„რეზონანსი“: დონალდ ტრამპის პოლიტიკაზე დამოკიდებული საქართველოს უსაფრთხოება // „გაგრძელდება თუ არა ნატოს ღია კარის პოლიტიკა და ხომ არ დაიკარგება ალიანსში გაწევრიანების პერსპექტივა“

„რეზონანსი“: ინტერვიუ ვახტანგ მაისაიასთან: „თუ ნატოს პროცესების მიღმა დავრჩით, საქართველოს შანსები გაურკვეველი ვადით გადაიწევს“

„რეზონანსი“: ინტერვიუ ხათუნა ლაგაზიძესთან: „უნდა ვიცოდეთ, ნატოს, ტრანსფორმირების შემთხვევაში ჩვენ რა გველოდება“ // „მსოფლიო რევოლუციური მოვლენების მოლოდინშია“

„რეზონანსი“: ინტერვიუ კორნელი კაკაჩიასთან: „რუსეთი თვლის, რომ საქართველოსსაგარეო ვექტორების შეცვლის შანსი ჯერ კიდევ არსებობს“ // „საქართველო არ უნდა ეხვეწოს რუსეთს სავიზო რეჟიმის გაუქმებას“

„რეზონანსი“: „რუსეთმა სავიზო რეჟიმი უნდა გააუქმოს“ – შეჯიბრებითობა და სტიმული მოსკოვისთვის

——-

„ახალი თაობა“: ინტერვიუ რომან გოცირიძესთან: „გაზპრომ“-თან ხელშეკრულება საქართველოსთვის საზიანოა“

„ახალი თაობა“: ინტერვიუ გიორგი კანდელაკთან: „შინაგან საქმეთა და თავდაცვის მინისტრებისგან პასუხს ვითხოვთ“

„ახალი თაობა“: ინტერვიუ ლევან ხაბეიშვილთან: „ქართული ოცნება“ პრეზიდენტის ინსტიტუტის გაუქმებას აპირებს“ // „ხელისუფლება გიგა ბოკერიად გადაიქცა“

———————

„რეზონანსი“, 02 თებერვალი, 2017 წელი

დონალდ ტრამპის პოლიტიკაზე დამოკიდებული საქართველოს უსაფრთხოება

„გაგრძელდება თუ არა ნატოს ღია კარის პოლიტიკა და ხომ არ დაიკარგება ალიანსში გაწევრიანების პერსპექტივა“

სალომე სარიშვილი

ამერიკის შეერთებული შტატების ახალი ადმინისტრაციის პოლიტიკის კვალდაკვალ სპეციალისტები გეოპოლიტიკურ ცვლილებებს კავკასიის რეგიონშიც პროგნოზირებენ და ამბობენ, რომ ახლა საქართველოს უსაფრთხოების საკითხების გადაწყვეტაც მეტწილად სწორედაც რომ ტრამპის პოლიტიკაზე და შემდგომ მოვლენებზე იქნება დამოკიდებული.

ზუსტად ამ ფონის გათვალისწინებით, სპეციალისტები საქართველოს აშშ-ს ადმინისტრაციასთან მეტი კომუნიკაციისა და კავშირების გაღრმავებისკენ მოუწოდებენ. ამბობენ, რომ ახლა აქტიურობა მეტად მნიშვნელოვანია.

აშშ-ს ახალი ადმინისტრაციისა და უშუალოდ პრეზიდენტ ტრამპის პოზიციებზე სამხედრო ანალიტიკოსებს არაერთგვაროვანი შეფასებები აქვთ, თუმცა კი იმაზე ცალსახად თანხმდებიან, რომ საქართველოს ნატოსა და ამერიკის შეერთებულ შტატებთან ახლა უფრო მჭიდრო კავშირი მართებს.

ბრიგადის გენერალი, ანალიტიკოსი სამხედრო-პოლიტიკურ და უსაფრთხოების საკითხებში ამირან სალუქვაძე მიიჩნევს, რომ საქართველოს უსაფრთხოების საკითხებში ბევრი რამ ამერიკის საგარეო პოლიტიკაზეც იქნება დამოკიდებული და კერძოდ იმაზე, მოხდება თუ არა იქ რამე კარდინალური ცვლილებები. მისივე თქმით, მიუხედავად დონალდ ტრამპის ნატოსთან მიმართებაში გაცხადებული პოზიციისა, (რომელიც ერთგვარად ნატოს არსებობას ეჭქვეშ აყენებს) აშშ-ს პრეზიდენტის განცხადებები ამერიკის ნატოს ორგანიზაციიდან გამოსვლაზე არ უნდა მოუთითებდეს.”ჩვენ ახლა ნატოს გაფართოების პოლიტიკა გვაინტერესებს – გაგრძელდება თუ არა ღია კარის პოლიტიკა და ხომ არ დაიკარგება ალიანსში გაწევრიანების პერსპექტივა, ეს რა თქმა უნდა, მეტწილად ამერიკის პოლიტიკაზე იქნება დამოკიდებული. ამასთანავე ნატო-რუსეთის მოლაპარაკეკებზე, რადგან ერთ-ერთი საკითხი რაც რუსეთს აინტერესებს, ნატოს გაფართოებაა”, – ფიქრობს ანალიტიკოსი და შიშობს, რომ დონალდ ტრამპსა და ვლადიმირ პუტინს შორის შესაძლოა ამ საკითხზე შეთანხმება მოხდეს. მისი თქმით, თუ ტრამპის პუტინთან სატელეფონო საუბარს გავიხსენებთ, ჩანს, რომ ტრამპს რუსეთთან ურთიერთობის დათბობა სურს, რაც მისი შეფასებით, ურთიერთშეთანხმებით ხდება. ანალიტიკოსის შეფასებით, ზუსტად ამიტომაა მნიშვნელოვანი რუსეთის ფაქტორი, რომელიც ტრამპს აუცილებლად დაუყენებს რამდენიმე მნიშვნელოვან საკითხს.

ბრიგადის გენერალის თქმით, ეს საკითხები სანქციების მოხსნას, ნატოს გაფართოების შეჩერებასა და რუსეთის გავლენის სფეროების აღიარებას შეეხება, რის მიღწევასაც პუტინი ტრამპთან აუცილებლად შეეცდება.

“ვფიქრობ, რუსეთთან შეთანხმების მიღწევა რამე დაპირების გარეშე რთული იქნება, მაგრამ თუ ეს ასე მოხდა, ეს ჩვენზე პირდაპირ აისახება და ცხადია, ნატოს გაფართოების ჭრილში. თუმცა, არ მგონია ნატო რუსეთთან დათმობაზე წავიდეს და თავის პოლიტიკაზე უარი თქვას, ალბათ სამიტი გარკვეულ მინიშნებებს ამ კუთხით მოგვცემს”, – აღნიშნავს ამირან სალუქვაძე და იქვე უმატებს, რომ ამ ფონზე საქართველომ აშშ-სთან ურთიერთობა უფრო მეტად უნდა გააღრმავოს და შესაბამისად ამ საკითხზე მეტი აქტიურობით იმუშავოს.

სამხედრო ანალიტიკოს ვახტანგ მაიასაიას შეფასებით კი, მოსალოდნელი გეოპოლიტიკური ცვლილებების ფონზე, ძალიან საინტერესო ტენდენციებს აქვს ადგილი.

ვახტანგ მაისაიას თქმით, ამერიკის ახალმა ადმინისტრაციამ პირველი ნაბიჯები არა ევროპის და ახლო აღმოსავლეთის მიმართულებით, არამედ უფრო წყნარი ოკეანისა და სამხრეთ აღმოსავლეთი აზიის მიმართულებით გადადგა, რაც ნიშნავს, რომ აქცენტირება გეოპოლიტიკური ცენტრებისა, თანდათანობით უკვე იკვეთება.

“მაგალითად, წინა ადმინისტრაციის, ობამას გრავიტაციის ცენტრი ახლო აღმოსავლეთი და აღმოსავლეთ ევროპა იყო, ხოლო შავი ზღვისპირეთის აუზში საქართველო პირდაპირ ჯდებოდა. ამიტომ იყო რომ ამერიკა საქართველოსა და უკრაინასთან ურთიერთობას უფრო ააქტიურებდა და ამ კონტექსტში ამერკელების დაინტერესებაც იკვეთებოდა. ტრამპმა ეს ცენტრი ფაქტობრივად აღმოსავლეთის მიმართულებით გადაიტანა”, – ამბობს ვახტანგ მაისაია. მისი თქმით, იმ ფონზე, როცა ევროკავშირისა და ნატოს პოზიციები არც თუ ისე ძლიერია და ტრამპმა უკვე ნატოს არსებობაც ერთგვარად ეჭქვეშ დააყენა, ამან შესაძლოა სხვა გავლენიანი გეოპოლიტიკური ცენტრების გაძლიერება გამოიწვიოს, მათ შორის გლობალური.

“საუბარია რუსეთზე, რეგიონალურ თურქეთსა და ირანზე, რომელთაც შესაძლოა თავიანთი პოზიციები გააძლიერონ. ეს უკვე ჩანს კიდევაც ახლო აღმოსავლეთით, კავკასიასა და ცენტრალური აზიის მიმართულებით”, – აღნიშნავს “რეზონანსთან” საუბრისას სამხედრო ანალიტიკოსი და იქვე უმატებს, რომ რუსეთის საქართველოსადმი ძალის გაძლიერება უკვე თვალნათლივ ჩანს. მისი თქმით, ამ ფონზე მნიშვნელოვანია საქართველომ აშშ-თან აქტიურობა უფრო გააძლიეროს. გარდა ამისა, ანალიტიკოს მიიჩნევს, რომ ნატოს სამიტზე საქართველოს მხრიდან უარის თქმა დაუშვებელია.

“თუ ჩვენ ამ პროცესების მიღმა დავრჩით, გაფართოების ფორმატში საქართველოს შანსები გაურკვეველი ვადით გადაიწევს. შესაბამისად, ჩვენი მხრიდან ახლა პასიურობა ყოვლად დაუშვებელია”, – ფიქრობს ვახტანგ მაიასაია.

„რეზონანსი“, 02 თებერვალი, 2017 წელი

ინტერვიუ ვახტანგ მაისაიასთან: „თუ ნატოს პროცესების მიღმა დავრჩით, საქართველოს შანსები გაურკვეველი ვადით გადაიწევს“

სალომე სარიშვილი

“იმ ფონზე, როცა ევროკავშირისა და ნატოს პოზიციები არც თუ ისე ძლიერია და ტრამპმა უკვე ნატოს არსებობაც ერთგვარად ეჭვქვეშ დააყენა, ამან შესაძლოა სხვა გავლენიანი გეოპოლიტიკური ცენტრების გაძლიერება გამოიწვიოს, მათ შორის გლობალური.

“საუბარია რუსეთზე, რეგიონალურ თურქეთსა და ირანზე, რომელთაც შესაძლოა თავიანთი პოზიციები გააძლიერონ. ეს უკვე ჩანს კიდევაც ახლო აღმოსავლეთით, კავკასიაში და ცენტრალური აზიის მიმართულებით”, – ამბობს “რეზონანსთან” საუბრისას შავი ზღვის საერთაშორისო უნივერსიტეტის გეოპოლიტიკური კვლევების ცენტრის მოადგილე და სამხედრო ანალიტიკოსი ვახტანგ მაისაია. იგი ფიქრობს, რომ ამერიკელების მოდუნებამ გამოიწვია ის, რომ დონბასის მიმართულებით სამხედრო მოქმედებები არ წყდება.

ვახტანგ მაისაია: აშშ-ის პოლიტიკის პარალელურად რუსეთსა და თურქეთს შორის სამხედრო ურთიერთობა კიდევ უფრო განმტკცდა. მოგეხსნებათ, რომ მათ სამხედრო ოპერაციები სირიაში ერთობლივად ჩაატარეს და შესაბამისად, დარტყმები ისლამური სახალიფოს, დაიშის მიმართულებით გააძლიერეს.

პოსტცივი ომის შემდგომ პირველად, ნატოს წევრმა სახელმწიფომ და რუსეთმა თავიანთი გეგმების ჰარმონიაზაცია მოახდინეს, რომელსაც შემდგომ ასტანაში შეხვედრები მოჰყვა, რომელსაც ისევ ეს ორი სახელმწიფო აფინანსებდა.

რუსეთის საქართველოსადმი ძალის გაძლიერება სამწუხაროდ უკვე თვალნათლივ ჩანს, თუმცა ამ შემთხვევაში თურქეთიც ირიბად მაინც საქართველოს წინააღმდეგ მოდის.

- თქვენ ამბობთ, რომ რუსეთთან ერთად საქართველოს წინააღმდეგ ირიბად თურქეთიც ილაშქრებს. კერძოდ რაში გამოიხატება ამ ორი ქვეყნის წინააღმდეგობა ამ ეტაპზე და რა შედეგის მომტანი შეიძლება იყოს ჩვენი ქვეყნის უსაფრთხოებისთვის?

- კერძოდ იმაში, რომ რუსეთმა ჩრდილოეთ კავკასიაში თავისი სამხედრო კონტიგენტი უკვე გააძლიერა. ოკუპირებულ აფხაზეთში კი საზღვრები ჩაკეტა და კიდევ რომელი ერთი. ამასთან, ყურადღება თურქეთის გაძლიერებზეც მინდა გავამახვილო. მაგალითად, თურქულ პრესაში და განსაკუთრებით რეჯეფ ერდოღანის მომხრე მედიაში გაჟღერდა ინფორმაცია, რომ თურქეთი თავის ინტერესებსა და კავშირებს საქართველოს მიმართულებითაც გააძლიერებს. საინტერესოა ჩაღლარის სკოლების სისტემის შესახებ არსებული ინფორმაცია, რომელზეც მსურს ყურადღების გამახვილება.

სხვათა შორის, ეს სკოლები სახელმწიფოთა შორის შეთანხმებების საფუძველზე შეიქმნა, სადაც მთავარი სასწავლო პროგრამა ეროვნულ ინტერესებს სავსებით შეესაბამება. სკოლებში 500 საქართველოს მოქალაქეა დასაქმებული და 3 ათასი ქართველი მოსწავლე სწავლობს, სადაც სხვა ენებთან შედარებით ქართულს მეტი უპირატესობა ენიჭება.

ახლა კი ერდოღანის მომხრე ჯგუფები ამ სკოლების ერთგვარად ხელში ჩაგდებას ცდილობს. ასეთი ტენდენციები კი გახლავთ სწორედ იმის მცდელობა, რომ საქართველო ტერიტორიაზე თურქეთის შიდა პოლიტიკური დაპისისპირება მოხდეს, ეს ძალიან საშიშია.

ჩვენ არ უნდა დავუშვათ, რომ ნებისმიერი შიდა დაპირისპირების არეალი საქართველო გახდეს, სულ ერთია, ეს თურქეთი იქნება, სომხეთი და აზერბაიჯანი. ეს დაპირისპირება შიდა პოლიტიკური პროცესია და მისთვის გეოპოლიტიკური ტენდენციების მიცემა დაუშვებელია. ეს არის მაგალითი, რომელიც ტენდენციების გამოკვეთას ასახავს.

- ზემოთ აშშ-ის პრეზიდენტი დონალდ ტრამპი ახსენეთ, რომლის პოზიციაც ნატოსთან მიმართებაში როგორც თავადაც თქვით, უკვე ნათელია, თუმცა მან ისიც თქვა, რომ პარტნიორ ქვეყნებთან კავშირს არ გაწყვეტს… რა გვეტყვით, რა შედეგი შეიძლება მოჰყვეს კავკასიაში გეოპოლიტიკურ ცვლილებებს?

- თუ გახსოვთ, დონალდ ტრამპმა ინაუგურაცისას ახსენა სიტყვა შერჩევითობა და ეს ტერმინი ისრაელთან მიმართებაში უკვე გამოიყენა. თუ რომელი ქვეყანა მოხვდება ამ სელექციურ ნაწილში და იქნება თუ არა ის საქართველო, ეს აბსოლუტურად ჩვენს აქტიურობაზე, კარგი გაგებით აშშ-ში საქართველოს ლობირებაზეა დამოკიდებული.

ქვეყანა კი მხოლოდ ელჩ ბაქრაძის იმედზე არ უნდა იყოს, ვისურვებდი, რომ ტრამპის ადმინისტრაციაში პოლიტიკური დონის, კვალიფიციური დიპლომატი იყოს მივლენილი.

- ნატოს გენერალური მდივნის, იენს სტოლტენბერგის განცხადებაზე რას გვეტყვით, რომელიც ნატო შავი ზღვის რეგიონში სამხედრო ყოფნის გაძლიერების ზომების პაკეტის შემუშავებას დაასრულებას შეეხება?

- ეს გახლავთ ვარშავის სამიტის ინციატივის გაგრძელება, რომელიც სხვათა შორის თუქეთის მცდელობის შედეგად ჩავარდა. როგორც ჩანს, ახლა ახალი ვარიანტი შემუშავდა, რომელიც ნატოს ბრიუსელის სამიტზე განიხილება. ძალიან მიკვირს რატომ არ უნდა იყოს საქართველო ამ სამიტზე წარმოდგენილი.

- პრეზიდენტი ხომ იქნება…

- ძალიან დიდი ბოდიში, მაგრამ პრეზიდენტის წასვლა იქ მხოლოდ სიმბოლური ვიზიტი იქნება და მას არანაირი მნიშვნელობა არ აკისრია. ჩვენ ახლა უნდა დავაფიქსიროთ პოზიცია უსაფრთხოების განმტიცების კუთხით, რათა ამ პროცესის მიღმა არ დავრჩეთ.

- როგორ ფიქრობთ, არსებული რეალობის გათვალისწინებით, რამდენად არსებობს საფრთხე იმისა, რომ ნატოს ღია კარის პოლიტიკა კიდევ უფრო ჩაიკეტოს?

- გეთანხმებით, რომ ამის ერთგვარი რისკი ნამდვილად არსებობს, მითუმეტეს ტრამპის ადმინისტრაციის პოლიტიკის ფონზე, როცა მან შესაძლოა პოზიციებს გადახედოს, მითუფრო ახლა – გაფართოების ფორმატში. მნიშვნელოვანია საფრანგეთის საპრეზიდენტო არჩევნებიც, რომელიც ამერიკის შემდეგ ნატოს კოტექსტში ყველაზე ძლიერი ევროპული პოზიების მქონე სახლმწიფოა. ამავე დროს ნატოს კარის გაფართოებაზე გერმანიის არჩევნებიც იმოქმდებეს, ანუ სანამ არ გამოჩნდება რომელი პოლიტიკური ძალა გაიმაჯვებს, იქამდე ეს საკითხი ღიად დარჩება. თუმცა, ეს იმას არ ნიშნავს, რომ ჩვენ ჩვენი პოზიციები არ გავაძლიეროთ. თუ ჩვენ ამ პროცესების მიღმა დავრჩით, გაფართოების ფორმატში საქართველოს შანსები გაურკვეველი ვადით გადაიწევს. შესაბამისად, ჩვენი მხრიდან ახლა პასიურობა ყოვლად დაუშვებელია.

„რეზონანსი“, 02 თებერვალი, 2017 წელი

ინტერვიუ ხათუნა ლაგაზიძესთან: „უნდა ვიცოდეთ, ნატოს, ტრანსფორმირების შემთხვევაში ჩვენ რა გველოდება“ // „მსოფლიო რევოლუციური მოვლენების მოლოდინშია“

ელზა პაპოშვილი

პოლიტოლოგი ხათუნა ლაგაზიძე ამბობს, რომ ნატოს სამიტზე დასწრება აუცილებელია, რადგანაც მსოფლიო დიდი რეფორმების მოლოდინშია და საქართველო ამ მოვლენების ეპიცენტრში უშუალოდ უნდა იმყოფებოდეს. პოლიტოლოგის აზრით, ქართული მხარის დასწრება კიდევ იმიტომ არის მნიშვნელოვანი, რომ სამიტს ამერიკის ახალი პრეზიდენტი დონალდ ტრამპიც დაესწრება და ნატოსთან მიმართებაში მისი ხედვები ცნობილი გახდება. საქართველოს სამიტის ოფიციალური შეხვედრებისთვის გამოყენებაც შეუძლია.

- საკონსტიტუციო კომისიამ მუშაობა დაიწყო და უკვე გაკეთდა განცხადებები, რომ დიდი ალბათობით, საარჩევნო სისტემა პროპორციულზე გადავა და ასევე ორპალატიანი პარლამენტის შემოღების საკითხებიც განიხილება. თქვენ როგორ შეაფასებდით საკონსტიტუციო კომისიის მუშაობის სტარტს?

- ჯერ ძალიან ადრეა იმაზე საუბარი, საბოლოო ჯამში საკონსტიტუციო ცვლილებები რა სახეს მიიღებს. ფუნდამენტლურია, რომ კონსტიტუციით ადამიანის უფლებების და თავისუფლებების შეზღუდვა არ მოხდეს. ასევე, აუცილებელია, რომ რეალური საარჩევნო რეფორმა გატარდეს.

ურთიერთგამომრიცხავი ინფორმაციები გამოდის და ამიტომ, ჩემთვის რთულია, რომ ზუსტად შევაფასო საკონსტიტუციო კომისია რა სახის ცვლილებებზე მუშაობს. რამდენად შეესაბამება ეს სწორ ინფორმაციას, ზუსტად არ ვიცი, თუმცა საუბარია იმაზე, რომ პარტიათა მიერ ბლოკების შექმნის აკრძალვა შესაძლოა კონსტიტუციაში ჩაიდოს. ეს ფაქტობრივად იმას ნიშნავს, რომ ხელისუფლების საარჩევნო წესით შეცვლაზე უარს ვამბობთ. გამომდინარე იქიდან, რომ ქართული ოპოზიციური სპექტრი სრულიად გადარეცხილია, სიტუაცია ამ ინფორმაციის რეალობის შემთხვევაში საკამოდ მძიმე იქნება.

ამიტომ დღევანდელი ოპოზიციის ბლოკად გაერთიანება საკრებულოში თუ პარლამენტში, მათი წარმოდგენის ერთადერთი ფორმაა. მეეჭვება მსგავსი აბსურდის განხილვა მოხდეს, მაგრამ თუ ასე იქნება, მაშინ, როგორც უკვე აღვნიშნე, გამოდის, რომ ხელისუფლება საარჩევნო გზით ცვლილებაზე უარს ამბობს.

- ევროსასამართლომ საქართველოს მიერ წარდგენილი კანდიდატები უკვე მეორედ დაიწუნა. თქვენ როგორ ფიქრობთ, დაწუნებული კანდიდატურების წარდგენაში ბრალი ვის მიუძღვის?

- არ ვიცი, კანდიდატების დაწუნებაში ბარლი ვის შეიძლება დავდოთ. თუმცა, ფაქტია რომ ევროსასამართლომ ქართველების მიერ წარდგენილ კანდიდატურებზე უარი განაცხადა. ამაზე პასუხისმგებელი კოლექტიურად საქართველოს ხელისუფლებაა. საინტერესო იქნება, ახალი კანდიდატების შერჩევისას როგორ იხელმძღვანელებს. “ქართულ ოცნებას” ერთი დადებითი თვისება ჰქონდა, საზოგადოების კრიტიკაზე რეაგირებდა, მითუმეტეს დასავლელი პარტნიორების განწყობებს ყურადღებას აქცევდა. ევროსასამართლოს მიერ ჩვენი კანდიდატების დაწუნება, სერიოზული კრიტიკაა, ამიტომ დიდი მნიშვნელობა ექნება, ახლა ამაზე ხელისუფლება რა სახის რეგირებას მოახდენს.

- როგორც უკვე ცნობილი გახდა, უახლოესი ნატოს სამიტის მუშაობაში ქართული მხარე მონაწილეობას არ მიიღებს. თქვენი აზრით, რამდენად მართებულია ნატოს სამიტის მუშაობაში ქართული მხრიდან მონაწილეობის არმიღება?

- ჩემი აზრით, ქართული დელეგაცია ამ სამიტს აუცილებლად უნდა დაესწროს. მითუფრო რომ ამერიკის პრეზიდენტმა დონალდ ტრამპმა ნატოს რეორგანიზების საკითხი დღის წესრიგში დააყენა. ჩვენ უნდა ვიცოდეთ, სამიტზე რა პროცესები განვითარდება, რადგანაც პირველი სამიტია, რომელსაც ამერიკის ახალი პრეზიდენტი დაესწრება და იქ გარკვეული სახის აქცენტების გაკეთება მოხდება. რა თქმა უნდა, ეს დასწრება იმ მისაღები ფორმატით უნდა მოხდეს, რომლითაც საქართველოს დასწრება შეუძლია. იქ იქნება თუ არა ისტორიული გადაწყვეტილებები მიღებული, ამას დიდი მნიშვნელობა არ აქვს, ჩვენ მაინც პროცესის უშუალო მონაწილეები უნდა ვიყოთ.

აცილებლად უნდა ვიცოდეთ ნატოს ტრანსფორმირების შემთხვევაში მსოფლიოს და მათ შორის ჩვენც რა გველოდება. ამ რევოლუციური მოვლენების ფონზე, ჩვენ მსოფლიოს ყურადღების ცენტრში დარჩენა უნდა შევძლოთ.

- როგორ ფიქრობთ, დონალდ ტრამპის ინტერესი საქართველოს მიმართ როგორი იქნება და ამერიკა ჩვენი ქვეყნის მიმართულებით პოლიტიკურ აქტიურობას ხომ არ შეასუსტებს?

- დასავლეთმა რომ ყოფილ პოსაბჭოთა ქვეყნების მიმართ ყურადღება არ შეანელოს და კვლავ აქტიური პოლიტიკა აწარმოოს, ორმხრივი ურთიერთობების გააქტიურება უნდა მოხდეს. მსოფლიო ახლა რევოლუციური მოვლენების მოლოდინშია, ამიტომ ხელისუფლებამ ამ ფონზე თავისი მოკავშირე ქვეყნები უნდა მოძებნოს და ამ კუთხით აქტიურად იმუშაოს. მსოფლიო გეოპოლიტიკურ ქაოსში აუცილებლად ღუზა გვჭირდება, რომელსაც ჩავეჭიდებით. ეს შეიძლება ბრიტანეთის პრემიერი ტერეზა მეიც იყოს, რომელიც სწორედ იმ მესიჯებს გზავნის, რომელიც ჩვენი ქვეყნისთვის სასიცოცხლოდ მნიშვნელოვანია.

„რეზონანსი“, 02 თებერვალი, 2017 წელი

ინტერვიუ კორნელი კაკაჩიასთან: „რუსეთი თვლის, რომ საქართველოსსაგარეო ვექტორების შეცვლის შანსი ჯერ კიდევ არსებობს“ // „საქართველო არ უნდა ეხვეწოს რუსეთს სავიზო რეჟიმის გაუქმებას“

ნინო ქეთელაური

“ვიზალიბერალიციის შემდეგ რუსეთი იძულებული იქნება ევროკავშირთან შეჯიბრობითობის პრინციპში ჩაერთოს. ის თვლის, რომ საქართველოს საგარეო ვექტორების შეცვლის შანსი ჯერ კიდევ არსებობს”, – ასე აფასებს პოლიტოლოგი კორნელი კაკაჩია, საქართველოსთან მიმართებით რუსეთის მოსალოდნელ ნაბიჯებს. მისი შეფასებით, შესაძლოა რუსეთმა სავიზო რეჟიმის გამარტივებაც მოისურვოს, რადგან საქართველსთან ე.წ ხელის გადაგრეხის პოლიტიკით მას არაფერი გამოუვიდა.

კორნელი კაკაჩია: რა თქმა უნდა, ამის შესაძლებლობა არსებობს. იქიდან გამომდინარე, რომ რუსეთს, მოლდოვისგან განსხვავებით, საქართველსთან ბევრი შესაძლებლობა არ აქვს. მისმა ემბარგომ და 2008 წლის შემდეგ გატარებულმა პოლიტიკამ, რეალურად არ გამოიღო ის შედეგი, რასაც რუსეთის ხელისუფლება ელოდა. ე.წ ხელის გადაგრეხამ არ გაამართლა და ახლა ის იძულებულია, დაყვავების პოლიტიკით, უფრო ეკომიკის, თუ სავიზო რეჟიმების გამარტივებით მოიგოს ჩვენი საზოგადოების გული.

მითუმეტეს, ვიზალიბერალიციის შემდეგ ის იძულებული იქნება ევროკავშირთან შეჯიბრობითობის პრინციპში ჩაერთოს. რუსეთი თვლის, რომ საქართველოს საგარეო ვექტორების შეცვლის შანსი ჯერ კვლავ არსებობს.

- როგორ ფიქრობთ, საქართველოს ხელისუფლება მოლაპარაკებებისთვის მზად არის?

- აქ ძალიან წინააღმდეგობრივი ინფორმაციები ვრცელდება და ბოლომდე გაურკვეველია რა ხდება. იმიტომ, რომ თუ რუსული მხარის ინფორმაციას დავეყრდნობით და ამასთანავე, საქართველოს სპეციალური წარმომადგენლის განცხადებებს, ისინი ან ცუდად გებულობენ, ან კომუნიკაციასთან არის პრობლემები. რუსული მედიის ცნობით, თითქოს საქართველო დიპლომატიური ურთიერთობების აღდგენაზე თანახმაა და ამისთვის აბაშიძის კომენტარიც მოიშველიეს. ეს არის ის, რაც რეალურად რუსეთს უნდა, რომ საქართველო რაღაცნაირად შეიტყუოს ამ სცენარში და ურთიერთობების აღდგენისკენ ჩვენმა ქვეყანამ გადადგას პირველი ნაბიჯი. თან ისე, რომ აფხაზეთის და სამხრეთ ოსეთის აღიარება რუსეთს შერჩეს. ეს წარმოუდგენელია, რადგან არა თუ აბაშიძის მანდატში არ შედის, არამედ საქართველოს ხელისუფლებასაც გაუჭირდება ასეთი რამის გაკეთება, რადგან ამან ქვეყნის შიგნით შეიძლება ძალინ სერიოზული დესტაბილიზაცია გამოიწვიოს, მათ შორის, რეჟიმის შეცვლაც კი.

ბუნებრივია, ეს კარგად ესმის ხელისუფლებასც და იმ საექსპერტო წრეებსაც, ვინც ამაში ჩართულნი არიან. მე იმედი მაქვს, რომ რუსული პრესის და ხელისუფლების თვითშემოქმედებასთან გვაქვს საქმე და ეს არ არის ოფიციალურად ქართული მხარის პოზიცია. განსაკუთრებით იმის იმედი მაქვს, რომ ეს არ არის აბაშიძე-კარასინის ფორმატში კულუარი მოლაპარაკებების საგანი.

- როგორ ფიქრობთ, აბაშიძე-კარასინის ფორმატი შესაცვლელია? ქვეყნების პირველი პირების შეხვედრა უფრო შედეგიანი ხომ არ იქნება?

- ამ ეტაპზე, მე ამის აუცილებლობას ვერ ვხედავ. შეხვედრა შეხვედრისთვის არაფრის მომცემი არ არის. იმისთვის, რომ შეხვედრა შედგეს, წინამოსამზადებელი სამუშაოები ჩატარებული უნდა იყოს. ეს ნიშნავს, რომ მაგალითად, რუსეთის მხარე მზად უნდა იყოს, რომ მინიმუმ თავისი ე.წ წარმომადგენლები სამხრეთ ოსეთიდან გაიწვიოს და ამის შემდეგ უკვე შეიძლება საქართველოს მხრიდან რაღაც კონსტრუქციული ნაბიჯების გადადგმა. მაგრამ, როგორც რუსეთის წარმომადგენლების განცხადებებიდან ჩანს, ასეთი რამ, არ იგეგმება. ბუნებრივია, ამ პირობებში, საქართველოს მხრიდან ხვეწნა იმაზე, რომ სავიზო რეჟიმი რუსეთმა გააუქმოს, არამომგებიანია და ეს არამგონია, ქართულ მხარეს სჭირდებოდეს. ეს ჩვენთვის სასიცოცხლო მნიშვნელობის არ არის.

- რამდენად მნიშვნელოვანია საქართველო-რუსეთს შორის მოლაპარაკებების დაწყება?

- ჩემი სუბიექტური მოსაზრებაა, რომ თუ ჩვენს გეოპოლიტიკურ კონტექსტს გავითვალისწინებთ, ამისთვის წინაპირობები არ არსებობს. ამ ეტაპზე, მოლაპარაკების წარმოება, იმ შემთხვევაშიც კი, თუ ორივე მხარიდან იქნებოდა მზაობა, დღევანდელი გეოპოლიტიკური კონტექსტი არ უწყობს ამას ხელს და ასეთი ნაბიჯის გადადგმამ შეიძლება საქართველოს საგარეო პოლიტიკისთვის და უსაფრთხოებისთვის გარკვეული რისკები შექმნას.

„რეზონანსი“, 02 თებერვალი, 2017 წელი

„რუსეთმა სავიზო რეჟიმი უნდა გააუქმოს“ – შეჯიბრებითობა და სტიმული მოსკოვისთვის

ნინო ქეთელაური

საქართველოს ვიზალიბერალიზაცია, წესით, რუსეთისთვის სტიმული უნდა იყოს, რომ ჩვენთან მანაც უვიზო მიმოსვლა დააწესოს – ასეთია ქართველი ექპერტების მოსაზრება ვიზალიბერალიზაციის დაწესების შემდეგ ამ ორი ქვეყნის ურთიერთობაზე. მათი აზრით, რუსეთის მიერ აქამდე წარმოებულმა პოლიტიკამ, მისთვის სასურველი შედეგი არ გამოიღო და ახლა შეეცდება ე.წ დაყვავების პოლიტიკა აწარმოოს, ასევე “ევროკავშირთან შეჯიბრობითის პრინციპში ჩაერთოს”.

პოლიტოლოგი კორნელი კაკაჩია “რეზონანსთან” საუბრისას აღნიშნავს, რომ რუსეთი ქართული საზოგადოების გულის მოგებას შესაძლოა უვიზო რეჟიმის დაწესებით შეეცადოს.

“იმ პოლიტიკამ, რომელსაც რუსეთი 2008 წლის შემდეგ აწარმოებს, რეალურად არ გამოიღო ის შედეგი, რასაც ელოდა. ე.წ.-მა ხელის გადაგრეხამ არ გაამართლა და ახლა ის იძულებულია, დაყვავების პოლიტიკით, უფრო ეკონომიკის, თუ სავიზო რეჟიმების გამარტივებით და მსგავსი გზებით, მოიგოს ჩვენი საზოგადოების გული. მით უმეტეს, ვიზალიბერალიციის შემდეგ ის იძულებული იქნება, ევროკავშირთან შეჯიბრობითობის პრინციპში ჩაერთოს. რუსეთი თვლის, რომ საქართველოს საგარეო ვექტორების შეცვლის შანსი ჯერ კიდევ არსებობს”, – ამბობს კორნელი კაკაჩია.

პოლიტოლოგი სოსო ცინცაძე მიიჩნევს, რომ წესით, საქართველოსთან უვიზო მიმოსვლის სურვილი რუსეთმაც უნდა გამოთქვას, რადგან ეს მის ინტერესებშიც შედის.

“საქართველოს ვიზალიბერალიზაცია, წესით, რუსეთისთვის სტიმული უნდა იყოს, რომ ჩვენთან მანაც უვიზო მიმოსვლა დააწესოს. ლოგიკური განვითარებით, ეს მოსალოდნელია. თუმცა, რუსეთის ხელმძღვანელობას ხშირად ავისი ლოგიკა აქვს, ამიტომ დაზუსტებით აქ არაფრის თქმა არ შეიძლება. ისე კი, ყველა მონაცემებით, რუსეთმა სავიზო რეჟიმი უნდა გააუქმოს, რომ მეტი ურთიერთობა და კავშირები იყოს, რაც მოსკოვის ინტერესბეშიც არის”, – ამბობს სოსო სინცაძე, თუმცა აღნიშნავს, რომ რას ფიქრობს რუსეთი და კონკრეტულად რა გეგმები აქვს, ამის დაზუსტებით თქმა შეუძლებელია.

სოსო ცინცაძის შეფასებით, საქართველოსა და რუსეთს შორის ურთიერთობა იმ დონეზე მომწიფებულია, რომ მაღალი რანგის პირებს შორის შეხვედრა შედგეს.

“მე ვფიქრობ, ამ ორ ქვეყანას შორის ურთიერთობა იმ დონეზე მომწიფებული არის, რომ მაღალი რანგის პირებს შორის შეხვედრა შედგეს. თუმცა, ქვეყნის შიდა მოვლენათა განვითარება, პოლიტიკური პროცესები, ოპოზიციის როლი, ამ მხრივ ცოტა მუხრუჭია. პოზიცია, რომ არავითარი კონტაქტები და მოლაპარაკებები რუსეთთან, რადგან ისინი მაინც მოგვატყუებენ, ეს დიპლომატია არ არის, ეს იდეოლოგიაა და სადაც დიპლომატიის იდეოლოგიით ჩანაცვლება ხდება, იქ უკვე “აჭრილი” სიტუაცია გამოდის”, – აცხადებს სოსო ცინცაძე და აღნიშნავს, რომ ამ ვითარებაში, საქართველოს ხელისუფლება მოლაპარაკებებზე წამსვლელი ნაკლებად არის. მე ვეჭვობ, რომ ჩვენმა ხელისუფლებამ ახლა გაბედოს და ამ ორი ქვეყნის ურთიერთობაში გარღვევა მოახდინოს. არამგონია, რომ რუსეთთან უმაღლეს დონეზე დაიწყოს მოლაპარაკებები. ვფიქრობ, კარასინ-აბაშიძის “ფლირტი” კიდევ კარგა ხანს გაგრძელდება”, – ამბობს სოსო ცინცაძე.

რაც შეეხება მოლაპარაკებების შედეგს, როგორც პოლიტოლოგი აღნიშნავს, ეს ყოველთვის დიპლომატიურ ხელოვნებასა და მომზადების დონეზეა დამოკიდებული.

“შედეგი ყოველთვის დიპლომატურ ხელოვნებაზეა დამოკიდებული. ამიტომ, წინასწარ იმის თქმა, რომ შეხვედრას აზრი არ აქვს, რადგან აქ მაინც არაფერი გამოვა, არასწორია. დიპლომატიის ისტორიაში მრავალი შეხვედრა ყოფილა, როდესაც არავინ ელოდა და შედეგი იყო. გააჩნია, შეხვედრაზე შენ რა განწყობით მიდიხარ, რამდენად ძლიერი პოზიციები გაქვს და არჩევანის საშუალება გაქვს, თუ არა. შენ თუ შეხვედრაზე მხოლოდ ერთი ვარიანტით მიდიხარ და ალტერნატივა თვითონაც არ გაგაჩნია, რა თქმა უნდა, ეს შეხვედრა უკვე წინასწარ განწირულია.

სიმართლე გითხრათ, ჩვენი მხრიდან ამ დონის მომლაპარაკებლებს ვერ ვხედავ. მომზადება სჭირდება ყველაფერს. დღეს რომ გადაწყდეს შეხვედრა, ხვალ ადგნენ და წავიდნენ, ეს არ გამოვა. შეხვედრებისთვის თვეობით მომზადებაა საჭირო და ამ მოსამზადებელ სამუშაოებს მე ვერ ვხედავ. ამიტომ, ახლა შეხვედრა, ეს აბსულუტურად მოუმზადებელი და არაფრის მომცემი იქნება”, – აცხადებს სოსო ცინცაძე. როგორც ის აღნიშნავს, აქ მთავარია პოლიტიკური ნება, რომელიც დღეს საქართველოს მხრიდან არ არის.

“დღეს ქართული დიპლომატია შიდაპოლიტიკური პროცესების მძევალია, მათ შორის პრემიერიც და ხელისუფლებაც”, – ამბობს სოსო ცინცაძე. მისი აზრით, საქართველოს და რუსეთის მაღალი რანგის წევრებს შორის შეხვედრა აუცილებელია და ამისთვის შესაბამისი დონის მომზადება უნდა დაიწყოს.

“მიმაჩნია, რომ აუცილებლად დაიწყოს ძალიან სერიოზული მომზადება. ეს უნდა იყოს კონფიდენციალური, საიდუმლო ვითარებაში და არა თოქ-შოუებში განსახილველი. მერე ვნახოთ, რა იქნება. დიპლომატია მათემატიკა არ არის, რომ ორჯერ ორი ყოველთვის ოთხი იყოს”, – ამბობს სოსო ცინცაძე.

————————-

„ახალი თაობა“, 02 თებერვალი, 2017 წელი

ინტერვიუ რომან გოცირიძესთან: „გაზპრომ“-თან ხელშეკრულება საქართველოსთვის საზიანოა“

„გაზპრომ“-თან დადებული ხელშეკრულება აქტუალობას არ კარგავს. „ნაციონალური მოძრაობა“ საპროტესტო აქციებს მართავს და ხელშეკრულების გასაჯაროებას ითხოვს, თუნდაც იმ ნაწილის, სადაც მითითებულია, რა რაოდენობის თანხას უხდის გაზპრომი საქართველოს. „ახალი თაობის“ კითხვებს ნაცმოძრაობის წევრი, პარლამენტის დეპუტატი რომან გოცირიძე პასუხობს.

- ბატონო რომან, ხელისუფლება აცხადებს, რომ თემა პოლიტიზირებულია. ცალ მხარეს არ აქვს უფლება, ხელშეკრულება გაასაჯაროოს. ოპოზიცია კი ხელშეკრულების გასაჯაროებას აქტიურად ითხოვს. როგორია თქვენი პოზიცია, წამგებიანი ხელშეკრულება დაიდო „გაზპრომ“-თან?

- ხელშეკრულება არის არათუ წამგებიანი, არამედ სერიოზულად საზიანო ქვეყნის ინტერესებისთვის.

- რა თვალსაზრისითაა საზიანო?

- როგორც პოლიტიკური, ისე ეკონომიკური. პოლიტიკური კონტექსტი მარტივია და ამაზე აღარ შევჩერდები. რაც შეეხება ეკონომიკურს, ფაქტობრივად, ამ ხელშეკრულების შემდეგ, საქართველოს არ რჩება არავითარი უფლება, რომ მან შეისყიდოს გაზი. თუ წელიწადში ჩვენ გვრჩებოდა სულ მცირე, 40 მილიონის ღირებულების გაზი, ახლა, ამ ხელშეკრულების თანახმად, ჩვენ გვიხდიან მხოლოდ ტრანზიტის საფასურს, რომლითაც დაიფარება მხოლოდ გაზის ტრანსპორტირების კომპანიის ხარჯები და შეიძლება მცირეოდენი თანხა გადარჩეს.

- ჩვენ არ ვიცით, რა თანხაზეა საუბარი. იქნებ არც ისე მცირეა, როგორც ოპოზიციას ჰგონია?

- თუ გავითვალისწინებთ იმასაც, რომ გაზის ტრანსპორტირების კომპანია მართავს მთელ ქსელს ქვეყნისას, დაახლოებით 1.500 კილომეტრის სიგრძისას და არის ძალიან არაეფექტური კომპანია, აქვს უამრავი ხარჯები, გაბერილი შტატები და ასე შემდეგ, რუსული მხარის მიერ ანაზღაურებული თანხები, ფაქტობრივად, მოხმარდება სომხეთამდე გაზის ტრანზიტს. საუბარი იმის თაობაზე, რომ თუ საქართველოს დასჭირდა გაზი და მას იყიდის, კი ბატონო, შესაძლოა, რუსეთმა მოგვყიდოს 185 დოლარად, მაგრამ ამისთვის სულ სხვა ფული უნდა გამოინახოს, მაშინ, როდესაც ჩვენ გვრჩებოდა უზარმაზარი შემოსავალი.

- კახა კალაძე აცხადებს, რომ სხვა გზა არ ჰქონდა ქართულ მხარეს, ან უნდა დათანხმებოდა პირობებს, ან დარჩენილიყო საერთოდ ხელცარიელი. ამაზე რას იტყვით?

- კონტრაქტს რაც შეეხება, ჩვენ ვკარნახობდით ყველა პირობას, ჩვენზე იყო დამოკიდებული ამ კონტრაქტის შინაარსი. დემაგოგიურად აცხადებს ენერგეტიკის სამინისტრო, რომ თითქოს სხვა გამოსავალი არ იყო და თუ არ დავთანხმდებოდით, სომხეთს გაზს მიაწვდიდნენ ირანიდან.

- არ იზიარებთ ამ ვერსიას?

- არა, ეს აბსოლუტური დემაგოგიაა. რუსეთი ტრანზიტიდან ჩვენ გვიტოვებს 200 მილიონ კუბურ მეტრ გაზს. 200 მილიონი კუბური მეტრი არის გაზპრომის დანაკარგები, რომელიც სისტემაში ორთქლდება. 200 მილიონი კუბური მეტრი გაზისთვის რუსეთი ორჯერ უფრო ძვირადღირებულ გაზს არ იყიდდა ირანიდან. ის სომხეთს აწვდის საკუთარ გაზს, ამ შემთხვევაში ის ყიდის გაზს, სომხეთისთვის იაფად, მაგრამ სომხეთში ყველა ენერგეტიკული ობიექტი არის რუსეთის საკუთრება. ეს არის რუსეთის ბიზნესი სომხეთის ტერიტორიაზე.

ირანიდან რომ კომერციული გაზი შემოიტანოს, მაშინ გაკოტრდება სომხეთის გაზის სისტემა, რომელიც რუსეთს ეკუთვნის. ამიტომ საუბარი იმაზე, რომ რუსეთი თვალს დახუჭავს ეკონომიკურ ზარალზე, მოსახლეობის მოტყუებაა. რუსეთს სხვა გამოსავალი არ აქვს. რუსეთს სჭირდებოდა ჩვენი ტერიტორია. დღეს კი რა გამოდის? ჩვენ ვმუშაობთ რუსეთისთვის და სომხეთისთვის, რომ როგორმე სომხეთამდე გაზი მივიტანოთ.

- მაშინ რა ინტერესი ამოძრავებდა ქართულ მხარეს, რატომ წავიდა წამგებიან ხელშეკრულებაზე?

- უსუსურები და უუნაროები არიან და იმიტომ. დავუშვათ, მათ გააფორმეს ცუდი კონტრაქტი, მაგრამ კონტრაქტი კონფიდენციალური იქნებოდა თუ არ იქნებოდა, ესეც ხომ ჩვენს მხარეზეა დამოკიდებული?! იმასაც ვერ მიაღწიეს, რომ კონტრაქტი არ ყოფილიყო გასაიდუმლოებული! მაგრამ აწყობდა საქართველოს მთავრობას ეს. კონტრაქტი ვერ იქნება გასაიდუმლოებული, თუნდაც იქიდან გამომდინარე, რომ როგორც კი ჩვენ ფულს ჩაგვირიცხავს გაზპრომი, გაზის ტრანსპორტირების კომპანიაში და ეს კომპანია არის კერძო სამართლის სუბიექტი, მას მოუწევს ბალანსების გამოქვეყნება საგადასახადოსთან და ელემენტარულად ყველა გაიგებს, რამდენი გადაგვიხადეს ფული.

- მაშინ რა უშლით ხელს, რატომ არ საუბრობენ ფინანსურ მხარეზე?

- მათი მთავარი მიზანია, როგორმე ახლა გადააგორონ ეს თემა, მაგრამ გპირდებით, ვერაფერსაც ვერ გადააგორებენ! ჩვენ არ ვითხოვთ კონტრაქტის გასაჯაროებას, გვითხრან ის, თუ რა რაოდენობის ფულს გვიხდიან! ეს ხომ არ არის საიდუმლო?!

- რა ბერკეტი აქვს ამ შემთხვევაში რუსულ მხარეს, როდესაც პოლიტიკურ მოტივზე საუბრობთ?

- რუსეთი უკვე 4 წელიწადია, ნელ-ნელა, მცოცავი რეჟიმით მოდის საქართველოში. ჯერ ბაზარი გაგვიხსნა. ახლა, თუ დასჭირდება, გვეტყვის, რომ ბაზარს დაგიკეტავთ და ღვინოს არ შევუშვებთო. ჩვენ ელექტროენერგიას იქით ვყიდდით და დღეს იძულებულები ვართ, რუსეთისგან ვიყიდოთ, რადგან ვერ შეძლო ხელისუფლებამ ამ სისტემის განვითარება. რუსეთს ნებისმიერ დროს შეუძლია გვითხრას, რომ არ გვაძლევს ელექტროენერგიას.  ასევე არის პოლიტიკური ზეწოლის სხვადასხვა ფორმები. მთავრობის ნებართვით ბევრი ისეთი ობიექტი ჩაუვარდა რუსეთს ხელში, რომელიც აკრძალული იყო.

- მაგალითად?

- თუნდაც როსნეფტმა იყიდა ტერმინალი ფოთში. ეს პოლიტიკური მოტივები. არ გამოვრიცხავ ეკონომიკურ მოტივებსაც, რომ ვიღაცები დაინტერესებული არიან ამ კონტრაქტით და რუსეთთან აქვთ საერთო ბიზნესინტერესები. სხვა საკითხია საქართველოს ხელისუფლების არაკომპეტენტურობა. მუდმივი ხელისუფლება არ არსებობს, თვალს თუ გადავავლებთ ისტორიას, ძალიან მძიმედ ვითარდებოდა ხელისუფალთა ბედი. არც ეს ხელისუფლებაა მუდმივი და შეიცვლება და ამ კონტრაქტის საკითხი იქნება სერიოზულად გამოძიებული და იქნება დადგენილი, იყო თუ არა აქ მხოლოდ არაკომპეტენტურობა და უვიცობა, თუ იყო კერძო ინტერესებიც!

„ახალი თაობა“, 02 თებერვალი, 2017 წელი

ინტერვიუ გიორგი კანდელაკთან: „შინაგან საქმეთა და თავდაცვის მინისტრებისგან პასუხს ვითხოვთ“

პარლამენტის ფრაქცია „ევროპული საქართველოს“ წევრი, დეპუტატი გიორგი კანდელაკი „ახალ თაობასთან“ ინტერვიუში აცხადებს, რომ პარლამენტის თავდაცვისა და უშიშროების კომიტეტის საგანგებო სხდომა უნდა იქნას მოწვეული.

- ბატონო გიორგი, თქვენი ფრაქცია თავდაცვისა და შინაგან საქმეთა მინისტრების პარლამენტში მისვლას ითხოვს. რა კითხვები გაქვთ მინისტრებთან?

- ჩვენი მოთხოვნა განაპირობა იმ რამდენიმე ნაბიჯმა, რომლებიც ბოლო პერიოდში ხელისუფლებამ გადადგა. მთავრობამ მოუხშირა ისეთი ნაბიჯების გადადგმას, რაც პირდაპირ ურტყამს ჩვენი ქვეყნის დამოუკიდებლობასა და სუვერენიტეტს.

- კონკრეტულად რომელ ნაბიჯს გულისხმობთ?

- ვგულისხმობ შსს-ს წარმომადგენლის მიერ საკუთარი პირით დადასტურებულს, რომ შინაგან საქმეთა სამინისტროს ჩვენი დამსახურებული ოფიცრის პირადი მონაცემები, რომლებიც საიდუმლო გახლავთ და ეს მონაცემები კანონით არის დაცული, თურმე ოკუპანტი სახელმწიფოსთვის გადაუცია. ამ ოფიცრებს ჩვენი სახელმწიფოს თავისუფლებისთვის ყველაზე ძვირფასი – სიცოცხლე აქვთ განწირული და სისხლი აქვთ დაღვრილი. საქართველოს სისხლის სამართლის კოდექსის თანახმად, მტრული ქვეყნისთვის საიდუმლო ინფორმაციის გადაცემა სისხლის სამართლის დანაშაულია და კანონით ისჯება. ეს ყველაფერი სახელმწიფო ღალატის ნიშნებს შეიცავს. ეს საკმარისი მიზეზია საიმისოდ, რომ მოწვეულ იქნას თავდაცვისა და უშიშროების კომიტეტის საგანგებო სხდომა. თუ ეს სისხლის სამართლის დანაშაული დადასტურდა, მაშინ პასუხი უნდა აგოს ყველა იმ პირმა, ვინც მტრულ სახელმწიფოს გადასცა ეს საიდუმლო ინფორმაცია.

- ამ ინფორმაციას არ ადასტურებს არც შინაგან საქმეთა მინისტრი და არც ერთი სხვა ოფიციალური პირი...

- როგორ არა, გაუმართლებელ რაღაც საბუთებს იგონებენ, ინტერპოლს იშველიებენ. რუსეთის მიერ ინტერპოლში გაგზავნილია ისეთი მოთხოვნა, რომელიც მათ ვერ ექნებოდათ, თუ ქართული მხარე არ გადასცემდა. საქართველოს ხელისუფლებამ ვერ მოახერხა საქართველოს მოქალაქის, ოთხოზორიას მკვლელის ინტერპოლით ძებნაზე დასმა. საერთოდ საუბარი არ არის იმ რუს სამხედრო პირებზე, რომლებმაც 2008 წელს სამხედრო დანაშაული ჩაიდინეს.

- ადამიანის უფლებათა საერთაშორისო სასამართლოში 2008 წლის ომის გამოძიება მიმდინარეობს...

- მეორე მიზეზი, რატომაც ვითხოვთ თავდაცვის მინისტრის მოსვლას პარლამენტში, არის მე-5 ბრიგადის ფაქტობრივად დაშლა. ჩვენისთანა მდგომარეობაში მყოფი სახელმწიფო შეიარაღებულ ძალებს ამცირებს. რატომ? ამ კითხვაზე ვითხოვთ მინისტრისგან პასუხს. ეს, როგორც მინიმუმ, არის მცდარი ნაბიჯი. ესეც საკმარისზე მეტი საფუძველია იმისთვის, რომ პარლამენტში საგანგებო სხდომა იქნას მოწვეული.

- ელოდებით, რომ მოვლენ მინისტრები, თუ ეს არის თქვენი მხრიდან ერთგვარი პოლიტიკა?

- მათი ვალდებულებაა, რომ მოვიდნენ და ამ კითხვებზე გაგვცენ პასუხები, ეს არის ვალდებულება, რომელსაც აღმასრულებელ ხელისუფლებას საქართველოს კონსტიტუცია აკისრებს. ჩვენი, როგორც ხალხის მიერ არჩეული დეპუტატების, ვალდებულებაა, რომ ეს კითხვები დავსვათ და ყველა ფორმატში, ყველა ფრონტზე შევუტიოთ მთავრობას, რომელიც მავნებლურ ნაბიჯებს დგამს. სამწუხაროდ, ამ ნაბიჯების რაოდენობა უკვე თვალშისაცემად ბევრია.

- როდესაც ოპოზიციას ხელისუფლების მიმართ ბრალდება აქვს, რომ ის რუსეთუმეა, ხშირად მთავრობის არგუმენტია, რომ მან ხელი მოაწერა ევროპასთან ასოცირების ხელშეკრულებას, რომ მივიღეთ ვიზალიბერალიზაცია. რას იტყვით ამ არგუმენტებზე?

- ეს არ არის არგუმენტი. უვიზო მიმოსვლა, ჩვენი გეგმის თანახმად, საქართველოს ჯერ კიდევ 2014 წელს უნდა მიეღო. სამწუხაროდ, ჩვენს მთავრობას არ აღმოაჩნდა კომპეტენცია, რომ დროულად მიგვეღო ვიზალიბერალიზაცია და ეს პროცესი ბოლომდე მიეყვანა. საბედნიეროდ, პროცესი დაგვიანებით, მაგრამ მაინც მივიდა ლოგიკურ ფინალამდე, რომელიც 2012 წელს არის დაწყებული. რა თქმა უნდა, მინდა საქართველოს მოქალაქეებს მივულოცო ეს დღე. სამწუხაროა, რომ ჩვენი მოქალაქეები მთავრობის არაკომპეტენტურობის გამო აქამდე ვერ სარგებლობდნენ ამ სიკეთით.

„ახალი თაობა“, 02 თებერვალი, 2017 წელი

ინტერვიუ ლევან ხაბეიშვილთან: „ქართული ოცნება“ პრეზიდენტის ინსტიტუტის გაუქმებას აპირებს“ // „ხელისუფლება გიგა ბოკერიად გადაიქცა“

შექმნიან თუ არა ყოფილი ხელისუფლების წარმომადგენლებთან საარჩევნო ბლოკს, რას უპირებს „ოცნება“ პრეზიდენტის ინსტიტუტს, როგორ ისჯებიან საპროტესტო აქციების მონაწილეები, რა გეგმები აქვს ბიძინა ივანიშვილს, იყრის თუ არა თბილისის მერად კენჭს გიორგი ვაშაძე? – ამის შესახებ „ახალ თაობას“ პოლიტიკური გაერთიანება „ახალი საქართველოს“ ერთ-ერთი ლიდერი ლევან ხაბეიშვილი ესაუბრება.

- ექსპერტი სოსო ცისკარიშვილი არ გამორიცხავს, რომ კონსტიტუციაში ცვლილებების შეტანა ბიძინა ივანიშვილის პრეზიდენტად არჩევას უკავშირდება. თქვენ რას ფიქრობთ ამასთან დაკავშირებით?

- არა მგონია, რომ ბიძინა ივანიშვილს ხელისუფლებაში მობრუნება უნდოდეს. მისი მმართველობის სტილი ასეთია – ჩრდილშია, ოფიციალურად არაფერზე არ აგებს პასუხს, მაგრამ რეალურად ის მართავს ქვეყანას. არა მგონია, ბიძინა ივანიშვილს უფუნქციო პრეზიდენტის მანტია ხიბლავდეს, მას რუხი კარდინალობა ურჩევნია საერთოდ მგონია, რომ „ქართული ოცნება“ პრეზიდენტის ინსტიტუტის გაუქმებას აპირებს და ამისთვის ძალიან ბევრსაც მუშაობენ. ამ გადაწყვეტილებას საპარლამენტო მოდელზე გადასვლით გაამართლებენ. იმ არგუმენტსაც მოიშველიებენ, რომ 25 მილიონიც დაიზოგება თუ უფუნქციო პრეზიდენტის არჩევნები აღარ ჩატარდება.

- პრეზიდენტის ინსტიტუტის გაუქმებას თუ აპირებენ, ამაზე ხმამაღლა რატომ არ მიდის საუბარი?

- ამ თემაზე ბევრი კრიტიკა მიიღეს და ურჩევნიათ, ნელ-ნელა მოამზადონ საზოგადოებრივი აზრი. მაგალითისთვის რამდენიმე ევროპულ ქვეყანასაც მოიყვანენ, სადაც საპარლამენტო მოდელია. არა მგონია, რომ მარგველაშვილის ვადის ამოწურვის შემდეგ ჩვენ კიდევ ავირჩიოთ პრეზიდენტი. „ქართულ ოცნებას“ პარლამენტში საკონსტიტუციო უმრავლესობა ჰყავს და ამ ცვლილებას უპრობლემოდ შეიტანენ კონსტიტუციაში.

- საპარლამენტო ოპოზიცია პრეზიდენტის ინსტიტუტის გაუქმებას წინააღმდეგობას ვერ გაუწევს?

- ვინ უნდა გაუწიოს წინააღმდეგობა, პატრიოტთა ალიანსმა, რომელიც ბიძინა ივანიშვილმა პარლამენტში ძალით გაიყვანა? ასევე არაფერს არ უნდა ველოდოთ „ევროპული საქართველოსგან“, რომელიც პარლამენტში ისე მოხვდა, არჩევნებში მონაწილეობაც კი არ მიუღიათ. ასეთი მოქმედება ბოკერიას სტილია, ამ პარტიის არსებობა არავინ არ იცოდა და დღეს პარლამენტში 21 კაცი ჰყავთ. ადრეც ვთქვი და ახლაც გავიმეორებ, რომ ეს პარტია იქნება „ქრისტიან-დემოკრატიული მოძრაობა-2“.

„ევროპული საქართველო“ პარლამენტში ბიძინა ივანიშვილის ფსევდოოპოზიციის როლს შეასრულებს. ამ ძალის ლიდერებს ქვეყნის არაფორმალურ მმართველთან ძალიან ბევრი ვალდებულება აქვთ. შეთქმულებების თეორიები არ მიყვარს, მაგრამ ეს რომ ასეა, ეს შეუიარაღებელი თვალითაც ჩანს.

- „ევროპული საქართველო“ ვახსენეთ და რას ფიქრობთ მათთან ერთად საარჩევნო ბლოკის შექმნაზე? უფლებადამცველთა გაერთიანების თავმჯდომარე ნიკოლოზ მჟავანაძე არ გამორიცხავს, რომ „გირჩმა“, „ევროპულმა საქართველომ“, „ნაციონალებმა“ და „ახალმა საქართველომ“ ბლოკი შექმნათ.

- ნიკოლოზს ვიცნობ და მის პოზიციებს არ ვიზიარებ, მაგრამ ამ შემთხვევაში ცალსახად სისულელე თქვა. „ევროპულ საქართველოსთან“ ერთად ჩვენ არავითარ შემთხვევაში არ გავერთიანდებით. თავის დროზე „ნაციონალური მოძრაობა“ იმიტომ დატოვა ჩვენმა გუნდმა, რომ გიგა ბოკერია, მიშა მაჭავარიანი, დათო ბაქრაძე, ხათუნა გოგორიშვილი და გოკა გაბაშვილი იყვნენ კულუარული მმართველები. ყველა სიკეთესთან ერთად, ისინი მანდატების ქურდებიც აღმოჩნდნენ.

როგორ უნდა ვითანამშრომლოთ იმ გუნდთან, რომელსაც არანაირი რეფორმა არ გაუტარებია. არადა ამ ხალხს საკმაოდ მაღალი თანამდებობები ეკავა. გიგა ბოკერიას გატარებულ რეფორმას ვერავინ ვერ იხსენებს. მასზე რაღაც მითებია შექმნილი, რომ დასავლეთთან კარგი კავშირები აქვს და ამ ფრონტზე რაღაცებს ალაგებს.

დავით ბაქრაძე პარლამენტის თავმჯდომარე იყო. მისი სპიკერობის დროს პარლამენტი ნოტარიუსად იყო ქცეული. მაშინდელ მთავრობაზე პარლამენტი კონტროლს რომ ვერ ახორციელებდა, ეს პირდაპირ ბაქრაძის ბრალია. აკაკი ბობოხიძის და გოკა გაბაშვილის გაკეთებული საქმე ბუნებაში არ არსებობს, იგივე შეიძლება ითქვას ირმა ნადირაშვილზე. ამ გუნდში გამონაკლისს მიშა მაჭავარიანი და ხათუნა გოგორიშვილი წარმოადგენენ. მათ ისეთი საარჩევნო კოდექსი შექმნეს, რომ ამომრჩეველთა 40%-იანი მხარდაჭერით პარტიამ პარლამენტში შეიძლება მანდატების 80% მოიპოვოს.

- „გირჩებთან“ თანამშრომლობაზე რას იტყვით?

- ესეც წარმოუდგენელია. მართალია მათი იდეების დიდ ნაწილს ვეთანხმები, მაგრამ „გირჩთან“ გაერთიანების არანაირი პერსპექტივა არ არსებობს. პოლიტიკაში იმის თქმა, რომ ეს არასდროს არ მოხდება, კარგ ტონად არ ითვლება, მაგრამ „გირჩთან“ თანამშრომლობა არ გამოვა.

- „ნაციონალებთანაც“ გამორიცხულია კოალიციის შექმნა?

- გამორიცხულია. ასევე წარმოუდგენლად მიმაჩნია, როგორ უნდა ითანამშრომლონ „ნაციონალებმა“ და გიგა ბოკერიას ფრთამ.

- გავარკვიეთ, რომ ყოფილი ხელისუფლების წარმომადგენლებთან თანამშრომლობა არ გსურთ. სხვა ძალებთან თუ აპირებთ თანამშრომლობას? რამდენიმე თვის წინ თქვენი პარტია იყო ერთ-ერთი პირველი, რომელმაც პროდასავლურად განწყობილ პარტიებს თანამშრომლობისკენ მოუწოდა...

- ჩვენ ახლაც ვთვლით, რომ კარგი იქნება თუ პროდასავლური ძალების გაერთიანება მოხდება. ამ ეტაპზე ჩვენ არავისთან გაერთიანებას არ ვაპირებთ, რადგანაც ძალიან ბევრი საქმე გვაქვს.

- რა საქმეები?

- ჩვენმა გუნდმა უკრაინაში 20-ზე მეტი იუსტიციის სახლი უნდა ააშენოს. უკრაინაში ჩვენ სასამართლო და საგადასახადო რეფორმაზეც ვმუშაობთ. ჩვენი გუნდი მოლდოვაშიც აქტიურად მუშაობს. ჩვენი ლიდერი, ინოვატორული განვითარების ფონდის ხელმძღვანელი გიორგი ვაშაძე 2 კვირა იმყოფებოდა ამერიკაში, სადაც ჩიკაგოს მერიასთან გაფორმდა თანამშრომლობის მემორანდუმი. ვაშინგტონში ვაპირებთ ოფისის გახსნას.

ჩვენ საკმაოდ სერიოზული გუნდი გვყავს, რომელსაც საქმის კეთება შეუძლია. თუ ხალხი ამას დაინახავს და აგვირჩევს, მზად ვართ ვემსახუროთ ჩვენს ქვეყანას და პროდასავლურ ძალებთან ვითანამშრომლოთ. მინდა პროდასავლურობასთან დაკავშირებით ერთი განმარტება გავაკეთო, პროდასავლურობა ეს იგივე პროქართულობაა, რადგანაც საქართველოს განვითარება დასავლურ ღირებულებებს უკავშირდება.

ძალიან გაგვიჭირდება იმ ხალხთან თანამშრომლობა, რომლებიც გამუდმებით იმას გაიძახიან, რომ ქართველობას გვართმევენ. ამ ძახილით ხალხი შეცდომაში შეჰყავთ. იმის ძახილი, რომ მიწის გაყიდვა არ შეიძლება, პოპულიზმია და მეტი არაფერი.

- პოპულიზმი რატომ არის?

- იმიტომ, რომ ეს ჩვეულებრივი ამბავია. პირველ ეტაპზე გლეხს უნდა დაუკანონდეს ის მიწა, რომელიც მის მამა-პაპას ეკუთვნოდა. გლეხს ასევე საკუთრებაში უნდა გადავცეთ ის მიწები, რომლებსაც ის ამუშავებს. საუბარია სასოფლო-სამეურნეო მიწების 60-70%-ზე. სახელმწიფოს სულ დარჩება 15-20%, აქედან უცხოელებს სულ რაღაც 1% აქვთ ათვისებული. უცხოელებზე მიწის გასხვისებასთან ისეთი ამბავია ატეხილი, რომ კაცი იფიქრებს, ინვესტორები შემოგვესივნენ და მიწებს ყიდულობენ. უცხოელებზე მიწის გაყიდვის აკრძალვა ნიშნავს იმას, რომ საქართველოში სასოფლო-სამეურნეო მიწებს კოლექტიური მაკრახიძეები დაეუფლებიან. მაკრახიძე გორის მაჟორიტარი დეპუტატია `ქართული ოცნებიდან~. ამ ადამიანს დეკლარაციაში უწერია, რომ 300.000 კვ.მ. მიწა აქვს საკუთრებაში. მათი სახით მივიღეთ ე.წ. მინიგარქები, მათ ფაქტიურად იყიდეს საქართველო. ასეთი ხალხი ბევრია პარლამენტში.

ამ თემაზე დებატებისას აღმოვაჩინე, რომ ბატონი დიმიტრი ლორთქიფანიძე დიდი სიამოვნებით ადის ბაზალეთის ტბაზე. ეს ადგილი ებრაელებმა შეიძინეს და შესანიშნავი დასასვენებელი კომპლექსი ააშენეს. ლორთქიფანიძის იდეა რომ გასულიყო, ებრაელები ვერასოდეს ვერ ააშენებდნენ ამ კომპლექსს, სადაც დღეისთვის 400 ადამიანია დასაქმებული.

აქედან გამომდინარე არ მესმის, რატომ უნდა ჩავხერგოთ ინვესტიციები. ჩვენ არავისთვის ქართველობის წართმევას არ ვაპირებთ, უბრალოდ გვინდა, ძლიერი გლეხი და ძლიერი სოფელი. თუ ეს არავის არ უნდა, მაშინ ვიძახოთ, რომ მიწები მხოლოდ ჩვენია და ამოვწყდეთ მშივრები.

- მიწის გაყიდვის თემიდან თბილისის მერის არჩევნებზე გადავიდეთ. ცოტა ხნის წინ თქვენ გამოაქვეყნეთ მერობის სავარაუდო კანდიდატების სია, სადაც გიორგი ვაშაძის გვარიცაა ნახსენები. ის იქნება „ახალი საქართველოს“ მერობის კანდიდატი თბილისში?

- პირდაპირ გეტყვით, ამ საკითხზე ჩვენ ბევრს ვსაუბრობთ, მათ შორის გიორგისთანაც. ჯერ გადაწყვეტილი არაფერი არ არის და ვერ გეტყვით, მიიღებს თუ არა ის მერის არჩევნებში მონაწილეობას. რაც შეეხება თავად ჩამონათვალს, ეს იყო მხოლოდ ჩემი ვარაუდი.

- ჩამონათვალში დავით ნარმანიას გვარიც იყო. თქვენი აზრით, გაბედავს „ოცნება“ მეორედ მისი კანდიდატურის დაყენებას?

- ქვეყანაში ისეთი ვითარებაა, რომ შესაძლოა ბიძინა ივანიშვილი გაკადნიერდეს და ნარმანიას კანდიდატურა მეორედ წარმოადგინოს. ხელისუფლების კადნიერებას კი საზღვარი მართლა არა აქვს და ამის დასამტკიცებლად ის მაგალითიც კმარა, რომელსაც ახლა მოვყვები. გასული წლის 10 დეკემბერს აქციზების ზრდასთან დაკავშირებით გაიმართა აქცია, სადაც რამდენიმე ასეულმა მანქანამ მიიღო მონაწილეობა. საპროტესტო მსვლელობა დაიწყო დიღმიდან და პარლამენტთან დასრულდა. ამ მსვლელობას საპატრულო პოლიციის ეკიპაჟი აკვირდებოდა. მძღოლები პოლიციის მითითებებს ასრულებდნენ და კანონი არ დაურღვევიათ. ამ აქციიდან 40 დღის შემდეგ აქციის სამ მონაწილეს მართვის მოწმობა ჩამოართვეს. მათ შორის ერთ-ერთი „ახალი საქართველოს“ წევრი ვახო ხარაზიშვილია. ჩვენი აზრით, ეს სამი ადამიანი აქტიურობის გამო შეარჩიეს.

- მართვის მოწმობები რატომ ჩამოართვეს?

- მიზეზად ის დაასახელეს, რომ თურმე ჯგუფურად, ორგანიზებულად მოძრაობდნენ. მკითხველისთვის რომ უფრო გასაგები იყოს, ავხსნი რას ნიშნავს ჯგუფურად მოძრაობა. ადამიანები ორგანიზებულად, ჯგუფურად მოძრაობენ ქორწილებსა და გასვენებებში. ასევე ჯგუფურად და ორგანიზებულად მოძრაობენ ადამიანები მაშინ, როცა წინასაარჩევნო კამპანია ტარდება.

ხელისუფლება ერთი მხრივ ამბობს, რომ ეს დასჯადი არ არის და მეორე მხრივ, ამის გამო სამ ადამიანს წაართვეს მართვის მოწმობა. რაღაც არ მახსენდება, რომ ასე ჯგუფურად მოძრაობის გამო წინასაარჩევნოდ ვინმე დაესაჯათ.

აქ მოხდა ასეთი რამე – ხელისუფლებამ ამ ახალგაზრდებს პროტესტის გამოხატვა არ აპატია. არადა კანონით პროტესტის გამოხატვის უფლება ყველას აქვს. ამ ბიჭების დასჯით ხელისუფლებამ ყველას მისცა ნიშანი, რომ ვინც „ოცნების“ მიმართ პრეტენზიებს გამოთქვამს, დაისჯება. ხელისუფლება გადაიქცა გიგა ბოკერიად და მათ შორის არანაირი განსხვავება აღარ არის.