„რეზონანსი“: იქნება თუ არა არეულობა არჩევნებზე?! // „შეიძლება „ნაციონალურ მოძრაობას“ ან ვიღაცას დაძაბულობა მართლაც სურს, მაგრამ არანაირი ასეთი არეულობის მცდელობა არ ჩანს“
„რეზონანსი“: რამდენად მოსალოდნელია არეულობები საარჩევნოდ?
„რეზონანსი“: ინტერვიუ სოსო ცინცაძესთან: „ბიძინა ივანიშვილი „ოცნების“ საარჩევნო კამპანიით და თავისი გუნდით მაინცდამაინც კმაყოფილი არაა“
„რეზონანსი“: ინტერვიუ ლევან ბერძენიშვილთან: „ბიძინა ივანიშვილმა თავად დაგვიძახა, ჩვენ არავისთან მივსულვართ“ // „რესპუბლიკელე-ბისთვის გაუგებარია ექსპრემიერის მხრიდან მათ პარტიაზე შეტევა“
„რეზონანსი“: ინტერვიუ გია ვოლსკისთან: „ნაცმოძრაობა“ სიტუაციის დაძაბვას ცდილობს, მაგრამ არ გამოუვა“
„რეზონანსი“: ინტერვიუ გიორგი ბარამიძესთან: „ყველა თავდასხმა უშუალოდ „ოცნების“ ხელმძღვანელობის მითითებით მოხდა“
„რეზონანსი“: ირაკლი ოქრუაშვილის დოკუმენტი „რუსთავი 2“-ის დავაში // ქიბარ ხალვაშის ადვოკატი დოკუმენტზე თავისი კლიენტის ხელმოწერას უარყოფს
„რეზონანსი“: ირაკლი ოქრუაშვილი ამბობს, რომ „რუსთავი-2“-ის დოკუმენტის გამოჩენით კახა კალაძეს სამაგიერო მიუზღო
———
„ახალი თაობა“: ინტერვიუ ბიძინა გუჯაბიძესთან: „არჩევნებში გამარჯვებაზე საუბარი ნაციონალების მხრიდან ბაქი-ბუქია“ // „ხალხთან შეხვედრებმა დამარწმუნა, რომ საზოგადოება იმედგაცრუებული არაა, სამეგრელოს მოსახლეობას ვერ მოატყუებენ“
„ახალი თაობა“: ინტერვიუ გელა ნიკოლაიშვილთან: „ქართული ოცნება“ 70 მანდატს აიღებს“
„ახალი თაობა“: ინტერვიუ მინისტრ დავით ბაქრაძესთან: „ვიზალიბერალიზაცია არჩევნებს არ მიებმება“ // „750 ევროპარლამენ-ტარიდან საქართველოსთვის ვიზალიბერალიზაციის მინიჭებას 550-ზე მეტი მხარს უჭერს“
„ახალი თაობა“: ინტერვიუ მამუკა ტუსკაძესთან: „ხელისუფლება რომ არ შეცვლილიყო, ცოცხალი ვერ გადავრჩებოდი“ // „ადამიანები პირიდან შადრევანივით ასხამდნენ სისხლს და ფილტვები პირიდან ამოსდიოდათ“
——————-
„რეზონანსი“, 07 სექტემბერი, 2016 წელი
იქნება თუ არა არეულობა არჩევნებზე?!
„შეიძლება „ნაციონალურ მოძრაობას“ ან ვიღაცას დაძაბულობა მართლაც სურს, მაგრამ არანაირი ასეთი არეულობის მცდელობა არ ჩანს“
სალომე სარიშვილი
მმართველი ძალა წინასაარჩევნო პერიოდში გარკევულ დაძაბულობას არ გამორიცხავს და აცხადებს, რომ “ნაციონალურ მოძრაობას” პროვოკაციების მოწყობა აქვს დაგეგმილი. თავად “ნაციონალები” კი ამბობენ, რომ არჩევნებში “ოცნების” წაგება გარდაუვალია, ამიტომ მას წინასაარჩევნო პროცესის აბსურდული ბრალდებებით წარმართვა აქვს გადაწყვეტილი. ექსპერტებში კი ამ საკითხზე აზრთა სხვაობაა, ისინი ორი შესაძლო სცენარის განვითარებაზე საუბრობენ.
“ქართული ოცნება – დემოკრატიული საქართველოს” აღმასრულებელი მდივნის, ირაკლი კობახიძის განცხადებით, არსებობს ინფორმაცია იმის თაობაზე, რომ “ნაციონალური მოძრაობის” მიერ გარკვეული ტიპის პროვოკაციებია დაგეგმილი. მისივე თქმით, პარტიაში ინფორმაცია სხვადასხვა წყაროდან მიდის და ბუნებრივია, როდესაც პროვოკაციები პოლიტიკური გაერთიანების მიერ იგეგმება, ეს ინფორმაცია გარეთ ჟონავს.
“თუ დადასტურდება ინფორმაცია იმის თაობაზე, რომ “ნაციონალური მოძრაობის” მიერ დაგეგმილი პროვოკაციები დანაშაულის ნიშნებს შეიცავს, ამ შემთხვევაში, სამართალდამცავ ორგანოებს აუცილებლად მივმართავთ,” – განაცხადა ირაკლი კობახიძემ. მისივე თქმით, “ქართულ ოცნებას” აქვს ინფორმაცია იმის თაობაზე, რომ ამ პროვოკაციების განხორციელებისთვის მათ შეიძლება გამოიყენონ როგორც უშუალოდ თავიანთი სტრუქტურები, “ისე მათთან ასოცირებული ძველი თუ ახალი ორგანიზაციები და ეს შეიძლება იყოს ე.წ. არასამთავრობო ორგანიზაციები ან სხვა ტიპის დაჯგუფებები, მათ შორის “თავისუფალი ზონა”.
“რა თქმა უნდა, “ნაციონალურ მოძრაობას” მასთან ასოცირებული ორგანიზაციების გარკვეული ქსელი აქვს, რომელსაც პროვოკაციებისთვის გამოიყენებენ, ეს მოგვიანებით გახდება ცნობილი, მაშინ, როდესაც პროვოკაციები მათ მიერ იქნება განხორციელებული. ჩვენი მიზანია პრევენცია, ჩვენი ამოცანაა ყველანაირი გართულების თავიდან აცილება. საბოლოო ჯამში, ჩვენ ვართ პასუხისმგებელი ამ არჩევნებზე, როგორც მმართველი პარტია. აქედან გამომდინარე, ჩვენს ინტერესებშია, რომ ეს არჩევნები ჩატარდეს სამართლიანად, კორექტულად და ამისთვის ყველაფერს გავაკეთებთ,” – განაცხადა ირაკლი კობახიძემ.
“ნაციონალური მოძრაობის” წარმომადგენლის, სალომე სამადაშვილის განცხადებით, “ქართულ ოცნებას” საზოგადოებისთვის სათქმელი არაფერი აქვს. ამბობს, რომ მმართველი გუნდის არჩევნებში წაგება გარდაუვალია, ამიტომ “ოცნებას” გადაწყვეტილი აქვს, წინასაარჩევნო პროცესი აბსურდული ბრალდებებით წარმართოს.
“ასეთი ტიპის ბრალდება მხოლოდ ერთ რამეს აჩვენებს, “ქართული ოცნება” დარწმუნდა, რომ “ნაციონალური მოძრაობა” ერთადერთი პოლიტიკური ძალაა ქვეყანაში, რომელსაც ქვეყნის კრიზისიდან გამოყვანის გეგმა აქვს,” – აცხადებს სალომე სამადაშვილი. მისი თქმით, “ოცნება” ახლა ყველანაირი მეთოდით ცდილობს, პარტიას წინასაარჩევნო კამპანიის ჩატარებაში ხელი შეუშალოს.
“ქურდს კუდი ეწვოდა“ – ამ ანდაზას მაგონებს ის პოლიტიკური ძალა, რომელმაც კორცხელი მოაწყო, რომელიც ყოველდღე ოპოზიციის ოფისებს თავს ესხმის. ეს არის “ქართული ოცნების” სისუსტის ნიშანი,” – ასე გამოეხმაურა “ნაციონალური მოძრაობის” წევრი გიორგი კანდელაკი მმართველი გუნდის წარმომადგენლების ბრალდებებს პროვოკაციების მოწყობაზე. პარტიაში მიიჩნევენ, რომ “ქართული ოცნება” ხელს საზოგადოების დეგრადირებას უწყობს.
“სასაცილოა, სატირალი რომ არ იყოს, იმიტომ, რომ ეს ადამიანები მართავენ დღეს ჩვენს ქვეყანას. “ქართული ოცნება” არა მარტო ვნებს, არამედ დეგრადირებას უკეთებს ადამიანებს – ეს არის ჩუგოშვილის მაგალითი,” – განაცხადა აკაკი ბობოხიძემ.
პოლიტოლოგი და კონსტიტუციონალისტი ვახტანგ ძაბირაძე მიიჩნევს, რომ ხელისუფლების წარმომადგენელთა განცხადებები მოსალოდნელ არეულობაზე არასერიოზული და საფუძველს მოკლებულია. მისი შეფასებით, მმართველ ძალას შეუძლია, მსგავს ფაქტებზე მხოლოდ რეაგირება მოახდინოს და ამაზე ღიად არ ისაუბროს, თუმცა ნაცვლად ამისა, საზოგადოებაში ხელოვნურად შიშსა და პანიკას თესავს.
“როდესაც ხელისუფლება ან მისი წარმომადგენლები ასეთ განცხადებებს აკეთებენ, არაფრით არ შემიძლია ეს სერიოზულად აღვიქვა. მთელი 25 წლის განმავლობაში ყველა ხელისუფალი არჩევნების წინ ლაპარაკობდა იმაზე, რომ ოპოზიცია რაღაცას ამზადებს ან გეგმავს. თუკი ამ პარტიაში მსგავსი სიგნალები მიდის და თანაც ისეთ პარტიაში, რომლის ხელშიც უშიშროება, პოლიცია და ყველა ძალოვანი სტრუქტურაა, ადგეს და გამოიძიოს. რა უბედურებაა ეს? შეიძლება “ნაციონალურ მოძრაობას” ან ვიღაცას დაძაბულობა მართლაც სურს, მაგრამ არანაირი ასეთი არეულობის მცდელობა არ ჩანს. რამდენიც არ უნდა უნდოდეს ეს ვინმეს, თუკი საამისო ბაზა არ გააჩნია, ასეთი რამ არ და ვერც მოხდება. ასეთი განცხადებები ემსახურება იმას, რომ როგორმე საზოგადოებაში დაძაბულობა ხელოვნურად შემოიტანონ, ეს კი ხელს აძლევს, როგორც მმართველ გუნდს, ისე თავად “ნაციონალებს”. ე.ი. გამოდის, რომ მთელი საზოგადოება გაფაციცებით უნდა ველოდოთ, არიქა, “ნაციონალებმა” ან “ოცნებამ” რაიმე უბედურება არ დაატრიალოს,” – განუცხადა “რეზონანსს” ვახტანგ ძაბირაძემ და იქვე დაუმატა, რომ შესაძლოა ეს მეთოდი “ოცნების” საარჩევნო პიარკამპანიის ერთ-ერთი ნაწილიც იყოს. „ქართული ოცნება” დაკარგული ამომრჩეველის ამგვარი ფორმით მოტრიალებას ცდილობს. ეს ერთგვარი დაშინებაა მოსახლეობისა, რომ თუკი მხარს მათ არ დაუჭერს, აი, “ნაციონალები” უბედურებას დაატრიალებენო,” – ამბობს ვახტანგ ძაბირაძე.
ვახტანგ ძაბირაძისაგან განსხვავებით პოლიტოლოგი იგორ კვესელავა მიიჩნევს, რომ მმართველი გუნდის განცხადება საფუძველს მოკლებული ვერ იქნება, რადგან ამ არჩევნებზე “ნაციონალების” “ბოლო გაბრძოლება” იქნება და შესაბამისად, ისინი გარკვეული არეულობისა თუ აქციების მოწყობას არ მოერიდებიან.
„რვა ოქტომბერს მათ უნდა დაასრულონ თავიანთი გედის სიმღერა, ამიტომაც ახლა ყველა რესურსის გამოყენებას ცდილობენ საიმისოდ, რომ გარკვეული დაძაბულობა შექმნან. თანაც ნუ დაგვავიწყდება, რომ ეს ძალა ხელისუფლებაში 9 წლის განმავლობაში იყო, ის ფლობს საარჩევნო ტექნოლოგიებს და ძალიან კარგად იციან, რა, როგორ უნდა აკეთოს. ვფიქრობ, ასეც მოიქცევიან, ამიტომ ხელისუფლების წარმომადგენლები თავიანთი განცხადებებით გარკვეულ პრევენციას ცდილობენ და ეს გამართლებულიცაა. დესტრუქციული მოქმედებების პრევენცია სწორედაც რომ აგვარი გზითაა შესაძლებელი და ეს გასულ წლებშიც კარგად გამოჩნდა. ამდენად, არჩევნებზე გაცილებით რთულ პროცესებს უნდა ველოდოთ, ვიდრე ახლაა,” – აღნიშნავს იგორ კვესელავა.
„რეზონანსი“, 07 სექტემბერი, 2016 წელი
რამდენად მოსალოდნელია არეულობები საარჩევნოდ?
ლიკა გურაბანიძე
ვიცე-პრემიერის, ენერგეტიკის მინისტრ კახა კალაძის განცხადებით, “ნაციონალურმა მოძრაობამ” არჩევნებამდე ერთი თვით ადრე, საზოგადოებაში დაძაბულობის შემოსატანად სპეციალური ორგანიზაცია შექმნა. „დაარსებულია, თუ არ ვცდები, რაღაც ორგანიზაცია, რომლითაც აპირებენ გარკვეული არეულობის შემოტანას. ამის მაგალითები არის უკვე, თუნდაც, აჭარაში საარჩევნო კამპანიის ხელის შეშლაში, მივარდნები და ასე შემდეგ,” – აღნიშნა კახა კალაძემ.
შეგახსენებთ, რომ ანალოგიური შინაარსის განცხადება “ქართული ოცნების” სახელით მანამდე თამარ ჩუგოშვილმაც გააკეთა, სადაც ნათქვამია, რომ მოსალოდნელია გარკვეული პროვოკაციები. თამარ ჩუგოშვილის თქმით, “ნაციონალური მოძრაობა” არჩევნებს აგებს და ერთადერთ შანსს არეულობის ინსპირირებაში ხედავს. ამავე შინაარსის განცხადება ექსპრემიერმა ბიძინა ივანიშვილმაც გააკეთა. მისი თქმით, “ნაციონალური მოძრაობა” არჩევნების ჩაშლას ცდილობს. ბიძინა ივანიშვილმა აღნიშნა, რომ “ნაციონალურმა მოძრაობამ” რევოლუცია რამდენჯერმე დაგეგმა, თუმცა არ გამოუვიდა, “ამ პარტიის გათვლა ახლაც მხოლოდ რევოლუციას უკავშირდება”.
ბრალდებებს საქართველოს ექსპრეზიდენტმა, ოდესის ოლქის გუბერნატორმა მიხეილ სააკაშვილმა ფეისბუქით უპასუხა. „ბიძინა ივანიშვილმა და მისმა მარიონეტებმა დაიწყეს ძახილი, რომ თურმე ჩვენ ვამზადებთ არეულობას. როგორც წესი, ის მოწინააღმდეგეს აბრალებს თავის გეგმებს. არჩევნები ივანიშვილს წაგებული აქვს, რაც არ უნდა მოიმოქმედოს,” – აღნიშნა მიხეილ სააკაშვილმა.
რამდენად მოსალოდნელია არეულობები საარჩევნოდ? – ამ კითხვით “რეზონანსმა” საზოგადოების ცნობილ წევრებს მიმართა.
მიხეილ ცაგარელი (ასტროლოგი): აქ ახალი არაფერია, “ნაციონალური მოძრაობა”, მას შემდეგ, რაც ოპოზიციაშია, მუდმივად პროვოკაციული განცხადებებითაა დაკავებული და ემზადება სხვადასხვა პროვოკაციისთვის, ამის დიდოსტატები არიან. ეს ყველამ ვიცით, აქ გასაკვირი არაფერია. გასაკვირია “ქართული ოცნების” პოზიცია, რომელმაც ეს ყველაფერი იცის წლების განმავლობაში და ხმა ახლა ამოიღო. “ოცნება” არაფერს აკეთებს იმისთვის, რომ ზოგიერთ მაპროვოცირებელ პროცესზე გავლენა მოახდინოს.
გიგა ნასარიძე (ა/ო “საქართველო არ იყიდება”): თუ გავიხსენებთ იმას, რა მოხდა ცოტა ხნის წინ კორცხელში, ხელისუფლებამ რა გააკეთა და რა მოვლენებს ჰქონდა ადგილი, ადვილი მისახვედრი იქნება, რას შეიძლება გეგმავდეს წინასაარჩევნოდ ხელისუფლება. ამ ყველაფრიდან გამომდინარე, უნდა ვივარაუდოთ, რომ ხელისუფლება ძალადობრივი სცენარისათვის ემზადება. ჩვენ ყველაფერი უნდა გავაკეთოთ, რომ ეს არ მოხდეს.
ნანა კაკაბაძე (უფლებადამცველი): ეს მოსალოდნელი კი არა, გარდაუვალია, რაც აუცილებლად მოხდება. ბუნებრივია, რომ ამ არჩევნებით ისინი პოლიტიკური სივრციდან ან გაქრებიან, ან გადარჩებიან. უამრავი პროვოკაცია უკვე სახეზეა, მაგალითად ორგანიზებული საპროტესტო აქციები. “ნაციონალური მოძრაობის” მხრიდან ეს პროცესის სრული დესტაბილიზაციისკენაა მიმართული. ჯერჯერობით ეს ვერ გამოსდით.
ედიშერ გვენეტაძე (ისტორიკოსი): დარწმუნებული ვარ, “ნაციონალური მოძრაობა” ქვეყანაში სიტუაციის ასარევად ემზადება და ამისათვის საბაბად მათ არჩევნები სჭირდებათ. “ნაციონალური მოძრაობა” ყველაფერზეა წამსვლელი, რომ მათ საკუთარი პრივილეგიები დაიბრუნონ, მაგრამ, ვფიქრობ, ამას ქართველი ხალხი არასდროს დაუშვებს. რვა ოქტომბერს ხალხი იმ დესტრუქციულ ძალას, რომელსაც “ნაციონალური მოძრაობა” ჰქვია, პოლიტიკურ სამარეში გაუშვებს.
გია ბურჯანაძე (მსახიობი): სანამ “ნაციონალური მოძარაობა”, როგორც დამნაშავე ორგანიზაცია არ გასამართლდება, მანამ ყველაფერია მათგან მოსალოდნელი. “ქართული ოცნების” დანაშაული არის ის, რომ არ გაასამართლა და გადაარჩინა “ნაციონალური მოძრაობა”, ამიტომ ორივე დამნაშავე პარტიაა.
„რეზონანსი“, 07 სექტემბერი, 2016 წელი
ინტერვიუ სოსო ცინცაძესთან: „ბიძინა ივანიშვილი „ოცნების“ საარჩევნო კამპანიით და თავისი გუნდით მაინცდამაინც კმაყოფილი არაა“
სალომე სარიშვილი
პოლიტოლოგი სოსო ცინცაძე წინასაარჩევნო პერიოდის ერთ-ერთ პრობლემად პარტიებში “საკადრო შიმშილს” მიიჩნევს. მისი თქმით, ეს ეხება როგორც მმართველ ძალას, ისე ოპოზიციურ პარტიებს. ფიქრობს, რომ უმეტეს შემთხვევაში საზოგადოება მის რეგიონსა თუ უბანში წარდგენილ მაჟორიტარობის კანდიდატს საერთოდ არ იცნობს, რაც ხელს არც მმართველ ძალას და არც ოპოზიციურ სპექტრს არ აძლევს. პოლიტოლოგი ჩვენთან საუბრისას წინასაარჩევნო კამპანიაში ექსპრემიერ ივანიშვილის ჩართვასაც შეეხო და თქვა, რომ მისი გააქტიურებით კიდევ ერთხელ დამტკიცდა, რომ ივანიშვილის გარეშე “ოცნება” ქმედუნარიანი ვერაა.
წინასაარჩევნო პროცესებსა და მიმდინარე პოლიტიკურ მოვლენებზე “რეზონანსი” სოსო ცინცაძეს გაესაუბრა.
სოსო ცინცაძე: თავდაპირველად ივანიშვილმა აბსოლუტურად სწორი კურსი აიღო, როდესაც წინასაარჩევნო კამპანიაში არ ერეოდა და პროცესებს გარედან უყურებდა. ახლა მისი გააქტიურება თითიდან გამოწოვილი და უსაფუძვლო არ გახლავთ, ე.ი. რაღაც აუცილებლობამ გამოიწვია. ამის მიზეზზე ჩვენ მხოლოდ ვარაუდის დონეზე შეგვიძლია ვისაუბროთ. “ოცნებას” თავისი შიდა მოხმარების სოციოლოგიური გამოკითხვები აქვს, რასაც არ ახმაურებს. როგორც ჩანს, მისი შედეგი არცთუ ისე დიდი წარმატების მოლოდინს ქმნის.
ალბათ ამიტომაც გახდა საჭირო სტრატეგიული რეზერვისა თუ მძიმე არტილერიის გამოყენება და აქ ბიძინა ივანიშვილი იგულისხმება, რომელიც “ოცნებისთვის” რესურსია. ერთი რამ კი დამტკიცდა, კერძოდ ის, რომ ივანიშვილის გარეშე “ოცნება” ქმედუნარიანი ვერაა. მეორე საკითხია, რა ფორმით ერთვება ის წინაასაარჩევნო კამპანიაში და მოიტანს თუ არა ეს შედეგს, თუმცა ჩვენთვის მისი ჩართულობის გამომწვევი მიზეზი ბევრად უფრო მნიშვნელოვანია, ვიდრე მისი ფორმა.
- თქვენი აზრით, რამ გამოიწვია ბიძინა ივანიშვილის დაბრუნება?
- როგორც ჩანს, ბიძინა ივანიშვილი “ოცნების” წინასაარჩევნო კამპანიის მიმდინარეობით მაინცდამაინც კმაყოფილი არაა. ვფიქრობ, არც გუნდითაა კმაყოფილი. მისი ტონალობა, გაღიზიანება, წონასწორობიდან უცბად გამოსვლა – ეს არ გახლავთ ის ტონალობა, რომელიც 2012 წელს გამარჯვების შემდეგ ყოფილ პრემიერს ჰქონდა. ეს მეტყველებს იმაზე, რომ მას ბევრი რამ არ მოსწონს და ხშირად გაღიზიანებას ვერ მალავს. ვინ იფიქრებდა, რომ 4 წლის შემდეგ “ოცნებას” საქმე ასე გაურთულდებოდა.
- მაინც რა სირთულეებს ხედავთ მმართველი გუნდის საქმიანობაში?
- გნებავთ, ღირსეული კანდიდატების მოძებნა ავიღოთ. ხომ ხედავთ, რა ხალხი დააყენეს მაჟორიტარობის კანდიდატებად? – სულ უცნობებები. საზოგადოება მათ აბსოლუტურად არ იცნობს. მეორე საკითხია მოქმედი პრემიერი, რომელიც, ნაცვლად იმისა, რომ ქვეყანაში არსებულ მძიმე სოციალურ პრობლემებზე ისაუბროს, თავის უმეტეს დროს ყოველდღიურად რეგიონებში აბსოლუტურად უცნობი ხალხის წარდგენას უთმობს. გარდა ამისა, “ოცნებას” ძალიან ხშირად უხდება თავის მართლების რეჟიმში გადასვლა, რადგან არგუმენტი მძიმე მემკვიდრეობის შესახებ უკვე საკმარისი აღარაა. მაშინ “ნაციონალებისგან” შეიძლება სოციალურ ჭრილში კონტრარგუმენტიც კი მოისმინონ, რადგან მათ ამ კუთხით ათჯერ და ოცჯერ უფრო მძიმე მემკვიდრეობა მიიღეს. “ოცნების” ყველაზე დიდი პრობლემა ისაა, რომ მათ გრძელი სათადარიგო სკამი არ აღმოაჩნდათ, ისევე როგორც “ნაციონალებს”. ყველაფერს ვიფიქრებდი და ზურაბიშვილის ქალს თუ საიდანღაც გამოჩხრეკდნენ და მომავალ პარლამენტში შესასვლელად მხარს დაუჭერდენენ, ამას კი ვერ წარმოვიდგენდი.
- ბიძინა ივანიშვილმა თავის გამოსვლებში რესპუბლიკური პარტია და „თავისუფალი დემოკრატები“ გააკრიტიკა. როგორ ფიქრობთ, რამდენად სწორი და მომგებიანია „ოცნებისთვის“ ახლა სხვა პარტიების რეიტინგებზე აპელირება?
- ამ ფორმატმა შესაძლოა ელექტორატი ალტერნატივის გარეშე დატოვოს. ხალხი მივიდეს იმ აზრამდე, რომ ვინ თუ არა “ოცნება”. იმიტომ კი არა, რომ “ოცნება” ძალიან კარგია, არამედ სხვაა სუსტი. მათი სურვილიც სწორედ ისაა, რომ ხალხს თავში ეს აზრი ჩაუტენონ.
აქ კიდევ სხვა პრობლემაა, ივანიშვილი ხომ მაღალი რანგის პოლიტიკოსი არაა? ის პოლიტიკაში სულ სხვა სფეროდან მოვიდა.
- დავით უსუფაშვილის მისამართით გაკეთებულ კრიტიკულ განცხადებებზე რას ფიქრობთ?
- ამაზე საუბარი ძალიან შორს წაგვიყვანს. თუმცა ისიც უნდა აღინიშნოს, რომ ჩვენი ოპოზიცია უკვე მერამდენედ არჩევნებს დაქსაქსული ხვდება, ესეც ხომ რეალობა და ფაქტია. პრაქტიკულად გამოდის, რომ მხოლოდ ორი ძალაა – “ოცნება” და “ნაციონალები”, დანარჩენებს კი უწევთ ამტკიცონ ის, რომ კვლევები სიცრუეა.
- მას შემდეგ, რაც ყოფილმა პრემიერმა “პატრიოტთა ალიანსის” მისამართით გარკვეული სიმპათია გამოხატა, გაჩნდა მოსაზრება იმის შესახებ, რომ შესაძლოა “ოცნებამ” ამ პარტიასთან საპარლამენტო კოალიცია შექმნას, თუ დასჭირდა. თქვენ როგორ უყურებთ ამ მოსაზრებას?
- ვერ გეტყვით. ამ ლოგიკით, ივანიშვილს ბევრი ადამიანის მიმართ გამოუხატავს სიმპათია, რომელიც შემდგომ ანტიპათიით შეუცვლია. ფაქტი ისაა, რომ თვითონ ცხოვრებას მიჰყავს ჩვენი რეალობა იქითკენ, როგორ მდგომარეობაშიც ვვარდებით.
- სხვა პარტიების შესაძლებლობებზე რას გვეტყვით? თქვენი აზრით, ნინო ბურჯანაძეს რა შანსი აქვს?
- რაც შეეხება ნინო ბურჯანაძეს და მის პარტიას, როდესაც ნატო მაინცდამაინც არ გველოდება, ევროკავშირი საერთოდ არ გვიყურებს და ვიზალიბერალიზაცია ლამის დიპლომატიურ ტრიუმფად აღვიქვათ, ნინო ბურჯანაძისკენ მიმართული ქილიკი და აბსოლუტურად უსამართლო დემონირება ჩვენი საზოგადოების დაბალ პოლიტიკურ დონეზე მეტყველებს. რაც მთავარია, ეს ყველაფერი ხდება მაშინ, როცა ევროპამ მილიონ-ნახევარ მუსულმანს კარი გაუღო და მთელი მსოფლიო ევროპის ისლამიზაციაზე საუბრობს. მთავარი ისაა, რომ ყველგან საკადრო შიმშილია. კიდევ ერთი, რაც ყველაზე მეტად მაღიზიანებს და მთრგუნავს, ფულის კულტია. ყველა და ყველაფერი იყიდება.
- კერძოდ ვის გულისხმობთ?
- მაგალითად “ქრისტიან-დემოკრატები”, რომელიც ხელოვნური განაყოფირებით შეიქმნა. პირველი გაქცეულები სამუშია და გაბუნიაც არ დავიწყებია ხალხს. ახლა კიდევ ნინო ბურჯანაძის პარტიიდან გაქცეულები. გნებავთ “გირჩი” და “ახალი მემარჯვენეები” აიღეთ, რომლებიც პაატა ბურჭულაძეს შეუერთდნენ, ესეც გაყიდვა იყო. არ მჯერა, რომ მან ეს პარტიები სიამოვნებით მიიღო. გადაახვიეთ და ნახეთ, “გირჩი” პაატა ბურჭულაძეს რად მიიჩნევდა. დიდი ეჭვი მაქვს, რომ “გირჩის” შეკედლება პაატა ბუჭულაძის ინიციატივა არ იყო, რადგან ისე ეს პარტია წყალწაღებული იყო.
- აბა ვისი ინიციატივა იყო?
- ვერ გეტყვით, ჩემს ეჭვზე ასე ღიად საუბარი არ მსურს.
- დაბოლოს, მმართველ გუნდში ამბობენ, რომ “ნაციონალები” საარჩევნოდ პროვოკაციებსა და არეულობას გეგმავენ. თქვენ როგორ ფიქრობთ, არსებობს ამის ნიადაგი?
- ეს მხოლოდ ამგვარი განცხადებების ავტორების ფანტაზიის შეზღუდულობაზე მეტყველებს. გაიხსენეთ, 3 წლის წინანდელი განცხადებები, როცა ყოფილი შს მინისტრი “ნაციონალების” მიერ დადგმულ შესაძლო არეულობის სცენარზე საუბრობდა. საბურავების ამბავი ალბათ ყველას ახსოვს. არც სამშობლოს ღალატით აღძრული საქმე დაგვიწყებია, სადაა ის საქმე? დაიხურა? დღეს ამაზე ვიცინით.
როდესაც დღეს იმავეს საუბრობენ, ეს მხოლოდ უფანტაზიობაზე მეტყველებს. თქვე დალოცვილებო, სხვა რამე მოუგონეთ ამ “ნაციონალებს”, რაღა სამი წლის წინანდელ ამბავს უხსენებთ. ხალხი ამას სერიოზულად არ იღებს ისევე როგორც ამ თმაგაჩეჩილი ირაკლი კობახიძის განცხადებებს, რომლის გამოსწორებაც მერე გუნდის სხვა წევრებს უხდებათ. გახსოვთ, რომ დაიმუქრა პრესას ვაჩვენებ, სამ დღეს ვერაფერს რომ ვერ დაბეჭდავსო? შემდეგ მისი განცხადების შეცვლა ვოლსკის დაევალა და თქვა, რომ სხვა რამეს გულისხმობდა. ჩუგოშვილი ვინაა საერთოდ, ხალხმა იცის? – ეს ყველაფერი არასოლიდურია.
„რეზონანსი“, 07 სექტემბერი, 2016 წელი
ინტერვიუ ლევან ბერძენიშვილთან: „ბიძინა ივანიშვილმა თავად დაგვიძახა, ჩვენ არავისთან მივსულვართ“ // „რესპუბლიკელებისთვის გაუგებარია ექსპრემიერის მხრიდან მათ პარტიაზე შეტევა“
სალომე სარიშვილი
“ბატონ ბიძინას არასდროს დაუმალავს, რომ დავით უსუფაშვილის გადაბირება უნდოდა და ასეთ შემთხვევაში ყველაფერს ჰპირდებოდა. ასე ვთქვათ, როგორც ოქროს თევზი, ისე იყო. სწორედ იმიტომ, რომ ეს არ გამოუვიდა, ივანიშვილი გაღიზიანდა, თუმცა ვერ გეტყვით, ბოლო ხანების განცხადებები და “რესპუბლიკელებზე” შეტევა რამ გამოიწვია,” – ამბობს “რეზონანსთან” საუბრისას რესპუბლიკური პარტიის ერთ-ერთი ლიდერი და პარლამენტის წევრი ლევან ბერძენიშვილი.
როგორც ჩვენთან საუბრისას განაცხადა, მისთვის გაუგებარია, რატომ ღელავს და ნერვიულობს ყოფილი პრემიერი “რესპუბლიკელებზე”, თუკი მიიჩნევს, რომ ამ პარტიის რეიტინგი მხოლოდ 1%-ს უტოლდება. დეპუტატის თქმით, მაშინ, როცა მოქმედი პრემიერი 2 თვის წინ “პატრიოტთა ალიანსთან” ბლოკის შექმნას კატეგორიულად გამორიცხავდა, ახლა ივანიშვილის მხრიდან ირმა ინაშვილის ქება უცნაურად ჟღერს.
ყოფილი პრემიერის ბიძინა ივანიშვილის განცხადებებსა და ამ საკითხისადმი “რესპუბლიკელების” დამოკიდებულებაზე “რეზონანსი” ლევან ბერძენიშვილს გაესაუბრა.
ლევან ბერძენიშვილი: პრინციპში, მთლიანობაში რომ შევაფასოთ ივანიშვილის განცხადებები, ყველაფერი მცდარი იყო. კარგ შემთხვევაში მას ბევრი რამ ეშლება, ხოლო ცუდში უბრალოდ ტყუის. რესპუბლიკური პარტიის რეიტინგი მხოლოდ არჩევნებზე გაირკვევა, იქვე ისიც გაირკევა, ვინ როგორი ექსპერტია. რამდენადაც მეტი იქნება ასეთი ტიპის ექსპერტი, იმდენად არასაიმედო და არაკეთილსინდისიერი გამოვა იგი. რაც შეეხება უშუალოდ ჩვენს პარტიასა და “რესპუბლიკელების” რეიტინგს, ივანიშვილს პოლიტიკური პარტიის როლი საერთოდ არ ესმის. როგორც საბჭოთა მენტალობის ადამიანს, მასაც ჰგონია, რომ პოლიტიკის კეთება მისი, ერთი კაცის საქმეა და არა პოლიტიკური ძალებისა. ასე რომ, არაფერი ახალი იქ არ თქმულა, ესაა მისი აზრები, რომლითაც მან 2011 წლის საკუთარი თავის ვერსია დაამარცხა, როდესაც “რესპუბლიკელები” თავისთან მიიხმო.
- უფრო კონკრეტულად რას გულისხმობთ? თავის დროზე, როდესაც „რესპუბლიკელები“ კოალიციაში შეხვედით, სხვანაირად გაფასებდათ?
- ბიძინა ივანიშვილმა თავად დაგვიძახა, მან გვთხოვა და დაგვასახელა, ჩვენ არავისთან მივსულვართ და არც პარტნიორობა გვითხოვია. ჩვენ ვიბრძოლეთ ერთად და სამართლიანადაც, თუმცა ამის შემდეგ ჩვენი გზები გაიყარა.
- თუკი აზრთა სხვადასხვაობა გქონდათ, მანამდე რატომ არ გამოეთიშეთ კოალიციას?
- რა თქმა უნდა, ეს შეიძლება მანამდეც მომხდარიყო, თუმცა ჩვენ იმ ამომრჩევლის დაპირებას ვასრულებდით, რომელსაც 2012 წელს კოალიციაში ბოლომდე დარჩენით მივეცით. ფორმალურად ჩვენ ახლაც კოალიციაში ვართ. ამიტომაც პირადად ჩემთვის “რესპუბლიკელებზე” შეტევა გაუგებარია.
- ექსპრემიერმა შეფასება არც დავით უსუფაშვილის მისამართით დაიშურა და თქვა, რომ პრემიერ გიორგი კვირიკაშვილს ბევრად უფრო კარგი თვისებები აქვს, ვიდრე პარლამენტის თავმჯდომარეს. თქვენი აზრით, რამ განაპირობა ექსპრემიერის თქვენი ლიდერისადმი და ზოგადად პარტიისადმი ნეგატიური განწყობა?
- რაც შეეხება უშუალოდ დავით უსუფაშვილზე შეტევას, ისიც გაუგებარია, როცა ივანიშვილმა თქვა, რომ პრემიერ-მინისტრის მსგავსი თვისებები დავით უსუფაშვილს არ გააჩნია. ეს სწორია, რადგან გიორგი კვირიკაშვილი დავით უსუფაშვილის მსგავსი ვერ იქნება, იგი 38 წელია პარტიაშია, რომელსაც უზარმაზარი, 25-წლიანი პოლიტიკური გამოცდილება გააჩნია. გიორგი კვირიკაშვილს კი პოლიტიკაში მოკრძალებული წვლილი აქვს შეტანილი.
ახლა არავინ მიმტკიცოს, რომ პრემიერი ვინმემ დანიშნა, გიორგი კვირიკაშვილი ბიძინას რჩეულია და ეს ყველამ იცის. მისი საწინააღმდეგო არაფერი მაქვს, მაგრამ თუკი საქმე შედარებაზე მიდგება, მაშინ პრემიერი პარლამენტის თავმჯდომარეს ბევრი კომპონენტით ჩამორჩება და ეს ჩემი პირადი აზრი არ გახლავთ. ჩვენ არ გვაქვს იმის განცდა, რომ 2011 წლის შემდგომ შევიცვალეთ ან რაიმეთი განსხვავებული ვართ, ამიტომ ეს შეკვითხვა თავად მას უნდა დაუსვათ. ჩვენ ვართ სტაბილური პარტია და იმას ვფიქრობთ ახლაც, რასაც 10 წლის წინ. ასე რომ, ცვლილება თავად ივანიშვილშია და არა ჩვენში.
- გუშინ პარლამენტის თავმჯდომარემ და თქვენმა ლიდერმა განაცხადა, რომ ბიძინა ივანიშვილის პოტენციური პარტნიორი ახლა ირმა ინაშვილის პარტია უფროა, ვიდრე “რესპუბლიკელები” ან თუნდაც “თავისუფალი დემოკრატები”. თქვენი აზრით, ბიძინა ივანიშვილმა მმართველი გუნდის კურსი შეცვალა?
- რა თქმა უნდა, სწორედ ამას ვამბობ. ბიძინა ივანიშვილი შეიცვალა და ამაში კურსისა და პარტნიორების ცვლილებაც იგულისხმება. ახლა “თავისუფალი დემოკრატებისა” და “რესპუბლიკელების” ნაცვლად, პოზიტიურად ირმა ინაშვილის პარტია მოიხსენია, როდესაც თქვა, რომ ისინი “ნაციონალების” სახეს სწორად ხედავენ. ირმა ინაშვილის მიმართ კეთილი სიტყვები არ დაიშურა და ის არასერიოზული განცხადებებიც გაიმეორა, რაც ბატონმა თარხან-მოურავმა ბათუმში გააკეთა. ახლა ეს ივანიშვილის პოზიციაც ყოფილა, რაც ძალიან საინტერესოა. უწინ სახელწიფოებრიობაზე საუბრობდა და ახლა ირკვევა, რომ ხელს ანტისახელმწიფოებრივ რაღაცებს უწყობს.
- კერძოდ რას გულისხმობთ?
- ის, რასაც “პარტიოტთა ალიანსი” ჩვენს სტრატეგიულ პარტნიორსა და მეზობელთან აკეთებს, ვგულისხმობ თურქეთს, არ შეიძლება დადებითად ჩაითვალოს და ქვეყანას წაადგეს. იმ პარტიის ქება, რომელზეც 2-3 თვის წინ პრემიერმა პარტიის ალიანსი კატეგორიულად გამორიცხა, ახლა ცოტა უცნაურია. ეს გიორგი კვირიკაშვილმა და ბიძინა ივანიშვილმა პარტიის შიგნით უნდა გაარკვიონ და ჩამოყალიბდნენ, ირმა ინაშვილი კარგია თუ ცუდი.
- როგორ ფიქრობთ, ამ ფონზე რამდენად მოსალოდნელია “ოცნებისა” და “პატრიოტთა ალიანსის” გაერთიანება ან სამომავლოდ კოალიციური მთავრობის შექმნა?
- თუკი კეთილად მოიხსენია, რატომაც არა? გამორიცხული არაფერია. ბიძინა ივანიშვილს იმედი აქვს, რომ კოალიციური მთავრობა არ დასჭირდება, მაგრამ თუკი დასჭირდება, რატომაც არა? – შექმნის ირმა ინაშვილთან. რაც შეეხება პროდასავლური კურსიდან “ოცნების” გადახვევას, ამაში ჯერჯერობით ბრალს ვერ დავდებ, რადგან ასეთი არაფერი მომხდარა, თუმცა როცა ასეთი უპასუხისმგებლო განცხადებები კეთდება, მერე არავის არაფერი აღარ უკვირს. სწორედ ამიტომ არ შეიძლება “ქართულმა ოცნებამ” ხელისუფლება ერთპიროვნულად ჩაიბაროს, საჭიროა მრავალპარტიული პარლამენტი. საზოგადოებამ “ოცნებისა” და “ნაციონალების” გარდა სხვა პარტიებიც უნდა დაინახოს.
„რეზონანსი“, 07 სექტემბერი, 2016 წელი
ინტერვიუ გია ვოლსკისთან: „ნაცმოძრაობა“ სიტუაციის დაძაბვას ცდილობს, მაგრამ არ გამოუვა“
გვანცა ღვედაშვილი
“ქართული ოცნების” წევრი გია ვოლსკი “რეზონანსთან” ინტერვიუში იმ მიზეზებზე საუბრობს, რის გამოც “ნაციონალურ მოძრაობას” ქვეყანაში დესტაბილიზაციის შექმნა სურს. მისი თქმით, შეუძლებელია ინფორმაციის დამალვა ისეთ მცირე ქვეყანაში, როგორიც საქართველოა. იგი ასევე აღნიშნავს, რომ დესტაბილიზაციის სურვილზე “რუსთავი 2″-თან მიხელ სააკაშვილის სიტყვებიც მიუთითებს, როდესაც ის აცხადებს, რომ არჩევნებამდე საქმის მიყვანა შეუძლებელია და ხალხის მობილიზება და ქუჩაში გამოყვანა უნდა მოხდეს.
გია ვოლსკი: ჩვენი საზოგადოება საკმაოდ მცირეა იმისთვის, რომ რაიმე დაიმალოს. სხვადასხვა წყაროდან მოდის ინფორმაცია, რომ რაღაც მზადება მიმდინარეობს. შეხვედრების დროს შეურაცხყოფით, და მსგავსი ქმედებებით ცდილობენ, სიტუაცია დაძაბონ და დაპირისპირებები გამოიწვიონ, რაც, სულ მცირე, არ წაადგება საქართველოს საკმაოდ მაღალ ავტორიტეტს საერთაშორისო ასპარეზზე.
მაგონდება ინტერვიუ, რომელიც სააკაშვილმა აგვისტოში მისცა “რუსთავი 2″-ს. ის პირდაპირ მიუთითებდა, რომ დაუშვებელია არჩევნებამდე საქმის მიყვანა და უნდა მოხდეს ხალხის მობილიზება ყველა რაიონში. ის პირდაპირ ამბობს, რომ ინტერნეტ-ქსელი ყველგან გააკეთეს, კომუნიკაცია შესაძლებელია და სწორედ ამის მეშვეობით მოხდებოდა ხალხის დარაზმვა და ქუჩაში გამოყვანა. იმავეზე მეტყველებს მისი განცხადებები “რუსთავი 2″-თან ბარიკადების აღმართვაზე, სისხლის ღვრასა და დაძაბულობის პროვოცირებაზე; ეს ყველაფერი ისევ ძალაშია და არც არავის არ უარუყვია.
- ხალხის მობილიზებაზე საუბრობთ და რამდენად არის იმის ალბათობა, რომ “ვარდების რევოლუციის” სცენარი განმეორდეს?
- მგონია, რომ ამის გამეორება შეუძლებელია. საზოგადოება კარგად ხედავს, სად არის სიკეთე და ძალა, რომელსაც მეტად რთულ საერთაშორისო და შიდა ვითარების პირობებში ქვეყნის სამშვიდობოზე გაყვანა უნდა.
- „ნაციონალური მოძრაობა“ მათი ოფისების დარბევაში “ქართულ ოცნებას” ადანაშაულებს. მათი თქმით, ქვეყანაში დაძაბულობის შემოტანა სწორედ “ოცნებას” უნდა...
- ერთადერთი მხარე, რომელსაც დაძაბულობა არ აწყობს, ეს საქართველოს ხელისუფლებაა და ამით ყველაფერი ნათქვამია. თუმცა შემიძლია გითხრათ, რომ არსებობს ხალხის გარკვეული ნაწილი, რომელიც არავითარ შემთხვევაში არ შეიძლება იყოს განხილული, როგორც “ქართული ოცნების” წარმომადგენელი. ადამიანები, რომლებიც პრეტენზიას გამოთქვამენ “ნაციონალური მოძრაობის” წარმომადგენლების მიმართ, აუცილებელი არ არის, რომ “ქართულ ოცნებასთან” იყვნენ დაკავშირებული.
უამრავი ადამიანია, რომლებიც სრულიად აპოლიტიკური არიან, თუმცა გაუგონარი ძალადობა ახსოვთ. რასაკვირველია, ეს მთავრობის პასუხისმგებლობაა, მაგრამ თუ ვინმეს სახელმწიფოს დაზიანება არ სურს, არ უნდა ჩაიდინოს ისეთი რაღაც, რასაც ადვილად შეაფასებენ ძალადობად და დაპირისპირებად. კიდევ ერთხელ ვიმეორებ, რომ თუ ვინმეს ინტერესებში არ არის დაძაბულობის შექმნა, ეს საქართველოს ხელისუფლებაა.
„რეზონანსი“, 07 სექტემბერი, 2016 წელი
ინტერვიუ გიორგი ბარამიძესთან: „ყველა თავდასხმა უშუალოდ „ოცნების“ ხელმძღვანელობის მითითებით მოხდა“
გვანცა ღვედაშვილი
“ნაციონალური მოძრაობის” წევრი გია ბარამიძე “რეზონანსთან” ინტერვიუში იმ ბრალდებების შესახებ საუბრობს, რომლებიც “ქართული ოცნების” წევრმა თამარ ჩუგოშვილმა გააჟღერა. მისი თქმით, “ნაცმოძრაობა” წინასაარჩევნოდ დაპირისპირებების პროვოცირებასა და არეულობის შექმნას აპირებს. ამ განცხადებას გიორგი ბარამიძე “ბოდვას” უწოდებს და აღნიშნავს, რომ მათი მხრიდან არასდროს არანაირი ძალადობის პროვოცირება არ მომხდარა, პირიქით კი უამრავი მაგალითი არსებობს. მისივე თქმით, ყველა თავდასხმა, რომელიც “ნაციონალების” ოფისზე განხორციელდა, სწორედ “ქართული ოცნების” მითითებით მოხდა.
გიორგი ბარამიძე:
- ეს ბოდვითი განცხადებები უკვე რამდენიმე წელია, გრძელდება. ხან საბურავებს ვაგროვებდით, ხან სახელმწიფო გადატრიალებას ვაწყობდით და სინამდვილეში ამ განცხადებებს არანაირი საფუძველი არ ჰქონია. მუდმივად ლაპარაკობდნენ, რომ გამოიძიებდნენ და იტყოდნენ, რა მოხდა ყველა იმ საქმეზე, რომელიც გახმაურებული იყო. დაწყებული წინა არჩევნებიდან, გაგრძელებული შალვა თათუხაშვილის და კიდევ უამრავი ადამიანის სიკვდილთან დაკავშირებით. ხელისუფლებას პასუხები არ გაუცია და არ გამოუძიებიათ ეს საქმეები. მხოლოდ განცხადება კეთდებოდა, თუმცა რეალურად არაფერი მომხდარა. მათი ბრალდებები, ცხადია, აბსურდია. წლების განმავლობაში ირიბი მტკიცებულებაც კი არ წარმოუდგენიათ თავიანთი გაჟღერებული ბრალდებების დასამტკიცებლად. ეს სისულელეა, მით უმეტეს, რომ არაფერში არ გვჭირდება, არც დაგვჭირვებია და არც გამოგვიყენებია მსგავსი მეთოდი. საერთოდ, თუკი ვინმე იყო ქვეყანაში სტაბილურობის მომხრე, ეს ჩვენ ვიყავით. მთავრობაში ვიყავით თუ ოპოზიციაში, ჩვენი მხრიდან არასდროს არანაირი ძალადობის პროვოცირება არ მომხდარა, პირიქით კი უამრავი მაგალითი გვაქვს.
ბოლო წლების განმავლობაში არაერთი თავდასხმა განხორციელდა ჩვენს ოფისზე. ყველაზე გახმაურებული იყო თებერვლის ცემა-ტყეპა, 2016 წლის კორცხელის ინციდენტი და ახლახან სოფელ ჯიხაშკარში მომხდარი შემთხვევა, რომელიც ასევე გამოუძიებელია. ხელისუფლებას არაფერი აქვს სალაპარაკო იმის შესახებ, თუ რა შეასრულა იმ დაპირებებიდან, რომლებიც უხვად გასცა ბიძინა ივანიშვილმა და ახლა ისევ იმას ცდილობენ, “ნაციონალურ მოძრაობას” რაღაც დააბრალონ და სიტუაცია დაძაბონ. ჩუგოშვილმა როგორც კი განაცხადა პროვოკაციების შესახებ, იმ დღესვე მიუცვივდნენ სანდრა რულოვსს მოსახლეობასთან შეხვედრისას და ისევ ჩვენმა აქტივისტებმა დაამშვიდეს ხალხი, რათა დაპირისპირება არ მომხდარიყო და თავ-ყბა არ დაელეწათ მათთვის. უნდათ, რომ სიტუაცია დაძაბონ, საქმიანი საუბარი და დებატები კი არ იყოს. მათ იმ კონფროტაციულ რეჟიმში ყოფნა სურთ, რომელშიც ბოლო ოთხი წელი იყვნენ. როგორც ჩანს, მთელი წინასაარჩევნო კამპანიის წარმართვა სწორედ ასე სურთ.
ეს ყველაფერი სამწუხაროა, თუმცა მათ არაფერი უშველით, რადგან ყველამ კარგად იცის, როგორია საზოგადოების განწყობილება. იდიალური არავინ ყოფილა, არც ჩვენ ვიყავით შეუცდომლები, მაგრამ ამათ რომ არავინ აირჩევს, ცხადია. ხალხი აპირებს, მტკიცედ და მშვიდობიანად გაისტუმროს ესენი პოლიტიკურ სანაგვეზე.
- ბოლო პერიოდში “ნაციონალური მოძრაობის” რამდენიმე ოფისი დაარბიეს. ვის ადანაშაულებთ ამაში?
- არც ერთი თავდასხმა “ნაციონალური მოძრაობის” ოფისზე არ განხორციელებულა უშუალოდ “ქართული ოცნების” ხელმძღვანელობის მითითების გარეშე. ეს თავისთავად არ ხდება, როცა მთავარი ოპოზიციური პარტიის ოფისს რაღაც ჯგუფი არბევს, ცხადია, ეს ან პირდაპირ არის შეთანხმებული, ან ვიღაცის მიერ არის პროვოცირებული. ეს ადამიანები თავს გრძნობენ დაუსჯელად. აქამდე არც ერთი პიროვნება, რომელმაც ჩვენს დეპუტატებზე ან აქტივისტებზე თავდასხმა განახორციელა, რეალურად არ დასჯილა. მთელი ეს ოთხი წელი ამით იყვნენ დაკავებული. თუმცა, კიდევ ერთხელ ვამბობ, მათ მაინც არაფერი უშველით. რამდენადაც ამის საშუალება მოგვეცემა, თავს დავიცავთ თუ დაგვესხმებიან, მაგრამ ჩვენ არ ვაპირებთ აყალმაყალს. ჩვენ ვგეგმავთ, ვისაუბროთ პრობლემებსა და მათი მოგვარების გზებზე. იმაზე, თუ როგორ შევქმნათ სამუშაო ადგილები, როგორ გავზარდოთ პენსია, გავაუმჯობესოთ ბიზნესგარემო, გავზარდოთ ინვესტიციები, შევამციროთ სიღარიბე და ა.შ. ჩვენ ვაპირებთ საქმეზე ლაპარაკს. “ქართულ ოცნებას” დღემდე არ წარმოუდგენია პროგრამა. ჩვენ ეს პროგრამა გვიდევს და ვიცით, რა და როგორ გავაკეთოთ.
გავიმეორებ, რომ ვიცით ჩვენი შეცდომები და არ ვაპირებთ მათ გამეორებას. გვყავს განახლებული გუნდი, მეტი პროფესიონალი და პატრიოტი შემოემატა ჩვენს რიგებს. ასე რომ, ვართ საქმით დაკავებულნი და ვემზადებით არჩევნებისვის, რათა მეორე დღესვე დავიწყოთ იმის რეალიზება, რასაც ვგეგმავთ.
- თქვენი აზრით, იქნება თუ არა გარკვეული დაძაბულობა საპარლამენტო არჩევნებზე და რამდენად მოსალოდნელია, კორცხელის ინციდენტი გამეორდეს?
- ვფიქრობ, სავსებით შესაძლებელია, მსგავსი ინციდენტი გამეორდეს. კორცხელში რაც მოხდა, ამას რა დიდი გამოძიება სჭირდება?! მე არ ვამბობ, რომ არ სჭირდება, მაგრამ ელემენტარული საკითხია. ყველაფერი ვიდეოზეა გადაღებული და ამას ნორმალური საგამოძიებო ორგანო, რომელსაც პატიოსანი ზრახვები აქვს და საქმის გახსნა უნდა, ყველაფერს რამდენიმე დღეში გაარკვევდა.
საზოგადოებისთვის ცხადია ყველაფერი და ამაზე მხოლოდ “ნაციონალური მოძრაობა” კი არ ლაპარაკობს, არამედ პრეზიდენტი და პრემიერ-მინისტრიც კი, თუმცა არანაირი შედეგი ამ საუბრებს არ მოჰყოლია. პრობლემაც იმაშია, რომ სინამდვილეში ქვეყანას მართავენ ივანიშვილი და რამდენიმე მისი ნდობით აღჭურვილი ადამიანი. ერთ-ერთია მისი დაცვის უფროსი, რომელიც უშიშროებასაც და პოლიციასაც აკონტროლებს. შესაბამისად, ამ ადამიანების დაუსჯელობა იმას ნიშნავს, რომ ისინი რაღაცისთვის სჭირდებათ. ახლა რომ დასაჯონ, იმავეს ხომ ვერ გააკეთებენ?! სხვა ჯგუფებსაც დაეკარგებათ მოტივაცია და იტყვიან, რომ სხვებმა რომ გააკეთეს და დასაჯეთ, ახლა ჩვენ ამას აღარ ვიზამთო.
ამიტომ ეუბნებიან, ხომ ხედავთ, სპორტსმენებმა დაუნგრიეს თავ-პირი ყველას, მაგრამ არც არაფერი არ მოხდა და მიდით ბიჭებო, ისევ გააკეთეთ იგივეო. სხვა რა დასკვნა უნდა გავაკეთოთ?! მთელი ამ ხნის განმავლობაში საზოგადოება, პრეზიდენტიც და პრემიერიც მათ დასჯას მოითხოვს, თუმცა ისინი პასუხსგებაში არ მიცემულან და თუ მსგავს რამეს არ გეგმავენ, მაშინ რატომ ხდება ეს?!
„რეზონანსი“, 07 სექტემბერი, 2016 წელი
ირაკლი ოქრუაშვილის დოკუმენტი „რუსთავი 2“-ის დავაში
ქიბარ ხალვაშის ადვოკატი დოკუმენტზე თავისი კლიენტის ხელმოწერას უარყოფს
თიკო ოსმანოვა
ტელეკომპანია “რუსთავი 2″-ის წილების საქმესთან დაკავშირებით სამართლებრივ დავას ამჯერად თავდაცვის ყოფილი მინისტრი, გორის მაჟორიტარი დეპუტატობის კანდიდატი, ირაკლი ოქრუაშვილი აპირებს. მან 2010 წელს მას და ქიბარ ხალვაშს შორის დადებული ხელშეკრულება გაასაჯაროვა, რომელშიც აღნიშნულია, რომ ტელეკომპანიის წილები რეალურად ირაკლი ოქრუაშვილმა შეიძინა, ქიბარ ხალვაში კი მისი ნდობით აღჭურვილი პირი იყო.
თავად ქიბარ ხალვაში ამ დოკუმენტის აუთენტურობას არ ადასტურებს და მზად არის, ოქრუაშვილთან ნებისმიერ იურდიულ ინსტანციაში იბრძოლოს.
რაც შეეხება ტელეკომპანია “რუსთავის 2″-ის საქმესთან დაკავშირებით ამჟამად უზენაეს სასამართლოში მიმდინარე დავას, ხალვაშის ადვოკატის, პაატა სალიას თქმით, ეს დოკუმენტი ამ დავაზე გავლენას ვერ იქონინებს.
ტელეკომპანიის ადვოკატი თამთა მურადაშვილი კი საპირისპიროს ამტკიცებს. ამბობს, რომ ამ დოკუმენტით, საკასაციო სასამართლომ სიმართლის დასადგენად საქმე ქვედა ინსტანციაში უნდა დააბრუნოს.
“ამ დოკუმენტით დგინდება, რომ ეს ადამიანი, რომელსაც მიაკუთვნეს ტელეკომპანია, თურმე არ არის ის, ვისაც უნდა მიაკუთვნონ. ეს რომ გვქონოდა, დასაწყის ეტაპზე დავაყენებდით არასათანადო მოსარჩლეობის საკითხს, რაც იმას ნიშნავს, რომ ადამიანს, რომელიც ჩივის, ამის უფლება არ გაჩნია, შესაბამისად, საერთოდ სხვა სამართლებრივი შედეგი გვექნებოდა. ამ დოკუმენტს უზენაესმა სასამართლომ, წესით, გვერდი ვერ უნდა აუაროს. პირველ რიგში, დასაშვებად უნდა ცნოს საქმე და როცა დასაშვებად იქნება ცნობილი, მერე სიმართლის დასადგენად დააბრუნოს ქვედა ინსტანციაში. იმიტომ, რომ ამ საკითხის გარკვევა უზენაესში ვერ მოხერხდება”, – ამბობს “რეზონანსთან” საუბრისას თამთა მურადაშვილი.
პაატა სალიას განცხადებით კი, ასეთი დოკუმენტი ბუნებაში არ არსებობს.
“ეს დოკუმენტი არის ყალბი, არ არსებობს ქიბარ ხალვაშის ხელმოწერა მსგავს შეთანხმებაზე. ქიბარ ხალვაშმა ცალსახად და ერთმნიშვნელოვნად განაცხადა, რომ მასზე ხელმოწერა არ ეკუთვნის მას. იმისათვის, რომ დადგინდეს, რომელი მხარე ამბობს მართალს და რომელი ტყუილს, საჭიროა ჩატარდეს ექსპერტიზა. ეს კი უნდა ჩაუტარდეს დოკუმენტის დედანს და არა ასლს. ეს დედანი ვის აქვს, არ ვიცით. ქიბარ ხალვაშს არ აქვს, იმიტომ, რომ ასეთი შეთანხმება ბუნებაში არ არსებობს. შესაბამისად, ირაკლი ოქრუაშვილმა უნდა ამტკიცოს, რომ ეს დოკუმენტი ნამდვილია. თუ ნოტარიულად დაადასტურებს, რომ ნამდვილია, მაშინ სხვა რაღაცასთან გვაქვს საქმე, მაგრამ არავის არ უთქვამს, რომ დოკუმენტი ნოტარიულად არის დამოწმებული. არ ვიცით, რა ხდება, თუმცა იმას, რასაც ლაპარაკობს ოქრუაშვილი, არანაირი გავლენა მიმდინარე სასამართლო პროცესზე არ აქვს. ეს შეიძლება იყოს ცალკე დავის საგანი და იქაც ვეჭვობ, რომ ჰქონდეთ რამე სერიოზული საფუძველი. ეს ცალკე დავის თემაა და თუ გადაწყვეტს სამართლებრივ დავას, მზად ვართ, ნებისმიერ იურისდიქციაში პასუხი გავცეთ”, – გვითხრა სალიამ.
ამასთან დაკავშირებით, გუშინ საგანგებო ბრიფინგი გამართა არხის გენერალურმა დირექტორმა ნიკა გვარამიამაც და როგორც განაცხადა, ეს დოკუმენტი მათი მთავარი კოზირი არ არის.
“ჩვენ წარვადგინეთ ე.წ. სასამართლოს მეგობრის დასკვნა, რომლის ავტორი არის ბატონი თეიმურაზ თოდრია, რომელიც საქართველოს ისტორიაში არის სამართლის ერთ-ერთი ყველაზე გამორჩეული სპეციალისტი და უზენაესი სასამართლოს მოსამართლე. გამორჩეული თავისი წესიერებითა და პროფესიონალიზმით და ამაში დამეთანხმება ყველა, ვისაც შეხება ჰქონია მის სამართალწარმოებასთან. მისი დასკვნით, იკვეთება შემდეგი: პირველი, ფასის ზრდის პროპორციის გამო არ შეიძლება დადგეს ბათილობა; მეორე, კეთილსინდისიერი შემძენისთვის, როგორი დისპროპორციაც არ უნდა იყოს, პირველ ტრანზაქციაში სინდისიერი შემძენისთვის არ შეიძლება ქონების ჩამორთმევა; მესამე, საქმეში იმდენი პროცედურული დარღვევაა, რომ ნებისმიერ შემთხვევაში ის უნდა გაუქმდეს და უკან დაბრუნდეს. შეგახსენებთ, თოდრია არის ის ერთადერთი წყარო, რომელსაც სააპელაციო სასამართლო დაეყრდნო თავის გადაწყვეტილებაში. სწორედ ამ დისერტაციის ავტორი ამბობს, რომ ეს დისერტაცია მათ შორის არასწორად იქნა გაგებული და სასამართლო მსჯელობა არის აბსოლუტურად უკანონო და არალოგიკური. რაც შეეხება ბატონი ოქრუაშვილის მიერ წარმოდგენილ დოკუმენტს, როგორც მოგახსენეთ, რა თქმა უნდა, ის არ არის ჩვენი მთავარი ე.წ. კოზირი, მიუხედავად ამისა, ამ დოკუმენტს აქვს თავისი ფასი და მნიშვნელობა.
ეს დოკუმენტი ცხადყოფს, რომ ფასის დისპროპორცია კი არა, საერთოდ არავითარ გარემოებას ქიბარ ხალვაშთან დაკავშირებით მნიშვნელობა არ აქვს, იმიტომ, რომ იგი არ წარმოადგენდა “რუსთავი 2″-ის რეალურ მფლობელს. იგი იყო მხოლოდ სახელი და გვარი, შესაბამისად, მისი უფლებები და ინტერესები ვერ შეილახებოდა ფიზიკურად იმიტომ, რომ მას ეს უფლებები არ ჰქონდა ამ ქონებასთან მიმართებით. იგი არასდროს ფლობდა ამ ქონებას, შესაბამისად, ზედმეტია მის მიერ საუბარი რაიმე უფლებებისა და ქონებრივი ზიანის მიღებაზე,” – განაცხადა ნიკა გვარამიამ.
ცნობისთვის: ოქრუაშვილის მიერ გამოქვეყნებული დოკუმენტი 2010 წელსაა გაფორმებული და 5 პუნქტისგან შედგება.
“მხარეები ადასტურებენ, რომ ირაკლი ოქრუაშვილის მიერ ქიბარ ხალვაშის სახელითა და მეშვეობით (აგრეთვე ამ უკანასკნელის საკუთრებაში და კონტროლქვეშ მყოფი კომპანიების მეშვეობით) შეძენილ იქნა საქართველოს იურისდიქციის ქვეშ მყოფი ტელეკომპანია “რუსთავი 2″-ის 100%-იანი წილი, რომლის გარიგებებიც სრულად იქნა დაფინანსებული ირაკლი ოქრუაშვილის მიერ. ქიბარ ხალვაში მიდასტურებს, რომ ტელეკომპანია “რუსთავი 2″-ის შესაძენად დადებულ ყველა გარიგებაში წარმოადგენდა ირაკლი ოქრუაშვილის ნომინირებულ პირს და მოქმედებდა მისი სახელით. შესაბამისად, ტელეკომპანია “რუსთავი 2″-ზე, მის წილებზე, აქტივებზე, ინტელექტუალურ საკუთრებაზე, მის წილთა შემძენ კომპანიებზე, “რუსთავი 2″-ის მესაკუთრეობასთან დაკავშირებულ ყველა პრეტენზიაზე, მოთხოვნაზე, სარგებელზე, მისაღებზე (რეცცივაბლეს) საკუთრებისა და მოთხოვნის უფლებები ეკუთვნის ირაკლი ოქრუაშვილს; ქიბარ ხალვაში არ იმოქმედებს “რუსთავი 2″-თან დაკავშირებულ არც ერთ საკითხში ირაკლი ოქრუაშვილთან შეთანხმების გარეშე. ქიბარ ხალვაში წინამდებარე პუნქტის დარღვევის ან სადავოდ გახდის შემთხვევაში ვალდებულებას იღებს, ირაკლი ოქრუაშვილს კომპენსაციის (ჯარიმის) სახით გადაუხადოს 7 000 000 (შვიდი მილიონი) ამერიკული დოლარი,” – აღნიშნულია დოკუმენტის მეორე პუნქტში.
აღსანიშნავია, რომ ტელეკომპანიის წილები ქიბარ ხალვაშმა 2004 წელს შეიძინა და როგორც აცხადებს, 2006 წელს იძულებით მინიმალურ ფასად დაათმობინეს.
„რეზონანსი“, 07 სექტემბერი, 2016 წელი
ირაკლი ოქრუაშვილი ამბობს, რომ „რუსთავი 2“-ის დოკუმენტის გამოჩენით კახა კალაძეს სამაგიერო მიუზღო
თიკო ოსმანოვა
თავდაცვის ყოფილი მინისტრი და გორის მაჟორიტარობის კანდიდატი ირაკლი ოქრუაშვილი ვიცე-პრემიერ კახი კალაძეს მის შევიწროებაში ადანაშაულებს. მისი თქმით, კალაძე “ყველა გზაზე ჩასაფრებულისა და ფეხის დამდების” პოზიციიდან ებრძვის.
“კახა კალაძე, რომელიც სამი წელია ჩემთან ურთიერთობაშია, ყველა გზაზე ჩასაფრებულისა და ფეხის დამდების პოზიციიდან მებრძვის. კითხვის ნიშანი რომ არ გაჩნდეს, რა შუაშია კახა კალაძე, მე ერთ ისტორიას მოვყვები. 2013 წელს საერთოდ არ ვაპირებდი პოლიტიკაში დაბრუნებას. მინდოდა, ბიზნესში, ენერგეტიკაში რაღაც პროექტის დაწყება, გორში ქარის წისქვილების დამონტაჟება. შესაბამისი წინადადებით მივმართე მას და მისგან სრული იგნორირება მივიღე.
“ის ხელმძღვანელობდა უშუალოდ ჩემი საარჩევნო რეგისტრაციის გაუქმების პროცესს 2014 წლის ადგილობრივ არჩევნებზე. ის ხელმძღვანელობდა ამას როგორც ცენტრალურ საარჩევნო კომისიაში, ასევე სასამართლოებში. ის ხელმძღვანელობდა არჩევნებს მთლიანად გორში, სადაც, მიუხედავად იმისა, რომ გამარჯვებას მივაღწიე, ის მომპარეს და წამაგებინეს. ის ხელმძღვანელობდა გუშინდელ საკრებულოს სხდომაზე ჩემი თანაგუნდელის, ილია მეტრეველის გადაყენებასაც. მან წინასწარვე იცოდა, რომ თუ ამას გააკეთებდნენ, მე არაფერი ასარჩევი აღარ მექნებოდა, თუ არა ის ნაბიჯი, რომელიც გადავდგი. მისი მხრიდან ეს ყველაფერი შეგნებულად გაკეთდა. დარწმუნებული ვარ იმიტომ, რომ სხვანაირად ლოგიკური ახსნა ამას არ აქვს”, – განაცხადა ირაკლი ოქრუაშვილმა “ტვ პირველის” ეთერში .
მისივე თქმით, “ქართულ ოცნებასთან” საკმაოდ კონსტრუქციული იყო.
“ოცნებასთან” საკმაოდ კონსტრუქციული ვიყავი და საკმაოდ მკაფიო გზავნილები მქონდა. არ ვაპირებდი ამ დოკუმენტის გასაჯაროებას და არ ვაპირებდი მათ თამაშში შუაში ჩადგომას. მაგრამ, თუ იქნებოდა გადაყენებული ჩემი თანაგუნდელი, მე სხვა არაფერი მრჩებოდა. გუშინ გადააყენეს ჩემი თანაგუნდელი და მე სხვა გზა აღარ დამრჩა. ყველანაირი წითელი ხაზი გადაიკვეთა,” – განაცხადა ირაკლი ოქრუაშვილმა.
კახა კალაძე ამ ბრალდებებს არ პასუხობს. “ქართული ოცნების” ერთ-ერთი ლიდერი გია ვოლსკი კი ამბობს, რომ გორის საკრებულოს თავმჯდომარის, ილია მეტრეველის გადაყენება საკრებულოს წევრებმა გადაწყვიტეს და კალაძის მითითება არ სჭირდებათ.
“კალაძე არის “ქართული ოცნების” საარჩევნო შტაბის ხელმძღვანელი, ნიჭიერი ახალგაზრდა ადამიანი, რომელიც პროფესიულად უდგება საქართველოსთვის მნიშვნელოვან საქმებს. რაც შეეხება გორის საკრებულოს თავმჯდომარის გადაყენების საკითხს, ეს საკრებულოს წევრების გადასაწყვეტია.
“საკრებულოში თავმჯდომარე უნდა იყოს ის, ვინც უმრავლესობისთვის მისაღებია და თანაც შესაბამისი რესურსი გააჩნია მისი მართვის. რამდენადაც ვიცი, როდესაც ადამიანს ასეთი რესურსი არ გაჩნია, საკრებულოს წევრებს მისი გადაყენების უფლება აქვთ. დეპუტატებს ამ გადაწყვეტილების მიღება დამოუკიდებლად შეუძლიათ, არ არის აუცილებელი, ამას კახი კალაძე ან რომელიმე ჩვენგანი კარნახობდეს,” – განუცხადა “რეზონანსს” ვოლსკიმ და ოქრუაშვილს მის წინააღმდეგ არსებული ბრალდებები შეახსენა.
„ირაკლი ოქრუაშვილის წილად მოდის საკმაოდ სერიოზული დარღვევები ადამიანის უფლებების, ქონების წართმევის და სხვა კუთხით. ასე რომ, თუკი ოქრუაშვილი დღეს კიდევ არის პოლიტიკურ ასპარეზზე და თავისუფლად დაიარება ჩვენს ქვეყანაში, ეს, მგონი, ხელისუფლების დამსახურებაცაა. მის მიმართ დაუსაბუთებელი სამართლებრივი ბრალდებები რომ არ არის, ესეც ჩვენი დამსახურებაა. მას აქვს შესაძლებლობა, პოლიტიკაშიც გამოჩნდეს და სხვა ადგილებშიც. თუმცა საზოგადოებას მასთან დაკავშირებით ბევრი კითხვა აქვს,” – ამბობს ვოსლკი.
„ახალი თაობა“, 07 სექტემბერი, 2016 წელი
ინტერვიუ ბიძინა გუჯაბიძესთან: „არჩევნებში გამარჯვებაზე საუბარი ნაციონალების მხრიდან ბაქი-ბუქია“ // „ხალხთან უშუალო შეხვედრებმა დამარწმუნა, რომ საზოგადოება იმედგაცრუებული არაა, სამეგრელოს მოსახლეობას ვერ მოატყუებენ“
„ახალი თაობა“ წინასაარჩევნო სიტუაციაზე ესაუბრა პარლამენტის უმრავლესობის წევრს, დეპუტატ ბიძინა გუჯაბიძეს
- „ქართული ოცნების“ წარმომადგენლებმა განაცხადეს, რომ ნაციონალური მოძრაობა გეგმავს პროვოკაციებს და „ოცნების“ წინასაარჩევნო შეხვედრების ჩაშლას. ამან დიდი აღშფოთება გამოიწვია ნაცმოძრაობაში. ნაციონალებმა აღნიშნეს, რომ მმართველ პარტიას ცუდად აქვს საქმე და ამის გამო ცილს სწამებს ოპოზიციას. მათივე თქმით, პასუხისმგებლობა ვითარებაზე ხელისუფლებას ეკისრება..
- ინფორმაცია იმის შესახებ, რომ ნაციონალური მოძრაობის წევრები პროვოკაციებს და არეულობას აპირებენ, ნამდვილად არსებობს. რას ამბობენ ამაზე ნაციონალები, სხვა საქმეა. ცხადია, ისინი ვერ აღიარებენ, რომ პროვოკაციები აქვთ ჩაფიქრებული. ცუდად ვის აქვს საქმე, 8 ოქტომბერს გამოჩნდება. ამ ეტაპზე კარგად ჩანს, ვის უნდა პროვოკაციები. ასეთი პროვოკატორები ოზურგეთში ბიძინა ივანიშვილთანაც მივიდნენ, მაგრამ მათ თავიანთი შეკითხვებით ვერაფერს მიაღწიეს. მათგან მოითხოვეს არგუმენტები, რომელიც ამ ხალხმა ვერ წარმოადგინა. ნაცმოძრაობა გაწაფულია ასეთ ამბებში და გასაკვირი არაა, რომ მან ამ ხრიკებს მიმართოს მაშინ, როცა იცის, რომ არჩევნებში შედეგს ვერ აჩვენებს.
- პროვოკაციებშია გაწაფული ნაციონალური მოძრაობა?
- პროვოკაციებში, არეულობების მოწყობაში. ამ პარტიამ ისიც კარგად იცის, როგორ უნდა წარმოაჩინოს თავი დაჩაგრულად. არჩევნების შემდეგ ნაციონალები იმაზე იყვირებენ, თითქოს არჩევნები გაყალბდა. ახლა ბაქი-ბუქი აქვთ ატეხილი იმაზე, რომ ოქტომბერში ისინი ხელისუფლებაში ბრუნდებიან. თვითონაც შესანიშნავად იციან, რომ არჩევნების გზით ნაცმოძრაობა ხელისუფლებაში ვერ მოვა, მაგრამ ცდილობენ ხალხზე ზეგავლენა მოახდინონ. ისინი პროვოკაციებსაც მიმართავენ.
- ჯიხაშკარში ორშაბათს მოხდა ინციდენტი სანდრა რულოვსის მომხრეებსა და მოწინააღმდეგეებს შორის. თქვენი აზრით, რა მიზნით დაასახელა ნაციონალურმა მოძრაობამ იგი თავის კანდიდატად?
- ნაცმოძრაობას უნდა, ხალხის ემოციებზე ითამაშოს. გარკვეული ხნის წინ სანდრა რულოვსმა რამდენიმე სიტყვა და სიმღერა ისწავლა მეგრულად. ამ პარტიამ ახლა ეს გამოიყენა. თავად მეგრელების სიძე ვარ და ვიცი, როგორ უჩუყებს გულს ასეთი ფაქტორები ადამიანებს სამეგრელოში. ისინი ისედაც ძალიან სტუმართმოყვარეები და მოსიყვარულეები არიან. მით უმეტეს, სამეგრელოში განსაკუთრებული სითბოთი ეპყრობიან უცხოელს, რომელმაც მეგრული სიტყვები ისწავლა. მაგრამ საქმე ისაა, რომ მეგრელები მარტო მგრძნობიარე ხალხი არაა. სამეგრელოს მოსახლეობა პრინციპულობითა და პოლიტიკური ალღოთიც გამოირჩევა. ასე რომ, ნუ ფიქრობენ ნაციონალები, რომ ეს რეგიონი მათი ამომრჩევლებისგან შედგება. ხალხს ასე ადვილად ვეღარ მოატყუებენ.
- ამ დღეებში გამოქვეყნდა ტელეკომპანია იმედის დაკვეთით ჩატარებული სოციოლოგიური გამოკითხვის შედეგები. ამ გამოკითხვით, „ქართული ოცნების“ რეიტინგია 38%, ნაციონალური მოძრაობის - 18%. საარჩევნო ზღურბლს უახლოვდებიან ლეიბორისტები და თავისუფალი დემოკრატები...
- ტელეკომპანია „იმედს“ ვინმეს ინტერესების გატარებაში ვერ დავადანაშაულებ, მაგრამ გამოკითხვა ჩაატარა დაქირავებულმა კომპანიამ. არ ვიცი, რამდენად ზუსტად, პროფესიონალურად და მიუკერძოებლად მოქმედებდა ეს სამსახური. მანამდე ბევრჯერ გასაჯაროვდა სხვა ორგანიზაციების მონაცემები, რომელსაც ბევრი ადამიანი არ ენდობა. კვლევა და გამოკითხვა ბევრი ტარდება. მათ შორის, შიდა კვლევები. მოსახლეობის განწყობას ისინიც აჩვენებს.
- აქამდე მოსახლეობის დიდი ნაწილის განწყობა გაურკვეველი, ზოგ შემთხვევაში ნიჰილისტური იყო...
- სანამ მოსახლეობასთან შეხვედრები არ დავიწყე, მეც ასე მეგონა. მანამდე პარლამენტში საქმიანობით ვიყავი დაკავებული. მაჟორიტარი არ ვყოფილვარ, ამიტომ ხალხს მასობრივად ვერ ვხვდებოდი. ჩუღურეთში ვცხოვრობ. აქ კენჭს იყრის გია ვოლსკი, რომელიც ძალიან ბევრ შეხვედრას ატარებს. დაახლოებით 6 შეხვედრას მეც დავესწარი. ხალხის ისეთი გულწრფელი მხარდაჭერა ვნახე, რომ გავოცდი. მანამდე ყველა ამბობდა, რომ ხალხი გულაცრუებულია. არის პრობლემები, განსაკუთრებით, დასაქმების მხრივ, მაგრამ ადამიანები ხედავენ, რაც გაკეთდა და გაგებით ეკიდებიან შექმნილ ვითარებას.
- მაჟორიტარობის კანდიდატობა რთული არ არის იმ პირობებში, როცა მაჟორიტარული სისტემის გაუქმებაა გადაწყვეტილი?
- „ქართული ოცნების“ კანონპროექტით, მაჟორიტარული სისტემა მომავალი არჩევნებისთვის აღარ იარსებებს. ეს ბოლო არჩევნებია, როცა მაჟორიტარებს ვირჩევთ. ჩუღურეთში გია ვოლსკის საარჩევნო კამპანია გაუადვილა რიმა ბერაძემ, რომელიც ამ უბნის მოსახლეობამ მაჟორიტარად აირჩია თბილისის საკრებულოში. მომავალში პარლამენტს მაჟორიტარები არ ეყოლება. თითქმის მთელი ტვირთი გადავა საკრებულოების მაჟორიტარებზე, ადგილობრივ თვითმმართველობებსა და მმართველობებზე. პარლამენტი მათ კანონებით დაეხმარება. პარლამენტში პარტიები იქნებიან ხალხის ინტერესების გამტარებლები.
- თქვენი პროგნოზით, „ქართული ოცნების“ გარდა, ვინ მოხვდება მომავალ პარლამენტში?
- პარტიების დასახელებისგან თავს შევიკავებ. ასეთი პროგნოზი ჩემი მხრიდან სწორად არ მიმაჩნია. შემიძლია ის ვთქვა, რომ „ქართულ ოცნებას“ შთამბეჭდავი გამარჯვება ექნება. ბიძინა ივანიშვილი ამბობს, რომ „ოცნება“ 90 ან 100 დეპუტატს გაიყვანს. მე 100-ზე მეტის გადეპუტატებას ვვარაუდობ მაჟორიტარების წარმატების ხარჯზე. გია ვოლსკი, მაგალითად, პირველივე ტურში გაიმარჯვებს. ასე იქნება ბევრი სხვაც. სხვა პარტიები ხშირად არარეალურ განცხადებებს აკეთებენ. მაგალითად, ლეიბორისტები ხელისუფლებაში მოსვლის პირობას დებენ. შეიძლება, მათ ჰგონიათ, რომ ორი დეპუტატის გასვლაა ხელისუფლებაში მოსვლა, არ ვიცი. ნაციონალების თითქმის ყველა განცხადება ბაქიაობაა.
„ახალი თაობა“, 07 სექტემბერი, 2016 წელი
ინტერვიუ გელა ნიკოლაიშვილთან: „ქართული ოცნება“ 70 მანდატს აიღებს“
„ახალი თაობის“ კითხვებს იურისტი გელა ნიკოლაიშვილი პასუხობს.
- ბატონო გელა, დღეს ბევრი საუბრობს იმის თაობაზე, რომ არჩევნების მოახლოებასთან ერთად სიტუაციაც დამძიმდება. იმატა მკვლელობებმა თბილისის ქუჩებში. ბევრი თვლის, რომ ეს საბოტაჟის ნიშნებს შეიცავს. როგორია თქვენი შეფასებები?
- წინასაარჩევნოდ ყველგან და მათ შორის ჩვენთანაც სიტუაცია ბუნებრივად იძაბება. მე არ ვიტყოდი, რომ ამის შედეგია ის გახშირებული მკვლელობები.
- აბა, რისი შედეგია?
- მე პირიქით ვიტყოდი, ეს მკვლელობები, დაპირისპირებები, ქუჩური გარჩევები თვითონ შეიძლება იქნეს გამოყენებული გარკვეული პოლიტიკური ძალების მიერ უფრო მეტი გამწვავებისა და დესტაბილიზაციისთვის. აი, ამის საფრთხე არსებობს, თორემ პირდაპირ, რა თქმა უნდა, ეს მკვლელობები არ შეიძლება დავუკავშიროთ არჩევნებს. შეიძლება, ისინი გამოიყენონ კონკრეტულმა ძალებმა.
- ზოგი იმაზეც საუბრობს, რომ ნაციონალებს ჰყავთ თავიანთი ზონდერები, რომლებსაც სიტუაციას აარევინებენ. ამაზე რას იტყვით?
- ამაზე მხოლოდ ვარაუდები შეიძლება გამოითქვას. ვინც ამას ამბობს, შეიძლება, მეტი მტკიცებულებები აქვს. მე მხოლოდ ლოგიკით შეიძლება ვიმსჯელო. იქიდან გამომდინარე, რომ ეს პარტია თავისი არსებობის განმავლობაში ყოველთვის ორიენტირებული იყო იმავე დაძაბულობაზე, პროვოკაციაზე, 2003 წლიდან მოყოლებული, შემდეგ, ხელისუფლებაში ყოფნის დროს, ძალის გადაჭარბებულ გამოყენებაზე, რომელსაც მაქსიმალურად იყენებდნენ იმ მმართველობის პერიოდში, რაც ლეგიტიმაცია ჰქონდათ და ეს როგორ ბოროტად გამოიყენეს, ყველამ ვიცით, მით უმეტეს, როდესაც მათ საშუალება არა აქვთ, რეალურად გარკვეული დესტაბილიზაციის გარეშე პატიოსან არჩევნებში გაიმარჯვონ. მათ ჰყავთ მხოლოდ საკუთარი ელექტორატი, მყარი 10-15%-ის ფარგლებში.
- ეს საკმარისია?
- ეს მათთვის ძალიან ცოტაა და არ არის საკმარისი. აქედან გამომდინარე, შეიძლება ვივარაუდოთ, რომ ისინი შეეცდებიან დაძაბულობის მაქსიმალურ ხარისხში აყვანას, დესტაბილიზაციასაც, არჩევნების პროცესში თუ მას შემდეგ. ხელისუფლების ვალდებულებაც ის არის და უნარიც უნდა ჰქონდეს იმისა, რომ ეს არ დაუშვას, რა თქმა უნდა, კანონიერი მეთოდებით.
- უნდა გამკაცრდეს თუ არა კონტროლი ცეცხლსასროლ იარაღზე?
- კანონით იარაღის ტარების უფლება არავის აქვს, გარდა მცირე კატეგორიისა, ხოლო იარაღის ფლობის უფლება აქვს ყველას, თუ არ ჩავთვლით რაღაც გამონაკლისებს, ნასამართლევებს, არამდგრადი ფსიქიკის ადამიანებს და ასე შემდეგ. რადგანაც პრაქტიკულად ყველას აქვს იარაღის ფლობის უფლება, იმის კონტროლი, რომ შენ რომ იარაღი გაქვს, გარეთ გამოიტან თუ არა, პრაქტიკულად შეუძლებელია. თუმცა სამართალდამცავი ორგანოები განსაკუთრებულ რეჟიმში უნდა მუშაობდნენ, ვიმეორებ, კანონის ფარგლებში, რომ ესეც არ იქნეს ბოროტად გამოყენებული.
- ასევე ხშირია დაძაბულობის კერების შექმნა იქ, სადაც ნაციონალური მოძრაობა მოსახლეობას ხვდება, თუნდაც იმავე სანდრა რულოვსთან დაკავშირებით მომხდარი ინციდენტი ზუგდიდში. ეს ხელისუფლებას არ აზარალებს?
- ასეთი ინციდენტები ყოველთვის წამგებიანია იმ ადამიანებისთვის, რომლებიც ცდილობენ ასეთი შეხვედრების ჩაშლას. ამ შემთხვევაში ეს მომგებიანია ნაციონალებისათვის. ეს რატომ ვერ გაიგეს და ვერ გაითვალისწინეს პოლიტიკურმა პარტიებმა?! მე მგონი, ბოლოს და ბოლოს, უნდა დავიდეს მაგათ ტვინამდე, რომ, პირიქით, ის ადამიანები, რომლებიც ასე იქცევიან, წყალს ასხამენ მოპირდაპირე მხარის წისქვილზე.
- ვის აწყობს დღეს ყველაზე მეტად დესტაბილიზაცია, ნაციონალებს?
- ნაციონალური მოძრაობა თავის გარანტირებულ 10-15%-ს მიიღებს, ხოლო თუ არჩევნებზე დაბალი აქტივობა იქნება, ეს 10-15% გადაიქცევა 30 და 40%-დ. „ქართული ოცნების“ 20-25%-ც არაფერს ცვლის. ეს დაახლოებით 15-20 კაცია, ხოლო მათი მიზანი, რომ 100 კაცი გაიყვანონ პარლამენტში, მძიმედ მისაღწევად მიმაჩნია. აქ გადამწყვეტი მაჟორიტარები იქნება და მაჟორიტარებში, უმრავლეს შემთხვევაში, მეორე ტური გახდება საჭირო, რადგან პირველ ტურში 50%-იან ზღვარს ძალიან ცოტა თუ გადალახავს. ალბათ, მაინც „ოცნება“ მიიღებს უმრავლესობას, 70 კაცამდე გაიყვანენ.
- „ოცნებას“ სერიოზულად უჭირს კადრებში?
- კი, მეც ასე ვფიქრობ, სერიოზულად უჭირს, იმიტომ, რომ იქ რაღაცა დაჯგუფებები, რაღაცა კლანები… სტანდარტებისა და გამოცდილების მიხედვით კი არ არის არჩევა კანდიდატების, არამედ კლანური მიდგომაა. იმის კადრი, ამის კადრი… საბოლოო ჯამში, ეს მათ დაღუპავს. ეს ძალიან სახიფათო გზაა.
- რატომ ვერ შეძლო „ოცნებამ“, ჯანსაღ ძალად ჩამოყალიბებულიყო?
- აქ მთავარი შეცდომა ის იყო, რომ ბიძინა ივანიშვილი ჩამოსცილდა პროცესებს და ის არის ერთადერთი ადამიანი, რომელსაც, საქმის გარდა, არანაირი ინტერესი არა აქვს. დანარჩენები კი კლანების შექმნით, საკუთარი საახლობლო წრის დასაქმებით და კიდევ ათასი სხვა რამით არიან დაკავებულნი. დღეს „ოცნებაში“ არ არის ის ლიდერი, რომელიც ამისგან თავისუფალი იქნებოდა.
- საკმაოდ გააქტიურდა ივანიშვილი. რატომ, ხვდება, რომ მის გარეშე „ოცნება“ ვერაფერს იზამს? რამდენად უშველის საქმეს მისი გააქტიურება?
- მე მგონი, გარკვეული დოზით უშველის, თუ უკვე დაგვიანებული არ არის. მთავარი არ არის საჯარო გააქტიურება. მე ნამდვილად ვიცი კულისებიდან, რომ ის არ ერეოდა კანდიდატების შერჩევის პროცესში და ეს იყო შეცდომა.
- ითქვა, რომ ბიძინა ივანიშვილი უკმაყოფილო დარჩენილა კანდიდატების შერჩევით…
- საქმეც ეს არის, როცა უკმაყოფილო რჩები და როცა შეგიძლია, გავლენა მოახდინო, უნდა გადადგა ეს ნაბიჯი და ხელები არ უნდა დაიბანო! მიუშვა ნებაზე და ამან არ გაამართლა.
- რა შედეგით დასრულდება ეს არჩევნები?
- პირველი ძალა კვლავაც „ოცნება“ იქნება. მეორე, ჩემდა სამწუხაროდ, ალბათ, ისევ ნაციონალები იქნებიან, თუმცა მათ გარდა ორი-სამი პარტია გადალახავს მცირე რაოდენობით და ეს არ არის ცუდი. ოთხი-ხუთი პარტია პოლიტიკური ცხოვრებისთვის საკმარიც არის და საინტერესოც.
„ახალი თაობა“, 07 სექტემბერი, 2016 წელი
ინტერვიუ მინისტრ დავით ბაქრაძესთან: „ვიზალიბერალიზაცია არჩევნებს არ მიებმება“ // „750 ევროპარლამენტარიდან საქართველოსთვის ვიზალიბერალიზაციის მინიჭებას 550-ზე მეტი მხარს უჭერს“
ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრი დავით ბაქრაძე „ახალ თაობასთან“ ინტერვიუში აცხადებს, რომ ვიზალიბერალიზაციის ყველა პროცესი, ყველა აღებული ვალდებულება საქართველომ წარამტებით შეასრულა.
- ბატონო დავით, ვიზალიბერალიზაციის პროცესთან დაკავშირებით არაერთგვაროვანი ინფორმაციები ვრცელდება. ევროპარლამენტის მიერ ორი დღის წინ მიღებული გადაწყვეტილება 44 მომხრე, 5 წინააღმდეგ, რა გზავნილია ქართველი ხალხისთვის, რომელიც ევროპასთან უვიზოდ მიმოსვლის მოლოდინშია?
- ეს დამაიმედებელი და დადებითი გზავნილი არის. მე შევეცდები თქვენი მკითხველისთვის პროცესი მთლიანად ავხსნა. გასულ წელს, დეკემბერში ჩვენ დავასრულეთ ერთი მეტად მნიშვნელოვანი ეტაპი, რომელსაც ევროკომისიამ დადებითი შეფასება მისცა. ახლა ევროპის სამ ინსტიტუციაში პარალელურად გრძელდება პროცესის მეორე ეტაპი. ევროკომისიამ პოზიტიური დასკვნა მოგვცა და თქვა, რომ ასი პროცენტით, ზოგ შემთხვევაში კი თქვა, რომ – საქართველო კიდევ უფრო წინ წავიდა იმ რეფორმების განხორციელების გზაზე, რომელმაც უნდა უზრუნველყოს საქართველოსთვის ვიზალიბერალიზაცია. ახლა პროცესი არის ევროპარლამენტში. პარლამენტის პარალელურად აღნიშნულ საკითხს საბჭოც განიხილავს. საკითხი ევროპარლამენტში, როგორც საქართველოს პარლამენტში, ისე იქაც, პირველ რიგში კომიტეტების დონეზე განიხილება. საგარეო საქმეთა კომიტეტმა დაწერა დასკვნა, რომ საქართველო ვიზალიბერალიზაციას იმსახურებს. რაც შეეხება თქვენ მიერ ნახსენებ კომიტეტს, სადაც 44 დეპუტატის მხარდაჭერა მივიღეთ, ეს იყო მართლმსაჯულების კომიტეტი, რომელმაც ასევე დადებითი დასკვნა გამოაქვეყნა. ამის შემდეგ კომიტეტების დონეზე საკითხის განხილვა დასრულებულია.
ახლა გადავდივართ ტრილოგიის რეჟიმში, სადაც ევროპის საბჭო, კომისია და პარლამენტი ერთად განიხილავენ აღნიშნულ საკითხს. შემდეგი ეტაპი კი არის პლენარული სხდომა. საბჭომ, რომელიც წევრი ქვეყნების საგარეო საქმეთა მინისტრებისგან შედგება, უკვე უზრუნველყო მხარდაჭერა. ერთ-ერთი ყველაზე მნიშვნელოვანი, რაც უკვე მოხდა, არის ის, რომ ყველა ძირითადმა პოლიტიკურმა პარტიამ სრული უმრავლესობით მისცა საქართველოსთვის ვიზალიბერალიზაციას ხმა. ეს კი მეტყველებს იმაზე, რომ პარლამენტში როდესაც საკითხი გავა, ის მხარდაჭერილი იქნება ყველა პოლიტიკური პარტიისა და ძალის მიერ.
- გასაგებია, რომ ჩვენ ტექნიკური მხარე, ყველა ის ვალდებულება, რომელიც აღებული გვქონდა, შევასრულეთ, მაგრამ პროცესის შეყოვნება ქვეყნაში მიმდინარე დემოკრატიულ პროცესებთან შესაძლებელია იყოს ბმაში?
- ვიზალიბერალიზაციის სამოქმედო გეგმის მოთხოვნას არ წარმოადგენს პოლიტიკური პროცესები. ქვეყანაში მიმდინარე პოლიტიკური პროცესები მნიშვნელოვანი ფაქტორია, თუმცა, ჩვენი ქვეყნის შემთხვევაში, იმ რეფორმების გათვალისწინებით, რომლებიც ჩავატარეთ ასოცირების ხელშეკრულების მოთხოვნის შესაბამისად, იმ განსხვავებული დემოკრატიული გარემოდან გამომდინარე, რომლითაც არჩევნებს ვატარებთ, აქ კითხვის ნიშნები არ არსებობს. ასევე, როგორც კითხვის ნიშნები არ არსებობს ტექნიკური თვალსაზრისითაც. 30 საკანონმდებლო ცვლილება მოხდა, სტრატეგიები, კონვენციები ყველაფერი შესაბამისობაშია, ეს არის ის მოთხოვნები, რომლებიც იყო და პირნათლად შევასრულეთ და ასეთია მათი პოზიციაც.
- არჩევნები შეიძლება ერთგვარი წინაპირობა იყოს ვიზალიბერალიზაციის?
- არ შეიძლება არჩევნები თუ სხვა რამ იყოს წინაპირობა საქართველოს მოსახლეობისთვის უვიზოდ მიმოსვლის მისანიჭებლად.
- თუმცა, მსგავსი განცხადებები გაკეთდა ევროპარლამენტარების მხრიდან.
- გასაგებია, მაგრამ ევროპარლამენტი, ისევე, როგორც საქართველოს პარლამენტი, განსხვავებული შეხედულებების ადამიანებით არის დაკომპლექტებული. ასეთი სულ რამდენიმე განცხადება გაკეთდა და მათი განცხადებებიც კი არ წარმოადგენდა მათი ფრაქციის პოზიციას. 750-ზე მეტი პარლამენტარია და 500-ზე მეტი მხარს უჭერს საქართველოსთვის ვიზალიბერალიზაციის მინიჭებას, რაც სამ რეზოლუციაში აისახა. ამდენად, ჩვენ პრობლემას არ ველოდებით. ეს არის საკითხი, რომელიც გადაწყვეტილია. გვაქვს ძალიან მაღალი პოლიტიკური მხარდაჭერა როგორც კომისიის, ისე პარლამენტის მხრიდან. აქედან გამომდინარე, იმედია, რომ ეს პროცესი ძალიან მალე დასრულდება. მთავარი ამ თვალსაზრისით არის ის, რომ ორმხრივად ყველაფერი გაკეთდა, სამოქმედო გეგმა შესრულდა, არის პოზიტიური განწყობა, აქედან გამომდინარე, პროცედურებს დაველოდოთ.
- ბატონო დავით, ვადები როგორია? როდის შეიძლება უვიზოდ გადაადგილდეს საქართველოს რიგითი მოქალაქე შენგენის ზონაში?
- ვადებზე პროგნოზს პრინციპულად არ ვაკეთებ, რადგან ერთი დღითაც რომ დაიგვიანოს, მერე ამას იმედგაცრუება მოჰყვება, რისი ფუფუნებაც არ გვაქვს. მთავარია, რომ გადაწყვტილება მიღებულია. ყველა ქვეყანა თანხმდება, რომ საქართველომ უნდა მიიღოს ვიზალიბერალიზაცია.
- ბატონო დავით, აბსოლუტურად გამორიცხავთ ამ პროცესის არჩევნებთან გარკვეულ ბმას? ზოგადად წინასაარჩევნო გარემოს როგორ შეაფასებთ, არის ეს დემოკრატიისკენ გადადგმული ნაბიჯი?
- სამი თვე გავიდა, რაც ოფიციალურად დაიწყო წინასაარჩევნო კამპანია და ჩვენ აბსოლუტურად განსხვავებულ გარემოს ვხედავთ. თავისუფალ, კონკურენტულ პირობებში პარტიებს აქვთ შესაძლებლობა, მოსახლეობას ესაუბრონ, პროგრამები გააცნონ. სამწუხაროდ, ინციდენტები, რომელთაც ადგილი ჰქონდა ან პროვოკაციის მცდელობები, არის ის, რაც ძალიან გვაღელვებს, რადგან 8 ოქტომბრამდე ეს პროცესი უნდა გამოვიყენოთ, როგორც უდიდესი ნაბიჯი წინ, დემოკრატიისკენ. ასეთი არჩევნები ჩვენ ჯერ არ გვქონია.
- რას გულისხმობთ?
- უმაღლესი დემოკრატიის სტანდარტებით ჩატარებულ წინასაარჩევნო კამპანიას და არჩევნებს. ამით ძალიან დიდ ნაბიჯს გადავდგამთ დემოკრატიისკენ. ჩვენთვის, როგორც ევროპული სახელმწიფოსთვის, საზოგადოებისთვის, არჩევნები არ არის გამოწვევა. ეს არის ძალიან დიდი შესაძლებლობა, რომ კიდევ ერთი დიდი ნაბიჯი გადავდგათ წინ. ვიზალიბერაზალიციით ჩვენი ინტეგრაციის პროცესი არ სრულდება. ჩვენ გვაქვს ძალიან ამბიციური გეგმები, რომლებიც უკავშირდება მომავალი სამი წლის დღის წესრიგს. ამით ჩვენ სერიოზულ საფუძველს ჩავყრით და მნიშვნელოვანი ნაბიჯით დავიწყებთ სვლას. ამიტომ ჩვენს ინტერესშია, რომ მინიმუმამდე დავიყვანოთ ეს რისკი. საერთაშორისო საზოგადოებას მოვუწოდებ, ყურადღებით დააკვირდნენ პარტიების აქტივობებს, შესაძლო პროვოკაციებს. მეორე მხრივ კი მოვუწოდებ ჩვენს მომხრეებს, რომ მაქსიმალურად თავი აარიდონ პროვოკაციებს. მაქსიმალურად მოერიდონ შესაძლო ინციდენტებს, რადგან ჩვენ გამარჯვებისთვის მივდივართ 8 ოქტომბერს და ეს უნდა იყოს არამხოლოდ არჩევნებში გამარჯვება, არამედ ეს უნდა იყოს პროცესში გამარჯვებაც.
- დაბოლოს, მინდა გკითხოთ რუსულ პროპაგანდაზე, რომელიც ამ ბოლო დროს აქტუალურია. როგორია თქვენი პოზიცია?
- ჩვენთვის უცხო არ გამხდარა რუსული პროპაგანდა არც წელს, არც სამი წლის წინ და არც საბჭოთა რეჟიმის პირობებში. ჩვენ ვიცით, რას ნიშნავს რუსული პროპაგანდა, აქიდან გამომდინარე შეიძლება პირიქით უფრო რეზისტენტულებიც შეიძლება ვიყოთ ამ საკითხის მიმართ, მაგრამ ბოლო პერიოდში ეს ძალიან აქტიურად იქნა გამოყენებული, როგორც პოლიტიკური იარაღი. ბოლო სამი წლის განმავლობაში აბსოლუტურად განსხვავებული და მობილური სისტემა შევიმუშავეთ.
- ამართლებს ეს პოლიტიკა?
- დიახ, ამართლებს. ღია გარემოში, სადაც არც მედია იკრძალება და არც თავისუფალი და განსხვავებული აზრი, სწორედ ამ გარემოში, გაზრდილი რუსული პროპაგანდის ფონზე, ჩვენ უზრუნველვყავით ევროკავშირსა და ნატოში ინტეგრაციის მიმართ ზუსტად ისეთივე მაღალი მახრადჭერა, როგორიც ადრე იყო. ეს არის ის შედეგი, რომელსაც ჩვენ ამ პოლიტიკით მივაღწიეთ.
„ახალი თაობა“, 07 სექტემბერი, 2016 წელი
ინტერვიუ მამუკა ტუსკაძესთან: „ხელისუფლება რომ არ შეცვლილიყო, ცოცხალი ვერ გადავრჩებოდი“ // „ადამიანები პირიდან შადრევანივით ასხამდნენ სისხლს და ფილტვები პირიდან ამოსდიოდათ“
გოგა ხაინდრავას ფილმ „ჰეროკრატიაში“ მოთხრობილ სააკაშვილისდროინდელი ციხის ისტორიებში უფლებადამცველისა და ადვოკატის (ახლა უკვე პარლამენტის დეპუტატობის კანდიდატი „პატრიოტთა ალიანსიდან“) მამუკა ტუსკაძის ცემა-წამებაცაა ასახული. იგი „ახალ თაობასთან“ საუბარში ამხელს სააკაშვილის სისტემის ჯალათებს და ციხეში გატარებული საშინელი დღეების, ცემა-წამების სხვა ეპიზოდებს იხსენებს. ის პარლამენტის ადამიანის უფლებათა კომიტეტმა უკანონო პატიმრად ცნო. პატიმრობიდან კი სწორედ იმ დღეს გათავისუფლდა, როდესაც ვანო მერაბიშვილი დააპატიმრეს.
- ბატონო მამუკა, თქვენ მოხვდით ნაცების რეპრესიული მანქანის კლანჭებში. თქვენი ციხის საშინელი ცხოვრების ერთი ეპიზოდის თაობაზე მოთხრობილია გოგა ხაინდრავას ფილმ „ჰეროკრატიაშიც“. როგორ აღმოჩნდით ციხეში?
- 2010 წელს ადგილობრივ არჩევნებში მივიღე მონაწილეობა. მანამდე აქტიურად ვიყავი ჩართული საზოგადოებრივ-პოლიტიკურ საქმიანობაში. 7 ნოემბრის აქციების საორგანიზაციო ჯგუფის წევრი გახლდით, ვინაიდან იმ პერიოდში ვმუშაობდი ირაკლი ოქრუაშვილის საარჩევნო შტაბში. იმ პერიოდიდან დაიწყო ჩემი დევნა სხვადასხვა მეთოდით. საადვოკატო ბიურო მქონდა და ცდილობდნენ, შემოეპარებინათ რაღაც დოკუმენტი, რომ მოეხდინათ ჩემი პასუხისგებაში მიცემა, რაც იმ პერიოდში ვერ მოახერხეს. შემდეგ ჩემს წარმოებაში აღმოჩნდა დოკუმენტები, რომელთა მიხედვით, რაღაც ჯგუფს, რომელსაც ვანო მერაბიშვილი და ჯოზეფ ქეი ხელმძღვანელობდნენ, პრეზიდენტის რეზიდენციის მიმდებარე ტერიტორიაზე უკანონოდ მითვისებული ჰქონდა მოქალაქის მიწის ნაკვეთი.
- დოკუმენტები თქვენთან როგორ აღმოჩნდა?
- იმ მოქალაქის ინტერესებს ვიცავდი, რომლის მიწის ნაკვეთის მითვისების სქემაც ჰქონდათ. ამ დოკუმენტებით მაღალჩინოსნების ბრალეულობა იკვეთებოდა. ჩემი დაკავებიდან ერთი თვის შემდეგ ციხეში შემომიგზავნეს დოკუმენტი, სადაც ეწერა, რომ დანაშაულის ნიშნების არარსებობის გამო ეს საქმე ჩამოიწერა.
- ანუ მაშინ ვანო მერაბიშვილისა და ჯოზეფ ქეის წინააღმდეგ აღძრული საქმე ჩამოწერეს?
- ამ დოკუმენტებით ვანო მერაბიშვილსა და ჯოზეფ ქეის ვამხელდი თაღლითურად ქონების მითვისებაში. ციხიდან ჩემი გათავისუფლების შემდეგ ეს საქმე ამოვწიე და დღესაც ძიებაშია.
- დაკავების ორგანიზება როგორ მოხდა?
- უშიშროების მაღალჩინოსნებს ჩემზე განსაკუთრებული მეთვალყურეობა ჰქონდათ დაწესებული. 2010 წელს მონაწილეობა მივიღე ადგილობრივ არჩევნებში გლდანის საარჩევნო ოლქში. მეორე ადგილზე გავედი. ნაციონალებმა არჩევნები გააყალბეს. მომზადებული მქონდა საჩივარი არა მარტო ადგილობრივ სასამართლო ინსტანციებში, არამედ საერთაშორისო სასამართლოში საჩივლელად. დამაპატიმრეს არჩევნების შედეგების შეჯამების დღეს ანუ 9 ივნისს.
- ციხეში შესული ყველა პატიმარი გარკვეულ რეპრესიულ მანქანაში ხვდებოდა. ე.წ. კარანტინის დაშლა შეგეხოთ?
- გლდანის ციხეში 2010 წლის 11 ივნისს მიმიყვანეს. მაშინ ჯერ კიდევ არ იცოდა ციხის ადმინისტრაციამ, რა მოტივით და რისთვის ვიყავი დაკავებული. მათ იცოდნენ, რომ მე ვიყავი დეპუტატობის კანდიდატი გლდანში, იცოდნენ, რომ ვაპირებდი გასაჩივრებას. ცუდად არ მომქცევიან. იმ დღეს ლადო ბედუკაძე იყო მორიგე. მე ციხეში ლადო ბედუკაძემ მიმიღო.
- როგორ მიგიღოთ? ლადო ბედუკაძემ იცოდა, რომ თქვენ დეპუტატობის კანდიდატი იყავით და რატომ დაგაკავეს?
- კარგად მიმიღო. ჩვენ გვქონდა მცირეოდენი გასაუბრება და მან იმ დღეს მოახერხა, რომ არ შემხებოდნენ. მცირე სამედიცინო შემოწმებაზე გამატარეს და საკანში ამიყვანეს, სადაც წელიწადი და 8 თვე ვიცხოვრე. 4 თვის განმავლობაში ყველაფერი ნორმალურად გრძელდებოდა. თავს დამნაშავედ არ ვცნობდი და ბოლო მომენტამდე დუმილის უფლებას ვიყენებდი. სასამართლოზე ვაცხადებდი, რომ პოლიტიკური პატიმარი ვიყავი და აუცილებლად დადგებოდა ის დღე, როდესაც იმ მარწუხებიდან თავს დავაღწევდი.
- თქვენი წამება როდის დაიწყეს?
- ციხეში ჩემი ტანჯვა-წამება და არაადამიანური მოპყრობა დაიწყო 4 თვის შემდეგ, რადგან არ ვთანამშრომლობდი გამოძიებასთან. არც არაფერი მქონდა სათანამშრომლო. ამიტომ გამოძიებას უჭირდა ჩემთვის ბრალის დამტკიცება. მტკიცებულებები არ იყო საკმარისი. უნდოდათ დაემტკიცებინათ, რომ მე მივითვისე რაღაც სახის ქონება. ჩემს წინააღმდეგ დავა იყო წამოწყებული დოკუმენტების გაყალბების თაობაზე თითქოსდა ქონების მითვისების მიზნით, თანამდებობრივი მდგომარეობის გამოყენებით. თუმცა, არც ერთი მოწმე არ ჰყავდათ. 6 ეპიზოდზე იყო საუბარი, შემდეგ 5 ეპიზოდზე დავიდა. მხოლოდ 1 ცრუ მოწმე გამოაჩინეს, რომელმაც თქვა, რომ მე მივეხმარე დოკუმენტების გაყალბებასა და დარეგისტრირებაში. თუმცა, ის ადამიანი დღემდე ინანიებს ამ საქციელს.
- ვინ არის?
- ის ჩემი ოქროს მოწმეა და არ მინდა, მისი არსებობა კითხვის ნიშნის ქვეშ დავაყენო. ჩემი საქმე ახლა სტრასბურგშია გაგზავნილი და პროცესი გრძელდება. საბოლოო ჯამში, განმესაზღვრა 30 წლით თავისუფლების აღკვეთა. თუმცა, შემდეგ მე გავურიგდი ხელისუფლებას, რადგან 30 წელი ძალიან ბევრი იყო.
- როგორ გაურიგდით?
- გავურიგდი 13 წელზე. პროკურორს ვუთხარი, რომ არ ვაღიარებ დანაშაულს, მაგრამ, სისხლის სამართლის საპროცესო კოდექსის თანახმად, დავდე გარიგება. დანაშაულის აღიარების გარეშე შეიძლება ადამიანს გაუფორმდეს საპროცესო. აქედან 8 წელი რეალური, 5 წელი – პირობითი.
- როგორ გაწამებდნენ?
- პირველი წამება იყო საკანი, რომელიც 22 კვადრატული იყო თავისი ტუალეტიანად და 8 ადამიანი ვისხედით. შემდეგ, სანამ ჩემამდე მოვიდოდნენ, იღებოდა კარი და ისმოდა არაადამიანური ხმები.
- რა ხმები?
- ისმოდა განწირული ხმები და იგრძნობოდა სისხლის სუნი. ადამიანებს აწამებდნენ და ჩვენ გვასმენინებდნენ. მერე ექიმი მოდიოდა.
- თქვენ ხედავდით, ექიმი რომ მოდიოდა?
- დიახ. ვხედავდით, გარდაცვლილები როგორ გაჰყავდათ საკაცეებით, როგორ გაჰყავდათ მომაკვდავები და როგორ შემოჰყავდათ დაინვალიდებულები. იღებოდა კარი და იწყებოდა წამება. მანამდე ბიჭები, რომლებიც ჩემს საკანში ისხდნენ, მეუბნებოდნენ, ვინ ხარ, რომ არ გეხებიანო, მაგრამ გათენდა ის „ბედნიერი“ დღე, როცა ჩემი საკნის კარიც შემოაღეს. სისტემატურად შემოდიოდა ოლეგ ფაცაცია.
- ფიზიკურად გეხებოდნენ?
- ფიზიკურად მისწორდებოდნენ.
- რატომ გცემდნენ, არ გეუბნებოდნენ?
- პირდაპირ მეუბნებოდნენ: შენი პოლიტიკოსი დედა, შენ ვინ უნდა გადააგდო და ვინ უნდა შეცვალო, შე გლახა, შენ მამაძაღლოო. მათი სისასტიკე მიმძაფრებდა დაუმორჩილებლობის სურვილს. ამიტომ დამიწერეს დასკვნა, რომ ვარ დაუმორჩილებელი.
- დაუმორჩილებლობა რით გამოიხატებოდა?
- შეგიძლიათ, ოლეგ ფაცაციასთან შეხვიდეთ ციხეში და ჰკითხოთ, რატომ ურტყამდი მამუკა ტუსკაძეს-თქო. ის დაგიდასტურებთ, რომ მამუკა ტუსკაძეს ურტყამდა თავისი პოლიტიკური საქმიანობის გამო.
- ანუ ოლეგ ფაცაცია გირტყამდათ?
- ოლეგ ფაცაციაც მირტყამდა და მუხაძეც. ჩემი იქ ყოფნის დროს გლდანის ციხის დირექტორი ჯერ მელაძე იყო, შემდეგ – ფაცაცია. თამაზ მელაძის დროს მე ციხეში არ მცემდნენ. მას შემდეგ, რაც მოვიდა ალექსანდრე მუხაძე (ქილერა), დაიწყო ჩემი ცემა-წამება. უკვე გასამართლებული ვიყავი, როცა შემოდიოდა პროკურორი და მეუბნებოდა, ამა და ამ ადამიანზე მიეცი ჩვენება, თორემ შენზე ახალ საქმეზე გამოძიება იწყება და სასჯელს დაგიმატებენო.
- ჩვენების მიცემას ვის წინააღმდეგ გთხოვდნენ?
- ბევრი ადამიანის წინააღმდეგ.
- კერძოდ?
- მთხოვდნენ, ჩვენება მიმეცა საჯარო რეესტრისა და მერიის მაღალჩინოსნების წინააღმდეგ, რომლებთანაც მე არავითარი შეხება არ მქონდა.
- ვინ არ მოსწონდა სააკაშვილის რეჟიმს?
- სააკაშვილის რეჟიმი მთხოვდა, ჩვენება მიმეცა ტარიელ ხიზანეიშვილის წინააღმდეგ, რომელიც ვიცემერი იყო. მთხოვდნენ, ჩვენება მიმეცა საჯარო რეესტრის მაღალჩინოსნებზე, მათ შორის ქეთი ზაალიშვილზე, რომელსაც დღემდე არ ვიცნობ. ცემამ სისტემატური სახე მიიღო. ოღონდ, ეს არ იყო მხოლოდ ადამიანური ღირსების შემლახავი ცემა, თავში ჩარტყმა, აბანოში შიშველი დადგომა, ცივი წყლის დასხმა, რეზინის დუბინკის მსგავსი მათრახით ცემა (რომელსაც გირტყამენ და სხეულზე არაფერი გეტყობა) და სხვა.
- გარეთ მიმდინარე პოლიტიკური მოვლენები ციხეში არსებულ ვითარებაზე გავლენას არ ახდენდა?
- როდესაც ნინო ბურჯანაძემ თქვა, რომ შეცვლიდა ხელისუფლებას და დაიწყო ხალხის მობილიზება, ჩემი ცემა შეწყვიტეს და კონტროლიორების, ოფიცრების მეშვეობით ცდილობდნენ ჩემთან კომუნიკაციას, როგორ ფიქრობ, რა მოხდებაო.
- თქვენ რაიმე კავშირი გქონდათ ნინო ბურჯანაძესთან?
- არავითარი. უბრალოდ, ყველამ იცოდა, რომ პოლიტიკის გამო ვიჯექი ციხეში. გლდანი ჩემი პლაკატებით იყო მოფენილი და ხედავდნენ.
- რა აინტერესებდათ?
- მეკითხებოდნენ, ნინო ბურჯანაძეს რა რესურსი შეიძლებოდა ჰქონოდა. ზუსტად ვიცოდი, ხელისუფლების შეცვლის მეტი არაფერი მიშველიდა. ამიტომ პატიმრებში ვავითარებდი აზრს, რომ 26 მაისი ნამდვილად გამარჯვებით დასრულდებოდა – ნინო ბურჯანაძე კანონიერი გზებით დაამხობდა სააკაშვილის ხელისუფლებას და ხელისუფლებაში დემოკრატიული ძალები მოვიდოდნენ.
- არაფერს გეუბნებოდნენ?
- სწორედ ეს არ მაპატიეს. 2011 წლის 26 მაისის წინა დღეებში რადიოს ვუსმენდით, შემოვიდნენ რადიოს წასაღებად და შევეწინააღმდეგე, რადიოს არ ვატანდი. შემოვარდა 10 კაცი (ჯგროდ დადიოდა 9-10 კაცი), თითი არავისთვის დაუკარებიათ, ჩამოგლიჯეს რადიო, გაიტანეს და შემპირდნენ, რომ 26 მაისს გამისწორდებოდნენ. 26 მაისს ველოდებოდი, იქნებ ბურჯანაძემ რაღაც ქნას-მეთქი. მთელი ღამე ლოცვაში გავატარე. ძლიერი წვიმა იყო, შემოდიოდა ინფორმაცია, რაც ხდებოდა. ჩემი საკანი პირდაპირ რესპუბლიკური საავადმყოფოს მისაღებს უყურებდა. იმ ღამეს მე დავინახე ათობით გვამი, ადამიანები საკაცეებით როგორ მოიტანეს გლდანის ციხეში. მივხვდი, რომ მიტინგი იყო დარბეული. მანამდე დავინახე, როგორ გაიყვანეს ციხიდან სპეცრაზმი. გლდანის ციხეში თითო კორპუსში თითო კაცი დატოვეს, დანარჩენი მიტინგის დასარბევად გაიყვანეს.
- ანუ 26 მაისის დარბევაში გლდანის ციხის სპეცრაზმიც მონაწილეობდა?
- დიახ. საერთოდ, პატიმრებს საღამოობით სცემდნენ ხოლმე. დღის განმავლობაში მოდიოდნენ სხვადასხვა ქვეყნის წარმომადგენლები და ციხეში, სადაც 4.200 პატიმარი ჰყავდათ, ბუზის გაფრენის ხმა ისმოდა. 26 მაისს, საღამოს, შემოწმების შემდეგ, 8 საათი იქნებოდა, შემოვიდნენ ვახტანგ ბუცხრიკიძე, ოლეგ ფაცაცია, ავსაჯანიშვილი, ყაჭეიშვილი და სხვები. ოლეგ ფაცაციამ, რომელსაც დიდი რაცია ეჭირა, გამომიყვანა შუაში და მითხრა, ტუსკაძე, ახლა შენი დედის ტირების დროა მოსულიო _ საფეთქელთან რაცია ჩამარტყა და ძვალი ჩამიმტვრია (დღემდე მტკივა). წავიქეცი და გავითიშე. როცა აზრზე მოვედი, დასისხლიანებული და არა მარტო ცხვირპირდალეწილი, არამედ ნეკნებჩამტვრეულიც ვეგდე ნარის (რაზეც ვწვებოდი) ქვეშ წყალში. როგორც ჩანს, წყალს მასხამდნენ, რომ მოვსულიერებულიყავი. როცა აზრზე მოვედი, ისტერიული სიცილი ამივარდა.
- რატომ?
- ჩემს თავს აღარ ვეკუთვნოდი. ტიპი, რომელსაც რაღაცად მიმაჩნია თავი, ვაგდივარ დასისხლიანებული, ჩემი 7 თანამოსაკნეები კი ხელაწეული დგანან.
- მათაც სცემეს?
- დიახ, მაგრამ ისე არა, როგორც მე. ერთი ტუსკაძე როგორ ვერ გააჩერეთო. ამ დღის შემდეგ რამდენიმე კაცი წაიყვანეს და საკანში აგენტები შემოიყვანეს. გატეხილი ნეკნი და გატეხილი ყბა ნახევარი ანალგინით მოვირჩინე. იმდენად მტკიოდა, ტკივილისგან ლამის კედელზე დავდიოდი. ყბა მოტეხილი მქონდა და საჭმელს ვერ ვჭამდი, ვერ ვლაპარაკობდი და ყველაფერი მტკიოდა. გლდანის ციხეში ყოფნა ჩემი სასჯელი იყო.
- ექიმები არ იყვნენ?
- მაშინ ციხის საავადმყოფოში ჯალათი ექიმები მუშაობდნენ. იცოდნენ, რომ დაგლეჯილი ვიყავი, მაგრამ ერთ ცალ ანალგინს მაძლევდნენ. ერთი კვირის შემდეგ კვლავ დაიწყო ჩემი სისტემატური ცემა. გატეხილ ნეკნზე მირტყამდნენ. თვეში ერთხელ ვიბანდი, რადგან 5 წუთში წყალს გამორთავდნენ. თუ არ გამოხვიდოდი, გცემდნენ. თვეში ერთხელ ცემას ვუძლებდი. შემოცვივდებოდნენ, ტუსკაძე, ნუ ფილოსოფოსობ, ნუ ჩურჩულებ, ნუ ლაპარაკობო და გირტყამდნენ. ისე, `გამიმართლა~, როცა არაადამიანურად მცემეს.
- რატომ?
_ ჩამტვრეულმა ნეკნმა ფილტვი დამიზიანა, დამემართა დაჩრდილვა და გავხდი ცუდად. იქვე შეიძლებოდა განკურნება, მაგრამ დაახლოებით 3 თვის განმავლობაში წამალი არ მომცეს, იქნებ ტუბერკულოზი დაემართოსო. 2011 წლის 1 აგვისტოს ანალიზების პასუხებში მიწერია, რომ ტუბერკულოზი არ მქონდა. 5 აგვისტოს მიწერია, რომ მაქვს დაჩრდილვა. 29 აგვისტოს გლდანის ციხის საავადმყოფოს ექიმმა გელა ბესელიამ მომცა ცნობა, რომ მე მქონდა ტუბერკულოზი და გადამიყვანა ქსნის ციხეში. გლდანის ციხეში სიკვდილს გადავურჩი.
- თუ ტუბერკულოზი არ გქონდათ, ქსანში ხომ, პირიქით, დაავადდებოდით?
- სხვა გზა არ იყო. ქსანში 150 ადგილზე 1.200 პატიმარი იყო. მათ შორის, 1.150 მართლა ავადმყოფი იყო. დანარჩენს ჰქონდა დაჩრდილვა და ამგვარი დაავადებები. ქსანში პირველივე დღიდან დავიწყე გაპროტესტება, ნიღბით დავდიოდი. რამდენიმე დღე ვიშიმშილე. ციხის იქაური ხელმძღვანელი ვლადიმერ (ბაჩო) როდონაია, რომელიც ახალაიას გუნდის წევრი იყო, ნამდვილი ჯალათი გახლდათ, მეუბნებოდა, ან შენ უნდა იყო, ან მეო.
- ნიღბის გამო გემუქრებოდათ?
- თავიდან ნიღბის გამო მემუქრებოდა. შემდეგ ვაპროტესტებდი, რომ ტუბერკულოზი არ მქონდა, მაგრამ ნემსებს ძალით მიკეთებდნენ. მაკავებდნენ და წამლებს ისე მასმევდნენ. 300 ანტიბიოტიკი უნდა გამეკეთებინა. როცა გამოვედი ციხიდან, შევამოწმებინე. კახა იშხნელმა, სააკაშვილის ხელისუფლების კიდევ ერთმა ჯალათმა, ერთი მხრივ, მომცა დოკუმენტი, რომ მე მქონდა ტუბერკულოზის ქრონიკული დაავადება, მეორე მხრივ, მომცა დოკუმენტი, რომ მე არ მქონდა დაავადება, მესამე მხრივ, გადამიყვანა რუსთავის ზონაში, მეოთხე მხრივ, დამაბრუნა ისევ ტუბზონაში. შემდეგ დამიწერა, რომ არასოდეს მქონია ტუბერკულოზი. ეს არ არის რეჟიმი და ზეწოლა? ეს არ არის ადამიანის გაუბედურება და გაგიჟება? ქსნის ზონაში რაც ხდებოდა, იმის აღწერა შეუძლებელია. ჩემ თვალწინ ტუბერკულოზით დაავადებულები იხოცებოდნენ. არ შველოდა 13 სახის წამალი, ადამიანები პირიდან შადრევანივით ასხამდნენ სისხლს და ფილტვები პირიდან ამოსდიოდათ. ბაქტერია ვრცელდებოდა. ადამიანები მორჩენისკენ რომ მიდიოდნენ, კვლავ ავადდებოდნენ. დაავადებულ ადამიანებს მხოლოდ 3 საათი ეძინათ დღე-ღამეში მორიგეობით.
ჩემთან ერთად ტუბერკულოზიანი და შიდსიანი პატიმრები იყვნენ. შევესწარი, ექიმები შიდსიან ნემსებს გამოსახარშად აგდებდნენ. ციხის ტუბზონაში ადამიანებზე ექსპერიმენტებს ატარებდნენ. ტუბერკულოზიან პატიმარს ბოლო დონეზე სცემდნენ. ტუბზონაში ჩვეულებრივად გაგრძელდა ცემა. მიზეზი იყო ნიღბით სიარული, ნემსის არგაკეთება, ზონაში აგიტაცია-პროპაგანდა. ბიძინა რომ გამოჩნდა, ზონაში ვინც ჩემი სახელი არ იცოდა, ბიძინას მეძახდა. როდესაც ციხის კადრები გამოქვეყნდა, სექტემბერში როდონაიას ბოლო კომუნიკაცია ჩემთან ჰქონდა.
- ბიძინას განცხადება რომ გამოქვეყნდა, რა გითხრეს?
- 7 ოქტომბერს მთელი ტუბზონა ჩემთან შეიკრიბა. აგიტაციას ვეწეოდი. მეორე დღეს ციხის ხელმძღვანელობამ მითხრა, თუ დემაგოგიას არ შეეშვები, განანებთო.
- ბიძინას განცხადების შემდეგ ციხის ხელმძღვანელობა როგორ ხასიათზე იყო?
- იცინოდნენ. ბიძინა კი არა, იესო ქრისტე რომ ჩამოვიდეს, ვერაფერს გვავნებსო.
- ამბობდნენ, რომ ციხეში იყო ზეიმი, როდესაც ხელისუფლება შეიცვალა...
- პირველ ოქტომბერს პატიმრები მოდიოდნენ და მილოცავდნენ, თითქოს არჩევნები მე მომეგოს. ხელისუფლება რომ არ შეცვლილიყო, ცოცხალი ვერ გადავრჩებოდი.
- როდის გათავისუფლდით?
- ჩემი გვარი პოლიტპატიმართა სიიდან ამოიღეს, მაგრამ პარლამენტმა უკანონო პატიმრის სტატუსი მომანიჭა. ეს გამოვიყენე. 21 მაისს ანუ იმ დღეს, როცა ციხიდან გავთავისუფლდი, ვანო მერაბიშვილი დააპატიმრეს. როცა ტელევიზორში ვუყურებდი, როგორ დააკავეს ვანო მერაბიშვილი, ციხის ახალი ხელმძღვანელი მეძახდა, ტუსკაძე, გათავისუფლებული ხარო.
- თქვენი მწამებლები დღეს დაპატიმრებული არიან?
- მხოლოდ ოლეგ ფაცაციაა ციხეში. ისიც სხვა ეპიზოდზე ჩასვეს. ოლეგ ფაცაციას ვპირდები, ჩემი ცემის ეპიზოდზე მაშინ მიიღებს სასჯელს, როცა მისი გათავისუფლების დრო დადგება. მაგნაირი ჯალათები საზოგადოებისთვის საშიშნი არიან.
- სტრასბურში გაგზავნილ სარჩელში ოლეგ ფაცაციაზე არ არის საუბარი?
- არა, ის სარჩელი წამებასთან დაკავშირებით არაა, დაპატიმრების კანონიერებაზეა.
- პროკურატურაში თუ იჩივლეთ?
- დიახ, ჩვენება მივეცი წამების კომიტეტს. პროკურატურას ციხეში ყოფნის პერიოდშიც და შემდეგაც მივეცი ჩვენება, მაგრამ საქმე თაროზეა შემოდებული.
