„ახალი თაობა“: ინტერვიუ დავით ზურაბიშვილთან: „ბიძინა ივანიშვილი პროცესებს კულუარებიდან მართავს“

„ახალი თაობა“: ინტერვიუ ლადო სადღობელაშვილთან: „ირაკლი კობახიძე პარლამენტის თავმჯდომარეობიდან, ფაქტობრივად, გადააყენეს“ // პარლამენტზე კონტროლს „ნაციონალები“ ამყარებენ

„ახალი თაობა“: ოპოზიცია გიორგი კვირიკაშვილთან შეხვედრას ითხოვს

ინტერვიუ კახა კუკავათან: „ოცნებას“ კონსტიტუციაში დამატებით ცვლილებებს შევატანინებთ“

——

„საქართველო და მსოფლიო“: საერთაშორისო მედიაფორუმი „მედია, პოლიტიკა, ფასეულობები: დავძლიოთ „პოსტსიმართლე”

——————-

„ახალი თაობა“, 05 ივლისი, 2017 წელი

ინტერვიუ დავით ზურაბიშვილთან: „ბიძინა ივანიშვილი პროცესებს კულუარებიდან მართავს“

რესპუბლიკური პარტიის ერთ-ერთი ლიდერი, თბილისის საკრებულოს დეპუტატი დავით ზურაბიშვილი „ახალ თაობასთან“ ინტერვიუში ე.წ. ელიავას ბაზრობის ირგვლივ განვითარებულ მოვლენებსა და თბილისის განაშენიანების გენერალურ გეგმაზე საუბრობს.

- ბატონო დავით, „ბავშვთა სამყაროში“ ცეცხლის გაჩენის ფაქტის შემდეგ ე.წ. ელიავას ბაზრობაზე გაჩენილ ცეცხლს არაერთგვაროვანი შეფასებები მოჰყვა, საუბრობენ გარკვეულ ინტერესებზე. როგორც ცნობილია, ელიავას ტერიტორიაზე სარეკრეაციო ზონის გაშენების პროექტის განხილვა იყო საკრებულოს სხდომაზე. რა კავშირში შეიძლება იყოს ბოლო პერიოდში ბაზრობებზე ცეცხლის გაჩენის ფაქტი გარკვეულ ინტერესებთან?

- ამ კავშირებს ვერც დავადასტურებ და ვერც უარვყოფ, თუმცა, კავშირშია იმდენად, რამდენადაც ძალიან მალე გაკეთდა განცხადებები, მათ შორის საკრებულოს უმრავლესობის წარმომადგენლებისგან, რომ ელიავას ბაზრობა კეთილმოეწყობა, ხალხს უკეთესი სამუშაო პირობები ექნება და ა.შ.

- ჯაბა სამუშიას განცხადებებს გულისხმობთ?

- დიახ, ეს არ არის შემთხვევითი განცხადებები. ამ პროექტს მხარდაჭერა აქვს. თბილისის საკრებულოში შემოვიდა სრულიად სხვა პროექტი, რომელიც ითვალისწინებდა იქ დიდი დახურული ტიპის ბაზრობის აშენებას. უმრავლესობის წევრებშიც, როგორც ჩანს, ამ პროექტთან დაკავშირებით არ არის ერთიანი ხედვა. ოპოზიციამ, ჩვენ, საკრებულოს დამოუკიდებელმა დეპუტატმა ჩვენი ხედვა გამოვთქვით ამ პროექტთან დაკავშირებით.

- საკრებულოს უმრავლესობის შიგნითაც არ არის ერთიანი ხედვა იმ პროექტთან დაკავშირებით, რომელიც ე.წ. ელიავას ბაზრობას უკავშირდება?

- მკვეთრი, უარყოფითი შეფასება არავისგან მომისმენია, მაგრამ, რადგან აქამდე გადაიდო, ე.ი. რაღაც შენიშვნები იყო. ამ დროს არსებობს მეორე ხედვა, რომელიც ეფუძნება დედაქალაქის განვითარების გენერალური გეგმის ჯგუფის ხედვას. 2015 წლის ადგილობრივი არჩევნების შემდეგ შეიქმნა გენერალური გეგმის ჯგუფი, რომელმაც პრაქტიკულად უნდა შექმნას თბილისისთვის ჩარჩო-საფუძველი, რომლის ნიადაგზეც მოხდება დედაქალაქის შემდგომი განაშენიანება. მნიშვნელოვან ადგილებში, სადაც ბევრი ინტერესის კვეთაა, მათ, ცხადია, გარკვეული მოთხოვნები და ხედვა აქვთ. მაგალითად, ე.წ. ელიავას ბაზრობაზე, რომელიც 42 ათასი კვ მეტრს მოიცავს, არის მოსაზრება, რომ დიდი სარეკრეაციო ზონა შეიქმნას, ცენტრალური პარკი. დიდი ურბანისტობა და ქალაქგეგმარების სპეციალისტობა არ სჭირდება იმის წარმოდგენას, თუ როგორ შეიძლება ის ტერიტორია განვითარდეს, სადაც ცენტრალური პარკი აშენდება, როგორ გახდება ის მიმზიდველი, მაგრამ, როგორც გითხარით, არის მეორე ხედვაც, რომელზეც გაკეთდა განცხადებები საკრებულოს უმრავლესობის წარმომადგენლების მხრიდან.

- ქალაქის გენერალური გეგმის პროექტის პრეზენტაცია, როგორც ცნობილი იყო, აპრილში უნდა გამართულიყო, თუმცა ჯერ ქალაქის გენგეგმა არავის უნახავს. რატომ გადაიდო, როგორ ფიქრობთ?

- დიახ, გენერალური გეგმის პრეზენტაცია აქამდე უნდა გამართულიყო, თუმცა ვხედავთ, რომ არ გამართულა. როგორც ვიცი, შემოდგომისთვის არის გადადებული, რისი მიზეზიც შეიძლება ის პარალელური პროექტებია, რომლებიც გენგეგმის ჯგუფის ხედვას ეწინააღმდეგება. რა არის გენერალური გეგმა? სწორედ გენერალური გეგმის საფუძველზე უნდა მოხდეს ქალაქის შემდეგი განაშენიანება, დაგეგმარება და არა ვიღაცის ინტერესებისა და ჯგუფების აზრების გათვალისწინებით.

- ასეთი მოსაზრება გამიგია, რომ დავით ნარმანიას მერობის დროს ბევრი არაფერი გაკეთებულა ქალაქისთვის, მაგრამ მთავარს - გენგეგმას დაუტოვებს თბილისს. გამოდის, გენერალური გეგმის შექმნის საკითხი გადაიდო?

- არ ვიცი, რას დატოვებს და როგორ, რადგან აქამდე ვერ დატოვა, მაგრამ ერთი პრობლემა აშკარაა: უამრავი პროექტი შემოდის, ერთ-ერთი ე.წ. ელიავას ბაზრობის ტერიტორიასთან დაკავშირებით უკვე გითხარით. ეს პროექტები არ არის გენგეგმის შემქმნელებთან შეთანხმებული. როგორც ჩანს, ეს სერიოზული პრობლემაა. ვფიქრობ, სწორედ იმიტომ შეჩერდა გენგეგმის პრეზენტაცია, რომ ვიღაცები რაღაცის მოსწრებაზე არიან. გენგეგმის დამტკიცების შემდეგ ასე თავისუფლად ვეღარ მოხდება ამ პროექტების განხორციელება. ეს იცის ყველამ. 2010 წელს ნაციონალურ მოძრაობასაც ჰქონდა ასეთ დაპირება, რომ ქალაქის გენერალურ გეგმას შექმნიდა, გარკვეული განაშენიანების თეორია დაიდო, რომლის საფუძველზეც ქალაქი ზონებად დაიყო და ა.შ. მაგრამ ეს არ იყო ქალაქის გენერალური გეგმა. იმის შემდეგ 2 ათასი თუ 3 ათასი შესწორებაა შეტანილი. ამით არ დაკმაყოფილდნენ და საკრებულოსა და პარლამენტის მიერ მთელი რიგი საკანონმდებლო ნორმებია მიღებული, რომლებიც იძლევა შესაძლებლობას, რომ განაშენიანების რეგულირების გეგმას გვერდი აუარონ და ისე განახორციელონ მშენებლობები, რომ საერთოდ არაფერს ანგარიში არ გაუწიონ. ნარმანიამ ეს საკითხი ვერ მოაგვარა და დღესაც ზუსტად იგივე ვითარება გვაქვს, არავინ იცის, სად რა შენდება. იყო დაპირება, რომ გენერალური გეგმა დაიდებოდა, თითქოს ბოლომდეა საქმე მიყვანილი, მაგრამ პრეზენტაცია დღემდე არ მომხდარა.

- ჩაიშალა?

- არა, არ ჩაშლილა, დარწმუნებული ვარ, იქნება, მაგრამ, არის მცდელობა, რომ მანამდე რაღაცები უნდა მოესწროს. არ გამოვრიცხავ, რომ თუ `ქართული ოცნების~ მერობის კანდიდატი გახდა მერი და ქალაქის მთავრობაში კვლავ მმართველი პარტია დარჩება, მაშინ დარჩეს ის სტრატეგია, რომელიც იყო ნაციოანლების დროს, როდესაც მთავარ როლს თამაშობს სისტემა და არა დაწერილი დოკუმენტი.

- მერობის კანდიდატებზე რას იტყვით? თუ კახა კალაძე გახდა მერი, კურსი შეიცვლება?

- კურსის ცვლილებაზე იმ შემთხვევაში შეიძლება მსჯელობა, თუკი ვიტყვით, რომ დღეს რაც დედაქალაქის პოლიტიკაში ხდება, არის არა ერთი კაცის, არამედ ზოგადად ხელისუფლების პოლიტიკა. ის მიდგომა, რომელიც დღეს არის, რა თქმა უნდა, შენარჩუნებული იქნება ბატონი კალაძის პირობებშიც. წინააღმდეგ შემთხვევაში, თუ კალაძე გახდება მერი და მას ენდომება, ეს მდგომარეობა შეცვალოს, უნდა გამოიცვალოს პოლიტიკური პარტია და გუნდი.

- ეს როგორ?

- ამას ვამბობ იმიტომ, რომ ბიძინა ივანიშვილის მიერ შექმნილ „ქართულ ოცნებაში“ ის პოლიტიკა გატარდება, რომელიც ახლა ტარდება, სხვა ვერ გატარდება. ნარმანიასაც სულ სხვა გეგმები ჰქონდა პირველ ეტაპზე.

- ბატონო დავით, ექსპერტების მოსაზრებას, რომ ბიძინა ივანიშვილი პოლიტიკურ პროცესებს ჩამოშორდა და ეს გამოჩნდა კახა კალაძის წარდგენაზეც, არ ეთანხმებით?

- შეიძლება დროებით ჩამოსცილდა, მაგრამ შეიძლება კვლავ აქტიური გახდეს. ეს არ არის გამორიცხული. ის, რაც აქამდე კეთდებოდა, საბოლოო ჯამში, ამ პიროვნების პოლიტიკური ნება იყო. დარწმუნებული ვარ, ივანიშვილი კულუარებიდან პროცესების მართვას არ ჩამოსცილებია. ჩვენ, რესპუბლიკურ პარტიას, კოალიციაში ყოფნის დროს გვქონდა მცდელობები, რომ ბიძინა ივანიშვილის სტატუსი გარკვეულ ინსტიტუციურ ჩარჩოებში მოგვექცია, მაგრამ ეს ვერ მოხერხდა, რადგან მას პრინციპულად არ უნდა ოფიციალური სტატუსი. მას პრინციპულად სურს იყოს კულუარებში და იქიდან მართოს პროცესები, რაც არ გამოვა. ეს შეუძლებელია.

„ახალი თაობა“, 05 ივლისი, 2017 წელი

ინტერვიუ ლადო სადღობელაშვილთან: „ირაკლი კობახიძე პარლამენტის თავმჯდომარეობიდან, ფაქტობრივად, გადააყენეს“ // პარლამენტზე კონტროლს „ნაციონალები“ ამყარებენ

ქვეყნის უმაღლეს საკანონმდებლო ორგანოში დიდ ცვლილებებს ელოდებიან. გავრცელებული ინფორმაციით, პარლამენტის სპიკერმა შესაძლოა თანამდებობა დატოვოს. პოსტიდან წასვლით ის თავად დაიმუქრა, თუ მისი მოთხოვნა არ შესრულდებოდა და 2020 წელს არჩევნები პროპორციული წესით არ ჩატარდებოდა. მისი ულტიმატუმი არავინ გაითვალისწინა, მაჟორიტარების ძალისხმევით პროპორციულ სისტემას მხოლოდ 2024 წელს ვეღირსებით. მაჟორიტარების გამარჯვების შემდეგ ირაკლი კობახიძემ გადადგომაზე უარი თქვა და განაცხადა, ეს ნახევრადხუმრობით დავიმუქრეო.

შესაძლოა, მან მართლაც იხუმრა, მაგრამ პარლამენტში მის ჩანაცვლებაზე გარკვეული ძალები სერიოზულად ფიქრობენ. „ქართული მიწის დაცვის კომიტეტის“ წევრი ლადო სადღობელაშვილი „ახალ თაობასთან“ საუბარში ამბობს, რომ პარლამენტის თავმჯდომარე, ფაქტობრივად, უკვე გადაყენებულია.

„მისმა მატარებელმა ფილარმონიის სკანდალის შემდეგ ჩაიარა. მმართველ გუნდში მაშინ გადაწყდა, რომ კობახიძეს თანამდებობას ეტაპობრივად ჩამოაშორებენ. დღეს ის ბუტაფორიად არის ქცეული და გადაწყვეტილებებს აღარ იღებს. მისი წასვლა ოფიციალურად თვითმმართველობის არჩევნების შემდეგ გაფორმდება“, – ამბობს ლადო სადღობელაშვილი. მისი ინფორმაციით, პარლამენტზე კონტროლი საპარლამენტო უმრავლესობის ლიდერმა და ფრაქცია „ქართული ოცნების“ თავმჯდომარემ აიღეს.

„წესითა და რიგით, სპიკერის მოვალეობები თავის თავზე პირველ ვიცესპიკერს უნდა აეღო, მაგრამ თამარ ჩუგოშვილი პარლამენტში „ოცნებას“ არ წარმოადგენს და მას სულ სხვა მისია აკისრია. ის აშშ-ის საელჩომ დანიშნა ოდეერად და პარლამენტის ვადის ამოწურვამდე ამ მისიას შეასრულებს. პარლამენტის თავმჯდომარის ფუნქციებს დღეს არჩილ თალაკვაძე და მამუკა მდინარაძე ასრულებენ. სპიკერის თანამდებობაზე ერთ-ერთი მათგანი იქნება წარდგენილი“, – აღნიშნავს „ქართული მიწის დაცვის კომიტეტის“ წევრი. იგი არც იმას გამორიცხავს, რომ „ოცნებაში“ განხეთქილების თავიდან აცილების მიზნით ირაკლი კობახიძეს თანამდებობა ფორმალურად შეუნარჩუნონ. ლადო სადღობელაშვილის თქმითვე, ამ პროცესში აქტიურად მონაწილეობს „ევროპული საქართველოც“:

„საპარლამენტო არჩევნების შემდეგ ნაციონალები პარლამენტში შესვლაზე უარს აცხადებდნენ და ქუჩის აქციების დაწყებას აპირებდნენ. პარტიის ერთმა ნაწილმა, ბოკერიას თამადობით, სხვა პოზიცია დაიკავა. ისინი ხელისუფლებას გაურიგდნენ და ნაციონალები პარლამენტში შევიდნენ. პარლამენტში შესვლიდან მალევე გიგა ბოკერიას ფრთამ ნაციონალური მოძრაობა დატოვა და „ევროპული საქართველო“ დაირქვა. „ქართული ოცნების“ წარმომადგენლები მხოლოდ „ევროპულ საქართველოს“ ელაპარაკებიან. საკონსტიტუციო ცვლილებებზე საუბარი როცა დაიწყო, საპარლამენტო ოპოზიციის ნაწილი პროცესის ბოიკოტით დაიმუქრა. მათ მეოცნებეებმა პირდაპირ უთხრეს, რომ მხოლოდ „ევროპული საქართველოს“ აზრი აინტერესებდათ. ახლა „ევროპულ საქართველოსთან“ ერთად შეეცდებიან პარლამენტზე კონტროლის დამყარებას“, – ამბობს ლადო სადღობელაშვილი. მისი განცხადებით, ეს საზოგადოებისთვის მოულოდნელი არ უნდა იყოს. სადღობელაშვილი ამას კოაბიტაციის ნაყოფად მიიჩნევს: „ხალხი თავიდანვე არ უნდა დათანხმებულიყო კოაბიტაციას. დათანხმდნენ და ახლა შეეგუონ, რომ მალე პარლამენტს გიგა ბოკერია და მისი ფრთა გააკონტროლებს. პარლამენტის მმართველობა ნაციონალების ხელში გადადის“.

„ქართული მიწის დაცვის“ კომიტეტის წევრი „ოცნების“ ლიდერების ნაციონალურ წარსულზეც საუბრობს. მისი თქმით, პარლამენტს ისედაც უკვე ნაციონალები მართავენ, ამის დასამტკიცებლად კი შემდეგი არგუმენტები მოჰყავს:

„საპარლამენტო უმრავლესობის ლიდერი არჩილ თალაკვაძე წლების განმავლობაში იყო სახალხო დამცველ გიორგი ტუღუშის მოადგილე და მრჩეველი. ტუღუში ყველა უკანონობაზე თვალს ხუჭავდა. მას არასდროს დაუგმია ნაციონალების სისხლიანი მმართველობა. ამ მხრივ თავი არც არჩილ თალაკვაძეს გამოუჩენია. დღეს ორივე პარლამენტშია. ტუღუში ბოკერიას ფრთის წევრია. ისინი ერთმანეთთან მჭიდროდ თანამშრომლობენ. გახსოვთ ასლან აბაშიძის გუნდის წევრი ანზორ აბრალავა? დეპუტატიც იყო აღორძინებიდან 1999-2004 წლებში! ჰოდა, აი ამ ზარდიაშვილის მეუღლე თინათინ აბრალავა არის ანზორ აბრალავას ქალიშვილი, ამასთანავე, მამუკა მდინარაძის მეუღლე ნათია კუნჭულია არის ანზორ აბრალავას დისშვილი. ანუ რა გამოდის, მდინარაძე გამოდის ზარდიაშვილის სიძე. ისე, რომ იცოდეთ, ზარდიაშვილი მდინარაძემ მიყვანა „ოცნებაში“, ხოლო თვითონ მდინარაძე 2013 წელს მივიდა „ოცნებაში“ ჩვეულებრივ იურისტად! ამ მდინარაძეს არავითარი დამსახურება არ აქვს ნაციონალების წინააღმდეგ ბრძოლაში! მეტიც, მათთან შეკრული იყო, კერძოდ, ზარდიაშვილის მეშვეობით საპროცესოებს უფორმებდა ხალხს“.

ლადო სადღობელაშვილის მტკიცებით, ეს წარსული მათ ისევ დააკავშირებს ერთმანეთთან და, არ არის გამორიცხული, პარლამენტში ახალი უმრავლესობა მივიღოთ. ცოტა ხნის წინ მან განაცხადა, რომ ირაკლი კობახიძე იქნებოდა კახა კალაძის საარჩევნო შტაბის უფროსი. ის კალაძეს მოუწოდებდა კიდეც, არ დათანხმებოდა ამას. „ოცნების“ მერობის კანდიდატის ოფიციალური წარდგენის შემდეგ სერიოზული ეჭვები გაუჩნდა.

„როცა კალაძე წარადგინეს, მან ყველას ჩამოუარა და გადაკოცნა, ირაკლი კობახიძეს კი გამარჯობაც არ უთხრა. არადა, ის მისი კუდი იყო „ოცნებაში“. ეს ნიშნავს იმას, რომ მათ შორის სერიოზული უთანხმოებაა“, – აცხადებს „მიწის დაცვის კომიტეტის“ წევრი.

„ოცნების“ მერობის კანდიდატის წარდგენამ მას სხვა ეჭვებიც გაუჩინა: „ამ წარდგენაზე ლამის მთელი „ოცნება“ იყო, მხოლოდ ბიძინა ივანიშვილი და ირაკლი ღარიბაშვილი არ ჩანდნენ, რაც შემთხვევით არ მომხდარა. ღარიბაშვილი იმიტომ არ მივიდა, რომ ივანიშვილი არ მიდიოდა, ივანიშვილს კი საამისოდ რამდენიმე მიზეზი ჰქონდა. მე ადრეც გითხარით, რომ ივანიშვილი არ ერეოდა თბილისის მერობის კანდიდატის შერჩევაში. კანდიდატურის დასახელება და წარდგენა ამიტომ დაგვიანდა. მართალია, `ოცნებამ~ კალაძე წარადგინა, მაგრამ ეს ივანიშვილის თანხმობის გარეშე მოხდა“.

„ქართული მიწის დაცვის კომიტეტის“ წევრი დარწმუნებულია, რომ ყოფილ პრემიერს ამ კანდიდატურის დასახელებაზე თანხმობა არ განუცხადებია. ის არ იზიარებს პირველი „მეოცნების“ გარშემო გავრცელებულ ინფორმაციებს და მის გაუჩინარებას ასე ხსნის: „ბევრს საუბრობენ იმაზე, რომ ბიძინა ივანიშვილი ავად არის და საზღვარგარეთ არის სამკურნალოდ. ეს არ არის სიმართლე. ის საქართველოში იმყოფება და ამას ბევრი ადამიანი დაადასტურებს. რამდენადაც მე მაქვს ინფორმაცია, ცუდად მისი მშობელია და დედის გვერდით არის, საჯაროდ კი იმიტომ არ ჩნდება, რომ „ოცნებისგან“ ჩამოშორება სურს“.

ლადო სადღობელაშვილის თქმით, არც ის არის გამორიცხული, რომ ყოფილმა პრემიერმა ახალი გუნდი შექმნას.

კითხვას, იქნება თუ არა ამ გუნდში ირაკლი ღარიბაშვილი, სადღობელაშვილი ასე პასუხობს: „ივანიშვილს თუ პოლიტიკაში რაღაც ფორმით უნდა ყოფნა, მაშინ გვერდით ირაკლი ღარიბაშვილი უნდა დაიყენოს. ის მთელ ამ გუნდში ერთადერთი ერთგული ადამიანი იყო. როცა ღარიბაშვილი ხელისუფლებაში იყო, არც ნაციონალები იყვნენ ასეთი გაბლატავებულები და არც ამდენი დანაშაული ხდებოდა“.

„ახალი თაობა“, 05 ივლისი, 2017 წელი

ოპოზიცია გიორგი კვირიკაშვილთან შეხვედრას ითხოვს

ინტერვიუ კახა კუკავათან: „ოცნებას“ კონსტიტუციაში დამატებით ცვლილებებს შევატანინებთ“

„ახალი თაობის“ კითხვებს თავისუფალი საქართველოს ლიდერი კახა კუკავა პასუხობს.

- თქვენი აზრით, რატომ განერიდა ბიძინა ივანიშვილი პროცესებს? თქვენც ფიქრობთ, რომ ის დაპირისპირებულია კახა კალაძესთან?

- დაპირისპირებული რომ იყოს, ალბათ, ბიძინა ივანიშვილს ექნებოდა იმის ბერკეტები, რომ არ დაეყენებინათ კალაძე თბილისის მერად. თუმცა, შესაძლოა, ასეთი მეთოდი აქვს. ხშირად საუბრობენ, რომ ბიძინა ივანიშვილი რუსეთში სწორედ ასე იქცეოდა. როდესაც მსხვერპლს ნებაზე მიუშვებს და მერე იწყებს მის გაგუდვას. მე დღეს დაბეჯითებით ვერ გეტყვით, დაპირისპირებულია თუ არა ივანიშვილი კალაძესთან, მაგრამ შემიძლია ერთი რამ გითხრათ, ამ ორ ადამიანს სრულიად სხვადასხვა გზა აქვთ.

- რას გულისხმობთ?

- 2020 წლის შემდეგ ბიძინა ივანიშვილის გზა საქართველოში არ ჩანს, ხოლო კალაძე აპირებს 2020 წლის შემდეგაც დარჩეს ქართულ პოლიტიკაში. ამიტომაც, ბუნებრივად, ამ ადამიანებს აქვთ სხვადასხვა დღის წესრიგი და სხვადასხვა ამოცანები.

- ანუ მათ შორის განხეთქილებას არ გამორიცხავთ?

- უფრო ზუსტად რომ ვთქვათ, განხეთქილება ახლა იწყება. რასაც ჰქვია სერიოზული განხეთქილება პოლიტიკურ ენაზე, ეს ალბათ მოხდება საპრეზიდენტო არჩევნების შემდეგ. დღეს არის დაახლოებით იგივე პროცესი, რაც მოქალაქეთა კავშირში ხდებოდა 1997-99 წლებში. როცა მოქკავშირი გარეგნულად ერთიანი იყო, მაგრამ იქ ჩამოყალიბდა რეფორმატორების და ანტირეფორმატორების გუნდი.

- ზაქარია ქუცნაშვილმა განაცხადა, რომ ჩვენ ხალხის ინტერესი გავატარეთ, მათი მოთხოვნა იყო მაჟორიტარული სისტემის დატოვებაო. ასეა?

- ზაქარია ქუცნაშვილი განეკუთვნება სწორედ იმ მეორე ჯგუფს პოლიტიკოსებისა, რომელიც არ ფლობს ინფორმაციას არა მხოლოდ იმაზე, თუ რა ხდება ზოგადად ქართულ პოლიტიკაში, ან საქართველოს ირგვლივ, არამედ ის საკუთარი გუნდიდანაც არ ფლობს ინფორმაციებს, თუ რა პროცესი მიმდინარეობს ახლა. ყოველთვის გაიმარჯვებს მომავალზე ორიენტირებული ფრთა, აქ ორი აზრი არ არის. უბრალოდ, ეს რ მოხდება მყისიერად და ერთ წამში. ეს პროცესი დაწყებულია და ლოგიკურად დასრულდება 2020 წელს.

- ოპოზიცია პრემიერ გიორგი კვირიკაშვილს დიალოგზე წამოსვლისკენ მოუწოდებდა, რამდენად მოხერხდება ეს დიალოგი?

- მე დარწმუნებული ვარ, რომ ეს დიალოგი შედგება, იმიტომ, რომ პრემიერ-მინისტრი არის რაციონალურად მოაზროვნე ადამიანი. ჩვენ არც ერთ საკითხში პრაქტიკულად თანხმობა არა გვაქვს, მას სხვა ხედვები აქვს, მე სხვა, მაგრამ ის არის ბანკირი, ის არის რაციონალურად მოაზროვნე კაცი და ძალიან კარგად ხვდება, რომ ამ სიტუაციაში დიალოგზე უარმა რა შეიძლება მოუტანოს მმართველ პარტიას. ამიტომ, მე დარწმუნებული ვარ, რომ ეს დიალოგი უახლოეს დღეებში შედგება.

- ანუ პრემიერი იმ გუნდშია, ვინც მომავალზეა ორიენტირებული?

- რა თქმა უნდა. პრემიერს რაც აკლია, ეს არის ინიციატივიანობა. ის არ არის პოლიტიკური ლიდერი, ის არავის არ აურჩევია. პრინციპში არც უნდოდა მას მმართველი პარტიის ლიდერობა. რასაკვირველია, ზაქარია ქუცნაშვილისგან განსხვავებით ის ხვდება, რომ როცა ვენეციის კომისია გეუბნება თქვენი კონსტიტუცია არალეგიტიმურიაო, უკვე იცის, ვინ შეიძლება გააკეთოს შემდეგი განცხადება და რა შინაარსის. ზუსტად ვიცი, რომ კვირიკაშვილი სულელი არ არის. მე ზუსტად შემიძლია გითხრათ, რომ ეს დიალოგი დაიწყება და მასში ჩართული იქნება კვირიკაშვილიც და კალაძეც.

- რამდენად გაქვთ დათმობის მოლოდინი ხელისუფლების მხრიდან? შევა მესამე მოსმენის დროს ცვლილებები კონსტიტუციაში?

- აუცილებლად იქნება მესამე მოსმენის დროს ცვლილებები. რა ცვლილებები იქნება, ეს რთული სათქმელია. რა თქმა უნდა, ცვლილებების შინაარსს მნიშვნელობა აქვს, მაგრამ ბევრად უფრო მნიშვნელოვანია ამ ცვლილებების ფაქტი და ცვლილებების ფორმა. ანუ მცდელობა იმისა, რომ ერთ პარტიას მიეღო ცვლილებები, ეს მცდელობა ჩაიშალა.

- ანუ თქვენ უფრო მოგწონთ თქვენი, ოპოზიციის როლი ამ პროცესში?

- რამდენიც არ გვიძახეს 1%-იანები, 2%-იანები, იქ სამოქალაქო ომის `გმირი~ ხაინდრავა გამოიყვანეს სცენაზე და კუკავას აგდებულად მოიხსენიებდა და ასე შემდეგ, როგორც აღმოჩნდა, ჩვენი 2%-იანი პარტიები უფრო მნიშვნელოვანი ყოფილა, ვიდრე გოგა ხაინდრავა და ზაქარია ქუცნაშვილი! აი ეს ფაქტი, ძალიან კარგად დაინახა თვითონ საქართველოს ხელისუფლებაც. ჩვენ სამომავლოდ შევძლებთ პროცესის ისე წარმართვას, რომ გოგა ხაინდრავებს და ზაქარია ქუცნაშვილებს ამ პროცესში არ ექნებათ არანაირი ფუნქცია!

- უნდა ვივარაუდოთ, რომ ბიძინა ივანიშვილი ამ პროცესებს მიღმაა და ის რადიკალების გუნდშია?

- ბიძინა ივანიშვილიც ბანკირია. აქედან გამომდინარე, ის ვერ იქნება რადიკალი, მას დასაკარგი ყველაზე უფრო მეტი აქვს. აქედან გამომდინარე, მას რაც არ უნდა რადიკალური განწყობები ჰქონდეს, ის ისტიტუციონალურად ვერ წავა დასავლეთის დირექტივების და მისი პოლიტიკური ნების წინააღმდეგ. მე ვფიქრობ, რომ ბიძინა ივანიშვილი, საბოლოო ჯამში, იქნება ამ პოლიტიკური პროცესის მონაწილე. შესაძლოა ამის დიდი ხალისი არ ჰქონდეს, მაგრამ მაინც აუცილებლად იქნება.

- კეთდება შეფასებები, რომ ბიძინა ივანიშვილი შიგნით პროცესებს ვეღარ აკონტროლებს, ვეღარ მართავს სიტუაციას. თქვენც ასე ფიქრობთ?

- რა თქმა უნდა! ეს ქრესტომათიაა. ჩვენ ხომ ვნახეთ, ორი ვადა როგორ იყო. პირველ ვადაში, როდესაც ხელმწიფე თეთრ ცხენზე ზის, ყველას უნდა, რომ იყოს ამ თეთრი ცხენის სიახლოვეს. ხოლო მეორე ვადაში, როცა ყველა აცნობიერებს, რომ სხვა ხელმწიფე უნდა მოვიდეს, ყველა ცდილობს, დროულად მოახერხოს გარკვევა, ვინ არის ახალი ხელმწიფე და იმის თეთრ ცხენთან იყოს ახლოს. ეს ბუნებრივი პროცესია. „ქართული ოცნების“ შიგნით ისინი, ვინც ახალგაზრდები არიან, ცხადია, მომავლისკენ იყურებიან. შეიძლება გოგა ხაინდრავას ეს არ ანაღვლებს, მაგრამ თამუნა ხულორდავას და თამარ ჩუგოშვილს ჰკითხეთ აბა და დანარჩენ გოგო-ბიჭებს, განათლებულები რომ არიან და კემბრიჯის დიპლომებით, უნდათ მთელი ცხოვრება „ქართული ოცნების“ იარლიყით იყვნენ?! ბუნებრივია, ეს ადამიანები, იგივე კალაძე და სხვები, იქნებიან მოტივირებულები, რომ ამ პოლიტიკურ პროცესში ისეთი სტატუსი ჰქონდეთ, რომ 2020 წლის შემდგომ ჯვარი არ დაესვათ მათ პოლიტიკურ კარიერას.

- ანუ გემს ტოვებს უკვე „ოცნების“ ეს ნაწილი?

- ასე ძალიანაც ნუ დააჩქარებთ პროცესებს. ახლა შენ გინდა ის ინტერვიუ ჩამომართვა, რომელიც 2019 წლის იანვარ-თებერვალში უნდა მოგცე. გემის დატოვება დაიწყება საპრეზიდენტო არჩევნების შემდეგ! საპრეზიდენტო არჩევნებამდე ხელისუფლება შეინარჩუნებს ფორმალურ ერთიანობას.

- ახალი ხელმწიფე შეჯდება თეთრ ცხენზეო, ვინ იქნება ეს, კახა კალაძე?

- კახა კალაძე ერთ-ერთი კანდიდატი იქნება. ვინც აჯობებს, ის დაჯდება თეთრ ცხენზე. მარათონი შეგვიძლია გამოვაცხადოთ გახსნილად, მაგრამ ვერავინ ვერ იტყვის 2017 წელს, ვინ გახდება პირველი პირი 2020 წელს. 2003 წლის ბოლოსაც სულ გვესმოდა შეფასებები, რომ აი, ბურჯანაძე მოდის ხელისუფლებაში, აი, ჟვანია მოდის, მაგრამ ხელისუფლება ხელში სააკაშვილმა ჩაიგდო. რატომ? იმიტომ, რომ ის იყო ყველაზე სწრაფი და ადეკვატური შექმნილი ვითარების. ის ვინც იქნება ყველაზე ადეკვატური, ყველაზე ენერგიული და ვინც ყველაზე უკეთესად შეაფასებს შექმნილ ვითარებას, ხელისუფლების სათავეშიც ის მოექცევა.

————————–

„საქართველო და მსოფლიო“, 05-11 ივლისი, 2017 წელი

საერთაშორისო მედიაფორუმი „მედია, პოლიტიკა, ფასეულობები: დავძლიოთ „პოსტსიმართლე”

ნათია თათარაშვილი

29-30 ივნისს თბილისში (წყნეთში), სასტუმრო “კოპალაში” გაიმართა უკვე ტრადიციადქცეული სამხრეთკავკასიური საერთაშორისო მედიაფორუმი “მედია, პოლიტიკა, ფასეულობები: დავძლიოთ “პოსტსიმართლე (Post–truth)”. მედიაფორუმის ორგანიზატორები იყვნენ: პოლიტიკური ცენტრი „ჩრდილოეთი–სამხრეთი” (“Север-Юг”) დსთ–ის სახელმწიფოების “ჰუმანიტარული თანამშრომლობის საერთაშორისო ფონდის” (МФГС) მხარდაჭერით, რომელიც პოსტსაბჭოთა ქვეყნებს შორის ამ ურთიერთობის განმტკიცებას უწყობს ხელს, აგრეთვე, პრესკლუბი “თანამეგობრობა”, არასამთავრობო ორგანიზაცია “ისტორიული მემკვიდრეობა” და გაზეთი “საქართველო და მსოფლიო”. მედიაფორუმში მონაწილეობდნენ 4 ქვეყნის – აზერბაიჯანის, სომხეთის, საქართველოსა და რუსეთის მასმედიის გავლენიანი წარმომადგენლები.

მედიაფორუმის პირველი დღის სადისკუსიო შეხვედრას ხელმძღვანელობდა დსთ-ის სახელმწიფოების “ჰუმანიტარული თანამშრომლობის საერთაშორისო ფონდის” თანადამფუძნებელი, რუსეთის ფედერაციის პრეზიდენტის სპეციალური წარმომადგენელი საერთაშორისო კულტურული თანამშრომლობის საკითხში _ მიხეილ შვიდკოი, რომელმაც მისალმების შემდეგ მედიაფორუმის მონაწილეებთან ისაუბრა იმ ჰუმანიტარული თანამშრომლობის ასპექტებზე, რომელიც მნიშვნელოვანია პოსტსაბჭოთა სივრცის ქვეყნებს შორის მეგობრობისთვის.

მიხეილ შვიდკოი: _ ასეთი ტიპის ფორუმები და შეხვედრები, რომლებზეც ერთმანეთს ხვდებიან პოსტსაბჭოთა სივრცეში მცხოვრები ქვეყნები, ამზადებს პლატფორმას რუსეთსა და კავკასიის რეგიონში მცხოვრები ხალხების დასაახლოებლად. ფორუმზე განვიხილავთ არა მხოლოდ პრობლემურ საკითხებს, არამედ ვსაუბრობთ იმაზეც, რა ხდება დღეს, ერთმანეთს ვუზიარებთ ჩვენს თვალსაზრისს პრობლემების გადაჭრის გზებზე, ვინაიდან ყველა მხარეს განსხვავებული ხედვა აქვს. რთულია, დღეს საინფორმაციო ომის ორომტრიალში დავიცვათ სიმართლე. მსგავსი ფორუმი კი გვაძლევს საშუალებას, მეტი ყურადღებით განვიხილოთ ჩვენს ქვეყნებში მიმდინარე მოვლენები და მართალი ინფორმაცია გავუზიაროთ ერთმანეთს და არა დამახინჯებული, როგორიც ხშირად ვრცელდება მსოფლიოს მასმედიაში. ინფორმაციით მანიპულირება დღეს ეფექტიანი იარაღია. ინფორმაციის არასწორი ინტერპრეტაცია ხშირად ძაბავს და აფუჭებს ქვეყნებს შორის ურთიერთობასა და წარმოდგენას ამ სახელმწიფოებზე, იმ პროცესებზე, რომლებიც ხდება ამ ქვეყნებში. ჩვენ, ფორუმის მონაწილე ქვეყნები, ვეცდებით, ვებრძოლოთ მათ, ვინც აქტიურად ცდილობს, ბზარი გააჩინოს ყველგან, და ჩვენი ერები სიმართლის დაცვით დავაახლოვოთ ერთმანეთს.

* * *

ფორუმის შემეცნებითი ხასიათის ბლოკს “ინტერნეტგამოცემები, როგორც თანამედროვე საინფორმაციო სამყაროს ფენომენი. ინტერნეტმედიისთვის მოპოვებული მასალების შექმნის სპეციფიკა” – უხელმძღვანელა ინტერნეტგაზეთ “ვზგლიადის” მთავარმა რედაქტორმა ალექსეი შარავსკიმ. ეს ბლოკი განსაკუთრებით საინტერესო აღმოჩნდა მედიაფორუმის მონაწილეებისთვის, რადგან განიხილებოდა ისეთი თემები, როგორიცაა “პროპაგანდის ინსტიტუტი”, სტერეოტიპები, რომლებიც ხშირად ქმნის საზოგადოებრივ აზრს, როგორ ვრცელდება დეზინფორმაცია, ინფორმაციის გაშუქების სპეციფიკა და სხვა საკითხები, რომლებიც ყველას გვაერთიანებს. მთავარი საკითხი იყო ინტერნეტგამოცემები, რომლებიც, ძირითადად, ქმნიან პოლიტიკურ ამინდს მსოფლიოში. ინფორმაციის გავრცელების ყველაზე ეფექტიანი საშუალება დღეს არის ინტერნეტი, რომელმაც დააჩქარა გლობალიზაციის პროცესი.

ალექსეი შარავსკი:

- დღეს მსოფლიოში მილიონობით ინტერნეტგამოცემაა, საზოგადოებისთვის ხელმისაწვდომია ნებისმიერი სახის ინფორმაცია და ადვილია ამ საზოგადოების მანიპულირებაც, რადგან არ ხდება ინფორმაციის გაფილტვრა. თანამედროვე საინფორმაციო სამყაროში ინტერნეტგამოცემებს ფეხი ისე აქვს მოკიდებული, რომ ბეჭდური მედია ხშირად უკანა პლანზე დგას. ინფორმაციის გავრცელების მრავალი საშუალებიდან ყველაზე ეფექტიანი და მასშტაბური სწორედ ინტერნეტგამოცემებია. შესაბამისად, დღეს კოლოსალური თანხებია გამოყოფილი ისეთი საინფორმაციო სააგენტოების შესაქმნელად, რომლებიც ამა თუ იმ ორგანიზაციის დაკვეთას შეასრულებენ. დამფინანსებლის პოლიტიკური კუთვნილების მიხედვით ხდება მოპოვებული მასალების გამოყენება, ეს არის მსოფლიო სპეციფიკა. დღეს პოლიტიკური ინტერნეტგამოცემების მთავარი მიზანი საკუთარი იდეოლოგიის გავრცელებაა და არა ფინანსური სარგებლის მიღება. ვისაც რა ინტერესი აქვს, იმის მიხედვით მოქმედებს.

* * *

მედიაფორუმზე ასევე საინტერესო იყო ტრენინგი _ “გამოცდილება, როგორ ავიღოთ ინტერვიუ მნიშვნელოვანი ფიგურებისგან”, რომელსაც უხელმძღვანელა საერთაშორისო მედიაჯგუფ “როსია სეგოდნიას” (МИА “Россия сегодня”) სპეციალური პროექტების ხელმძღვანელმა ზახარ ვინოგრადოვმა. მან აუდიტორიას მოუწყო ღია ინტერვიუ და თავის ჟურნალისტურ გამოცდილებაზე დაყრდნობით შეეცადა, მონაწილეებისთვის ეჩვენებინა, როგორ უნდა აიღონ ინტერვიუ მნიშვნელოვან საზოგადოებრივ-პოლიტიკური ფიგურისგან. ვინოგრადოვმა ჟურნალისტებს იმ ასპექტებზე სთხოვა ყურადღების გამახვილება, რომლებსაც ხშირად ივიწყებენ ჟურნალისტები მასალების მოპოვებისა და მათი პუბლიკაციისას: ეს არის ტაქტიკა, ფორმა, კითხვების სწორი ფორმულირების მეთოდი, რესპონდენტის ალაპარაკების სპეციფიკა, ინფორმაციული სიზუსტის დადგენა, საინტერესო კითხვების შედგენა, კომუნიკაციის მეთოდიკა და ა.შ. ფორუმის მეორე დღეს მსგავსი ინტერვიუს მასტერკლასით მონაწილეების წინაშე წარდგა რადიოსადგურ “გოვორიტ მოსკვას” (“Говорит Москва”) გენერალური დირექტორი ვლადიმერ მამონტოვი.

ფორუმის შემდგომი ბლოკი დაეთმო კრეატიულ პროდიუსერს, რადიოსადგურ “ვესტი FM”-ის წამყვან გიორგი სარალიძეს, რომლის სადისკუსიო თემას წარმოადგენდა “სპორტი და მედია – ახალი ფორმატები, როგორ უნდა მოხდეს კულტურულ–სპორტული ღონისძიებების განახლება”. გიორგი სარალიძემ ხაზი გაუსვა, რომ ქვეყნებს შორის დაახლოების მნიშვნელოვან ასპექტს განსაზღვრავს არა მხოლოდ პოლიტიკურ ღონისძიებებში, პროექტებსა და ფორუმებში მონაწილეობა, არამედ კულტურულ-სპორტული ღონისძიებებიც, რომლებიც ეფექტიან საკომუნიკაციო ხიდს ქმნის ერებს შორის დაახლოების საკითხში. მან აღინიშნა, რომ კულტურაზე, ხელოვნებასა და სპორტზე არ უნდა აისახებოდეს ქვეყნებს შორის პოლიტიკური პროცესების მიმდინარეობის სპეციფიკა, თუმცა არ უარყო, რომ ის დადებით როლს თამაშობს კულტურათა დაახლოების საკითხში. გიორგი სარალიძემ აღნიშნა, რომ 2018 წლის მსოფლიოს საფეხბურთო ჩემპიონატი, რომელიც რუსეთში გაიმართება, ამ შესაძლებლობებს კიდევ უფრო გაზრდის.

მედიაფორუმის პირველი დღის საფინალო ბლოკი იყო ლექცია “მასმედიის იდეოლოგიური სტრატეგიები – აზრების შექმნის ტექნოლოგიები”, რომელსაც უხელმძღვანელა სოციალური საკითხების დაპროექტების ცენტრ “პლატფორმას” ხელმძღვანელმა ალექსეი ფირსოვმა. ლექციაზე განიხილეს საზოგადოებრივი აზრის სტერეოტიპების სპეციფიკა, მათი შეცვლისა და ახალი აზრის გაჩენის ტექნოლოგიები, რომელსაც კურატორობს ესა თუ ის მასმედია.

ალექსეი ფირსოვი:

- თითოეულ გამოცემას, იქნება ეს ბეჭდური, ვებგვერდი თუ სამაუწყებლო, აქვს თავისი იდეური წარმოდგენები და სტრატეგიები, რომელთა მიხედვით მოქმედებს. უფრო მნიშვნელოვანია, ვისაუბროთ მათი მოქმედების სპეციფიკაზე, რადგან ყველა იდეოლოგია ვერ ვრცელდება, რაც თავისთავად მისი “შეფუთვის” არასწორ მეთოდიკაზე მიუთითებს. რა ახდენს საზოგადოებაზე ყველაზე დიდ გავლენას? _ რა თქმა უნდა, სიტყვა, რომელიც ყველაზე ეფექტიანი ძალაა. თუმცა ამ შემთხვევაში მედიამ უნდა იცოდეს, როგორ მიაწოდოს მკითხველს, მაყურებელსა და მსმენელს კონკრეტული ინფორმაცია ისე, რომ იგი უტყუარი იყოს ან ჩათვალოს მაინც ასეთად. საზოგადოებრივ აზრს ქმნიან არა პოლიტიკური მოვლენები ან პოლიტიკური ფიგურები, არამედ მედიასაშუალებები, რომლებსაც “მესამე ხელისუფლებას” უწოდებენ. ისინი, ვინც იცის, ეს როგორ გამოიყენონ, ახერხებენ, გავლენა იქონიონ საზოგადოებრივ აზრზე.

* * *

მედიაფორუმის მეორე დღეს ლექცია თემაზე “სიტყვისა და რელიგიის თავისუფლება: პოლიტკულტურულ საზოგადოებაში ჰარმონიის ძებნა” წაიკითხა მოსკოვის საპატრიარქოს ეკლესიის საზოგადოებასა და მედიასთან ურთიერთობის განყოფილების თავმჯდომარის მოადგილემ ვახტანგ ყიფშიძემ. საინტერესო აღმოჩნდა მრგვალი მაგიდისთვის შერჩეული თემა “რუსული მედია და სამხრეთი კავკასია: თარგმნის პრობლემები?”, რომელსაც ხელმძღვანელობდნენ მოდერატორები: გაზეთი “საქართველო და მსოფლიოს” მთავარი რედაქტორი ირაკლი თოდუა და რუსეთის სახელმწიფო ჰუმანიტარული უნივერსიტეტის დოცენტი, ექსპერტი საერთაშორისო საკითხებში ალექსანდრე გუშჩინი. მონაწილეებისთვის, აგრეთვე, საინტერესო იყო რუსეთის ნაციონალური უნივერსიტეტის _ “ეკონომიკის უმაღლესი სკოლის” _ მედიაფაკულტეტის დეპარტამენტის ხელმძღვანელ ილია ქირიას მასტერკლასი თემაზე “რატომ ხდება მედიაკომპანიების დეგრადაცია: როგორ ვმართოთ შემოქმედება ახალ პირობებში”. ილია ქირიამ გამოყო ასპექტები, რომლებიც პროვოცირებას უწევს მედიაკომპანიების დეგრადაციას, ისაუბრა მასმედიის ისტორიაზე, მეოცე საუკუნის მასმედიასა და მის ფუნქციონირებაზე და ა.შ.

ილია ქირია:

- დღეს არა მხოლოდ საინფორმაციო ომზე ვსაუბრობთ, არამედ იმაზეც, რომ ინტერნეტეპოქა კომერციული სარბიელია მედიაკომპანიებისთვის. ერთმნიშვნელოვნად ვერ ვიტყვით, რომ არსებული პოლიტიკური საინფორმაციო სააგენტოების უმრავლესობა მხოლოდ იდეური სარგებლისთვის იბრძვის. მათ ამოძრავებთ კომერციული მიზნებიც და ეს სრულიად ბუნებრივია, რადგან მათაც სურთ არსებობა. ისეთი სააგენტოების შემთხვევაში კი, რომლებსაც იდეოლოგიური მოტივით აფინანსებენ, კომერციულ სარგებელზე ზრუნვა მეათეხარისხოვანია. მაგალითისთვის დავასახელებ ჯორჯ სოროსსა და მის ორგანიზაციებს, რომლებიც ეფექტიანად აკეთებენ თავიანთ საქმეს. სოროსის მთავარი ბერკეტი არის ფინანსები, რომელსაც არ იშურებს მასშტაბური მიზნების მისაღწევად. რაც შეეხება შავ პიარს, ესეც ძალიან აქტუალური საკითხი და პრობლემაა. დღეს ამბობენ, რომ შავი პიარიც პიარია, რომ “ომში ყველა ხერხი მისაღებია”. ფაქტია, რომ მსგავსი მეთოდი მოქმედებს. მაგალითად, “სი-ენ-ენს”, ყველაზე ცნობილ ტელეარხს მსოფლიოს მასშტაბით, ხშირად ადანაშაულებენ და ამხელენ დეზინფორმაციის გავრცელებაში, მაგრამ მის საიმიჯო მხარეს ამ ფაქტმა ბევრი ვერაფერი დააკლო, ანუ რას ნიშნავს ეს? _ დიახ, დეზინფორმაციაც მოქმედებს და ხშირად სიმართლეზე უფრო ეფექტიანად. შემდეგ საკმარისია, მოუბოდიშო საზოგადოებას და, მიუხედავად იმისა, რომ ეჭვის თვალით შემოგხედავს, მაინც განაგრძობს შენს მოსმენას.

მედიაფორუმის მონაწილეთა განცხადებით, ერთ-ერთი საინტერესო სპიკერი იყო ვლადიმერ მამონტოვი.

ვლადიმერ მამონტოვი:

- ძალიან სასარგებლო ფორუმში ვმონაწილეობდი. ამ ფორუმის მსვლელობისას სადისკუსიო შეხვედრის ინტელექტუალური დონე საკმაოდ მაღალი იყო და ამიტომ ეს შეხვედრა ძალიან პროდუქტიულ გამოძახილს ჰპოვებს ჩვენს სამომავლო თანამშრომლობაში. ვისაუბრეთ საკმაოდ მწვავე საკითხებზე, რა თქმა უნდა, მათი მოგვარების პრეროგატივა ჩვენს ხელთ არ არის, რადგან კომპეტენცია არ გვაქვს, მაგრამ ჩვენი აქ ყოფნით გავლენას ვახდენთ მოვლენების განვითარებაზე. ეს ძალიან კარგია, რადგან გვინდა, მეტი შევიტყოთ ერთმანეთზე. სხვაგან სად მოვუყვებოდით ერთმანეთს ჩვენს ქვეყნებში არსებულ პრობლემებზე? ყველაზე მეტად კი მომეწონა ინიციატივა საერთო საინფორმაციო სივრცის შექმნასა და შეხვედრების მოწყობაზე, რომლებზეც განვიხილავთ ახალი საინფორმაციო პორტალის ან პროგრამის შექმნის იდეას, და რომლებზეც მოხდება იდეების გენერირება, უტყუარი ავთენტური ინფორმაციის გაცვლა და განხილვა. ამ შეხვედრებში მონაწილეობას მიიღებენ დაინტერესებული კვალიფიციური ექსპერტები და ჟურნალისტები. დღეს არ არსებობს ტაბუდადებული თემები. მაგალითად, თქვენი კოლეგა მოვიდა ჩემთან პროვოკაციული მიმართვით: “რა თქმა უნდა, თქვენ გინდათ საბჭოთა კავშირის დაბრუნება!” საიდან მოიტანა? ისე მომმართა, აპრიორი რომ დავთანხმებოდი მის პროვოკაციულად ფორმულირებულ კითხვას და თავი მემართლებინა. ის ჟურნალისტია და მესმის მისიც, თავის საქმეს აკეთებს. მეც ჟურნალისტი ვარ და ვიცი, რომ არის მეთოდი, რესპონდენტი ისე ალაპარაკო, ისეთი რამ ათქმევინო, რასაც შემდეგ შენი მიზნისთვის გამოიყენებ მასალაში. მე არ მინდა საბჭოთა კავშირის დაბრუნება. მე ყველაფერს რეალისტურად აღვიქვამ და ვაფასებ… არსებობს ბევრი ანგაჟირებული მედიასაშუალება – ეს რეალობაა. ჩვენ კი აუცილებლად უნდა შევუწყოთ ხელი მსგავსი ფორუმების ჩატარებას. მეც ბევრი რამ შევიტყვე ამა თუ იმ პოლიტიკურ ფაქტზე და ა.შ. კმაყოფილი ვარ დღევანდელი შეხვედრით.

მედიაფორუმის დასრულების შემდეგ მონაწილეებს საზეიმოდ გადაეცათ სერთიფიკატები. პოლიტიკურ ცენტრ “ჩრდილოეთი–სამხრეთის” (Север–Юг) აღმასრულებელმა დირექტორმა ანჟელიკა ტრაპეზნიკოვამ აღნიშნა, რომ ძალიან კმაყოფილია წლევანდელი ფორუმით და იმედოვნებს, რომ ფორუმი კიდევ უფრო მასშტაბური და პროდუქტიული იქნება სამომავლოდ.

ანჟელიკა ტრაპეზნიკოვა:

- მედიაფორუმი უმაღლეს დონეზე ჩატარდა, ამის შესახებ მონაწილეებმაც განაცხადეს. ორგანიზატორებიც კმაყოფილი ვართ შედეგით. ფორუმში მონაწილეობდნენ საზოგადოების მნიშვნელოვანი ფიგურები და ძალიან ძლიერი ჟურნალისტები, რომლებმაც მონაწილეებს გააცნეს საკუთარი თვალსაზრისი და კონცეფციები, საინტერესოდ ისაუბრეს იმ პრობლემურ საკითხებზე, რომლებიც აწუხებს ჩვენს ქვეყნებს. ფორუმის მთავარი თემიდან გამომდინარე, თითოეული საკითხი განიხილებოდა მასმედიის განვითარების ჭრილში. ვგეგმავთ სამომავლო თანამშრომლობას და ჩვენი პროექტებით ვეცდებით, კიდევ უფრო შევუწყოთ ხელი ჩვენს ქვეყნებს შორის მეგობრული ურთიერთობის გაღრმავებას; მიგვაჩნია, რომ ეს, ძირითადად, ჩვენმა ახალგაზრდებმა უნდა გააკეთონ. სწორედ ამიტომ შემოდგომაზე იგეგმება დიდი საერთაშორისო ფორუმის ჩატარება მოსკოვში, სადაც თავს მოიყრიან მსოფლიოს სხვადასხვა ქვეყნის ახალგაზრდები, რომლებიც ერთმანეთს გააცნობენ და გაუზიარებენ თავიანთ თვალსაზრისს. ფორუმის მთავარი თემა იქნება “ტრადიციული ოჯახის ღირებულებები”. ამა წლის აგვისტოში, აგრეთვე, ჩავატარებთ ცენტრალური აზიის ყოველწლიურ ფორუმს ბიშკეკში, ყირგიზეთის რესპუბლიკაში. ფორუმის ფორმატი ანალოგიური იქნება, უბრალოდ, განსხვავებულ თემატიკას შევარჩევთ. ძალიან მიხარია, რომ ასეთი კარგი და დადებითი შეფასება აქვს ჩვენს პროექტებს. ეს გვაძლევს სტიმულს და ვრწმუნდებით, რომ მსგავსი ფორუმებითა და პროექტებით შევძლებთ ახალგაზრდა თაობების დამეგობრებას, რაც აისახება შემდგომში ჩვენი ქვეყნების პოლიტიკურ-საზოგადოებრივ-კულტურულ ურთიერთობებზე.