„რეზონანსი“: ინტერვიუ დავით ლორთქიფანიძესთან: „ლევან ბერძენიშვილმა თამაზ მეჭიაურს ბოდიში უნდა მოუხადოს

„რეზონანსი“: შეძლებს თუ არა პაატა ბურჭულაძე, მნიშვნელოვან პოლიტიკურ ფიგურად დამკვიდრდეს?

„რეზონანსი“: ინტერვიუ გურამ გირგვლიანთან: დარწმუნებული ვარ, რომ პაატა ბურჭულაძე სამართლიანობის აღდგენას შეძლებს

————-

“ალია”: რას ჰგავხართ თქვე გაუბედურებულებო, რას დაგამსგავსათ არქიფო სეთურმა?! // დავით უსუფაშვილი „რესპუბლიკელებს“ ტოვებს და „ოცნებაში“ გადადის?

“ალია”: ვისი ფულით მოდის პაატა ბურჭულაძე პოლიტიკაში და რა კითხვები აქვს მასთან არასაპარლამენტო ოპოზიციას?

“ალია”: რით დააშანტაჟა და რა გარიგება შედგა მილიარდერ ბიძინა ივანიშვილსა და მილიონერ ლეონიდ ჩერნოვეცკის შორის?

————-

„ახალი თაობა“: ინტერვიუ გიგლა ბარამიძესთან: „პაატა ბურჭულაძე ამერიკის პროექტია… იგი საქართველოს პრეზიდენტობისთვის ემზადება“

„ახალი თაობა“: ინტერვიუ ზურაბ ჭიაბერაშვილთან: „2012 წელს მშვიდად გადავაბარეთ ხელისუფლება. ახლა „ოცნებისგან“ იმავეს ველოდებით”

———————

„რეზონანსი“, 13 მაისი, 2016 წელი

ინტერვიუ დავით ლორთქიფანიძესთან: „ლევან ბერძენიშვილმა თამაზ მეჭიაურს ბოდიში უნდა მოუხადოს

ეკატერინე ბასილაია

“ლევან ბერძენიშვილი ან ემოციას აჰყვა, ან ცოტა ზედმეტებშია გადასული. მან თამაზ მეჭიაურთან მიმართებაში ელემენტარული ეთიკის ნორმები არ უნდა დაარღვიოს,” – აცხადებს “ქართული ოცნების” წევრი დავით ლორთქიფანიძე, რომელიც ლევან და დავით ბერძენიშვილების მხრიდან მეჭიაურის კრიტიკას რადიკალურად ემიჯნება და ამ ფონზე უახლოეს ხანში სამთავრობო ცვლილებებსაც პროგნოზირებს, რადგან მიაჩნია, რომ პრემიერი მინისტრებთან კომფორტულად უნდა გრძნობდეს თავს, მეჭიაურთან დაკავშირებით ზაქარეიშვილის მხრიდან მთავრობის კრიტიკა კი ძალიან უხერხული იყო.

- თამაზ მეჭიაურსა და “რესპუბლიკელებს” შორის ორი დღეა, საგარეო კურსის გამო ურთიერთბრალდებებია. დეპუტატი ბერძენიშვილები პრემიერს მეჭიაურის პარტიიდან გარიცხვას სთხოვენ, მეჭიაური კი ამბობს, რომ თუკი “რესპუბლიკელ” მინისტრებს არ გადააყენებენ, ის პარტიიდან თავად წავა. ამ დაპირისპირებაში თქვენ რომელი პოზიცია გიჭირავთ?

- ვფიქრობ, რომ სხვა პოლიტიკური ძალის არც ერთ წარმომადგენელს არ აქვს ინსტიტუციური და მორალური უფლება, მეორე პარტიას უკარნახოს, როგორ მოიქცეს. პარტია “ქართული ოცნება” იმსჯელებს ყველა საკითხზე, რასაც საჭიროდ ჩათვლის. კონკრეტულად ეს საკითხი კი არ მგონია, განსაკუთრებული სამსჯელო იყო. მადლობა უფალს, ჩვენ დღეს იმ ქვეყანაში ვცხოვრობთ, სადაც ნებისმიერ ადამიანს საკუთარი აზრის გამოთქმის უფლება აქვს და ამას აკეთებს. მით უფრო, პარლამენტის წევრს ვინ წაართვა აზრის გამოთქმის საშუალება? ვფიქრობ, ეს ჭიქაში ქარიშხალს უფრო ჰგავს. არანაირი საფუძველი არ არსებობს, რომ თამაზ მეჭიაურს თავისი მოსაზრებების გამო სხვა პოლიტიკური ძალის წარმომადგენლებმა პოლიტიკური გარჩევები და თან პარტიის ხელმძღვანელობას მიუთითონ, როგორ მოიქცნენ. ეს სწორი არ მგონია.

- თქვენ ეთანხმებით იმას, რომ ნატო-სკენ სწრაფვა საქართველოს უსაფრთხოებას საფრთხეს უქმნის?

- ყველა იმ ღონისძიებას, საერთაშორისო აქტორების ჩართულობით, რომელიც ჩვენი ქვეყნის კიდევ უფრო ევროპული ორიენტაციისკენ და ჩვენი ქვეყნის სიძლიერისკენაა მიმართული, მხარს ვუჭერ. ხოლო იმ აზრს, რომ ამან რაღაც ფორმით საფრთხე გამოიწვიოს, არსებობის უფლება აქვს. ჩვენ საუკუნეებია, ამ გეოპოლიტიკურ არეალში ვართ და ვიცით, თუ რა მდგომარეობაშია ჩვენი ქვეყანა. თბილისიდან ნახევარი საათის განმავლობაში უცხო ქვეყნის ჯარები დგას და ამდენად საფრთხეზე მოსაზრებას აქვს არსებობის უფლება.

- როდესაც პარტიის კურსი პროდასავლურია, ნორმალურია, როდესაც ამ კურსის საწინააღმდეგო განცხადებები კეთდება გუნდიდან?

- პარტიის კურსი პროდასავლურია და გახსნილი პოლიტიკური ძალა ვართ, ამიტომ დისკუსია და განსხვავებული აზრი მიღებული ფორმაა და ზუსტად ამაში გამოიხატება ჩვენი ევროპისკენ ორიენტირებაც. ერთი მოსაზრების გამტარებელი რომ ვიყოთ, ვფიქრობ, ეს ევროპული გზა არ იქნებოდა.

- ლევან ბერძენიშვილმა თქვა, თუ ბატონი მეჭიაური ვინმეს რუპორია ნატო-სთან მიმართებაში, მაშინ ისიც მასავით “გონებაშეზღუდული, ბნელი მტერია” ქართველი ხალხის ნებისა, ვინც უნდა იყოსო.

- ვფიქრობ, რომ ლევან ბერძენიშვილი ან ემოციას აჰყვა, ან ცოტა ზედმეტებშია გადასული. მან თამაზ მეჭიაურთან მიმართებაში ელემენტარული ეთიკის ნორმები არ უნდა დაარღვიოს. აქ კი მეჭიაურს ის აპრიორი გონებაშეზღუდულს უწოდებს, რის გამოც მან თამაზს ბოდიში უნდა მოუხადოს, დანარჩენი კი, შემდეგ არკვიონ, ვინ ვისი რუპორია.

- თუმცა ასევე ხშირად გამოთქმულა მოსაზრება, რადგანაც მეჭიაური ივანიშვილის მეგობარია და მას ხვდება კიდეც, დეპუტატი შეიძლება ექსპრემიერის აზრებსაც ახმოვანებდესო.

- კატეგორიულად ვერ გავიზიარებ მოსაზრებას, რომ ივანიშვილი აძლევდეს მეჭიაურს მითითებებს. ბატონ ბიძინას ძალიან ახლოს ვიცნობ და მინდა დაგარწმუნოთ, რომ ივანიშვილი არ არის ის კაცი, ვინმეს ამგვარი დავალება მისცეს.

- მეჭიაურთან დაპირისპირებამ “რესპუბლიკელები” ასევე დააპირისპირა პრემიერთანაც. “რეზონანსთან” ინტერვიუში ბერძენიშვილმა თქვა, კვირიკაშვილი “ქვეყნის გადასარჩენად ციდან ჩამოფრენილი არ არის” და არ უნდა დაავიწყდეს, რომ მთავრობის მეთაურის პოსტზე “რესპუბლიკელების” 10 ხმითაც არის დამტკიცებულიო. ეს პრემიერის მიერ პაატა ზაქარეიშვილის კრიტიკას მოჰყვა.

- ლევან ბერძენიშვილიც არ არის შეზღუდული, აზრი გამოთქვას, მაგრამ როდესაც საქმე მთავრობის წევრებს ეხება, ძალიან უხერხულია, როდესაც მთავრობის ზოგიერთი მინისტრი განსხვავებულ პოზიციას აფიქსირებს და პრემიერს აკრიტიკებს.

ზაქარეიშვილმა თქვა, რომ მას მეჭიაური, როგორც ადამიანი, არ აინტერესებს, მაგრამ მეჭიაურის გამონათქვამზე “ქართული ოცნება” განცხადებას რატომ არ აკეთებსო. კოლეგაზე, პარლამენტის წევრზე ასეთი ტერმინოლოგიით საუბარი არ შეიძლება. როდესაც მინისტრი აკრიტიკებს მმართველ ძალას, მას უნდა ახსოვდეს, რომ ჩვენი მხრიდან ქვეყნის სტრატეგიულ კურსზე განცხადება არაერთხელ გაკეთებულა და ხელისუფლების კურსთან მიმართებაში მას კითხვები არ უნდა ჰქონდეს. თუმცა ვფიქრობ, რომ პარტიული ვექტორი მიმართულია მეჭიაურის, თოფაძისა და ჯაჭვლიანის წინააღმდეგ და სხვა პოლიტიკური ძალის წარმომადგენლების მიერ მათ მიმართ გაკეთებულ განცხადებებს რადიკალურად ვემიჯნები.

- ითქვა ისიც, რომ მეჭიაურის გარიცხვა პარტიის და პრემიერის პრესტიჟის საკითხია. მიგაჩნიათ თუ არა, რომ რესპუბლიკელები “ქართულ ოცნებას” და პრემიერს უკვე ღიად უპირისპირდებიან?

- ვთვლი, რომ ეს არის ლევან ბერძენიშვილის პოზიცია და არა პარტიის. თუ რესპუბლიკური პარტიის უმაღლესი ორგანოც ამ მოსაზრებას გაიზიარებს, მაშინ ეს უკვე იქნება პარტიებს შორის დაპირისპირება.

- თქვენი აზრით, “რესპუბლიკელი” მინისტრები მთავრობაში უნდა იყვნენ?

- აქ ორი გზაა, პირველი ისაა, რომ “რესპუბლიკელებმა” თავად უნდა მიიღონ გადაწყვეტილება, მეორე გზაა, რომ პრემიერმა. ეს პრემიერის გადასაწყვეტია. თუმცა ვამბობ იმას, რომ კაბინეტის წევრი მინისტრების ამგვარი განცხადებები ძალიან უხერხულია.

როდესაც ბატონი კვირიკაშვილი პრემიერად მოვიდა, ვთქვი, რომ საკადრო ცვლილებები იქნებოდა. ხელმძღვანელს უნდა ემუშავებოდეს საკუთარ გუნდთან. პრემიერი მინისტრებთან კომფორტულად უნდა გრძნობდეს თავს, ამიტომ საკადრო ცვლილებები გარდაუვალია.

- პარტიაში ბევრი ფიქრობს დასავლურ კურსზე ისე, როგორც მეჭიაური?

- ამ თემაზე საუბარი კოლეგებთან არ მქონია. ამ კვირაში სხდომები გვაქვს და იქ მეტი საშუალება იქნება, ამ თემებზე ვიმსჯელოთ. თუმცა ყველა დეპუტატს აქვს საკუთარი აზრის გამოხატვის უფლება.

- პარტიის ყოფილმა აღმასრულებელმა მდივანმა არმაზ ახვლედიანმა დატოვა პარტია და მიზეზად ის დაასახელა, რომ “ბებერი ნიანგები” პარტიის განვითარების საშულებას არ იძლევიან. “ოცნება” კი არჩევნებში მხოლოდ გაყალბებით შეძლებს გამარჯვებას. რა დაპირისპირებაა პარტიაში?

- მე მგონია, რომ არმაზი კარგა ხანია პარტიის მიმართულებით არაქმედუნარიანია. ერთ წელიწადზე მეტია, ახვლედიანს პარტიაში არანაირი აქტივობა არ ჰქონია. მე ვურჩევდი მას, დაესახელებინა ის ადამიანები, რომლებიც პარტიის პრობლემად მიაჩნია.

- მან თქვა, რომ ვოლსკი არის ერთ-ერთი პრობლემა ამ პარტიაში, რომელიც “შავბნელ საქმეებს” აკეთებს.

- თქვენგან მესმის, რომ დაასახელა ვოლსკი, მაგრამ მე არ ვიცი. არმაზი ერთ-ერთ საკვანძო პოსტზე იყო და მე მისი აქტიურობა და რევოლუციური გადაწყვეტილებები არ მახსენდება, რომლის სამართლებრივი ბერკეტები ჰქონდა. თუ წავიდა, წარმატება მინდა ვუსურვო. ალბათ, პოლიტიკიდან წასვლას არ დააპირებს.

- ქუცნაშვილმა თქვა, მოიკითხეთ ის, ვინც ახვლედიანი პარტიაში მოიყვანა და მას დაუსვით კითხვებიო. საუბარია, რომ ახვლედიანს რეკომენდაცია უსუფაშვილმა გაუწია და ფიქრობთ, მისი დემარშიც “რესპუბლიკელებს” უნდა მოჰკითხოთ?

- ნამდვილად არ ვიცი, ვისი რეკომენდაციით მოვიდა, მაგრამ ვიცი, რომ აბსოლუტურად გვერდიდან მოვიდა. ის წინასაარჩევნო ბატალიებში ჩართული არ იყო. მას პოლიტიკური დივიდენდები ჰქონდა და ეტყობა, მისმა რეკომენდატორმა მენეჯერული გამოცდილება დაინახა, თუმცა მას პარტიის მშენებლობაში რაიმე განსაკუთრებული გარღვევა არ გაუკეთებია. თუ მას ამ პარტიაზე მართლა შესტკივა გული, დაასახელოს ყველა ის ადამიანი, ვინც პრობლემაა და არსად არ წავიდეს. მისი ერთწლიანი გაჩუმება მისი რენომესთვის მომგებიანი არ მგონია.

- იქნებ რევოლუციური ცვლილებები სწორედ იმიტომ ვერ გააკეთა, რომ ხელს უშლიდნენ? ერთპიროვნულ მართვაზე პრეტენზიები გუნდში ადრეც არსებობდა და ამის გამო თქვენც კი უმრავლესობის იმჟამინდელ ლიდერს, დავით საგანელიძეს აკრიტიკებდით. ახლა ახვლედიანმა ერთპიროვნულ მართვაში დაადანაშაულა უმრავლესობის ამჟამინდელი ლიდერი. გამოდის, პრობლემა იგივეა?

- ჩემსა და საგანელიძეს შორის უთანხმოება 2012 წელს მაჟორიტარების შერჩევისას წარმოიშვა. გარკვეულ კანდიდატებზე ვუთხარი, რომ ისინი ვერ მოიგებდნენ. ჩემი მოსაზრება არ გაიზიარა და მაშინ სამ ათეულ ოლქში წავაგეთ მაჟორიტარების არჩევნები. ამის შემდეგ ანალიზის გაკეთებას ვითხოვდი და ეს რომ არ გაკეთდა, ამიტომ იყო უთანხმოება. უთანხმოება იყო ის, რომ მაშინ გადაწყვეტილებებს ძირითადად საგანელიძე იღებდა, ხოლო ამას ვისთან ათანხმებდა, ეს სხვა თემაა. ახლა, როგორც ვხედავ, განხილვები პოლიტსაბჭოს რეჟიმშია. თუმცა მთავარი გადაწყვეტილებები აწია მისაღები. ყველა რაიონში აღმასრულებელი მდივნები დაინიშნა და 14-ში, ყრილობის შემდეგი მოხდება მაჟორიტარების დასახელება. იმედი მაქვს, კარგი გაანალიზება მოხდება, ვინ სად უფრო სარგებლიანია. რადგან ჯერ გადაწყვეტილებები მიღებული არ არის, საფუძველი არ მაქვს ვთქვა, ვინმე ერთპიროვნულად იღებს თუ არა რაიმე გადაწყვეტილებას. თუ ჩვენ 2012 წლის მსგავსად არაფერს გვკითხავენ და იგნორირება იქნება, გარწმუნებთ, ამაზე მეც და ჩემს სხვა კოლეგებსაც ექნებათ რეაქცია.

- ახვლედიანი წასვლის გარდა, სხვა წევრის წასვლას თუ პროგნოზირებთ?

- ჯერ არავისგან არ მსმენია ეს, ყველა მოლოდინის რეჟიმშია, რომ განხილვა იქნება. დღეს კოალიციაში “რესპუბლიკელები”, “დემოკრატები” და “ფორუმი” არ არიან და დარჩენილ 3 სუბიექტთან ერთად ბევრად უფრო ადვილია თემების გავლა და მაჟორიტარების შერჩევა.

- რა გაგრძელება ექნება ერთი მხრივ “რესპუბლიკელებისა” და მეორე მხრივ მეჭიაურისა და პრემიერის დაპირისპირებას?

- ვფიქრობ, ეს დაპირისპირება კიდევ უფრი გაღრმავდება, იმიტომ, რომ ბერძენიშვილების მხრიდან აგრესიულ გამოსვლებს ვხედავ და ისინი ამას გააგრძელებენ. ეს რადიკალური განცხადებები რესპუბლიკურ პარტიას ამომრჩევლის სიმპათიას არ შემატებს.

- ფიქრობთ, “რესპუბლიკელებს” ამგვარი განცხადებების გამო არჩევნებში გამარჯვებაც გაუჭირდეთ?

- რესპუბლიკური პარტია რამდენ პროცენტს აიღებს, ამის სპეციალისტი არ ვარ, თუმცა 5 თვეა დარჩენილი და ყველაფერს ვნახავთ. ვფიქრობ, ქართველი ამომრჩეველი სწორ გადაწყვეტილებას მიიღებს.

„რეზონანსი“, 13 მაისი, 2016 წელი

შეძლებს თუ არა პაატა ბურჭულაძე, მნიშვნელოვან პოლიტიკურ ფიგურად დამკვიდრდეს?

ელზა პაპოშვილი

მსოფლიო ბანმა პაატა ბურჭულაძემ გუშინ გამართულ პრესკონფერენციაზე ოფიციალურად განაცხადა, რომ ის პოლიტიკაში წავიდა და შექმნა ახალი პოლიტიკური მოძრაობა “სახელმწიფო ხალხისთვის”. მისი თქმით, მთელი 25 წლის განმავლობაში ყველა ხელისუფლების გვერდით იდგა და ქართულ პოლიტიკურ ცხოვრებაში პირდაპირ თუ არა ირიბად ყოველთვის ჩართული იყო – ეს იქნებოდა გამსახურდია, შევარდნაძე, სააკაშვილი თუ ივანიშვილი. “მე ვიყავი ყველას გვერდით, რადგან ახალი იქმნებოდა, თუმცა დღეს მე ვერ ვხედავ ისეთ ადამიანს, ვის გვერდითაც შეიძლება დადგომა. ეს ქვეყანა ძალიან ცუდ მდგომარეობაშია. არა იმიტომ, რომ მე ვარ ძალიან კარგი პოლიტიკოსი ან პიროვნება, არამედ იმიტომ, რომ ქვეყანა არის ძალიან ცუდ მდგომარეობაში, იძულებული ვიყავი, მიმეტოვებინა კარიერა, ტკბილი და კარგი ცხოვრება და ჩავდგომოდი პოლიტიკურ ძალას სათავეში,” – განაცხადა პაატა ბურჭულაძემ.

შეძლებს თუ არა პაატა ბურჭულაძე, რომ მნიშვნელოვან პოლიტიკურ ფიგურად დამკვიდრდეს? ამ კითხვით “რეზონანსმა” საზოგადოებისთვის ცნობილ ადამიანებს მიმართა.

დოდო ხურცილავა  თეატრმცოდნე): მე ვფიქრობ, რომ ის საზოგადოებაში ნამდვილად სერიოზულ პოლიტიკურ ფიგურად ჩამოყალიბდება. მას აქვს ისეთი განსაკუთრებული პიროვნული თვისებები, რომლითაც საზოგადოებას ნამდვილად მოხიბლავს. ეს კვლევებითაც დადგინდა – მას მოსახლეობის დიდი ნაწილი პოზიტიურ პიროვნებად განიხილავს. აქვს ისეთი ქარიზმატულობა, რომელიც პოლიტიკოსს აუცილებლად უნდა ჰქონდეს. შესაძლებელია, მან პირველივე ეტაპზე წარმატებას მიაღწიოს.

იური მეჩითოვი  (ფოტოხელოვანი): მე ვფიქრობ, რომ პაატა ბურჭულაძე სერიოზულ პოლიტიკურ ფიგურად ვერ ჩამოყალიბდება. ის არის ახალი პროექტი, რომელსაც მომავალ არჩევნებზე საზოგადოებას შესთავაზებენ. ის წინასწარ უკვე შეამზადეს. ჩემი აზრით, შექმნეს სპეციალური ალტერნატიული პარტია, რომელმაც ამომრჩევლის გარკვეული ხმები უნდა გადაინაწილოს. ეს სპეციალურად ხდება იმისთვის, რომ ამომრჩეველი, რომელიც ვერ გარკვეულა, ხმა ვის მისცეს, იფიქრებს, რომ ახალი ძალა გამოჩნდა და ხმას ბურჭულაძეს მისცემს. ეს მხოლოდ კარგად დაგეგმილი თამაში მგონია.

ვახტანგ ძაბირაძე  (კონსტიტუციონალისტი): პირველ რიგში მინდა პაატა ბურჭულაძეს პოლიტიკურ საქმიანობაში წარმატება ვუსურვო. მიუხედავად იმისა, რომ ამ კითხვაზე პირდაპირ პასუხის გაცემა საკამოდ რთულია, მაინც მგონია, რომ მას აქვს შანსი, შედგეს სერიოზულ და წარმატებულ პოლიტიკურ ფიგურად. მოახერხებს თუ არა ამას, ეს უკვე მასზეა დამოკიდებული. ბურჭულაძეს საზოგადოებაში საკმაოდ პოზიტიური მხარდაჭერა გააჩნია და ამას თუ კარგად გამოიყენებს, გარკვეული წარმატების მიღწევას შეძლებს. მთავარია, საზოგადოება დაარწმუნოს, რომ ის იმ პრობლემების მოგვარებას შეძლებს, რომლებიც ამ ხელისუფლების პირობებში ვერ მოხერხდა.

გია მურღულია (ფილოლოგი): საქართველოში თეორიულად ყველაფერი შესაძლებელია, მაგრამ პრაქტიკულად ბურჭულაძე შეძლებს თუ არა, რომ სერიოზული და მთავარი პოლიტიკური ფიგურა გახდეს, ცოტა რთული ამბავი მგონია. არ მგონია, რომ ბურჭულაძემ ჩვენს საზოგადოებაში ასე სწრაფად ამხელა პოლიტიკური სიმპათიები დაიმსახუროს. არჩევნებამდე ნახევარი წელი ძალიან ცოტაა იმისთვის, რომ გამოუცდელი ადამიანი უცბად სერიოზულ პოლიტიკურ ფიგურად ჩამოყალიბდეს.

„რეზონანსი“, 13 მაისი, 2016 წელი

ინტერვიუ გურამ გირგვლიანთან: „დარწმუნებული ვარ, რომ პაატა ბურჭულაძე სამართლიანობის აღდგენას შეძლებს“

ელზა პაპოშვილი

სანდრო გირგვლიანის მამა გურამ გირგვლიანი პაატა ბურჭულაძეს პოლიტიკურ საქმიანობაში მხარს უჭერს. მისი აზრით, ის ქვეყანასა და ხალხს იმედს დაუბრუნებს, რომელიც მათ ამჟამინდელი ხელისუფლების პირობებში დაკარგეს. გ.გირგვლიანი ამბობს, რომ “ქართული ოცნება” მას და მის გარდაცვლილ მეუღლეს, ირინა ენუქიძეს, სამართლიანობის აღდგენას დაჰპირდა, თუმცა ამის მაგივრად, მოსამართლე ლევან მურუსიძეს პრივილეგიები შეუქმნა და სისტემისა და რეჟიმის მსხვერპლად გამოაცხადა. მისი აზრით, ბურჭულაძე ის ადამიანია, რომელიც ამჟამად ქვეყანას ძალიან სჭირდება.

- თქვენ პაატა ბურჭულაძეს პოლიტიკურ საქმიანობაში მხარდაჭერა გამოუცხადეთ. ხომ არ აპირებთ პოლიტიკაში მოსვლას, შესაძლებელია, ბურჭულაძის ახლად შექმნილ პარტიაში გიხილოთ?

- არც პოლიტიკაში და არც რომელიმე პარტიაში გაერთიანებას არ ვაპირებ. პაატა ბურჭულაძეს, მხოლოდ როგორც რიგითმა მოქალაქემ და მისმა მეგობარმა, პოლიტიკურ საქმიანობაში მხარდაჭერა გამოვუცხადე. მეც და ჩემი გარდაცვლილი მეუღლეც მხოლოდ და მხოლოდ სამართლიანობის აღდგენისთვის ვიბრძოდით, რაც, როგორც აღმოჩნდა, ამ ხელისუფლებამ ვერ მოახერხა.

- გუნდის მხარდაჭერაში რას გულისხმობთ?

- გუნდის მხარდაჭერაში პირველ რიგში იმას ვგულისხმობ, რომ მათი იმედი მაქვს და მგონია, რომ თუ ისინი ხელისუფლებაში მოვლენ, იმ სამართლიანობის აღდგენისთვის იბრძოლებენ, რომელიც ამ ხელისუფლებამ ვერ შეძლო. პაატა ჩემთვის ვიღაც არ არის და სანდროს გარდაცვალებიდან დღემდე ის ყოველთვის გვერდში მიდგას. ის ჩემი ბავშვობის მეგობარია და ბურჭულაძეების ოჯახი ჩემი ოჯახია. ჩემთან არაერთი პარტიის წარმომადგენელი მოდიოდა და თანაგრძნობას გამოხატავდა. ბევრმა ეს სათავისოდაც გამოიყენა. ალბათ მკითხველი მიხვდება, რასაც ვგულიხმობ. ბურჭულაძემ ჩემი და ჩემი მეუღლის ტრაგედია პირადი ინტერესებისთვის კი არ გამოიყენა, არამედ პირიქით, მართლა გვერდით დამიდგა. იმ მძიმე წუთებში, როდესაც მთელი იმდროინდელი რეჟიმი ჩემი ოჯახის გასანადგურებლად იყო მომართული, მას უკან ერთი ნაბიჯითაც არ დაუხევია.

- თქვენმა ოჯახმა “ქართული ოცნების” მოსვლამდე ამ პოლიტიკური ძალისგან სამართლიანობის აღდგენის დაპირება მიიღო. როგორ ფიქრობთ, რატომ ვერ მოხერხდა დაპირების შესრულება?

- რა თქმა უნდა, მეც და ჩემს მეუღლესაც დიდი იმედი გვქონდა, რომ მოვიდოდა ძალა, რომელიც სამართლიანობის აღდგენისთვის იბრძოლებდა. შვილის სიკვდილით გამოწვეული ტკივილი მხოლოდ მე არ შემეხო და საქართველოში ასეთი ძალიან ბევრი ადამიანია. მაშინ ყველას იმედი მოგვეცა, მაგრამ ახლა ეს ყველაფერი მხოლოდ ილუზიად დარჩა. არ ვიცი, რატომ ვერ შეძლეს სამართლიანობის აღდგენა, მაგრამ ფაქტი სახეზეა, რომ ყველას სხვა მოლოდინი გვქონდა. ჩვენ ვიბრძოდით, რომ ახალ ხელისუფლებას დაესამარებინა მურუსიძის ვირუსი, რომელიც კი არ დასამარდა, არამედ პირიქით, უფრო კარგი პირობები აქვს შექმნილი. ეს ერთი მაგალითიც კი საკმარისია იმისთვის, რომ ყველა ჩემნაირი შვილმკვდარი მამა თუ დედა, მოტყუებული აღმოჩნდა.

- თქვენ როგორ ფიქრობთ, რატომ გახდა მოსამართლე ლევან მურუსიძე ხელისუფლებისთვის მისაღები ფიგურა?

- საზოგადოებას ალბათ ახსოვს, როდესაც პრეზიდენტმა ჩემი გარდაცვლილი მეუღლე ირინა ენუქიძე ღირსების ორდენით დააჯილდოვა, მაშინ მეგონა, რომ მას უზენაესი სასამართლოს საბჭოს თავმჯდომარედ არ აირჩევდნენ, რადგანაც “ქართული ოცნების” მიერ წარდგენილი საბჭოს წევრები ხმას არ მისცემდნენ. ვიფიქრე, ამას როგორ იკადრებენ-მეთქი. ერთი ხელით რომ მოგეფერებიან და მეორე ხელით სილას გაგაწნავენ, ეს იმ შემთხვევას ჰგავდა. ეს კაცი იმდენად ღირებული აღმოჩნდა, რომ ბოლოს სააკაშვილის სისტემის მსხვერპლადაც კი გამოაცხადეს. თუ მურუსიძე ასეთი წამებულია, მაშინ სხვებმა რაღა დააშავეს? ყველა რეჟიმის მსხვერპლი გამოდის. ამიტომაც არის, რომ პაატა ბურჭულაძეს წმინდა მეგობრული მხარდაჭერა გამოვუცხადე და ზუსტად ვიცი, რომ ხალხს რასაც დაჰპირდება, შეასრულებს.

- გაკეთდა განცხადებები, ბურჭულაძე “ნაციონალური მოძრაობის” სატელიტიაო.

- ეს სასაცილოა. პაატა ბურჭულაძე არც სააკაშვილის და არც არავის სატელიტი არ არის. ის არის ადამიანი, რომელიც ამჟამად ჩვენს ქვეყანას ძალიან სჭირდება. მოდით, ამის გადაწყვეტა ხალხს მივანდოთ, არჩევანს საზოგადოება გააკეთებს.

————————–

“ალია”, 13 მაისი, 2016 წელი

რას ჰგავხართ თქვე გაუბედურებულებო, რას დაგამსგავსათ არქიფო სეთურმა?!

დავით უსუფაშვილი „რესპუბლიკელებს“ ტოვებს და „ოცნებაში“ გადადის?

ნინო სამხარაძე

კბენა, ღრენა, მუშტების ბრახუნი… პარლამენტი კი არა, ცხოველთა ფერმაა, ბოსელი, სადაც შესვლა სიცოცხლისთვის მავნებელია. რას ჰგავხართ თქვე გაუბედურებულებო, რას დაგამსგავსათ არქიფო სეთურმა… აი, რით განსხვავდებით ცხოველებისგან – მეტყველების აპარატით, ცხოველებს გაცილებით მეტი სარგებელი მოაქვთ, ვიდრე თქვენ.

ამჯერადაც, დაპირისპირება პარლამენტში საკონსტიტუციო სასამართლოს შესახებ ცვლილებათა პროექტის განხილვისას კინაღამ მუშტიკრივში გადაიზარდა. ახლა არა აქვს მნიშვნელობა იმის ახსნას, ვინ ვის რა დაუწუნა, ფაქტი ერთია, ოპოზიციონერი დეპუტატები ლამის მაუგლივით ხტუნავდნენ და პროტესტის ნიშნად მაგიდაზე ხელებს აბრახუნებდნენ, განსაკუთრებული აქტივობით გამოირჩეოდა ჩიორა თაქთაქიშვილი. ეს ჰიპერაქტიური ქალბატონი, როგორც ჩანს, პირად ცხოვრებაში ენერგიას ვერ ხარჯავს, რაც იწვევს საპარლამენტო სხდომებზე მის ასეთ გამოხტომებს. ამ „კოლექტიურ ჩიორებს“ კარგი ფსიქიატრი სჭირდებათ და ზოგადად, შემოვდივარ ინიციატივით, რომ პარლამენტის წევრობის კანდიდატებმა წარმოადგინონ ფსიქიატრიული დასკვნა, წინააღმდეგ შემთხვევაში ვხედავთ, რომ გიჟებს ქვეყანა ეწირება, როგორც „ქართული ოცნების“, ასევე „ნაციონალების“ მხრიდან.

ეკა ბესელიასა და ჩიორას დაპირისპირება ინტერნეტჰიტი გახდა, ეკა „ბესელკებიდან“ ამოხტა და ჩიორას თვალები გადაუბრიალა, – „სანამ ჩიორა ხარ, აქედან დაახვიე, თორემ ვიცი, რასაც გიზამო!..“. ჩიორა მსუქანი მატლივით იგრიხებოდა, „შენ დაახვიე ამ დარბაზიდან, ეს ადგილი ჩემიაო“. მარტივად რომ ვთქვათ, ეს იყო ძუკნების ომი. ორივე მხრიდან გულისამრევია „მარტის კატასავით“ ჩხავილი, ფიქრი იმაზე, როგორ შეინარჩუნონ სტატუს კვო.

პარლამენტში გამოცხადებული ომის ქრონიკის პარალელურად, პაატა ბურჭულაძემ, როგორც იქნა, საკუთარი ზრახვები საჯარო გახადა. მან პოლიტიკური პარტია შექმნა სახელწოდებით – „სახელმწიფო ხალხისთვის“. „ალია“ ჯერ კიდევ 2014 წლის ზაფხულში წერდა, რომ პაატა ბურჭულაძე პოლიტიკურ ავანსცენაზე გამოჩნდებოდა. მაშინ ძალიან ბევრი პოლიტიკოსი ამ ინფორმაციას დაუჯერებლად მიიჩნევდა, თუმცა 2016 წლის 12 მაისს თავად პაატა ბურჭულაძე წარდგა როგორც პოლიტიკური პარტიის ლიდერი და ამით დაამტკიცა „ალიას“ უტყუარი ინფორმაცია. ის შემოვიდა პოლიტიკაში, როგორც „ნაცმოძრაობის“ სატელიტი პარტია“, ამ კლიშეს ბურჭულაძე ვერ მოიცილებს, რადგან ის შემჩნეულია მიხეილ სააკაშვილთან კუსკუსში, მათი ურთიერთობის ამსახველი არაერთი ფოტო გავრცელდა სოციალურ ქსელში.

„ქართული ოცნების“ აღმასრულებელმა მდივანმა ირაკლი კობახიძემ „ლეიბორისტებს“, „“თავისუფალ დემოკრატებსა“ და პაატა ბურჭულაძეს „ნაციონალური მოძრაობის“ სატელიტი უწოდა, თუმცა დაავიწყდა, რომ „გირჩები“, „ციყვები“ და „რკოები“ მათი სატელიტები არიან… ამ ჯერ კიდევ ჩამოუყალიბებელ პოლიტიკოსს საკუთარი სიტყვების არ სჯერა, მისი მხრიდან ასეთი განცხადებები კი სასაცილოდ ჟღერს, რაც არ უნდა რეალური იყოს ინფორმაცია.

პაატა ბურჭულაძე აცხადებს: „იძულებული ვიყავი, მიმეტოვებინა კარიერა, ტკბილი და კარგი ცხოვრება და ჩავდგომოდი პოლიტიკურ ძალას სათავეშიო…“. ვინ გთხოვათ და ვინ დაგიკვეთათ, ბატონო პაატა, ამხელა მსხვერპლის გაღება?.. მახსენდება მწერალ მერაბ შათირიშვილის განცხადება, როცა პაატა ბურჭულაძე პოლიტიკურ ასპარეზზე გამოჩნდა: `რა პაატა ბურჭულაძე, რის პაატა ბურჭულაძე, რა რეიტინგი, რის რეიტინგი… ბოლოს და ბოლოს, მომღერალია და თუ ხმა გაუფუჭდა დილაობით უმი კვერცხი ყლაპოს უზმოზე.

რომელი პოლიტიკოსი ეგ მყავს, ან რეიტინგების რა ჭია შეუჩნდა. ხელი მოითბო ფარისევლური ქველმოქმედებით, ფული იშოვა და ხელისუფლება მოუნდა?!. სად იყო მაშინ, მიშას დესპოტიზმი უკანალებს რომ აზანზარებდა, საკუთარ უკანალს გაუფრთხილდა?!. ეს ქვეყანაა თუ „სბროდი“, ვერ გამიგია. გიჟები ვართ, თუ უკვე შიზოფრენიის ზღვარს გავეცალეთ და პათოლოგიური პოლიტიკომანიით შეპყრობა გვჭირს?!. მე მკითხონ, ვინ არის ეს ოპერმუშაკი, ერთი, ჯიბიდან გავარდნილი „ფასიანი“ პატრიოტია და მოდი, ჩავაბაროთ ქვეყანა პაატა ბურჭულაძეს, მერე ვიმღეროთ და ვიმღეროთ არიები – „ვაი, ჩვენს პატრონს, უბედურს!..“

ჟურნალისტის კითხვაზე – სად იყო პაატა ბურჭულაძე 9 წლის განმავლობაში? მან უპასუხა: „25 წელია ყველა იმ ადამიანის გვერდითაა, ვინც ხელისუფლებაში მოდიოდა. ეს იქნებოდა გამსახურდია, შევარდნაძე, სააკაშვილი თუ ივანიშვილი…“. თუმცა, ზვიად გამსახურდიას შვილმა ცოტნემ თავის დროზე „ალიასთან“ ინტერვიუში განაცხადა: „პაატა ბურჭულაძის მხოლოდ ერთ ფრაზას გამოვეხმაურები, როცა ის ამბობს, რომ მას გამსახურდიადან დაწყებული, ყველა ეხვეწებოდა პოლიტიკაში მოსვლას, ეს სიმართლეს არ შეესაბამება. პაატა ბურჭულაძეს ზვიად გამსახურდიამ პოლიტიკაში მოსვლა კი არა, საქართველოსთვის დახმარება სთხოვა როგორც „ინწელიგენციის“ უმრავლესობას, მაგრამ მათ შევარდნაძესთან კონსულტაციები და მისი ყმადნაფიცობა არჩიეს. ამავე დროს, თუ ამ უმძიმეს 25 წლის მანძილზე არ გაუჩნდა სურვილი, პოლიტიკურ თუ საზოგადოებრივ ცხოვრებაში რამე დადებითი გაეკეთებინა ამ უბედური ქვეყნისთვის, ახლა რა ღმერთი გაუწყრა?!. ობიექტურობისთვის უნდა ითქვას, რომ პაატა ბურჭულაძემ დააარსა ფონდი „იავნანა“ და ძალიან ბევრ სოციალურად გაჭირვებულ, ღატაკ, უსახლკარო მრავალშვილიან ოჯახს ბინები საჩუქრად გადასცა. ამას ის წლების მანძილზე უანგაროდ აკეთებდა და ასევე, ეკლესიების მშენებლობაში განსაკუთრებული წვლილი შეჰქონდა… თუმცა, როცა მეცენატი, ქველმოქმედი პოლიტიკაში შემოდის, ისევე როგორც ეს ივანიშვილმა გააკეთა, ეს ნიშნავს, რომ ქვეყანაში პოლიტიკოსების სერიოზული კრიზისია და სულაც არ არის კარგის ნიშანი, რადგან ამ ქველმოქმედებების მიღმა იკვეთება წინასწარ დაგეგმილი ანგარება, ხმების მოსყიდვა, რაც შემდგომში ასეთი ადამიანების მიმართ უნდობლობასა და იმედგაცრუებას იწვევს.

ამასობაში, უმრავლესობის წევრი თამაზ მეჭიაური, პარტია „ქართულ ოცნებას“ ტოვებს, პრემიერ-მინისტრმა ლონდონიდან კოლექტიურ „მეჭიაურებს შემოუთვალა“: „გუნდში არ იქნებიან ის ადამიანები, ვისაც რაიმე ეჭვი ექნება საქართველოს საგარეო პოლიტიკურ ვექტორთან მიმართებაში…“. ეს იმ კითხვის საპასუხოდ განაცხადა, იქნება თუ არა დეპუტატი თამაზ მეჭიაური „ქართული ოცნების“ საარჩევნო სიაში.

თამაზ მეჭიაურისთვის ეს გასაგები გზავნილი აღმოჩნდა იმისთვის, რომ პოლიტიკური გადაწყვეტილება მიიღოს და დატოვოს „ქართული ოცნება“: „მე გავაგრძელებ ჩემს პოლიტიკურ ცხოვრებას ჩვენი პარტიისგან დამოუკიდებლად….

ნელ-ნელა „ქართული ოცნება“ „ნაციონალური მოძრაობის“ გზას დაადგა, როცა ყველა ერთ ხმაში მღეროდა და განსხვავებული აზრის გამოთქმის გამო, პარტიის წევრები ისჯებოდნენ. თუკი მეჭიაური არ აღმოჩნდება საარჩევნო სიაში, ახლა ის დროა, დაველოდოთ, ვინ განახორციელებს დემარშს – მეჭიაურისგან დისტანცირებას. ეს კი მართლაც საინტერესო პროცესია. პრემიერის ლოგიკით, უნდა ვივარაუდოთ, რომ კოალიციაში აღარც „მრეწველები“ იქნებიან და სავარაუდოდ, გოგი თოფაძე, მეჭიაური და ნატო-ზე გულაყრილები დაწყვილდებიან „პატრიოტთა ალიანსის“ გარშემო.

და ბოლოს, ამბობენ, დავით უსუფაშვილმა რქები „ვეშოლკაზე“ ჩამოკიდა და „რესპუბლიკური პარტიიდან“ წასვლას აპირებსო. ძნელად წარმოსადგენია უსუფაშვილმა პარტია დატოვოს, მაგრამ დიდი ხანია, ვრცელდება ინფორმაცია, რომ მას ძმებ ბერძენიშვილებთან სერიოზული დაპირისპირება აქვს. ბოლოს კი ბერძენიშვილები უსუფაშვილისგან ითხოვდნენ, დემარშით დაეტოვებინათ მინისტრის პორტფელები „რესპუბლიკური პარტიის“ წევრებს, რაზეც პარლამენტის თავმჯდომარემ უარი განაცხადა და მათ შეახსენა ის დრო, როცა ივანიშვილი მას პარტია „ქართული ოცნების“ თავმჯდომარეობას სთავაზობდა, მაგრამ პარტია არ მიუტოვებია. თუმცა, ქართულ პოლიტიკაში გამორიცხული არაფერია და შესაძლოა, ივანიშვილის „ლუბიმჩიკი“ უსუფაშვილი „ქართული ოცნების“ რიგებშიც ვიხილოთ.

“ალია”, 13 მაისი, 2016 წელი

ვისი ფულით მოდის პაატა ბურჭულაძე პოლიტიკაში და რა კითხვები აქვს მასთან არასაპარლამენტო ოპოზიციას?

ნინო ლაბარტყავა

გუშინ პაატა ბურჭულაძემ, როგორც იქნა, აღიარა, პოლიტიკაში მოვდივარო. ბურჭულაძის პოლიტიკურ ორგანიზაციას „სახელმწიფო ხალხისთვის“ ჰქვია… ვერაფერს იტყვი, ისეთი სახელწოდებაა, პირდაპირ ფეხზე წამოდგომას მოითხოვს, სამშობლოს სადღეგრძელოსი არ იყოს, თუმცა, მართლაც რამდენად ედარდება ხალხი, ეს სხვა საკითხია. უკვე რა ხანია, მას სააკაშვილთან „კურკურში“ სდებენ „ბრალს“ და ამის დასტურად იმ ფოტოს ატრიალებენ, რომელშიც ის 2015 წელს ოდესაში სააკაშვილთან ხელგადახვეული დგას.

ახალი პოლიტიკური ძალის გამოჩენას თავისთავად მოჰყვა რეაქციები. საპარლამენტო უმრავლესობის ლიდერმა ზვიად კვაჭანტირაძემ თქვა, წავიკითხე ბურჭულაძის განცხადება და აზრი ვერ გამოვიტანე, ეს არის ლამაზი სიტყვების რახარუხიო (ისე, თქვენ ხომ რას ამბობთ, სულ აზრიანად არაკრაკებთ ხოლმე სათქმელს და ზედ საქმესაც აყოლებთ!). პრემიერ-მინისტრმა გიორგი კვირიკაშვილმა, – რაც უფრო მეტი პოლიტიკური მოთამაშე იქნება, მით მეტი კონკურენცია იქნება, მაგრამ ბურჭულაძე „ოცნებას“ კონკურენციას ვერ გაუწევსო. „ნაციონალებმა“ თქვეს, მივესალმებით მის ამ გადაწყვეტილებასო, ირაკლი ალასანიამ კი პაატა ბურჭულაძესთან მომავალში რიგ საკითხებზე თანამშრომლობაც არ გამორიცხა… ექსპერტების ნაწილი ამბობს, რომ სააკაშვილთან ბურჭულაძის წარსული თუ სამომავლო პოლიტიკური თანამშრომლობა საეჭვოა, რადგან პაატას ისეთი გარემოცვა ჰყავს, ამის გათვალისწინებით ეს ცოტა წარმოუდგენელი ჩანსო და ძნელი დასაჯერებელია, რომ ის მიშას პროექტი იყოსო.

მოკლედ, გუშინ მთავარ პოლიტიკურ ინტრიგად დარჩა კითხვა, ვისთან ითანამშრომლებს ბურჭულაძის პარტია? თავად ამაზე არაფერი უთქვამთ. ვიცით რომ ყველანაირ კოალიციაზე უარს ამბობენ „ლეიბორისტები“, იგივე განაცხადეს „ახლებმაც“.

საინტერესოა, რას ფიქრობს პაატა ბურჭულაძის პოლიტიკაში შემოსვლაზე არასაპარლამენტო ოპოზიციაში და აპირებენ თუ არა მასთან თანამშრომლობას?

———–

გვესაუბრება კახა კუკავა, „თავისუფალი საქართველოს“ ლიდერი:

- გუშინ გაკეთებულ კომენტარებში უმეტესობა აცხადებდა, რომ პაატა ბურჭულაძე მიხეილ სააკაშვილის „პროექტია“. კონკრეტული იცით ამაზე რამე?

- ამის კონკრეტული მტკიცებულებები მე არ მაქვს, მაგრამ რაც ჩანს, არის ის, რომ პაატა ბურჭულაძე იზიარებს იმ საგარეო კურსსა და პოლიტიკურ იდეოლოგიებს, რომელიც სააკაშვილს და მის პარტიას აქვს. ჩანს ისიც, რომ „რუსთავი 2“, რომელიც არის „ნაციონალური მოძრაობის“ მხარდამჭერი ტელეარხი, პაატა ბურჭულაძის ირგვლივ ინფორმაციებს დიდი სიმპათიით აშუქებს. ისიც ჩანს, რომ „აირაიც“ და „ენდიაიც“ სიმპათიით არიან განწყობილნი ბურჭულაძის მიმართ. ეს არის ის, რაც თვალსაჩინოა, დანარჩენი კი უკვე ინტერპრეტაციის საგანია.

- პაატა ბურჭულაძემ არ დააკონკრეტა, აპირებს თუ არა წინასაარჩევნოდ რომელიმე პოლიტიკურ ძალასთან თანამშრომლობას. თქვენ ხომ არ ფიქრობთ მასთან თანამშრომლობას? ან როგორ ფიქრობთ, ვისთან შეიძლება გადაიკვეთოს ბურჭულაძისა და მისი პარტიის პოლიტიკური გზები?

- არა, არ ვფიქრობთ. რაც შეეხება პაატა ბურჭულაძის სხვა პოლიტიკურ ძალებთან შესაძლო თანამშრომლობას: არ მგონია, რომ მან არჩევნებამდე მოახერხოს და შექმნას საარჩევნო კოალიცია. არჩევნების შემდეგ, სავარაუდოდ, „ნაციონალური მოძრაობა“, „თავისუფალი დემოკრატები“, ბურჭულაძის პარტია, რომლებიც ღიად გამოხატავენ პროამერიკულ კურსს, ამერიკა, ალბათ, ისურვებდა, რომ ამათ მომავალში ჩამოაყალიბონ საპარლამენტო უმრავლესობა.

- რამე იცით ბატონი პაატას ფინანსურ რესურსებსა და წყაროებზე? თითქმის ყველა რაიონი მოიარა და წინასაარჩევნო პიარკამპანია ჩაატარა, ამ ყველაფერს კი სერიოზული ფინანსები სჭირდება…

- კონკრეტული ინფორმაცია მაგასთან დაკავშირებით არ მაქვს, მაგრამ რაც გამიგია, არის ის, რომ მას აფინანსებს ქართულ-ებრაული წარმოშობის ბიზნესმენი დავით იაკობაშვილი. როგორც ვიცი, იაკობაშვილს საქართველოშიც აქვს ბევრი ობიექტი, თავის დროზე თანამშრომლობდა კეზერაშვილთან და რუსეთის ხელისუფლებასთან კონფლიქტის გამო, მან დატოვა რუსეთის ტერიტორია და ახლა საზღვარგარეთ საქმიანობს.

———–

გიორგი ახვლედიანი, „გაერთიანებული დემოკრატიული მოძრაობის“ ერთ-ერთი ლიდერი, ამბობს:

„პაატა ბურჭულაძის პარტიასთან თანამშრომლობა, ალბათ, ცოტა რთული თემაა. ჩვენ სერიოზული შედეგების დასადებად არ გვჭირდება ბლოკები, კოალიციები, გაერთიანებები და ა.შ. გარდა ამისა, ჯერჯერობით ძალიან ბევრი კითხვის ნიშანია, რომელსაც, ალბათ, ბატონი პაატა პასუხს გასცემს. რადგან როდესაც ახლად შექმნილ პოლიტიკურ ორგანიზაციას კითხვის ნიშნები მოჰყვება, ეს ყოველთვის ხელისშემშლელი ფაქტორია საზოგადოებისთვის. და როდესაც კითხვები პასუხგაუცემელი რჩება ხოლმე, ეს სერიოზულად აზარალებს თავად გუნდსაც და მის წევრებსაც.

- თქვენ რა კითხვები გაქვთ?

- ბატონმა პაატამ საზოგადოებას გააცნოს ის წყაროები, რომლიდანაც მას საკმაოდ სერიოზული ფინანსური რესურსის რეალობა უჩანს. ყველა რაიონში უზარმაზარი წარმომადგენლობების გახსნა საკმაოდ ძვირი სიამოვნება და ძალიან სერიოზული ფუფუნებაა არათუ ახლად შექმნილი პოლიტიკური ორგანიზაციისთვის, არამედ იმ პარტიებისთვისაც კი, რომლებსაც საბიუჯეტო დაფინანსება აქვთ მოპოვებული. რა თქმა უნდა, როდესაც ფინანსური რესურსი იკვეთება, მასთან დაკავშირებით გარკვეული პოლიტიკური ვალდებულებებიც არსებობს. როდესაც საზოგადოებას ეუბნები, რომ იცით, რა? ჩვენ აბსოლუტურად ღიანი ვართ, ხალხს სახელმწიფოს დავუბრუნებთო, სწორედ ხალხს აქვს უფლება, იცოდეს, რა ფინანსური ვალდებულებებით მოდის კონკრეტული ახალი პოლიტიკური ძალა, ვის მიმართ აქვს მას აღებული კონკრეტული ვალდებულებები, რომელი ფინანსური ჯგუფების მიმართ?

სად არიან ეს ჯგუფები – საქართველოში თუ მის ფარგლებს გარეთ? რამდენადაც ვიცი, ბატონი პაატა არ მიეკუთვნება ქართველ მილიონერთა რიცხვს. მხოლოდ წარმომადგენლობებში რამდენიმე ასეული ათასი (თუ მეტი) დოლარის დახარჯვა, ჩემი აზრით, არ შეესაბამება მის ფინანსურ იმიჯს, რადგან მე არ გამიგია, რომ ის დიდი ბიზნესმენი იყოს, საწარმოები ჰქონდეს, საიდანაც შემოსავალი აქვს და ა.შ. მე მაგალითად ამ კითხვასაც დავსვამდი: როგორ ხდება, რომ „ნაცმოძრაობის“ მთელი მედიარესურსი დღეს პაატა ბურჭულაძის რეკლამირებაზე მუშაობს? მთავარია ისიც, რამდენად შეძლებს ბატონი პაატა, პოზიციონირება მოახდინოს, როგორც პოლიტიკოსმა, როგორც პარტიის ლიდერმა? მას მოუწევს ამ ნაბიჯის გადადგმა და არის კი ამისთვის მზად? ძალიან ბევრი რამ აქვს მას გასაკეთებელი იმისთვის, საზოგადოება დაარწმუნოს, რომ ის გარკვეულწილად მზად არის, ის იმედები გაამართლოს, რომელიც მას უკავშირდება.

“ალია”, 13 მაისი, 2016 წელი

რით დააშანტაჟა და რა გარიგება შედგა მილიარდერ ბიძინა ივანიშვილსა და მილიონერ ლეონიდ ჩერნოვეცკის შორის?

გელა ზედელაშვილი

პარლამენტის ვიცე-სპიკერმა, მურმან დუმბაძემ ლეონიდ ჩერნოვეცკისთან ურთიერთობა გაწყვიტა. შეგახსენებთ, რომ კიევის ყოფილმა მერმა, ამჟამად ქობულეთში მცხოვრებმა ჩერნოვეცკიმ ჯერ კიდევ შარშან დააფუძნა პარტია „ბედნიერი საქართველოსთვის“ და პირველი, ვისაც თავისთან დაუძახა, გახლდათ მურმან დუმბაძე. მილიონერი ლეონიდ ჩერნოვეცკი აქამდე გვიანონსებდა, რომ ის შეკრებდა ძლიერ გუნდს, მოიზიდავდა ახალ, გაურყვნელ სახეებს და უმრავლესობით მოვიდოდა ხელისუფლებაში, თუმცა ამ დღეებში სიტუაცია შეიცვალა, მურმან დუმბაძე აცხადებს, რომ მას შემდეგ, რაც ჩერნოვეცკი ივანიშვილს შეხვდა, მასთან ურთიერთობა აღარ ჰქონია: „არანაირი განმარტება არ მიმიღია და არც ის ვიცი, რაზე მოილაპარაკა მან ბიძინა ივანიშვილთან. რადგან მან პარტიის მშენებლობა და ჩემთან თანამშრომლობა აღარ გააგრძელა, რაღაც დასკვნის გაკეთება ძნელი საქმე არ არის“.

რასაკვირველია, დასკვნების გაკეთება იოლია, მით უმეტეს მაშინ, როცა ჩერნოვეცკიმ საარჩევნო კამპანია რადიკალურად შეცვალა და ახლა უკვე ფიქრობს, რომ ამ არჩევნებზე მარტო გამოვა. დუმბაძის თქმით, პარტია „ბედნიერი საქართველოსთვის“ არის მხოლოდ შირმა, ის მაჟორიტარად კენჭისყრას ქობულეთის რაიონში აპირებს: „მეჩვენება, რომ ეს ორი მდიდარი კაცი ერთმანეთს ეთამაშება. ეს თამაში არც ერთ მათგანს არ მოუტანს სასურველ შედეგს. ლეონიდ ჩერნოვეცკი შეეცდება, ქობულეთში რაღაც შედეგი დადოს. ამასთანავე, აუცილებლად უნდა ახსოვდეს, რომ „ქართულ ოცნებას“ მისთვის მისაცემი ხმა არ აქვს“.

როგორც ინკოგნიტო წყარო ამბობს „ალიასთან“ საუბარში, ჩერნოვეცკი ივანიშვილს აქამდე პირადად არ იცნობდა, არასოდეს შეხვედრია, მაგრამ რაღაც მომენტში მათი გზები გადაიკვეთა: „ამ შეხვედრისას ბიძინამ ჩერნოვეცკის აეროპორტის საბაჟოზე დაკავება შეახსენა. ამბობენ, რომ აეროპორტის საბაჟოზე დააკავეს საეჭვო ტვირთი, სავარაუდოდ, ნარკოტიკები, რომელიც ჩერნოვეცკის უკავშირდებოდა. ყოველ შემთხვევაში, ეს საქმე გასაიდუმლოვდა. მაქვს ინფორმაცია, რომ კიევის ყოფილმა მერმა დიდი ჯარიმა გადაიხადა. ბიძინას გაუფრთხილებია, შენს ქცევას დავაკვირდები, თუ დაიმსახურებ, შეიძლება ქობულეთი დაგითმოო“.

არ ვამტკიცებთ, რომ ეს ინფორმაცია უტყუარია, თუმცა იგივე წყაროს ინფორმაციით (ეს ფაქტი შემდეგ საინფორმაციო საშუალებებითაც გავრცელდა), ივანიშვილთან შეხვედრის შემდეგ ჩერნოვეცკი შეშინდა და სულის მოსათქმელად საქართველო დატოვა. თუმცა მოგვიანებით განაცხადა, რომ მისი პერსონა შანტაჟს არექვემდებარება: „მე უკვე დიდი ხანია, არავის შევხვედრივარ. ჩემი შანტაჟი საქართველოში შეუძლებელია. მე არ მაქვს არც ბიზნესი და არც ისეთ საკითხებში ვარ ჩაბმული, რომლის გამოც დამოკიდებული ვიქნები მთავრობაზე ან სპეცსამსახურებზე! და მე არ ვფიქრობ, რომ ასეთი რამ დღეს საქართველოში შეიძლება მოხდეს. მთავარი კი ის არის, რომ ჩემი ბუნებით მე შანტაჟს არ ვექვემდებარები. ახლა მე რვა დღით ევროპაში ვიმყოფები ჩემს მეუღლესთან ერთად: ზურგს ვმკურნალობ, რათა პარლამენტში მოსვლის შემდეგ ასეთი საკითხები აღარ მაწუხებდეს და არ მომიხდეს რომელიმე პლენარული სხდომის გამოტოვება“.

მართალია, ჩერნოვეცკი ივანიშვილთან შეხვედრასაც უარყოფს და ე.წ. გარიგებასაც, მაგრამ სახეზეა სამი ფაქტი: პირველი – მას მურმან დუმბაძე გაეცალა იმის გამო, რომ ბიძინა ივანიშვილს რაღაცაზე გაურიგდა; მეორე – ჩერნოვეცკიმ, ფაქტობრივად, შეწყვიტა პარტიული საქმიანობა და ახლა ფიქრობს, რომ იბრძოლებს მხოლოდ მაჟორიტარობისთვის; მესამე – ის მართლაც იყო წასული საქართველოდან, რასაც ხსნის მხოლოდ ზურგის ტკივილით. არადა, პირველი ორი ფაქტი სრულიად საპირისპიროს ამტკიცებს. გარდა ამისა, თავად მურმან დუმბაძეც ადასტურებს „ალიასთან“, რომ ის მართლაც შეხვდა ბიძინა ივანიშვილს და ამის შემდეგ თვითონაც ესაუბრა ამ საკითხზე ჩერნოვეცკის:

_ რას ჰქვია, არ შეხვედრია? ფაქტია ისიც, რომ ჩერნოვეცკიმ თავისი პარტიული მოღვაწეობა შეზღუდა და აპირებს, ქობულეთში იყაროს კენჭი. მე დადასტურებით ვამბობ, რომ შეხვდა და იყო რაღაც გარიგება, ამას არასოდეს ვიტყოდი, რომ არ მქონდეს ფაქტები. ჩერნოვეცკი ივანიშვილთან შეხვედრის შემდეგ მხვდება მე და მეუბნება, პარტიული საქმიანობა უნდა შევზღუდოო. ჩემთან საუბარში ჩერნოვეცკიმ დაადასტურა, რომ აქამდე ივანიშვილს არ იცნობდა პირადად.

- როგორ ფიქრობთ, კონკრეტულად რა გარიგება შედგა მათ შორის?

- მე ვიცი ის, რა შედეგიც ჩანს, შემცირდა მისი პოლიტიკური არეალი. გამოგიტყდებით, ჩერნოვეცკი კი არის საქართველოს მოქალაქე, მაგრამ არის მხოლოდ პასპორტით. მიუხედავად იმისა, რომ ის მე ვერაფერს მაძლევდა და ეს არც მაინტერესებდა, თანამშრომლობაზე მაინც დავთანხმდი. მე პოლიტიკაში ფული არასოდეს მიკეთებია, მაგრამ ამ ადამიანს შეეძლო პოლიტიკის ფინანსურად უზრუნველყოფა და ეს იყო მნიშვნელოვანი. ვგულისხმობ ოფისებისა თუ სხვა ღონისძიებების დაფინანსებას, რაც სჭირდება საარჩევნო მარათონს. გარდა ამისა, აქვს პოლიტიკური გამოცდილება, საკმაოდ ჩახედულია საპარლამენტო საქმიანობაში და საინტერესო პროექტებიც წარმოადგინა. მოკლედ, ივანიშვილთან შეხვედრის შემდეგ მოხდა ის, რაც უკვე გითხარით.

- არ გითხრათ ჩერნოვეცკიმ, რაზე ისაუბრა ივანიშვილთან?

- არა, მე თავად გამომაქვს დასკვნები, ივანიშვილს არც ის მოეწონებოდა, რომ ჩერნოვეცკის ჩემთან ჰქონდა ურთიერთობა და მოსთხოვდა, ეს ურთიერთობა შეეწყვიტა. არც მიკვირს, ჩერნოვეცკი არ არის ქართველი, არ იცის ჩვენი ფსიქოლოგია და შესაბამისად, ის ვერ გააკეთებს იმას, რაც გააკეთა უკრაინაში. იქ კი გახდა ორჯერ ჯიუტად კიევის მერი, მაგრამ აქ ვერ გაიტანს თავის სიჯიუტეს ისევე, როგორც საფრანგეთის მოქალაქე ბიძინა ივანიშვილი თავისას ვერ გაიტანს საფრანგეთში. ვაღიარებ, ამ ადამიანმა გააკეთა დიდი საქმე, სააკაშვილის „მახინის“ მოშორება არ იყო იოლი, მაგრამ იგივეს ვერ განახორციელებს საფრანგეთში, აქ ხელი შევუწყვეთ ჩვენ, ხალხმა.

- ბატონო მურმან, რამე ხომ არ გსმენიათ, ხომ არ გაგიგონიათ, რა მოხდა ბათუმის აეროპორტის საბაჟოზე, რა საეჭვო ტვირთი დააკავეს, რომელიც შემდეგ ჩერნოვეცკის დაუკავშირეს?

- ასეთი რამ გამიგონია, მაგრამ ხმამაღლა ვერ ვამბობ, რადგან ხელთ არ მაქვს დოკუმენტები. თუ ასეთი რამ მოხდა, მაშინ შესაბამისი დოკუმენტაციაც უნდა არსებობდეს. მე ამის შესახებ მისთვის შეკითხვა არასოდეს დამისვამს, თვითონაც არაფერი უთქვამს, შეიძლება ბიძინა ივანიშვილს გაცილებით მეტი ინფორმაცია აქვს. როგორც თქვენ გაქვთ ინფორმაცია, მეც ასევე მაქვს ამ ფაქტის შესახებ, მაგრამ ოფიციალურად ვერ ვადასტურებ.

- როდესაც ჩერნოვეცკის შეხვდით, გითხრათ, აღარ მჭირდები, კარგად იყავიო?

- არა, ასეთი რამ არ უთქვამს… მითხრა, ჩემი აქტიურობა იქნება შემოსაზღვრული მხოლოდ ქობულეთით, სადაც ამჟამად ვცხოვრობო. შეიძლება ფორმალურად პარტიაც დააკომპლექტოს, სახელები და გვარებიც ჩაწეროს, მაგრამ ის არ იბრძოლებს ქვეყნის მასშტაბით.

„ალია“ შეეცადა, ლეონიდ ჩერნოვეცკისგან ან მისი პრესსამსახურიდან მაინც მიეღო კომენტარი, რაზე შეთანხმდნენ ივანიშვილი და ჩერნოვეცკი, რა მოხდა საბაჟოზე, რაც ჩერნოვეცკის უკავშირდება და ა.შ. ეს შეკითხვებიც გადავუგზავნეთ სალომე წერეთელს, 4 საათზე, დაგვპირდა, რომ დათქმულ დროს (საღამოს 7 საათამდე) პასუხებს მივიღებდით, მაგრამ ბოლო მომენტში უარი განაცხადეს. ყოველ შემთხვევაში, ჩვენ ისიც გავარკვიეთ, რომ `ალიას~ მიერ გაგზავნილი შეკითხვები ივანიშვილთან შეხვედრის, აეროპორტის საბაჟოზე მომხდარი ინციდენტისა და პოლიტიკური მოღვაწეობის შეზღუდვის შესახებ, ლეონიდ ჩერნოვეცკის მაგიდაზე დაუდეს, მაგრამ მან თვითონ არ ისურვა ამ თემაზე პასუხების გაცემა. ასე რომ, ჩვენ პატიოსნად მოვიხადეთ პროფესიული ვალდებულება.

თუკი ბატონი ჩერნოვეცკი დასმულ კითხვებზე პასუხის გაცემას მოინდომებს, მის პოზიციასაც დავაფიქსირებთ. „ალიას“ ბათუმის საბაჟოზე მომხდარ შემთხვევასთან და მასთან ჩერნოვეცკის შესაძლო კავშირზე შსს-ს კომენტარიც სურდა, მაგრამ ვინაიდან დასვენების დღე იყო, ეს ვერ მოხერხდა.

————————–

„ახალი თაობა“, 13 მაისი, 2016 წელი

ინტერვიუ გიგლა ბარამიძესთან: „პაატა ბურჭულაძე ამერიკის პროექტია… იგი საქართველოს პრეზიდენტობისთვის ემზადება“

რატომ წავიდა პაატა ბურჭულაძე პოლიტიკაში, ვინ დგას მის უკან? გაუწევს თუ არა ოპოზიციურ პარტიებს კონკურენციას, რა გადაწყვეტილების მიღება მოუწევს ბიძინა ივანიშვილს? – ამის შესახებ „ახალ თაობას“ დემოკრატიული მოძრაობის ერთ-ერთი ლიდერი გიგლა ბარამიძე ესაუბრება.

„როდესაც პაატა ბურჭულაძემ რეგიონებში საქველმოქმედო ოფისების გახსნა და ხელისუფლების კრიტიკა დაიწყო, მაშინვე ვთქვით, რომ ის პოლიტიკაში წავიდოდა. სწორედ „ახალ თაობასთან“ და ერთ-ერთ გადაცემაში ვთქვი, რომ გავა 5 თვე და პაატა ბურჭულაძე იტყვის, რომ ხალხმა მოსთხოვა, საქველმოქმედო ორგანიზაცია პოლიტიკურ პარტიად გადაკეთებულიყო. ისე აგიხდეთ ყველაფერი კარგი, როგორც ეს პროგნოზი გამართლდა. ჩემი ნათქვამი ჩვენმა სახელოვანმა ბანმა სიტყვასიტყვით გაიმეორა. ჩვენს მტერ-მოყვარეებს ვურჩევ, სანამ რაღაც პროცესებზე გააკეთებენ კომენტარს, ჩვენს ინტერვიუებს გაეცნონ და სხვებზე ადრე ეცოდინებათ, 5-6 თვეში რა მოხდება“, – ამბობს გიგლა ბარამიძე.

- პაატა ბურჭულაძეს ჯერ პოლიტიკაში მოსვლაზე განცხადება არ ჰქონდა გაკეთებული, როცა დაიწყო საუბარი იმაზე, თუ ვისთან შექმნიდა ალიანსს. თქვენი აზრით, ვისთან ერთად ვიხილავთ მას არჩევნებზე?

- ვიღაცასთან დაფარულ თუ ირიბ ალიანსში აუცილებლად შევლენ. გამომდინარე იქიდან, რომ სხვა პარტიების საქმეებში არ ვერევით, ეს ნაკლებად გვაინტერესებს. ღმერთმა ხელი მოუმართოთ, თუ რამეს შეძლებენ.

- რამდენიმე კვირის წინ „აირაი“-მ გამოაქვეყნა კვლევა, სადაც ბურჭულაძე ყველაზე პოპულარულ ლიდერად დასახელდა. ამას როგორ ახსნით?

- „აირაი“-სა და „ენდიაი“-ს კვლევების ვის სჯერა. ეგენი პოლიტიკურ კონიუნქტურაზე აყოლილი ორგანიზაციები არიან და ვიღაცის დაკვეთებს ასრულებენ. ორივე მათგანი ამერიკის ხელისუფლების მიერ ფინანსდება და აქაური ოფისები ნუ კოკეტკობენ, რომ საზოგადოებრივ აზრს იკვლევენ. ისინი ასრულებენ გარკვეულ დაკვეთებს. პაატა ბურჭულაძის შემთხვევაშიც ასე მოხდა. ამერიკა ფსონს ახლა პაატა ბურჭულაძეზე აკეთებს. ასე იმიტომ კი არ იქცევიან, რომ მისით ვიღაც ჩაანაცვლონ, არამედ არჩევნების შემდგომი პერიოდისთვის ემზადებიან. იმ შემთხვევაში, თუ შედეგი ისეთი არ იქნა, როგორიც ვიღაცას აწყობს, აქ დაიწყება გამოსვლები. ქუჩაში გამოვა პაატა ბურჭულაძეც. ენდიაისა და აირაის პატრონებიც იტყვიან: აი, ხედავთ, მთელი რიგი პარტიები გამოხატავენ პროტესტსო. პაატა ბურჭულაძესა და მის რამდენიმე თანაგუნდელს დიდ პატივს ვცემ და არ გამოვრიცხავ, რომ ასეთი გეგმა მათთან შეთანხმების გარეშე დაიწერა.

- ამ ადამიანის პოლიტიკურად გააქტიურებას პარტიების მხრიდან გაღიზიანება მოჰყვა. თქვენი აზრით, შეძლებს ის სხვა პარტიებისთვის ამომრჩევლის წართმევას? მაგალითად, თქვენი ამომრჩეველი არ წავა მისკენ?

- სხვებს არ ვიცი, რას ან ვის წაართმევს, მაგრამ ჩვენს პარტიას ეს არ ემუქრება. ყველას მინდა შევახსენო 2011 წლის 26 მაისი. მაშინ ჩვენს პარტიას მთელი მსოფლიოსთვის რომ არ ეჩვენებინა ნაციონალების რეალური სახე, დღეს „ქართული ოცნების” წარმომადგენლები ასე ვერ იყელყელავებდნენ. ეს ამბავი ყველას დაავიწყდა და დედის რძესავით შეირგეს ჩვენ მიერ მომწიფებული პროცესი. ქვეყნისთვის სასარგებლოდ რომ ემუშავათ, ხმას არ ამოვიღებდით, მაგრამ საკუთარ კეთილდღეობაზე ზრუნავენ და ამისათვის ერთმანეთის ჭამასაც კი არ ერიდებიან.

რაც შეეხება პაატა ბურჭულაძეს, არა მგონია, ის სერიოზული კონკურენტი იყოს. ხალხი მას პოლიტიკოსად ვერ აღიქვამს და მისი სახელის გაგონებისთანავე წარმოუდგებათ მისი მშვენიერი ბანი. ის სხვა საქმეებითაც ახსოვს ხალხს. მან შექმნა ფონდი “იავნანა“. არა მგონია, ეს იმიტომ გააკეთა, რომ შემდეგ პოლიტიკაში მოსულიყო. მის მიმართ კიდევ ერთხელ გამოვხატავ პატივისცემას, მაგრამ პოლიტიკურ მეტოქედ ვერ აღვიქვამ.

- თქვენ თქვით, მისი გვარის ხსენებაზე ხალხს მისი მშვენიერი ბანი ახსენდებაო. ექსპერტებს მიაჩნიათ, რომ მას ეს მშვენიერი ბანი და ის ფაქტი, რომ პოლიტიკაში გასვრილი არ არის, არჩევნებზე წარმატებას მოუტანს...

- ჩვენი საზოგადოება ისე გაიწაფა ამ პოლიტიკურ შუქ-ჩრდილებში, რომ არა მგონია, კიდევ რაიმე შეეშალოს. რატომღაც მგონია, რომ პაატა ბურჭულაძე საპრეზიდენტოდ ემზადება და ამიტომაც შექმნა პოლიტიკური პარტია. როგორც იქნა, გვაღირსა ხელისუფლებამ და გამოაცხადა საარჩევნო მარათონის დაწყების თარიღი. ეს ისე გააკეთეს, თითქოს დაკარგული ტერიტორიები დაგვიბრუნეს. სასაცილოა ეს ყველაფერი, მაგრამ საზოგადოების თვალში ძალიან ცუდად ჩანს. აღარაფერს ვამბობ მათ რიგებში არსებულ დაპირისპირებაზე.

- ამ დაპირისპირების შედეგად მმართველ გუნდში თანამოაზრეები გამოგიჩნდათ თოფაძისა და მეჭიაურის სახით. ისინიც ისევე ფიქრობენ ნატოზე, როგორც დემოკრატიული მოძრაობა. რაიმე დაახლოება ხომ არ იქნება მოსალოდნელი?

- არა მგონია, მეჭიაური და თოფაძე ჩვენი თანამოაზრეები გახდნენ. ისინი ახლა იმეორებენ იმ ხედვებს, რომლებზეც ჩვენ წლებია ვსაუბრობთ. ჩვენი განცხადებები რეალურ ანალიზზეა დაფუძნებული. ამასთან, ვიტყვი იმასაც, რომ ევროკავშირში გაწევრიანების წინააღმდეგ არასდროს წავსულვართ. ჩვენი პოლიტიკური ძალის პროგრამის პირველ გვერდზე პრეამბულასავით წერია, რომ საქართველო ინსტიტუციონალურად უნდა დაბრუნდეს ევროკავშირში, სადაც ისტორიულად არის ჩვენი ადგილი.

არც ნატოში გაწევრიანების წინააღმდეგი ვიყავით, მაგრამ 2008 წელს შეიცვალა ვითარება. სააკაშვილმა საქართველოდან გაყვანილი უცხო ქვეყნის ჯარები შემოაბრუნა. საქართველოს 2 ძირძველ ტერიტორიაზე – აფხაზეთსა და სამაჩაბლოში განთავსდა ძალიან ძლიერი სამხედრო ბაზები. როცა სახეზე ორი დე ფაქტო რესპუბლიკა და ორი ძლიერი სამხედრო ბაზაა, ამ დროს საქართველოში ნატოს ჯარების განთავსება დამატებით საფრთხეებს გამოიწვევს. სერიოზული პრობლემები შეიქმნება ტერიტორიული მთლიანობის კუთხითაც. ვიდრე ეს პრობლემა არ მოგვარდება, თუნდაც მეგობარი ქვეყნის სამხედრო შენაერთების შემოყვანა არასწორია.

სამწუხაროდ, საქართველოში ბოლო დროს პრიმიტიული აზროვნებს დოღია და თუ ე.წ. მედასავლეთეების აზრს არ ითვალისწინებ, ეგრევე კრემლის აგენტად გაცხადებენ. არადა, ამ ხალხს 2 წიგნიც კი არა აქვს წაკითხული, ლოზუნგებით აზროვნებენ, ასეულათასობით იღებენ გრანტებს და საკუთარი თავიც ვიღაცას ხომ უნდა შეახსენონ. ეროვნული პოზიციის დაფიქსირების შემთხვევაში ანალიზით ვერ გიპირისპირდებიან, სამაგიეროდ, იარლიყების მიწებება იციან. სხვანაირად ვერ გიდასტურებენ, თუ რატომ ყივიან გაუგებრობებს. ამათ ხელში ქვეყანა არასამთავრობო ორგანიზაციად გადაიქცა.

- კოალიცია „ქართულ ოცნებაში“ აქამდე ერთმანეთს პრორუსულები და მედასავლეთეები უპირისპირდებოდნენ, ბოლო რამდენიმე დღეა მედასავლეთეებიც შეებნენ ერთმანეთს. რესპუბლიკელებსა და მარგველაშვილს შორის სერიოზულად გამწვავდა ვითარება. თქვენი აზრით, რა ხდება ამათ თავს?

- ეს არაფერია, თუ არა პარტიული გულყრები, ელეთმელეთი, საზაფხულო ცქმუტვები, რომელიც პიროვნული ზიზღიდან მომდინარებს და არჩევნების მოახლოებას უკავშირდება. უნდათ, რომ ეს სამარცხვინო დაპირისპირება ლამაზად შეფუთონ. ისე გვაჩვენებენ, თითქოს ორიენტაციის გამო უპირისპირდებიან ერთმანეთს. გამოდიან და ამტკიცებენ, თუ ვინმეა რეფორმატორი და მედასავლეთე, მე ვარო. კარგით, რა, მერამდენედ უნდა მოვიჭრათ ეგ კბილი. ამათი ამბავი პროფესიონალი მეძავის საქციელს მაგონებს, რომელიც შედარებით წესიერ ქალს პირველი დაესხმება თავს და იმას დააბრალებს მეძავობას. რა კივილი აუტყდათ, ვინმე ეუბნება, ასეთი ხარ ან ისეთიო? ახლა რომ გაუმწვავდათ ორიენტაციები, აქამდე როგორ იტანდნენ ერთმანეთს? ივანიშვილის მიერ მიცემული თანამდებობები დედის რძესავით რომ შეირგეს, მაშინ არ იცოდნენ, ვინ რას ფიქრობდა საგარეო კურსზე?!

დღეს ხშირად ვისმენთ შეფასებებს, დაპირისპირებაა მმართველ გუნდშიო. ეს გუნდი სად არის, ის მანახეთ, ან ვის აქვს საერთოდ მსოფლმხედველობა. ჩამოაყალიბა ვინმემ რამე? გვესმის მხოლოდ ჭიჭყინი, ევროატლანტიკური ინტეგრაცია, ევროატლანტიკური ინტეგრაციაო. თქვენ სად იყავით, საქართველო ევროპის ნაწილი რომ იყო. თქვენი მოვალეობა საქმის კეთებაა, მაგრამ საქმის კეთება არ გინდათ. სამაგიეროდ, პირადი კეთილდღეობა გაიუმჯობესეს და კანში ვეღარ ეტევიან. არ დამავიწყდება ერთი სცენა, ერთმა ქალმა, რომელიც იმ მომენტში მინისტრის პოსტზე იყო წარდგენილი, ჟურნალისტებს კომენტარს აძლევდა, უცბად მიკროფონებს ხელი ჰკრა, უი, პრემიერი მირეკავსო და ჯერ კიდევ დაუმტკიცებელი მინისტრის კაბინეტში შევარდა.

იმიტომ არიან გამწარებული, რომ იციან, თანამდებობების დატოვება მოუწევთ. საკუთარი ნებით არ მიდიან – შუბლის ძარღვი აქვთ გაწყვეტილი. მგონი, დროა, ივანიშვილი თავისი სასახლიდან გადმოდგეს და ქაჯანასავით დაუწყოს ამათ ყვირილი: წადით, წადით.

„ახალი თაობა“, 13 მაისი, 2016 წელი

ინტერვიუ ზურაბ ჭიაბერაშვილთან: „2012 წელს მშვიდად გადავაბარეთ ხელისუფლება. ახლა „ოცნებისგან“ იმავეს ველოდებით”

„ახალი თაობისთვის“ ცნობილი გახდა, რომ „ნაციონალური მოძრაობის“ საარჩევნო სიის ათეულში, დავით ბაქრაძის გარდა, არცერთი მოქმედი ნაციონალი დეპუტატი არ იქნება. სიის მეორე ათეულში იქნება წარმოდგენილი გიგა ბოკერია, ზურაბ ჭიაბერაშვილი კი – სიის მესამე ათეულში. ზურაბ ჭიაბერაშვილი „ახალ თაობასთან“ ინტერვიუში საპარლამენტო არჩევნებზე საუბრობს.

- ბატონო ზურაბ, 8 ივნისს წინასაარჩევნო კამპანია გახსნილად გამოცხადდება. როგორ წინასაარჩევნო კამპანიას ელოდებით? საზოგადოებას ახსოვს, თუ როგორი რთული წინასაარჩევნო პერიოდი იყო 2012 წელს, როდესაც თქვენი გუნდი იყო ხელისუფლებაში. ამ ეტაპზე შეიძლება უფრო ხელსაყრელი გარემო იყოს ოპოზიციისთვის?

- საარჩევნო თარიღის დანიშვნას რამდენიმეკვირიანი კინკლაობა უძღოდა პრემიერსა და პრეზიდენტს შორის, რაც „ქართული ოცნების“ ხელისუფლებისთვის დამახასიათებელია. ხელისუფლების შტოები ყველაზე მნიშვნელოვან საკითხსაც კი პოლიტიკური დებატების საგნად აქცევენ. ეს გამოწვეულია იმით, რომ „ქართული ოცნება”, ბიძინა ივანიშვილი, მის მიერ ხელდასხმული კვირიკაშვილიც ძალიან კარგად გრძნობენ, რომ არჩევნებს აგებენ, რასაც ადასტურებს ყველა ობიექტური სოციოლოგიური გამოკითხვა.

საქართველოში არასდროს ყოფილა, რომ არჩევნებამდე დიდი ხნით ადრე, პრაქტიკულად, თანაბარი რეიტინგი აქვს როგორც ხელისუფლებას, ისე ოპოზიციას. მაგალითად, 2012 წელს, სანამ ციხის სკანდალური კადრები გამოქვეყნდებოდა, საზოგადოებრივი აზრის კვლევებში მნიშვნელოვანი უპირატესობა ჰქონდა ნაციონალურ მოძრაობას, მაგრამ ციხის სკანდალმა მნიშვნელოვნად შეცვალა ქვეყანაში განწყობები.

წინასაარჩევნო პერიოდში თუ რამე მსგავსი სკანდალი არ მოხდა, დღევანდელი პირობებით ხელისუფლება განწირულია წაგებისთვის. მით უფრო ამას ადასტურებს არა მხოლოდ პოლიტიკური რეიტინგები, არამედ საზოგადოების ზოგადი განწყობა. ქვეყანა რეალურად უკან წავიდა და მოსახლეობა ამას მძიმედ განიცდის, რაც ასევე აისახა კვლევებში.

- თქვენი პარტიის წინასაარჩევნო კამპანია როგორი იქნება, მთავარი აქცენტი რაზე გაკეთდება?

- ჩვენი ხელისუფლებაში მოსვლის შემდეგ ჩვენი ნაბიჯები მიმართული იქნება ეკონომიკურ ზრდაზე, რაზეც პირდაპირ მიბმულია დანარჩენი პრობლემების მოგვარება. ვგულისხმობ პენსიების მატებას, სოციალური დახმარების აღდგენას.

- თქვენი მთავარი გზავნილი ეკონომიკაზე იქნება?

- დიახ, თუ როგორ გავზარდოთ ეკონომიკა ქვეყანაში. როგორ წარმოგვიდგენია ეს, ამას კონკრეტულად ვამბობთ.

- მაგალითად?

- პირველი, გადასახადების შემცირება, მოგების გადასახადის გაუქმება და საშემოსავლო გადასახადის შემცირება, აქციზის გაუქმება საწვავსა და გაზზე, საგადასახადო ტვირთის შემცირება, ადმინისტრირების გამარტივება. ყველა ეს ქმედება მიმართული იქნება იმისკენ, რომ საშუალო და წვრილ ბიზნესს გაუუმჯობესდეს არსებობა, რადგან რეალურ სამუშაო ადგილებს სწორედ ეს სექტორი ქმნის. თუ გვინდა, რომ მთავარი პრობლემა – უმუშევრობა – აღმოვფხვრათ, სწორედ ამ მიმართულებით უნდა გადავდგათ ნაბიჯები.

- თუმცა, ხელისუფლებაში როდესაც „ნაციონალური მოძრაობა“ იყო, უმუშევრობა ერთ-ერთი სერიოზული პრობლემა გახლდათ...

- ეს პრობლემა ნამდვილად იყო და ამას არავინ უარყოფს, მაგრამ შედარებაა მნიშვნელოვანი. 2012 წელი უნდა შევადაროთ 2003 წელს, რა ჩავიბარეთ და რა დავტოვეთ. ასევე, როდესაც „ოცნებას“ ვაფასებთ, უნდა შევადაროთ 2012 წელი 2016 წელს, რა ჩაიბარეს და რას ტოვებენ. განსხვავება უზარმაზარია.

- რაში გამოიხატება ეს?

- ჩვენ ჩავიბარეთ ქვეყანა, სადაც ელექტროენერგიის მომარაგებაც არ იყო. არ არსებობს მსოფლიოში ქვეყანა, სადაც უმუშევრობის პრობლემა არ იყოს, მაგრამ საუბარი სხვა რამეზეა, დღეს, 2012 წელთან შედარებით, უფრო მეტი ადამიანი ცხოვრობს გაჭირვებაში თუ უფრო ნაკლები. სწორედ იმის გამო, რომ ეკონომიკური სტაგნაციაა და ეკონომიკა არ გაიზარდა, შესაბამისად, ბიუჯეტი არ გაიზარდა და, ბუნებრივია, ბევრი ადამიანის მდგომარეობა გაუარესდა. ეს უნდა შემოვაბრუნოთ. თუ არ დავიწყეთ ეკონომიკის ზრდა, პრობლემას ვერ დავძლევთ. ამაზეა საუბარი და არა იმაზე, რომ ამ პრობლემის მოგვარება ასი პროცენტით შეიძლება.

- თქვენი პარტია აცხადებს, რომ ხელისუფლებაში ბრუნდება, მაგრამ თქვენი უკვე ყოფილი თანაგუნდელები აცხადებენ, რომ პარტიამ ვერ გაიაზრა, რა შეცდომები დაუშვა, რა პრობლემები იყო, ვერ მოხდა განახლება და ამიტომ ტოვებენ პარტიას. ამ ფონზე როგორ აპირებთ ამომრჩევლის ნდობის დაბრუნებას?

- დავით ბაქრაძემ თავის წინასაარჩევნო კამპანიაში საპრეზიდენტო არჩევნების დროს ძალიან ბევრჯერ ისაუბრა იმაზე, რომ საჭიროა წარსულის კარგად გააზრება. ახლაც ვსაუბრობთ ამაზე. ის რომ ვერ გავიაზრეთ, ამას ვერ მივიღებთ. როდესაც პარლამენტში კანონპროექტი წარვადგინეთ ბიზნესდავების დეკრიმინალიზაციის შესახებ, ეს იდეა უბრალოდ კი არ მოგვსვლია, ეს იყო წარსულის გააზრება. საკმაოდ ხისტი იყო ადმინისტრირება, არასწორი იყო წინასწარი პატიმრობის გამოყენება, როდესაც სახელმწიფოს ბიზნესთან დავა ჰქონდა. სწორედ ამ ნეგატივის გააზრებით მოხდა ამ კანონპროექტის წარდგენა.

რაც შეეხება პარტიის განახლებას, ძალიან ბევრი გვარი დასახელდა, რომლებიც არასდროს ყოფილან პარტიის წევრები და არ ყოფილან პოლიტიკაში, ისინი აპირებენ, შემოუერთდნენ ჩვენს მოძრაობას.

- საარჩევნო სია ფორმირებულია?

- რამდენიმე დღე დარჩა და საზოგადოებას ვეტყვით, თუ როგორი იქნება ჩვენი სია და ვინ იქნებიან ის ადამიანები, რომლებმაც რეფორმების დროშა უნდა აიღონ ხელში. სიის გამოქვეყნება ნამდვილად დაგარწმუნებთ იმაში, რომ განახლებაზე სერიოზულად გვაქვს ნაფიქრი.

- ათეულში არის ყველა ეს ადამიანი, რომლებიც ჯერ პოლიტიკაში არ ყოფილან?

- ათეულში და სიის სხვადასხვა ადგილას. არ ვაპირებთ მხოლოდ ათი კაცით პარლამენტში გასვლას, პარლამენტში ჩვენი წარმომადგენლობა გაცილებით დიდი იქნება.

- საინტერესოა, ვისთვის გეთმობათ ეს 10 ადგილი?

- გასაგებია საზოგადოების ინტერესი, თუ ვინ არის პირველი, მეორე, მესამე და ა.შ. მაგრამ ჩვენ საზოგადოებას შევთავაზებთ კარგ და პროფესიონალ ადამიანებს.

- ბატონო ზურაბ, ვაშაძემ მკვეთრი განცხადებებით დატოვა პარტია, რომ მხოლოდ შევარდნაძის მმართველობის დროინდელი ადამიანები იღებენ გადაწყვეტილებებს პარტიაში. ეს იყო მისი წასვლის რეალური მიზეზი თუ სხვა მიზეზი არსებობს?

- ამაზე პასუხი იქნება ის საარჩევნო სია, რომელიც გამოქვეყნდება და საზოგადოება თვითონ განსჯის, შევძელით თუ არა ახალი, საინტერესო, პატრიოტი ადამიანების მოზიდვა. ყველა დაინახავს, რომ ვაშაძის განცხადებები სიმართლეს არ შეესაბამება. განახლებული პარტიით ვაპირებთ რეფორმების გაგრძელებას.

- ამ ათეულში არ იქნებიან ის ადამიანები, რომლებიც ვაშაძემ დაასახელა?

- რამდენიმე დღეში სია გამოქვეყნდება. მოვლენებს ნუ გავუსწრებთ.

- რომან გოცირიძე უკვე ცნობილია, რომ ათეულში იქნება, მაგრამ ასევე ცნობილი გახდა, რომ ზაზა ბიბილაშვილმა თქვა უარი. რატომ?

- შეიძლება ვიღაცებმა ფორმალურად ვერ შეძლონ დეპუტატობა, რადგან წლების განმავლობაში პროფესიულ საქმიანობაში არიან და თავიანთი ცხოვრება ვერ შეცვალონ.

- თქვენ კიდევ ერთხელ აღნიშნეთ, რომ ხელისუფლებაში ბრუნდებით. თუ ასე არ მოხდა, საპროტესტო აქციები გარდაუვალია?

- ჩვენთვის ამოსავალია, არჩევნები თავისუფალ და სამართლიან რეჟიმში წარიმართოს. თუ დავინახავთ, რომ ხელისუფლება ცდილობს, ქართველი ხალხის არჩევანი შეცვალოს, ბუნებრივია, ამაზე რეაქცია გვექნება. 2012 წელს ამ ქვეყანამ დიდი ნაბიჯი გადადგა წინ, როდესაც ჩვენ, უამრავი ბრალდების მიუხედავად, არჩევნების დღესვე ვაღიარეთ დამარცხება და მშვიდად გადავაბარეთ ხელისუფლება. იმავეს ველოდებით „ოცნებისგან“. თუ სამართლიან არჩევნებში დამარცხდება, ეს უნდა აღიაროს და ხელისუფლება გადააბაროს იმას, ვისაც ხალხი აირჩევს.

- ეს იქნება არჩევნების შედეგებზე დამოკიდებული და აქ სად ჯდება აქციები?

- აქციები ჩვენი თვითმიზანი სულაც არ არის. დღეს ხელისუფლება ძალიან ნერვიულობს, რადგან ხედავს, რომ არჩევნებს აგებს. ასეთ ნერვულ ატმოსფეროში შეიძლება ბიძინა ივანიშვილს სურვილი გაუჩნდეს, არადემოკრატიული მეთოდებით შეინარჩუნოს ხელისუფლება. მაგალითად, უახლოეს პერიოდში თუ შეეცდება რუსთავი 2-ის მისაკუთრებასა და მისი სარედაქციო პოლიტიკის შეცვლას, ეს იქნება განაჩენი. ამ შემთხვევაში 8 ოქტომბრისთვის პასიურად დალოდება, თუ როგორ გაიფორმებს ხელისუფლებას ივანიშვილი, წარმოუდგენელი მგონია. საზოგადოების რეაქცია იქნება საპასუხო, თუ როგორ მოიქცევა ხელისუფლება. თუ პროცესი ნორმალურად, სამართლიანად წარიმართება, არავითარი აქციები არ იქნება საჭირო.