„ახალი თაობა“: ინტერვიუ გიორგი ვაშაძესთან: „ვიქნები თუ არა თბილისის მერობის კანდიდატი, ჯერ გადაწყვეტილი არ არის“ // „მიხეილ სააკაშვილი იუსტიციის სახლის გახსნაზე გავიცანი“ // „მე „ნაცმოძრაობის“ კადრი არ ვარ“
„ახალი თაობა“: ინტერვიუ დავით დარჩიაშვილთან: „ხელისუფლებას ევროსაბჭომ წითელი ბარათი უჩვენა“
„ახალი თაობა“: ინტერვიუ სოსო შატბერაშვილთან: „არ შემხვედრია ადამიანი, რომელსაც მაჟორიტარული სისტემა უნდა“ // „ქოხებიდან“ სასახლეში გადასვლამ „ქართულ ოცნებას“ აზროვნება შეუცვალა“
—-
„რეზონანსი“: მგზავრობის სიძვირის გამო ხალხი დედაქალაქშია გამოკეტილი // საშეღავათო სისტემის ამოქმედების ნაცვლად რკინიგზამ და ავტოსადგურებმა გაძვირების ახალი კამპანია წამოიწყეს
——————-
„ახალი თაობა“, 07 ივლისი, 2017 წელი
ინტერვიუ გიორგი ვაშაძესთან: „ვიქნები თუ არა თბილისის მერობის კანდიდატი, ჯერ გადაწყვეტილი არ არის“ // „მიხეილ სააკაშვილი იუსტიციის სახლის გახსნაზე გავიცანი“ // „მე „ნაცმოძრაობის“ კადრი არ ვარ“
„ახალ თაობას“ „ახალი საქართველოს“ ლიდერი გიორგი ვაშაძე ესაუბრება.
- ბატონო გიორგი, გავრცელდა ინფორმაცია, რომ თბილისის მერის არჩევნებში კენჭისყრას გეგმავთ…
- ყველა შემთხვევაში ჩვენ ჩვენი კანდიდატურა გვეყოლება. ამ ეტაპზე საბოლოოდ გადაწყვეტილი არ არის, მე ვიქნები თუ ვინმე სხვა.
- ეს რაზეა დამოკიდებული?
- მაქსიმალურად ვცდილობ, ახალი ადამიანები გამოჩნდნენ პოლიტიკაში და, თუ რამდენიმე კანდიდატი გამოიკვეთა, შეიძლება პრაიმერიზიც მოგვიწიოს. თუ სხვანაირად წარიმართა, მაშინ დავაყენებ ჩემს კანდიდატურას. რასაც მე ვუყურებ თბილისის მერობის კანდიდატებს, თითოეული პროფესიონალიზმისგან ძალიან შორს არის. ქალაქის მართვა არ არის მათი პროფესია.
- კახა კალაძე თბილისის მერად არ გამოდგება?
- კახა კალაძე ძალიან კარგი ფეხბურთელია, მაგრამ ეს არ ნიშნავს, რომ კარგი მმართველია. ზაალ უდუმაშვილი კარგი ჟურნალისტი და დიქტორია, მაგრამ ასევე არ ნიშნავს, რომ კარგი მმართველია. ელენე ხოშტარია საგარეო საკითხების კარგი სპეციალისტია, მაგრამ ასევე არ ნიშნავს, რომ მას რამე გამოცდილება აქვს მართვის. ალეკო ელისაშვილიც კარგი ჟურნალისტია და სკანდალებს კარგად აწყობს, მაგრამ არც ეს ნიშნავს, რომ მას აქვს მართვის გამოცდილება.
- თქვენ გაქვთ მართვის გამოცდილება?
- მე, უბრალოდ, ვფიქრობ, რომ ჩვენ ბოლო პერიოდში ძალიან ბევრი პროექტი შევძელით და გავაკეთებინეთ მერიას, დაწყებული უფასო სასადილოებიდან, გაგრძელებული სკვერებისა და ბაღების მოწესრიგებით.
- კახა კალაძე ვერ იქნება ძლიერი კონკურენტი?
- ძლიერი კონკურენტი იქნება, რადგან სახელისუფლებო და ფინანსური რესურსი აქვს ძალიან დიდი, მაგრამ ის ძლიერი მერი ვერ იქნება, ეს ცალსახაა!
- კახა კალაძე გასულ კვირას წარადგინა პრემიერ-მინისტრმა. დიდი მოლოდინის მიუხედავად, მის გვერდით არ გამოჩენილა ბიძინა ივანიშვილი. რა ხდება, განუდგა „ქართულ ოცნებას“ ბიძინა ივანიშვილი?
- ბიძინა ივანიშვილი არ აპირებს აქტიურად ჩაერთოს ამ საარჩევნო კამპანიაში. ბიძინა ივანიშვილის გარეშე „ქართულ ოცნებას“ ძალიან გაუჭირდება, იმიტომ რომ ეს არის ბიძინა ივანიშვილის ელექტორატი. რაც უფრო ნაკლები იქნება მისი ჩართულობა, მით უფრო მეტი პრობლემა ექნება „ოცნებას“ არჩევნებში. როგორც ჩანს, ბიძინა ივანიშვილი მეორე სიცოცხლეს ეძებს.
- ანუ?
- მას უნდა, რომ პასუხისმგებლობას გაექცეს და დაშორდეს იმ პროცესებს, რომლებიც ახლა ხდება ქვეყანაში. თუმცა, არ მგონია, ეს ასე მარტივად გამოუვიდეს.
- შეიძლება, რომ „ოცნება“ დამარცხდეს ამ არჩევნებში?
- იმხელა ქაოსშია ქვეყანა ჩაგდებული „ქართული ოცნების“ მხრიდან, რომ ძალიან ბევრი რამ შეიძლება მოხდეს. ხალხს ყელში ამოუვიდა ეს უსაქმურობა. ელიავას ბაზრობის ხანძარმა კიდევ ერთხელ აჩვენა მავნებლური დამოკიდებულება ყველაფრის მიმართ.
- თქვენც მათ რიგებში ხართ, ვინც ფიქრობს, რომ ეს ხანძარი ხელოვნურადაა მოწყობილი და მასში ხელისუფლების ხელი ურევია?
- არა, მე ამაში არ ვადანაშაულებ. მათ არ იციან კრიზისული სიტუაციების მართვა. ეს არის სწორედაც რომ ხელისუფლების მოვალეობა. როდესაც ასეთი რამ ხდება, მნიშვნელოვანია, როგორ მართავს ხელისუფლება კრიზისულ სიტუაციებს. აღარაფერს ვამბობ იმ გამოუძიებელ ხანძრებზე, რომლებიც აქამდე იყო, მერე რამდენიმე დღე გადაკეტილი ბაზრობა და ვინც არ დაზარალდა, ისიც დააზარალეს ხელახლა. „ქართულმა ოცნებამ“ კიდევ ერთხელ აჩვენა სრული უცოდინრობა, არაპროფესიონალიზმი და ეს უკვე მავნებლობაში გადადის!
- ოპოზიციის კანდიდატებისგან გვესმის შეფასებები, რომ კახა კალაძე სუს-ის მეთოდებით ცდილობს, დაიწყოს წინასაარჩევნო კამპანია. როგორ ფიქრობთ, თუკი „ოცნებას“ გაუჭირდა თბილისში, მივიღებთ კორცხელის მსგავს სურათს?
- ორგანიზატორი ამ დაჯგუფებების, რომელიც ვიხილეთ კორცხელში თუ სადმე სხვაგან, იყო კალაძე და სრულიად არ გამოვრიცხავ, რომ თუ დასჭირდა, ეს ადამიანი გამოიყენებს ამ მეთოდებს. აბა რისთვის ამზადებდა ამხელა სპორტსმენების ჯგუფებს და ამხელა დაჯგუფებებს?! იმისთვის, რომ საჭირო დროს გამოიყენოს ეს ყველაფერი.
- დანარჩენი კანდიდატების შანსებს როგორ აფასებთ? „ნაციონალების“ კანდიდატი პოპულარობით სარგებლობს თბილისის მოსახლეობაში?
- ეს არის პირველადი განცდა ამ პოპულარობის. ნელ-ნელა ეს ეიფორია ჩაცხრება. მთავარი პრობლემა „ნაციონალურ მოძრაობას“ რომელიც აქვს, მარტო ახალი ადამიანის მოყვანა კი არ არის მნიშვნელოვანი, მთავარია, რამდენად შინაარსობრივად ახალს სთავაზობ. „ნაციონალური მოძრაობა“ დაიკარგა და გაიჭედა წარსულში. მისი დაპირებები ისევ ვაუჩერებია. 2012 წლის შემდეგ ოთხჯერ წააგო არჩევნები ამ ვაუჩერებით და რამდენჯერ უნდა შესთავაზონ ეს ვაუჩერები?! ახალი იდეა არ აქვთ საერთოდ. ამ არჩევნების შემდეგ კიდევ უფრო ჩამოიშლება „ნაცმოძრაობა“. ზაალ უდუმაშვილი პოლიტიკაში როგორც შემოვიდა, ისე გაქრება პოლიტიკიდან!
- არ აქვს მას პოლიტიკური მომავალი?
- ყველას გვესმის, რომ ის არ არის გრძელვადიანი პოლიტიკური ფიგურა. ზაალ უდუმაშვილი არის ტექნიკური კანდიდატი, რომელიც დანიშნა მიხეილ სააკაშვილმა! „ევროპული საქართველო“ საერთოდ განულებულია, მათ შორის იმიტომ, რომ ისინი პირდაპირ გარიგებაში არიან „ქართულ ოცნებასთან“, რასაც ადასტურებს ბოლო პერიოდში მიმდინარე მოვლენები.
- რომელ მოვლენებს გულისხმობთ?
- თუნდაც საკონსტიტუციო ცვლილებებთან დაკავშირებით. დღეს ვკითხულობდი პრემიერის განცხადებას და ისევ და ისევ თავს იწონებენ იმ კომფორტით, რომელიც „ევროპულმა საქართველომ“, როგორც უმცირესობამ პარლამენტში, შეუქმნა „ოცნებას“ საკონსტიტუციო განხილვებში მონაწილეობის დროს. ჩვენ კარგად ვხედავთ, როგორ დამთავრდა ეს საკონსტიტუციო განხილვები, თავზე გადაახიეს ყველას ეს კონსტიტუცია და სრულიად სხვა რედაქცია დაწერეს და კენჭიც უყარეს. დღეს ჩიხში არიან, რადგან საერთაშორისო საზოგადოებას ვერ მოატყუებდნენ, რადგან მეტისმეტი მოუვიდა „ქართულ ოცნებას“.
- ამბობენ, რომ კონსენსუსამდე მივლენ...
- კი, გვესმის მსგავსი განცხადებები. გუშინ გავრცელდა ინფორმაცია, რომ „ევროპული საქართველო“ მოლაპარაკებებს აწარმოებს „ოცნებასთან“.
- „ევროპულმა საქართველომ“ უარყო ეს ინფორმაცია...
- მერე უარყვეს, ვიღაცა დაიბნა და ვერ უარყო, ვიღაცამ სხვა რაღაც თქვა. პირდაპირ ვთქვათ, უმცირესობის 21 მანდატი არის მოპარული მანდატი, რომელიც „ევროპულ საქართველოს“ აქვს და ამ მანდატს იყენებენ მხოლოდ საკუთარი ინტერესებისთვის.
- ანუ თქვენ ამტკიცებთ, რომ „ევროპული საქართველო“ „ოცნების“ თამაშს თამაშობს?
- პირდაპირ ვამბობ, ეს ყველაფერი დადასტურდება, თუ „ევროპული საქართველო“ რაიმე ტიპის კომპრომისზე წავა და ცალკე დაიწყებს მოლაპარაკებას „ქართულ ოცნებასთან». მსგავსი რამ ერთი-ორჯერ უკვე გააკეთეს და საერთო ოპოზიციური შეთანხმება ჩაშალეს. ხალხი არ არის ბრმა და ყრუ, ამას რომ ვერ ხედავდეს! შესაბამისად, მათ მხარდაჭერა ექნებათ ნულზე უფრო დაბალი! ისინი ფიქრობენ ტექნიკური ხმების აღებას, „ნაციონალური მოძრაობის“ კოორდინატორები ჰყავთ გადაფორმებული და ფიქრობენ, მათ ხელფასებს თუ დაურიგებენ, რაღაც რაოდენობა ხმას აიღებენ. ეს არის მათი მთელი გათვლა!
- „ნაციონალური მოძრაობის“ იარლიყის მოშორება ძალიან გაგიჭირდებათ. თქვენ მათი სახე იყავით. ამაზე რას იტყვით?
- კი, მათი სახეც ვიყავი, თუმცა 2012 წლამდე პოლიტიკაში არ ვიყავი, ხოლო 2012 წლის შემდეგ ჩემი და კიდევ ერთი-ორი კაცის მეტი დებატებში ვერავინ დადიოდა. ბოკერიები და გაბაშვილები ვერც კი ჩნდებოდნენ თავიდან, ისე ეშინოდათ საჯარო სივრცის, სახლიდან გარეთ ვერ გამოდიოდნენ. მიხეილ სააკაშვილი 2010 თუ 2011 წელს გავიცანი იუსტიციის სახლის გახსნაზე.
- ისე გეკავათ ამხელა თანამდებობა, რომ მიხეილ სააკაშვილს არ იცნობდით? ცოტა დაუჯერებელია…
- გიმეორებთ, მიხეილ სააკაშვილი მე გავიცანი იუსტიციის სახლის გახსნაზე.
- როგორ მოხვდით ამ თანამდებობაზე?
- მე ჩუღურეთის საპასპორტოს უფროსობით დავიწყე დამოუკიდებლად, კონკურსის წესით. მაშინ მინისტრის მოადგილე იყო კოტე ვარძელაშვილი და დეპარტამენტის უფროსი – ირაკლი ფორჩხიძე. მაშინ შეიქმნა სამოქალაქო რეესტრი, საპასპორტო გადავიდა იუსტიციის სამინისტროში და მე კონკურსის წესით დავიწყე მუშაობა. ექვსი მინისტრი გამოვიცვალე და ყველა მათგანი ექვსი თვის მერე აპირებდა ჩემს გათავისუფლებას ერთადერთი რამის გამო…
- რის გამო?
- მე არავისთან კომპრომისზე არ მივდიოდი. არც პარტიულ კადრებს ვნიშნავდი და არც ნეპოტიზმით ვიყავი დაკავებული. ვერ გამათავისუფლა ვერც ერთმა სამსახურიდან, იმიტომ, რომ შედეგებს ვდებდი! აი, ეს იყო რეალობა. პირდაპირ გეუბნებით, მე „ნაცმოძრაობის“ კადრი არ ვარ, თუმცა იმ პასუხისმგებლობას, რომელიც იყო, არ გავურბივარ. ძალიან ბედნიერი ვარ, რომ სწორი ნაბიჯი გადავდგი გასულ წელს და მანდატების ქურდებივით არ შევედი პარლამენტში. მე ავდექი და გარანტირებულ ადგილზე ვთქვი უარი.
დრო ყველა თავისას მიუზღავს და განაჩენს გამოუტანს. ასე მოუვათ ბაქრაძესაც, ბოკერიასაც და მის ირგვლივ შეკრებილებს, რომლებიც მზად არიან, ყველანაირ გარიგებაზე წავიდნენ, ოღონდ თვითონ იყვნენ პარლამენტში.
„ახალი თაობა“, 07 ივლისი, 2017 წელი
ინტერვიუ დავით დარჩიაშვილთან: „ხელისუფლებას ევროსაბჭომ წითელი ბარათი უჩვენა“
„ევროპული საქართველოს“ ერთ-ერთი ლიდერი, ყოფილი დეპუტატი დავით დარჩიაშვილი „ახალ თაობასთან“ ინტერვიუში მიმდინარე პოლიტიკურ პროცესებზე საუბრობს.
- ბატონო დავით, პრემიერმა გიორგი კვირიკაშვილმა განაცხადა, რომ საკონსტიტუციო პროცესთან დაკავშირებით ჯანი ბუკიკიომ ხელისუფლებას მოუწონა კონსენსუსის მიღწევის მზაობა. თქვენ რამდენად გრძნობთ ხელისუფლების ამ მზაობას?
- ასეთი მზაობა მე არ შემიმჩნევია ხელისუფლებისთვის. შეიძლება კულუარებში თავისთვის წუხან, რა პროცესებსაც აქვს ადგილი საკონსტიტუციო ცვლილების ირგვლივ. თუ ოდნავ მაინც შერჩენიათ რაციონალური ანალიზის უნარი და ხელისუფლებაში ყოფნის ხიბლში არ არიან გადაშვებულნი, მაშინ უნდა ესმოდეთ, რომ ევროპის საბჭოს დემოკრატიისა და კანონის უზენაესობის კომისიის შენიშვნები არის სერიოზული ყვითელი ბარათი, მეტიც, შეიძლება ეს იყოს წითელი ბარათიც საქართველოს ხელისუფლებისთვის. ამ პროცესებით, საქართველო ადგილს იმკვიდრებს არა დემოკრატიის გზაზე მიმავალ, პერსპექტიულ ქვეყნებს შორის, არამედ პოსტსაბჭოთა ავტორიტარულ სისტემებს შორის. ასეთ შეფასებას თუ ევროპა გააკეთებს, ეს მძიმე მდგომარეობაში ჩაგვაგდებს. ეს გვიქადის უპერსპექტივობას ყველა მიმართულებით ამ ქვეყნის მოქალაქეებს.
- რამდენად აცნობიერებს ამას ხელისუფლება?
- ვერ გეტყვით, რამდენად აცნობიერებს და ეძებს თუ არა ამ ჩიხიდან გამოსავალს დღეს ხელისუფლება, მე ეს არ შემიმჩნევია ჩვენი ხელისუფლებისთვის, მაგრამ რეალობა არის ისეთი, როგორიც გითხარით. გულის სიღრმეში რა აქვს კვირიკაშვილს ან კიდევ ვინმეს, არ ვიცი, მაგრამ სამოქმედო ნამდვილად აქვთ.
- ექსპერტები ამბობენ, რომ ხელისუფლებაში ორი ფრთა არსებობს, ერთი რადიკალების, მეორე - დასავლეთისკენ ორიენტირებული, რომლებიც მზად არიან შენიშვნების გასათვალისწინებლად. თქვენ როგორ ფიქრობთ, პროცესებს მართავს პრემიერი თუ მართლაც მაჟორიტარები, კახა ოქრიაშვილი წყვეტს ამ ყველაფერს?
- კარგით, რა, მართლაც გჯერათ, რომ კახა ოქრიაშვილი არის ის ისტორიული ფიგურა, რომელმაც ამ ქვეყნის დასავლური, დემოკრატიული განვითარების პერსპექტივა უნდა დაამუხრუჭოს?! კახა ოქრიაშვილზეა დამოკიდებული საქართველოს განვითარების ბედი?!
- ასე ჩანს, რომ კახა ოქრიაშვილის ნების საწინააღმდეგოდ არ მიდის ხელისუფლება...
- ეს იმიტომ, რომ ასე გამოაჩინეს და ასე სურთ, რომ ჩანდეს. ასე შენიღბეს მმართველი ელიტის წარმომადგენლებმა თავიანთი მერკანტილური ზრახვები, რომ მაჟორიტარები გვიძალიანდებიან. რეალურად კი მაჟორიტარების ეს შემადგენლობა აკეთებს იმას, რაც სურს მმართველ ელიტას. ასე იყო მიხეილ სააკაშვილის მმართველობის დროსაც და ედუარდ შევარდნაძის დროსაც. ეს ყველამ კარგად იცის. ესენი არიან რაიონის მასშტაბის კერძო ინტერესების მატარებელი ადამიანები, რომლებსაც ხელისუფლებასთან, ვინც არ უნდა იყოს ის, ურთიერთობის გაფუჭებაზე მეტად არაფრის ეშინიათ. ხომ სასაცილოა იმის წარმოდგენაც კი, რომ უცებ მაჟორიტარებმა გადაწყვიტეს, გადატრიალება მოაწყონ, სასაცილოა.
- თქვენ ამბობთ, რომ გიორგი კვირიკაშვილს არ უნდა, წინ წავიდეთ დემოკრატიის გზაზე?
- გიორგი კვირიკაშვილის გამოცდილება საშინაო და საგარეო პოლიტიკაში ძალიან მწირია. ამას ძალიან დიპლომატიურად ვამბობ. ამის უკან დგას ივანიშვილი და სპეცსამსახურებში გავლენიანი ადამიანები, გარკვეული ჯგუფები. ჩანს, რომ მათი სურვილების შესაბამისად ხდება, რაც ხდება.
- ექსპერტები ამბობენ, რომ ბიძინა ივანიშვილი პოლიტიკურ პროცესებს ჩამოშორდა. არ გჯერათ?
- ერთხელ ივანე მრისხანემაც თქვა, გადავდექიო, მაგრამ ამან რამე შედეგი გამოიღო, შეიცვალა რამე?! არა მგონია, რომ ბიძინა ივანიშვილი პოლიტიკას განერიდა.
- რამდენად რეალურია, რომ 2020 წლისთვის ერთჯერადად „ევროპულმა საქართველომ“ ხელისუფლებას შესთავაზა მაჟორიტარული მანდატების შემცირება პროპორციულის ხარჯზე?
- გიგი უგულავამ განმარტა, რომ ეს იყო აბსოლუტურად კონტექსტიდან ამოგლეჯილი ინფორმაცია.
- რამდენად განიხილება ეს საკითხი თქვენს გუნდში, რომ ასეთი შეთავაზება მოხდეს?
- ჩვენმა პარტიამ თავისი დამოკიდებულებები ძალიან ნათლად გამოხატა.
- რამდენად არის ხელისუფლებისთვის სერიოზული სიგნალი ის გზავნილები, რომლებსაც თუნდაც სტრასბურში ისმენს კობახიძე?
- ვერ ვხედავ, რომ ამ ადამიანებს, რომლებიც დღეს თანამდებობებზე არიან, ჰქონდეთ გაცნობიერებული, თუ რა შარში არიან გახვეულნი. გარეგნულად ეს არ ჩანს, მაგრამ, გულში თუ წუხან და ამას ნელ-ნელა აცნობიერებენ, მიდიან რაციონალურ დასკვნამდე, კარგია, მაგრამ ეს არ ჩანს. არ არის გამორიცხული, რომ მართლაც ღელავენ, წუხან, მაგრამ რისთვის არიან მზად და რისთვის – არა, არ ვიცი. ეს მათ უნდა გვითხრან ბოლოს და ბოლოს.
„ახალი თაობა“, 07 ივლისი, 2017 წელი
ინტერვიუ სოსო შატბერაშვილთან: „არ შემხვედრია ადამიანი, რომელსაც მაჟორიტარული სისტემა უნდა“ // „ქოხებიდან“ სასახლეში გადასვლამ „ქართულ ოცნებას“ აზროვნება შეუცვალა“
ოპოზიცია იმედოვნებს, რომ კონსტიტუციის საბოლოო ვარიანტში აისახება ბევრჯერ გაცემული პირობა მაჟორიტარული არჩევნების გაუქმების შესახებ. `ახალი თაობა~ ამ და სხვა საკითხებზე ესაუბრა „მემარცხენე ალიანსის“ გენერალურ მდივან სოსო შატბერაშვილს.
„მაჟორიტარები უმნიშვნელოვანესი საკითხია. რატომღაც პოლიტიკოსების ნაწილისთვის მთავარი საარჩევნო პრობლემა პრეზიდენტის არჩევის წესია. პრეზიდენტის ახლანდელი უფლებამოსილებები ისეთია, რომ მნიშვნელობა არა აქვს, მას ხალხი აირჩევს თუ ხმოსნების ჯგუფი. მაჟორიტარული საპარლამენტო არჩევნები და მაჟორიტარების ყოფნა კი პარლამენტში ანგრევდა და ანგრევს პოლიტიკურ სისტემას, ხელს უწყობს ვაჭრობასა და ფეოდალთა კასტის ჩამოყალიბებას. მაჟორიტარები ის ხალხია, რომელიც ადვილად გადადის ერთი პოლიტიკური ბანაკიდან მეორეში და არ აკეთებს საქმეს. მაჟორიტარების უმეტესობა თავისი ბიზნესის დაცვით არის დაკავებული“, – ამბობს სოსო შატბერაშვილი.
- მმართველი პარტია, მიუხედავად იმისა, რომ მაჟორიტარული სისტემის გაუქმების პროექტი სახალხოდ გამოიტანა, ბოლოს მაჟორიტარულ სისტემას ვერ შეელია...
- მმართველ პარტიას არ აწყობს პროპორციულ სისტემაზე გადასვლა. საკონსტიტუციო უმრავლესობა „ქართულმა ოცნებამ“ მაჟორიტარების ხარჯზე მოიპოვა. არადა, ეს დაპირება 2012 წლიდან გვესმის. წინა პარლამენტში „ქართული ოცნება“ იმით იმართლებდა თავს, რომ საკმარისი ხმები არ ჰქონდა, მმართველი კოალიცია კი ჭრელი იყო. ახლა სხვა მიზეზი აქვთ თავის გასამართლებლად – მაჟორიტარების წინააღმდეგობა.
- ეს სათადარიგო ვარიანტი ხელისუფლებას თავიდანვე ექნებოდა?
- მაჟორიტარებს ვერ ელევიან. რომ გვეუბნებიან, მაჟორიტარები გვეწინააღმდეგებიანო, შე დალოცვილო, ერთი გუნდი არ ხართ? ეს ხალხი თქვენი პარტიის სახელით არ მონაწილეობდა არჩევნებში? არ იცოდნენ, რა პროგრამა გქონდათ? ერთ ფილოსოფოსს აქვს ნათქვამი – სასახლეში ადამიანი სხვანაირად აზროვნებს, ქოხში კი -სხვანაირად. „ქოხებიდან“ სასახლეში გადაბარგებამ „ქართულ ოცნების“ წევრებს აზროვნება შეუცვალა, თორემ, როცა ჩვენი თანამებრძოლები იყვნენ, როცა ყველას ერთად გვარბევდნენ და გვწამლავდნენ, მაშინ მაჟორიტარული სისტემის გაუქმებას ჩვენთან ერთად მოითხოვდნენ. პარლამენტში, „ოცნების“ გარდა, სხვა პარტიებიც არიან. კეთილი ინებოს „ოცნებამ“, უზრუნველყოს მათი ხმების მობილიზება და შეასრულოს ის, რასაც ხალხს ჰპირდებოდა მაჟორიტარებთან დაკავშირებით.
- „ქართული ოცნების“ წევრების თქმით, ხალხს მაჟორიტარული სისტემა მოსწონს...
- ეს მტკნარი სიცრუეა. ხალხს ხელისუფლებაზე ბევრად ხშირად ვხვდები და მთელი პასუხისმგებლობით შემიძლია ვთქვა, რომ ჯერ არ შემხვედრია ადამიანი, რომელსაც მაჟორიტარული სისტემა უნდა. ადამიანები ყვებიან, როგორ ქრთამავენ მაჟორიტარობის კანდიდატები არჩევნების წინ ამომრჩეველს, არჩევნების შემდეგ კი იკარგებიან.
ეს ყოველთვის ასე იყო. მაგალითად, ნიკო ლეკიშვილი ამბროლაურში არიგებდა ვიდეომაგნიტოფონებს, ტელევიზორებს და ყოველთვის იმარჯვებდა. სხვები ფქვილსა და ზეთს გასცემენ. სამაგიეროდ, მერე პარლამენტში დანახარჯს ინაზღაურებენ და მოგებასაც იღებენ. მაჟორიტარები წილში უსხდებიან სხვებს და სხვა გზებითაც ხელს ითბობენ. რომ გაიძახიან, რეგიონს წარმომადგენელი უნდა ჰყავდესო, ბევრი მაჟორიტარი რეგიონს კი არა, მილიონერთა კლანს, ფეოდალების კლასს წარმოადგენს. ოქრიაშვილი და მისთანები პარლამენტში იცავენ საკუთარ ბიზნესს და ერგებიან ყველა ხელისუფლებას.
- პარლამენტში მაჟორიტარების საქმე სამეურნეო საკითხების მოგვარება არასდროს ყოფილა. ამ მხრივ საკრებულოების მაჟორიტარების საქმიანობა როგორ შეიძლება შეფასდეს?
- სამეურნეო საკითხების მოსაგვარებლად არიან მერები, გამგებლები, საკრებულოები. მაჟორიტარების საქმე პარლამენტში პოლიტიკური მაიმუნობაა და მეტი არაფერი, თუმცა, ისიც უნდა ითქვას, რომ მათ არც ევალებათ ისეთი ყოფითი პრობლემების მოგვარება, როგორებიც არის სახურავის შეკეთება, გზის დაგება, ბოსლის აგება და ა.შ. ბევრჯერ მიყრია კენჭი და ჩემთვისაც მოუთხოვიათ ასეთი საკითხების გადაჭრა. მე გულწრფელად ვუხსნიდი ამომრჩეველს, რას გავაკეთებდი და რას – ვერა. მაჟორიტარებს პარლამენტში თავის დროზე პატარა ფეოდალები უწოდა ბიძინა ივანიშვილმაც. ამ მაჟორიტარებს იმხელა გასაქანი აქვთ და ისინი ისეთ საქმეებში ერევიან, რომ პრეზიდენტზე მეტი უფლებები აქვთ.
- ამ დროისათვის თბილისის მერობის ხუთი კანდიდატია დასახელებული. კონკურენტულია ეს არჩევნები?
- სხვებიც იქნებიან. კანდიდატების რაოდენობა, ასე, 12-მდე ავა. ამ ეტაპზე უძლიერესი პოზიციები აქვს მმართველი გუნდის წარმომადგენელ კახა კალაძეს. ამის მთავარი მიზეზი ისევ ბიძინა ივანიშვილის დიდი ავტორიტეტია. მეორეც, მას ხმას მისცემენ სპორტის გულშემატკივრები. გარდა ამისა, კახა კალაძემ თავი გაართვა მინისტრობას. თუ ჯანსაღი ოპოზიცია მიიღებს ჩემს მოწოდებას და ერთიან ღირსეულ კანდიდატზე შევთანხმდებით, მაშინ სხვა სიტუაცია შეიქმნება. ამჟამად კახა კალაძე უალტერნატივოა, ძლიერია ბიძინა ივანიშვილის ფაქტორი. რა იქნება 2 ან 5 წლის შემდეგ, არ ვიცი, ახლა კი ასეთი რეალობაა.
