„რეზონანსი“: ამერიკის პრეზიდენტობის რომელი კანდიდატი უფრო სასურველია საქართველოსთვის?
„რეზონანსი“: ინტერვიუ გუგული მაღრაძესთთან: „არა მგონია, მოსახლეობას მოკლე მეხსიერება ჰქონდეს და “ნაცმოძრაობას” გაჰყვეს“
„რეზონანსი“: როგორია საქართველოში პარტიების დაფინანსების სისტემა
———–
„ახალი თაობა“: ინტერვიუ ნანა დევდარიანთან: „ოცნება“ ხმების 50%-ს ვერ აიღებს… თუმცა „ნაციონალებს“ ეს არ უშველის“
„ახალი თაობა“: ინტერვიუ მურმან დუმბაძესთან: „ირაკლი ღარიბაშვილის პრემიერობა ლეონიდ ჩერნოვეცკის შეეწირა“
„ახალი თაობა“: ინტერვიუ ნუგზარ მალაღურაძესთან: „ნაციონალურ მოძრაობას“ ბიძინა ივანიშვილთან პირადი მტრობა აქვს”
„ახალი თაობა“: ინტერვიუ კახა კუკავასთან: „არც ნაცები, არც ქოცები!“
„ახალი თაობა“: ინტერვიუ ნოდარ ნათაძესთან: „პრორუსული რევანში არ გამოვა… რუსეთმა საქართველოში თავისი აგენტურა სრული შემადგენლობით აამოქმედა“
„ახალი თაობა“: ირაკლი შიხიაშვილი პოლიტიკაში ბრუნდება: „ნაცმოძრაობა მე დავშალე“
„ახალი თაობა“: დადგება თუ არა დავით ნარმანიას იმპიჩმენტის საკითხი
ზაზა ვეკუა: „მერს უნდა გავაგებინოთ, რომ ის არჩეულია“
———————
„რეზონანსი“, 05 მაისი, 2016 წელი
ამერიკის პრეზიდენტობის რომელი კანდიდატი უფრო სასურველია საქართველოსთვის?
ეკატერინე ბასილაია
გუშინ საბოლოოდ გაირკვა აშშ-ის საპრეზიდენტო არჩევნების რესპუბლიკელი ნომინანტი – დონალდ ტრამპი. დემოკრატების ბანაკში სიტუაცია საბოლოოდ გარკვეული არ არის, თუმცა უკვე დიდი ალბათობით შეიძლება იმის თქმა, რომ ეს ჰილარი კლინტონი იქნება (თუმცა სოციალისტური შეხედულებების მქონე ბერნი სანდერსსაც აქვს მცირე შანსი). ამასთან დაკავშირებით საინტერესოა, რომელი კანდიდატის გაპრეზიდენტება იქნება საქართველოსთვის უფრო მომგებიანი?
ქართველი ანალიტიკოსების თვალსაზრისით, აშშ-ში რამდენადაც ძლიერი იქნება ანტირუსული პოლიტიკა, იმდენად მეტი ყურადღება მიექცევა საქართველოს, ამიტომაც, ამ ლოგიკით, ჩვენთვის ყველაზე სასურველი დემოკრატი ჰილარი კლინტონის გამარჯვება იქნება.
“ვინც არ უნდა მოვიდეს აშშ-ის პრეზიდენტად, საქართველო იმგვარ მხარდაჭერას ვერ მიიღებს, რაც ჯორჯ ბუშის დროს გვქონდა. ეს იყო ქართულ-ამერიკულ ურთიერთობებში ოქროს ხანა. ფიგურალურად რომ ვთქვათ, პრიორიტეტების თვალსაზრისით ჯორჯ ბუშის დროს საქართველო პირველ ათეულში შედიოდა, დღეს კი მეოთხე-მეხუთე ათეულში თუ შედის. ამიტომაც იყო, რომ ამერიკაში პრემიერის ვიზიტი პრაქტიკულად ჩავარდა. ის არც ერთმა გავლენიანმა კომიტეტის თავმჯდომარემ და არც ერთმა ნორმალურმა უნივერსიტეტმა არ მიიღო. ჯონ მაკკეინი არ ითვლება, რადგან ის დავით ნარმანიასაც კი შეხვდებოდა, ძველი ურთიერთობების გამო. ერთ-ერთი მიზეზი ისიცაა, რომ ამ ბოლო წლებში ერთ ნორმალურ ელჩსაც კი ვერ ვეღირსეთ,” – აცხადებს დიპლომატიის აკადემიის რექტორი სოსო ცინცაძე.
“აშშ-საქართველოს დღევანდელი ურთერთობა საუკეთესო არ არის და თუ ჯორჯ ბუშის პერიოდის დროინდელ ურთიერთობებს ვერ დავუბრუნდებით, კარგი იქნებოდა შუალედური ვარიანტი მაინც გამოინახოს. ამიტომ, საქართველოსთვის ჰილარი კლინტონის გაპრეზიდენტება სჯობს. მას ამ დარგში გამოცდილება აქვს და კარგად იცნობს ჩვენს რეგიონს. თუმცა ზედმეტი ილუზიების დამყარება არ ღირს,” – აღნიშნავს პოლიტოლოგი კორნელი კაკაჩია.
სოსო ცინცაძის თქმით, თუმცა დონალდ ტრამპი რუსეთთან ურთიერთობის დარეგულირების მომხრეა, რის გამოც მას დიდი 20-ეულის ქვეყნებიდან მხოლოდ რუსეთი უჭერს მხარს, ამიტომ ისიც მიიჩნევს, რომ საქართველოსთვის მაინც ყველაზე ხელსაყრელი ჰილარი კლინტონის გამარჯვება იქნებოდა.
“დონალდ ტრამპმა თქვა, რომ რუსეთთან ურთიერთობის დარეგულირებას შეეცდება. თუმცა სამი დღის წინ იმავე დონალდ ტრამპმა განაცხადა, რომ რუსეთთან მოლაპარაკებას ძალის პოზიციიდან ვაპირებ, ჩვენს გამანადგურებლებს ბალტიის ზღვაში უნდა ჩამოეგდოთ რუსული სუ-24, რომელმაც ამერიკულ კრეისერს გადაუფრინაო. ამდენად გაურკვეველია, დონალდ ტრამპს გამარჯვების შემთხვევაში როგორი საგარეო პოლიტიკა ექნება. თუმცა ჩვენთვის მაინც, ალბათ, ჰილარი კლინტონი სჯობს, ვინაიდან ის აქტიურად უჭერს მხარს რუსეთის წინააღმდეგ სანქციებს და მისი გაპრეზიდენტება კარგ არაფერს უქადის მოსკოვს,” – აღნიშნავს სოსო ცინცაძე. მისი აზრით, აშშ-ში რამდენადაც ძლიერი იქნება ანტირუსული პოლიტიკა, იმდენად მეტი ყურადღება მიექცევა საქართველოს, ვინაიდან კავკასიის რეგიონში პრაქტიკულად მხოლოდ საქართველოა პროდასავლური კურსის ერთგული.
“ჯორჯ ბუშის დროს სხვა ვითარება იყო, აშშ-ს არ ჰქონდა მწვავე პრობლემები და ამიტომ ჩვენი ქვეყანა პრიორიტეტებში შედიოდა. დღეს კი აშშ-ს უამრავი სხვა თავის სატკივარი აქვს,” – დასძენს სოსო ცინცაძე.
კორნელი კაკაჩიას განცხადებით, ყველა კანდიდატიდან ჩვენთვის საუკეთესო ვარიანტი სენატორი რუბიო იქნებოდა, რადგან ის მეტ-ნაკლებად იცნობდა საქართველოს. თუმცა ახლა ყველაზე უკეთესი ვარიანტი ჰილარი კლინტონია. მას ჩვენს რეგიონთან ურთიერთობის ძალიან მდიდარი გამოცდილება აქვს, მათ შორის რუსეთსა და პოსტსაბჭოთა სივრცესთან. ასევე პირდაპირი შეხება ჰქონია საქართველოსთან და ჩვენს პოლიტიკურ ელიტასთან. აქედან გამომდინარე, მას გარკვეული წარმოდგენა აქვს შექმნილი ჩვენზე და ზედმეტი ახსნა-განმარტება საქართველოს მნიშვნელობაზე არ დასჭირდება. კორნელი კაკაჩიას თქმით, ახლანდელ არჩევნებში “რესპუბლიკური პარტიის” კანდიდატებმა პრაქტიკულად უღალატეს საგარეო პოლიტიკაში იმ ტრადიციულ კურსს, რაც მათ ათწლეულების განმავლობაში ჰქონდათ. ამის მაგალითია ტრამპის რიტორიკა რუსეთსა და პუტინთან დაკავშირებით, როდესაც ამბობს, რომ მოსკოვთან დიალოგი საჭიროა.
“ტრამპის წინასაარჩევნო კამპანიაში გამოსვლისას თითქოს ჩანს, რომ წინააღმდეგიც არ არის, რომ პოსტსაბჭოთა სივრცეზე რუსეთის მხრიდან გარკვეული გავლენა შენარჩუნდეს. ამიტომაც ჩვენთვის უფრო საინტერესოა, რას ლაპარაკობს ჰილარი კლინტონი. ის “დემოკრატიული პარტიის” ე.წ. “ქორების ბანაკს” წარმოადგენს, რომლებიც უფრო კრიტიკულად და აგრესიულადაც კი არიან განწყობილი პუტინის რუსეთის მიმართ. სავარაუდოდ, კლინტონი უფრო მკაფიოდ იქნება დაპირისპირებული რუსეთთან, ვიდრე ობამაა დღეს. კლინტონი უფრო პრინციპული იქნება მაგალითად, სხვა ქვეყნების სუვერენიტეტთან დაკავშირებით. ამდენად, საქართველო უფრო კომფორტულად და დაცულად იგრძნობს თავს,” – აღნიშნავს კორნელი კაკაჩია. იგი ფიქრობს, რომ იმ ოქროს ეპოქას ვერ დავუბრუნებთ, რასაც საქართველომ ჯორჯ ბუშის დროს მიაღწია.
“ამას რამდენიმე მიზეზი განაპირობებდა. ერთი ის, რომ საქართველოს იმდროინდელი ხელისუფლება მეტ-ნაკლებად აღმოჩნდა აშშ-ის ინტერესის ობიექტი, რადგან ბუშის ადმინისტრაციის დეკლარირებული კურსი იყო დემოკრატიის მხარდაჭერა მთელ მსოფლიოში და მაშინ როდესაც ერაყში, ავღანეთსა და ბევრ სხვა ქვეყანაში აშშ-ის იდეები ჩაფლავდა, მხოლოდ საქართველო იყო წარმატების მაგალითის ფორმულად დარჩენილი. აქედან გამომდინარე, გარკვეული იდეოლოგიური თანხვედრაც იყო და საგარეო პოლიტიკური ნარატივებიც დაემთხვა, რამაც უბიძგა ხელი, რომ ორ ქვეყანას შორის განსაკუთრებული ურთიერთობა ყოფილიყო. თუმცა ეს არ იყო ნორმალური. ისეთი პატარა სახელმწიფო, როგორიც საქართველოა, სუპერ სახელმწიფოსთან განსაკუთრებულ ურთიერთობაში ვერ იქნება. აქეან გამომდინარე, ობამას პოლიტიკა იქითკენ იყო მიმართული, რომ საქართველოს მიუჩინა ის ადგილი, რომელიც მას მეტ-ნაკლებად ეკუთვნოდა, რაც ჩვენთვის მტკივნეულიც იყო,” – მიიჩნევს კორნელი კაკაჩია. მისი თქმით, ლობიზმი მნიშვნელოვანია და “ქართულმა ოცნებამ” უნდა შეძლოს დასავლეთში საქართველოს მხარდამჭერი პოლიტიკოსების მოძებნა და დამეგობრება.
“ქართულმა ოცნებამ” რაც უნდა გააკეთოს და რასაც ჯერჯერობით ვერ აკეთებს, ისაა, რომ შეინარჩუნოს აშშ-ის სენატსა და კონგრესში მხარდაჭერა და მათ საქართველოს ახალი მეგობრები უნდა მოუმრავლოს. თუმცა, სამწუხაროდ, ეს არ ჩანს. ძირითადად ჩვენით ინტერესდებიან საქართველოს ყოფილი მეგობრები, რომლებიც სააკაშვილის ხელისუფლების დროს შევიძინეთ. ახალი სენატორები, კონგრესმენები, ახალი ჯგუფები, რომლებიც საქართველოს მხარდამჭერები იქნებიან და რომლებიც “ქართულმა ოცნებამ” მოუპოვა საქართველოს, არ ჩანან. ეს კი აუცილებელია,” – დასძენს კორნელი კაკაჩია.
„რეზონანსი“, 05 მაისი, 2016 წელი
ინტერვიუ გუგული მაღრაძესთთან: „არა მგონია, მოსახლეობას მოკლე მეხსიერება ჰქონდეს და “ნაცმოძრაობას” გაჰყვეს“
გვანცა ღვედაშვილი
“ქართული ოცნების” წევრი გუგული მაღრაძე დარწმუნებულია, რომ მოსახლეობა საპარლამენტო არჩევნებში “სწორ გადაწყვეტილებას მიიღებს” და “ქართული ოცნების” კეთილსინდისიერ მუშაობას დააფასებს”. მიუხედავად იმისა, რომ პარლამენტში რაც შეიძლება მეც პარტიას მიესალმება, მაგრამ დარწმუნებულია, რომ “ქართული ოცნება” უმრავლესობაში იქნება.
- ბოტანიკურ ბაღსა და მიმდებარე ტერიტორიასთან დაკავშირებულმა ამბებმა დიდი პროტესტი გამოიწვია. როგორ ფიქრობთ, “ნაციონალური მოძრაობის” მიერ დაანონსებულ აქციებს საზოგადოების მხარდაჭერა მოჰყვება?
- რაც შეეხება “ნაცმოძრაობის” მიერ დაანონსებულ აქციებს, ამის მაგალითები გვაქვს და გვექნება, მაგრამ, დარწმუნებული ვარ, მოსახლეობა ობიექტურად აფასებს მათ და, შესაბამისად, რაიმე ასეთი აქციისადმი მნიშვნელოვან მხარდაჭერას გამოვრიცხავ. პროტესტი ყველაფერზე შეიძლება, მაგრამ რაიმე სერიოზული მხარდაჭერა ასეთ პროტესტს არა აქვს და არც ექნება. მაგალითად, საარჩევნო სიებთან დაკავშირებით ატეხილი აჟიოტაჟი სათანადო ინფორმაციის მიღებით გასაგები გახდა. სტატისტიკის ეროვნული სამსახურის სია საყოველთაო აღწერის შედეგებს ეყრდნობა. ცესკოს საარჩევნო სია კი ეყრდნობა იუსტიციის სამინისტროს მონაცემებს და მოიცავს საქართველოს ყველა მოქალაქეს, რომელსაც შესრულებული აქვს 18 წელი.
პროტესტის აგორების სხვა მცდელობა იყო, ბატონი ბიძინა ივანიშვილის პიროვნებასა და მის მოქმედებებზე შეტევა. მისი ღვაწლი განუზომელია, პოლიტიკაში მოსვლითანავე თქვა, რომ 2 წელი იქნება პოლიტიკაში და შეეცდება, რეალური დემოკრატიის გზაზე დამდგარი ქვეყანა დატოვოს, და მან ეს შეასრულა. ქვეყანაში დაცულია ადამიანის უფლებები, უსაფრთხოება, მედია არის იმდენად თავისუფალი, რომ ზოგჯერ გაკვირვებასაც კი იწვევს. სასიკეთო ძვრებია ბიზნესის თავისუფლების მხრივ. ცხადია, არის ისეთი მტკივნეული საკითხი, როგორიცაა უმუშევრობის შემცირება, რასაც 2-5 წელში ვერ გამოასწორებ, მაგრამ ამ მხრივ დაწყებულია პროგრამები, რომლებიც თავის შედეგს სამომავლოდ გამოიღებს.
რაც შეეხება ბოტანიკურს, ამ საკითხზე მსჯელობისას უნდა გვახსოვდეს, რომ ბატონმა ბიძინამ წლების მანძილზე, როცა არავის ეცალა ბოტანიკური ბაღისთვის, 23 მილიონზე მეტი დაახარჯა ამ ტერიტორიას. თავისი ხარჯებით შეინახა და გადაარჩინა ბოტანიკური ბაღი.
ისე, სად გინახავთ კერძო საკუთრებასთან ასეთი ბრძოლა, თუ არ ჩავთვლით საბჭოთა წყობას, რომლის ვითომდა შეურიგებელი მტერია ზოგიერთი პროტესტანტი?!
- ექსპერტთა ნაწილის აზრით, ხელისუფლებაზე მზარდი შეტევები 2003 წლის რევოლუციის წინა პერიოდს ემსგავსება. ხომ არ ფიქრობთ, რომ შესაძლებელია, იგივე პროცესები განვითარდეს?
- ნათქვამია, ერთსა და იმავე მდინარეში ორჯერ ვერ შეხვალო. “ნაციონალური მოძრაობის” და, შესაძლოა, სხვა პოლიტიკური ძალების მცდელობა 2003 წლის მსგავსი სცენარით შეეცადონ მოვლენების განვითარებას არჩევნების შემდეგ, განუხორციელებელია. ცხადია, მცდელობები იქნება, რომ სხვადასხვა საკითხზე ააგორონ რაღაც საპროტესტო ტალღა, მაგრამ ეს მოძრაობა მცირერიცხოვანი მხარდამჭერებით შემოიფარგლება. არ მგონია, საქართველოს მოსახლეობას მოკლე მეხსიერება ჰქონდეს და გაჰყვეს “ნაციონალურ მოძრაობას”. ვფიქრობ, მოსახლეობა იმასაც აცნობიერებს, რომ პროტესტის გამომხატველი არასამთავრობო ორგანიზაციების მნიშვნელოვანი ნაწილი, რომლებიც “ნაცმოძრაობის” ყოფილი მაღალჩინოსნების მიერაა დაფუძნებული, ობიექტური ვერ იქნება.
კიდევ ერთი მნიშვნელოვანი ფაქტორი, რის გამოც შეუძლებელია 2003 წლის სცენარის გამეორება: საერთაშორისო მხარდაჭერის მხრივ განსხვავებული ვითარებაა. მიუხედავად იმისა, რომ “ქართული ოცნების” ხელისუფლებას საკმაო ბარიერების გადალახვა მოუხდა დასავლეთში “ნაცმოძრაობის” ძველი კავშირებიდან გამომდინარე, ჩვენ მიერ ქვეყნის დემოკრატიზაციისაკენ განხორციელებულმა ქმედებებმა და სახელისუფლებო წრეების მუშაობამ თავისი შედეგი გამოიღო და დასავლეთი დადებითადაა განწყობილი საქართველოს ამჟამინდელი ხელისუფლების მიმართ.
- როგორ აფასებთ “ქართული ოცნების” შანსებს საპარლამენტო არჩევნებში და აქვს თუ არა მას გამარჯვების შანსი?
- ვფიქრობ, საარჩევნო ყუთებთან მისული მოსახლეობა კიდევ ერთხელ გააცნობიერებს, რომ “ქართული ოცნების” ხელისუფლებამ კეთილსინდისიერად, მონდომებულად იმუშავა. შეიძლება ვერ შეასრულა ყველა ვალდებულება, მაგრამ გაიხსენებენ იმ ობიექტურ ვითარებასაც, რამდენად შესაძლებელი იყო და რატომ ვერ მოხდა ყველაფრის შესრულება და სწორ დასკვნას გამოიტანენ.
ყველა სხვა პოლიტიკურ ძალასთან შედარებით “ქართულმა ოცნებამ” გამოიჩინა მტკიცე პოლიტიკური ნება. გადაჭრა და მოაგვარა ბევრი მტკივნეული და მანამდე წარმოუდგენელად შესასრულებელი საკითხები – ჯანდაცვა, ბიზნესის თავისუფლება, ადამიანის უფლებები, პატიმრების მდგომარეობის გაუმჯობესება და სხვა. შესაბამისად, მოსახლეობა სწორად შეაფასებს ხელისუფლების სინდისიერებას, ხალხის კეთილდღეობისაკენ მიმართულ ძალისხმევებს და არა სხვა ხელისუფლებებისათვის დამახასიათებელ მოჩვენებითობას და არჩევანს “ქართული ოცნების” სასარგებლოდ გააკეთებს. მომავალი პარლამენტის შემადგენლობაში ვისურვებთ, რომ იყოს მეტი პარტია, რასაც მივესალმებით და ხელისუფლება ამას ხელს უწყობს. მაგრამ, დარწმუნებული ვარ, უმრავლესობაში “ქართული ოცნება” იქნება.
„რეზონანსი“, 05 მაისი, 2016 წელი
როგორია საქართველოში პარტიების დაფინანსების სისტემა
ელზა პაპოშვილი
არჩევნების მოახლოებასთან ერთად პარტიების დაფინანსების თემა აქტუალური ხდება და ისმის კითხვები, ვის ვინ და როგორ აფინანსებს. აუდიტის სამსახურის მიერ გამოქვეყნებულ ანგარიშს, რომელიც აპრილში პარტიების დაფინანსებას ეხება, პოლიტოლოგები აფასებენ და ამბობენ, რომ საქართველოში პარტიების დაფინანსების ოფიციალური მაჩვენებელი ხშირად რეალობას არ ასახავს.
ამის მიზეზი კი პოლიტიკური ორგანიზაციებისთვის არალეგალური გზით შემოსული ფულით დაფინანსებაა, სადაც წამყვანი პარტიების შემოსავლები გამჭვირვალე არ არის. ამიტომაც, ხშირად რეიტინგულ სამეულში ახლად აღმოცენებული პარტიებია, რომლებიც, მათგან განსხვავებით, საკუთარი შემოსავლების ლეგალიზაციას ცდილობენ.
სახელმწიფო აუდიტის თანახმად, მიმდინარე წლის აპრილში მიღებული შემოწირულობით პარტიებს შორის “საქართველოს პატრიოტთა ალიანსი” ლიდერობს. გასულ თვეში პარტიამ დაფინანსების სახით, ჯამში სულ 268 500 ლარი მიიღო. მის შემდეგ შემოწირულობის რაოდენობით “ქართული ოცნება – დემოკრატიული საქართველო” მოდის, რომელსაც აპრილში 149 020 ლარი ჩაერიცხა. მესამე ადგილს კი – 124 000 ლარით – ახალი პოლიტიკურ ცენტრი “გირჩი” იკავებს.
სხვა პარტიების მაჩვენებელი კი ასე გამოიყურება: “გაერთიანება ბედნიერი საქართველოსთვის” – 46 939 ლარი, “საქართველოს ქრისტიან-კონსერვატიული პარტია” – 9 000 ლარი, “საქართველოს მშვიდობისთვის” – 3 173 ლარი, “თავისუფალი საქართველო” – 1 364 ლარი, “რესპუბლიკური პარტია” – 1 131 ლარი, “ერთიანი ნაციონალური მოძრაობა” – 900 ლარი, “დემოკრატიული მოძრაობა – ერთიანი საქართველო” – 600 ლარი და “საქართველოს კონსერვატიული პარტია” – 120 ლარი.
აპრილში პოლიტიკურმა პარტიებმა სულ შემოწირულობის სახით, საერთო ჯამში, 604 747 ლარი მიიღეს.
აღსანიშნავია, რომ “პატრიოტთა ალიანსის” ყველაზე მსხვილი შემომწირველი მისივე წევრი, ვეტერანი ფეხბურთელი მანუჩარ მაჩაიძეა. ის ახლა საკრებულოს წევრია და პარტიას აპრილში 60 000 ლარი შესწირა.
პოლიტოლოგი და ანალიტიკოსი გია ხუხაშვილი ამბობს, რომ პარტიების დაფინანსების შესახებ წარმოდგენილი რეიტინგები ნომინალურია, რადგანაც ქართულ პოლიტიკურ სინამდვილეში უფრომეტად შავი ფული ტრიალებს და პარტიების ძირითადი ნაწილი არალეგალურად ფინანსდება, რომელიც ტრანზიტული და კრიმინალური გზით შემოდის.
“ხშირ შემთხვევაში პარტიებს ბიზნესები აფინანსებენ, მაგრამ, კანონის შეზღუდვიდან გამომდინარე, ეს ფული ჩრდილში გადის და შემდეგ ნომინალურ კერძო პირებზე ნაწილდება, რომელთა მეშვეობითაც უკვე პარტიებში მიდის.
“გადანაწილების ეს სისტემა თავისი არსით უკვე კრიმინალური ოპერაციაა, ეს ყველას კარგად ესმის, მაგრამ პარტიები ამაზე ჩუმად თანხმდებიან. ეს არის სისტემური დარღვევა, რომელზეც ხელს ფაქტობრივად საქართველოში არსებული ყველა პარტია აწერს. რა თქმა უნდა, გამონაკლისებიც არსებობს.
“გირჩის” შემთხვევა ძალიან საინტერესოა, რადგანაც, ჩემი აზრით, ეს პარტია მთელი თავისი შემოსავლების ლეგალიზაციას ახდენს. ისინი ცდილობენ, რომ მთლიანად კანონის მოთხოვნებს დაექვემდებარონ. სწორედ ამით არის განპირობებული, რომ ის რეიტინგების სამეულში მუდმივად ფიგურირებს,” – განაცხადა ხუხაშვილმა.
ანალიტიკოსი ამბობს, რომ წარმოუდგენელია, “გირჩს” უფრო მეტი დაფინანსება ჰქონდეს, ვიდრე “ნაციონალურ მოძრაობას”. რადგანაც წამყვან პარტიებს უფრო დიდი ინფრასტრუქტურა და ადამიანური რესურსი აქვთ, რომელთა შენახვაც გაცილებით მეტი ჯდება. ხუხაშვილის აზრით, პარტიების დაფინანსება იმ ტიპის კრიმინალია, რომელზეც ყველა თანხმდება და საერთო პარტიულ კონსენსუსს წარმოადგენს.
პოლიტოლოგი ვახტანგ ძაბირაძე აუდიტის მიერ წარმოდგენილ მონაცემებს ლოგიკურს უწოდებს და ამბობს, რომ გასაკვირი არაფერია, როდესაც ახალ პარტიებს უფრო მეტი დაფინანსება აქვთ, ვიდრე ძველებს, რადგანაც ისინი პოლიტიკურ არენაზე ახალი შემოსული არიან და გაცილებით მეტი სახსრები სჭირდებათ. ამიტომაც არის, რომ “პატრიოტთა ალიანსს” და “გირჩს” უფრო მეტი შემოწირულობა აქვთ, ვიდრე “ნაციონალურ მოძრაობასა” და “ქართულ ოცნებას”.
“როდესაც ახალი პარტიები პოლიტიკურ ასპარეზზე შემოსვლას და დამკვიდრებას იწყებენ, ბუნებრივია, რომ მათ პიარის კუთხით, ინფრასტრუქტურის და ადამიანური რესურსის შესაძენად მეტი ფინანსები სჭირდებათ, ვიდრე იმ პარტიებს, რომელთაც უკვე ორგანიზაციული სტრუქტურა აქვთ და ამ თვალსაზრისით წელში გამართული არიან. საწყის ეტაპზე, რა თქმა უნდა, “გირჩს” და “პატრიოტთა ალიანსს” უფრო მეტი ექნებათ.
“რაც შეეხება ადამიანებს, რომლებიც ამ პარტიებს აფინანსებენ, რა თქმა უნდა, მათ კონკრეტული ინტერესები გააჩნიათ. ხშირად ეს პირად ან ბიზნესინტერესებს უკავშირდება. საქართველოში არის ასევე სამეგობრო წრე, რომელსაც ასევე საკუთარი მიზნები აქვს. უანგაროდ არავინ არავის არ აფინანსებს,” – ამბობს ძაბირაძე.
———————–
„ახალი თაობა“, 04 მაისი, 2016 წელი
ინტერვიუ ნანა დევდარიანთან: „ოცნება“ ხმების 50%-ს ვერ აიღებს… თუმცა „ნაციონალებს“ ეს არ უშველის“
„ნაციონალური მოძრაობა“ რომ ბოტანიკური ბაღის ირგვლივ აჟიოტაჟს ქმნის, სულ არ მიკვირს. მაგათ რა აქვთ სალაპარაკო, ნახევარი საქართველო ისე გაასხვისეს, რომ სინანული ვერავის შევატყვეთ. სწორედ მათი მთავარი იდეოლოგი ამბობდა, რომ ყველაფერი უნდა გაიყიდოს, სინდისის გარდაო“, – აცხადებს გლობალური კვლევების ცენტრის ხელმძღვანელი ნანა დევდარიანი „ახალ თაობასთან“ ინტერვიუში.
- რადგან წინა ხელისუფლება ყიდდა, ამიტომ ახალმაც იგივე უნდა გაიმეოროს?
- რა თქმა უნდა, არა. გააჩნია, ვინ ამბობს ამას. ამას როდესაც ამბობენ ადამიანები, ვინც ადრეც გარემოს დაცვით იყვნენ დაკავებული, ადრეც ედარდებოდათ ეს გასხვისებული საქართველო, მაშინ გასაგებია, მაგრამ ნაციონალებისგან ეს ყოვლად მიუღებელია!
- წინასაარჩევნო პერიოდია და ხელისუფლება არ არის მომგებიან სიტუაციაში. უამრავ გაჭირვებულ ადამიანებს ხედავს საზოგადოება ტელევიზიით, ხალხი შიმშილობს. იმატა ამ ადამიანების რიცხვმა წინა წლებთან შედარებით?
- ადრე ხომ ჩვენ საბჭოთა პერიოდის ვრემიას გვაყურებინებდნენ! მარტო აღმშენებლობა რომაა ქვეყანაში და არავის რომ არ უჭირს და ყველაფერი რომ გადასარევად არის. ეს იგივე ხალხი არ არის, ვინც მაშინ ვერანაირ გაჭირვებას ვერ ხედავდა?! ხომ ყველას კარგად გვახსოვს, რომ ზაფხულში მთელი „რუსთავი-2“-ის საინფორმაციო შემადგენლობა ბათუმში გადადიოდა, რომ თან დაესვენათ და თან დეზინფორმაციები გაევრცელებინათ. ეს ხომ ყველას კარგად გვახსოვს?!
- იმის თქმა გინდათ, რომ აზვიადებენ და არც ასე ცუდადაა საქმე?
- გაჭირვებული ადამიანები მაშინაც იყო, დღესაც არის და საბჭოთა დროსაც იყო. თუმცა გააჩნია, შენი ამოცანა რა არის, დახატო სურათი, რომ ქვეყანაში გადასარევადაა ყველაფერი, თუ დახატო აპოკალიფსის სურათი, რომ ისეთი რაღაცა ხდება, რაც ჯერ არ მომხდარა. ამ გაჭირვებული ადამიანების გამოყენება უნდათ საარჩევნოდ! თორემ მაგათ გაჭირვებას მთელი ცხრა წელი ზედ არ უყურებდნენ ეგენი.
- „ნაციონალებმა“ აქციებს მოუხშირეს და გამოითქმის ვარაუდი, რომ საპროტესტო ტალღაზე კვლავ შეძლონ ხელისუფლებაში დაბრუნება. ამაზე რას იტყვით?
_ მაგათი დაბრუნების შანსი არ არსებობს! ეგენი რომ ეცდებიან დესტაბილიზაციას და აქედანვე ცდილობენ რევოლუციური სცენარის განვითარებას, ამას ყველანი ვხედავთ, მაგრამ 2003-ში ხალხი თუ ვერ ხვდებოდა რაღაცას, 2003-დან 2012-მდე ისე კარგად დაანახეს თავის სახე, რომ ამათ არავინ წაყვება ძალიან მცირე მხარდამჭერის გარდა. რევოლუცია რომ მოაწყო, ამისთვის შესაბამისი სიტუაცია უნდა იყოს ქვეყანაში. ვითარება უნდა იყოს. არ არის ეს რევოლუციური სიტუაცია. არჩევნებით კი ეგენი დღეს კი არა, ვერასოდეს აიღებენ უმრავლესობას. ამიტომ წავლენ უკიდურეს გამწვავებაზე, ყველაფერს იღონებენ, რომ მოხდეს დესტაბილიზაცია, მაგრამ ხელისუფლება იმისთვის არსებობს, რომ აღკვეთოს ასეთი მცდელობები!
- მაქსიმალურად ცდილობენ, ხაზი გაუსვან ქვეყანაში არსებულ მძიმე მდგომარეობას. ეს მათ წისქვილზე არ დაასხამს წყალს?
- მდგომარეობა მართლაც მძიმეა, მაგრამ ეს მაგათ რას უშველის?! ამით სხვის წისქვილზე ასხამენ წყალს, რადგან თუ მოვლენ, გაცილებით მეტი წარმომადგენლობით მოვლენ სხვა პარტიები, ვინც დღეს არასაპარლამენტო ოპოზიციაა.
- დაკარგავს “ოცნება“ უმრავლესობას?
- მთლიანობაში შესაძლოა 50% ვერ აიღოს და ალბათ ვერც აიღებს, მაგრამ ეს „ნაციონალებს“ არ უშველის და მათ წარმომადგენლობას არ გაზრდის პარლამენტში, რადგან შევლენ სხვა პოლიტიკური ძალები. იმის შემდეგ, რაც კოალიციის წევრი პარტიები ცალ-ცალკე გადიან, „ქართულ ოცნებას“, რა თქმა უნდა, ყველა დანარჩენზე მეტი შანსი აქვს.
- კოალიციაში მყოფი დანარჩენი პარტიები ვერ გადალახავენ ბარიერს?
- გარკვეული შანსები აქვს რესპუბლიკურ პარტიასაც, რადგან ამ სამ წელიწადნახევარში ძალიან განიმტკიცეს მდგომარეობა, როგორც ცენტრალურ ხელისუფლებაში, ისე ადგილებზე. ირაკლი ალასანიას რამდენიც არ უნდა დაუწეროს ენდიაიმ და აირაიმ, ძალიან სათუოა, რომ შეძლოს ბარიერის გადალახვა. რეალური პრეტენდენტები არიან პატრიოტთა ალიანსი და ბურჯანაძის კოალიცია.
- რესპუბლიკურ პარტიას ყოველთვის დაბალი მაჩვენებელი ჰქონდათ და რის ხარჯზე უნდა ჰქონდეს წარმატების იმედი? მინისტრის პორტფელები უშველით?
- რა თქმა უნდა, უშველით! ესეც ადმინისტრაციული რესურსია. ასევე ადგილებზეც, ადგილობრივ თვითმმართველობაშიც კარგი პოზიციები აქვთ. თუმცა ეს არ ნიშნავს, რომ ისინი სერიოზული ძალით შევლენ პარლამენტში, აქ ბარიერის გადალახვაზეა საუბარი.
- ანუ პარლამენტს გარეთ არ დარჩებიან?
- მე ვამბობ, რომ აქვთ შანსი, თუმცა ყველაფერი წყდება არჩევნების დღეს. ჯერ წინ მთელი წინასაარჩევნო პროცესია და ვნახოთ, რა და როგორ იქნება. ძალიან ბევრი ამომრჩეველი ბოლო დღეს იღებს გადაწყვეტილებას. კვლევების მიხედვითაც ჩანს, რომ საკმაოდ მაღალი პროცენტია, რომელსაც ჯერ არ მიუღია გადაწყვეტილება, ვის მისცემს ხმას.
- საუბარია, რომ არჩევნებამდე რესპუბლიკელი მინისტრები დატოვებენ თანამდებობას. ამაზე რას იტყვით?
- არა მგონია, იმიტომ, რომ იმ მომენტმა ჩაიარა, როცა ეს შეიძლებოდა მომხდარიყო. როგორც ჩანს, შეთანხმდნენ იმაზე, რომ არჩევნებამდე ასეთი ცვლილებები არ იქნება. თუმცა, თუ სიტუაცია დაიძაბა, ხანდახან ხდება, რომ ხელისუფლება იძულებულია, რაღაც ნაბიჯები გადადგას, რომ აჩვენოს საკუთარი ქმედუნარიანობა. არც ეს არ არის გამორიცხული, მაგრამ ამ ვითარებაში ეს არ ჩანს. დღეს სხვა გარემოა, სხვა არჩევანია. 2012-ში იყო ან „ნაციონალები“, ან „ოცნება“, მაშინ შუა გაიკრიფა. დღეს ასე აღარ არის. პირიქით, დღეს შუა არის მოღონიერებული და განსაზღვრავს შემდეგი პარლამენტის კონფიგურაციას.
- დავა მიდის იმის თაობაზე, როდის დაიწყოს წინასაარჩევნო კამპანია, 3 თუ 5 თვით ადრე. მოუწოდებენ პრეზიდენტს, რომ გადახედოს საკუთარ დადგენილებას. რას ფიქრობთ თქვენ, როგორც ცესკოს ყოფილი თავმჯდომარე?
- სიტყვა არის ჩიტივით. უკვე ითქვა და გაფრინდა. მორჩა, წინასაარჩევნო რეჟიმი უკვე ჩართულია! ახლა რასაც არ უნდა გადახედო, არაფერი შეიცვლება. პარტიების აქტივობიდანაც ჩანს, რომ უკვე დაწყებულია წინასაარჩევნო კამპანია. საერთოდ, ამას არ წყვეტს ხოლმე რომელიმე ერთი თანამდებობის პირის განცხადება. როდესაც რამდენიმე თვეა დარჩენილი არჩევნებამდე, წამმზომი არის ჩართული და ყველა ცდილობს, რომ საარჩევნო ბრძოლაში საკუთარი განაცხადი გააკეთოს. ისედაც ვიცით, რომ ოქტომბერში არჩევნებია და 6 თვით ადრე სამზადისს ყველა იწყებს. 8-ში იქნება, 12-ში თუ 28-ში, ეს არაფერს ცვლის!
„ახალი თაობა“, 04 მაისი, 2016 წელი
ინტერვიუ მურმან დუმბაძესთან: „ირაკლი ღარიბაშვილის პრემიერობა ლეონიდ ჩერნოვეცკის შეეწირა“
რა შეთანხმება შედგა ბიძინა ივანიშვილსა და ლეონიდ ჩერნოვეცკის შორის, ვინ და რა შარში გახვია ირაკლი ღარიბაშვილი, რატომ არ შეიძლება „ნაციონალებთან“ და „ქართულ ოცნებასთან“ თანამშრომლობა? – ამ თემებზე „ახალ თაობას“ პარლამენტის ვიცე-სპიკერი მურმან დუმბაძე ესაუბრება.
- რამდენიმე თვის წინ ჩვენთან საუბარში განაცხადეთ, რომ სადღაც აპრილის თვეში პარტიის “ბედნიერი საქართველოსთვის“ ფორმირება დასრულდებოდა. აპრილი ისე გავიდა, ეს პროცესი არც დაწყებულა და, როგორც ამბობენ, არც დაიწყება. იმასაც ამბობენ, რომ აღარც თქვენ ხართ ამ პარტიაში. რა ხდება?
- როცა კიევის ყოფილმა მერმა ლეონიდ ჩერნოვეცკიმ განაცხადა, რომ ის ქართულ პოლიტიკაში მოსვლას და პარტიის შექმნას აპირებდა. ამ განცხადებიდან ძალიან მალე ჩვენ შორის შედგა შეხვედრა. რამაც, როგორც ჩანს, ძალიან ააღელვა ბიძინა ივანიშვილი. ამ ამბავს არ გავახმაურებდი, თავად ლეონიდ ჩერნოვეცკის რომ არ გაეხმაურებინა. ამ შეხვედრის შემდეგ კიევის ყოფილმა მერმა საარჩევნო კამპანია რადიკალურად შეცვალა. ის ფიქრობს, რომ ამ არჩევნებზე მარტო გამოვა. პარტია „ბედნიერი საქართველოსთვის არის მხოლოდ სახელი და მეტი არაფერი. ის კენჭისყრას ქობულეთის რაიონში აპირებს. არ ვიცი, რაზე შეთანხმდა ორი მდიდარი კაცი, მაგრამ მეჩვენება, რომ ერთმანეთს ეთამაშებიან. ეს თამაში არც ერთ მათგანს არ მოუტანს სასურველ შედეგს. ლეონიდ ჩერნოვეცკი შეეცდება, ქობულეთში რაღაც შედეგი დადოს. ამასთან, აუცილებლად უნდა ახსოვდეს, რომ “ქართულ ოცნებას“ მისთვის მისაცემი ხმა არ აქვს.
- თქვენ თქვით, რომ ბიძინა ივანიშვილთან შეხვედრის შემდეგ კიევის ყოფილმა მერმა საარჩევნო სტრატეგია შეცვალა. თქვენთან თუ ჰქონდა ამ თემაზე საუბარი და რითი ახსნა ეს ყველაფერი?
- მას შემდეგ, რაც ის ბიძინა ივანიშვილს შეხვდა, ჩვენ შორის ურთიერთობა აღარ ყოფილა. შესაბამისად, არანაირი განმარტება არ მიმიღია და არც ის ვიცი, რაზე მოილაპარაკა მან ბიძინა ივანიშვილთან. რადგან მან პარტიის მშენებლობა და ჩემთან თანამშრომლობა აღარ გააგრძელა, რაღაც დასკვნის გაკეთება ძნელი საქმე არ არის.
- ფიქრობთ, რომ ლეონიდ ჩერნოვეცკისთან თქვენი თანამშრომლობა ბიძინა ივანიშვილმა ჩაშალა?
- მოდით, ამ პროცესს ჩაშლას ნუ დავარქმევთ, ეს უფრო იყო დაშლა.
- ამ შეხვედრამდე ლეონიდ ჩერნოვეცკისთან სამომავლო გეგმები უკვე შეთანხმებული გქონდათ?
- ჩვენ შევთანხმდით, რომ პარტიულ სტრუქტურებს მთელი ქვეყნის მასშტაბით შევქმნიდით. დავიწყეთ ისეთი ადამიანების მოძიება, რომლებიც ბოლო 25 წლის მანძილზე საზოგადოებრივ საქმიანობაში აქტიურად ჩანდნენ. ლეონიდ ჩერნოვეცკისთან შეხვედრაზე სერიოზული გეგმა დავსახეთ, მაგრამ მერე გამოჩნდა ბიძინა ივანიშვილი და ყველაფერი შეიცვალა. შესაძლოა, ლეონიდ ჩერნოვეცკი დაარწმუნეს, რომ ის ქობულეთის მაჟორიტარი გახდება, მაგრამ ეს იოლი საქმე არ იქნება. მას „ქართული ოცნება“ სერიოზულ წინააღმდეგობას გაუწევს. იმისთვის, რომ არჩევნები მოიგო, საჭიროა, გვერდით გამოცდილი გუნდი გყავდეს. მას ჰგონია, რომ საქველმოქმედო საქმიანობა, რასაც ის ეწევა, პარლამენტში შესვლაში დაეხმარება, რაც ასე ნამდვილად არ არის. მას წინ სერიოზული კონკურენცია ელოდება.
- თქვენ თუ აპირებთ მისთვის კონკურენციის გაწევას?
- მე ვრჩები პოლიტიკაში. შესაბამისად, ვერავის დავპირდები, რომ კონკურენციას არ გავუწევ. თავის დროზე „ახალ თაობასთან“ საუბარში კარგად ავხსენი, თუ რატომ დავთანხმდი ჩერნოვეცკისთან თანამშრომლობას. ახლაც გავიმეორებ, რომ ის ელექტორატის თვალსაზრისით ვერაფრით დამეხმარებოდა. ამ შემთხვევაში მნიშვნელობა ჰქონდა მის ფინანსებს. საქართველოში პოლიტიკური პარტიების უმრავლესობა იმიტომ არის სუსტი, რომ დაფინანსება არ გააჩნია. პოლიტიკურ საქმიანობას ფული სჭირდება. ამ შემთხვევაში ჩერნოვეცკი გამოსადეგი კაცი იქნებოდა. პოლიტიკის წარმოების თვალსაზრისით კი ჩვენ გვქონდა უზარმაზარი გამოცდილება, რაზეც კიევის ყოფილმა მერმა უარი თქვა. ამის მიუხედავად, ჩვენ ყველგან გვეყოლება საკუთარი კანდიდატები.
- ახალი პარტიის შექმნას აპირებთ თუ ვინმესთან გაერთიანდებით?
- ამ ეტაპისთვის არც ერთ პარტიასთან არ ვთანამშრომლობ. ამის მიუხედავად, მე და ჩემი გუნდი ვრჩებით პოლიტიკაში და მზად ვართ ნებისმიერ პარტიასთან ვითანამშრომლოთ, რომელიც ორ პირობას შეასრულებს. პირველი, ეს პოლიტიკური გუნდი არ უნდა თანამშრომლობდეს „ნაციონალურ მოძრაობასთან“ და მეორე – ამ გუნდში ან კოალიციაში არ უნდა იყოს შესული „ქართული ოცნება“. „ქართული ოცნება“ 3,5 წელია, რაც ხელისუფლებაში მოვიდა. ამ პერიოდმა დაამტკიცა, რომ მას და ყოფილ ხელისუფლებას შორის დიდი განსხვავება არ არის. ერთი წუთით დავუშვათ, რომ „ქართულმა ოცნებამ“ 2016 წლის არჩევნებში უმრავლესობა მოიპოვა. ასეთ შემთხვევაში გარწმუნებთ, რომ ერთი წლის შემდეგ ის ერთი-ერთში დაემსგავსება „ნაციონალურ მოძრაობას“. ასპარეზზე გამოჩნდა რამდენიმე ახალი პარტია და ალბათ მომავალშიც გამოჩნდებიან. მეჩვენება, რომ ისინი თანამშრომლობენ „ქართულ ოცნებასთან“.
- მხედველობაში გირჩები და პაატა ბურჭულაძე გყავთ?
- მეჩვენება, რომ ყველა ახალი ძალა ხელისუფლებასთან არის ალიანსში. ბიძინა ივანიშვილი არის ძალიან მდიდარი კაცი და მას ყველაფრის ყიდვა შეუძლია.
- ამით რისი თქმა გინდათ?
- შექმნილი სიტუაციიდან ჩანს, რომ ის პოლიტიკურ პარტიებსაც ყიდულობს.
- ლეონიდ ჩერნოვეცკიც იყიდა?
- კიევის ყოფილ მერზე ვერ ვიტყვი, რომ იყიდა. ის თავადაც მდიდარი ადამიანია და ბიძინა ივანიშვილის ფული არ სჭირდება. ის ფაქტი, რომ ჩვენი თანამშრომლობა აღარ გაგრძელდა, მიუთითებს იმაზე, რომ ბიძინა ივანიშვილს შეუძლია, ინდივიდები და პოლიტიკური ლიდერები გადაიბიროს. ხანმოკლე ურთიერთობის მიუხედავად, კარგად შევისწავლე ლეონიდ ჩერნოვეცკი. ის ქართულ პოლიტიკაში ღრმად არის ჩახედული და ბევრი რამე სიღრმისეულად იცის. მას არ მოსწონს ავტორიტარიზმი და, შესაბამისად, არასდროს გახდება „ნაციონალების“ მხარდამჭერი. ამასთან, დარწმუნებული ვარ, რომ არც ბიძინა ივანიშვილი მოსწონს დიდად.
- აბა, რატომ დათანხმდა მას?
- ნუ გვავიწყდება რომ ლეონიდ ჩერნოვეცკი მხოლოდ პასპორტით არის საქართველოს მოქალაქე. ის საქართველოში რომ დაბადებულიყო, ან დიდი ხნის წინ ჩამოსულიყო, თავისი ფინანსური რესურსებით გაცილებით მეტი შესაძლებლობა ექნებოდა. და რახან ახლა ეს მოქალაქეობა პრეზიდენტმა უბოძა, ფრთების მეტად გაშლას ვერ შეძლებდა.
- მოდით, ისევ თქვენს სამომავლო გეგმებს დავუბრუნდეთ. თუ ვერ იპოვეთ ღირსეული პოლიტიკური პარტნიორი, მაინც მიიღებთ არჩევნებში მონაწილეობას?
- პოლიტიკიდან არსად ვაპირებ წასვლას და არც „ქართულ ოცნებას“ მივცემ მოსვენებას. ჩემი ჰობია გამარჯვება. გამარჯვებულთან ყოფნა დიდად არ მხიბლავს. წინასწარ რამის თქმა ახლა გამიჭირდება, მაგრამ მგონია, რომ დამარცხებულ პარტიებთან ვითანამშრომლებ. საუბარი მაქვს იმ პარტიებზე, რომლებიც ოპოზიციაში არიან როგორც მოქმედ, ასევე ყოფილ ხელისუფლებებთან. ასეთ ხალხს შევეხიდები და დავეხმარები, რომ ხელისუფლებაში მოვიდეთ.
- ერთ-ერთ ინტერვიუში გვითხარით, რომ 22 წელი იყავით რესპუბლიკური პარტიის წევრი. შემთხვევით, მათთან ხომ არ აპირებთ დაბრუნებას?
- ნამდვილად დიდი ხანი ვიყავი ამ პარტიის წევრი. მათთან ურთიერთობა არასდროს გამფუჭებია, მიუხედავად იმისა, რომ პარტიიდან გამრიცხეს. ამ ადამიანებს დღესაც პატივს ვცემ, მაგრამ მათთან არ დავბრუნდები. ასეთი ნაბიჯის გადადგმა ჩემს პოლიტიკურ ბიოგრაფიას დააზარალებს. ჩემთვის დაბრუნება არც რესპუბლიკელებს შემოუთავაზებიათ. ერთი რამეც იცოდეთ, იმისთვის, რომ არსებული ხელისუფლება დავამარცხო, მზად ვარ, ნებისმიერ ძალასთან ვითანამშრომლო.
- მათ შორის რესპუბლიკელებთანაც?
- ოპოზიციაში მყოფ ნებისმიერ პარტიასთან მზად ვარ სათანამშრომლოდ.
- პატრიოტთა ალიანსთან და ნინო ბურჯანაძის პარტიასთან თუ გქონდათ რაიმე კონსულტაციები?
- ყველა პოლიტიკური პარტიის ლიდერთან ნორმალური და კარგი ურთიერთობა მაქვს. ამ ორ ძალასთან თანამშრომლობას არ გამოვრიცხავ. საამისოდ უნდა დამარწმუნონ, რომ არც ნაციონალებთან და არც „ოცნებასთან“ ალიანსში არ იქნებიან. თანამშრომლობა არ ნიშნავს რომელიმე პარტიაში შესვლას. ვერავისთან თუ ვერ შევთანხმდი, არც ეგ არის პრობლემა. არსებობს დამოუკიდებელი მაჟორიტარის ცნება. მეც დამოუკიდებლად ვიყრი კენჭს ბათუმში. მაჟორიტარებთან დაკავშირებით მთელ რიგ პარტიებთან მოგვიწევს დალაპარაკება.
- ზემოთ ახსენეთ პარტიები, რომლებიც, თქვენი თქმით, სამომავლოდ შეიქმნებიან. როგორც ამბობენ, ახალი პარტიის შექმნას აპირებს ყოფილი პრემიერი ირაკლი ღარიბაშვილი. მასთან თუ ითანამშრომლებთ?
- მართალია, პოლიტიკაში დიდი ხანია ვარ, მაგრამ დიპლომატიური ენა ჩემთვის ცოტა უცხოა და ამჯერადაც პირდაპირ ვიტყვი სათქმელს. ყოფილ პრემიერს პოლიტიკაში დაბრუნების არავითარი შანსი არა აქვს.
- რატომ არ აქვს ამის შანსი?
- იმიტომ, რომ ის არ არის პოლიტიკური ფიგურა, მიუხედავად იმისა, რომ ის იყო შს მინისტრი და პრემიერი. ამის გარდა, ის არასდროს ყოფილა დამოუკიდებელი. ირაკლი ღარიბაშვილი დამოუკიდებლად ვერც ერთ გადაწყვეტილებას ვერ ღებულობდა. არ გამოვრიცხავ, მაინც გადაწყვიტოს დაბრუნება, მაგრამ მე მასთან არ ვითანამშრომლებ. რაღაც დროის მანძილზე ჩვენ ერთ პარტიაში ვიყავით და ხშირად ვკამათობდით.
- რამდენად ხშირად?
- კვირაში ორჯერ მაინც. „ქართული ოცნებიდან“ ჩემი წამოსვლის მიზეზიც სწორედ ეს გახდა.
- რაზე კამათობდით ყოფილ პრემიერთან?
- კამათი ძირითადად იმ თემებზე მიდიოდა, რომლებმაც „ქართული ოცნება“ და ქვეყანა ამ მდგომარეობამდე მიიყვანა. საუბარია ნაციონალებთან კოაბიტაციაზე. თანამდებობებზე ინიშნებოდა ისეთი ხალხი, რომლებიც რეჟიმს კი არ ემსახურებოდნენ, არამედ რეჟიმში დამნაშავეები იყვნენ. ასე რომ, მასთან თანამშრომლობა გამორიცხულია. აქვე ერთ საინტერესო დეტალსაც გავახმაურებ – ირაკლი ღარიბაშვილს თანამდებობის დატოვება ლეონიდ ჩერნოვეცკის პოლიტიკაში მოსვლის გამო მოუწია.
- რა შუაში იყო ირაკლი ღარიბაშვილი მის პოლიტიკაში მოსვლასთან ან რატომ უნდა წასულიყო მის გამო?
- ამ თემაზე ბევრი სკანდალური ინფორმაცია ვიცი, მაგრამ ამ ეტაპზე ამის მეტს არაფერს ვიტყვი. ირაკლი ღარიბაშვილი იმ დროს გადადგა, როცა ჩვენ საარჩევნო სიის ათეულზე ვმუშაობდით. შემდეგ კიევის ყოფილ მერს ბიძინა ივანიშვილი შეხვდა და მან სტრატეგია შეცვალა.
„ახალი თაობა“, 04 მაისი, 2016 წელი
ინტერვიუ ნუგზარ მალაღურაძესთან: „ნაციონალურ მოძრაობას“ ბიძინა ივანიშვილთან პირადი მტრობა აქვს”
დედაქალაქის საკრებულოს სარევიზიო კომისიის თავმჯდომარე ნუგზარ მალაღურაძე „ახალ თაობასთან“ ინტერვიუში ბოტანიკური ბაღის მიმდებარე 29 ჰექტარი მიწის ნაკვეთის ირგვლივ განვითარებულ მოვლენებს ნაციონალური მოძრაობის წინასაარჩევნო კამპანიის ნაწილად თვლის.
- ბატონო ნუგზარ, „ნაციონალური მოძრაობა“ ითხოვს, რომ პარლამენტში გაიმართოს აღნიშნულ საკითხზე მოსმენა, მათ გარემოს დაცვის მინისტრიც დაიბარეს. ასევე ისინი საკრებულოს საგანგებო სხდომის მოწვევას ითხოვენ. როგორ შეიძლება მოვლენები განვითარდეს, აპირებთ სხდომის მოწვევას?
- როდესაც ბოტანიკურ ბაღს ახსენებენ, ეს არის როგორც ორიენტირი და არა ბოტანიკური ბაღის ტერიტორია, ასეთ ორიენტირად ჩვენ შეგვიძლია ვთქვათ მთაწმინდის პარკი. აღნიშნული ტერიტორიის გასხვისება სახელმწიფოს მიერ კანონის სრული დაცვით მოხდა. არ აქვს მნიშვნელობა, ვინ იყიდდა იმ ტერიტორიას, ეს იქნებოდა ივანიშვილი თუ მალაღურაძე, ვინაიდან კანონის ფარგლებში მოხდა ყველა პროცედურა და არაფერი დარღვეულა. ეს არის „ნაციონალური მოძრაობის“ მიერ დაწყებული წინასაარჩევნო კამპანიის ნაწილი და სწორედ ამ კონტექსტში მოქმედებს ნაციონალური მოძრაობა. ნაციონალურმა მოძრაობამ ვერ მოინელა, 2012 წელს ქართველმა ხალხმა და ბიძინა ივანიშვილმა არჩევნებში სრულიად სამართლიანად რომ დაამარცხა. ვერ მოინელეს, რომ ხელისუფლებას ჩამოშორდნენ. მთელი 9 წელი მათ საკუთარ კანტორად ჰქონდათ მთელი ქვეყანა.
- მხოლოდ ეს არის მიზეზი?
- რა თქმა უნდა. წინააღმდეგ შემთხვევაში, სახელმწიფო როდესაც ყიდის, მაგალითად, ნაკვეთს, რადგან ყველაფერს თვითონ ვერ მოუვლის, და როდესაც კერძო სექტორი შემოჰყავს, ამით ივსება ბიუჯეტი, ამით იქმნება სამუშაო ადგილები, ამით ვითარდება ინფრასტრუქტურა, ქალაქი და მისი მიმდებარე ტერიტორია. სახელმწიფოს მიერ ტერიტორიების, მიწის ნაკვეთების აუქციონზე გატანა კანონდარღვევა არ არის, ეს არ არის ცუდი, რადგან კერძო სექტორმა უნდა განავითაროს ინფრასტრუქტურა, უნდა შექმნას სამუშაო ადგილები და ა.შ. ეს არ არის ახალი ამბავი. გამაგებინეთ, რა შუაშია აქ ბოტანიკური ბაღი!
- იმ აუქციონზე, სადაც იყო ეს მიწის ნაკვეთი გატანილი, მხოლოდ ერთი კომპანია იღებდა მონაწილეობას. ეს რამდენად სამართლიანია?
- მითხარით მექანიზმი, როგორ უნდა აიძულო სხვა კომპანიები, რომ აუქციონში მიიღონ მონაწილეობა, რომ მხოლოდ ერთი კომპანია არ იყოს წარმოდგენილი?! ასეთი მექანიზმი უბრალოდ არ არსებობს. აუქციონი გამოცხადდა და მასში მიიღო კომპანიამ მონაწილეობა.
- „ნაციონალური მოძრაობა“ თუ წინასაარჩევნო პიარისთვის იყენებს ამ თემას, რატომ არ ხდება სრულყოფილი განმარტებები, თუნდაც საკრებულოს სხდომის მოწვევა, რომ მოსახლეობისთვის გასაგები გახდეს, რომ იქ არავითარი კითხვის ნიშნები არ არის?
- მეტი რა განმარტებები უნდა გაკეთდეს, ყველაფერი არის ნათელი. გეუბნებით, რომ არავითარი კანონი არ დარღვეულა. თბილისის მერმა გააკეთა განმარტება, ასევე მთავრობის სხვა წევრებმა, მეტი რა განმარტება უნდა გაკეთდეს. სისულელეებზე საკრებულოს სხდომას არ მოვიწვევთ. მე, მაგალითად, მხარს არ დავუჭერ სხდომის მოწვევას, რადგან სისულელედ მიმაჩნია ამ საკითხზე სხდომის მოწვევა. არავითარი არგუმენტი და საფუძველი სხდომის მოწვევის არ არსებობს. ყველა კითხვაზე ადეკვატური პასუხი გაცემულია.
- ადეკვატური იყო ეს განმარტებები?
- როგორ არ იყო, ისევ გეუბნებით, რას ნიშნავს ადეკვატური იყო?! ვინ უნდა შეაფასოს, იყო თუ არ იყო ადეკვატური. რა განცხადებებიც არ უნდა გაკეთდეს და როგორადაც არ უნდა დაამტკიცო, რომ არავითარი კანონი აქ არ დარღვეულა, ნაციონალურ მოძრაობას პირადი მტრობა გააჩნია ბიძინა ივანიშვილისადმი. ისინი გაბრაზებულები არიან და ამიტომ ყველაფერს იკადრებენ, მაგრამ ყველაფრის მკადრებლებზე საზოგადოებას აქვს თავისი შეხედულება. მათ ვერ მოინელეს, რომ არჩევნებში დამარცხდნენ.
- „ნაციონალური მოძრაობის“ გარდა, არასამთავრობო ორგანიზაციებიც აპროტესტებენ და აცხადებენ, რომ აქციებს გამართავენ. ამას როგორ ხსნით?
- არასამთავრობო ორგანიზაციების ერთი ნაწილი არის ამა თუ იმ პარტიების სატელიტები. ეს არის ფაქტი, სამწუხარო რეალობა. ცხადია, ეს არ ეხება ყველას.
- „ნაციონალური მოძრაობა“ აცხადებს, რომ საპარლამენტო არჩევნებში „ქართულ ოცნებას“ დაამარცხებს…
- ნეტარ არიან მორწმუნენი. „ნაციონალურ მოძრაობას“ მთელი ამ ხნის მანძილზე არაფერი შეუცვლია, მათ ისევ ისე ტყუილზე ააგეს, როგორც სჩვევიათ. ტყუილის ტირაჟირებით იგივე რეჟიმში აგრძელებენ, არადა ვერ ხვდებიან, რომ ქართველმა ხალხმა ტყუილში ცხოვრების გზა უკვე გაიარა და აღარასდროს იქ აღარ დაბრუნდება. თავისუფლების იმ ხარისხს, რომელიც ხალხმა მოიპოვა, არასდროს დათმობს.
- ბატონო ნუგზარ, კონკრეტული ტერიტორია, რომელიც აუქციონზე გავიდა, ბოტანიკური ბაღის შემადგენლობაში არ იყო?
- აუქციონზე რაც გავიდა, ის ტერიტორია ბოტანიკურ ბაღს არ ეკუთვნის და არც არასდროს ეკუთვნოდა.
„ახალი თაობა“, 04 მაისი, 2016 წელი
ინტერვიუ კახა კუკავასთან: „არც ნაცები, არც ქოცები!“
როგორც ოპოზიციონერმა საგანგებოდ გამართულ ბრიფინგზე განაცხადა, დღეს ამ ქვეყანას ორი პრობლემა აქვს: ეს არის „ნაციონალური მოძრაობის“ და „ქართული ოცნების“ დანაშაულებრივი ჯგუფების თანამშრომლობა. ქვეყნისთვის მთავარი ამოცანა არის ის, რომ ოქტომბრის საპარლამენტო არჩევნებისთვის მიხეილ სააკაშვილი და ბიძინა ივანიშვილი ჩამოსცილდნენ ქართულ პოლიტიკას.
- ფიქრობთ, რომ ამას გაერთიანებული ოპოზიცია შეძლებს?
- ყველა ბოლო გამოკითხვა და ბოლო არჩევნები ამას აჩვენებს, რომ ცალკე აღებულ არც ერთ არასაპარლამენტო პარტიას არ ძალუძს, დაამარცხოს ან ერთი, ან მეორე პოლიტიკურ ძალა. ამის მიღწევა შეიძლება მხოლოდ ერთიანობით. მიუხედავად იმისა, რომ ამის შესახებ ბევრი ზოგადი საუბრები მიდის, ჯერჯერობით კონკრეტული შედეგები არ ჩანს. ამიტომაც, ჩვენ, „თავისუფალ საქართველოს“, გვსურს მივმართოთ კონკრეტული წინადადებით არასაპარლამენტო პარტიებს.
- რას შეიცავს ეს წინადადებები, რას ითხოვთ?
- ჩამოყალიბდეს საარჩევნო ბლოკი, რომელშიც შევლენ კონკრეტული პოლიტიკური პარტიები. განვაცხადოთ ღიად, რომ არ ვაპირებთ თანამშრომლობას არც „ოცნებასთან“, არც ნაციონალებთან და არც მათ ნარჩენებთან!
- მათი ნარჩენები ვინ არიან?
- თქვენ იცით, რომ როგორც „ნაციონალურ მოძრაობას“, ისე „ოცნებას“ გამოეყო მთელი რიგი პოლიტიკური პარტიები, რომლებიც ახლა ცდილობენ, თავი დაიმკვიდრონ, როგორც ოპოზიციურმა ძალებმა. თუმცა ჩვენ მივიჩნევთ, რომ ისინი სრულად იზიარებენ პასუხისმგებლობას სააკაშვილის და ივანიშვილის რეჟიმების საქმიანობაზე და ამიტომ მათთან თანამშრომლობა არასაპარლამენტო პარტიების მხრიდან უნდა გამოირიცხოს!
- რამდენად წამოვა არასაპარლამენტო ოპოზიცია გაერთიანებაზე? კვოტები ყოველთვის სერიოზულ პრობლემას ქმნის ასეთ დროს...
- დიახ, ყოველთვის მიდიოდა ხოლმე ვაჭრობა სიაში კვოტებზე, ამიტომ ჩვენ ვთავაზობთ ყველა პარტიას, სიაში კვოტები გადანაწილდეს უკანასკნელ არჩევნებში ნაჩვენები შედეგების მიხედვით.
- ეს როგორ?
- ვინც მიიღო 10%, ბუნებრივია, ის მიიღებს მეტ ადგილს სიაში, ვინც მიიღო 3%, და 4%, ის მიიღებს ნაკლებს. ასევე მაჟორიტარ კანდიდატებთან დაკავშირებით, ჩვენ ვთავაზობთ არასაპარლამენტო ოპოზიციას, ჩავატაროთ პრაიმერიზი და ყველა საარჩევნო ოლქში გამოვავლინოთ ყველაზე რეიტინგული კანდიდატები. ეს არის ის კონკრეტული საკითხები, რომელთა მიღწევის შემთხვევაშიც, ჩვენ შევძლებთ, ოქტომბერში დავამარცხოთ ნაციონალური მოძრაობა და “ქართული ოცნება“.
- თუკი არ წამოვა ამაზე არასაპარლამენტო ოპოზიცია?
- წინააღმდეგ შემთხვევაში, ყველა პარტია, რომელიც უარს იტყვის არასაპარლამენტო პარტიების გაერთიანების გეგმაზე და თავისი 0%-იანი ბარიერის გასაძლიერებლად, ცალკე გააგრძელებს პოლიტიკურ საქმიანობას, ნებსით თუ უნებლიეთ, წყალს დაასხამს ივანიშვილის წისქვილზე. წყალს დაასხამს იმაზე, რომ „ქართულმა ოცნებამ“ კიდევ ოთხი წლით გაიგრძელოს თავისი საქმიანობა და ნაციონალურმა მოძრაობამ კიდევ ოთხი წლით შეინარჩუნოს მთავარი ოპოზიციური ძალის სტატუსი. ამ გეგმაზე პასუხი იქნება ლუსტრაცია, ვინ არის დღეს საქართველოში რეალური ოპოზიცია და ვინ არის ხელისუფლების სატელიტი!
„ახალი თაობა“, 04 მაისი, 2016 წელი
ინტერვიუ ნოდარ ნათაძესთან: „პრორუსული რევანში არ გამოვა… რუსეთმა საქართველოში თავისი აგენტურა სრული შემადგენლობით აამოქმედა“
სახალხო ფრონტის ლიდერი ნოდარ ნათაძე „ახალ თაობასთან“ ინტერვიუში აღნიშნავს, რომ ყველაფერი კეთდება მომავალ პარლამენტში ახლანდელი კონფიგურაციის შესანარჩუნებლად. „ნაციონალური მოძრაობაც“ და „ქართული ოცნებაც“ რუსულ საქმეს აკეთებენ. რუსეთისთვის მნიშვნელოვანია, რომ მომავალი პარლამენტიც თავისი ძალებით დააკომპლექტოს. ამიტომ, მთელი ძალისხმევა მიმართულია იქით, რომ შემდეგი საკანონმდებლო ორგანოც ნაცქოცური იყოს. ამ ორ ძალას შორის სხვაობა იმაშია, რომ ნაციონალებს ხალხის სისხლში აქვთ ხელი გასვრილი, „ოცნებას“ სისხლიანი დანაშაულები არ ჩაუდენია”, – ამბობს ნოდარ ნათაძე.
- ბოლოდროინდელი სოციოლოგიური კვლევებით, ნაციონალური მოძრაობის რეიტინგი გაუტოლდა „ქართული ოცნების“ რეიტინგს. ამ მხრივ ენდიაისა და აირაის მონაცემები ერთმანეთს ჰგავს...
- „ენდიაი“-ს თბილისის ოფისის წინა წლების საქმიანობას თუ გავიხსენებთ, დავრწმუნდებით, რომ მისი ციფრების ნდობა შეუძლებელია. ვინც მსგავს მონაცემებს აქვეყნებს, არც ისაა სანდო. ჩემს ხელთ არსებული სარწმუნო ინფორმაციით, 2012 წელს „ნაციონალურ მოძრაობას“ 12% ჰქონდა, მაგრამ 40% გაუფორმეს. ახლაც წამატებულია „ნაციონალური მოძრაობის“ რეიტინგები. რუსეთს მარტო ამ ორი ძალის მოსვლა კი არ უნდა, ის სხვანაირადაც არის გააქტიურებული.
- რა გაქვთ მხედველობაში?
- რუსეთმა აამოქმედა თავისი აგენტურა. თანაც, სრული შემადგენლობით. ედუარდ შევარდნაძის მმართველობის მიწურულს გააქტიურებული იყო რუსეთის აგენტურის 40%, ახლა ეს ციფრი თითქმის 100%-ს უტოლდება.
- სად ჩანს ეს?
- სულ ახლახან გერმანულ მედიას ინტერვიუ მისცა ნინო ბურჯანაძემ. მისმა გამონათქვამებმა 2008 წლის ომის შესახებ ყოველგვარ ზღვარს გადააჭარბა. ნინო ბურჯანაძის გამოსვლა ნამდვილი ღალატია. ეს ინტერვიუ აისახება ფილმში, რომელსაც ახლა იღებენ.
- ადრე ამბობდით, ღალატი 2008 წელს მიხეილ სააკაშვილმა ჩაიდინაო...
- მიხეილ სააკაშვილმაც ჩაიდინა ღალატი. ეს არ ნიშნავს, რომ ბურჯანაძეს იმის უფლება აქვს, რომ ომის დაწყებაში საქართველო დაადანაშაულოს. მაშინდელი მოვლენების წინ რუსეთმა ორი კვირით ადრე დაიკავა ტერიტორიები, ფაქტობრივად დაამთავრა ყველაფერი და მერე დაავალა სააკაშვილს, ცხინვალისკენ ჭურვი გაესროლა. სააკაშვილს რომ საქართველოს ინტერესების დაცვა სდომებოდა, ადგილობრივი ტელეგამოსვლებით არ უნდა დაკმაყოფილებულიყო. მას მსოფლიოსთვის დროზე უნდა მიემართა. სააკაშვილმა იმოქმედა ისე, როგორც რუსეთს უნდოდა.
- კიდევ სადმე იკვეთება რუსეთის აგენტურის გააქტიურება?
- ეს ჩანს კიდევ ლევან ვასაძის აქტიურობით. საერთოდ, რუსეთს უნდა, რომ მომავალი პარლამენტი მას მოემსახუროს. რუსეთის მიზანია, საბოლოოდ დაეპატრონოს საქართველოს რომელიმე ტერიტორიას. ამის შედეგად ის ხდება ამიერკავკასიის სრულუფლებიანი სახელმწიფო, რომელიც დაბლოკავს დასავლეთს. რუსეთისთვის სულ ერთია, როგორ გადანაწილდება პროცენტები და 60%-ს „ქართული ოცნება“ მიიღებს თუ ნაცმოძრაობა. მთავარია, ჯამში იყოს ყოვლისშემძლე უმრავლესობა. რუსეთის გააქტიურება გარკვეულ განწყობებშიც ჩანს. მაგალითად, პოლიტიკაში ჩართული ადამიანები, რომლებიც ადრე რუსეთს მძაფრად აკრიტიკებდნენ, ახლა რუსეთსა და აშშ-ს ერთად აყენებენ, ანუ ორივეს ერთნაირად უპირისპირდებიან.
- „ნაციონალური მოძრაობა“ და „ქართული ოცნება“ მსგავს ძალებად მიგაჩნიათ. იმას როგორ ხსნით, რომ ნაციონალებს სერიოზული ლობისტები ჰყავთ დასავლეთში?
- რას ავალებს „ნაცმოძრაობას“ რუსეთი, ეს გასაგებია. რისი მიღწევა უნდათ ლობისტებს დანარჩენ მსოფლიოში ნაციონალური მოძრაობის მეშვეობით, ეს ჯერჯერობით ბუნდოვანია.
- როგორ გგონიათ, რუსეთი სამხედრო თვალსაზრისითაც გააქტიურდება, თუნდაც, საქართველოდან მოშორებით?
- არა მგონია, რუსეთი სამოქმედოდ ემზადებოდეს. ის ტრაბახით და წვრთნებით შემოიფარგლება. თუ რუსეთი რაიმეს წამოიწყებს და ამაზე იქნება დასავლეთის სათანადო რეაქცია, რუსეთის გენერლები პუტინს არ აცოცხლებენ. თუ საერთოდ გაჩერდება, მას ვანკა დაახრჩობს. ამიტომ, პუტინი იძულებულია, სულ სხვების დაშინებაში, ბაქიაობასა და პროპაგანდაში იყოს. სერიოზულ ბრძოლას ის ვერ დაიწყებს.
- საქართველოში რას მიაღწევს?
- საქართველოში რუსეთს პრორუსული რევანში არ გამოუვა. აგენტების გააქტიურებით სასურველ მასშტაბებს ვერ მიაღწევს.
- პარლამენტში მოხვედრის შანსი სხვა ძალებსაც ხომ აქვთ?
- აქტიურ ასპარეზზე მყოფი სხვა ძალები არაფერს წარმოადგენენ. პარლამენტში უნდა მოხვდნენ პატრიოტული დემოკრატიული პროდასავლური ძალები. ჩვენ, ეროვნული ძალების ალიანსი, პროგრამის გარშემო გავერთიანდებით. პროგრამის პირველ ნაწილს საგარეო პოლიტიკის შესახებ ამ დღეებში გამოვაქვეყნებთ. სერიოზული ხედვები გვაქვს მიწის საკითხზე, კონფლიქტების მოგვარებაზე. ეს ის თემებია, რომლებიც აწუხებს ნებისმიერ ნორმალურ მოქალაქეს.
„ახალი თაობა“, 04 მაისი, 2016 წელი
ირაკლი შიხიაშვილი პოლიტიკაში ბრუნდება: „ნაცმოძრაობა მე დავშალე““
ვეტერანთა საქმეების დეპარტამენტის ყოფილი თავკაცის ირაკლი შიხიაშვილის პერსონა ისევ აქტუალურია: გუშინ, 4 მაისს, მან გვამცნო, რომ პოლიტიკაში ბრუნდება და მაჟორიტარად იყრის კენჭს. ამ ამბამდე რამდენიმე დღით ადრე ქალაქში ხმა გავარდა, რომ შიხიაშვილმა ამერიკაში პოლიტიკური თავშესაფარი მოითხოვა. ეს ინფორმაცია მაშინ გავრცელდა, როცა ის შეერთებულ შტატებში იმყოფებოდა. მან ეს ინფორმაცია კატეგორიულად უარყო და მალევე დაბრუნდა სამშობლოში.
ყოფილი დეპუტატი მეგი გოცირიძე კი დღემდე ამტკიცებს, რომ ირაკლი შიხიაშვილი აშშ-ში საემიგრაციო სამსახურის წარმომადგენლებს შეხვდა და თავშესაფარი ითხოვა. „ეს ინფორმაცია მივიღეთ ძალიან სარწმუნო წყაროებიდან. ამაზე ამბავი რომ არ აგვეტეხა, შიხიაშვილი ქვეყნიდან გაიქცეოდა და პოლიტიკურ თავშესაფარს მიიღებდა“, – განაცხადა „ახალ თაობასთან“ საუბარში მეგი გოცირიძემ.
ამერიკიდან დაბრუნებულმა ირაკლი შიხიაშვილმა ყველასთვის მოულოდნელი გადაწყვეტილება მიიღო და განაცხადა, რომ საპარლამენტო არჩევნებში მიიღებს მონაწილეობას. „მე მაქვს პოლიტიკური გეგმები, არ გამოვრიცხავ არჩევნებში მონაწილეობას დამოუკიდებელ მაჟორიტარად. როდესაც საარჩევნო პერიოდი დაიწყებს ათვლას, უფრო მეტ დეტალზე მაშინ ვისაუბრებ. საერთოდ თუ ხელისუფლებასთან არ ხარ, აუცილებლად მისი ოპონენტი ხარ? მე მიმაჩნია, რომ ხელისუფლების კრიტიკა ჩემი თვითმიზანი არასდროს იქნება. ჩემი მიზანი იქნება ვაკეთო საქმე. მე მყავს გუნდი, რომელიც არჩევნებზე იქნება ჩემ გვერდით. საუბარი მექნება ყველასთან. ვისაუბრებ ყველასთან იმაზე, რომ სამართლიანად ჩატარდეს არჩევნები, ყველას ჰქონდეს თანაბარი პირობები“, – განაცხადა ირაკლი შიხიაშვილმა.
მისი მისამართით „ნაცმოძრაობის“ წევრები განსაკუთრებულ აგრესიას ამჟღავნებენ. მათ შორის შავმა კატამ 2012 წელს ჩაირბინა. საპარლამენტო არჩევნებამდე ცოტა ხნით ადრე, შიხიაშვილმა დედაქალაქის საკრებულოში „ნაციონალური მოძრაობა“ მიატოვა და სხვებთან ერთად „ქართული ოცნების“ ფრაქცია ჩამოაყალიბა. ამ ამბავს ყოფილი ხელისუფლება მას დღემდე ვერ პატიობს, მოქმედმა კი თავგამოდება დაუფასა და ხელისუფლების შეცვლის შემდეგ ის დედაქალაქის საკრებულოს თავმჯდომარედ აირჩიეს.
დედაქალაქის საკრებულოში შესვლას 2014 წელსაც აპირებდა, მაგრამ მაშინ კახა კალაძემ სიაში არ შეაყვანინა. მიზეზად მისი ნაციონალური წარსული დაასახელა. არადა, შიხიაშვილი დღემდე ამტკიცებს, რომ ნაციონალი არასდროს ყოფილა.
„ნაციონალური მოძრაობის“ წევრი არასოდეს ვყოფილვარ, მე მათი ფრაქციის წევრი ვიყავი. პოლიტიკური პლატფორმის შეცვლა, მგონი, მხოლოდ აქ ითვლება სირცხვილად. მე ვიყარე კენჭი პარტიის სიით, მაჟორიტარად, მაგრამ ეს არ ნიშნავს პარტიის წევრობას. თავის დროზე მე ვიყავი ლიბერალური პარტიის წევრი. „ნაციონალურ მოძრაობას“ 2012 წლის არჩევნებამდე გავემიჯნე. იმდენი იძახა „ნაციონალურმა მოძრაობამ“ „პორტირებული შიხიაშვილიო“, რომ მერე ადამიანებს რატომღაც დაავიწყდათ, რომ ირაკლი შიხიაშვილი ამ პარტიას არჩევნებამდე გაემიჯნა. განცხადება არჩევნებამდე 5 დღით ადრე გაკეთდა, თუმცა გამიჯვნა, რეალურად, 11 თვით ადრე მოხდა. პირველ სექტემბრამდე გამიჯვნა ნიშნავდა „ნაციონალური მოძრაობის“ განრისხებას. ცივი წყალი დალიოს ნაციონალურმა მოძრაობამ“, – განაცხადა ჟურნალისტებთან საუბარში ირაკლი შიხიაშვილმა. იგი იმ მიზეზებსაც განმარტავს, თუ რატომ ვერ იტანენ მას „ნაციონალები“.
„ამ პარტიას ირაკლი შიხიაშვილი განა იმიტომ არ უყვარს, რომ მარტო მათ ფრაქციას გაემიჯნა, არამედ იმიტომ, რომ ირაკლი შიხიაშვილმა მოახერხა და ჯერ უმრავლესობა, თავის მეგობრებთან ერთად დაუშალა, შემდეგ ქალაქის მერის ერთპიროვნული მმართველობა დაანგრია და საკრებულოში სამართლიანი გარემო დატოვა“, – აღნიშნავს იგი.
——–
ირაკლი შიხიაშვილის მეორედ მოსვლის ამბავი „ნაციონალებს“ არ მოეწონათ. განსაკუთრებით აღშფოთდა მეგი გოცირიძე. განცხადებამ იმის შესახებ, რომ ნაცმოძრაობა შიხიაშვილმა დაშალა, ყოფილი დეპუტატი სულ გადარია.
„რისი ან ვისი დამშლელია შიხიაშვილი? ან სად ხედავს დაშლილ ნაცმოძრაობას? ჩვენი შემადგენლობა იგივე დარჩა. რამდენიმე გამყიდველის წასვლით არაფერი დაგვკლებია. რაც შეეხება დაშლას. დაშლა და დაშლილები შიხიაშვილმა „ქართულ ოცნებაში“ მოიკითხოს. ცოტაც გაუძლოს და ქოცებთან ერთად ჩავაბარებთ მაგას ელიავაზე დაშლილებში“, – აღნიშნავს მეგი გოცირიძე. იგი დარწმუნებულია, რომ ირაკლი შიხიაშვილი ვერც პოლიტიკურ პარტიას შექმნის და ვერც არჩევნებს მოიგებს. მისი მტკიცებით, პოლიტიკაში შიხიაშვილი შიშმა დააბრუნა.
„მას შემდეგ, რაც ამერიკული გეგმა ჩავუშალეთ, შიხიაშვილი სასოწარკვეთილებაში ჩავარდა და გამოსავლის ძიება დაიწყო. ყველამ კარგად იცის, რა საგმირო საქმეები ჩაიდინა მან ვეტერანთა დეპარტამენტში. იქ აუდიტის სამსახური აპირებს შესვლას და შიხიაშვილს გაფლანგული ფულების უკან მოტანა მოუწევს. შესაძლოა, ის სასამართლოს წინაშეც წარდგეს. მას ეშინია და ცდილობს, გამოსავალი იპოვოს. „ქართულმა ოცნებამ“ ის მოისროლა და ახლა დამოუკიდებლად უნდა პარლამენტში მოხვედრა. ეს არ გამოვა, მას ხმას არავინ მისცემს“, – ამტკიცებს ყოფილი დეპუტატი. მისი განმარტებით, შიხიაშვილის გარშემო არ ეგულება ადამიანი, რომელიც მას ხმას მისცემს.
„რომელი არჩევნების მოგებაზე მელაპარაკებით? იცით, რომ მაგას საკუთარი ოჯახის წევრებიც კი არ აძლევენ ხმას? არ გჯერათ? აბა იკითხეთ, მამამისი 2008 წლის საპრეზიდენტო არჩევნებზე რომელი კანდიდატის შტაბის უფროსი იყო, რომ არ იწვალოთ, გეტყვით, შიხას მამა სამგორის რაიონში გრეჩიხას, იგივე ლევან გაჩეჩილაძის საარჩევნო შტაბს მეთაურობდა. ასე რომ, შიხას მატარებელმა ჩაიარა“, – ამბობს მეგი გოცირიძე.
„ახალი თაობა“, 04 მაისი, 2016 წელი
დადგება თუ არა დავით ნარმანიას იმპიჩმენტის საკითხი
ზაზა ვეკუა: „მერს უნდა გავაგებინოთ, რომ ის არჩეულია“
ბოტანიკური ბაღის გარშემო ატეხილი ამბების შემდეგ დედაქალაქის საკრებულოში კიდევ ერთხელ ალაპარაკდნენ დავით ნარმანიას შესაძლო გაიმპიჩმენტებაზე. ამჯერად ამ ინიციატივით ფრაქცია დემოკრატიული მოძრაობის თავკაცი ზაზა ვეკუა გამოვიდა. იგი დარწმუნებულია, რომ ნარმანიას იმპიჩმენტს საკრებულოს სხვა წევრებიც უჭერენ მხარს. ამის მიუხედავად ამბობს, რომ პროცედურის დაწყება იოლი არ იქნება.
„იმპიჩმენტი საკმაოდ რთული პროცედურაა. ამისთვის ჯერ რიგგარეშე სხდომის მოწვევაა საჭირო, რასაც 13 ხელმოწერა სჭირდება. იმისთვის, რომ მერის უნდობლობის საკითხი დღის წესრიგში დადგეს, უკვე 25 ხელმოწერაა საჭირო. იმპიჩმენტს კი 33 ხმა სჭირდება. მე შორს ვარ იმ აზრისგან, რომ ამ საქმეში უმრავლესობა მხარს დაგვიჭერს და შევძლებთ საჭირო ოდენობით ხელმოწერების შეგროვებას. თუმცა ყველაფერი შეიძლება მოხდეს და ჯობია ვიმოქმედოთ“, – აცხადებს „ახალ თაობასთან“ საუბარში ზაზა ვეკუა.
დემოკრატიული მოძრაობის გარდა, დავიტ ნარმანიას იმპიჩმენტზე ნაციონალებიც საუბრობენ. ბოროტი ხმები იმასაც ამბობენ, რომ, შესაძლოა, მერის წინააღმდეგ მმართველ კოალიციაში შემავალი პარტიებიც წავიდნენ. „დანამდვილებით რამის თქმა გამიჭირდება. მართალია, ნარმანიას მუშაობით არც „ქართულ ოცნებაში“ არიან კმაყოფილები, მაგრამ ალბათ მაინც მას დაუჭერენ მხარს“, – აღნიშნავს დეპუტატი. მისი აზრით, დავით ნარმანიას როგორმე უნდა გააგებინონ, რომ ის თბილისელების წინაშეა პასუხისმგებელი და მათ უნდა გაუწიოს ანგარიში.
„ბოტანიკური ბაღის გარშემო დიდი ამბებია ატეხილი, მაგრამ ეს არ არის მთავარი პრობლემა. თბილისში საშინელებები ხდება. დედაქალაქს პატრონი არ ჰყავს. ნარმანია ვერ აცნობიერებს მის წინაშე არსებულ ვალდებულებებს. ამ ადამიანმა უნდა გაიგოს, რომ თბილისელების წინაშეა, პირველ რიგში, პასუხისმგებელი. მართალია, ის ვიღაცის ხათრით იქნა ამ თანამდებობაზე არჩეული, მაგრამ რაკი დანიშნული არ არის, მარტო ერთი კაცისთვის ანგარიშის გაწევას უნდა შეეშვას“, – აცხადებს ზაზა ვეკუა.
იმ ერთ კაცში დეპუტატი ბიძინა ივანიშვილს გულისხმობს. „არ შეიძლება ერთი კაცის წინაშე იყო მხოლოდ პასუხისმგებელი. მისი ასეთი ქცევა იმაზე მიუთითებს, რომ მას არც თბილისი უყვარს და არც აქაურებს სცემს პატივს. აქედან გამომდინარე იმპიჩმენტზე საუბარი აუცილებლად იქნება“, – ამბობს დეპუტატი.
———
კოალიცია „ქართულ ოცნებაში“ დავით ნარმანიას გაიმპიჩმინტებას გამორიცხავენ. ამასთან, კულუარულ საუბრებში ამბობენ, რომ მერი თავად აპირებს თანამდებობის დატოვებას. ამბობენ, რომ შემოდგომაზე საპარლამენტო არჩევნებთან ერთად, მერის რიგგარეშე არჩევნებიც გაიმართება. დავით ნარმანიას მომავალს რაც შეეხება, „ოცნების“ კულუარებში არ გამორიცხავენ, რომ ის საარჩევნო სიაში შეიყვანონ, მეორე ვერსიით, ქალაქის თავი, შესაძლოა, თბილისის სახელმწიფო უნივერსიტეტის რექტორად მოგვევლინოს.
