„რეზონანსი“: ინტერვიუ სოსო ცინცაძესთან: „დღევანდელი რიტორიკით დონალდ ტრამპი „იალტა-2“-ის წინააღმდეგი შეიძლება, სულაც არ იყოს“

„რეზონანსი“: სკანდალი თავდაცვაში – ლევან იზორიას თანამდებობაზე „ზონდერების“ დანიშვნას აბრალებენ

„რეზონანსი“: ინტერვიუ ანი მიროტაძესთან: „ოპოზიციურ პარტიებში ახალ გაერთიანებაზე მიდის საუბარი“

—–

„ვერსია“: „ეროვნულ ფორუმს“ ანი მიროტაძეც ტოვებს და პარტია უქმდება? // ოპოზიცია ახალ პარტიას – „საქართველოს პოლიტიკოსთა ნაკრებს“ ქმნის

„ვერსია“: ინტერვიუ გოჩა ჯოჯუასთან: კვალიფიციური სუბიექტები ახალ მოძრაობას იწყებენ // არჩევნებში დამარცხებული პარტიები რამდენიმე ბანაკს ქმნიან

„ვერსია“: არასაპარლამენტო ოპოზიციის ფარული გეგმა // ნინო ბურჯანაძესა და გუბაზ სანიკიძესთან ბლოკს ვალერი ხაბურძანია, სიმონ ნოზაძე და ზვიად ჩიტიშვილი ქმნიან?

—–

„ახალი თაობა“: ინტერვიუ რამაზ საყვარელიძესთან: „ნაცმოძრაობა“ წამგებიანი ალტერნატივის წინაშეა“

„ახალი თაობა“: ინტერვიუ კონსტანტინე გამსახურდიასთან: „ოპოზიცია ძლიერი იყო 2007 წლის 2 ნოემბერს“ // „პოლიტიკა ნიჰილისტური განწყობების ადგილი არ არის“

„ახალი თაობა“: ინტერვიუ გელა ნიკოლაიშვილთან: „ნარკოტიკებით ვაჭრობას მფარველები ხელისუფლებაშიც ეყოლება“ // „დღეს მოსწავლეებში ნარკოტიკის მოხმარება კარგ ტონად ითვლება“

„ახალი თაობა“: ინტერვიუ ლევან ხაბეიშვილთან: „დავით ნარმანია მილიონერების სწავლას აფინანსებს“ //  „სოციალურად დაუცველი სტუდენტების დაფინანსება 150.000 ლარით მცირდება“

—–

„რეზონანსი“: საქართველოს საბანკო სექტორში ფული თეთრდება // „დიდი კვლევა-ძიება საჭირო არ არის, ისედაც ცხადია, რომელია ასეთი ბანკები ქვეყანაში“

„რეზონანსი“: ლარის დღევანდელ ნიშნულზე დასტაბილურება კრიზისს გააღრმავებს // ეროვნული ვალუტა ჯერ უნდა გამყარდეს და შემდეგ მისაღებ ნიშნულზე გაჩერდეს

„რეზონანსი“: თუ ხელისუფლებამ ნარკოპოლიტიკა არ შეცვალა, „გირჩი“ საჯაროდ დათესავს „პლანს“

——————-

„რეზონანსი“, 17 ნოემბერი, 2016 წელი

ინტერვიუ სოსო ცინცაძესთან: „დღევანდელი რიტორიკით დონალდ ტრამპი „იალტა-2“-ის წინააღმდეგი შეიძლება, სულაც არ იყოს“

თაკო მათეშვილი

“ხან ამერიკული ტანკები რომ შემოდიოდა თბილისში ორიოდ კვირით, ხან ფინანსური დახმარებები იყო, ხან არმიის წვრთნა ტარდებოდა, ამერიკელების ფულით ნატო-ს სასწავლო ცენტრი გაიხსნა და ა.შ. ეს ყველაფერი ნელ-ნელა გაქრება,” – ასე პესიმისტურად ხედავს პოლიტოლოგი სოსო ცინცაძე საქართველო-ამერიკის მომავალ ურთიერთობებს და ამბობს, რომ ილუზიები სტრატეგიულ პარტნიორობასთან დაკავშიორებით, დასრულდა. მისივე თქმით, ევროპელებმაც იგრძნეს, რომ ამერიკის ხარჯზე “მუქთად ცხოვრება” დასრულდა და სწორედ ამის გამოძახილია არაერთი ლიდერის ბოლოდროინდელი განცხადებები იმის შესახებ, რომ დროა ევროპამ თავდაცვის გეგმები ცალკე შეიმუშაოს.

სოსო ცინცაძე: ევროპელებს ამერიკისა და ტრამპის იმედი აღარ აქვთ. სტოლტენბერგის წერილი, რომელიც ცოტა ხნის წინ გავრცელდა, პანიკის მდგომარეობაში იყო დაწერილი. აშკარად ემჩნევა, რომ მისი ავტორი უკვე შეცბუნებული და სასოწარკვეთილია. ეს დიპლომატიური მიმართვა არ იყო. როგორც ჩანს, ევროპელებს აქვთ იმის საფუძველი, რომ მომავალი და ამერიკის ხედვა ნატო-სთან დაკავშირებით რეალისტურად შეაფასონ. თუმცა, მგონი შიში ცოტა არ იყოს, გაზვიადებულია, რადგან ტრამპს არ უთქვამს, რომ ამერიკა ნატო-ს მიატოვებს. მან მხოლოდ ის თქვა, რომ ყველამ დაწესებული საწევრო უნდა გადაიხადოს – ქვეყნის მთლიანი შიდა პროდუქტის 2%. ეს მოთხოვნა კანონიერია. ვერავინ იტყვის, რომ ნატო-ში ყოფნა უნდათ, მაგრამ საწევროს გადახდა – არა. არადა, აქამდე ასე იყო – მთელი 70 წელი დადგენილ საწევროს მხოლოდ ამერიკა იხდიდა. ახლა კი ტრამპმა თქვა, რომ თუკი ევროპელებს ამერიკისა და ნატოს-სგან დაცვა უნდათ, ნაკისრი ვალდებულებები უნდა შეასრულონ.

- ევროპული არმიის შექმნაზეც ამიტომ გააქტიურდა საუბარი?

- ამაზე ლაპარაკი ადრეც იყო, მაგრამ ეს ყველაფერი ფანტაზიის დონეზეა. არმიის შექმნას დონალდ ტრამპის პრეზიდენტობის ვადა არც ეყოფა. ეს უამრავ ბიუროკრატიულ პროცედურასთანაა დაკავშირებული – 28 ქვეყანა უნდა შეთანხმდეს და ა.შ. თანაც გამოდის, მისი მიზანი ბალტიისპირეთის რუსეთისაგან დაცვა იქნება და როგორ ფიქრობთ, ბულგარეთი დაეთანხმება იმას, რომ არმია შექმნან, რომელიც რუსეთის წინააღმდეგ იმოქმედებს? ან უნგრეთი და იტალია დაეთანხმებიან? ასე რომ, ეს მხოლოდ ლირიკაა.

- ახალი არმიის შექმნა ხომ დიდ ფინანსებთანაა დაკავშირებული და ევროპელებს ნატო-ს საწევროს გადახდა ახალ არმიაზე რატომ ურჩევნიათ?

- ყველაფერი ფინანსებთანაა დაკავშირებული, მაგრამ მაგათ იმის იმედიც არ აქვთ, რომ მშპ-ის 2%-ის გადახდის შემდეგ მაინც ტრამპი შეთანხმების ერთგული იქნება და რუსეთის აგრესიის პირობებში ბალტიის ქვეყნების მიმართ მე-5 მუხლს აამოქმედებს.

დონალდ ტრამპი ერთს ამბობს, მაგრამ როგორ მოიქცევა, არავინ იცის. მისი პირველივე ნაბიჯები უკვე ეჭვს იწვევს. ეკოლოგიური სააგენტოს დირექტორად დანიშნა ადამიანი, რომელიც უკანასკნელი 10-15 წელი იმითაა ცნობილი, რომ ქვანახშირის მომპოვებელ საერთაშორისო კორპორაციებს დაქირავებული ჰყავთ, მთელ მსოფლიოში დადის და იძახის, რომ არავითარი ეკოლოგიური პრობლემები, გლობალური დათბობა და მავნე გაზები არ არსებობს. ასეთი კაცი დანიშნა მან და ეს იმას ნიშნავს, რომ ამერიკა ეკოლოგიური პროგრამებისთვის კაპიკს აღარ გადაიხდის. არადა, ამის შესახებ ვალდებულებები შარშან პარიზში იკისრა. ორიოდ კვირაში ეკოლოგიურ საკითხებზე სამიტი უნდა გაიმართოს და ტრამპმა უკვე თქვა, რომ ის მონაწილეობას არ მიიღებს. მისი პირველივე ნაბიჯები ევროპელებში პესიმიზმს იწვევს. პარტნიორებთან დაკავშირებულ ამერიკულ პრინციპებს ტრამპი თავდაყირა აყენებს. ერთადერთი, ვისთანაც ის ვერაფერს ბედავს, ისრაელია. ამდენი ჭკუა ნამდვილად აქვს. თუმცა, კაციშვილმა არ იცის, ხვალ რას მოიმოქმედებს. ამერიკის მოკავშირეებთან ურთიერთობის საკითხში რევოლუციური ცვლილებებია მოსალოდნელი.

დონალდ ტრამპის პრინციპი ასეთია – გინდა დაგეხმარო? ჩემი დახმარება უნდა იყიდო. თუ ამის ფული არ გაქვს, დემოკრატიული ლიდერის იმიჯის გამო არ დაგეხმარები.

- თუ დონალდ ტრამპი ევროპასთან მიმართებაში ამბობს, რომ ფულის გარეშე არავითარი სტრატეგიული მოკავშირეობა არ არსებობს, საქართველოსთან მიმართებაში როგორ პოზიციას დაიკავებს? რა კონკრეტულ ცვლილებებს ელოდებით?

- ჩემი აზრით, საქართველოს სტრატეგიული მოკავშირე თავისი ისტორიის მანძილზე არ ჰყოლია. ის, რაც იყო – ხან ამერიკული ტანკები რომ შემოდიოდა თბილისში ორიოდ კვირით, ხან ფინანსური დახმარებები იყო, ხან არმიის წვრთნა ტარდებოდა, ამერიკელების ფულით ნატო-ს სასწავლო ცენტრი გაიხსნა და ა.შ., ყველაფერი ნელ-ნელა გაქრება.

- საქართველოს არაფერი აქვს ისეთი, რითიც დონალდ ტრამპს დააინტერესებს?

- ჯერჯერობით რასაც დონალდ ტრამპი ლაპარაკობს, იქიდან გამომდინარე საქართველოს არაფერი აქვს. პირიქით – ტრამპი ამბობს, რომ რუსეთთან ნორმალური, პარტნიორული ურთიერთობა უნდა და ამას ცუდი სუნი უდის. არა მხოლოდ საქართველოს კუთხით, მან ისიც თქვა, რომ უკრაინა საერთოდ არ აინტერესებს, რომ უკრაინის მოვლენები ევროპელების პრობლემაა და მათი მისახედია. თავისი დღევანდელი რიტორიკიდან გამომდინარე, ტრამპი სულაც არ იქნება წინააღმდეგი, პუტინის გეგმა “იალტა 2″-ის განხორციელების თაობაზე შესრულდეს. ანუ, როგორც იალტაში გაიყო მსოფლიო გავლენის სფეროებად, ახლაც ხელახლა გაიყოს. პუტინს უნდა, პოსტსაბჭოური სივრცე მისი გავლენის სფეროდ აღიარონ, დასავლეთ ევროპაში კი არ ჩაერევა. ამას ითხოვდა სტალინიც.

თუ თავის დროზე იალტის მოვლენები იკადრეს და თავს ლაფი დაისხეს ისეთმა დემოკრატებმა, როგორებიც რუზველტი და ჩერჩილი იყვნენ, ტრამპი მაგაზე უკან დაიხევს? თანაც, ახლანდელი მოლდოვისა და ბულგარეთის არჩევნების შედეგებიც საინტერესოა. იტალიაშიც რეფერენდუმია დანიშნული, შემდეგ გერმანიასა და საფრანგეთშიც მოდის არჩევნები. არავინ იცის, როგორ შეიცვლება ძალთა თანაფარდობა.

რეალისტები უნდა ვიყოთ. ცოტა ხანში კვირიკაშვილი ევროპაში მიდის და ეს ვიზიტი ძალიან მნიშვნელოვანი იქნება. ვნახოთ, რას ეტყვიან ევროპელები. თუკი მას პოლიტიკური ნება და დასავლური ფასეულობების ერთგულება კიდევ გააჩნია, უნდა ხვდებოდეს, რომ რეგიონში მისი უკანასკნელი დასაყრდენი, ბუნებრივი მოკავშირე ერთადერთი ქვეყანა – საქართველოა. ამ დროს კი ვხედავთ, როგორ ცუდად გვექცევა ევროპა – კასტრირებულ ვიზალიბერალიზაციას გადაგვაყოლეს. გაზაფხულიდან დაწყებული გვეუბნებიან, რომ მალე იქნება და მთელი წელი გავიდა, ვიზალიბერალიზაცია კი ისევ არ ჩანს. წესით, თუკი ევროპას მართლაც უნდა, საქართველოს ხელი გამოუწოდოს და სულ მინიმალური დახმარება აღმოუჩინოს, ვიზალიბერალიზაციას კი არ უნდა გვაძლევდეს, საერთოდ უვიზო რეჟიმს უნდა აწესებდეს.

ბოლოს და ბოლოს სირიიდან, ერაყიდან, აფრიკის ქვეყნებიდან მილიონობით მუსლიმი ევროპაში უვიზოდ შედის, ეხმარებიან კიდეც და საქართველოს ვიზალიბერალიზაციასაც არ აძლევენ? მთელი საბჭოთა კავშირიდან ყაჩაღები და ბანდიტები იქ ისედაც კარგად შედიან. მხოლოდ ნორმალური, წესიერი ვერ შედის, თორემ ბანდიტებს და განგსტერებს ეს არასოდეს უჭირდათ.

ასე რომ, ევროპას რაც ემართება, თავისი ბრალია. ამიტომ, სიმართლე გითხრათ, მისდამი არანაირი თანაგრძნობა არ გამაჩნია. ევრობიუროკრატია უბრალოდ გაღორდა და სხვის ხარჯზე ცხოვრებას დაეჩვია. შეიარაღებაზე კაპიკის დახარჯვა აღარ უნდათ. ავღანეთში 2-2 და 3-3 ჯარისკაცი გაგზავნეს. ექიმებს და მზარეულებს გზავნიან, ჯარისკაცების გაგზავნა კი არ უნდათ.

საქართველოს უფრო მეტი ჯარისკაცი ჰყავს გაგზავნილი, ვიდრე ევროპის ნატო-ს ქვეყნებს ერთად აღებულს. ახლა, როცა მოვიდა კაცი, რომელმაც უთხრა, რომ თავის კმაყოფაზე აღარ ამყოფებს, ევროპელები პანიკაში ჩაცვივდნენ. ამაზე დროზე უნდა ეფიქრათ. დღეს თუ არ იქნებოდა ტრამპი, ხვალ იქნებოდა ვინმე სხვა, ვინც ეტყოდა, რომ სხვის ხარჯზე ცხოვრება აღარ გამოუვათ.

- ჩვენთვის ყველაზე ცუდი სცენარი ამერიკის მიერ რუსეთის ოკუპაციასთან შეგუება იქნება. გვაქვს გარანტია, რომ საქმე აქამდე არ მივა?

- ხომ ხედავთ, ჩვენ არაღიარებით უკვე დავკმაყოფილდით. არაღიარება “ნაცმოძრაობის” უდიდესი მიღწევა გვგონია. არადა ეს მინიმალურზე მინიმალური იყო. ასე არაღიარებით წინ ვერ წავალთ. გაყოფილი კვიპროსი ნახევარ საუკუნეზე მეტია, არსებობს და აქაც ასე იქნება. მით უმეტეს, რომ არავინ იცის, ჰქონია თუ არა ოდესმე შერიგების სამინისტროს ტერიტორიული მთლიანობის აღდგენის რაიმე სტრატეგია. არასოდეს ჰქონია. ამ დროს აფხაზეთში ახალი თაობები მოდის, რომელთათვისაც საქართველო აფრიკის რომელიმე ქვეყანასავით უცხოა. ჩვენდამი სულ უფრო და უფრო მტრული დამოკიდებულებაა. რაც არ უნდა ვეძახოთ, ძმები ხართო, ისინი მაინც გვპასუხობენ, რომ მტრები ვართ და კომიკური სიტუაცია იქმნება. ჩვენმა ქართულმა დიპლომატიამ ცოტა თავი უნდა შეაჯანჯღაროს და კრეატიული გადაწყვეტილებების ძებნა დაიწყოს.

- ახლო აღმოსავლეთისათვის რა იცვლება ტრამპის ახლებური მიდგომების შედეგად?

- ტრამპის პრიორიტეტი დღეს, როგორც თავად ამბობს, ქალაქ მოსულის “ისლამური სახელმწიფოსაგან” გათავისუფლებაა. შეიძლება ამის შემდეგ ასადის ყოფნაზე თვალი დახუჭოს და სირია რუსეთს ჩააბაროს. მხოლოდ “ისლამური სახელმწიფოს” დამარცხებით ახლო აღმოსავლეთში წესრიგი არ დამყარდება, რადგან იქ უკვე ათობით სამხედრო ორგანიზაციაა. ტრამპმა უკვე თქვა, რომ დღეს ასადის გადაყენება პრიორიტეტი არაა, მაშინ, როცა ობამასა და ევროპელებს ასადის დარჩენის გაგონება არ უნდოდათ.

როგორც ჩანს, ასადი რჩება და თუკი ის რჩება, ე.ი. სამოქალაქო ომიც გაგრძელდება. ის კი ამ ომს მარტო ვერ გაუძლებს და მოკავშირე დასჭირდება. ეს მოკავშირე რუსეთი იქნება. სამაგიეროდ კი პოსტსაბჭოურ ზონაში ამერიკელების გავლენა და დახმარება შემცირდება.

„რეზონანსი“, 17 ნოემბერი, 2016 წელი

სკანდალი თავდაცვაში – ლევან იზორიას თანამდებობაზე „ზონდერების“ დანიშვნას აბრალებენ

ელზა პაპოშვილი

მინისტრ ლევან იზორიას მიერ გუშინწინ ავიაციისა და საჰაერო თავდაცვის სარდლის მოვალეობის შემსრულებლად სერგო ნინუას, ხოლო ავიაციისა და საჰაერო თავდაცვის შტაბის უფროსად გიორგი ცაბაძის დანიშვნას სამხედრო ექსპერტებისა და ანალიტიკოსების მწვავე შეფასებები და განცხადებები მოჰყვა. ამის შემდეგ კი გუშინ თავდაცვის სამინისტროს გენერალურმა ინსპექციამ ამ თანამდებობის პირებზე მოკვლევა დაიწყო, რის შემდგაც ნინუამ და ცაბაძემ თანამდებობები დროებით დატოვეს.

სამხედრო და უსაფრთხოების საკითხების სპეციალისტები ცაბაძეს და ნინუას, “ნაციონალური მოძრაობის” ხელისუფლების დროს “სიკვდილის ესკადრონების” ტიპის დაჯგუფების ხელმძღვანელობას აბრალებენ. ამას გარდა, “მოამბემ” გამოამზეურა დოკუმენტი, სადაც გენშტაბის უფროსის პირველი მოადგილე ვლადიმერ ჩაჩიბაია მინისტრ იზორიას ამ ოფიცრების დანიშვნას თხოვს, მიუხედავად იმისა, რომ როგორც თვითონვე მიუთითებს, ისინი საჭირო კრიტერიუმებს ვერ აკმაყოფილებენ.

მათი განცახდებით, ეს ოფიცრები ჯარისკაცებსა და სხვა ოფიცრებზე პოლიტიკურ ზეწოლას ახორციელებდნენ და ყველა სახის დანაშაულებრივ დავალებას ასრულებდნენ. მათივე განცხადებით, ნინუა და ცაბაძე თანამდებობების დასაკავებლად შესაბამის კრიტერიუმებს ვერ აკმაყოფილებდნენ და მინისტრმა ისინი კანონდარღვევით დანიშნა.

“გთხოვთ გადაწყვეტილებას ვიცე-პოლკოვნიკ ნინუასა და ვიცე-პოლკოვნიკ ცაბაძის წარმოდგენილ თანამდებობებზე დანიშვნის შესახებ, გამონაკლისის სახით, შერჩევის უმაღლეს საბჭოზე განხილვის გარეშე… დამატებით მოგახსენებთ, რომ ზემოაღნიშნული სამხედრო მოსამსახურეები ვერ აკმაყოფილებენ… თავდაცვის მინისტრის 2014 წლის 17 თებერვლის ბრძანებით დამტკიცებული “საქართველოს თავდაცვის სამინისტროს საშტატო ნუსხებით განსაზღვრულ ოფიცერთა თანამდებობის საკვალიფიკაციო მოთხოვნებს” – ნათქვამია ჩაჩიბაიას მიერ იზორიასთვის გაგზავნილ წერილში. “პოლკოვნიკის” თანამდებობის საკვალიფიკაციო მოთხოვნებია: მინიმალური ნამსახურები წლები ოფიცრის თანამდებობაზე და უცხო ენის ცოდნა.

გარდა ამისა, კონსტიტუციით, შეიარაღებული ძალების გენერალური შტაბის უფროსს და სხვა მხედართმთავრებს მთავრობასთან შეთანხმებით პრეზიდენტი ნიშნავს, თუმცა ამ შემთხვევაში ნინუასა და ცაბაძის თანამდებობაზე დანიშვნის ბრძანება თავდაცვის მინისტრის მიერაა გამოცემული.

სერგო ნინუას და გიორგი ცაბაძის განცხადებით, თანამდებობები იმის გამო დატოვეს, რომ სრულყოფილი მოკვლევა ჩატარდეს და მათ მიმართ გაჟღერებულ ბრალდებებთან დაკავშირებით ყველა კითხვას პასუხი გაეცეს. სამხედროები იმ პირების დაკითხვასაც მოითხოვენ, რომლებმაც მათ მიმართ ბრალდებები გააჟღერეს.

სამხედრო ექსპერტ ვახტანგ მაისაიას თქმით, ლევან იზორია შეცდომაშია შეყვანილი და იმ პირის თანამდებობიდან გადაყენებას ითხოვს, ვინც ცაბაძისა და ნინუას თანამდებობებზე დანიშვნის მოთხოვნით მინისტრს მიმართა, ანუ გენერალ ჩაჩიბაიასი.

მაისაიას თქმით, ნინუა და ცაბაძე “ნაციონალური მოძრაობის” ხელისუფლების დროს, არაფორმალურ გაერთიანებაში იმყოფებოდნენ, სადაც, სხვა ძალოვანი სტრუქტურის წარმომადგენლებთან ერთად, კონკრეტული მაღალჩინოსნებისგან პოლიტიკურ დავალებებს იღებდნენ და პოლიტიკური ტერორის განხორციელება ევალებოდათ. ამაში კი საკმაოდ სოლიდურ გასამრჯელოს იღებდნენ.

“ამ ხალხის კვლავ თავდაცვის სამინისტროში მოღვაწეობა და ახლა მათი დაწინაურება იმის ბრალია, რომ “ქართულმა ოცნებამ” თავის დროზე საკადრო წმენდა არ განახორციელა და სამინისტო ასეთი საეჭვო წარსულის მქონე ადამიანებისგან არ გაათავისუფლა. “სიკვდილის ესკადრონებში” მონაწილე ყველა პირის იდნეტიფიკაცია არ მოხდა, ამიტომაც დღეს ისინი უკვე თანამდებობებზე ვიხილეთ,” – ამბობს ვახტანგ მაისაია. მისივე თქმით, სამხედრო პროკურატურისა და სასამართლოს გაუქმებამ გამოიწვია ის, რომ ადამიანები საპასუხისმგებლო თანამდებობებზე მათი დოსიეს გადახედვის გარეშე ინიშნებიან. ექსპერტის თქმით, ლადო ჩაჩიბაია მიხეილ სააკაშვილის დროს გენერალური შტაბის უფროსი იყო და მის მიმართაც გარკვეული კითხვები უნდა არსებობდეს. მაისაიას განცახდებით, ეს ფაქტი მინდია ჯანელიძის დროს რომ მომხდარიყო, ეს არ გაუკვირდებოდა, რადგანაც ის იმ სისტემის გადმონაშთი იყო. ხოლო ლევან იზორია, “ნაციონალური მოძრაობის” რეჟიმის წინააღმდეგ აქტიურად იბრძოდა და მას ამ პირების შესახებ სწორი ინფორმაცია რომ ჰქონოდა, თანამდებობებზე არ დანიშნავდა.

ბრიგადის გენერალი ამირან სალუქვაძე ამბობს, რომ ბევრი ინფორმაცია ნინუასა და ცაბაძის შესახებ მისთვის და არა მხოლოდ მისთვის მანამდეც ცნობილი იყო. თუმცა, თავდაცვის სამინისტროს გენერალური ინსპექციის მოკვლევას უნდა დაველოდოთ. სალუქვაძეს თავდაცვის სამინისტროში არსებული სისტემური პრობლემები აწუხებს და ფიქრობს, რომ თანამდებობაზე დანიშვნისას პირის წარსული და დოსიე განსაკუთრებით უნდა გადამოწმდეს.

“არ მაქვს სურვილი, პერსონალიებზე დავიდე. ჩემთვის ყოველთვის ამოსავალი წერტილი სისტემური მიდგომაა. შეიარაღებულ ძალებში სისტემურ პრობლემებზე დიდი ხანია, ვსაუბრობ და ვწერ. 100-დღიანი მუშაობის ანგარიშის პრეზენტაციისას ჩვენ მოვისმინეთ მინისტრის სურვილი, რომ საკადრო პირამიდა ააწყოს. ამ პირამიდაში დიდი წვლილი გენშტაბს მიუძღვის და ძალიან მნიშვნელოვანია, რომ მსოფლიოში საუკუნეების მანძილზე გამომუშავებული ელემენტარული ტრადიციები და ლოგიკა გათვალისწინებული იქნას. ჩემი აზრით, არაა მიზანშეწონილი სარდლის და შტაბის უფროსის ერთდროული გათავისუფლება. თუ არსებობს შერჩევის საბჭო, რატომ უნდა სთხოვონ მინისტრს, გამონაკლისი დაუშვან?” – კითხულობს ამირან სალუქვაძე.

გენერლის თქმით, რატომ მიიღო ჩაჩიბაიამ ამ პირების თანამდებობაზე დანიშვნის გადაწყვეტილება, მისთვის უცნობია და ამაზე პასუხი თავად უნდა გასცეს. სალუქვაძის აზრით, კადრების საკითხს ძალიან უდიერად ვუდგებით, რადგანაც ბოლო წლებში სამხედო ავიაციიდან სხვადასხვა მიზეზით 60-მდე მფრინავი, 40-ზე მეტი ბორტტექნიკოსი და სხვა სპეციალობის სამხედრო დაითხოვეს, რაც პატარა არმიისთვის ძალიან დიდი დანაკლისია.

„რეზონანსი“, 17 ნოემბერი, 2016 წელი

ინტერვიუ ანი მიროტაძესთან: „ოპოზიციურ პარტიებში ახალ გაერთიანებაზე მიდის საუბარი“

სალომე სარიშვილი

“ეროვნული ფორუმის” ერთ-ერთი ლიდერი, ანი მიროტაძე აცხადებს, რომ აუცილებელია შეიქმნას ახალი ერთიანი პოლიტიკური გაერთიანება, თუმცა როგორი ფორმით მოხდება და ვინ იქნებიან ამ გაერთიანების წევრები, ამაზე საუბარი ამ ეტაპზე გაუმართლებლად მიაჩნია. ამბობს, რომ ამ საკითხზე არასაპარლამენტო ოპოზიციაში უკვე მსჯელობენ, თუმცა რა გადაწყდება საბოლოოდ, ამაზე დაზუსტებულ ინფორმაციას საზოგადოება უახლოეს მომავალში მიიღებს.

ანი მიროტაძე “რეზონანსთან” საუბრისას შიდაპარტიულ საკითხებსაც შეეხო და თქვა, რომ “ფორუმის” პოლიტსაბჭოში რაიმე დაძაბულობას ადგილი არ ჰქონია, გუბაზ სანიკიძის პარტიიდან წასვლას კი გულდასაწყვეტს, თუმცა ლოგიკურს უწოდებს.

- ბოლო რამდენიმე დღეა, არასაპარლამენტო ოპოზიცია თემატურ საკითხებსა და სამომავლო გეგმებზე მსჯელობს. თქვენ თუ ხართ ჩართული ამ პროცესში?

- კვალიფიცური სუბიექტები ახლა ორ თემაზე მსჯლობენ: ერთია არჩევნების ლეგიტიმაციის საკითხი, რომელზეც საერთო განცხადება უნდა გაკეთდეს. მეორე საკითხი კი საარჩევნო კანონმდებლობას ეხება, რომელიც სრულად შესაცვლელია და რომელმაც პრაქტიკულად უზრუნველყო ის, რომ სახელისუფლებო სისტემამ ქვეყანაში ზოგადად პოლიტიკა დაამარცხა. ამ ორივე ნაწილში ჩვენ არასაპარლამენტო ოპოზიციის აზრს მხარს ვუჭერთ და ვფიქრობთ, რომ არჩევნებზე მიღებული შედეგის შეფასება აუცილებელია. ეს იმიტომ, რომ არჩევნები დიდი დარღვევებითა და გაყალბებით ჩატარდა. ანუ, ხელისუფლებამ ყველაფერი გააკეთა საიმისოდ, რომ დღეს იმ მოცემულობამდე მივედით, როგორიც სახეზე გვაქვს.

მხედველობაში მაქვს ის, რომ პარლამენტიც, აღმასრულებელი ხელისუფლებაცა და სასამართლო სისტემაც დღეს მხოლოდ “ქართული ოცნების” ხელშია. პრაქტიკულად, ქვეყანაში დემოკრატიული პროცესები საფრთხის ქვეშაა. რაც შეეხება საარჩევნო კოდექსს, ჯერ კიდევ მაშინ, როცა უმრავლესობაში ვიყავით, ვამბობდით, რომ არჩევნები მაჟორიტარული, ფეოდალური სისტემით არ უნდა ჩატარებულიყო. “ფორუმი”, რა თქმა უნდა, სისტემის შეცვლის მომხრეა, თუმცა ოპოზიციასთან მოლაპარაკების მაგიდასთან ჯერ არ დავმსხდარვართ.

- ოპოზიციიდან ზოგმა პარტიების გაერთიანებაც არ გამორიცხა. თქვენი პარტიის პოზიცია როგორია ამ საკითხზე?

- ჩვენი მოსაზრებით, კოალიციური რეჟიმი სწორი ვერ იქნება, ვინაიდან ჩვენ ამის არცთუ ისე კარგი გამოცდილება გვაქვს – ვნახეთ, რომ კოალიციური რეჟიმი არ ამართლებს. ჩვენი აზრით, ახალი პოლიტიკური გაერთიანება უფრო მართებულია. ჩვენ კონსულტაციებისთვის მზად ვართ. ვფიქრობთ, რომ ეს ყველაზე მნიშვნელოვანი საკითხია, რათა ყველაზე კონკურენტუნარიანი პოლიტიკური ძალა შეიქმნას. ვიცი, რომ კვალიფიციური სუბიექტები ამაზე მსჯელობენ, თუ რა გამოვა აქედან, ახლა ამის პროგნოზირება გამიჭირდება.

- კერძოდ, რომელი ვისთან ერთად ფიქრობთ გაერთიანებას?

- ზუსტად ვიცი, რომ ეს არ იქნება “ქართული ოცნება”, “ნაციონალური მოძრაობა” და არც მათი ყოფილი თანაგუნდელები. როდესაც რეჟიმს ემსახურები, ასეთი პოლიტიკოსების გვერდით გაერთიანება წარმოუდგენელია. ამ ეტაპზე მიმდინარეობს კონსულტაციები. ვფიქრობ ამის იქით რამის თქმა არასწორი იქნება.

- კონსულტაციებში ვინ მონაწილეობს?

- პროცესი რაღაც ნიშნულამდე უნდა მივიდეს, ამიტომ ამის იქით არაფრის თქმა არ შემიძლია. ყველაფერს რომ თავი დავანებოთ, ახლა არა მხოლოდ საკუთარი შეცდომების გადაფასების ეტაპია, არამედ სამომავლო სტრატეგიის შემუშავებაა საჭირო. დღეს “ნაცმოძრაობისა” და “ოცნების” ყველაზე კარგი პარტნიორი ჩვენი შეცდომები იქნება, ამიტომ შეცდომების უფლება აღარ გვაქვს.

- რა მდგომარეობაა ახლა “ფორუმში”? ვნახეთ, რომ გასულ კვირას პარტიის ერთ-ერთმა ლიდერმა გუბაზ სანიკიძემ დაგტოვათ…

- სრული პასუხისმგებლობით გეუბნებით, რომ “ფორუმის” პოლიტსაბჭოში არავითარი განხეთქილება ან დაპირისპირება არაა. რაც შეეხება გუბაზ სანიკიძეს, მან წასვლის მიზეზზე ისაუბრა, თქვა, რომ თავისფალ სივრცეში მოქმედებას უკეთ შეძლებდა. ამ თემაზე საუბარი ახლა ძალიან გამიჭირდება, თუმცა მან მიიღო გადაწყვეტილება და შესაძლოა, ამ მოცემულობაში ეს მისთვის და სხვა ლიდერებისთვისაც უკეთესი იყოს. ცხადია, “ფორუმს” არ ვგულისხობ და ნუ მიიღებთ ამას რაიმე ინფორმაციად.

- ნინო ბურჯანაძემ განაცხადა, რომ სანიკიძესთან კონსულტაციებს გეგმავს. “თავისუფალ სივრცეში” ეს იგულისხმება?

- არ ვიცი, ამაზე პასუხის გაცემა ძალიან გამიჭირდება. შემიძლია, მხოლოდ ჩემს სამომავლო გეგმებზე გესაუბროთ.

- ეს გეგმები როგორია? ჟურნალისტიკას ხომ არ უბრუნდებით?

- ეს პროფესია ძალიან მიყვარს, მაგრამ ვფიქრობ, რომ პოლიტიკაში უფრო საინტერესო ვიქნები. ფაქტი ერთია, 21-ე საუკუნეში, ქვეყანაში, სადაც საკოსნსტიტუციო უმრავლესობა ერთ პოლიტიკურ შტოს აქვს, იქ ოპოზიციური ძალა და მედია განსაკუთრებით ფხიზლად უნდა იყოს.

——————–

„ვერსია“, 16-17 ნოემბერი, 2016 წელი

„ეროვნულ ფორუმს“ ანი მიროტაძეც ტოვებს და პარტია უქმდება?

ოპოზიცია ახალ პარტიას - „საქართველოს პოლიტიკოსთა ნაკრებს“ ქმნის

თათია გოჩაძე

,,ეროვნული ფორუმის” ლიდერი ანი მიროტაძე, ახალი პოლიტიკური გაერთიანების შექმნის ინიციატივით გამოვიდა. 14 ნოემბერს, საგანგებო ბრიფინგზე განაცხადა, რომ ახალი გაერთიანების პროცესი უკვე დაწყებულია და მისი სახელიც დაანონსა – ,,საქართველოს პოლიტიკოსთა ნაკრები”. ანი მიროტაძის განმარტებით, გაერთიანდებიან არა პარტიები, არამედ პოლიტიკოსები და ისიც კი განაცხადა, თუ საჭირო გახდა, ,,ფორუმსაც” დავტოვებო.
ანი მიროტაძის განმარტებით, გაერთიანება იქმნება იმ მიზნით, ,,ოცნებას” ძლიერი ოპონირება გაუწიოს: ,,დღევანდელი ხელისუფლება დაცლილია პოლიტიკური გამოცდილებისგან, რაც ცუდია. როცა ქვეყანა ამდენი გამოწვევის წინაშეა, პოლიტიკურად გამოუცდელი გუნდი აუცილებლად დაუშვებს შეცდომებს. ამის შანსი, ამ ხელისუფლების პირობებში, დიდია, რადგან ის არის გამოუცდელი და აქვს საკონსტიტუციო უმრავლესობა. არ მინდა, ჩემმა ხელისუფლებამ დაუშვას შეცდომები. ჯანსაღი ოპონირების პროცესი პარლამენტსგარეთ უნდა განვითარდეს, რაც დემოკრატიის განვითარებას განაპირობებს. კახა შარტავამ არჩევნების დასრულებისთანავე განაცხადა, რომ ,,ფორუმი” მზადაა, ჩაუდგეს სათავეში დიდი ოპოზიციური გაერთიანების შექმნას”.

ანი მიროტაძის განმარტებით, ეს იქნება ევროპული ტიპის, თვისებრივად ახალი პარტია, რომელსაც ვეღარ დაამარცხებს სახელისუფლებო სისტემა. საინტერესოა, რომელი პოლიტიკოსები შევლენ ახალ გაერთიანებაში? ,,ფორუმის” ლიდერი, ჯერჯერობით, კონკრეტულ გვარებს არ ასახელებს, თუმცა განაცხადა, რომ მათ მოსაზრებას იზიარებს, მაგალითად, დავით უსუფაშვილი. ასე რომ, გამორიცხული არაა, ყოფილი რესპუბლიკელი ,,საქართველოს პოლიტიკოსთა ნაკრებში” ვიხილოთ. სამაგიეროდ, მიროტაძის აზრით, ,,გამორიცხულია, თანამშრომლობა ნაციონალური მოძრაობის მოქმედ, ყოფილ, გაქცეულ თუ გამოგდებულ წევრებთან”. რაც შეეხება, ,,ფორუმის” უკვე ყოფილ წევრ გუბაზ სანიკიძეს, მიროტაძის განმარტებით, ,,ფორუმში” იცოდნენ, რომ პარტიიდან გუბაზ სანიკიძის წასვლა უხმაუროდ არ ჩაივლიდა, თუმცა მას სჭირდებოდა პარტიული ჩარჩოებიდან გათავისუფლება და პოლიტიკაში, შესაბამისად, მათ თანამებრძოლად რჩება.

პრეს-კონფერენციაზე ,,ეროვნული ფორუმის” ლიდერმა არჩევნების შედეგებზეც ისაუბრა. მისი თქმით, ჰქონდათ სხვა მოლოდინი და განცდა, რომ პარლამენტი მრავალპარტიული იქნებოდა და დემოკრატიული ხელისუფლება მოვიდოდა, მაგრამ გამოჩნდა, რომ პოლიტიკურ ცენტრს სჭირდებოდა საკონსტიტუციო უმრავლესობა: ,,როცა უმრავლესობაში ვიყავით, ვეწინააღმდეგებოდით 2016 წლის არჩევნების მაჟორიტარული სისტემით ჩატარებას. წინააღმდეგობა შეგვხვდა მმართველი გუნდისგან და აღმოვჩნდით აბსოლუტურ უმცირესობაში. არჩევნები ასე სწორედ იმიტომ ჩატარდა, რომ ეს სისტემა, ნაკლები მხარდაჭერის პირობებში, საკონსტიტუციო უმრავლესობის მოპოვებას შეძლებდა. ,,ოცნებამ” თქვა, რომ ამ კანონის გატანას ხელი შეუშალა ენმ-მ, თუმცა თავადაც დაინტერესებული იყო, ეს ცვლილება საარჩევნო კანონში არ შესულიყო”. მიროტაძის შეფასებით, „ოცნებამ“ და ენმ-მ დაამარცხეს ოპოზიციური სპექტრი, ნაციონალური მოძრაობა კი, ან ხელისუფლების დანამატია, ან მათი ინტერესები დაემთხვა – ,,ოცნებას” სჭირდებოდა ,,საკონტროლო პაკეტი”, ენმ-ს კი – მთავარი ოპოზიციური ძალის სტატუსი: ,,ფაქტია, შეთანხმება ამ ორ პოლიტიკურ ძალას შორის შედგა. ეს იყო ტიპური გაყალბებული არჩევნები, თუმცა არჩევნების არალეგიტიმურობაზე საუბარი ახლა სწორი არ იქნება, რადგან არჩევნების შედეგები უკვე აღიარებულია. ახლა მთავარია, იმ სისტემას დავუპირისპიროთ პოლიტიკურად სწორად გამართული სტრატეგია, რომელიც აღარასდროს მისცემს ხელისუფლებას ასეთი არჩევნების ჩატარების შესაძლებლობას“.

„ვერსიის“ კითხვებს, რა შედეგი მოუტანია ამგვარ პოლიტიკურ გაერთიანებებს და აპირებს თუ არა ,,ფორუმის” დატოვებას, პარტიის ლიდერმა ამგვარად უპასუხა: ,,ჩვენ გვაქვს გამოცდილება, როცა მაგალითად ,,რვიანის” ან ,,ექვსიანის” ფორმატი მაინცდამაინც არ იყო შედეგიანი. ასეთ გაერთიანებას არ ვგულისხმობთ. ვაპირებთ ერთი დიდი ახალი პოლიტიკური პარტიის შექმნას. პირადად მე, „ფორუმიდან“ წასვლას არ ვაპირებ, მაგრამ თუ ახალ პარტიაში აუცილებლობა დადგება, შეიძლება, მივიღო ამგვარი გადაწყვეტილება. ვრჩები ოპოზიციაში, ვრჩები პოლიტიკაში და მოვიქცევი ისე, როგორც ვითარება მოითხოვს. ,,ეროვნული ფორუმი” მზადაა, ამ იდეას შესწიროს, გააუქმოს პარტია, თუმცა ეს მტკივნეული პროცესი იქნება”.

„ეროვნული ფორუმის“ ინიციატივა, „ვერსიასთან“ ექსპერტმა მამუკა არეშიძემ ამგვარად შეაფასა: „პოლიტიკურ გაერთიანებებს არანაირი მნიშვნელობა არ აქვს. ეს პროცესი უკვე გავიარეთ. მთავარია, იდეოლოგიური ერთობა. აქედან გამომდინარე, ჯერ იდეოლოგიური მიდგომებია ჩამოსაყალიბებელი, ახალი სიტყვაა სათქმელი ქართულ პოლიტიკაში. ჯერჯერობით ასეთ გაერთიანებაში ვერავის მოვიაზრებ, რადგან ახალი რამ ჯერ არც ერთ სუბიექტს უთქვამს. ქართველ ხალხს აინტერესებს ახალი იდეები და არა ის, ვინ ვის ელაპარაკება. თუ იქნება ახალი იდეები, გაერთიანება შესაძლებელია. იმასაც გააჩნია, ვინ იქნება ამ ახალი იდეის მედროშე. მე აღარ ვაპირებ არავისთან გაერთიანებას, დავიღალე“.

„ვერსია“, 16-17 ნოემბერი, 2016 წელი

ინტერვიუ გოჩა ჯოჯუასთან: კვალიფიციური სუბიექტები ახალ მოძრაობას იწყებენ // არჩევნებში დამარცხებული პარტიები რამდენიმე ბანაკს ქმნიან

თათია გოჩაძე

პარლამენტსგარეთ დარჩენილი ოპოზიციური პარტიების ნაწილი ახალი გაერთიანების ჩამოყალიბების გეგმავს, სახელწოდებით – „კვალიფიციურ სუბიექტთა გაერთიანება“. „ვერსიამ“ იმ პარტიათა სია მოიპოვა, რომლებიც ამ მიზნით, 16 ნოემბერს, მოლაპარაკების მაგიდას შემოუსხდებიან: პატრიოტთა ალიანსი, ტრადიციონალისტთა კავშირი – აკაკი ასათიანი, კონსტანტინე გამსახურდია, კახა კუკავა – „თავისუფალი საქართველო“, გია ბერძენიძე – ძალოვან ვეტერანთა კავშირი, გოჩა ჯოჯუა – ახალი ქრისტიან-დემოკრატები, ლეიბორისტები, ნინო ბურჯანაძე – ახალი დემოკრატები, ლევან სამუშია და თამუნა კეკნაძე – „თავისუფალი დემოკრატები“, პაატა ბურჭულაძის ბლოკიდან გიორგი ვაშაძის წარმომადგენელი ლევან ხაბეიშვილი.

„ვერსიისთვის“ ისიც ცნობილი გახდა, რომ ჯერ-ჯერობით გადაწყვეტილება მიღებული არ აქვს რესპუბლიკურ პარტიას და არც ისაა გარკვეული, დაესწრება თუ არა შეკრებას „ეროვნული ფორუმი“. საინტერესოა, როგორ დასხდებიან ერთ მაგიდასთან ასეთი განსხვავებული იდეოლოგიის პარტიები და რა ფუნდამენტურ პრინციპს უნდა დაეყრდნოს ეს გაერთიანება? დეტალების გასარკვევად ,,ვერსია” „ახალი ქრისტიან-დემოკრატების“ ლიდერს, გოჩა ჯოჯუას დაუკავშირდა.

- ბატონო გოჩა, რა იდეის გარშემო და რა ტიპის გაერთიანებას ქმნიან კვალიფიციური სუბიექტები?

- გაერთიანების მთავარი მიზანი საარჩევნო სისტემის შეცვლაა, თუმცა არ გამოვრიცხავ სხვა გეგმების შემუშავებასაც, გააჩნია, რაზე შევთანხმდებით. სწორედ ამ მიზნით დავგეგმეთ შეკრება.

- შეხვედრა დახურულ კარსმიღმა გაიმართება?

- დიახ, რადგან პოლიტიკოსების უმრავლესობას, როცა ჟურნალისტს ხედავს, პოპულიზმი ეწყება. ვისაუბრებთ და ინფორმაციას სრულად მივაწვდით საზოგადოებას.

- გაერთიანების ლიდერი ვინ იქნება. ამ პოსტზე ნინო ბურჯანაძე განიხილება?

- გაერთიანების ლიდერი ჯერჯერობით გამოკვეთილი არაა. ნინო ბურჯანაძეს იმხელა ცოდვები აქვს ჩადენილი, ლიდერი რატომ უნდა გახდეს.

- მას ყოველთვის ჰქონდა ლიდერობის ამბიცია, როცა საქმე გაერთიანებებს ეხებოდა და იმიტომ გკითხეთ…

- როცა გაერთიანებაში ყველა პარტიის წევრს შენად არ აღიქვამ, ლიდერობას ვერ შეძლებ. ლიდერი ნიშნავს, თანაბართა შორის პირველი იყო. ბურჯანაძემ ამიტომაც ვერ შეძლო ლიდერობა.

- მაგრამ ხალხისთვის ლიდერი მაინც ყოველთვის ერთ-ერთი გადამწყვეტია, ბატონო გოჩა…

- მთავარი ეს კი არა, ისაა, პოლიტიკური ელიტა რას ფიქრობს. ცნობადობა მაღალი მაქვსო, რომ ამბობს ზოგი, რად გინდა ეგეთი ცნობადობა. მთავარია, პოლიტიკურ წრეში ვინ ხარ. როცა პოლიტიკურ წრეში ვიცი, რომ აფერისტი და გადამგდები ხარ, რატომ უნდა მოგიყვანო ხელისუფლებაში? 16 ნოემბრის შემდეგ მივაწვდით საზოგადოებას სრულ ინფორმაციას.

- როგორ უნდა მოახერხოთ საარჩევნო სისტემის შეცვლა? კანონიერი გზით ამას აშკარად ვერ შეძლებთ.

- საარჩევნო სისტემის შეცვლისთვის უნდა მოვახერხოთ ის, რომ ქართველმა ერმა გაითავისოს, თუ საჭირო გახდა, დადგეს პარლამენტთან და პირდაპირ უთხრას ხელისუფლებას, რაც ხდებოდა. ხალხის ქუჩაში გამოყვანა, რევოლუცია, ყველაფრის დაშვება შეიძლება, თუ საჭირო გახდება. ვიცით, რომ დღეს ამის მუხტი არ არსებობს, მაგრამ როცა ხალხი მიხვდება, რომ ეკონომიკურად ვერ ამოისუნთქა, როცა შეცივდება, გადასახადები გაეზრდება, გამოვა ქუჩაში. ასეთ დროს, უნდა არსებობდეს ძალა, ვინც მათ გაუძღვება. ამ ყველაფერს სჭირდება უსაზღვროდ დიდი მუშაობა, გაძლება და მიღწევა. პატრიოტთა ალიანსის საშუალებით კი, შეგვიძლია, პარლამენტში გავიტანოთ ჩვენი იდეები.

- როგორ უნდა გაერთიანდნენ ისეთი განსხვავებული იდეოლოგიის პარტიები, როგორიცაა მაგალითად, რესპუბლიკელები და ბურჯანაძის „დემოკრატიული მოძრაობა“?

- სიტყვაზე, პრორუსი ნინო და პროამერიკელი „თავისუფალი დემოკრატი“ უნდა შევთანხმდეთ, რომ პირველ რიგში, მთავარია, ხელისუფლება გავწიოთ გვერდზე, მით უმეტეს, რომ ბიძინა ივანიშვილი გვერდზე გადგომას არ აპირებს.

- დავუშვათ, ამ მიზანს მიაღწიეთ. მერე როგორ უნდა დაუჭიროს მხარი ამომრჩეველმა გაერთიანებას, სადაც პრორუსული და პროამერიკული ძალები ერთად იქნება?

- საქმეც ესაა, რომ ისინი შემდეგ ერთ პარტიაში აღარ იქნებიან.

- არჩევნებამდე რატომ არ შექმენით ასეთი გაერთიანება? ასე ხომ უფრო მარტივად შეძლებდით მიზნის მიღწევას და „ოცნების“ გვერდზე გაწევას?

- არჩევნებამდე ამ პარტიებს რომ შევთავაზეთ ერთ ბლოკში გაერთიანება, გვითხრეს, ბარიერი უკვე გადალახული გვაქვს და გამარჯვებულები ვართო. ურემი რომ გადაბრუნდება, გზა მერე გამოჩნდებაო, სწორედ მათზეა ნათქვამი. ახლა კი კვალიფიციურ სუბიექტთა საკოორდინაციო საბჭო იწყებს მუშაობას, რას მიაღწევს, ჯერ არავინ იცის. შეიძლება, ბლოკებიც ჩამოყალიბდეს. ერთი რამ ვიცით, რომ ნაციონალებსა და „ოცნებასთან“ ურთიერთობა არ გვექნება.

- საარჩევნო სისტემის შეცვლის გამო რომ იკრიბებით, გასაგებია, მაგრამ კონკრეტულად რა არ მოგწონთ ამ სისტემაში?

- 2012 წელს იყო რევოლუციური სიტუაცია და ყველა ამბობდა, რომ მიშას არ მისცა ხალხმა ხმა. ის არჩევნები იყო ,,არა მიშას!”. ,,ოცნების” საშუალებით უნდა მომხდარიყო ნაცრეჟიმის შეცვლა. მაშინ ალტერნატიული ძალა არ ჩანდა. დღეს კი, სხვა ვითარებაა. ,,ოცნებამ” ამ საპარლამენტო არჩევნებზე იმის იმიტირება მოახდინა, ვითომ ნაცმოძრაობის საფრთხე ისევ არსებობდა და საკმაოდ აგრესიული პოლიტიკა გაატარა, „შუის გაკრეფა“ ისევ კარგად გამოუვიდა. 2016 წლის არჩევნებზე მოვიდა ბევრად ნაკლები ამომრჩეველი და რეალურად, ,,ოცნებამ” 50%-ზე ნაკლები ხმა მიიღო. ამ დროს, საარჩევნო სისტემამ საკონსტიტუციო უმრავლესობის მიღების საშუალება მისცა. ყველა პოლიტიკური ძალა, გარდა ხელისუფლებისა, შეთანხმებულები ვიყავით, რომ ეს საარჩევნო სისტემა უნდა შეცვლილიყო. გასაუქმებელია მაჟორიტარული არჩევის წესი. გარდა ამისა, საარჩევნო კამპანიაში ფულის დახარჯვის გაკონტროლების არანაირი რეგულაცია არ არსებობს. ბიძინა ივანიშვილს, როგორც პოლიტიკისგან განზე მდგომს, სწორედ ეს საკითხი უნდა მოეგვარებინა. ამის მაგივრად მოიყვანა ადამიანები, ვინც ქალწულები არიან პოლიტიკაში. რა კრიტერიუმებით შეაფასა ეს ადამიანები, არავინ იცის.

- ამ ფონზე, მომავალი 4 წელი, თქვენი პროგნოზით, როგორი იქნება?

- მოსალოდნელია გარკვეული საფრთხეები. ნაციონალებს ძალადობა ხელისუფლებაში მოსვლისთანავე არ დაუწყიათ, ამიტომ არავინ იცის, რას გააკეთებს ,,ოცნება” ამ 4 წლის განმავლობაში. დღეს, ქვეყნისთვის საფრთხე ისაა, რომ განვითარების პერსპექტივა არ ჩანს. საგარეო მიმართულებით ბევრი შეცდომაა დაშვებული, მაგალითად, საგარეო ვექტორად მხოლოდ რუსეთი და ამერიკა მოიაზრება, არადა ვფიქრობ, ჩვენი კავკასიელი მეზობლებისგან ბევრი საფრთხე გვემუქრება. არ მინდა, ადამიანებს შიში გაუჩნდეთ, მაგრამ ვიცით, ეკონომიკურად დამოკიდებულნი ვართ აზერბაიჯანზე, რომ აღარაფერი ვთქვა თურქეთზე. როცა სტრატეგიული ობიექტები ჩვენს ქვეყანაში სხვა სახელმწიფოს აქვს, ეს უკვე საფრთხეა. ,,ოცნების” ეროვნული ინტერესები პრიმიტიულ დონეზეა განვითარებული. ეს თემა გაცნობიერებული არ აქვთ და ვერც მოვთხოვთ, რადგან ის ადამიანები, ვინც დღეს პოლიტიკაში გამოჩნდა, კოლბაში გამოზრდილები არიან. მათ მიიღეს უცხოეთში განათლება, რაც ძალიან კარგია, მაგრამ პოლიტიკური გამოცდილება არ აქვთ. ისინი გაიზარდნენ დამოუკიდებელ საქართველოში, ამიტომ არ იციან, რომ ამას ბრძოლა და შენარჩუნება სჭირდება.

- პოლიტიკოსების მიერ პარტიების დატოვებას როგორ აფასებთ, რაც ტენდენციად იქცა პოსტსაარჩევნო პერიოდში?

- დავით უსუფაშვილი, ირაკლი ალასანია, გუბაზ სანიკიძე, ანუ ისინი, ვინც განაცხადეს, რომ პარტიიდან მიდიოდნენ, ჩემი აზრით, პატიოსნად მოიქცნენ. თუმცა ალასანიას შანსი ჰქონდა, დიდ გაერთიანებას ჩადგომოდა სათავეში. როცა ერთი პარტია ესაუბრება სხვა პარტიას, პარტიის წევრებს შიში უჩნდებათ, რომ მეორე-მესამე ადგილზე გადაინაცვლებენ, ამიტომ მოლაპარაკებები არ ხიბლავთ. ალასანიას პრობლემა სწორედ პარტიის წევრებთან ურთიერთობა იყო. რაც შეეხება უსუფაშვილს, მას ჰქონდა ისტორიული შანსი – არჩევნებამდე ყველა პოლიტიკურმა პარტიამ, ხელი მოვაწერეთ, რომ სისტემა შეცვლილიყო. მაშინ ნაცმოძრაობამ თქვა, თუ შეთანხმდებით, ჩვენც დავუჭერთ მხარს ამ ინიციატივასო. უსუფაშვილმა თქვა, რომ ხელს გვიწერდა, როგორც რესპუბლიკური პარტიის წარმომადგენელი და არა როგორც პარლამენტის თავმჯდომარე. თუ რესპუბლიკელები, „ფორუმი“, ნაციონალები და თავისუფალი დემოკრატები ხმას მისცემდნენ ამ ინიციატივას, საარჩევნო სისტემა შეიცვლეობდა.

დავით უსუფაშვილს ჰქონდა ორი ალტერნატივა: პირველი – ჩამოეყალიბებინა ახალი უმრავლესობა, მაგრამ ნაციონალებთან ყოფნით, მორალურად მართალი არ იქნებოდა და მეორე – მიეღო ეს კანონი და პარლამენტი დაეშალა. საბოლოოდ, ეს შანსი ხელიდან გაუშვა ალბათ იმიტომ, რომ ამ შემთხვევაში, პარლამენტის თავმჯდომარეობაზე უარი უნდა ეთქვა. მაშინ უნდა მიგვეღო ისეთი კანონი, რომელიც გამარჯვების თანაბარ საშუალებას მისცემდა ყველა პოლიტიკურ ძალას. მათრახისა და ორცხობილას პოლიტიკა უკვე გავიარეთ სააკაშვილის დროს. დღეს ივანიშვილმაც დაიწყო ამგვარი პოლიტიკა – დაიწყო ორცხობილების მიცემა პარტიებზე, პოლიტიკიდან ვიღაც გაიყვანა, ვიღაც გაიყიდა და ვიღაც შეშინდა. დავრჩით ისინი, ვისაც ფული არც გვქონია. სამგზის დეპუტატი ვარ. სააკაშვილს უნდოდა, დავეჭირე და მიზეზად ჩემი ბიზნესი მოედოთ, მაგრამ აღმოაჩინა, რომ ბიზნესი არ მქონდა. პოლიტიკაში მხოლოდ ისინი უნდა დარჩნენ, ვინც მათრახსაც და ორცხობილის ცდუნებასაც გაუძლებს. ფილმი ,,სათამაშოს” ერთი სცენა მახსენდება, როცა დირექტორს მფლობელი ეუბნება, გაიხადე და ისე გადიო. ისიც გახდას იწყებს, ამ დროს მფლობელი ეკითხება, ვინ მეტი მონსტრია, მე, რომელმაც ეს გიბრძანე თუ შენ, რომელიც ამ ბრძანებას ასრულებო? ეს ხალხიც ასე ,,გააშიშვლეს”. კი ბატონო, ისევ მოდი პოლიტიკაში, მაგრამ თქვი, რომ ხვალ იგივეს აღარ გააკეთებ; ან საერთოდ წადი პოლიტიკიდან, აღიარე, რომ ეს საქმე არ გამოგდის.

- ისეთი პარტიები ან ლიდერები რომლებია, ვინც მათრახსა და ორცხობილის ცდუნებას გაუძლო?

- მაგალითად, ,,ეროვნული ფორუმის” ლიდერი კახა შარტავა. ამ ადამიანს ცდუნებაც ჰქონდა და მათრახისთვისაც გაუძლია. არ შევიდა პარლამენტში. შარტავა იმაზე არ იყო წამსვლელი, რასაც სთავაზობდნენ და ამიტომ ვაფასებ მის საქციელს.

- სამაგიეროდ, მისი პარტიიდან მიროტაძე და სანიკიძე შევიდნენ პარლამენტში…

- დიახ, ფაქტობრივად ისინი გაგდებულები აღმოჩნდნენ და ამის მერე დაიწყეს საუბარი, რომ რაღაცები არ მოსწონთ.

- მათ მოიაზრებთ თქვენს გაერთიანებაში?

- რატომაც არა, ოღონდ უნდა გაიაზრონ და თქვან, რომ შეცდომა დაუშვეს. სინანულზეა საუბარი. თქმაც არაა აუცილებელი, მთავარი მოქმედებაა. გუბაზ სანიკიძემ ჯერ უნდა დააკონკრეტოს, როგორ წარმოუდგენია პოლიტიკური გამსხვილებები, რაზეც განაცხადა.

- გაერთიანებაში გაწევრიანება მას შესთავაზეთ?

- ჩვენ რატომ უნდა შეგვეთავაზებინა? შევთავაზეთ ,,ფორუმს”, გარკვეული პიროვნებები არ გამოგვიყვია.

- ანუ თქვენ გაერთიანებაში შეიძლება „ფორუმიც“ ვიხილოთ?

- დიახ, გაერთიანებაში ,,ეროვნულ ფორუმსაც” მოვიაზრებთ. ,,ფორუმს” ვესაუბრეთ, მაგრამ გაურკვეველი პასუხი მივიღეთ, ანი მიროტაძე ახვლედიანს ესაუბრა და ველოდებით, შეიძლება შემოგვიერთდეს კიდეც, ეს მისი გადასაწყვეტია.

- ანი მიროტაძემ ახალი პარტიის შექმნა დააანონსა, ბატონო გოჩა…

- როცა 0.75%-ს მიიღებ და მერე ამბობ, რომ გაერთიანება გინდა, გასაგებია. მეც ვფიქრობ ასე, მაგრამ გააჩნია, რაზე შევთანხმდებით.

„ვერსია“, 16-17 ნოემბერი, 2016 წელი

არასაპარლამენტო ოპოზიციის ფარული გეგმა

ნინო ბურჯანაძესა და გუბაზ სანიკიძესთან ბლოკს ვალერი ხაბურძანია, სიმონ ნოზაძე და ზვიად ჩიტიშვილი ქმნიან?

ნინო დოლიძე

ქართული ოპოზიცია „დიდ დეპრესიაშია“. ყოველ შემთხვევაში, „ანტიოცნებელი“, უფრო სწორად, ერთ დროს ,,ოცნებელი” ლიდერები მშობლიურ პარტიებსა თუ პოლიტიკურ ავანსცენას ერთმანეთის მიყოლებით ტოვებენ. თავდაპირველად, ირაკლი ალასანია „გაიქცა“, მას დავით უსუფაშვილი მიჰყვა. ამ დღეებში კი ალასანია-უსუფაშვილს გუბაზ სანიკიძეც „გაეკიდა“, თუმცა სამართლიანობა მოითხოვს, ითქვას, რომ ალასანია პოლიტიკიდან „დროებით გავიდა“. უსუფაშვილი და სანიკიძე კი, უბრალოდ, იმ პარტიებს გაემიჯნენ, სადაც აქამდე საქმიანობდნენ, ანუ ეს პერსონები პოლიტიკაში დარჩნენ. იმის შესახებ, რას აპირებს პარლამენტის აწუკვე ყოფილი თავმჯდომარე, „ვერსია“, კონფიდენტზე დაყრდნობით, უკვე წერდა - რესპუბლიკელყოფილმა შესაძლოა, ახალი პარტია შექმნას, რომელიც ირიბად, ალბათ, პრეზიდენტ მარგველაშვილის პოზიციებს გაამაგრებს და რომელიც შესაძლოა, პროევროპელი სულისკვეთების პოლიტიკოსებით, მათ შორის, ექსნაციონალებითაც დაკომპლექტდეს, მაგრამ სად და რატომ წავიდა გუბაზ სანიკიძე, რომელმაც გასული ოთხი წლის განმავლობაში საზოგადოებას თავი პარლამენტში ძილით დაამახსოვრა? - ალბათ, გახსოვთ, 2012 წლის არჩევნების წინ, ფარული აუდიოჩანაწერი გავრცელდა, რომლის თანახმადაც, სანიკიძე ამბობს, მილიონი მინდა ვიშოვოო. მერე კი, როცა სანიკიძე დეპუტატი გახდა, მიხეილ სააკაშვილმა ფოტო ააფრიალა, რომელზეც ქუთაისის პარლამენტის სხდომათა დარბაზში მწერლის „ტკბილად მთვლემარე“ ვაჟი იყო აღბეჭდილი…

„ნინო ბურჯანაძემ, პრინციპში, დაადასტურა და მეც თითქმის დარწმუნებული ვარ, რომ გუბაზი სწორედ მას მიეკედლება“, – ეუბნება ,,ვერსიას” კონფიდენციალური წყარო, რომელიც არ გამორიცხავს, რომ სანიკიძის პარალელურად, ეროვნული ფორუმი მალე რეზო შავიშვილმაც დატოვოს. ამასთან, ჩვენი კონფიდენტი ამბობს, რომ ქართულ პოლიტიკაში ახალი გადანაწილება დაიწყო, რომლის მიზანიც პრორუსული ძალების გაძლიერებაა.

„ირაკლი ალასანიას მიმართ ყოველთვის სიმპათიით ვიყავი განწყობილი, მაგრამ იმის გამო, რაც არჩევნების მერე გააკეთა, ძალიან გავბრაზდი. დიახ, ეჭვი არ მეპარება, ალასანიამ, ნებსით თუ უნებლიედ, ქართულ პოლიტიკაში დასავლური ფლანგი მოკლა, ანუ სხვა სიტყვებით რომ ვთქვა, პოლიტიკიდან ალასანიას წასვლით ყველაზე მეტად რუსეთისადმი ლოიალურად განწყობილი პოლიტიკური სპექტრი იხეირებს, რომელიც ყველაფერს გააკეთებს, მინიმუმ, ქუჩა დაიკავოს. ისე, კარგად თუ დავაკვირდებით, ქუჩის დაკავების, ესე იგი, პოლიტიკის ქუჩაში გადატანის დიდი ალბათობა არსებობს – ახალი პარლამენტი აპოლიტიკური ფიგურებით არის „გატენილი“. გარდა ამისა, არც იმის ილუზია მაქვს, რომ იგივე დავიტ უსუფაშვილი, რომელმაც რესპუბლიკური პარტია დატოვა, ორ-სამ თვეში ისეთ მძლავრ პოლიტიკურ ძალას შექმნის, რომელიც დასავლეთზე იქნება ორიენტირებული და პროცესებზე ზეგავლენას მოახდენს. ამ ფონზე ერთადერთი ან თითქმის ერთადერთი ფიგურა, რომელსაც მინიმუმ, პოლიტიკის ანბანი ესმის, მოგვწონს თუ არა, ნინო ბურჯანაძეა. ჰოდა, ეს ქალბატონი ყველაფერს გააკეთებს, იმ ოპოზიციური მუხტის ავანგარდში მოექცეს, რომელიც ხალხში ძალიან მალე გაჩნდება, თუმცა ბურჯანაძემ იცის, რომ მისგან „ხალხის ბელადი“ ვერ დადგება, ამიტომ გვერდით ისეთი პერსონა სჭირდება, რომელსაც მშიერი მასა გაჰყვება. ამ როლის შესასრულებლად კი გუბაზ სანიკიძე იდეალური კანდიდატურაა – ალბათ, გახსოვთ, იგივე 2009 წლის აქციების დროს, მაშინდელი ოპოზიციიდან სწორედ ეროვნული ფორუმი სარგებლობდა მოსახლეობის უდიდესი მხარდაჭერით, თუმცა ამ მხარდაჭერას ვერც კახა შარტავას მივაწერთ და ვერც რეზო შავიშვილის. დიახ, გუბაზ სანიკიძე ეროვნული ტიპაჟია, რომელსაც საზოგადოების ემოციების მართვა კარგად ეხერხება“, – აღნიშნავს „ვერსიის“ კონფიდენტი და აქვე ბურჯანაძე-სანიკიძის ბეგრაუნდსაც იხსენებს ანუ ხაზს იმ დეტალს უსვამს, რომ ამ ორი სუბიექტის მეგობრობას საფუძველი ჯერ კიდევ მათმა მშობლებმა ჩაუყარეს, – „როგორც ვიცი, ცხონებული ლევან სანიკიძე და ანზორ ბურჯანაძე მეგობრობდნენ; ისიც გამიგია, რომ ერთი პერიოდი მათ უთანხმოება მოუვიდათ, მაგრამ მალევე შერიგდნენ. ჰოდა, იმის თქმა მინდა, რომ ნინო და გუბაზი ერთმანეთს ახალგაზრდობიდან იცნობენ და, თუ არ ვცდები, ნათელმირონობაც აკავშირებთ – სანიკიძე ექს-სპიკერის ერთ-ერთი შვილის ნათლია უნდა იყოს. ზოგადად, ყოველთვის, როცა ნინო მნიშვნელოვან ნაბიჯს დგამს, სანიკიძე მის გვერდით ხან ფარულად დგას და ხან ღიად. მაგალითად, ვიცი, რომ 2011 წლის 26 მაისის დარბევამდე, გუბაზ სანიკიძე ნინოსთან მივიდა და ეხვეწებოდა, რომ ხალხი რუსთაველზე არ წაეყვანა, რადგან ჰქონდა ინფორმაცია, რომ ის მოხდებოდა, რაც მოხდა, მაგრამ მაშინ ნინომ გუბაზს, როგორც ჩანს, არ დაუჯერა“.

ერთი სიტყვით, თუ ჩვენი კონფიდენტის ლოგიკას გავყვებით, ქართულ პოლიტიკაში ბურჯანაძის აღზევების ეპოქა იწყება. ეს შეფასება ვინმეს შეიძლება, გადაჭარბებულად მოეჩვენოს და ბოლომდე არც „ვერსიას“ სჯერა, რომ პარლამენტის ყოფილი თავმჯდომარე და სააკაშვილის ყოფილი მეგობარი რეიტინგის „აკრეფას“ შეძლებს, მაგრამ ჩვენი კონფიდენტი, რომელიც პიარტექნოლოგიებსა და ასევე, პოლიტიკურ კომბინაციებში კარგად ერკვევა, ამბობს, რომ ოპოზიციური ველი თავისუფალია. შესაბამისად, ხალხის სიმპათიას ის დაიმსახურებს, ვინც ამ ველის დაკავებას დროზე მოახერხებს.

„კი ბატონო, ამბობენ, თითქოს ერთი დიდი პარტია შეიქმნება, რომელშიც ყველა ის ლიდერი გაწევრიანდება, რომელმაც 8 ოქტომბრის შემდეგ ან დროებითი ტაიმ-აუტი აიღო, ან „მშობლიური“ პარტია დატოვა. ეს კი არადა, ვიღაცამ ისიც თქვა, უსუფაშვილი, ბურჯანაძე და სანიკიძე ერთიანდებიანო, მაგრამ შემიძლია, ათასი პროცენტით გითხრათ, რომ ეს მტკნარი სიცრუეა. ასეთი ჭორის გავრცელება ვიღაცას საზოგადოებრივი აზრის ფორმირებისთვის სჭირდება. მოკლედ, უსუფაშვილი არა, მაგრამ ბურჯანაძის გვერდით, სანიკიძესთან ერთად, მალე, ალბათ, ისეთ პერსონებსაც ვიხილავთ, როგორიც მაგალითად, უშიშროების ყოფილი მინისტრი ვალერი ხაბურძანიაა.

ზოგადად, ამ „ტრიოს“ – ბურჯანაძე-სანიკიძე-ხაბურძანიას, ყოველთვის კარგი ურთიერთობა ჰქონდა. ცნობილია, რომ სანიკიძე და ხაბურძანია მეგობრები არიან და იმ სატელეფონო ჩანაწერშიც, რომელიც 2012 წლის პირველი ოქტომბრის არჩევნებამდე გავრცელდა, გუბაზი, როგორც მახსოვს, სწორედ ხაბურძანიას ელაპარაკებოდა.

გარდა ამისა, ვიცი, ნინო და ხაბურძანია კლასელები არიან და თავის დროზე ამ უკანასკნელის უშიშროების მინისტრად დანიშვნასაც, ერთგვარად, სწორედ ბურჯანაძე ლობირებდა. ის ინფორმაციაც მაქვს, რომ რამდენიმე წლის წინ, ხაბურძანია ბურჯანაძესთან მოლაპარაკებას აწარმოებდა, რათა პოლიტიკურ ველში, როგორც პოლიტიკოსი, ნინოს პარტიის სახელით დაბრუნებულიყო, მაგრამ მაშინ შეთანხმება არ თუ ვერ შედგა, ახლა კი ყველაფერი თავისით დალაგდება. ამასთან, არ გამოვრიცხავ, ამ ფლანგზე სიმონ ნოზაძეც ვიხილოთ. მოგეხსენებათ, სიმონ ნოზაძე ხაშურის მაჟორიტარი გახდა – მეორე ტურში „ოცნების“ კანდიდატი ვალერი გელაშვილი დაამარცხა. ნოზაძე უშიშროების კადრია – მას გენერალ-მაიორის ჩინი აქვს და წლევანდელ არჩევნებში „მრეწველების“ ეგიდით მონაწილეობდა. ნოზაძეს თავის დროზე უშიშროების მინისტრის მოადგილის თანამდებობა ეკავა და აქედან გამომდინარე, იგივე ხაბურძანიასთან ნორმალური ურთიერთობა უნდა ჰქონდეს“, – აღნიშნავს „ვერსიასთან“ საუბრისას ჩვენი ოპერატიული წყარო, რომელიც ასევე, უშვებს ალბათობას, ბურჯანაძის გვერდით ზვიად ჩიტიშვილიც დადგეს.

„ზვიად ჩიტიშვილი ფართო საზოგადოებისთვის მაინცდამაინც ცნობილი პიროვნება არ გახლავთ, თუმცა მისი ბიოგრაფია საინტერესოა“, - ამბობს წყარო და მიანიშნებს, რომ ჩიტიშვილს გარკვეული კავშირები ჩრდილოეთში აქვს.

საძიებო სისტემა Google-ს მიხედვით, ზვიად ჩიტიშვილი 1971 წლის 20 დეკემბერს, თბილისში, ნაძალადევის რაიონში დაიბადა. 154-ე საშუალო სკოლის დამთავრების შემდეგ, სწავლა საქართველოს ტექნიკურ უნივერსიტეტში განაგრძო; ასევე დამთავრებული აქვს ეკატერინბურგის სახელმწიფო იურიდიული აკადემია. ჩიტიშვილი ქართულ-რუსული საქველმოქმედო ორგანიზაცია „გროსის“ ერთ-ერთი დამფუძნებელია. ნიშანდობლივია, რომ ეს ორგანიზაცია აქტიურადაა ჩართული ქართველ და რუს ხალხებს შორის კულტურული და საქმიანი ურთიერთობების განმტკიცებაში.

სხვათა შორის, 8 ოქტომბრის არჩევნებამდე კარგა ხნით ადრე გავრცელდა ინფორმაცია, რომ ზვიად ჩიტიშვილის პარტია „ჩვენი სამშობლო“ და ქვემო ქართლის ყოფილი გუბერნატორის, ლევან მამალაძის პოლიტიკური გაერთიანება „სახალხო ხელისუფლება“ გაერთიანდნენ, თუმცა საბოლოოდ, ჩიტიშვილი ოქტომბრის არჩევნებზე „მრეწველებთან“ ერთად გამოვიდა.

„მოგეხსენებათ, ნებისმიერი სახის პოლიტიკური აქტიურობისთვის, მით უმეტეს, თუ საქმე ქუჩას ეხება, ფულია საჭირო. ამ კონტექსტში, ბურჯანაძის პარტიას ფულის პრობლემა არ უნდა ჰქონდეს - ჯერ ერთი, კვალიფიციური სუბიექტია, ანუ არჩევნებში 3%-იანი ბარიერი გადალახა და, კანონის თანახმად, წელიწადში 300 ათას ლარს ბიუჯეტიდან მიიღებს; აჭარის უმაღლეს საბჭოში კი ხუთპროცენტიანი ბარიერის გადალახვაც მოახერხა. გარდა ამისა, როგორც ვიცი, კვალიფიციურ სუბიექტს, განვითარების მიზნით, გარკვეულ თანხას ცესკო-ც აძლევს. თუ ბურჯანაძის გვერდით ჩიტიშვილიც დადგება და მრეწველებიც, გამოვა, რომ ეს პარტია წელიწადში სოლიდურ თანხას მოაგროვებს. გუბაზ სანიკიძის სახით „ფეისიც“ ეყოლება და შესაბამისად, ფარული გეგმაც ამუშავდება, ანუ ვფიქრობ, ყველაფერ ამით პროდასავლური სპექტრი ჩრდილში აღმოჩნდება და ამასობაში, ადგილობრივი არჩევნებიც კარს მოგვადგება. ჰოდა, პირადად მე, სულაც არ გამიკვირდება, რომ გაისად ადგილობრივი თვითმმართველობის ორგანოებში ბურჯანაძე სოლიდურად იქნეს წარმოდგენილი“, -ვარაუდობს „ვერსიის“ კონფიდენციალური წყარო, თუმცა აქვე ამბობს, რომ პოლიტიკაში გრძელვადიანი პროგნოზები მაინცდამაინც არ ამართლებს და შესაძლოა, ყველაფერი სხვა სცენარით განვითარდეს.

——————–

„ახალი თაობა“, 17 ნოემბერი, 2016 წელი

ინტერვიუ რამაზ საყვარელიძესთან: „ნაცმოძრაობა“ წამგებიანი ალტერნატივის წინაშეა“

შეინარჩუნებს „ნაცმოძრაობა“ მიხეილ სააკაშვილს, სააკაშვილი წააგებინებს, დაკარგავს სააკაშვილს და უსააკაშვილობა წააგებინებს? „ნაცმოძრაობაში“ მიმდინარე პროცესებზე „ახალი თაობა“ ექსპერტ, ფსიქოლოგ რამაზ საყვარელიძეს ესაუბრა.

- ბატონო რამაზ, როგორ აფასებთ ექსპრეზიდენტ მიხეილ სააკაშვილის განცხადებებს, რომელიც აცხადებს, რომ ივანიშვილმა ყველაფერი გააკეთა, რომ დაეშალა ნაციონალური მოძრაობა. ჯერ იყო და პირველი ჯგუფი - „გირჩი“, შემდეგ მეორე ჯგუფი - ვაშაძე. არის სიმართლე მიხეილ სააკაშვილის განცხადებებში?

- ექსპრეზიდენტის სიმართლე იშვიათია ხოლმე. მას უყვარს იმის თქმა, რაც მისთვის მომგებიანია იმ მომენტში და არ აინტერესებს, ეს სიმართლეა თუ არა. ის, რომ დაშლის ნიშნებია, დღეს კიდევ უფრო მკაფიოდ გამოჩნდა. დღევანდელი დაშლა ლოგიკურს ხდის იმას, რომ წინა ჯგუფების გამოყოფა, „გირჩის“ და ვაშაძის გუნდების, შემთხვევითი არ იყო.

- რას გულისხმობთ?

- იგივე მიზეზებს, როცა ანგარიში არ ეწევა დანარჩენ წევრებს. ალბათ იგივე მიზეზი იყო მათ გამოყოფაშიც. ამიტომ, ივანიშვილის კისერზე ამ პროცესის ჩამოკიდება და საკუთარი შეცდომების დაუნახაობა, არა მგონია, რომ სწორი სტრატეგია იყოს. თუნდაც იმისთვის, რომ სამომავლოდ შეინარჩუნოს ამ პარტიამ სახე და სააკაშვილმა – პარტიაში ადგილი.

- ის ითხოვს სასწრაფოდ ყრილობის ჩატარებას. „ნაციონალურ მოძრაობაში არის საშიში ტენდენცია - სვეტების ჯგუფი“. რას გულისხმობს სააკაშვილი?

- ახლა გავრცელდა ინფორმაცია, რომ სააკაშვილი ფარულად, პირიქით ცდილობს იმას, რომ ყრილობა არ ჩატარდეს. მე უფრო დამაჯერებელი ეს მეორე ვერსია მგონია და არა – განცხადებული სურვილი ყრილობის ჩატარების.

- რატომ? სააკაშვილი ხვდება, რომ შესაძლებელია თავიდან მოიშორონ?

- სწორედ რომ ასეა, თუკი მხარდამჭერების რაოდენობა საკმარისი არ ჰყავს და წესით არც უნდა ჰყავდეს.

- მიხეილ სააკაშვილი ნაციონალური მოძრაობის ზოგიერთ წევრს თვითგამოცხადებულ ლიდერს უწოდებს. აქ ბოკერია და მისი ფრთა იგულისხმება?

- აქ ერთი საინტერესო ტენდენციაა. უკვე მერამდენე ინტერვიუ აქვს მაგას მიცემული ამ თემაზე და სახელებს არსად ამბობს. გახსოვთ, ასეთივე სტილი ჰქონდა ივანიშვილთან საუბრის დროს, 2012 წლის არჩევნების წინ. ანუ, როცა მეტოქის ეშინია, ის ცდილობს, მისი სახელი არ თქვას.

- ამას რით ხსნით?

- ამ შიშს ალბათ რეალური საფუძველი გააჩნია თვითონ სააკაშვილის თვალში.

- რეალურია ეს შიში? დაკარგავს თავმჯდომარეობას, ლიდერის პოსტს?

- პრაქტიკულად დაკარგული აქვს, როცა ლიდერის გადაწყვეტილებას პარტია არ ემორჩილება, ის რაღა ლიდერია მაშინ.

- რა ხდება ნაციონალური მოძრაობის მეორე ფრთის მხარეს? ისინი შევიდნენ პარლამენტში, საპარლამენტო თანამდებობებიც მოირგეს, თუმცა ახალი სახეები წამოწიეს წინა პლანზე. გადახალისება მიდის?

- დიახ, გადახალისება მიდის, გადასინჯვა, გადაფასება თითოეული წევრის და მთლიანად პარტიის მოღვაწეობისა. გასაკვირი იქნებოდა, ეს რომ არ მომხდარიყო. აქამდე რომ არ ხდებოდა, ეს მიკვირდა. წესით, დიდი ხნით ადრე უნდა მომხდარიყო ეს ამბავი. თუმცა სჯობს გვიან, ვიდრე არასდროს.

- დღეს იკვეთება ისეთი ტენდენცია, რომ მთლიანად სააკაშვილს შეახოცონ ხელი მისმა თანაგუნდელებმა. ეს რამდენად გამართლებულია ადამიანური თვალსაზრისით და თუნდაც პოლიტიკურად?

- მოდით, პოლიტიკურით დავიწყოთ, იმიტომ, რომ ადამიანური თვალსაზრისი არც ისე კარგი მრჩეველია პოლიტიკაში. პოლიტიკური თვალსაზრისით არის მათთვის მეტ-ნაკლებად წამგებიანი ეს გზა, რადგან სააკაშვილის ქარიზმა ბევრ ხმას აძლევდა პარტიას. ამ ქარიზმის გარეშე, სავარაუდოა, რომ ნაციონალური მოძრაობა იგივე შედეგებს აჩვენებს, რასაც გირჩი და ვაშაძის პარტია. მეორე მხრივ, თუკი ისინი სააკაშვილს შეინარჩუნებდნენ, როგორც ლიდერს, მაშინ მისი ჯიუტი მოთხოვნები დააყენებდა პარტიას დარტყმის ქვეშ.

- რა კუთხით?

- როცა სააკაშვილი უბიძგებდა პარტიას ქუჩის აქციებისკენ, ეს პარტიის განადგურების ტოლფასი იყო. მერე სააკაშვილს ექნებოდა სალაპარაკო, რომ აი, ივანიშვილმა ქუჩის მომიტინგეები დაარბია და დემოკრატიას ღალატობს. ამისთვის უნდოდა სააკაშვილს ქუჩაში მათი გაყვანა. პარტია ამჟამად წამგებიანი ალტერნატივის წინაშეა. არც ერთი ალტერნატივა მისთვის მომგებიანი არ არის. შეინარჩუნებს სააკაშვილს, სააკაშვილი წააგებინებს, დაკარგავს სააკაშვილს და უსააკაშვილობა წააგებინებს.

- ნურც გაფრინდები, ნურც მოფრინდების პოზიციაში არიან?

- მე მაინც ვთვლი, რომ პარტიამ უფრო სწორი გადაწყვეტილება მიიღო. რომც დაბალი შედეგები აჩვენონ, გუნდი უფრო ერთიანი იქნება, გუნდი იქნება და არა _ ერთ კაცზე ორიენტირებული. გადაწყვეტილებებსაც გაფილტრავენ და ისე მიიღებენ. აი, სააკაშვილს რომ გუნდისთვის მოესმინა, შეიძლება მათთვის ნორმალური შედეგიც კი დამდგარიყო. ერთმანეთს რომ არ უსმენენ, იმან გააჩინა ის, რაც მოხდა.

- სააკაშვილის პოზიციები უკრაინაშიც შეირყა, აქ კი ლიდერის პოზიციებს კარგავს. ამ სიტუაციაში როგორ იმოქმედებს სააკაშვილი? შესაძლოა, რაიმე ახალი ვარიანტი შემოგვთავაზოს? ელით რაიმე ნაბიჯებს მისგან?

- ძნელია იმის თქმა, რომ არ ველი. ძალიან ენერგიული და ექსცენტრიული პოლიტიკოსია, რომელიც ლოგიკურად არ იქცევა და ამ ალოგიკურობაში მან შეიძლება ბევრი ისეთი სვლა გააკეთოს, რასაც ახლა ვერ განსაზღვრავს ადამიანი. სავარაუდოა, რომ ის ეცდება, დაალაგოს ურთიერთობა ტრამპის ადმინისტრაციასთან. სავარაუდოა, რომ ამერიკის გავლით ეცდება უკვე, რომ შევიდეს უკრაინაში. ანუ ამერიკული გავლენით იმოქმედოს უკრაინაში. ეს რამდენად შედეგიანი იქნება, ამის თქმა ძნელია, რადგან ტრამპის პოლიტიკა ჯერ გახსნილი არ არის, მისი ხასიათი და პოლიტიკა ჯერჯერობით ბუნდოვანია. ხოლო სააკაშვილს, ამერიკის გარდა, სხვა დასაყრდენი, პრაქტიკულად, არ გააჩნია. თუ ეს საყრდენიც გამოეცალა, მერე როგორ იმოქმედებს, ეს ძნელი სათქმელია.

„ახალი თაობა“, 17 ნოემბერი, 2016 წელი

ინტერვიუ კონსტანტინე გამსახურდიასთან: „ოპოზიცია ძლიერი იყო 2007 წლის 2 ნოემბერს“ // „პოლიტიკა ნიჰილისტური განწყობების ადგილი არ არის“

ოპოზიციის ერთ-ერთი ლიდერი კონსტანტინე გამსახურდია „ახალ თაობასთან“ ინტერვიუში მიმდინარე პოლიტიკურ პროცესებზე საუბრობს.

- ბატონო კონსტანტინე, 8 ოქტომბრის საპარლამენტო არჩევნების შემდეგ ოპოზიცია ერთგვარად დაბნეულია. ისეთი პროცესები განვითარდა, რომელთაც თვითონაც არ მოელოდნენ, ამას დაემატა საკონსტიტუციო უმრავლესობის მოპოვება მმართველი ძალის მიერ. გადალახავს ამ სირთულეებს ოპოზიცია?

- იშვიათია პერიოდი, როდესაც სახელისუფლო ბლოკს საკონსტიტუციო უმრავლესობა არ ჰქონოდა მოყოლებული. გამონაკლისი იყო 2012-2016 წლები. ეს არჩევნები ყველას დაემუქრა. ოპოზიციის ნაწილმა დამდგარ შედეგებზე მწვავე რეაგირება მოახდინა. ერთი მხრივ, მოვლენებს გაერიდნენ და მეორე მხრივ, თავის თავზე აიღეს პასუხისმგებლობა. თუმცა, არავინ არსად წასულა, სადღაც პოლიტიკის სიახლოვეს რჩებიან, ანუ ეს იმას ნიშნავს, რომ ისინი კვლავ გამოჩნდებიან. ოპოზიცია არსებობს იმდენად, რამდენადაც ის არსებულ რეალობას აპროტესტებს და გამოხატავს თავის მზადყოფნას, რომ არ შეეგუოს არსებულ სიტუაციას და იბრძოლოს ახალი რეალობისთვის.

- ახლა ოპოზიცია ცდილობს, საარჩევნო კანონმდებლობის ირგვლივ გაერთიანდეს. რამდენად შეძლებს რეალური შედეგის მიღებას?

- ნორმალური საარჩევნო კანონმდებლობისთვის ბრძოლა ერთ-ერთი მთავარი წინაპირობაა ოპოზიციის არსებობისთვის. სამი წელიწადი გახდება მალე, რაც ჩვენ უკვე ვიკრიბებით და ვცდილობთ სამართლიანი საარჩევნო კანონმდებლობის დამკვიდრებას. თუმცა, რეალურად ხელისუფლებას არაფერი შეუცვლია. მან დროის გაყვანის ტაქტიკას მიმართა და კოსმეტიკური ცვლილებაც კი არ განახორციელა. ხელისუფლებამ ასეთი შულერული მეთოდებით მიაღწია სწორედ საკონსტიტუციო უმრავლესობას. ასევე არალეგალურად განკარგა უზარმაზარი თანხა, ასეულობით მილიონი. ეს იყო ფარსი, მიზანი იყო, რომ ძირითადი განაწილება სწორედ ამ ორ პარტიას შორის მომხდარიყო.

- საპარლამენტო არჩევნების შემდეგ ოპოზიციური პარტიების ლიდერებმა ერთმანეთის მიყოლებით უარი თქვეს აქტიურ პოლიტიკაზე ან უკანა პლანზე გადავიდნენ. არჩევნების შედეგით იყო ეს ნაკარნახევი?

- არჩევნები არის გამოხატულება იმ პროცესის, რაც რეალურად ქვეყანაში მიდის. ეს არის ძალაუფლებისა და რესურსების კონცენტრაცია ერთი ადამიანისა და ერთი პოლიტიკური ძალის ხელში. არჩევნებიც და სხვა დანარჩენი პოლიტიკური პროცესიც არის ფაქტების კონსტატირება და სხვა არაფერი. რაც შეეხება იმას, რომ ლამის ოპოზიცია გაუქმდეს, როგორც ასეთი, როდის არ იყო ამ ქვეყანაში ოპოზიცია გაუქმების პირზე?! მე არ მახსოვს პერიოდი, როდესაც საწინააღმდეგო ყოფილიყო.

- ძლიერი ოპოზიცია არ გახსოვთ?

- თუ არ ჩავთვლით 2007 წლის 2 ნოემბერს, როდესაც მართლაც დიდი ძალა ჰქონდა ოპოზიციას, მაგრამ ეს იყო ფრაგმენტული. მოქმედი ხელისუფლება ჯერ-ჯერობით ახერხებს, რომ ხალხში მასობრივი უკმაყოფილების საპროტესტო მუხტი არ იყოს. მაგრამ როდემდე?! ადრე თუ გვიან, ეს მუხტი გარდაუვალია.

- დღეს ოპოზიციაში ნიჰილისტური განწყობები სჭარბობს?

- არ მგონია, ასე იყოს. ნიჰილისტური განწყობებისთვის დრო და ადგილი არ რჩება ოპოზიციაში. მაშინ ქუდი უნდა დაიხურონ და პოლიტიკიდან წავიდნენ. პოლიტიკაში ნიჰილისტური განწყობილებების ადგილი არ არის.

- შეიძლება იქითკენ მიდის ყველაფერი, რომ სწორედ ორპარტიული სისტემა არის მომავალი ამ პოლიტიკური პროცესის?

- არა, არა მგონია, რომ ორპარტიული პოლიტიკური სისტემა იყოს ჩვენი მომავალი. მე მგონია, რომ ეს არის ორი, ტოტალიტარულად განწყობილი, პარტიის რაღაცნაირი თანაარსებობა. სწორედ ამ ორმა ძალამ გაიყო მთელი პოლიტიკური ველი, პოლიტიკური პოზიციები. ეს არის რეალობა, ერთმა აიღო უმრავლესობა, მეორემ – უმცირესობა. „ქართულ ოცნებას“ წყალივით ესაჭიროება ნაციონალური მოძრაობა, რომ დაარწმუნოს თავისი ამომრჩეველი – თუ ის არა, ნაციონალები დაბრუნდებიან, მიხეილ სააკაშვილის აქტიურობა ამაზე პირდაპირ ასხამს წყალს.

- თუმცა, პარლამენტში შედის პატრიოტთა ალიანსიც...

- დიახ, მაგრამ ისინი მოკრძალებული რაოდენობით იქნებიან წარმოდგენილნი საკანონმდებლო ორგანოში. ისინი ოპოზიციის ძირითად იდეებსა და ინიციატივებს გაახმოვანებენ და სხვა არაფერი. პარლამენტის ტრიბუნა ნამდვილად არის გამოსაყენებელი.

„ახალი თაობა“, 17 ნოემბერი, 2016 წელი

ინტერვიუ გელა ნიკოლაიშვილთან: „ნარკოტიკებით ვაჭრობას მფარველები ხელისუფლებაშიც ეყოლება“ // „დღეს მოსწავლეებში ნარკოტიკის მოხმარება კარგ ტონად ითვლება“

ირღვევა თუ არა ადამიანის უფლებები ახალი ხელისუფლების პირობებში? რატომ გაიზარდა ქვეყანაში ნარკოტიკების მოხმარება? რამდენად საშიში ტენდენციები იკვეთება? ვინ „კრიშავს“ ფსიქოტროპული ნივთიერებების ბიზნესს აფთიაქებში? – „ახალი თაობის“ ამ და სხვა კითხვებს უფლებადამცველი გელა ნიკოლაიშვილი პასუხობს.

- ორიოდე დღის წინ, ქუთაისის აეროპორტში ახალგაზრდების ჯგუფი დააკავეს, რომლებიც ერთ-ერთ არასამთავრობო ორგანიზაციას წარმოადგენდნენ. მოტივი იყო ის, რომ მათ ნარკოტიკული საშუალებები შემოჰქონდათ. თითოეულ მათგანს ტომოგრაფიაც კი გადაუღეს. მათ ნარკოტიკის კვალი არ აღმოაჩნდათ. ეს ადამიანები მათი უფლებების შელახვაზე საუბრობენ.

- ასეთი შემთხვევებიც არის ხოლმე, როდესაც პოლიცია, განსაკუთრებით ნარკოტიკულ დანაშაულთან დაკავშირებით, აკავებს ადამიანებს, ისინი ყოველთვის ხელმძღვანელობენ ოპერატიული ინფორმაციებით.

- ანუ ჰქონდათ ინფორმაცია და არ გამართლდა?

- რა თქმა უნდა. ძირითადად ეს ინფორმაციები მართლდება ხოლმე. მათი აგენტურა, ან მათთან მოთანამშრომლე ადამიანები წინასწარ აძლევენ ინფორმაციებს და ჩვენს პრაქტიკაში, რაც კი ნარკოტიკულ დანაშაულთან არის დაკავშირებული საქმეები, 99%-ს შემთხვევაში, ყველას აკავებენ კონკრეტული ინფორმაციით. არის გამონაკლისი ის 1%, როდესაც არ მართლდება და ამ შემთხვევაშიც სწორედ ასეთთან გვქონდა საქმე.

- ანუ ინფორმატორმა არასწორი ინფორმაცია მიაწოდა?

- ფაქტია, რომ რაღაც მოხდა, ან არასწორი ინფორმაცია მიაწოდეს, თორემ პოლიციას ინტერესი რომ ჰქონოდა ამ ადამიანების დაკავების, სამწუხაროდ, ასეც ხდება ხოლმე ჩვენს პრაქტიკაში, უბრალოდ, ჩაუდებდნენ. მერე იმის მტკიცება, ჩაუდეს თუ ნამდვილად ჰქონდათ, დამერწმუნეთ, პრაქტიკულად შეუძლებელია ხოლმე.

- ნარკოტიკების ჩადება ბოლო პერიოდში შეგხვედრიათ?

- ეს შემცირებულია, მაგრამ საბოლოოდ რომ აღმოფხვრილი იყოს, არა. 90-95% თუ რეალურია, შეიძლება ითქვას, რომ 5-10% გვაქვს ხოლმე ჩადებებიც. როცა ეს დაინტერესებული პირის მიმართ ხდება, თორემ ასე ქუჩაში, პოლიციისთვის სრულიად უცნობი და უინტერესო ადამიანის მიმართ, ბუნებრივია, არავინ დაგეგმავს ოპერაციას. ეს ძირითადად იმ პირების მიმართ ხდება, როდესაც იციან, რომ ამ ადამიანს ნამდვილად აქვს ჩადენილი დანაშაული და ვერ უმტკიცებენ, ამ დროს შედარებით ადვილია ჩადებით დაჭერა. შემდეგ მიდის ხოლმე ვაჭრობა, რომ თუ იმ დანაშაულს აღიარებ, აქ შეღავათს გაგიწევთ.

- იმატა ნარკოტიკული საშუალებების მოხმარებამ, განსაკუთრებით საგანგაშო მდგომარეობაა თინეიჯერებში, რომლებიც ეტანებიან ფსიქოტროპულ ნარკოტიკებს და რომ ვიღაც „კრიშავს“ ამ ბიზნესს აფთიაქებში. რისი თქმა შეგიძლიათ ამის თაობაზე?

- სამწუხაროდ, ამაში დაგეთანხმებით და ვიტყოდი, რომ დიახ, ნარკოტიკების მოხმარება, სამწუხაროდ, უფრო მასობრივი გახდა და ამის ერთ-ერთი მიზეზი მე მაინც ის მგონია, რომ ძალიან ლიბერალური დამოკიდებულებაა ადამიანების ცნობიერებაში და მთელი ეს კამპანიები, რომ რა მოხდა, ნარკოტიკია, არავის არაფერს უშავებენ და ასე შემდეგ, ეს ყველაფერი ძალიან ცუდად აისახა ჩვენს საზოგადოებაზე.

- ანუ, ამ კუთხით ლიბერალურ დამოკიდებულებას არ იზიარებთ?

- აქ შეიძლება მართლაც იყოს საუბარი მსუბუქი ნარკოტიკის ლიბერალიზაციაზე, მარიხუანა და ექსტაზი სხვა არის, მაგრამ ჩვენს ახალგაზრდა თაობას, ჩვენს მოქალაქეებს ძალიან უჭირთ განსხვავება, ფიქრობენ, რა მნიშვნელობა აქვს, ისიც ნარკოტიკია და ისიც. თუ იმის მიმართ მიდგომა ასეთი ლიბერალურია, მაშინ ესეც არაფერია. სამწუხაროდ, მასობრივ ცნობიერებაში ნელ-ნელა იწყება იმის დამკვიდრება, რომ ეს ჩვეულებრივი ამბავია, რომ დასავლეთში ლეგალიზებულია და ჩვენთანაც ასე უნდა იყოს. ამ დროს ძალიან ცოტა საუბრობს იმაზე, რომ დღეს ეს ჩვენთან სისხლის სამართლის დანაშაულია. ძალიან რთულია თვითონ სამართალდამცავი უწყებების მუშაობა ასეთ პირობებში.

- როგორ პირობებში?

- როდესაც საზოგადოებას ეს ჩვეულებრივ ფორმად მიაჩნია. კი ბატონო, მსუბუქი კატეგორიის ნარკოტიკის ლიბერალიზაციის მომხრე მეც ვარ და ამისთვის გამოიყოს კონკრეტული ადგილები, მაგრამ არც ერთ ქვეყანაში არ ხდება ის, რომ ნებისმიერი ნარკოტიკის მოხმარება, ნებისმიერ ადგილას დასაშვები იყოს და ის არ იყოს დასჯადი!

- ამ მიდგომებმა მოიტანა ის, რომ მომხმარებელთა რიცხვმა იმატა?

- დიახ. როგორც ადრე სიგარეტის მოწევა მოსწავლეებისთვის იყო რაღაცა „ვაჟკაცობის“ და „სვეტობის“ მაჩვენებელი, დღეს, სამწუხაროდ, მოსწავლეებში სიგარეტი ნარკოტიკმა ჩაანაცვლა. დღეს მოსწავლეებში ნარკოტიკის მოხმარება ითვლება კარგ ტონად. ეს საგანგაშო ტენდენციაა. სტატისტიკა ამ თვალსაზრისით შემაშფოთებელია.

- რას იტყვით იმ აფთიაქების შესახებ, სადაც იყიდება ეს ფსიქოტროპული ნივთიერებები? იყო საუბარი ასეთი აფთიაქების დახურვაზე, მათთვის საქმიანობის აკრძალვაზე, რატომ ვერ ან არ განხორციელდა მსგავსი ქმედებები?

- აქ კი ხელისუფლების არაჯეროვან მოქმედებასა თუ უნიათობაზე და არათანმიმდევრულობაზე უნდა ვილაპარაკოთ. მეც მესმის და ყველა ჩვენგანს, რომ აი, ჩემი სახლის წინ, ამ აფთიაქში დაუბრკოლებლად იყიდება, რიგები დგას და ასე შემდეგ.

- ეს ინფორმაცია სამართალდამცავი ორგანოების ყურამდე არ მიდის?

- რა თქმა უნდა, მათ ყურამდეც მიდის და ხშირ შემთხვევაში ისინი იყენებენ ამას თავისი ოპერატიული მიზნებისთვის, ხშირად თვალს ხუჭავენ და ესეც ძალიან ცუდია. თუ არის ბრძოლა რაღაცა სენთან, უნდა იყოს პირდაპირი და მასობრივი ბრძოლა და არა ისე, რომ დღეს ვებრძვი და ხვალ არ ვებრძვი. არათანმიმდევრულობას იჩენს ჩვენი ხელისუფლება ამ სენთან ბრძოლაში.

- ინტერესიც ხომ არ იკვეთება?

- რა თქმა უნდა, იქნება. ნარკოტიკი, პროსტიტუცია და იარაღით ვაჭრობა არის სამი ისეთი სფერო, სადაც ყველაზე დიდი ფული კეთდება მთელ მსოფლიოში. ბუნებრივია, ჩვენთანაც ეყოლება მფარველები და ათასი ვიღაც ხელს ითბობს ამით. კონკრეტიკას ვერ დავიწყებ, მაგრამ მათ შორის იქნებიან ისეთი ადამიანებიც, რომლებსაც ხელისუფლების ბერკეტები უპყრიათ ხელთ და მათ ინტერესებშიც ეს ყველაფერი შედის.

„ახალი თაობა“, 17 ნოემბერი, 2016 წელი

ინტერვიუ ლევან ხაბეიშვილთან: „დავით ნარმანია მილიონერების სწავლას აფინანსებს“ //  „სოციალურად დაუცველი სტუდენტების დაფინანსება 150.000 ლარით მცირდება“

რატომ ამცირებს სოციალურ ხარჯებს ნარმანია მომავალი წლის ბიუჯეტში, რა უნდა ასწავლოს სამშენებლო კომპანიებს ხალხის ჯიბიდან ამოღებული ფულით, რატომ არ მცირდება ადმინისტრაციული ხარჯები, რატომ უშვებს თავის თანამშრომლებს 2-დღიან სემინარზე? – ამ თემებზე „ახალ თაობას“ „ახალი საქართველოს“ ერთ-ერთი ლიდერი ლევან ხაბეიშვილი ესაუბრება.

ლევან ხაბეიშვილი:

- დედაქალაქის სატენდერო დოკუმენტაციის შესწავლისას ერთი ძალიან საინტერესო დეტალი მომხვდა თვალში. სამშენებლო კომპანიებისთვის დედაქალაქის მერია ატარებს ტრეინინგს, რომ მათ განათლება მისცეს. ამაში დედაქალაქის მერია იხდის 10.000 ლარს. სამშენებლო კომპანიების წარმომადგენლები მილიონერები არიან და არ მესმის, რატომ უნდა გადავიხადოთ მათ განათლებაში თბილისელებმა ფული. ეგრევე რომ ტენდერი გამოაცხადა მერიამ, ჯერ ეკითხათ ამ კომპანიების წარმომადგენლებისთვის, ეგება საკუთარი ხარჯებით აფინანსებდნენ ამ ტრეინინგს. დავით ნარმანიას ასეთ რამეში დღეს თუ 10.000-იანი ტენდერი გაუვიდა, ხვალ ეს თანხა შესაძლოა გააორმაგოს და გაასამმაგოს. სატენდერო დოკუმენტაცია კარგად შევისწავლე, მაგრამ ვერაფრით მივხვდი, რატომ უნდა გადავიხადოთ ამაში ფული. შესაძლოა, 10.000 სასაცილო თანხაა, მაგრამ მილიონერების სწავლაზე მერიამ ჩვენი ჯიბეებიდან ერთი თეთრიც კი არ უნდა დახარჯოს.

- რა უნდა ასწავლონ მილიონერებს, ეს მაინც თუ წერია სატენდერო დოკუმენტაციაში?

- ეს ტრეინინგი ეკომიმართულებით არის, მაგრამ მაინც არ მესმის, რატომ უნდა გადავიხადოთ ამაში ფული. დედაქალაქის მერიას თუ არ მოსწონს, როგორ მიდის მშენებლობები, ან ეკოლოგიის კუთხით არის რამე პრობლემა, ეს მათი მოსაგვარებელია, რადგან მერია გასცემს მშენებლობებზე ნებართვებს და სწორედ ამ ნებართვების საფუძველზე აშენებენ ეს კომპანიები ტროტუარებზე კორპუსებს.

განათლებაზე რაკი ვლაპარაკობთ, საინტერესო ამბავს გეტყვით, რომელიც თბილისის მომავალი წლის ბიუჯეტს ეხება. 2017 წლის დედაქალაქის ბიუჯეტში სოციალურად დაუცველი სტუდენტების დაფინანსება 150.000 ლარით მცირდება. სამაგიეროდ, მილიონერების სწავლა-განათლებას აფინანსებს ნარმანია. განათლების სამინისტროს ინფორმაციით, დღეის მდგომარეობით, 35.000 ახალგაზრდას აქვს სტუდენტის სტატუსი შეჩერებული. ამ ახალგაზრდების 70% სტუდენტის სტატუსი სწავლის გადასახადის გადაუხდელობის გამო შეუჩერდა. კატასტროფული მდგომარეობა სოციალურ მუხლში, ამ მიმართულების დაფინანსება 29 მილიონით მცირდება. 2016 წლის ბიუჯეტში 209 მილიონი იყო გამოყოფილი ჯანმრთელობის დაცვაზე და სოციალურ უზრუნველყოფაზე. მომავალი წლის ბიუჯეტში ეს მუხლი 180 მილიონით დაფინანსდება. იმ დროს, როცა ქვეყანაში ასეთი მძიმე მდგომარეობაა, სოციალურად დაუცველებს კი არ უნდა აკლებდნენ დაფინანსებას, არამედ ბიუროკრატიულ ხარჯებს უნდა კვეცდნენ.

- ასეთ „მსხვერპლზე“ მერია ალბათ არ წავიდოდა...

- რა თქმა უნდა, არ წავიდოდა, ეგღა აკლიათ, კაი ცხოვრებაზე უარი თქვან. მეტსაც გეტყვით, მერიაში დასაქმებულთა რაოდენობა იზრდება. 2015 წელს მათი რიცხვი 3.919-ს შეადგენდა, 2016 წელს იყო 5.731. ამას ძალიან დიდი კრიტიკა მოჰყვა, მაგრამ ეს არავინ გაითვალისწინა და მომავალი წლის ბიუჯეტის თანახმად, მერიაში დასაქმებულთა რაოდენობა კიდევ 12 ერთეულით გაიზარდა. შესაბამისად, იზრდება ბიუროკრატიული ხარჯები. ესენი არც პრემიებს და დანამატებს მოიკლებენ, სამაგიეროდ, შემცირდება სოციალური უზრუნველყოფის და ჯანდაცვის ხარჯები. ექვსი მილიონით მცირდება სატრანსპორტო მიმართულება. სოციალურად დაუცველი ადამიანები საქალაქო ტრანსპორტით მგზავრობისას შეღავათიანი ტარიფით სარგებლობდნენ. 2016 წელს ვაუჩერებისთვის გამოყოფილი იყო 27 მილიონი, მომავალ წლის ბიუჯეტში ამ მიმართულებით 12 მილიონი ლარია მხოლოდ გათვალისწინებული. საინტერესოა ისიც, თუ რა კატეგორიის ადამიანებს უმცირებენ ბიუჯეტს, საუბარია სოციალურად დაუცველ, მკვეთრად შეზღუდული შესაძლებლობების მქონე პირებზე. ბიუჯეტი მცირდება შეზღუდული შესაძლებლობების მქონე მოზარდების რეაბილიტაციის მიმართულებითაც.

ბიუჯეტი იმ გაჭირვებულების ხარჯზე მცირდება, ვისაც დახმარება ყველაზე მეტად სჭირდება. სამაგიეროდ, არაფერი არ იცვლება ბიუროკრატიისთვის და როგორც უკვე გითხარით, გამოიყო ფული, რომ მილიონერებს მისცენ განათლება. მერიას თავისი თანამშრომლების განათლებაზეც უზრუნია. გამოცხადებულია 58.000 ლარიანი ტენდერი 2-დღიანი სემინარის მოსაწყობად. ჩვენ ზოგადად განათლების მიცემის წინააღმდეგი არ ვართ, უბრალოდ, მათ პრიორიტეტებთან ეს თანხვედრაში არ არის.

- რატომ არ არის თანხვედრაში?

- მაშინ, როცა ადამიანებს გამოცდების და ტესტირებების გარეშე ნიშნავენ თანამდებობებზე, მაშინ როცა ადამიანები გამოცდას ვერ აბარებენ და მაინც მაღალ თანამდებობაზე რჩებიან, ბუნებრივია, იბადება კითხვა, მაშინ რაღას იხდი 58.000 ლარს განათლებაში. ეჭვი მაქვს, რომ ეს 2-დღიანი გასვლითი ღონისძიება `ქართული ოცნების~ შტაბისთვის, ვინც არჩევნებზე თავი გამოიდო, ღრეობა იქნება. კიდევ ერთხელ ვამბობ, დედაქალაქის მერიას განათლებული კადრები რომ სდომოდა, ამაზე აქამდე იზრუნებდნენ, უდიპლომოებით და გამოცდაზე ჩაჭრილებით კი არ აავსებდნენ იქაურობას.

ჩვენ ამ ტენდერს განსაკუთრებულ ყურადღებას მივაქცევთ და აუცილებლად გამოვითხოვთ, ვინ წავიდა ამ სემინარზე და რა სახის ტრეინინგები ჩაუტარდათ მათ. ჩვენი ყურადღება კიდევ სამმა ტენდერმა მიიქცია, რომლის მთლიანი ღირებულება 1.800.000 ლარია. ეს თანხა დედაქალაქში არსებული ორმოულების შეკეთებას უნდა მოხმარდეს. სატენდერო დოკუმენტაციაში მითითებული არ არის მისამართები, თუ სად უნდა მოხდეს ამ ორმოულების შეკეთება. აქედან გამომდინარე, ისე გაათეთრებენ ფულს, ნახევარი საქართველო ვერ გაიგებს. მისამართი როცა არ ფიქსირდება, მიდი და სდიე მერე, სად რა გააკეთეს.

- მიღება-ჩაბარების აქტებით არ შეიძლება ამის გაკონტროლება?

- ორმოულების მიმართულებით ეს არ გამოგვადგება. ორმოული შესაძლოა ამოავსონ, მაგრამ მეორე დღეს გაფუჭდეს. ამიტომ თავისუფლად შეუძლიათ თქვან, ჩვენ გავაკეთეთ, მაგრამ დაზიანდაო. თან წინ ზამთარი გველოდება და ამ პერიოდში გზა ხშირად კეთდება. ამის გარდა, ჩვენ გვაქვს მიზეზი, თუ რატომ არ არის მერია სანდო. გასულ წელს გამოაცხადეს ტენდერი, რომლის შესწავლის შემდეგაც გაირკვა, რომ გზის დაგებას იქ აპირებდნენ, სადაც გზა უკვე გაკეთებული იყო. ამისთანა ხალხისგან ყველაფერია მოსალოდნელი. ამიტომაც მოვუწოდებ დედაქალაქის საკრებულოში მყოფ ოპოზიციას – მაქსიმალურად გააკონტროლეთ მერიის საქმიანობა!

——————–

„რეზონანსი“, 17 ნოემბერი, 2016 წელი

საქართველოს საბანკო სექტორში ფული თეთრდება

„დიდი კვლევა-ძიება საჭირო არ არის, ისედაც ცხადია, რომელია ასეთი ბანკები ქვეყანაში“

მარი ჩიტაია

საქართველოს საბანკო სექტორში ფულის გათეთრების ნიშნები აშკარაა. ჯერჯერობით სახეზეა ერთი ფაქტი, რომელიც “კაპიტალ ბანკის” საქმიანობას ეხება და მისთვის ლიცენზიის გაუქმების მიზეზი გახდა. როგორც სპეციალისტები ვარაუდობენ, საქართველოში არალეგალური ფულის მოძრაობა მხოლოდ “კაპიტალ ბანკით” არ შემოიფარგლება. ფულის გათეთრების და სხვა უკანონო მაქინაციებში შეიძლება, სწორედ ამ ტიპის ბანკები იყვნენ ჩართული. ისინი ძალიან პასიურები არიან, არ ემსახურებიან ხალხს და, ძირითადად, ფულის გატარებით არიან დაკავებული.

საქართველოში რამდენიმე წვრილი ბანკია, რომლებსაც არ აინტერესებთ ეკონომიკური საქმიანობა და მხოლოდ თავისი მფლობელების კერძო ინტერესებს ემსახურებიან. ბაზარზე მათი საქმიანობა ზოგიერთ სპეციალისტს ეჭვს უღვივებს.

“კაპიტალ ბანკთან” დაკავშირებით ეროვნულმა ბანკმა უკვე გააკეთა განმარტება, რომელშიც აღნიშნულია, რომ ბანკის შემოწმების პროცესში გამოვლინდა “უკანონო შემოსავლის ლეგალიზაციის აღმკვეთი კანონმდებლობით გათვალისწინებული მოთხოვნების შეუსრულებლობის, ასევე საქართველოს ეროვნული ბანკის დადგენილებების, წესებისა და ინსტრუქციების, საერთაშორისო საბანკო ნორმებისა და ჩვევების დარღვევის ფაქტები”.

მსგავს ფინანსურ მაქინაციებში მხილებული იყო “კაპიტალ ბანკის” წინამორბედი – “ინვესტ ბანკი”, რომელმაც შემდეგში რებრენდინგი განახორციელა და მოიპოვა სრული საბანკო მომსახურების განხორციელების უფლება.

სპეციალისტების უმრავლესობა ეჭვობს, რომ ფულად მაქინაციებში, შესაძლოა, მონაწილეობდნენ სხვა მცირე ბანკებიც, ძირითადად, ოფშორში დარეგისტრირებული კომპანიები, რომელთა შესახებ საზოგადოებას ინფორმაცია არ გააჩნია.

“ახალი ეკონომიკური სკოლის” პრეზიდენტი პაატა შეშელიძე მიიჩნევს, რომ ფულის გათეთრება ბანკების გვერდის ავლითაც შესაძლებელია, თუმცა თითოეული გამოვლენილი ფაქტი კრიმინალია და უნდა მიეცეს სათანადო კვალიფიკაცია. საბოლოო ჯამში, გაცილებით მკაცრი ზომებია მისაღები, ვიდრე მხოლოდ ლიცენზიის გაუქმებაა.

“დღესდღეობით ყველა ბანკი არის ეროვნული ბანკის ზედამხედველობის ქვეშ. ამიტომ პასუხისმგებლობაც სებ-ს ეკისრება. გამოდის, რომ ფულის გათეთრების ფაქტი გამორჩათ ან ვერ დაინახეს. დიდი ალბათობით, ეს საფრთხე სხვაგანაც იკვეთება, რადგან ფულის გათეთრება ბანკის გვერდის ავლითაც არის შესაძლებელი. ათასნაირი მაქინაცია ხდება. თუ კრძალავს სხვა და ჩვენ ვუშვებთ მას, მთლად ჯანსაღად არ უნდა ვიყოთ.

გარდა ამისა, თუ ბანკი ატარებდა არალეგალურ ფულს, ეს კრიმინალია და რატომ არ არის დამნაშავე დაკავებული? ლიცენზიის გაუქმება საკმარისი ღონისძიება არ არის”, – აცხადებს შეშელიძე და დასძენს, რომ საბანკო სექტორში უნდა მოხდეს გადახალისება, რათა ქვეყანაში დაინერგოს თანამედროვე მექანიზმი, სადაც ბანკების საქმიანობა დეპოზიტების მიღებით შემოიფარგლება.

“საბანკო ლიცენზიის გამკაცრების შესახებ გატარებული ზომა არასწორად მიმაჩნია, პირიქით, ლიცენზია უნდა გამარტივდეს. ბაზარზე სულ 5 ბანკია პრივილეგირებულ მდგომარეობაში და ლამის ქვეყანა გადაყლაპონ. თანამედროვე სისტემა ითხოვს, რომ შეიცვალოს ეს დამოკიდებულება. მსოფლიო ელექტრონულ ფულზე გადადის და თანამედროვეობის მოთხოვნებს ჩვენც უნდა ავუწყოთ ფეხი.

ბანკებს უნდა დავემშვიდობოთ. მსოფლიოში ახალი ტექნოლოგიები და მოდელია, სადაც საბანკო სექტორი არ არის პრივილეგირებული და მას მხოლოდ დეპოზიტების მიღების ერთადერთი გამორჩეული უფლება აქვს. დროა, საბანკო სექტორი საქართველოშიც გადახალისდეს”, – აცხადებს შეშელიძე.

სპეციალისტების აზრით, აუცილებლად გადასახედია იმ კომერციული ბანკების საქმიანობა, რომლებიც სისტემატურად განიცდიან ზარალს, არ მუშაობენ მოსახლეობის მოზიდვაზე, დაკრედიტებაზე და გააჩნიათ მხოლოდ მიმდინარე ანგარიშები.

როგორც ექსპერტი ლია ელიავა განმარტავს, “კაპიტალ ბანკს”, დაახლოებით, 70 მლნ დოლარი ჰქონდა უცხოურ ანგარიშებზე განთავსებული, ეროვნულ ვალუტაში – 15 მლნ ლარი, ხოლო საკრედიტო საქმიანობა წლიდან წლამდე უმცირდებოდა. იგი, ფაქტობრივად, ფულადი გადარიცხვებით იყო დაკავებული.

“როცა ბანკი რამდენიმე წლის განმავლობაში სისტემატურად ზარალს აჩვენებს, სებ-მა თავის დროზე უნდა მიიღოს ზომა და აღკვეთოს მისი უცნაური საქმიანობა. ვფიქრობ, ეროვნულმა ბანკმა “კაპიტალ ბანკთან” დაკავშირებით ცოტა გვიან გამოიფხიკა ყურები.

რაც შეეხება ფულის გათეთრებას, გეტყვით, რომ სებ-ი, მიუხედავად იმისა, რომ გააჩნია ფულის გათეთრების წინააღმდეგ სტრუქტურა, ამ მიმართულებით არაფერს აკეთებს. ჩვენ არ ვიცით არც ერთი საქმე, რომ გამოევლინათ ფულის გათეთრება ან რამე სახის უკანონო ოპერაცია ბანკის მხრიდან. შესაბამისად, ამ მიმართულებით სებ-ს ჯერ კიდევ ბევრი აქვს გასაკეთებელი.

დიდი კვლევა-ძიება საჭირო არ არის, ისედაც ცხადია, რომელია ასეთი ბანკები ქვეყანაში. ეროვნულმა ბანკმა უნდა გაააქტიუროს მუშაობა, რომ საქართველოს ბაზარი “ჯიბის ბანკებისაგან” გაასუფთაოს”, – განმარტავს ელიავა.

მისი აზრით, სებ-ი დიდი ყურადღებით უნდა ეკიდებოდეს საბანკო ლიცენზიების გაცემის საქმეს. კერძოდ, არ უნდა გაიცემოდეს საბანკო ლიცენზია გაურკვეველი წარმოშობის ბიზნესმენზე, რომელსაც ოფშორებში აქვს ფული გადანახული და ჩვენს ქვეყანაში საბანკო ბიზნესს გაურკვეველი წარმომავლობის ფულით ყიდულობს.

“სებ-ი ყურადღებით თუ მოახდენს ლიცენზირების საკითხზე კონცენტრირებას, შესაბამისად, არ წარმოიშვება ფულის გათეთრებასთან დაკავშირებული პრობლემა და არც ბანკის ფინანსურ სტაბილურობას შეექმნება საფრთხე. გამოდის, რომ ეროვნული ბანკი ახლა თავის მიერ დაშვებულ შეცდომას ასწორებს.

ეკონომიკურად ჩამორჩენილ ქვეყნებში, როგორიც საქართველოა, ყოველთვის დიდია ალბათობა, რომ “ფული ირეცხებოდეს”. სამწუხაროდ, რამდენიმე ბანკი ახლაც არის საქართველოში, რომლის მფლობელი უცნობია, შესაბამისად, მისი საქმიანობაც საეჭვოა. ეს არანორმალური მოვლენაა, სებ-ის საზედამხედველო პოლიტიკის ძალიან დიდი ნაკლი, რომელიც სასწრაფოდ გამოსასწორებელია”, – აცხადებს ელიავა.

განსხვავებული მოსაზრებისაა ექსპერტი მიხეილ თოქმაზიშვილი, რომელსაც მიაჩნია, რომ ფულის გათეთრებასთან დაკავშირებით მოკვლევას სებ-ი არ უნდა ახორციელებდეს, რადგან ამ ფუნქციით რეალურად სხვა სტრუქტურაა აღჭურვილი.

“არა მარტო ბანკები, ზოგჯერ ფიზიკური პირებიც არიან გადამრიცხავები და შუამავლები იმ თანხისა, რომელიც შემდეგში შეიძლება ფულის გათეთრებას მოემსახუროს. ამისთვის შესაბამისი ინსტიტუტი არსებობს, რომელიც ფულის გათეთრების საქმეს იკვლევს. ეს იმდენად სპეციფიკური საკითხია, რომ აქ რამე კომენტარი გააკეთო, ძნელია.

სპეციალური მოკვლევისა და ფაქტის დადასტურების გარეშე ფულის გათეთრებაზე საუბარი უხერხულია. სებ-ის ფუნქცია არ არის გამოძიება. შესაძლოა, ფული გადაირიცხა, მაგრამ ემსახურებოდა თუ არა იგი ფულის გათეთრებას, ასეთი ინფორმაცია ეროვნულ ბანკს არ ჰქონდეს”, – აღნიშნა მიხეილ თოქმაზიშვილმა.

„რეზონანსი“, 17 ნოემბერი, 2016 წელი

ლარის დღევანდელ ნიშნულზე დასტაბილურება კრიზისს გააღრმავებს

ეროვნული ვალუტა ჯერ უნდა გამყარდეს და შემდეგ მისაღებ ნიშნულზე გაჩერდეს

ნათია ლომიძე

სახელმწიფო მოხელეები ბოლო დროს ლარის გამყარებაზე თითქმის აღარ საუბრობენ და მხოლოდ მის დასტაბილურებაზე აკეთებენ აქცენტს. ბიზნესმენები და სპეციალისტები კი ამბობენ, რომ თუკი ეროვნული ვალუტა დღევანდელ ნიშნულზე “დასტაბილურდა”, ქვეყანა ეკონომიკურ კრიზისს თავს ვერ დააღწევს და ვერც მოსახლეობა ამოვა ჭაობიდან. ლარის დღევანდელ მაჩვენებელზე (2.48) შეჩერება აშფოთებთ იმპორტიორებსა და მსესხებლებს.

ბოლო დროს ეროვნული ვალუტის ირგვლივ მიმდინარე პროცესების კომენტირებისას მხოლოდ დასტაბილურებას ახსენებენ. მაგალითად, ფინანსთა მინისტრი ნოდარ ხადური დარწმუნებულია, რომ ლარი შეინარჩუნებს სტაბილურობას და საშუალოვადიან პერიოდში აუცილებლად გამყარდება. ლარის დასტაბილურებაზე აკეთებს აქცენტს “ქართული ოცნების” წევრი პაატა კვიჟინაძეც, რომელიც პარლამენტის საფინანსო-საბიუჯეტო კომიტეტის თავმჯდომარის პირველ მოადგილედაა დასახელებული. მსგავს პოზიციას აფიქსირებენ ეკონომიკის ბლოკის სხვა მინისტრებიც.

მოკლევადიან პერიოდში ლარის გამყარების პერსპექტივას ვერ ხედავს ანალიტიკოსი ზურაბ ხორგუაშილი. მისი თქმით, არსებული რეალობა – დაწყებული ინვესტიციებით და დამთავრებული ბიუჯეტის დეფიციტური ხარჯვით – არ იძლევა ამის საშუალებას. ანალიტიკოსი იმპორტის შეზღუდვაზეც საუბრობს და მის ხელოვნურ შემცირებას დაუშვებლად მიიჩნევს.

“სამწუხაროდ, ამ ეტაპზე ლარის გამყარების პერსპექტივის საფუძველი არ არსებობს. სავალუტო ბაზარზე მიმდინარე პროცესი არ იძლევა ამის საშუალებას. მთავრობის ინიციატივა, რომელიც წარმოიშვა დოლარიზაციასთან დაკავშირებით და ა.შ. ეს ყველაფერი ლარის გამყარებას ხელს კი არ უწყობს, პირიქით, პრობლემას ქმნის ეკონომიკაში. ის გეგმა, რაც მთავრობას აქვს, გრძელვადიან პერსპექტივაში კურსზე დადებით გავლენას ვერ მოახდენს. საუბარია ასევე იმპორტის შეზღუდვაზე, რაც ნიშნავს სხვადასხვა პროდუქტზე ფასის ზრდას. რაც არ უნდა იყოს, დაუშვებელია იმპორტის ხელოვნურად შემცირება, ეს არის ვაჭრობის სფეროში ხელოვნურად ჩარევა”, – განუცხადა “რეზონანსს” ხორგუაშვილმა.

სპეციალისტი დედოლარიზაციაზეც საუბრობს და მის ხელოვნურად შემცირებას არასწორად მიიჩნევს და გამოსავალს ეკონომიკის ლიბერალიზაციას მიიჩნევს, რომელიც მოიზიდავს გაცილებით მეტ უცხოურ ვალუტას, რაც ლარს გაამყარებს.

“დოლარიზაციის მაჩვენებლის ხელოვნურად შემცირება არასწორია. ეს არის საბაზრო პროცესებში ჩარევა. ადამიანები დოლარს რომ მეტად ენდობიან, ამიტომ იყენებენ ამ ვალუტას, ხოლო მათი იძულება გამოიყენონ ლარი, რისკს ზრდის, რაც გააძვირებს კრედიტებს. გაზრდილი საპროცენტო განაკვეთი ნიშნავს ნაკლებ სესხს, რაც უარყოფითად აისახება არა მხოლოდ საფინანსო სექტორზე, არამედ თითოეულ მოქალაქესა და ქვეყნის ეკონომიკაზე.

გრძელვადიანი გამოსავალი არის ეკონომიკის ლიბერალიზაცია, რათა მოვიზიდოთ მეტი დოლარი და კურსი გამყარდეს ან დასტაბილურდეს. ასევე, ერთ-ერთი მარტივი, მაგრამ არა იოლი გამოსავალია თავისუფალი სავალუტო სისტემა, რაც მოსპობს ლარის ფსევდომონოპოლიას და მოსახლეობის უმრავლესობა არ იზარალებს სავალუტო რისკის გამო”, – ამბობს ხორგუაშვილი.

ლარის კურსის გამყარებას აუცილებლობად მიიჩნევს “პირველი საკრედიტო კავშირის” ხელმძღვანელი გივი კორინთელი, თუმცა იქვე დასძენს, რომ კურსის გამყარება აუცილებლად გეგმაზომიერი უნდა იყოს.

“იმპორტისთვის კურსის გამყარება ძალიან მნიშვნელოვანია, მაგრამ სწრაფი პროცესიც მავნებელია. ეს უნდა მოხდეს გეგმაზომიერად. კურსს დღევანდელ ნიშნულამდე თანდათანობით რომ მიეღწია, ასეთი დესტაბილიზაცია არ იქნებოდა. არჩევნების შემდეგ ნახტომისებურ ცვლილებას მოჰყვა ის არასტაბილურობის შეგრძნება და პანიკაც მივიღეთ. რასაკვირველია, აუცილებელია, ლარის კურსი ჯერ გამყარდეს და შემდეგ მისაღებ ნიშნულზე დასტაბილურდეს. ამისკენ უნდა გადაიდგას ნაბიჯები. ამ კურსზე შეჩერება კრიზისიდან ვერ გამოგვიყვანს. სჯობს, დაველოდოთ მთავრობის განცხადებას, რომელიც დაანონსებულია. ვნახოთ, რა რეგულაციას შემოგვთავაზებენ. ამ განცხადების შემდეგ უფრო კონკრეტული პროგნოზის გაკეთება იქნება შესაძლებელი”, – განუცხადა “რეზონანსს” გივი კორინთელმა.

ლარის გამყარების აუცილებლობაზე საუბრობს იმპორტიორი მიხეილ რაზმაძეც. როგორც მან აღნიშნა, ლარის არსებული ნიშნული (2,48) მიუღებელია როგორც ბიზნესისთვის, ასევე ქვეყნის ეკონომიკისათვის. მას აშინებს ისიც, რომ მომავალში გაცილებით უარესს უნდა ველოდოთ, შეიძლება ლარი კიდევ უფრო გაუფასურდეს.

“არ შეიძლება, მთელი მსოფლიოს ქვეყნების ეკონომიკის ფულადი ნიშნები მიბმული იყოს დოლარზე. ამაზე უნდა ვიფიქროთ, ეს უნდა მოგვარდეს. ყველა ქვეყანა საკუთარი შრომის ნაყოფიერებას საზღვრავს დოლარით. საქართველოში სხვა რეალობაა, როგორც წარმოების, ასევე მომსახურების სფეროში. ჯერ ეს უნდა დარეგულირდეს და შემდეგ მიეხედოს სხვა რამეს. ამ პრობლემას რომ მოაგვარებენ, შემდეგ უნდა იზრუნონ ლარის გამყარებასა და დასტაბილურებაზე. რასაკვირველია, დღევანდელი ნიშნული ჩემთვის მიუღებელია, მაგრამ ისე არ მოხდეს, რომ დღევანდელი კურსიც სანატრელი გაგვიხდეს. რომელ გამყარებაზეა საუბარი, როდესაც კურსის დასტაბილურებას ვერ ახერხებენ?” – განუცხადა “რეზონანსს” მიხეილ რაზმაძემ.

ლარის კურსის გამყარებასა და შემდეგ დასტაბილურებას აუცილებელ პირობად მიიჩნევს კომპანია “აგარის შაქრის” დამფუძნებელი ალხან ალიზადე. მისი თქმით, ვალუტის გამყარება ბიზნესისა და ქვეყნის ეკონომიკისათვის წინ გადადგმული ნაბიჯი იქნება.

“ლარის კურსის გამყარება მნიშვნელოვანია ბიზნესისთვის და ზოგადად ეკონომიკისთვის. ჩვენ ისევ ვაპირებთ საქმიანობის გაგრძელებას და კარგი იქნება, თუკი ლარი გამყარდება. ამაზე მთავრობამ და შესაბამისმა ორგანოებმა უნდა იზრუნონ”, – აღნიშნა “რეზონანსთან” საუბრისას ალიზადემ.

„რეზონანსი“, 17 ნოემბერი, 2016 წელი

თუ ხელისუფლებამ ნარკოპოლიტიკა არ შეცვალა, „გირჩი“ საჯაროდ დათესავს „პლანს“

გვანცა ღვედაშვილი

იმ შემთხვევაში, თუ მე-9 მოწვევის პარლამენტი და მთავრობა ახალ წლამდე არსებული ნარკოპოლიტიკის ცვლილებას არ განახორციელებს და მარიხუანას ლეგალიზაციას არ დაუშვებს, “გირჩის” წევრები 31 დეკემბერს, მარიხუანას საჯაროდ დათესავენ. თუმცა, “ქართული ოცნება” ლეგალიზაციას დაშუვებლად მიიჩნევს და აცხადებს, რომ არც პირდაპირ და არც ირიბად არ აპირებენ, ხელი შეუწყონ ამ “მავნე ჩვევას” თუ “დაავადებას”.

შეგახსენებთ, რომ სს-ის კოდექსის 265-ე მუხლით, ნარკოტიკული საშუალების შემცველი მცენარის უკანონო დათესვა, მოყვანა ან კულტივირება ისჯება ჯარიმით ან თავისუფლების აღკვეთით ვადით 2-დან 5 წლამდე.

“გირჩის” ლიდერმა ზურაბ ჯაფარიძემ მედიას გუშინ გამართულ პრესკონფერენციაზე პარლამენტისადმი მიმართვა გააცნო, რომელშიც პარტია მარიხუანას და მისი შემცველი პროდუქტების მოხმარების ლეგალიზაციას, ასევე საკუთარი მოხმარების მიზნით მარიხუანას კულტივირების და შენახვის ლეგალიზაციას მოითხოვს.

“ჩვენ (“გირჩი”), ვარსებობთ მხოლოდ მეტი თავისუფლების მოპოვების მიზნით. ყველა თემას ვუკავშირებთ ადამიანის თავისუფლებას, თავისუფლება კი იწყება საკუთარი თავის, საკუთარი სხეულის განკარგვის სრული თავისუფლებიდან. ჩვენი აზრით, ეს არის ადამიანის ნებისმიერი სხვა უფლების ფუნდამენტი და მის გარეშე თავისუფალი საზოგადოების არსებობა შეუძლებელია. ჩვენ და არაერთი საზოგადოებრივი ჯგუფი, წლებია ტრადიციული მეთოდებით ვცდილობთ, ამ ქვეყანაში არსებული დრაკონული ნარკოპოლიტიკის ცვლილებას. ჩვენი შეთავაზება წინა მოწვევის პარლამენტისთვის, გადაედგა თუნდაც უმნიშვნელო ნაბიჯი სწორი მიმართულებით, მიუღებელი აღმოჩნდა. წლების განმავლობაში ასობით ათას მოქალაქეს, მათი ოჯახის წევრებს, სახელმწიფომ გაუმწარა და დაუნგრია ცხოვრება, მხოლოდ ბოლო წლის განმავლობაში ორი მოქალაქე გამოასალმა სიცოცხლეს. სახელმწიფო მანიპულირებს საზოგადოებრივი აზრით, შემდეგ ექცევა მის ტყვეობაში და ბრმად რეაგირებს მასზე. ამიტომ ჩვენთვის მნიშვნელოვანია, საზოგადოება დავაფიქროთ, რატომ არის მნიშვნელოვანი ადამიანის თავისუფლება – მოეპყროს თავს საკუთარი ნების შესაბამისად, რა კატასტროფული შედეგები მოაქვს სახელმწიფო ძალადობას და რა სიკეთის მოტანა შეუძლია მეტ თავისუფლებას როგორც კონკრეტულად ამ საქმეში, ისე ზოგადად,” – ნათქვამია მიმართვაში.

ამასთან, პარტია იმ მოთხოვნებსაც ავრცელებს, რომლებიც მათ სახელმწიფოს წაუყენეს. აცხადებენ, რომ თუ მათი მიმართვა უგულებელყოფილი იქნება და ხელისუფლება არ შეცვლის ნარკოპოლიტიკას, 31 დეკემბერს, ახალი წლის ღამეს, ისინი “გირჩის” ოფისში, საჯაროდ, პირდაპირ ეთერში, მარიხუანას დათესავენ. მიუხედავად იმისა, რომ ამ ქმედებით სისხლის სამართლის კოდექსი ირღვევა და შესაძლოა მათ, 6-დან 12 წლამდე თავისუფლების აღკვეთა მიესაჯოთ.

“ჩვენი მოთხოვნა მდგომარეობს შემდეგში: პირველი – მოხდეს მარიხუანას და მისი შემცველი პროდუქტების მოხმარების ლეგალიზაცია და მეორე – ქვეყანაში მოხდეს საკუთარი მოხმარების მიზნით, მარიხუანას კულტივირების და შენახვის ლეგალიზაცია. ახალ წლამდე მე-9 მოწვევის პარლამენტს ექნება საკმარისზე მეტი დრო, რათა შესაბამისი საკანონმდებლო ცვლილებები განახორციელოს. ამისთვის საჭიროა მხოლოდ პოლიტიკური ნება, ნარკოპოლიტიკის ლიბერალიზაციას კი წინასაარჩევნოდ ყველა საპარლამენტო პარტია ჰპირდებოდა ამომრჩეველს. თუ ახალი პარლამენტი პირველი საშემოდგომო სესიის განმავლობაში არ განახორციელებს შესაბამის საკანონმდებლო ცვლილებებს, 2016 წლის 31 დეკემბერს, 23 საათსა და 59 წუთზე, “გირჩის” ოფისში, საჯაროდ, პირდაპირ ეთერში, ჩვენ, “გირჩის” წევრები, სხვა ნებისმიერ სრულწლოვან მოხალისეებთან ერთად დავთესავთ მარიხუანას.

ზუსტად გვესმის, რომ ამ ქმედებით ვარღვევთ სისხლის სამართლის კოდექსის 265-ე მუხლს. ჩვენ არ ვართ გიჟები, გვყავს ოჯახები, გვაქვს უამრავი მნიშვნელოვანი საქმე და არ გვსურს ცხოვრების რამდენიმე წლის პატიმრობაში გატარება. “გირჩისთვის” ეს არის პოლიტიკური აქტი, თავისუფლებისთვის პოლიტიკური ბრძოლის კონკრეტული გზა. მარიხუანა ამ შემთხვევაში მხოლოდ სიმბოლური ხასიათის მატარებელია. აკრძალული რომ იყოს ალკოჰოლი – დავრგავდით ვაზს; აკრძალული რომ იყოს ნიკოტინი – დავრგავდით თამბაქოს ბუჩქს. გვესმის, რომ მივდივართ რისკზე, მაგრამ ამავე დროს დარწმუნებული ვართ, რომ ამ ბრძოლას აუცილებლად მოვიგებთ. თუ გავიმარჯვებთ ახლა, მაშინ გარდაუვლად გავიმარჯვებთ მეტი თავისუფლებისთვის, ყველა შემდგომ ბრძოლაშიც,” – ნათქვამია მიმართვაში.

“გირჩის” განცხადებასთან დაკავიშირებით უმრავლესობა აცხადებს, რომ აზრის გამოხატვის უფლება ყველას აქვს, თუმცა ეს კანონის დაიცვის ფარგლებში უნდა მოხდეს. რაც შეეხება ნარკოტიკების ლეგალიზაციას “ქართული ოცნების” ნაწილისთვის ეს მიუღებელია, რადგან მათი შეფასებით, აღნიშნული ქმედება ხელს ნარკოტიკების მოხმარების პოპულარიზაციას შეუწყობს, რაც დაუშვებელია.

როგორც “ქართული ოცნების” წევრი გუგული მაღრაძე “რეზონანსთან” საუბრისას აღნიშნავს, საზოგადოებას არ უნდა გაუჩნდეს განცდა, რომ ხელისუფლება აღარ ებრძვის ნარკოტიკების მოხმარებას, თუმცა დასჯის მეთოდად ციხე დაუშვებლად მიაჩნია. ამასთან მისი თქმით, სახელმწიფომ უნდა მოახერხოს და შექმნას ისეთი დაწესებულებები, სადაც ნარკომანს სურვილის შემთხვევაში, თავისი ქცევის გამოსწორების საშუალება ექნება.

“პარტია “გირჩს” შეუძლია, კანონის ფარგლებში ის გააკეთოს, რაც უნდა. აზრის გამოხატვის უფლება ყველას აქვს, მაგრამ კანონი უნდა დაიცვან.

“რაც შეეხება ნარკოპოლიტიკას, მიმაჩნია, რომ ის უნდა იყოს, ზომიერად მკაცრი და ზომიერად ლმობიერი. რაც ნიშნავს, რომ ხელისუფლება ნარკოტიკების გამავრცელებლებს უნდა ებრძოდეს. ნარკოტიკის მომხმარებელთა მიმართ პრევენციის მიზნით ჰქონდეს გარკვეული მკაცრი დამოკიდებულება, მაგრამ ეს არ უნდა სცილდებოდეს კანონის ფარგლებს და არ უნდა არღვევდეს ადამიანის უფლებებს. მეორე მხრივ, მარიხუანას თუ სხვა ნარკოტიკის მომხმარებელმა უნდა იცოდეს, რომ ეს არ არის დადებითი ქცევა და გარკვეული უხერხულობის განცდა უნდა ჰქონდეს, რათა ხელი ახალგაზრდებში ნარკოტიკების მოხმარების ინტერესის გაჩენას არ შეუწყონ. საზოგადოებას არ უნდა ჰქონდეს განცდა, რომ ხელისუფლება აღარ ებრძვის ნარკოტიკების მოხმარებას. ციხე გამორიცხულია, მაგრამ რაღაც სანქციები უნდა იყოს მათ მიმართ, ვინც ორჯერ, სამჯერ და მეტჯერ მოიხმარა ნარკოტიკი და ვერ გამოსწორდა. პარალელურ რეჟიმში ხელისუფლებამ თანდათანობით უნდა მოახერხოს და ჯარიმების ხარჯზე, შექმნას ისეთი დაწესებულებები, სადაც ნარკომანს სურვილის შემთხვევაში თავისი ქცევის გამოსწორების საშუალება ექნება,” – განაცხადა გუგული მაღრაძემ.

“გირჩის” მოთხოვნას მარიხუანას მოხმარება-დათესვის ლეგალიზაციასთან დაკავშირებით “ტაბულასთან” საუბარში “ქართული ოცნების” წევრი ზაქარია ქუცნაშვილი გამოეხმაურა და განაცხადა, რომ იგი ლეგალიზაციასა და დეკრიმინალიზაციას შორის განსხვავებას ვერ ხედავს, აქედან გამომდინარე, “გირჩის” მოთხოვნებს მხარს არ დაუჭერს.

“ჩვენ ამასთან დაკავშირებით გვაქვს კონსერვატიული მიდგომა, რაც გამოიხატება იმაში, რომ არ შევუწყოთ ხელი არც პირდაპირ და არც ირიბად ამ მავნე ჩვევას თუ დაავადებას და ჯერჯერობით ამ მიდგომას არ ვცვლით. ლეგალიზაცია ნიშნავს სწორედ დეკრიმინალიზაციას. ისინი ითხოვენ ლეგალიზაციას იმის გამო, რომ მოხდეს დეკრიმინალიზაცია. ჩვენ ძალიან შევამსბუბუქეთ პასუხისმგებლობა ნარკოტიკების მოხმარებისთვის. ნარკოტიკების შეძენა-მოხმარება-გასაღება ერთნაირად ისჯებოდა, გავყავით 273-ე მუხლი და, შესაბამისად, შევამსუბუქეთ პასუხისმგებლობა მოხმარებისთვის, თან ისიც – განმეორების შემთხვევაში”, – განაცხადა ქუცნაშვილმა.

——————–