ვაპირებთ დავილაპარაკოთ ამომრჩეველთან, მოვაწონოთ თავი და მივიღოთ ხმები.
- როგორ წარმართავთ ერთდროულად დამოუკიდებლად და თან კოალიციაში ყოფნის პროცესში წინასაარჩევნო კამპანიას?
- ეს მოხდება ზუსტად ისე, როგორც ხდება ევროპის ქვეყნებში, სადაც პარტიები არიან კოალიციაში და აგრძელებენ მუშაობას აღმასურულებელ ხელისუფლებაში, მაგრამ კამათობენ როგორც კონკურენტები პარლამენტში და ცალ-ცალკე გადიან არჩევნებზე. ევროპის ყველა ქვეყანაში ასეა, საქართველო ევროპული ქვეყანაა და ჩვენ ახლა გადავდივართ ამ დონეზე. ევროპის დაახლოებით 30 ქვეყანაში ასე ხდება და დარწმუნებული ვარ, ამის გაკეთება ჩვენც შეგვიძლია. მოვახერხებთ თუ არა, ეს უკვე მომავლის საკითხია.
- რამდენად მოსალოდნელია, რომ “რესპუბლიკელმა” მინისტრებმა თანამდებობა დატოვონ?
- განცხადებაში ვთქვით და თქვენთანაც გავიმეორებ, რომ “რესპუბლიკელი” მინისტრები თანამდებობას დატოვებენ მხოლოდ იმ შემთხვევაში, თუკი ამ გადაწყვეტილებას პარტია ან პრემიერი მიიღებს. იმის გამო, რომ რომელიმე ქვეყანას, პარლამენტის წევრს, ჩვენს მტერს ასე უნდა, ჩვენი მინისტრები არ გადადგებიან. სხვების, მაგალითად, სტალინისტების, იმისტების, ამისტებისა და ირმა ინაშვილის ხუშტურებზე ნამდვილად ვიცი, რომ თინა ხიდაშელი არ გადადგება.
- როგორ აისახება თქვენი გადაწყვეტილება პარლამენტზე?
- ჩვენ არასოდეს არ ვუშლიდით და არც ახლა შევუშლით ხელს პარლამენტის მუშაობას. ის, რომ უმრავლესობამ კვორუმი ვერ უზრუნველყო, “რესპუბლიკელების” გამო არ მომხდარა. დესტრუქციას არ ვაპირებთ, ეს ჩვენში არაა. მოკლედ, პარლამენტში ჩვეულებრივი კონკურენტული გარემო იქნება, თუმცა ამას არა დაპირისპირებით, არამედ პოლიტიკური კულტურის წესებით გავაკეთებთ.
- რამ მიიყვანა პარტია ასეთ გადაწყვეტილებამდე, კოალიციასთან ხშირი უთანხმოების გამო?
- იმან, რომ ამის ისტორიული დრო დადგა. დრო, როცა საქართველოში არავინ არავის არაფერი აიძულოს. ზუსტად ამაზე გველაპარაკებოდნენ, თითქოს პარლამენტში ვიღაცას შევყავართ და დამოუკიდებლად ეს არ შეგვიძლია. ახლა სწორედ იმას ვაპირებთ, რომ არჩევნებით ამ საუბარს სათანადო პასუხი გავცეთ. საუბარი იმაზე, რომ ვიღაცამ რაღაც თქვა და ჩვენ ამიტომ ცალკე გასვლას ვაპირებთ, ასე მარტივად საქმე ნამდვილად არაა. ცალკეული პარლამენტარების განცხადებებით არ ვსჯელობთ, ჩვენ ვართ სერიოზული პარტია და გადაწყვეტილებას დამოუკიდებლად ვიღებთ.
- მოსაზრების დონეზე ითქვა ისიც, რომ “რესპუბლიკელებმა” ეს გადაწყვეტილება “ქართულ ოცნებასთან” შეთანხმებით მიიღეს.
- გადაწყვეტილება 35-მა ადამიანმა მარტომ მიიღო, ორდღიან მსჯელობისას ჩვენთან არავინ ყოფილა – არც სტუმარი და არც “ქართული ოცნების” რომელიმე წარმომადგენელი. გვყოფნის საკუთარი ძალა იმისთვის, რომ ვარიანტები გავთვალოთ და გადაწყვეტილება მივიღოთ. ეს არ იყო იოლად მისაღები გადაწყვეტილება, რა თქმა უნდა, იყო აზრთა სხვაობაც ეს ჩვეულებრივი ამბავია.
„რეზონანსი”, 01 აპრილი, 2016 წელი
ინტერვიუ თამაზ მეჭიაურთან: «დღევანდელი მოცემულობით, რესპუბლიკური პარტია ბარიერს გადალახავს“
თაკო მათეშვილი
საპარლამენტო უმრავლესობის წევრი თამაზ მეჭიაური მიიჩნევს, რომ მომავალ პარლამენტში მოხვედრის შანსი კოალიციის ყველა სუბიექტს აქვს, თუკი ისინი საარჩევნო კამპანიას სწორად წარმართავენ. მათ შორის, როგორც თამაზ მეჭიაური ამბობს, ბარიერს რესპუბლიკური პარტიაც გადალახავს, მითუმეტეს, რომ ისინი წამყვან თანამდებობებზე არიან ადგილობრივი თვითმმართველობის ორგანოებში, გამგეობებში, მერიებსა და სამინისტროებში. ამბობს, რომ მათ მომხრეები ჰყავთ დასაქმებული და, აქედან გამომდინარე, მომავალ არჩევნებში ბარიერების გადალახვა არ გაუჭირდებათ. „ორივე პარტიის გადაწყვეტილებას პატივს ვცემ – “რესპუბლიკლეებისაც” და “ქართული ოცნებისაც”, – ამბობ იგი.
- საარჩევნო შანსებზე რას ფიქრობთ?
- ყოველთვის ვამბობდი, რომ ყველა პოლიტიკურმა ძალამ, რომელსაც მინიმალურზე მეტი ამბიცია აქვს, არჩევნებში მონაწილეობა დამოუკიდებლად უნდა მიიღოს და პარლამენტში იმ შემთხვევაში შევა, თუ ხალხი მას ნდობას გამოუცხადებს.
- ფიქრობთ, რომ პარტია “ქართული ოცნება” დამოუკიდებლად გასვლის შემთხვევაშიც მოიპოვებს გამარჯვებას?
- რა თქმა უნდა, მოიპოვებს. თუმცა გააჩნია როგორი იქნება ეს გამარჯვება.
- თქვით, რომ “რესპუბლიკელებმა” კარგად გამოიყენეს სახელისუფლო რესურსი და არჩევნებზე ბარიერსაც გადალახავენ.
- მე ადმინისტრაციული რესურსის გამოყენების უკანონო ფორმა არ მიგულისხმია. უბრალოდ, მათ უკვე აქვთ ძალიან ბევრი თანამდებობა როგორც მთავრობაში, ისე თვითმმართველობებში. ბევრ სტრუქტურაში მათი აქტივი მაქსიმალურად დასაქმდა და ყოველივე ესაა რესურსი, რომელიც მათ შეუძლიათ არჩევნების დროს ყოველგვარ კანონდარღვევის გარეშე გამოიყენონ.
- ბარიერს გადალახავენ?
- დღევანდელი მოცემულობით კი, მაგრამ არავინ იცის, როგორ განვითარდება მოვლენები არჩევნებამდე.
- თქვენი აზრით, შეინარჩუნებენ არჩევნებამდე ამ თანამდებობებს, და როგორ მოხერხდება ამის პარალელურად საარჩევნო კამპანიის წარმოება?
- ეს ის კითხვაა, რომელიც პრემიერს უნდა დაუსვათ. მე ამაზე პასუხის გაცემა მიჭირს.
- რომელ პარტიებს აქვთ მომავალ პარლამენტში მოხვედრის შანსი მთელი პოლიტიკური სპექტრის გათვალისწინებით, გვექნება უფრო მრავალპარტიანი პარტლამენტი?
- შანსი აქვს ყველა იმ სუბიექტს, რომლებიც კოალიციაში იყვნენ, თუ, რა თქმა უნდა, სწორად დაჯგუფდებიან თავისთან უფრო ახლოს მყოფ პოლიტიკურ ძალებთან.
- ანუ, დაჯგუფება ისევ მოუწევთ?
- ვისაც არა აქვს იმის შესაძლებლობა, რომ კენჭი დამოუკიდებლად იყაროს, ის თავისთან იდეურად ახლომდგომ პოლიტიკურ ძალასთან ერთად ერთ საარჩევნო ბლოკში უნდა გაერთიანდეს.
- პარტია “ქართული ოცნების” სიას რაც შეეხება, როდის გახდება ცნობილი და რა ცვლილებებს უნდა ველოდოთ მასში?
- ამაზე ჯერ ვერაფერს გეტყვით. ინფორმაციას არ ვფლობ.
- განახლება, თქვენი აზრით, საჭიროა?
- განახლება ყოველთვის საჭიროა, გააჩნია, რა დოზით მოხდება.
„რეზონანსი”, 01 აპრილი, 2016 წელი
ინტერვიუ გია ხუხაშვილთან: “ოცნების” გარდა ყველა სხვა პარტიას ბარიერის გადალახვა გაუჭირდება“
თაკო მათეშვილი
პოლიტოლოგი გია ხუხაშვილი კოალიციის დაშლას მიესალმება და ამბობს, რომ ეს ბოლოდროინდელი მოვლენების ერთადერთი ლოგიკური დასასრულია. თუმცა კოალიციაში შემავალი პარტიები წინასაარჩევნოდ არცთუ კარგ დღეში აღმოჩნდებიან, რადგან წარმატების შანსი, ხუხაშვილის აზრით, მხოლოდ პარტია “ქართულ ოცნებას” აქვს. დანარჩენ პარტიებს კი, მისი თქმით, ბარიერის გადალახვაც გაუჭირდებათ. მიუხედავად ამისა, იგი დარწმუნებულია, რომ მომავალი პარლამენტი მულტიპარტიული იქნება და მასში მინიმუმ 5-6 პარტია მოხვდება. თუ რომელი პარტიები იქნებიან ესენი და რა ბედი ელის კოალიციდან გამოსულ რესპუბლიკურ პარტიას, ამაზე გია ხუხაშვილს “რეზონანსი” ესაუბრა.
გია ხუხაშვილი: ეს ერთადერთი ლოგიკური და სახელმწიფოებრივად სწორი გადაწყვეტილებაა. კოალიცია, როგორც განსაკუთრებით ბოლო პერიოდში გამოჩნდა, საკმაოდ ეკლექტური წარმონაქმნი იყო. შიდა დაპირისპირებები, როგორც მსოფლმხედველობრივ, ისე პიროვნულ დონეზე უკვე ისეთ სახიფათო ზღვარზე იყო მისული, რომ შეიძლებოდა სახელმწიფო ინტერესები დაეზიანებინა.
გარდა ამისა, თუ ჩვენ ევროპისაკენ მივდივართ, ევროპული საარჩევნო სტანდარტი იმაზე მეტყველებს, რომ ყველა პარტია ხალხისგან ლეგიტიმაციას არჩევნებზე იღებს და საარჩევნო პერიოდში კოალიციები საერთო გეგმებსა და მსოფლმხედველობაზე დაფუძვნებით იქმნება. ესაა სწორი და ჯანსაღი საარჩევნო პროცესი.
დრო, როცა ბევრი პარტია ერთი ადამიანის რესურსზე პარაზიტობით ცდილობს ძალაუფლება და თბილი ადგილები შეინარჩუნოს, უნდა დამთავრდეს. უკანა კარიდან ხელისუფლებაში მოსვლა და ყოფნა მაინცადამაინც კეთილსინდისიერი საქციელი არაა. ძალაუფლების ერთადერთი დემოკრატიული წყარო ხალხია და არა გვერდითა რესურსები. ასე რომ, კეთილი ინებონ, ხალხს მიმართონ, მანდატი მათგან მიიღონ და ამის საფუძველზე უკვე უნდათ სახელისუფლებო კოალიციებში გაერთიანდნენ და უნდათ სადმე სხვაგან.
- არჩევნებში ცალ-ცალკე გასვლით კოალიციის რომელიმე სუბიექტს გამარჯვების შანსი აქვს?
- პირდაპირ გეტყვით, რომ დიდი შანსი არ აქვთ. მიუხედავად იმისაა, რომ ხელისუფლებაში ყოფნის დროს მათ გარკვეული საარჩევნო ინფრასტრუქტურის ჩამოყალიბების შესაძლებლობა ჰქონდათ, პარტია “ქართული ოცნების” გარდა ყველა სხვა პარტიის ბედი კითხვის ქვეშ დგება. არა მხოლოდ იმიტომ, რომ მათ თავის დროზე გარკვეული ავტორიტეტი და რეიტინგი არ ჰქონდათ, არამედ იმიტომ, რომ მათ ფორმა დაკარგეს და დაავიწყდათ, რომ ძალაუფლების წყარო ხალხია. ახლა ფორმის აღდგენა მოუწევთ. მოკლედ, უყველა მათგანის სამომავლო ბედი სათუოა.
- მათ შორის “რესპუბლიკელებისაც”?
- დიახ, მათ შორის “რესპუბლიკელებისაც”.
- ბარიერის გადალახვა გაუჭირდებათ?
- ესეც კითხვის ნიშნის ქვეშ დგება. ისინი ქართული პოლიტიკის ღამურებად მოგვევლინნენ, რომლებიც არც მიწისები არიან და აღარც ცისები. “რესპუბლიკელები”, ერთი მხრივ, იძულებულები არიან ოპოზიციურ ნიშაში გადაინაცვლონ და მეორე მხრივ, სავარძლები არ ეთმობათ. შესაბამისად, გაუგებარია, როგორ მოახერხებენ საარჩევნო კამპანიის წარმოებას, თუკი ჯიუტად ამტკიცებენ, რომ სამთავრობო ადგილებიც უნდათ და საპარლამენტო თანამდებობებიც. როგორ შეათავსებენ ამ ყველაფერს, გაუგებარია.
- იქნება თუ არა მომდევნო პარლამენტი უფრო მრავალპარტიული და მთელი პოლიტიკური სპექტრის გათვალისწინებით, რომელ პარტიებს აქვთ მასში მოხვედრის შანსი?
- ამის პოტენციალი აქვს პარტია “ქართულ ოცნებას”, “ნაციონალურ მოძრაობას”, “თავისუფალ დემოკრატებს”, “პატრიოტთა ალიანსს”, ბურჯანაძის “გაერთიანებულ დემოკრატებს”. გარკვეული შანსი აქვს პაატა ბურჭულაძესაც თუ მან პოლიტიკაში ინტეგრაცია გადაწყვიტა, “გირჩიც” შესაძლებელია. ლეიბორისტულმა პარტიამ ქართულ პოლიტიკაში თავისი დაკარგული პოზიციები აღიდგინა. კოალიციიდან ვინ მოახერხებს, ეს ჯერ არ ვიცით. ასე რომ, პარლამენტში მინიმუმ 5-6 სუბიექტი გვეყოლება და მულტიპარტიულ პარლამენტს მივიღებთ. ეს, ჩემი აზრით, ქვეყნისათვის დადებითი მოვლენა იქნება. მომავალი არჩევნების უნიკალურობა სწორედ იმაში გამოიხატება, რომ ამ ორპოლუსიანი მანკიერი საარჩევნო პროცესიდან გამოვდივართ და გვეძლევა შესაძლებლობა, რომ მულტიპარტიული პარლამენტი გვყავდეს.
- საკითხების გატანა რამდენად იქნება ასეთ პირობებში შესაძლებელი?
- პოლიტიკოსებმა თანაარსებობა უნდა ისწავლონ. ამის გაკეთება მოუწევთ. სხვა გზა არ ექნებათ.
- მეჭიაურმა განაცხადა, რომ “რესპუბლიკელებმა” სახელისუფლო რესურსი კარგად გამოიყენეს და არჩევნებზე ბარიერსაც გადალახავენ…
- ვფიქრობ, მეჭიაური აჭარბებს. შეიძლება ამას შეგნებულადაც აკეთებდეს და ირონიით ამბობდეს. არ მგონია, მეჭიაური ნამდვილად ფიქრობდეს, რომ რესპუბლიკური პარტია ბარიერს ასე იოლად გადალახავს, რა რესურსიც უნდა გამოიყენონ.
- ადმინისტრაციული რესურსის გამოყენების საშიშროება რეალურად არსებობს?
- რანაირად უნდა გამოიყენონ? ადმინისტრაციული რესურსი რამდენიმე სუბიექტზე არ იყოფა, იგი ყოველთვის ხელისუფლების ხელშია. საარჩევნო პერიოდისათვის კი რესპუბლიკური პარტია ხელისუფლებაში აღარ იქნება. რამდენიც უნდა ილაპარაკონ, ლოგიკა ასეთ კონფიგურაციას არ უშვებს.
- ანუ, ფიქრობთ, რომ არჩევნებამდე “რესპუბლიკელები” აღარც მინისტრები იქნებიან და აღარც მინისტრის მოადგილეები?
- არ მგონია, მინისტრების პორტფელები არჩევნებამდე შეინარჩუნონ. ეს აბსურდია. როგორ უნდა აწარმოონ საარჩევნო კამპანია? თუ მათ ხელისუფლებისადმი განაწყენებულ ელექტორატზე გასვლა უნდათ, მაშინ ხელისუფლება რაღაცა ფორმით უნდა გააკრიტიკონ და როგორ წარმოუდგენიათ ეს? დავით უსუფაშვილმა თავისი მეუღლე თინა ხიდაშელი უნდა აკრიტიკოს, რომელიც მინისტრი იქნება? ეს ყველაფერი უკვე მარტო პოლიტიკურ არამედ ოჯახურ განზომილებას იძენს. ამიტომაც, ვფიქრობ, რომ ეს ყველაფერი მხოლოდ დროებითი რიტორიკაა და ახლო პერიოდში, უახლოეს 2-3 თვეში სამთავრობო პორტფელების დატოვება მათ ყველა შემთხვევაში მოუწევთ. შესაძლოა, უფრო მალეც.
- ელით თუ არა ქუჩის აქციებს?
- ასეთი რისკი, რა თქმა უნდა, არის. შეიძლება პოსტსააარჩევნო კრიზისი მივიღოთ. რისკი განსაკუთრებით იმ შემთხვევაში იზრდება, თუკი ჩვენ დაბალი ლეგიტიმაციის ხელისუფლება გვეყოლება. იმას ვგულისხმობ, რომ დაბალი აქტივობის პირობებში საზოგადოებას გაუჩნდება განცდა, რომ მას არ აურჩევია ხელისუფლება, რომელსაც არჩევნებში ყველაზე უკეთესი შედეგი ექნება. უკმაყოფილო პოლიტიკური ელიტა კი ამით ისარგებლებს. ამის ალბათობა ნამდვილად არსებობს და ერთადერთი წამალი არჩევნებში ხალხის მაღალი აქტივობვაა. მაღალი აქტივობის პირობებში საარჩევნო კრიზისი გამორიცხულია. პრინციპში, ხელისუფლება დღეს ამაზე უკვე უნდა ზრუნავდეს.
„რეზონანსი”, 01 აპრილი, 2016 წელი
ინტერვიუ ზურაბ ტყემალაძესთან: „რესპუბლიკელების” გასვლა “მრეწველებთან” დაპირისპირების შედეგია“
თიკო ოსმანოვა
“მრეწველების” ერთ-ერთი ლიდერის, ზურაბ ტყემალაძის განცხადებით, ჯერჯერობით არ არის მიღებული გადაწყვეტილება, რა სახით წარდგება პარტია საპარლამენტო არჩევნებში. მისი თქმით, ამასთან დაკავშირებით პარტია კონსულტაციებს გამართავს, როგორც საკუთარ წევრებთან, ისე პარტნიორ პარტიებთანაც. რაც შეეხება კოალიციიდან “რესპუბლიკელების” გასვლას, ტყემელაძე ამბობს, რომ ეს 2-თვიანი დაპირისპირების კანონზმიერი შედეგია.
ზურა ტყემელაძე: ის, რომ “რესპუბლიკელები” ამ გადაწყვეტილებას მიიღებდნენ, მოსალოდნელი იყო, რადგან თოფაძის მიმართ ძალიან არაკორექტული განცხადებები გააკეთეს. და, ეს დაპირისპირება, რომელიც 2 თვეა გრძელდება, კანონზომიერ შედეგამდე მივიდა. “რესპუბლიკელებმა” გააკეთეს განცხადება, რომ ისინი რჩებიან უმრავლესობაში, მაგრამ იმოქმედებენ და მიიღებენ ყველა იმ გადაწყვეტილებას, რაც პარტიის საჭიროებიდან გამომდინარეობს, ალბათ ქვეყნის საჭიროებიდან გამომდინარე, უნდა ეთქვათ, მაგრამ არა უშავს…
- ვახტანგ ხმალაძის თქმით, კოალიციურ პარტნიორებთან გარკვეული უხერხულობა ჰქონდათ. თქვენი აზრით, იგულისხმება თუ არა ამაში “მრეწველები”
- ვის გულისხმობს ხმალაძე, ნამდვილად ვერ გეტყვით, მაგრამ “მრწეველებთან” მიმართებაშ,ი არა მგონია, რომ რაიმე უხეხულობა ეგრძნო. ჩვენ საუხერხულო ნამდვილად არაფერი გაგვიკეთებია.
- კვოტების განაწილების საკითხი ხომ არ იყო კოალიციის ფაქტობრივი დაშლის მიზეზი?
- კვოტებზე საუბარი ნამდვილად არ ყოფილა. საუბარი ამ ბოლო ორი თვის განმავლობაში იყო მხოლოდ “მრეწველების” და “რესპუბლიკელების” დაპირისპირებაზე. და, ეს გადაწყვეტილებაც ამის შედეგია.
- და ამ საკითხზე ბიძინა ივანიშვილთან შეხვედრა არ გქონიათ?
- დაპირისპირების დროს არ მისაუბარია ბატონ ბიძინასთან.
- 2013 წლის ერთ-ერთ ინტერვიუში ბიძინა ივანიშვილმა განაცხადა, რომ ოპოზიციური ველი ცარიელი არ დარჩება, როგორც კი ოპოზიცია ნორმალურ ოპონირებას ვერ შეძლებს, აუცილებლად გაჩნდება იქ სხვა ძალა, რომელიც ამას მოახერხებს. თქვენი აზრით, არის თუ არა ეს გარკვეული გეგმის ნაწილი, რომ ქვეყანაში მთავარ ოპოზიციურ პარტიად “რესპუბლიკელები” მოგვევლინონ?
- ვერ გეტყვით. გეგმის შედგენაში ნამდვილად არ ვღებულობდი მონაწილეობას და არც ის ვიცი, არსებობდა თუ არა ასეთი გეგმა.
- რა გეგმები აქვს “მრეწველებს?
- “მრეწველები” ჯერჯერობით იმ ბლოკს წარმოადგენენ, რომელიც 2012 წლის არჩევნების წინ შეიქმნა და რომლის მოქმედების ვადაც არის 2016 წლის არჩევნებამდე.
როგორც ხედავთ, კოალიცია დაიშალა, მაგრამ ჩვენ ვართ ერთგული ჩვენი პარტნიორების მიმართ. ვინაიდან “რესპუბლიკელები” გაემიჯნენ, ჩვენ ვამბობთ, რომ არ გავემიჯნებით არც “ქართულ ოცნებას” და არც კონსერვატიულ პარტიას.
რაც შეეხება საპარლამენტო არჩევნებს, მაგაზე, რა თქმა უნდა, გვექნება მსჯელობა, როგორც კოლეგა პარტიებთან, ისე ჩვენს პარტიაში შიგნით და მივიღებთ გადაწყვეტილებას, რომელიც, ცხადია, პრესისთვისაც გახდება ცნობილი.
- როგორ ფიქრობთ, დამოუკიდებლად გასული პარტიები მოახერხებთ ბარიერის გადალახვას?
- ამაზე მკითხაობას ვერ დავიწყებ, ეს უნდა ჰკითხოთ ამომრჩეველს.
„რეზონანსი”, 01 აპრილი, 2016 წელი
ინტერვიუ ანი მიროტაძესთან: კოალიცია დაიშალა – რა გეგმები აქვს “ეროვნულ ფორუმს”
თიკო ოსმანოვა
“სამი აპრილისთვის “ეროვნული ფორუმისთვის” დაიწყება ახალი პოლიტიკური პროცესები”, – ამბობს “რეზონანსთან” საუბრისას საპარლამენტო ფრაქცია “ეროვნული ფორუმის” წევრი ანი მიროტაძე. მისი თქმით, კოალიცია “ქართული ოცნების” დაშლას პარტიის დღის წესრიგი არ შეუცვლია.
ანი მიროტაძე: “ეროვნული ფორუმის” დღის წესრიგზე დღევანდელ გადაწყვეტილებას გავლენა არ მოუხდენია. მართალია, გარემო შეიცვალა, ვგულისხმობ, “რესპუბლიკელებისა” და პრემიერ-მინისტრის გადაწყვეტილებას, მაგრამ, როგორც ცნობილია, ჩვენ დაგეგმილი გვქონდა ყრილობა, სადაც ზუსტად ამ საკითხზე უნდა გვემსჯელა. 3 აპრილისთვის “ეროვნული ფორუმისთვის” დაიწყება ახალი პოლიტიკური პროცესები.
- რამდენად მოსალოდნელი იყო თქვენთვის “რესპუბლიკელების” და პრემიერის ეს განცხადებები?
- ახალი არ იყო არაფერი. კონკრეტულად ეს განცხადება, რა თქმა უნდა, ჩემთვის არ იყო ცნობილი და არც არავისთვის, მაგრამ ის, რომ ყველა პოლიტიკურ პარტიას თავისი სტრატეგია და რესურსი აქვს და აქედან გამომდინარე მოქმედებს, ეს ძალიან მარტივია. ამის პროგნოზირება და გათვლა სულაც არ არის ძნელი.
- არჩევნებამდე როგორ რეჟიმში იმუშავებთ?
- ჩვენ ავიღეთ პასუხისმგებლობა 4 წლით. თუ იქნება თემები, რომელზეც გვექნება რადიკალურად განსხავებული მოსაზრებები, ამას ისედაც დავაფიქსირებთ და იცით, რომ ამას ყოველთვის ვაკეთებდით, იმის მიუხედავად, რომ ვიყავით უმრავლესობაში და ვაგრძელებთ ყოფნას. ახლა რომ გამოვიდეთ და რადიკალური ოპოზიციის რიგებში ჩავდგეთ და “ნაციონალური მოძრაობის” პარტნიორი გავხდეთ, ეს ნამდვილად არ მოხდება. ვერ ვიქნებით “ნაცმოძრაობის” ტიპის პარტია. მაგრამ ის, რომ სტარეგიულად მნიშვნელოვან საკითხებზე “ფორუმს” ექნება თავისი პოზიცია, რომელიც შეიძლება არ ემთხვეოდეს სხვა პარტიის პოზიციას, ეს გაგვიკეთებია და გავაკეთებთ სამომავლოდაც.
- კოალიციიდან გამოსული სუბიექტები, თქვენი აზრით, რამდენად შეძლებთ არჩევნებზე წარმატების მიღწევას, ბევრი საუბრობს, რომ ხმის მომტანი პარტია “ქართული ოცნებაა”…
- და რატომ? ჩვენ, დანარჩენი პარტიები, რას ვაკეთებდით?! მე ასე არ ვუყურებ საკითხს. ყველა პარტიას აქვს რესურსი და შეუძლია ამის გამოყენება. მე ზუსტად ვიცი ჩვენი რესურსი და შესაბამისად ვიცი, ძალიან ბევრი გვაქვს სამუშაო, რომ არჩევნებში მოვიპოვოთ გამარჯვება. დარწმუნებული ვარ, ყველა პარტიას გათვლილი აქვს თავისი შესაძლებლობა, სტრატეგია და ის არსენალიც განსაზღვრული აქვს, რომლითაც აპირებენ არჩევნებისთვის ბრძოლას.
„ახალი თაობა“, 01 აპრილი, 2016 წელი
ინტერვიუ სოსო ცინცაძესთან: „ქართულ ოცნებას“ მარტო გაუჭირდება“
პოლიტოლოგი სოსო ცინცაძე „ახალ თაობასთან» ინტერვიუში საპარლამენტო არჩევნებში „ქართული ოცნებისა“ და რესპუბლიკელების შანსებზე საუბრობს.
- ბატონო სოსო, პრემიერ-მინისტრმა განაცხადა, რომ პარტია „ქართული ოცნება“ დამოუკიდებლად იყრის კენჭს. ეს ნიშნავს თუ არა, რომ კოალიცია დაიშალა?
- თუ ცხოვრებაში ეს გატარდა, რასაკვირველია, ეს ნიშნავს, რომ კოალიცია დაიშალა. თუმცა, პარტია „ქართულ ოცნებას“ არ აქვს არჩევნებში დამოუკიდებლად მონაწილეობის გამოცდილება. ამიტომ მათ ძალიან დიდი მუშაობა მოუწევთ როგორც საარჩევნო სიის ფორმირების თვალსაზრისით, ისე ამომრჩეველთან. ბიძინა ივანიშვილის პირადი რესურსის გამოყენების შემთხვევაშიც, ვფიქრობ, პარტია „ქართულ ოცნებას“ დამოუკიდებლად გაუჭირდება კვალიფიციური უმრავლესობის მოპოვება პარლამენტში. თუმცა, შეიძლება მოხდეს პატარა პარტიებთან გარკვეული გარიგება და ასე მოაგროვონ პარლამენტში უბრალო უმრავლესობა.
- დავით უსუფაშვილმა განაცხადა, რომ რესპუბლიკელები „ქართულ ოცნებასთან“ პარტნიორობა-კონკურენციის რეჟიმში გადადიან, ამ ფონზე კი მთავრობაში რჩებიან რესპუბლიკელი მინისტრები. როგორ ხსნით ამას?
- პარტნიორობა-კონკურენციის რეჟიმი ქართულ პოლიტიკაში არ არსებობს. ეს, უბრალოდ, წარმოუდგენელია. ეს ან გულუბრყვილობაა, ან პოლიტიკური ეშმაკობა. პარტნიორობა-კონკურენცია ითვალისწინებს, როგორც მინიმუმ, ევროპული დონის პოლიტიკურ კულტურას, რომ არაფერი ვთქვა ამერიკულ პოლიტიკურ კულტურაზე. ქართულ პოლიტიკაში ან კონკურენტი ხარ, ან პარტნიორი, შუალედური მიდგომა არ არსებობს. ივანიშვილი არ აიტანს კონკურენტ-პარტნიორს გვერდით. მისთვის არის წყალგამყოფი, რომლის იქით არის კონკურენტი და აქეთ პარტნიორი. ეს ასეც არის.
- რის თქმა უნდოდა ამით დავით უსუფაშვილს?
- ეს განცხადება არის სახის შენარჩუნების მცდელობა, თუ რატომ არ მიდიან დღესვე მთავრობიდან, რატომ არ ტოვებენ მინისტრის პოსტებს.
- მინისტრის პორტფელი არ ეთმობათ?
- გასამართლებელი არგუმენტი აქვთ, რომ კოალიცია არჩევნებიდან არჩევნებამდე ანუ ოთხწლიანი ვადით შედგა. თუმცა, მე ასეთი დოკუმენტი არ მინახავს. მე რამდენადაც ვიცი, საუბარი იყო წინასაარჩევნო კოალიციაზე. რატომ არ მიდიან? იმიტომ, რომ წინ არჩევნებია, სადაც დამოუკიდებლად გადიან და ამ 6 თვეს, თითო დღეს თითო თვის ფასი აქვს. ეს არის უმნიშვნელოვანესი წინასაარჩევნო პერიოდი. წარმოიდგინეთ სამი თუ ოთხი მინისტრი, პარლამენტის თავმჯდომარე, პარლამენტში ფრაქცია, რამხელა ადმინისტრაციული რესურსია წინასაარჩევნო კამპანიის წარმოებაში. ინტრიგა მდგომარეობს იმაში, რომ ხელისუფლებამ 6 თვე სტრატეგიული მნიშვნელობის თანამდებობები მისცა მის წინააღმდეგ ბრძოლისთვის გასაძლიერებლად მის კონკურენტს.
- რატომ ტოვებს ამ ინტრიგას ხელისუფლება?
- რომ არ გაამწვავოს სიტუაცია. თუმცა მოზაიკა ძალიან რთულია. ყველას, მთავრობაში თუ არა, პარლამენტში მაინც, კარგად ესმის, რა არის მათთვის ცუდი და რა – კარგი.
- რესპუბლიკელები შეძლებენ 5%-იანი ბარიერის გადალახვას?
- შეიძლება გადალახონ კიდეც. მე მაინც ვფიქრობ, რომ ისინი წინასაარჩევნო ბლოკს ალასანიას თავისუფალ დემოკრატებთან შეკრავენ. არც იმას გამოვრიცხავ, რომ ასეთი საარჩევნო ბლოკები სხვა პარტიებმაც შექმნან. წინასაარჩევნოდ ბევრი ორ-სამ პარტიული ბლოკი შეიქმნება. ასეთ საარჩევნო ბლოკებს შექმნიან არასაპარლამენტო ოპოზიციის წარმომადგენლები. არც იმას გამოვრიცხავ, რომ ნაციონალებთან ჯენტლმენური გარიგება შედგეს, წინასაარჩევნო კამპანიას ერთმანეთის წინააღმდეგ არ ააგებენ და ყველამ ერთად შეუტიოს ხელისუფლებას.
- ყველა „ოცნების“ წინააღმდეგ?
- „ქართული ოცნება“ შეეცდება, პატარ-პატარა პარტიებს გადაუნაწილოს ადმინისტრაციული რესურსი, რომ ისინი შევიდნენ პარლამენტში.
- რომელ პარტიებს გულისხმობთ?
- მაგალითად, კონსერვატორებს, რომლებიც დამოუკიდებლად ვერასდროს შევლენ პარლამენტში, ასევე სოციალ-დემოკრატებს და ა.შ. მერე ამ პარტიებთან ერთად შექმნის „ქართული ოცნება“ ახალ კოალიციას.
- არჩევნების შემდეგ შემდგარი კოალიცია ხომ არის უფრო სამართლიანი?
- რასაკვირველია, ეს უფრო სამართლიანი და მისაღებია. ევროპული გამოცდილება სწორედ ასეთი კოალიციის შექმნაა. თუმცა, მე დღეს უკვე ძალიან მეეჭვება, რომ რესპუბლიკელებმა და „ოცნებამ“ პარლამენტში ახალი კოალიცია შექმნან. ასევე ეჭვი მეპარება, რომ „ოცნებამ“ ალასანიასთან შექმნას კოალიცია.
- რატომ?
- აქ უკვე წინა პლანზე მოდის პიროვნული ფაქტორი. მართალია, პოლიტიკაში არ არსებობს თემები, რომლებიც არ იყოს გადალახვადი, მაგრამ ამ შემთხვევაში ბიძინა ივანიშვილსა და თავისუფალ დემოკრატებს, უფრო სწორად, ირაკლი ალასანიას შორის ისე შორს არის წასული დაძაბულობის ვექტორი, რომ არ მგონია, ის მობრუნებადი იყოს.
- საქართველოში წინასაარჩევნო პერიოდი არც ისე მშვიდია ხოლმე, მაგრამ რამდენად შეიძლება, კიდევ უფრო დაიძაბოს მოვლენები არჩევნების წინ?
- ახლა აქცენტს ყველა ფარული პირადი ცხოვრების ამსახველ კადრებზე აკეთებს, მაგრამ მოულოდნელი კითხვები გაჩნდა ცესკოს მიმართ. ეს არცთუ სასიამოვნო პერსპექტივას ბადებს.
„ახალი თაობა“, 01 აპრილი, 2016 წელი
ინტერვიუ სანდრო ბრეგაძესთან: „თინა ხიდაშელი უნდა გადადგეს!»
სახელმწიფო მინისტრის ყოფილმა მოადგილე სანდრო ბრეგაძემ პრემიერ-მინისტრს თავდაცვის მინისტრის სასწრაფოდ გადაყენება მოსთხოვა. რატომ ითხოვს ბრეგაძე თინა ხიდაშელის გადაყენებას? რა ინფორმაციებს ფლობს რესპუბლიკელების გეგმებთან დაკავშირებით? – „ახალი თაობის“ ამ და სხვა კითხვებს სანდრო ბრეგაძე პასუხობს.
- ბატონო სანდრო, თქვენ პრემიერ-მინისტრს თავდაცვის მინისტრს გადაყენების მოთხოვნით მიმართეთ. რატომ, რას აშავებს თავდაცვის მინისტრი?
- რესპუბლიკელები აპირებენ არჩევნებში დამოუკიდებლად გასვლას, მაგრამ ისინი რჩებიან კოალიციაში. ამ დარჩენას კი აქვს ერთადერთი მიზანი.
- რა მიზანი?
- ის, რომ მათ შეინარჩუნონ თანამდებობები, მინისტრის პორტფელები და საპარლამენტო თანამდებობები. რესპუბლიკელები გაყარეს, მაგრამ ისინი არ მიდიან, ბოლომდე ებღაუჭებიან სკამებს. ამ ყველაფერს კი აქვს ერთი მიზეზი, რომ თავდაცვის მინისტრი თინათინ ხიდაშელი არჩევნების პერიოდში უნდა იყოს თავის პოსტზე, რათა საჭიროების მომენტში გააკეთოს ის საქმე, რაც ნაციონალური მოძრაობის ინტერესებშია.
- რას გულისხმობთ?
- სარწმუნო წყარომ მომაწოდა ინფორმაცია, რომ ნაციონალები, თუკი მათთვის სასურველი შედეგი არ დადგა, გეგმავენ თბილისური მაიდანის მოწყობას, თინა ხიდაშელი კი გეგმავს, რომ იყოს მათ მხარეს.
- ეს ინფორმაცია საიდან გაქვთ, ან პროკურატურა არ დაინტერესდა ამით, როდესაც მსგავსი განცხადებით პრემიერ-მინისტრს მიმართეთ?
- ეს ინფორმაცია მაქვს სარწმუნო წყაროდან, ამიტომ მივმართე პრემიერს, რომ სასწრაფო წესით გადააყენოს თინათინ ხიდაშელი, რადგან ის შემჩნეულია ქართული სახელმწიფოს წინააღმდეგ მიმართულ საკმაოდ ბევრ ქმედებაში. ყველაფერს რომ თავი დავანებოთ, სირცხვილია, გყავდეს ისეთი თავდაცვის მინისტრი, რომელიც აფხაზეთს საქართველოს ნაწილად არ განიხილავს. საპარლამენტო არჩევნების დროს ნაციონალების მხრიდან, დიდი ალბათობით, მოსალოდნელია არეულობის მოწყობა, ქაოსი და ეს გადაწყვეტილებები ოდესაში უკვე მიღებული აქვს მიხეილ სააკაშვილს. გეგმა უკვე შედგენილია.
- თქვენს განცხადებაში დიდ თანხებზე საუბრობდით. ისიც ხომ არ იცით, ვინ აფინანსებს?
- უკვე ორი ასეული მილიონი დოლარია ამისთვის გამოყოფილი. თანხების მობილიზება კეზერაშვილს აქვს დავალებული იმისთვის, რომ საქართველოში შედგეს რევანში, ხოლო ამ დროს თინა ხიდაშელის ყოფნა თავდაცვის მინისტრის პოსტზე არის შენელებული მოქმედების ნაღმი, რომელიც აფეთქდება ზუსტად იმ მომენტში, როდესაც ეს ნაციონალებისა და რესპუბლიკელების საერთო პატრონს დასჭირდება.
- და ამხელა თანხას დავით კეზერაშვილი იხდის?
- სწორედ დავით კეზერაშვილი გახლავთ ის ადამიანი, რომელმაც მოიძია თანხები, ჯერ წინასაარჩევნო პერიოდისთვის, ხოლო არჩევნების შემდგომ – ქაოსისა და დესტაბილიზაციისთვის, რომელიც მათი გეგმების მიხედვით უნდა გადაიზარდოს თბილისურ მაიდანში. ჩემმა წყარომ ასევე მომაწოდა ინფორმაცია იმის თაობაზე, რომ თინა ხიდაშელი შეხვდა უცხოელ პარტნიორებს და იქაც სწორედ ამ გეგმაზე იყო საუბარი. დღეს ნაციონალები და რესპუბლიკელები ერთი მიზნისთვის იბრძვიან.
- ბატონო სანდრო, თქვენი გადადგომის შემდეგ უამრავი ინფორმაცია ვრცელდება. ბრალად დაგდეს დასმენები. ამის თაობაზე რას იტყვით?
- სულელი ხალხის სულელურ გამონათქვამებზე ნამდვილად არ ვისაუბრებ. მე ამაზე არც კი ვბრაზდები, რადგან სულელი ადამიანი ვერაფერს დაგიშავებს.
- ღიად ასახელებენ სახელებსა და გვარებს, რომლებიც თქვენ დაასმინეთ...
- გითხარით, რომ ეს ყველაფერი არასერიოზულია, სისულელეა და არასერიოზული ხალხის გამონათქვამებზე რატომ მაკეთებინებთ კომენტარებს?! ჩემ წინააღმდეგ მიმართულ კამპანიას მე ორ ნაწილად გავყოფდი. ერთია, რომელსაც ძალიან სერიოზულად ვუყურებ და ესენი არიან რესპუბლიკელები და ნაციონალები, ხოლო მეორე – ეს არის არასერიოზული ხალხი და მათთან საკამათო დრო არ მაქვს.
- ანუ თქვენი გადადგომის მიზეზი დასმენის თემა არ გამხდარა და პრემიერს ამის გამო არ მიუღია გადაწყვეტილება თქვენი გადაყენების თაობაზე?
- ეს, ხშირ შემთხვევაში, შეცდომაში შეყვანილი ხალხის სულელური განცხადებებია. სანდრო ბრეგაძე თუ რატომ გადადგა თანამდებობიდან, თუ თქვენ მაგაზე კითხვა კიდევ გაქვთ, მაშინ თქვენთანაც შევწყვეტ საუბარს! მთელმა ქვეყანამ იცის, მთავრობის წევრებმაც ძალიან კარგად იციან, რომ ეს იყო ჩემი პრინციპული, მორალურ-ზნეობრივი პოზიცია იმ საკითხთან დაკავშირებით, რომელსაც ერთნაირსქესიანთა ქორწინება ეწოდებოდა! მე რომ არ გადავმდგარიყავი თანამდებობიდან, დარწმუნებით შემიძლია გითხრათ, რომ ეს საკითხი საქართველოს პარლამენტში არ დადგებოდა! ჩემი პრინციპული პოზიცია დაედო საფუძვლად ამ საკითხის ბოლომდე მიყვანას.
„ახალი თაობა“, 01 აპრილი, 2016 წელი
ინტერვიუ სოსო მანჯავიძესთან: „ეს რესპუბლიკელების გადაწყვეტილება არ ყოფილა“
ბოლოდროინდელ მოვლენებამდე ყველა ექსპერტი აღნიშნავდა, რომ რესპუბლიკური პარტია არაფრით დატოვებდა კოალიცია „ქართულ ოცნებას“. გუშინ, 31 მარტს, რესპუბლიკელებმა სახალხოდ განაცხადეს, რომ არჩევნებში დამოუკიდებლად მიიღებენ მონაწილეობას. საკრებულოს დამოუკიდებელი დეპუტატი სოსო მანჯავიძე „ახალ თაობასთან“ ინტერვიუში აღნიშნავს, რომ ეს გადაწყვეტილება რესპუბლიკელებს დამოუკიდებლად არ მიუღიათ.
„რესპუბლიკელებს ეს განცხადება საკუთარი ნებით არ გაუკეთებიათ, პირიქით, ისინი ყველანაირად ცდილობდნენ, რომ ისევ პარტია `ქართული ოცნების~ გვერდით ყოფილიყვნენ და ასე გასულიყვნენ მომავალ საპარლამენტო არჩევნებშიც. მათ ამ ნაბიჯისკენ პარტია „ქართულმა ოცნებამ“ მოუწოდა. რესპუბლიკელების ლიდერები ამის საპასუხოდ არ მოერიდნენ შანტაჟს. ისინი ემუქრებოდნენ პრემიერ გიორგი კვირიკაშვილს, რომ დაშლიდნენ საპარლამენტო უმრავლესობას. ახლა ისინი უმრავლესობიდან არ გადიან და თანამდებობებსაც ინარჩუნებენ, მაგრამ არჩევნებზე ცალკე გავლენ“, – ამბობს სოსო მანჯავიძე..
- პარტია „ქართული ოცნება“ ამით რას იგებს?
- მმართველი პარტიის მიმართ ნდობა გაიზრდება. მიუხედავად იმისა, რომ პარტია „ქართული ოცნება“ დღეს უალტერნატივოა, მას მხარდაჭერის გაზრდა მაინც ესაჭიროება. მას შემდეგ, რაც ნაციონალური მოძრაობა ჩამოიშალა, შექმნილი ვაკუუმი ვერავინ შეავსო. მოსახლეობის დაახლოებით 60% და მეტი გაურკვევლობაშია. მმართველ კოალიციაში არსებული უთანხმოება ხალხის უნდობლობას იწვევდა. ფაქტია, რომ განსაკუთრებული გაღიზიანება იყო რესპუბლიკური პარტიის მიმართ. ხალხს არ მოსწონდა ამ პარტიის წევრების არაპროპორციული წარმოდგენა ხელისუფლებაში. რესპუბლიკელებისგან ჩამოცილებისა და დამოუკიდებლად გასვლის შემთხვევაში პარტია „ქართული ოცნების“ შანსები იზრდება.
- ანუ ფიქრობთ, რომ კოალიციის ყველა სუბიექტი ცალ-ცალკე მიიღებს მონაწილეობას არჩევნებში?
- რასაკვირველია. საარჩევნო ბლოკის შექმნაზე მათ შორის გაფორმებულ ხელშეკრულებას მაისში გასდის ვადა. მომავალში ამ პარტიებს ერთმანეთთან არანაირი ვალდებულება არ დააკავშირებთ.
- ნაციონალური მოძრაობის ჩამოშლა ახსენეთ. ამაზე ნაადრევი ხომ არ არის ლაპარაკი?
- ნაციონალური მოძრაობის ელექტორატი დაახლოებით 10%-ია. ეს ადამიანები, სავარაუდოდ, მობილიზებული არიან. ამ პარტიის მომავალი დამოკიდებულია იმაზე, თუ მთლიანობაში რამდენი ამომრჩეველი მივა საარჩევნო უბნებზე. ზოგადად, რაც მეტი ადამიანი მისცემს ხმას სხვადასხვა პარტიას, მით ნაკლებ პროცენტს მიიღებს ნაციონალური მოძრაობა. ამომრჩევლის პასიურობის შემთხვევაში ნაციონალების მობილიზებული მომხრეები უკეთეს შედეგს აჩვენებენ.
- ბოლო დროს ნაცმოძრაობა აქტიურობს ვიზალიბერალიზაციის თემაზე...
- აშკარაა, რომ ნაციონალურ მოძრაობას უნდა, როგორმე დააბრკოლოს ვიზალიბერალიზაცია. აქედან არაფერი გამოვა. საქართველოსთვის ვიზალიბერალიზაციის მინიჭება, ევროინტეგრაცია არ არის დამოკიდებული მხოლოდ საქართველოზე. ეს ევროკავშირის, მთლიანად ევროსტრუქტურების გადაწყვეტილებაა. ამ კურსს ვერც საქართველოს ხელისუფლება გადაუხვევს და ვერც რომელიმე პარტია შეაფერხებს.
- არის იმის ნიშნები, რომ გიგი უგულავა, ვანო მერაბიშვილი და ბაჩო ახალაია პოლიტპატიმრებად გამოაცხადონ...
- ამის დამტკიცებას ცდილობს ნაციონალური მოძრაობა ევროპის სახალხო პარტიის დახმარებით. ამის საწინააღმდეგოდ საქართველოს მთავრობამ ევროპულ საზოგადოებას უნდა მიაწოდოს რეალური სურათი და განუმარტოს, რაშია მხილებული ეს სამეული და რატომ ვერ გახდებიან ისინი პოლიტიკური პატიმრები.
„რეზონანსი”, 01 აპრილი, 2016 წელი
არჩევნების წელი – გაფიცვების წელი
“არჩევნებამდე ქვეყანაში საპროტესტო აქციების მასშტაბი მნიშვნელოვნად მოიმატებს“
მარი ჩიტაია
წინასაარჩევნოდ ქვეყანაში საპროტესტო აქციები გახშირდება. წლის პირველ კვარტალი არც კი დასრულებულა და უკვე რამდენიმე სრულმასშტაბიანი აქციის მომსწრე გავხდით. ფოთში, რუსთავში, ტყიბულში, ზესტაფონში, ჭიათურასა და ზუგდიდში აქციები მძიმე მრწეველობასა და ტრანსპორტის სფეროებში დასაქმებულებმა მოაწყვეს. არ არის გამორიცხული, რამდენიმე დღეში “საქართველოს რკინიგზის”, “საქართველოს ფოსტასა” და ზესტაფონის მუშები გაიფიცონ.
სხვადასხვა რეგიონში საპროტესტო აქციები ახალი წლის დასაწყისიდანვე გაჩაღდა. ეს არც არის გასაკვირი, რადან არჩევნების წელია და ხალხი მმართველი ძალების მიმართ მეტად მომთხოვნია, ვიდრე ჩვეულებრივ პერიოდში.
როგორც გაერთიანებულ პროფკავშირებში განმარტავენ, უკმაყოფილება ხალხს, უმეტესწილად, შრომის ანაზღაურებასთან დაკავშირებით აქვს. მძიმე მრეწველობაში დასაქმებულთათვის კი ერთ-ერთი სერიოზულ პრობლემას შრომის უსაფრთხოება წარმოადგენს.
პროფკავშირების თავმჯდომარის მოადგილე გოჩა ალექსანდრია განმარტავს, რომ ხელფასთან დაკავშირებით უკმაყოფილებაა მშენებლობის, ჯანდაცვისა და განათლების სექტორებშიც, სადაც დასაქმებულები განსაკუთრებით ლარის გაუფასურებამ დააზარალა.
“ჩვენი პოლიტიკა არ არის იმისკენ მიმართული, რომ საპროტესტო აქციები მაინცდამაინც არჩევნებს დავამთხვიოთ. რასაც დრო მოიტანს და რა პრობლემაც გამოჩნდება, იმის შესაბამისად ვმოქმედებთ. დღესდღეობით თითქმის ყველა სექტორშია პრობლემა. ინფლაციამ, რაც გამოწვეული იყო ლარის გაუფასურებით, დასაქმებულებს (და არა მარტო მათ) დიდი დარტყმა მიაყენა. პრობლემა სამთომომპოვებელ, მეტალურგიულ და ქიმიურ მრეწველობაში დასაქმებულებს დღესაც აქვთ. ასევეა ტრანსპორტის სფეროში. ცხადია, პოლიტიკური და სოციალური ფონიც ახდენს გავლენას. სადაც ყველაზე დაბალი ხელფასია, პროტესტიც იქ არის მოსალოდნელი. ერთ-ერთი ასეთია განათლების სექტორი, თუმცა აქ ანაზღაურების ზრდა იგეგმება. პრობლემაა სამშენებლო და სატრანსპორტო სფეროებში. არ არის მარტივი წელიწადი, ჯერ მხოლოდ სამი თვეა გასული და ქვეყანაში რამდენიმე სრულმაშტაბიანი გაფიცვა მოხდა”, – აცხადებს გოჩა ალექსანდრია.
მისი ინფორმაციით, კოლექტიური შრომითი დავაა ახლაც “საქართველოს რკინიგზაში”, ზესტაფონში და “საქართველოს ფოსტაში”. ალექსანდრია ვარაუდობს, რომ არჩევნებამდე ქვეყანაში საპროტესტო აქციების მასშტაბი მნიშვნელოვნად გაიზრდება.
“არ გამოვრიცხავ, დასაქმებულთა პრობლემა საპროტესტო აქციებში გადაიზარდოს. “საქართველოს რკინიგზის” შემთხვევაში, ხელისუფლების წარმომადგენლებიც ჩაერთვნენ. ჯერჯერობით მიჭირს ვარაუდი, როგორ შეიძლება განვითარდეს მოვლენები.
რაც შეეხება ჯანდაცვის სფეროს, ხელფასების პრობლემა მეტ-ნაკლებად გამოსწორდა, თუმცა ქვედა რგოლში დასაქმებულთა შრომის ანაზღაურება კვლავ დაბალი რჩება. ამიტომ საპროტესტო აქციების მასშტაბების ზრდა არ უნდა გვიკვირდეს.
მოსახლეობის დიდი ნაწილი ვალებშია, ხალხს აქვს პრობლემა, რაც იწვევს გაუგებრობას და შრომით დავებს ამა თუ იმ სექტორში. ბუნებრივია, ნაწილი საპროტესტო აქციებში გადადის. ვფიქრობ, არჩევნებამდე პროტესტის ტალღა განსაკუთრებით მოიმატებს”, – აცხადებს გოჩა ალექსანდრია.
სპეციალისტების შეფასებით, საპროტესტო აქციების უმეტესობას შრომის კანონმდებლობაში არსებული ხარვეზი იწვევს. ამიტომ პროტესტი დასაქმებულების მხრიდან აბსოლუტურად ლოგიკურია, თუმცა ხშირად უარგუმენტოც. ასე ფიქრობს ეკონომიკურ და სოციალური საკითხების ექსპერტი ნოდარ კაპანაძე, რომელიც საპროტესტო აქციების ინიციატორებს არაორგანიზებულობაში წუნს სდებს.
“აქციების მნიშვნელოვანი კომპონენტია, რამდენად მრავალრიცხოვანი იყო გამოსვლები. ჩემი აზრით, მონაწილეთა მოთხოვნები მაინცდამაინც არგუმენტირებული არ ყოფილა. ვერ ვიტყვი, რომ რომელიმე საპროტესტო აქციამ ამ მხრივ თავი დამამახსოვრა, ასე ნამდვილად არ იყო.
პრობლემა, რაც გამოიკვეთა ამ გამოსვლებში, რეალურად არის საპროტესტო, მაგრამ გამპროტესტებელი არ აღმოჩნდა სათანადოდ ორგანიზებული. არ მინახავს არც ერთი კარგად ჩამოყალიბებული საპროტესტო მოძრაობა. მძღოლებისა და მეტალურგების პროტესტს თუ განვიხილავთ, მათ პრობლემა შრომის კანონმდებლობასთან აქვთ”, – განმარტავს კაპანაძე.
მისი შეფასებით, საქართველოს აქვს მონათმფლობელურ წესებთან მიახლოებული შრომითი კანონმდებლობა, სადაც დასაქმებულების ინტერესები აბსოლუტურად იგნორირებულია. ამ წესით კი, როგორც ექსპერტი ამბობს, დაქირავებულს არ აქვს უფლებები, მას მხოლოდ მოვალეობა გააჩნია.
“აქციებში მონაწილე ხალხის გულისწყრომის მიზეზი გასაგებია. ასე გაგრძელდება, სანამ ქვეყანაში დასაქმებასთან დაკავშირებით სისტემური ღონისძიებები არ გატარდება. მეშახტეებისა და მეტალურგების პროტესტი გამოწვეული იყო სოციალური უსამართლობით. არ გამოვრიცხავ, ამ ადამიანებმა კიდევ მოაწყონ აქციები და ზოგიერთი პოლიტიკური ძალა საპროტესტო მუხტის სათავისოდ გამოყენებას შეეცდება. საბოლოო ჯამში, საპროტესტო აქციების შედეგი დამოკიდებულია იმაზე, რამდენად შეძლებს მთავრობა არსებული პრობლემის მოგვარებას”, – აცხადებს კაპანაძე “რეზონანსთან” საუბრისას.
როგორც სპეციალისტები ვარაუდობენ, შეიძლება, რაღაც მომენტში არც მთავრობამ დათმოს. მით უმეტეს, როცა არ ჩანს ისეთ ძალა, რომელიც დაწყებულ საქმეს ბოლომდე მიიყვანს.
„რეზონანსი”, 01 აპრილი, 2016 წელი
გაუმჯობესებული ბალანსი გამყარებულ ლარს არ ნიშნავს
მაკა ხარაზიშვილი
შარშან, შარშანწინდელთან შედარებით, საგადასახდელო ბალანსი 103 მილიონი დოლარით, ხოლო მეოთხე კვარტალთან თითქმის 200 მილიონი დოლარით გაუმჯობესდა. ეს დადებითი ტენდენცია ეროვნული ვალუტის კურსს არ დასტყობია. სპეციალისტები ვარაუდობენ, რომ 2015 წელს არსებობდა სხვა მნიშვნელოვანი ფაქტორები, რომელიც ვალუტის დევალვაციაზე გავლენას ახდენდა.
2015 წლის მეოთხე კვარტალში საგადასახდელო ბალანსის მიმდინარე ანგარიშის დეფიციტმა 522.1 მლნ დოლარი შეადგინა. ეს მაჩვენებელი 185,22 მილიონი დოლარით უმჯობესია 2014 წლის მეოთხე კვარტალის (-736,92 მლნ დოლარი) მაჩვენებელზე.
“საგადასახდელო ბალანსის დადებითი ტენდენციის შენარჩუნება ნიშნავს იმას, რომ ქვეყნიდან უცხოური ვალუტის გადინება მცირდება. საქართველოს ეკონომიკა დიდწილად დამოკიდებულია პირდაპირ უცხოურ ინვესტიციებზე და ფულად გადმორიცხვებზე. ის, რომ 200 მილიონამდე გაუმჯობესდა საგადასახდელო ბალანსი დადებითი ფაქტია და ამ პროცესზე მნიშვნელოვანი გავლენა მოახდინა ლარის გაუფასურებამ, ვინაიდან იმპორტზე მოთხოვნა შემცირდა”, – აცხადებს ახალგაზრდა ფინანსისტთა და ბიზნესმენთა ასოციაციის წარმომადგენელი მერაბ ჯანიაშვილი და დასძენს, რომ სტაბილურ ეკონომიკას ძლიერი ექსპორტი სჭირდება, რათა ქვეყანაში ბევრი უცხოური ვალუტა შემოვიდეს.
ეროვნული ბანკის ინფორმაციით, მიმდინარე ანგარიშის უარყოფითი სალდოს ფორმირებაში მთავარი როლი, ტრადიციულად, საქონლით ვაჭრობას ეკისრება. საქონლის ექსპორტი წლიურად 21.7 პროცენტით, ხოლო იმპორტი 13.4 პროცენტით შემცირდა. აქვე ხაზგასასმელია ის, რომ ს ჰეპატიტის ელიმინაციის პროგრამის ფარგლებში გრანტით მიღებული მედიკამენტების გარეშე იმპორტში 19.2-პროცენტიანი კლება გვაქვს. თანხობრივ მოცულობაში იმპორტი უფრო მეტად შემცირდა, ვიდრე ექსპორტი.
ეროვნულ ბანკში აღნიშნავენ, რომ მომსახურებით ვაჭრობის დადებითი ბალანსი (ტურისტული შემოსავლების გამო) ნაწილობრივ ანეიტრალებს საქონლით ვაჭრობის უარყოფით სალდოს. კერძოდ, 2015 წლის მეოთხე კვარტალში მომსახურების ექსპორტი წლიურად 5.2 პროცენტით გაიზარდა, ხოლო მომსახურების იმპორტი 8.0 პროცენტით შემცირდა. მომსახურებით ვაჭრობიდან ყველაზე მაღალი დადებითი სალდოთი ტურისტული მომსახურება გამოირჩევა, ქვეყანამ ტურიზმიდან 427.7 მილიონი დოლარის შემოსავალი მიიღო.
2014 წელს ეროვნული ვალუტის დევალვაციის მთავარი მიზეზი მეოთხე კვარტალში საგადასახდელო ბალანსის მკვეთრი გაუარესება გახდა (-260 მილიონი დოლარი). ექსპორტი შემცირდა გაზრდილი იმპორტის ფონზე, იკლო გზავნილებმა და ა.შ. თუმცა, ეკონომსტების შეფასებით, გაუფასურებულმა ლარმა თავად შეასრულა დამაბალანსებელი როლი, გავლენა იქონია იმპორტზე, იმპორტი შემცირდა და უცხოური ვალუტის შემოდინება-გადინების ბალანსი აღდგა.
შედეგად უნდა მიგვეღო დასტაბილურებული ლარი, თუმცა რეალობა საპირისპირო აღმოჩნდა. რატომ არ მოჰყვა ბალანსის აღდგენას და გაუმჯობესებას ლარის დასტაბილურება და რატომ გაგრძელდა დევალვაცია სიტუაციის გაუმჯობესების ფონზე? ამ კითხვებზე არგუმენტირებული პასუხი საზოგადოებას არ მოუსმენია. ფაქტი ერთია, 2015 წლის ბოლოს საგადასახდელო ბალანსის 103 მილიონი დოლარით გაუმჯობესების მიუხედავად, ვალუტის გაუფასურება გაგრძელდა.
“ეროვნული ვალუტის კურსზე საუბრისას ცოტა უცნაური შეფასებები კეთდება ხოლმე. ის, რომ ბიუჯეტიდან თითოეული ლარის ხარჯვა კურსზე ახდენს გავლენას, ეს არის აბსურდი. ასევე გაკეთდა ძალიან დილეტანტური შეფასება, რომ ეროვნული ვალუტის გაუფასურება სეზონურია. პირველ რიგში, ამ პროცესზე გავლენას ახდენს საგადასახდელო ბალანსი, რომლის მიხედვითაც ივარაუდება ლარის კურსის ცვლილება. ბალანსის გაუმჯობესების მიუხედავად, თუ რამ გამოიწვია ლარის გაუფასურება ზუსტი შეფასებას მაშინ შევძლებთ, როდესაც სხვა მონაცემებიც გამოქვეყნდება”, – ამბობს მერაბ ჯანიაშვილი.
ასეთი სახის ანალიზი უნდა გაეკეთებინა ეროვნულ ბანკს ფინანსური სტაბილურობის ანგარიშში, რათა მოსახლეობასა და დაინტერესებულ ბიზნესმენებს საქართველოს ეკონომიკაში მოსალოდნელ პროცესებზე წარმოდგენა ჰქონოდათ. “სამწუხაროდ ამას ბოლო სამი წელი აღარ აკეთებდნენ”, – დასძენს ჯანიაშვილი.
“ალია”, 01 აპრილი, 2016 წელი
ინტერვიუ გია ხუხაშვილთან: წითელი ხაზები გადალახულია, ქვეყანა აყროლდა
ნინო სამხარაძე
წითელი ხაზები გადალახულია, ქვეყანა აყროლდა, პროკურატურას წამმზომი ჩაურთო სახალხო დამცველმა, მაგრამ ეს კაცი გინდ ყოფილა და გინდ – არა, მისი დისკრედიტირებაც შეძლეს. გაირკვა, რომ 105 000-ლარიანი „მერსედესით“ გადაადგილდება, ნაკლები სახალხო დამცველს არ მეკადრებაო… 31 მარტის მუქარა ძალაშია, კადრები აიტვირთა, „რესპუბლიკელებმა“, ნებით თუ უნებლიეთ, დამნაშავე ძალის ულტიმატუმი შეასრულეს და კოალიციიდან გასვლა დააანონსეს, თუმცა მთავარი სამიზნე თინა ხიდაშელი თავდაცვის მინისტრის პოსტს ინარჩუნებს… პოლიტიკოსები ყველაფერზე მიდიან ძალაუფლების შესანარჩუნებლად, მაგრამ მათ პოლიტიკურ არარაობას ხალხი არჩევნების დღეს გააფორმებს! „რესპუბლიკელების“ ბედი გაირკვა. ამავე მდგომარეობაში აღმოჩნდება „ეროვნული ფორუმიც“, რომელმაც დაივიწყა, რომ ხელისუფლების მთავარი წყარო არის ხალხი.
ექსპერტი გია ხუხაშვილი მთავარ პოლიტიკურ მოვლენებზე „ალიას“ კითხვებს პასუხობს:
- 31 მარტის მუქარამ „მისია“ შეასრულა?
- მე ვფიქრობ, რომ ეს ისტორია დასრულებული არ არის, მეჩვენება, რომ ეს არის დიდი გეგმის ნაწილი და პრინციპში, შედეგების კონტურები ჯერ გამოკვეთილი არ არის. ვფიქრობ, ხდება საზოგადოების ტესტირება და საბოლოო ჯამში, უფრო სერიოზული პროვოკაცია იგეგმება, ვიდრე დღემდე ვნახეთ.
- რა პროვოკაციაა და რა არის მიზანი?
- გარკვეულწილად მთელი პოლიტიკური პროცესის დისკრედიტაცია. სამიზნე ამ ყველაფრის, დიდი ალბათობით, არის პირველ რიგში პრემიერმინისტრი და ბიძინა ივანიშვილი. ასევე, ამ პროვოკაციის მიზანია სრული უნდობლობის გარემოს დაბრუნება, შეიძლება ითქვას, რომ, ფაქტობრივად, ეჭვმიტანილია მთელი საზოგადოება, ასევე, გარკვეული სიმწვავის მიცემა პროცესებისთვის.
- პრემიერი ახსენეთ. როგორ ფიქრობთ, ხომ არ იგეგმება პრეზიდენტ მარგველაშვილის დისკრედიტაცია ვიდეოსკანდალებით, რომელმაც ცოტა ხნის წინ განაცხადა, რომ მას ჰქონდა და ექნება მდიდარი და მრავალფეროვანი სექსი?
- არა მგონია, რომ პრეზიდენტისნაირ ადამიანზე ამ ტიპის ვიდეოების ატვირთვით ზემოქმედება შეძლონ. თეორიულად რომ დავუშვათ, რომ მასზე არსებობს ჩანაწერი, პრეზიდენტი ასეთი ტიპის ზემოქმედებას არ დაექვემდებარება. ამის გარდა, ვფიქრობ, რომ პრეზიდენტის სამიზნედ გახდომა ნაადრევია, რადგან საპრეზიდენტო არჩევნებამდე ჯერ კიდევ დიდი დროა, ამ ეტაპზე კრიტიკული წერტილია საპარლამენტო არჩევნები, რომლის სუბიექტი პრეზიდენტი არ არის, თუმცა დიდ პოლიტიკურ კომბინაციაში ირიბ სამიზნედ შეიძლება იყოს გამოყენებული.
- პროკურატურას წამმზომი აქვს ჩართული საზოგადოების მხრიდან. შეძლებს ის ამ დანაშაულის გახსნას?
- შეიძლება პროკურატურას მაშინ გაუმართლოს, თუკი შემთხვევით გაიხსნება ეს საქმე. საკმაოდ გართულებულია ამ თემის ძიება, ჩანს, ეს ჯგუფი დარწმუნებულია, რომ მათი დანაშაულებრივი კვალის დადგენა გაჭირდება და დაანონსებული გეგმით მიდის. საბოლოო ჯამში, ეს ხომ ხელისუფლებისა და პროკურატურის ბრალია, რომ აქამდე მიუშვეს ეს პროცესი, სისტემურ პრობლემას თავის დროზე არ გაეცა პასუხი, ჩვენ ამის შედეგებს ვიმკით და ეს კადრები კი, მგონი, უკვე მშრალ ხიდზეც იყიდება, იმდენად გაბნეულია და დაკარგულია კონტროლი ვითარებაზე, ასეთ უკონტროლო ვითარებაში წყაროს იდენტიფიცირება საკმაოდ გართულებულია.
- ქვეყანაში, სადაც მოსახლეობის უდიდესი უმრავლესობა მშიერია და თვლის, რომ ხელისუფლებამ მოატყუა, ვიდეოტერორი გააჩენს ნიჰილიზმს და ქაოსს?
_ რა თქმა უნდა, სტაბილურობის შეგრძნება გაქრება და დაისმება მთავარი კითხვა – ერთადერთი მონაპოვარი, რაც ამ ხელისუფლებას ჰქონდა, იყო ის, რომ ხალხმა დაკარგა შანტაჟის შიში, შიშიც თუ დაბრუნდა, ამომრჩეველი იკითხავს, კი მაგრამ, რა შეიცვალა?
- გია ბარამიძის არაადეკვატურმა განცხადებამ ააფეთქა საინფორმაციო საშუალებები. ამბობს, „ეს ნაძირალები იღებდნენ გიგი უგულავას, დავით ბაქრაძეს საკუთარ ცოლებთან, მათ შორის ჩვენც და ამ ხელისუფლებამ კი დამნაშავეების დასჯა ვერ მოახერხა“-ო. მართალია, ეს განცხადება ფსიქოლოგების შესაფასებელია, მაგრამ, როგორც პოლიტოლოგმა, აგვიხსენით, რასთან გვაქვს საქმე?
- პასუხისმგებელი ამაზე არის თვითონ გია ბარამიძე და მისი პოლიტიკური ჯგუფი, ამდანაშაულს ჰყავს სამი მხარე: პირველი – ვინც იღებდა, მეორე – ვინც ინახავდა და მესამე – გამავრცელებელი! სამივე თანაბრადაა პასუხისმგებელი დანაშაულზე. იღებდნენ „ნაციონალების“ ხელისუფლების დროს და ინახავდნენ მათივე ხელისუფლების დროს. მინიმუმ, ორი შემადგენელი ამ სამი მხარისა, მათი პასუხისმგებლობის ზონაა და მათი მხრიდან ასეთი ჰონორით ლაპარაკი, მინიმუმ, რთული მოსასმენია.
- უცნაურად დაემთხვა დროსა და სივრცეში, ინტერნეტმუქარას „რესპუბლიკური პარტიის“ განცხადება, რომ ისინი გადიან კოალიციიდან, თუმცა ინარჩუნებენ თანამდებობებს არჩევნებამდე. ასევე, გადაწყდა, რომ „ეროვნული ფორუმი“ დატოვებს კოალიციას. როგორია თქვენი შეფასება ამ პოლიტიკური განქორწინების შესახებ?
_ დამთხვევა რომ არც იყოს, ფაქტია, რომ კოალიციაში შემავალი სუბიექტები არჩევნებზე ცალ-ცალკე მიდიან და ეს კარგია, რადგან კოალიცია ჰგავდა ოჯახს, სადაც ცოლ-ქმარს დიდი ხანია, ერთმანეთი ეზიზღებათ, ერთმანეთზე ძალადობენ, მაგრამ ოჯახის სიწმინდის დაცვის სახელით აგრძელებენ თანაცხოვრებას გაუსაძლის გარემოში, სადაც ნორმალური ბავშვის გაზრდა შეუძლებელია. რაც შეეხება საპარლამენტო თანამდებობებს, აქ შეიძლება დაშვება, რადგან პარლამენტი წმინდა პოლიტიკური ორგანოა და შესაბამისად, ოპოზიციის წარმომადგენელს რომ ჰქონდეს თანამდებობა, ეს პრობლემას არ შექმნის, მაგრამ მთავრობაში იყოს შენი წარმომადგენელი და ხელისუფლებისგან განსხვავებული საარჩევნო კამპანია აწარმოო, ცოტა უცნაურია.
მე არ მესმის „რესპუბლიკელების“ პოზიცია, თუ არ გააკრიტიკებენ ხელისუფლებას, მაშინ არჩევნებზე რა პერსპექტივას ელოდებიან, ან თუ დაიწყებენ ხელისუფლების კრიტიკას, დავით უსუფაშვილმა თინა ხიდაშელი უნდა აკრიტიკოს?! რა უნდა იყოს ეს საარჩევნო კამპანია, ბუნდოვანია. ცდილობენ სახის შენარჩუნებას, მაგრამ ეფექტურად არ მოჩანს მათი საქციელი. ვფიქრობ, რომ მათ მთავრობის დატოვება ყველა შემთხვევაში მოუწევთ, მაქსიმუმ, ორი-სამი თვის განმავლობაში. პარლამენტში კი „რესპუბლიკელებმა“ შესაძლებელია, შეინარჩუნონ თანამდებობები იმისთვის, რომ საპარლამენტო მუშაობის პარალიზების მცდელობა არ იყოს და გადალაგებები არ დაიწყოს.
- თინა ხიდაშელი თავდაცვის მინისტრობას ვერ ელევა, ისტერიკაშია, არ გადავდგებიო, დავით უსუფაშვილი კი ბიძინა ივანიშვილს ენანება დასაკარგად. არის იმის ალბათობა, რომ ამ წყვილმა „რესპუბლიკური“ პარტია დატოვოს და „ქართული ოცნების» სუბიექტები გახდნენ?
- თინა ხიდაშელის რა გითხრათ, მაგრამ უსუფაშვილი საჭირო შენაძენი იქნებოდა პარტია „ქართული ოცნებისთვის“. მეტსაც გეტყვით, უსუფაშვილი ერთადერთია „რესპუბლიკური პარტიიდან“, რომელიც მენანება იმისთვის, რომ მომავალ პარლამენტში თამაშგარე დარჩეს. დანარჩენებზე გული არ მწყდება. თავის დროზე იყო სურვილი, რომ უსუფაშვილი გადასულიყო „ოცნებაში“, თუმცა ამას შეთავაზების ფორმა არ ჰქონია.
„რესპუბლიკელებთან“ ალიანსს არც ერთი პარტია არ ისურვებს, ელექტორალური თვალსაზრისით ეს პარტია არაფერს არ იძლევა, ეს პარტია უფრო მინუსია, ვიდრე პლუსი. კოალიციაში შემავალი პარტიები – „ფორუმი“, „მრეწველები“, „კონსერვატორები“ და ა.შ. პარაზიტირებდნენ ბიძინა ივანიშვილის რესურსებზე და მის მხრებზე, მათ დაკარგეს ხალხთან კომუნიკაცია და დაავიწყდათ, რომ ხალხია ძალაუფლების წყარო, ამ კომუნიკაციის აღდგენა ძალიან ძნელი იქნება. გარდა პარტია „ქართული ოცნებისა“, რომელიც ბიძინა ივანიშვილის მხრებზე დარჩება, ყველა პარტიის ბედი კითხვის ნიშნის ქვეშ დადგება, ამიტომაც ზოგიერთი პარტიის ლიდერი შესაძლოა «ქართული ოცნების“ სიაში აღმოჩნდეს პიროვნულად და არა პარტიის სახელით. შესაძლოა, „კონსერვატორების“ ლიდერმა ზვიად ძიძიგურმა და „სოციალ-დემოკრატების“ გია ჟორჟოლიანმა, „მრეწველებიდან“ ტყემალაძემ ისურვონ პიროვნულად „ოცნების“ სიაში ჩასმა, შესაბამისად, კოალიცია აღარ იქნება.
„ოცნებას“ ჯერ კიდევ არ აქვს საბოლოო კონფიგურაცია ჩამოყალიბებული, სიის განახლებას ცდილობენ. სკეპტიკურად ვუყურებ, რომ ისინი პარტიულ სიას ხარისხობრივად გააუმჯობესებენ, ამის რესურსი მათ არ აქვთ და ამას აქვს ორი მთავარი მიზეზი, პირველი -
სახელისუფლებო პარტიაში წინა რიგებში ყოველთვის მამაძაღლები და გამორჩენის მომლოდინე ადამიანები დგებიან, მეორე – ამბიციურ და წესიერ ახალგაზრდებში „ოცნება“ არ არის მოდური, რადგან არ ასოცირდება პროგრესთან. ასე რომ, სკეპტიკურად ვუყურებ „ოცნების“ გადახალისებას, თუმცა აუცილებლად გამოჩნდებიან ახალი სახეები, ხარისხზე კი რა მოგახსენოთ!
“ალია”, 01 აპრილი, 2016 წელი
ინტერვიუ ვალერი ვალერი ხაბურძანიასთან: „მე ვთქვი, კიდევ ორ-სამ ქალბატონზე გამოაქვეყნებენ ვიდეოს-მეთქი და კაცებიც ნუ არიან მშვიდად, ამის შემდეგ ნადირობა დაიწყება კაცებზე“
გელა ზედელაშვილი
კოალიცია „ქართული ოცნება“, ფაქტობრივად, დაიშალა. გუშინ, კოალიციიდან წასვლაზე განცხადების გავრცელების შემდეგ, პრემიერ-მინისტრი კვირიკაშვილი შეხვდა პარლამენტის თავმჯდომარეს, დავით უსუფაშვილს და განაცხადა, რომ მომავალ არჩევნებში „ქართული ოცნება“ გამოვა დამოუკიდებლად. გუშინდელი დღე იმითაც იყო მნიშვნელოვანი, რომ ამ დღეს მოსახლეობა მორიგი ვიდეო კომპრომატების გავრცელებას ელოდებოდა. რაღაც ვიდეო აუტვირთავთ კიდეც რამდენიმე ადამიანის ფეისბუქ-გვერდზე, მაგრამ შინაარსი გაურკვეველი დარჩა.
რას აცხადებს მოსკოვში მოღვაწე უშიშროების ყოფილი მინისტრი, ვალერი ხაბურძანია „რესპუბლიკელების“ წასვლაზე, რომლებმაც ხაზგასმით ახსენეს სიტყვები – „სტალინისტები“ და „ანტინატოელები“? იხარჯება თუ არა რუსული ფული არჩევნებისთვის? რატომ ვერ იძიებენ ფარული ვიდეოების საქმეებს?
„ალიას“ ვალერი ხაბურძანიაესაუბრა:
- ირაკლი ალასანიას მაგალითმაც გვაჩვენა, რომ შეუცვლელი ადამიანი არ არსებობს, არც თავდაცვის მინისტრია შეუცვლელი და არც თავად „რესპუბლიკური პარტია“. ახლა კი მოხდა რა? „ქართული ოცნება“ ამათ უტოვებს ადმინისტრაციულ რესურსს, მთლად ჩხუბით არ უშვებენ და საშუალებასაც აძლევენ, რომ სარგებელი ნახონ. ნუ გამოვრიცხავთ, რომ ალასანიამ, „ნაციონალებმა“ და „რესპუბლიკელებმა“ დასავლეთს შეუქმნან შთაბეჭდილება, რომ საქართველოში ძალაუფლება პრორუსულმა ძალებმა ჩაიგდეს ხელშიო და ამას მოჰყვეს გართულებები. „რესპუბლიკელებმა“ თავიანთ განცხადებაში იხმარეს ტერმინები – „სტალინისტები“ და „ანტინატოელები“. თან დამცინავი ტონი აქვთ. სტალინისტი ამ ქვეყანაში იყო მიხეილ სააკაშვილი, რაც საბჭოთა რეჟიმს ცუდი ჰქონდა, მან ყველაფერი გადმოიღო და რეალურ ცხოვრებაში იყენებდა. როცა ოპოზიციონერობა გინდა და თან სახელისუფლებო რესურსს იყენებ, ამას რა ჰქვია, დემოკრატიული წესებით თამაში, თუ შენც სტალინისტი ხარ? მოკლედ, „ქართულმა ოცნებამ“ „რესპუბლიკელებს“ საარჩევნოდ ადმინისტრაციული რესურსი შეუნარჩუნა.
- „რესპუბლიკელების“ განცხადებაში, ასევე, ნახსენებია ოკუპანტი ქვეყანა… სიტუაციას ისე გვიხატავენ, თითქოს რაც ხდება, ამაში რუსეთის ხელიც ურევია. დარწმუნებული ვარ, თუ ამათ არჩევნებამდე დაატოვებინებენ თანამდებობებს, ყველაფერს რუსეთს და ადგილობრივ სტალინისტებს გადააბრალებენ. ამ სიტუაციაში თქვენ რუსეთის ხელს ხედავთ?
- ამათ უკვე ბოდვაში გადასდით ყველაფერი. თუკი თავდაცვის მინისტრმა არ იცის, რომ რუსეთის აქტივობა ამ წუთას ნულის ტოლია, მაშინ კარგად ჰქონია საქმე. ეს ყველაფერი სჭირდებათ საზოგადოების „დასაბოლებლად“. ახლა „“ნაცები“ წუხილს გამოთქვამენ, „რესპუბლიკელებს“ ეუბნებიან, თქვენ გაბედული ხალხი ხართ, მაგრამ ბოლომდე რატომ არ აწვებითო? პირდაპირ მოუწოდებენ, ჩვენიანები ხართ და აქეთ წამოდითო. რასაკვირველია, „რესპუბლიკელებმა“ ჯერ არ იციან, რა გარანტიებს მისცემენ „ნაცები“, ახლა რომ იჩქარონ, შეიძლება სულ ისე დარჩნენ. ახლა რომ ლაპარაკობენ „რესპუბლიკელები“ სტალინისტებზე, საიდან გაჩნდნენ ასეთები კოალიციაში, აქამდე სად იყვნენ? ან თავის დროზე რატომ შევიდნენ ამ რუსეთუმეებით გატენილ კოალიციაში? ვთქვათ, სიმართლე, საქართველოში არჩევნების ბედს წყვეტს ფული და ადმინისტრაციული რესურსი. ამის მიხედვით დგება არჩევნების შედეგები, პროგრამასა და იდეოლოგიას არავინ არ უყურებს. ვინმეს აინტერესებს ამერიკაში, ვინ არის საარჩევნო კომისიის თავმჯდომარე ან კიდევ უბნებში ასეთი დაკა-დაკა იყოს? ჩვენთან, ფაქტობრივად, არჩევნები არ ტარდება, ერთი ელექტრონული სისტემა იყო გასაკეთებელი და ეგეც არ გააკეთეს. არავითარი რუსეთი, ამერიკა და ჩოხატაური, ვინც ფულს იძლევა, სრულდება მისი სურვილები, ხანდახან ფულს ამერიკელებიც იძლევიან და მათაც უწევენ ანგარიშს. მე ზუსტად ვიცი, რომ დღეს რუსები ფულს არ იძლევიან და სურვილიც რომ ჰქონდეთ, უკვე დაგვიანებულია. ყველამ კარგად იცის, ეს ასეა, მაგრამ სპეციალურად იქმნება მითები, თითქოს საქართველოს ხელისუფლებაში მომძლავრდნენ პრორუსული ძალები.
არჩევნებამდე ჯერ კიდევ არის საკმაო დრო, რომ არა თანამდებობების შენარჩუნება და ადმინისტრაციული რესურსი, შეიძლება „რესპუბლიკელებმა“ ბარიერი ვერ გადალახონ. სწორედ ამიტომ სცეს პატივი და დატოვეს მინისტრების თანამდებობებზე, ცოტაოდენ სხვა რესურსის წახმარება საკმარისი იქნება, რომ მათ პარლამენტში ფრაქციის შესაქმნელად ხმები აიღონ. ჩვენ კი ვიძახით, რომ 2-3-პროცენტიანი პარტიაა, მაგრამ პარლამენტში მაინც შეიყვანენ ამ გარიგების საფუძველზე.
- ფაქტობრივად ასეა, აგერ, საპარლამენტო უმრავლესობის წევრი, თამაზ მეჭიაური აცხადებს, „რესპუბლიკელებს» საკმაო რაოდენობით ხალხი ჰყავთ დასაქმებული და ბარიერს გადალახავენო.
- კი, ეს მარტივი მისახვედრია, სამწუხაროდ, აქამდე მიიყვანეს საქმე და ჩვენს თვალწინ თამაშდება კიდევ ერთი აფიორა. რასაკვირველია, მოხდა გარიგება, თორემ პრემიერ-მინისტრს დღესვე შეუძლია, ამ ყველაფერს ბოლო მოუღოს. აქ ისეთი თამაშები მიდის, ვერავინ ვეღარ ჩაერევა, აზრი აღარ აქვს.
- რატომ ვერ ხსნიან ფარული ვიდეოების საქმეებს? „ფებეერიც“ დაგვეხმარებაო, თქვეს…
- რაც შეეხება ფარული ვიდეოკადრების გავრცელებას, რაც ამ მხრივ ხდება, ეს უკვე ისტერიკაა, აღარავინ ლაპარაკობს იმ ადამიანების დასჯაზე, ვინც ამ ყველაფერს აკეთებდა. მეტიც, „ნაციონალები“ ცდილობენ, ყველაფერი ამ ხელისუფლებას გადააბრალონ, არა და ყველამ ვიცით, ეს ვინ გააკეთა. მე მაშინვე ვთქვი, კიდევ ორ-სამ ქალბატონზე გამოაქვეყნებენ ვიდეოს-მეთქი და სხვათა შორის, მავანი კაცებიც ნუ არიან მშვიდად, ამის შემდეგ ნადირობა დაიწყება კაცებზე. ჩვენ უკვე დავრწმუნდით, რომ ამას აკეთებენ პროფესიონალები და პოვნა თითქმის შეუძლებელია.
ყველაფერი მარტივადაა, თუკი სუფთა აიპი-მისამართიდან გამოიგზავნება, ამტვირთავების ვინაობის დადგენა ვერ მოხერხდება. დღეს არსებობს მილიონი საშუალება, რომ კვალი დაფარო. სანამ დაიბლოკება, ბევრი ასწრებს გადმოწერას და მერე მიდის შიდა ტირაჟირება. რაც ხდება, ამას აღარაფერი ეშველება, ხელისუფლებას რჩება მხოლოდ ერთი გზა, დასაჯოს ის ადამიანები, რომლებმაც ასეთი დანაშაული ჩაიდინეს. მორჩა, დანარჩენის გამოძიება და ამტვირთავების კვალზე გასვლა, თითქმის შეუძლებელია, არსებობს მხოლოდ თეორიული შანსი.
“ალია”, 01 აპრილი, 2016 წელი
რა დაწერა თინა ხიდაშელმა „ფეისბუქში“ და რა დაუწერეს კომენტარებში…
წუხელ, გვიან ღამით, თავდაცვის მინისტრმა, თინა ხიდაშელმა ასეთი სახის `პოსტი~ გაავრცელა:
„ძალიან, ძალიან ბევრი ადამიანის წინაშე მაქვს პასუხისმგებლობა აღებული. ბევრი ადამიანის ბედზე და წარმატებაზე. აქ შეცდომა დაუშვებელია, ემოციები უსარგებლო. ის რასაც დღეს ვაკეთებ, ყველაზე უფრო მნიშვნელოვანია, რაც კი ოდესმე მიკეთებია, და ალბათ ყველაზე მნიშვნელოვანი იქნება ყველა იმ საკეთებელზე რისი კეთებაც შემდეგი წლების მანძილზე მომიწევს. ამიტომ ვცდილობ ბოროტებს, უზნეოებს, ჭორიკნებს, მატყუარებს პასუხი არ გავცე, ემოცია დავთრგუნო, ყველაფერი რაც მე პირადად მეხება გვერდზე გადავდო, არ ავყვე და პირიქით მეტი ენერგიით და ენთუზიაზმით შევუძახო საკუთარ თავს, რომ სწორედ ამ პასუხისმგებლობის და საქმის მნიშვნლეობის გამო უნდა ავიტანო, მოვითმინო, საქმეში დავიკარგო. მაგრამ ეხლა გიგა მოვიდა სახლში. ისეთ დაღლილია არაფრის თავი არ მაქვსო გამოგვიცხადა. მამა დაუჯდა და საშინაო დავალება — მოთხრობას უკითხავს. მე მთელი დღე ეკრანს ვუყურებდი და ვერ მივხვდი რამე უნდა დამეწერა თუ არა. ეხლა ზუსტად ვიცი, რომ არ უნდა გავატარო.
სცენარი იგივეა, თითქოს არაფერი მომხდარა განსაკუთრებული. ვიდეო აიტვირთა, მერე დაიბლოკა, ირკვევა რომ პრაქტიკულად არავის უნახავს, ჭორაობა დაიწყო. თუმცა იყო ერთი „მცირე“ დეტალი. პროკურატურის რეგისტრატურის წინ მდგომ დასაკითხად მისულ ახალგაზრდას ჟურნალისტმა ჰკითხა „პოლიტიკოსის კადრები იყო?“ – „დიახ“ – იყო პასუხი. ასევე ქალბატონი იმავე პროკურატურასთან, იმავე მიზნით მისული ასევე სხვათაშორის ამბობდა რომ „პოლიტიკოსის პირადი ცხოვრების ამსახველი ვიდეო“. ამ პატარა გასაუბრებით ამოცანა შესრულდა. ეჭვი გაჩნდა, და მგმობელი, მორალისტი, მაწყევარი, მაგინებელი არ დაილია. და არც კი ვიცი სერიოზულად უნდა ვიკითხო თუ არა, მაგრამ ამ 2 ადამიანს მინდა ვკითხო, ასეთ ტყუილს რომ იტყვი, ადამიანს ლაფში ამოსვრი, სრულიად ჩვეულებრივ ცილისმწამებლად და შანტაჟისტად რომ იქცევი, მერე რით განსხვავდები იმ ხალხისგან ვისაც ასე გულმოდგინებით „გმობ“ ვიდეოების გავრცელებისთვის?
აღარაფერს ვამბობ სრულიად ქართულ ტელემედიაზე, რომელმაც არ დაიზარა და მთელი დღე ტირაჟირებდა ამ ტყუილს, რომ პოლიტიკოსის პირადი ცხოვრების კადრების მორიგი სერია გამოჩნდა ინტერნეტ სივრცეში. უკვე წარმომიდგენია როგორი მჭერმეტყველი იქნება ხვალ ბეჭდური მედია. თუმცა შესაძლოა ამოცანაც ეს იყო. დაიდო სრულიად გაუგებარი ვიდეო, 20-მა ნახა, 200-მა ამბავს ყური მოკრა, მერე ტელევიზიით 200 ათასმა ცილისწამება და ტყუილი მოისმინა, მერე ვიღაცამ ჭორაობით გული იჯერა ზოგმა განზახ, ზოგმა „გულწრფელი აღშფოთებით“ და მორჩა. ისინი ფიქრობენ – მიზანი მიღწეულია. მაგრამ როგორც თავში მოგახსენეთ ბატონებო, ჩემი მიზანი რომელსაც ვემსახურები, ვიშრომო, ვიბრძოლო, ვიცხოვრო ჩემი შვილების და თქვენი შვილების ბედნიერებისთვის, გაცილებით უფრო დიდია, უფრო საინტერესო, უფრო მშვენიერი და ჯერ არავის მოუფიქრებია და არ გამოუგონიათ ძალა რომელიც გამაჩერებს“.
თინა ხიდაშელის ამ „პოსტს“ კომენტარები მოჰყვა:
თამუნა გიორგაძე: „თინი, ეს გული არაფერია იმ დიდ პატივისცემასთან შედარებით რასაც ვგრძნობ“;
მალალო გოგოლაძე: „ეგ იმათ ჯერავთ ვინც ძალიან გამოცდილია ეგეთ საქმეებში ქ-ნო თინა. ზოგს მხედველობა და ადამიანების გარჩევა უჭირს, მაღალს და დაბალს ვერ არკვევენ, მსუქანს და გამხდარს… მაგრამ საქმე მაგაში არ არის… არ აინტერსებთ.. ხომ ითქვა… ხომ დაიწერა….. და სულ არ ანაღვლებთ ეს ვინ იყო… მთავარია რომ ჰგონიათ გაიმარჯვეს.. ვაი მაგათ პატრონს…. მე მესმის თქვენი ამდენ სიბინძურეს როგორ უმკლავდებით.. ალბათ მაგიტომ ხართ მაგარი ქალბატონი. გისურვებთ წარმატებებს როგორც პირად ცხოვრებაში, ისე პროფესიულ საქმიანობაში“;
ლადო სანიკიძე: „ვინც მზადა რეალური ჯოჯოხეთი პირადად იხილოს, შვილებსა და სხვა ახლობლებზე დამიზნებული საშინელებები რეალობად ეჩვენებოდეს და სხვაგვარად მაინც ვერ ახერხებდეს, უკან დახევა არ შეეძლოს, იმას ჭორები რას დააკლებს?! შენ ახლა ერთ-ერთ მთავარ პულტთან დგახარ და ნერვიულობაც კი არ გაბედო, არ დაგშვენდება! მიყვარხარ და მჯერა შენი უდრეკობის!!!“.
კობა ჩოპლიანი: „ჭორიკნებს და გველგესლებს ნუ მიაქცევ ყურადღებას, დღეს ერთი თემა აქვთ ხვალ მეორე და ასე შემდეგ…. ამ ქვეყნისთვის საკეთებელი და პასუხისმგებლობა არის სწორედ ძალიან მნიშვენლოვანია. სასიხალუროა რომ ძალიან სწორი პოზიციები და აქცენტები გაქვთ. წარმატებები“;
ლევან გუდაძე: „რამდენჯერ და რამდენი გადაწყვეტილება მიიღეთ შანტაჟის ქვეშ, ამორალურო, უპრინციპო, უბრალოდ ნაძირალა არსებავ?.. და ეს არარაობაა საჯარო პირი, ე.წ. ელიტის წარმომადგენელი და თავდაცვის მინისტრი“;
ნანა მჟავია: „გამაგრდი, თინათინ, გვეიმედები. მხოლოდ კარგია მტრიანი. თუ ვერ გავუძელით, დაღუპულები ვართ. აკეთე შენი საკეთებელი, რომელსაც დამნახავი ხედავს, ასეთები ბევრნი ვართ“;
გიორგი ვაშაყმაძე: „ოქტომბერში გაჩერდები თინა“.
ნიკოლოზ ბერუკაშვილი: „ქალბატონო თინა თქვენი ბრალია სააკაშვილი და მაგის ბრბო რო გაუშვით არავინ დაიჭირეთ და არავის აგებინეთ პასუხი უკვე 4 წელია ლამის, 1 ვინ დაიჭირეთ ამ დანაშაულზე, რატო არ მიხვედით დამკვეთებთან?“;.
ნინი დავითაშვილი: „ქალბატონო თინა დაზღვევას მიხედეთ და გადახედეთ ჯობია,ძალიან დიდ ფულს იხდით როგორც მე ბიცი და ჩვენ გვატყუებს ეგ სადაზღვეოოოო, 20 ლარის ანაზღაურებაზეც წუწუნებენ“;
„გეორგიან მაჩო“: „არა საკადრის პასუხს რომ ქართველი ხალხი გაგცემთ ოქტომბერში მაგაში დარწმუნებული ვარ. რამოდენიმე ათეული ბნელი აქ რომ გეპირფერება ეგენი ვეღარ გიშველიან!“;
მაკა რაზმაძე (ჟურნალისტი, რომელზეც თინა ხიდაშელი თავის „პოსტში“ საუბრობს – „ალია“): „ბესო ზანგურო, ჩვენი ბრალი ყოფილა მთელი დღე თავი რომ გავიგიჟეთ ზედ გადაფარებით და დაცვით და იმით რომ არც სქესი და არც არაფერი ნიშანი არ წამოგვცდა… მეტის ღირსები ვართ…. რაც გძულდეს და რასაც ებრძოდე ის დაგაბრალონო…. რა გვინდოდა, რას მივედით პროკურატურაში. ვყოფილიყავით ჩუმად… ასეა ხალხი ალბათ ნაჩვევიდა „ეს შენ გეხება“ მხოლოდ ფარსია. როგორც კი მართლა დააპირებ ბრძოლას, მაშინვე აქეთ დაგდებენ ბრალს და ტალახს გესვრიან. არაუშავს… ამასაც გადავიტანთ… არადა გულით მჯეროდა და რა ვქნა, ახლაც მჯერა რომ ტყუილს და ცილისწამებას უნდა შეებრძოლო – მათ შორის შენს წინააღმდეგაც! რა უხერხულია, როცა უსამართლოდ გირტყამენ…. როცა რეალური დამნაშავის ნაცვლად შენზე იწმენდენ ხელებს მხოლოდ იმის გამო, რომ ეცადე სოლიდარული ყოფილიყავი…..“.
“ალია”, 01 აპრილი, 2016 წელი
როდიდან და ვისთან ერთად იწყებს აქციებს კახა კუკავა?
მაკა დეკანოსიძე
საარჩევნო სისტემის გაუმჯობესებაზე მომუშავე ინტერპარტიული ჯგუფის წევრმა კახა კუკავამ ხელისუფლებასთან მიმდინარე კონსულტაციები, ფაქტობრივად, ჩიხში შეყვანილად გამოაცხადა და ახლო მომავალში ქუჩის აქციები დააანონსა. როდიდან და ვისთან ერთად იწყებს აქციებს?
„ალიას“ კახა კუკავაესაუბრა:
- კახა, აქამდე გულწრფელად გჯეროდა, რომ წინასაარჩევნოდ სამართლიან საარჩევნო კოდექსს დადებდა მმართველი გუნდი?
_ როცა კვირიკაშვილმა ამაზე განცხადება გააკეთა, გადავწყვიტეთ, ჩვენი კონსტრუქციულობა გვეჩვენებინა. წინა პრემიერისგან განსხვავებით, ბევრად უფრო კონსტრუქციულია და სხვა ენაზე მეტყველებს, მაგრამ რამდენიმე თვე პრემიერ-მინისტრია უკვე და როგორც ჩანს, მისი ლეგიტიმაცია, მისი არეალი, მიიღოს გადაწყვეტილებები, შეზღუდულია. ამიტომ რეალურად ჩვენ ვხედავთ, რომ ეს პროცესი ვერ შედგა, მიუხედავად იმისა, რომ რამდენიმე შეხვედრა იყო, კიდევ ველოდებით შეხვედრას და თეორიულად კვლავ არის შანსი კონსენსუსის, თუმცა, ვატყობ, ამ შეხვედრაზეც, გარდა პროტოკოლური განცხადებებისა, რაიმე კონკრეტულ განცხადებას ვერ მოვისმენთ.
- რაც შეეხება აქციების თარიღს, ამ შეხვედრასაც დაელოდებით და მერე გამოხვალთ ქუჩაში თუ თვლით, რომ უკვე აზრი აღარ აქვს და უახლოეს დღეებში დაგეგმავთ?
- ჩვენ დაველოდებით კიდევ, მომავალ კვირას არის შეხვედრა, თუ რაიმე წინადადება იქნება ხელისუფლების მხრიდან, თეორიულად გამოცხადებულია, რომ შესაძლოა, მათ გამოაქვეყნონ თავიანთი წინადადებები, მოგვაწოდონ, თუკი ეს მოხდება, ამ დიალოგს ბოლომდე მივიყვანთ, მაგრამ, თუკი ხელისუფლებამ აირჩია ფეხებზე დაკიდების სტრატეგია, მაშინ იძულებული ვიქნებით, ჩვენც ფეხებზე დავიკიდოთ დიალოგი.
რასაც ვუყურებ, მზაობა არაფერზე არ აქვს ამ ხელისუფლებას და მაშინ უნდა გადადგენ, იმის გამო რომ ხან კადრები გამოქვეყნდება, ხან კოალიცია დაიშლება, მნიშვნელოვანი რეფორმები არ გავატაროთ, დაუშვებელია. ხელისუფლების ქმედუუნარობა კარგა ხანია ჩანს უკვე, ყველა საკითხში, არამარტო საარჩევნო რეფორმაზე. კადრები გავრცელდება თუ არა, უშიშროების სამსახური ამბობს, რომ ვაიმე ჩვენ ამას ვერ გამოვიძიებთ, ეს შეუძლებელია, ანალოგიური შეუძლებლობა სჭირთ ამათ ყველა სფეროში. ისე, საარჩევნო რეფორმის გასატარებლად აქციები იყო ყოველთვის ყველაზე შედეგიანი შევარდნაძის დროსაც, სააკაშვილის დროსაც და როგორც ჩანს, ასეთივე ტაქტიკითაა შესაძლებელი ივანიშვილის რეჟიმის პირობებშიც. ამიტომ ვფიქრობ, საპროტესტო აქციები გარდაუვალი იქნება.
- აქციებს მარტო გეგმავთ, თუ არასაპარლამენტო ოპოზიცია ერთიანი იქნება?
- როგორც ვიცი და რა ინფორმაციაც მაქვს, არასაპარლამენტო ოპოზიცია იქნება ერთიანი ამ საკითხში, აზრთა სხვადასხვაობა სხვადასხვა საკითხებში არსებობს, მაგრამ ამ კუთხით – არა. წინასწარ ვერ გეტყვით მასშტაბებს, ეს დამოკიდებული იქნება, ხალხის აქტივობაზეც. თუ ხელისუფლება უარს იტყვის რეფორმაზე, მაშინ ოპოზიცია უნდა გავიდეს ქუჩაში და არამხოლოდ საარჩევნო ცვლილების გამო.
_ როცა წინასაარჩევნოდ კოალიცია, ფაქტობრივად, ჩამოიშალა, არ ფიქრობთ, რომ ხელისუფლებაში მყოფ ყველაზე მსხვილ პარტიას „ქართულ ოცნებას“ არასაპარლამენტო ოპოზიცია ერთიანი ძალით უნდა დაუპირისპირდეთ, რადგან პარლამენტში მოხვედრის შანსი ცალ-ცალკე საკმაოდ მცირე გაქვთ?
- ვფიქრობ, შექმნილ ვითარებაში მით უფრო აუცილებელია ოპოზიციის კოორდინაცია, როგორც მინიმუმ, მაჟორიტარ კანდიდატებზე და არ არის გამორიცხული, პროპორციული სიითაც შეიქმნას ბლოკები. ზოგადად, „ქართული ოცნების“ რღვევას მივესალმები. როგორც „მოქალაქეთა კავშირის“ ჩამოშლამ მისცა ბიძგი შევარდნაძის რეჟიმის დასრულებას, ასევე კოალიციის ჩამოშლაც წინაპირობა უნდა გახდეს ივანიშვილის რეჟიმის დემონტაჟის. ყველა პარტიასთან მზად ვართ ბლოკის შესაქმნელად „ოცნების“ და „ნაციონალების“ გარდა.
- ნინო ბურჯანაძესთანაც? ან ინტერფრაქციული ჯგუფის წევრებთანაც, რომელთაც ადრე „ნაციონალების“ განშტოებას უწოდებდით?
- მიუხედავად იმისა, რომ ნინო ბურჯანაძესთან გვაქვს ძალიან დიდი აზრთა სხვადასხვაობა, მიმაჩნია, რომ უმჯობესია, არასაპარლამენტო ოპოზიცია, მათ შორის ბურჯანაძეც, ვიყოთ ერთიან ბლოკში, მხოლოდ ასეთ შემთხვევაში შეუძლია არასაპარლამენტო ოპოზიციას არჩევნების მოგება. თუმცა ჯერჯერობით არც ერთ პარტიასთან არ დგას დღის წესრიგში გაერთიანება და წინასწარ ვერაფერს გეტყვით.
