„რეზონანსი“: ინტერვიუ არჩილ გამზარდიასთან: „ამომრჩეველს აინტერესებს, რომელი ძალა მისცემს თვითრეალიზების საშუალებას, უსაფრთხოებას…» // „არჩევნებზე წარმატების შანსი ახლა უფრო მეტ პოლიტიკურ ძალას აქვს“

„რეზონანსი“: ვანო მერაბიშვილს, შესაძლოა, ახალი ბრალი წაუყენონ // „თუ ახალი საქმე შეიკერება, ეს ქვეყნისთვის კატასტროფა იქნება“

„რეზონანსი“: ინტერვიუ ირაკლი ალასანიასთან: „ძალიან მრცხვენია, რომ ხალხს ვერ შევუსრულეთ დაპირება, მართლმსაჯულების გათავისუფლება”

„რეზონანსი“: ინტერვიუ მამუკა არეშიძესთან: „გიგა ოთხოზორიას მკვლელს არ აძლევენ უფლებას დატოვოს აფხაზეთის საზღვრები”

„ალია”: რატომ დატოვა „პატრიოტთა ალიანსი“ მანუჩარ მაჩაიძემ?

„ახალი თაობა“: ინტერვიუ ლია მუხაშავრიასთან: „ვანო მერაბიშვილს მე ციხიდან გამოვუშვებდი“ // „ეს ხელისუფლებაც ძალიან დაემსგავსა სააკაშვილის ხელისუფლებას“

„ახალი თაობა“: ინტერვიუ მამუკა გიორგაძესთან: „ხელისუფლება ანტიდასავლურ ნაბიჯებს დგამს“

„ახალი თაობა“: ინტერვიუ შალვა ოგბაიძესთან: „ევროსასამართლო ბოლომდე სამართლიანი არ არის“

——————–

„რეზონანსი“, 16 ივნისი, 2016 წელი

ინტერვიუ არჩილ გამზარდიასთან: „ამომრჩეველს აინტერესებს, რომელი ძალა მისცემს თვითრეალიზების საშუალებას, უსაფრთხოებას…» // „არჩევნებზე წარმატების შანსი ახლა უფრო მეტ პოლიტიკურ ძალას აქვს“

სალომე სარიშვილი

(შემოკლებით)

წინასაარჩევნო გარემოზე, პარტიების შანსებსა და მათ მიერ შერჩეულ წინასაარჩევნო კამპანიებზე “რეზონანსი” ანალიტიკოს არჩილ გამზარდიას ესაუბრა.

არჩილ გამზარდია: დასაწყისისთვის მნიშვნელოვანია, რომ მიმდინარე არჩევნები არაა ვიღაცის წინააღმდეგ მიმართული, როგორც ჩვენ ამას შეჩვეულნი ვიყავით. ამომრჩეველი იმასაც ხედავს, რომ ადმინისტრაციული რესურსების გამოყენების საშუალება იმ დოზით, რაც გასულ წლებში არსებობდა, რა თქმა უნდა, არ არსებობს. აღსანიშნავია ისიც, რომ საზოგადოება მთელი პოლიტიკური სპექტრის მიმართ კრიტიკულია, რაც ნიშნავს, რომ ეს ისევ მათ შანსებს ზრდის, რათა სწორი პოზიციონირების შემთხვევაში ამომრჩევლის მხარდაჭერა მიიღონ. წლევანდელი არჩევნები განსხვავდება იმითაც, რომ წარმატების შანსი უფრო მეტ პოლიტიკურ ძალას აქვს.

- წინასაარჩევნო მარათონი უკვე გაიხსნა და შესაბამისად, ამომრჩეველი სხავდასხვა პარტიებისგან ყოველდღიურად ახალ დაპირებას ისმენს. ამ თვალსაზრისით რომ შევაფასოთ, თქვენი აზრით, რომელ პოლიტიკურ ძალას აქვს უფრო რეალური დაპირება, რამაც, შესაძლოა, ამომრჩევლის მხარდაჭერა მიაღებინოთ?

- ის, რომ პოლიტიკურ სუბიექტებს რეალური დაპირებები ჰქონდეთ, მხოლოდ მათზე არაა დამოკიდებული – ეს მრავალმნიშვნელოვნად და მეტწილად ისევ ამომრჩეველზეა დამოკიდებული. დავუშვათ, რამდენად ცნობიერი, ინფორმირებულია ამომრჩეველი და რამდენად კარგი ანალიზის უნარი გააჩნია. როდესაც ამომრჩეველში მოწონების საგანი ისეთი დაპირებებია, რომელიც უბრალოდ ლამაზად ჟღერს, მაგრამ შესასრულებლად არც თუ ისე მარტივია, ასეთ შემთხვევაში პოლიტიკური სუბიექტების ბრალეულობა ნაკლებია.

ამ კუთხით თუ მივუდგებით, პოლიტიკური ძალებიც ისეთ დაპირებებს გასცემენ, რასაც ამომრჩეველი თავად ითხოვს, ამიტომ როგორც ამომრჩეველს, თავად შეგვიძლია ცოტა თვითკრიტიკულნი ვიყოთ. ამ მიმართულებით მეორე უკიდურესობა გახლავთ ისიც, როცა გარკვეული პოლიტიკური სუბიექტები ამბობენ – აი, ისინი არაფერს აკეთბდნენ, ამიტომ ჩვენ არაფერს გპირდებითო, რაც მთლად სწორი არაა. პოლიტიკური სუბიექტის ფუნქცია ესაა: განაგრძოს მოცემულობა, განსაზღვროს რა გაკეთდა შეცდომით და რისი გაკეთება შეიძლება უფრო უკეთესად, ხოლო საკუთარი პარტიის წევრები კი ამომრჩეველს ამ ყველაფრის განმახორციელებლად შესთავაზოს. გარდა ამისა, შესთავაზოს დამაჯერებელი, საკუთარი რესურსი.

- ყოფილი ხელისუფლების შეცდომებზე აქცენტირებას არც მმართველი ძალა აკლებს…

- გააჩნია, ამას რა კუთხით შევხედავთ, საარჩევნო ტექნოლოგიური თვალსაზრისით, ეს შესაძლებელია მომგებიანი იყოს, რათა ამომრჩეველს უმთავრესი განსხვავება აჩვენოს.

ამაზე აქცენტის გაკეთებას არასწორად მივიჩნევდი იმ შემთხვევაში, თუკი წინა მმართველი ძალა დღეს ოპოზიციაში აღარ იქნებოდა და შესაბამისად, არჩევნებში მონაწილეობას არ მიიღებდა. რამდენადაც ისინი არჩევნებში მონაწილეობენ, შედარება შეიძლება პოტენციური მომავლის დახატვის საშუალება იყოს. ამგვარი პრინციპი შეცდომა მაშინ უფრო იყო, როდესაც წინა ხელისუფლება მისი წინამორბედის შედარებას აკეთებდა, რადგან შევარდნაძისდროინდელი პოლიტიკოსების ორგანიზებული დაბრუნების პერსპექტივა ნულოვანი იყო.

ახლა კი, როდესაც “ნაციონალური მოძრაობის” დაბრუნების შანსი არსებობს, რაგდანაც ისინი მუშაობენ და შესაბამისი რესურსი გააჩნიათ, ამის ალბათობა რეალურია, ამიტომაა შედარების პრინციპი გამართლებული. თუმცა, ამ მხრივ ჩვენი ამომრჩეველი ცოტა განვითარდა და მხოლოდ შედარების პრინციპი მომგებიანი არაა, ამას პოლიტიკური სუბიექტების მხრიდან თან მთელი რიგი მოწადინება უნდა დაერთოს. გარდა ამისა, უნდა იყვნენ ლიდერები, რომელთაც გაკვეული ბექგრაუნდი გააჩნიათ და ამომრჩევლის ნდობის ნაწილზე ახდენენ გავლენას.

- და ბოლოს, იმ ფონზე, როდესაც გაჩნდა ახალი პოლიტიკური ძალები, რომლებიც შედარებით ნაკლებად დადებითად უყურებენ ჩვენს ევროსტრუქტურებში ალიანსს, ამასთან, ევროპიდან მთლად სახარბიელო შედეგებს ვერ ვიღებთ, ხომ არ ფიქრობთ, რომ ამ ფაქტორმა შესაძლოა ამომრჩეველზე ზეგავლენა იქონიოს და ანტიდასავლური მუხტი გაზარდოს?

- ვფიქრობ, ამ წუთისათვის არ გვაქვს ისეთი მდგომარეობა, რომ უპირატესობა ე.წ პრორუსულ ძალებს მიენიჭოს, თუმცა აქაც გასამიჯნია რაღაცები, რადგან დეკლარირებასა და შესრულებას შორის განსხვავებაა. აქ გასათვალისწინებელია ერთი მომენტიც, კერძოდ ის, რომ ეს ძალები ინტერესს ე.წ ფსევდოეროვნული გამოხატულებით იმსახურებენ, რაც თავისთავად ნიშნავს იმას, რომ ამომრჩეველი მათ ბიძგს აძლევს, რათა ეროვნული მუხტი არ დაკარგოს. საბოლოოდ მაინც მგონია, რომ ასეთ ძალებს ამომრჩეველი უფრო ნომინალური რაოდენობით ჰყავთ, ვიდრე გლობალურად.

საერთო ჯამში, არსებობს ერთი ელემენტარული რაღაც, რაც პოლიტიკურმა ძალებმა უნდა გაიგონ: ჩვენ, როგორც ამომრჩევლები, არ ვართ პროფესიონალები, არ ვუყურებთ იდელოგიას, ფასეულობებსა და პროგრამებს, ამიტომ პოლიტიკურმა სუბიექტებმა უნდა გაითვალისწინონ, რომ არსებობს მოქალაქეები და მათი პირადი პრობლემები, რა დროსაც ამომრჩეველს რუსეთი და გლობალური პოლიტიკა საერთოდ არ აინტერესებს.

ამომრჩეველს აინტერესებს, რომელი ძალა მისცემს თვითრეალიზების საშუალებას, უსაფრთხოებასა და ა.შ. მოქალაქე არჩევანს სწორედ ამის მიხედვით აკეთებს და არა კონკრეტული ძალის პრორუსულობის ან პროდასავლურობის მიხედვით.

„რეზონანსი“, 16 ივნისი, 2016 წელი

ვანო მერაბიშვილს, შესაძლოა, ახალი ბრალი წაუყენონ

„თუ ახალი საქმე შეიკერება, ეს ქვეყნისთვის კატასტროფა იქნება“

ელზა პაპოშვილი

თავდაცვის ყიფილმა მინისტრმა ირაკლი ოქრუაშვილმა მიხეილ სააკაშვილისა და ვანო მერაბიშვილის წინააღმდეგ სასამართლოში ვალერი გელაშვილის ცემის ფაქტზე ჩვენება მისცა. ოქრუაშვილის თქმით, სააკაშვილს გელაშვილის მიმართ გარკვეული წყენა ჰქონდა, რომელიც უკავშირდებოდა ექსპრეზიდენტის ოჯახის წევრებზე ბიზნესმენის მიერ გაკეთებულ განცხადებებს. მისი თქმით, თავად მას სააკაშვილმა სთხოვა, რომ გელაშვილის მიმართ ანგარიშსწორება განეხორციელებინა. ხოლო ეს ისე უნდა მომხდარიყო, რომ საქმეში მისი კვალი არ გამოჩენილიყო. ოქრუაშვილის თქმით, მაშინ პრეზიდენტის თხოვნაზე მან უარი განაცხადა. ხოლო როდესაც უკვე გელაშვილის ცემის ფაქტი მოხდა, ის დარწმუნდა, რომ სააკაშვილის სურვილი მერაბიშვილმა შეასრულა.

მისივე თქმით, ეჭვს კიდევ ის ფაქტი ამყარებდა, რომ იმჟამინდელი შს მინისტრი ვანო მერაბიშვილი მიხეილ სააკაშვილს აქეზებდა და ეუბნებოდა, რომ თუ მსგავსი შეურაცხყოფა პრეზიდენტს ერთხელ მაინც ვინმემ გაუბედა, სხვებიც იგივეს იზამდნენ. ამიტომაც გელაშვილის სათანადოდ დასჯას სთავაზობდა.

“მერაბიშვილი აგულიანებდა და ეუბნებოდა, თუ ერთხელ ასეთი რამ პრეზიდენტს ვინმემ გაუბედა, მაშინ სხვებიც გაუბედავდნენ, რომ არ უნდა დარჩენილიყო ყურადღების მიღმა და გარკვეული ზომა უნდა მიგვეღო.

“ჩავთვალე, რომ მიხეილ სააკაშვილის გადარწმუნებას აზრი არ ჰქონდა. მეორე შეხვედრა იყო, როცა მე ვცდილობდი გადარწმუნებას, მესამე შეხვედრაზე კი პოსტ-ფაქტუმ ვისაუბრეთ, ანუ ეს ყველაფერი მოხდა და ვალერი გელაშვილზე ანგარიშსწორება განხორციელდა.

“ხოლო რაც შეეხება იმას, თუ ასეთი ჩვენება წინასწარი გამოძიების დროს რატომ არ მივეცი, ამის მიზეზი ის იყო, რომ დაკითხვა ზერელედ და ზედაპირულად მოხდა. მე ორჯერ დავიკითხე და დამრჩა შთაბეჭდილება, რომ გამომძიებელი არ იყო დაინტერესებული. ეს დაკითხვები სპონტანური იყო”, – განაცხადა ირაკლი ოქრუაშვილმა.

იურისტი ლია მუხაშავრია ამბობს, რომ ოქრუაშვილის ჩვენების საფუძველზე ვანო მერაბიშვილისთვის ახალი ბრალის წაყენება შეუძლიათ. თუმცა პროკურატურის ასეთი გადაწყვეტილება, სტრასბურგის სასამართლოს მხრიდან კიდევ ერთი ახალი გადაწყვეტილების მიღების საბაბი გახდება. იურისტის თქმით, თუ ეს ასე მოხდა, მაშინ მერაბიშვილის საქმის ირგვლივ კიდევ ბევრი კითხვა გაჩნდება.

“სტრასბურგის გადაწყვეტილების შემდეგ, პროკურატურა ახლა თუ გაბედავს, რომ ოქრუაშვილის ჩვენების საფუძველზე მერაბიშვილს ახალი ბარლი წაუყენოს, ეს ჭკუასუსტობის უმაღლესი გამოვლინება იქნება. ან იქნება შეთქმულება იმისთვის, რომ სატრასბურგმა კიდევ ახალი გადაწყვეტილება გამოაქვეყნოს, სადაც დაწერს, რომ მერაბიშვილი დაუყოვნებლივ უნდა გათავისუფლდეს.

“ამ გადაწყვეტილების აღსრულების პროცესში, სასამართლო და მისი აღმასრულებელი ორგანო თვალყურს მიადევნებენ, რა ხდება. მერაბიშვილი რჩება თუ არა პატიმრობაში და როგორი იქნება მისი მდგომარეობა. თუ ახლა ახალი საქმე შეიკერება, ეს ქვეყნისთვის კატასტროფა იქნება.

“წარმოუდგენელია, როდესაც ოქრუაშვილის სახით გამომძიებელს ასეთი მნიშვნელოვანი მოწმე ჰყავს, ის ზერელედ დაკითხოს. მითუმეტეს ამ საქმის ირგვლივ ძალიან დიდი დაინტერესება არსებობდა”, – აცხადებს ლია მუხაშავრია.

იურისტი ლევან ალაფიშვილის აზრით, ამ მიმართულებით პროკუარტურას რამე სახის მნიშვნელოვანი მტკიცებულება რომ ჰქონოდა, მერაბიშვილს ბრალს აქამდეც წაუყენებდა. მისი აზრით, მათ ჩათვალეს, რომ ამ შემთხვევაში ამის აუცილებლობა არ იყო.

“ირაკლი ოქრუაშვილის ნათქვამში უცხო და ახალი არაფერი ყოფილა, უბრალოდ, ეს ახლა სასამართლოზე პროცესუალურად გაფორმდა. თუკი მერაბიშვილის პასუხისმგებლობის დამძიმების კუთხით ვიმსჯელებთ, პროკურატურას ამის გაკეთება თუ სურდა, ეს ადრეც შეეძლო.

“ფორმალურად ნებისმიერი ინფორმაცია გამოძიების დაწყების საფუძველია, მაგრამ რადგანაც ეს ყველაფერი უკვე ოქრუაშვილმა გაცილებით ადრე თქვა და ამას პროკურატურის მხრიდან რეაგირება არ მოჰყოლია, ვფიქრობ, რომ ახლაც არანაირ ახალ ბარლდებას არ წაუყენებს.

“კითხვა, რატომ ოქრუაშვილმა მსგავსი სახის ჩვენება წინასწარი გამოძიების დროს არ მისცა, ლეგიტიმურია, მაგრამ მას ეს საჯაროდ ნათქვამი ჰქონდა და გამომძიებელს მერაბიშვილის თუ სხვა პირების პასუხისმგებლობაზე მსჯელობა მაშინვე შეეძლო”, – განაცხადა ლევან ალაფიშვილმა.

„რეზონანსი“, 16 ივნისი, 2016 წელი

ინტერვიუ ირაკლი ალასანიასთან: „ძალიან მრცხვენია, რომ ხალხს ვერ შევუსრულეთ დაპირება, მართლმსაჯულების გათავისუფლება”

თიკო ოსმანოვა

“ეს ქართული მართლმსაჯულების მარცხია – დამნაშავე ვანო მერაბიშვილს ვერ დაუმტკიცეს წესიერად დანაშაული”, – ამბობს “რეზონანსთან” საუბრისას, “თავისუფალი დემოკრატების” ლიდერი ირაკლი ალასანია. მისი თქმით, რცხვენია, რომ ქართველ ხალხს 2012 წელს წინასაარჩევნოდ მიცემული დაპირება არ შეუსრულა და ქართული მართლმსაჯულება ვერ გაათავისუფლა პოლიტიკური წნეხისგან.

ირაკლი ალასანია: ჩვენი მთავარი ამოცანაა, შევქმნათ განცდა მოსახლეობაში, რომ გამოუვალი მდგომარეობა არ არსებობს. პერსპექტივა აქვს ქვეყანას, თუკი დავაკომპლექტებთ მთავრობას პროფესიონალი ხალხით. ჩვენ “თავისუფალ დემოკრატებს” გვყავს პროფესიონალი ხალხი და საზოგადოებას ამაში აუცილებლად დავარწმუნებთ. არაფორმარული მართველობა ქვეყანაში აუცილებლად უნდა დამთავრდეს. ეს კი იმ შემთხვევაში მოხდება, თუ ივანიშვილს უმრავლესობა არ ექნება. ასევე მნიშვნელოვანია ეკონომიკური განვითარება. ჩვენი პლატფორმა აგებულია ეკონომიკური წინსვლით და განვითარებით. ჩვენ შეგვიძლია, უკეთესი ცხოვრება შევთავაზოთ საზოგადოებას. და მუდმივად ვიტრიალებთ ამის ირგვლივ – გავაუმჯობესოთ ეკონომიკა და საზოგადოების ცხოვრება, რომ ლუკმა-პურის შოვნა გავუადვილოთ.

არანაირად არ ჩავებმევით პოლიტიკურ კინკლაობაში, ისეთში, როგორშიც ჩართულია “ნაციონალური მოძრაობა” და “ქართული ოცნება”. ეს მათი თამაშის წესებია – ორპოლუსიანი პოლიტიკური ველი. ერთმანეთთან ბრძოლაში ერთმანეთს აძლიერებენ, მათ ერთმანეთი სჭირდება. ჩვენ კიდევ არც ერთი გვინდა და არც მეორე. აქედან გამომდინარე ჩვენი ტაქტიკა სხვანაირია, არ შევალთ ტალახის სროლაში, ვისაუბრებთ იმაზე, რაც ხალხს და საზოგადოებას აღელვებს. სწორედ ამის გამო კვლევებშიც ჩანს, რომ საზოგადოების ნახევარი არ არის ჩამოყალიბებული, ვის დაუჭერს მხარს. ელოდება ალტერნატივას და, მგონია, წინასაარჩევნო კამპანიის ბოლო თვე იქნება გადამწყვეტი მოსახლეობის და ელექტორატის ჩამოყალიბებაში.

- ელოდებით თუ არა დაძაბულობას წინასაარჩევნო კამპანიის პერიოდში?

- კორცხელში რაც მოხდა, ეს იყო საგანგაშო ზარი ყველასთვის. სასწრაფოდ უნდა ამოქმედდეს უწყებათაშორისო ჯგუფი წინასაარჩევნო კამპანიის პერიოდში, რომელიც ასეთ ინციდენტებზე სწრაფ რეაგირებას გააკეთებს. ვფიქრობ, პოლიტიკური ძალები ქცევის წესებზე უნდა შეთანხმდნენ. ამასთან დაკავშირებით, ჩვენი ინიციატივა უკვე გააჟღერა ვიქტორ დოლიძემ და ვთვლით, რომ ერთობლივი დეკლარაცია უნდა იქნას მიღებული. თამაშის წესები ერთამენთში უნდა დავადგინოთ იმიტომ, რომ ხალხი უკეთესის ღირსია.

რაც შეეხება კორცხელის ინციდენტს სასწრაფოდ უნდა მოხდეს ამის ორგანიზატორების დასჯა, რომ აღარ განმეორდეს ასეთი რამ. ასევე საერთაშორისო და ჩვენი დამკვირვებლების რაოდენობით, რომელიც იქნება საკმაოდ ბევრი, არის შანსი, რომ ეს არჩევნები ჩავატაროთ ნორმალურად, ადამიანურად. რა თქმა უნდა, ინციდენტები იქნება და ამის თავიდან აცილება შესაძლებელია უწყებათაშორისო ჯგუფის შექმნით.

საქართველოს მოსახლეობამ კორცხელში მოხმდარი ინციდენტი იმიტომ შეაფასა უარყოფითად, რომ აღარ უნდა არჩევნები პოლარიზებულ გარემოში ჩატარდეს. ეს არის ჩვენი საზოგადოების გადაწყვეტილება. ხალხს არ აინტერსებს გაუთავებელი ფიზიკური და სიტყვიერი დაპირისპირება. მათ აინტერესებს რას სთავაზობს პოლიტიკური პარტიები, რომ უკეთესი გახდეს მათი ცხოვრება. შევქმნათ სამუშაო ადგილები და სხვა.

- მაჟორიტარები ყველა ოლქში გეყოლებათ?

- კი, ყველგან გვეყოლება და ჩვენ ახლა სწორედ ამაზე ვმუშაობთ, რომ ჩამოვაყალიბოთ ყველა რაიონში საარჩევნო შტაბი. ეს პროცესი რამდენიმე კვირა გაგრძელდება და სადღაც თვის ბოლოსკენ საზოგადოებას ჩვენი პარტიული სიის ნაწილს წარვუდგენთ. ახლა საზოგადოებაში ნიჰილიზმი სჭარბობს – “ქართულმა ოცნებამ” ხალხის დიდ ნაწილს იმედი გაუცრუა. არავითარ შემთხვევაში არ დავაბრუნებთ “ნაციონალურ მოძრაობას” უკან ხელისუფლებაში, რომ გაატაროს ის პოლიტიკა, რაც მიხეილ სააკაშვილს ჰქონდა. მაგრამ ასევე ვერ მივცემთ იმის უფლებას, რომ ივანიშვილმა გააგრძელოს ის პოლიტიკა, რომელიც ბოლოს ჰქონდა და მიგვიყვანა სტაგნაციამდე. ქვეყანას ახალი საღი ძალა სჭირდება, რომ წავიდეთ წინ.

- ახალი სახეები საზოგადოებას უკვე გააცანით, გაგრძელდება თუ არა ეს პროცესი კიდევ?

- ამ დღეებშიც იგეგმება ახალი სახეების წარდგენა. ვძლიერდებით ყოველდღიურად და სწორედ ეს მაძლევს დიდ იმედს, რომ ვართ მიზიდულობის ძალა პროფესიონალი ხალხისთვის.

- არჩევნებში მთავარ კონკურენტად ვინ მიგაჩნიათ?

- ჩვენ კონკურენტად ვხედავთ ხელისუფლებაში მყოფ ძალას. სწორედ ამიტომ ვამბობ, ჩვენი მთავარი ამოცანაა ალტერნატივა გავაჩინოთ ხალხში “თავისუფალი დემოკრატების” სახით. გავაუმჯობესებთ ქვეყნის ეკონომიკურ მდგომარეობას, შევქმნით დამატებით სამუშაო ადგილებს და ზოგადად გავაჯანსაღებთ პოლიტიკურ ველს. რასაც სთავაზობს “ნაციონალური მოძრაობა” და “ქართული ოცნება”, არის დაპირისპირება, შეჯახება, ჩვენ კი წარსულში სწორედ ამის დატოვება გვინდა. ამიტომ ეს ალტერნატივა, დარწმუნებული ვარ, საზოგადოების მხარდაჭერას დაიმსახურებს.

- თანამდებობიდან თქვენი წასვლის შემდეგ თინა ხიდაშელმა საფრანგეთთან ორი ხელშეკრულება გააფორმა, რითაც ფრანგული მხარე საქართველოს საჰაერო თავდაცვის საშუალებას აწვდის. ნიშნავს თუ არა ეს იმას, რომ საქართველოს იარაღის შესყიდვაზე ემბარგო მოეხსნა?

- “თავისუფალი დემოკრატების” ხელისუფლებაში ყოფნის დროს და კონკრეტულად ჩემი თავდაცვის მინისტრობის დროს დავამთავრე ემბარგო ევროპელ პარტნიორებთან, განსაკუთრებით ეს შეეხება საჰაერო თავდაცვის საშუალებებს. ამაში ერთობლივად მიგვიძღვის წვლილი, განსაკუთრებით კი ეს ჩვენი ჯარისკაცების დამსახურებაა, რომლებიც წავიდნენ და ევროპულ მისიებში მსახურობენ. ემბარგოს მოხსნის შემდეგ მოხდა მნიშვნელოვანი ხელშეკრულების გაფორმება, რომელიც მე გავაფორმე, მიუხედავად დიდი წინააღმდეგობისა, რომლის ისტორია საზოგადოებამ კარგად იცის.

ახლა მთავარია, ეს ხელშეკრულებები იქცეს რეალობად. როდესაც ჩვენ მოვალთ ხელისუფლებაში, ერთადერთი, რასაც ვიზამთ, დავიწყებთ საჰაერო თავდაცვის საშუალებების გაძლიერებას, თუ გვინდა ეკონომიკის განვითარება და ინსტიტუტების გაძლიერება. თუ თავდაცვა არ გვექნება და საჰაერო სივრცე არ იქნება დაცული, ძნელია ვისაუბროთ ქვეყნის განვითარებაზე და ევროპასთან უვიზო მიმოსვლაზე. დარწმუნებული ვარ, დასავლეთის მხრიდან საზოგადოება ამ გადაწყვეტილებას ძალიან მალე ნახავს. ის, რომ ამასთან დაკავშირებით საქართველომ ყველა კრიტერიუმი შეასრულა, ამაში გარკვეული წვლილი ჩვენს გუნდსაც მიუძღვის. ჩვენი დეპუტატები, განსაკუთრებით ვიქტორ დოლიძე, ამ მიმართულებით ახლაც აქტიურად მუშაობენ.

- რატომ შეფერხდა ვიზალიბერალიზაციის პროცესი?

- ეს პროცესი ჩემი აზრით, შიდა ევროპული პრობლემების გამო შეფერხდა, მიგრაციულ კრიზისს ვგულისხმობ. როდესაც ევროპაში მოხდება საკანონმდებლო ცვლილება, ვფიქრობ, ამის შემდეგ მიიღება გადაწყვეტილება საქართველოსთან მიმართებაში. შინაგანად დარწმუნებული, ვარ, საქართველოს სასიკეთოდ, ევროპა ამ გადაწყვეტილებას ძალიან მალე მიიღებს.

- “კაბელების საქმესთან” დაკავშირებით დღეს თქვენი პარტია მორიგ აქციას მართავს. მიიღებს თუ არა ეს პერმანენტულ ხასიათს?

- აქცია დაგეგმილი გვაქვს სააპელაციო სასამართლოსთან, რომელიც მურუსიძის სასამართლოა. ძალიან მრცხვენია, რომ 2012 წელს ქართველ ხალხს ვერ შევუსრულეთ დაპირება, რასაც მართლმსაჯულების გათავისუფლება ჰქვია. ახლა ეს ინსტრუმენტი ჩაიბარა ივანიშვილმა, ამიტომაცაა მნიშვნელოვანი, საზოგადოების პროტესტი დავაფიქსიროთ.

- რაც შეეხება სტასბურგის სასამართლოს გადაწყვეტილებას ვანო მერაბიშვილთან დაკავშირებით, რომელმაც ნაწილობირივ დააკმაყოფილა მისი მოთხოვნა. თქვენი აზრით, რამ განაპირობა ასეთი გადაწყვეტილება?

- ეს არის აბსოლუტური არაკომპეტენტურობა იუსტიციის სამინისტროსი, პროკურატურის და არაფორმალური მართვისაც. არაფორმალური მართვის დროს სწორედ არაკომპეტენტური ხალხი მოდის სტრუქტურების სათავეში. ეს ქართული მართლმსაჯულების მარცხია – დამნაშავე მერაბიშვილს ვერ დაუმტკიცეს წესიერად დანაშაული.

„რეზონანსი“, 16 ივნისი, 2016 წელი

ინტერვიუ მამუკა არეშიძესთან: „გიგა ოთხოზორიას მკვლელს არ აძლევენ უფლებას დატოვოს აფხაზეთის საზღვრები”

ნინო ქეთელაური

“საკმარისია საქართველოს ხელისუფლებამ უფრო მეტი ილაპარაკოს ნატოსთან ინტეგრაციაზე, ვიდრე ეს მოსკოვში მოსწონთ, რომ მაშინვე იწყება რუსეთიდან საპასუხო ნაბიჯები”,- ამის შესახებ ექსპერტი კავკასიის საკითხებში მამუკა არეშიძე “რეზონანსთან” საუბრობს და ამბობს, რომ სოფელ ავლევში ე.წ სასაზღვრე აბრის დამონტაჟების ფაქტიც, რუსეთის მხრიდან საპასუხო რეაქცია იყო. რაც შეეხება საქართველოსთვის ჟენევის ფორმატის მნიშვნელობას, მამუკა არეშიძის თქმით, ჟენევის ფორმატი არის ერთადერთი მოედანი, სადაც ურთერთდაპირისპირებული მხარეები ხვდებიან ერთმანეთს და ეს იმითაც არის მნიშვნელოვანი, რომ ამ პროცესს საერთაშორისო თანამეგობრობის წარმომადგენლები ხელმძღვანელობენ.

მამუკა არეშიძე: ამ ფორმატში, პირადი კონტაქტის შედეგად, ურთიერთობის დათბობა ხდება და გარდა ამისა, მას აქვს ის ფუნქცია, რომ ზოგიერთი კანონდარღვევის პრევენციაც ხდება. თუმცა, რომ გითხრათ, ამას გადამწყვეტი მნიშვნელობა აქვს და სიტუაციის მთლიანად მოგვარება ხდება-მეთქი, ეს ასე არ არის. რაც შეეხება იმას, საბოლოო ჯამში, თუ რას მისცემს ჟენევის ფორმატი საქართველოს, ის მდგომარეობას ვერ გადაჭრის. მხოლოდ საქართვლოს მხარის აქტიურობა სიტუაციას ვერ შეცვლის იმიტომ, რომ არსებობს ძლიერი რუსეთის ფაქტორი. რუსეთი თუ იქნება იმ მდგომარეობაში, როგორშიც არის თუნდაც დღეს, ის ფეხს არ მოუცვლის თავის გადაწყვეტილებას.

- როგორც ცნობილია, ჟენევის ფორმატში გიგა ოთხოზორიას მკვლელის დასჯის საკითხი დაისმება. რამდენად რეალურია, რომ კანჯი ოღლი დაისაჯოს?

- გიგა ოთხოზორიას მკვლელი რომ დაისჯება, ამის გარკვეული მოლოდინი არსებობს და ამას რამდენიმე ფაქტორი განაპირობებს. ერთი ის, რომ როგორც აფხაზური საზოგადოება ამბობს – ამ პიროვნებამ საფრხთის ქვეშ დააყენა “აფხაზეთის სახელმწიფო”. საერთოდ, თუ არ დაიჭერ, ქურდი არ არის, მაგრამ ეს პიროვნება დაჭერილი კი არა, მისი თავხედობა და ცინიზმი ყველა საზღვარს გასცდა. კამერებმა დააფიქსირა და ყველამ იცის, რომ ეს ასე მოხდა. სწორედ ამიტომაც იყო დაკავებული რამდენიმე საათის გამავლობაში და ჩემი ინფორმაციით, კანჯი ოღლის არ აძლევენ უფლებას დატოვოს აფხაზეთის საზღვრები, თორემ ამის დიდი სურვილი ჰქონდა.

ჩვენ სავარაუდო გვარიც ვიცით, რა გვარითაც აპირებდა რუსეთში გადასვლას, ეს იყო დუხინი. აფხაზეთს უნდა მსოფლიოს თვალში ცივილიზებულ “სახელმწიფოდ” გამოჩნდეს. სწორედ ამიტომ, ეს არის ერთ-ერთი მნიშვნელოვანი ფაქტორი იმისა, რომ კანჯი ოღლი დაისჯება. მეორე ფაქტორია ის, რომ კანჯი ოღლი არ არის აფხაზი, ის არის ლაზების შთამომავალი. აქედან გამომდინარე, მისთვის ის დაცვის სისტემა, როგორიც აფხაზეთშია, მინდამაინც არ მუშაობს.

აფხაზეთში არის კლანური სისტემა და როდესაც კლანის ერთ-ერთი წევრი დანაშაულს ჩაიდენს, მთელი კლანი გადაეფარება და სამართლიანობის აღდგენის უფლებას დე-ფაქტო ხელისუფლებას არ აძლევენ. ასეთი შემთხვევა უამრავია და ამიტომაც არის აფხაზეთში კრიმინალის დონე ძალიან მაღალი. მაგრამ, როგორც გითხარით, დაცვის ეს სისტემა ამ პიროვნებას არ ეხება და ეს ფაქტორიც მუშაობს. გარდა ამისა, შეიძლება ერთი შეხედვით ჩვენთვის წარმოუდგენელი იყოს, მაგრამ ამ პიროვნებამ დაარღვია აფხაზეთის დე-ფაქტო სასაზღვრო ჯარების შიდაგანაწესი, ანუ სხვანაირად რომ ვთქვათ, “კანონი” დაარღვია. აქ ოთხოზორიას მკვლელობაში არ არის საქმე, აფხაზური პოზიციიდან ეს ფაქტი ჩანს ისე, რომ მან მიატოვა პოსტი, გადავიდა სხვა ტერიტორიაზე და “სახელმწიფო” დააყენა დარტყმის წინაშე. სხვათა შორის, მის წინააღმდეგ საქმე ამ მუხლითაც არის.

და კიდევ ერთი ფაქტორი, რომ გითხრათ, რუსებს ძალიან გაუხარდათ ეს ამბავი-მეთქი, ეს ასე არ არის. მიუხედავად იმისა, რომ რუსეთის საგარეო საქმეთა სამინისტრო მუდმივად საუბრობს, რომ ეს არის ქართველებისა და აფხაზების პრობლემა, მან ძალიან კარგად იცის, რომ აფხაზებსა და რუსებს შორის არსებობს ხელშეკრულება, რომლის მიხედვითაც მოსკოვი თავის თავზე იღებს აფხაზეთის “საზღვრის” დაცვას დანარჩენი საქართველოსგან. პრაქტიკულად, იურიდიული პასუხისმგებელი არის მოსკოვი.

ასე რომ, წესით, ყველა ამ ფაქტორმა ერთად უნდა იმოქმედოს და მკვლელი უნდა დააკავონ. როგორ დასჯიან და რას მიუსჯიან, ეს სხვა ამბავია. მე თუ მკითხავთ, პრინციპში, სოხუმის დე-ფაქტო ხელისუფლებისა და მოსკოვის ინტერესშია, რომ ამ საქმეს შესაბამისი მსვლელობა მიეცეს.

- სულ ცოტა ხნის წინ სოფელ ავლევში ე.ს საზღვრის აღმნიშვნელი ბანერის დამონტაჟება მოხდა. როგორ ფიქრობთ, რამ განაპირობა “საზღვრის” გადმოწევის ფაქტი და რა რეაგირება უნდა მოჰყვეს ამას?

- რთული სათქმელია. მოდით ასე შევხედოთ ამ ამბავს – საქართველოს ხელისუფლება რამდენად დაინტერესებულია იმით, რომ ამ თემის გამო საკუთარი საზოგადოების მხრიდან მუდმივი კრიტიკის საგანი იყოს? რასაკვირველია, არ უნდა იყოს დაინტერესებული, მაგრამ საქმე ისაა, რომ ძალიან რთულია რეცეპტის გამოწერა.

მე გეტყვით, რეალურად რაშია საქმე. რუსული მხარე მუდმივად ცდილობს, რომ “საზღვრის” განსაზღვრასთან დაკავშირებით, ქართულ მხარესთან დაჯდეს მოლაპარაკების მაგიდასთან. ქართული მხარე ამას არ აკეთებს და ლოგიკურიც არის, რადგან საკმარისია ასეთი მოლაპარაკებები დაიწყოს, რომ მაშინვე დაიწყება სახელმწფოთა შორის ოფიციალური “საზღვრის” თაობაზე ლაპარაკი. ამიტომ ქართული მხარე ამაზე არ მიდის. ეს არის ტექნიკური საკითხი, მაგრამ ჩვენთვის სახელმწიფოს პრესტიჟის მნიშვნელობის არის.

ასევე ერთ მნიშვნელოვან საკითხზე მინდა გავამახვილო ყურადღება. ჩვენ გეოპოლიტიკურ ფაქტორს არ ვითვალისწინებთ. ახლა ახლოვდება ნატოს სამიტი, მიაქციეთ ყურადღება, როგორი აქტიურია საქართველოს თავდაცვის სამინისტროს ხელმძღვანელობა ამერიკის შეერთებულ შტატებში, ყურადღება მიაქციეთ საქართველოს თავდაცვის მინისტრის განცხადებებს.

საკმარისია საქართველოს ხელისუფლებამ უფრო მეტი ილაპარაკოს ნატოსთან ინტეგრაციაზე, ვიდრე ეს მოსკოვში მოსწონთ, რომ მაშინვე იწყება რუსეთიდან საპასუხო ნაბიჯები. ეს საპასუხი ნაბიჯები კი ამ პირობითი საზღვრის აქეთ-იქით ტარებაა. საგარეო ვექტორთან დაკავშირებით ჩვენი და რუსეთის ინტერესები ერთმანეთს არ ემთხვევა (ვერც დაემთხვევა), აქედან გამომდინარე, დასავლეთის მიმართულებით ჩვენი ნებისმიერი აქტივობა იწვევს შესაბამის რეაქციას რუსეთისგან და პირიქით, რაც უფრო აგრესიულია რუსეთი ოკუპირებულ ტერიტორტიებზე, მით უფრო იხრება საქართველო დასავლეთისკენ.

- საქართველოში ტერაქტების საფრთხეზე მინდა გკითხოთ… მსოფლოში გახშირებული ტერაქტების, აქტობეში მომდარი ფაქტის ფონზე, საქართველო რამდენად არის რისკის ზონაში?

- არც ერთი ქვეყანა არ არის დაცული ტერაქტებისგან. კონკრეტულად საქართველოს რაც შეეხება, სხვადასხვა კვლევებით, განსაკუთრებით ამერიკის შეერთებული შტატების შესაბამისი სამსახურის კვლევებით, საქართველო შედის მესამე კატეგორიის ხიფათის ქვეყნებში, რაც ნიშნავს იმას, რომ ტერაქტების თვალსაზრისით, განსაკუთრებული საფრთხე არ გვემუქრება, მაგრამ არავინ არაფრისგან არის დაზღვეული. თუ საქართველო და მისი მოქალაქეები არა, შეიძლება ხიფათის ობიექტი, მომავალში აქ განლაგებული საერთაშორისო წარმომადგენლობები გახდეს. ასე რომ, რამეს დაბეჯითებით თქმა წარმოუდგენელია.

„ალია”, 16 ივნისი, 2016 წელი

რატომ დატოვა „პატრიოტთა ალიანსი“ მანუჩარ მაჩაიძემ?

ნინო ლაბარტყავა

გუშინ პარტია «საქართველოს პატრიოტთა ალიანსი“ პარტიის და ამავდროულად, თბილისის საკრებულოს წევრმა მანუჩარ მაჩაიძემ დატოვა, ამის მიზეზად კი პარტიის ხელმძღვანელობასთან საარჩევნო სიებთან დაკავშირებული უთანხმოება დაასახელა: „პატრიოტთა ალიანსის“ საარჩევნო სიაში „რუსთავი-2“-ის ტელეწამყვანის დიანა ჯოჯუას მეუღლის ნიკოლოზ რამიშვილის ყოფნა ჩემთვის მიუღებელია. მის კანდიდატურას პარტიის პოლიტსაბჭომ მხარი დაუჭირა, რასაც მე არ დავეთანხმე. „საქართველოს პატრიოტთა ალიანსის“ დატოვების მიზეზი სწორედ ეს გახდა“. მისივე თქმით, რამიშვილი „ნაციონალური მოძრაობის“ და ვანო მერაბიშვილის მეგობარია“.

მანუჩარ მაჩაიძის განცხადებას პარტიის ლიდერი ირმა ინაშვილი საკუთარ „ფეისბუკის“ გვერდზე გამოეხმაურა: „ვწუხვარ, რომ ამ თემაზე მიწევს საუბარი. ბატონი მანუჩარ მაჩაიძის განცხადება, უბრალოდ, უზნეობაა. მანუჩარ მაჩაიძემ ჩვენი პარტია დატოვა მხოლოდ იმიტომ, რომ უარი ვუთხარით საპარლამენტო სიის ხუთეულზე. მოგეხსენებათ, ბატონი მანუჩარი თბილისის საკრებულოს წევრია. მას საკრებულოში კიდევ 1 წლის სამუშაო აქვს და ჩვენ ჩავთვალეთ, რომ საპარლამენტო სიაში ის ამჯერად არც მეხუთე ნომერი უნდა ყოფილიყო და საერთოდაც არ უნდა მიეღო მონაწილეობა ამ არჩევნებში, ანუ უნდა დარჩენილიყო საკრებულოში. მანუჩარ მაჩაიძე გაბრაზდა და პარტია დატოვა… ნიკა რამიშვილი არც ვანო მერაბიშვილის მეგობარია და არც „ნაციონალური მოძრაობის“ წევრი. არც არასდროს ყოფილა და სიაშიც, შესაბამისად, არაა… ნიკა რამიშვილი არის ჩემი უახლოესი მეგობრის შვილი, არის ჩემი მეგობარი და მე მას მანამდე ვიცნობდი, სანამ საერთოდ პარტიის გენმდივანი გავხდებოდი და ვიდრე ნიკა რამიშვილი საერთოდ დიანა ჯოჯუას გაიცნობდა“.

დეტალების გასარკვევად „ალია» ორივე მხარეს დაუკავშირდა:

მანუჩარ მაჩაიძე:

- მე არასწორად მიმაჩნია, რომ რამიშვილისნაირი პიროვნება, რომელსაც, სხვათა შორის, არ ვიცნობ და არ ვიცი, როგორი ადამიანია – „პატრიოტთა ალიანსში“ არ უნდა იყოს. როდესაც პოლიტსაბჭოზე ეს საკითხი წყდებოდა, მართალია, ახლა ესენი უარყოფენ, არა, რა ხუთეული, რის ათეული, სია საერთოდ არ არსებობსო, მაგრამ არსებობდა, ბატონო, ამაზე გვქონდა მსჯელობა. რა, აბა, დამესიზმრა ამ კაცის სახელი და გვარი? ეს არის სიმართლე და ამიტომაც გამოვედი პარტიიდან. რა არის, ვერ გავიგე, ვინმეს ვლანძღავ? მართალია, პარტიისთვის არ არის სასიამოვნო, მისი დეპუტატი ასეთ რამეს რომ გააკეთებს, მაგრამ მე საკრებულოში არ შევსულვარ ირმა ინაშვილისა და თარხანმოურავის ხათრით, ხალხმა მე მომცა ხმა და ჩემი ხმა მაგათ მიეწერათ, თორემ მაგათ ქართველი ხალხი არც იცნობდა და ახლაც წესიერად არ იციან, ვინ არიან ეგენი, კაცო. მე კიდევ მთელი საქართველო და მსოფლიო მიცნობს და რატომ აქვთ ასეთი ამბიციები, ვერ გავიგე? კი, ბატონო, გასაბრაზებელი და ცოტა საწყენია, კაცმა ასეთი რამე თქვას, მაგრამ მე ვერ ვიტან ისეთ რაღაცებს, როცა წინა რეჟიმის ხალხი რაღაცნაირად მოჰყავთ პოლიტიკაში. ასეთი დანდობებით, წაყრუებით, სხვადასხვა მეთოდებით ასეთი ხალხი, როგორიც „ნაციონალურ მოძრაობაში“ იყო, შედის პარლამენტში, იკავებს თანამდებობებს, გვტანჯავს და ქართველი ერი უბედურ დღეში ჰყავს. იმ ცხრა წლის ყოველი წელი, რომელიც ჩვენ გავიარეთ, იყო კომუნისტური რეჟიმის 37 წელი. რა, ტყუილს ვამბობ? კი, მესმის ხათრი, კომპრომისი, მაგრამ ასე მოდის ეს ხალხი პოლიტიკაში.

- ირმა ინაშვილმა ხაზგასმით აღნიშნა, რომ რამიშვილი არ არის „ნაციონალური მოძრაობის“ წევრი, არც არასდროს ყოფილა და არც მერაბიშვილის მეგობარი არ არისო...

- კარგით, დავუშვათ, არ არის „ნაციონალური მოძრაობის“ წევრი, ქალბატონი ჯოჯუას მეუღლე, რომელიც ცხრა თუ ათი წელია, „რუსთავი-2“-ის ჟურნალისტია, ხომ არის? და შეიძლება, რომ მისი მეუღლე ნიკა რამიშვილი სხვანაირად მოაზროვნე იყოს? შეუძლებელია, რა. და თუ აზრზე არ არიან, რა ხდება და როგორ ხდება და მაგასთან კავშირი არ აქვთ, მაშინ რატომ არის, რომ „პატრიოტთა ალიანსის“ რეკლამა „რუსთავი 2“-ზე უკვე ორი თვეა, გადის?

- „პატრიოტთა ალიანსის“ მხრიდან ამაზე არგუმენტი, ალბათ, ის იქნება, რომ წინასაარჩევნოდ ისინი ნებისმიერ ეთერს იყენებენ...

- სხვა არც ერთი პარტიის რეკლამა არ გადის არსად, მარტო „პატრიოტთა ალიანსი“ გადის „რუსთავი 2“-ზე, ესეც მე მოვიგონე?

- ირმა ინაშვილი თავის განცხადებაში წერს, მანუჩარ მაჩაიძე იმაზე გაბრაზდა, რომ უარი ვუთხარით საპარლამენტო სიის ხუთეულზეო...

- როგორ გეკადრებათ? ჯერ ერთი, მე ვიყავი მაგ პარტიის დამფუძნებელი, ირმა ინაშვილი მაშინ არ იყო მისი წევრი, როცა სოსო მანჯავიძე გავიდა, ირმა მაშინ შემოვიდა. მე, მოგეხსენებათ, პარლამენტის წევრიც ვიყავი, საკრებულოს წევრიც და ჩემთვის ეს სიახლე არ არის და ამით მე არც რეგალიები მომემატება და არაფერი. მე იმაზე ვამახვილებ ყურადღებას, რომ პარლამენტში არ უნდა ხვდებოდნენ შემთხვევითი ადამიანები, ისეთი ადამიანები, რომლებიც ყველაფერს აკეთებენ ქართველი ერის წინააღმდეგ, კაცო და საიდან იღებს ის ხალხი ამ ინსტრუქციებს არ ვიცი.

- მანუჩარ მაჩაიძეს საკრებულოში კიდევ 1 წლის სამუშაო აქვს და ჩვენ ჩავთვალეთ, რომ საერთოდაც არ უნდა მიეღო მონაწილეობა ამ არჩევნებშიო, ინაშვილი ამბობს...

- მაგათ რა უფლება აქვთ, მე შემიყვანონ ან არ შემიყვანონ სიაში? კარგით, რა! არ მინდა, ბატონო. მე მაგის გამო არ გამომიცხადებია პროტესტი. მე ვუთხარი, – კარგი, დავუშვათ, გამოქვეყნდა სია და იქ რამიშვილი იქნება ჩაწერილი, ხომ გაშიფრავს ამ სიას ნებისმიერი მცოდნე? ხომ გამოჩნდება მერე ყველაფერი და არ არის ეს საჭირო-მეთქი. არაო, ეგ უნდა გავიდესო. მაგათ ეგონათ, რომ ეს ასე ჩაივლიდა. როდესაც პარტიის წევრი ტოვებს პარტიას, თუ ის საკრებულოში წარმომადგენელია, ეს უნდა განუცხადოს საკრებულოს ხელმძღვანელობას და ქართველი საზოგადოება საქმის კურსში უნდა ჩააყენოს, ამას კანონი მოითხოვს. ასე გავაკეთე მეც და არც მეგონა, თუ ასეთი ამბები ატყდებოდა, მაგრამ ეს ამბავი რომ მედიასაშუალებებით გავრცელდა, ირმა ინაშვილი, რომელსაც მე ყოველთვის პატივს ვცემდი, ეტყობა, გაბრაზდა და არასწორი ინფორმაციის მიწოდება დაიწყო.

- გასაგებია… საკრებულოს დატოვებასაც ხომ არ აპირებთ?

- არა, რადგან მე მანდ სრულიად დამსახურებულად მოვხვდი, ის ხმები, რომელიც ადგილობრივ არჩევნებში ავიღეთ, ბევრი ჩემიდამსახურებით იყო, მაშინ თარხანმოურავს და ირმა ინაშვილს ხალხი არ იცნობდა და რატომ უნდა დავტოვო? მით უმეტეს, რომ კანონი მაძლევს იმის უფლებას, რომ პარტიის დატოვების მიუხედავად, კვლავ გავაგრძელო მუშაობა დამოუკიდებელი დეპუტატის სტატუსით, რასაც ვაპირებ კიდეც.

- სხვა პარტიაში ხომ არ აპირებთ გაწევრიანებას? რაიმე მოლაპარაკებები თუ გაქვთ რომელიმე პარტიასთან?

- ჯერჯერობით, მოლაპარაკებები არ მიმდინარეობს და არ ვიცი, ვნახოთ.

———————

ირმა ინაშვილი:

- საარჩევნო სიის ფორმირებაზე ახლა, თითქმის, ყველა პარტია მუშაობს, მაგრამ ჩვენ ამ სიაზე მუშაობა დამთავრებული, ჯერჯერობით, არ გვაქვს, რადგან კანდიდატურებს განვიხილავთ. გვინდა, ამ სიაში იყოს ყველა ის ადამიანი, ვინც ათი წლის მანძილზე ჩვენთან ერთად იბრძოდა სააკაშვილის რეჟიმის წინააღმდეგ, ვისაც დამსახურება აქვს და ვინც საზოგადოების მხარდაჭერასა და პატივისცემას იმსახურებს. სიის ხუთეულზე, ათეულზე საუბარი ჯერ ნაადრევად მიმაჩნია, ჯერ კიდევ აქვთ დრო პარტიებს, რომ ეს ათეულები თუ ოცეულები მედიასა და საზოგადოებას წარუდგინონ. ძალიან ვწუხვარ, რომ მანუჩარ მაჩაიძის განცხადებებთან დაკავშირებით მიწევს კომენტარის გაკეთება, რადგან ძალიან ვაფასებ ბატონ მანუჩარს, მაგრამ საკრებულოში „პატრიოტთა ალიანსის“ წევრი რომ იყო, საზოგადოებამ ეს დღეს გაიგო. არადა, თითქმის, წელიწადზე მეტია, იგი თბილისის საკრებულოში „პატრიოტთა ალიანსს“ წარმოადგენს. ჩვენმა გუნდმა ჩათვალა, რომ მას გაეგრძელებინა ეს საქმიანობა ისევ თბილისის საკრებულოში, რადგან ეს ძალიან დიდი პასუხისმგებლობაა და წელიწადზე მეტია კიდევ დარჩენილი, ეს პასუხისმგებლობა პირნათლად შეასრულოს, რაც ამომრჩეველმა მას მიანდო.

როდესაც კანდიდატურებს ვიხილავდით და სიებზე იყო საუბარი, აქ ბატონ მანუჩარს ის კი არ გაუპროტესტებია, ჩემი მეგობარი ვინ არის – მისი მთავარი პრეტენზია იმაში მდგომარეობდა, რომ მას სურდა როგორც საკრებულოს წევრობა, ასევე, სურდა, საარჩევნო სიის ხუთეულში მეხუთე ნომერი ყოფილიყო და გულახდილად გეტყვით:

უსამართლოდ მიმაჩნდა და ახლაც ასე მიმაჩნია ასეთი გადაწყვეტილების მიღება, რადგან პარტიაში ბევრი სხვა დამსახურებული სახეც არის, ახალი სახეც და თუ «პატრიოტთა ალიანსიდან“ მარტო ბატონი მანუჩარი იქნება საკრებულოს წევრიც, პარლამენტის წევრიც, მინისტრადაც ის დაინიშნება, ეს ხომ უსამართლო დამოკიდებულებაა პარტიის მხრიდან მისი გუნდის სხვა წევრების მიმართ? ამიტომ მას პოლიტსაბჭომ საარჩევნო სიის მეხუთე ნომრობაზე უარი უთხრა და მისი გაბრაზების რეალური მიზეზი ესაა და არა ნიკა რამიშვილი.

- გარდა იმისა, რომ თქვენ და მანუჩარ მაჩაიძეს მეგობრობა გაკავშირებთ, სახელმწიფო აუდიტის ინფორმაციით, მიმდინარე წლის აპრილში „პატრიოტთა ალიანსს“ მაჩაიძემ 60 ათასი ლარი შესწირა, ანუ ერთი შეხედვით, მას საკმაო დამსახურება აქვს და ბოლოს და ბოლოს, რა პრობლემა იქნებოდა მისი სიაში ჩასმა?

- იცით, რაშია საქმე? შემოწირულობა, არის ერთი თემა. პარტიისთვის შემოწირულობა პარტიის გუნდიდან არაერთ სხვა წევრსაც გაუღია. მე ამას ვაფასებ და მადლობას ვეუბნები ჩვენი პარტიის გუნდის იმ წევრებს, რომლებმაც ჩვენი პარტიისთვის შემოწირულობა გაიღეს, მაგრამ ეს არ არის მთავარი კრიტერიუმი იმისთვის, რომ მაინცდამაინც მეხუთე ნომერი გახდე პარტიაში. მასთან ჩვენ მართლები ვართ, რადგან ის ჩვენ წარმოგვადგენდა აქამდე საკრებულოში და მე მგონი, ის არ აფასებს იმას, რაც აქვს. ბატონი მანუჩარი საკრებულოს წევრიც იყოს, პარლამენტის საარჩევნო სიაშიც მეხუთე ნომერიც იყოს, მაშინ სხვა ადამიანებს სტიმული ეკარგებათ, ხომ? ყველაფერი ერთ კაცს და სხვას – არაფერი? ჩვენ ჩვენი გეგმა, გეზი, სტრატეგია გვაქვს უკვე შემუშავებული. ჩვენ მანუჩარ მაჩაიძის ფუნქციას ამ ეტაპზე ვხედავთ თბილისის საკრებულოში.

8 ოქტომბრით არ მთავრდება მართლა ცხოვრება და სახეს ნუ დავკარგავთ, ესაა მთავარი და არა ნუმერაცია, ვინ რა ნომერი იქნება საარჩევნო სიაში. მეტსაც გეტყვით: პოლიტსაბჭოს ვთავაზობ, რომ ამ სიაში 25-ე ვიყო, იგივე სურვილი აქვს ჩვენი პარტიის თავმჯდომარეს, დავით თარხან-მოურავსაც და უხერხულია, რა, ამ ნუმერაციებზე გუნდიდან წასული ადამიანების მხრიდან საუბარი.

„ახალი თაობა“, 16 ივნისი, 2016 წელი

ინტერვიუ ლია მუხაშავრიასთან: „ვანო მერაბიშვილს მე ციხიდან გამოვუშვებდი“ // „ეს ხელისუფლებაც ძალიან დაემსგავსა სააკაშვილის ხელისუფლებას“

სამართლის ექსპერტი, ადვოკატი ლია მუხაშავრია „ახალ თაობასთან“ ინტერვიუში ვანო მერაბიშვილის საქმეზე, სტრასბურის ადამიანის უფლებათა სასამართლოს გადაწყვეტილებაზე საუბრობს.

- ქალბატონო ლია, მერაბიშვილის საქმეზე სტრასბურის ადამიანის უფლებათა სასამართლოს გადაწყვეტილებას ნაციონალური მოძრაობის მხრიდან მოჰყვა განმარტება, რომ მერაბიშვილი ევროპულმა სასამართლომ პოლიტპატიმრად აღიარა. ხელისუფლების წარმომადგენლები კი აცხადებენ, რომ ასე არ უთქვამს სტრასბურის სასამართლოს. მაინც რა გადაწყვეტილება მიიღო სტრასბურის სასამართლომ?

- ჯერ კიდევ 2000 წელს სტრასბურის ადამიანის უფლებათა ევროპულმა სასამართლომ განმარტება გააკეთა, თუ ვინ არის პოლიტიკური პატიმარი. პოლიტპატიმრად ითვლება პირი, თუ ის იყო მაღალი პოლიტიკური თანამდებობის პირი და მის მიმართ დაშვებულია პროცესუალური დარღვევები მოქმედი კანონმდებლობის მიხედვით. ამ ეტაპზე, რაზეც იმსჯელა ევროპულმა სასამართლომ, იყო ის, რომ მერაბიშვილის მიმართ ბრალდების წაყენება თანმიმდევრულად ხდებოდა. ერთბაშად კი არ მოხდა ყველა ბრალის წაყენება, არამედ ერთი საქმე რომ დამთავრდებოდა, მერე მეორეზე წაუყენებდნენ, მოგვიანებით მესამეზე და ა.შ. ეს არის უხეში დარღვევა. სწორედ ამ უხეშმა დარღვევამ გამოიწვია ევროსასამართლოს ეს გადაწყვეტილება. თუ ვინმეს არ უნდა, ის პოლიტპატიმრად აღიაროს, ეს მისი ნებაა, მაგრამ ფაქტია, რომ მერაბიშვილის დევნა მოხდა პოლიტიკური ნიშნით და კანონის უხეში დარღვევით.

- პოლიტიკური ნიშნით თუ ჩადენილი დანაშაულებების გამო, რომელზეც არის საუბარი სასამართლოს გადაწყვეტილებაში?

- რა თქმა უნდა, დევნა უნდა განხორციელდეს მის მიმართ, მაგრამ ამ დროს არ უნდა მოხდეს არც ერთი საპროცესო ნორმის დარღვევა, რომელიც მოქმედი კანონმდებლობით ან ევროპული კონვენციით არის დაცული.

მე დარწმუნებული ვარ, რომ მერაბიშვილი არ არის ყველა იმ დანაშაულისთვის პასუხისგებაში მიცემული, რომელიც მას აქვს ჩადენილი. მეორე, მის მიმართ ასევე სახელმწიფომ მძიმე დანაშაული ჩაიდინა, როდესაც როგორც პატიმრის მიმართ საპროცესო გარანტიები დაარღვია დაკავებისა და სასამართლოში საქმის გამოძიების დროს.

- ევროსასამართლო მსჯელობს მერაბიშვილის საკნიდან გაყვანის ეპიზოდზე, რომელზეც თავად ბრალდებულმა განაცხადა. ეკა ბესელია ამბობს, რომ ამ ეპიზოდის თავიდან გამოძიება უნდა მოხდეს. თავის დროზე ჯეროვანი რეაგირება რომ ყოფილიყო, სტრასბურის სასამართლო სხვა გადაწყვეტილებას მიიღებდა?

- დიახ, თავის დროზე ამ ფაქტს ყურადღება რომ არ მიაქციეს, სწორედ ამან გამოიწვია ის ჩანაწერი, რომ ხელისუფლებას დაევალა გამოიძიოს ეს გარემოება. აღნიშნული ეპიზოდის გამოძიების შედეგების გაცნობა სწორედ ევროსასამართლოს მეთვალყურეობით მოხდება. ახლა ასე მარტივი არ იქნება სიტუაციიდან გამოძრომა, როგორც ეს მაშინ მოხდა. მაშინ საზოგადოებას უთხრეს, რომ ვიდეოჩანაწერი 24 საათზე მეტხანს არ ინახება, ეს იყო ძალიან არასერიოზული დამოკიდებულება. მსგავს სიტუაციებში ყოველთვის მტკიცების ტვირთი მოდის სახელმწიფოზე. ყველაფერი უნდა ეღონა მაშინ სახელმწიფოს, რათა დაემტკიცებინა, რომ მერაბიშვილის საკნიდან გაყვანა არ მომხდარა და რომ ცრუობს ის, მაგრამ ასე არ მოხდა.

მსგავს სიტუაციებში ყოველთვის მომჩივანს უჯერებენ, რადგან მთავრობამ ვერ დაამტკიცა საწინააღმდეგო, რომ ფაქტს ადგილი არ ჰქონდა.

- საწინააღმდეგო შედეგი რომ დაედო გამოძიებას, რომ ფაქტს ჰქონდა ადგილი?

- გამოძიებას რომ დაედგინა, რომ მერაბიშვილის საკნიდან გაყვანას ადგილი ჰქონდა და ეს გამოძიებას ღიად ეთქვა, მაშინ ეს ეპიზოდი და ეს ფაქტი არ მოხვდებოდა ევროსასამართლოს გადაწყვეტილებაში. ეს იქნებოდა გამოძიების შედეგად გამოააშკარავებული ფაქტი.

- როგორი უნდა იყოს ახლა ხელისუფლების მოქმედება?

- მათ უნდა აღიარონ, რომ თავის დროზე ვერ მოხდა გამოძიება და ახლა დადონ რეალური შედეგები.

- სახელმწიფოს იმიჯზე რამდენად იქონიებს ეს გადაწყვეტილება გავლენას? გარკვეული თანხაც დაეკისრა სახელმწიფოს...

- მხოლოდ თანხა და თანხის ოდენობაც, რომელიც დაეკისრა სახელმწიფოს, არ არის პრობლემა. პრობლემა გაცილებით უფრო მძიმეა. ზოგადად ევროპის სასამართლოს მსგავსი გადაწყვეტილებები ნებისმიერი სხვა ქვეყნისთვის ბევრის მთქმელია, სწორედ აქ არის პრობლემა. როდესაც ამ ფორმით ხდება ანგარიშსწორება, ეს არის დაუშვებელი. ევროსასამართლომ გადაწყვეტილება ძალიან სწრაფად გამოიტანა, პრიორიტეტი მიანიჭა ამ საქმეს. დარწმუნებული ვარ, რომ გადაწყვეტილების აღსრულებაზეც დიდი ყურადღება ექნება ევროსასამართლოს. აქამდე საქმე არ უნდა მიეყვანათ. ხელისუფლებას ვურჩევდი, რომ ის კომენტარები არ გაეკეთებინათ, რაც გააკეთეს გასაჩივრებასთან დაკავშირებით. მეტიც, მე შეშფოთებას გამოვხატავდი და ვიტყოდი, რომ მერაბიშვილს გავათავისუფლებთ, ვინაიდან მის მიმართ ადგილი ჰქონდა პროცესუალურ დარღვევას.

- მსგავსი განცხადება დიდ ვნებათაღელვას გამოიწვევს თუნდაც საზოგადოების გარკვეულ ნაწილში…

- ადამიანს, ვინც არ უნდა იყოს ის, რა დიდი დანაშაულიც არ უნდა ჰქონდეს ჩადენილი, უნდა მიეზღოს მხოლოდ იმ დანაშაულისთვის, რომელიც მან ჩაიდინა. თანაც, პასუხისგებაში მიცემული პირის მიმართ ზედმიწევნით კარგად უნდა იყოს დაცული ყველა საპროცესო მოთხოვნა. ეს ხელისუფლებაც ძალიან დაემსგავსა სააკაშვილის ხელისუფლებას, რადგან ისინიც არ ათავისუფლებდნენ იმ პატიმრებს, რომელთა მიმართაც კანონმდებლობა დაარღვიეს. ძალიან საწყენია ასეთი იდენტური ფაქტების არსებობა.

- ნინო ბურჯანაძემ განაცხადა, რომ ვინც ეს საქმე აწარმოა, ყველა პასუხისგებაშია მისაცემი. თქვენი განწყობაც ასეთია?

- მეც მომხრე ვარ, რომ მოხდეს გამოძიება, ვისი დაუდევრობით თუ შეცდომით ან განზრახვით მოხდა ის, რომ სტრასბურის სასამართლომ მიიღო ის გადაწყვეტილება, რომელიც მიიღო. ევროსასამართლომ თქვა, რომ წინასწარი დაკავებისას იყო დარღვევა. ამაზე ვიღაცამ უნდა აგოს პასუხი. მე არ ვსაუბრობ ყველას დაჭერასა და განთავისუფლებაზე. აქ საუბარია, რომ ასეთი გადაწყვეტილების გამოტანის შემდეგ პასუხისმგებლობა დაეკისროთ ამ მოსამართლეებს და ისინი თანამდებობიდან წავიდნენ. მაშინ ჩვენ გაცილებით უკეთესი და ხარისხიანი მართლმსაჯულება გვექნება, ვიდრე დღეს გვაქვს. ეს ძალიან გონივრული იქნებოდა, თანაც ეს იქნებოდა ერთგვარი გზავნილი ევროპული სასამართლოს, ევროკავშირის წევრი სახელმწიფოებისთვისაც.

„ახალი თაობა“, 16 ივნისი, 2016 წელი

ინტერვიუ მამუკა გიორგაძესთან: „ხელისუფლება ანტიდასავლურ ნაბიჯებს დგამს»

სახალხო პარტიის ლიდერი მამუკა გიორგაძე მიიჩნევს, რომ სტრასბურის სასამართლოს გადაწყვეტილება ვანო მერაბიშვილთან დაკავშირებით ხელისუფლების მიერაა პროვოცირებული. „ახალ თაობასთან~ ინტერვიუში მან განაცხადა, რომ პროცედურები ვანო მერაბიშვილის დაკავების დროს შეგნებულად დაირღვა.

მამუკა გიორგაძე:

- ვანო მერაბიშვილის დაკავებისას პროცედურები სპეციალურად დაირღვა. პროცედურებს ჩვენში არ ექცევა ყურადღება, თორემ ცივილიზებული სამყაროსთვის ამას ძალიან დიდი მნიშვნელობა აქვს. ამიტომ, ადამიანის უფლებათა სასამართლომ მიიღო ის გადაწყვეტილება, რომელიც უნდა მიეღო. ამ პარლამენტის პირველივე სხდომაზე დავით უსუფაშვილმა განაცხადა, რომ იწყებენ პროცედურული დემოკრატიის დამყარებას. რეალობაში სხვა რამ ხდება. ერთი მხრივ, დააკმაყოფილეს საზოგადოების მოთხოვნა და ვანო მერაბიშვილი შედარებით მსუბუქი სასჯელებისთვის ციხეში ჩასვეს, მეორე მხრივ, დააპირისპირეს ქართული საზოგადოება დასავლურ საზოგადოებას.

- ქართული საზოგადოება ამით დასავლურს დაუპირისპირდა?

- რა თქმა უნდა. ესაა კიდევ ერთი მიზეზი იმისთვის, რომ გაიზარდოს ანტიდასავლური განწყობები. ხალხში უკმაყოფილებაა იმაზეც, რომ არ დასჯილან ნაცმოძრაობის ხელისუფლების წევრი დამნაშავეები. ვანო მერაბიშვილისთვის 3 წლითა და 9 თვით თავისუფლების აღკვეთა არაა ადეკვატური სასჯელი.

- საუბარია მის გამოშვებაზეც.

- სტრასბურის სასამართლოს არაფერი უთქვამს მის გამოშვებაზე, ბრალეულობაზე. ეს საჩივარი შევიდა მაშინ, როცა ვანო მერაბიშვილი დააკავეს და გამოძიება დასრულებული არ იყო. გამოშვებაზე ლაპარაკობს ნაცმოძრაობა. ეს პარტია ახდენს ინსინუაციებს ამ თემაზე. ამის შედეგად იურიდიულ ნიუანსებში გაურკვეველი საზოგადოება შეიძლება მოტყუვდეს კიდეც. ხელისუფლება იძლევა საბაბს, რომ ნაციონალური მოძრაობა დაჩაგრულად წარმოჩინდეს. ტელემედიის მფლობელი ნაციონალური მოძრაობა მსოფლიოს უმტკიცებს, რომ პროდასავლური ძალაა და მას დევნიან.

- ამის გამო ჩვენი საზოგადოება დასავლურ საზოგადოებასთან კონფლიქტში რატომ უნდა შევიდეს?

- ხელისუფლება, საერთოდ, ანტიდასავლურ ნაბიჯებს დგამს. ეს სხვა მოვლენებშიც ჩანს. მაგალითად, ერთი მხრივ, თავდაცვის მინისტრი თინა ხიდაშელი დასავლეთს საყვედურობს, რუსეთის შიშის გამო ნატოში არ გვიღებთო. მეორე მხრივ, არ აგზავნის სამხედროებს ნატოს ყველაზე დიდ წვრთნებში ვარშავაში. მიზეზი სასაცილოა _ თურმე, ორ ჯარისკაცს ჩუტყვავილა აღმოაჩნდა! დალოცვილებო, სხვა შენაერთი არ გყავთ, წვრთნებზე რომ გაუშვათ? ასეთი მოქმედებებით ხელისუფლება და `ქართული ოცნება~ რუსეთის წისქვილზე ასხამენ წყალს. დასავლეთსაც არ სჯერა ამ ხელისუფლების. გარდა ამისა, დასავლეთში არიან ღრმად ჩახედული ჩვენს შიდა ამბებში და ისინი თავის მოვალეობად თვლიან, დაეხმარონ პროდასავლურ ძალებს. ასეთებად რატომღაც ნაციონალური მოძრაობა და რესპუბლიკური პარტია ითვლებიან. სწორედ მათი მიუღებლობის გამო აუცრუვდა ბევრს გული დასავლეთზე.

- არადა, საქართველოში დასავლური ძალები არიან...

- საქმეც ესაა! მაგრამ ამ ძალებს არ გვეძლევა აქტიურობის საშუალება. ჩვენ, სახალხო პარტია, ვერ ვახერხებთ, რომ გადავფაროთ ხელისუფლებისა და ნაციონალური მოძრაობის ხმაური და დიდი ფულით მიღებული უპირატესობები.

- ვიზალიბერალიზაციის შეფერხება როგორ იმოქმედებს საზოგადოებაზე?

- როგორ უნდა იმოქმედოს? ამისთვის ხელისუფლებამ რა გააკეთა? რა შთაბეჭდილება უნდა ჰქონდეთ დასავლეთში საქართველოზე, როცა აქ არის ბელადების საჭიროება? სააკაშვილი პირდაპირ არწმუნებდა დასავლელ პარტნიორებს, რომ საქართველოს ბელადი და მათრახი სჭირდებოდა. ივანიშვილი აღიარებს, რომ ქვეყნის არაფორმალური მმართველია. არადა, დემოკრატია და არაფორმალური მმართველობა ერთმანეთთან აბსოლუტურად შეუთავსებელია. დემოკრატიას ხელს უშლის უსამართლო საარჩევნო გარემოც.

- ევროპას მიგრანტთა კრიზისი და ტერორიზმის საფრთხეც ხომ აქვს? ეს არ არის კავშირში ვიზალიბერალიზაციასთან?

- ევროპას რომ პრობლემები აქვს, ეს ცნობილია. მთავარია, საქართველოს ხელისუფლება იყოს სანდო. სამწუხაროდ, მას არ ენდობიან. ევროკავშირთან ასოცირების შეთანხმება წელს უნდა გაფორმებულიყო, მაგრამ ბევრად ადრე გაფორმდა. ეს იმიტომ მოხდა, რომ ევროპაში ეჭვი ჰქონდათ, რომ საქართველოს ხელისუფლება ამაზე 2016 წლის ბოლოს უარს იტყოდა. დასავლეთს უნდა, რომ ჩვენ სამართლიანი სახელმწიფო და რეალური თვითმმართველობა გვქონდეს, რომ დაცული იყოს ადამიანის უფლებები. ეს ჩვენი ინტერესიცაა. აშშ-ის დაზვერვის შეფმა ყურადღება გაამახვილა საქართველოს მოსახლეობის მძიმე სოციალურ მდგომარეობაზე. მისი თქმით, მძიმე სოციალური ფონი შეიძლება გამოიყენონ რუსეთის სპეცსამსახურებმა. არაფერი კეთდება იმისთვის, რომ ხალხის მდგომარეობა გაუმჯობესდეს. მაპსაც გარკვეული მიზეზით არ გვაძლევენ.

- რა მიზეზით?

- დასავლეთს აქვს შიში, რომ მაპის მიღების შემდეგ საქართველოს ხელისუფლება რაღაცას მოიმოქმედებს. უგუნური და გაუთვლელი ნაბიჯი 2008 წელს სააკაშვილმა გადადგა. დასავლეთს „ქართული ოცნებისაც“ არ სჯერა.

- თუმცა, გვაიმედებს.

- ესაა დიპლომატია. აბა, პირდაპირ ხომ არ იტყვიან, თქვენი მოქმედებებით რუსეთის წისქვილზე ასხამთ წყალსო? დემოკრატიული დასავლური ტიპის სახელმწიფოს აშენება ჩვენი პირდაპირი ინტერესი უნდა იყოს. ხელისუფლება აქეთ არ მიისწრაფვის. ნამდვილად დემოკრატიული სახელმწიფო ტრადიციულ ღირებულებებსაც დაიცავს. ევროპის სახალხო პარტია, რომლის პარტნიორიც ხელისუფლების ხელშეწყობით ნაციონალური მოძრაობაა, კატეგორიულად ეწინააღმდეგება ერთნაირსქესიანთა ქორწინებებს. ჩვენ ამ პარტიასთან დიდი ხნის კონტაქტები გვაქვს, მაგრამ მასთან ურთიერთობის საშუალება არ გვეძლევა. მისი ახლო პარტნიორია ნაცმოძრაობა, რომელიც ერთნაირსქესიანთა ქორწინებებს მხარს უჭერს. ბოლოს და ბოლოს, მოვიდა დრო, საზოგადოებამ მხარი უნდა დაუჭიროს დასავლურ ძალებს, რომლებიც ქართულ ღირებულებებსაც დაიცავენ.

„ახალი თაობა“, 16 ივნისი, 2016 წელი

ინტერვიუ შალვა ოგბაიძესთან: „ევროსასამართლო ბოლომდე სამართლიანი არ არის»

ვისი ან რისი ბრალია სტრასბურის სასამართლოს მიერ ვანო მერაბიშვილისთვის გამოტანილი განაჩენი, რა არის მთავარი ადამიანის უფლებათა დაცვის სასამართლოსთვის, რატომ ჭიანურდება საქართველოში სამართლიანობის აღდგენა? – ამის შესახებ „ახალ თაობას“ დემოკრატიული მოძრაობის ერთ-ერთი ლიდერი შალვა ოგბაიძე ესაუბრება.

- სტრასბურის სასამართლოს მიერ მერაბიშვილისთვის გამოტანილ განაჩენს საქართველოს ხელისუფლების უუნარობას უკავშირებენ. თქვენ რას იტყვით ამასთან დაკავშირებით?

- მას შემდეგ, რაც 72 ადამიანს მკვლელ ბრეივიკს შოკოლადის მიუწოდებლობა წამებად გაუთანაბრეს, ნამდვილად აღარ მიკვირს, ვანო მერაბიშვილზე ასეთ დასკვნას რომ წერენ. ერთი რამ ცხადია, ევროსასამართლო ძალიან გაზულუქდა. მათ აქვთ ძალიან მაღალი ხელფასები, ცხოვრობენ ფუფუნებაში და მხოლოდ საკუთარი ჯიბეებიდან იყურებიან.

სააკაშვილის მმართველობის პერიოდში ჩემი ოჯახის, პირადად ჩემი, ჩემი შვილების წამების, დევნის ფაქტზე სარჩელით მივმართეთ სტრასბურს. სარჩელის დაწერაში ევა გოცირიძე მომეხმარა და მანვე შეიტანა ეს განაცხადი. ევროსასამართლომ ეს სარჩელი განსახილველად არც კი მიიღო.

- სტრასბურმა რატომ არ მიიღო თქვენი სარჩელი?

- ზუსტად არ ვიცი. ეს ევა გოცირიძეს და ზაქარია ქუცნაშვილს უნდა ჰკითხოთ. მათ ჰქონდათ კომუნიკაცია. მე მხოლოდ ქაღალდი მომივიდა, რომ სარჩელი არ მიიღეს. ამით კიდევ ერთხელ დადასტურდა ჩემი და ჩემი თანამოქალაქეების ეჭვი იმის შესახებ, რომ ევროპული სასამართლო ბოლომდე სამართლიანი არ არის. მაგრამ ეს იმას არ ნიშნავს, რომ ჩვენ არაფერ შუაში ვართ. პრობლემები საქართველომ საკუთარ თავშიც უნდა ეძებოს, პირველ რიგში, ეს სასამართლოს და პროკურატურას ეხება. მე არ ვიცი, რა ბრალდებები წაუყენეს ვანო მერაბიშვილს, მაგრამ ჩემი განცხადება ჩვენს პროკურატურას არც კი განუხილავს.

- კონკრეტულად რაზე შეიტანეთ საჩივარი?

- საჩივარში კონკრეტულ საქმეებზე იყო საუბარი. 2011 წლის 26 მაისს საოპერაციო მაგიდაზე დამაპატიმრეს, 2009 წლის 6 მაისს აკრძალული ტყვიებით დაგვხვრიტეს მე და ჩემი მეგობრები. ჩემს განცხადებაზე საგამოძიებო მოქმედება რომ დაწყებულიყო, აუცილებლად დაიკითხებოდა ის ადამიანი, ვინც გასცა საოპერაციო მაგიდაზე ჩემი დაკავების ბრძანება. ამით მტკიცებულებებით გამყარებულ ისეთ პროდუქტს მივიღებდით, რომელიც იქნებოდა უტყუარი საბუთი და ვერც ერთ გაზულუქებულ ჩინოვნიკს ენა ვერ მოუბრუნდებოდა იმის სათქმელად, რომ მერაბიშვილი უკანონოდ არის დაკავებული.

- 26 მაისის დარბევა ისე გამოიძიეს, რომ თქვენ პროკურატურამ არ დაგკითხათ?

- როგორც თქვენ არ დაუკითხიხართ ამ საქმეზე, ისე მე არ დავუკითხივარ არავის. არც ჩემი ბევრი თანამებრძოლი დაუკითხავს ვინმეს. 26 მაისს დაკავებულთა ნაწილს, ხელისუფლების შეცვლის შემდეგ გამოცემულმა ამნისტიამ საპატიმრო ადგილებში მიუსწრო. ისინი პოლიტპატიმრის სტატუსით გამოვიდნენ, მაგრამ საქმე ამის იქეთ აღარ წასულა. არც ერთი მათგანი დამატებით არავის დაუკითხავს. თითქოს, მართლა დამნაშავეები იყვნენ, არც მათი რეაბილიტაცია მომხდარა. ყველას რატომღაც დაავიწყდა 2011 წლის 26 მაისამდე 10 დღით ადრე დაწყებული მასობრივი „აყრა“. ძალიან ბევრი ჩვენი აქტივისტი დააკავეს იმ პერიოდში. მათ შორის იყო თქვენი კოლეგა და ჩვენი მეგობარი ალეკო ჩუბინიძე. დააკავეს გიორგი ჯავახიშვილი და გოჩა წიკლაური. ბესო დანელია 21 მაისს თავის ოჯახთან ერთად იყო, როცა დააპატიმრეს და ძვლებში დაამტვრიეს. ამის ნიადაგზე მის მეუღლეს მუცელი მოეშალა. ბესოს ორივე ფეხი გადატეხილი ჰქონდა და ფიზიკურად ვერ წაიყვანეს, თორემ მასაც ტენიდნენ მანქანაში. კიდევ ბევრი ადამიანის ჩამოთვლა შემიძლია, მაგრამ არ მინდა ვინმე გამომრჩეს.

როდესაც პოლიტიკურ ტილს – ნაციონალურ მოძრაობას ფეხზე დაისვამ, ის თავზე აგაცოცდება. ასეც მოხდა და ამიტომ ევროსასამართლო გაუმაგრებელი და უსუსური ბრალდებების გამო ამართლებს მერაბიშვილს. ისინი მერაბიშვილის ნამოქმედარს არ იძიებენ. ევროსასამართლოში უყურებენ იმ ქაღალდებს, რომლებიც მათ წარუდგინეს და აინტერესებთ, რამე სამართლებრივი ნორმა ხომ არ არის დარღვეული.

- რეალური მტკიცებულებები რომ ყოფილიყო, სხვა განაჩენი დადგებოდა?

- რა თქმა უნდა. ათასობით ადამიანის მკვლელობის, ქონების წართმევის, წამების და უკანონო მოსმენების ფაქტი თუ იქნებოდა გამოძიებული, გაზულუქებული სასამართლო ასეთ გადაწყვეტილებას აღარ მიიღებდა. ფარული მოსმენა ჩემზეც ხორციელდებოდა და ეს ჩანაწერი სოციალურ ქსელშიც დევს. არც ამაზე დავუკითხივარ ვინმეს.

- სამეგრელოში ნაპოვნ კასრებში დასაჭერი ხალხის სიაც აღმოაჩინეს. ამ სიაში თქვენი გვარიც ფიგურირებდა, არც ამაზე ჩატარებულა გამოძიება?

- არც ამაზე ჩატარებულა და არც ბევრ სხვა საქმეზე, საქართველოში ბევრს წაართვეს ქონება, მაგრამ მხოლოდ ქიბარ ხალვაშის საქმეს იხილავენ. ისიც იმიტომ, რომ მასზე ევროპაში თქვეს რაღაც. რა გამოდის, ევროპაში თუ ჩვენი საქმეებით არ დაინტერესდნენ, აქაურმა პროკურატურამ არ უნდა გამოიძიოს? ასეთი მიდგომა ძალიან ცუდია ქვეყნის განვითარებისთვის. სამწუხაროდ, ჩემთვის სასამართლო გახდა მურუსიძე. ბედის ირონიით, ეს ის მურუსიძეა, რომელმაც ძალაში დატოვა ჩემთვის ქონების ჩამორთმევის გადაწყვეტილება.

- ჩამორთმეული ქონების დაბრუნება მაინც თუ მოახერხეთ?

- დაბრუნებას ვინ ჩივის, ამ საქმის გამოძიებაც კი არ დაუწყიათ. მეტსაც გეტყვით, ჩვენი ფირმის დარჩენილი ქონება აღსრულების ბიუროს მიერ არის დაყადაღებული და ინახება ორხევის საწყობში. ამ ადამიანების კეთილი ნებაა, ეს ქონება აუქციონზე რომ არ გააქვთ. აქამდე 2 თვეში ერთხელ მირეკავდნენ, აუქციონზე უნდა გავიტანოთო. შარშან შეიქმნა მართლმსაჯულების ხარვეზების დამდგენი კომისია, რომელსაც ირაკლი ნადირაძე ხელმძღვანელობს. ამ კომისიიდან მისული წერილის საფუძველზე შეჩერდა აუქციონი. ამის შემდეგ ერთი წელი გავიდა, წინ არ წასულა საქმე. უკვე მერიდება კიდევაც ამაზე დარეკვა.

- დარეკვა რატომ გერიდებათ?

- ვატყობ, რომ სასამართლოს ამ შემადგენლობას ამ საქმეების გამოძიების რესურსი აღარ დარჩა. ამ საქმის დამწნილებას შესაძლოა 4 წელი დასჭირდეს და ალბათ ამის შემდეგ გახსნიან.

- ნაციონალები ახლა უგულავას და ახალაიას საქმის განხილვას ელოდებიან. მათაც მერაბიშვილის მაგვარ განაჩენს ხომ არ გამოუტანს სტრასბურის სასამართლო, თქვენ მიერ ნახსენები გამოუძიებელი საქმეებიდან გამომდინარე?

- არ არის გამორიცხული, იგივე გადაწყვეტილება გამოიტანონ. კიდევ ერთხელ ვიმეორებ, მათთვის მთავარია, რა წერია ქაღალდზე. ადამიანის დაჭერა ჩემი თვითმიზანი არასდროს ყოფილა. დაჭერილ ადამიანზე უკვე ღმერთი ზრუნავს. ერთი ცაში არსებობს სამსჯავრო და დედამიწაზე არის სისხლის სამართლის კოდექსი. რატომ ჰქვია მას სისხლის სამართალი? მართალია, მწარეა, მაგრამ ამაზე უკეთესი კაცობრიობას ჯერ არაფერი მოუგონია. სამართლის ქმნა თანაბრად უხდება დაზარალებულსაც და დამნაშავესაც.

- დარწმუნებული ხართ, რომ დამნაშავესაც წაადგება?

- კარგად თუ ჩაუღრმავდება ადამიანი, შესაძლოა, მის სულში კათარზისი მოხდეს. მეტი არაა ჩემი მტერი, ვანო მერაბიშვილის სულში ეს მოხდეს.

- მერაბიშვილის მიმართ გამოტანილი გადაწყვეტილება ხომ არ აიძულებს ხელისუფლებას, ნაციონალების დროს დაზარალებულების საქმეები უფრო ეფექტურად გამოიძიონ?

- არ ვიცი, წესით აქამდე უნდა გამოეძიათ. ახლა იწყება საარჩევნო კამპანია და ამ დროს არავის ხელის ხლება არ შეიძლება. ალბათ კიდევ მოგვიწევს ლოდინი.