„რეზონანსი“: ინტერვიუ თედო ჯაფარიძესთან: ევროატლანტიკური ინტეგრაცია, რუსეთთან ურთიერთობა და ქართული ლობი აშშ-ში
„ალია“: რატომ მალავს პრემიერი პრეზიდენტთან დაპირისპირების რეალურ მიზეზებს? // გიორგი მარგველაშვილი საგარეო პოლიტიკის უწყებათაშორისი საბჭოს შექმნამ გაანაწყენა
„რეზონანსი“: შეთანხმება საჰაერო სისტემების შესახებ: თავდაცვის მინისტრს საკუთარი განცხადების შესწორება მეორედ მოუწია
„ალია“: ვინ ჩამოიყვანს მიშას უკრაინიდან, “პატრიოტთა ალიანსი” თუ ქართული სპეცსამსახური?
„რეზონანსი“: ირმა ინაშვილი სააკაშვილის ჩამოსაყვანად სპეცოპერაციას ითხოვს // „ვსაუბრობ იმ მეთოდზე, რომელიც ისრაელმა გამოიყენა ნაცისტების დასაკავებლად მთელ მსოფლიოში“
———————-
„რეზონანსი“, 02 აპრილი, 2015 წელი
ინტერვიუ თედო ჯაფარიძესთან: ევროატლანტიკური ინტეგრაცია, რუსეთთან ურთიერთობა და ქართული ლობი აშშ-ში
იაგო ნაცვლიშვილი
(შემოკლებით)
ინტერვიუში პარლამენტის საგარეო ურთიერთობათა კომიტეტის თავმჯდომარე თედო ჯაფარიძე ჟურნალისტ იაგო ნაცვლიშვილთან საქართველოს საშინაო და საგარეოპოლიტიკურ საკითხებზე საუბრობს. მისი თქმით, „პრეზიდენტის გამოსვლაში საინტერესო გზავნილები იყო საგარეო პოლიტიკისა და უსაფრთხოების საკითხებზე. ერწმუნეთ ჩემს გამოცდილებას, გზავნილი, რომ საქართველო ევროატლანტიკური კურსის ერთგულია, ძალიან მნიშვნელოვანია“.
„რეზონანსი“: თუმცა მან მმართველი გუნდი გააკრიტიკა, ამ გზაზე საკმარისად აქტიური არ არისო…
თედო ჯაფარიძე: როგორც მმართველი გუნდის წევრი, ვაცხადებ, რომ აქტივობა არ დაგვიკლია. ყოველ შემთხვევაში ჩვენს დონეზე, ვგულისხმობ პარლამენტის საგარეო ურთიერთობათა კომიტეტს. უფრო მეტს გეტყვით. ცოტა ხნის წინ ვიყავი ბრიუსელში ნატო-საქართველოს კომისიის სხდომაზე. შევხვდი მაღალი რანგის თანამდებობის პირებს, სადაც მათ გვითხრეს, რომ ქართული მხარე, განსაკუთრებით კი სამხედროები, ძალიან აქტიურობენ. ნატოს თანამდებობის პირები ამბობენ, რომ ჩვენ უფრო აქტიურები ვართ, ვიდრე ალიანსი ჩვენთან მიმართებაში.
„რეზონანსი“: როგორ ფიქრობთ, ალიანსის მხრიდან რატომ არ არის შემხვედრი ნაბიჯები ჩვენ მიმართ და რა ხდება ნატოს არსებით პაკეტთან დაკავშირებით?
თედო ჯაფარიძე: ნატოსთან ურთიერთობის ბევრი საკითხი არ არის საჯარო. ის, რომ არსებობს ნატო-საქართველოს კომისია, ყოველწლიური გეგმა, უკვე პროგრესია. ჩვენ ხარისხობრივად ჩქარი ტემპით მივიწევთ წინ.
„რეზონანსი“: შესაძლოა, ნატოს არსებითი პაკეტის საიდუმლო ნაწილზე საზოგადოებას არ მიუწვდებოდეს ხელი, მაგრამ როდესაც ამაზე პრეზიდენტი სთხოვს ინფორმაციას თავდაცვის უწყებას და ის ამ ინფორმაციას არ აძლევს, ეს რამდენად სწორად მიგაჩნიათ, მით უმეტეს, რომ პრეზიდენტი ქვეყნის მთავარსარდალიცაა…
თედო ჯაფარიძე: მე ეს არ მიმაჩნია სწორად, ისევე როგორც ის, რომ პრეზიდენტის გამოსვლას გუშინ არ დაესწრნენ მთავრობის წევრები. ჩვენ საქმე მარგველაშვილთან კი არ გვაქვს, არამედ ქვეყნის მეთაურთან. ქვეყანას, სახელმწიფო ინსტიტუტებს უნდა ვცეთ პატივი და არა კონკრეტულ პიროვნებას. ამ ფაქტმა მე შემაშფოთა.
ეს არის საჯარო პოლიტიკა, რომელსაც უსმენენ ჩვენი მოქალაქეები. გუშინ მათ შეიტყვეს, რომ პრეზიდენტმა ორჯერ მიმართა თავდაცვის უწყებას კონკრეტული ინფორმაციის მიწოდებაზე, მაგრამ უარი მიიღო. ეს ნიშნავს, რომ პრეზიდენტსა და პრემიერს შორის რაღაც გაუგებრობას აქვს ადგილი. ჩვენი მოქალაქეებისთვის უნდა დაგვენახვებინა გუშინ, რომ ვართ ერთი გუნდი, რომელსაც აქვს ძალიან მნიშვნელოვანი ამოცანები გადასაჭრელი.
„რეზონანსი“: დეპუტატი გოგი თოფაძე ბოლო დროს აკეთებს ნეგატიურ განცხადებებს ნატოზე. მანამდე იყო ზურაბ აბაშიძის ინტერვიუ, რომელსაც ასევე ხმაური მოჰყვა… ხომ არ ახდენს ეს განცხადებები გავლენას ჩვენს დასავლელ პარტნიორებზე?
თედო ჯაფარიძე: ეს განცხადებები არაფერზე არ ახდენს გავლენას, ვინაიდან ჩვენმა პარტნიორებმა იციან, რომ ევროატლანტიკური არჩევანი გააკეთა ჩვენმა ხალხმა. მართალია, “ქართული ოცნება” კოალიციური გუნდია, მაგრამ ეს არ არის მონოლითი. ეს არ არის იდეოლოგიაზე აწყობილი გუნდი, სადაც ლიდერი ამბობს ერთ რაღაცას და ეს უნდა გაიმეოროს ყველამ. “ნაცმოძრაობისგან” განსხვავებით ჩვენ ასეთი რაღაც არ გვახასიათებს.
„რეზონანსი“: მათ შორის პრინციპულ საკითხებთან დაკავშირებითაც, შესაძლოა, რომ გუნდში აზრთა სხვადასხვაობა იყოს?
თედო ჯაფარიძე: დიახ, პრინციპულ საკითხებთან დაკავშირებითაც. კოალიციაში უმრავლესობა ვიზიარებთ იმ პოზიციას, რაც ხალხმა მიიღო, რომ ჩვენ უნდა ვიაროთ ევროატლანტიკური მიმართულებით. მაგრამ არიან ადამიანები, ვისაც აქვს განსხვავებული აზრი. პირადად მე განსხვავებულ აზრს პატივს ვცემ.
„რეზონანსი“: აბაშიძე-კარასინის შეხვედრათა ფორმატზე რას ფიქრობთ, პრეზიდენტმა თქვა, რომ კანონით არ არის დადგენილი, რა მანდატი აქვს ზურა აბაშიძეს…
თედო ჯაფარიძე: ამის შესახებ დეტალების სრული ნუსხა მე არ გამაჩნია, შესაძლოა, კანონით არ არის დადგენილი. მაგრამ ეს ხომ არ არის ოფიციალური შეხვედრები. ეს არის რეგულარული საუბრები ორ ქვეყანას შორის, რომელიც იმართება პრაღაში. მე მიმაჩნია, რომ რაც შეიძლება მეტი საკომუნიკაციო არხი უნდა იყოს რუსეთსა და საქართველოს წარმომადგენლობებს შორის.რიგ საკითხებთან მიმართებაში ინოვაციურები და კრეატიულები უნდა ვიყოთ. აუცილებელია საუბარი ჩვენთვის მტკივნეულ საკითხებზეც. აფაზეთთან და სამხრეთ ოსეთთან გაფორმდა ე.წ. ხელშეკრულებები და ამ მტკივნეულ საკითხზე საუბარი ძალიან მნიშვნელოვანია. მით უმეტეს ისეთი გამოცდილი დიპლომატების მხრიდან, როგორებიც ბატონი აბაშიძე და კარასინი არიან.
ამ ყოველივეს მიუხედავად, მე ვერ გავაკეთებ ოპტიმისტურ განცხადებას, რამეთუ ჩვენი ჩრდილოელი მეზობელი ძალიან ხისტი და არცთუ ისე სასიამოვნო პარტნიორია არ მხოლოდ საქართველოსთვის, არამედ მთლიანად დასავლეთისთვის.
„რეზონანსი“: ამერიკულ პრესაში გაჟღერდა, თითქოს აშშ-ის ყოფილი სახელმწიფო მდივნის, ჰილარი კლინტონის მრჩეველი ბიძინა ივანიშვილს 2012 წელს არალეგალურად ლობირებდა. რა ინფორმაციას ფლობთ ამ თემაზე?
თედო ჯაფარიძე: სტატიაში ნახსენებია ჯონ კორნბლუმიც, რომელიც ჩემი ახლო მეგობარია. მერწმუნეთ, მას აშშ-ში არავითარი ლობისტური საქმიანობა არ ჰქონია. “ქართულ ოცნებას” ის ეხმარებოდა ევროპაში კონტაქტების დამყარებაში. ის გვეხმარებოდა როგორც მეგობარი, რაშიც გასამრჯელოს არ იღებდა. თუ ის ამას აშშ-ში გააკეთებდა, რეგისტრაცია უნდა გაევლო, თუმცა, როგორც გითხარით, ამერიკაში ლობისტურ საქმიანობას არ ეწეოდა.
ეს ეპიზოდი არის იმ კამპანიის ნაწილი, რომელიც მიმართულია ჰილარი კლინტონის წინააღმდეგ. მოგეხსენებათ, კლინტონი აპირებს კენჭი იყაროს ამერიკის საპრეზიდენტო არჩევნებში, ამიტომ მას აუგორეს შავი პაირი, რაც ამერიკულ პოლიტიკურ ცხოვრებაში ჩვეულებრივი მოვლენაა. ეს არის კერძო მიმოწერა კორნბლუმსა და კლინტონის მრჩეველ სინდი ბლუმენტალს შორის. ესეც კითხვებს ბადებს, ვინაიდან ჰაკერობა ეს უკვე კრიმინალია. მერწმუნეთ, ეს რამდენიმედღიანი სკანდალია.
დაახლოებით ვხვდები, ვინ გაახარა ამ სკანდალმა ჩვენს ქვეყანაში. ჩემს კოლეგებს თქვენი გაზეთის საშუალებით მინდა შევუთვალო, რომ ის თითიდან არის გამოწოვილი და ვერც ქართულ-ამერიკულ ურთიერთობას მიაყენებს ზიანს და ვერც ამერიკისა და “ქართული ოცნების” ურთიერთობებს.
„ალია“, 02 აპრილი, 2015 წელი
რატომ მალავს პრემიერი პრეზიდენტტან დაპირისპირების რეალურ მიზეზებს?
გიორგი მარგველაშვილი საგარეო პოლიტიკის უწყებათაშორისი საბჭოს შექმნამ გაანაწყენა
ლევან ჯავახიშვილი
(შემოკლებით)
სახეზეა პრეზიდენტსა და პრემიერს შორის დაპირისპირება, მაგრამ ღარიბაშვილი ამ თემას ჯერ არ შლის, რეალურ მიზეზებზე არ საუბრობს და ამ დაუჯერებელი მიზეზებით ან დრო გაჰყავს, ან საერთოდ აპირებს ამ საქმის ჩაფარცხვას. პრემიერის გუნდის ყველა წევრი კი ისე მოიქცა, როგორც ირაკლი ღარიბაშვილს, მთავრობის მეთაურს სურდა – არად ჩააგდეს პრეზიდენტი და პარლამენტში არ მივიდნენ. მათი ეს გადაწყვეტილება აბსოლუტურად ადეკვატური და რაც მთავარია, გუნდურობისა და ერთსულოვნების მაჩვენებელი იყო.
(…)
გუშინაც ვწერდი და დღესაც ვიმეორებ, რომ მარგველაშვილმა მთავრობა პარლამენტში გამოსვლისას პარალელური სტრუქტურების შექმნაში დაადანაშაულა. მან, უპირველესად, თავის დაქვემდებარებაში მყოფი უშიშროების საბჭოს საპირწონე, უსაფრთხოების სააგენტო და ასევე, საგარეო პოლიტიკის უწყებათაშორისი საბჭო დაასახელა. ორივე სტრუქტურა პრემიერს ექვემდებარება და მოდით, სიმართლე ვთქვათ, კი, ეს მართლაა სახელმწიფო უწყებათა შორის ფუნქციათა დუბლირება. მაგრამ რა ქნას პრემიერმა, როცა ხედავს, რომ პრეზიდენტს დაქვემდებარებული უშიშროების საბჭო ვერ ან არ წყვეტს იმ პრობლემებს, რომლებიც მას აკისრია? სხვა მიზეზით ღარიბაშვილს არაფერში სჭირდებოდა უსაფრთხოების სააგენტოს შექმნა. საგარეო პოლიტიკის უწყებათაშორისი საბჭოს შექმნამ კი, მარგველაშვილი იმიტომ გაანაწყენა, რომ მას ყველაზე მეტი უფლებამისილება საგარეო პოლიტიკაში აქვს და ხედავს, რომ ამ ფუნქციასაც უზღუდავენ ამ პარალელური სტრუქტურით. მერედა, ეს ვისი ბრალია? ნუ იქნები უუნარო პრეზიდენტი, ის მინიმალური ფუნქციები, რაც გაქვს, მაქსიმალურად გამოიყენე და დაანახე ხალხსა და მთავრობასაც, რომ შენს მოვალეობას ათიანზე ასრულებ და ამ პარალელურ სტრუქტურებს არავინ შეგიქმნის. იქნებ ვინმემ გამახსენოს გიორგი მარგველაშვილის ერთი წარმატებული საერთაშორისო მოლაპარაკება და მისი შედეგები და ვიტყვი, რომ ღარიბაშვილი ცდება, ამ „დუბლირების პოლიტიკის“ გატარებით.
არც ერთი ამგვარი წარმატებული მოლაპარაკება მარგველაშვილს არ უწარმოებია, თორემ გვეცოდინებოდა – მისი აპარატი ნამდვილად არ დამალავდა. ვერ გავიგე, პრეზიდენტის უცხოეთში ვიზიტების მთელი დატვირთვა ის არის, რომ ფეშენებელური სასტუმროების საპრეზიდენტო ნომრებში იცხოვროს, არანაირი ამქვეყნიური სიკეთე არ მოიკლოს და ამისთვის ფული მე ვიხადო საკუთარი ჯიბიდან? უკვე დავიღალე, რამდენს უნდა გადავუხადო? არა, ვინც საქმე აკეთებს, კი, ბატონო, ალალი იყოს მათთვის, მაგრამ ვისაც გრიალი და დროსტარება მოუნდება საბიუჯეტო ხარჯზე, ყველას მე რატომ უნდა გადავუხადო? ის ბიუჯეტი, საიდანაც მარგველაშვილის ძვირადღირებული ვიზიტები ფინანსდება, აკი ჩემი და ჩემისთანა გადასახადების გადამხდელებისგან ივსება?
„რეზონანსი“, 02 აპრილი, 2015 წელი
შეთანხმება საჰაერო სისტემების შესახებ: თავდაცვის მინისტრს საკუთარი განცხადების შესწორება მეორედ მოუწია
ეკატერინე ბასილაია
(შემოკლებით)
ალასანია-ჯანელიძის სიტყვიერი დაპირისპირება და ურთიერთბრალდებები გრძელდება – თავდაცვის მინისტრს უკვე მეორედ მოუწია საკუთარი განცხადების გასწორება.
ამჯერად საქმე საჰაერო თავდაცვითი სისტემების ხელშეკრულებას ეხება – ერთკვირიანი უარყოფის შემდეგ თავდაცვის მინისტრმა მინდია ჯანელიძემ დაადასტურა, რომ ალასანიას საფრანგეთში ვიზიტისას მართლაც დაურეკა და სატელეფონო საუბრისას საჰაერო უსაფრთხოებასთან დაკავშირებულ ხელშეკრულებაზე ხელმოწერის არა გაუქმებას, არამედ რამდენიმე დღით გადადებას სთხოვდა. თუმცა მანამდე ჯანელიძე ამტკიცებდა, რომ დოკუმენტი, რომელზეც ალასანია საუბრობდა, „ბუნებაში არ არსებობდა“, გუშინ კი თავისი განცხადების უარყოფა მოუწია. ამის მიზეზი „თავისუფალი დემოკრატების მიერ გუშინ დავრცელებული ფილმი გახდა, სადაც ექსმინისტრი ირაკლი ალასანია „ბუნებაში არარსებული“ ხელშეკრულების ხელმოწერის ფოტოებს აქვეყნებს.
„დამოუკიდებელ ექსპერტთა კლუბის“ პრეზიდენტის, სოსო ცისკარიშვილის თქმით, მას აქვს ინფორმაცია, რომ ჯანელიძემ სწორედაც ხელშეკრულეის გაფორმებაზე უარი ითხოვა და არა პ როცედურების დაზუსტება. მისივე თქმით, ეს არის მეორე შემთხვევა, როდესაც მინისტრს ადრინდელი განცხადების შელამაზება დასჭირდა. პირველად, უკრაინაში მებრძოლი ქართველების გამო სამინისტროს მხრიდან გაკეთებული ოფიციალური განცხადების გამო და ახლა – ხელშეკრულების გამო. „როგორც ჩანს, ბატონი ჯანელიძისთვის ხელმიუწვდომელი ინფორმაციაა ის, რაც ცნობილია ბავშვებისთვისაც – რომ ტყუილს მოკლე ფეხები აქვს, – ამბობს ცისკარიშვილი.
(…)
გუშინ „თავისუფალმა დემოკრატებმა“ ე.წ. კაბელების საქმესა და საფრანგეთში საქართველოსა და საფრანგეთს შორის გასაფორმებელ ხელშეკრულებაზე მომზადებული ფილმი გაარვცელეს, სადაც ალასანია ყვება, რომ სახელმწიფო უსაფრთხოებისა და კრიზისების საბჭოს მდივანმა მას პრემიერ-მინისტრის სახელით დაურეკა და სთხოვა, თავი შეეკავებინა დოკუმენტზე ხელმოწერისგან და შექმნილი სიტუაციიდან გონივრული გამოსავალი მოეძებნა. ამის შემდეგ ის შეეცადა პრემიერთან დაკავშირებას, თუმცა კავშირი ვერ შედგა, რადგან პრემიერი დაკავებული იყო. ალასანია იმასაც იხსენებს, რომ ხელმოსაწერი დოკუმენტის – განზრახულობათა ოქმის ტექსტი, პრემიერ-მინისტრის გარდა, შეთანხმებული იყო პარლამენტის თავმჯდომარესთან და მინისტრთა კაბინეტის წევრებთან. ფილმში პირველად ქვეყნდება დოკუმენტის ხელმოწერის ფოტოებიც. ვიდეო ალასანიას განცხადებით სრულდება, სადაც თავდაცვის ყოფილი მინისტრი ამბობს – „ცუდად მიცნობენ“.
გუშინ მთელი ამ ვიდეოფილმისა და განცხადებების შემდეგ მინდია ჯანელიძეს კომენტარის გაკეთება ჟურნალისტებთან ისევ მოუწია.
„კიდევ ერთხელ ვიმეორებ და ამ საკითხზე დამატებითი კომენტარის გაკეთებას აღარ ვაპირებ. მე ალასანიას შევახსენე ის აუცილებელი პროცედურები, რომლებიც უნდა დაეცვა და ვთხოვეთ, რომ მხოლოდ რამდენიმე დღით გადაედოთ ხელმოწერის პროცედურა. არ იყო ისე, როგორც ის აცხადებს, რომ უარი ეთქვა ხელმოწერაზე. ჩვენი თხოვნა იყო, დაეცვა პროცედურები“, – აღნიშნა ჯანელიძემ მთავრობის სხდომის დასრულების შემდეგ.
უფრო მეტიც, ჯანელიძე „თავისუფალ დემოკრატებს“ მოუწოდებს, მშვიდად იყვნენ“ და რომ ამ საკითხზე ბევრი და ღია ლაპარაკით ისინი ქვეყანას ზიანს აყენებენ.
„რაც უფრო მეტს ილაპარაკებენ ბატონი ალასანია და მისი პარტიის წევრები ამ საკითხზე, უფრო მეტი ზიანი მიადგება ჩვენს ქვეყანას. რაც შეეხება პროცესს, პროცესი მიმდინარეობს ძალიან წარმატებით. ამაზე მეტს ვერ გეტყვით, რადგან იმ ხალხისგან განსხვავებით, ვინც ამ საკითხზე ღიად საუბრობს, მე სხვა პაუხისმგებლობა მაქვს“, – დასძენს ჯანელიძე.
„ჩემთვის გაუგებარია, ამ თემას რატომ არ უნდა დაეთმოს შესაბამისი ყურადღება პარლამენტისა თუ საზოგადოების მხრიდან. მეორე მხრივ, ეს იმაზე მიუთითებს, რომ თავდაცვის მინისტრის მხრიდან გამოკვეთილი პოზიცია არ არსებობს და სხვადასხვა კონსულტაციების შემდეგ სხვადასხვა პოზიციებს ახმოვანებს“, – ამბობს „თავისუფალი დემოკრატების“ წევრი ირაკლი ჩიქოვანი. მისი თქმით, ხელშეკრულების დეტალები არ იცის და მის შესახებ მაქსიმალურად კონკრეტულად 3 აპრილს თავად ირაკლი ალასანია ისაუბრებს.
სოსო ცისკარიშვილის განცხადებით, ამ ინფორმაციის გასაჯაროება, მართალია, თავად მოახდინა, მაგრამ „მისი ბრალი არაფერია“, მან საკუთარი წყარობით გაიგო, რომ ჯანელიძეს დაავალეს და მან ხელშეკრულების გაუქმება მოითხოვა. ხოლო ვისგან მოდიოდა ეს დავალება, ამაზე დაზუსტებული ინფორმაცია არ აქვს. მისი ვარაუდით, ჯანელიძის ზარის მიზეზი დიდი ალბათობით, რუსეთის საგარეო საქმეთა მინისტრის, სერგეი ლავროვის იმ დღეებში გაკეთებული განცხადება გახდა, სადაც მან უკმაყოფილება გამოთქვა, ნეტა საქართველო ვის წინააღმდეგ აპირებს ჰაერსაწინააღმდეგო სისტემების გამოყენებასო?!
„ლავროვის ამ კითხვაზე არანაირი პასუხი არ გაცემულა, მორცხვად თავდახრილებმა ვერ შევბედეთ ლავროვს შეგვეხსენებინა, რომ ყველა ქვეყანას ასეთი სისტემა იმ ქვეყნის წინააღმდეგ აქვს მიმართული, რომელიც საავიაციო თავდასხმებს იწყებს. როგორც ჩანს, არც თუ ღია საკომუნიკაციო არხით ხელმოწერამდე მოხდა რეაგირება“, – აღნიშნავს ცისკარიშვილი. მისი განმარტებით, ტერმინოლოგიური ლაბირინთი კარგი თავშესაფარია და ამას ჯანელიძე ოსტატურად იყენებს. „იმაზე საუბარი, რომ რაიმე ისეთ დოკუმენტს ეწერებოდა ხელი, რომლის ხელმოწერის შემდეგ ქვეყანა სერიოზული ვალდებულებების წინაშე აღმოჩნდებოდა, მართლაც არ ყოფილა. ეს იყო პირველადი დოკუმენტი, რომელიც არის შემდგომი შეთანხმების წინაპირობა, რაც ხელშეკრულებით და კონტრაქტით უნდა დასრულდეს. კონტრაქტამდე საქმე არ მისულა და ეგ უფრო მეტ კითხვას ბადებს – რა იყო ჯანელიძისადმი მიცემული დავალების მიზეზი, მაშინ როდესაც ალასანიას პარიზში წასვლამდე ეს საკითხი განხილული იყო“, – დასძენს ცისკარიშვილი.
„ალია“, 02 აპრილი, 2015 წელი
ვინ ჩამოიყვანს მიშას უკრაინიდან, “პატრიოტთა ალიანსი” თუ ქართული სპეცსამსახური?
ნინო სამხარაძე
(შემოკლებით)
ექსპრეზიდენტ მიხეილ სააკაშვილის ექსტრადირებაზე უკრაინის გენერალური პროკურატურა უარს აცხადებს. მათი ინფორმაციით, არსებობს რისკები, რომ სააკაშვილის ექსტრადირების თხოვნა პოლიტიკური მოტივით მის დევნას ისახავდეს მიზნად: „მიხეილ სააკაშვილის ექსტრადირების მოთხოვნა ადამიანის უფლებათა და ძირითად თავისუფლებათა დაცვის კონვენციის მოთხოვნებს ეწინააღმდეგება“, – ნათქვამია განცხადებაში.
შეგახსენებთ, საქართველოს მთავარმა პროკურატურამ უკრაინულ მიხეილ სააკაშვილის ექსტრადირების თხოვნით ორჯერ მიმართა. საქართველოს მხარის ფორმალობა, უკვე მერამდენედ ანეკდოტურ ვითარებას ემსგავსება. ჯერ იყო და ამ საერთაშორისო მაწანწალაზე შიდა ძებნა გამოაცხადეს, თითქოს ავლაბარში იმალებოდა და არ ახსოვდათ, როგორ გაიქცა საქართველოდან თავქუდმოგლეჯილი, ახლა დავით საყვარელიძეს მოსთხოვეს, შენი მამამარჩენალი გადმოგვეციო.
„ალიას“ კითხვებს ადვოკატი შალვა ხაჭაპურიძე პასუხობს:
- არსებობს თუ არა კიდევ რაიმე სამართლებრივი მექანიზმები დამნაშავე ექსპრეზიდენტის გადმოცემისთვის?
- ჯერ ერთი, არ არის უკრაინის გენერალური პროკურორის კომპეტენცია, სააკაშვილს გადმოგვცემენ, თუ არა. უკრაინის მოქმედ კანონმდებლობას ძალიან კარგად ვიცნობ, რადგან რამდენიმე ქართველის ექსტრადიცია მოხდა უკრაინიდან საქართველოში ამ წლების განმავლობაში. მათი კანონმდებლობით, შემდეგი ღონისძიება ხორციელდება:
როდესაც ინტერპოლით გამოცხადდება ძებნა, მაშინ ხდება ხსენებული პირის ყოველგვარი ახსნა-განმარტების გარეშე დაკავება, რაც არის 24-საათიანი, უნდა გაიმართოს სასამართლო პროცესი, სადაც სასამართლო მიიღებს გადაწყვეტილებას, პირი გადაეცეს თუ არა საქართველოს, მოხდეს თუ არა პირისთვის პატიმრობის შეფარდება ან სხვა რაიმე აღმკვეთი ღონისძიების გატარება, იქნება ეს შინაპატიმრობა, გაუსვლელობის ხელწერილი, გირაო თუ ასე შემდეგ. ამის შემდეგ, მხოლოდ სასამართლოს აქვს უფლება განაცხადოს, პირი გადაეცეს თუ არა მომთხოვნ სახელმწიფოს, ამიტომ უკრაინის გენერალური პროკურატურის მომართვა, ალბათ, წმინდა წყლის პოლიტიკური განცხადებაა და არ არის სამართლებრივი დოკუმენტი. გენერალური პროკურატურის ეს განცხადება ნათლად გამოხატავს უკრაინის მმართველი პოლიტიკური ელიტის განწყობას და მათ დამოკიდებულებას სააკაშვილისა და მისი თანაგუნდელებისადმი, რომლებიც ახლა უკრაინაში იმყოფებიან და სხვადასხვა სტრუქტურებში მუშაობენ თანამდებობებზე. ეს არ გამომდინარეობს არც უკრაინის და არც საერთაშორისო სამართლიდან. როდესაც ქვეყანა პირის გადაცემაზე უარს აცხადებს, უარი დასაბუთებული უნდა იყოს სასამართლო გადაწყვეტილებით! კი ბატონო, არ გადმოსცეს დავით კეზერაშვილი და დათა ახალაია, მაგრამ ფაქტი ერთია, რომ ეს მოხდა სასამართლოს დადგენილებით. რადგან ასეთი პასუხებია უკრაინის ხელისუფლების მხრიდან, ამიტომ არსებობს საგარეო საქმეთა სამინისტრო, რომელმაც სააშკარაოზე უნდა გამოიტანოს უმნიშვნელოვანესი საკითხები.
საერთოდ, არ მესმის, ვინ ეკითხება უკრაინის გენერალურ პროკურორს ან უკრაინის პრეზიდენტს, მილიარდერ ფულის ტომარას, უკრაინა გადმოსცემს თუ არა სააკაშვილს საქართველოს?! პოროშენკომ, ჯობია, თავის ხალხს მიხედოს, შიმშილით რომ ეხოცება! სააკაშვილის გადმოცემის საკითხი არის სხვა ქვეყნების სპეცსამსახურების დავალება, რომელსაც ემორჩილება უკრაინის ხელისუფლება, ამიტომ ამის წამალი არსებობს. ისრაელის სახელმწიფოში უამრავი მაგალითია იმისა, როცა დამნაშავეს არ აძლევენ და „მოსადი“ ახორციელებს სპეცოპერაციას, იპარავენ დამნაშავეს და ჩაჰყავთ ისრაელში.
საქართველო ისრაელივით პატარა ქვეყანაა და თავის დროზე, როცა „ვარდების რევოლუციის“ შემდეგ, ადეიშვილთან მქონდა საუბარი, საქართველოში ჩამოყალიბებულიყო „მოსადის“ მსგავსი სამსახური. როგორც წესი, ასეთი ტიპის სამსახური ამართლებს, მაგრამ ადეიშვილმა ამაზე ხელები გაასავსავა, თურმე დაგეგმილი ჰქონიათ, რომ უშიშროება შეერთებოდა შს სამინისტროს.
დღეს უნდა ეყოს უშიშროების სამსახურს იმის ძალა, რომ განახორციელოს მსგავსი ტიპის სპეცოპერაცია, სააკაშვილთან, ადეიშვილთან, კეზერაშვილთან თუ ახალაიასთან დაკავშირებით.
- მიხეილ სააკაშვილზე, რომელსაც ბრალი ედება სისხლის სამართლის უამრავ დანაშაულში, ექსტრადიციის მოთხოვნის დაკმაყოფილების შემთხვევაში, რატომ დაირღვევა 1950 წლის, ადამიანის უფლებათა და ძირითადი თავისუფლების დაცვის კონვენციის მოთხოვნები, რისი შიშიც ასე ძალიან აქვს უკრაინის პროკურატურას?
- ამ კონვენციაში საუბარია, რომ ექსტრადიცია შეიძლება არ განხორციელდეს, თუ დგინდება, რომ პირის მიმართ შესაძლებელია განხორციელდეს პოლიტიკური დევნა. ამიხსენით, ვინ დევნის სააკაშვილს პოლიტიკურად? საქართველოში იყო, ხელი მისთვის არავის უხლია, ვიდრე გამოძიებამ არ დადო საკმარისი მტკიცებულებები, მას თავისუფლად გადაადგილების საშუალება მისცეს, რომ ნდომოდათ პოლიტიკური დევნა, რა სააკაშვილს საქართველოდან გაუშვებდნენ?! სად არის პოლიტიკური დევნა საქართველოში? ყოველდღე ორ-ორი გამამართლებელი განაჩენი გამოდის სასამართლოდან „ნაციონალური მოძრაობის“ წარმომადგენლებზე და ვინმე ამაზე ხმას იღებს? ეს არის შირმა! მე გეტყვით, ეს ვინც გააკეთა, პოროშენკოს ზარის შემდეგ, უკრაინის პროკურატურამ გააკეთა განცადება, პოროშენკოს კი დაურეკეს გარკვეული ქვეყნის სპეცსამსახურებმა და მოსთხოვეს, რომ სააკაშვილს არ გადასცემთ საქართველოს, რადგან სააკაშვილი ამ ეტაპზე საჭიროა იყოს უკრაინის ტერიტორიაზეო.
- ყველა გახმაურებული მკვლელობის კვალი მიდის სააკაშვილის დაჯგუფებამდე, იური ვაზაგაშვილი, ბესო ხარძიანი, რომლის ოჯახის წევრებიც ხელს სააკაშვილის რეჟიმის წარმომადგენლებს ადებენ, ვინც თავის დროზე ამ ადამიანების გაუბედურებასა და წამებაში ლომის წვლილი შეიტანა, მათ შორის არის გია უდესიანი, რომელსაც კიევში „ნაციონალების“ გვერდით ხედავენ… გამოცხადებული მკვლელობის ქრონიკაა საქართველოში - „სამართალი მოიკითხეთ საიქიოში“!
- არ ვარ იმ პრინციპის მომხრე, როდესაც ამბობენ, მოწინააღმდეგე ძლიერია და ჩვენ რა ვქნათ? მოწინააღმდეგე კი არ არის ძლიერი, ჩვენ ვართ სუსტები და რადგან სუსტები აბა, ვინ ჩამოიყვანს მიშას უკრაინიდან, „პატრიოტთა ალიანსი“, თუ ქართული სპეცსამსახური? ვართ, ნებისმიერი დიდი სახელმწიფო საქართველოს არც კი მოიხსენიებს, აღარავის ახსოვს აგვისტოს ომი, ვიზებს გვპირდებოდნენ და ახლა გვეუბნებიან, სულ კარგად იყავით, ჩვენ თვითონ არ ვართ მოწოდების სიმაღლეზე, ამიტომ გვაკადრებენ იმას რაც საკადრებელი არაა. თუ მაგარი ხარ, პასუხი გაეცი. დიახ, ჩვენ ვართ სუსტები და ვერ შევქმენით სახელმწიფოებრიობა, ჩვენ ვერ გავართვით ჩვენს პრობლემებს თავი და შესაბამისადაც გვექცევიან ისე, რაც დავიმსახურეთ, აბა, სომხეთსა და აზერბაიჯანს თუ გაუბედავენ ამდენს. რა გახდა ამ სააკაშვილის ჩამოყვანა, ისრაელის სპეცსამსახურები თუ იყენებენ დღემდე ამ ღონისძიებას, შენ რატომ ვერ იყენებ, გაუშვი სპეცსამსახურები და ჩამოიყვანე, თუ გამართლდება, გამართლდეს! ჩვენ ვთამაშობთ სახელმწიფოებრიობანას.
იმ უკრაინელების გამკვირებია, ქართველები რომ წაიყვანეს, მაჩვენეთ ერთი სფერო 25 წლის მანძილზე, სადაც საქმეს თავი გავართვით. იმ უკრაინამ იცის, რომ მათი პოზიციის საპირწონე არაფერი გვაქვს, ვერანაირ სანქციას ვერ განვახორციელებთ, არ გვთვლის სახელმწიფოდ და გვექცევა ისე, როგორც ვიმსახურებთ! სააკაშვილზე ჯერ არ გამოცხადებულა ინტერპოლით საერთაშორისო ძებნა, ჯერ არ არის ინტერპოლის პასუხი, თუკი შემდეგაც არ გადმოგვცემს უკრაინა სააკაშვილს, მერე უკვე სხვა ღონისძიებებია გასატარებელი.
————–
პოსტსკრიპტუმი: თუკი საქართველოს ხელისუფლება და სპეცსამსახურები უკრაინიდან დამნაშავეთა ჩამოყვანის სპეცოპერაციას ვერ, ან არ ატარებენ, მაშინ ამის გაკეთების სურვილს „პატრიოტთა ალიანსი“ გამოთქვამს, რომლის ლიდერმა, ირმა ინაშვილმა ორი დღის წინ სკანდალური გაცხადება გააკეთა:
„ქვეყანაში უკვე დამკვიდრდა ორგანიზებული ტერორიზმი. კლავენ ადამიანებს და არ ვიცით, ვინ არის დამკვეთი. პირადად სააკაშვილისა და ადეიშვილის კრიმინალების ჯგუფს ვადებ ხელს, რომლებიც უკრაინიდან გეგმავენ იმ ადამიანების მკვლელობებს, რომლებიც საუბრობენ სამართლიანობის აღდგენაზე… იგეგმება კიდევ 3-4 ადამიანის მკვლელობა, მათ შორის, მეც მემუქრებიან… ხელისუფლების პირველი პირების ნება თუ იქნება, „პატრიოტთა ალიანსი“ უზრუნველყოფს სააკაშვილისა და ადეიშვილის ჩამოყვანას“.
როგორ აპირებს ამის განხორციელებას „პატრიოტთა ალიანსი“, უცნობია, მაგრამ ფაქტია, შეთავაზება საჯაროდ გაჟღერდა.
„რეზონანსი“, 02 აპრილი, 2015 წელი
ირმა ინაშვილი სააკაშვილის ჩამოსაყვანად სპეცოპერაციას ითხოვს
„ვსაუბრობ იმ მეთოდზე, რომელიც ისრაელმა გამოიყენა ნაცისტების დასაკავებლად მთელ მსოფლიოში“
თიკო ოსმანოვა
(შემოკლებით)
“კიევიდან თბილისში ტერაქტები იგეგმება,” – აცხადებს “პატრიოტთა ალიანსის” ერთ-ერთი ლიდერი ირმა ინაშვილი და მთავრობისგან სააკაშვილისა და ადეიშვილის საქართველოში ჩამოსაყვანად ყველა მეთოდის გამოყენებას ითხოვს, თუნდაც ისეთის, რასაც ისრაელის სპეცსამსახურები მიმართავდნენ-ხოლმე. „თუ ხელისუფლებას არ შეუძლია ამის გაკეთება, თქვას, და ჩვენ ვიმოქმედებთ შესაბამისად“, – უთხრა მან „რეზონანსს“. ირმა ინაშვილი გუშინ პროკურატურაშიც მივიდა და მი ხელთ არსებული ინფორმაცია მიაწოდა. ამბობს, კომპეტენტურმა წყარომ უთხრა, რომ ტერაქტს საქართველოს ექსპრეზიდენტი მიხეილ სააკაშვილი და იუსტიციის ყოფილი მინისტრი ზურაბ ადეიშვილი გეგმავენ. ინაშვილის თქმით, თუ ხელისუფლება მიხეილ სააკაშვილსა და სხვა ყოფილი მაღალჩინოსნების საქართველოში ჩამოყვანისთვის ყველა მექანიზმს არ გამოიყენებს, მკვლელობები გაგრძელდება.
კონკრეტულად რა ინფორმაციას ფლობს „პატრიოტთა ალიანსის“ ერთ-ერთი ლიდერი და რა კითხვები დაუსვეს პროკურატურაში, ამ და სხვა საკითხებზე „რეზონანსი“ ირმა ინაშვილს ესაუბრა.
- პროკურატურა დაინტერესდა იმ განცხადებასთან დაკავშირებით, რომელიც შესაძლო მკვლელობებთან დაკავშირებით საჯაროდ გავავრცელე. მივეცი ჩვენება, გავუზიარე ის ინფორმაცია, რასაც ვფლობდი, თუმცა გამოძიების ინტერესებიდან გამომდინარე, სხვა დეტალებს ვერ ვიტყვი.
– და რამდენად სანდო ინფორმაცია გაქვთ?
– წყაროების გადამოწმება პრობლემა არ არის. სამართალდამცავ სტრუქტურებს იმიტომ მივეცი ჩვენება,რ ომ მოხდეს ამის გადამოწმება. ვაზაგაშვილის აფეთქებას რომ სხვა მკვლელობებიც მოჰყვებოდა, ამას ადრევე ვამბობდი, ამიტომ უნდა ვიყოთ ფხიზლად. საქმე გვაქს ორგანიზებულ ტერორისტებთან – ეს იურიდიული ფაკულტეტის პირველი კურსის სტუდენტსაც ესმის. ამიტომ აუცილებელია ამ მიმართულებით საგამოძიებო სამუშაოს ჩატარება.
(…)
– თქვენ ორი დღის წინ პროკურატურას გონივრული ვადა მიეცით, წინააღმდეგ შემთხვევაში სამოქალაქო დაუმორჩილებლობის გამოცხადებას აპირებთ, კონკრეტულად როდის გეგმავთ რუსთაველზე კარვების გაშლას?
– ჩვენ ხელისუფლებას მივეცით ვადა და ვეუბნებით, თუ არ ვნახავთ შედეგს, რომ ისინი იღვწიან სააკაშვილის, ადეიშვილის დასაპატიმრებლად და ჩამოსაყვანად, არ იყენებ ამ მიმართულებით მსოფლიოში აპრობირებულ ყველა მეთოდს, იჭერენ მხოლოდ შემსრულებლებს და არ გადიან დამკვეთებზე, მაშინ ჩვენ ვეუბნებით, რომ მკვლელობები გაგრძელდება, იმიტომ, რომ მთავარი დამკვეთები სხედან კიევში. ჩვენმა ხელისუფლებამ უნდა გამოაცხადოს ტერორიზმის წინააღმდეგ ბრძოლის კამპანია. ასე უნდა აისახოს დასავლეთში, აშშ-ში და სწორედ ამ კომპანიის პარალელურად სამართლებრივი გზები უნა გამოინახოს მათ ჩამოსაყვანად. ეს გზები აპრობირებულია მსოფლიოში, მაგალითადკი ისრაელი გამოგვადგება.
თუ ვნახეთ, რომ ხელისუფლება ამას არ აკეთებს ჩვენ არ დავუშვებთ ქვეყანაში ადამიანების მკვლელობებს და მივმართავთ რადიკალურ ზომებს. ეს იქნება სრულფასოვანი დაუმორჩილებლობა მთელი ქვეყნის მასშტაბით და ამას დავიწყებთ რუსთაველიდან, რომელსაც აუცილებლად გადავკეტავთ.
– ულტიმატუმის ვადა როდის იწურება, ცნობილია, რომ უკრაინა საქართველოსთვის სააკაშვილის გადმოცემაზე უარს ამბობს.
– არ ვსაუბრობ ამ ტიპის გადმოცემაზე. ვიცით, რომ უკრაინა არ გადმოსცემს საქართველოს სააკაშვილს. ვსაუბრობ იმ მეთოდზე, რომელიც ისრაელმა გამოიყენა ფაშისტების და ნაცისტების დასაკავებლად მთელ მსოფლიოში. ეს არის სპეცსამსახურებისთვის აპრობირებული მეთოდი.
– და ამ მეთოდის გამოყენებისთვის სამართლებრივი საფუძველი არსებობს?
– აუცილებლად გამოიღებს ეს შედეგს და უფრო მეტს გეტყვით, თუ ხელისუფლებას არ შეუძლია ამის გაკეთება, თქვას და ჩვენ ვიმოქმედებთ შესაბამისად.
