„რეზონანსი“: ინტერვიუ გიგლა ბარამიძესთან: „ნინო ბურჯანაძის მიმართ მოსკოვში იმდენად დიდი ინტერესია, რომ ამას არც ველოდით”

„ახალი თაობა“: ინტერვიუ დავით დარჩიაშვილთან: „ბიძინა ივანიშვილის დასაყრდენი შეიძლება ნინო ბურჯანაძე გახდეს“

„ახალი თაობა“: ინტერვიუ გოგი ქავთარაძესთან: „მე ვთქვი, რომ ნატოს რაც შეიძლება სწრაფად უნდა მიგვიღოს“

———————-

„რეზონანსი“, 11 ივლისი, 2015 წელი

ინტერვიუ გიგლა ბარამიძესთან: „ნინო ბურჯანაძის მიმართ მოსკოვში იმდენად დიდი ინტერესია, რომ ამას არც ველოდით“

თაკო მათეშვილი

(შემოკლებით)

(…)

ბურჯანაძე მოსკოვში 9 ივლისს რუსეთის დუმის სპიკერ სერგეი ნარიშკინის მიწვევით გაემგზავრა იმ კონფერენციაში მონაწილეობისათვის, რომლის თემაა „21-ე საუკუნის მსოფლიო და რეგიონული გამოწვევები“. მოსკოვში ყოფნისას, გარდა კონფერენციისა, იგი რუს ჩინოვნიკებსაც შეხვდა. შეხვედრა გამართა სერგეი ნარიშკინთანაც, სადაც რუსეთ-საქართველოს დიალოგის საკითხები განიხილეს. ბურჯანაძემ ტელეკომპანია „როსია 1“-ის ეთერში საუბრისას აღნიშნა, რომ რუსეთთან ნორმალური ურთიერთობების დამყარება აუცილებელია. მისი თქმით, ეს თბილისშიც ესმით. მან ისაუბრა აგრეთვე საქართველო-უკრაინის ურთიერთობის პრობლემებზეც, რომელიც ექს-პრეზიდენტ მიხეილ სააკაშვილისა და სხვა ყოფილი ქართველი ჩინოვნიკების უკრაინაში საქმიანობასთანაა დაკავშირებული.

(…)

“გაერთიანებულ დემოკრატებში” ნინო ბურჯანაძის მოსკოვურ ვიზიტს წარმატებულად აფასებენ და ამბობენ, რომ რუსების მხრიდან ამხელა ინტერესის გამოხატვას არც კი ელოდნენ. პუტინს არ ხვდება, თუმცა პარტიაში იმასაც გვიმხელენ, რომ ეს უახლოეს მომავალში იგეგმება.

ნინო ბურჯანაძის მოსკოვური ვიზიტის მიზნებსა და მოლოდინებზე უფრო დაწვრილებით „რეზონანსს“ „გაერთიანებული დემოკრატების“ პოლიტიკური მდივანი გიგლა ბარამიძე ესაუბრა.

გიგლა ბარამიძე: კონფერენციამდე და მის შემდეგაც არაერთი შეხვედრა დაიგეგმა, რაც ჩვენთვის მნიშვნელოვანია. მოგეხსენებთ, სამი წელია გავიძახით, რომ საქართველოს მთავრობამ ამ იწილო-ბიწილოს თავი უნდა დაანებოს და როგორმე დიალოგი დაიწყოს. მიუხედავად იმისა, რომ რუსეთთან დიპლომატიური ურთიერთობა არ გვაქვს და ჩვენი ტერიტორია ხელყოფილია, ამ საკითხების მოწესრიგების ერთადერთი გზა დიალოგია.

ესენი კი ჟენევის ფორმატს ვერ გასცდნენ, რომლის შედეგიც ნულია. პოლიტიკური საკითხების გადასაჭრელად შეხვედრები უფრო მაღალ დონეზე უნდა მოეწყოს. ხელისუფლება ამას არ აკეთებს. ამიტომაც გადავწყვიტეთ, რომ ეს ვიზიტი ამ კონტექსტშიც გამოგვეყენებინა.

– რა თემებზე ისაუბრა ქალბატონმა ნინომ შეხვედრებზე?

– ამ დროისათვის ძალიან საინტერესო შეხვედრა გაიმართა ნარიშკინთან. საუბარი ყველაფერს შეეხო – ტერიტორიულ მთლიანობას, აფხაზეთისა და ოსეთის დე-ფაქტო ლიდერებთან პირდაპირ დიალოგს, ამ საკითხისადმი რუსეთის დამოკიდებულებას, უვიზო მიმოსვლის აღდგენას და იმასაც, რომ უკვე აუცილებელია შეხვედრა უმაღლეს დონეზეც მომზადდეს. მართალია, ნინო ბურჯანაძე ოფიციალური პირი არაა და მხოლოდ თავისი პოლიტიკური ავტორიტეტის გამოყენება შეეძლო, მაგრამ მას მაინც დიდი პატივით იღებდნენ და უხაროდათ, რომ როგორც იქნა საკითხი დაიძრა და გაჩნდა შესაძლებლობა, ჩვენი ქვეყნის პირველ პირებს შორის დიალოგი დაიწყოს.

გარდა თანამდებობის პირებისა, ქალბატონ ნინოსთან ქართული დიასპორის წარმომადგენლებმაც მოისურვეს შეხვედრა. მოგეხსენებათ, რუსეთში მილიონამდე ქართველი ცხოვრობს და ჩანს, რომ მათაც ბევრი აქვთ სათქმელი. მათაც უნდათ საქართველოში დაბრუნება და ხელისუფლებისაგან პირობების შექმნას ითხოვენ.

მედიაც დაინტერესდა ბურჯანაძის ვიზიტით. მას გამოსვლები ჰქონდა რუსეთის პირველ არხზე, „დოჟდზე“, „როსიაზე“, „რაშა თუდეიზე“, „ენტევეზე“ და ასევე რამდენიმე ჩართვა საქართველოს ტელევიზიებთანაც. ინტერვიუები ჩამოართვეს „სი-ენ-ენმა“, „ევრონიუსმა“, „ბი-ბი-სიმ“ და გერმანიის ტელევიზიებმა.

საუბრისას მუდმივად ფიქსირდებოდა საქართველოს ყველაზე მძლავრი არასაპარლამენტო ოპოზიციური პარტიის აზრი – რომ ჩვენი სურვილი ეროვნულ ინტერესებზე დაყრდნობით საქართველოს ტერიტორიული მთლიანობის აღდგენაა და რომ ამისათვის ყველაფერი უნდა გაკეთდეს. თუმცა, იმისათვის, რომ ეს მოხდეს, გვინდა თუ არა, რუსეთთან დიალოგია საჭირო.

ახლა ვიღაც იკითხავს, რა აზრი აქვს ამასო, მაგრამ დიალოგის დაწყებას აზრი ყოველთვის აქვს. ჩვენ ხომ ამ კონფლიქტს იარაღის ძალით ვერ მოვაგვარებთ. ამიტომ დიალოგი აუცილებელია. მით უმეტეს, რომ იქაური პოლიტიკური წრეების დიდი ინტერესი ცხადია. მაგალიად კარასინი ამბობდა, რომ იგი მაღალი რანგის ქართველი პოლიტიკოსის რუსეთში ჩასვლით ბედნიერია. უხარია, რომ საუბარი სერიოზულ საკითხებზე იწყება. არა ვაჭრობასა და ყველის გაყიდვაზე, არამედ პოლიტიკურ თემებზე – ტერიტორიულ მთლიანობაზე და ა.შ.

რეალურად, საქართველოს ხელისუფლებას თავისი პოზიცია უმაღლეს დონეზე რუსეთის ხელისუფლებასთან არ დაუფიქსირებია. სულ ვიღაცების მეშვეობით კონტაქტობს და ეს პირველი შემთხვევაა, როცა კონტაქტი უშუალოდ შედგა. მართალია ბურჯანაძე ოფიციალური პირი არაა, მაგრამ ყოფილი პრეზიდენტი და პარლამენტის თავმჯდომარეა და მის პოზიციას დიდი მნიშვნელობა აქვს.

რა აჯობებს, თუკი მის ამ ურთიერთობებს ჩვენი დღევანდელი ხელისუფლება გამოიყენებს? თუმცა, მარგველაშვილმა ბაქოში პუტინს ზურგი შეაქცია, იმის მაგივრად, რომ არაფორმალური საუბარი მაინც გაემართათ. ჩვენ რუსებს კულუარულად არ ვხვდებით, როგორც ამას წინა ხელისუფლების დროს აკეთებდნენ. გაიძახოდნენ, რუსებს არ შევხვდებითო და მერე მოაწყობდნენ ისე, რომ სადმე ევროპაში, რომელიმე უწყების დერეფანში ვითომ შემთხვევით შეხვედროდნენ. ამის მცდელობა დღევანდელ ხელისუფლებასაც აქვს. ჩვენ კი ყველაფერს საჯაროდ ვამბობთ – ვის ვხვდებით, რაზე ვისაუბრებთ და ა.შ. ეს ჩვენი მხრიდან ერთგვარი გმირობაც კია იმ ფონზე, რომ ყოველი მხრიდან გავეშებულად გვჭამენ. საზოგადოებას არ ვატყუებთ, მიგვაჩნია, რომ ის, რასაც ვაკეთებთ, აუცილებელია.

– შეხვდება თუ არა იგი პუტინს?

– ამ ეტაპზე ეს არ იგეგმებოდა, თუმცა უახლოეს მომავალში შესაძლებელია. პუტინი ამ მომენტში ბრაზილიის, ჩინეთის, სამხრეთ აფრიკისა და ინდოეთის პირველ პირებთან შეკრებაზე იმყოფებოდა.

– თქვენვე აღნიშნეთ, რომ ამ პოზიციის გამო ხშირად გაკრიტიკებენ. როგორ ფიქრობთ, რამდენად იმოქმედებს ეს პარტიის რეიტინგზე, თქვენ ხომ მომავალ არჩევნებში მონაწილეობას გეგმავთ?

– კი, რა თქმა უნდა, ამ შემთხვევაში პარტიულ ინტერესებზე მაღლა სახელმწიფოებრივ ინტერესებს ვაყენებთ. საქართველოს მოსახლეობის დიდ ნაწილს რუსეთთან ნორმალური ურთიერთობა უნდა. საზოგადოებას ჩვენი პოზიცია მოსწონს და არ მგონია, ხმები დაგვაკლდეს. ამ შემთხვევაში სახელმწიფო და საარჩევნო ინტერესები ერთმანეთს კვეთს. როგორც ზემოთაც ვთქვი, რუსეთში მილიონამდე ქართველი ცხოვრობს და რაც უნდა ვიძახოთ, რომ ევროპაში მიმოსვლა გვინდა, საქართველოს მოსახლეობის დიდ ნაწილს პირველ რიგში რუსეთთან უვიზო მიმოსვლა აინტერესებს. იქ ნათესავები ჰყავთ, მეგობრები, სავაჭრო ურთიერთობები აქვთ და ა.შ. საზოგადოება ამით რომ დაინტერესებულია, ამაზე ის ინტერესიც მეტყველებს, რაც ქალბატონი ნინოს რუსეთში ვიზიტმა გამოიწვია. იმდენად დიდი ინტერესია, რომ ამას არც ველოდით.

– ანუ, ფიქრობთ, რომ რუსეთსა და ევროპას შორის საზოგადოება არჩევანს რუსეთზე აკეთებს? თუ თვლით, რომ ამგვარი არჩევანის გაკეთება საჭირო არაა და ერთთან კარგი ურთიერთობა მეორესთან იგივეს ხელს არ უშლის?

– ევრაზიულ კავშირში შესვლაზე არ ვსაუბრობთ. ჩვენ ვსაუბრობთ იმაზე, რომ საქართველო ოდითგანვე ევროპული ცივილიზაციის ნაწილი იყო. რაღაც პერიოდში ამ კავშირის ისტორიული წყვეტა მოხდა, მაგრამ ახლა კვლავ იქით მივიწევთ. თუმცა, ეს იმას არ ნიშნავს, რომ მეზობელთან, რომელთანაც პრობლემების მიუხედავად ასევე ისტორიული კავშირები გვაქვს, ურთიერთობა შევწყვიტოთ. ერთი მეორეს არ გამორიცხავს. ერთი თუ მეორე – საკითხი ასე არ უნდა დაისვას. სხვათა ორის ასე საკითხს არც ევროსაბჭო აყენებს., არც ევროკავშირი, არც სახელმწიფო დეპარტამენტი. ყველა გვეუბნება, რომ სირთულეებისა და ტერიტორიების დაკარგვის მიუხედავად, რუსეთთან კონტაქტი აუცილებელია. ამის მაგალითს თავადაც გვაძლევენ. მრჩება შთაბეჭდილება, რომ დღევანდელ ხელისუფლებას რუსეთთან მოლაპარაკების რესურსები არ გააჩნია. ამიტომაც მუდმივად აცილებას ცდილობენ. ამიტომაც ვთავაზობთ დახმარებას. თუკი თავად არ აქვთ მოლაპარაკების თავი, ჩვენი პოტენციალი და შესაძლებლობები გამოიყენონ.

– ანუ, მზად ხართ ერთგვარი შუამავლის როლი შეასრულოთ?

– რა თქმა უნდა. ეს ჯერ კიდევ სამი წლის წინ შევთავაზეთ. ჩვენთან ძლიერი ჯგუფია, დიდი გამოცდილებაა დაგროვილი და ხელისუფლებას ვთავაზობთ გამოგვიყენონ. თუმცა, მათ არაფრის მოსმენა არ უნდათ. ის ხელისუფლება კი, რომელსაც მოსმენა არ უნდა, განწირულია. ამიტომაც არ აქვთ შედეგი. მთავრობას უნდა, რომ ევროკავშირმა და აშშ-მა ხელი ჩაჰკიდონ და ათრიონ. ჩვენი პრობლემები მათ მოაგვარონ. არადა ახლახან სახელმწიფო დეპარტამენტის ანგარიშში უმკაცრესად მიგვითითეს – გაინძერით და თქვენს საზღვრისპირა რეგიონებს ყურადღება მიაქციეთო. ეს დოკუმენტში ჩაიწერა და სირცხვილი არ არის? ესენი კი გაისუსნენ, ვითომ არაფერი მომხდარა. ასეთი ჩავარდნა უამრავი მიმართულებითაა.

„ახალი თაობა“, 11 ივლისი, 2015 წელი

ინტერვიუ დავით დარჩიაშვილთან: „ბიძინა ივანიშვილის დასაყრდენი შეიძლება ნინო ბურჯანაძე გახდეს“

შორენა მარსაგიშვილი

(შემოკლებით)

ვისი დავალებით აკეთებენ მმართველი გუნდის წევრები ნატოს საწინააღმდეგო განცხადებებს, რატომ არ მერყეობს ივანიშვილი საგარეო კურსის არჩევისას, რატომ არის საეჭვო რესპუბლიკელების პროდასავლურობა, რა კავშირი აქვს ამ ყველაფერთან ნინო ბურჯანაძეს? – ამის შესახებ “ახალ თაობას” ნაციონალური მოძრაობის ერთ-ერთი ლიდერი დავით დარჩიაშვილი ესაუბრება.

დავით დარჩიაშვილი:

- მმართველი გუნდის ცალკეული წარმომადგენლები ნატოსთან დაკავშირებით უმნიშვნელოვანეს სტრატეგიულ განცხადებებს აკეთებენ, რომლებიც, ერთი შეხედვით, არ შეესაბამება კოალიციის მიერ ღიად დეკლარირებულ კურსს. აქედან გამომდინარე თავისუფლად შემიძლია ვთქვა, რომ ნატოს წინააღმდეგ გაკეთებული განცხადებები „ქართული ოცნების“ ლიდერებთან არის შეთანხმებული. არც გოგო ქავთარაძე, არც გოგი თოფაძე და არც ზურაბ ტყემალაძე ამ განცხადებებს დამოუკიდებლად არ გააკეთებდნენ.

- რატომ გგონიათ, რომ დამოუკიდებლად არ გააკეთებდნენ?

- ასეთი რამეები პოლიტიკაში არ ხდება. სამივე მათგანმა ნატოს საწინააღმდეგო განცხადებები „ქართული ოცნების“ ლიდერებთან შეთანხმებით გააკეთა. ეს არის მინიმუმ ზონდირება და ნიადაგის მოსინჯვა.

- რას უსინჯავენ ნიადაგს?

- ნატოს მიმართ საზოგადოების განწყობა აინტერესებთ. აინტერესებთ, რა რეაქცია ექნება საზოგადოებას პრორუსულ განცხადებებზე. არც იმას გამოვრიცხავ, რომ ეს განცხადება ნინო ბურჯანაძესთან იყოს დაკავშირებული.

- ბურჯანაძე რა შუაშია მათ განცხადებებთან?

- მასაც სურს, მისთვის სასურველი განცხადებები ჩაიტანოს თბილისიდან მოსკოვში, რითაც რუსებთან იამაყებს და ეტყვის, რომ აი, ხომ ხედავთ, საქართველოში მართლა ყველა ნატოს მომხრე კი არ არის. ეს სერიოზული პოლიტიკური თამაშია.

- ნინო ბურჯანაძე ახსენეთ და როგორ ფიქრობთ, გახდება ის ბიძინა ივანიშვილის ახალი დასაყრდენი? ექსპერტთა ნაწილი ამაზე უკვე ალაპარაკდა.

- ხელისუფლება საგარეო პოლიტიკის მიმართ ავლენს უპრინციპობას, ასეთი უპრინციპობის დროს კი ყველაფერია მოსალოდნელი, მათ შორის ისიც, რომ მომავალ არჩევნებში ივანიშვილი ბურჯანაძეს დაეყრდნოს.

- ისევ ნატოს წინააღმდეგ გაკეთებულ განცხადებას დავუბრუნდეთ. ამას კოალიციაში შემავალი რესპუბლიკური პარტია ოფიციალურად გაემიჯნა. ეს არაფერს ნიშნავს?

- ეს არის კომფორტული განცხადება. თუ მართლაც ემიჯნებიან გოგი ქავთარაძის პოზიციას, მაშინ სხვანაირად უნდა მოიქცნენ.

- სხვანაირად, როგორ?

- განცხადება უნდა გაკეთდეს მთელი უმრავლესობის სახელით. ოფიციალურად უნდა მოხდეს ამ პოზიციის დაგმობა. მარტო გამიჯვნა საკმარისი არ არის. ამ თემაზე კოალიციაში უნდა იმსჯელონ და შედეგები საზოგადოებას გააცნონ. იმის ძახილი, რომ ეს ჩვენ არ გვეხება, საქმეს არ წაადგება. ეს განცხადება ყველას ეხება, ვინც კოალიცია „ქართულ ოცნებაშია“. საგარეო კურსთან დაკავშირებით მმართველ გუნდში ამხელა განსხვავება არ შეიძლება იყოს.

- ზემოთ აღნიშნეთ, რომ ნატოს საწინააღმდეგო განცხადებებს იმიტომ აკეთებინებენ პოლიტიკოსებს, რომ საზოგადოებრივი აზრის შემზადება უნდათ. თუ „ქართულ ოცნებას“ ასეთი გეზი აქვს აღებული, უფრო წონიან ფიგურებს რატომ არ ავალებენ მსგავსი ტიპის განცხადებების გაკეთებას?

- ბიძინა ივანიშვილს არანაირი საგარეო პოლიტიკური პრინციპი არ გააჩნია. მისთვის სულერთია, რა ორიენტაცია ექნება საქართველოს. ყოფილ პრემიერს მხოლოდ ის უნდა, რომ თავად გრძნობდეს თავს კომფორტულად. ამასთან, იმდენი გამჭრიახობა კი აქვს, რომ რუსეთში არსებული პრობლემები დაინახოს. მისი კაპიტალი დასავლეთის დამოკიდებულებაზეა მიბმული. ის ხან დასავლეთისკენ მიდის, ხან _ რუსეთისკენ. ნიადაგის მოსასინჯად ძირითადად მეორეხარისხოვან ფიგურებს აკეთებინებს განცხადებებს. თუმცა მრეწველებს მთლად მეორეხარისხოვნებს ვერ ვუწოდებთ. ფასადურად რესპუბლიკელებს აძლევს მაღალ თანამდებობებს, რეალურად კი სხვა გავლენის ცენტრები იქმნება, რომლებიც სხვა რაღაცებს აკეთებენ. „ასავალ-დასავალს“ რომ მისცემს ინტერვიუს პრემიერი, ისიც დიდი სიგნალია.

- რისი სიგნალია, ბატონო დავით? „ასავალ-დასავალი“ არის ჩვეულებრივი გაზეთი და რა გასაკვირია, პრემიერმა თუ რომელიმე გაზეთს ინტერვიუ მისცა?

- საქმეც ისაა, რომ „ასავალ-დასავალი“ არ არის ჩვეულებრივი გაზეთი. ეს გამოცემა არაევროპული ენის მატარებელია. ამ ყველაფერს თუ ერთად ავკინძავთ, სავალალო სურათს ვღებულობთ. ის მერყეობა, რაც დღეს საგარეო პოლიტიკასთან მიმართებაშია, საქართველოსთვის კარგად არ დასრულდება.

- ამ მერყეობამ სადამდე შეიძლება მიგვიყვანოს? არის იმის ალბათობა, რომ ნატოს ნაცვლად ერთ მშვენიერ დღეს რუსეთის კარზე მივაკაკუნოთ?

- როდესაც მმართველ ელიტას ჩამოყალიბებული პრინციპი არ აქვს, ამან ის შეიძლება ყველგან მიიყვანოს. ნატოსთან და ევროკავშირთან ინტეგრაციაში ასეთი უპრინციპობა ხელს არავითარ შემთხვევაში არ შეგვიწყობს.

- რესპუბლიკელების პოზიცია მხოლოდ ფორმალობა იყოო, განაცხადეთ. ბევრი მიიჩნევს, რომ ამის გამო კოალიციაში რაღაც უთანხმოება შეიძლება მოხდეს. მრეწველები ღიად აფიქსირებენ რუსეთის მიმართ სიმპათიებს, რესპუბლიკელები კი _ ანტიპათიას. თქვენ რას ფიქრობთ, შეძლებენ ერთად ყოფნას?

- კოალიციაში შემავალ ძალებს, მათ შორის რესპუბლიკელებსაც, პრინციპები რომ გააჩნდეთ, აქამდე ერთად ვერ იქნებოდნენ. რესპუბლიკელების პროდასავლურობა, ჩემი აზრით, მოჩვენებითია. პრონატოური და ანტინატოური ძალების ერთად ყოფნა შეუძლებელია. ასეთი რამე არაფერში არ ჯდება.

- აბა როგორ არიან ერთად?

- პრინციპები არ აქვთ და ამიტომაც არიან ერთად.

- ამ განსხვავებულობას კოალიციის წევრები თავიანთ სიძლიერედ მიიჩნევენ.

- თუ უპრინციპობა ვინმესთვის სიძლიერეა, ღმერთმა გაუმარჯოს თავის რწმენაში.

„ახალი თაობა“, 11 ივლისი, 2015 წელი

ინტერვიუ გოგი ქავთარაძესთან: „მე ვთქვი, რომ ნატოს რაც შეიძლება სწრაფად უნდა მიგვიღოს“

ნათია ხურცილავა

(შემოკლებით)

„ახალ თაობასთან“ ინტერვიუში „ქართული ოცნების“ წევრი, საპარლამენტო უმრავლესობის დეპუტატია გოგი ქავთარაძე პარლამენტის სხდომაზე ნატოსტან დაკავშირებით მის მიერ გაკეთებული განცხადების შესახებ საუბრობს.

- ბატონო გოგი, პარლამენტის სესიაზე თქვრენ მიერ გაკეთებულ განცხადებას არაერთგვაროვანი შეფასებები მოჰყვა: „ნაციონალურმა მოძრაობამ“ „ქართული ოცნება“ კიდევ ერთხელ დაადანასაულა პრორუსულ ორიენტაციაშიო… რა იყო თქვენი განცხადების მიზანი?

- განცხადება ნატოსთან მიმართებით გავაკეთე, მაგრამ ის სრულიად სხვა კონტექტში ვთქვი და სრულიად სხვაგვარად იქნა აღქმული. რასაკვირველია, ჩემი განცხადება არავიტარ შემთხვევაში არ იყო მიმართული ნატოს წინააღმდეგ. ამ განცხადებას, ვინც ნორმალურია, ის ნორმალურად აღიქვამს და ვინ არა, ეს მისი პრობლემაა.

მე ჩემი ქვეყნის თავმოყვარეობაზე ვაკეთებდი აქცენტს. მე ვთქვი, რომ ვერ გავიგე აქამდე რატომ ვერ შევდივართ ნატოში-მეთქი და ვიღაცეებმა კი იმაზე დაიწყეს საუბარი, რომ მე საქართველოს ნატოში შესვლა არ მინდა. ეს ხომ არის აბსურდი? ვიმეორებ – მე ვამბობ, რატომ ვერ სევდივართ ალიანსში-მეთქი და ვირაცეები კი მაბრალებენ – ნატოში შესვლა არ უნდაო. მე ვამბობ, რომ ნატოში შესვლა უნდა დაჩქარდეს და რანაირად შეიძლება ნატოში შესვლა არ მინდოდეს? მე ზალიან ცამოყალიბებულად ვთქვი, რომ ჩვენ ვართ ღირსი მიგვიღონ ნატოში, რომ ჩვენი ჯარისკაცები იბრძვიან ნატოს წევრი ქვეყნების ჯარისკაცების გვერდით და არავისზე ნაკლებად არ იცავენ მშვიდობასა და უსაფრთხოებას.

- „ნაციონალები“ აცხადებენ, რომ ამ ხელისუფლებას არ ჰქონდა მიზნად ნატოს მიმართულებით წასვლა. ამაზე რას იტყვით?

- არასოდეს ეს საკითხი დღის წესრიგში არ დამდგარა, რომ ჩვენ ამ მიმართულებით არ წავსულიყავით. ჩვენს ხელისუფლებას ყოველთვის უნდოდა და ყოველთვის აყენებდა საკითხს, რომ ნატოში შევსულიყავით. ჩემი განცხადებათ ამას ადასტურებს. მე მინდა, რომ რაც სეიძლება სწრაფად მიგვიღონ ნატოში

- ანუ გამოდის, რომ ხელისუფლების წარმომადგენლებმა, კერძოდ, თავდაცვის მინისტრმა თინა ხიდაშელმა და დავით ბერძენიშვილმა არასწორად გაიგეს?

- ზუსტად ვერ გეტყვით, მაგრამ მე მოჩვენა, რომ მათ ჩემი განცხადება არ მოუსმენიათ და ვიღაცამ უთხრა… დარწმუნებული ვარ, რომ თინა ხიდაშელს ჩემი განცხადება არ უნახავს, თორემ ასეთ კომენტარს არ გააკეთებდა…