„რეზონანსი»: საარჩევნო მარათონი დაიწყო. საით წავა „პროდასავლური“ და „ანტიდასავლური“ ხმები?
„რეზონანსი“: „პატრიოტთა ალიანსი“ ექვს წევრიან პარტიულ ბლოკს ქმნის
“ალია”: ექვსი ჩამჭრელი კითხვა ბიძინა ივანიშვილს // რა მტკიცებულებების დადებას აპირებს ზაზა ხატიაშვილი ივანიშვილისთვის?
„რეზონანსი“: ინტერვიუ ლევან ბერძენიშვილთან: “მომავალი პარლამენტი მრავალპარტიული, მთავრობა კი კოალიციური იქნება”
„რეზონანსი“: ინტერვიუ სოსო ცინცაძესთან: “ბიძინა ივანიშვილის ფენომენი” მეტი აღარ განმეორდება“
„ახალი თაობა“: ინტერვიუ სოსო ცინცაძესთან: „ბიძინა ივანიშვილი თუ პატა ბურჭულაძე?“ // „ძირითადი მეტოქეობა ამ ორ ადამიანს შორის იქნება“
„ახალი თაობა“: ინტერვიუ ბიძინა გუჯაბიძესთან: „გიორგი ვაშაძეს კავშირი არ გაუწყვეტია მიხეილ სააკაშვილთან“ // „ორპოლუსიანობა არ გამოვა“
„ახალი თაობა“: ინტერვიუ რამაზ საყვარელიძესთან: „ორპოლუსიანობა ბიძინა ივანიშვილის მიზანი არ არის“ // „თვითკრიტიკა მის გუნდს დაეხმარება“
„ახალი თაობა“: ინტერვიუ ანი მიროტაძესთან: „ქვეყნის მართვის სისტემა შესაცვლელია“ // რაზე ისაუბრეს ბიძინა ივანიშვილმა, კახა შარტავამ და გუბაზ სანიკიძემ?
„ახალი თაობა“: ინტერვიუ ნუგზარ წიკლაურთან: „ბიძინა ივანიშვილი მიდის“ // „ხელისუფლების განცხადებების კომენტირება უკვე შეუძლებელია“
———-
„რეზონანსი“: “ვიზალიბერალიზაციის ზაფხულში დასრულება გამორიცხულია. ფაქტობრივად საკითხი უკვე გადავადებულია”
„რეზონანსი“: ოპტიმისტურად ხართ თუ არა განწობილი, რომ ვიზალიბერალიზაციის გადაწყვეტილება მალე იქნება?
——————–
„რეზონანსი“, 09 ივნისი, 2016 წელი
საარჩევნო მარათონი დაიწყო. საით წავა “პროდასავლური” და “ანტიდასავლური” ხმები?
ეკატერინე ბასილაია
წინასაარჩევნო მარათონი ოფიციალურად გაიხსნა. პრემიერ-მინისტრმა არჩევნებთან დაკავშირებით პრეზიდენტის მიერ გამოცემულ განკარგულებას ხელი გუშინ მოაწერა და საარჩევნო კამპანიაც დაიწყო. მარათონის პირველსავე დღეს პირველი საარჩევნო ბლოკიც უკვე გამოჩნდა – ე.წ. ანტიდასავლურ ფლანგზე. “პატრიოტთა ალიანსმა” 5 მცირე პარტიასთან ბლოკის შექმნა გამოაცხადა. ინაშვილთან შეერთებას არ გამორიცხავენ “მრეწველებიც” და თამაზ მეჭიაურიც, თავისი ახლად შექმნილი პარტიით. ზურაბ ტყემალაძე ამბობს, რომ “ერთ თვეში იტყვის”. სხვა რამე გაერთიანება კი, ჯერჯერობით, დაანონსებული არ არის. უფრო მეტიც, დანარჩენი პოლიტიკური პარტიები, ახლად შექმნილები თუ ძველები, კატეგორიულად გამორიცხავენ არჩევნებისთვის სხვასთან ერთობას.
გუშინ ირმა ინაშვილმა საჯაროდ განაცხადა, რომ ხუთ პარტიასთან ერთად საარჩევნო ბლოკს ქმნის. მისი წევრები არიან, ასევე: კახა კუკავას პარტია “თავისუფალი საქართველო”, კონსტანტინე გამსახურდიას “თავისუფლება”, აკაკი ასათიანის “ტრადიციონალისტთა კავშირი”, გოჩა ჯოჯუას “ახალი ქრისტიან-დემოკრატები” და გია ბერძენაძის “ძალოვან ვეტერანთა და პატრიოტთა პოლიტიკური მოძრაობა”. ბლოკის სახელწოდებაა “დავით თარხან-მოურავი, ირმა ინაშვილი – პატრიოტთა ალიანსი – გაერთიანებული ოპოზიცია”.
ინაშვილმა ახალ გაერთიანებაში დაპატიჟა ყველა, “რესპუბლიკელებისა” და “ნაციონალების” გარდა, რაც, პრინციპში, მოსალოდნელი იყო.
ინაშვილთან ერთიანობის სურვილი კი ორი დღის წინ გაახმოვანა თამაზ მეჭიაურმა, რომელმაც ახალი პარტია “თამაზ მეჭიაური – ერთიანი საქართველოსთვის” დააფუძნა და მასში “ოცნების” ყოფილი რამდენიმე ცნობილი მხარდამჭერი უკვე გაერთიანდა. მაგალითად “ოცნების” ახალგაზრდული ფრთის დამფუძნებელი დავით ფაცაცია, დიასპორის საკითხებში სახელმწიფო მინისტრის ყოფილი მოადგილე სანდრო ბრეგაძე და წინა ხელისუფლების დროს მოკლული ბუტა რობაქიძის დედა ია მეტრეველი. მეჭიაურმა განაცხადა, რომ მისი პარტია მმართველ გუნდს ეწინააღმდეგება საგარეო კურსთან მიმართებით, ასევე იმაში, რომ “ოცნებამ” სამართლიანობის აღდგენა სათანადოდ ვერ მოახერხა და მისი პოლიტიკური გაერთიანება ითანამშრომლებს ამგვარად მოაზროვნე “მეგობარ პარტიებთან”. მეგობარ პარტიებში კი, რა თქმა უნდა, საგარეო პოლიტიკური მიმართულებით ევროატლანტიკური კურსის მოწინააღმდეგე პარტიები, პირველ რიგში კი “პატრიოტთა ალიანსი” იგულისხმა კიდეც.
ირმა ინაშვილისა და თამაზ მეჭიაურის მიმართ ასევე კეთილგანწყობილია “მრეწველების” თავმჯდომარე ზურაბ ტყემალაძე. “ჯერჯერობით არ ვაპირებთ, ვნახოთ, რას მოგვიტანს დარჩენილი დრო. გამორიცხვით არ გამოვრიცხავთ. თუ რამე იქნება, ერთი თვის შემდეგ. ჯერ საუბარი არც ინაშვილთან გვქონია და არც მეჭიაურთან. იმ პარტიებთან კი, რომლებიც “ქართული ოცნების” ბლოკში შედიოდნენ, გაერთიანებას არ ვაპირებთ,” – ამბობს ტყემალაძე.
ამავე ფლანგზე კიდევ ერთი პოლიტიკური პარტია, ნინო ბურჯანაძის “დემოკრატიული მოძრაობაა”. თუმცა პარტიის წევრი ზაზა ვეკუა “რეზონანსთან” საუბრისას ამბობს, რომ ისინი დამოუკიდებლად იყრიან კენჭს. “არავისთან ბლოკის შექმნას არ ვგეგმავთ. საუბრები და შემოთავაზებები, რა თქმა უნდა, იყო, თუმცაღა ჩვენ მიგვაჩნია, რომ ბლოკების შექმნამ და პატარა პარტიების გაყვანამ არ გაამართლა, რადგან ამგვარი ბლოკები შემდეგ ყოველთვის იშლება. ამიტომაც არ გვინდა წარსულს დავუბრუნდეთ. პარლამენტში კი თემატურად ყველასთან შეიძლება თანამშრომლობა,” – ამბობს ზაზა ვეკუა.
“პატრიოტთა ალიანსსა” და “დემოკრატიულ მოძრაობას” დაახლოებით ერთი და იმავე მსოფლმხედველობის ამომრჩეველი ჰყავთ და პოლიტოლგები მიიჩნევენ, რომ ეს ორი ძალა გარკველწილად ხმებს ერთმანეთს წაართმევს. მეჭიაურსა და “მრეწველებს” ცალკე, თუმცა თუკი ისინიც “პატრიოტების” ბლოკში შევლენ, ეს ბლოკი დაჯაბნის კიდეც ნინო ბურჯანაძის პარტიას.
პოლიტიკურ ასპარეზზე ასევე მრავლადაა პოლიტიკური ძალები პროდასავლურ ფლანგზეც. მათ შორის არიან ძველებიც და ახლებიც. ძველებიდან “ქართულ ოცნებასა” და “ნაციონალურ მოძრაობას” დამოუკიდებლად პარლამენტში შესვლის გასაჭირი არ აქვთ და არც აპირებენ რაიმე ბლოკის შექმნას. ორივე ძალას ამბიცია პირველობაზე აქვს და დიდი ჯაფაც ამაზეა.
“ქართულმა ოცნებამ” თვეების წინ განაცხადა, რომ ცალკე აპირებს არჩევნებზე გასვლას და კოალიციაში შემავალი პარტიებისთვის ეს არცთუ სასიამოვნო სიურპრიზი აღმოჩნდა. გუშინ კი საარჩევნო მარათონის ოფიციალურად გახსნის დღესვე, პრემიერმა გამოაცხადა პარტიის საარჩევო შტაბის უფროსიც. შტაბს, როგორც წინა არჩევნებზე, ისევ ვიცე-პრემიერი კახა კალაძე უხელმძღვანელებს.
პირველ-მეორე ადგილებს არა, მაგრამ პარლამენტში შესვლისთვის აქტიურობენ “თავისუფალი დემოკრატები”, რომლებსაც, ბოლო კვლევებით, 6-7% აქვთ და რომლებიც უკვე რამდენი ხანია აცხადებენ, რომ არავისთან აპირებენ გაერთიანებას.
კვლევებში არაფერია ნათქვამი, მაგრამ 5%-იანი ბარიერის დამოუკიდებლად გადალახვის დიდი იმედი აქვთ “რესპუბლიკელებს”. ასევე ჯერ ბლოკზე არ საუბრობენ არც ყოფილი “ნაციონალებისგან” შექმნილი ახალი პარტიები – “გირჩი” და გიორგი ვაშაძის მოძრაობა.
ასევე დამოუკიდებლად აპირებს გასვლას არჩევნებზე პაატა ბურჭულაძის ახლად შექმნილი პარტია “სახელმწიფო ხალხისთვის”.
“გამოვრიცხავთ. ჩვენ არავისთან არ შევდივართ ბლოკში. არჩევნებში მარტო გავდივართ, იქიდან გამომდინარე, რომ ჩვენ წარმატების მიღწევის ყველაზე საუკეთესო რესურსი გვაქვს,” – აცხადებს პარტიის ერთ-ერთი ლიდერი ხათუნა ლაგაზიძე.
პოლიტოლოგი და ფსიქოლოგი რამაზ საყვარელიძე თვლის, რომ, როგორც წესი, მომგებიანია, როდესაც ერთსა და იმავე ამომრჩეველზე გამსვლელი პარტიები ერთიანდებიან, რომ ამით ხმები არ დაიფანტოს.
მისი თქმით, ერთსა და იმავე ამომრჩეველზე გადის მეჭიაურიც, თოფაძეც, ინაშვილიც და ბურჯანაძეც, რომლებიც ანტიდასავლეთელებად მიიჩნევიან. მეორე ფლანგზე კი უფრო მრავალფეროვნებაა და მათი დაჯგუფება მარტო დასავლური საგარეო კურსის მთლად სწორი არ არის. თუმცა მათ შორისაც არის პარტიები, რომლებიც გაერთიანებით არ წააგებდნენ, მაგალითად, მიიჩნევს, რომ “რესპუბლიკელები” მოიგებდნენ თუ “თავისუფალ დემოკრატებთან” იქნებიან. ასევე, რაღაც დონეზე შესაძლებლად მიიჩნევს ყოფილი “ნაციონალების” ერთობასაც.
“მრეწველებისა” და მეჭიაურის გუნდის ერთობა მომგებიანი იქნება. თუმცა ვნახოთ, რამდენად იაქტიურებენ და რას შემოგვთავაზებენ. ისინი ყურადღების ცენტრში განცხადებებით გახდნენ და ახლა მთავარია შეძლონ, ელექტორატის ყურადღების ცენტრში ისევ დარჩენენ. ნინო ბურჯანაძე ძლიერი ლიდერია და მასთან ბლოკის შექმნა სხვა ლიდერების ჩრდილში ყოფნას მოასწავებს, ამიტომაცაა, რომ მასთან ერთობა სხვებისთვის მომგებიანი არ არის. ინაშვილის მიერ შექმნილი ბლოკი ბუნდოვანია. მგონია, რომ სხვადასხვა ორიენტაციის ამომრჩეველზეა გათვლილი. მაგალითად გამსახურდიას ამომრჩეველი სხვა ორიენტაცისაა, ინაშვილის – სხვა. თავისთავად იმას, რომ პოლიტიკური ლიდერები ერთმანეთს მხარში დაუდგებიან, აქვს წონა და მნიშვნელობა. ამ კოალიციაში პოლიტიკური განცხადების უნარის მქონე ლიდერი ბევრი იქნება და ეს დადებითია, მაგრამ ხმების უფრო მეტად მოზიდვის თვალსაზრისით, რაიმე დიდი შენამატი არ იქნება. “პატრიოტთა ალიანსს” ეს ბლოკი ხმებს არ მოუმატებს. საარჩევნო პროცესში გამოჩნდება, ვის რა აქვს მომარაგებული,” – მიიჩნევს საყვარელიძე და აღნიშნავს იმასაც, ჯერჯერობით საზოგადოების ყველაზე დიდი ინტერესი მაინც სიახლის, ინაშვილის მიმართაა და ის ამ ფლანგზე უდავოდ ლიდერია.
“პროდასავლური ხმებიდან ძალიან ბევრს “ნაციონალები” წაიღებენ. მას შეიძლება ის ხმები განერიდოს, რომლებიც პროდასავლურად კი არიან განწყობილი, მაგრამ აქვთ უარყოფითი დამოკიდებულება მათი წინა მმართველობის მიმართ. ასეთი ხმები ალბათ უმეტესად ალასანიას გუნდისკენ წამოვა და ნაწილობრივ “რესპუბლიკელებისკენ”. გააჩნია, “რესპუბლიკელები” ამომრჩეველს თავს როგორ შესთავაზებენ. “გირჩის” აქტივობებს პირადად მე ვერ შევესწარი და მათზე ვერაფერს ვიტყვი, მაგრამ ვაშაძეს კი ძალიან საინტერესო ნიშა აქვს. მას ორიენტაცია ახალგაზრდებზე აქვს აღებული და თუ ეს ნიშა მყარად დაიკავა, შესაძლოა, პერსპექტიული აღმოჩნდეს არა გეოპოლიტიკური ორიენტაციით, არამედ ასაკობრივი ორიენტაციით,” – ამბობს საყვარელიძე.
საყვარელიძის თქმით, ასევე “საინტერესოა” პაატა ბურჭულაძის პარტია. თვლის, რომ ის ალბათ “ნაციონალების” და ნაწილობრივ “ქართული ოცნების” ამომრჩევლებს წაიყვანს. გეოპოლიტიკური ორიენტაცია კი მასზე არ გადატყდება და მის მიმართ არ იქნება იმ რანგის მსჯელობა, მკაფიოდ პროდასავლურია თუ მკაფიოდ ჩრდილოური ეს პოლიტიკური ძალა.
“ოცნების” საწინაღმდეგოდ განწყობილ ამომრჩეველს მიიზიდავს. ვხედავთ, რომ “ნაციონალური მოძრაობის” მიმართ კრიტიკული არ არის, მათ ფორმულებს იმეორებს და მათთან “ნაციონალების” ხმების მოხვედრა გასაკვირი არ არის. ბარამიძემაც განაცხადა, მათთან ალიანსთან თანახმა ვიქნებითო. ასევე მასთან მივა იმედგაცრუებული და ზომიერი “ოცნების” ხმებიც. თუ ქართველი ამომრჩევლების ტიპებს დავაკვირდებით, ჭარბად არის სახელიანი ადამიანების მოყვარულთა ჯგუფები და თან, თუ ეს სახელი მთლად პოლიტიკური არ არის და ქველმოქმედებას და ხელოვნებას უკავშირდება. ამიტომაც, ერთ სახელიან ადამიანთან, ივანიშვილთან ნამყოფი კაცი, თუ მას იმედი გაუცრუვდა, მგონი, ისევ სახელიანის ძიებას დაიწყებს. ამიტომაც ბურჭულაძეს შანსი აქვს, ორივე პარტიას წაართვას ხმები და პარლამენტში შევიდეს,” – მიიჩნევს საყვარელიძე.
„რეზონანსი“, 09 ივნისი, 2016 წელი
„პატრიოტთა ალიანსი“ ექვს წევრიან პარტიულ ბლოკს ქმნის
თიკო ოსმანოვა
წინასაარჩევნოდ მორიგი საარჩევნო ბლოკი იქმნება – “საქართველოს პატრიოტთა ალიანსი” ხუთ პარტიასთან ერთიანდება. ახალი საარჩევნო ბლოკის სახელწოდებაა “დავით თარხან-მოურავი, ირმა ინაშვილი – პატრიოტთა ალიანსი – გაერთიანებული ოპოზიცია”.
საარჩევნო ბლოკში შედიან: “საქართველოს პატრიოტთა ალიანსი”, კახა კუკავას პარტია “თავისუფალი საქართველო”, კონსტანტინე გამსახურდიას პარტია “თავისუფლება”, აკაკი ასათიანის “ტრადიციონალისტთა კავშირი”, გოჩა ჯოჯუას “ახალი ქრისტიან-დემოკრატები” და გია ბერძენაძის “ძალოვან ვეტერანთა და პატრიოტთა პოლიტიკური მოძრაობა”.
ირმა ინაშვილის თქმით, ახლად შექმნილი ბლოკი სხვა პარტიებთან კონსულტაციისთვის მზად არის, გარდა “ნაციონალური მოძრაობისა” და რესპუბლიკური პარტიისა.
“ჩვენ იმიტომ შევქმენით ეს საარჩევნო ბლოკი, რომ ქვეყანაში არის უთანასწორო და უსამართლო საარჩევნო გარემო. “ქართულმა ოცნებამ” არ შეცვალა ის კანონმდებლობა, რაც სააკაშვილის რეჟიმმა შექმნა. ასეთ უთანასწორო პირობებში ჩვენ, ჩვენი მოთხოვნები ჩამოვაყალიბეთ და მივმართეთ ხელისუფლებას. ერთ-ერთი მათგანი ითვლისწინებდა იმ გამგებლებისა და პოლიციის უფროსების სისხლისსამართლებრივ დასჯას, რომლებიც დგანან საარჩევნო უბნების წინ და ამომრჩევლებს პირდაპირ თუ ირიბად აშინებენ. ამის ნაცვლად, ხელისუფლება იწყებს იმ კანონის მიღებას, რომლის თანახმადაც, თუ ჩვენ ასეთ გამგებელს საარჩევნო უბნის წინ გადავეყრებით და მასთან ფიზიკური შეხლა-შემოხლა მოგვივა, უკვე ჩვენ დაგვაპატიმრებენ. ეს ყველაფერი არის შეუთავსებელი,” – განაცხადა ინაშვილმა.
ირმა ინაშვილის თქმით, ხელისუფლებამ მათ ცესკო-ში წევრის მიღებაზე უარი უთხრა, ასევე წაართვა უფასო საეთერო დრო.
“ჩვენ ასევე გვართმევენ უფასო საეთერო დროს. იყო ყოველ საათში, დაახლოებით, ერთი წუთი და ახლა იქნება 24-27 წამი. ამ დროში რა უნდა თქვას პოლიტიკურმა პარტიამ? ჩვენთვის წართმეულ უფასო სარეკლამო დროს რესპუბლიკურ პარტიასა და სხვა პარტიებზე ანაწილებენ. რით დაიმსახურა რესპუბლიკურმა პარტიამ ის, რომ ჩვენ წაგვართვან საეთერო დრო და მათ მისცენ?” – განაცხადა ირმა ინაშვილმა.
“პარტიოტთა ალიანსის” თავმჯდომარე დავით თარხან-მოურავის განცხადებით, ბლოკის შექმნის მიზანი არჩევნებში გამარჯვებაა, თორემ ბარიერის გადალახვის პრობლემა ისედაც არა აქვთ.
“საქართველოში საარჩევნო ბლოკი ყოველთვის იქმნება იმისთვის, რომ არჩევნებში მაქსიმალური ეფექტი იქნას მიღწეული, მით უმეტეს როდესაც არჩევნები უსამართლოდ ტარდება. თუმცა, რა თქმა უნდა, საარჩევნო ბლოკები იმისთვისაც შექმნილა, რომ ბარიერი გადაელახათ. ჩვენ შემთხვევაში ეს ნამდვილად არ არის. ჩვენ ბარიერს მრავალჯერ გადავლახავთ, ახლა სულ სხვა პრეტენზიაზეა საუბარი. 25 წელია, საქართველოში სამართლიანი არჩევნები არ ჩატარებულა, ერთადერთი სამართლიანი არჩევნები კომუნისტურმა მთავრობამ ჩაატარა.
“ბლოკი შეიქმნა იმიტომ, რომ ხელისუფლებამ კიდევ ერთხელ მოგვატყუა და არც ერთი წინასაარჩევნო დაპირება არ შეასრულა. ქვეყანაში მეორე პოლიტიკური ძალა ვართ და გავერთიანდით, რომ გავიმარჯვოთ,” – უთხრა “რეზონანსს” თარხან-მოურავმა.
“თავისუფალი საქართველოს” ლიდერი კახა კუკავა ოპოზიციურ პარტიებს გაერთიანებისკენ მოუწოდებს. მისი თქმით, ამ საარჩევნო ბლოკმა “ქართული ოცნებისა” და “ნაციონალური მოძრაობის” მმართველობის ხანა უნდა დაასრულოს.
“ქართული ოცნების” და “ნაციონალური მოძრაობის” მმართველობის დასასრულებლად გავერთიანდით. ვართ ძირითადი და მთავარი მოთამაშეები და გამარჯვებითვის ვიბრძოლებთ. სხვა პოლიტიკურ ძალებს მოვუწოდებთ, პოლიტიკური ამბიციები გვერდზე გადადონ, შემოურთდნენ გაერთიანებულ ოპოზიციას და ვიბრძოლოთ იმ მთავარი ამოცანისთვის, რომელიც ორპარტიული სისტემის დამხობას გულისხმობს,” – ამბობს “რეზონანსთან” საუბრისას კახა კუკავა. მისი თქმით, ახალი საარჩევნო ბლოკი მოსახლეობას სისტემურ ცვლილებებსა და რეფორმებს ჰპირდება.
საზოგადოებრივი კომუნიკაციების მართვის სპეციალისტი არჩილ გამზარდია ამბობს, რომ “პატრიოტთა ალიანსს” არჩევნებზე დამოუკიდებლად გასვლისას წარმატების უფრო მაღალი შანსი აქვს, ვიდრე ამ გაერთიანებით.
“ვფიქრობ, “პატრიოტთა ალიანსისთვის” ამ ბლოკის შექმნით შანსები და რეიტინგი არ გაიზრდება. თუმცა, როგორც პარტიას, შანსი ნამდვილად აქვს და ბარიერის გადალახვა არ გაუჭირდება. საზოგადოების ნაწილი ამ პარტიის მიმართ საკმაოდ დადებითად არის განწყობილი. ასე რომ, “ალიანსმა” ეს პარტიები მხარზე ჩამოისვა და რეალურად არაფერს მოუტანს. კუკავას, როგორც პოლიტიკოსს, აქვს გარკვეული პოზიციები საზოგადოებაში, მაგრამ მის პარტიას არანაიარი რეიტინგი არ აქვს,” – გვითხრა არჩილ გამზარდიამ. მისივე თქმით, ამ ბლოკში თოფაძე და მეჭიაური თუ შევიდა, მაშინ ბლოკს წარმატების მიღწევა უფრო გაუადვილდება. “აღსანიშნავია, რომ “ალიანსს” ჰყავს კონკურენტები, იგივე მეჭიაური და თოფაძე, რომლებიც ერთსა და იმავე ელექტორატზე მუშაობენ. თუკი ამ ბლოკში ისინიც შევლენ, უფრო დიდ წარმატებას მიაღწევენ, ბარიერის გადალახვა კიდევ უფრო გაუადვილდებით,” – უთხრა “რეზონანსს” გამზარდიამ.
“ალია”, 09 ივნისი, 2016 წელი
ექვსი ჩამჭრელი კითხვა ბიძინა ივანიშვილს // რა მტკიცებულებების დადებას აპირებს ზაზა ხატიაშვილი ივანიშვილისთვის?
“გუშინ ადვოკატთა ასოციაციის პრეზიდენტმა ზაზა ხატიაშვილმა ბიძინა ივანიშვილს ღია წერილით მიმართა და ტელედებატებში გამოიწვია.
გთავაზობთ მოკლე შინაარსს
“ბატონო ივანიშვილო-მურუსიძე. როგორც იქნა მახსენე თქვენი ბრიფინგის დროს. ადვოკატთა ასოციაციის თავმჯდომარესთან მიმართებაში ვერ დამალე ბოღმა, რომელიც ვერანაირად ვერ გადაიბირე, მიუხედავად მცდელობების, ვერ დაიმონე. სამოქალაქო საზოგადოების თვალში გამხილე, როგორც მატყუარა, მურუსიძეების დამცველი და სამოქალაქო საზოგადოების მტერი. 2006 წელს, გიორგი მიქიაშვილის წამების შემდეგ დავიწყე მოძრაობა მურუსიძეების სასამართლოსგან გათავისუფლების მიზნით. 8 წელი ვიბრძოდი მიქიაშვილის წამების საქმესთან დაკავშირებით. საბოლოოდ 2012 წელს ევროპის ადამიანის უფლებათა სასამართლო მოვიგე, რომელმაც მიქიაშვილის წამება დაადასტურა – არაადამიანური, არაჰუმანური მოპყრობა. ვიფიქრე, მიქიაშვილის საქმის მოგების შემდეგ მურუსიძეს საბრალდებო სკამზე დასვამდი, მაგრამ მოხვედი ხელისუფლებაში, სამოქალაქო საზოგადოებას უღალატე და მურუსიძის და მისნაირი მოსამართლეების დამცველად მოგვევლინე… თანახმა ვარ თქვენს ტელევიზიაში მოვიდე სრულიად მარტო და მოვიტანო მტკიცებულებები რამდენი საშინელება ჩაიდინეთ”, – ნათქვამია ზაზა ხატიაშვილის ღია წერილში.
“აქედან დავიწყოთ – მან შეხვედრაზე თქვა, სააკაშვილზე უარესი რა გავაკეთეო. ჯერ ერთი თავის თავს სააკაშვილს რატომ ადარებს? სააკაშვილი იყო რეჟიმი და ივანიშვილი იმიტომ მოვიდა, რომ ქვეყანაში რეჟიმი არ ყოფილიყო – ფეოდალიზმი დაამყარეო, ამისთვის კი არ მოუყვანია სამოქალაქო საზოგადოებას. ჩემთვის მთავარია სამართლებრივი საკითხები. მოვიდა და მოწმის სასამართლოში დაკითხვა, რაც კოდექსში იყო ჩადებული ორი წლით გადადო და დამახინჯებული ფორმით აამოქმედა… გახსოვთ, როდესაც “კაბელების საქმეზე” ხალხი დაიჭირეს, ადვოკატებმა და ჟურნალისტებმა არ ვიცოდით საქმის არანაირი დეტალები, რადგან გრიფით “საიდუმლო” იყო და ვინც ჩუმად გაამჟღავნებდა, ეს სისხლის სამართლის დანაშაული იყო. ბიძინა ივანიშვილი, რომელიც უკვე მოქალაქე იყო, პირდაპირ ეთერში ინტერვიუში ამბობდა: აი, ეს დანაშაული ჩაიდინეს ამ ადამიანებმა, რაც ამაში და ამაში გამოხატებოდაო. ვკითხავდი – საიდან იცოდი შენ გრიფით “საიდუმლო” სისხლის სამართლის მასალები, ვინ მოგიტანა? თუ გაჩვენეს, ეს არის სისხლის სამართლის დანაშაული იმ პირის მიმართ, ვინც მოგიტანა და შენი მხრიდან მისი გახმაურება, ასევე სისხლის სამართლის დანაშაულია”, – აცხადებს „ალიას“ კორესპონდენტთან საუბრისას ზაზა ხატიაშვილი.
“ივანიშვილი იცით, რის გამოა ჩემზე გამწარებული? ევა გოცირიძეს რომ შეჰპირდნენ და რომ არ დავანიშნინე. მე ახლა, 13 ივნისს შიმშილობას ვიწყებდი სტრასბურგში. 14-15-ში არის ხოლმე იქ დიდი კონფერენცია და მე ვესწრები ხოლმე. სტრასბურგმა ბილეთი გამომიგზავნა და ვიფიქრე: სამი დღე ვიშიმშილებდი. როგორც კი ეს აქ გაიგეს, ეგრევე წარადგინეს ხალხი… მე, ადვოკატთა ასოციაციის თავმჯდომარე იქ რომ შიმშილობას დავიწყებდი, იცით რა სკანდალი ატყდებოდა? ყველა პირველ პირს ვიცნობ იქ, ყველა შემხვდებოდა და ვაჩვენებდი ევა გოცირიძის მიერ პირდაპირ ეთერში გაკეთებულ განცხადებას – ლევან მურუსიძეს რომ ხმას ვაძლევდითო (ფარულ კენჭისყრაზეა საუბარი), წინასწარ იცოდა ნინო გვენეტაძემ და ჩვენ წინასწარ ვიყავით შეთანხმებულიო. ამაზე კიდევ მაქვს 2 საინტერესო დოკუმენტი, ყველაფერი მოვაგროვე…”, – განაგრძობს რესპონდენტი.
“ხალხი, ვინც ვიდექით და ძალადობას ვაპროტესტებდით – ახლა არ უნდა გაიყიდოს და არჩევნებზე ხმა საქართველოს მომავალს უნდა მისცენ. სამართლებრივად არჩევნებმა უნდა გადაწყვიტოს ბევრი რამ. საქართველოს მოსახლეობა ხომ ხედავს, რომ ქვეყანას ფაქტობრივად მართავს არაფორმალური მმართველი ივანიშვილი, რომელიც საერთოდ გასულია სამართლებრივი სივრციდან და ჟურნალისტებს უქნევს ხელს – ცუდ კითხვებს რატომ მისვამთო. ეს ადამიანი ვერ იტანს საპირისპირო აზრს და ყველას თითს უქნევს. ამ ქვეყნისთვის ძალიან ცუდია თუ ერთი პოლიტიკური ძალა, როგორი კარგიც არ უნდა იყოს, მოვა აბსოლუტურ უმრავლესობაში – ეს არის უკვე დიქტატურა. ივანიშვილმა დააანონსა – 95 დეპუტატი უნდა გავიყვანოო. ეს არის დავალების მიცემა სამართალდამცავ ორგანოებზე და ხალხი ცოტა უნდა გამოფხიზლდეს”, – დასძენს ხატიაშვილი და შეკითხვას – “პერსონალურად თქვენ თუ შეგიძლიათ მოსთხოვოთ სამართლებრივი პასუხი რაზეც მტკიცებულებები გაქვთ?” – პასუხობს:
“მე ივანიშვილს სამართლებრივად მოვთხოვ პასუხს მაშინ, როცა ქვეყნის სათავეში არ იქნება”
„რეზონანსი“, 09 ივნისი, 2016 წელი
ინტერვიუ ლევან ბერძენიშვილთან: “მომავალი პარლამენტი მრავალპარტიული, მთავრობა კი კოალიციური იქნება”
ელზა პაპოშვილი
პარლამენტის ევროპასთან ინტეგრაციის კომიტეტის თავმჯდომარე, რესპუბლიკელი ლევან ბერძენიშვილი ამბობს, ბიძინა ივანიშვილის მოლოდინი, რომ მომავალ პარლამენტში “ქართული ოცნება” უმრავლესობით მოვა, გადაჭარბებულია. მისი აზრით, პარლამენტი მრავალპარტიული იქნება და, არ არის გამორიცხული, კოალიციის შექმნა გახდეს საჭირო. ამბობს, რომ პარლამენტში მოხვედრის შემთხვევაში რესპუბლიკურმა პარტიამ შეიძლება, ყველასთან ითანამშრომლოს, გარდა “პრორუსული პარტიებისა”.
- როგორ შეაფასებთ ბიძინა ივანიშვილის ინტერვიუს? შეძლებს “ოცნება” დიდი უპირატესობით მოგებას, როგორც მან ჟურნალისტებთან შეხვედრისას თქვა?
- ამ ინტერვიუდან გამოჩნდა, რომ ის გარკვეულ საკითხებში კარგად ერკვევა, თუმცა პროგნოზები, რომელიც მან გამოთქვა, მეტისმეტად გადაჭარბებული და ოპტიმისტურია. აშკარაა, რომ ივანიშვილი ერთ პოლიტიკურ ძალას, “ქართულ ოცნებას” გულშემატკივრობს და ყოფილი კოლეგებისა და მეგობრებისკენ აღარ იყურება. ივარაუდა, რომ პარლამენტში 95 დეპუტატს გაიყვანენ, თუმცა ამაში ვერ დავეთანხმები, რადგანაც არჩევნების შემდეგ გაირკვევა, რომ სულ სხვა რეალობაა და მის მიერ მოყვანილი რიცხვი ზუსტი არ არის.
- როგორ ფიქრობთ, რატომ აქვს ივანიშვილს ასეთი იმედი? რეალური ინფორმაცია არ აქვს?
- ეს იმედია თუ რაიმე სხვა სახის განცხადება, არ ვიცი. შეიძლება, ადამიანი სინამდვილეში 50-ს ანგარიშობდეს და 95-ს ამბობდეს. ეს მას უნდა ჰკითხოთ, ალბათ ზუსტი პასუხი, რაზე დაყრდნობით ამბობს, მას ეცოდინება. როგორც თქვა, პერიოდულად გარკვეული სახის კვლევებს ატარებს, შესაძლოა, მისი გარემოცვა ივანიშვილს იმ ციფრებს აწვდიდეს, რომელიც მას სურს და მოეწონება. საერთაშორისო დონეზე რაც კვლევები ჩატარებულა და ხელმისაწვდომია, ჩვენ სხვა რიცხვები გვაქვს, თუმცა ცალსახად ვერც იმას ვიტყვით, რომ ისინიც სანდოა. ამიტომ დაველოდებით იმ კვლევებს, რომლებსაც ვენდობით.
- “რუსთავი 2″-ის თემას მინდა შევეხოთ და ივანიშვილის განცხადებაზე გკითხოთ. მან თქვა, რომ თუ არჩევნებამდე სასამართლო ტელეკომპანიის მფლობელებს შეცვლის, ის ფინანსურად თავად უზრუნველყოფს, რომ არჩევნებამდე არსებული მენეჯმენტი შენარჩუნდეს. რას ნიშნავს ეს განცხადება?
- ამ განცახდებით ვირტუალურად გვაჩვენა, რომ ბევრი ფული აქვს და გარკვეული საკითხების გადაწყვეტა უპრობლემოდ შეუძლია. უბრალოდ, ამ განცხადების შინაარსში მე პირადად ვერ გავერკვიე. თუკი სასამართლო გადაწყვეტს, რომ “რუსთავი 2″ იმ ხალხის არ არის, ვინც ახლა მას წარმოადგენს, მაშინ ვიღაცამ ფული რატომღა უნდა გადაიხადოს, რომ ისინი კვლავ დარჩნენ? აი, ეს მომენტი ვერ გავიგე. მაშინ ამ სასამართლოს რაღა აზრი აქვს? ვისთვის იმართება? მისი განცახდების ეს ნაწილი ბუნდოვანი იყო. ვფიქრობ, ვერავინ ვერ გაიგო, სინამდვილეში რას გულისხმობდა. შეიძლება, რაღაც უფრო ღრმა არის ჩადებული, მაგრამ ისეთი ფორმით, რომ ჩვენ ვერ გავიგეთ.
- ვიზალიბერალიზაციის საკითხთან დაკავშირებით, როგორც ვხედავთ, საბოლოო გადაწყვეტილების მიღება დროში იწელება. რა ხდება, შეიძლება საერთოდ არ მოგვცენ?
- არაფერი განსაკუთრებული არ ხდება. ეს არის ჩვეულებრივი ევროპული ბიუროკრატია, რომელიც ასე მუშაობს და მოულოდნელი, ვფიქრობ, აქ არაფერი ყოფილა. თუ ვინმემ ეს არ იცოდა, ალბათ ეს მისი ბრალია, რადგანაც საკითხს კარგად არ იცნობს. საქართველოს, პოლიტიკური თვალსაზრისით, ყველაფერი გაკეთებული აქვს. ჩვენი ქვეყანა როგორც თავის მოსახლეობასთან, ასევე ევროპასთან პირნათელია. ევროპარლამენტმა თქვა, რომ ისინი ევროპაში უვიზო მიმოსვლის საკითხს დადებითად აფასებენ.
ახლა ლაპარაკია იმაზე, რომ ევროპის რამდენიმე ქვეყნის ელჩი თავს სულ სხვა მოტივების გამო იკავებს. აქ არც საქართველოს ვალდებულებების შესრულებასა და არც შიდა პოლიტიკასთან დაკავშირებული საკითხები წარმოადგენს მთავარ პრობლემას. ეს არის მხოლოდ მათი პირადი მოსაზრება, ვიზით ვინ უნდა შევიდეს და მიგრაცია როგორი უნდა იყოს. ვნახოთ, ეს ყველაფერი 10 ივნისს გადაწყდება. ჩვენს საკითხს “ბ”-ს სტატუსი მიენიჭა, რაც იმას ნიშნავს, რომ მისი განხილვა მოხდება. მაგალითად “ა”-ს სტატუსი რომ მიენიჭებინათ, საკითხს განხილვის გარეშე გადაწყვეტდნენ.
- მოახლოებულ საპარლამენტო არჩევნებთან დაკავშირებით მინდა გკითხოთ. თუ რესპუბლიკური პარტია ბარიერს გადალახავს და კვლავ პარლამენტში მოხვდება, არის თუ არა შესაძლებელი, რომ თქვენმა პარტიამ კოალიცია შექმნას და თუნდაც ირაკლი ალასანიას პატიასთან გარეთიანდეთ?
- თუკი პარლამენტში შესულ არც ერთ პარტიას იმდენი ძალა არ ექნა, რომ დამოუკიდებლად მთავრობა შექმნას, ბუნებრივი იქნება საუბარი იმაზე, რომ კოალიცია შეიქმნას. რა თქმა უნდა, რესპუბლიკური პარტია ამ მოლაპარაკებაში აუცილებლად შევა. თუმცა გაერთიანება არ მოხდება პრორუსულ ძალებთან, მაგალითად ირმა ინაშვილის პარტიას ვგულისხმობ. რაც შეეხება ირაკლი ალასანიას პარტიას ანუ “თავისუფალ დემოკრატებს”, ჩვენ მათთან წინასაარჩევნოდ არანაირ გაერთიანებას არ განვიხილავთ, ხოლო როცა ბარიერს გადავლახავთ და პარლამენტში შევალთ, ვის რამდენი პროცენტი ექნება, იმის მიხედვით ვიმოქმედებთ. ივანიშვილმა კი თქვა, “ქართული ოცნება” პარლამენტში უმარვლესობით მოვა და არანაირი კოალიცია არ იქნებაო, მაგრამ ჩვენ ასე არ ვფიქრობთ და გვგონია, რომ მომავალი პარლამენტი მრავალპარტიული, მთავრობა კი კოალიციური იქნება.
- რას იტყვით პაატა ბურჭულაძის პარტიასთან დაკავშირებით, როგორ შეაფასებთ მის შანსებს და როგორ ფიქრობთ, თუ ბარიერს ისიც გადალახავს, რესპუბლიკური პარტია მასთან თუ ითანამშრომლებს?
- ეს დამოკიდებული იქნება იმაზე, პაატა ბურჭულაძეს საპარლამენტო არჩევნებზე რა შედეგები ექნება. ჩვენ ყველა იმ ადამიანთან ვითანამშრომლებთ, რომელთაც არაფერი არ დაუშავებიათ და პირიქით, ხალხისთვის კარგის მეტი არაფერი უკეთებიათ. ჩვენი სურვილია, რომ ისინი პარლამენტში მოხვდნენ. ვნახოთ, რატომაც არა, ბურჭულაძესთან არანაირი პრობლემა არ გვაქვს. უბრალოდ, ჩვენ ძველი და გამოცდილი პარტია ვართ, ამიტომაც ბურჭულაძეს მეტი სიფრთხილისკენ მოვუწოდებთ.
„რეზონანსი“, 09 ივნისი, 2016 წელი
ინტერვიუ სოსო ცინცაძესთან: “ბიძინა ივანიშვილის ფენომენი” მეტი აღარ განმეორდება
ია აბულაშვილი
“თავისთავად ის ფაქტი, რომ ქვეყანაში არჩევნებამდე ოთხი თვით ადრე არსდება პარტიები, თანაც პერსპექტიული პარტიები, როგორც მინიმუმი, პარლამენტში გასვლის შანსი რომ აქვთ გარანტირებული, მრავლის მაუწყებელია. ყველაფერი არ არის წესრიგში ქვეყანაში. ასეთი რამე უცხოა ნორმალური საზოგადოებისათვის,” – აცხადებს პოლიტოლოგი სოსო ცინცაძე, რომელსაც “რეზონანსი” წინასაარჩევნო ამბებზე გაესაუბრა.
სოსო ცინცაძე: არსებობს თუ არა პირდაპირი კავშირი წინასაარჩევნო კამპანიასა და არჩევნების შედეგებს შორის, ამ კითხვაზე ასეთივე ლოგიკით შეიძლება ვიკითხოთ – რატომ აპროტესტებენ არჩევნების შედეგებს სისტემატურად ქვეყნის ერთ ჯგუფში, ხოლო მეორეგან ეს გამონაკლის იშვიათობას წარმოადგენს, რატომ ზოგან არავის არ აინტერესებს, თუ კონკრეტულად ვინ ითვლის თუ თვალყურს ადევნებს ხმების თვლის ელექტრონულ სისტემას, ხოლო მეორეგან ცესკოს ხელმძღვანელზეა ბევრი რამ დამოკიდებული?
აი, ცოტა ხნის წინ პუტინმა ავადსახსენებელი ჩუროვი ნდობის მაღალრეიტინგიანი პანფილოვათი შეცვალა და ეს ფაქტი, რასაც არანაირ ყურადღებას არ მიაქცევდნენ დემოკრატიულ ქვეყანაში, მთელი რუსული მედიის მთავარ თემად იქცა. ასე რომ, ყველაფერი კონკრეტული პოლიტიკური გარემოს ანატომიაზეა დამოკიდებული და ამ კითხვაზე არ არსებობს ერთი უნივერსალური პასუხი. თუ მაინცდამაინც საქართველოზე ვიმსჯელებთ – მთლად პირდაპირი თუ არა, ძალზე ძლიერი ურთიერთკავშირი არსებობდა, გარდა წინა საპარლამენტო არჩევნებისა, არსებობს და მომავალშიც დიდხანს იარსებებს.
- რატომ გამოყავით 2012 წლის არჩევნები?
- უბრალო მიზეზით; ის, არჩევნები გამონაკლისი იყო არა მხოლოდ ჩვენთვის, არამედ ათობით ჩვენნაირი ქვეყნისათვის. ასეთი რამ, ვთქვათ, ამერიკაში მოხდა ლინკოლნის დროს (იმ “პატარა” განსხვავებით, რომ ლინკოლნი ღარიბი იყო). კიდევ შეიძლება პერონის არგენტინა გავიხსენოთ, როდესაც პრაქტიკულად ერთი კაცი იგებდა არჩევნებს კოლოსალური პირადი ნდობის სარესურსო ბაზაზე. ხომ ხედავთ, დემოკრატიულ ქვეყნებში ასეთი “ლირიკული გადახვევები” აღარ მეორდება. არც საქართველოში აღარ გამეორდება “ივანიშვილის ფენომენი”…
- იმაზე რას იტყვით, რომ არჩევნებამდე ოთხი თვით ადრე იქმნება პარტიები, რომლებიც დარწმუნებულნი არიან, რომ პარლამენტში გასვლის შანსი აქვთ?
- თავისთავად ის ფაქტი, რომ ქვეყანაში არჩევნებამდე ოთხი თვით ადრე არსდება პარტიები, თანაც პერსპექტიული პარტიები, როგორც მინიმუმი, პარლამენტში გასვლის შანსი რომ აქვთ გარანტირებული, მრავლის მაუწყებელია. ყველაფერი არ არის წესრიგში ქვეყანაში. ასეთი რამ უცხოა ნორმალური საზოგადოებისათვის. ჯერჯერობით პაატა ბურჭულაძე შეცდომებს არ უშვებს. აბა, მიაქციეთ ყურადღება მის საჯარო განცხადებებს, როგორ სიძუნწეს ავლენს წინასაარჩევნო დაპირებებში. მე პირადად ასეთი შთაბეჭდილება მრჩება, რომ მას სწორად აქვს გაანალიზებული “ოცნების” საბედისწერო შეცდომები, რამაც დღევანდელ მდგომარეობამდე მიიყვანა მმართველი პარტია.
ან იქნებ ვინმე სერიოზულად აღიქვამს ჩვენი მინისტრების მტკიცებას, რომ მხოლოდ გარე ფაქტორებია ყველა პრობლემის სათავე? ახლა, როდესაც “ოფიციალურ” სტადიაში შედის წინასაარჩევნო კამპანია, ყველა არასამთავრობო პარტია უნდა ეცადოს, მომაბეზრებლად და ზომაგადასულად მყვირალა აგრესიულ ტონალობაში არ წარმართოს საკუთარი კამპანია. ამ მომენტში სოლიდურობის შენარჩუნებაზე იქნება დამოკიდებული ბევრი რამ.
ახლა კონკრეტულად ბატონ თამაზ მეჭიაურსა და მის პოტენციურ ამომრჩეველზე; გახსოვთ, ერთი წლის წინ პარიზში მილიონი ადამიანი რომ გამოვიდა ქუჩაში ერთსქესიანთა ქორწინების წინააღმდეგ? საქართველოში მილიონზე მეტია მათი თანამოაზრე; თამაზ მეჭიაურს კი ეროვნული ტრადიციებისა და სქესთა შორის ტრადიციული ურთიერთობების პრინციპული მომხრის მყარი რეპუტაცია აქვს. თუ გეებისა და ლგბტ-თა მომხრეებისათვის არსებობს და უნდა იარსებოს კიდეც გამოხატვის თავისუფლება, მათ ოპონენტებსაც ხომ უნდა გააჩნდეთ ანალოგიური უფლება? ჰოდა ყველა, ვისთვისაც ძნელად აღსაქმელია ეს, მეჭიაურის ამომრჩევლად ჩათვალეთ.
ვიცი, რასაც მიპასუხებთ – სხვა ყველა პოლიტიკური ლიდერი სექსუალური უმცირესობის და ერთსქესიანთა ქორწინების მხარდამჭერია? შეიძლება არა, მაგრამ რისაც მეჭიაურს არ ეშინია, რომ ფაშისტად და დემოკრატიის მტრად შეიძლება მონათლონ, სხვები გაურბიან ასეთ იარლიყებს. მეჭიაური “ოცნებას” გამიჯნული პირველი პოლიტიკოსია, რომელიც მზადაა, საკუთარ თავზე აიღოს იმავე “რუსთავი 2″-ისა და მისი ეთერის ოჯახის წევრებად ქცეული “სტუმრების” ყველა “ფეტვა” და ანათემა. მას მხოლოდ ერთ რამეში სჭირდება ასიათასობით დღეს ჯერ მდუმარე თანამოაზრის გვერდში დგომა – რვა ოქტომბერს მშვიდად და უხმაუროდ, ტელეკამერებისაგან მოშორებით, ანონიმურად დააფიქსირონ ის, რაც გულსა და გონებაში უდევთ.
- თქვენი ვარაუდით, მეჭიაურის პარტიას აქვს პარლამენტში მოხვედრის რეალური შანსი?
- რასაკვირველია, აქვს. რაც გადამწყვეტია, თანამოაზრეთა უპრეცედენტო მძლავრი ბაზა აქვს. ახლა მთავარია, შეცდომები არ დაუშვას. უფრო სწორედ კი, ბიძინა ივანიშვილის საბედისწერო შეცდომები არ გაიმეოროს საკადრო სელექციის საკითხში. ამის საფრთხე რეალურია. საქმე ის არის, რომ საპარლამენტო სინეკურას მიჩვეული უამრავი ე.წ. პოლიტიკოსი რჩება მუქთა კეთილდღეობის გარეშე. მათთვის ხომ მხოლოდ მეჭიაური რჩება უკანასკნელ დამსაქმებელ-გადამრჩენად. თანაც მას ჯერ არ დაუკომპლექტებია საბოლოოდ არც გუნდი და არც კანდიდატების სავარაუდო სია არ გამოუქვეყნებია. ე.ი. ვაკანსიები გააჩნია. წარმოგიდგენიათ, რა რიგი დადგება მის კაბინეტთან? სიაში ჩასმაზე უარის თქმა მტრად გადაკიდების ტოლფასია და გაუძლებს ყველაფერ ამას?
- სხვათა შორის, მეჭიაური ეტყობა, რუსეთთან დიპლომატიური ურთიერთობების აღდგენასაც გეგმავს, ყოველ შემთხვევაში, ამაზე მისივე დასწრებით, თუმცა საკუთარი სახელით, ღიად განაცხადა მისი საინიციატივო ჯგუფის წევრმა მაროშკინამ. როგორც დარგის სპეციალისტს, რამდენად შესაძლებლად მიგაჩნიათ ასეთი რამ?
- ეს უკვე მეორე სერიოზული საფრთხეა; რასაკვირველია, ადრე თუ გვიან ჩვენ შორის აღდგება დიპლომატიური ურთიერთობები, მაგრამ საშიში დიპლომატიური მცდელობაა ამ რთულ და მრავალწახნაგოვან პრობლემაზე ნაადრევი და ღია საუბარი, მით უმეტეს პოლიტიკური პარტიის დონეზე. ბატონ თამაზს არ მოსწონს “ოცნების” მიერ დაშვებული შეცდომები. არც მე მომწონს. შეცდომა იყო, როდესაც რუსეთთან კონფიდენციალური მოლაპარაკებების გარეშე, კეთილი ნების საჯარო გამოვლენის დემონსტრაცია მოვახდინეთ და პირველი ნაბიჯი გადავდგით ზურაბ აბაშიძის თანამდებობის შექმნის სახით.
ჯერ ერთი, დიპლომატიის ნომერი პირველი დაუწერელი კანონია, რომ მუდამ უნდა ერიდო პირველი ნაბიჯის გადადგმას. მეორეც კეთილი ნების ჟესტებზე ავტომატურ რეჟიმში ადეკვატური პასუხი უცხო ხილია დიპლომატიაში. ამიტომაც გვალოდინა პუტინმა კარგა ხანს და საბოლოო ჯამში, ჩვენსავით კი არ შექმნა სპეციალური სამსახური, არამედ მხოლოდ ფუნქცია გაუზარდა ლავროვის ერთ-ერთ მოადგილეს.
ეს ყველაფერი კი იმიტომ მოხდა, რომ საკითხი წინასწარ არ იყო სათანადო პროფესიულ დონეზე დამუშავებული. არც “რბილი” საბოტაჟის ვერსია იყო გამორიცხული. საგარეო საქმეთა სამინისტრო ხომ ჩუმი უკმაყოფილებით შეხვდა აბაშიძის მისიას.
- როგორც თქვენი საუბრიდან ჩანს, მმართველ პარტიას დღეს ძალზე უჭირს და თუ ვინმემ უნდა ნახოს ხეირი მმართველი პარტიის გასაჭირით, პირველ რიგში, ეს ალბათ “ძველ” არასაპარლამენტო ოპოზიციაზე ითქმის. ბურჯანაძე, ნათელაშვილი, “ეროვნულ-დემოკრატები”, “ახალი მემარჯვენები”, რა შანსი აქვთ მათ?
- თუ გახსოვთ თქვენთან ერთ-ერთ ინტერვიუში, მგონი ორიოდე თვის წინ, გითხარით, რომ თქვენ მიერ ჩამოთვლილი პარტიები სახიფათოდ გაერთნენ ე.წ. “ინტერფრაქციონალური ტუსოვკით” საარჩევნო კანონის აშკარად უკეთეს, მაგრამ ასევე აშკარად უპერსპექტივო ვარიანტზე მუშაობით. “ინტერფრაქციულ” დონეზე მათ განხილვა- შეჯიბრებებსა და სატელევიზიო პრეზენტაციებში იმდენი დრო და ენერგია დაკარგეს, რომ დღეს დიდი ალბათობით, ისევ ჩვეულ რეჟიმში, ანუ ცალ-ცალკე დაქუცმაცებულად მოუწევთ არჩევნებში მონაწილეობა.
- ჰქონდათ კი სხვა არჩევანი?
- რასაკვირველია, ჰქონდათ: დაახლოებით ისევე უნდა მოქცეულიყვნენ, როგორც “ოცნება” მოიქცა 2012 წელს – გაერთიანებულიყვნენ ერთი ლიდერის ირგვლივ და 5-6 თვის წინ დაეწყოთ “რბილი” წინასაარჩევნო კამპანია. ცხადია, თორმეტში განსხვავებული სიტუაცია იყო, მაშინ ლიდერს არანაირი არჩევა არ სჭირდებოდა, ის თითონ ირჩევდა თანამებრძოლებს, მაგრამ მე სქემას ვგულისხმობ. საოცარია, როგორ ვერ მიხვდა თუნდაც იგივე მამუკა კაციტაძე, რომ “ოცნება” არავის არ მოაჭრევინებდა ცოცხალი თავით იმ სასიცოცხლო ტოტს, თვითონ რომ იჯდა ზედ. მმართველ პარტიაში ხომ სხვებზე უკეთ იცოდნენ, რომ გრაფ მონტე-კრისტოს ხელგაშლილობით გაცემული და შემდეგ შეუსრულებელი დაპირებებისა და გაუარესებული სოციალური ფონის პირობებში, სისულელე იქნებოდა წინა ხელისუფლებისგან მემკვიდრეობით მიღებული ნებისმიერი მმართველი პარტიის გამარჯვების მძლავრ გარანტად ქცეული თამაშის წესების სერიოზული რევიზია. როდესაც ყოველი დღე; ყოველი საათი, ძალზე რთულად მისაღწევი გაერთიანებისათვის აუცილებელი კომპრომისების ძებნას უნდა მოხმარებოდა. ამ დალოცვილებს შვედეთსა და შვეიცარიაში ეგონათ თავი და დემოკრატიული ლოგიკის ძალით აპირებდნენ თავისის გატანას. გინესების წიგნში შესატანი ნეტარმორწმუნეობაა. და ეს ყველაფერი ხდებოდა მაშინ, როდესაც მათ განკარგულებაში იყო ისეთი მძიმეწონიანი დამრტყმელი ძალა, როგორიც ნინო ბურჯანაძეა თავისი რესურსით.
- ნინო ბურჯანაძეს თავისი ცოდვები გააჩნიაო … იყო ასეთი მოსაზრებაც?
- უცოდველი მხოლოდ მაცხოვარია და ამიტომაც არ არის დღეს ჩვენ შორის. დედამიწაზე მხოლოდ ცოდვილებიღა დავრჩით. მე პოლიტიკა და პარლამენტი მაქვს მხედველობაში და არა სამონასტრო რიტუალები. ისე კი ბურჯანაძის “ცოდვები” საბავშვო “პესოჩნიკებში” (მაპატიეთ ქართული შესატყვისი არ მახსენდება) თამაშია თუ გნებავთ იგივე ნარმანიას მიერ დედაქალაქის წინაშე ჩადენილ ცოდვებთან შედარებით.
- დავანებოთ თავი ოპოზიციის საკანონმდებლო რომანტიზმს – გაერთნენ და დაამთავრეს. აი “რესპუბლიკელების” გერმანულ ვარიანტს რაღას უწუნებენ? თქვენთვის დამაჯერებელია მმართველი პარტიის არგუმენტები?
- რაც მოვისმინე, რასაკვირველია, არა; როდესაც ზვიად ძიძიგური გვარწმუნებდა, გერმანული მოდელი კარგი კია, მაგრამ ჩვენთვის არ ვარგა, ვინაიდან ქართველი პარლამენტარები ვერასოდეს ვერ შექმნიან კოალიციურ მთავრობასო, ანუ ელემენტარულ კომპრომისებსა და პირადულზე მაღლა სახელმწიფო ინტერესების დაყენების უნარი არა აქვთო, ცოტა არ იყოს, მეუცნაურა იმ პარტიის ერთ-ერთი ლიდერისაგან, რომელიც წლების მანძილზე გვიმტკიცებს – ან უკვე ვართო ევროპელები, ან ცოტაღა გვიკლიაო.
გარდა ამისა, დღემდის თურქმენეთისა და ტაჯიკეთის ლიდერებისგან მესმოდა – ჩვენც ვიცით, დემოკრატია რომ კარგია, მაგრამ ჩვენი ხალხი ჯერ საამისოდ მზად არ არისო.
- ვიზალიბერალიზაციასთან დაკავშირებით რას გვეტყვით. ნატოში არ გვიღებენ, ამის დიდი იმედი არც გვქონია, ყოველ შემთხვევაში, უახლოეს წლებში რომ ეს არ მოხდებოდა, ამას თითქმის შეგუებულნიც კი ვიყავით. ევროპაში უვიზო მიმოსვლა კი თითქმის უკვე ჯიბეში გვედო. რა ბზიკმა უკბინა ევროპას?
- ამ ბზიკს ჯანსაღი სახელმწიფო ეგოიზმი ჰქვია. ნორმალურ ქვეყანაში, კონკრეტულ შემთხვევაში კი, მთავარი მიზეზი ობიექტური ფაქტორია. შეიძლება სუბიექტურად ის ჩავთვალოთ, რომ ქართულმა დიპლომატიამ დროზე ვერ შეამჩნია შედეგის განმსაზღვრელი საფრთხე – რატომ ამოვყავით თავი უკრაინასა და კოსოვოსთან ერთ პაკეტში? რამდენიმე თვის წინ ხომ საქართველოს საკითხი ავტონომიურად განიხილებოდა და თითქმის გარანტირებულიც იყო დადებითი გადაწყვეტილება. ამის შემდეგ მოუხშირა უკრაინის პრეზიდენტმა ბრიუსელსა და გერმანიაში ვიზიტებს, თბილისი კი მამაპაპური გულარხეინობით ელოდა, თუ როდის გაგვიხსნიდა კარს ევროპა.
რასაკვირველია, არის სხვა მომენტებიც. მილიონობით ახლო აღმოსავლელი ლტოლვილი, საბერძნეთის გადაუჭრელი პრობლემა; 23 ივნისს ძალზე მნიშვნელოვანი რეფერენდუმი ბრიტანეთში. ყველაფერი ეს ობიექტური ფაქტორია, მაგრამ ერთი ციცქნა საქართველოს საკითხი რომ 40 მილიონიანი უკრაინისა და ბანდიტური კრაზანის ბუდე კოსოვოსაგან დამოუკიდებლად განხილულიყო, გამორიცხული არ არის, რომ განსხვავებული ვერდიქტი მიგვეღო.
„ახალი თაობა“, 09 ივნისი, 2016 წელი
ინტერვიუ სოსო ცინცაძესთან: „ბიძინა ივანიშვილი თუ პატა ბურჭულაძე?“ // „ძირითადი მეტოქეობა ამ ორ ადამიანს შორის იქნება“
პოლიტოლოგი სოსო ცინცაძე „ახალ თაობასთან“ ინტერვიუში აცხადებს, რომ დიდი ხნის შემდეგ, ქართულ პოლიტიკურ რეალობაში პირველად არის არაპროგნოზირებადი, თუ როგორ განვითარდება მოვლენები არჩევნებზე.
- ბატონო სოსო, როგორ წინასაარჩევნო კამპანიას ელოდებით?
- ახლო პოლიტიკურ წარსულში ასეთი წინასაარჩევნო კამპანია აღარ ყოფილა, როდესაც გაურკვეველია, ვინ მოიპოვებს რეალურად გამარჯვებას. იყო ასეთი არჩევნები – გამსახურდია თუ კომუნისტები? მაშინ გამსახურდიამ გაიმარჯვა. შემდეგი, თითქმის ყველა არჩევნების შედეგები გამოცნობადი იყო. 2012 წლამდე, ასევე თითქმის ყველა არჩევნებში მმართველ პარტიას გარანტირებული ჰქონდა გამარჯვება და ეს ღიად იკითხებოდა. ასევე აღნიშვნის ღირსია ის გარემოება, რომ პირველად მმართველი პარტია არჩევნების მოგებას გაყალბებით არ აპირებს. ჯერჯერობით ამის მონაცემები არ ჩანს.
- ხელისუფლება სახელისუფლო რესურსზე უარს იტყვის?
- სახელისუფლო რესურსის გამოყენება ჩვენნაირი ქვეყნისთვის მომაკვდინებელ ცოდვად არ ითვლება. მე ვსაუბრობ ღია გაყალბებაზე, როდესაც ნაგვის ურნებში პოულობდნენ საარჩევნო ბიულეტენებს და ე.წ. კარუსელები რომ ტრიალებდა, განსაკუთრებით შევარდნაძის მმართველობის ბოლო წლებში. მსგავსი ფაქტების ეპოქა, მადლობა ღმერთს, უკვე გავიარეთ. ეჭვი არ მეპარება, რომ ივანიშვილს გულწრფელად სურს დაამტკიცოს, რომ „ქართულ ოცნებას“ ყოველგვარი მაიმუნობების გარეშე შეუძლია გაიმარჯვოს. ივანიშვილი სწორედ ამ მიმართულებით ეცდება მოვლენების განვითარებას. გუნდში თუ ვინმე სხვანაირად ფიქრობს, ის ამაზე ხელს ააღებინებს. თუმცა, მმართველი პარტიისთვის ცუდი ფონია შექმნილი.
- რას გულისხმობთ?
- იმ ფაქტებს, როგორებიცაა უარი ვიზალიბერალიზაციაზე, თანაც ისეთი უარი, რომელიც ძალზე დამამცირებელია, ქურდების ექსპორტს აწარმოებთ ევროპაშიო. შიგნით კი უმუშევრობას, რიგითი ამომრჩევლის უკმაყოფილებას და ა.შ. ეს ყველაფერი ოპოზიციაზე ასხამს წყალს ძალაუნებურად.
- ამ ფონზე ოპოზიციის შანსები იზრდება?
- არა, ოპოზიციისთვის გადაულახავ წინააღმდეგობად იქცა დაქსაქსვა. ვერა და ვერ ხერხდება დიდი ოპოზიციური გაერთიანება. არასაპარლამენტო ოპოზიციამ 5-6 თვე წყალში გადააგდო. ინტერპარტიული შეკრებები ცუდი არ იყო, მიზანი კეთილშობილური იყო, საარჩევნო კანონმდებლობის ცვლილება, მაგრამ იმთავითვე ცხადი იყო, რომ ეს მიუღწეველი ოცნება იყო. გიჟები ხომ არ არიან მმართველ პარტიაში, რომ მემკვიდრეობით მიღებული თამაშის წესები შეეცვალათ, რომელიც გამარჯვების გარანტიას იძლევა! ეს იყო ფუჭი დროის დაკარგვა. იმის ნაცვლად, რომ ერთი ლიდერის გარშემო გაერთიანებულიყვნენ, პირიქით მოხდა.
- ხუთსუბიექტიანი გაერთიანება მოხდა...
- ეს არაფერს ცვლის, თანაც უკვე გვიან არის. თუმცა, ოპოზიცია მაინც აქცენტს მმართველი პარტიის დაპირებებზე გააკეთებს.
- „ოცნება“ დაპირებებში მოზომილი იქნება?
- თუ ჭკუა აქვს, მოზომილი უნდა იყოს, მაგრამ ჩვენი ამომრჩეველი რამდენად არის გაზრდილი?! რამდენად ფიქრობს იმაზე, ეს კი მპირდება, მაგრამ შეასრულებს?! თუ ამომრჩეველი ვერ გაიზარდა, თუ კარგად ვერ გააცნობიერა თავისი არჩევანის მნიშვნელობა, რამდენად არის შესაძლებელი, მაგალითად, უფასო წყალი, გაზი და ა.შ. მანამდე მუდმივად ერთ წრეზე ვიტრიალებთ.
- ბიძინა ივანიშვილი აცხადებს, რომ `ქართული ოცნება~ 95 დეპუტატს გაიყვანს. რამდენად რეალური მოლოდინი აქვს ყოფილ პრემიერს?
_ ზაქარია ქუცნაშვილმაც იგივე ციფრი დაასახელა. არ ვიცი, ივანიშვილმა გადაიწერა ქუცნაშვილისგან თუ პირიქით. 94 დეპუტატი რომ იყოს, უარს იტყვიან?! სააკაშვილსაც ზუსტად ასე ეგონა 4 წლის წინ ამ დროს. ის ამბობდა, მეტი საქმე არ მაქვს, ჩემი აშენებული ქვეყანა ამათ დავანგრევინოო, მაგრამ მოვლენები სრულიად საწინააღმდეგოდ განვითარდა. ამიტომ პროგნოზები უმადური საქმეა. ეს მოლოდინი აქვს ივანიშვილს, მაგრამ საიდან, ვერ გეტყვით.
- მესიჯია ასეთი, წინააღმდეგ შემთხვევაში ნაციონალური მოძრაობა დაბრუნდება...
- და იქვე აცხადებს, ზღვარსაც ვერ გადალახავსო. ისე ვითარდება მოვლენები, რომ არავინ იცის, რა მოხდება თუნდაც არჩევნების წინა დღეს. 2012 წელს “ცოცხების ისტორია” რომ არ მომხდარიყო, შეიძლება მოვლენები სულ სხვანაირად განვითარებულიყო.
- რადიკალურ ცვლილებებს ელოდებით თუ კვლავ „ქართული ოცნება“ გაიმარჯვებს?
- რადიკალურ ცვლილებებს ნამდვილად არ ველოდები. თუმცა, მოულოდნელობასაც არ გამოვრიცხავ. ხშირად გადამწყვეტია პიროვნული ფაქტორი. მით უფრო ჩვენნაირ ქვეყანაში. კვლავ აქტუალურია ერთი ადამიანის იმედად ყოფნა.
- და ეს ადამიანი კვლავ ივანიშვილია?
- ივანიშვილი კვლავ იქნება “ქართული ოცნების“ მთავარი გამწევი ძალა, მაგრამ ამ არჩევნებზე მთავარი შეჯიბრი იქნება ბიძინა ივანიშვილსა და პაატა ბურჭულაძეს შორის. ეს იქნება მხოლოდ პიროვნულ მოლოდინებს შორის შეჯიბრი. ცხადია, ეს არ არის მაღალი სტანდარტის დემოკრატიის მაჩვენებელი.
- არჩევნებზე მთავარი დაპირისპირება ამ ორ ლიდერს შორის იქნება?
- დიახ და ეს იქნება მხოლოდ პიროვნულ დონეზე, რადგან ჩვენში ადამიანები ისევ მხსნელის მოლოდინში არიან. ეს უფრო ნათლად გამოჩნდება, როდესაც წინასაარჩევნო კამპანია ეშხში შევა და მთელ ძალას აკრეფს. წინასაარჩევნო პაექრობა ძირითადად ორ ლიდერს შორის იქნება.
„ახალი თაობა“, 09 ივნისი, 2016 წელი
ინტერვიუ ბიძინა გუჯაბიძესთან: „გიორგი ვაშაძეს კავშირი არ გაუწყვეტია მიხეილ სააკაშვილთან“ // „ორპოლუსიანობა არ გამოვა“
წინასაარჩევნოდ ქვეყანაში შექმნილ სიტუაციაზე „ახალი თაობა“ პარლამენტის წევრს კონსერვატიული პარტიიდან ბიძინა გუჯაბიძეს ესაუბრა.
„ეს ხელისუფლება ცდილობს დემოკრატიის დამკვიდრებას ყველა სფეროში. ამ ხელისუფლების მიერ ჩატარებული ყველა არჩევნები დემოკრატიული იყო. ასეთი მოლოდინია მომავალი საპარლამენტო არჩევნებისთვისაც. უნდა გაგრძელდეს არჩევნების დემოკრატიულად ჩატარების ტრადიცია. კორცხელის მსგავსი ამბებიც უნდა გამოირიცხოს”, – ამბობს ბიძინა გუჯაბიძე.
- ზოგი თვლის, რომ 2012 წლის შემდეგ საარჩევნო გარემოში არაფერი შეცვლილა...
- მაშინდელი არჩევნები ანტიდემოკრატიულმა ნაციონალურმა მოძრაობამ ჩაატარა. მას ჰქონდა გაყალბებისა და ძალადობის სერიოზული მცდელობა. საბედნიეროდ, საერთაშორისო დამკვირვებლებისა და ქართველი ხალხის მცდელობით, იმ მასშტაბის გაყალბება ვერ მოხდა, რაც ჩაფიქრებული იყო. გადამწყვეტი გამოდგა ამომრჩევლის აქტიურობა და „ქართული ოცნების“ მიმართ მისი მხარდაჭერა. ყველას კარგად გვახსოვს, რომ იმ დროს იყო ბიულეტენის გატაცებები და სხვა ძალადობრივი მოქმედებები. ახლა რეალობაც სხვაა. 2012 წელს ჩვენი საერთო მიზანი იყო სააკაშვილის რეჟიმის გაშვება. ახლა ეს საერთო ამოცანა არ დგას. დარწმუნებული ვარ, რომ „ქართული ოცნება“ ამ არჩევნებში დიდი უპირატესობით გაიმარჯვებს.
- ამას ბიძინა ივანიშვილიც ამბობს. მისი გათვლით, მომავალ პარლამენტში „ოცნება“ 90 ან 95 დეპუტატს გაიყვანს. საზოგადოებაში კი ასეთი განწყობა არ შეინიშნება..
- 2012 წელთან შედარებით, შეიძლება „ქართულ ოცნებას“ რეიტინგი შეუმცირდა, მაგრამ უპირატესობა მაინც ამ ძალას აქვს. გარდა ამისა, არჩევნებამდე არის დრო. ამ პერიოდში არაერთი ადამიანი დარწმუნდება, რომ ხმა ისევ „ქართულ ოცნებას“ უნდა მისცეს.
- ბევრი კვლევის თანახმად, ამომრჩევლის დაახლოებით 60% ჩამოუყალიბებელია...
- „ქართული ოცნება“ და ჩვენც, კონსერვატორებიც, ყველანაირად დავარწმუნებთ მოქალაქეებს, რომ მოვიდნენ არჩევნებზე. ამას მოვახერხებთ კანონის დაცვით, ახსნა-განმარტებებით.
- ბოლო დროს გამოიკვეთა ორპოლუსიანობის დამყარების სურვილი. მიხეილ სააკაშვილი და ბიძინა ივანიშვილი თავიანთ გამოსვლებში მხოლოდ ერთმანეთს და ერთმანეთის პარტიებს ახსენებენ...
- ახლა ისეთი ვითარებაა, რომ ორპოლუსიანობა, ორპარტიულობა ვერაფრით ვერ დამყარდება. პარლამენტში მოხვედრის შანსი გაუჩნდა ბევრ ძალას. სააკაშვილი თავისი ტელევიზია „რუსთავი 2“-ის მეშვეობით ცდილობს დაამტკიცოს, თითქოს ნაციონალური მოძრაობა კონკურენციას უწევს „ქართულ ოცნებას“. სინამდვილეში, ესაა კვეხნა. სააკაშვილის ძალას ამის შანსი არ გააჩნია.
- რისი შანსი აქვს ნაციონალურ მოძრაობას?
- მას პარლამენტში მოხვედრის შანსი აქვს, მაგრამ ის არაა „ქართული ოცნების“ კონკურენტი. ნაცმოძრაობას წლების განმავლობაში ჰყავდა დასაქმებული ადამიანები. ისინი ახლაც ფინანსდებიან. ესაა მათი ამომრჩეველი. ისე, რაც მეტი ადამიანი მიიღებს არჩევნებში მონაწილეობას, მით ნაკლებ პროცენტს მიიღებს ნაციონალური მოძრაობა.
- იმას როგორ ხსნით, რომ ცოტა ხნის წინ სააკაშვილი პედაგოგების ტრენინგზე დისტანციურად ჩაერთო შეკრებილებს?
- ეს კანონის დარღვევაა. სახელმწიფო სტრუქტურებს არ აქვთ უფლება, რესურსები გამოიყენონ პოლიტიკური მიზნებისათვის. ეს ფაქტი გამოსაძიებელია. მიხეილ სააკაშვილს უკანონო აქტივობები და აფერისტობა ყოველთვის ახასიათებდა. ასეთი რამ გიორგი ვაშაძემაც ჩაიდინა. მან თავისი ღონისძიებისათვის თბილისში წალკის სკოლებიდან ჩამოიყვანა ხალხი.
- საკუთარი პარტიის პრეზენტაციაზე?
_ დანამდვილებით ვიცი, რომ მან ეს გააკეთა. შეიძლება ეს პრეზენტაციაზე მოხდა. ვაშაძის მოქმედება ზუსტად იმეორებს სააკაშვილის ხელწერას.
- როგორ გგონიათ, მას აქვს კავშირი სააკაშვილთან?
- დიდი ეჭვი მაქვს, რომ ახალი პარტიის შემქმნელ და ნაციონალებიდან გამოსულ ვაშაძეს არ გაუწყვეტია კავშირი სააკაშვილთან. მგონია, რომ ისიც და სხვა პოლიტიკოსებიც, რომლებმაც დატოვეს ნაცმოძრაობა, მიბმული არიან სააკაშვილთან.
- ეს ყველაფერი იმას მიანიშნებს, რომ ნაცმოძრაობას დიდი გეგმები აქვს..
- ნაცმოძრაობას პროვოკაციები აქვს ჩაფიქრებული. ისინი არჩევნებს უკავშირდება. მოსალოდნელია, რომ მათ დიდი ხმაური ატეხონ იმის გამო, რომ სასურველ შედეგებს ვერ მიაღწიეს. დარწმუნებული ვარ, რომ ეს მხოლოდ მცდელობები იქნება და სახელმწიფო მანქანა ეფექტურად იმუშავებს. ეს თავიდან აგვაცილებს გაუთვალისწინებელ მოვლენებს.
„ახალი თაობა“, 09 ივნისი, 2016 წელი
ინტერვიუ რამაზ საყვარელიძესთან: „ორპოლუსიანობა ბიძინა ივანიშვილის მიზანი არ არის“ // „თვითკრიტიკა მის გუნდს დაეხმარება“
ბოლო პერიოდის პოლიტიკურ პროცესებს და ყოფილი პრემიერის განცხადებებს „ახალ თაობასთან“ ინტერვიუში ექსპერტი, ფსიქოლოგი, რამაზ საყვარელიძე აფასებს.
- ბატონო რამაზ, ბიძინა ივანიშვილის გზავნილებს ოპონენტები უარყოფითად აფასებენ. როგორია თქვენი შეფასებები მის გზავნილებზე?
- მე უფრო დადებითად შევაფასებდი, მთელი რიგი მიზეზების გამო, თუმცა, რა თქმა უნდა, მაქვს პრეტენზიები.
- მაინც რას მიიჩნევთ დადებითად?
- დადებით შეფასებას იმსახურებს სწორედ ის, რაზედაც მას საყვედურობენ, რომ მან აქცენტი გააკეთა ნაციონალურ მოძრაობაზე. მე არ ვეთანხმები იმ ოპონენტებს, რომლებიც თვლიან, რომ ეს არის ისევ ორპოლუსიანობამდე მიყვანა საარჩევნო პროცესის.
- მაშინ რა არის?
- ორპოლუსიანობამდე რომ მიეყვანა მას საარჩევნო პროცესი, აქვე გააკეთებდა სხვა პარტიების შეფასებას, თუნდაც როგორც ნაციონალური მოძრაობის ხელშემწყობის, ანუ გაკრეფავდა შუაში მყოფ ყველა სუბიექტს და დატოვებდა მარტო ამ ორს. ასეთი ხერხი მას ამ შემთხვევაში არ გამოუყენებია, მხოლოდ ნაციონალებზე იყო აქცენტი.
- მაშინ რატომ იყო ეს აქცენტი?
- აქცენტი იყო იმ მიზეზით, რაზედაც ბევრი ლაპარაკობს განვლილი პერიოდის განმავლობაში, რომ ნაციონალების მიმართ ლოიალობამ ნაციონალები გახადა აქტიური და გაზარდა იმის შანსი, რომ ნაციონალები თუ ხელისუფლებაში არა, სერიოზული პოლიტიკური წონის პარტიად მოგვევლინონ პარლამენტში. პარლამენტში ნაციონალების მთავარ ოპოზიციად ყოფნამ ბევრი პრობლემა შეუქმნა არა მარტო „ქართულ ოცნებას“, არამედ საქართველოს მთლიანად და პოლიტიკური დევნის იარლიყი მხოლოდ იმიტომ მიაკრეს სამართლიანობის აღდგენის პროცესს, რომ ის წამყვანი პოლიტიკური ოპონენტი იყო „ქართული ოცნებისთვის“.
- ახლა რას ცდილობს ბიძინა ივანიშვილი, საით მიანიშნებს?
- შესაბამისად, მომავალ პარლამენტში თუ მთავარი პოლიტიკური ოპონენტი აღარ იქნება ნაციონალური მოძრაობა და ჩაიწევს უფრო დაბლა, მას უკვე ასეთი არგუმენტის მოშველიება, რომ დევნიან, როგორც მთავარ ოპოზიციურ ძალას, აღარ შეეძლება და დასავლეთის მხრიდან ის ტალღაც აღარ იქნება პოლიტიკური შურისძიების თაობაზე, რასაც ოთხი წელიწადია ვისმენთ. ასე რომ, ნაციონალების კვლავაც მთავარ ოპოზიციად ჩამოყალიბება მომავალ პარლამენტში ნამდვილად არ არის სასურველი. სწორედ ამაზე გააკეთა აქცენტი ივანიშვილმა. სწორედ ამ მხრივ მიმაჩნია ეს გონივრულ პოლიტიკურ აქცენტად.
- ბიძინა ივანიშვილს ოპონენტები სერიოზულად აკრიტიკებენ იმის გამო, რომ მან დაასახელა კონკრეტული ციფრი, „ოცნება“ ამდენ კაცს შეიყვანს პარლამენტშიო. რა გარანტიები აქვს და წინასწარ რატომ ასახელებს კონკრეტულ ციფრებს?
- იმავე ოპონენტებს რა გარანტიები აქვთ, როდესაც ისინი ამბობენ, არჩევნებში ჩვენ გავიმარჯვებთ და „ოცნებას“ ოპოზიციაში გადავუშვებთო. ეს პოლიტიკური ბრძოლის შეძახილებია ერთი მხრიდანაც და მეორე მხრიდანაც. გარანტიების ქონა ცოტა ღიმილის მომგვრელია ასეთ დროს. მით უმეტეს იმათგან, რომლებიც თვითონ გარანტიების გარეშე ლაპარაკობენ.
- თქვენთვის რა იყო უარყოფითი?
- დადებითში მე მივანიშნებდი კიდევ ერთ მომენტს. რეგიონებში რომ არ არის სახარბიელო სიტუაცია, ამაზე ისაუბრა ივანიშვილმა. ამ ტიპის თვითკრიტიკული მინიშნებები გვაფიქრებინებს, რომ ივანიშვილი ბევრ რამეს ხედავს. თუ შეცდომებზე თვითონ ილაპარაკებს და რასაც ხედავს, სწორედ იმას იტყვის, ეს ერთგვარი კრიტიკა მის გუნდს უფრო დაეხმარება სამომავლოდ.
- იქნებ ეს წინასაარჩევნო კამპანიის ნაწილია?
- რა თქმა უნდა, წინასაარჩევნო კამპანიის ნაწილია, გეთანხმებით. თვითონ ივანიშვილის ჩართვაც ასე აქტიურად არჩევნებით არის განპირობებული. ბევრად უკეთესია, შენს მეტოქეს დაასწრო შენს ხარვეზზე სიტყვის თქმა და მოსახლეობას და ამომრჩეველს შენივე ხარვეზი დაანახო იმ ჭრილში, როგორადაც გინდა, რომ შეფასდეს ის, რაც ვერ მოახერხე ამ ხნის განმავლობაში.
- საუბარია, რომ ის გვერდზე გადგომას არ აპირებს. როგორი იქნება მისი როლი და გავლენა ამ პროცესზე?
- მე დამრჩა შთაბეჭდილება, რომ ის წინასაარჩევნო საკადრო პოლიტიკაში, ანუ ვინ ჩაეწეროს სიაში და ვინ არ ჩაეწეროს, ვინ დაინიშნოს და ვინ მოიხსნას, არ ერევა. მან მიანდო ეს საქმე გიორგი კვირიკაშვილს.
- ანუ ყველაფერი გადააბარა ამჟამინდელ პრემიერს?
- დიახ. ეს ბიზნესმენის ლოგიკაა, რომ რაც შეიძლება მეტად გადააბარო სხვებს, დელეგირება მოახდინო სხვებთან იმისი, რასაც შენგან ითხოვენ. ის არ უზღუდავს უფლებას არავის, პირიქით, უნდა, რომ ადამიანებმა ისწავლონ დამოუკიდებლად მოქმედება თავისივე გუნდშიც და ზოგადად საქართველოშიც. სწორედ ეს პოლიტიკა ჩანს მის ნაბიჯებში.
- რამდენად დემოკრატიულ პირობებში ჩატარდება ეს წინასაარჩევნო პერიოდი და შემდეგ არჩევნები?
- ვიტყვით, რომ ხარვეზების გარეშე ჩატარდა, თუკი არ იქნება ძალისმიერი დარღვევები. თუნდაც კორცხელისმაგვარი. ან კიდევ უარესიც. ერთ დროს საარჩევნო ყუთებს იტაცებდნენ. თუ ასეთი რამ არ იქნება, ჩავთვალოთ, რომ არჩევნები ნორმალურად ჩატარდა.
- რუსთავი 2-ის თემამაც და ამ კუთხით გაკეთებულმა განცხადებებმა დადებითი შეფასება გამოიწვია, თუმცა ნაციონალებმა აქაც მხოლოდ უარყოფითი დაინახეს. რას იტყვით თქვენ?
- ნაციონალებს აწყობთ, რომ „რუსთავი-2“, როგორც სახელისუფლო პრობლემა, ისე წარმოჩნდეს. სასამართლომ საკმარისია მიიღოს გადაწყვეტილება უფლებამოსილების შეწყვეტის თაობაზე, რომ „რუსთავი-2“-ის ადმინისტრაცია, სასწრაფოდ გამოვა შენობიდან და გარედან დაიწყებს ძახილს – ხელისუფლებამ „რუსთავი-2“ დახურა. ამ პროცესს ის პირობა, რაც ივანიშვილმა დადო, ვერ უშველის.
- ჯერი სასამართლოზეა?
- დიახ, ჯერი სასამართლოზეა და ვნახოთ, სასამართლო რა მიმართულებით წაიყვანს ამ პროცესს.
„ახალი თაობა“, 09 ივნისი, 2016 წელი
ინტერვიუ ანი მიროტაძესთან: „ქვეყნის მართვის სისტემა შესაცვლელია“ // რაზე ისაუბრეს ბიძინა ივანიშვილმა, კახა შარტავამ და გუბაზ სანიკიძემ
გაიყარა თუ არა საბოლოოდ ფორუმის და „ოცნების“ გზები, რა თემებზე იყო საუბარი ბიძინა ივანიშვილის ფორუმის ლიდერებთან შეხვედრისას? „ახალ თაობას“ ამ და სხვა საკითხებზე ფორუმის ერთ-ერთი ლიდერი, ანი მიროტაძე ესაუბრა.
- ანი, რა დამატებით დეტალებზე შეგიძლიათ საუბარი, რაც ჩვენთვის დღემდე უცნობია? რატომ წამოვიდა თქვენი პარტიის ლიდერების მხრიდან ამხელა კრიტიკა ივანიშვილის მისამართით და მართლაც შედგა თუ არა შეხვედრა ივანიშვილს, შარტავასა და სანიკიძეს შორის?
- დიახ, დაგიდასტურებთ, რომ ეს შეხვედრა ნამდვილად შედგა და ეს იყო ჩვენი კოალიციის დატოვების შემდეგ. შეხვედრა შედგა ბიძინა ივანიშვილის ინიციატივით. ამ შეხვედრას მე არ ვესწრებოდი, ესწრებოდნენ კახა შარტავა და გუბაზ სანიკიძე.
- რა საკითხებზე ისაუბრეს?
- განხილული იყო საკითხები, თუ როგორ მოვედით აქამდე, ჩვენ მიერ მიღებული გადაწყვეტილება ხომ არ უკავშირდებოდა რაიმე გაუგებრობას. ამაზე ვუთხარით, რომ არა და ჩვენ გვინდა ცალკე ვცადოთ შესაძლებლობები. იყო საუბარი პოლიტიკაზე, სამომავლო გეგმებთან დაკავშირებით. მან აზრი ჰკითხა კახა შარტავას.
- რასთან დაკავშირებით?
- თუ როგორი უნდა ყოფილიყო ივანიშვილის როლი და ფუნქცია. ბიძინა ივანიშვილი მნიშვნელოვანი პოლიტიკური პროცესის ლიდერი იყო, რომელიც დასრულდა გამარჯვებით და მისმა ფაქტორმა ამ პროცესში გადამწყვეტი როლი შეასრულა და შემდეგ დატოვა თავისი თანამდებობა. კახა შარტავამ მას ურჩია, რომ უმჯობესი იქნებოდა, ის დარჩენილიყო კვლავ ფაქტორად და არ ყოფილიყო რომელიმე მხარე.
- მხარეში რა იგულისხმა? „ქართული ოცნება“?
- რასაკვირველია, „ქართული ოცნება“. ეს რჩევა რამდენად გაითვალისწინა, ან სხვასაც თუ ჰკითხა აზრი, დარჩენილიყო თუ არა პოლიტიკაში, ეს ჩვენთვის უცნობია. თუმცა ფაქტი ის არის, რომ ის აპირებს მიეხმაროს „ქართულ ოცნებას“. არ ვიცით, ამის მოტივი რა იყო, მიაჩნია, რომ „ოცნებას“ მისი დახმარება სჭირდება, ან ამით უნდა, რომ ხალხს ანგარიში ჩააბაროს საარჩევნო პროცესში.
- რას იტყვით წერილზე და გუბაზ სანიკიძის განცხადებაზე?
- წერილს სხვადასხვა შეფასებები მოჰყვა. მე ნამდვილად არ მომეჩვენა, რომ წითელი ხაზების გადაკვეთაზე იყო საუბარი, იქ ხაზგასმულად იყო ნათქვამი, რომ ეს წერილი არ იყო ამ კატეგორიის ადამიანისთვის დაწერილი ტექსტი და გუბაზ სანიკიძემ ხაზი გაუსვა, რომ არაკვალიფიციური და უნიჭო ადამიანის მიერ იყო დაწერილი.
- კი მაგრამ, ეს წერილი ხომ ივანიშვილს ეკუთვნის?
- თქვენც ხომ კარგად ხვდებით, რომ ასეთი ტიპის წერილებზე ხშირ შემთხვევაში ერთი და ორი ადამიანი არ მუშაობს. მუშაობს გუნდი და ეტყობოდა კიდეც.
- ანუ ხაზი გაუსვა იმას, რომ ეს დაუწერეს ბიძინა ივანიშვილს და ეს იყო უნიჭოდ დაწერილი?
- დიახ, დაუწერეს და ეს იყო უნიჭოდ დაწერილი წერილი, სწორედ ამას გაუსვა ხაზი. ჩვენც გვინდა, რომ ყველაფერი კარგად იყოს, მაგრამ წერილში რაზეც იყო საუბარი, ის აცდენილია ჩვენს რეალობასთან. ჩვენ ყველამ კარგად ვიცით, რომ ჩვენი მოსახლეობის უმრავლესობა შიმშილობს და დამოკიდებულია ბანკის კრედიტებზე, ხოლო ამ კრედიტების პროცენტები მძიმედ აწევს თითოეულ ოჯახს.
- შეფასდა, რომ გუბაზ სანიკიძის განცხადებები იყო განაწყენებული პოლიტიკოსის განცხადება. ასეა?
- არა, არც ერთ შემთხვევაში. ჩვენ არ გვაქვს განაწყენების მიზეზი. ხაზგასმით ვამბობ, რომ ჩვენ არც არავის გამოვუგდივართ კოალიციიდან, არც გაბრაზებულებს გამოგვიკეტია კარი და წამოვსულვართ. ეს გადაწყვეტილება პარტიამ მიიღო. განაწყენების მიზეზი არ არსებობს. თუმცა მოვიდა დრო, იმაზეც ვილაპარაკოთ, რომ სერიოზული შეცდომები იყო დაშვებული მართვაში. ქვეყნის მართვის სისტემა შესაცვლელია.
- საუბრობენ იმაზეც, რომ ივანიშვილი გუბაზ სანიკიძეზე 2012 წლის მერეა ნაწყენი, ვგულისხმობ იმ გახმაურებულ ჩანაწერებს. ამ შეხვედრაზე მსგავს თემებზეც ხომ არ ყოფილა საუბარი?
- ჩემი ინფორმაციით, არ ყოფილა. ეს თემა უფრო მასშტაბურად არის ქცეული, ვიდრე ეს არის. ასე არ ხდება. ჩვენ ამ ხნის განმავლობაში ვიყავით თანამებრძოლები და ბევრი მნიშვნელოვანი ეტაპი გავიარეთ ერთად. ჩვენ წყენის და გაბრაზების დრო არ გვქონდა. პირადი ურთიერთობებით ჩვენ არ ვხელმძღვანელობთ. იმას, რაც არ მოგვწონს, პირდაპირ ვამბობთ. არ მომწონს ის, რაც სასამართლოში ხდება და ამას ღიად ვამბობ.
- ჩასაფრებულის პოზიციიდან საუბრობენო...
- როგორ შეიძლება, იმ გუნდთან იყო ჩასაფრებული, რომელთან ერთადაც ხელისუფლებაში მოვედით. უბრალოდ, ყველაფერი შეიცვალა და ახალი ხედვები და ახალი სახეებია საჭირო. პოლიტიკას ახალი სისხლი სჭირდება.
- თქვენ არ იყავით ასეთი კრიტიკულები, როდესაც კოალიციაში იყავით…
- მე ამაში დაგეთანხმებით. როდესაც ხარ გუნდში, გუნდური პრინციპები მოითხოვს, რომ იმუშაო შიგნით. თუმცა ჩემს მაგალითზე ამ შენიშვნას ვერ მივიღებ. პირველი ვიყავი სახელისუფლო გუნდიდან, ვინც გავაკრიტიკე მურუსიძის დანიშვნა. ახლაც ვამბობ, რომ ეს უზარმაზარი სირცხვილია. იყო სხვადასხვა საკითხები, რომლებზეც კატეგორიული და განსხვავებული პოზიცია მქონდა. ფორუმი იყო ერთადერთი, ვინც კოაბიტაციაში არ შევიდა ნაციონალებთან და ჩვენ ვიყავით ის ძალა, რომელსაც არც ერთი მაღალი თანამდებობის პირი არ გვყოლია მთავრობაში. დანარჩენს მკითხველი მიხვდეს, რისი თქმაც მინდა.
- ანუ ფორუმის და ბიძინა ივანიშვილის გზები, მასთან ერთად „ოცნების“, სამუდამოდ გაიყარა?
- დღეს ეს მოცემულობა გვაქვს, ამომრჩეველთან მივდივართ მარტო, ეს მოცემულობაა 8 ოქტომბრამდე. რა იქნება 8 ოქტომბრის შემდეგ, ამას წინასწარ ვერ ვიტყვით. ეს ძალიან რთულია. პარლამენტში შესულ სუბიექტებს მოუწევთ განიხილონ კოალიციური მთავრობის შექმნის საკითხი. ჩვენ ვიმოქმედებთ მოცემულობიდან გამომდინარე.
„ახალი თაობა“, 09 ივნისი, 2016 წელი
ინტერვიუ ნუგზარ წიკლაურთან: „ბიძინა ივანიშვილი მიდის“ // „ხელისუფლების განცხადებების კომენტირება უკვე შეუძლებელია“
ვინ ან რამ აიძულა ბიძინა ივანიშვილი დაეგმო კორცხელის ინციდენტი, ვის გაუჭირდება საარჩევნო ბარიერის გადალახვა, რა შეუსაბამო განცხადებებს აკეთებს ხელისუფლება? – ამ თემებზე „ახალ თაობას~ ნაცმოძრაობის ერთ-ერთი ლიდერი ნუგზარ წიკლაური ესაუბრება.
„ბიძინა ივანიშვილმა დაგმო და გაემიჯნა კორცხელის ინციდენტს, მაგრამ ეს არაფერს შეცვლის. ის ხალხი, რომელიც ამ დარბევაში მონაწილეობდა, არ დაისჯება. ეს განცხადება მხოლოდ იმიტომ გაკეთდა, რომ ივანიშვილს სხვა გამოსავალი არ ჰქონდა, იმდენად ნათელი იყო ყველაფერი. ყოფილი პრემიერი მართლა რომ გმობდეს ამ ფაქტს, მაშინ იმის გამოძიებას მოითხოვდა, როგორ აღმოჩნდა 50 მოჭიდავე და მოკრივე კორცხელში. ამ დაგმობის პარალელურად ივანიშვილმა ისაუბრა იმ პროვოკაციაზე, რომელიც თითქოსდა ჩვენ მოვაწყვეთ. არადა ყველაფერი მშვიდობიანად მიდიოდა, მაგრამ როცა დაინახეს, რომ არჩევნების აგებდნენ, 50 ზონდერი მიუსიეს მშვიდობიან მოსახლეობას”, – ამბობს ნუგზარ წიკლაური.
- ამ განცხადების შემდეგ გაჩნდა მოსაზრებები, რომ კახა კალაძეს მოუწევს თანამდებობის დატოვება. თქვენი აზრით, შეელევიან ვიცე-პრემიერს?
- ვერ გეტყვით, შეელევიან თუ არა. ჩვენ საპარლამენტო ტრიბუნიდან მოვითხოვეთ ენერგეტიკის მინისტრის დაკითხვა. საპარლამენტო სხდომებსაც ამიტომ ვუცხადებთ ბოიკოტს, რომ დამნაშავეების გამოვლენა და სათანადოდ დასჯა არ მოხდა. ეჭვი მეპარება, რომ ამის გამო ვინმე დასაჯონ. კომიკური სასჯელები ბოლომდე ძალაში დარჩება. საერთაშორისო თანამეგობრობის აღშფოთება რომ არა, ეს სასჯელებიც არ დადგებოდა.
- თქვენ თვლით, რომ ეს განცხადება მხოლოდ დასავლეთისთვის იყო გაკეთებული?
- ასე გამოდის. ეს ფაქტი რომ არ დაეგმოთ, ჩვენს დასავლელ პარტნიორებს კიდევ უფრო მწვავე რეაგირება ექნებოდათ.
- თქვენი პარტიის წარმომადგენლები ივანიშვილის ერთმა განცხადებამ აღაშფოთა ძალიან. მისი პროგნოზით, შესაძლოა, ნაცმოძრაობამ საარჩევნო ბარიერიც კი ვერ გადალახოს. რა აძლევს ყოფილ პრემიერს ამის თქმის საფუძველს?
- ამ განცხადებიდანაც ჩანს, როგორი არაადეკვატურია ხელისუფლება. ჟურნალისტებთან შეხვედრის დასაწყისში ივანიშვილმა თქვა, ხელისუფლებაში ნაცმოძრაობის დაბრუნების საფრთხე არსებობსო. ცოტა ხნის შემდეგ კი განაცხადა, საარჩევნო ბარიერის გადალახვაც გაუჭირდებათო. ძალიან ძნელი ამოსაცნობია, რისი თქმა სურდა რუს ოლიგარქს. ამ გამონათქვამებში ლოგიკა არ არსებობს. ბოლო პერიოდში რამდენიმე ორგანიზაციამ ჩაატარა სოციოლოგიური კვლევა. ამ კვლევის თანახმად, ჩვენ და `ქართულ ოცნებას~ გვაქვს თანაბარი პოზიციები. ამას დავამატოთ 22 მაისს ჩატარებული შუალედური არჩევნები, სადაც ჩვენ კარგი შედეგი დავდეთ. ამ ყველაფერს თუ შევხედავთ, ნათელია, რომ არჩევნებზე წარმატების შანსები გაქვს. ამ დროს მათი რეიტინგი ნელ-ნელა ქვევით მიდის. მესმის, რომ საერთაშორისო ორგანიზაციების მიერ ჩატარებულ კვლევებს არ ენდობიან, მაგრამ ეს სურათი დაუდგათ მაშინ, როცა თავად ჩაატარეს კვლევა. ამ კვლევის შედეგები ერთ-ერთმა სააგენტომ გამოაქვეყნა.
ირაკლი ღარიბაშვილი ჩვენზე ამბობდა, ბარიერს ვერ გადალახავენ და რადარებიდან გაქრნენო. მერე ყველამ ვნახეთ, ვინ გაქრა რადარებიდან. ის თავისმა გუნდმა ძალიან სამარცხვინოდ გააგდო, ხოლო ჩვენმა პარტიამ 4 უბნიდან 2-ში არჩევნები მოიგო. ერთსა და იმავე საკითხზე საუბრისას ერთსა და იმავე შეხვედრაზე ივანიშვილის პოზიციების შეუთავსებლობა „ქართულ ოცნებაში“ არსებულ ისტერიაზე მიუთითებს. მათ ძალიან კარგად იციან, რომ არჩევნებს წააგებენ.
- მათ შეიძლება წააგონ არჩევნები, მაგრამ ეს იმას ხომ არ გამორიცხავს, რომ სხვას გაუჭირდება ბარიერის გადალახვა...
- ის სხვა ჩვენ ნამდვილად არ ვიქნებით. კორცხელში ჩვენ 60% ავიღეთ და თუ ახლა 60%-იან ბარიერს დააწესებენ, მაშინ მას ვერც ერთი პარტია ვერ გადალახავს. სხვა შემთხვევაში ჩვენი გამარჯვება გარდაუვალია. „ქართულ ოცნებას” კი მართლა ძალიან გაუჭირდება ბარიერის გადალახვა.
- ამ მიმართულებით ყოფილი პრემიერი ოპტიმისტურად არის განწყობილი. მისი მტკიცებით, მომავალ არჩევნებზე მისი გუნდი 95 დეპუტატს მაინც გაიყვანს. ამ პროგნოზზე რას ფიქრობთ?
- რა უნდა ვთქვათ ამ ვარაუდზე, მათივე გამოკითხვებიდან ჩანს, რომ „ქართული ოცნების“ რეიტინგი უკან-უკან მიდის. ძალაუფლების შესანარჩუნებლად შესაძლოა მათ ფული დახარჯონ, ან ისეთი ძალადობა გაიმეორონ, როგორსაც კორცხელში ჰქონდა ადგილი. ასეთი ძალადობა შედეგს რომ არ გამოიღებს, ეს კორცხელშიც გამოჩნდა. ხალხს თუ გადაწყვეტილი აქვს, ხმა მისცეს თავის რჩეულს, ყველაფრის მიუხედავად, მას მისცემენ ხმას.
როდესაც 4 წლის მანძილზე არაფერს გააკეთებ და ხალხის მოტყუებით იქნები მარტო დაკავებული, საკადრის პასუხს არჩევნებზე მიიღებ. იმის ნაცვლად, რომ შეუსრულებელი დაპირებების გამო ბოდიში მოეხადა, ივანიშვილმა მორიგი ტყუილი იკადრა და განაცხადა, 700 საწარმო ავაგუგუნეთო. ამის საპასუხოდ მას ხალხი სახლში გაუშვებს. ყოფილ პრემიერს მარტო სახლში კი არ მოუწევს წასვლა, საქართველოსაც დატოვებს. ეს მან თავად იწინასწარმეტყველა. ტელევიზიებთან შეხვედრისას მან თქვა, დამარცხების შემთხვევაში სახლში წავალო. ეს მისი სიტყვებია და მართლაც წავა.
———————-
„რეზონანსი“, 09 ივნისი, 2016 წელი
“ვიზალიბერალიზაციის ზაფხულში დასრულება გამორიცხულია. ფაქტობრივად საკითხი უკვე გადავადებულია”
ლიკა ამირაშვილი
ზაფხულში ვიზალიბერალიზაცია უკვე გამორიცხულია. პროცესი შეიძლება, მომავალი წლისთვისაც კი გადადონ ან კიდევ უფრო შორეულ პერსპექტივაში, რადგან ბევრი ნეგატიური ფაქტორი ერთმანეთს დაემთხვა, ამბობს “რეზონანსთან” საუბრისას ფონდ “ღია საზოგადოეობა საქართველოს” ევროინტეგრაციის მიმართულების მენეჯერი ვანო ჩხიკვაძე.
ვანო ჩხიკვაძე: რაც შეეხება საქართველოს ვიზალიბერალიზაციის დარჩენილი პროცესს, წესით, პარასკევს (ევროკავშირის ქვეყნების) იუსტიციისა და შინაგან საქმეთა მინისტრების საბჭოზე უნდა გავიდეს, თუმცა შესაძლოა, ეს საკითხი დღის წესრიგიდან მოიხსნას. გადაწყვეტილება ჯერჯერობით მიღებული არ არის. საქართველოსთვის ვიზალიბერალიზაციამ ერთი მოსმენა უკვე გაიარა, დარჩენილია ერთი, რის შემდეგადაც უნდა დამტკიცდეს. ამის შემდეგ პლენარულ სხდომაზე დებატები იქნება დაბოლოს კენჭისყრა. პარლამენტი საკითხს უმრავლესობით ამტკიცებს. ამის შემდეგ მოდის სტანდარტული პროცედურა და ძალაში 21-ე დღეს უნდა შევიდეს. თუმცა იმის გამო, რომ შეთანხმება ვერ შედგა, შესაძლოა, დღის წესრიგიდან მოხსნან. განხილვის ალბათობა ჯერჯერობით 50/50-ზეა.
- ამ საკითხზე გერმანიის პოზიცია უარყოფითია. რატომ გვბლოკავს? და კიდევ რომელი ქვეყანა იზიარებს მის პოზიციას?
- გერმანიამ ოფიცალურ მიზეზად კრიმინალი დაასახელა, თუმცა სტატისტიკურმა მონაცემებმა ცხადყო, რომ როგორსაც გერმანია ხატავს, ისეთი პრობლემა არ არის. როგორც ვიცი, მხარს საფრანგეთიც არ გვიჭერს.
- როგორ ფიქრობთ, რისი ბრალია ვიზალიბერალიზაციის პროცესის შესაძლო გადადება?
- ვფიქრობ, მტყუან-მართლის გარჩევის დრო, ვისი ან რისი ბრალია, ახლა არ არის. ბევრი რამის და ვინმეს ბრალია. მხოლოდ საქართველოს ბრალი არ არის.
პირველ რიგში იმ სიტუაციის ბრალია, რაც ზოგადად ევროკავშირშია. მეორე რიგში, რადიკალი მემარჯვენეების გააქტიურების, რომლებიც მიგრანტებს, რბილად რომ ვთქვათ, კარგი თვალით უყურებენ. ძალიან ბევრი საკითხი ერთმანეთთან თახვედრაშია.
- როგორც გვპირდებოდნენ, ვიზალიბერალიზაციის პროცესი ზაფხულში დასრულდებოდა, ახლა საუბრობენ, რომ შესაძლოა, შემოდგომისთვის გადაიდოს. რამდენად არის იმის ალბათობა, რომ ამ პროცესმა კიდევ გადაიწიოს?
- პროცესის ზაფხულში დასრულება გამორიცხულია. ფაქტობრივად საკითხი უკვე გადავადებულია. როდის დასრულდება ეს პროცესი – შემოდგომაზე, ზამთარში, 2016-ში, თუ 2017 წელს, ძნელი სათქმელია.
- საქართველო როგორ უნდა მოიქცეს რომ პროცესი სასიკეთო მიმართულებით წავიდეს და კიდევ უფრო არ გაიწელოს?
- ამ მხრივ ძალიან ბევრი სამუშაოა ჩასატარებელი, მათ შორის გერმანიის მიმართულებითაც. ასევე ზოგადად საქართველოს ევროპულ და ევროატლანტიკურ სტრუქტურებში ინტეგრაციის საკითხებში ბევრი სამუშაოა ჩასატარებელი. საპარლამენტო უმრავლესობის ლიდერები ერთს ამბობენ, მინისტრები სულ სხვას ამბობენ, ზოგი საერთოდ არაფერს არ ამბობს. ქვეყანაში ერთიანი სტრატეგია არ არსებობს. გადავადების შემთხვევაში რა კომუნიკაცია უნდა შედგეს საქართველოს მოსახლეობასთან, უბრალოდ, გათვლილი არ არის.
„რეზონანსი“, 09 ივნისი, 2016 წელი
ოპტიმისტურად ხართ თუ არა განწობილი, რომ ვიზალიბერალიზაციის გადაწყვეტილება მალე იქნება?
გვანცა ღვედაშვილი
ევროკავშირის წევრი ქვეყნების ელჩებმა საქართველოსთვის ვიზალიბერალიზაციის საკითხის განხილვა გერმანიის, საფრანგეთისა და იტალიის წინააღმდეგობის გამო გადადეს. მიუხედავად ამისა, პარლამენტის თავმჯდომარე დავით უსუფაშვილმა ბერლინში, ბუნდესტაგის პრეზიდენტ ნორბერტო ლამერტთან შეხვედრის შემდეგ განაცხადა, რომ კონკრეტულად საქართველოსთან მიმართებაში ვიზალიბერალიზაციის გადაწყვეტილება იქნება მალე და იქნება დადებითი.
ოპტიმისტურად ხართ თუ არა განწობილი, რომ ვიზალიბერალიზაციის გადაწყვეტილება მალე იქნება? ამ კითხვით “რეზონანსმა” საზოგადოებისთვის ცნობილ ადამიანებს მიმართა.
ზაზა ხუციშვილი (მუსიკოსი): მე ვფიქრობ, კი, რადგან რეალურად ევროპელებმა უნდა გააანალიზონ და მიხვდნენ, რომ თუკი ეს პროცესები გაიწელება, ე.წ. რუსული პროპაგანდა საქართველოში კიდევ უფრო გაძლიერდება. რეალურად ნატოსთან დაკავშირებული ამბები ფერხდება და თუ ამ მხრივაც პროცესები გაიწელება, რუსეთისკენ გადახრილი ადამიანების რიცხვი უფრო გაიზრდება.
ვთვლი, რომ საღი აზრი გაიმარჯვებს და საბოლოოდ მივიღებთ ვიზალიბერალიზაციას, თუმცა მთავარი მიზეზი, რის გამოც ეს პროცესები ფერხდება, ალბათ ის არის, რომ ევროპას არ უნდა ამდენი მიგრანტი. საქართველოში წამოჭრილი თემები კი არის მიზეზი იმისა, რომ მთავრობა გალანძღონ, რეალურად ეს არის იმ ქვეყნების პოლიტიკური გადაწყვეტილება, არ უნდათ ბევრი ადამიანი დარჩეს ევროპაში.
გია ანჩაბაძე (ისტორიკოსი): არ მგონია, მალე მიიღონ ეს გადაწყვეტილება. ვფიქრობ, ამ წელიწადში ეს საკითხი ვერ გადაწყდება და მომავალ წლამდე გადაინაცვლებს მისი განხილვა. რახან ასე შეჩერდა ეს პროცესი, აღარ მგონია, მალე მიიღონ გადაწყვეტილება, ვერც იმას გეტყვით, დადებითი იქნება თუ არა, რადგან მაინცდამაინც ჩახედული არ ვარ. როგორც ვიცი, თავიანთი შიდა პრობლემებიც აქვთ ევროკავშირში, თუნდაც ამდენი ხალხის ჩასვლის გამო. ამიტომ აჩერებენ ამ პროცესებს. გადაწყდება, მაგრამ ალბათ გარკვეული ვადით გადაიდება.
გივი სიხარულიძე (მსახიობი, მწერალი): ყველაფერი მოხდება იმისთვის, რომ საქართველომ ვიზალიბერალიზაცია არ მიიღოს. სიმართლე გითხრათ, მე არ ვარ დადებითად განწყობილი ამ საკითხებისადმი, რადგან რომც მოგვცენ, ისეთ უბედურობებს ჩაიდენენ ჩვენები, რომ მაინც შეგვიწყვეტენ ამ ვიზალიბერალიზაციას. ასე რომ, დიდი აღფრთოვანებითა და სიყვარულით არ ვარ განწყობილი ამ პროცესებისადმი.
ჩვენი საზოგადოება, თუ გვყავს საერთოდ საზოგადოება, არ არის მზად ამ ყველაფრისთვის. ჯერ ერთი, ვინც წავა, მათგან ნახევარზე მეტი აღარ დაბრუნდება. გულწრფელად რომ გითხრათ, მაშინ, როცა ჩვენი პარტიები ერთმანეთს ჭამენ, წინასაარჩევნოდ კი ზოგიერთი პარტია მზად არის ერთმანეთს არა პოლიტიკური ბრძოლა გამოუცხადოს, არამედ ხელში იარაღით ერთმანეთი დახოცონ, ასეთ ქვეყანაში რა ვიზალიბერალიზაციაზეა ლაპარაკი?!
ნატო გელაშვილი (მუსიკოსი): დადებითად ნამდვილად ვარ განწყობილი. ყოველ შემთხვევაში, იმედიანად ვუყურებ, ისევე როგორც ყველა ნორმალური ადამიანი. ვიმედოვნებ, რომ გადაწყვეტილებას მალე მიიღებენ. მე მჯერა, რომ ეს საკითხი დადებითად უნდა გადაწყდეს და მალეც, თუ რაიმე სასწაული არ მოხდა.
