„რეზონანსი“: ბიძინა ივანიშვილის შეცდომები // “იგი ყოველთვის ამბობს, რომ პოლიტიკა არ იზიდავს, სხვა ინტერესები აქვს”
„რეზონანსი“: ინტერვიუ ვახტანგ ძაბირაძესთან: „გიორგი კვირიკაშვილი საკადრო ცვლილებებს იწყებს” // „პრემიერი საკუთარი გუნდის ჩამოყალიბებას აპირებს“
„რეზონანსი“: „საქართველოს ამ მონაპოვარს ვერავინ წაართმევს, ვიზალიბერალიზაციას მივიღებთ”
„რეზონანსი“: ინტერვიუ ირაკლი სესიაშვილთან: “გერმანიასთან განსაკუთრებული ურთიერთობისთვის ხელისუფლებამ ბევრი გააკეთა”
„რეზონანსი“: შეაფერხებს თუ არა გერმანიის პოზიცია საქართველოს-თვის ვიზალიბერალიზაციის შემოღებას?
„ახალი თაობა“: ინტერვიუ ადა მარშანიასთან: „ვიზალიბერალიზაციის თემას „ნაციონალური მოძრაობა“ სათავისოდ იყენებს“ // „ნაციონალური მოძრაობის“ რიგითმა წევრებმა ახლა მაინც უნდა დატოვონ ეს კრიმინალური დაჯგუფება“
„ახალი თაობა“: ინტერვიუ კახა კუკავასთან: „დასავლეთმა დაიწყო ბიძინა ივანიშვილის წასვლის მომზადება” // „ვიზალიბერალიზაცია ჩაიშალა”
„ახალი თაობა“: ინტერვიუ ნიკოლოზ მჟავანაძესთან: „საკონსტიტუციო სასამართლო ნაციონალების დაქვემდებარებაშია“ // „საია-მაიებმა თავისუფალი მედიის ცნება გააუპატიურეს“
„ვერსია“: ინტერვიუ რამაზ საყვარელიძესთან: „ნაციონალებისთვის ხელსაყრელი რევოლუციაა!“ // რატომ დაესწრო პაატა ბურჭულაძის პარტიის ყრილობას და გაუშვებს თუ არა რამაზ საყვარელიძეს სამსახურიდან განათლების ახალი მინისტრი
———————
„რეზონანსი“, 07 ივნისი, 2016 წელი
ბიძინა ივანიშვილის შეცდომები
“იგი ყოველთვის ამბობს, რომ პოლიტიკა არ იზიდავს, სხვა ინტერესები აქვს“
თაკო მათეშვილი
პოლიტიკაში მოსვლა, პოლიტიკიდან წასვლა, პროცესებში არაფორმალურად ჩართვა, “ნაციონალურ მოძრაობასთან” კოჰაბიაცია, დემოკრატიული ინსტიტუტების დასუსტება, კომპეტენტური ადამიანების სათანადოდ არდაფასება – ეს იმ შეცდომების არასრული ჩამონათვალია, რომლებიც, პოლიტოლოგებისა და პიარსპეციალისტების აზრით, ბიძინა ივანიშვილმა გასული 4 წლის განმავლობაში დაუშვა. მათი ნაწილი მიიჩნევს, რომ მისი პოლიტიკაში გამოჩენა იმთავითვე უკვე უდიდესი შეცდომა იყო, რადგან ამით მანამდე არსებული დადებითი იმიჯი გაიფუჭა. ხოლო რაკი პოლიტიკაში მოვიდა, მათი აზრით, შემდეგ საქმის შუა გზაში მიტოვება და ისევ წასვლა, კიდევ უფრო დიდი წინდაუხედაბა იყო.
მოგეხსენებათ, ყოფილი პრემიერი პოლიტიკურ ასპარეზზე კვლავ გააქტიურდა – ჯერ საკმაოდ ხმაურიანი წერილი გამოაქვეყნა, შემდგომ სატელევიზიო ეთერში გამოჩნდა, რამაც ასევე დიდი აჟიოტაჟი გამოიწვია, უახლოეს დღეებში კი მისი ტელევიზიებთან შეხვედრაც იგეგმება და მოგვიანებით – პრესის წარმომადგენლებთან.
გარდა ამისა, ის წინასაარჩევნოდ რეგიონებში გასვლასაც აანონსებს. ანუ, “ქართული ოცნების” საარჩევნო კამპანიაში აქტიურად ერთვება.
ჩვენი რესპონდენტებისთვის ეს უკანასკნელი გადაწყვეტილებაც სადავოა. მათი ნაწილი ამბობს, რომ ივანიშვილს ამის სრული უფლება აქვს და არაფერს აშავებს, ნაწილი კი მიიჩნევს, რომ თუკი პოლიტიკაში ასე აქტიურად ყოფნა უნდოდა, არ უნდა წასულიყო და პასუხისმგებლობა არ უნდა აერიდებინა. ხოლო თუ წავიდა, ახლა ამომრჩევლის ხმების მოპოვებას აღარ უნდა ცდილობდეს.
ურთიერთობა “ნაცმოძრაობასთან“
პოლიტოლოგი, პროფესორი იგორ კვესელავა ბიძინა ივანიშვილის უმთავრეს შეცდომად “ნაციონალურ მოძრაობასთან” რბილ მოპყრობასა და მათთან ურთიერთობაში შესვლას ასახელებს. მიიჩნევს, რომ იგი ამ პროცესში ბევრად უფრო ხისტი უნდა ყოფილიყო და რომ საზოგადოებაც სწორედ ამას ელოდა. მისი აზრით, ხელისუფლებაში მოსვლიდან პირველსავე თვეებში მას ყველა დონეზე ფუნდამენტური, სისტემური ცვლილებები უნდა განეხორციელებინა, რაც “ნაციონალური მოძრაობის” ქმედებებისა თუ კადრების “ძირფესვიანად აღმოფხვრას” გულისხმობს.
“ამ პარტიასთან არანაირი ურთიერთობა და კოაბიტაცია არ უნდა დაემყარებინა. მასთან კოაბიტაციამ ძალიან ბევრი ხმა დააკარგვინა. ასე რომ, ეს მისი უპირველესი შეცდომაა. გარდა ამისა, შეცდომად მიმაჩნია ისიც, რომ საქართველოში მეცნიერებს არ უსმენენ. ეს ივანიშვილისგან ძალიან მიკვირს, რადგან თავადაც მეცნიერი კაცია. მგონი, საქართველო მსოფლიოში ერთადერთი ქვეყანაა, სადაც მეცნიერებს არც უსმენენ, არც ელაპარაკებიან და ბევრ შეცდომასაც უშვებენ. მეცნიერმა თეორიულად ბევრი რამ იცის და ეს ცოდნა ხელისუფლებამ პრაქტიკაში უნდა გამოიყენოს. ამას ყველა განვითარებული ქვეყანა აკეთებს. ასე რომ, ჩემი აზრით, ბიძინა ივანიშვილს მეცნიერები მეტად უნდა მიეზიდა და მათთვის რჩევა ეკითხა. ძალიან ბევრი სფეროს სერიოზული მცოდნეები გვყავს, პატრიოტი ხალხი და ისინი გვერდით უნდა ამოეყენებინა”, – აცხადებს “რეზონანსთან” ინტერვიუში იგორ კვესელავა.
რაც შეეხება ბიძინა ივანიშვილის ბოლოდროინდელ გააქტიურებას, პოლიტოლოგი ამბობს, რომ მისი მიზანი ხელისუფლებაში “ნაციონალური მოძრაობის” არმობრუნებაა და ამისათვის ყველა ღონეს იხმარს. მათ შორის, არც ფინანსურ რესურსს დაიშურებს, როგორც ეს წერილში თავადვე აღნიშნა.
პასუხისმგებლობა დატოვებულ მთავრობაზე
საარჩევნო კამპანიაში ჩართვას ივანიშვილის შეცდომად არ მიიჩნევს საზოგადოებრივი კომუნიკაციების მართვის სპეციალისტი არჩილ გამზარდია და ამბობს, რომ მას სრული უფლება ჰქონდა. მისივე თქმით, ამას კანონი არავის უკრძალავს – ნებისმიერ მოქალაქეს შეუძლია, წინასაარჩევნო კამპანიაში ჩაერთოს. მათ შორის ყოფილ პრემიერ-მინისტრსაც. რაც შეეხება იმას, თუ რამდენად სწორი გადაწყვეტილებაა ეს, გამზარდიას თქმით, მიუხედავად იმისა, რომ ივანიშვილი პრემიერი აღარაა, პასუხისმგებლობას მაინც გრძნობს, რადგან ესაა ხელისუფლება, რომელიც მან დატოვა.
სპეციალისტის აზრით, ეს სავსებით მისაღები და ნორმალური დამოკიდებულებაა, რომელიც მისი თვითვალდებულების განცდითაა გამოწვეული.
“იგი ყოველთვის ამბობს, რომ პოლიტიკა არ იზიდავს. მას ვიცნობ, ურთიერთობა მქონია და მაქვს და ვიცი, რომ სხვა ინტერესები აქვს. ამიტომაც უნდა ჩავთვალოთ, რომ ეს თვითვალდებულების განცდაა. ამ პოზიციას მეც ვიზიარებ. გასული 4 წლის განმავლობაში მის წინააღმდეგ აქტიური, მძლავრი საინფორმაციო კამპანიები მიმდინარეობდა, რამაც მის იმიჯს გარკვეული ზიანი მიაყენა. ასევე იმანაც, რომ საზოგადოების მოლოდინი კიდევ უფრო მაღალი იყო, ვიდრე რეალობაა. ამ ყველაფერმა, საერთო ჯამში, მისი რეიტინგი ნაწილობრივ შელახა, თუმცა იგი მაინც იმ ადამიანად რჩება, რომელსაც საზოგადოებისათვის სიტყვა ეთქმის და რომლის სიტყვაც ანგარიშგასაწევია”, – აცხადებს არჩილ გამზარდია.
რაც შეეხება ბიძინა ივანიშვილის პოლიტიკიდან წასვლას, ეს, გამზარდიას თქმით, შეცდომად არ უნდა ჩაითვალოს, რადგან უპრეცენდენტო რამ მოხდა – მმართველი თანამდებობა საკუთარი ნებით ვიღაცამ პირველად დატოვა. იგი ამბობს, რომ ამდენი ხნის განმავლობაში ჩვენთან ასეთი შემთხვევა არ ყოფილა, საზოგადოება ბელადებს იყო მიჩვეული და ყოველთვის ვხედავდით ხოლმე, თუ როგორ ებღაუჭებოდნენ ლიდერები ძალაუფლებას. ამ მხრივ, არჩილ გამზარდიას აზრით, ივანიშვილმა დიდი გარდატეხა მოახდინა. ახლა კი ქვეყანას ჰყავს პრემიერ-მინისტრი, რომელიც ბელადი არაა.
“ისაა ანგარიშგასაწევი, მნიშვნელოვანი ძალაუფლების მქონე ფიგურა, მაგრამ არაა “დიქტატორი” მმართველი, როგორიც მაგალითად, მიხეილ სააკაშვილი იყო. ასე რომ, ძალიან მნიშვნელოვანი გარდატეხა მოხდა და ამ მხრივ მისმა წასვლამ ბევრად უკეთესი შედეგები დატოვა, ვიდრე პრემიერად დარჩენის შემთხვევაში მივიღებდით. ივანიშვილი თანამდებობაზე რომ დარჩენილიყო, საზოგადოებაში იმდენად დიდი მოლოდინი იყო, რომ შესაძლოა, ეს ყველაფერი ბევრად უფრო დიდ აგრესიაშიც გადაზრდილიყო. ამიტომაც, ჩემთვის გასაგებია, თუ რატომ მიიღო აქტიური პოლიტიკიდან წასვლის გადაწყვეტილება. თუმცა, იმ პირებიდან, რომელთა მიმართაც საზოგადოების მხრიდან ინტერესი არსებობს, იგი ერთ-ერთი ყველაზე გამჭვირვალე ადამიანია. მუდმივად საზოგადოებასთან ანგარიშგების რეჟიმშია”, – დასძენს არჩილ გამზარდია.
დაპირებები მოსახლეობას
ბიძინა ივანიშვილის შეცდომების გაცილებით ვრცელ ჩამონათვალს აკეთებს ჩვენთან საუბრისას პოლიტოლოგი ნიკა ჩიტაძე, რომელიც მიიჩნევს, რომ მის პირად შეცდომად უნდა ჩაითვალოს ყველაფერი ცუდი, რაც კი გასული 4 წლის განმავლობაში ქვეყანაში მოხდა, რადგან ძალაუფლების მქონე პასუხისმგებელი პირი სწორედ ის იყო. მისი აზრით, ივანიშვილის შეცდომები პირველ რიგში იმას უკავშირდება, რომ ქვეყანაში დემოკრატია ვერ განვითარდა.
“მაგალითად, როცა იგი პრემიერ-მინისტრი იყო, ადგილობრივი თვითმმართველობის ხელმძღვანელობა ძალადობრივი გზით იქნა შეცვლილი – საქართველოს 53 მუნიციპალიტეტში ადგილობრივი თვითმმართველობის ორგანოებში ძალით შეიჭრნენ და პოლიციამ ეს ძალადობა არ აღკვეთა. როცა მას ამის შესახებ ევროპის საბჭოში ჰკითხეს, განაცხადა, რომ მოსახლეობა გათვითცნობიერებული არ იყო – საპარლამენტო არჩევნებს თვითმმართველობის არჩევნებთან აიგივებდნენ. შესაბამისად, რაკი პარლამენტში ახალი ძალა მოვიდა, მათ ეგონათ, რომ ადგილობრივი თვითმმართველობაც უნდა შეცვლილიყო. მოსახლეობა თუ არ იყო ინფორმირებული, პოლიცია ხომ იყო? მსგავსი ქმედებები, ჩემი აზრით, ხელისფლების მფარველობით ხორციელდებოდა. იგივე შეიძლება ითქვას 2013 წლის 8 თებერვლის ინციდენტზეც, როცა ე.წ პოლიტპატიმრები პოლიტიკურ ოპონენტებს საჯარო ბიბლიოთეკის წინ გაუსწორდნენ. კორცხელის ინციდენტი და ა.შ. ეს ყველაფერი მისი შეცდომაა, რადგან ჯერ პრემიერ-მინისტრი იყო, შემდეგ კი არაფორმალური მმართველი. მას ამ პრობლემების მოგვარებაზე პასუხისმგებლობა ეკისრებოდა”, – აცხადებს ნიკა ჩიტაძე.
ასევე, პოლიტოლოგის აზრით, შეცდომა იყო ისიც, რომ ივანიშვილი ხალხს რუსეთთან ურთიერთობის დალაგებას ჰპირდებოდა და ამბობდა, რომ რუსეთს ჩვენი ტერიტორიების მიტაცება მიზნად არ ჰქონია. ეს რომ ტყუილია, ჩიტაძის აზრით, არაერთხელ დადასტურდა, რადგან საოკუპაციო ხაზის გადმოწევა ფაქტობრივად მუდმივ რეჟიმში მიმდინარეობს.
შესაბამისად, რუსეთთან მიმართებაში გატარებულ პოლიტიკასაც იგი ყოფილი პრემიერის შეცდომად მიიჩნევს. გარდა ამისა, შეუსრულებელ დაპირებებს – გახმაურებული საქმეების გამოძიებასთან დაკავშირებით, ეკონომიკურ ჩავარდნებს, ლარის გაუფასურებას და ა.შ. ნიკა ჩიტაძე ივანიშვილს მიაწერს.
“მე მისი პოლიტიკაში მოსვლა მიმაჩნია შეცდომად. პატივსაცემი ადამიანი იყო, როგორც მეცენატი, რომელიც არ ჩანდა, მაგრამ გარკვეულ საქმეებს აკეთებდა. მაღალი რეიტინგი ჰქონდა. ამას 2012 წლის არჩევნების შედეგებიც ადასტურებს, როცა ხალხმა ივანიშვილის ხათრით ხმა “ქართულ ოცნებას” მისცა. დღეს კი მოსახლეობა ყველა წარუმატებლობას ივანიშვილის სახელს უკავშირებს. მისი პრემიერ-მინისტრობის დროსაც ასე იყო და ახლაც ასეა. ეს ბუნებრივიცაა, რადგან მოსახლეობას დაპირებები მან მისცა და მასვე უნდა შეესრულებინა”, – აცხადებს ნიკა ჩიტაძე.
„რეზონანსი“, 07 ივნისი, 2016 წელი
ინტერვიუ ვახტანგ ძაბირაძესთან: „გიორგი კვირიკაშვილი საკადრო ცვლილებებს იწყებს” // „პრემიერი საკუთარი გუნდის ჩამოყალიბებას აპირებს“
ლიკა ამირაშვილი
“პოლიტსაბჭოში ახალი ხალხის შეყვანა გიორგი კვირიკაშვილის ინიციატივით მოხდა – ის ნელ-ნელა საკადრო ცვლილებების განხორციელებას იწყებს”, – განაცხადა “რეზონანსთან” საუბრისას კონსტიტუციონალისტმა ვახტანგ ძაბირაძემ, რომელმაც ასევე ახალი პოლიტიკური ძალების შანსებზე ისაუბრა მომავალ საპარლამენტო არჩევნებზე.
როგორც ვახტანგ ძაბირაძემ ჩვენთან საუბრისას აღნიშნა, პრემიერ-მინისტრი საკუთარი გუნდის ჩამოყალიბებას იწყებს.
ვახტანგ ძაბირაძე: როგორც ჩანს, გიორგი კვირიკაშვილი საკუთარი გუნდის ჩამოყალიბებას იწყებს – პოლიტსაბჭოში ახალი კადრების შეყვანა სწორედ მისი ინიციატივით მოხდა. ნელ-ნელა საკადრო ცვლილებების განხორციელებას იწყებს. ამ შემთხვევაში ყველაზე უმტკივნეულო განათლების მინისტრის ცვლილება გახდა. თამარ სანიკიძის გადაყენების მიზეზები არ დაუსახელებია, ზოგადად საქართველოში, ასეთი გადაწყვეტილებების გამჟღავნებისას ყოველთვის კეთდება განცხადება, რომ ყველაფერი კარგადაა, თუმცა ახალი სისხლია საჭირო. ასეთია მინისტრის გადაყენებისას ტრადიციული კომენტარი, სხვას არც უნდა ველოდოთ. იმის გამო, რომ სულ მალე “რესპუბლიკელი” მინისტრები მთავრობას დატოვებენ, შესაძლოა მათ მიმართებაში სხვაგვარი გამოსვლა ჰქონდეს, თუმცა დანარჩენ შემთხვევაში ყოველთვის ასეთი კომენტარებია ხოლმე.
მინისტრის გაშვებაში დიდ პრობლემას ვერ ვხედავ, აუცილებელი არ არის, რომ რომელიმე მინისტრის წასვლა კრიტიკას უკავშირდებოდეს. ზოგადად მეთოდი ასეთია, იცვლება პრემიერი და მოჰყავს ახალი გუნდი.
საქართველოში განათლების სისტემა კრიტიკას ვერ უძლებს, თუმცა არ მგონია, ამაში ლომის წილი თამარ სანიკიძეს მიუძღოდეს. იმის თქმა, რომ სანიკიძის წინამორბედები სასწაულებს აკეთებდნენ, სწორი არ არის. განათლების სისტემაში ერთადერთ მიღწევად, შესაძლოა, ერთიანი ეროვნული გამოცდები ჩაითვალოს. ერთადერთია, რომელმაც გაამართლა. დანარჩენი რეფორმები ბნელ ოთახში რაღაცის ძებნას ჰგავს. პრემიერმა როგორც განაცხადა, 4-პუნქტიანი გეგმა აქვთ, რასაც სწორედ ის ადამიანი სჭირდება, ვინც მინისტრად დანიშნა.
- დეპუტატი თამაზ მეჭიაური არჩევნებში მონაწილეობას დამოუკიდებლად აპირებს და საზოგადოებას საკუთარი გუნდიც წარუდგინა. როგორც გუნდის წევრები აცხადებენ, პარლამენტში მეორე ადგილზე გასვლას აპირებენ. მათ შანსებს როგორ შეაფასებდით?
- საქართველოში ძალიან ბევრი პოლიტიკური ძალაა და კიდევ ერთი დაემატა. არ მგონია, ამ გუნდს რამე წარმატებისა და ბარიერის გადალახვის შანსი ჰქონდეს. ვთვლი, რომ პარლამენტის წინ ზარზეიმით დაფუძნებული ვაშაძის ახალი პოლიტიკური ორგანიზაცია და მეჭიაურის გუნდიც 5-პროცენტიანი ბარიერის მიღმა დარჩენისთვის არიან განწირულნი. მათ წარმატებაში ეჭვი მეპარება, თუმცა არ გამოვრიცხავ, რომ რომელიმე რეგიონში მათმა მაჟორიტარობის კანდიდატმა გაიმარჯვოს.
- ბიძინა ივანიშვილის მერ გამოქვეყნებულ ვრცელ წერილს სატელევიზიო ინტერვიუ მოჰყვა, რამაც საზოგადოებაში დიდი რეზონანსი გამოიწვია…
- ინტერვიუმ საკმაოდ მძიმე შთაბეჭდილება დატოვა, ფაქტობრივად მთელი საათი კინკლაობა იყო, რასაც ინტერვიუს ნამდვილად ვერ დავარქმევ. როგორც ბიძინა ივანიშვილმა ინტერვიუმდე განაცხადა, წერილთან დაკავშირებით დაზუსტებები იქნებოდა. თუმცა სულ სხვა მიმართულებით წავიდა. მთელი ინტერვიუს განმავლობაში ჟურნალისტი კითხვებს სვამდა, ივანიშვილი კი აპროტესტებდა. ასეთი ვითარებაში ჟურნალისტი კარგად უნდა მოემზადოს. მათი შეთანხმება ასეთი იყო, რომ ინტერვიუ წერილთან დაკავშირებით იქნებოდა. ახსენეს პანორამა, საყდრისი, რაზეც საზოგადოებისთვის ივანიშილის პოზიცია უკვე ცნობილია. ამ საკითხებზე ახალს ივანიშვილის არაფერს არ იტყოდა, ამიტომაც ჟურნალისტი ჯობდა იმ შეთანხმების ფარგლებში დარჩენილიყო. რა თქმა უნდა, თუნდაც საყდრისთან დაკაშირებით ივანიშვილის პოზიცია ჩემთვის მისაღები არ არის, თუმცა ამ თემაზე ახალს არაფერს არ იტყოდა.
წერილი უნაკლო ნამდვილად არ არის, ამიტომ შესაძლებელი იყო, უფრო მწვავე კითხვები დასმულიყო, მოლაპარაკების ფარგლებშიც დარჩებოდა და მწვავე კითხვებიც იქნებოდა.
- ყოფილი პრემიერი თავის წერილში ძალიან დიდ ადგილს უთმობს “ნაციონალური მოძრაობის” კრიტიკას. რამდენად სწორი იყო “ნაციონალებისთვის” ამდენი დროის დათმობა?
- სამწუხარო რეალობა ასეთი გვაქვს, რომ არჩევანი “ნაციონალურ მოძრაობასა” და “ქართულ ოცნებას” შორის გვიწევს. ამ 4 წელიწადში ახალი რეალური ძალა არ გამოჩნდა და ისევ ამ პოლიტიკურ გარემოში ვრჩებით. უმჯობესი იყო, “ოცნებას” მის “კოლოსოლურ” მიღწევებზე ესაუბრა, თუმცა ყველაზე მარტივი გზა აირჩიეს, რომელიც საქართველოში 90-იანი წლებიდანაა აპრობირებული. იმ პერიოდშიც ასეთი დილემის წინაშე ვიდექით, შევარდნაძე თუ აბაშიძე. დღეს “ოცნება” მოსახლეობას იგივე დილემის წინაშე აყენებს, ჩვენ მხარს თუ არ დაგვიჭერთ, მაშინ “ნაციონალური მოძრაობა” მოვაო. მერჩივნა, წერილში პრობლემებზე ყოფილიყო საუბარი, იმაზე, თუ რა მოხდა 4 წელიწადში და მომავალში რას ვაპირებთ. როგორც ჩანს, არავინ არაფერს არ აპირებს, დაპირებები არ იქნება. იქნება დაშინება, არ მოგვცემთ ჩვენ ხმას და მოვა “ნაციონალური მოძრაობაო”, ესაა წერილის მთელი დედააზრი.
„რეზონანსი“, 07 ივნისი, 2016 წელი
“საქართველოს ამ მონაპოვარს ვერავინ წაართმევს, ვიზალიბერალიზაციას მივიღებთ“
ეკატერინე ბასილაია
(შემოკლებით)
საქართველოსთვის უვიზო მიმოსვლის დაწესება ფერხდება, ყველაზე დიდი მოწინააღმდეგე გერმანიაა ამას გერმანელი პოლიტიკოსები უკვე ღიად საუბრობენ და ერთ-ერთ მიზეზად ქართველი კრიმინალების გერმანიაში გააქტიურებას ასახელებენ.
(…)
“სიტყვას უკან ვერ წაიღებენ!”
ევროინტეგრაციის კომიტეტის თავმჯდომარე ლევან ბერძენიშვილი გერმანიიდან ქართველ კრიმინალებზე გაკეთებული განცხადებებით და ვიზალიბერალიზაციის შესაფერხებლად ამ არგუმენტის გამოყენებით უკმაყოფილებას არ მალავს. მისი თქმით, გერმანელი პოლიტიკოსების არგუმენტები, რომ უვიზო მიმოსვლის შემდეგ ქართველი კრიმინალების რიცხვი გაიზრდება, უსაფუძვლო, დისკრიმინაციული და მიუღებელია. სურს, იმედი ჰქონდეს, რომ პოლიტიკოსების განცხადების გამო ვიზალიბერალიზაცია არ შეფერხდება, თუმცა რა იქნება, პროგნოზის გაკეთება მაინც უჭირს.
“ყველაზე უკეთ ვიზას გერმანიის საელჩო იძლევა და ამიტომაც მათ ლაპარაკში არანაირი ლოგიკა არ არის. საქართველოს მოქალაქე შეიძლება ჩავიდეს ვიზით და მოითხოვოს თავშესაფარი, ასევე შეიძლება ჩავიდეს უვიზოდ და მოითხოვოს თავშესაფარი. ლოგიკა მხოლოდ ისაა, რომ იქნებ არ ვაწყენინოთ რომელიმე დიდ ქვეყანას, მაგრამ ამ ლაპარაკის მიღება ჩვენ არ შეგვიძლია. ჩვენ უნდა მივიღოთ ის, რასაც დაგვპირდნენ. დავალება შევასრულეთ და ევროპა უნდა იყოს სიტყვის შემსრულებელი. დაველოდებით 10 ივნისს, როდესაც კორეპერის მეორე შემადგენლობა, ანუ მინისტრების დონეზე უნდა გადაწყდეს ეს საკითხი. თუ არ გადაწყდება დადებითად, ეს არ ნიშნავს, რომ საქართველოს უარი ეთქვა. სიტყვას უკან ვერ წაიღებენ! საქართველოზე ითქვა ის, რომ ჩვენ ყველაზე უკეთ მომზადებულები ვართ. პოლიტიკურად ბევრი ლაპარაკი შეიძლება, პოლიტიკურად კორექტული თუ არ იქნები, გერმანიაზეც ისეთი რაღაცების ლაპარაკი შეიძლება, რომ ეს ქვეყანა საერთოდ არ უნდა იღებდეს არაფერში მონაწილეობას, მაგრამ ხომ აღიარეს თავისი დანაშაული, ხომ გამოისყიდეს, ბევრი კანონი მიიღეს! თუ ვიზის ამბავში რამე ნაკლი გვქონდა, უნდა ეთქვათ! გვეუბნებიან, რომ უნაკლოა და კარგია. ახლა კი ლაპარაკი იმაზე, რომ ქართველები თვალში არ მომდის, ეს მისაღები არ არის”, – ერთგვარი გაღიზიანებით აცხადებს ლევან ბერძენიშვილი.
არადა, ორი დღის წინ დაბეჭდილ სტატიაში სათაურით – გერმანია უარს ამბობს საქართველოსთვის ვიზალიბერალიზაციის მინიჭებაზე, აღნიშნულია, რომ უფრო და უფრო მეტი ქართული დაჯგუფება გერმანიაში ძარცვით არის დაკავებული. თუმცა, ამის მიუხედავად, ევროკავშირს სურს, საქართველოსთვის უვიზო რეჟიმი დააწესოს.
გერმანიისთვის კი ეს დიდი საფიქრალია და, ამდენად, ამ სავარაუდო გადაწყვეტილებისადმი წინააღმდეგობა იზრდება.
(…)
ლევან ბერძენიშვილი ამბობს, რომ ეს კრიტიკული განცხადებები მნიშვნელოვანია იმ თვალსაზრისით, რომ ჩვენ 28 ქვეყნიდან 65%-იანი მხარდაჭერა მაინც უნდა მივიღოთ, რაც აუცილებლად ევროპის დიდი ქვეყნების მხარდაჭერას ნიშნავს. ამიტომაც გერმანიის პოზიციას მნიშვნელობა აქვს, თუმცა ამბობს იმასაც, რომ ქართველ კრიმინალებზე ეს პოზიცია ახალი არ არის, ამაზე კრიტიკა გერმანიისა და საფრანგეთის შს სამინისტროებიდან გასულ წლებშიც იყო და ისინი არც გასულ წელს ეთანხმებოდნენ ვიზალიბერალიზაციას, ეს ყველაფერი მშვენივრად იცოდა ევროკომისიამ, რომელშიც გერმანიის წარმომადგენელიც არის და რომელმაც საქართველოს მიერ ვიზალიბერალიზაციის ყველა ეტაპის შესრულება დადებითად შეაფასა და ევროპის პარლამენტსა და ევროპის კავშირის საბჭოს შესთავაზა, რომ საქართველოს ვიზალიბერალიზაცია მიეცეს.
“ერთი რამ შემიძლია გითხრათ, ჩვენ ჩვენი ხალხისა და ევროპელი კოლეგების წინაშე მართლები ვართ, ჩვენ არაფერი დაგვიშავებია, ყველაფერი 5-იანზე შევასრულეთ. გასაგებია, საქართველო იდეალური ქვეყანა არ არის, მაგრამ ჩვენ ახლა ევროკავშირის წევრობას ხომ არ ვითხოვთ, ვითხოვთ უვიზო მიმოსვლას. ყველა არგუმენტი, რომ თურმე საქართველოში ბანდიტები ყოფილან, კრიმინალური მენტალიტეტის ქვეყანაა, ეს დისკრიმინაციული არგუმენტებია და არაფერს არ ნიშნავს. იმიტომ, რომ საქართველოში “ვეფხისტყაოსანიც” დაიწერა და ადამიანებსაც კლავენ. ასევე გერმანიაშიც, ბახიც იყო და საკონცენტრაციო ბანაკებიც. ჩვენ ყველა ამოცანა შევასრულეთ, პირნათლად ვართ და ჩვენ ვითხოვთ იმას, რასაც დაგვპირდნენ”, – ამბობს ლევან ბერძენიშვილი. მისი თქმით, ასეთივე უარყოფითი აქტიური პოზიცია აქვს საფრანგეთის შს სამინისტროს, რომელიც ახლა დუმს, რადგან გერმანული მხარე ლაპარაკობს. თუ გერმანული მხარე დაწყნარდება, შეიძლება ფრანგული მხარე ალაპარაკდეს და თვლის, რომ საქართველოს მთვარობის ამოცანაა, ჩვენი წარმომადგენლებით “დავბომბოთ” ევროპა.
“ჩვენი წარმომადგენლებით უნდა დავბომბოთ იქაურობა, უნდა ვიმუშაოთ. ჩვენი პრემიერი შეხვდა საფრანგეთის პრეზიდენტს, მიიღო რწმუნება, რომ ის ეტყვის თავის შს მინისტრს. ასევე ქალბატონი გერმანიის კანცლერი სულ გვპირდებოდა, რომ შეფერხება არ გვექნებოდა. ვიზიტები კიდევ საჭიროა. ახლა წავა დავით უსუფაშვილი და შეეცდება, ჩვენი კოლეგები დაარწმუნოს. ევროპაში ყველა საკითხი რთულად წყდება და ეს ნუ გაგიკვირდებათ. ადვილი მხოლოდ ეს-ენ-გეში შესვლაა, რაც მოახერხეს, ჩვენდა სამარცხვინოდ, და დღეს იგივე ხალხი, ვინც ეს ჩაიდინა, მათ შორის ისიც, ვინც დარბაზში შემორბოდა, ჩემი ხმა არ დააკლდესო რუსეთს, დღეს ტელევიზორში ზის და გვიხსნის, რომ თურმე ხელისუფლების ბრალია, ევროპა ასე რომ გვიყურებს. ეს უსამართლობაა. თუ ბავარიაში ვინმემ ქართველი კრიმინალი დაინახა, ისიც დაინახოს, რომ 26 წელია იქვე ქართული სიმფონიური ორკესტრი ემსახურება. ვინმე სტალინი თუ დაინახა, თავად ვინ ჰყავდათ, ისიც გაიხსენონ. ეს დისკრიმინაციაა.
დანაშაულს სამშობლო არ აქვს. როგორ გგონიათ, კრიმინალს ვიზის საკითხი უშველის?! კარგად ვერ გავიგეთ, რას ამბობენ. როდესაც ლოგიკა არ არის, ჩვენ მტკიცედ უნდა დავდგეთ და ჩვენი მოვითხოვოთ. ამას ვაკეთებთ კიდეც. იმედი მაქვს და ყველამ, ვიცით, თუ გააჯანჯლებენ და გადადებენ, თორემ საქართველოს ამ მონაპოვარს ვერავინ ვერ წაართმევს და საქართველო ვიზალიბერალიზაციას მიიღებს… ცალკეული პოლიტიკოსებისგან არასერიოზული არგუმენტები გავიგონე და არ მიკვირს. პოლიტიკური კლასი მთელ მსოფლიოში დაბალია და რა სულელური მსჯელობა გამიგონია საქართველოს პარლამენტში, ზუსტად ისეთი სულელური მსჯელობა იყო ბუნდესტაგში დღეს და გუშინ”, – დასძენს ლევან ბერძენიშვილი.
დეპუტატის მოლოდინია, რომ ევროკავშირი ჯერ მიიღებს იმ კანონს, რომელიც ვიზალიბერალიზაციის იოლად მოხსნის მექანიზმს გულისხმობს და მერე მოგვცემენ ვიზას.
“უბრალოდ, მცდელობაა, რომ შეფერხებას გამართლება მოუძებნონ“
საქართველოს საკითხის საბოლოო გადაწყვეტას ვიზალიბერალიზაციის სწრაფი შეჩერების მექანიზმის დაწესების შემდეგ ელოდება ევროპული კვლევების ცენტრის ხელმძღვანელი კახა გოგოლაშვილიც. მისი თქმით, ამ ეტაპზე გერმანიასა და საფრანგეთში არ არის მხარდაჭერა იმის, რომ მესამე სამყაროს ქვეყნებს უვიზო მიმოსვლა მიეცეთ. პლუს ამ უარყოფით დამოკიდებულებას იზიარებს ბელგიაც და მათ სურთ ჰქონდეთ მექანიზმი, რომ საქართველოს, უკრაინას, კოსოვოსა და თურქეთს მიგრაციის დიდი ნაკადის ან სხვა გართულების შემთხვევაში ვიზალიბერალიზაცია სწრაფად შეუჩერონ. იგი თვლის, რომ დიდი ალბათობით, ჯერ ამ კანონის მიღება მოხდება და შემდეგ გადაწყდება ჩვენი საკითხი.
“უვიზო მიმოსვლის მიცემა-არმიცემა გერმანიაში პოლიტიზებული თემა გახდა და ამიტომაც არის აზრთა სხვადასხვაობა. მარტო საქართველოს საკითხი რომ წყდებოდეს, არ იქნებოდა ასეთი მძაფრი დებატები, მაგრამ აქ უკრაინის, კოსოვოსა და თურქეთის ვიზალიბერალიზაციის საკითხიც იხილება და ინტერესი და დებატები ამიტომაცაა დიდი. ეს საკითხი მნიშვნელოვან ფაზაშია შესული და ამ საკითხს ასე მარტივად ვერ დახურავენ, იმის გამო, რომ თურმე ქართველი კრიმინალები არსებობენ ევროპაში. ამის შესახებ ინფორმაცია მათ ჰქონდათ და თუ ეს რეალური მიზეზია, შეეძლოთ, ეს პროცესი წინა ეტაპზე შეეჩერებინათ. კრიმინალები ახლა არ გამრავლებულან. ამიტომ ეს უბრალოდ მცდელობა, რომ შეფერხებას გამართლება მოუძებნონ”, – ამბობს კახა გოგოლაშვილი და დასძენს, რომ ჯერ დრო ისევ არის და გადაწყვეტილების მიღება 8 ივლისამდე, ევროპარლამენტის არდადეგებამდე უნდა მოესწროს.
„რეზონანსი“, 07 ივნისი, 2016 წელი
ინტერვიუ ირაკლი სესიაშვილთან: “გერმანიასთან განსაკუთრებული ურთიერთობისთვის ხელისუფლებამ ბევრი გააკეთა”
თიკო ოსმანოვა
პარლამენტის თავდაცვისა და უშიშროების კომიტეტის თავმჯდომარე ირაკლი სესიაშვილი ვიზალიბერალიზაციის პროცესის შეფერხებას უკრაინას უკავშირებს. მისი თქმით, კოსოვოს, საქართველოს, თურქეთის და უკრაინის საკითხის განხილვა ერთ პაკეტში არ უნდა ხდებოდეს. გერმანიის მხრიდან კრიმინალური შემთხვევების გამო ვიზალიბერალიზაციის საკითხის გადადებას დეპუტატი არასწორად მიიჩნევს და ამბობს, რომ სწორედ ამასთან დაკავშირებით უახლოეს ხანში გერმანიას პრეზიდენტი, პრემიერი და პარლამენტის თავმჯდომარე ეწვევიან.
ირაკლი სესიაშვილი: ყოველგვარ პოლიტიკურ სპეკულაციას თავი რომ დავანებოთ, გეტყვით, საქართველომ ყველა ვალდებულება შეასრულა და არ არსებობდა სხვა რამე წინაპირობა. სამწუხაროდ, გერმანიამ რაც დაიწყო, ეს არასწორად მიმაჩნია. ის ჩვენი ქვეყნის სტრატეგიული პარტნიორია, ძალიან კარგი მეგობარია და დარწმუნებული ვარ, ის პრეტენზიები, რასაც გერმანია აყენებს, უბრალოდ საბაბია. რეალურად ვიზალიბერალიზაციის საკითხის გადახედვა უკავშირდება დროებითი მექანიზმის შეჩერების ამოქმედებას და ეს ეხება არა მხოლოდ საქართველოს, არამედ ყველა ქვეყანას, მათ შორის შეერთებულ შტატებსაც და კანადასაც. ის საბაბი, რომ თითქოს კრიმინალური რისკების გამო გერმანია თავს იკავებს, საქართველოსთვის ვიზალიბერალიზაციის პროცესს მხარი დაუჭიროს, არადამაჯერებელი არგუმენტია. ჩვენ, როდესაც ვიზალიბერალიზაციაზე დავიწყეთ მუშაობა, რამე მსგავსი წინაპირობა არ ყოფილა, მეტიც კრიმინალთან დაკავშირებით, რომელიც თითქოს გერმანიას აწუხებს, ჩასული იყო შინაგან საქმეთა მინისტრი, რომელმაც ჩვენი რეადმისიის საკითხები გააფართოვა, ამიტომ არა მგონია, ეს საკითხი მთავარი არგუმენტი და მიზეზი იყოს.
მეტიც, კრიმინალს არც ეთნიკური და არც მოქალაქეობრივი წარმომავლობა არ გააჩნია. სამწუხაროდ, გერმანულ მედიაში ქართულ კრიმინალზე საუბარმა შეურაცხყოფა მიაყენა იმ ბევრ ქართველს, რომელიც კანონმორჩილად იმყოფება გერმანიაში. ბევრი მათგანი ძალიან წარმატებულია, მიუნხენში ქართული ორკესტრიც კი არის, რომელსაც ძალიან დიდი წარმატებები აქვს. ასეთი მიდგომა არასწორია. თუ კრიმინალი მართლაც ხდება, საუბარია 400 შემთხვევაზე, გერმანიის სტატისტიკის მიხედვით ძალიან ცოტაა.
- თუმცა, გასული წლის კრიმინალური სტატისტიკის მიხედვით, ქართველები გერმანიაში ძალიან ბევრი არ არიან, მაგრამ მათ მიერ ჩადენილი დანაშაული სხვებზე უფრო მეტია…
- არა, ასე არ არის. 400-ზეა საუბარი, რაც გერმანიის კრიმინალური სტატისტიკის თვალსაზრისით, ძალიან ცოტაა. ყველაფერს, რომ თავი დავანებოთ, ამაზე არანაირი წინაპირობა არ ყოფილა და ასე ჰაერიდან მოტანილი საკითხი არ უნდა გახდეს ვიზალიბერალიზაციის პროცესის შემაფერხებელი. მეორე, თუნდაც დავუშვათ, რომ ზოგი საქართველოს მოქალაქე კრიმინალით არის დაკავებული, რა დააშავეს ჩვენმა კეთილსინდისიერმა მოქალაქეებმა?! რატომ უნდა დაისაჯოს სხვა და შეეზღუდოს უფლებები. ასეთი არგუმენტები დაუჯერებელია. ამიტომ, გერმანიაში საქართველოს პრეზიდენტი, პრემიერი, პარლამენტის თავმჯდომარე დამოუკიდებელ ვიზიტებს გეგმავენ და დარწმუნებული ვარ, ჩვენი ხელისუფლება შეძლებს გერმანიის დარწმუნებას, რომ არამართლზომიერია ეს არგუმენტი და თუ დამატებით რამე გარანტიებია საჭირო, ჩვენ ამაზეც მივდივართ. ვფიქრობ, აქ რეალობა სხვა რამეა. მე პირადად ამას ვუკავშირებ საერთო გეოპოლიტიკურ სიტუაციას, რაც შექმნილია რეგიონში და ის პრობლემები, რომელიც უფრო მეტად აქვს უკრაინას და თურქეთს.
- ანუ, ჩვენი, უკრაინის, კოსოვოს და თურქეთის საკითხი მაინც ერთ პაკეტში იხილება?
- მიმაჩნია, რომ არასწორი მიდგომაა – უკრაინა, საქართველო, თურქეთი და კოსოვო ერთ ქვაბში იხარშებიან. არ არის ინდივიდუალური მიდგომა. ნამდვილად ვერ დაველოდები იმას, უკრაინა შეასრულებს თუ არა თავის ვალდებულებას.
- ვიზალიბერალიზაციის პროცესის შეჩერება საქართველოს ხელისუფლების პასიურობის გამო ხომ არ მოხდა?
- არ მინდა, საზოგადოებას ისეთი შთაბეჭდილება დარჩეს, თითქოს გერმანია ჩვენ გვბლოკავს. ასე ნამდვილად არ არის, ის ჩვენი ერთ-ერთი საიმედო პარტნიორია. თუმცა, თავისთავად ცხადია – გერმანიას თავის ინტერესი აქვს და არ მალავს რუსეთთან სტრატეგიული თანამშრომლობის მნიშვნელობას და ცხადია, ის თავის ინტერესებიდან გამოდის. რაც შეეხება იმას, ხელისუფლებამ ხომ არ დააკლო რამე ურთიერთობას?! – პირდაპირ გეტყვით, წინა ხელისუფლებისგან განსხავებით, როდესაც გერმანიისგან მტრის ხატის შექმნეს, ჩვენმა ხელისუფლება ურთიერთობის ტრანსფორმირება მოახდინა.
შეგახსენებთ, რომ ირაკლი ღარიბაშვილი რამდენჯერმე შეხვდა ანგელა მერკელს და კანცლერმა ყოფილ პრემიერს პირადად უთხრა, რომ თავად იგი და გერმანია იქნება ერთ-ერთი ლოკომოტივი საქართველოს ინტერესების მხარდასაჭერად. ეს არის მისი სიტყვები, ამიტომ საქართველოს ხელისუფლების რამე ხარვეზებზე საუბარს თუ ვინმე დაიწყებს, ის პოლიტიკურად სპეკულირებს. ძალიან ბვერი ჩადო ხელისუფლებამ იმისთვის, რომ გერმანიასთან განსაკუთრებული ურთიერთობა გვქონოდა და აგერ თვის ბოლომდე სამი უმაღლესი პოლიტიკური ვიზიტებია დაგეგმილი.
- საქართველოში ანგელა მერკელის ვიზიტი რატომ არ შედგა აქამდე?
- ამაზეც ჯერ კიდევ ირაკლი ღარიბაშვილის დროს იყო საუბარი. კიდევ ერთხელ ვიმეორებ, ჩვენ ყველა ვალდებულება 100%-ით შევასრულეთ. ამას ადასტურებს მთელი საერთაშორისო საზოგადოება, ევროპა და ამას ადასტურებენ მათ შორის გერმანელებიც. ორი დღის წინ ჩამოვედი და პირდაპირ მითხრეს, რომ საქართველომ 100%-ით შეასრულა თავის ვალდებულება. გერმანია ევროკავშირს სთავაზობს შეჩერების მექანიზმთან დაკავშირებით მიიღოს გადაწყვეტილება, რომელიც ეხება არამხოლოდ საქართველოს არამედ შეერთებულ შტატებსაც და ყველა იმ ქვეყანას, რომელსაც ევროკავშირთან უვიზო მიმოსვლა აქვს.
- ანუ მიგრაციის პოლიტიკის გამკაცრებას გულისხმობთ?
- დიახ, ამიტომ ერთადერთი, რაც არ მომწონს მიდგომაში, არის ის, რომ ამ ვითარებაში განგვიხილავენ უკრაინას, თურქეთთან და კოსოვოსთან ერთად.
- ქვეყანაში მიმდინარე პროცესებიც ხომ არ აფერხებს ამას?
- პირდაპირ გეუბნებით, უნამუსობაა, თუ რომელიმე პოლიტიკური ძალა არგუმენტად მოიყვანს რამე შიდა პოლიტიკურ ხარვეზებს, ან დემოკრატიის ხარვეზებს. ეს არის იაფფასიანი პოლიტიკური სპეკულირება. იმიტომ, რომ რეალურად ამ მიმართებით ერთი კითხვაც კი არ დასმულა არსად. ეს ამბავი უფრო მეტად უკავშირდება უკრაინის საკითხს, ვიდრე საქართველოს. ამიტომ იმედს გამოვთქვამ, უახლოეს ხანში შევძლებთ გერმანიასთან სიტუაციის გარკვევას და მოვახერხებთ იმას, რომ საქართველოსთან მიმართებაში ყველა პრეტენზია მოხსნილი იყოს.
- ბოლოს-ბოლოს, როდის შეძლებს საქართველოს მოსახლეობა ევროპაში უვიზო მიმოსვლას?
- აქამდე მოლოდინი გვქონდა, რომ ივლისიდან უნდა ამოქმედებულიყო. ეს საკითხის დღის წესრიგში რჩება, თუმცა, როგორც გითხარით, გერმანიის ინიციატივაა, რომ შეჩერების მექანიზმი იქნეს შემუშავებული, რასაც თავად გერმანიის ვარაუდით, სექტემბერში მიიღებენ, ამიტომ გამიჭირდება, დამატებით რამე გითხრათ.
„რეზონანსი“, 07 ივნისი, 2016 წელი
შეაფერხებს თუ არა საქართველოსთვის გერმანიის პოზიცია ვიზალიბერალიზაციის შემოღებას?
ნინო ქეთელაური
გერმანიის წამყვანი პოლიტიკური ძალები საქართველოსთვის ვიზალიბერალიზაციის დაწესების წინააღმდეგ გამოდიან. როგორც გერმანული გამოცემა “ბილდი” წერს, შესაბამისი განცხადებები ფრაქცია ქრისტიან-დემოკრატიული კავშირისა და ქრისტიან-სოციალური კავშირის ბლოკში გაკეთდა, რომლის თავმჯდომარეც გერმანიის კანცლერი ანგელა მერკელია. (…)
როგორ ფიქრობთ, გერმანიის წამყვანი პოლიტიკური ძალების პოზიცია გავლენას იქონიებს თუ არა საქართველოსთვის ვიზალიბერალიზაციის დაწესებაზე? – ამ კითხვით “რეზონანსმა” საზოგადოების წარმომადგენლებს მიმართა.
თაკო ჩარკვიანი (პუბლიცისტი): “მე ვაკვირდები, როგორც ჟურნალისტი და მგონია, რომ გარკვეულწილად რუსული ლობი კარგად მუშაობს გერმანიში. შეიძლება ინფორმაციას აწვდიან ისინი და ეუბნებიან – ნახეთ, რა მდგომარეობაა საქართველოში, იგივე სასამართლო სისტემა, “რუსთვი 2″ და აშ.
ძალიან ბევრი კითხვის ნიშანია, რომელიც ევროპაში ძალაუნებურად იწვევს, რომ არ შეგიშვან ევროპულ ოჯახში. ამის ხელშემწყობი ვიცით, რომ ძალიან ბევრი გვყავს. ამიტომაც ვამბობდით, რომ ჩვენმა ხელსუფლებამ ზედმიწევნით სწორად უნდა გაიაროს ეს გზა. სწორედ ამაშია საქმე, რომ არ გადიან ამ გზას ფრთხილად. ევროკავშირში წამოდგება ვიღაც ფეხზე და იტყვის – დავფიქრდეთ აბა, ეს ქვეყანა თავისი სამართლებრივი გზით, ნორმალურ მდგომარეობაშია?! მთავარია ჩვენ საბაბი არ მივცეთ. სამწუხაროდ, მოკავშირეები მათ ჩვენი ქვეყნის შიგნით ჰყავთ, ქვეყნის გარეთ ვერავინ ვერაფერს დაგვაკლებს. მე ხანდახან ვფიქრობ, ადამიანების გარკვეული ნაწილი სპეციალურად ხომ არ აკეთებს-მეთქი ამას, რომ არ მივიღოთ ვიზალიბერალიზაცია?! ჩვენ ძალიან მაგრად უნდა დავუდგეთ ამ ყველაფერს, რომ არ გაუვიდეთ. გვეღირსოს იქნებ ეს ნანატრი ვიზალიბერალიზაცია.”
ქეთი ბექაური (იურისტი): “მე არ ვიქრობ, რომ მარტო გერმანიის პოზიციით გადაწყდება საქართველოსთვის ვიზალიბერალიზაციის მინიჭება. ასე ხელაღებით თქმა, რომ ქართული დაჯგუფებები არიან, არამგონია, რომ ეს ზუსტი ინფორმაცია იყოს, ეს გადმოწმებას საჭიროებს. იმიტომ, რომ ემიგრანტები ძალიან ხშირად არ რეგისტრირდებიან თავიანთი ზუსტი მონაცემებით და არ არის გამორიცხული, რომ არ იყვნენ საქართველოს წარმომადგენლები. მეორეც, ასოცირების ხელშეკრულებით რაც გათვალისწინებული იყო, საქართველომ ყველა პუნქტი პირნათლად შეასრულა და წესით, არაფერი უნდა დაუდგეს წინ ამ პროცესს.”
სერგო ვარდოსანიძე (ისტორიკოსი): “სინანული მინდა გამოვთქვა იმიტომ, რომ გერმანიაში კრიმინალური დაჯგუფება მარტო ქართული წარმოშობის არ იქნება, აქ სხვა ქვეყნებიც იქნებიან და ვიზალიბერალიზაცია ამ კრიმინალურ დაჯგუფებებთან არ უდნა იყოს დაკავშირებული. ეს არის პოლიტიკური გადაწყვეტილება და თუ პროცესი შეჩერდა, ეს უფრო მძიმე შედეგების მომტანი იქნება არამარტო საქართველოსთვის, არამედ თვითონ ევროკავშირის ქვეყნებისთვის. ეს ძალიან სერიოზული საკითხია და იმედი მაქვს, დასავლელი პოლიტიკოსები დააჯერებენ გერმანულ პარტიებს, რომ ვიზალიბერალიზაციის მინიჭება საქართველოსთვის აუცილებელია.”
ნუცა ჯანელიძე (მუსიკათმცოდნე): “შეიძლება მათ რამე შენიშვნები შეიტანონ, მაგრამ მარტო გერმანია მაგის გადამწყვეტი არ უნდა იყოს, წესით, იქ ხომ სხვა ქვეყნებიც არიან და თუ გერმანიას 2 ხმის უფლება აქვს, ეს უკვე რა კომისიაა, მე არ ვიცი.”
„ახალი თაობა“, 07 ივნისი, 2016 წელი
ინტერვიუ ადა მარშანიასთან: „ვიზალიბერალიზაციის თემას „ნაციონალური მოძრაობა“ სათავისოდ იყენებს“ // „ნაციონალური მოძრაობის“ რიგითმა წევრებმა ახლა მაინც უნდა დატოვონ ეს კრიმინალური დაჯგუფება“
ევროპასთან ვიზალიბერალიზაციის პროცესი შეიძლება შეფერხდეს. ეს შეეხება არა მარტო საქართველოს. აფხაზეთის უმაღლესი საბჭოს დეპუტატი, საქართველოს პატრიოტთა ალიანსის ერთ-ერთი ლიდერი ადა მარშანია „ახალ თაობასთან“ ინტერვიუში აცხადებს, რომ ეს პროცესი გამოწვეულია საგარეო ფაქტორებით და ევროპაში სიტუაციის გართულებით.
„ამ პროცესის შეფერხება და გადადება არ არის კარგი მოვლენა. მოსახლეობა ვიზალიბერალიზაციას ელოდება. თუმცა, პირადად მე ეს არ გამკვირვებია შექმნილი მდგომარეობიდან გამომდინარე. ვიცით, როგორი არეულობაა უკრაინაში. გარდა ამისა, მძიმე ფონია შექმნილი მთლიანად ევროპაში. იქ დიდი ხანია, დევნილთა კრიზისია. როცა გვითხრეს, რომ ეს ხელს არ შეუშლიდა საქართველოსთვის ვიზალიბერალიზაციის მინიჭებას, გამიხარდა, თუმცა, გამიკვირდა კიდეც. ახლა, ეტყობა, ევროპაში უფრო კარგად გაიაზრეს არსებული ვითარება. სამწუხაროდ, გერმანიაში ვითარებას ართულებს აქედან ჩასულების მიერ ჩადენილი დანაშაულები. ეს საკითხი უკვე გერმანიის პარლამენტის განსახილველიც კი გახდა. ვიზალიბერალიზაცია იქნებოდა შეღავათი სტუდენტებისთვის, მივლინებაში წასული პირებისთვის. ეს მოქალაქეების ამ ნაწილს თავიდან ააცილებდა ბიუროკრატიულ დაბრკოლებებს. მოსახლეობის დიდ ნაწილს ჯერ კიდევ არ გააჩნია ზუსტი ინფორმაცია ვიზალიბერალიზაციაზე”, – ამბობს ადა მარშანია.
- რას გულისხმობთ?
- ბევრმა არ იცის, რომ ევროპაში მოხვედრა არ ნიშნავს სამუშაოს შოვნას. ესაა სამთვიანი ვიზა. სამი თვით ევროპაში ცხოვრებაც სერიოზულ ხარჯებთან არის დაკავშირებული. სამწუხაროდ, საზღვრების გახსნით ლეგალურად ვერავინ დასაქმდება. დასაქმების შესახებ შეთანხმებები სხვა სახელმწიფოებთან არ გვაქვს. ამაზე არც ახლანდელ და არც წინა ხელისუფლებებს არ უზრუნიათ. ამიტომ, საჭიროა, რომ ეს მომავლის გეგმა იყოს. ამ ტოტალური უმუშევრობის პირობებში, სანამ სამუშაო ადგილებს ჩვენს ქვეყანაში შევქმნით, ხელი უნდა შევუწყოთ ჩვენი მოქალაქეების ლეგალურად დასაქმებას უცხოეთში.
- „ნაცმოძრაობის“ აზრით, ვიზალიბერალიზაციას საქართველოს ხელისუფლება აფერხებს. საუბარია „რუსთავი-2“-ის გარშემო განვითარებულ მოვლენებზე, კორცხელის ინციდენტზე და სხვა.
- საქართველოს საშინაო მოვლენები არაფერ კავშირში არ არის ვიზალი-ბერალიზაციასთნ. ნაციონალური მოძრაობა ამ თემას სათავისოდ იყენებს. ეს ორგანიზაცია ყველაფრის ფოკუსირებას ახდენს საკუთარ თავზე. ნაციონალები ისე იქცევიან, თითქოს ყველაფერი მათ ირგვლივ ტრიალებს. მათი ბრალდებები სუბიექტური და ძალიან გაზვიადებულია. ამ კამპანიაში ისინი იყენებენ თავიანთ საინფორმაციო საშუალება „რუსთავი-2“-ს. რაც ხდება, ეს ხელისუფლების ბრალია.
- ხელისუფლების ბრალი რატომაა?
- იმიტომ, რომ ხელისუფლებამ აქცია ნაციონალური მოძრაობა მთავარ ოპოზიციად მაშინ, როცა ესაა თავხედური ძალა და კრიმინალური დაჯგუფება. ეს მარტო ჩემი აზრი არ არის. ეს განცხადება დოკუმენტებს ემყარება. ნაცმოძრაობის რიგით წევრებს სააკაშვილი გადამრჩენელი ეგონათ. ახლა მაინც ხომ იციან, რომ ის დამნაშავეა! ადგნენ და ახლა მაინც დატოვონ ეს კრიმინალური დაჯგუფება!
- ამ დღეებში ნაცმოძრაობის მმართველობის დროინდელი წამებისა და არაადამიანური მოპყრობის ფაქტებზე მოხსენება წარმოადგინა პარლამენტის ადამიანის უფლებათა დაცვის კომიტეტის თავმჯდომარე ეკა ბესელიამაც. ექნება ამას შემდგომი მსვლელობა?
- არა მგონია. ამის ნიშნები არ ჩანს. ქალბატონ ბესელიას ასეთი მოხსენება პარლამენტის არჩევიდან ნახევარ წელიწადში, უკიდურეს შემთხვევაში, ერთ წელიწადში უნდა გაეკეთებინა. მას მთელი საქართველო დაეხმარებოდა. რომ მოეთხოვა, ნაცმოძრაობის დანაშაულის დამამტკიცებელი საბუთები მოგვიტანეთო, ყველა იაქტიურებდა. ამას მოჰყვებოდა ამ პარტიის საქმიანობის პოლიტიკური შეფასება პარლამენტის მხრიდან და სამართლებრივი შედეგები, მთავარი დამნაშავეების დასჯა. ეს არ მოხდა.
ახლა ძალიან გვიანაა. საქმე იქამდე მივიდა, რომ სამართლიანობის აღდგენის მოთხოვნა ნაცმოძრაობის დასაცინი გახდა. პარლამენტი რომ სწორად მოქცეულიყო, ახლანდელი სიტუაცია არ გექნებოდა. არც სასამართლო სისტემა იქნებოდა ამ დღეში, არც სხვა სფეროები, არ გვეყოლებოდა ამდენი აღშოთებული და იმ რეჟიმისგან დაზარალებული ადამიანი.
„ახალი თაობა“, 07 ივნისი, 2016 წელი
ინტერვიუ კახა კუკავასთან: „დასავლეთმა დაიწყო ბიძინა ივანიშვილის წასვლის მომზადება” // „ვიზალიბერალიზაცია ჩაიშალა”
ქვეყანაში შექმნილ პოლიტიკურ პროცესებს „ახალ თაობასთან“ ინტერვიუში თავისუფალი საქართველოს ლიდერი, კახა კუკავა აფასებს.
- ბატონო კახა, ხვალიდან წინასაარჩევნო კამპანია ოფიციალურად დაიწყება. როგორი გარემოა არჩევნებამდე ოთხი თვით ადრე?
- გარემო არის იდენტური იმისა, რაც იყო წინა მთავრობების დროს. რომ ვთქვა, რომ ყველაზე უარესი გარემოა, ასე ნამდვილად არ არის. არის იგივე, რასაც სთავაზობდა ოპოზიციას შევარდნაძე და რასაც სთავაზობდა სააკაშვილი. „ქართულ ოცნებას“ ერთი ეს ჰქონდა სალაპარაკო, ჩვენ დროს ძალადობა მაინც არ ხდებაო და ახლა ესეც „გამოასწორეს“.
კორცხელის ინციდენტი, რომელიც დაიგეგმა „ქართული ოცნების“ ლიდერების მიერ, იყო არა შემთხვევითი და გამონაკლისი, არამედ ეს ხორციელდებოდა „ქართული ოცნების“ პირველი პირების დავალებით და აქედან გამომდინარე ის ლოიალობაც, რომელიც ხელისუფლებამ გამოიჩინა ამ პირთა მიმართ, იყო კანონზომიერი.
- დღეს არ საუბრობენ იმის თაობაზე, რომ დაძაბულობაა და არც 2007 წელს ადარებენ 2016-ს...
- მინდა ყველას ვუთხრა, რომ ჯერ დარჩენილია 4 თვე და იმ სისტემით და იმ სულისკვეთებით, რითაც ხელისუფლება წარმართავს წინასაარჩევნო გარემოს, ძალიან ცხელი შემოდგომა გველოდება.
- სერიოზული შენიშვნები ისმის დასავლეთიდან. არ დაუჭერს დასავლეთი მხარს ხელისუფლებას და არ მისცემს უფლებას, რომ იცუღლუტოს?
- დასავლეთის მოქმედება ჩვენ ვნახეთ წარსულში. შევარდნაძის მიმართაც როგორ განახორციელეს თავისი სტრატეგია და სააკაშვილის მიმართაც, რაც გულისხმობს იმას, რომ მათ არ ახასიათებთ, რომ ერთ წამში გადაწყვიტონ პრობლემა.
- ანუ?
- ისინი დიდხანს ამზადებდნენ შევარდნაძის წასვლასაც და სააკაშვილის წასვლასაც. მათ უკვე დაიწყეს ივანიშვილის წასვლის მომზადება, ეს სრულიად აშკარაა. ივანიშვილმა თავისი თავი უკვე მოჭამა. რაც შეეხება იმას, თუ რა ფორმით დაასრულებს ივანიშვილი თავის ხელისუფლებას, ეს დამოკიდებულია თვითონ მასზე.
- რისკენ მიანიშნებს დასავლეთი ივანიშვილს?
- ისინი ეუბნებიან ივანიშვილს, რომ თუ ჭკვიანად იქნები, შენ შეგიძლია წააგო არჩევნები და წახვიდე საცხოვრებლად საფრანგეთში, თუ არ იქნები ჭკვიანად, შეიძლება რაიმე უბედური შემთხვევაც დაგემართოს.
- ელჩის განცხადებაც გაფრთხილება იყო?
- არამარტო ელჩის განცხადება. მანამდე იყო სახელმწიფო მდივნის თანაშემწის განცხადება რუსთავი 2-თან დაკავშირებით, რომელიც ბევრად უფრო მკაფიოდ და მკაცრად ჟღერდა, თუმცა ელჩის განცხადებაც ძალიან მნიშვნელოვანია.
- ჩვენი ხელისუფლება ამას შიდა საქმეებში ჩარევად მიიჩნევს და ასეა?
- ამას ჩვენი ხელისუფლება ვერ მიიჩნევს ჩარევად, რადგან ხელისუფლებას აქვს ასეთი საგარეო კურსი. ამის თქმის უფლება საქართველოში მაქვს მარტო მე და ჩვენს პარტიას, რომ ვთქვათ, რომ ეს არის ჩარევა.
- ვითომ რატომ?
- იმიტომ, რომ ჩვენ არ ვუჭერთ მხარს ამ საგარეო კურსს. დღევანდელი ხელისუფლება კი ვერ იტყვის, რომ ეს არის ჩარევა, რადგან თავადვე ამბობენ, რომ ეს არის ნორმალური, რომ შეერთებული შტატები არის მათი სტრატეგიული პარტნიორი. როცა მათ სასარგებლოდ ერეოდა, მაშინ ამაზე პრეტენზია არ ჰქონდათ.
- ამერიკის ჩარევა არ არის ჯანსაღი პროცესი?
- რა თქმა უნდა, ეს არ არის ჯანსაღი პროცესი. თუმცა უნდა გვესმოდეს, რომ ამ ყველაფერს ყოველთვის მიზეზს აძლევს საქართველოს ხელისუფლება. მე რომ ვიყო საქართველოს პრემიერ-მინისტრი, აშშ-ის მთავრობას არ მივცემდი სათქმელს, რომ საქართველოში არ არის სამართლიანი საარჩევნო გარემო. ჩვენ უნდა გვქონდეს ისეთი საარჩევნო კოდექსი, რომელზეც შეთანხმებული იქნება მთელი პოლიტიკური ოპოზიცია და რომელიც არც ქვეყნის მტერს და არც ქვეყნის მოყვარეს არ მისცემს იმის თქმის საშუალებას, რომ საქართველოში საარჩევნო გარემოს ხარვეზები აქვს. მე მაქვს ჩემი პროგნოზი და დაბეჭდეთ ასე – ნახავთ, ერთ-ორ თვეში თუ არ გამართლდება. იმ საარჩევნო გარემოს ჩაშლაში „ქართულ ოცნებას” მოუწევს ძალიან ძვირი პოლიტიკური ფასის გადახდა და ეს ფასი იქნება არჩევნების ლეგიტიმაციის კითხვის ნიშნის ქვეშ დაყენება.
- ვიზალიბერალიზაციის შესახებ რას ფიქრობთ?
- ჩვენ ვამბობდით სამი თვის წინაც, რომ ვიზალიბერალიზაცია არის არარეალური და საქართველო მას ვერ მიიღებს. მაშინ ყველა პარტიას, სამთავრობოსაც და ოპოზიციურსაც, გამართული ჰქონდათ ბალმასკარადი, რას ზეიმობდნენ, თვითონაც არ იცოდნენ და ულოცავდნენ საქართველოს მოსახლეობას, პირველი ივლისიდან უვიზოდ ივლით ევროპაშიო.
_ ამ პროცესში საკმაოდ დიდია რუსეთის როლი და გავლენა. რამდენად არის ასე?
- რა თქმა უნდა, რუსეთის გავლენა არის დიდი და სწორედ ამიტომაც ჩვენ ვსაუბრობთ, რომ რუსეთის გავლენა ყველაფერზე დიდია – ჩვენს ეკონომიკაზე, ვიზალიბერალიზაციაზე, ტერიტორიულ მთლიანობის აღდგენაზეც, ამიტომ აუცილებელია საქართველომ დაიწყოს პოლიტიკური დიალოგი. თუმცა წლებია, ყველა საპირისპიროს გვიმტკიცებდა. აი, რუსეთის იგნორირების შედეგიც.
- რუსეთი რომ ოკუპანტია, თქვენ იცავთ და ამართლებთ მას?
- მე ნამდვილად არ ვიცავ და არ ვიზიარებ რუსეთის პოზიციას! ჩვენ რუსეთს განვიხილავთ როგორც ოკუპანტს, ჩვენ მიგვაჩნია, რომ ის არის აგრესორი, მაგრამ პოლიტიკა არ არის მხოლოდ ლოზუნგების და ტრანსპარანტების ბეჭდვა. პოლიტიკა არის გამოსავლის ძიება. რუსეთთან კონფრონტაცია არ შედის საქართველოს ინტერესებში.
- ანუ ვიზალიბერალიზაციის საკითხი ჩაიშლება?
- უკვე ჩაიშალა. დღეს ეწერა, რომ გერმანია არის წინააღმდეგი და მეტი ვიღამ უნდა თქვას უარი? სწორედ გერმანიაა ევროკავშირი. პოლონეთს და ლიტვას აზრს არ ეკითხებიან.
„ახალი თაობა“, 07 ივნისი, 2016 წელი
ინტერვიუ ნიკოლოზ მჟავანაძესთან: „საკონსტიტუციო სასამართლო ნაციონალების დაქვემდებარებაშია“ // „საია-მაიებმა თავისუფალი მედიის ცნება გააუპატიურეს“
რა აღიარებითი ჩვენება მისცა ნიკა გვარამიამ, რატომ დააკმაყოფილებს საკონსტიტუციო „რუსთავი-2“-ის სარჩელს, რაზე უნდა ამოიღონ ხმა არასამთავრობოებმა? _ ამის შესახებ „ახალ თაობას“ უფლებადამცველთა გაერთიანების თავმჯდომარე ნიკოლოზ მჟავანაძე ესაუბრება.
„როდესაც ნაციონალური მოძრაობის წარმომადგენლები და მათი მხარდამჭერი ე.წ. დამოუკიდებელი ექსპერტები სასამართლო სისტემის დამოუკიდებლობის ხარვეზებზე საუბრობენ, მათ რატომღაც არ „ახსენდებათ“ და ისინი თვალს ხუჭავენ იმ გარემოებაზე, რომ სწორედ ამ სისტემის უმნიშვნელოვანესი რგოლი, საკონსტიტუციო სასამართლოს სახით, პრაქტიკულად სწორედ ნაციონალური მოძრაობის ერთ-ერთ საქვეუწყებო დაწესებულებად არის გადაქცეული. ისე თავდაჯერებულნი არიან ამ სასამართლოს მათდამი ერთგულებაში, რომ აღარ დაგიდევენ თუნდაც მათ ფორმალურ რეპუტაციას და საკუთარ გამონათქვამებს კონტროლს ვეღარ უწევენ და პირდაპირ ლუსტრირებას ახდენენ”, – ამბობს ნიკოლოზ მჟავანაძე.
- პირდაპირ ლუსტრირებას ახდენენო და ეს რაში გამოიხატება?
- 2016 წლის 31 მაისს რუსთავი 2-ის პირდაპირ ეთერში გადაცემა „აქცენტებში“ ამ ტელეკომპანიის გენერალურმა დირექტორმა გვარამიამ განაცხადა, რომ საკონსტიტუციო სასამართლო იხილავს მათ რამდენიმე სარჩელს და სააპელაციო სასამართლო პროცესის დასრულებას ჩქარობს, რათა მას არ დაასწროს საკონსტიტუციო სასამართლომ და არ გააუქმოს ის ნორმები, რომელთა საფუძველზეც ეს დავა მიმდინარეობს. მან ასევე განაცხადა, რომ 31 მაისს, პრეზიდენტის მიერ დადებული ვეტოს შემდეგ, უკვე საკონსტიტუციო სასამართლოს სათანადო დრო აქვს, რომ მოაწყოს გადაწყვეტილების მიღება ამ საკითხზე (ანუ „რუსთავი-2“-ის პირველ სარჩელზე, სადაც ითხოვენ მართლსაწინააღმდეგო და ამორალური გარიგების თაობაზე ნორმის გაუქმებას – საქართველოს სამოქალაქო კოდექსის 54-ე მუხლი). სინამდვილეში ამით გვარამიამ საკონსტიტუციო სასამართლოს განუსაზღვრა საკმაოდ შეზღუდული დრო.
- შეზღუდული დრო რატომ დაუწესა?
- პრეზიდენტის დადებული ვეტოს დაძლევა-არდაძლევის საკითხი ლოგიკურადმ ცხადია, საკმაოდ მოკლე ხანში უნდა გადაწყვეტილიყო. ამის შემდეგ პირდაპირ განაცხადა, რომ რაც არ უნდა მოხდეს, მათ აქვთ სათადარიგო გზაც. საკონსტიტუციო სასამართლოს განხილვაშია „რუსთავი 2“-ის მეორე სარჩელიც. ამ სარჩელზე საუბრისას გვარამიამ პრაქტიკულად სკანდალური აღიარება გააკეთა. მან პირდაპირ თქვა, რომ რეტრო აქტიურობის ნორმაც უქმდება. აქ საუბარია საკონსტიტუციო სასამართლოში რუსთავი 2-ის მეორე სარჩელზე (სარეგისტრაციო #678), სადაც ისინი ითხოვენ, რომ საკონსტიტუციო სასამართლოს გადაწყვეტილებებს მიენიჭოს უკუძალა წარსულ დროში და ის გახდეს ახლად აღმოჩენილი გარემოება საერთო სასამართლოების მიერ მიღებულ გადაწყვეტილებებთან მიმართებაში ანუ საკონსტიტუციოს გადაწყვეტილება უნდა გახდეს საერთო სასამართლოების მიერ წარსულში მიღებულ გადაწყვეტილებათა გაუქმების, მათი გადასინჯვის და ახალი გადაწყვეტილების მიღების საფუძველი. ამით გვარამიამ თავისდაუნებურად განაცხადა, რომ იცის, რომ მომავალში საკონსტიტუციო სასამართლოში აუცილებლად დაკმაყოფილდება მათი სარჩელი. ეს ალბათ მართლა ასე მოხდება.
- რატომ გგონიათ ან თქვენ ან გვარამიას, რომ საკონსტიტუციოში რუსთავი 2-ის სარჩელი დაკმაყოფილდება?
- ეს მისი განცხადებიდანაც ჩანს, გვარამია ამბობს, რომ „იქ რეტრო აქტიურობის ნორმაც უქმდება“ ანუ სწორედ ის ნორმა, რაც ამჟამად არ ითვალისწინებს საკონსტიტუციო სასამართლოს გადაწყვეტილებებისთვის ძალის მინიჭებას წარსულ დროში. მოსარჩელე ტელეკომპანია რუსთავი 2-ის (იურიდიული პირის სპეციფიკიდან გამომდინარე, რიგ შემთხვევებში სასამართლოში წარდგენილი სარჩელის სუბიექტი არის ტელეკომპანია საქართველო) ყველა კონსტიტუციური სარჩელი (675, 678, 679, 681, 720 ,721, 726) განსახილველად დაეწერა საკონსტიტუციო სასამართლოს ერთ კოლეგიას (გამონაკლისი იყო მხოლოდ 719 კონსტიტუციური სარჩელი, რომელიც იმის გამო, რომ გასაჩივრებული იყო `საქართველოს საკონსტიტუციო სასამართლოს შესახებ~ საქართველოს ორგანული კანონის ნორმა, განიხილა სასამართლოს პლენუმმა). აღნიშნულ სარჩელებში სადავო იყო გამხდარი სხვადასხვა კანონში არსებული, ერთმანეთთან შინაარსობლივ კავშირში არმყოფი სხვადასხვა ნორმა.
ამ სარჩელებს ერთმანეთთან აერთიანებდა მხოლოდ ის, რომ მათი ავტორი წარმოადგენდა ერთსა და იმავე სუბიექტს, რაც მათი განსახილველად ერთი კოლეგიისათვის მიკუთვნების საფუძველი კი არ უნდა გამხდარიყო, არამედ პირიქით, როდესაც ერთი სუბიექტის სარჩელებს ყოველთვის განიხილავს ერთი კოლეგია, ამან შეიძლება გააჩინოს ეჭვები როგორც საქმეთა განაწილების, ასევე საქმის გადაწყვეტის ობიექტურობასთან დაკავშირებით.
ასეთი შემთხვევა საკონსტიტუციო სასამართლოს პრაქტიკაში არაერთია. პრაქტიკულად გამოდის, რომ კონკრეტული სუბიექტისთვის „პერსონალური“ კოლეგიაა გამოყოფილი საკონსტიტუციო სასამართლოში, რომელიც მის სარჩელებს იხილავს. ასეთი საქმეები, მართალია, ნაწილდება „შემთხვევით“ მხოლოდ ერთ კოლეგიაზე, თუმცა იქაც, რატომღაც კოლეგიის სამ წევრზე (მომხსენებელი მოსამართლეები არიან ვარძელაშვილი, ერემაძე და კოპალეიშვილი) და მეოთხე წევრს, მერაბ ტურავას, რატომღაც არ ხვდება ასეთი საქმეები.
მოსარჩელე ტელეკომპანია „რუსთავი-2“-ის და ტელეკომპანია საქართველოს რიგ სარჩელებთან დაკავშირებით საკონსტიტუციო სასამართლომ შესაშურად მოკლე ვადაში მოახერხა საქმის განხილვა და შესაბამისი სამართლებრივი შედეგების დაყენება. მაგალითად, 675-ე სარჩელი არსებითად განსახილველად მიიღო (სადავო ნორმა შეაჩერა) სარჩელით სასამართლოსთვის მიმართვიდან 6 დღეში. ხოლო 681-ე სარჩელზე იგივე სამართლებრივი შედეგი დააყენა 7 დღეში. მე არ მჯერა, რომ პირველი კოლეგია საკითხის განხილვისას მიუკერძოებელი იქნება.
- ამის რატომ არ გჯერათ, რაკი სულ ამათ ხვდებათ ეს საქმე განსახილველად?
- ესეც საკმარისი მიზეზია, მაგრამ არის სხვა მნიშვნელოვანი მომენტიც. ამავე კოლეგიის წევრი კოპალეიშვილი წლების განმავლობაში იყო ნიკა გვარამიას იუსტიციის მინისტრობისას, მისი რეკომენდაციით დანიშნული მოადგილე ჯერ იუსტიციის სამინისტროში, ხოლო შემდეგ განათლების მინისტრობისას ის იყო ერთადერთი მოადგილე, რომელიც იუსტიციის მინისტრობიდან განათლების მინისტრად გადასვლისას თან გადაიყოლა გვარამიამ ისევ მოადგილის პოზიციაზე. ნიკა გვარამიას პირველი მოადგილე განათლების მინისტრობისას იყო ვარძელაშვილის მეუღლე ანა ჟვანია.
მიუხედავად ამ აშკარა გარემოებებისა, როდესაც აცილების საკითხი დადგა მოპასუხე მხარის პარლამენტის წარმომადგენლის მხრიდან, ამ ორი მოსამართლის მიმართ #675-ე სარჩელზე, ისინი არ იქნენ აცილებული ამ საქმის განხილვას.
ნიკა გვარამიას აღიარება ცხადყოფს, რომ საკონსტიტუციო სასამართლო ნაციონალების და მის დაქვემდებარებაშია. ამ ფონზე ძალიან საინტერესოა საია-მაიების და ე.წ. დამოუკიდებელი ექსპერტების მიერ ატეხილი განგაში. ისინი ცდილობენ ყველას დაუმტკიცონ, რომ თავისუფალი მედია საფრთხეშია. ამ ხალხმა თავისუფალი მედიის ცნება გააუპატიურა, რადგან რუსთავი 2 არ არის თავისუფალი მედია. ის არის ნაციონალების რუპორი.
„ვერსია“, 06 ივნისი, 2016 წელი
ინტერვიუ რამაზ საყვარელიძესთან: „ნაციონალებისთვის ხელსაყრელი რევოლუციაა!“
რატომ დაესწრო პაატა ბურჭულაძის პარტიის ყრილობას და გაუშვებს თუ არა რამაზ საყვარელიძეს სამსახურიდან განათლების ახალი მინისტრი
ნინო კომახიძე
ახალი პოლიტიკური მოთამაშეები, ე.წ. ქუჩის ოპოზიციის მუქარა, გადახალისება მინისტრთა კაბინეტში, ნაციონალების დაშლა-გაშლა, „რუსთავი-2“-სა და ზოგადად, მედიაში მიმდინარე გადანაწილება - ამ თემებზე „ვერსია“ პოლიტიკურ ექსპერტს, განათლების მინისტრის მრჩეველ რამაზ საყვარელიძეს ესაუბრა, რომელიც, სხვათა შორის, პაატა ბურჭულაძის პარტიის ყრილობას ესწრებოდა.
- ბატონო რამაზ, განათლების მინისტრის მოხსნის გადაწყვეტილება თქვენთვისაც მოულოდნელი თუ იყო და ამით თქვენთვის, როგორც მინისტრის მრჩევლისთვის, რა შეიცვლება?
- ეს ჩემთვისაც სიახლე იყო – ამ გადაწყვეტილების შესახებ არ ვიცოდი. თუკი ახალი მინისტრი გადაწყვეტს, მრჩეველი შეცვალოს, შესაძლოა, ჩემთვის ვითარება შეიცვალოს; ასევე შეიცვალოს იმ საკითხების მიმართ დამოკიდებულება, რაშიც ჩართული ვარ _ ფსიქოლოგიის ინსტიტუტის აღდგენის მცდელობა და განათლების სისტემაში ფსიქოლოგიური საკითხების დამუშავება.
- ხომ არ ფიქრობთ, რომ თამარ სანიკიძე განათლების რეფორმასა და თსუ-ში ბოლო დროს მიმდინარე მოვლენებს შეეწირა?
- გამორიცხული არაა, სანიკიძის წასვლას კავშირი ამ მოვლენებთანაც ჰქონდეს. ეს აზრი მაშინ გამიჩნდა, როცა პრემიერ-მინისტრს სტუდენტებთან შეხვედრა მოუხდა. წესით, მინისტრის მუშაობას პრემიერის დახმარება არ უნდა სჭირდებოდეს, თუმცა ამის შესახებ ინფორმაცია ნამდვილად არ მქონია, ქალბატონი თამარი კი ძალიან აქტიურად და კარგად მუშაობდა.
- სხვათა შორის, ბატონო რამაზ, თქვენი მისამართით, მას მერე, რაც პაატა ბურჭულაძის პარტიის ყრილობაზე გამოჩნდით, ასეთი კითხვა მოვისმინე - ,,ოცნების” სახელმწიფო ჩინოვნიკია და ოპოზიციური პარტიის ყრილობაზე რა უნდოდაო?
- საერთოდ, ყველა ადამიანის მისწრაფებაა, ინფორმაცია დეტალიდან ამოკრიფოს, მით უმეტეს, როცა არსებობს კითხვა – ვინ იქნება ბურჭულაძის გვერდით. მის განცხადებებში მკაფიოდ არ ჩანდა, წევრებსა და თანამებრძოლებს რა პრინციპით შეარჩევს, ამიტომ ხალხმა თავად დაიწყო ამ კითხვებზე პასუხების მოძიება, რაც გასაკვირი სულაც არაა. დიახ, მეც ვიყავი ყრილობაზე და ჩემს უკან კიდევ რამდენიმე ექსპერტი იჯდა, მაგალითად, მამუკა არეშიძე და ჩვენ ორს, ყოველ შემთხვევაში, ბურჭულაძისგან შეთავაზება არ გვქონია.
რაც შემეხება მე, განათლების სამინისტროსთან ვთანამშრომლობ, როგორც ფსიქოლოგი. ჩემი და ,,ოცნების” ურთიერთობის შესახებ კი, ალბათ, ყველას ახსოვს: ივანიშვილისა და ჟურნალისტების დაპირისპირებამდე, ერთ-ერთი მძაფრი სცენა სწორედ ექსპერტებთან, განსაკუთრებით კი ჩემთან და მამუკასთან დაპირისპირება იყო. შესაბამისად, ამის შემდეგ ,,ოცნების” პოლიტიკური სტრუქტურების მხრიდან ჩემს მიმართ დისტანცირება ყოველთვის იგრძნობოდა, თუმცა განათლების სამინისტროს ჩემი პოლიტიკური შეფასებები კი არა, ფსიქოლოგიის მიმართულებით არსებული გამოცდილება აინტერესებდა, ამიტომაც იქ პროფესიული ნიშნით ვარ და არა – პოლიტიკური.
- რაც შეეხება ყრილობას, არსებობდა მოლოდინი, რომ ახალ ძალაზე ბევრი რამ ნათელი გახდებოდა, მაგრამ პარტიის დაფუძნებას ბრალდებათა ახალი ტალღა მოჰყვა - ასოცირება ნაციონალურ მოძრაობასთან, ,,იმ ცხრა წლის” არშეფასება და ა.შ. თქვენც გაქვთ ეს კითხვები პაატა ბურჭულაძესთან?
- ყოველ შემთხვევაში, ,,ოცნებასა” და ნაციონალებს პროპორციულად ნამდვილად არ აკრიტიკებს. უფრო ადრე ყურში მეც მეცა, რომ ბურჭულაძე ამ ხელისუფლების შეფასებისას ნაციონალების ფორმულებს იყენებდა: არაფორმალური მმართველობა და ა.შ. რა თქმა უნდა, წინა ხელისუფლების კრიტიკა სავალდებულო არაა, მაგრამ ეს წინა ხელისუფლება არსად გამქრალა, საკმაოდ მკაფიოდაა ქართულ პოლიტიკაში და ისევ ჯიუტად იბრძვის ხელისუფლებისთვის. ამიტომ დღეს ნაციონალების შეფასება-არშეფასება, მხოლოდ წარსულის გახსენება კი არა, ავტომატურად, იმ 9 წლის შეფასება-არშეფასებაცაა. რაკი ბურჭულაძე ნაციონალებს არ აკრიტიკებდა, სწორედ ამან ათქმევინა მიხეილ მაჭავარიანსა და გიორგი ბარამიძეს, თანახმა ვართ, პაატა ბურჭულაძესთან ვითანამშრომლოთო.
- პაატა ბურჭულაძეც თანახმაა, ოღონდ ყველასთან თანამშრომლობაზე...
- დიახ, მან თქვა, რომ საუბარი ყველასთან შეუძლია და ნაციონალები არ გამოუკვეთია, თუმცა ნაციონალების ეს განცხადება ლოგიკური ნაბიჯია, რადგან შესაძლოა, მათი მხარდამჭერებისთვის ბურჭულაძის პოზიცია მისაღები აღმოჩნდეს… ამიტომ ნაციონალებს, რა თქმა უნდა, ურჩევნიათ, ეს ელექტორატი კი არ დაიშალოს, არამედ, ერთიანი დარჩეს და მერე ადგილები ერთმანეთში გადაანაწილონ, თუმცა ბურჭულაძეს მათთან გაერთიანებაზე არაფერი უთქვამს და მეორეც, ფიქრობს, რომ მის ძალას ალტერნატივა არ გააჩნია, რომ პრემიერობის პერსპექტივა აქვს და ამ პერსპექტივებს არავის გაუყოფს.
- და ეს პერსპექტივები მის ამბიციებს ემთხვევა?
- ვნახოთ, მისი საარჩევნო კამპანია როგორ წავა, თუმცა ჯერ ერთი პარტიის მკაფიო სტრატეგიასაც ვერ ვხედავ, როგორ აპირებს ელექტორატის გულისმოგებას. ვეჭვობ, ამ არჩევნებზეც საარჩევნო პროგრამები ერთი დიასახლისის მიერ გამომცხვარი მჭადივით ერთნაირი იქნება! 2012 წელს წამყვანი ის პოლიტიკური შინაარსი იყო, რასაც ამომრჩეველი ამა თუ იმ პარტიაში თავად დებდა. ძირითადი შინაარსი კი სწორედ ნაციონალური მოძრაობის მიუღებლობა იყო, რაც ე.წ. ციხის კადრებმაც გააძლიერა. შესაბამისად, რამდენადაც მიუღებელი იყო წინა ხელისუფლება, იმდენად ,,ოცნების” გარშემო გაიზარდა კონსოლიდაცია და ცენტრში მდგარმა ფიგურამ, ქველმოქმედმა ბიძინა ივანიშვილმა ნდობა დაიმსახურა. ნაციონალებისადმი ეს დამოკიდებულება რომ არ ყოფილიყო, ,,ოცნება” პარლამენტში ამხელა შემადგენლობით ვერ მოხვდებოდა.
- გასაგებია, რომ საარჩევნო პროგრამების ჭიდილი არც წლევანდელ არჩევნებზე იქნება ანუ ფიქრობთ, ,,ანტინაციონალური” კამპანია და ,,სააკაშვილის რეჟიმის დამთავრების” მოთხოვნა ძალაში დარჩება?
- სრულიად შესაძლებელია, რადგან სააკაშვილი არ დამთავრებულა! შეიძლება ვცდები, მაგრამ მგონი, ნაციონალებს რაღაცები შეეშალათ. საკმაოდ კარგი აზრის ვარ ამ პარტიის პიარტექნოლოგიის სპეციალისტებზე, ამიტომ მათგან ველოდი, რომ სწორ გზას დაადგებოდნენ. თავადაც იცოდნენ, რებრენდინგი სწორი გზა იყო და ეს პროცესი ცხრაჯერ გამოაცხადეს, მაგრამ ცხრაჯერვე ჩაუვარდათ, რადგან ძველმა სახეებმა საჭესთან ადგილები არ დათმეს. ისიც კარგად იციან, რომ ძველი სახეებით მოქმედება აღარ შეიძლება. ამიტომ ვიფიქრე, რაკი რებრენდინგი ვერ მოახერხეს, მაშინ პასიურები მაინც გახდებიან, რათა ხალხმა მათი სტილი და ძველი ლიდერები დაივიწყოს-მეთქი. ამ მხრივ, ხალხის მეხსიერება ძალიან ელასტიკურია _ დავიწყებაში ხუთიანი გვიწერია, თუმცა არც ეს გააკეთეს, პირიქით, უფრო გააქტიურდნენ და ბრძოლის ხერხებიც მკვეთრი გახადეს. გაიძახიან, ხელისუფლება მედიის დამორჩილებას ცდილობს, ჩვენზე პოლიტიკური ზეწოლა მიდის, ბიზნესი წნეხის ქვეშააო და ა.შ. რაც მათი პირიდან ძალიან არადამაჯერებლად ჟღერს ანუ ამ 4 წელიწადში პიარის მეთოდები არ შეცვალეს და ისევ ისეთები არიან, როგორებიც იყვნენ.
- ერთი განსხვავებით _ დაიშალნენ თუ გაიშალნენ…
- ეს ძალიან საინტერესო მომენტია: გაშლა იმ პარტიას აწყობს, რომელსაც აქვს გარანტია, რომ პარლამენტში გაშლილ ჯგუფებთან ერთად შევა და მერე გუნდს იქ შეკრავს. არის კი ასეთი პარტია ნაციონალური მოძრაობა? -_ საეჭვოა, ნაციონალებს თავად ჰქონდეთ ამის განცდა. გარდა ამისა, როცა ამბობენ, პაატა ბურჭულაძეც ამ გეგმის ნაწილიაო, ძალიან მეეჭვება. რეალურად, რაც მეტ ხმას აიღებს პაატა ბურჭულაძე, მით ნაკლებს აიღებს ნაციონალური მოძრაობა. ის, რომ ბურჭულაძე ნაციონალებს არ აკრიტიკებს, მგონი, მისი პოლიტგემოვნების საკითხია და არა პარტნიორობის მაჩვენებელი. პირიქით თუ აღმოჩნდა, რომ პარლამენტში შესული ბურჭულაძე და ,,ქართული ოცნება” ალიანსს შეკრავენ, ეს ორივე ძალის მხრიდან ძალიან საინტერესო პოლიტიკური სვლა იქნება. ხოლო თუ ბურჭულაძემ პარტნიორობა ნაციონალებთან ეძება, მაშინ ეს სწორედ ყოფილი ხელისუფლების გაშლის გარკვეული ფორმა იქნება, მაგრამ უფრო სტიქიური, ვიდრე – ჩაფიქრებული.
- სხვათა შორის, ბოლო სატელევიზიო ინტერვიუში ბიძინა ივანიშვილმა არაერთხელ საგანგებოდ აღნიშნა, დღეს ნაციონალური მოძრაობა ,,ოცნების” ერთადერთი ოპონენტიაო. თქვენც ფიქრობთ, რომ ბურჭულაძე, ბურჯანაძე, ალასანია, ნათელაშვილი, ინაშვილი და სხვა ყველა პარტია ნომინალურია და ,,ოცნებასა” და ნაციონალებს სურთ, ეს არჩევნები ისევ ორ პოლუსამდე დაიყვანონ?
- ალბათ, ივანიშვილი მიხვდა, რომ 2012 წელს, ნაციონალებზე გამარჯვება დროებითი იყო და ეს ძალა მისი ყველაზე ძლიერი ოპონენტია. არც ერთი სხვა პარტია ,,ოცნებას” თავისმართლების იმდენ აუცილებლობას არ უჩენს, რამდენსაც ნაცმოძრაობა. გარდა ამისა, მის გარეშე ისეთი ტექნიკური საკითხები, როგორიცაა მაგალითად, პარლამენტის თბილისში გადმოტანა, ვერ გვარდება. რაც მთავარია, ნაციონალური მოძრაობა ერთადერთია, ვინც ხელისუფლებას საერთაშორისო ასპარეზზე მდგომარეობას ურთულებს. ჰოდა,
საკმარისია, ნაციონალებმა ე.წ. მთავარი ოპოზიციის სტატუსი დაკარგონ, რომ იმის თქმის საფუძველი გამოეცლებათ – ხელისუფლება პოლიტიკური ნიშნით გვდევნისო. ამიტომ იბრძვის ეს პარტია და მისი ,,მეორე ძალობის” არგუმენტი ის 40%- ია, რომელიც 2012 წელს მიიღო. როგორც კი სხვა ძალა მიიღებს ,,მეორე ძალის” სტატუსს, უკვე გაუგებარი გახდება საერთაშორისო საზოგადოებისთვის, თუ რატომ უნდა სდიოს პოლიტიკური ნიშნით ხელისუფლებამ უმნიშვნელო ნაციონალებს. ,,ოცნება” კვლავ რომ გაიმარჯვებს, ამას ლამის ნაციონალებიც აღიარებენ, ამიტომ 2016 წლის არჩევნების მთავარი ინტრიგა ისაა, ვინ იქნება მეორე ძალა!
- საინტერესოა, ვის აქვს ამის შანსი და რა მოხდება იმ შემთხვევაში, თუკი ნაციონალები ამ სტატუსს დაკარგავენ?
- აქ მეორე ინტრიგაცაა – მეორე ადგილზე ბურჭულაძე იქნება, ინაშვილი, ბურჯანაძე თუ სხვა ნებისმიერი პარტია, ,,ოცნებას” დიალოგი ყველასთან შეეძლება, ნაციონალების გარდა. რეალურად, ამ 4 წელში ,,ოცნებამ” სამართლიანობის აღდგენის სამართლებრივი მექანიზმები ვერ შექმნა და ამიტომაც მოთხოვნებს შორის უპირველესი დღემდე სამართლიანობის აღდგენაა. რეალურად, ნაციონალების მესამე და მეოთხე ადგილზე გასვლა უკვე წაგებაა. ამის მერე დაიწყება სამართლებრივი მექანიზმის ამუშავება და ისინი ვეღარ იყვირებენ, რომ ხელისუფლება მთავარ ოპოზიციურ ძალას ებრძვის. ვფიქრობ, მათ მიმართ უფრო გაიხსნება სამართლებრივი ბრძოლა და ამისკენ გარკვეული მოძრაობებიც მიანიშნებს. ამ პოზიციებით თუ ვიმსჯელებთ, მათთვის ხელსაყრელი რევოლუციაა.
- ანუ, რევოლუცია გარდაუვალია?
- არ მგონია, რადგან რევოლუციას ხალხის ძალიან დიდი რაოდენობა სჭირდება.
- შეიძლება, მაგრამ გამორიცხული არაა, სახალხო მღელვარების საბაბი ,,რუსთავი 2”-ის საქმე გახდეს, მით უმეტეს, ამ თემაზე აშშ-ს ელჩის, იან კელის განცხადებაც მოვისმინეთ, ქართველმა ხალხმა მედიაზე დარტყმა არ უნდა მოითმინოსო. შეიძლება თუ არა ამ თემას სამოქალაქო არეულობა მართლა მოჰყვეს?
- დიახ, შესაძლებელია, კელის განცხადება კი უპრეცედენტოა და ძალიან გამიკვირდება, თუკი ხელისუფლებას შესაბამისი რეაქცია არ ექნება. ვეჭვობ, იან კელის განცხადება ერთი ჯგუფის პოზიციაა და არა აშშ-ს სახელმწიფოსი. თუ პროცესები 2012 წლის კატეგორიებით განვითარდა, მაშინ გამორიცხული არაა, ნაციონალური მოძრაობის მომხრეები ,,რუსთავი 2”-ის შენობასთან დადგნენ, მოწინააღმდეგეები კი _ აშშ-ს საელჩოსთან. გვინახავს კონტრაქციები, როცა ლევან გაჩეჩილაძე საელჩოს შენობასთან ამერიკელების მიერ ნაციონალების დაცვას აპროტესტებდა. ამიტომ აშშ-ს საელჩოს ამ მიმართულებით პროცესების სტიმულირებას არ ვურჩევდი. არ მგონია, ,,რუსთავი 2”-ის თემა ისე გამძაფრდეს, რომ ხელისუფლებამ ჯახის არიდება თავიდან ვერ შეძლოს. ეს ჯახი მხოლოდ ნაციონალებს აწყობთ – ეს იქნება ე. წ. კორცხელის მოდელი, რომელიც იმასაც გვიჩვენებს, რომ ნაციონალები ყველაფერზე წავლენ, რათა გაილახონ.
- წინასაარჩევნოდ ,,რუსთავი 2”-თან დაპირისპირება საკმარისი არაა, რომ უბრალო მოქალაქეებს კითხვები და პროტესტი გაუჩნდეთ?
- ადამიანთა დიდი ნაწილი მედიაზე ხელის აღმართვას არ ეთანხმება, მიუხედავად იმისა, თუ რა პოლიტიკით მიდის პროცესი. ეს შეიძლება, ის სეგმენტი იყოს, რომელიც ნაციონალი სულაც არაა. უბრალოდ, ,,რუსთავი 2”-ის მაყურებლები ნაციონალებთან იგივდებიან და ეს გაიგივება ხელისუფლებასაც აწყობს, თუმცა ,,რუსთავი 2”, მაღალხარისხიანი პროდუქტის შექმნის გამო, ბევრ სხვა, მათ შორის აპოლიტიკურ სეგმენტშიც წამყვანია. საერთოდ, დიდი პროფესიონალიზმია _ მაყურებელი შეინარჩუნო და მერე ის უთხრა, რაც გჭირდება, თუმცა მაინც მეეჭვება, პროცესები ასე გართულდეს, რადგან გამწვავება თავად ,,ოცნების” ინტერესებში არაა. გარდა ამისა, საარჩევნო კამპანიაში ,,რუსთავი 2”-ის არსებობა ,,ოცნებას” აწყობს, რადგან ეს არხი მისი დემოკრატიულობის სიმბოლოა.
