„რეზონანსი”: პრეზიდენტს სააარჩევნო თარიღის შეცვლას ურჩევენ
„რეზონანსი”: ყველაზე რეიტინგული ოპოზიციონერები // ირაკლი ალასანია, დავით ბაქრაძე, შალვა ნათელაშვილი, ნინო ბურჯანაძე, პაატა ბურჭულაძე
„რეზონანსი”: ინტერვიუ ელისო ჩაფიძესთან: “ოცნება” რჩება მემარცხენე-ცენტრისტულ პარტიად”
„რეზონანსი”: ინტერვიუ გია ხუხაშვილთან: “რესპუბლიკელი” მინისტრები მთავრობას ვარშავის სამიტის შემდეგ დატოვებენ”
„რეზონანსი”: ქართველები ხელფასის ნახევარს “კრედიტში ტოვებენ” // “ფაქტობრივად, მთელი საქართველო არის ვალებში გახვეული”
———
„ახალი თაობა“: ინტერვიუ ნანა დევდარიანთან: „ირაკლი ალასანიას და რესპუბლიკელებს არჩევნებზე გაუჭირდებათ“
„ახალი თაობა“: ინტერვიუ მამუკა კაციტაძესთან: „პრეზიდენტს არჩევნების თარიღზე კონსულტაცია ჩვენთანაც უნდა გაემართა“
„ახალი თაობა“: ინტერვიუ ომარ ნიშნიანიძესთან: „არჩევნებზე ბევრგან მეორე ტური გაიმართება“ // „ქართული ოცნება“ დავით უსუფაშვილის გადაბირებას აპირებს?
„ახალი თაობა“: აფხაზეთში ყარაბაღის სცენარის გამეორებას ვარაუდობენ
———
„ვერსია“: ინტერვიუ ხათუნა სამნიძესთან: რესპუბლიკური პარტიის თავმჯდომარე ყველა ბრალდებას პასუხობს – „ჩვენი მინისტრები პოსტებს აგვისტოში დატოვებენ“
„ვერსია“: ინტერვიუ შალვა რამიშვილთან: რატომ აღარ გავა „იმედზე“ მისი გადაცემები
„ალია“: ინტერვიუ გია ბურჯანაძესთან: ფარული ვიდეოებით რიგითი მოქალაქეების დაჟანტაჟებაც დაიწყეს?!
————————-
„რეზონანსი”, 08 აპრილი, 2016 წელი
პრეზიდენტს სააარჩევნო თარიღის შეცვლას ურჩევენ
ელზა პაპოშვილი
საქართველოს ისტორიაში პირველად, შვიდი თვით ადრე, 2016 წლის საპარლამენტო არჩევნების თარიღი უკვე ცნობილია, რომელიც 8 ოქტომბერს ჩატარდება. თუმცა პრეზიდენტ გიორგი მარგველაშვილის მიერ გამოცხადებულმა საარჩევნო თარიღმა პოლიტიკური სპექტრის ნაწილის უკმაყოფილება გამოიწვია. მათი აზრით, პრეზიდენტმა იჩქარა და არჩევნების გამოცხადებამდე ქვეყნის შიგნით სათანადო კონსულტაციები არ გამართა. ამიტომაც ისინი პრემიერ-მინისტრს, გიორგი კვირიკაშვილს ურჩევენ, რომ პრეზიდენტს განკარგულება მოტივირებული შენიშვნებით უკან დაუბრუნოს.
შეგახსენებთ, რომ პრეზიდენტმა მისი ორი განკარგულება 2016 წლის საპარლამენტო არჩევნებისა და აჭარის ავტონომიური რესპუბლიკის უმაღლესი საბჭოს არჩევნების დანიშვნის შესახებ ხელმოსაწერად საქართველოს პრემიერ-მინისტრს უკვე გადაუგზავნა, თუმცა პროცედურის გასავლელად პრემიერს კანონი 10 დღის ვადას აძლევს.
“ახალგაზრდა იურისტთა ასოციაციის” შეფასებით, არჩევნების დანიშვნის თაობაზე პრეზიდენტის განკარგულების ის ჩანაწერი, რომელიც აქტის ძალაში შესვლის თარიღად 8 აგვისტოს განსაზღვრავს, საარჩევნო კანონმდებლობასთან წინააღმდეგობაში მოდის.
ორგანიზაცია მიიჩნევს, რომ მთავრობამ პრეზიდენტს განკარგულება შენიშვნებით უკან უნდა დაუბრუნოს.
“აღნიშნული გადაწყვეტილებით იქმნება რისკი, რომ კანონმდებლობის საწინააღმდეგოდ, ხელოვნურად მოხდეს წინასაარჩევნო კაპანიის დაწყების თარიღის გადავადება. ვინაიდან, საქართველოს საარჩევნო კოდექსის თანახმად, წინასაარჩევნო კამპანია იწყება არჩევნების დანიშვნის თაობაზე გამოცემული სამართლებრივი აქტის გამოქვეყნებისთანავე. აქვე აღსანიშნავია, რომ კანონმდებლობის თანახმად, მთელი რიგი რეგულაციები, რომლებმაც უნდა უზრუნველყონ სამართლიანი და თანაბარი წინასაარჩევნო გარემო (მეგ. ადმინისტრაციული რესურსის გამოყებების წესები და პოლიტიკური პარტიების უფლებები და ვალდებულებები) ამოქმედებას იწყებს სწორედ არჩევნების დანიშვნის თაობაზე გამოცემული სამართლებრივი აქტის გამოქვეყნების მომენტიდან. შესაბამისად, კამპანიის დაწყების თარიღის გაურკვევლობას, შეუძლია არსებითად უარყოფითი გავლენა მოახდინოს წინასაარჩევნო გარემოზე”, – აცხადებენ „საია“-ში.
საარჩევნო თარიღთან დაკავშირებით უკმაყოფილებას “ლეიბორისტული” პარტიაც გამოთქვამს. პარტიის ლიდერი შალვა ნათელაშვილი ამის რამდენიმე მიზეზს ასახელებს და ამბობს, რომ პრეზიდენტმა არჩევნებისთვის სრულიად ჩამკვდარი პერიოდი დაასახელა.
“პირველი შეცდომა, რომელიც პრეზიდენტმა დაუშვა, მან პოლიტიკურ სპექტრთან კონსულტაციები არ გაიარა. ამით კი ჩაკეტა საარჩევნო კანონმდებლობის განახლების პერსპექტივა. ხოლო პრეზიდენტმა არჩევნების პერიოდად შეარჩია პოლიტიკურად სრულიად ჩამკვდარი სეზონი, როდესაც მოსახლეობის უმეტესი ნაწილი ისვენებს და პარტიებს ამომრჩეველთან შეხვედრის ნაკლები შესაძლებლობა აქვს”, – განაცხადა შალვა ნათელაშვილმა.
ფრაქცია “ქართული ოცნების” თავმჯდომარის, გია ვოლსკის აზრით, საპარლამენტო არჩევნებთან დაკავშირებით პრეზიდენტის განკარგულება იმით არის მნიშვნელოვანი, რომ არჩევნების კონკრეტული თარიღი პოლიტიკური პარტიებისთვის უკვე ცნობილია.
დეპუტატის თქმით, ის აქტის სამართლებრივი ნაწილის შეფასებისგან, რაც დისკუსიის თემად იქცა, თავს შეიკავებს და მხოლოდ იურისტებს მოუსმენს.
“საკითხის სამართლებრივ ნაწილში დასკვნის გასაკეთებლად იურისტების მოსმენა დამრჩენია და ამაზე კომენტარების გაკეთება მათი პრეროგატივა მგონია. რეალურად მართებული იქნება, ყველა მხარეს მოვუსმონოთ, თუ რამდენად დასაბუთებულია პრეზიდენტის განკარგულება. როგორც პრეზიდენტის აპარატი აცხადებს, სამართლებრივად სავსებით მართებული აქტია მიღებული. მე რეალურად ამ აქტის კონკრეტული შედეგი და საზოგადოების ხედვა მაინტერსებს. ვფიქრობ, საზოგადოებისთვისაც, ისევე, როგორც მედიისთვის და პოლიტიკოსებისთვის, მნიშვნელოვანია არჩევნების ზუსტი თარიღის შესახებ ექვსი თვით ადრე იცოდნენ, საშუალება ჰქონდეთ პოზიცია ჩამოაყალიბონ და იმ გამოწვევას უპასუხონ, რასაც არჩევნები ჰქვია. კარგია, რომ ჩვენ ვიცით, როდის ტარდება საპარლამენტო არჩევნები”, – განუცხადა გია ვოსლკიმ.
„რეზონანსი”, 08 აპრილი, 2016 წელი
ყველაზე რეიტინგული ოპოზიციონერები
ირაკლი ალასანია, დავით ბაქრაძე, შალვა ნათელაშვილი, ნინო ბურჯანაძე, პაატა ბურჭულაძე
თაკო მათეშვილი
ირაკლი ალასანია, დავით ბაქრაძე, ნინო ბურჯანაძე, გიორგი ახვლედიანი, პაატა ბურჭულაძე – პოლიტოლოგები და პიარსპეციალისტები ამ პოლიტიკოსებს ყველაზე რეიტინგულ ოპოზიციონერებად ასახელებენ და ამბობენ, რომ არჩევნებში წარმატების მიღწევას, სავარაუდოდ, სწორედ ისინი შეძლებენ. მათი თქმით, ამ პოპულარობას სხვადასხვა ფაქტორი განაპირობებს და ხშირია შემთხვევები, როცა პოლიტიკოსი პოპულარობით სარგებლობს, თუმცა პარტია, რომელსაც იგი წარმოადგენს – არა.
პოლიტოლოგი ნიკა ჩიტაძე, მაღალრეიტინგული ოპოზიციონერი ლიდერების სიის სათავეში დავით ბაქრაძეს ასახელებს და ამბობს, რომ ეს საპრეზიდენტო არჩევნების შედეგებმაც აჩვენა, რომელზეც იგი პრეზიდენტობის კანდიდატი იყო და ამომრჩეველთა 22%-ის ხმა მიიღო. მას ამის მაგალითად “ენდიაის” მიერ ჩატარებული კვლევაც მოჰყავს, რომლის შედეგების მიხედვითაც, ოპოზიციონერ პოლიტიკოსებს შორის რეიტინგით დავით ბაქრაძე ლიდერობდა. ამბობს, რომ ასევე რეიტინგულია ირაკლი ალასანიაც და სანამ “თავისუფალი დემოკრატები” კოალიციას დატოვებდნენ, მაშინდელმა კვლევამაც აჩვენა, რომ მის ფარგლებშიც ალასანია ყველაზე მაღალრეიტინგულ პოლიტიკოსად სახელდებოდა. ასე რომ, ამ სიაში იგი ალასანიას მეორე ადგილზე აყენებს.
“თუ რესპუბლიკელები ოპოზიციის ამპლუაში მოგვევლინებიან, მაშინ მაღალრეიტინგული ოპოზიციონერების სიას დავით უსუფაშვილიც შეუერთდება. “რაც შეეხება ნინო ბურჯანაძეს, თუ გავითვალისწინებთ, რომ საპრეზიდენტო არჩევნებში მან ამომრჩეველთა 10% მიიღო, მაშინ ისიც რეიტინგულად უნდა მივიჩნიოთ. განსაკუთრებით იმასაც თუ გავითვალისწინებთ, რომ გამოკითხვების მიხედვით, გამოკითხულთა 31% ევრაზიულ კავშირში შესვლის მომხრე იყო.
“ამ სიაში შალვა ნათელაშვილიც უნდა ვახსენოთ. თუმცა მას ადრე უფრო მაღალი რეიტინგი ჰქონდა”, – ამბობს ჩიტაძე. მისივე თქმით, პოლიტიკოსისადმი მხარდაჭერას გარკვეულწილად პარტიისადმი მხარდაჭერა განაპირობებს. თუ პარტია რეიტინგულია, მაშინ პოლიტიკოსიც რეიტინგულია და – პირიქით.
განსხვავებულ მოსაზრებას აფიქსირებს პიარსპეციალისტი, “პერიტუს გრუპის” წარმომადგენელი ნინო პერტენავა და ამბობს, რომ ჩვენთან პარტიები ლიდერზეა მიბმული. მაშინ როცა ევროპასა და ამერიკაში წონა პარტიას გააჩნია და მხოლოდ ამის შემდეგ ხდება რეიტინგული მისი ლიდერი, ჩვენთან ეს პირიქითაა.
ქართული საზოგადოება, სპეციალისტის თქმით, ლიდერს უფრო მეტ მნიშვნელობას ანიჭებს. ამბობს, რომ ამაში ბიზნესი და პოლიტიკა ერთმანეთისაგან დიდად არ განსხვავდება.
“როცა უნდათ ბიზნესი ცნობადი გახდეს, ირჩევენ ცნობილ სახეს და მის იმიჯზე აბამენ ბიზნესსაც. იგივეს აკეთებენ პოლიტიკაშიც. ლოკომოტივად ქარიზმატულ პიროვნებას ირჩევენ და ამის შემდეგ პარტიის პოპულარულობა უფრო ადვილია. ადამიანის ქვეცნობიერში ეს დევს – ქარიზმატულ პიროვნებას მიჰყვებიან. პირიქით კი უფრო რთულია – ჯერ პარტიისადმი რომ ჩამოაყალიბო პოზიტიური განწყობა და მერე ლიდერისადმი. ამას ბევრად მეტი დრო სჭირდება. ასე რომ, პარტიის ლიდერზე მიბმა ყოველთვის უფრო მარტივი გამოსავალია”, – აღნიშნავს ნინო პერტენავა.
საზოგადოებასთან ურთიერობის სპეციალისტი ამბობს, რომ საქართველოში ცნობადობას და რეიტინგულობას ერთმანეთში ხშირად ურევენ. მისი თქმით, ხშირია შემთხვევა, როცა ადამიანი მაღალი ცნობადობით სარგებლობს, მაგრამ ეს იმას არ ნიშნავს, რომ იგი რეიტინგულია და მის სიტყვას წონა აქვს. იგი ამბობს, რომ ზოგჯერ შესაძლოა ადამიანს ყველა იცნობდეს, მაგრამ ნეგატიურად იცნობდნენ და არა პოზიტიურად. ასევე პირიქით – შესაძლოა ადამიანს ბევრი არ იცნობდეს, მაგრამ ვინც იცნობს, მათში ძალიან მაღალი რეიტინგი ჰქონდეს.
“ჩვენთან ცნობადობა რეიტინგში ხშირად ერევათ. რეიტინგი ისაა, გამოკითხული 1 000 ადამიანიდან რამდენი დაუჭერს მხარს ამა თუ იმ პიროვნებას, ცნობადობა კი ისაა, ამ ათასიდან რამდენი იცნობს მას. ბოლო დროს კი ხალხში, ჩემი დაკვირვებით, უნდობლობაა. როცა პოლიტიკოსი საზოგადოებას პროგრამას წარუდგენს, ბევრს უჭირს განსაზღვროს, თუ რამდენად რეალური და შესრულებადია ეს პროგრამა. ზოგი ამომრჩეველი უფრო გარკვეულია და მას მარტივად შეუძლია პროფესიონალი არაპროფესიონალისგან გაარჩიოს. ხოლო ის, ვინც ვერ ერკვევა, ხმას იმას აძლევს, ვინც უფრო ლამაზად ლაპარაკობს და თავის აზრს უფრო მჭერმეტყველურად გამოხატავს. სამწუხაროდ, ასეთი ადამიანები უმრავლესობაში არიან და შედეგად, ხშირად ძალაუფლებას ხელში არაკომპეტენტური ადამიანები იგდებენ”, – აცხადებს “რეზონანსთან” ინტერვიუში ნინო პერტენავა.
რაც შეეხება ოპოზიციონერებს, რომლებიც საზოგადოებაში პოპულარობით სარგებლობენ, იგი ამბობს, რომ მათი ჩამონათვალი არცთუ დიდია.
“ცნობადობა ნამდვლად გააჩნია პაატა ბურჭულაძეს. საკმაოდ აქტიურობს და უნდა ითქვას, რომ ხალხი მის ნალაპარაკევს მეტნაკლებად პოზიტიურად აღიქვამს. ასევე, საკმაოდ აქტიურობს გიორგი ახვლედიანი ნინო ბურჯანაძის პარტიიდან. ამ სიაში უნდა ვახსენოთ ირაკლი ალასანიაც, თუმცა მასზე უარყოფითი მოსაზრებები უფრო ხშირია, ვიდრე დადებითი”, – დასძენს ნინო პერტენავა.
„რეზონანსი”, 08 აპრილი, 2016 წელი
ინტერვიუ ელისო ჩაფიძესთან: “ოცნება” რჩება მემარცხენე-ცენტრისტულ პარტიად”
თიკო ოსმანოვა
“ქართული ოცნება” რჩება მემარცხენე ცენტრისტულ პარტიად და სწორედ ამ იდეოლოგიიდან გამომდინარე, მომავალი 4 წლის განვითარების გეგმას შევთავაზებთ საზოგადოებას საპარალმენტო არჩევნებისათვის”, – ამბობს “რეზონანსთან” საუბრისას საპარლამენტო უმრავლესობის წევრი ელისო ჩაფიძე, რომელსაც პარტიის მომავალ გეგმებზე ვესაუბრეთ.
ელისო ჩაფიძე: “ქართული ოცნების” გეგმებთან დაკავშირებით 14 მაისს ბევრ ახალ საინტერესოს შევიტყობით. გამოჩნდებიან პარტიის ახალი სახეები, ასევე განახლებული პოლიტიკური საბჭო – ქართული საზოგადოება შეიტყობს, როგორი იქნება ჩვენი პარტიის წინასაარჩევნო პროგრამა, მთავარი ლოზუნგები და ა.შ. თუმცა არ ველოდები, რომ 14 მაისისთვის ჩამოყალიბებული იქნება 2016 წლის არჩევნების საპარლამენტო სიის საბოლოო ვერსია. მაგრამ შესაძლოა, ამ დროისთვის დასახელდეს მაჟორიტარების სერიოზული შემადგენლობა.
- მაჟორიტარების შემადგენლობა მკვეთრად იცვლება?
- ამასთან დაკავშირებით წინასწარ ვერაფერს გეტყვით. არის ადგილები, სადაც გამოკვეთილია კანდიდატები, ზოგან კი ჯერ კიდევ მიმდინარეობს კონსულტაციები და შეჯერება.
- “ქართული ოცნება” იდეოლოგიას იცვლის?
- არა, რა თქმა უნდა. ჩვენ ვრჩებით მემარცხენე ცენტრისტულ პარტიად და სწორედ ამ იდეოლოგიიდან გამომდინარე, მომავალი 4 წლის განვითარების გეგმას შევთავაზებთ საზოგადოებას საპარალმენტო არჩევნებისათვის. ჩვენ ამ 4 წლის განმავლობაში ბევრი მნიშვნელოვანი ნაბიჯი გადავდგით სოციალური სამართლიანობის დამკვიდრების კუთხით, რომლის დაპირებითაც მოვიდა “ქართული ოცნება”. ავამოქმედეთ ბევრი მნიშვნელოვანი პროგრამა, რომელიც სასიცოცხლოდ აუცილებელი იყო საქართველოსთვის ეს იყო საყოველთაო ჯანდაცვის პროგრამა, განათლების რეფორმა და სხვა მნიშვნელოვანი ნაბიჯები.
- და მაინც, ვის ვიხილავთ “ქართული ოცნების” საარჩევნო სიაში და ვის არა?
- ამასთან დაკავშირებით მე არავითარი ინფორმაცია არ გამაჩნია და ვერც ვისაუბრებდი, კიდევაც რომ მქონდეს ინფორმაცია.
- თქვენ პირადად იქნებით სიაში თუ არა?
- მე მაქვს ძალიან საინტერესო გეგმები, ყველა შემთხვევაში დავრჩები პოლიტიკაში. მაქვს საინტერესო მოსაზრებები და წინადადებები ჩემს მომავალთან დაკავშირებით და ამასთან დაკავშირებითაც თავის დროზე გაიგებთ და თქვენ პირველი გეტყვით, რა გადაწყვეტილებას მივიღებ.
- თქვენი აზრით, უნდა დატოვონ თუ არა თანამდებობა “რესპუბლიკელმა” მინისტრებმა?
- ვფიქრობ, მათ ძალიან მნიშვნელოვანი ამოცანები აქვთ, განსაკუთრებით თავდაცვის მინისტრს და ამ კუთხით სწრაფი და გაუგებარი ცვლილება ჩემი აზრით, არ იქნება მისაღები ჩვენი დასასვლელი პარტიონერებისთვის. ჩვენი გუნდის ერთ-ერთი ლიდერი გიორგი კვირიკაშვილი ახერხებს ყველა პოლიტიკურ ძალასთან თანამშრომლობას. ამით ის თამაშობს საზოგადოების გამართიანებელ როლს.
- საქართველოს ისტორიაში, პირველად 7 თვით ადრე არჩევნების თარიღი უკვე ცნობილია. თქვენი აზრით, რატომ იჩქარა პრეზიდენტმა?
- ჩემთვის აბსოლუტურად მისაღებია არგუმენტაცია, რომ ჯანსაღი პოლიტიკური პროცესისთვის მნიშვნელოვანია საზოგადოება წინასწარ იყოს ინფორმირებული მოსალოდნელი არჩევნების თარიღთან დაკავშირებით. ეს იქნება პირველი არჩევნები, რომელიც არ იქნება მიმართული რომელიმე პოლიტიკური რეჟიმის შეცვლაზე. გაიმართება პოლიტიკურ პროგრამებს შორის ჭიდილი და მოსახლეობას მიეცემა საშუალება აირჩიოს სხვადასხვა პოზიტიურ პროგრამებს შორის საუკეთესო, რაც მისთვის მისაღებია – მემარჯვენე ან მემარცხენე ხედვა.
„რეზონანსი”, 08 აპრილი, 2016 წელი
ინტერვიუ გია ხუხაშვილთან: “რესპუბლიკელი” მინისტრები მთავრობას ვარშავის სამიტის შემდეგ დატოვებენ”
ლიკა ამირაშვილი
ექსპრემიერის ყოფილი მრჩევლის, გია ხუხაშვილის აზრით, მომავალ პარლამენტში უმრავლესობით გასვლის ერთადერთი შანსი “ქართულ ოცნებას” აქვს. როგორც გია ხუხაშვილი “რეზონანსთან” ინტერვიუში აცხადებს, არჩევნების შემდეგ არ არის გამორიცხული, მრავალპარტიული პარლამენტი ვიხილოთ. მისი აზრით, პარლამენტში 5-6 პარტია გავა და იმ შემთხვევაში, თუ უმრავლესობა ვერც ერთმა პარტიამ ვერ მიიღო, კოალიციის შექმნის საჭიროება დადგება.
გია ხუხაშვილი: ამ ეტაპისთვის ზოგადი სურათია ისეთია, რომ, სავარაუდოდ მრავალპარტიულ პარლამენტს მივიღებთ, რაც კარგი იქნება. ასეთი გამოცდილება ქვეყანას ნამდვილად სჭირდება. რაც შეეხება, რომელი პარტია შეძლებს უმრავლესობის მიღებას, პრინციპში, ამის ერთადერთი შანსი “ქართულ ოცნებას” აქვს. თუმცა ეს შანსი ძალიან მაღალი არ არის.
ვფიქრობ, პარლამენტში 5-6 პარტია უნდა გავიდეს, თუმცა მოვლენების გარკვეული განვითარების შემთხვევაში, შესაძლოა, უფრო მეტიც ვიხილოთ, რასაც ძალიან კონკრეტული მიზეზი აქვს. ამომრჩევლის დიდ ნაწილს, ხმას ვის მისცემს, ჯერ გადაწყვეტილი არ აქვს. უმრავლესობას როგორც “ქართული ოცნების”, ასევე “ნაციონალური მოძრაობის” მიმართ მკვეთრად ნეგატიური განწყობა აქვს. შესაბამისად, ეს ადამიანები საბოლოო ჯამში არჩევნებზე თუ წავიდნენ, არჩევანს დანარჩენი პარტიებიდან გააკეთებენ. ეს ფაქტი შედარებით მომცრო პარტიების შანსს, რომ პარლამენტში მოხვდნენ, გაზრდის, რაც აგრეთვე მისასალმებელია.
- იმ შემთხვევაში, თუ უმრავლესობა ვერც ერთმა პარტიამ ვერ მიიღო, მოვლენები როგორ განვითარდება?
- ვფიქრობ, არჩევნების შემდეგ ქვეყანაში საპარლამენტო კოალიციის შექმნის საჭიროება გაჩნდება. კოალიციის შექმნის აუცილებლობა იმ შემთხვევაში დადგება, თუ საპარლამენტო უმრავლესობის მიღებას ვერავინ ვერ შეძლებს, რისი ალბათობაც ძალიან მაღალია. როგორც წესი, პარლამენტში კოალიციები იქმნება არა ნეგატიური ნიშნით, ვიღაცის წინააღმდეგ, არამედ პოზიტიური ნიშნით, ანუ რაღაც პოზიტიური დღის წესრიგიდან გამომდინარე. უმრავლესობის ფორმირება რომ მოხდეს და ხელისუფლება ფუნქციონირებადი გახდეს, საპარლამენტო კოალიციის შექმნა აუცილებელი გახდება. ვფიქრობ, ჩვენთვის კარგი გამოცდილებაც იქნება.
- თქვენ ახსენეთ, რომ არჩევნების შემდეგ, შესაძლოა, კოალიციის შექმნის აუცილებლობა დადგეს. წინასაარჩევნოდ თუ უნდა ველოდოთ ბლოკების შექმნასა და პარტიების გაერთიანებას?
- არსებობენ უმნიშვნელო პარტიები, რომლებიც შესაძლოა გაერთიანდნენ, ეს თეორიულად დასაშვებია, თუმცა დიდი კოალიციის შექმნას არ ველოდები. კოალიციების შექმნას აზრი მაშინ აქვს ხოლმე, როდესაც ამ კოალიციაში ერთი პოლიტიკური ძალა თავისი საარჩევნო პერსპექტივით აშკარად გამოკვეთილია, რომელსაც სხვები ჩაებმებიან. სიმართლე გითხრათ, ასეთ კონფიგურაციას, ვერ ვხედავ. “ნაციონალური მოძრაობა” კოალიციის ცენტრი იქიდან გამომდინარე ვერ გახდება, რომ სხვა პარტიებისთვის გარკვეულწილად კეთროვანია. “ქართული ოცნება” კი ამას არ აპირებს. სხვა პარტიების დაჯგუფებაში კი დიდ აზრს ვერ ვხედავ. შესაძლოა, ეს მოხდეს, მაგრამ გამოვრიცხავ ამან საარჩევნო გარემო პრინციპულად შეცვლოს.
- როგორ ფიქრობთ, “რესპუბლიკელი” მინისტრები დაკავებულ თანამდებობას უნდა ინარჩუნებდნენ თუ არა?
- მათი მხრიდან თანამდებობების შენარჩუნება აბსურდია და საარჩევნო ლოგიკას არანაირად არ დაექვემდებარება. ასეთი კითხვა მაქვს, ისინი მზად თუ არიან, რომ “ქართულ ოცნებასთან” ერთად აღმასრულებელ ხელისუფლებაზე პასუხისმგებლობა გაინაწილონ? ისინი თუ ამისთვის მზად არიან, მაშინ მათი საარჩევნო კამპანია რას ემყარება? არჩევნებზე რა მესიჯით მიდიან? ამ შემთხვევაში ამომრჩეველმა ხმა რატომ უნდა მისცეს “რესპუბლიკელებს”, ხოლო “ქართულ ოცნებას” არ მისცეს. ისინი თუ მზად არიან პასუხისმგებლობა გაინაწილონ, მაშინ ცოტა გაუგებარია, “ქართული ოცნებისგან” რით განსხვავდებიან? ვფიქრობ, “რესპუბლიკელ” მინისტრებს მთავრობაში დიდი დღე არ უწერიათ. მაქსიმუმ, ვარშავის სამიტის შემდეგ მთავრობიდან გასვლა მოუწევთ, რაც მათ ინტერესშიცაა იმისათვის, რომ სრულფასოვანი საარჩევნო კამპანიის ჩატარების შესაძლებლობა მიეცეთ.
„რეზონანსი”, 08 აპრილი, 2016 წელი
ქართველები ხელფასის ნახევარს “კრედიტში ტოვებენ“
“ფაქტობრივად, მთელი საქართველო არის ვალებში გახვეული“
ელზა წიკლაური
საქართველოს ზრდასრული მოსახლეობის 85%-ს საფინანსო სტრუქტურების ვალი აქვს, აქედან უმეტესობას 2 ან 3 კრედიტი გააჩნია. უმრავლესობა სასეხსო მომსახურებაში შემოსავლის 30-60%-ს იხდის, რაც ძალიან დიდი მაჩვენებელია. სპეციალისტები ამ ციფრს საგანგაშოს უწოდებენ და სახელმწიფო რეგულაციების დაწესებისკენ მოუწოდებენ. მათი მტკიცებით, საქართველოში, ისევე როგორც ცივილურ ქვეყნებში ერთი ადამიანის საკრედიტო ტვირთი 25-30%-ს არ უნდა აღემატებოდეს.
მოსახლეობის დიდი ნაწილი რომ სხვადასხვა საფინანსო ორგანიზაციის სესხით სარგებლობს ამაში ცუდი არაფერი იქნებოდა, ეს ვალდებულება ხალხის ფინანსური მდგომარეობის შერყევის საფუძველი რომ არ იყოს. თუ ცივილურ სამყაროში კრედიტი მატერიალური მოთხოვნილების დასაკმაყოფილებლად გამოიყენება, ჩვენთან ამას ფინანსური მდგომარების გაუარესება ახლავს თან. საქართველოში კომერციულ სტრუქტურებს სესხებზე საკმაოდ მაღალი საპროცენტო განაკვეთი აქვთ დაწესებული. არ არსებობს ლიმიტი ყოველთვიური ტვირთი მსესხებლის შემოსავლის რა ნაწილს უნდა შეადგენდეს. ამიტომ, ხშირია შემთხვევა, როდესაც ერთი ადამიანი ბანკში ყოველთვიურად მისი ხელფასის 40-60%-ს ან უფრო მეტს ტოვებს.
თბილისელი მარიამ ვარადაშვილი ამბობს, რომ მისი ყოველთვიური შემოსავალი 700 ლარია, ბანკში კი 400 ლარს იხდის: “გამოდის, რომ ჩემი ხელფასის 60%-ს ბანკში ვტოვებ. რომ არა ოჯახის სხვა წევრების შემოსავალი, ცხადია, რომ დარჩენილი 300 ლარი არაფერში არ მეყოფოდა. შეიძლება ვინმემ თქვას, თუ ცოტა გქონდა შემოსავალი, ამ ვალს რატომ იღებდიო, მაგრამ როცა სხვა გზა არ მქონდა, რა უნდა გამეკეთებინა? ავიღე ვალი და გაჭირვებით ვიხდი”, – ამბობს მარიამ ვარადაშვილი.
საკრედიტო ბარათით და სამომხმარებლო სესხით სარგებლობს თბილისელი ეკა წამალაიშვილი. მისი სასეხსო ვალდებულება ყოველთვიური ხელფასის 35-38%-ს შეადგენს.
“როდესაც ანაზღაურება ცოტა გაქვს, ცდილობ, სხვადასხვა მოთხოვნილება კრედიტის მეშვეობით დაიკმაყოფილო. ამიტომაც მომიწია სამომხმარებლო სესხით სარგებლობა, სარკედიტო ბარათზე არსებული თანხა კი გაუთვალისწინებელი ხარჯის გამო გავხარჯე. ახლა კი ხელფასის 35%-ს, ზოგჯერ კი 38%-საც საკრედიტო ვალდებულებების გასტუმრებაში ვხარჯავ. ძალიან ბევრს ვიხდი ბანკში, ამიტომ ხელფასის აღებასაც ვერ ვგრძნობ. რომ არა ოჯახის წევრები, ალბათ, სრულფასოვნად არსებობასაც კი ვერ შევძლებდი. როდესაც ხელფასს ვალს ახვედრებ, რეალურად არაფერი გრჩება”, – ამბობს ეკა წამალაიშვილი.
საკრედიტო მომსახურების ხარჯი განსაკუთრებით მათთვის არის დიდი, ვინც იპოთეკური სესხით სარგებლობს. არანაკლებ მძიმე მდგომარეობაში არიან ისინიც, ვისაც ერთდროულად 2 ან 3 სესხის აქვს.
საქართველოს ეროვნული ბანკის მონაცემებით, ერთ წელიწადში კომერციული ბანკების მიერ გაცემული სესხების რაოდენობა 13,2%-ითაა გაზრდილი და 15,3 მლრდ ლარს შეადგენს. ერთი წლის წინ სესხის მოცულობა 13,5 მლრდ ლარს უტოლდებოდა.
ამასთან, სებ-ის მონაცემებით, ერთ წელიწადში საბანკო დაწესებულებებში არსებული ვადაგადაცილებული სესხების მოცულობა 13,4%-ითაა მომატებული და 346,7 მლნ ლარს შეადგენს. სებ-ის მონაცემებით, 2015 წლის მარტში ვადაგადაცილებული სესხი მთლიანად 305,6 მლნ ლარს შეადგენდა, 2016 წლის მარტში კი – 346,7 მლნ ლარამდე გაიზარდა.
გარდა რეგულირებული საფინანსო სექტორისა, მოსახლეობაზე სესხებს გასცემენ ონლაინ-საკრედიტო ორგანიზაციები და ე.წ. მევახშეები, თუმცა უცნობია მათი მომსახურებით რამდენი ადამიანი სარგებლობს. თუ კომერციული ბანკების გამკაცრებულ პოლიტიკას გავითვალისწინებთ, გამორიცხული არ არის, რომ ასეთი ორგანიზაციების კლიენტთა რიცხვი მაღალი იყოს.
“კრედიტ-ინფოს” აღმასრულებელი დირექტორის, სანდრო გომიაშვილის ინფორმაციით, მათ ბაზაში საკრედიტო ჩანაწერების რაოდენობა ყოველწლიურად იზრდება. 2016 წლის თებერვლისთვის ბაზაში უკვე 14 მილიონი ჩანაწერია, რაც რეკორდული მაჩვენებელია. მისივე თმით, კრედიტების ნაწილი დახურულია, ამ დროისთვის აქტიური კი 4,1 მლნ სესხია.
“14 მლნ-დან ყველა აქტიური სესხი არ არის, მათ შორის, არის დაფარულიც. მათგან აქტიური სესხი 4 100 000-ია. დაკრეტიდების ზრდა განპირობებულია იმით, რომ სესხის აღება უფრო ხელმისაწვდომი გახდა და უფრო მეტ მომხმარებელს აქვს შესაძლებლობა, რომ ისარგებლოს საკრედიტო პროდუქტებით. მოსახლეობის დაკრედიტება გააქტიურა ონლაინ-საკრედიტო ორგანიზაციებმაც”, – აღნიშნავს გომიაშვილი.
“კრედიტ-ინფოს” ბაზაში ინფორმაცია სულ 2,2 მლნ ფიზიკურ პირზეა განთავსებული. ეს იმას ნიშნავს, რომ ამა თუ იმ ტიპის საკრედიტო ვალდებულება სწორედ ამდენ ადამიანს გააჩნია. ბოლო აღწერით საქართველოში სულ 3,7 მლნ ადამიანი ცხოვრობს, შესაბამისად, გამოდის, რომ სესხით მთლიანი მოსახლეობის დაახლოებით 60% სარგებლობს. თუ გავითვალისწინებთ იმას, რომ 20 წლამდე ასაკის ადამიანებზე სესხს, პრაქტიკულად, არც ერთი საფინანსო სტრუქტურა არ გასცემს, 75 წლის ზემოთ მყოფები კი კრედიტს აღარ იღებენ, გამოვა, რომ აქტიური მოსახლეობის 85%-ს სესხი ამძიმებს. სტატისტიკის სამსახურის მონაცემებით, საქართველოში 20-დან 75 წლამდე ასაკის 2,6 მლნ ადამიანი ცხოვრობს.
რაც შეეხება ისევ საკრედიტო მომსახურებაზე გაწეულ ხარჯს, როგორც უკვე აღვნიშნეთ, ისსაკმაოდ დიდია. მოსახლეობის უმეტესობას ყოველთვიურად ამისთვის შემოსავლის 35-60%-ის გაღება უწევს.
საბანკო სფეროს სპეციალისტი ლია ელიავა ამბობს, რომ დასავლეთის ქვეყნებში სესხის ტვირთი ერთ ადამიანზე არ უნდა აღემატებოდეს მისი შემოსავლის 30%-ს. თუ ეს მაჩვენებელი იზრდება, უკვე ითვლება სესხის გადაუხდელობის დამატებით რისკ-ფაქტორად. იქ ბანკები და სხვა გამსესხებლები ყოველთვის ცდილობენ, რომ გადაუხდელობის ფაქტორი, რისკი გამორიცხონ.
“საქართველოში სიტუაცია არის განსხვავებული, ზოგიერთ ადამიანი კრედიტში შემოსავლის 80%-საც კი ხარჯავს. ის ახერხებს სესხის გადახდას მხოლოდ და მხოლოდ იმიტომ, რომ მას ოჯახის წევრები ეხმარებიან. ფაქტობრივად, ერთმა პირმა შეიძლება მთელი თავისი შემოსავალი დატოვოს სესხის პროცენტში და იცხოვროს ოჯახის სხვა წევრების კისერზე. ბუნებრივია, ეს არის საკმაო საფრთხის შემცვლელი არა მარტო გამსესხებლისთვის, არამედ თვითონ მსესხებელისთვის, რადგან გამორიცხული არ არის, რომ ადამიანს გაუთვალისწინებელი ხარჯი გამოუჩნდეს და კრედიტის მომსახურება ვეღარ მოახერხოს”, – ამბობს ელიავა.
საქართველოში სასეხსო ტვირთთთან დაკავშირებით რეგულაცია დაწესებული არ არის. ზოგადად ნორმატიულ დოკუმენტებში აღნიშნულია, რომ კომერციულმა ბანკებმა უნდა შეისწავლონ მსესხებლის გადახდისუნარიანობა.
“ბანკები სამკაოდ კარგად სწავლობენ მსესხებლის გადახდისუნარიანობას, თუ ეს ეხება ბიზნესს, მაგრამ სხვა მიმართულებით თავს არ იწუხებენ. ამა თუ იმ პიროვნების გადახდისუნარიანობაზე ხშირად კომერციული ბანკები თვალს ხუჭავენ.
აუცილებელია, რომ მოხდეს კრიტერიუმების შემუშავება, თუ რა შემთხვევაშია სესხის გაცემა შესაძლებელი. ეს ძალიან მნიშვნელოვანია არა მარტო ფინანსური სისტემის მდგრადობისთვის, არამედ მოსახლეობის სოციალური უზრუნველყოფის თვალსაზრისითაც.
არ შეიძლება ადამიანი ხარჯავდეს სესხის მომსახურებაზე თავისი შემოსავლის მეტ წილს და იკლებდეს სხვას ყველაფერს. ფაქტობრივად, მთელი საქართევლო არის ვალებში გახვეული. ეს კი თავისთავად ამცირებს მოსახლეობის შესაძლებლობას, რომ საკუთარი შემოსავალი საჭიროებისამებრ გამოიყენოს”, – აღნიშნა ლია ელიავამ.
——————————-
„ახალი თაობა“, 08 აპრილი, 2016 წელი
ინტერვიუ ნანა დევდარიანთან: „ირაკლი ალასანიას და რესპუბლიკელებს არჩევნებზე გაუჭირდებათ“
არჩევნების თარიღმა ოპოზიციურ სპექტრსა და არასამთავრობო ორგანიზაციებში აზრთა სხვადასხვაობა და უკმაყოფილება გამოიწვია. რატომ არის ეს თარიღი ოპოზიციისთვის მიუღებელი, ამის გარკვევას „ახალი თაობა“ ცესკოს ყოფილ თავმჯდომარე ნანა დევდარიანთან შეეცადა.
- ქალბატონო ნანა, რატომ წავიდნენ ოპოზიციის დიდი ნაწილი და არასამთავრობო ორგანიზაციები არჩევნების თარიღად 8 ოქტომბრის დანიშვნის წინააღმდეგნი?
- 28 ოქტომბერს უნდა დანიშნულიყოო, მოვისმინეთ შეფასებებში. რომ გითხრათ, რაღაცა განსაკუთრებულს წყვეტს ეს სამი კვირა-მეთქი, ასე არ არის. ადმინისტრირების პროცესი ნორმალურია, დახვეწილია ამ ეტაპისათვის. რა პრეტენზიები აქვთ ოპოზიციურ პარტიებს, ამ ყველაფერში მთავარი ის არის, რომ მათ უნდოდეთ საარჩევნო კოდექსის შეცვლა, თორემ, პროცესი რომ დადგეს საფრთხის წინაშე, ეს მომენტი არ არსებობს.
- მაშინ რატომ აპროტესტებენ?
- ეს ვადა დიდს არაფერს არ წყვეტს. შესაძლოა, მათი კალენდრიდან გამომდინარე, ვარაუდობდნენ, რომ 28 ოქტომბერს იქნება. თუმცა რატომ ვარაუდობდნენ, ეგეც გაუგებარია, იმიტომ, რომ პირველ ოქტომბერს იყო 2012 წელს, ამ თვალსაზრისით, ძალიან ახლოს არის ეს თარიღი წინა არჩევნების თარიღთან. კონსტიტუციაც პირდაპირ გვეუბნება, რომ ოთხ წელიწადში ერთხელ არის არჩევნები.
- პრეტენზიები გაუგებარია?
- ამიტომ პრეტენზიები ცოტა გაუგებარია. დანარჩენი, ის რა წინააღმდეგობებიც არის, არსებულ ნორმებს და იმას შორის, რასაც ოპოზიცია ითხოვს, ესეც სრულიად გასაგებია, თუმცა ამ თვალსაზრისით ბევრი არაფერი იცვლება, იმიტომ, რომ თუ არის პოლიტიკური ნება, გადაწყვეტილებების მიღება შეიძლება. ხოლო თუ არ არის პოლიტიკური ნება, გინდ ორში იყოს, გინდ რვაში და გინდ 28-ში, არავითარი მნიშვნელობა ამას არა აქვს.
- გიორგი კვირიკაშვილს სთხოვენ, რომ არ მოაწეროს ხელი პრეზიდენტის დადგენილებას. შეიცვლება რამე?
- არაფერი, გარდა იმისა, რომ კიდევ ერთი დაძაბულობის კერა შეიქმნება პრეზიდენტსა და პრემიერს შორის. ეს ვის რაში სჭირდება?! მე დაახლოებით ვხვდები, ვის შეიძლება სჭირდებოდეს, მაგრამ მაინც…
- ითქვა ისიც, რომ ოფიციალურად წინასაარჩევნო კამპანია დაიწყება 8 აგვისტოს. ეს ხომ არ არის მიუღებელი ოპოზიციისთვის? ამბობენ, რომ აგვისტო პოლიტიკურად მკვდარი თვეა. ეს ყოველივე პრობლემებს შეუქმნის მათ?
- რა თქმა უნდა, საერთოდ, ითვლება, რომ აგვისტო დასვენების პერიოდია, მაგრამ, მეორე მხრივ, მოდით, რეალურად ვთქვათ, აგვისტოში საზღვარგარეთ დასასვენებლად წასვლა ჩვენი მოსახლეობის რა პროცენტს შეუძლია? მაქსიმუმ 5%-ს. დანარჩენებისთვის სერიოზულ პრობლემას წარმოადგენს დასვენება, ეკონომიკური მდგომარეობა დამძიმდა, ბავშვების გაყვანაც კი ძალიან უჭირს უმეტესობას. ეს კატეგორია საქართველოს მასშტაბით მიდის სადღაც და მათთვის რა პრობლემაა, რა, რეგიონებში არ უნდა იმუშაონ?!
- ანუ პრობლემა არც ეს არ არის. მაშინ რა უნდათ?
- რეალურად უფრო მსუბუქი იქნებოდა მათთვის 28 აგვისტოდან საარჩევნო კამპანიის დაწყება. რვაში კი არა, 2 ოქტომბერს იყო არჩევნები დანიშნული და ამას ხელი არ შეუშლია კოალიცია „ქართული ოცნებისთვის“, რომ მოეგო.
- მესამე სექტორზე რას იტყვით? საია გამოვიდა წინააღმდეგი, საერთაშორისო გამჭვირვალობა. რატომ გამოხატავენ პროტესტს? ეს გადაწყვეტილება არაკონსტიტუციურია?
- უკვე ძალიან უხერხულ სახეს იღებს ეს ყველაფერი. მესამე სექტორის განცხადებები, გამონათქვამები სულ უფრო ემსგავსება პოლიტიკური ჯგუფის განცხადებებს.
- იმის თქმა გინდათ, რომ ისინი რომელიღაც პოლიტიკური ჯგუფის ინტერესს ატარებენ?
- არც აქვს მნიშვნელობა, ერთისას ატარებენ თუ რამდენიმესას. ისინი მთელი თავისი მოქმედებით ძალიან უახლოვდებიან პოლიტიკურ ერთეულს. ეს აშკარაა. მაშინ გაცილებით მარტივი იქნება, გადავიდნენ პოლიტიკაში და ისე იმოქმედონ. არ შეიძლება, შენ გქონდეს მორგებული არბიტრის მანტია და ამბობდე, რომ გამოხატავ საზოგადოების ინტერესს და ამ დროს მოქმედებდე რომელიმე პოლიტიკური ძალის სასარგებლოდ ან პირიქით, რომელიმე პოლიტიკური ძალის წინააღმდეგ.
- წინასაარჩევნოდ რამდენად თანაბარ პირობებში იქნებიან პარტიები ჩაყენებული?
- თანაბარი პირობები არც არის და არც ყოფილა არასოდეს, იმიტომ, რომ არსებობს ადმინისტრაციული რესურსი და მისი გამოყენების რეალური შანსი. ამის გარდა, ფინანსებიც არ არის თანაბარი. ასევე არათანაბრად არიან წარმოდგენილი მედიაში. თანაბარ პირობებზე ლაპარაკი ცოტა უხერხულია. ჩვენ ვამბობთ, რომ სწორება გვაქვს დასავლეთზე და გადახედეთ შეერთებულ შტატებს, იქ რამდენად თანაბარია საარჩევნო გარემო? გგონიათ, რომ მარტო ორი პარტიაა? არა, მაგრამ რეალურად ჩანს ეს ორი პარტია და უმსხვილესი კომპანიები ამ ორ პარტიას აფინანსებენ. იქაც ასეთივე სიტუაციაა. ამდენად, თანაბარი პირობები არ არის. ყველა ოპოზიციური პარტია, რომლებიც ითხოვენ, რომ თანაბარი იყოს პირობები, მერე რომ მოდიან ხელისუფლებაში, ყველაფერს იმავეს ტოვებენ, იმიტომ, რომ ასე უფრო კომფორტულია.
- საარჩევნო კოდექსში შესატან ცვლილებებთან დაკავშირებითაც გამოითქვა პრეტენზიები. ამბობენ, რომ ეს ცვლილებები პრემიერ კვირიკაშვილს მოარგეს. ასეა?
- ეს საკითხი სადავოა. ბევრი ხარვეზია და ასე გადაჭრით ამის თქმა სწორი არ იქნება. სხვადასხვა წაკითხვით შეიძლება შეხედო ამ საკითხს. თუმცა მთელი დანარჩენი უთანაბრობის ფონზე ეს უკვე ნაკლებად მნიშვნელოვანია. ჩვენ ცხვირწინ გვაქვს საგარეჯოს მაგალითი. ისიც ძალიან კარგად ვნახეთ, ამ რესურსის გამოყენება და მერე მისი `გაპრავება~ როგორ ხერხდება.
- ამბობენ, რომ სწორედ ამ საგარეჯოს არჩევნებმა შეიწირა რესპუბლიკელები. რამდენად ფიქრობთ ასე?
- პოლიტიკაში ასეა, ყოველთვის რაღაც ასრულებს ბოლო წვეთის ფუნქციას. თორემ ეს გაღიზიანება ხომ ბოლო წელიწად-ნახევრის განმავლობაში სულ მწიფდებოდა. ეს გამოწვეული იყო იმითი, რომ რესპუბლიკელებს არაადეკვატურად მაღალი წარმომად-გენლობა ჰყავდათ ხელისუფლების უმაღლეს რგოლებში, ვიდრე ეს მათი რეიტინგიდან გამომდინარეობს.
- კოალიცია დაიშალა, `ოცნების~ სიის სერიოზულ გადახალისებაზეა საუბარი. ვის რა შანსები აქვს?
- დავუკვირდეთ, როგორი სიტუაცია შეიქმნა. თუ 2012 წელს ივანიშვილი ამბობდა, შუა უნდა გაიკრიფოსო, ეს მოახერხა კიდეც და ფაქტობრივად ორი სუბიექტი ებრძოდა ერთმანეთს არჩევნებზე, ახლა, პირიქით, მონაწილე პარტიების ჩამონათვალი დაქუცმაცდა. თვითონ კოალიციის სუბიექტებიც გადიან ცალკე. ეს კიდევ უფრო ართულებს ყველას მდგომარეობას – რეალურად ასეთ დანაწევრებულ პარტიებში არჩევანის გაკეთება ძალიან რთული იქნება.
- ეს ვის აძლევს ხელს, „ოცნებას“?
- პირველ რიგში, რა თქმა უნდა, „ოცნებას“. ისინი ასე ითვლიან, რომ თვითონ რაც აქვს რესურსი და მხარდაჭერა, მთლიანად თვითონ შეინარჩუნონ. თუმცა ეს ძალიან სათუოა.
- არსებულ პოლიტიკურ ბაზარზე რამდენად არის იმის რესურსი, რომ სია იყოს მაქსიმალურად დახვეწილი?
- ძალიან რთულია ამის თქმა. მე არ გამოვრიცხავ, რომ `ოცნებამ~ შეინარჩუნოს ის პარტიები, რომლებიც ისედაც პერსონალურად არის წარმოდგენილი. ჯერჯერობით სამმა პარტიამ დაადასტურა, რომ ცალკე გადიან არჩევნებზე. იქ კიდევ არის სხვა პარტიები, რომლებიც პარტიის ლიდერების სახით არიან წარმოდგენილნი. შესაძლოა ეს სქემა იყოს შენარჩუნებული. არასაპარლამენტო ოპოზიციასთან, არა მგონია, `ქართულმა ოცნებამ~ მოლაპარაკება გამართოს. ზოგადად, მივესალმები პარტიების გამსხვილებას. ეს წინასაარჩევნოდ მომგებიანია, თუმცა ამ წუთას ამის არანაირი ნიშანწყალი არ არსებობს.
- ვის რა შანსები აქვს?
- წინასაარჩევნოდ პროგნოზების გაკეთება უმადური საქმეა, თუმცა, ვინც გადალახავს ბარიერს, ეს არის „ოცნება, ასევე ნაციონალები, მაგრამ გაცილებით ნაკლები წარმომადგენლობით, ვიდრე დღეს, ასევე – ბურჯანაძის კოალიცია და პატრიოტთა ალიანსი. ეს რეალურად, რაც დღეს ჩანს.
- რესპუბლიკელები და ალასანია სათუოა?
- ალასანიამ რომ გადალახოს ბარიერი, ეს ძალიან სათუოა, მით უმეტეს ახლა, როცა რესპუბლიკელები გადიან ცალკე, იმიტომ, რომ ისინი ერთ ამომრჩეველზე მუშაობენ. ერთმანეთს ხმებს დააკარგვინებენ.
- მათი ალიანსი?
- ჯერჯერობით უარყოფენ. ვნახოთ, როგორ განვითარდება მოვლენები. თუ აკვირდებით, რესპუბლიკელები კი გადიან ცალკე, მაგრამ ბოლომდე დისტანცირებული არ არიან ივანიშვილის პარტიისგან. მაშინ მათ პირდაპირ ომი უნდა გამოუცხადონ ივანიშვილს.
„ახალი თაობა“, 08 აპრილი, 2016 წელი
ინტერვიუ მამუკა კაციტაძესთან: „პრეზიდენტს არჩევნების თარიღზე კონსულტაცია ჩვენთანაც უნდა გაემართა“
„ახალი მემარჯვენეების“ თავმჯდომარე მამუკა კაციტაძე „ახალ თაობასთან“ ინტერვიუში აცხადებს, რომ არჩევნებში დამოუკიდებლად არ მიიღებენ მონაწილეობას და საარჩევნო ბლოკს შექმნიან.
- ბატონო მამუკა, ოპოზიცია აცხადებს, რომ პრეზიდენტმა არჩევნები ადრე დანიშნა, სამართლის ექსპერტები კი მიუთითებენ იმაზე, რომ ამ თარიღმა შეიძლება სამართლებრივი ვაკუუმი შექმნას. თქვენთვის რაიმე სახის პრობლემას ქმნის ეს თარიღი?
- საპარლამენტო არჩევნები 2016 წლის ოქტომბერში რომ უნდა ჩატარდეს, ეს კანონით არის განსაზღვრული, მაგრამ საინტერესო იყო კონკრეტული რიცხვის დასახელება. ფაქტია, როდესაც 6 თვით ადრე იცი, როდის ჩატარდება არჩევნები, ეს კარგია, თუმცა, რომ გითხრათ, ამით განსაკუთრებული პოზიტივი გაჩნდა, მართალი არ ვიქნები, თანაც ამ თარიღს ახლავს სამართლებრივად კითხვის ნიშნები. პრეზიდენტის ამ განკარგულების გამოქვეყნებისთანავე იწყება შეზღუდვები, მათ შორის საარჩევნო ადმინისტრაციის დაკომპლექტების კუთხით, ადმინისტრაციული რესურსის გამოყენების კუთხით, პარტიების ცესკოში რეგისტრაციის მიმართულებით და ა.შ. ამდენად, შესაბამის სტრუქტურებს მოუწევთ, კანონთან შესაბამისობაში მოიყვანონ არჩევნების დანიშვნის სამართლებრივი მხარე. კარგი იქნებოდა, რომ ეს კითხვის ნიშნები იმთავითვე ყოფილიყო წაკითხული და წინასწარვე ყოფილიყო თადარიგი დაჭერილი.
- ბატონო მამუკა, არჩევნების თარიღის გამოცხადება ინტერპარტიულ ჯგუფსა და ხელისუფლებას შორის საარჩევნო კანონმდებლობის ცვლილებასთან დაკავშირებით მიმდინარე მოლაპარაკებებში კორექტივებს შეიტანს?
- არჩევნების თარიღის დანიშვნა ხელს ვერ შეუშლის, რადგან, როგორც უკვე აღვნიშნე, ეს თარიღი განსაზღვრულია კანონმდებლობით, მხოლოდ, რომელ კონკრეტულ რიცხვს ჩატარდება არჩევნები, ეს უნდა გარკვეულიყო. მიუხედავად ამისა, ცხადია, უმჯობესი იქნებოდა, რადგანაც 15 აპრილი არის სამუშაო ჯგუფის მუშაობის ბოლო ვადა, არჩევნების თარიღიც მას შემდეგ დანიშნულიყო, რაც ხელისუფლებისგან გვექნებოდა ამ საკითხზე სრული პასუხი. ჩვენ ჯერ არ ვიცით, თუ როგორი იქნება ხელისუფლების პასუხი საარჩევნო კოდექსის ცვლილების ირგვლივ, პოზიტიური თუ ნეგატიური.
- პარტიების ნაწილი ამბობს, რომ პრეზიდენტს ჩვენთანაც უნდა გაემართა კონსულტაციები არჩევნების თარიღზე. თქვენც ასე ფიქრობთ?
- პრეზიდენტმა მარგველაშვილმა, სანამ არჩევნების თარიღს გამოაცხადებდა, რამდენიმე ხნით ადრე მოლაპარაკებები გამართა პრემიერ კვირიკაშვილთან. აქვე უნდა გვახსოვდეს, რომ პრემიერი კონკრეტული პოლიტიკური ძალის ლიდერია. ამიტომ, პრემიერსა და პრეზიდენტს შორის თუ არჩევნების თარიღი იყო განხილვის საგანი, მაშინ იქნებ ეს საკითხი დანარჩენ პოლიტიკურ ძალებთანაც გამხდარიყო განხილვის საგანი.
პრეზიდენტი, რომელიც აცხადებს, რომ ის არ არის რომელიმე ერთი პოლიტიკური ძალისა თუ პარტიის ლიდერი, არამედ არის ნეიტრალური პოლიტიკურადაც და პარტიულადაც, სწორედ ამ თვალსაზრისიდან გამომდინარე მას უნდა გაემართა კონსულტაციები სხვებთანაც. ეს არის და ეს. ისე, ზოგადად, არჩევნები ამომრჩევლისა და პოლიტიკური პარტიებისთვის ტარდება. ამდენად, ვფიქრობ, ურიგო არ იქნებოდა, რომ გარკვეული კონსულტაციების საფუძველზე დანიშნულიყო არჩევნების დღე.
- არ მოგწონთ ეს თარიღი?
- ოქტომბრის დასაწყისი არ არის მთლად საუკეთესო პერიოდი არჩევნების ჩასატარებლად. საარჩევნო კალენდარი მოქმედებას იწყებს არჩევნების დღიდან 60 დღით ადრე ანუ 8 აგვისტოს. აგვისტო და სექტემბრის დასაწყისი საარჩევნო კამპანიისთვის, წინასაარჩევნო აგიტაციისთვის მაინცდამაინც კარგი დრო არ არის. როგორც წესი, ამ დროს ამომრჩეველი თავისი რეგისტრაციის ადგილზე არ არის, ან ზღვის სანაპიროებზეა, ან აგარაკზე. ამ თვალსაზრისით უმჯობესი სხვა თარიღი იქნებოდა. თუმცა, ისევე, როგორც ვერ ვხედავ ამ თარიღის ადრე გამოცხადებაში განსაკუთრებულ პოზიტივს, ასევე არ მინდა, განსაკუთრებული კრიტიკის საგნად ვაქციო, რადგან ეს არის მოცემულობა. მას შემდეგ, რაც სამართლებრივ ჩარჩოში ჩაჯდება პრეზიდენტის ეს განკარგულება, პოლიტიკურ ძალებს გვმართებს ჩვენი ძალისხმევის მობილიზება ორი მიმართულებით: ერთი, ძალიან მოკლე დროში შევძლოთ საარჩევნო გარემოს ირგვლივ ყველა შესაძლო ვერსიის გამოყენება და რეალიზაცია და მეორე – სრულფასოვანი მზადება არჩევნებისთვის.
- ასეთი შეფასებებიც მოვისმინე, რომ ხელისუფლებამ გამოცხადებული თარიღი მოირგო იმ ფონზე, როდესაც მოლაპარაკებები მიმდინარეობს საარჩევნო კანონმდებლობაზე. რამდენად რეალური შეიძლება იყოს ეს? კითხვის ნიშანს გიტოვებთ, რომ მოლაპარაკებები დასრულდა?
- არა, კითხვის ნიშანს ნამდვილად არ მიტოვებს. მოლაპარაკებების პროცესი ისედაც უნდა დასრულდეს ან დადებითად, ან უარყოფითად. ამიტომ ხელის შემშლელ ფაქტორად ამას ვერ დავასახელებ. რაც შეეხება მორგებას, არა, რანაირად უნდა მოირგოს, 8 ოქტომბერი ჩემთვისაც 8 ოქტომბერია და ხელისუფლებისთვისაც.
- ბატონო მამუკა, კოალიციაში შემავალი პარტიების ნაწილი დამოუკიდებლად აპირებს კენჭისყრას. იმავეს აცხადებენ ალასანიას პარტია და ნაციონალური მოძრაობა. ექსპერტები მიიჩნევენ, რომ არასაპარლამენტო ოპოზიცია თუ იდეოლოგიის, მონათესავე პოლიტიკური პლატფორმის მიხედვით საარჩევნო ბლოკს შექმნის, მათი შანსები უფრო დიდია. თქვენ როგორ აპირებთ ამ არჩევნებზე გასვლას?
- ამ მიმართულებით ნაფიქრიც გვაქვს და კონკრეტული გადაწყვეტილებაც მიღებული. ყველა პარტია აცხადებს, რომ არჩევნებზე მარტო გადის, თითქოს ეს მოდაში შემოვიდა, მაგრამ მერე ვხედავთ, რომ საარჩევნო ბლოკში, კოალიციაში არიან. ეს ხომ მიანიშნებს ამ პარტიების შესაძლებლობებზე. რაც შეეხება „ახალ მემარჯვენეებს“, ჯერ კიდევ კოალიციის დაშლამდე ჩამოვყალიბდით, რომ ჩვენ არჩევნებზე პოლიტიკური ბლოკის სახით გავალთ. ახლა ამოცანა არ არის საკუთარი პარტიის გადარჩენა, როგორმე პარლამენტში შეღწევა და ტივტივი. ჩვენი მიზანი სერიოზული პოლიტიკური ერთობის შექმნაა.
- ვისთან ერთად?
- იდეოლოგიურ, ფასეულობრივ და ევროატლანტიკური მიმართულებით თანხვედრილ ძალებთან. პარტნიორებიც სწორედ ამ კუთხით გვყავს მოაზრებული.
- არ გვიმხელთ, ვისთან შეიძლება იყოს ასეთი ერთობა?
- ვერ გიმხელთ. ამ კრიტერიუმებში, ამ ფასეულობებში ვინც მოიაზრება, ყველასთან შეიძლება იყოს ასეთი ერთობა, გარდა „ნაცმოძრაობისა“ და „ქართული ოცნებისა“.
„ახალი თაობა“, 08 აპრილი, 2016 წელი
ინტერვიუ ომარ ნიშნიანიძესთან: „არჩევნებზე ბევრგან მეორე ტური გაიმართება“ // „ქართული ოცნება“ დავით უსუფაშვილის გადაბირებას აპირებს?
შორენა მარსაგიშვილი
რატომ არა აქვს „ქართულ ოცნებას“ ფული, წაართმევენ თუ არა მათ ხმებს რესპუბლიკელები და ფორუმი, როგორი სამზადისია საარჩევნოდ? – ამ თემებზე „ახალ თაობას“ საპარლამენტო უმრავლესობის ერთ-ერთი ლიდერი ომარ ნიშნიანიძე ესაუბრება.
- ბატონო ომარ, მედიაში გავრცელდა ინფორმაცია იმასთან დაკავშირებით, რომ თითქოს „ქართული ოცნება“ დავით უსუფაშვილის გადაბირებას აპირებს. მართალია ეს ამბავი?
- ამის შესახებ ვერაფერს გეტყვით, მე ზედა ეშელონებში არა ვარ და ასეთ საკითხებში არ ვერევი. ამ თემაზე ჩემთან არავის უსაუბრია. შესაძლოა, ვიღაცას უნდა, რომ უსუფაშვილი პარტია „ქართულ ოცნებაში“ იყოს, მაგრამ ამაზე ხმამაღლა არაფერი უთქვამს. ამიტომ ამ ინფორმაციას ვერ დაგიდასტურებთ.
- ვერ გვიდასტურებთ, მაგრამ ვერც უარყოფთ?
- რაც არ ვიცი, იმას ვერც დავადასტურებ და ვერც უარვყოფ.
- რადგან უსუფაშვილი ვახსენეთ, აქვე მის რესპუბლიკელებსაც შევეხოთ. ისინი ეროვნულ ფორუმთან ერთად ამ არჩევნებზე თქვენი კონკურენტები გახდებიან და ხმებს ხომ არ წაგართმევენ?
- რა ხმები უნდა წაგვართვან? მგონი, არავის აქვს იმის ილუზია, რომ კოალიცია „ქართულმა ოცნებამ“ მათი მხარდამჭერებით მოიპოვა გამარჯვება. იმ არჩევნებზე ჩვენ ხმების 80% მივიღეთ, მაგრამ ნაციონალებმა 60% დაგვიწერეს. ამ ხმების დიდი ნაწილი ივანიშვილის ავტორიტეტმა მოიტანა. რესპუბლიკელებსაც და ეროვნულ ფორუმსაც ჰყავთ თავიანთი მხარდამჭერები, მაგრამ, არა იმდენი, რომ ჩვენ რაღაცნაირად დავზარალდეთ. თამამად შემიძლია იმისი თქმა, რომ `ქართული ოცნება~ წელს ბევრად მეტ ხმას აიღებს, ვიდრე 2012 წელს. მაშინ, როგორც უკვე გითხარით, ნაციონალებმა მოგვპარეს ხმები. პარტიას არ დავასახელებ და მათი წასვლაც მოგვიტანს დამატებით ხმებს.
- რესპუბლიკურ პარტიას გულისხმობთ?
- ამომრჩევლის ნაწილი ხშირად გვეუბნებოდა, რომ ხმას რესპუბლიკელების გამო არ გვაძლევდნენ. ახლა ისინი ცალკე არიან, ჩვენ – ცალკე. ასე რომ, თავშეკავებულთა ხმებიც ჩვენკენ წამოვა. მართალია, მომავალ არჩევნებზე ფორუმი და რესპუბლიკური პარტია ჩვენი კონკურენტები იქნებიან, მაგრამ მათ მაინც წარმატებას ვუსურვებ. ყველაფერს რომ თავი დავანებოთ, ჩვენ ერთად ვიყავით იმ ომში, რომელშიც სააკაშვილის რეჟიმი დავამარცხეთ. ღმერთმა ყველას მშვიდობაში მოახმაროს თავისი ელექტორატი.
- ამბობთ, რომ ამ პარტიებსაც ჰყავს თავისი მხარდამჭერები. თქვენი აზრით, ამ მხარდამჭერების დახმარებით შეძლებენ ისინი საარჩევნო ბარიერის გადალახვას?
- ვერ გეტყვით, გადალახავენ თუ არა ბარიერს. ამ პარტიის რამდენიმე წევრი, ალბათ, მოხვდება პარლამენტში. წინ საინტერესო პოლიტიკური ცხოვრება გველოდება. კონკურენცია იქნება მაღალი და ზოგიერთ ოლქში მეორე ტურის დანიშვნა გახდება საჭირო.
- მეორე ტური დაინიშნებაო და ეს რას უკავშირდება, ხელისუფლების რეიტინგი დაეცა?
- 2012 წელთან შედარებით, ჩვენი რეიტინგი შემცირდა, მაგრამ მეორე ტურის დანიშვნასთან ამას საერთო არა აქვს. დარწმუნებული ვარ, მაჟორიტარული ოლქების 80%-ზე მეტს ჩვენი კანდიდატები მოიგებენ, ზოგან კი გამარჯვებულის გამოსავლენად მეორე ტურიც გახდება საჭირო.
- მეორე ტური ნაციონალებთან გაიმართება?
- რატომ ნაციონალებთან? არიან სხვა ღირსეული პარტიები, რომლებსაც ასევე ღირსეული კანდიდატები ეყოლებათ. არც იმას გამოვრიცხავ, რომ სადმე ნაციონალებიც გაძვრნენ მეორე ტურში. წინასაარჩევნოდ დემაგოგიას ფრთა გაეშლება და საზოგადოების იმ ნაწილის გადაბირება, რომელიც კრიტიკულ აზროვნებას მიჩვეული არ არის, ძნელი არ იქნება, ნაციონალებს კი დემაგოგიაში ვერავინ აჯობებს. არჩევნებში მეორე ტურის დანიშვნა ცუდი არ არის. ეს დემოკრატიულობის მაჩვენებელია. თვითმმართველობის არჩევნებშიც იყო მეორე ტური და ამით ქვეყანა არ დაქცეულა.
- ბატონო ომარ, თქვენ და თქვენი კოლეგები ხშირად აღნიშნავდით, რომ ბიძინა ივანიშვილი აქტიურად პოლიტიკურ პროცესებში თებერვლიდან ჩაერთვებოდა. მისი გააქტიურება ჯერ არ შეინიშნება და რა ხდება?
- ბიძინა ივანიშვილი აუცილებლად გამოჩნდება. როგორი ფორმით მოხდება ეს, ახლო მომავალში ვნახავთ. არჩევნები კარგს მოგვადგა და დაყოვნება აღარ ღირს. მისი გამოჩენა „ქართულ ოცნებას“ ძალიან წაადგება.
- არის იმის შანსი, რომ ის საარჩევნო სიაში ვიხილოთ?
- პოლიტიკაში არაფრის გამორიცხვა არ შეიძლება, მაგრამ, არა მგონია, ის სიაში იყოს.
- სულ იმას ამბობდით, რომ პარტია `ქართული ოცნება~ სათანადოდ არ იყო გაძლიერებული. ახლა არჩევნებზე დამოუკიდებლად მიიღებთ მონაწილეობას და მზად ხართ არჩევნებისთვის?
- ჩვენ ძალიან ბევრი დრო დავკარგეთ. შეიძლებოდა, ეს წლები პარტიის გასაძლიერებლად გამოგვეყენებინა. ასე არ მოვიქეცით და ახლა თავზე საყრელად გვაქვს საქმე. სამზადისი უკვე დაწყებულია და, დარწმუნებული ვარ, არჩევნებისთვის მოვასწრებთ სათანადო ფორმაში ჩადგომას.
- არჩევნებამდე 6 თვეა დარჩენილი. 3 წელიწადში ვერ ჩადექით ფორმაში და 6 თვეში მოასწრებთ ამის გაკეთებას?
- მოვასწრებთ, მთავარია, ყოველი დღე სწორად გამოვიყენოთ. როგორმე პიარის საკითხიც უნდა მოვაგვაროთ. უამრავი რამე გავაკეთეთ და ხალხმა ამის შესახებ არაფერი იცის. ნაციონალების მიერ კონტროლირებადი მედიის ამარა ხალხის დატოვება არ შეიძლება. მაგათ რომ უსმინოს კაცმა, ქვეყანა დაქცეულია, რაც სიმართლე არ არის. ჩვენ ხალხს, პირველ რიგში, რეალობა უნდა დავანახოთ და მათ სწორი არჩევანის გაკეთება აღარ გაუჭირდებათ.
- არჩევნების თარიღზე რას იტყვით? ოპოზიცია შეშფოთებულია, რატომ დანიშნეს არჩევნები 8 ოქტომბერსო…
- 14 ოქტომბერს რომ დანიშნულიყო, მოეწონებოდათ? ეს არის თითიდან გამოწოვილი პრეტენზიები. ყველაფერზე განგაშის ატეხა არ შეიძლება. ყველამ კარგად ვიცოდით, რომ არჩევნები ოქტომბერში გაიმართებოდა. უკვე გითხარით, რომ ზოგან მეორე ტური გახდება საჭირო. ამას დამატებითი დრო დასჭირდება და ახალ წლამდე მაინც ხომ უნდა დაკომპლექტდეს ახალი პარლამენტი. არჩევნებისთვის ძალიან კარგი თარიღია შერჩეული.
- რამდენიმე დღის წინ გამოქვეყნდა პარტიებისათვის გაღებული შემოწირულობები, საიდანაც ჩანს, რომ „ოცნებისთვის“ დიდი თანხა არავის გადაურიცხავს. თქვენი კოლეგა თამაზ მეჭიაური ამბობს, პარტიაში ყველა ჩემსავით ჯიბეგაფხეკილიაო და მართლა ასეთი ჯიბეგაფხეკილები ხართ?
- თამაზი სიმართლეს ამბობს. მილიონერები არა ვართ, მაგრამ არც ნამეტანი თავის მომკვდარუნებაა საჭირო. პარლამენტის წევრი სანამ გავხდებოდი, მანამდე მატერიალურად უფრო კარგად ვიყავი. გარდა იმისა, რომ პროფესორი ვარ, კერძო ინსტიტუტი და კერძო სკოლაც მქონდა. როგორც კი დეპუტატი გავხდი, ეს ყველაფერი გავაჩერე. ნაციონალების დროს დეპუტატები ყველაფერს იყვნენ მოდებული, ჩვენ ასე ვართ. ისე არავინ აღიქვათ, რომ ვწუწუნებთ, თუმცა, ყველამ იცოდეს, რომ არავის წილში არ ჩავსხდომივართ. ჩვენ ეს არ გვიკადრია. თუ ვინმეს ბიზნესის დაწყებაში დავეხმარეთ, არავისგან სამაგიერო არ მოგვითხოვია. ღმერთმა სიკეთეში მოახმაროთ თავიანთი საქმე. ეს, პირველ რიგში, ქვეყანას წაადგება. რაც მეტად გაძლიერდება საშუალო ფენა, მით უკეთესი იქნება ჩვენი ქვეყნისთვის.
- გაირკვა, რომ ცოტა ხნის წინ შექმნილმა „გირჩებმა“ თქვენზე მეტი ფული მიიღეს. ეს რანაირად მოხდა, თქვენი ლიდერი ხომ ამ ქვეყნის ყველაზე მდიდარი მოქალაქეა?
- რატომ გიკვირთ, „გირჩებმა“ ყველაზე მეტი დაფინანსება რომ მიიღეს? მაგათ პატრონსაც არ აკლია ფული. მათ უკან ისევ ნაცები დგანან და ისინივე აფინანსებენ. სააკაშვილი ცდილობს, გააკეთილშობილოს თავისი პარტიის განაყოფები. ხალხს ატყუებენ, თითქოს ნაცმოძრაობას გამოეყვნენ. არაფერიც არ გამოყოფიან, ისევ იქ არიან იდეოლოგიურად. სახელის გადარქმევით ვერ განიბანებიან და კრისტალები ვერ გახდებიან. იგივე დარჩნენ, რაც ნაციონალებში იყვნენ. გინდა „გირჩი“ დაირქვან და გინდა ციყვი. იმის გამო, რომ ჩვენი ლიდერი ბიძინა ივანიშვილია, ყველას ჰგონია, რომ ფულებს გვაყრის თავზე. ეს ასე ნამდვილად არ არის. ჩვენ ყველაფერს კანონის ფარგლებში ვაკეთებთ.
- ბატონო ომარ, თქვენ არაერთხელ განაცხადეთ, რომ გინდათ, ქუთაისის მაჟორიტარობისთვის იბრძოლოთ. ისევ გაქვთ ამის სურვილი?
- ქუთაისის მაჟორიტარობაზე ისევ მაქვს პრეტენზია, მიმაჩნია, რომ ცუდი მაჟორიტარი არ ვიქნები. ჩემს მშობლიურ ქალაქს გამოვაცოცხლებდი. 2012 წლის არჩევნების შემდეგ ქუთაისი ერთგვარად მიტოვებული იყო. არ გეგონოთ, რომ გუბაზ სანიკიძეზე საყვედურს ვამბობ. მან ბევრი კარგი საქმე გააკეთა, მაგრამ არ იყო აქტიური მაჟორიტარი. სხვათა შორის, ეს არ არის ჩემი სიტყვები. ამას ქუთაისელები ამბობენ. გარკვეული თვალსაზრისით, ამ წლების განმავლობაში მე მიწევდა ქუთაისის მაჟორიტარის ფუნქციის შესრულება. ჩემი სახლ-კარი, ინსტიტუტი იყო „ქართული ოცნების“ შტაბი. ყოველდღე უამრავი ადამიანი მაკითხავდა. ჩემი თუ არ გჯერათ, შეგიძლიათ, შუამდგომლობებს გადახედოთ. ქუთაისსა და ქუთაისელებზე ზრუნვა არასდროს მეზარებოდა და არც მომავალში დამეზარება. ახლა უფრო მეტად მინდა, მაჟორიტარობისთვის ვიბრძოლო.
- რატომ, რადგან გუბაზ სანიკიძე და მისი ფორუმი კოალიციიდან წავიდნენ?
- ამიტომ არა. საარჩევნო ოლქები სხვანაირად გადანაწილდა და ქუთაისს ჩემი ღვიძლი რაიონის – თერჯოლის სოფლები მიუერთეს. ორმაგად გამიჩნდა მაჟორიტარობის სურვილი.
- თქვენ ერთგან თქვით, თერჯოლელი სოკრატე ვარო და ამით ქუთაისელები ხომ არ გაანაწყენეთ? მოინდომებენ ისინი მაჟორიტარად თერჯოლელ სოკრატეს?
- ქუთაისელები ამას არ მიწყენენ. თერჯოლაში ვარ დაბადებული და იქ გავიზარდე. 42 წელია, ქუთაისში ვცხოვრობ და ნამდვილი ქუთაისელი ვარ. იმედი მაქვს, გაითვალისწინებენ ამ ყველაფერს და დამასახელებენ მაჟორიტარობის კანდიდატად.
- არ გქონიათ ამ თემაზე პარტიაში საუბარი?
- არავისთან მისაუბრია. საჯაროდ ეს განცხადება რამდენჯერმე მაქვს გაკეთებული. ვნახოთ. ცოტა ხანში დაასახელებენ მაჟორიტარობის კანდიდატებს და იქ გაირკვევა, შეჩერდება თუ არა ჩემზე არჩევანი.
- თუ არ დაგასახელებენ, რას იზამთ?
- გული დამწყდება, მაგრამ, ვისაც დაასახელებენ, იმას ვუსურვებ წარმატებას. მე დეპუტატად არ დავბადებულვარ და არც პარლამენტიდან გამიჭირდება წასვლა. არც მე და არც ჩემი მეგობრები სკამებს არ ვართ გამოკერებული.
„ახალი თაობა“, 08 აპრილი, 2016 წელი
აფხაზეთში ყარაბაღის სცენარის გამეორებას ვარაუდობენ
მთიანი ყარაბაღის კონფლიქტის განახლებამ შექმნა მძიმე რეალობა, რომელიც თითქმის მთელ მსოფლიოს აღელვებს. როგორც ირკვევა, ამან შიში გააჩინა ანექსირებულ აფხაზეთშიც. სოხუმში გამოითქვა ეჭვი, რომ ძალისმიერი მეთოდის გამოყენება შეიძლება თბილისმაც ცადოს. აფხაზეთის საოკუპაციო რეჟიმი იმის გამოც არის შეშფოთებული, რომ მთიანი ყარაბაღი მოძმე რესპუბლიკაა. საერთოდ, აფხაზეთის რეჟიმს განსაკუთრებულად მჭიდრო ურთიერთობები აქვს თვითგამოცხადებულ მხარეებთან _ მთიან ყარაბაღთან, დნესტრისპირეთთან და ე.წ. სამხრეთ ოსეთთან.
აფხაზეთის პარლამენტის დეპუტატი თემურ გულია აცხადებს, რომ აფხაზეთში მთიანი ყარაბაღის სცენარის გამეორებაა მოსალოდნელი.
- სიტუაცია სერიოზულია: საქართველოს შეიარაღებული ძალები ატარებენ წვრთნებს და იმაღლებენ საბრძოლო მზადყოფნას. ჯარი მარაგდება ახალი სახის შეიარაღებით. საქართველოს არმიამ პრაქტიკულად დაასრულა ნატოს სტანდარტზე გადასვლა. ამიტომ ჩვენ მზად უნდა ვიყოთ მოვლენების განვითარების ნებისმიერი, მათ შორის ძალისმიერი ვარიანტისათვის, – აღნიშნავს თემურ გულია.
მისთვის სერიოზულ პრობლემას წარმოადგენს ის, რომ საქართველოს ხელისუფლება გაურბის ძალის გამოუყენებლობის ხელშეკრულების ხელმოწერას, რაც მას საკითხის ძალისმიერად გადაწყვეტის შესაძლებლობას უტოვებს.
აფხაზი დეპუტატი ირწმუნება, რომ პერიოდულად საქართველოს საზოგადოებაში ისმის მოწოდებები 2008 წლის აგვისტოს რევანშის თაობაზე.
თემურ გულიას თქმით, დასავლეთი საქართველოს წინაშე აყენებს მოთხოვნას _ სანამ არ მოაგვარებს კონფლიქტებს, მანამდე კარს არ გაუღებს. ამ სიტუაციაში საქართველოს აქვს ორი გზა – ან ძალისმიერად გადაწყვიტოს ეს პრობლემა, ან აღიაროს აფხაზეთისა და სამხრეთ ოსეთის დამოუკიდებლობა და სუვერენიტეტი. მისივე თქმით, აფხაზეთსა და მთიან ყარაბაღს ბევრი აქვთ საერთო, განსხვავება კი იმაშია, რომ აფხაზეთი აღიარა რუსეთმა.
ყარაბაღის სიტუაციის გამეორებას აფხაზეთში ამ ეტაპზე შეუძლებლად მიიჩნევს დეპუტატი რობერტ აილიანი. მისი შეფასებით, თბილისი აფხაზეთში ატარებს თანამშრომლობის პოლიტიკას აღიარების გარეშე. გარდა ამისა, აფხაზებსა და ქართველების დაპირისპირებაში, ყარაბაღისაგან განსხვავებით, არ არსებობს რელიგიური ფაქტორი. აფხაზეთში უსაფრთხოებას უზრუნველყოფს რუსეთის ბაზები და რუსეთ-აფხაზეთის ხელშეკრულება თანამშრომლობის შესახებ.
აფხაზეთში ყარაბაღის სცენარის განვითარებას არ ელიან რუსი პოლიტოლოგებიც. მათი აზრით, საქართველოს არმია სუსტია, არ შეიძლება მისი შედარება აზერბაიჯანის ძლიერ არმიასთან. ამიტომ ის ძალისმიერ მოქმედებებს ვერ დაიწყებს. გარდა ამისა, აფხაზეთს რუსეთის ჯარი იცავს. მათივე შეფასებით, ხმამაღალი განცხადებები საქართველოს ნატოში მოსალოდნელ შესვლაზე მხოლოდ პიარია. საომრად საქართველოს დღევანდელი ხელისუფლებაც არ არის განწყობილი.
—————————-
„ვერსია“, 08 აპრილი, 2016 წელი
ინტერვიუ ხათუნა სამნიძესთან: რესპუბლიკური პარტიის თავმჯდომარე ყველა ბრალდებას პასუხობს – „ჩვენი მინისტრები პოსტებს აგვისტოში დატოვებენ“
ნინო კომახიძე
არჩევნების თარიღი გამოცხადებულია, სახელისუფლო კოალიციის დაშლა გაფორმებული, მღელვარების პირველი ტალღა _ გადავლილი, თუმცა რჩება კითხვები რესპუბლიკელებთან: ხელშეუხებლობის რა გარანტიები მიიღეს პრემიერისგან, როგორ შეძლებენ საპარლამენტო ოპოზიციაში და სამთავრობო პოზიციაში ერთდროულად ყოფნას, რატომ არ თმობენ მინისტრების პორტფელებსა და სპიკერის პოსტს, რეალურად, რატომ დატოვეს კოალიცია, დაიწყებენ თუ არა «ჟონგლიორობას“ საკუთარი ათი მანდატით და დააკომპლექტებენ ახალ უმრავლესობას… ,,ვერსიის” კითხვებს რესპუბლიკური პარტიის თავმჯდომარე ხათუნა სამნიძე პასუხობს და ექსკლუზიურად გვიმხელს, რომ აგვისტოში მინისტრები პოსტებს საკუთარი ნებით დატოვებენ, ,,ოცნების” ფრაქცია რაიონში საკრებულოს რესპუბლიკელი თავმჯდომარის გადაყენებას ცდილობს და პარტიის რიგები, კოალიციიდან გასვლის გამო, უკვე ერთმა გამგებელმა დატოვა. ხათუნა სამნიძესთან საუბარს პარტიული სიის პირველი ნომრის ვინაობით ვიწყებთ.
- საარჩევნო სიებზე დიდი ხანია ვფიქრობთ, მაგრამ პროცესი არც დასრულებულია და არც იმ ფაზაშია, პირველი სამეული ან ხუთეული დაგისახელოთ. ბუნებრივია, სიის პირველი ნომერი ან პარტიის თავმჯდომარე იქნება, ან დავით უსუფაშვილი, ამიტომ ამ ეტაპზე, ზუსტად ვერაფერს ვიტყვი, თუმცა ჩვენთან სიის ფორმირება, პროცედურულად, საკმაოდ გაწერილია. სიას ადგენს თავმჯდომარე, წარუდგენს ეროვნულ კომიტეტს, სადაც იქნება დისკუსია და შესაძლოა, ნუმერაცია შეიცვალოს. გარდა ამისა, გვაქვს ტრადიცია, რომ 4 თავმჯდომარე ერთად განვიხილავთ პარტიულ სიას.
- კოალიციიდან თქვენი გამოსვლის მიზეზი ისიც ხომ არ იყო, რომ კვოტებზე საუბრისას ძალიან ცოტა მანდატი შემოგთავაზეს? მსგავსი ინფორმაცია უკვე გაჟღერდა ეროვნული ფორუმის შემთხვევაში…
- კოალიციამდეც და კოალიციაში ყოფნის დროსაც, ხაზს ყოველთვის ვუსვამდით, რომ ყველაფერი, რაც რესპუბლიკურ პარტიას ეხება, წყდება პარტიის შიგნით. ჩვენ სიაში ვერავინ ჩაერევა და ამის მცდელობაც არ ყოფილა. მაჟორიტარების შემთხვევაში, რა თქმა უნდა, შეთანხმება შესაძლებელი იყო. ეს საუბრები, ვინ რამდენ ადგილს მიიღებდა კოალიციაში, ჩვენთან არ შემდგარა და გარწმუნებთ, რომ შემდგარიყო, ეს ამბავი ასე ჩუმად არ ჩაივლიდა; თანაც, პრემიერთან ორპარტიულ შეთანხმებასა და ევროპულ კოალიციაზე საუბარი შედეგამდე ვერ მივიდა.
- რატომ… ბარემ, დღეს მაინც ავხსნათ ყველასთვის გასაგებად, რას გულისხმობდა ეს ორპარტიული სტრატეგიული თანამშრომლობა ,,ოცნებასა” და რესპუბლიკელებს შორის?
- პრემიერის მოლოდინს, სურვილსა და მზაობას ჩვენთან თანამშრომლობის შესახებ „ოცნების“ ლიდერშიპი არ დაეთანხმა. ამ პროცესის უარყოფა მეორე დღესვე დაიწყეს და ამიტომ შორს ვერ წავიდა. სხვათა შორის, ორპარტიული სტრატეგიული თანამშრომლობა არც პრემიერთან იმ ერთსაათიანი შეხვედრის დროს განგვიმარტავს, რადგან სხვა თემებზეც იყო საუბარი. თუმცა რა თქმა უნდა ვიცოდით, რომ ამაში იგულისხმება კონკრეტული თემატიკა, ვინ რაზე იღებს პასუხისმგებლობას, როგორი უნდა იყოს თამაშის წესები ამ ორ პარტიას შორის და იმ პარტიებთან, ვინც შემოგვიერთდება; საუბარი, რა თქმა უნდა, მინისტრების პორტფელებზე, პასუხისმგებლობის გადანაწილებასა და კვოტებზეც იქნებოდა. თუმცა ვერც ამ ფაზაში შევედით. სრული პასუხისმგებლობით ვამბობ, კოალიციაში კვოტებზე საუბარი არავის დაუწყია.
- დღეს, როცა თქვენი გასვლით გამოწვეული სიხარულის პირველმა ტალღამ გადაიარა, მაინც ვისმენთ მუქარას, არც გოგი თოფაძის დარტყმები შეჩერებულა ხიდაშელის წინააღმდეგ, არც პარტიის არაპოპულარულ თემებზე მიბმა. რატომ?
- გოგი თოფაძე არ არის ჩვენი წასვლის მიზეზი. მან პრობლემა შეუქმნა მთელ კოალიციას. ჩვენთვის კი პრინციპული იყო, ყველასთვის დაგვენახებინა, რომ მსგავს განცხადებებს მხოლოდ ეს ერთი ინდივიდი არ აკეთებს და ეს საფრთხეს უკვე მთელ ქვეყანას უქმნის. ამ ნაწილის პირდაპირი მოთხოვნა რესპუბლიკელების წასვლა იყო ხელისუფლებიდან. ეს ყველამ, მათ შორის, პრემიერმაც დაინახა, ამიტომ ჩვენს განცხადებაშიც ხაზი გავუსვით, რომ 2016 წელს ცალკე კი ვიყრით კენჭს, მაგრამ არჩევნებამდე ვრჩებით ხელისუფლებაში. არ წავედით ბოლომდე და არც წავალთ სხვისი მოთხოვნით. წავალთ საკუთარი გადაწყვეტილებით. არ ვექვემდებარებით შანტაჟს, არც შეტევებს და დარტყმებს. ჩვენ წავალთ მხოლოდ ჩვენი დღის წესრიგით!
- თუმცა ექვემდებარებით პრემიერს…
- მას ექვემდებარებიან მინისტრები, რაც კანონითაა გაწერილი და თუ ასე არ იქნება, მაშინ საერთოდ რა გვინდა მინისტრთა კაბინეტში. მინისტრების წასვლის გადაწყვეტა პრემიერსაც შეუძლია და პარტიასაც. გარდა ამისა, თუკი მინისტრი იქნება საარჩევნო სიაში, მაშინ მას არ აქვს პოსტზე დარჩენის უფლება.
- თქვენთვის რა უფრო პრიორიტეტულია, თინა ხიდაშელმა თავდაცვის მინისტრის პოსტი შეინარჩუნოს და ვარშავის სამიტზე წავიდეს 7-8 ივლისს, თუ იყოს თქვენი სიის პირველი ნომერი?
- თინა ხიდაშელის ვარშავის სამიტზე წასვლა, ქვეყნის სტაბილურობა არის ჩვენი პრიორიტეტი! არ გვინდა, კითხვები გაჩნდეს არც საგარეო ორიენტირებზე, არც სტაბილურობაზე. თინა ხიდაშელის ყოფნა ამ პოზიციაზე და განსაკუთრებით ვარშავის სამიტზე დასწრება, დიახ, ჩვენი პრიორიტეტია. სამიტამდე არავითარ ცვლილებებს არ ველით. პრემიერმაც აღნიშნა, რომ მზადაა ამ თანამშრომლობისთვის. როცა პრემიერი და პრეზიდენტი შეხვდნენ და გაჩნდა ჭორი, თითქოს რესპუბლიკელი მინისტრები უნდა გადამდგარიყვნენ, ეს ინფორმაციის გადამოწმებამდეც კი არ დავიჯერე – ვერ დავუშვებ, რომ პრემიერმა შეცვალა 1 კვირის წინ მიღებული გადაწყვეტილება, რომელიც პარლამენტის სპიკერთან ერთად გამოაცხადა. გვეგონა, დასრულდა ეს სპეკულაციები, როგორი იქნება კოალიცია და ვინ როგორ იყრის კენჭს, მაგრამ ჩანს, ახლა ახალი ფაზა დაიწყო, არკვევენ, როდის მოხსნიან რესპუბლიკელ მინისტრებს.
- თუ გაქვთ გარანტია პრემიერისგან, რომ ხიდაშელს სამიტამდე არ გადააყენებენ და თუკი მაინც ასე მოხდა, ეს თქვენთვისაც კურსის ცვლილების სიგნალი იქნება, როგორც, თავის დროზე, ალასანიასთვის?
- ვარშავის სამიტი განცხადებაში არ გვიხსენებია, მაგრამ დიახ, ეს არის მთავარი თემა ჩვენი ყველა საუბრისა და კონსულტაციის დროს. ქვეყნის სტაბილურობისა და საგარეო კურსის ერთ-ერთი გარანტია კი სწორედ ისაა, რომ თავდაცვის მინისტრი წამდაუწუმ არ იცვლებოდეს. ველი, რომ იგივე პრიორიტეტები აქვს პრემიერსაც. ვფიქრობ, ის მზადაა თანამშრომლობისთვის და არ სურს, ქვეყანაში კითხვები გაჩნდეს. სწორედ ამიტომ
პარტიის ხარჯზე, ვტოვებთ მინისტრებს პოსტებზე და ამის გამო, ჩვენი მისამართით ბევრი კითხვა ჩნდება. ახლა ვმუშაობთ სიის ფორმირებაზე და ცოტა ხანში, მინისტრებთან ერთად გადავწყვეტთ, მათგან ყველა იქნება სიაში, არცერთი თუ რომელიმე და ვინ შეინარჩუნებს პოსტს ბოლომდე. ეს აქამდე არ მითქვამს, თუმცა ვფიქრობ, ხალხს უნდა ვუთხრათ, როცა პარტია ძალიან აქტიურ საარჩევნო ფაზაში შევა, მინისტრები შესაბამის გადაწყვეტილებას მიიღებენ, ამიტომ რეალურად, აგვისტოში ჩვენი მინისტრები წავლენ.
ჩვენთვის მნიშვნელობა აქვს პრემიერის დამოკიდებულებას ჩვენი პარტიისადმი. თუ განახლება მოხდება ,,ოცნებაში” და პრემიერის ხედვის მქონე ხალხი გაერთიანდება, რომელსაც ასეთი აუხსნელი, გაუცნობიერებელი და არასწორი წარმოდგენები არ ექნება, მათთან პარტნიორობას არჩევნებამდე შევძლებთ. ჩვენგან ერთმანეთის სიყვარულს არავინ ითხოვს, საერთო ინტერესები გვაკავშირებს, თორემ, ჩვენც არ გვიყვარს ბევრი. თუ ,,ოცნებაში”, დღევანდელივით, რაღაც შიშები აღარ იქნება გამეფებული, მაშინ არჩევნებამდე მასთან უპრობლემოდ ვითანამშრომლებთ და შესაძლოა, პარლამენტშიც, არჩევნების შემდეგაც იყოს საუბარი თემატურ კოალიციაზე. დღეს ასეთი რეალობაა – დამოუკიდებლად ვემზადებით არჩევნებისთვის, თუმცა არ ვამბობთ, რომ სხვა ფორმატი გამორიცხულია. ამაზე ფიქრი 2014 წლის ადგილობრივი არჩევნების შემდეგაც დავიწყეთ, რადგან ბევრი რამ ამ არჩევნებზე ფორსმაჟორში მოხდა და „ოცნების“ მხრიდან, გაანალიზებასა და შეცდომების გამოსწორებაზე არავის უფიქრია. ესეც კოალიციიდან წასვლის ერთ-ერთი მიზეზი იყო. გასვლის თემაზე პარტიის ეროვნულ კომიტეტში ყოველთვის იყო დისკუსია. ყოველ 2 თვეში ერთხელ გვქონდა შეხვედრა და ვიხილავდით, რა ხდება კოალიციაში, როგორ იქცევიან პარტნიორები, ჩვენ რა როლი გვაქვს, რას ვაღწევთ, რას ვერა. რაც დრო გადიოდა, უფრო მეტად ჩანდა, რომ იმდენი ძალა აღარ გვქონდა და მაგალითად, ვერ ვაღწევდით წარმატებას საერთო სასამართლოების საკითხზე, მოსმენების კანონი ბოლომდე ვერ მივიყვანეთ, ასევე გავლენას ვერ ვახდენდით ბევრ საკითხზე საკრებულოებში.
- რა ხდება ამ მხრივ რაიონების საკრებულოებში, გამგეობებში, გამოიწვია თუ არა ,,ოცნების” კოალიციიდან გასვლამ პარტიიდან გადინება ან ცდილობს თუ არა ხელისუფლება ფრაქციები დაგიშალოთ?
- ადგილებზე ძლიერი ორგანიზაციები გვყავს, სადაც თავმჯდომარეები წლებია, ოპოზიციაში არიან, ამიტომ ამ მხრივ, მშვიდად ვართ. რეალურად, კოალიციიდან გასვლის გამო პარტიიდან ერთი ადამიანი წავიდა, ეს გახლავთ საბურთალოს გამგებელი, ბექა მიქაუტაძე. მან მიზეზად ის დაასახელა, რომ დაწყებული აქვს რაღაც საქმეები და სურს, ბოლომდე მიიყვანოს. ძალიან გამიკვირდა და ამაზე ბევრი ლაპარაკი არც მსურს. თუმცა ვაცხადებ, რომ საჯარო სტრუქტურებში დასაქმებულ რომელიმე რესპუბლიკელს, პარტიული ნიშნის გამო პრობლემა თუ შეექმნება, ჩვენ არ ვიქნებით ჩუმად და მათ დავიცავთ. თუ ვინმეს მოლოდინი აქვს, რომ რაკი პარტია ცალკე იყრის კენჭს, ამის გამო მათ სამუშაო ადგილებს საფრთხე დაემუქრება, ე.ი. რესპუბლიკელებს 2012 წლის მერე ვერაფერი გაგვიკეთებია, რასაც ხაზს ვუსვამდით, რომ გავაკეთეთ.
რაც შეეხება საკრებულოებს, ფაქტობრივად, მთელ საქართველოში გვყავს წარმომადგენლები. არის რაიონები, სადაც წმინდა რესპუბლიკური ფრაქცია გვაქვს, ჩვენი წევრთა უმრავლესობით და მათ დაშლა არ ემუქრება. არის ისეთი რაიონებიც, სადაც ვიღაც გვიქმნის ფრაქციას, ან დამოუკიდებელი დეპუტატი გვყავს და აქ შეიძლება რაღაც შეიცვალოს. თუ დავინახეთ, რომ ადგილებზე დამოკიდებულება იცვლება და ვიღაც ფრაქციას გვიშლის, არც ამაზე გავჩუმდებით. დღეს 100-მდე რესპუბლიკელი წევრია საკრებულოებში თანამდებობეზე, კომისიებში, ფრაქციების თავმჯდომარეებად, მოადგილეებად. გვაქვს 29 ფრაქცია. თუ მათი გადაყენების სერია დაიწყო, ამაზეც გვექნება პასუხი. ერთადერთი შემთხვევა, რაც დაიწყო და აღარ გაგრძელდა, ხარაგაულში მოხდა.
მთელ საქართველოში საკრებულოს ერთადერთი ქალი თავმჯდომარე სწორედ ხარაგაულში ჰყავს, ის რესპუბლიკელია. არსებობს კადრებიც, რომელსაც მე ვუყურე, თუ როგორ აკეთებს ჩვენი წევრი მუშაობის 1-წლიან ანგარიშს და მას ფრაქცია ,,ოცნების” თავმჯდომარე ეუბნება, რომ ის არ მოსწონთ და ამიერიდან, მის გადაყენებაზე იმუშავებენ. თუმცა დარწმუნებული ვარ, ეს ადგილობრივი ინიციატივა და თვითშემოქმედებაა. ასეთ შემთხვევებსაც ყურადღებით ვაკვირდებით და „ოცნების“ ხელმძღვანელობას ვატყობინებთ, რადგან მსგავსი ქმედებები ადგილებზე დიდ არეულობას გამოიწვევს.
- სამი წელი სახელისუფლო პარტია იყავით. ამ ხნის განმავლობაში, რა ბენეფიტები წამოიღეთ კოალიციიდან, რა რესურსები შეიმატეთ და რის იმედად ამბობთ, რომ არჩევნებზე მარტო გახვალთ და პარლამენტში შეხვალთ?
- ახლა ვმუშაობთ ყველა იმ თემის წამოწევაზე, რაშიც წვლილი შევიტანეთ. კოალიციიდან სახელისუფლო გამოცდილება წამოვიღეთ და ამომრჩეველმა იცის, რომ თუ ხელისუფლებაში მოვალთ, პასუხისმგებლობის აღებასაც შევძლებთ. გამოჩნდა, რომ თანამშრომლობა შეგვიძლია, სანდო პარტნიორები ვართ, შეგვიძლია ვიყოთ მეორე პარტიაც და აქტიურად ვიმუშაოთ, ხედავენ ჩვენს მინისტრებს. ასევე, გვყავს წარმომადგენლები ცესკო-ში, ოლქებსა და კომისიებში.
- პირდაპირ გკითხავთ, თქვენი პარტიის მეორე სახელი ,,ერთპროცენტიანებია”. დღეს, თქვენი აზრით, უკეთესი რეიტინგი გაქვთ?
- 2016 წლის არჩევნებზე ეს მითი დაინგრევა. ვფიქრობ, ეს 2008 წლის არჩევნების ტრავმაა, რადგან მაშინდელმა ხელისუფლებამ ჩვენთვის ამ პროცენტის დაწერაზე იზრუნა. არჩევნები ყალბდებოდა და ეს ყველამ იცის, თუმცა მაშინაც კი 70 000 ხმა ავიღეთ. იმასაც ვხვდებით, რომ სპეციფიკური ამომრჩეველი გვყავს, რომლის ნაწილი კოალიციაში ყოფნით და გარკვეულ კომპრომისებზე წასვლით გავანაწყენეთ. ნაწილი დავკარგეთ, ნაწილი შევიძინეთ. ჩვენი შიდაკვლევებით ჩანს, რომ გარდა ერთგული ამომრჩევლისა, პოტენციურიც არსებობს, რომელსაც უფრო მკვეთრი გზავნილები სჭირდება ჩვენგან, რათა ხმა მოგვცეს. ხალხს გულწრფელად ვეტყვით, იმის მოლოდინი არ გვაქვს, რომ 60%-ს ავიღებთ და უმრავლესობაში მოვალთ, მაგრამ ვფიქრობთ, ჩვენი ხმებით და წილით გავლენას ვიქონიებთ მთავრობასა და პარლამენტის დღის წესრიგზე. ხელისუფლებაში ვიქნებით თუ ოპოზიციაში, მთავარია, ამომრჩეველმა ჩვენი როლი დაინახოს.
- ანუ, არასაპარლამენტო ოპოზიციის რიგებში დასაბრუნებლადაც მზად ხართ?
- თუ ამომრჩეველმა ასე გადაწყვიტა, ასეც იქნება. თუმცა არასდროს დავნებდებით, რადგან მარათონელები ვართ. რა შედეგიც უნდა დადგეს, არც პოლიტიკიდან გავქრებით, არც გავჩუმდებით, 38 წელია ასე ვართ, ამიტომ ეს არჩევნები იმის განმაპირობებელი არ იქნება, ვიარსებებთ თუ არა!
- თუმცა წინასაარჩევნო პერიოდში თქვენი ნაბიჯები პარლამენტში ბევრი რამის განმაპირობებელი შეიძლება გახდეს. უკვე იმაზეც დაიწყო საუბარი, რომ შესაძლოა, ახალი უმრავლესობა შეგროვდეს, რომელსაც ნაციონალები, ,,გირჩი”, თავისუფალი დემოკრატები და დამოუკიდებელი დეპუტატები თქვენთან ერთად შეადგენენ. ასეთი რამ რეალურია?
- არა! გამოვრიცხავთ, ახალი უმრავლესობის ფორმირებას. ჩვენ პარტიას მკაცრად აქვს გაცხადებული, რომ რჩება საპარლამენტო უმრავლესობის რიგებში. არ ვაპირებთ ჩვენი ათი მანდატით ,,ჟონგლიორობას”, როგორც ეს პარტიის პოლიტიკურმა მდივანმა თქვა და ჩვენი პოზიცია არ შეიცვლება. თუმცა არის პრინციპული საკითხები, რაშიც განსხვავებული პოზიცია გვაქვს ,,ოცნებისგან” და თუ ამაში ,,გირჩი”, თავისუფალი დემოკრატები და სხვები დაგვეთანხმებიან, არც ამის კომპლექსი გვექნება.
„ვერსია“, 08 აპრილი, 2016 წელი
ინტერვიუ შალვა რამიშვილთან: რატომ აღარ გავა „იმედზე“ მისი გადაცემები
მაია მიშელაძე
5 აპრილს, ტელეკომპანია „იმედის“ გენერალურმა დირექტორმა გიორგი ბახტაძემ, კომპანია „ზენიტის“ დამფუძნებელს, რომელიც შალვა რამიშვილის გადაცემებს ამზადებს, კონტრაქტი შეუწყვიტა. მიზეზი უცნობია, რის გამოც შალვა რამიშვილი გიორგი ბახტაძეს საჯარო განმარტებას სთხოვს. მედიაში გავრცელებული ინფორმაციით, მსახიობ თათია სამხარაძეს (ტასო ბარნოვა) აქვს სექსუალური შინაარსის ფარული ჩანაწერი შალვა რამიშვილზე, რის გამოც ,,იმედის” ხელმძღვანელმა მისი გადაცემები შეწყვიტა. პარალელურად, „ვერსიის“ წყაროს ინფორმაციით, სამაუწყებლო კომპანია „რუსთავი 2“-მა ხელშეკრულება გაუწყვიტა ინტელექტშოუ ,,რა, სად, როდის” ავტორსა და წამყვანს, გიორგი მოსიძეს. „ვერსიამ“ ორივე ტელეკომპანიასთან დაკავშირებული ინფორმაციები პირველწყაროებთან გადაამოწმა.
შალვა რამიშვილმა სოციალურ ქსელში გაავრცელა ინფორმაცია, რომ 6 აპრილიდან, ,,იმედის” გენერალური დირექტორის გადაწყვეტილებით, ტელეკომპანიის ეთერში აღარ გავა გადაცემები: „პოლიტიკა“, „ილო ბეროშვილის შოუ‘“ სკეტჩ-შოუ „ერთხელ საქართველოში“ და სერიალი „2 გოგო“, რომლის გადაღებები მიმდინარეობს და ეთერში ჯერ არ გასულა. რა მიზეზით შეწყდა შალვა რამიშვილის გადაცემები „იმედზე“, უცნობია. შესაძლოა, ჟურნალისტი ისევ ტელეკომპანია ,,მაესტროს” დაუბრუნდეს. მით უმეტეს, ამგვარ შესაძლებლობას შალვა რამიშვილი ,,ვერსიასთან” საუბრისას არ გამორიცხავს:
- შალვა, ვრცელდება ინფორმაცია, რომ ტელეკომპანია ,,მაესტროზე” აპირებთ გადასვლას…
- არა, ეს თემა ჩემს უახლოეს გარემოცვაში ჯერ არ განიხილება. ეს ძალიან შორეული საკითხია, მაგრამ ახლა მთავარია, ,,იმედის” ხელმძღვანელისგან პასუხი მივიღოთ.
- რატომ შეწყდა თქვენი გადაცემები ,,იმედზე”?
- არსებობს შპს ,,ზენიტი”, რომლის არც დამფუძნებელი ვარ და არც დირექტორი, მას ჩემი მეგობარი ნანა ხიმშიაშვილი ხელმძღვანელობს. ამ კომპანიას ჰქონდა კონტრაქტი ტელეკომპანია ,,იმედთან” და აწარმოებდა ,,ილო ბეროშვილის შოუს”, უზრუნველყოფდა, რომ გადაცემა ,,პოლიტიკა” წამეყვანა, აწარმოებდა სკეტჩ-შოუს ,,ერთხელ საქართველოში”, სერიალს ,,2 გოგო”, რომელიც ეთერში ჯერ არ გასულა. ზოგიერთი კონტრაქტის ხანგრძლივობა თვის ბოლომდეა, ზოგი _ აგვისტომდე, ზოგი _ ორ თვემდე, ოღონდ ყველა ეს ხელშეკრულება მოქმედი იყო. კონტრაქტის თანახმად, მისი შეწყვეტის შესახებ, მინიმუმ, ერთი თვით ადრე უნდა მიგვეღო შეტყობინება. თუმცა 5 აპრილს, ტელეკომპანია ,,იმედის” დირექტორისგან მივიღეთ წერილი, რომლითაც გვაუწყებდა, რომ ყველა ეს კონტრაქტი მოშლილია. ჩვენ არ ვიცით მიზეზი, რადგან წერილში არ ეწერა და ეს არც პირადი საუბრისას უთქვამთ. მინდა, საჯაროდ მივმართო ტელეკომპანია ,,იმედის” ხელმძღვანელობას, დააფიქსირონ ამ კონტრაქტების მოშლის მიზეზი და აგვიხსნან, რატომ დატოვეს 50 კაცი უმუშევარი.
- ამ კონტრაქტების მოშლა ფინანსურად დაგაზარალებთ, თქვენ ხომ გარკვეული სარეკლამო ვალდებულებები გაქვთ?
- დიახ, ჩვენ გვაქვს ვალდებულებები საბანკო ორგანიზაციებთან, რადგან ეს ყველაფერი კრედიტით დაფინანსდა. ბუნებრივია, ბანკებმა სწორედ ამ კონტრაქტების საფუძველზე მოგვცეს კრედიტი.
- ამ ფონზე, ალბათ სასამართლოსაც მიმართავთ?
- თქვენ ამ საქმის სასამართლო პერსპექტივაზე საუბრობთ, მაგრამ ჩვენ ჯერ ამაზე არ ვმუშაობთ. ამ ეტაპზე, სარჩელს არ ვამზადებთ, რადგან ჯერ ტელეკომპანიის ხელმძღვანელისგან გვინდა გავიგოთ პასუხი კითხვაზე _ რატომ გაწყვიტეს კონტრაქტი.
- კონტრაქტის გაწყვეტა პოლიტიკურ მოტივს ხომ არ უკავშირდება?
- არა, ეს ხელისუფლების ბრალი ცალსახად არ არის!
—————-
მართალია, შპს ,,ზენიტის” შემთხვევაში, შალვა რამიშვილსა და ნანა ხიმშიაშვილს საქმიანი ურთიერთობა არ აკავშირებთ, მაგრამ ,,ვერსიამ” სამეწარმეო რეესტრში რეგისტრირებული სხვა კომპანიის ამონაწერს მიაკვლია, სადაც მეგობრები საქმიან პარტნიორებად გვევლინებიან. რაც მთავარია, ,,ილო ბეროშვილის შოუსა” და სკეტჩშოუ ,,ერთხელ საქართველოს” ტიტრებში მითითებულია, რომ გადაცემების პროდიუსერი ნანა ხიმშიაშვილია, რაც სრულიად ბუნებრივია. ამ გადაცემებს სწორედ ,,ზენიტის” სტუდიის ბაზაზე ამზადებდნენ.
შპს ,,ზენიტი” რეესტრში 2014 წლის 13 მარტს, ბათუმში, გონიოს დასახლებაში დარეგისტრირდა. კომპანიის დირექტორი და 100%-იანი წილის მფლობელი ნანა ხიმშიაშვილია. პარალელურად, ოფიციალურად რეგისტრირებულია კომპანია ,,სიგმა პლუსიც”, რომლის 100%-იან წილს შალვა რამიშვილი ფლობს, ხოლო დირექტორი ნანა ხიმშიაშვილია. 2011 წლის 30 დეკემბერს, რეესტრში შპს ,,შალვა რამიშვილი და ჩO” დარეგისტრირდა, აქაც 100%-იან წილს შალვა რამიშვილი ფლობს, ხოლო დირექტორი ნანა ხიმშიაშვილია. სამეწარმეო რეესტრის ამონაწერიდან ჩანს, რომ 2014 წლის 28 მაისს (,,ზენიტის” რეგისტრაციიდან ორ თვეში), შპს ,,შალვა რამიშვილი და СO” ახალი სახელით _ ,,სიგმა პლუსით” დარეგისტრირდა.
2011 წლის 17 ოქტომბრიდან, შალვა რამიშვილი ,,ქართული პარტიის” წევრის, სოფიო ხორგუანის კომპანია “7 Z”’-ს დაუკავშირდა. ამ კომპანიაში 51%-იან წილს სოფიო ხორგუანი, 33%-იან წილს შალვა რამიშვილის ყოფილი მეუღლე, თეა აბაშმაძე, ხოლო 15%-იან წილს შალვა რამიშვილი ფლობდნენ. მანამდე, ამ კომპანიის წილებს სოფიო ხორგუანი, თეა აბაშმაძე და ლელა ფირალიშვილი განკარგავდნენ. “7Z”’, რომელიც გია გაჩეჩილაძის, ანუ ,,უცნობის” საპროდიუსერო კომპანიის შვილობილი იყო, აწარმოებდა მულტსერიალ ,,სამსონაძეებს”, რომელიც ტელეკომპანია ,,იმედის” ეთერში 2009-2010 წლებში გადიოდა, ამავე კომპანიის გადაღებულია ,,ბარამბოსა” და ,,სენტას” სარეკლამო რგოლებიც. 2011 წლის 17 ოქტომბერს გადაწყდა, რომ შალვა რამიშვილის ავტორობით, ეს კომპანია გადაიღებდა მულტსერიალ ,,დარდუბალა 2”-ს, რომელიც ტელეკომპანია ,,მაესტროს” ეთერში გადიოდა. სხვათა შორის, სწორედ 5 წლის წინ, 17 ოქტომბერს გადაწყდა, რომ მულტსერიალს მთლიანად ბიძინა ივანიშვილი დააფინანსებდა და შესაბამისად, კომპანია ,,7Z”-ში მეწილეების სხვა კონფიგურაცია გაჩნდა.
2011 წლის 17 ოქტომბრის ამბავი შემთხვევით არ გაგვიხსენებია. ჯერ კიდევ 6 აპრილს, გვიან საღამომდე ვფიქრობდით, რომ ,,იმედის” გენერალური დირექტორის მოულოდნელი გადაწყვეტილება პოლიტიკურად მოტივირებულ ფინანსურ თვალთმაქცობას უკავშირდებოდა. რაც მთავარია, შალვა რამიშვილსა და ,,უცნობს” სწორედ ეს ძველი კომპანია აკავშირებდათ, რაც ახლა იმას ნიშნავს, რომ შესაძლოა, რამიშვილი მართლაც ,,მაესტროზე” დაბრუნდეს.
,,ვერსია” დაინტერესდა, რა აკავშირებ ამ კომპანიებს და კომენტარისთვის ,,ზენიტის” დირექტორს, ნანა ხიმშიაშვილს მიმართა. მან იურისტებთან შეხვედრა მოიმიზეზა და დაგვპირდა, რომ შეხვედრის შემდეგ გვიპასუხებდა, თუმცა უშედეგოდ… 6 აპრილს, გვიან საღამოს, საინფორმაციო სააგენტოების საშუალებით ისეთი ინფორმაცია გავრცელდა, რომ ჩვენი ვერსია ფინანსურ თვალთმაქცობასთან დაკავშირებით, გაქარწყლდა. სააგენტოების ინფორმაციით, ,,შალვა რამიშვილი მსახიობ თათია სამხარაძესთან, იგივე ტასო ბარნოვასთან, სექსუალური ძალადობის მცდელობის გამო, ტელევიზიიდან გაათავისუფლეს. ტასო ბარნოვამ კი შალვა რამიშვილს სასამართლოში უჩივლა”.
კარგად ინფორმირებული წყაროს საშუალებით, ,,ვერსიამ” შეიტყო, რომ რამდენიმე დღის წინ, შალვა რამიშვილმა საკუთარი შოუდან გაათავისუფლა მსახიობი თათია სამხარაძე, რომელიც ხან ფისო ბოტკოველის, ხან ტასო ბარნოვას როლში გვევლინებოდა. კვირას, 3 აპრილს, ,,ილო ბეროშვილის შოუში”, ტასო ბარნოვა პირველად არ გამოჩნდა, მის ნაცვლად, ,,თბილისი ფეშენ ვიკი” მსახიობმა ნოდარ გურგენაშვილმა გააშუქა. ,,ვერსიის” წყაროს ინფორმაციით, შანტაჟის ან სამაგიეროს გადახდის მიზნით, თათია სამხარაძე შალვა რამიშვილს დაემუქრა, რომ ფარულ ჩანაწერს გამოაქვეყნებდა. თუმცა რა შინაარსისაა ეს ფარული ჩანაწერი, მართლა იძალადა თუ არა რამიშვილმა სამხარაძეზე, არის თუ არა ეს თათია სამხარაძის შურისძიება, ეს შესაბამისი უწყებების კვლევის საგანია. წყაროს ინფორმაციით, შალვა რამიშვილისა და თათია სამხარაძის დაპირისპირებასთან ,,იმედის” ხელმძღვანელობას არაფერი აკავშირებს, რადგან თათია სამხარაძე რამიშვილის მიერ დაქირავებული მსახიობია. თუმცა თუ ამგვარი ფაქტი მართლაც მოხდა, ცოტა უხერხულია, კვირის მთავარი პოლიტიკური თოქშოუ არხზე წაიყვანოს ადამიანმა, რომელიც ძალადობაში ამხილეს…
ცხადია, წყაროს ინფორმაციის გადამოწმება ,,ვერსიამ” თავად თათია სამხარაძესთან სცადა, მაგრამ მან ჩვენს სატელოფონო ზარებსა და მოკლე ტექსტურ შეტყობინებებს არ უპასუხა. სამაგიეროდ, 7 აპრილს, შალვა რამიშვილმა სოციალურ ქსელში ეს განცხადება გამოაქვეყნა: ,,ვრცელდება ხმები, თითქოს ეს ყოველივე (გულისხმობს ,,იმედზე” დახურულ გადაცემებს) დაკავშირებულია ჰიპოთეტურად არსებულ სექსუალური შინაარსის ფარულ ჩანაწერთან, რომელიც თითქოს აქვს კომპანიის ყოფილ თანამშრომელს თათია სამხარაძეს და რომელიც შეიცავს ს/ს დანაშაულის ნიშნებს ან/და არის ჩემი რეპუტაციის შემლახავი. აგრეთვე ჟურნალისტურ წრეებში ვრცელდება ხმები, თითქოს ამ ჩანაწერს გაეცნო ,,რუსთავი 2”-ის ზოგიერთი თანამშრომელი, მაგალითად, ნანუკა ჟორჟოლიანი. მოვითხოვ, თათია სამხარაძემ, ნანუკა ჟორჟოლიანმა, ასევე ნებისმიერმა პირმა, რომელსაც თითქოს აქვს აღნიშნული ჩანაწერი ან იცის მისი შინაარსის შესახებ, საჯაროდ განაცხადოს. მე ორი დღის წინ უკვე შევიტანე განცხადება პროკურატურაში. მოვითხოვ ,,იმედის” ხელმძღვანელობისაგან: ტელევიზიის დირექტორმა უთხრას თქვენს მონა-მორჩილს, სამსახურის გარეშე დარჩენილ ჩემს 50 თანამშრომელს და რა თქმა უნდა საზოგადოებას, გაეცნო თუ არა ამ რაღაც ჩანაწერს და არის თუ არა ეს კონტრაქტების ნაჩქარევი და იურიდიულად გაუმართავი შეწყვეტის მიზეზი.
ასევე მივმართავ ყველას, ვისაც ეს ეხება: თუ გაეცანით ჩანაწერს ან მოიპოვეთ იგი და თუ ჩანაწერში იკვეთება რაიმე სახის დანაშაული, თქვენი ვალია, აცნობოთ ამის შესახებ პროკურატურას. თუ ვინმე საკუთარ თავს რაიმე სახის ძალადობის მსხვერპლად მიიჩნევს, განაცხადოს საჯაროდ ან მიმართოს კომპეტენტურ ორგანოებს. ყურადღება! თუ ეს რაღაც ჩანაწერი შეიცავს ჩემს მაკომოპრემეტირებელ ცნობებს, ყველას ვალია, არ დაუშვათ ჩანაწერის უკანონო გასაჯაროება, რაც შესაბამის სამართლებრივ შედეგებს გამოიღებს. მე დასამალი აღარაფერი მაქვს!”
———-
,,იმედზე” განვითარებული მოვლენების პარალელურად, ,,ვერსიამ” კონფიდენციალური წყაროს საშუალებით შეიტყო, რომ სამაუწყებლო კომპანია ,,რუსთავი 2”-ის ხელმძღვანელობამ ხელშეკრულება გაუწყვიტა ინტელექტშოუ ,,რა, სად, როდის” წამყვან გიორგი მოსიძეს. მიზეზი პოლიტიკურია, რამდენიმე დღის წინ, ,,ვერსიაში” გამოქვეყნდა სტატია, რომელშიც ,,ქართული ოცნების” საარჩევნო სიის ძირითადი შემადგენლობა დასახელდა. ,,ვერსიის” კულუარული ინფორმაციით, ამ სიაშია გიორგი მოსიძეც. ჩვენი წყაროს ინფორმაციით, ნიკა გვარამიამ გიორგი მოსიძე სწორედ ამ მიზეზით გაუშვა არხიდან. წყაროს ინფორმაციის გადასამოწმებლად, ,,ვერსია” სამაუწყებლო კომპანია ,,რუსთავი 2”-ის დირექტორს, ნიკა გვარამიას დაუკავშირდა:
- ბატონო ნიკა, რა მიზეზით შეუწყვიტეთ ხელშეკრულება ,,რა, სად, როდის” ავტორს?
- არ არის მართალი! უბრალოდ, ამ გადაცემას სპონსორებთან დაკავშირებული პრობლემა ჰქონდა, მაგრამ დეტალებს ვერ დაგისახელებთ. ჯერჯერობით, თვითონ გადაცემის გუნდი ეძებს სპონსორებს, რა თქმა უნდა, ჩვენი გარანტიით, რომ ,,რა, სად, როდის” ეთერს მივცემთ. გადაცემის ახალი სეზონი ისედაც მაისში უნდა დაიწყოს და ვფიქრობ, ამ ფინანსური პრობლემის მოგვარება მოესწრება. დეტალებს გიორგი მოსიძე აგიხსნით, საქმის კურსში არ ვარ, უბრალოდ, ველოდები, როდის მეტყვიან, რომ იწყებენ გადაცემას.
- გიორგი მოსიძეს მისი პოლიტიკური შეხედულების გამო გაუწყვიტეთ კონტრაქტი?
- რა სისულელეა, ცხადია, რომ არა!
————–
,,ვერსიას” ინტელექტკლუბ ,,რა, სად, როდის” პრეზიდენტი და ამ გადაცემის უცვლელი წამყვანი, გიორგი მოსიძე ესაუბრება:
- ბატონო გიორგი, ,,რუსთავი 2”-მა ხელშეკრულება შეგიწყვიტათ?
- რა თქმა უნდა, არა. ეს იყო შარშანდელი, ერთწლიანი ხელშეკრულება, რომლის ვადა ამოიწურა. წლევანდელი ხელშეკრულება უკვე გავაფორმეთ და 7 მაისს, ეთერში ამ გადაცემის გაზაფხულის სერია გავა. გარკვეული პრობლემები გვქონდა სპონსორებთან დაკავშირებით, რადგან კრიზისია, მაგრამ ახლა ეს პრობლემა მოგვარდა, მოლაპარაკება შედგა და სპონსორებიც გვყავს. მათგან ზოგი ძველია, ზოგი ახალი, მაგრამ გადაცემას 7 მაისს დავიწყებთ.
- ,,ვერსიის” წყაროს ინფორმაციით, GDS-ზე აპირებდით ,,რა, სად, როდის” გაშვებას…
- არა, რადგან არავითარი მოლაპარაკება და საუბარიც კი, სადმე, სხვა არხზე გადავსულიყავით, არ ყოფილა. რაც მთავარია, ,,რუსთავი 2” ყველაზე მაღალი ხარისხის შოუებს აკეთებს. ჩვენ კი ხარისხს საკმაოდ დიდ ყურადღებას ვაქცევთ.
- ის ფაქტი, რომ შესაძლოა, გიორგი მოსიძე ,,ქართული ოცნების” სიაში ვიხილოთ, თქვენს თანამშრომლობაზე ,,რუსთავი 2”-თან არ აისახება?
- ვინ თქვა, რომ ,,ქართული ოცნების” სიაში მოვხვდები? ჭორია, რადგან ამასთან დაკავშირებით ინფორმაციას არ ვფლობ. ყოველ შემთხვევაში, ამ თემაზე არავინ დამკავშირებია.
———-
P.S. 7 აპრილს, საღამოს, ტელეკომპანია „იმედმა“ ჟურნალისტ შალვა რამიშვილთან დაკავშირებით განცხადება გაავრცელა. შპს „ტელეიმედმა“ შალვა რამიშვილთან დაკავშირებულ კონ¬ტრაქტორ კომპანიასთან გაწყვიტა საქმიანი ურთიერთობა. რაც შეეხება იმ სატელევიზიო პროდუქტებს, რომლებსაც ეს კომპანია ,,იმედისთვის” ამზადებდა და გადიოდა ეთერში, არხი ინარჩუნებს ამ გადაცემებს და შემოქმედებითი ჯგუფის წამრომადგენლებთან თანამშრომლობის გაგრძელებას აპირებს.
„ალია“, 08 აპრილი, 2016 წელი
ინტერვიუ გია ბურჯანაძესთან: ფარული ვიდეოებით რიგითი მოქალაქეების დაჟანტაჟებაც დაიწყეს?!
“მას შემდეგ რაც მთავარი პროკურორის ირაკლი შოთაძის მოადგილემ განცხადება გააკეთა, რომ თურმე შს სამინისტრო და სახელმწიფო უსაფრთხოების სამსახური მოკლებულია იმ კომფორტს, რომ მიაკვლიონ “იუთუბზე” გავრცელებული პირადი ცხოვრების ამსახველი ვიდეოკადრების გამავრცელებლების ვინაობას, ეს ერთგავარას იმ კრიმინალების წახალისები აღმოჩნდა, რომლებმაც დღეს თავი წამოყვეს. ჩვენს ორგანიზაციას უკვე ათამდე ადამიანმა მიმართა, რომლებიც დაახლოებით ერთნაირ ისტორიას ჰყვებიან – მონათხრობის მიხედვით 4-5 წლის წინ ეს ადამიანები იმყოფებოდნენ სხვადასხვა სასტუმროებში მანდილოსნებთან ერთად, რაც გადაღებულია ვიდეოფირებზე და დღეს ეს მასალები გამოყენებულია შანტაჟისთვის”, – აცხადებს “ანტიკორუფციული კავშირის” ხელმძღვანელი გია ბურჯანაძე გაზეთ “ალიასთვის” მიცემულ ინტერვიუში, სათაურით ფარული ვიდეოებით რიგითი მოქალაქეების დაჟანტაჟებაც დაიწყეს? / რას ურჩევენ ასეთ ადამიანებს და რას აცხადებენ შსს-ში?
“ადამიანები, რომლებიც ეწევიან შანტაჟს – ისინი უკავშირდებიან გადაღებულ პირებს, ემუქრებიან ფირების გადასაჯაროებით ან ოჯახის წევრებისთვის გადაცემით თუ არ გადაუხდიან კონკრეტულ თანხას – არ ყოფილან თანამდებობის პირები. ჩანაწერები მოიგდეს ხელში სხვადასხვა ხერხით და ფულს სძალავენ ადამიანებს. ცნობილია, რომ ასეთი ვიდეოკადრების ასლები დღემდე ინახება. თუ ეს ვიღაცისთვის პოლიტიკური ვაჭრობის თემა იყო და ამიტომ გაავრცელეს, არიან ისეთებიც, პოლიტიკოსები არ არიან და არავის გასარჩევი არ უნდა გახდეს, ისე მეუღლეს ღალატობს თუ რა ხდება მის ცხოვრებაში. ჩვენი ორგანიზაცია არასამთავრობოა, ამიტომაც მეტად გვენდობიან, ეს ადამიანები მოდიან ჩვენთან და გვეკითხებიან როგორ მოიქცნენ, არ იციან რა გააკეთონ… ჩვენც ვერ ვეხმარებით, მაგრამ ფაქტია, ადგილი აქვს სერიოზულ ფსიქოლოგიურ ძალადობას არ არიან დარწმუნებული, რომ ვინც მათ აშანტაჟებს დასჯიან – უამრავი სამქ გადაცემუი საგამოძიებო ორგანოებში, მაგრამ არ იძიებენ, ეს იციან და მათთან კონტაქტზე არ მიდიან”, – აღნიშნავს გამოცემის კორესპონდენტთან საუბრისას გია ბურჯანაძე.
“ჩანს, დასჯა არ შედის მათ ინტერესში – ვინ უნდა დასაჯონ, ადამიანები ვინც თავის დროზე ამ საქმიანობით იყვნენ დაკავებული და ახლა მათ გვერდით მუშაობენ? როცა ასეთი ფაქტები ხდება გამოდიან და მერე ამბობენ, რომ თურმე მათ არ ხელეწიფებათ ასეთი შემთხვევების გამოძიება… ასეთ ადამიანებს საგამოძიებო სამსახური რაღაც იმედს მაინც უნდა უტოვებდეს, რომ ამ ეტაპზე თუ ვერა, შემდეგში მაინც მოჰყვება ამას სამართლებრივი რეაგირება. ჩვენგან გადაგზავნილი ათეულობით მასალა დევს დღემდე პროკურატურაში. შს სამინისტროში, მაგრამ ნაბიჯი არ იდგმება, რომ რამე გაკეთდეს”, – დასძენს რესპონდენტი.
