„რეზონანსი“: კიდევ ერთი ფარული ჩანაწერი, რასაც „ნაციონალები“ და „ოცნება“ ერთმანეთს აბრალებენ
„რეზონანსი“: ვის ინტერესშია ნიკა გვარამიასა და პაატა ბურჭულაძის სატელეფონო საუბრის ჩანაწერის გავრცელება?
„რეზონანსი“: არჩევნებს მაჟორიტარული ოლქები გადაწყვეტს, 50%-იანი ბარიერი “ოცნებას” შეიძლება, ძვირი დაუჯდეს
„რეზონანსი“: ინტერვიუ კორნელი კაკაჩიასთან: „პარტიებსა და ამომრჩეველს შორის „ხიდჩატეხილობის“ პრობლემაა
——
„ახალი თაობა“: ინტერვიუ რამაზ საყვარელიძესთან: „ხელისუფლების ამოცანა პაატა ბურჭულაძესთან ბრძოლა არ არის“
„ახალი თაობა“: ინტერვიუ ლევან ბერძენიშვილთან: „პაატა ბურჭულაძეს პოლიტიკაზე წარმოდგენა არ აქვს“ // „ბიძინა ივანიშვილის ლანძღვაში გულწრფელობას ვერ ვგრძნობ“
„ახალი თაობა“: ინტერვიუ პაატა ჯიბლაძესთან: „ორპარტიული მმართველობა არ გამოვა“
„ახალი თაობა“: ინტერვიუ მეგი გოცირიძესთან: „ხელისუფლების წარმომადგენლები ნაციონალებში აპირებენ გადმოსვლას“ // „პოპკორნი“ მოიმარაგეთ, წინ მაგარი სანახაობა გველის“
——
„ვერსია“: ბიძინა ივანიშვილის მასტერკლასი // ერთი განცხადება, რომელმაც ნაციონალებისა და რუსეთუმეების მზე ერთდროულად დააბნელა
„ვერსია“: ინტერვიუ სოსო არჩვაძესთან: რა გავლენას ახდენს არჩევნები საინვესტიციო გარემოზე
——————-
„რეზონანსი“, 15 სექტემბერი, 2016 წელი
კიდევ ერთი ფარული ჩანაწერი, რასაც „ნაციონალები“ და „ოცნება“ ერთმანეთს აბრალებენ
ნინო ქეთელაური
ინტერნეტში სატელეფონო საუბრის ჩანაწერი გავრცელდა, რომლის მიხედვითაც “რუსთავი 2″-ის გენერალური დირექტორი, ნიკა გვარამია პაატა ბურჭულაძეს “გირჩის” იმ წევრების პოზიციის გამო საყვედურობს, რომელიც “ქართულ ოცნებასთან” კოალიაციაში ყოფნის სურვილს ეხება. ჩანაწერში ბურჭულაძე პასუხობს, რომ “მსგავსი რამ არ ხდება”.
აღნიშნულთან დაკავშირებით, შინაგან საქმეთა სამინისტრომ პირადი მიმოწერისა და ტელეფონით საუბრის საიდუმლოების დარღვევის ფაქტზე გამოძიება უკვე დაიწყო.
“რუსთავი 2″-ის გენერალური დირექტორი არ უარყოფს, რომ პაატა ბურჭულაძესთან მსგავსი საუბარი შედგა. მისი თქმით, ჩანაწერი დამონტაჟებულია, რადგან მასში ამოჭრილია ის ფრაზა, როცა ბურჭულაძე ამბობს, რომ ის არც სააკაშვილის არის და არც ივანიშვილის.
“ეს ბატონმა პაატამ არაერთხელ გაიმეორა და თუ ამ საუბარში ეს არ არის, უკანონო ჩაწერასთან და გამოქვეყნებასთან ერთად, დამონტაჟებულიც არის. ეს შედის იმის ინტერესში, ვინც ცდილობს აჩვენოს, რომ პაატა ბურჭულაძე არის სააკაშვილთან, “რუსთავი 2″-თან დაკავშირებული. ეს ძალა არის ხელისუფლება, ვის ინტერესშიც ეს შედის,” – განაცხადა გვარამიამ.
ჩანაწერის მოპოვება-გავრცელებაში პოლიტიკოსების ნაწილი “ქართულ ოცნებას” ადანაშაულებს, ნაწილი კი თვლის, რომ ჩანაწერმა ბურჭულაძისა და “ნაციონალური მოძრაობის” კავშირი დაადასტურა.
“ერთიანი ნაციონალური მოძრაობის” დეპუტატობის კანდიდატის, ელენე ხოშტარიას თქმით, ხელისუფლება არალეგიტიმური და არადემოკრატიული მეთოდებით ბრძოლას აგრძელებს. “მოსმენები და შანტაჟი ხელისუფლების მხრიდან გახდა ნორმა. თან ეს ის ხელისუფლებაა, რომელიც პოლიციის დეპოლიტიზაციის და ადამიანის უფლებების დაცვის ლიზუნგით მოვიდა. დაუშვებელია მსგავს მეთოდებთან შეგუება, დაუშვებელია, რომ სუსი იყოს მთავარი პოლიტიკური მოთამაშე. ერთხელ და სამუდამოდ უარი უნდა ვთქვათ ასეთ მეთოდებზე, გავაუქმოთ პოლიტიკური პოლიცია და დავასრულოთ პირად ცხოვრებაში ჩარევა და შანტაჟი,” – განაცხადა ელენე ხოშტარიამ.
სახელმწიფო უსაფრთხოების სამსახურში სატელეფონო საუბრის ჩანაწერის მოპოვებასთან კავშირს უარყოფენ და ბრალდებას უსაფუძვლოს უწოდებენ. სუს-ის განცხადებით, ჩანაწერის მოპოვება-გავრცელების საკითხს გამოძიება დაადგენს.
“ქართული ოცნების” ინტერესებში მისთვის არაფრის მომცემი ხმაურის შექმნა არ შედის,” – ასე გამოეხმაურა აღნიშნულ ჩანაწერს “ქართულოი ოცნების” დეპუტატი ეკა ბესელია. მისი თქმით, ფორმასა და გავრცელების ფაქტთან დაკავშირებით კითხვებზე პასუხებს გამოძიება გასცემს. “პოლიტიკურ მხარეებს სურთ, აქცენტი საუბრის შინაარსზე არ გაკეთდეს და ყურადღება მხოლოდ ფორმაზე გადავიტანოთ. ჩვენთვის ორივე საყურადღებოა. ახალი არაფერია – ვხედავთ, რა პოლიტიკური პროცესი მიმდინარეობს პაატა ბურჭულაძის პარტიაში, მაგრამ მავანთათვის საინტერესო უნდა იყოს, თუ როგორ ხდება, რომ ერთ-ერთი კერძო ტელეკომპანიის დირექტორი, რომელიც სტანდარტებზე, პლურალიზმზე, მედიის თავისუფლებასა და დემოკრატიაზე საუბრობს, ცდილობს მართოს პოლიტიკური პროცესი და დავალებები მისცეს ერთ-ერთი კოალიციის წარმომადგენელს,” – განაცხადა ეკა ბესელიამ.
“დარწმუნებული ვარ, ის ჩანაწერი, რაც დღეს გამოქვეყნდა, ნიკა გვარამიას შემოქმედება და მისი მონტაჟია,” – განაცხადა “ქართული ოცნების” კიდევ ერთმა მაჟორიტარობის კანდიდატმა ირაკლი სესიაშვილმა. მისი თქმით, “რუსთავი 2″ რომ პოლიტიკური მედიასაშუალებაა და არა თავისუფალი და დამოუკიდებელი, ეს თავად ნიკა გვარამიამ დაადასტურა. ის, რომ პაატა ბურჭულაძე თავისი კოალიციით არის “ნაციონალური მოძრაობა 2″, ესეც ყველასთვის ცნობილია. დიახ, “ნაციონალური მოძრაობის”, ნიკა გვარამიას და პაატა ბურჭულაძის ინტერესში შედის სტერეოტიპი, რომ “ისევ გვისმენენ” აქტუალური იყოს. დიახ, სწორედ ამიტომ გამოქვეყნდა დღეს, მით უმეტეს როდესაც ევროპის საბჭოს საპარლამენტო ასამბლეის სადამკვირვებლო მისია ჩამობრძანდა და ბატონმა ნიკამ და პაატამ სიურპრიზად დაახვედრეს ეს ჩანაწერი,” – განაცხადა ირაკლი სესიაშვილმა, რომელმაც აღნიშნა, რომ რა ტონითაც ჩანაწერში ნიკა გვარამია პაატა ბურჭულაძეს ესაუბრება, მედიის წარმომადგენელი პოლიტიკოსს არ ესაუბრება.
“ნიკა გვარამია, როგორც ბატონი ყმას, ისე ელაპარაკებოდა. სიცხვილია უბრალოდ,” – აღნიშნა ირაკლი სესიაშვილმა.
ჩანაწერის გავრცელებას პრეზიდენტის ადმინისტრაციაშიც გამოეხმაურნენ, სადაც განაცხადეს, რომ ქვეყანაში ერთხელ და სამუდამოდ უნდა დასრულდეს მსგავსი ჩანაწერების გაკეთება, შემდეგ მისი მედიის მიერ ტირაჟირება, ვინაიდან საქმე კონკრეტული პირების “პირად სივრცეს” ეხება.
რესპუბლიკური პარტიის წევრის ლევან ბერძენიშვილის განცხადებით, “საერთოდ მოსმენები გულისამრევია”. როგორც ის აღნიშნავს, მთავრობისთვის გაცილებით მნიშვნელოვანია ბურჭულაძის მოსმენა, ვიდრე გვარამიასი. “ერთს უსმენდნენ თუ მეორეს, ჩემთვის არავითარი მნიშვნელობა არ აქვს – უნდა გითხრათ პირდაპირ, რომ მოსმენები გულისამრევია და ამის გამოქვეყნება არ მიმაჩნია სწორად და სამართლიანად, მაგრამ ბურჭულაძის პოლიტიკური პარტია, ეს არის ხელოვნური ფსევდოოპოზიცია, შექმნილი ბიძინა ივანიშვილისა და შესაძლოა, მიხეილ სააკაშვილის მიერ, რომელსაც ყოველდღიურად ტოვებენ მთავარი წარმომადგენლები,” – განაცხადა ლევან ბერძენიშვილმა.
“ჩანაწერი ადასტურებს იმას, რომ პაატა ბურჭულაძე ვერავისთვის იქნება სანდო პარტნიორი და მით უმეტეს, საკუთარი ხალხისთვის,” – ამის შესახებ მოძრაობა “სახელმწიფო ხალხისთვის” ყოფილმა წევრმა ხათუნა ლაგაზიძემ განაცხადა. მისი თქმით, ამ ჩანაწერებმა დაადასტურა, რომ ბურჭულაძე, როგორც პოლიტიკოსი, ვერ შედგა და ეს გაერთიანება ერთი დიდი ბიზნესპროექტია.
აღნიშნულ ჩანაწერს კამპანია “ეს შენ გეხება” გამოეხმაურა. კამპანიაში შემავალი არასამთავრობო ორგანიზაციების განცხადებით, სახელმწიფომ ამ დრომდე ვერ უზრუნველყო როგორც ჩადენილი დანაშაულის ეფექტური გამოძიება, ასევე მოსმენების შესახებ სამართლებრივი სისტემის ძირეული რეფორმა, რათა დაცული იყოს თითოეული ადამიანის პირადი ცხოვრების ხელშეუხებლობა. კამპანიამ ხელისუფლებას მოუწოდა, რომ სწრაფად და ეფექტურად გამოიძიოს ჩანაწერის მოპოვება-გავრცელების საკითხი, მიიღოს შესაბამისი საკანონმდებლო ცვლილებები და შეიქმნას დამოუკიდებელი საგამოძიებო მექანიზმი, რომელიც სამართალდამცავებისა და ხელისუფლების სხვა ორგანოების დანაშაულს გამოიძიებს.
„რეზონანსი“, 15 სექტემბერი, 2016 წელი
ვის ინტერესშია გვარამიასა და ბურჭულაძის სატელეფონო საუბრის ჩანაწერის გავრცელება?
ნინო ქეთელაური
(შემოკლებით)
როგორ ფიქრობთ, ვის ინტერესშია გვარამიასა და ბურჭულაძის სატელეფონო საუბრის ჩანაწერის გავრცელება? – ამ კითხვით “რეზონანსმა” საზოგადოების წარმომადგენლებს მიმართა.
ლია მუხაშავრია (იურისტი): ყველა შემთხვევაში, არჩვნების წინ ასეთი რამ ხელისუფლების ინტერესშია. ის ცდილობს, რომ კონკურენტები ჩაძიროს და ხელისუფლება შეინარჩუნოს. ამის ტექნიკური შესაძლებლობები და შესაბამისი მოტივაციაც მხოლოდ მას აქვს.
ანა რატიანი (ჟურნალისტი): როგორ გითხრათ, მგონი, ორივე პარტიის ინტერესში შედიოდა – როგორც “ქართული ოცნების”, ისე “ნაციონალური მოძრაობის:. პაატა ბურჭულაძეს, როგორც ხელოვანსა და საზოგადო მოღვაწეს, უდიდეს პატივს ვცემ, რადგან ძალიან ბევრი კეთილი საქმე აქვს გაკეთებული, მაგრამ ვთვლი, რომ ის არ უნდა ჩართულიყო პოლიტიკურ საქმიანობაში, ხოლო თუ ჩაერთო, ბევრად უფრო პრინციპული და საზოგადოებისთვის ღია უნდა ყოფილიყო. პოლიტიკა ძალიან რთული საქმეა. მიუხედავად იმისა, რომ დარწმუნებული ვარ და მჯერა, რომ პაატა ბურჭულაძეს ჰქონდა საუკეთესო ზრახვები და სურვილები, ვთვლი, რომ ეს მისი საქმე არ იყო.
მიხეილ ცაგარელი (ასტროლოგი): ვის ინტერესში შედის, ამის თქმა საკმაოდ რთულია. შესაძლოა, ძალიან ბევრი ადამიანი იყოს ამით დაინტერესებული. რასაკვირველია, ეს ის ხალხია, რომელიც “ნაციონალური მოძრაობისა” და ბურჭულაძის წინააღმდეგ გამოდის, თუმცა კონკრეტულად ვინ გაავრცელა და რატომ, ასე ვერ გეტყვით.
გია როინიშვილი (მსახიობი): მე ვფიქრობ, მსგავსი ჩანაწერის გავრცელება ხელისუფლების ინტერესშია.
ნანა კაკაბაძე (უფლებათადამცველი): რა თქმა უნდა, მხოლოდ ხელისუფლების ინტერესში შეიძლება იყოს, მაგრამ მთავარი ის არის, რომ ეს საუბარი რეალურია და მის აუთენტურობას არც ნიკა გვარამია უარყოფს.
„რეზონანსი“, 15 სექტემბერი, 2016 წელი
არჩევნებს მაჟორიტარული ოლქები გადაწყვეტს, 50%-იანი ბარიერი “ოცნებას” შეიძლება, ძვირი დაუჯდეს
ეკატერინე ბასილაია
8 ოქტომბრის არჩევნებზე მთავარი პოლიტიკური ბრძოლა მაჟორიტარულ ფლანგზე იქნება და არჩევნების საბოლოო ბედს დამაჯერებლად გაწყვეტს ის, თუ 73 მაჟორიტარული მანდატიდან ვინ აიღებს აბსოლუტურ უმეტესობას. მით უმეტეს იმ ფონზე, როდესაც ყველა კვლევიდან ჩანს, რომ არც ერთ პარტიას 40%-იანი (შესაძლოა, 30%-იანიც) მხარდაჭერაც კი არ გააჩნია. თუმცა, თუ ყველა წინა არჩევნებზე ადრიან დილით, დაახლოებით მაინც ცნობილი იყო, ვინ იღებდა პარლამენტში მანდატების უმეტესობას, 9 ოქტომბერს შეიძლება, ეს ისევ შეუძლებელი იყოს. მიზეზი ისაა, რომ წელს, მაჟორიტარულ სისტემაში 50%-იანი ბარიერის შემოღების გამო, მაჟორიტარების უმეტესობის ბედი მეორე ტურში გადაწყდება და პირველ-მეორე ადგილებზე გასული პარტიები მეორე ტურში საბრძოლველად დაიწყებენ მზადებას და ე.წ. ნერვების თამაშსაც.
პოლიტოლოგები თუ სოციოლოგები მაჟორიტარების გამოსავლენად მეორე ტურს ძალიან ბევრ ოლქში პროგნოზირებენ. უფრო მეტიც, საქართველოს განვითარების კვლევითი ინსტიტუტის დამფუძნებელ გია ხუხაშვილის თქმით, მეორე ტურის დანიშვნით ყველაზე მეტად მმართველი პარტია ზარალდება, რადგან 9 ოქტომბერს გამოჩნდება, რომ “ქართული ოცნება” 50%-ს ოლქების აბსოლუტურ უმეტესობაში ვერ აიღებს და ფორმალურად გამარჯვების გამოცხადების საფუძველი არ ექნება. ხოლო თუ 9 ოქტომბერს გამარჯვებას ვერ გამოაცხადებენ, მიუხედავად იმისა, რომ მეორე ტურში პირველ ადგილზე გასული კანდიდატები ეყოლებათ, ეს მათთვის შეიძლება სეროზული ფსიქოლოგიური ბარიერი გახდეს მეორე ტურის წინ.
“მაჟორიტარულ არჩევნებში, როგორც წესი, უპირატესობა ხელისუფლებას აქვს და სწორედ ამიტომაც, წინასაარჩევნო დაპირების მიუხედავად, “ქართულმა ოცნებამ” ეს სისტემა არ გააუქმა. თუმცა, ამ არჩევნებზე მაჟორიტარულ სისტემაში 50%-იანი ბარიერის შემოღებამ შესაძლოა “ქართული ოცნებისთვის” არასასურველი პრეცედენტი შექმნას. მაგალითად, როგორც წესი, პარტიის შედეგი მაჟორიტარების შედეგთან მეტ-ნაკლებ წონასწორობაში მოდის. ხოლო იქიდან გამომდინარე, რომ “ქართული ოცნება” ვერც ერთი კვლევით ვერც ერთ რეგიონში 50%-მდე ვერ ადის, წესით, ჩვენ ძალიან ბევრი მეორე ტური უნდა გვქონდეს. ძალიან ბევრი მეორე ტური თავისთავად შექმნის პრეცედენტს და შესაძლებელია, 9 ოქტომბერს “ქართულ ოცნებას” გამარჯვების გამოცხადების ფუფუნება არ მიეცეს. პირველ ადგილზე ბევრგან გავლენ, მაგრამ პირველი ადგილი გამარჯვებას არ ნიშნავს. ეს კი, ფაქტობრივად, გარკვეულ ფსიქოლოგიურ ზიანს მიაყენებს მმართველ პარტიას. უპირატესობის მიუხედავად, ხელისუფლებას თუ არ შეუძლია გამარჯვება გამოაცხადოს, ეს ამომრჩევლის თვალში სისუსტედ აღიქმება და შესაბამისად, შესაძლებელია შემდეგ, მეორე ტურის წინ არაპროგნოზირებადი ვითარებაც კი მივიღოთ. რეალურად, ძალიან მაღალია იმის ალბათობა, რომ 8 ოქტომბერს კი არ შედგეს არჩევნები, არამედ დაიწყოს რაღაც პროცესი და მთელი ოქტომბრის განმავლობაში ჩვენ გვქონდეს საკმაოდ დაძაბული და ბუნდოვანი ვითარება,” – აცხადებს გია ხუხაშვილი. მისივე თქმით, მართალია მოლოდინი, რომ ხელისუფლების კანდიდატების აბსოლუტური უმეტესობა გადავა მეორე ტურში, მაგრამ მეორე ტურში გადასვლა სულაც არ ნიშნავს იმას, რომ იქ ხელისუფლების კანდიდატები გამარჯვებას გაინაღდებენ.
გია ხუხაშვილი: “2012 წლის არჩევნების დღევანდელი არჩევნებისგან განსხვავება ისაა, რომ მაშინ ფაქტობრივად რევოლუციური არჩევნები იყო და სხვა ლოგიკა მუშაობდა. დღეს ასეთი რევოლუციური ფონი არ არის. ამომრჩეველი აგრესიულადაა განწყობილი როგორც “ქართული ოცნების”, ისე “ნაციონალური მოძრაობის” მიმართ. ამიტომაც ვფიქრობ, რომ მაჟორიტარები ამ ორ პარტიას შორის არ გადანაწილდება. ჩვენ შეიძლება მაჟორიტარულ ოლქებში სულ სხვა კანდიდატები ვიხილოთ გამარჯვებულებად. შეიძლება, სპექტრი გაიშალოს. კონკრეტულად სად ვის რა შანსი აქვს, ვერაფერს გეტყვით. გადაუწყვეტელი ამომრჩეველი დიდია. ფაქტია ის, რომ გადაუწყვეტელ ამომრჩეველს არც “ნაციონალები” უნდა და არც “ოცნება”, ამიტომ შესაძლებელია სხვადასხვა რაიონში სხვადასხვა პარტიაზე ან საერთოდ დამოუკიდებელ კანდიდატზე ჩამოყალიბდნენ და მაჟორიტარებთან დაკავშირებით სპექტრი ძალიან გაიშალოს. თუმცა ეს ყველაფერი თეორიაა. “ქართული ოცნების” გამარჯვების შანსი ძალიან მაღალია, მაგრამ რისკები, თანაც მაჟორიტარულ ფლანგზე, მათთვის არსებობს. თან რატომღაც მეჩვენება, რომ მათ ეს რისკი ბოლომდე კარგად გათვლილი არ აქვთ.
“ქართული ოცნების” მხრიდან ზუსტად იმაზეა აპელირება, რომ მარტივად მოიგებენ. გათვლა აქვთ, რომ მეორე ადგილზე გასულ ოპოზიციურ კანდიდატს სხვა პარტიები მხარს არ დაუჭერენ, ამას დაემატება ადმინისტრაციული რესურსის ამოქმედება ხელისუფლების სასარგებლოდ და ამიტომაც ყველგან უპრობლემოდ გაიმარჯვებენ. ასე ფიქრობენ. ესაა გეგმა, მაგრამ მათ ფსიქოლოგიური პრობლემა ავიწყდებათ. თუ ხელისუფლებამ პირველი ტურის შემდეგ სისუსტე გამოავლინა და 9-ში ვერ გამოაცხადა გამარჯვება, ამან შეიძლება ამომრჩეველს განუმტკიცოს მოსაზრება, რომ ხელისუფლება სუსტია. თუ ამომრჩეველს ეს განცდა გაუჩნდება, მაშინ მეორე ტურში ამ ადმინისტრაციულმა რესურსმა შეიძლება, ვეღარ იმუშაოს. ”თუ ხელისუფლება, როგორც ძალის ცენტრი, მოირყა, თანაც ეს რეგიონებში ძალიან მნიშვნელოვანია, მაშინ ადმინისტრაციული რესურსის ეფექტურობა შემცირდება და მეორე ტურებში პირველ ადგილზე გასვლა გამარჯვების ცალსახა გარანტია არ იქნება,” – აღნიშნავს გია ხუხაშვილი.
საკვლევ-საკონსულტაციო ცენტრ “ფსიქო-პროექტის” დამფუძნებელი ზურაბ ბიგვავაც ამბობს, რომ ამ არჩევნების ყველაზე დამახასიათებელი მომენტი მაჟორიტარულ ფლანგზე ბევრი მეორე ტური იქნება. თუმცა მისი პროგნოზი “ოცნებისთვის” უფრო პოზიტიურია. ამბობს, რომ მაჟორიტარული ოლქების აბსოლუტურ უმეტესობაში, დაახლოებით 60-ში, მანდატს “ქართული ოცნება” აიღებს, ნაწილს – პირველივე ტურით, ნაწილს – მეორე ტურში და ის, რომ 9 ოქტომბერს მაჟორიტარების უმეტესობის ბედი ჯერ ისევ გაურკვეველი იქნება, ხელისუფლებას არ აკნინებს, პირიქით, 50%-იანი მხარდაჭერის მქონე მაჟორიტარი უფრო ლეგიტიმური იქნება ხალხის თვალში.
“ბიძინა ივანიშვილის გათვლა 95, 100 თუ 105 დეპუტატზე რეალისტური ჩანს,” – აცხადებს ბიგვავა, რომლის ორგანიზაცია “ოცნების” შიდა კვლევებს ატარებს ხოლმე. “მაგალითად, 50%-მდე რომ აიღონ პროპორციული სიით და დანარჩენი მაჟორიტარული ოლქებით მოიგონ.”
აქვს თუ არა “ქართულ ოცნებას” რეგიონების მიხედვით კვლევა ჩატარებული და რომელი რეგიონია ყველაზე პრობლემატური და რომელი – ყველაზე წარმატებული, ზურაბ ბიგვავა ამბობს, რომ პარტიის დაკვეთით კვლევა ახლა მიმდინარეობს და შედეგი ერთ კვირაში ეცოდინება. ძველი მონაცემებით რაიმეზე საუბარი კი არასერიოზულია. მისი თქმით, მოლოდინია, რომ “ქართული ოცნება” ბევრ მაჟორიტარულ მანდატს აიღებს, მაგრამ ეს ცოტა გართულდება და 50%-იანი ბარიერის დაწესების გამო პარტია გამარჯვებას ბევრგან ალბათ მეორე ტურით მოიპოვებს.
“მაჟორიტარულ სისტემაში რადგან 50%-იანი ბარიერი დაწესდა, ეს პრობლემაა. “ოცნება” პირველივე ტურში ყველგან ვერ გაიმარჯვებს. მეორე ტური საკმაოდ ბევრი იქნება. შესაძლებელია, მოულოდნელობებსაც ჰქონდეს ადგილი, მაგრამ უმეტესობა რეგიონებში სახელისუფლებო პარტიას მოგების უფრო მეტი შანსი აქვს. გამორიცხულია, ყველა მანდატი “ქართულმა ოცნებამ” მიიღოს, შეიძლება 10-15 მანდატი დაიკარგოს, მაგრამ 60 მანდატზე ნაკლებს არ მიიღებს,” – აღნიშნავს ზურაბ ბიგვავა. მისი ვარაუდით, სამეგრელო და თბილისი იქნება რთული. მაგალითად, საბურთალოზე დავით უსუფაშვილი, ვაკეში – ელენე ხოშტარია იქნებიან “ქართული ოცნების” ძლიერი კონკურენტები. სამეგრელოში “ნაციონალურ მოძრაობას” ჰყავს მხარდამჭერები, ზუგდიდში, სადაც სანდრა რულოვსია მაჟორიტარობის კანდიდატი, სერიოზული მუშაობაა. იგი ასევე აღნიშნავს იმასაც, რომ სერიოზული ბრძოლა იქნება გორში, სადაც ირაკლი ალასანია და ირაკლი ოქრუაშვილი უპირისპირდება “ქართული ოცნების” კანდიდატ იოსებ მაკრახიძეს და იქ მაკრახიძის დამარცხებას არ გამორიცხავს. ასევე ამბობს, რომ მცხეთა-თიანეთში ძალიან გაუჭირდება “ოცნების” წევრ დიმიტრი ხუნდაძეს, რომელსაც დამოუკიდებელი კანდიდატი, ბიზნესმენი ცეზარ ჩოჩელი უპირისპირდება.
ზურაბ ბიგვავა ამბობს, რომ მართალია, ყველა კვლევით მეორე ადგილზე “ნაციონალური მოძრაობაა”, მაგრამ იმედი აქვს, რომ შესაძლოა ძლიერი მესამე ძალაც გამოჩნდეს. ეს მესამე ძალა კი “პაატა ბურჭულაძე – სახელმწიფო ხალხისთვის” ან “თავისუფალი დემოკრატები” იყოს. ასევე, რაღაც გარკვეული შანსი აქვს “პატრიოტთა ალიანსის” ბლოკს.
„რეზონანსი“, 15 სექტემბერი, 2016 წელი
ინტერვიუ კორნელი კაკაჩიასთან: „პარტიებსა და ამომრჩეველს შორის „ხიდჩატეხილობის“ პრობლემაა
თაკო მათეშვილი
პოლიტოლოგი, თბილისის სახელმწიფო უნივერსიტეტის პროფესორი კორნელი კაკაჩია წინასაარჩევნოდ პარტიების რეიტინგებს აფასებს და ამბობს, რომ შედეგები, რომელთაც კვლევები დებენ, რეალობას ნაკლებად ასახავს.
მოგეხსენებათ, უკანასკნელი კვლევების მიხედვით, სახელისუფლებო პარტია “ქართული ოცნება – დემოკრატიული საქართველოს” რეიტინგი 30%-ს შეადგენდა. კაკაჩია ამბობს, რომ თუკი ეს მართლაც ასეა, პარტია პარლამენტში უმრავლესობით მოსვლას შეძლებს, თუმცა ივანიშვილის მოლოდინი იმასთან დაკავშირებით, რომ მათ 100 დეპუტატი ეყოლებათ, ფუჭია.
კორნელი კაკაჩია: ერთია, რა რეიტინგს დებს პარტია საკუთარ კვლევაში და მეორეა რეალობა. პარტიების ნათქვამი რეალობასთან არ უნდა გავაიგივოთ, ისევე როგორც ნებისმიერი საერთაშორისო ორგანიზაციის მიერ ჩატარებული სოციოლოგიური კვლევები, რადგან საზოგადოებრივი კვლევის მიზანი ხალხის აზრის ძირითადი მიმართულების გამოკვეთაა. ვერც ერთ კვლევას ვერ ექნება იმის პრეტენზია, რომ იგი აბსოლუტურად სწორ სურათს დებს, მით უმეტეს, პარტიების მიერ ჩატარებულს. ზოგიერთი პარტია ონლაინგამოკითხვებს ატარებს, რომელთაც ძირითადად თავიანთი მომხრეები ნახულობენ და ავსებენ.
- სახელისუფლებო პარტიის 30%-იანი რეიტინგი, განსაკუთრებით არჩევნებამდე დარჩენილ ასეთ მცირე დროში რამდენად ნიშნავს იმას, რომ მას გამარჯვების შანსი აქვს?
- თუ მათ ნათქვამს დავიჯერებთ და ეს 30% ნამდვილად აქვთ, ეს იმას ნიშნავს, რომ, შესაძლოა, უმრავლესობაში აღმოჩნდნენ. მით უმეტეს, თუ ამას მაჟორიტარობის კანდიდატებსაც დავამატებთ. კოალიციის დახმარებით ისინი ახალი მთავრობის ჩამოყალიბებას, ალბათ, მოახერხებენ, მაგრამ მათი მოლოდინი, რომ აბსოლუტური უმრავლესობით მოვლენ ან პარლამენტში 100 დეპუტატს შეიყვანენ, ცოტა გაზვიადებული მგონია. ამის არავითარი საფუძველი არ არსებობს. მით უმეტეს, რომ სხვა კონკურენტ პარტიებსაც აქვთ გარკვეული რესურსები.
- როგორ ფიქრობთ, რამდენად ეფექტურ წინასაარჩევნო კამპანიებს ატარებენ პარტიები და პოლიტიკური ლიდერები, რამდენად მუშაობენ რეიტინგის გაზრდაზე?
- რა თქმა უნდა, სასურველია, პარტიების მხრიდან მეტ აქტიურობასა და პროფესიონალიზმზს ვხედავდეთ. იმას ვგულისხმობ, რომ პარტიებს ჰქონდეთ გარკვეული კვლევითი სტრუქტურები, რომლებიც არა მხოლოდ არჩევნების დროს იმუშავებენ ამომრჩეველთან, არამედ მას შემდეგაც. რამდენიმე ძირითად პარტიას თუ არ ჩავთვლით, სხვა პარტიებს ამის საშუალება არ აქვთ. ამიტომ, მათ ამომრჩევლის ნების გაგება უჭირთ. ეს სოცილოლგიურ კვლევებშიც აისახება, რადგან, როგორც ვნახეთ, საკმაოდ დიდი იყო ჩამოუყალიბებელი ამომრჩევლის როდენობა. მართალია, ბოლო პერიოდში ეს შემცირდა, მაგრამ რაც უფრო იაქტიურებენ პოლიტიკური პარტიები და სხვადასხვა სოციალური ფენისა თუ ინტერესთა ჯგუფების ნებას გამოხატავენ, მით უფრო მეტია შანსი, რომ მხარდაჭერა მიიღონ. დარწმუნებული ვარ, რომ ბოლო კვირების განმავლობაში პარტიები კიდევ უფრო გააქტიურდებიან და მერე უკვე ამომრჩეველი გადაწყვეტს, თუ რომელი მათგანის მოქმედება იქნება წარმატებული. ეს მხოლოდ ფინანსურ საკითხებთან არაა დაკავშირებული. საჭიროა, პოლიტიკურმა პარტიებმა შეძლონ იმ სოციალური და ინტერესთა ჯგუფების იდენტიფიცირება, რომლებიც მათ სავარაუდოდ მხარს უჭერენ.
- ანუ, წინასაარჩევნო კამპანიას რეიტინგის თვალსაზრისით დიდი მნიშვნელობა აქვს და მან შესაძლოა, დასაწყისისათვის არსებული სიტუაცია მკვეთრად შეცვალოს?
- რა თქმა უნდა. თუმცა ქართველი ამომრჩეველი იმასაც დიდ ყურადღებას აქცევს, თუ ვინაა პარტიის ლიდერი, რა გაუკეთებია მანამდე, რამდენად ცნობადია მისი პარტია, რამდენად ეფექტურია მათი პოლიტიკური გზავნილები და ა.შ. მთავარი კი სანდოობაა. სანდოობის პრობლემა ერთ-ერთი ყველაზე დიდი პრობლემაა. ამომრჩეველი ფუჭი დაპირებებისაგან გადაიღალა, რომლებიც ბოლო 25 წლის განმავლობაში პარტიებისგან ესმის. თანაც, რაც მთავარია, ამ დაპირებების დიდი ნაწილი ერთი და იგივეა და ეს ამომრჩევლის მხრიდან უდნობლობას ხელს უწყობს. რაც უფრო მეტი ახალი გზავნილი და შემოთავაზება იქნება პოლიტიკური პარტიების მხრიდან, მით უკეთესია, მაგრამ ეს გზავნილები საზოგადოების ინტერესებს უნდა პასუხობდეს. თუმცა, აქვე კიდევ ერთხელ ვუსვამ ხაზს, რომ ლიდერს დიდი მნიშვნელობა აქვს. ივანიშვილის ან თუნდაც სააკაშვილის ფაქტორი, როგორც დადებითი, ისე უარყოფითი კუთხით დიდ როლს თამაშობს.
სხვა პარტიებიც ძირითადად მაინც ლიდერთან ასოცირდება, მათ პოლიტიკურ წარსულთან და არა პოლიტიკურ პლატფორმებთან, ეკონომიკურ ხედვასთან თუ სოციალური საკითხების მიმართ მიდგომებთან. ესაა ის, რისი მიხედვითაც საზოგადოების დიდი ნაწილი პარტიებს აფასებს.
- საარჩევნო პროგრამას რა როლი უკავია პარტიების რაიტინგის განსაზღვრაში?
- განვითარებული დემოკრატიის მქონე ქვეყნებში ესაა ის კომპონენტი, რაც პარტიის წარმატებას განსაზღვრავს. თუმცა საქართველოში, მიუხედავად იმისა, რომ სოციალური ქსელები საკმაოდ განვითარებულია და საზოგადოების დიდ ნაწილს პარტიების პროგრამებზე ხელი მარტივად მიუწვდება, ეს გარდამტეხ მომენტად მაინც ვერ იქცა. ამას ობიექტური მიზეზებიც ქვს და სუბიექტურიც. ობიექტური მიზეზი ისაა, რომ საზოგადოების ნაწილი ბოლომდე არაა გათვითცნობიერებული იდეოლოგიებში, ან ეკონომიკურ გათვლებში და, გარდა ამისა, პოლიტიკურ პარტიებსა და ამომრჩეველს შორის ე.წ. “ხიდჩატეხილობის” პრობლემა არსებობს, რადგან პარტიებიც ვერ აწვდიან ამომრჩეველს ინფორმაციას თავისი პლატფორმის შესახებ ისე, როგორც ეს საჭიროა. ასე რომ, ამ კუთხით ორივე მხირდან ბევრია გასაკეთებელი, თუმცა მთლიანობაში ყველაფერი ქვეყანაში პოლიტიკური კულტურის ამაღლებასთანაა დაკავშირებული. ამას კი დრო სჭირდება.
- პოლიტიკურ პარტიებში გადაჯგუფება ჯერ კიდევ მიმდინარეობს და არც ისაა გამორიცხული, რომ კიდევ გაგრძელდეს. როგორ ფიქრობთ, ამ გადაჯგუფებითა და შერწყმით პარტიები უფრო მეტ ამომრჩეველს იძენენ თუ კარგავენ?
- რისკი, რა თქმა უნდა, არსებობს. თუნდაც პაატა ბურჭულაძის შემთხვევა ავიღოთ – საზოგადოების დიდ ნაწილს მისი კოალიციაში გაერთიანება არ მოეწონა. ამან გარკვეული ვნებათაღელვა გამოიწვია. სხვა პარტიებთან გაერთიანებამ შეიძლება გარკვეული უკურეაქცია გამოიწვიოს, რადგან კოალიციების შემთხვევაში ხშირია, როცა ვიღაცას ერთი პარტია მოსწონს, მაგრამ მეორე – არა. ამ ყველაფრის თვალნათელი მაგალითი იყო ის, რაც ამ პარტიაში მოხდა – პოლიტიკოსების ნაწილმა პარტია ზუსტად ამ მოსაზრების გამო დატოვა და მსგავსი მოსაზრება საზოგადოებაშიც შეიძლება არსებობდეს.
- ბურჭულაძის პარტია მუდმივად ყურადღების ცენტრშია. ფაქტობრივად ყოველდღე ვრცელდება ინფორმაცია იმასთან დაკავშრებით, რომ იგი წევრებმა დატოვეს. ზოგიერთმა მათგანმა ეს სკანდალური განცხადებების ფონზე გააკეთა. გუშინ კი პაატა ბურჭულაძისა და ნიკა გვარამიას საუბრის ფარული ჩანაწერიც გამოქვეყნდა. როგორ ფიქრობთ, უშუალოდ მისი და მისი პარტიის რეიტინგი საარჩევნო კამპანიამ გაზარდა თუ შეამცირა?
- კვლევის გარეშე ამაზე ზუსტი საუბარი რთულია, თუმცა ფაქტია, რომ პოლიტიკაში შემოსვლისას მისი პირადი რეიტინგი საკმაოდ მაღალი იყო. ახლა კი საკითხავია, ბოლოდროინდელი მოვლენებიდან გამომდინარე, რამდენად შეძლო მან ამ რეიტინგის შენარჩუნება. ეს მისთვის გარკვეული გამოწვევაა და საინტერესოა, რამდენად გაართმევს თავს ამ პრობლემას. თუმცა ბოლოდროინდელი მოვლენები და თუნდაც ივანიშვილის განცხადებები ცხადყოფს, რომ იგი სერიოზულ კონკურენტად განიხილება, რომელსაც პარლამენტში საკუთარი ჯგუფის გაყვანის სერიოზული შანსი აქვს.
- ბოლო დღეების განმავლობაში პრემიერისა და შინაგან საქმეთა მინისტრის მხირდან არაერთი განცხადება გაკეთდა იმასთან დაკავშირებით, რომ გარკვეული პარტიები სიტუაციის დესტაბილიზაციას ცდილობენ და პროვოკაციებსაც გეგმავენ. როგორ ფიქრობთ, ეს უბრალოდ პრევენციული ხასიათის განცხადებებია, თუ ამის საშიშროება ქყევანაში მართლაც დგას?
- თითქოს ამის საბაბი არ არსებობს, თუმცა აქ სხვა რამაა მნიშვნელოვანი – თუ რა როლი აქვთ საქართველოში უსაფრთხოების სამსახურებს. ანუ, ისინი პოლიტიკოსებს უსმენენ თუ არა. გარკვეული ეჭვი არსებობს, რომ ამ ყველაფრის უკან შეიძლება უსაფრთხოების სამსახურები დგანან. თუ ეს ასეა, გამოდის, რომ 2012 წელს გაცემული დაპირებები იმასთან დაკავშირებით, რომ უშიშროების სტრუქტურები პოლიტიკურ საქმიანობაში არ ჩაერევიან და პოლიტიკოსებს არ მოუსმენენ, არ შესრულდა.
აქედან გამომდინარე, იმაზე საუბარი, რომ ამ სტრუქტურების რეფორმა განხორციელდა, ყალბია. ამ კუთხით უფრო მნიშვნელოვანია სზოგადოების ყურადღების კონცენტრირება, რათა იგივე შედეგები არ მივიღოთ, რაც წინა ხელისუფლების პირობებში გვქონდა – როცა ხელისუფლება ამ სტრუქტურებს საკუთარი პოლიტიკური მიზნებისათვის, განსკუთრებით კი ოპოზიციის წარმომადგენლების წინააღმდეგ იყენებდა.
- დღეს გავრცელებული ჩანაწერებიც ამის მაგალითია?
- რა თქმა უნდა, ეჭვს ბადებს. დღეს საქართველოში არავის აქვს ამის საშუალება, თუკი უცხო ქვეყნის სპეცსამსახურებს არ ჩავთვლით, რომელთაც ვფიქრობ, დიდად არ აინტერესებთ, თუ რაზე ისაუბრებენ ამა თუ იმ პარტიის ლიდერები. აქედან გამომდინარე, ბუნებრივია, გარკვეული ეჭვი ჩნდება, რომ ხელისუფლება ცდილობს ეს რესურსები პოლიტიკური მიზნებისათვის გამოიყენოს და საზოგადოებრივ განწყობებზე გავლენა იქონიოს. ეს კი, მთლიანობაში, საარჩევნო პროცესს ხელს, რა თქმა უნდა, არ უწყობს და ეს იმ სხვადასხვა საერთაშორისო ორგანიზაციის ანგარიშებში, რომლებიც წინასაარჩევნო პერიოდს უკვე აკვირდებიან, ალბათ აისახება კიდეც.
- რაზე იქონიებს გავლენას მათი ანგარიშები და ზოგადად ამ არჩევნების შედეგები? რა არის დამოკიდებული მასზე როგორც ქვეყნის შიგნით, ისე საგარეო ასპარეზზე? თუნდაც ვიზალიბერალიზაცია, რომლის პროცესის დასრულებასაც უახლოეს მომავალში ველით, რამდენადაა დამოკიდებული იმაზე, თუ რამდენად მშვიდობიანად და დემოკრატიულად ჩატარდება არჩევნები?
- ჩვენ შევეჩვიეთ იმას, რომ თითოეულ არჩევნებს აფასებენ, როგორც ძალიან მნიშვნელოვანს. ამიტომაც მეჩვენება, რომ ეს რიტორიკა, ცოტა არ იყოს, გაცვდა. თუმცა, ამ შემთხვევაში ასე არაა, რადგან 2012 წელს, როცა პირველად ჩატარდა არჩევნები, რა დროსაც ხელისუფლება უსისხლოდ შეიცვალა, საერთაშორისო ასპარეზზე საქართველოს იმიჯი გაზარდა. ახლა ამ იმიჯის გამყარებაა ძალიან მნიშვნელოვანი. სწორედ ამისთვისაა საჭირო მეორე საპარლამენტო არჩევნები, რომელიც ექსცესების გარეშე, დემოკრატიულ გარემოში ჩაივლის. თუ ასე მოხდა, საქართველოსათვის ვიზალიბერალიზაციისა თუ ნატო-სთან დაახლოების საკითხების მოგვარება უფრო ადვილი იქნება, ვიდრე იმ შემთხვევაში, თუკი გაჩნდა ეჭვი, რომ ამ არჩევნებში ხელისუფლება პოლიტიკური მაქინაციებით ერეოდა. იმედი მაქვს, რომ ეს ხელისფლებასაც და ოპოზიციასაც კარგად ესმის.
———————
„ახალი თაობა“, 15 სექტემბერი, 2016 წელი
ინტერვიუ რამაზ საყვარელიძესთან: „ხელისუფლების ამოცანა პაატა ბურჭულაძესთან ბრძოლა არ არის“
პოლიტოლოგი რამაზ საყვარელიძე „ახალ თაობას“ ქვეყანაში ბოლო დროს მომხდარი მოვლენების შესახებ, კერძოდ, პაატა ბურჭულაძესა და ნიკა გვარამიას სატელეფონო საუბრის მნიშვნელობაზე ესაუბრება.
- ბატონო რამაზ, მთელი ინტერნეტ სივრცე დაიპყრო ნიკა გვარამიას და პაატა ბურჭულაძის სატელეფონო საუბრის ჩანაწერმა. ეს ნიშნავს, რომ ქვეყანაში გრძელდება უკანონო მოსმენები?
- დიახ, თუკი ჩავთვლით, რომ არ არის ბრძანება გაცემული ნიკა გვარამიას მოსმენაზე. ამას ხაზს იმიტომ ვუსვამ, რომ მის ფიგურას კავშირი ჰქონდა ადრე დესტაბილიზაციის პროცესებთან.
- ანუ შესაძლოა იყოს სანქცირებული გვარამიას სატელეფონო საუბრების მოსმენა?
- მაშინ, როგორც მე მახსოვს, საქმე აღიძრა და ამ ფონზე უკვე აღარ არის გამორიცხული, რომ ისმინებოდეს. მაგრამ თუკი ისმინება ასეთი სანქცირებული გზით და ხელში ჩაუვარდათ მონაცემი, მაშინ რა უშლის ხელს იმის აღიარებას, რომ აი ჩაგვივარდა ხელში და გთავაზობთ. ამდენად ცოტა გაუგებარი სიტუაციაა ამ თვალსაზრისით.
- და რა არის ამ ყველაფრის ქვეტექსტი? რომ ჩვენი კაცია ბურჭულაძე?
- თუ დავაკვირდებით, რას საყვედურობს გვარამია ბურჭულაძეს, ფაქტიურად საყვედურობს გადახრას ივანიშვილისკენ, მაშინ გამოდის ის, რასაც ნაციონალური მოძრაობა იძახის…
- და რას იძახის?
- რომ ბურჭულაძის პარტიის შექმნა, ივანიშვილის ძალისხმევის შედეგია.
- მათი საუბრიდან გამომდინარე ასე რომ ვერ ვიმსჯელებთ? თითქოს მათი კაცი უფრო ჩანს, ისე საყვედურობს...
- ყოველ შემთხვევისთვის, ასეთი დიალოგი, გაკვირვების საგანი, როგორც ჩანს, არ იყო. ყველამ კარგად ვიცით, რომ დღეს სატელეფონო საუბრის მოსმენა დიდ პრობლემას არ წარმოადგენს, ამისთვის სახელმწიფო სტრუქტურები საჭირო სულაც არ არის. თქვენი კითხვისა არ იყოს, ისეთი გაუგებარი საუბარია, ერთის მხრივ იკითხება ნაციონალების გავლენა, ის რომ ნაციონალებს ბურჭულაძეზე საყვედურის უფლება აქვთ და ისიც არ უნდა გამოვრიცხოთ, რომ ბურჭულაძე ივანიშვილთან ურთიერთობის მომხრე იყოს ამ ეტაპზე. ამ გამოქვეყნებას ნაციონალებისთვისაც გარკვეული სარგებელი აქვს და ხელისუფლებისთვისაც, თუკი მათ მიაჩნიათ, რომ ბურჭულაძის პარტიას უნდა ებრძოლონ. თუმცა მე მეეჭვება, რომ ხელისუფლებას დღეს ჰქონდეს ბურჭულაძესთან ბრძოლის ამოცანა.
- რატომ?
- იმიტომ, რომ ბურჭულაძის პარტია, იმ მიგრაციების მიერ, მისგან წამყვანი ფიგურების წამოსვლის შემდეგ, ის თავისი რეიტინგით არ უნდა წარმოადგენდეს ხელისუფლებისთვის სახიფათო გუნდს. ბურჭულაძის გაერთიანება დაახლოებით ისეთივე რეიტინგის იქნება, როგორისაც არიან ბარიერის გადალახვისთვის მებრძოლი სხვა პარტიები. ჩემთვის გაუგებარია, ბურჭულაძის გამოყოფა მათ ინტერესებში რატომ უნდა იყოს?!
- გვესმის შეფასებები, რომ ბოლო პერიოდია მიზანმიმართულად მიმდინარეობს პაატა ბურჭულაძის, როგორც პოლიტიკური ფიგურის ჩაძირვა, განადგურება. ეს ეპიზოდიც ამის გაგრძელებად უნდა ჩავთვალოთ?
- გააჩნია ამ განადგურების ავტორად ვის ვიგულისხმებთ? მე მგონი, პირველი ავტორი ასეთი განადგურებისა არის თვითონ პაატა ბურჭულაძე. იმიტომ, რომ ანალოგიური რაოდენობა შეცდომებისა, ასე მოკლე ხანში, არც ერთ პოლიტიკურ ფიგურას არ დაუშვია. გაუგებარი ნაბიჯები, მცდარი ნაბიჯები, ქაოტური მოქმედება, სადაც პოლიტიკური სტრატეგიის წაკითხვა ძნელია.
- ანუ არ არის მისი ადგილი პოლიტიკაში და ამას უმტკიცებენ?
- არავინ არ უმტკიცებს, თვითონ აკეთებს ამ ყველაფერს იმიტომ, რომ არც ერთი იმ ადამიანთაგანი, ცნობილი ფიგურები, ვინც წამოვიდნენ ბურჭულაძისგან, ნამდვილად არ არიან ლოიალურად განწყობილნი ხელისუფლების მიმართ. პირიქით, კრიტიკულები არიან. ასე რომ, მე ვერ ვხედავ ვინმე სხვის მცდელობას იმისას, რომ, არიქა, გამოაცალონ პაატა ბურჭულაძეს რაღაც ძალები. მას რომ ნაბიჯი ნაციონალური მოძრაობისკენ არ გადაედგა, ანუ ამ ახალი ფორმისკენ, რასაც „გირჩისა“ და გიორგი ვაშაძის ალიანსი ჰქვია, მსგავსი არაფერი მოხდებოდა. შეთქმულების თეორიის მოგონება ამ სიტუაციაში, როცა ბევრი მხარდამჭერი არ ჰყავს ნაციონალურ მოძრაობას, ეს ყველაფერი გასაკვირი არ უნდა იყოს. ამ ჩანაწერის ამოტივტივებას რაც შეეხება, ეს ნაციონალების ინტერესში უფროა, ვიდრე ხელისუფლების თუ ინტერესებს შევყვებით და იცით, რატომ?!
- რატომ?
- მას მერე, რაც იკვეთება ნაციონალურ მოძრაობასთან პაატა ბურჭულაძის სიახლოვე, დიდი შანსია, რომ პაატა ბურჭულაძემ იგივე ელექტორატი წაიყვანოს, რომელზედაც მუშაობს ნაციონალური მოძრაობა. ისე რომ, ეს ნაციონალობის იარლიყი ყოფს ნაციონალების ხმებს.
- და ეს არ აწყობთ ნაციონალებს?
- რასაკვირველია და სწორედ მათ ინტერესშია, რომ ეს იარლიყი ჩამოაცილოს პაატა ბურჭულაძეს და მიაწებოს ნებისმიერ სხვას. მათ შორის, უპირველესად რაც სჭირდება, ეს არის ივანიშვილთან ურთიერთობის იარლიყი, რომ ივანიშვილს წაართვას ხმები და არა ნაციონალურ მოძრაობს. დღეს ბურჭულაძე აღიქმება, როგორც დაგდებული, ჩართული მტვერსასრუტის მილი, რომელიც საით გადავარდება და საიდან მოხიკავს ხმებს, კაცმა არ იცის. ამიტომ ყველა ცდილობს, რომ გადააგდოს ეს ხმების შემსრუტავი ინსტრუმენტი მეტოქის ბაღში.
- ამ ყველაფრის შემდეგ ბურჭულაძე ხმების შემსრუტავის ფუნქციას შეასრულებს?
- ამ ყველაფრის შემდეგ დიდი ეჭვი მაქვს, რომ ბევრს ვერაფერს შეისრუტავს, მაგრამ მანდაც ნაციონალების ხელწერა იკითხება. ისინი სკურპულოზურები არიან, არც ერთი ხმის დაკარგვა არ უნდათ ხოლმე. თავის დროზე, როცა ბურჭულაძემ ყრილობა ჩაატარა და მის წარმოთქმულ სიტყვაში იგრძნობოდა ნაციონალებისკენ გადახრა, მეორე დღესვე, მაჭავარიანმა საჯაროდ განაცხადა, ალიანსი შევკრათ, ჩვენ თანახმა ვართო. სწორედ იმიტომ, რომ ხმები არ გაყოფილიყო. მაშინ ბურჭულაძემ ამაზე უარი თქვა.
- მაშინ რატომ თქვა უარი?
- სწორედ ამიტომ ვამბობ, ქაოტურად მოქმედებს ბურჭულაძე. ამოცანა დღესაც იგივეა და ეს უფრო მწვავედ დგას. იმდენად მწვავედ მიეწება ბურჭულაძეს ნაციონალების იარლიყი, რომ ის აშკარად წამღებია რაღაცა რაოდენობა ხმებისა. ხოლო ნაციონალები არც ერთ ხმას ადვილად არ თმობენ. ამ შემთხვევაშიც იბრძვიან საკუთარი ხმების დაბრუნებისთვის, რომელიც ბურჭულაძემ წაართვა.
„ახალი თაობა“, 15 სექტემბერი, 2016 წელი
ინტერვიუ ლევან ბერძენიშვილთან: „პაატა ბურჭულაძეს პოლიტიკაზე წარმოდგენა არ აქვს“ // „ბიძინა ივანიშვილის ლანძღვაში გულწრფელობას ვერ ვგრძნობ“
რესპუბლიკური პარტიის ერთ-ერთი ლიდერი, პარლამენტის ევროპასთან ინტეგრაციის კომიტეტის თავმჯდომარე ლევან ბერძენიშვილი „ახალ თაობასთან“ ინტერვიუში ქვეყანაში ბოლო დროს განვითარებულ პოლიტიკურ პროცესებზე საუბრობს.
- ბატონო ლევან, პაატა ბურჭულაძესა და ნიკა გვარამიას შორის ფარულ სატელეფონო ჩანაწერს, რომელიც უკანონოდ გავრცელდა, სადაც მიმდინარე პოლიტიკურ პროცესებზეა საუბარი, როგორ შეაფასებთ?
- ზოგადად მოსმენები გულისამრევია და სრულიად მიუღებელი, ვინც არ უნდა იყოს მოსმენების ობიექტი. ამ კონკრეტულ შემთხვევაში ჩვენ ხელს ვერავის ვერ დავადებთ თუ ვინ ჩაწერა ეს საუბარი, მისი ჩაწერა მოხდა აქ, უკრაინაში თუ ამერიკაში, ჩვენ ეს არ ვიცით. სამწუხარო არის ის, რომ საქართველოს ხელისუფლება ამით არასდროს არ ინტერესდება. იყო გამოქვეყნებული ფარული, უკანონო ჩანაწერები და მისი სრულყოფილი გამოძიება არ მოხდა. თუ ეს საქმეები არ იქნა გამოძიებული და ბოლომდე მიყვანილი, ეს მექანიზმი კიდევ იმუშავებს, რაც სამწუხაროა.
- სატელეფონო საუბრის შინაარსზე რას იტყვით?
- ჩვენ არ ვიცით, ეს საუბარი რამდენად ავთენტურია და ამიტომ სასაუბროც არაფერია. საექსპერტო დასკვნა არავის არ დაუდია. არც პაატა ბურჭულაძის და არც ნიკა გვარამიას მხრიდან არ ყოფილა ფაქტის არც დადასტურება და არც უარყოფა. ამიტომ სალაპარაკოც არაფერი არ არის.
- ნიკა გვარამიამ არ უარყო, რომ მსგავსი შინაარსის საუბარი ჰქონდა პაატა ბურჭულაძესთან...
- გასაგებია, მაგრამ გვარამიას ეს განცხადება არ ნიშნავს, რომ ამ სატელეფონო საუბრის შინაარსის ავთენტურობა დადგენილია. ჩვენ არ გვაქვს ექსპერტიზის დასკვნა. თუ ეს საუბარი რეალურად შედგა, ეს მიუთითებს იმაზე, რომ არსებობს ორი პარტია, რომლებიც ერთმანეთთან პარტნიორულ ურთიერთობაში არიან. ერთ-ერთს, ბურჭულაძის ოპოზიციურ გაერთიანებას, პოლიტიკასთან პირდაპირი კავშირი არ ჰქონდა, ამიტომ გადაწყვიტა, რომ მასში შემავალ პოლიტიკურ ძალებთან ერთად, „გირჩი“ იქნება, ვაშაძე თუ სხვები, პოლიტიკური თამაში ითამაშოს. კოალიციაში, თუ რაც არის, ამ ხელოვნურ წარმონაქმნში ვიღაცა ამბობს იმას, რასაც მაინცდამაინც არ ეთანხმება უფროსი. ჩვენ ვნახეთ, რომ ვიღაც არის ისეთი, რომელიც ამბობს ერთს, რასაც პაატა ბურჭულაძე თითქოს არ ეთანხმება. საუბარია იმაზე, მომავალში ითანამშრომლებენ თუ არ ითანამშრომლებენ „ქართულ ოცნებასთან“. ეს პოლიტიკური გამოუცდელობის ამბავია, რადგან არავინ არჩევნების წინ არ ლაპარაკობს, ვისთან ითანამშრომლებს, ეს არ არის ახლა გადასაწყვეტი საკითხი. ეს იქნება მას შემდეგ გადასაწყვეტი, როდესაც არჩევნები გაიმართება და პარლამენტში პარტიები შევლენ, კონფიგურაცია დალაგდება და ა.შ. ამიტომ ვამბობ, რომ ეს არის პოლიტიკური გამოუცდელობის ბრალი. წინასწარ ამაზე ლაპარაკი არ მეტყველებს დიდ გამოცდილებაზე.
- ბოლო დროს ბურჭულაძის პარტიაში თუ კოალიციაში განვითარებულ მოვლენებს როგორ აფასებთ, დისონანსი შეიტანა ამ ყველაფერმა პოლიტიკურ პროცესებში? სადღაც კულუარებში დაგეგმილი მოვლენები სააშკარაოზე გამოვიდა...
- დიახ, მართალია, რომ სააშკარაოზე გამოვიდა, მაგრამ ეს არის პოლიტიკის პერიფერია, ეს არ არის პოლიტიკის გული, რადგან ბურჭულაძე ვერ გახდა პოლიტიკოსი. ერთ და ორ დღეში პოლიტიკოსი ვერ გახდები. მით უფრო იმ გამოსვლების შემდეგ, რომელიც ვნახეთ. მაგალითად, აჭარაში გამოჩნდა, რომ პაატა ბურჭულაძეს პოლიტიკაზე წარმოდგენა არ აქვს. ამ კატასტროფული გამოსვლის შემდეგ არათუ პოლიტიკა, სიმღერა უნდა შეეწყვიტა. პოლიტიკა, საქმის კეთების გარდა, ლაპარაკიც არის. მას ლაპარაკი არ შეუძლია და საქმე როგორ უნდა გააკეთოს?!
საერთოდ უნდა ვთქვა, რომ პაატა ბურჭულაძის პარტია, თუ რაც არის, თვალსა და ხელს შუა ქრება. ყველაზე უფრო მოწინავე პირები ტოვებენ პარტიას და გადიან. ამ დროს, როდესაც პარტიაში ეს ხდება, პაატა ბურჭულაძე სხვა კონტინენტზე იმყოფება. ეს საერთოდ წარმოუდგენელი ამბავია. მაგალითად, დავით უსუფაშვილი, პარლამენტის თავმჯდომარის რანგში, როდესაც ქვეყნიდან მივლინებით მიდის, ჩვენ ამასაც მივტირით, რომ ერთი დღით პარტიაში კაცი, ლიდერი დაგვაკლდება. სხვა პარტიაში კი თურმე თვეობით შეიძლება არ იყო. ამიტომ არ მჯერა ამ პარტიის მომავლის სწორედ იქიდან გამომდინარე, რასაც ვხედავ. ეს პარტია გადალახავს თუ არ გადალახავს საარჩევნო ბარიერს, იქნება თუ არა პარლამენტში წარმოდგენილი, მას, როგორც ჩანს, პოლიტიკური მომავალი არ აქვს.
- რატომ?
- იმიტომ, რომ ეს ხალხი, რომელიც ჯერ არსად არ მოსულა, მაგრამ უკვე აკეთებს ასეთ განცხადებებს და უკვე ვხედავთ ასეთ მოვლენებს, მათ, რა თქმა უნდა, გაუჭირდებათ. მართალი გითხრათ, საინტერესო კი არის, მაგრამ საქართველოს პოლიტიკის უმნიშვნელო ნაწილია პარტია – სახელმწიფო ხალხისთვის. საერთოდ, ორპარტიული დაპირისპირება „ქართული ოცნებისა“ და ნაციონალური მოძრაობის, თავისი ხელოვნური გაერთიანებით, რომელიც, როგორც ჩანს, ორმაგი დაქვემდებარებისაა, სამივე ერთად ჯამში 50%-ზე მეტს ვერ აიღებს. ქვეყანაში კიდევ არის 50%, რომლისთვისაც სხვა პარტიები იბრძვიან, ამიტომ მომავალი პარლამენტი იქნება არა ორ პარტიული და სამ პარტიული, არამედ მრავალპარტიული. დაახლოებით 1992 წლის პარლამენტის მსგავსი პარლამენტია მოსალოდნელი.
- თქვენ ამბობთ, რომ ჭრელი პარლამენტი გვეყოლება?
- არა, მე ვამბობ მრავალპარტიული, ჭრელში უარყოფითი ნოტები იგრძნობა. პოლიტიკა ერთფეროვანი და ერთ პარტიული კატასტროფაა. საბჭოთა კავშირი უკვე იყო 70 წელი ამ ქვეყანაში.
- ბატონო ლევან, თქვენ ახსენეთ ორპარტიული დაპირისპირება, როდესაც პაატა ბურჭულაძე გამოჩნდა, ექსპერტებმა მიიჩნიეს, რომ სწორედ ის იყო მესამე ძალა, რომელიც სწორედ ამ ორპარტიული დაპირისპირების ალტერნატივა შეიძლება ყოფილიყო. დღეს ეს შანსი ნაკლებია?
- მესამე ძალა არა, ბურჭულაძე თავის თავს, როგორც პირველს, ისე განიხილავს. მერე გაირკვა, რომ მესამე ძალაა, ახლა ირკვევა, რომ მე-17 ძალაა. უკაცრავად, მაგრამ ნამდვილად არ ვფიქრობ, რომ მას, იმ პარტიებს შორის, ვისაც ბარიერის გადალახვის შანსი აქვს, უფრო მეტი რეიტინგი აქვს.
- იმ შემთხვევაში, რესპუბლიკური პარტია თუ იქნება პარლამენტში წარმოდგენილი, ვისთან ითანამშრომლებთ და ვისთან გამორიცხავთ?
- არის საკითხები, რომელთან დაკავშირებითაც ყველა პარტიასთან ვითანამშრომლებთ. მაგალითად, ევროპასთან ინტეგრაციის საკითხებზე, ნატოსთან დაკავშირებით ვითანამშრომლებთ ირმა ინაშვილთანაც თუ მან ხელი მოაწერა დოკუმენტს. თუ საუბარია უმრავლესობას ვისთან შევქმნით და ვისთან არა, ჯერ უნდა ვიცოდეთ, ვინ შედის პარლამენტში და ვინ ვერა. ახლა ამაზე ვერ ვფიქრობთ, ახლა ჩვენ ვფიქრობთ თუ როგორ მოვხვდეთ პარლამენტში იმაზე მეტი, ვიდრე ვართ, ახლა 10 კაცი ვართ. უკანასკნელი სიტყვებით გვლანძღავს, გვწყევლის კოალიციის ერთ-ერთი დამფუძნებელი.
- ბიძინა ბიძინა ივანიშვილზე ხართ ნაწყენი, ბატონო ლევან?
- არა, ბებია რომ შვილიშვილს წყევლის და ძუძუებით ლოცავს, ასეთი ამბავია. ვერ ვგრძნობ მის ლანძღვაში გულწრფელობას. პოლიტიკური ამოცანა აქვს, როგორც ჩანს, მაგრამ ჩვენ ვერ გავიგეთ, რა უნდა.
„ახალი თაობა“, 15 სექტემბერი, 2016 წელი
ინტერვიუ პაატა ჯიბლაძესთან: „ორპარტიული მმართველობა არ გამოვა“
მიუხედავად იმისა, რომ მომავალ პარლამენტში მოხვედრის შანსი რამდენიმე ძალას გაუჩნდა, მაინც ბევრი საუბარია იმაზე, რომ „ქართულ ოცნებას“ ხელს აძლევს ორპარტიულობა. ითვლება, რომ ისევ იქმნება ოპროლუსიანი ვითარება, როცა მმართველი პარტიის ერთადერთი მოწინააღმდეგე ერთიანი ნაციონალური მოძრაობაა. მემარცხენე ალიანსის პოლიტიკური მდივანი პაატა ჯიბლაძე `ახალ თაობასთან~ ინტერვიუში აღნიშნავს, რომ აქ მთავარია მოსახლეობა, რომელსაც ორპარტიულობა არ სურს.
პაატა ჯიბლაძე:
- შეიძლება „ქართულ ოცნებას“ ძალიანაც უნდა, რომ მისი ერთადერთი კონკურენტი ასაკრძალი ნაციონალური მოძრაობა იყოს, მაგრამ ეს მიუღწეველი ამოცანაა. „ქართულ ოცნებას“ მომავალ პარლამენტში ორპარტიულობა არ გამოუვა. 2016 წელს არჩეული საკანონმდებლო ორგანო არ იქნება ახლანდელი პარლამენტის გამეორება. მოსახლეობას არანაირი სურვილი არა აქვს, რომ ქვეყნის მართვა ორ პარტიას მიანდოს. აქედან ერთი დამნაშავე ორგანიზაციაა. ქვეყანაში არიან აქტიური პოლიტიკური ძალები, რომლებსაც აქვთ პარლამენტში მოხვედრის შანსი. ხალხის დიდ ნაწილში იმედგაცრუებაა დღევანდელი ხელისუფლებით. ადამიანებს არც ნაცმოძრაობის დაბრუნება უნდათ. ეჭვს არ იწვევს ის, რომ ხალხს მხოლოდ ამ ორი ძალის ხელისუფლებაში ყოფნა არ უნდა. ორპარტიულობისგან თავის დასაღწევად ყველაზე კარგი საშუალებაა ამომრჩევლის აქტივობა. ამომრჩეველი აუცილებლად უნდა მივიდეს არჩევნებზე.
- პოლიტიკური კლასის შეცვლის მიზნით მიმდინარე კამპანია არ შეუშლის ხელს სხვა ძალების მოხვედრას პარლამენტში?
- პოლიტიკური კლასის შეცვლაზე ბევრს საუბრობენ, მაგრამ ამაში განსაკუთრებულს ვერაფერს ვხედავ. ამ პროცესის უნდა ეშინოდეს იმას, ვინც გასვრილი და კომპრომეტირებულია. მემარცხენე ალიანსი სამი წელიწადია არსებობს. ცუდი სახელი არ გვაქვს. მთლიანობაში, ჩვენ, პარტიის წარმომადგენლები, პოლიტიკაში 20 წელია ვართ. ჩვენზე კომპრომატებს ვერ დადებენ. პოლიტიკური კლასის შეცვლაზე ლაპარაკიც არ გვაშინებს.
- საუბარია იმაზე, რომ პოლიტიკაში სრულიად ახალი სახეები უნდა მოვიდნენ..
- ეს საუბრები და მცდელობები, როგორც გითხარით, დაკავშირებულია კომპრომატებთან. სანამ იარსებებს პოლიტიკა, იქნება კომპრომატების ომიც. საქართველოს პოლიტიკაში მარტო პატიოსანი ხალხი არაა. არიან ისეთი პირები, რომელთა მიზანი ფულის კეთებაა. მათ ქვეყანა, მისი ტერიტორიული მთლიანობა, ხალხის გაჭირვება, საერთოდ არ აინტერესებთ. მათთვის მთავარია გამდიდრება. ასეთები თუ სხვაგან გადაინაცვლებენ, კარგი იქნება.
- ნაცმოძრაობას ასაკრძალი პარტია უწოდეთ. ამ პარტიის მოწინააღმდეგე ორგანიზაცია არც ისე ბევრი უნდა იყოს...
- სიმართლე გითხრათ, ეს არ მაინტერესებს. არ ვიძიებ, ვინ რას ამბობს ნაციონალურ მოძრაობაზე, ან ვინაა ჩადენილ დანაშაულებზე გაჩუმებული. არასამთავრობო ორგანიზაციებისა და პარტიების ნაწილი გასუსულია. როგორც ჩანს, ეს ადამიანები ელიან, რომ დამნაშავე ნაციონალური მოძრაობა და მათი არაოფიციალური ლიდერი სააკაშვილი მათ რაღაცას გადმოუგდებს. ფული ნაციონალებს უამრავი აქვთ. მათ ნაძარცვი არ დაუბრუნებიათ. ისინი ამ უკანონო ფულს მომხრეებისთვისაც ხარჯავენ. მემარცხენე ალიანსი აგრძელებს ნაცმოძრაობის საწინააღმდეგო სარჩელზე მუშაობას. ეს ხანგრძლივი პროცესი გამოდგა. ჩვენი მიზანია ამ სარჩელის საფუძველზე ნაციონალური მოძრაობის აკრძალვა. ნაცმოძრაობის საარჩევნო რეგისტრაციიდან მოხსნის მოთხოვნით ცესკოსაც მივმართეთ. ნაციონალებს ჰყავთ თავიანთი არასამთავრობო ორგანიზაციები და სატელიტები პოლიტიკურ ორგანიზაციებში, რომლებსაც ისინი აფინანსებენ. სატელიტები უნისონში იმეორებენ იმას, რასაც ამბობს ნაცმოძრაობა.
- მაგალითად?
- ამის გარკვევას გამოძიებაც არ სჭირდება. გადახედეთ ნაცმოძრაობის ტელევიზია „რუსთავი-2“-ს და იმათ, ვისაც გადაცემებში ლამის ყოველდღე იწვევენ. ესენი არიან ნაცმოძრაობის სატელიტები. მაგალითისთვის მხოლოდ ორ სუბიექტს დავასახელებ – პაატა ბურჭულაძის ბლოკს და შალვა ნათელაშვილს. ლეიბორისტულ პარტიაში პატიოსანი ხალხიც დარჩა, მაგრამ პარტიის ლიდერი – ნათელაშვილი დიდი ხანია სააკაშვილისგან ფინანსდება. ბურჭულაძე ბლოკის შექმნამდეც იყო რუსთავი 2-ის გაძლიერებული ყურადღების საგანი. ნაცმოძრაობისგან შორს არ ყოფილან ისინიც, ვინც ბურჭულაძემ შეიერთა.
„ახალი თაობა“, 15 სექტემბერი, 2016 წელი
ინტერვიუ მეგი გოცირიძესთან: „ხელისუფლების წარმომადგენლები ნაციონალებში აპირებენ გადმოსვლას“ // „პოპკორნი“ მოიმარაგეთ, წინ მაგარი სანახაობა გველის“
რისთვის ემზადებიან ნაციონალები, რა იარაღს გამოიყენებენ არჩევნებზე, რა ინფორმაცია ჟონავს „ქართული ოცნებიდან“? – ამის შესახებ „ახალ თაობას“ ყოფილი დეპუტატი მეგი გოცირიძე ესაუბრება.
- პროვოკაციები და არეულობის თემა კვლავ აქტუალურია. შს მინისტრი და პრემიერი ამბობენ, რომ მოსალოდნელ არეულობაზე სერიოზული ინფორმაცია აქვთ...
- მაგ დალოცვილებს თუ სერიოზული ინფორმაცია აქვთ, წავიდნენ და აღკვეთონ მოსალოდნელი არეულობა.
- „ქართული ოცნების“ აღმასრულებელი მდივანი ირაკლი კობახიძე ამბობს, რომ ინფორმაცია არეულობის სამზადისზე ნაციონალებიდან ჟონავს. ამაზე რას იტყვით?
- თქვენი გაზეთის საშუალებით მინდა მივმართო კობახიძეს – ირაკლი, შვილო, ინფორმაციების გამოჟონვა თქვენსკენ მოიკითხე.
- ამით რისი თქმა გინდათ?
- ის, რომ ყველაფერი ვიცით, რაც მათ პარტიაში ხდება. ვიცით, რომ პოლიტსაბჭოს ყველა სხდომა ცემა-ტყეპით მთავრდება. ვიცით, რა ამბები იყო სიის ფორმირებაზე. სხვათა შორის, ეს დეტალები კობახიძის ახლო მეგობრებიდან გავიგეთ.
- ამ მეგობრებს არ დაასახელებთ?
- რა თქმა უნდა, არა. ახლა წავიდეს და ირაკლი კობახიძემ გაარკვიოს, ვის გამოაქვს მათგან ინფორმაცია. ჩემი მხრიდან ერთ საინტერესო ინფორმაციას მოგაწვდით, `ოცნების~ პოლიტსაბჭოს რამდენიმე წევრი ძალიან აქტიურად ცდილობს ჩვენთან კონტაქტზე გამოსვლას.
- რას ნიშნავს ცდილობს კონტაქტზე გამოსვლას?
- ინფორმაციებს გვაწვდიან, მომავალზე გვესაუბრებიან. ძალიან კარგად იციან, რომ მათი საქმე დამთავრებულია და ჩვენთან მოსასვლელ გზებს ეძებენ.
- თქვენთან რა უნდათ?
- იციან, რომ ჩვენ მოვალთ ხელისუფლებაში.
- ეს საიდან იციან?
- ეს ბავშვმაც კი იცის.
- არჩევნების შედეგებზე არჩევნების შემდეგ ვისაუბროთ, მანამდე არეულობაზე მაინტერესებს თქვენი აზრი?
- ამ 4 წლის მანძილზე ქოცებისგან მეტი არაფერი გამიგია, მარტო სისხლიან 9 წელს და მოსალოდნელ არეულობაზეა საუბარი. თუ 9 წელი ამდენი დანაშაული ჩავიდინეთ და სისხლისმსმელები ვიყავით, რატომ არ გაგვასამართლეს? რატომ შეიყვანეს სიაში ნაციონალები, მარტო მე და მიშა ვსვამდით სისხლს? რაც შეეხება არეულობას, ამდენ ლაპარაკს, არ ჯობდა, ფაქტები დაედოთ? ხომ ამტკიცებდნენ, რომ ნახმარ საბურავებს ვაგროვებდით მაიდნის მოსაწყობად, ეს საბურავები დაიდოს. ამ თემაზე საუბარი ირაკლი ღარიბაშვილმა დაიწყო. მერე ჭიკაიძემ გააგრძელა. ჭიკაიძის შემდეგ თუ კიდევ გამაკვირვებდა შს მინისტრი, არ მეგონა, მაგრამ გიორგი მღებრიშვილმა ყოველგვარი რეკორდი მოხსნა.
- რაზე საუბრობთ?
- ქვეყანა კრიმინალების სათარეშო მოედნად გადაიქცა. დღე ისე არ გავა, ვიღაც არ დაჭრან, ან არ მოკლან. ყაჩაღობებზე აღარაფერს ვამბობ, ამ დროს გამოდის შს მინისტრი და ამბობს, ჩვენმა ოპონენტებმა იციან, რომ არჩევნები წაგებული აქვთ და არეულობას გეგმავენო. ჯერ ერთი, საიდან იცის, ვის წაგებული აქვს და ვის მოგებული და მეორე, როგორ შეიძლება შს მინისტრი საქართველოს მოქალაქეების ნაწილს ოპონენტებად მოიხსენიებდეს? ეს ჭიკაიძიზმიც აღარ არის, ეს არაპროფესიონალიზმის ზეიმია. ამის შემდეგ გამოვლენ და იტყვიან, პოლიცია დეპოლიტიზირებულიაო. ჩვენ არეულობას ნამდვილად არ ვაპირებთ, არეულობას ვინც აწყობს, ამას ყველა ხედავს. დაგვირბიეს ოფისები, ნაცმოძრაობის თითქმის ყველა ლიდერზე თავდასხმები განხორციელდა. ამის შემდეგ ყოფნით სითავხედე და ამტკიცებენ, რომ ჩვენ პროვოკაციებისთვის ვემზადებით. ერთადერთი პარტია, რომელსაც ახლა საქართველოში არეულობა სურს, ეს „ქართული ოცნებაა“. ისინი უკვე დამარცხებული არიან და ეს ბიზინა ივანიშვილის სატელევიზიო გამოსვლამაც დაადასტურა.
- როდის და სად თქვა ბიძინა ივანიშვილმა ვმარცხდებითო?
- ქუთაისში გამართული პრესკონფერენცია ამის ნათელი მაგალითია. ჟურნალისტების ნაწილი ოთახში ჩაკეტეს და მხოლოდ ისინი დაუშვეს, რომლებიც ყოფილ პრემიერს მისთვის სასურველ კითხვებს დაუსვამდნენ. მოგვიანებით ივანიშვილი უკანა კარიდან გააპარეს, ის 20 კაცთანაც კი ვეღარ ბედავს დალაპარაკებას. მას უკვე საკუთარმა თანაგუნდელებმა აქციეს ზურგი.
- ეს რაში გამოიხატა?
- ის „ქართული ოცნების“ საარჩევნო კლიპიდანაც კი ამოიღეს. ჩვენ ისიც ვიცით, რას ამბობენ ყოფილ პრემიერზე მისი თანაპარტიელები.
- რას ამბობენ?
- მე რატომ უნდა მოგიყვეთ. ცოტა ხანი მოიცადეთ და საჯაროდ გააკეთებენ ამ განცხადებებს. „ოცნებაში“ ღიად საუბრობენ, რომ არჩევნებზე ადმინისტრაციული რესურსის იმედი აქვთ მხოლოდ და მინდა ვუთხრა, რომ იმედი გაუცრუვდებათ. ადმინისტრაციული რესურსი მათ მხარეს არ იქნება. გამოსავალი ერთია – არჩევნები უნდა გააყალბონ. ამიტომაც მიამაგრეს საარჩევნო უბნებზე ნარკომანები.
- ნარკომანებმა რა უნდა გაუკეთონ?
- ეს ხალხი ყველაფერზე წავა და არჩევნების ჩასაშლელად გამოიყენებენ. ვაფრთხილებ ხელისუფლებას, არაფერი გაბედონ. ამ უკანონობას ჩვენ ძალიან სერიოზულ იარაღს დავუპირისპირებთ.
- რა იარაღს?
- ჩვენი იარაღი ჩვენი მხარდამჭერების ხმებია.
- ზედმეტად ხომ არ ხართ საკუთარ ამომრჩეველში დარწმუნებული?
- პირიქით, ძალიან მოკრძალებულად ვსაუბრობ. ჩვენ იმაზე მეტი მხარდამჭერი გვყავს, ვიდრე ეს ვინმეს წარმოუდგენია. ისინი მწყობრად და მშვიდობიანად წავლენ არჩევნებზე და მოგვცემენ ხმას.
- ყველა პარტია იმას იძახის, რომ ამომრჩეველი მას მისცემს ხმას...
- სხვა პარტიებთან ჩვენი შედარება როგორ შეიძლება? დაუშვებელია ნაციონალური მოძრაობა რესპუბლიკელებთან გააიგივო.
- არადა ბევრი საერთო გაქვთ?
- რა გვაქვს მაგათთან საერთო? ისინი ისევე აგებენ პასუხს ამ 4 წელზე, როგორც „ქართული ოცნება“. პასუხი განსაკუთრებული სიმწვავით დავით უსუფაშვილს მოეთხოვება.
- დავით უსუფაშვილს რატომ სთხოვთ განსაკუთრებული სიმკაცრით პასუხს?
- იმიტომ, რომ პარლამენტის თავმჯდომარეა და ქვეყნის მეორე პირია. ყველაზე სასაცილო ისაა, რომ ამ კაცმა გამოაცხადა, ოპოზიცია ვარო. 4 წელი თავზე დაიმხო ყველაფერი და არჩევნებიდან 2 კვირით ადრე ოპოზიციაში წავიდა.
- უსუფაშვილმა კონკრეტულად რა დაიმხო თავზე?
- რა დაიმხო და ქვეყნის ბიუჯეტი. პარლამენტის შენობის რემონტზე ათეულობით მილიონი დახარჯა.
- თქვენმა ხელისუფლებამ საერთოდ მეორე პარლამენტის შენობა ააშენა, რაშიც 400 მილიონამდე დაიხარჯა...
- ძალიანაც კარგი მოხდა, რომ ახალი პარლამენტის შენობა აშენდა. იქ მუშაობისთვის ყველა პირობაა შექმნილი. უსუფაშვილს ქუთაისში სიარული დაეზარა და თბილისის პარლამენტი გაარემონტა. და ეს იმ დროს, როცა ხალხი ქუჩაში შიმშილით იღუპება. უსუფაშვილს ოპოზიციის მანტია არ უშველის, ის სხვებთან ერთად აგებს პასუხს. ახლა ისევ არეულობას დავუბრუნდები და მინდა ვიკითხო, კორცხელში ვინ მოაწყო არეულობა? ამ არეულობაზე ხალხმა მათ საკადრისი პასუხი გასცა და იმიტომაც წააგეს იქ არჩევნები. ასევე იქნება მთელი საქართველოს მასშტაბით – მოაწყობენ არეულობას, წააგებენ არჩევნებს.
- გამოდის, რომ არეულობა თქვენს ინტერესშია.
- ჩვენს ინტერესში არანაირად არ არის. მხოლოდ იმას ვამბობ, რომ ხალხის რეაქცია იქნება ადეკვატური. ჩვენი იარაღი ჩვენი საარჩევნო ხმაა. ამ ხმებს კი აუცილებლად დავიცავთ.
- რა ფორმებით დაიცავთ?
- ყველა ფორმით დავიცავთ. ამის უფლება კონსტიტუციით გვაქვს მონიჭებული. 2012 წელს, არჩევნების წაგების შემდეგ, ჩვენ წავედით. ამათ კეთილი ინებონ და წავიდნენ. წასვლამდე კი ისეთ სანახაობას შემოგვთავაზებენ, ყალყზე დაუდგება ყველას თმები.
- რა სანახაობას?
- ერთმანეთზე ისეთ რამეებს იტყვიან, შოკში ჩავარდებით.
- თქვენ საიდან იცით, რას იტყვიან?
- თავად გვიყვებიან ამის შესახებ. ასე რომ, პოპკორნი მოიმარაგეთ, წინ მაგარი სანახაობა გველის.
———————
„ვერსია“, 14 სექტემბერი, 2016 წელი
ბიძინა ივანიშვილის მასტერკლასი
ერთი განცხადება, რომელმაც ნაციონალებისა და რუსეთუმეების მზე ერთდროულად დააბნელა
მერაბ მერაბიშვილი
ნაცების ლაპარაკს იმის შესახებ, რომ ბიძინა ივანიშვილი და, ზოგადად, ,,ქართული ოცნება” პრორუსული პოლიტიკური ძალაა, წერტილი თავად ყოფილმა პრემიერმა დაუსვა _ ორი დღის წინ მკვეთრად და ნათლად განაცხადა, რომ არც უბლოკო სტატუსი მოსწონს და არც გოგი თოფაძის ესმის. მაშინ, როცა საპარლამენტო არჩევნებამდე თვეზე ნაკლებია დარჩენილი, ივანიშვილის ამ განცხადებამ, პრინციპში, პოლიტიკურ სპექტრში ახალი მეინსტრმი შემოიტანა ანუ აქამდე ნაციონალებს თავი ისე მოჰქონდათ, თითქოს საქართველოს პროდასავლური კურსის ერთპიროვნული ლობისტები იყვნენ, მაგრამ ახლა ყველაფერი სხვანაირად არის.
აქვე ისიც ხაზგასასმელია, რომ ბიძინა ივანიშვილს საქართველოს საგარეო ორიენტაციაზე ასეთი მკაფიო განცხადება დღემდე არ გაუკეთებია, რაც ნაციონალებს ათასი ინტერპრეტაციის საშუალებას აძლევდა. ახლა კი ყოფილ მმართველ გუნდს მანიპულაციის საშუალება მოესპო. ყველაფერი ეს კი, პირდაპირ თუ ირიბად, ალბათ, არჩევნებზეც აისახება, მით უმეტეს, ამ გამოსვლისას ყოფილმა პრემიერმა კიდევ ერთი მნიშვნელოვანი მინიშნება გააკეთა, სახელდობრ, მან თავისუფალი დემოკრატები დადებით კონტექსტში მოიხსენია ანუ როგორც ანალიტიკოსები ამბობენ, ამით ივანიშვილმა ელექტორატს მიანიშნა, რომ თუ ნაციონალები არ იქნებიან ახალ პარლამენტში, ეს ტრაგედია სულაც არ იქნება, რადგან მათი არყოფნით საქართველოს ევროატლანტკურ არჩევანს საფრთხე არ დაემუქრება, რადგან იგივე თავისუფალი დემოკრატები არანაკლები პროდასავლური ძალაა. ამას გარდა, ყოფილი პრემიერის განცხადება ერთგვარი „მეხის დაცემა“ მარტო ნაციონალებისთვის კი არა, იგივე პრორუსული ძალებისთვისაც უნდა ყოფილიყო, რადგან ბოლო დროს ვიღაცები ცდილობდნენ უბლოკო სტატუსის ლობირებას, რაც იგივე მმართველი გუნდის ზოგიერთი მხარდამჭერისთვის, შესაძლოა, მისაღები ფორმულირება იყო.
ზოგადად, ცნობილია, რომ ადამიანების სოლიდური ნაწილი „ოცნების“ მხარდამჭერი ისევ ბიძინა ივანიშვილის ავტორიტეტის გამოა. გამომდინარე აქედან, მისი, რბილად რომ ვთქვათ, კრიტიკა უბლოკო სტატუსის შესახებ, ,,ოცნების” მხარდამჭერებისთვის პირდაპირი სიგნალი იქნებოდა, რომ ისინი ,,უბლოკოებს” და საერთოდ, პრორუსულად განწყობილ პოლიტიკურ ძალებს ახლოსაც არ უნდა გაეკარონ.
„ჩვენ გვაქვს ჩვენი სტრატეგიული მიმართულება არჩეული, რაშიც არა მარტო „ქართული ოცნება“, არამედ, ჩემი აზრით, მთელი საზოგადოებაა შეთანხმებული, რომ ჩვენი მიმართულება, კონკურენციის გარეშე, არის ევროპა, ევროკავშირი და ევროატლანტიკური სივრცე. ქალბატონ ნინოს შანსებს რაც შეეხება, არ მგონია, რომ დიდი შანსები აქვს. რუსეთთან რომ ურთიერთობის დალაგება გვინდა, ამას ჩვენც ვამბობთ. დღესაც შემიძლია გავიმეორო, რომ რუსეთთან ურთიერთობები უნდა დავალაგოთ, მაგრამ არა _ დაკარგული ტერიტორიების ხარჯზე, რაც წყალგამყოფი შეიძლება გახდეს. ყველაფერი უნდა გავაკეთოთ იმისთვის, რომ მშვიდობიანად ჩვენს ყველაზე დიდ მეზობელთან დავალაგოთ ურთიერთობები და ამაში ნინო ბურჯანაძე ვერ არის გამორჩეული“, – განაცხადა ბიძინა ივანიშვილმა.
„ჩვენთვის რომ ვთქვათ, ყოფილმა პრემიერმა ერთი განცხადებით ორი კურდღელი დაიჭირა – ნაციონალების ფანტაზიებიც მოაშთო და ნინო ბურჯანაძესაც მდუღარე გადაასხა. არადა, ნინო ბურჯანაძემ, მას შემდეგ, რაც უბლოკო სტატუსის ინიციატივით გამოვიდა, რეიტინგი, ასე თუ ისე, აკრიფა. ყოველ შემთხვევაში, ის ადამიანები, ვისაც საბჭოთა ნოსტალგია აქვს, დაფიქრდნენ, 8 ოქტომბერს ხმა პარლამენტის ყოფილ თავმჯდომარეს ხომ არ მივცეთო. ალბათ, ქალბატონი ნინოც ფიქრობდა, რომ მის იდეას გარკვეული დადებითი გამოხმაურება „შუშის სასახლიდანაც“ ექნებოდა, მაგრამ ფაქტი ჯიუტია: მისი გათვლები არ გამართლდა და ისეც შეიძლება მოხდეს, რომ უბლოკო სტატუსი მისი პოლიტიკური კარიერის დასასრულის დასაწყისად იქცეს. ისე, ყველაფერ ამას თუ იმასაც დავამატებთ, რომ თოფაძის პარტიამ საარჩევნო რეგისტრაცია ვერ გაიარა, შეიძლება, ერთგვარი წრე შეიკრას. მართალია, ცესკო სახელისუფლო შტო არ არის, მაგრამ საქართველოში გაბატონებული აზრის თანახმად, სარჩევნო ადმინისტრაცია ხელისუფლების პოზიციებს ამყარებს. ჰოდა, შეიძლება, ისიც ვიფიქროთ, რომ თოფაძის პარტიის რეგისტრაციაში არგატარება შეიძლება, ერთგვარი პოლიტიკური ხაზის გატარებაა, ან სულაც, თავად თოფაძის გუნდმა დაუშვა მიზანმიმართული შეცდომა, რადგან ვიდრე სიებს წარადგენდნენ, შეიძლება, მასაც „აუწიეს ყური“ და უთხრეს, რომ ჩრდილოეთის მიმართულებით აღარ უნდა ეაქტიურა”, – უთხრა „ვერსიას“ კონფიდენტმა ანალიტიკოსმა, რომლის განმარტერბით, პოლიტიკაში, ცხოვრებისა არ იყოს, ცალკეული მოვლენები დამოუკიდებლად კი არა, ერთმანეთთან კავშირში უნდა განვიხილოთ.
მოკლედ, საქართველოს ყოფილმა პრემიერმა, ბიძინა ივანიშვილმა ქართულ პოლიტიკურ სპექტრს მასტერკლასი კიდევ ერთხელ ჩაუტარა, რის შემდეგაც გონზე მოსასვლელად ლიდერებს, ალბათ, დიდი დრო დასჭირდებათ.
„ვერსია“, 14 სექტემბერი, 2016 წელი
ინტერვიუ სოსო არჩვაძესთან: რა გავლენას ახდენს არჩევნები საინვესტიციო გარემოზე
მაია მიშელაძე
სტატისტიკის ეროვნული სამსახურის – „,საქსტატის“ მონაცემებით, მეორე კვარტალში პირდაპირი უცხოური ინვესტიციების მოცულობა საგრძნობლად გაიზარდა. წინასწარი მონაცემებით, 2016 წლის მეორე კვარტალში, პირდაპირი უცხოური ინვესტიციების მოცულობამ 445 მილიონი აშშ დოლარი შეადგინა, რაც 2015 წლის იმავე პერიოდის მონაცემებს 20%-ით აღემატება. მიმდინარე წლის პირველ ნახევარში, 834 მილიონი აშშ დოლარის პირდაპირი უცხოური ინვესტიცია განხორციელდა, რაც წინა წლის შესაბამისი პერიოდის მაჩვენებელზე 11%-ით მეტია.
„საქსტატის“ მონაცემებითვე, 2016 წლის მეორე კვარტალში, უმსხვილესი ინვესტორი ქვეყანა აზერბაიჯანია 33%-ით, მეორე ადგილზე გაერთიანებული სამეფოა 14%-ით, მესამეზე კი ჩეხეთი 8%-ით. ყველაზე მეტი პირდაპირი უცხოური ინვესტიცია ტრანსპორტისა და კავშირგაბმულობის სექტორში განხორციელდა და 175 მილიონ აშშ დოლარს მიაღწია, რაც მთლიანი პირდაპირი უცხოური ინვესტიციების 39%-ია. მეორე ადგილზეა საფინანსო სექტორი 60 მილიონი აშშ დოლარით, მესამეზე ენერგეტიკა 46 მილიონი აშშ დოლარით. ,,საქსტატი” ტოპ-ინვესტორების ათეულსაც აქვეყნებს. სტატისტიკის ეროვნული სამსახურის ინფორმაციით, 2016 წლის მეორე კვარტალში, უმსხვილესი პირდაპირი უცხოური ინვესტიციები განახორციელეს: კომპანიებმა ,,აიდიეს ბორჯომი საქართველო”, შპს ,,აიდიეს ბორჯომი ბევერიჯიზ კომპანის” საქართველოს ფილიალი, შპს ,,მაგთიკომი”, შპს ,,ბურჯი”, სს ,,ენერგო- პრო ჯორჯია”, შპს ,,ტავ ურბან საქართველო”, შპს ,,ჯინო პარკი”, სს ,,საქართველოს ჯანდაცვის ჯგუფი”, სს ,,ჰუმანითი ჯორჯია”, შპს ,,ბლექ სი არენა და BP Group (ბრითიშ პეტროლიუმი).
გარდა იმისა, რომ პირდაპირი უცხოური ინვესტიციების სიჭარბე ქვეყნის ეკონომიკის სტაბილურობაზე მიუთითებს და ადასტურებს, რომ უცხოელი ინვესტორები ქვეყანას უსაფრთხოდ მიიჩნევენ, ეროვნული ვალუტის სიმყარის თვალსაზრისითაც, მნიშვნელოვან ფუნქციას ასრულებს. მეტიც, ინვესტიციების სიჭარბე ქვეყნის პერსპექტიულობასაც უსვამს ხაზს, რაც საერთაშორისო ასპარეზზე საკმაოდ პოზიტიური სიგნალია.
„ვერსიას“ ეკონომიკის ექსპერტი, სტატისტიკის სამსახურის ყოფილი უფროსი სოსო არჩვაძე ესაუბრა:
- პირდაპირი უცხოური ინვესტიციების მოცულობა ქვეყნის ეკონომიკისადმი მხოლოდ უცხოური კაპიტალის დაინტერესების დონეს კი არ აჩვენებს, არამედ, ხაზს ეკონომიკის სანდოობასა და პერსპექტიულობასაც უსვამს. საერთოდ, ინვესტიცია მოკლევადიან პერიოდზე არაა გათვლილი და როდესაც ინვესტიციები იზრდება, ეს ნიშნავს, რომ ქვეყნის ეკონომიკისადმი ნდობის ფაქტორიც იზრდება. საქართველოს საინვესტიციო კლიმატი იმდენად საინტერესოა, რომ შორეული ქვეყნებიდან კაპიტალის დაბანდებას სწორედ აქ ამჯობინებენ. მაგალითად, 90-იანი წლების დასაწყისში, სახელმწიფო საბჭოს თავმჯდომარის, შევარდნაძის ხელმოწერილი გარანტია იყო საჭირო, რომ ქვეყანაში ინვესტორი როგორმე ,,შემოგვეტყუებინა”. დღეს კი, საქმიანი კლიმატიდან გამომდინარე, დამოუკიდებლად განხორციელებული მონიტორინგის საფუძველზე, ინვესტორები გადაწყვეტილებას თვითონ იღებენ. საქართველო თანდათან ეწერება ცივილურ ურთიერთობათა მსოფლიო სისტემაში და ეს მხოლოდ მისასალმებელია.
- ბატონო სოსო, მეორე კვარტალში, ინვესტიციების განხორციელების თვალსაზრისით, აზერბაიჯანი, დიდი ბრიტანეთი და ჩეხეთი ლიდერობენ. საქართველოს ტრადიციული სავაჭრო პარტნიორები თავს რატომ იკავებენ?
- მხოლოდ ერთი კვარტლის მონაცემების მიხედვით, შორსმიმავალი დასკვნებისგან თავი უნდა შევიკავოთ. ზუსტი სურათისთვის, წლიური ინვესტიციების მოცულობა გვჭირდება, რაც დინამიკის მიხედვით, წინა წლების მონაცემებს უნდა შევადაროთ. მხოლოდ ასეთ შემთხვევაში გამოჩნდება, ამ ინვესტიციებს ქვეყანაში რამდენად სტაბილური ხასიათი აქვს. შესაბამისად, უფრო დაზუსტებით დავასკვნით, ინვესტიციები შემთხვევითია, ერთჯერადი თუ მყარ ტრადიციებს ეფუძნება. ჩვენი ქვეყნის ტრადიციული სავაჭრო და საინვესტიციო პარტნიორი აზერბაიჯანია, რომელიც მეორე კვარტლის მონაცემებითაც ლიდერობს, თუმცა წლების განმავლობაში, საქართველოს ტრადიციული სავაჭრო და საინვესტიციო პარტნიორები, აზერბაიჯანის მსგავსად, ევროკავშირის წევრი ქვეყნებიც იყვნენ და მათი ინტერესი წლიურ მონაცემებში უფრო აშკარად გამოჩნდება. ბოლო დროს, საქართველოს მიმართ არაბული ქვეყნების ინტერესიც იზრდება ანუ ნელ-ნელა ჩვენი ქვეყნის საინვესტიციო გეოგრაფია ფართოვდება. რაც მთავარია, ამ შემთხვევაში არ უნდა გამოგვრჩეს ჩინეთი _ ამ ქვეყნიდან განხორციელებული ინვესტიციები საგრძნობლად მზარდია, რაც ძალიან მნიშვნელოვანია. სხვათა შორის, ბოლო დროს, საქართველოს ეკონომიკით რუსული კაპიტალი სულ უფრო მეტად ინტერესდება: თუ ადრე რუსეთი მხოლოდ ენერგეტიკის სფეროთი იყო დაინტერესებული, ახლა გადამამუშავებელ და კვების მრეწველობაში, ასევე ღვინის წარმოებაშიც შემოდის.
- ტრადიციულად, ინვესტიციების სიჭარბით ენერგეტიკა, ტრანსპორტი და კავშირგაბმულობა გამოირჩევა. ინვესტორები ეკონომიკის სხვა დარგებით რატომ არ ინტერესდებიან?
- ხაზი გავუსვათ, რომ ჩვენ მხოლოდ მეორე კვარტლის მონაცემებზე დაყრდნობით ვმსჯელობთ, რაც სრულყოფილ სურათს არ გვაძლევს. რაც შეეხება კითხვას, პირდაპირი უცხოური ინვესტიციები შემოდის ქიმიურ მრეწველობაში, გადამამუშავებელ სფეროში. მეტსაც გეტყვით, საქართველოს ეკონომიკაში არაა დარჩე ნილი მნიშვნელოვანი სფერო, სადაც უცხოური კაპიტალი არ მონაწილეობს. ზოგადად, ინვესტორს ერთი პრინციპი აქვს _ რამდენად საინტერესოა ის სფერო, სადაც კაპიტალი უნდა დააბანდოს და როგორია მოგების ის მასშტაბი, რაც ინვესტიციის განხორციელების შედეგად უნდა მიიღოს. თუ ბაზარი და მისი ტევადობა მცირეა და აქ წარმოებული პროდუქციის გასაღების ბაზარს პრობლემები ექმნება, მაშინ ინვესტორი ასეთ სფეროში კაპიტალს არ დააბანდებს. რაც შეეხება ენერგეტიკას, ეს საკმაოდ პერსპექტიული დარგია, როგორც საქართველოში, ასევე, მის ფარგლებს გარეთაც. დღეს მსოფლიოში ენერგიაზე მზარდი და სტაბილური მოთხოვნა არსებობს, შესაბამისად, ეს დარგი საკმაოდ პერსპექტიულია და უცხოელი ინვესტორებიც ენერგეტიკით სწორედ ამის გამო ინტერესდებიან, თუმცა ბოლო დროს ქართველი ინვესტორებიც ინტერესდებიან უცხო ქვეყანაში კაპიტალის დაბანდებით და ერთობლივ საწარმოებსაც ქმნიან. მართალია, ჯერჯერობით ეს არცთუ მნიშვნელოვანი და დიდი ტალღაა, მაგრამ ცალკეული ფაქტების არსებობაც კი სასიამოვნოა. ყველაფერი ეს კი ნიშნავს, რომ ქართული კაპიტალი უკვე ვეღარ ეტევა ,,ეროვნულ არტახებში” და ცდილობს, საერთაშორისო ბაზარზე გავიდეს.
- ქართული კაპიტალის უცხო ბაზრებით დაინტერესებაში კონკრეტულად, რას გულისხმობთ?
- მართალია, ცალკეული შემთხვევებია, მაგრამ არცთუ დიდი ხნის წინ, ქართულ- სომხური ავიაკომპანია შეიქმნა, რომელიც სომხეთიდან ფრენებს სხვადასხვა ქვეყნის მიმართულებით ახორციელებს. ქართული კაპიტალი ზოგიერთი უკრაინული საწარმოს ფორმირებაშიც მონაწილეობს. ეს არცთუ დიდი ტალღაა, მაგრამ აშკარად პირველი მერცხლები არიან იმ თვალსაზრისით, რომ ქართული კაპიტალის სხვა ქვეყნებში დაბანდებას ცდილობენ.
- ბატონო სოსო, მეორე კვარტალი აქტიური პერიოდია ინვესტიციების განხორციელების თვალსაზრისით, თუ პირდაპირი უცხოური ინვესტიციების შემთხვევაში, პერიოდს მნიშვნელობა არ აქვს?
- ინვესტიციებს აღმავალი ან დაღმავალი ტრენდები კვარტლების მიხედვით არ ახასიათებს. პირდაპირი უცხოური ინვესტიციების მოცულობის სიჭარბე ან ნაკლებობა გარიგებებსა და ხელშეკრულებებში დაფიქსირებულ დროზეა დამოკიდებული, რაც ამა თუ იმ სფეროში საქმიანობის დაწყებას მიუთითებს, თუმცა ტენდენცია, რომ პირდაპირი უცხოური ინვესტიციების მოცულობა მეორე კვარტალში მზარდია, გარკვეულწილად, პოზიტიურია და აგიხსნით, რატომაც.: საკმაოდ მნიშვნელოვანი მომენტი არ უნდა დაგვავიწყდეს _ საქართველოში საარჩევნო წელია. ქვეყანაში რომ პოლიტიკური არასტაბილურობა და გაურკვევლობა იყოს, უცხოელი ინვესტორები თავს შეიკავებდნენ, არჩევნების შედეგებს დაელოდებოდნენ და ინვესტიციებს ამის შემდეგ განახორციელებდნენ, მაგრამ არჩევნების მიუხედავად, ვინაიდან მეორე კვარტლის მონაცემებით, პირდაპირი უცხოური ინვესტიციების მოცულობა გაიზარდა, ეს ნიშნავს, რომ არჩევნები რა შედეგითაც უნდა დასრულდეს, ქვეყანაში საინვესტიციო გარემო არ გაუარესდება, რაც ძალიან დიდი, სერიოზული მიღწევაა და ამით უნდა ვიამაყოთ, რადგან საქართველოს ეკონომიკაში სტაბილურობა, პრაქტიკულად, უზრუნველყოფილი იქნება.
