„ვერსია“: ინტერვიუ სოსო ვახტანგაშვილთან: „ბერშუეთთან ე.წ. საზღვრის გადმოწევაზე ატეხილი აჟიოტაჟი ნაციონალების საარჩევნო კამპანიის ნაწილია!“ // „ტელევიზიით ორჭოსანთან აღმართული ბარიერი გააშუქეს, რომელმაც დაახლოებით ორი წლის წინ გადმოიწია და არა ახლა“
——
„ახალი თაობა“: ინტერვიუ მამუკა გვაძაბიასთან: „ოხრახუშით, ქინძითა და ღვინით ვაჭრობას ეწირება საქართველოს ინტერესები“ // „მოჩვენებითი სიმშვიდე დამღუპველია“
„ახალი თაობა“: ბიძინა ივანიშვილი კახა კალაძეზე კომპრომატების გამოქვეყნებას აპირებს? // ინტერვიუ ლევან ხაბეიშვილთან: „არაა გამორიცხული, პოლიტიკურ სცენაზე ირაკლი ღარიბაშვილი გამოვიდეს~ // „ყოფილი პრემიერი ამერიკელების ინიციატივის შემდეგ გაუჩინარდა~
„ახალი თაობა“: ინტერვიუ დავით ზურაბიშვილთან: „ქართულ ოცნებაში~ სხვადასხვა ინტერესთა ჯგუფებია – ეს ბიძინა ივანიშვილის მართვის სტილია~
„ახალი თაობა“: ინტერვიუ გელა ნიკოლაიშვილთან: „ფარმან ჯეირანლის დაპატიმრებაში აზერბაიჯანის ინტერესი იკვეთება“
——————-
„ვერსია“, 10-12 ივლისი, 2017 წელი
ინტერვიუ სოსო ვახტანგაშვილთან: „ბერშუეთთან ე.წ. საზღვრის გადმოწევაზე ატეხილი აჟიოტაჟი ნაციონალების საარჩევნო კამპანიის ნაწილია!“ // „ტელევიზიით ორჭოსანთან აღმართული ბარიერი გააშუქეს, რომელმაც დაახლოებით ორი წლის წინ გადმოიწია და არა ახლა“
თათია გოჩაძე
ოკუპანტებმა სოფელ ბერშუეთთან ე.წ. ადმინისტრაციული საზღვარი კიდევ 500 მეტრით გადმოწიეს. სწორედ ეს საკითხი განიხილეს 7 ივლისს, პრაღაში აბაშიძე-კარასინის შეხვედრაზე, რის შემდეგაც კრემლის წარმომადგენელმა, გრიგორი კარასინმა განაცხადა, ჟენევის ფორმატის წინ ამ თემას გარკვეული პოლიტიკური ძალები განგებ ააქტიურებენ, რადგან სურთ, რუსეთმა და საქართველომ დიალოგი ვერ შეძლონო. გრიგორი კარასინს, პირდაპირ თუ ირიბად, ჩვენი რესპონდენტიც ეთანხმება და ამბობს, რომ ,,მცოცავ ოკუპაციაზე” აჟიოტაჟი საფუძვლიანად, მაგრამ ამავე დროს, პოლიტიკური ქულების დასაწერად ატყდა.
რა ხდება სინამდვილეში ბერშუეთთან და ვის აწყობს ,,ხანძარი” ადგილობრივი თვითმმართველობის არჩევნების წინ? ,,ვერსია” ყოფილ პარლამენტარს, ეროვნული ფორუმის წარმომადგენელს, სოსო ვახტანგაშვილს ესაუბრა.
- რაც სოფელ ბერშუეთთან ხდება, ცუდია, მაგრამ არა ახალი და კარგი იქნებოდა, აჟიოტაჟი აქამდეც ატეხილიყო. სინამდვილეში, ბერშუეთთთან გადმოწეული მავთულხლართები ე.წ. ბორდერიზაციის განმსაზღრელი ბანერი არაა. ტელევიზიით სოფელ ორჭოსანთან აღმართული ბარიერი გააშუქეს, რომელმაც დაახლოებით, ორი წლის წინ გადმოიწია და არა ახლა, – ამბობს სოსო ვახტანგაშვილი.
- მახსოვს, მაშინ შემთხვევის ადგილზე პოლიტიკოსები და ჟურნალისტები ჩავიდნენ…
- დიახ… ახლა ბანერი სოფელ ბერშუეთში გადმოწიეს, რაც თავისთავად ძალიან ცუდია, მაგრამ ეს ბანერი ცენტრალური მაგისტრალიდან 500 მეტრით კი არა, დაახლოებით 10-12 კილომეტრითაა დაშორებული. ხელისუფლების ადვოკატობას არ ვაპირებ, მაგრამ ეს აჟიოტაჟი პოლიტიკურ ინტერესებთანაა დაკავშირებული და ეს რწმენა მაშინ გამიღრმავდა, როცა ბანერთან ნაციონალური მოძრაობის თბილისის მერობის კანდიდატი ზაალ უდუმაშვილი დავინახე. აღშფოთების უფლება, რა თქმა უნდა, აქვს, მაგრამ როცა თქვა, ყველაფერი ხელისუფლების ბრალია და ადგილობრივი თვითმმართველობის არჩევნები რაღაცას შეცვლისო, მივხვდი, პოლიტიკური ინტერესი იყო.
- იმის თქმა გინდათ, რომ აჟიოტაჟი ნაციონალების საარჩევნო კამპანიის ნაწილია?
- დიახ, თუმცა ბორდერიზაცია უდიდესი პრობლემაა, რაც ხელისუფლებას მემკვიდრეობით ერგო… სხვათა შორის, ადამიანების გატაცების თავიდან ასაცილებლად შეგვიძლია, თანამედროვე ტექნიკა – ვიდეოკამერები გამოვიყენოთ. ჯერ კიდევ ორი წლის წინ ვეუბნებოდი ხელისუფლებას, იმ განსაკუთრებულ ზონებში, სადაც ადამიანების გატაცება ყველაზე ხშირად ფიქსირდება, გონიერი, მოძრავი ან სტაციონარული კამერები დაგვემონტაჟებინა, მაგრამ ხელისუფლება უუნარო და უნიათოა, ამიტომ მოქალაქეებს ისე გვტაცებენ, როგორც წიწილებს და გამოსასყიდს ისე ითხოვენ, როგორც ,,ლეკიანობის” დროს. მსგავსი ფაქტები უფრო გახშირდება – იგივეს გაკეთებას აფხაზეთის მიმართულებითაც დაიწყებენ.
- ვიდეოკამერების გარდა, ხელისუფლებას ,,მცოცავი ანექსიის” შესაჩერებლად კიდევ რას სთავაზობთ?
- ხელისუფლებამ ყველაფერი უნდა გააკეთოს, თუნდაც, სამთავრობო თათბირი ჩაატაროს ზუსტად იმ ტერიტორიაზე, სადაც ადმინისტრაციული საზღვარია და რუსებს უთხრას, რომ ერთ ნაბიჯსაც არ დავთმობთ.
- გგონიათ, ეს შედეგს გამოიღებს?
- ეს იმის დემონსტრირება იქნება, რომ ყველაფერს ვაპროტესტებთ. მიუხედავად იმისა, რომ ხელისუფლებამ ეს პრობლემა მემკვიდრეობით მიიღო, პასუხისმგებლობისგან არ თავისუფლდება, ამიტომ ქმედითი ნაბიჯები უნდა გადადგას…
- ბერშუეთის, ასე ვთქვათ, ინციდენტით, კიდევ რამდენი მეტრი მიწა წაგვართვა ოკუპანტმა?
- როგორც ამბობენ, საზღვარმა 500 მეტრით გადმოიწია და ტრასას მოუახლოვდა, რაც ყველაზე დიდი პრობლემაა და აგიხსნით, რატომაც: თავის დროზე, როცა მიხეილ სააკაშვილმა ,,სამხრეთ ოსეთის” ადმინისტრაციული ერთეული აღიარა, მასში ახალგორიც შეიყვანა, სწორედ ახალგორის სოფელია ორჭოსანი. კომუნისტების დროს ახლაგორისა და გორის რაიონებს შორის არაფორმალური გარიგება დაიდო, რომ ორჭოსნის მიწებს გორის რაიონის მეურნეობა დაამუშავებდა, რადგან ეს სოფელი გორთან ახლოსაა. მოკლედ, ორჭოსანი დღეს უკვე ე.წ. სამხრეთ ოსეთის შემადგენლობაშია ისევე, როგორც ბერშუეთი და ოსებმაც ყოფილი საბჭოთა ოსეთის ოლქის კუთვნილი ტერიტორია მოითხოვეს. ახლა არჩევნები მოგვადგა და ორი წლის წინ გადმოწეულ ორჭოსნის ბანერზე აჟიოტაჟი ხელოვნურად ატეხეს, თუმცა ვიმეორებ: ეს დიდი ხნის პრობლემაა.
- ეს საკითხი აბაშიძე-კარასინის შეხევდრაზე განიხილეს და ალბათ, ჟენევის ფორმატშიც ისაუბრებენ. ამგვარი მოლაპარაკებები შედეგს მოიტანს?
- აბაშიძე-კარასინის ფორმატი პოლიტიკური საკითხების განხილვას არ მოიცავს, თუმცა ეს ფაქტი აქტუალობიდან გამომდინარე განიხილეს. ვფიქრობ, აქედან არაფერი გამოვა, რადგან რუსეთს აქვს არგუმენტი, რომ ქართულმა მხარემ ე.წ. სამხრეთ ოსეთის რესპუბლიკა იმ ტერიტორიაზე, სადაც საბჭოთა სამხრეთ ოსეთის ტერიტორიული ოლქი არსებობდა, აღიარა. შუამავალი ევროკავშირის მონიტორებიც დაადასტურებენ, რომ რუკების მიხედვით, რომლითაც ე.წ. ბორდერიზაცია ხდება, ე.წ. სამხრეთ ოსეთის ადმინისტრაციული საზღვარი იქ გადის.
- ანუ ბერშუეთთან საზღვრის გადმოწევაც ,,კანონიერად“ მოხდა?
- დიახ, ეს სოფელი ყოფილი ,,სამხრეთ ოსეთის ავტონომიური რესპუბლიკის” შემადგენლობაში იყო. როცა სააკაშვილმა სანაკოევის ადმინისტრაცია აღიარა, შეიძლებოდა, ე.წ. სამხრეთ ოსეთის შემადგენლობაში ახალგორი არ შესულიყო და დღეს ორჭოსნის პრობლემაც არ გვექნებოდა.
- ბერშუეთთან ქართველმა ახალგაზრდებმა აქცია გამართეს და კარვებიც დასცეს. ეს ოკუპანტს ხომ არ გააღიზიანებს?
- აქციის შინაარსსა და ფორმას გააჩნია, თუმცა სწორი არც პრობლემის მიჩქმალვა იქნება. საერთოდ, ასეთი აქციების დროს მაქსიმალურად ფრთხილად უნდა ვიყოთ, რათა ჩვენი ქვეყნის ინტერესები არ დავაზიანოთ. ცნობილია, რომ დაახლოებით ორი წლის წინ, ყოფილი გუბერნატორი, ბარნოვი მავრთულხლართსმიღმა გადავიდა _ ჩვენს სამართალდამცავებს არ დაემორჩილა. რამდენადაც ვიცი, რუსი ე.წ. მესაზღვრეები ანუ ოკუპანტები დაახლოებით 50 მეტრში იყვნენ ჩასაფრებულნი და არსებობდა შანსი, ინციდენტი მომხდარიყო, რასაც უარესი პროცესები მოჰყვებოდა. ქართული დროშა, რომელიც აქციის მონაწილეებმა იმ ტერიტორიაზე დაკიდეს, რომელსაც ვერ ვაკონტროლებთ, მაშინ დეფაქტო ადმინისტრაციის ერთ-ერთმა ოსმა წარმომადგენელმა ჩამოხსნა და დაკეცა _ ჩვენს სიმბოლიკას ძალიან კულტურულად მოექცა, მაგრამ ერთი წამით წარმოიდგინეთ, ასე რომ არ მოქცეულიყო და ქართული დროშა გაეთელა, ყველაფერი შეიძლება, სერიოზულ შეიარაღებულ კონფლიქტამდე მისულიყო. კარგი იქნება, თუ ამ სიტყვებს არ ამოჭრით – ყველა პოლიტიკური პარტია ასეთი უმნიშვნელოვანესი საკითხების ირგვლივ უნდა გაერთიანდეს. მივმართავ პოლიტიკოსებს: ამგვარ თემებს ნუ გამოიყენებთ საკუთარ საარჩევნო კამპანიაში და ნუ ეცდებით, ასეთი საკითხით საკუთარ მიზანს მიაღწიოთ!
- კულუარებში იმაზეც საუბრობენ, რომ რუსულ-ქართული საპარლამენტო დელეგაციების შეხვედრა იგეგმება. ამ ფორმატზე რას ფიქრობთ?
- წარმოდგენა არ მაქვს, რაზე უნდა ისაუბრონ. დარწმუნებული ვარ: ამ ეტაპზე, მსგავსი ტიპის შეხვედრა მხოლოდ შეხვედრისთვის ჩატარდება და შედეგს არ გამოიღებს.
- მოკლედ, ბატონო სოსო, აჟიოტაჟი საფუძვლიანად, მაგრამ პოლიტიკური ქულების დასაწერად ატეხილი გგონიათ, არა?
- დიახ… რეალურად, ადმინისტრაციული ოლქის ,,საზღვრის” ტერიტორიას მოჰყვებიან. ეს პროცესი არ დასრულდება, რადგან ადმინისტრაციული ზოლი სრულად ჯერ კიდევ არაა დატვირთული. საერთოდ, ძალიან დიდ სივრცეზეა საუბარი: წარმოიდგინეთ, ხაშურის რაიონიდან მცხეთის რაიონამდე არსებული მთელი ადმინისტრაციული საზღვარი ე.წ სამხრეთ ოსეთისაა; ამიტომაც ვიმეორებ – ხელისუფლებამ ქმედითი ზომები უნდა გაატაროს და ადმინისტრაციულ საზღვართან თუნდაც დემონსტრაციულად, მთავრობის სხდომა ჩაატაროს!
————
8 ივლისს, გორის მუნიციპალიტეტის სოფელ ბერშუეთთან ახალგაზრდებმა აქცია – „არა ოკუპაციას“ გამართეს. აქციის მონაწილეებმა მოწოდებებით – „არა ოკუპაციას”, ,,რუსეთი ოკუპანტია” ე.წ. მესაზღვრეების მიერ ქართული მხარის მიერ კონტროლირებად ტერიტორიაზე მწვანე ბანერის დამონტაჟება გააპროტესტეს. ამასთან, აღნიშნულ საკითხს საქართველოში აშშ-ს ელჩი იან კელიც გამოეხმაურა და განაცხადა, რომ საერთაშორისოდ აღიარებული საზღვრების ნებისმიერი ცვლილება მიუღებელია.
,,საერთაშორისო წარმომადგენლებმა, მტკიცედ და მკაფიოდ უნდა გამოვხატოთ ჩვენი მოსაზრება, რომ ნებისმიერი ცვლილება, საერთაშორისოდ აღიარებული საზღვრებისა, არის მიუღებელი და არ ვიღებთ ამას. რაც შეეხება თავად ამ საკითხს, ევროკავშირის მისია აწარმოებს მონიტორინგს და ამ საკითხში მას ჰყავს ექსპერტები. კიდევ ერთხელ და ყოველდღიურად გავიმეორებ, რომ ჩვენ ვუჭერთ მხარს საქართველოს ტერიტორიულ მთლიანობასა და სუვერენიტეტს საერთაშორისოდ აღიარებულ საზღვრებში. ეს ასე იყო, არის და იქნება მომავალში”, – აღნიშნა ელჩმა. საქართველოს საპატრიარქოში კი აცხადებენ, რომ აუცილებელია საერთაშორისო ორგანიზაციებისა და საქართველოს მეგობარი ქვეყნების ძალისხმევის გააქტიურება, რათა აღნიშნული პროცესი შეჩერდეს და გამოსწორდეს.
———————–
„ახალი თაობა“, 11 ივლისი, 2017 წელი
ინტერვიუ მამუკა გვაძაბიასთან: „ოხრახუშით, ქინძითა და ღვინით ვაჭრობას ეწირება საქართველოს ინტერესები“ // „მოჩვენებითი სიმშვიდე დამღუპველია“
დამოუკიდებელი ექსპერტი მამუკა გვაძაბია „ახალ თაობასთან“ აცხადებს, რომ საქართველოს და რუსეთის მიერ ჩვენი ქვეყნის ტერიტორიების ოკუპაციის თემა მსოფლიო პოლიტიკური დღის წესრიგიდან ქრება.
- ბატონო მამუკა, რატომ არის საგანგაშო გზავნილი ტრამპის განცხადება, რომელშიც რუსეთის მიერ ოკუპირებულ ქვეყნებს შორის საქართველო არ არის მოხსენიებული?
_ როდესაც ჩვენი პარტნიორი სახელმწიფოს მეთაური ამას ამბობს, ეს არის ძალიან სერიოზული გზავნილი მსოფლიოს სხვა სახელმწიფოებისთვის, სხვა საერთაშორისო ორგანიზაციებისთვის. პამბურგში `დიდი ოცეულის~ ფარგლებში პუტინისა და ტრამპის პირველი ოფიციალური შეხვედრა მოხდა, რომელიც ნახევარ საათს უნდა გაგრძელებულიყო, მაგრამ ორსაათნახევარი გაგრძელდა, შეხვედრაზე წამოწეული იყო რამდენიმე მნიშვნელოვანი საერთაშორისო საკითხი, მათ შორის უკრაინა, სირია და სხვა. საქართველოს სახელიც კი არ უხსენებიათ. უბრალოდ, იგულისხმებოდა `სხვებში~. ნახსენები იყო უკრაინისა და სხვების ოკუპაცია.
როდესაც ჩვენი სტრატეგიული პარტნიორი საკითხს ასე უდგება, დამაფიქრებელია. თუმცა, სტრატეგიული პარტნიორი ჩვენ მაგივრად ვერ იტყვის, რომ საქართველოში უბედურება ხდება, ჩვენ უნდა ავტეხოთ ამაზე განგაში. ამას ხელისუფლება გეგმაზომიერად აკეთებს, პრობლემაზე წაყრუებას არჩევს.
- ეს იმიტომ ხომ არ ხდება, რომ უკრაინის ტერიტორიების ოკუპაცია უფრო გვიან მოხდა და დონბასში ბრძოლები კვლავ მიმდინარეობს, ხოლო საქართველოს ოკუპირებულ ტერიტორიებზე, ან ადმინისტრაციულ საზღვართან, ქართველებსა და რუსებს შორის დღეს ბრძოლები არ არის?
- ეს არის ემოციური დამოკიდებულება. რა მნიშვნელობა აქვს, სროლა არის თუ არა. საომარი მოქმედებების დასრულების შემდეგ შვიდჯერ თუ რვაჯერ გადმოიწია საოკუპაციო ხაზმა საქართველოს სიღრმეში. დღეს მთავარი არტერიიდან 500 მეტრში დგას ოკუპანტი. ამაზე მეტი საგანგაშო რა შეიძლება იყოს? ისვრიან თუ არა, ამას პრინციპული მნიშვნელობა არ აქვს. სროლა რომ არ იყოს, სჯობს, მაგრამ ყველა შემთხვევაში, ეს მოჩვენებითი სიმშვიდე უფრო დამღუპველია, უფრო ცუდად მოქმედებს, მათ შორის, საერთაშორისო თვალსაზრისით საქართველოს საკითხზე.
- საქართველოს ბედზე…
- დიახ, მოჩვენებითი სიმშვიდე დამღუპველია. ამას ვამბობდი 2008 წლამდე, როცა საქართველოს ოკუპირებულ ტერიტორიაზე ოკუპანტ ძალას სამშვიდობო ძალის სტატუსი ჰქონდა და ახლაც ვამბობ, რომ რუსეთი ოკუპანტია. ამ კურსის შერბილება ძალიან საშიშია. დღევანდელი მოცემულობიდან გამომდინარე, სწორედ კურსის შერბილებასთან გვაქვს საქმე.
- კურსის შერბილება რას ნიშნავს?
- კურსის შერბილებაა, როდესაც ხელისუფლების წარმომადგენლები, საერთოდ, ოკუპანტის არსებობას არ აღიარებენ. ერთი მინისტრი გამოდის და ამბობს, რა მოხდა მერე, თუ ადმინისტრაციული საზღვარი რამდენიმე ასეული მეტრით გადმოიწია, მეორე მინისტრი გამოდის და იგივე საკითხს სვამს. ოკუპაცია თურმე 2008 წელს დამთავრებულა და მას შემდეგ თურმე არაფერი მომხდარა. 2008 წელს უბედურება მოხდა. მას შემდეგ უბედურებას უბედურება ემატება – საქართველო შაგრენის ტყავივით პატარავდება. ეს ყველას უნდა ჰქონდეს გაცნობიერებული.
- როდესაც 2008 წლის კატასტროფის შემდეგ (როდესაც დღეში 150 სოფელი დავკარგეთ), მიხეილ სააკაშვილმა თქვა, რომ არაფერი დაგვიკარგავს, მხოლოდ ქვა-ღორღი იყოო, ეს იყო საოცრად გამაოგნებელი განცხადება ქვეყნის პირველი პირის მხრიდან, რომელმაც ომი წააგო და ტერიტორიები დაკარგა. ახლა საოკუპაციო ხაზის გადმოწევაზე რომელმა მინისტრმა განაცხადა, არაფერი ხდებაო?
- დევნილთა მინისტრმა სუბარმა, ტელევიზიით რამდენჯერმე მოვისმინე, არაფერიც არ ხდება, რა მოხდა, საოკუპაციო ხაზმა რამდენიმე ასეული მეტრით გადმოწიაო.
- ერთი მეტრითაც რატომ უნდა გადმოიწიოს ან რატომ უნდა გაბედონ საოკუპაციო ხაზის ერთი მეტრითაც გადმოწევა?
- მაშინ, როდესაც პუტინის წარმომადგენლებს ტაშ-ფანდურით ხვდებიან თბილისში, მაშინ, როდესაც საქართველოს მიმართ ძალიან უარყოფითად განწყობილ პირებს შეხვედრებს უწყობენ, ამ ფონზე არაფერი მიკვირს. პუტინის წარმომადგენელი შვიდკოი და მამონტოვი ოკუპირებულ ტერიტორიებზეც იმყოფებოდნენ. მათ ოკუპაციის შესახებ კანონი აქვთ დარღვეული, მაგრამ თითქოს არაფერი, თბილისში შეხვედრებს მართავენ. ამ ფონზე არ მიკვირს, ხელისუფლება ასეთ განცხადებებს რომ აკეთებს.
- ამაზე, მგონი, ზურაბ აბაშიძემ განაცხადა, მამონტოვი და შვიდკოი არასამთავრობო ორგანიზაციებისა და ჟურნალისტების საერთაშორისო კონფერენციაში მონაწილეობდნენო...
- ეს არასამთავრობოები ვინც არიან, გასაგებია.
- ვინ არიან?
- რომელი არასამთავრობო ორგანიზაციაც მოიწვევდა მამონტოვსა და შვიდკოის – რუსეთიდან დაფინანსებული, ე.წ. „რბილი ძალის“ წარმომადგენლები. არ დავინტერესებულვარ, ვინ მოიწვია შვიდკოი. ვისაც არ უნდა მოეწვია, თავმოყვარე სახელმწიფოს ორივე უკან უნდა დაებრუნებინა. მამონტოვი არის ქართველთ მოძულე, აფხაზეთში ტაშ-ფანდურს მართავდა, ორჯერ იყო ჩასული. ასეთი პრეცედენტების დაშვება და ხელისუფლების განცხადებები ქმნის იმის ნიადაგს, რომ ოკუპაციის პრობლემა სახელმწიფოსთვის დღის წესრიგის პირველი საკითხი არ არის. დღის წესრიგის პირველი საკითხია ოხრახუშით, ქინძითა და ღვინით ვაჭრობა. ამას ეწირება ჩვენი სახელმწიფოს ინტერესები.
- ასეთ შემთხვევაში მნიშვნელოვანია, შს ორგანოებში თუ არის დაფიქსირებული, რომ მათ უკანონოდ გადმოკვეთეს ჩვენი სახელმწიფო საზღვარი და შევიდნენ ოკუპირებულ ტერიტორიაზე?
- შს ორგანოების წარმომადგენლებმა თავი იმით იმართლეს, 6 წლის წინ იმყოფებოდნენ და ხანდაზმულობის ვადა შეეხო და ამიტომ კანონი ოკუპაციის შესახებ მათ მიმართ არ მოქმედებსო. 6 წლის წინ კი არა, 2014 წელსაც იყო ჩამოსული. 2014 წლის შემდეგ 6 წელი არ გასულა. 2014 წელს რომ იყო ჩამოსული, ის არ ახსოვთ?
- თქვენ ნამდვილად იცით, რომ 2014 წელს შვიდკოი და მამონტოვი აფხაზეთში იმყოფებოდნენ?
- რა თქმა უნდა, მამონტოვის გვერდზე შევედი და ვნახე. „სოხუმი-2014“-ის ფოტოკოლაჟი აქვს. მამონტოვი ამას არც მალავს, საქართველოში მომიწვიეს და მშვენივრად შემოვედიო, დაიტრაბახა. შვიდკოიმ ინტერვიუებში განაცხადა, აფხაზეთისა და ცხინვალის რეგიონის აღიარებას რუსეთი უკან არ წაიღებს და ამის იმედი არც გქონდეთო. თბილისში ჩამოდის და ამას ამბობს. ამ ფონზე საქართველო პატარავდება, საუბედუროდ. ამაზე პასუხისმგებლობა ყველა ხელისუფლებას ეკისრება.
- თქვენ გამოსავალს რაში ხედავთ?
- ამ პრობლემის მიმართ ხელისუფლებაც და ოპოზიციაც არაადეკვატურები არიან. სანამ არ იქნება აღიარებული, რატომ დაიწყო საომარი მოქმედებები აფხაზეთში 1992 წელს, თუ აფხაზეთში, სოხუმში არსებულ პროქართულ ოპოზიციურ ძალებს გაფურჩქვნის საშუალება არ მიეცა, ამ პრობლემას არაფერი ეშველება. ამ თვალსაზრისით არაადეკვატური არიან ხელისუფლება, ოპოზიცია და ყველა. ისინი მხოლოდ იმისთვის მოქმედებენ და იმისთვის იღებენ გადაწყვეტილებებს, რომ მომავალი არჩევნებისთვის დევნილების მეტი ხმები მოიპოვონ. ეს არის ამათი სტრატეგიაც და პრაქტიკაც. უფრო მეტს, შორსმიმავალს მიზნებს ვერ ვხედავ. მათ ახლა ამ პრობლემის წინ წამოწევა არ აწყობთ, რადგან დარწმუნებულები არიან, რომ ტერიტორიული მთლიანობის აღდგენის თემაზე სერიოზული განცხადებები არამომგებიანი იქნება.
- რატომ არ უნდათ ამ თემაზე სერიოზული განცხადებების გაკეთება, რადგან ტერიტორიული მთლიანობის აღდგენა ამ ეტაპზე მიუღწეველია?
- მიაჩნიათ, რომ ამ ეტაპზე კი არა, შორეულ პერსპექტივაშიც ტერიტორიული მთლიანობის აღდგენა შეუძლებელია. სინამდვილეში ასე არ არის, თუ საქართველოს ხელისუფლება ადეკვატური იქნება. ყველაზე მეტი პასუხისმგებლობა დღეს ხელისუფლებას ეკისრება. ოპოზიციასაც ეკისრება თავისი წილი პასუხისმგებლობა.
„ახალი თაობა“, 11 ივლისი, 2017 წელი
ბიძინა ივანიშვილი კახა კალაძეზე კომპრომატების გამოქვეყნებას აპირებს?
ინტერვიუ ლევან ხაბეიშვილთან: „არაა გამორიცხული, პოლიტიკურ სცენაზე ირაკლი ღარიბაშვილი გამოვიდეს~ // „ყოფილი პრემიერი ამერიკელების ინიციატივის შემდეგ გაუჩინარდა~
რატომ გაუჩინარდა ბიძინა ივანიშვილი, რატომ დაეძაბა მას ურთიერთობა კახა კალაძესთან, რამდენ ნაწილად გაიყო „ქართული ოცნება“, ვის შეყვანას აპირებს ხელისუფლება საკრებულოებში? ამ თემებზე „ახალ თაობას“ მონიტორინგის ცენტრ `მედიატორის~ დამფუძნებელი ლევან ხაბეიშვილი ესაუბრება.
„ქართულ პოლიტიკაში ბოლო დროს ბევრი რამე მოხდა, პოლიტიკაში კი დამთხვევები იშვიათია, ყველაფერი თავის ლოგიკურ ჩარჩოში ჯდება. ჩვენ ვიცით ამერიკის ინიციატივა, ვისაც რუსეთში 1 მილიონზე მეტი აქვს ნაშოვნი, მას შესაძლოა პრობლემები შეექმნას. ამ ინიციატივას დაემთხვა, რომ ბიძინა ივანიშვილი გაქრა პოლიტიკიდან“, – ამბობს ლევან ხაბეიშვილი.
- თქვენ ფიქრობთ, რომ ამ ინიციატივის გამო გაუჩინარდა ივანიშვილი?
- ვფიქრობ კი არა, ეს ასეა. ყველა ხვდება, რომ 2020 წლის არჩევნების შემდეგ „ქართული ოცნება“ ამ კონფიგურაციით ვეღარ მოვა ხელისუფლებაში. სპრინტი დაწყებულია იმასთან დაკავშირებით, თუ ვის ხელში აღმოჩნდება ძალაუფლება. ამას გარედან ვერავინ გადაწყვეტს და აქედან გამომდინარე, ადგილობრივი თვითმმართველობის არჩევნები ტესტია პოლიტიკური პარტიებისთვის. ამ პროცესს სერიოზულად დააკვირდება დასავლეთი, შეხედავს პარტიებს და გააკეთებს დასკვნას, თუ ვინ შეიძლება მისი დასაყრდენი გახდეს. პროდასავლურ პარტიებს ვგულისხმობ და არა ბურჯანაძე-ინაშვილის პარტიებს, რომლებსაც მკვეთრად გამოხატული პრორუსული ორიენტაცია აქვს. სერიოზული რყევებია „ქართულ ოცნებაში“. ეს გუნდი რამდენიმე კლანად არის დაყოფილი და ყველა კლანს ძალაუფლების გადაბარებაზე პრეტენზიები აქვს. თავისი დაჯგუფება ჰყავს ბიძინა ივანიშვილს, მაგრამ ის ასე ღიად ვეღარ ჩაერევა პოლიტიკურ პროცესებში. ამერიკის ინიციატივა რუსეთში ნაშოვნ მილიონებთან დაკავშირებით მისთვის სერიოზული მესიჯი იყო. ამას დავუმატოთ ისიც, რომ აშშ-ის ვიცე-პრეზიდენტი დაუგეგმავად ჩამოდის საქართველოში.
- მაიკ პენსის ვიზიტი ბიძინა ივანიშვილს უკავშირდება?
- ეს ვიზიტი დაემთხვა თვითმმართველობის არჩევნებს. აშშ-ის ვიცე-პრეზიდენტი დაუგეგმავად ჩამოდის, რაც ძალიან სერიოზული მესიჯია. ამ ვიზიტის შედეგი იქნება ის, რომ ყოფილი პრემიერი საარჩევნო კამპანიას ოფიციალურად გამოეთიშება. ბიძინა ივანიშვილი არ არის ის კაცი, რომელიც ის ასე იოლად დათმობს პოზიციებს. თან მან იცის, რომ „ქართული ოცნება“ დიდხანს ვეღარ დარჩება ხელისუფლებაში. ის შეეცდება, რომ მისი მოურავები სხვადასხვა ფორმით მოხვდნენ ხელისუფლებაში. აქ მნიშვნელოვანია ერთი დეტალიც, ქართულ პოლიტიკაში კახა კალაძის სახით „ახალი“ მოთამაშე გამოჩნდა. მას თავისი პოლიტიკური მიზნები და ამოცანები აქვს. სხვა მეოცნებეებისგან განსხვავებით, ფინანსურად ივანიშვილზე დამოკიდებული არ არის. მას აქვს საერთაშორისო კონტაქტებიც, რაც თავის გადარჩენის საშუალებას აძლევს. მისგან განსხვავებით, ეკა ბესელია და გია ვოლსკი თავს ვერ გადაირჩენენ. მათ პატრონი არ ჰყავთ. ამათნაირების მამა-მარჩენალი და არქიფო სეთური არის ყოფილი პრემიერი. ისინი იმას გააკეთებენ, რასაც ბიძინა ეტყვის. წინააღმდეგ შემთხვევაში მათ სერიოზული პრობლემები შეექმნებათ.
- რა პრობლემები?
- მრავალნაირი. მათ შორის, სამართალთან დაკავშირებული პრობლემები. ბესელიას და მანანა კობახიძეს იმდენი დანაშაული აქვთ ჩადენილი, ნორმალური ხელისუფლების პირობებში ისინი ციხეში წავლენ. ამიტომაც ისინი მთლიანად მოიაზრებიან `ოცნების~ დამფუძნებლის გუნდში.
- კახა კალაძე აღარ მოიაზრება ბიძინა ივანიშვილის გუნდში?
- თბილისის მერობის კანდიდატი კარგად ლავირებს და ისე წარმოაჩენს, რომ ყოფილი პრემიერის გავლენის ქვეშაა. ამ დროს ის ყველაფერს აკეთებს, რომ ამ გავლენებისგან გათავისუფლდეს. ამაზე მუშაობა უკვე დაწყებული აქვს. ჩემი ინფორმაციით, „ქართული ოცნების“ საარჩევნო სიაში თბილისის საკრებულოს მოქმედი დეპუტატებიდან სამ კაცზე მეტი ვერ მოხვდება.
რა ხალხიც ჰყავს „ოცნებას“ საკრებულოში, კარგად ვიცით. ისინი მონურ მორჩილებაში იმყოფებიან ბიძინა ივანიშვილთან. ეს ის ხალხია, ვინც ყოფილ პრემიერს რამდენიმე საათში კოეფიციენტი შეუცვალა, ბოტანიკური ბაღი გაუფორმა. პანორამა თბილისზე აღარაფერს ვამბობ. ეს ყველაფერზე ხელის ამწევი ხალხია, რომელსაც არქიფო სეთურისთვის პრობლემა არ შეუქმნიათ. ისინი მას პრობლემებს არც მომავალში შეუქმნიდნენ, მაგრამ კალაძემ მათი ჩამოშორება გადაწყვიტა. მან `ქართული ოცნების~ თავმჯდომარეების და აქტივისტების ჩაჩოჩება დაიწყო რეგიონებში. მან თქვა, რომ თავად დახარჯავს ფინანსებს, თავად დააკომპლექტებს საკრებულოებს, მაჟორიტარულ ოლქებს. ეს იმას ნიშნავს, რომ ის გარკვეული ინიციატივის ხელში აღებას ცდილობს. მას სურს, რომ თბილისის მერია პოზიციების გასამყარებლად გამოიყენოს.
არსებული კანონმდებლობის თანახმად, საკრებულოს არჩეული მერისთვის იმპიჩმენტის მოწყობა შეუძლია. ამის შესახებ იცის კალაძემაც და იმასაც ხვდება, რომ თუ ისე არ მოიქცევა, შესაძლოა, ივანიშვილმა მერობიდან მოასრიალოს. ამიტომაც ცდილობს საკრებულოში თავისი ხალხის შეყვანას.
- კახა კალაძის ჩანაფიქრს ივანიშვილი ვერ ხვდება?
- ბიძინა ივანიშვილი შტერი ნამდვილად არ არის, რომ ვერ გამოიცნოს, რა ჩანაფიქრი აქვს კალაძეს და რატომ წმენდს პოლიტიკურ გუნდს დედაქალაქში. პირველი მეოცნებე არაა ის კაცი, ამას რამე არ დაუპირისპიროს. დაიმახსოვრეთ, კალაძეს პრობლემები და დისკომფორტები შეექმნება. მათ შორის საარჩევნო პერიოდშიც. მათი დაპირისპირება ჯერ ისევ კულუარულ დონეზე დარჩება. მისი საჯარო სივრცეში გამოტანა არც ერთს არ აწყობს. თბილისის მერად კალაძის დასახელება „ოცნებაში“ ბევრს არ მოსწონს. მათ კარგად იციან, რომ ის ისეთი მერი არ იქნება, როგორიც ნარმანიაა. მას ასე იოლად ვერ დაურეკავენ, ვერაფერს მოსთხოვენ და არც მისი მართვა იქნება იოლი. ის თავისი კლანური მმართველობითა და ბიზნესინტერესებითაა ცნობილი. მისთვის არც ნეპოტიზმია უცხო. ახლა მისი მთავარი ამოცანაა, დედაქალაქის პარტიული სტრუქტურა „ოცნების“ კადრებისგან გაწმინდოს და იქ თავისი ხალხი შეიყვანოს.
- მის ხალხში ძირითადად ფეხბურთელები უნდა ვიგულისხმოთ?
- პირველ რიგში ფეხბურთელები. მათ არც პოლიტიკური გამოცდილება აქვთ და არც პოლიტიკური გასაქანი. კალაძისთვის იდეალური კანდიდატები არიან ლევან კობიაშვილი, გოჩა ჯამარაული, მიხეილ ყაველაშვილი. მიზნის მისაღწევად რომ ყველაფერს იკადრებს, ესეც ვიცით. ვისაც არ ახსოვს, ფეხბურთის ფედერაციის პრეზიდენტის არჩევნებს გავახსენებ. იმისთვის, რომ კობიაშვილი გაეყვანა, ადამიანი დღისით-მზისით მოიპარა. ის ყველაფერზე წავა, მაგრამ არც „ოცნების“ სხვა დაჯგუფებები იქნებიან გულხელდაკრეფილი.
- რა დაჯგუფებები არის „ოცნებაში“?
- კალაძის დაჯგუფება უკვე ვახსენეთ. არის ჩუგოშვილის და ახალგაზრდების ფრთა, რომლებსაც თავისი ამოცანები აქვთ. ივანიშვილის გუნდში იქნებიან ძველი კომკავშირლები – ვოლსკი, ბესელია და ბიზნესმენები. ეჭვი მაქვს, რომ ეს შიდა დაპირისპირება „ქართულ ოცნებას» მთლიანად გადაიყოლებს. უკვე დიდი ხანია, ხალხი აღარ ახსოვთ, თავიანთ ბიზნესებზე და შიდა დაპირისპირებებზე არიან გადასულები. ვფიქრობ, ხალხი ამას ძალიან კარგად ხვდება. არ უნდა დავივიწყოთ კახელების კლანი. ირაკლი ღარიბაშვილი ალბათ ისევ გამოვა პოლიტიკურ სცენაზე. არის კიდევ სუს-ის დაჯგუფება. ძალიან ბევრი დაჯგუფებაა „ოცნებაში“ და ჯერჯერობით ყველა ისევ ივანიშვილის მოურავია. განსხვავება მათ შორის მხოლოდ კატეგორიებია.
- რა კატეგორიები?
- ისინი იყოფიან პირველ, მეორე, მესამე, მეოთხე ხარისხის მონა-მოურავებად. პირველი კატეგორიის მონა-მოურავებში ბესელია-ვოლსკი-ძიძიგური შედიან. ამ კატეგორიის ხალხი ბიძინას ეთაყვანება. ის პოლიტიკური სიბინძურე, რაც ახლა მმართველ გუნდშია, შემოდგომაზე ლოგიკურად დასრულდება. თვითმმართველობის არჩევნებზე ხალხისგან ისინი მწარე ალიყურს მიიღებენ.
- დარწმუნებული ხართ, რომ ალიყურს მიიღებენ?
- ძალიან მინდა, რომ ასე მოხდეს და შეიძლება ამიტომ მჯერა ამის. არ მიყვარს ამომრჩევლის გამტყუნება, მაგრამ უნდა ვთქვა, რომ პოლიტიკურ პროცესებზე მათაც ეკისრებათ პასუხისმგებლობა. სხვა თუ არაფერი, ხომ გაგიგია, რაც ერი, ის ბერიო. რა არჩევანიც გაკეთდა, ის ხელისუფლებაც მიიღეს. ეჭვი მაქვს, რომ ამ არჩევნებზე სერიოზული ალიყური მოხვდება „ოცნებას“.
- თუ არ მოხვდა?
- მაშინ აღარ უნდა იწუწუნონ. ახლაც თუ ლანგრით მიართმევენ თვითმმართველობებს, მაშინ უნდა შეეგუონ, რომ 4 წლის მანძილზე ისინი მათკენ არც კი გამოიხედავენ. და რომ არ მოიხედებიან, იქნებიან მართლები.
- მართლები რატომ იქნებიან?
- ამ ხუთი წლის მანძილზე რომ არ მოგხედე და კიდევ ხმა მომეცი, რატომ უნდა მოგხედო? გამოდის, რომ ასეთი მოგწონვარ. ალიყურის მოხვედრის შემთხვევაში შეფუცხუნდებიან და ხალხზე იფიქრებენ.
- მოდით, ისევ ბიძინა ივანიშვილისა და კახა კალაძის დაპირისპირებას დავუბრუნდეთ. თქვენ თქვით, რომ საარჩევნო პერიოდში მთავარმა მეოცნებემ შესაძლოა მერობის კანდიდატს პრობლემები შეუქმნას. ახსენეთ ირაკლი ღარიბაშვილიც. არის იმის ალბათობა, რომ ღარიბაშვილი დააყენოს მერობის კანდიდატად?
- ბიძინა ივანიშვილი მერობის სხვა კანდიდატურას არ წამოაყენებს, მაგრამ ის შეეცდება, პოლიტიკურად დააზიანოს კახა კალაძე. დღეს არსებული ვითარებით, ეს უკანასკნელიც ივანიშვილის მოურავია, ოღონდ კლასიფიკაციით მეოთხე. ეს მხოლოდ იმითაა გამოწვეული, რომ მერობის კანდიდატს თავისი ფინანსები აქვს. იმის გამო, რომ მათ შორის უნდობლობა გაჩნდა, კახა კალაძემ ახალი პარტნიორების ძებნა დაიწყო. ის შიშობს, რომ შეიძლება შუა მერობიდან მოასრიალონ. ეს ყველაფერი სერიოზულ კითხვებს აჩენს და, დარწმუნებული ვარ, მათ შორის სერიოზული შუღლი გაღვივდება.
კახა კალაძის ამბიციების გარდა, არის ივანიშვილის ხასიათი. ის ვერ იტანს, თუ ვინმე მისგან დამოუკიდებელია. არც ის მოსწონს, თუ ვინმე პოლიტიკურ დივიდენდებს მოიპოვებს. აქამდე ის თანამდებობებზე ისეთ ხალხს აყენებდა, ვისაც პოლიტიკური დივიდენდების მოპოვების შანსი არ ჰქონდა და ვერც დამოუკიდებელ თამაშს გაბედავდა.
კახა კალაძეს საკუთარი გუნდის ჩამოყალიბების შესაძლებლობა აქვს, ნარმანიასგან ეს გამორიცხულია. ისევე, როგორც კვირიკაშვილისგან. ეს უკანასკნელი საერთოდ არაფრის მაქნისია. მტერი კარზე მოგვადგა, ეგ კი მთავრობის სხდომაზე გაიძახის, ქართველ კაცებს ბორდელებში არ უშვებენო. ამ პოსტზე მხოლოდ იმიტომ ზის, რომ კარგი ფორმა აქვს და, ირაკლი ღარიბაშვილისგან განსხვავებით, კარგად მეტყველებს. სხვა მათ შორის განსხვავება არ არის. წინ დიდი ამბები გველოდება და არავინ იცის, მეოცნებეები ერთმანეთს როდის, სად და რა კომპრომატს აუფრიალებენ.
„ახალი თაობა“, 11 ივლისი, 2017 წელი
ინტერვიუ დავით ზურაბიშვილთან: „ქართულ ოცნებაში~ სხვადასხვა ინტერესთა ჯგუფებია - ეს ბიძინა ივანიშვილის მართვის სტილია~
რესპუბლიკური პარტიის წევრი, თბილისის საკრებულოს დეპუტატი დავით ზურაბიშვილი „ახალ თაობასთან“ ინტერვიუში საკონსტიტუციო ცვლილებების ირგვლივ განვითარებულ მოვლენებზე საუბრობს.
- ბატონო დავით, საკონსტიტუციო პროცესი რამდენად არის ჩიხში შესული? ხელისუფლება ამბობს, რომ ორი მოსმენით კონსტიტუციის პროექტი მიღებული აქვს და ძირეულ ცვლილებებს არ აპირებს...
- ხელისუფლებამ ყველა პირობა დაარღვია, რაც კი დადო. ლაპარაკი იყო ერთზე და მიიღეს მეორე. კონსენსუსი, ან ნაწილობრივი კონსენსუსი, ეს მთლიანად ხელისუფლებაზეა დამოკიდებული. ოპოზიციას, არასამთავრობო სექტორს, სამოქალაქო თუ საერთაშორისო საზოგადოებას, ყველას აქვს შენიშვნა, გარდა ხელისუფლებისა. არ მესმის, ამ შემთხვევაში რა აზრი აქვს საერთოდ ლაპარაკს.
- რამდენად არის პრობლემა მაჟორიტარული სისტემა? ხშირად არგუმენტად მოჰყავთ ამერიკის შეერთებული შტატების მაგალითი, სადაც მთლიანად მაჟორიტარული არჩევნებია...
- კიდევ არის სხვა ქვეყნების მაგალითებიც. საერთოდ არ არსებობს ორი ერთნაირი ქვეყანა, რომელსაც ზუსტად ერთნაირი საარჩევნო სისტემა ჰქონდეს. ყველა ქვეყნის საარჩევნო სისტემა მისადაგებულია იმ ქვეყნის რეალობასთან, გნებავთ პოლიტიკურ ტრადიციასთან, პოლიტიკურ კულტურასთან, რომელშიც ესა თუ ის ქვეყანა იმყოფება. ამიტომ არ მგონია, ასეთი შედარებები სწორი იყოს.
რაც შეიძლება საზოგადოების მეტ ფენას, ინტერესთა ჯგუფს უნდა წარმოადგენდნენ პარლამენტში მოხვედრილი პოლიტიკური პარტიები, ადამიანები. ეს, როგორც წესი, მრავალპარტიული წარმომადგენლობით ხდება, გამონაკლისი ორპარტიული სისტემა მხოლოდ ამერიკის შეერთებულ შტატებშია. რაც შეეხება ამერიკას, მას ამ საარჩევნო სისტემის პოლიტიკური ტრადიცია აქვს და ამ ქვეყნის თავისებურებიდან გამომდინარეობს ორპარტიულობა. დანარჩენ სამყაროში კი მრავალპარტიული სისტემაა. იქაც კი, სადაც ორპარტიული სისტემა იყო, მაგალითად, დიდ ბრიტანეთში, სხვა პოლიტიკური ძალებიც გამოჩნდნენ, მიუხედავად იმისა, რომ ბრიტანეთშიც მაჟორიტარული სისტემაა.
რაც შეეხება საქართველოს, მაჟორიტარული სისტემა ჯობია, პროპორციული თუ შერეული მოდელი, ამაზე აბსტრაქტული მსჯელობა უაზროა. ის საარჩევნო სისტემაა საქართველოსთვის კარგი, რომელიც რაც შეიძლება მეტ წარმომადგენლობას უზრუნველყოფს პარლამენტში. იმ სისტემას უნდა ვუგულშემატკივროთ, რომელიც ჩვენი ქვეყნისთვის არის კარგი.
- იქნებ ხელისუფლების ამოცანაც სწორედ ეს არის, რომ იყოს მხოლოდ ორპარტიული სისტემა. შეიძლება საარჩევნო ბლოკების გაუქმება აქეთკენ გადადგმული ნაბიჯია, ვინც გადარჩება და გაძლიერდება, ისინი დაუპირისპირდნენ ერთმანეთს არჩევნებში…
- არა, ასე ნამდვილად არ არის, რადგან ხელისუფლების განზრახვა ღიად ჩანს.
- და რა არის ეს განზრახვა?
- დარჩეს ხელისუფლებაში რაც შეიძლება დიდხანს და რაც შეიძლება მეტი მანდატი მიიღოს ამომრჩევლის ცოტა ხმით, ეს არის და ეს. საზოგადოებრივი ლეგიტიმურობის თვალსაზრისით, მთლიანად პროპორციული სისტემა არის საჭირო და რაც შეიძლება დაბალი საარჩევნო ბარიერი. ეს არის იმისთვის საჭირო, რომ მოსახლეობის ინტერესების ფართო სპექტრი იყოს პარლამენტში წარმოდგენილი და ამით თავიდან ავიცილოთ სერიოზული დაპირისპირებები, რაშიც 25 წელია ვიმყოფებით. მაჟორიტარები ჩვენს რეალობაში ყველა ხელისუფლებასთან საერთო ენას პოულობენ და კარგადაც გრძნობენ თავს, ამის კლასიკური მაგალითია კახა ოქრიაშვილი.
- საარჩევნო ბლოკებთან დაკავშირებით ხელისუფლების არგუმენტია, რომ ისინი პარტიების გაძლიერებაზე ზრუნავენ, რომ თითოკაციანი პარტიები წარსულს ჩაბარდეს…
- ხელისუფლება საერთოდ არ არის დაინტერესებული არანაირი პარტიების გაძლიერებით. ბლოკების აკრძალვა არ ნიშნავს პარტიების გაძლიერებას. სრულიად პირიქით არის. ცალ-ცალკე ყველაფერი შეიძლება, მაგრამ ერთიანობაში რომ შეხედავ, მაგალითად, მაღალი საარჩევნო ბარიერი, ბლოკების აკრძალვა, ამას დამატებული ბონუსი, ამით ხელისუფლება გვეუბნება: ამომრჩევლის ცოტა ხმას მივიღებ, მაგრამ მერე რა, მაინც მე ვიქნები. თან ერთჯერადად კი არა _ სულ მე ვიქნები.
- ბატონო დავით, თქვენ რა ინფორმაცია გაქვთ, „ქართულ ოცნებაში“ მართლაც არის ორი ფრთა, ერთი, რომელსაც არ სურს ცვლილებები და მეორე, რომელიც დასავლეთზეა ორიენტირებული?
- სხვადასხვა ინტერესთა ჯგუფები რომ არის, ეს ფაქტია. ერთი, რაც დანამდვილებით ვიცი, ყოველ შემთხვევაში აქამდე ასე იყო, ყველაფერს ბიძინა ივანიშვილი წყვეტდა. საბოლოო ჯამში კეთდებოდა ის, რაც მას უნდოდა. ეს იცოდა ყველამ. საერთოდ, ივანიშვილს თავის გუნდში ჰყავს განსხვავებული ჯგუფები, განსხვავებული მსოფლმხედველობის, იდეოლოგიის ადამიანები. მას ასეთი მიდგომა აქვს, ასეთია მისი შეხედულებები, ასეთი მართვის სტილი აქვს, მაგრამ გადაწყვეტილებას საბოლოო ჯამში იღებს თვითონ.
- განსხვავებული ჯგუფები რომ გამოვიდნენ და პროცესები ააყირავონ?
- მას მიაჩნია, რომ ეს არის სწორი მენეჯმენტი. ჩემი აზრი თუ გაინტერესებთ, მაშინ გეტყვით, რომ ეს არ არის თანამედროვე პოლიტიკური, გნებავთ დემოკრატიული მართვის სტილი.
„ახალი თაობა“, 11 ივლისი, 2017 წელი
ინტერვიუ გელა ნიკოლაიშვილთან: „ფარმან ჯეირანლის დაპატიმრებაში აზერბაიჯანის ინტერესი იკვეთება“ // „ქირურგმა კაზიმმა, ვინც ოპერაციები გააკეთა, გვითხრა, ოპოზიციონერის დახმარებად ჩამითვლიან ჩემს ჩვენებასო“
(შემოკლებით)
მკითხველისთვის ცნობილია, რომ „ახალი თაობა“ დეტალურად წერდა კლინიკა „ლანცეტში“ მომხდარი ამბების შესახებ. კლინიკაში ჩატარებული წარუმატებელი ოპერაციის შედეგად, რომლის დროსაც ორი პაციენტი დაიღუპა, მაისში კლინიკის დამფუძნებელი ფარმან ჯეირანლი დააკავეს.
ხვალ ფარმან ჯეირანლის საქმეზე წინასასამართლო მოსმენა გაიმართება. დაკავებულის ადვოკატი გელა ნიკოლაიშვილი მიიჩნევს, რომ მისი დაცვის ქვეშ მყოფი საქართველოში მცხოვრები ოპოზიციის მხარდაჭერის გამო დააკავეს.
გასულ კვირას გელა ნიკოლაიშვილი აზერბაიჯანში იმყოფებოდა, სადაც იმ ქირურგს შეხვდა, ვინც კლინიკა ლანცეტში ღვიძლის გადანერგვის ოპერაცია ჩაატარა, რომელიც ლეტალურად დასრულდა და რის გამოც მისი კლიენტი დაკავებულია.
- ბატონო გელა, რა ახალი დეტალები იკვეთება ფარმან ჯეირანლის საქმეში?
- 12 ივლისს ჩანიშნულია წინასასამართლო სხდომა ფარმან ჯეირანლის მიმართ, რომელიც შპს ლანცეტის დამფუძნებელი და გენერალური დირექტორი იყო. ის დააპატიმრეს 21 მაისს იმის გამო, რომ 1 წლითა და 2 თვით ადრე, 2016 წლის 3 და 8 მარტს გაკეთდა ღვიძლის გადანერგვის ორი ოპერაცია, რომლებიც ლეტალური შედეგით დასრულდა. ეს ორი ოპერაცია გააკეთა მირჯალალ კაზიმიმ, რეგიონში ერთ-ერთმა ყველაზე ცნობილმა პროფესორმა. ის აზერბაიჯანელია, მან განათლება თურქეთში მიიღო და თურქეთის იზმირის კლინიკაში მუშაობს. ამ ოპერაციების შედეგი არ არის მოულოდნელი.
- რატომ?
- იმიტომ, რომ ასეთი ოპერაციების 20-30% მთავრდება ლეტალური შედეგებით. თუნდაც ამის ბოლო მაგალითია ის სამწუხარო ფაქტი, რომელიც მოხდა სულ ერთი კვირის წინ თურქეთში, როდესაც ცნობილმა ტრანსპლანტოლოგმა, კილიჩმა, რომელიც მსოფლიო ათეულში შედის, გაუკეთა ოპერაცია 15 წლის ახალგაზრდა გოგონას, თენგიზ სიგუას შვილიშვილს, რომლის დონორიც იყო საკუთარი დედა, მაგრამ ორგანიზმმა არ მიიღო და გოგონა გარდაიცვალა. გადანერგვის ოპერაციები იშვიათად ტარდება. ასეთი ოპერაციები 15-20 წელია, რაც ტარდება. ფარმან ჯეირანლის სურდა, რომ საქართველოშიც ჩატარებულიყო ასეთი ოპერაციები. უფრო მეტიც, ის გამხდარიყო ცენტრი რეგიონის და პაციენტები არა უცხოეთში წასულიყვნენ, არამედ საქართველოში გაეკეთებინათ, სადაც არა 100 და 150, არამედ 40 ათასი ჯდებოდა ეს ოპერაციები. კარლო კეკელიძეს, რომელმაც აღნიშნული თანხა გადაიხადა, 3 მარტს გაუკეთდა ეს ოპერაცია. მისი დონორი იყო მისივე ქალიშვილი. კეკელიძემ ზუსტად ერთი კვირა იცოცხლა. ოპერაციამ წარმატებით ჩაიარა, ფეხზეც ადგა ეს ადამიანი, მაგრამ შემდეგ მოულოდნელად დაიღუპა.
- მეორე ოპერაციაც ამ პერიოდში ჩატარდა?
- მეორე ოპერაცია გაკეთდა 8 მარტს. გიორგი ჩუბინიძეს გაუკეთდა ოპერაცია, რომლის დონორიც იყო მისი ბიძაშვილი. მანაც ერთი კვირა იცოცხლა და 15 მარტს გარდაიცვალა.
- რატომ დააკავეს მაინცდამაინც ჯეირანლი, როცა ოპერაცია სხვამ ჩაატარა? რა არის მისი დანაშაული?
- კაზიმს, რომელიც დღესაც მუშაობს აზერბაიჯანში, არათუ ვინმე რაიმეს ედავება, არც კი დაუკითხავთ საგამოძიებო ორგანოებს.
- თქვენ შეხვდით კაზიმს?
- დიახ, ჩვენ გადავწყვიტეთ დაგვეკითხა. მე გახლდით აზერბაიჯანში თარჯიმანთან ერთად, რათა ოფიციალურად გამოგვეკითხა, შეგვედგინა ოქმი. ჩვენთან ერთად აზერბაიჯანში იმყოფებოდა ლანცეტის ერთ-ერთი თანამშრომელი, რომელიც კარგად იცნობდა იქაურ გარემოს, იმ საავადმყოფოს, სადაც კაზიმი მუშაობს. ჩვენ იქ გამოვკითხეთ მირზალარ კაზიმის 7-8 პაციენტი, საქართველოს მოქალაქეები, რომლებიც ძალიან ემადლიერებიან მას და ამბობენ, რომ სწორედ მან აჩუქა სიცოცხლე.
- ბევრი ასეთი ოპერაცია აქვს საქართველოს მოქალაქეებისთვის გაკეთებული?
- საქართველოს 26 მოქალაქისთვის აქვს მას გაკეთებული მსგავსი ოპერაცია, ოღონდ არა საქართველოში, არამედ აზერბაიჯანში და თურქეთში. აქედან გამომდინარე, როდესაც ჩვენ აზერბაიჯანში ჩავდიოდით, გვქონდა იმედი, რომ ის გაგვცემდა პასუხს შეკითხვებზე იმ ოპერაციებთან დაკავშირებით, რომელთაც ედავებიან არა მას, არამედ ფარმან ჯეირანლის. რომელიც მხოლოდ დირექტორი იყო და ტრანსპლანტაციასთან შეხება არ აქვს.
რატომღაც ეს მირზარალ კაზიმი დაგხვდა ძალიან შეშინებული. არ პასუხობდა ჩვენს სატელეფონო ზარებზე. გვეუბნებოდა, რომ ხან 40 წუთში მოვიდოდა, ხან 1 საათში და ასე გვემალებოდა. ბოლოს გვითხრა, ჩემი ადვოკატის გარეშე ვერ დაგელაპარაკებითო. ბოლოს დავუყარაულდით კაბინეტთან და მთელი დღის დამალობანას თამაშის შემდეგ, როგორც იქნა, შევხვდით.
- გასცა კაზიმმა თქვენს კითხვებს პასუხი?
- დაახლოებით საათნახევარი ვისაუბრეთ და მთელი ეს დრო ჩვენი მხრიდან დასჭირდა იმის მტკიცებას, რომ ჩვენ პრეტენზია მის მიმართ არ გვაქვს, მხოლოდ გვინდოდა, ესაუბრა ამ ოპერაციებთან დაკავშირებით. თუ მიუძღვის რაიმე დანაშაული ფარმან ჯეირანლის და ასევე ვთხოვეთ, რომ გამოსულიყო სასამართლო პროცესზე. თუ საქართველოში ვერ გაბედავდა ფიზიკურად ჩამოსვლას, სკაიპით მაინც ჩართულიყო.
- ამაზე რა პასუხი მიიღეთ?
- მან კაბინეტში შემოიყვანა თავისი ე.წ. ადვოკატი. ე.წ. იმიტომ ვამბობ, რომ გაგვაცნო როგორც იურისტი, სინამდვილეში კი ის სპეცსამსახურების წარმომადგენელი იყო. მის მითითებებს ასრულებდა. ამ ქალბატონმა არ მისცა საშუალება კაზიმს, რომ რაიმე ეთქვა ჩვენთვის. კაზიმი ამბობდა და ის ქალბატონიც უდასტურებდა ამას, რომ ფარმან ჯეირანლი მიჩნეულია ოპოზიციონერად და ამიტომ ოპოზიციონერის დახმარებად ჩამითვლიან ჩემს ჩვენებას, ამიტომ აქ დიდი უსიამოვნებები შემხვდება, შესაძლოა, სამსახურიც დავკარგოო. ბოლოს ვთხოვეთ, რომ სულ არაფერს შეგეკითხებით ფარმან ჯეირანლიზე, იმაზე მაინც ისაუბრეთ, ამ ოპერაციებმა როგორ ჩაიარა.
- ამაზე თუ დაგთანხმდათ?
- არა, ამაზეც უარი განაცხადა და აპელირებას ახდენდა ჯეირანლის ოპოზიციონერობაზე, რომ თითქოს ოპოზიციონერია, მას აზერბაიჯანში ყველა ცუდი თვალით უყურებს და ასე შემდეგ.
- მართლაც იდევნება ჯეირანლი აზერბაიჯანში? რას საუბრობენ მის შესახებ?
- 4 მაისს აზერბაიჯანულ სამთავრობო პრესაში გამოქვეყნებულია წერილი, სადაც სხვებთან ერთად ჯეირანლიც არის მოხსენიებული ოპოზიციონერთა შორის, რომ თითქოს ის აფინანსებს ოპოზიციას. ეს გამოქვეყნდა მის დაპატიმრებამდე სამი კვირით ადრე.
- ანუ ამ საქმეს პოლიტიკური სარჩული აქვს?
- ის ასე თვლის და მეც დავრწმუნდი ამაში. როგორც ჩანს, პოლიტიკური სარჩული არსებობს და ეს მოსაზრება უსაფუძვლო ნამდვილად არ არის. თავად ფარმან ჯეირანლი ამბობს, რომ არ აქვს შეხება პოლიტიკასთან, არავის აფინანსებს, ბიზნესმენია, მაგრამ ვინაიდან მეგობრობს იმ ხალხთან, რომლებიც აზერბაიჯანიდან თბილისში ჩამოდიან და არიან ოპოზიციონერები, ზოგი მისი პაციენტია და ზოგიც მეგობარი, აზერბაიჯანის ხელისუფლებამ ჩათვალა, რომ ისიც მათ რიგებშია.
ფარმან ჯეირანლი 21 მაისს დააპატიმრეს და 23 მაისს აზერბაიჯანში კვლავ ქვეყნდება სტატია, რომ საქართველოში აზერბაიჯანელი ოპოზიციონერი თაღლითობის ბრალდებით დააპატიმრეს. ასე რომ, არის სრული საფუძველი ვიფიქროთ, რომ ამ საქმეს პოლიტიკური სარჩული აქვს. ამ ყველაფრის შესახებ ვისაუბრებთ ჩვენ წინასასამართლო სხდომაზე და მოვითხოვთ ჯეირანლისთვის ბრალის მოხსნას და აღმკვეთი ღონისძიების გაუქმებას, უკიდურეს შემთხვევაში კი გირაოთი გათავისუფლებას მაინც.
- თავად ფარმან ჯეირანლიმ უკვე ორჯერ მიმართა საქართველოს პრეზიდენტს ღია წერილით და მისი საქმით დაინტერესება სთხოვა. ის მიიჩნევს, რომ აზერბაიჯანული მხარის მოთხოვნით არის დაპატიმრებული. იზიარებთ მის პოზიციას?
- იმ ბევრი დამთხვევიდან გამომდინარე, რაზეც მე ზემოთ გესაუბრეთ, ჩვენ შეგვიძლია საფუძვლიანი ეჭვი გამოვთქვათ და დასაბუთებული ვარაუდი, რომ ეს პოზიცია არ არის საფუძველს მოკლებული და სწორედ აზერბაიჯანული მხარის შეკვეთით მოხდა მისი დაპატიმრება.
- თუკი გადავხედავთ ბოლო პერიოდის პროცესებს, რამდენად გაქვთ იმედი, რომ სასამართლო მას გაამართლებს? რამდენიმე დღის წინ დემირელის სკოლის დამფუძნებელს ეთქვა უარი პოლიტიკური დევნილის სტატუსზე. რას ელით?
- ეს პროცესი უნდა გაგრძელდეს, მოწმეები უნდა დაიკითხონ. ჩვენ უამრავი მტკიცებულება წარვადგინეთ, თითქმის 900 გვერდამდე მასალა წარვადგინეთ წინასასამართლო პროცესზე დასამტკიცებლად. შემდეგში გაგრძელდება გამოძიება და მე დარწმუნებული ვარ, რომ აქ სისხლის სამართლის დანაშაულის ნიშნები ფარმან ჯეირანლის მხრიდან არ არსებობს და ის, საბოლოო ჯამში, უნდა გამართლეს ამ ბრალდებაში. თუ 12 ივლისს, ყველანაირი საღი აზრის მიუხედავად, ის მაინც დატოვეს პატიმრობაში, უკვე სხვა არანაირი საფუძველი არ მექნება, გარდა იმისა, ვიფიქრო, რომ ეს სწორედ პოლიტიკური შეკვეთაა და ამიტომ ვერ ბედავს საქართველოს ხელისუფლება, რომ თუნდაც გირაოთი იქნას გათავისუფლებული. ველოდებით პროცესს.
(…)
