„ვერსია“: ინტერვიუ მამუკა არეშიძესთან: „ამის დაწერა არ შეიძლება!” // „ნაცნობები თქვენც გყავთ და შეიძლება, ჩემზე ადრეც იცოდეთ, რეალურად რა მოხდა!“ // რა კავშირი აქვს სააკაშვილის დედას გიულენთან, რატომ გადასცეს ნაციონალებმა ჩეჩნები რუსეთს
——-
„ახალი თაობა“: ნუკრი ქანთარია ირაკლი კობახიძეს აკრიტიკებს // „პარლამენტის თავმჯდომარეს სუსტი პოზიცია აქვს ბონუსებთან დაკავშირებით“ // „ქართულ ოცნებას“ ჯერ არ გადაუწყვეტია, როგორი საარჩევნო სისტემა იქნება“
„ახალი თაობა“: ინტერვიუ ნიკა რურუასთან: „ხელისუფლებას თვითგანადგურება თუ არ სურს, მუხთარლის საქმე მართლა უნდა გამოიძიოს“
„ახალი თაობა“: ინტერვიუ ლადო სადღობელაშვილთან: „დიმიტრი ქუმსიშვილს და კახა კალაძეს პრემიერობის ამბიცია მოუსპეს“ // „ბიძინა ივანიშვილმა ოთარ ფარცხალაძის დასჯის განკარგულება გასცა“ // „გიორგი მღებრიშვილს ალეკო ტაბატაძე შეცვლის“
———————
„ვერსია“, 5 ივნისი, 2017 წელი
ინტერვიუ მამუკა არეშიძესთან: „ამის დაწერა არ შეიძლება!” // „ნაცნობები თქვენც გყავთ და შეიძლება, ჩემზე ადრეც იცოდეთ, რეალურად რა მოხდა!“ // რა კავშირი აქვს სააკაშვილის დედას გიულენთან, რატომ გადასცეს ნაციონალებმა ჩეჩნები რუსეთს
ვანო პავლიაშვილი
,,აზერბაიჯანელი ჟურნალისტი ვიღაცამ ან იმიტომ გაიტაცა, საქართველოს ხელისუფლების დისკრედიტაცია მოეხდინა, ან იდიოტების ხელში ვართ, მაგრამ ასეთი იდიოტების ხელში ნამდვილად არ ვართ!.. საშინლად სკანდალური ფონი შეიქმნა და ის, ვინც ეს გააკეთა, ქვეყნის მოღალატეა… თუ ეს ვიღაც სპეცსამსახურის თანამშრომელია, მაშინ დიდი ფული აქვს აღებული… თუ ვიღაცამ დავალება მისცა, მაშინ საქართველოზე არ უფიქრია და ეს დავალების მიმცემი თანამდებობაზე არ უნდა იყოს! თუ მესამე ძალამ გააკეთა, მაშინ ციხე უნდა ,,ახეხინო”. მოკლედ, ქვეყნის სასწორი პინაზე დადეს და ამიტომ, დანდობა არ უნდა იყოს!” - ასე აფასებს აზერბაიჯანელ ჟურნალისტ აფგან მუხთარლისთან დაკავშირებულ, რბილად რომ ვთქვათ, ინციდენტს ექსპერტი კავკასიის საკითხებში მამუკა არეშიძე. ამასთან, ყოფილი ჟურნალისტი ,,ვერსიასთან” საუბრისას რამდენიმე სკანდალურ განცხადებასაც აკეთებს და იმ დროსაც იხსენებს, როცა ნაციონალებმა რუსეთს რამდენიმე ჩეჩენი ყოველგვარი გამოძიების გარეშე გადასცეს. მოკლედ, რასთან გვაქვს საქმე - ადამიანებით ვაჭრობასა თუ სპეცსამსახურულ თამაშებთან და, საერთოდ, რა კავშირშია თურქეთის ორი მოქალაქის დაკავება მუხთარლის საქმესთან?
,,ვერსია” მამუკა არეშიძის არა-ჩვეულებრივ ინტერვიუს წარმოგიდგენთ.
- თავდაცვის ყოფილმა მინისტრმა, თინათინ ხიდაშელმა სოციალურ ქსელში იეჭვა, მხედრიონის ეპოქაში ვბრუნდებითო. ბატონო მამუკა, რა ხდება, მართლაც წინ, წარსულისკენ მივდივართ?
- კარგი, თან ისეთი კითხვაა, საუბრის დაწყების სურვილს რომ მოგიკლავს.
- საუბრის დაწყების სურვილი რატომ ,,მოგიკვდათ”?
- იმის თქმა მინდა, რომ ყველაფერი, რაც ბოლო დროს ქვეყანაში ხდება, რთულად აღსაქმელია.
- ქვეყანაში ასეთი მაინც რა ხდება?
- ამ შემთხვევაში, ჩვენს მეზობლებთან _ აზერბაიჯანსა და თურქეთთან დაკავშირებულ ორ ფაქტს ვგულისხმობ.
- ანუ აზერბაიჯანელი ჟურნალისტის გაუჩინარება და თურქეთის ორი მოქალაქის დაკავება ერთ კონტექსტში უნდა განვიხილოთ?
- გარედან მაყურებელს ისეთი შთაბეჭდილება ექმნება, საქართველოს თურქეთი და ასევე აზერბაიჯანიც თავზე წამოაჯდა. სხვათა შორის, სოციალურ ქსელში ასეთ განცხადებას – ,,ხომ გეუბნებოდით” ხშირად ვხვდები და ამაში სწორედ ეს ე.წ. თავზე წამოჯდომა იგულისხმება.
- თავზე წამოჯდომისა რა მოგახსენოთ და ყველაფერი ეს უფრო სპეცსამსახურული თამაშები მგონია…
- რა ვიცი, როგორ გითხრათ?.. საერთოდ, ბევრი რამაა ისეთი, რაც ჩემთვის თეთრი ლაქაა და რაზეც საუბარი ხელაღებით არ შემიძლია. ერთ მაგალითს მოგიყვანთ, რაც ჩემთვის გახდა ცნობილი: ბათუმში შახინის სკოლის დახურვის პარალელურად, თურქეთში სეპარატისტული აფხაზეთის არაოფიციალური წარმომადგენლობაც დაიხურა ანუ მექმნება შთაბეჭდილება, რომ ერთი მეორეში გაიცვალა.
- ეს ,,გაცვლა” კარგია თუ ცუდი?
- ერთი შეხედვით, პატივმოყვარეობას გიკმაყოფილებს, თორემ შახინის სკოლის ტერორიზმთან კავშირის მოტივით დახურვა თვალთმაქცობაა. საერთოდ, საქართველოში სულ 11 დაწესებულებაა, რომელიც გიულენს უკავშირდება. გიულენისა და მიხეილ სააკაშვილის ჯგუფის ურთიერთობაზე ბევრი ინფორმაცია ვრცელდება.
- რას გულისხმობთ?
- მაგალითად, ოფიციალური ინფორმაციაა, რომ სააკაშვილის დროს, დედამისი შავი ზღვის უნივერსიტეტის დამფუძნებელი იყო, თან დამფუძნებელი თავისი სურვილით კი არ გახდა, არამედ თურქულმა მხარემ სთხოვა, ერთგვარი ,,კრიშა” ყოფილიყო… როგორც კი ხელისუფლება შეიცვალა, გიული ალასანია დამფუძნებლებიდან გავიდა. ნუ დაგავიწყდებათ, რომ გიული ალასანია ე.წ. ალასანიას უნივერსიტეტში თავისუფლად მუშაობს ანუ ვერ ვიტყვით, ახალი ხელისუფლების მიერ პრობლემები შეექმნა და შავი ზღვის უნივერსიტეტის დამფუძნებლებიდან ამიტომ გავიდაო. უბრალოდ, იქ ,,კრიშა” იყო და სხვა დამფუძნებლების წინაშე მეტი ვალდებულება არ ჰქონდა…
- გიულენს გიული ალასანიას ,,კრიშობა” რისთვის უნდოდა?
- ალბათ იმისთვის, რომ უნივერსიტეტს ლიცენზია მიეღო და ემუშავა.
- მუშაობა ერთია, მაგრამ, ბატონო მამუკა, როგორც ექსპერტი, ხომ არ ეჭვობთ, ყველაფერი ეს შავ-ბნელ საქმიანობასთანაა დაკავშირებული?
- კარგი კითხვაა, რომელზეც პასუხი ცალსახა ვერ იქნება.
- რატომ?
- თურქეთის დღევანდელი ხელისუფლება გამუდმებით ავრცელებს ინფორმაციას, რომ ეს სკოლები ტერორისტებს ამზადებენ, მაგრამ ამ პრინციპით ზაზა ფაჩულია ტერორისტი გამოდის, რადგან სწორედ დემირელის კოლეჯი დაამთავრა და სხვათა შორის, თურქეთის მოქალაქეობაც აქვს… მეც იქ ვასწავლიდი და…
მაშასადამე, თურქეთის ხელისუფლების ლოგიკით, თქვენც ტერორისტი ხართ, არა?
- (იღიმის) დიახ, პედაგოგი ტერორისტი… საერთოდ, ამ პროექტს ჩაღლარი ჰქვია და მისი სუბიექტები, წლების განმავლობაში, სერიოზული, როგორც იტყვიან, მონიტორინგის ქვეშ გვყავდა და ტერორიზმის იდეოლოგიური მომზადების ნიშნები არ შემხვედრია.
- სხვათა შორის, თავის დროზე გიულენი ერდოღანის ძმადნაფიცი იყო და იმასაც ამბობენ, ერდოღანის აღზევებაში ლომის წვლილი მიუძღვისო…
- რომ არა გიულენი, ერდოღანი ვერ იქნებოდა, მაგრამ მას შემდეგ, რაც მათი გზები გაიყო, ერდოღანმა გიულენისტებს დევნა მსოფლიო მასშტაბით დაუწყო ანუ მსოფლიოს თითქმის ას ქვეყანაში გიულენის სკოლის დახურვა მოითხოვა, თუმცა მხოლოდ ერთის დახურვას მიაღწია.
- სად?
- საინტერესო სწორედ ესაა: სად და აფხაზეთში.
- აფხაზეთში გიულენის სკოლა როდის დაიხურა?
- აგუძერაში არსებული გიულენის გიმნაზია, რუსების მოთხოვნით, 2008 წელს დახურეს. ისე, გიულენის სკოლა უზბეკეთშიც დაიხურა, ოღონდ არა ერდოღანის მოთხოვნით, არამედ ქვეყნის მაშინდელმა მეთაურმა, ქარიმოვმა იეჭვა, რომ ამ სკოლაში ტერორისტებს ამზადებდნენ. მოკლედ, მუსულმანურ ქვეყნებში გიულენის სკოლები შეიძლება, სწავლების სხვა მეთოდს იყენებენ, მაგრამ ქრისტიანულ ქვეყნებში ასე არაა და იგივე ბულგარელმა კოლეგებმა მითხრეს, კარგის გარდა, არაფრის თქმა შეგვიძლიაო…
- კეთილი, მაგრამ მედალს მეორე მხარეც აქვს ანუ იმის თქმა მინდა, რომ ამ სკოლებში ტერორიზმის წახალისება, ხომ შეიძლება, ფარულად ხდებოდეს?
- ამ ვერსიის განხილვა და შესწავლა წლების წინ დავიწყე.
- როგორ?
- როგორ და, მთლიანი პროგრამა გადავამოწმე და შემიძლია, ვთქვა, რომ გიულენის სკოლები სახელმწიფოს მიერ დამტკიცებული სასწავლო გეგმების მიღმა ნაბიჯსაც არ დგამენ. ამასთან, მოსწავლეთა მშობლებსაც ვესაუბრე და დავინტერესდი, ბავშვებს რამე კლასგარეშე ლიტერატურას ხომ არ ასწავლიდნენ… საერთოდ, განათლების სპეციალისტი არ ვარ, მაგრამ ჩემს ახლობლებს, რომლებიც ფილოლოგები არიან, შვილები დემირელის კოლეჯში დაჰყავდათ და არაფერი შეეშლებოდათ…
- ცნობილია, რომ დიპლომატიური მისიების საფარქვეშ სადაზვერვო სამუშაოები ხორციელდება ხოლმე. ჰოდა, გამორიცხულია, ის თურქი პედაგოგები, რომლებიც საქართველოში ჩაღლარის პროექტის ფარგლებში ჩამოდიან, ტერორისტულ საქმიანობას სწორედ პედაგოგობით ნიღბავდნენ ანუ პედაგოგობა ერთგვარი კონსპირაცია იყოს?
- რასაკვირველია, შესაძლებელია, მაგრამ თურქეთიდან სულ 40 პედაგოგია ჩამოსული, დანარჩენები ადგილობრივები არიან და ნიკა ჩიტაძე ან ვახო მაისაია ტერორისტია?
- ისე, ვახტანგ მაისაია ნაცებმა ტერორისტებთან არა, მაგრამ გამოძიებით დაუდგენელ უცხო ქვეყნის სპეცსამსახურთან კავშირის ბრალდებით დაიჭირეს…
- ვახტანგ მაისაია იქით იყოს და, თუკი ეს ვერსია მართალია, მაშინ შევთანხმდეთ, რომ სპეცსამსახური არ გვაქვს.
- რა, ეჭვი გეპარებათ, რომ არ გვაქვს?
- ამას ვერ ვიტყვი, მაგრამ ისეთი ნაყოფიერი არაა, როგორიც უნდა იყოს. საერთოდ, ერთ სეგმენტს ჩვენი სპეცსამსახურის მუშაობას ძალიან მაღალ დონეზე ვაფასებ.
- და ეს ,,ერთი სეგმენტი” რომელია?
- პანკისის ხეობა…
- პანკისზე აუცილებლად გკითხავთ, მაგრამ სპეცსამსახური რომ გვქონდეს, დევნილი ჟურნალისტი თბილისის ცენტრიდან გაუჩინარდებოდა?
- ეს ძალიან ცუდია!
- გვეუბნებიან, საზღვარი უკანონოდ გადაკვეთაო, არადა, აფგან მუხთარლი ორი წელია აზერბაიჯანიდან გამოქცეულია და უბრალოდ დაუჯერებელია, საზღვარზე ,,ტასაობა” დაეწყო…
- კრიტიკული შენიშვნების გამოთქმა დილიდან საღამომდე შეიძლება, მაგრამ მანჩესტერში მომხდარი ბოლო ტერაქტი გავიხსენოთ – აღმოჩნდა, რომ ლიბანელი, რომელმაც ეს ტერაქტი მოაწყო, სამი წელი აღრიცხვაზე იყო, მაგრამ მეთვალყურეობა, თურმე მოხსნილი ჰქონდა. იგივე 11 სექტემბრის ტერაქტები რომ გავიხსენოთ, ადამიანებმა, რომლებიც შტურვალთან ისხდნენ, განათლება აშშ-ში მიიღეს.
- ვერ ვხვდები, ამით რისი თქმა გინდათ, ბატონო მამუკა?
- სპეცსამსახურს ვერ მოსთხოვ, სიტუაცია აბსოლუტურად ,,მოიცვას”, რადგან დღევანდელი სპეცსამსახური საბჭოთა ,,ენ-კა-ვე-დე” არაა, მაგრამ მე რომ სპეცსამსახურის რიგითი თანამშრომელი ვიყო, მხოლოდ პანკისის თემით ვიამაყებდი!
- წეღანდელი თქმისა არ იყოს, აზერბაიჯანელი ჟურნალისტის ინციდენტამდე, თურქეთის ორი მოქალაქე დააკავეს. თურქული მედიის ცნობით, ამ დღეებში, საქართველოში თურქეთის სპეცსამსახურის 15-კაციანი ჯგუფი იმყოფებოდა და ზემოხსენებული დაკავებაც სწორედ ამ ჯგუფმა განახორციელა…
- ამაზე ვერაფერს გეტყვით, მაგრამ ვიცი, საქართველოს ხელისუფლებაზე უზარმაზარი ზეწოლა იყო.
- ანუ ოფიციალური ანკარა თბილისს დაემუქრა, თურქეთის ორი მოქალაქე აუცილებლად დაეკავებინა?
- მუქარა არა, მაგრამ მოთხოვნა იყო… სხვათა შორის, ამას წინათ, თურქეთის საელჩოში შეხვედრა გვქონდა და ეს რეკომენდაცია ჩემი ყურით მოვისმინე.
- მაინც, რა რეკომენდაცია?
- არაა სასურველი, საქართველოში დემირელის სასწავლებლები არსებობდესო.
- ეს რეკომენდაცია ვინ ,,გასცა”?
- ელჩმა…
- თურქეთის მოქალაქეების დაკავებამდე, ჩვენსა და თურქეთის პრემიერებს შორის შეხვედრაც გაიმართა…
- სხვა შეხვედრებიც იყო და დარწმუნებული ვარ, საუბარი გიულენის თემაზეც იქნებოდა… სწორედ ამიტომაც ვთვლი, რომ შახინის სკოლებთან განვითარებული მოვლენების პარალელურად თურქეთში სეპარატისტული აფხაზეთის წარმომადგენლობის დახურვა, გაცვლითი ღონისძიება იყო…
- ნორმალურია, როცა სხვადასხვა ქვეყნის სპეცსამსახურები ასე ,,ხმაშეწყობილად” მუშაობენ?
- სპეცსამსახურის წარმომადგენელი არ ვარ…
- ვიცი, მაგრამ ამ სისტემაში, მგონი, ჩემზე უკეთ ერკვევით და ბევრ ინფორმაციასაც ფლობთ…
- რასაკვირველია…
- ჰოდა, ე.წ. გაცვლითი ოპერაციები ნორმალურია?
- ეს სპეცსამსახურების დონეზე არ მოხდებოდა და აუცილებლად, ხელისუფლებებთან იქნებოდა შეთანხმებული…
- ისე, ამბობენ, შეიძლება არსებობდეს ორი მეგობარი ქვეყანა, მაგრამ ორი მეგობარი სპეცსამსახური არ არსებობსო…
- სოჭის ოლიმპიური თამაშები ამის ნათელი მაგალითია…
- ბატონო მამუკა, ყველაფერ იმის კვალი, რაზეც ზემოთ ვისაუბრეთ, ჩრდილოეთამდე ხომ არ მივა?
- არა!
- რატომ?
- თურქეთის შემთხვევაში, ერდოღანი გიულენის პირადი მტერია. რაც შეეხება აზერბაიჯანს, იგივე რუსეთს აზერბაიჯანიდან გაქცეული რამდენიმე პიროვნება აფარებს თავს.
- ვის გულისხმობთ?
- აზრი დამამთავრებინეთ, რა?!
- კეთილი, გისმენთ…
- რუსეთში მცხოვრებმა მდიდარმა აზერბაიჯანელებმა ,,ლომების კლუბი” შექმნეს, რომელიც ალიევის წინააღმდეგაა ორიენტირებული, თუმცა რუსეთში ,,ლომების კლუბის” ერთი წევრი არც დაუჭერიათ და არც აზერბაიჯანისთვის გადაუციათ. სამაგიეროდ, აზერბაიჯანს თავისი ბლოგერი ბელარუსმა გადასცა, რაც წარმოუდგენელია.
- ჩრდილოეთი შემთხვევით არ მიხსენებია და აი, რატომ: საქართველომ ვიზალიბერალიზაცია ახლახან მიიღო და განა გამორიცხულია, კრემლმა კვანტი მიზანმიმართულად დაგვიდოს, რის გამოც ევროპა ზურგს გვაქცევს? ახლა, იმას კი არ ვამბობ, თურქეთისა და აზერბაიჯანის სპეცსამსახურები მოსკოვის მითითებით მოქმედებენ-მეთქი, მაგრამ ხომ იცით, რუსულ უშიშროებას დიდი საცეცები აქვს და გამორიცხავთ, იგივე აზერბაიჯანელი ჟურნალისტის ინციდენტში თუნდაც ადგილობრივი აზერბაიჯანელების ხელი ერიოს?
- ჯერ ერთი, არაფერს გამოვრიცხავ; მეორეც, ამ თემაზე ჯერ არ გადავსულვართ.
- კი ბატონო, გადავიდეთ…
- ასეა თუ ისე, რუსეთის კვალს ვერ ვხედავ და რა ვქნა?
- ვერაფერს იზამთ, მაგრამ ეს ინციდენტი ჩვენს ევროპულ იმიჯზე ცუდად იმოქმედებს?
- არ მგონია, მაგრამ საქართველოს ხელისუფლებას ვურჩევ, თურქეთის მოქალაქეების ექსტრადიცია არ მოხდეს. ისე, ზოგს დაკავებაც არ მოსწონს, მაგრამ შეიძლება, ადამიანი დააკავო, თუმცა მერე გაარკვიო, რომ ტერორისტი არაა და გაათავისუფლო.
- სხვათა შორის, მგონი, არ გახმაურებულა, იგივე თურქეთის მოქალაქეები რა ბრალდებით დააკავეს…
- ბიზნესმენის ბრალდება არ ვიცით, თორემ პედაგოგი ტერორიზმშია ეჭვმიტანილი, თუმცა ეს ღიმილისმომგვრელი ბრალდებაა და თუ სერიოზული არგუმენტები არ იქნება, ღიმილი ხორხოცში გადაიზრდება!
- მოდი, ისევ აზერბაიჯანელი ჟურნალისტის ინციდენტს დავუბრუნდეთ. თქვენი აზრით, აფგან მუხთარლი აზერბაიჯანში როგორ მოხვდა?
- რამდენიმე ვარიანტია: ჯერ ერთი, შეიძლება, საქართველოს მთავრობასთან შეთანხმება მოხდა და ამის განხორციელება სპეცსამსახურს დაევალა, რაც კატასტროფაა; მეორე, სპეცსამსახურის ერთმა ჯგუფმა საქართველოს ხელისუფლების რომელიღაც ჯგუფის დავალება შეასრულა, რაც ასევე კატასტროფაა; კიდევ უარესი კატასტროფა იქნება, თუკი დადგინდება, რომ ეს სპეცოპერაცია აზერბაიჯანულმა სპეცსამსახურმა საქართველოსთან შეუთანხმებლად ჩაატარა და მეოთხე ვარიანტი _ აფგან მუხთარლი შესაძლოა, ადგილობრივმა აზერბაიჯანელებმა მოიტაცეს და აზერბაიჯანის საზღვრამდე მიიყვანეს.
- ჩემი აზრით, მეხუთე ვარიანტიც არსებობს, რომელიც, არ ვიცი, გამოგრჩათ თუ ყურადღება შეგნებულად არ გაამახვილეთ…
- რომელი მეხუთე?
რომელი და ,,სოკარის” ვერსია ანუ არსებული ინფორმაციით, აფგან მუხთარლი სწორედ ,,სოკარისა” და ჩვენი ხელისუფლების კორუფციულ სქემებს იძიებდა…
- არ მგონია, ამ საქმეში ,,სოკარი” ჩარეულიყო.
- რატომ არ გგონიათ?
- თუ უნდოდა, ,,სოკარი” ისე მოაწყობდა, ამაში მონაწილეობა ვინმე სხვას მიეღო ანუ ,,სოკარის” იდეოლოგიით თუ ვიმსჯელებთ, ამაში არ ჩაერეოდა.
- შეიძლება, მაგრამ თუკი ჟურნალისტისგან საფრთხეს გრძნობდა, თავს მაინც შეიკავებდა? ამასთან, ცნობილია, რომ მიზანი საშუალებას ამართლებს, უფრო სწორად, არ არსებობს ადამიანი, არ არსებობს პრობლემა!
- ,,სოკარს” შეეძლო, ფული დაეხარჯა და ისეთი ადამიანები მოეძებნა, ვინც ამას ისე გააკეთებდა, კომპანიისკენ ხელი ვერავის გაეშვირა. აფგან მუხთარლის მეუღლე, ლეილა ამბობს, რომ კაფეში ,,სოკარის” უსაფრთხოების თანამშრომლები ისხდნენ. შესაძლოა, ასეც იყო, მაგრამ ისინი ამ ოპერაციაში მონაწილეობას არ მიიღებდნენ!
- მაშასადამე, უბრალოდ დაემთხვა, რომ გატაცების წინ, კაფეში, ჟურნალისტის გვერდით ,,სოკარის” წარმომადგენლები ისხდნენ?
- არა… შეიძლება, უთვალთვალებდნენ ან ამოწმებდნენ, მაგრამ აბსოლუტურად გამოვრიცხავ, ამ ოპერაციაში მონაწილეობა მიეღოთ.
- ისე, აფგან მუხთარლის პირადად იცნობთ?
- არა, თუმცა ვიცი, რომ რეჟიმის წინააღმდეგ მებრძოლი აქტივისტია…
- ალექსანდრე ჯეჯელავამ თავდაპირველად განაცხადა, მუხთარლი ჟურნალისტი კი არა, რადიო ,,თავისუფლების” უსაფრთხოების სამსახურის თანამშრომელიაო. მერე კი, მოიბოდიშა, უი, მაპატიეთ, მართლაც, ჟურნალისტი ყოფილა და შემეშალაო. ჯეჯელავა მხოლოდ განათლების მინისტრი კი არა, ვიცე-პრემიერიცაა და უმაღლესი თანამდებობის პირის ასეთი, მინიმუმ, კომიკური განცხადება განა, ეჭვს არ აჩენს?
- რასაკვირველია… ძალიან ცუდია, როცა სახელმწიფოს წარმომადგენელი მოუმზადებელი ლაპარაკობს.
- ასეა თუ ისე, მომხდარზე პასუხისმგებლობა ვინ უნდა აიღოს?
- ყველამ, ვინც ამაში მონაწილეობდა, მაგრამ როცა ამაზე ნაცმოძრაობის წარმომადგენლები ლაპარაკობენ, ვერ ვიჯერებ და რა ვქნა?
- ნაცების ნათქვამში დაუჯერებელი რა არის?
- ძალიან კარგად მახსოვს, ამერიკელებს საქართველოში ჩამოსული ირანელი მეცნიერი როგორ გადასცეს.
- როდის?
- ნაცმოძრაობის დროს…
- ამის შესახებ პირველად მესმის, თუმცა მუხთარლის შემთხვევა მაინც განსაკუთრებულია - ის საქართველოში ტურისტად კი არ ჩამოვიდა, ორი წელი აქ ცხოვრობდა ანუ ალიევს ემალებოდა…
- ვანო, დამამთავრებინეთ… მესმის, ეს სხვა შემთხვევაა, მაგრამ განა კარგია, ადამიანი, რომელიც საქმეზე ჩამოდის, დაიჭირო და მესამე ქვეყანას გადასცე? ბოლოს და ბოლოს, არ შემოუშვა! ირანელის გადაცემის შესახებ ჩემთვის ცნობილი პრესიდან გახდა. ყველაზე მთავარი კი რუსეთისთვის ჩეჩნების გადაცემაა.
- ესეც ნაცების მმართველობისას მოხდა?
- დიახ, 2004-2005 წლებში… სამი ჩეჩენი რუსეთს გადასცეს და ეს, პრაქტიკულად, ამ ადამიანების სიკვდილზე ხელის მოწერა იყო!
- ჩეჩნები, რომლებიც მიშას დროს რუსეთს გადასცეს, ტერორიზმში იყვნენ ეჭვმიტანილნი?
- დღეს საქართველოში 250 თუ სამასი ჩეჩენიღაა დარჩენილი და შესაძლოა, ყველაზე თქვა, ტერორისტიაო. მუხთარლის შემთხვევაშიც იგივე არაა?
- არა, არა, მუხთარლი, ოფიციალური ვერსიით, საზღვრის უკანონო გადაკვეთისთვის დააკავეს…
- ეს ბრალდება ახლა აქვს წაყენებული, თორემ ხალიდა ჯალილოვას ინტერვიუ წავიკითხე, რომელიც ამბობს, მუხთარლი იმ სამიდან ერთ-ერთია, რომელზეც ძებნა ტერორიზმის გამოა გამოცხადებულიო. მუხთარლი, რასაკვირველია, ტერორისტი არაა…
- ბატონო მამუკა, საუბრის დასაწყისში მითხარით, პანკისთან დაკავშირებით სპეცსამსახურის მუშაობას დადებითად ვაფასებო; ახლა კი დანანებით აღნიშნეთ, მიშამ რუსეთს ჩეჩნები გადასცაო. არ გეწყინოთ და, ეს ორი განცხადება ერთმანეთთან წინააღმდეგობაში მოდის…
- არა, არ მოდის.
- რატომ?
- პანკისი დღევანდელ კონტექსტში ვახსენე, სააკაშვილის დროს ანუ 2004-2005 წლებში კი სირიის თემა აქტუალური არ იყო. ჩეჩნები ვახსენე, თორემ იმაზე ხომ არაფერს ვამბობ, რომ სააკაშვილის ხელისუფლებამ რუსეთს ყარაჩაელი კრიმ შამხალოვი გადასცა _ მას რუსეთში მოწყობილ ტერაქტებში მონაწილეობა მართლა ჰქონდა მიღებული. ეს თემა ვიცი, მაგრამ ახლა მთლიანად ხომ არ გავშლი? მეორე ყარაჩაელის წინააღმდეგ ურეკში სპეცოპერაცია ჩაატარეს, მაგრამ ვერ დაიჭირეს… მოკლედ, ეს სხვა შემთხვევა იყო, ჩეჩნების შემთხვევაში კი საგამოძიებო მოქმედებებიც არ ჩატარებულა, რუსეთის ინფორმაციას დაეყრდნნენ, პირდაპირ დაიჭირეს და გადასცეს… რაც შეეხება პანკისს, ვანო, წეღანაც გითხარით, რომ დღევანდელმა სპეცსამსახურმა იქ აბსოლუტურად მისაღები ვითარება შექმნეს.
- ჩემი ინფორმაციით, ამ კუთხით, სპეცსამსახურთან თანამშრომლობდით, არა?
- სპეცსამსახურში ვის ვჭირდები ან თანამშრომლობა რაში მეტყობა?
- ანუ არ მიდასტურებთ, რომ სპეცსამსახურს გარკვეულ კონსულტაციას უწევდით?
- არა… თანამშრომლობა ერთადერთი, თურქეთის ქალაქ გაზიანთებში მყოფ საქართველოს მოქალაქეებზე შედგა. ისე, ესეც არ უნდა მეთქვა, მაგრამ გითხარით!
- რაკიღა დაიწყეთ, ბარემ, კარტი ბოლომდე გახსენით _ გაზიანთებში რა ხდებოდა?
- იქ საქართველოს მოქალაქეები იმყოფებოდნენ და არა მხოლოდ პანკისელები…
- აბა, კიდევ ვინ?
- გურიასა და აჭარიდანაც.
- მოკლედ, პოსტფაქტუმ მიიღეთ ინფორმაცია, რომ საქართველოს მოქალაქეები ქალაქ გაზიანთებში იმყოფებოდნენ, საიდანაც სირიაში უნდა წასულიყვნენ და ამის თაობაზე ჩვენს სპეცსამსახურს აცნობეთ?
- როცა გავიგე, იქ იმყოფებოდნენ და რომელ ბანაკში ემზადებოდნენ, ამის თაობაზე ხელისუფლებასთან კონსულტაციები ნამდვილად მქონდა.
- ხელისუფლებასთან, მაშასადამე სპეცსამსახურთან, არა?
- არა, სხვა უწყებასთან…
- ჩაგეძიებით, მაგრამ ვხვდები, ამაზე მეტს აღარაფერს მეტყვით, ამიტომ საუბრის თემას ნაწილობრივ შევცვლი: გარდა იმისა, რომ ექსპერტი ხართ კავკასიის საკითხებში, ეთნიკური აზერბაიჯანელებით დასახლებულ რეგიონებს, მაგალითად, მარნეულს კარგად იცნობთ - იქ კენჭსაც იყრიდით. ჰოდა, მუხთარლის ინციდენტს ქართველი აზერბაიჯანელების მღელვარება ხომ არ მოჰყვება?
- არა, მიუხედავად იმისა, რომ საქართველოს აზერბაიჯანული მოსახლეობის უმრავლესობა აზერბაიჯანის ხელისუფლებაზე ნაწყენია, რადგან აზერბაიჯანის მოქალაქეობას არ აძლევს.
- ანუ ჩვენს აზერბაიჯანელებს ორმაგი მოქალაქეობა უნდათ?
- არა.
- აბა?
- საქართველოს მოქალაქეობიდან გასვლა და აზერბაიჯანის მოქალაქეობის მიღება, მაგრამ აზერბაიჯანის ხელისუფლებამ გადაწყვიტა, საქართველოდან წასულ აზერბაიჯანელებს მოქალაქეობა არ მისცეს.
- რატომ?
- ამის დაწერა არ შეიძლება!..
- რა ამის პასუხია და, როგორ ფიქრობთ, უცხოელებზე ქართული მიწა უნდა იყიდებოდეს?
- ის ფორმა, რომელიც კონსტიტუციის ცვლილებებში მიწის გასხვისებას უკავშირდება, ჩემთვის აბსოლუტურად მიუღებელია!
- დამიდასტურეთ, რომ მიწის გასხვისების ეს ფორმა ევროპის მოთხოვნა არაა!
- ევროკავშირის ყველა თანამშრომელმა, ვისაც ველაპარაკე, მითხრა, ამის თაობაზე არაფერს ვამბობთო; ამიტომ მექმნება შთაბეჭდილება, რომ წინა ხელისუფლების დროსაც და ახლაც, რაღაც ოლიგარქიული სტრუქტურები მუშაობენ, რომელთაც ამ მიწების ყიდვა უნდათ… კანონში წერენ, უცხოელს მიწა მემკვიდრეობით ან იმ შემთხვევაში გადაეცემა, თუ ცოლად საქართველოს მოქალაქე შეირთოო, მაგრამ ეს ნონსენსია _ ნახევარი საქართველო ფორმალურად გათხოვდება.
- ფორმალური ქორწინებით საქართველოს მოქალაქეები ფულს იშოვიან, უცხოელები კი ქართულ მიწებს დაეპატრონებიან, არა?
- რასაკვირველია… ასე რომ, სერიოზულ ხვრელს ვტოვებთ! უცხოეთის მოქალაქეს საქართველოში მიწის ფლობის უფლება არ უნდა ჰქონდეს, თუმცა უნდა შეეძლოს, არენდით აიღოს…
- არენდასაც გააჩნია _ 100-წლიანი იჯარა ხომ იგივე საკუთრებაა ანუ როგორც კახეთში ამბობენ, ასი წლის მერე, ან ვირი იქნება, ან ვირის პატრონი…
- დიახ, მაგრამ არენდაში მთავარი ისაა, ქონება შენი საკუთრება არ ხდება, თან საარენდო ხელშეკრულების დარღვევა ნებისმიერ დროს შეიძლება…
- წეღან უნდა მეკითხა და დამავიწყდა: ის, რომ მიშას ილჰამ ალიევთან მაინცდამაინც კარგი ურთიერთობა არ ჰქონდა, რეალურია თუ ჭორი დააგდეს, ალიევის ცოლს უჩქმიტაო?
- ტყუილია! ყოველ შემთხვევაში, როგორც ვიცი, ისეთი არაფერი მომხდარა, შეიძლება, ცოტა არადელიკატური მოპყრობა იყო, მაგრამ ქართულმა პრესამ გაამუქა. სააკაშვილსა და ალიევს გადასარევი ურთიერთობა იმის ხარჯზე ჰქონდათ, რომ სააკაშვილმა უამრავი ეკონომიკური ბერკეტი დაუთმო და დღევანდელ ხელისუფლებას ხმალამოღებული ბრძოლა უწევს, მაგალითად, ხორბლისა თუ შაქრის იმპორტზე აზერბაიჯანული ჯგუფების მონოპოლია როგორმე შეასუსტოს. ენერგეტიკაზე აღარაფერს ვამბობ…
- მოკლედ, მამუკა ბატონო, ყველაფერ ზემოთქმულიდან გამომდინარე, რასთან გვაქვს საქმე - ადამიანებით ვაჭრობასთან?
- ეს არ ვიცი, მაგრამ ჩემთვის მნიშვნელოვანი ქვეყნის პრესტიჟია, რომელიც სწორედ ასეთი ეპიზოდებისგან შედგება. ბევრისთვის საქართველო, მით უმეტეს, დღევანდელი თავისუფლების სივრცე იყო. ვანო, შეიძლება, თქვენ არა, მაგრამ პირადად მე სამი ადამიანი ვიცი, რომელიც რუსეთიდანაა გამოქცეული და თავს საქართველოს აფარებს. ამ სამიდან ორი ძალიან ცნობილი ხელოვანია.
- ვინ?
- გვარების დასახელება არ მინდა… ნურც იმას დაივიწყებთ, რომ თბილისში ,,ვრემიას” ყოფილი წამყვანი, ბურატაევაც ცხოვრობს, რომელიც რუსეთის სახელოვნებო ბომონდში ძალიან ცნობილია.
- ბურატაევაც პუტინს გამოექცა?
- არა, მაგრამ მის გარშემო მოსკოვური ბომონდი ანუ ის ადამიანები იკრიბებიან, რომლებიც რუსეთში არსებულ დემოკრატიას, რბილად რომ ვთქვა, ეჭვის თვალით უყურებენ. ამასთან, საქართველოში მხოლოდ აფგან მუხთარლი და მისი ცოლი კი არა, სხვა უამრავი აზერბაიჯანელი ცხოვრობს. სხვა ქვეყნებიდან, მათ შორის თურქეთიდან გამოქცეულებიც ცხოვრობენ… მოკლედ, საქართველოს ასეთი იმიჯი ჰქონდა _ ისეთი დემოკრატიაა, რომ ტერორისტმა და ბანდიტმა კი არა, სხვანაირად მოაზროვნე ადამიანმა შეიძლება თავი შეაფაროსო. თუ ეს პრესტიჟი ,,დაირღვევა”, ძალიან ცუდი იქნება!
_ ჰოდა, ეგებ სწორედ მესამე ძალა, ამ შემთხვევაში, რუსეთი ცდილობს, ეს იმიჯი შეგველახოს?
_ ვანო, ეს ლამაზად ნათქვამია ანუ იცი, რომ კონკრეტული მტერი გყავს, რომელსაც უნდა ებრძოლო, მაგრამ მეორე ვარიანტი უფრო უარესი იქნება, ვიღაც ხარბსა და გაუმაძღარს ფული რომ ჰქონდეს აღებული და ქვეყნის პრესტიჟი ფეხზე ეკიდოს! ისე, დარწმუნებული ვარ, ჩვენი ხელისუფლების შესაბამისმა სტრუქტურებმა უკვე იციან, ეს ვინ გააკეთა.
- თუ იციან, საჯარო განცხადებას რატომ არ აკეთებენ?
- არ ვიცი… ქვეყნის პრესტიჟი რომ გადაარჩინონ, პირიქით, უნდა გამოვიდნენ და ყველაფერი თქვან. შეიძლება, გვარები არ დაასახელონ, მაგრამ ყოველ შემთხვევაში, ხალხს უნდა უთხრან, ვიცით, ეს ვინც ჩაიდინა, ყველას დავსჯითო და გივი თარგამაძისნაირ ტიპებს ლაპარაკის საშუალება არ მისცენ!
- მაშასადამე, გჯერათ, რომ აფგან მუხთარლის საქმე გაიხსნება?
- იმედი მაქვს, უფრო სწორედ, ვიცი, რეალურად რა მოხდა, მინიმუმ ერთ კვირაში მეცოდინება!
- თქვენ კი გეცოდინებათ, მაგრამ ჩვენ, რიგითი მოკვდავებიც თუ გავიგებთ, სინამდვილეში რა მოხდა?
- მეც რიგითი მოკვდავი ვარ, თან ვანო, ისეთი ნაცნობები თქვენც გყავთ, რომლებიც გაგიგებენ და შეიძლება, ჩემზე ადრეც იცოდეთ, რეალურად რა მოხდა!
- ვნახოთ, ხომ იცით, ნათქვამია, არასოდეს არ თქვა არასოდესო…
„ახალი თაობა“, 06 ივნისი, 2017 წელი
ნუკრი ქანთარია ირაკლი კობახიძეს აკრიტიკებს
ინტერვიუ: „პარლამენტის თავმჯდომარეს სუსტი პოზიცია აქვს ბონუსებთან დაკავშირებით“ // „ქართულ ოცნებას“ ჯერ არ გადაუწყვეტია, როგორი საარჩევნო სისტემა იქნება“
„ქართული ოცნების“ წარმომადგენელი, საპარლამენტო უმრავლესობის დეპუტატი ნუკრი ქანთარია „ახალ თაობასთან“ ინტერვიუში სახელისუფლო გუნდის მერობის კანდიდატზე და საკონსტიტუციო ცვლილებებზე საუბრობს.
- ბატონო ნუკრი, არის ინფორმაცია, რომ კვირას გამართულ უმრავლესობის დახურულ შეხვედრაზე პრემიერმა გიორგი კვირიკაშვილმა კახა კალაძე წარადგინა როგორც მერობის კანდიდატი. როგორი იყო გუნდის პოზიცია?
- კახი კალაძე შეიძლება ერთადერთი ის ადამიანია, რომელმაც თავისი მოღვაწეობით მოიპოვა ლიდერობა. ლიდერი, როგორც ასეთი, უნდა შედგეს და ის უნდა იყოს აღიარებული და არა დანიშნული. ყველა არჩევით თანამდებობაზე ლიდერი უნდა იყოს წარდგენილი.
- თავისი თავი თვითონ შექმნა?
- დიახ და არა მხოლოდ, ვგულისხმობ, როგორც არა წარმატებულმა ფეხბურთელმა, არამედ, როგორც პოლიტიკოსმა. კახის ფეხბურთელობა უკვე ყველას დაავიწყდა, ის პოლიტიკურად გაიზარდა. შეიძლება ზოგს მოსწონს, ზოგს არა, მაგრამ ის შედგა, როგორც პოლიტიკოსი და გაიზარდა. ყველანაირი უპირატესობა აქვს, რომ ამ ბრძოლაში წარმატებული იყოს და გაიმარჯვოს.
- უკეთესი მერი იქნება, ვიდრე დავით ნარმანია არის?
- დავით ნარმანიას ცუდ დროს მოუწია მერობა, ძალიან ცუდი მემკვიდრეობა დახვდა, მე მგონი მაქსიმალური შეძლო. ახლა საჭირო არის ენერგიის განახლება, ეს თვითონაც კარგად იცის. არა როგორც პრემიერმა, არამედ, როგორც პარტიის თავმჯდომარემ გიორგი კვირიკაშვილმა წარმოგვიდგინა და ჩვენი გუნდის მხრიდანაც ძალიან დადებითი შეფასება მოჰყვა, რაც ძალიან გულწრფელი იყო.
- განსხვავებული აზრი იყო კახა კალაძის კანდიდატურასთან დაკავშირებით?
- არა, მაგრამ ჯერ კალაძე ოფიციალურად არ არის წარდგენილი, პოლიტსაბჭოზე იქნება განხილული მისი კანდიდატურა და მას ექნება თავისი ხედვები წარმოდგენილი.
- გაიმარჯვებს?
- კალაძე?! უდავოდ. კალაძე უალტერნატივოა. ჯერჯერობით კანდიდატები არ არიან დასახელებულნი.
- ელენე ხოშტარია დასახელდა...
- მან ვაკეში ვერ მოიგო და არ მგონია, თბილისმა მხარი დაუჭიროს. ალბათ, მამამისი და კიდევ რამდენიმე თავისი პარტიის წარმომადგენელი დაუჭერს მხარს. ელენე ხოშტარიას სერიოზულ კანდიდატად ვერ განვიხილავ.
- იყო ხმები, რომ ირაკლი ღარიბაშვილსაც უნდოდა მერობა...
- არ ვიცი, მე არ მსმენია.
- ბიძინა ივანიშვილმა თავის დროზე ღარიბაშვილზე თქვა, რომ ის სათადარიგო ადამიანია, შეიძლება საკვანძო პოზიციაზე დაბრუნდეს, მაგალითად, პრეზიდენტის პოსტზე?
- ვერ გეტყვით. ერთი ვიცი, რომ ირაკლი ღარიბაშვილი ნიჭიერი ადამიანია, გაბედული, ასევე გაბედულად გადადგა ნაბიჯი, რომ თანამდებობიდან წამოსულიყო. მას აქვს შენარჩუნებული ავტორიტეტი, მისი ავტორიტეტი არ არის გაცვეთილი. ამიტომ შეიძლება გარკვეულ შემთხვევაში ის ვიხილოთ და გამოადგეს გუნდსაც და ქვეყანასაც.
- ბატონო ნუკრი, არსებობს ინფორმაცია, რომ გუნდში მწვავე დაპირისპირება არსებობს საარჩევნო სისტემასთან დაკავშირებით. რამდენად მოსალოდნელია, რომ იგივე საარჩევნო სისტემა დარჩეს?
- დაპირისპირებას არ დავარქმევ, მაგრამ სერიოზული აზრთა სხვადასხვაობა არის. ორივე მხარეს აქვს საკმაოდ ლოგიკური არგუმენტი. მაჟორიტარულ სისტემას აქვს დადებითი მხარეც და იგივე შემიძლია ვთქვა პროპორციულ სისტემაზეც. ვნახოთ, თვითონ უმრავლესობის შიგნით როგორ მოხდება საკითხების შეთანხმება, რომელიც პრობლემატურია.
- მაჟორიტარების დარწმუნება თუ ხდება, რომ ეს არის წინასაარჩევნო დაპირება და ჩვენ უნდა შეველიოთ მოქმედ სისტემას?
- რა თქმა უნდა. საკმაოდ ბევრი არის მომხრე, რომ მაჟორიტარული სისტემა არ გაუქმდეს.
- მხოლოდ მაჟორიტარები არიან წინააღმდეგი?
- არა მხოლოდ, პროპორციული სიით გასულებსაც მიაჩნიათ, რომ ადამიანი პირდაპირ უნდა იყოს არჩეული, მისი სახელი და გვარით, ის უნდა წარდგეს ამომრჩევლის წინაშე და არა – საერთო სია. სერიოზულად მოგვიწევს მუშაობა, რომ ჩამოვყალიბდეთ და შევთანხმდეთ.
- შეიძლება არსებული საარჩევნო სისტემა დარჩეს?
- არაფერი გამორიცხული არ არის. საბოლოოდ კონსტიტუციის მიღება დეპუტატთა ხმების რაოდენობით წყდება და არა სხვაგვარად, ვერავინ ვერავის ვერაფერს ვერ დააძალებს. საბოლოოდ ყველა ინდივიდუალურად მიიღებს გადაწყვეტილებას. მე, მაგალითად, ვფიქრობ, რომ არსებული სისტემის დატოვებაც უხერხულობას გამოიწვევს საზოგადოებაში. გამოვა, რომ უსინდისოდ ვიტყუებოდით და ვერავის დავაჯერებთ, რომ არ ვიტყუებოდით. ამიტომ, არ ვიცი, რა შეიძლება იყოს გამოსავალი, სრულ მაჟორიტარულ სისტემაზე გადასვლა თუ ორპალატიანი პარლამენტის შემოღება.
- კიდევ რომელი არის პრობლემატური საკითხი, იგივე შეიძლება ვთქვათ ბონუს სისტემაზე?
- გადაუნაწილებელი მანდატები, რა თქმა უნდა, არ ტოვებს სამართლიანობის განცდას. ვფიქრობ, აუცილებელია ამ საკითხის გათვალისწინება, რაც აჩვენა კიდეც საყოველთაო განხილვებმა. პარლამენტის თავმჯდომარე კი ამართლებდა ამას, მაგრამ ძალიან სუსტი პოზიცია ჰქონდა. მართლაც შეუძლებელია, ეს გაამართლო. ასევე პრობლემატურია მიწის გასხვისების საკითხი, მაგრამ ვფიქრობ, ჩვენ მოვახერხებთ ამ საკითხზე შეჯერებას. ჩემი კატეგორიული მოთხოვნა იყო, რომ მიწა არ უნდა გაიყიდოს უცხოელ მოქალაქეებზე. საკმაოდ გამოკვეთილად იქნება ჩაწერილი, რომ მიწა არ გაიყიდება, განსაკუთრებული იჯარის შემთხვევაში ამას ორგანული კანონი დაარეგულირებს. თუმცა ძალიან მკაცრად იქნება დარეგულირებული.
ჩემთვის ასევე ცოტა საკამათო არის მოქალაქეობის საკითხი. ასევე ვფიქრობ, რომ კონსტიტუცია ვერ იტანს გარკვეულ ჩანაწერებს, თუნდაც ევროატლანტიკური მიმართულებით გაკეთებულ ჩანაწერს.
- ოჯახთან დაკავშირებით, განმარტება უნდა იყოს?
- დიახ, ეს თავიდანვე იყო ჩემი ინიციატივა, რაც საბოლოოდ აისახება კონსტიტუციაში. ამაში სადავო არაფერია, ეს არის საქართველოს მოქალაქეების 93%-ის სურვილი და ამის ასახვა მოხდა.
- შემოთავაზებულ პრეზიდენტის არჩევის წესს ეთანხმებით?
- დიახ, რადგან საპარლამენტო რესპუბლიკაში პრეზიდენტის უფლებამოსილებები არ არის ადეკვატური პირდაპირი ლეგიტიმაციის. არ არის გამორიცხული, რომ ბევრი ხიფათის შემცველიც იყოს პირდაპირი წესით არჩეული პრეზიდენტი ამ მოდელში.
- რატომ?
- იმიტომ, რომ თუკი აქტიური პრეზიდენტი იქნება და არ ექნება შესაბამისი ძალაუფლება, არ არის გამორიცხული, რომ კანონგარეშე იმოქმედოს, ხალხს მიმართოს და გარკვეული ხიფათები შექმნას. რაც შეეხება კონსტიტუციის ამ ნორმის ამოქმედებას, ვფიქრობ, რომ ხმოსნებს, ამ მოწვევის პარლამენტს და არც საკრებულოს წევრებს არ გვაქვს ის მანდატი, რომ პრეზიდენტი ავირჩიოთ, ამიტომ მისმა ამოქმედებამ უნდა გადაიწიოს.
- ოპოზიციას დიდი ვნებათაღელვა აქვს პოლიტიკური ბლოკების აკრძალვასთან დაკავშირებით. უნდა აიკრძალოს?
- ბლოკების დრო წავიდა, რადგან ეს იქცა მაქინაციებისა და კომბინაციების, ფულის კეთების წყაროდ.
- თუმცა, ოპოზიცია ძალიან ხისტია ამ პოზიციის დაცვისას.
- ისინი უნდა შეთანხმდნენ და საერთო იდეოლოგიურ პარტიაში გაერთიანდნენ, ვიდრე ყველას ჰქონდეს თავისი ოფისი, თავისი ლიდერი და ამ დროს შიგნით არავინ იყოს.
- რამდენად ხართ კმაყოფილი იმ პროცესით, რასაც საერთო სახალხო განხილვა ჰქვია?
- პირიქით უნდა მომხდარიყო. ჯერ გუნდს უნდა ჩაეკეტა კარი და შეთანხმებულიყო მთლიან პრინციპზე და ამის შემდეგ უნდა გამოეტანა, როგორც უკვე გუნდის შეთანხმებული ვარიანტი სახალხო განხილვაზე. ახლა პირიქით მოხდა, იმ ფონზე დაიწყო სახალხო განხილვები, როდესაც მთავარი პრინციპები გუნდში არ არის შეთანხმებული. ამიტომ სახეზე გვაქვს ის რეალობა, რაც არის.
„ახალი თაობა“, 06 ივნისი, 2017 წელი
ინტერვიუ ნიკა რურუასთან: „ხელისუფლებას თვითგანადგურება თუ არ სურს, მუხთარლის საქმე მართლა უნდა გამოიძიოს»
გუშინ ერთიანმა ნაციონალურმა მოძრაობამ პრესკონფერენცია გამართა და პრემიერ-მინისტრს გიორგი მღებრიშვილის, ვახტანგ გომელაურისა და ალექსანდრე ჯეჯელავას მოხსნა მოსთხოვა. პარტიაში მიიჩნევენ, რომ კვირიკაშვილმა აზერბაიჯანელი ჟურნალისტის, აფგან მუხთარლის საქმეზე სწრაფი რეაგირება უნდა მოახდინოს და აღნიშნულ პირებს თანამდებობები დაატოვებინოს. რატომ მოითხოვს „ნაციონალური მოძრაობა“ გომელაურის, მღებრიშვილის და ჯეჯელავას გადადგომას, რა სკანდალში გაეხვა ჩვენი ქვეყანა და ვინ არის პასუხისმგებელი მომხდარზე? „ახალი თაობის“ ამ და სხვა კითხვებს ნაციონალური მოძრაობის ერთ-ერთი ლიდერი ნიკა რურუა პასუხობს.
- ბატონო ნიკა, რას მოითხოვთ პრემიერისგან? რატომ უნდა გადააყენოს თქვენ მიერ დასახელებული პირები?
_ პრემიერ-მინისტრისგან მოვითხოვთ აზერბაიჯანელი ჟურნალისტის, აფგან მუხთარლის გატაცებაზე პასუხისმგებელი პირების გადაყენებას. ესენი არიან უსაფრთხოების სამსახურის უფროსი გომელაური, შს მინისტრი მღებრიშვილი და ვიცე-პრემიერი ჯეჯელავა.
- ჯეჯელავა რა შუაშია?
- ესენი აწარმოებენ მიზანმიმართულ კამპანიას ქართველი საზოგადოების, ქართველი ხალხის თვალის ასახვევად და მოსატყუებლად. ეს პირები, იმის მაგივრად, რომ პასუხისმგებლობას იღებდნენ, ტყუილების კორიანტელს აყენებენ საზოგადოების წინაშე. ამიტომ ვთხოვთ კვირიკაშვილს, რომ ეს სამი პასუხისმგებელი პირი გაათავისუფლოს. ადამიანი, ვინც თავი შეაფარა შენს ქვეყანას, მოიტაცო და გადასცე იმ ქვეყანას, საიდანაც ის არის დევნილი, ეს არის წარმოუდგენელი რაღაცა. ხარისხობრივად სულ სხვა ქვეყნების სიაში გადაჰყავს ამას საქართველო.
- რომელი ქვეყნების სიაში?
- ეს ნიშნავს, რომ შენ ხარ უკვე სათარეშო ტერიტორია და არა _ სახელმწიფო. ეს არის უდაბლესი სტანდარტი, ამაზე პასუხისმგებლობა უნდა აიღოს უსაფრთხოების და პოლიციის ხელმძღვანელობამ და ასევე ვიცე-პრემიერმა, ვინც ტყუილების კორიანტელი დააყენა.
- წინააღმდეგ შემთხვევაში?
- წინააღმდეგ შემთხვევაში ვიბრძოლებთ იმისთვის, რომ მთელი მთავრობის პასუხისმგებლობა დადგეს. იმიტომ, რომ ასეთი ფაქტები პერსპექტივას ართმევენ ქვეყანას.
- ათასნაირი ვერსია ვრცელდება, თქვენ ფიქრობთ, რომ ხელისუფლების ხელი ურევია მის გატაცებაში?
- პასუხისმგებლობა აშკარად არის ხელისუფლების. პასუხისმგებელი ამაზე ხელისუფალია, იმიტომ, რომ ის არის მართლწესრიგზე ანგარიშვალდებული ამ ქვეყანაში. ამიტომ ის ან ამაში მონაწილეობდა, ან იმდენად არაეფექტური და არაკომპეტენტურია, რომ ასეთი რაღაცა ჩაუტარეს ცხვირწინ სხვებმა. ორივე შემთხვევაში პასუხისმგებლობაა ასაღები. იმის მაგივრად, რომ საქმე გამოიძიონ, გამოდიან და ზღაპრებს ყვებიან. ხან ვითომ ეს კაცი თვითონ გაიქცა, რაღაცა მწვანე ზონაში გადავიდა, რაღაც აბსურდი. შეურაცხყოფას აყენებენ ყველა მსმენელს და, პირველ რიგში, ქართველ ხალხს.
- სერიოზული საერთაშორისო გამოხმაურება მოჰყვა ამ ყველაფერს. რა შედეგები შეიძლება ვიწვნიოთ?
- ჟურნალისტის მოტაცება არ არის უბრალო ფაქტი. ჟურნალისტის, რომელიც პოლიტიკური თავშესაფრის გამო შეფარებული გყავს. ჯერ ერთი, ამით აგზავნი სიგნალს, რომ არასანდო ხარ. როგორც ქვეყანა, არასანდო პარტნიორი ხარ. გარდა იმისა, რომ ეს ყველაფერი უკანონოა, სტუმართმოყვარეობის ფუნდამენტურ პრინციპებს არღვევს. ეს არის სამარცხვინოზე სამარცხვინო ფაქტი. ეს არის გამყიდველობის ყველზე ნათელი მაგალითი.
მეორეც, უსაფრთხო ქვეყნის იმიჯს კარგავ. მთელი მსოფლიო ხვდება, რომ შენთან ადამიანის მოტაცება დღისით-მზისით შესაძლებელია. ასეთი რამეები გამოძიების გარეშე არ უნდა რჩებოდეს. იმის მაგივრად, რომ გამოძიება დაეწყო ხელისუფლებას, დაიწყო ტყუილების ტირაჟირება იმ დღიდან, როგორც კი ეს ფაქტი მოხდა. ეს მიანიშნებს მათ დანაშაულზე!
- მსგავს განცხადებებს გატაცებული ჟურნალისტის მეუღლეც აკეთებს...
- ეს ქალი პირდაპირ აცხადებს, რომ მას გააჩნია ინფორმაცია, რომ მისი ქმარი სამართალდამცველებმა გაიტაცეს და გადაიყვანეს აზერბაიჯანში. ე.წ ნარუშილოვკების გამოყენებით.
- სერიოზულ სკანდალში გაეხვევა ჩვენი ქვეყანა?
- უკვე გახვეულია! თუ გვინდა, რომ ეს სკანდალი დამთავრდეს, წერტილი დაესვას ამ ყველაფერს, უნდა გადადგნენ პასუხისმგებელი პირები! დამთავრებულია, ელემენტარულია. ეს არის მინიმალური დემოკრატიული მოთხოვნა და ვალდებულება. ეს თვითონ უნდა გააკეთონ, თუ ჭკუა აქვთ.
- ეს შეცდომას რამდენად უშველის?
_ ამით პასუხისმგებლობას აიღებს სახელმწიფო ერთი მხრივ და მეორე მხრივ, იპოვის დამნაშავე პირებს, ვინც ეს ჟურნალისტი გაიტაცა. როგორც ვიცით, ის სამ მანქანაში გადასვეს, ამ პირებს იპოვის, ყოველ შემთხვევაში, ეცდება დაადგინოს, რა მოხდა. ამ სამარცხვინო ამბავს თუ რამე დაასრულებს, ეს დაასრულებს, პასუხისმგებლობის აღება და ღია და გამჭვირვალე გამოძიება!
- ხედავთ ამ მზაობას ხელისუფლების მხრიდან, რომ ის მზად არის, ობიექტურად გამოიძიოს ყოველივე?
- ეს უკვე მათზეა დამოკიდებული, თუ არ არიან სუიციდალურები, ასე უნდა გააკეთონ, ხოლო თუ შეპყრობილები არიან თვითგანადგურების ინსტინქტით და ჰგონიათ, რომ ხელშეუხებლები არიან, მაშინ მომავალი აჩვენებს მათ, რომ ეს ასე არ არის!
„ახალი თაობა“, 06 ივნისი, 2017 წელი
ინტერვიუ ლადო სადღობელაშვილთან: „დიმიტრი ქუმსიშვილს და კახა კალაძეს პრემიერობის ამბიცია მოუსპეს“ // „ბიძინა ივანიშვილმა ოთარ ფარცხალაძის დასჯის განკარგულება გასცა“ // „გიორგი მღებრიშვილს ალეკო ტაბატაძე შეცვლის»
რა ხდება ფინანსთა სამინისტროში, დაიჭერენ თუ არა ოთარ ფარცხალაძეს, რა დავალებები გასცა ბიძინა ივანიშვილმა თვითმმართველობის არჩევნების წინ, ვინ დატოვებს მთავრობა, რას უნდა ელოდოს „ქართული ოცნება“? ამ თემებზე „ახალ თაობას“ პატრიოტთა ალიანსის წევრი ლადო სადღობელაშვილი ესაუბრება.
„ფინანსთა სამინისტროს საგამოძიებო სამსახურში სასწაული რამეები ხდება. მთელმა დეპარტამენტმა, დამლაგებლის ჩათვლით, სამსახურიდან წასვლის შესახებ განცხადება დაწერა. ამ მასობრივი გადადგომის შემდეგ დიმიტრი ქუმსიშვილი დამოუკიდებელი საქართველოს ისტორიაში გახდება პირველი ფინანსთა მინისტრი, რომელიც ფინანსთა სამინისტროსთან ერთად, ფინანსურ პოლიციასაც გააკონტროლებს“, – ამბობს ლადო სადღობელაშვილი.
- ფინანსთა სამინისტროს საგამოძიებო დეპარტამენტი ყოველთვის ფინანსთა მინისტრს არ ექვემდებარებოდა?
- ოფიციალურად კი, მაგრამ ამ დეპარტამენტში კადრების შერჩევა ფინანსთა მინისტრს არ ეხებოდა. ეს უწყება იმიტომ იყო ფინანსთა სამინისტროს დაქვემდებარებაში, რომ მათ ერთმანეთი დაერეგულირებინათ. ბადაშვილის და მისი გუნდის წასვლის შემდეგ ეს დეპარტამენტი მთლიანად დიმიტრი ქუმსიშვილის ხელში გადავა და კადრებსაც ის შეარჩევს. როგორც მე ხელისუფლებასთან დაახლოებულმა პირებმა მითხრეს, ეს ადამიანი ამაზე ფინანსთა მინისტრად დანიშვნის დღიდან მუშაობს. ფარცხალაძე-თორდიას დაპირისპირების შემდეგ მან ეს სურვილი აისრულა. დღეიდან ბატონი დიმიტრი ქუმსიშვილი ყველა ბიზნესმენის მამაზეციერი გახდა. მას ნებისმიერი ბიზნესმენის გაკოტრება და ფეხზე დაყენება შეუძლია.
- ამბობთ, რომ აქამდე საგამოძიებო დეპარტამენტში კადრებს სხვა ნიშნავდა. იქნებ ახლაც ასე მოხდეს და იმ სხვამ დიმიტრი ქუმსიშვილსაც არაფერი ჰკითხოს...
- გამორიცხულია. ფინანსთა სამინისტროს საგამოძიებო დეპარტამენტი მთლიანად მის დაქვემდებარებაში გადავიდა. შემთხვევითი არც ის ყოფილა, რომ მთელი ეს დეპარტამენტი მოხსნეს, ოფიციალური ვერსიით, მათ თავად მოისურვეს წასვლა. ჩემთვის ცნობილი გახდა, რომ გიორგი ბადაშვილი და მისი „კამანდა“ ისევ პროკურატურას უბრუნდება. ერთ-ერთი ვერსიით, გიორგი ბადაშვილი, შესაძლოა, მთავარი პროკურორის მოადგილე ან მრჩეველი გახდეს.
- ეს მისთვის დამცირება არ იქნება?
- რატომ უნდა იყოს დამცირება? ფინანსთა სამინისტროში საგამოძიებო სამსახურის უფროსობამ არ დაამცირა და მთავარი პროკურორის მრჩევლობამ ან მოადგილეობამ რატომ უნდა დაამციროს.
- როგორც ამბობენ, საგამოძიებო დეპარტამენტიდან კოლექტიური წასვლა პირდაპირ უკავშირდება ფარცხალაძე-თორდიას ინციდენტს. ეს ნიშნავს თუ არა იმას, რომ ყოფილი მთავარი პროკურორი ჩააჩოჩეს?
- ამას ჩაჩოჩება აღარ ჰქვია. ფარცხალაძე ძალიან სერიოზულ შარშია. რამდენადაც მე გავიგე, ივანიშვილმა მასზე ხელი საბოლოოდ ჩაიქნია და ამის შესახებ `ოცნების~ ლიდერებსაც ესაუბრა.
- ხელის ჩაქნევაში რას გულისხმობთ, აღარ მფარველობს?
- აღარ მფარველობს კი არა, გასცა განკარგულება, რომ ყოფილი მთავარი პროკურორი მაქსიმალურად დაისაჯოს. მასთან ერთად მისი გარემოცვაც დაისაჯა. ისინი ფინანსთა სამინისტროს საგამოძიებო სამსახურიდან გაუშვეს. ხოლო ისინი, ვინც ფარცხალაძის გარემოცვას არ წარმოადგენენ, ივანიშვილის განკარგულებით, წავლენ პროკურატურაში.
- ამბობთ, რომ ბადაშვილი პროკურატურაში დასაქმდება. ამ დროს ის ფარცხალაძის გუნდის წევრია...
- გასაგებია, რომ მისი გარემოცვაა, მაგრამ ის რამდენიმე წლის მანძილზე ქვეყნის მთავარი პროკურორი იყო. ეს კი პატარა რაღაც არ არის. ეგრე თუ წავიდა საქმე, შოთაძეც ფარცხალაძის კადრია, მაგრამ მთავარ პროკურორად ზის.
- ფარცხალაძის დაჭერამდე მივა საქმე?
- დაჭერით შეიძლება არ დაიჭირონ, მაგრამ მას გავლენების სფეროებს მაქსიმალურად შეუმცირებენ. სამაგიეროდ, ძალიან ძლიერდება ქუმსიშვილის გავლენები.
- ქუმსიშვილის ასეთ გაძლიერებას რას უკავშირებთ? ბოლო თვეების მანძილზე ის და კახა კალაძე ერთმანეთის ჩაძირვაზე მუშაობდნენ და ამას არც მალავდნენ...
- ისინი დღესაც აგრძელებენ ერთმანეთის ჭამას. ივანიშვილს მარტო ქუმსიშვილი არ გაუძლიერებია. კალაძესაც მისცა ტორტის საკმაოდ დიდი და მსუყე ნაჭერი.
- ტორტის მსუყე ნაჭერში თბილისის მერად მისი კანდიდატურის დასახელებას გულისხმობთ?
- ამაზე მოგახსენებთ. ივანიშვილმა მასაც არგო ტორტის ნაჭერი და ფინანსთა მინისტრსაც. ჩემი აზრით, ტორტის ნაჭრების ჩამორიგებით მთავარმა მეოცნებემ ისინი დააშოშმინა და ამბიციებიც მოუკლა. ორივე მათგანს პრემიერობის სურვილი აქვს. ივანიშვილს კი არც ერთი მათგანის ხილვა არ სურს მთავრობის მეთაურის თანამდებობაზე.
ბიძინა ივანიშვილის სურვილებზე ვსაუბრობ და მისი ერთი განკარგულების შესახებაც მინდა შევატყობინო თქვენ მკითხველს. როგორც „ოცნებიდან“ მომაწოდეს ინფორმაცია, ყოფილი პრემიერის მითითებით, თვითმმართველობის არჩევნებზე მაქსიმალურად უნდა გაიქაჩოს „ევროპული საქართველო“. მათი გაქაჩვის ფონზე ძალიან დაბალი შედეგი უნდა აჩვენოს ნაციონალურმა მოძრაობამ.
ამავე წყაროს ინფორმაციით, თბილისის საკრებულოში აღარ უნდა მოხვდეს დემოკრატიული მოძრაობა. არ არის გამორიცხული, ბურჯანაძის პარტიამ ამ არჩევნებზე გამსვლელი 4%-ც ვერ მოაგროვოს. ასეთივე მდგომარეობაში შეიძლება აღმოჩნდეს ჩემი პარტიაც, პატრიოტთა ალიანსი და ალბათ არჩევნები ასეთი შედეგით დასრულდება.
- რატომ გგონიათ, რომ არჩევნები ასეთი შედეგით დასრულდება, რაკი ივანიშვილს ასე სურს?
- მერე ცოტაა, ივანიშვილს რომ ასე სურს.? მისი მოთხოვნით, არჩევნებზე ნაციონალური მოძრაობა აიღებს 7%-ს. დემოკრატიულმა მოძრაობამ და პატრიოტთა ალიანსმა 4-4%-ზე მეტი არ უნდა აიღონ. სამაგიეროდ, 15%-ს მისცემენ `ევროპულ საქართველოს“. რაც შეეხება ოპოზიციურ ხმებს, მათ ე.წ. დამოუკიდებელ მაჟორიტარებზე გადაანაწილებენ, რომლებსაც „ოცნება“ არ დაუყენებს კანდიდატს. იგივე მოხდება, რაც სალომე ზურაბიშვილის შემთხვევაში მოხდა. დედაქალაქის საკრებულოში 4 ან 5 ე.წ. დამოუკიდებელი მაჟორიტარის გაყვანას უნდა ველოდოთ. ეს არის რეპეტიცია მომავალი საპარლამენტო არჩევნებისთვის. წინაპირობა იქნება იმისა, თუ როგორი უნდა იყოს მომავალი პარლამენტი. ივანიშვილს სურს, რომ ქვეყანაში ორპარტიული პარლამენტი იყოს. ამაზე ჯერ კიდევ 2012 წელს საუბრობდა ყოფილი პრემიერი.
- გინდათ თქვათ, რომ შუას გაკრეფის პროცესი მიდის?
- ამას გაკრეფა აღარ ჰქვია. ეს უკვე შუას გაპარსვაა. მართლა არავის არ შეუშვებენ პარლამენტში, თუ ასპარეზზე დავით უსუფაშვილი არ გამოჩნდა. რამდენადაც ჩემთვის ცნობილია, ის ამ არჩევნებში მონაწილეობას არ მიიღებს. საბოლოო პასუხი ამ დღეებში გაირკვევა. საპარლამენტოსთვის იმედი მაქვს, რომ მზად იქნება.
რამდენიმე დღის წინ გამოცოცხლდნენ მრეწველებიც. მათ განაცხადეს, რომ თვითმმართველობის არჩევნებში მიიღებენ მონაწილეობას. რამდენადაც ჩემთვის არის ცნობილი, ეს გამოცოცხლება ზურაბ ტყემალაძის ბიჭს, გიორგის, უკავშირდება. ამ ადამიანს თბილისის საკრებულოს თავმჯდომარის მოადგილის პოსტი უკავია. მას, როგორც კანდიდატს, შეიწოვს „ოცნება“ ან დამოუკიდებელ კანდიდატად წაიყვანენ. ძალიან მზაკვრული გეგმა მზადდება ოპოზიციის წინააღმდეგ. სხვებზე ვერაფერს ვიტყვი, მაგრამ ჩვენი პარტიის და დემოკრატიული მოძრაობის ბედი ძალიან მადარდებს. დღეს ამ 2 პარტიის გაერთიანება სასიცოცხლოდ აუცილებელია. გაერთიანების შემთხვევაში მათ მესამე ძალად გადაქცევის შანსი აქვთ. ბიძინა ივანიშვილის გარეშე არც თვითმმართველი ქალაქებისთვის სტატუსის შეჩერება მომხდარა. ეს იმ 7 ქალაქში მოხდა, სადაც „ოცნებას“ უჭირს.
- გინდათ თქვათ, რომ გორს, თელავს. მცხეთას იმიტომ შეუჩერეს თვითმმართველი ქალაქის სტატუსი, რომ აქ „ოცნებას“ არჩევნების მოგება გაუჭირდება?
- მოგება ყველგან გაუჭირდება. ამ ქალაქებში კი განსაკუთრებით. ეს საპარლამენტო არჩევნების დროსაც გამოჩნდა. დიმიტრი ხუნდაძემ ძლივს მოუგო მცხეთაში ცეზარ ჩოჩელს. იგივე მოხდა გორში. იქაც მეორე ტური გახდა საჭირო. ასეთი რამეები არც ახლაა გამორიცხული. სხვა თუ არაფერი, აქ ირაკლი ოქრუაშვილია და ის მოიმოქმედებს რაღაცას. ასევეა თელავშიც. ვინ იფიქრებდა, რომ ირაკლი სესიაშვილს მეორე ტური დასჭირდებოდა არჩევნების მოსაგებად, მაგრამ დასჭირდა.
- და რატომ უნდა მოეგო პირველ ტურში, ასეთი ძლიერი კანდიდატი იყო?
- ირაკლი სესიაშვილი ნეგატიური ქოცი არ არის და მის მიმართ ხალხს მაინც აქვს სიმპათიები. მაგაზე ბევრად ნეგატიურები, სადაცაა თბილისის მერად მოგვევლინებიან.
- ფიქრობთ, რომ კახა კალაძე მერის არჩევნებს უპრობლემოდ მოიგებს?
- არჩევნებს მოიგებს, მაგრამ, იმედი მაქვს, პირველივე ტურში გაუჭირდება. მისთვის მეორე ტურში გასვლა ძალიან დიდი დარტყმა იქნება.
- თქვენ გეგულებათ ვინმე ისეთი კანდიდატი, რომელიც კალაძეს მეორე ტურში გადააგდებს?
- იმედი მაქვს, რომ ასეთი გამოჩნდება. ამ ეტაპზე მხოლოდ რამდენიმე კანდიდატურაა გამოკვეთილი. ერთი არის ალეკო ელისაშვილი. დემოკრატიული მოძრაობა, როგორც მე ვიცი, ისევ დიმიტრი ლორთქიფანიძის კანდიდატურას დააყენებს. დიმამ 2014 წლის არჩევნებზე მესამე ადგილი დაიკავა, მაგრამ ახლა ყველაფერს გააკეთებენ, რომ მან ასეთი შედეგი აღარ აჩვენოს. რაც შეეხება კალაძეს, ის ალბათ მოიგებს არჩევნებს, რაც თბილისისთვის კატასტროფა იქნება.
- კატასტროფა რატომ იქნება? ყველა ამბობს, რომ ნარმანიაზე უკეთესი მერი იქნება...
- დავით ნარმანიაზე უკეთესი ტიპი ნამდვილად არის, მაგრამ მის ზურგს უკან ძალიან საეჭვო ტიპები დგანან. კახა კალაძის გამერების შემთხვევაში ისინი თბილისს მოედებიან და ნარმანია შეიძლება სანატრელი გაგვიხდეს. „ოცნება“ ძალიან თავდაჯერებულად გამოიყურება, ყველაფერზე მიდის და ეს მისთვის ცუდად დამთავრდება. ამის ნათელი მაგალითი წინა ხელისუფლებაა, რომელიც მაშინ დამთავრდა, როცა ოპოზიცია მაქსიმალურად იყო დასუსტებული. 2011 წლის 26 მაისის სისხლიანი ღამის შემდეგ, არავის ეგონა, რომ ნაციონალები ახლო მომავალში შეიცვლებოდნენ. რამდენიმე თვეში ივანიშვილი მოვიდა პოლიტიკაში და ნაციონალები დამთავრდნენ.
პოლიტიკაში ასეთი რამე ხშირად ხდება, როდესაც ყველაზე უფრო წარმატებული ხარ, მაშინ დაგაჯდება სიკვდილის ბუზი. ამ შემთხვევაში პოლიტიკური სიკვდილის ბუზს ვგულისხმობ. ამ ბუზს ვერც ესენი გადაურჩებიან. ხალხი მათ ამდენ იმედგაცრუებას და ნაციონალებთან კოაბიტაციას არ აპატიებს. ჩემთვის ყველაზე ცუდი მოსასმენი ისაა, რომ მოსახლეობის ნაწილი ნაციონალებს მისტირის. მათ შორის ისეთებიც, ვინც გამუდმებით ყოფილი ხელისუფლების წინააღმდეგ იბრძოდა.
ქვეყანაში ყველა მიმართულებით მძიმე ვითარებაა, არჩევნების წინ ხელისუფლებამ რაღაც უნდა მოიფიქროს. ეს რაღაც შესაძლოა სამთავრობო ცვლილებები იყოს. ხელისუფლებიდან გამოჟონილი ინფორმაციით, უახლოეს მომავალში შინაგან საქმეთა მინისტრი გიორგი მღებრიშვილი პოსტს დატოვებს. მას ამ თანამდებობაზე სუსის უფროსის მოადგილე ალეკო ტაბატაძე ჩაანაცვლებს.
