„რეზონანსი“: “ოცნება” “კონსერვატორებს” სამ ოლქს ჩუქნის
„რეზონანსი“: გამართლებულია თუ არა “ოცნების” მხრიდან მაჟორიტარული ოლქების “გაჩუქება”?
„რეზონანსი“: ინტერვიუ სოსო ცინცაძესთან: „რატომ არ დადიან ქართველი პოლიტიკოსები კინოში, ქუჩაში, ბაზარში… // “თუ რამე სასწაული არ მოხდა, რაც ხალხს დარაზმავს, “ოცნებას” უმრავლესობა ისედაც გარანტირებული აქვს, რადგან ასეთი კანონმდებლობა გვაქვს”
„ახალი თაობა“: ინტერვიუ სოსო ცინცაძესთან: „არჩევნებზე პოლიცია არ უნდა იყოს საჭირო“ // „კოალიციური მთავრობა დემოკრატიის ნიშანი იქნება“
„ახალი თაობა“: ინტერვიუ გიგა ბუკიასთან: „თუ პრეზიდენტი ვანო მერაბიშვილს შეიწყალებს, ის პასუხისმგებლობასაც ვერ გაექცევა“ // „ადამიანებს არ უნდა მოსთხოვო, ხმა მოგცენ იმიტომ, რომ კარგად მღეროდი“
„ახალი თაობა“: ინტერვიუ არჩილ გამზარდიასთან: „გიორგი მარგველაშვილმა უნდა აგვიხსნას, რატომ შეხვდა ჩუმად გიგა ბოკერიას”
——————–
„რეზონანსი“, 18 ივნისი, 2016 წელი
“ოცნება” “კონსერვატორებს” სამ ოლქს ჩუქნის
ლიკა ამირაშვილი
საპარლამენტო არჩევნებზე “ქართული ოცნება”, შესაძლოა, “კონსერვატორებს” კანდიდატების გაყვანაში დაეხმაროს. კერძოდ, რამდენიმე უბანზე, სადაც “კონსერვატორი” მაჟორიტარობის კანდიდატები იყრიან კენჭს, “ქართული ოცნება” დეპუტატობის საკუთარ კანდიდატურას ან არ დაუპირისპირებს, ან ისეთ კანდიდატურას შეარჩევს, რომლის წარდგენას მხოლოდ სიმბოლური დატვირთვა ექნება.
პოლიტოლოგთა ნაწილი ფიქრობს, რომ ამით “ოცნებას” სურს, რომ პარლამენტში პარტნიორი გუნდი ჰყავდეს. ექსპერტთა შეფასებით, “ოცნება” ხმების მაქსიმალური რაოდენობის მოგროვებისკენ არ მიისწრაფვის, რადგან მომავალში კოალიციის შექმნა სურთ და პარტნიორი გუნდიც სწორედ ამიტომ სჭირდება.
“კონსერვატორების” სამი მაჟორიტარი
“ინტერპრესნიუსის” ინფორმაციით, ეს ორი პარტია შეთანხმებას სამ მაჟორიტარულ ოლქზე გეგმავს. როგორც სააგენტოს ინფორმირებულმა წყარომ აცნობა, მაჟორიტარულ ოლქებში, სადაც “კონსერვატორების” მაჟორიტარობის კანდიდატები ზვიად ძიძიგური და პაატა კვიჟინაძე იქნებიან, “ქართული ოცნება” საკუთარი მაჟორიტარის გაყვანისათვის არ იბრძოლებს. “ქართული ოცნება” ამ ფორმით “კონსერვატორებისთვის” კიდევ ერთი მაჟორიტარული ოლქის დათმობას აპირებს, სადაც “კონსერვატორთა” მხრიდან მაჟორიტარობის კანდიდატი ან გიგა ბუკია, ან ბიძინა გუჯაბიძე იქნებიან.
როგორც ცნობილი გახდა, პაატა კვიჟინაძის მაჟორიტარობის კანდიდატად დასახელება საჩხერეში იგეგმება. საპარლამენტო ფრაქცია “კონსერვატორების” თავმჯდომარე გიგა ბუკიამ “ინტერპრესნიუსს” დაუდასტურა, რომ მაჟორიტარობის კანდიდატებთან შეთანხებასთან დაკავშირებით კონსულტაციები მიმდინარეობს. “მიმდინარეობს კონსულტაციები, თუმცა საბოლოო გადაწყვეტილება მართლა არ გვაქვს მიღებული.
დარწმუნებულია ვარ, რომ მსგავსი კონსულტაციები თვითონ ოპოზიციურ სპექტრშიც მიმდინარეობს. სასურველია, ყველა ერთნაირი ხედვის მქონე პოლიტიკურმა ძალამ მოახერხოს ის, რომ ერთმანეთს კონკურენცია არ გაუწიოს.
“ჩვენ შეიძლება ჩამოვყალიბდეთ კონკრეტულ პოლიტიკურ ფიგურაზე და მასთან დაკავშირებით შეთანხმება იყოს მიღწეული. თუ ეს შეთანხება შედგა, ამომრჩეველი არ დაიბნევა და ერთნაირი ხედვის მქონე პოლიტიკურ ძალებს შორის მეტი კოორდინაცია იქნება. ეს არის სურვილი, ვნახოთ, რა იქნება რეალობა. სწორია, თუკი ხმები არ დაიქსაქსება, რადგან მოგეხსენებათ, რომ მაჟორიტარულ ოქლებში 50%-იანი ბარიერი ნებისმიერი პოლიტიკური ძალისთვის საკმაოდ სერიოზული ბარიერია. ეს აბსოლუტურად ლეგიტიმური და ჯანსაღი პროცესია”, – განაცხადა გიგა ბუკიამ.
უმრავლესობის წევრი და ფრაქციის თავმჯდომარე გია ვოლსკი “რეზონანსთან” საუბრისას აცხადებს, რომ თუკი “კონსერვატორები” საჩხერეში პაატა კვიჟინაძის კანდიდატურას წარადგენენ, ეს შესაძლოა, “ქართული ოცნებისთვის” მისაღები იყოს და საკუთარი კანდიდატურა აღარ დაუპირისპიროს.
“მე ვადასტურებ იმას, რომ თუკი ეს საკითხი დადგა, პაატას მონაცემებს გავითვალისწინებთ, ასევე მის მარგი ქმედების კოეფიციენტს, დამოკიდებულებას ქვეყნისა და საქმისადმი. ასეთ გადაწყვეტილებას მივესალმები. ამ თემაზე დამატებით ინფორმაციას ვერ გეტყვით, ვინაიდან საკითხი არ განხილულა არც ერთ დონეზე. პარტიებთან ლაპარაკი არ არის, ამ საკითხთან დაკავშირებით დამოკიდებულება ჯერ-ჯერობით არ განხილულა”, – განაცხადა გია ვოლსკიმ.
“ფორუმი” და “მრეწველები” – “ჩვენ შემთხვევაში მსგავსი რამ არ ხდება”
“რეზონანსი” შეეცადა გაერკვია, იგეგმება თუ არა სხვა პარტიებთან მსგავსი შეთანხმების დადება, რაზეც “ეროვნული ფორუმის” წევრმა, დეპუტატმა ანი მიროტაძემ გვიპასუხა, რომ მსგავსი საკითხი არც განიხილება და არც სურთ.
„ჩვენ მსგავსი ტიპის არც შემოთავაზება, არც მოლაპარაკება არ გვაქვს და არც ვაპურებთ. არ ვიცი, მათ როგორი პრინციპი აქვთ, მაგრამ მათ ექნებათ გარკვეული მოლაპარაკებები. ეს ინფორმაცია მეც ვნახე, რომლის მიხედვითაც სამ მაჟორიტარულ ოქლში “ოცნების” კანდიდატის წარდგენა არ მოხდება. ჩვენ განსხვავებული მოცემულობაც გვაქვს, ისინი ისევ უმრავლესობაში არიან. ეს პარტიების მოლაპარაკებების თემაა. წინასაარჩევნოდ რაღაც მოლაპარაკებები მიმდინარეობს ხოლმე, მაგრამ ჩვენ შემთხვევაში მსგავსი რამ არ ხდება”, – აღნიშნა ანი მიროტაძემ. “ოცნებასთან” ასეთი შესაძლო შეთანხმების შესახებ ინფორმაცია “რეზონანსს” არც “მრეწველების” წევრმა ზურაბ ტყემალაძემ დაუდასტურა.
რას კარგავს და რას იგებს “ოცნება” “კონსერვატორების” დახმარებით
როგორც პოლიტოლოგმა და ფსიქოლოგმა რამაზ საყვარელიძემ “რეზონანსთან” საუბრისას აღნიშნა, იმ შემთხვევაში, თუ “ოცნება” “კონსერვატორების” კანდიდატის გაყვანას გადაწყვეტს, ამით შესაძლოა, ბევრი მანდატი დაკარგოს.
“იმისათვის, რომ განვსაზღვროთ, “ოცნების” რეიტინგზე როგორ აისახება, საჭიროა, ნორმალური სოციალური გამოკვლევის შედეგები ვიცოდეთ. იმის მიხედვით, როგორი რეიტინგი აქვს “ოცნებას” და როგორი “კონსერვატორებს”, შეიძლება მსჯელობა. თუ “ოცნებას” იმდენად მაღალი რეიტინგი აქვს, რომ მას თავისთვის მაჟორიტატები არ სჭირდება, ეს სხვა საკითხია. ეტყობა “ოცნება” თავის პარტიაზე რაღაც გამოკვლევებსა და ინფორმაციას ფლობს, ისე, რომ თავად არ აღმოჩნდეს დანაკლისში, რადგან ასეთი რაინდული საქციელი მოდაში აღარ არის. ვივარაუდოთ, რომ აწყობს ის შედეგი, რომელიც ახლა აქვს. “ოცნებას” პარლამენტში თავისი მხარდამჭერი გუნდი დასჭირდება, მაგრამ “კონსერვატორები” მთელი ამ ხნის განმავლობაში ისედაც “ოცნების” ფრთის ქვეშ იყვნენ და მათი გაყვანით “ოცნებამ”, შესაძლოა, ბევრი მანდატი დაკარგოს. ერთი რამ ცხადია – “ოცნება” არ მიისწრაფის იმისკენ, რომ რაც შეიძლება მეტი მანდატი ჰქონდეს. როგორც ჩანს, შემდეგ კოალიციის გაკეთებას აპირებს.
რაც შეეხება “ოცნების” პარტნიორ პარტიას არჩევენებზე როგორი შანსი ექნება, ეს დამოკიდებულია სხვა პარტიებზე – მარტო “ოცნება” და “კონსერვატორები” ხომ არ უპირისპირდებიან ერთმანეთს. თუ სხვა პარტიები იმ კონკრეტულ უბანში ეცდებიან, ძლიერი ფიგურები შეიყვანონ, მაშინ შეიძლება ორივესთვის დაკარგული აღმოჩნდეს. ამ ფაქტით “ოცნებამ” საქართველოს მოსახლეობას უთხრა, რომ გინდ ჩემთვის მოგიციათ ხმა და გინდ “კონსერვატორებისთვისო”. იმ შემთხვევაში, თუ არჩევნებზე კვლავ ივანიშვილის ფაქტორი იქნება და ამომრჩევლისთვის არჩევანის გაკეთებისას “ოცნების” ფაქტორი უფრო მნიშვნელოვანი აღმოჩნდება, ვიდრე კონკრეტული კანდიდატის პიროვნება, მაშინ არსებითი განსხვავება არ იქნება. ვისაც გადაწყვეტილი აქვს, რომ ხმა “ოცნებას” უნდა მისცეს, მაშინ ის ადგება და მხარს “კონსერვატორებს” დაუჭერს”, – განაცხადა რამაზ საყვარელიძემ.
„რეზონანსი“, 18 ივნისი, 2016 წელი
გამართლებულია თუ არა “ოცნების” მხრიდან მაჟორიტარული ოლქების “გაჩუქება”?
თიკო ოსმანოვა
(შემოკლებით)
გამართლებულია თუ არა “ოცნების” მხრიდან მაჟორიტარული ოლქების ყოფილი თანაგუნდელებისათვის დათმობა? – ეს კითხვა “რეზონანსმა” საზოგადოების წარმომადგენლებს დაუსვა.
მიხელ ცაგარელი (ასტროლოგი): “ამ შეთანხმებასთან დაკავშირებით ძალიან ბევრი კითხვა მაქვს და სანამ ამ კითხვებს პასუხი არ გაეცემა, ვერაფერს გეტყვით. მაინტერესებს, რატომ აკეთებენ ამას და რა აქვს დადებითი ქვეყნისთვის. თუ ამას აკეთებენ, ეს უნდა იყოს საზოგადოებისთვის ახსნილი. სხვანაირად გაუგებარია, იმიტომ, რომ შეიძლება საზოგადოებამ ჩათვალოს, რომ წყალქვეშა დინენებია და სხვა სახის პოლიტიკური თამაშები მიმდინარეობს. თუ საუბარია გამჭვირვალობაზე, მაშინ უნდა აგვიხსნან, რატომ აკეთებენ მაინცდამაინც “კონსერვატორებთან”, რით დაიმსახურეს და რით არიან სხვებზე უკეთესები. მაშინ იქნება ეს გასაგები, თუ არა და, საზოგადოებას ეჭვი შეეპარაება”.
ირმა სოხაძე (მომღერალი): “ეს ალბათ შიდა ამბებია და მათი გადასაწყვეტია, თუმცა ვფიქრობ, ამასთან დაკავშირებით აუცილებლად ახსნა-განმარტებაა გასაკეთებელი. შეიძლება, კარგი და ლოგიკურიც არის და არ ვიცი. ამიტომ დაველოდოთ მოვლენების განვითარებას. საერთოდ ყველაფერზე ველოდები ახსნა-განმარტებას. ზოგს აქვს, ზოგს – არა და მემგონი ეს რთული არ იქნება და მოსახლეობას აუხსნიან, რატომ ხდება ეს”.
ვაჟა ოთარაშვილი (პოეტი): “პოლიტიკაში გარიგებები ჩვეულებრივი ამბავია და გასაკვირი არ არის, რომ “ქართულმა ოცნება” “კონსერვატორებს” დაუთმოს ადგილი. თუმცა, ზვიად ძიძიგურის პარტია ღირსი არ არის, მომავალ პარლამენტში იყოს. იმიტომ, რომ ხალხის საკეთილდღეოდ მას 4 წლის განმავლობაში არაფერი გაუკეთებია ისე, როგორც “ქართულ ოცნებას”.
ნუცა ჯანელიძე (მუსიკათმცოდნე): “გამართლებულია. დარწმუნებული ვარ, “კონსერვატორებს” ეყოლებათ ღირსეული კანდიდატები. თან ეს კოლეგიალურობაა, რასაც მხოლოდ და მხოლოდ მივესალმები.”
„რეზონანსი“, 18 ივნისი, 2016 წელი
ინტერვიუ სოსო ცინცაძესთან: „რატომ არ დადიან ქართველი პოლიტიკოსები კინოში, ქუჩაში, ბაზარში… // “თუ რამე სასწაული არ მოხდა, რაც ხალხს დარაზმავს, “ოცნებას” უმრავლესობა ისედაც გარანტირებული აქვს, რადგან ასეთი კანონმდებლობა გვაქვს”
თაკო მათეშვილი
„ანგელა მერკელმა მიიღო გიორგი ვკვირიკაშვილი, ესაუბრა, მაგრამ პოლიტიკაში ყველაფერი კონკრეტული შედეგით განისაზღვრება. უნდა გვითხრან, თუ რა რეალობა იყო წასვლის წინ და რა ჩამოიტანა,” – ამბობს პოლიტოლოგი სოსო ცისკარიშვილი პრემიერ-მინისტრის გერმანიაში ვიზიტის შეფასებისას და მიიჩნევს, რომ კვირიკაშვილს ბერლინიდან არაფერი ჩამოუტანია. მისივე თქმით, თუკი ვინმეს იმის იმედი ჰქონდა, რომ ამ ვიზიტით იგი მერკელს საქართველოსთვის ვიზალიბერალიზაციის მოცემაზე დაიყოლიებდა, ცდებოდა. დარწმუნებულია, რომ ვიზიტი ვერც ამ შედეგს მოიტანს და ვერც რაიმე სხვას, რადგან იგი მოუმზადებელი და სპონტანური იყო.
“რეზონანსთან” ინტერვიუში პოლიტოლოგი სტრასბურგის სასამართლოს მიერ მერაბიშვილის გამართლებასაც ეხება და ამას ხელისუფების “იაღლიშს” უწოდებს. მისი აზრით, ქართული მხარის მოუმზადებლობამ ქვეყანას საერთაშორისო ასპარეზზე სახილი კიდევ ერთხელ გაუტეხა.
სოსო ცინცაძე: როცა დღევანდელი ჩვენი იუსტიციის მინისტრი ჩემი სტუდენტი იყო, გაცილებით მეტი ლოგიკური დასაბუთების უნარი გააჩნდა. ძალიან კარგი სტუდენტი იყო. ახლა კი ეტყობა, სკამმა იმოქმედა. ჯერ ამბობს, არაფერი მოხდა, ჩვენ გავიმარჯვეთო, მერე იძახის – უნდა გავასაჩივროთო. მოგებულ პროცესს ვინ ასაჩივრებს?! ასეთი რამ მსოფლიო იურისპრუდენციაში არ არსებობს, რომ ადამიანი, რომელიც პროცესით კმაყოფილია, ასაჩივრებდეს. ეს ცოტა უხერხულ სიტუაციას ქმნის. აქამდე ყველა იძახდა – ვანო მერაბიშვილის სადღაც ღამით თავზე ჩამოცმული გაყვანა გამოსაძიებელი არააო, დღეს კი ყველა ამბობს, რომ ეს აუცილებელია და გააკეთებენ. ეს ყველაფერი, ცოტა არ იყოს, უკვე უხერხულია. ხელისუფლების წარმომადგენლების არგუმენტები ნაკლებად დამაჯერებელია. გაუთავებელი მინიშნებები იმაზე, რომ ადრე ყველაფერი უარესად იყო, დამღლელია. დღევანდელზე ვილაპარაკოთ. ასე რომ, სტრასბურგის სასამართლოს ეს გადაწყვეტილება საჩუქრად ნამდვილად არ აღიქმება, მით უმეტეს წინასაარჩევნოდ.
- ვანო მერაბიშვილის ამბავს წინ თითქმის ყველა ყოფილი მაღალჩინოსნის ინტერპოლით ძებნილთა სიიდან ამოღება უძღოდა. ეს ყველაფერი სისტემურ კრახზე მიუთითებს?
- ეს შემთხვევა არც პირველი იყო და ალბათ არც უკანასკნელი იქნება. შევარდნაძის დროიდან მოყოლებული, საერთაშორისო არენაზე საქართველო თითქმის ყველა პროცესს აგებს. რითია ეს გამოწვეული? ჩვენი იურისტების არაკვალიფიციურობით, თუ საქმეების არასასურველი ხარისხით? სამწუხარო ისაა, რომ საერთაშორისო სასამართლოებში ყველაფერი ინახება და არასოდეს წაიშლება. ეს საქართველოსათვის ნამდვილად ცუდია. მით უმეტეს, ჩვენი ხელისუფლება გვარწმუნებს – ვიზალიბერალიზაციისათვისაც, ევროკავშირში გასაწევრიანებლად და ნატო-ში მისაღებადაც ყველა პირობა შევასრულეთო. თითქოს ყველაფრისთვის მზად ვართ და ამ დროს ასეთი “იაღლიშები” მოგვდის.
- ვიზალიბერალიზაციასთან დაკავშირებულ პრობლემებს გიორგი კვირიკაშვილის გერმანიაში ვიზიტი მოჰყვა. რა ჩამოიტანა მან?
- ესეც არაა ნორმალური, რომ ვიზიტები ასე უცებ და სპონტანურად გახშირდა. როცა წინასაარჩევნო კამპანიაა და ისეთი სიტუაცია ტრიალებს, რომ დედა შვილს არ აიყვანს ხელში, პრემიერი მოგზაურობს. თუ ჩვენს საგარეო საქმეთა სამინისტროში ფიქრობენ, რომ ევროპელებს თავიანთ გადაწყვეტილებას გადაათქმევინებენ და არჩევნებამდე ვიზალიბერალიზაციას გამოსტყუებენ, კარგად ყოფილა მათი საქმე.
მოტივაციას ვერ ვხედავ. ევროპა დღეს თავის პრობლემებში თავად იხრჩობა. კი, ბატონო, მერკელმა მიიღო კვირიკაშვილი, ესაუბრა, მაგრამ ეფექტი რა იქნება? ზოგადი არ მაინტერესებს. პოლიტიკაში ყველაფერი კონკრეტული შედეგით განისაზღვრება. უნდა გვითხრან, თუ რა რეალობა იყო წასვლის წინ და რა ჩამოიტანა. ახლა კი ამას ვერ ვხედავ. თუმცა, როგორც ჩანს, ხელისუფლება მიხვდა, რომ ევროპაში მეტი მუშაობაა საჭირო. ამ დროს კი ჩვენი დიპლომატიური კორპუსი კატასტროფულ მდგომარეობაშია. ეს, პირველ რიგში, საკადრო პოლიტიკითა და არაშესატყვისი ინტელექტუალური დონითაა გამოწვეული. პრემიერს ახლა დიპლომატის ფუნქციის შეთავსება უხდება. რასაც კვირიკაშვილი აკეთებს, ელჩების საქმეა. პრემიერის ვიზიტი კი შედეგზე უნდა იყოს გათვლილი და არა – მხოლოდ საუბარზე. ასეთი საუბრებისთვის ელჩებს ვუხდით ხელფასს, თანაც – საკმაოდ დიდ ხელფასს.
- ანუ, ფიქრობთ, რომ კვირიკაშვილის გერმანიაში ვიზიტს ქვეყნისთვის არაფერი მოუტანია?
- არ მოუტანია და ვერც მოიტანდა, რადგან ეს ვიზიტი სათანადოდ მომზადებული და გააზრებული არ იყო. პრემიერის ვიზიტს რამდენიმეთვიანი მოსამზადებელი სამუშაო სჭირდება. იქ რომ ჩადის, ხელშეკრულებებს უნდა დებდეს. თუნდაც მეორე და მესამეხარისხოვანს. რაღაცაზე ხელს უნდა აწერდნენ. უბრალოდ საუბრისათვის წასვლა ახლა, როცა ქვეყნის შიგნით ასეთი სიტუაციაა, უადგილოა. თუნდაც ის განვიხილოთ, როგორი მინისტრთა კაბინეტი აქვს აქ. დამოუკიდებელ მუშაობას არავინაა მიჩვეული. არც ერთი მინისტრი სურდოს მიქსტურას არ დალევს ისე, თუ პრემიერთან ან ივანიშვილთან შეთანხმებული არაა. დამოუკიდებელ რეჟიმში გადაწყვეტილებების მიღებას არ არიან მიჩვეული და ამიტომაცაა ასეთი ქაოსი და ურთიერთგამომრიცხავი განცხადებები, რომელთაც ჩვენი ხელისუფლება დემოკრატიის ნიმუშად წარმოგვიდგენს.
- “ვაშინგტონ პოსტმა” საქართველო-ნატოს ურთიერთობასა და მაპ-ის მინიჭების საკითხს საკმაოდ ვრცელი სტატია მიუძღვნა. როგორც გამოცემა ნატო-ს ერთ-ერთ მაღალჩინოსანზე დაყრდნობით წერს, დეკემბერში ალიანსში მაპ-ის მოცემის საკითხზე ისევ იმსჯელებენ. გვაქვს იმის საფუძველი, რომ პოზიტიური მოლოდინი გვქონდეს?
- არავითარი საფუძველი არ არსებობს. “ვაშინგტონ პოსტმა” ათასი რაღაც შეიძლება დაწეროს, მაგრამ კონსენსუსს რაც შეეხება, არ მგონია, რამე ისეთი მოხდეს, რომ პარიზმა, ლონდონმა, ბერლინმა და რომმა ამას ვეტო არ დაადონ. ეს გამორიცხულია. მაკკეინსა და ამერიკელებზე რომ იყოს დამოკიდებული, დიდი ხანია, ნატო-ში ვიქნებოდით, მაგრამ სამწუხაროდ, ასე არაა.
- ნატო-სგან სასიკეთო სიახლეები ნაკლებადაა. მისი წვრთნებიდანაც, როგორც ამბობენ, მოგვხსნეს. ვიზალიბერალიზაციაზეც პრობლემებია. ეს ყველაფერი არჩევნებში პროდასავლური პარტიების რეიტინგზე აისახება?
- რომელია ჩვენთან პროდესავლური პარტია? ჩემთვის პროდასავლურობა პარტიის ლიდერების განცხადებებით არ შემოიფარგლება. ამას პროდასავლური ფასეულობები და ღირებულებები განსაზღვრავს. როცა სასამართლოს მიმართ კითხვებია, იქ პროდასავლურობაზე საუბარი ზედმეტია. როცა სტრასბურგის დადგენილების გასამართლებად პატარა ბიჭი – კობახიძე გამოჰყავთ და მას ალაპარაკებენ, არც ესაა პროდასავლური კურსი.
როდესაც ქალაქი ნაგავშია ჩაფლული და მერი შენობაში უკანა კარიდან იპარება, ქუჩაში ვერ გაუვლია, ესეც არაა ჩემთვის პროდასავლურობა. მინისტრებთან და დეპუტატებთან შეხვედრებსა ხალხს საგანგებოდ რომ არჩევენ, რათა “ხორკლიანი” კითხვები არავინ დაუსვას – არც ესაა პროდასავლურობა.
ორი დღის წინ ინგლისში ახალგაზრდა პარლამენტარი ქალი მოკლეს, მაგრამ არავის გასჩენია სურვილი, თანამდებობის პირებისათვის დაცვა მოეთხოვა. ადრეც ყოფილა ასეთი შემთხვევები, მაგრამ წესი არ შეუცვლიათ – დაცვა არავისთვის მიუჩენიათ.
პოლიტიკოსი თავის ხალხს არ უნდა ემალებოდეს. იგი ჩვეულებრივ უნდა დადიოდეს კინოში, ქუჩაში, ბაზარში. რომელიმე პოლიტიკოსი ბაზარში გინახავთ? როცა 24 წლის ბიჭს, მხოლოდ იმის გამო, რომ ვიღაცის ნათესავია, პროფესორზე 15-ჯერ მაღალი ხელფასი აქვს, ეს ევროპისაკენ სვლა არაა. ამიტომ, ამ ტერმინს ცოტა ფრთხილად უნდა მოვეკიდოთ, პროდასავლურობა მარტო ნატო-ში შესვლის სურვილი არ არის.
- ყოველ შემთხვევაში, არჩევნების შედეგებზე თუ იმოქმედებს ის იმედგაცრუება, რაც ხალხში ნატო-სა და ევროკავშირთან დაკავშირებით გაჩნდა?
- რასაკვირველია, იმოქმედებს. რაც უფრო ახლოა ხელისუფლება ხალხთან, მისთვის მით უკეთესია. დღეს ქუჩაში პოლიტიკოსს ვერ დაინახავ. რომელი მინისტრი წარმოგიდგენიათ, საღამოს რუსთაველზე რომ სეირონებდეს? ეს რომელს მოუვა აზრად?
კომუნისტების დროსაც კი არ იმალებოდნენ. მაგალითად, მახსოვს, რომ ქალაქის მერი, რომელსაც მაშინ აღმასკომის მდივანი ერქვა, ქუჩაში ხშირად დადიოდა, მშენებლობებს ათვალიერებდა ხოლმე, ხალხსაც ესაუბრებოდა. არ იმალებოდნენ. ნარმანიასთან მისვლა კი ნებისმიერი თბილისელისათვის უდიდესი სირთულეა.
- დღეს გავრცელდა ინფორმაცია, რომ “ქართულმა ოცნებამ” შესაძლოა, ზოგიერთი საარჩევნო ოლქი “კონსერვატორების” მაჟორიტარობის კანდიდატის სასარგებლოდ დათმოს…
- რა თქმა უნდა, ასე იქნებოდა, რადგან სხვანაირად ძიძიგურს არჩევის 0%-იანი შანსი აქვს. სასათბურე პირობები თუ არ შეუქმნეს, “კონსერვატორები” ვის გაიყვანენ? გასული 4 წლის განმავლობაში მათი ინიციატივა მარტო ერთი მახსოვს – სამსახურში ჩოხებით ვიაროთო. მთელი მათი იდეები ეგ იყო. ზოგიერთი დამრგვალებული ჩინოვნიკის ჩოხაში წარმოდგენა ნამდვილად არაა სასიამოვნო…
- “კონსერვატორების” მოტივაცია გასაგებია და “ოცნებას” რა დაინტერესება შეიძლება ჰქონდეს ამ შემთხვევაში?
- “ოცნებას” თავისი სატელიტი ჯგუფები, პარტიები სჭირდება. თუმცა, ჩემი აზრით, თუ რამე სასწაული არ მოხდა, რაც ხალხს დარაზმავს, “ოცნებას” უმრავლესობა ისედაც გარანტირებული აქვს, რადგან ასეთი კანონმდებლობა გვაქვს. სანამ მაჟორიტარები იარსებებენ, მმართველ პარტიას გამარჯვება ყოველთვის გარანტირებული აქვს.
- ივანიშვილს პარლამენტში 95 დეპუტატის შეყვანის იმედი აქვს და ეს მოლოდინი რამდენად რეალისტურია?
- შეიყვანს. 75 მაჟორიტარია და 20-ს სიით ვერ გაიყვანენ? ნამდვილად შევლენ მაგ რაოდენობით. მაგიტომაც იყვნენ, მაჟორიტარების გულისთვის ლამის რელსებზე რომ დაწვნენ. ზოია კოსმოდემიანსკაიას არ უბრძოლია ამდენი კომკავშირის დასაცავად, როგორც ამათ მაჟორიტარების დასაცავად იბრძოლეს.
„ახალი თაობა“, 18 ივნისი, 2016 წელი
ინტერვიუ სოსო ცინცაძესთან: „არჩევნებზე პოლიცია არ უნდა იყოს საჭირო“ // „კოალიციური მთავრობა დემოკრატიის ნიშანი იქნება“
პოლიტოლოგი სოსო ცინცაძე „ახალ თაობასთან” ინტერვიუში კოალიციური მთავრობის პლუსებსა და მინუსებზე საუბრობს.
- ბატონო სოსო, ბოლო პრესკონფერენციაზე ყოფილმა პრემიერმა ბიძინა ივანიშვილმა განაცხადა, რომ კოალიციური მთავრობა შესაძლებელია ხელის შემშლელი ფაქტორი აღმოჩნდეს რეფორმების გზაზე. თუმცა, იქვე აღნიშნა, რომ ეს არის დემოკრატიული, ევროპული გზა. როგორ შეაფასებთ ბიძინა ივანიშვილის ამ განცხადებას?
- ძალიან ცუდია, როდესაც არგუმენტები გვესმის და არა მხოლოდ ბიძინა ივანიშვილისგან, სხვებისგანაც, რომ ეს კარგია, დემოკრატიულია, მაგრამ ჩვენთვის ჯერ ადრეა. მაგალითად, საარჩევნო სისტემის გერმანულ მოდელზე ზვიად ძიძიგურმა თქვა, რომ გერმანიისთვის კარგია, მაგრამ ჩვენთვის ცუდია, მზად არ ვართო. მსგავსი არგუმენტები მე ტაჯიკეთიდან, უზბეკეთიდან, ყირგიზეთიდან მესმის, მაგრამ ჩვენი ხელისუფლებისგან ასეთი არგუმენტები ცოტა ყურს მჭრის, მიუღებელია. თუ ჯერ ჩვენთვის ეს ადრეა, მზად არ ვართ, მაშინ ევროკავშირში შესასვლელად როგორ ვართ მზად?! ამიტომ მსგავსი არგუმენტები არ უნდა მოიყვანონ ჩვენი ხელისუფლების წარმომადგენლებმა.
- რეალურად კოალიციური მთავრობა შეიძლება იყოს შემაფერხებელი ფაქტორი?
- რა თქმა უნდა, შეიძლება იყოს, მაგრამ ეს არის დემოკრატია. თუ ჩვენი მიზანი არის ევროპული დემოკრატიის რეალურად დამკვიდრება და ევროპის ნაწილად გახდომა, მაშინ ჯობია, წავიდეთ ამ გზით და ამ გზაზე შეგვხვდეს პატარა გაუგებრობა, წინააღმდეგობაც კი, რადგან ამის გარეშე არ არსებობს.
დემოკრატიისკენ მიმავალი გზა ყოველთვის ოღრო-ჩოღროა, მაგრამ ამ გზას თუ დავადექით, ამ პატარა ოღრო-ჩოღროების აღარ უნდა შეგვეშინდეს. მზად უნდა ვიყოთ ამისთვის. რაც შეეხება კოალიციურ მთავრობას, პარლამენტში იძულებული ხდება ყველა ძალა, საერთო ენა როგორმე გამონახოს. ჩვენმა დეპუტატებმა საერთო ენის გამონახვა ისწავლონ. ჩვენს პარლამენტში იყო ქალბატონი დეპუტატი, რომელიც ღიად მიმართავდა ოპოზიციას, თქვენ რაც გინდათ ილაპარაკეთ, ჩვენ უფრო მეტნი ვართ და ჩვენ მივიღებთ გადაწყვეტილებას. ეს არის დემოკრატია?
- რომელ დეპუტატს გულისხმობთ?
- ქალბატონ ნადირაძეს, რომელიც დეპუტატი იყო ერთ-ერთი მოწვევის პარლამენტში. პოლიტიკა კომპრომისების ხელოვნებაა. თუ კომპრომისების ძიების, დათმობების, პოზიციების შეჯერების გზას ვერ გავივლით, ეს ძალიან ცუდი იქნება. ყველა ვითარებაში გამოსავალი უნდა ეძებო, ეს არის თუნდაც საპარლამენტო დიპლომატია. კოალიციური მთავრობა ერთმმართველობას მიჩვეული საზოგადოებისთვის რთული აღსაქმელია, მაგრამ ეს არის დემოკრატიის გზა. ნებისმიერი კოალიციური მთავრობის დროს აღარ არის საჭირო პარლამენტში სპორტსმენები, მსახიობები, მომღერლები. არავის ვერჩი, მაგრამ ამ დროს უფრო საჭირონი ხდებიან იურისტები, ანალიტიკოსები. ოთხი წელი ისე გავიდა, რომ ჩვენი დეპუტატების დიდი ნაწილი საერთოდ მიკროფონთან არ მისულა. არც კომიტეტებში მუშაობით მოუკლავთ თავი. ეს უნდა დასრულდეს.
- მათი არგუმენტია, რომ გადაწყვეტილების მიღება გაჭირდება...
- დიახ, მაგრამ ეს არის პარლამენტი. ნებისმიერი ევროპული მთავრობა თავისი პარლამენტის წინ ღელავს, ვაითუ რაღაც ინიციატივა, რომელიც აქვს მომზადებული, თავზე დაახიოს, არ დაუმტკიცოს. ეს არის დემოკრატია და არა სამ წუთში მიღებული გადაწყვეტილება, აბსოლუტური უმრავლესობით რომაა მიღებული. ხომ გახსოვთ, ჰილარი კლინტონი, სახელმწიფო მდივანი როდესაც იყო, კონგრესში მისული რა დღეში ჩააგდეს კონგრესმენებმა. დემოკრატია წვალებაში იბადება, დემოკრატიას ყველგან რთული მშობიარობა აქვს და ეს ყველამ უნდა გააცნობიეროს, ოპოზიციამ, ხელისუფლებამ, პირველ რიგში, გიორგი კვირიკაშვილმა, რომლის პასუხისმგებლობაც დიდი იქნება ამ არჩევნებზე.
- პარლამენტი მსჯელობს მთავრობის ინიციატივაზე, არჩევნების დღეს პოლიციელები საარჩევნო უბნის სიახლოვეს განალაგოს თუ არა. კორცხელის ინციდენტიდან გამომდინარე ხელისუფლება თავს იზღვევს, რასაც ოპოზიცია არ ეთანხმება. რას იტყვით?
- თვითონ ის ფაქტი, რომ საარჩევნო უბნების დაცვაა საჭირო, ღირსებას არ მატებს დემოკრატიულობის პრეტენზიის მქონე ქვეყანას. თუმცა, ხელისუფლებამ კარგად იცის, რომ ამ არჩევნებს მთელი საერთაშორისო თანამეგობრობა გამადიდებელი შუშით დააკვირდება, ამიტომ გასაგებია თადარიგის დაჭერა. ჩვენი პოლიცია რომ იყოს, მაგალითად, ინგლისის პოლიციის დონის მომზადების, კიდევ მისაღები იქნებოდა. ერთი მხრივ, იმათაც აქვთ არგუმენტები ვინც კატეგორიული წინააღმდეგია პოლიციის გამოჩენის საარჩევნო უბნის სიახლოვეს და მეორე მხარესაც არის არგუმენტი, რომ პოლიცია ყოველთვის აღიქმება, როგორც წესრიგის დამცველი და სხვა არაფერი. თუ მე მკითხავთ, უკეთესია, პოლიცია საერთოდ არ იყოს საჭირო.
- პრევენციის მიზნით უნდა იყოს თუ არა დაშვებული?
- საქმეც მაგაშია, რომ პრევენცია გვჭირდება და ჯერ კიდევ არ ვართ იქამდე განვითარებული, რომ პოლიცია არჩევნების დღეს ზედმეტი იყოს. ჩვენ ხომ ვიცით, რომ სპონტანური შეჯახებები ხდება, როდესაც ვიღაც მთვრალია ან ქორწილში ან დიდ სუფრაზე, მაგრამ მსგავს სიტუაციაში, არჩევნებს ვგულისხმობ, ან ერთი გეგმავს ამ შეჯახებას, ან მეორე, რაც კარგად აჩვენა კორცხელის ინციდენტმა. ხელისუფლებისთვის უკეთესია, შექმნას ისეთი პირობები, რომ საერთოდ არ იყოს საჭირო პოლიციის გამოჩენა, ეს ჯერ კიდევ შეუძლია ხელისუფლებას, რომ ეჭვი არავის ეპარებოდეს. 3.000 უბანზე მთელი დღე პოლიციის განთავსება რამდენად მართებულია, ვერ გეტყვით.
„ახალი თაობა“, 18 ივნისი, 2016 წელი
ინტერვიუ გიგა ბუკიასთან: „თუ პრეზიდენტი ვანო მერაბიშვილს შეიწყალებს, ის პასუხისმგებლობასაც ვერ გაექცევა“ // „ადამიანებს არ უნდა მოსთხოვო, ხმა მოგცენ იმიტომ, რომ კარგად მღეროდი“
პარლამენტის უმრავლესობის წევრი, ფრაქცია „კონსერვატორების“ თავმჯდომარე გიგა ბუკია „ახალ თაობასთან“ ინტერვიუში უსაფუძვლოს უწოდებს განცხადებებს იმის თაობაზე, რომ ვიზალიბერალიზაციის გადადება საქართველოს ხელისუფლების ბრალია.
„ვიზალიბერალიზაციის შეფერხება არ არის საქართველოს ხელისუფლების ბრალი. ამაში საქართველოს ხელისუფლებას არ ადანაშაულებენ ევროპული სტრუქტურები. ეს კარგად გამოჩნდა პრემიერ კვირიკაშვილის ვიზიტის დროსაც. ევროპაში დაფიქსირდა სრული მხარდაჭერა საქართველოს მიმართ. ყველა აღიარებს, რომ საქართველომ სრულად შეასრულა ვიზალიბერალიზაციის სამოქმედო პროგრამით გათვალისწინებული მოთხოვნები. 2012 წლიდან დაწყებული რეფორმები თვალსაჩინოა. გერმანიის კანცლერმა ანგელა მერკელმა აღნიშნა, რომ საქართველო მიიღებს ვიზალიბერალიზაციას. მანვე გერმანელ ბიზნესმენებს მოუწოდა, განავითარონ ეკონომიკური ურთიერთობები საქართველოსთან. ვინც ამ მხრივ საქართველოს ხელისუფლებას ბრალდებებს უყენებს, ან საქმეში ჩაუხედავია, ან ზნეობასთან მწყრალადაა”, – ამბობს გიგა ბუკია.
- „ვაშინგტონ პოსტის“ სიტყვებით, ნატომ და ევროკავშირმა საქართველო მიატოვეს...
- ამასაც ვერ დავეთანხმები. რას ნიშნავს საქართველოს მიტოვება? საგაზეთო პუბლიკაცია შეიძლება შეკვეთილი იყოს, ან შესაძლოა, ესაა ვინმეს სუბიექტური მოსაზრება. ჩვენ არჩეულ კურსს მივყვებით. ესაა დასავლური, ევროპული კურსი, რომელსაც რეფერენდუმზე მხარი დაუჭირა საქართველოს მოსახლეობამ. არც ჩვენ გადაგვიხვევია ამ კურსიდან და არც დასავლელ პარტნიორებს მივუტოვებივართ. ეს კურსი არის ეკონომიკური სტაბილურობის, სიძლიერისა და პოლიტიკური სიმშვიდის ერთადერთი გარანტი. ვიღაცებს რომ უნდათ, ქვეყანამ ამ კურსს გადაუხვიოს, ეს სხვა თემაა. მთავარია, რომ ხელისუფლება სწორ გზას ადგას. ხდება ჩვენი ინტერესების თანხვედრა დასავლეთის ინტერესებთან.
- ერთ-ერთი მთავარი აქტუალური თემა ვანო მერაბიშვილის შესაძლო შეწყალებაა. საუბარია იმაზე, მას პრეზიდენტი მარგველაშვილი შეიწყალებს...
- თუ პრეზიდენტი მერაბიშვილს შეიწყალებს, ის პასუხისმგებლობასაც ვერ გაექცევა. მაშინ გიორგი მარგველაშვილს მოუწევს პოლიტიკური პასუხისმგებლობის აღება. საერთოდ, პრეზიდენტის ბევრი განცხადება ჩემში გაკვირვებას იწვევს. ის ხან საკუთარ სექსუალურ გამოცდილებაზე საუბრობს, ხან – პოლიტიკოსებზე. ახლახან გიორგი მარგველაშვილმა განაცხადა, რომ მოსახლეობას პოლიტიკოსები ეზიზღება. პრეზიდენტი, მით უმეტეს, წინასაარჩევნოდ, ასეთ დაუფიქრებელ ფრაზებს არ უნდა ამბობდეს.
- გამოცდილი პოლიტიკოსების წინააღმდეგ სხვებიც გამოდიან. ამ მხრივ განსაკუთრებით აქტიურობენ ნაციონალებიდან გამოსული „ახალი საქართველოს“ ლიდერი გიორგი ვაშაძე და ორგანიზაცია „სახელმწიფო ხალხისათვის“ თავმჯდომარე პაატა ბურჭულაძე...
- ასეთი მიდგომა არასწორია თუნდაც იმიტომ, რომ ყველა პროფესიას გამოცდილება სჭირდება. საჭესთან აბსოლუტურად გამოუცდელ კაცს ხომ არ სვამენ? ასეა პოლიტიკაც. ვინც დიდი ხანია პოლიტიკაშია, ხალხს მასზე ინფორმაციაც აქვს. ცნობილია, ვინ რა გზა გაიარა.
მაგალითად, პაატა ბურჭულაძე, რომელიც პოლიტიკოსების წინააღმდეგ გამოდის, მღეროდა. იგი კარგი მომღერალი იყო, თუმცა ამის მეტი არაფერი გაუკეთებია. ახლა მას სხვა ამბიციები აქვს. არ შეიძლება, ხალხს მოსთხოვო, ხმა მოგცენ იმიტომ, რომ კარგად მღეროდი. აქამდე რაიმეზე პროტესტი ამ კაცისგან არ გაგვიგია.
- თუმცა ის იყო საქველმოქმედო კონცერტების ორგანიზატორი...
- პაატა ბურჭულაძის ეს საქმიანობა კითხვებს აჩენს. პრესაში გამოქვეყნდა მასალა იმის შესახებ, რომ მას უამრავი ბინა აქვს. ამიტომ ამ კაცის კავშირზე ქველმოქმედებასთან ვერაფერს ვიტყვი. ერთი რამ შემიძლია დავადასტურო, რომ პაატა ბურჭულაძეს პოლიტიკისა ბევრი არაფერი ესმის. მას უფლებაც არა აქვს, პოლიტიკოსების გამოცდილება ნეგატიურად მოიხსენიოს. გამოუცდელმა პოლიტიკოსებმა მძიმე სიტუაციაში ჩააყენეს ქვეყანა. ამის მწარე გამოცდილება გვაქვს.
- რა გაქვთ მხედველობაში?
- საქართველოს უახლესი ისტორია, 25-წლიანი პერიოდი. ჩვენი გამოუცდელობით სისხლიც კი დაღვრილა. გამოუცდელები სააკაშვილსაც ჰყავდა ხელისუფლებაში. გამოუცდელობა ახლა მაინც არ უნდა დავუშვათ.
- პარლამენტში მოხვედრის შანსი ბევრს აქვს?
- ჩემი აზრით, „ქართული ოცნების” გარდა, პარლამენტში დაახლოებით 5 ძალა მოხვდება. „ქართულ ოცნებას“ რეალურად აქვს შესაძლებლობა, მოიპოვოს მყარი უმრავლესობა მომავალ პარლამენტში და დააკომპლექტოს მთავრობა. დანარჩენებს საარჩევნო ბარიერის გადალახვის შანსი აქვთ. ესეც დამოკიდებულია იმაზე, თუ როგორ სტრატეგიას აირჩევენ ეს პარტიები. არასწორმა ნაბიჯებმა შეიძლება მათი რეიტინგი გაანულოს.
„ახალი თაობა“, 18 ივნისი, 2016 წელი
ინტერვიუ არჩილ გამზარდიასთან: „გიორგი მარგველაშვილმა უნდა აგვიხსნას, რატომ შეხვდა ჩუმად გიგა ბოკერიას”
გულიკო ბალაძე
ანალიტიკოსი არჩილ გამზარდია „ახალ თაობასთან“ ინტერვიუში აცხადებს, რომ პრეზიდენტი აღმასრულებელი ხელისუფლების დისკრედიტაციას ისახავს მიზნად.
„ჩემთვის ყოვლად გაუგებარია დახურულ კარს მიღმა გიგა ბოკერიასთან შეხვედრა და სტრასბურის სასამართლოს იმ ნაწილზე აპელირება, რომელიც, საერთო ჯამში, წონადი არ არის. ამით ის ხელისუფლების დისკრედიტაციას ცდილობს. ძალიან ხელოვნური პროცესებია და პრეზიდენტის მხრიდან ამგვარ პროცესებში ჩართვა, აშკარა ტენდენციურობაზე მიუთითებს“, – განაცხადა არჩილ გამზარდიამ.
- როგორ აღიქვით ვანო მერაბიშვილის ადვოკატების განცხადება ევროგადაწყვეტილების საფუძველზე მერაბიშვილის პატიმრობიდან გათავისუფლების თაობაზე?
- ბუნებრივია, მსგავსი არაფერი უთქვამს საერთაშორისო სასამართლოს. სასამართლომ დააზუსტა და განმარტა, რომ მერაბიშვილის დაკავებაც და წინასწარი პატიმრობაც კანონიერია. თუმცა, გარკვეული პროცედურული უზუსტობების შესახებ გამოხატა შენიშვნა. დემაგოგია და პროპაგანდაა იმის თქმა, რომ სტრასბურის სასამართლომ გაამართლა მერაბიშვილი. პირიქით, ეს არის ნაცმოძრაობის დიდი მარცხი საერთაშორისო სასამართლოს მასშტაბით. შეიძლება მცირე დარღვევები არის. იდეალური არ არის, მაგრამ საერთაშორისო სასამართლოს არც ერთ შემთხვევაში არ გამოუხატავს მოსაზრება და არ შეუფასებია მერაბიშვილი პოლიტპატიმრად.
- მაშინ მის ადვოკატებს საიდან გამოაქვთ ასეთი დასკვნები?
- არ ვიცი. სტრასბურის სასამართლომ მერაბიშვილი კანონიერ პატიმრად ცნო. დანარჩენი ჩვეულებრივი სპეკულაციაა.
- მაშინ რატომ დააკისრეს საქართველოს სახელმწიფოს 4 ათასი ევრო მერაბიშვილისთვის გადასახდელად?
- ვანო მერაბიშვილი 35 ათას ევროს ითხოვდა,. ჯარიმის სახით 4 ათასი ევროს დაკისრება იმდენად სიმბოლურია, რომ ვანო მერაბიშვილის ადვოკატს შეუძლია თავი შეურაცხყოფილად იგრძნოს. ეს იგივეა საქართველოს სასამართლომ რაღაც პროცედურულ დარღვევაზე 40 ლარის გადახდა რომ დაგვაკისროს.
- თუმცა, როგორც ჩანს, სამართალდამცავ ორგანოებს ჰქონდათ რაღაც გადაცდომა...
- ბუნებრივია, შესაძლებელია, პროცედურული დარღვევა ყოფილიყო. ნამდვილად არ მაქვს ისეთი წარმოდგენა, რომ სამართალდამცავი ორგანოები იდეალურ დონეზე მუშაობენ, მაგრამ იმდენად უმნიშვნელო ჯარიმაა, რომ უმნიშვნელო დარღვევასთან გვაქვს საქმე.
- როგორ ხდება, რომ ყველასათვის კარგად ცნობილი ადეიშვილის (რომლის კისერზეა უამრავი დანაშაული) მოადგილე სრულიად სუფთა გამოდის საქმიდან, წარმატებული ადვოკატი ხდება და ახლა მერაბიშვილის გათავისუფლებას ითხოვს? თუკი ადეიშვილი ამდენ დანაშაულში იყო ჩაფლული, მისი მოადგილე კახიძე საქმიდან სუფთა როგორ გამოდის?
- ბუნებრივია, ეს ასე არ ხდება ხოლმე, მაგრამ საკმაოდ ჩაკეტილი სივრცეა. დადგება დრო, როცა ამ პერიოდს უფრო ღრმად შეისწავლიან სისხლის სამართლის კუთხითაც _ დაადგენენ, ნაცმოძრაობის მმართველობის დროს რა დონის დარღვევებს ჰქონდა ადგილი და რა დონის პასუხისმგებლობაა საჭირო.
- ყველას ჰგონია, რომ პრეზიდენტი მერაბიშვილს შეიწყალებს. ამ საკითხისადმი თქვენი დამოკიდებულება როგორია?
- ეს არის აბსურდული აზრი. საქართველოს სასამართლოებმა მიიღეს გადაწყვეტილება მისი პატიმრობის შესახებ. საერთაშორისო სასამართლომ ეს გადაწყვეტილება გაამართლა. არანაირი მოტივაცია, მიზეზი და პირობა არ არსებობს საიმისოდ, რომ ეს გადაწყვეტილება რამდენადმე მაინც იყოს ხელახლა გადაფასებული.
პრეზიდენტის მხრიდან ვანო მერაბიშვილის შეწყალება ყველაზე უმსგავსო საქციელი იქნება ქვეყნისა და მოსახლეობის წინაშე. პრეზიდენტმა ძალიან კარგად იცის მოსახლეობის განწყობა. ასევე ძალიან კარგად იცის მერაბიშვილისა და მაშინდელი ჩინოვნიკების დამნაშავეობის შესახებ. ამიტომაც, ვფიქრობ, პრეზიდენტი მსგავს სისულელეს არ გააკეთებს. თუ პრეზიდენტი მერაბიშვილს შეიწყალებს, გადახაზავს იმ შეფასებებს, რასაც ის აკეთებდა 2012 წლამდე და პრეზიდენტად მოსვლამდე.
თუ პრეზიდენტი შეიწყალებს ვანო მერაბიშვილს, საქართველოს მოსახლეობის მხრიდან ნამდვილად იქნება დასასმელი პრეზიდენტის პასუხისმგებლობის საკითხი. პრეზიდენტის გადაყენების მოთხოვნა სრულიად ლეგალური გახდება. გარკვეულ კორუფციულ სქემაზეც შეიძლება საუბარი, რადგან მერაბიშვილის გათავისუფლების არანაირი მოცემულობა არ არსებობს. საპატიმროებში უამრავი ადამიანი რჩება, რომელიც შეიძლება შეიწყალოს. თუ მათ ნაცვლად გაათავისუფლებს ყოფილ შს მინისტრ მერაბიშვილს, ბევრი ცუდი ვერსიის წარმოდგენა შეიძლება ამის მიზეზად _ შეიძლება დანაშაულთან გვქონდეს საქმე.
- რა დანაშაულთან?
- დაწყებული პრეზიდენტის მხრიდან მორალურ დონეზე დანაშაულით და არა მხოლოდ მორალური დანაშაულით.
- კორუფციულ სქემაში რას გულისხმობთ? პრეზიდენტი რანაირად შეიძლება იყოს კორუფციულ სქემაში გარეული? გიგა ბოკერიასაგან შეიძლება ფული აიღოს თუ რა?
- არ არსებობს ვანო მერაბიშვილის გათავისუფლების მოცემულობა. თუკი პრეზიდენტი შეიწყალებს ვანო მერაბიშვილს, რომელიც ყველა ინსტანციის სასამართლომ დამნაშავედ ცნო, მაშინ უნდა ვეძებოთ პრეზიდენტის დაინტერესების მიზეზი. შესაბამისად, დაინტერესებაში ბევრი ვერსია შეიძლება ვიგულისხმოთ. მათ შორის, თეორიულად შეიძლება მატერიალური ან პოლიტიკური დაინტერესება იყოს.
- გიგა ბოკერიასთან შეხვედრის შემდეგ პრეზიდენტის პრესსპიკერმა განაცხადა, გიორგი მარგველაშვილი სტრასბურის გადაწყვეტილებას სახელმწიფოსთვის დამაზიანებლად მიიჩნევს და სამართალდამცავ და სასამართლო სისტემაში პასუხისმგებელი პირების დასჯას მოითხოვსო. სტრასბურის გადაწყვეტილება თქვენ არ მიგაჩნიათ სახელმწიფოსთვის დამაზიანებელ გადაწყვეტილებად?
- არანაირი დამაზიანებელი გადაწყვეტილება არ მიუღია სტრასბურს. თუ პრეზიდენტი მხოლოდ ამ ნაწილს ხედავს და იმ ნაწილს არაფრად აგდებს, რომ მერაბიშვილის პატიმრობას სასამართლო კანონიერად ცნობს, ეს არაეთიკურია. პრეზიდენტი მარგველაშვილი არის კონსტიტუციის გარანტი და ინსტიტუციების პატივისმცემელი, მაგრამ სინამდვილეში, სამწუხაროდ, მრჩება შთაბეჭდილება, რომ ის აღმასრულებელი ხელისუფლების დისკრედიტაციას ისახავს მიზნად. მართალია, მართვის ბერკეტები მას არ გააჩნია, მაგრამ ამგვარი განცხადებები არაეთიკურად მეჩვენება. მისი მხრიდან აღმასრულებელ ხელისუფლებაზე შეტევა პირველი არ არის.
- ახლა აღმასრულებელი ხელისუფლების დისკრედიტაცია რაში გამოიხატება?
- სტრასბურის სასამართლოს გადაწყვეტილების ის ნაწილი, რომელიც ნაწილობრივ ნაცმოძრაობისთვის თითზე დასახვევია, აიტაცა პრეზიდენტმა, რაც არაეთიკურია. პრეზიდენტი ამაზე საუბრით ახდენს აღმასრულებელი ხელისუფლების დისკრედიტაციას.
- თქვენ ახსენეთ პოლიტიკური დაინტერესებაც. რა პოლიტიკური დაინტერესება შეიძლება ჰქონდეს პრეზიდენტს? შეუძლია ყველაფერს გადააბიჯოს და ნაცმოძრაობასთან რაიმე პოლიტიკურ კავშირში შევიდეს?
- იმდენად არ მინდა ახლა ამაზე ვიფიქრო, რომ ამ ვერსიას ვერ ვუშვებ. ვერ ვუშვებ, რომ ქვეყნის პრეზიდენტი დანაშაულებრივ (ყოფილ) ხელისუფლებასთან შევიდეს მნიშვნელოვან გარიგებაში და საერთო ინტერესები გაუჩნდეთ. ეს ნამდვილი კატასტროფა იქნება.
- გიგა ბოკერიას დახურულ კარს მიღმა შეხვდა...
- თავისთავად იმ ფაქტის გამო, რომ ბატონი მარგველაშვილი ბოკერიას დახურულ კარს მიღმა შეხვდა, ქვეყნის პრეზიდენტისთვის, მინიმუმ საზოგადოების ნაწილს პრეზიდენტის სასახლესთან საპროტესტო აქცია ნამდვილად უნდა მოეწყო. პრეზიდენტს აუცილებლად უნდა გაეკეთებინა განმარტებები, თუ რატომ გააკეთა ეს.
- პრეზიდენტის ფილოსოფიურ კრედოს სახელმწიფოებრივ საკითხებში როგორ ხედავთ? თქვენ თქვით, მთავრობის დისკრედიტაციას ახდენსო. კიდევ რა შეიძლება გააკეთოს, რაც მთავრობას არ მოეწონება?
- მიუხედავად იმისა, რომ პრეზიდენტი გასული სამი წლის მანძილზე გარკვეულ შეცდომებს უშვებდა, მე მომწონდა მისი ხედვა, რომ საკუთარი თავი ამჟამინდელი კონსტიტუციის ფარგლებში ზეპარტიულ სუბიექტად აქცია. მისი მხრიდან გარკვეულ ძალისხმევასაც ვხედავდი. მომწონდა, რომ მასში ვერ დაიჭერდი რომელიმე პოლიტიკურ სუბიექტს. ხან ნაცმოძრაობა აკრიტიკებდა, ხან `ქართული ოცნება~. თითქოს ბეწვის ხიდზე გავლას ცდილობდა. თუმცა, მისი ბოლო პერიოდის განცხადებები აშკარა ტენდენციურობაზე მიანიშნებს. ძალიან სამწუხაროა, თუ აქ მისი პოლიტიკური ინტერესია.
- რომელ განცხადებას გულისხმობთ?
- ვგულისხმობ თუნდაც სტრასბურის სასამართლოს გადაწყვეტილებაზე განცხადებას, ბოკერიასთან შეხვედრის ფაქტს.
- მოვისმინე, პრეზიდენტი ყველას პრეზიდენტიაო. შეიძლება აქედან გამომდინარეობს მისი განცხადებები...
_ მესმის, მაგრამ მიუხედავად ამისა, ჩემთვის ყოვლად გაუგებარია დახურულ კარს მიღმა გიგა ბოკერიასთან შეხვედრა და სტრასბურის სასამართლოს იმ ნაწილზე აპელირება, რომელიც, საერთო ჯამში, წონადი არ არის. ამით ხელისუფლების დისკრედიტაციის მცდელობაა. ეს ძალიან ხელოვნური პროცესებია. პრეზიდენტის მხრიდან ამგვარ პროცესებში ჩართვა აშკარა ტენდენციურობაზე მიუთითებს.