„რეზონანსი“: შეჭრა “საზოგადოებრივ მაუწყებელში” და პირველი ფიზიკური დაპირისპირება
„რეზონანსი“: ინტერვიუ ნინო ზაუტაშვილთან: „შევარდნა-შეჭრა ჩვენთვის მიუღებელია და ამას არასოდეს დავეთანხმები“
„რეზონანსი“: ბორდმა ვასილ მაღლაფერიის გეგმა ჩააგდო? // „დიდი ალბათობით, მივიღებთ რეფომის სხვა კონცეფციას“
„რეზონანსი“: „პირველი არხის“ ფოიედან სახალხო მღელვარებამდე // „გამწარებული ხალხის აქციაზე გამოყვანა ძნელი არ არის“
„რეზონანსი“: ინტერვიუ სოსო ცისკარიშვილთან: „ნაცმოძრაობას“ გამოვაკლოთ ცოცხები და მივიღებთ „ოცნებას“
„რეზონანსი“: „ნაცმოძრაობის“ პროგნოზს არც „რუსთავი-2“-ის ადვოკატი ადასტურებს და არც ქიბარ ხალვაშის //როდის განიხილავს უზენაესი სასამართლო „რუსთავი-2“-ის საქმეს
„რეზონანსი“: რა თანაფარდობით გაიყო „ნაცმოძრაობა“ რეგიონებში
„ენმ“-ში ამბობენ, რომ მათ მხარეს 90% დარჩა, „ევროპული საქართველო“ კი ამ მონაცემებს არაზუსტს უწოდებს
„რეზონანსი“: ინტერვიუ პეტრე მამრაძესთან: „პარლამენტი უპრობლემოდ მიიღებს სასურველ კანონს ფარულ მოსმენებზე“
„რეზონანსი“: უვიზო მიმოსვლის ამოქმედების სავარაუდო თარიღი ცნობილია: 29 მარტი
——-
„ახალი თაობა“: ინტერვიუ ნანა დევდარიანთან: „არცერთ ხელისუფლებას მედიასთან დაპირისპირება არ მოუგია“
„ახალი თაობა“: ინტერვიუ ნინო კალანდაძესთან: „ბიძინა ივანიშვილი ცდილობს, მედია კონტროლქვეშ მოაქციოს“
„ახალი თაობა“: ინტერვიუ დავით დარჩიაშვილთან: „საკონსტიტუციო ცვლილებები პრეზიდენტს ძალაუფლებას კიდევ უფრო შეუმცირებს“
———————
„რეზონანსი“, 10 თებერვალი, 2017 წელი
შეჭრა “საზოგადოებრივ მაუწყებელში” და პირველი ფიზიკური დაპირისპირება
სალომე სარიშვილი
“საზოგადოებრივი მაუწყებლის” ირგვლივ შექმნილმა საზოგადოებრივმა ვნებათაღელვამ პიკს მიაღწია. გუშინ რამდენიმე ჯგუფის მიერ ორგანიზებული აქციის მიწურულს ვითარება უკიდურესად დაიძაბა, როცა აქტივისტების ნაწილი ტელევიზიის შენობაში შეიჭრა.
აქციის მონაწილეები ხუთწუთიან ეთერს ითხოვდნენ, რათა ტელევიზიის ჟურნალისტებისთვის სოლიდარობა გამოეცხადებინათ. ამასთან, აქტივისტები ახალი მენეჯმენტის მიერ წარმოდგენილ გეგმას ეწინააღმდეგებოდნენ და ითხოვდნენ, სამეურვეო საბჭოს ახალი დირექტორის მიერ წარმოდგენილი გეგმა ჩაეგდო.
აქციაზე სხვა მედიასაშუალების ჟურნალისტებთან ერთად, თავად საზოგადოებრივი მაუწყებლის რიგითი თანამშრომლებიც იმყოფებოდნენ, რომელთა აბსოლუტური უმრავლესობაც “რეზონანსს” მხოლოდ კონფიდენციალობის დაცვის გარანტიით თანხმდებოდა კომენტარზე.
ტელევიზიის შენობასთან მობილიზებული იყო პოლიცია, რომელიც რამდენიმე წუთის განმავლობაში ვითარების განმუხტვასა და აქტივისტების დაშოშმინებას ცდილობდა. მიუხედავად მათი მცდელობისა, აქციის მონაწილეებმა შენობაში შეჭრა მაინც მოახერხეს და ტელევიზიაში ჩართვის უფლებაც მიიღეს.
“აქციაზე მდგომი არცერთი ადამიანის მოთხოვნა განსხვავებული არაა. თითოეული ჩვენგანი საერთო პრინციპებზე ვდგავართ და საერთო აზრის ირგვლივ ვართ გაერთიანებული. ტელევიზიაში შემოვედით იმიტომ, რომ სხვა გზა არ დაგვიტოვეს. მიგვაჩნია, რომ საზოგადოებრივი მაუწყებელი არის სივრცე, სადაც საზოგადოებრივი აზრის გაჟღერება ყოველგვარი პარტიული ინტერესების გარეშეა შესაძლებელი. მოვუწოდებთ საზოგადოებრივი მაუწყებლის ჟურნალისტებსა და პროფკავშირებს, გაერთიანდნენ თავიანთი ინტერესებისა და უფლებების დასაცავად,” – განაცხადეს აქციის მონაწილეებმა ტელევიზიაში შეჭრისას და განცხადების მიწურულს კიდევ ერთი აქცია დააანონსეს, რომელიც მათი თქმით, დღეს თავისუფლების მოედანზე მშრომელთა უფლებების მხარდასაჭერად გაიმართება.
ცნობისთვის: გუშინდელი აქცია რამდენიმე ჯგუფის მიერ იყო ორგანიზებული, მათ შორის, ესენი იყვნენ: სტუდენტური მოძრაობა “აუდიტორია 115″, მოძრაობა “მწვანე მუშტი“; ფემინისტური მოძრაობა “ქალთა მზერა“, პროფკავშირებისა და “ახალგაზრდა იურისტთა ასოციაციის” წევრები.”საზოგადოებრივი მაუწყებლის მხარდამჭერ აქციებს უკვე რამდენიმე დღეა ვმართავთ. ვითხოვთ, რომ სივრცე, რომელიც საზოგადოებრივ მაუწყებელზე ახლა არსებობს, შენარჩუნდეს. ერთი მხრივ ჩვენ მხარს ვუჭერთ თანამშრომლებსა და მათ შრომით უფლებებს, რათა ისინი უმიზეზოდ სამსახურიდან არ გაუშვან, ხოლო მეორე მხრივ, ჩვენ ვუპირისპირდები იმ ე.წ. გეგმას, რომელიც საზოგადოებრივი მაუწყებლის ახალმა გენერალურმა დირექტორმა საზოგადოებას შესთავაზა. “ჩვენ გვსურს და მოვუწოდებთ სამეურვეო საბჭოს – არ დაუჭიროს მხარი ამ ე.წ. გეგმას, ვინაიდან წინააღმდეგ შემთხვევაში ის უნიკალური სივრცე, რომელიც საზოგადოებრივ მაუწყებელში არსებობს და რომლის ერთგვარი ვალდებულებაცაა საზოგადოების პრობლემების გაშუქება, დაიკარგება. სწორედ ესაა ჩვენი აქციების მიზანი,” – განუცხადა “რეზონანსს” “აუდიტორია 115″-ის წარმომადგენელმა თორნიკე შევარდნაძემ.
რაც შეეხება უშუალოდ „საზოგადოებრივი მაუწყებლის“ ჟურნალისტებს, რომლებიც აქციაზე ასევე იმყოფენოდნენ, მათი უმრავლესობა მედიასთან საკუთარი პოზიციის გამოხატვას ერიდებოდა. ყველა მათგანისთვის მიუღებელია ის პროცესები, რაც „საზოგადოებრივ მაუწყებელში“ უკანასკნელი ორი კვირის განმავლობაში მიმდინარეობს. ვარაუდობენ, რომ ჟურნალისტების უმრავლესობა უსამსახუროდ დარჩება და ამბობენ, რომ მიუხედავად ამ კითხვაზე გაუცემელი პასუხისა, მათი ეჭვი ლეგიტიმურია.
როგორც ჟურნალისტების უმრავლესობა ჩვენთან საუბრისას აცხადებდა, მათთვის ადამიანების ასე ხელაღებით სამსახურიდან გაშვება მიუღებელია და ასეთ შემთხვევაში მნიშვნელობა არ აქვს ეს ტელევიზია იქნება, თუ სხვა დაწესებულება.
„პირველი არხის” ჟურნალისტები ვარაუდობენ, რომ დასაწყისში სამსახურიდან გაშვება იმ ჟურნალისტებს ემუქრებათ, რომელთაც ტელევიზიასთან მოკლევადიანი კონტრაქტები აქვთ გაფორმებული. მიუხედავად იმისა, რომ საინფორმაციო სამსახურის რამდენიმე ჟურნალისტს (როგორც ამას თავად ვარაუდობენ) ტელევიზიის დატოვება არ მოუწევს, ისინი თავის კოლეგებს მაინც მხარს უჭერენ და ამბობებ, რომ თუკი მაუწყებელზე თანამშრომლების მასობრივი დათხოვნა დაიწყო, ისინი აქციებს გამართავენ და თავიანთ პროტესტს მასშტაბური გამოსვლებით გამოხატავენ.
„ზუსტად ვიცი, რომ მათ, ვისაც ამგვარი მეთოდებით სამსახურიდან გაუშვებენ, ყველა მხარში დაუდგება. მიუხედვად იმისა, რომ შესაძლოა წმენდა “მოამბეს” არ შეეხოს, არიან მოკლევადიანი კონტრაქტების მქონე თანამშრომლები, რომელთაც უსამსახუროდ დარჩენა ემუქრებათ. ყოველ შემთხვევაში, მათი ბედი ჯერ კიდევ გადაუწყვეტელია,” – ამბობენ ჟურნალისტები და სამეურვეო საბჭოს ახალი მენეჯმენტის მიერ წარმოდგენილი გეგმის “ჩაგდებისკენ” მოუწოდებენ.
აღსანიშნავია, რომ საზოგადოებრივ მაუწყებელში გასატარებელი რეფორმების აუცილებლობაზე თავად ჟურნალისტებიც საუბრობენ, თუმცა ამბობენ, რომ ეს ადამიანების სამსახურიდან გაშვების საფუძველზე არ უნდა მოხდეს. მათი თქმით, საზოგადოებრივი მაუწყებლის ამ მდგომარეობამდე მიყვანა ყველა იმ ადამიანის პასუხისმგებლობაა, რომელიც ამ დრომდე მენეჯმენტში მუშაობდა. “ამ შემთხვევაში სულ ერთია, ვინ იყო მენეჯმენტში. მთავარია, რომ მათი მისამართით კითხვები არსებობს, რომელსაც პასუხი გაცემული არ აქვს. ზუსტად იმ ადამიანებმა უნდა აგონ პასუხი და არა ჩვეულებრივმა, რიგითმა ადამიანებმა. მიუხედავად იმისა, რომ ტელევიზიას უამრავი პრობლემა აქვს და ეს დიდი ხანია რაც გრძელდება, ჟურნალისტები მაინც ჩვეულ რეჟიმში მუშაობენ და ამას ყველა ხედავს,” – აცხადებენ პირველი არხის ჟურნალისტები.
ამასთან, ისინი მომხრე არიან ახალმა მენეჯმენტმა ტელევიზიაში ტესტირება ჩაატაროს, თუმცა, მათი თქმით, ეს უნდა იყოს მაღალ დონეზე ჩატარებული ტესტირება და მას პროფესიონალი უნდა ხელმძღვანელობდეს.
“კი, ბატონო, ჩაატარონ ტესტირება, ოღონდ მაღალ დონეზე და არა ისე, რომ ვიღაც არაპროფესიონალმა შეაფასოს ადამიანი, რომელიც 24 საათის განმავლობაში ამ ტელევიზიაში ქმნიდა ამბავს და უკეთესი მომავლისთვის იღწვოდა,” – ამბობენ ისინი.
„რეზონანსი“, 10 თებერვალი, 2017 წელი
ინტერვიუ ნინო ზაუტაშვილთან: „შევარდნა ჩვენთვის მიუღებელია და ამას არასოდეს დავეთანხმები“
თიკო ოსმანოვა
“წარმოუდგნელად მიმაჩნია ამ გეგმის მიხედვით ტელევიზიის მართვა. მითუმეტეს ისეთი რთული ორგანიზამის, როგორიც არის „საზოგადოებრივი მაუწყებელი“. ვფიქრობ, საღი აზრი გაიმარჯვებს და „პირველ არხს“მიეცემა მაუწყებლობის საშუალება”, – ამბობს “რეზონანსთან” საუბრისას ჟურნალისტი გადაცემა “რეალური სივრცის” წამყვანი ნინო ზაუტაშვილი. საზოგადოებრივ მაუწყებელთან გუშინ გამართულ აქციაზე და ზოგადად ტელევიზიის გარშემო განვითარებულ მოვლენებზე “რეზონანსი” ნინო ზაუტაშვილს ესაუბრა.
- ვასილ მაღლაფერიძის მიერ წარმოდგენილმა გეგმამ გარკვეული ვნებათაღელვა გამოიწვია. გუშინ ამასთან დაკავშირებით აქციაც გაიმართა, რომელიც ტელევიზიაში შეჭრით დასრულდა რას ფიქრობთ ამასთან დაკავშირებით?
- ასეთი რაღაცეები არ უნდა მოხდეს. მესმის ეს გამოხატვის თავისუფლების ფორმებია, მაგრამ ნამდვილად არ არის სწორი, როცა ადამიანები იჭრებიან ტერიტორიაზე, სადაც ადამიანები მუშაობენ. გასაგებია, რომ იქ მისულ ადამიანებს აქვთ პროტესტის მიზანი, მაგრამ რა თქმა უნდა ფორმებზე არ ვთანმხდებით, ეს არაა სწორი.
- შესაძლოა აქციებმა პერმანეტული ხასიათი მიიღოს და მას პოლიტიკური პარტიებიც შეურთდეს…
- არანაირი პარტიული ნიშნით გამართულ აქციას არ შევუერთდები. „საზოგადოებრივი მაუწყებელი“ ზუსტად ის ორგანიზაცია, რომელსაც ნეიტრალური პოზიცის დაცვა ევალება. ის, რომ ჩვენ რაიმე მოძრაობებს შევუერთდეთ, აბსოლუტურად გამორიცხულია. ყოველთვის ვამბობდი და ახლაც გავიმეორებ – ვემიჯნები ყველანაირ პარტიულ აქტივობებს. არ ვარ პარტიული ადამიანი, ვარ ჟურნაალისტი, თავისუფალი სიტყვის მომხრე და დავრჩები მთელი ჩემი ცხოვრება.
- მაშინ რას აპირებთ, როგორ უნდა გაუწიოთ წინააღმდეგობა ამ გეგმას, რომელიც ამ ეტაპზეა წარმოდგენილი?
- მხოლოდ სამართლებრივად. ის, რომ ადამიანების ერთი ხელის მოსმით სამსახურიდან გაშვება და გადაცემების დახურვა კანონს ეწინაღმდეგა, ყველასთვის ცნობილია და ჩვენც ზუსტად კანონის ფარგლებში ვიმოქმედებთ. თუ საზოგადოება ჩათვლის საჭიროდ, მოვიდეს და აქცია გამართოს, ეს მათი გადასაწყვეტია, მაგრამ შევარდნა და ამ ფორმით პროტესტის გამოხატვა ჩვენთვის მიუღებელია და ამას არასოდეს დავეთანხმები.
- და როგორ ფიქრობთ, რა გადაწყვეტილებას მიიღებს თავად ბორდი?
- საზოგადოებრივი მაუწყებლის ბორდს ძალიან სერიოზული პასუხისმგებლობა აკისრია. ვფიქრობ საღი აზრი გაიმარჯვებს და “პირველ არხს” მიეცემა მაუწყებლობის საშუალება.
- თქვენ პირადად თუ ესაუბრეთ ამ გეგმის წარმოდგენის შემდეგ ვასილ მაღლაფერიძეს?
- ე.წ. გეგმის წარმოდგენის შემდეგ ერთხელ შევხდი ბატონ ვასილ მაღლაფერიძეს და მინდა გითხრათ, რომ კიდევ უფრო ბუნდოვანი გახდა ეს ე.წ. გეგმა. ამიტომ მე წარმოუდგნელად მიმაჩნია ამ გეგმის მიხედვით ტელევიზიის მართვა. მითუმეტეს ისეთი რთული ორგანიზამის, როგორიც არის „საზოგადოებრივი მაუწყებელი“. კიდევ ერთხელ დავაფიქსირებ – ეს არაა არც ტელევიზია და არც რადიო. ესაა დემოკრატიული ინსტიტუცია, რომელსაც უკვე ამდენი წელია ვაკოწიწებთ. ცუდი თუ კაი ტექნიკით – ფაქტია ის შეფასებები, რაც ბოლო პერიოდში დაიდო საზოგადოებრივი მაუწყებლის მუშაობასთან დაკავშირებით. ტელევიზია დაბალანსებულად ახერხებდა ინფორმაციის მიწოდებას მაყურებლისთვის და ეს აუცილებლად გასათვალისწინებელია.
- თქვენი აზრით, არხი საჭიროებს თუ არა ზოგადად რეფომას?
- რეფორმა რა თქმა უნდა საჭიროა, მაგრამ რეფომა არ ნიშნავს აუცილებლად გადაცემების დახურვას და ადამიანების ოპტიმიზაციას. კარგი მენეჯმენტი არ ნიშნავს მცირე კადრებით რაღაცის მართვას. პირიქით, კჩ ცუდი მენეჯმენტის ნიშანია. ასე რომ, ძალიან ყურადღებით უნდა მოვეკიდოთ ასეთ საკითხებს. რეფორმის ჩატარება თავისუფლად შეიძლება გაცილებით უფრო ნორმალური და ადამიანური მეთოდებით.
- რაც შეეხება თანამშრომლების ტესტირებას ამასთან დაკავშირებით რა აზრის ხართ?
- არ ვიცი, ამასთან დაკავშირებით ვერაფერს ვიტყვი. ზოგადად ტესტირება ტრაგედია არ არის არცერთ ქვეყანაში, მაგრამ გაჩნიათ კრიტერიუმებს და მოხდება თუ არა ზუსტად იმ კრიტერიუმებით, რომელსაც ჟურნალისტიკის პრინციპების დაცვა ითვალისწინებს. პროფესიული ნიშნით ტესტირება ცუდი არ არის, მაგრამ ეს არ უნდა იყო მიკერძოებული და იმაზე გათვლილი, რომ ამას გაუშვებენ და სხვას მიიღებ.
„რეზონანსი“, 10 თებერვალი, 2017 წელი
ბორდმა ვასილ მაღლაფერიის გეგმა ჩააგდო?
„დიდი ალბათობით, მივიღებთ რეფომის სხვა კონცეფციას“
თიკო ოსმანოვა
საზოგადოებრივ მაუწყებლის ახალი გენერალური დირექტორის ვასილ მაღლაფერიძის რადიკალური გეგმის დამტკიცება, დიდი ალბათობით არ მოხდება. გენერალურ დირექტორსა და ბორდს შორის პირველი შეთანხმება მიღწეულია, ერთ კვირაში ბორდმა საზოგადოებრივ მაუწყებლის შეფასების კრიტერიუმები უნდა წარადგინოს და პარალელურად საჯარო შეხვედრებს გააგრძელებენ. სამუერვეო საბჭოს წევრის ირინა ფუტკარაძის თქმით, ბორდის უმრავლესობის აზრით, მაუწყებლის შეფასების კრიტერიუმი მარტო რეიტინგი არ არის მაღლაფერიძის კონცეფცია კი მხოლოდ ამაზეა აგებული.
ცნობისთვის: კვირის დასაწყისში არხის გენერალურმა დირექტორმა ვასილ მაღლაფერიძემ არხის განვითარების 3 წლიანი გეგმა წარმოადგინა, რომელიც 2018 წლამდე საინფორმაციო გამოშვების გარდა ყველა გადაცემის დახურვას ითვალისწინებდა. სწორედ ამიტომ, გუშინ სამეურვეო საბჭოსა და გენერალური დირექტორს შორის შეხვედრა გაიმართა, სადაც 5 საათის განმავლობაში ამ საკითხზე მსჯელობდნენ. საბოლოოდ შეთანხმდნენ, რომ სანამ ტელევიზიის განვითარების გეგმაზე შეჯერდებიან, მანამდე არხის შეფასების კრიტერიუმებს ჩამოაყალიბებენ.
„იყო საქმიანი შეხვედრა, მცირე კამათიც. საბოლოოდ შევთანმხდით, რომ საჭიროა დაკონკრედტდეს საზოგადოებრივი მაუწყებლის შეფასების კრიტერიუმები. ამასთან დაკავშირებით ბორდი ვალდებულებას იღებს, რომ ამას ერთ კვირაში წარუდგენს მენეჯმენტს და გახდება მსჯელობის საგანი. ჯერ შემოწმდეს, რით უნდა გაიზომოს საზოგადოებრივი მაუწყებლის წარმატება თუ წარუმატებლობა, ეს არის რეიტინგი თუ სხვა კრიტერიუმი. ამის მერე ვნახავთ, თუ რა გეგმა უნდა მივუსადაგოდ. თუ რეიტინგზე ვაკეთებთ სწორებას, ეს ერთი საკითხია და თუ სხვა კრიტერიმებსაც დავუმატებთ – მეორე. ამასთან, სამეურვეო საბჭო პარალელურად გააგრძელებს შეხვედრებს ყველა საჯარო პირებთან და ორგანიზაციებთან”, – ამბობს “რეზონანსთან” საუბრისას სამეურვეო საბჭოს თავმჯდომარე გრიგოლ გოგელია. მისი თქმით, საბჭო არხის განვითარების გეგმას ამის მერე მიუბრუნდება.
“შევთანხმდით ერთობლივად, რომ ჯერ კრიტერიუმებზე ჩამოყალიბდებით და მერე მივუბრუნდებით ამ საკითხს, ღირს თუ არა ასეთი პოლიტიკის გატარება. თუ შევთანხმდებით, რომ სხვა რაღაცაა, მაშინ შეიძლება ამ გეგმამ სულ სხვანაირი სახე მიიღოს. შეიძლება ამ კრიტერიუმების დადებამ ისიც გამოიწვიოს, რომ შეფასდეს სათითაოდ გადაცემები და პროექტები”, – გვითხრა გრიგოლ გოგელიამ.
ბორდის წევრის ირინა ფუტკარაძის თქმით, ბორდის უმრავლესობის აზრით, მაუწყებლის მთავარი შეფასების კრიტერიუმი მხოლოდ რეიტინგი არ არის, მაღლაფერიძის კონცეფცია კი მხოლოდ ამაზეა აგებული.
“გენერალურმა დირექტომა რა ხედვაც წარმოადგინა, ეს იყო დაფუძნებული მხოლოდ რეიტინგებზე და იმიტომ წარმოადგინა ასეთი რადიკალური გეგმა. ხოლო ბორდის წევრების უმრავლესობას მიაჩნია, რომ მაუწყებლის კრიტერიუმი მხოლოდ რეიტინგი არ არის. საზოგადოებრივი მაუწყებელს სხვა დანარჩენი ფუნქციაც აქვს. შესაბამისად, ამ ყველაფერზე დოკუმენტს შევიმუშავებთ. ამის მერე ყველა დაინტერესებულ პირს შევხდებით და ვისმჯელებთ ტელევიზიის ბედზე”, – უთხრა “რეზონანსს” ირინა ფუტკარაძემ.
კითხვაზე, ეს გამოიწვევს თუ არა ვასილ მაღლაფერიძის კონცეფციის ჩაგდებას იგი გვპასუხობს: “კი. არაერთხელ აღნიშნა გენერალურმა დირექტორმა, რომ ეს კონცეფცია დაფუძნებული იყო მარტო რეიტინგებზე. ჩვენ შევთანხმდით, რომ მაუწყებელი სხვადასხვა კრიტერიუმით უნდა შეფასდეს. ეს არ ნიშნავს, იმას, რომ არხი რეფორმას არ საჭიროებს.
“დიდი ალბათობით, მივიღებთ რეფომის სხვა კონცეფციას. უფრო კონკრეტულად იქნება, თუ რა გვჭირდება – რამდენი გადაცემა, რამდენი თანამშრმომელი და რა ფართი”, – გვითხრა ირინა ფუტკარაძემ.
აღნიშნულ შეხვედრასთან დაკავშირებით კომენტარი გააკეთა საზოგადოებრივი მაუწყებლის გენერალურმა დირექტორმა ვასილ მაღლაფერძიმეც, რომელმაც აღნიშნა, რომ ამ შეხვედრით მნიშვნელოვანი პროცესი დაიწყო.
“შეკითხვები არ იყო, ჩვენ გავდიოდით ჩვენს მიერ წარდგენილ დოკუმენტს. შეფასებით ნაწილში იყო სრული თანხვედრა. ვფიქრობ, ძალიან მნიშვნელოვანი პროცესი დაიწყო. ჩვენი წარდგენილი დოკუმენტი ეფუძნებოდა ხედვას, რომ მაუწყებელი უნდა ფასდებოდეს რეიტინგებით, ანუ მაყურებლების რაოდენობით. ასე უნდა იზომებოდეს ტელევიზიის მუშაობა, ანუ მედიასივრცეში, საბაზრო ეკონომიკის პირობებში ჩვენი ხედვა ამას ეფუძნება დღესაც. გამოითქვა მოსაზრება, რომ საზოგადოებრივი მაუწყებელი არ უნდა ფასდებოდეს მხოლოდ რეიტინგებით და უნდა ფასდებოდეს კიდევ სხვა დამატებითი კრიტერიუმით, ანუ საზოგადოებრივი მაუწყებელი უნდა შეფასდეს განსხვავებულად, ვიდრე სხვა რომელიმე ტელევიზია. მაგრამ აქვე ითქვა ისიც, რომ აქამდე ასეთი კრიტერიუმი არ შემუშავებულა. სამეურვეო საბჭომ აიღო ვალდებულება და ძალიან მნიშვნელოვანი ნაბიჯი გადადგა, რომ ერთი კვირის თავზე, ხუთშაბათს ის მოიტანს იმ ვარიანტს, თუ როგორ უნდა ფასდებოდეს „საზოგადოებრივი მაუწყებელი“ – ანუ რეიტინგი და კიდევ ორი, სამი, ოთხი კომპონენტი, რომელიც იქნება გაზომვადი და ხელშესახები”, – განაცხადა ვასილ მაღლაფერიძემ. მისივე ინფორმაციით, სამეურვეო საბჭო ექსპერტრებთან ერთად იმუშავებს.
“ჩვენ მიგვაჩნდა, რომ ლიდერი საზოგადოებრივი მაუწყებელი უნდა გაჩნდეს არსებულ მედიაბაზარზე, ამ ტელევიზიებთან კონკურენციაში. ჩვენ ამ გზას ვთავაზობდით. თუ სამეურვეო საბჭო და საზოგადოება იტყვის, რომ ჩვენ უნდა ვმოქმედებდეთ სხვა სივრცეში და სხვა კრიტერიუმებით, ამას შევხედავთ და შევაფასებთ. ჩვენი გეგმა, რასაკვირიველია, შეიძლება არა მარტო გადაიხედოს, არამედ შეიძლება გვერდზეც გადაიდოს, მაგრამ ერთ მნიშვნელოვანზე შევთანხმდით, რაც ვფიქრობ მთელი ამ წლების განმავლობაში ძალიან მნიშვნელოვანი მიღწევაა – რომ არსებულ ვითარებას საზოგადოებრივი მაუწყებელი აღარ დაუბრუნდება. დაიწყო დისკუსია, სადაც მთელი საზოგადოება შეთანხმდება, როგორი გვინდა იყოს საზოგადოებრივი მაუწყებელი. როგორი უნდა იყოს და როგორ გაიზომოს, ამაზე უნდა შევთანხმდეთ და ეს უნდა გაიწეროს”, – განაცხადა ვასილ მაღლაფერიძემ.
„რეზონანსი“, 10 თებერვალი, 2017 წელი
„პირველი არხის“ ფოიედან სახალხო მღელვარებამდე
„გამწარებული ხალხის აქციაზე გამოყვანა ძნელი არ არის“
ეკატერინე ბასილაია
საზოგადოებრივი მაუწყებლის კიბეებიდან დაწყებული მცირე საპროტესტო აქცია შესაძლებელია სხვა ბევრი პატარა თუ დიდი აქციის ერთგვარ სიმბოლურ დასაწყისად იქცეს და ახალგაზრდების კიდევ უფრო გააქტიურება გამოიწვიოს, რაც, პოლიტოლოგების თქმით, ხელისუფლებისთვის საკმაოდ დიდი გამოწვევა გახდება.
„ქუჩა უკვე გამოცოცხლდა და ამის სიმბოლო იყო დღეს საზოგადოებრივი მაუწყებლის წინ მიმდინარე აქცია. ხვალ უკვე დაინიშნა კიდეც ახალი აქციის დრო და ადგილი,” – აცხადებს “დამოუკიდებელ ექსპერტთა კლუბის” პრეზიდენტი სოსო ცისკარიშვილი. მისი თქმით, დღეს წინა პლანზე სოციალური პრობლემები გამოდის და ეს კიდევ უფრო დიდი საფრთხის შემცველია “არხეინად მჯდომი ხელისუფლებისთვის”.
“ყველაფერს აქვს თავისი საზღვარი და ჩვენი საზოგადოების ვერცერთი ფენა ვერ იქნება ნეიტრალური. ცალკე აზოტის ქარხნის ასეულობით პროფესიონალი დაითხოვეს ერთ დღეს, ასევე სასოწარკვეთილნი არიან “ბავშვთა სამყაროს” განადგურების შემდეგ დარჩენილი მოვაჭრეები, ამას ემატება უსამართლობის განცდა. ჯერ კიდევ არ არის ორგანიზებული ფართო ახალგაზრდული მოძრაობები, მაგრამ იქნება ეს “აუდიტორია 115″ თუ “მწვანე მუშტი”, ასეთები კიდევ შეიქმნებიან იმისდა მიხედვით, სიჯიუტის როგორ ეტაპს შეარჩევს არსებული ხელისუფლება. უსამართლობა არის მთავარი საფუძველი ბუნტის და აჯანყების. გამწარებული ხალხის აქციაზე გამოყვანა ძნელი არ არის,” – მიიჩნევს სოსო ცისკარიშვილი.
ექს-პრემიერ ბიძინა ივანიშვილის ყოფილი მრჩეველი გია ხუხაშვილი ამბობს, რომ დღეს მედიის დასაცავად დაწყებული პროტესტი ბუნებრივია, რადგან ის მარტო ერთი მედიის პრობლემასთან ასოცირებული არ არის, ის უფრო სამოქალაქო პროტესტია უსამართლობის წინააღმდეგ. იგი ამბობს, რომ არა მარტო სიტყვის თავისუფლების კუთხით არის ბუნდოვანი სურათი, არამედ წმინდა სოციალური პრობლემატიკის გამოც, როდესაც ასობით ადამიანი შეიძლება დარჩეს სამსახურის გარეშე და თან ეს ყველაფერი ძალიან უხეშად ხდება.
„ახლა უკვე ეს პროტესტი მარტო ერთი მედიის პრობლემასთან ასოცირებული არ არის. მეტსაც გეტყვით, საქართველოს უახლეს ისტორიაში ძალიან ბევრი აქტიური სამოქალაქო დაპირისპირების პირველი კერა სწორედ ამ საზოგადოებრივ ტელევიზიაში ჩნდებოდა. მიუხედავად იმისა, რომ ეს ერთგვარად სასაცილოა, რადგან ამ ტელევიზიას პრაქტიკულად არავინ არ უყურებს ამ ქვეყანაში, მაგრამ რატომღაც პროტესტის ეპიცენტრი ის ხდება ხოლმე. როგორ შეიძლება განვითარდეს პროცესები, ეს მხარეების კეთილგონიერებაზეა დამოკიდებული,” – აღნიშნავს გია ხუხაშვილი. მისი თქმით, ქვეყანაში სოციალური პრობლემები მარტო ტელევიზიის თანამშრომლებთან დაკავშირებით კი არ არის, სოციალური ფონია მთლიანად დამძიმებული, საპროტესტოდ უკვე ახალგაზრდები გამოვიდნენ, რომლებსაც სისხლი უდუღთ და თუ ხელისუფლება პრობლემის ადეკვატური არ იქნება, დიდი გამოსვლებია მოსალოდნელი.
„ძალიან ბევრი პრობლემაა დაგროვილი, საზოგადოებრივი მაუწყებელი არის პრობლემების მთელი ბუკეტის ერთ-ერთი გამოვლინება. საქმე ისაა, რომ ეს ბევრი პრობლემა ჯერ ისევ სამზარეულოშია ჩაკეტილი, მაგრამ ერთხელ თუ იფეთქა და მასშტაბი აკრიფა, მერე შეიძლება ეს დიდ პროტესტში გადაიზარდოს. ყველა ტკივილი გაერთიანდეს, ისე როგორც არაერთხელ მომხდარა. მგონია, რომ პრემიერის განცხადებამ ცეცხლზე ნავთი დაასხა, როდესაც უპირობო მხარდაჭერა გამოუცხადა საზოგადოებრივი მაუწყებლის დირექტორს და ამით ბორდის პოზიციისა და სოციალური პრობლემატიკის უგულებელყოფა მოახდინა. არაადეკვატურია, როდესაც ხელისუფლებაში მოსვლიდან მე-5 წელს გაახსენდა, რომ თურმე არაეფექტურად იხარჯება ფული. ეკონომიკის მინისტრი არ იყო და მის კომპეტენციაში არ იყო ტელევიზიაში რა ხდებოდა ამის აუდიტირება?
პრემიერის განცხადება არაადეკვატური და ვითარების შეუსაბამო იყო და ამან დეტონატორის როლი ითამაშა. თუ ხელისუფლება რიტორიკას არ დაუკვირდება, საზოგადოებასთან დიალოგში არ შევა, რთულ პროცესებს შეიძლება მისცეს ბიძგი. ეს ყველაფერი იფეთქებს და იფეთქებს ძალიან ცუდად,” – ამბობს გია ხუხაშვილი.
საზოგადოებრივი კომუნიკაციების მართვის სპეციალისტ არჩილ გამზარდიას განცხადებით, საერთო ჯამში ყველა პროტესტი უფლებებზე მიდის: „პრობლემაა მედიაში დასაქმებულთა მომავალი ბედიც და ასევე პრობლემაა ბოლო პერიოდში ფართოდ გასაჯაროებული უსამართლობაა ძალიან ბევრ ორგანიზაციაში, რაც პროტესტს იწვევს და თვითმართვადი პროტესტიც უკვე ჩანს. დღეს პოლიტიკური ჯგუფები არ არიან წინა პლანზე, მაგრამ ხვალ-ზეგ მათაც დავინახავთ“. მისივე თქმით, ცალსახად ჩნდება განცდა, რომ ხელისუფლება სოციალურ და სხვადასხვა ტიპის უსამართლობას მეურვეობს, შედეგად კი მსხვერპლის დასაცავად შესაძლოა ყველა გაერთიანდეს და საერთო ჯამში ამან ძალიან ბევრ ნეგატიურ პროცესს მისცეს საფუძველი.
“საზოგადოების მუხტი დაიჭიმება და ხელისუფლება თავის გადარჩენის მიზნით იძულებული იქნება შეკავების მექანიზმს მიმართოს. ამას “ნაციონალური მოძრაობის” ხელისუფლება მიმართავდა და ეს შეკავება იყო მოქალაქეებზე ძალადობა, დიქტატურა და რეჟიმის პირობებზე გადასვლა. სავსებით შესაძლებელია, პროცესები იგივე წრეზე წავიდეს. გააჩნია, ეს ყველაფერი სადამდე წავა,” – აღნიშნავს არჩილ გამზარდია. მისი თქმით, ვნახეთ ისიც, როდესაც საზოგადოებრივი მაუწყებლის შენობაში შეცვივდა რამდენიმე ადამიანი, ხელისუფლების უშუალო მომხრეებმა მათი დარბევა და დაკავება მოითხოვეს კიდეც და თუ ხელისუფლება დაინტერესებული არ არის ამ პროცესების მართვით და პრობლემების მოგვარებით, შესაძლებელია, საზოგადოებაში ფართო დაპირისპირებაც მივიღოთ.
“ჩვენი ხელისუფლება ძირითადად წაყრუების პოლიტიკას მისდევს, მაგრამ ენერგიული ჯგუფები აქტიური მუხტის შეტანას ცდილობენ და ხელისუფლებას არ დარჩება სხვა გამოსავალი, გარდა შეკავებისა. წინა ხელისუფლების დროსაც ასე ხდებოდა, ჯერ თითქოს მიუშვებდა აქციებს, მაგრამ შედეგის ვერდადგომის გამო პროტესტი მძაფრდებოდა და ხელისუფლება იძულებული ხდებოდა, რეჟიმულ და დიქტატორულ ფორმატზე გადასულიყო. ამის პერსპექტივა კი დღეს უკვე ჩანს. შეგვიძლია ვთქვათ, რომ ნელ-ნელა დიქტატურა ჩნდება, უბრალოდ ჯერ პასიური ფორმა აქვს,” – დასძენს არჩილ გამზარდია.
„რეზონანსი“, 10 თებერვალი, 2017 წელი
ინტერვიუ სოსო ცისკარიშვილთან: „ნაცმოძრაობას“ გამოვაკლოთ ცოცხები და მივიღებთ „ოცნებას“
ნინო ქეთელაური
„ყალბი არჩევნები, პრივატიზებული პარლამენტი და კონსტიტუცია, გზაკვალ- აბნეული „რუსთვი-2“, ყველაფერი ის, რაც მიუღებელია ევროპისთვის, არის სამიზნე ჩვენი კადრებთუხუცესისთვის”, – აცხადებს „დამოუკიდებელ ექსპერტთა კლუბის” პრეზიდენტი სოსო ცისკარიშვილი და აღნიშნავს, რომ, ის რაც დღვანდელ პარლამენტში ხდება, საზოგადოებისთვის ხელმისაწვდომი მხოლოდ მეორე არხის საშუალებით იყო, ეს კი საკმარისი მიზეზია იმისთვის, რომ საზოგადოებრივი მაუწყებელი “დაებნელებინათ”.
საკონსტიტუციო კომისია, პრეზიდენტის ვეტო, საზოგადოებრივ მაუწყებელში მიმდინარე პროცესები – ეს ის საკითხებია, რაზეც “რეზონანსი” პოლიტოლოგს ესაუბრა.
სოსო ცისკარიშვილი: უნდა ვეცადოთ, არ მივიღოთ ის შედეგი, რაც საპარლამენტო უმრავლესობას მთავარ მიზნად აქვს დასახული. დიდი ალბათობით, ჩვენი ახალი კონსტიტუცია პრივატიზებული იქნება კვლავ ერთი პოლიტიკური სუბიექტის მიერ, რომელიც თვის მხრივ პრივატიზებულია ერთი რიგითი მოქალაქის მიერ. გარკვეული განცხადებებით კი ვცდილობთ, რომ ევროპულ სტანდარტებს დავუახლოვდეთ, მაგრამ სინამდვილეში ხდება იგივე, რაც წინა წლებში. კონსტიტუციის ყოფილი და ამჟამინდელი მფლობელების ვითარება, ვფიქრობ, ძალიან მარტივი არითმეტიკული მიდგომით შეიძლება შევაფასოთ – “ნაციონალურ მოძრაობას” გამოვაკლოთ ცოცხები, მივიღებთ “ქართულ ოცნებას”.
- საკონსტიტუციო კომისიის მუშაობის დასრულების შემდეგ რა მოლოდინი გაქვთ, როგორი კონსტიტუცია გვექნება?
- იმ პროცესში, რისი მოწმენიც ვართ, ჩემთვის რაიმე მოულოდნელობა არ არსებობს. ყველაფერი დამოკიდებულია იმაზე, საბოლოო გადაწყვეტილების წარმოჩენის დღეს რა ხასიათზე გაიღვიძებს ბატონი ბიძინა ივანიშვილი. „დამოუკიდებელ ექსპერტთა კლუბის” დაახლოებით 20 წევრს კარგად გვახსოვს, ჩვენთან სტუმრად მყოფი ბატონი ივანიშვილი როგორ გულზე მჯიღის ცემით ამბობდა, რომ საქართველოს პრეზიდენტი არავითარ შემთხვევაში არ უნდა იყოს პარლამენტის მიერ არჩეული, რომ ახალი კონსტიტუციით უფრო ბევრი უფლებამოსილება უნდა მივანიჭოთ მას და ამ ინსტუტუტის გაძლიერება უნდა მოხდესო. ეს მისი ფრაზებია. დადგა ჟამი და აღმოჩნდა, რომ თურმე საქართევლოს ვნებს მხოლოდ პრეზიდენტი და სხვა არავინ.
სამწუხაროა, რომ საპარლამენტო უმრავლესობის ზოგიერთი ლიდერი ასეთ შეფასებებს ემონება და ჩვენ დავბრუნდით 2014 წელში, როდესაც პრემიერ-მინისტრს და მთავრობის წევრებს პრეზიდენტთან ურთიერთობა აკრძალული ჰქონდათ. ამ მიმართულებით, ერთადერთი გამონათება გახლდათ ჩვენი დღევანდელი პრემიერ-მინისტრი და პარლამენტის ყოფილი თავმჯომარე, დავით უსუფაშვილი, რომელიც ყოველთვის საკუთარ ადგილზე იყო და გონივრულ ნაბიჯებს დგამდა, ცდილობდა სიტუაციის დამბალანსებელი ყოფილიყო. თუმცა დღეს, როდესაც ჩვენი კადრებთუხუცესისთვის აღსრულებულია ოცნება, ამ ვითარებაში, რასაკვირველია, საქართველოს კონსტიტუცია მიუღებელი იქნება ევროპული სტანდარტებისთვის. ასევე, ვერ იქნება მოწონებული ის შედეგი, რომლის სურვილიც ჩვენს კადრებთუხუცესს “რუსთავი 2″-თან დაკავშირებით გააჩნია.
დიდი ალბათობით, გასული წლის ოქტომბრის არჩევნები ევროპული და სხვა წარმოშობის დამკვირვებელთა მიერ არ იქნებოდა ლეგიტიმურად გაცხადებული, მაგრამ დასავლეთ სამყარო აცნობიერებდა, რომ თუ არჩევნებს არალეგიტიმურად ჩათვლიდა, ამით მხოლოდ რუსეთი გაიხარებდა. ამიტომ მათ თვალი დახუჭეს ბევრ ისეთ საკითხზე, რაც შეიძლება, რომ საქართველოს მიმართ საყვედურის მიზეზი ყოფილიყო. ახლაც ალბთ “ბიძია, გვაპატიე” – ასე უნდა ველაქუცოთ ევროპულ სისტემას. სხვა მხრივ, ყალბი არჩევნები, პრივატიზებული პარლამენტი და კონსტიტუცია გზაკვალაბნეული „რუსთვი-2“ და ყველაფერი ის, რაც მიუღებელია ევროპისთვის, არის სამიზნე ჩვენი კადრებთუხუცესისთვის.
- პრეზიდენტი ახსენეთ და აქვე გკითხავთ – როგორ ფიქრობთ, პარლამენტის მიერ პრეზიდენტის ვეტოს დაძლევა ნიშნავს იმას, რომ მისი კონკრეტული შენიშვნები იყო მიუღებელი, თუ პრეზიდენტის აზრი ნებისმიერ შემთხვევაში მიუღებელია უმრავლესობისთვის?
- პეზიდენტმა “ვეფხისტყაოსანზე” უფრო ფილოსოფიური პოემა რომ შემოგვთავაზოს, რასაკვირველია, მისი წაკითხვის უფლებაც კი არ ექნებათ “ქართული ოცნების” ლიდერებს. ეს მიმანიშნებელია იმისა, რომ ჯერ ერთი, პარლამენტის ახალბედა თავმჯდომარეს უკვე აკრძალული აქვს პრეზიდენტთან ურთიერთობა და დასწრება, თუნდაც, უშიშროების საბჭოს სხდომებზე.
როდესაც პრეზიდენტისგან ეს შენიშვნების დოკუმენტი პარლამენტს გადაეგზავნა, ჩვენი სპიკერი დიდი აკადემიურობით ამბობდა – დიახ, ეს დოკუმენტი არის პრეზიდენტის უფლემოსილება და ვალდებულება, რომ საკუთარი ხედვა ჩამოაყალიბოსო. აქვე აცხადებდა, რომ ამ შემოთავაზების განხილვა მოხდებოდა. სამიოდე დღეში იგივე სპიკერი, ისეთივე აკადემიურობით ბრძანებდა, რომ პრეზიდენტის მიერ ვეტოს გამოცხადება ეს არის უმნიშვნელოვანესი რეფორმის დაკნინების მცდელობაო.
რა მოხდა ამ სამ დღეში, არცთუ რთულად პროგნოზირებადია, ერთი წკიპურტი (პირდაპირი თუ არაპირდაპირი ნიშნით) საკმარისი იქნებოდა, რომ მას შეეცვალა დამოკიდებულება ვეტოს მიმართ. ნამდვილად საცოდავი იყო უმრავლესობის რამდენიმე წევრი, როდესაც იურიდიული კომიტეტის სხდომაზე 2 საათზე მეტხანს ისმენდნენ ქალბატონი ანა დოლიძის გამოსვლას. პირველ რიგში მსდომი რამდენიმე მამრი წინასწარ იყო დაგეშილი იმაზე, რომ რასაც ქალბატონი დოლიძისგან მოისმენდნენ, არაფერი არ მოსწონებოდათ. იმასაც კი ვერ ხვდებოდნენ, რომ დიახ, ვენეციის კომისიისა და პრეზიდენტის მიდგომები 100%-ით იყო თანხვედრილი და ამის შესაბამისი ციტატებიც იყო მოყვანილი. ამ ყველაფერს მაყურებელი პირდაპირ ეთერში ადევნებდა თვალს და საკმაოდ სამართლიანი წარმოდგენაც შეექმნათ.
საზოგადოების თვალში საპარლამენტო უმრავლესობის ასეთი დაკნინება შეიძლებოდა აერიდებინათ მხოლოდ ერთი გზით – ვიღაცას შარი მოედო საზოგადოებრივი სატელევიზიო სივრცისთვის და საერთოდ დაებნელებინა პირველი და მეორე არხები, რაც დიახ, საინფორმაციო სიბნელეში ამყოფებს ამომრჩეველს და ჩვენთვის მხოლოდ ბნელ სივრცეში მიღებული გადაწყვეტილებები იქნება ის განაჩენი, რომელიც ადრე თუ გვიან გაჟღერდება
- „საზოგადოებრივ მაუწყებელში“ მიმდინარე პროცესებში პირდაპირ პოლიტიკურ ინტერესებს ხედავთ? რა იქნება შედეგი?
- დიახ, სწორედ ამაზე ვსაუბრობ, რომ ის, რაც დღევანდელ პარლამენტში ხდება, საზოგადოებისთვის ხელმისაწვდომი მხოლოდ “მეორე არხის” საშუალებით არის, რაც საკმარისია იმისათვის, რომ მეორე არხი დაბნელებულიყო. ამას მიაყოლეს „პირველი არხის“ დაბნელების აუცილებლობაც. თუმცა ბატონი ბიძინას მთავარი ოცნება ჯერ არ აუსრულებია – „რუსთვი-2“-ის ეკრანის დაბნელებას ჯერ ვერ აღწევს. თუ მას მართლაც გადაწყვეტილი აქვს, რომ ჩვენ საგარეო პოლიტიკაში ვექტორის შერჩევა შეგვეშალა და კრემლისკენ უნდა მივაბრუნოთ ისარი, რასაკვირველია, ეს საკმარისი იქნება იმისთვის, რომ დააბნელონ „რუსთვი-2“-ის ეკრანიც და მერე უკვე ჩვენი თანამემამულეების ნაწილი საკუთარ ფუნქციას შესრულებულად მიიჩნევს. მაგრამ რა მოხდება საქართველოში და როგორ განვითარდება მოვლენები, ეს ამ ადამიანთა გათვლილი ნამდვილად ვერ იქნება.
„რეზონანსი“, 10 თებერვალი, 2017 წელი
„ნაცმოძრაობის“ პროგნოზს არც „რუსთავი-2“-ის ადვოკატი ადასტურებს და არც ქიბარ ხალვაშის //როდის განიხილავს უზენაესი სასამართლო „რუსთავი-2“-ის საქმეს
თიკო ოსმანოვა
ტელეკომპანია „რუსთავი-2“-ის წილების საქმეზე სამართლებრივი დავა შესაძლოა კიდევ რამდენიმე თვე გაჭიანურდეს. შესაბამისად, “ნაციონალური მოძრაობის” მიერ გავრცელებულ ინფორმაციას, რომ გადაწყვეტილება 10-დან 15 თებერვლამდე გამოცხადდება, საქმის იურისტები არარეალურს უწოდებენ.
ტელეკომპანიის ადვოკატის თამთა მურადაშვილის თქმით, სასამართლოს დიდი პალატა საქმის განსახილველად ჯერაც არ დაკომპლექტებულა.
შეგახსენებთ, რომ ტელეკომპანია „რუსთავი-2“-ის წილების საქმეზე სააპელაციო სასამართლომ პირველი ინსტანციის გადაწყვეტილება ძალაში დატოვა, რაც იმას ნიშნავს, რომ ამჟამად ტელეკომპანიის 100%-იანი წილის მფლობელი ქიბარ ხალვაშია (60% ქიბარ ხალვაშის, 40% მისი კუთვნილი კომპანიის), თუმცა აღსრულების მუხლის შეჩერების გამო ტელევიზიის მართვას ვერ ახერხებს და უზენაესი სასამართლოს გადაწყვეტილებას ელოდება. რის შემდეგადაც, გამარჯვების შემთხვევაში, შეძლებს არხზე სადავეების აღებას.
უზენაეს სასამართლოს საქმის განსახილველად კანონით განსაზღვრული 6-თვიანი ვადა აქვს, რომელიც 25 იანვარს ამოიწურა. საქმის არსებითი განხილვა 21 ნოემბერს დაიწყო, მაგრამ მოგვიანებით ცნობილი გახდა, რომ საქმის სირთულის გამო ტელეკომპანიის ბედს 3 მოსამართლის ნაცვლად 9 მოსამართლე გადაწყვეტს.
როგორც იურისტები ამბობენ, სასამართლოს კოლეგია ჯერ არ დაკომპლექტებულა. აქედან გამომდინარე, ვარაუდობენ, რომ საქმის განხილვა გაჭიანურდება. შესაბამისად, მათთვის უცნობია, რა წყაროზე დაყრდნობით ავრცელებს ინფორმაციას “ნაციონალური მოძრაობის” ლიდერი ნიკა მელია. მან ოთხშაბათს საგანგებო ბრიფინგი გამართა და ტელეკომპანიის მხარდასაჭერად აქცია დააანონსა.
ნიკა მელიას თქმით, 10-დან 15 თებერვლამდე „რუსთავი-2“-ის საქმეზე უკანონო გადაწყვეტილება გამოცხადდება. „ნაციონალური მოძრაობა“ 10 თებერვალს იკრიბება ორის ნახევარზე, რათა გააპროტესტოს მსგავსი უხეში ჩარევა სასამართლოს გადაწყვეტილების მიღების პროცესში. არ არის აუცილებელი, იქ მოვიდეს მხოლოდ “ნაციონალური მოძრაობის” მხარდამჭერი. ჩვენ მსვლელობით დავიძვრებით უზენაესი სასამართლოსკენ”, – განაცხადა ნიკა მელიამ.
გამოცხადდება თუ არა „რუსთავი-2“-ის საქმესთან დაკავშირებით გადაწყვეტილება მართლაც მომავალ კვირას, ამ საკითხის გარკვევას “რეზონანსი” უზენაეს სასამართლოში შეეცადა, სადაც გვითხრეს, რომ როგორც კი რამე ინფორმაცია ექნებათ, განცხადებას თავად გაავრცელებენ.
ოპოზიციის მიერ გავრცელბულ ინფორმაციას კი თავად მხარეები არარეალურს უწოდებენ. „გუშინ ვესაუბრე თანაშემწეს და მას არანაირი ინფორმაცია არ ჰქონდა, არაფერი იცოდა და რადგან არ იცოდა, ე.ი. სასამართლოს კოლეგიაც ჯერ დაკომპლექტებულა, ვინც საქმე უნდა განიხილოს. აქედან გამომდინარე, 10 თებერვალს და ვერც 15 თებერვალს ვერ მოხდება საქმის არსებითი განხილვა, მითუმეტეს გადაწყვეტილების მიღება. კანონით, სანამ სასამართლო შეიკრიბება, ვალდებულები არიან შეკრების თარიღამდე 3 დღით ადრე აცნობონ მხარეებს საქმის განხილვის თარიღი. თანაც, რომ დაკომპლექტდეს, საქმეზე გადაწყვეტილებას მალევე ვერ გამოიტანენ, ეს უბრალოდ ფიზიკურად შეუძლებელია, ამხელა მასალას თავს ორ-სამ დღეში ვერ გაართმევენ. არაერთი საჩივარი და განჩინება გვაქვს გასაჩივრებული – არსებითი გადაწყვეტილების გარდა, პლიუს შუამდგმლობები. აქედან გამომდინარე, შეუძლებელია ყველაფერი ერთ დღეში განიხილონ. წესით ამას თვეები დასჭირდება თუ ყველაფერი წინასწარ არ აქვთ გათვლილი და ხელმოწერილი”, – ამბობს “რეზონანსთან” საუბრისას, „რუსთავი-2“-ის ადვოკატი თამთა მურადაშვილი.
იგივეს ადასტურებს ქიბარ ხალვაშის ადვოკატი პაატა სალიაც.
„არ ვიცი, ეტყობა ისინი უფრო ადრე იგებენ. როგორც მხარის წარმომადგენელს, ჩემთვის არავის არაფერი შეუტყობინებია. ჯერეჯერობით, როგორც ვიცი, სასამართლოს კოლეგიაც არ დაკომპლექტებულა. ასე რომ, საიდან მოიტანეს ეს თარიღი, ნამდვილად არ ვიცი”, – გვითხრა პაატა სალიამ.
რაც შეეხება მოლოდინს, ქიბარ ხალვაშის ადვოკატი დარწმუნებულია, რომ საქმეს მესამე ინსტანციაშიც მოიგებენ.
“იმედი გვაქვს, რომ საქმე ჩვენს სასარგებლოდ დასრულდება. გავეცანი უზენაესი სასამართლოს კოლეგიის განჩინებას. დიდი პალატისთვის გადაცემასთან დაკავშირებით გარკვეული ნიუნასებია, რომელსაც ნაწილობრივ ვეთანხმებით, ნაწილობრივ – არა. შესაბამისად, მიგვაჩნია, რომ ჩვენი პოზიცია, რომელიც წარდგენილი იყო სამივე ინსტანციაში, დასაბუთებულია და წესით ქიბარ ხალვაშის სასარგებლოდ უნდა დასრულდეს ეს დავაც. თუმცა, საბოლო გადაწყვეტილება მაინც სასამართლომ უნდა მიიღოს”, – ამბობს “რეზონანსთან” საუბრისას პაატა სალია.
მსგავსი მოლოდინი აქვს „რუსთავი-2“-ის ადვოკატსაც, თუმცა, არც წაგება იქნება მათთვის მოულოდნელი: „ნათელია, რომ ხელისუფლება ყველა ნაბიჯს დგამს იმისთვის, რომ საბოლოოდ დაეპატრონოს „რუსთავი-2“-ს ამიტომ მოულოდნელი არაფერი იქნება. თუმცა, მაქვს იმის იმედი, რომ სასამართლო რაღაცნაირად სახეს მაინც შეინარჩუნებს, მოსამართლები ბოლომდე გაუძლებენ ზეწოლას და საქმეს სასამართლებრივ ჩარჩოებში განიხილავენ”, – გვითხრა თამტა მურადაშვილმა.
„რეზონანსი“, 10 თებერვალი, 2017 წელი
რა თანაფარდობით გაიყო „ნაცმოძრაობა“ რეგიონებში
„ენმ“-ში ამბობენ, რომ მათ მხარეს 90% დარჩა, „ევროპული საქართველო“ კი ამ მონაცემებს არაზუსტს უწოდებს
სალომე სარიშვილი
მას შემდეგ, რაც “ერთიანი ნაციონალური მოძრაობა” პარტიის გარკვეულმა ნაწილმა დატოვა, ცვლილებები მოხდა როგორც თბილისის, ისე რეგიონის საკრებულოებში. როგორც “ნაციონალურ მოძრაობაში” აცხადებენ, საკრებულოებში პარტიის წარმომადგენლების დიდმა ნაწილმა “ნაცმოძრაობაში” დარჩენის გადაწყვეტილება მიიღო, თუმცა მათგან გაყოფილ “ევროპულ საქართველოში” განსხვავებულ ინფორმაციაზე საუბრობენ და ამბობენ, რომ რეგიონებში საკრებულოს წარმომადგენლების გადალაგების პროცესი ჯერ კიდევ არ დასრულებულა.
როგორც „რეზონანსს“ „ნაციონალურ მოძრაობაში“ განუცხადეს, რეგიონის საკრებულოებში „ენმ“-ის წარმომადგენლების 90%-ზე მეტი პარტიაში დარჩა. უფრო კონკრეტულად კი, როგორც პარტიაში აგვიხსნეს, საქართველოს მასშტაბით, სულ „ნაციონალურ მოძრაობას“ 276 საკრებულოს წევრი ჰყავდა, დღეის მონაცემებით კი, ეს რიცხვი 241-ს შეადგენს. ანუ, როგორც ენმ-ში აცხადებენ, პარტია ჯამში 14 საკრებულოს (მათ შორის 5 ქალაქი და 9 თემი) 35 წევრმა დატოვა.
რაც შეეხება კონკრეტულ მაჩვენებლებს, “რეზონანსს” ეს ციფრებიც მიაწოდეს, რომელიც შემდეგნაირად გამოიყურება:
თბილისში „ერთიან ნაციონალურ მოძრაობას“ სულ 7 საკრებულოს წევრი ჰყავდა, საიდანაც სამი პარტიდან გავიდა; ახალციხე – 11 საკრებულოს წევრი, მათგან “ევროპულ საქართველოში” ორი გადავიდა; ადიგენში 6 საკრებულოს წევრიდან 2 წავიდა “ევროპულ საქართველოში”; გურჯაანში 6 საკრებულოს წევრი, მათგან “ენმ” 4-მა დატოვა; ახალქალაქი – სულ იყო 1 საკრებულოს წევრი, რომელიც პარტიას გამოეთიშა; ფოთი – სულ იყო 2 საკრებულოს წევრი და ორივე მათგანი წავიდა; ზუგდიდი – 18 საკრებულოს წევრი, მათგან “ევროპულ საქართველოში” 4 გადავიდა; მცხეთა – 2 საკრებულოს წევრი, წავიდა 1; ხულო – 5 საკრებულოს წევრი, წავიდა 4; ჭიათურა – სულ იყო 5 საკრებულოს წევრი, წავიდა 1; ქუთაისი – სულ იყო ოთხი საკრებულოს წევრი, წავიდა ორი; ხონი – სულ იყო 12 საკრებულოს წევრი, წავიდა – 9.
ეს გახლავთ მონაცემები, რომელიც „რეზონანსს“ „ნაციონალური მოძრაობიდან“ მიაწოდეს და გვითხრეს, რომ აღნიშნულუ ინფორმაცია მათ საზოგადოებას უკვე წარუდგინეს. თუმცა განსხვავებულ მონაცემებზე საუბრობენ “ნაცმოძრაობიდან” წასული “ევროპული საქართველოს” წარმომადგენლების ნაწილი. ისინი ამბობენ, რომ საკრებულოებიდან მათი წარმომადგენლების გადანაწილების პროცესი ჯერ კიდევ არ დასრულებულა. ამის შესახებ “რეზონანსს” “ევროპული საქართველოს” წევრმა, დეპუტატმა ხათუნა გოგორიშვილმა განუცხადა.
“ეს პროცესი არ დასრულებულა და შემიძლია გითხრათ, რომ ის ამ წუთებშიც მიმდინარეობს. პარტია რეგიონალურ და პარტიულ შეხვედრებს ყველგან ატარებს და შესაბამისად, ეს ჯერ კიდევ მუშა პროცესი გახლავთ. შემიძლია მხოლოდ ის დაგიდასტუროთ, რომ საკრებულოებში გადანაწილების საკითხი რამდენიმე რეგიონშია დასრულებული. მაგალითად, ფოთში, ზუგდიდში, ახალციხესა და ადიგენში. ეს გახლავთ ის საკრებულოს წევრები, რომლებმაც პარტიის გაყოფის შემდეგ თავიანთი არჩევანი უკვე გამოხატეს და გაამჟღავნეს, თუ რომელი პოლიტიკური ძალის მხარეს რჩებიან,” – აცხადებს ხათუნა გოგორიშვილი და ხაზს უსვამს, რომ ტექნიკური საკითხების გამო, მათი წარმომადგენლები საკრებულოებში ოფიციალურად ჯერ კიდევ არ ფიქსირდებიან, რაზეც “ევროპული საქართველო” ახლა ზრუნავს.
ადამიანები, რომლებიც “ევროპულ საქართველოში” გაწევრიანდნენ და, წესით, ჩვენს წარმომადგენლებად უკვე უნდა ჩანდნენ, ბიუროკრატიული პრობლემების გამო ვერ ფიქსირდებიან. ახლა ზუსტად ამ ბიუროკრატიული პრობლემების მოგვარებით ვართ დაკავებული, ეს კი ნიშნავს, რომ რეგიონებში საჭიროა კონკრეტული ცნობების წარდგენა, რომ ჩვენმა წარმომადგენლება “ნაციონალური მოძრაობა” დატოვეს. ეს ცნობები კი კანცელარიიდან ოფიციალურად უნდა იყოს აღებული და დამოწმებული. ამდენად, ტექნიკურად ეს საკითხი, რა თქმა უნდა, გარკვეულ დროს საჭიროებს, რის შემდეგაც საზოგადოებას კონკრეტული პასუხი ეცოდინება,” – გვითხრა “ევროპული საქართველოს” წევრმა.
რაც შეეხება “ნაციონალური მოძრაობის” მიერ გამოქვეყნებულ ციფრებს, დეპუტატის თქმით, ესაა მონაცემები, რაც მათ საინფორმაციო საშუალებებიდან აქვთ. გოგორიშვილის თქმით, ის მონაცემები, რომელიც მთელ რიგ საკრებულოებს ეხება, “ნაციონალური მოძრაობის” სტატისტიკაში ასახული არაა. „მესმის მათი. რა დოკუმენტიც აქვთ, სტატისტიკასაც იმავე დოკუმენტით აკეთებენ. თუმცა ვფიქრობ, რომ ისინიც აჩქარდნენ, როცა პროცესის დასრულებამდე ეს მონაცემები გაასაჯაროეს,” – განუცხადა “რეზონანსს” ხათუნა გოგორიშვილმა.
„რეზონანსი“, 10 თებერვალი, 2017 წელი
ინტერვიუ პეტრე მამრაძესთან: „პარლამენტი უპრობლემოდ მიიღებს ისეთ კანონს ფარული მოსმენების თაობაზე, როგორიც უნდათ“
ია აბულაშვილი
“ფარული მოსმენებთან დაკავშირებით ველოსიპედის გამოგონება ნამდვილად არ იყო საჭირო, საკმარისი იყო ევროპული სტანდარტების შესაბამისი კანონის მიღება”, – აცხადებს პეტრე მამრაძე, რომელსაც “რეზონანსი” ფარულ მოსმენებთან დაკავშირებულ საკითხებზე ესაუბრა.
- თქვენი პროგნოზით, შეძლებს უმრავლესობა ფარულ მოსმენებთან დაკავშირებით იმ კანონპროექტის მიღებას, რომელიც, მათი თქმით, რადიკალურ ცვლილებებზეა ორიეტირებული?
- ჩემი პროგნოზი ელემენტარულია – პარლამენტი უპრობლემოდ მიიღებს იმ კანონს, რომელიც უნდათ, რადგან მმართველ გუნდს პარლამენტში საკონსტიტუციო უმრავლესობა აქვთ, მაგრამ სულ სხვაა რასთან გვაქვს საქმე. ორიოდე წლის წინათ პარლამენტის თავმჯდომარე დავით უსუფაშვილი ამბობდა – ახია ჩვენზე, რომ ისევ ფარულ მოსმენებზე გვიწევს მსჯელობაო. მართლაც უკვე 4 წელიწადზე მეტია გასული “ქოცების” გამარჯვებიდან და დღემდე მოუგვარებელია ეს პრობლემა.
საქმე ის არის, რომ მმართველ დაჯგუფებას არ უნდა ხელიდან იმ ბერკეტების გაშვება, რაც თავის დროზე შექმნა და ინტენსიურად იყენებდა თავის სასარგებლოდ სააკაშვილის რეჟიმი. არც გოგორიშვილის საარჩევნო კოდექსს, არც კაციტაძის საარჩევნო სიებს, რომლებსაც “ქართული ოცნება” მწვავედ აკრიტიკებდა ხელისუფლებაში მოსვლამდე, ძალაუფლების მოპოვების შემდეგ ხელი არ ახლეს – იმ ბერკეტებს რაც სააკაშვილმა შექმნა. პირიქით, მოირგეს და შეირგეს კიდეც. ფარული მოსმენების შემთხვევაშიც ველოსიპედის გამოგონება ნამდვილად არ იყო საჭირო, საკმარისი იყო ევროპული სტანდარტების შესაბამისი კანონის მიღება და მორჩა. ამის გაკეთება კი “ოცნების” გამარჯვებიდან პირველივე წელს შეიძლებოდა. ამის ნაცვლად იქამდე მიიყვანეს საქმე, რომ რაღაც სამ გასაღებზე ლაპარაკობენ.
- ოპოზიცია და არასამთავრობო ორგანიზაციები აცხადებენ, რომ სინამდვილეში რუსულ მოდელს იღებენ. ეთანხმებით ამ მოსაზრებას?
- რაც შეხება კონკრექულად კანონპროექტს, რამდენადაც ვიცი, ის მართლაც რუსული მოდელია, რომელიც ადამიანის უფლებათა ევროპულმა სასამართლომ კონვენციის მე-8 მუხლის საწინაღმდეგოდ მიიჩნია. იურისტები აღნიშნავენ, რომ შესაბამისი სააგენტოს ხელმძღვანელის დანიშვნის წესიც არ პასუხობს საკონსტიტუციო სასამართლოს მოთხოვნებს. ექსპერტების საერთო აზრია, რომ ყველაფერი ისევ მთლიანად სუს-ის ხელში რჩება და როგორც სოსო ცისკარიშვილმა განაცხადა, ასეთ შემთხვევაში ყველა გასუსულია.
რაც შეეხება ოპოზიციის კრიტიკას, მხედველობაში მყავს “ნაცები”, ეს მათთვის ჩვეული, ამაზრზენი ცინიზმი და უტიფრობაა. სწორედ მათ დროს საქართველოში საქმე იქამდე მივიდა, რომ დასავლელი გაოგნებული ჟურნალისტები წერდნენ: “საბჭოთა ეპოქაში საქართველოში თავისუფლად ყვებოდნენ ანტისაბჭოთა ანეგდოტებს, თუნდაც საზოგადოებრივი თავშეყრის ადგილებში. დღეს ვითომ დემოკრატიულ საქართველოში მეგობრები ერთმანეთს რომ ხვდებიან, ქუჩაში მობილურებიდან ელემენტებს იღებენ და ამით ერთმანეთს უჩვენებენ, რომ საუბრის ჩაწერას არ აპირებს და მერე იწყებენ საუბარსო”.
გავიხსენოთ ათასობით ფარული ჩანაწერი, აუდიო თუ ვიდეო, რაც სააკაშვილის სისტემამ დატოვა. ახლა კი ბედავენ კანონპროექტის კრიტიკას. თვითონ კანონებს არც კი უყურებდნენ, ისე უსმენდნენ და იღებდნენ ყველაფერს. არანაირი ზნეობრივი უფლება არ აქვთ თავისუფლებაზე და დემოკრატიაზე ისაუბრონ სადისტური სისტემის შემქმნელებმა, ვინც არ უნდა იყოს, სააკაშვილის “წასულმა” თუ “დარჩენილმა” თანამზრახველებმა.
„რეზონანსი“, 10 თებერვალი, 2017 წელი
უვიზო მიმოსვლის ამოქმედების სავარაუდო თარიღი ცნობილია: 29 მარტი
ნინო ქეთელაური
შესაძლოა, საქართველოსთვის უვიზო მიმოსვლა ძალაში 29 მარტიდან შევიდეს. ამის შესახებ რადიო „თავისუფლების” კორესპონდენტი რიკარდ იოზვიაკი „ტვიტერში“ წერს. მისივე ცნობით, ევროკავშირის ელჩები საქართველოსთვის ვიზალიბერალიზაციის საკითხის შეჩერების მექანიზმს 22 თებერვალს დაამტკიცებენ.
ქართველი ექსპერტები ამ პროგნოზს ეჭვქვეშ აყენებენ და აცხადებენ, რომ გადაწყვეტილების ძალაში შესვლამდე ძალიან ბევრი “თუ” არსებობს და ამის მოგვარება დროში ვერ მოესწრება. თუმცა, “რეზონანსთან” საუბრისას იმ ტექნიკურ დეტალებს განმარტავენ, რაც ვიზალიბერალიზაციის დამტკიცების წუთიდან ამოქმედდება.
შეგახსენებთ, რომ ორ თებერვალს ევროპარლამენტმა საქართველოს ვიზალიბერალიზაციას მხარი დაუჭირა. ამასთან, როგორც ცნობილია, საქართველოსთვის ვიზალიბერალიზაციის საკითხსა და შეჩერების მექანიზმს ევროკავშირის ელჩები 22 თებერვალს დამტკიცებენ.
ფონდ “ღია საზოგადოება – საქართველოს” ევროინტეგრაციის მიმართულების მენეჯერი ვანო ჩხიკვაძე აცხადებს, რომ თუკი გადაწყვეტილება ძალაში 29 მარტს შევა, ეს ნიშნავს, რომ მეორე დღიდან საქართველოს მოქალაქეებს ევროპის ქვეყნებში უვიზოდ გადასვლა შეეძლებათ.
„პირველ რიგში ხაზგასმით უნდა ითქვას, რომ ამ გადაწყვეტილების ძალაში შესვლამდე ძალიან ბევრი “თუ” არსებობს. მაგრამ, თუ ის ძალაში მართლაც 29 მარტს შევა, ეს ნიშნავს, რომ მეორე დღიდან საქართველოს ნებისმიერ მოქალაქეს, ვისაც ბიომეტრიული პასპორტი და ის დოკუმენტაცია ექნება, რაც შენგენის ზონაში გადასასვლელადაა საჭიროა, ევროპის ქვეყნებში უვიზოდ წასვლა შეეძლება”, – ამბობს ვანო ჩხიკვაძე.
კითხვაზე, გადაწყვეტილების ძალში შესვლამდე რა დაბრკოლებები შეიძლება შეიქმნას, ვანო ჩხიკვაძე ამბობს, რომ გარკვეული პროცედურებია გასავლელი, სადაც მთავარი დროის ფაქტორია.
“არ მგონია, რაიმე დაბრკოლება შეიქმნას. უბრალოდ, აქ მთავარია დროის ფაქტორი, თუ რამდენად მოესწრება ის ყველაფერი, რაც გასაკეთებელია. ვგულისხმობ კენჭისყრას მინისტრთა საბჭოში, შეჩერების მექანიზმზე კენჭისყრას პარლამენტში და ასევე, საბჭოში; შემდეგ მის გამოქვეყნებას და 21-ე დღეს ამოქმედებას. აქ აუცილებლად საჭიროა ევროპარლამენტის პრეზიდენტის და თავმჯდომარე ქვეყნის ხელმოწერაც. თუ ეს ტექნიკური საკითხები მოესწრო, თეორიულად შესაძლებელია, რომ 29 მარტიდან ამოქმედდეს, მაგრამ სხვა შემთხვევაში, კიდევ იქით გადაიწევს”, – ამბობს ვანო ჩხიკვაძე.
რაც შეეხება იმ ტექნიკურ დეტალებს, რომლის გავლაც საქართველოს მოქალაქეებს ვიზალიბერალიზაციის შემდეგ მოუწევთ, ამას პოლიტოლოგი სოსო ცინცაძე შემდეგნაირად განმარტავს.
“საქართველოს მოქალაქეებს შეეძლებათ, რომ 180 დღის განმავლობაში 90 დღე ევროპაში გაატარონ. ეს დღეები შეგიძლიათ გადაანაწილოთ, არ არის აუცილებელი, 90-ვე დღე ერთნაირად გამოიყენოთ. თუმცა, ვიზალიბერალიზაციის პირობებში, იმ დღეების განმავლობაში, რასაც ევროპაში გაატარებთ, ვერ ისწავლით, ვერ იმუშავებთ და რაც მთავარია, წასვლისას მესაზღვრე უნდა დაარწმუნოთ, რომ უკან დაბრუნებას აპირებთ და იქ ჩუმად სამუშაოდ ან სხვა მიზნებისთვის (ვთქვათ, სხვა ქვეყანაში გადადასვლელად) არ მიდიხართ”, – ამბობს სოსო ცინცაძე, რომელიც ვიზალიბერალიზაციის 29 მარტიდან ამოქმედებას ასევე ეჭვქვეშ აყენებს.
„ჯერ კიდევ გარკვეული პროცედურებია გასავლელი. აქ აუცილებლად უნდა აღვნიშნოთ, რომ ეს უვიზო მიმოსვლა არ არის. ჩვენს ხელისუფლებას კი უნდა, ისე წარმოადგინოს, რომ თითქოს იქ გვეპატიჟებიან, ჩავალთ და ყველაფერი უფასოა, მაგრამ ასე არ არის. ეს არის ვიზალიბერალიზაცია, ანუ გამარტივებული ვიზა. კი, ბატონო, წინ გადადგმული ნაბიჯია, მაგრამ ამით ევროპას მხოლოდ სიმბოლურად დავუახლოვდით და ესეც 29 მარტიდან არ მგონია, ამოქმედდეს. ევროჩინოვნიკები ფორსმაჟორის ტემპში მუშაობაში არ არიან შემჩნეულები, ზარმაცი ხალხია და რაც შეიძლება გაკთდეს ხვალ, იმას დღეს არასდროს აკეთებენ. თუ ისე მოხდა, რომ ცოტა აჩქარდნენ, რა თქმა უნდა, კარგია. თუმცა არ მგონია, აპრილამდე მოესწროს”, – ამბობს სოსო ცინცაძე.
——————-
„ახალი თაობა“, 10 თებერვალი, 2017 წელი
ინტერვიუ ნანა დევდარიანთან: „არცერთ ხელისუფლებას მედიასთან დაპირისპირება არ მოუგია“ // „საზოგადოებრივ მაუწყებელზე გადაცემების დახურვა არ შეიძლება“
„ახალი თაობის“ კითხვებს ყოფილი სახალხო დამცველი, ჟურნალისტი ნანა დევდარიანი პასუხობს.
- ქალბატონო ნანა, ის პროცესები, რომლებიც მედიასთან მიმდინარეობს, არ ტოვებს კარგ შთაბეჭდილებას, თუნდაც ის, რაც „საზოგადოებრივ მაუწყებელზე“ ხდება. როგორია თქვენი შეფასებები ამ კუთხით?
- იმაზე, რაც ახალმა გენერალურმა დირექტორმა ვასილ მაღლაფერიძემ თქვა, დიდი ხანია ლაპარაკია. არაერთხელ იყო ეს თვითონ თანამშრომლებში უკმაყოფილების საგანი.
- რის გამო იყვნენ უკმაყოფილონი?
- რომ ამხელა თანხები იხარჯება, ჟურნალისტები საკმაოდ დაბალ ხელფასებზე არიან, ტექნიკური განახლება არ ხდება, შენობაში რომ შეხვიდოდი, გული მოგიკვდებოდა, ისეთ მდგომარეობაშია. ეს ყველასთვის ცნობილია. უბრალოდ, აჟიოტაჟი გამოიწვია იმან, რომ ორი არხის გაჩერებაზე იყო საუბარი.
- თერთმეტი თვით უნდა დაიხუროს გადაცემებიო. ეს რამდენად არის გამოსავალი?
- ის პრობლემები, რომლებიც მოსავლელია, საერთოდ არ არის შეხებაში ჟურნალისტებთან.
- მაშ, რა არის პრობლემა? გაამართლებს ის ეჭვი, რომ ნელ-ნელა მიხურავენ ყველა გადაცემას და ბოლოს არხს?
- შეთქმულების თეორიების მომხრე არ ვარ. საერთოდ, თუ „საზოგადოებრივი მაუწყებლის“ დახურვა უნდათ, პარლამენტში საკონსტიტუციო უმრავლესობა აქვს „ქართულ ოცნებას“, მიიღებს კანონს და გააუქმებს, იტყვის, რომ არ სჭირდება სახელმწიფოს „საზოგადოებრივი მაუწყებელი“. ეს იქნება ყველაზე ადვილი გამოსავალი და ვერავინ ვერაფერს იტყვის, საკანონმდებლო ნორმით იქნება ეს გამაგრებული. პრობლემა რაშია, იცით?
- რაში?
- „კარმუშკაო“, რომ ამბობს ვასილ მაღლაფერიძე, ვისთვისაც „კარმუშკა“ იყო და ვინც ფული იშოვა ამ 10 წლის განმავლობაში, იმას არავინ არაფერს ეუბნება. ჟურნალისტებს იქიდან ფული სახლში რომ არ წაუღიათ და არ გაუფლანგავთ, ეს ფაქტია. გამოვა, რომ გაიჭყლიტებიან ის პროფესიონალები, რომლებიც მთელ ამ ბინძურ პროცესში ჩართული ნამდვილად არ ყოფილან. მეორესაც გეტყვით, ჟურნალისტებთან შედარებით ათჯერ მეტი ხელფასები აქვთ სამეთვალყურეო საბჭოს წევრებს. მათი მოვალეობა სხვა რა იყო, გარდა იმისა, რომ გადაცემებთან და მიმართულებებთან დაკავშირებით ემსჯელათ და რაღაცა შეემუშავებინათ.
- სამეთვალყურეო საბჭოს წევრები პროტესტს გამოთქვამენ და არ ეთანხმებიან ახალი ხელმძღვანელობის ხედვებს...
- ერთი გამოსავალია, უნდა დასხდნენ, პრიორიტეტებზე დაილაპარაკონ. 11 თვით სახელმწიფო ბიუჯეტზე არსებული ამხელა ორი არხის გაჩერება ძალიან დიდი ფუფუნებაა. აღარაფერს ვამბობ იმაზე, თუ ამდენ ადამიანს რა უნდა უთხრა. კონტრაქტები აქვთ გაფორმებულები, მუშაობენ. თუ რაღაცა არ მოგწონს, იმიტომ არსებობს იქ ხელმძღვანელობა და მაღალი ხელფასები იმიტომ აქვთ, რომ ამაზე უნდა იფიქრონ ყოველდღიურად. არაჯანსაღი სიტუაცია დღეს არ შექმნილა საზმაუზე! არაჯანსაღი სიტუაცია იყო, ხან რომ მიდიოდა დირექტორი, ხან რომ საკონსტიტუციოში რაღაცას ასაჩივრებდა. არაფერი იცვლებოდა და ზედა რგოლებში იყო პოლიტიკური თამაშები.
- ანუ პასუხისმგებლობა პირველ პირებს უნდა მოეკითხოთ?
- რა თქმა უნდა და არა ჟურნალისტებს, იმიტომ, რომ ისინი თავიანთი ნებით ვერ მართავენ საზოგადოებრივ მაუწყებელს. ისინი ცალკეულ გადაცემებსა და პროექტებზე მუშაობენ. პროექტებს თუ უნდა კორექტირება, ამის გაკეთება შეიძლება.
- ანუ გადაცემების შეჩერების გარეშეა შესაძლებელი პრობლემის მოგვარება?
- რა თქმა უნდა, შესაძლებელია! საზოგადოებრივ მაუწყებელზე რეფორმირების პროცესი მუდმივად მიმდინარეობდა, მაგრამ გადაცემები არავის გაუჩერებია.
- ანუ არასწორია ახალი ხელმძღვანელობის ხედვა?
- მე არ ვიცნობ დოკუმენტს, რომელიც ვასილ მაღლაფერიძემ უნდა წარუდგინოს სამეთვალყურეო საბჭოს, ხოლო ის, რაც ითქვა და რაზეც ღიად ისაუბრეს, ხშირად რაც ზედაპირზე დევს, ის არ არის სიმართლე. ის, რაზეც საუბრობენ, არ არის აუცილებლობით ნაკარნახევი. იცით, რას ჰგავს ეს ყველაფერი? ექიმი რომ ავადმყოფს დიაგნოზს ვერ დაუსვამს და მოდი, გავჭრათ და ვნახოთ, შიგნით რა ხდებაო.
- პრემიერ-მინისტრიც გამოეხმაურა საზოგადოებრივ მაუწყებელზე მიმდინარე პროცესებს და განაცხადა, რომ არხი უნდა იყოს ძალიან მაღალი დონის და უნდა აკმაყოფილებდეს საერთაშორისო სტანდარტებს. მხარი დაუჭირა და მოუწოდა ახალ ხელმძღვანელობას, ამისთვის ყველაფერი გააკეთეთო. ბევრმა პრემიერის ეს განცხადება პირდაპირ ჩარევად აღიქვა. რას იტყვით თქვენ?
- ჩვენი მთავრობა და ხელისუფლება საერთაშორისო სტანდარტებს აკმაყოფილებს?! თუ ჩვენი პარლამენტია ბრიტანეთის პარლამენტი?! ან ჩვენი ხელისუფლებაა შეერთებული შტატების სახელმწიფო დეპარტამენტის დონეზე?! არ შეიძლება, საზოგადოების რომელიღაც ერთ სეგმენტს მოსთხოვო, იყოს ყველაზე მაგარი, როცა შენ თვითონ არ ხარ ასეთი!
- ტელევიზიების გამსხვილების პროცესი მიმდინარეობს. ახლა ამას „საზოგადოებრივი მაუწყებელიც“ შეუერთდა. ეს ბევრ კითხვის ნიშანს აჩენს. რას იტყვით თქვენ?
- იმას, რომ პროცესი ხელოვნურ ხასიათს ატარებს. ამას დიდი მსჯელობა არ სჭირდება. უბრალოდ, კარგად გააცნობიერონ ერთი რამ – არცერთ ხელისუფლებას მედიასთან დაპირისპირება არ მოუგია! ყველა რჩება საბოლოოდ წაგებული. შენ შეიძლება დღეს შენი გაიტანო, იძალაო და გაიტანო, მაგრამ ხვალ სანანებელი გაგიხდება.
„ახალი თაობა“, 10 თებერვალი, 2017 წელი
ინტერვიუ ნინო კალანდაძესთან: „ბიძინა ივანიშვილი ცდილობს, მედია კონტროლქვეშ მოაქციოს“
დღეს „ნაციონალური მოძრაობა“ საპროტესტო აქციას გამართავს. როგორც პარტიის ლიდერები აცხადებენ, ისინი თავისუფალი სიტყვის დასაცავად გამოდიან.
- დღეს ქვეყანაში ძალიან მძიმე ფონია. ბიძინა ივანიშვილს მყარად აქვს გადაწყვეტილი, რომ სიტყვის თავისუფლება მაქსიმალურად უნდა შეიზღუდოს და ეს ინსტიტუტი, რასაც ჰქვია თავისუფალი მედია, თავის კონტროლქვეშ მოაქციოს. როგორც მოსალოდნელი იყო, იერიში მიიტანა „რუსთავი-2“-ზე, – ამბობს „ნაციონალური მოძრაობის“ წევრი ნინო კალანდაძე.
- ხელისუფლება აცხადებს, რომ მას ინტერესი არ გააჩნია „რუსთავი-2“-თან დაკავშირებით და ამ არხს თავად შიგნით ვერ იყოფენ. ასეა?
- მიუხედავად იმისა, რომ რამდენიმე თვის განმავლობაში ბევრი პირობა იდებოდა, მათ შორის მისივე დავალებით კვირიკაშვილის მიერაც, რომ „რუსთავი-2“-ს აღარ შეეხებოდნენ, აღმოჩნდა, რომ ეს მხოლოდ წინასაარჩევნო დაპირება იყო დიპლომატიური კორპუსის გასაგონად, იმიტომ, რომ ზეწოლა იყო მათი მხრიდან, მაგრამ არცერთ ეტაპზე ეს გეგმები არ გადახედილა და არცერთ ეტაპზე ბიძინა ივანიშვილს არ გადაუფიქრებია, რომ როგორც ყველა სახელმწიფო ინსტიტუტის, ისე, პირველ რიგში, მედიასივრცის სრული უზურპაცია უნდა მოახდინოს.
- სად იკვეთება ხელისუფლების ინტერესი „რუსთავი-2“-თან დაკავშირებით?
- ყველაზე მეტად ეს გამოიკვეთა მაშინ, როდესაც „რუსთავი-2“-ის წინააღმდეგ პროცესები დაიწყო. ბიძინა ივანიშვილის დიდი ინტერესი მედიის მიმართ კიდევ უფრო აშკარა გახადა პირველ არხზე განვითარებულმა პროცესებმა, იმან, თუ რა ფორმატში ჩატარდა საზოგადოებრივ მაუწყებელზე დირექტორის არჩევნები, როგორ გადანაწილდა იქ მმართველი რგოლი და რა პროცესი მიმდინარეობს ახლა საზოგადოებრივ მაუწყებელზე. რეალურად იქ ტოტალური წმენდა ხორციელდება.
- და „რუსთავი-2“ რა შუაშია ამ ყველაფერთან? ამ არხზე მსგავსი პროცესები ხომ არ მიმდინარეობს?
- დასრულდა თუ არა არჩევნები და გაინაღდა თუ არა ბიძინა ივანიშვილმა უკანონო კონსტიტუციური უმრავლესობა, ახლა ჯერი ისევ „რუსთავი-2“-ზე მიდგა, რათა ეს ბოლო არხიც თავის კონტროლქვეშ მოაქციოს. „რუსთავი-2“ არ არის ოპოზიციური არხი. ის კრიტიკული არხია და მას რეალურად შეუძლია გააშუქოს და ამცნოს ადამიანებს, რომ გია ცერცვაძის გადაცემა ხდება რუსეთისთვის და რომ ადამიანი ხეებს თვითნებურად თხრის. ეს არის მიზეზი, რატომაც უშლის ხელს ეს არხი ბიძინა ივანიშვილს იმ ფორმით, რომლითაც არსებობს!
- „ნაციონალურმა მოძრაობამ“ ხელისუფლება დაადანაშაულეთ რუსთავი 2-ის საქმის მოსამართლეების მოსყიდვაში, თუმცა მოვისმინეთ კონტრბრალდებები, რომ დავით საყვარელიძე სააკაშვილისა და ადეიშვილის დავალებით აქეთ უპირებდა მოსამართლეებსა და პროკურორებს მოსყიდვას. საზოგადოება დააბნია ამ ურთიერთგამომრიცხავმა ბრალდებებმა. რა ხდება რეალურად და სად არის სიმართლე?
- რეალურად ხდება ის, რომ სასამართლო სისტემა, როგორც დამოუკიდებელი ინსტიტუტი, რომელმაც უნდა იფუნქციონიროს ხელშეუხებლად, ბიძინა ივანიშვილის ინტერესში არ შედის. სასამართლო ხელისუფლება ბიძინა ივანიშვილს უნდა იყოს ექვემდებარებოდეს. სწორედ ეს არის მიზეზი, რომ ახლა ზეწოლა მიმდინარეობს მოსამართლეებზე, მათ შორის იმ მოსამართლეებზეც, რომლებმაც, როგორც ჩანს, რაღაც ფორმით გამბედაობა გამოიჩინეს და ცადეს, წინ აღდგომოდნენ ხელისუფლების მხრიდან ზეწოლას, უფრო რომ დავაზუსტოთ, სუსის მხრიდან.
- რატომ, თქვენ ფიქრობთ, რომ სუს-ი ახდენს ზეწოლას მოსამართლეებზე?
- ყველამ ძალიან კარგად ვიცით, რომ ეს ასეა. ყველამ კარგად იცის, რაზეც ვსაუბრობ და სუსს ხელმძღვანელობს ადამიანი, რომელიც არის ბიძინა ივანიშვილის ყოფილი პირადი დაცვის უფროსი. აქ ჯაჭვი სრულიად გასაგებია და სრულიად გარკვეულია, რასთან გვაქვს საქმე. უბრალოდ, იმის გამო, რომ პრობლემა შეიქმნა ამ ორი მოსამართლის თავს, ახლა ხელისუფლებამ გადაწყვიტა, ამ ფორმით დააკომპენსიროს და პარალელური, სრულიად არადამაჯერებელი კამპანია აწარმოოს, თითქოს ვიღაცები წერილებს იწერებიან მოსამართლეების დაჯილდოების მიზნით. ეს თავისთავად აბსურდული ბრალდებაა.
- თუ ეს აბსურდული ბრალდებაა, მაშინ, სად არის გარანტია, რომ მეორე მხარე სრულ სიმართლეზე საუბრობს? რით ასაბუთებთ ყოველივეს? ამბობენ, რომ სწორედ მიხეილ სააკაშვილი და დავით საყვარელიძე აშანტაჟებდნენ მოსამართლეებს.
- ვაცხადებ, რომ ეს აბსურდული ბრალდებაა. არავინ გეგმავდა მოსამართლეების დაჯილდოებას და არც არავინ აშანტაჟებდა. ასეც რომ იყოს, 14 იანვარს არის მოსამართლეების განაცხადი პროკურატურაში შესული. 14 იანვარს თუ პროკურატურაში საჩივარი შევიდა, რომ დავით საყვარელიძე და მიხეილ სააკაშვილი მოსამართლეებს აშანტაჟებდნენ, ვინმეს ეჭვი ეპარება, რომ 15 იანვარსვე ეს ყველას არ გვეცოდინებოდა და მთელ საზოგადოებას ხელისუფლება არ ამცნობდა ამის თაობაზე? რატომ აცხადებს პროკურატურა უარს 14 იანვრის განცხადების გასაჯაროებაზე, რასაც დაჟინებით ითხოვენ საზოგადოება და ოპოზიცია?!
- დღეს აქციას მართავს „ნაციონალური მოძრაობა“. აქცია „რუსთავი-2“-ის დასაცავად იმართება?
- აქცია იმართება სიტყვის თავისუფლების დასაცავად, ბიძინა ივანიშვილის რეჟიმის წინააღმდეგ, რომელიც ცდილობს, მოახდინოს ძალაუფლების უზურპაცია და ყველა სახელმწიფო ინსტიტუტი თავის კონტროლს დაუქვემდებაროს, პირველ რიგში კი – მედია. საზოგადოებამ ეს არ უნდა დაუშვას.
„ახალი თაობა“, 10 თებერვალი, 2017 წელი
ინტერვიუ დავით დარჩიაშვილთან: „საკონსტიტუციო ცვლილებები პრეზიდენტს ძალაუფლებას კიდევ უფრო შეუმცირებს“
„მოძრაობა თავისუფლებისთვის – ევროპული საქართველოს“ ერთ-ერთი ლიდერი დავით დარჩიაშვილი „ახალ თაობასთან“ ინტერვიუში მიმდინარე პოლიტიკურ პროცესებს აფასებს.
- ბატონო დავით, ბოლო დროს ქვეყანაში განვითარებულ მოვლენებზე მინდა გკითხოთ, როგორია თქვენი შეფასება? მაგალითად, ნაციონალური მოძრაობა პერმანენტულ აქციებს აანონსებს. უერთდებით?
- მე არ ვარ ნაციონალური მოძრაობის წევრი, თუმცა პათოსს ვუერთდები, რადგან ქვეყანაში, ვფიქრობ, რთული ვითარებაა. ბიძინა ივანიშვილის ხელისუფლება, სხვაგვარად ვერ ვუწოდებ, სარგებლობს ამ მომენტით. რეალურად ამინდის შემქმნელი, გავლენის მომხდენი პოლიტიკურ პროცესებზე ბიძინა ივანიშვილია, რომლის ნებასაც საქართველოს პარლამენტში საკონსტიტუციო უმრავლესობა აღასრულებს.
- თქვენ ფიქრობთ, რომ პროცესებს ისევ ბიძინა ივანიშვილი მართავს?
- შეიძლება, ბიძინა ივანიშვილი ყოველდღე არ ზის ქვეყნის მართვის პულტთან თუ სადავეებთან, მაგრამ ფაქტია, რომ მისი სურვილის შესაბამისად იმართება. თუ მას არ სურს პროცესებში ჩარევა, მაშინ ავტონომიური მოქმედების შესაძლებლობა ეძლევათ მთავრობის წევრებს.
- კონკრეტული მაგალითი შეგიძლიათ დაგვისახელოთ?
- რომელი ერთი. ეჭვი მაქვს, რომ დიდ თუ პატარა საქმეებს მთავრობის წევრები ივანიშვილთან ათანხმებენ. ამით სარგებლობს ივანიშვილი, ასევე სარგებლობს საზოგადოებაში არსებული ნიჰილიზმითა და აპათიით და ნელ-ნელა ხდება ამ ქვეყნის სახელისუფლებო მოდელის დაცილება დემოკრატიის პრინციპებისგან, რომელსაც საერთო არ აქვს არც იმ ყბადაღებულ სასამართლო სისტემის ე.წ. მესამე ტალღასთან და არც სხვა არაფერთან, რადგან, საბოლოო ჯამში, ეს ყველაფერი ფარატინა ქაღალდად იქცევა.
- რატომ, არ გჯერათ რეფორმის მესამე ტალღის?
- როგორ უნდა მჯეროდეს, როდესაც თვალნათლივ ვხედავთ, რაც ხდება. მაგალითად, სწორედ ამის გამოვლინებაა მოსამართლე ნაზღაიძის ოჯახის მოულოდნელი გამდიდრება. ასევე ამის გამოვლინებაა ის, რისი განხორციელებაც საზოგადოებრივ მაუწყებელზე სურთ. განა ეს გამორიცხავს იმას, რომ საზოგადოებრივ მაუწყებელზე მძიმე ვითარება არ არის? რა თქმა უნდა, არ გამორიცხავს. განა ვინ ამბობს, რომ სიტუაცია არ უნდა შეიცვალოს?! აქ საუბარია იმაზე, თუ როგორ უნდა შეიცვალოს, როგორი უნდა იყოს მიდგომები.
- თქვენ საკონსტიტუციო უმრავლესობა ახსენეთ. ყველა ექსპერტი თანხმდება, რომ საკონსტიტუციო უმრავლესობა ყველა ხელისუფლებისთვის გამოწვევაა...
- ყველა დიდმა ლიბერალმა და დემოკრატმა ლიდერმა იცოდა, რომ ძალაუფლება რყვნის და აბსოლუტური ძალაუფლება აბსოლუტურად რყვნის. ამიტომ, ეჭვგარეშეა, რომ საჭიროა კონტროლი. რაც უფრო ნაკლებია კონტროლი, მით უფრო დიდია ძალაუფლების უზურპაციის საფრთხე.
- „ქართულმა ოცნებამ“, როდესაც საკონსტიტუციო უმრავლესობა მოიპოვა, თქვა, რომ საზოგადოების ნების საწინააღმდეგოდ არცერთ საკონსტიტუციო ცვლილებას არ განახორციელებდა. სწორედ ამიტომ გეკითხებით?
- კომუნისტებიც ამბობდნენ, რომ საზოგადოებას ემსახურებოდნენ, ჩვენი ხელისუფლებაც, როდესაც 2003 წელს მოვიდა ხელისუფლებაში, ამბობდა, რომ ყველაფერი იდეალურად იქნებოდა, მაგრამ ხომ არ იყო იდეალურად?! ამიტომ ვამბობ, რომ ყველა ხელისუფლებას, რაოდენ კარგიც არ უნდა იყოს ის, სჭირდება დაბალანსება, გაწონასწორება. თავისთავად, ძალაუფლება რისკია, თვითონ ადამიანური ბუნებიდან გამომდინარე. ამას ჭკვიანი პოლიტიკოსი აცნობიერებს, ნაკლებად ჭკვიანი – ვერა. დღეს პრეზიდენტის ინსტიტუტი არის თუნდაც ნაწილობრივად დამაბალანსებელი, მაგრამ ეს არ მოსწონს ხელისუფლებას და ამიტომ გვესმის სრულად საპარლამენტო მოდელზე გადასვლის დემაგოგია. ამიტომ სულაც არ გამოვრიცხავ, რომ საკონსტიტუციო ცვლილებები სწორედ იმ მიმართულებით განხორციელდეს, რათა პრეზიდენტის უფლებამოსილება კიდევ უფრო შემცირდეს. ჩემი აზრით, პრეზიდენტის მექანიზმი დღეს შესუსტებულია როგორც სამართლებრივად, ისე პოლიტიკურად, პიროვნულად, მაგრამ მაინც ერთადერთი კუნძულია, რომელიც ივანიშვილის ნებას არ ემორჩილება.
- ძლიერი საპრეზიდენტო მმართველობის მომხრე ხართ?
- არ არსებობს იდეალური მოდელი. საერთოდ, სამყაროში იდეალური და სრულყოფილი არაფერია, მით უფრო – საზოგადოება.
- ოპტიმალურ მოდელზე გეკითხებით.
- ოპტიმალური მოდელი უნდა განისაზღვროს ქვეყნის პოლიტიკური კონტექსტიდან გამომდინარე. დღეს ისეთი კონტექსტია, რომ არ შეიძლება ამის გაკეთება. ეს მხოლოდ ვიღაცების პოლიტიკურ ინტერესებზე ასხამს წყალს და არა ქვეყნის დემოკრატიული მიმართულებით განვითარებაზე.
- თქვენ ამბობთ, რომ გამოსავალი ძლიერ ოპოზიციაში, საზოგადოების აქტიურობაშია...
- პირველ რიგში, თავად ამ ხელისუფლების მომხრეებმა უნდა გააცნობიერონ ეს ყველაფერი, წინააღმდეგ შემთხვევაში, ხელისუფლების წინ ძალიან ბევრი გამოწვევაა. საზოგადოების იგნორირება აუცილებლად გაამწვავებს ვითარებას, რაც, მერწმუნეთ, ყველასათვის სარისკო იქნება. თუკი ამას გააცნობიერებენ, პრობლემა ნაკლები იქნება და ბევრი რამ შეიძლება წყნარად, მშვიდად შეიცვალოს. ამიტომ დღეს სამუშაო უფრო ხელისუფლების მხარდამჭერებს, „ქართული ოცნების“ მომხრეებს აქვთ.
