„რეზონანსი“: ინტერვიუ თამაზ მეჭიაურთან: „არ მსურს, რომ ჩემი ახალი პარტია “ოცნების” დაწუნებული დეპუტატებით დაკომპლექტდეს“ // “ომარ ნიშნიანიძეს ვურჩევ, კარგად ჩამოყალიბდეს რა უნდა”
„რეზონანსი“: ინტერვიუ სოსო ცისკარიშვილთან: ბიძინა ივანიშვილი და “მეჭიაუროკრატია” // „გიორგი კვირიკაშვილი მოახერხებს, რომ არც მწვადი დაწვას და არც შამფური”
„ახალი თაობა“: ინტერვიუ კარლო კოპალიანთან: „ძველი ბიჭები“ რომ ვყოფილიყავით, „ნაციონალებს“ საშინელ დღეში ჩავაგდებდით”
„ახალი თაობა“: ინტერვიუ მიხეილ მაჭავარიანთან: „თამარ სანიკიძე ივანიშვილის მოთხოვნით გადააყენეს“ // „მოდარ ხადური რომ გყავს მთავრობაში, იქ სხვა მინისტრი როგორ უნდა შეცვალო“
„ახალი თაობა“: ინტერვიუ სანდრო ბრეგაძესთან: „გიგა ბოკერიამ 100%-ით შეუსრულა ხელისუფლებას“ // „კორცხელზე პასუხისმგებლობა გიორგი კვირიკაშვილმა უნდა აიღოს“
„ახალი თაობა“: ინტერვიუ ნოდარ ნათაძესთან: „სიმართლე ანექსირებული ტერიტორიების შესახებ მსოფლიოს უნდა გავაგებინოთ” // „რუსეთი ამიერკავკასიის სახელმწიფოდ ქცევის მიზნით ადრე აღებულ კურსს აგრძელებს“
———————
„რეზონანსი“, 04 ივნისი, 2016 წელი
ინტერვიუ თამაზ მეჭიაურთან: „არ მსურს, რომ ჩემი ახალი პარტია “ქართული ოცნების” დაწუნებული დეპუტატებით დაკომპლექტდეს“ // “ომარ ნიშნიანიძეს ვურჩევ, კარგად ჩამოყალიბდეს რა უნდა”
ელზა პაპოშვილი
პარლამენტის წევრი თამაზ მეჭიაური ამბობს, რომ ის მოახლოებულ საპარლამენტო არჩევნებში მონაწილეობას ახალი პოლიტიკური პარტიით და გუნდით აპირებს. მისი თქმით, მოლაპარაკება სხავადსხვა პოლიტიკურ სუბიექტებთან ჯერ კიდევ მიმდინარეობს, თუმცა კონკრეტული სახელების და გვარების დასახელებისგან ჯერ თავს შეიკავებს.
თამაზ მეჭიაური ადასტურებს ინფორმაციას, რომ მის გუნდში შესაძლოა გაწევრიანება სურდეს როგორც ნონო ბურჯანაძის, ასევე გოგი თოფაძის პარტიის წევრებს. თუმცა ის მათ მოუწოდებს, რომ ურთიერთობა ჯერ საკუთარი გუნდის ლიდერებთან გაარკვიონ და მის პარტიაში გადასვლაზე შემდეგ იფიქრონ.
დეპუტატი ამბობს, რომ მას არ სურს პარტია “ქართული ოცნების” მიერ დაწუნებული დეპუტატებით დააკომპლექტოს. მის განცხადებით, “ოცნების” ზოგიერთი დეპუტატი, ჯერ მოვლენების განვითარებას ელოდება – იქნება პარტიის საარჩევნო სიაში სასურველი ადგილები მიიღონ, თუ არა და შემდეგ მის პარტიაში გადავლენ. თამაზ მეჭიაურს ასეთი საქციელი სწორად არ მიაჩნია და მათ დროზე ჩამოყალიბებას ურჩევს.
თამაზ მეჭიაური: დიახ, მე გადავწყვიტე, რომ საპარლამენტო არჩევნებში მოსახლეობის წინაშე ჩემი ახალი გუნდით წარვდგე. ამისთვის მოლაპარაკება მიდის სხვადასხვა პოლიტიკურ სუბიექტებთან, თუმცა მოლაპარაკების დასრულებამდე ჯერ კონკრეტულ პიროვნებებზე საუბრისგან თავს შევიკავებ. ვპირდები საზოგადოებას, რომ ჩემს წინასაარჩევნო გეგმებს და ახალ პოლიტიკურ პარტიას უახლოეს მომავალში წარვუდგენ.
- იმისთვის, რომ არჩევნებში მონაწილეობა მიიღოთ, პარტიის დასარეგისტრირებლად არც ისე დიდი დრო დაგრჩათ. თუ გაქვთ უკვე გადაწყვეტილი პარტიის სახელი და ვინ იქნებიან ის ადამიანები, რომლებიც თქვენს პარტიაში გაწევრიანდებიან?
- სახელი გადაწყვეტილი მაქვს, თუმცა, როგორც გითხარით, ჯერ მოლაპარაკებები არ დამისრულებია და მათთან შეთანხმების გარეში სახელის თქმისგან თავს შევიკავებ. ორი კვირა არც ისე ცოტა დროა და პარტიის დარეგისტრირებასაც მოვასწრებ. მხოლოდ მთავარი საკითხების გარკვევაღა დარჩა და ამის შემდეგ უკვე ყველაფერზე ჩავმოვყალიბდებით.
- ჩვენი ინფორმაციით, თქვენ პარტიის შექმნაზე სანდრო ბრეგაძესთან გქონდათ მოლაპარაკება…
- კი, სანდრო ბრეგაძესთან მოლაპარაკება ნამდვილად მიმდინარეობს, თუმცა ჯერ კონკრეტულ გადაწყვეტილებმადე არ მივსულვართ. მის გარდა კიდევ სხვა ადამიანებთანც მიმდინარეობს კონსულტაციები, მაგრამ მათ სახელებს და გვარებს ჯერჯერობით ვერ გავამხელ, სანამ მოლაპარაკებები არ დასრულდება. იმას დავადასტურებ, რომ პარტიაში შეიძლება ცნობადი სახეებიც ვიხილოთ.
- ვრცელდება ასევე ინფორმაცია, რომ თქვენ მოლაპარაკებებს ნინო ბურჯანაძის და გოგი თოფაძის პარტიის წევრებთანაც ახორციელებთ. შესაძლოა, თქვენს პარტიაში ეს ხალხიც ვიხილოთ?
- მე შემიძლია ერთი რამ გითხრათ – რომ არავის თანაგუნდელებზე არ ვნადირობ და არ მინდა ვინმემ ისე გაიგოს, თითქოს მათი პარტიის წევრების გადაბირებას ვაპირებდე. მე იმ ადამიანებს, ვისაც ჩემს პარტიაში გაწევრიანება სურთ, ერთი რამ მინდა ვუთხრა – ჯერ საკუთარ ლიდერებთან გაარკვიონ ურთიერთობა და გადაწყვეტილება შემდეგ მიიღონ.
არ მივესალმები იმას, რომ იმ გუნდის ლიდერებთან, რომელთაც პერსპექტივაში პოლიტიკურ პარტნიორებად მივიჩნევ, მათ ყოფილი გუნდის წევრებს დაძაბული ურთიერთობა ჰქონდეთ. სწორად არ მიმაჩნია, რომ პოტენციურმა პარტნიორმა პოლიტიკურმა ძალებმა ერთმანეთის თანაგუნდელებზე ინადირონ. მე გოგი თოფაძესთან ძალიან კარგი ურთიერთობა მაქვს და მის გაფუჭებას არ ვაპირებ.
- რას იტყვით იმაზე, რომ შესაძლოა ომარ ნიშნიანიძე თქვენს პარტიაში ვიხილოთ, შეიძლება “ქართული ოცნებიდან” კიდევ სხვა წევრებიც გადმოვიდნენ, მაგალითად, დავით ლორთქიფანიძე?
- ომარ ნიშნიანიძეს ვურჩევ, კარგად ჩამოყალიბდეს, რა უნდა. ვფიქრობ, მას გადაწყვეტილება ჯერ არ მიუღია. ახლა “ოცნების” წევრები თუ დაელოდებიან, რომ მათ იმ მანდატებს მისცემენ, რომლიც სურთ და თუ არა და გაბრაზებულები მერე ჩემთან წამოვლენ, მე ასეთი საქციელი სწორად არ მიმაჩნია. მაპატიეთ, მაგრამ არ მსურს, რომ ჩემი ახალი პარტია “ქართული ოცნების” დაწუნებული დეპუტატებით დაკომპლექტდეს. ამის აუცილებლობას ვერ ვხედავ. ისინი ჩამოყალიბებული უნდა იყვნენ, ეთანხმებიან თუ არა იმ ხედვას, რაც მე მაქვს და რაც საზოგადოებისთვის არჩევნებზე ჩემი მთავარი გზავნილი იქნება. ახლა თუ მათ განსხვავებული პოლიტიკური ხედვა აქვთ და ჩემს პარტიაში მხოლოდ იმიტომ წევრიანდებიან, რომ სხვა გზა არ აქვთ, ასე ნამდვილად არ მინდა.
- რა იქნება თქვენი პარტიის მთავარი პოლიტიკური აქცენტები, რომელზეც წინასაარჩევნოდ ყურადღებას გაამახვილებთ?
- ძირითადად აქცენტს ეროვნულობაზე გავაკეთებ და ჩემი პოლიტიკური პარტია არც დასავლეთიდან და არც ჩრდილოეთიდან მართული არ იქნება. რაც შეეხება საგარეო კურსს, ჩემი გუნდი, პირველ რიგში, ორიენტირებული ქვეყნის ინტერესებზე იქნება. მთავარი აქცენტი ქვეყნის ტერიტორიული მთლიანობის აღდგენაზე გაკეთდება. რაც შეეხება საგარეო ვექტორს, თუ საჭიროა დასავლეთსაც და ჩრდილოეთსაც უნდა ველაპარაკოთ. ყველა ქვეყანასთან ურთიერთობა მხოლოდ ქვეყნის მიზნებს უნდა ემსახურებოდეს. რაც შეეხება პრინციპულ საკითხებს, რაც მნიშვნელოვან საკონსტიტუციო გადაწყვეტილებებს ეხება, ეს ყველაფერი მოსახლეობასთან შეთანხმებით პლებისციტით და რეფერენდუმით უნდა წყდებოდეს. ყველა ამბობს, რომ ნატოში შესვლას მხარს უჭერს, თუმცა არ ამბობენ, როგორ შედიან – ტერიტორიების გარეშე თუ მასთან ერთად. პირველ რიგში, ასეთ პრინციპულ საკითხებთან დაკავშირებით მოსახლეობისგან მანდატი უნდა ავიღოთ. არ უნდა ხდებოდეს ისე, რომ ამერიკის ელჩი ჩვენს ქვეყანაზე ყველა საკითხთან დაკავშირებით ზეწოლას ახორციელებდეს.
- გუბაზ სანიკიძემ განაცხადა, რომ ბიძინა ივანიშვილის წერილი მისი დაწერილი არ არის და მას საკუთარი გარემოცვა ატყუებს. თქვენ რა შთაბეჭდილება დაგრჩათ?
- პირველ რიგში, წერილს მის გარეშე რომ არ დაწერდნენ, ფაქტია. თუმცა მთავარი მაინც მისი შინაარსია, რომელსაც ის ხელს აწერს. წერილში სიმართლე ის არის, რომ ქვეყანაში ადამიანის უფლებები ნამდვილად გაუმჯობესდა, მოხდა ჯანდაცვის რეფორმის განხორციელება, მთის კანონის მიღება, განათლებაში მთელი რიგი წარმატებები გვაქვს და ასევე სოფლის მეურნეობაში რიგი რეფორმები გატარდა.
თუმცა წერილში არ იყო ნახსენები, რომ ივანიშვილმა დაპირებული სამართლიანობის აღდგენა ვერ უზრუნველყო, რასაც შედეგად კარგი სიტუაცია არ მოჰყვება. არ გამოვრიცხავ, რომ წინასაარჩევნოდ პროცესები უმართავი გახდეს. მითუმეტეს ვნახეთ, რომ თვითმმართველობის არჩევნებზე “ოცნება” “ნაციონალების” პროვოკაციას ადვილად წამოეგო. შემოდგომაზე კი ეს დაძაბულობა პიკს მიაღწევს. თუ სამართლიანობის აღდგენის დაჩქარება არ მოხდა, არ არის გამორიცხული, რომ სამოქალაქო დაპირისპირება ვიხილოთ.
წერილში ივანიშვილი “ნაციონალურ მოძრაობას” მთავარ პოლიტიკურ ოპოზიციად განიხილავს, რაშიც არ ვეთანხმები. ასევე ის ევროატლანტიკურ ორგანიზაციაში გაერთიანების პერსპექტივას კვლავ იმედის თვალით უყურებს, რაც საზოგადოების მოტყუებას ნიშნავს.
„რეზონანსი“, 04 ივნისი, 2016 წელი
ინტერვიუ სოსო ცისკარიშვილთან: ბიძინა ივანიშვილი და “მეჭიაუროკრატია” // „გიორგი კვირიკაშვილი მოახერხებს, რომ არც მწვადი დაწვას და არც შამფური”
თიკო ოსმანოვა
“უფრო ხმაურიანი და სანახაობითი იქნება წინასაარჩევნო კამპანია. “ქართული ოცნებისთვის” დებიუტია ეულად გასვლა საარჩევნო სივრცეში. და ჩემი აზრით, მიუხედავად არსებული განსხავებული მიდგომისა, ვფიქრობ, რომ ივანიშვილის ჩართვა არჩევნებში მაინც უკეთესი შედეგის მომტანი იქნება, ვიდრე დამოუკიდებლად გასვლა”, – ამბობს “რეზონანსთან” საუბრისას პოლიტოლოგი სოსო ცისკარიშვილი.
განათლების მინისტრის, თამარ სანიკიძის გადაყენებაზე და ბიძინა ივანიშვილის ბოლოდროინდელ გამოსვლებზე “რეზონანსი” სოსო ცისკარიშვილს ესაუბრა.
სოსო ცისკარიშვილი: ალბათ არსებობს მიზეზი იმ ცვლების, რომელიც პრემიერ-მინისტრმა განახორციელა. განათლების მინისტრის შეცვლაზე საუბარი რამდენიმე თვის განმავლობაში მიმდინარეობდა და თავისთავად ახალი მინისტრის მიმართ უფრო მაღალი მოთხოვნა იქნება წამოყენებული. გავეცანი ახალი მინისტრის განათლების წყაროებს, თუმცა ჯერჯერობით მწირი ინფორმაცია არსებობს მისი სამსახურებრივი კარიერის შესახებ.
ჩემთვის სრულიად სანდოა პრემიერ-მინისტრი, მას რაიმე შეცდომა საკადრო საკითხებში ჯერ არ ჰქონია. დარწმუნებული ვარ, წარმატებული იქნება ახალი მინისტრიც, მაგრამ რაც უფრო მეტი ინფორმაცია ექნება ჩვენს საზოგადოებას ახალ მინისტრთან დაკავშირებით, მით უფრო სიმშვიდე იქნება ამ სისტემაში. თავისთავად არცთუ მშვიდი გარემო ელოდება ახალ მინისტრს სამასახურებრივი საქმიანობისას და საინტერესოა მისი უნარი აჯანყებულ სტუდენტებთან ურთიერთობისა. ჩემთვის ერთი რამ ცხადია – ბატონი კვირიკაშვილი ბევრად უფრო მაღალი პასუხისმგებლობის მატარებელია და უფრო მეტი გამოცდილების მქონე, ვიდრე მისი წინამორბედები. ამიტომ გამიკვირდება, თუ რომელიმე ისეთი პირი დაინიშნა მაღალ თანამდებაზე, რომელიც მისაღები არ იქნება საზოგადოებისთვის. ბატონი გიორგი საკმაოდ გამოცდილია, რომ რაიმე მიუღებელი გადაწყვეტილება არ მიიღოს. ეცადოს, იყოს დამოუკიდებელი მთავრობის თავმჯდომარე და არ იყოს დაქვემდებარებული რაიმე სახის ზეწოლას ნებისმიერი მხრიდან.
- თუმცა ის, რომ მთავრობას არაფორმალურად ისევ ბიძინა ივანიშვილი მართავს, ეს ბიძინა ივანიშვილის ბოლო ინტერვიუში პრაქტიკულად კიდევ ერთხელ დადასტურდა და შეძლებს გიორგი კვირიკაშვილი დამოუკიდებლად მართვას?
- ეს მასზე დამოკიდებული არ გახლავთ მხოლოდ. თუმცა პესიმიზმის საფუძველი ნამდვილად გამაჩნია. ვკითხულობ და ვუსმენ მისი წინამორბედის სტატიებს და გამოსვლებს ტელევიზორში. საზოგადოების პოზიცია ბატონი კვირიკაშვილისთვის ცნობილია და დარწმუნებული ვარ ის მოახერხებს, რომ არც მწვადი დაწვას და არც შამფური, იყოს წარმატებული თავმჯდომარე ჩვენი მთავრობის. რაც შეეხება ბიძინა ივანიშვილის ინტერვიუს და წერილს, ჯერჯერობით როგორც დავინახე, ცნობიერებითი ცვლილება ამ ადამიანში არ მომხდარა და მისი დამოკიდებულება დემოკრატიის მიმართ ალბათ უფრო აღიქმება, როგორც ქართული “მეჭიაუროკრატია” და არა დემოკრატია.
საშურ ვითარებაშია ჩვენი პრემიერი, მაგრამ განვმეორდები, რომ მისი განვლილი ცხოვრების გზა და პირადი თვისებები გახლავთ საყრდენი, რომელიც თვალსაჩინო წარმატების მომტანი იქნება ჩვენი ქვეყნისთვის.
- ბიძინა ივანიშვილი წინასაარჩევნო კამპანიაში აქტიურ ჩართვას გეგმავს. როგორც აცხადებს, მოივლის რეგიონებს და ისევ შეხვდება მოსახლეობას. თქვენი აზრით, ამით გაიზრდება თუ არა “ქართული ოცნების” რეიტინგი,?
- რასაკვირველია, 2012 წლის წინასაარჩევნო პერიოდთან შედარებით დღევანდელი “მეოცნებეებისთვის” ეს საკმაოდ ძნელი იქნება. განვლილი 4 წელი, სამწუხაროდ, არ აღმოჩნდა რაიმე სახით მიახლოებული საერთო ოცნებებთან, მაგრამ ნათქვამია – ფული ჯოჯოხეთს ანათებსო. უფრო ხმაურიანი და სანახაობითი იქნება წინასაარჩევნო კამპანია. “ქართული ოცნებისთვის” დებიუტია ეულად გასვლა საარჩევნო სივრცეში. და, ჩემი აზრით, მიუხედავად არასებული განსხავებული მიდგომისა, ვფიქრობ, რომ ივანიშვილის ჩართვა არჩევნებში მაინც იქნება უკეთესი შედეგის მომტანი, ვიდრე დამოუკიდებლად გასვლა.
- რაც შეეხება ტელეკომპანია “რუსთავი 2″-ის გარშემო განვითარებულ მოვლენებს, ხედავთ თუ არა ამ პროცესებში პოლიტიკურ სარჩულს?
- პოლიტიკური სარჩული ძნელია რომ არ დავინახოთ, მაგრამ რასაც თვალყურს ვადევნებთ ტელეკრანებზე, პოლიტიკური სარჩული გადადის უკანა პლანზე და არანაკლებ მიუღებელი ფორმატის მომსწრენი ვართ. “რუსთავი 2″-ის ადვოკატები ფართო საზოგადოებას უზრდელობის გაკვეთილებს უტარებენ და ამ ტელეკომპანიის გენერალური დირექტორი საერთოდ გასულია ცივილიზებული ფორმატიდან.
ასეთი სასამართლო სხდომის წარმართვა გაუჭირდებოდა ძალიან გამოცდილ მოსამართლეებსაც, მაგრამ ამჟამად უფრო პრიორიტეტულად მიმაჩნია, რომ, რაც უნდა განაწყენებული იყოს ბრალდებული მოსამართლის მიმართ, უნდა იყოს გარკვეულ ჩარჩოში მოქცეული და სპექტაკლები უზრდელობისა და თავხედობისა გარიყული იქნას ქართული მართლმსაჯულებისგან, რომელსაც ისედაც უამრავი ცოდვა აქვს მოსანანიებელი.
ის, რაც ყოველდღე ისმის საქართველოდან ევროპის დედაქალაქებში, არის მზაობა, რომ არ მივიღოთ ვიზალიბერალიზაცია.
ახლა გამოჩნდა თურმე “რუსთავი 2″ აუცილებელი სუბიექტი მეპატრონის შეცვლისა. ასევე საკონსტიტუციო სასამართლოზე შეტევის რეალობაც ადვილად გასაშიფრია. არის ბევრი ასეთი თემა, რომელიც შეიძლებოდა გადადებულიყო ივნისის ბოლოსკენ, რომ მანამდე ვიზალიბერალიზაცია მიგვეღო. ასევე ის დღე და ის კადრები როდის დაავიწყდება ჩვენს ევროპელ მეგობრებს, ჯერ კიდევ საკითხავია. ვგულისხმობ შუალედურ არჩევნებს, რაც იყო სრულიად შემარცხვენელი ჩვენი ქვეყნისა. მის შემდეგ გატრუნული პროკურატურა იმის მიმანიშნებელია, რომ ეს არ იყო სპონტანური დაპირისპირება.
- ანუ, თქვენი აზრით, ვიზალიბერალიზაციის პროცესის შეფერეხება საქართველოში განვითარებულმა მოვლენებმა გამოიწვია?
- რასაკვირველია. ჩვენ ისედაც ძალიან ფრთხილნი უნდა ვყოფილიყავით და უნდა შეგვეთავაზებინა სრულიად მკაფიო შესაძლებლობები რეადმისიის მიმართ. მაგრამ როდესაც ქვეყნდება სტატისტიკა, რომ მხოლოდ გერმანიაში 2015 წელს ციხეებში აღმოჩნდა საქართველოს 4 ათასზე მეტი მოქალაქე, აქ დიდი მოლოდინი მაინცდამაინც არ უნდა ყოფილიყო. ერთადერთი შანსი უვიზო მიმოსვლის მიღების იყო ჩვენი დემოკრატიის გაჯანსაღების მიმანიშნებელი ბევრი შემადგენელი ნიშნები, თუმცა მოხდა პირიქით.
ძალიან კარგია მეგობრობა, ურთიერთობა, მაგრამ ჩვენ საკუთარ თავს ასე უთავმოყვარეოდ თუ წარვუდგენთ ევროპას, საოცრება იქნება, თუ ასეთ დათმობაზე წამოვლენ ჩვენი ევროპელი მეგობრები.
——————
„ახალი თაობა“, 04 ივნისი, 2016 წელი
ინტერვიუ კარლო კოპალიანთან: „ძველი ბიჭები“ რომ ვყოფილიყავით, „ნაციონალებს“ საშინელ დღეში ჩავაგდებდით”
დაიწყო თუ არა მმართველი გუნდისა და პრეზიდენტის დაპირისპირების ახალი ეტაპი, რას ნიშნავს ამერიკის ელჩის განცხადება, ჰყავთ თუ არა პარტიაში ძველი ბიჭები და ტოვებს თუ არა „ქართულ ოცნებას“, ამის შესახებ „ახალ თაობას“ საპარლამენტო უმრავლესობის ერთ-ერთი ლიდერი კარლო კოპალიანი ესაუბრება.
- უკვე დადასტურდა, რომ „ქართულ ოცნებას“ რამდენიმე წევრი დატოვებს. გავრცელებული ინფორმაციით, წამსვლელთა შორის ხართ თქვენც. მართლა აპირებთ პარტიიდან წასვლას?
- ეს კითხვა უკვე დამისვა რამდენიმე ჟურნალისტმა და ძალიან მიკვირს, საიდან გავრცელდა ასეთი ინფორმაცია. არც სოციალურ ქსელებში და არც სხვაგან არსად მითქვამს, რომ „ქართულ ოცნებას“ ვემიჯნები. ყველაფერს რომ თავი დავანებოთ, იქიდან წამოსვლა ჩემი მხრიდან ღალატის ტოლფასი იქნება.
- რატომ იქნება ღალატის ტოლფასი?
- მე ამ პარტიის ერთ-ერთი დამფუძნებელი ვარ და არაა ლამაზი, როცა პარტიას მისი დამფუძნებელი ტოვებს.
- თუ პარტიაში რაღაც დაპირისპირებაა და, როგორც ამბობენ, „ოცნებაში“ მართლა არის დაპირისპირება, მაშინაც ღალატის ტოლფასია პარტიიდან წასვლა?
- ისევე, როგორც ყველა პარტიაში, ჩვენთანაც არის რაღაც თემებზე აზრთა სხვადასხვაობა. ამის გულისთვის არ უნდა გაიქცე. პირიქით, მაგრად უნდა დადგე და ყველაფერი გააკეთო იმისთვის, რომ პარტიიდან შემთხვევითი ხალხი და მიტმასნილები გააქციო. პარტიების გამოცვლაც არ არის ლამაზი საქციელი. ჩვენს პოლიტიკაში ძალიან ბევრია ისეთი ადამიანი, რომელსაც თითქმის ყველა პარტია აქვს მოვლილი. მე ასეთ კატეგორიას არ მივეკუთვნები. კი მაძახებენ ნაციონალები, კომპარტიის წევრი იყავიო, მაგრამ იმ დროს ყველა ამ პარტიის წევრი იყო.
- თქვენ რესპუბლიკელებთანაც ხომ იყავით?
- რესპუბლიკელებთან ვიყავი, მაგრამ არასდროს ვყოფილვარ რესპუბლიკელი. 2008 წლის არჩევნებისთვის ასეთი წესი იყო, რომ აუცილებლად პარტიას უნდა წარედგინა შენი კანდიდატურა მაჟორიტარად. მათ მხოლოდ წარმადგინეს, არჩევნები დამოუკიდებლად მოვიგე ცაგერის რაიონში და რადგანაც პარტიისგან თავისუფალი ვიყავი, პარლამენტში შესვლის გადაწყვეტილება მივიღე. იმ წელს ოპოზიციის ნაწილმა მანდატები დაჭრა. ახლაც ვთვლი, რომ მაშინ სწორი გადაწყვეტილება მივიღე.
- წარსულიდან აწმყოში გადმოვიდეთ. პრეზიდენტსა და „ქართულ ოცნებას“ შორის დაპირისპირების ახალი ეტაპი დაიწყო?
- ამ მოსაზრებას ვერ დავეთანხმები. პრემიერი გიორგი კვირიკაშვილი და მთელი მთავრობა, ასევე საპარლამენტო უმრავლესობა კონსტრუქციულად ვთანამშრომლობთ გიორგი მარგველაშვილთან.
- გიორგი მარგველაშვილმა რამდენიმე დღის წინ განაცხადა, რომ „ქართულ ოცნებაში“ მოძველბიჭო ელემენტები არიან. არც ეს გაამწვავებს თქვენ შორის ურთიერთობას? ადრე უმრავლესობა მის ყველა განცხადებაზე მკვეთრად რეაგირებდა...
- ეს განცხადება პრეზიდენტმა კორცხელში მომხდარი ინციდენტის შეფასებისას გააკეთა. ეს მთლად კორექტული განცხადება არ იყო, ეს არც უმრავლესობის სხვა წევრებს მოეწონათ, მაგრამ ჩვენ კვლავ კონსტრუქციული თანამშრომლობის რეჟიმში ვრჩებით.
- მოძველბიჭო ელემენტები რომ ახსენა პრეზიდენტმა, თქვენი აზრით, ვინ ჰყავდა მხედველობაში?
- აბა, რა გითხრათ, პრეზიდენტის გულში არ ვზივარ და არ ვიცი, ვისზე საუბრობს. როცა ასეთ განცხადებას აკეთებდა, ჯობდა დაეკონკრეტებინა, ვინ ჰყავდა მხედველობაში.
- ისე, თქვენ როგორ ფიქრობთ, არიან თქვენს პარტიაში მოძველბიჭოები?
- ჩვენს პარტიაში ნამდვილად არ არის ისეთი ხალხი, რომლებიც კუნთებზე იყურებიან.
- კუნთებზე შესაძლოა არ იყურებიან, მაგრამ ბევრი კუნთმაგარი ნამდვილად გყავთ პარტიაში...
- კი ბატონო, კუნთმაგარი ხალხიც გვყავს და ჩემპიონებიც, მაგრამ, რამდენიმე გამონაკლისის გარდა, გინახავთ, რომ ჩვენ ჩხუბი დაგვეწყოს? მოძველბიჭოები რომ ვყოფილიყავით, ნაციონალებს მართლა საშინელ დღეში ჩავაგდებდით. საზოგადოება სწორედ იმიტომ გვსაყვედურობს, რომ მათ საკადრისი პასუხი არ გავეცით. ხშირად ჩვენც გვინდოდა მათთვის საკადრისად გვეპასუხა, მაგრამ ყოველთვის ვიხსენებდით, რომ პარლამენტში ვიყავით, სადაც მუშტი-კრივი არ შეიძლება. ამ 4 წლის განმავლობაში ჩვენ მათგან ისეთი შეურაცხყოფა მოვითმინეთ, რომელთა მოთმენაც წარმოუდგენელია. იმდენად უნამუსო ხალხია, გამოდიოდნენ და ჩვენ გვაბრალებდნენ იმას, რაც თავად ჰქონდათ ჩადენილი. ეს ურცხვები გვაბრალებდნენ, პატიმრებს აწამებთ და პოლიტიკურ ოპონენტებს დევნითო. მოძველბიჭოები რომ ვიყოთ, ნაციონალების ასეთი განცხადებების შემდეგ პარლამენტიდან სხვა დაწესებულებაში მოხვდებოდნენ.
იყო ისეთი მომენტებიც, როცა თავი ვეღარ გავაკონტროლეთ, მაგრამ დედას რომ შეგაგინებს ვინმე, ამაზე პასუხი აუცილებლად უნდა გასცე. აქ უკვე მნიშვნელობა არა აქვს, პარლამენტში იქნები თუ სადმე სხვაგან. კაკო ბობოხიძემ საჯაროდ შეგვაგინა დედა და კარგი ვქენით, რომ პასუხი გავეცით. ძველი ბიჭები რომ ვყოფილიყავით, კაკო ბობოხიძე ძალიან დიდი ხნის განმავლობაში ვერ ადგებოდა საწოლიდან. ასე რომ, ნამდვილად ვერ გავიზიარებ პრეზიდენტის შეფასებას და არც კორცხელის ინციდენტთან დაკავშირებით გამოთქმულ სხვა მოსაზრებებში არ ვეთანხმები.
- რაში არ ეთანხმებით, რომ კორცხელში ძალადობა მოხდა?
- კორცხელში ძალიან ცუდი რამე მოხდა, მაგრამ ამ ფაქტზე რამდენიმე პირს წაუყენეს ბრალი. ნაციონალების მმართველობის დროს ასეთი საქმეებისთვის ხალხის აჯილდოებდნენ. მე ვითხოვ, რომ ეს საქმე თავიდან ბოლომდე იქნეს გამოძიებული და ყველა ის პირი დაისაჯოს, რომლებმაც ეს პროვოკაცია მოაწყვეს. ეს იყო „ნაციონალების“ მიერ კარგად დაგეგმილი პროვოკაცია, რომელსაც, სამწუხაროდ, წამოვეგეთ. ჩვენ უნდა გვცოდნოდა, რომ გიგა ბოკერია იქ შემთხვევით არ ჩავიდოდა და არც ნიკა მელიას გამოჩენა იყო შემთხვევითი.
ნიკა მელიამ იქ გინება დაიწყო და ვიღაცას ნერვებმა უმტყუნა. გიგა ბოკერიამ კი სპექტაკლი დადგა. ეს ნათლად ჩანს კადრებიდან. ოპერატორები ისე დააყენეს, რომ ძირს დავარდნილი და დასისხლიანებული ბოკერია კარგად დაეფიქსირებინათ. როგორც კი ის დაბლა დაეცა, ოპერატორებს დერეფანი გაუკეთეს და მისი გადაღების საშუალება მისცეს. კადრებში კარგად ისმის ყვირილიც – დროზე გადამიღეთო. გამოძიებამ ამ კუთხითაც უნდა იმუშაოს. ცუდია, რომ პროვოკაციაზე წამოვეგეთ, მაგრამ მეორე მხარეც დამნაშავეა.
ახლა ყველაფერი კეთდება იმისათვის, რომ ამ ინციდენტით საერთაშორისო თანამეგობრობის ყურადღება მიიქციონ. მიზანს ნაწილობრივ მიაღწიეს, ამერიკის ელჩმაც გამოხატა შეშფოთება. ამერიკის ელჩის მიერ გაკეთებული განცხადებით ჩვენც შეშფოთებული ვარ. მხედველობაში „რუსთავი-2“-თან დაკავშირებით გაკეთებული განცხადება მაქვს. რატომღაც მგონია, რომ მას ასეთი მკვეთრი შეფასებები არ გაუკეთებია და მისი განცხადება არასწორად იყო ნათარგმნი. ამერიკა ჩვენი მეგობარი ქვეყანაა და არა მგონია, მეგობარი ქვეყნის ელჩმა ხალხს სასამართლოს გადაწყვეტილებების დაუმორჩილებლობისკენ მოუწოდოს.
„ახალი თაობა“, 04 ივნისი, 2016 წელი
ინტერვიუ მიხეილ მაჭავარიანთან: „თამარ სანიკიძე ივანიშვილის მოთხოვნით გადააყენეს“ // „მოდარ ხადური რომ გყავს მთავრობაში, იქ სხვა მინისტრი როგორ უნდა შეცვალო“
რატომ შეცვალეს მოულოდნელად განათლების მინისტრი, შეიცვლება თუ არა საარჩევნო კოდექსი, რა გზა აირჩიეს გირჩებმა, როგორ შემცირდა ღარიბების რაოდენობა? _ ამის შესახებ „ახალ თაობას“ ნაციონალური მოძღაობის ერთ-ერთი ლიდერი, დეპუტატი მიხეილ მაჭავარიანი ესაუბრება.
- სამ ივნისს საქართველოს მთავრობაში მორიგი საკადრო ცვლილება განხორციელდა და პრემიერმა თამარ სანიკიძე შეცვალა. ცვლილებებს ყველა ელოდა, მაგრამ განათლების მინისტრის შეცვლას - არავინ. თქვენი აზრით, რატომ მიიღო ეს გადაწყვეტილება პრემიერმა?
- მეხი გასკდა სრულიად „ქართული ოცნების“ ცაზე და ვერავინ გაიგო, სინამდვილეში რა მოხდა. ოფიციალური განმარტება მოხსნის მიზეზთან დაკავშირებით არ გაკეთებულა, სოციალურ ქსელებში გავრცელებულ ჭორებზე კი საუბარი არ მინდა. ერთადერთი, რაშიც დარწმუნებული ვარ, ისაა, რომ ეს გადაწყვეტილება გიორგი კვირიკაშვილს არ მიუღია. ამაში ბიძინა ივანიშვილის ხელი ურევია.
- რატომ შეაჩერა მან არჩევანი თამარ სანიკიძეზე? ერთ-ერთი ვერსიით, ამ ცვლილებით კორცხელის ინციდენტის გადაფარვა სურდათ...
- ამ გადაწყვეტილებას ალბათ რაღაც პროცესები უძღოდა წინ, ასე უცბად ამ გადაწყვეტილებას არავინ მიიღებდა. განათლების სფეროში მართალია იყო პრობლემები და თამარ სანიკიძის მიმართ ჩვენც გვქონდა პრეტენზიები, მაგრამ როდესაც მთავრობაში გყავს ნოდარ ხადური, იქ სხვა მინისტრი როგორ უნდა შეცვალო, არ მესმის.
- იქნებ მართლა კორცხელის ინციდენტის გადასაფარად მოხდა ეს ცვლილება?
- მოდით, ჯერ იმაზე შევთანხმდეთ, რომ ეს იყო დარბევა და არა ინციდენტი. ყველამ კარგად ვიცით ისიც, რომ ეს ადამიანები სპეციალურად ემზადებოდნენ და როცა დრო დადგა, წავიდნენ ზუგდიდში. სამეგრელოში ისინი 9 მანქანით გაემგზავრნენ. ისინი იქ ამირან ლაგვილავას აგიტაცია-პროპაგანდისთვის არ წასულან. მთავარი პრობლემა ისაა, რომ ეს დარბევა იყო დავალება. ასეთი ჯგუფები ჰყავდათ წაყვანილი წყალტუბოშიც, კასპშიც და გურიაშიც.
- თუ დარბევა ჰქონდა ამ ჯგუფებს დავალებული, სხვა რაიოონებში რატომ არავინ გაილახა?
- იმ რაიონებში „ქართული ოცნების“ რომელიღაც ლიდერი მაინც იმყოფებოდა. მათ თავის თავზე ჰქონდათ პასუხისმგებლობა აღებული. ზუგდიდში კაციშვილი არ იყო, ეს ზონდერები მიუშვეს თავის ნებაზე და უთხრეს. იმოქმედეთო. ამათაც რაც იცოდნენ, ის გააკეთეს – იჩხუბეს. მომხდარზე პასუხი უნდა აგოს კახა კალაძემ. ეს ჯგუფი მის მიერ არის მომზადებული. ასე რომ, სანიკიძის გადაყენება კალაძის ამბავს ვერ გადაფარავს.
ცხადია, ამ თემის მიჩუმათებაც სურთ და ამიტომ წარუდგინეს 6 კაცს ბრალი. ეს საკმარისი არ არის. იქ ძალიან ბევრი ადამიანი ჩხუბობდა. არც გირაო მიმაჩნია საკმარისად. გავიხსენებ ერთ საინტერესო ამბავს. გასულ წელს რუსთავი 2-ის მხარდამჭერი აქციები იმართებოდა. ახალგაზრდებმა აქცია ქუთაისის პარლამენტთანაც გამართეს. დეპუტატის პიჯაკის დაზიანების მცდელობისთვის იქ 3 პირი დააკავეს და აღმკვეთის სახით პატიმრობა შეეფარდათ. ის ბიჭები 3 თვე ისხდნენ პიჯაკის დაზიანების მცდელობისთვის. ჩვენმა თანამებრძოლებმა სერიოზული დაზიანებები მიიღეს, მაგრამ ამისთვის დამნაშავეებს გირაო აკმარეს.
თამარ სანიკიძის გადაყენების მიზეზებზე ვსაუბრობთ და მას საზოგადოებრივ მაუწყებელზე გასულ ინტერვიუსაც უკავშირებენ. ეტყობა, ძალიან გაბრაზდა ბიძინა ივანიშვილი და ვიღაცაზე იყარა ჯავრი. ინტერვიუც ძალიან საინტერესო აღმოჩნდა იმ თვალსაზრისით რომ ივანიშვილმა ყველაფერზე ისაუბრა, გარდა მთავარი გამოწვევებისა. მას საერთოდ არ აინტერესებს, ჩვენს მოქალაქეებს ასე ძალიან რომ უჭირს.
- ვიცე-პრემიერ ქუმსიშვილის მტკიცებით, სიღარიბეში მყოფი ადამიანების რიცხვი 500.000-მდე შემცირდა…
- სიაღარიბეში მცხოვრებთა რაოდენობა კი არ შემცირდა, ამ მთავრობამ სოციალურად დაუცველთა ბაზიდან ამოყარა ხალხი. აბა მიმოვიხედოთ ჩვენ გარშემო, ვისი ცხოვრების დონე გაუმჯობესდა? ყველაფერი უარესობისკებ მიდის. ამაზე კვლევებიც მეტყვებლებს.
- კვლევებს ხელისუფლება არ ენდობა...
- პოლიტიკურ რეიტინგებს რომ არ ენდობიან, ეგ გავიგე, მაგრამ ადამიანები როცა ნომერ პირველ პრობლემად უმუშევრობას ასახელებენ და ამის საპასუხოდ მთავრობა ამბობს, უმუშევართა რიცხვი რეკორდულად შემცირდაო, ეს ადეკვატურია? ნომერ მეორე პრობლემად სწორედ სიღარიბე სახელდება. მათი რაოდენობა როგორ შეამცირეს, უკვე გითხარით. „გამდიდრებულთა“ რაოდენობა შესაძლოა კიდევ უფრო გაიზარდოს.
- რატომ ამოიღეს ეს ხალხი სოციალურად დაუცველთა ბაზიდან?
- იმიტომ, რომ ფული არ ჰყოფნიდათ. ახლაც ჯანდაცვის ხარჯები იმაზე მეტია გახარჯული, ვიდრე გეგმით იყო გათვალისწინებული. ეს იმიტომ ხდება, რომ მენეჯმენტი არ უვარგათ.
- მოდით, სხვა თემაზეც ვისაუბროთ. საარჩევნო კანონში ცვლილებებს კატეგორიულად ითხოვდით, მაგრამ კომიტეტის სხდომაზე არ დაესწარით მის განხილვას. რა ხდება?
- ჩვენ საპარალმენტო საქმიანობა დროებით შევაჩერეთ და ამის შესახებ საჯაროდ გვაქვს განცხადება გაკეთებული. საკომიტეტო მოსმენაზე ჩვენს ყოფნა-არყოფნას გადამწყვეტი მნიშვნელობა არ ჰქონდა. ეს ხელს არავის უშლიდა, საკითხი პლენარულ სხდომაზე გაეტანათ.
- არსებობს ვარაუდი, რომ თქვენ, „ქართული ოცნების“ მსგავსად, გაწყობთ არსებული მოდელი და ამიტომ აღარ მონაწილეობთ საკითხის განხილვაში...
_ ჰი. ჰი, ჰი! არსებული მოდელი როგორ უნდა გვაწყობდეს, ყველაფერს რომ თავი დავანებოთ, თვლა ვიცით. არც გერმანული მოდელი არის იდეალური, მაგრამ არსებულს ნამდვილად ჯობია. ისე, არსებული მოდელი იმ პარტიის მიერაც არის მიღებული, რომელმაც ახლა გერმანული მოდელი წარმოადგინა.
- რესპუბლიკელებზეა საუბარი?
- იმათზე, ვინც 2015 წელს მხარი დაუჭირა ცვლილებს და ახლა ამბობს, აღარ ვარგაო. ჩვენ ეს ცვლილებები გავასაჩივრეთ საკონსტიტუციო სასამართლოში. სასამართლომ ჩვენი საჩივარი განსახილველად მიიღო და პირველი სხდომა უკვე 6 ივნისს გაიმართება.
- კონკრეტულად რა გაასაჩივრეთ?
- არსებული ანუ ქოცმოდელი გავასაჩივრეთ. დაველოდებით სასამართლოს გადაწყვეტილებას. და ამის მიხედვით ვიმოქმედებთ. ჩვენ ვიცით, რომ ამ მოდელით არჩევნების ჩატარება არ შეიძლება. ეს მოდელი მხოლოდ `ქართული ოცნების~ აწყობს, მაგრამ ვერც ამ მოდელით შეინარჩუნებენ ძალაუფლებას.
- „გირჩები“ ამბობენ, რომ თქვენ ხელისუფლების შეცვლის რესურსი არ გაქვთ...
- „გირჩები“ ბოლო დროს ბევრ რამეს ამბობენ. მათთან ყველაფერზე დებატები შეუძლებელი იქნება.
- „გირჩების“ ლიდერმა ზურაბ ჯაფარიძემ პეტრე ცისკარიშვილთან გამართულ ტელედებატებში განაცხადა, რომ მათთან დებატებისა გეშინიათ. ისიც თქვა, რომ ნაციონალური მოძრაობის ეკონომიკური პროგრამა მისი დაწერილია და დაამატა, რომ თქვენ უღალატეთ ბენდუქიძის პრინციპებს.
- მე თავად არ მიყურებია ამ დებატებისთვის, მაგრამ ამბავი ვიცი. ძალიან არ მინდა ზურაბ ჯაფარიძეზე გულში გავივლო ის, რასაც ახლა ვიტყვი. გირჩებს თუ მეტი პრობლემა არა აქვთ ნაციონალებთან დაპირისპირების გარდა, ეს 2 რამეზე მეტყველებს. მათ დავალება აქვთ ასეთი რომ ან ჩვენს ხმებზე უნდათ დაჯდომა, ანდა ისე უნდა მოიქცნენ, მაქსიმალური დაპირისპირება კი არ ჰქონდეთ ივანიშვილთან, არამედ მრავალპოლარული საარჩევნო კამპანიის წარმოჩენა სურთ.
რას ჰქვია, ბენდუქიძის პრინციპებს ვუღალატეთ, რეებს მიედ-მოედება და კინაღამ რაღაც წამომცდა კიდევ! ამ გუნდში იყო ბევრი ადამიანი, რომლებმაც თავისი წვლილი შეიტანეს ეკონომიკური პროგრამის შექმნაში. გუნდში დღემდე სხვადასხვა ხედვებია. პარლამენტში 2 საკანონმდებლო ცვლილება შევიტანეთ. ვითხოვდით მოგების გადასახადის გაუქმებას და დეკრიმინალიზაციას. ეს ცვლილება რომ შევიტანეთ, მაშინ ზურაც ჩვენთან ერთად იყო და ერთად ვმუშაობდით.
სასამართლოს რეფორმის საკითხებში ასევე თავიდან ბოლომდე იყო ჩართული პავლე კუბლაშვილი, მიუხედავად იმისა, რომ მისი ძმა კოტე უზენაესი სასამართლოს თავმჯდომარე იყო. ბუნების დაცვის საკითხებზე თუ რამე გაჭაჭანდებოდა, ამ საქმეში გოგა ხაჩიძე ჩართული რომ იქნებოდა, ამაში ვინმეს ეჭვი ხომ არ ეპარება? ახლა რა დაემართა ამ ზურაბ ჯაფარიძეს. მაგელანად გადაიქცა თუ ამერიკო ვესპუჩიდ და ამერიკა აღმოაჩინა? ან ვაშლი დაეცა თავში და ნიუტონი გახდა? არ შეიძლება იმის მტკიცება, რომ ეკონომიკური პროგრამა მან დაგვიწერა, ამ ვინმესთან დებატების გვეშინია.
- ზურაბ ჯაფარიძემ ასეთი რამეც თქვა, ნაციონალები ჩვენს ანტიპიარს ეწევიან და ამბობენ, ჩვენგან ვინც წავიდა, ყველანი ჩათლ….ები არიანო. მართლა ასეთი სიტყვებით მოიხსენიებთ წასულებს?
- პარტიიდან არიან წასულები, ამ ქვეყნიდან ხომ არა, მხოლოდ კარგი რომ უნდა ვილაპარაკოთ ან არაფერი? მოდით, მე ბევრს აღარ ვილაპარაკებ და მხოლოდ იმას ვიტყვი, რომ მათ პოლიტიკურ მომავალს დიდი პერსპექტივა არა აქვს. მიუხედავად იმისა, რომ ძალიან კარგი დაფინასება აქვთ.
„ახალი თაობა“, 04 ივნისი, 2016 წელი
ინტერვიუ სანდრო ბრეგაძესთან: „გიგა ბოკერიამ 100%-ით შეუსრულა ხელისუფლებას“ // „კორცხელზე პასუხისმგებლობა გიორგი კვირიკაშვილმა უნდა აიღოს“
კორცხელის ინციდენტი აქტუალურობას არ კარგავს. ინციდენტში მონაწილე სპორტსმენებს მუხლი დაუმძიმდათ. მათ დასჯას, ოპოზიციურ სპექტრთან ერთად, ამერიკის ელჩიც მოითხოვს. მოძრაობა ეროვნულების ლიდერი სანდრო ბრეგაძე კი მიიჩნევს, რომ შეშინებულმა ხელისუფლებამ ბიჭები გაწირა.
- ბატონო სანდრო, როგორც ცნობილია, სპორტსმენებს ბრალი დაუმძიმეს. ამბობენ, რომ ეს ზეწოლის შედეგად მოხდა. რა პროცესები მიმდინარეობს?
- ეს არის ძალიან ცუდი პროცესები. გიგა ბოკერიამ და ნაციონალურმა მოძრაობამ 100%-ით შეუსრულა ხელისუფლებას. ფაქტობრივად, დღეს სახეზე გვაქვს შეშინებული ხელისუფლება, რომელიც მზად არის, გაწიროს უდანაშაულო ახალგაზრდები, სპორტსმენები, მხოლოდ იმის გულისთვის, რომ თავი გადაირჩინოს.
- რომელ უდანაშაულობაზე საუბრობთ, როცა ცემა-ტყეპა გაიმართა?
- ვერცერთი ქართველი ვაჟკაცი ვერ მოითმენს დედის შეგინებას. სწორედ ასე მოიქცნენ ნაციონალების პროვოკატორები. ნიკა მელიამ შეკრებილ ბიჭებს დედა შეაგინა და მან მშვენივრად იცოდა, რომ ამაზე მიიღებდა ადეკვატურ პასუხს. ეს ყველაფერი წინასწარ იყო განსაზღვრული და წინასწარ დადგმული სცენარით განხორციელდა. სააკაშვილის ლობისტებისაგან დაშინებული ხელისუფლება წირავს ამ ახალგაზრდებს და, ფაქტობრივად, უშვებს 7-წლიან პატიმრობაში.
- მუხლი ზეწოლის შედეგად შეიცვალა?
- რა თქმა უნდა, ეს იყო ზეწოლის შედეგი. პარლამენტში ამაზე უარესი მუშტი-კრივი არ გვინახავს? დაუსჯიათ ამისთვის ვინმე?!
- პრეზიდენტის შეფასებებიც მოვისმინეთ, სადაც ის ამბობს, რომ ხელისუფლებაში მოძველბიჭო ელემენტების დაჯგუფებები არსებობს. ამაზე რას იტყვით?
- კარგით, რა. მოდით, პირდაპირ ვთქვათ, რომ პრეზიდენტი თამაშობს ნაციონალური მოძრაობის თამაშს. მე დღეს პრეზიდენტზე არა მაქვს საუბარი. ის ყოვლად კომიკური ფიგურაა. „ქართული ოცნების“ ყველაზე დიდი შეცდომაა, რომ მარგველაშვილი, ადამიანი, რომელსაც არანაირი წვლილი არ მიუძღვის საქართველოს არც ისტორიაში და არც თანამედროვეობაში, დღეს არის საქართველოს პრეზიდენტი. ეს არის ადამიანი, რომელიც შემოაპარეს, ჩანერგეს „ქართულ ოცნებაში“. ვიღაც-ვიღაცებს ეგონათ, რომ ის იქნებოდა ისეთივე მონა, როგორიც ბევრი გვხვდება ქართულ პოლიტიკაში.
- მერედა ცუდია, რომ მარგველაშვილი ხელისუფლების მონა არ არის?
- მარგველაშვილი არ არის ხელისუფლების მონა, მაგრამ ის არის სხვა ძალების მონა. დავანებოთ ამ კარიკატურაზე საუბარს თავი და გადავიდეთ უფრო სერიოზულ თემაზე.
- და რა არის უფრო სერიოზული?
- მე ვფიქრობ, რომ ბატონმა კვირიკაშვილმა უნდა მიიღოს ადეკვატური გადაწყვეტილება. ის უნდა მოიქცეს ისე, როგორც იქცევიან ვაჟკაცი ადამიანები.
- რას გულისხმობთ?
- მან თავის თავზე უნდა აიღოს პასუხისმგებლობა ამ ყოველივეზე. როდესაც შენი პარტიის წევრები, შენი თანაგუნდელები შარში ეხვევიან, შენ გვერდზე კი არ უნდა გადგე და ხელები კი არ უნდა დაიბანო, არამედ, როგორც პარტიის თავმჯდომარემ, პირადად უნდა აიღო პასუხისმგებლობა ყოველივე ამაზე. დღეს ჯოხის გადატეხა უნდათ კახა კალაძეზე.
- დადგება დღის წესრიგში კალაძის გადაყენების საკითხი?
- დღეს ხელისუფლება იყოფა რამდენიმე ნაწილად. კალაძე გახლავთ იმ ნაწილის წარმომადგენელი, რომელიც ყველაზე მეტად არ აწყობს ნაციონალურ მოძრაობას, ისე, როგორც თავის დროზე არ აწყობდათ ირაკლი ღარიბაშვილი. კალაძე ბოლომდე მებრძოლია. ნაციონალებს კი ხელისუფლებაში ისეთი პიროვნებები აწყობს, რომლებიც დაშინებულები და შეშინებულები არიან. ღარიბაშვილის შემდგომ კალაძე მათთვის ყველაზე დიდი დაბრკოლებაა. სწორედ ამიტომ ცდილობენ, ჯოხი კალაძეზე გადატეხონ. პასუხისმგებლობა პარტიის თავმჯდომარემ უნდა აიღოს, რადგან, წესით, ყველაფერი მასთან უნდა თანხმდებოდეს.
- ანუ თუ საქმე პასუხისმგებლობას ეხება, ეს კვირიკაშვილმაც უნდა გაიზიაროს?
- დიახ. მხედართმთავარი, რომელიც საკუთარ ჯარისკაცებს ეფარება, ვერცერთ ომს ვერ მოიგებს. იმის გამო, რომ ბოკერიას ლობისტებმა შენზე ცუდი არ თქვან, ამ ბიჭებს ციხისთვის წირავ. დღეს ჩვენი ხელისუფლება ნაციონალური მოძრაობისა და მათი ლობისტების მიერ არის შეშინებული. ისინი ყველასა და ყველაფერს გაწირავენ, ოღონდ საკუთარი ტყავი გადაირჩინონ.
- ამბობენ, რომ დანაშაული მოხდა და დამნაშავეები სამაგალითოდ უნდა დაისაჯონ. ნაციონალების გარდა, ამას ამბობს რესპუბლიკური პარტია, სხვა ოპოზიციური პარტიებიც, საუბარია კანონის გამკაცრებაზე...
- რესპუბლიკური პარტია საიდან არის ოპოზიციური პარტია, ამიხსნას ვინმემ! სამი ყველაზე საკვანძო თანამდებობა ხელისუფლებაში სწორედ რესპუბლიკელებს უკავიათ. ბოლოს და ბოლოს, თავდაცვის სამინისტროა მათ ხელში. მსგავსი პრეცედენტი მსოფლიოში არ არსებობს, თან ოპოზიციაში ხარ და თან შენი მინისტრები გყავს ხელისუფლებაში. მე როდესაც მოვუწოდებდი კვირიკაშვილს, გადააყენე რესპუბლიკელები-მეთქი, როგორც კრუხი, ისე გადაეფარა თინა ხიდაშელს. მე რამდენადაც მაქვს ინფორმაცია, რესპუბლიკელებს მომავალ პარლამენტშიც გარანტია აქვთ მიღებული, რომ თუკი ისინი შევლენ პარლამენტში, სამი მინისტრის სავარძელი კვლავ მათ ხელში იქნება. ასევე პარლამენტის თავმჯდომარის სავარძელიც მათ ხელში იქნება.
- ეს გარანტია ვისგან მიიღეს?
- ეს გარანტია მიიღეს პრემიერისგან.
- საუბრისას ნაციონალები და მიხეილ სააკაშვილი ახსენეთ. ვრცელდება ინფორმაციები, რომ სააკაშვილი საქართველოში დასაბრუნებლად ემზადება. რა შანსები აქვთ ნაციონალებს და უნდა ველოდოთ მათგან ახალ პროვოკაციებს?
- სააკაშვილს ხელისუფლების უნიათობა უქმნის იმის საფუძველს, რომ ის საქართველოში დაბრუნდეს. სააკაშვილი გახლავთ პოლიტიკური ფიგურა, რომელიც აღვსილია რევანშის სურვილით. სააკაშვილმა იცის, რომ უკრაინაში დიდი დღე არ უწერია. მისი მიზანია, საქართველოში დაბრუნდეს. ეს კი შესაძლებელია იმ შემთხვევაში, თუ მოხდება ხელისუფლების ცვლილება.
- რა შანსები აქვთ?
- ნაციონალები არჩევნებისთვის არ ემზადებიან, მათთვის არჩევნები მეათეხარისხოვანია. მათთვის მთავარია, ქვეყანაში შეიქმნას რევოლუციური სიტუაცია, რომლის მეშვეობითაც მოხდება პოლიტიკური რევანში. ეს რევოლუციური სიტუაცია უკვე იქმნება და მასში დიდ მონაწილეობას იღებენ ის ჩანერგილი ნაციონალები, რომლებიც ხელისუფლების მაღალ ეშელონებში არიან და ნაციონალების დავალებებს ასრულებენ.
„ახალი თაობა“, 04 ივნისი, 2016 წელი
ინტერვიუ ნოდარ ნათაძესთან: „სიმართლე ანექსირებული ტერიტორიების შესახებ მსოფლიოს უნდა გავაგებინოთ” // „რუსეთი ამიერკავკასიის სახელმწიფოდ ქცევის მიზნით ადრე აღებულ კურსს აგრძელებს“
საქართველოში ხშირად უკან იწევს ქვეყნის ტერიტორიული პრობლემები. არადა, რუსეთი აგრძელებს საოკუპაციო ზოლის გადმოწევას, საოკუპაციო რეჟიმის ე.წ. მესაზღვრეები კი ხოცავენ საქართველოს მოქალაქეებს. მსოფლიო თანამეგობრობა აღიარებს საქართველოს ტერიტორიულ მთლიანობას, თუმცა უცხოეთში ნაკლებად გადის ინფორმაცია იმაზე, რომ აფხაზეთი და ცხინვალის რეგიონი ძირძველი ქართული ტერიტორიებია.
სახალხო ფრონტის ლიდერი ნოდარ ნათაძე „ახალ თაობასთან“ აცხადებს, რომ საჭიროა დიპლომატიური მუშაობის გააქტიურება და ინფორმაციის გატანა იმ ტერიტორიების შესახებ, რომლებიც დღეს ანექსირებულია.
„ტერიტორიული მთლიანობის საკითხის მიშვება არ შეიძლება იმ დროს, როცა აფხაზეთი და ცხინვალის რეგიონი რუსეთს აქვს ანექსირებული და სიტუაცია მიმდებარე რაიონებშიც მწვავდება. ჩვენ უნდა ვამტკიცოთ სიმართლე ყველა ტრიბუნაზე, ყველას უნდა გავაცნოთ ამ კონფლიქტების ისტორია“, – ამბობს ნოდარ ნათაძე.
- ამ მხრივ ამ ხელისუფლებასთან გაქვთ პრეტენზია თუ წინა ხელისუფლებებთანაც?
- ყველასთან. საქართველოს ინტერესებს არავინ იცავდა. შევარდნაძისა და სააკაშვილის მმართველობების წარმომადგენლებზე უცხოეთში ისეთი შთაბეჭდილება იქმნებოდა, თითქოს ისინი გონებრივად განუვითარებელთა კრებულს წარმოადგენენ. ზოგი მათგანი გაუნათლებელი ნაციონალიზმის წარმომადგენელივით იქცეოდა. სინამდვილეში, ქართველების ბუნებაში განათლებული ნაციონალიზმი დევს. ის გამორიცხავს ვინმეს ჩაგვრას. ჩვენ, ქართველი პატრიოტებიც, განათლებული ნაციონალიზმის მიმდევრები ვართ. ასეთები იყვნენ ილია ჭავჭავაძე, არჩილ ჯორჯაძე, მიხეილ წერეთელი, სხვები. ილია ჭავჭავაძემ იწინასწარმეტყველა, რომ საქართველოს სრულ გათავისუფლებას რუსეთისგან ხელს შეუწყობდა მსოფლიოში განვითარებული დემოკრატიზაციის პროცესი და ასევე რუსეთის დასუსტება ანუ რუსეთი ვერ მოინელებდა იმ დიდ ლუკმას, რომელიც გადაყლაპა. ეს საქართველოსაც ეხება.
- განათლებული ნაციონალიზმი ერის ინტერესების დაცვას ნიშნავს?
- ერის ინტერესების დაცვა ამ შემთხვევაში განიხილება არა კერძო შემთხვევად, არამედ, ზოგადად, ერების უფლებების უზრუნველყოფად. ერისათვის ადამიანები სიცოცხლეს წირავენ. პუტინი გაუნათლებელი ნაციონალიზმის მაგალითია. მისი ლოგიკით, ის, რაც კოსოვოში მოხდა, შეიძლება განხორციელდეს ცხინვალის რეგიონშიც.
- ანექსირებულ ტერიტორიებს დავუბრუნდეთ. აფხაზეთისა და ცხინვალის რეგიონის შემთხვევაში ისტორია სხვადასხვაა..
- დიახ, მაგრამ ორივე საქართველოს ძირძველი მიწაა. აფხაზეთი ქართველმა ერმა ფეოდალიზმამდე მიიყვანა. ქართველები აფხაზეთის ავტოქტონური ერია. აფსუები იქ ფეოდალურ ხანაში, ძირითადად, მშვიდობიანად მკვიდრდებოდნენ. ადიღესტომელმა აფსუებმა დაირქვეს აფხაზები, იმიტომ რომ აფხაზეთში დასახლდნენ. მათ არჩევანს ჩვენ პატივს ვცემთ. მიუღებელი იქნება, თუ მათ პრეტენზია ექნებათ, რომ მონათესავე ადიღეელები ჩამოასახლონ აფხაზეთში. ყოფილ აფსუებს ანუ აფხაზებს აქვთ უფლება, თავიანთ ნებაზე და თავიანთი ტრადიციებით მოაწყონ იქ ცხოვრება.
- ცხინვალის რეგიონში ისევ სვამენ რუსეთთან მიერთების საკითხს.
- ეს აღმაშფოთებელია. საამისოდ არანაირი საფუძველი, მათ შორის, იურიდიული, არ არსებობს. საერთოდ, ტერმინი „სამხრეთ ოსეთი“ თავიდანვე ბლეფი იყო. ეს ტერმინი პირველად გამოიყენა ფონ კნორინგმა 1802 წელს რუსეთის მეფისადმი გაგზავნილ წერილში. რუსეთის იმპერია ხელოვნურად ამკვიდრებდა ამ დასახელებას იქ, სადაც თითო-ოროლა ოსი თუ იყო. რუსეთის მიზანი იყო, ძალით შეექმნა წარმონაქმნი, კოლონია, რომლის მეშვეობითაც ის ამიერკავკასიაში დამკვიდრდებოდა.
- ანუ ამიერკავკასიის სახელმწიფოდ გახდომა რუსეთს მაშინვე უნდოდა?
- დიახ. რუსეთი ამისათვის ახლაც ყველაფერს აკეთებს. ამას რომ მიაღწიოს, რუსეთი გადაუკეტავს გზას აშშ-ს კავკასიისა და შუა აზიისაკენ. ე.წ. სამხრეთ ოსეთი 1922 წლის აპრილის დეკრეტით შეიქმნა. ყველაზე საინტერესო ისაა, რომ ეს არ მომხდარა რაიმე დოკუმენტის საფუძველზე. ფაქტობრივად, ე.წ. სამხრეთ ოსეთი შეიქმნა ჰაერიდან. მანამდე რუსები ნერგავდნენ სიტყვას „ოსეტინსკი“, რომელიც კავშირში იყო როგორც ოსებთან, ისე ოსეთთან.
- საერთაშორისო ორგანიზაციებზე ეს ისტორია იმოქმედებს?
- ჩვენ ჩვენი უნდა ვცადოთ, უნდა ვიაქტიუროთ. სამწუხაროდ, ამ საკითხზე არსებობს ეუთოს ერთი დადგენილება. 1994 წელს მიღებული ეს დადგენილება უსამართლოა. მისი შინაარსი ასეთია – ეს მიწა თქვენია, მაგრამ ოსებს მიჩვეულს ნუ გადავაჩვევთო. მაშინ ეუთოს ამ პოზიციას 51 კაცი გამოვეხმაურეთ. აქედან 49 დეპუტატი ვიყავით. არადეპუტატები შოთა ნადირაშვილი და კაკო ბაქრაძე იყვნენ.
