„რეზონანსი”: ბიძინა ივანიშვილი “ოცნების” სიაში არ იქნება
„რეზონანსი”: ინტერვიუ პეტრე მამრაძესთან: რუსებმა ნინო ბურჯანაძეზე ფსონი ერთხელ უკვე დადეს და იმედი გაუცრუვდათ
„ახალი თაობა“: ინტერვიუ ჯონდი ბაღათურიასთან: „კოალიცია „ქართული ოცნების“ დაშლის გადაწყვეტილება მიღებულია“
„ახალი თაობა“: ინტერვიუ ტრისტან წითელაშვილთან: “მთავრობის წევრები დავალებებს ისევ მიხეილ სააკაშვილისგან იღებენ”
„რეზონანსი”: მილიონი ლარი დამნაშავეზე ინფორმაციისათვის // ვის აძლევდა ხელს ოპოზიციონერი პოლიტიკოსის პირადი ცხოვრების ფარული ჩანაწერის გავრცელება
„რეზონანსი”: ვის ინტერესში იყო ფარული ჩანაწერის გავრცელება?
„რეზონანსი”: აფხაზეთის დე ფაქტო მინისტრმა გაქცევა მოასწრო, მისი მოადგილე კი გალახეს // დიდი ჩხუბი სოხუმში და მისი სავარაუდო პოლიტიკური შედეგები
————————-
„რეზონანსი”, 12 მარტი, 2016 წელი
ბიძინა ივანიშვილი “ოცნების” სიაში არ იქნება
ლიკა ამირაშვილი
ექსპრემიერ ბიძინა ივანიშვილის თქმით, 2016 წლის საპარლამენტო არჩევნებში აქტიურად ჩაერთვება, თუმცა რა ფორმით და როდის გამოჩნდება იგი საპარლამენტო უმრავლესობაში ჯერ არ იციან. “ქართული ოცნების” ყრილობა, სავარაუდოდ, აპრილში გაიმართება, მის გამოჩენას კი სწორედ ამ დროისთვის ვარაუდობენ. პიარ-სპეციალისტების აზრით, იმისათვის, რომ ივანიშვილმა ამომრჩევლთა ნდობა დაიბრუნოს, მნიშვნელოვანი იქნება საზოგადოების წინაშე რა ფორმით და როგორი იდეით გამოჩნდება.
როგორც უმრავლესობის წევრი თამაზ მეჭიაური “რეზონანსთან” საუბრისას ამბობს, ივანიშვილის გეგმებზე მან მხოლოდ ის იცის, რომ ივანიშვილი “ოცნების” საარჩევნო სიაში არ იქნება. “რაღაც ფორმით, შესაძლოა, ახლაც არის ჩართული, მაჟორიტარების შერჩევის პროცესი დაიწყო, პარალელურად ყრილობა მომზადდება, რომელიც, სავარაუდოდ, მარტში ან აპრილში იქნება. ყრილობაზე ალბათ მოწვეული იქნება, თუმცა რა სტატუსით ვერ გეტყვით. არჩევნებში რა ფორმით ჩაერთვება, ვერ გეტყვით, შესაძლოა ასე საჯაროდ არ გამოვიდეს, მაგრამ რაღაც ფორმით “ქართულ ოცნებას” მხარი დაუჭიროს. ამას რა ფორმით გამოხატავს, დრო გვიჩვენებს. მე მხოლოდ ის ვიცი, რომ სიაში არ იქნება, თუმცა მე ვისურვებდი, რომ სიის პირველი ნომერი ბიძინა ივანიშვილი ყოფილიყო და საზოგადოების წინაშე ამ ფორმით წარდგენილიყო, თუმცა ამას არ აპირებს”, – აღნიშნა თამაზ მეჭიაურმა.
როგორც საკვლევ-საკონსულტაციო ცენტრის “ფსიქოპროექტის” დამფუძნებელი ზურაბ ბიგვავა “რეზონანსთან” საუბრისას ამბობს, წინასაარჩევნო სიტუაცია აქტიურ ფაზაში აპრილიდან გადავა და სავარაუდოდ ბიძინა ივანიშვილი ოფიციალურ განცხადებასაც გააკეთებს.
“ბიძინა ივანიშვილის განცხადებაში ნათქვამია, რომ საარჩევნო კამპანიაშია აქტიურად ჩაერევა და “ქართულ ოცნებასაც” მხარს აქტიურად დაუჭერს. ოფიციალურად წინასაარჩევნო კამპანიის დაწყება ადრეა, თუმცა რეალურად ეს კამპანია დაიწყო მაშინ, როდესაც წინა არჩევნები დასრულდა. წინასაარჩევნო სიტუაცია არასოდეს არ მთავრდება. ვფიქრობ, აპრილიდან გაცილებით აქტიური ფაზაში გადავა და ალბათ ივანიშვილიც რაღაც განცხადებას გააკეთებს. შესაძლოა, ის პრესკონფერენციიით გამოვიდეს, ან თავისი მოსაზრებები და ხედვები ინტერვიუში გამოთქვას. ის აუცილებლად გამოჩნდება იმიტომ, რომ ეს ოფიციალურად განაცხადა. როდესაც წინასაარჩევნო პროცესები დაიწყება, ლოგიკურია, რომ ბიძინა ივანიშვილი თავისი მოსაზრებებით გამოვიდეს. პოლიტიკური ორგანიზაციის ოფიციალური დამფუძნებელია და სრული უფლება აქვს, რომ ამ პროცესში სრულად ჩაერთოს. “ყრილობა ჩატარდება თუ არა აპრილში, არ ვიცი, თუმცა, ეს თუ მოხდა, ძირითადი მომხსენებელი ბიძინა ივანიშვილი იქნება”, – აღნიშნა ზურაბ ბიგვავამ
როგორც საზოგადოებასთან ურთიერთობის და მარკეტინგული კომუნიკაციების სპეციალისტი ელდარ პირმისაშვილი “რეზონანსთან” საუბრისას აღნიშნავს, რომ ძალზე მნიშვნელოვანია, თუ რა ფორმით და რა იდეით გამოჩნდება ბიძინა ივანიშვილი.
“რაც დრო გადის, “ქართული ოცნების” მიმართ მით უფრო ბევრი კითხვა ჩნდება. ამომრჩეველთა უმეტესობა უკვე ჩამოყალიბებულია, ხმას ვის მისცემს. შესაბამისად, გამოჩენას თუ აპირებს, ძალიან მნიშვნელოვანია, რომ რამდენიმე თვით ადრე გამოჩნდეს და საკუთარ გუნდს მხარი დაუჭიროს. თუმცა, რა თქმა უნდა, ძალიან დიდი მნიშვნელობა აქვს, რა ფორმით გამოჩნდება. ამ ეტაპზე მის გამოჩენას იმდენად დიდი მნიშვნელობა არ აქვს, ვიდრე რა იდეით გამოჩნდება. ადამიანების ორი ჯგუფი არსებობს – ერთია, რომელიც ბიძინა ივანიშვილს მხარს უჭერს, მეორე ჯგუფი კი ფიქრობს, რომ მან დაპირებები ვერ შეასრულა. შესაბამისად, ორივე ჯგუფისთვის მნიშვნელოვანია, როდის გამოჩნდება. პირველი ჯგუფისთვის მნიშვნელოვანია ბოლოსთვის გამოჩნდეს, ხოლო მეორე ჯგუფისთვის, რაც მალე გამოჩნდება, მით უკეთესი იქნება. ამომრჩეველთა დაახლოებით 30-40 %-ს ჯერ გადაწყვეტილი არ აქვს, ხმას ვის მისცემს. ეს იმას ნიშნავს, რომ ისინი ჯერ დაკვალიანებულები არ არიან. ამომრჩეველთა ეს ნაწილი თავშესაფრად სხვადასხვა ტიპის პარტიებს ეძებს. შესაბამისად, ვინც აქცენტს ამ ადამიანებზე გააკეთებს, არჩევნებსაც ის მოიგებს”, – აღნიშნა ელდარ პირმისაშვილმა.
ექსპერტის თქმით, საქართველოში ჩატარებულ არჩევნებში ყველაფრის კულმინაცია, როგორც წესი, ბოლოს არის ხოლმე.
“წინა არჩევნების მსგავსად, ყველაფრის კულმინაცია ბოლოს მოხდება. საარჩევნო კამპანია ჯერ არ დაწყებულა. პარტიები საარჩევნო კაპანიას ნელ-ნელა იწყებენ და თუ გამოჩენას აპირებს საზოგადოებაზე ზეგავლენის მოხდენის მიზნით, ვფიქრობ, ბოლოში გამოჩნდება. მნიშვნელოვანია, რა ფორმით და როგორი გუნდით გამოჩნდება. აქცენტი სპორტსმენებზე კეთდება ხოლმე, მნიშვნელოვანია, გუნდის წევრები ადგილს რამდენად შეინარჩუნებენ. მოკლედ, მნიშვნელოვანია გუნდის დალაგება როგორ მოხდება და რა არგუმენტები ექნებათ მას და მის გუნდს. საზოგადოება ფიქრობს, რომ დაპირებები არ შეასრულა. ზოგადად, საზოგადოებას რეალურად უფრო მეტი მოთხოვნა აქვს, ვიდრე რომელიმე პოლიტიკურ პარტიას ამის შესრულება შეუძლია. ამიტომ მას ძალიან დიდი არგუმენტები და დიდი იდეა დასჭირდება იმისათვის, რომ საზოგადოებისგან კიდევ ერთი შანსი მიიღოს.
რაც შეეხება იქნება თუ არა პირველი სიის პირველი ნომერი, ამას რეიტინგისთვის, მე მგონი, გადამწყვეტი მნიშვნელობა არ ექნება. როგორც წესი, საზოგადოება არჩევანს ამ ლოგიკით არ აკეთებს. საზოგადოება უფრო ემოციებს ეჭიდება და გადაწყვეტილებასაც ასე იღებს. ვფიქრობ, კარგი იქნება, ტრადიციულ მიდგომას თუ გამოიყენებს და საზოგადოების წინაშე გუნდით და იდეით წარდგება. მაგალითად, წინა შემთხვევის დროს მან მუსიკალური ეფექტები გამოიყენა ბერას დახმარებით, რამაც იმოქმედა. დღეს დაუკავებელი სეგმენტი ძირითადად ახალგაზრდები არიან და ეს მოქმედებს. მას ასეთი მსგავსი ტიპის კამპანია სჭირდება, თუმცა იგივეს განმეორება შედეგის მომტანი არ იქნება, რადგან საზოგადეობამ ეს უკვე იხილა”, – განაცხადა ელდარ პირმისაშვილმა.
„რეზონანსი”, 12 მარტი, 2016 წელი
ინტერვიუ პეტრე მამრაძესთან: რუსებმა ნინო ბურჯანაძეზე ფსონი ერთხელ უკვე დადეს და იმედი გაუცრუვდათ
ელზა პაპოშვილი
“მართვის სტრატეგიული ცენტრის” ხელმძღვანელი პეტრე მამრაძე მიიჩნევს, რომ მომავალ საპარლამენტო არჩევნებზე არასაპარლამენტო პარტიებს საპარლამენტო პარტიებთან შედარებით შანსი არ აქვთ იმ შემთხვევაშიც კი, თუკი გაერთიანებას მოახერხებენ. “მთელ კვირასთან” საუბარში იგი თსუ-ში მიმდინარე პროცესებსაც შეეხო და აღნიშნა, რომ რექტორ ლადო პაპავაზე ზეწოლა ხორციელდება. მისი აზრით, სტუდენტებს აქვთ გარკვეული წყაროებიდან ინფორმაცია, რომ უნივერსიტეტში “ოდეერის” ინსტიტუტი არსებობს, რამაც მათი ასეთი გაღიზიანება გამოიწვია.
- როგორ ფიქრობთ, უნივერსიტეტში “ოდეერის” ინსტიტუტი ნამდვილად არსებობს?
- ამის დოკუმენტური მტკიცებულება არ მაქვს, მაგრამ მე მახსოვს შარშან დეპუტატმა გია ვოლსკიმ, როდესაც მას ოდეერების არსებობის შესახებ ჰკითხეს, თქვა, რომ დიხაც, არსებობს და ის კანონის შესაბამისად მოქმედებს.
მახსოვს ასევე, როდესაც ჟურნალისტმა რესურსცენტრის წარმომადგენელს ჰკითხა კონკრეტულ ადამიანზე, რომ ის “ოდეერი” იყო, მან უპასუხა, რომ დიახ, სისტემაში “ოდეერი” გვყავს, თუმცა ეს ის ადამიანი არ არისო.
“ოდეერი” საბჭოთაკავშირის დროინდელი ინსტიტუტია, როდესაც უშიშროების ოფიცერს სხვადასხვა სახელმწიფო დაწესებულებებში თანამშრომლის სახით აგზავნიდნენ. მას ყველა თანამშრომლის კონტროლი და ხელმძღვანელის მაგივრად გადაწყვეტილებების მიღება ევალებოდა. შემზარავი და ამაზრზენია, როდესაც დამოუკიდებლობის გამოცხადების შემდეგაც საქართველოში ეს ინსტიტუტი არსებობს. მახსოვს, როდესაც სტუდენტები სანდრო კვიტაშვილის მმართველობას აპროტესტებდნენ, მაშინ პარლამენტის წევრი ვიყავი და მათ შევხვდი, მითხრეს, რომ სანდროსთან პრეტენზია არ ჰქონდათ, თუმცა ამბობდნენ, რომ უნივერსიტეტში უშიშროების კაცი იყო და ყველაფერს ის მართავდა. კვიტაშვილს იქ არაფრის უფლება არ ჰქონდა, მხოლოდ ფორმალური მმართველი იყო.
- როგორ ფიქრობთ, გიორგი გაფრინდაშვილის წინააღმდეგ სტუდენტები რატომ გამოდიან?
- კონკრეტული ინფორმაცია, რომ გიორგი გაფრინდაშვილი “ოდეერის” თანამშრომელია, არ მაქვს, თუმცა მის მიმართ, რა თქმა უნდა, ლოგიკური კითხვები არსებობს. ასე მოულოდნელად 28 წლის ბიჭი საიდან გამოჩნდა? ვინ არის? უნივერსიტეტში როგორ მოხვდა? მის ადგილას მეცნიერი და ძალიან დამსახურებული ადამიანი იყო წარდგენილი. ვფიქრობ, სტუდენტებმა რაღაც იციან. მათ აქვთ საკმარისი ინფორმაცია, რომელიც გაფრინდაშვილის მიმართ არსებობს. სხვაგვარად ისინი ამხელა აჟიოტაჟს ტყუილად არ ატეხდნენ. ხაზს ვუსვამ, რომ ამ ინსტიტუტის არსებობას ბოლო უნდა მოეღოს.
- ფიქრობთ, რომ წინა საარჩევნოდ ხელისუფლება უნივერსიტეტში “ოდეერის” ინსტიტუტს აძლიერებს?
- ფაქტია, რომ სტუდენტებამდე რაღაც ინფორმაცია ჟონავს. დიდი ალბათობით ამას ფაქტებით ვერ დაადასტურებენ, მაგრამ ჩვენ ვიცით, მსგავსი სახის ინფორმაცია გარეთ როგორ გამოდის. საქართველოში ძალიან ადვილია იმის ცოდნა, ვინ ვისი კაცია.იმედი მაქვს, რომ ეს ხელისუფლება “ოდეერის” ინსტიტუტეს არ გააძლიერებს, რადგანაც ამით კარგს ვერაფერს მიიღებს. მგონია, რომ საქართველოს პრემიერ-მინისტრი წინასაარჩევნოდ ამ ინსტიტუტის გამოყენებას და გაძლიერებას არ დაუშვებს.
- რა უნდა გააკეთონ სტუდენტებმა, თუკი მათი მოთხოვნები არ დაკმაყოფილდება?
- სტუდენტებს მოვუწოდებ, რომ მიუხედავად ყველაფრისა, კანონის ჩარჩოებს არ გასცდნენ. ეს ადამიანი კანცლერიც რომ გახდეს, როცა იქნება თავს მაინც გამოავლენს. უბარლოდ კითხვა ჩნდება – ის ნამდვილად უნივერსიტეტის რექტორის ლადო პაპავას კანდიდატურაა? მან თავის დროზე ამ თანამდებობაზე პროფესორი სოსო არჩვაძე წარადგინა. არ გამიგია, რომ სტუდენტებს პაპავას გადადგომა მოეთხოვოთ. პირიქით, ისინი ამბობენ, რომ მათ რექტორზე ზეწოლა ხორციელდება. რატომ შეცვალა მან დამსახურებული პროფესორის განდიდატურა 28 წლის სრულიად გამოუცდელი ახალაგაზრდით?
- თქვენი აზრით, ლადო პაპავას ამ სიტუაციაში რისი გაკეთება შეუძლია? თუკი მასზე ზეწოლა მართლა ხდება და სტუდენტები სიმართლეს ამბობენ?
- მას შეუძლია, რომ ზუსტად მოქმედ კანონმდებლობას მიჰყვეს და ყველა ის წესი დაიცვას, რაც რექტორს ევალება. ჩვენ ვნახეთ, რომ ლადო პაპავა სულ სტუდენტების გვერდითაა და მათ პაპავას მიმართ აგრესია არა აქვთ.
- რას ფიქრობთ “მაესტროს” ირგვლივ განივითარებულ მოვლენებზე?
- ყველაფერი ერთმანეთს დროში ძალიან ემთხვევა. ვგულისხმობ “მაესტროდან” ჟურნალისტების ნინო ჟიჟილაშვილის და ვახო სანაიას გაშვებას. მათ პირდაპირ თქვეს, რომ გოგელიასთან კონფლიქტი მოუვიდათ, მხოლოდ იმიტომ, რომ მათი გადაცემები მას ხელისუფლებასთან პრობლემებს უქმნიდა. შემდეგ გრიგოლიასა და ეკა მიშველაძის გადაცემების დახურვა გავიხსენოთ. თუკი ადამიანს ხელისუფლებასთან ურთიერთობის გაფუჭების ეშინია, რა თქმა უნდა, რომ გრიგოლიას მსგავს რეიტინგულ გადაცემასაც დახურავს.
- თქვენ ფიქრობთ, რომ გოგელია ხელისუფლების გულის მოგებას ცდილობდა და ვერ მოხერხა?
- არ ვიცი ვინ რას ცდილობდა, მაგრამ მამუკა ღლონტის სიტყვებს გავიხსენებ, რომ “მაესტროს” საბოლოოდ პროსახელისუფლო სარედაქციო პოლიტიკა ექნებაო. ვინმეს სჯერა, რომ გაჩეჩილაძეს რუხაძემ მილიონები ასესხა? ეს ხომ პატარა ბავშვსაც არ სჯერა. გაჩეჩილაძეები ხელისუფლებისთვის “მაესტროს” გასაკონტროლებლად საუკეთესო კანდიდატები აღმოჩდნენ. რა თქმა უნდა, გოგელიაც იძულებული იქნება, რომ ისე მოიქცეს, როგორც მისთვის უკეთესი აღმოჩნდება. ეს ხაზს იმას უსვამს, რომ მედია სივრცის გაკონტროლებით ხელისუფლებაში ვიღაც კონკრეტული ადამიანია დაკავებული.
ვნახეთ რა მოხდა “რუსთავი 2″-თან მიმართებაში. როდესაც პროცესებმა კულმინაციას მიაღწია და უკვე “ქართული ოცნების” რეიტინგზე მოქმედება დაიწყო, სასწრაფოდ ბიძინა ივანიშვილი გამოჩნდა და განაცხადა, რომ ის ურთმელიძის ადგილას ასე არ მოიქცეოდა. რა მოხდა შემდეგ – მისი თქმა და ყველაფრის გაქრობა ერთად მოხდა. სად არის ახლა ქიბარ ხალვაში თავისი მოთხოვნებით? სად არიან აქიმიძე და დვალი? თითქოს ივანიშვილმა ჯადოსნური ჯოხი ჩამოჰკრა და ყველაფერი შეწყვიტა. აი, რაშია საქმე – როდესაც სისტემა ბატონ-ყმურია და “ხაზეინი” რასაც იტყვის, ყველა იმას აკეთებს.
- რას იტყვით არასაპარლამენტო ოპოზიციის შესაძლო გაერთიანების შესახებ – მომავალ საპარლამენტო არჩევნებში სერიოზულ ძალად ჩამოყალიბებას შეძლებენ?
- არცერთი არ არის იმ ქარიზმის მქონე ადამიანი, რომ ხალხში ნდობის მოპოვება შეძლონ. რა თქმა უნდა, მათ გარკვეული სახის ამომრჩეველი ჰყავთ, თუმცა არა იმდენი, რომ საპარლამეტო არჩევნებისთვის “ქართულ ოცნებას” ან სხვა რომელიმე საპარლამენტო ოპოზიციას აჯობონ. “ნაციონალურ მოძრაობას”, რამდენად გასაკვირიც არ უნდა იყოს, თავისი ამომრჩეველი ჰყავს. ქვეყანაში არც ისეთი ვითარებაა, რაც თუნდაც 2003 და 2012 წელს იყო. საქართველოში ხმას ჯერ კიდევ პიროვნებას აძლევენ. შესაბამისად, მე ვერ ვხედავ ამ ხალხში ისეთ გამოკვეთილ ლიდერს, ვისაც შესაძლოა ხმა მისცენ.
- ფიქრობთ, რომ ნინო ბურჯანაძე და ირმა ინაშვილი მომავალ საპარლამენტო არჩევნებზე პარლამენტში შესვალს ვერ შეძლებენ? მათ საკმარისი ამომრჩეველი არ ჰყავთ?
- არ გამოვრიცხავ, რომ ბარიერი გადალახონ, თუმცა სერიოზულ კონკურენციას მაინც ვერავის ვერ გაუწევენ. თანაც ეს ხალხი საზოგადოებისთვის მაინც პრორუსულ ძალას წარმოადგენენ. კი ამბობენ, რომ ჩვენს ქვეყანაში რუსეთის მხარდაჭერა გაზრდილია, მაგრამ მაინც ისე არ მგონია, რომ ამ პარტიებმა სერიოზული მხარდაჭერა მიიღონ.
თანაც, როდესაც რუსეთი დაინახავს, რომ არჩევნებისთვის მათ არცთუ კარგი რეიტინგი აქვთ, დიდად არ მგონია, რომ ფულის ხარჯვაზე თავი გაიგიჟონ. მითუმეტეს ბურჯანაძეზე ფსონი ერთხელ უკვე დადეს და იმედი გაუცრუვდათ. ამიტომაც არ მგონია, რომ მასზე დიდ იმედებს ამყარებდნენ.
„ახალი თაობა“, 12 მარტი, 2016 წელი
ინტერვიუ ჯონდი ბაღათურიასთან: „კოალიცია „ქართული ოცნების“ დაშლის გადაწყვეტილება მიღებულია“
გაერთიანდება თუ არა ოპოზიციური სპექტრი? რა ხდება უმრავლესობაში? ვის რა შანსები აქვს არჩევნებზე? „ახალი თაობის“ ამ და სხვა კითხვებს `ქართული დასის~ ლიდერი ჯონდი ბაღათურია პასუხობს.
- ბატონო ჯონდი, ამ თემაზე ჩვენი გაზეთი რამდენიმე დღის წინაც წერდა. საუბარია სამი ოპოზიციური პარტიის: თქვენი, ნინო ბურჯანაძის და ირმა ინაშვილის პარტიების გაერთიანებაზე. დაწყებულია ამ თემაზე კონსულტაციები?
- უფრო ზუსტად რომ ვთქვათ, ინიციატივა მდგომარეობს იმაში, რომ ზოგადად მოხდეს ოპოზიციის გაერთიანება. რომელი პოლიტიკური ძალები მიიღებენ ამაში მონაწილეობას, ამას ექნება დიდი მნიშვნელობა, მაგრამ ეს ჯერჯერობით ცნობილი არ არის.
- ანუ დიალოგი არ მიმდინარეობს?
- ჯერჯერობით დიალოგი ამ თემებზე არ დაწყებულა. იყო მხოლოდ შემოთავაზება ამ დიალოგის დაწყების. ამის შემდგომ ერთი შეხვედრა გაიმართა ჩვენსა და პატრიოტთა ალიანსს შორის. უბრალოდ, უკეთ გავერკვიეთ მათ ხედვებში, ჯერჯერობით მეტი არაფერი მომხდარა. კონსოლიდირებული ოპოზიცია უფრო ეფექტურია და ამომრჩეველიც უფრო აქტიურად მოდის კონსოლიდირებული ოპოზიციის მხარდასაჭერად. თუმცა დიდი მნიშვნელობა ექნება მონაწილე სუბიექტებს. ეს ძალები მისაღები უნდა იყოს ელექტორატისთვის.
- ანუ არ გამორიცხავთ, რომ რამდენიმე პარტია არჩევნებზე გაერთიანებული სახით წარდგეთ?
- პირადად მე მხარს ვუჭერ ერთიანობას, მაგრამ ეს ერთობა უნდა იყოს თავსებადი პოლიტიკური ძალების. ჩვენი პარტნიორი არის ნინო ბურჯანაძის დემოკრატიული მოძრაობა. თუმცა დეტალებზე საუბარი ჯერ ადრეა. ვნახოთ, როგორ სახეს მიიღებს დიალოგი ოპოზიციის შიგნით. ოპოზიციის გაერთიანებას მე ყოველთვის მხარს დავუჭერ.
- ამ ინიციატივის ავტორი თქვენ ხართ?
- ინიციატივა ეკუთვნის პატრიოტთა ალიანსს. დიალოგის დაწყებაზე ინიციატივა ირმა ინაშვილისგან წამოვიდა და მე ამას მივესალმები.
- თუ იცით ნინო ბურჯანაძის პოზიცია ამ თემაზე?
- ნინო ბურჯანაძე ჩვენი პარტნიორია, ჩვენ ალიანსი გვაქვს. ეს კოალიცია შევქმენით ადგილობრივი არჩევნების დროს და მის დაშლას არც ვგეგმავთ. ზოგადად მეც და ქალბატონი ნინოც ერთიანობას მხარს ვუჭერთ და მიგვაჩნია, რომ უმჯობესი იქნება, პოლიტიკურმა ძალებმა თავისი ელექტორატი არ გაყონ და, პირიქით, გააერთიანონ. ეს უფრო ეფექტური იქნება. თუმცა როგორც ჩემთვის, ისე ნინო ბურჯანაძისთვის დიდი მნიშვნელობა ექნება დეტალებს. ამ დეტალებზე კი მოსაზრებები ჯერჯერობით ჩამოყალიბებული არ არის და პასუხს ვერც ნინო ბურჯანაძის მაგივრად გაგცემთ.
- რა შანსები გაქვთ, თუკი იმასაც გავითვალისწინებთ, რომ საარჩევნო კანონმდებლობა უცვლელი დარჩა?
- თუ ოპოზიციამ მოახერხა კონსოლიდაცია, მაშინ ის უფრო ეფექტური იქნება. წინააღმდეგობის გაწევას შეძლებს არა მხოლოდ პროპორციული სიების არჩევისას, არამედ მაჟორიტარებშიც. ამ მხრივ აქ მართლაც ჩნდება შანსი გამარჯვების, მაგრამ თუ კონსოლიდაცია არ მოხდა, მაშინ ჩვენ მოგვიწევს ბრძოლა უბრალოდ ბარიერის გადალახვისთვის.
- დღევანდელი სიტუაციიდან გამომდინარე, არც იმას გამორიცხავენ, რომ კოალიცია „ქართული ოცნება“ დაიშალოს. მაშინ ხომ სულ სხვა მოცემულობა დგება?
- კოალიცია რეალურად დაშლილია. ის, რაც დღეს კოალიციაში ხდება, ეს სასურველი არ არის სახელმწიფოსთვის, თუმცა ოპოზიციის გაერთიანების შემთხვევაში, ეს გამარჯვების შანსს იძლევა. ამიტომ ამ შანსის ხელიდან გაშვება არ შეიძლება.
- რა პროცესია ის, რაც დღეს კოალიციაში ხდება?
- კოალიციაში არის დღეს დაპირისპირება, არის პოლიტიკურ ინტერესთა კონფლიქტი, არის ფინანსურ ინტერესთა კონფლიქტი, ასევე არსებობს კორუმპირებულ ინტერესთა კონფლიქტი. თუმცა არსებობს ცნობიერებითი კონფლიქტიც. მაგალითად, მრეწველებს და რესპუბლიკელებს ნამდვილად აქვთ ცნობიერებითი კონფლიქტი. თუმცა ისიც აშკარაა, რომ ამ კონფლიქტის პროვოცირება რესპუბლიკელებმა დაიწყეს და პირადი შეურაცხყოფა მიაყენეს მრეწველების ლიდერ გოგი თოფაძეს. მრეწველები უფრო კონსერვატიული შეხედულებების მქონე პარტიაა, ხოლო რესპუბლიკელების შეხედულებებზე დროს აღარ დავხარჯავ, ყველამ ყველაფერი კარგად იცის.
- რას გულისხმობთ?
- რესპუბლიკელების ცნობიერებაზე ლაპარაკი თუ ვინმეს უნდა, ეს ძალიან კარგად და აშკარად გამოჩნდა მათი დამოკიდებულებით ბოლო საკანონმდებლო ინიციატივაზე, რომელიც მდგომარეობს იმაში, რომ კონსტიტუციაში ჩაიწეროს, რომ ოჯახი არის ქალისა და მამაკაცის ერთობა. ამის წინააღმდეგ როცა მიდის პარტია, იმ პარტიას რაზე უნდა ველაპარაკოთ?! მათი სახე კიდევ ერთხელ გამოჩნდა. პირველად ექსკლუზიურად სწორედ თქვენ გითხარით ის ინფორმაცია, რომ ამ ერთსქესიანთა ქორწინების ლობირებას მხარს დაუჭერენ რესპუბლიკური პარტია და ნაციონალური მოძრაობა.
- თუმცა რესპუბლიკელები კოალიციაში წამყვან ძალად რჩებიან...
- ეს არის ივანიშვილის სტრატეგიული შეცდომა. წამყვან ადგილზე რესპუბლიკელების ყოფნა არ არის გამოწვეული მათი პოპულარობით, მათი საზოგადოებრივ აზრზე გავლენით. ეს არის განპირობებული იმით, რომ ისინი ბიძინა ივანიშვილთან არიან დაახლოებულები, მასთან ახლოს ყოფნით სარგებლობენ და ხლართავენ ინტრიგებს. ამიტომ მოიპოვეს ასეთი დაწინაურებული პოზიცია კოალიციის შიგნით. ამიტომ აძლევენ თავს უფლებას, ასე გამაღიზიანებლად ილაპარაკონ, რაც დიდი ინტელექტის მაჩვენებელი არ არის.
- რას ველოდებით? რამდენად მოსალოდნელია სიურპრიზები?
- ფაქტია, რომ კოალიცია არის დაშლილი და ფაქტია, რომ არის მიღებული გადაწყვეტილება, რომ ეს არ აცნობონ არც საზოგადოებას და არც კოალიციის მონაწილე სუბიექტებს არჩევნებამდე.
- რატომ?
- იმიტომ, რომ პარლამენტში არ მოხდეს უმრავლესობის დაშლა.
- მაშინ რა სახით წარდგება არჩევნებზე კოალიცია? ბევრმა ვერ გაიგო უსუფაშვილის განცხადება - სტრატეგიული თანამშრომლობა. რას ნიშნავს ეს ყველაფერი?
- ამ განცხადების ქვეტექსტში იკითხება ის, რომ კოალიცია დაიშალა, მაგრამ ამაზე განცხადებას არ გააკეთებენ არჩევნებამდე. უმრავლესობას შეინარჩუნებენ იმისთვის, რომ თანამდებობები შეინარჩუნონ. კოალიციის დაშლა არ აწყობს „ქართულ ოცნებას“, რადგან დაკარგავს უმრავლესობას. უმრავლესობის დაშლა არც რესპუბლიკელებს აწყობთ, რადგან დაკარგავენ უსუფაშვილის სკამს, აი ამიტომ ორივე მხარე ჩუმადაა და ელოდება არჩევნებს. ეს არის მათი სტრატეგიული თანამშრომლობა. ცნობილი გამონათქვამი არსებობს _ ქვეყანას მართავს არა იმპერატორი, არამედ ის, ვინც იმპერატორთან ახლოს არის და მისი ყური ეკუთვნის.
- ანუ ეს როლი აქვთ რესპუბლიკელებს?
- ის, ვისაც აქვს საშუალება ყურში ჩაბზუოდეს ლიდერს. დიახ, მათ აქვთ ივანიშვილთან კომუნიკაციის საშუალება.
- პარტიების დამოუკიდებლად გასვლა არჩევნებზე პარტია „ქართული ოცნებისთვის“ სახიფათო არ იქნება? ეს ხომ არ იქნება ბეწვის ხიდზე გავლა?
- ივანიშვილის როლი გადამწყვეტია. ის „ქართული ოცნების“ დამფუძნებელია, ამიტომ სხვებზე მეტ მხარდაჭერას მიიღებენ. ზოგიერთმა პარტიამ ივანიშვილის ხარჯზე პოზების დაჭერა დაიწყო და იმაზე მეტი მოითხოვა, ვიდრე ეკუთვნით. ამიტომ ყველასთვის ჯობია მარტო გასვლა. ეს მარტო რესპუბლიკელებს არ ეხებათ, სხვებიც დადიან გაბღენძილები და გაფხორილები.
„ახალი თაობა“, 12 მარტი, 2016 წელი
ინტერვიუ ტრისტან წითელაშვილთან: “მთავრობის წევრები დავალებებს ისევ სააკაშვილისგან იღებენ”
ვინ ასრულებს სააკაშვილის დავალებებს საქართველოს მთავრობაში, ვინ მფარველობს ძებნილებს, რას გეგმავენ ნაციონალები, ვის უწამლავს ტვინს კობა ხაბაზი? – ამის შესახებ „ახალ თაობას“ სამხედრო ექსპერტი ტრისტან წითელაშვილი ესაუბრება.
„უკვე აღარც კი მახსოვს, მერამდენე თვეა, ხელისუფლებას იმ არეულობის შესახებ ვაფრთხილებ, რომელიც საქართველოში საპარლამენტო არჩევნებისთვის იგეგმება. გეგმა მიხეილ სააკაშვილს აქვს შემუშავებული და მისი განხორციელება ეტაპობრივად მიმდინარეობს. ვიღაცები ჩემს გაფრთხილებებს თავიდან ალმაცერად უყურებდნენ. არადა, შარშან შემოდგომაზე გამოჩნდა, რომ მართალი ვიყავი. „რუსთავი-2“-ის გარშემო დატრიალებული ამბებიდან ყველა დარწმუნდა, რომ სააკაშვილს აქ ზონდერები ჰყავდა გამოგზავნილი. ეს ზონდერები მაშინაც დავაფიქსირე, აქ ვეტერანთა შეკრება რომ ჩატარდა. უკრაინიდან ჩამოსულ ქართველ ზონდერებს უკრაინული სამხედრო ფორმები ეცვათ. ჩვენ მათ ფოტოები გადავუღეთ და გავასაჯაროვეთ. ისინი სხვადასხვა არასამთავრობო ორგანიზაციაში გადანაწილდნენ. ამ თვის ბოლოდან ეს ხალხი აქტიურ ქმედებებზე გადავა“, – ამბობს ტრისტან წითელაშვილი..
- უკრაინიდან ჩამოსულ ქართველ ზონდერებს ფოტოები გადავუღეთო, ამბობთ. ეს მასალა სათანადო ორგანოებს თუ მიაწოდეთ?
- ბუნებრივია, მივაწოდე. ჩემ მიერ მიწოდებული ინფორმაცია იყო სრულყოფილი. დეტალებში აღვუწერე, რა ვითარებაში შემოვიდნენ ისინი თბილისის აეროპორტში. მათ ეცვათ უკრაინული სამხედრო ფორმები შემდეგი წარწერებით: „აზოვი“ და „დონბასი“. ეს ფოტომასალა გადავეცი ხელისუფლებას, მაგრამ არანაირი რეაგირება არ ყოფილა. რამდენიმე დღის წინ ისინი ქუჩაში შემხვდნენ, თავიანთ ოფისთან მიდიოდნენ.
- რა ოფისზეა საუბარი?
- ამნაირების შტაბი არის ყოფილი პირიმზის ტერიტორიაზე, ახლა კოდუების დედა რომ აკონტროლებს. ისინი არაერთხელ მყავს ამ ტერიტორიაზე დაფიქსირებული. არის ზონდერების მეორე ჯგუფიც, რომელიც იამანიძის ქუჩაზე ვეტერანთა ჰოსპიტალს არიან ამოფარებული. ორივე დაჯგუფება სააკაშვილის პირად დაქვემდებარებაშია და დაფინანსებასაც იქიდან იღებენ.
- მიხეილ სააკაშვილი აძლევს ფულს?
- დაფინანსებასთან დაკავშირებული საკითხების მოგვარება დავით კეზერაშვილს აქვს დავალებული. მან უნდა დააფინანსოს ე.წ. დამოუკიდებელი ექსპერტები და ზონდერები.
- თქვენ თქვით, რომ უკრაინიდან ჩამოსულებს იქაური სამხედრო ფორმები ეცვათ. ცოტა უცნაური არაა საქართველოს ტერიტორიაზე სხვა ქვეყნის სამხედრო ფორმით სიარული ან იქნებ ამას კანონი არ კრძალავს?
- ამის უფლება არავის აქვს. ისინი ამ ფორმებით რომ გამოვიჭირე და გეგმაც ჩავუშალე, დამირეკეს და ჩემთან შეხვედრის სურვილი გამოთქვეს. შეხვედრაზე მოტყუებით მიმიყვანეს. მითხრეს, თითქოს ომის ვეტერანებს სურდათ ჩემთან საუბარი. წავედი, ისინი დამხვდნენ გაზეთებით, სადაც ჩემი ინტერვიუები იყო გამოქვეყნებული. მისაყვედურეს, რატომ წერ ჩვენზე ასეთ რამეებსო. მე იქით დავუსვი კითხვა და დავინტერესდი, რატომ დადიოდნენ საქართველოს ტერიტორიაზე უცხო ქვეყნის შეიარაღებული ძალების ფორმით. ისიც ვუთხარი, სააკაშვილის ბანდის წევრები ხართ და აქ არეულობა გინდათ-მეთქი. შეხვედრაზე სისხლის სამართლის კოდექსი მქონდა წაღებული და იქიდან რაღაცები წავუკითხე.
- რა წაუკითხეთ?
- ამ კოდექსის 310-ე მუხლი პირდაპირ ითვალისწინებს იმ პირის პატიმრობას, რომელიც სხვა ქვეყანაში არაოფიციალურად მონაწილეობს საბრძოლო მოქმედებებში. აი, ეს წავუკითხე და ვუთხარი, ამის მიხედვით თქვენ ციხეში უნდა იყოთ-მეთქი. ამის თქმა იყო და გამეცალნენ. ამის შემდეგ ჩემთან აღარ დაურეკავთ, მაგრამ მე ვადევნებ თვალს. მათ გოგა ონიანთან და ნიკა მელიასთან აქვთ მჭიდრო კავშირი. ონიანი ძველი ზონდერია და მას საკმაოდ სერიოზული ჯგუფი ჰყავს. ისინი მალე გააქტიურდებიან. კიდევ არიან სხვა ჯგუფები, რომლებიც საჭირო დროს შერწყმულად იმოქმედებენ.
- რა მოქმედებები უნდა განახორციელონ მათ?
- ისინი იმ დავალების მიხედვით იმოქმედებენ, რომელიც მათ უკრაინიდან მოუვათ. მათგან სხვადასხვა ტიპის არეულობებს უნდა ველოდოთ.
- ნაციონალების მხრიდან მოსალოდნელ არეულობებზე უკვე 3 წელია საუბრობენ, მაგრამ დღემდე არაფერი მოუწყვიათ და გადაჭარბებული ხომ არ არის ეს შიშები?
- იცით, რატომ არ მოაწყვეს? მათი გეგმები წინასწარ გავშიფრეთ და ხელ-ფეხი შევუკარით. ახლა უკვე ყველაფერზე წავლენ, რადგან საარჩევნოდ არეულობა სჭირდებათ. ისინი სხვადასხვა სახის აქციას გამართავენ. მე არც დივერსიულ აქტებს გამოვრიცხავ. ყველაფერს გააკეთებენ, რომ მოსახლეობა ხელისუფლების წინააღმდეგ განაწყონ და ქუჩაში გამოიყვანონ. მოვუწოდებ ხელისუფლებას, განსაკუთრებული ყურადღება მიაქციონ სტრატეგიულ ობიექტებს. ზონდერები შეეცდებიან, ქვეყნის პარალიზება მოახდინონ.
- მათ 6 მარტსაც სცადეს ხალხის გამოყვანა, მაგრამ ისეთი არაფერი მომხდარა...
- ზონდერებს იმიტომაც მიმართავენ, რომ ხალხში ნდობა საერთოდ აღარ აქვთ. ამიტომაც შეეცდებიან ისეთი დივერსიის მოწყობას, რაც ხალხს ქუჩაში გამოიყვანს. ამის მოსაწყობად ზონდერებს საკმარისი გამოცდილება აქვთ. ამათი მთავარი მამოძრავებელი ძალა კობა ხაბაზია.
- ეს კობა ხაბაზი რა ისეთი სტრატეგოსია, რომ ყველას ის უწევს კოორდინაციას და მითითებებს აძლევს?
- სტრატეგოსი არა, ის. ის ნაციონალების მონა, გაიძვერა, ცუდი და მშიშარა ადამიანია.
- თუ მშიშარაა, ზონდერებს რანაირად უთავკაცებს?
- მშიშარა ადამიანებს სულ სხვანაირი ტვინი და ფსიქოლოგია აქვთ, თავში ისეთი ბინძური აზრები მოსდით, სხვა რომ ვერ მოიფიქრებს. ის ამ მიმართულებაში იდეოლოგად ჰყავთ. მასაც გამოჭერილი ჰყავს ახალგაზრდები თუ ზონდერები და უწამლავს ტვინს.
- რას ეუბნება ამისთანას?
- თავისი მეთოდებით უნერგავს, რომ ისინი არიან ქვეყნის გადამრჩენები და ნაციონალები თუ არ დაბრუნდებიან, ქვეყანა დაიღუპება. ის ამ თემაზე საათობით კითხულობს ლექციებს. ვაი იმას, ვისაც ხაბაზის ლაპარაკის მოსმენა უწევს.
- ზემოთ სისხლის სამართლის 310-ე მუხლი ახსენეთ, რომლითაც საქართველოს მოქალაქეს ეკრძალება სხვა ქვეყნის ტერიტორიაზე საომარ მოქმედებებში მონაწილეობა. ეს თუ ასეა, რატომ არ დააკავეს ეს პირები, რომლებზეც თქვენ საუბრობთ?
- ეს ხელისუფლების წარმომადგენლებს უნდა ვკითხოთ. სისხლის სამართლის კოდექსი რადგან ვახსენეთ, ბარემ 410-ე მუხლსაც გავიხსენებ, რომელიც მოწოდებასაც კი კრძალავს. რამდენიმე თვის წინ ბაჩანა ახალაიამ ციხიდან მოუწოდა ხალხს _ შევქმნათ სამობილიზაციო შტაბები და უკრაინაში წავიდეთ საომრადო. პროკურატურას ამის გამო მის წინააღმდეგ სისხლის სამართლის საქმე უნდა აღეძრა, ასევე უნდა დაეკავებინათ ის პირები, რომლებზეც მე ვსაუბრობ. სამწუხაროდ, პროკურატურასა და შინაგან საქმეთა სამინისტროში კვლავაც მოქმედებენ სააკაშვილის მიერ ჩატოვებული დივერსანტები. სწორედ მათ გადმოჰყავთ ბოევიკები საზღვარზე და მათი მფარველობით დადიან ისინი თავისუფლად ქუჩაში. საჯაროდ ვაცხადებ, შინაგან საქმეთა სამინისტროში საკმაოდ მაღალ თანამდებობებზე სხედან პირები, რომლებიც უშუალოდ სააკაშვილისგან იღებენ მითითებებს. მთავრობაშიც ბევრია ასეთი.
- რა მითითებებზეა საუბარი?
- ყველანაირ მითითებებს ასრულებენ. მაგალითად, უკრაინიდან ზონდერებს რომ აგზავნიან აქ, აფრთხილებენ, რომ მათ ხელი არავინ ახლოს და ასეც არის. საქართველოში ყველამ იცის დავით მარტიაშვილის ამბავი. მის მიმართ საქმეა აღძრული და მასზე ძებნაა გამოცხადებული. სხვა ზონდერების მსგავსად, ისიც უკრაინაშია და სააკაშვილის შტაბს წარმოადგენს. რამდენიმე თვის წინ მარტიაშვილი საქართველოში იყო ჩამოსული. მიუხედავად იმისა, რომ მასზე ძებნაა გამოცხადებული, ის არავის დაუკავებია და თავისუფლად წავიდა ქვეყნიდან.
ზონდერების მფარველებზე დეტალურ ინფორმაციებს ვაგროვებ და მასაც მალე გამოვაქვეყნებ. არ მავიწყდება შს მინისტრის მოადგილე გამეზარდაშვილის განცხადება. ზაფხულში ვანო მერაბიშვილის ყოფილ მოადგილე ლევან გვაზავას იარაღი გაუვარდა და შემდეგ თვითმკვლელობა ცადა. გამეზარდაშვილი მის სანახავად მივიდა და თქვა, რომ ის პატიოსანი ადამიანი იყო. კაცი მერაბიშვილის მოადგილე რომ არის, რანაირად შეიძლება, ის პატიოსანი იყოს? მეგონა, განმარტებას გააკეთებდა გამეზარდაშვილი, მაგრამ მსგავსი არაფერი მომხდარა.
- ამით რის დამტკიცება გინდათ, რომ ის არის სააკაშვილის დავალებების შემსრულებელი?
- ამის თქმა არ მინდა. ეს ამბავი ისე გავიხსენე და არ მომეწონა, მერაბიშვილის მოადგილე კარგად რომ მოიხსენია.
- ისე, ამბობენ, რომ გამეზარდაშვილი ღარიბაშვილის კადრია...
- ასე ამბობენ და, სიმართლე გითხრათ, უკვე ვეღარ ვიგებ, ვინ ვისი კადრია და ვინ რას კადრულობს.
„რეზონანსი”, 12 მარტი, 2016 წელი
მილიონი ლარი დამნაშავეზე ინფორმაციისათვის
ვის აძლევდა ხელს ოპოზიციონერი პოლიტიკოსის პირადი ცხოვრების ფარული ჩანაწერის გავრცელება
თაკო მათეშვილი
ამაზრზენი, სამარცხვინო, საზიზღარი, უზნეო, ამორალური, გადაგვარებული, სახელმწიფოს დამანგრეველი – ამგვარი ეპითეტებით ამკობენ ხელისუფლებაში პირადი ცხოვრების ამსახველი კადრების გამავრცელებლებს და აცხადებენ, რომ წარმოდგენაც კი არ აქვთ იმის შესახებ, თუ ვის ინტერესებში შეიძლება შედიოდეს ეს ყველაფერი.
მოგეხსენებათ, გუშინ, ნაშუადღევს ინტერნეტში “იუთუბზე” ერთ-ერთი ოპოზიციონერი პოლიტიკოსის პირადი ცხოვრების ამსახველი ვიდეოჩანაწერი გავრცელდა. “ამ და სხვა მსგავსი კადრების არგავრცელების სანაცვლოდ, უამრავ ანტისახელმწიფოებრივ წინადადებაზე დაითანხმეს მთვარობის წევრები, მათ შორი, გაუპატიურების საქმეების გამოუძიებლობა, ანტიდისკრიმინაციული კანონის მიღება და მასალების განადგურება ირაკლი ღარიბაშვილი მინისტრობის დროს. აი, ვის პირად სიამოვნებას ეწირება ქვეყანაში სამართლიანობის აღდგენა”, – ნათქვამი იყო ვიდეოს ტიტრებში.
სამართალდამცავმა ორგანოებმა ვიდეო “იუთუბიდანაც” მალევე, დაახლოებით 45 წუთში წაშალეს. მთავარმა პროკურატურამ კი პირადი ცხოვრების ამსახველი ინფორმაციის უკანონოდ გავრცელების ფაქტზე გამოძიება დაიწყო. “მიმდინარე წლის 11 მარტს, ინტერნეტ სივრცეში განთავსებულ პირადი ცხოვრების ამსახველ ვიდეო მასალასთან დაკავშირებით, მთავარ პროკურატურაში დაიწყო გამოძიება პირადი ცხოვრების ამსახველი ინფორმაციის უკანონოდ გავრცელების ფაქტზე, საქართველოს სისხლის სამართლის კოდექსის 157-ე მუხლის მე-2 ნაწილით გათვალისწინებული დანაშაულის ნიშნებით. ამ ეტაპზე საქმეზე აუცილებელი და გადაუდებელი საგამოძიებო მოქმედებები ტარდება”, – აღნიშნულია პროკურატურის განცხადებაში.
მთელი დღის განმავლობაში გმობდნენ პოლიტიკოსები თუ არაპოლიტიკოსები პირადი ცხოვრების ამსახველი კადრების როგორც გადაღებას, ისე გავრცელებას და დამნაშავეების უმკაცრესად დასჯას ითხოვდნენ.
საკმაოდ მწვავე კანცხადება გააკეთა პარლამენტის თავმჯდომარე დავით უსუფაშვილმა, რომელმაც აღნიშნა, რომ “შეშფოთება, აღშფოთება და გამოძიების დაწყება აღარ არის ადეკვატური რეაგირება ისეთი გადაგვარებული ადამიანების წინააღმდეგ, ვინც შექმნა, დაამონტაჟა, დაასაწყობა და ახლა საზოგადოებას მიზანმიმართულად წამლავს.”
იგი მიმართავს პროკურატურის, პოლიციის და უშიშროების სამსახურების ხელმძღვანელებს, აღიარონ, რომ ამ პრობლემას ტრადიციული მეთოდებთ ვერ უმკლავდებიან და საგანგებო ზომების მიღებისაკენ მოუწოდებს. მიიჩნევს, რომ ამგვარ დანაშაულს ისე უნდა ებრძოლონ, როგორც ტერორიზმს.
“დააწესეთ მილიონი ლარი და კონსპირაციულობის დაცვის სრული გარანტია იმ პირებისთვის, ვინც გამოძიებას დამნაშავემდე მიიყვანს,” – აცხადებს უსუფაშვილი და აღნიშნავს, რომ საქართველოს პარლამენტი მზად არის, წვლილი შეიტანოს შესაბამისი საბიუჯეტო სახსრების მოძიებაში.
აღსანიშნავია, რომ იმ საინფორმაციო საშუალებებმა, რომლებმაც ამ ფარული ჩანაწერის შესახებ ინფორმაცია გაავრცელეს ისეთი ფორმით, რომელიც ჩანაწერზე ასახული პოლიტიკოსის იდენტიფიცირებისა და “იუტუბზე” თავად ჩანაწერის მარტივად მოძებნის შესაძლებლობას იძლეოდა, ხელისუფლების, არასამთავრობოებისა და თავად მედიის წარმომადგენელთა ნაწილის კრიტიკა და პროტესტი დაიმსახურეს. ესენი იყვნენ საინფორმაციო სააგენტო “ინტერპრესნიუსი” და რადიო “ფორტუნა”.
გუშინ იუსტიციის მინისტრმა თეა წულუკიანმა, თავდაცვის მინისტრმა თინა ხიდაშელმა და პრეზიდენტ გიორგი მარგველაშვილის ადმინისტრაციამ განაცხადეს, რომ ბოიკოტს უცხადებენ ამ საინფორმაციო საშუალებებს და მათთან თანამშრომლობას წყვეტენ. ასევე მოიქცნენ ტელეკომპანია “რუსთავი 2″ და “მაესტრო”. მომხდარის გამო “ინტერპრესნიუსმა” და “ფორტუნამ” საჯაროდ ბოდიშიც მოიხადეს. ამასთან, “ინტერპრესნიუსმა” გაავრცელა განცხადება იმის შესახებ, რომ რედაქტორი, რომელიც პასუხისმგებელი იყო გუშინ გავრცელებული პირადი ცხოვრების შესახებ ინფორმაციის გავრცელებაზე, გათავისუფლდა თანამდებობიდან.
საპარლამენტო უმრავლესობაში ამბობენ, რომ მათ არ აქვთ ვერსია იმასთან დაკავშირებით, თუ ვის ინტერესში შეიძლება შედიოდეს ამგვარი ჩანაწერის გავრცელება, თუმცა, როგორც “ეროვნული ფორუმის” ერთ-ერთი ლიდერი ანი მიროტაძე ამბობს, იგი ხელმისაწვდომი ყველასთვის შეიძლება ყოფილიყო – როგორც პოლიტიუკურად, ისე პირადად დაინტერესებული პირებისათვის.
თუმცა ეს, მიროტაძის თქმით, მისთვის ნაკლებად მნიშვნელოვანია და ახლა მხოლოდ იმას ელის, რომ 2-3 დღეში პროკურატურა და შსს გამოიკვლევენ, თუ რასთან გვაქვს საქმე, დამნაშავეს გამოავლენენ და უმკაცრესად დასჯიან.
“შესაძლოა, ჩვენი კანონი ლიბერალურიც კი იყოს ამ შემთხვევაში და მისი გამკაცრების საჭიროებაც იდგეს, რადგან მგონია, რომ ეს დანაშაული არა მსუბუქი, არამედ მძიმედ მძიმე დანაშაულის კატეგორიას განეკუთვნება. როცა ადამიანის პირად ცხოვრებაში ასე ბინძურად ერევი, რომელიც კონსტიტუციით დაცული და უზრუნველყოფილია, უმკაცრესად უნდა დაისაჯო. არანაირი მნიშვნელოა არ აქვს, თუ ვინაა ეს ადამიანი. ესაა მახინჯი და ბინძური ფორმა, რომელიც სახელმწიფოს აზიანებს და აზარალებს,” – აღნიშნავს მიროტაძე.
უმრავლესობის წევრ გუგული მაღრაძის აზრით კი, ჩანაწერის გავრცელება შესაძლოა იმ ადამიანების ინტერესებში შედიოდეს, რომელთაც უნდათ საზოგადოებას აჩვენონ, რომ “ასეთი რაღაცების გავრცელება გრძელდება” და რომ ხელისუფლება არაეფექტურია.
იგი იზიარებს მოსაზრებას, რომ ასეთ კადრებზე ხელი შესაძლოა ნებისმიერ ადამიანს, პოლიტიკურ ძალასა თუ დაჯგუფებას მიუწვდებოდეს.
“დღევანდელი ტექნოლოგიების პირობებში არ არსებობს იმის შესაძლებლობა, რომ ასეთი ტიპის აპარატურა მხოლოდ ხელისუფლების მიერ იყოს კონტროლირებადი და სხვას ხელი არ მიუწვდებოდეს. ძალიან დემოკრატიულ ქვეყნებშიც კი არიან დაჯგუფებები, რომელთაც ადამიანების თვალთვალი, პირადი ცხოვრების ამსახველი მასალის ჩაწერა და გავრცელება შეუძლიათ. ასე რომ, ამისგან დაზღვეული არ ვართ.
“რაც მთავარია, საზოგადოება მსგავსი ფაქტების მიმართ გულგრილი უნდა იყოს. როცა საზოგადოება ამაზე აჟიოტაჟს არ ატეხს, აღარც ასეთი ჩანაწერების გაკეთებისა და გავრცელების სურვილი იარსებებს. რთული მისაღწევია, მაგრამ ყველაზე კარგი გზა ესაა,” – აღნიშნავს გუგული მაღრაძე.
ვიდეოს გამავრცელებლის მოტივაციაზე საუბარი “რესპუბლიკელ” ლევან ბერძენიშვილსაც უჭირს და ამბობს, რომ შედეგი ასეთია – “სახელმწიფო ინგრევა”. ეს ყველაფერი, ბერძენიშვილის თქმით, საქართველოს სახელმწიფოს წინააღმდეგაა მიმართული და არა მხოლოდ ხელისუფლების. ამბობს, რომ ხელისუფლების იმიჯიც ზიანდება, მაგრამ, პირველ რიგში, ეს მთელი ქვეყნის შეუმდგომრობაზე მეტყველებს.
“როცა მისი მოქალაქის უფლებები ასე ითელება ფეხქვეშ, იმ სახელმწიფოში კეთილი არაფერი იქნება. ევროინტეგრაციის გზაზე მიმავალ ქვეყანას ვიღაცა ასეთი ნაღმებით აფეთქებს. ასე რომ, სახელმწიფოსთვის ეს სიკვდილ-სიცოცხლის საკითხია. გვერდზე უნდა გადაიდოს ყველაფერი და ეს საქმე უნდა გამოიძიოს,” – აცხადებს ბერძენიშვილი.
იგი უერთდება პარლამენტის თავმჯდომარის ინიციატივას ფულადი პრიზის გამოყოფის თაობაზე და აცხადებს, რომ ეს ერთხელ და სამუდამოდ თუ არ დამთავრდა, მაშინ “მხოლოდ ხელისუფლება კი არა საქართველო დამთავრდება”. ასე ცხოვრება, დეპუტატის თქმით, შეუძლებელი იქნება.
დღის ბოლოს, პირადი ცხოვრების ამსახველი ვიდეოკადრების გავრცელების გამო მთავრობის კანცელარიასთან “საქართველოს ქალთა მოძრაობის” ორგანიზებით საპროტესტო აქციაც გაიმართა. როგორც აქციის ორგანიზატორები აცხადებდნენ, ფარული ჩანაწერების კიდევ ერთხელ გავრცელება ნათლად ადასტურებს, რომ საქმე პირადი ცხოვრების, ადამიანების შანტაჟის მცდელობასთან გვაქვს.
„რეზონანსი”, 12 მარტი, 2016 წელი
ვის ინტერესში იყო ფარული ჩანაწერის გავრცელება?
ლიკა ამირაშვილი
ინტერნეტში ოპოზიციონერი პოლიტიკოსის პირადი ცხოვრების ამსახველი ფარული ვიდეოჩანაწერის გავრცელებას გუშინ სკანდალი მოჰყვა. მთავარმა პროკურატურამ პირადი ცხოვრების ამსახველი ინფორმაციის უკანონოდ გავრცელების ფაქტზე საქართველოს სისხლის სამართლის კოდექსის 157-ე მუხლის მე-2 ნაწილით გათვალისწინებული დანაშაულის ნიშნებით გამოძიება უკვე დაიწყო. ამ ეტაპზე საქმეზე აუცილებელი და გადაუდებელი საგამოძიებო მოქმედებები ტარდება.
როგორ ფიქრობთ, ვის ინტერესში იყო ამ ფარული ჩანაწერის გავრცელება? – ამ კითხვით “რეზონანსმა” საზოგადოების წარმომადგენლებს მიმართა.
სერგო ვარდოსანიძე (ისტორიკოსი): “მთავარი ამ საკითხში არის ის, თუ ვინ გააკეთა ეს ჩანაწერი და სად იყო აქამდე შენახული. ვის სჭირდებოდა ასეთი ჩანაწერის გაკეთება. ჩვენ ცოტა ხნის წინ დიდი ზარ-ზეიმით გამოვაცხადეთ, რომ ყველა პირადი ჩანაწერი, რომელიც წინა ხელისუფლების მიერ უკანონოდ მოპოვებული იყო განადგურებული იქნა. მაშინ საიდან მოიძებნა ეს პირადი ჩანაწერი?
“ეს, რასაკვირველია, ისევ რომელიმე პოლიტიკურ ძალას აწყობს. ჩანაწერის გავრცელება, ფაქტი რაც მოხდა, რა თქმა უნდა, ძალიან ცუდი და მიუღებელია. ასეთი ჩანაწერები ზოგადად რომ არ არსებობდეს, როგორც საზოგადოების წევრი თავს უფრო ბედნიერად და დაცულად ჩავთვლიდი.”
დოდო ხურცილავა (თეატრმცოდნე): “დავიწყოთ იმით, რომ პირადი ჩანაწერების გავრცელება ზოგადად დაუშვებელი და მიუღებელი ფორმაა. ღრმად ვარ დარწმუნებული, რომ აქ არ არის სახელმწიფო სტრუქტურა და ამას ვიღაც კონკრეტული პროვოკატორი პიროვნება აკეთებს. ეს აუცილებლად უნდა გამოიკვლიონ და დამნაშავე კანონის შესამაბისად უნდა დაისაჯოს. ეს ის ადამიანია, ვინც სახელმწიფოს ყოველთვის ჩასაფრებული პროზიციიდან უყურებს. ამის გაკეთება შეუძლია მხოლოდ იმ ადამიანს, ვისაც ამ საქმისთვის ყველანაირი მოწყობილობა აქვს და ეს მოწყობილობა წინა ხელისუფლებისგან დარჩათ. შესაძლებელია, რომ ეს ადამიანი ცდილობს ახლანდელ ხელისუფლებას სახელი გაუტეხოს.”
მიხეილ ცაგარელი (ასტროლოგი): “პირადი ცხოვრების ამსახველი ფარული კადრების გავრცელება ნებისმიერი ჯგუფის ინტერესებში შეიძლება ყოფილიყო, ვინც ამ ქალბატონის წინააღმდეგ გამოდის. არ გამოვრიცხავ იმ ფაქტსაც, რომ შესაძლოა ეს ქალბატონი რომელ ჯგუფსაც მიეკუთვნება, იმ ჯგუფში ჰყავდეს მოშუღლე ადამიანი და ეს სწორედ ამ პიროვნებამ ჩაიდინა. “მომხდარ ფაქტთან დაკავშირებით ზოგადად ძნელია კონკრეტული ვარიანტისა და ვერსიის დასახელება. არ გამოვრიცხავ, რომ ზოგიერთს ეს ქალბატონი არ მოსწონს და სურს პოლიტიკური ასპარეზიდან მოიშოროს. ჩემი პირადი აზრით, მომხდარი ფაქტი დასაგმობია და რასაკვირველია, აღმოსაფხვრელი.”
ჯემალ ჭკუასელი (ანსაბლ “ერისიონის” ხელმძღვანელი): “სახლის მშენებლობა საძირკვლიდან იწყება და ეს ყველამ ძალიან კარგად იცის. სწორედ ამ საძირკველში უნდა ვეძებოთ ამ კადრების გამავრცელებლები და დამნაშავეები. უნდა მოხდეს დამნაშავეების დასჯა. ასეთ ფაქტებს ძალიან ხშირი ხასიათი აქვს და ეს, ჩემი აზრით, სრული საზიზღრობაა.
“პიროვნების პირადი ფარული ჩანაწერების გავრცელება მთავრობის ინტერესებში არ უნდა შედიოდეს, რადგან ეს მის ქვეყანაში ხდება და იგი ამ ყველაფერზე პასუხისმგებელია. შესაძლოა, ეს ისეთმა ადამიანმა გააკეთა, ვისაც პოლიტიკასთან არანაირი შეხება არ აქვს.”
„რეზონანსი”, 12 მარტი, 2016 წელი
აფხაზეთის დე ფაქტო მინისტრმა გაქცევა მოასწრო, მისი მოადგილე კი გალახეს
დიდი ჩხუბი სოხუმში და მისი სავარაუდო პოლიტიკური შედეგები
ეკატერინე ბასილაია
ოკუპირებულ აფხაზეთში ე.წ. შინაგან საქმეთა მინისტრის გადადგომას ითხოვენ. მიზეზი კი ისაა, რომ ე.წ. მილიციამ გაბედა და “აფხაზეთის გმირს”, დრანდის ციხის ყოფილ უფროსს რუსლან ჯელიას ავტომობილის გაჩერება მოსთხოვა, დაუმორჩილებლობის შემდეგ კი გაფრთხილების ნიშნად ჰაერში გაისროლა.
“მინისტრის” გადადგომის მოთხოვნით დრანდის ციხის ყოფილი ხელმძღვანელის, რუსლან ჯელიას ნათესავებმა და მეომრებმა 9 მარტს აფხაზეთის ე.წ. შინაგან საქმეთა სამინისტროს შენობის წინ აქციაც გამართეს, სადაც დე ფაქტო შს მინისტრის მოადგილე სცემეს, თავად “მინისტრი” ლეონიდ ძიაპშპამ კი გაქცევით უშველა თავს. ოპოზიციამ აქციაზე თვით დე ფაქტო პრეზიდენტის რაულ ხაჯიმბას გადადგომაც კი მოითხოვა.
აფხაზეთის დე ფაქტო შს სამინისტრო აცხადებს, რომ არეულობის ყველაზე აქტიური მონაწილეები დაისჯებიან, რადგან ეს არეულობა პოლიტიკურ დესტაბილიზაციას ისახავდა მიზნად. “იმ მომენტში ადგილზე რუსლან ჯელიას ნათესავების და მომხრეების გარდა ძალიან ბევრი ადრე ნასამართლევი და კრიმინალური განწყობის მქონე ადამიანი იყო, რომლებსაც ოპოზიცია ძალოვანი სტრუქტურებთან დასაპირისპირებლად იყენებს”, – ნათქვამია იმ მიმართვაში რომელიც დე ფაქტო შსს-მ “რესპუბლიკის” ხელისუფლებას გაუგზავნა. მიმართვის ავტორების განცხადებით, არეულობის მონაწილეები და მათი კოორდინატორები სიტუაციის გამწვავებას ცდილობდნენ.
გარდა ამისა, განცხადებას ავრცელებს დე ფაქტო “პროკურატურაც”, სადაც წერია, რომ “საგამოძიებო დეპარტამენტი” სამინისტროს წინ გამართული არასანქცირებული აქციის ფაქტზე მოკვლევას ატარებს”. მათივე ცნობით, მოკვლევის დროს, დე ფაქტო შს სამინისტროს წარმომადგენლების და რუსლან ჯელიას ქმედებები სამართლებრივად შეფასდება.
რუსლან ჯელია, რომელი “აფხაზეთის გმირად” არის მიჩნეული. ციხის ხელმძღვანელის თანამდებობიდან 2015 წლის ნოემბერში დაითხოვეს, მას შემდეგ, რაც სასჯელაღსრულების დაწესებულებიდან საქართველოს მოქალაქე ბაჩუკი ლატარია გაიქცა. ამ საქმეზე გამოძიება ახლაც მიმდინარეობს.
ე.წ. აფხაზეთის შს სამინისტროს ცნობით, მილიციის თანამშრომელმა 7 მარტს ჯელიას გადაჭარბებული სიჩქარის გამო ავტომობილის გაჩერება მოსთხოვა, მოთხოვნის დაუმორჩილებლობის შემდეგ კი მისი მისამართით გამაფრთხილებელი გასროლა განახორციელა. დე ფაქტო შსს-ს მტკიცებით, მილიციის თანამშრომელმა ჰაერში გაისროლა და არც არავინ დაშავებულა და არც ავტომობილი დაზიანებულა.
მიუხედავად ამისა, 9 მარტს სოხუმს ცენტრში აქცია გაიმართა, სადაც დე ფაქტო მინისტრის ლეონიდ ძიაპშპას გადადგომას ითხოვდნენ. მომიტინგეები ამ ინციდენტზე პასუხისმგებლობას დე ფაქტო შს სამინისტროს აკისრებდნენ. მათი თქმით, რუსლან ჯელიას მოძრობის წესები არ დაურღვევია და პოლიციელებმა მისი მისამართით პროვოკაციული ქმედებები ჩაიდინეს.
როგორც “სპუტნიკ აბხაზია” წერდა, ლეონიდ ძიაპშპა ჯელიას ნათესავებს შეხვდა, სადაც ერთგვარად მოიბოდიშა კიდეც და თქვა, რომ “მინისტრი” მომხდარის გამო წუხდა. ჯელიას ნათესავებს კი სთხოვა სიტუაცია არ დაეძაბათ. თუმცა, ჯელიას ნათესავები ღიად ბოდიშის მოხდას და მისი გადადგომას ითხოვდნენ.
მომიტინგეებთან ღიად შეხვედრა “მინისტრმა” და მისმა “მოადგილემ” გადაწყვიტეს, თუმცა, აქციაზე დაპირისპირება მოხდა. “შს მინისტრმა” სამინისტროს შენობაში შესვლა მოასწრო, მის “მოადგილეს” კი აქციის მონაწილეები ფიზიკურად დაუპირისპირდნენ და სახის არეში რამდენჯერმე დაარტყეს.
“საქართველოს ევროპელი დემოკრატების” თავმჯდომარე პაატა დავითაიას განცხადებით, მთელი ამბავი იმის გამოა ამტყდარი, რომ ძველ “ბოევიკებს” მილიცია შეწუხებას არ უნდა უბედავდეს და სოხუმში ახლა ორ ჯგუფს შორის გავლენების ბანდიტური გარჩევა ხდება.
“იქ სახელმწიფო ინსტიტუტები არ მუშაობს. რუსლან ჯელიამ, რომელიც ერთ-ერთი ციხის ყოფილი დირექტორია და რომელიც ომის დროს დაჯგუფებას ხელმძღვანელობდა, აფხაზეთში გმირის წოდება აქვს და მებრძოლებში საკმაოდ გავლენიანია, მან პირად შეურაცხყოფად მიიღო ის, თუ როგორ გაუბედა მილიციამ მას, აფხაზეთის გმირს მანქანის გაჩერების მოთხოვნა,” – ამბობს პაატა დავითაია. მისი თქმით, სოხუმში არის გარკვეული ძალები, რომლებიც ამ სიტუაციის პოლიტიკური მიზნებისთვის გამოყენებას ცდილობენ.
“რუსლან ჯელიას მხარდამჭერები ბევრნი არიან, 2 000 კაცზეა საუბარი. 2 ათასი კაცი შეიძლება ჩვენთვის ცოტაა, მაგრამ აფხაზეთისთვის ბევრია. მიტინგზე გამოსული ბევრი მეომარი არსებული ხელისუფლების ოპოზიციონერია. იგივე “ამცახარა”, რომელიც ანქვაბის დაჯგუფებაა და პრეზიდენტობის ყოფილ კანდიდატს ასლან ბჟანიას უჭერენ მხარს.
“მიტინგზე ბევრი კრიმინალიც იყო გამოსული, რომლებსაც სურთ, რომ მილიციამ კონტროლი დაკარგოს. ყველაფერი ერთმანეთზეა გადაჯაჭვული. არანაირ რაღაც ლეგიტიმურ “სტრუქტურებზე” საუბარი არ შეიძლება იყოს, ეს სუფთა ბანდიტური გარჩევაა ორ ჯგუფს შორის. არ ვიცი საბოლოოდ ამას ვინ როგორ გამოიყენებს, მაგრამ, ჩემი აზრით, ამ ეტაპზე ხაჯიმბას გადაყენება აქტიურ მოთხოვნაში არ გადაიზრდება, იმიტომ, რომ ახლა იქ გავლენაზე კრიმინალური გარჩევები მიდის,” – მიიჩნევს პაატა დავითაია.
აფხაზეთის უშიშროების ექსმინისტრი ლევან კიკნაძე აცხადებს, რომ ოკუპირებულ აფხაზეთში მილიციური რეჟიმი ყალიბდება, ჯელიას მისამართით გასროლა კი მოთმინების ბოლო წვეთი იყო და მომიტინგეები ამას აპროტესტებენ.
“ჩემი აზრით, კლანებს შორის ბრძოლა მიმდინარეობს. ციხის ყოფილი უფროსობა არ არის ის წოდება, რომ მის მხარდასაჭერად ამდენი ადამიანი გამოდიოდეს და მილიციის უფროსის ლეონიდ ძიაპშპას წინააღმდეგ ილაშქრებდეს. როგორც ჩანს, მილიციელების თავხედობა, მილიციური რეჟიმი, რაც ძიაპშპას ხელმძღვანელობით ყალიბდება, ბევრს არ მოსწონს და აფხაზეთის გმირის მიმართ რაც განახორციელეს, ეს მოთმინების ბოლო წვეთი იყო. ყოფილ მებრძოლებს ისიც აღიზიანებთ, რომ მათ უკვე დაფასება მაინცდამაინც არ აქვთ. ადრე ისინი ყველაზე მეტად დაფასებულები იყვნენ. რაც დრო გადის, მათ ყურადღებას არ აქცევენ და ამას ხელისუფლებას ვერ პატიობენ,” – ამბობს ლევან კიკნაძე. მისი ვარაუდით, თუ ასე გაგრძელდა, მიტინგები უფრო მეტ მოთხოვნებშიც შეიძლება გადაიზარდოს. შეიძლება უკვე ხაჯიმბას გადადგომის მოთხოვნაც მიაბან ამას.
“იქაური მილიცია ხაჯიმბას დასაყრდენია და ამას მოსახლეობა და ვეტერანები გრძნობენ. როდესაც ანქვაბი აიძულეს გადამდგარიყო და ხაჯიმბა მოიყვანეს ხელისუფლებაში, მაშინვე ვამბობდი, რომ ეს ხელისუფლება დიდხანს ვერ გაძლებს-მეთქი. იმიტომ, რომ აფხაზეთში ხაჯიმბა პოპულარული არ არის, მისი დანიშვნა კრემლის დაკვეთით მოხდა. რაც ახლა აფხაზეთში ხდება, ეს მთლად ხაჯიმბას ბრალი არ არის. ვინც უნდა მოვიდეს იქ პირველ პირად, აფხაზეთში არსებულ სიტუაციას, კრიმინალურ მდგომარეობას და სოციალურ-ეკონომიკური მდგომარეობას ვერავინ გამოასწორებს. აფხაზეთის მოსახლეობა ასეთ კრიმინალურ გარჩევებს მიჩვეულია და შესაძლოა რაღაც დათმობებზე წავიდნენ, თუმცა მომავალში ხაჯიმბას გადაყენების საკითხი აუცილებლად გააქტიურდება,” – აცხადებს ლევან კიკნაძე.
