„რეზონანსი“: ინტერვიუ ნინო ბურჯანაძესთან: “პატრიოტთა ალიანსთან” გაერთიანებას არ ვაპირებთ“… // „დასავლელმა პარტნიორებმა ყველა ენაზე გვითხრეს, რომ საქართველოს არ აქვს ნატოში გაწევრიანების პერსპექტივა“
„ალია“: ნინო ბურჯანაძე: „პოლიტიკოსები, რომლებიც ნატოში გაწევრიანების შანსზე ისევ ლაპარაკობენ, პროვოკატორები და მატყუარები არიან“
„ახალი თაობა“: ინტერვიუ ჯემალ გამახარიასთან: „ამერიკამ აფხაზებისთვის სავიზო პოლიტიკა შეარბილა“
———————-
„რეზონანსი“, 5 მარტი, 2015 წელი
ინტერვიუ ნინო ბურჯანაძესთან: “პატრიოტთა ალიანსთან” გაერთიანებას არ ვაპირებთ“…
„დასავლელმა პარტნიორებმა ყველა ენაზე გვითხრეს, რომ საქართველოს არ აქვს ნატოში გაწევრიანების პერსპექტივა“
იაგო ნაცვლიშვილი
(შემოკლებით)
“გაერთიანებული დემოკრატიული მოძრაობის” ლიდერი ნინო ბურჯანაძე “რეზონანსთან” საუბრისას “პატრიოტთა ალიანსთან” გაერთიანებას გამორიცხავს. ბურჯანაძე ხაზგასმით აცხადებს, რომ ინაშვილთან ამ თემაზე საერთოდ არ უსაუბრია. იგი ამბობს, რომ გაერთიანების საკითხზე ამ ეტაპზე არავისთან საუბრობენ და პარტია რეგიონული ოფისების გაძლიერების საკითხზე მუშაობს. ბურჯანაძე მომავალში არ გამორიცხავს, რომ ამ თემაზე ვინმესთან მოლაპარაკება გაააქტიურონ, თუმცა დასძენს, რომ დღეის მონაცემებით ამის პერსპექტივა არ ჩანს.
ნინო ბურჯანაძემ “რეზონანსთან” ქართულ-რუსულ ურთიერთობაზეც ისაუბრა. მისი აზრით, საქართველოს ხელისუფლების ლიდერებს რუსეთთან პირდაპირი საუბარი რომ ჰქონოდათ, გრიგორი კარასინი არ იტყოდა იმას, რომ საქართველო უახლოეს წლებში დე-ფაქტო აფხაზეთისა და ოსეთის დამოუკიდებლობას აღიარებს.
“დემოკრატიული მოძრაობის” ლიდერის შეფასებით, აბაშიძის განცხადება გონივრული იყო, როდესაც მან თქვა, რომ საქართველო დღეს და ხვალ ნატოს წევრი ვერ გახდება. ფრანსუა ოლანდის განცხადებაც იმის დემონსტრირება იყო, რომ საქართველო უახლოესი ათწლეულების განმავლობაში ალიანსის წევრი ვერ გახდება.
(…)
„რეზონანსი“: აბაშიძე-კარასინის ბოლო შეხვედრას საქართველოში დიდი ვნებათაღელვა მოჰყვა. თქვენი აზრით, ზურაბ აბაშიძის მიერ “რია ნოვოსტისთვის” მიცემულ ინტერვიუში იყო ისეთი პასაჟები, რომელსაც ამხელა გამოხმაურება უნდა მოჰყოლოდა?
ნინო ბურჯანაძე: პრემიერ-მინისტრის წარმომადგენელმა რუსეთთან ურთიერთობის საკითხებში ზურაბ აბაშიძემ რეალურად ის გაიმეორა, რაზეც მე კარგა ხანია ვსაუბრობ. ოღონდ აქამდე ხელისუფლება და თავად აბაშიძე ნაკლებად ლაპარაკობდნენ. ის ისტერიკა, რაც “ნაცმოძრაობამ” და “თავისუფალმა დემოკრატებმა” ალასანიას ხელმძღვანელობით ატეხეს, ჩემთვის აბსოლუტურად გასაგებია. ეს ორი პოლიტიკური ძალა ერთმანეთს ეჯიბრება იმაში, ვინ უფრო პროდასავლური ძალის ადგილს დაიმკვიდრებს. თუ “ნაცმოძრაობა” ადგილის შენარჩუნებას ცდილობს, “თავისუფალი დემოკრატები” “ნაცმოძრაობის” ჩანაცვლებას ცდილობენ, რომ როგორმე დაანახონ საკუთარი პოლიტიკური ძალის პროდასავლურობა დასავლელ პატრონებს. ამ ძალების აპელირება ნათლად აჩვენებს მათ მიზანს. სამწუხაროდ, არც ქვეყანა აინტერესებთ და არც რეალობა.
„რეზონანსი“: ამბობთ, რომ ქვეყნის საგარეო კურსი პიარის ნაწილად აქციეს?
ნინო ბურჯანაძე: რა თქმა უნდა, ეს პიარის ნაწილია, ისევე როგორც თანამდებობების დატოვება აქციეს პიარის ნაწილად, თუმცა ეს ძალიან ცუდად გამოუვიდათ. ძალიან სასაცილოა, რომ ალასანიას გუნდმა რეალურად ოპოზიციაში გადასვლაც კი ვერ მოასწრო, როდესაც ყველაფერი იმის კრიტიკა დაიწყეს, რომლის ნაწილიც თავად იყვნენ. შეგახსენებთ, რომ ისინი ოპოზიციაში მას შემდეგ გადავიდნენ, როდესაც მათი ლიდერი თანამდებობიდან გაათავისუფლეს. ალასანია რომ არ გაეთავისუფლებინა პრემიერს, დღესაც ხელისუფლებაში იქნებოდნენ და არც აბაშიძის განცხადებები შეუქმნიდათ უხერხულობას და არც ივანიშვილის კულისებიდან მართვა.
აბაშიძის განცხადებებს რაც შეეხება, საკმაოდ გონივრული იყო, მაგრამ პრობლემა ისაა, რომ არც მისი მანდატი და არც ამ შეხვედრების ფორმატი არ ითვალისწინებს ასეთი განცხადებების კეთების შესაძლებლობას.
„რეზონანსი“: მაია ფანჯიკიძემ “რეზონანსთან” ინტერვიუში თქვა, რომ აბაშიძის განცხადება გავლენას მოახდენს ნატოს წევრი ქვეყნების იმ ლიდერებზე, რომლებიც ისედაც სკეპტიკურად უყურებდნენ ჩვენს ინტეგრაციას ალიანსში. გუშინ უკვე მოვისმინეთ საფრანგეთის პრეზიდენტის, ფრანსუა ოლანდის განცხადება, რომ ნატო გაფართოებას არ აპირებს…
ნინო ბურჯანაძე: თქვენ და მაია ფანჯიკიძეს გგონიათ, რომ ოლანდი აბაშიძის განცხადებების მიხედვით იღებს გადაწყვეტილებებს? ოლანდამდე გაცილებით ადრე ეს თქვა მერკელმა, თავის დროზე ეს განაცხადა რასმუსენმა, შარშან ეს ობამაც თქვა…
მე ძალიან კარგად მესმის, რომ დასავლეთმა ანგარიში გაუწია რუსეთს. ნათლად დაიწყო საუბარი, რომ საქართველო ნატოში ვერ შევა. რუსეთის განცხადებები არ არის ის, რომლის იგნორირებაც დასავლეთს შეუძლია.
კიდევ ერთხელ ვიმეორებ, დასავლელმა პარტნიორებმა ინგლისურად გვითხრეს, გერმანულად, ფრანგულად, რუსულად და ქართულადაც, რომ საქართველოს არ აქვს ნატოში გაწევრიანების პერსპრექტივა. თუ ეს განცხადება მოულოდნელი იყო ჩვენი ხელისუფლებისთვის, კიდევ უარესი, ეს ნიშნავს, რომ ჩვენი ბედი და ჩვენთან დაკავშირებული საკითხები ჩვენ გარეშე წყდება ისე, რომ ამაზე არავინ საქმის კურსში არ გვაყენებს.
გუშინ ოლანდმა საბოლოო წერტილი დაუსვა საქართველოს ნატოში გაწევრიანების შანსს უახლოესი ათწლეულების განმავლობაში. ნატოს წევრ ქვეყნებს ალიანსის გაფართოების საკითხზე ვეტოს უფლება აქვთ. დაახლოებით ასეთი შთაბეჭდილება დამრჩა, რომ ვერ გაიგეს ამ ქართველებმა დიპლომატიურად ნათქვამი და ახლა პირდაპირ სახეში უნდა მოგახალოთ, რომ ვერ გახდებით ალიანსის წევრიო. დაახლოებით ასე ჟღერდა მისი განცხადება. ასეთი მკვეთრი განცხადება დიპლომატიისთვის არადამახასიათებელი ენა არაა, მაგრამ როგორც ჩანს, მათ პირდაპირ თქმა გადაწყვიტეს. თუ ახლა კიდევ გავაგრძელებთ ნატოს კარზე კაკუნს, ეს ქვეყანას არავითარ სიკეთეს არ მოუტანს.
„რეზონანსი“: აბაშიძესთან შეხვედრიდან გამოსულმა კარასინმა განაცხადა, რომ უახლოეს წლებში საქართველო თავად აღიარებს აფხაზეთისა და ოსეთის დამოუკიდებლობას, მაშინ როდესაც აბაშიძემ თქვა, რომ ამ საკითხზე საერთოდ არ უმსჯელიათ. რაზე მიანიშნებს ეს პოზიცია?
ნინო ბურჯანაძე: ეს აბსოლუტურად მიუღებელია ჩემთვის, ვინც უნდა თქვას, ეს იქნება კარასინი თუ პუტინი. არასოდეს შევეგუებით იმას, რომ ჩვენი განუყოფელი ნაწილი აფხაზეთი და სამაჩაბლო არ იყოს საქართველოს შემადგენლობაში.
პირდაპირ გეტყვით, ჩვენ რომ მოლაპარაკება დაგვეწყო თუნდაც ორი წლის წინ, ბიძინა ივანიშვილს კეთილი ენება და შეხვედროდა პუტინს ან ღარიბაშვილი და მარგველაშვილი ჩამოყალიბებულიყვნენ და მოლაპარაკება ეწარმოებინათ რუსეთთან, კარასინი ასეთ განცხადებას არ გააკეთებდა.
5 წლის წინ, როდესაც პუტინს შევხვდი, კონკრეტული შედეგების მიღწევის გაცილებით მეტი შანსი გვქონდა, ვიდრე დღეს გვაქვს. ყველა იმ ადამიანმა, ვინც მე პრორუსს მეძახდა, ნებსით თუ უნებლიეთ, ყველაფერი გააკეთა იმისთვის რომ საქართველოსა და რუსეთს შორის მოლაპარაკება არ გამართულიყო. მოვა დრო და ამას დავამტკიცებ, რადაც უნდა დამიჯდეს.
„რეზონანსი“: როგორ ფიქრობთ, რუსი ოპოზიციონერის, ბორის ნემცოვის მკვლელობა ვის ინტერესში შედიოდა?
ნინო ბურჯანაძე: რუსეთის ხელისუფლების ინტერესში რომ არ შედიოდა, ეს შემიძლია აბსოლუტურად დაბეჯითებით გითხრათ. მის თანამებრძოლებსა და თანაგუნდელებსაც არ უთქვამთ, რომ რუსეთის ხელისუფლებამ მოკლა, მაგრამ ეს თქვეს “რესპუბლიკელებმა” და “თავისუფალმა დემოკრატებმა”.
როგორ ფიქრობთ, ეს რომ პუტინის ხელისუფლებას სდომოდა, მაინცდამაინც კრემლის ფონზე მოკლავდნენ და მსოფლიოს აჩვენებდნენ, როგორ არის ოპოზიციონერი ლიდერი კრემლის ფონზე მოკლული?! ეს არის იმის ინტერესში, ვისაც რუსეთში დესტაბილიზაციის მოწყობა სურს და რუსეთის იმიჯის მაქსიმალური შელახვა უნდა.
„ალია“, 5 მარტი, 2015 წელი
ნინო ბურჯანაძე: „პოლიტიკოსები, რომლებიც ნატოში გაწევრიანების შანსზე ისევ ლაპარაკობენ, პროვოკატორები და მატყუარები არიან“
„გაერთიანებული დემოკრატიული მოძრაობის“ ლიდერის ნინო ბურჯანაძის განცხადებით, ჩვენმა დასავლელმა პარტნიორებმა არაერთგზის პირდაპირ გვითხრეს, რომ საქართველოს ნატოში გაწევრიანების პერსპექტივა გაურკვეველი მომავლის საქმეა.
აღნიშნულით ნინო ბურჯანაძე საფრანგეთის პრეზიდენტ ფრანსუა ოლანდის იმ განცხადებას გამოეხმაურა, სადაც ოლანდი ნატოს გაფართოების წინააღმდეგ გამოდის და მიიჩნევს, რომ ნატომ, მასში გაწევრიანების მსურველ ქვეყნებს უარი უნდა უთხრას.
„ქართული ანდაზაა, „კარგ მთქმელს კარგი გამგონე უნდაო“. საქართველოში, სამწუხაროდ, ბოლო პერიოდის განმავლობაში ეს ანდაზა არ მუშაობს. ათასჯერ გვითხრეს ჩვენმა დასავლელმა პარტნიორებმა: 2014 წელს გამოვიდა ბატონი ობამა და თქვა, რომ უკრაინისა და საქართველოს ნატოში გაწევრიანება არ იგეგმება; გამოვიდა ნატოს გენერალური მდივანი, რომელმაც იგივე თქვა, და უამრავი სხვა პოლიტიკოსი, რომელთაც იგივე გაიმეორეს; ოლანდმა საბოლოოდ გვითხრა, რომ საფრანგეთი არ დაუჭერს მხარს ახალი კანდიდატების ნატოში შესვლას. ეს ნიშნავს იმას, რომ საფრანგეთს, გერმანიასა და სხვა სახელმწიფოებს ვეტოს უფლება აქვთ ნატოს გაფართოებასთან ან არგაფართოებასთან დაკავშირებით. საქართველოს არ აქვს შანსი ნატოში გაწევრიანების, რა ენაზე უნდა გვითხრან მეტი. ინგლისურად გვითხრეს, ფრანგულად გვითხრეს, გერმანულად გვითხრეს, ამდენი ხანია მე ქართულად ვამბობ ამას, კიდევ რა ენაზე უნდა გვითხრან? ხოლო ის პოლიტიკოსები ვინც დღეს კვლავ ლაპარაკობენ საქართველოს ნატოში გაწევრიანების შანსზე, უბრალოდ, პროვოკატორები და მატყუარები არიან და ცდილობენ, ამ განცხადებებით როგორმე ქულები დაიწერონ თავიანთ დასავლელ პატრონებთან“, – განაცხადა „გაერთიანებული დემოკრატიული მოძრაობის“ ლიდერმა.
მისივე თქმით, ნატოში ვერ გავწევრიანდებით და ამის შანსი საქართველოს, უახლოეს მომავალშიც არ აქვს.
„რა იქნება 30 და 50 წლის შემდეგ, არავინ იცის. შესაბამისად, ჩვენ უნდა ვიმოქმედოთ იმ რეალობიდან გამომდინარე, რომელიც დღეს ქვეყანაშია. 2008 წლის აგვისტოს ომმა რადიკალურად შეცვალა სიტუაცია და 2008 წლის შემდეგ ვერ მომიტანთ ვერც ერთი სერიოზული პოლიტიკოსის გამონათქვამს, რომელიც ნატოში საქართველოს გაწევრიანების უახლოეს პერსპექტივაზე ლაპარაკობს. ყველა იფარგლებოდა ზოგადი ფრაზით, რომ ოდესმე საქართველო შეიძლება გახდეს ნატო-ს წევრი და რომ ნატოს კარი საქართველოსთვის ღიაა. მე მაქვს იმის გამოცდილება, ცოდნა და რაც მთავარია, გამბედაობა, რომ ადამიანებს ვუთხრა ის რეალობა, რა რეალობაც არის. თუ კვლავ ილუზიებში ვიცხოვრებთ, კიდევ უფრო მძიმე მდგომარეობაში აღმოვჩნდებით. ეს არის რეალობა, ახლა ვისაც რა უნდა, ის იძახოს. ვისაც უნდა იძახოს, რომ თურმე პროქართული პოლიტიკის უკან რუსეთის პოლიტიკა ყოფილა და თურმე რუსეთის პოლიტიკას უდრის პროქართული პოლიტიკა. ესე იგი ჩვენი ინტერესები ასე ემთხვევა ერთმანეთს?
დავანებოთ თავი კეკლუცობას, ადამიანების მოტყუებას და დავანებოთ თავი იმ პოლიტიკოსების მოსმენას, რომლებიც ყველაფერზე მიდიან, ოღონდ დასავლეთთან თავიანთი იმიჯი და პოლიტიკაში არსებობის შანსი შეინარჩუნონ“, – განაცხადა ნინო ბურჯანაძემ.
„ახალი თაობა“, 5 მარტი, 2015 წელი
ინტერვიუ ჯემალ გამახარიასთან: „ამერიკამ აფხაზებისთვის სავიზო პოლიტიკა შეარბილა“
ინტერვიუში აფხაზეთის უზენაესი საბჭოს თავმჯდომარის მოადგილე ჯემალ გამახარია ჟურნალისტ გულიკო ბალაძესთან ქართულ-აფხაზურ და აფხაზურ-რუსული ურთიერთობების შესახებ საუბრობს.
გთავაზობთ ამონარიდს:
– ბატონო ჯემალ, მოგეხსენებათ, ერთ მხარესაა ევროპის, დასავლეთის ინტერესები, მეორე მხარეს – რუსეთის, მესამეა საქართველოს სახელმწიფოს ინტერესები, რომელიც, ფაქტობრივად, დაკავშირებულია საქართველოს ტერიტორიულ გამთლიანებასთან, დღევანდელი რთული პოლიტიკური ლაბირინთებიდან უვნებლად ამოსვლასა და თავის გადარჩენასთან. როგორ უნდა მოვახერხოთ ეს?
– ჩვენთვის კარგადაა ცნობილი რუსეთის ინტერესი. მას ოკუპირებული აქვს ჩვენი ტერიტორია. დასავლეთსაც აქვს თავისი ინტერესები. მართალია დასავლეთი მხარს უჭერს საქართველოს ტერიტორიულ მთლიანობას, მაგრამ არ დგამს ისეთ კონკრეტულ ქმედით ნაბიჯებს, რომ მოხდეს აფხაზეთის დეოკუპაცია. ფაქტობრივად, დაკონსერვებული კონფლიქტია, რა ვადით, არ ვიცით. დასავლეთს ბევრი სხვა პრობლემა გააჩნია. თუმცა, აფხაზეთის პრობლემა მათი პრობლემაცაა. რაც უფრო ადრე მიაქცევენ მეტ ყურადღებას, მით უფრო კარგი იქნება მათთვის. ტერიტორიული მთლიანობის აღდგენას საქართველოსთვის სასიცოცხლო მნიშვნელობა აქვს, სანამ ეს პრობლემა არაა მთელი მსოფლიოს ერთ-ერთი მ თავარი საზრუნავი, მანამ არ შეიქმნება ისეთი პოლიტიკური სიტუაცია, რომელიც განაპირობებს კონფლიქტის სტაგნაციის შეცვლას. მანამდე უნდა შევეცადოთ აფხაზეთში დარჩენილ ჩვენს მოქალაქეებთან დაახლოვებას, მათი მონაწილეობით სხვადასხვა პროგრაების განხორციელებას, ნდობის აღდგენას, რამდენადაც შესაძლებელია. სხვა გზა არ გაგვაჩნია. ხვალ და ზეგ აუცილებლად დადგება ტერიტორიული მთლიანობის აღდგენის ჟამი. შერიგების პოლიტიკა, სახალხო დიპლომატია, სხვადასხვა პროექტების განხორციელება აქეთკენ გადადგმული ნაბიჯია.
– ახლახან აფხაზეთში სურკოვი იმყოფებოდა. მან თქვა, რომ აფხაზეთსა და რუსეთს შორის საზღვარი საჭირო არ არის. თქვენ როგორი რეაქცია გქონდათ მის განცხადებაზე?
– ეს საზღვარი რუსეთისთვის არასოდეს არსებობდა. რა საზღვრის პრობლემა აქვთ რუსებს აფხაზებთან, როდესაც აღნიშნული ტერიტორია ოკუპირებული აქვთ და თვითონ აწესებენ საზღვარსაც, სასაზღვრო რეჟიმსაც. ყველაფერს თვითონ აგვარებენ. აფხაზური მხარის გადაწყვეტილება არ არის იმგვარი რეჟიმის არსებობა რეგიონში. ამას რუსეთი აკეთებს. უნდა რაღაცას შეცვლის, უნდა – არა. საბოლოომიზანი ამ ტერიტორიის ანექსიაა, რის შემდეგაც ფორმალური საზღვარიც აღარ იქნება. სურკოვმა მოვლენებს გაასწრო და თქვა, საბოლოო მიზანი რა არის. ამან აფხაზეთის მოსახლეობის საკმაოდ დიდი ნაწილის უკმაყოფილება გამოიწვია. სეპარატისტებმა სურკოვის ნათქვამი შეალამაზეს და თქვეს, ევროპაში არიან დიდი სახელმწიფოები, რომლებსაცსაზღვარიფორმალურად აქვთ, იქ არავითარი მესაზღვრეები არ დგანან. ჩვენც რუსეთის ასეთი მოკავშირეები ვართ, ეს იგულისხმა სურკოვმა და არა საზღვრის მთლიანად გაუქმებაო, რაც მოსახლეობის დასამშვიდებლად და მოსატყუებლადაა ნათქვამი. ცხადია, რუსეთის მიზანია ამ ტერიტორიის სრული ანექსია და საზღვრების მოშლა.
– ფაქტია, რომ რუსეთი ცდილობს საქართველო-რუსეთის საზღვარი ქვეყნის შუაგულში გადმოიტანოს. აფხაზეთსა თუ ცხინვალის რეგიონში ამ პოლიტიკას ყოველდღიურად ახორციელებს. ჩვენ როგორ შეგვიძლია დავუპირისპირდეთ მათ ამგვარ განზრახვებს?
– რუსეთის განზრახვებს შეგვიძლია დავუპირისპირდეთ მხოლოდ და მხოლოდ საერთაშორისო ასპარეზზე, საერთაშორისო ორგანიზაციებში მკაცრი განცხადებებით. სამწუხაროდ, იარაღით წინ ვერ აღვუდგებით, რადგან მას მოჰყვება რუსეთის შეიარაღებული ძალების რეაქცია და სადაც მოუნდებათ, იქ გაავლებენ საზღვარს, რასაც იურიდიული ძალა არ გააჩნია, მაგრამ, ფაქტობრივად, ასეა. რუსეთის ქმედებები ძალიან მძიმე მდგომარეობაში აყენებს მთლიანად ქვეყანას, მოსახლეობას, რომელსაც ეს უშუალოდ ეხება. ამიტომ საჭიროა ამ მიმართულებით ჩვენი საგარეო პოლიტიკის გააქტიურება და საერთაშორისო ორგანიზაციებში ამ საკითხის ძალიან მკაცრად დასმა. რა მნიშვნელობა აქვს, ტერიტორიას შეიარაღებული ბრძოლით და ომებით იპყრობს, თუ სარგებლობს დიდი სამხედრო უპირატეოსბით. სახელმწიფო საზღვარს, სადაც უნდა, გაავლებს. ეს არის სახელმწიფო საზღვრის შეცვლა. ჩვენი ხელისუფლება უნდა შეუერთდეს იმ სანქციებს, რომელიც უკრაინის მოვლენებთან დაკავშირებით რუსეთს დაუწესეს. სანქციები ყირიმით დაიწყო და გამკაცრდა დონეცკსა ლუგანსკში განვითარებულ მოვლენებთან დაკავშირებით. სანქციებში უნდა ჩაერთოს საქართველოც. რა მნიშვნელობა აქვს, ახლა ბრძოლები არის თუ არა, გადმოწია ოკუპაციის ხაზი და მიისაკუთრა ტერიტორია. თუ დასავლეთი ამაზე თვალს დახუჭავს, ხვალ და ზეგ დიდი პრობლემის სახით მიუბრუნდება, როგორც, სამწუხაროდ, არაერთხელ მომხდარა. დასავლეთმაც ამას სერიოზული ყურადღება უნდა მიაქციოს. სერიოზული რეაგირება დასავლეთის მხრიდან არ არის.
– ცოტა ხნი სწინ, აფხაზეთის ე.წ. საგარეო საქმეთა მინისტრის ჩირიკბას განცხადება გავრცელდა, რომელიც შეეხებოდა აფხაზებისთვის რუსეთის პასპორტით ამერიკაში შესვლის უფლებას, ანუ სავიზო რეჟიმის შერბილებას. საქართველოს საგარეო საქმეთა სამინისტრომ აღნიშნული ინფორმაცია არ დაადასტურა. თქვენ თუ გაიგეთ, ამერიკამ მართლა დაუშვა რუსული პასპორტებით აფხაზების ამერიკაში შეშვება?
– სამწუხაროდ, არ მოგვისმენია ამერიკული მხარის რეაქცია ამაზე. თუმცა, ჩირიკბამ ნამდვილად განაცხადა, რომ აშშ-მა შეარბილა სავიზო პოლიტიკა აფხაზეთის მცხოვრებთათვის, რომლებიც ამერიკაში აპირებენ შესვლას სოხუმში, რუსეთის საელჩოს მიერ გაცემული პასპორტებით. თუ ადრე არავინ ცნობდა რუსეთის საელჩოს მიერ სოხუმში გაცემულ რუსულ პასპორტებს, ახლა თითქოს აშშ-მა ამ პასპორტებით აფხაზეთის მოაქალაქეებს ქვეყანაში შესვლის უფლება დართო. დიდ ტრაგედიას ვერ ვხედავ, თუ აფხაზები აშშ-ში გაემგზავრებიან, იქნებ მათ იქ ის ნახონ, რასაც რუსეთში ვერასოდეს იხილავენ, მაგრამ თუ ეს მართლა მოხდა, რატომ მოხდა საქართველოს საგარეო საქმეთა სამინისტროსთან შეთანხმების გარეშე. ალბათ, ამის პასუხს აშშ-გან გავიგებთ, რა მოხდა სინამდვილეში. თუმცა, ცუდს ამაში ვერაფერს ვხედავ.
– თუ ვიცით ჩვენ ან ვინმემ ამ სახელმწიფოში, მართალა რომ შეგვეშვას რუსეთი, აფხაზებთან მოლაპარაკება შეიძლება?
– რასაკვირველია, შეიძლება. თუ მოხდება აფხაზეთისა და ცხინვალის რეგიონის დეოკუპაცია, დარწმუნებული ვარ, აფხაზებიც არ იქნებიან წინააღმდეგი და იმ დღესვე შესაძლებელია მოლაპარაკების გზით მოვაგვაროთ ურთიერთობა. თუმცა, სანამ საოკუპაციო ჯარი დგას აფხაზეთისა და ცხინვალის ტერიტორიაზე, არავითარი მოლაპარაკება არ გაიმართება. რუსეთი კი ასეთ ფარისევლურ განცხადებებს გააკეთებს, ვითომ საერთაშორისო საზოგადოების შეცდომაში შეყვანის მიზნით. რუსები წავიდნენ თავიანთ ქვეყანაში და აფხაზებისა და ქართველების შერიგება თავისთავად მოხდება, სულაც არ სჭირდება ამას რუსების შუამდგომლობა.
