„ახალი თაობა“: ინტერვიუ გია ხუხაშვილთან: „ფარულმა ჩანაწერებმა შეიძლება კომიკური სახე მიიღოს“
„ახალი თაობა“: ინტერვიუ სერგო რატიანთან: „მეწყინება, ჩანაწერები ჩემზეც რომ არ იყოს“
„ახალი თაობა“: ინტერვიუ სოსო მანჯავიძესთან: „ანტიეროვნულ საკონსტიტუციო სასამართლოს უფლებამოსილება უნდა შეუწყდეს“
„რეზონანსი“: ინტერვიუ ირაკლი ბათიაშვილთან: ჩანაწერები საქართველოს სპეცსამსახურებს არ ეკუთვნის
„რეზონანსი“: საკუთრების წართმევაზე ყველა საქმე შეიძლება შეჩერდეს // „რუსთავი 2″-ის ადვოკატები საკონსტიტუციოში კიდევ ორი მუხლის შეჩერებას ითხოვენ
„ვერსია“: ინტერვიუ ზურაბ ბიგვავასთან: „ხალხის დიდი ნაწილი არ ფიქრობს, რომ „რუსთავი-2“ მისი დასაცავია – არანაირი სისხლისღვრა და გადატრიალება არ იქნება“
„საქართველო და მსოფლიო“: ინტერვიუ ჰამლეტ ჭიპაშვილთან: „რესპუბლიკელებმა საგარეჯოში არჩევნები ივანიშვილის მიერ გაცემული განკარგულებით მოიგეს“
„საქართველო და მსოფლიო“: რა ტიპის კვლევები ტარდება და მიმდინარეობს თუ არა ლუგარის ლაბორატორიაში სახიფათო შტამებთან მუშაობა
„ალია“: საექსპერტო კონფერენცია ლუგარის ლაბორატორიის შესახებ
—————————-
„ახალი თაობა“, 05 ნოემბერი, 2015 წელი
ინტერვიუ გია ხუხაშვილთან: „ფარულმა ჩანაწერებმა შეიძლება კომიკური სახე მიიღოს“
ნათია ხურცილავა
პოლიტოლოგი გია ხუხაშვილი გავრცელებულ ფარულ ჩანაწერებთან დაკავშირებით აცხადებს, რომ ხელისუფლებამ არ უნდა გადაამლაშოს და გამოძიებამ ამ საქმის რეალური დამნაშავე უნდა გამოკვეთოს. წინააღმდეგ შემთხვევაში იმედგაცრუება გარდაუვალი იქნება.
- ბატონო გია, ფარულ ჩანაწერებს ბოლო არ უჩანს. სადამდე შეიძლება მოვლენები განვითარდეს? გივი თარგამაძე და ნუგზარ წიკლაური ახალი ფიგურანტები არიან. უკრაინიდან აპირებდა სააკაშვილი რევოლუციის მოწყობას?
- სააკაშვილს არ შეუძლია ცივილიზებული, ნორმალური, მდგრადი ურთიერთობები. მისი ბუნებაა რევოლუციური. ბუნებრივია, რომ სააკაშვილი მუდმივად ცდილობს, მაღალი რისკები შექმნას. ეს არ არის გასაკვირი. საკითხავია, რამდენად ეტევა ეს ყველაფერი სამართლის ფარგლებში. თუ დანაშაულთან გვაქვს საქმე, მაშინ ჩნდება კითხვა, რა ტიპის დანაშაულთან გვაქვს საქმე?!
- გამოძიება დაიწყო სახელმწიფო შეთქმულებისა და კონსტიტუციური წესრიგის დამხობის მუხლით.
- მე არ ვარ კომპეტენტური, რომ ამ დეტალებზე ვისაუბრო. გადატრიალებასთან გვაქვს საქმე თუ დაუმორჩილებლობასთან, თუ ეს ყველაფერი პოლიტიკური ბრძოლის ფარგლებში ეტევა. რაც შეეხება პოლიტიკურ ნაწილს, პირველი ჩანაწერი, რომელიც გავრცელდა მედიასაშუალებებში, შოკის მომგვრელი იყო. ასეთი შოკი ამ ქვეყანაში არაერთ ადამიანს განუცდია. ორი კოდური სიტყვა ისმის ამ ჩანაწერებში: `სისხლი~ და `გასროლა~. ცხადია, ეს სიტყვები შოკს იწვევს ადამიანებში, მაგრამ რაც უფრო მეტი დრო გადის და რაც უფრო მეტი ჩანაწერი ვრცელდება, ეს ყველაფერი პაროდიულ სახეს იღებს. როგორც ჩანს, ხელისუფლებაში არ ჰყავთ ნორმალური პოლიტ-ტექნოლოგი.
- ფიქრობთ, ასეთი სიხშირით არ უნდა ვრცელდებოდეს?
- მე მეშინია, ამ ყველაფერმა უკურეაქცია არ გამოიწვიოს.
- სახალხო დამცველმაც ისაუბრა, რომ ამ ჩანაწერების გავრცელებაზე გარკვეული შეზღუდვა დაწესდეს.
- საბოლოო ჯამში, თუ ასე გააგრძელეს, უკუშედეგს მიიღებენ. მთლიანად პროცესის პროფანაცია მოხდება. სამწუხაროდ, ეს დაწყებულია. პირველმა შოკურმა ტალღამ საზოგადოებაში გადაიარა.
- ახლა შედეგის მოლოდინის რეჟიმშია საზოგადოება?
- ცხადია, მაგრამ ამას ხელისუფლება ვერ გრძნობს. საზოგადოების პულსს ვერ გრძნობს. იმდენად გადაამლაშეს, რომ ძალიან ახლოს არის წერტილი, როდესაც საზოგადოება არასერიოზულად ჩათვლის ხელისუფლებას. გიგა ბოკერიას დაკითხვა ავიღოთ – ეს ყველაფერი გარედან ასე გამოიყურებოდა: დაკითხვისას ლინგვისტური კამათი შედგა ბოკერიასა და გამომძიებელს შორის. გამომძიებელი ბოკერიას უმტკიცებდა, რომ სიტყვა `ბოევიკი~ ნიშნავს სისხლიან ტერორისტს ავტომატით ხელში, რომელსაც ცუდი საქმე დაავალეს. ბოკერიამ უთხრა გამომძიებელს, მე არ გეთანხმებით, რომ `ბოევიკი~ ამას ნიშნავს, ის არის კუნთმაგარი ადამიანი, რომელიც სიტყვის თავისუფლებას იცავს. იკამათეს გამომძიებელმა და ბოკერიამ, ცხადია, ვერ შეთანხმდნენ და ბოკერია გამოვიდა.
- ეს თქვენი უტრირებაა, ასეთი შთაბეჭდილება დაგრჩათ?
- სამწუხაროდ, ასეთი აღქმა რჩება. როდესაც სახელმწიფო გადატრიალების მუხლით აღძრავ საქმეს და ფიგურანტი მიგყავს დაკითხვაზე და ის იქიდან ხანგრძლივი მუსაიფის შემდეგ გამოდის და თითქოს არაფერი, სახლში მიდის, ამის შემდეგ სხვა აღქმა შეუძლებელია დაგრჩეს. ამას რომ იტყვი, ეს სწყინს შესაბამის სამსახურებს და მერე გვიცხადებენ, საზოგადოებაში ნუ ქმნით არასწორ გაგებასო. ეს არის პოლიტიკური განაცხადი.
- უსაფრთხოების სამსახურის ამ განცხადებას არაერთგვაროვანი შეფასებები მოჰყვა საზოგადოებაში. არ უნდა გაეკეთებინათ?
- რა საჭირო იყო ამ განცხადების გაკეთება, ვერ გავიგე. უსაფრთხოების სამსახურის საქმე არ არის საზოგადოების განწყობა. საზოგადოებაში განწყობები მათი ქმედებებით იქმნება და არა მათი განცხადებებით. ეს უნდა ესმოდეთ.
- ფიქრობთ თუ არა, რომ პოლიტიკურმა ნაწილმა არ უნდა გადაფაროს სამართლებრივი მხარე ამ საქმის და მას უნდა ჰყავდეს პასუხისმგებელი პირებიც?
- რა თქმა უნდა, სწორედ ასე უნდა მოხდეს. აუცილებლად უნდა ჰყავდეს პასუხისმგებელი პირები. წინააღმდეგ შემთხვევაში, თუ საზოგადოებაში დარჩა განცდა, რომ ეს ყველაფერი პოლიტიკური ინტერესისთვის კეთდებოდა, ეს ხელისუფლებას უზარმაზარ ზიანს მიაყენებს. მაშინ ირიბად გაჩნდება ეჭვი, რომ ეს ჩანაწერები იყო ხელისუფლების მიერ ინიცირებული. თუ არ დადგება რეალური პასუხისმგებლობის საკითხი იმ ადამიანების, ვინც, როგორც მოვისმინეთ, აწყობდა ქვეყნის გადატრიალებას, მაშინ ჩვენ დაგვრჩება დეჟავიუს შეგრძნება. ჩვენ ხომ ეს ყველაფერი ერთხელ კი არა, მრავალჯერ გვაქვს ნანახი.
- ერთ-ერთ ინტერვიუში თქვენ აღნიშნეთ, რომ ყოფილი ხელისუფლების დროს ფარული ჩანაწერების ერთ-ერთი ფიგურანტი იყავით.
- დიახ, ბადრი პატარკაციშვილის წინააღმდეგ გაკეთებულ ჩანაწერებს ვგულისხმობ. ის, რაც ბადრის დროს ხდებოდა და რისი ერთ-ერთ ფუგურანტი მეც გახლდით იმ ე.წ. სახელმწიფოს გადატრიალების საქმეში. მაშინ მათ ეს ყველაფერი პოლიტიკურად გამოიყენეს. ახლაც გამოვა, რომ ეს ხელისუფლებაც პოლიტიკურად იყენებს ამ ყველაფერს. ამ შემთხვევაში გაჩნდება მთავარი კითხვა: რითი განსხვავდება წინა ხელისუფლება მოქმედი ხელისუფლებისგან? მერე უკვე პასუხის გაცემა ძალიან გართულდება. თუ, რასაკვირველია, ამ საქმეზე შედეგი არ დადგა.
- სააკაშვილის მოქალაქეობის საკითხი უნდა დამდგარიყო დღის წესრიგში ამ ფონზე?
- ეს უკვე კანონით არის განსაზღვრული. კანონში წერია, რომ სხვა ქვეყნის მოქალაქეობის მიღების შემთხვევაში, საქართველოს მოქალაქე ავტომატურად კარგავს საქართველოს მოქალაქეობას. ეს ცალსახად ასეა. რაც შეეხება ბიძინა ივანიშვილის მოქალაქეობის შეწყვეტას წინა ხელისუფლების დროს, მე არ მინდა ამ პარალელის გავლება. მაშინ სხვა სიტუაცია იყო, ახლა სულ სხვა ვითარებაა, მაგრამ გარკვეული დეჟავიუ აქაც ჩნდება. ამ ყველაფერზე ხელისუფლებამ სერიოზულად უნდა იფიქროს. საზოგადოებაში თუ გაჩნდა განცდა, რომ დღევანდელი ხელისუფლება ცდილობს გაიმეოროს ყველა ის შეცდომა, თუ დანაშაული, რომელსაც სჩადიოდა წინა ხელისუფლება, მაშინ ის მის ბედს გაიზიარებს.
„ახალი თაობა“, 05 ნოემბერი, 2015 წელი
ინტერვიუ სერგო რატიანთან: „მეწყინება, ჩანაწერები ჩემზეც რომ არ იყოს“
ნონა ცაბაძე
ტელეკომპანია „რუსთავი-2“-ის ხელმძღვანელები და ჟურნალისტები, ნაციონალურ მოძრაობასთან ერთად, წინასწარ აანონსებდნენ, რომ მოსამართლე ურთმელიძე გადაწყვეტილებას ქიბარ ხალვაშის სასარგებლოდ გამოიტანდა.
„ნაციონალური მოძრაობის“ ერთ-ერთი ლიდერი, სერგო რატიანი, სასამართლოს გადაწყვეტილებას უკანონოდ მიიჩნევს. აცხადებს, რომ ამის საფუძველს იძლევა ის, რომ ურთმელიძე არ შეიძლებოდა ყოფილიყო ობიექტური.
- რატომ ვერ იქნებოდა ობიექტური? ამაში ეჭვი რატომ გეპარებათ?
- იმ გარემოების გამო, რომლებიც ყველასთვის ცნობილია. ანუ ადამიანი, რომელსაც ფაქტობრივად დედა ჰყავს მძევლად, ვერ იქნება ობიექტური! ეს არის ერთმნიშვნელოვანი და აქ არაფერ შუაში არ არის ის სულელური განმარტება, რომ დედა მისი ოჯახის წევრი არ არის.
პოლიტიკოსის განცხადებით, ეს უკვე იყო პირველი ნიშანი იმისა, რომ ურთმელიძე ობიექტურ გადაწყვეტილებას ვერ გამოიტანდა. ამას გარდა, რატიანი მიიჩნევს, რომ არ არსებობს საქმეში მტკიცებულება იმისა, რა შეფასებასაც ქიბარ ხალვაში აძლევს რუსთავი 2-ს.
- ქიბარ ხალვაშს შესაძლებელია ედავა ზიანზე ან ზარალის ანაზღაურებაზე, რომ მისთვის უფრო მეტი გადაეხადათ, მაგრამ ვერანაირი სამართლებრივი ნორმა ვერ გაამართლებს იმას, რომ დღეს რუსთავი 2-ის ფუნქციონირებას საფრთხე ექმნება. შესაბამისად, ეს გაკეთებულია არა იმისთვის, რომ სამართლიანობა აღდგეს, – აცხადებს სერგო რატიანი, – ეს სჭირდება მხოლოდ ხელისუფლებას, მას ნაკლებად ადარდებს, ხალვაში დაზარალდა თუ არა. მისი სურვილია, ჩაახშოს ოპოზიციური და კრიტიკული მედია!
- სასამართლომ „რუსთავი-2“ ქიბარ ხალვაშს მიაკუთვნა, თუმცა ვერ მოხდება ამ გადაწყვეტილების დაუყოვნებლივ აღსრულება. ეს ნორმა საკონსტიტუციო სასამართლოს მიერ შეჩერებულ იქნა.
- პირველ რიგში, ეს „რუსთავი-2“-ის ჟურნალისტების დამსახურებაა. ის, რომ მათ აქვთ ძალიან სერიოზული რეპუტაცია. მეორე, ეს არის მთელი ქართული საზოგადოების და ასევე არასამთავრობო ორგანიზაციების და იმ პოლიტიკური სპექტრის წარმომადგენლების დამსახურება, ვინც უშუალოდ იქ იდგნენ და იცავდნენ ამ ტელევიზიას. სწორედ ამიტომ, დღეს ჩვენ ვუყურებთ „რუსთავი-2“-ს და არა – ბიძინა ივანიშვილს საღამოს ეთერში. ჩვენ ვეტყვით ბიძინა ივანიშვილს, რომ ჯიდიესზე მისი რეიტინგი ძალიან დაბალია. რუსთავი 2-ზე მისი ყურებადობა გაცილებით მაღალია, თუნდაც იგივე ვანოს შოუში.
- ამბობენ, რომ საკონსტიტუციო სასამართლო მთლიანად ნაციონალების გავლენის ქვეშ არის. ამაზე რას უპასუხებდით?
- სისულელეა, როდესაც გავლენებზე საუბრობენ. ეს სასამართლო დღეს არის დამოუკიდებელი და მასზე გავლენს ვერ ახდენს ხელისუფლება, მან მიიღო ობიექტური გადაწყვეტილება. დღეს ბიძინა ივანიშვილს სურს, რომ საქართველოში დაამყაროს ავტორიტარული რეჟიმი, რაც ნიშნავს ყველა ინსტიტუციის დაქვემდებარებას.
- ბატონო სერგო, თქვენ ხელისუფლებას ბრალს დებთ იმაში, რაზეც წლების განმავლობაში სწორედ თქვენს ხელისუფლებას ედავებოდა საზოგადოება. არ იყო ასე?
- მე შემიძლია ვთქვა, რომ პრობლემები, რასაკვირველია, იყო და ამას ჰქონდა სრულიად განსაზღვრული ისტორიული საფუძველი.
- რომელ საფუძვლებზე საუბრობთ?
- ის, რომ 2003 წლის რევოლუციის შემდეგ დამთავრდა 30 წლიანი შევარდნაძის კომუნისტური რეჟიმის ნომენკლატურის მმართველობა. თანამოაზრეები მოვიდნენ ყველა ინსტიტუციაში. რასაკვირველია, ხშირ შემთხვევაში შეგვიძლია ვილაპარაკოთ დაქვემდებარებაზე, ხელისუფლების სხვადასხვა შტოების, ან უბრალოდ თანამოაზრეობაზე. ჩვენ განსაკუთრებით ხაზს ვუსვამთ 2012 წლის არჩევნების მნიშვნელობას. ხელისუფლებას არ უნდა ჰქონდეს წვდომა სხვადასხვა ინსტიტუციებზე. სწორედ ეს ქმნის დემოკრატიის საშუალებას.
სერგო რატიანი მიიჩნევს, რომ 2012 წლის არჩევნებმა ეს შესაძლებლობა გააჩინა, ხოლო ივანიშვილი ამ შესაძლებლობას კლავს.
- პრობლემები წინა ხელისუფლების დროს ამ მიმართულებით იყო, მაგრამ აღარ უნდა იყოს იგივე პრობლემები, რაც იყო 20 წლის წინ. მაშინ ჩვენს ხელისუფლებას სხვა ამოცანები ჰქონდა. დანგრეული იყო ყველა სისტემა და ჩვენ აღვადგინეთ სახელმწიფო ინსტიტუტები. ამის შემდეგ წინ უნდა გადაიდგას ნაბიჯები და არა _ უკან, _ აცხადებს დეპუტატი.
- ვიდრე ხელისუფლების საქმიანობას შევეხებოდეთ, „რუსთავი-2“-ის თემა რომ ამოვწუროთ, გამოდის, რომ მინიმუმ 9 თვე ამ ტელევიზიას საფრთხე აღარაფერი ემუქრება?
- საქმე არ არის ასე მარტივად. აქ საუბარია იმაზე, რომ მყისიერი აღსრულება არის შეუძლებელი. თეორიულად შესაძლებელია, რომ ეს დავა დასრულდეს 9 თვით ადრეც და შესაძლებელია, რომ გაიწელოს.
- ფარული ჩანაწერების თემაზე რას იტყოდით? საუბარია, რომ ახალმა ხელისუფლებამ ამ მანკიერ მხარეშიც მიბაძა ძველს. თქვენზეც ხომ არ არის მსგავსი ჩანაწერი?
- ძალიან მეწყინება, ჩემზე რომ არ იყოს (იცინის). უხერხულობასაც ვგრძნობ ამის გამო. უფრო სერიოზულად კი გეტყოდით, რომ მართლაც სრულ ისტერიაშია ხელისუფლება. გადატრიალებაზე საუბრობენ და გადატრიალებულიც არის ეს ხელისუფლება და უკვე ბანკროტიც. ხელისუფლებას აქვს 11%-იანი მხარდაჭერა, ალბათ გესმით, რომ მისი ლეგიტიმაცია არის ძალიან დაბალი. თან საინტერესოა ის ფაქტი, რომ ყოველი მნიშვნელოვანი ფაქტის დროს იდება ეს ჩანაწერები.
- მნიშვნელოვანში რას გულისხმობთ?
- მაგალითად, დაიდო ენდიაის გამოკითხვების დროს, მერე ყოველი პროცესის წინ იდებოდა ახალი სერიები. პოზიტიური დღის წესრიგი ამ ხელისუფლებას არ აქვს. ერთადერთი, რასაც შეიძლება მოელოდეს ქართველი ხალხი ამ ხელისუფლებისგან, ეს არის სერიალები. ამაშიც არის რაღაც დადებითი, სერიალებს მაინც გვჩუქნიან და შეუძლიათ, გააგრძელონ ასე.
- ეს ყველაფერი დისკომფორტს არ გიქმნით? თქვენთვის არაფერს ნიშნავს?
- ჩვენ ვაპირებთ, ძალიან წყნარად, არჩევნების გზით მოვუგოთ ამ ხელისუფლებას, თუ, რასაკვირველია, რაღაც საშინელება არ დამართა საკუთარ თავს ამ ხელისუფლებამ. ალბათ არავის ეპარება ეჭვი, რომ ჩვენ გაცილებით კომფორტულად ვგრძნობთ თავს დებატებში, გაცილებით კომფორტულად ვგრძნობთ თავს პარლამენტში, ასევე ძალიან კომფორტულად ვგრძნობთ თავს საარჩევნო გარემოში. ჩვენ ამ არჩევნებს მოვიგებთ.
- რა გაძლევთ ამის თქმის საფუძველს? ფიქრობთ, რომ ხალხს გული მოუბრუნდა თქვენზე?
- ამის თქმის საფუძველს გვაძლევს თუნდაც ის ბოლო გამოკითხვები, რომლებიც დაიდო. თავიდან 9%-ზე ჩამოვარდა ჩვენი რეიტინგი, მათი კი 60% იყო. თუმცა, ამის მიუხედავად, ჩვენ ძალიან წყნარად, თანმიმდევრული პოლიტიკით, სამი წლის განმავლობაში მოვახერხეთ, რომ ბოლო გამოკითხვებით ვიყოთ პირველ ადგილზე.
სერგო რატიანის თქმით, მათ ეს კმაყოფილების საფუძველს არ აძლევთ. მიაჩნია, რომ გასაკეთებელი ბევრია, რომ ხალხთან ბევრი აქვთ სასაუბრო.
- მერე, მოგისმენთ ხალხი?
- მოგვისმენს. თქვენ რომ მეკითხებოდით შეცდომებზე, ხალხი უნდა მიხვდეს, რომ ჩვენ ამ შეცდომებზე ვისწავლეთ. სამწუხარო რეალობაა დღეს, რომ ვისწავლეთ ჩვენ და არა _ ჩვენმა ოპონენტებმა. ჩვენი ქვეყნისთვის იქნებოდა გაცილებით უკეთესი, რომ ჩვენს შეცდომებზე ხელისუფლებას ესწავლა. ძალიან ცუდი სასტარტო პირობები გვხვდება, ჩვენ ათვლის წერტილს დავიწყებთ არა 2016 წლიდან, არამედ 2012 წლიდან. განსაკუთრებით კი ეკონომიკაში.
- როდესაც ვრცელდება ფარული ჩანაწერები, არავინ ამბობს, რომ სააკაშვილთან არ ჰქონია მსგავსი საუბარი. ამას ერთხმად აღიარებენ...
- ჩვენ არ უარვყოფთ, რომ სააკაშვილთან გვაქვს ხშირი საუბრები. ყველა ეს ადამიანი ბევრჯერ ელაპარაკა სააკაშვილს. კონკრეტულ სიტუაციაში რაზე ლაპარაკობენ, ეს უკვე მეორეხარისხოვანია.
- აბა, რა არის მნიშვნელოვანი?
- ჩვენ, ყველამ თავიდანვე ცხადად და ერთხმად ვთქვით, რომ რუსთავი 2-ს არ დავთმობდით. ვთქვით, რომ ეს იქნებოდა მშვიდობიანი, მაგრამ მტკიცე პროტესტი.
- აბა, სპეცრაზმიო?
- ჩვენ ვიქნებოდით ძალიან ბევრი და სპეცრაზმს მოუწევდა ჩვენზე გადავლა. ჩვენ ვიქნებოდით თუ არა აგრესიულები? გიპასუხებთ, რომ ჩვენ ვიქნებოდით მტკიცეები და ვიდგებოდით ბოლომდე. ამაზე მეტი საუბრები არც იქ არის. შეკოწიწებულია ნაწილ-ნაწილ საუბრები. შეიძლება კვირაში ხუთჯერ ველაპარაკოთ სააკაშვილს და აქედან რა არის ამოღებული და რა დატოვებული, ვინმეს ჰგონია, მეტი საქმე არ გვაქვს, ვსხედვართ და დეტალურად ვუსმენთ, რა ამოიღეს და რა დატოვეს?!
- ანუ არ ემიჯნებით სააკაშვილის ზრახვებს? გვარამია აცხადებს, რომ მან მოუსმინა სააკაშვილს, მაგრამ არ გაიზიარა…
- ეს ძალიან მნიშვნელოვანი თემაა, წარმოიდგინეთ დემოკრატიული პარტია, რომელიც იღებს გადაწყვეტილებებს, მსჯელობა მიდის ბევრ რაღაცაზე და შემდეგ ერთ კონკრეტულზე ხდება შეჯერება. რას ამბობს განსაკუთრებულს სააკაშვილი?! ის ამბობს, რომ ეს ხალხი არის გამსროლი ხალხი, მათ უნდათ არეულობა.
- ვის უნდა არეულობა, ხელისუფლებას?
- ის, რომ ამ ადამიანებს უნდათ არეულობა და უნდათ კონტროლი არეულობის ფონზე. ეს დაადასტურა წინა კვირამაც.
- რითი დაადასტურა?
- 63 ჩვენს ოფისზე იყო ერთდროულად თავდასხმა. წარმოიდგინეთ, 10 რაიონში ხდება თავდასხმა ჩვენს ოფისებზე, თანაც პრემიერისგან ისმის პირდაპირი მოწოდებები. ჩვენ რომ არ ვყოფილიყავით ორგანიზებული ძალა, ჩვენ რომ არ გვქონოდა ძალიან მკაცრი გაფრთხილება, იქ შესაძლებელი იყო, მომხდარიყო ექსცესები. რეალურად კი ამას ხელისუფლება პროვოცირებდა. არეულობას გეგმავდა ხელისუფლება!
- რაში უნდა სჭირდებოდეს ხელისუფლებას ქაოსი და დესტაბილიზაცია?
- ჩვენ გვყავს 11%-იანი ხელისუფლება, რომელსაც არაფერი გაუკეთებია იმისთვის, რომ უკეთესად წაეყვანა პროცესები, მან უბრალოდ მოატყუა მოსახლეობა დაპირებებით. დღეს მას, როგორც ჩანს, სხვა დღის წესრიგი არ აქვს და სწორედ ამიტომ აწყობს ეს არეულობა.
„ახალი თაობა“, 05 ნოემბერი, 2015 წელი
ინტერვიუ სოსო მანჯავიძესთან: „ანტიეროვნულ საკონსტიტუციო სასამართლოს უფლებამოსილება უნდა შეუწყდეს“
მარიამ მჭედლიშვილი
საქალაქო სასამართლოს გადაწყვეტილებას „რუსთავი-2“-ის ქიბარ ხალვაშისათვის მიკუთვნების შესახებ ნაცმოძრაობის წარმომადგენლებმა უწოდეს ძალადობა სასამართლოს ხელით და ივანიშვილის ბნელი დიქტატურის გაფორმება.
დედაქალაქის საკრებულოს დამოუკიდებელი დეპუტატი სოსო მანჯავიძე ასეთ შეფასებებს ცინიკურს უწოდებს. მისი თქმით, შესაბამისი გადაწყვეტილება სამართლებრივია. ტელეკომპანიამ 20-ჯერ გამოიცვალა მფლობელი – ყარყარაშვილითა და ჩიხრაძით დაწყებული, ბოლოდროინდელი მეწილეებით დამთავრებული. „ასეთი კომენტარები გასაკვირი არ არის ნაციონალური მოძრაობისგან. ტელეკომპანია „რუსთავი-2“-ს თავისუფალ სიტყვასთან შეხებაც არ აქვს. ის ყოველთვის ასრულებდა ნაციონალური მოძრაობის შეკვეთებს. ეს ტელევიზია ყოველთვის იყო საინფორმაციო შხამების ფაბრიკა“, – აღნიშნა „ახალ თაობასთან“ ინტერვიუში სოსო მანჯავიძემ.
- შხამების ფაბრიკაში რა იგულისხმება?
- უახლესი ისტორიის, რეალობის გაყალბება, ტირანიის, ტერორის გამართლება, ერთი პარტიის ინტერესების გატარება. ამას აკეთებდა წლების განმავლობაში „რუსთავი-2“ ნაცმოძრაობისა და სააკაშვილის დაკვეთით. სააკაშვილი ის პოლიტიკოსია, რომელმაც ერთხელ უკვე მოაწყო სახელმწიფო გადატრიალება და მას რატომღაც უწოდეს ვარდების რევოლუცია. ახლა ვხედავთ იმის ნიშნებს, რომ ის კიდევ გეგმავს გადატრიალებას. ამაში მას ეხმარებიან „რუსთავი-2“, ასევე ის პოლიტიკოსები თუ სამოქალაქო აქტივისტები, ვისაც სააკაშვილი აფინანსებს. რეალობა ასეთია. იმის მაგივრად, რომ სინამდვილე აღიარონ, ზოგიერთებმა დაიჭირეს გაუგებარი პოზიცია.
- ვინ გყავთ მხედველობაში?
- ყველა, ვინც რუსთავი 2-ის დასაცავად გამოდის. ამ ტელევიზიას იცავენ ისინიც, ვისაც კარგად აქვს გაცნობიერებული ამ მედიასაშუალების მავნებლური ხასიათი. ეს კეთდება იმ მოტივით, რომ ქვეყნის იმიჯი არ დაზიანდეს. თუ დაზიანებაზე მიდგა საქმე, ამას თვითონ „რუსთავი-2“ აკეთებს. ეს ტელევიზია ფსიქოლოგიურ ზიანს აყენებს საკუთარ მოსახლეობას და ხელს უშლის ქვეყნის განვითარებას – გრძელდება მოვლენების, ფაქტების გაყალბება და პანიკის დათესვა. ეს ტელეკომპანია წარმოადგენს აპოკალიფსური უღმერთობისა და ნგრევის ნაზავს, ფაქტობრივად, აპოკალიფსურ მეძავს.
- საუბარია იმაზე, რომ ოპოზიციურ ტელევიზიას ებრძვის ხელისუფლება...
- დიახ. ასეთი განცხადებები ისმის. საერთოდ, ამა თუ იმ პროცესში სხვადასხვა ფორმით ჩარეულია ხოლმე ნებისმიერი ხელისუფლება. გააჩნია ფორმებს. რა, სააკაშვილი არ ერეოდა პროცესებში? ტელეკომპანია იმედში რომ შევარდნენ და დაარბიეს ყველა და ყველაფერი, ნაციონალები არ იყვნენ? ახლა ამ დარბევის მხარდამჭერები და ორგანიზატორები მედიის დევნასა და რეჟიმზე გველაპარაკებიან. არადა, საქმე ირჩევა სასამართლოში. ნაციონალებს გვერდით უდგას ერთი პარტიის დამცველი ანტიეროვნული ინსტიტუტი – საკონსტიტუციო სასამართლო. ჩვენ აუცილებლად უნდა მოვითხოვოთ საკონსტიტუციო სასამართლოს უფლებამოსილების შეჩერება., ონსტიტუციაში ცვლილებების შეტანით. საკონსტიტუციო უმრავლესობა პარლამენტში ჯერჯერობით არ არსებობს, მაგრამ იმედი არ უნდა დავკარგოთ.
- ანტიეროვნული რატომაა საკონსტიტუციო სასამართლო?
- იმიტომ, რომ ბევრი ანტიეროვნული გადაწყვეტილება აქვს მიღებული. ორი მათგანი ქართული მიწის უცხოელებზე გასხვისებას უკავშირდება. პირადად მე ვიყავი მოსარჩელე, როცა სააკაშვილისთვის უფლებამოსილების შეწყვეტას მოვითხოვდით. ბუნებრივია, რომ ეს სარჩელი საკონსტიტუციო სასამართლომ არ დააკმაყოფილა.
- ითვლება, რომ „რუსთავი-2“-თან ბრძოლით ებრძვიან ევროინტეგრაციის კურსს.
- ასეთი მიდგომა სასაცილოა. გამოდის, რომ „რუსთავი-2“ ყოფილა ევროპული ღირებულებების დამცველი. ვინც ამას ამტკიცებს, ის ეწევა ევროპული კურსისა და დასავლური ღირებულებების დისკრედიტაციას. ფაქტების გაყალბება, მაყურებლის მოტყუება, მასზე ზემოქმედება, გარყვნილების პროპაგანდა არ არის ევროპული ღირებულებები. ჯერ ერთი, კონსერვატორები და ლიბერალები იქაც არიან. დემოკრატიული ქვეყნების ტელევიზიები „რუსთავი-2“-ის მსგავსად არ მუშაობენ.
საქართველოს ხელისუფლებამ ასეთ აბსურდულ განცხადებებს ყურადღება არ უნდა მიაქციოს. ხელისუფლება არ უნდა დაჰყვეს იმ ზეგავლენებს, რომლებსაც ნერგავენ ნაციონალები, მათი ტელეკომპანიის წარმომადგენლები, ანგაჟირებული არასამთავრობოები და სააკაშვილის მიერ ნაკვები პოლიტიკოსები. ხელისუფლება მათი ყიყინის მძევალი არ უნდა გახდეს. ჯობია, ხელისუფლებამ გაიზიაროს ხალხის პოზიცია. ხალხი კი ამ ერთი მუჭა ჯგუფს მხარს არ უჭერს.
„რეზონანსი“, 05 ნოემბერი, 2015 წელი
ინტერვიუ ირაკლი ბათიაშვილთან: ჩანაწერები საქართველოს სპეცსამსახურებს არ ეკუთვნის
თიკო ოსმანოვა
“ეს საუბრები ისეთი სპეცტექნიკითაა ჩაწერილი, რომლის საშუალება საქართველოს სპეცსამსახურებს არ გაჩნია. ჩვენს სპეცსამსახურებს აქვთ ტექნიკა, რომელიც გამოჰყვათ სააკაშვილის დროიდან და ისმინება ჩვეულებრივი მობილური სატელეფონო საუბრები. რაც შეეხება ვაიბერით საუბრებს, ეს ისმინება უფრო სერიოზული სპეცსამსახურების მიერ”, – ამბობს “რეზონანსთან” საუბრისას “დემოკრატიული მოძრაობა – ერთიანი საქართველოს” წევრი ირაკლი ბათიაშვილი, რომელიც 1990-იან წლებში უშიშროების მინისტრის პოსტს იკავებდა.
ირაკლი ბათიაშვილი: ამ ჩანაწერების ნაწილი სერიოზულ მტკიცებულებას წარმოადგენს გამოძიებისთვის, რომ მზადდებოდა ანტისახელმწიფოებრივი დანაშაულებრივი ქმედებები. ამაზე მეტყველებს მთელი რიგი ფრაზები. მაგალითად, სააკაშვილის ლაპარაკი ნიკა გვარამიასთან და გიგა ბოკერიასთან, სადაც ამბობენ, რომ რევოლუციური სცენარით უნდა განვითარდეს მოვლენები, იქნება სისხლისღვრა და სხვა. ეს ჩანაწერები აუცილებლად უნდა განვიხილოთ ერთიან ლოგიკურ კონტექსტში. შემდეგ მისი საუბარი სოფო ნიჟარაძესთან, სადაც ამბობს, სისხლისღვრა იქნება აუცილებლადო.
ეს ყველაფერი მეტყველებს, რომ იყო დიდი დესტაბილიზაციის მომზადების გეგმა. კონკრეტულად საუბარია მასობრივი არეულობის შექმნაზე, რომელიც კვალიფიცირდება სსკ 285-ე მუხლის მიხედვით. ამაზე არაერთხელ მილაპარაკია. ჯერ კიდევ თვეების წინ ვამბობდი, რომ “ნაციონალური მოძრაობა” და მიხეილ სააკშვილი აპირებდნენ დესტაბილიზაციის აგორებას და ეს უნდა მომხდარიყო არეულობის ინსცენირებით და ამაში ერთ-ერთი გადამწყვეტი როლი ტელეკომპანია “რუსთავი 2″-ს უნდა შეესრულებინა. თუმცა ეს გეგმა ვერ განხორციელდა, ჩაიფუშა მთელი რიგი მიზეზების გამო – “რუსთავი 2″-ის მოწოდებებზე ხალხი არ გავიდა და ინფორმაციამაც გამოჟონა.
- თქვენი აზრით, ეს ჩანაწერები საკმარისია თუ არა იმისთვის, რომ ამ ადამიანების პასუხისმგებლობის საკითხი დადგეს?
- გამოძიება მიმდინარეობს, მიდის დაკითხვები. პროკურორების მაგივრად ნამდვილად ვერაფერს ვერ გეტყვით, საით მიდის გამოძიება და როგორ მიდის. მთავარია, ეს შოუდ არ გადაიქცეს და ამ ჩანაწერების გამოქვეყნებამ არ მიიღოს ხასიათი, რომ მიმდინარეობს უბრალოდ კომპრომატების ომი. აუდიოჩანაწერს ყოველთვის უნდა ჰქონდეს გამოძიებისთვის ძალიან კონკრეტული მტკიცებულების ძალა და მნიშვნელობა, რომელიც გამოძიების ორგანოს დაეხმარება დანაშაულის გამოვლენაში. საზოგადოებამ უნდა იცოდეს, რა ავანტიურისტულ გეგმებს ისახავდა და ახლაც ისახავს მიხეილ სააკაშვილი. მას რაღაცაზე აქვს გათვლა გაკეთებული, მაგრამ რაც შეეხება სისხლის სამართლებრივ დევნას და გამოძიებას, ეს ყველაფერი უნდა ემყარებოდეს მტკიცებულებას.
- ყოველდღე ვხედავთ დაკითხვაზე მოსიარულე ადამიანებს, თუმცა ჯერჯერობით სხვა არაფერი გვესმის, თანაც საქმეს გრიფი საიდუმლო ადევს. და ეს ყველაფერი ხომ არ დაემსგავსა ერთგვარ შოუს?
- დაკითხვა თავისთავად გასაგებია, მაგრამ საით მიდის ეს გამოძიება და რა შედეგი ექნება ამას, ამასთან დაკავშირებით ბევრი კითხვა არსებობს. 2012 წლიდან ვერაფრით ვერ ვიხილეთ სამართლიანობის აღგენა და დღესაც ბევრს ეჭვი ეპარება, რომ ეს გამოძიება რაღაცით დასრულდება.
- “შეთქმულება ან ამბოხება საქართველოს კონსტიტუციური წყობილების ძალადობით შესაცვლელად” – ამ მუხლით დაწყებული გამოძიება, ფარული ჩანაწერების ფონზე, საქართველოს ისტორიას არაერთხელ ახსოვს. ხედავთ თუ არა ამ საქმეებში მსგავსებას? ხომ არ არის ეს კვლავ კომპრომატების ომი, რომელსაც “ნაციონალური მოძრაობა” აქტიურად იყენებდა?
- საერთოს ნამდვილად ვერაფერს ვხედავ. მაგალითად, ერთ-ერთ ადრინდელ ჩანაწერში გოგა ხაინდრავა ლევან ბერძენიშვილს ჩვეულებრივ კითხულობს და ამაზე დაიწყეს გამოძიება. სააკაშვილი კი პირდაპირ ლაპარაკობს, რომ სისხლისღვრა იქნება, რომ საჭიროა, გაისროლონ, ბარიკადები ააგონ და სხვა. მაშინ ჩემი საუბრებიც გამოაქვეყნეს და აბსურდული ბრალდება შემითითხნეს ჩემი სატელეფონო და საჯარო განცხადებების გამო.
აქ საუბარია იმაზე, რომ სააკაშვილი ინსტრუქციებს იძლევა, რომელიც აშკარად მიუთითებს დანაშაულებრივ ქმედებაზე. ვინაიდან ამ ჩანაწერებს უკრაინული საიტიდან იღებენ, ჩვენი ხელისუფლების მხრიდან ეს არ გამოდის ფარულად მოპოვებული ინფორმაცია. აქედან გამომდინარე, აბსოლუტურად ლეგალურია. თუმცა, რა თქმა უნდა, გამოძიებამ უნდა იმუშაოს კიდევ უამრავი მიმართულებით იმისათვის, რომ მოიპოვოს გაცილებით მდიდარი ბაზა, რომ საქმეში მხოლოდ ჩანაწერები არ იყოს.
- ანუ ამ ჩანაწერებში თქვენ საქართველოს ხელისუფლების კვალს ვერ ხედავთ?
- დარწმუნებული ვარ, ეს ჩვენი სპეცსამსახურების მოპოვებული არ არის.
- რა გაძლევთ ამის თქმის საფუძველს?
- ეს საუბრები ისეთი სპეცტექნიკითაა ჩაწერილი, რომლის საშუალება საქართველოს სპეცსამსახურებს არ გააჩნიათ. ჩვენს სპეცსამსახურებს აქვთ ტექნიკა, რომელიც გამოჰყვათ სააკაშვილის დროიდან და ისმინება ჩვეულებრივი მობილური სატელეფონო საუბრები. რაც შეეხება ვაიბერით საუბრებს, ეს ისმინება უფრო სერიოზული სპეცსამსახურების მიერ.
- თქვენი აზრით, ე.წ არეულობის მოწყობის საფრთხე კიდევ არსებობს?
- საფრთხე დროებით ავირიდეთ. ეს ავანტიურა არ გამოუვიდათ, რადგან ხალხი არ აჰყვა. მაგრამ სააკაშვილი ამაზე გაჩერებას არ აპირებს. მინდა გითხრათ, რომ მას აქვს თავისი ავანტიურისტული გათვლები. მაგრამ, საბოლოო ჯამში, რა მცდელობაც უნდა ჰქონდეს, არ გამოუვა და ეს ყველაფერი, პირიქით, “ნაციონალურ მოძრაობას” მიუბრუნდება ძალიან ცუდად.
„რეზონანსი“, 05 ნოემბერი, 2015 წელი
საკუთრების წართმევაზე ყველა საქმე შეიძლება შეჩერდეს
“რუსთავი 2″-ის ადვოკატები საკონსტიტუციოში კიდევ ორი მუხლის შეჩერებას ითხოვენ
ეკატერინე ბასილაია
“რუსთავი 2″-ის ადვოკატები საკონსტიტუციო სასამართლოსგან სამოქალაქო კოდექსის იმ ორი მუხლის შეჩერებას ითხოვენ, რომლის საფუძველზეც შეიტანა სარჩელი და მოიგო პირველი ინსტანციის სასამართლო ქიბარ ხალვაშმა. ამ მუხლების შეჩერებით არა მარტო “რუსთავი 2″-ის წილებზე მიმდინარე დავა გაიწელება, არამედ შეჩერდება ყველა ის საქმეც, რომელიც წინა ხელისუფლების დროს საკუთრების იძულებით დათმობა-წართმევას ეხება. ასეთი საქმეები კი, იურისტების თქმით, ათასობითაა.
“არ მგონია, რომ ამ ორი ნორმის, რომლებიც ძალიან დიდი ხანია არა მხოლოდ ჩვენს საკანონმდებლო სივრცეში არსებობს, შეჩერება გონივრული იყოს და ღირდეს საჯარო სიკეთის საფრთხის ქვეშ დაყენება, რომელიც შეიძლება გამოუსწორებელ შედეგებამდე მივიდეს,” – აცხადებს სტრატეგიული კვლევებისა და განვითარების ცენტრის პროგრამების ხელმძღვანელი ლევან ალაფიშვილი.
ცნობისათვის, ორი დღის წინ “რუსთავი 2″-ის გენერალურმა დირექტორმა ნიკა გვარამიამ განაცხადა, რომ არჩევნებამდე ისინი ამ პროცესებს აუცილებლად გაჭიმავენ. “…მერე დარწმუნებული ვართ, რომ ბიძინა ივანიშვილს ჩვენ ამ ქვეყანაში ვეღარ ვიხილავთ და “რუსთავი 2″-იც, სასამართლოც, თავისუფალი სიტყვაც, დემოკრატიაც ქვეყანაში იქნება უსაფრთხო, დემოკრატიული ძალების ხელში,” – განაცხადა ნიკა გვარამიამ.
პარალელურად კი ტელეკომპანიის ადვოკატებმა საკონსტიტუციო სასამართლოში მეორე სარჩელი შეიტანეს. ისინი სამოქალაქო კოდექსის 54-ე და 55-ე მუხლების არაკონსტიტუციურად ცნობას ითხოვენ. 54-ე მუხლში, რომელიც მართლსაწინააღმდეგო და ამორალურ გარიგებებს ეხება, ვკითხულობთ: “ბათილია გარიგება, რომელიც არღვევს კანონით დადგენილ წესსა და აკრძალვებს, ეწინააღმდეგება საჯარო წესრიგს ან ზნეობის ნორმებს.” 55-ე მუხლში კი აღნიშნულია: “გარიგების ბათილობა გავლენის ბოროტად გამოყენების გამო: ბათილია გარიგება, რომელიც დადებულია ერთი მხარის მიერ მეორეზე გავლენის ბოროტად გამოყენებით, როცა მათი ურთიერთობა დაფუძნებულია განსაკუთრებულ ნდობაზე.”
ქიბარ ხალვაში ამტკიცებს, რომ წილები სწორედ ამორალური გარიგების საფუძველზე დათმო.
იურისტები მიიჩნევენ, რომ ამ ორი ნორმის გაუქმება წარმოუდგენელია. არც ერთი ეს ნორმა არაკონსტიტუციური არ არის. თუმცა იქვე არც იმას გამორიცხავენ, რომ შესაძლოა, საკონსტიტუციო სასამართლომ საბოლოო გადაწყვეტილებამდე ნორმები დროებით შეაჩეროს.
ა/ო “კონსტიტუციის 42-ე მუხლის” აღმასრულებელ დირექტორს, ნინო ელბაქიძეს მოლოდინი აქვს, რომ დიდი ალბათობით, ნორმის დროებით შეჩერება მოხდება და ამ შემთხვევაში რაღაც პერიოდი ვერც ერთი დავა საკონსტიტუციო სასამართლოს გადაწყვეტილებამდე ვერ გადაწყდება. ხოლო თუკი საბოლოო გადაწყვეტილება იქნება, რომ ნორმები არაკონსტიტუციურია, ის საერთოდ დაკარგავს ძალას.
“რუსთავი 2″-ის საქმე სააპელაციოში შევა, მაგრამ შესაძლოა, საქმის წარმოება საკონსტიტუციოს საბოლოო გადაწყვეტილებამდე შეჩერდეს. ნორმების შეჩერება ან საერთოდ არაკონსტიტუციურად ცნობა რას გამოიწვევს, ამის პროგნოზი მიჭირს, რადგან ამ მუხლების საფუძველზე ძალიან ბევრი სარჩელია შეტანილი და ძალიან ბევრი საქმის განხილვა შეჩერდება. საუბარია გარიგების ორ სახეზე – ამორალურ და მოტყუებით დადებულ გარიგებებზე. პროცესი მარტივი არ იქნება, იმიტომ, რომ იყო მოტყუებით დადებული გარიგებები, იძულება, ამორალურ გარიგებებზეც ბევრი იყო საუბარი და ასეთი საქმეები სასამართლოში ერთი და ორი არ დევს,” – აღნიშნავს ელბაქიძე და დასძენს: “საკონსტიტუციო სასამართლოს უფლებამოსილება შეუზღუდავი და განუსაზღვრელი არ არის და თუ მხარე რაღაც ნორმის შეჩერებას ითხოვს, უნდა დაასაბუთოს ამ ნორმის შეჩერების საფუძველი. საკონსტიტუციო სასამართლოს მოქმედი ნორმის შეჩერების არც თუ დიდი პრაქტიკა აქვს. თუმცა, თუ მხარის პოზიცია არგუმენტებულია და თუ ნორმის მოქმედება ზიანს აყენებს მოსარჩელეს, საკონსტიტუციოს ნორმის შეჩერების უფლება ცალსახად აქვს. უბრალოდ მხარემ სასამართლოს წინაშე უნდა დაასაბუთოს, ამ ნორმის მოქმედებით რა ზიანი შეიძლება მიადგეს. რაც შეეხება კონკრეტული დავის არსს და შინაარსს, საქმის მასალებს არ ვიცნობ და ვერ ვიტყვი, რამდენად სწორად აქვს “რუსთავი 2″-ს საკონსტიტუციო სასამართლოში მოთხოვნა დაყენებული.”
ანტიკორუფციული პალატის თავმჯდომარე პაატა შავაძე აცხადებს, რომ აქ მარტო “რუსთავი 2″-ის საკითხი არ წყდება და თუკი საკონსტიტუციო სასამართლომ თუნდაც დროებით მაინც შეაჩერა 54-ე და 55-ე მუხლების მოქმედება, ყველა საქმე შეჩერდება, რაც ამ მუხლებითაა გასაჩივრებული და ძალიან ბევრი ადამიანი დაზარალდება.
“ეს არის აბსურდი. ეს არ ჯდება ლოგიკურ ჩარჩოში, ამათ საქმის განხილვის და აღსრულების გაჭიანურება უნდათ, ეგ არის მიზანი. ეს უფრო სასამართლოზე წნეხის უპრეცედენტო მცდელობად მიმაჩნია. ეს უკვე თავისუფალი სიტყვის დაცვა აღარ არის. ყველა ვალდებული ვართ, მოგვწონს თუ არ მოგვწონს, სასამართლო გადაწყვეტილებას პატივი ვცეთ. არსებობს გასაჩივრების ზემდგომი ინსტანციები და პროცედურები და თუკი რომელიმე მხარისათვის ესა თუ ის გადაწყვეტილება მისაღები არ არის, სააპელაციოს და შემდგომ საკასაციო ინსტანციას უნდა მიმართოს. საკონსტიტუციო სასამართლოს რომელიღაც დაჯგუფების ჯიბის სასამართლოდ გამოყენების მცდელობა კი დასაგმობია,” – აცხადებს შავაძე. მისივე მტკიცებით, იურიდიულად ეს სარჩელი უსაფუძვლოა და წინასწარვე განწირულია. ეს ნორმები იმიტომ არის სამოქალაქო კოდექსში მოცემული, რომ შესაძლოა, ნდობის ბოროტად გამოყენებით რომელიმე მხარის უკან გაფორმდეს გარიგება.
“არსებობს ფარული გარიგებები და რა ვქნათ, არ ვედავოთ ასეთ გარიგებებს?! თუკი იმ მიზანს მიაღწევენ და ამ ორი ნორმის მოქმედება შეჩერდება, მე, როგორც მოქალაქემ, რა ვქნა, – არ ვიდავო, თუკი გარიგების მეორე მხარის მხრიდან ანალოგიურ სიტუაციაში ჩავთვლი თავს, იმის გამო, რომ “რუსთავი 2″-ში ორ კაცს რაღაც მოეპრიანა და სარჩელი შეიტანა?! არ მომწონს საკონსტიტუციო სასამართლოს ასეთი გააქტიურება, ეს უკვე პოლიტიკურ დაჯგუფებას დაემსგავსა, ვიდრე სასამართლოს. რაღაც არ მახსოვს, რომ საკონსტიტუციო სასამართლოს ასე აქტიურად დაეკმაყოფილებინოს სარჩელები. ახლა რატომ ხდება?! მით უფრო ასეთი მნიშვნელოვანი ნორმების ბათილობაზე მსჯელობა მარაზმია. თქვა კიდევაც გვარამიამ, ამ პროცესებს ჩვენ არჩევნებამდე გავაჭიანურებთო. ცხადია, რომ ამ ყველაფერს პოლიტიკური სარჩული უდევს. ამიტომაც დიდია მოლოდინი, რომ საკონსტიტუციომ დროებით ეს ნორმები შეაჩეროს. ამით ძალიან ბევრი ადამიანი დაზიანდება. საინტერესოა მოვიკითხოთ სტატისტიკა, ამ ნორმებით დღეს რამდენი ადამიანი დავობს და რამდენი ადამიანი შეიძლება დაზარალდეს. სანამ საკონსტიტუციო სასამართლო საბოლოო გადაწყვეტილებას მიიღებს, საქმეები უნდა შეჩერდეს. უკვე აბსურდამდე მივედით. ყველამ იცის, რომ ამ ნორმების ბათილად ცნობა დაუშვებელია და იმდენად აბსურდული მოთხოვნაა, რომ წესით, საკონსტიტუციო სასამართლოს საერთოდ წარმოებაშიც არ უნდა მიეღო ეს სარჩელი.”
სტრატეგიული კვლევებისა და განვითარების ცენტრის პროგრამების ხელმძღვანელის, ლევან ალაფიშვილის თქმით, თეორიულადაც კი დაუშვებელი ამ ორი ნორმის არა თუ არაკონსტიტუციურად ცნობა, არამედ დროებით შეჩერებაც კი, რადგან ამ შემთხვევაში მართლმსაჯულება პრაქტიკულად უნდა გაჩერდეს.
“არ მგონია, რომ ამ ორი ნორმის, რომლებიც ძალიან დიდი ხანია არა მხოლოდ ჩვენს საკანონმდებლო სივრცეში არსებობს, შეჩერება გონივრული იყოს და ღირდეს საჯარო სიკეთის საფრთხის ქვეშ დაყენება, რომელიც შეიძლება გამოუსწორებელ შედეგებამდე მივიდეს. მით უმეტეს, თუ გავითვალისწინებთ, რომ დღესაც და ხვალაც არაერთი საქმე განიხილება და დასრულდება სწორედ ამ ნორმების გამოყენებით,” – ამბობს ალაფიშვილი და, აქედან გამომდინარე, ვარაუდობს, რომ მოხდება არა მთლიანად ნორმის შეჩერება, არამედ მისი ნორმატიული შინაარსის შეჩერება.
ლევან ალაფიშვილი: “თეორიულად, დავუშვათ, რომ საკონსტიტუციო სასამართლოს შეუძლია თქვას, შეჩერდეს ის ნორმატიული შინაარსი, რომელიც, მაგალითად, ამ კონკრეტულ, “რუსთავი 2″-ის, საქმესთან დაკავშირებულ რაღაც ურთიერთობას გულისხმობს. ესეც ლოგიკური მსჯელობაა, რადგან საკონსტიტუციო სასამართლო არსებით გადაწყვეტილებებში უკვე ასახავს-ხოლმე, რომ არა კონკრეტულად ნორმა, არამედ მისი ნორმატიული შინაარსი იქნეს ცნობილი კონსტიტუციის საწინააღმდეგოდ. ნორმა დარჩება, მაგრამ იქვე იქნება შენიშვნა, რომ ამ ნორმის ის შინაარსი, რომელიც ამ თუ იმ ურთიერთობას შეეხებოდა, საკონსტიტუციო სასამართლოს მიერ ცნობილია არაკონსტიტუციურად. ნორმატიული შინაარსის შეჩერება ძალიან სპეციფიკური საკითხია და რთულია ასახსნელად. მაგალითად, ერთი და იგივე ნორმას შეიძლება ჰქონდეს სხვადასხვა შინაარსი სხვადასხვა ურთიერთობისას: სახელმწიფოსა და კერძო პირების ურთიერთობაში აბსოლუტრად სხვა შინაარსი ჰქონდეს იგივე გავლენის ბოროტად გამოყენებას და კანონსაწინააღმდეგეობას სხვა შინაარსი ჰქონდეს და ე.წ. კერძო ურთიერთობებში – სხვა.”
გარდა იმისა, რომ ალაფიშვილი მიიჩნევს ამ ორი ნორმის შეჩერება არაგონივრულია, ასევე აცხადებს იმასაც, რომ თუკი “რუსთავი 2″-ის ადვოკატების სურვილია, პროცესი ყველა ხერხით გააჭიანურონ, ეს ნაბიჯი უშედეგოა. საკონსტიტუციოს “რუსთავი 2″-ის საქმეზე გავლენა ვერ ექნება, რადგან 2006 წელს, როდესაც “რუსთავი 2″-ის წილებზე გარიგება მოხდა, ძველი ნორმა მოქმედებდა და კანონს უკუქცევითი ძალა არ აქვს.
“თეორიულად შესაძლებელია რომელიმე ინსტანციის დროს, მაგალითად, როდესაც “რუსთავი 2″-ის საქმე უზენაესში იქნება, საკონსტიტუციო სასამართლომ იმსჯელოს და გამოაცხადოს ამ ორი ნორმის არაკონსტიტუციურობა, მაგრამ ამის მიუხედავად, დამკვიდრებული სასამართლო პრაქტიკაა, ამ გადაწყვეტილებას გავლენა მაინც ვერ ექნება “რუსთავი 2″-ის საქმეზე, რადგანაც ამ შემთხვევაში გადამწყვეტი არის, ამა თუ იმ გარიგების მომენტისთვის ნორმა მოქმედებდა თუ არა. ასეთია სასამართლო პრაქტიკა. ამას დიდი მითითება და განსჯა არ სჭირდება, იმიტომ, რომ თვით კონსტიტუციაში და საკონსტიტუციო სასამართლოს შესახებ ორგანულ კანონში პირდაპირაა ჩაწერილი, საკონსტიტუციო სასამართლოს გადაწყვეტილება ძალაში შედის მისი გამოცხადების შემდგომ და მას უკუქცევითი ძალა არ აქვს,” – აცხადებს ალაფიშვილი.
„ვერსია“, 5 ნოემბერი, 2015 წელი
ინტერვიუ ზურაბ ბიგვავასთან: „ხალხის დიდი ნაწილი არ ფიქრობს, რომ „რუსთავი-2“ მისი დასაცავია – არანაირი სისხლისღვრა და გადატრიალება არ იქნება“
ნინო კომახიძე
საზოგადოებაზე ტელევიზიიდან თუ პოლიტიკური ტრიბუნებიდან ფსიქოლოგიური ზეწოლა პიარტექნოლოგიის ნაწილი რომაა, ყველასთვის ცნობილია. დაძაბულ ფონს, რომელსაც ზოგიერთი ექსპერტი და პოლიტიკოსი წინასაარჩევნო აგონიასაც უწოდებს, პერმანენტულად, ოპოზიციის ლიდერთა ფარული ჩანაწერები, ან წამების კადრები „ალამაზებს“. კვლავ დაძაბული რჩება „რუსთავი 2“-ის გარშემო მიმდინარე პროცესი და ამასობაში, ახალ საპარლამენტო არჩევნებსაც ვუახლოვდებით. ამ დროს, შუალედური არჩევნები ორ რაიონში გარკვეული დარღვევებით, მაგრამ ,,ოცნების” კანდიდატების გამარჯვებით უკვე შედგა და ამ ფაქტის სწორმა ანალიზმა, შესაძლოა, 2016 წლის არჩევნების მიახლოებით შედეგზეც მიგვანიშნოს. ვითარების ანალიზი კი წარსულში, ,,ოცნების” მრჩეველთა საბჭოს ერთ-ერთ წევრს, ფსიქოლოგ ზურაბ ბიგვავას ვთხოვეთ, რომელიც ,,ვერსიისთვის” საინტერესო შეფასებებს აკეთებს.
- ბატონო ზურაბ, ბოლო დროს ხშირად გვესმის შეფასებები, რომ პოლიტიკური ძალები წინასაარჩევნო აგონიაში არიან _ ხელისუფლება რეიტინგის, ოპოზიცია კი ხელისუფლებაში მობრუნების შანსის დაკარგვის გამო. მოვლენებს თქვენც ასე აფასებთ?
- ადრე პოლიტიკაში ბევრი ექიმი იყო და ეტყობა, ახლაც შემორჩა ვიღაც, ვისაც პროფესიული ტერმინების ნოსტალგია აქვს. აგონია სიკვდილისწინა შიშის მდგომარეობაა, ახლა კი იმის ნიშანი არ არის. თუმცა ზოგადად, ნიჰილიზმი დღევანდელი პოლიტიკური ლანდშაფტის ყველაზე გამოკვეთილი მახასიათებელია, მაგრამ ასე ბევრ ქვეყანაში ხდება. რეიტინგის დაკარგვას რაც შეეხება, ევროპაში 35%-იანი, გამარჯვებული ძალა მთავრობას აკომპლექტებს და ეს სრულიად ნორმალურია. პირიქით, საზოგადოება ნელ-ნელა ახალ საარჩევნო კალაპოტში ჩადგება და არც ჭარბი ნდობა ექნება რომელიმე ძალის მიმართ, არც ჭარბი მტრობა. მგონი, ეს აგონიური კი არა, ჯანსაღი პროცესია. ასე რომ, რეალურად, არც სიკვდილის აჩრდილი დადის ქვეყანაში და არც წინასასიკვდილო აგონიაა. არის პოლიტიკა, არიან პოლიტიკური სუბიექტები და მიდის პროცესი.
- არის წამებისა და გაუპატიურების კადრები, რომელთაც დიდ ეკრანებზე ვუყურებთ, არის მუქარა „ბოევიკებისა“ და სისხლისღვრის შესახებ, წამყვან ტელევიზიაში არსებული დაძაბულობა და ა.შ. თქვენ ეს მეთოდები მოგწონთ პოლიტიკაში, ან ვინ რას მოიგებს ამ ვითარებაში?
_ რაც ჩამოთვალეთ, ეს გარკვეული ტრადიციაა: ჩანაწერების ჩვენება, კომპრომატების გამოყენება, პირადი სივრცის დარღვევა და ა.შ. ჩვენს პოლიტიკაში ეს ამაზრზენი მეთოდები ხშირად გამოიყენება, თუმცა დარწმუნებული ვარ, ავადმყოფების გარდა, ამის კეთება არავის ეხალისება. დიახ, ესეც პოლიტიკური ხერხია და, ალბათ, ოპონენტის მოქმედებაზე საპასუხო რეაქცია. პიარის ტექნოლოგიები ასეთ მეთოდებსაც მოიცავს, მაგრამ ეს უაღრესად არაეთიკურია. ნებისმიერ შემთხვევაში, ხალხი ამისგან არაფერს იღებს და იგებს. ასეთი კადრები ადამიანის ემოციებზე მუშაობს. სამი კომპონენტი არსებობს, რაზეც ზემოქმედება შეიძლება: ემოციაზე, ქცევასა და შემეცნებაზე. ყველაზე ეფექტური შემთხვევაა, როცა ემოციას ურტყამენ და იდება ინტიმთან, პირად ცხოვრებასთან, წამებასთან, სექსუალურ ძალადობასთან დაკავშირებული კადრები. ეს ყველაფერი ღრმა ემოციურ სფეროებს ეხება.
- და რა არის ადამიანების ღრმა ემოციურ სფეროზე ზემოქმედების მიზანი, ან არსებობს თუ არა ფეთქებადსაშიში ვითარების შექმნის საფრთხე?
- როცა რაღაც კადრი კონკრეტულ ადამიანს, ან მის პირად უსაფრთხოებას ეხება, მაშინ შესაძლოა, ზემოქმედებაც მეტი იყოს. თუმცა აქ ყველაზე მნიშვნელოვანი ხალხის სიმრავლეა და ამ შემთხვევაში, ადამიანების გაღიზიანება ამ კადრების ავტორებისა და ორგანიზატორების წინააღმდეგ იყო მიმართული. იყო საუბარი, რომ კონსტიტუციურ წესრიგს საფრთხე ემუქრება და ა.შ. მაგრამ მსგავსი განცხადებებიც გადაჭარბებულად მიმაჩნია.
- ახლა პრეზიდენტის გამოსვლაზე ვსაუბრობთ. მის და მანამდე, პრემიერის გამოსვლას როგორ აფასებთ ასეთ დაძაბულ ვითარებაში?
- ვფიქრობ, პრეზიდენტსაც და პრემიერსაც ემოციური გამოსვლები ჰქონდათ. როგორც ჩანს, ემოციები ვერ მოთოკეს. ასეა საზოგადოებაც – უარყოფით ემოციას ყოველდღიურ ცხოვრებაში გამოხატავს. ქუჩაში წვიმის დროს რომ გაიაროთ, ნახავთ, ხალხი ამასაც მთავრობას აბრალებს. ამიტომ აქვს ამ საჯარო განცხადებებს დიდი მნიშვნელობა, თორემ სახლში ვინ რას ამბობს და ვინ იგინება, ამას არავინ განიხილავს. ვფიქრობ, პრეზიდენტს კეთილშობილური მიზნები ამოძრავებდა, როცა გამოვიდა და თქვა, რომ კონსტიტუციურ წესრიგს ემუქრება საფრთხე და ხვალ შეიძლება ქვეყანა დაინგრეს. რეალურად, კი ამით საფრთხის შეგრძნება და მნიშვნელობა გაიზარდა, საჩოთირო ვითარება შეიქმნა.
- თუმცა, ამ განცხადებიდან სამ დღეში მართლაც აღიძრა საქმე 315-ე მუხლით, რაც ხელისუფლების წინააღმდეგ შეთქმულებას გულისხმობს. ე.ი. იყო რაღაც საფრთხე და ახლაც არის.
- ეს სულ სხვა რამაა. შეთქმულება კონსტიტუციური წესრიგის დარღვევა, ან გადატრიალება არ არის და ეს სულაც არ ნიშნავს, რომ ამ გეგმაში ხალხის მასებია ჩართული. მეტიც, ვნახეთ, რომ როგორც კი ფარული აუდიოჩანაწერები გამოქვეყნდა, ნიკა გვარამიამ მაშინვე თქვა, ხომ ხედავთ, ექსპრეზიდენტს არ ვემორჩილები, არც ბარიკადებს ვაშენებ არხის გარშემოო. ასე მარტივად ეს ამბები არ კეთდება.
- ეს „შეთქმულებაც‘ ჩვენს შიშსა და ემოციებზე თამაშია, როგორც ნაციონალების დროს იყო?
- შეთქმულება ყოველთვის შეიძლება არსებობდეს. შეიძლება, მე და თქვენ დავსხდეთ და ვილაპარაკოთ, მოდი, ხელისუფლების გადატრიალება მოვაწყოთო, მაგრამ ეს საზოგადოებისთვის საფრთხისმომტანი იქნება? ან თუნდაც, ჩვენთან ერთად ამაზე კიდევ 50-მა ნაცნობმა რომ ილაპარაკოს, ეს საზოგადოებრივ საფრთხეს ნიშნავს?! ბუნტებისა და რევოლუციების კეთება ასე მარტივი არ არის. 90-იან წლებში, სამოქალაქო ომი, რეალურად, 100-100 კაცს შორის მიმდინარეობდა, მეზობელ ქუჩებზე კი ხალხი რესტორნებში იჯდა. ამიტომ ასე ერთი ხელის მოსმით რევოლუციები არ კეთდება. ხალხში რევოლუციური მუხტი არ არის. არიან გარკვეული ძალები, რომლებიც ფართო მასების დამუხტვას ცდილობენ, მაგრამ არაფერი გამოსდით. თანაც, წინასწარ ხდება მოსინჯვა, რამდენი ადამიანი ჩაერთვება, ვინ აყვება მსგავს მოწოდებებს და ვინ არა და ა.შ. ნაციონალები ნამყოფები არიან ხელისუფლებაში და ამ მეთოდებს კარგად იცნობენ. მოსინჯეს, რა განწყობაა ქვეყანაში, გაყვება თუ არა ხალხი ამ რადიკალიზმში და მათი იმედი, რომ საზოგადოებრივ მღელვარებას გამოიწვევდნენ და ქვეყნის შიგნით დაპირისპირებას მოაწყობდნენ, არ გამართლდა. აღმოჩნდა, რომ ხალხი ვერ მოაგროვეს. რეალურად, იმ ჩანაწერებშიც სწორედ ხალხის რაოდენობის მოგროვებაზე იყო საუბარი, კუნთმაგარი, იარაღიანი ადამიანების გამოყვანაზე, თუმცა ნახეს, რომ როგორც მათ სურთ, ისე არ გამოვა _ დღეს ხალხის დიდი ნაწილი არ ფიქრობს, რომ „რუსთავი 2“ მისი დასაცავია.
- მაგრამ „რუსთავი 2“ის ყველაზე რეიტინგული ტელევიზია რომაა, ეს უდავოა, ამაზე ციფრები მეტყველებს. გადის თუ არა ამ თემაზე საზოგადოებრივი მღელვარების წითელი ხაზი?
- დღეს იქნება თუ ხვალ, ამ არხზე რაღაც შეიცვლება. ნახეთ, რა პროცესი მიდის: ორი დღის წინ გამოჩნდნენ რეალური მფლობელები, ყარამანაშვილები და განცხადება გააკეთეს. მანამდე კი აბსურდული ვითარება იყო. აქეთ ხალვაში ედავებოდა „რუსთავი 2“-ს, მაგრამ მფლობელებს და არა ნიკა გვარამიას. ეს მფლობელები კი ხმას არ იღებდნენ. სამაგიეროდ, მათ ნაცვლად საუბრობდნენ გვარამია, ჟურნალისტები, ადვოკატები და ნაციონალური მოძრაობა. ამ დროს, კი, „ოცნებას“ ძალიან კომფორტული პოზიცია ჰქონდა – ამბობდა, ,,რუსთავი 2”-ის ერთ და მეორე მფლობელს შორის დავა მიდის და არც ერთის საქმეში არ ვერევიო. დარწმუნებული ვარ, ,,ოცნებას” ამ არხის სარედაქციო პოლიტიკა და მენეჯმენტი არ მოსწონს. არც ქიბარ ხალვაშის გამარჯვების შემთხვევაში მოიკლავს თავს, მაგრამ ამხელა აჟიოტაჟი ამ თემაზე მაინც წაქეზებული პროცესია. ასე რომ, ,,რუსთავი 2”-ზე საზოგადოებრივი მღელვარების წითელი ხაზი არავითარ შემთხვევაში არ გადის. ეს ხაზი გადის ეკონომიკურ მდგომარეობაზე და ესაა რეალურად მნიშვნელოვანი საკითხი. ახლა შეიძლება, ვიღაცას გაეცინოს, მაგრამ ეს ხელისუფლება ყველაზე დემოკრატიული აღმოჩნდა. წარმოიდგინეთ, როგორ მოიქცეოდა მიხეილ სააკაშვილი ამ ვითარებაში?!
- ალბათ, „რუსთავი 2“-ის საქმე საკონსტიტუციო სასამართლომდე საერთოდ არ მივიდოდა, ასეა?
- რა თქმა უნდა, გამორიცხულია, საქმე აქამდე მისულიყო. მეტიც, არათუ სარჩელი არ წავიდოდა საკონსტიტუციოში, არამედ, რაღაც ფორმით, გიორგი პაპუაშვილსაც გააქრობდა საკონსტიტუციო სასამართლოდან. ყველა მწვავე პრობლემას უცებ გადაჭრიდა, ზედმეტი მიეთ- მოეთის გარეშე. ამიტომაც ეუბნებიან ახლა „ოცნებას“, უუნარო ხარო. ჰოდა, სააკაშვილი იყო უნარიანი! სწორედ იმ კადრებით იყო სააკაშვილი უნარიანი, რასაც ახლა ატრიალებენ და რაც არავის მოგვწონს. ამ ხელისუფლებამაც იგივე რომ აკეთოს და მსგავსი საზიზღარი მეთოდებით მიიღონ აღიარებითი ჩვენებები, ყველა საქმეს უცებ გამოიძიებენ, მაგრამ გვინდა ეს?!
- ისე, რომელია სჯობს: უუნარო, უნიათო, არაპროფესიონალი და ოპოზიციაში ჩარჩენილი „ოცნება“ თუ „ნაციონალური უნარები“?
- პასუხი თავად კითხვაშია. მირჩევნია, მთავრობა უნიათო იყოს და ადამიანები არ დაიჩაგრონ, უსამართლოდ არ დაიჭირონ, არ დაისაჯონ და მუდმივ შიშში არ იცხოვრონ. დღეს სწორედ ასეთი გარემოა – როგორც ამბობენ, შიში გატყდა და ეს შუალედურ არჩევნებზეც გამოჩნდა.
- კი მაგრამ, როდის გინახავთ საარჩევნო უბნებზე ჩამომსხდარი თავდაცვის მინისტრი და პარლამენტის თავმჯდომარე, ან ის რა იყო, საგარეჯოში, ჯარისკაცების აღრიცხულ რაოდენობაზე 2-ით მეტი ხმა რომ მიიღო სამხედროებისგან „ოცნების“ კანდიდატმა?
- პირველ რიგში, ის გამოჩნდა, რომ სახელისუფლო და ოპოზიციურმა კანდიდატებმა დაახლოებით მსგავსი შედეგები დადეს, რაც ნიშნავს, რომ ადამიანებს არჩევანის გაკეთება უკვე სამსახურიდან გაყრის შიშის გარეშე შეუძლიათ. ყველა დეტალი არ ვიცი, მაგრამ ვიცი ის, რაც თინა ხიდაშელმა თქვა: ჯარისკაცების იქ ჩასვლა და ბაზაზე განლაგება არჩევნებამდე ბევრად ადრე იყო დაგეგმილი. მოგვწონს თუ არა ხიდაშელი, ან მისი გამოხედვა და ჩაცმულობა, ის პასუხისმგებლიანი პოლიტიკოსია და ამ ვითარებაში, როცა მარტივად შეიძლება გადამოწმება, ტყუილს არ იტყვის. დიახ, როცა იქ თავდაცვის მინისტრიც იმყოფება, დიდი ალბათობით, შესაძლოა, ჯარისკაცებმა მის კანდიდატს ხმა პატივისცემის ნიშნად მისცეს, მაგრამ არა შიშის გამო. ამ დროს, ირმა ინაშვილი რომელიღაც ოპოზიციური პარტიის ლიდერია და დაახლოებით იგივე რაოდენობის ხმები აიღო. ეს ბევრ რამეზე მეტყველებს. ინაშვილისა და თარხან-მოურავის პარტიას, თუკი რაიმე ადამიანური და ფინანსური რესურსი ჰქონდა, ყველაფერი ამ ერთ რაიონს დაახარჯეს. ეს რესურსი, რა თქმა უნდა, მთელ საქართველოს ვერ გასწვდება, თუმცა ფაქტია, გარკვეული მხარდაჭერაც მოიპოვეს მოსახლეობაში და ამის ახსნაც მარტივია: მათი მხრიდან რადიკალური მოწოდებები ისმის, „ოცნების“ რიგებს კი სწორედ მისი შედარებით რადიკალი მხარდამჭერები აკლდება. ეს ხალხი სწორედ ინაშვილთან წავა და არავითარ შემთხვევაში ნაციონალებთან.
- როგორ ფიქრობთ, ადგილობრივი არჩევნები ლოკალური პრობლემებითა და შედეგებით, არის თუ რა 2016 წლის არჩევნების მიკრომოდელი, ან ამ პრობლემების მასშტაბის გაზრდას თუ ელით?
- ყველანაირი არჩევნები მინახავს: ბიულეტენებით სავსე ტომრებიც მახსოვს, გალახული ხალხიც, „კარუსელებიც“ და ა.შ. 2012 წელს წესიერთან მიახლოებული არჩევნები ჩატარდა, ძალიან სუფთად ჩაიარა საპრეზიდენტო არჩევნებმა, არც ადგილობრივ არჩევნებს ჩაუვლია სერიოზული ხარვეზებით.
- თუმცა 2012-ის მერე, ყველა შემდეგ არჩევნებზე ხელისუფლების რეიტინგის მკვეთრი ვარდნა სახეზე იყო, რა იქნება 2016 წელს?
- კლების ტენდენცია ნამდვილად ჩანდა, თუმცა ეს იმას არ ნიშნავს, რომ 2016 წელს მკვეთრი ცვლილებებია მოსალოდნელი. ვფიქრობ, 2016-შიც „ოცნება“ აიღებს ყველაზე მეტ ხმას, თუმცა ის რეიტინგი არ ექნება, რაც 2012 წელს ჰქონდა. კონკრეტულ შედეგებზე საუბარი ახლა ძნელია, მაგრამ ცალსახაა, რომ პოლიტიკური სპექტრის გარკვეული რადიკალიზაცია მოხდება. თარხან-მოურავის პარტია გავა თუ ბურჯანაძის, ძნელი სათქმელია, თუმცა პროცესების რადიკალიზება გარდაუვალია. დანარჩენ პარტიებს კი, არა მგონია, დარჩენილ ერთ წელიწადში რეიტინგის მოგროვების შანსი ჰქონდეთ. არც ის მგონია, რომ ცის კაბადონზე ახალი ძალა გამოჩნდეს და რაიმე შედეგი დადოს. თუმცა ერთი კია, იქმნება ილუზია, რომ ,,ოცნებას” 13% აქვს, რაც ასე ნამდვილად არ არის. ჩემი აზრით, პირველ ადგილზე სწორედ „ოცნება“ გავა, მეორე ადგილი ჯერ ბუნდოვანია, ხოლო ნაციონალებს ბარიერის გადალახვაც გაუჭირდებათ. ამ შედეგებამდე ეს პარტია სააკაშვილმა და ამ ბოლო აუდიოჩანაწერებმა მიიყვანა. თუმცა ცოტა ხანში, წინასაარჩევნო პერიოდი დაიწყება – ანგარიშების ჩაბარების დრო დგება და ვნახოთ, რას იტყვის ხელისუფლება საკუთარ თავზე. საზოგადოება კი ამ ყველაფერს შეაფასებს და მერწმუნეთ, ობიექტურად. დარწმუნებული ვარ, არანაირი სისხლისღვრა და გადატრიალება არ იქნება!
„საქართველო და მსოფლიო“, 4 ნოემბერი, 2015 წელი
ინტერვიუ ჰამლეტ ჭიპაშვილთან: „რესპუბლიკელებმა საგარეჯოში არჩევნები ივანიშვილის მიერ გაცემული განკარგულებით მოიგეს“
ეკა ნასყიდაშვილი
გასული კვირა კვლავ ხმაურიანი იყო და კვლავ “რუსთავი 2” -ის მიზეზით, ოღონდ პროცესში ამჯერად ოდესის გუბერნატორი ჩაერია, რასაც საქართველოში “ნაცების” ლიდერისა და ტელეკომპანია “რუსთავი 2”-ის დირექტორის დაკითხვა მოჰყვა, რომელიც უშედეგოდ დასრულდა, თუმცა ხელისუფლებამ მიიღო გადაწყვეტილება, რომ ნაპრეზიდენტალ სააკაშვილს მოქალაქეობა ჩამოართვას. პარალელურად კახეთში, საგარეჯოს საარჩევნო ოლქში, “პატრიოტთა ალიანსის” წარმომადგენლების მტკიცებით, შუალედური არჩევნები გაყალბდა და დღეს ქართველი საზოგადოების დიდი ნაწილი ორი რესპუბლიკელი მინისტრის _ თინა ხიდაშელისა და გიგლა აგულაშვილის _ მოხსნას მოითხოვს. საქართველოსა და მსოფლიოში მიმდინარე მნიშვნელოვან მოვლენებზე პოლიტოლოგი ჰამლეტ ჭიპაშვილი გვესაუბრება.
- გასულ კვირას საქართველო “რუსთავი 2” -ის გარშემო ატეხილ ხმაურს ისმენდა. ამას ფარული ჩანაწერების გავრცელებაც მოჰყვა, სადაც სააკაშვილი თანაპარტიელებს დირექტივებს აძლევდა. ხალხი, რომელიც სამართლიანობის აღდგენას მოითხოვდა, დღეს ისევ “ნაციონალებზე” კარგავს უამრავ დროს. უღირს თუ არა ხელისუფლებას დროის ფუჭად კარგვა “ნაცმოძრაობის” გამო, როდესაც ქვეყანაში უამრავი პრობლემაა?
- დიდი ხანია, “რუსთავი 2” -ზე ვლაპარაკობთ და ასე, ალბათ, კიდევ კარგა ხანს გაგრძელდება… ამ ყველაფრისთვის წერტილის დასმა ხელისუფლებას შეეძლო, მაგრამ მომენტი ხელიდან გაუშვა. “რუსთავი 2” სამი წლის წინათ უნდა გაეჩერებინათ. ხელისუფლებამ ვერ გაიგო, რას წარმოადგენს “ნაცმოძრაობა”. ის არის ანტინაციონალური და ანტიჰუმანური ორგანიზაცია, “რუსთავი 2” კი – ამ ორგანიზაციის რუპორი, ამიტომ ის საზოგადოებისგან მოსაკვეთია. ეს რომ 2012 წელს მომხდარიყო, ახლა ამ პროცესების მომსწრენი არ ვიქნებოდით.
- სააკაშვილის, გიგა ბოკერიასა და ნიკა გვარამიას სატელეფონო საუბრების ჩანაწერების გავრცელების შემდეგ ხელისუფლებამ გადაწყვიტა, ყოფილ პრეზიდენტს მოქალაქეობა ჩამოართვას. სწორია ეს გადაწყვეტილება? უკეთესი არ იქნებოდა, სააკაშვილი ქართული კანონმდებლობით გაესამართლებინათ?
- ძნელია თქმა, რომელი ჯობია. საინტერესოა, რატომ გაახსენდა იუსტიციის მინისტრს დღეს ეს ამბავი. წულუკიანი ამბობს, რომ უფრო ადრე ვფიქრობდით ამის გაკეთებას, მაგრამ უკრაინამ დოკუმენტები არ გამოგზავნაო. ეს უფრო აღმაშფოთებელია, ვიდრე ის, ჩამოერთმევა თუ არა სააკაშვილს მოქალაქეობა. უკრაინა საქართველოს ხელისუფლებას არაფრად აგდებს.
სააკაშვილი საშიში არავისთვის აღარ არის. სააკაშვილისთვის მოქალაქეობის ჩამორთმევით ხელისუფლება მოსახლეობის დიდ ნაწილს, უბრალოდ, კოჭს უგორებს. მოქალაქეობის ჩამორთმევა სააკაშვილისთვის არაფერია. ეს მისი დასჯა არ არის.
მივუბრუნდეთ უკრაინის მხრიდან ჩვენი ქვეყნის უპატივცემულობის საკითხს. ამ ხნის განმავლობაში საქართველოს მთავრობა უკრაინის მთავრობას ეკითხებოდა, რატომ შეიფარეთ ქართველი დამნაშავეებიო, მაგრამ პასუხის ღირსადაც არ ჩაგვთვალეს. საქართველოს წყენა მარტივად უნდა გამოეხატა. ელჩი მიხეილ უკლება სასწრაფოდ უნდა გამოეწვია და საქართველოს საელჩოს დონე მესამე მდივნამდე უნდა დაეყვანა. ის, რაც უკრაინამ საქართველოს წინაშე ჩაიდინა, დიპლომატიური სკანდალია. დარწმუნებული ვარ, მიხეილ უკლება სააკაშვილთან უფრო მჭიდროდ თანამშრომლობს, ვიდრე საქართველოს ხელისუფლებასთან, ის ხომ მათი კაცია?!
- ბიძინა ივანიშვილმა რამდენიმე დღის წინათ განაცხადა, რომ “ჭარბი ნდობით” სარგებლობს და მომავალ არჩევნებში კვლავ გაიმარჯვებს…
- ივანიშვილისადმი ნდობა ისეთივეა, როგორიც “ნაციონალების” მიმართ აქვს ხალხს. ივანიშვილმა ცუდად იმუშავა, მისი ყოველი გამოსვლა ანტიჰუმანური და ანტიეროვნულია. ის ვერც ხვდება, როგორ შეურაცხყოფს მოსახლეობას. ტყუილს ჯიქურ ამბობს, თეთრზე შავს გვეუბნება და გვაიძულებს, დავიჯეროთ.
სააკაშვილის მოშორება არჩევნების გზით შესაძლებელი იყო, მაგრამ ივანიშვილს ვერ მოვიშორებთ, რადგან მან ყველაფერი “ყმაწვილებს” ჩააბარა, განზე გადგა და ქურდულ-მაფიოზური სისტემა შექმნა, რომლის მსგავსიც მსოფლიოში არ არსებობს. ივანიშვილი ამბობს, რომ რიგითი მოქალაქეა, მაშ, რატომ მიდიან მასთან ჟურნალისტები? რატომ წერენ აკადემიკოსები წერილს და აბარებენ ანგარიშს, რა გაკეთდა გასულ წელს? რატომ ეკითხებიან ჭკუას მთავრობის წევრები? საზოგადოება მას რატომ მიმართავს, როგორც მმართველს? სწორედ, ამიტომ სჯერა ივანიშვილს, რომ “ჭარბი ნდობით” სარგებლობს. ივანიშვილის განათლება ძალიან დაბალ დონეზეა. როცა მას ჭკუას ეკითხებიან, თავი ღმერთი ჰგონია, ეს ასეა, მისიც და ერის სამწუხაროდ. ივანიშვილის მმართველობა დემოკრატიული არ არის, საქართველოში არის კლანური, ქურდული მმართველობა.
- საქართველოდან 700 კილომეტრში ომია…
- მართალია, 700 კილომეტრში ომია _ რუსეთი სირიაში “ისლამური სახელმწიფოს” პოზიციებს ბომბავს და საკმაოდ წარმატებითაც. სირიის სამთავრობო ჯარები შეტევაზე გადავიდნენ და მათ ირანელები, ქურთები, “ჰეზბოლა” ეხმარებიან. არის ნიშნები, რომ სირიიდან ტერორისტებს მალე განდევნიან. რუსეთმა ამ დამომბვებით დიდი პოლიტიკური ნაბიჯი გადადგა, ის ახლო აღმოსავლეთში დაბრუნდება. მიუხედავად იმისა, რომ მსოფლიო რუსეთის წინააღმდეგია, მას ჭკუას მაინც ეკითხებიან.
რუსეთს შორს მიმავალი გეგმები აქვს _ თუ გაიმარჯვებს, რუსეთი-ირანი-”ჰეზბოლა”-სირია, ეს ის ძალაა სამომავლოდ, რომელიც ანტივაჰაბიტური და ანტისალაფიტური მოძრაობის წინააღმდეგ იქნება მიმართული. ამას გარდა, რუსეთი აღნიშნულ რეგიონში პირველ ძალად ჩამოყალიბდება და ამერიკა მეორე პლანზე გადავა.
საქართველოში გამოქვეყნდა ჩანაწერები სააკაშვილისა და “ნაციონალების” სატელეფონო საუბრებისა, მაგრამ არავინ მიაქცია ყურადღება, რომ გამოქვეყნდა სხვა მასალებიც, რომლებშიც სააკაშვილის, კეზერაშვილისა და უკრაინელი მაღალჩინოსნის _ გერაშენკოს საუბარია. ამ ადამიანებს უშუალო ურთიერთობა აქვთ ჯონ მაკკეინთან. საუბარობენ იმაზე, როგორ უნდა გადასხან სირიაში უკრაინელი “ბოევიკები” და იქ ამერიკული თვითმფინავები ჩამოყარონ, რათა ამერიკამ ეს ყველაფერი რუსეთს დააბრალოს. წარმოგიდგენიათ, რამხელა ავანტიურაში მონაწილეობს სააკაშვილი?!
- რუსეთი წინ მიიწევს და, სავარაუდოდ, ამ ბრძოლიდან, როგორც პოლიტოლოგები ამბობთ, გამარჯვებული გამოვა. ასეთ ვითარებაში საქართველოს პირველი კანონმდებელი დავით უსუფაშვილი ნატოს გენერალურ მდივანს _ იენს სტოლტენბერგს ეუბნება: “როცა თქვენ ჩვენთან ხართ, მშვიდად ვართ, ან მიგვიღეთ ნატოში, ან დარჩით ჩვენთან”…
- უსუფაშვილი იყო კლერკი, პატარა ბიჭი, რომელიც პოლიტიკურად არ გაზრდილა, მისი უმწიფრობა საქართველოზე უარყოფითად მოქმედებს. ასეთი ადამიანების ბედი ხალხის გადასაწყვეტია. უსუფაშვილსა და მის ცოლს ჰგონიათ, რომ ამერიკელებზე მეტი ამერიკელები არიან და ამერიკელებზე მეტად უნდათ ნატო. უსუფაშვილი ამ სიტყვებით საქართველოს ცუდ საქმეს უკეთებს. საერთოდ, საქართველს ხელისუფლება მუშაობს ცუდად. როდესაც ხედავ, რომ რუსეთი კასპიის ზღვის აკვატორიიდან სირიას ბომბავს და საქართველოს ტერიტორიაზე მაინც აკეთებ ნატოს საწვრთნელ ბაზას, აზროვნებასთან ცუდად გაქვს საქმე. რუსეთმა დაამტკიცა, რომ დაჟანგული ტანკები არ ჰყავს. ამ ქვეყანას შეუძლია, წამში გაანადგუროს საქართველო, თუკი ამ ზომამდე მივიყვანთ.
- არის ამის ნიშნები?
- არის ამის ნიშნები, რადგან თინა ხიდაშელი წავიდა და ჰაერსაწინააღმდეგო თავდაცვის რაღაც დანადგარები იყიდა, ნატოს საწვთნელი ბაზაც გააკეთეს. საქართველოს ხელისუფლებამ სამი წლის განმავლობაში არ გამოიჩინა ინიციატივა, რუსეთთან ურთიერთობა მოეგვარებინა, რადგან ხან სააკაშვილის ეშინოდა, ხან _ ამერიკის.
ახლო აღმოსავლეთში ვითარება ისეა დაძაბული, რომ არავინ იცის, “ისლამური სახალიფოს” წევრები სად წავლენ. იქ ხომ ქართველი “ბოევიკებიც” არიან, რომლებიც საქართველოში დაბრუნდებიან. ასეთი 500 ადამიანია.
ვლადიმერ პუტინმა რამდენიმე დღის წინათ დსთ-ს ქვეყნების უშიშროების სამსახურების უფროსები შეკრიბა. შეხვედრის დასასრულს რუსეთის უშიშროების ფედერალური სამსახურის უფროსმა ალექსანდრე ბორტნიკოვმა საფრთხეებზე ისაუბრა და წარმოადგინა სია, რომელი ქვეყნიდან რამდენი “ბოევიკი” იბრძვის სირიაში. საქართველო მეორე ადგილზე იყო, თანაც, “ისლამური სახელმწიფოს” ხელმძღვანელთა შორის ბევრი ქართველია.
მიხეილ სააკაშვილსა და მის ხელისუფლებას წლების განმავლობაში ექსტრემისტ ისლამისტებთან მჭიდრო ურთიერთობა ჰქონდათ. ამაზე ამერიკელი მკვლევარი წერს. წიგნში აღწერილია, რამდენჯერ ჩატარდა ექსტრემისტი ისლამისტების დახურული შეხვედრა და რამდენი ტერორისტული ორგანიზაციის წარმომადგენელი მონაწილეობდა, მათ შორის, “ალ ქაიდას”. წიგნში ასევე ნახსენებია შეხვედრების ორგანიზატორის გვარი _ ლორთქიფანიძე, რომელიც ამჟამად უკრაინაში სააკაშვილთან ერთად იმყოფება. ის ყოფილი პოლიციელია. როდესაც ქვეყანას ასეთი კავშირები აქვს და კაცი, რომელიც ახლა უკრაინაში იმყოფება, პირდაპირ კავშირშია ამ ყველაფერთან, რატომ არავინ ფიქრობს, რომ სირიიდან წამოსული “ბოევიკები” არ აღადგენენ ძველ კავშირებს. საინტერესოა, სააკაშვილი გვარამიას რომ ეუბნებოდა, “ბოევიკები” მოიხმეთო, ვის გულისხმობდა.
- ასეთ მძიმე ვითარებაში ამჟამინდელ ხელისუფლებას პროცესების მართვა შეუძლია?
- არა. ხელისუფლება, რომელსაც ნატოს იმედი აქვს, ბრიყვია. ნატო არ ჩაერევა ამ არეულობაში, მით უმეტეს, ამ ხელისუფლების სასარგებლოდ. არც ამერიკა ჩაერევა, რომელმაც “ისლამური სახელმწიფო” შექმნა და დღესაც იარაღით ამარაგებს.
- “ქართულმა ოცნებამ” შუალედური არჩევნები გააყალბა, რაშიც აქტიურად იყვნენ ჩართულნი რესპუბლიკელები, კერძოდ, თავდაცვის მინისტრი. “პატრიოტთა ალიანსის” ლიდერ ირმა ინაშვილს არჩევნები ბოლო წუთს წააგებინეს…
- არ მიკვირს ის, რაც ამ არჩევნებში მოხდა. საქართველოში ერთადერთი დემოკრატიული არჩევნები კომუნისტებმა ჩაატარეს. მას შედეგ, არც ერთი არჩევნები სამართლიანი არ ყოფილა. 1995 წლის შემდეგ ამ პროცესებს “მწვანეთა პარტია” მართავდა, რომელიც ხელისუფლებაში მოვიდა. ჟვანია-გოგორიშვილ-სააკაშვილის ტრიო არჩევნებს აყალბებდა. ამ ყველაფერს კი “სამართლიანად” აფასებდა ახალგაზრდა იურისტთა ასოციაცია, რომელსაც ჯერ უსუფაშვილი ხელმძღვანელობდა, შემდეგ კი _ ხიდაშელი და, ბუნებრივია, გაყალბების მეთოდები შესანიშნავად შეითვისეს.
ხელისუფლება, რომელსაც ბერკეტები აქვს, ყოველთვის შეეცდება არჩევნების გაყალბებას, მოსახლეობა კი ამას შეეგუება. რესპუბლიკელებმა საგარეჯოში არჩევნები ივანიშვილის მიერ გაცემული განკარგულებით მოიგეს.
- სოციალურ ქსელში კვლავ გავრცელდა ინფორმაცია, სადაც ჯონ მაკკეინი სააკაშვილს ამშვიდებს, რომ “რუსთავი2”-ს არაფერი ემუქრება და მის ბიჭებს ხელს ვერავინ ახლებს. მეორე დღესვე სასამართლომ გადადო პროცესი - “რუსთავი 2”-ში “დაუყოვნებლივი აღსრულების პროცესი” არ მოხდება, ანუ ქიბარ ხალვაში, სასამართლო რომც მოიგოს, “რუსთავი 2”-ს მაინც ვერ დაიბრუნებს.
- ხელისუფლება ისეთი უსუსური, უმწიფარი, ქვეშაფსია და მშიშარაა, რომ დამოუკიდებელი ნაბიჯის გადადგმის უნარი არ აქვს. მათ ღვთის რისხვასავით ეშინიათ ამერიკისა (მაკკეინის სახით), მაკკეინის, რომელიც არაფერს წარმოადგენს.
„საქართველო და მსოფლიო“, 4 ნოემბერი, 2015 წელი
რა ტიპის კვლევები ტარდება და მიმდინარეობს თუ არა ლუგარის ლაბორატორიაში სახიფათო შტამებთან მუშაობა
შორენა ცივქარიშვილი
31 ოქტომბერს სასტუმრო “ქორთიარდ მარიოტში” არასამთავრობო ორგანიზაცია “გლობალური კვლევების ცენტრმა” რიჩარდ ლუგარის ლაბორატორიასთან დაკავშირებულ საკითხებზე გამართა საგანგებო კონფერენცია, სახელწოდებით “ლუგარის ლაბორატორია _ საექსპერტო ხედვა”.
რიჩარდ ლუგარის სახელობის საზოგადოებრივი ჯანდაცვის ცენტრალური რეფერალური ლაბორატორია თბილისის გარეუბანში, ე.წ. ალექსეევკის დასახლებაში, 2004 წელს ამოქმედდა და მას შემდეგ ამ ლაბორატორიაზე მითქმა-მოთქმა არ წყდება. მაღალი საზოგადოებრივი ინტერესიდან გამომდინარე, აღნიშნულ თემას “საქართველო და მსოფლიომაც” არაერთი სტატია და ინტერვიუ მიუძღვნა. რა მიზნით გაიხსნა ლუგარის ლაბორატორია საქართველოში, რა საფრთხეს შეიძლება შეიცავდეს მისი არსებობა ქვეყნისთვის და ვინ უზრუნველყოფს ლაბორატორიაში განთავსებული შტამების დაცვასა და ჩვენს უსაფრთხოებას? _ სწორედ წლების მანძილზე დაგროვილ ამ უპასუხო კითხვებზე სცადეს პასუხის გაცემა კონფერენციაზე პოლიტიკოსებმა, საზოგადოებრივი ორგანიზაციების წარმომადგენლებმა და სპეციალისტებმა.
რიჩარდ ლუგარის ლაბორატორიასა და მისგან მომდინარე საფრთხეებზე სხვადასხვა დროს გაზეთ “საქართველო და მსოფლიოსთან” ამერიკელი ჟურნალისტი ჯეფრი სილვერმანიც საუბრობდა. ის ამბობდა, რომ ლუგარის ლაბორატორიაში ბიოლოგიური იარაღის შექმნას აპირებდნენ. ლაბორატორიისგან მომდინარე საფრთხეებზე საუბრობდნენ ადგილობრივი მცხოვრებლებიც, რომლებიც შიშობდნენ, რომ დივერსიის ან ტერაქტის შემთხვევაში ქვეყანაში სასიკვდილო ვირუსები გავრცელდებოდა.
ნანა დევდარიანი, “გლობალური კვლევების ცენტრის” ხელმძღვანელი:
- ლუგარის ლაბორატორიის მიმართ წლების განმავლობაში საზოგადოებაში უამრავი კითხვა და ეჭვი დაგროვდა. მაგალითად, იყო ასეთი ეჭვიც: ხომ არ წარმოადგენდა ეს ლაბორატორია ამერიკელი სამხედრო მოსამსახურეების საქართველოში ყოფნისთვის ერთგვარ საფარს? თუმცა გვესმის, რომ მოსახლეობას, საზოგადოდ, ახასიათებს პანიკური დამოკიდებულება გარკვეული ინფორმაციისადმი და სწორედ ამიტომ ჩვენი მიზანია არა პანიკური ფონის შექმნა, არამედ, რეალური ინფორმაციის მოსმენა, ვინაიდან, როდესაც რამელიმე საკითხის ირგვლივ ამდენი ეჭვი და კითხვა ჩნდება, ასეთ დროს გამჭვირვალობა და უშუალოდ სპეციალისტებისგან კითხვებზე პასუხის მიღება ძალიან მნიშვნელოვანია.
როგორც ირკვევა, ვიდრე მიხეილ სააკაშვილი იყო ხელისუფლებაში, ამ ლაბორატორიას ერთი დღე არ უმუშავია და ეს ყველაფერი მხოლოდ და მხოლოდ რუსეთის გასაღიზიანებლად კეთდებოდა. ამერიკელი სენატორის, ლუგარის, სახელიც იმიტომ დაარქვა სააკაშვილმა ლაბორატორიას და ის სახელმწიფო დაზვერვის სამსახურს დაუქვემდებარა. სინამდვილეში, 2013 წლამდე ლაბორატორიაში მეცნიერები არც შესულან.
გიორგი მდივანი, “ახალგაზრდა პოლიტოლოგთა კლუბის” წარმომადგენელი:
- ლუგარის ლაბორატორიის მსგავსი ორგანიზაციები მსოფლიოს სხვადასხვა ქვეყანაში არსებობს, მაგალითად, ტაილანდში, ჩინეთში, კენიაში, გვატემალაში, ეგვიპტეში, ყაზახეთში, ინდოეთში, სამხრეთ აფრიკასა და ბანგლადეშში, თუმცა საინტერესოა ის გარემოება, რომ ამ ქვეყნებში არსებულ ლუგარის ცენტრებზე ინფორმაცია დახურულია და მათ შესახებ ინტერნეტში ვერაფერს მოიძიებთ. ამას გარდა, ყველა ქვეყანაში, მათ შორის, საქართველოში არსებული ლაბორატორიაც ძალიან მჭიდროდ თანამშრომლობს უოლტერ რიდის უნივერსიტეტთან, რომელიც, გაგიკვირდებათ და, არა კვლევითი და სამეცნიერო პროფილის, არამედ სამხედრო პროფილისაა და ინფორმაცია მის შესახებაც მიუწვდომელია.
2011 წელს სააკაშვილის ყოფილი მრჩევლის ჯეფრი სილვერმანის ინტერვიუმ ლუგარის ლაბორატორიის ირგვლივ ვითარება ძალიან დაძაბა და შესაბამისად რუსების მძაფრი რეაქცია გამოიწვია, ვინაიდან სილვერმანმა განაცხადა, რომ ამ ლაბორატორიაში ამერიკელი სპეციალისტების დახმარებით ბიოლოგიური იარაღის შექმნას აპირებდნენ.
გასათვალისწინებელია ისიც, რომ აღნიშნული პროექტისთვის ამერიკელებმა სამასი მილიონი აშშ დოლარის ინვესტიცია განახორციელეს, რაც მცირე თანხა არ არის და პენტაგონი ამხელა თანხას ტყუილუბრალოდ არ ხარჯავს. საერთოდაც, ჩემი აზრით, როდესაც სხვა ქვეყნის სამხედრო უწყება რომელიმე ქვეყანაში პირდაპირ ახორციელებს მსგავს ინვესტიციას და გლობალური ფორმატის კვლევით ცენტრს ქმნის, ეს უკვე საფრთხის შემცველია. ამიტომ, ამ ლაბორატორიაში მიმდინარე პროცესები უფრო მეტად გამჭვირვალე უნდა იყოს.
ვახტანგ მაისაია, სამხედრო ექსპერტი:
- ვინაიდან 1998 წელს აშშ-ს საჰაერო ძალების დოქტორანტი გახლდით და სწორედ ამგვარ დახურულ ცენტრში – ეროვნული უსაფრთხოების ინსტიტუტში – გავდიოდი სტაჟირებას, სადაც მუშაობა მასობრივი იარაღის განადგურების შემცირების საკითხზე მიწევდა, შევეცდები, ჩემი კომპეტენციის ფარგლებში ვისაუბრო.
კონფერენციაზე დაისვა კითხვა, რატომ დახარჯა ამერიკამ 300 მილიონი აშშ დოლარი მაშინ, როდესაც ყველამ ვიცით, რომ ამხელა თანხას ტყუილუბრალოდ არც ერთი ქვეყანა არ დახარჯავდა. ბუნებრივია, ამერიკას აქვს თავისი ინტერესები, ვინაიდან საქართველო და კავკასია მასობრივი განადგურების იარაღის შემცირებისთვის საკმაოდ მოწყვლადი არეალია. მაგალითად, 1998 წელს ჩრდილოკავკასიაში მოქმედ ისლამურ რადიკალურ ჯგუფებს ჰქონდათ კონკრეტული მიზანი, ხელში ჩაეგდოთ ბიოლოგიური და ქიმიური იარაღი. ამას გარდა, საქართველო განიხილება, როგორც შავი ტრანზიტის, მათ შორის, ნარკოტიკებისა და იარაღის უკანონო ვაჭრობის საკითხებში ერთ-ერთი ეფექტური ქვეყანა. ამის შესახებ აშშ-ის სახელმწიფო დეპარტამენტმაც რამდენჯერმე ოფიციალურად განაცხადა და ეს “მესიჯი” მათ არაერთხელ გაუგზავნეს წინა ხელისუფლების წარმომადგენლებსაც, რომლებსაც ისლამ რადიკალებთან საკმაოდ კარგი და თბილი ურთიერთობა ჰქონდათ, რომლის დამადასტურებელი ფაქტებიც არსებობს.
შესაბამისად, არ მიკვირს, რომ საქართველოში ასეთი ცენტრის შექმნა გადაწყდა და ამაში შემაშფოთებელს ვერაფერს ვხედავ, ვინაიდან, როგორც ჩანს, არსებული საფრთხეებიდან გამომდინარე, ამერიკელებმა ჩათვალეს, რომ საჭირო იყო პრევენციული ზომების მიღება და თავდაცვისა თუ რეგიონული უსაფრთხოების მიზნით ასეთი ლაბორატორია დააარსეს”.
დიმიტრი ლორთქიფანიძე, “გაერთიანებული დემოკრატიული მოძრაობის” წევრი:
- ნუთუ არ შეიძლება, მოვიწვიოთ მეცნიერები, სპეციალისტები, რომლებიც იტყვიან, რა ხდება ლუგარის ლაბორატორიაში? გვაინტერესებს, რა ტიპის კვლევები ტარდება, მიმდინარეობს თუ არა ლუგარის ლაბორატორიაში სახიფათო შტამებთან მუშაობა და, საერთოდ, რა საფრთხის შემცველია ეს ლაბორატორია საქართველოსთვის. ან აგვიხსნან, რა სარგებლობა მოაქვს ამ ლაბორატორიის არსებობას ჩვენი ქვეყნისთვის და ჩვენი მეცნიერების განვითარებისთვის, ხოლო, თუ ეს ლაბორატორია ბიოლოგიური იარაღის საცავია, მოსალოდნელი რისკების არსებობის შესახებაც უნდა ვიცოდეთ. მრჩება შთაბეჭდილება, რომ ლუგარის ლაბორატორიაზე საზოგადოებაში დღეს ბევრი შეკითხვა და შიში არსებობს, ამიტომ კარგი იქნება, თუ ამ ლაბორატორიის სარგებლიანობაზე მეტ ინფორმაციას მოვიპოვებთ.
ამირან გამყრელიძე, დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელი:
- რიჩარდ ლუგარის ლაბორატორია არავითარ საშიშროებას არ წარმოადგენს, პირიქით, ასეთი დონის ლაბორატორია ქვეყნის სიმდიდრეა და ეს ყველაფერი ჩვენი ძირითადი სტრატეგიული პარტნიორის – აშშ-ის დახმარებით ჩამოყალიბდა.
ლუგარის ლაბორატორია კავკასიის რეგიონში არის ერთ-ერთი საუკეთესო შესაძლებლობების მქონე ლაბორატორია, რომელსაც ბიოტექნოლოგიებსა და ბიოსამედიცინო კვლევებში უნიკალური შესაძლებლობები აქვს, რომელიც სხვადასხვა მძიმე ინფექციის აღმოჩენას, დიაგნოსტიკას, მეცნიერულ კვლევას გულისხმობს. საქართველოს გარდა, ასეთი პროექტები ბევრ ქვეყანაში, მათ შორის, უკრაინაში, აზერბაიჯანში, სომხეთში, ყაზახეთში, ტაილანდში, ეგვიპტეშიც ხორციელდება, ვინაიდან ამერიკელები გლობალური ჯანმრთელობის უსაფრთხოების საკითხს სერიოზულად უყურებენ და მას გლობალური უსაფრთხოების ნაწილად აღიქვამენ.
„ალია“, 5 ნოემბერი, 2015 წელი
საექსპერტო კონფერენცია ლუგარის ლაბორატორიის შესახებ
გლობალური კვლევების ცენტრი სრულიად განსხვავებულ თემატიკაზე მართავს კონფერენციებსა და სემინარებს. ამჯერად თემად ლუგარის სახელობის ლაბორატორია შეირჩა.
სასტუმრო „ქორთიარდ მარიოტის“ საკონფერენციო დარბაზში ბიოლოგებმა, მედიკოსებმა, დაავადებათა კონტროლის ცენტრის ხელმძღვანელებმა და უსაფრთხოების სფეროს ექსპერტებმა საკუთარი მოსაზრებები წარმოადგინეს.
კონფერენცია „ლუგარის ლაბორატორია – საექსპერტო ხედვა“ თვე-ნახევრით ადრე დაიგეგმა, თუმცა წინა დღეს რუსეთის ფედერაციის უშიშროების საბჭოს მდივანმა ნიკოლაი პატრუშევმა მორიგი განცხადება გააკეთა იმის შესახებ, რომ დსთ-ს ქვეყნებში ბიოლოგიური იარაღის ლაბორატორიები მოქმედებს, რომ ლებიც ვაშინგტონიდან იმართებიან. საქართველო 2008 წლიდან აღარ არის დსთ-ს წევრი, მაგრამ უნდობლობა და ეჭვები თანაბრად ვრცელდება საქართველოზეც თბილისის მახლობლად 2011 წელს გახსნილი ლაბორატორიის გამო.
რამდენიმე თვის წინ საქართველოში რუსი ჟურნალისტების მედიატური ჩატარდა და მათ საშუალება ჰქონდათ, დეტალურად შეესწავლათ, არის თუ არა ამ ლაბორატორიაში ბიოლოგიური იარაღის შექმნის შესაძლებლობა.
დაავადებათა კონტროლისა და საზოგადოებრივი ჯანმრთელობის ეროვნული ცენტრის გენერალურმა დირექტორმა ამირან გამყრელიძემ კონფერენციაზე კიდევ ერთხელ დაადასტურა, რომ ლაბორატორია გახსნილია დაინტერესებული პირებისთვის და ის მხოლოდ სამედიცინო და ბიოლოგიურ მიზნებს ემსახურება.
„საქართველოს მწვანეთა მოძრაობა – დედამიწის მეგობრების“ თანათავმჯდომარე ნინო ჩხობაძისაზრით, აუცილებელია, რომ საზოგადოებას მეტი ინფორმაცია მიეწოდოს, რათა მსგავსი კითხვები არ გაჩნდეს.
სხდომას ესწრებოდა თავდაცვის ყოფილი მინისტრი, დავით თევზაძე, რომელმაც აღნიშნულ საკითხთან დაკავშირებით მხოლოდ ერთი ფრაზა წარმოთქვა: „ვერ გავიზიარებ თქვენს ენთუზიაზმს ყველაფრის გასაჯაროებასთან დაკავშირებით“.
ექსპერტმა ვახტანგ მაისაიამსაკითხი თავდაცვისა და უსაფრთხოების კუთხით განიხილა და ისიც აღნიშნა, რომ ამერიკაში არსებული ამ ტიპის, მაგრამ უფრო მაღალი დონის ლაბორატორიები ორმხრივ დატვირთვას იძენს და სამოქალაქო თავდაცვასთანაცაა დაკავშირებული. საქართველოს ხელისუფლებას აღნიშნული ლაბორატორიის შექმნა ამერიკელებმა დაავადებათა ეროვნული ცენტრის ტერიტორიაზე ჯერ კიდევ 2002 წელს შესთავაზეს. მისი შეფასებით, ბიოლოგიურ იარაღზე საუბარს უფრო პოტიკური დატვირთვა აქვს და ის საერთო რეგიონული საფრთხეების გამწვავებას უნდა შირდებოდეს.
რეპლიკებში ისიც გაისმა, რომ სააკაშვილის ხელისუფლებამ ამერიკელი სენატორის სახელობის ლაბორატორიას რუსების გასაღიზიანებლად განზრახ დაარქვა.
„გაერთიანებული დემოკრატების“ ერთ-ერთმა ლიდერმა, დიმიტრი ლორთქიფანიძემ გაიხსენა, რომ 2008 წლის ნოემბერში, როცა ამერიკელი სენატორი რიჩარდ ლუგარი რესპუბლიკური პარტიის სენატორებთან ერთად ჩვენთან სტუმრად იმყოფებოდა, „საქართველოსთვის ტანკსაწინააღმდეგო და ჰაერსაწინააღმდეგო თავდაცვითი სისტემების გადაცემის შესახებ“ ხელშეკრულებას განიხილავდა. „როგორც გაირკვა, ეს მხოლოდ „პიარი“ იყო რესპუბლიკური პარტიისთვის და მას არანაირი შედეგი არ მოჰყოლია. თუმცა გაფორმდა ამერიკის შეერთებულ შტატებთან სტრატეგიული პარტნიორობის ქარტია, რომელიც ფორმალურად დღესაც მოქმედებს. ერთადერთი, რაც პრაქტიკულად დახმარების სახით მივიღეთ, ეს ლუგარის ლაბორატორია იყო“. ეჭვების გასაფანტად მეტი სიცხადე და ინფორმირებულობაა საჭირო.
————
შენიშვნა: იგივე მასალა გამოქვეყნებული გაზეთ „ახალი თაობის“ 5 ნოემბრის ნომერშიც.
