„რეზონანსი“: ინტერვიუ მაია ფანჯიკიძესთან: “არსებობს გეგმა საქართველოს ნატოში გაწევრიანებისა“
„ახალი თაობა“: „საგარეო პოლიტიკა ტაქსი არ არის, კრსი რომ შეუცვალო“ // რას ერჩიან თავისუფალი დემოკრატები და ზურაბ აბაშიძე ერთმანეთს
„ახალი თაობა“: ინტერვიუ დავით ლორთქიფანიძესთან: „საქართველოს ევროპული კურსი აქვს აღებული“
„ახალი თაობა“: ინტერვიუ აკაკი ასათიანთან: „სააკაშვილი უკრაინის რეფორმებს გადაჰყვება“
———————–
„რეზონანსი“, 2 მარტი, 2015 წელი
ინტერვიუ მაია ფანჯიკიძესთან: “არსებობს გეგმა საქართველოს ნატოში გაწევრიანებისა“
იაგო ნაცვლიშვილი
(შემოკლებით)
ზურაბ აბაშიძის განცხადებამ ქვეყანა დააზარალა ნატოსთან ინტეგრაციის კუთხით, – ამბობს ყოფილი საგარეო საქმეთა მინისტრი, “თავისუფალი დემოკრატების” ერთ-ერთი ლიდერი მაია ფანჯიკიძე “რეზონანსთან” ინტერვიუში. მისი განცხადებით, ალიანსში ინტეგრაციის კუთხით, ნატოში არიან სკეპტიკოსები, რომლებიც ახლა ზურაბ აბაშიძის განცხადებას არგუმენტად გამოიყენებენ, რომ საქართველოშიც არ აქვთ მოლოდინი, რომ ახლო მომავალში ქვეყანა ალიანსის წევრი გახდებაო
მაია ფანჯიკიძე: დე-ფაქტო პრემიერის პირად წარმომადგენელს ვურჩევ, რომ ირგვლივ მიმოიხედოს და მიხვდება, სად არის არაკომპეტენტურობა, სად არაპროფესიონალიზმი და სად არის ყველაფერი დანარჩენი სხვა, “თავისუფალი დემოკრატებისთვის” გადაბრალებას რომ ცდილობს.
„რეზონანსი“: ზურაბ აბაშიძის შეფასება გამოიწვია თქვენი პარტიის ლიდერების განცხადებებმა, რომ პრემიერის სპეცწარმომადგენელი საგარეო საქმეთა დე-ფქტო მინისტრიაო. რაში გამოიხატება ეს?
მაია ფანჯიკიძე: მიმაჩნია, რომ მან გადააჭარბა იმ კომპეტენციას, რომელიც მას ჰქონდა მინიჭებული აბაშიძე-კარასინის დიალოგის ფორმატში. მან ისეთი განცხადებები გააკეთა, რომლის მანდატიც მას არ აქვს. იმ საქმეებში ჩაერია, რაც მთავარია, მან ეს გააკეთა საქართველოს ინტერესების დაზიანებით. ის განცხადებები, რომელიც მან გააკეთა საქართველოს ნატოში ინტეგრაციის შესახებ, ეს აზიანებს ქვეყანას და სიამოვნებს რუსეთს.
„რეზონანსი“: ალბათ, „რია „ნოვოსტისათვის“ მიცემულ ინტერვიუს გულისხმობთ. ეს განცხადება მან განმარტა და თქვა, რომ ახალი არაფერი უთქვამს და ის თქვა, რაზედაც ნატოს წარმომადგენლები საუბრობენ…
მაია ფანჯიკიძე: სჯობდა, მას ეს განმარტება არ გაეკეთებინა. პირიქით, მას უნდა შეერბილებინა ის განცხადება, რაც ქართულ მედიასთან გააკეთა. უნდა დაფიქრებულიყო იმ პრობლემაზე, რაც ამ განმარტებით გააჩინა. ეს არ არის მხოლოდ “თავისუფალი დემოკრატების” აზრი. პრეზიდენტით დაწყებული რიგითი მოქალაქეებით დამთავრებული ყველა ერთნაირად ფიქრობს და ყველამ ერთნაირად აღიქვა ეს განცხადება. ამაში დარწმუნებული ვარ. თუ შენ ხარ მთავრობის წარმომადგენელი და შენი ქვეყნის და შენი ხალხის მიზანი ნატოში გაწევრიანებაა, მაშინ შენ არ უნდა გააკეთო ასეთი განცხადებები, როცა იცი, რომ არსებობენ სკეპტიკური ქვეყნები, რომლებიც შემდეგ უკვე ამ განცხადებას არგუმენტად გამოიყენებენ, რომ თვითონ საქართველოშიც იციან, ნატოში გაწევრიანება ასეთი იოლი არ არის და მოთმინებით ელოდება იმ დროს, როდესაც ეს შესაძლებელი გახდებაო. აქ საუბარია იმაზე, თუ რა განწყობას, რა დამოკიდებულებას გამოხატავ საქართველოსთვის ამ სასიცოხლოდ მნიშვნელოვანი მიზნის მიმართ. ეს განცხადება იყო კაპიტულანტური, რუსეთისთვის მაამებლური და საქართველოს დამაზიანებელი. დიახაც, რომ არსებობს გეგმა, რომლის მიხედვითაც, უნდა მოხდეს საქართველოს ნატოში გაწევრიანება. დიახაც, არსებობს გეგმა, რომლის მიხედვითაც უნდა მოხდეს ნატო-საქართველოს ერთობლივი ინფრასტრუქტურის მოწყობა, რომელშიც გაიწვრთნებიან არა მხოლოდ ქართველი ჯარისკაცები, არამედ ნატოს წევრებიც. რასაკვირველია, ამ ცენტრს ექნება სამხედრო ელემენტი. ეს საკითხი საქართველოსთვის ხვალ და ზეგ უნდა გადაწყდეს. წლის ბოლოს არის მინისტერიალი, სადაც გადაწყვეტილებების მიღება მოხდება. მომავალ წელს არის ნატოს ვარშავის სამიტი, რომლისგანაც ძალიან ბევრს ველოდებოდი, როდესაც ხელისუფლებაში ვიყავი და უელსის სამიტიდან დავბრუნდი.
„რეზონანსი“: ახლა აღარ გაქვთ ეს მოლოდინი?
მაია ფანჯიკიძე: თუ ასე გაგრძელდება, მაშინ მე სკეპტიციზმი გამიჩნდება საქართველოს ნატოში ინტეგრაციასთან დაკავშირებით.
„რეზონანსი“: თქვენი აზრით, ზურაბ აბაშიძის განცხადება ეს მისი მხრიდან დაშვებული შეცდომა იყო თუ მიზანმიმართული კამპანია?
მაია ფანჯიკიძე: ამან უკვე სისტემატური ხასიათი მიიღო. ეს რომ შეცდომა ყოფილიყო, მაშინ იგი არ იქნებოდა რუსული მედიით გამყარებული განცხადება. არ იქნებოდა გამყარებული მისთვის სეუფერებელი განცხადებებით, რომლითაც პირად შეურაცხყოფაზეა გადმოსული. მიმაჩნია, რომ ეს იყო სისტემური და მიზანმიმართული ძალიან მნიშვნელოვანი პოზიციის გაჟღერება.
„რეზონანსი“: მმართველ გუნდში ამბობენ, რომ ერთი მაგალითი მაინც დაუსახელეთ, როდესაც დასავლელი პარტნიორები შეშფოთებულნი არიან იმით, რომ საქართველოს მიერ არებულ კურსს საფრთხე ემუქრება…
მაია ფანჯიკიძე: ჩვენ არასოდეს გვითქვამს, რომ საქართველომ გადაუხვია კურსს. ვერ გადაუხვევს კურსს, იმიტომ რომ ეს მხოლოდ კანცელარიაში მყოფი ადამიანების გადასაწყვეტი საკითხი არ არის, მაგრამ ამ კურსის შენელების საფრთხეს ჩვენ ვხედავთ. ამ საკითხზე გარკვეული საუბარი ნამდვილად გვქონია დასავლელ პარტნიორებთან. მხოლოდ 4 თვეა, რაც ხელისუფლება დავტოვეთ და ახლა იწყება იმპლემენტაციის ეტაპი, რომლის მიღწევაც ჩვენი ხელისუფლებაში ყოფნის პერიოდში მოხდა. მომდევნო თვეები გამოაჩენს ამას კარგად. ამაზე საუბარი კი აღარ დაგვჭირდება, არამედ ფაქტები იქნება. იმედი მაქვს, რომ ხელისუფლება ამას ვერ გაბედავს.
„რეზონანსი“: გვითხარით, ვისთან გქონდათ საუბარი, რომლებიც დასავლური საგარეო კურსი დან გადახვევასა და ამასთან დაკავშირებულ საფრთხეს ხედავენ?
მაია ფანჯიკიძე: ადრესატებს ვერ დაგისახელებთ. ვერც იმას გეტყვით, ევროპელ თუ ამერიკელო პარტნიორებთან გვქონია ამაზე საუბარი. ჩვენ მეგობრებთან დიალოგის ნაკლებობას ნამდვილად არ ვუჩივით.
„რეზონანსი“: 21 მარტს “ნაცმოძრაობა” მთავრობის გადაყენების მოთხოვნით აქციას მართავს, თქვენც ხომ არ აპირებთ აქციაზე მისვლას?
მაია ფანჯიკიძე: ჩვენ არ მივალთ. ეს არის “ნაცმოძრაობის” პარტიული მიტინგი. თუკი როდისმე ქუჩის აქციაზე ვყოფილვარ, ეს ყოფილა “ნაცმოძრაობის” საწინააღმდეგო აქციაზე. აბსოლუტურად წარმოუდგენელია, რომ მე “ნაცმოძრაობის” აქციას შევუერთდე, ისევე როგორც ჩემი პარტიის წევრები”.
„ახალი თაობა“, 3 მარტი, 2015 წელი
„საგარეო პოლიტიკა ტაქსი არ არის, კრსი რომ შეუცვალო“
რას ერჩიან თავისუფალი დემოკრატები და ზურაბ აბაშიძე ერთმანეთს
შორენა გონგლაძე
რამდენიმე დღის წინ თავისუფალი დემოკრატების ლიდერმა ირაკლი ალასანიამ რუსეთთან ურთიერთობის საკითხებში საქართველოს პრემიერ-მინისტრის სპეციალურ წარმომადგენელ ზურაბ აბაშიძეზე საზოგადოებრივი კონტროლის დაწესება მოითხოვა.
ამის საპასუხოდ, ზურაბ აბაშიძემ თავისუფალ დემოკრატებს ურჩია, სამოქალაქო კონტროლი თავიანთ არაკომპეტენტურობას დაუწესონ. აბაშიძის თქმით, ნატო-ში გაწევრიანების თაობაზე მის განცხადებებზე აჟიოტაჟი ნაციონალებს თავისუფალმა დემოკრატებმა დაასწრეს.
ზურაბ აბაშიძე:
– მათ ჩემზე კარგად იციან, რომ ალიანსში საქართველოს წევრობა დღევანდელი და ხვალინდელი პერსპექტივა არ არის, მაგრამ რაღაცით ხომ უნდა მოაწონონ საზოგადოებას თავი. თეზისები,რაც აღნიშნულ კომენტარში ჩამოვაყალიბე, სრულად აისახა 25 თებერვალს ნატო-ს გენერალური მდივნის წარმომადგენლის ჯეიმს აპატურაის განცხადებაში. კერძოდ, მან დაადასტურა, რომ საქართველო მიზანმიმართულად მიემართება ნატო-ში გაწევრიანებისკენ, მაგრამ სრული წევრობის შესახებ ახლა კონკრეტული პროგნოზის გაკეთება რთულია; ნატო არ გეგმავს საქართველოში თავისი სამხედრო ინფრასტრუქტურის ან ბაზის განლაგებას, საუბარია ერთობლივ საწვრთნელ ცენტრზე, რაც საქართველოს კუთვნილება იქნება; ნატო-საქართველოს თანამშრომლობა არავის წინააღმდეგ არ არის მიმართული, საქართველომ კი აუცილებლად უნდა გააგრძელოს დიალოგი რუსეთთან.
ზურაბ აბაშიძეს აინტერესებს, რატომ არ უპასუხეს მისმა ოპონენტებმა ბატონ აპატურაის ამ კომენტარებს და რატომ არ შევიდნენ მასთან პოლემიკაში.
– რატომ არ უწესებენ „სამოქალაქო კონტროლს“ თავიანთ არაკომპეტენტურობას? – კითხულობს აბაშიძე, – ასეთი უსაფუძვლო აჟიოტაჟით ისინი განა არ იფუჭებენ ავტორიტეტს შიგნით და გარეთ? ვფიქრობ, რომ იფუჭებენ და სწორედ ამ პოზიციაში დაზიანდებიან პოლიტიკურად გამუდმებით, რომელიც ყველაზე დაცული ჰგონიათ.
ზურაბ აბაშიძე ალექსი პეტრიაშვილსაც გამოეხმაურა და მას იუმორი შეუქო.
– მას შემდეგ, რაც მთავრობიდან წავიდა, ეტყობა, მწვავედ განიცდის ნოსტალგიას მინისტრის პოსტის მიმართ და ქვეცნობიერად ამას სხვასაც მიაწერს. ისე, უცნაური ხალხი არიან ეს ჩვენი ოპონენტები. იმ დღემდე, სანამ მთავრობაში იყვნენ, საქართველოს ევროატლანტიკურ კურსს არაფერი ემუქრებოდა. იმავე დღესვე კი, როცა მთავრობას დატოვეს, თურმე ეს კურსი რადიკალურად შეიცვალა. თითქოს საგარეო კურსი სამარშრუტო ტაქსი იყოს, – განაცხადა ზურაბ აბაშიძემ.
აბაშიძის თქმით, მის კომენტარებში სკანდალური ან პრინციპულად ახალი არაფერი ყოფილა, ამიტომ, მავანთა დარდი, რომ ზურაბ აბაშიძე სხვათა კომპეტენციებში ჩაერია, მათი უცოდინარობის მორიგი დასტურია. ამასთან, ზურაბ აბაშიძე კოლეგა ოპონენტებს მისი წიგნის – „ნატო და საქართველო“ წაკითხვას სთავაზობს, რომელიც ნატო0ს ყოფილი გენერალური მდივნის, რობერტსონის წინასიტყვაობით გამოიცა.
***
ზურაბ აბაშიძის განცხადებას თავისუფალი დემოკრატების ერთ-ერთი ლიდერი ალექსი პეტრიაშვილი გამოეხმაურა. ყოფილი სახელმწიფო მინისტრის განცხადებით, ზურაბაბაშიძე, დე ფაქტო პრემიერ ბიძინა ივანიშვილის ხელში, საქართველოს ნატო-ში გაწევრიანების შეფერხებს ინსტრუმენტად იქცა.
ალექსი პეტრიაშვილი::
– ზურაბ აბაშიძე, დე ფაქტო საგარეო საქმეთა მინისტრი, იქცა დე ფაქტო პრემიერის, ბიძინა ივანიშვილის ხელში ინსტრუმენტად საქართველოს ნატო-ში გაწევრიანების შეფერხების თვალსაზრისით. ადამიანურად ამაზე ძალიან ვწუხვარ, ვინაიდან როგორც საქმიანი, ისე მეგობრული ურთიერთობები გვაკავშირებდა. როგორც ჩანს, ბატონ აბაშიძეს ძალიან მძიმე დრო დაუდგა, ვინაიდან ასეთ კომენტარებს აკეთებს. ეს განპირობებულია რუსეთის მხრიდან გაძლიერებული წნეხით, როგორც პირადად აბაშიძეზე, ისე მის უშუალო კურატორ ბიძინა ივანიშვილზე.
პეტრიაშვილის თქმით, ღიმილის მომგვრელია, როდესაც ამ ხელისუფლების წარმომადგენელი ვინმეს კომპეტენტურობას კითხვის ნიშნის ქვეშ აყენებს. რაც შეეხება ზურაბ აბაშიძის განცხადებას იმის შესახებ, რომ მის კომენტარებში ახალი და სკანდალური არაფერი ყოფილა და იგივე პოზიცია გაიმეორა ნატო-ს გენერალური მდივნის სპეციალურმა წარმომადგენელმა ჯეიმ აპატურაიმ, ალექსი პეტრიაშვილის თქმით, სულ რომ ასე იძახონ ალიანსის წარმომადგენლებმა და ნატო-ს წევრმა ქვეყნებმა, იმ ქვეყნის მთავრობის წარმომადგენლის მიერ, რომლის მთავარი პრიორიტეტი ნატო-ში გაწევრიანებაა, მსგავსი განცხადება, ყველაფერს რომ თავი დავანებოთ, არაკომპეტენტურობაა. – წლის ბოლოს ბრიუსელში ნატო-ს მინისტერიალია, მომავალ წელს ნატო-ს სამიტია ვარშავაში, სადაც უმნიშვნელოვანესი გადაწყვეტილებები უნდა იქნას მიღებული. წელს უნდა გაიხსნას ნატო-ს საწვრთნელი ცენტრი საქართველოში. ამ ფონზე მთავრობის წარმომადგენლისგან გაკეთებული განცხადება იყო ძალიან დამაზიანებელი ჩვენი ქვეყნის სტრატეგიული მიზნების განხორციელებისთვის და ძალიან მაამებლური იმ ქვეყნის სტრატეგიული მიზნებისთვის, რომელსაც საქართველოს ტერიტორიების 20 % აქვს ოკუპირებული, – განაცხადა ალექსი პეტრიაშვილმა.
„ახალი თაობა“, 3 მარტი, 2015 წელი
ინტერვიუ დავით ლორთქიფანიძესთან: „საქართველოს ევროპული კურსი აქვს აღებული“
შორენა მარსაგიშვილი
ინტერვიუში პარლამენტის წევრი უმრავლესობიდან დავით ლორთქიფანიძე საქართველოს საშინაო და საგარეოპოლიტიკურ საკითხებზე საუბრობს.
გთავაზობთ ამონარიდს:
- თქვენი კოლეგების ნაწილი არ გამორიცხავს, რომ „ნაციონალები“ თბილისში მეორე მაიდნის მოწყობას შეეცდებიან. ამაზე რას ფიქრობთ?
- თბილისური მაიდანი არ გამოვა. კიევში მაიდანი ქვეყნის საგარეო კურსისი ცვლილებას უკავშირდებოდა, საქართველოში ასე არ არის.
- თუმცა გარკვეული ძალები აცხადებენ, რომ საქართველომ ევროპულ კურსს გადაუხვიაო…
- რაში გამოიხატება კურსიდან გადახვევა? ევროპასთან ასოცირების ხელშეკრულებას მოვაწერეთ ხელი და ევროპული კურსიდან როგორ გადავუხვევდით. საქართველოს ევროპული კურსი აქვს აღებული, ამასთან, ჩვენმა სახელმწიფომ უნდა აწარმოოს ეროვნული და ჯანმრთელი სამეზობლო პოლიტიკა. მეზობლებთან ნორმალურ ურთიერთობებს თუ არ დაამყარებ, ვერანაირ პრობლემას ვერ მოაგვარებ.
- ნორმალური ურთიერთობის დამყარება რუსეთსაც ეხება?
- პირველ რიგში რუსეთთან უნდა მოვაგვაროთ პრობლემები. ეს მოსკოვის დიქტატის ქვეშ მოქცევას და მისი მოთხოვნების შესრულებას არ გულისხმობს. თანასწორუფლებიან პირობებში უნდა დავსხდეთ და განვიხილოთ ის პრობლემები, რომლებიც ენი ორი ქვეყნის ურთიერთობაშია. არ არსებობს მაგალითი იმისა, რომ კონფლიქტში მყოფ ქვეყანასთან დიალოგის გარეშე პრობლემა მოგვარებულიყოს. ნაცმოძრაობის“ მიზანიც სწორედ ესაა, რომ ეს პრობლემა არ მოგვარდეს. მაგათი შიშით კი დიალოგზე უარს არ ვიტყვით.
„ახალი თაობა“, 3 მარტი, 2015 წელი
ინტერვიუ აკაკი ასათიანთან: „სააკაშვილი უკრაინის რეფორმებს გადაჰყვება“
ნონა ცაბაძე
ინტერვიუში ტრადიციონალისტთა კავშირის ლიდერი აკაკი ასათიანი საქართველოს საშინაო და საგარეოპოლიტიკურ საკითხებზე საუბრობს.
გთავაზობთ ამონარიდს:
– განახლდა აბაშიძე-კარასინის ფორმატი, მოვისმინეთ სხვადასხვაგვარი შეფასებები. ოპოზიცია ყვირის, რომ კურსი ნატოსკენ აღარ მიდის და ასე შემდეგ…
– კომიკური სიტუაციაა. აბაშიძეს კი არ უთქვამს, რომ დღეს და ხვალ არ იქნება ნატოო, ეს თქვეს ობამამ და მერკელმა. პირისპირ საუბარში ნატოს ყველა მაღალჩინოსანი ამას ლაპარაკობს, რომ მინიმუმ 15 წელი თქვენთვის ნატოს კარი არ გაიღებაო. ობამას და მერკელს მოსთხოვონ პასუხი, რაღა ზურაბ აბაშიძეს ეცნენ. ეს თქვეს ობამამ და მარკელმა. რკინიგზაზეა საუბარი, თუკი მართლა აღდგა ეს მონაკვეთი, ეს ძალიან სერიოზული ლაპარაკია. რა არის ამაში ცუდი? თუმცა ჩვენ ჯერ არ ვიცით, რას ითხოვს რუსეთი, სანაცვლოდ რას მივიღებთ.
– როგორი იქნება რუსეთის წინადადებები?
– მათ არ დაუმალავთ და არც მალავენ, კარასინმაც თქვა ეს, რომ ნატოს გაფართოება, ჩვენთან საწვრთნელი ბაზის გახსნა, თავდაცვის სისტემების გაკეთება მათთვის საშიშროებას წარმოადგენს და ამაში არის სიმართლის მარცვალი. საჰაერო თავდაცვის სისტემები, სულ რომ სიამტკბილობაში ვიყოთ ჩვენ და რუსეთი, ქვეყანას მაინც სჭირდება. ამაზე არ მესმის, რატომ კამათობენ, ქვეყანაა და სჭირდება. შეხედეთ, რა ხდება უკრაინაში, საჰაერო ძალებს არ იყენებს რუსეთი. ჩვენთან კი ჰაერით წავაგეთ 2008-ში. საჰაერო დაცვა რომ გვქონოდა, წინააღმდეგობა გაცლებით სერიოზული იქნებოდა. ჩვენ კიდევ ერთხელ უნდა დავაფასოთ ჩვენი ბიჭების გამირობა.
– თქვენ უკრაინა ახსენეთ და რა ხეირს მოუტანენ სააკაშვილი და მისი გუნდი ამ ქვეყანას?
– ძალიან მეეჭვება, რამე სასიკეთო გააკეთონ. იგივე მეთოდების გამოყენება, რაც საქართველოში გააკეთეს, შეუძლებელია. ქართველი ხალხი მიდრეკილია წესიერი და ცივილიზებული ცხოვრებისაკენ. კორუფცია აღმოფხვერითო, ხალხი იყო ამისკენ მიდრეკილი, იმიტომ აღმოფხვრეს, ეს მათი დამსახურება კი არ იყო. იქ რამდენად არის ეს შესაძლებელი, ისეა გამჯდარი, რომ ვერაფერს გეტყვით. სააკაშვილს უთქვამს, ახლა იანუკოვიჩის პერიოდზე უარესი კორუფციააო. კიდევ უარესი იქნება. 41 მილიონიან ქვეყანას, რომელიც სამხედრო წარმოებით მსოფლიოს ხუთეულში შედიოდა, არმია, უბრალოდ, არ აღმოაჩნდა. ამიტომ ეს წარმოუდგენლად რთული ამოცანაა და მე ვფიქრობ, რომ შეუძლებელია და ამ ყველაფერს გადაჰყვებიან სააკაშვილი და ძმანი მისნი იქ.
