„რეზონანსი”: ამერიკული სატანკო და საჰაერო დესანტი საქართველოში // მსოფლიოში ერთ-ერთი საუკეთესო ტანკი “აბრაამსი” და “ბრედლის” საბრძოლო მანქანები

„საქართველო და მსოფლიო“: „გლობალური კვლევების ცენტრის” საექსპერტო შეხვედრა: „რეგიონში პირველივე სერიოზული სამხედრო აქტივობის შედეგად საქართველო აჭარას დაკარგავს“

„საქართველო და მსოფლიო“: ევროკომისიის “რუსული პროპაგანდა” და “სიძულვილის ენა”

„რეზონანსი”: მოსკოვის სავიზო შეჯიბრი ბრიუსელს

„რეზონანსი”: ინტერვიუ ვანო ჩხიკვაძესთან: „უვიზო რეჟიმი დემოგრაფიული თვალსაზრისით დადებით როლს ითამაშებს”

„ალია“: ინტერვიუ სოსო ცინცაძესთან: სინამდვილეში რას მიიღებს მოსახლეობა ვიზალიბერალიზაციით? რა ელით ევროპაში მყოფ ქართველ არალეგალებს?

„ახალი თაობა“: ინტერვიუ ვიქტორ დოლიძესთან: „საბჭოურიდან ევროპულისკენ ტრანსფორმირება უნდა მოხდეს“

„ახალი თაობა“: ინტერვიუ არჩილ გამზარდიასთან: „კოალიცია უნდა დაიშალოს და პარტია „ქართული ოცნება“ არჩევნებზე ცალკე გავიდეს“

„ალია“: ინტერვიუ კახა კუკავასთან: „იგეგმება, როგორ უნდა გამოაჩინონ ივანიშვილი არჩევნების წინ“

„ალია“: ბიძინა ივანიშვილის მთავარი დანაშაული იცით, რა არის?

„ალია“: ბიძინა ივანიშვილი ჩასაფრებულია! რას აპირებს 12 მარტის პოლიტსაბჭოს სხდომაზე ექსპრემიერი?

„რეზონანსი”: ინტერვიუ დავით ზურაბიშვილთან: “თუ კოალიციაში ცივილიზებული ურთიერთობა არ ჩამოყალიბდა, ცუდი იქნება”

„რეზონანსი”: სტუდენტთა ამბოხი თსუ-ში პიკს აღწევს // “აქციები გაგრძელდება ხვალაც, ზეგაც და მომავალში, სანამ ჩვენი მოთხოვნა არ დაკმაყოფილდება”

„ახალი თაობა“: ინტერვიუ სოფიო ხორგუანთან: „მე რომ მედიამაგნატი ვიყო, „რუსთავი-2“-ის ყიდვასაც შევეცდებოდი”

————————-

„რეზონანსი”, 11 მარტი, 2016 წელი

ამერიკული სატანკო და საჰაერო დესანტი საქართველოში

მსოფლიოში ერთ-ერთი საუკეთესო ტანკი “აბრაამსი” და “ბრედლის” საბრძოლო მანქანები

ვახტანგ შამუგია

“ბრედლის” ტიპის ქვეითთა საბრძოლო მანქანები და მსოფლიოში ერთ-ერთი საუკეთესოდ დაცული და ძლიერი ტანკი “აბრაამსი” – მაისში საქართველოში ქართულ-ამერიკული ფართომასშტაბიანი სამხედრო წვრთნები – “ღირსეული პარტნიორი” ჩატარდება. მასში მონაწილეობას ქართველი და ამერიკელი სამხედროები და დიდი რაოდენობით მძიმე ტექნიკა მიიღებს.

DefenseNews-ი ევროპაში შეერთებული შტატების არმიის მეთაურის, გენერალ-ლეიტენანტის, ბენ ჰოჯესის ინტერვიუს ავრცელებს, სადაც გენერალი შეკითხვაზე – “აქვს თუ არა აშშ-ს ახალი გეგმები სამხედრო წვრთნებთან დაკავშირებით”, პასუხობს, რომ მაისში აშშ საქართველოში განახორციელებს სამხედრო წვრთნებს.

“მაისში ჩვენ საქართველოში განვახორციელებთ წვრთნებს, რომელსაც “ღირსეული პარტნიორი” ჰქვია. მასში ჩვენ გასულ წელსაც ვიღებდით მონაწილეობას. ეს საქართველოს თავდაცვის ეროვნული წვრთნაა. სპეციალურად ამისთვის, შავი ზღვის გავლით საქართველოში სატანკო და საჰაერო სადესანტო ასეული შემოვა და ისინი საქართველოს ბატალიონის მეთაურს დაექვემდებარებიან”, – აცხადებს ბენ ჰოჯესი. მან აგრეთვე რუსეთის გაზრდილ სამხედრო აქტივობასა და აღმოსავლელი მოკავშირეების თავდაცვისუნარიანობის შესაძლებლობების გაზრდაში დასავლეთის დახმარების აუცილებლობაზე ისაუბრა.

ქართულ-ამერიკული სწავლება “ღირსეული პარტნიორი” გასულ წელსაც ჩატარდა. იგი 26 მაისს საზეიმო ვითარებაში დაიხურა. ამერიკელმა სამხედროებმა და ამერიკულმა ჯავშანტექნიკამ მონაწილეობა საქართველოს დამოუკიდებლობის დღისადმი მიძღვნილ ღონისძიებებშიც მიიღეს.

წინა წელს წვრთნებში მონაწილეობა 600-მა ქართველმა და ამერიკელმა სამხედრომ მიიღო. მანევრების მიზანი ნატოს სწრაფი რეაგირების ძალებში ქართული და ამერიკული კონტინგენტის თავსებადობის ზრდა იყო.

სამხედრო წვრთნების საქართველოს ტერიტორიაზე ჩატარებას დადებითად აფასებენ ქართველი პოლიტიკოსები, სამხედრო თუ პოლიტიკური მიმომხილველები. თუმცა, ამავდროულად, ისინი არ გამორიცხავენ იმასაც, რომ მსგავსი აქტივობა მოსკოვს გააღიზიანებს და კრემლი თავის მხრივ, ოკუპირებულ ტერიტორიაზე გარკვეულ სამხედრო-სასწავლო მანევრებს განახორციელებს.

“მსგავსი სწავლებების მნიშვნელობა არა მხოლოდ სამხედრო, არამედ პოლიტიკური კუთხითაც მეტად მნიშვნელოვანია. ხდება ხაზგასმა იმისა, რომ საქართველო დასავლეთის პარტნიორია, რომ ის მარტო არ არის, ეს კი დღეს, მაშინ, როდესაც რუსეთი ასე გააქტიურებულია, ბევრს ნიშნავს. ის ფაქტი, რომ ქართველი სამხედროები ამერიკელ კოლეგებთან ერთად იმოქმედებენ, თავისთავად კარგია, რადგანაც ამ უკანასკნელთა ცოდნა და გამოცდილება ჩვენ არმიას ეხმარება იმ უნარ-ჩვევების გამომუშავებაში, რაც ასე აუცილებელია ძლიერი და ბრძოლისუნარიანი ჯარის შესაქმნელად”, – თქვა სამხედრო მიმომხილველმა გიორგი ინაურმა “რეზონანსთან” საუბრისას. იგი ცოტა ხნის წინ ქართულ მედიაში გავრცელებულ ინფორმაციას, ამერიკელი სამხედროების მიერ ქართველი კოლეგებისათვის წვრთნების დროს გამოყენებული ტექნიკის გადმოცემის შესახებ, არარეალურად მიიჩნევს.

“ამერიკული მძიმე ტექნიკის ქართული მხარისათვის გადმოცემა ნაკლებსავარაუდოა. როგორც ცნობილია, ამერიკული მხრიდან საქართველოში, აღნიშნულ წვრთნაში მონაწილეობას “ბრედლის” ტიპის ქვეითთა საბრძოლო მანქანები და მსოფლიოში ერთ-ერთი საუკეთესოდ დაცული და ძლიერი ტანკი “აბრაამსი” მიიღებს. ფლობენ კი ქართველი სამხედროები იმ უნარ-ჩვევებს, რომლებიც საჭიროა ამ ტექნიკის მოვლა-ექსპლუატაციისათვის?!

ამასთან, ტექნიკის რამდენიმე ერთეული, რაც უნდა მაღალი შესაძლებლობისა იყოს, არმიის ბრძოლისუნარიანობას დიდად არ ამაღლებს, განსაკუთრებით მაშინ, თუ სხვა კომპონენტებში, მაგალითად, ჰაერსაწინააღმდეგო თავდაცვის ეფექტურობაში არმია მოისუსტებს. უფრო უპრიანი იქნებოდა, ქართული არმიისათვის ტანკსაწინააღმდეგო მართვადი რაკეტების კომპლექსების გადმოცემა, ან როგორც მინიმუმ, მათი გამოყენების სწავლება. როგორც მოგეხსენებათ, ცხინვალის, გუდაუთისა და გიუმრის ბაზაზე რუს სამხედროებს უკვე დიდი ხანია, რაც მოდერნიზებული და თანამედროვე ტ-72 და ტ-90 ტიპის ტანკები ჰყავს შეყვანილი, რაც აგრესიის განახლების შემთხვევაში მოწინააღმდეგეს დიდ უპირატესობას აძლევს. თუმცა თავად ფაქტიც კი, რომ ჩვენი ჯარისკაცები ნატოს შეიარაღებაში არსებულ ტექნიკას ახლოდან გაეცნობიან, ბევრს ნიშნავს”, – თქვა გიორგი ინაურმა.

„საქართველო და მსოფლიო“, 9-15 მარტი, 2016 წელი

“გლობალური კვლევების ცენტრის” საექსპერტო შეხვედრა:

რეგიონში პირველივე სერიოზული სამხედრო აქტივობის შედეგად საქართველო აჭარას დაკარგავს

შორენა ცივქარაშვილი

5 მარტს არასამთავრობო ორგანიზაცია “გლობალური კვლევების ცენტრმა” სასტუმრო “ვერე-პალასში” მორიგ აქტუალურ საკითხზე საექსპერტო შეხვედრა გამართა. რა გამოწვევების წინაშე შეიძლება აღმოჩნდეს უახლოეს მომავალში ჩვენი ქვეყანა, როგორ დასრულდება რუსეთ-თურქეთის კონფლიქტი და ორ დიდ სავაჭრო პარტნიორს შორის ურთიერთობის გამწვავება როგორ აისახება საქართველოს პოლიტიკურ-ეკონომიკურ მდგომარეობაზე? – ამ საკითხებსა და რეგიონში განვითარებულ მოვლენებზე საგანგებოდ მოწვეულმა ექსპერტებმა და პოლიტოლოგებმა იმსჯელეს.

ნანა დევდარიანი, “გლობალური კვლევების ცენტრის” ხელმძღვანელი:

„მასმედიის წარმომადგენლები ექსპერტებს მეტწილად გვეკითხებიან მხოლოდ ამა თუ იმ კონკრეტული თემის შესახებ, რაც მათ აინტერესებთ, უმნიშვნელოვანესი საკითხები კი პოლიტიკური კინკლაობისა და ე.წ. სკანდალური თემების გამო იჩრდილება და მათზე მსჯელობა ქვეყანაში, ფაქტობრივად, არ მიმდინარეობს. აღნიშნულ საექსპერტო შეხვედრაზე კი ჩვენ მიმოვიხილეთ არამხოლოდ რუსეთისა და თურქეთის დაპირისპირება, არამედ რეგიონში არსებული ვითარება და ვიმსჯელეთ, რა სარგებელი შეიძლება ნახოს საქართველომ ამ სიტუაციაში. ყველა ეს საკითხი დაწვრილებით უნდა შევისწავლოთ, ჩვენმა ხელისუფლებამ კი გაითვალისწინოს. მხოლოდ ამერიკისა და ევროპის ძახილი არაფერს მოგვცემს, რადგან ურთულესი რეგიონის შუაგულში ვართ და, თუ ამ საფრთხეებსა და პრობლემებს თვალი არ გავუსწორეთ, უახლოეს მომავალში, შესაძლოა, დიდ უსიამოვნებაში აღმოვჩნდეთ“.

მამუკა არეშიძე, ექსპერტი კავკასიის საკითხებში:

„უკვე წლებია, ქვემო ქართლში ერთმანეთს ებრძვიან აზერბაიჯანელები, ირანელები, თურქები და არაბები. სხვადასხვა წარმატებით, მაგრამ ისე ინტენსიურად მიმდინარეობს ბრძოლა გავლენისთვის, რომ ხშირად გგონია, ვიდრე ისინი ერთმანეთს ებრძვიან, ეს საქართველოსთვის პრობლემას არ წარმოადგენს, მაგრამ, როგორც კი რომელიმე ძალა უპირატესობას მოიპოვებს, დაიწყება ჩვენი პრობლემები… საქმე იქამდე მივიდა, რომ საქართველოს ტერიტორიაზე იბრძვიან არამხოლოდ რელიგიური ჯგუფები, არამედ, მაგალითად, თურქეთის წარმომადგენლები – გიულერისტები და ერდოღანისტებიც კი ებრძვიან ერთმანეთს და ეს ბრძოლა უკვე საშიშ ფორმებს იღებს. ამ ყველაფრის შესახებ საქართველოს მოსახლეობამ და მათ შორის ქართულმა სპეცსამსახურებმაც არაფერი იციან. ანალოგიური რამ ხდება აჭარაშიც და, როდესაც ზოგიერთს მიაჩნია, რომ ორი დიდი ქვეყნის კონფლიქტში საქართველომ შეიძლება გარკვეული სარგებელი ნახოს, ნუ გვავიწყდება, რომ ჩვენ არაფრისთვის მზად არ ვართ და მიმდინარე მოვლენების მიმართ მხოლოდ მაყურებლის პოზიცია გვიკავია. სამწუხაროდ, ეს საკითხი ჩვენი ქვეყნის ხელმძღვანელობისთვისაც უცხოა.

მინდა გითხრათ, რომ მოსკოვში სერიოზულად შეშფოთებულები არიან აჭარაში შექმნილი ვითარებით, რადგან მიიჩნევენ, რომ საქართველოს აჭარა პრაქტიკულად დაკარგული აქვს. რეგიონში პირველივე სერიოზული სამხედრო აქტივობის შედეგად საქართველო აჭარას დაკარგავს, ვინაიდან არსებობს სერიოზული “მეხუთე კოლონა”, რომელიც ამ სიტუაციას გამოიყენებს. იმის მაგივრად ხელისუფლებამ ამ მიმართულებით რომ იმოქმედოს, ამ საკითხს ყურადღებას არ აქცევს“.

გუბაზ სანიკიძე, პარლამენტარი, “ეროვნული ფორუმის” წარმომადგენელი:

„წინასაარჩევნოდ მთავარი ბატალიები, ალბათ, ორ ძირითად საკითხზე გაიმართება: ეს იქნება სექსუალური უმცირესობებისა და რელიგიური საკითხები. დარწმუნებული ვარ, ქვეყნის გარეთ გარკვეული ძალები დაინტერესებულები არიან ამ საკითხებით, რადგან სხვანაირად საქართველოს ვერ “ააფეთქებ”, ჩვენს ქვეყანას რელიგიური საკითხით თუ მოერევი. მათ კარგად იციან, რომ საქართველოში ამის ნოყიერი ნიადაგი უკვე არსებობს.

რაც შეეხება რუსეთისა და თურქეთის კონფლიქტს, მაინც მგონია, რომ რუსეთი და თურქეთი სერიოზულ დაპირისპირებას მოერიდებიან. რაც შეეხება ალეპოს, ახლა ალეპო არის საკვანძო წერტილი, იგივე სტალინგრადი. ვინც ამ ქალაქს დაიკავებს, ის იქნება დომინანტი. ვითარება ძალიან მძიმეა და ჩვენ ვერ გავთვლით, როგორ განვითარდება მოვლენები, რადგან ამას ამერიკული და რუსული სპეცსამსახურებიც ვერ თვლიან. ეს არსებულ ვითარებას კიდევ უფრო ამძიმებს“.

სიმონ კილაძე, ანალიტიკოსი:

„თუ მიმოვიხილავთ მეზობელი ქვეყნების პრესაში გამოქვეყნებულ პუბლიკაციებს და, მაგალითად, ირანული პრესაში ბოლო ხანს გამოქვეყნებულ მასალებზე გავამახვილებთ ყურადღებას, ვნახავთ, რომ ფართოდ გააშუქეს კახა კალაძის ვიზიტები ირანში. ყველა ძირითადი საკითხი იყო განხილული, მაგრამ ვერ ვიტყვი, რომ ირანის ინგლისურენოვან პრესაში საქართველო ყოველთვის ფიგურირებს, მხოლოდ ვიზიტებთან დაკავშირებული მასალები იბეჭდება ხოლმე.

რაც შეეხება თურქულ პრესას, ის ტრადიციულად საკმაო ყურადღებას უთმობს ჩვენს ქვეყანას, საქართველოსა და თურქეთის ურთიერთობებს, განსაკუთრებით მას შემდეგ, რაც მოსკოვსა და ანკარას შორის ურთიერთობა გართულდა, თურქები ყურადღებას აქცევენ ისტორიულ კონტექსტს და აფხაზეთის საკითხს. მაგალითად, პოპულარული ინგლისურენოვანი გაზეთი “თუდეი ზამანი” თითქმის თვეში ორ-სამჯერ ბეჭდავს ცნობილი თურქი პოლიტოლოგისა და ანკარის სტრატეგიული კვლევების ცენტრის ხელმძღვანელის _ ჰასან კანბოლათის მოსაზრებას. ეს პიროვნება ბევრჯერაა აფხაზეთში ნამყოფი და აფხაზეთზე ხშირად წერს გულთბილად და ლოიალურად, ანუ ანტიქართულად.

რაც შეეხება ქართულ პრესას, შეიძლება ითქვას, რომ აქ არავითარი პროფესიონალიზმი და საექსპერტო ანალიზი არ შეინიშნება. ბოლო ხანს დიდი რეზონანსი ჰქონდა თურქეთის ელჩთან დაბეჭდილ ინტერვიუს, მაგრამ დიპლომატმა რა უნდა თქვას? ხომ არ იტყვის, ომს ვიწყებთ ან ჩვენი საიდუმლო სამსახურები თქვენ წინააღმდეგ მუშაობენო?! საერთოდ კი ჟურნალისტებმა უმჯობესია, ვინმე ისეთის კომპეტენტური წყაროსგან აიღონ ინტერვიუები, რომელმაც იცის, რა ხდება სინამდვილეში აჭარაში. ამას გარდა, ჩვენთან ისეთი პოლიტიკოსებიც არიან, რომლებსაც ჰგონიათ, თურქეთი ჩვენი მესიაა, მშველელი და ისტორიული მეგობარი“.

პეტრე მამრაძე, “მართვის სტრატეგიული ინსტიტუტის” ხელმძღვანელი:

„შეიძლება ითქვას, ამ ვითარებაში ძალიან იზრდება რისკები საქართველოს მიმართ და ჩვენ ვხდებით სწორედ ის დაბალი ღობე, ის პოლიგონი, რომელიც შეიძლება გამოიყენონ. მაგალითად, ლავროვმა განაცხადა, თუ ჩვენ დავინახავთ, რომ ნატო ითრევს საქართველოს თავის რიგებში, კონკრეტულ ზომებს მივიღებთო, რაც იმას ნიშნავს, ვიღაცას რომ ტვინი გადაუბრუნდეს და ვარშავის სამიტზე განაცხადოს, საქართველოსთვის უბრალოდ მაპის მიცემის საკითხი გადავწყვიტეთო, რუსები იმ დღესვე ჩააყენებენ სამხედრო ბაზებს საქართველოში და იტყვიან, სხვა გზა არ გვაქვს, სამხრეთით ჩვენი საზღვრები უნდა ჩავკეტოთ, რადგან საქართველო შედის ნატოში და აქვეა თურქეთიც, რომელიც ნატოს წევრია და რომელმაც ზურგში დანა ჩაგვარტყაო.

ბოლო დროს მე შევხვდი ნატოს წევრი ქვეყნების ელჩებს, მათ მოადგილეებს, სამხედრო ატაშეებს და ყველას ამ კითხვას ვუსვამდი, რუსები რომ ასე მოიქცნენ, რა უნდა ვქნათ-მეთქი და მპასუხობდნენ, ჩვენი მხრიდან განცხადებების გარდა არაფერს ელოდოთო. არადა, ეს რისკები გაზრდილია”.

ვახტანგ მაისაია, სამხედრო ექსპერტი:

„კარგად მოგეხსენებათ, რა მდგომარეობაა სირიაში. შეთანხმება ცეცხლის შეწყვეტის შესახებ დროებითია და საომარი მოქმედებები მალე განახლდება, რადგან, პროამერიკული და პრორუსული კოალიციების გარდა, გამოჩნდა მესამე საკმაოდ ძლიერი ძალების ცენტრი _ თურქეთ-საუდის არაბეთის კოალიცია, რომელიც, ბუნებრივია, ამ შეთანხმების პირობებს არ ეთანხმება. სავარაუდოდ, სიტუაცია გამწვავდება, რადგან რუსულმა კოალიციამ საკმაოდ წარმატებული სამხედრო კამპანია ჩაატარა. ეს უნდა ვაღიაროთ. რუსები უკვე აკონტროლებენ სირია-თურქეთის საბრძოლო ზოლის 70%-ს, ანუ ისინი, ფაქტობრივად, გავიდნენ საკონტაქტო დაპირისპირების ზოლზე. თურქეთს მობილიზებული ჰყავს მეორე საველე არმია, დაახლოებით 200 ათასი მეომრით და პლუს მეოთხე სარეზერვო არმია, რომელშიც 200 ათასი ადამიანია. ამას გარდა, თურქეთი აპირებს, შექმნას მძლავრი დაჯგუფება, მაგრამ თურქულ დაჯგუფებას უპირისპირდება საკმაოდ მძლავრი რუსული დაჯგუფება. მობილიზებულია 80-მდე რუსული საბრძოლო თვითმფრინავი და 16 დამრტყმელი ვერტმფრენი და, თუ შევადარებთ, გამოდის, რომ ძალთა თანაფარდობა რუსულ და თურქულ კოალიციებს შორის თანაბარია.

შეტაკებების შედეგად, არ არის გამორიცხული, დაპირისპირებამ კავკასიის მიმართულებითაც გადმოინაცვლოს და მთიანი ყარაბახის კონფლიქტის ესკალაცია მოახდინოს. ალეპოსთან რუსულ კოალიციას მოწინააღმდეგე, ფაქტობრივად, ალყაში ჰყავს მოქცეული და, თუ თურქები არ ჩაერევიან, ალეპოს ბედი გადაწყვეტილია“.

იოსებ არჩვაძე, ექსპერტი ეკონომიკის საკითხებში:

„რუსეთი და თურქეთი არა მხოლოდ ჩვენი მეზობლები, არამედ სოლიდური სავაჭრო პარტნიორებიც არიან. დიდი ხნის განმავლობაში რუსეთზე მოდიოდა ჩვენი საგარეო სავაჭრო ბრუნვის ჯერ 60%, შემდეგ _ 30% და ემბარგოს შემდეგ ეს მაჩვენებელი საგრძნობლად შემცირდა, შემდგომ კი ჩვენი ძირითადი სავაჭრო პარტნიორი გახდა თურქეთი, ამიტომ რუსეთსა და თურქეთს შორის ურთიერთობა ჩვენთვის საინტერესო და მნიშვნელოვანია.

თურქეთისა და რუსეთის სტატისტიკური სამსახურების ბოლო მონაცემებით, რუსეთში ექსპორტირებული პროდუქციის მიხედვით თურქეთს მე-5, იმპორტირებული მიხედვით კი მე-13 ადგილი უკავია. თურქეთის ექსპორტში რუსეთს მე-7 ადგილი უკავია, ხოლო რუსეთის იმპორტი პირველ ადგილზეა. ასე რომ, თურქეთის საგარეო ვაჭრობაში, მიუხედავად იმისა, რომ შემცირების ტენდენცია შეინიშნება, რუსეთის წილი სოლიდურადაა წარმოდგენილი.

თუ შევადარებთ სავაჭრო ბრუნვას, აღმოჩნდება, რომ რუსეთიდან განხორციელებული ექსპორტის წილი თურქეთში თითქმის ხუთ-ექვსჯერ აღემატება თურქეთიდან ექსპორტის წილს რუსეთში. მართალია, სავაჭრო ბალანსი თურქეთს რუსეთთან უარყოფითი აქვს, მაგრამ, სამაგიეროდ, მომსახურების ბალანსი აქვს საკმაოდ წარმატებული. რაც შეეეხება ინვესტიციებს, 1990-იანი წლებიდან დღემდე რუსეთის მიერ თურქეთში განხორციელებული ინვესტიციები მოცულობით ორჯერ მეტი იყო, ვიდრე თურქული ინვესტიციებისა რუსეთში. ამ მიმართულებით საქართველოს შეუძლია, ერთი მხრივ, მაგალითად, რუსეთის ბაზარზე სასოფლო-სამეურნეო პროდუქციის შეტანა და, მეორე მხრივ, თურქეთის მიმართ ენერგეტიკული დერეფნის როლის ფუნქციის გაზრდა. ეს ყველაფერი კი ორ ქვეყანას შორის მხოლოდ მშვიდობიანი ურთიერთობების პირობებში იქნება შესაძლებელი“.

„საქართველო და მსოფლიო“, 9-15 მარტი, 2016 წელი

ევროკომისიის “რუსული პროპაგანდა” და “სიძულვილის ენა”

ნანა დევდარიანი

განათლების მინისტრმა ის-ის იყო, დედა დაიფიცა, სკოლებში სექსუალური აღზრდის სახელმძღვანელოს შეტანას არ ვაპირებო, რომ ევროკომისიამ სასწრაფო რეკომენდაცია აფრინა საქართველოს ხელისუფლების სახელზე _ სასკოლო პროცესში ჰომოსექსუალთა მიმართ ტოლერანტობის პროგრამები უნდა ჩართოთო! ოღონდ რას ელოდნენ, უცნობია. რასიზმისა და შეუწყნარებლობის წინააღმდეგ (ECRI) ევროპულმა კომისიამ 2015 წლის 8 დეკემბერს შემუშავებული რეკომენდაციები სამი თვის შემდეგ გამოაქვეყნა _ 1 მარტს.

მოხსენება საკმაოდ მკაცრ ტონშია შედგენილი და 23 რეკომენდაციას შორის მითითებულია:

“ხელისუფლებამ (იგულისხმება საქართველოს ხელისუფლება) აცნობა ECRI-ს, რომ საგანმანათლებლო სექტორში არ დანერგილა სპეციალური პროგრამები ლგბტ პირთა მიმართ ტოლერანტობის ხელშეწყობისთვის, არც სკოლებში და არც უნივერსიტეტებში. დისკუსია ჰომოსექსუალიზმის არსებობაზე არ არის ჩართული სკოლის სასწავლო პროგრამებში. ლგბტ საკითხებზე ბალანსირებული და ობიექტური სწავლების არარსებობის გამო მოსწავლეები მოწყვლადნი რჩებიან ქართულ საზოგადოებაში ფართოდ გავრცელებული ჰომო/ტრანსფობიური დისკურსის მიმართ”.

ეს პირდაპირი საყვედურია იმის თაობაზე, რის მცდელობასაც კატეგორიულად უარყოფდა განათლების სამინისტრო. სამაგიეროდ, სახალხო დამცველი, რომელიც, ყველა სხვა მოქალაქისგან განსხვავებით, მეტისმეტად სათუთად ეპყრობა სწორედ სექსუალურ უმცირესობებს, პირდაპირ გააიგივეს ლგბტ თემთან და საქართველოს ხელისუფლებას “ურჩიეს”, “გადაიდგას ნაბიჯები ლგბტ პირთა წინააღმდეგ მიმართულ შეუწყნარებლობასა და დისკრიმინაციასთან საბრძოლველად. ეს უნდა განხორციელდეს ლგბტ თემსა და სახალხო დამცველთან თანამშრომლობით, რომელმაც უნდა მიიღოს სათანადო დახმარება ლგბტ-სადმი მიძღვნილი დეპარტამენტის შექმნაში, ასევე, შემუშავდეს სათანადო ელემენტები სკოლებში ცნობიერების ასამაღლებლად”.

სათანადო დახმარებაში ის იგულისხმება, რომ ჩვენი, გადასახადის გადამხდელთა ჯიბიდან უნდა დაფინანსდეს ლგბტ-სადმი მიძღვნილი დეპარტამენტის შექმნა! ჰო, აბა, დასავლეთიდან მსუყედ დაფინანსებული “იდენტობის” ხელმძღვანელმა ვაჭარაძემ ის ფული ლგბტ პირთა უფლებების ნაცვლად საკუთარი მატერიალური მდგომარეობის გაუმჯობესებას მოახმარა და ახლა, მისთვის პასუხის მოთხოვნის მაგივრად, ჩვენი ჯიბიდან უნდა დაიცვან მისი კლიენტები!

ბანკის ვალებში ჩავარდნილი ადამიანების ქვეყანაში სოციალური უფლებები მხოლოდ ერთნაირსქესიან წყვილებს აქვთ, ამიტომ ევროკომისია გულდათუთქული იუწყება: “ამჟამად საქართველოში არ არის აღიარებული რაიმე სახის ერთნაირსქესიანი პარტნიორობა. ეს იწვევს სხვადასხვა სახის დისკრიმინაციას სოციალურ უფლებათა სფეროში. ამ მხრივ, ECRI ხელისუფლების ყურადღებას ამახვილებს ევროპის საბჭოს მინისტრთა კომიტეტის რეკომენდაციაზე CM/Rec (2010) 5 წევრი სახელმწიფოს მიმართ, სექსუალური ორიენტაციისა და გენდერული იდენტობის საფუძვლებზე დისკრიმინაციასთან ბრძოლის შესახებ”.

არადა, რა უწყინარად იწყებოდა ყველაფერი! ანტიდისკრიმინაციულ კანონში მმართველმა კოალიციამ “ცუდი ვერაფერი დაინახა”. გაფრთხილების მიუხედავად, რომ ეს მხოლოდ დასაწყისი იყო, დეპუტატები არხეინად იყვნენ, ეგონათ, სკანდალი გადაგორდა. არ გადაგორდა და 23 რეკომენდაცია ამ არჩევნების წინ მათ თავზე დამოკლეს მახვილივით დაეკიდა.

“სქესის შეცვლის ოპერაციის კრიტერიუმები ბუნდოვანია და არ არის სტანდარტიზებული. ასევე არ არის ცხადი მოთხოვნები ახალი გენდერული იდენტობის ცნობასა და მასთან დაკავშირებული დოკუმენტების ცვლილების მიმართ”. ეს სახალხო დამცველის განცხადების სიტყვა-სიტყვით გამეორებაა, რომელსაც მოქალაქეთა უფლებების მასობრივი დარღვევები სულაც არ ანაღვლებს და “ახალი გენდერული იდენტობის” ცნობის სირთულეებით არის შეშფოთებული!

“ECRI იძლევა რეკომენდაციას, რათა ხელისუფლებამ ნათელი სახელმძღვანელო პრინციპები შეიმუშაოს სქესის შეცვლის პროცედურებსა და მათ ოფიციალურ აღიარებასთან მიმართებით”. ევროკომისიელო ბიძიებო, დეიდებო და მათო ლგბტ კოლეგებო, უკანონოდ გაყვლეფილი და ხელისუფლებისგან ფეხებზე დაკიდებული მოსახლეობის უდიდესი უმრავლესობის პრობლემები რომ აღიაროთ, არ გიცდიათ?

ევროპული კომისიის შეფასებასა და რეკომენდაციებში პატრიარქიც არის ნახსენები _ ის “სიძულვილის ენით” საუბარშია დადანაშაულებული: “სიძულვილის ენა გამოიხატა ჰომოფობიასა და ტრანსფობიასთან ბრძოლის საერთაშორისო დღის აღსანიშნავ საჯარო ღონისძიებათა წინააღმდეგ გამართულ საპროტესტო აქციებზე _ მაგალითად, 2013 წლის მაისში. საქართველოს მართლმადიდებლური ეკლესიის პატრიარქმა ლგბტ ღონისძიებებს “ქართველი ერის შეურაცხყოფა”, ჰომოსექსუალიზმს კი “დაავადება” უწოდა”.

მოსთხოვოს ერთი ევროკომისიამ ებრაელ რაბინებს ან მუსლიმ იმამებს ჰომოსექსუალიზმის აღიარება და, რასაც მიიღებს, თავადვე დაინახავს! თუმცა მიგრანტების მოზღვავების პირობებში, იმავე პოლიტკორექტულ ენაზე სჯა-ბაასს მაინც ვერ იშლიან და ნამდვილ პრობლემებს ისეთი საზრუნავით ანაცვლებენ, რომელზეც საქართველოში მოღვაწე ლგბტ-უფლებადამცველებიც კი აღიარებენ, რომ ის “დღის წესრიგში არ დგას”!

თავის დროზე პრემიერმა ღარიბაშვილმა პირობა დადო, რომ კონსტიტუციაში ოჯახი განისაზღვრებოდა, როგორც ქალისა და მამაკაცის ერთობა. ახალმა პრემიერმა გიორგი კვირიკაშვილმა ეს პირობა შეასრულა და “ქართული ოცნების” პოლიტსაბჭოს სხდომაზე კონსტიტუციის შესწორების საკითხი დასვა. როგორც მოსალოდნელი იყო, პარლამენტის რესპუბლიკელი თავმჯდომარის რეაქცია მყისიერი იყო, მით უფრო, იმის გათვალისწინებით, რომ სკანდალი “სტალინელ” გოგი თოფაძესა და “ლიბერალ” თინა ხიდაშელს შორის ჯერაც არ მინავლებულა:

“ცალსახად ითქვა, რომ პოლიტსაბჭოს გუშინდელ სხდომაზე არანაირი თემა არ განხილულა, ქორწინების საკითხზე საკონსტიტუციო ცვლილების საკითხის გარდა. პოლიტსაბჭოს ამ სხდომაზე რესპუბლიკური პარტიის წარმომადგენლობა არ იყო _ მე გახლდით, როგორც პარლამენტის თავმჯდომარე. ცხადია, რესპუბლიკელიც ვარ, მაგრამ რესპუბლიკურმა პარტიამ პოლიტსაბჭომდე განცხადება გააკეთა, რომლითაც ძალიან მკაფიოდ აღნიშნა, რომ რესპუბლიკური პარტია, საქართველოში მოქმედი კანონმდებლობით, ქორწინებას აღიარებს, როგორც ქალისა და მამაკაცის ნებაყოფლობით ერთობას და არაფერს სხვას.

შესაბამისად, ჩვენი კანონმდებლობა და კონსტიტუცია ამ თვალსაზრისით ნაკლული სამართლებრივად არ არის. თუკი ვინმე თვლის, რომ რაიმე მეტად და უკეთესად შეიძლება ჩაიწეროს შიგნით, ამას სწორი დრო და სწორი ტაქტიკა სჭირდება. იმ ვითარებაში, როდესაც ცვლილების ინიცირება ხდება, ამით იმის გაცხადება ხდება, რომ ამ თვალსაზრისით, შესაძლოა, კონსტიტუციას რაღაც აკლია, ხოლო თუ ინიცირებას სწრაფი გადაწყვეტილება არ და ვერ მოჰყვება, მაშინ ჩვენ ვტოვებთ პრობლემას, კიდევ უფრო გამრავლებულს და პრობლემა კიდევ უფრო მძაფრდება. ჩვენ ვთვლით, რომ ეს არის გარკვეულ პოლიტიკურ დანაღმულ ველზე შესვლა. ამ თემით უახლოესი თვეების და საარჩევნო პროცესის დომინირება არანაირად არ შედის საქართველოს, ქართველი ხალხის ინტერესებში. ჩვენ ბევრი მნიშვნელოვანი თემა გვაქვს, რომლის საფუძველზეც და რომლის ფონზეც უნდა მოხდეს საარჩევნო გადაწყვეტილებების მიღება და არა საეჭვო წარმოშობისა და საეჭვო მიზნების თემით”.

ერთი სიტყვით, უსუფაშვილი თან იმას ამბობს, ეგ ხომ მაინც ეგრეა _ ოჯახი ქალის და კაცის ერთობააო, თან ამ საკითხის დასმას “პოლიტიკურად დანაღმულ ველს” ადარებს. მოკლედ, ასე იყო თუ ისე, რესპუბლიკური პარტია ინიცირების პროცესს პოლიტიკურად გაემიჯნა. ამასთანავე, პარლამენტის თავმჯდომარემ განაცხადა, რომ “პატივს სცემს კოალიციის იმ წევრების, ასევე საკუთარი პარტიისა და ფრაქციის წარმომადგენლების მოსაზრებას, რომლებიც საკითხს განხილავენ წმინდა ზნეობრივ და მორალურ ჩარჩოში და არა – პოლიტიკურ ჩარჩოში”. ესეც კიდევ ერთი რესპუბლიკური აღიარება: ქართული პოლიტიკა აცდენილია “წმინდა ზნეობრივ და მორალურ ჩარჩოებს”!

ნაციონალები რომ ნაციონალები არიან, ისინიც კი არ უჭერენ ერთხმად მხარს ლგბტ იდეოლოგიას. გივი თარგამაძე “ქართული ოცნების” საკონსტიტუციო ინიციატივას მხარს არ დაუჭერს: “ხელისუფლება ვერ გამოდის იმ სახიფათო წრიდან, როდესაც საკუთარი წარუმატებლობის დაბალანსებას ცდილობს ამ ძალიან რადიკალური ჯგუფების გრძნობებზე თამაშით და ამ მხრივ სიძულვილის გაღვივებით. ეს საკითხი ფორმულირებულია სამოქალაქო კოდექსში და შესაბამისად, ეს ყურით მოთრეული საკითხია. აქედან გამომდინარე, მე მხარს არ დავუჭერ და ვფიქრობ, რომ ამის განხილვა ზედმეტია”. როგორ ჰგავს რესპუბლიკელების პოზიციას, არა?

ნაციონალების ერთ-ერთი ლიდერი მიხეილ მაჭავარიანი კი, იმ შემთხვევაში, თუ აღნიშნული საკონსტიტუციო ინიციატივა კენჭისყრაზე გამოვა, მას მხარს დაუჭერს: “მიუხედავად იმისა, რა ეწერება კონსტიტუციაში, ოჯახი არის ქალსა და მამაკაცს შორის ურთიერთობა, შვილები, მათი აღზრდა და ა.შ. როგორც ჩანს, ,,ქართულ ოცნებას” საქმე გამოელია. თუ ამით ტესტს აკეთებენ და მიაჩნიათ, რომ მეტი პრობლემა არ არის ქვეყანაში, კი, ბატონო, გატესტონ. დიახ, დავუჭერთ მხარს, მაგრამ კიდევ ერთხელ ვიმეორებ, რომ ეს არის სუფთა პოლიტიკური თამაშები და ამით არიან დაკავებულები”.

პრობლემის მეტი რა არის, ბატონო მიხეილ, და ერთი მათგანი სწორედ თქვენ ხართ _ რესპუბლიკელების მონდომებით “გადარჩენილი” და ხელისუფლებაში ჩატოვებული ნაციონალები, მაგრამ საიდანაც ეს 23 რეკომენდაცია მოვიდა, იქიდან გიჭერენ მხარს და ხალხს ამ პრობლემიდან ყურადღების არარსებულ პრობლემებზე გადატანას აიძულებენ.

რესპუბლიკელებს გოგი თოფაძეზე ნათქვამი მოუტრიალა “მწვანეთა პარტიის” ლიდერმა, დამოუკიდებელმა დეპუტატმა გიორგი გაჩეჩილაძემ: “მართლა მიკვირს რესპუბლიკელების პოზიცია… თუ კოალიციაში რჩებიან, მაშინ ქორწინების საკითხზე ერთიანი მოსაზრება უნდა ჰქონდეთ”. გაჩეჩილაძის აზრით, გაჭირდება ხმების შეგროვება, რადგან, გარდა რესპუბლიკელებისა, საჭიროა “ნაციონალური მოძრაობის” ხმებიც: ამიტომ უმჯობესია, მომავალ პარლამენტში ისეთი პარტიები შევიდნენ, რომლებიც ასეთ საკითხებზე კითხვის ნიშნებს არ დასვამენ _ ეს უნდა გაითვალისწინოს საზოგადოებამ.

“კარგი იქნება, კონსტიტუციაში თუ ეს ჩანაწერი გაკეთდება, რადგან სადავო აღარაფერი იქნება ამ თემის ირგვლივ. რესპუბლიკელები უნდა დაფიქრდნენ ამ საკითხზე, რადგან ეს სახელმწიფოებრივი მნიშვნელობის საკითხია, რათა კიდევ ერთხელ არ მიეცეს ვინმეს საშუალება, ერთნაირსქესიანთა ქორწინების თემა სპეციალურად ააგოროს”, _ განაცხადა გიორგი გაჩეჩილაძემ.

პოლიტიკური თამაშები გრძელდება, ხალხის დაბოლებაც. ევროკომისიელი ბიძიების, დეიდებისა და მათი ლგბტ კოლეგების უკან ოკეანისგაღმელი “უფროსი ძმები (დები და ა.შ.)” რომ დგანან, ესეც უკვე ცნობილია. ხშირად გამოგზავნეთ ასეთი “რეკომენდაციები” და მერე თქვენ მიერვე მოგონილ “რუსულ პროპაგანდას” ნუღარ დააბრალებთ იმას, რასაც თქვენზე ქართველი ხალხი ფიქრობს.

და კიდევ ერთი: ამ სტატიის არც ერთ სიტყვაში სიძულვილი არ არის, მით უფრო _ “სიძულვილის ენა”, რომლითაც ჩვენი ადგილობრივი “ლიბერალები” გვიმასპინძლდებიან, როცა მათ აკვიატებულ იდეებს არ ვიზიარებთ.

„რეზონანსი”, 11 მარტი, 2016 წელი

მოსკოვის სავიზო შეჯიბრი ბრიუსელს

ეკატერინე ბასილაია

ევროპის 30 ქვეყნის კვალდაკვალ უვიზო რეჟიმი, შესაძლოა, წელს რუსეთთანაც ამოქმედდეს. მოსკოვი ევროკავშირს ერთგვარად ეჯიბრება იმაში, საქართველოს მოქალაქეებისთვის საზღვრის გახსნით ევროპისკენ მაყურებელი ქართველების კეთილგანწყობის მოპოვება თავადაც შეძლოს და უკვე გაცხადებულია ის, რომ 16 მარტს პრაღაში კარასინი-აბაშიძის მორიგ შეხვედრაზე რუსეთის მხრიდან ვიზების გაუქმების თემა ერთ-ერთი მთავარი განსახილველი საკითხი იქნება. უფრო მეტიც, შესაძლოა მოსკოვმა ბრიუსელთან ამ შეჯიბრის გამო ვიზები უფრო ადრე გააუქმოს კიდეც, ვიდრე ევროკავშირმა, თანაც ყველანაირი წინაპირობის გარეშე.

თუკი ადრე კრემლი აცხადებდა იმას, რომ ვიზების გაუქმების სურვილი აქვთ, თუმცა ირიბად მიანიშნებდა იმაზე, რომ დიპლომატიური ურთიერთობის არქონის შემთხვევაში ეს ცოტა უცნაურად გამოიყურებოდა, ახლა ქართველი ექსპერტები ამგვარ წინაპირობას აღარ ელოდებიან და მიიჩნევენ, რომ მოსკოვმა ტაქტიკა შეცვალა და საქართველოზე ზეგავლენის დაკარგვის საფრთხის გამო საზღვრის გახსნა ე.წ. რუსული რბილი ძალის ერთ-ერთი კომპონენტია.

“გამორიცხული არ არის წელს რუსეთთან სავიზო რეჟიმი მოიხსნას”, – ამის შესახებ განცხადება საქართველოს პრემიერ-მინისტრის წარმომადგენელი რუსეთთან ურთიერთობის საკითხებში ზურაბ აბაშიძემ გააკეთა და დააანონსა ის, რომ 16 მარტს რუსეთის საგარეო საქმეთა მინისტრის მოადგილე გრიგორი კარასინთან პრაღაში მორიგი შეხვედრისას, სხვა საკითხებთან ერთად ვიზებთან დაკავშირებული საკითხიც განიხილება. სანამ რუსეთის სავიზო რეჟიმზე გიპასუხებთ, მინდა აღვნიშნო, რომ ევროკავშირის ქვეყნებში სავიზო რეჟიმის გაუქმება იქნება საქართველოს უახლეს ისტორიაში ერთ-ერთი უმნიშვნელოვანესი მოვლენა და ეს ყველას დამსახურებაა. რა თქმა უნდა, განსაკუთრებით საქართველოს მთავრობის.

რაც შეეხება რუსეთის სავიზო რეჟიმის საკითხებს, აქ ახალი არაფერია. წელს, სავარაუდოდ, შეიძლება საერთოდ მოიხსნას სავიზო რეჟიმი, ვინაიდან თავად რუსეთის პრეზიდენტმა განაცხადა გასული წლის დეკემბერში, რომ რუსეთი საქართველოს მოქალაქეებისთვის სავიზო მოთხოვნებს გააუქმებს. შემდგომ საგარეო უწყებამ გააკეთა კომენტარი, რომ ჯერ გამარტივებული სავიზო რეჟიმი ამოქმედდება და შემდეგ გამორიცხული არ არის სავიზო მოთხოვნები საერთოდ მოიხსნას”, – აცხადებს ზურაბ აბაშიძე.

ქართველი დიპლომატის თქმით, პირველი ნაბიჯი უკვე გადაიდგა და რუსეთთან გამარტივებული სავიზო რეჟიმი ამ წლის იანვრიდან უკვე მოქმედებს, მეორე ნაბიჯი კი შესაძლოა წელს სავიზო რეჟიმის საერთოდ გაუქმება იყოს.

დაასწრებს თუ არა რუსეთის მხრიდან სავიზო რეჟიმის საერთოდ გაუქმება ევროკავშირის მხრიდან ვიზალიბერალიზაციას, ზურაბ აბაშიძე ამბობს, რომ “ვნახოთ”, ვიზების გაუქმების სანაცვლოდ რამე წინაპირობას კი გამორიცხავს.

“იმაზე საუბარი, რომ ამ თემაზე გადაწყვეტილება მზადდებოდა, ბატონ კარასინსთან გასული წლის ზაფხულში გვქონდა. არანაირი წინაპირობა არ არის. თუკი რამე მინიშნებები იყო დიპლომატიური ურთიერთობის აღდგენაზე, ჩვენი მხრიდან პასუხი იყო და არის შემდეგი: დიპლომატიური ურთიერთობის არქონა სრულიად არ გვიშლიდა ქართულ მხარეს ხელს იმაში, რომ 2011 წელს რუსეთის მოქალაქეებისთვის სავიზო რეჟიმი გაგვეუქმებინა. ამან არც ახლა შეუშალა რუსეთის მხარეს ხელი გამარტივებული სავიზო რეჟიმი შემოეღო და თუკი სურვილი აქვთ, არც საერთოდ გაუქმება შეუშლის ხელს”, – აღნიშნავს აბაშიძე “რეზონანსთან” საუბრისას და დასძენს: “თუკი ვინმე თვლის, რომ მოსკოვის ეს სურვილი ბრიუსელთან კონკურენციითაა გამოწვეული, ასეთი კონკურენციის წინააღმდეგი რატომ უნდა ვიყოთ. თუ ჩვენს მოქალაქეებს ნებისმიერი მიმართულებით თავისუფლად გადაადგილების საშუალება ექნებათ, მით უკეთესი”.

ცნობისათვის: მოსკოვიდან სავიზო რეჟიმის გაუქმებაზე საჯაროდ ოფიციალური განცხადებები გასული წლის დეკემბერში სწორედ იმ დროს დაიწყო, როდესაც ევროკომისიამ საქართველოს ვიზალიბერალიზაციის სამოქმედო გეგმა დადებითად შეაფასა და უვიზო მიმოსვლაზე პოლიტიკური გადაწყვეტილება გამოაცხადა. რუსეთის პრეზიდენტმა ვლადიმირ პუტინმა პრესკონფერენციაზე თქვა, რომ მზად არის გააუქმონ სავიზო რეჟიმი. შემდეგ კი იანვრის ბოლოს რუსეთის საგარეო საქმეთა მინისტრმა სერგეი ლავროვმა გაიმეორა იგივე, ოღონდ ერთი ირიბი მინიშნებაც გააკეთა, მზად ვართ უვიზო რეჟიმზე წამოვიდეთ, თუმცა ამაზე მსჯელობა ცოტა უცნაურია, როცა ქვეყნებს შორის დიპლომატიური ურთიერთობა არ არსებობსო.

საერთაშირისო ურთიერთობათა დოქტორი თორნიკე შარაშენიძის თქმით, რუსეთის მხრიდან სავიზო რეჟიმის გაუქმებაზე საუბარი გააქტიურებულია და ეს გამოწვეულია იმით, რომ ევროპა აუქმებს სავიზო რეჟიმს.

“ევროპის მხრიდან ეს რომ არ მომხდარიყო, მოსკოვი უვიზო მიმოსვლაზე თავს არ შეიწუხებდა. რუსეთს ასეთი მიდგომა აქვს, რაც უფრო ვცემთ, მით უფრო ვუყვარვართ. ამიტომ გვცემდნენ. ამ ცემის მიუხედავად რომ გავიხედეთ ევროპისკენ, იფიქრეს, ამან არ იმუშავა, შეიძლება საბოლოოდ გაიქცნენ იქითკენო და ტაქტიკა შეცვალეს და ახლა სავიზო რეჟიმის გაუქმებაზე დაიწყეს საუბარი”, – ამბობს თორნიკე შარაშენიძე. მისი თქმით, რუსეთი ახლა ვიზების გაუქმების სანაცვლოდ არანაირ წინაპირობას არ წამოაყენებს და დიდი ალბათობით, შემოიღებს კიდეც უვიზო მიმოსვლას.

“ეს არის რუსეთის რბილი ძალის ერთ-ერთი კომპონენტი, თუმცა ნორმალური ადამიანი ევროპაშიც რომ წავა და რუსეთშიც, არ მგონია ევროპის შემდეგ რუსეთი მოეწონოს. ვიზების გაუქმებაში ევროპას მაინც ვერ დაასწრებს იმ მარტივი მიზეზის გამო, რომ ეს საკითხი პუტინისთვის მაინც მე-20 ხარისხოვანია. სანამ საკითხი პუტინამდე მივა და ის გადაწყვეტილებას მიიღებს, შემდეგ ბიუროკრატიულ დონეებს გაივლის, ჩვენ ევროპასთან ვიზალიბერალიზაცია უკვე გვექნება. პირადად მე ვთვლი, რომ რაც უფრო მეტად გაიხსნება საზღვრები, ჩვენთვის უკეთესია. შემდეგ ლეგენდებიც მოისპობა, რომ ევროპა ცუდია და რუსეთი – კარგი. ივლიან რუსეთში და შედარებას გააკეთებენ. ყველამ საკუთარი თვალებით ნახოს ეს განსხვავება, სხვისგან ძალით დარწმუნება რომ არ იყოს საჭირო,” – დასძენს თორნიკე შარაშენიძე.

“ევროპული კვლევების ცენტრის” დირექტორი კახა გოგოლაშვილის თვალსაზრისით, რუსეთი ცდილობს ქართველებს დაანახოს, რომ ევროპის კარის გარდა მათი კარიც ღიაა და საქართველოს მოქალაქეების მიმართ რუსეთი კეთილგანწყობილია.

ისინი ფიქრობენ, რომ რაც უფრო მეტი პერსონალური კავშირები განვითარდება საქართველოსა და რუსეთს შორის, მით მეტი მხარდამჭერი გაუჩნდება საქართველოში რუსეთს, იმისათვის რომ პოლიტიკურადაც მეტი დასაყრდენი ჰქონდეთ.

“რუსეთი ცდილობს მაქსიმალურად მიმზიდველი იყოს და რაც შეიძლება მეტი გავლენა იქონიოს საქართველოზე. უვიზო მიმოსვლა კი არის გავლენის ერთ-ერთი ბერკეტი და შეეცდება ევროკავშირს ამაში არ ჩამორჩეს. სავიზო რეჟიმის გაუქმებას შეიძლება მოჰყვეს მეტი მოქალაქის გადაადგილება რუსეთში სამუშაო მიზნით, მეტი კონტაქტები და რუსეთის მიმართ მეტი პოზიტიური დამოკიდებულების გაჩენა, რაც ძირითადად დასაქმების პერსპექტივას ეხება. პრინციპში, პრორუსული ძალებიდან პოლიტიკური დისკუსი სწორედ ამ მიმართულებითაა განვითარებული, რომ რუსეთთან მეტი კონტაქტი და ურთიერთობა, ეს ჩვენი სოციალურ-ეკონომიკური პრობლემების გადაწყვეტის ერთ-ერთი გზაა. ამაზე საუბრობენ და რუსეთის ეს ნაბიჯი უვიზო მიმოსვლის თაობაზე სწორედ აქითკენ არის მიმართული, რომ ქვეყანაში ეს დისკუსი გაძლიერდეს”, – მიიჩნევს კახა გოგოლაშვილი.

თუმცა იგი იმასაც ამბობს, რომ ამ ეტაპზე მაინც რუსეთთან სავიზო რეჟიმის გაუქმებაზე საუბარი ნაადრევია და საეჭვოა რუსეთმა ამ ეტაპზე მთლიანად მოხსნას სავიზო რეჟიმი. ერთი იმიტომ, რომ დიპლომატიური ურთიერთობის აღსადგენად სავაჭროდ რაღაცას დაიტოვებენ, მეორე საკითხი კი საქართველოში რუსული პასპორტების დარიგებას ეხება.

“რუსული რბილი ძალის პოლიტიკის კომპონენტი არის რუსული პასპორტების დარიგება საქართველოს მოსახლეობაში. ხოლო თუკი რუსეთთან უვიზო მიმოსვლა ბოლომდე გაიხსნება, მაშინ პასპორტიზაციის პოლიტიკის აქტუალობა დაიკარგება. საქართველოს მოქალაქეებს აღარ მოუნდებათ რუსული პასპორტების აღება და სანაცვლოდ ქართულის დაკარგვა და ესეც შეიძლება იყოს შემაკავებელი მთლიანად მოხსნას სავიზო რეჟიმი. ჯავახეთში მოსახლეობის დიდმა ნაწილმა აიღო რუსული პასპორტები, რომ რუსეთში სამუშაოდ წასულიყვნენ. თუკი მოსკოვს საქართველოში რუსეთის ბევრი მოქალაქე ეყოლება, ეს მისთვის წნეხის დამატებითი საფუძველია იმის სათქმელად, რომ ჩემი მოქალაქეების ბედ-იღბლის მიმართ გულგრილი ვერ დავრჩები და როგორც სამხრეთ ოსეთში მოხდა, იმგვარად გაამართლებს საკუთარ ნაბიჯს საქართველოს ნებისმიერ რეგიონში. თანაც, ადამიანი, რომელსაც რუსეთის პასპორტი უდევს ჯიბეში, თავისთავად მეტად კეთილგანწყობილია რუსეთის მიმართ და რუსეთის სახელმწიფოც აცხადებს, ჩემი ვალდებულებაა ეს ადამიანები დავიცვაო”, – აცხადებს კახა გოგოლაშვილი და რუსული პასპორტიზაციის პოლიტიკას ჩვენი უსაფრთხოებისთვის ძალიან დიდ საფრთხედ მიიჩნევს.

„რეზონანსი”, 11 მარტი, 2016 წელი

ინტერვიუ ვანო ჩხიკვაძესთან: „უვიზო რეჟიმი დემოგრაფიული თვალსაზრისით დადებით როლს ითამაშებს“

ელზა პაპოშვილი

ფონდი “ღია საზოგადოება საქართველოს” ევროინტეგრაციის მიმართულების მენეჯერი ვანო ჩხიკვაძე არ ეთანხმება იმ მოსაზრებას, რომ ჩვენს ქვეყანას შენგენის ზონის გახსნით დემოგრაფიული პრობლემები შეექმნება. იგი ფიქრობს, რომ ემიგრანტები, რომლებიც ევროპაში ცხოვრობენ და სამშობლოში დაბრუნებას ვერ ახერხებდნენ, ახლა ამ კანონის ამოქმედების შემდეგ საქართველოში მოგზაურობას შეძლებენ.

- ვიზალიბერალიზაციის ამოქმედების შემდეგ, საქართველო ევროპისგან რა კოკნრეტულ სიკეთეს ელის?

- საქართველოს ნებიმიერ მოქალაქე, რომელსაც ბიომეტრული პასპორტი ექნება, ვიზის გარეშე ევროკავშირში გამგზავრებას შეძლებს. აქედან გამომდინარე, ჩვენი მოქალაქეები პირადად თავის თავზე იგრძნობენ იმ სიკეთეს, რასაც შენგენის ქაღალდის ზონის დანგრევა ჰქვია.

- შენგენის ზონის გახსნა საქართველოს ეკონომიკური თვალსაზრისით როგორ წაადგება?

- ეკონომიკური თვალსაზრისით რამის თქმა გამიჭირდება, რადგანაც ამაზე რამე სახის კვლევა არ ჩატარებულა. თუმცა ფაქტი ერთია, რომ როდესაც ევროკავშირთან თავისუფალი ვაჭრობა გვაქვს და ჩვენი საქონლის გატანა შეზღუდვების გარეშე შეგვიძლია, ქვეყნისთვის ესეც უკვე სარგებლის მომტანია. საქართველოს ბიზნესმენების ევროპაში გაშვება უვიზოდ შეეძლება, რომლებიც ყველანაირი პრობლემის გარეშე, ბიზნესკონტაქტს დაამყარებენ და თავის პროდუქციას დამატებითი ბარიერების გარეშე ევროკავშირის ქვეყნებში გაიტანენ.

- როგორ ფიქრობთ, თავად ევროკავშირს რა ინტერესი აქვს, როდესაც ქვეყანას უვიზო რეჟიმს აძლევს. ბევრი ფიქრობს, რომ ამის ერთ-ერთი მიზეზი რუსეთის ფაქტორია?

- ვფიქრობ, რომ აქ რუსეთის ფაქტორი არაფერ შუაშია. ევროპას არაერთხელ გაუჟღერებია, რომ ამ ქვეყანას არაფერში ეჯიბრება. უბრალოდ საქართველო ევროპაში ინტეგრაციის ერთ-ერთ საფეხურზე იმყოფება და ვიზალიბერალიზაცია მათი მხრიდან პირველი გამოხმაურებაა, რაც ქვეყნის ევროპასთან ურთიერთობას და თანამშრომლობას გაამარტივებს.

- უვიზო რეჟიმი საქართველოდან ევროპაში უფრო მეტი ემიგრანტის გადინებას ხომ არ გამოიწვევს?

- ვფიქრობ, რომ ვიზალიბერალიზაცია ჩვენს თანამოქალაქეებს საშუალებას მისცემს ევროპაში წავიდნენ, თუმცა იქ აღარ დარჩნენ. იქიდან გამომდინარე, რომ ადამიანს თუ დადებითი ისტორია ექნება, და მას აღარ დაარღვევს, ყოველთვის მიეცემა შანსი, რომ უკან, სამშობლოში დაბრუნდეს. შესაბამისად ჩვენს თანამოქალაქეებს უფრო მეტი მოტივაცია აქვთ, რომ წესებს დაემორჩილონ. ადრე იცოდნენ, რომ ევროპაში ყოფნის ერთი შანსი ჰქონდათ და ის აუცილებლად უნდა გამოეყენებინათ. ამიტომაც იყო, რომ ევროპაში ჩასვლის შემდეგ არალეგალურად რჩებოდნენ.

- ბევრი ადამიანი ფიქრობს, რომ ვიზალიბერალიზიაცია ქვეყანაში დემოგრაფიულ პრობლემებს გამოიწვევს. მოხდება ახალგაზრდა და ინტელექტუალური ადამიანების ევროპაში გადინება…

- კველევის თავსაზრისით არ არსებობს არანაირი დასკვნა, რომ ვიზალიბერალიზაცია ჩვენი ქვეყნისთვის დემოგრაფიული თვალსაზრისით პრობლემებს მოიტანს. პირიქით, ვფიქრობ, რომ ამ მიმართულებით უფრო დადებითი როლს ითამაშებს, რადგანაც ძალიან ბევრი ადამიანი, რომელიც ევროპის შიგნით იმყოფება და ვერ ჩამოდის, ახლა სამშობლოში უპრობლემოდ იმოგზაურებს. ცალსახად საუბარი იმაზე, რომ ეს საქართველოში დემოგრაფიულ შოკს გამოიწვევს, ამის თქმა სწორი არ იქნება.

- როგორ ფიქრობთ, ვიაზალიბერალიზაციასთან დაკავშირებული პროცესები ევროკავშირში შესვლის ერთ-ერთი წინაპირობაა?

- ეს ორი საკითხი, სრულიად ცალ-ცალკე მიმავალი პროცესია. დღეს ჩვენ ნამდვილად არ ვიმყოფებით იმ ეტაპზე, რომ ევროკავშირმა ახლო მომავალში საქართველო მის შემადგენლობაში შემსვლელ ქვეყნად განიხილოს. აქედან გამომდინარე, ეს ორი საკითხი ერთმანეთისგან სრულიად გამიჯნულია.

- ევროპაში მცხოვრებ ემიგრანტებს, ვიზალიბერალიზაციის კანონის ამოქმედების შემდეგ რა პრობლემები შეიძლება შეექმნათ და როგორ უნდა მოიქცნენ შესაძლო გართულებების ასარიდებლად?

- ვფიქრობ, რომ მათ სხვა არაფერი პრობლემები არ შეექმნებათ. არის ევროპული ქვეყნები, რომლებიც ე.წ. ამინისტიას აცხადებს და საქართველოს მოქალაქეებს თავიანთი იქ ყოფნის დაკანონება, ანუ რეგალიზაცია შეუძლიათ. სხვა რამე განსაკუთრებული სახის პრობლემები მათ არ შეექმნებათ.

„ალია“, 11 მარტი, 2016 წელი

ინტერვიუ სოსო ცინცაძესთან: სინამდვილეში რას მიიღებს მოსახლეობა ვიზალიბერალიზაციით? რა ელით ევროპაში მყოფ ქართველ არალეგალებს?

ნინო ლაბარტყავა

(შემოკლებით)

„ალიას“ პოლიტოლოგი სოსო ცინცაძე ესაუბრა:

- ვიზალიბერალიზაციაზე არაერთხელ გვისაუბრია. გვპირდებიან, ზაფხულში უვიზოდ ივლითო. ხომ არ შეიცვლება რამე?

- ევროკავშირი კონსერვატიული ორგანიზაციაა, ის არ ცვლის ყოველთვე თავის მიდგომებს, მაგრამ აქ მთავარი რა არის: ჩვენთან საზოგადოება ეიფორიამ მოიცვა. ქსენია დიასახლისმა იფიქრა, ვაიმე, გავკეთდი, ჩავალ ევროპაში, სამსახური მექნება, აღარ დამჭირდება ვიღაცისთვის ქრთამის მიცემაო, მაგრამ უკვე გაირკვა, რომ, პრაქტიკულად, ეს ვიზალიბერალიზაცია ქართველ მოქალაქეს გაცილებით ნაკლებ უფლებებს აძლევს, ვიდრე სირიიდან და ერაყიდან ჩასულ ლტოლვილს: ჯერ ერთი, თქვენ იგივე საბუთები გჭირდებათ აქ, რაც ვიზის აღების დროს გჭირდებოდათ, ერთადერთი, რასაც გადაურჩებით, რიგში დგომაა. ამასთანავე, მესაზღვრე ოფიცერს სრული უფლება აქვს, თავის შეხედულებებისამებრ გადაწყვიტოს ვიზის მოცემაარმოცემის საკითხი. მაგალითად, შემოგხედათ და თქვენი ვარცხნილობა არ მოეწონა, აქვს უფლება, მოგთხოვოთ ყველა ის საბუთი, რაც თქვენ აქ, თბილისში, საელჩოში უნდა წარგედგინათ და ყოველგვარი ახსნა-განმარტების გარეშე გამოგაბრუნებთ უკან, დაკარგავთ ბილეთის ფულს, საგზურს და მორჩა. თუ დაარღვიეთ, ხომ მთლად უარესი – 5 წელი ფეხი უნდა ამოიკვეთოთ იქიდან. უვიზო მიმოსვლასთან ამ ყველაფერს ისეთივე კავშირი აქვს, როგორც ჩვენს მინისტრებს თავიანთი ცოდნა-განათლებით ევროპელ მინისტრებთან.

პირდაპირ ვთქვათ: ეს ყველაფერი არის მხოლოდ მდიდრებისთვის, ვინც იქ სასეირნოდ მიდის, ორივე ჯიბე ევროებით აქვს გატენილი, ხოლო იმ რიგით მოქალაქეებს, ვინც დღეს ლოზუნგებით გამოდის ამ ყველაფრის მხარდასაჭერად და უხარიათ, არ აქვთ არც სწავლის, არც სამსახურის უფლება, მკურნალობისთვისაც კი არავითარი დიდი შეღავათები ამ მხრივ არ კეთდება.

- როგორც მახსოვს, ჩვენს ხელისუფლებას უვიზო მიმოსვლის ამოქმედებისთანავე ევროპის ქვეყნებიდან ჩვენი არალეგალების საქართველოში ჩამოყვანა დაევალა. ეს როგორ უნდა გაკეთდეს?

- მე ერთი რამე ვიცი: რამდენიმე ათასი, შეიძლება ათეული ათასი ადამიანი 90-იან წლებში არის წასული ლტოლვილის ყალბი საბუთებით. გასულ წელს გამოცხადდა – თუ ყველა ის ადამიანი, ვინც ყალბი საბუთით არის წასული, 1-ელ იანვრამდე თავისით დაბრუნდებოდა აქ, მათ მიმართ სისხლის სამართლის საქმე არ აღიძვრებოდა, ოღონდ ისევ უკან ვეღარ წავიდოდნენ. არც ერთი არ ჩამოსულა და მათ მიმართ უკვე სისხლის სამართლის საქმეა აღძრული. ჩვენი ხელისუფლებაც ცოტა ეშმაკობს: ვის აწყობს რამდენიმე ათასი იქიდან ძალად გამოყრილი ადამიანი? არადა, ეს ვალდებულება გვაქვს, უკანონო მიგრანტები, რომლებიც გამოვლინდებიან და ვისი იდენტიფიცირებაც მოხდება, შენ თვითონ უნდა წამოიყვანო. კიდევ არის ბევრი სხვა ვალდებულება, რომელთა ნაწილიც ჯერჯერობით არ ხმოვანდება და მათ შორის ყველაზე სერიოზული არის, რასაც უარყოფენ, მაგრამ თანდართულ დოკუმენტებში ზოგან სქოლიოს სახით, მიჩუმათებულად წერია – სექსუალურ უმცირესობათა უფლებების დაცვა. შემთხვევით კი არ იყო ერთსქესიანთა ქორწინების თემა შემოგდებული? (…)

„ახალი თაობა“, 11 მარტი, 2016 წელი

ინტერვიუ ვიქტორ დოლიძესთან: „საბჭოურიდან ევროპულისკენ ტრანსფორმირება უნდა მოხდეს“

თავისუფალი დემოკრატების ერთ-ერთი ლიდერი, პარლამენტის წევრი ვიქტორ დოლიძე „ახალ თაობასთან“ ინტერვიუში აცხადებს, რომ საქართველოს იმ ქვეყნების სიაში გადასვლა, რომელთა მოქალაქეებსაც ევროკავშირის წევრი ქვეყნების ტერიტორიაზე ვიზიტისთვის ვიზა არ სჭირდებათ, ნამდვილად არის ჩვენი ქვეყნის გამარჯვება.

- ბატონო ვიქტორ, პროცედურულად რა ეტაპი რჩება, რომ საქართველოს მოქალაქეებმა შეძლონ ევროკავშირის ქვეყნებში რეალურად უვიზოდ გადაადგილება?

- ევროპარლამენტსა და ევროსაბჭოში შესაბამისმა კომიტეტებმა უნდა მიიღონ შესაბამისი გადაწყვეტილება. შემდეგ ევროპარლამენტი სხდომაზე განიხილავს აღნიშნულ საკითხს და ევროპარლამენტის პრეზიდენტი და ევროკავშირის საბჭოს თავმჯდომარე ხელს მოაწერენ დოკუმენტს. ამ შემთხვევაში ხელს მოაწერს ნიდერლანდების სამეფოს საგარეო საქმეთა მინისტრი. მერე ეს ხელმოწერილი დოკუმენტი იქაურ საკანონმდებლო მაცნეში უნდა გამოქვეყნდეს. გამოქვეყნებიდან 20 დღის ვადაში შედის ძალაში. ეს არის ის პროცედურა, რომელიც გასავლელი დარჩა. გარდა ამ ტექნიკური ნიუანსებისა, მთელ ამ პროცესს მნიშვნელოვანი პოლიტიკური დატვირთვა აქვს.

- სწორედ პოლიტიკური მხარეა საინტერესო. ჩვენი ჩრდილოელი მეზობლის გათვალისწინებით, ზოგადად რეგიონში და ქვეყნის შიგნით რა პოლიტიკური დატვირთვა აქვს მთელ ამ პროცესს?

- ეს მნიშვნელოვანი საკითხია როგორც რეგიონში, ასევე ჩვენი მეზობელი რუსეთის მიმართულებით. ეს იყო ორმხრივი პასუხისმგებლობა. პასუხისმგებლობა ავიღეთ ჩვენ, რომ ამ დავალებას შევასრულებდით და პასუხისმგებლობა აიღო ევროკავშირმაც, რომ, თუ ყველაფერს ზედმიწევნით კარგად შევასრულებდით, ის ამას დაგვიფასებდა და ასეც მოხდა. ეს კარგია საგარეო მიმართულებითაც, სხვებისთვისაც გახდება ეს კარგი სიგნალი, რომ, თუ ისინი მოინდომებენ, მათ ეს დაუფასდებათ. ასევე ყველასთვის ნათელი გახდება, რომ ჩვენი მისწრაფებები ევროკავშირის მისწრაფებებს ემთხვევა და რომ უფრო მეტი ინტეგრაციაა ჩვენი მიზანი. პოლიტიკური ასოცირება, ეკონომიკური ინტეგრაცია გარდაუვალია. ეს არის ჩვენი მოქალაქეებისთვის პოზიტიური სიგნალი, მიუხედავად რუსული პროპაგანდისა, მიუხედავად სხვადასხვა ინსინუაციებისა, ევროკავშირის მხრიდან ადეკვატური პასუხი ამ პროცესისთვის სასარგებლოა, რათა სკეპტიკოსებს არ დარჩეთ სათქმელი. ასევე მნიშვნელოვანი იქნება ეს საკითხი ჩვენს ოკუპირებულ რეგიონებში მცხოვრები ხალხისთვის. მათ შეუძლიათ, საქართველოს მოქალაქის ბიომეტრიული პასპორტები აიღონ და ევროკავშირის ქვეყნებში უვიზოდ იარონ.

- როდის ამოქმედდება ეს რეგულაციები? ევროინტეგრაციის მინისტრი ვადებს არ აკონკრეტებს...

- მე ივნისისთვის მოველი, შეიძლება უფრო ადრეც, მაქსიმუმ, ივლისში ამოქმედდეს, მაგრამ მე მაინც ივნისი მგონია.

- ეს ხომ არ გამოიწვევს ადამიანების ქვეყნიდან გადინებას?

- არა, არავითარ შემთხვევაში. ვიღაცამ რაღაცა შეიძლება მოინდომოს, მაგრამ ყველაფერს თავისთავად პროცესი დაარეგულირებს. ეს პროცესი მნიშვნელოვნად ზრდის საქართველოს შანსებს, რომ სრულფასოვნად გადადგას ნაბიჯები ევროკავშირში ინტეგრაციის მიმართულებით. ამავე დროს, ეს არის ჩვენი ქვეყნისთვის პასუხისმგებლობაც, რომ გავატაროთ რეფორმები, რაც უნდა იყოს ეფექტური, დროული და მიზანმიმართული.

- კონკრეტულად რა მიმართულებით არის სამუშაო გასაწევი? ალბათ, საკანონმდებლო დონეზე, რათა ევროპულ სტანდარტებს დავუახლოვდეთ. კიდევ რა მიმართულებით არის ცვლილებები საჭირო?

- არა მხოლოდ საკანონმდებლო დონეზე. კანონმდებლობა არის ერთ-ერთი მთავარი შემადგენელი და ის ჰარმონიაში უნდა იყოს ევროკავშირის კანონმდებლობასთან, რომელიც დინამიკურია და ხშირად იცვლება, მაგრამ, მთავარი ის კი არ არის, რა წერია ფურცელზე, მთავარია, ფურცელზე დაწერილი ცხოვრებაში როგორ სრულდება. საჭიროა სექტორალური რეფორმების გატარება. მე ამას დავარქმევდი საბჭოურიდან ევროპული მიმართულებით ტრანსფორმირებას. თუ ამას დროულად და ეფექტურად შევძლებთ, ეს ძალიან მნიშვნელოვანი იქნება.

„ახალი თაობა“, 11 მარტი, 2016 წელი

ინტერვიუ არჩილ გამზარდიასთან: „კოალიცია უნდა დაიშალოს და პარტია „ქართული ოცნება“ არჩევნებზე ცალკე გავიდეს“

როდის გავლენ „რესპუბლიკელები“ კოალიცია „ქართული ოცნებიდან“ – არჩევნებამდე თუ არჩევნების შემდეგ? აქვს თუ არა რესპუბლიკურ პარტიას „ქართული ოცნების“ გარეშე ხელისუფლებაში მოხვედრის შანსი? ამ და სხვა საკითხებზე „ახალ თაობას“ ანალიტიკოსი არჩილ გამზარდია ესაუბრა.

- ბატონო არჩილ, რესპუბლიკელები კოალიცია “ქართული ოცნებიდან“ გადიან?

- ამ წუთისთვის ეს საკითხი არ დგას. ლაპარაკია იმაზე, რომ რესპუბლიკელები გადადიან სტრატეგიულ პარტნიორობაზე პარტია „ქართულ ოცნებასთან“ კოალიციის ფარგლებში, რაც გულისხმობს უფლება-ვალდებულებების განსაზღვრას.

- უსუფაშვილის განცხადებებს თუ გავშიფრავთ, დიდი შანსია, რესპუბლიკურმა პარტიამ არჩევნების წინ თუ არა, არჩევნების შემდეგ მაინც დატოვოს კოალიცია…

- რესპუბლიკური პარტია ჯერჯერობით მზად არ არის, რომ მარტო წარმატებულად გავიდეს არჩევნებზე. შესაბამისად, მას აუცილებლად სჭირდება მოკავშირე. ასეთი მოკავშირე შეიძლება იყოს ორი სუბიექტი – ნაცმოძრაობა ან „ქართული ოცნება“. რესპუბლიკელებმა ნაცმოძრაობასთან კოალიცია რომ შეკრან და მასთან ერთად ორგანულად შეძლონ არჩევნებზე გასვლა, ამისთვის დრო ცოტაა. რესპუბლიკური პარტიის ინტერესი შეიძლება იყოს მხოლოდ „ქართულ ოცნებასთან“ კოალიციაში ყოფნა. დიდი ალბათობით, თუკი არჩევნებში ერთად გავლენ, „ქართული ოცნება“ შემდეგ შეიძლება დაიშალოს, თუმცა დღეს ამის პროგნოზირება ძნელია.

- რესპუბლიკელების გასვლით მმართველი კოალიცია დაიშლება?

- რესპუბლიკელების გასვლით კოალიცია არ დაიშლება, მაგრამ იმ პარტიებს შორის, რომლებიც ხელისუფლებაში თანამონაწილეობენ, რესპუბლიკელებს მნიშვნელოვანი რგოლი აქვთ.

- ეს, ალბათ, იქიდან გამომდინარეობს, რომ მათ დიდი პრეტენზიები აქვთ.

- პრეტენზიები აქვთ, მაგრამ, გარკვეულწილად, ნორმალური პროცესია. ისინი ცდილობენ, მთელი ძალისხმევა იქით მიმართონ, რომ ხელისუფლებაში გავლენა მოიპოვონ. შიდა კონკურენცია ნორმალურია.

- თავისუფალ დემოკრატებთან კოალიციაში რესპუბლიკელები ერთად ვერ გამოვლენ?

- თავისუფალ დემოკრატებთან გაერთიანება რესპუბლიკელებს დღეს განსაკუთრებულ პერსპექტივას არ მისცემს.

- თქვენი შთაბეჭდილებით, რა შედეგით გამოვიდნენ რესპუბლიკელები პრემიერთან შეხვედრიდან?

- რატომღაც საზოგადოებამ ისე აღიქვა, რომ პრემიერი მხოლოდ რესპუბლიკელების მისამართით გამოვიდა კრიტიკით. ასე არ არის. პრემიერმა გააკრიტიკა როგორც მრეწველები, ისე რესპუბლიკელები. სავსებით ნორმალური პროცესია. რესპუბლიკელებმა მეტი სიცხადე მოინდომეს.

- სიცხადის შეტანა უნდოდათ თუ იუკადრისეს, როგორ თუ პრემიერმა გაგვაკრიტიკაო. პრემიერი ხომ თავდაცვის მინისტრის გათავისუფლებით იმუქრებოდა?

- პრემიერი არის უდიდესი ძალაუფლების მფლობელი, იმაზე დიდი ძალაუფლების, ვიდრე წინა ხელისუფლებაში პრეზიდენტი იყო.

- ზოგმა ისე გაიგო, რომ რესპუბლიკელები უფრო გაძლიერებულები გამოვიდენ პრემიერთან შეხვედრიდან...

- მე მგონია, რომ რესპუბლიკელები პრემიერთან შეხვედრიდან არც უფრო გაძლიერებულები გამოვიდნენ და არც უფრო დასუსტებულები. პრემიერმა მათ მისცა საჯარო შენიშვნა. მათ მიიღეს ინფორმაცია და პრემიერთან გარკვეულ ქმედებათა პრინციპზე შეთანხმდებოდნენ. ამიტომაც გარკვეულ სტრატეგიულ თანამშრომლობაზე გაკეთდა განცხადებები. ეს ორი პარტიის თანამშრომლობას არ ნიშნავს. ეს ერთი შეხედვით უცნაურია, რადგან კოალიციაში სხვა პარტიებიც შედიან, მაგრამ ამ შეხვედრამ მეტი ნათელი მოჰფინა საკითხს.

- რამდენად საჭირო იყო საკონსტიტუციო ცვლილებასთან დაკავშირებით რესპუბლიკელების განცხადება, რომელიც შეეხებოდა ოჯახის ინსტიტუტს?

- ე.წ. ერთსქესიანთა ქორწინების საკითხი ჩვენთან ხელოვნურად არის წამოწეული. რესპუბლიკელებს არ უთქვამთ, პრემიერის იდეას იზიარებენ თუ არა. მათ მხოლოდ ის თქვეს, დამატებითი ფორმულირება საჭირო არ არის, იმიტომ, რომ კონსტიტუციაში შემავალი დანარჩენი ცნებები ისედაც ცხადყოფს, ოჯახი არის ქალისა და მამაკაცის ერთობა.

- იყო თუ არა ამის თაობაზე განცხადება კოალიციაში შემავალი პარტიის ლიდერების მხრიდან?

- როდესაც კოალიციაში შედის რამდენიმე პარტია, ერთი ტიპი სამოქმედო სივრცისა და განცხადებებისა არის მმართველი ძალის ფარგლებში, მეორეა ცალკე პარტიის ხედვები. არ არსებობს ვალდებულება, რომ ცალკე დაზუსტება მომხდარიყო. ამიტომაც განცხადება გააკეთა პარტიის გარკვეულმა ნაწილმა და არა _ მმართველ ძალაში მყოფმა პირებმა. ამაში ურთიერთგამომრიცხავი არაფერია.

- განცხადება უსუფაშვილმა გააკეთა. თქვენ ვის გულისხმობთ მმართველ ძალაში არმყოფ პირებში?

- განცხადებების ნაწილს ხომ აკეთებს პარტიის თავმჯდომარე სამნიძე. უსუფაშვილმა გააკეთა განცხადება, როგორც ერთ-ერთმა უმაღლესი თანამდებობის პირმა.

- ანუ რესპუბლიკური პარტია კოალიციურ თამაშში კი არ მონაწილეობს, არამედ უკვე საკუთარ თამაშს თამაშობს?

- რესპუბლიკური პარტია ყოველთვის საკუთარ თამაშს თამაშობდა, მიუხედავად იმისა, ის მარტო იყო თუ სხვადასხვა ძალასთან ერთად, იმავე კოალიცია „ქართულ ოცნებასთან“.

- ავნებს თუ არა რესპუბლიკური პარტიის ასეთი პოზიციები კოალიციასა და ხელისუფლებას?

- კოალიციაში შემავალი სუბიექტების ნებისმიერი განცხადება, რომელიც მმართველი ძალის პოზიციისგან ძალიან განსხვავებულია, უხერხულობებს ქმნის. ყველაზე გონივრული იქნებოდა, კოალიცია დაშლილიყო და „ქართული ოცნება“ პარტიის სახით გასულიყო არჩევნებზე. ეს ბევრად მეტ დადებით შედეგს მოიტანდა.

- თქვენ რესპუბლიკელებს არასანდო პარტნიორებს უწოდებთ. რატომ?

- რესპუბლიკურ პარტიას ბევრი დადებითი მხარე აქვს, მაგრამ ისინი პოლიტიკურ თანამებრძოლებში ვერ ქმნიან ერთგული თანამებრძოლების შთაბეჭდილებას, იმიტომ, რომ ზედმეტად არიან მოტივირებულნი თვითდაზღვევაზე, ყოველთვის იტოვებენ გზას, რომ შემდეგ მშვიდად დაუპირისპირდნენ მას, ვისთანაც პარტნიორულ ურთიერთობაში არიან. ეს კი მათ სანდოობას ცოტა ამცირებს.

„ალია“, 11 მარტი, 2016 წელი

ინტერვიუ კახა კუკავასთან: „იგეგმება, როგორ უნდა გამოაჩინონ ივანიშვილი არჩევნების წინ“

ნინო სამხარაძე

„ქართულმა ოცნებამ“ ხელისუფლებაში მოსვლის დღიდან გადაყლაპა არასაპარლამენტო ოპოზიცია და დღეს, დომინანტი მხოლოდ „ქართული ოცნებაა“, რომელმაც ხალხს თავი მოაბეზრს. არავინ არ ფიქრობს ხელისუფლებაში რიგითი მოქალაქეების პრობლემებზე, უმრავლესობიდან ვერავისგან მოისმენ ხალხის გასაჭირზე საუბარს. მმართველმა გუნდმა ახლა მოინდომა ყველა სოციალური და ეკონომიკური საკითხის გადაფარვა, საკონსტიტუციო ცვლილებით – ოჯახი არის ქალის და მამაკაცის ერთობა და ამ ქვეყანაში ერთსქესიანთა ქორწინება არ დაკანონდება (კიდევ კარგი). ესეც გათვლილია ტრადიციული ქართველი ამომრჩევლის ემოციაზე, თუმცა ამ ბატონებმა ისიც უნდა იცოდნენ, რომ რეგიონებში მოსახლეობა ისეთ მძიმე და გაუსაძლის მდგომარეობაშია, მათ სულ არ აინტერესებთ, თბილისში რომელი კაცი რომელ მამრს დააორსულებს, ნარგიზა ნაირას მოიყვანს ცოლად, თუ სხვას.

პოლიტიკურად ყველაზე მძიმე მდგომარეობაში დღეს ის არასაპარლამენტო ოპოზიციაა, რომელიც წლების, გამოცდილების, კისრისტეხის მიუხედავად, მაინც ვერ ახერხებს ერთ პოლიტიკურ ბლოკში გაერთიანებას და ერთიანი სიით არჩევნებზე გასვლას.

„თავისუფალი საქართველოს“ ლიდერი კახა კუკავა გამოდის ინიციატივით და არასაპარლამენტო ოპოზიციას მოუწოდებს, საარჩევნო ბლოკად ჩამოყალიბდეს, სხვა შემთხვევაში, თითოეული მათგანი დამარცხდება ხელისუფლებასთან ბრძოლაში.

„ალიას“ კახა კუკავა ესაუბრა:

- გაერთიანება ერთადერთი სწორი იდეაა არჩევნების წინ, თუმცა ბევრი საუბრობს გაერთიანებაზე და რეალურად, ამ ერთობისთვის ისინი მზად არ არიან. როგორც ვიცი, ნინო ბურჯანაძემ გამორიცხა ყველანაირი ტიპის ერთობა, ისევე, როგორც ირაკლი ალასანიამ განაცხადა, რომ არ აპირებს საარჩევნო ბლოკის შეკვრას რომელიმე პოლიტიკურ სუბიექტთან. რაც შეეხება „პატრიოტთა ალიანსს“, მათ ჯერჯერობით ამ საკითხზე ზოგადი განაცხადი გააკეთეს, ხოლო ჩვენ, „თავისუფალი საქართველო“, ოფიციალურად ვაცხადებთ, მზად ვართ, შევკრათ საარჩევნო ბლოკი ნებისმიერ ძირითად ოპოზიციურ პარტიასთან და მოვილაპარაკოთ როგორც ერთიან პარტიულ სიაზე, ასევე მაჟორიტარ კანდიდატებზე.

- რომელიმე პარტიისგან მიიღეთ თანხმობა?

- ჯერჯერობით კონკრეტული თანხმობა არც ერთი პოლიტიკური პარტიისგან არ მიგვიღია, ზოგიერთი ყოყმანობს, ელოდება რაღაც დეტალების გარკვევას. დაბეჯითებით შემიძლია გითხრათ, რომ „თავისუფალი საქართველოს“ გარდა, ამ ეტაპზე რომელიმე სხვა პოლიტიკური ძალა ერთიანობისთვის მზად არ არის. საარჩევნო ბლოკი რომ შედგეს, მინიმუმ ორი სუბიექტის თანხმობაა საჭირო, ველოდები, ვინ მიიღებს ჩვენს წინადადებას.

- „პატრიოტთა ალიანსის“ გარშემო რომ გაერთიანდეთ და თქვენ არ იყოთ ინიციატორი საარჩევნო ბლოკის, არ წახვალთ ამ შემოთავაზებაზე?

- რატომაც არ წავალ, მაგრამ მათ ზოგადი მიმართვა გააკეთეს. მე არა მაქვს პრეტენზია, ვიყო დომინანტი ამ საკითხში, და თუკი დიდ ოპოზიციურ გაერთიანებაზე იქნება საუბარი, იქ ვერც ერთი პარტია დომინანტი ვერ იქნება, რადგან მხოლოდ რამდენიმე პარტიაა, რომელსაც თანაბარი რეიტინგი აქვს. ირაკლი ალასანია რომ არ გაერთიანდება ნინო ბურჯანაძესთან და პირიქით, ეს ფაქტია, იგივე შეიძლება ითქვას „ლეიბორისტებზე“. თუ ჩვენ ვსაუბრობთ, რომ ერთიანი სიით დავუპირისპირდეთ „ოცნებას“, მაშინ უნდა გვესმოდეს, რომ ეს უნდა იყოს მეტნაკლებად პარიტეტზე დაფუძნებული საარჩევნო ბლოკი. არ არის გამოკვეთილი ჩვენში ქარიზმატული ლიდერი, როგორიც იყო – ზვიად გამსახურდია, მიხეილ სააკაშვილი და ბიძინა ივანიშვილი, ოპოზიციას რომ ჰყავდეს ივანიშვილის მსგავსი ლიდერი, დამიჯერეთ, ამდენი ხვეწნა-მუდარა აღარ იქნებოდა საჭირო ერთიან საარჩევნო ბლოკზე, თავისთავად მოხდებოდა გაერთიანება.

როცა ივანიშვილი გამოვიდა პოლიტიკურ ასპარეზზე, იგი კარს არავის უმტვრევდა, პირიქით, ივანიშვილის კართან იდგა რიგები, ოღონდაც მის კოალიციაში აღმოჩენილიყვნენ და რადგან ასეთი ტიპის ლიდერი ჩვენ არ გვყავს, ამიტომ უნდა წავიდეთ მეორე გზით.

- პოლიტიკურმა წარსულმა დაამტკიცა, რომ პოლიტიკურ ლიდერებს ამბიციები ტვინში ურტყამთ და ისინი ხშირად რეალობას აცდენილები არიან. შესაბამისად, პარიტეტული გაერთიანება როგორ წარმოგიდგენიათ?

- გეთანხმებით, რომ პოლიტიკოსებში ამბიციები სჭარბობს, რის გამოც ისინი რეალობისგან შორს არიან და პოლიტიკურ სვლებში აგებენ. არ დაგიმალავთ და ინტენსიური მოლაპარაკებები მაქვს პარტიებთან, ვისთან ჯერ ვერ დავაკონკრეტებ და მარტის ბოლოს ეს საკითხი კონკრეტულ სახეს მიიღებს. პარტიებმა უნდა იცოდნენ, რომ დღეს საზოგადოებაში არის მოთხოვნილება ნამდვილ ოპოზიციურ გაერთიანებაზე. ყველაფერი უკან დაგვრჩება, თუ საარჩევნო ბლოკი არ შეიქმნა, რადგან „ქართულ ოცნებას“ დღეს აქვს დიდი უპირატესობა ნებისმიერ პარტიასთან შედარებით, ეს რეალობაა. თუ არ მოხდება ოპოზიციური გაერთიანება, მერწმუნეთ, რომ ამ ბრძოლაში ხელისუფლება დიდი უპირატესობით გაიმარჯვებს. დღეს საკითხი ასე დგას, რა გვირჩევნია, ცალ-ცალკე დავრჩეთ და წავაგოთ არჩევნები, თუ ერთად დავდგეთ და დავამარცხოთ ხელისუფლება.

- როგორ აფასებთ კოალიცია „ქართულ ოცნებაში“ დაპირისპირებას? ფაქტობრივად, ხელოვნურ სუნთქვაზეა „ქართული ოცნების“ ხელისუფლება და არის ინფორმაცია, რომ არჩევნების წინ საბოლოოდ გაფორმდებამათი დაშლა და ცალ-ცალკე გავლენ არჩევნებზე. შესაძლოა, ეს „რესპუბლიკელების“ შესაშინებელი ინფორმაციაც იყოს, რომ მადა შეიმცირონ. თქვენ რა ინფორმაცია გაქვთ?

- მე ვფიქრობ, რომ იქ მიმდინარეობს კვოტებით ვაჭრობა. „რესპუბლიკელები“, როგორც ჩემთვის ცნობილია, მანდატების 25%-ს ითხოვდნენ, რაზეც მიიღეს უარი და ამან გამოიწვია კონფლიქტი. რაც შეეხება სხვა თემებს, ეს არის საზოგადოებისთვის შეჩეჩებული ტყუილი, რეალურად, მერწმუნეთ, რომ ისინი ძალაუფლებისთვის იბრძვიან. კოალიცია რეალურად დაშლილია, დიახ, ხელოვნურ სუნთქვაზეა გადაყვანილი. ყველანაირად ცდილობენ, მოჩვენებითი ერთიანობა შეინარჩუნონ, ეს ყველაფერი მაგონებს იმას, როცა ალიევი გარდაიცვალა, ორი კვირა მაცივარში ინახავდნენ, რადგან მისი შვილი უნდა დაენიშნათ და ალიევის გარდაცვალების შესახებ ინფორმაციის გამოცხადება არ შეიძლებოდა, რომ სიტუაცია არ არეულიყო და ვიღაცას არ ესარგებლა. დღესაც ასეთი მდგომარეობაა, კოალიცია „ქართული ოცნება“ მკვდარია და მაცივარში ინახავენ არჩევნებამდე, რადგან ამით სხვებმა არ ისარგებლონ. ხომ ხედავთ, ბიძინა ივანიშვილი არ აკეთებს განცხადებებს მიმდინარე საკითხებზე. იცით, რატომ? მათ დაქირავებული ჰყავთ სხვადასხვა პიარკომპანიები, მათ შორის უცხოური და მათი ინსტრუქციით მოქმედებენ. იგეგმება, როგორ უნდა გამოაჩინონ ივანიშვილი არჩევნების წინ.

ეს არ იქნება ადვილი საქმე, რადგან მისი დაპირებების უმრავლესობა არ შესრულებულა, მან მოატყუა საქართველოს მოსახლეობა, ამიტომაც პიარტექნოლოგები გეგმავენ, როგორ შეიძლება მისი პოზიტიურად წარმოჩენა. მას შემდეგ, როცა გაირკვა, რომ ივანიშვილი არ აპირებს თავისი ფულის დახარჯვას სოციალური ვალდებულებების შესრულებაზე, ეკონომიკაზე, როგორ უნდა დაუმტკიცონ ამომრჩევლებს, რატომ მოატყუა ივანიშვილმა ხალხი და შავზე როგორ თქვან, რომ თეთრია.

- მოხდება თუ არა არჩევნების წინ „სისხლის გადასხმა“ და მინისტრთა კაბინეტის ცვლა, პრემიერმა გუბერნატორებით დაიწყო და როგორ ფიქრობთ, ამ საკადრო რეფორმაში მინისტრებიც მოყვებიან?

- დიდი მნიშვნელობა არა აქვს, შეიცვლებიან თუ არა მინისტრები, რადგან მათი პოლიტიკა არ იცვლება, გადაჭარბებული მოლოდინი იყო პრემიერმინისტრ კვირიკაშვილის მიმართ, აშკარაა, რომ პრემიერ-მინისტრი ვერ გამოვიდა ივანიშვილის ჩრდილიდან, დღემდე საქართველოს პრემიერ-მინისტრი მაინც ივანიშვილია, რეალურად კვირიკაშვილი ვერ იღებს გადაწყვეტილებებს. ამიტომაც ის მინისტრთა კაბინეტის შეცვლაზე დამოუკიდებელ გადაწყვეტილებას ვერ მიიღებს, მთავარი იმედი, რაც ჩვენ გვქონდა, რომ დაიწყებოდა რეფორმები და შეიცვლებოდა კურსი, გამოვიდოდა კვირიკაშვილი ივანიშვილის ჩრდილიდან, ჩემი აზრით, ვეღარ მოხდება.

„ალია“, 11 მარტი, 2016 წელი

ბიძინა ივანიშვილის მთავარი დანაშაული იცით, რა არის?

ლევან ჯავახიშვილი

უკვე დამღალა ამ ხელისუფლებამ… რა ხანია, „ქართული ოცნების“ ლიდერები უსირცხვილოდ და თანაც რიხიანად აცხადებენ, რომ მომავალ საპარლამენტო არჩევნებს უპრობლემოდ მოიგებენ. უკვე ყელში ამოვიდა მათი ეს განცხადებები. გულისამრევია ხელისუფლების დაქირავებული იმ ექსპერტების „საფუძვლიანი“ პროგნოზებიც, რომლებიც, ასევე, „ქართულ ოცნებას“ არჩევნებში ტრიუმფს უწინასწარმეტყველებენ – აბა, მომგებს სხვას ვის ხედავთო? გეგონება, რაც ხელისუფლებაში არიან „მეოცნებეები“, ქვეყანა ააყვავეს, ყველა დაპირება შეუსრულეს ხალხს და ხალხიც თავქუდმოგლეჯილი გავარდება მათთვის ხმის მისაცემად. ფუი, თქვენი… „ოცნება“ კია არა, ცვედნების „სხადნიაკი“ ხართ…

რა გააკეთეს ჯერ ბიძინა ივანიშვილმა პრემიერობისას და მერე (როცა პოლიტიკიდან გაიქცა და როგორც „ნაციონალები“ იტყვიან, „კოლბაში“ დაიმალა), მისმა ნარჩენებმა ისეთი, რომ გარანტირებულ გამარჯვებაზეც ლაპარაკობენ? თუ რამე გაკეთდა, მიზერი და ამისთვის ჩვენს გაზულუქებულ ჩინოვნიკებს გვარიანადაც ვუხდით. ჰოდა, ნუ გვამადლით, რა!.. თქვენი გაკეთებული საქმეების ჩამოთვლას არ დავიწყებ, არც ისე ბევრია და არც ღირს. სამაგიეროდ, დაუსრულებლად შემიძლია წერა ჩვენი დეპუტატებისა და სხვადასხვა რანგის ჩინოვნიკების მიერ ბიუჯეტიდან მითვისებულ თანხებზე – სახელფასო დანამატებსა და პრემიებზე. ამათ ბიუჯეტიდან ფულის მოპარვა აღარ სჭირდებათ, ბიუჯეტიდან რამდენსაც უნდათ, იმდენს ხსნიან და ხმის გამცემიც არავინ არის.

„ქართული ოცნების“ ლიდერებმა, ჩვენმა ჩინოვნიკებმა ხალხის ფულით მოიწყვეს ცხოვრება, ზოგმა საშვილიშვილოდ და აი, ეგ არის მაგათი ახდენილი „ქართული ოცნება“. ვინც ესენი ხელისუფლებაში მოათრია და კომფორტული სამსახურები უბოძა, ის ხალხი დაიკიდეს. იმასაც გვაყვედრიან ეს ნაძირლები, ვინც მიშას დროს ბუჩქებში იყო შემძვრალი და დღეს „მაგარ ფულიან“ „კრესლოში“ ზის, „ქართულმა ოცნებამ“ და ბიძინა ივანიშვილმა „ნაციონალები“, სააკაშვილი და მისი ბანდა მოაგშორათ და რაღას წუწუნებთო? „ბაბოი ტარემ“, რა! ხალხი რომ არ გამოგყოლოდათ, ჩემს ფეხებს მოიგებდით არჩევნებს. ჩასხედით „კრესლოებში“, „მაყუთს“ გემო გაუგეთ და ხალხი ფეხებზე დაიკიდეთ…

„ქოცებო“, რომ მოთბილდით „კრესლოებში“ საპარლამენტო სესიები მალე დაიწყება და იქნებ რიგ-რიგობით მოგვიყვეთ, ოღონდ, ალალად – რა შეასრულა ბიძინა ივანიშვილმა თავისი დაპირებებიდან? კომუნალური გადასახები შეცირდა? – ხვიშტი! სამუშაო ადგილები შეიქმნა? – უფრო დიდი ხვიშტი!! სამართლიანობა აღდგა? ძაააალიან დიდი ხვიშტი!!!!! ღატაკნი აღარ არიან და ნაგვის ბუნკერებთან პურის მაძიებელთა რიგები შემოკლდა? ბებიამა, რა…

მოკლედ, ხალხი ისევ იმ ქაქშია, როგორშიც 2012 წლის არჩევნების წინ იყო და თუ ციხეში კაცებს აღარ აუპატიურებენ, ამას ბიძინა და „ქოცები“ ნუ იბრალებთ, ეს, ქართველი ხალხის დამსახურებაა. „ნაციონალებთან“ დაუსრულებელი კოაბიტაცია ანუ ჩახუტება ხალხის ინტერესი იყო? ეს ცოცხალ-მკვდარი პოლიტიკური შანტრაბა ბიძინამ არ მოასულიერა და მოაყოჩაღა?

ვინ წარმოიდგენდა, რომ 2012 წლის არჩევნებიდან თითქმის 4 წლის მერე, ხალხს ის ექნებოდა საფიქრალი, არიქა, „ნაცები“ არ დაბრუნდნენ რევანშითო? ბიძინა ივანიშვილის მთავარი დანაშაული იცით, რა არის? აი, ავადმყოფი ლოგინში რომ არ დაა…ნა. არჩევნების შემდეგ კურდღლებად ქცეულ „ნაცებს“ ქართული „ნიურნბერგის პროცესი“ რომ არ მოუწყო, მათი დამნაშავე ლიდერებით ციხეები რომ არ გაავსო და სამართლიანობის აღდგენა  არ დაიწყო.

აი, დასავლეთი ჩაერია და ბიძინამ „“ნაცები“ ამიტომ არ დააჩაგვრინაო. კიდევ ფუი!… თუ მიქარული არ გაქვს, უბატონოდ ხმას არვინ გაგცემს, მაგრამ ეტყობა მაგარი მიქარული აქვს და თავისი მილიარდების დაკარგვისა შეეშინდა. შეპირდი ხალხს? გააკეთე. არა გაქვს გაკეთების ტრაკი, ადექი, წადი, დანიშნე ვადამდელი არჩევნები და ვისაც ხალხი აირჩევს, ის მოუშვი ხელისუფლებაში.

„ქოცებო“, რა არჩევნების მოგებაზე ლაპარაკობთ, გვეღადავებით? იმის მეათედი რეიტინგი არც ივანიშვილს და არც „ქართულ ოცნებას“ აღარ აქვთ, როგორიც 2012 წელს ჰქონდათ. ივანიშვილი გაკოტრებული რომ იყო, მე მაშინ მივხვდი, თბილისის მერის არჩევნებში დავით ნარმანიას „ნაციონალ“ ნიკა მელიასთან მეორე ტური რომ დასჭირდა. არადა, ამ დროს მხოლოდ წელიწად-ნახევარი იყო გასული 2012 წლის საპარლამენტო არჩევნებში დიდი გამარჯვებიდან. ამის მერე ნარმანია ყველა ბრუნვაში ატრიალეს და ისევ თანმდებობაზეა. ადრეც დავწერეთ და ვიმეორებ – ნარმანია ჭორვილის გამგებელი რომ ყოფილიყო, დღეს მისი ბუნდღა აღარ იქნებოდა, მაგრამ იტანს და რა გინდა რომ ქნა?

ხალხს სულ ფეხებზე ჰკიდია „ქართული ოცნებაც“ და მომავალი არჩევნებიც. ივანიშვილისა და მისი ახლო გარემოცვის წევრებისგან განსხვავებით, რომელთაგან ერთი სოლოლაკის შუშის თუ შუშუს სასახლიდან გარეთ არ იხედება, მეორენი – ხალხის მიერ გადახდილი გადასახადებით მოწყობილი კომფორტული კაბინეტებიდან, ამ უბრალო ხალხის ნაწილი ვარ და მათში ვტრიალებ, მათი განწყობაც ჩინებულად ვიცი. გადით და ხალხს მოუსმინეთ, რას ამბობენ, ყველა ერთს კითხულობს: რა გაგვიკეთა ბიძინა ივანიშვილმა საიმისო, რომ არჩევნებში ხმა მივცეთ? ცხოვრება ორჯერ გაგვიძვირა, ყოველ მესამე ადამიანს ლომბარდის და ბანკის ან მევახშის ვალი აქვს. არ არის ასე? დიახ, ასეა, ცხოვრება ორჯერ გაძვირდა, ხალხი კვლავ აუტანელ ყოფაშია და ისევ ნაგავში იქექება ლუკმაპურის საშოვნელად. ამ ხალხმა ივანიშვილის 2012 წლის საპარლამენტო არჩევნების შემდეგ, „პოსლეზე“ ორჯერ მისცა ხმა და ორჯერვე მოაგებინა არჩევნები – 2013 წელს საპრეზიდენტო და 2014 წელს – ადგილობრივი თვითმმართველობისა.

თუმცა, ხალხს არც ამ არჩევნების შემდეგ ეშველა, მიუხედავად იმისა, რომ დაპირებები ამ არჩევნების წინაც მრავლად იყო. ახლა ეს ხალხი „ქართულ ოცნებას“ მისცემს ხმას კი არა, საერთოდ არ წავა არჩევნებზე.

არც აპირებენ. არჩევნებზე მხოლოდ ე.წ. მოტივირებული ამომრჩეველი წავა და არჩევნები ჩაიშლება, რადგან ამგვარი ამომრჩეველი ამომრჩეველთა საერთო რაოდენობის 30%-ს ვერანაირად ვერ მიაღწევს. ყველა ქვეყანაში და ყველა არჩევნებზე, ეს „მოტივირებული ამომრჩეველი“ 15-20%-ზე მეტს არასდროს აღწევს. არა, რამდენად უუნარო უნდა იყო, რა ფეხებზემკიდია უნდა იყო, ამხელა რეიტინგი არასრულ 4 წელიწადში ისე გაფლანგო, რომ ხალხს ყოველგვარი არჩევნების სურვილი დაუკარგო?

ხალხი გაღიმებული დატოვეს… ისევე როგორც ყველა წინა, ამ ხელისუფლებამაც „გადააგდო“, მოატყუა და გააწბილა. ეს ხომ პირველი არ არის, მაგრამ განსაკუთრებული შემთხვევაა. ერთი, რომ ქართველ ხალხს არც ერთი ხელისუფლების მოსაცილებლად არ გაუღია იმხელა ძალისხმევა, რაც სააკაშვილის კლანის მოსაშორებლად გაიღო, მეორე, ხალხის ისეთი ნდობა დღემდე არც ერთ ქართველ პოლიტიკურ ლიდერებს არ ჰქონიათ, რამხელაც ბიძინა ივანიშვილს. ამ კაცმა კი ხალხს ეს თავგანწირვაც წყალში გადაუყარა და საკუთარი იმიჯრეიტინგიც ზედ მიაყოლა. ეს იმიჯი ეგებ ფეხებზეც ჰკიდია, კაცს 7 მილიარდი აქვს და ეგებ ეს პოლიტიკური რეიტინგი საერთოდ არ აღელვებს, მაგრამ ხალხს ვინ მისცემს იმას, რისთვისაც იბრძოლა და სამკვდრო-სასიცოცხლო ბრძოლაში გაჰყვა ივანიშვილსა და მის პარტიას? არავინ! ხალხი ამ ამათთვის მხოლოდ პოლიტიკური მიზნების მიღწევის საშუალებაა, მაგრამ არ დაგავიწყდეთ – ეს ხალხი გამოფხიზლდა და აბანოს ვარიანტია _ თეთრი და შავი ერთი ადგილი, არჩევნებზე გამოჩნდება…

„ალია“, 11 მარტი, 2016 წელი

ბიძინა ივანიშვილი ჩასაფრებულია! რას აპირებს 12 მარტის პოლიტსაბჭოს სხდომაზე ექსპრემიერი?

ლევან ჯავახიშვილი

ბოლო ორი დღის მოვლენებს თუ დავაკვირდებით, პრემიერმინისტრმა გიორგი კვირიკაშვილმა შიდა კოალიციური დაპირისპირება ვერ შეანელა. მან გამართა შეხვედრა `რესპუბლიკელებთან~, შემდეგ იყო „ქართული ოცნების“ პოლიტსაბჭოს სხდომა, მოგვიანებით ისაუბრა გოგი თოფაძესთანაც, თითქოს ყველა მხარეს თავი უნდა შეეკავებინა ღია გამოხტომებისგან, მაგრამ მაინც არაფერი გამოვიდა – იქით თინა ხიდაშელი კვლავ აგრძელებს განცხადებების კეთებას, თოფაძისგან არაფერი მიკვირს, ეგ ყველა კაბინეტში სტალინის სურათის დაკიდებას ითხოვდაო. აქეთ გოგი თოფაძე იმუქრება, ამ დღეებში ოჯახის ცნების საკითხს ისევ გავამწვავებთ, თეთრი და შავი აბანოში გამოჩნდებაო.

საინტერესო განცხადებას აკეთებს საპარლამენტო უმრავლესობის წევრი, ომარ ნიშნიანიძე. მისი თქმით, დეპუტატებმა არ იციან ბიძინა ივანიშვილის აზრი კოალიციაში გამძაფრებულ დაპირისპირებაზე, თუმცა ყოფილი პრემიერი ყველაფერს აკვირდება და ისეთ უმნიშვნელო დეტალებსაც კი ამჩნევს, რომელთა შემჩნევა ერთი შეხედვით შეუძლებელიაო. თურმე ივანიშვილმა კულუარული ინფორმაციები კარგად იცის და ის ახლა ყველას ლუსტრირებას ელოდება. საყურადღებოა გოგი თოფაძის ნათქვამიც, პრემიერ-მინისტრი ჩვენ, „მრეწველებს“, არ გვამტყუნებს, მაგრამ ცოტა თავის შეკავებას გვირჩევსო.

სიტყვები – „გვირჩევს“ და „არ გვამტყუნებს“ იმას ნიშნავს, რომ თითქმის ამართლებს. მოქმედი პრემიერი რომ ყოფილი პრემიერის „დაბროს“ გარეშე ვერც თოფაძის გვერდით დადგება და ვერც კონსტიტუციაში შესატან ცვლილებებს დაუჭერს მხარს ქალისა და მამაკაცის ოჯახური ერთობის თაობაზე, ეს სალაპარაკოც აღარ არის.

ყურის აწევები თუ საყვედურების გამოცხადება „პირად საქმეში“ შეტანით: „ივანიშვილთან შეხვედრა უკვე მომწიფებულია და ეს უკვე ბევრ რამეს გადაწყვეტს. არავისთვის არაა სასიამოვნო ამ კინკლაობის გაგრძელება, სიტუაცია ან ისე უნდა გადაწყდეს, ან – ასე, სანამ უკან დასახევი გზა კიდევ არსებობს, სანამ ყველა ხიდი არ არის დამწვარი. მე ვფიქრობ, ამ ყველაფერს წერტილი დაესმება 12 მარტს.

დავით უსუფაშვილს ისიც უთქვამს, ყველაფრისთვის მზად უნდა ვიყოთ, შეიძლება კოალიცია მართლაც დაიშალოსო. ჩემი აზრით, მათ კოალიციიდან გასვლა არ უნდა უნდოდეთ, მაგრამ რა მოხდება, არ ვიცი. „რესპუბლიკელებმა“ 2012-ში ძალიან კარგად ივაჭრეს და ბევრი მიიღეს, ახლა ვეთანხმები თამაზ მეჭიაურს, მოდი, ვსინჯოთ,ცალ-ცალკე რა ბიჭები ვართ. ასეთი გაზრდილი მადა რომ გვაქვს, ამის გადაწყვეტა ხალხს მივანდოთ“.

კულუარული ინფორმაციით, „რესპუბლიკელები“ „ქართულ ოცნებასთან“ გასაფორმებელ ხელშეკრულებაში წერენ, რომ მომავალ არჩევნებში მათ სიაში 10 ადგილი ეკუთვნით, 5 მაჟორიტარი უნდა ჰყავდეთ და მინისტრების პორტფელები შეუნარჩუნდეთ. ამაზე „ქართულ ოცნებაში“ ამბობენ, რომ ეს ძალიან ბევრია, მაშინ რა დააშავეს კოალიციაში შემავალმა სხვა პარტიებმა? იგივე „ოცნებაში“ ბევრს არ ესმის, რა საჭიროა ასეთი ვითომსტრატეგიული ხელშეკრულება. „რესპუბლიკელებმა“ რამდენიც არ უნდა წერონ და იკითხონ, ბოლოს ყველაფერი მაინც ბიძინა ივანიშვილმა უნდა გადაწყვიროგორც ომარ ნიშნიანიძე ამბობს „ალიასთან“ საუბარში, უკვე დაწყებულია ყველას ლუსტრირების პროცესი, რათა მომავალი საარჩევნო სია უფრო დახვეწილი იყოს და კოალიციაც, თუკი ასეთი იქნება, დაღვინებული სახით წარდგეს მოსახლეობის წინაშე:

„ბიძინა ივანიშვილი ყველას აკვირდება არა მხოლოდ საქმიანობიდან გამომდინარე, პიროვნული თვალსაზრისითაც. ამის შემდეგ კი გამოგვიტანს საბოლოო „განაჩენს“, ვინმეს უნდა თუ არა, ჩვენი ლიდერი მაინც ის არის“.

ომარ ნიშნიანიძის მსჯელობას თუ მივყვებით, გამოდის, ამ ეტაპზე ბატონი ივანიშვილი ჩასაფრებულია – აბა, ერთი, კიდევ ვის რა შეეშლება, ვინ ჩაიჭრება და ასე შემდეგ. თუმცა ნიშნიანიძის თქმით, ეს ჩასაფრება კი არა, უფრო გაფრთხილებაა: „ჩვენ მას ადრე უფრო ხშირად ვხვდებოდით და ბევრ რამეს ვიგებდით. უახლოეს ხანში კიდევ გაიმართება შეხვედრა,მას ბევრი ინფორმაცია აქვს და სიტუაციაში უკეთესად გავერკვევით. ჩემი აზრით, უკვე საჭიროა ნაწილობრივ გამხნევება, ზოგიერთისთვის ყურის აწევა, საყვედურიც და ასე შემდეგ“.

ომარ ნიშნიანიძის თქმით, პრემიერის შეხვედრა „რესპუბლიკელებთან“, გოგი თოფაძესთან და კიდევ პოლიტსაბჭოს სხდომის გამართვა, როგორც ჩანს, საკმარისი არ იყო და ამიტომაც შაბათს, 12 მარტს, კიდევ იქნება პოლიტსაბჭოს სხდომა. ამის შემდეგ კოალიციას შეხვდება თავად ბიძინა ივანიშვილი და ალბათ, სწორედ იქ წავა ტოს. ომარ ნიშნიანიძის თქმით, „რესპუბლიკელებს“ რომ ასეთი მოთხოვნები ექნებათ, ამაში დარწმუნებულია: „კი, ამაში დარწმუნებული ვარ, ისინი გაცილებით მეტს ითხოვენ, ვიდრე 2012 წელს ერგოთ. მე მესმის, პარტიას უნდა უნდოდეს მეტი, მაგრამ ესეც მოლაპარაკების საგანია.

შეიძლება მე სიტყვა „დაპირისპირება“ არ მსიამოვნებს, მაგრამ პიროვნული დაპირისპირებები ისევ მიდის კოალიციაში. აი, ამიტომ უნდა გაიმართოს კიდევ პოლიტსაბჭოს სხდომა და უნდა შეგვხვდეს ბიძინა ივანიშვილი. ბოლოს და ბოლოს, ხომ უნდა ჩაცხრეს ეს პიროვნული დაპირისპირება?

წინ არჩევნებია და უფრო მეტი საფიქრალი გვაქვს. მართალია, ჩემს დონეზე არ წყდება, მაგრამვიცი, განახლება იქნება, ამაზე მსჯელობა მიდის და უფრო გააქტიურდება მომდევნო თვეებში, შემდეგ კი მაისში გაიმართება ყრილობა. მე თუ მკითხავთ, უარყოფითი დამოკიდებულება მაქვს ამ ხელშეკრულებასთან დაკავშირებითაც, ჩვენს ფრაქციაში ვფიქრობთ, ეს არაკორექტულია თუნდაც იმიტომ, რომ სხვა პარტიები დგებიან თამაშგარე მდგომარეობაში. ხელშეკრულება ისე ვერ გაფორმდება, თუ სხვებსაც არაფერი ვკითხეთ. საბოლოო წერტილს მაინც ბიძინა ივანიშვილი დაუსვამს და ყველაფერს გასაგებად ახსნის. ჩემი ინფორმაციით, ბატონმა ბიძინამ ყველაფერი ძალიან კარგად იცის და რაღაც პატარა ნიუანსებია დარჩენილი, ის თავის სიტყვას უახლოეს ხანში იტყვის“.

როგორც უკვე მოგახსენეთ, საბავშვო ბაღის „აღსაზრდელები“ პრემიერ-მინისტრმა ვერ დააშოშმინა და როგორც ჩანს, სწორედ ამის გამო გადაწყდა, რომ საქმეში ბიძინა ივანიშვილი ჩაერევა. როგორც ომარ ნიშნიანიძე ამბობს, ცოტა ხანში ვნახავთ, ვის აუწევს ყურს, ვის გამოუცხადებს საყვედურს, ვის დატოვებს საარჩევნო სიაში და ვის გაუშვებს „პენსიაზე“.

„რეზონანსი”, 11 მარტი, 2016 წელი

ინტერვიუ დავით ზურაბიშვილთან: “თუ კოალიციაში ცივილიზებული ურთიერთობა არ ჩამოყალიბდა, ცუდი იქნება”

თიკო ოსმანოვა

“ჩვენი პრიორიტეტია კოალიციაში ცივილიზებული ურთიერთობის ჩამოყალიბება კოალიციური შეთანხმების საფუძველზე. თუ ეს არ გამოვიდა, რა თქმა უნდა, ცუდი იქნება. თავისთავად კოალიცია ოდესღაც დაიშლება, თუმცა როდის, ვერ გეტყვით”, – ამბობს “რეზონანსთან” საუბრისას “რესპუბლიკური” პარტიის წევრი დავით ზურაბიშვილი.

კოალიაციაში არსებულ ვითარებაზე და სკოლის პედაგოგთა გამოცდების შედეგებზე “რეზონანსი” დავით ზურაბიშვილს ესაუბრა. “რესპუბლიკელებსა” და “მრეწველებს” შორის პარტიული დაპირისპირება არ ყოფილა. უბრალოდ, პიროვნების გამონათქვამი არ შეესაბამებოდა კოალიაციის გაცხადებულ დეკლარაციულ მიზნებს. დანარჩენი ვნახოთ, რა იქნება», – ამბობს რესპოდენტი.

- არსებული ინფორმაციით, კოალიაციის ერთობა ბიძინა ივანიშვილმა შეინარჩუნა, მან დაურეკა დავით უსუფაშვილს და ამით საბოლოოდ წერტილი დაუსვა “რესპუბლიკელებისა” და “მრეწველების” დაპირსპირებას. რას იტყვით ამასთან დაკავშირებით?

- ჭორებზე და რაღაცებზე ვერაფერს ვერ ვიტყვი. ასეთი რამე არ გამიგია

- “რესპუბლიკელები” პარტია “ქართულ ოცნებასთან” ხელშეკრულების დადებას აპირებს, რას გულისხმობს ეს შეთანხმება?

- არა მარტო პარტია “ქართულ ოცნებასთან”, უბრალოდ, ჩვენ ჯერ ამ პარტიასთან დავიწყებთ. კოალიაცია როდესაც იქმნება, სუბიექტებს შორის შიგნით ურთიერთობა უნდა იყოს ფორმალიზებული, ანუ უნდა იყოს განსაზღვრული, ვის რა უფლებამოსილება აქვს, რაში გვაქვს ერთიანი პოზიცია, სისუსტეები და სხვა. ვფიქრობთ, ასეთი მიდგომა არის ცივილიზებული და ამ შემთხვევაში გაუგებრობა იქნება ნაკლები. მართალია, რაღაც დეკლარაცია არსებობს, მაგრამ ახლა როდესაც შეთანხმების გარეშეა კოალიაცია, ბევრი გაუგებრობა არსებობს.

- ორშაბათს გამართულ პოლიტსაბჭოს სხდომაზე რა საკითხებზე მიმდინარეობდა მსჯელობა, რას ამბობდნენ დაპირისპირებული მხარეები?

- ვერ მოვყვები, ახლა რაც ითქვა იმის მეტს ვერაფერს. ანალიტიკოსი არ ვარ, რომ ვარაუდები გამოვთქვა. რაც სათქმელი იყო, ითქვა, ვერაფერ დანარჩენს ვერ დავამატებ. ხელშეკრულების თაობაზე კი, რაც იგულისხმებოდა, გითხარით.

- კახი კალაძის თქმით, კოალიაციის დაშლა ტრაგედია არ არის. ამასთან გაისმა მოსაზრება, რომ კოალიაციაში შემავალმა პარტიებმა არჩევნებში ცალ-ცალკე მიიღონ მონაწილეობა…

- ჩვენი პრიორიტეტია კოალიციაში ცივილიზებული ურთიერთობის ჩამოყალიბება – კოალიციური შეთანხმების საფუძველზე. თუ ეს არ გამოვიდა, რა თქმა უნდა, ცუდი იქნება, თავისთავად კოალიცია ოდესღაც დაიშლება, თუმცა როდის, ვერ გეტყვით.

- და ამ შეთანხმებაზე მუშაობა როდის დასრულდება?

- გვინდა, რომ ეს იყოს სწრაფად, რომ არჩევნებზე გასვლა მოხდეს ასეთ პირობებში.

- ანუ არჩევნებამდე მოხდება?

- არ ვიცი, შეიძლება ნაწილობრივ მოხდეს, ნაწილობრივ ვერა.

- გავრცელებული ინფორმაციით, გამსვლელი 15 კაციდან “რესპუბლიკელები” 10 კაცის გაყვანას ითხოვენ. კვოტების გადანაწილებასთან დაკავშირებით რა ხდება კოალიაციაში?

- ჯერ არანაირ კვოტებზე ლაპარაკი არ არის, ეს ყველაფერი ჭორებია.

- ვიზალიბერალიზაციის პირველი ეტაპი წარმატებით გადაილახა, მაგრამ პოლიტიკური პროცესი ჯერ კიდევ წინ არის…

- ეს არის სერიოზული წარმატება და, რა თქმა უნდა, ეს არის ამ ხელისუფლების წარმატება. ამ მთავრობის მიმართ რომ არსებობდეს რაღაც ეჭვები, ჩვენ ვიზალიბერალიზაციას არავინ მოგვცემდა. ეს ქვეყნისთვის ცალსახად კარგია.

- სკოლის მასწავლებელთა უმრავლესობამ მინიმალური კომპეტენციის ზღვარის გადალახვა ვერც ამჯერად მოახერხა…

- ძალიან სერიოზული კრახია ის, რომ მასწავლელების დონე ვერ აკმაყოფილებს გარკვეულ კრიტერიუმებს. ეს არის დიდწილად იმის შედეგი, რომ თავის დროზე წინა ხელისუფლების დროს გატარდა მოუმზადებელი და არაკვალიფიციური რეფორმები.

მიუხედავად იმისა, რომ მუშაობა მიდის ამ მიმართულებით, რა თქმა უნდა, ჩვენი პასუხისმგებლობაც არის. ხომ ვერ გავყრით არა მასწავლებლებს?! განათლების სფეროში, რაღაცას რომ აკეთებ, შედეგი იქნება არა ხვალ, არამედ 5-10 წლის მერე. ეს თავისებურება განათლების სისტემას ახასიათებს. ვფიქრობ, აქ საჭიროა სერიოზული რეფორმების გატარება და რაც შეიძლება სწრაფად, რომ შედეგიც მალევე დადგეს.

- განათლების მინისტრთან პრეტენზიები მანამდეც არსებობდა. თქვენი აზრით, უნდა აიღოს თუ არა პასუხისმგებლობა თამარ სანიკიძემ?

- კონკრეტულად ამაზე მინისტრის დადანაშაულება არასწორია. რა თქმა უნდა, მინისტრებს ეკისრებათ პასუხისმგებლობა, მას და მის წინამორბედებსაც, მაგრამ ვფიქრობ, ეს უფრო ძველი, ადრე განხორციელებული რეფორმის შედეგია.

„რეზონანსი”, 11 მარტი, 2016 წელი

სტუდენტთა ამბოხი თსუ-ში პიკს აღწევს

“აქციები გაგრძელდება ხვალაც, ზეგაც და მომავალში, სანამ ჩვენი მოთხოვნა არ დაკმაყოფილდება“

სალომე სარიშვილი

თსუ-ში მასობრივი აქციების შემდგომ სტუდენტები დანებებას მაინც არ აპირებენ და კანცლერის თანამდებობაზე წარდგენილი გიორგი გაფრინდაშვილის კანდიდატურის დაუყოვნებლივ მოხსნას ითხოვენ, წინააღმდეგ შემთხვევაში კი მასშტაბურ აქციებს აანონსებენ.

თბილისის სახელმწიფო უნივერსიტეტში გამართულმა გუშინდელმა სენატის სხდომამ დიდი დაპირისპირებისა და ხმაურის ფონზე ჩაიარა. სტუდენტების გაღიზიანება თსუ-ს კანცლერის არჩევნებს მოჰყვა, რომელზეც პროტესტანტი სტუდენტები სამართალდამცველებმა არ დაუშვეს. ამ ფაქტმა თსუ-ში მდგომარეობა კიდევ უფრო გაამწვავა, რამაც სტუდენტებსა და დაცვის თანამშრომლებს შორის ფიზიკური შეხლა-შემოხლაც კი გამოიწვია. საბოლოოდ, სტუდენტებმა ხდომაზე შესვლა დიდი ძალისხმევის შედეგად მოახერხეს, მოგვიანებით კი სენატის სხდომა ჩაიშალა და გაურკვეველი ვადით გადაიდო.

სტუდენტები თსუ-ს პირველ კორპუსთან გუშინ, დღის სამი საათიდან შეიკრიბნენ და კანცლერის არჩევნების საწინააღმდეგო აქცია გამართეს. მოგვიანებით კი, სენატის სხდომის დაწყებისთანავე მათ არჩევნებზე დასწრება მოითხოვეს, თუმცა სრულიად უშედეგოდ – სტუდენტები სხდომაზე მხოლოდ დაცვის პოლიციასთან და სამართალდამცველებთან დაპირისპირების შემდეგ შეუშვეს.

აქციის მონაწილე სტუდენტები თსუ-ს კანცლერის კანდიდატურაზე წარდგენილ გიორგი გაფრინდაშვილის კანდიდატურას აპროტესტებდნენ, რომელიც მათივე თქმით, წარსულში უნივერსიტეტის ადმინისტრაციაში მუშაობდა და სტუდენტებზე მოძალადე პირებს ხელს აფარებდა. სტუდენტების განცხადებით, გიორგი გაფრინდაშვილის კანდიდატურა საუნივერსიტეტო საზოგადოებისთვის აბსოლუტურად მიუღებელია.

გარდა ამისა, სტუდენტები ამბობენ, რომ გაფრინდაშვილი სახელმწიფო უსაფრთხოების სამსახურთან ფარულად თანამშრომლობს, რაც მათთვის აბსოლუტურად მიუღებელია. ისინი გაფრინდაშვილის კანდიდატურის მოხსნას კატეგორიულად ითხოვენ.

“ჩვენი დიდი ძალისხმევითა და ერთიანობით სენატის სხდომა ჩაიშალა. ვითხოვთ გიორგი გაფრინდაშვილმა კანდიდატურა დაუყოვნებლივ მოხსნას, წინააღმდეგ შემთხვევაში აქციებს გავაგრძელებთ და ამას ექნება მასშტაბური ხასიათი.

“გაფრინდაშვილი იმ პერიოდის ნაწილია, როცა სტუდენტებზე ძალადობდნენ, სცემდნენ, პროფესორებს კი საკუთარი განსხვავებული აზრის გამოხატვის გამო უნივერსიტეტიდან აძევებდნენ. გაფრინდაშვილმა მაშინ სტუდენტების დაცვა ვერ მოახერხა, პირიქით დამნაშავეებს ხელი დააფარა.

“ასეთი ადამიანი დღეს სტუდენტთა უფლებების დაცვას ვერ მოახერხებს და შესაბამისად, ვერც კანცლერი გახდება. აქციები გაგრძელდება ხვალაც, ზეგაც და მომავალში, მანამ, სანამ ჩვენი მოთხოვნა არ დაკმაყოფილდება და გაფრინდაშვილი კანდიდატურას საკუთარი სურვილით არ მოხსნის”, – უთხრა “რეზონანსს” აქციის ერთ-ერთმა ორგანიზატორმა, სენატის წევრმა ირაკლი კუპრაძემ.

აღსანიშნავია, რომ აქციის მსვლელობისა და სენატის სხდომის პარალელურად თსუ-ში მთელი საღამოს განმავლობაში მობილიზებული იყო საპარტულო პოლიცია.

სამართალდამცველების განცხადებით, ისინი უნივერსიტეტში დაცვის სამსახურმა გამოიძახა. სიტუაციის გამწვავების შემდგომ კი აქციის მონაწილე სტუდენტებთან თსუ-ს რექტორი ლადო პაპავა მივიდა. მან სტუდენტებს სიმშვიდისკენ მოუწოდა და სთხოვა კანონის ფარგლებში ემოქმედათ.

უნივერსიტეტის რექტორმა საპატრულო პოლიციის თანამშრომლებს დაწესებულების დატოვებისკენ მოუწოდა. როგორც სტუდენტებმა პაპავასთან შეხვედრისას თქვეს, საპატრულო პოლიციის თანამშრომლების მხრიდან მათ მიმართ ძალადობრივ ქმედებებს ჰქონდა ადგილი.

ამასთან, პაპავამ სტუდენტებსაც მოუწოდა, დაეტოვებინათ ტერიტორია და უნივერსიტეტის სენატისთვის არჩევნების მშვიდად ჩატარების საშუალება მიეცათ, თუმცა, ამ მოთხოვნაზე მან სტუდენტების მხრიდან უარი მიიღო. თსუ-ს რექტორის განცხადებით, მას არ აქვს უფლება სენატის სხდომა გადადოს.

“სენატის სხდომის გადადების უფლება აქვს მხოლოდ სენატს, რექტორს ამის გადადების მექანიზმი არ გააჩნია. მთავარია, არ ამოვვარდეთ საკანონმდებლო სივრციდან, რასაც განსაზღვრავს კანონი უმაღლესი განათლების შესახებ და რაც არის უნივერსიტეტის წესდება.

“სენატის სხდომის ჩატარება წესდებით დღესაა გათვალისწინებული. ჩემთვის მთავარია უნივერსიტეტი ასრულებდეს უმთავრეს ფუნქციას – სასწავლო-სამეცნიერო ფუნქციას, ნებისმიერი ექსცესი უნივერსიტეტისთვის მიუღებელია. ყველამ თავის წილი პასუხისმგებლობა უნდა აიღოს საკუთარ თავზე”, – განაცხადა ვლადიმერ პაპავამ.

საბოლოოდ, კანცლერის არჩევნები გუშინვე ჩაიშალა. სენატის წევრების თქმით, არჩევნების ხელახალი თარიღის განსაზღვრამდე სტუდენტების იმ წარმომადგენლებს შეხვდებიან, რომლებიც კანცლერის პოსტზე გიორგი გაფრინდაშვილის კენჭისყრას აპროტესტებენ.

სენატმა სტუდენტებს დამატებითი მოსამზადებელი შეხვედრა ორშაბათისთვის შესთავაზა. როგორც სენატის წევრებმა განაცხადეს, ამ შეხვედრის შემდეგ გადაწყდება, როდის გაიმართება კანცლერის არჩევნები.

„ახალი თაობა“, 11 მარტი, 2016 წელი

ინტერვიუ სოფიო ხორგუანთან: „მე რომ მედიამაგნატი ვიყო, „რუსთავი-2“-ის ყიდვასაც შევეცდებოდი”

კრიზისების მართვის მენეჯერი სოფიო ხორგუანი „ახალ თაობასთა”~ ინტერვიუში ტელეკომპანია მაესტროს ირგვლივ განვითარებულ პროცესებს აფასებს.

- სოფიო, გვესმის შეფასებები, რომ მაესტროს ირგვლივ განვითარებული პროცესები ზედმეტად ანგაჟირებული, პოლიტიზებულია. რას ფიქრობთ თქვენ ამ ყველაფერზე?

- მეც ვფიქრობ, რომ თემა ძალიან ანგაჟირებულია, მაგრამ ეს ნორმალურია. ნორმალური იმ თვალსაზრისით, რომ არავინ არავის უშლის ხელს, ასე მძაფრად გამოხატოს თავისი პოზიციები. ხშირ შემთხვევაში, ძალიან ბევრი უპასუხისმგებლო განცხადება კეთდება, თუმცა ამისთვის არავინ ისჯება.  ჩემთვის, როგორც მოქალაქისთვის, მნიშვნელოვანია, რომ ამ პროცესში ხელისუფლების მონაწილეობა არ არის. ეს არის ძალიან დადებითი რამ.

- თუმცა აქტიურად ადანაშაულებენ ხელისუფლებას, რომ სწორედ მისი ინტერესია და რომ ეს არის პოლიტიკური ბრძოლა მაესტროსა და ხელისუფლებას შორის…

- კი, მეც მოვისმინე ეს შეფასებები, თუმცა აქ ხელისუფლების ინტერესს ვერ ვხედავ. ის, რომ მედია არ არის ჩვეულებრივი ბიზნესი და ის კავშირშია პოლიტიკასთან, აქსიომაა. ის, რაც მასობრივია, ყოველთვის იქნება რაღაც კავშირში პოლიტიკასთან. დავუშვათ, რომელიღაც მედიასაშუალებას უნდა, რომ იყიდოს მაესტრო.

- ეს რამდენად სწორი და კანონიერი მცდელობაა?

- მე რომ ვიყო მედიამაგნატი და მქონდეს საშუალება, არათუ მაესტროს, არამედ „რუსთავი-2“-ის ყიდვასაც შევეცდებოდი, როგორც წარმატებული ბიზნესპროექტის, წარმატებული მედიაპროექტის. ამაში ცუდს ვერაფერს ვხედავ. შენ თუ უყურებ მედიას, როგორც ბიზნესს, შენ გინდა, რომ გაფართოვდე და მეტი იყო, თუ მედიამაგნატი ხარ. ასე მოიქცეოდა მსოფლიოში ნებისმიერი მედიამაგნატი. მთავარია, არ დაირღვეს კანონი, კანონმდებლობის დაცვით ხდებოდეს მთელი ეს პროცედურა. იმისთვის, რომ კანონი იყოს დაცული და მთელი ეს ბიზნესშეთანხმება კანონის ფარგლებში ხდებოდეს, ამისთვის ჩვენ ძალიან ბევრი უწყება გვაქვს მაკონტროლებლად, თუნდაც მარეგულირებელი კომისიით დაწყებული.

- ოდესმე დასრულდება ეს დავა?

- ჩემი აზრით, ეს დავა ძალიან მალე უნდა დასრულდეს. მგონია, რომ კონკრეტულ შეთანხმებას მიაღწევენ ეს ადამიანები. ერთი მხარე ყიდის, მეორე ყიდულობს, ალბათ, სადღაც რაღაც შეთანხმებამდე მივლენ, ასეთი პირი უჩანს. მე ნამდვილად არ მრჩება შთაბეჭდილება, რომ ამაში ხელისუფლებაა გარეული.

- მაშინ ვის აწყობს საკითხის პოლიტიკურ ჭრილში გადატანა?

- აშკარად ვხედავ, რომ აქ ვაჭრობა მიდის. ვინ როგორ ვაჭრობს, ეს უკვე სხვა თემაა. რა მეთოდს გამოიყენებენ იმისათვის, რომ უკეთესად ივაჭრონ, ეს მათი არჩევანია. ვინ როგორ განცხადებას გააკეთებს, ჩემთვის ეს გემოვნების საკითხია, სანამ ისინი კანონს არ არღვევენ. როგორც კი კანონს დაარღვევენ, რა ტიპის განცხადებაც არ უნდა გააკეთოს ან ერთმა მხარემ, ან მეორემ, კანონის წინაშე ყველა თანასწორია.

- თქვენ სიტყვა ვაჭრობა ახსენეთ, ვინ უკეთ ვაჭრობსო. ვაჭრობა მიდის დამფუძნებლებს შორის და ერთი მხარე პოლიტიკური განცხადებებით ვაჭრობს?

- დიახ, ასეა, მაგრამ მას აქვს ამის უფლება და მოდით, ნუ განვსჯით მკაცრად. აღვნიშნე კიდეც, რომ ეს გემოვნების საკითხია. შეიძლება ჩვენ ასე არ ვივაჭროთ. აქ მთავარია, კანონი არ დაირღვეს. ბოლო ინფორმაციაში, რომელსაც გავეცანი, ნათქვამია, რომ ნაპოვნია ახალი შენობა, სადაც გადავა მაესტრო. მე მგონი, ყველაფერი სიმშვიდისკენ მიდის. ყველაფერი ცივილიზებულად უნდა გადაწყვიტონ. ეს მოლაპარაკების საკითხია. ალბათ, შეთანხმდებიან კონკრეტულ თანხაზე ან კონკრეტულ პირობებზე. მეც რომ ვყოფილიყავი მედიამაგნატი, შევიძენდი ყველა მედიასაშუალებას, რის უფლებასაც მომცემდა კანონი.

- ეს ჯანსაღი პროცესია?

- რასაკვირველია. მე გეტყვით, რა იყო არაჯანსაღი, როდესაც მედია ზედმეტად პოლიტიზებული იყო და მერე როგორი რეაქცია ჰქონდა სახელმწიფოს. არაჯანსაღი, იცით, რა იყო? როდესაც სახელმწიფო შევარდა ტელეკომპანია იმედში. აი, ეს იყო ძალიან საშიში. ეს იყო დანაშაული. სწორედ ის იყო დანაშაული, რასაც იმდროინდელი ხელისუფლება აკეთებდა, დადიოდა და აყადაღებდა თეფშებს. დღეს სადმე მსგავს პროცესებს ხედავთ?! პრემიერის პოსტის დაკავების შემდეგ ბიძინა ივანიშვილმა გააჩუქა თავის მფლობელობაში არსებული მედიასაშუალება. ეს იყო ჯანსაღი, ძალიან კარგი პროცესი!

- თუმცა ამის გამო ბევრმა უსაყვედურა...

- კი, ასე იყო. დღეს შეიძლება ბევრს არ მოეწონოს ჩემი შეფასება, მაგრამ მე მიმაჩნია, რომ ეს იყო სწორი გადაწყვეტილება. ეს იყო კარგი გადაწყვეტილება. ეს იყო ჯანსაღი გადაწყვეტილება. როდესაც ხელისუფლების სათავეში მოვიდა ბიძინა ივანიშვილი, მან გაასხვისა თავისი მედიასაშუალება. იმ დროს ეს იყო სრულიად ჯანმრთელი პოზიცია.

- თქვენ აცხადებთ, მედიამაგნატი რომ ყოფილიყავით, შეეცდებოდით შეგეძინათ ბაზარზე არსებული ტელეკომპანიები. დღეს გამოითქმის ეჭვები, რომ, არ არის გამორიცხული, „მაესტრო“ გახდეს „იმედი-2“. რამდენად საფუძვლიანია ეს ეჭვები? ემუქრება ეს საფრთხე „მაესტროს“?

- მე ვერ ვხედავ ამ საფრთხეებს. მე, მაგალითად, მხოლოდ მაესტროს კი არა, „რუსთავი-2“-საც შევიძენდი, თუკი კანონი მომცემდა ამის საშუალებას. მე ასე ვუყურებ ამ საკითხს და სწორედ ასე მოიქცეოდა ნებისმიერი მედიამაგნატი.

- მერედა ეს არ იქნება ერთი ხაზი, ერთი პოლიტიკის გატარება ამ ტელევიზიებში? არ დაიკარგებოდა თავისუფლების ხარისხი?

- ჩვენ შეშინებულები ვართ და ცუდი გამოცდილება გვაქვს, ამაში გეთანხმებით, მაგრამ, თუკი კანონი საშუალებას მაძლევს, შევიძინო მედიასაშუალება ერთი, ორი, სამი და ასე შემდეგ, თუ ეს მონოპოლიად არ ჩაითვლება, რატომ არ უნდა გავაკეთო ეს?! სახელმწიფო ხომ იცავს თავს ამისგან, რომ ყველაფერი ერთის ხელში არ მოხვდეს, პროცენტებს ითვლიან. ამისთვის ხომ არსებობს მარეგულირებელი კომისია, რომლის წევრებიც კოსმიურ ხელფასებს იღებენ. დადგნენ და ითვალონ მათ ეს პროცენტები, მეათედები და მეასედები, აქვს თუ არა ვიღაცას იმის უფლება, გახდეს ასეთი მედიამაგნატი. ჩვენ რატომ უნდა ვნერვიულობდეთ ამ საკითხებზე?! მათ ითვალონ. სწორედ მათ უნდა მოვთხოვოთ, მიადევნონ თვალი, რომ იქ ყველამ კანონი დაიცვას.

- როდესაც ერთი მაგნატის ხელში მოექცევა მედიასაშუალებები, უფრო დიდი საფრთხე არ იქნება იმისა, რომ მარტივად მოექცეს პოლიტიკური გავლენის ქვეშ, ვიდრე მაშინ, როცა ყველა ტელევიზიას სხვადასხვა მფლობელი ჰყავს?

- როდესაც მედიასაშუალება ძლიერი მაგნატის ხელში იქნება, უფრო ძლიერი იქნება და წელში კარგად გამართული. ასეთ მედიასაშუალებას თავის დაცვაც უკეთ შეეძლება პოლიტიკური ზეგავლენებისგან. როცა შენ ძლიერი ხარ, მაგარი ხარ, სახელმწიფოს ვალი არ გაქვს, როგორ უნდა დაგიქვემდებაროს ხელისუფლებამ? გვახსოვს, რომ სულ ვალების ჩამოჭრაზე მიდიოდა საუბარი წინა ხელისუფლების დროს და სწორედ ამ დროს ექცევიან ზეგავლენის ქვეშ, როდესაც დავალებულები არიან. შენ თუ ფინანსურად მყარად დგახარ ფეხზე, ეს საფრთხე არ გემუქრება, ვერ გაგიბედავს ხელისუფლება, რომ რამე დაგიშავოს. მე ძალიან მინდა, რომ ჩვენი მედია იყოს ძალიან ძლიერი და წელში გამართული.

- ჩვენ ასევე მოვისმინეთ განცხადებები, რომ მაესტრო რუსული ფულით ფინანსდება, რომ იგრძნობა რუსული ინტერესები. ამის თაობაზე რას იტყვით?

- რეალურად ეს არის მოცემულობა. როგორ უნდა ვთქვათ, რომ ეს ასე არ არის. რუსულ ფულში რას ვგულისხმობთ? პირდაპირ ფსბ-ს ფული მოდისო? მე ამის დამტკიცება არ შემიძლია, ხოლო ბიზნესმენი, რომელიც ფლობს ამ ფინანსებს, არც მალავს და არავისთვის ახალი ამბავი არ არის, რომ რუსეთში მოქმედი ბიზნესმენია. როდესაც საუბარია ფულის წარმომავლობაზე, ამერიკული ფულია თუ რუსული, მე ამ შემთხვევაში სახელებსა და გვარებს თავს დავანებებ და უბრალოდ ვიტყვი, რომ მე, პირადად, ამერიკის საგადასახადო სისტემას, იქაურ ფინანსურ ინსტიტუტებს უფრო ვენდობი, ვიდრე რუსეთის საგადასახადო სისტემას ან ფინანსურ ჯგუფებს. თუმცა აქ მთავარი სხვა რაღაცაა.

- რა?

- ეს ფული გინდა კამბოჯაში მქონდეს ნაშოვნი და გინდა ჩინეთში, თუკი მე ეს ფული ლეგალურად შემომაქვს და ლეგალურად ვხარჯავ ამ სახელმწიფოში, არავის საქმე არ არის, სად ვშოულობ. მთავარია, მე კანონი არ დავარღვიო და იყოს ლეგალური ფული. ამისთვის მაკონტროლებლები გვყავს და ამაზე ჩვენ არ უნდა ვნერვიულობდეთ.