„რეზონანსი“: როგორი უნდა იყოს თავდაცვის ახალი მინისტრი // „რესპუბლიკურმა პარტიამ“ მმართველი ძალა მძიმე მდგომარეობაში ჩააყენა”

„ვერსია“: ინტერვიუ გიორგი ვაშაძესთან: ვის ამზადებს ეკონომიკის მინისტრად და რით შეეცდება იგი  ამომრჩევლის მოხიბვლას

„ახალი თაობა“: ინტერვიუ ნიკოლოზ მჟავანაძესთან: „ნაციონალებმა რამდენიმე პარტია გადაიბირეს“ // „არჩევნების დღეს მიხეილ სააკაშვილი სარფში იქნება“ // „ქართულ ოცნებაში“ მოღალატეები არიან“

„ახალი თაობა“: ინტერვიუ ნანა კაკაბაძესთან: „სულხან მოლაშვილს მიხეილ სააკაშვილის კორუფცია ჰქონდა გამოძიებული”

„ახალი თაობა“: ინტერვიუ კახა კუკავასთან: „ეს ხელისუფლება სულხან მოლაშვილის მწამებლებს არ დასჯის” // „სამართლიანობის აღდგენა 8 ოქტომბრის შემდეგაა შესაძლებელი“ // „თუ ხელისუფლება არ დასჯერდება თავის 25%-ს, ის ძალაუფლებას დიდხანს ვერ შეინარჩუნებს”

„ახალი თაობა“: ინტერვიუ ვახტანგ მაისაიასთან: „ლაფანყურის ოპერაციის გამოძიება დასრულებულია“ // „მიხეილ სააკაშვილმა საკუთარი თავი ამხილა”

„ახალი თაობა“: ინტერვიუ გია ვოლსკისთან: „აჰმედ ჩატაევი მიხეილ სააკაშვილის ბრიგადაში აღმოჩნდა” // „ლევან ვარშალომიძის გამოჩენა არათუ პოზიტიურს, ნეგატიურსაც კი არ უკავშირდება“

„რეზონანსი“: ინტერვიუ ზურაბ აბაშიძესთან: «მოლაპარაკების შედეგად 7 მოქალაქე გავათავისუფლეთ”

——————-

„რეზონანსი“, 05 ივლისი, 2016 წელი

როგორი უნდა იყოს თავდაცვის ახალი მინისტრი

„რესპუბლიკურმა პარტიამ“ მმართველი ძალა მძიმე მდგომარეობაში ჩააყენა”

თაკო მათეშვილი

გამოცდილი პოლიტიკოსი, მაგრამ ამავდროულად სამხედრო საკითხებში გათვითცნობიერებული ადამიანი – ასეთი უნდა იყო პოლიტოლოგთა და სამხედრო ანალიტიკოსთა აზრით, მომავალი თავდაცვის მინისტრი, რომელიც, სავარაუდოდ, თინა ხიდაშელს შეცვლის. თუმცა როდის მოხდება ეს, უცნობია, რადგან როგორც ჩანს, ხიდაშელი გადადგომას ვარშავის სამიტის შემდეგაც არ აპირებს.

თავდაცვის მინისტრის თანამდებობაზე დანიშვნიდან ხიდაშელი არაერთხელ მოექცა კრიტიკის ქარცეცხლში. მათ შორის, მაშინდელი თანაგუნდელების მხრიდანაც კი. აღსანიშნავია, რომ “რესპუბლიკელებს” კიდევ ორი მინისტრი ჰყავთ – სახელმწიფო მინისტრი შერიგების საკითხებში პაატა ზაქარეიშვილი და გარემოს დაცვის მინისტრი გიგლა აგულაშვილი. თუმცა რატომღაც ხიდაშელის გადადგომასა და შემცვლელზე ბევრად აქტიურად საუბრობენ, ვიდრე დანარჩენი ორი მინისტრისა. ჩვენი რესპონდენტების აზრით, ეს ყველაფერი დიდწილად იმან გამოიწვია, რომ იგი ქალია და თანაც, აქტიური ქალი.

თავდაცვის მინისტრის შემცვლელის ვინაობის დადგენა ქვეყანაში ბოლო თვეების მთავარი ინტრიგაა. აქტიურად განიხილავენ ორ ადამიანს – ვეტერანთა სახელმწიფო დეპარტამენტის ხელმძღვანელ კობა კობალაძესა და დეპუტატ ირაკლი სესიაშვილს.

თუმცა გუშინ თინა ხიდაშელმა ხმების გამავრცელებლებს ცივი წყალი გადაავლო და განაცხადა, რომ მისი შემცვლელის ვინაობაზე საუბარი ჯერ ძალიან ნაადრევია, რადგან იგი არც გადამდგარა და “არც მომკვდარა”.

ამ თემაზე ინტერვიუ ხდაშელმა “კვირის პალიტრას” მისცა. ჟურნალისტის კითხვაზე, თუ რომელ კანდიდატს ანიჭებს უპირატესობას თავად იმ ორიდან, რომელზეც საზოგადოება საუბრობს, თინა ხიდაშელმა არც ერთი არ დაასახელა.

“ჩემს თანამდებობაზე ორ კანდიდატურაზე, ასე ვთქვათ, ჭორაობენ – ჯერ არც მოვმკვდარვარ და არც გადავმდგარვარ. ამ კითხვაზე პასუხი როგორ უნდა გაგცეთ? მე რომ არ ვიქნები ამ პოსტზე, პრემიერის გადასაწყვეტი იქნება ახალი მინისტრის ვინაობა. მე რომ მქონდეს არჩევანი, თუ თინა ხიდაშელი არა, მაშინ სხვა კანდიდატურა მეყოლებოდა, სუფთა, კვალიფიციური, პროფესიონალი… თუმცა ის კაცი კანდიდატურად ვერ გამოდგება, რადგან არასდროს დასთანხმდება ამ წინადადებას”, – განაცხადა თინა ხიდაშელმა. მან პირდაპირი პასუხი არ გასცა კითხვას იმის შესახებ, რომ შესაძლოა არჩევნებში პარტიული ნიშნით მონაწილეობაზე უარი თქვას და მინისტრად დარჩეს: “როგორც ბატონმა პრემიერმა თქვა და ვიზიარებ სრულად, ჩემი ყველა გადაწყვეტილება, რომელიც დღემდე მივიღე, პოლიტიკურად და პრაქტიკული ამოცანებიდან გამომდინარე, შეთანხმებული და სინქრონიზებული იყოო. ზუსტად ისეთივე იქნება 8 ოქტომბრამდე მიღებული ჩემი ყველა გადაწყვეტილება”, – აღნიშნა თინა ხიდაშელმა.

კობა კობალაძემ მისი შესაძლო გამინისტრების შესახებ ინფორმაცია უარყო. რაც შეეხება სესიაშვილს, როცა “რეზონანსმა” მას ეს კითხვა დაუსვა, თემაზე საუბარი არ მოინდომა, რადგან მისი აზრით, ეს არაეთიკური იქნებოდა მაშინ, როცა ქვეყანას თავდაცვის მინისტრი ჯერ კიდევ ჰყავს: „ვინც უნდა იყოს და რომელი პარტიის წარმომადგენელიც უნდა იყოს იგი, ჯარისკაცს, ოფიცერს მმართველობის სტაბილურობის განცდა უნდა ჰქონდეს. “რესპუბლიკელების” წასვლას რაც შეეხება, ეს გასაგები და ლოგიკურია. როცა არჩევნებში მონაწილეობას ცალკე იღებ, არაადეკვატურია, რომ მთავრობაში იყო. ვინ დაიკავებს მათ პოსტებს, ეს პრემიერის გადასაწყვეტია. მისი პრეროგატივაა და როგორი გადაწყვეტილებაც იქნება მიღებული, იმის მიხედვით ვისაუბროთ. წინასწარ ნამდვილად ვერ გეტყვით, ვინ იქნება და ჭორებს ვერ ავყვები”, – აღნიშნა მან. ჩვენს კითხვაზე, მიუღია თუ არა ამის თაობაზე შეთავაზება, ირაკლი სესიაშვილმა გვიპასუხა, რომ პირდაპირი შეთავაზება არ ყოფილა, თუმცა, ზოგადად, ბევრ საკითხზე მსჯელობენ.

ის, რომ “რესპუბლიკელებმა” მოსალოდნელი სცენარი შეცვალეს და თანამდებობების დატოვებაზე უარს აცხადებენ, პოლიტოლოგ სოსო ცინცაძეს არ უკვირს. ამბობს, რომ სამი მინისტრის რესურსი წინასაარჩევნოდ ხელწამოსაკრავი არაა და ამის გამოყენებას ყველა შეეცდებოდა. იგი აღნიშნავს, რომ “რესპუბლიკელი” მინისტრები თავისი ნებით არ გადადგებიან, თუ მთავრობის მხრიდან ზეწოლა არ იქნება. ხოლო თუ ზეწოლა იქნება, ეს ამ მინისტრებსა და პარტიას ქულებს შემატებს, რადგან საქართველოში დაჩაგრულ ადამიანს ყველა გვერდში უდგება. ასე რომ, მისი თქმით, ძალიან დელიკატური სიტუაცია შეიქმნა.

“წვევამდელების გაწვევის გაუქმებითაც დამტკიცდა, რომ “რესპუბლიკელები” ძალიან ზუსტ თამაშს თამაშობენ. წინასაარჩევნო კამპანია უშეცდომოდ დაიწყეს. ამით კიდევ ერთხელ დაამტკიცეს, რომ მათ ინტელექტუალურ პოტენციალთან დაკავშირებით პრობლემა არ აქვთ. ზოგს მოსწონს “რეპუბლიკელები”, ზოგს არა, მაგრამ ვერავინ უარყოფს – ეს პარტია ნომერ პირველი ინტელექტუალური პოლიტიკური ძალაა. ამიტომ, ეს გათვლაც – ჩემით არ წავალ და თუ არ მოგწონვარ, გადამაყენე – ჭკვიანურია. ეს პოლიტიკაა და ასეთი ნაბიჯები ნურავის უკვრის. მითუმეტეს, როცა თანამდებობებზე თავდაცვის, შერიგებისა და გარემოს დაცვის მინისტრებზე ბევრად ოდიოზური ფიგურები რჩებიან.

უხერხული სიტუაცია იქმნება და როგორც ჩანს, პრემიერი, თავისი წინამორბედისაგან განსხვავებით, საკმაოდ გონიერი ადამიანია და ასეთ შეცდომას არ დაუშვებს. ამით კი “რესპუბლიკური პარტია” სრულად ისარგებლებს”, – ამბობს სოსო ცინცაძე. მისი აზრით, ახლა თავდაცვის მინისტრის პოსტის დაკავებას ყველა სერიოზული პოლიტიკოსი მოერიდება, მათ შორის ირაკლი სესიაშვილიც, ვინაიდან თანამდებობაზე მოსვლისთანავე მას ძალიან არაპოპულარული ნაბჯის გადადგმა – ჯარში წვევამდელთა სავალდებულო გაწვევის ხელახლა შემოღება მოუწევს, რაც წინასაარჩევნოდ ასიათასობით ხმას დააკარგვინებს. ამიტომაც ჰქონდა ირაკლი სესიაშვილს ამ საკითხზე ყველაზე მწვავე რეაგირება. ეტყობა, იგი მიხვდა, თუ რა მძიმე მდგომარეობაში ჩააყენა “რესპუბლიკურმა პარტიამ” მმართველი ძალა”, – დასძენს იგი.

რაც შეეხება იმას, თუ რატომაა უფრო აქტუალური თინა ხიდაშელის გადადგომა და არა მისი თანაგუნდელი სხვა მინისტრებისა, ცინცაძის თქმით, “იმიტომ, რომ აქტიურია და ქალია”. “რაც უნდა ვიყვიროთ, ევროპელები ვართო, ჩვენი საზოგადოება კლასიკური აზიელია და აქტიურ ქალს ვერ ეგუებიან. მამაკაცების 80%-ის აზრით, ქალის ადგილი სამზარეულოსა და აკვანთანაა. ამ ფონზე, გასაკვირი არაა, რომ ხიდაშელის აქტიურობა არ მოსწონთ. თანაც, ხიდაშელი ახლა ხომ არ გამხდარა ასეთი, 15 წელია ასეთი აქტიურია, ჯერ კიდევ “ახალგაზრდა იურისტთა ასოციაციაში” ყოფნის პერიოდიდან. ხშირად ქმარზე მეტად აქტიურიც, რაც ევროპაში ჩვეულებრივი ამბავია, მაგრამ საქართველოში ამასთან შეგუება უჭირთ”, – აცხადებს პოლიტოლოგი.

სამხედრო ანალიტიკოსი ვახტანგ მაისაია კი “რეზონანსთან” იმ კრიტერიუმებზე საუბრობს, რაც, მისი აზრით, მომდევნო თავდაცვის მინისტრმა უნდა დააკმაყოფილოს, ვინც უნდა იყოს იგი. მისი აზრით, მომავალი მინისტრი, გარდა იმისა, რომ კარგი პოლიტიკოსი უნდა იყოს, სამხედრო თემაშიც უნდა ერკვეოდეს.

“არმიაში საკმაოდ რთული სიტუაციაა და მას სათვეში უფრო პროფესიონალი ადამიანი სჭირდება. თავდაცვისუნარიანობის საკითხები კარგად უნდა ესმოდეს და სამხედრო საქმის მცოდნე უნდა იყოს. ამ თანამდებობაზე მხოლოდ პოლიტიკოსი არ გვჭირდება. ხიდაშელი კარგი პოლიტიკოსია, ასეთი ადამიანიც საჭიროა ჩვენთვის, მაგრამ არა ამ ეტაპზე”, – მიიჩნევს ვახტანგ მაისაია.

———————

„ვერსია“, 04 ივლისი, 2016 წელი

ინტერვიუ გიორგი ვაშაძესთან: ვის ამზადებს ეკონომიკის მინისტრად და რით შეეცდება იგი ამომრჩევლის მოხიბვლას

მაია მიშელაძე

,,ახალი საქართველო ღირსეული, წარმატებული და ახალი სამუშაო ადგილების ქვეყანა, სადაც ყველაზე სწრაფად ეკონომიკა განვითარდება და სადაც თითოეულ მოქალაქეს საკუთარი შესაძლებლობების რეალიზების საშუალება ექნება“, - ამბობს ექსნაციონალი, ახალი პარტია “ახალი საქართველოს“ ლიდერი გიორგი ვაშაძე, რომელიც „ვერსიას“ პარტიის ეკონომიკური პროგრამის მთავარი გზავნილებზე ესაუბრა.

- ჩვენ ახალი ეკონომიკური მოდელი უნდა შევქმნათ, რომელიც ქართული იქნება. სხვადახვა ქვეყანაში განხორციელებული რეფორმების კოპირების წინააღმდეგი ვარ, რადგან, თუ ამ რეფორმებს, უბრალოდ, ვაკოპირებთ, ეს მხოლოდ იმის ქსეროასლი იქნება, რაც სხვაგანაა. ამიტომაც ვამბობ, რომ საქართველო მეორე შვიცარია ვერ იქნება, ვერც ჰონგ-კონგი და ვერც სინგაპური. ეს არც ინვესტორებს მიიზიდავს. ჩვენ სრულიად ახალი ეკონომიკური მოდელი უნდა შევქმნათ.

- და ეს სრულიად ახალი ეკონომიკური მოდელი როგორია?

- მთავარია, სახელმწიფომ ბიზნესის განვითარებისთვის დემოტივაციის ფაქტორები მოხსნას, რაც იმას ნიშნავს, რომ მაქსიმალურად ახალი თაობის რეფორმები გატარდეს. პროცედურები რაც შეიძლება მარტივი უნდა იყოს და პირიქით, შესაძლოა, ბიზნესი აუთსორსზე (გარე კომპანიის მომსახურება, რაც ბიზნესისთვის უფრო მომგებიანია, – ავტ.) გავიდეს, რათა ბაზრის მოთხოვნებს მაქსიმალურად მოერგოს. აუცილებელია დემონოპოლიზაციაც ანუ კონკურენტული გარემოს შექმნა, სადაც მონოპოლიები ვერ იარსებებს. შემდეგი ნაბიჯი კი დეკონცენტრაციაა ანუ ხელისუფლების ერთი ვერტიკალის ქვეშ კონცენტრირებული ძალაუფლება უნდა გადანაწილდეს. მაგალითად, სამართალდამცავი ორგანოები და პროკურატურა ბიზნესისა და ეკონომიკის განვითარებას ხელს უშლიან. მაქსიმალური დეკონცენტრაცია იმას გულისხმობს, რომ ურთიერთდაკავშირებული ფუნქციები ერთი ვერტიკალის ქვეშ არ იყოს, რათა სისტემა არ ჩაიკეტოს და სხვადასხვა პოლიტიკური პროექტი, მძლავრი მექანიზმებით, ხელოვნურად არ გაცოცხლდეს. ბოლოს, აუცილებელია დეცენტრალიზაცია – უფლება-მოვალეობების ადგილობრივ დონეზე და ბევრი ფუნქციის ბიზნესისთვის აუთსორსზე გატანას. უნდა ვეცადოთ, რომ ქვეყნის შიგნითაც შევქმნათ კონკურენციები ქალაქვბსა და რაიონებს შორის, რადგან თუ კონკურენცია არ გვექნება, მათ შორის, სახელმწიფო უწყებებშიც, ერთ ვერტიკალს მივიღებთ. არ შეიძლება, მხოლოდ ცენტრი წყვეტდეს, რომელ რაიონში რა უნდა გაკეთდეს. ჩვენი ეკონომიკური პროგრამა იმაზე იქნება დაფუძნებული, როგორ შევქმნათ ისეთი გარემო, რომელიც ხელს უწყობს ქვეყნის, როგორც რეგიონალური და არა მარტო გლობალური ჰაბის ფუნქციის წარმოშობას. ახალი თაობის რეფორმები იმასაც გულისხმობს, რომ სახელმწიფო უკანა პლანზე ინაცვლებს და ნაკლები ფუნქცია აქვს ანუ ის მხოლოდ პოლიტიკას განსაზღვრავს, ამა თუ იმ ფუნქციის რეალიზება კი ბიზნესის, კერძო და არასამთავრობო ორგანიზაციების საშუალებით ხდება. ესაა ჩვენი ეკონომიკური ხედვა, რომლის საზოგადოებამდე მიტანაც, რა თქმა უნდა, მარტივი არ იქნება. ღიად ვამბობ: ჩვენ უნდა გვქონდეს ამბიცია, უფრო ინოვაციური იდეა მოვიფიქროთ, ვიდრე სხვას აქვს, წინააღმდეგ შემთხვევაში, ვერ განვვითარდებით. რაც უნდა ვაკოპიროთ თავისუფალი ეკონომიკური ზონა, მაგალითად, დუბაიდან, თქვენც ხომ ხედავთ, რომ რეალურად, ეს ჩვენთან ვერ მუშაობს? ამის მიზეზი მარტივია: როცა თავისუფალი არჩევანი აქვს _ დუბაი თუ საქართველო, ინვესტორი დუბაიში მიდის, რადგან იქ უფრო დიდი ეკონომიკაა, მეტი პერსპექტივა და შესაძლებლობაა. ამგვარ კონკურენციაში საქართველო მარცხდება, ამიტომ ინოვაციური იდეებითა და ახლებური მიდგომებით უნდა მოვიგოთ და ის გავაკეთოთ, რაც დუბაიში არ არის! ბევრი ამბობს, ილუზიებში ხომ არ ხართო, მაგრამ იუსტიციის სახლი მსოფლიოსთვის დღესაც საინტერესო მხოლოდ იმიტომაა, რომ სხვა ქვეყანაში ანალოგი არ აქვს!

- რომ არ გსურთ, საქართველო მეორე შვეიცარია, ჰონგ-კონგი და სინგაპური იყოს, მხოლოდ მოქმედ ხელისუფლებას კი არა, ყოფილ თანაპარტიელებსაც უპირისპირდებით, რადგან საქართველოს სინგაპურიზაცია ნაციონალური მოძრაობის ერთი ფრთის აკვიატებაა…

- ჩვენსა და სხვა პარტიებს შორის მთავარი განსხვავება ისაა, რომ ჩვენ კონკრეტული ხედვა გვაქვს. ისინი კი სხვა ქვეყნებს უყურებენ და ფიქრობენ, როგორ გადმოაკოპირონ მათი რეფორმები. ვფიქრობ, კოპირების შემთხვევაში, ჩვენ მხოლოდ ქსეროქსის აპარატი ვიქნებით და არ მგონია, ამ ასლგადამღებით რამე წარმატებას მივაღწიოთ. შესაბამისად, მუდმივად იქნება შიმშილი და გაჭირვება, რაც დღეს ქვეყანაშია. ჩვენ გვჭირდება გლობალური, კონკურენტუნარიანი ხედვა, რომელიც სხვა ქვეყნებისგან განსხვავებული იქნება. პირდაპირ გეტყვით: რაც ოპოზიციაში ვარ, უკრაინაში, მოლდოვაში, მაკედონიასა და ევროკავშირის ქვეყნებში მუშაობამ შესაძლებლობა მომცა, საკუთარი ხედვის დიაპაზონი უფრო გამეშალა, განვითარების შესაძლებლობები და პერსპექტივები სხვაგვარად დამენახა. მაგალითად, უკრაინაში ვნერგავთ ელექტრონული აუქციონების სისტემას, რომელიც ახალ ტექნოლოგიაზეა დაფუძნებული და რომლითაც სახელმწიფოს მანიპულაციის შესაძლებლობა საერთოდ უქრება. უკრაინისა და მოლდოვასთვის ისეთი საგადასახადო სისტემის მოდელი მოვხაზეთ, რომლის პრეზენტაციის დროსაც ყველა საერთაშორისო ექსპერტი შოკირებული იყო _ საგადასახადო ოფიცერსა და ფინანსურ პოლიციას, ის ,,მათრახის ფუნქცია”, რაც დღეს საქართველოში აქვს, პრაქტიკულად, დავუკარგეთ. მეორე მხრივ, ბიზნესს გარანტიას ვაძლევთ, რომ გადასახადს ყველა გადაიხდის, თორემ სხვაგვარად, ვერ იმუშავებს. ესაა ახალი თაობის რეფორმები, სადაც სახელმწიფო ,,მათრახის” როლში კი არ გვევლინება, რომელიც რაღაცის კეთებას გვაიძულებს, არამედ თვითრეალიზების შესაძლებლობას გვაძლევს.

რაც შეეხება სხვა პარტიებთან დაპირისპირებას, პირდაპირ გეუბნებით, სერიოზული კონფლიქტი მაქვს და ყველა ძველებურ აზროვნებას ვუპირისპირდები!

- ბატონო გიორგი, 2012 წლის საპარლამენტო არჩევნების დროს, ციხის კადრებს რომ თავი დავანებოთ, ჩემთვის, როგორც ეკონომიკის ჟურნალისტისთვის, მთავარი მაინც „ქართული ოცნების“ ეკონომიკური პროგრამა იყო, რაც ხალხისთვისაც საკმაოდ ადვილად გასაგები გამოდგა. სხვა საკითხია, ამ პროგრამიდან რა შესრულდა და რა არა, მაგრამ სპეციალისტების შეფასებით, 2016 წლის საპარლამენტო არჩევნების წინ, პარტიები ერთმანეთს სწორედ ეკონომიკური პროგრამებით დაუპირისპირდებიან. რასაც თქვენ ბრძანებთ, ძალიან მომწონს და ძირითად ნაწილში გეთანხმებით, მაგრამ ყველაფერ ამას ხალხი რამდენად გაიგებს – არჩევნებზე ხმა რატომ უნდა მოგცეთ?

- ეკონომიკური პროგრამა გვაქვს, მაგრამ არ მინდა, იმ ახალ წევრებს, რომლებიც ჩვენს პარტიაში შემოდიან, თავზე მოვახვიო… ყველაფერს, რაზეც გესაუბრეთ, მოსახლეობას მარტივ და გასაგებ ენაზე „გადავუთარგმნით“. ცალკე გვექნება სოფლების, ქალაქებისა და ზოგადად, ეკონომიკური განვითარების პროგრამები, რაც ასევე, მარტივი და იოლად აღსაქმელი იქნება. ვფიქრობ, დრო გვაქვს, ამიტომ უმჯობესია, კარგად შევიმუშაოთ და პროგრამა, რომელიც ერთ თვეში მზად გვექნება, შემდეგ გამოვაქვეყნოთ. ჩვენ პოპულისტური დაპირებები არ გვექნება, რადგან ამგვარმა დაპირებებმა თავისი თავი ამოწურა. თუ ვინმე გამოჩნდება და იტყვის, რომ ტარიფებს შეამცირებს, ვფიქრობ, ხალხი არ დაუჯერებს. ,,ქართულ ოცნებას” დაპირებები ჰქონდა და სათავეში მდიდარი ადამიანიც ედგა. ამ პირობებში, ხალხმა ჩათვალა, რომ მისი დაპირებების შესრულება შესაძლებელი იქნებოდა. 2012 და წლევანდელი არჩევნების ყველაზე დიდი განსხვავება ისაა, რომ სამწუხაროდ, დღეს ამომრჩეველში ძალიან დიდი ფლუსტრაციაა _ დაპირებებს, მით უმეტეს, არარეალურს საერთოდ არ ენდობა!

- ამომრჩეველი პოლიტიკური პარტიებისგან კონკრეტულ მესიჯებს ელის. რა არის ის, რასაც ხელისუფლებაში მოსვლის შემთხვევაში აუცილებლად გააკეთებთ?

- „ცოდნის ეკონომიკა“ რომ ავაწყოთ, განათლებაში გაცილებით მეტ ინვესტიციას ჩავდებთ. ყოველწლიურად, 2 000-მდე პედაგოგსა და ლექტორს კვალიფიკაციის ასამაღლებელ კურსებს დავუფინანსებთ, მათ შორის, საქართველოს ფარგლებსგარეთაც. ვფიქრობ, სტუდენტებში ჩადებული თანხა ერთ ადამიანში ჩადებული ინვესტიციაა, მასწავლებლებსა და ლექტორებში ჩადებული თანხა კი თაობებში ჩადებულ ინვესტიციას ნიშნავს. საშუალოვადიან პირობებშიც კი, თუ გვინდა, წარმატებას მივაღწიოთ, ისეთი საგანმანათლებლო სისტემა გვჭირდება, რომელიც თანამედროვე, კონკურენტუნარიან და კვალიფიციურ კადრებს გამოუშვებს.

ჯანდაცვის სფეროშიც კონკრეტული გზავნილები გვაქვს და სოფლის განვითარებაზეც. სოფელში მეურნეობა და ტურიზმია, დიდი სახლები დგას, რომელთა მაქსიმალური დატვირთვაც შესაძლებელია. მაგალითად, სოფლად ,,გესტ ჰაუსების” ტიპის სისტემის განვითარება სრულიად შესაძლებელია, რასაც სოფლების ირგვლივ არსებული ღირსშესანიშნაობების შესახებ სრული ინფორმაციაც უნდა დავურთოთ. ტურისტი, რომელიც პირობითად, თბილისსა და ბათუმში ჩამოდის, სოფელშიც უნდა მივიყვანოთ, რომელიც ადგილობრივ ნატურალურ პროდუქტსა შეიძენს და რამდენიმე დღით „გესტ ჰაუსშიც“ გაჩერდება. ფაქტია: რუსეთსა და უკრაინას კონკურენციას მხოლოდ ხორბლის წარმოებით ვერ გავუწევთ, მაგრამ შესაძლოა, ადგილობრივი ფქვილით მომზადებული ხინკალი და პური მაღალფასიან სეგმენტში გავიდეს, რაც კონკრეტულ სოფელში დიდ შემოსავალს მოგვიტანს. ამისთვის გვჭირდება გზა, დენი, წყალი, გაზი და ინტერნეტი. სხვათა შორის, „კომპიუტერული ცოდნის გამავრცელებელი საზოგადოება“ ჩემი პროექტი იყო, რომელიც 2012 წელს დავიწყეთ და 220 სოფელში დღესაც მუშაობს. მაგალითად, ასეთი ტიპის პროექტზე ჭიათურაში, სოფელ კაცხში ვმუშაობდი, სადაც ,,გესტ ჰაუსებს” სახელმწიფო კი არა, ადგილობრივი მოსახლეები აწყობდნენ. იგივე გავტესტეთ ხონის რაიონის სოფელ გორდშიც, სადაც გასულ წელს 10 000-მდე ახალგაზრდა ჩავიყვანეთ. ერთ სოფელში ჩასული 10 000 ადამიანი იმას ნიშნავს, რომ ერთ თვეში იქ, მინიმუმ, 200 000-დან 300 000 ლარამდე იხარჯება. თუ შიდას გარე ტურიზმსაც მივაბამთ, ამით სერიოზულ შესაძლებლობას შევქმნით.

- 2012 წლის საპარლამენტო არჩევნების შემდეგ, ბიძინა ივანიშვილს საკმაოდ დიდი დრო დასჭირდა, რათა ეკონომიკის მინისტრი შეერჩია. თქვენი ჩრდილოვანი კაბინეტის მონახაზი გაქვთ?

- პრაიმერების გზით, ღია შერჩევის მექანიზმი გამოვაცხადეთ და შედეგად, ჩვენს პარტიაში ბევრი საინტერესო ადამიანი მოდის. შესაბამისად, მთავრობის კაბინეტსაც სწორედ ამ ადამიანებისგან შევქმნით. ცხადია, ჩვენი ხედვები გვაქვს, თუ ვინ ან სად შეიძლება დავნიშნოთ, მაგრამ ცოტა ხანს გვაცადეთ და ყველაფერს თავის დროზე გაჩვენებთ.

————————

„ახალი თაობა“, 05 ივლისი, 2016 წელი

ინტერვიუ ნიკოლოზ მჟავანაძესთან: „ნაციონალებმა რამდენიმე პარტია გადაიბირეს“ // „არჩევნების დღეს მიხეილ სააკაშვილი სარფში იქნება“ // „ქართულ ოცნებაში“ მოღალატეები არიან“

არიან თუ არა „ქართულ ოცნებაში“ მოღალატეები, რატომ გააქტიურდა სანდრა რულოვსი, რას აპირებს სააკაშვილი არჩევნების დღეს, ვინ გადაიბირა ნაციონალურმა მოძრაობამ? – ამ თემებზე „ახალ თაობას“ უფლებადამცველთა გაერთიანების თავმჯდომარე ნიკოლოზ მჟავანაძე ესაუბრება.

ნიკოლოზ მჟავანაძე:

- უკვე დიდი ხანია ვსაუბრობ იმაზე, რომ ნაციონალები სერიოზული არეულობისთვის ემზადებიან. ამის ნათელი დადასტურება პოლიტიკურ ველზე სანდრა რულოვსის გამოჩენაა. 3 ივლისს ის სხვა ნაციონალებთან ერთად დახვდა ლევან ვარშალომიძეს და განაცხადა, მალე მიშაც ჩამოვაო. დიდი ალბათობით სანდრა რულოვსიც იმ რევოლუციის ერთ-ერთი მებაირაღე იქნება, რომელიც ყოფილ ხელისუფლებას დაანონსებული აქვს.

- ვარშალომიძის დაბრუნება ახსენეთ. ყოფილი ხელისუფლების წარმომადგენლები მას დიდი ზარ-ზეიმით დახვდნენ. თქვენი აზრით, მათ ამით რისი თქმა უნდოდათ?

- ზარ-ზეიმი იმიტომ მოაწყვეს, რომ ქვეყანაში შეიქმნას ილუზია, თითქოს ხალხს უხარია ნაციონალების დაბრუნება. ლევან ვარშალომიძე სისხლიან საქმეებში არასდროს ყოფილა ჩართული. საარჩევნო სიის პირველი ათეულიც ასეთი ხალხისგან დააკომპლექტეს, მაგრამ ამით ვერავის მოატყუებენ. გერმანიაში თავის დროზე ნაცისტური პარტია მთლიანი შემადგენლობით გაასამართლეს. კულტურის მუშაკებს, რომლებიც რეჟიმს მხარს უჭერდნენ, თავები გადაპარსეს. ლევან ვარშალომიძეს თავად არავინ მოუკლავს, მაგრამ არც ფრთიანი ანგელოზი არ არის. მისი ხელისუფლებაში ყოფნის დროს აჭარაში არაერთი მიტინგი დაარბიეს, არაერთი ადამიანი მოკლეს და უამრავ ადამიანს წაართვეს ქონება. ნაციონალები ამაოდ ცდილობენ მისი სახით აჭარის რეგიონის მხსნელის გმირი შექმნან. ახლო მომავალში კიდევ ვიღაცებს გამოაჩენენ და შეეცდებიან საზოგადოებას დაუმტკიცონ, რომ შეიცვალნენ.

- იქნებ მართლა გადაწყვიტეს შეცვლა. მიხეილ სააკაშვილმა თქვა, შურისძიებაზე უარს ვიტყვითო...

- სააკაშვილს როგორ უნდა დაუჯეროს კაცმა საერთოდ? მაგას რომ თავი დავანებოთ, სხვა ნაციონალები პირდაპირ და ღიად იმუქრებიან სამაგიეროს გადახდით. ამ პარტიის წარმომადგენლები სასამართლო პროცესებზე დადიან და მათ მიერ დახოცილი ადამიანების ახლობლებს ემუქრებიან. პირდაპირ ეუბნებიან, დავბრუნდებით და ნახავთ, რას გიზამთო. ეჭვიც არ მეპარება, რომ ხელისუფლებაში დაბრუნების შემთხვევაში უარეს საშინელებებს ჩაიდენენ. მათი დაბრუნების საფრთხე კი საკმაოდ რეალურია.

- ხელისუფლების წარმომადგენლების თქმით, მათ ხალხის მხარდაჭერა არ აქვთ და ხელისუფლებაში ვეღარასდროს დაბრუნდებიან...

- ხალხის მხარდაჭერა ნამდვილად არ აქვთ, მაგრამ არსებობს არაერთი მაგალითი იმისა, რომ უცხო ქვეყნების დახმარებით ძალაუფლება იმ ძალებს ჩაუგდიათ ხელში, რომლებიც ხალხის მხარდაჭერით არასდროს სარგებლობდნენ. ხელისუფლების წარმომადგენლებმა უნდა გაითვალისწინონ ისიც, რომ დღეს მთელი რიგი სახელმწიფო ინსტიტუტები პირდაპირ სააკაშვილზე მუშაობენ. ამ მხრივ გამორჩეულები არიან პრეზიდენტის ადმინისტრაცია და სახალხო დამცველის ოფისი. არასამთავრობოებზე უკვე აღარაფერს ვამბობ. პრეზიდენტი და მისი ადმინისტრაცია ცალკე მინდა გამოვყო. ეს ინსტიტუტი უკვე ღიად ლობირებს ნაციონალურ მოძრაობას. გიორგი მარგველაშვილმა გიგი წერეთელს რომ დაუჭირა მხარი, ამაზე მეტი გამოვლინება რაღად გინდა. ამას თავი დავანებოთ, ვინც კი „ქართულ ოცნებას“ დაუპირისპირდა, პრეზიდენტმა ყველა თავისთან დაასაქმა.

- ვისზე საუბრობთ?

- კახა კოჟორიძით დაწყებული, ანა დოლიძით და ეკა მიშველაძით დამთავრებული. მარგველაშვილი რომ ნაციონალებს უჭერდა მხარს, ვიცოდი, მაგრამ გიგი წერეთლის მხარდაჭერით ოფიციალურად დაადასტურა, რომ მათ დაქვემდებარებაშია. გიგი წერეთლის ეუთოს ხელმძღვანელად არჩევა ქვეყნისთვის ხიფათის შემცველია. ნაციონალებს ჯერ ისედაც აკლებული აქვთ ევროსტრუქტურები და მათი კაცი რომ იქ მაღალ თანამდებობაზე გავიდეს, ხომ წარმოგიდგენიათ, რა მოხდება. არც ის დაგვავიწყდეს, რომ საპარლამენტო არჩევნებზე ეუთოს დამკვირვებლებიც ჩამოდიან. წარმოდგენაც კი არ მინდა, რა სურათს დადებს არჩევნებთან დაკავშირებით ეუთო, რომელსაც ნაციონალმა უნდა უხელმძღვანელოს. მარგველაშვილი კი ყველაფერს აკეთებს, რომ ეს კაცი მაღალ თანამდებობაზე გავიდეს.

ნაციონალებს თავიანთი სატელიტები რომ ჰყავთ, ეს ყველასთვის ცნობილია, მაგრამ ისინი სხვა პარტიების გადაბირებაზეც მუშაობენ და დიდი ალბათობით მათი ნაწილი უკვე ნაყიდი ჰყავთ.

- რომელ პარტიებზეა საუბარი?

- ოპოზიციურ პარტიებზეა საუბარი. ნაციონალებმა იციან, რომ მათ ხალხი მხარს არ უჭერს. ისიც კარგად იციან, რომ ამომრჩევლის დიდი ნაწილი არჩევნებზე მისვლას არ აპირებს და აქედან გამომდინარე, პარლამენტს მიღმა ბევრი პარტია დარჩება. რევოლუციის მოსაწყობად ნაციონალები ისეთი პარტიების გადაბირებას ცდილობენ, რომლებიც ხალხში მათ სატელიტებად არ აღიქმებიან.

- იქნება მაინც დააკონკრეტოთ, რომელ პარტიებზეა საუბარი? ოპოზიციური პარტიები პარლამენტშიც არიან და მის გარეთაც...

- მუშაობა ორივე მიმართულებით მიდის. ზოგს ფულს შესთავაზებენ, ზოგს კომპრომატებს დაუდებენ. ასეთი რამეები კარგად გამოსდით. თავის ქება არ მინდა, მაგრამ რაც კი პროგნოზი გავაკეთე, ყველა გამართლდა. გამონაკლისი არც ეს იქნება.

- პროგნოზს თუ აკეთებთ, ბარემ დაასახელეთ ეს პარტიებიც...

- მოდით, კონკრეტიკისგან თავს შევიკავებ, რადგან ეს ლუსტრაციის პროცესისთვის იქნება დამაზიანებელი. დამატებით იმას გეტყვით მხოლოდ, რომ მუშაობა დეპუტატებთანაც მიდის. იმ დეპუტატების გადაბირებას ცდილობენ, რომლებსაც მომავალ პარლამენტში მოხვედრის თეორიული შანსიც კი არ აქვთ.

- არც ამ დეპუტატების ვინაობას დაასახელებთ?

- დასახელება რად უნდა, გადახედეთ განცხადებებს. საუბარია იმ ხალხზე, ვინც ეს 4 წელი პარლამენტში კარგად გამოიზამთრეს, ფულები აითვისეს და ახლა აღმოაჩინეს, რომ ბიძინა ივანიშვილი თურმე ჩრდილიდან და ერთპიროვნულად მართავს ქვეყანას. აქამდე ეს კითხვები საერთოდ არ გასჩენიათ. ასეთი განცხადებების გამკეთებლებისგან საერთოდ არ გამიკვირდება, რომ ნაციონალების ბანაკში აღმოჩნდნენ. ამ ბანაკში იქნება ის ხალხიც, რომლებიც თან იმას გაიძახიან, ხელისუფლებას კოაბიტაციაზე უარი უნდა ეთქვა და სამართლიანობა აღედგინაო და ამ დროს რუსთავი 2-სა და საკონსტიტუციოს უჭერენ მხარს. ამათ რომ უსმინო, მიშას მიერ დანიშნული საკონსტიტუციოს მოსამართლეები ყინწვისის ანგელოზები არიან, ხოლო საქალაქოში და სააპელაციოში ტარტაროზები სხედან. ღმერთმა არ ქნას და, ეს ხალხი ხელისუფლებაში რომ მოვიდეს, ესენი დასჯიან დამნაშავე ნაციონალებს? გამორიცხულია.

- დასჯით არც „ქართულ ოცნებას“ დაუსჯია ნაციონალები...

- როგორ არ დასაჯეს? მთავარი დამნაშავეები ციხეში არიან. სააკაშვილზე ძებნა არის გამოცხადებული. ეს ყველაფერი მოხდა იმ დროს, როცა „ოცნებაზე“ ნაციონალების ლობისტები არნახულ ზეწოლას ახორციელებდნენ. სამართლიანობის აღდგენის ტემპებით არც მე ვარ კმაყოფილი, მაგრამ ერთი რამე ყველამ უნდა გაითვალისწინოს – კოაბიტაცია ნაციონალების მიერ მოგონილი არ არის. ჩვენ წინ ძალიან დიდი ლუსტრაცია და იმედგაცრუებები გველოდება. საზოგადოება ერთხელ და სამუდამოდ დაინახავს პოლიტიკური ძალების ნამდვილ სახეს. მიხეილ სააკაშვილი სერიოზულად ემზადება ოქტომბრისთვის. გადაწყვეტილი ამბავია, რომ არჩევნების წინა დღეს ის უკვე იქნება სარფში. ის საქართველოს საზღვარს არ გადმოლახავს და იქიდან უხელმძღვანელებს პროცესებს. ის რამდენჯერმე ჩაერთვება პირდაპირ ეთერში და ასე გაამხნევებს მხარდამჭერებს. შექმნის იმის ილუზიას, რომ საჭიროების შემთხვევაში შემოვა საქართველოში.

- შემოსვლით შემოვა?

- მოვლენების განვითარებას გააჩნია. ძალაუფლების დასაბრუნებლად ყველაფერზე წავლენ. სცენარი უკვე დაწერილია. სააკაშვილის მითითებით, პროცესებში აქტიურად ჩაერთვებიან შოუ-ბიზნესის წარმომადგენლები. საუბარია იმ ხალხზე, რომლებიც ნაციონალებს სხვადასხვა მეთოდებით ჰყავთ დაკმაყოფილებული. მათ დავალება აქვთ, არჩევნების შემდეგ ცეკვა-სიმღერით გაახარონ ქუჩაში გამოსული ხალხი. ამისთვის გამოყოფილია სათანადო თანხები. პროცესებში ჩაერთვებიან არასამთავრობოებიც და ის პარტიებიც, რომლებიც მის სატელიტებად არ აღიქმებოდნენ. დაიხატება სურათი, რომ მთელი საზოგადოება ქუჩაშია გამოსული და არჩევნების შედეგებს აპროტესტებს. სააკაშვილს ისე უნდა ხელისუფლებაში დაბრუნება, სანდრა რულოვსი გამოუშვა პოლიტიკაში. ცოტა ხანში ეგ მზია ბებოს და შვილებსაც ჩართავს პროცესებში.

ხელისუფლება მოღალატეებისგან თუ არ გათავისუფლდა და ამ პროცესებს მომზადებული არ დაუხვდა, შესაძლოა, ყველაფერი თავზე დაემხოთ. ზვიად გამსახურდიაც და შევარდნაძეც მოღალატეებმა დაამხეს. არც ის საერთაშორისო მხარდაჭერა უნდა დავივიწყოთ, რომელიც ნაციონალებს აქვთ. დღეს ევროპაში პოლიტიკურ ამინდს ევროპის სახალხო პარტია ქმნის. ეს პარტია ნაციონალებს კრუხივით ჰყავს გადაფარებული. მათი წყალობით ლამისაა მერაბიშვილის და უგულავას ხატი დაიწეროს. ამ დროს „ოცნება“ მოღალატეებით არის სავსე.

- “ქართული ოცნების“ შიგნით მოღალატეები არიან?

- კაცი ყველა პარტიას რომ მოივლის, მოღალატეა, აბა რა არის? ერთი და ორი პარტია რომ გამოიცვალა, „ქართულ ოცნებას“ რატომ ვერ უღალატებს ვითომ? იმედია, კარგად გადახედავენ საკუთარ შემადგენლობას და საეჭვო ხალხისგან გათავისუფლდებიან. წინააღმდეგ შემთხვევაში, ხელისუფლება თუ შეიცვალა, პასტას ვერ გააგდებინებს მათ პროკურატურა. ნაციონალებზე რომ ქილიკობენ, ურჩევნიათ, თავიანთი გუნდის წევრების ერთგულებას მიხედონ. ისიც უნდა იცოდნენ, რომ პარტიაში ყველას შეშვება არ შეიძლება. პარტია დასავაჟკაცებელი დაწესებულება არაა, რომ ყველა გამოუცდელი აქ მიიღონ. თუ არ უნდათ ამ რჩევების გათვალისწინება, მაშინ გამსახურდიას და შევარდნაძის ხელისუფლების ბედს გაიზიარებენ.

„ახალი თაობა“, 05 ივლისი, 2016 წელი

ინტერვიუ ნანა კაკაბაძესთან: „სულხან მოლაშვილს მიხეილ სააკაშვილის კორუფცია ჰქონდა გამოძიებული”

სულხან მოლაშვილს დღეს უკანასკნელ გზაზე გააცილებს ქართველი ხალხი. საზოგადოებისთვის კარგად ცნობილმა სახეებმა პეტიცია გამოაქვეყნეს და ხელმოწერებს აგროვებენ. ისინი სულხან მოლაშვილის მწამებლების დასჯას მოითხოვენ. აღნიშნული პეტიციის ერთ-ერთი ავტორი და ხელმომწერი უფლებადამცველი ნანა კაკაბაძეა, რომელიც „ახალი თაობის“ კითხვებს პასუხობს.

- ქალბატონო ნანა, პეტიციას ერთ-ერთმა პირველმა მოაწერეთ ხელი. რამდენად გაქვთ იმედი, რომ ხელისუფლება მოუსმენს საზოგადოებას და დამნაშავეები რეალურად დაისჯებიან?

- სულხან მოლაშვილი შეეწირა ღირსებას და შეეწირა იმას, რომ მან ვერ გადააბიჯა იმ ადამიანურ, ელემენტარულად კაცურ ღირსებს, რომლებიც, როგორც მოქალაქეს და როგორც პიროვნებას გააჩნდა. ის დააპატიმრეს მხოლოდ იმის გამო, რომ მას ჰქონდა, როგორც კონტროლის პალატის იმდროინდელ თავმჯდომარეს, დასკვნა დადებული მიხეილ სააკაშვილის კორუფციის შესახებ.

- რა მასალებს ფლობდა?

- მას ჰქონდა გამოძიებული ის, რომ ნაციონალური მოძრაობა რევოლუციას გეგმავდა და ამ რევოლუციას აფინანსებდა სახელმწიფო ბიუჯეტიდან და როგორც კი ნაციონალურმა მოძრაობამ მოახდინა რევოლუცია და გადატრიალება, მაშინვე დააპატიმრეს ადამიანი, რომელსაც ამაზე სერიოზული მტკიცებულებები ჰქონდა. სულხან მოლაშვილის კონტროლის პალატის თავმჯდომარეობის პერიოდში, მიუხედავად იმისა, რომ ის იყო ხელისუფლებაში, ხოლო სააკაშვილი იყო „ოპოზიციაში“, ვერ მოხერხდა ის, რომ პროკურატურას აღეძრა სისხლის სამართლის საქმე და დაეწყო გამოძიება კონტროლის პალატის მიერ დადებულ ამ მძიმე დასკვნაზე.

- ამით რისი თქმა გსურთ?

- ეს თავისთავად იმაზე მეტყველებს, რომ უკვე რევოლუციამდე რეალურ ძალაუფლებას ფლობდა ის ბოროტი ძალა, რომელმაც სულხან მოლაშვილი აწამა და მისი სიკვდილიც ამ წამების შედეგად დადგა.

- როგორია თქვენი მოთხოვნა დღეს?

- დღეს ჩვენ მოვითხოვთ იმ დამნაშავეების დასჯას, რომლებმაც უშუალოდ აწამეს სულხან მოლაშვილი, რომლებმაც დაუკვეთეს სულხან მოლაშვილის წამება და მთლიანად ვინც შექმნა სისტემა, სადაც ქვეყნის მართვა დაფუძნებული იყო წამებაზე, ღირსების შემლახავ მოპყრობაზე და ეს იყო ნაციონალური მოძრაობის პოლიტიკის ნაწილი!

- სამართლიანობის აღდგენას 2012 წლის შემდეგ მოითხოვთ, თუმცა მხოლოდ თითო-ოროლა თუ მოხვდა ციხეში. რამდენად გაქვთ ახლა სამართლიანობის აღდგენის და დამნაშავეების დასჯის იმედი?

- ეს ყველაფერი მაინც საზოგადოებაზეა დამოკიდებული. არასოდეს უნდა ვფიქრობდეთ, რომ ოდესმე იქნება ისეთი იდეალური ხელისუფლება, რომელიც ჩვენს სურვილებს და თუნდაც საკუთარ ვალდებულებებს თავისი ნებით აღასრულებს. საზოგადოება უნდა იყოს იმ სიმაღლეზე, რომ ხელისუფლება გრძნობდეს, ასეთი რაღაცები არ ეპატიება.

- მაინც რა არ ეპატიება?

- არ ეპატიება ის, რომ დღეს ის შევიდა კოაბიტაციაში დანაშაულებრივ რეჟიმთან და ნაცვლად იმისა, რომ აღედგინა დაზარალებული ადამიანების, რეჟიმის დროს მოკლული, დასახიჩრებული თუ ქონებაწართმეული ადამიანების უფლებები, მან თავისი კომფორტული მდგომარეობისთვის აირჩია არა სამართლიანობის აღდგენა, არამედ კოაბიტაცია. დღეს საზოგადოების ბრალია ის, რომ არ არიან ეს ადამიანები დასჯილი!

- საზოგადოება არ დგას თავის სიმაღლეზე და არ არის აქტიური?

- რა თქმა უნდა! სანამ არ იქნება ქვეყანაში სამართლიანობა, მანამ არ იქნება აქ კეთილდღეობა და მშვიდობა და ჩვენი ქვეყანა ვერ განვითარდება. სწორედ ეს არის ამ პეტიციის მიზანიც, თორემ ამით სულხან მოლაშვილს აღარაფერი ეშველება, დაისჯებიან მისი მკვლელები თუ არ დაისჯებიან, მას აღარაფერი ეშველება.

- კიდევ რა არის მოტივი ამ ხელმოწერების შეგროვების?

- ეს არის მესიჯი ხელისუფლებისთვის, რომ მან უნდა გადადგას ეს ნაბიჯები! თუ არადა წინ არის არჩევნები და ქართველი საზოგადოება, ცხადია, არ დაუშვებს ნაციონალების ხელისუფლებაში მობრუნებას, მაგრამ ასეთ უნიათო ხელისუფლებასაც, რომელმაც დღემდე პასუხი არ მიაგო ნაციონალურ მოძრაობას, არ მისცემს ხმას!

- ულტიმატუმს უყენებთ ხელისუფლებას?

- დღეს ხელისუფლებამ უნდა აირჩიოს: ან შეინარჩუნოს ხელისუფლება და მომავალი ოთხი წელი კიდევ მართოს ქვეყანა და ან ნაციონალურ მოძრაობასთან ერთად დატოვოს პოლიტიკა და წავიდეს ქართული პოლიტიკიდან! მესამე არჩევანი „ქართულ ოცნებას” არ ექნება!  დღეს საზოგადოება უნდა იყოს კონსოლიდირებული, იმიტომ, რომ სულხან მოლაშვილმა მართლაც აჩვენა გმირობის, ვაჟკაცობის და ღირსების მაგალითი ქვეყანას! თუ როგორი უნდა იყოს ნამდვილი მოქალაქე! მან ხელი არ მოაწერა ცრუ ჩვენებებს. მან არავის დააბრალა დანაშაული, რასაც მისგან მოითხოვდა ის ხელისუფლება და სულხანი წავიდა სიკვდილზე!

- მიუხედავად იმისა, რომ უმძიმეს მდგომარეობაში გამოვიდა ციხიდან სულხან მოლაშვილი, მას ბრძოლა არ შეუწყვეტია და აგროვებდა მასალებს და საჯაროდ ლაპარაკობდა მის მწამებლებზე. დაინტერესდა ამ საქმით პროკურატურა? დაიკითხა სულხან მოლაშვილი?

- ის ამ საქმეზე დაკითხულ არ არის! მე ვიყავი მისი ამბის პირველი მოწმე, მე შევეხე მისი პირველი წამების კვალს, პირველი ემოცია და პირველი ინფორმაცია მე მივიღე იმასთან დაკავშირებით, თუ რა ხდებოდა მის თავს და რა დღეში ჩააგდეს სულხანი. მე არ ვარ დაკითხული. ოჯახის წევრები არ არიან დაკითხულნი. მხოლოდ ერთი კვირის წინ დაიკითხა მაია ნიკოლეიშვილი, ექსპერტი. დიდი მადლობა მაიას, მართლაც გმირობა იყო მისი მხრიდან, მაშინ, როდესაც ის დათანხმდა, შევიდა და გადაიღო ეს ყველაფერი. ოთხი წელია, ეს ხელისუფლება მოსულია და ჯერ კიდევ დათარეშობენ ეს მკვლელები და ისევ ხელისუფლებაში მოსვლას გეგმავენ. კარგით, ხელისუფლება როგორიც არის ისეთია, მაგრამ საზოგადოება სად არის?!

- რა უნდა ქნას საზოგადოებამ?

- როგორ შეიძლება ნორმალურმა და ჯანმრთელმა საზოგადოებამ დაუშვას ის, რაც დღეს საქართველოში ხდება! სად არის დღეს ქართველი ხალხი, როდესაც ნაციონალური მოძრაობის თვალსაჩინო წარმომადგენლის გიგი წერეთლის კანდიდატურას ეუთო აყენებს მაღალ თანამდებობაზე?!

- რა გააკეთოს ამ დროს ქართველმა ხალხმა?

- რატომ არ დგას ეუთოსთან და რატომ არ ეუბნება, რომ ეს არის ქართველი ხალხისთვის სულში ჩაფურთხება და როგორ ბედავთ თქვენ ამის გაკეთებას! ჩვენ ხალხი ვართ თუ ვინა ვართ?! უნდა გამოვფხიზლდეთ და მივხვდეთ, რომ ჩვენ უნდა შევქმნათ ამ ქვეყანაში თავისუფლებაც, დემოკრატიაც და ღირსეული საზოგადოებაც! დღეს ჩვენ გვყავს ზუსტად ისეთი ხელისუფლება, როგორი საზოგადოებაც ვართ! თუ ხელისუფლებაზე გვაქვს პრეტენზია, ვკითხოთ საკუთარ თავს – განა უკეთეს ხელისუფლებას ვიმსახურებთ?!

„ახალი თაობა“, 05 ივლისი, 2016 წელი

ინტერვიუ კახა კუკავასთან: „ეს ხელისუფლება სულხან მოლაშვილის მწამებლებს არ დასჯის” // „სამართლიანობის აღდგენა 8 ოქტომბრის შემდეგაა შესაძლებელი“ // „თუ ხელისუფლება არ დასჯერდება თავის 25%-ს, ის ძალაუფლებას დიდხანს ვერ შეინარჩუნებს”

საზოგადოების წარმომადგენლები აგროვებენ ხელმოწერებს პეტიციაზე იმ პირების დასასჯელად, რომლებიც სააკაშვილის მმართველობის დროს მონაწილეობდნენ სულხან მოლაშვილის წამებასა და სხვა დანაშაულებში მის მიმართ.

საქართველოს პატრიოტთა ალიანსი-გაერთიანებული ოპოზიციის წარმომადგენელი, თავისუფალი საქართველოს ლიდერი კახა კუკავა „ახალ თაობასთან“ ინტერვიუში აცხადებს, რომ ეს შრომა ამაოა: „ამ ხელმოწერების შეგროვებას აზრი არ აქვს იმ პირობებში, როცა სასამართლო ხელისუფლების ერთ-ერთი მთავარი პირი ლევან მურუსიძეა. ლევან მურუსიძე სულხან მოლაშვილის საქმის მოსამართლე იყო. მურუსიძე ბევრ რამეშია მხილებული, მაგრამ ის ისევ ერთ-ერთი ხელმძღვანელი პირია სასამართლოში და ბიძინა ივანიშვილის ფავორიტი. არჩევნებამდე არც სულხან მოლაშვილის საქმეს გადახედავენ და არც სხვა საქმეებზე აღდგება სამართლიანობა. ეს ამოცანა დღის წესრიგში იქნება საპარლამენტო არჩევნების შემდეგ“, – ამბობს კახა კუკავა..

- ამით იმის თქმა ხომ არ გინდათ, რომ არჩევნების შემდეგ ხელისუფლება შეიცვლება? გაერთიანებულ ოპოზიციას უმრავლესობაში მოსვლის შანსი გაქვთ?

- ხელისუფლებაშიც რომ არ მოვიდეთ, მაინც ბევრ რამეს შევცვლით. ჩვენ სოლიდური წარმომადგენლობაც რომ გვქონდეს პარლამენტში, გულხელდაკრეფილი არ ვისხდებით. როცა საპარლამენტო ოპოზიციაში ვიყავით მე და ჩემი მეგობრები, პარლამენტში გირგვლიანის სახელი მუდმივად ისმოდა. ჩვენ მუდმივად ვაყენებდით სხვა პრობლემებსაც და ნაციონალურ მოძრაობას დიდ დისკომფორტს ვუქმნიდით.

- თავისუფალი საქართველო „ქართულ ოცნებასაც“ უქმნიდა დისკომფორტს...

- მართალია. თითქმის ერთადერთი ძალა ვიყავით, რომელიც ხალხს აფხიზლებდა. სხვა საკითხებთან ერთად, კოაბიტაციის წინააღმდეგაც გამოვდიოდით. ამ პროცესის მიმართ ყოველთვის სკეპტიკურად ვიყავით განწყობილი.

- კოაბიტაცია ხალხის დიდ ნაწილს არ მოსწონდა...

- საზოგადოება მაშინ ისე იყო გაბრუებული და ეგზალტირებული, რომ “ქართულ ოცნებას“ საერთოდ არ აკრიტიკებდა. ჩვენ ყველას ვაფრთხილებდით, მაგრამ ჩვენი გაფრთხილებები არ შეისმინეს. ახლა, 4 წლისთავზე მიხვდნენ, რომ კოაბიტაცია დიდი შეცდომა იყო და „ქართულმა ოცნებამ“ სხვა შეცდომებიც დაუშვა. ჩვენ თუ გვეყოლება პარლამენტში სოლიდური წარმომადგენლობა, სასამართლო ხელისუფლებაში და სხვა შტოებში აღარ იქნებიან მურუსიძის მსგავსი ადამიანები. მაშინ მანანა კობახიძე და ეკა ბესელია, რომლებმაც მხარი დაუჭირეს მურუსიძეს, უფრო მოკრძალებულად მოიქცევიან.

- რამდენიმე თვის წინ თითქმის ყველა თანხმდებოდა იმაზე, რომ მომავალ პარლამენტში უმრავლესობით ვერავინ მოვა. ახლა ბევრი ალაპარაკდა იმაზე, რომ „ქართული ოცნება“ დიდი უმრავლესობით იმარჯვებს...

- თქვენ კარგად გახსოვთ 2003 წლისა და 2012 წლის მოვლენები. პირველ შემთხვევაში შევარდნაძე ებღაუჭებოდა ხელისუფლებას, მეორე შემთხვევაში – მიხეილ სააკაშვილი. ახლა ამ როლშია „ქართული ოცნება“. ავტორიტარული გამოვლინებები ერთნაირად მთავრდება ხოლმე. 2008 წელს სააკაშვილს რომ ეღიარებინა წაგება საპრეზიდენტო არჩევნებში, ის ახლა ოდესაში კი არა, საქართველოში იქნებოდა. ჯობია, „ქართულმა ოცნებამ“ ალალად შეირგოს თავისი 25% და გადავიდეს ოპოზიციაში.

- რა იქნება მაშინ, თუ „ქართული ოცნება“ მეტს მოინდომებს?

- მაშინ ის ძალაუფლებას დაკარგავს. შეიძლება ერთი ან ორი წელიწადი გაძლოს, მაგრამ მერე კრახი ელის.

- კრახს ხელისუფლებას ნაციონალური მოძრაობაც უწინასწარმეტყველებს. ნაციონალები არჩევნების შემდეგ გამოსვლებს გეგმავენ...

_ ნაციონალური მოძრაობა მაოხრებელი მკვდრის როლშია. ის ხელს უშლის სახელმწიფოს განვითარებას. მართალია, ის სუსტია და ამ ხელისუფლებას ბევრი ვერაფერი დააკლო, მაგრამ ხელისუფლების ხელშეწყობით სხვა ოპოზიციის ფონზე ის ძლიერ ძალად ჩანდა. წინა არჩევნები ორ ფერში მიმდინარეობდა.

- წლევანდელი არჩევნები არ ჩატარდება ორ ფერში?

- გაერთიანებული ოპოზიცია ამას არ დავუშვებთ. ჩვენ უკან ჩამოვიტოვებთ ნაციონალურ მოძრაობას. ეს შეცვლის ძალთა ბალანსს და სიტუაციას ქვეყანაში. ოპოზიციის მიმართ მოსახლეობის დამოკიდებულება შეიცვლება. გაერთიანებულ ოპოზიციაში ხალხი პროგრესს დაინახავს.

- ახალ რეალობაში ნაცმოძრაობის ცნობილი გეგმებიც შეიცვლება?

- ნაციონალურ მოძრაობას ხავერდოვანი რევოლუციის მოწყობისთვის საზოგადოების მხარდაჭერა არ გააჩნია, თუმცა, აქვს საერთაშორისო მხარდაჭერა. ნაცმოძრაობას რაიმეს მოსაწყობად ხელისუფლების ხელშეწყობა დასჭირდება. ასე იყო 2003 წელს. ამის ნიშნები ახლაც არსებობს. კორცხელის ინციდენტის დროს ნაცმოძრაობა ვერანაირ პროვოკაციას ვერ მოაწყობდა „ქართული ოცნების“ გარეშე. კალაძის ზონდერების გარეშე იქ ვერაფერი მოხდებოდა. ასეთი მოვლენებისგან დაზღვეული არ ვართ. ხელისუფლება შეიძლება ნებსით ან უნებლიეთ ჩაერთოს გარკვეულ მოვლენებში.

- თქვენი ბლოკის შექმნამდე პრემიერმა და „ქართული ოცნების“ თავმჯდომარემ გიორგი კვირიკაშვილმა განაცხადა, რომ მისი პარტია არ ითანამშრომლებს ირმა ინაშვილისა და ნინო ბურჯანაძის პარტიებთან. თქვენ ახლა ინაშვილის პარტიასთან ხართ...

- გიორგი კვირიკაშვილი ღიად თანამშრომლობს ნაციონალურ მოძრაობასთან. პირადად კვირიკაშვილის კადრია „ქართული ოცნების“ პოლიტსაბჭოს წევრი დავით კოღუაშვილი, რომელმაც საჯაროდ განაცხადა, რომ მერაბიშვილი და უგულავა თანამდებობებზეც კი შეიძლება იყვნენ. გიორგი კვირიკაშვილი ნაცმოძრაობის მმართველობის დროსაც ლოიალურად იყო განწყობილი ნაციონალების მიმართ. იგი ახლაც ისურვებდა, რომ პარლამენტში მეორე ადგილი ნაციონალურ მოძრაობას ჰქონდეს. სწორედ ასეთი ლობისტები შეიძლება დაეხმარონ ნაციონალურ მოძრაობას.

„ახალი თაობა“, 05 ივლისი, 2016 წელი

ინტერვიუ ვახტანგ მაისაიასთან: „ლაფანყურის ოპერაციის გამოძიება დასრულებულია“ // „მიხეილ სააკაშვილმა საკუთარი თავი ამხილა”

ექსპერტი სამხედრო-პოლიტიკურ და უსაფრთხოების საკითხებში ვახტანგ მაისაია „ახალ თაობას“ თურქეთში რამდენიმე დღის წინ მომხდარ ტერაქტებთან დაკავშირებულ ახმედ ჩატაევზე, ტერორიზმთან დაკავშირებულ სააკაშვილზე, მის აღიარებით ჩვენებაზე პირდაპირ ეთერში ლაფანყურის ოპერაციასთან დაკავშირებით და ლაფანყურის საგამოძიებო საქმის დასრულებაზე ესაუბრება.

- ბატონო ვახტანგ, ახმედ ჩატაევს თურქეთის ტერაქტებთან ოფიციალურად არ აკავშირებენ, თუმცა, ამაზე ჩვენთან მისი გათავისუფლების საკითხზე დებატები იმართება. თქვენ თუ გაქვთ ინფორმაცია ჩატაევის ფაქტორზე?

- აჰმედ ჩატაევს უკვე ოფიციალურადაც აკავშირებენ თურქეთში მომხდარ ტერაქტთან – ამერიკის კონგრესის უსაფრთხოების კომიტეტის თავმჯდომარემ აჰმედ ჩატაევის ტერაქტში მონაწილეობის საკითხი წამოწია და დაადასტურა.

- თურმე მიხეილ სააკაშვილის პირადი აგენტი ყოფილა…

- ირაკლი სესიაშვილმა განაცხადა, რომ ის საქართველოს სპეცსამსახურებთან თანამშრომლობდა. 2009 წელს სააკაშვილი დაადგა ტერორისტებთან თანამშრომლობის პოლიტიკას. მან დაიწყო მჭიდრო თანამშრომლობა „კავკასიის იმამატთან“, რომელიც ამერიკის სახელმწიფომ საშიში ორგანიზაციების სიაში შეიყვანა. ფაქტობრივად, მიხეილ სააკაშვილი დაადგა პოლიტიკას, რომელსაც ჰქვია ტერორიზმის სახელმწიფო მხარდაჭერის პოლიტიკა. სააკაშვილი ტერორისტებთან თანამშრომლობის პოლიტიკას ახორციელებდა რუსეთის წინააღმდეგ ბრძოლის საბაბით. ის ჩართული იყო მაღალი დონის კორუფციულ სქემებში. მიხეილ სააკაშვილი იღებდა დიდ თანხებს იმ სპონსორებისგან, რომლებიც ეხმარებოდნენ „კავკასიურ იმამატს“.

- მიხეილ სააკაშვილი ტერორისტებთან თანამშრომლობდა?

- მიხეილ სააკაშვილი „კავკასიურ იმამატს“ იყენებდა, როგორც საკუთარ საშინაო, ასევე საგარეო მიზნების მისაღწევად. ლაფანყურის ოპერაცია არის ამგვარი პოლიტიკის ყველაზე ნათელი დადასტურება. აჰმედ ჩატაევი, ფაქტობრივად, იყო „კავკასიური იმამატის“ შუამავალი და წარმომადგენელი საქართველოში. იგივე ფუნქციას ასრულებდა ალი დუბაევი, რომელიც, ფაქტობრივად, მონაწილეობდა ლაფანყურის ოპერაციის განხორციელებაში, რომელიც შემდეგ თურქებმა გამოავლინეს, როგორც რუსეთის სპეცსამსახურების აგენტი და სამუდამო პატიმრობა მიუსაჯეს. რთულია საუბარი, რომ ახმედ ჩატაევიც რუსეთის სპეცსამსახურების აგენტი გახლდათ. წარმოიდგინეთ, მიხეილ სააკაშვილმა ჩაატარა სპეცოპერაცია, რომლის მთავარი მიზანი იყო საქართველოში ახმედ ჩატაევის ჩამოყვანა და მისი ჩართვა ტერორიზმის სახელმწიფო მხარდაჭერის პოლიტიკის რეალიზაციაში. ფაქტობრივად, მიხეილ სააკაშვილი დადანაშაულებულ იქნა ტერორიზმის მხარდაჭერაში.

- აჰმედ ჩატაევთან დაკავშირებით მიხეილ სააკაშვილის განცხადებებს როგორ აფასებთ?

- მიხეილ სააკაშვილმა გააკეთა სენსაციური განცხადება. მან, ფაქტობრივად, სრულად დაადასტურა დასკვნა, რომელიც ლაფანყურის ოპერაციასთან დაკავშირებით ჩვენმა კომისიამ დადო. ადრე სააკაშვილი ამბობდა, რომ ეს ჯგუფი გადმოდიოდა საქართველოში, ორი დღის წინ კი განაცხადა, რომ თურმე ეს ჯგუფი მართლა საქართველოდან გადადიოდა რუსეთში. სააკაშვილმა საკუთარი თავი ტყუილში გამოიჭირა.

- მიხეილ სააკაშვილი რუსეთთან შეთანხმებით ხომ არ მოქმედებდა ლაფანყურთან დაკავშირებით?

- რუსეთის სპეცსამსახურების მონაწილეობა რომ იყოს, გასაკვირი არ არის. ამ ჯგუფში რუსეთის სპეცსამსახურების ორი აგენტი იყო. ამ ჯგუფის ხელმძღვანელობას ახორციელებდა რუსეთის სპეცსამსახურების დღეს უკვე გაშიფრული აგენტი. აქ მე ვისაუბრებ ვანო მერაბიშვილის ფაქტორზეც. მისი კავშირები ბელარუსისა და რუსეთის სპეცსამსახურებთან საკმაოდ საინტერესო კუთხით უნდა განვიხილოთ. აღნიშნული ჯგუფი გაანადგურეს. ამ ჯგუფის გადარჩენილი წევრები გადაიყვანეს თურქეთის ტერიტორიაზე. მათ შორის, ზონი დუბაევი, რომელიც გადაიყვანეს საქართველოს სპეცსამსახურების წარმომადგენლებმა. იქ იყო კიდევ ხუთი ტყვედჩავარდნილი ჯიჰადისტი – ამ რაზმის წევრი და ასევე გადაიყვანეს თურქეთის ტერიტორიაზე. მოგვიანებით ისინი აღმოჩნდნენ ისლამური სახელმწიფოს რიგებში. ისინი შემდეგ შეუერთდნენ „კავკასიური ისლამური იმამატის“ სირიის ჯგუფს.

- მიხეილ სააკაშვილის განცხადებები რას ადასტურებს?

_ ფაქტობრივად, მიხეილ სააკაშვილმა თავისი პირით დაადასტურა, რომ ის ოფიციალურად მონაწილეობდა ტერორიზმის ხელშემწყობი და მხარდამჭერი პოლიტიკის განხორციელებაში. სააკაშვილმა საკუთარი თავის წინააღმდეგ მისცა ჩვენება. სააკაშვილმა უარყო მისი პრეზიდენტობის დროს გამოთქმული ვერსია, რომ ის შეიარაღებული რაზმი გადმოდიოდა რუსეთიდან საქართველოში. მან თქვა, რომ რაზმი საქართველოდან რუსეთში გადადიოდა. ეჭვი მეპარება, რომ მიხეილ სააკაშვილი სინდისმა შეაწუხა. თუმცა, ფაქტობრივად, დაადასტურა, რომ მან მონაწილეობა მიიღო ახალგაზრდების დახოცვაში, რომლებიც მოტყუებით იქნენ ჩართული ამ ოპერაციაში. ამ განცხადებების საფუძველზე შეგვიძლია ვთქვათ, რომ ლაფანყურის ოპერაციის გამოძიება, ფაქტობრივად, დასრულებულია. სააკაშვილმა დაადასტურა, რომ ის და მისი სპეცსამსახურები უშუალოდ მონაწილეობდნენ ამ ოპერაციის დაგეგმვაში.

- მათი დახოცვის ბრძანება ვინ გასცა?

- სავარაუდოდ, სააკაშვილმა გასცა ბრძანება ამ ჯგუფის განადგურების შესახებ. მან ეს აღიარა. ამიტომ ლაფანყურის ოპერაციის გამოძიება დასრულებულია. გამოვიდა ერთ-ერთი მთავარი ფიგურანტი გია ლორთქიფანიძე და ასევე დაადასტურა მისი უშუალო მონაწილეობა ამ საქმეში. მე მქონდა ეჭვი, რომ ის იყო მთავარი სუბიექტი. გია ლორთქიფანიძემ მისცა ვრცელი ინტერვიუ ამერიკულ გამოცემას, სადაც დაადასტურა, რომ ჩატაევი იყო მისი აგენტი და ჩატაევთან ჰქონდა უშუალო ურთიერთობები.

- რამდენად სწორი იყო ჩატაევის გაშვება?

- ჩატაევმა ბევრი რამ იცოდა. მისი გაშვება მაშინდელი ხელისუფლებისთვის საშიში იყო და ის დააპატიმრა. ჩატაევს ბრალად დასდეს არა ამ ოპერაციაში მონაწილეობა, არამედ იარაღის უკანონო ტარება და გაასამართლეს. ეს იყო შეკერილი საქმე, როგორც სხვა შეკერილი საქმეები.

- რატომ?

- რუსეთმა მოიტყუა, რომ ჩატაევი შეუერთდა რაზმს და მაშინ დაჭრეს. სინამდვილეში ჩატაევი დაჭრეს მოლაპარაკების დროს, როდესაც ის ესაუბრებოდა ლოპოტაში ალყაშემორტყმული რაზმის წარმომადგენლებს. სპეცსამსახურის წარმომადგენელმა ზელიმხან ხანგოშვილმა დაჭრა ამ მოლაპარაკების დროს. შემდეგ, ფაქტობრივად, დაიწყო ბრძოლა საქართველოს სპეცსამსახურებსა და შეიარაღებულ ნაწილებს შორის. ასევე იკვეთება ჩვენი სამხედროების საეჭვო მონაწილეობა. როგორც ჩანს, მათ ბევრი რამ იცოდნენ. ამასთან დაკავშირებით ჩვენმა კომისიამ საინტერესო ფაქტები დადო. ძალიან საეჭვო ვითარებაში მოხდა მათი ლიკვიდაცია. ეს უფრო მოწმეების თავიდან მოშორების სპეციალურად დაგეგმილ ოპერაციას ჰგავდა. აჰმედ ჩატაევი იმ რაზმთან მოსალაპარაკებლად მივიდა უიარაღოდ, საქმეში ჩაწერეს, თითქოს ორი ლიმონკა ჰქონდა. ლიმონკა ჩაუდეს სააკაშვილის სპეცსამსახურებმა, რომ ჩატაევი ციხეში ჰყოლოდათ. არის ინფორმაცია, რომ შეეცადნენ ჩატაევი ციხეში მოეწამლათ. მიხეილ სააკაშვილის წარმომადგენლები აპირებდნენ მის ლიკვიდაციასაც. ახლა გამოვიდა კახიძე, რომელიც იყო ჯალათი.

- იუსტიციის ყოფილი მოადგილე?

- ფაქტობრივად, ის არის მკვლელი და ჯალათი, როგორც მერაბიშვილი. კახიძემ გახსნა ლოპოტის ოპერაციის დეტალები. მან თქვა, რომ სპეცსამსახურებს შეეძლოთ მოეკლათ და მიეგდოთ და ანალოგიური გვამი იქნებოდაო. არ გამოვრიცხავ, კახიძეც მონაწილეობდა ამ ოპერაციაში. მისი საუბრიდან ეს დასკვნა გამოვიტანე, რადგან ის იყო ადეიშვილის მოადგილე. ეტყობა, ჩატაევისგან ინფორმაციების მიღება და მერე მოკვლა უნდოდათ. ახალ ხელისუფლებას დახვდა ჩატაევი მხოლოდ იარაღის ბრალდებით ბრალდებული.

- თანაც დიდი საზოგადოებრივი ზეწოლა იყო ჩატაევის გათავისუფლების მოთხოვნით...

- ის საკმაოდ მძიმე მდგომარეობაში იყო და მოითხოვდა სერიოზულ მკურნალობას. ასევე არ არსებობდა მტკიცებულებები, რომელიც რაიმე ფორმით მის მონაწილეობას დაადასტურებდა. შემდეგ გამოირკვა, რომ ჩატაევი იყო `კავკასიური იმამატის~ წარმომადგენელი. მნიშვნელოვანია ისიც, რომ ახალი ხელისუფლების პირობებში გამოძიება დაავალეს ვალერი ზუმბაძესა და ლადო დათაშვილს, რომლებიც იყვნენ საქართველოს კონტრდაზვერვის დეპარტამენტის მთავარი ჯალათები და ასევე მონაწილეობდნენ ლოპოტის ოპერაციაში.

- ამერიკამ არ იცოდა, რომ მიხეილ სააკაშვილი ტერორიზმის ხელშემწყობ პოლიტიკას ადგა?

- იცოდა და ამიტომ ამერიკის ადმინისტრაციამ კავშირი გაწყვიტა მიხეილ სააკაშვილთან, ანუ ოფიციალური შეხვედრები არ ტარდებოდა. ობამა დემონსტრაციულად არ ხვდებოდა მიხეილ სააკაშვილს, რამაც დიდი როლი ითამაშა მიხეილ სააკაშვილის მშვიდობიანი გაძევების საქმეში.

„ახალი თაობა“, 05 ივლისი, 2016 წელი

ინტერვიუ გია ვოლსკისთან: „აჰმედ ჩატაევი მიხეილ სააკაშვილის ბრიგადაში აღმოჩნდა” // „ლევან ვარშალომიძის გამოჩენა არათუ პოზიტიურს, ნეგატიურსაც კი არ უკავშირდება“

„ქართული ოცნების” ერთ-ერთი ლიდერი, პარლამენტის ფრაქცია „ქართული ოცნების“ თავმჯდომარე გია ვოლსკი „ახალ თაობასთან” ინტერვიუში მიმდინარე პოლიტიკურ პროცესებზე საუბრობს.

- ბატონო გია, ნაციონალური მოძრაობა აცხადებს, რომ ჩატაევის ციხიდან განთავისუფლება არის მოქმედი ხელისუფლების ბრალი. რას უპასუხებთ თქვენს ოპონენტებს და რეალურად რატომ მოხდა მისი განთავისუფლება?

- იმიტომ, რომ რეალურად დანაშაულებრივი ქმედების ნიშნები არ იყო აღმოჩენილი. დანაშაულში მისი მონაწილეობა არ დადასტურდა. შეიძლება ნებისმიერი ადამიანი დღეს არ იყოს დამნაშავე და ხვალ აღმოჩნდეს დამნაშავე, მაგრამ ეს იმას არ ნიშნავს, რომ ის გუშინ უნდა დაიჭირო, როცა დანაშაული არ ჩაუდენია. ჩვენ დღესაც არ ვიცით გარკვევითა და დადასტურებით, რომ ჩატაევი მონაწილეობდა ან ორგანიზება მოახდინა თურქეთის ტერაქტის. რაც შეეხება თქვენს კითხვას, რატომ გათავისუფლდა, მე როგორც ვიცი, სასამართლომ მიიღო გადაწყვეტილება, რადგან ვერ აღმოაჩინა დანაშაულების ნიშნები, პატიმარი გაეთავისუფლებინა. წინააღმდეგ შემთხვევაში ის შეიძლება უკანონო პატიმარი ყოფილიყო, ამიტომ იქნა მიღებული გადაწყვეტილება, რამდენადაც მე ვხვდები.

- ხელისუფლების წარმომადგენლები აცხადებენ, რომ აჰმედ ჩატაევი მიხეილ სააკაშვილის ხელისუფლებას ემსახურებოდა და მისგან დავალებებსაც იღებდა…

- ფაქტია, რომ აჰმედ ჩატაევი წინა ხელისუფლებას ემსახურებოდა. ასევე ფაქტია, რომ რაღაც საგანგებო დავალებებს ასრულებდა. ფაქტია, რომ დაიჭრა და ხელთან ერთად ფეხიც დაკარგა. ასევე ფაქტია, რომ ავსტრიამ მას პოლიტიკური თავშესაფარი მიანიჭა, შესაძლოა ამ პოლიტიკურმა კონიუნქტურამაც იმოქმედა იმდროინდელი პროკურატურის გადაწყვეტილებაზე. ეს საკითხი შესწავლას მოითხოვს და თუ ვინმეს დამატებითი ინფორმაცია ან მასალები აქვს, მან ეს დაუყოვნებლივ უნდა მიაწოდოს პროკურატურას, ამაში ვეთანხმები თეა წულუკიანს. ჩატაევის საკითხთან დაკავშირებით უფრო მეტი ინფორმაციაა მისაღები, უფრო მეტი სამუშაოა ჩასატარებელი, რომ მისი საქმიანობა კონკრეტულ დანაშაულს დაუკავშირდეს. შეიძლება იმაში, რომ ხელისუფლებასთან თანამშრომლობდა, კრიმინალური საქმიანობა არ იკვეთებოდეს. ფაქტია, რომ ჩატაევი არის ადამიანი, რომელიც წინა ხელისუფლებისთვის მუშაობდა. ასევე ფაქტია ისიც, რომ ჩატაევი რუსეთსაც ჰყავდა დაკავებული, უკრაინასაც და საბოლოოდ სააკაშვილის ბრიგადაში აღმოჩნდა.

- აჰმედ ჩატაევის გაშვება იყო შეცდომა?

- გამოძიებას, როგორც ჩანს, არ ჰქონდა საკმარისი მტკიცებულება, რომ ჩატაევის ბრალეულობა დაემტკიცებინა და ის კრიმინალში ემხილა. მე მეტი ინფორმაცია არ მაქვს ამ საკითხზე. შეიძლება მაშინ ავსტრიასაც ვკითხოთ, რატომ მიანიჭა პოლიტიკური თავშესაფარი? ან რატომ გაუშვა უკრაინამ? რატომ გაუშვა რუსეთმა? სააკაშვილი მოგვიწოდებს დღეს, რომ არ უნდა გამოგვეშვა ციხიდან, მაგრამ აქ არაფერი არ არის უცნაური, ეს სააკაშვილის სტილი და დამახასიათებელი ნიშან-თვისებაა. სააკაშვილი ნებისმიერ ადამიანს ჩასვამს ციხეში ისე, რომ არც კი აინტერესებს, დანაშაული აქვს ამ ადამიანს ჩადენილი თუ არ აქვს ჩადენილი.

- ბატონო გია, უნდა მოხდეს თუ არა სააკაშვილის დროინდელი ჩინოვნიკების, სპეცსამსახურის წარმომადგენლების დაკითხა აღნიშნულ საქმეზე? ლაფანყურის სპეცოპერაცია გამოძიებული არ არის და საზოგადოებამ დღესაც არ იცის, რეალურად რა მოხდა იქ...

- გეთანხმებით, თუ რა მოხდა ლაფანყურში, საზოგადოებამ ამის შესახებ არ იცის, მაგრამ მე დარწმუნებული ვარ, რომ გამოძიება ამას დაადგენს.

- რატომ ჭიანურდება გამოძიება, ეს ხომ არ იყო რიგითი საქმე?

- ბევრი ადამიანი, რომელსაც აქვს ინფორმაცია სწორედ ამ საკითხთან დაკავშირებით, ქვეყანაში არ იმყოფება და მიმალვაშია. თავად სააკაშვილიც ძალიან მნიშვნელოვანი მოწმეა, ყველაზე მეტი ინფორმაციის მატარებელია და ყველაზე მეტი ინფორმაციის მომწოდებელიც იქნებოდა, მაგრამ მას ამის სურვილი არ გააჩნია. პროკურატურას ცოტა გაუჭირდება, თუმცა, მე არ ვიცი, რა ეტაპზეა გამოძიება და რა დონეზე აქვს მათ ინფორმაცია მიღებული.

- ნაციონალური მოძრაობა 8 ოქტომბრის არჩევნებში გამარჯვებას აპირებს, როგორც ისინი აცხადებენ, ეს ლევან ვარშალომიძის საქართველოში დაბრუნებით დაიწყება. რა შანსები აქვს საპარლამენტო არჩევნებში ნაციონალურ მოძრაობას?

- საზოგადოების ნებისმიერ წარმომადგენელს, მათ შორის თქვენი გაზეთის რედაქციასაც შემიძლია დავპირდე, რომ ვარშალომიძეს შეუძლია მხოლოდ 300 ადამიანის გამოყვანა და აჟიოტაჟის მოწყობა, მას მეტი არაფერი შეუძლია. ლევან ვარშალომიძის პოლიტიკურ ავანსცენაზე გამოჩენა არათუ რაიმე პოზიტიურს, მე ვიტყოდი, ნეგატიურსაც კი არ უკავშირდება. ვარშალომიძის გამოჩენა არაფერს მოუტანს ნაციონალურ მოძრაობას. ის ყოველთვის იყო პიროვნება, რომელიც არაფრით გამოირჩეოდა მთელ მათ გუნდში.

- ისინი ამბობენ, რომ ის პროცესები, რომლებიც ლევან ვარშალომიძის გამოჩენას ახლდა, მათი გამარჯვების საწინდარია...

- ე.ი. ძალიან ცუდად ჰქონიათ საქმე. თუ ჰგონიათ, რომ ვარშალომიძის გამოჩენით გამარჯვებას მოიპოვებენ, გამოდის, არათუ ფლუსტრაციაში არიან, არამედ სერიოზული პრობლემა აქვთ რეალობის აღქმის.

- დღეს პოლიტიკურ ავანსცენაზე მხოლოდ ორი პარტიის „ქართული ოცნებისა“ და ნაციონალური მოძრაობის არსებობა რაზე მიანიშნებს, შეიძლება საზოგადოებამ იფიქროს, რომ თქვენ ერთმანეთი გაწყობთ?

- არა, ასე ნამდვილად არ არის. რატომ უნდა გვაწყობდეს ერთმანეთი ან ჩვენ რატომ უნდა გვაწყობდეს ნაციონალური მოძრაობა?! ასე ნამდვილად არ არის. ეს არის არჩევნების შედეგი. 2012 წლის საპარლამენტო არჩევნების შემდეგ გამოჩნდნენ პოლიტიკური ძალები, რომლებიც არიან პოლიტიკურ ავანსცენაზე და ისინი საკმაოდ აქტიურები არიან. მართალია, ეს ძალები თავის დროზე კოალიციის შემადგენლობაში იყვნენ, მაგრამ დღეს არიან, როგორც დამოუკიდებელი პოლიტიკური ძალები და ისინი ძალიან აქტიურები არიან.

- მაჟორიტარ კანდიდატებთან დაკავშირებით მინდა გკითხოთ, გასაგებია, რომ მათ ვინაობას დღეს არ გვეტყვით, მაგრამ თუ შეგიძლიათ გვითხრათ, ვისზე გაკეთდა აქცენტი, პროფესიონალებზე თუ ცნობად სახეებზე?

- რატომ არ გეტყვით, რომ ვიცოდე, აუცილებლად გეტყოდით. პროფესიონალიზმი, მაღალი კვალიფიკაცია არ არსებობს ცნობადობის გარეშე, ამდენად, ერთი მეორეს ნამდვილად არ გამორიცხავს.

———————

„რეზონანსი“, 05 ივლისი, 2016 წელი

ინტერვიუ ზურაბ აბაშიძესთან: «მოლაპარაკების შედეგად 7 მოქალაქე გავათავისუფლეთ”

თიკო ოსმანოვა

“რამდენიმე ჩვენი მოქალაქე კიდევ რჩება რუსეთის ციხეში, თუმცა ეს გაცილებით ნაკლებია, ვიდრე გათავისუფლდა. ძალიან სერიოზული სამუშაოა გაწეული, ზედმეტი ხმაურის, შოუების გარეშე”, – ამბობს “რეზონანსთან” საუბრისას რუსეთთან ურთიერთობის საკითხებში პრემიერ-მინისტრის სპეციალური წარმომადგენელი ზურაბ აბაშიძე. მას რუსეთის საგარეო საქმეთა მინისტრის მოადგილე გრიგორი კარასინთან მორიგი შეხვედრის დეტალებზე ვესაუბრეთ.

ზურაბ აბაშიძე: 2013 წელს, როდესაც დავიწყეთ აბაშიძე-კარასინის დიალოგი, შევთანხმდით, რომ ამ ფორმატში განგვეხილა პრაქტიკული საკითხები, როგორიც არის – სავაჭრო-ეკონომიკური თემები, სატრანსპორტო პრობლემატიკა, ტურიზმის ხელშეწყობა და გარკვეული ჰუმინიტარული საკითხები. ამ თემებზე ვსაუბრობთ მას შემდეგ, რაც დავიწყეთ დიალოგი. საკმაოდ დიდი სფეროებია, იმის გამო, რომ არ გვაქვს დიპლომატიური ურთიერთობა, საელჩოები, ერთი შეხვედრიდან მეორე შეხვედრამდე საკმაოდ ბევრი საკითხი გროვდება სხვადასხვა მასშტაბის – ზოგი ტექნიკური, ზოგი უფრო მსხვილი და ჩვენ ამ შეხვედრებზე ვცდილობთ, შეძლებისდაგვარად არსებული პრობლემური საკითხები მოვაგვაროთ. ეს არის არაფორმალური დიალოგი, ჩვენ რაღაც ოფიციალურ ვალდებულებებს არ ვიღებთ. დოკუმენტებს არ ვაფორმებთ, ასე რომ, ყველა ჩვენი შეთანხმება ჯენტლმენური ხასიათისაა.

- და ამ შეხვედრაზე კონკრეტულად რა საკითხები განიხილეთ?

- ამ მოლაპარაკების შედეგად 7 მოქალაქე გავათავისუფლეთ. მეშვიდე საქართველოში რამდენიმე დღის წინ დაბრუნდა. ისე, რომ რაღაც მემორანდუმები, დოკუმენტები არ გაფორმებულა. ამ ადამიანების გათავისუფლება, ჩემი აზრით, ძალიან კარგი საქმეა. სახელმწიფო უნდა ზრუნავდეს ასეთ ადამიანებზე. მათ მრავალწლიანი სასჯელი ჰქონდათ მისჯილი კიდევ ბევრი წელი მოუწევდათ საპყრობილეში ყოფნა.

- რუსეთის საგარეო უწყების განცხადებით, ამ ადამიანების გათავისუფლება ურთიერთგაცვლის საფუძველზე მოხდა. რა იგულისხმა ლავროვის უწყებამ?

- 2013 წელს ამნისტიის შედეგად რუსეთის რამდენიმე მოქალაქე გავათავისუფლეთ, მერე კიდევ ერთი, ასე რომ, რაც ჩვენი მხრიდან გაკეთდა, იგივე მოჰყვა მათი მხრიდანაც. 2014 წელს გაათავისუფლეს ჩვენი სამი მოქალაქე, თვენახევრის წინ კიდევ 3 და ახლა რამდენიმე დღის წინ ერთი ადამიანი. რამდენიმე ჩვენი მოქალაქე კიდევ რჩება რუსეთის ციხეში, თუმცა ეს გაცილებით ნაკლებია, ვიდრე გათავისუფლდა. გავაგრძელებთ ამაზე მუშაობას. ზოგადად ძალიან სერიოზული სამუშაოა გაწეული ზედმეტი ხმაურის, შოუების გარეშე.

- რუსეთის მოქალაქეები საქართველოში კონკრეტულად რა ბრალდებით იყვნენ დაკავებულნი?

- ჯაშუშობის ბრალდებით.

- კიდევ თუ რჩებიან ციხეში რუსეთის მოქალაქეები?

- არა. ჯაშუშობის ბრალდებით დაკავებულები აღარ რჩებიან. სხვა ბრალდებებთან დაკავშირებით ვერაფერს გეტყვით.

- იქ დარჩენილი რამდენიმე ადამიანის გასათავისუფლებლად რუსეთი სანაცვლოდ რამეს აღარ მოითხოვს?

- ჩვენ ამას ისე ვაკეთებთ, რომ ვცდილობთ, რაღაც პოლიტიკურ კონიუნქტურას ავაშოროთ და პრინციპში მოვახერხეთ, არ იყო არანაირი ხმაური და ზედმეტი აჟიოტაჟი. ამ თემის ირგვლივ არ ვეწევით განსაკუთრებულ პროპაგანდას, ყველაფერი გაკეთდა ღირსეულად.

- ფორმატის თემა არ იყო, თუმცა თქვენ ხურჩას ტრაგედიაზე, გიგა ოთხოზორიას მკვლელობაში ბრალდებულ რაშიდ კარჯიოღლიზეც ისაუბრეთ. რა არის ამ საკითხზე ოფიციალური მოსკოვის პასუხი?

- ოთხოზორიას თემა, ისევე როგორც საოკუპაციო ხაზზე შექმნილი ვითარება, ინციდენტები, უსაფრთხოება, არის ჟენევის ფორმატის პრობლემატიკა. თუმცა, როდესაც ასეთი ვითარებაა, წმინდა ადამიანურად ვერ ავუვლით გვერდს ამ საკითხს, ამიტომ ამ თემაზეც ვისაუბრეთ. პასუხი ასეთია – ისინი გმობენ ამ დანაშაულს, იმ მოსაზრებასაც იზიარებენ, რომ შიდა პატიმრობა, რომელიც მიუსაჯეს, არანაირად არ არის ადეკვატური გადაწყვეტილება. მაგრამ რუსეთის მხარე კატეგორიულად აცხადებს, რომ მათ არანაირი შეხება ამ ინციდენტთან არ აქვთ და ისინი პასუხისმგებლობას მთლიანად კონკრეტულ ე.წ აფხაზ მესაზღვრეს აკისრებენ. რა თქმა უნდა, ჩვენთვის ეს პოზიცია მისაღები არ არის.

- ვიზების საკითხზე ხომ არ ყოფილა საუბარი, რუსეთი კიდევ არ აპირებს ვიზების გაუქმებას?

- არა, ამეჯრად ვიზებზე საუბარი არ ყოფილა. მიმდინარე წლის იანვრიდან გამარტივებულია საქართველოს მოქალაქეებისთვის რუსული ვიზებს მიღება და საკმაოდ გაზრდილია გაცემული ვიზების რაოდენობა.