„ალია“: რისთვის ჩამოვიდა პრეზიდენტი ალიევი და რატომ არ დახვდა აეროპორტში პრეზიდენტი მარგველაშვილი?

„რეზონანსი“: ინტერვიუ ლევან ბერძენიშვილთან: საქართველო და სააკაშვილი, შუალედური არჩევნები, საქართველო და ნატო

„რეზონანსი“: „ოცნება“ მთავარი კონკურენტის გარეშე // „ოპოზიციურ ფლანგზე უახლოეს თვეებში სიახლეებს უნდა ველოდოთ”

„რეზონანსი“: სჭირდება თუ არა წინასაარჩევნოდ ქვეყანას ახალი პოლიტიკური ძალების შექმნა?

„ახალი თაობა“: ინტერვიუ ომარ ნიშნიანიძესთან: „ნაციონალები“ ფრთხილად იყვნენ, გადატრიალებისას ქვეშ არ მოგვყვნენ!“

„ახალი თაობა“: ინტერვიუ დავით დარჩიაშვილთან: „ჩანაწერებში გადატრიალებაზე არავინ საუბრობს“

„ახალი თაობა“: ინტერვიუ გიორგი ცაგარეიშვილთან: „რუსულ გაზს რუსული ჩექმა მოსდევს“

„ახალი თაობა“: ინტერვიუ შალვა ხაჭაპურიძესთან: „ისევ კომუნისტური, საბჭოთა კავშირის მოდელით მივდივართ“

—————————-

„ალია“, 6 ნოემბერი, 2015 წელი

რისთვის ჩამოვიდა პრეზიდენტი ალიევი და რატომ არ დახვდა აეროპორტში პრეზიდენტი მარგველაშვილი?

გელა ზედელაშვილი

საქართველოში აზერბაიჯანის პრეზიდენტი ილჰამ ალიევი ჩამოვიდა. აზერბაიჯანის დელეგაციას აეროპორტში საქართველოს ვიცე-პრემიერი კახი კალაძე და პრეზიდენტ მარგველაშვილის ადმინისტრაციის წევრები დახვდნენ. ეს ერთი „ჩეპე“. წესით, ალიევს მარგველაშვილი უნდა დახვედროდა. სულ მცირე, ირაკლი ღარიბაშვილი მაინც, მაგრამ, როგორც ვიცით, ის ამჟამად ლიტვაში იმყოფება ოფიციალური ვიზიტით. აზერბაიჯანის პრეზიდენტის სტუმრობის შესახებ ჯერ კიდევ 10 ოქტომბერს გახდა ცნობილი, როდესაც ირაკლი ღარიბაშვილი ბაქოში იმყოფებოდა. როგორც ამბობენ, მანამდე ფარულად კახი კალაძეც ჩავიდა მასთან მოსალაპარაკებლად. თუ რაზე, ამის შესახებ ცოტა ქვემოთ…

ოფიციალური ინფორმაციის თანახმად, ალიევი ხელს აწერს ორმხრივი თანამშრომლობის გაღრმავების დეკლარაციას პოლიტიკის უსაფრთხოების, სავაჭრო-ეკონომიკურ, სატრანზიტო, კულტურის, განათლებისა და მეცნიერების სფეროებში.

სინამდვილეში რა ხდება და რატომ არის ასეთი ხშირი მისვლა-მოსვლა აზერბაიჯანსა თუ საქართველოში?

„ალიას“ პოლიტოლოგი სოსო ცინცაძესაუბრა:

- ბატონო სოსო, როგორ ფიქრობთ, რატომ არ დახვდა ილჰამ ალიევს პრეზიდენტი მარგველაშვილი აეროპორტში?

- ეს მართლაც მნიშვნელოვანი ვიზიტია. არა მხოლოდ ჩვენი მეზობელი პრეზიდენტი ჩამოვიდა, არამედ იმ ქვეყნის ხელმძღვანელი, რომელიც არის ჩვენი სტრატეგიული პარტნიორი. ვერავინ უარყოფს დღეს აზერბაიჯანი არის ჩვენი სტრატეგიული მოკავშირე, მაგათი გაზით ვთბებით და ვარსებობთ. გარდა ამისა, ნამდვილად არ არის არც ხელწამოსაკრავი პრეზიდენტი და არც ხელწამოსაკრავი ქვეყანა. ჩემთვის თვალშისაცემია ჩვენი ქვეყნების დიპლომატიური სამსახურების მიერ გათამაშებული ცუდი კომბინაცია.

შეიძლება ალიევს არ შეეძლო ამ ვიზიტის გადადება, მაგრამ ჩვენთვის ბალტიისპირეთი დღეს არ არის ისეთი პრიორიტეტი, რომ პრემიერ-მინისტრი თბილისში არ დაბრუნებულიყო. ჩვენთვის აზერბაიჯანთან ურთიერთობა გაცილებით მნიშვნელოვანია, ვიდრე ბალტიისპირეთის სამივე ქვეყანასთან.

- კი ბატონო, პროტოკოლიც გასაგებია, საგარეო საქმეთა სამინისტროს სისუსტეც გასაგებია, დიპლომატიური სამსახურების უვიცობაც ვიცით, მაგრამ ჩვენი პრეზიდენტი ხომ უნდა გამოსულიყო იმ პომპეზური რეზიდენციიდან და ნორმალურად დახვედროდა?

- შენ ნუ გამორიცხავ, რომ მარგველაშვილი საერთოდ ამოაგდეს „სასტავიდან“ და არ გაუშვეს აეროპორტში. ძალიან კარგად ვიცით, როგორი დაძაბული ურთიერთობაა მთავრობასა და პრეზიდენტს შორის, აი, სწორედ აქ არის ძაღლის თავი დამარხული, არც იმას გამოვრიცხავ, რომ თვითონ ალიევს არ ჰქონოდა სურვილი ისეთ პრეზიდენტთან შეხვედრისა, რომელიც ვერაფერს ვერ წყვეტს და ფორმალურად არსებობს. მისთვის ვიცე-პრემიერი კახი კალაძე უფრო საინტერესოა. ჯერ ერთი, აზერბაიჯანში იყო კალაძე ჩასული, შემდეგ პრემიერ-მინისტრი ღარიბაშვილი და მათ მოიწვიეს საქართველოში. აქ მარგველაშვილი უკვე კონტექსტიდან არის ამოვარდნილი. თუმცა გარედან თუ შევხედავთ მოვლენებს, ეს ყველაფერი ძალიან ცუდად ჩანს. გავა დრო, არავის ემახსოვრება ის, თუ რა ურთიერთობა ჰქონდა მარგველაშვილს მთავრობასთან, მაგრამ დაფიქსირდება, რომ ალიევს დახვდნენ ცუდად. ორი ქვეყნის ისტორიაში დარჩება მხოლოდ ფაქტი. აზერბაიჯანსა და საქართველოს შორის სიტუაცია ახლა არ დაძაბულა, ეს მოხდა მაშინ, როცა ბიძინა ივანიშვილი იყო პრემიერ-მინისტრი და თავისი დელეგაციით მოუმზადებელი ჩავიდა აზერბაიჯანში.

მაშინ ჩვენი დელეგაციის წევრები მიდიოდნენ თითქოს საქმის გასარჩევად, ანუ გაზზე ფასების დასაკლებად. ეს მოულოდნელი აღმოჩნდა აზერბაიჯანული მხარისთვის და ამას მოჰყვა დიდი აჟიოტაჟი პრესაში. მაშინ ბაქოში აცხადებდნენ, რომ ქართველებმა ისიც კი არ იციან, როგორ ხდება ბუნებრივ აირზე ფასწარმოქმნაო. აზერბაიჯანისთვის დღეს ერთი რამ არის მთავარი, მართალია, ეს ქვეყანა რუსეთთან ურთიერთობას არ იფუჭებს, მაგრამ არც იმას მიესალმება, რომ რუსეთის გავლენა უფრო გაძლიერდეს კავკასიაში და ალიევმა დაკარგოს ლიდერის ფუნქცია.

- ოფიციალურად აცხადებენ, ალიევის ვიზიტი „გაზპრომთან“ არ არის კავშირშიო, მაგრამ მეეჭვება, ამაზე არ ესაუბრათ.

- როდესაც კახი კალაძემ „გაზპრომზე“ წამოიწყო ლაპარაკი, ესეც მოულოდნელი იყო აზერბაიჯანელებისთვის. შეიძლება რასაც კალაძე ლაპარაკობს, ჩვენი ქვეყნისთვის აუცილებელია, იგივე უფასო გაზი ტრანზიტის სანაცვლოდ, მაგრამ ეს მოულოდნელი მაინც არ უნდა ყოფილიყო. მსოფლიოში არსებობს ცნება „ენერგეტიკული დიპლომატია“. სხვათა შორის, ეს საგანი რუსეთის ყველა უმაღლეს სასწავლებელში ისწავლება. ვეჭვობ, ჩვენს საგარეო საქმეთა სამინ ისტროში ამ სფეროს ერთი სპეციალისტი მაინც არსებობდეს.

აღარაფერს ვამბობ ენერგეტიკის სამინისტროზე. როდესაც კახი კალაძემ განაცხადა, ჩვენ აზერბაიჯანი საკმარის გაზს ვერ გვაწვდისო, ბაქოში თავი შეურაცხყოფილად იგრძნეს. ესენი სკანდალის შემდეგ კი ჩავიდნენ აზერბაიჯანში, მაგრამ ეჭვები მაინც ვერ გაფანტეს. აი, ამიტომ ჩამოვიდა ალიევი თბილისში, რათა საბოლოოდ დალაგდეს სიტუაცია. ჩვენ ჯერ არ ვიცით, დახურულ კარს მიღმა კიდევ რაზე იქნება ლაპარაკი მთავრობის  ევრებთან, ან რა ტონალობაში წარიმართება საუბარი. ვიზიტის დამთავრების შემდეგ ორივე მხარე ჩვენთვის გასაგონად ილაპარაკებს მეგობრობაზე, ძმობაზე, ერთობაზე და ა.შ. ეს იქნება ჩვეულებრივი დიპლომატიური რევერანსები. ის, რომ ჩვენსა და აზერბაიჯანს შორის ცოტა ხნის წინ შავი კატის აჩრდილი გამოჩნდა, ყველამ დავინახეთ და ვერავინ უარყოფს რამდენიმე დღის წინ აზერბაიჯანულ პრესაში შევარდნაძის პერიოდიც კი გაიხსენეს, როდესაც ქართულმა მხარემ ჰეიდარ ალიევს პრინციპულად დაუყენა საკითხი, თბილისიბაქო-ჯეიჰანის გაზსადენიდან ამდენი და ამდენი უნდა მოგვცეთო.

მაშინ უფროსი ალიევი შევარდნაძემ დაითანხმა, ახლა უმცროსი ალიევი ჰკითხავს ჩვენს მთავრობას, თუკი გაზი აქამდე არ გყოფნიდათ, ამაზე რატომ არაფერი მითხარით, „გაზპრომთან“ მოლაპარაკებები რა საჭირო იყოო?! კულუარებში საუბრობენ, რომ შეიძლება არჩევნებამდე მოხდეს მოსახლეობისთვის გაზზე ფასის მომატება, ამიტომ ქართული მხარე ყველანაირად ცდილობს, აზერბაიჯანი დაიყოლიოს, რომ ეს არ მოხდეს და როგორმე არსებული ფასი შენარჩუნდეს.

- ბატონო სოსო, ერთი ვერსიით, შესაძლებელია, ალიევს იმიტომ არ დახვდა მარგველაშვილი, რომ ეს კაცი ბოლო დროს ხშირად აკრიტიკებს ევროპას, ევროკავშირსა. უკვე ოფიციალურად აცხადებს, ჩვენს საქმეებში ცხვირს ნუ ჰყოფთო… როგორც ვიცით, ჩვენი პრეზიდენტი პროდასავლურ კურსს „აწვება“. იქნებ, ამიტომაც შეიკავა თავი?

- მე ასე არ მგონია, ალიევი ევროკავშირზე ჯერ კიდევ წინა არჩევნების დროს გაბრაზდა, როცა გააკრიტიკეს, აზერბაიჯანში არც ოპოზიცია არსებობს და არც დამოუკიდებელი მედიაო. მას უკიჟინებდნენ, შენ აღმოსავლეთის პარტნიორობის წევრი ხარ და რეკომენდაციებს არღვევო. მაშინ ალიევმა თქვა, – თქვენი დედაც ვატირე, აღარც თქვენი აღმოსავლური პარტნიორობა მინდა და არც ევროკავშირი, თავი დამანებეთო. ალიევს ევროპაში განიხილავენ იგივე კონტექსტში, როგორც ნაზარბაევსა და ლუკაშენკოს. მიაჩნიათ, რომ ის არის დიქტატორი, თუმცა მათგან განსხვავებით, მან პრეზიდენტობა მემკვიდრეობით მიიღო. აი, ეს მემკვიდრეობა აღიზიანებთ ევროპაშიც და ამერიკაშიც. არც ნაზარბაევს, არც კარიმოვს, არც ლუკაშენკოს თანამდებობები მემკვიდრეობით არ მიუღიათ, ეს არის პირველი შემთხვევა პოსტსაბჭოურ სივრცეში. ალიევთან ევროპას სულ სხვა ანგარიშები აქვს, ლუკაშენკოს უფრო კარგი თვალით უყურებენ, ვიდრე ალიევს. ასე რომ ყოფილიყო, როცა ლუკაშენკო ჩამოვიდა, იმასაც არ დახვდებოდნენ პომპეზურად.

- ანუ, დასავლეთის ფაქტორმა იმუშავა… როგორ ფიქრობთ, ალიევი „ნომერ პირველ მოქალაქეს“ არაოფიციალურად შეხვდება?

- ჩემი აზრით, ალიევს ფარულად შეახვედრებენ. რაღაც ვახშამივით იქნება და იქ დაილაპარაკებენ. ასეთი რაღაცები ყოველთვის ხდება ხოლმე.

- გადავიდეთ მეორე საკითხზე, რა შეიძლება ჩამოგვიტანოს ირაკლი ღარიბაშვილმა ბალტიისპირეთიდან?

- ბალტიისპირეთის სამივე ქვეყანა ევროკავშირის წევრია, ასევე, ნატოს წევრია და ყოველთვის გვიჭერენ მხარს ნებისმიერ საკითხში. ამ სამი პატარა ქვეყნის ღირებულება ჩვენთვის მეტი არაფერია, აქ მიდის ინტერესების მოსინჯვა, ამ ქვეყნების ხელმძღვანელები უფრო არიან საქმის კურსში იმის თაობაზე, რა გველის ჩვენ მომავალი წლის მაისში, ვარშავაში, გვაძლევენ მაპ-ს თუ არ გვაძლევენ. თუ ნატოს მიხურულ კარსმიღმა რამე ხდება, მათ კარგად იციან. იქ დიდი საუბრები და კამათი მიდის, შენ წარმოიდგინე, ზოგიერთი ქვეყანა პირდაპირ ითხოვს, საქართველო ნატო-ში მივიღოთო, ზოგი მაპ-ის მოცემას უჭერს მხარს, ზოგი წინააღმდეგია. მართალია, ბალტიისპირეთის ქვეყნებს არავითარი გავლენა არ აქვთ ამ სფეროში, მაგრამ ამბების გამოტანა მაინც შეუძლიათ. ამიტომ მათთან კარგი ურთიერთობა ჩვენ ყოველთვის გვჭირდება.

„რეზონანსი“, 06 ნოემბერი, 2015 წელი

ინტერვიუ ლევან ბერძენიშვილთან: საქართველო და სააკაშვილი, შუალედური არჩევნები, საქართველო და ნატო

სალომე სარიშვილი

“მიხეილ სააკაშვილი ქვეყანაში დაუმორჩილებლობასა და არეულობას ამზადებდა, რომლის უნარიც არ გააჩნია, ამიტომ მან მხოლოდ მოახერხა ის, რომ “ნაციონალური მოძრაობა” ლაფში ამოსვარა”, – აცხადებს “რეზონანსთან” საუბრისას საპარლამენტო უმრავლესობის ერთ-ერთი ლიდერი ლევან ბერძენიშვილი ბოლო დღეებში გამოქვეყნებული ხმაურიანი ჩანაწერების შეფასებისას. მისი თქმით, საქართველოს ყოფილ პრეზიდენტთან ერთად, ძალადობის პროვოცირებას “ნაციონალური მოძრაობის” ცალკეული ლიდერებიც ცდილობდნენ, თუმცა საბოლოო ჯამში, ამით სააკაშვილმა მხოლოდ საკუთარი პარტიის დისკრედიტაცია მოახდინა. ლევან ბერძენიშვილმა ჩვენთან საუბრისას საგარეო პოლიტიკასა და ევროპასთან ინტეგრაციის საკითხებზეც ისაუბრა და დასძინა, რომ ამ კუთხით ქვეყანამ დაკისრებულ მოვალეობას თავი წარმატებით გაართვა.

ლევან ბერძენიშვილი: აბსოლუტურად დარწმუნებული ვარ, რომ “რუსთავი 2″ ყველა საშუალებას მიმართავს, რათა მათ ყველა ინსტანცია გაიარონ – იქნება საკასაციო და უზენაესი სასამართლო, თუმცა მეეჭევება, რომ არჩევნებამდე მათ რამე მოუხერხდეთ. ეს პროცესი გაცილებით მალე დასრულდება, ვიდრე მათ ჰგონიათ.

- “რუსთავი 2″-ის თემას ბოლო დღეებში გავრცელებული ჩანაწერებიც დაემატა, რასაც დიდი გამოხმაურება და კონკრეტულ პირთა დაკითხვებიც მოჰყვა. თქვენ რას ფიქრობთ, რამდენად მოსალოდნელია დაპირისპირებისა და ძალადობის საფრთხე?

- ძალადობის მომზადებას მიხეილ სააკაშვილი აპირებდა და ეს ნათელია, თუმცა მას შემდეგ, რაც მისი გეგმები საყოველთაოდ ცნობილი გახდა, მას ეს ძალიან გაუჭირდება. გასაგებია, რომ სახელმწიფოსაც არ სძინავს. ის, რომ “ნაციონალური მოძრაობის” ცალკეული ლიდერები ძალადობის პროვოცირებას ცდილობდნენ, სახეზეა. ეს ამ პარტიას სიკეთეს არ მოუტანდა, ახლა კი მიხეილ სააკაშვილმა მისი გეგმებით მათ სამსახური გაუწია და საკუთარი პარტია შეარცხვინა. ხელმძღვანელმა, რომელიც თურმე “ბოევიკების” ძალას კანონზე მაღლა აყენებს. ჩვენ გვეგონა იქ პატიოსანი პროფესორები თერმოსებით ბრძოლას აპირებდნენ და თურმე მათ უკან კაციჭამიები უნდა მდგარიყვნენ. ეს ყველაფერი ნიშანია იმისა, რომ პოლიტიკური ელიტა “ნაციონალური მოძრაობის” ხელმძღვანელობით, გადაგვარდა. განსაკუთრებით ეს სააკაშვილს ეხება. არ ვიცი ის უკრაინას როგორ გამოადგება, ეს მათი გადასაწყვეტია, თუმცა საქართველოს არ გამოადგება ის კაცი, რომელმაც შემოგვითვალა, რომ ქვეყანას საპენსიოდ ინახავს.

საქართველო მისი სათამაშო არ არის, მიხეილ სააკაშვილი არ გახლავთ ის ფიგურა, რომელიც პენსიაზე გავა და აქ ჩამოსვლის შემდეგ, ჩვენ დაგვაკმაყოფილებს. ის ქვეყანაში დაუმორჩილებლობასა და არეულობას ამზადებდა, რომლის უნარიც არ გააჩნია, ამიტომ მან მხოლოდ მოახერხა ის, რომ “ნაციონალური მოძრაობა” ლაფში ამოსვარა. კარგია ეს თუ ცუდი, ამას ვერ შევაფასებ, თუმცა გეტყვით მხოლოდ ერთ რამეს – მიხეილ სააკაშვილი არის პოლიტიკური კეთროვანი და თუკი მას ვინმე გაეკარება, ყველა მოუსვლელში წავა, ასეთ ადგილას საკუთარი თავი მან თვითონვე დააყენა.

- შუალედურ არჩევნებზე ისაუბრეთ და ირმა ინაშვილს მოუწოდეთ “რესპუბლიკელებს” თავი დაანებოს, თუმცა ის კვლავ შედეგების გაყალბებაზე საუბრობს და ამბობს, რომ სასამართლოს მიმართავს…

- გაყალბებას ადგილი არსად არ ჰქონია და ამას ვერავინ იტყვის. ეს საკითხი ლაპარაკით არ წყდება – მთავარია, რომ ამ დარღვევებზე შესწავლა მოხდა და არსად არაფერი დადასტურდა. ირმა ინაშვილის დამარცხებას გაყალბება არ სჭირდება, იგი თამარ ხიდაშელმა სრულიად ლეგიტიმურად დაამარცხა და ამას ბევრი საუბარი აღარ უნდა. არსებობს ცენტრალური საარჩევნო კომისია, სასამართლო, მიმართოს და იბრძოლოს სამართლებრივი წესით. ირმა ინაშვილი არ არის ის ფიგურა, რომელზეც ყოველდღე უნდა ვილაპარაკოთ – წააგო, წააგო, რა მოხდა მერე?! მან კი არა, უინსტონ ჩერჩილმა წააგო არჩევნები. ჩვენ გვინდოდა გამაჯვება და მოვიპოვეთ კიდეც, დანარჩენზე საუბარს არც ვაპირებ და არც მაინტერესებს. მე ვგულშემატკივრობდი კარგი, გონიერი, ნათელი და განათლებული ადამიანის გამარჯვებას და ასეც მოხდა. ზედმეტი არ უნდა მოგვივიდეს, ამიტომ მოდით ირმა ინაშვილს ნუ გავაფეტიშებთ.

- ორი დღეა მედიაში აქტიურად ვრცელდება ინფორმაცია დიასპორის საკითხებში სახელმწიფო მინისტრის აპარატისა და სამოქალაქო თანასწორობის საკითხებში მინისტრის აპარატის შესაძლო გაუქმებაზე. რა გვეტყვით, ადასტურებთ, რომ საპარლამენტო დონეზე ამაზე საუბარი მართლაც იყო?

- მე ერთ-ერთი კომიტეტის თავმჯდომარე ვარ, რომელსაც ორივე სტრუქტურის მუშაობა ეხება, ჩვენ ამ სამინისტროებზეც საპარლამენტო კონტროლს ვახორციელებთ, ვინაიდან ერთიცა და მეორეც ევროპასთან ინტეგრაციის მიმართულებით მუშაობს.

მე ასეთი ინფორმაცია არ მაქვს, ვინ არის უმრავლესობა არ ვიცი. ვისაც ვიცნობ, ამგვარი ინფორმაცია არავის აქვს. არ ვიცი ამას ვინ ამბობს, თუმცა ფაქტია, რომ ვერავინ ვერცერთ სახელსა და გვარს ვერ ასახელებს, ვინ არის ეს საიდუმლო უმრავლესობა ვერ დავადგინეთ. ერთი შემიძლია გითხრათ, რომ ეს არც უმრვლესობის რომელიმე ლიდერია და არც კომიტეტის თავმჯდომარე, სხვა წყარო ვინ ჰყავთ, არ ვიცი. გარდა ამისა, ეს საკითხი პარლამეტში არ წყდება, ეს მთავრობის მეთაურმა უნდა გადაწყვიტოს. ამდენად ამ ინფორმაციას ვერ დაგიდასტურებთ. უფრო მეტიც, საერთოდ არ მესმის რა არის ამ ინფორმაციის არსი, თუმცა ცვლილებები ყველგან შესაძლოა მოხდეს.

- საგარეო პოლიტიკაზე მინდა გკითხოთ, დეკემბერი ახლოვდება და ევროპასთან უვიზო მიმოსვლის შესახებ უკვე კონკრეტული პასუხი უნდა მივიღოთ. როგორია ჩვენი მოლოდინი?

- საერთოდ ეს ბოლო ხანები, დაწყებული ოქტომბრიდან, საქართველო ევროპული ინტეგრაციის ფაზაშია შესული. ისეთ ფაზაში, როცა ყოველდღე რაღაც ხდება. გვქონდა ნატოს კვირეული, შემდეგ ევროპარლამენტთან ასოცირების კომიტეტის პირველი სხდომა, ორშაბათს კი მთავრობა ევროპასთან ინტეგრაციის საკითხებს განიხილავს. გარდა ამისა, შემდეგ კომიტეტი ბრიუსელში გვაქვს, 15 დეკემბრამდე ყოველდღე რაღაც ხდება, ამის მერე კი გვეცოდინება, იქნება თუ არა ჩვენსა და ევროკავშირს შორის უვიზო მიმოსვლა. ამ მდგომარეობით, ყველაფერი მეტყველებს იმაზე, რომ 15 დეკემბრის გადაწყვეტილება საქართველოს მიმართ დადებითი იქნება. ამის შემდეგ კი ჩვენ დამოკიდებულნი ვიქნებით ევროპარლამენტსა და ევროკავშირში შემავალი ქვეყნების პოლიტიკურ ნებაზე.

რაც შეეხება ტექნიკურ ნაწილს, როგორც ჩანს, ეს ნაწილი საქართველომ პირნათლად შეასრულა და ზოგიერთ შემთხვევაში გადააჭარბა კიდეც. საპარლამენტო თვალსაზრისით, ყველაფერი, რაც მოთხოვნილი იყო, 100%-ით გვაქვს შესრულებული. სამთავრობო ნაწილშიც გარკვეული გადაჭარბებაა, ანუ, იმაზე მეტია გაკეთებული, ვიდრე მოთხოვნა იყო. ამდენად, ჩვენ ველოდებით და გვაქვს პირველი ნიშნები, რომ 15 დეკემბერი ჩვენთვის წარმატებული იქნება.

- ნატოსთან ინტეგრაციის საკითხზეც გვითხარით ორიოდე სიტყვა. ამ კუთხით რა სიახლეები გვაქვს?

- ვფიქრობ, ჩვენ გვაქვს ამერიკის შეერთებული შტატების ახალი განცხადება, რომელიც ღრმად და საფუძვლიანადაა შესასწავლი, ვინაიდან იქ კარგად ჩანს, რომ შტატები ჩვენს ნატოში ინტეგრაციას მხარს გაცილებით უფრო მეტად უჭერს, გაცილებით უფრო მეტი ნაბიჯებისთვისაა მზად, ვიდრე უწინ იყო. ჩვენ არ ვიცით, იქნება თუ არა მაპი ნატოში გაწევრიანებისთვის საერთოდ საჭირო, ვინაიდან ძალიან ბევრი ნაბიჯი გვაქვს გადადგმული. რაც შეეხება სამხედრო შეფასებას, ამაზე 2 კვირის წინ ევროპარლამენტში თავად მოვისმინე აზრი – საქართველოს ნატოსთან გასასწორებელი არაფერი აქვს და მას შეუძლია, დღესვე იყოს ნატოს წევრი ქვეყანა. ხოლო რაც შეეხება პოლიტიკურ ნაწილს, რა თქმა უნდა, საქართველოს ამ ნაწილში ნაბიჯები გადასადგმელი აქვს. ბუნებრივია, ეს ბევრ მიმართულებას მოიცავს, თუმცა ეს არ გახლავთ 1 და 2 წლის საქმე, ეს გახლავთ რამდენიმე წლის საკითხი.

ჩვენ ძალიან ახლოს ვართ ნატოსთან და არ გამოვრიცხავ, რომ შესაძლოა, ძალიან სასიამოვნო მოულოდნელობები გვქონდეს, მაგრამ ამისთვის საჭიროა მუშაობა. როგორც ევროპასთან ასოცირების საკითხი დაიძრა, ზუსტად ასე ხდება ნატოსთან მიმართებაშიც. ნელ-ნელა ვხედავთ, რომ დამოკიდებულება იცვლება. დარწმუნებული ვარ, ჩვენი და თინათინ ხიდაშელის პროაქტიური პოლიტიკა თავის შედეგს აუცილებლად მოიტანს, თუმცა მოგეხსენებათ, რომ ამისთვის მარტო ჩვენი ძალისხმევა საკმარისი არ არის. მსოფლიოს სჭირდებოდა იმის მტკიცება, თუ რამდენად გვინდა და გვიღირს ნატოსთან ინტეგრაცია, ჩვენ ეს ვაჩვენეთ – ვაჩვენეთ, რომ ევროპაც გვინდა და ნატოც. მიუხედავად იმისა, რომ ჩვენივე კოლეგების მხრიდან არის იმის მცდელობა, თითქოს საქართველოს არაფერი ეკუთვნის, ვინაიდან სტალინს ძეგლებს ვუდგამთ, ჩვენ მაინც ყველას ავუხსენით, რომ სახელმწიფო ამას არსად არ დაუშვებს.

„რეზონანსი“, 06 ნოემბერი, 2015 წელი

„ოცნება“ მთავარი კონკურენტის გარეშე

„ოპოზიციურ ფლანგზე უახლოეს თვეებში სიახლეებს უნდა ველოდოთ”

თიკო ოსმანოვა

2016 წლის საპარლამენტო არჩევნებისათვის ოპოზიციური სპექტრის რეფორმირებაა მოსალოდნელი. სპეციალისტების აზრით, სამთავრობო კოალიციის დამარცხების შანსი ოპოზიციას მხოლოდ გაერთიანების შემთხვევაში ექნება, რადგან ცალ-ცალკე თითოეული პარტიის რეიტინგი საკმაოდ დაბალია. რაც შეეხება “ნაციონალურ მოძრაობას”, პოლიტოლოგთა ნაწილის აზრით, მან მთავარი ოპოზიციური პარტიის სტატუსი უკვე დაკარგა. თუკი არჩევნებამდე პოლიტიკურ ასპარეზზე დღეს არსებული ვითარება შენარჩუნდა და ახალი ძალა არ გამოჩნდა, ან რამდენიმე პარტიამ კოალიცია არ შექმნა, მათი აზრით 2016 წელს უფრო მრავალპარტიული პარლამენტი გვექნება, სადაც ოპოზიციური სპექტრი მცირე დოზით იქნება წარმოდგენილი, უმრავლესობას კი კვლავ “ქართული ოცნება” მოიპოვებს.

პოლიტიკური გადაჯგუფება

მცირე ცვლილებები ოპოზიციურ ფლანგზე ჯერ კიდევ რამდენიმე თვის წინ დაიწყო და დღემდე გრძელდება. პოლიტოლოგები ვარაუდოებენ, რომ არჩევნების მოახლოებასთან ერთად, გადაჯგუფება კიდევ უფრო გააქტიურდება.

ცვლილებებია “თავისუფალ დემოკრატებში”, რომელიც ჯერ დავით ზალკალიანმა არასამთავრობო სექტორში მუშაობის გამო დატოვა, გუშინ კი ცნობილი გახდა, რომ პარტიას თბილისის ორგანიზაციის ხელმძღვანელის მოადგილეც გამოეყო. ამასთან, გუშინვე გავრცელდა ინფორმაცია, რომ ვანში “თავისუფალი დემოკრატების” პარტია აღარ არსებობს. ქუთაისში, “ქართული ოცნების” ოფისში, ვანის საკრებულოს “თავისუფალი დემოკრატების” ყოფილმა წევრმა, რომან თვალაბეიშვილმა ბრიფინგი გამართა, სადაც განაცხადა, რომ პარტია რამდენიმე დღის წინ ყველა წევრმა დატოვა. მისი განმარტებით, “თავისუფალი დემოკრატების” პოლიტიკურ გზას ემიჯნებიან, რომელიც “ნაციონალური მოძრაობის” ინტერესებს ემსახურება. რომან თვალაბეიშვილის განცხადებით, საკრებულოს წევრები, რომლებიც “თავისუფალ დემოკრატებს” წარმოადგენდნენ, ჯერჯერობით დამოუკიდებელ დეპუტატებად რჩებიან.

ასევე ვრცელდებოდა ინფორმაცია ზურაბ აბაშიძისა და ვიქტორ დოლიძის წასვლის შესახებაც, თუმცა პარტიაში ეს არ დაადასტურეს. ამასთანავე, ასპარეზზე “ნაციონალური მოძრაობიდან” წამოსული სახეებიც გამოჩნდნენ. ზურაბ ჯაფარიძემ, გოგა ხაჩიძემ და სხვებმა გუშინ ახალი პოლიტიკური ცენტრის პრეზენტაცია გამართეს, რომელსაც “გირჩი” ეწოდა. ქუთაისში მათ რეგიონული ოფისიც გახსნეს, რომელსაც თემურ ცამციშვილი უხელმძღვანელებს.

ვინ არის მთავარი ოპოზიცია?

მოგეხსენებათ, ბოლო კვირების განმავლობაში უკრაინულ საიტზე აქტიურად ქვეყნდებოდა როგორც ძალადობის ამსახველი ვიდეოკადრები, ისე “ნაციონალური მოძრაობის” წევრებისა და ყოფილი პრეზიდენტის სატელეფონო საუბრების ჩანაწერები. თითოეული მათგანის გავრცელება საზოგადოებაში აჟიოტაჟის მიზეზი ხდებოდა.

ამ ყველაფერმა საზოგადოების გარკვეულ ნაწილში იმდენად დიდი აღშფოთება გამოიწვია, რომ როგორც დედაქალაქში, ისე რაიონებში გახშირდა “ნაცმოძრაობის” ოფისებზე თავდასხმისა და ხმაურიანი აქციების, შეხლა-შემოხლის ფაქტები. შესაბამისად, სპეციალისტები მიიჩნევენ, რომ ბოლოდროინდელმა მოვლენებმა პარტიის რეიტინგი საგრძნობლად დაწია და არჩევნებამდე დაკარგული ხმების დაბრუნება გაუჭირდებათ.

საზოგადოებრივი კომუნიკაციების მართვის სპეციალისტი არჩილ გამზარდია ამბობს, რომ “ნაცმოძრაობის” რეიტინგი ჩანაწერების გავრცელებამდე საკმაოდ დაბალი იყო, თუმცა მათი აქტიურობისა და საკმაო დაფინანსების გამო ეს ნაკლებად შეიმჩნეოდა. რეალურად კი, გამზარდიას თქმით, “ნაციონალური მოძრაობის” აქციებზე საკმაოდ ცოტა მხარამჭერი მივიდა, მიუხედავად იმისა, რომ დაანონსება ერთი თვით ადრე დაიწყო, “რუსთავი 2″-იც აქტიურად იყო ჩართული და ორგანიზებას მთელი საქართველოს მასშტაბით უწევდნენ. “რუსთავის 2″-ის მხარდამჭერ აქციებზე კი, მისი თქმით, კიდევ უფრო ცოტა ხალხი მივიდა და რეალურად, ამ პროცესმა აჩვენა, რომ “ნაცმოძრაობის” ამომრჩეველი მეტისმეტად შემცირებულია. “მათი დღევანდელი მხარდამჭერები ძირითადად აქტივისტები, დაინტერესებული პირები და აგრესიული რადიკალები არიან. ამიტომაც, ვეჭვობ, რომ ჩანაწერების გავრცელებას ამ ადამიანებში განსაკუთრებული ძვრა მოეხდინა”, – ამბობს გამზარდია. მისი აზრით, “ნაცმოძრაობა” მთავარი ოპოზიციური პარტია არც არასდროს ყოფილა და ახლა მითუმეტეს აღარ არის. ეს სტატუსი, სპეციალისტის თქმით, პარტიამ ხელოვნურად შეიქმნა. რუალურად კი, იგი, სხვა ოპოზიციური პარტიებისაგან მხოლოდ აქტიურობითა და დაფინანსებით განსხვავდება.

სწორედ ამიტომ არჩილ გამზარდია 2016 წლის არჩევნებში სხვა პარტიებისაგან უფრო დიდ წარმატებას ელოდება. “საკმაოდ წინ წაიწია “პატრიოტთა ალიანსმა”, რომელმაც ყველაზე მეტი კონკურენტუნარიანობა გამოიჩინა. ვფიქრობ, მომავალ შემოდგომაზე ძირითადი ბრძოლა “ნაცმოძრაობასა” და “ქართულ ოცნებას” შორის არც იქნება. თუმცა, ეს “ქართულ ოცნებას” საქმეს გაურთულებს, რადგან “ნაცმოძრაობასთან” ბრძოლაში მას ბევრად მეტი შანსი ექნებოდა. როგორც კვლევები ცხადყოფს, ამომრჩევლის დიდი ნაწილი სიმპათიით არავის მიმართ არაა განწყობილი, მაგრამ “ნაცმოძრაობასა” და “ქართულ ოცნებას” შორის არჩევანს მაინც “ოცნებაზე” შეაჩერებენ. თუმცა, ვის ექნება მეტი შანსი 2016-ში, ეს გასარკვევია, რადგან ოპოზიციურ ფლანგზე უახლოეს თვეებში სიახლეებსაც უნდა ველოდოთ”, – ამბობს გამზარდია.

იმ შემთხვევაში კი, თუ არჩევნებამდე ოპოზიციურმა ფლანგმა სერიოზული ცვლილებები არ განიცადა და არჩევნებამდე დაახლოებით იმავე კონფიგურაციით მივედით, რაც დღეს გვაქვს, არჩილ გამზარდია ფიქრობს, რომ “ქართული ოცნება” სერიოზული კონკურენტის გარეშე დარჩება. დღეს რომ არჩევნები იყოს, მისი აზრით, პარლამენტში შესვლის შანსი უფრო მეტ პარტიას ექნებოდა, ოღონდ მცირე წარმომადგენლობით.

“მიუხედავად იმისა, რომ ხელისუფლებისადმი საზოგადოებას ძალიან ბევრი შენიშვნა და პრეტენზია აქვს, იგი მაინც შედარებას აკეთებს – თუ რა არის და რა შეიძლებოდა ყოფილიყო. ბევრი ფიქრობს, რომ “ქართულ ოცნებას” მხოლოდ იმიტომ მაინც უნდა მისცე ხმა, რომ ისინი მკვლელები არ არიან და სისასტიკეს არ სჩადიან. ამან აჩვენა, რომ “ნაცმოძრაობის” ცოდვებმა მათი გაკეთებული ყველა საქმე გადაწონა და სოციალური მდგომარეობის გართულებაც კი შესაძლოა, მოსახლეობისათვის უსაფრთხოებასთან შედარებით, მეორეხარისხოვანი აღმოჩნდეს. თუკი საზოგადოებას ასეთი არჩევანი ექნება, მაშინ შესაძლოა, მან მოქმედი ხელისუფლების მიმართ, როგორც უსაფრთხო მთავრობისადმი, ისევ დიდი მხარდაჭერა გამოხატოს”, – დასძენს იგი.

რაც შეეხება იმას, თუ რომელ პარტიებს ექნებოდათ პარლამენტში მოხვედრის შანსი, არჩილ გამზარდია ამბობს, რომ ესენი იქნებოდნენ “ნაციონალური მოძრაობა” და “პატრიოტთა ალიანსი”, რომელსაც სავარაუდოდ, “ნაცმოძრაობაზე” მეტი წარმომადგენლის შეყვანის შანსი ექნება. “ასევე შეიძლება “თავისუფალი დემოკრატებიც” ვიხილოთ პარლამენტში, თუმცა, ეს პარტია ამჟამად ისე არაეფექტურად ჩანს, რომ მომავალ პარლამენტში მოხვედრის ნაკლები შანსი აქვს. ასე რომ, დღეს რომ არჩევნები იყოს, ვფიქრობ, უფრო მრავალპარტიული პარლამენტი გვექნებოდა, თუმცა ოპოზიცია პატარ-პატარა წარმომადგენლობებით და “ოცნება” კი უმრავლესობით”, – დასძენს არჩილ გამზარდია.

პოლიტოლოგ-კონსტიტუციონალისტ ვახტანგ ძაბირაძის აზრით კი, სკანდალური ჩანაწერები “ნაცმოძრაობის” მხარდამჭერებზე მეტად დანარჩენ საზოგადოებაზე ახდენს გავლენას. თუმცა, მისი აზრით, პარტიას რეიტინგი დაკარგული რომ აქვს, ეს ფაქტია და არჩევნებამდე დარჩენილ მცირე დროში პოლიტიკური იმიჯის რებრენდინგს ვერ მოახერხებს.

“რა თქმა უნდა, ჩანაწერები ამომრჩეველზე გავლენას ახდენს, მაგრამ “ნაციონალური მოძრაობა” და მისი მხარდამჭერები ფაქტობრივად რაღაც სექტასავით ჩამოყალიბდნენ და დანარჩენი საზოგადოებისაგან თითქოს თვითიზოლაცია მოახდინეს. ასე რომ, ეს ჩანაწერები საზოგადოებაზე უფრო ახდენს გავლენას, ვიდრე “ნაციონალური მოძრაობის” მხარდამჭერებზე. რაც შეეხება იმას, ინარჩუნებს თუ არა ყველაზე მთავარი და გავლენიანი პარტიის იმიჯს, სამწუხაროდ, ჯერჯერობით, ეს ასეა. მიუხედავად იმისა, რომ მან სექტის ფორმა მიიღო, ეს სექტა საკმაოდ მრავალრიცხოვანი, შეკრული და სტრუქტურირებულია. ჩანაწერებშიც ხომ არის საუბარი, თუ ვინ რამდენი კაცი უნდა მიიყვანოს. ასე რომ, ეს საკმაოდ გამართული სტრუქტურაა, რომელიც დღეს და გუშინ არ შექმნილა. ასეთი ძლიერი სტრუქტურა არცერთ სხვა ოპოზიციურ პარტიას არ აქვს. თანაც, როგორც ჩანს, “ნაცმოძრაობას” დასავლეთიდანაც საკმაოდ ძლიერი მხარდაჭერა აქვს გამოქვეყნებული ჩანაწერების მიუხედავად”, – მიიჩნევს პოლიტოლოგი. მისივე აზრით, არჩევნებამდე ჩანაწერების გამოქვეყნება განახლდება და მომავალი არჩევნები ისევ კომპრომატული იქნება.

კითხვაზე, კიდევ რომელ ოპოზიციურ პარტიას აქვს არჩევნებში წარმატების მოპოვების შანსი, ძაბირაძე გვპასუხობს, რომ “თავისუფალი დემოკრატები და “პატრიოტთა ალიანსი” ძალებს უფრო იკრებენ. “მიუხედავად იმისა, რომ ახალბედები არიან და დამოუკიდებელ პოლიტიკურ პარტიებად ახლა ყალიბდებიან, ვფიქრობ, რომ შანსი მათაც აქვთ, მითუმეტეს, “პატრიოტთა ალიანსს”. თუმცა, არ მგონია, რომელიმემ “ნაცმოძრაობას” გადაუსწროს, ან უკეთესი სტრუქტურა შექმნას. სხვათა შორის, ბურჯანაძესაც ექნებოდა შანსი, შემდგომი ზრდის რესურსი რომ გააჩნდეს. “ზოგადად, მგონია, რომ ოპოზიციამ კოალიციის შექმნაზე უნდა იფიქროს. სხვაგვარად მას მნიშვნელოვანი წარმატების მიღწევა გაუჭირდება”, – აცხადებს ვახტანგ ძაბირაძე.

„რეზონანსი“, 06 ნოემბერი, 2015 წელი

სჭირდება თუ არა წინასაარჩევნოდ ქვეყანას ახალი პოლიტიკური ძალების შექმნა?

გვანცა ღვედაშვილი

ქუთაისში “ახალი პოლიტიკური ცენტრის-გირჩის” რეგიონული ოფისი გაიხსნა. რეგიონულ წარმომადგენლობას თემურ ცამციშვილი უხელმძღვანელებს. “ახალი პოლიტიკური ცენტრის” ხელმძღვანელებმა დღეს მედიას ცენტრის ძირითადი მიმართულებები და სამომავლო გეგმები გააცნეს. “პარტიის მიზანია, შექმნას ახალი, ღია პოლიტიკური ცენტრი, მოიზიდოს და პოლიტიკურ პროცესში ჩართოს პროფესიონალები. ახალი პოლიტიკური ცენტრი გთავაზობთ: აქტიურ პოლიტიკაში ჩართვის შესაძლებლობას; ღია და თავისუფალ საპარლამენტო სიას 2016 წლის საპარლამენტო არჩევნებისთვის, სადაც არ დაგხვდებათ წინასწარ ჩამოწერილი ხალხი; სიაში მოხვედრის გასაგებ და გამჭვირვალე კრიტერიუმებს – რაც არასოდეს ჰქონია საქართველოში რომელიმე პოლიტიკურ პარტიას”, – განაცხადეს ცენტრის ხელმძღვანელებმა, რომლებიც “ნაციონალური მოძრაობის” ყოფილი წევრები არიან. პარტიის ერთ-ერთი წევრის გოგა ხაჩიძის თქმით, პოლიტიკური ცენტრის სახელი შეირჩა პარტიის წევრთა ერთობლივი გადაწყვეტილებით, როგორც თავად განმარტავს, გირჩი ასოცირდება სიახლესთან, მარადმწვანესთან. ის არის განახლების სიმბოლო. გარდა ამისა, გირჩი ყველგან არის – ქალაქშიც და სოფელშიც.

სჭირდება თუ არა წინასაარჩევნოდ ქვეყანას ახალი პოლიტიკური ძალების შექმნა? – ამ კითხვით “რეზონანსმა” საზოგადოების ცნობილ წარმომადგენლებს მიმართა.

ირმა სოხაძე (მომღერალი): “ახალი პარტიები სჭირდება თუ არა ქვეყანას, ამას მე ვერ ვიტყვი, უბრალოდ ახალი პარტიები ძველი სახეებით რამდენად სანდოა მოსახლეობისთვის, არ ვიცი, რამე ახალს და განსხვავებულს ამაში მე ვერ ვხედავ. ძველ პარტიაში მყოფმა ადამიანებმა უკვე დაამტკიცეს, რისი გამკეთებლები არიან და ახალი სახელის დარქმევით რამდენად მოიპოვებენ ხალხის ნდობას, არ ვიცი, ამაში ეჭვი მეპარება.”

თაკო ჩარკვიანი (პუბლიცისტი): “როგორ გითხრათ, უნდათ და გააკეთეს. ჯანსუღმა ერთხელ იხუმრა – ერთი პარტია უნდა გავაკეთო “ვიჩეპე” უნდა დავარქვაო, როცა ვკითხე, რას ნიშნავდა, მითხრა, “ვაი, ჩვენს პატრონსო”. რომ გითხრათ, მაღიზიანებს-მეთქი, ასე არ არის. ეს მათი უფლებაა. ისე, მგონი, “ნაციონალები” უფრო გაღიზიანებულები უნდა იყვნენ, ხაჩიძემ ისეთი კომენტარი გააკეთა. ბოლო დროს რომ ვაკვირდები მოვლენებს, მართლა ვფიქრობ, რომ “ვაი, ჩვენს პატრონს.”

სერგო ვარდოსანიძე (ისტორიკოსი): “ჩემი აზრით, ახალი პოლიტიკური პარტია ნამდვილად სჭირდება ჩვენს ქვეყანას, მაგრამ არა ძველი სახეებით, რადგან ის არ გამოადგება ჩვენს ქვეყანას. ახალი პარტია უნდა იყოს ახალი ადამიანებითა და იდეებით წარმოდგენილი.

გიგა ნასარიძე  (ა/ო “საქართველო არ იყიდება”): “მე მგონია, რომ პოლიტიკური სივრცე გაჯერებულია პოლიტიკური პარტიებით, თუმცა მე, რა თქმა უნდა, წარმატებებს ვუსურვებ იმ პარტიებს, რომლებიც აღიარებენ დასავლურ იდეებს და ემიჯნებიან რუსულ გზას.”

„ახალი თაობა“, 06 ნოემბერი, 2015 წელი

ინტერვიუ ომარ ნიშნიანიძესთან: „ნაციონალები“ ფრთხილად იყვნენ, გადატრიალებისას ქვეშ არ მოგვყვნენ!“

შორენა მარსაგიშვილი

რა გეგმა შეიძლება აამოქმედოს ყოფილმა ხელისუფლებამ, იყო თუ არა ნაცმოძრაობის კოორდინატორი, უნდა მოიხსენიონ თუ არა კოლეგები დეპუტატებმა უცენზურო სიტყვებით, რა საბედისწერო შეცდომა დაუშვა „ქართულმა ოცნებამ“? – ამის შესახებ „ახალ თაობას“ საპარლამენტო უმრავლესობის ერთ-ერთი ლიდერი ომარ ნიშნიანიძე ესაუბრება.

ომარ ნიშნიანიძე:

- ეს მზაკვარი ხალხი რომ რაღაცას გეგმავდა, ამაზე სულ ვსაუბრობდით და ეს ცოტა ხნის წინ გამოქვეყნებული ჩანაწერებითაც დამტკიცდა. საინტერესო იყო ის, რომ ჩანაწერების ავთენტურობა ნაციონალებს ეჭვქვეშ არ დაუყენებიათ და აცხადებდნენ, დიახაც, შედგა საუბრებიო. გამოვიდა თუ არა აშშ-ის ელჩი კელი, მაშინვე ფირფიტა ამოატრიალეს და ახლა გაიძახიან, საუბრები დამონტაჟებულიაო. ყველა ერთსა და იმავეს იმეორებს, ეტყობა, უთხრეს, ასე ილაპარაკეთო.

- ვინ უთხრა?

- თავიანთმა პატრონებმა, სხვა ვინ ეტყოდა. ჩანაწერების ავთენტურობის უარყოფა შეუძლებელია და ურჩიეს, სხვა ვერსიას მიაწვნენ. ექსპერტების განცხადებით, საუბარი დამონტაჟებული არ არის და ეს ჩანაწერები ჩვენს სპეცსამსახურებს არ ჩაუწერიათ.

- ამას იმის გამო ამტკიცებთ, რომ საუბრები უკრაინულ საიტებზე გამოქვეყნდა?

- დადგენილია, რომ ეს ჩვენების ჩაწერილი არ არის. იმდენად სუფთა ხარისხით არის ჩანაწერი გაკეთებული, რომ აშკარაა, აქ მაღალი რანგის სპეცსამსახურების მიერ არის გაკეთებული. ახლა ყველაფერი პროკურატურაზეა დამოკიდებული, რამდენად გამოიძიებენ შესაძლო დანაშაულს. ერთი კი იცოდნენ, გადატრიალებები აქ არ გაუვათ.

- გადატრიალებას არც ვაპირებთო, აცხადებენ ნაციონალები. მიხეილ მაჭავარიანმა „ახალ თაობასთან“ საუბარში განაცხადა, რატომ უნდა გადავატრიალოთ, როცა ერთ წელიწადში არჩევნებზე ისედაც გადატრიალდებიან-გადმოტრიალდებიანო.

- სხვას რას ელოდით მაგათგან? რა მაგათი საქმეა, არჩევნებზე გადავტრიალდებით თუ გადავტრიალდებით. ეგენი ფრთხილად იყვნენ, ქვეშ არ მოგვყვნენ.

- არის იმის ალბათობა, რომ არჩევნებზე გადავტრიალდეთ?

- პოლიტიკაში პარტიები მიდიან და მოდიან, ჩვენც წავალთ, მაგრამ ნაციონალები არასდროს მოექცევიან ზევით. ვინც არ უნდა მოვიდეს ხელისუფლებაში, ეგენი ყოველთვის ქვეშ იქნებიან.

- რის საფუძველზე ამბობთ, რომ ისინი ყოველთვის ქვეშ იქნებიან?

- ისინი ჩიხში არიან შესული და მათი ყოველგვარი რესურსი ამოწურულია. ნაციონალური მოძრაობა ისეთი ბოროტი ძალაა, რომ ქვეყნის განვითარების შანსს მოსპობენ. ჩვენს რეიტინგზე ტყუილად ნერვიულობენ, რაღაცები შეგვეშალა, მაგრამ ჩვენი რესურსი ჯერ არ ამოწურულა. დაშვებულ შეცდომებს გამოსწორება სჭირდება.

- არჩევნებამდე დარჩენილ დროში მოასწრებთ შეცდომების გამოსწორებას?

- უნდა მოვასწროთ, მაგრამ ამის გაკეთება რთული იქნება. დაპირებების შესრულების პარალელურად, ნაციონალების პროვოკაციები უნდა აღვკვეთოთ, რომლებიც სულ გადატრიალებაზე ფიქრობენ.

- გამოძიების დასრულებამდე რატომ ამტკიცებთ, რომ გადატრიალებას აპირებდნენ, იქნებ მართლაც „რუსთავი 2“-ის დასაცავად ახდენდნენ ხალხის მობილიზებას?

- ვინც ნაციონალებს იცნობს, ყველა დამეთანხმება, რომ ისინი გადატრიალებაზე მიდიოდნენ. ამ ჩანაწერებამდე ბევრად ადრე პარლამენტის ტრიბუნიდან გაჰკიოდნენ მოსალოდნელ სამოქალაქო დაპირისპირებაზე. ისე ეტრფიან ძალაუფლებას, მის დასაბრუნებლად შვილებსაც კი არ დაინდობენ. ამ ხალხს რევანშის არანორმალური წყურვილი აქვს. „ქართული ოცნების“ დეპუტაციას კოალიციის ლიდერებთან გვქონდა შეხვედრა. იქ ვთქვი, რომ შესაძლოა არც არაფერი მოხდეს, მაგრამ ყველაფრისთვის მზად უნდა ვიყოთ. ერთხელ უკვე დავუშვით უზარმაზარი შეცდომა და ეგ დამნაშავეები ხელისუფლებაში მოვიდნენ. ეს ჩვენი დოყლაპიობის ბრალი იყო.

- როგორც ამბობენ, მაშინ თქვენ ნაციონალების მხარეს იდექით. მართალია ეს ამბავი?

- არ დაგიმალავთ და გეტყვით, რომ 2003 წელს მეც ვუჭერდი მათ მხარს და ჩემი ბრალიცაა, ეგენი ხელისუფლებაში რომ მოვიდნენ.

- რამდენი ხანი იყავით ამ პარტიის მხარდამჭერი?

- ჟვანია რომ მოკლეს, ამის შემდეგ სულ ოპოზიციაში ვედექი. მათ გვერდით დგომა ჩემს დიდ სირცხვილად მიმაჩნია. ახლა ყველაფერი უნდა გავაკეთოთ, რომ ეს უკეთური ძალა ხელისუფლებაში არ მოვუშვათ. 2005 წლის თებერვლიდან მოყოლებული, არ დამიტოვებია მაშინდელი ოპოზიციის მიტინგი, ყველგან გამოვდიოდი და ნაციონალების საწინააღმდეგო პოზიციას ვაფიქსირებდი. ჩემი სტუდენტები სულ მაფრთხილებდნენ. რამდენჯერმე ცადეს უნივერსიტეტიდან ჩემი გაგდება, მაგრამ ვერ გაბედეს. 2011 წელს ბიძინა ივანიშვილის გამოჩენით ძალიან გამწარდნენ და გამაგდეს სამსახურიდან. მათგან ჩემმა ოჯახმა სხვა საშინელებაც გადაიტანა.

- შეგიძლიათ გვითხრათ, რა მოხდა?

- 2012 წლის საპარლამენტო არჩევნების წინა დღეებში ნაციონალებმა ჩემი სიძე გაიტაცეს და რამდენიმე დღე გადამალული ჰყავდათ. ამაზე ძალიან ვინერვიულეთ. ჩემი ქალიშვილი ფეხმძიმედ იყო და მას ოპერაცია დასჭირდა. ამ ოპერაციის შედეგად ჩემი შვილიშვილი 6-თვიანი დაიბადა. მადლობა ღმერთს, ახლა ყველანი კარგად ვართ. კარგად ვიცნობ ამ ხალხს და ვიცი, რომ ამ ჩანაწერების გამოქვეყნების შემდეგ ეგენი არ გაჩერდებიან. მათი გამონათქვამებიდან ჩანს, რომ კიდევ აქვთ ბე, ჭე და ყე გეგმები. ასეთ საშინელებებს ამზადებენ და მერე უკვირთ, რაღაც იარლიყებს რატომ გვაწებებენო.

- ნაციონალების მიმართ ხელისუფლების წარმომადგენლები მართლაც ცუდ სიტყვებს ხმარობთ. პრემიერი და ვიცე-პრემიერი მათ ქინძებად მოიხსენიებს. გასულ კვირას თქვენ მათი ერთ ადგილზე შეძვრენა მოითხოვეთ. პოლიტიკოსების მხრიდან ასეთი ლექსიკა რამდენად არის გამართლებული?

- მე ვთქვი, ერთი საშოდან დაბადებულებს ჰგავხართ-მეთქი. ეს სიტყვა პირდაპირი მნიშვნელობით არ გამომიყენებია. მხედველობაში ის დიდი კოსმოპოლიტურ-ლიბერტარიანული საჩეკარი მქონდა, საიდანაც გამოძვრნენ. ვიმეორებ, იქ უნდა შევაძვრინოთ, რომ ქვეყანას აღარაფერი დაუშავონ. ამ საჩეკარის ხსენება უკვირს იმ ძალას, რომელმაც ამდენი საშინელება ჩაიდინა? მე ვიცი, რომ მალე გამოქვეყნდება კადრები, პატიმარი მამის წინ პატარა გოგონა რომ გააუპატიურეს. ამის გამკეთებლები უარესი შეფასების ღირსები არიან. მეტიც ეკუთვნით მაგათ. მადლობა თქვან, რომ ჩვენ თავს ვიკავებთ. სხვა ჩვენს ადგილზე მათ ყოველდღე შეახსენებდა, რასაც წარმოადგენენ. რასაც მაგათზე ამ წუთას ვფიქრობ, ვერ გეტყვით, გაზეთში ამის დაწერა უხერხულია.

- პრემიერი და ვიცე-პრემიერი ქინძზე რომ ახდენენ აპელირებას, ამაზე რას იტყვით, ბატონო ომარ?

- ქინძი სრულიად უწყინარი მწვანილი იყო აქამდე. გაქინძებას თავად სააკაშვილმა დაუდო საფუძველი და განაცხადა, ქინძი ხომ არა ვარო. მთლად კარგი გამოთქმა არ არის, მაგრამ ხანდახან შეიძლება, იხმაროს კაცმა.

- რიგითმა მოქალაქემ შეიძლება იხმაროს, მაგრამ პრემიერმა და ვიცეპრემიერმაც?

- ეგენიც ადამიანები არიან, შეუძლიათ, გამოიყენონ ეს ტერმინი, მაგრამ მთლად ყოველ წუთას ნუ დაატრიალებენ.

- ჩანაწერებიდან გაირკვა, რომ დეპუტატებსაც უსმენენ. თქვენ, როგორც დეპუტატი, რას ფიქრობთ ამაზე?

- ჩვენი ხელისუფლება ფარული მოსმენების წინააღმდეგია და ამასთან დაკავშირებით კანონიც კი მივიღეთ. არსებობს მოსმენების ომბუდსმენი, რომელიც ამ ყველაფერს აკონტროლებს. რაც შეეხება დეპუტატების მოსმენას, კიდევ ერთხელ გეუბნებით, ეს ჩვენს სპეცსამსახურებს არ გაუკეთებია და სხვა ქვეყანას რანაირად მოვთხოვო პასუხი.

- დეპუტატების მოსმენასთან დაკავშირებით მაინც რას ფიქრობთ?

- თუ არსებობს ინფორმაცია, რომ დეპუტატი უკანონობას ამზადებს, მასაც უნდა მოუსმინონ, ოღონდ ეს სასამართლოს ნებართვით უნდა განხორციელდეს. ნაციონალები ვის მოსმენებზე საუბრობენ, მაგათ დროს ხალხს აბაზანაში და ტუალეტშიც კი მოსასმენი აპარატურა დაუმონტაჟეს. ნაციონალური მოძრაობა უკეთური ძალაა და მას ზუსტადაც უნდა მოუსმინო, ოღონდ – კანონის ფარგლებში.

- თუ უკანონოდ ხდება უკეთური ძალის მოსმენა?

- უკანონოდ თუ ხდება, ის უნდა აღიკვეთოს. ამ ეტაპზე რაც გამოიკვეთა, ჩვენს ძალოვნებს უკანონობა არ ჩაუდენიათ. მათ მხოლოდ საქმე აღძრეს. ეს რომ არ გაეკეთებინათ, დანაშაული იქნებოდა..ამ საკითხზე აუცილებლად იქნება მსჯელობა საპარლამენტო უმრავლესობაში და, ალბათ, ერთობლივ განცხადებასაც მივიღებთ. ნაციონალების ქმედებას ყველა ჩემი კოლეგა, ვისაც კი ვესაუბრე, მწვავედ აკრიტიკებს.

- ვისაც თქვენ ესაუბრეთ, ისინი კი აკრიტიკებენ, მაგრამ უმრავლესობა რამდენად იქნება ერთიანი? რესპუბლიკელები ყოველთვის კოაბიტაციასა და ნაციონალების გადარჩენას უჭერდნენ მხარს...

- რესპუბლიკელები ამ უკეთურებს ყოველთვის უფრო რბილად უყურებენ, ახლა რას იზამენ, ვერ გეტყვით. დაველოდოთ მათ შეფასებებს და, თუ კიდევ გადაუსვამენ თავზე ხელს, მაშინ მე მათ მიმართ კრიტიკული ვიქნები. წინასწარ ვერც მე დავითხრი თვალებს და ვერც მაგათ ვუზამ იმავეს..იმედი მაქვს, ნაციონალებთან დაკავშირებით ერთ აზრზე მივალთ და მოვახერხებთ ამ ძალის გასამართლებას. ყველაფერი დროზე უნდა გაკეთდეს და ამ მიმართულებით ჩვენ დავაგვიანეთ. მაგათთვის თავის დროზე რომ გამოგვეტანა განაჩენი, ქვეყანა ასეთ დღეში აღარ იქნებოდა.

- განაჩენის გამოტანაში რას გულისხმობთ, ბატონო ომარ?

- ყოფილი ხელისუფლებისთვის უნდა გვეწოდებინა დამნაშავე რეჟიმი. ეს არ გავაკეთეთ. ამით საკუთარ ბორბალში გავირჭეთ ძალაყინი და ამის ბრალია, ახლა ძლივს რომ მივდივართ წინ. ყოფილი ხელისუფლება არის თვითმარქვია ნაციონალური მოძრაობა და უნდა მოხდეს მათი გაუქმება.

- მათი გაუქმება როგორ წარმოგიდგენიათ?

- ამას ხალხი გააკეთებს, არჩევნები ისეთი შედეგებით დასრულდება, რომ ეგენი საერთოდ გაქრებიან.

- ისინი ამბობენ, რომ „ქართული ოცნება“ გაქრება...

- მოვა არჩევნები და ვნახავთ, ვინც გაქრება. ჩვენ, შესაძლოა, ხალხმა გადაგვირჩიოს, მაგრამ ნაციონალებს თავიანთი მომხრეებიც კი აღარ მისცემენ ხმას. ეგენი აუცილებლად წავლენ პოლიტიკურ სამარეში. იმედი მაქვს, პარლამენტში მოვა ნამდვილი ოპოზიციური ძალა, რომელიც ჩვენი სტიმული იქნება. მათგან კრიტიკასაც მივიღებთ და მოტივაციაც გვექნება, რომ კარგად ვიმუშაოთ. ამ უკეთურებმა კი რა შენიშვნა უნდა მოგვცენ, ან სად სცალიათ შენიშვნებისთვის, გადატრიალებებსა და საზიზღრობებზე ფიქრობენ.

„ახალი თაობა“, 06 ნოემბერი, 2015 წელი

ინტერვიუ დავით დარჩიაშვილთან: „ჩანაწერებში გადატრიალებაზე არავინ საუბრობს“

ნათია ხურცილავა

ნაციონალური მოძრაობის ერთ-ერთი ლიდერი, პარლამენტის წევრი დავით დარჩიაშვილი „ახალ თაობასთან“ ინტერვიუში აცხადებს, რომ მისთვის გავრცელებული ფარული ჩანაწერების წარმომავლობა და მათი კანონიერება უფრო მნიშვნელოვანია, ვიდრე საუბრების შინაარსი. „ეს მასალები უკანონოდ არის მოპოვებული. ხელისუფლება ემიჯნება და ამბობს, რომ მას არ გაუკეთებია. არადა, ცალსახაა, რომ სპეცსამსახურების ნახელავია. სავალალო ის არის, რომ ეფესბე და საქართველოს სპეცსამსახურები რაღაცნაირად თანამშრომლობენ ამ საქმეში. ეს არის მტრული სახელმწიფოს სპეცსამსახურებთან თანამშრომლობა, რაც თავისთავად კრიმინალია“, – ამბობს დავით დარჩიაშვილი.

- საუბრების შინაარსზე რას გვეტყვით?

- არც ერთი ინფორმაცია არ იძლევა იმის თქმის საფუძველს, რომ იქ საუბარია რაიმე სახის გადატრიალებაზე. საუბარია იმაზე, რომ თუკი იქნება ფიზიკური თავდასხმა გადაცმული თუ პირდაპირ ჩაცმული სპეცსამსახურების მხრიდან, მაშინ საჭიროა ტელევიზიის დაცვა, მათ შორის ფიზიკური თავდასხმისგან. თუ „რუსთავი 2“-ის ეზოში თავდასხმის შემთხვევაში თავდაცვა სახელმწიფო გადატრიალებაა, მაშინ არ ვიცი, რა უნდა გითხრათ.

- თუმცა ჩანაწერებში საუბარია „ბოევიკებზე“, ამ ხალხის მობილიზებაზე.

- სიტყვა „ბოევიკი“ თუ გაშინებთ, თან პირად საუბარში, ათასგვარი სიტყვა შეიძლება გამოიყენო. საუბარია იმაზე, რომ ტელევიზია ფიზიკურად არის დასაცავი. სად არის აქ გადატრიალება?

- სისხლისღვრა, გასროლა, შეჯახება, ფიზიკური დაპირისპირება - ეს სიტყვები ისმის.

- სადმე არის ნათქვამი, რომ ჩვენ გავისროლოთ, ჩვენ დავღვაროთ სისხლი?!

- ეს არ არის ნათქვამი, მაგრამ სისხლი დაიღვრებაო, ამბობს ყოფილი პრეზიდენტი.

- პირად საუბარში ადამიანები ამბობენ, რომ ეს ხელისუფლება შეიძლება სისხლისღვრაზე წავიდეს. მე გახსნილად გეუბნებით, რომ ოღონდ ხელისუფლება არ დათმოს და ივანიშვილის გუნდი ყველაფერზეა წამსვლელი, მათ შორის სისხლისღვრაზეც. მე მგონია, რომ უკვე სისხლი დაღვრილია არჩევნებში გამარჯვების მოსაპოვებლად, რადგან არ იძიებენ რაფალიანცის საქმეს, ეროსი კიწმარიშვილის საქმეს, რაღაც დოზით მათი ხელი ურევია. ამას ვაცხადებ და რა, ახლა პოლიტიკურმა პოლიციამ სისხლის სამართლის დევნა უნდა დაიწყოს ჩემ წინააღმდეგ?! კი ბატონო, დაიწყოს.

- ბატონო დავით, ეს თქვენი, ოპოზიციური პარტიის წარმომადგენლის მოსაზრებაა, მაგრამ იმ ჩანაწერებში, რომელთა მთავარი ფიგურანტიც ქვეყნის ყოფილი პრეზიდენტია, ის დარწმუნებულია, რომ სისხლი დაიღვრება. რამდენად უპრიანია, რომ ყოფილი პრეზიდენტის მხრიდან ისმოდეს ასეთი ფრაზები?

- არსად ჩანს და არც ბუნებაში არსებობს, რომ მიხეილ სააკაშვილს უნდა უდანაშაულო სისხლისღვრა ძალაუფლების პრობლემების გადასაწყვეტად. ეს არ იკითხება ამ ჩანაწერებიდან. მესმის, რომ ივანიშვილს სწორედ ასე უნდა წაკითხვა, მაგრამ თვალიც გვაქვს, ყურიც და მოვისმინოთ. ეს უკანონობა ცივილიზებულ საზოგადოებაში არ შეიძლება, სამხილად იქცეს. მეორე, შეიძლება, ეს ჩანაწერები იყოს ამოკენკილი და გადაბმული სხვადასხვა საუბრიდან, სადაც უფრო მკაფიოდ იქნებოდა ნათქვამი, რომ ივანიშვილი დაღვრის სისხლს, ისეა ჩაჭიდებული ხელისუფლებას. ეს ადგილი წაშლილი იქნებოდა, რომ გულუბრყვილო მსმენელს სხვა შთაბეჭდილებები გასჩენოდა.

- თუმცა ამ საუბრების ავთენტურობას გიგა ბოკერია და ნიკა გვარამია ადასტურებენ.

- ავთენტურობის დადასტურებას ექსპერტიზა სჭირდება. შეიძლება, გიგამ თქვას, რომ მას ჰქონდა საუბარი სააკაშვილთან, მაგრამ ეს ჩანაწერი ზუსტად ასახავს თუ არა საუბარს, მოჭრილია თუ არა, ამოკრებილია თუ არა სხვადასხვა საუბრიდან, ეს ექსპერტიზამ უნდა დაადასტუროს და ასე დგინდება ავთენტურობა.

- თქვენი ხელისუფლების პირობებშიც იყო ფარული ჩანაწერები, რომლებიც კეთდებოდა მაშინდელი ოპოზიციის - ბადრი პატარკაციშვილის, გოგა ხაინდრავას, სხვების წინააღმდეგ. რამდენად ხედავთ პარალელებს?

- 2007-2011 წლებში მე მჯერა, რომ რუსული სპეცსამსახურების კვალი იყო, რომელიც გადიოდა ოპოზიციის ზოგიერთ წარმომადგენელზე, მაგალითად, ბადრი პატარკაციშვილსა თუ გოგა ხაინდრავაზე, მერე უკვე ბურჯანაძეზე. საუბარი იყო რუსული ძალის დახმარებით ძალადობის პროვოცირებაზე, ასევე – შინაგან საქმეთა მინისტრის განეიტრალებაზე. აშკარად იკვეთებოდა გადატრიალების ნიშნები.

- თუ ასე იყო, თუ იკვეთებოდა სახელმწიფო გადატრიალება, რატომ არ დააკავეს კონკრეტული პირები?

- წინა ხელისუფლების დროს მოხდა იმის გაცნობიერება, რომ ამ საუბრების საფუძველზე სისხლის სამართლის დევნა და ოპოზიციის წარმომადგენლების დაჭერა სწორი არ იქნებოდა. პოლიტიკურ ფიგურათა დაჭერა დემოკრატიის სერიოზული ტესტია. ვინც ამას აკეთებს, ის ამ ტესტს ვერ გადის, მაგრამ ეს ამ ხელისუფლებას არ ესმის, ბევრად უფრო უწყინარ საუბრებზე სისხლის სამართლის საქმე აღძრეს და ოპოზიციის წარმომადგენლებს აქეთ-იქით ატარებენ.

- თუმცა ჯერ არავინ არის დაჭერილი და არ ვიცით, გამოძიება როგორ დასრულდება.

- ვერ გაბედავენ ერთადერთი იმ შემთხვევაში, თუ საერთაშორისო რეაქციის შეეშინდებათ, მაგრამ, სურვილი რომ არის და ამაზე ოცნებობენ, ცხადია. მაშინ ხელისუფლებამ გააცნობიერა, რომ ამას სხვანაირი სამხილები სჭირდება, რომ მხოლოდ საუბარი არ არის საკმარისი, მაგრამ, საზოგადოება რომ საქმის კურსში ყოფილიყო, ჩანაწერები გავრცელდა. საზოგადოებამ კი შინაარსს ნაკლები ყურადღება მიაქცია და ყურადღება მიაქცია იმას, რომ მოსმენა მოხდა. მაშინ საზოგადოებამ დაასკვნა, რომ ყველას უსმენენ. თუ იმ დროს შინაარსზე უფრო მნიშვნელოვანი მოსმენის მიუღებლობა იყო, ახლა რა ხდება?! ამ ჩანაწერებში საუბარი იმაზე კი არ არის, რომ შინაგან საქმეთა მინისტრი უნდა დავაძინოთ, საუბარია „რუსთავი 2“-ის ეზოს დაცვაზე.

- რამდენად იყო ნაციონალური მოძრაობისთვის, მისი ლიდერებისთვის ეს ჩანაწერები სერიოზული დარტყმა, თუნდაც რეიტინგის თვალსაზრისით?

- არა მგონია, ჩვენთვის ეს დარტყმა ყოფილიყო.

„ახალი თაობა“, 06 ნოემბერი, 2015 წელი

ინტერვიუ გიორგი ცაგარეიშვილთან: „რუსულ გაზს რუსული ჩექმა მოსდევს“

მარიამ მჭედლიშვილი

პარლამენტის წევრი, „თავისუფალი დემოკრატების“ ფრაქციის წარმომადგენელი გიორგი ცაგარეიშვილი ფიქრობს, რომ თავიდანვე არ იყო მიზანშეწონილი მთავრობაში სახელმწიფო მინისტრების თანამდებობების შემოღება. მისი აზრით, განსაკუთრებით არ არის გამართლებული ღარიბ ქვეყანაში ისეთი ზედმეტი პოსტების არსებობა, როგორებიცაა მინისტრები დიასპორის, კონფლიქტების მოგვარების საკითხებში.

- ორწელიწად-ნახევრის განმავლობაში თავისუფალი დემოკრატები საპარლამენტო უმრავლესობაში ვიყავით. მაშინ უწყებების ოპტიმიზაციაზე საუბარი არ ყოფილა. ასეთი რამ, როგორც ვიცი, არც ახლა იგეგმებოდა. აშკარაა, რომ დიასპორის საკითხების მინისტრი თავისი მკვეთრი განცხადებების გამო ისჯება, – განუცხადა „ახალ თაობას“ გიორგი ცაგარეიშვილმა.

მისი აზრით, ზოგიერთი თანამდებობა ქვეყანაში ფულისა და სხვა რესურსების ფუჭი ხარჯვაა. მათ შორისაა დიასპორისა და კონფლიქტების სახელმწიფო მინისტრების პოსტები. მათი ფუნქციები საგარეო უწყების შესასრულებელია. რაც შეეხება ევროინტეგრაციის საკითხებში სახელმწიფო მინისტრს, ეს თანამდებობა შეიძლება ამ ეტაპზე გამართლებული იყოს, ვინაიდან საქართველო ევროკავშირისა და ნატოსკენ მიისწრაფვის.

- „გაზპრომის“ თემა ბოლო დროს ძალიან აქტუალურია.

- საქართველოს მთავრობა დგამს ნაბიჯებს გაზპრომთან თანამშრომლობისკენ. საზოგადოებამ ვერ გაიგო, რატომ უნდა შევისყიდოთ გაზი ამ რუსული კომპანიისაგან, მით უმეტეს იმ დროს, როცა ეს გაზი ძვირია. საქართველოს ტერიტორიაზე გადის გაზსადენი, რომლითაც რუსეთი სომხეთს ამარაგებს გაზით. ტრანზიტისათვის საქართველოს გარკვეული რაოდენობა რჩება. ამ მილსადენის გამტარუნარიანობა არ ვიცი. თუ საუბარია იმაზე, რომ მეტი გაზი გავიდეს სომხეთში, მაშინ ეს რუსეთ-სომხეთის გადასაწყვეტია. სომხეთში ტრანზიტიდან თუ დაგვრჩება მეტი, ეს სხვა საკითხია. ღელვას იწვევს ის, რომ უნდათ რუსული გაზის შესყიდვა. ჩვენ ეს არაფერში გვჭირდება. აზერბაიჯანს შეუძლია, მეტი გაზი მოგვაწოდოს. იგეგმება შაჰ-დენიზის მეტად დატვირთვა. ამ პროექტში ჩართულია ბი პი. რამდენიმე წელიწადში ამით ვისარგებლებთ. აზერბაიჯანს ახლაც არ აქვს პრობლემები გაზმომარაგებასთან დაკავშირებით. გვარწმუნებენ, გაზპრომი კომერციული ორგანიზაციააო.

- ვინ ამბობს ამას?

- ეს განაცხადა ენერგეტიკის მინისტრის მოადგილემ, როცა ჩვენ ის პარლამენტში დავიბარეთ. როგორც ჩანს, ასეთია ენერგეტიკის მინისტრის პოზიციაც. მათ ვერ გაუგიათ, რომ გაზპრომი კომერციული კი არა, სახელმწიფო, იმპერიული სტრუქტურაა, რომელიც ყოველთვის დაკავშირებული იყო რუსეთის უშიშროებასთან. მთავრობაში არ ესმით, რომ რუსულ გაზს მოსდევს რუსული ჩექმა, თუმცა აქ შეიძლება, თანამდებობის პირების პირადი ინტერესები იყოს მთავარი.

- გახშირდა განცხადებები, რომ საქართველოს ევროატლანტიკურ კურსს მხოლოდ გაზპრომის შემოსვლა კი არა, ტელეკომპანია რუსთავი 2-ის საწინააღმდეგო მოქმედებები ემუქრება...

- „რუსთავი 2“-ის გარშემო მიმდინარე მოვლენებს ვერც გაზპრომისა და ვერც საგარეო კურსის თემას ვერ დავუკავშირებ. „რუსთავი 2“ ვარდების რევოლუციის შემდეგ სააკაშვილის ჯიბის ტელევიზიაა. სააკაშვილია მისი რეალური მეპატრონე და დამფინანსებელი. ბოლოდროინდელი ფარული ჩანაწერებიდანაც გამოჩნდა, რომ ამ ტელევიზიაში ყველა სააკაშვილის ქვეშაა მოქცეული როგორც პირდაპირი, ისე გადატანითი მნიშვნელობით. ამ ტელევიზიის გენერალური დირექტორი ნიკა გვარამია ახსენებს ხოლმე საგარეო კურსს ამ მოვლენებთან დაკავშირებით. რა შუაშია საგარეო ორიენტაცია? გვარამია კი ისეთივე ჟურნალისტია, როგორც მე ვარ ჩინეთის იმპერატორი. გვარამიამ პროკურორის მანტია ვერ ჩამოიხსნა.

- ხელისუფლება როგორ უნდა მოიქცეს?

- ნებისმიერმა ხელისუფლებამ უნდა აიტანოს კრიტიკა, თუნდაც ტენდენციური. ხელისუფლებას ყოველთვის უნდა ჰყავდეს ადამიანები, რომლებიც მას გააკრიტიკებენ და გააფრთხილებენ. ქიბარ ხალვაშს უფლება აქვს, მოითხოვოს თავისი ქონების დაბრუნება. თვითონ როგორ მიიღო ეს ქონება, სხვა საკითხია. საერთოდ, ამ ტელეკომპანიის წილები და მეპატრონეები ჩახლართული ამბავია. თუ ხელისუფლება ერევა რამეში, ჯობია, განზე გადგეს და მშვიდად იყოს. ფარული ჩანაწერების დემონსტრირებით საკუთარი ფარული ვნებების გამომჟღავნება საჭირო არ არის.

„ახალი თაობა“, 06 ნოემბერი, 2015 წელი

ინტერვიუ შალვა ხაჭაპურიძესთან: „ისევ კომუნისტური, საბჭოთა კავშირის მოდელით მივდივართ“

ნონა ცაბაძე

ფარული ჩანაწერების ისტერიკას ბევრი უკვე არასერიოზულად უყურებს. საზოგადოებაში უკმაყოფილების განცდა მატულობს. ამბობენ, რომ ხელისუფლებამ კომპრომატების ომი წინასაარჩევნოდ წამოიწყო. იურისტი და უფლებადამცველი შალვა ხაჭაპურიძე აცხადებს, რომ ეს ცუდი ტენდენციაა, თუმცა, მისი თქმით, ვერავინ ამტკიცებს, რომ ამ ჩანაწერებს ხელისუფლება დებს. „ეს ჩანაწერები იდება ხან ვიკილიქსისა და ხან უკრაინულ საიტებზე. მიმდინარეობს გამოძიება, თუ საიდან ვრცელდება ისინი. სახალხო დამცველი გამოვიდა იმ ინიციატივით, დაიბლოკოს ეს საიტები. ნურც ის დაგვავიწყდება, რომ ამ საუბრებში დანაშაულის ნიშნები იკვეთება. სულ სისხლისღვრასა და გადატრიალებაზეა საუბარი“, – აცხადებს ხაჭაპურიძე.

- ხელისუფლება არაფერ შუაშია ამ ჩანაწერებთან?

- მკითხაობას ნამდვილად ვერ დავიწყებ. ყოველ შემთხვევაში, ამ ჩანაწერებს არ ავრცელებენ ქართული საგამოძიებო უწყებები, რაც წინა ხელისუფლების პერიოდში ხდებოდა. გამოძიებამ უნდა დაადგინოს მათი ავთენტურობა და დაკითხოს ის პირები, რომლებიც ამ სატელეფონო საუბრებში ფიგურირებენ.

- სამართალდამცავი უწყებები ამ ეტაპზე მხოლოდ ამ პირების დაკითხვით შემოიფარგლებიან. თუკი დანაშაულის ნიშნები იკვეთება, რატომ არ ტარდება სხვა ტიპის ღონისძიებები?

- დღევანდელი გამოძიება იქცევა ისე, როგორც უნდა მოიქცეს. ის ატარებს საგამოძიებო მოქმედებებს და, თუ გამოიკვეთება ვინმეს ბრალეულობა, მაშინ დაიწყება სისხლისსამართლებრივი დევნა. როგორც ჩანს, ჯერ არ არის გამოკვეთილი ისეთი ნიშნები, რომლებიც გამოძიებას დააყენებს იმ საჭიროების წინაშე, რომ დაიწყოს სისხლისსამართლებრივი დევნა.

- რატომ აღიარებენ ნაციონალები ამ საუბრებს? ეს რა ტაქტიკაა?

- ეს ის ტაქტიკაა, რომ ესენი აცხადებენ, ჩვენ ვინმეს გადატრიალებას კი არ ვაპირებდით, არამედ, თუ ხელისუფლება შემოიჭრებოდა რუსთავი 2-ში, ჩვენ თავს დავიცავდითო. მათ რატომ ავიწყდებათ, რომ ქვეყანა რომ დაიქცეს, სასამართლოს გადაწყვეტილება უნდა აღსრულდეს?! ეს არის სამართლის აღიარებული პრინციპი! მაშინ რა აზრი აქვს სასამართლოს, თუ გადაწყვეტილება არ აღსრულდება?!

უფლებადამცველის აზრით, ნაციონალებს წარმოედგინათ, რომ როგორც თვითონ შეიჭრნენ 7 ნოემბერს ტელეკომპანია იმედში, დღევანდელი ხელისუფლებაც ასე მოიქცეოდა. ხაჭაპურიძე მიიჩნევს, რომ მათ საუბრებში სულ სხვა რამ იგულისხმება.

- რა იგულისხმება, ბატონო შალვა?

- ეს სააკაშვილის საუბრებშიც კარგად ჩანს. მათი რეალური მიზანი და განზრახვა იყო, რუსთავი 2 დაეთმოთ, იქ მომხდარიყო სისხლისღვრა და ეს გადაზრდილიყო სერიოზულ არეულობაში, ამაში ჩართულიყვნენ ბოევიკები და მომხდარიყო სახელმწიფო ხელისუფლების დამხობა.

თუმცა, იურისტის აზრით, ხელისუფლებამ სააკაშვილს ეს რომ წაუყენოს ბრალად, ამას მთელი რიგი საგამოძიებო მოქმედებები სჭირდება.

- საკონსტიტუციო სასამართლოს გადაწყვეტილებაზე რას იტყვით?

- მთელი ცივილიზებული სამყარო თანხმდება ერთ რამეზე, რომ ნებისმიერ სახელმწიფოში უნდა არსებობდეს ცალკე კუნძული, სადაც ადამიანს შეეძლება მივიდეს და მტყუანი და მართალი გაარჩიოს, თუმცა ჩვენ ვხედავთ, რომ ორივე სასამართლო სისტემა, საერთო სასამართლოები და საკონსტიტუციო, ამა თუ იმ პოლიტიკური ძალის ხელში პოლიტიკური იარაღი გახლავთ.

ადვოკატის განცხადებით, ეს ტენდენცია ბოლო პერიოდში საკონსტიტუციო სასამართლომ განსაკუთრებულად გამოამჟღავნა.

- რა გაძლევთ ამის თქმის საფუძველს?

- ის, რომ საკონსტიტუციო სასამართლომ შეაჩერა დაუყოვნებლივ აღსრულების ნორმა. ამან, შესაძლებელია, სამართლებრივი კოლაფსი გამოიწვიოს. იმიტომ, რომ არსებობს უამრავი დავა, რომლებიც დაუყოვნებლივ აღსრულების გარეშე აზრს კარგავს, მაგალითად, უკანონოდ გათავისუფლებული პირის სამსახურში აღდგენა. გამოდის, რომ ამ ადამიანმა უნდა უცადოს სამ ინსტანციას და სამი ინსტანციის შემდეგ შეიძლება იგი აღადგინონ სამსახურში, თუკი მოიგებს საქმეს. ეს ნორმა იმიტომ დევს კოდექსში, რომ სწორედ ასეთი ტიპის დავებზე იქნეს გამოყენებული.

- ზოგადად გამოიყენებოდა ეს ნორმა?

- ძალიან იშვიათად.

იურისტი სამართლებრივ სივრცეში მიმდინარე რეფორმებსაც ეხება და აცხადებს:

- კვლავ გრძელდება ნარკოტიკის და იარაღის ჩადებები. მთელი სისტემაა მომპალი. დამპალი ხის ნაყოფის პრინციპით მუშაობს ყველაფერი! პოლიციამ ჩაიდინა უკანონობა, პროკურატურამ დაუდასტურა და სასამართლომ ამაზე თვალები დახუჭა! ვართ ასეთ კატასტროფულ მდგომარეობაში!

ადვოკატი მიიჩნევს, რომ ამ ყველაფერს სჭირდება რეფორმირება, თორემ ისეთი სიურპრიზები, როგორიც მარიხუანასთან დაკავშირებით გააკეთა საკონსტიტუციო სასამართლომ, კვლავაც მოსალოდნელია.

- 69 გრამი მარიხუანის დაკანონება, არ ვიცი, ამას რა ვუწოდო. ეს ჰოლანდიასაც კი არ დაესიზმრება, ისეთი გადაწყვეტილება მიიღო საკონსტიტუციო სასამართლომ, _ აცხადებს ხაჭაპურიძე.

უფლებადამცველი საგარეჯოს არჩევნების თემასაც შეეხო. მისი თქმით, სახელმწიფო მოხელეს კანონით არ ეკრძალება, არჩევნებამდე გააკეთოს მოწოდება კონკრეტული პირისთვის ხმის მიცემის შესახებ, თუმცა არსებობს ზნეობრივი ნორმები, არსებობს პოლიტიკური ნორმები:

- ის, რაც მე ვნახე, კომპიუტერთან მჯდარი ქალბატონი თავდაცვის მინისტრი საარჩევნო უბანზე, მერე გაირკვა, რომ ვიღაცა ვიღაცის კლასელი და ახლობელია. მოკლედ, საშინელებაა ეს ყველაფერი. ამის შემყურე, სულ ისმის კითხვა – რა გვეშველება?!

შალვა ხაჭაპურიძე აცხადებს, რომ ამ ყველაფრის მიმართ სერიოზული პროტესტის გრძნობა აქვს. „მაშინ წასულიყო მთელი თავდაცვის სამინისტრო იქ და ყველას ერთად დაეჭირა მხარი სასურველი კანდიდატისთვის“, – ამბობს იგი. მისი თქმით, შესაძლოა, ხიდაშელი გადადგეს, მუდმივი ხომ არაფერია ამ ქვეყანაში, მაგრამ ფაქტია, რომ იმ პოლიტიკურმა ძალამ, რომელიც დღეს ხელისუფლების სათავეშია, პოლიტიკური რეფორმების შესახებ უნდა იფიქროს.

- ყველაფერი ძირფესვიანად არის შესაცვლელი და ეს კონსტიტუციიდან უნდა დაიწყონ! აქ კონკრეტულ პიროვნებებზე არ ვსაუბრობ, სისტემაშია პრობლემა. 21-ე საუკუნეში ნარკოტიკს რომ აღარ უნდა უდებდნენ ადამიანებს, ეს რატომ ვერ გაიგეს?! ისევ კომუნისტური, საბჭოთა კავშირის მოდელით მივდივართ! – აცხადებს შალვა ხაჭაპურიძე