„ვერსია“: ინტერვიუ გიორგი ანდრიაძესთან: „ისეთ რამეს ვიტყვი, რაც აქამდე არავის მოუსმენია!“ // „დეკანოზ მამალაძეს ევროპის სასამართლო აუცილებლად გაამართლებს!“ // რატომ ეძახის გიორგი ანდრიაძე „ციანიდის საქმეს“ აბსურდის თეატრს
——
„ახალი თაობა“: ინტერვიუ ავთანდილ დემეტრაშვილთან: „ირაკლი კობახიძე კონსტიტუციის პროექტში ცვლილებებს შეიტანს“
„ახალი თაობა“: ინტერვიუ ზაქარია ქუცნაშვილთან: „მაჟორიტარული სისტემის დატოვება ხალხმა გვთხოვა“ // „ირაკლი კობახიძე თავის განცხადებებზე პასუხს თავად აგებს“
„ახალი თაობა“: ინტერვიუ კახა მიქაიასთან: „ოცნებას“ და „ნაციონალებს“ ერთმანეთისგან ვეღარ ვარჩევ“
„ახალი თაობა“: ინტერვიუ ბეჟან ნათელაშვილთან: „ბიძინა ივანიშვილი პინგვინს უფრო დიდ პატივს სცემს, ვიდრე მთელ „ქართულ ოცნებას“
——
„ახალი თაობა“: ინტერვიუ ალეკო ელისაშვილთან: „ელიავას ბაზრობაზე ხანძრის ხელოვნურად გაჩენის ეჭვს საფუძველი აქვს“
——————-
„ვერსია“, 03-05 ივლისი, 2017 წელი
ინტერვიუ გიორგი ანდრიაძესთან: „ისეთ რამეს ვიტყვი, რაც აქამდე არავის მოუსმენია!“ // „დეკანოზ მამალაძეს ევროპის სასამართლო აუცილებლად გაამართლებს!“ // რატომ ეძახის გიორგი ანდრიაძე „ციანიდის საქმეს“ აბსურდის თეატრს და რა კულუარულ ინფორმაციებს ასაჯაროებს
ვანო პავლიაშვილი
„აფგან მუხთარლის დაჭერაზე ნახევარი საქართველო ყვირის და წივის, საქართველოს იმიჯი შეელახა და სახელი გაუტყდაო. ერთი საცოდავი ჟურნალისტის გამო ქვეყანას სახელი შეელახა და ხუთი თვის განმავლობაში რომ შენს ეკლესიაში სიბინძურე ტრიალებს და პატრიარქის მკვლელობაზე საუბრობენ, ამით სახელი არ ელახება? სად არიან საზოგადოებრივ-პოლიტიკური მოღვაწეები? ვერ ხვდებით, რომ ყველა სადღაც სოროშია შემძვრალი და სირაქლემასავით თავი აქვს ჩაყოფილი, ვითომ ვერ ხედავს, რა ხდება თუ ყველაფერი ეს კოლიზეუმია და სეირს უყურებენ?“ – რიტორიკულად კითხულობს საპატრიარქოს წმინდა ანდრია პირველწოდებულის სახელობის უნივერსიტეტის სამეთვალყურეო საბჭოს წევრი გიორგი ანდრიაძე, რომელმაც შეხვედრა – არც მეტი, არც ნაკლები – ჩეხური ლუდის ბარში დამითქვა. ამ დეტალს, რასაკვირველია, ყურადღება მივაქციე და საუბარიც სწორედ ამ თემით დავიწყე.
- ბატონო გიორგი, ვერასოდეს წარმოვიდგენდი, რომ ადამიანი, რომელიც, ასე ვთქვათ, ეკლესიურად ცხოვრობს, ლუდზე დამპატიჟებდა… რატომ გადაწყვიტეთ, ერთმანეთს ლუდის ბარში შევხვედროდით?
- ჯერ ერთი, სამუშაო დღე არაა და მეცნიერებათა აკადემიაში ჩემი სამუშაო ოთახი დაკეტილია; მეორეც, ლუდი დასავლეთ ევროპის ქრისტიანულ სამყაროში „დაიბადა“. ასე რომ, ეკლესიას სასმელისგან დისტანცირება არ აქვს.
- პატრიარქმა თავის დროზე ლუდით სადღეგრძელოების თქმაც აკურთხა, მაგრამ მიუხედავად ამისა, ჩვენში ლუდით ვინმეს დღეგრძელობა მაინც ცუდ „პონტად“ ითვლება…
- არა, არ ითვლება… ეს არასწორი ტრადიცია თბილისში არაქართული წარმოშობის ელემენტმა დაამკვიდრა. სხვათა შორის, ხევში, საიდანაც პატრიარქია, სადღეგრძელო ლუდით ისმევა და თუ მაგარი ბიჭები არიან, ავიდნენ და ზევით, ხატობაში უთხრან ჩვენს ქართველებს, რომ ლუდით ვინმეს დღეგრძელობა ცუდია.
(…)
- ბატონო გიორგი, პაპიროსი რომ გავაბოლო, შეიძლება?
- კი ბატონო…
- სხვათა შორის, ამას წინათ, როცა პარლამენტში ე.წ. თამბაქოს კანონპროექტი განიხილებოდა, საპატრიარქოს წარმომადგენელმა მოწევა პირდაპირ მკვლელობას გაუთანაბრა…
- ყველაფერს, რასაც ვამბობ, ხომ დაწერთ?
- რა თქმა უნდა…
- მოკლედ, ნებისმიერი რამ, მათ შორის სასმელიც, თუ გადაჭარბებული დოზით მიიღება და ადამიანს ზიანს აყენებს, ცოდვაა. მაგალითად, ლუდი სასარგებლოა, მაგრამ როგორც კი ზომას გადააჭარბებს, ჯანმრთელობას ზიანს მიაყენებს და ამიტომ ცოდვა იქნება.
- მესმის, მაგრამ თუნდაც მოწევის მკვლელობასთან გათანაბრება მცდარი დოგმების კულტივირებაა?
- იცით, როგორაა? ეკლესია მხოლოდ თავისი წევრებისთვის ლაპარაკობს, თორემ მასზე, ვინც ეკლესიის წევრი არ არის, არც მარხვა ვრცელდება და არც სხვა რამე. ასეთი გამოსვლები ეკლესიის გარეთ მდგარ საზოგადოებას აღიზიანებს, რაც გაუგებარია, რადგან ეს იგივეა, საზოგადოების ამ ნაწილმა, მაგალითად, ბუდისტების კრიტიკა დაიწყოს, ძროხის ხორცს რატომ არ ჭამენო… ყველას თავისი რწმენა აქვს…
(…)
- გიორგი ბატონო, მართალია, სატელეფონო საუბრისას გითხარით, რომ საუბარი მხოლოდ ციანიდზე არ მსურდა, მაგრამ მაღალი საზოგადოებრივი ინტერესებიდან გამომდინარე, ამ თემას ვერ გავექცევით. სხვათა შორის, მას შემდეგ რაც ეს სკანდალი აგორდა, ცოდვად არ ჩამითვალოთ და, საახლობლოში ტერმინი - „ნაკურთხი ციანიდი“ დავამკვიდრე…
- ცოდვა არაა. კურთხევის თემაზე ხუმრობა არ შეიძლება, მაგრამ სიტუაცია სასაცილოა და ამ სპექტაკლს სწორედ ამ კუთხით უნდა ვუყუროთ!
- „ციანიდის საქმეს“ სპექტაკლს რატომ უწოდებთ?
- რატომ და, მისი მთავარი მიზანი ეკლესიის დისკრედიტაციაა, თორემ ჩემი აზრით, არავინ არავის კლავდა.
- მოდით, დეტალებში შევიდეთ და მითხარით, ეს სპექტაკლი ვინ დადგა?
- ზუსტად ვერ გეტყვით და პიროვნებებსაც ვერ დავასახელებ, რადგან მათი ვინაობა მხოლოდ ჩემთვის კი არა, შეიძლება, უშიშროების სამსახურისთვისაც უცნობია, მაგრამ ძალიან დიდი ანტიეკლესიური ძალები მოქმედებენ.
- სიტყვამ მოიტანა და, დაკავებული დეკანოზი ხელს სწორედ სპეცსამსახურებისკენ იშვერს და „ციანიდის სპექტაკლის“ „რეჟისორის“ გვარსაც ასახელებს…
- ადამიანი, როცა კუთხეშია მომწყვდეული, ხელს ყველასკენ გაიშვერს, მაგრამ ფაქტია: ჯერ ერთი, ციანიდის გადაცემა არ ფიქსირდება; მეორეც, არ არსებობს მოწმე, რომელიც იტყვის, რომ დეკანოზი მამალაძე ვინმეს კლავდა. ამ საქმის მთელი აბსურდი და პარადოქსი ესაა და შესაბამისად, ჩემთვის სრულიად ნათელია: ეს სპექტაკლი იმ მიზნითაა დადგმული, რომ ამ ფონზე სულ სხვა პროცესები განვითარებულიყო, რომელსაც ე.წ. ციანიდთან კავშირი არ აქვს.
- რას გულისხმობთ?
- მაგალითად, გაიჟღერა, რაღაც სექსუალური ურთიერთობის ფაქტებია და სასამართლო ამიტომ უნდა დავხუროთო. სხვათა შორის, საპატრიარქოს არც სასამართლოს დახურვა მოუთხოვია და არც სარჩელი დაუწერია. საქმე ირაკლი მამალაძის ვიდეოჩანაწერებზე აღიძრა, თუმცა დეკანოზს ირაკლი მამალაძეც ვერ ადებს ხელს, რომ კონკრეტულად ვინმეს კლავდა.
- გამოძიების მთავარი მოწმე, დიახაც, კონკრეტულად ამბობს, უმაღლესი სასულიერო პირის მოწამვლა იგეგმებოდაო…
- აი, მთელი აბსურდის თეატრი სწორედ ესაა _ მოწმე უმაღლეს სასულიერო პირზე საუბრობდა, მაგრამ მერე თემა ქალი თანამშრომლისკენ წავიდა, რომელიც არ ჩივის ანუ ძალიან ბევრი ლაფსუსია და საქართველოს სასამართლომ დეკანოზი მამალაძე რომც გაამტყუნოს, ჩემი აზრით, ევროპის სასამართლო აუცილებლად გაამართლებს.
- არ დაგიმალავთ და, მეორე ანუ დეკანოზთან დაპირისპირებული ბანაკის წარმომადგენელი მეგონეთ…
- ერთი მხარეც და მეორეც სწორედ სპექტაკლის ნაწილია. მე კი თეატრალური ნიჭი არ მაქვს და, შესაბამისად, ვერც ერთ მხარეს ვითამაშებ და ვერც – მეორე.
- არადა, ერთობ თეატრალური გარეგნობა გაქვთ…
- (იღიმის) ეს სუბიექტური შეფასებაა.
- შეიძლება… თქვენი ვარაუდით, „ციანიდის სპექტაკლის“ პრემიერა რამდენ ხანს მზადდებოდა?
- არ ვიცი… შეიძლება, წინა წელს დაიწყო… დიდი ხნის დაგეგმილს არ ჰგავს… ყველაფერი, ჩემი აზრით, ეკლესიაში რევოლუციურ ცვლილებებს უკავშირდება.
- და ეს „რევოლუციური ცვლილებები“ რას ნიშნავს?
- რას და, საქართველოს მართლმადიდებლური ეკლესიის ლიბერალიზაცია უნდათ. შეიძლება, ისეთ რამეს ვამბობ, რაც აქამდე არავის მოუსმენია, მაგრამ ჩვენი სახელმწიფო ყველაფერში ევროატლანტიკურ სამყაროსთანაა ინტეგრირებული, არ დარჩა კანონი, რომელიც არ მიგვიღია, მათ შორის, ანტიდისკრიმინაციული. მხოლოდ ერთნაირსქესიანთა ქორწინების კანონის მიღებაღა დაგვრჩა… ამ ფონზე ჩვენი მართლმადიდებლური ეკლესია ყველა საერთაშორისო ეკლესიური გაერთიანებისგან დისტანცირებულია. მაგალითად, ჩვენი ეკლესია ძველ სტილზეა, ისინი ახალზე. ყველაფერი ეს კი ეკლესიის გარეთმყოფ ძალებში გაღიზიანებას იწვევს და სისტემატურად აპელირება სწორედ ამაზე ხდება. ერთი სიტყვით, უნდათ, ეკლესიაში იდეოლოგიური და მენტალური ცვლილება მოხდეს…
- გიორგი ბატონო, რამდენი ხანია, ეკლესიის წიაღში ხართ?
- 1988 წლიდან.
- რამდენი წლის ხართ?
- 46-ის… ეროვნული მოძრაობის აქტიური და ოფიციალური წევრი, ასევე სტუდენტური ფრთის ხელმძღვანელი ვიყავი. მაშინ ეკლესიასთან ნომინალური შეხება მქონდა. ჩემი რელიგიური ცხოვრება კი 1991 წლიდან დაიწყო. 1993-დან საპატრიარქოს ახალგაზრდული ცენტრის დამფუძნებელი და ხელმძღვანელი ვარ.
- სასულიერო პირობაზე არ გიფიქრიათ?
- მიფიქრია, მაგრამ სასულიერო პირს, ჩემი აზრით, რიგით მართლმადიდებელზე მეტი ზნეობრივი ცხოვრება და ასკეტიზმი მოეთხოვება…
- ასეა თუ ისე, საეკლესიო კანონებში ჩემზე უკეთ ერკვევით. ჰოდა, დავიჯერო, არ დაინტერესდით, მაგალითად, პეტრე ცავაა ან, სულაც, დეკანოზი მამალაძე ძალიან მოკლე დროში როგორ დაწინაურდა?
- დავინტერესდი კი არა, სულ ამაზე ვსაუბრობ.
- არ მგონია, ასეთი თავბრუდამხვევი იერარქიული აღმასვლის უკან დასავლეთი იდგეს…
- დასავლეთზე არაფერი მითქვამს… სხვათა შორის, ნატო-ს შტაბბინაში დელეგაციის წევრად ვიყავი და, საერთოდ, ანტირუსული და ანტისომხური, პოლიტიკურ ნაწილს ვგულისხმობ, გამოსვლებით გამოვირჩევი; ამიტომ მეცინება, ვინმე ანტიდასავლურ თემას რომ მომაწერს ხოლმე.
- შორენა თეთრუაშვილიც საერო პირია…
- დიახ, მაგრამ ჩემი აზრით, ის შავი მუშაა. მისი ადვოკატი არასოდეს ვყოფილვარ, მაგრამ კათალიკოს-პატრიარქმა თავის პირად მდივან-რეფერენტად დანიშნა და ეს ჩემთვის სრულიად საკმარისია, ისეთი მივიღო, როგორიც არის.
- მაშასადამე, საპატრიარქოში შორენას კი არ ჰყავს „ოქროს თევზები“, არამედ თვითონაა ვიღაცის „შავი მუშა“?
- ის პატრიარქის „შავი მუშაა“. შეიძლება, მეგობრის და ან დედა, რომელიც ცოტა ანჩხლია, არ მოგწონდეს, მაგრამ რადგან მეგობარს პატივს სცემ, ყველა, ვინც მის გვერდით დგას, განსაკუთრებით, ქალი უნდა აიტანო. ყოველ შემთხვევაში, მასზე საჯაროდ, ორღობეში არ უნდა ისაუბრო. ყველა ადგილიდან, რაც საპატრიარქოში დამიარსებია, წასვლა ზეწოლის გამო მომიხდა.
- ზეწოლას ვინ და რა ფორმით ახდენდა?
- ვინ და, ჯერ ედუარდ შევარდნაძის მთავრობა ახდენდა პატრიარქზე ზეწოლას, მერე – მიხეილ სააკაშვილის, სამწუხაროდ, ახალი მთავრობაც – საპატრიარქოს უნივერსიტეტიდან დისტანცირებული ვარ, ორი წელია, იქ სამუშაო ოთახი არ მაქვს.
- ესე იგი, უნივერსიტეტიდან მთავრობის წაფითილებით გამოგაგდეს?
- არა… სხვათა შორის, საპატრიარქოს ტელევიზია ჩემი დაარსებულია და უნივერსიტეტიც ჩემი აწყობილი სქემით იმართება… მოკლედ, როცა რაღაც დაპირისპირება იწყება, სიტუაციას ვეცლები ხოლმე, რადგან არ მინდა, პატრიარქი უხერხულობაში ჩავარდეს…
- ბატონო გიორგი, ერთმანეთს, მართალია, პირველად ვხვდებით, მაგრამ მგონი, რაღაცის თქმა გინდათ, თუმცა არ ამბობთ…
- რა თქმა უნდა, არ ვამბობ! პეტრე ცაავა ხომ არ ვარ, გამოვიდე და საპატრიარქოს გარკვეულ პირებთან, მათ შორის, იერარქებთან ჩემს კონფლიქტებზე საჯაროდ ვისაუბრო. ეს ეკლესიას არაფერს მისცემს. რადგან მართალი ვარ, გულს მე მომფხანს და მათ მიწაში ძალიან მარტივად ჩავდებ, მაგრამ ამით ეკლესია დაშავდება!
- ეკლესია ისეც დაშავებულია _ ყველაფერს თავი რომ დავანებოთ, „ციანიდის სკანდალის“ შემდეგ, მხოლოდ სამების შემოსავალი 30 პროცენტით შემცირდა…
- საჯაროდ ვაცხადებ: „ციანიდის საქმის“ მთავარი მიზანი ეს იყო ანუ შემოსავალს არავინ ითვლის, მაგრამ NDI-ს გამოკითხვებით, ეკლესიის რეიტინგი ნახევარჯერ შემცირდა… ამას არც სააკაშვილის რეჟიმი ახორციელებდა და არც დღევანდელი მთავრობა ახორციელებს. ამას კონკრეტული ძალები აკეთებენ, რომელთაც, პირობითად, შეიძლება, ლიბერალური ძალები ვუწოდოთ. ამ ძალებს მხოლოდ ეს მიზანი არ აქვთ.
- აბა, კიდევ რა მიზანი აქვთ?
- „ციანიდის საქმის“ თანმდევია ნარკოპოლიტიკის ლიბერალიზაცია, რომელსაც ჯერ ათი წლის წინ მე ვითხოვდი. საერთოდ, მართლმადიდებლური მსოფლმხედველობა ჩვენი ახალგაზრდობის, ასე ვთქვათ, გარყვნას, ნარკოტიკი იქნება თუ ზნეობრივი ცხოვრება, ხელს უშლის…
- ისე არ გაიგოთ, თითქოს ნარკოტიკის აპოლოგეტი ვარ – მარიხუანაც არ მომიწევია. თქვენ მოგიწევიათ?
- არა, თუმცა სიგარეტს ვეწეოდი…
- ჰოდა, მარიხუანა ან სექსი გარყვნილება რატომაა?
- მარიხუანა ნაკლები გარყვნილებაა, სექსი ზომიერ ანუ ოჯახურ ნაწილში აუცილებელია, სხვა ნაწილში კი ნებისმიერი რელიგიით ცოდვაა. რელიგიური ადამიანისთვის ნებისმიერი ცოდვა გარყვნილებაა. საერთოდ, უნდა ვეცადოთ, რელიგიურმა და არარელიგიურმა საზოგადოებებმა ერთმანეთთან კონსენსუსით ვიცხოვროთ.
- კი ბატონო, ვიცხოვროთ, მაგრამ ხმა დადის, ეკლესიაში „ბევრი და მრავალფეროვანი“ სექსიაო…
- ხმა დადის, თორემ პეტრე ცაავამ ან მაგის მღვდელმა სარიამ ის, რასაც ამბობს, დაამტკიცოს. მხოლოდ ლაპარაკი – სამართლებრივ, ზნეობრივ თუ საეკლესიო კონტექსტში დიდი დანაშაულია. რასაც ამბობ, დაამტკიცე და არავინ არავის დაიცავს! ჭორად მეც გამიგია, რომ ჩემი მეზობელი ცოტა ისე მიდი-მოდის, მაგრამ ამას დამტკიცება უნდა…
- გიორგი ბატონო, შეიძლება, ვცდები, მაგრამ მეჩვენება, რომ ყველა სიტყვას გააზრებულად ამბობთ…
- (იღიმის) ყოველთვის ყველაფერს გააზრებულად ვამბობ.
- ანუ, წეღან შემთხვევით არც ფარული ჩანაწერები ახსენეთ და არც ნარკოტიკები, არა? მოკლედ, სექსს, ნარკოტიკებსა და „ციანიდის საქმეს“ შორის კავშირი არსებობს?
- ყველაფერი ერთმანეთთან კავშირშია!
- მოდით, კარტი ბოლომდე გახსენით…
- რასაც მეკითხებით, გპასუხობთ, თორემ საუბარს კითხვებით „ჭრით“ და სხვადასხვა თემაზე „მახტუნავებთ“…
- ვცდილობ, დაგაბნიოთ და ბევრი საინტერესო გათქმევინოთ…
- დაბნევა რა საჭიროა? თანმიმდევრულად მივდივარ და გეუბნებით: ნარკოტიკების დეკრიმინალიზაციას 10 წლის წინ ვითხოვდი. სხვათა შორის, ამას პატრიარქიც ითხოვდა. ახლაც ამის მომხრე ვარ, მაგრამ დეკრიმინალიზციის ფონზე ჯანსაღი ცხოვრების აქტიური პროპაგანდა უნდა განვითარდეს ანუ პოლიციამ ახალგაზრდას ნარკოტიკი არ უნდა ჩაუდოს და ამით არ გაამწაროს, სწორედ ეს თემა უნდა მოვხსნათ, თორემ ნარკომანიის პროპაგანდა არ უნდა გავწიოთ… მოკლედ, სახელმწიფო ცალი ხელით მარიხუანასა თუ ბიოს მხარდაჭერას ახდენს _ მაგალითად, შუა დიდუბეში არსებობს ღამის კლუბი „ბასიანი“, სადაც ნარკოტიკები იყიდება. ამის ფონზე უნდა, 18-19 წლის ბიჭები ჯარში მონებად წავიდნენ და ღიპიან სამხედროებს ემსახურონ. ეს ანომალიაა და სწორედ ამის გამო შეიქმნა გირჩის მიერ რელიგიური ორგანიზაცია, რომელიც სახელმწიფოს დასცინის.
- მაშასადამე, გირჩის რელიგიურ ინიციატივას მხარს უჭერთ?
- არა, მაგრამ სახელმწიფოზე ზეწოლა უნდა მოხდეს, რომ ჯარში გაწვევის მონობრივი სისტემა შეცვალოს და პროფესიული არმია შექმნას. ამ ფონზე საზოგადოებას უნდა უთხრას, შვილო, არ დაგიჭერ, მაგრამ მარიხუანა კატასტროფააო… სხვათა შორის, საეკლესიო კანონით, თუ ადამიანს ხელს დაადებ და იტყვი, ასეთი და ასეთიაო, უნდა დაუმტკიცო, თორემ შენ თვითონ დაისჯები. მაგალითად, მეუფე პეტრემ ტელევიზიით დამაბრალა, უცხიმო კარაქს ამზადებდა და ქურდიაო. ეს კაცი ეპისკოპოსი აღარაა, რადგან ცილს მწამებს, თუმცა ვერ ამტკიცებს _ კარაქის წარმოებასთან შეხება არ მქონია. ლუდის წარმოება კი მინდა, მაგრამ ამის არც გამოცდილება მაქვს და არც ფული.
(…)
- ეკლესია თავის შვილს _ დეკანოზ მამალაძეს, რომელსაც ბრალი არ დამტკიცებია, რატომ არ იცავს?
- ამაზე კომენტარი გავაკეთე და ხმას არავინ იღებს.
- ასეთი რა თქვით?
- პეტრე ხომ ეპისკოპოსია?
- დიახ, არის.
- მერე, დეკანოზს რატომ არ აზიარებს?
- ანუ, პეტრე ცაავას დეკანოზის ზიარება შეუძლია?
- რა თქმა უნდა, ციხეშიც შევიდა, მაგრამ არ აზიარა, თემა გაწელა და ისე გამოჩნდა, აი, საშინელი ეკლესია საცოდავ მღვდელს არ აზიარებსო. მეუფე იაკობს „აწვებიან“, აზიარეო, მაგრამ მეუფე იაკობი ფიქრობს, ეს კაცი დამნაშავეაო და როგორ აზიარებს? მეუფე პეტრეს დეკანოზის უდანაშაულობის სჯერა. ჰოდა, ამხელა მიტროპოლიტი კაცია, შევიდეს და აზიაროს.
- გიორგი ბატონო, გისმენთ და ძალიან დავიბენი - ვერ გავიგე, საპატრიარქოში ვინ ვისი მომხრე და მოწინააღმდეგეა…
- თქვენ კი არა, მთელი საზოგადოებაა დაბნეული.
- მარტივად მითხარით: საპატრიარქოში რამდენი კლანია?
- არანაირი კლანი არაა.
- შეიძლება, მაგრამ პეტრე ცაავა და მღვდელი სარია ერთ ფრთას წარმოადგენენ, მეუფე იაკობი - მეორეს. შორენაც მეორე კლანშია?
- შორენა კლანში კი არა, როგორც ჩანს, პატრიარქზეა მიბმული.
- ანუ?
- ანუ ის, რომ ამ შორენას აწვებიან, აწვებიან, მაგრამ პატრიარქი არ ათავისუფლებს.
- გამაგებინეთ: შორენა „გევასებათ“ თუ არა?
- რას ნიშნავს, „მევასება“ თუ არა? ამის თქმა არ მიყვარს, მაგრამ პატრიარქს თითქმის ვაღმერთებ და მის გვერდში მდგომ ყველა ადამიანს პატივს ვცემ.
- მესმის, მაგრამ თუკი ამ ადამიანთან დაკავშირებით კითხვები არსებობს, პატივი როგორ უნდა სცეთ?
- ასეთ დროს, ძმაკაცთან უნდა მიხვიდე და უთხრა, შენს გვერდით მდგარი ქალი -დედაშენი, შენი და ან დეიდაშენი ასეთ და ასეთ რაღაცას აკეთებსო და თუ ამას ვერ მოაგვარებს, მაშინ ძმაკაცს თავი უნდა გაანებო…
- წეღან უნდა მეკითხა და დამავიწყდა: თუკი „ციანიდის საქმე“ სპექტაკლია, მთავარ „როლზე“ დეკანოზი მამალაძე რატომ „დაამტკიცეს“?
- ამას რა მნიშვნელობა აქვს? შეიძლება, ვინმე სიკინჭილაშვილი ყოფილიყო…
- ისიც რამეზე ხომ არ მიანიშნებს, რომ „ციანიდის საქმის“ მთავარი ფიგურანტები მოგვარეები არიან?
- ეს დეტალები არ ვიცი…
- ჰო, მართლა: თავის დროზე საპატრიარქოს ტელევიზიის დირექტორად მეუფე პეტრეს დანიშვნას შორენა თეთრუაშვილი მართლა ეწინააღმდეგებოდა?
- არა, ბატონო, წინააღმდეგი არ ყოფილა. შორენაც, ცაავაც და მთელი ეპისკოპოსების გუნდი, რვა წლის განმავლობაში, ყველა დღესასწაულს სააკაშვილთან ერთად ხვდებოდნენ! ასე რომ, ცაავამ კბილები გაიხეხოს!
- თუკი ასე იყო, აბა, ცაავა შორენას რატომ დაუპირისპირდა?
- რატომ და სხვა დირექტივა მიიღო.
- ვისგან?
- ცაავა ახალაიების საძმაკაცოა და ამას არ მალავს.
- შორენაც ამ საძმაკაცოს წევრი იყო?
- არა, შორენა პატრიარქის გვერდით დგას, პატრიარქი კი ხელისუფლების მიმართ ყოველთვის ლოიალურია და ეკლესია სწორედ ასე უნდა იქცეოდეს – სასულიერო პირი ასეთი უნდა იყოს. სასულიერო პირი ამიტომაც ვერ ვხდები – ლოიალური არ ვარ, არც შევარდნაძე „მევასებოდა“, არც სააკაშვილი და დიდი სიმპათია არც „ოცნების“ ბიჭებთან მაქვს!.. მოკლედ, ახლა პეტრემ სხვა დავალება მიიღო.
- და ეს დავალება რა არის?
- რა და, იმ აჟიოტაჟის ატეხვა, რაც ახლა ხდება.
- ესე იგი, ირიბად მიანიშნებთ, რომ „ციანიდის საქმის“ უკან შესაძლოა, ახალაიები იდგნენ ანუ ახალაიები, ამ შემთხვევაში, რომელიმე ძალის კრებსითი სახელია?
- ამ ძალის კრებსითი სახელი „ლიბერალებია“, ახალაიები, როგორც პეტრე, ერთ-ერთი რგოლია, რომელმაც კონკრეტული დავალება შეასრულა. ისე, პეტრე მაშინ უფრო ძლიერი იყო, როცა რვა წლის განმავლობაში, ახალაიები ზენიტში იყვნენ!
- პეტრე ცაავა, როგორც ცნობილია, „ოცნებელ“ ოთარ დანელიასთანაც მეგობრობდა…
- ესენი სურათებს ცვლიან ხოლმე: ჯერ ედიკას სურათი ეკიდათ, მერე მიშასი, მერე კი ბიძინასი! ასეა, ბატონო!
- თუკი ყველა მთავრობისთვის მიუღებელი იყავით და ხართ, ესე იგი, კომპრომატები თქვენზეც იარსებებს…
- თუ აქვთ, დადონ, ველოდები, მაგრამ ვერ დებენ! პეტრე, ჩემს სახელს რომ გაიგებს ხოლმე, ადგილზე ხტუნაობს, მაგრამ ვერაფერს ამბობს და მხოლოდ აბსურდული რაღაც დამაბრალა, უცხიმო კარაქს ამზადებდაო, მაგრამ მორჩა, ეგ კაცი აღარ არის და ვინც ამ სიცრუეში გვერდით დაუდგება, ეპისკოპოსი ისიც აღარ იქნება!
- ბატონო გიორგი, საუბრის თემას ოდნავ შევცვლი და გკითხავთ: ეკლესია ან პირადად თქვენ, რატომ არ იჩენთ ინიციატივას, რომ რუსუდან კერვალიშვილი და მაია რჩეულიშვილი საპატრიარქოს თავდებობით გაათავისუფლონ? ეს ადამიანები წლების განმავლობაში ქართულ ეკლესიას სოლიდურ დახმარებას უწევდნენ და ახლა რა გამოდის - განსაცდელში მიატოვეთ?
- ამ თემაში ჩახედული არ ვარ…
- ვაიმე, არ იცით, რომ დები პატიმრობაში არიან?
- ეგ ვიცი, მაგრამ არ ვიცი, შეიძლება, საპატრიარქო რამეს აკეთებს. ყოველ შემთხვევაში, მგონია, რომ ციხეში ყურადღებას მიაქცევს.
- რჩეულიშვილები საპატრიარქოს ტელევიზიას თქვენი ხელმძღვანელობის დროსაც ხომ აფინანსებდნენ?
- არა, იმ დროს ტელევიზიისთვის თეთრიც არავის მოუცია. ერთადერთი, თურქეთში მცხოვრები ლაზები დამეხმარნენ! ასევე, თანხას პირადად პატრიარქი იღებდა ხოლმე. სააკაშვილის დროს ფულს როგორ მომცემდნენ? მიშას ვებრძოდი და ვინ გაბედავდა, რამე მოეცა?
- სააკაშვილს ვებრძოდიო და, რატომ არ დაგიჭირეს?
- არ სჭირდებოდათ, თუმცა მკვლელობა დააპირეს და ამაზე საქმეცაა აღძრული, მაგრამ ღმერთი არსებობს და ღვთის წყალობით, გადავრჩი!
(…)
———————-
„ახალი თაობა“, 04 ივლისი, 2017 წელი
ინტერვიუ ავთანდილ დემეტრაშვილთან: „ირაკლი კობახიძე კონსტიტუციის პროექტში ცვლილებებს შეიტანს“
კონსტიტუციონალისტი, სახელმწიფო საკონსტიტუციო კომისიის წევრი ავთანდილ დემეტრაშვილი „ახალ თაობასთან“ ინტერვიუში საუბრობს, თუ როგორ არის სამართლებრივად შესაძლებელი ორი მოსმენით მიღებულ კონსტიტუციის პროექტში ცვლილებების შეტანა.
- ბატონო ავთანდილ, რამდენად არის მოსალოდნელი, რომ კონსტიტუციის პროექტთან დაკავშირებით მმართველმა პარტიამ პოზიციები შეცვალოს?
- ორიგინალური პროცესი მიმდინარეობს. ვენეციის კომისია და მისი ხელმძღვანელი არ არის სადამსჯელო ორგანო. მას მხოლოდ რეკომენდაციები შეუძლია გასწიოს. უმრავლესობის დეპუტატმა კიდეც უპასუხა ბუკიკიოს, ჩვენ ხალხის მიერ ვართ არჩეული და შეგვიძლია ეს რეკომენდაცია გავითვალისწინოთ ან არ გავითვალისწინოთო. თუმცა, ყველას კარგად ახსოვს, რა განცხადებაც გააკეთეს ირაკლი კობახიძემ და მისმა მოადგილემ თამარ ჩუგოშვილმა, რომ ვენეციის კომისიის ყველა შენიშვნას გაითვალისწინებდნენ. ეს იყო დაუფიქრებელი განცხადება.
- რატომ?
- იმიტომ, რომ ეს იყო პოლიტიკური განცხადება, რომელმაც არ გაამართლა. არ იყო მიზანშეწონილი ასეთი ფიცის დადება. ჯანი ბუკიკიომ განაცხადა, გაოცებული ვარ იმით, რომ არის ქვეყანა, რომელიც მზად არის, ჩვენი ყველა რეკომენდაცია გაითვალისწინოსო. ასეთი რამ არ ხდება, მე ვიყავი 7 წელი ვენეციის კომისიის წევრი და არ მახსოვს ქვეყანა, რომელსაც მსგავსი განცხადება გაეკეთებინოს. ასეთი განცხადება ირაკლი კობახიძეს არ უნდა გაეკეთებინა, ის არის კარგი კონსტიტუციონალისტი, მაგრამ გამოუცდელი პოლიტიკოსია და ეს ამ განცხადებაშიც გამოჩნდა.
- პოზიციები უნდა შეეჯერებინა ჯერ გუნდში?
- რა თქმა უნდა. მოვლენების ასე განვითარებას არ ელოდა კობახიძე, თორემ ამ განცხადებას არ გააკეთებდა. პარლამენტმა ორი მოსმენით ის ტექსტი მიიღო, რომელიც არსებითად განსხვავდება იმ პროექტისგან, რომელიც საკონსტიტუციო კომისიამ შეადგინა. პოლიტიკური კონსენსუსი, რომელიც მიღწეული იყო კომისიაში, სრულად იქნა უგულებელყოფილი. საკონსტიტუციო კომისიამ, რომელიც ფართო შემადგენლობის იყო, მიიღო გარკვეული პროექტი, მაგრამ პარლამენტმა მისი სრული იგნორირება მოახდინა. კომიტეტების თავმჯდომარეები, რომლებმაც კომისიის პროექტი შეცვალეს, ამ კომისიის წევრები იყვნენ.
- მაჟორიტარები ვერ დავიყოლიეთო, გუნდში გვაქვს შეუთავსებლობაო.
- ვერ დავიფიცებ, რომ ეს სიმართლეა. თუმცა, ვერც უარვყოფ. ასეა თუ ისე, მიღებულ იქნა ერთპარტიული კონსტიტუცია, როგორც ჯანი ბუკიკიომ განაცხადა. ეს არის კონსტიტუცია, რომლითაც ერთი პარტია დომინანტური როლის შენარჩუნებას ცდილობს 2020 წლის არჩევნებისთვის.
- თუ დათმობაზე წავიდა „ქართული ოცნება“, ტექნიკურად როგორ არის შესაძლებელი ორი მოსმენით მიღებულ პროექტში შესწორებების შეტანა?
- სამართლებრივად ეს შეუძლებელია. რეგლამენტის მიხედვით, მეორე მოსმენით მიღებულ ტექსტში მხოლოდ რედაქციული ხასიათის შესწორებების შეტანა შეიძლება. მესამე მოსმენის დროს შეიძლება ან მთლიანად იყოს ტექსტი მიღებული ან უარყო, ჩააგდო.
- გამორიცხავთ ცვლილებებს?
- არ გამოვრიცხავ, რადგან `ქართული ოცნება~ იძულებული გახდება, რომ კონსტიტუციის ტექსტში ცვლილებები შეიტანოს, მიუხედავად იმისა, რომ ეს ტექსტი ორი მოსმენით უკვე მიღებულია და ეს თითქმის შეუძლებელია.
- თუ ასეა, როგორ შეიძლება ეს ცვლილებები განხორციელდეს?
- ამისთვის რამდენიმე გზა არსებობს. მაგალითად, მმართველ გუნდს შეუძლია, მეორე მოსმენა გაიმეოროს.
- ხელახლა დადგეს საკითხი მეორე მოსმენისთვის?
- დიახ, სწორედ ასეა. თუმცა, არსებობს უფრო მარტივი, მაგრამ უფრო ხანგრძლივი პროცედურაც: პარლამენტის უმრავლესობამ პარლამენტში უნდა შეიტანოს კონსტიტუციური კანონის პროექტი, პროექტში ცვლილებების შეტანის თაობაზე და პარლამენტს შესთავაზოს ის ცვლილებები, რომლებიც იქნება მიღებული. ამ პროცედურის ხანგრძლივობა გამოიხატება იმაში, რომ ეს პროექტი ერთთვიანი განხილვის შემდეგ პირველი მოსმენითაც უნდა იყოს მიღებული, მეორე მოსმენითაც და მესამე მოსმენითაც. სწორედ ამ გზით შევა შესწორებები იმ პროექტში, რომელიც იქნება მიღებული სექტემბერში. ეს ბევრად უფრო ხანგრძლივი პროცედურაა, მაგრამ სამართლებრივად აბსოლუტურად გამართულია.
- რამდენად არის მოსალოდნელი, ევროსაბჭოში კრიტიკა დაიმსახუროს ამ პროექტმა?
- ვენეციის კომისია ევროსაბჭოს საკონსულტაციო ორგანო გახლავთ, ეს არ არის ცალკე, იზოლირებულად მდგომი ორგანო. მისი გავლენა ევროპულ ორგანიზაციებზე ძალიან დიდია. ევროსაბჭოში დაგეგმილია ვენეციის კომისიის ამ დასკვნის მოსმენა და მას საქართველოს დელეგაციაც დაესწრება ირაკლი კობახიძის ხელმძღვანელობით. დარწმუნებული ვარ, რომ სწორედ ამ ფორმატში მოხდება ევროპელების ჩართვა პროცესში და თხოვნა, რომ საქართველომ არ გადაუხვიოს აღებულ კურსს და არ მიიღოს ერთპარტიული კონსტიტუცია. როგორი იქნება ამ თხოვნაზე ხელისუფლების რეაქცია, ეს უკვე ქვეყნის შიგნით ბევრ რამეზე იქნება დამოკიდებული.
- მაინც რაზე?
- პოლიტიკურ პროცესებზე. მაქვს ინფორმაცია, რომ ირაკლი კობახიძის პოზიციაა, რომ არ არის გამორიცხული, უკვე მიღებულ პროექტში ცვლილებები შევიდეს.
„ახალი თაობა“, 04 ივლისი, 2017 წელი
ინტერვიუ ზაქარია ქუცნაშვილთან: „მაჟორიტარული სისტემის დატოვება ხალხმა გვთხოვა“ // „ირაკლი კობახიძე თავის განცხადებებზე პასუხს თავად აგებს“
მიმდინარე პოლიტიკური მოვლენების შესახებ „ახალი თაობის“ კითხვებს დეპუტატი ზაქარია ქუცნაშვილი პასუხობს.
- ბატონო ზაქარია, ბუკიკიომ დაგიბარათ, რომ კონსტიტუციასთან დაკავშირებით უნდა მიაღწიოთ კონსენსუსს. რამდენად არის ცვლილებების შეტანა შესაძლებელი ორი მოსმენით მიღებულ კონსტიტუციაში?
- ეს დამოკიდებულია მონაწილე მხარეების პოზიციებზე. სამწუხაროდ, ოპოზიცია მთელი ეს პერიოდი მხოლოდ პროცესის პედალირებით იყო დაინტერესებული, რომ ხელში ჩაეგდო მონოპოლია არჩევნების სისტემაზე. მათ უნდათ, რომ მხოლოდ პარტიებს ჰქონდეთ არჩევნებში მონაწილეობის მიღების უფლება, ხოლო მოქალაქეებს ჩამოერთვათ. ისინი მხოლოდ ამ საკითხით არიან დაინტერესებულნი.
- ყველაზე მეტად აღელვებს ოპოზიციას ამ შერეული სისტემის გაუქმება და პროპორციულზე გადასვლა. ამ კუთხით არაფრის შეცვლას არ გეგმავთ?
- უკვე გითხარით, ეს დამოკიდებულია იმაზე, თუ რა პოზიციები აქვთ მხარეებს. მათი სურვილია, რომ მოქალაქეს ჩამოერთვას უფლება და ეს ჰქონდეთ მხოლოდ პარტიებს. დღეს არავინ არ სვამს საკითხს იმის თაობაზე, პრეზიდენტი რატომ ირჩევა მაჟორიტარული საარჩევნო სისტემით?! თუ პრეზიდენტის არჩევა შეიძლება მაჟორიტარული სისტემით, ხალხის წარმომადგენლების არჩევა რატომ არ შეიძლება?!
- ანუ ოპოზიცია და ხელისუფლება ამ საკითხზე ვერ შეთანხმდებიან?
- ის გადაწყვეტილება, რაც მიღებულ იქნა, იყო კომპრომისის ნაყოფი. იმ კომპრომისის, რომელიც შედგა ხალხის წარმომადგენლებსა და ხალხს შორის. მე უამრავ შეხვედრას ვესწრებოდი საჯარო განხილვების და ხალხი წინააღმდეგია მაჟორიტარული სისტემის გაუქმების. მათ იციან დღეს, ვის მოსთხოვონ პასუხი, ვის წინაშეა პასუხისმგებელი არჩეული დეპუტატი. პროპორციულის შემთხვევაში, დემოკრატია ამომრჩეველთა უფლებების კუთხით, თვისობრივად სუსტდება.
- მაშინ თავიდანვე რატომ საუბრობდით, რომ გადადიოდით პროპორციულ სისტემაზე? ან კობახიძემ რატომ დადო პირობა, თუ არ გაუქმდებოდა შერეული სისტემა, ის გადადგებოდა?
- ეს უკვე ბატონ ირაკლი კობახიძეს უნდა ჰკითხოთ. მან რა განცხადება გააკეთა, ამაზე პასუხს თავად აგებს.
- ითქვა ისიც, რომ მაჟორიტარები შანტაჟზე წავიდნენ. ასე იყო?
- მაჟორიტარი დეპუტატები ხალხის არჩეულები არიან და ხალხი სთხოვდა, რომ არ გააუქმოთ პირდაპირ ანგარიშვალდებული საარჩევნო სისტემა, არ გაყიდოთ ქართული მიწები, არ დაუშვათ ერთსქესიანთა ქორწინების ლეგალიზება! ეს იყო ხალხის მოთხოვნები, რაც ყველა შეხვედრაზე ერთნაირად ისმოდა.
- თქვენც საბაბი გქონდათ და ამას აჟღერებდით პარლამენტში?
- პარლამენტშიც ვაჟღერებდით და ყველა საჯარო შეხვედრისას.
- თავდაპირველად ბუკიკიომ განაცხადა, იმედგაცრუებული ვარო. საბოლოოდ როგორი განწყობით გაუშვით საქართველოდან?
- მე მგონი, კარგი განწყობით წავიდა ბატონი ჯანი.
- რა იქნება მესამე მოსმენის პირობებში? შევა სერიოზული ცვლილებები თუ მხოლოდ სარედაქციო კორექტივებით შემოიფარგლებით?
- ვნახოთ. არ გავასწროთ მოვლენებს წინ. ჯერ ლამაზი ზაფხულია და მერე მოვა ბარაქიანი შემოდგომა..
- ანუ არ არის გამორიცხული ცვლილებები?
- გამორიცხული ჩვენს ცვალებად მსოფლიოში არაფერია. ამერიკამ უარი თქვა ემიგრანტების მიღებაზე და საქართველოში რაღა უნდა იყოს გასაკვირი?!
- პოლიტიკურმა პარტიებმა წინასაარჩევნო კამპანია დაიწყეს, როგორ აფასებთ მერობის კანდიდატების შანსებს და რას ელოდებით?
- სამწუხაროდ თუ საბედნიეროდ, „ქართულ ოცნებას“ დღეს დამმარცხებელი ოპონენტი არ ჰყავს და ეს არის ის რეალობა, რომელშიც მოგვიწევს არჩევნების ჩატარება. არჩევნები კონკურენტულ გარემოში წარიმართება. იქნება შეჯიბრი, მაგრამ, სამწუხაროდ თუ საბედნიეროდ, დღეს ჩვენ კონკურენტი არა გვყავს.
- რას იტყვით ბიძინა ივანიშვილის პასიურობაზე? იყო მოლოდინი, რომ ის აუცილებლად გამოჩნდებოდა კალაძის წარდგენისას. თუმცა ეს მოლოდინი არ გამართლდა. მთლიანად ჩამოშორდა ივანიშვილი პროცესებს?
- ბატონმა ბიძინამ, ყველამ იცით, რაც გააკეთა. შექმნა საოცარი მაგალითი იმისა, რომ პოლიტიკიდან წავიდა ერთწლიანი საჯარო მოღვაწეობის შემდეგ. მან ეს პირობა შეასრულა.
- ამის მიუხედავად, ის ყველა არჩევნებზე აქტიურობდა. გვერდით ედგა მარგველაშვილს, ნარმანიას… ჩანდა ყველა არჩევნებზე. ახლა არ ჩანს. რატომ?
- როცა პრეზიდენტს დაუდგა გვერდით, მაშინ პრემიერი იყო და პარტიის თავმჯდომარე და დღეს არც პრემიერ-მინისტრია და არც პარტიის თავმჯდომარე.
- ამ ლოგიკით არც 2016 წლის საპარლამენტო არჩევნების დროს იყო პრემიერ-მინისტრი და პარტიის თავმჯდომარე, მაგრამ საკმაოდ აქტიურობდა...
- 2016 წელს, როგორც პარტიის დამფუძნებელი და საქართველოს მოქალაქე, გამოხატავდა საჯარო ინტერვიუების ჩატარების გზით მხარდაჭერას, თორემ რომელიმე წინასაარჩევნო შეხვედრაში მან მიიღო მონაწილეობა?!
„ახალი თაობა“, 04 ივლისი, 2017 წელი
ინტერვიუ კახა მიქაიასთან: „ოცნებას“ და „ნაციონალებს“ ერთმანეთისგან ვეღარ ვარჩევ“ // „ზუგდიდის გამგეობის ქმედებას პოლიტიკური მასტურბაცია ვუწოდე“
რა ხდება სამეგრელოში, რატომ არა აქვს აზრი ქუჩის აქციებს, რა სისულელე გააკეთა ზუგდიდის გამგეობამ? ამის შესახებ „ახალ თაობას“ „დაიცავი საქართველოს“ ერთ-ერთი ლიდერი კახა მიქაია ესაუბრება.
- რამდენიმე დღის წინ სოციალურ ქსელში გავრცელდა სურათები, სადაც ჩანს, რომ ზუგდიდის გამგეობის თანამშრომლები კოლექტიურად მონაწილეობენ გამოკითხვაში, რომელიც თბილისის მერობის კანდიდატებთან დაკავშირებით ტარდებოდა და ისინი ხმას კახა კალაძეს აძლევდნენ. ეს მართლა ასე მოხდა თუ ოპოზიციის ბოროტი ხუმრობაა?
- ეს მეც ხუმრობა მეგონებოდა, მაგრამ ეს ფოტომასალა ზუგდიდის გამგეობის საიტზე იყო განთავსებული. ამ ყველაფერს თავად გადაუღეს ფოტოები და თავად განათავსეს სოციალურ ქსელში. ამის გარდა, ეს ფოტოები გამგეობის წევრებმა ფეისბუქის საკუთარ გვერდებზეც განათავსეს.
- რატომ გააკეთეს ასეთი რაღაცა, ვერ მიხვდნენ, ამას რა მოჰყვებოდა?
- ეგონათ, რომ მაგარი რაღაცა გააკეთეს. როგორი ბრიყვი უნდა იყო, რომ ვერ მიხვდე, რამხელა სისულელეს აკეთებ. ფეისბუქიდან ეს ფოტომასალა მას შემდეგ გააქრეს, რაც ოპოზიციამ ერთი ამბავი ატეხა. ამ უმსგავსობას და სიბრიყვეს მაშინვე გამოვეხმაურე და ზუგდიდის გამგეობის ქმედებას პოლიტიკური მასტურბაცია ვუწოდე. ხელისუფლება მართლა ამით არის დაკავებული. ახლაც კი მიჭირს იმის დაჯერება, რომ ამ კოლექტიურ დალაიქებას თავად გადაუღეს ფოტოები.
ეს კიდევ ერთხელ ადასტურებს, რომ ქვეყანა ძალიან მძიმე მდგომარეობაშია. ან კარგად როგორ იქნება, როცა მისი ხელისუფლება ერთმანეთისგან კარგსა და ცუდს ვერ არჩევს. ასეთ ხელისუფლებას მე პოლიტიკურ მასტურბანტს ვუწოდებ. აღნიშნული შეფასება თუ ვინმეს ეწყინება, შეუძლია ცივი წყალი დალიოს.
- წლების წინ, არჩევნების წინა პერიოდში, სამეგრელოს რეგიონში პოლიტიკური ტემპერატურა ძალიან მაღალი იყო. მოსახლეობაც აქტიურობდა და ადგილობრივი ოპოზიციაც. ახლა ამ მხრივ სიმშვიდეა, ხალხი კმაყოფილია თუ რა ხდება?
- როგორ შეიძლება, დღეს ხალხი სადმე კმაყოფილი იყოს. დუმილს კი თავისი მიზეზები აქვს. სამეგრელო არც სააკაშვილის სისხლიანი მმართველობის წლებში ხმაურობდა. დუმდა ადგილობრივი ოპოზიციაც.
- ასეთი მდუმარება მაშინ არ ყოფილა. თქვენ ძალიან აქტიურობდით და ახალაიების მამას, როლანდს, ზუგდიდში ბიუსტიც დაუდგით...
- მე ვხმაურობდი და კიდევ რამდენიმე კაცი, მაგრამ ეს არ იყო მძლავრი პროტესტი. რაც შეეხება დღევანდელობას, რეგიონში არის მძიმე ვითარება. კორუფცია და ნეპოტიზმი არის უმაღლეს დონეზე. იმაზე აღარ ვილაპარაკებ, როგორ ჩატარდა საპარლამენტო არჩევნები. არსებულ ვითარებას სულ რამდენიმე ადამიანი აპროტესტებს. ეს, ბუნებრივია, რომ შეუმჩნეველი რჩება. ზვიად გამსახურდიას დამხობის შემდეგ, სამეგრელოში ძალიან მძიმე მოვლენები განვითარდა. სამოქალაქო ომი, შეიარაღებული ფორმირებების თარეში…. მოსახლეობამ დიდი უბედურება გადაიტანა და წლების განმავლობაში სერიოზული წნეხის ქვეშ იმყოფებოდა. ამან თავისი დაღი დაასვა რეგიონს – სამეგრელო პოლიტიკური რუკიდან გაქრა. ჩემთვის ამის თქმა ძალიან მძიმეა. მაგრამ ესაა სიმართლე. ძალიან მიჭირდა და ახლაც ძალიან მიჭირს პირში წყალჩაგუბებული საქართველოს ყურება, რომელიც ნეპოტიზმს და უმეცრებას ეგუება. რაღაც არაორდინარული უნდა მოხდეს, რომ სამეგრელომ საკუთარი ფუნქცია დაიბრუნოს.
- რაღაც არაორდინარულში რას გულისხმობთ?
- ცუდი რამისგან ღმერთმა დაგვიფაროს. რაღაც ისეთი უნდა მოხდეს, რომ სამეგრელომაც იგრძნოს თავის საჭიროება.
- თქვენ თქვით, სამეგრელო სამოქალაქო ომის შემდეგ პოლიტიკური რუკიდან გაქრაო. არადა ვარდების რევოლუციაში ყველაზე აქტიური ეს რეგიონი იყო...
- მაშინ სამეგრელო მიშა სააკაშვილს თბილისში ერთი მიზეზით გაჰყვა. მან მეგრელებს ასეთი რამე უთხრა, ზვიად გამსახურდია, რომლის იდეებისთვისაც ასე იბრძოდით და რომელიც შევარდნაძემ დაამხო, იმ შევარდნაძის წინააღმდეგ ვიწყებ ბრძოლას. ეს იყო მიზეზი, რატომაც მიიღო ჩემმა კუთხემ ვარდების რევოლუციაში მონაწილეობა. ჩემი სამეგრელო 2003 წელს თბილისში შევარდნაძეზე შურის საძიებლად წავიდა. „ვარდების რევოლუცია“ სააკაშვილის გამარჯვებით დასრულდა. ამ გამარჯვების შემდეგ მან საშინელება დამართა ჩემს რეგიონს. ამიტომაა ძალიან მძიმე მდგომარეობაში სამეგრელო. რაღაცა აუცილებლად შეიცვლება, მაგრამ მარტო სამეგრელო ვერაფერს გახდება. პროცესები მთელ საქართველოში ერთნაირად უნდა დაიწყოს.
- რა პროცესებზე საუბრობთ?
- საყოველთაო გამოღვიძებას. მთელი ერის გამოღვიძებაა საჭირო.
- პირადად თქვენ რატომ დუმხართ?
- ვინ დუმს, კაცო? მე ვარ დადუმებული? მარტო შენ რამდენჯერ მოგეცი ინტერვიუ. ფეისბუქი აჭრელებული მაქვს მთლიანად.
- ეს გასაგებია, მაგრამ ჩვენ სხვანაირი კახა მიქაია გვახსოვს, რომელიც ნაციონალებს სისხლს უშრობდა...
- მაშინ მე ვიყავი ქუჩაში და ისე ვიქცეოდი, როგორც ქუჩის ოპოზიციას შეეფერებოდა.
- არც ახლა ხართ პარლამენტში...
- სამაგიეროდ, ვარ პრესაში და ტელევიზიაში. კახა მიქაია არაა ის კაცი, რომ გაჩერდეს. უბრალოდ, ბრძოლის ფორმა შევიცვალე.
- ქუჩაში გასვლას აღარ აპირებთ?
- გავიდოდი, მაგრამ არსებული ვითარება არ ქმნის ამისთვის პირობებს. სამეგრელოში იმდენად სუსტია წინააღმდეგობა, რომ ქუჩაში გამოსვლა ეფექტური არ იქნება. წინააღმდეგობის სისუსტე იქეთ იყოს, ხალხი საშინლად იმედგაცრუებულია. ყოფილი და მოქმედი ხელისუფლება ერთმანეთს ისე შეერწყა, ერთმანეთისგან მათი გარჩევა შეუძლებელია. როდესაც საკრებულოს წევრი ვიყავი, მაშინ ვურჩიე, რომ ლურჯი და წითელი მაისურებით ევლოთ, სხვანაირად შეუძლებელია იმის გარჩევა, რომელია „ნაციონალი“ და რომელი – „მეოცნებე“. მათ ერთმანეთისგან მეც კი ვეღარ ვარჩევ.
„ახალი თაობა“, 04 ივლისი, 2017 წელი
ინტერვიუ ბეჟან ნათელაშვილთან: „ბიძინა ივანიშვილი პინგვინს უფრო დიდ პატივს სცემს, ვიდრე მთელ „ქართულ ოცნებას“ // „გიორგი მარგველაშვილი გაპლასტინილებული „ოცნების“ ფონზე ფოლადივით გამოიყურება“
რატომ წავიდა შალვა ნათელაშვილი ამერიკაში, როდის დაიწყებს აქციებს ოპოზიცია, რა ელოდება ივანიშვილის გარეშე დარჩენილ „ოცნებას“, რა არის ქართული პოლიტიკის მთავარი უბედურება? ამ თემებზე „ახალ თაობას“ ლეიბორისტული პარტიის წევრი ბეჟან ნათელაშვილი ესაუბრება.
„საქართველოს ცეცხლთაყვანისმცემელი ხელისუფლება ცეცხლთან თამაშს ცუდად დაასრულებს. ძალიანაც რომ არ მინდოდეს, ეჭვი მიჩნდება, რომ ამ ხანძრების უკან ხელისუფლება დგას. შეუძლებელია, 2012 წლიდან დღემდე ამდენი ბაზრობა დამწვარიყო. ხელისუფლება ხანძრებს სხვა მიმართულებითაც აჩენს. საკვებ პროდუქტებს და წამლებს ცეცხლი უკიდია. ახლო მომავალში ისინი გაზსა და დენზე აპირებენ ფასების გაზრდას. ეს სერიოზულ უკმაყოფილებას გამოიწვევს. ხელისუფლება ცუდად ეთამაშება ცეცხლს და ერთხელაც იქნება, თავადაც დაიწვება“, – ამბობს რესპოდენტი.
- გაზის ტარიფის გაზრდა დაანონსებულია, მაგრამ ამაზე ხმას არავინ იღებს. გაგებით ელოდება ხალხი უკვე ამ ყველაფერს?
- ამას როგორ შეიძლება ხალხი გაგებით მოეკიდოს. დარწმუნებული ვარ, ამას დიდი საპროტესტო გამოსვლები მოჰყვება. ამის ორგანიზებას ხალხი თავად გააკეთებს. ოპოზიცია აუცილებლად დადგება მათ გვერდით. ჩვენი პარტია ამას პირველი გააპროტესტებს.
- თქვენი პარტია ახსენეთ და რატომ წავიდა ამერიკაში თქვენი პარტიის ლიდერი?
- ეს არ არის პირველი შემთხვევა, როდესაც ბატონ შალვას ამერიკაში იწვევენ. მას იქ ძალიან სერიოზული შეხვედრები აქვს. სამშობლოში დაბრუნების შემდეგ, ის თავად გააკეთებს განცხადებას. ვფიქრობ, საზოგადოება მისგან სერიოზულ მესიჯებს მოისმენს.
- საარჩევნოდ დავალებების მისაღებად წავიდა ნათელაშვილი ამერიკაში?]
- ბატონი შალვა სხვის დავალებებს არ ასრულებს. ის სერიოზული პოლიტიკური ძალის ლიდერია და ამიტომაც იწვევენ ამერიკაში. ამერიკელ კონგრესმენებთან შეხვედრაზე ის ალბათ მოახლოებულ არჩევნებზეც ისაუბრებდა. თუმცა, დაველოდოთ მის ჩამოსვლას. დეტალურ ინფორმაციას თავად მოგვაწვდის.
- ადრე ამბობდნენ, რომ მას ამერიკაში ვიზიტების ორგანიზებაში სააკაშვილი და ნაციონალები ეხმარებოდნენ…
- იმდენ რამეს გვაბრალებდნენ, ეს რა მოსატანია. ახლა ყველას 9 წელზე რომ აქვს პირი დაღებული, იმ სისხლიანი წლების დროს სად იყვნენ? სააკაშვილის რეჟიმს მხოლოდ ჩვენ ვაკრიტიკებდით. მაშინ პოლიტიკოსების ნახევარი შიშისგან იყო გატრუნული, მეორე ნახევარი კი ნაციონალებს აქებდა. ყველა ხელისუფლება იმით ცოცხლობს, რომ ჩვენ დაგვაბრალოს რაღაცა. ჩვენი მისამართით პრეტენზიები ჰქონდა შევარდნაძის ხელისუფლებას. ნაციონალები ხან შევარდნაძესთან ალიანსში გვდებდნენ ბრალს, ხან რუსეთუმეობას გვაბრალებდნენ. მათ ივანიშვილთან კავშირშიც კი დაგვდეს ბრალი.
- ბიძინა ივანიშვილთან ალიანსი როდისღა დაგაბრალეს?
- ჯერ ივანიშვილი პოლიტიკურ ორბიტაზე რომ არ ჩანდა. წლების წინ ბატონმა შალვამ თქვა, რომ თუ პრეზიდენტი გავხდები, ივანიშვილს დავნიშნავ პრემიერადო. ამის შემდეგ გვაბრალებდნენ მასთან ალიანსს. საინტერესოა ის ფაქტი, რომ ივანიშვილთან ალიანსის გამო ის ხალხი გვლანძღავდა, ვინც ახლა `ოცნების~ მამას უკმევს გუნდრუკს.
- ისე, კარგა ხანია, რაც თქვენთვის ნაციონალების დაკვეთების შესრულება აღარ დაუბრალებიათ და მართლა ივანიშვილთან ხომ არ შეხვედით ალიანსში?
- ასეთი ბრალდებები მართლა აღარ მოგვისმენია. ეტყობა, ამისთვის არ სცხელათ, ქვეყანა და პარტია თავზე ემხობათ. ანდა ნამუსმა შეაწუხათ _ თავად ჩაეხუტნენ ნაციონალებს და სხვას ვეღარ აბრალებენ. რაც შეეხება ივანიშვილთან ალიანსს, არც მასთან და არც სხვასთან ალიანსში შესვლას არ ვაპირებთ. ჩვენ ყოველგვარი ალიანსების და საარჩევნო ბლოკების წინააღმდეგი ვართ. ყველა პარტიამ დამოუკიდებლად უნდა მიიღოს არჩევნებში მონაწილეობა. ჩვენი პარტია დაარსების დღიდან სულ მარტო იბრძვის, ახლაც ასე გააგრძელებს.
- მარტო ბრძოლას შედეგი რომ არ მოაქვს?
- დღეს არ მოაქვს, ხვალ მოიტანს. შედეგი როგორ უნდა დაიდოს, როდესაც დრაკონული საარჩევნო კოდექსი გვაქვს. ამათ ნაციონალებზე უარესი კანონი მიიღეს. ამ კანონით, არჩევნების გზით ხელისუფლების შეცვლა წარმოუდგენელი ხდება. ამას დაუმატეთ ადმინისტრაციული რესურსი, რომელსაც `ოცნება~ წინა ხელისუფლებაზე ურცხვად იყენებს.
- თქვენი საუბრიდან თუ ვიმსჯელებთ, ამ არჩევნებზე ოპოზიციას შანსი არა აქვს...
- ხელისუფლება ამ არჩევნების მოგებას ალბათ შეძლებს. თუმცა თუ ოპოზიცია იაქტიურებს და მოწოდების სიმაღლეზე დადგება, ძალადობა და გაყალბება არ გაუვათ. ისეთი კანონი აქვთ მიღებული, გაყალბება დიდად არც დასჭირდებათ. არჩევნების მოგებას ხელისუფლება სოციალურად დაუცველების ხარჯზე შეეცდება.
საქართველოში ასეულობით ათასი სოციალურად დაუცველია. მათ ელემენტარულად პურის ფულიც კი არა აქვთ. ერთჯერადი ფულადი დახმარების სანაცვლოდ ისინი მისცემენ ხელისუფლებას ხმას. ამის გამო მათ არ ვაკრიტიკებ, როცა ადამიანს იმის ფული არა აქვს, რომ შვილს პური უყიდოს, მაღალ მატერიებზე არ უნდა ელაპარაკო. მე კარგად მესმის მათი, მაგრამ ერთ რჩევას მაინც მივცემ _ მათ უნდა იცოდნენ, რომ პოლიტიკოსი, რომელიც მათ ხმებს ყიდულობს, ამ დახარჯულ თანხას ისევ მათგან ამოიღებს. საქართველოში დიდი ხანია, პოლიტიკა ბიზნესად იქცა. აბა გადახედეთ პოლიტიკოსებს, რა ფუფუნებაში ცხოვრობენ. ივანიშვილი რომ ივანიშვილია, პოლიტიკაში ისიც კი ფულის საკეთებლად მოვიდა.
- მას არც პოლიტიკაში მოსვლამდე აკლდა ფული...
- ეტყობა, აკლდა და ამიტომაც მოვიდა პოლიტიკაში. ხალხს მისი მომხრეები უმტკიცებდნენ, რომ მილიარდერია და ჩვენს ფულს მაინც არ მოიპარავსო. მოსახლეობამ დაიჯერა და აირჩია. ახლა ყველა თავბედს იწყევლის და ერი ახალი მესიის მოლოდინშია.
- ახალი მესია ჯერ არ ჩანს...
- გამოჩნდება. დამოუკიდებელი საქართველოს არსებობის მანძილზე სულ მესიების მოლოდინში ვართ და ამიტომაც დაიქცა ეს ქვეყანა. დაიმახსოვრეთ, მალე ქართულ პოლიტიკაში ახალი მესია გამოჩნდება. ის ისევე მოულოდნელად გამოჩნდება, როგორც ივანიშვილი გამოჩნდა. ვიღაც აუცილებლად ეყოლებათ რეზერვში.
- ვინ შეიძლება იყოს ახალი მესია?
- ვერ გეტყვით. ვიღაც აუცილებლად გამოჩნდება. ივანიშვილი მესიობას ნამდვილად ვეღარ ქაჩავს. მგონი, თავადაც აღარ უნდა ეს ყველაფერი და პოლიტიკური რელსებიდან გადავიდა. ეს „ოცნებას“ დაასამარებს. ყოფილი პრემიერი იყო „ოცნების“ ლოკომოტივი და მისი რელსებიდან გადასვლა კუკუშკა მეოცნებეებს აქეთ-იქეთ მიმოფანტავს. როგორც კი ეს მოხდება, ეს ხალხი მთავარი მეოცნებეს ლანძღვა-გინებას დაუწყებს. უპატრონოდ დარჩენილი მედროვე პოლიტიკოსები განსაკუთრებით საშიშები და აუტანლები არიან. ისინი თავიანთ ლიდერზე ძალიან გაბრაზებულები არიან და სამაგიეროს აუცილებლად გადაუხდიან.
- რამ გააბრაზა?
- ივანიშვილი ხვდება, რომ პოლიტიკური კარიერის დასასრულის დასაწყისი დაუდგა. საეჭვოდ გაიტრუნა და წასასვლელად საჭირო მომენტს ელოდება. მისმა გაუჩინარებამ ათასი ჭორ-მართალი გამოიწვია. ამ მეოცნებეთუხუცესმა ისიც არ გააკეთა, რომ გამოსულიყო და თავისიანები დაემშვიდებინა. ამით მან მეოცნებეების მიმართ უპატივცემულობა გამოიჩინა და დაამტკიცა, რომ პინგვინს უფრო დიდ პატივს სცემს, ვიდრე მთელ `ქართულ ოცნებას~.
- იქნებ ასე იმიტომ იქცევა, რომ ეს ხალხი მობეზრდა? ისეთი გარემოცვა ჰყავს, შეუძლებელია, არ მობეზრებოდა...
- მინდა იცოდეთ, რომ ეს ხალხი სულ მობეზრებული ჰყავდა. თავის გარშემო მხოლოდ იმიტომ შემოიკრიბა, რომ თავისი მიზნისთვის მიეღწია. ის მათზე და მთლიანად ქვეყანაზე ექსპერიმენტებს ატარებდა. ამ ექსპერიმენტებმა დაარწმუნა, რომ პოლიტიკური ალღო არ უვარგა. ყველას ახსოვს, რა განცხადებებს აკეთებდა მარგველაშვილი პრეზიდენტად არჩევამდე. ის სახალხოდ აცხადებდა, პლასტელინივითა ვარ და ისეთ ფორმას მივიღებ, როგორც გადამზილავთო. დრომ აჩვენა, რომ მთელ „ოცნებაში“ ის ყველაზე მყარი გამოდგა, დანარჩენები კი თავად გადაიზილნენ პლასტელინივით. დანარჩენი „ოცნების“ ფონზე მარგველაშვილი მართლა ფოლადივით გამოიყურება. მას კიდევ უფრო მეტი სიმყარე რომ გამოეჩინა, ქვეყნისთვის უკეთესი იქნებოდა. მან საკუთარ თავს უშველა, მაგრამ საკითხავია, რას იზამენ ივანიშვილის მიერ მიტოვებული „ოცნების“ წევრები.
- მაგათ იმდენი პატრონი გამოიცვალეს, ახლის მოძებნა არ გაუჭირდებათ. თან თქვენ თავად თქვით, რომ ახალი მესია გამოჩნდება და იმას მიესევიან...
- მართლაც რომ მიესევიან. ჩვენი პოლიტიკის უბედურება სწორედ ისაა, რომ ეს ხალხი ვერ გავყარეთ პოლიტიკიდან. ეს ადამიანები 4 ხელისუფლებას მოერგნენ და კიდევ რამდენიმეს მოერგებიან.
- ვისაც ერგებიან, იმას რაში სჭირდება ასეთი ხალხი?
- ასეთი ხალხის მოძებნა იოლია? თავი დავანებოთ იმას, რომ პოლიტიკურ ველზე მედროვეები სხვას არ აჭაჭანებენ. ისინი გასვრილები არიან, გასვრილი ხალხი კი სამართავად ძალიან იოლია. სკამების შესანარჩუნებლად ყველაფერზე მოაწერენ ხელს. ვიდრე პოლიტიკა ასეთი ხალხისგან არ გასუფთავდება, ქვეყანა ფეხზე ვერ დადგება.
————————
„ახალი თაობა“, 04 ივლისი, 2017 წელი
ინტერვიუ ალეკო ელისაშვილთან: „ელიავას ბაზრობაზე ხანძრის ხელოვნურად გაჩენის ეჭვს საფუძველი აქვს“
საკრებულოს დამოუკიდებელი დეპუტატი ალეკო ელისაშვილი „ახალ თაობასთან“ საუბარში ელიავას ბაზრობაზე მომხდარ ხანძარს ეხმაურება. საზოგადოებისთვის ცნობილია, რომ 2 ივლისის ღამით ელიავას ბაზრობაზე 14-მდე მაღაზია მთლიანად დაიწვა. იყვნენ დაშავებულებიც. მოვაჭრეებს ეჭვი აქვთ, რომ ხანძარი ვიღაცამ გააჩინა.
„დიდი ტერიტორია დაიწვა, დაახლოებით 2.500 კვადრატული მეტრი. მე რაც ჩემი თვალით ვნახე, შემიძლია ის გითხრათ, რომ ადამიანები იყვნენ აბსოლუტურად სასოწარკვეთილები, ვისაც სავაჭრო ჯიხურები ჰქონდათ, ვისაც ქონება გაუნადგურდათ. ეს ხალხი მძიმე დღეშია, აქვთ ვალები, კრედიტები და მათ იმედი არ აქვთ, რომ ვინმე ამ დანაკარგს აუნაზღაურებს“, – ამბობს ალეკო ელისაშვილი.
- მომხდარი კითხვის ნიშნებს აჩენს?
- საეჭვო არის. ისე, ზოგადად მე არ ვარ ეჭვიანი ადამიანი და მირჩევნია, ყველას ვენდო, ვიდრე არ ვენდო. ეჭვის საფუძველი არის და ვნახოთ. თეორიულად, რასაკვირველია, შეიძლება, რომ იქ ხანძარი მართლაც გაჩნდა, აალებადი პროდუქციაა და იქიდან მოედო დანარჩენ მაღაზიებს.
- მაშინ ეჭვს რა იწვევს?
- იმის გამო, რომ არც ერთი ხანძარი მანამდე არც ერთ ბაზრობაზე გამოძიებული არ არის და პროკურატურას, რომელიც სულ ტყუილად არსებობს და რეალურად არანაირ საქმეს არ აკეთებს, არც ერთ კონკრეტულ შემთხვევაში დასკვნა არ დაუდია, რომ ან ასე იყო, ან ისე იყო. ამის გამო არის სერიოზული უნდობლობა და ამის გამო არის შიშები, რომ აქ რაღაცა ისე არ არის. მოდი და ნუ გექნება ეს ეჭვები.
- წარსულზე რომ საუბრობთ, ბავშვთა სამყაროს დაწვის ფაქტსაც გულისხმობთ?
- თუნდაც რა გამოიძიეს ბავშვთა სამყაროს დაწვის ფაქტზე?! იანვარში მოხდა ეს ამბავი, ნახევარი წელი გავიდა, რა გამოიძიეს. ხომ შეიძლება მართლა რაღაც აალდა, ვიღაცას რაღაც დარჩა ჩართული და ასე შემდეგ, მაგრამ რა დაუსრულებელი გახდა ეს გამოძიება! ამიტომ ჩნდება ეჭვები და კითხვის ნიშნები.
- ელიავას ბაზრობის დაზარალებულები რას ამბობენ? აქვთ ეჭვის საფუძველი?
- ეს ადამიანები არიან ძალიან გაღიზიანებულები, თავზარდაცემულები. იყო შევარდნის და შეჭრის მცდელობები და პოლიცია ძლივს აკავებდა. ამ შემთხვევაში პოლიცია სწორად იქცეოდა. ესენი კი იყვნენ სასოწარკვეთილები, მაგრამ არაფრით არ შეიძლებოდა, ხანძარში ვინმე შევარდნილიყო. ასე ქაოტურად ვერავის შეუშვებდნენ, ზოგი თუ თავისი საქონლის გადასარჩენად იბრძოდა, შეიძლება სხვას ხელს გამოეყოლებინა სხვისი ქონება. ზოგს გული მისდიოდა და ზოგსაც გულის შეტევა მოუვიდა.
- ხელისუფლებას წინასაარჩევნოდ ნამდვილად არ აწყობს მსგავსი ინციდენტები, ამიტომ ამ შემთხვევაში ხელისუფლების ინტერესი ნაკლებად იკვეთება. რას იტყვით თქვენ?
- მე ნამდვილად ვერ ვიტყვი, რომ იქ ნარმანია მივიდა და იმან წაუკიდა ცეცხლი, ან ბიძინა ივანიშვილი და მუგუზალი შეაგდო, ცხადია, ამას ვერ ვიტყვი, მაგრამ ჩვენ რომ გვქონდეს წინა ხანძრები გამოძიებული, მაშინ ამდენი მითქმა-მოთქმა და ჭორიც არ იქნებოდა. მაშინ მართლა ვიტყოდით, რომ მოდით დაველოდოთ გამოძიებას. უკვე სასაცილო გახდა ტერმინი – დაველოდოთ გამოძიებას. იმიტომ, რომ რას ველოდოთ უსასრულოდ, არაფერს?! ზრდილობის გულისთვის რაღაც მაინც თქვან!
- ანუ სერიოზული უნდობლობაა?
- ასეა. ცარიელ ადგილზე არც ნდობა ჩნდება და არც უნდობლობა. ერთსაც და მეორესაც აქვს თავისი საფუძვლები. თუ ადამიანი კეთილსინდისიერად ასრულებს თავის საქმეს, მის მიმართ არის ნდობა. ადამიანი თუ ცუცურაკობს, არაფერს აკეთებს და თვალში ნაცარს გაყრის, მის მიმართ არის უნდობლობა. ეს ძალიან მარტივი ამბავია.
პროკურატურა თვალებში ნაცარს გვაყრის! რისი გამოძიებაც არ უნდათ, იმას არ იძიებენ. თან გვეუბნებიან, გამოძიება მიმდინარეობსო. რით ვერ დასრულდა?! ყაზბეგის გამზირზე მოჭრეს ხეები, ერთი წელი გავიდა და დღეს არ გვეუბნებიან, ვინ მოჭრა ეს ხეები, ან რატომ მოჭრა?! ესეც ხანძარია? ვთქვათ, ხანძრის გამოძიება რთულია. პროკურატურაში იმიტომ იღებენ ამხელა ხელფასს, რომ რთული საქმეები უნდა გააკეთონ. ესენი კი არაფერს ამბობენ, შესაბამისად, არის უნდობლობა და ამ ახალ ხანძარზე ჩნდება ეჭვები. ხელისუფლებას აწყობდა, ან არ აწყობდა, ეს რთული სავარაუდოა. ხელისუფლებას ის უნდა აწყობდეს, რომ ინციდენტები იყოს გამოძიებული. მაგრამ იძიებენ?!
- ასევე დიდი ამბავი ჰქონდა ოპოზიციას ნაზღაიძის ძმისთვის მიწის გადაცემის ფაქტზე, თუმცა აღნიშნულ საქმეზე სასამართლო წარმოება შეწყდა...
- დიახ, ნაზღაიძის საქმე, ფარცხალაძის საქმე. რა, მან ნაკლები გააკეთა? მერიისგან იყიდა 200 ათასად მიწის ნაკვეთი და იგივე ნაკვეთი დაუბრუნა მილიონნახევრად, მილიონ სამასი ათასი კი ჩაიდო ჯიბეში! რა, ეს გამოსაძიებელი არ არის?! ან ვიღაცა სოსო გოგაშვილი რომ არის უშიშროების მინისტრის მოადგილე, ცოტა ხნის წინ სოციალურად დაუცველთა სიაში რომ იყო და დღეს ცოლისდების სახელზე 120 ჰექტარი მიწა, სახლები, აგარაკები და ჯიპები რომ ჰყავს გადაფორმებული, ეს ეჭვის საფუძველს არ აღძრავდა და ეს არ უნდა გამოეძიებინათ?!
- მსგავსი ფაქტების შედეგად გაჩნდა უნდობლობა?
- უნდობლობა ჩნდება ზუსტად ასეთი ნაბიჯების შემდეგ! სააკაშვილისადმი უნდობლობა გაჩნდა მას შემდეგ, რაც სანდრო გირგვლიანთან დაკავშირებით თვალში ნაცარს გვაყრიდნენ და გვეუბნებოდნენ, სანდრო გირგვლიანი თვითონ მიუხტა კუდის სპეცრაზმს, დაუწყო ლანძღვა-გინება, ცემა-ტყეპა და წაათრია ხუთი კაცი ოქროყანის სასაფლაოზე, ურტყა და მერე თავი მოიკლა. აი, ამას გვეუბნებოდა მიხეილ სააკაშვილი და ამისი არავის სჯეროდა, ყველამ იცოდა რომ ეს იყო ტყუილი და ამიტომ გაჩნდა სააკაშვილისადმი უნდობლობა!
- ეს პარალელი ამ ხელისუფლებასთან რა შუაშია?
- მსგავსი ისტორიები დაიწყო ამ ხელისუფლებამ და უკვე ღრმად შეტოპილია ამ ისტორიებში.
