„რეზონანსი“: ვიზალიბერალიზაციის შემოდგომამდე მიღების კიდევ ორი შანსი

„რეზონანსი“: ინტერვიუ რამაზ საყვარელიძესთან: ვიზალიბერალიზაცია და “ოცნების” რეიტინგი // “როცა ვიზალიბერალიზაციის საკითხზე დასავლეთის მხრიდან ერთი ნაბიჯიც კი გადაიდგა, ამას ევროპაზე ორიენტირებული ადამიანების რიცხვის გაზრდა მოჰყვა”

„რეზონანსი“: ინტერვიუ გიორგი ცაგარეშვილთან: „ბიძინა ივანიშვილს მაჟორიტარების იმედი აქვს, ის საარჩევნო ოლქებს, უბრალოდ, იყიდის”

„ახალი თაობა“: ინტერვიუ გია ხუხაშვილთან: „საარჩევნო შტაბის ხელმძღვანელობა კახა კალაძისთვის ხაფანგია” // „ბიძინა ივანიშვილს მოსახლეობის გულის მოგება გაუჭირდება” // „პაატა ბურჭულაძე ნაციონალებსა და „ოცნებას“ სერიოზულ სიურპრიზებს შესთავაზებს“

„ახალი თაობა“: ინტერვიუ დავით დარჩიაშვილთან: „ბოიკოტს ერთი დღით დავარღვევთ“

„ახალი თაობა“: ინტერვიუ ჯონდი ბაღათურიასთან: „ევროპელები ტყეში რომ დარბოდნენ, ჩვენ მაშინ `ვეფხისტყაოსანს~ ვწერდით~ // „დასავლეთს საქართველო ქართველების გარეშე უნდა“

„ახალი თაობა“: ინტერვიუ სოსო შატბერაშვილითან: „პარლამენტში უმრავლესობით მოსვლის შანსი არავის აქვს“ // „საქართველოს ეკონომიკას ჩინეთთან ურთიერთობების განვითარება გადაარჩენს”

–——————-

„რეზონანსი“, 10 ივნისი, 2016 წელი

ვიზალიბერალიზაციის შემოდგომამდე მიღების კიდევ ორი შანსი

თაკო მათეშვილი

ვიზალიბერალიზაციის პროცესში დღევანდელი დღე საკმაოდ მნიშვნელოვანია – საქართველოსათვის სავიზო რეჟიმის გაუქმებაზე ლუქსემბურგში ევროკავშირის წევრი ქვეყნების შინაგან საქმეთა მინისტრები იმსჯელებენ.

თუკი ხელისუფლება აქამდე თეორიულადაც კი აღარ უშვებდა შანსს, რომ ეს საკითხი ისევ გადადებულიყო, ახლა ამას უკვე შესაძლებლად მიიჩნევენ. თუმცა, დარწმუნებით აცხადებენ, რომ წლის ბოლომდე ევროპაში უვიზოდ მოგზაურობას აუცილებლად შევძლებთ.

ევროპასთა უვიზო მიმოსვლა საქართველომ შესაძლოა დღესვე მიიღოს – დღეს ლუქსემბურგში ევროკავშირის შს მინისტრები იკრიბებიან და განხილვის ერთ-ერთი საკითხი სწორედ ეს იქნება. თუკი გადაწყვეტილება აქ არ მიიღეს, კიდევ რჩება ერთი შანსი – ევროკავშირის წევრი ქვეყნების საგარეო საქმეთა მინისრების შეხვედრა, რომელიც 20 ივნისსაა დანიშნული.

რა გახდა ერთი შეხედვით ბოლომდე მიყვანილი პროცესის შეფერხების მიზეზი? – ესაა მთავარი კითხვა, რომელზე პასუხის ძიებისასაც ხელისუფლების წარმომადგენლებიცა და პოლიტოლოგებიც არაერთ ვერსიას ასახელებენ.

პროცედურები და შანსები

მოგეხსენებათ, 8 ივნისს ევროკავშირის წევრი ქვეყნების ელჩებმა საქართველოსთვის ვიზალიბერალიზაციის საკითხის განხილვა გერმანიის, საფრანგეთისა და იტალიის წინააღმდეგობის გამო ისევ გადადეს. ევროკავშირის მუდმივ წარმომადგენელთა კომიტეტის (“კოპერერ”) სხდომაზე საქართველოსთვის უვიზო რეჟიმის შემოღების საკითხზე კვლავ იყო მსჯელობა, თუმცა საფრანგეთმა, გერმანიამ და იტალიამ ამ პროცესის წინ წაწევას მხარი არ დაუჭირეს. პროცესი 10 ივნისისათვის გადაიდო და როგორც უკვე აღვნიშნეთ, დღეს საქართველოს საკითხი გადის სხდომაზე, რომელსაც ევროკავშირის წევრი ქვეყნების შინაგან საქმეთა მინისტრები ესწრებიან.

საპარლამენტო უმრავლესობის წევრი, ევროპასთან ინტეგრაციის კომიტეტის თავმჯდომარე ლევან ბერძენიშვილი განმარტავს, რომ საქართველოს საკითხი სხდომაზე გადის სტატუსით “ბ”. “ა” სტატუსი რომ ყოფილიყო, მისი თქმით, გადაწყვეტილებას განხილვის გარეშე მიიღებდნენ, მაგრამ რაკი “ბ” სტატუსია, ჯერ დისკუსია იქნება და მერე გადაწყვეტილება. მისი თქმით, უცნობია, რა გადაწყვეტილებას მიიღებენ. შეიძლება საკითხი არც გადაწყდეს და შემდეგი სხდომისთვის გადაიდოს.

“ვიცით, რომელი ქვეყნების ელჩებმა გამოთქვეს წუხილი და ალბათ მათი მინისტრებიც გამოვლენ. გვაქვს შანსი, რომ ხვალ ყველაფერი დადებითად გადაწყდეს, კომპრომისი მოიძებნოს, მაგრამ თუ ეს ასე არ მოხდა, მუშაობა გაგრძელდება. ვიზალიბერალიზაციას ადრე თუ გვიან აუცილებლად მივიღებთ, მაგრამ კონკრეტული თარიღების დასახელება გვიჭირს, რადგან ეს ჩვენს ხელში არ არის. მთავარია, რომ უარყოფითი პასუხი არ იქნება. უკვე გადაწყვეტილია, რომ ჩვენ ვიზალიბერალიზაცია უნდა მოგვცენ. აქ საუბარი ვადებზეა. მარტო ჩვენ არ ვართ, იქ 4 ქვეყნის საკითხი იხილება. შეიძლება დაშლა გადაწყვიტონ და ჩვენ მოგვცენ ვიზალიბერალიზაცია, მათ კი – არა,” – აცხადებს ლევან ბერძენიშვილი.

დღევანდელი სხდომის დღის წესრიგიდან საკითხის მოხსნას ფონდ “ღია საზოგადოება – საქართველოს” ევროინტეგრაციის მიმართულების მენეჯერი ვანო ჩხიკვაძე არ გამორიცხავს და დასძენს, რომ გადაწყვეტილი ჯერ ესეც კი არაა. პროცედურებზე საუბრისას იგი განმარტავს, რომ საქართველოს ვიზალიბერალიზაციამ ერთი მოსმენა უკვე გაიარა, დარჩენილია ერთი, რის შემდეგადაც უნდა დამტკიცდეს. ამის შემდეგ პლენარულ სხდომაზე დებატები იქნება და ბოლოს კენჭისყრა. “პარლამენტი საკითხს უმრავლესობით ამტკიცებს. ამის შემდეგ მოდის სტანდარტული პროცედურა და ძალაში 21-ე დღეს უნდა შევიდეს. თუმცა, იმის გამო, რომ შეთანხმება ვერ შედგა, შესაძლოა, დღის წესრიგიდან მოხსნან. განხილვის ალბათობა ჯერჯერობით 50/50-ზეა,” – აცხადებს ვანო ჩხიკვაძე.

(…)

რატომ შეფერხდა ვიზალიბერალიზაცია: შესაძლო მიზეზები

№ 1 – გეოპოლიტიკა

ჩვენი რესპონდენტები მრავალფეროვან მიზეზებს ასახელებენ. პირველ რიგში კი ისეთ მიზეზებს, რომელზეც საქართველოს გავლენის მოხდენა და რაიმეს შეცვლა არ შეუძლია. ასეთი კი მრავლადაა – რუსეთის ფაქტორი და ქვეყნები, რომელთაც მისი გაღიზიანება არ უნდათ, ასევე ევროპაში მიგრანტთა მზარდი კრიზისი, კოსოვოს, თურქეთისა და უკრაინის პროტესტი და ა.შ.

პოლიტოლოგი მამუკა არეშიძე “რეზონანსთან” საუბრისას ამბობს, რომ დასავლეთი ამ ბოლო დროს ჩვენს ყველა აქტივობასა თუ თავიანთ დაპირებაზე ორაზროვან თავშეკავებას იჩენს. ეს იქნება ნატოსა და ევროკავშირში ინტეგრაცია, ვიზალიბერალიზაცია თუ სხვა. თუმცა, მისი აზრით, თუ ამ პროცესს სხვა კუთხითაც უნდა შევხედოთ და გავიაზროთ, რომ ევროპას უამრავი სერიოზული პრობლემა აქვს. ვიზალიბერალიზაციის კონტექსტში ეს პრობლემა ემიგრანტთა უზარმაზარი ნაკადია, რომელიც ბოლო დროს ევროპას მიაწყდა. თანაც, მამუკა არეშიძის აზრით, ასევე სერიოზული მიზეზია ისიც, რომ მიგრანტთა ყველაზე დიდი ნაწილი სწორედ იმ ქვეყანას მიაწყდა, რომელთანაც პრეტენზია გვაქვს, ანუ გერმანიას.

გარდა ამისა, პოლიტოლოგის თქმით, საქართველოს ვიზალიბერალიზაციის პროცესი თავიდან მხოლოდ საქართველოს არ ეხებოდა, ეს კიდევ რამოდენიმე ქვეყანას მოიაზრებდა მათ შორის უკრაინასაც.

“მართალია, საქართველო მერე ამ ქვეყნებისაგან გამოცალკევდა, თურქეთს უკრაინასა და კოსოვოს ჩამოშორდა, მაგრამ ამ ქვეყნების საზოგადოების ცნობიერებაში მაინც დარჩა. როდესაც ევროპელებმა საქართველოსთვის ვიზალიბერალიზაციის პროცესის გააქტიურება დაიწყეს, ამ ქვეყნებიდან საპროტესტო განცხადებები წამოვიდა. ეს განსაკუთრებით უკრაინას ეხება. მთელი ამ პროცესის ერთგვარი შემაფერხებელი ფაქტორი ესეცაა. კიდევ ერთი ფაქტორი რუსეთია. მიუხედავად იმისა, რომ სიტყვიერად რუსეთი თითქოს საქართველოს ნატოში გაწევრიანების წინააღმდეგი უფროა და ევროკავშირში ინტეგრაციის წინააღმდეგი არ არის, სინამდვილეში ეს ასე არაა. ყველამ ვიცით, როგორი გავლენა აქვს მოსკოვს გერმანიაში, როგორც პოლიტიკურ ისე მედია წრეებზე,” – აცხადებს მამუკა არეშიძე.

იგივეს ამბობს ჩვენთან საუბრისას საპარლამენტო უმრავლესობის წევრი, ევროპასთან ინტეგრაციის კომიტეტის თავმჯდომარის მოადგილე გუგული მაღრაძე და დასძენს, რომ ვიზალიბერალიზაციის შეფერხების მიზეზად ძირითადად ყველას ისეთი რაღაცეები მოჰყავს, რაც საქართველოსგან დამოუკიდებელია.

“პირველ რიგში, ევროკავშირში მიგრაციული კრიზისი. გარდა ამისა რუსეთთან ურთიერთობა და გლობალური კონტექსტი, მესამე მიზეზად კი ქართველი კრიმინალები სახელდებიან. ამ სამ მიზეზზეა საუბარი და საქართველოში მიმდინარე შიდა პროცესები არავის უხსენებია. შეიძლება ზოგიერთს რუსეთთან ურთიერთობა მიაჩნდეს უმთავრესად და გულწრფელად ფიქრობდეს, რომ საქართველოსათვის ვიზალიბერალიზაციის მიცემით რუსეთთან ურთიერთობა არ უნდა გაიუარესოს. ასე რომ, ცალკეული შეხედულებები არის, მაგრამ მთავარი ისაა, თუ როგორი იქნება ერთობლივი გადაწყვეტილება,” – აცხადებს იგი.

№2 – შიდა პროცესები

ჩვენი რესპონდენტების აზრით, ქვეყნის შიგნით მიმდინარე პროცესები უვიზო რეჟიმის დაწესებაზე ყველაზე ნაკლებად ახდენს. ბოლო დროინდელი სკანდალური მოვლენები – “რუსთავი 2″-ის საქმე, ან კორცხელის იცინდენტი, მათი თქმით, გლობალურ საკითხებს არანაირად არ ეხება.

მამუკა არეშიძის თქმით, “რუსთავი 2″-ის საქმე მედია თავისუფლების, სიტყვის თავისუფლებისათვის მებრძოლი ორგანიზაციებისთვის შესაძლოა მნიშვნელოვანი იყოს და ზოგიერთმა დასავლელმა პოლიტიკოსმა ამაზე მწვავე რეაქციაც გამოავლინოს, მაგრამ გლობალურ პოლიტიკაში ეს არაფერს ნიშნავს. “მაგალითად, ჩვენს მეზობელ აზერბაიჯანში ადამიანთა უფლებებისა და სიტყვის თავისუფლების თვალსაზრისით ბევრად უარესი მდგომარეობაა, მაგრამ ეს დასავლეთისა და აზერბაიჯანის ურთიერთობაზე არ აისახება. ასევე ევროპაში არის ქვეყნები, სადაც სიტყვის თავისუფლების მხრივ ძალიან ცუდი მდგომარეობაა, მაგალითად ალბანეთში, მაგრამ ის ევროკავშირის წევრია,” – აცხადებს მამუკა არეშიძე.

გუგული მაღრაძის თქმით, “ამ ყველაფერს ქვეყნის შიდა პროცესებს რომ უკავშირებენ და “რუსთავი2″-ის საქმეს და კორცხელის ინციდენტს რომ ახსენებენ, არასწორია. უნდა ითქვას, რომ ვიზალიბერალიზაციასთან ამ ფაქტებს არანაირი კავშირი არ აქვს. შეიძლება რომელიღაც ინდივიდუალურ წევრებს განწყობა შეეცვალოთ, მაგრამ ფორმალურად ეს თემები ერთმანეთთან დაკავშირებული არ არის.”

№3 – „მავნე“ ოპოზიცია

საკმაოდ სკანდალური განცხადება გააკეთა გუშინ საქართველოში ამერიკის სავაჭრო პალატის პრეზიდენტმა სარა იულიამსონმა, რომელმაც აღნიშნა, რომ ევროკავშირსაც და ქართულ ოპოზიციურ პარტიებსაც საკუთარი თავის უნდა რცხვენოდეთ.

“ევროკავშირს უნდა რცხვენოდეს საკუთარი თავის, მაგრამ არა იმდენად, როგორც იმ ქართულ, სავარაუდოდ, პროდასავლურ ოპოზიციურ პარტიებს, რომლებიც ლობირებდნენ საკუთარი ქვეყნისთვის ვიზალიბერალიზაციის პროცესის წინააღმდეგ საკუთარი პოლიტიკური ინტერესების გათვალისწინებით.ეს არ არის მოქალაქეობრივი ან პატრიოტული საქციელი. ეს ნარცისიზმი და გულისამრევი ქმედებაა”, – წერს სარა უილიამსონი სოციალურ ქსელში.

ოპოზიციური პარტიების ძალისხმევაზე, როგორც ვიზალიბერალიზაციის ხელისშემშლელ საკმაოდ სერიოზულ მიზეზზე ჩვენი რესპონდენტებიც საუბრობენ და აცხადებენ, რომ კულუარული ქმედებებით ისინი ყველაფერს აკეთებენ, რათა ამ პროცესს როგორმე ხელი შეუშალონ.

მამუკა არეშიძის თქმით, ეს პარტია “ნაციონალური მოძრაობაა”, რადგან სხვა არც ერთ პარტიას არა აქვს საიმისო რესურსი, რომ ევროსტრუქტურებში მომუშავე ადამიანებზე იმოქმედონ. ამბობს, რომ ამის შესახებ სხვადასხვა წყაროებიდან უილიამსონის განცხადებამდეც ცნობილი იყო.

“ევროპის სახალხო პარტიის წევრის, სარიუშ-ვოლსკის განცხადება იმის თაობაზე, რომ საქართველო უვიზო რეჟიმს არჩევნების დამთავრებამდე ვერ მიიღებს ზუსტად ამ კონტექსტშია, რადგან სარიუშ-ვოლსკი ახმოვანებს ზუსტად იმას, რასაც “ნაციონალური მოძრაობიდან” ეუბნებიან. “ნაცმოძრაობის” ინტერესი ისაა, რომ ვიზალიბერალიზაციის პროცესი არჩევნებამდე შეაფერხონ. მათთვის ძალიან მნიშვნელოვანია, რომ ამას მათი სახელი დაერქვას. ასოცირების ხელშეკრულების ხელმოწერისასაც ყველაფერს აკეთებდნენ, რათა ხელხისთვის დაემტკიცებინათ, რომ ეს მათი მუშაობის შედეგია,” – ამბობს არეშიძე.

“ნაცმოძრაობის” ქმედებებზე ყურადღებას პარლამენტარი გუგული მაღრაძეც ამახვილებს და მაგალითად მასაც სარიუშ-ვოლსკის ნათქვამი მოჰყავს იმის თაობაზე, რომ არჩევნებამდე უვიზო მიმოსვლა არ უნდა მოგვცენ. “არადა, ეს საკითხი არჩევნებზე არაა მიბმული. ამ მიბმის იდეამაც “ნაციონალების” აქტიურობით გაიჟღერა. სამწუხაროდ, არ მაქვს იმის რწმენა, რომ “ნაცმოძრაობა” იმისთვის ზრუნავს, რათა ქართველმა ხალხმა ვიზალიბერალიზაცია რაც შეიძლება მალე მიიღოს,” – დასძენს დეპუტატი.

№4 – კრიმინალი ქართველები

8 ივნისის სხდომაზე გერმანიის წარმომადგენელმა საქართველოს საკითხის წინ წაწევისათვის მხარის არდაჭერის მიზეზად გერმანიაში ქართული კრიმინალური დაჯგუფებების გაძლიერება დაასახელა. მისი თქმით, ქართველების მიერ ჩადენილი დანაშაულებრივი ქმედებები საზოგადოების შეშფოთების მიზეზი გახდა.

აქვე იმასაც შეგახსენებთ, რომ 7 ივნისს, გერმანული ტაბლოიდის, “ბილდის” გვერდზე კრიმინალის განყოფილებაში გამოქვეყნდა სტატია სათაურით: “ევროკავშირი საქართველოსათვის ვიზის ლიბერალიზაციაზე უარს ამბობს”. სტატიის ქვემოთ აღწერაში კი წერია: “შიდა ექსპერტები გაფრთხილებას იძლევიან: ქართველი თავშესაფრის მაძიებლები უფრო დიდი კრიმინალები არიან, ვიდრე სხვა ჯგუფები.”

დაახლოებით მსგავსი შინაარსის მასალა 5 ივნისს კიდევ ერთ გერმანულ გამოცემაში “დი ველტში” გამოქვეყნდა.

გერმანულმა “შრიგელმა” კი შეასწორა სტატია, სადაც ნათქვამია იყო, რომ გერმანიაში ბინების ძარცვის ყველაზე მეტი რაოდენობა ქართველი კრიმინალების მიერაა ჩადენლი. გამოცემის რედაქცია აღნიშნავს, რომ სტატიის წინა ვერსია ეყრდნობოდა სააგენტო “ფრანს პრესის” ინფორმაციას, რომელიც მცდარი აღმოჩნდა.

რამდენად სერიოზულ საფრთხედ შეიძლება აღიქმებოდეს ქართველების ქმედება გერმანიაში – ამ კითხაზე პასუხად მამუკა არეშიძემ გვითხრა, რომ ეს, უბრალოდ, ფარისევლობაა. მისი თქმით, დანაშაულის ჩადენის რაოდენობით ქართველები მოწინავე პოზიციებს ნამდვილად არ იკავებენ. იგი ამბობს, რომ იქაურ პრესაში მართლაც იბეჭდება სტატიები ქართველების კრიმინალური ქმედებების თაობაზე, მაგრამ სტატიები ასევე იბეჭდება რუმინელების, ხორვატების, ალბანელების და სხვების კრიმინალური მოქმედებების შესახებაც.

მამუკა არეშიძე მიიჩნევს, რომ ეს სტატიები შეკვეთილია და ერთ-ერთ შემკვეთად რუსეთს მოიაზრებს. “რასაკვირველია, ქართველების ქმედება ვერავითარ კრიტიკას ვერ უძლებს. საკუთარ ქვეყანასაც უტეხენ სახელს და საქმესაც გვიფუჭებენ, მაგრამ, მეორე მხრივ, ეს ობიექტური სურათი და მთავარი მიზეზი არ არის. ხელოვნურად გაბუქებულია,” – ამბობს მამუკა არეშიძე.

გუგული მაღრაძის თქმით კი, „გერმანიის შინაგან საქმეთა მინისტრი რომ ამბობს ქართველების მხრიდან კრიმინალის, განსაკუთრებით ბინების გატეხვის შემთხვევა ბევრია და მხარს ამიტომ არ ვუჭერო, ეს მიზეზებია. გერმანიაში საკმაოდ დიდი და ძლიერი ალბანური მაფია მოქმედებს, რომელიც ისეთ დანაშაულებს სჩადის, ქართველების ბინის ქურდობა მონაგონია, მაგრამ ალბანეთს ვიზალიბერალიზაცია აქვს.”

„რეზონანსი“, 10 ივნისი, 2016 წელი

ინტერვიუ რამაზ საყვარელიძესთან: ვიზალიბერალიზაცია და “ოცნების” რეიტინგი // “როცა ვიზალიბერალიზაციის საკითხზე დასავლეთის მხრიდან ერთი ნაბიჯიც კი გადაიდგა, ამას ევროპაზე ორიენტირებული ადამიანების რიცხვის გაზრდა მოჰყვა”

სალომე სარიშვილი

პოლიტოლოგი და ფსიქოლოგი რამაზ საყვარელიძე მიიჩნევს, რომ არჩევნებამდე 4 თვით ადრე შექმნილი ახალი პოლიტიკური პარტიები ხმას ძირითადად ხელისუფლებისა და “ნაციონალური მოძრაობის” მიმართ კრიტიკულად განწყობილი ამომრჩევლისგან მიიღებს, თუმცა რამდენად საკმარისი იქნება მათი რაოდენობა ცალკეული პარტიების შემთხვევაში, ამის პროგნოზირება უჭირს. ამბობს, რომ სოციოლოგიური კვლევების გარეშე ბარიერის გადალახვაზე საუბარი რთულია, ხოლო ზოგადი სურათის შეფასებისას, შეიძლება ითქვას, რომ ყველა პარტიას სხვადასხვა შანსი აქვს.

რამაზ საყვარელიძემ “რეზონანსთან” საუბრისას ყურადღება ვიზალიბერალიზაციის თემაზეც გაამახვილა და აღნიშნა, რომ ამ თემასთან დაკავშირებით მთავრობის წარმომადგენლებმა საზოგადოებაში გადაჭარბებულად ოპტიმისტური განწყობა შექმნეს, რაც პოლიტოლოგის აზრით, ამ საკითხზე გაკეთებული უარგუმენტო განცხადებების შედეგია. მისი შეფასებით, მთავრობამ საზოგადოებას რეალურად შექმნილი ვითარება უნდა აუხსნას, წინააღმდეგ შემთხვევაში კი, შესაძლოა, ამან პროევროპულად განწყობილ ამომრჩეველზე ცუდად იმოქმედოს.

ქვეყანაში მიმდინარე პოლიტიკურ მოვლენებზე “რეზონანსი” პოლიტოლოგ რამაზ საყვარელიძეს ესაუბრა.

რამაზ საყვარელიძე: სანდო სოციოლოგიური მონაცემების გარეშე ახალი პარტიების შანსზე საუბარი, რა თქმა უნდა, გამიჭირდება, რადგან მათი შექმნის შემდეგ არც ერთი თუნდაც არასანდო კვლევაც კი არ ჩატარებულა. ასე აბსტრაქტულად თუ ვილაპარაკებთ, მაშინ ამ პარტიებს შანსი, რა თქმა უნდა, აქვთ. ცხადია, ის ვითარება, რომ ამომრჩეველი კრიტიკულადაა განწყობილი როგორც ხელისუფლების, ისე ე.წ. მთავარი ოპოზიციური პარტიის, “ნაციონალური მოძრაობის” მიმართ, ახალი პარტიების შანსს ზრდის, თუმცა რამდენად საკმარისია ეს შანსები ცალკეული პარტიების შემთხვევაში, რთული სათქმელია. მთავარია, რომ ახალმა პარტიებმა ამომრჩევლის წინაშე საკუთარი პოლიტიკის წარდგენა მოასწრონ.

- თუმცა რამდენიმე ახლად შექმნილი პარტიის ლიდერის პოლიტიკა საზოგადოებისთვის უკვე კარგად ნაცნობია. მაგალითად, თამაზ მეჭიაურის პარტია, სადაც რამდენიმე “ქართული ოცნების” მხარდამჭერი გაერთიანდა. როგორ ფიქრობთ, რა შანსი აქვს მის პარტიას და ვის წაარმთევს ხმებს?

- ამომრჩევლების იმ ნაწილს, რომელმაც შეიძლება მეჭიაურის პარტია შემოხაზოს, პრორუსულს ვერ დავარქმევ. არსებობენ ადამიანები და ასეთები მეც შემხვედრია, რომელთაც რუსეთთან ურთიერთობის დალაგება სურთ, მაგრამ ეს რუსული პოლიტიკის მხარდაჭერას სულაც არ გულისხმობს. ამავე დროს არსებობს კატეგორია, რომელიც კრიტიკულია არა მხოლოდ იმ პოლიტიკოსების მიმართ, რომლებიც დასავლეთს ყველაფერში ცალსახად ეთანხმება, არამედ თავად დასავლეთის მიმართ აქვს ნეგატიური განწყობა. ასეთი ადამიანები არიან და სწორედ მათი ხმები მივა სხვა პარტიებთან, მათ შორის მეჭიაურთან. საბოლოოდ, ციფრებში იმის თქმა, გადალახავს თუ არა მეჭიაურის პარტია საარჩევნო ბარიერს, რთულია, რადგან საამისოდ სოციოლოგიური მონაცემები არ გაგვაჩნია, თუმცა კი მისი ამომრჩევლის კატეგორიაზე მოგახსენეთ.

- “პატრიოტთა ალიანსი” 5 პარტიასთან ერთად საარჩევნო ბლოკს ქმნის, სადაც კახა კუკავას, აკაკი ასათიანისა და კონსტანტინე გამსახურდიას პარტიები ერთიანდებიან. ამ ალიანსზე რას ფიქრობთ?

- არ ვიცი, ისინი სიას რა პრინციპით შეადგენენ, მაგრამ ფაქტია, რომ გაერთიანების დროს პირველ ადგილებზე ლიდერები მიდიან-ხოლმე, შემდეგ მეორე პირები და ა.შ. თუ ამ თვალით შევხედავთ, გამოდის, რომ ეს გაერთიანება პარლამენტში საკმაოდ სოლიდურად იქნება წარმოდგენილი, თანაც ისეთი ადამიანების მიერ, რომლებისთვისაც საჯარო პოლიტიკური მსჯელობა და დისკუსია სიახლეს არ წარმოადგენს. ამდენად, ამ პოლიტიური გაერთიანებით შეიძლება პარლამენტში საკმაოდ აქტიური ჯგუფიც კი მივიღოთ.

რაც შეეხება მათ პოზიციას, ალბათ ეს შემდეგნაირი ხასიათის იქნება – რომ საქართველო ყველა გავლენისგან დამოუკიდებელი უნდა იყოს. ყოველ შემთხვევაში ამ პოლიტიკურ გაერთიანებაში მყოფი პოლიტიკური ფიგურების განცხადებებში სწორედ ასეთ ქვეტექსტი იკითხება-ხოლმე.

- ამ შემთხვევაში ევროპისა და რუსეთის გავლენისგან გათავისუფლებას გულისხმობთ?

- ნუ, ალბათ ამ ტიპის ამომჩეველიც არსებობს, თუმცა რამდენია მათ რიცხვი და ეყოფა თუ არა ეს რაოდენობა ბარიერის გადალახვას, ამას ვერ გეტყვით. თუმცა ის, რომ ასეთი ამომრჩეველი არსებობს, ესეც ფაქტია. დიახ, ეს გაერთიანება ეწინააღმდეგება როგორც რუსულ, ისე ევროპულ გავლენას და ფიქრობენ, რომ საქართველომ ყოველთვის თავისი ინტერესებით უნდა იმოქმედოს. რამდენად რეალურია ეს აზრი – კიდევ სხვა საკითხია. პირადად მიმაჩნია, რომ ეს თანამედროვე მსოფლიოსა და ზოგადად პოლიტიკაში არარეალისტური მოთხოვნაა, მაგრამ ისიც უნდა ითქვას, რომ ამ მოთხოვნის მხარდამჭერები საზოგადოებაში არსებობს.

- “ქართული ოცნების” წინასაარჩევნო სტრატეგიაზეც მინდა გკითხოთ. მთავრობის წარმომადგენლების მხრიდან ხშირად გვესმის აზრი იმის შესახებ, რომ წინა ხელისუფლებამ მძიმე მემკვიდრეობა დატოვა და ბევრი შეცდომა დაუშვა. ამაზე საუბრობს ექსპრემიერი ბიძინა ივანიშვილიც. როგორ ფიქრობთ, რამდენად მომგებიანია “ქართული ოცნებისთვის” წინასაარჩევნო კამპანიის ისევ “ნაცმოძრაობის” კრიტიკაზე აგება?

- როგორც მე მრჩება შთაბეჭდილება და ამის შესახებ აზრი ბოლოს ბიძინა ივანიშვილის მიერაც გამოითქვა, “ქართულ ოცნებას” ამ სტრატეგიით გარკვეული გზავნილის ხაზგასმა სურს. კერძოდ კი იმის, რომ “ნაციონალური მოძრაობა” პოლიტიკური სიმაღლიდან ჩადენილი გარკვეულ დანაშაულთან დაკავშირებული პოლიტიკური ძალაა და ამას საზოგადოება უნდა აცნობიერებდეს. ხვდებოდეს იმას, რომ ამ პარტიას სამართლებრივი პრობლემები აქვს, ხოლო ამომრჩეველმა გადაწყვეტილება ამ ფონზე შექმნილი განწყობით უნდა მიიღოს.

- კი მაგრამ, ამაზე ხომ მუდმივად გვესმის საუბარი, ალბათ არც საზოგადოებას დავიწყებია წარსული…

- დიახ, ასეა, მაგრამ აქ სხვა საფრთხეზეა საუბარი. საკმარისია საზოგადოება მოდუნდეს, მთავრობაში არაფერი მოსწონდეს და ამის გამო არჩევნებზე სახლში დარჩეს, რომ ვითარება შეიძლება სხვანაირად შეიცვალოს. დავუშვათ ასეთი გახლავთ საზოგადოების 50%, მაშინ “ნაციონალური მოძრაობის” 20% გაორმაგდება და გახდება იმდენივე, რამდენიც 2012 წელს იყო – 40%. ამას კიდევ სხვა ფაქტორები რომ დაემატოს, ეს პროცენტული მაჩვენებელი კიდევ გაიზარდება. ასე რომ, საზოგადოების დამოკიდებულება “ნაციონალური მოძრაობის” მიმართ მის აქტიურობას გულისხმობს. “ქართულ ოცნებას” სწორედ ამ აქტიურობაზე სურს ყურადღების გამახვილება და იმ პასუხისმგებლობაზეც, რაც თითოეულ მოქალაქეს აქტიურობისას აკისრია. ასე რომ, უნდა თუ არა და ახსოვს თუ არა საზოგადოებას წარსული, შესაძლოა, მას ცხვირწინ კვლავ დაუდგეს რეალობა და “ნაციონალური მოძრაობა” მომგებიან პოზიციაში აღმოჩნდეს.

დღეს შეიძლება ამას არ ვფიქრობთ და ყველამ ყველაფერი ვიცით, მაგრამ კონკრეტული გადაწყვეტილების მიღებისას შეიძლება ისეთი რეალობა მივიღოთ, რომელიც არ გვაწყობს. ახლა ამ აქცენტებით სწორედ ამის შეხსენება ხდება. ვფიქრობ, ამ მოტივით მსგავსი ტიპის განცხადებები საჭიროა, თუმცა თავად ივანიშვილი რას ფიქრობს, ეს მას უნდა ჰკითხოთ.

- რადგან ყოფილი პრემიერი ვახსენეთ, საინტერესოა, რას ფიქრობთ მის განცხადებაზე, სადაც ამბობს, რომ შეჭირვებულმა მოსახლეობამ შეიძლება სწორი ანალიზი ვერ გააკეთოს და ხელისუფლების ბრალეულობად ჩათვალოს, ის, რაც ხდება…

- როგორც მივხვდი, ამ განცხადების კონტექსტი შემდეგნაირი იყო – რეალურად ის, რაც ხდება, ვგულიხმობ ეკონომიკურ პრობლემებსა და შექმნილ მძიმე სიტუაციას, მხოლოდ ხელისუფლების ბრალეულობაზე არ მეტყველებს, რომ ეს გარკვეულწილად დატოვებული მემკვიდრეობისა თუ სხვა გარე ფაქტორების შედეგია. ვფიქრობ, მას ამ განცხადებით სწორედ ამის თქმა სურდა. თუმცა, მე როგორც მოქალაქე და ამ განცხადებების მსმენელი ვისურვებდი, რომ მის წილ პასუხისმგებლობაზე ხელისუფლებამ ისაუბროს და თუკი რამე ვერ გაკეთდა, თუნდაც რაღაც მიზეზით, ამაზე ღიად ილაპარაკოს, რათა მსგავსი კითხვის ნიშნები არ გაჩნდეს.

- ვიზალიბერალიზაციის საკითხი – მიუხედავად მთავრობაში შექმნილი ოპტიმისტური განწყობისა, რაც მათ განცხადებებშიც გამოიხატებოდა, ეს პროცესი სხვადასხვა ფაქტორების გამო ჯერ კიდევ შეფერხებულია. თქვენ რას ფიქრობთ, რატომ ჭიანურდება საქართველოსთვის უვიზო მიმოსვლის უფლების მინიჭება?

- აი, ამ ნაწილში კი ნამდვილად ვეთანხმები ივანიშვილს, როდესაც ამბობს, რომ საქართველოსთვის ვიზალიბერალიზაციის მინიჭების საკითხს სხვა საკითხებიც წამოეწია. კერძოდ კი სხვა ქვეყნების ფაქტორები, რომელთაც შესაძლოა საქართველოსთან კავშირი არ ჰქოდეს, თუმცა გავლენას მაინც ახდენდეს. ჩვენ ვხედავთ, ევროპაში თუ რამდენად დიდია პრობლემები მიგრაციასთან დაკავშირებით, გერმანელებმა ამ პრობლემის გამო ლამის მერკელი გადააგდეს. ამავე დროს ვიზალიბერალიზაციის სურვილს თურქეთი და კოსოვო შეუერთდა. მართალია, ჩვენ ამის შესახებ უფრო ადრე ვსაუბრობდით, თუმცა ახლა სხვა ქვეყნებში შექმნილი მდგომარეობა ჩვენზეც აისახება, რადგან ამ შემთხვევაში პოლიტიკური კონტექსტიც გასათვალისწინებელია. ბევრი ამ ფაქტორის ერთმანეთთან თანხმევდრამ ვითარება არსებითად შეცვალა, რამაც სწრაფად გადაწყვეტილების მიღებას ხელი შეუშალა.

პრინციპში, ევროპა დიდი ენერგიულობითა და ოპერატიულობით ისედაც ვერ გამოირჩევა, რადგან ერთდროულად გადაწყვეტილებას ბევრი სახელმწიფო იღებს-ხოლმე, ამიტომ დროულად ამაზე კონკრეტული პასუხის მოსმენა ჭირს.

- მაგრამ ამ ყველაფრის გაცნობიერება მთავრობის წარმომადგენლებს ალბათ მანამდეც შეეძლოთ, როცა ოპტიმისტურ განცხადებებს აკეთებდნენ და ამბობდნენ, რომ უკვე ზაფხულში შენგენის ზონაში უვიზო მიმოსვლას შევძლებდით…

- აი, ეს უკვე სხვა ასპექტია, რაშიც აბსოლუტურად გეთანხმებით. სწორედ ამ ფაქტორების გათვალისწინებით, მთავრობის წარმომადგენელთა მხრიდან განცხადებები ვიზალიბერალიზაციის თემაზე ლოზუნგივით არ უნდა გაკეთდეს. მსგავსი ტიპის თემაზე სადღეგრძელოებივით არ უნდა საუბრობდნენ. რა თქმა უნდა, ამ შემთხვევაში გადააჭარბეს.

ახლა კეთილი ინებონ და მთავრობის წარმომადგენლებმა არსებული ვითარების მოკლე ანალიზი გააკეთონ. მიაწოდონ საზოგადოებას რეალური ინფორმაცია ამ სიტუაციაში ვიზალიბერალიზაციას რამდენად უნდა ველოდოთ. ასე უნდა მოიქცნენ სხვა სიტუაციაშიც, სულ ერთია იქნება ეს ვიზალიბერალიზაცია, ნატოში გაფართოება თუ სხვა ნებისმიერი საკითხი. ასეთი ანალიზი მთავრობის მხრიდან არ კეთდება. ანალიზს ჩვენ გვაკისრებთ-ხოლმე და მთავრობა მხოლოდ სადღეგრძელოს ამბობს. ამ დროს ჩვენ გვიწევს დასაბუთება, რატომ თქვა იმან ეს და შემდეგ რატომ ვერ მოხდა ასე. ამიტომ მთავრობა განცხადებებს სრული პასუხისმგებლობით უნდა მოეკიდოს, რადგან უარგუმენტო, უანალიზო ნათქვამს შესაძლოა მოსახლეობა სერიოზულად აღარ მოეკიდოს.

- როგორ ფიქრობთ, ხომ არ გაზრდის ეს პროცესი ანტიდასავლური განწყობის მქონე ადამიანების რაოდენობას და რაც მთავარია, როგორ აისახება ეს პროცესი თავად მთავრობაზე?

- თუ გაიხსენებთ, როცა ვიზალიბერალიზაციის საკითხზე დასავლეთის მხრიდან ერთი ნაბიჯიც კი გადაიდგა, ამას ევროპაზე ორიენტირებული ადამიანების რიცხვის გაზრდა მოჰყვა. ამდენად, ამ მხრივ საკმაოდ მადლიერი ამომრჩეველი ჰყავს მთავრობას, თუმცა ამავე დროს საკმაოდ გაბრაზებულიც, როცა შესაბამის ნაბიჯს ვერ ხედავს. დიახ, თუკი ეს პროცესი სექტემბერს გადაცდება, შესაძლოა, ამან ევროპული ორიენტაციის პარტიებზე ცუდად იმოქმედოს და შესაბისად, აქ მთავრობაც მოიაზრება.

„რეზონანსი“, 10 ივნისი, 2016 წელი

ინტერვიუ გიორგი ცაგარეშვილთან: „ბიძინა ივანიშვილს მაჟორიტარების იმედი აქვს, ის საარჩევნო ოლქებს, უბრალოდ, იყიდის”

ელზა პაპოშვილი

“თავისუფალი დემოკრატების” წევრი გიორგი ცაგარეიშვილი ამბობს, რომ ქვეყანა მოახლოებულ არჩევნებს კვლავ იმ გადაუჭრელი პრობლემებით ხვდება, რომელიც 4 წლის წინ იყო. მისი თქმით, კორცხელის ინციდენტმა აჩვენა, რომ “ქართული ოცნება” წინა ხელისუფლების სხვა ჩვევებთან ერთად, წინასაარჩევნოდ ძალადობის ხერხსაც გამოიყენებს. ცაგარეიშვილი ფიქრობს, რომ “ოცნებამ” ხალხის ნდობა უკვე საკმაოდ გაფლანგა და მათ ბიძინა ივანიშვილის გააქტიურებაც ვეღარ უშველით.

დეპუტატი ვიზალიბერალიზაციის პროცესაც ეხება და ამბობს, რომ ბევრი ევროპელი პოლიტიკოსი რუსული პროპაგანდის გავლენის ქვეშ იმყოფება.

- წინასაარჩევნო კამპანია ოფიციალურად დაიწყო. როგორ ფიქრობთ, როგორი საარჩევნო გარემო იქნება და მოახერხებს თუ არა ხელისუფლება, რომ კამპანიამ მშვიდ სიტუაციაში ჩაიაროს?

- ვფიქრობ, რომ საკმაოდ რთული და არაორდინალური საარჩევნო გარემოა. ვერ წრმოვიდგენდი, რომ 4 წლის თავზე ნელ-ნელა ისევ იქ მივიდოდით, საიდანაც დავიწყეთ.

2012 წლის 1-ლი ოქტომბერი საზოგადოებისთვის იმის მაუწყებელი უნდა ყოფილიყო, რომ წინასაარჩევნოდ ყველანაირი ძალადობა დასრულდა. სამწუხაროდ, კვლავ გვაქვს დახურული საარჩევნო სივრცე, გვყავს არაკომუნიკაბელური და ოპოზიციური პარტიებისგან გაუცხოებული მთავრობა, დამახინჯებული და გაუკუღმართებული საარჩევნო როგორც სისტემა, ასევე კანონმდებლობა. ასევე ხელისუფლების მხრიდან, ადმინისტრაციული რესურსების გამოყენების ტენდენცია კვლავ გრძელდება. სააკაშვილის ხელისუფლების დროს, საზოგადოებასაც და მთელ პოლიტიკურ სპექტრს სწორედ ეს პრობლემები აწუხებდა. “ქართულ ოცნებაში” ამ პრობლემების გადაწყვეტის არანაირი პოლიტიკური ნება არ არსებობს. კორცხელის ინციდენტი პირდაპირ იმ სიტუაციას იმეორებს, რომელიც წინა ხელისუფლების დროს არსებობდა.

- რას ელით კორცხელის ინციდენტის შემდეგ, ექსპერტების განცახდებით, ეს ხელისუფლებისთვის კარგი გაკვეთილი იქნება. როგორ ფიქრობთ, 8 ოქტომბრის არჩევნები როგორ სიტუაციაში ჩაივლის?

- ვფიქრობ, რომ ამ მოვლენამ ხელისუფლება კი არა, საზოგადოება უფრო დააფიქრა. არ მესმის, რატომ და ვის მიერ იყო ეს ძალადობრივი აქტი დაგეგმილი. ვფიქრობ მხოლოდ ბრიყვი თუ ჩაიდენდა ასეთ ქმედებას, რადგანაც ყველა ნორმალურ ადამიანს კარგად ესმის, რომ მსგავსი საქციელით ქვეყანას ვნებს.

ქვეყანაში ისედაც დაძაბული მდგომარეობაა, ხოლო ასეთი არაადეკვატური ქმედებებით, სიტუაციის გამწვავებას ხელს უწყობენ, ხოლო საერთაშორისო ასპარეზზე, ქვეყნის იმიჯს აზიანებენ. ასეთი საქციელი შეიძლება წახალისებადაც ჩაითვალოს და ყველამ, ვისაც რომელიმე პოლიტიკოსი არ მოსწონს, მათი ცემა ქუჩაში დაიწყონ. თუ “ნაციონალური მოძრაობის” წევრების დასჯა უნდოდათ, ხელისუფლებას მათი კანონის ძალით დასჯისთვის 4 წელი ჰქონდა.

- ბიძინა ივანიშვილმა განაცხადა, რომ მისი ვარაუდი, არჩევნებზე “ქართული ოცნება” პარლამენტში დაახლოებით 95 ადგილს მოიპოვებს. თქვენი აზრით, ეს რეალურია?

- ერთადერთი იმედი, როგორც ჩანს ბიძინა ივანიშვილს მაჟორიტარი კანდიდატების აქვს. ის უზარმაზარი ფინანსური შესაძლებლობით საარჩევნო ოლქებს უბრალოდ იყიდის. სხვა რაიმე სახის იმედი დარწმუნებული ვარ, რომ მას არა აქვს. ცნობილია, რომ წინასაარჩევნოდ “ოცნების” რეიტინგი საკმაოდ დაბალია და ივანიშვილი რეალობას მოწყვეტილია. არა აქვს მნიშვნელობა ის რა კვლევებს ატარებს. მის მსგავსად კვლევებს ჩვენი პარტიაც ახორციელებს. შესაბამისად, ყველამ კარგად იცის, ვის რა შესაძლებლობები აქვს.

ბიძინა ივანიშვილს საზოგადოებაში როგორი ავტორიტეტიც არ უნდა ჰქონდეს, არ მგონია მან მარტომ ამხელა ჭაპანის გაწევა შეძლოს და ჩვენი მოქალაქეები “ოცნებისკენ” შემოაბრუნოს. ფაქტიურად ის ვალდებულებას იღებს, რომ პარტიაში მყოფი უსახური ფიგურები ვაგონებივით ჩაიბას და წინასაარჩევნოდ ხალხში ატაროს.

მერე და რა შედეგი ექნება? მე შეიძლება სუბიექტური ვარ, მაგრამ თქვენმა მკითხველმა შეაფასოს ხელისუფლებისგან საზოგადოებაში რა გზვნილები მოდის. ივანიშვილი საზოგადოებას მხოლოდ აშინებს და იმას ეუბნება, რომ “ნაციონალური მოძრაობის” უკან დაბრუნება არ უნდა მოხდეს. ამ კაცს რატომ ჰგონია, რომ საზოგადოება ასეთი ბრიყვია და მათ გარდა სხვა ოპოზიციურ პარტიებს ვერ ამჩნევს? აბა, სხვა რა თქვას? მეტი სათქმელი არ აქვს.

- როგორ ფიქრობთ, რა არის ის მთავარი მიზეზები რის გამოც ვიზალიბერალიზაციის პროცესი ფერხდება?

- ვფიქრობ, რომ ამის მთავარი მიზეზს ყველა ადმიანი კარგად ხვდება. ეს არის რუსეთის ხილული თუ უხილავი პროპაგანდა, რომელიც, როგორც აღმოჩნდა, ევროპულ ქვეყნებშიც შესანიშნავად მოქმედებს. ჩვენ მეგობრებს და პარტნიორებს ყველაფრის მიუხედავად კიდევ ეჭვი ეპარებათ, ღირს თუ არა საქართველოსთან ურთიერთობა.

ვიღაც შეიძლება ამის თქმას ვერ ახერხებს, მაგრამ სამწუხაროდ ძალიან ბევრი ევროპელი პოლიტიკოსი ვერ გრძნობს რუსეთიდან რამხელა საფრთხე მოდის. ისინი ფიქრობენ, რომ იქნებ არ ღირს საქართველოს და მისნაირი ქვეყნების დაახლოვება რუსეთის თავის ტკივილად. ეს არის დამოკლეს მახვილი, რომელიც ევროპელი მედროვე პოლიტიკოსების თავზე კიდია. უბარლოდ გული მწყდება, რომ როდესაც პასუხისმგებლიანი გადაწყვეტილების მიღების დრო დგება, ეს ხალხი მაშინვე იმას იხსენებს, რომ ქართველები გერმანიაში ბინების ძარცვით ვართ დაკავებულები. თურმე, რამოდენიმე დამნაშავის გამო, 4 მილიონიან ქართველს ევროპული პერსპექტივა საერთოდ უნდა დაუკარგო. გამოდის, რომ ქვეყანას რუსეთისკენ ხელს კრავ. ევროკავშირში რომ ღრმა კრიზისია, ფაქტია.

- პოლიტოლოგთა ნაწილის პროგნოზებით, მომავალი პარლამენტი მრავალპარტიული იქნება და უმრავლესობას ერთი კონკრეტული პარტია ვერ შექმნის. თუ “თავისუფალი დემოკრატები” ბარიერს გადალახავთ, შესაძლებელია, რომ რომელიმე პოლიტიკურ პარტიასთან კოალიცია შექმნათ?

- ამ ეტაპზე ჯერ-ჯერობით საუბარი კოალიციის შექმნაზე და რომელიმე პარტიასთან გაერთიანებაზე რთულია. თუმცა, შემიძლია გითხრათ, რომ არავითარ გაერთიანებაზე არ ვფიქრობთ და იმედი გვაქვს, რომ ჩვენი პარტია პარლამენტში უმარვლესობით მოვა. ყოველ შემთხვევაში, ამის ამბიცია გვაქვს. დანარჩენს დრო გვიჩვენებს.

„ახალი თაობა“, 10 ივნისი, 2016 წელი

ინტერვიუ გია ხუხაშვილთან: „საარჩევნო შტაბის ხელმძღვანელობა კახა კალაძისთვის ხაფანგია” // „ბიძინა ივანიშვილს მოსახლეობის გულის მოგება გაუჭირდება” // „პაატა ბურჭულაძე ნაციონალებსა და „ოცნებას“ სერიოზულ სიურპრიზებს შესთავაზებს“

რა რისკის წინაშე დგას ენერგეტიკის მინისტრი? რა ელოდება ბიძინა ივანიშვილს რეგიონებში, გახდება თუ არა მესამე ძალა პატრიოტთა ალიანსთან შექმნილი საარჩევნო ბლოკი? – ამის შესახებ „ახალ თაობას“ ექსპერტი გია ხუხაშვილი ესაუბრება.

- ბიძინა ივანიშვილმა კორცხელის ინციდენტი დაგმო. ამ დაგმობიდან რამდენიმე დღეში „ქართული ოცნების“ საარჩევნო შტაბის უფროსად დაინიშნა კახა კალაძე, რომელიც, ნაციონალების მტკიცებით, ამ ინციდენტის ორგანიზატორია. თქვენი აზრით, რატომ მიიღეს მმართველ გუნდში ასეთი გადაწყვეტილება?

- ეს გადაწყვეტილება ჩემთვის მოულოდნელი არ ყოფილა. კახა კალაძე არის პარტიის გენერალური მდივანი და ის აქტიურად არის ჩართული პროცესებში. ამის გარდა, 2014 წელს კალაძე ერთხელ უკვე ხელმძღვანელობდა საარჩევნო შტაბს და მან გამოცდილება მიიღო. ის პოლიტიკაში ფეხბურთიდან მოვიდა და ბევრი არაფერი იცოდა, მაგრამ დღეს კარგ ფორმაშია, აშკარაა, რომ საკუთარ თავზე ბევრს მუშაობს. აქედან გამომდინარე, გასაკვირი არაა, რომ სწორედ ის იქნება საარჩევნო შტაბის ხელმძღვანელი. როგორ გაართმევს თავს დაკისრებულ მოვალეობას, მომავალი გვაჩვენებს, მაგრამ, კორცხელის ინციდენტიდან გამომდინარე, ეს თანამდებობა შესაძლოა მისთვის ხაფანგი იყოს.

- რას გულისხმობთ?

- საარჩევნო კამპანია აქტიურ ფაზაში შედის. ამ დროს დაპირისპირებები ხშირად ხდება. საკმარისია, „ქართული ოცნება“ კორცხელისმაგვარ ინციდენტში აღმოჩნდეს ჩართული, რომ კალაძის კარიერა დასრულდეს. მისთვის საარჩევნო შტაბის უფროსობა ძალიან სარისკოა და შესაძლოა აქ იმიტომ გაუშვეს, რომ პოლიტიკას ჩამოაცილონ.

- იმავე კორცხელიდან გამომდინარე, კალაძე ასეთ შეცდომას გაიმეორებს? ის ისედაც არ თვლის დამნაშავედ თავს...

- ვერ გეტყვით. როცა ნაციონალებთან გაქვს საქმე, იქ ყველაფერია მოსალოდნელი. მათ პროვოკაციების მოწყობა არ უჭირთ.

- ამბობთ, რომ ეს თანამდებობა კალაძისთვის ხაფანგი შეიძლება იყოს. ეს ხაფანგი ვინ დაუგო, ივანიშვილმა დაანიშვნინა ამ თანამდებობაზე?

- ბიძინა ივანიშვილი მონაწილეობს პარტიაში მიმდინარე პროცესებში და გადაწყვეტილებებსაც იღებს, მაგრამ ასე ღიად არ ჩაერეოდა, თანაც უკვე გითხარით, რომ კალაძე არის გენერალური მდივანი, ძალიან აქტიური ფიგურა და მას ყველაზე მეტად შეეფერებოდა ეს თანამდებობა. ახლა ის ყურადღებით უნდა იყოს, რათა ხაფანგში არ აღმოჩნდეს და ხელისუფლებას არ ჩამოაშორონ.

- ბიძინა ივანიშვილი არც საარჩევნო სიის ფორმირებაში ჩაერევა?

- მის მოსაზრებას ყველა გაითვალისწინებს, მაგრამ ივანიშვილი დიდად არ ჩაერევა სიის ფორმირებაში. საარჩევნო სიების საკითხი მას დიდად არასოდეს აინტერესებდა. ახლაც ასე იქნება. მისი აზრით, სიის ფორმირება არ არის მნიშვნელოვანი.

- რატომ არ მიაჩნია სიის ფორმირება მნიშვნელოვნად?

- ის საარჩევნო სიას, როგორც პიროვნებების ჯგუფს, კი არ აღიქვამს, არამედ, როგორც მასას, რომლის მართვაც შეიძლება. მისთვის პიროვნებებს მნიშვნელობა არ აქვს. ივანიშვილმა „ქართული ოცნების“ დეპუტატების ნახევარზე მეტის გვარიც კი არ იცის და არც აინტერესებს, ვინ არიან. მთავარია, კონტროლი იყოს.

- მას მიაჩნია, რომ ნაციონალებს საარჩევნო ბარიერის გადალახვა გაუჭირდებათ.

- მან ძალიან კარგად იცის, რომ ეს ასე არ არის. ეს არის ჩვეულებრივი პიარი და პოლიტტექნოლოგია. ნაციონალებიც ამბობენ, რომ `ოცნება~ ბარიერს ვერ გადალახავს.

- ამბობს, პარლამენტში 95 დეპუტატს მაინც გავიყვანთო და ესეც პოლიტტექნოლოგიის ნაწილია?

- ეს უკვე არასერიოზული განცხადებაა. მას თუ მართლა სჯერა, რომ ამ შედეგის დადება შესაძლებელია, მაშინ გამოდის, რომ ის გარემოცვას სერიოზულ იზოლაციაში ჰყავს და არასწორ ინფორმაციებს აწვდის.

- მას ამ საკითხზე კითხვაც დაუსვეს, რომლის პასუხად განაცხადა, რომ მისი მოტყუება შეუძლებელია. მართლა შეუძლებელია ამის გაკეთება?

- „ქართული ოცნება“ დღეს სერიოზულად არის დისკრედიტებული და ამის შესახებ ყველამ იცის, ვისაც ხალხთან ოდნავი შეხებაც კი ჰქონია. ამ დროს ივანიშვილი აცხადებს, რომ ის პარლამენტში 95 კაცს გაიყვანს. ეს იმაზე მიუთითებს, რომ ყოფილი პრემიერი რეალობას მოწყვეტილია და მას არასწორ ინფორმაციებს აწვდიან. ხელისუფლებას ხალხის თვალში ნდობა დაკარგული აქვს. ნდობის აღდგენა არჩევნებამდე დარჩენილ 4 თვეში, ფაქტობრივად, შეუძლებელია.

- ბიძინა ივანიშვილი ამბობს, რომ ყველა რეგიონს მოივლის, მოსახლეობას შეხვდება და მისი გულის მოგებას შეეცდება. მისი ვოიაჟები „ქართულ ოცნებას“ დაკარგულ ნდობას დაუბრუნებს?

- დაკარგული ნდობის 4 თვეში აღდგენა ძნელია. ხალხის გულის მოსაგებად ხელისუფლებამ რაიმე სასწაული უნდა ჩაიდინოს, ასეთი სასწაული კი არსად ჩანს. ივანიშვილის შეხვედრები ამ კუთხით დიდად ეფექტური ვერ იქნება. ისიც საკითხავია, მოივლის თუ არა ის რეგიონებს.

- რატომ გგონიათ, რომ ის რეგიონებში არ წავა?

- რამდენიმე რეგიონში, ალბათ, წავა, მაგრამ საინტერესოა, რას ეტყვის მოსახლეობა. მას რეგიონებში 2012 წლის განწყობით აღარ შეხვდებიან. ამ შეხვედრებისთვის ნაციონალებიც მოემზადებიან და რაღაც პროვოკაციებს მოაწყობენ. 2-3 ვიზიტის შემდეგ ივანიშვილს რეგიონებში სიარული მობეზრდება და ვერც ხელისუფლება აღიდგენს ნდობას.

- იმ ფონზე, როცა ხელისუფლება, ყოფილ ხელისუფლებასთან ერთად, ნდობას კარგავს, უჩნდება თუ არა რაიმე დამატებითი შანსები სხვა პარტიებს? რას ფიქრობთ იმ გაერთიანებასთან დაკავშირებით, რომელიც პატრიოტთა ალიანსის გარშემო შეიქმნა? ბევრი მიიჩნევს, რომ ეს პატრიოტთა ალიანსისთვის კარგი არ იქნება...

- ამით ალიანსს არაფერი დაუშავდება. რადგან ამ საარჩევნო ბლოკში მაინც ისინი იქნებიან მთავარი ძალა. ბლოკს საინტერესო სახელი აქვს: „დავით თარხან-მოურავი – პატრიოტთა ალიანსი – გაერთიანებული ოპოზიცია“. აქ უკვე ნათელია, ვინ იქნება მთავარი. ისიც ცნობილია, რომ ბლოკში შემავალ პარტიებს საარჩევნო სიაში თავიანთი ხალხის ჩასმაზე დიდი პრეტენზიები არ აქვთ. ასე რომ, ალიანსი მხარდამჭერებს არ დაკარგავს.

- გარდა იმისა, რომ სახელი დაუგრძელდა, ამ ბლოკმა პატრიოტთა ალიანსს რა დადებითი შედეგი მოუტანა?

- მან დამატებით შეიძინა რამდენიმე მოლაპარაკე თავი. ეს არაა დიდი წარმატება, მაგრამ არც წარუმატებლობაა.

- შეძლებს ეს ბლოკი, გახდეს მესამე ძალა?

- ეს საარჩევნო ბლოკი მესამე ძალა ვერ გახდება. ქართულ პოლიტიკურ სივრცეში მესამე პოლიტიკური ცენტრი პაატა ბურჭულაძის პარტია იქნება. მიუხედავად იმისა, რომ ზერელედ უყურებენ პაატა ბურჭულაძის თემას, მას აქვს შანსი, ნაწილობრივ მაინც დაიკავოს ის ნიშა, რომელიც ბიძინა ივანიშვილმა დაიკავა, როდესაც პოლიტიკურ რეჟიმს დაუპირისპირდა. დღეს პაატა ბურჭულაძეს აქვს შანსი, დაუპირისპირდეს ორივეს ერთად.

- რა აძლევს ამ შანსებს ბურჭულაძეს?

- მართალია, ის არ არის ბიძინა ივანიშვილის მასშტაბის, მაგრამ იმის შანსი ნამდვილად აქვს, რომ ყოფილ და მოქმედ ხელისუფლებას დაუპირისპირდეს. მთავარი ისაა, რომ მან სუფთა ფურცლიდან დაიწყო. ის არ არის დამძიმებული წარსულის ცოდვებით. მან უკვე უპასუხა ამომრჩეველს ანუ ამომრჩეველმა გაზომა და თქვა, მე ეს კაცი მომწონსო. „ქართულ ოცნებასა“ და ნაციონალურ მოძრაობას სიურპრიზები ელოდებათ.

„ახალი თაობა“, 10 ივნისი, 2016 წელი

იტერვიუ დავით დარჩიაშვილთან: „ბოიკოტს ერთი დღით დავარღვევთ“

„ნაციონალური მოძრაობის“ ერთ-ერთი ლიდერი, პარლამენტის წევრი დავით დარჩიაშვილი, „ახალ თაობასთან“ ინტერვიუში წინასაარჩევნო კოდექსსა და საარჩევნო გარემოზე საუბრობს.

- ბატონო დავით, მიიღებთ მონაწილეობას 10 ივნისს დაგეგმილ კენჭისყრაში, რომელიც საარჩევნო კოდექსის ცვლილებასთან დაკავშირებით რესპუბლიკელების ინიციატივას ეხება?

- მიუხედავად იმისა, რომ გერმანული მოდელის მიმართ კითხვები არსებობს იმ ფორმით, როგორც ის არის რესპუბლიკელების ინიციატივაში ჩამოყალიბებული, ჩვენ მზად ვართ, მხარი დავუჭიროთ. თუ ჩვენი ხმები გადამწყვეტია, კენჭისყრაში მონაწილეობას მივიღებთ. თუმცა, პარლამენტის თავმჯდომარე უსუფაშვილმა, სხვა დეპუტატებმაც არაერთგზის განაცხადეს, რომ საკმარისი ხმები ვერ გროვდება.

- 76 დეპუტატის ხმაა საჭირო, რომ ეს ინიციატივა გავიდეს...

- დიახ, მაგრამ ვერ გროვდება. არაერთხელ არის დათვლილი არაფორმალურად, ვინ იღებს მონაწილეობას კენჭისყრაში და ვინ – არა. ჩვენ მივიღებთ კენჭისყრაში მონაწილეობას თუ არ მივიღებთ, ეს კანონპროექტი მაინც ვერ გადის. ამიტომ ჩვენთვის ამის დაბრალება, რომ ჩვენ გამო ვერ გადის, მთლად პატიოსანი საქციელი არ არის. ჩვენკენ თითის გაშვერა რაღაც ხრიკია.

- არასაპარლამენტო ოპოზიცია არსებულ საარჩევნო მოდელს მძაფრად აკრიტიკებს და ლეგიტიმაციის საკითხის დაყენებაზეც საუბრობს. თქვენ მზად ხართ, მოქმედი მოდელით გახვიდეთ არჩევნებზე?

- ჩვენ საკონსტიტუციო სარჩელზეც ვსაუბრობთ, რომ არსებული მოდელი კონსტიტუციას ეწინააღმდეგება. ჩვენ ამ მოდელის წინააღმდეგი ვართ. 2012 წელს ვალდებულება გვქონდა აღებული, რომ შემდეგი არჩევნებისთვის შეგვეცვალა ეს მოდელი, მაგრამ ხელისუფლება შეიცვალა. „ქართულ ოცნებას“ ასევე ჰქონდა დანაპირები, რომ შეცვლიდა, მაგრამ ახლა ამ დაპირებას „ქართული ოცნება“ არღვევს.

- თავის დროზე თქვენც დაარღვიეთ და არ შეცვალეთ. ..

_ ჩვენ როდესაც დავდეთ პირობა, მაშინ უნდა შეგვეცვალა, მაგრამ ჩვენ ხელისუფლება დავკარგეთ და ეს ხელისუფლებაში მოსული ძალის შესასრულებელი გახდა, მით უფრო, როდესაც ეს პირობა მათ წინასაარჩევნოდ ჰქონდათ დადებული, მაგრამ არ ასრულებენ, მეტიც, გააუარესეს, ხმების გათანაბრების მიზნით ოლქები ისეთნაირად გაჩეხეს, რომ აბსოლუტურად შეუსაბამო სურათს ვიღებთ. მაგალითად, რაჭა და სვანეთი გააერთიანეს. მოქმედი მოდელი საქართველოსთვის შესაფერისი არ არის. პოლიტიკურმა კონტექსტმა აჩვენა, რომ მაჟორიტარული სისტემა პარტიული პოლიტიკის საპირისპირო მოდელია, ხელს უშლის იდეოლოგიურ გაერთიანებებსა და ამ გზით არჩევნებში მონაწილეობას.

- მაჟორიტარული სისტემა არ მოგწონთ?

- მე არ ვამბობ, რომ მაჟორიტარული სისტემა აბსოლუტურად არადემოკრატიულია. ეს სისტემა ქართული რეალობისთვის მიუღებელია და ეს მაგალითებმაც დაადასტურა. ხშირად მაჟორიტარი დეპუტატები უყურებენ იმას, თუ ვინ არის ხელისუფლებაში, რომ მასთან მისასვლელი გზები გაითავისუფლონ, რათა მასთან კარგად იყვნენ.

- ნაციონალური მოძრაობაც იყენებდა მაჟორიტარებს, უფრო ადრეც ხდებოდა მაჟორიტარების გამოყენება...

- დიახ, ყველამ დაიწვა ამაზე ხელი. თავის დროზე შევარდნაძემ დაიწვა ხელი, მერე _ ჩვენ. „ოცნება“ ახლა იმავეს აკეთებს, მაგრამ სხვისი მაგალითით ხომ უნდა ისწავლოს.

- ბატონო დავით, როგორ წინასაარჩევნო გარემოს ელოდებით? კორცხელის მაგალითი შეიძლება გაკვეთილი აღმოჩნდა ხელისუფლებისთვის?

- კორცხელის მაგალითი გაკვეთილი არ აღმოჩნდა ხელისუფლებისთვის. ხელისუფლებამ იცის, რომ სამართლიან საარჩევნო პირობებში შანსები არ აქვს. მძიმე ვითარებას მოველი, შეიძლება ნერვებმა უმტყუნონ და ოპოზიციის ლიდერებზე ფიზიკური თავდასხმა გაგრძელდეს. რაც აქამდე ხელისუფლებამ გვაჩვენა, ეს არის ძალადობა და ხელების გადაგრეხა. ამის ყველაზე თვალნათელი ნიმუში არის ის, რაც ხდება რუსთავის 2-ის ირგვლივ. როგორც ჩანს, ხელისუფლებას ეგზიტპოლის პერსპექტივის ეშინია. ხელისუფლებას არ უნდა ეგზიტპოლი. მეორე, ასევე ვნახეთ ფიზიკური ძალადობა კორცხელში.

- კორცხელში მომხდარ ფაქტს ხელისუფლებამ, პრემიერმა კვირკაშვილმა სამარცხვინო უწოდა და ბრალდებულებიც გამოვლინდნენ...

- კი, დაგმეს, მას შემდეგ, რაც მეგობარი სახელმწიფოს ელჩებმა ხმა ამოიღეს. პირველი რეაქცია როგორი იყო?! რა ხდებოდა პარლამენტში, რატომ გამოვაცხადეთ პოლიტიკური ბოიკოტი?! ასევე, ვისთანაც ასოცირდება ძალადობა, ის დანიშნეს საარჩევნო კამპანიის შტაბის უფროსად.

- კახა კალაძეს გულისხმობთ?

- დიახ. ასეთი ფაქტები უძღვის საარჩევნო გარემოს, ეს ახდენს მასზე გავლენას და ამაზე საუბრობს ეუთოს დასკვნა. ეს ჩრდილს აყენებს და ნიადაგს ურღვევს დემოკრატიას, თანაბარ პირობებს, გამჭვირვალობას.

- ბიძინა ივანიშვილმა განაცხადა, რომ ნაციონალურ მოძრაობას ბარიერის გადალახვა გაუჭირდება. ასეა?

- ასევე განაცხადა, მათი ძალაუფლებაში დაბრუნების საფრთხეაო. რა უნდა გითხრათ, რა თქმა უნდა, არ გაუჭირდება, ეს აჩვენა კორცხელმაც და ნასაკირალმაც. ერთგანაც მოვიგეთ და მეორეგანაც.

- ბიძინა ივანიშვილს სხვაგვარი ახსნა ჰქონდა, რომ მოსახლეობამ ხელისუფლებას გამგებლის დაჭერა არ აპატია...

- რაღაც ხომ უნდა თქვას. ნასაკირალის მოსახლეობამ არ აპატია „ოცნებას” უნიათობა, მოსახლეობის ინტერესების გაუთვალისწინებლობა.

- ამბობთ, რომ ბარიერს გადალახავთ, მაგრამ რა შემადგენლობით მოხვალთ?

- სხვა საარჩევნო სისტემით რომ ჩატარებულიყო არჩევნები, შედეგი ბევრად ადეკვატური იქნებოდა საზოგადოების განწყობის, მაგრამ ამ პირობებშიც, როდესაც საარჩევნო სისტემა მმართველ გუნდზეა მორგებული და ადგილი აქვს ზეწოლას, `ქართული ოცნება~ დამარცხებული იქნება. თუმცა, ეს არ ნიშნავს, რომ რომელიმე ერთადერთი პარტია იქნება გამარჯვებული. შეუძლებელია, მთელი 4 წელი ოპონენტების დემონიზაციამ შედეგი გამოიღოს.

- მთავარი ოპონირება ორ ძალას შორის იქნება თუ უფრო მულტიპარტიული დაპირისპირება იქნება და პარლამენტიც მრავალპარტიული გვექნება?

- გადამწყვეტი არის ეს ორი ძალა, მაგრამ, ვფიქრობ, პარლამენტი მულტიპარტიული გვექნება.

- სხვა პარტიებს, მათ შორის ბურჭულაძეს გამორიცხავთ?

- არა. სხვა პარტიების შედეგები, მათ შორის ბურჭულაძის შედეგი, გავლენას მოახდენს მთავრობის ფორმირებაზე.

„ახალი თაობა“, 10 ივნისი, 2016 წელი

ინტერვიუ ჯონდი ბაღათურიასთან: „ევროპელები ტყეში რომ დარბოდნენ, ჩვენ მაშინ `ვეფხისტყაოსანს~ ვწერდით~ // „დასავლეთს საქართველო ქართველების გარეშე უნდა“

ვიზალიბერალიზაციის საკითხი ქართველ საზოგადოებაში დღემდე განხილვის თემად რჩება. ოპოზიციური პარტიები ხელისუფლებას საზოგადოების მოტყუებაში ადანაშაულებენ. დასავლეთს საქართველო ქართველების გარეშე უნდა, – აცხადებს „ახალ თაობასთან“ ინტერვიუში ქართული დასის ლიდერი ჯონდი ბაღათურია.

- ბატონო ჯონდი, როგორია თქვენი შეფასებები აღნიშნულ საკითხთან დაკავშირებით?

- ვიზალიბერალიზაციაზე უარის თქმით დასავლეთმა კიდევ ერთხელ დაამტკიცა, რომ საქართველო უნდათ, ოღონდ – ქართველების გარეშე! მათ საქართველოს ტერიტორია სჭირდებათ, როგორც პლაცდარმი რუსეთზე შეტევისთვის, რაიმე მავნებლობა რომ ჩაიდინონ რუსეთის წინააღმდეგ და მერე საქართველოს კიდევ დააკარგვინონ ტერიტორიები.

მათ ეს ტერიტორია უნდათ იმისთვის, რომ აქ ტანკები შემოიყვანონ, ბაზები ააგონ, აქედან ხე-ტყე და წიაღისეული სიმდიდრეები გაიტანონ. აი, ამისთვის უნდათ საქართველო, მაგრამ ხალხი არ უნდათ! და ერს ასეთი შეურაცხყოფა მიაყენო, რომ თურმე კრიმინალური ერია, აბა, რაზე უნდა ველაპარაკოთ ჩვენ ევროპელებს?! ეგენი ტყეში რომ დარბოდნენ, ჩვენ მაშინ „ვეფხისტყაოსანს“ ვწერდით. ჩვენთან რომ მე-13 საუკუნეში სიკვდილით დასჯა აიკრძალა, ევროპაში ინკვიზიციის სამარცხვინო კოცონი ენთო და ცოცხლად წვავდნენ ადამიანებს!

- თუკი არ გვაძლევდნენ ვიზალიბერალიზაციას, მაშინ დარწმუნებით რატომ გვესაუბრებოდნენ ამის თაობაზე, რომ ივლისიდან უვიზოდ ვივლიდით ევროპაში?

- ასეთ ყალბ იმედებს დასავლეთი საქართველოს უკვე 30 წელია აძლევს. ჩვენ გეოპოლიტიკური ეპიცენტრი ვართ. რაც უფრო დაიცლება ჩვენი ერი ეკონომიკურად, მორალურად, ისინი მით უფრო კარგად განახორციელებენ თავიანთ მიზანს.

- ასოცირების ხელშეკრულებას ხომ მოაწერეს ხელი?

- ასოცირების ხელშეკრულებით ევროპამ მიიღო საქართველოს ტერიტორიაზე დაუბეგრავი ვაჭრობის უფლება, მაგრამ საქართველომ იგივე არ მიიღო. აქაც იმავე ფორმულასთან გვაქვს ლაპარაკი. ისინი ჩვენს ტერიტორიაზე გაასაღებენ თავიანთ პროდუქციას, ჩვენთვის კი იგივე უფლება არ მოუციათ.

- რას ველოდებით ამ კუთხით, არაფერი შეიცვლება?

- გაუარესდება, სანამ ჩვენ არ შევცვლით საგარეო კურსს, სანამ არ ჩამოყალიბდება სწორი საგარეო კურსი, რომელიც ორიენტირებული იქნება ქვეყნის ინტერესებზე. დღეს ჩვენი ქვეყანა მარგინალიზებულია! შეერთებული შტატების ზეწოლითა და იძულებით დღეს საქართველოს მთავრობა გეგმავს, სამხედრო ალიანსი შექმნას თურქეთთან და აზერბაიჯანთან ერთად – ცენტრი იქნება თბილისი.

- და ეს რას ნიშნავს?

- ეს ავტომატურად ნიშნავს რუსეთისა და სომხეთისთვის ომის გამოცხადებას. როცა ქმნი სამხედრო ალიანსს ერთ მეზობელთან, რომელსაც მეორე მეზობელთან ომი აქვს, ავტომატურად უცხადებ ომს შენს მეორე მეზობელს. და ნუ დაგავიწყდებათ, რომ სომხებსა და აზერბაიჯანელებს ერთმანეთთან ომი აქვთ. ნურც ის დაგავიწყდებათ, რომ რუსეთის თვითმფრინავი აქვთ თურქებს ჩამოგდებული და როდის დაიწყება სამხედრო დაპირისპირება მათ შორის სირიაში, ეს არავინ იცის.

- და რატომ მიდის ასეთ რისკზე ხელისუფლება, რუსეთის გასაღიზიანებლად?

- ხელისუფლება იმიტომ მიდის, რომ მარიონეტია! გარედან ეუბნებიან, შეერთებული შტატებიდან მოსული გაიდლაინებით იმართება დღეს საქართველოო! ისინი კი ეუბნებიან, შენ ასე უნდა გააკეთოო! რომ უფრო მეტად უნდა გააღიზიანოთ რუსეთი, რომ კიდევ თავს დაგესხათ, წაიღოს კიდევ 200-300 სოფელი! სამაგიეროდ, ჩვენ შევძლებთ, რუსეთთან სანქციების პოლიტიკას ახალი ენერგია მივცეთ!

- ანუ ცხელი წერტილების შექმნის საშიშროებას ხედავთ?

- პირდაპირ გვიბიძგებს აქეთკენ ხელისუფლების მიერ განხორციელებული პოლიტიკა. უბიძგებენ ქვეყანას ახალი ცხელი კერების შექმნისაკენ. ხელისუფლებას კი ამისკენ უბიძგებს შეერთებული შტატები. შეერთებული შტატების ამ ახალმა ელჩმა, ბატონმა კელიმ, თავისი განცხადებებით ქვეყნის საშინაო საქმეებში ჩარევის საერთოდ ყველა რეკორდი მოხსნა, მათ შორის სასამართლო საქმეებში ჩარევით, ვინ როგორ უნდა ელაპარაკოს ერთმანეთს, პროკურატურამ როგორ უნდა იმუშაოს. სადამდე უნდა ვუყუროთ ამ მარაზმს?! ყველაფერს ხომ აქვს დასასრული?! შეიძლება მარადიული იყოს სიბრიყვე და უნამუსობა?!

- დაიწყო წინასაარჩევნო კამპანია. ბიძინა ივანიშვილი აქტიურად დაეხმარება „ოცნებას“. რამდენად ჯანსაღი პროცესები წავა წინასაარჩევნოდ?

_ ბიძინა ივანიშვილი ვის დაეხმარება, ეს მისი უფლებაა და ამ უფლებას ვერავინ წაართმევს. რა თქმა უნდა, სასურველი იყო, რომ ბიძინა ივანიშვილი არ დახმარებოდა „ქართულ ოცნებას“, ჩვენ მეტი შანსი გვექნებოდა წარმატების, თუმცა მას ამ უფლებას ვერავინ წაართმევს. ამას მეორე მხარე აქვს კიდევ.

_ რომელ მხარეზე საუბრობთ?

_ „ოცნება“ ოთხი წელი იყო ხელისუფლებაში და ყველა ბერკეტი ჰქონდა, რომ კიდევ დასახმარებლად არ გაეხადა საქმე, მაგრამ იმდენი შეცდომა დაუშვა „ქართულმა ოცნებამ“ და იმდენი უპრინციპო გადაწყვეტილება მიიღო, რომ საქმე ისე გაუხდა, კვლავ სჭირდებათ ივანიშვილის დახმარება. მიუხედავად ამ მნიშვნელოვანი დახმარებისა, „ქართულ ოცნებას” მაინც გაუჭირდება გამარჯვების მოპოვება.

„ახალი თაობა“, 10 ივნისი, 2016 წელი

ინტერვიუ სოსო შატბერაშვილითან: „პარლამენტში უმრავლესობით მოსვლის შანსი არავის აქვს“ // „საქართველოს ეკონომიკას ჩინეთთან ურთიერთობების განვითარება გადაარჩენს”

ბოლო დროს მომავალ პარლამენტში უმრავლესობით მოსვლის პრეტენზია რამდენიმე ძალამ გამოთქვა. „ქართული ოცნებისა“ და ნაციონალური მოძრაობის გარდა, ამის ამბიცია გამოხატეს პაატა ბურჭულაძის პარტიამ და ახალმა საარჩევნო ბლოკმა, რომელიც პატრიოტთა ალიანსის გარშემო შეიქმნა. მემარცხენე ალიანსის გენერალური მდივანი სოსო შატბერაშვილი „ახალ თაობასთან“ ინტერვიუში აცხადებს, რომ 2016 წლის არჩევნების შედეგად პარლამენტში უმრავლესობას ვერავინ მოიპოვებს.

„ვერც რომელიმე ბლოკი და ვერც პარტია უმრავლესობით ვერ მოვა. 2012 წლის შედეგი ვერ გამეორდება. მაშინდელი კოალიცია „ქართული ოცნება“ ნაჩქარევად იყო შეკოწიწებული. მან ნაციონალური მოძრაობა დაამარცხა, მაგრამ შემდეგი პერიოდი ერთმანეთთან უთანხმოებასა და კინკლაობაში, ასევე ნაციონალებთან კამათში გაატარა. ეს კოალიცია შედეგიანი არ იყო. მომავალი პარლამენტი იქნება მრავალპარტიული. უმრავლესობას ვერავინ მოიპოვებს. საარჩევნო ბლოკების შექმნა არაფრის გარანტია არ არის. შეიძლება ასეთი ბლოკები შეიქმნას, მაგრამ არჩევნების შემდეგ ჩქარა დაიშალოს“, – ამბობს სოსო შატბერაშვილი.

- საარჩევნო პროცესებში ბიძინა ივანიშვილის ჩართვა რას ცვლის?

- იგი ისევ მნიშვნელოვანი ფიგურაა, რომელმაც გადამწყვეტი როლი შეასრულა 2012 წლის მოვლენებში. მაშინ დამოუკიდებელი საქართველოს ისტორიაში პირველად მოხდა ხელისუფლების ცვლა მშვიდობიანი, არჩევნების გზით. მანამდე ხან ბოლშევიკური ინტერვენცია იყო, ხან გადატრიალებები. 2012 წელს ივანიშვილის ძალისხმევით დამარცხდა სააკაშვილი. ბიძინა ივანიშვილის ფაქტორი არსებითია, მაგრამ „ქართული ოცნება“ უმრავლესობით მაინც ვერ მოვა. მთავარია, შენარჩუნდეს არჩევნების მშვიდობიანად ჩატარების ტრადიცია და ამომრჩეველმა გადაწყვიტოს, ვის ანდობს ქვეყნის ბედს.

- იმიტომ, რომ რეიტინგი დაკარგა?

- რა თქმა უნდა, დაკარგა. საუკეთესო შემთხვევაში, `ქართული ოცნება~ ხმების 40%-ს აიღებს. რა რეიტინგიც აქვს ამ პარტიას, ისიც მთლიანად ბიძინა ივანიშვილის დამსახურებაა. მმართველი პარტიის რეიტინგზე ცუდად აისახა საკადრო საკითხები. ბიძინა ივანიშვილმა საქმის კეთება თავის გუნდს მიანდო. საუბედუროდ, ეს გუნდი კრიტიკას ვერ უძლებს. მთავრობა უშვებს შეცდომებს, ხშირად უუნაროა. გამგებლები და მათი მოადგილეები საერთოდ ცალკე განხილვის თემაა. ამას მედიასთან შეხვედრისას თავად ბიძინა ივანიშვილიც შეეხო. მან თქვა, რომ არ იცის, საიდან მოიყვანოს განათლებული გამგებლები. საკადრო თემა და მართვის საკითხების ცოდნა სერიოზულ პრობლემად რჩება. მართვა დიდი ხელოვნებაა.

- თქვენი პარტიის ლოზუნგად „ჩვენი თავი ჩვენადვე გვეყუდნოდეს“ წამოაყენეთ. თამაზ მეჭიაურის პარტია აცხადებს, არც ჩრდილოეთისკენ ვიქნებით, არც დასავლეთისკენო. გამოდის, რომ ერთი და იგივე ელექტორატი გყავთ?

- შეიძლება ეს ლოზუნგები ჰგავდეს ერთმანეთს. მემარცხენე ალიანსი დასავლეთთანაც, ჩრდილოეთთანაც და აღმოსავლეთთანაც ურთიერთობების მოწესრიგების მომხრეა. არც პროდასავლურები ვართ, არც პრორუსულები და არც პროაღმოსავლელები. ჩვენ ქართული ძალა ვართ.

- აღმოსავლეთში ვის გულისხმობთ?

- პირველ რიგში, ჩინეთს. ესაა მძლავრი სახელმწიფო, რომელიც პოლიტიკურადაც ძლიერდება, ეკონომიკურადაც და სამხედრო თვალსაზრისითაც. ჩინეთის მარტო ერთ რომელიმე პროვონციასთან სავაჭრო ურთიერთობები, ჩვენი პროდუქციის იქ გატანა გადაარჩენდა საქართველოს ეკონომიკას. აუცილებლად უნდა განვავითაროთ თანამშრომლობა ჩინეთთან.

- არჩევნებში დამოუკიდებლად აპირებთ მონაწილეობას?

- ეს საკითხი ჯერ გადაუწყვეტელია. სიმართლე გითხრათ, საჩქაროდ, წინასაარჩევნოდ ვინმესთან გაერთიანებისაკენ არ მივისწრაფვით. თუ გაერთიანებაა, გვინდა, რომ ის 2020 წლამდე მაინც შენარჩუნდეს. მოკავშირესთან საერთო იდეოლოგია უნდა გვაერთიანებდეს. კოალიციები და ბლოკები ხშირად მტკიცე არ არის ხოლმე. სიმტკიცე არც იმ გაერთიანებებს ეტყობათ, რომლებმაც პრეზენტაციები ჩაატარეს