„რეზონანსი“: „რესპუბლიკელები” ყველას წინააღმდეგ
„რეზონანსი“: ინტერვიუ არმაზ ახვლედიანთან: „პარტიის ლიდერი არც ბიძინა ივანიშვილია და არც გიორგი კვირიკაშვილი… პარტიას სხვა ლიდერები ჰყავს»
„რეზონანსი“: ინტერვიუ ომარ ნიშნიანიძესთან: „არ იქნება სწორი, „ოცნებამ” “ძველი გვარდიელები” ახლა სახლებში გაუშვას“
„რეზონანსი“: ინტერვიუ ზურაბ აბაშიძესთან: “პროტესტი იქნება, მათ შორის – ქუჩის აქციებიც”
———–
„ვერსია“: ექსკლუზიური ინტერვიუ ირაკლი კობახიძესთან: „ოცნების“ აღმასრულებელი მდივანი „თავისუფალ დემოკრატებს“ „ნაციონალების“ სატელიტს უწოდებს და პაატა ბურჭულაძესა და „ნაციონალებს“ შორის დადებული გარიგების დეტალებს ამხელს
———–
„ახალი თაობა“: დატოვებს თუ არა დავით უსუფაშვილი რესპუბლიკურ პარტიას // „რესპუბლიკელები“ გიორგი მარგველაშვილის და ირაკლი ალასანიას წინააღმდეგ
„ახალი თაობა“: ინტერვიუ შოთა მალაშხიასთან: „ზვიად ნიშნიანიძე და თამაზ მეჭიაური ამბობენ იმას, რაც ბიძინა ივანიშვილს უნდა“ // „პასუხს მარტო ნიშნიანიძეს კი არა, მთელ „ქართულ ოცნებას“ მოვთხოვ“ // „რესპუბლიკელების პროტესტი პრაგმატულ-კარიერისტულ მიზნებს უკავშირდება“
„ახალი თაობა“: ინტერვიუ გოგი თოფაძესთან: „ირმა ინაშვილთან კოალიცია შესაძლებელია“ // „ბიძინა რამდენიმე თვეა, არ მინახავს” // „ვინ ეკითხება რესპუბლიკელებს, თოფაძე სად იქნება?!”
„ახალი თაობა“: ინტერვიუ ზაქარია ქუცნაშვილთან: „ქართულ ოცნებაში“ განსხვავებული აზრისთვის არავის ვდევნით”
„ახალი თაობა“: ინტერვიუ ვახტანგ მაისაიასთან: „საქართველო ცივი ომის ფრონტის ხაზზეა“ // „ნატოს წვრთნები ქართული ჯარის თავდაცვისუნარიანობას აამაღლებს“
———————
„რეზონანსი“, 12 მაისი, 2016 წელი
“რესპუბლიკელები” ყველას წინააღმდეგ
თაკო მათეშვილი
გუშინდელი დღე მმართველ გუნდში მრავალფეროვანი დაპირისპირებებით გამოირჩეოდა. რესპუბლიკურ პარტიას ახლა არა მხოლოდ ზოგიერთი დეპუტატი უპირისპირდება, არამედ უკვე – პრეზიდენტი და “თავისუფალი დემოკრატები”. თავის მხრივ, “რესპუბლიკელებმა” პრეზიდენტს “უმადური” და “სამარცხვინო” უწოდეს, “თავისუფალი დემოკრატების” ლიდერს კი – რუსულ პროპაგანდაში ჩართული.
“ქართული ოცნება” და რესპუბლიკური პარტია უნისონში საუბრობდნენ პრეზიდენტის ინსტიტუტის შესუსტებასა და პრეზიდენტის მმართველობის დისკრედიტაციის თაობაზე,” – ამის შესახებ პრეზიდენტმა გიორგი მარგველაშვილმა გუშინ გამართულ პრესკონფერენციაზე განაცხადა. მისი თქმით, ზემოხსენებული პარტიები მიიჩნევდნენ, რომ პრეზიდენტის როლი მხოლოდ პანაშვიდებზე სიარულია.
“საუბრობდნენ, რომ თურმე როდესაც პრეზიდენტი მოიწვევს პარლამენტის სხდომას, ტელევიზიით უნდა მოუწოდო დეპუტატებს, ნუ დაუჯერებთ პრეზიდენტს და ნუ მიხვალთ იმ სხდომაზე იმიტომ, რომ დეპუტატი თურმე პარლამენტში არ უნდა მიდიოდეს პრეზიდენტის დაძახებულზე,” – განაცხადა გიორგი მარგველაშვილმა. მისივე თქმით, ეს არის ის პოლიტიკური გუნდი, რომელიც პრინციპულად უპირისპირდებოდა მათ, როდესაც საუბარი პრეზიდენტის ინსტიტუტის პატივისცემასა და საპრეზიდენტო გამოსვლებზე იყო.
„მე ერთადერთი შემიძლია ხაზგასმით ვთქვა, რომ მთელ ამ პოლიტიკურ ორწლიან პროცესში პოლიტიკური ფიგურა, რომელთანაც ურთიერთობა შევძელი, გიორგი კვირიკაშვილია, რომელიც არასდროს კარგავდა სახეს, როგორც მინისტრი და როგორც ვიცე-პრემიერი. დანარჩენ ფიგურანტებზე ნაკლებად მინდა ვიმსჯელო, მაგრამ ამ პროცესს აქვს თავისი ისტორია და როდესაც შენს პრინციპებს მეთოდურად ღალატობ, ეს უკან გიბრუნდება,” – განაცხადა გიორიგ მარგველაშვილმა.
პრეზიდენტის გამონათქვამებმა “რესპუბლიკელები” გააოცა. როგორც ლევან ბერძენიშვილმა განაცხადა, მან არ იცის, თუ რატომ გაწირა ყველამ ეს პარტია. მისი თქმით, პრეზიდენტს დაავიწყდა ეთქვა, რომ ორი წლის განმავლობაში პარლამენტის თავმჯდომარე მასზე “გადაფარებული იყო” და ყველანაირად ცდილობდა, იგი პოლიტიკიდან არ გაერიყათ. ვინ ცდილობდა მის გარიყვას, ბერძენიშვილის თქმით, არც ესაა დიდი საიდუმლო.
“რატომ თქვა პრეზიდენტმა, რომ “რესპუბლიკელები” და მეჭიაური უნისონში იყვნენ და მათ შორის განსხვავებას ვერ ხედავს, ეს პრობლემური საკითხია. მე არ მინდა ვთქვა, რომ ის ამდენად ვერ აზროვნებს. ეს ბოროტი ცილისწამებაა რესპუბლიკურ პარტიასა და დავით უსუფაშვილზე. უბრალოდ უმადურებაა, ადამიანები ასე არ იქცევიან. პრეზიდენტის რანგში ადამიანს თავისი ღირსება არ უნდა დაავიწყდეს. გია ხუხაშვილის გავლენის ქვეშ რომაა პრეზიდენტი, ვინ ჰგონია ეს გია ხუხაშვილი? ერთი ჩვეულებრივი წურბელაა, რომელიც მდიდრებს მიუჯდებოდა ხოლმე და ცდილობდა, მათგან რაღაც გამოეწოვა. ასეთი კაცის ნააზრევს საქართველოს პრეზიდენტი პოლიტიკურ ფილოსოფიად გვაცნობს. მისი დღევანდელი გამოსვლა ძალიან სამარცხვინო იყო. პრეზიდენტი უმადურია, ვინადიან დათო უსუფაშვილი რომ არ ყოფილიყო, იგი პოლიტიკიდან გარიყული იყო. ყველა მის მოხსენებაზე ვიჯექი პარლამენტში, ვისმენდი. მაგ კაცისგან ერთი ნაყოფიერი იდეა არ გვახსოვს,” – განაცხადა ლევან ბერძენიშვილმა ინგა გრიგოლიასთან ინტერვიუში.
რესპუბლიკური პარტიის გაცხარებას ბუნებრივად მიიჩნევს თავად გია ხუხაშვილი და ამბობს, რომ გამწარებული ადამიანის ნათქვამზე რეაგირება სწორი არაა. მისი თქმით, მათ “თავისი უბედურებაც ეყოფათ”.
„რეზონანსთან“ ინტერვიუში გია ხუხაშვილი ამბობს, რომ “რესპუბლიკელებმა” პრინციპებს უღალატეს მაშინ, როცა მოსმენების კანონთან დაკავშირებით პრეზიდენტის ვეტოს გადალახვაში აქტიური მონაწილეობა მიიღეს. მაშინაც, როცა თავის მრავალწლიან მოთხოვნას გადაუხვიეს მაჟორიტარული არჩევნების გაუქმებასთან დაკავშირებით და ა.შ.
“როცა პრეზიდენტი იბრძოდა ეს პრინციპები გაეტარებინა, რესპუბლიკური პარტია საბოტირებდა და ძალიან კომფორტულად გრძნობდა თავს იმ “ოცნებაში”, რომელიც დღეს თითქოს არ მოსწონს. მეჭიაური დღეს ხომ არ შესულა იმ პარტიაში? თავის დროზე ისინი პრეზიდენტსა და პრეზიდენტის ინსტიტუტს ხმაშეწყობილად უტევდნენ. პრეზიდენტისათვის უმადურის წოდება მათი მხრიდან არაკეთილსინდისიერების პიკია. მათ რატომღაც ჰგონიათ, რომ პრეზიდენტი ამას ჩემი კარნახით აკეთებს. ეს სრული სისულელე და პარანოიის შეტევაა. ბოლო ერთი თვეა, პრეზიდენტი არც მინახავს, მიუხედავად იმისა, რომ მეგობრული ურთიერთობა გვაქვს. მარგველაშვილს თავადაც ახსოვს, თუ რას აკეთებდა “რესპუბლიკური პარტია” პრეზიდენტის ინსტიტუტის დაკნინების კუთხით მთელი 2-3 წლის განმავლობაში – როცა ღარიბაშვილი საკმაოდ არაკორექტულად უტევდა, ისინიც ხმაშეწყობილად ატარებდნენ იმავე ხაზს,” – უთხრა გია ხუხაშვილმა “რეზონანსს”.
ამის პარალელურად, არც თამაზ მეჭიაურს გამოუჩენია გუშინ პასიურობა. მან მომენტი არ გაუშვა ხელიდან და “რესპუბლიკელები”, განაკუთრებით კი თავდაცვის მინისტრი თინა ხიდაშელი, კიდევ ერთხელ გააკრიტიკა. ამჯერადაც თამაზ მეჭიაურმა თინა ხიდაშელს კვალიფიკაცია დაუწუნა და განაცხადა, რომ ის თავდაცვის უწყებას არ უნდა ხელმძღვანელობდეს. „თინა ხიდაშელმა ომის სფეროში კომპიუტერული თამაშები მაინც უნდა იცოდეს,” – განუცხადა გუშინ თამაზ მეჭიაურმა ჟურნალისტებს.
პასუხად თინა ხიდაშელმა აღნიშნა, რომ თამაზ მეჭიაური მისთვის საინტერესო არაა და მის “ხუმრობებზე” კომენტარის გაკეთებას არ აპირებს. მან კომენტარი არც “რესპუბლიკურ პარტიასთან” დაკავშირებით პრეზიდენტის განცხადებაზე გააკეთა. “მე არ ვაპირებ ამ პინგ-პონგში მონაწილეობის მიღებას. გახსენით არქივი, ნახეთ ჩემი განცხადებები გიორგი მარგველაშვილის პრეზიდენტობის პირველივე დღიდან. ეს არის ყველაფერზე პასუხი,” – აღნიშნა თინა ხიდაშელმა.
თამაზ მეჭიაურითა და პრეზიდენტით არ სრულდება იმ ადამიანების სია, რომლებიც გუშინ “რესპუბლიკელებსა” და პირადად თინა ხიდაშელს დაუპირისპირდნენ. “თავისუფალი დემოკრატების” ლიდერის, ირაკლი ალასანიას განცხადებით, საქართველოს საჰაერო თავდაცვის საკითხთან დაკავშირებით, თავდაცვის ამჟამინდელ მინისტრს გარკვეული ჩარჩოები დაუწესეს. “თინა ხიდაშელის უწყებას ის პოლიტიკური ჩარჩოები დაუწესეს, რასაც მე ვერ მიწესებდნენ” – აღნიშნა ალასანიამ “პალიტრანიუსის” გადაცემაში სტუმრობისას.
თინა ხიდაშელს უპასუხოდ არც ირაკლი ალასანია დაუტოვებია. მეჭიაურისაგან განსხვავებით, მასზე მინისტრმა საკმაოდ ვრცლად ისაუბრა და განაცხადა, რომ ალასანია რუსულ პროპაგანდაში ჩაერთო. მისი აზრით, ალასანიას განცხადებები სასაცილოა.
თინა ხიდაშელის განცხადებით, ირაკლი ალასანიამ ყველაზე კარგად იცის, რომ მისთვის პოლიტიკური ჩარჩოები არასოდეს არავის დაუწესებია. თავდაცვის მინისტრის თქმით, ეს დადასტურდა მაშინ, როცა “კაბელების საქმეზე” სამსახურიდან გათავისუფლებულები სამინისტროში აღადგინა. “სირცხვილია, მაგრამ ალბათ ხანდახან ადამიანები გაუგებარ არჩევანს აკეთებენ. როცა ვსაუბრობთ ქვეყნის უსაფრთხოებასა და თავდაცვისუნარიანობაზე, ერთი წლის განმავლობაში ვისმენდი პრეტენზიებს ყოფილი თავდაცვის მინისტრისგან. მთელი ერთი წელია არ გამიცია პასუხი არც ერთი განცხადებისთვის, რადგან ქვეყნის თავდაცვისუნარიანობა გაცილებით მნიშვნელოვანია, ვიდრე ეს პაექრობა. ძალიან სამწუხაროა, რომ, როგორც ჩანს, რთულად გასაგებია, რატომ არ გცემენ პასუხს. საჯაროდ მოვითხოვ თავდაცვის ყოფილი მინისტრისგან, წარმოადგინოს პრეტენზიების ნუსხა, თუ სად იყო უკეთესად შესაძლებელი ქვეყნის დაცვა და მე ეს არ გავაკეთე. კიდევ უფრო სირცხვილია, რომ ბატონი ირაკლი ჩაერთო იმ რუსულ პროპაგანდაში. მას პირდაპირ ცეცხლი აქვს ჩემ წინააღმდეგ გახსნილი და დღეს იგი ხელისმომკიდის პრინციპით ამ მარათონში მონაწილეობს,” – აღნიშნა თავდაცვის მინისტრმა.
„რეზონანსი“, 12 მაისი, 2016 წელი
ინტერვიუ არმაზ ახვლედიანთან: „პარტიის ლიდერი არც ბიძინა ივანიშვილია და არც გიორგი კვირიკაშვილი... პარტიას სხვა ლიდერები ჰყავს»
თიკო ოსმანოვა
პარტია “ქართული ოცნების” პოლიტსაბჭოს აწ უკვე ექს-წევრის, არმაზ ახვლედიანის განცხადებით, პარტიას არ შესწევს უნარი, რეალური ცვლილებები განახორციელოს და მხოლოდ ფასადურით შემოიფარგლება. მისი თქმით, შაბათს დაგეგმილი ყრილობა სწორედ ამის დემონსტრირებაა. ამბობს, რომ პოლიტიკურ აქტიურობას გააგრძელებს, თუმცა სამომავლო გეგმებზე საუბრისგან ჯერ თავს იკავებს. დასძენს, რომ არცერთ პარტიასთან არ იკვეთება მისი სამომავლო გზები. “ოცნების” დატოვების მიზეზებსა და სამომავლო გეგმებზე “რეზონანსი” არმაზ ახვლედიანს გაესაუბრა.
- თქვენი თქმით, პარტია “ქართული ოცნება” მოჩვენებით ცვლილებებს გეგმავს. რას გულისხმობთ კონკრეტულად?
- მოჩვენებითობა, ფასადურობა საზოგადოების შეცდომაში შეყვანას ემსახურება. სამწუხაროდ, “ოცნება” ამ გზით მიდის. მას არ შესწევს უნარი რეალური, არსებითი ცვლილებებისთვის. ვწუხვარ, მაგრამ მორიგი ყრილობა ამის დემონსტრირება იქნება.
- განაცხადეთ, რომ “რეტროგრადების გავლენით, ვერც თავად ვითარდება და ვერც ქვეყნის დემოკრატიულ წინსვლას უწყობს ხელს”, ვის გულისხმობთ კონკრეტულად, ახლა მაინც თუ დაასახელებთ?
- საკუთარი თავი კარგად ამოიცნო ზოგიერთმა ბატონმა. მე დავასახელე კიდეც და ყოველ ჯერზე მათი სახელებისა და გვარების გამეორების არავითარი სურვილი არ მაქვს. ვფიქრობ, ყველამ ამოიცნო თავი. სწორედ მათზეა პასუხისმგებლობა “ოცნების” ჩიხში შეყვანის გამო.
- თუმცა ზოგიერთ თქვენს აწ უკვე ყოფილ თანაგუნდელს რჩება შთაბეჭდილება, რომ ამ ბრალდებებთან დაკავშირებით რეალური ფაქტები არ გაქვთ და მხოლოდ განაწყენებული კაცის პოზიციიდან საუბრობთ. რას უპასუხებთ მათ?
- როცა სხვა არგუმენტი არ გააჩნიათ, მაშინ ასეთი უსუსური განცახდებებით შემოიფარგლებიან. სასაცილოა, სხვა რა გითხრათ?!
- “ოცნების” დატოვებამდე თუ ესაუბრეთ ბიძინა ივანიშვილს ან გიორგი კვირიკაშვილს?
-პარტიის ლიდერი არც ბატონი ივანიშვილია და არც კვირიკაშვილი. პარტიას სხვა ლიდერები ჰყავს. მათ ჩემი პოზიციის შესახებ იცოდნენ. არაერთხელ შევთავაზე საუბარი, დისკუსია პოლიტსაბჭოს ფორმატში, მაგრამ არ ისურვეს. გასაგებია, მათ არ სურთ სიმართლის მოსმენა.
- კონკრეტულად ვის ესაუბრეთ, აღმასრულებელ მდივან ირაკლი კობახიძეს?
- კობახიძესთან არაფერი მქონდა სასაუბრო. ის არ არის პოლიტსაბჭოს წევრი, თუმცა მისი ჩართულობა ძალიან დამაზიანებელია პარტიისთვის.
- პარტია უკვე დატოვეთ. ახლა რას აპირებთ?
- სამომავლო გეგმებზე მოგვიანებით ვისაუბრებ.
- აპირებთ თუ არა რომელიმე პარტიასთან თანამშრომლობას?
- როგორც გითხარით, მოგვიანებით გაგაცნობთ კონკრეტულ მოსაზრებებს სამომავლო საქმიანობასთან დაკავშირებით.
- აპირებთ თუ არა გააქტიურებას წინასაარჩევნოდ?
- დიახ. თანამშომლობა დემოკრატიის სასარგებლოდ ალბათ ყველასთან შეიძლება, თუმცა ჩემი სამომავლო გზა არც ერთ პარტიასთან არ იკვეთება.
„რეზონანსი“, 12 მაისი, 2016 წელი
ინტერვიუ ომარ ნიშნიანიძესთან: „არ იქნება სწორი, “ოცნებამ” “ძველი გვარდიელები” ახლა სახლებში გაუშვას“
თიკო ოსმანოვა
“ამაში სააჟიოტაჟო არაფერია – ბევრი მოსულა და წასულა, თუმცა, ბუნებრივია, არ არის სასიამოვნო. ასე არ უნდა ვუშვებდეთ ხალხს”, – ამბობს “რეზონანსთან” საუბრისას ფრაქცია “ქართული ოცნების” წევრი ომარ ნიშნიანიძე. იგი პარტიიდან ძველი სახეების გაშვებას ეწინააღმდეგება და ამბობს, რომ ბალანსი დაცული უნდა იყოს. მისი თქმით, პარტია ძველი და ახალი სახეებით უნდა დაკომპლექტდეს. “ქართული ოცნებიდან” პოლიტსაბჭოს წევრ არმაზ ახვლედიანის წასვლასა და მოახლოებულ ყრილობაზე “რეზონანსი” უმრავლესობის დეპუტატ ომარ ნიშნიანიძეს გაესაუბრა.
ომარ ნიშნიანიძე: საინტერესოა, არმაზ ახვლედიანი თავიდან ვინ მოიყვანა და რატომ მოიყვანეს?! თუ მოიყვანეს, რაღას გაუშვეს?! მაინცდამაინც დიდი ფიგურა არ ყოფილა, მაგრამ თუ მოიყვანეს და ამხელა საქმე ჩააბარეს, რატომ გაუშვეს განაწყენებული?! ვფიქრობ, ამაში სააჟიოტაჟო არაფერია – ბევრი მოსულა და წასულა, თუმცა, ბუნებრივია, არ არის სასიამოვნო. ასე არ უნდა ვუშვებდეთ ხალხს.
- არმაზ ახვლედიანის განცხადებით, “ოცნება” საპარლამენტო არჩევნებისთვის მხოლოდ მოჩვენებით ცვლილებებს გეგმავს…
- თუ მოჩვენებითი ცვლილებები იქნება, ძალიან ცუდია, მაგრამ არც ის მგონია კარგი, პარტია ისე გადახალისდეს, რომ “ძველი გვარდიელები”, თანამებრძოლეები, რომლებმაც თავიანთი სიცოცხლე, თავის დროზე, საფრთხეში ჩააგდეს, ახლა სახლებში გაუშვან. კარგი იქნება თუ ბალანსი დაცული იქნება. პარტია უნდა დაკომპლექტდეს ძველი და ახალი სახეებითაც, რომლებსაც არც პროფესიონალიზმი და არც გამოცდილება აკლიათ.
- პარტია არჩევნებზე ისევ ძველი სახეებით უნდა წარსდგეს?
- რატომაც არა. რა დააშავა იმ ხალხმა, რომელმაც თავის დროზე იბრძოლა? აქტიურობა და ცოდნა არ აკლიათ. გამოცდილება შეიძლება ბევრი არ ჰქონდათ, თუმცა დროთა განმავლობაში შეიძინეს. თუ ასე არ მოხდება, ძალიან სამწუხარო იქნება. ბალანსის დაცვა ძველსა და ახალ სახეებს შორის ყოველთვის ყველა პარტია ცდილობს.
- თუმცა, აწ უკვე ყოფილი თანაგუნდელის თქმით, რეტროგრადების გავლენით, ვერც პარტია ვითარდება და ვერც ქვეყნის დემოკრატიულ წინსვლას უწყობს ხელს…
- ახვლედიანს ახლა ხომ მაინც არ ეშინია დაასახელოს რეტროგადები ვინ არიან, ვის გულისხმობს, ვინ აფერხებს პარტიის განვითარებას? კონკრეტული პიროვნებები დაასახელოს. ასეთი ზოგადი ბრალდებები განაწყენებული კაცის იერს ჰმქნის და არავის უხდება. თუ რამე სათქმელი აქვს, თქვას ბოლომდე. ახალგაზრდებშიც და ძველ ადამიანებშიც არიან ისეთებიც, რომლებიც ძველებურად აზროვნებენ და საბჭოთა კავშირს მისტირიან. ამიტომ მარტო ასაკს თუ ვგულისხმობთ, მეც არ ვარ ბავშვი, მაგრამ არა მგონია, რუსეთუმე ვიყო და ევრაზიული კავშირისკენ მივიწევდე.
- მან უკვე დაასახელა ზვიად კვაჭანტირაძე და გია ვოლსკი.
- მე მაინც ეს უფრო პირადი უთანხმოება მგონია. ეტყობა, რაღაცაზე მისი აზრი არ გაითვალისწინეს.
- თუმცა არიან პარტიაში ისეთი ადამიანები, რომლებიც, მაგალითად, ანტინატოურ განცხადებებს ხმა მაღლა აკეთებენ…
- ვერ ვიტყვი, რომ ეს ადამიანები ნატოს წინააღმდეგნი გამოდიან. თუ კრიტიკული ვიქნებით, გარკვეული თვალსაზრისით არ არის დიდი ცოდვა. ამით გვინდა, რომ ნატო გააქტიურდეს და გადმოდგას ნაბიჯები ჩვენკენ. ჩრდილოატლანტიკურ ალიანსზე უარს არავინ არ ამბობს. ამას აცხადებენ მხოლოდ კეთილი სურვილებით. ხელისუფლებამ ძალიან ბევრი რამ გააკეთა იმისათვის, რომ ნატოსთვის მისაღები სტანდარტები დაეკმაყოფილებინა.
- თქვენი აზრით, ასეთი განცხადებებით ზიანი არ მიადგება ქვეყანას?
- არა მგონია. თუ ნატოზე ის ახდენს გავლენას, რომ ვიღაც მეჭიაური ან ნიშნიანიძე, რაღაცებს იბჟუტურებენ, მაშინ აღარ ყოფილა საშველი. კეთილი სურვილები გვამოძრავებს. ვდგამთ ნატოსკენ ნაბიჯებს და ვაკაკუნებთ ღია კარზე. რაც მთავარია, ჩრდილოატლანტიკურმა ალიანსმაც შემხვედრი ნაბიჯები უნდა გადმოდგას.
- 14 მაისს “ქართული ოცნების” ყრილობა გაიმართება. რა სიახლეებს შესთავაზებს პარტია საზოგადოებას?
- ჯერ მოსაწვევიც არ მიმიღია. საერთოდ მეძახიან თუ არა, ისეც არ ვიცი, იმედი მაქვს, დამპატიჟებენ პარტიის დამფუძნებელი და მათ შორის ქუთაისის ორგანიზაციის დამფუძნებელი ვარ. სიურპრიზი ალბათ ის იქნება, რომ ახალი სახეები იქნებიან და პოლიტსაბჭოც გადახალისდება. სიაზე იქნება თუ არა მსჯელობა, არ ვიცი.
- და ახალი სახეები ვინ იქნებიან?
- კონკრეტულად ვინ იქნება, სიმართლე გითხრათ, არ ვიცი. ჩემთვისაც ძალიან საინტერესოა, იმიტომ, რომ ჩვენ არავინ არ გვაცნობს. იმედი მაქვს, ბატონი გიორგი კვირიკაშვილი აქტიურადაა ჩართული ამ საკითხებში. ალბათ დიდ როლს ითამაშებს სიისა და მაჟორატარი კანდიდატების დაკომპლექტებაში.
„რეზონანსი“, 12 მაისი, 2016 წელი
ინტერვიუ ზურაბ აბაშიძესთან: “პროტესტი იქნება, მათ შორის – ქუჩის აქციებიც”
თაკო მათეშვილი
“თავისუფალი დემოკრატები” არ ახმაურებენ, თუ ვისთან ამჯობინებენ ძალების გაერთიანებას იმ შემთხვევაში, თუკი კვლევების შედეგები, რომელთაც ისინი ნდობას უხცხადებენ, გამართლდა და არჩევნების შემდეგ მთავრობის დასაკომპლექტებლად პარლამენტში კოალიციის შექმნა გახდა საჭირო. პარტიის ერთ-ერთი ლიდერი ზურაბ აბაშიძე აცხადებს, რომ ამაზე წინასწარ არ საუბრობენ და რომ გადაწყვეტილებას იმ კონკრეტულ მომენტში მიიღებენ. მანამდე კი, აბაშიძის თქმით, წინასაარჩევნოდ ბრძოლას აპირებენ, რათა პარლამენტში მაქსიმალურად მეტი მანდატით შევიდნენ.
“რეზონანსთან” ინტერვიუში ზურაბ აბაშიძე ე.წ. კაბელების გახმაურებულ საქმეზეც საუბრობს და ამბობს, რომ თუკი სასამართლო გამამტყუნებელ განაჩენს გამოიტანს, “თავისუფალი დემოკრატები” ქუჩის აქციებს დაიწყებენ.
ზურაბ აბაშიძე: პროკურორის განცხადება, რომ სასამართლო ამ ადამიანებისადმი გამამტყუნებელ განაჩენს გამოიტანს, შემაშფოთებელი და მიუღებელი იყო. ეს სასამართლოზე ზეწოლაა და სხვა არაფერი. საზოგადოების უმრავლესობამაც იცის, რომ ეს ადამიანები 9 თვე ციხეში აბსოლუტურად ტყუილად ისხდნენ და მას შემდეგაც კიდევ რამდენი თვეა, პროცესი მიმდინარეობს… განაჩენს ძალიან ბევრი ელოდება. ყველამ იცის, რომ მათ არანაირი დანაშაული არ ჩაუდენიათ. ახლა უკვე ყველაფერი ბოლოში გადის და იმედია, სასამართლო სწორ გადაწყვეტილებას მიიღებს – ეს ხალხი გამართლდება. სხვა შემთხვევაში, ეს პოლიტიკური ზეწოლისა და დაკვეთის შედეგი იქნება, რაც ჩვენში სერიოზულ პროტესტს გამოიწვევს.
- რა სახის იქნება ეს პროტესტი?
- ეს პროტესტი ყველანაირი ფორმის იქნება. მათ შორის ქუჩის აქციები და ნებისმიერი სხვა ფორმა, რაც კონსტიტუციით დაშვებულია. არეულობის მოწყობასა და უკანონობაზე არავინ საუბრობს. “თავისუფალი დემოკრატები” მხოლოდ კანონიერ და დასაშვებ ფორმებს გამოიყენებს.
- ე.ი. თქვენ ამბობთ, რომ თუკი კაბელების საქმეზე გამამტყუნებელი განაჩენი დადგა, ეს იმის დასტური იქნება, რომ ბიძინა ივანიშვილი სასამართლოს გადაწყვეტილებაში ერევა?
- ვერ გეტყვით, რამდენად ერევა ბიძინა ივანიშვილი სასამართლო პროცესში, მაგრამ ჩემი ყურით მაქვს მოსმენილი და ჩემი თვალით ნანახი, რომ თავიდან, როცა ეს ადამიანები დააკავეს, ივანიშვილმა საბრალდებო დასკვნაც კი არ წაიკითხა, ისე გამოიტანა ამ ხალხის მიმართ განაჩენი და თქვა, რომ საუბარი ძალიან სერიოზულ უკანონობაზეა. მერე აღმოჩნდა, რომ თურმე ეს ასე არ იყო. სასამართლო პროცესმა ეს დაგვანახვა. მე და ჩემი თანამებრძოლები კაბელების საქმის თითქმის ყველა პროცესს დავესწარით და ორივე მხარის პოზიციებს ვისმენდით. ბრალდებები, რომლებსაც პროკურატურა აყენებდა, აბსოლუტურად აბსურდული იყო. დღეს კი, თუკი სასამართლო შუბლზე ძარღვს გაიწყვეტს და გამამტყუნებელ განაჩენს გამოიტანს, რა თქმა უნდა, ეს ხელისუფლების განაჩენი იქნება. მისი წარმომადგენლები კი იტყვიან, რომ ისინი არაფერ შუაში არიან და ეს სასამართლოს გადაწყვეტილებაა, მაგრამ ამას ვინ დაიჯერებს? ვინ წარმოიდგენს, რომ ეს ადამიანები, რომლებიც ციხიდან გამოვიდნენ და თავდაცვის სამინისტროში აღდგნენ, მუშაობენ და სამხედრო მოსამსახურეები არიან, ხელახლა ციხეში შეაბრუნონ? ეს ხომ სრული ნონსენსი და უსამართლობა იქნება, რაც ხელისუფლებას ძალიან ძვირად დაუჯდება.
- ენდიაისა და აირაის კვლევებს თქვენმა პარტიამ ნდობა გამოუცხადა და მისი შედეგებით კმაყოფილებაც გამოთქვით. ამ კვლევებს თუ დავეყრდნობით, ოქტომბერში არჩევნების შედეგად პარლამენტში შემდეგნაირი სიტუაცია იქნება – “ქართული ოცნება” და “ნაციონალური მოძრაობა” დაახლოებით თანაბარი შედეგებით შევლენ, მესამე ადგილზე კი თქვენი პარტია გავა. ანუ, მთავრობის დასამტკიცებლად საჭირო უმრავლესობა არავის ექნება და ამისათვის შიდა კოალიციის შექმნა და თქვენი პარტიის დახმარება გახდება საჭირო. რა გადაწყვეტილებას მიიღებთ ამ შემთხვევაში, რომელ პარტიასთან უფრო შესაძლებლად მიგაჩნიათ გაერთიანება?
- მოდით, მოვლენებს წინ ნუ გავუსწრებთ. შეიძლება პირველ ადგილზე “თავისუფალი დემოკრატები” გავიდნენ. ჯერ კიდევ საკმაო დროა დარჩენილი, საარჩევნო კამპანია აქტიურ ფაზაში ახლა შედის. ასე რომ, არჩევნების შედეგის მიხედვით ვიმსჯელებთ.
საზოგადოების მხარდაჭერის დიდი იმედი გვაქვს და ველით, რომ საქართველოს პარლამენტში სერიოზული რაოდენობით უნდა შევიდეთ. ამის შემდეგ კი ჩვენ თავად გადავწყვეტთ, რა და როგორ გავაკეთოთ. რა თქმა უნდა, პირველ რიგში სახელმწიფოსა და საზოგადოების ინტერესებიდან გამომდინარე ვიმოქმედებთ, რათა ჩვენი სამშობლო წინ წავიდეს. ვიწრო პარტიული ინტერესებით არ ვართ დაკავებული.
- ანუ, თუკი მთავრობის დასამტკიცებლად თქვენი დახმარება გახდება საჭირო, მერე გადაწყვეტთ, თუ ვისთან გააერთიანოთ ძალები?
- წინასწარ რაიმე ვარაუდის გამოთქმა არ შემიძლია. კვლევები ძალიან საინტერესოა ხოლმე, მაგრამ მთავარი კვლევა არჩევნებია, რომელიც რეალურ შედეგს გვიჩვენებს. გადაწყვეტილებას კი ისეთს მივიღებთ, რაც ქართული სახელმწიფოსა და საზოგადოების ინტერესებიდან იქნება გამომდინარე. “თავისუფალი დემოკრატები” ჩვენი ქვეყნის სამსახურში ვართ და ვიქნებით ადგილობრივ თუ ცენტრალურ დონეზე.
- საარჩვნო კამპანიის დაწყება 8 ივნისს გადაწყდა. ეს რამდენად მიზანშეწონილ გადაწყვეტილებად მიგაჩნიათ?
- ეს ძალიან ნორმალური გადაწყვეტილებაა. კარგია, რომ პრემიერი და პრეზიდენტი შეთანხმდნენ. 8 ივნისიდან საარჩევნო კამპანიის დაწყება იმას ნიშნავს, რომ ხელისუფლება და ოპოზიცია თანაბარ, კონკურენტულ პირობებში იქნებიან, იმის მიუხედავად, რომ ის სისტემა, რომელზეც ვმსჯელობთ, აბსოლუტურად მიუღებელი და არასამართლიანია. ჩვენ მზად ვართ, ამ საარჩევნო კამპანიაში აქტიურად ჩავებათ, ვიბრძოლოთ და სერიოზული შედეგი მივიღოთ.
- ბოლო დღეებში ხელისუფლებაში დაპირისპირებების ახალი ტალღა ვიხილეთ. არცთუ იშვიათად კეთდება განცხადებები, რომლებიც ეწინააღმდეგება ქვეყნისა და პრემიერის ოფიციალურ კურსსა და პოზიციას. ეს ყველაფერი იმაზე ხომ არ მიანიშნებს, რომ კოალიციის მართვის სადავეები გიორგი კვირიკაშვილის ხელში არ არის?
- რასაც ვუყურებთ, ეს სრული მარაზმია. ხელისუფლება აბსოლუტურად დემორალიზებულია. მუდმივად ურთიერთსაწინააღმდეგო განცხადებები კეთდება. კოალიცია დაიშალა, უმრავლესობაში შემავალი პარტიები კი ერთმანეთს ყველაფერში ეწინააღმდეგებიან. ეს ყველაფერი ჩემთვის სრულიად გაურკვეველი და მიუღებელია. საზოგადოება აცნობიერებს, რომ ამ ყველაფრის უკან კოალიცია “ქართული ოცნება” და მასში შემავალი პარტიები დგანან. სწორედ ისინი ქმნიან ამ იმედგაცრუებას თავიანთი არასწორი პოზიციებითა და გაუგებარი მოსაზრებებით როგორც საშინაო, ისე საგარეო პოლიტიკურ საკითხებზე. ამიტომ, დარწმუნებული ვარ, რომ შემოდგომაზე ქართველი ხალხი ამ ყველაფერს ადეკვატურ პასუხს გასცემს.
————————–
„ვერსია“, 11 მაისი, 2016 წელი
ექსკლუზიური ინტერვიუ ირაკლი კობახიძესთან: „ოცნების“ აღმასრულებელი მდივანი „თავისუფალ დემოკრატებს“ „ნაციონალების“ სატელიტს უწოდებს და პაატა ბურჭულაძესა და „ნაციონალებს“ შორის დადებული გარიგების დეტალებს ამხელს
ნინო კომახიძე
„ოცნების“ აღმასრულებელი მდივანი ირაკლი კობახიძე პარტიულ და საკანონმდებლო შემადგენლობაში რადიკალურ ცვლილებებს აანონსებს და გაჯანსაღების პროცესს უკავშირებს პარტიის რიგებიდან არმაზ ახვლედიანის წასვლასაც. კობახიძე ირწმუნება, რომ კარსმომდგარ ყრილობაზე პოლიტსაბჭოს თითქმის ნახევარი შეიცვლება, ის სუსტი საპარლამენტო მიმართულებები გაძლიერდება, რასაც კონსულტაციებისას ხაზი თავად ბიძინა ივანიშვილმა გაუსვა და ნაციონალური მოძრაობა, სატელიტებიანად, პოლიტიკაში ფაქტორი ვეღარ იქნება. ირაკლი კობახიძე ყოფილ თანაგუნდელებს შორის ნაციონალების სატელიტებს ასახელებს და 22 მაისს ჩანიშნული შუალედური არჩევნების შესახებ სკანდალურ ინფორმაციას გვიმხელს.
- თამაზ მეჭიაურის განცხადებები მორიგი სკანდალის მიზეზი გახდა. პირდაპირ გკითხავთ _ მეჭიაური იქნება თუ არა მომავალ პარლამენტში და ნიშნავს თუ არა პრემიერის ორი დღისწინანდელი რისხვა, რომ მეჭიაური ვეღარ მოხვდება ,,ოცნების” გუნდში?
- მუდმივად ერთი და იგივე პასუხების გაცემა მიწევს საარჩევნო სიის თემატიკაზე, ჩვენ ამაზე პრინციპული პოზიცია გვაქვს – დღეს არც ერთ სახელსა და გვარს არ ვაკონკრეტებთ, არც დადებით, არც უარყოფით კონტექსტში. ამასაც თავისი ობიექტური საფუძველი აქვს, ეს ჩვენი შიდა სამზარეულოა, ხოლო ზოგადი პოზიცია ისედაც გახმოვანებული გვაქვს.
- ზოგადად, რა ეტაპზეა მთავარი პოლიტიკური პარტიის საარჩევნო სიის ფორმირება?
- მზა სია, როგორც ასეთი, არ არსებობს და ამაზე მუშაობა ახლაც მიმდინარეობს. საბოლოო სახეს სია უშუალოდ არჩევნების დანიშვნის შემდეგ, ანუ ზაფხულში მიიღებს.
- სიამდე ახალ სახეებს არ წარადგენთ?
- აუცილებლად. სწორედ სიის შედგენამდე ვგეგმავთ ახალი სახეების წარდგენას, ეტაპობრივად. 14 მაისს პარტიის ყრილობა ტარდება და როცა პოლიტსაბჭოს შემადგენლობას ავირჩევთ, ახალი სახეები მათ შორისაც იქნებიან.
- პოლიტსაბჭოს რაც შეეხება, ვრცელდება ინფორმაცია, რომ მისი უდიდესი ნაწილი შეიცვლება, ამ ორგანოს კი, ცნობილი „შეწყალების სკანდალის” გამო, აუცილებლად დატოვებს ორი ქალბატონი _ კობახიძე და ბესელია. ამ ინფორმაციის დადასტურება შეგიძლიათ?
- სახელები და გვარები ცნობილი 14 მაისს გახდება. ვადასტურებ, რომ პოლიტსაბჭოს შემადგენლობის დაახლოებით ნახევარი შეიცვლება, თუმცა არა მთლიანად. მის შემადგენლობაში მოქმედი წევრებიც დარჩებიან. სხვათა შორის, დღეს არც პოლიტსაბჭოს საბოლოო სახეა დაზუსტებული. კანდიდატთა საბოლოო სია კი ყრილობაზე დელეგატებს წარედგინებათ დასამტკიცებლად.
- გაიაზრეთ თუ არა თქვენი შეცდომები, უსმენთ თუ არა ხალხს, რომელსაც აღარ სურს „მეჭიაურების“, „ჯაჭვლიანებისა“ და სხვების ხილვა პარლამენტში და რა კრიტერიუმებით იხელმძღვანელებს ამჯერად „ოცნება“ საარჩევნო სიის შედგენისას?
- არსებობს გარკვეული ფორმალობა, გვაქვს კოლეგიური ორგანოები, სადაც მსგავსი გადაწყვეტილებები მიიღება, მთავარი ორგანო სწორედ პოლიტსაბჭოა. პოლიტსაბჭოზე და არა ინდივიდუალური განხილვის რეჟიმში გადაწყდება, ვინ დააკომპლექტებს სიას. საბჭოს, რომელიც 14 მაისს დამტკიცდება, სიის ფორმირების მანდატი ექნება და სწორედ ის გახდება პასუხისმგებელი ამ პროცესზე. ჩვენს გეგმებში შედის პარტიული და პერსონალური კვლევებიც. არ გამოვრიცხავთ იმ პირების რეიტინგების გადამოწმებასაც, ვინც მაჟორიტარულ არჩევნებსა თუ პარტიულ სიაში იქნებიან. ჩვენ პირობა მივეცით ამომრჩეველს, რომ თვისობრივად განვაახლებდით ჩვენს გუნდს, მათ შორის საპარლამენტო შემადგენლობასაც და ამ პირობას აუცილებლად შევასრულებთ. რაც შეეხება კონკრეტულ კრიტერიუმებს, ზუსტად ვიცით, რა მიმართულებები საჭიროებს გაძლიერებას პარლამენტში. ეს არის კანონშემოქმედებითი, საფინანსო-ეკონომიკური და საგარეო პოლიტიკის მიმართულებები. ეს ის სამი მიმართულებაა, რომელსაც გაძლიერება ნამდვილად სჭირდება და ჩვენთვის პრიორიტეტული სწორედ ეს სფეროებია. თუმცა ეს არ ნიშნავს, რომ მხოლოდ ამ მიმართულების სპეციალისტები იქნებიან წარმოდგენილნი პარლამენტში.
- ამ სამი მიმართულების გაძლიერება, სავარაუდოდ, იმასაც ნიშნავს, რომ ამ მიმართულების დღევანდელი ხელმძღვანელები ,,ოცნებიდან” შეიცვლებიან?
- ჩვენი გეგმები და მიდგომა, რიგ შემთხვევაში, ჩანაცვლებასაც გულისხმობს. ჩვენი მიზანი განახლება და გაძლიერებაა და რაც საჭიროა, ამისთვის ყველაფერი გაკეთდება.
- რა დოზით მონაწილეობს ბიძინა ივანიშვილი სიის ფორმირებაში და დაესწრება თუ არა ექსპრემიერი ,,ოცნების” ყრილობას?
- პირველადი კონსულტაციები ბიძინა ივანიშვილთან ნამდვილად გვქონდა, სიის ფორმირების პრინციპებთან დაკავშირებით. სწორედ აქედან წამოვიდა ეს სამი მიმართულება, რომელთა გაძლიერებაც საჭიროა. რაც შეეხება ყრილობას, დიდი იმედი გვაქვს, რომ 14 მაისს ივანიშვილი ამ ღონისძიებას დაესწრება.
- პიარულად, როგორ გაქვთ გაწერილი ეს ნახევარი წელი არჩევნებამდე. როდის და რა ღონისძიებებს გეგმავს სახელისუფლო პარტია?
- გვაქვს გრძელვადიანი პიარსტრატეგია, რომლის შედეგებსაც ჩვენი ამომრჩეველი მალე იხილავს. ჩავაბარებთ ანგარიშსაც, რადგან ბევრი გვაქვს სათქმელი მოსახლეობისთვის. მთელი ეს დრო, სატელევიზიო სივრცეში, ძირითადად, ნეგატივი ტრიალებდა, რამაც გარკვეული განწყობა წინასწარ შექმნა მოსახლეობაში, თუმცა მარტივად შევძლებთ ამ განწყობის ჩვენს სასიკეთოდ შემობრუნებას. მარტო პიარი საქმეს ვერ უშველის, თუ სათქმელი არ არსებობს. სათქმელი კი ძალიან ბევრია, რადგან აბსოლუტურად ყველა მიმართულებით პროგრესი გვაქვს: ადამიანის უფლებებითა და დემოკრატიის განვითარებით დაწყებული, ინფრასტრუქტურით დასრულებული. ადამიანის უფლებების ნაწილში პროგრესზე საუბარიც ზედმეტია, რადგან საქმე ფუნდამენტურ ნახტომთან გვაქვს. სწორედ ადამიანის ღირსების შელახვაზე იდგა წინა რეჟიმი. ეს ნაციონალების მთავარი საყრდენი იყო.
- ეს იყო მთავარი საყრდენი, რომლითაც თქვენ გაიმარჯვეთ და ხელისუფლებაში მოხვედით, 4 წლის მერე, 2016 წელსაც იგივე უნდა ვისმინოთ?
- მარტო ერთ მიმართულებას, დემოკრატიულ განვითარებას არ ვეხებით, ეკონომიკის კუთხითაც ბევრია სათქმელი. რეალურად, აქაც პროგრესი გვაქვს და ამის დადასტურებაც მარტივია. ამ ხნის განმავლობაში გვესმოდა მანიპულირება რიცხვებით, სტატისტიკით მაშინ, როცა სურათი რადიკალურად განსხვავებულია, რასაც ხალხსაც დავუმტკიცებთ. რადიკალური პროგრესი გვაქვს სოციალური მიმართულებითაც, როგორც ჯანდაცვის, ისე განათლების სფეროებში. ელემენტარულად, ჯანდაცვის სამინისტროს ბიუჯეტი, 2012 წელთან შედარებით, გაორმაგებულია – 2012 წელს 1 600 000 ლარი იყო, ახლა კი 3 200 000 მილიონი ლარია. განათლების სფეროში ბიუჯეტის 50%-ზე მეტი ზრდა გვაქვს. რაც შეეხება საგარეო მიმართულებას, აქაც რადიკალური პროგრესი შეიმჩნევა.
- აი, ამ ნაწილში, სპიკერები გყავთ შესაცვლელი, რადგან 4 წლის მერე, პარტიის ყრილობის წინ, ,,ოცნების” მიმართ მთავარი კითხვა ისევ ის არ უნდა იყოს, პროდასავლურ კურსს ატარებთ თუ არა!
- სპიკერებს რომ თავი დავანებოთ, ჩვენ გვაქვს ძალიან მყარი კურსი, რომელიც არა მარტო სიტყვით, არამედ საქმითაც გამყარებულია.
- საქმით განსაკუთრებით მას მერე გამყარდა, რაც თავისუფალი დემოკრატები და რესპუბლიკელები გაყარეთ კოალიციიდან?
- ირაკლი ალასანია და რესპუბლიკელები არ ქმნიდნენ გარანტიას ჩვენი პროდასავლური კურსისა. ერთადერთი ძალა, რომელიც დღეს ამის გარანტიას ქმნის საქართველოში, ,,ოცნებაა”. ნაციონალური მოძრაობა კი ყველაზე ანტიდასავლური ძალა იყო ბოლო 25 წლის განმავლობაში და ამ რეალობის საწინააღმდეგო მითები იქმნებოდა. ამ სტერეოტიპებს ამკვიდრებდნენ როგორც ნაციონალები, ისე მათი სატელიტები და ამტკიცებდნენ, რომ ისინი პროდასავლური ძალები არიან.
- „ნაციონალების“ სატელიტში ვის გულისხმობთ?
- ირაკლი ალასანიას პარტია „თავისუფალ დემოკრატებს“.
- და მათი სატელიტობის შესახებ როდის გაიგეთ, 2 წელი ხელისუფლებაში არ გესხდათ მაშინ?
- მათ ჰქონდათ ერთი დღის წესრიგი, დღეს კი სრულიად სხვა დღის წესრიგი აქვთ, რამაც მათ სხვა ბანაკისკენ უბიძგა. ეს ძალიან ღიად ჩანს. ელემენტარულად, შეგვიძლია სატელევიზიო ეთერს შევხედოთ, ვინ რამდენჯერ და რა ტიპის გადაცემებსა და შოუებში ზის და რა ტიპის გამოსვლები აქვს. მაგალითად, შალვა ნათელაშვილი ნაციონალების მეორე სატელიტია. რეალურად, ვისაც რა პოზიცია უნდა ჰქონდეს, ,,ოცნების” წევრებისთვის სახელების შერქმევას და მათთვის ანტიგმირების დაძახებას თავი უნდა დაანებოს. ამის უფლება არც ნაციონალებს აქვთ და არც იმ ადამიანებს, ვინც დღეს პოლიტიკაში მოსვლის განაცხადს აკეთებს. მათ არ უნდა ისაუბრონ იმ ხალხზე, ვინც 2012 წელს თავი გადადო მაშინ, როცა თავად პოზიციაც კი არ დაუფიქსირებიათ.
- პაატა ბურჭულაძეს გულისხმობთ?
- დიახ. 2012 წელს, როცა სიკვდილ-სიცოცხლის საკითხი წყდებოდა და ქვეყანაში პოლიტიკური ომი იყო, პაატა ბურჭულაძეს საკუთარი პოზიცია საერთოდ არ დაუფიქსირებია, ის არც იქეთ იყო, არც აქეთ. დღეს კი ფაქტია, რომ 22 მაისისთვის ჩანიშნული საკრებულოს შუალედური არჩევნების კანდიდატი, ერთ-ერთ ადგილობრივ ოლქში, პაატა ბურჭულაძემ და ნაციონალებმა ერთობლივად წარადგინეს. ახლა სხვას ვერაფერს დავაკონკრეტებ.
- რატომ არ აკონკრეტებთ ან თქვენ რა იცით, რომ ეს სიმართლეა?
- 22 მაისს რომ ჩავტოვებთ 2%-ში, ამის მერე დავაკონკრეტებთ ბევრ რამეს. თუმცა ახლა ზუსტად ვიცი, რომ ეს ინფორმაცია სიმართლეს შეესაბამება და მათ ერთად შეარჩიეს კანდიდატურა. ყველაფერი იმისკენ მიანიშნებს, რომ ბურჭულაძის ფონდი მისი საარჩევნო მიზნების შესაფუთად იყო საჭირო. რაც შეეხება ,,ოცნების” იმ წევრებს, ვისაც დღეს აუგად მოიხსენიებენ, 2012 წელს მათ თავი გადადეს ცვლილებებისთვის.
- თუ ასეა, ალასანიაც ხომ თქვენთან ერთად იბრძოდა და თავი გადადო?
- ვინ როგორ გადადო თავი, ეს სხვა თემაა. ჩვენი გუნდისა და ფრაქციის წევრებმა კი 2012 წელს გმირობა ჩაიდინეს და სხვისი სალაპარაკო ეს ხალხი არ არის.
- ისე, თავად ნაციონალებში მიმდინარე პროცესებს როგორ აფასებთ - გიორგი ვაშაძე, ,,გირჩი”, ,,ივერია” და სხვები, რეალურად, ერთ ფრონტზე არიან და ,,ოცნების” წინააღმდეგ ბრძოლა სტრატეგიულად გაშალეს თუ ყოფილი სახელისუფლო პარტია მართლა იშლება?
- ნაციონალური მოძრაობა ძალიან მძიმე მდგომარეობაშია და ეს თავადაც იცის. ამის დამალვას კი პიარმექანიზმების მეშვეობით ცდილობენ, თუმცა რეალურად, მუხტის აწევა საკუთარ აქტივისტებშიც კი ვერ შეძლეს. მაგალითად, მათი აქტივი გარდაბნის არჩევნების შემდეგ, სრულიად დემოტივირებული იყო და მუხტის ასაწევად მერე გაყალბებული რეიტინგების გამოქვეყნებაც დასჭირდათ. მათ მძიმე მდგომარეობაზე მეტყველებს ჩვენი კვლევებიც, რომელთა მიხედვით, ნაციონალებს აქვთ ბარიერის გადალახვის შანსი, თუმცა ვფიქრობ, ამ პარტიაში ჩამოყალიბების პროცესი ჯერ არ დასრულებულა _ რეგრესის შანსი გაცილებით მაღალია, ვიდრე პროგრესის. ამიტომ გარწმუნებთ, რომ 2016 წლის არჩევნების მერე ნაციონალური მოძრაობა ქართულ პოლიტიკაში ფაქტორი აღარ იქნება. ,,გირჩი”, ვაშაძე და სხვები ისევე, როგორც მათი დანარჩენი სატელიტები და განაყოფები კი არავის აინტერესებს.
———————-
„ახალი თაობა“, 12 მაისი, 2016 წელი
ინტერვიუ შოთა მალაშხიასთან: „ზვიად ნიშნიანიძე და თამაზ მეჭიაური ამბობენ იმას, რაც ბიძინა ივანიშვილს უნდა“ // „პასუხს მარტო ნიშნიანიძეს კი არა, მთელ „ქართულ ოცნებას“ მოვთხოვ“ // „რესპუბლიკელების პროტესტი პრაგმატულ-კარიერისტულ მიზნებს უკავშირდება“
პარლამენტის უმრავლესობისა და უმცირესობის დეპუტატების – ომარ ნიშნიანიძისა და შოთა მალაშხიას უთანხმოება გრძელდება. ომარ ნიშნიანიძე ამბობს, რომ 2008 წელს სააკაშვილმა ავანტიურა მოაწყო, რომელსაც ადამიანები შეეწირნენ. იგი მზადაა, თუ საჭირო გახდა, ამ თემაზე მოპასუხე იყოს სასამართლოშიც. ნიშნიანიძე დარწმუნებულია, რომ თუ ამის გამო მას უჩივლებენ, სასამართლო ნაცმოძრაობის გასამართლებით დასრულდება.
ომარ ნიშნიანიძის შემდეგ, „ახალი თაობა“ ამ საკითხებზე ესაუბრა ქრისტიანულ-კონსერვატიული პარტიის ლიდერს, დეპუტატ შოთა მალაშხიასაც.
„ომარ ნიშნიანიძე მიხვდა, რომ არასწორი და უგუნური განცხადებები გააკეთა. ამიტომ, იგი ახლა ათას რამეს ამბობს. 2016 წელია და როგორ შეიძლება ვინმეს კიდევ ეჭვი ეპარებოდეს იმაში, თუ ვინ დაიწყო რუსეთ-საქართველოს ომი? შეიძლება 2008 წელს ყველა არ იყო ინფორმირებული, მაგრამ ახლა ხომ ყველაფერი ცნობილია! გარდა ამისა, რუსეთმა ღია აგრესია ჩაიდინა უკრაინაში. ამის გამო რუსეთი რვიანიდან გარიცხეს, მას დაუწესდა სერიოზული ეკონომიკური სანქციები. მსოფლიო ხედავს, რომ პუტინი საბჭოთა კავშირის აღდგენას ცდილობს. 2008 წელს რუსეთმა მოახდინა საქართველოს ტერიტორიების ოკუპაცია და ეთნოწმენდა. ეს საზღვარგარეთ იციან, მაგრამ ნიშნიანიძე და მისთანები ამტკიცებენ, თითქოს ეს ომი საქართველომ დაიწყო. ეს არის ანტისახელმწიფოებრივი აზროვნება და მოქმედება. ჩვენი კამათი ტელეკომპანია „იბერიის“ ეთერში მოჰყვა ნიშნიანიძის თანაგუნდელის, თამაზ მეჭიაურის ცნობილ განცხადებებს. მეჭიაურის გამო პრემიერ-მინისტრ კვირიკაშვილს მოუხდა თავის მართლება. ნიშნიანიძე ისეთ რამეს ამბობს, რომ შეიძლება ამის გამოც მოუხდეს გიორგი კვირიკაშვილს განმარტებები”, – ამბობს შოთა მალაშხია.
- თამაზ მეჭიაურზე ითქვა, რომ ის თავის პირად მოსაზრებებს გამოთქვამს...
- თამაზ მეჭიაურიც, ზვიად ნიშნიანიძის მსგავსად, პრორუსულ განცხადებებს აკეთებს. ყველაზე საშინელება ისაა, რომ რუსული პოლიტიკის მიმდევარი „ქართულ ოცნებაში“ მარტო ეს ორი კაცი არაა.
- სხვებიც ასე ფიქრობენ? მეჭიაურის გამოსვლებს კოლეგები გაემიჯნენ.
- არა. სინამდვილეში, ესაა „ქართული ოცნების“ ნამდვილი სახე და პოლიტიკა, რომელსაც ის ატარებს. აქ მეჭიაური და ნიშნიანიძეა, იქ – ენერგეტიკის მინისტრი კალაძე, რომელიც ფარულ მოლაპარაკებებს აწარმოებდა რუსულ გაზპრომთან. ყველაფრის თავი და თავი კი ივანიშვილია. ისაა „გაზპრომის“ მეწილე, რუსი ოლიგარქი და რუსეთის ინტერესების მთავარი გამტარებელი. მას პრემიერად ყოფნის დროს ბევრჯერ გამოუხატავს პრორუსული განწყობები. ნიშნიანიძე და მეჭიაური ამბობენ იმას, რაც ივანიშვილს უნდა.
- ომარ ნიშნიანიძეს უჩივლებთ?
- სამართლებრივი პასუხისმგებლობა დაეკისრება მთელ “ქართულ ოცნებას“ და არამარტო ამ გამონათქვამებისათვის. ეგ პოლიტიკოსები ხალხს ჰპირდებოდნენ, ქართველობას დაგიბრუნებთ, ეკონომიკას ავაყვავებთ, დემოკრატიით ევროპასაც გავაოცებთო. იყო სხვა კონკრეტული დაპირებები. ყველაფერი, რაც კეთდება, ამ შეპირებების საწინააღმდეგოა. ეს ხდება რუსეთის ინტერესების გატარების ფონზე. ასეთი სამარცხვინო ხელისუფლება საქართველოს არ ჰყოლია. ყოველივე ამისთვის „ქართული ოცნება“ პასუხს აგებს და გასამართლდება. ამ ხალხის მმართველობა მალე დასრულდება.
- „ქართული ოცნება“ ამბობს, რომ მალე ნაცმოძრაობის დრო დამთავრდება. ამას ხელს უწყობს ნაცმოძრაობის დაშლა...
- „ნაციონალური მოძრაობის“ წევრი არ ვარ. ამიტომ, არ ვიცი, პარტიის შიგნით რა ხდება. იმაში კი ვარ დარწმუნებული, რომ ერთი ადამიანის ან თუნდაც ჯგუფის გამოსვლით პარტიას არაფერი დააკლდება. მთავარია, რომ ნაცმოძრაობა არ გადაუხვევს პროდასავლურ, ანტიიმპერიულ კურსს.
- საგარეო კურსისა და თამაზ მეჭიაურის გამო, „ქართულ ოცნებას” რესპუბლიკელებიც მწვავედ აკრიტიკებენ...
- რესპუბლიკელები ამას პრაგმატულ-კარიერისტული მიზნებით აკეთებენ. რეალურად, რესპუბლიკურ პარტიასა და „ქართულ ოცნებას“ შორის იდეოლოგიური უთანხმოება არ არსებობს. რესპუბლიკელი მინისტრი პაატა ზაქარეიშვილი ისეთ განცხადებებს აკეთებდა, რომ ისინი არაფრით არაა ბოლოდროინდელ პრორუსულ განცხადებებზე უკეთესი. რესპუბლიკელებსაც მოეთხოვებათ პასუხი იმაზე, რასაც ეს ხელისუფლება აკეთებდა და აკეთებს. მაგალითად, პასუხი იმაზე, რომ გრუს თანამშრომლები პოლიტპატიმრებად შერაცხეს. ისინი ახლაც არიან თანამდებობებზე.
- ანუ არ მოელით, რომ რესპუბლიკელები თანამდებობებს დატოვებენ და ახალ საპარლამენტო უმრავლესობას შექმნიან?
- რესპუბლიკელები არჩევნებამდე იქნებიან თანამდებობებზე. რაც შეეხება უმრავლესობის დაშლას და ახალი უმრავლესობის შექმნას, ამისთვის დრო აღარ რჩება. ეს პარლამენტი მალე დაამთავრებს თავის საქმიანობას. თუ პრემიერს მინისტრების შეცვლა უნდა, ის ამას ისედაც მოახერხებს.
„ახალი თაობა“, 12 მაისი, 2016 წელი
ინტერვიუ გოგი თოფაძესთან: „ირმა ინაშვილთან კოალიცია შესაძლებელია“ // „ბიძინა რამდენიმე თვეა, არ მინახავს” // „ვინ ეკითხება რესპუბლიკელებს, თოფაძე სად იქნება?!”
ბოლო პერიოდის პროცესებზე „ახალი თაობის“ კითხვებს მრეწველების ლიდერი, გოგი თოფაძე პასუხობს.
- ბატონო გოგი, არჩევნების მოახლოებასთან ერთად, პოლიტიკური სიტუაციაც იძაბება. „ოცნების“ მიმართ კრიტიკულად გამოდიან რესპუბლიკელებიც და პრემიერს საყვედურობენ, თავის დროზე რატომ არ დადგა დღის წესრიგში თქვენი და მეჭიაურის კოალიციიდან გარიცხვის საკითხი...
- ვინ ეკითხება რესპუბლიკელებს, თოფაძე სად იქნება. თოფაძე თავისუფალი კაცია, როცა უნდა, წავა, როცა უნდა, დარჩება, როცა უნდა, სხვას მოიყვანს თავის მაგივრად. ვინ უჯერებს მაგათ. ახლა ეგენი აგონიაში არიან. ვეღარ წამოეკიდებიან კოალიციას. ხან ნაცმოძრაობას ეკიდებოდნენ, ხან მოქალაქეთა კავშირს და ყოველთვის ასე ხვდებოდნენ პარლამენტში. რა მნიშვნელობა აქვს მაგათ ლაპარაკს? დადგნენ და რამდენიც უნდათ, იმდენი ილაპარაკონ!
- ამით არაფერი შეიცვლება?
- რასაკვირველია, არ შეიცვლება. ვის შეუძლია, რომ დამაძალოს, ან მომთხოვოს, რომ დავტოვო პარლამენტი?! მე მაგათსავით სატელიტი კი არა ვარ. აგონიაში არიან და აღარ იციან, რა თქვან.
- გადაწყვიტეთ უკვე, რას აპირებთ? მარტო გახვალთ არჩევნებზე თუ ახალი კოალიცია შეიქმნება?
- ჯერ დრო ბევრი გვაქვს. 8 ივნისამდე საკმარისი დროა. ასე შეთანხმდნენ პრეზიდენტი და პრემიერი, ამ დროისთვის ჩვენ უკვე ჩამოყალიბებული ვიქნებით, რა და როგორ, ვის კანდიდატურას სად დავაყენებთ. ძალიან ბევრი მსურველია, რომ ჩვენი სახელით იყაროს კენჭი და ჩვენ ავარჩევთ კანდიდატებს. გეტყვით იმასაც, რომ გუშინ საღამოსაც ძალიან საინტერესო ახალგაზრდა კაცი იყო მოსული, რომელსაც ჩვენი პარტიით უნდა იყაროს კენჭი და ის წამოსულია სხვა პარტიიდან.
- რომელი პარტიიდან, არ გაგვიმხელთ?
- საიდან მოდის, ჯერ მაგაზე საუბარს თავი დავანებოთ. ფაქტია, რომ მოდის და ჩვენი ხედვები უფრო მოსწონს. ძალიან ბევრი ახალგაზრდობა მოდის, რადგან ყველა ხედავს, რომ ჩვენ უფრო ქართული ორიენტაციის გუნდი ვართ. რესპუბლიკელები რომ გვაბრალებენ, რუსეთუმეებიო და თვითონ მაგათ ვინ აფინანსებს და როგორ ფინანსდებიან, ეს ცალკე თემაა. ჩვენ ჩვენი ძალებით ვმოქმედებთ და დასამალიც არაფერი გვაქვს. ადრე 7%-იანი ბარიერი იყო და არ გვიჭირდა, ახლა 5%-იანი იქნება და ჩვენთვის უფრო მარტივი იქნება. არანაირი პრობლემა არ გვაქვს, ჩვენ ვიცით ხალხის განწყობა.
- ახალი კოალიცია შეიქმნება?
- ჯერ არ გადაგვიწყვეტია. თუმცა არ გამოვრიცხავ, რომ ვინმესთან ერთად ბლოკში გავერთიანდეთ.
- საუბარი იყო, რომ ირმა ინაშვილის პარტიასთან ერთად შექმნით საარჩევნო ბლოკს. ასე იქნება?
- რა თქმა უნდა, შესაძლებელია, ასეც იყოს. ძალიან კარგად მიდიან ეგენიც, ძალიან კარგი პოზიცია აქვთ.
- თუკი რესპუბლიკელები სერიოზულ ოპოზიციაში წავლენ, მოუწევთ მათ მინისტრებს გადადგომა?
- მე არ ვწყვეტ ამ საკითხებს. ჩემი არც ერთი აქტივისტიც კი არც ერთ სამინისტროში რიგით თანამდებობაზეც კი არ არის. ჩვენ არ ვიბრძოდით იმისთვის, რომ მაინცდამაინც დაგვეკავებინა განსაკუთრებული პოსტები. ეს მთავრობის გადასაწყვეტია. რა თქმა უნდა, ნონსენსია, ოპოზიციაში არიან და მინისტრის პორტფელები აქვთ. ამას პრემიერი გადაწყვეტს.
- „ნაციონალები“ აცხადებენ, რომ გოგი თოფაძე და თამაზ მეჭიაური ბიძინა ივანიშვილის განწყობას ახმოვანებენ. სხვანაირად მათ არ მიეცემოდათ უფლება ასეთი მკვეთრი განცხადებების კეთებისო. ასეა?
- ეგენი ცნობილი პროვოკატორები არიან. ბიძინა არ მინახავს უკვე რამდენიმე თვეა! ჯერ ერთი, მე ამ კაცთან მაქვს დიდი ხნის ურთიერთობა, საქმიანი, თუნდაც ბიზნესი და მე რომ ბიძინა ვნახო, ჩვენ სულ სხვა საკითხებზე ვილაპარაკებთ და არა მარტო პოლიტიკაზე, თუმცა კარგა ხანია, არ მინახავს. თამაზ მეჭიაური საკმაოდ ვაჟკაცურად ლაპარაკობს და აფიქსირებს თავის პოზიციას. ნაციონალებმა თავის თავს მიხედონ. მაგათი პოლიტიკაში მოსვლა აბსტრაქტულად შეიძლება ვინმემ წარმოიდგინოს. მათ საერთოდ აღარ აქვთ ხალხის ნდობა. ვერ მოვლენ, რაც უნდა დიდი დახმარება ჰქონდეთ დასავლეთიდან! ამიტომ, რაც უნდათ, ის ილაპარაკონ. გადახედეთ მათ ბიოგრაფიას და თუ რამე სასიკეთო გაუკეთებიათ საქართველოსთვის, მითხარით, მეც ვიცოდე. ეგენი ვეღარ შეძლებენ ხალხის მოტყუებას. ისედაც ამდენი წელი ატყუეს, ნატოში შევალთ, ევროკავშირში შევალთ. შევედით?! სწორედ ამას ამბობს მეჭიაური და ამ ყველაფერს პირდაპირ და ვაჟკაცურად ლაპარაკობს.
- საუბარია, რომ თქვენ და მეჭიაურიც ეწინააღმდეგებით ამ კურსს, რასაც ჰქვია ნატო და ევროკავშირი. ასეა?
- ათი წელია, ამას ვლაპარაკობ. როცა ნათელი გახდა, რომ „ნაციონალები“ იტყუებიან, აი, „მაპ“-ს მოგვცემენ, ნატოში შევალთ, ხომ ცხადი გახდა, რომ გვატყუებდნენ. მეც არაერთხელ შევხვედრივარ ნატოს წარმომადგენლებს და მათი პოზიცია ჩემთვის თავიდანვე ნათელი გახდა.
- რომელ პოზიციაზე საუბრობთ?
- ჩვენი მთავარი სატკივარი ტერიტორიების დაბრუნებაა, მათ კი ძალიან მისახვედრად გვითხრეს, ამ საკითხში ვერ ჩავერევითო. მათი ბევრი ლიდერის განცხადება მოვისმინეთ, შემდეგ კი აპატურაის, რომელმაც პირდაპირ გვითხრა, რომ ვერ მიგიღებთ, არ მიგიღებთ, ისევ თქვენივე უსაფრთხოებისთვის, იმიტომ, რომ აგრესიული მეზობელი გყავთ, რომელიც ამას არ დაუშვებს. მეტი რა უნდა თქვას, მეტი გასაგებად როგორ გვითხრან, რომ არ მიგვიღებენ?!
„ახალი თაობა“, 12 მაისი, 2016 წელი
ინტერვიუ ზაქარია ქუცნაშვილთან: „ქართულ ოცნებაში“ განსხვავებული აზრისთვის არავის ვდევნით”
„ქართულ ოცნებაში“ მიმდინარე პროცესებს „ახალ თაობასთან“ ინტერვიუში პარლამენტის დეპუტატი ზაქარია ქუცნაშვილი აფასებს.
- ბატონო ზაქარია, პარტია „ქართული ოცნება“ არმაზ ახვლედიანმა დატოვა და ბევრ ხარვეზზეც ისაუბრა. რა ხდება, არჩევნებამდე კიდევ ხომ არ უნდა ველოდოთ ასეთ ხმაურიან გასვლებს?
- გამორიცხული არაფერი არ არის. მიდის ჩვეულებრივი პროცესი პარტიიდან ხალხის გასვლის და ხალხის შემოსვლის სახით. ეს დინამიური პროცესია და არასდროს არ არის სტატიკურ მდგომარეობაში, რომ ან არავინ არ შემოდიოდეს და ან არავინ გადიოდეს.
- თუმცა ახვლედიანმა ისაუბრა იმაზე, რომ პარტია `ქართულმა ოცნებამ~ უღალატა საკუთარ პრინციპებს. არ შეასრულა დანაპირები. ეს განაწყენებული კაცის პოზიციაა თუ რეალურად ასეა?
- არა მგონია, სწორი იყოს ჩემი კომენტარის კეთება პარტიაში განვითარებულ პროცესებზე იმის გამო, რომ მე პარტიის მართვაში ბოლო ორ წელიწადია, მონაწილეობა არ მიმიღია.
- ის ბრალს დებს „ოცნების“ კოალიციას, რომ დანაპირები არ შეასრულა, პრინციპებს უღალატაო და ეს თქვენ არ გეხებათ?
- როცა ამ ტიპის შეკითხვას მისვამთ, მაშინ დააკონკრეტეთ საზოგადოებრივი ცხოვრების სფერო და იმის მიხედვით გეტყვით, რა გავაკეთეთ და რა ვერ გავაკეთეთ.
- თუნდაც ავიღოთ დასაქმების პრობლემა. საზოგადოება საუბრობს უმუშევრობაზე, გაჭირვებაზე, სად არის სამუშაო ადგილები, რომელთაც მოსახლეობას ჰპირდებოდით? ექსპერტებისგან ის შეფასებებიც გვესმის, რომ ამ კუთხით იმაზე მძიმე ვითარებაა, ვიდრე სააკაშვილის დროს იყო...
- ანუ თქვენ ფიქრობთ, რომ საქართველოში შეიძლება არსებობდეს ხელისუფლება, რომელიც უმუშევრობას ბოლომდე მოსპობს?!
- მე კითხვას გისვამთ საზოგადოების განწყობებიდან გამომდინარე, პირადად ჩემს აზრს არ ვაფიქსირებ. შესაძლოა, ვერ მოსპოს, თუმცა აქ შედარებაზე მიდის საუბარი. ახლა გასაგებია?
- უმუშევრობა არის შედეგი, ხოლო, მიზეზი არის მცირე ეკონომიკის ქონა. თუ ჩვენ ვერ შევძლებთ ძლიერი ქართული ეკონომიკის შექმნას, ისე ამ შედეგებს, გამოვლენილს უმუშევრობასა და გაჭირვებაში, ვერ დავამარცხებთ. როცა ვიღაცა უმუშევრობას და გაჭირვებას აცხადებს მიზეზად, ეს ნიშნავს იმას, რომ მას არ ესმის სახელმწიფოს და მისი ეკონომიკის მართვა. ვერ ხედავს პროცესს სწორად. ამიტომ მხოლოდ პოპულისტური და დემაგოგიურია ჟურნალისტის, პოლიტიკოსის თუ ნებისმიერი სხვა პროფესიის წარმომადგენლის მხრიდან საკითხის ასე დასმა, რომ ეს მიზეზები ვერ აღმოვფხვერით. უმუშევრობა და გაჭირვება მცირე ეკონომიკის შედეგია და არა – მიზეზი.
- მაშინ ეკონომიკის გაზრდაზე გემუშავათ, თუკი აქ არის სათავე პრობლემებისა...
- პოსტსაბჭოთა სივრცეში საქართველო არის ლიდერი ქვეყანა ლატვიის შემდეგ, რომელსაც ყველაზე მაღალი ეკონომიკური ზრდა აქვს. შავი ზღვის რეგიონში ასევე გვაქვს ყველაზე მაღალი ეკონომიკური ზრდის მაჩვენებელი რუმინეთის შემდეგ. ხოლო კავკასიის რეგიონში უპირობოდ ლიდერი ვართ. თუ ეს ყველაფერი შედარებითია, მაშინ შევადაროთ და მერე გავაგრძელოთ ამ თემაზე საუბარი.
- რესპუბლიკელების შესახებ რას იტყოდით, როგორია მათ ქცევებზე თქვენი შეფასებები. ისინი ოპოზიციაში გადადიან? რატომ ისმის ასეთი სერიოზული კრიტიკა მათი მხრიდან?
- გაღიზიანება გამოიწვია იმ ცნობილმა განცხადებებმა, რასაც დაერქვა მეჭიაურის და რესპუბლიკელების დაპირისპირება იმ თემაზე, რაზე აპელირებაც ყველა ოპოზიციურ პარტიას აწყობს, ვინც კი თავს მედასავლეთედ მიიჩნევს. ამიტომ მეჭიაურმა უნებლიეთ ხელი შეუწყო რესპუბლიკური პარტიის პოზიციონირებას და გააქტიურებას. ამიტომ მე მოვუწოდე ყველას, რომ ნუ შევუწყობთ ჩვენს კონკურენტ პარტიებს ხელს აქტუალიზაციასა და პოპულარიზაციაში.
- დღეს რესპუბლიკელები მოითხოვენ, რომ მეჭიაური გაირიცხოს კოალიციიდან. დადგება დღის წესრიგში ეს საკითხი?
- ჩვენ დავამკვიდრეთ ახალი კულტურა, რომ რაც არ უნდა მიუღებელი შეიძლება იყოს ესა თუ ის აზრი, მისი გამოხატვისთვის ადამიანებს არ ვდევნით. ბატონ კვირიკაშვილს უნდა მივცეთ რამდენიმე დღე, რომ გახდეს პარტიის თავმჯდომარე და აქედან გამომდინარე, წარმოეშვას პარტიის წევრებთან სამართლებრივ ურთიერთობაში შესვლის საშუალება. მას დღეს არ აქვს ეს საშუალება, რადგან ის გახლავთ პარტიის ისეთივე რიგითი წევრი, როგორც თქვენი მონა-მორჩილი.
- გავრცელდა ინფორმაცია, რომ თუკი მეჭიაური წავა `ქართული ოცნებიდან~, ის მაჟორიტარ დეპუტატად კენჭს იყრის თიანეთში. თქვენს ოპონენტად ხომ არ მოგვევლინება მეჭიაური?
_ გამორიცხული არაფერი არ არის, თუმცა, სამწუხაროდ, უჩა ნანუაშვილის სარჩელის და საკონსტიტუციო სასამართლოს გადაწყვეტილების გამო, თიანეთს აღარ ეყოლება თავისი დამოუკიდებელი დეპუტატი, რადგან თიანეთს, დუშეთს და ყაზბეგს, ეყოლება საერთო დეპუტატი.
- საკმარისი იქნება ერთი მაჟორიტარი სამი ამხელა რაიონისთვის?
- არავის მოსვლია აზრად, ეს რა პრობლემებს წარმოშობდა. ამ სამი მუნიციპალიტეტის გაერთიანებით მივიღეთ საქართველოს ყველაზე დიდი საარჩევნო ოლქი დასახლებათა რაოდენობის მიხედვით. 425 დასახლებული პუნქტი შედის დუშეთის, თიანეთის და ყაზბეგის მუნიციპალიტეტების გაერთიანებაში. არაოკუპირებული ტერიტორიების დასახლებული პუნქტების 13% ამ ერთ საარჩევნო ოლქში იქნება თავმოყრილი.
- 14 მაისი ახლოვდება, სიურპრიზებს უნდა ველოდოთ „ქართული ოცნებისგან“?
- მე ვფიქრობ, სიურპრიზები პოლიტიკაში ყველაზე ცუდი მმართველობის გამოხატულებაა. პოლიტიკაში უნდა იყოს განჭვრეტადი პროცესები, მიმართული სტაბილიზაციისა და დემოკრატიისკენ, რაც არის აუცილებელი წინაპირობა ქვეყნის განვითარებისათვის. ასე რომ, ხელისუფლება სიურპრიზების პოლიტიკით კი არ უნდა ელაპარაკებოდეს თავის მოსახლეობას, არამედ განჭვრეტადი, სტაბილური და მდგრადი პოლიტიკის წარმართვით.
„ახალი თაობა“, 12 მაისი, 2016 წელი
დატოვებს თუ არა დავით უსუფაშვილი რესპუბლიკურ პარტიას
„რესპუბლიკელები“ გიორგი მარგველაშვილის და ირაკლი ალასანიას წინააღმდეგ
„რესპუბლიკელებს“ აშკარად ცუდი პერიოდი უდგათ. აქამდე თუ თოფაძე-მეჭიაურთან უწევდათ ბრძოლა, ახლა მედასავლეთე გიორგი მარგველაშვილსა და ირაკლი ალასანიასაც შეებნენ. მათ მდგომარეობას სხვა ფაქტიც ართულებს. გავრცელებული ინფორმაციით, პარტიის შიგნითაც დაიწყო არეულობა. ინციდენტი პარტიის ეროვნული კომიტეტის სხდომაზე რამდენიმე დღის წინ მოხდა. ასეთ ინციდენტს მარტის ბოლოსაც ჰქონდა ადგილი. ეს მაშინ მოხდა, როცა რესპუბლიკელებმა კოალიციიდან გასვლა გადაწყვიტეს. მაშინ საუბარი იყო იმაზე, რომ რესპუბლიკელ მინისტრებს თანამდებობები უნდა დაეტოვებინათ. ეს პოზიცია მინისტრებმა არ გაიზიარეს, განსაკუთრებით თინა ხიდაშელი გაჯიუტებულა. როგორც ამბობენ, ამის შემდეგ ძმებ ბერძენიშვილებსა და რესპუბლიკელ მინისტრებს სიტუაცია დაეძაბათ.
კომიტეტს თინა ხიდაშელის და თამაზ მეჭიაურის დაპირისპირება უძღოდა წინ. დეპუტატმა ქართულ-ამერიკული სამხედრო წვრთნები გააპროტესტა, რასაც ამირსპასალარის მხრიდან ქოქოლა მოჰყვა. მართალია, თინა ხიდაშელმა კანონმდებელს პოლიტიკური წყევლა-კრულვა არ დააკლო და ლამის ამერიკული ტანკით მიუხტა სახლში, ძმებმა ბერძენიშვილებმა ეს არასაკმარისად მიიჩნიეს. მათ გიგლა აგულაშვილს, პაატა ზაქარეიშვილს და თინა ხიდაშელს პროტესტის ნიშნად თანამდებობების დატოვება მოსთხოვეს. „პირველი რადიოს“ ინფორმაციით, ძმებმა გადადგომისკენ დავით უსუფაშვილსაც მოუწოდეს. პარლამენტის თავმჯდომარე ამ ულტიმატუმით ძალიან აღშფოთებულა და უთქვამს, რომ თანამდებობას არავინ დატოვებდა.
დავით უსუფაშვილის წინააღმდეგობას, წყაროს ინფორმაციით, ბერძენიშვილების მხრიდან ხმამაღალი საუბარი მოჰყვა. დავით უსუფაშვილთან რომ ვერაფერს გახდა, კომიტეტიდან სხდომიდან გასული დავით ბერძენიშვილი თამაზ მეჭიაურს დაესხა თავს სიტყვიერად. ამის გამო მან გიორგი კვირიკაშვილისგან შენიშვნა მიიღო.
კომიტეტის სხდომაზე კიდევ ერთი საინტერესო ამბავი მოხდა. ძმებს და მათი პოზიციის ნაწილობრივ მოზიარე პაატა ზაქარეიშვილს დავით უსუფაშვილმა რამდენიმე წლის წინანდელი ამბავი გაახსენა.
დავით უსუფაშვილის თქმით, მაშინ, როცა კოალიცია შეიქმნა, ბიძინა ივანიშვილმა მას პარტია „ქართული ოცნების“ თავმჯდომარეობა შესთავაზა, რაზეც სპიკერმა უარი განაცხადა. თინა ხიდაშელის თანამეცხედრე ამტკიცებს, რომ მან ბიძინა ივანიშვილის შეთავაზება არ მიიღო, რათა პარტიის დაშლა აეცილებინა თავიდან.
„რესპუბლიკელებში“ მომხდარი დაპირისპირება „ახალ თაობას“ უფლებადამცველთა გაერთიანების თავმჯდომარემ, ნიკოლოზ მჟავანაძემაც დაუდასტურა. მისი ინფორმაციით, ეს იყო სერიოზული დაპირისპირება და ის მომავალშიც გაგრძელდება.
- ეს არ არის პირველი შემთხვევა, როცა მათ შორის დაპირისპირება ხდება. გაგებული მაქვს, რომ დავით უსუფაშვილს აღარ სურს ბერძენიშვილებთან ერთ პარტიაში ყოფნა. არ არის გამორიცხული, ის მართლა წამოვიდეს ამ პარტიიდან, – განაცხადა „ახალ თაობასთან“ საუბარში მჟავანაძემ.
ხმები დავით უსუფაშვილის პარტიიდან შესაძლო წასვლის შესახებ ცოტა ხნის წინაც გავრცელდა. როდესაც „რესპუბლიკელებმა“ კოალიციიდან გასვლის შესახებ განცხადება გააკეთეს, „ოცნებაში“ დავით უსუფაშვილის გადაბირებაზე დაიწყეს საუბარი.
„ახალ თაობას“ მაშინ პარტია „ქართულ ოცნებაში“ დაუდასტურეს ინფორმაცია იმის შესახებ, რომ უსუფაშვილის გადაბირებას მართლა აპირებდნენ. როგორც ისინი კულუარულ საუბარში აცხადებდნენ, ეს დირექტივა ივანიშვილის მიერ გაიცა. ივანიშვილს პარლამენტის თავმჯდომარის მიმართ დადებითი განწყობა აქვს. ეს პოზიცია მას არაერთხელ აქვს დაფიქსირებული. აღსანიშნავია ისიც, რომ სხვა რესპუბლიკელებისგან განსხვავებით, უსუფაშვილის მიმართ ნაკლები აგრესიაა. მის მიმართ ყველა პატივისცემას ამჟღავნებს.
- დავით უსუფაშვილი არ არის ისეთი აგრესიული და ანტიეროვნული, როგორც სხვა რესპუბლიკელები. იმ განცხადებებსაც, რაც აქამდე გაუკეთებია, იმიტომ აკეთებს, რომ ამ პარტიის წევრია, ის სხვანაირად აზროვნებს. არ იქნებოდა ცუდი, თუ ის მომავალ პარლამენტში კვლავ მოხვდება, ოღონდ უკვე „ქართული ოცნების“ სიით, – განაცხადა „ახალ თაობასთან“ საუბარში ხელისუფლებასთან დაახლოებულმა წყარომ. მისივე განცხადებით, უსუფაშვილი ჭკვიანი ადამიანია და კარგად ხვდება, რომ „რესპუბლიკელებთან“ ერთად მომავალი არ აქვს. ამიტომაც გასაკვირი არაა, რომ ბედი სხვაგან სცადოს.
————
საქართველოში, „რესპუბლიკელების“ გარდა, ყველა აღიარებს, რომ ისინი მომავალ პარლამენტში დამოუკიდებლად ვერ მოხვდებიან. ბოლო პერიოდში არაერთხელ გავრცელდა ინფორმაცია, რომ ისინი ირაკლი ალასანიასთან შექმნიდნენ ალიანსს. იმასაც ამბობდნენ, რომ ისინი გიორგი მარგველაშვილსაც კარგად გაუგებდნენ. ამ დღეებში კი აღმოჩნდა, რომ მათ მედასავლეთე ძალებთანაც აქვთ პრობლემები.
გიორგი მარგველაშვილი „რესპუბლიკელებზე“ აქამდე არაფერს ამბობდა, ორიოდე დღის წინ კი მათ ძველი ცოდვები გაუხსენა და პრინციპების ღალატში დასდო ბრალი. კოალიციაში არსებულ დაპირისპირებაზე მან ძალიან საინტერესო კომენტარი გააკეთა.
„ამ პოლიტიკურ გუნდთან მიმართებაში, ჩემთვის სერიოზული განსხვავებები ამ პოლიტიკურ ფიგურებს შორის არ არის იმიტომ, რომ იგივე პოლიტიკური პარტიებისა და ფრაქციების წარმომადგენლები უნისონში საუბრობდნენ პრეზიდენტის ინსტიტუტის შესუსტების თაობაზე, პრეზიდენტის მმართველობის დისკრედიტაციის თაობაზე. საუბრობდნენ იმის თაობაზე, რომ პრეზიდენტის როლი მხოლოდ პანაშვიდებზე სიარულია, იმის თაობაზე, რომ თურმე, როდესაც პრეზიდენტი მოიწვევს პარლამენტის სხდომას, ტელევიზიით უნდა მოუწოდო დეპუტატებს, ნუ დაუჯერებთ პრეზიდენტს და ნუ მიხვალთ იმ სხდომაზე იმიტომ, რომ დეპუტატი თურმე, პარლამენტში არ უნდა მიდიოდეს პრეზიდენტის დაძახილზე“, – განაცხადა გიორგი მარგველაშვილმა. მისივე თქმით, ეს არის ის პოლიტიკური გუნდი, რომელიც პრინციპულად უპირისპირდებოდა, როდესაც საუბარი იყო პრეზიდენტის ინსტიტუტის პატივისცემასა და საპრეზიდენტო გამოსვლებზე.
„ეს არის ის გუნდი, რომელიც ხშირად ვერ ხედავდა ჩემს ადგილს საქართველოს პარლამენტში. ეს არის ის გუნდი, როცა „ქართული ოცნების“ დეპუტატი და რესპუბლიკური პარტიის დეპუტატი ერთად უნისონში გმობდნენ პრეზიდენტის ვეტოს ეროვნულ ბანკთან მიმართებაში, რომელიც შემდეგ საკონსტიტუციო სასამართლომ გააჩერა. ეს არის ის პოლიტიკური გუნდი, რომელიც აბსოლუტურად უნისონში ახერხებდა იმას, რომ პრეზიდენტს შესაბამისი კორესპონდენცია არ მიეღო უცხოეთიდან. ამიტომ, ნაკლებ ყურადღებას ვაქცევ ამ პროცესს, – განაცხადა პრეზიდენტმა გიორგი მარგველაშვილმა.
თავის ამ ბევრისთვის მოულოდნელ სიტყვაში მან ხაზი გაუსვა, რომ ამ ორწლიან პროცესში პოლიტიკური ფიგურა, რომელთანაც შეძლო ურთიერთობა და კონსტრუქციული დიალოგი, იყო გიორგი კვირიკაშვილი, რომელიც არასდროს კარგავდა სახეს, როგორც მინისტრი და როგორც ვიცე-პრემიერი.
„დანარჩენ ფიგურანტებზე ნაკლებად მინდა ვიმსჯელო, მაგრამ ამ პროცესს აქვს თავისი ისტორია და როდესაც მეთოდურად შენს პრინციპებს ღალატობ, ეს გიბრუნდება უკან“, – აღნიშნა საქართველოს პრეზიდენტმა. მისი განცხადება რესპუბლიკელებს ცუდად მოხვდათ გულზე. თინა ხიდაშელი იმის გამო გადაირია, რომ პრეზიდენტი მის პარტიას თამაზ მეჭიაურისგან ვერ ასხვავებს.
„გიორგი მარგველაშვილი რესპუბლიკელებსა და თამაზ მეჭიაურს შორის განსხვავებას თუ ვერ ამჩნევს, ეს თავად პრეზიდენტს უნდა ჰკითხოთ. ჟურნალისტების არქივები საუკეთესო საშუალებაა ყველაფრისთვის. თქვენ შეგიძლიათ ამოიღოთ არქივები, როცა მე გავხდი მინისტრი და პირველსავე დღეს დამისვეს კითხვა, მივიღებდი თუ არა მონაწილეობას პრეზიდენტის საპარლამენტო გამოსვლაში. ნახეთ, და ძალიან გთხოვთ, საზოგადოებას გაახსენოთ. ამ თემაზე პინგ-პონგის თამაშს არ ვაპირებთ“, – განაცხადა თინა ხიდაშელმა.
პრეზიდენტის განცხადებას არაკორექტული უწოდა დეპუტატმა ლევან ბერძენიშვილმა. „თუ ვინმე პრეზიდენტის გვერდით იდგა და ცდილობდა, რომ არ გარიყულიყო ქართული პოლიტიკიდან, ეს დავით უსუფაშვილი იყო. მისი განცხადებები, უბრალოდ, ადამიანურად არასწორია, მაგრამ ასე თქვა და რა ვქნათ. ეს მის ნამუსზე იყოს“, – განაცხადა ლევან ბერძენიშვილმა.
…………….
ირაკლი ალასანია რესპუბლიკელებმა მის მიერ გაკეთებული განცხადების გამო ამოიღეს მიზანში. ნამინისტრალი ამბობს, რომ ის დამოუკიდებელი იყო, ხოლო თინა ხიდაშელს სხვები უდგენენ დღის წესრიგს. ამირსპასალარის განცხადებით, ირაკლი ალასანიამ ყველაზე კარგად იცის, რომ ხიდაშელისთვის პოლიტიკური ჩარჩოები არასოდეს არავის დაუწესებია. მისი თქმით, ეს დადასტურდა მაშინ, როცა კაბელების საქმეზე სამსახურიდან გათავისუფლებულები სამსახურში აღადგინა.
„ირაკლი ალასანიას პრეტენზიები სასაცილოა, სირცხვილია, მაგრამ ალბათ ხანდახან ადამიანები გაუგებარ არჩევანს აკეთებენ. როცა ვსაუბრობთ ქვეყნის უსაფრთხოებასა და თავდაცვისუნარიანობაზე, ერთი წლის განმავლობაში ვისმენდი პრეტენზიებს ყოფილი თავდაცვის მინისტრისგან. მთელი ერთი წელია არ გამიცია პასუხი არც ერთი განცხადებისთვის, რადგან ქვეყნის თავდაცვისუნარიანობა გაცილებით მნიშვნელოვანია, ვიდრე ეს პაექრობა. ძალიან სამწუხაროა, რომ, როგორც ჩანს, რთულად გასაგებია, რატომ არ გცემენ პასუხს. საჯაროდ მოვითხოვ თავდაცვის ყოფილი მინისტრისგან, წარმოადგინოს პრეტენზიების ნუსხა, თუ სად იყო უკეთესად შესაძლებელი ქვეყნის დაცვა და მე ეს არ გავაკეთე“, – განაცხადა თინა ხიდაშელმა. მისი თქმით, შეურაცხმყოფელია და სირცხვილია, როცა ასეთი განცხადებები ისმის.
„კიდევ უფრო სირცხვილია, რომ ბატონი ირაკლი ჩაერთო იმ რუსულ პროპაგანდაში, რომელსაც პირდაპირ ცეცხლი აქვს ჩემ წინააღმდეგ გახსნილი და დღეს იგი ხელისმომკიდეს პრინციპით ამ მარათონში მონაწილეობს“, – აღნიშნა ამირსპასალარმა.
„ახალი თაობა“, 12 მაისი, 2016 წელი
ინტერვიუ ვახტანგ მაისაიასთან: „საქართველო ცივი ომის ფრონტის ხაზზეა“ // „ნატოს წვრთნები ქართული ჯარის თავდაცვისუნარიანობას აამაღლებს“
ვაზიანის სამხედრო აეროდრომზე, ქართულ-ამერიკული სამხედრო სწავლება „ღირსეული პარტნიორი 2016“-ის ჩატარებამ აზრთა სხვადასხვაობა გამოიწვია. ამ საკითხებზე „ახალ თაობას“ ექსპერტი ვახტანგ მაისაია ესაუბრება.
- ბატონო ვახტანგ, როგორ აფასებთ ქართულ-ამერიკული სამხედრო წვრთნების ჩატარებას საქართველოში?
- ქართულ-ამერიკული სამხედრო წვრთნების „ღირსეული პარტნიორი 2016“-ის ჩატარებას დადებითად ვაფასებ. ეს არის ჩვენი თავდაცვისუნარიანობის განმტკიცებისკენ გადადგმული კიდევ ერთი ნაბიჯი. აღნიშნული წვრთნები არ არის საშიშროების შემცველი მესამე მხარისთვის. ის დაიგეგმა რამდენიმე თვის წინ. მსგავსი წვრთნები ჩატარდა შარშანაც და შარშანწინაც.
- გამწვავება დავით უსუფაშვილის განცხადებამაც ხომ არ გამოიწვია - სანამ აფხაზეთი და ცხინვალი ოკუპირებულია და დასაბრუნებელი გვაქვს, ქართულ ჯარს თავისი მისია შესასრულებელი აქვსო. ცხადია, ასეა, მაგრამ სამხედრო წვრთნების ფონზე, როდესაც ამერიკული შენაერთი თავისი შეიარაღებითაა შემოსული, რამდენად მიზანშეწონილია მსგავსი განცხადების გაკეთება?
- არა მგონია. კავშირს ვერ ვხედავ. პარლამენტის თავმჯდომარემ თქვა ის, რაც უნდა ეთქვა ნებისმიერ პოლიტიკურ თანამდებობის პირს. მით უმეტეს, საქართველოში. უჩვეულო არაფერი უთქვამს.
- შეფასება იყო, რომ ის არ გამორიცხავს ძალისმიერი გზით ტერიტორიების დაბრუნებას...
- ეს ნებისმიერი ქვეყნის სუვერენული უფლებაა. უსუფაშვილმა თქვა, რომ მას ეს არ უგულისხმია. მან თქვა, რომ საჯარისო შენაერთებმა უნდა შეასრულონ დავალებები გარკვეული დროის განმავლობაში. დავით უსუფაშვილი რჩება მშვიდობისმოყვარე პოლიტიკოსად. მას არ ახასიათებს ქორისებური გამოხდომები.
- რუსეთიც ატარებს წვრთნებს საქართველოს ტერიტორიაზე ცხინვალსა და აფხაზეთში. ახლანდელმა წვრთნებმა განსაკუთრებით გააღიზიანა კრემლი. მან ახალი ბატალიონიც კი შექმნა „დაჯავშნული მუხტის“ სახელწოდებით. მაშინ რამ შეაშფოთა რუსეთი, რომელმაც ოფიციალური განცხადებაც კი გააკეთა?
- წვრთნები ნატოს სულისკვეთებით ტარდება. ამან გააღიზიანა რუსეთი, რადგან ამ ეტაპზე ნატოსა და რუსეთს შორის უკიდურესად დაძაბული ურთიერთობაა. ბუნებრივია, რუსეთი ყველანაირად ცდილობს, რომ ნატოს ეგიდით ჩატარებული წვრთნა აღიქვას, როგორც მის წინააღმდეგ გამართული მტრული ნაბიჯი. შარშან და შარშანწინ ასეთი ფონი არ იყო. წელს დაძაბული ფონია. ზოგიერთი სპეციალისტი და ექსპერტი არ გამორიცხავს ამ ორ გეოპოლიტიკურ აქტიორს შორის სამხედრო შეტაკებასაც.
- მოვლენების ამგვარი განვითარება დასაშვებია?
- სავსებით დასაშვებია. მეც ვიზიარებ ამ მოსაზრებას, რადგან რუსეთმა ცოტა ხნის წინ არაერთი სამხედრო პროვოკაცია განახორციელა. ამიტომ ვითარება საკმაოდ გამწვავებულია.
- საქართველოს უსაფრთხოებისთვის რა მნიშვნელობა აქვს ამ წვრთნებს და ჩვენ როგორ ვჩანვართ ამ სიტუაციაში?
- ჩვენთვის საკმაოდ მნიშვნელოვანი წვრთნებია, რომელიც ნატოს კოალიციურ ჯარებთან ჩვენი ჯარის თავსებადობის მიღწევისთვის აუცილებელი კომპონენტია. წყდება თავდაცვის ტიპის ამოცანები. შეტევითი სცენარები არ არის გათვალისწინებული. ბუნებრივია, ამაღლდება ჩვენი შეიარაღებული ძალების თავდაცვისუნარიანობის დონე. ეს აუცილებელია, რადგან ჩვენ ვმონაწილეობთ საერთაშორისო მისიებში. ასევე საქართველოს შეიარაღებული ძალები ხდებიან ნატოს სწრაფი რეაგირების ძალების შემადგენელი ნაწილი.
- ამერიკის შენაერთი და სამხედრო ტექნიკა, რომელიც წვრთნებზე შემოვიდა, საქართველოში დარჩება?
- რა თქმა უნდა, არ დარჩება. ამერიკის შეიარაღებული ძალების სამხედრო ტექნიკა საქართველოში გამოიყენება მხოლოდ წვრთნების ფარგლებში.
- რუსეთი მაინც შფოთავს...
- გართულებული გეოსტრატეგიული ფონია. შესაბამისად, მხარეები ერთმანეთს აღიქვამენ სამხედრო მოწინააღმდეგეებად. მხარის ნებისმიერი გადაადგილება მეორეს მხრიდან საფრთხედ აღიქმება.
- ნატო-რუსეთის შეტაკება სად შეიძლება მოხდეს?
- შეტაკება შეიძლება მოხდეს ბალტიისპირეთში, შავი ზღვისპირეთში.
- ამ კონტექსტში უნდა განვიხილოთ ამერიკელი გენერლის განცხადებაც, თუ რუსეთთან თავშეკავების პოლიტიკამ არ იმოქმედა, ვიბრძოლებთო?
- ორივე მხარე სამხედრო რიტორიკას იყენებს ფართო მასშტაბით. ნატოელები თვლიან, რომ ეს რუსეთის აგრესიული სამხედრო პოლიტიკის შედეგია. შესაბამისად, ის უკან არ დაიხევს. არც ნატო და არც რუსეთი უკან დამხევი არ არიან.
- საქართველო ამ ფონზე რა ვითარებაშია?
- საქართველო და უკრაინა ცივი ომის ფრონტის ხაზზეა.
- როგორ აფასებთ ზოგიერთი პოლიტიკოსის შეშფოთებას ნატოს წვრთნებთან დაკავშირებით?
- მათ არ გააჩნიათ საკმარისი სამხედრო ცოდნა. წვრთნები თავისი შინაარსით თავდაცვითი ტაქტიკური ამოცანების შესრულებისთვის ტარდება.
